DNZ-17-TSA-017

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 17, Text 17, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །བཀའ་བབས་དྲུག་ལྡན་གྱི་འཁྲིད་ཡིག་འཕགས་ཡུལ་གྲུབ་པའི་ཞལ་ལུང་ཞེས་བྱ་བ་བཞུགས་སོ། །

ༀ་སྭ་སྟི། དཀྱིལ་འཁོར་ཀུན་གྱི་ཁྱབ་བདག་རྡོ་རྗེ་འཆང༌། །ངོ་མཚར་དགའ་བཞིའི་རྣམ་རོལ་བགྲང་ཡས་རྣམས། །ལྷན་སྐྱེས་སྙིང་པོའི་ངོ་བོར་སྡོམ་མཁས་པ། ། རྡོ་རྗེ་སློབ་དཔོན་མཆོག་ལ་དང་པོར་འདུད། །ལྔ་བརྒྱའི་དུས་འདིར་ཟུང་འཇུག་རྡོ་རྗེའི་སྐུ། །ཟབ་མོའི་ལམ་ལས་མངོན་དུ་གྱུར་པའི་མཐུས། །གསང་ཆེན་བསྟན་པའི་ལམ་སྲོལ་གསལ་མཛད་པ། །གྲུབ་པའི་དཔའ་བོ་བདེ་ཆེན་རྡོ་རྗེ་རྒྱལ། །བཀའ་བབས་དྲུག་གི་ཆུ་བོ་མཐའ་དག་ཀུན། །ཁྱོད་ཐུགས་བདེ་ཆེན་ཀློང་དུ་འཁྱིལ་བ་ལས། །དཔལ་ལྡན་སྐལ་བཟང་ཡོངས་ཀྱི་ཉེར་འཚོའི་གཞིར། །སྔོན་མེད་དམ་ཆོས་གསལ་བའི་དགའ་སྟོན་བཀྱེ། །རྒྱུད་རྣམས་ཀུན་གྱི་ཟབ་མོའི་དོན། །གྲུབ་བརྙེས་བྱེ་བས་མངོན་བགྲོད་ལམ༑ ༑བླ་མའི་ཞལ་ལུང་ལས་བྱུང་བ། །ཡི་གེའི་ལམ་དུ་སྤེལ་བར་བྱ། །དེ་ལ་འདིར་གྲུབ་པའི་སློབ་དཔོན་ཆེན་པོ་ཞི་བ་སྦས་པས་བཀའ་བབས་དྲུག་གི་མན་ངག་ཕྱོགས་ གཅིག་ཏུ་བསྡུས་པའི་ཁྲིད་ཚུལ་འདི་ལ། དང་པོ་བསྐྱེད་པའི་རིམ་པ། གཉིས་པ་ཕྱག་རྒྱ་ཆེན་པོ། གསུམ་པ་གཏུམ་མོའི་རྣལ་འབྱོར། བཞི་པ་འོད་གསལ། ལྔ་པ་ལས་རྒྱ། དྲུག་པ་མན་ངག་ཐོར་བུའོ། ༈ །དང་པོ་བསྐྱེད་པའི་རིམ་པའི་ཁྲིད་ལ་སྔོན་འགྲོ་དང་དངོས་གཞི་གཉིས་ལས། དང་པོ་སྔོན་འགྲོ་ནི། རང་གི་མདུན་གྱི་ནམ་མཁའི་གནས་སུ། རིན་པོ་ཆེའི་ཁྲིའི་སྟེང་དུ་རྩ་བའི་བླ་མ་མཚན་ལྡན་གྱི་རིག་མས་འཁྱུད་པ་ཞིག་དམིགས་ལ་མོས་གུས་དྲག་ཏུ་བྱ་ཞིང༌། དཔལ་ལྡན་བླ་མ་རིན་པོ་ཆེས་བདག་གི་རྒྱུད་ལ་བསྐྱེད་པའི་རིམ་པའི་ཏིང་ངེ་འཛིན་ཡང་དག་པར་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་བཏབ་བོ། །གཉིས་པ་ལ་སྔོན་དུ་འགྲོ་བའི་བསྙེན་པ་དང༌། དངོས་གཞིའི་སེམས་འཛིན་གྱི་རིམ་པའོ། །དང་པོ་ལ། བསྙེན་པ་ཆུང་འབྲིང་ཆེ་གསུམ་ལས། དང་པོ། རང་གི་མེ་ཏོག་འཕོག་པའི་ལྷ་ཡོད་ན་དང༌། དེའི་ངེས་བཟུང་མེད་ན། རང་ཡི་དམ་གང་བྱེད་ཀྱི་གཙོ་བོ་དེ་སྐད་ཅིག་བསྒོམས་ལ། གྲངས་ཀྱི་བསྙེན་པ་སྐྱེལ་བ་ནི་བསྙེན་པ་ཆུང་ངུ་དང༌། གཉིས་པ་ནི། རང་ཉིད་གཙོ་བོར་གསལ་བའི་སྐུ་ལ། ལུས་དཀྱིལ་འགོད་པ་སྟེ༑ བདེ་མཆོག་ལྟ་བུ་ལུས་དཀྱིལ་ཡོད་པ་རྣམས་སོ་སོའི་གཞུང་ལས་འབྱུང་བ་བཞིན་བསྒོམ་ཞིང༌། དེ་ལྟ་མ་ཡིན་ན་ལུས་དཀྱིལ་སྤྱི་འགྲོ་ནི། སྤྱི་བོ་ལ་སོགས་པའི་གནས་དྲུག་ཏུ་རིགས་དྲུག་ཡུམ་དང་བཅས་པ། མིག་ལ་ས་སྙིང༌། རྣ་བར་ཕྱག་རྡོར། སྣར་ནམ་མཁའི་སྙིང་པོ། ལྕེར་འཇིག་རྟེན་དབང་ཕྱུག །ལུས་སྒྲིབ་སེལ། ཚིགས་ཀུན་བཟང༌། རྩ་རྒྱུས་བྱམས་པ་སྟེ། དེ་རྣམས་དང༌། གཟུགས་རྡོ་རྗེ་མ་ལ་སོགས་པ་དྲུག །ཚིགས་ཆེན་བཅུ་ལ་ཁྲོ་བོ་ཡབ་ཡུམ་བཅུ་རྣམས་བཀོད་ལ་གྲངས་ཀྱི་བསྙེན་པ་བསྐྱེལ་བ་ནི་བསྙེན་པ་འབྲིང་པོ་དང༌། གསུམ་པ་ནི། དཀྱིལ་འཁོར་གྱི་འཁོར་ལོ་ཡོངས་རྫོགས་བསྒོམས་ལ། གྲངས་བསྙེན་ཡོངས་རྫོགས་བསྐྱེལ་བ་ནི་བསྙེན་པ་ཆེན་པོའོ། །བསྙེན་པ་ཆུང་འབྲིང་ཆེ་གསུམ་པོ་དེ་དག་གི་དགོས་པ་ནི། ལམ་བསྒོམ་པ་ལ་བར་ཆད་མི་འབྱུང་བའི་ཕྱིར་ཙམ་དང༌། རྒྱུད་བྱིན་གྱིས་རློབ་པ་ཡིན་གྱི། གསལ་སྣང་སྒྲུབ་པར་བྱེད་པ་ནི་མ་ཡིན་ནོ། །གཉིས་པ་སེམས་འཛིན་ལ་རྟོགས་པའི་རྣལ་འབྱོར་དང་དྲན་པ་གཅིག་པའོ། །དང་པོ་ལ། ལྷར་སྣང་ལ་སློབ་པ་དང༌། ང་རྒྱལ་ལ་སློབ་པ་དང༌། དེ་གཉིས་ལ་སྟོང་པས་རྒྱས་འདེབས་པའོ། །དང་པོ་ལ་ཐུན་ཐུན་མཚམས་གཉིས་ལས། དང་པོ་ནི། ཐོག་མར་གཙོ་བོའི་སྐུ་ལ་སེམས་འཛིན་པ་སྟེ། རང་གི་མདུན་དུ་བྲིས་སྐུ་མཚར་བ་ཞིག་བཀྲམས་ལ། དེ་ལ་ཡང་ཡང་བལྟ་ཞིང༌། རང་ཉིད་གཙོ་རྐྱང་དུ་བསྒོམ། ཐུན་མཚམས་སུ་འོག་འགྱུ་དང༌། བྱ་བྱེད་གཞན་མི་བྱེད་པར། ལྷ་སྐུའི་སྣང་བ་འབའ་ཞིག་བསྒོམ་མོ། །དེ་ལྟ་བུའི་སྒོ་ནས་གསལ་སྣང་མ་ཐོབ་ཀྱི་བར་དུ་བསྒོམས་པས། དེ་ལ་གསལ་སྣང་ཐོབ་པ་ན། དཀྱིལ་འཁོར་གྱི་འཁོར་ལོ་ཡོངས་རྫོགས་བསྒོམས་ལ་གསལ་སྣང་ཐོབ་པར་བྱ། དེ་ལ་ཡང་གསལ་སྣང་ཐོབ་ན། ཕྱི་རོལ་གྱི་དངོས་པོ་གང་ཡང་རུང་བ་ཞིག་ལྷ་སྐུར་བསྒོམ་སྟེ་གསལ་སྣང་ཐོབ་པར་བྱའོ། །དེ་ནས་སྣོད་ཀྱི་འཇིག་རྟེན་ཐམས་ཅད་གཞལ་ཡས་ཁང༌། བཅུད་ཀྱི་སེམས་ཅན་ཐམས་ཅད་ལྷ་སྐུར་བསྒོམ་མོ། །གཉིས་པ་ཐུན་མཚམས་སུ་དཀྱིལ་འཁོར་གྱི་ཐུགས་ཀ་ནས། གཙོ་བོ་གཉིས་པ་ཞིག་བྱུང་སྟེ། ཤར་སྒོ་ལྟ་བུ་གང་ཡང་རུང་བ་ཞིག་ནས་འཐོན་ཏེ། སྤྱོད་ལམ་ལ་འཇུག་ཅིང༌། དེའི་སྐབས་སུ་ཡང་རང་ཉིད་གང་དུ་འདུག་པའི་གནས་གཞལ་མེད་ཁང་དང་གྲོགས་ལྷར་མོས་པར་བྱའོ། །གཉིས་པ་ང་རྒྱལ་ལ་སློབ་པ་ལ། རང་ཉིད་མི་ཡིན་ནོ་སྙམ་པའི་ང་རྒྱལ་སྤངས་ཏེ། བདག་ཉིད་སྐྱོན་ཀུན་སྤངས་ཡོན་ཏན་ཀུན་རྫོགས་པའི་ལྷ། དཔེར་ན། འཁོར་ལོ་སྡོམ་པ་ལྟ་བུ་ཡིན་སྙམ་པའི་ང་རྒྱལ་བྱེད་པ་སྟེ་དམིགས་པ་དང་པོའོ། །དེ་ནས་རང་ཉིད་ལྷ་སྐུར་གསལ་བའི་སྤྱན་ནི་འཁོར་ལོ་བདེ་མཆོག་གི་སྤྱན་ཡིན། ཞལ་ནི་འཁོར་ལོ་ བདེ་མཆོག་གི་ཞལ་དང༌། དེ་བཞིན་དུ་ལུས་སྐུ་དང༌། ངག་གསུང༌། སེམས་འཁོར་ལོ་བདེ་མཆོག་གི་ཐུགས་ཡིན་སྙམ་སྒོམ་པར་བྱེད་པ་ནི་གཉིས་པའོ། །དེ་ནས་འཇིག་རྟེན་གྱི་ཁམས་ན། སྐུ་རྣམ་པ་ཐམས་ཅད་པས་གང་ལ་གང་འདུལ་གྱིས་སེམས་ཅན་གྱི་དོན་མཛད་པ་དང༌། གསུང་སྒྲ་དབྱངས་རྣམ་པ་ཐམས་ཅད་པས་སེམས་ཅན་སོ་སོའི་བསམ་པ་དང་མཐུན་པར་ཆོས་སྟོན་པ་དང༌། ཐུགས་ཤེས་བྱ་ཐམས་ཅད་མཁྱེན་པ་ལ་སོགས། མདོར་ན་སྐུ་གསུང་ཐུགས་ཀྱི་གསང་བ་ཐམས་ཅད་ཁྱབ་བདག་འཁོར་ལོ་བདེ་མཆོག་གི་སྐུ་གསུང་ཐུགས་ཀྱི་སྣང་ཆ་ཡིན་སྙམ་པའི་ང་རྒྱལ་བྱའོ། །གསུམ་པ་སྟོང་པའི་རྒྱས་འདེབས་པ་ནི། བདག་ཉིད་དཔལ་འཁོར་ལོ་བདེ་མཆོག་ཏུ་གསལ་བའི་ལྷ་སྐུ་འདི་གང་ནས་ཡང་མ་བྱུང༌། གང་དུ་ཡང་མི་འགྲོ། ད་ལྟར་འདི་ལྟར་ཡིན་བྱ་རྒྱུ་ཡང་མེད་པས། རང་བཞིན་སྤྲོས་པ་ཐམས་ཅད་དང་བྲལ་བ་ཡིན་པར་འདུག །སྣང་ཆ་ཡང་མི་འགགས་ཏེ། སྣང་ལ་རང་བཞིན་མེད་པའི་སྒྱུ་མ་ལྟ་བུའོ། །སྙམ་དུ་བསྒོམ་མོ། །ལྷ་ཡི་ང་རྒྱལ་ཡང་སྟོང་ཉིད་དུ་བསྒོམ་པ་ནི། ང་རྒྱལ་གྱི་འཛིན་སྟངས་སྣང་ཆ་མ་འགགས་པ་ལ། རང་བཞིན་སྤྲོས་པ་ཐམས་ཅད་དང་བྲལ་བ་སྒྱུ་མ་ལྟ་བུར་བསྒོམ་མོ། །གཉིས་པ་དྲན་པ་གཅིག་པ་ལ། སྟེང་གི་སྣ་རྩེར་བསྒོམ་པ་དང༌། སྙིང་གའི་སྣ་རྩེར་བསྒོམ་པ་དང༌། འོག་གི་སྣ་རྩེར་བསྒོམ་པའོ། །དང་པོ་ནི། རྟོགས་པའི་རྣལ་འབྱོར་གྱི་སྐབས་སུ་ལྷ་སྐུ་རགས་པ་ ལ་གསལ་སྣང་ཐོབ་ན། རང་ཉིད་དཀྱིལ་འཁོར་གྱི་གཙོ་བོར་གསལ་བ་དང༌། འཁོར་གྱི་ལྷ་རྣམས་ཀྱང་གསལ་བ་ཙམ་བྱ། རང་ཉིད་གཙོ་བོར་གསལ་བའི་སྣ་རྩེའི་ནང་དུ་ཐིག་ལེ་སྲན་ཆུང་ཙམ་ཁ་དོག་ལྷའི་སྐུ་མདོག་དང་མཚུངས་པ་ཞིག་གསལ་བཏབ་ལ། དེ་ལ་སེམས་འཛིན། དེ་ལ་གསལ་སྣང་ཐོབ་པ་ན། འཁོར་གྱི་ལྷ་རྣམས་ཀྱང་གསལ་བ་ཙམ་བྱ། རང་ཉིད་གཙོ་བོར་གསལ་བའི་སྣ་རྩེའི་ནང་དུ། ཐིག་ལེ་སྲན་ཆུང་ཙམ་ཁ་དོག་ལྷའི་སྐུ་མདོག་དང་མཚུངས་པ་ཞིག་གསལ་བཏབ་ལ། དེ་ལ་སེམས་འཛིན། དེ་ལ་གསལ་སྣང་ཐོབ་པ་ན། འཁོར་གྱི་ལྷའི་གནས་རྣམས་སུ་སོ་སོའི་སྐུ་མདོག་དང་མཚུངས་པའི་ཐིག་ལེ་རེ་རེ་བསྒོམས་ལ། སྣ་རྩེའི་ཐིག་ལེ་དང་དེ་གཉིས་ཀ་ལ་སེམས་འཛིན་ནོ། །དེ་གཉིས་ཀ་ལ་གསལ་སྣང་ཐོབ་ན། སྣ་རྩེའི་ཐིག་ལེའི་ནང་དུ་ལྷ་གྲངས་དང་མཉམ་པའི་ཐིག་ལེ། ལྷ་སོ་སོའི་ཁ་དོག་དང་མཐུན་པ་བསྒོམས་ལ་གསལ་སྣང་ཐོབ་པར་བྱ། དེ་ནས་སྣ་རྩེའི་ཐིག་ལེའི་ནང་དུ་གཞལ་མེད་ཁང་དང༌། དེའི་ནང་དུ་ཐིག་ལེའི་ལྷ་ཚོགས་སྔར་བཞིན་བསྒོམ་ཞིང༌། དེ་ལ་གསལ་སྣང་ཐོབ་ན། གཞལ་ཡས་ཁང་གི་ནང་དུ་ལྷ་སྐུའི་རྣམ་པ་དཀྱིལ་འཁོར་གྱི་འཁོར་ལོ་ཇི་ལྟ་བ་བསྒོམས་ལ་གསལ་སྣང་ཐོབ་པར་བྱའོ། །ཅི་སྟེ་ཐིག་ལེའི་དོད་དུ་ས་བོན་བསྒོམ་པ་ལ་སྤྲོ་ན། ཐོག་མར་སྣ་རྩེའི་ཐིག་ལེའི་ནང་དུ་ཧཱུྃ་ཡིག་སོགས་ལྷ་ཡི་ས་བོན་གང་ཡིན་པ་དེ་བསྒོམ་པ་དང༌། དཀྱིལ་འཁོར་གྱི་ལྷའི་འཁོར་ལོའི་ ལྷའི་གནས་རྣམས་སུ་ཡང་རང་རང་གི་ས་བོན་བསྒོམས་ལ་གསལ་སྣང་ཐོབ་པར་བྱའོ། །སྣ་རྩེའི་ཐིག་ལེའི་ནང་དུ་ལྷ་གྲངས་དང་མཉམ་པའི་ས་བོན་དང༌། ཡང་གཞལ་མེད་ཁང་གི་ནང་དུ་ས་བོན་གྱི་དཀྱིལ་འཁོར་དང༌། དེ་ལ་བརྟན་པ་ཐོབ་ན་ལྷའི་སྐུ་བསྒོམ་མོ། །ཡང་ན་ས་བོན་གྱི་དོད་དུ་ཕྱག་མཚན་བསྒོམ་པ་སྔར་བཞིན་ནོ། །གཉིས་པ་ནི། རང་ཉིད་ལྷར་གསལ་བའི་ཐུགས་ཀར་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་ཞུ་བ་ལས་ཐིག་ལེ་སྲན་ཆུང་ཙམ་བསྒོམ་སྟེ། དེའི་ནང་དུ་སྔར་བཞིན་ཐིག་ལེའི་དཀྱིལ་འཁོར་རམ། ཡི་གེའི་དཀྱིལ་འཁོར་རམ། ཕྱག་མཚན་གྱི་དཀྱིལ་འཁོར་གང་ཡང་རུང་བ་ཞིག་བསྒོམས་ལ་མཐར་ཐིག་ལེའི་ནང་དུ་རྟེན་དང་བརྟེན་པར་བཅས་པའི་དཀྱིལ་འཁོར་བསྒོམ་པའི་བར་སྔར་བཞིན་བྱའོ། །གསུམ་པ་ནི། རང་ཉིད་ཡི་དམ་དུ་གསལ་བའི་རྡོ་རྗེ་ནོར་བུའི་རྩེ་མོར་ཐིག་ལེ་སྲན་ཆུང་ཙམ་བསྒོམས་ལ། དེའི་ནང་དུ་ཐིག་ལེའི་དཀྱིལ་འཁོར་རམ་ཡི་གེའམ། ཕྱག་མཚན་གྱི་དཀྱིལ་འཁོར་གང་ཡང་རུང་བ་བསྒོམ་པའི་མཐར། རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་སྔར་བཞིན་བསྒོམ་པར་བྱའོ། །སྟེང་གི་སྣ་རྩེ་དང་འོག་གི་སྣ་རྩེ་དང༌༑ སྙིང་གའི་སྣ་རྩེ་གསུམ་པོ་གང་ཡང་རུང་བ་གཅིག་བསྒོམས་པས་ཆོག་གི་གང་ཟག་གཅིག་གིས་གསུམ་ཀར་བསྒོམ་དགོས་པ་ནི་མ་ཡིན་ནོ། །ཚུལ་འདི་ལྟ་བུ་གོམས་པ་ལས། ཐིག་ལེ་ཕྲ་མོའི་ནང་དུ་རྟེན་བརྟེན་པར་ བཅས་པའི་དཀྱིལ་འཁོར་གྱི་འཁོར་ལོ་ལ་གསལ་སྣང་ཐོབ་པ་ནི། དྲན་པ་གཅིག་པ་མཐར་ཕྱིན་པ་ཡིན་ཞིང༌། དེ་ལྟ་བུའི་གང་ཟག་དེས་ནི་ཚེ་འདིར་རྫོགས་པའི་རིམ་པ་གཏན་མ་བསྒོམས་ཀྱང༌། སྐྱེ་བ་ཕྱི་མ་ལ་རྫོགས་རིམ་བསྒོམ་པའི་སྐལ་བ་ཅན་དུ་གྱུར་ཏེ། གདོན་མི་ཟ་བར་མཆོག་གི་དངོས་གྲུབ་ཐོབ་པར་འགྱུར་རོ། །གཉིས་པ་ཕྱག་རྒྱ་ཆེན་པོའི་ཁྲིད་ལ་སྔོན་འགྲོ། དངོས་གཞི་གཉིས་ལས། དང་པོ་ནི། བསྐྱེད་རིམ་གྱི་སྐབས་སུ་བཤད་པ་ལྟ་བུའམ། ཡང་ན་རང་གི་མདུན་དུ་རྩ་བའི་བླ་མ་བསྒོམ། དེའི་ཐུགས་ཀར་ཟླ་གདན་ལ་བྱང་ཆུབ་སེམས་ཀྱི་ངོ་བོ་ཨ་དཀར་པོ་གནས་པར་བསམས་ལ་མོས་གུས་དྲག་ཏུ་བྱའོ། །གཉིས་པ་དངོས་གཞི་ལ། ཐོག་མར་སེམས་གནས་པ་བསྒྲུབས་ཏེ། ཕྱིའི་དམིགས་རྟེན་ལ་བརྟེན་པ་ནི། རང་གི་མདུན་དུ་དམིགས་རྟེན་ཤིང་ལྟ་བུ་ཁ་དོག་ནག་པོ་བཞག་ལ། དེ་ལ་མིག་བལྟ་ཞིང་སེམས་ཡང་བསྒྲིམས་ལ། རྒྱང་ཙམ་ཞིག་ལ་བཞག་གོ །དེའི་སྐབས་སུ་འོག་འགྱུ་དང་རྣམ་རྟོག་སོགས་བྱུང་ན་འཕྲོ་གཅོད་པ་སོགས་སྤྱི་དང་འདྲའོ། །ཡང་རྒྱང་ཙམ་ཞིག་སེམས་དམིགས་རྟེན་ལ་མི་གཏོད་པར་བསམ་མེད་དུ་བཞག །ཚུལ་དེ་ལྟ་བུ་སྤེལ་མར་བསྒོམ་མོ། །ཡང་ན་དམིགས་རྟེན་གཉིས་པ་ནི། རང་གི་མདུན་དུ་རྡོ་ལེབ་ཆུང་ངུ་ལྟ་བུ་ཞིག་ལ་བཙག་དམར་གྱི་གཡུང་དྲུང་རིས་བྲིས་ལ། དེ་ལ་མིག་དང་སེམས་བསྒྲིམས་ཏེ་བཞག་པས། གཡུང་དྲུང་རིས་གཡོ་མེད་ལ་ཁྲིག་གེར་བཞག ། ཡང་ཤེས་པ་ཁོང་ལྷོད་ཅིང༌། མིག་ཀྱང་ཅུང་ཟད་ལྷོད་པས། གཡུང་དྲུང་རིས་ཁོལ་ཁོལ་འཁོར་བར་བསམ་མོ། །ཡང་དམིགས་རྟེན་གསུམ་པ་ནི་རང་གི་མདུན་དུ་ནས་འབྲུའམ་རྡེའུའི་དཔལ་ར་ལྟ་བུའི་ཁོར་ཁོར་ཞིག་བརྩིག །དེ་དང་འགྱངས་ཅུང་ཟད་ཡོད་པར་ཡང་སྔར་བཞིན་དཔལ་ར་ལྟ་བུར་བརྩིགས་ལ། དེའི་བར་དུ་འཇག་མ་ལྟ་བུ་ཞིག་གིས་ཟམ་ཆུང་བཙུགས་ལ། དེ་ནས་མདུན་ཕྱོགས་ན་ཡོད་པའི་དཔལ་རའི་ཁ་ལ་སེམས་དང༌༑ མིག་གཏད་ཅིང་བསྐོར་བ་ལན་བདུན་ཙམ་བྱ། ནང་གི་དམིགས་རྟེན་ལ་འཇོག་ཚུལ་ལྔ་ལས། དང་པོ་ཐིག་ལེ་ལ་སེམས་འཛིན་པ་ནི། རང་གི་ལྟེ་བར་ཐིག་ལེ་ཁ་དོག་ནག་པོ་ཞིག་དམིགས་ལ། དེ་ལ་སེམས་བཟུང་ཞིང༌༑ ཡང་དམིགས་མེད་ཀྱི་ངང་ལ་བཞག་གོ །སེམས་འཛིན་གཉིས་པ་ནི། ནམ་མཁའ་སྟོང་པའི་དབྱིངས་སུ་རང་ཉིད་གནས་པར་བསམས་ལ། དེ་ནས་རང་ལུས་ཀྱི་མཐའ་ནས་རིམ་གྱིས་ཟགས་ཏེ། མཐར་ལུས་མི་དམིགས་པ་ཡལ་བར་བསམས་ལ་དམིགས་མེད་དུ་བཞག་གོ །སེམས་འཛིན་གསུམ་པ་ནི། རང་གི་གཡས་ནས་མི་མགོ་ནག་པོ་ཞིག་དང༌། གཡོན་ནས་མི་མགོ་ནག་པོ་གཅིག་སྟེ། དེ་གཉིས་གཡས་གཡོན་ནས་རྒྱུག་སྟེ་བྱུང་བ། རང་གི་མདུན་དུ་དེ་གཉིས་འཐབ་པར་བསམས་ལ། དེ་འདྲ་ལན་མང་དུ་བྱས་ཏེ་སེམས་འཛིན་ཞིང༌། མཐར་དམིགས་མེད་དུ་བཞག་གོ །སེམས་འཛིན་བཞི་པ་ནི། ཤར་ཕྱོགས་ཀྱི་ནམ་མཁའ་ལ་སེམས་གཏད། དེ་བཞིན་དུ། དེའི་ཡང་ཤར་དང༌། དེའི་ཡང་ཤར་སོགས། ཤར་ཕྱོགས་ཀྱི་ནམ་མཁའ་མཐའ་མེད་ཀྱི་བར་དུ་སེམས་གཏད་ཅིང༌། དེ་བཞིན་དུ་ཕྱོགས་བཅུ་ཀར་གྱི་ནམ་མཁའ་མཐའ་མེད་ལ་སེམས་བཟུང་ལ་མཐར་དམིགས་མེད་ཀྱི་ངང་དུ་བཞག་གོ །སེམས་འཛིན་ལྔ་པ་ནི། རང་སེམས་དེ། ཡུལ་གང་ཡང་རུང་བ། སྔར་རང་གི་འགྲོ་མྱོང་བ་ཞིག་གིས་ལམ་ལ་རིམ་པས་ཕྱིན་ཅིང༌། ཡུལ་དེར་སླེབས་པ་ན། སླར་ཡང་རིམ་པས་ལམ་བརྒྱུད་དེ། རང་གང་དུ་གནས་པའི་གདན་གྱི་སྟེང་དུ་སླེབས་པར་བསམས་ལ། དེ་འདྲ་ཡང་ཡང་བྱ་ཞིང༌། མཐར་དམིགས་མེད་ཀྱི་ངང་ལ་སློད་ཅིང་བཞག་གོ །དེ་ལྟར་དམིགས་པ་དང་བཅས་པ་དེ་དག་ལ་བརྟེན་ནས་སེམས་ཀྱི་གནས་ཆ་ཅི་རིགས་པ་བྱུང་བའི་ཚེ། དེ་ནས་དམིགས་པ་མེད་པའི་ཚུལ་གྱིས་བཟོ་མེད་དུ་འཇོག་པ་ནི། སེམས་ཆེད་གཏད་སྒྲིམ་པ་ཡང་མ་ཡིན། ཆེད་གཏད་ལྷོད་པ་ཡང་མ་ཡིན་པ་བཟོ་མེད་དུ་ཤིག་གེ་བཞག་གོ །དེ་ནས་ཕྱི་རོལ་གྱི་གཟུགས་སྒྲ་དྲི་རོ་རེག་བྱ་སོགས་ཡུལ་གང་དང་གང་ལ་མཐོང་ཐོས་ལ་སོགས་པ་བྱུང་བའི་ཚེ། དཔེར་ན་མིག་གིས་གཟུགས་མཐོང་བ་ན། དེའི་སྣང་ཆ་མི་དགག་ཅིང་དེ་ལ་རྟོག་དཔྱོད་ཀྱང་མི་བྱེད་པར་དེ་ཁའི་སྟེང་དུ་བཟོ་མེད་དུ་ལྷོད་དེ་བཞག་གོ །དེ་ནས་ཕྱི་རོལ་གྱི་ཡུལ་ཁོ་ན་ལ་མ་ལྟོས་པར་སེམས་ལ་བདེ་སྡུག་ཡུལ་སྣང་སོགས་ཅི་ཤར་ཡང༌། སྣང་ཆ་དེ་ཅུང་ཟད་ཙམ་མ་ཞིག་པར་བྱས་ལ། དེ་ལ་བཟོ་མེད་དུ་ཤིག་གེ་ བཞག་གོ །དེ་ལྟར་རྟོག་པ་གང་ཤར་དེ་ལ་བཟོ་མེད་བཞག་པས། རང་ཡལ་ལ་ཞི་བར་འགྱུར་རོ། །གཉིས་པ་ངོ་སྤྲོད་པ་ལ། ངོ་སྤྲོད་སྐོར་བརྒྱད་ཡོད་པ་ལས། དང་པོ་སེམས་ཀྱི་རང་བཞིན་འོད་གསལ་དུ་ངོ་སྤྲོད་པ་ནི། རང་གི་སེམས་ལ་རང་སེམས་ཀྱིས་བརྟགས་ཤིང་དཔྱད་པ་ན། ཁ་དོག་དང༌། དབྱིབས་དང༌། གནས་གང་ན་ཡང་མེད་པས། ངོས་བཟུང་དང་བྲལ་བ་ཡིན་ཀྱང༌། གསལ་རིག་ཙམ་རང་རིག་གི་མྱང་བྱར་འདུག་པ་ནི་རང་བཞིན་གྱིས་འོད་གསལ་བའོ། །ཞེས་ངོ་སྤྲོད་པ་ནི་ངོ་སྤྲོད་སྐོར་དང་པོའོ། །གཉིས་པ་ནི། སེམས་ལ་རྣམ་པར་རྟོག་པ་སྣ་ཚོགས་པ་ཤར་བ་རྣམས། སྐད་ཅིག་སྔ་མ་སྔ་མ་འགགས། ཕྱི་མ་ཕྱི་མ་སྐྱེད་པར་བྱེད་ཅིང༌། སྐྱེས་ཙམ་ཉིད་ནས་མེད་པས་ན་དྲི་མ་རྣམས་གློ་བུར་བ་ཡིན་ནོ། །ཞེས་ངོ་སྤྲོད་པ་ནི་ངོ་སྤྲོད་སྐོར་གཉིས་པའོ། །གསུམ་པ་ནི། ཕྱི་རོལ་གྱི་སྣང་བ་སྣ་ཚོགས་པ་འདི་རྣམས་དང༌། སེམས་ལ་ཤར་བའི་རྣམ་པར་རྟོག་པ་སྣ་ཚོགས་པ་འདི་རྣམས་མ་བརྟགས་མ་དཔྱད་པའི་ངོ་བོར་སྣང་བས་ན། མེད་ཅེས་ཀྱང་མི་བྱ་ལ། དེ་དང་དེའི་ངོ་བོར་མ་གྲུབ་པས་ན། ཡོད་ཅེས་ཀྱང་མི་བྱ་བར། ཡོད་མེད་གཉིས་ཀ་ལས་འདས་པའོ། །རང་སེམས་འདི་ཡང༌། ཕྱི་ནང་གང་དུ་ཡང་བཙལ་བས་མི་རྙེད་ཅིང༌། ངོས་བཟུང་དང་བྲལ་བས་ན། ཡོད་ཅེས་ཀྱང་མི་བྱ་ལ། གསལ་རིག་ཙམ་ཞིག་ཏུ་རིག་ཅིང་མྱང་བྱར་འདུག་པས་ན་མེད་ཅེས་ཀྱང་མི་བྱ་བས། ཡོད་མེད་གཉིས་ཀ་ལས་འདས་པའོ། ། ཆོས་ཐམས་ཅད་གཅིག་མ་ཡིན་པའི་ཕྱིར་ཡིན་པ་ལས་འདས་པ་སྟེ། དཔེར་ན་མདུན་གྱི་བུམ་པ་ཡང་དོན་ལ་མེད་ལ། ལྟོ་བ་ལྡིར་བ། ཞབས་ཞུམ་པ་ཞེས་པ་ཡང་དོན་ལ་མེད་པའི་ཕྱིར། དེ་གཉིས་གཅིག་མ་ཡིན་ལ། དེས་ན་ལྟོ་བ་ལྡིར་བ་བུམ་པ་ཡིན་རྒྱུ་ཡང་མེད་དོ། །བུམ་པ་ཞེས་པ་དོན་ལ་མེད་ཅིང༌། ཀ་བ་ཞེས་པ་ཡང་མེད་ལ་བློས་བཏགས་པ་ཙམ་ཡིན་པའི་ཕྱིར། དེ་གཉིས་ཐ་དད་ཀྱང་མ་ཡིན་ལ། དེས་ན་བུམ་པ་ཀ་བ་མ་ཡིན་རྒྱུ་ཡང་མེད་པས། དེ་ལྟར་ཡོད་མིན་ཡིན་མིན་སོགས་སྤྲོས་པ་ཐམས་ཅད་དང་བྲལ་བ་ཡིན་ནོ། །ཞེས་ངོ་སྤྲོད་པ་ནི་ངོ་སྤྲོད་སྐོར་གསུམ་པའོ། །བཞི་པ་ནི། ཏིང་ངེ་འཛིན་བསྒོམ་པའི་གནས་སྐབས་སུ། ལུས་སེམས་བདེ་བའི་རྣམ་པ་བྱུང་ན། འདི་ཉིད་ཉམས་ཀྱི་བདེ་བ་ཡིན་གྱི། དོན་དམ་པའི་བདེ་བ་ནི་མ་ཡིན་ནོ། །ཞེས་དེ་ལ་ཞེན་པར་ཡང་མི་བྱེད། དགག་པར་ཡང་མི་བྱེད་དོ། །དེ་བཞིན་དུ་རེས་འགའ་སྟོང་སང་ངེ་བ་ལ་སོགས་པ་བྱུང་ན་འདི་ནི་གནས་ལུགས་ཀྱི་སྟོང་པ་མ་ཡིན་གྱི། སྟོང་བའི་ཉམས་ཡིན་ནོ། །ཞེས་ཞེན་པར་མི་བྱའོ། །དེ་བཞིན་དུ་སྐབས་འགར་ཤེས་པ་ས་ལེ་སེང་ངེ་བ། ཁམས་དྭངས་སེང་བ་ལ་སོགས་པ་བྱུང་ན། འདི་ནི་ཉམས་ཀྱི་གསལ་བ་ཡིན་གྱི་གནས་ལུགས་ཀྱི་གསལ་བ་མ་ཡིན་ནོ། །ཞེས་ཞེན་པར་མི་བྱེད་ཅིང༌། གང་བྱུང་བ་དེ་དགག་པར་ཡང་མི་བྱེད་པ་ནི་ཉམས་ཀྱི་རྩི་ལ་མ་ཞེན་པར་ངོ་སྤྲོད་པ་སྟེ། ངོ་སྤྲོད་སྐོར་བཞི་པའོ། །ལྔ་པ་ནི། སེམས་ འདི་ངོས་བཟུང་གང་དུ་ཡང་མ་གྲུབ་ཅིང༌། སྤྲོས་པ་ཀུན་དང་བྲལ་བ་ཞིག་འདུག་པ་དེ་ཆོས་སྐུ་དང༌། ངོས་བཟུང་མེད་བཞིན་དུ་སྣ་ཚོགས་སུ་ཤར་བ་ཞིག་འདུག་པ་དེ་ནི་གཟུགས་ཀྱི་སྐུ་སྟེ། དེ་ལྟར་ན་སེམས་ཉིད་འདི་གདོད་མ་ནས་སྐུ་གཉིས་ཀྱི་ངོ་བོར་གནས་པ་ཡིན་ནོ། །ཞེས་ངོ་སྤྲོད་པ་ནི་ངོ་སྤྲོད་སྐོར་ལྔ་པའོ། །དྲུག་པ་ནི། སེམས་ཉིད་འདི་གཞི་ལམ་འབྲས་བུའི་གནས་སྐབས་ཐམས་ཅད་དུ་འགྱུར་བ་མེད་པ་ཡིན་ཏེ། དཔེར་ན། སྐད་ཅིག་སྔ་མའི་སེམས་དང་ཕྱི་མའི་སེམས་ཁྱད་པར་མེད་པ་བཞིན་ནོ། །ཞེས་ངོ་སྤྲོད་པ་ནི་ངོ་སྤྲོད་སྐོར་དྲུག་པའོ། །བདུན་པ་ནི། རྣམ་རྟོག་སྐྱེས་པའི་དུས་ཀྱི་སེམས་དང༌། མ་སྐྱེས་པའི་དུས་ཀྱི་སེམས་ལ་ཁྱད་པར་མེད་པ་དེ་བཞིན་དུ༑ གཟུགས་མཐོང་བའི་དུས་དང་མ་མཐོང་བའི་དུས་དང་། ལངས་པའི་དུས་དང་འདུག་པའི་དུས་ཏེ། མདོར་ན་ལུས་ཀྱི་སྤྱོད་ལམ། ངག་གི་སྨྲ་བརྗོད། སེམས་ཀྱི་བསམ་མནོ་སོགས་ཅི་བྱས་ཀྱང་སེམས་ཀྱི་རང་བཞིན་ངོས་བཟུང་དང་བྲལ་བ་མཉམ་པ་ཉིད་ཡིན་ནོ། །ཞེས་ངོ་སྤྲོད་པ་ནི་ངོ་སྤྲོད་སྐོར་བདུན་པའོ། །བརྒྱད་པ་ནི། སེམས་གནས་པའི་ཚེ་ཡང༌། མ་བཅོས་པར་བཟོ་མེད་དུ་འཇོག་པ་དང་སེམས་འགྱུ་བའི་ཚེ་ཡང་འགྱུ་བ་ཆེད་གཏད་མི་དགག་པར། འགྱུ་བའི་རང་ངོ་ཤེས་པ་ཙམ་བྱས་ལ། དེ་ལ་བཟོ་མེད་དུ་བཞག་གོ །དེ་ལྟར་ན། ཟས་ཟ་བ་གཏམ་སྨྲ་བ་འགྲོ་འཆག་ཉལ་འདུག་ཅི་བྱེད་ཀྱང་མ་བཅོས་པ་བཟོ་མེད་དུ་བཞག་པས། དཔེར་ན། རིན་པོ་ ཆེའི་གླིང་དུ་ཕྱིན་པ་ན། རིན་པོ་ཆེ་འབའ་ཞིག་མ་གཏོགས་རྡོ་མི་རྙེད་པ་ལྟར་ལུས་ཀྱི་སྤྱོད་ལམ། ངག་གི་སྨྲ་བརྗོད། སེམས་ཀྱི་བསམ་མནོ་སོགས་ཅི་བྱས་ཀུན་སྒོམ་འབའ་ཞིག་ཏུ་འགྱུར་རོ། །ཞེས་ངོ་སྤྲོད་པ་ནི་ངོ་སྤྲོད་སྐོར་བརྒྱད་པའོ། །ལམ་གྱི་ཡན་ལག །གེགས་བསལ་བོགས་འདོན་ལ། གེགས་བསལ་བ་དང༌། བོགས་འདོན་པའོ། །དང་པོ་ལ། བྱིང་བ་བསལ་བ་དང༌། རྒོད་པ་བསལ་བ་དང༌། རྣམ་རྟོག་རྒྱུན་ཆགས་ཀྱི་གེགས་བསལ་བའོ། །དང་པོ་ནི། རང་གི་ལྟེ་བར་ཐིག་ལེ་ཁ་དོག་དཀར་པོ་འོད་འཚེར་བ་ཞིག་གསལ་བཏབ་ལ། རིམ་པས་གྱེན་དུ་སོང་སྟེ་མཐར་སྤྱི་བོ་ནས་འཐོན། ནམ་མཁའི་དབྱིངས་ཇེ་མཐོ་ཇེ་མཐོ་ལ་སོང་བར་བསམས་ལ༑ མིག་གྱེན་དུ་གཏད་ཅིང་ཤེས་པ་ཧུར་ཕྱུང་ངོ༌། །དེ་ནས་མར་རིམ་པས་བབས་ཏེ། མཐར་ལྟེ་བར་སླེབས་པར་བསམ། དེ་ལྟ་བུ་ཡང་ཡང་བྱས་པས་བྱིང་བའི་གེགས་སེལ་བར་འགྱུར་རོ། །གཉིས་པ་ནི། རང་གི་ལྟེ་བར་ཐིག་ལེར་འོད་ཟེར་ནག་པོར་འཕྲོ་བ་ཞིག་གསལ་བཏབ་ལ། དེ་བཤང་སྒོ་ནས་རྒྱང་སྟེ་འཐོན། ས་འོག་ཐག་རིང་པོར་ནག་མུན་མུན་སོང་བར་བསམས་ལ། མིག་གི་ལྟ་སྟངས་ཡང་ཕབ་ཅིང༌། སེམས་ལྷོད་ཆགས་སུ་བྱེད༑ ཡང་ཐིག་ལེ་དེ་སླར་ཡང་སོང་སྟེ། ལྟེ་བར་སླེབས་པར་བསམས་ལ། དེ་ལྟ་བུ་ཡང་ཡང་བྱས་པས་རྒོད་པའི་གེགས་སེལ་བར་འགྱུར་རོ། །གསུམ་པ་ནི། རང་གི་ལུས་ཀྱི་ནང་ནས་རླུང་ཚུབ་དཔག་ཏུ་མེད་པ་བུ་ག་ དགུ་ནས་འཐོན་ཏེ། ལུས་ཀྱི་ཕྱི་ཐམས་ཅད་ཚུབ་མ་ཐལ་རླུང་གིས་ཁྱབ་པར་བསམས་ལ། མཐར་ཐལ་རླུང་རྣམས་ཕྱོགས་སོ་སོར་གྱེས་པར་བསམ་མོ། །དེ་ལྟར་ལན་མང་དུ་བསྒོམས་པས། རྣམ་རྟོག་རྒྱུན་ཆགས་སུ་འཁྲུགས་པ་རྣམས་ཞི་བར་འགྱུར་རོ། །གཉིས་པ་བོགས་འདོན་ལ། བདེ་གསལ་མི་རྟོག་པ་གསུམ་གྱི་བོགས་འདོན་པ་ལས། དང་པོ་མི་རྟོག་པའི་བོགས་འདོན་པ་ནི། གནས་དབེན་པ་ཞིག་ཏུ་ལུས་གནད་བཅས་ལ། རྣམ་རྟོག་འདིའི་རྗེས་སུ་འདི་དྲན་པར་བྱའོ། །སྙམ་དུ་སེམས་ལ་ལན་བཅུ་བཅུ་ཙམ་དྲན་པར་བྱས་ལ། དེ་རྗེས་མི་རྟོག་པ་ལ་ལྷོད་ཀྱིས་བཞག་གོ །ཡང་སྐྱེ་བོ་མང་པོའི་དབུས་སུ་འདུག་པ་ལ། རྣམ་རྟོག་འདིའི་རྗེས་ལ་འདི་དྲན་པར་བྱའོ་སྙམ་དུ་བསམས་ལ། སྔར་བཞིན་ལན་བཅུ་བཅུ་ཙམ་དྲན་པའི་མཐར་མི་རྟོག་པ་ལ་བཞག་གོ །དེ་ལྟར་མང་དུ་བྱས་པའི་མི་རྟོག་པ་ལ་བོགས་འཐོན་པར་འགྱུར་རོ། །གཉིས་པ་གསལ་བ་ལ་བོགས་འདོན་པ་ནི། རི་རྩེའམ། ཁང་སྟོང་ལྟ་བུ་མཐོ་བ་གཅིག་ཏུ་ཕྱིན་ལ། ཡུལ་གྱི་སྣང་བ་སྣ་ཚོགས་པ་ལ་སེམས་གཏོད་པ་སྟེ། དཔེར་ན་རི་ལྟ་བུ་ཞིག་གི་རྩེ་མོ་ལ་སེམས་ཅུང་ཟད་གཏད། ཡང་རིའི་སྐེད་པ་ལ་སེམས་ཡུད་ཙམ་ཞིག་གཏད། ཡང་རི་འདབ་ཀྱི་ནེའུ་གསེང་ལྟ་བུ་ལ་སེམས་ཡིད་ཙམ་གཏོད་པ་སོགས། ཡུལ་སྣ་ཚོགས་པ་ལ་སེམས་ཡུད་ཙམ་ཡུད་ཙམ་གཏད་པས་སེམས་ལ་གསལ་ཆ་རྙེད་པར་འགྱུར་རོ། །གསུམ་པ་བདེ་བའི་བོགས་འདོན་པ་ནི། རང་གི་སྤྱི་བོར་ཧཱུྃ་དཀར་པོ་ཞིག་གསལ་བཏབ། གསང་གནས་སུ་ཧཱུྃ་དམར་པོ་ཞིག་གསལ་བཏབ་ལ་སྤྱི་བོའི་ཧཱུྃ་དེ་མར་བབས། གསང་གནས་ཀྱི་ཧཱུྃ་དེ་ཡར་གྱེན་ལ་བྱུང་སྟེ། དེ་གཉིས་སྙིང་ཁའི་ཐད་ཙམ་དུ་འཁྲུགས་ཆིལ་གྱིས་འཐབ་པར་བསམས་ལ། ཧཱུྃ་དཀར་དམར་གཉིས་གཅིག་ལ་གཅིག་འདྲེས་པར་མོས་པས། ལུས་སེམས་བདེ་བས་ཁྱབ་པར་བསམས་ལ། དེ་ལྟ་བུ་ལན་མང་དུ་བྱས་པས་བདེ་བ་ལ་བོགས་ཐོན་པར་འགྱུར་རོ། །གསུམ་པ་གཏུམ་མོའི་མན་ངག་ལ། སྔོན་འགྲོ་དང་དངོས་གཞི་གཉིས་ལས། དང་པོ་ལ། བླ་མའི་རྣལ་འབྱོར་དང་། རྩ་ལམ་སྦྱངས་པ་དང་། རྩ་བྱིན་གྱིས་བརླབས་པ་གསུམ་ལས། དང་པོ་མདུན་གྱི་ནམ་མཁར་རྩ་བའི་བླ་མ་ཡི་དམ་གྱི་རྣམ་པའམ། རྡོ་རྗེ་འཆང་གི་རྣམ་པ་ཅན་གང་རུང་དུ་བསྒོམས་པའི་ལྟེ་བར་རྡོ་རྗེ་ཕག་མོ་གཡས་གྲི་གུག་དང༌། གཡོན་ཐོད་པ་འཛིན་པ། མཆན་ཁུང་ན་ཁ་ཊྭཱྃ་ག་བསྣམས་པ། ཞབས་གཡས་བརྐྱངས་པས་དུས་མཚན་མ་དང༌། གཡོན་བསྐུམས་པས་འཇིགས་བྱེད་མནན་པའི་སྐུ་ཅན་དུ་གསལ་བཏབ་ལ་མོས་གུས་དང་གསོལ་འདེབས་དྲག་ཏུ་བྱས་པའི་མཐར། བླ་མ་འོད་དུ་ཞུ། རྡོ་རྗེ་ཕག་མོ་ཡང་སྨིན་མཚམས་སམ༑ སྤྱི་བོ་ནས་ཞུགས་ཏེ། རང་རང་གི་ལྟེ་བའི་གཏུམ་མོ་ལ་ཐིམ་པར་བསམ་མོ། །གཉིས་པ་ལ། རླུང་གིས་རྩ་ལམ་སྦྱང་བ་དང༌། རྩས་རྩ་ལམ་སྦྱང་བ་དང༌། ཐིག་ལེས་རྩ་ལམ་སྦྱང་བའོ། །དང་པོ་ནི། རླུང་འཇམ་རླུང་ཙམ་ བཟུང་ལ། ཡིད་ཀྱི་དམིགས་པ་ལ་རླུང་བཟུང་བའི་ཚེ། ལུས་སྟོང་པར་གྱུར་པ་དེ་རླུང་གིས་ཁེངས་ཏེ་ལུས་ཇེ་སྦོམ་ལ་གྱུར་ཏེ། མཐར་ཤིན་ཏུ་སྦོམ་པར་གྱུར་པར་བསམ། རླུང་ཕྱིར་འགྲོ་བའི་ཚེ། ལུས་སྟོང་སང་ངེ་སོང་ནས༑ ལུས་ཀྱང་ཕྲ་བར་གྱུར་པར་བསམ་མོ། །གཉིས་པ་ནི། རང་ལུས་ཀྱི་དབུས་སུ་རྩ་དབུ་མ་གསལ་བཏབ། ཡང་རླུང་བཟུང་བའི་ཚེ། དབུ་མ་ཇེ་སྦོམ་ལ་སོང་ཞིང༌། དེའི་མཐུས་ལུས་ཀྱང་རིམ་པས་སྦོམ་པར་གྱུར་པར་བསམ་མོ། །ཡང་རླུང་ཕྱིར་འགྲོ་བའི་ཚེ། དབུ་མ་ཡང་ཕྲ་བར་གྱུར་ཅིང༌། ལུས་ཀྱང་ཕྲ་བར་གྱུར་པར་བསམ་མོ། །གསུམ་པ་ནི། རང་གི་རྩ་དབུ་མའི་ནང་གི་ལྟེ་བའམ། སྙིང་གའི་ཐད་ཙམ་དུ་གཏུམ་མོའི་རང་བཞིན་ཨ་ཤད་དམ། ཨཾ་དམར་པོ་ཞིག་གསལ་བཏབ་ལ། རླུང་ནང་དུ་གནས་པའི་ཚེ། ཨཾ་ངམ་ཨ་ཤད་ལས་འོད་ཟེར་དམར་པོ་དཔག་ཏུ་མེད་པ་འཕྲོས་པས། དེའི་ཐད་ཀྱི་དབུ་མ་དེ་རྒྱས་ཏེ་ཇེ་ཆེ་ལ་སོང་བས་ལུས་ཀྱང་ཇེ་སྦོམ་གྱུར་པར་བསམ། ཡང་རླུང་ཕྱིར་འགྲོ་བའི་ཚེ་འོད་ཟེར་རྣམས་གཏུམ་མོ་ལ་ཐིམ་ཞིང༌། དབུ་མ་དང་ལུས་གཉིས་ཀ་ཕྲ་བར་གྱུར་པར་བསམ་མོ། །གསུམ་པ་རྩ་བྱིན་གྱིས་བརླབ་པ་ནི། རང་གི་ལུས་ཀྱི་དབུས་སུ་རྩ་གསུམ་སྤྱི་དང་མཐུན་པར་གསལ་བཏབ་ཅིང༌། རྩ་གསུམ་ཅར་གྱི་ཡས་སྣའི་བཅད་ཁའི་མཉམ་པར་སྤྱི་བོ་ལ་ཟུག་པར་བསམ་རང་གི་སྤྱི་བོར་རྩ་བའི་བླ་མ་ཡི་དམ་ཡབ་ཡུམ་ཞལ་སྦྱོར་གྱི་རྣམ་པ་ལྟ་བུའམ། ཡང་ན་རྡོ་རྗེ་འཆང་ཡབ་ ཡུམ་ཅན་གྱི་རྣམ་པར་གསལ་བཏབ། དེ་ལ་མོས་གུས་དང་གསོལ་འདེབས་དྲག་ཏུ་བྱས་པས། ཡུམ་གྱི་སྦྱོར་མཚམས་ནས་བྱང་ཆུབ་ཀྱི་སེམས་དམར་པོའི་རྒྱུན་བྱུང་སྟེ། རོ་མའི་ནང་ནས་ཞུགས་པས། རོ་མའི་ནང་ཐམས་ཅད་གང་བར་བསམ། ཡབ་ཀྱི་སྦྱོར་མཚམས་ནས་བྱང་ཆུབ་ཀྱི་སེམས་དཀར་པོའི་རྒྱུན་བྱུང་སྟེ། རྐྱང་མའི་ནང་ནས་ཞུགས། དེའི་ནང་ཐམས་ཅད་གང་བར་བསམ། ཡང་གཉིས་ཀའི་སྦྱོར་མཚམས་ནས་བྱང་ཆུབ་ཀྱི་སེམས་དཀར་དམར་འདྲེས་པའི་རྒྱུན་བྱུང༌། དབུ་མའི་ནང་ནས་ཞུགས་པས་དབུ་མའི་ནང་ཐམས་ཅད་གང་བར་བསམ་མོ། །མཐར་བླ་མ་འོད་དུ་ཞུ། རྩ་གསུམ་ལ་ཐིམ་པར་བསམ་མོ། །གཉིས་པ་དངོས་གཞི་ལ༑ རླུང་ལ་བསླབ་པ་དང༌། གཏུམ་མོའི་མེ་དམིགས་ལ་བསླབ་པ་དང༌། ཐིག་ལེའི་རྣལ་འབྱོར་ལ་བསླབ་པ་དང༌། རྡོ་རྗེའི་བཟླས་པ་ལ་བསླབ་པའོ། །དང་པོ་ལ་བཞི་ལས། དང་པོ་རྡུལ་མཐའ་ཅན་ནི་རླུང་རོ་བསལ། རླུང་ནང་དུ་རྔུབ་ལ་རྔུབ་པ་རྫོགས་པ་ན། དལ་བུས་ཕྱིར་བུས་ལ། མིག་སྣ་རྩེ་ལ་གཏད་ཅིང༌། ཕྱིར་འབུད་པ་རྫོགས་པ་ན། ལུས་སྟོང་སང་ངེ་སོང་བར་བསམ་མོ། །གཉིས་པ་དགང་བ་ཅན་ནི། རླུང་ཕྱིར་སང་གིས་བུས་ལ། ནང་དུ་རྔུབ་པ་ན། དལ་བུས་རྔུབ་ལ། རྔུབ་པ་རྫོགས་པ་ན། རླུང་ལྟོ་བར་ནན་ཙམ་བྱའོ། །གསུམ་པ་བུམ་པ་ཅན་ནི། རླུང་ནང་དུ་ཤར་གྱིས་རྔུབ་ལ་འོག་རླུང་འཐེན་ལ། རླུང་གཉིས་ལྟེ་བར་ཁ་སྦྱོར་དུ་བཟུང་ཞིང༌། ཁ་ནང་གི་ རླུང་མིད་ལ་ཐུབ་ཚད་དུ་བཟུང༌། མི་བདེ་བ་སྙམ་བྱེད་ན་གཞིལ་བ་ཡང་བྱ་ཞིང༌། མཐར་སང་གིས་བཏང་ངོ་། །བཞི་པ་རེངས་པ་ཅན་ནི། རླུང་ཕྱིར་བུས་ལ། ཕྱིར་ཐུབ་ཚད་དུ་བཟུང་ངོ་། །གཉིས་པ་མེ་དམིགས་ལ་བསླབ་པ་ལ། གཏུམ་མོ་བསྡུས་པ་དང༌། འབྲིང་པོ་དང༌། རྒྱས་པ་དང༌། གོ་བཟློག་ལ་བསླབ་པ་དང་བཞི་ལས། དང་པོ་ལ། ལྟེ་བར་གཏུམ་མོ་བསྒོམ་པ་དང༌། ལྟེ་འོག་ཏུ་ཚངས་པའི་མེ་བསྒོམ་པའོ། །དང་པོ་སྔོན་འགྲོ་རྣམས་སྔོན་དུ་སོང་ནས། རང་ཉིད་ཡི་དམ་དུ་མོས་པ་ཙམ་བྱས་པའི་ལུས་ནང་སྟོང་སང་ངེ་བའི་ལྟེ་བར་པདྨ་འདབ་མ་བརྒྱད་པའི་འདབ་མ་བརྒྱད་ལ་ཨ་ཀ་ཙ་ཊ་ཏ་པ་ཡ་ཤའི་ཡི་གེ་བརྒྱད་འགོད་ཅིང༌། ཡང་ན་ཡི་གེ་མི་འགོད་པར་འདབ་མ་ཁ་རྐྱང་བསམ་མོ། །པདྨའི་ལྟེ་བར་ཆོས་འབྱུང་མཐེ་བོང་ཙམ་རྩ་བ་ཐུར་དུ་ཟུག་པ། དེའི་ནང་དུ་ཨ་ཤད་ལ་ཀླད་སྐོར་གྱིས་བརྒྱན་པའམ། ཡང་ན་ཨ་ཐུང་ལ་ཀླད་སྐོར་གྱིས་བརྒྱན་པ། ཁ་དོག་དམར་པོ་ཞིག་དམིགས་ལ། དེ་ལ་སེམས་རྩེ་གཅིག་ཏུ་གཏད་དོ། །གཉིས་པ་ནི། ལུས་ཀྱི་དབུས་སུ་རྩ་དབུ་མ་སྦོམ་ཕྲ་མདའ་སྨྱུག་འབྲིང་པོ་ཙམ། ཡས་སྣ་སྤྱི་བོ་ལ་ཐུག་པ་མས་སྣ་ལྟེ་འོག་ལ་ཟུག་པའི་ལྟེ་བ་ནས་སོར་གཉིས་ཙམ་གཞལ་བའི་ལྟེ་འོག་གི་དབུ་མ་ནི། ཕྱི་དབྱིབས་ཕུར་པའི་དབལ་ལྟ་བུར་ཟུར་གསུམ་ཡོད་པ་ལ། ནང་ཁོང་སྟོང་དུ་ཡོད་པའི་དབུས་སུ། ཀྵ་དམར་ནག་གམ། ཀྵུམ་གང་རུང་ཞིག་བསྒོམས་ལ། དེ་ལ་སེམས་རྩེ་གཅིག་ཏུ་གཏད། དེ་གཉིས་ཀ་ལ་རླུང་བུམ་ཅན་བཟུང་བའོ། །གཉིས་པ་འབྲིང་པོ་ལ་རྩ་བ་དང༌། ཡན་ལག་གཉིས་ལས། དང་པོ་ནི། སྙིང་ག་དང་ལྟེ་འོག་གི་བར་ལ་རྩ་དབུ་མ་སྦོམ་ཕྲ་མདའ་སྨྱུག་འབྲིང་པོ་ཙམ་དུ་ཡོད་པའི་སྙིང་གའི་འཁོར་ལོ་རྩ་འདབ་བརྒྱད་པ་ཁ་དོག་སྔོན་པོ་ཁ་ཐུར་བསྟན་དུ་གནས་པའི་ལྟེ་བར་ཧཱུྃ་དང༌། ལྟེ་བའི་རྩ་འདབ་དྲུག་ཅུ་རྩ་བཞི་པ་ཁ་དོག་དམར་སེར་ཁ་གྱེན་དུ་ཡོད་པའི་ལྟེ་བ་ལ། ཨྃ་དམར་སེར་མེའི་རང་བཞིན་ཅན་གསལ་བཏབ་ལ། རླུང་ཁ་སྦྱོར་དུ་བཟུང་བས། ཨྃ་ལས་གཏུམ་མོའི་མེ་འབར། སྙིང་གའི་ཧཱུྃ་ལ་རེག་པས་ཧཱུྃ་ལས་བྱང་ཆུབ་ཀྱི་སེམས་ཐིག་བབ་པར་བསམས་ལ། འབར་འཛག་རྩེ་གཅིག་ཏུ་སྤྲད་དོ། །གཉིས་པ་ནི། སྤྱི་བོའི་རྩ་འདབ་སོ་གཉིས་ཁ་དོག་དཀར་པོ་མགོ་ཐུར་བསྟན་གྱི་ལྟེ་བ་ལ་ཧཾ་དང༌། མགྲིན་པའི་འཁོར་ལོ་རྩ་འདབ་བཅུ་དྲུག་པ་ཁ་དོག་དམར་པོའི་ལྟེ་བ་ལ། ༀ་མེའི་རང་བཞིན་ཅན་གསལ་བཏབ་ལ། རླུང་ཁ་སྦྱོར་དུ་བཟུང་བས། མགྲིན་པའི་ཨྃ་ལས་གཏུམ་མོའི་མེ་འབར། སྤྱི་བོའི་ཧཾ་ལ་རེག་པས་ཧཾ་ལས་བྱང་ཆུབ་སེམས་རྒྱུན་ན་ར་ར་བབས་པར་བསམས་ལ། འབར་འཛག་ལ་སེམས་རྩེ་གཅིག་ཏུ་གཏད་དོ། །གསུམ་པ་གཏུམ་མོ་རྒྱས་པ་ལ། ཐིག་ལེའི་འགྲོས་དང་སྦྱར་བ་དང༌། རླུང་གི་འགྲོས་དང་སྦྱར་བ་གཉིས་ལས། དང་པོ་གཏུམ་མོ་རྒྱས་པ་དཔྱིད་ཐིག་ནས་འབྱུང་བ་ཇི་ལྟ་བ་བཞིན་ལས། རོ་རྐྱང་གི་འབར་འཛག་མི་བྱེད་པར། གཏུམ་མོ་དབུ་མའི་ནང་ནས་ཡར་སོང༌། སྨིན་མཚམས་གནད་ཀྱི་སྒོ་ཕྱེ་བ་ནས་ཐོན། ཕྱོགས་བཅུའི་སངས་རྒྱས་ཐམས་ཅད་ལ་ཕོག་པས། དེ་ཐམས་ཅད་བྱང་ཆུབ་ཀྱི་སེམས་སུ་ཞུ་བ། སྤྱི་བོ་ནས་མེ་དང་ལྷན་ཅིག་ཏུ་ཞུགས་ཧཾ་ལ་ཕོག་པས། ཧཾ་ལས་བྱང་ཆུབ་ཀྱི་སེམས་ཀྱི་རྒྱུན་བབས་ཏེ་ལྟེ་བའི་ཨཾ་ལ་སིབ་སིབ་ཐིམ་པར་བསམ། འབར་འཛག་ལ་སེམས་རྩེ་གཅིག་གཏད་དོ། །གཉིས་པ་ནི། རླུང་ཕྱིར་འགྲོ་བའི་ཚེ། ཨཾ་ལས་གཏུམ་མོ་འབར་ཞིང་ཧཾ་ལ་རེག་པར་བསམ། ནང་དུ་འོང་བའི་ཚེ། ཧཾ་ལས་བྱང་སེམས་ཀྱི་རྒྱུན་བབས་ཏེ་ཨཾ་ལ་ཐིམ་པར་བསམ་མོ། །བཞི་པ་གོ་བཟློག་ལ་བསླབ་པ་ལ་རྩ་བ་དང་ཡན་ལག་གཉིས་ལས། དང་པོ་ནི། སྙིང་གའི་འཁོར་ལོ་སྤྱི་དང་འདྲ་བའི་ལྟེ་བར་ཐིག་ལེ་དམར་ནག་དང༌། ལྟེ་བའི་འཁོར་ལོ་སྤྱི་དང་འདྲ་བའི་ལྟེ་བར་ཐིག་ལེ་དམར་ནག་ཅིག་གསལ་བཏབ་རླུང་བུམ་ཅན་དྲག་ཏུ་བཟུང་ལ། སྙིང་གའི་ཐིག་ལེ་དམར་ནག་ལས་འོད་ཟེར་དམར་ནག་ཤིན་ཏུ་ཚ་བ་ཞིག་ཐུར་དུ་འབར་བས་ལྟེ་བའི་ཐིག་ལེ་ལ་རེག་པས་ལྟེ་བའི་ཐིག་ལེ་ལས་ཀྱང་འོད་ཟེར་དམར་ནག་རེག་བྱ་ཤིན་ཏུ་བསིལ་བ་ཞིག་བྱུང་སྟེ། དེ་གཉིས་འཐབས་པ་ལས་སྙིང་གའི་ཐིག་ལེ་ལས་བྱུང་བའི་འོད་ཟེར་ཇེ་ཐུང་ལ་སོང༌། ལྟེ་བའི་ཐིག་ལེ་ལས་བྱུང་བའི་འོད་ཟེར་ཇེ་རིང་ལ་སོང་སྟེ། མཐར་སྙིང་གའི་ཐིག་ལེ་ལ་རེག་པས། ཡང་དེ་ལས་འོད་ཟེར་མེ་ལྕེ་ལྟ་བུ་བྱུང་སྟེ། སྔར་གྱི་ལྟེ་བའི་མེ་ལྕེ་ཇེ་ཐུང་དང༌། སྙིང་གའི་མེ་ལྕེ་ཇེ་རིང་ལ་གྱུར་ཏེ། ལྟེ་བའི་ཐིག་ལེ་ལ་རེག་ པར་བསམ། དེ་འདྲ་ཡང་ཡང་སྤེལ་མར་བྱའོ། །གཉིས་པ་ནི། སྤྱི་བོའི་རྩ་འདབ་སྔར་བཞིན་དང༌། མགྲིན་པའི་རྩ་འདབ་སྔར་བཞིན་ལས། ལྟེ་བ་གཉིས་སུ་ཐིག་ལེ་དམར་སྐྱ་རེ་རེ་བསྒོམ། བུམ་ཅན་དྲག་ཏུ་བཟུང་བ་ལས། སྤྱི་བོའི་ཐིག་ལེ་དམར་སྐྱ་ལས་དམར་པོའི་ཆ་དེ་མེ་ལྕེར་གྱུར་ནས་ནར་ཏེ་ཐུར་དུ་སོང་བས་མགྲིན་པའི་ཐིག་ལེ་དམར་སྐྱ་ལ་རེག་པས་དེ་ལས་དཀར་པོའི་ཆ་དེ་མེ་ལྕེར་གྱུར་ཏེ། དེ་གཉིས་འཐབ་པ་ལས། སྙིང་གའི་དེ་ཇེ་ཐུང་དང༌། མགྲིན་པའི་དེ་ཇེ་རིང་ལ་གྱུར་ཏེ། སྤྱི་བོའི་ཐིག་ལེ་ལ་རེག་པས། དེ་ལས་ཀྱང་མེ་ལྕེ་དམར་པོ་ཞིག་བྱུང་སྟེ། མགྲིན་པའི་ཐིག་ལེ་ལ་རེག་པས། དེ་ལས་ཀྱང་མེ་ལྕེ་འབྱུང་བ་སོགས་ཡུན་རིང་དུ་བསྒོམ་མོ༑ ༑དེ་དག་གི་སྐབས་སུ་རླུང་གནད་ནི། སྙིང་གའི་ཐིག་ལེ་དང་སྤྱི་བོའི་ཐིག་ལེ་ལས་མེ་ལྕེ་མར་འགྲོ་བའི་ཚེ། རླུང་ཁ་སྦྱོར་གྱི་ཤུགས་འོག་ཏུ་ནོན་པ་དང༌། ལྟེ་བའི་ཐིག་ལེ་དང༌། མགྲིན་པའི་ཐིག་ལེ་ལས་མེ་ལྕེ་ཡར་ཡོང་བའི་ཚེ། རླུང་ཤུགས་སྟོད་དུ་འཐེན་པའོ། །ཡང་ཕྱིར་བུས་ལ་ཕྱིར་བཟུང་བའི་སྐབས་སུ་ཐིག་ལེ་ལས་འོད་ཟེར་ཐུར་དུ་འགྲོ་བའི་ཚེ་སྟོང་གནོན་དང༌། ཐིག་ལེ་ལས་མེ་ལྕེ་ཡར་སོང་བའི་ཚེ་སྟོང་འཐེན་བྱའོ། །གསུམ་པ་ཐིག་ལེ་ལ་བསླབ་པ་ལ། ཐིག་ལེ་སྤྱིར་བསྒོམ་པ་དང༌། ཁྱད་པར་བསྒོམ་པ་དང༌། ལམ་གྱི་ཡན་ལག་བསྒོམ་པའོ། །དང་པོ་ནི། རང་ཉིད་ཡི་དམ་དུ་གསལ་བའི་གཙུག་ཏོར་གྱི་འཁོར་ལོ་རྩ་འདབ་བཞི་པའི་ལྟེ་བར། ཐིག་ལེ་ཁ་དོག་ལྗང་གུ། འོད་ཟེར་ལྔ་འཕྲོ་བ་ཞིག་དམིགས་ལ། དེ་ལ་སེམས་རྩེ་གཅིག་ཏུ་གཏད་གསལ་སྣང་ཐོབ་པར་བྱ། དེ་ནས་སྤྱི་བོའི་འཁོར་ལོ་རྩ་འདབ་དྲུག་པའི་ལྟེ་བར། ཐིག་ལེ་དཀར་པོའམ། ནག་པོ་འོད་ཟེར་འཕྲོ་བ་ཞིག་བསྒོམས་ལ་གསལ་སྣང་ཐོབ་པར་བྱ། དེ་ནས་མགྲིན་པའི་འཁོར་ལོ་རྩ་འདབ་སོ་གཉིས་པའི་ལྟེ་བར་ཐིག་ལེ་ཁ་དོག་དམར་པོ་འོད་ཟེར་འཕྲོ་བ་ཞིག་བསྒོམས་ལ་གསལ་སྣང་ཐོབ་པར་བྱ། དེ་ནས་སྙིང་གའི་འཁོར་ལོ་རྩ་འདབ་བརྒྱད་པའི་ལྟེ་བར་ཐིག་ལེ་བསྒོམ་པ་ནི། མགྲིན་པར་དཀར་པོ་བསྒོམས་ན་འདིར་ནག་པོ་དང༌། མགྲིན་པར་དམར་པོ་བསྒོམས་ན་འདིར་དཀར་པོ་བསྒོམས་ལ་གསལ་སྣང་ཐོབ་པར་བྱའོ། །དེ་ནས་ལྟེ་བའི་འཁོར་ལོ་ནང་སྐོར་རྩ་འདབ་བརྒྱད། ཕྱི་སྐོར་བརྒྱད། དེའི་ཡང་ཕྱི་སྐོར་བཅུ་གཉིས། དེའི་ཡང་ཕྱི་སྐོར་དྲུག་ཅུ་རྩ་བཞི་སྟེ། དེའི་ལྟེ་བར་ཐིག་ལེ་སེར་པོ་འོད་ཟེར་ལྔ་འཕྲོ་བ་ཞིག་བསྒོམས་ལ་གསལ་སྣང་ཐོབ་པར་བྱ། དེ་ནས་གསང་གནས་ཀྱི་འཁོར་ལོ་རྩ་འདབ་བཅུ་དྲུག་པའི་ལྟེ་བར་ཐིག་ལེ་སྔོན་པོ་འོད་ཟེར་འཕྲོ་བ་ཞིག་བསྒོམས་ལ་གསལ་སྣང་ཐོབ་པར་བྱ། དེ་དྲུག་ཀ་ལ་ཅུང་ཟད་གོམས་པ་ན། དེ་ནས་སྤྱི་གཙུག་ནས་གསང་གནས་ཀྱི་བར་གྱི་ཐིག་ལེ་རྣམས་ཡས་རིམ་གྱིས་གསལ་འདེབས་པ་དང༌། གསང་གནས་ནས་སྤྱི་གཙུག་གི་བར་གྱི་ཐིག་ལེ་རྣམས་མས་རིམ་གྱིས་བསྒོམ་པར་བྱའོ། །གཉིས་པ་ཁྱད་པར་བསྒོམ་པ་ལ། གསང་གནས་སུ་རྗེས་ཆགས་ཀྱི་ ཐིག་ལེ་བསྒོམ་པ་དང༌། སྙིང་གར་མི་ཤིགས་པའི་ཐིག་ལེ་བསྒོམ་པ་དང༌། སྣ་རྩེར་འོད་ཀྱི་ཐིག་ལེ་བསྒོམ་པ་དང༌། རྩ་བའི་རྣལ་འབྱོར་བསྒོམ་པའོ། །དང་པོ་ནི། རང་ཉིད་ཡི་དམ་ཡབ་ཡུམ་དུ་གསལ་བའི་ལུས་ལ་རྩ་གསུམ་འཁོར་ལོ་བཞི་ཡང་གསལ་བར་དམིགས་ལ། ཡབ་ཡུམ་རྗེས་སུ་ཆགས་པ་ལས། རྩ་སྟོང་ཕྲག་བདུན་ཅུ་རྩ་གཉིས་ཀྱི་བྱང་ཆུབ་ཀྱི་སེམས་ཐམས་ཅད་ཞུ་བ། འཁོར་ལོ་བཞིའི་རྩ་འདབ་སོ་སོར་འདུས་ཏེ། དེ་རྣམས་ཐམས་ཅད་ཀྱང་རོ་རྐྱང་དབུ་གསུམ་དུ་འདུས་པ་ལས། གསང་གནས་ཀྱི་འཁོར་ལོར་མ་སླེབས་ཀྱི་བར། དབུ་མའི་ནང་ནས་བྱང་སེམས་ནག་པོ་དང༌། རྐྱང་མའི་ནང་ནས་དཀར་པོ་དང༌། རོ་མ་ནས་དམར་པོ་འབབས་པར་བསམས་ལ། གསང་གནས་སུ་སླེབས་པ་ན། རྩ་གསུམ་གྱི་མས་སྣ་ཡང་ཟད་དེ། བྱང་སེམས་རྣམས་གཅིག་ཏུ་འདྲེས་ཏེ། ཁ་དོག་སྔོན་པོར་གྱུར་ཏེ། རྡོ་རྗེ་ནོར་བུའི་རྩེའི་ཤེས་རབ་མའི་ཟེའུ་འབྲུ་དང་འཕྲད་མཚམས་དེར་ཐིག་ལེ་ཁ་དོག་སྔོན་པོར་གནས་པ་ལ་སེམས་གཏད་དེ། རླུང་བུམ་ཅན་ལས་འོག་རླུང་གསང་གནས་འཕུལ་བའོ། །གཉིས་པ་ནི། དབུ་མ་གསལ་བཏབ་པའི་སྙིང་གའི་ཐད་དབུ་མའི་ནང་དུ་སེན་མོ་ཟླུམ་པོར་བཏང་བ་ཙམ་གྱི་ཚད་དང་ལྡན་པའི་ཉི་ཟླ་ཁ་སྦྱོར་གྱི་ནང་དུ། ཐིག་ལེ་སྔོན་པོ་འོད་འཚེར་བ་ཞིག་གསལ་བཏབ་ལ། དེ་ལ་སེམས་རྩེ་གཅིག་ཏུ་གཏད་དེ། སྟེང་རླུང་མནན་ཅིང༌། འོག་རླུང་རང་སར་ལྷོད་པའི་རླུང་སྦྱོར་བྱའོ། ། གསུམ་པ་ནི། སྙིང་གའི་ཐད་དབུ་མའི་ནང་དུ་ཉི་ཟླའི་ནང་ཐིག་ལེ་སྔོན་པོ་དང༌། སྣ་བུག་གཉིས་ཀྱི་འདོམས་ཀྱི་ནང་དུ་ཟླ་དཀྱིལ་སྲན་མ་ཕྱེད་པ་ཀས་ཙམ་བསམས་ལ། རླུང་ཕྱིར་འགྲོ་བའི་ཚེ། སྙིང་གའི་ཐིག་ལེ་ལས་འོད་ཟེར་ཁ་དོག་ལྔ་ལྡན་ཞིག་ན་ར་ར་བྱུང་སྟེ། དབུ་མའི་ནང་བརྒྱུད་སྤྱི་བོའི་བར་དུ་སོང༌། དེ་ནས་མདུན་ཕྱོགས་སུ་འཁྱོགས་ཏེ། སྣ་རྩེའི་ཟླ་བའི་སྟེང་དུ་ཁྱིལ་ལི་ལི་ཐིག་ལེར་སོང་བར་བསམས་ལ། རླུང་ཕྱིར་བཟུང༌། ནང་དུ་འོང་བའི་ཚེ། སྣ་རྩེ་འོད་ཀྱི་སྐུད་པ་འགྲིལ་བའི་ཐིག་ལེ་དེ་ཞིག་སྟེ། སྤྱི་བོ་བརྒྱུད་དེ་དབུ་མའི་ནང་ནས་བྱུང་བས་སྙིང་གའི་ཐིག་ལེ་ལ་ཐིམ་པར་བསམས་ཏེ་རླུང་ནང་དུ་ཅུང་ཟད་བཟུང་ངོ༌། །བཞི་པ་རྩ་བའི་རྣལ་འབྱོར་ནི༑ རང་གི་ལུས་ཀྱི་དབུས་སུ་རྩ་དབུ་མ་བྱང་སེམས་ནག་པོས་ཁྲིག་མེར་ཏེ་གང་བར་བསམ། གཡས་སུ་རོ་མ་རཀྟས་གང་བ། གཡོན་དུ་རྐྱང་མ་ཁམས་དཀར་པོས་གང་བ་ཡང་བསམ་མོ། །དེ་ནས་ལུས་ཀྱི་ནང་ཐམས་ཅད་རྩའི་དྲྭ་བས་ཁྱབ་པ། རྩ་ཐམས་ཅད་ཀྱང་སྒྲོ་སྐང་ལྟ་བུ་སྟོང་སང་ངེ་བ་ཡོད་པ་ལ། དེ་དག་གི་ནང་ཐམས་ཅད་བྱང་ཆུབ་ཀྱི་སེམས་དཀར་ལ་དམར་བའི་མདངས་ཆགས་པའི་རྣམ་པས་ཁྲིག་མེར་གྱིས་གང་བར་བསམ་མོ༑ ༑དེ་ནས་གཙུག་ཏོར་གྱི་འཁོར་ལོའི་རྩ་འཁོར་ཐམས་ཅད་གསལ་བཏབ་ལ། དེའི་དབུས་སུ་ཐིག་ལེ་ལྗང་གུ་ཞིག་དམིགས་ལ། དེའི་འོད་ཟེར་གྱིས་རྩ་ནང་ཐམས་ཅད་ཁྱབ་པས། དང་པོར་འོད་ཀྱིས་སྣང་བར་བྱས་ཤིང༌། བར་དུ་རྩ་རྣམས་དྭངས་པར་བྱས་པ་ཤེལ་གོང་ལྟར་གྱུར་པ་དང༌། མཐར་རྩ་ཐམས་ཅད་ཤིན་ཏུ་དྭངས་པ་འཇའ་ཚོན་ལྟར་ཕྱི་གསལ་ནང་གསལ་དུ་གྱུར་པར་བསམ་མོ། །དེའི་རིམ་པས་སྤྱི་བོ་དང༌། མགྲིན་པ་དང༌༑ སྙིང་ག་དང༌། ལྟེ་བ་དང༌། གསང་གནས་ཀྱི་རྩ་འཁོར་རྣམས་ཀྱང་གསལ་བཏབ་ལ་ཐིག་ལེ་ཁ་དོག་སོ་སོར་བསྒོམ་སྟེ། དེ་རྣམས་ཀྱི་འོད་ཀྱིས་རྩ་ནང་ཐམས་ཅད་ཁྱབ་པ་སོགས་གོང་བཞིན་བསྒོམ་མོ། །གཉིས་པ་ཡན་ལག་ལ་ལུས་ཀྱི་ནང་དུ་བསྒོམ་པ་དང༌། ཕྱི་རུ་བསྒོམ་པའོ། །དང་པོ་ལ་གསུམ་ལས། དམིགས་པ་དང་པོ་ནི། རང་གི་སྨིན་མཚམས་ན་བུག་པ་ཞིག་ཡོད་པར་བསམ། དེ་ཧཱུྃ་ཡིག་ནག་པོ་ཞིག་གིས་བཀག་ལ། དེའི་འོད་ནག་པོས་གདོང་པ་ཁྱབ་པར་བསམ། སྨིན་མཚམས་ཀྱི་ཐད་ཀྱི་ནང་དུ་ཧཾ་མགོ་ཐུར་བསྟན་ཞིག་བསྒོམ། དེ་ལས་བདུད་རྩིའི་རྒྱུན་བབས་པས་ཡ་རྐན་ཡན་གང༌། དེ་ལས་ཀྱང་མར་བབས་ཏེ་ལྕེ་ཆུང་ན་ཡི་གེ་གསུམ་ཡོད་པ་ལ་བརྟེན་ནས་བབས་པ་ལས་མཐར་ལུས་ནང་གི་རྩ་ཐམས་ཅད་སྦུགས་བྱང་ཆུབ་ཀྱི་སེམས་ཀྱིས་གང་བར་བསམ་མོ། །འདི་ནི་ཏིང་ངེ་འཛིན་ལ་བརྟེན་པའི་བཅུད་ལེན་ནོ། །དམིགས་པ་གཉིས་པ་ནི། རང་གི་ལུས་ཀྱི་དབུས་ཀྱི་སྙིང་གའི་ཐད་དུ་སྲོག་རྩ་ལས་འཕྱང་བའི་སྙིང་ཡོད་པར་བསམ། ལུས་ནང་གི་གཡས་ཕྱོགས་སུ་བདུད་རྩིའི་ལྷ་མོ་འོད་འཆང་མ་སྐུ་མདོག་དཀར་མོ། གཡས་གྲི་གུག་དང༌། གཡོན་བུམ་པ་བདུད་རྩིས་གང་བ་ བསྣམས་པ་ཞིག་གསལ་བཏབ། ཕྱག་གཡས་ཀྱི་གྲི་གུག་གིས་སྙིང་གི་དཀར་ནག་མཚམས་ནས་རྦད་ཀྱིས་བཅད་པས། སྙིང་གའི་རྩེ་མོ་སངས་རྒྱས་བྱང་སེམས་རྣམས་ལ་ཕུལ་བར་བསམ། ལུས་ཀྱི་ཤ་ཁྲག་ཐམས་ཅད་སྙིང་བཅད་མཚམས་ནས་བྱུང་སྟེ། བཤང་སྒོ་ནས་ཕྱིར་འཐོན་པར་བསམ། སྙིང་གའི་ནང་དུ་ལྷ་མོའི་ཕྱག་གཡོན་གྱི་བདུད་རྩི་བླུགས་པས། ལུས་ནང་གི་རྩ་སྦུགས་ཐམས་ཅད་བདུད་རྩིས་གང་བར་བསམ་ཞིང༌། སྙིང་གི་དཀར་ནག་མཚམས་ནས་སྔར་བཅད་པ་དེ་སླར་བླན་པར་བསམ་མོ། །དམིགས་པ་གསུམ་པ་ནི། མིག་གཉིས་སུ་ཐིག་ལེ་དཀར་པོ། རྣ་བ་གཉིས་སུ་ཐིག་ལེ་སྔོན་པོ། སྣ་བུག་གི་འདོམས་སོར་ཐིག་ལེ་སེར་པོ། ལྕེར་ཐིག་ལེ་དམར་པོ། སྐྲ་མཚམས་སུ་ཐིག་ལེ་ལྗང་གུ། ལྟེ་བར་ཐིག་ལེ་སྔོན་པོ་རྣམས་གསལ་བཏབ་བོ། །གཉིས་པ་ལུས་ཀྱི་སྤྱིར་བསྒོམ་པ་ནི། རང་ཉིད་ཀྱི་ལུས་འདི་མི་དམིགས་པའི་ལུས་ཀྱི་ཤུལ་ན་ཐིག་ལེ་དཀར་པོ་མཐེ་བོང་ཙམ་ཞིག་དམིགས་ལ། དེ་ལ་སེམས་གཏད་དོ། །དེ་ལ་གོམས་པ་ན། དངུལ་ཆུ་བྲེ་གང་ཙམ་གྱི་བོང་ཚོད་ཀྱི་ཐིག་ལེ་འོད་འཚེར་བ་ཞིག་དམིགས་ལ་སེམས་འཛིན། དེ་ལ་ཡང་སེམས་འཛིན་པ་ན་ཐིག་ལེ་དེ་ཉིད་ཚོ་གཉིས་སུ་གྱུར་པ་ལས། དེ་ཉིད་འཕེལ་ཏེ། དངུལ་ཆུ་བྲེ་གང་ཙམ་གྱི་ཚོད་ཀྱི་ཐིག་ལེ་གཉིས་གཡས་གཡོན་དུ་ཡོད་པར་བསམས་ལ་དེ་ལ་སེམས་འཛིན། དེ་ལ་ཡང་གོམས་པ་ན། ཐིག་ལེ་གཉིས་པོ་དེ་ཡང་ཆ་གཉིས་སུ་གྱུར་ཏེ། དངུལ་ཆུ་བྲེ་གང་ཙམ་གྱི་ཚོད་ཀྱི་ཐིག་ལེ་བཞི་ཡོད་པ་ལ་སེམས་འཛིན་ནོ། །དེ་ལ་ཡང་གོམས་པ་ན། ཐིག་ལེ་ཆ་བརྒྱད་དུ་གྱུར་པ་ལ་སེམས་འཛིན། དེ་ལ་ཡང་གོམས་པ་ན། ཐིག་ལེ་བཅུ་དྲུག་ཏུ་གྱུར་པ་ལ༑ ཐམས་ཅད་ཀྱང་ཕྱེད་དཀར་པོ་དང༌། ཕྱེད་དམར་པོ་ཡོད་པ་ལ་སེམས་འཛིན། དེ་ལ་ཡང་གོམས་ན། ཐིག་ལེ་བཅུ་དྲུག་པོ་ཐམས་ཅད་གཅིག་ཏུ་བསྡུས་པའི་ཐིག་ལེ་དཀར་ལ་དམར་བའི་མདངས་ཅན་ཤིན་ཏུ་ཆེ་བ་ཞིག་བསྒོམས་ལ་སེམས་འཛིན། དེ་ལ་ཡང་གོམས་པ་ན། ཐིག་ལེ་དེ་ཉིད་ཇེ་ཆེར་ལ་གྱུར་ཏེ། མཐར་སྣང་བ་ཐམས་ཅད་ཐིག་ལེས་ཁྱབ་པར་བསམ་མོ། །བཞི་པ་རྡོ་རྗེའི་བཟླས་པ་ལ། ཡི་གེ་གསུམ་གྱི་རྡོར་བཟླས་དང༌། གཉིས་ཀྱི་རྡོར་བཟླས་སོ། །དང་པོ་ལ། སྲོག་གི་རྡོ་རྗེའི་བཟླས་པ་དང༌། ཐུར་སེལ་གྱི་རྡོ་རྗེའི་བཟླས་པ་དང༌། མགོན་པོ་བཞིའི་རྡོར་བཟླས་དང༌། ལྷ་མོ་བཞིའི་རྡོར་བཟླས་དང༌། དབང་པོ་དྲུག་གི་རྡོར་བཟླས་སོ། །དང་པོ་ལ། དམིགས་སྐོར་དྲུག་ལས། དང་པོ་ནི། རླུང་རོ་བསལ་ལ། རླུང་ཕྱིར་འགྲོ་བའི་ཚེ། ཕྱིར་འགྲོ། ནང་དུ་འོང་བའི་ཚེ། ནང་དུ་འོང༌། ནང་དུ་གནས་པའི་ཚེ། གནས་ཞེས་མ་འཁྲུལ་བར་བྱེད་པའོ། །གཉིས་པ་ནི། ཕྱིར་འགྲོ་བའི་ཚེ༑ འོད་ཟེར་དཀར་པོའི་རྣམ་པས་ལུས་ནང་ནས་འཐོན་ཏེ། སྣ་སྒོ་ནས་འགྲོ་བར་བསམ། ནང་དུ་འོང་བའི་ཚེ་འོད་ཟེར་དམར་པོའི་རྣམ་པས་སྣ་སྒོ་ནས་ཞུགས་ཏེ། ལུས་ཐམས་ཅད་གང་བར་བསམ། གནས་པའི་ཚེ་འོད་ཟེར་ ནག་པོའི་རྣམ་པས་ཁྲིག་མེར་གནས་པར་བསམ་མོ། །གསུམ་པ་ནི། རླུང་ཕྱིར་འགྲོ་བའི་ཚེ། འོད་ཟེར་དཀར་པོའི་རྣམ་པར་ༀ་ཡིག་གི་སྒྲ་དང་བཅས་ཕྱིར་འགྲོ་བར་བསམ། ནང་དུ་འོང་བའི་ཚེ་འོད་ཟེར་དམར་པོའི་རྣམ་པ་ཨཱཿ ཡིག་གི་སྒྲ་དང་བཅས་པས་ནང་དུ་འོང་བར་བསམ། གནས་པའི་ཚེ་འོད་ཟེར་ནག་པོའི་རྣམ་པ་ཧཱུྃ་ཡིག་གི་སྒྲ་དང་བཅས་པར་གནས་པར་བསམ་མོ། །བཞི་པ་ནི། རླུང་ཕྱིར་འགྲོ་བའི་ཚེ་འོད་ཟེར་དཀར་པོ་ༀ་ཡིག་གི་སྒྲ་གཟུགས་དང་བཅས་པ་ཕྱིར་འགྲོ་བར་བསམ། ནང་དུ་འོང་བའི་ཚེ་འོད་ཟེར་དམར་པོ་ཨཱཿ ཡིག་གི་སྒྲ་གཟུགས་དང་བཅས་པས་ནང་དུ་འོང་བར་བསམ། ནང་དུ་གནས་པའི་ཚེ་འོད་ཟེར་ནག་པོ་ཧཱུྃ་ཡིག་གི་སྒྲ་གཟུགས་དང་བཅས་པས་གནས་པར་བསམ་མོ། །ལྔ་པ་ནི། ཕྱིར་འབུད་པའི་ཚེ། ༀ་ཡིག་གི་སྒྲ་གཟུགས་འོད་ཟེར་དཀར་པོའི་རྣམ་པ་ཕྱིར་འགྲོ་བར་བསམ། ནང་དུ་རྔུབ་པའི་ཚེ། ཨཱཿ ཡིག་གི་སྒྲ་གཟུགས་འོད་ཟེར་དམར་པོའི་རྣམ་པས་གནས་པར་བསམ། ནང་དུ་བུམ་ཅན་ཁ་སྦྱོར་དུ་གནས་པའི་ཚེ། འོད་ཟེར་ནག་པོ་ཧཱུྃ་ཡིག་གི་སྒྲ་གཟུགས་དང་བཅས་པས་གནས་པར་བསམ་མོ། །དྲུག་པ་ནི། རང་གི་ལྟེ་བའམ་སྙིང་ག་གང་རུང་དུ་འོག་ཏུ་ཉི་མ་དང༌། སྟེང་དུ་ཟླ་བ། དེ་གཉིས་ཀྱི་ཆེ་ཆུང་གི་ཚད་ནི་ཇི་ལྟར་རིགས་པ་ཡིན་ལ། ཉི་ཟླ་གཉིས་ཀྱི་དབུས་སུ་བུ་ག་རེ་རེ་ཡོད་པར་བསམ། དེའི་དབུས་སུ་ཐིག་ལེ་འོད་ཟེར་འཕྲོ་བ་ཞིག་བསམས་ལ། རླུང་ཕྱིར་འབུད་པའི་ ཚེ་ཐིག་ལེ་ལས་རླུང་རྣམས་འོད་ཟེར་དཀར་པོ་ༀ་ཡིག་གི་སྒྲ་དང་བཅས་པ་ཟླ་བའི་བུ་ག་ནས་འཐོན། སྣ་སྒོ་ནས་ཕྱིར་ཐོན་པར་བསམ་མོ། །རླུང་ནང་དུ་རྔུབ་པའི་ཚེ། ཨཱཿ ཡིག་གི་སྒྲ་གཟུགས་འོད་ཟེར་དམར་པོའི་རྣམ་པས་འོང་སྟེ་ཟླ་བའི་བུ་ག་ནས་ཞུགས། འོད་ཟེར་རྣམས་ཉི་མའི་བུ་ག་ནས་འཐོན་ཏེ་ལུས་ཐམས་ཅད་ཁྱབ་པར་བསམ། རླུང་ནང་དུ་བཟུང་བའི་ཚེ། ཉི་ཟླ་ཁ་སྦྱོར་གྱི་དབུས་ཀྱི་ཐིག་ལེའི་ནང་དུ་ཧཱུྃ་ཡིག་གི་སྒྲ་གཟུགས་ཀྱི་རྣམ་པས་གནས་པར་བསམ་མོ། །གཉིས་པ་ཐུར་སེལ་གྱི་རྡོར་བཟླས་ནི། སྟེང་རླུང་ཕྱིར་འགྲོ་བའི་ཚེ། ཐུར་སེལ་ནང་དུ་འོང་བ་དང༌། སྟེང་རླུང་ནང་དུ་འོང་བའི་ཚེ། ཐུར་སེལ་ཕྱིར་འགྲོ་བ་ཡིན་པས། དེའི་རིམ་པ་བཟུང་ནས། གསང་གནས་དང༌། འོག་སྒོ་གཉིས་ཀར་རམ། གང་རུང་ཞིག་ནས་གོང་གི་དམིགས་པ་དྲུག་པོ་བྱའོ། །དེ་ཡང་རྡོ་རྗེའི་བཟླས་པའི་གཙོ་བོ་དམིགས་པ་དྲུག་པོ་དེ་ལ་ཉམས་ཁྲིད་ཀྱི་ཚུལ་གྱིས་ཞིབ་པར་བྱ་བ་ཡིན་ཞིང༌། དམིགས་པ་ཕྱི་མ་རྣམས་རླུང་གིས་ཁ་དོག་ལ་སོགས་པ་མ་མཐོང་བའི་ལས་དང་པོ་བས་ཚུལ་བཞིན་འབྱུང་བར་དཀའ་བ་ཡིན་ནོ། །གསུམ་པ་མགོན་པོ་བཞིའི་རྡོ་རྗེའི་བཟླས་པ་ནི། ཐོག་མར་མགྲིན་པའི་ཐིག་ལེ་དམར་པོ་ལས་མེ་རླུང་ཁ་དོག་དམར་པོའི་རྣམ་པས་སྣ་བུག་གཡས་ནས་འགྲོ་འོང་བྱེད་པ་དང༌། རླུང་གི་རླུང་སྤྱི་བོའི་ཐིག་ལེ་ནག་པོ་ལས་ཁ་དོག་ནག་པོའི་རྣམ་པས། སྣ་བུག་གཡོན་ནས་འགྲོ་འོང་བྱེད་པ་དང༌། ས་རླུང་ ལྟེ་བའི་ཐིག་ལེ་སེར་པོ་ལས། འོད་ཟེར་སེར་པོའི་རྣམ་པ་སྣ་བུག་གཉིས་ཀ་ནས་འགྲོ་འོང་བྱེད་པ་དང༌། ཆུ་རླུང་སྙིང་གའི་ཐིག་ལེ་དཀར་པོ་ལས། འོད་ཟེར་དཀར་པོའི་རྣམ་པས་སྣ་བུག་གཉིས་ཀ་ནས་འགྲོ་འོང་བྱེད་པའོ། ། བཞི་པ་ལྷ་མོ་བཞིའི་རྡོར་བཟླས་ནི། སྣ་བུག་གཡས་ནས་རྒྱུ་བའི་མེ་ལྟ་བུ་ལ་ཡང༌། མེ་རླུང་གི་མེ་རླུང་དམར་པོ་དང༌། མེ་རླུང་གི་རླུང་ནག་མདངས་ཡོད་པ་དང༌། མེ་རླུང་གི་ས་རླུང་སེར་མདངས་ཡོད་པ་དང༌། མེ་རླུང་གི་ཆུ་རླུང་དཀར་མདངས་ཡོད་པ་སྟེ། དེ་དག་སྟེང་ལོགས་དང༌། ཐད་ཀ་དང༌། འོག་རྣམས་སུ་རྒྱུ་བའོ། །དེའི་རིགས་གཞན་རྣམས་ལའང་འགྲེའོ། །ལྔ་པ་དབང་པོ་དྲུག་གི་རྡོར་བཟླས་ནི། སྙིང་གར་ཐིག་ལེ་ཁ་དོག་སྣ་ཚོགས་པ་ཞིག་གསལ་བཏབ་ལ། དེ་ལས་རླུང་རྣམས་འབྱུང་བར་བསམས་ལ། མིག་ནས་དཀར་པོ། རྣ་བ་ནས་སྔོན་པོ། སྣ་བུག་ནས་སེར་པོ། ཁ་ནས་དམར་པོ། སྐྲ་མཚམས་ནས་ལྗང་གུ། ལྟེ་བའམ་གསང་གནས་ནས་སྔོན་པོའོ། །ཡི་གེ་གཉིས་པའི་རྡོར་བཟླས་ནི། རླུང་ཕྱིར་འགྲོ་བའི་ཚེ། ཧཱུྃ་ཡིག་གི་སྒྲས་འགྲོ་བ་དང༌། ནང་དུ་འོང་བའི་ཚེ། ཧོཿ ཡིག་གི་སྒྲས་འོང་བར་བསམ་མོ། །བཞི་པ་འོད་གསལ་གྱི་ཁྲིད་ལ། སྔོན་འགྲོ་སྒྱུ་ལུས་དང༌། དངོས་གཞི་འོད་གསལ་གཉིས་ལས། དང་པོ་ནི། སྒྱུ་ལུས་ཀྱི་སྔོན་འགྲོ་བླ་མའི་རྣལ་འབྱོར་ནི། རང་གི་མདུན་ནམ་སྤྱི་བོར་རྩ་བའི་བླ་མ་བསྒོམ། དེའི་ལྟེ་བའི་དབུས་སུ་ཡི་དམ་གྱི་སྐུ་དྭངས་ཤིང་གསལ་བ་ཞིག་བསྒོམས་ལ། སྒྱུ་མ་ལྟ་བུའི་ འདུན་པ་དང་བཅས་བཞིན་པས་གསོལ་བ་དྲག་ཏུ་བཏབ། མཐར་འོད་དུ་ཞུ་ནས་རང་ཉིད་ལ་ཐིམ་པར་བསམ་མོ། །སྒྱུ་ལུས་ཀྱི་དམིགས་སྐོར་དང་པོ་ནི། ལུས་གནད་ལེགས་པར་བཅས་ལ། དར་ཅིག་སེམས་མ་བཅོས་པར་ངལ་གསོ། དེ་ཀའི་ངང་ནས་བདག་གཞན་གནས་ལུས་ལོངས་སྤྱོད་ཐམས་ཅད་ལ་ཤེས་པ་ཞིག་གཏད་དེ། འདི་ཐམས་ཅད་བདེན་པར་གྲུབ་པ་གཅིག་ཀྱང་མེད་པ་སྒྱུ་མ་ལྟ་བུ་ཡིན་སྙམ་པའི་འདུན་པ་དྲག་ཏུ་སྦྱང༌༑ དེའི་ངོ་བོ་ལ་གཞིག་སྟེ་བལྟས་པས། ངོས་བཟུང་དང་བྲལ་བ་དེའི་ངང་ཅུང་ཟད་ཅིག་བསྐྱངས་ཏེ་མཉམ་པར་བཞག །ཚུལ་དེ་ལྟ་བུ་ཡང་ཡང་བསྒོམ་པར་བྱའོ། །དམིགས་སྐོར་གཉིས་པ་ནི། གནས་ཁང་མུན་པ་ཅན་དུ་ལུས་གནད་བཅས་ཤིང༌། མིག་ལྤགས་ཕྱེད་ཙམ་བཀབ་པའི་མིག་འབྲས་ཐད་ཀར་བལྟ། དེའི་ངང་ནས་རང་ཉིད་ཡི་དམ་གྱི་སྐུར་ལམ་གྱིས་བསྒོམས་ལ། འདི་ལྟར་གསལ་བ་འདི་བདེན་པར་གྲུབ་པ་མེད། མེད་བཞིན་དུ་ལྷའི་སྐུར་སྣང་བ་ཡིན་སྙམ་དུ་བསམ་ཞིང༌། དེའི་ངོ་བོ་ལ་བལྟས་པས། ངོས་བཟུང་ཐམས་ཅད་དང་བྲལ་བའི་ངང་ལ་མཉམ་པར་བཞག་ལ། དེ་ལྟ་བུ་ཡང་ཡང་སྒོམ་པར་བྱེད་པའོ། །དེ་ལ་བོགས་འདོན་པའི་དམིགས་སྐོར་གསུམ་པ་ནི། གནས་ཁང་སྣང་བ་དང་བཅས་པར། ཡི་དམ་གྱི་སྐུ་འགྱིང་བག་ཅན་ཞིག་བྲི། དེའི་གཟུགས་བརྙན་རང་གི་མདུན་དུ་མེ་ལོང་གི་ནང་དུ་འཆར་བར་བྱས་ལ། དེ་ལ་ཤེས་པ་གཞན་དུ་མ་ཡེངས་པར་རྩེ་གཅིག་ཏུ་གཏད་ལ་ཅུང་ཟད་མིག་གིས་བལྟ། དེ་ནས་མིག་འབྲས་གྱེན་དུ་སྒྲིལ་ལ། ལྷའི་སྐུའི་སྣང་བརྙན་མེ་ལོང་གི་ནང་དུ་ཤར་བ་དེ་འདྲ་བ་ཞིག་ཡིད་ཀྱིས་ཅི་གསལ་གསལ་བསྒོམ་མོ། །དེ་ལྟར་བདེན་མེད་ཀྱི་འདུན་པ་ཅུང་ཟད་དང་བཅས་ཏེ་སྤེལ་མར་སྒོམ་པར་བྱེད་པའོ། །ཡང་ན་ལྷ་སྐུའི་བྲིས་ཐང་མཚར་བ་ལ། མེ་ལོང་ལ་སོགས་པའི་འོད་ཕོག་པར་བྱས་ཏེ། དེ་ལ་མིག་གིས་བལྟ་ཞིང་སེམས་གཏད། དེ་ནས་མིག་འབྲས་གྱེན་དུ་སྒྲིལ་ཞིང༌། ལྷ་སྐུའི་སྣང་བརྙན་ཡིད་ཀྱིས་སྒོམ་པར་བྱེད་པ་སྟེ། དེ་གཉིས་གང་རུང་གཅིག་གིས་ཆོག་གོ །དེ་ལྟར་ཞག་བཅོ་ལྔ་ཙམ་རང་ཉིད་ལྷ་སྐུར་བསྒོམ་ཞིང༌། བདེན་མེད་ཀྱི་འདུན་པ་དྲག་ཏུ་སྦྱོང་བ་དེ་ཉིད་འབད་པས་བསྒོམ། ཡང་ཞག་བདུན་ཙམ་བོགས་འདོན་གཉིས་པོ་གང་རུང་ཞིག་བསྒོམ་བོགས་ཐོན་པར་བྱ། ཚུལ་དེ་ལྟ་བུས་ལྷ་སྐུ་ལ་ཡང་གསལ་སྣང་ཁྱད་པར་ཅན་ཐོབ་ཅིང༌། འདུན་པ་ལ་མ་ལྟོས་པར་སྣང་བ་སྒྱུ་མ་ལྟ་བུ་ཅུང་ཟད་ཤར་བ་ན། སྣང་སྟོང་གི་ལྷ་སྐུ་དེ་ཉིད་ལ་ཡུན་བསྲིངས་ཏེ་བསྒོམས་ནས། རེ་ཞིག་བརྟན་པར་བྱ། ཅུང་ཟད་བརྟན་པ་ན། དམིགས་སྐོར་བཞི་པ་སྤྲོ་བའི་དམིགས་པ་འདི་བསྒོམ། དེ་ཡང་རང་ཉིད་ལྷ་སྐུར་གསལ་བ་དེ་སྣང་བ་ཐམས་ཅད་ལ་ཁྱབ་པའི་ཚུལ་གྱིས༑ སྣང་བ་ཐམས་ཅད་ལྷ་སྐུར་ལམ་སྟེ་བསྒོམ་ཞིང༌། དེ་རྣམས་ལ་ཡང་སྒྱུ་མ་ལྟ་བུའོ་སྙམ་བདེན་མེད་ཀྱི་འདུན་པ་དྲག་ཏུ་སྦྱོང་ངོ་། །དེ་རྣམས་ནི་མཉམ་བཞག་གི་སྒྱུ་ལུས་བསྒོམ་པའི་ཚུལ་ལོ། །གཉིས་པ་རྗེས་ཐོབ་ཀྱི་ སྒྱུ་ལུས་བསྒོམ་ཚུལ་ལ། སྟོང་པ་ངོས་བཟུང་བ་དང༌། སྒྱུ་མ་ངོས་བཟུང་བ་གཉིས་ལས། དང་པོ་ནི། རང་གི་མིག་གི་ཡུལ་དུ་རས་ཁྲ་ལྟ་བུ་མཐོང་བ་ལ་ཤེས་པ་གཏད་པ་ན། ཐོག་མར་ཁྲ་བོར་སྣང་བ་ཙམ་ལ། རང་བཞིན་ངོས་བཟུང་དང་བྲལ་བར་ཤེས་པ་ནི། སྟོང་པ་དང༌། དེ་ལ་ཞིབ་ཏུ་བལྟས་པ་ན། ཁ་དོག་དང༌། དབྱིབས་ཀྱི་ཁྱད་པར་ཕྲ་མོ་རྣམས་ཀྱང་ཞིབ་པར་སྣང་ཙམ་ལ་རང་བཞིན་ངོས་བཟུང་ཐམས་ཅད་དང་བྲལ་བར་ཤེས་པ་ནི་ཤིན་ཏུ་སྟོང་པ་དང༌། དེ་ནས་ཡུལ་དེས་ཚིམས་པ་ལྟ་བུར་གྱུར་ཏེ། སྣང་བ་དེ་རྣམས་རིམ་གྱིས་ནུབ་པ་ལ་མངོན་དུ་ཕྱོགས་པར་སྣང་ཞིང༌། ངོས་བཟུང་དང་བྲལ་བར་ཤེས་པ་ནི་སྟོང་པ་ཆེན་པོའོ། །དེ་ནས་རིམ་པས་སྒྲ་སོགས་སྣང་བ་ཐམས་ཅད་ལ། སྟོང་པ་གསུམ་པོ་ངོས་འཛིན་པ་སློབ། གཉིས་པ་སྒྱུ་མ་ངོས་འཛིན་པ་ལ་མ་དག་ལས་སྣང་དང༌། དག་པ་ལྷ་སྐུའི་སྣང་བ་སྒྱུ་མ་ལྟ་བུར་ངོས་འཛིན་པ་གཉིས་ལས། དང་པོ་ནི། དེ་ལྟ་བུའི་སྣང་བ་འདི་ཐམས་ཅད་སྟོང་པ་གསུམ་གྱི་རིམ་པས་ནུབ་པར་གྱུར་པ་ན། ངོས་བཟུང་དང་བྲལ་བའི་ངང་ལ་མཉམ་པར་བཞག །དེ་ཀའི་འཕྲོ་ནས། བདག་གཞན་སྣོད་བཅུད་ཐམས་ཅད་ལ་ཤེས་པ་གཏད་དེ། མེད་བཞིན་དུ་སྣང་བ་སྒྱུ་མ་ལྟ་བུའོ། །ཞེས་འདུན་པ་སྦྱོང་བའོ། །གཉིས་པ་ནི། མ་དག་པའི་སྣང་བ་འདི་རྣམས་བདེན་མེད་དུ་ཤེས་པའི་སྣང་ཆ་དེ་ཡང་རིམ་པས་ནུབ་ན། དེའི་ཤུལ་དུ་ལྷ་སྐུའི་སྣང་བ་ལམ་སྟེ་ཤར་བར་མོས་ལ། དེ་ལ་ཡང་ བདེན་པར་མ་གྲུབ་ཀྱང༌། གསལ་བར་སྣང་བ་སྒྱུ་མ་ལྟ་བུའོ་སྙམ་པའི་འདུན་པ་སྦྱོང་ངོ་། །དེ་རྣམས་སད་དུས་སྒྱུ་མའི་དམིགས་པའོ། །རྨི་ལམ་སྒྱུ་མ་ལ་ཐོག་མར་རྨི་ལམ་འཛིན་པ་ནི། སྔ་དྲོ་ནས་བཟུང་ཉིན་ཕྱེད་ཀྱི་བར་དུ་དོ་ནུབ་ཅི་ནས་ཀྱང་རྨི་ལམ་ཟིན་པར་བྱ་སྙམ་པའི་འདུན་པ་རྒྱུན་མི་འཆད་དུ་བཏང༌། ཉིན་ཕྱེད་མན་དུ་གཉིད་དུ་སོང་འདུག །སྣང་བ་འདི་རྨི་ལམ་གྱི་སྣང་བ་ཡིན་པ་འདུག །ད་ནང་ཕན་ཆད་རྨི་ལམ་ལ་རྨི་ལམ་དུ་ངོ་མ་ཤེས་འདུག་སྙམ་པའི་འདུན་པ་རྒྱུན་མི་ཆད་དུ་བཏང་ངོ༌། །དེ་ནས་ཉི་མ་གཉིས་པ་ལ་ཡང༌། ཉིན་ཕྱེད་ཡན་ལ་མདང་རྨི་ལམ་ལ་རྨི་ལམ་དུ་ངོ་མ་ཤེས་འདུག །དོ་ནུབ་ཅིས་ཀྱང་རྨི་ལམ་ལ་རྨི་ལམ་དུ་ངོ་ཤེས་པར་བྱ་སྙམ་པའི་འདུན་པ་བཏང་ཞིང༌། ཉིན་ཕྱེད་མན་དུ་སྣང་བ་འདི་རྨི་ལམ་རང་ཡིན་འདུག་སྙམ་པའི་འདུན་པ་བཏང༌། ཚུལ་དེས་ཞག་བདུན་ནམ། བཅོ་ལྔ་ལ་སོགས་པས་རྨི་ལམ་ཅི་རིགས་ཟིན་པ་འབྱུང་ཞིང༌། འོན་ཀྱང་བརྟན་པོ་མི་འབྱུང་བས། དམིགས་པའི་རིམ་པ་འདི་བསྒོམ། དེ་ཡང་རང་གི་རྐེ་སྦོམ་མཚམས་མགྲིན་པའི་དབུས་སུ་པདྨ་དམར་པོ་འདབ་བཞིའམ། རྩ་འདབ་སྦུགས་ཅན་བཞི་པ་གང་རུང་ཞིག་བསྒོམ། དེའི་ལྟེ་བ་དབུ་མའི་ནང་དུ་ༀ་དམར་པོ་མེ་འོད་ཀྱི་རང་བཞིན་ཅན་ཞིག་དང༌། རྩ་འདབ་བཞི་ལ་ར་རཱ་ལ་ལཱ་བཞི་ཁ་དོག་དམར་པོ་བསྒོམ། དེ་ལ་དམིགས་པ་གཏད་ཅིང་ཉིན་ཕྱེད་ཡན་དུ་རྨི་ལམ་ཟིན་པ་བྱ་སྙམ་པའི་འདུན་པ་དང༌། ཉིན་ཕྱེད་ མན་དུ་སྣང་བ་འདི་རྨི་ལམ་གྱི་སྣང་བ་ཡིན་པ་འདུག །ང་གཉིད་དུ་སོང་འདུག་སྙམ་པའི་འདུན་པ་དང་བཅས་ཏེ་བསྒོམས་པས་རྨི་ལམ་ཟིན་པར་འགྱུར་ཞིང༌། དེས་མ་ཟིན་ན། རླུང་བུམ་པ་ཅན་བཟུང་ཞིང༌། འདུན་པ་དང༌། དམིགས་པ་གོང་བཞིན་བྱེད་པ་དང༌། དེས་ཀྱང་མ་ཟིན་ན། སྨིན་མཚམས་སུ་ཐིག་ལེ་ཆེ་ཆུང་རྒྱ་སྲན་ཙམ་ཁ་དོག་དཀར་པོ་ཞིག་ལ་དམིགས་པ་གཏད། འཇམ་རླུང་བུམ་པ་ཅན་བཟུང་ཞིང༌། འདུན་པ་གཏོང་ལུགས་སྔར་བཞིན་ནོ། །དེ་ལྟར་རྨི་ལམ་འཛིན་པ་ལ། འདུན་པས་འཛིན་པ་དང༌། མགྲིན་པའི་ༀ་ཡིག་མ་ནིང་གི་ཡི་གེ་བཞི་བསྒོམ་པའི་དམིགས་པ་དང༌། སྤོགས་ཆོག་གཉིས་ཏེ། བཞི་པོ་དེ་རྣམས་ལ་བརྟེན་ནས་རྨི་ལམ་བསྟར་ཆགས་སུ་ཟིན་པར་གྱུར་ན། རྨི་ལམ་སྦྱོང་བ་ལ་རྩ་བ་དང་ཡན་ལག་གི་དམིགས་པ་འདི་རྣམས་བསྒོམ་མོ། །དེ་ཡང་ཉིན་ཕྱེད་ཡན་ལ་དོ་ནུབ་རྨི་ལམ་དུ་རང་ཉིད་ལྷ་སྐུར་བསྒོམ་པར་བྱ་སྙམ་པ་དང༌། ཉིན་ཕྱེད་མན་ལ༑ ང་གཉིད་དུ་སོང་འདུག །སྣང་བ་འདི་རྨི་ལམ་གྱི་སྣང་བ་ཡིན་པར་འདུག་སྙམ་དུ་བསམས་ལ། རང་ཉིད་ཡི་དམ་ཕྱག་གཉིས་པར་ལམ་སྟེ་བསྒོམ་པ་ནི། རྩ་བའི་དམིགས་པ་དང་པོ་དང༌། འདུན་པ་གཏོང་ལུགས་གོང་བཞིན་རང་དང་སྣང་བ་ཐམས་ཅད་ལྷ་སྐུར་བསྒོམ་པ་ནི། རྩ་བའི་དམིགས་པ་གཉིས་པ་དང༌། འདུན་པ་གཏོང་ལུགས་འདྲ་བ་ལས་རང་དང་སྣང་བ་ཐམས་ཅད་ལྷ་སྐུར་གསལ་བ་དེ་ཅིག་ཆར་ནམ་མཁའ་ལ་འཇའ་ཚོན་ཡལ་བ་ ལྟར་འོད་གསལ་གྱི་ངང་དུ་ཐིམ་པའམ། ཡང་ན་སྣང་བ་ཐམས་ཅད་རང་ཉིད་ལ་ཐིམ། རང་ཉིད་ཀྱང་འོད་གསལ་སྟོང་པ་ཉིད་ཀྱི་ངང་དུ་ཐིམ་པར་བསམ་པ་ནི་རྩ་བའི་དམིགས་པ་གསུམ་པའོ། །དེ་ལྟར་ནང་སེལ་གྱི་དམིགས་པ་དེ་རྣམས་གཅིག་ཏུ་བསྡོམས་ཏེ། དམིགས་ཆེན་གཅིག་ཏུ་བྱས་པ་ལ། རྨི་ལམ་སྦྱོང་བའི་རྩ་བའི་དམིགས་པ་གཅིག་ཅེས་བྱའོ། །ཡན་ལག་གི་དམིགས་པ་གསུམ་སྟེ། སྤྲོ་བསྡུ་ལ་བསླབ་པ་དང༌། ཡ་ང་ལ་བསླབ་པ་དང༌། རྣམ་ཐར་ལ་བསླབ་པ་དང་གསུམ་ལས། དང་པོ་ནི། རང་གཞན་གྱི་དངོས་པོ་གཅིག་ལས་གཉིས་དང༌། གསུམ་ལ་སོགས་པ་མཐའ་ཡས་པའི་བར་སྤྲོ་བ་དང༌། མང་པོ་གཅིག་ཏུ་བསྡུ་བ་དང༌། ཆུང་ངུ་ཆེན་པོར་བསྐྱེད་པ་དང༌། ཆེན་པོ་ཆུང་ངུར་བསྡུ་བ་སོགས་ཉིན་པར་དམིགས་པས་བསྒོམ་ཞིང༌། མཚན་མོ་རྨི་ལམ་ཤར་བའི་ཚེ་དེ་ལྟར་བྱ་སྙམ་དུ་བསམ་མོ། །གཉིས་པ་ནི། རང་རྣམ་རྟོག་འཇོམས་དཀའ་བ། རྒྱ་མཚོ་ཆེན་པོའི་དབུས་སམ། མི་གཙང་བའི་ཁྲོད་དམ། གཡང་ས་འཇིགས་སུ་རུང་བ་རྣམས་སུ་བག་ཚ་མེད་པར་ཕྱིན་པར་མོས་ཤིང༌། མཚན་མོ་རྨི་ལམ་གྱི་ཚེ་དེ་ལྟ་བུ་རྣམས་ལ་ཐོག་རྫིས་སུ་བྱ་སྙམ་དུ་བསམ་མོ། །གསུམ་པ་ནི། བླ་མ་ཡི་དམ་སངས་རྒྱས་བྱང་སེམས་སོགས། རང་གང་ལ་མོས་པ་ཞིག་མདུན་དུ་བྱོན་པར་བསམས་ལ། དེ་ལ་བདག་དོ་ནུབ་ཏུ་རྨི་ལམ་དུ་བདེ་བ་ཅན་དུ་སླེབ་པར་མཛད་དུ་གསོལ། ཞེས་གསོལ་བ་བཏབ་པས། དེའི་ཐུགས་ཀ་ནས་འོད་ཟེར་གྱི་ ཐག་པ་ཞིག་བྱུང༌། དེ་ལ་རང་འཇུས་ཏེ། ཡི་དམ་སོགས་ཀྱིས་ཁྲིད་པས། བདེ་བ་ཅན་སོགས་རང་ཡུལ་སྣང་གང་བལྟ་འདོད་པ་དེར་སླེབས་པས་དེ་དང་དེ་མཐོང་བར་བསམ་པས། རྨི་ལམ་དུ་དེ་བཞིན་འབྱུང་བ་ཡིན་ནོ། །ཡང་རང་གི་མདུན་དུ་ཡི་དམ་སོགས་གང་རུང་གསལ་བ་ལ་དྲི་བ་འདི་དང་འདི་ལྟ་བུ་ལུང་བསྟན་དུ་གསོལ། ཞེས་གསོལ་བ་བཏབ་པས། དེའི་ལན་ཇི་ལྟ་བ་བཞིན་གསུངས་པའི་དམིགས་པ་ཉིན་པར་བསྒོམས་པས༑ མཚན་མོ་རྨི་ལམ་དུ་ཡང་དེ་བཞིན་འབྱུང་བར་འགྱུར་རོ། །བར་དོར་སྒྱུ་མ་བཟུང་བ་དང་སྦྱོང་བ་གཉིས་ལས། དང་པོ་ནི། རང་ཉིད་ཐ་མལ་པ་གནས་པའི་སྙིང་ག་ནས་འོད་ཟེར་འཕྲོས། སྣོད་བཅུད་ཐམས་ཅད་འོད་དུ་མེར་ཏེ་ཞུ། རིམ་པས་འདུས་ཏེ་རང་ལུས་ལ་ཐིམ། ལུས་འོད་ཀྱི་གོང་བུར་གྱུར་པ་མཐའ་ནས་རིམ་པས་འདུས། སྙིང་གའམ་ལྟེ་བའི་ཐད་དུ་འོད་མཐེ་བོང་ཙམ་དུ་གྱུར། དེ་ཡང་ཇེ་ཕྲར་གྱུར་ཏེ་སྟོང་པར་ཡལ་བར་བསམ་ལ་ཅུང་ཟད་མཉམ་པར་བཞག །དེ་ནས་རྣམ་རྟོག་གཞན་གྱིས་བར་མ་ཆོད་པར་སྣང་བ་འདི་རྣམས་ལ་ཤེས་པ་གཏད་དེ། ང་ཤི་འདུག་འདི་རྣམས་བར་དོའི་སྣང་བ་ཡིན་པར་འདུག །བདེན་པར་གྲུབ་པ་ཅུང་ཟད་ཀྱང་མི་འདུག་སྙམ་དུ་བསམས་ལ། ཡང་སྙིང་ཁ་ནས་འོད་ཟེར་སྤྲོ་བ་སོགས་བསྐྱར་གྱིན་བསྒོམ། ཐུན་མཚམས་སུ་བར་དོ་ཡིན་སྙམ་པའི་འདུན་པ་འབྲལ་མེད་དུ་བྱས་པས་བར་དོ་ཟིན་པར་འགྱུར་རོ། །གཉིས་པ་སྦྱོང་བ་ནི། རང་ཉིད་ཐ་མལ་པའི་སྙིང་ཁ་ནས་འོད་ཟེར་འཕྲོས། སྣང་བ་ཐམས་ཅད་འོད་དུ་མེར་ཏེ་ཞུ། རང་ལུས་ལ་ཐིམ། རང་ལུས་ཀྱི་གོང་བུ་ཡང་རིམ་པས་བསྡུས་ཏེ། སྙིང་གའམ། ལྟེ་བར་འོད་ཀྱི་གོང་བུ་མཐེ་བོང་ཙམ་དུ་གྱུར། དེ་ཡང་ཇེ་ཕྲར་གྱུར་ཏེ་སྟོང་པར་ཡལ་བའི་ངང་ལ་ཅུང་ཟད་མཉམ་པར་བཞག །དེ་ཀའི་ངང་ལ་རྟོག་པ་གཞན་གྱིས་བར་མ་ཆོད་པར་སྣོད་བཅུད་ཐམས་ཅད་ལ་ཤེས་པ་གཏད་དེ། ང་ཤི་འདུག །བར་དོའི་སྣང་བ་ཡིན་འདུག །སྣང་བ་འདི་རྣམས་དག་པའི་སྐུར་བསྒྱུར་བར་བྱ་སྙམ་དུ་བསམས་ལ། རང་ཉིད་དང་སྣང་བ་ཐམས་ཅད་ཡི་དམ་ཡབ་ཡུམ་གྱི་སྐུ་དང༌། སྒྲ་ཐམས་ཅད་སྔགས་ཀྱི་སྒྲར་བསམ་ཞིང༌། འདི་རྣམས་བདེན་མེད་སྒྱུ་མ་ལྟ་བུའོ། །སྙམ་དུ་བསྒོམ་མོ། །ཡང་བསྐྱར་ནས་བསྒོམ་པ་ན། རང་ཉིད་ཡི་དམ་གྱི་སྐུར་གསལ་བའི་སྙིང་ག་ནས་འོད་ཟེར་སྤྲོ་བ་སྔར་བཞིན་བྱའོ། །སྒྱུ་ལུས་ལས་འཕྲོས་པ་འཕོ་བའི་མན་ངག་ལ། སྣང་སྟོང་སྒྱུ་མ་ལྟ་བུར་ཡོངས་སུ་ཤེས་པའི་རྣལ་འབྱོར་པ་མཆོག་ལ་འཕོ་བ་མི་དགོས་ཀྱང༌། དེ་ལྟར་མ་རྟོགས་པ་རྣམས་ཀྱིས་གོང་དུ་འཕོ་དགོས་པའི་ཕྱིར་འཕོ་བའི་མན་ངག་སྟོན་པ། དེ་ལ་སྐུའི་འཕོ་བ། གསུང་གི་འཕོ་བ། ཐུགས་ཀྱི་འཕོ་བ། ཡེ་ཤེས་ཀྱི་འཕོ་བ་དང་བཞི་ལས། ཐམས་ཅད་ཀྱི་ཐོག་མར་སྒོ་དགག་པའི་དམིགས་པ་ནི། སྤྱིར་རང་ཡི་དམ་གང་རུང་བསྒོམ་པས་ཆོག་ཀྱང༌། བྱེ་བྲག་ཏུ་འཕོ་བའི་རིགས་རྣམས་ལ། མཁའ་འགྲོ་མའི་རིགས་བསྒོམ་ན་ལྷག་པར་ བསྔགས་པ་དང༌། དེའི་ནང་ནས་ཀྱང་གདན་བཞི་ནས་བཤད་པའི། འཕོ་བའི་ལྷ་མོ་ལྟ་བུ་བསྒོམ་ན་མཆོག་ཡིན་ཀྱང༌། དེ་ལྟར་མ་ཐུབ་ན། རང་རྡོ་རྗེ་ཕག་མོའམ། བདག་མེད་མ་ལྟ་བུ་གང་རུང་ཞིག་ཏུ་བསྒོམས་ལ༑ རང་གི་མིག་གཉིས་ཀྱི་དབུས་སུ་བུག་པ་ཕྲ་མོ་ཡོད་པར་བསམས་པའི་དཀྱིལ་དུ་ཧཱུྃ་སྔོན་པོ་མགོ་ནང་དུ་བསྟན་པ་རེ་རེས་བཀག་པར་བསམ། དེའི་འོད་ཟེར་གྱིས་སྲུབས་རྣམས་ཀྱང་བཀག་པར་མོས་ལ། རླུང་བུམ་ཅན་བཟུང༌། དེ་ལྟ་བུ་ཞག་བདུན་སོགས་ཇི་ལྟར་རིགས་པ་བསྒོམ། དེ་བཞིན་དུ་རྣ་བ་གཉིས་ཀྱི་བུག་པ་དམའ་མཚམས་སུ་ཡུམ་སྔོན་པོ་རེ་རེ་དང༌། སྣ་བུག་གཉིས་སུ་ཡུཾ་སྔོན་པོ་རེ་རེ་མགོ་ནང་བསྟན། སྤྱི་གཙུག་གི་བུག་པར་ཀྵུམ་སེར་པོ་མགོ་ཐུར་བསྟན། བཤང་ལམ་དུ་ཀྵཱུམ་སེར་པོ་མགོ་ནང་བསྟན། ཁའི་སྒོ་ལྕེའི་རྩ་བར་སུམ་དཀར་པོ་མགོ་ནང་བསྟན། ཆུ་ལམ་དུ་སུམ་དཀར་པོ་མགོ་ནང་བསྟན་བསྒོམས་ལ། ཡི་གེ་སོ་སོའི་འོད་ཟེར་གྱིས་བུག་པའི་སྲུབས་ཐམས་ཅད་བཀག་པར་བསམ་ཞིང༌། རླུང་བུམ་ཅན་བཟུང་བ་རེ་རེ་བཞིན་ཞག་བདུན་ཙམ་རེ་བྱའོ། །ཡི་གེ་བརྩེགས་མས་སྒོ་དགག་པ་ནི། མགྲིན་པའི་ནང་དུ་སྨྲཾཡུ་དང༌། སྙིང་ཁར་ཡཾམྲཡུ་དང༌། དཔུང་པ་གཉིས་ སུ་ཧྨྲཾཡུ་དང༌། ལྟེ་བར་ཀྵཾམྲཡུ་རྣམས་ཁ་དོག་སྔོན་པོ། མགོ་ནང་བསྟན་བསྒོམས་ལ། དེ་དག་ལ་ཡང་རླུང་བུམ་པ་ཅན་བཟུང་ལ་ཞག་བདུན་ཙམ་རེ་བསྒོམ་མོ། །དེ་ནས་ཐམས་ཅད་དུས་གཅིག་ཏུ་བསྒོམ་པར་བྱ་སྟེ་སྤྱི་གཙུག་གི་ཀྵུཾ་ནས་བཟུང༌། བཤང་ལམ་གྱི་ཀྵུཾ་གྱི་བར་ཡས་རིམ་གྱིས་གསལ་བཏབ་ཅིང༌། ཡི་གེ་རྣམས་ལས་འཕྲོས་པའི་འོད་ཟེར་གྱིས་སྒོ་རྣམས་བཀག་པར་བསམ། དེ་བཞིན་དུ་མས་ནས་རིམ་པ་བཞིན་གསལ་བཏབ་ཅིང་རླུང་བུམ་པ་ཅན་བཟུང་ངོ༌། །ཚུལ་དེ་ལྟ་བུས་ཟླ་བ་དྲུག་སོགས་བསྒོམས་ན་སྒོ་ཁེགས་པའི་རྟགས་ལ་དུ་བ། སྨིག་རྒྱུ་སོགས་རྟགས་ལྔ་ཡང་འབྱུང་ལ། ཁྱད་པར་དམིགས་པ་ལ་སེམས་གཏད་རེས་ཀྱིས་ཕྱི་རོལ་ཡུལ་གྱི་སྣང་བ་རྣམས་ནུབ་ཅིང༌། ནང་གི་ཤེས་པ་སལ་ལེ་བ་འདུག་པ་དེ། དཔེར་ན་གནས་ཁང་མུན་པ་ཅན་དུ་འདུག་པ་འདྲ་བ་ཞིག་བྱུང་ན་སྒོ་ཁེགས་པའི་རྟགས་ཡིན་ནོ། །དེ་ནས་ཐུན་གྱི་མགོར་སྒོ་དགག་པའི་དམིགས་པ་འདི་རྣམས་ལན་རེ་ཙམ་རེ་སྒོམ་ཐུབ་ན་ལེགས། མ་བསྒོམས་ཀྱང་ཆོག་གོ །དེ་ནས་ལུས་ཀྱི་དབུས་སུ་དབུ་མ་བསྒོམ་ན་ཅུང་ཟད་སྦོམ་པ་ཞིག་གསལ་བཏབ། མ་བསྒོམས་ཀྱང་ཆོག་སྟེ། སྙིང་གའི་ཐད་དུ་ཧཱུྃ་སྔོན་པོ། ཆེ་ན་སོར་བཞི་ཙམ་པ། ཆུང་ན་མཐེ་བོང་ཙམ་ཞུ་ལ་ཁད་པ་མགོ་ཐུར་བསྟན་ཞིག་བསྒོམ། ལྟེ་བར་ཨཾ་ཡིག་གམ། ཨ་ཤད་གང་རུང་མགོ་གྱེན་བསྟན་ཞིག་གསལ་བཏབ། རླུང་རོ་བསལ། ནང་དུ་རྔུབ་སྟེ། སྟེང་རླུང་མནན་པ་སྙིང་གའི་ཧཱུྃ་དེ་ལས་འོད་ཟེར་ཐུར་དུ་འཕྲོས་པར་བསམ། ཐུར་སེལ་སྟེང་དུ་འཐེན་པས་ལྟེ་བའི་ཨ་ཤད་ལས་གཏུམ་མོའི་མེ་འབར། མེ་རླུང་གི་ཤུགས་ཀྱིས་སྙིང་གའི་ཧཱུྃ་མགོ་གྱེན་དུ་བསྟན་པར་གྱུར་ཅིང་ཧཱུྃ་གི་ཞབས་ཀྱུ་ལས་ཐིག་ལེའི་ རྒྱུན་བབས་པའི་འབར་འཛག་ལ་དམིགས་པ་གཏད་ཅིང༌། རླུང་ཅི་ཐུབ་བཟུང༌། མི་ཐུབ་པ་དང་ཕྱིར་བཏང་སྟེ། སླར་ནང་དུ་རྔུབ་ཅིང༌། སྟེང་རླུང་མནན་པའི་ཚེ་སྙིང་གའི་ཧཱུྃ་མགོ་མཇུག་ལོག །འོག་རླུང་འཐེན་ཞིང༌༑ ལྟེ་བའི་གཏུམ་མོ་འབར་བའི་མེ་རླུང་གི་ཤུགས་ཀྱིས་སྙིང་གའི་ཧཱུྃ་མགོ་གྱེན་དུ་བསྟན་པར་བསམས་ལ། ཚུལ་དེ་ལྟ་བུ་ཡང་ཡང་བསྒོམ་པའོ། །དེ་རྣམས་ནི་འཕོ་བ་བཞི་ཀར་གྱི་སྔོན་འགྲོ་ཡིན་ལ། དངོས་གཞི་ལ་ཐོག་མར་སྐུའི་འཕོ་བ་ནི། ལུས་ཀྱི་དབུས་སུ་རྩ་དབུ་མ་ཅུང་ཟད་སྦོམ་པ་ཡས་སྣ་ཚངས་བུག་ལ་ཟུག་པ། མས་སྣ་གསང་གནས་སུ་ཟུག་པའི་སྙིང་གའི་ཐད། དབུ་མའི་འོག་ཏུ་ཡུཾ་སྔོན་པོ་གཉིས་མགོ་ཐུར་ཏུ་བསྟན་པ་གཞིབས་པ་ལ༑ ཞབས་ཀྱུ་གཉིས་རིམ་པས་གྱེས་པའི་སྟེང་དུ་ཡུཾ་སྔོན་པོ་གཉིས་མགོ་ཐུར་བསྟན། ཞབས་ཀྱུ་གཉིས་མཉམ་པར་གཞིབས་པ་ལ། མགོ་བོ་གཉིས་གྱེས་པའི་རྣམ་པ་ཅན། ཡི་གེ་བཞི་པོ་དེ་རྣམས་ཀྱི་དབུས་སུ་ཧཱུྃ་སྔོན་པོ་མགོ་ཐུར་བསྟན། ཡི་གེ་དམར་པོ་དེ་རྣམས་ཀྱི་འོག་ཏུ་ཧི་དམར་པོ་དང༌། སྟེང་དུ་ཀ་དཀར་པོ་ཡི་གེ་བདུན་པོ་དེ་རྣམས་དང༌། ལྟེ་བར་ཨ་ཤད་ཀྱང་གསལ་བཏབ་ལ། རླུང་བུམ་པ་ཅན་བཟུང་བས། ལྟེ་བའི་ཨ་ཤད་ལས་གཏུམ་མོའི་མེ་འབར་བའི་མེ་རླུང་གི་ཤུགས་ཀྱིས། སྙིང་གའི་ཡི་གེ་བདུན་པོ་མགོ་གྱེན་དུ་བསྟན་པ་བསམ་ཞིང༌། སྙིང་གར་འདར་ཁྲིལ་ཁྲིལ་འདུག་པར་བསམས་ལ། རླུང་ནང་དུ་བཟུང༌། ཧིཀ་ཞེས་པའི་སྒྲས་རླུང་ཕྱིར་ འབུད་པའི་ཚེ། ཡི་གེ་བདུན་པོ་གྱེན་དུ་ཕྱུར་ཕྱུར་སོང་བར་བསམས་ལ། ཚངས་བུག་ནས་འདར་ཁྲིལ་ཁྲིལ་ཕྱིར་འཐོན་ལ་ཁད་འདུག་པ་ལ་དམིགས་པ་གཏད་ལ་རླུང་ཅུང་ཟད་བཟུང༌། རླུང་ནང་དུ་རྔུབ་པའི་ཚེ། ཀ་ཧི་ཞེས་པ་ཡིད་ཀྱིས་དྲན་པར་བྱ། ཡི་གེ་བདུན་པོ་རྣམས་དབུ་མའི་ནང་ནས་མར་ཁྱུར་ཁྱུར་སོང་བར་བསམས་ལ། སྙིང་གར་སླེབ་པ་ན། སྟེང་རླུང་མནན་པའི་ཤུགས་ཀྱིས། ཡི་གེ་རྣམས་མགོ་མཇུག་ལོག་སྟེ་གནས་པ་ལ། ལྟེ་བའི་གཏུམ་མོ་འབར་བའི་མེ་རླུང་གི་ཤུགས་ཀྱིས་ཡི་གེ་རྣམས་མགོ་གྱེན་དུ་བསྟན་པ་སོགས་སྔར་བཞིན་བསྒོམ་པའོ། །གཉིས་པ་གསུང་གི་འཕོ་བ་ནི། རང་གི་ལུས་ཀྱི་ལྟེ་བའི་དབུས་སུ་རྡོ་རྗེ་མཁའ་འགྲོ་མའི་ས་བོན་གང་ཡང་རུང་བ་ཨཾ་གི་སྒྲ་ལྟ་བུ་ཞིག་དམིགས་ལ། རླུང་ཕྱིར་འབུད་པའི་ཚེ། ཨཾ་ཡིག་གི་སྒྲས་བུས་ལ། རང་སེམས་ཨཾ་ཡིག་གི་སྒྲས་ལྟེ་བར་གནས་པ་དེ་རིམ་པས། སྙིང་ག་དང༌། མགྲིན་པ་དང༌། སྤྱི་བོའི་ཚངས་བུག་ནས་ཐོན་ཏེ། སྟོང་པར་དབྱིངས་སུ་འཕོ་བའམ། བླ་མ་དང་ཡི་དམ་གང་མོས་ཀྱི་ཐུགས་ཀར་འཕོ་བའོ། །གསུམ་པ་ཐུགས་ཀྱི་འཕོ་བ་ནི། རང་གི་སྙིང་ག་ནས་འོད་ཟེར་འཕྲོས། སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། རང་ལུས་ཀྱང་སྟོང་པར་ཐིམ་པར་བསམ། ལྟེ་བའི་ཐད་ཀྱི་བར་སྣང་སྟོང་པ་དེར་རང་སེམས་རིག་ཅིང་གསལ་བ་ཙམ་དེ་ཉིད་རིམ་པས་ལྟེ་བའི་ཐད་ནས་སྙིང་གའི་ཐད། སྙིང་ག་ནས་མགྲིན་པའི་ཐད་དང༌། མགྲིན་པ་ནས་སྤྱི་བོའི་ཐད་ཙམ་ནས་དབྱིངས་སུ་ཐིམ་པའམ། བླ་མ་ཡི་དམ་གང་མོས་ཀྱི་ཐུགས་ཁར་འཕོ་བའོ། །འདི་ལ་ཅི་སྟེ་དམིགས་པ་མི་གསལ་ན། རང་སེམས་འོད་ཀྱི་རྣམ་པར་བྱ་ཞིང༌། ལྟེ་བའི་ཐད་ཀྱི་ཆ་ངེས་པ་ཡང་མེད་པ་མདུན་རྒྱབ་གཉིས་ནས་ལྟེ་བའི་ཐད་དུ་རེག་པའམ། རེག་བྱར་ཡོད་པར་སེམས་གཏད་དོ། །བཞི་པ་ཡེ་ཤེས་ཀྱི་འཕོ་བ་ནི། ལྟེ་བའི་ཐད་དུ་ཞུ་བདེའི་ཉམས་ཡོད་ན་དྲངས་ལ་དམིགས་པ་གཏད། དེ་ལྟར་མེད་ན་བདེ་བར་མོས་པ་ཙམ་བྱས་ལ་འཕོ་ཚུལ་ཐུགས་དང་འདྲའོ། །དེ་རྣམས་ཀྱིས་སྔོན་འགྲོ་སྒྱུ་ལུས་འཕྲོས་དོན་དང་བཅས་པ་སོང་ནས། གཉིས་པ་དངོས་གཞིའི་འོད་གསལ་ལ། བླ་མའི་རྣལ་འབྱོར་ནི། རང་གི་སྤྱི་བོར་བླ་མ་བསྒོམ། དེའི་ཐུགས་ཀར་ཐིག་ལེ་དཀར་ལ་དམར་བའི་མདངས་ཅན་འོད་ཟེར་འཕྲོ་བ་ཞིག་དམིགས་ལ་ཐུགས་ཡེ་ཤེས་ལྔའི་རང་བཞིན་ཡིན་སྙམ་དུ་མོས། དེ་ལས་འོད་ཟེར་འཕྲོས། སྣོད་ཐམས་ཅད་གཞལ་ཡས་ཁང་དང༌། བཅུད་ཐམས་ཅད་ལྷར་གྱུར་པར་བསམ། དེ་རྣམས་འོད་དུ་ཞུ་ནས་བླ་མའི་སྐུ་ལ་ཐིམ་པར་མོས་ལ། གཉིད་ཀྱི་འོད་གསལ་ཟིན་པ་དང༌། སད་དུས་ཀྱི་འོད་གསལ་ཁྱད་པར་ཟིན་པར་གསོལ་བ་བཏབ། བླ་མ་འོད་དུ་ཞུ་ནས་རང་ལ་བསྟིམ། དེ་ནས་རང་ཡི་དམ་དུ་གསལ་བའི་ལུས་ཀྱི་དབུས་སུ་རྩ་དབུ་མ་གསལ་ཐེབས་ན། སྙིང་གའི་ཐད་ཀྱི་དབུ་མའི་ནང་དུ་པདྨའི་ལྟེ་བ་དང༌། དབུ་མའི་ཕྱི་རོལ་གྱི་ཕྱོགས་བཞི་ལ་པད་འདབ་བཞི་ཡོད་པར་བསྒོམ། དབུ་མ་མི་གསལ་ན་སྙིང་གར་པདྨ་འདབ་མ་བཞི་པ་ཞིག་བསྒོམས་པའི་ལྟེ་བ་སྦུགས་སྟོང་དུ་ཡོད་པའི་སྟེང་དུ་ཨ་ཤད་དམ་ཧཱུྃ་སྔོན་པོ་ཞིག་བསྒོམ། འདབ་མ་བཞི་ལ་ཤར་ནས་གཡས་སྐོར་གྱིས། མ་ནིང་ཡི་གེ་བཞི་གསལ་བཏབ་ལ། རླུང་བུམ་པ་ཅན་བཟུང་ཞིང་དེ་རྣམས་ལ་སེམས་གཏད། དེ་ནས་མདུན་གྱི་ར་ཡིག་ཐུང་ངུ་ལ་དམིགས་པ་གཏད། བུམ་པ་ཅན་གསུམ་ལ་སོགས་པ་འཛིན། དེ་བཞིན་དུ་གཞན་གསུམ་ལ་ཡང་རེ་རེ་བཞིན་དམིགས་པ་གཏད་ཅིང་བུམ་པ་ཅན་གསུམ་ལ་སོགས་པ་འཛིན། དབུས་ཀྱི་ཡི་གེ་ལ་ཅུང་ཟད་ཡུན་རིང་བ་ཙམ་གཏད་ཅིང་བུམ་ཅན་བཟུང༌། དེ་ནས་ཤར་གྱི་ར་ཡིག་ཐུང་ངུ་དེ། གཡས་ཀྱི་རཱ་ཡིག་རིང་པོ་ལ་ཐིམ་པས། དེ་བརྗིད་དང་ལྡན་པར་གྱུར་ཅིང༌། ཤར་གྱི་པད་འདབ་སྟོང་སང་ངེ་གྱུར་པར་བསམས་ལ། གཡས་ཀྱི་ཡི་གེ་ལ་སེམས་གཏད་ཅིང༌། རླུང་བུམ་པ་ཅན་འཛིན། དེ་བཞིན་དུ་རཱ་ཡིག་རིང་པོ། རྒྱབ་ཀྱི་ལ་ཡིག་ཐུང་ངུ་ལ་ཐིམ་པ་དང༌༑ ལ་ཡིག་ཐུང་ངུ་གཡོན་གྱི་ལཱ་ཡིག་རིང་པོ་ལ་ཐིམ་པ་དང༌། དེ་ཡང་དབུས་ཀྱི་ཡི་གེ་ལ་ཐིམ་པས་དེ་བརྗིད་དང་ལྡན་ཞིང༌། འོད་འབར་བར་བསམས་ལ། དེ་ལ་དམིགས་པ་གཏད་ཅིང༌། རླུང་བུམ་པ་ཅན་འཛིན་ནོ། །དེ་ནི་འོད་གསལ་འཛིན་པའི་དམིགས་པ་འབྲིང་པོ་ཡིན་ལ། བསྡུས་པ་ནི། རང་གི་སྙིང་གར་པདྨ་འདབ་མ་བཞི་པའི་ལྟེ་བར། ས་བོན་ལ་མོས་ན་ཧཱུྃ་སྔོན་པོ་གསལ་བཏབ་ལ་དེ་ལ་དམིགས་པ་གཏད་པ་དང༌། ཐིག་ལེ་ལ་མོས་ན། ཧཱུྃ་ཞུ་བ་ལས་ཐིག་ལེ་སྔོན་པོ་འོད་འཕྲོ་བ་ཞིག་བསྒོམ་པ་དང༌། ལྷ་སྐུ་ལ་མོས་ན། པདྨའི་ལྟེ་བར་ཡི་དམ་ཞལ་གཅིག་ཕྱག་གཉིས་པ་ཞིག་བསྒོམས་ལ། དེ་ལ་སེམས་གཏད་པས་འོད་གསལ་ཟིན་པར་འགྱུར་རོ། ། འོད་གསལ་འཛིན་པའི་དམིགས་པ་རྒྱས་པ་ནི། རང་ཡི་དམ་དུ་གསལ་བའི་སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པ་ཁ་ཐུར་བསྟན་དང༌། ལྟེ་བར་སྤྲུལ་འཁོར་རྩ་འདབ་དྲུག་ཅུ་རྩ་བཞི་པ་ཁ་ཕྱིར་བསྟན་དེ་གཉིས་ཁ་འཕྲད་པ༑ ལྟེ་བའི་འཁོར་ལོའི་ལྟེ་བར་གཏུམ་མོའི་རང་བཞིན་ཨ་ཤད་ཅིག་བསྒོམ། སྙིང་གའི་ཨ་ཤད་འཁོར་ལོའི་ལྟེ་བར་ཧཱུྃ་ཡིག་རིང་པོ་དང༌། ཕྱོགས་ཀྱི་འདབ་མ་བཞི་ལ། གཡོན་བསྐོར་གྱིས་སུཾ་ཡུཾ་ཀྵུཾ་ཧཱུྃ་རྣམས་དང༌། མཚམས་རྣམས་ལ་བྱང་ཤར་ནས་གཡས་བསྐོར་གྱིས། སྨྲཾཡུ། ཡཾམྲཡུ། ཀྵཾམྲཡུ། ཧྨྲཾཡུ་རྣམས་བསྒོམས་ལ། ལྟེ་བའི་ཨ་ཤད་ཀྱི་མེ་འོད་ཀྱིས་སྙིང་གའི་འཁོར་ལོ་ཡི་གེ་དང་བཅས་པ་རྣམས་ཚ་འུར་རེ་ཁྱབ་པར་བསམས་ལ། རླུང་བུམ་ཅན་འཛིན་ ཞིང་བསྒོམ་པའོ། །ཡང་རྡོ་རྗེ་ནོར་བུ་པདྨ་འདབ་ བཞིའི་ལྟེ་བ་ལ་ཨཾ་སྔོན་པོའམ། ཧཱུྃ་སྔོན་པོ་གང་རུང་ཞིག་བསྒོམས་ལ། དེ་ལ་དམིགས་པ་གཏད་པ་དང༌། ཡང་ལས་ཀྱི་ཕྱག་རྒྱ་དང་མཉམ་པར་སྦྱོར་བའི་རྗེས་ཆགས་ཀྱི་བདེ་བ་ལ་གོམས་པ་ཞིག་ཡིན་ནོ། །ལས་རྒྱ་ལ་བརྟེན་པ་དང༌། དེ་ལྟར་མིན་ན་ཡེ་ཤེས་ཀྱི་ཕྱག་རྒྱའི་རྗེས་ཆགས་ཀྱི་བདེ་བ་བསྒོམ་པ་ན། རང་གི་ལུས་ཀྱི་སྟོད་སྨད་ཐམས་ཅད་ནས་བྱང་ཆུབ་སེམས་ ཞུ་བ་རྣམས་རིམ་པས་འདུས་ཏེ། སྙིང་གའམ་གསང་གནས་ཀྱི་ནོར་བུ་གང་རུང་ཞིག་ཏུ་ཐིག་ལེ་དཀར་ལ་དམར་བའི་མདངས་ཆགས་པ་ཞིག་ཏུ་གྱུར་པར་མོས་ལ། དེ་ཉིད་ཉམས་བདེ་ཁྲིལ་ལེ་འདུག་པ་ལ་སེམས་རྩེ་གཅིག་ཏུ་གཏད་ཅིང༌། རླུང་བུམ་པ་ཅན་འཛིན་ནོ། །དེ་ལྟར་འོད་གསལ་འཛིན་པའི་དམིགས་པ་དེ་རྣམས་ཉིན་པར་དྲག་ཏུ་བསྒོམ་ཞིང༌། མཚན་མོ་དམིགས་པ་ལ་སེམས་གཏོད་བཞིན་པའི་ངང་ནས་གཉིད་དུ་འགྲོ་བར་བྱས་པས་འོད་གསལ་ཟིན་པར་འགྱུར་རོ། །དེ་ཡང་དམིགས་པའི་རྣམ་གྲངས་དེ་རྣམས་གང་ཟག་གཅིག་གིས་ཐམས་ཅད་བསྒོམ་དགོས་པ་མ་ཡིན་གྱི། དམིགས་པ་གང་རུང་ཞིག་ལ་བརྟེན་ནས་འོད་གསལ་ཟིན་པར་བྱས་པས་ཆོག་པ་ཡིན་ནོ། །དེས་ཀྱང་མ་ཟིན་ན་མུན་ཁང་ངམ། སྤྲིན་མེད་ནམ་མཁའ་ལ་ལུས་གནད་རྣམ་སྣང་ཆོས་བདུན་དང་ལྡན་པར་བྱ། མིག་འབྲས་གྱེན་ལ་བསྒྲིལ་བས་བར་སྣང་སྟོང་པ་དེར་གཏད་ཅིང༌། སེམས་ཀྱང་གང་ཡང་ཡིད་ལ་མི་བྱེད་པར་བསྒོམ་མོ། །ཡང་ན་གཡས་པའི་མིག་བསྒྲིལ་ཞིང༌། གཡོན་ཕྱོགས་ཀྱི་ཕྲེད་སོགས་ཀྱི་ནམ་མཁའ་ལ་བལྟ་བ་དང༌། གཡོན་པའི་མིག་བསྒྲིལ་བ་གཡས་ཕྱོགས་ཀྱི་ཕྲེད་སོགས་ཀྱི་བར་སྣང་ལ་བལྟས་ལ། མིག་ལྤགས་ཕྱེད་བཀབ་ཙམ་བྱས་ཤིང་བསྒོམ་མོ། །དེ་ལྟར་ཞག་བདུན་རེ་ཙམ་རེ་བསྒོམ་ཞིང༌། ཡང་ཞག་བདུན་ཙམ་རེ་གོང་གི་དམིགས་པ་ཉིད་བསྒོམས་པས་འོད་གསལ་ཟིན་པར་འགྱུར་རོ། །དེ་ནི་ ཉིན་མོའི་འོད་གསལ་འཛིན་པའི་མན་ངག་གོ །འོད་གསལ་གྱི་བོགས་འདོན་ནི། རང་གི་སྙིང་གར་པདྨ་དཀར་པོ་འདབ་མ་བརྒྱད་པའམ་བཅུ་དྲུག་པ། འདབ་མ་ཕྱེད་ཙམ་གྱེན་དུ་ལངས་པ། འདབ་མ་བརྒྱད་བསྒོམ་ན་ཨ་ཨི་ཨུ་ར་ལ་ཨེ་ཨོ་ཨཾ་རྣམས་འདབ་མ་རྣམས་ལ་བསྒོམ། འདབ་མ་བཅུ་དྲུག་བསྒོམ་ན་དབྱངས་བཅུ་དྲུག་གསལ་བཏབ། དེའི་ནང་དུ་པདྨ་འདབ་མ་བརྒྱད་པ་ཁ་དོག་དམར་པོ། འདབ་མའི་ཕྱེད་ཙམ་གྱེན་ལངས་ཀྱི་རྣམ་པ་ཅན། འདབ་མ་རྣམས་ལ་ཨ་ཀ་ཙ་ཊ་ཏ་པ་ཡ་ཤ་བརྒྱད་བསྒོམ། དེའི་ནང་དུ་པདྨ་འདབ་བཞི་སྔོན་པོ། འདབ་མ་ཕྱེད་ཙམ་གྱེན་ལངས་ཀྱི་རྣམ་པ་ཅན། འདབ་མ་རྣམས་ལ་ཐིག་ལེ་སྔོན་པོ་བཞི་དང༌། ལྟེ་བར་ཨ་ཤད་ཅིག་གསལ་བཏབ། དེ་ནས་རླུང་བུམ་པ་ཅན་བཟུང་ལ། པདྨ་གསུམ་ཡི་གེ་དང་བཅས་པ་ལས་འོད་ཟེར་དཀར་པོ་འཕྲོས། སྣོད་བཅུད་ཐམས་ཅད་འོད་ཟེར་དཀར་པོའི་རྣམ་པར་གྱུར། དེ་རྣམས་ཚུར་འདུས། རང་གི་བ་སྤུའི་བུ་ག་ནས་ཞུགས། ཕྱིའི་པདྨ་དཀར་པོ་ཡི་གེ་དང་བཅས་པ་ལ་ཐིམ་པས། དེ་རྣམས་འོད་དུ་ལྟེམ་ལྟེམ་འདུག་པ་ལ་སེམས་གཏད་དོ། །དེ་ལྟར་ཡུན་རིང་དུ་བསྒོམ་པ་ལས། ཉིན་པར་གཉིད་དུ་འགྲོ་ཁ་དང༌། གཉིད་ཀྱི་འོད་གསལ་ཟིན་པའི་སྐབས་རྣམས་དཀར་ལམ་པའི་སྣང་བ་འབྱུང་ཞིང༌། དེ་ཡང་བརྟན་པོར་གྱུར་པ་ན། རླུང་བུམ་པ་ཅན་བཟུང་ཞིང༌། པདྨ་དཀར་པོ་ཡི་གེ་དང་བཅས་པ། པད་འདབ་དམར་པོ་ཡི་གེ་དང་བཅས་པ་ལ་ ཐིམ་པར་བསམ་མོ། །ཡང་པད་འདབ་དམར་པོ་ཡི་གེ་དང་བཅས་པ་ལས་འོད་ཟེར་དམར་པོ་འཕྲོས། སྣོད་བཅུད་ཐམས་ཅད་འོད་ཟེར་དམར་པོའི་རྣམ་པར་གྱུར། དེ་རྣམས་ཚུར་འདུས། རང་གི་བ་སྤུའི་བུ་ག་ནས་ཞུགས། པད་འདབ་དམར་པོ་ཡི་གེ་དང་བཅས་པ་ལ་ཐིམ་པས། དེ་རྣམས་འོད་དུ་ལྟེམ་ལྟེམ་འདུག་པ་ལ་སེམས་གཏད་ཅིང༌། རླུང་བུམ་པ་ཅན་བཟུང༌། དེ་ལྟར་ཡུན་རིང་དུ་བསྒོམས་པ་ལས། ཉིན་དང༌། གཉིད་དུ་འགྲོ་ཁ་དང༌༑ གཉིད་ཀྱི་འོད་གསལ་ཟིན་པའི་སྐབས་རྣམས་སུ་དམར་ལམ་པའི་སྣང་བ་འབྱུང་ཞིང༌། དེ་ཡང་བརྟན་པོར་གྱུར་པ་ན། པད་འདབ་དམར་པོ་ཡི་གེ་དང་བཅས་པ་པད་འདབ་ནང་མ་ལ་ཐིམ་པར་བསམ་ཞིང༌། བུམ་པ་ཅན་བཟུང་ངོ༌། །དེ་ནས་ཡང་པད་འདབ་སྔོན་པོའི་ལྟེ་བའི་ཨ་ཤད་དང་བཅས་པ་ལས་འོད་ཟེར་ཁ་དོག་སྔོན་པོའི་ཚོགས་དཔག་ཏུ་མེད་པ་སྤྲོས། སྣོད་བཅུད་ཐམས་ཅད་འོད་ཟེར་སྔོན་པོའི་རྣམ་པར་གྱུར། དེ་རྣམས་ཚུར་འདུས་ནང་བསྐོར་གྱི་པད་འདབ་སྔོན་པོ་ཐིག་ལེ་དང་བཅས་པ་ལ་ཐིམ་པས། དེ་ཉིད་འོད་དུ་ལྟེམ་ལྟེམ་འདུག་པ་ལ་སེམས་གཏད་ཅིང༌། རླུང་བུམ་པ་ཅན་འཛིན་ནོ། །དེ་ལྟར་གོམས་པ་ལས། ཉིན་པར་དང་། གཉིད་དུ་འགྲོ་ཁ་དང༌༑ གཉིད་ཀྱི་འོད་གསལ་གྱི་སྐབས་རྣམས་སུ་ནག་ལམ་པའི་ཉམས་འཆར་བར་འགྱུར་ཞིང༌། ཤར་བ་དེ་ཡང་བརྟན་པོར་གྱུར་པ་ན། པད་འདབ་སྔོན་པོ་ཐིག་ལེ་དང་བཅས་པ་ལྟེ་བའི་ཨ་ཤད་ལ་ཐིམ་པར་བསམ་ཞིང༌། བུམ་པ་ཅན་བཟུང་ངོ༌། །དེ་ནས་དབུས་ཀྱི་ཨ་ཤད་ལས་འོད་ཟེར་ཁ་དོག་འདི་ལྟ་བུ་མ་ཡིན་པ་ཤིན་ཏུ་དྭངས་པ་དཔག་ཏུ་མེད་པ་སྤྲོས། སྣོད་བཅུད་ཐམས་ཅད་སྨིག་རྒྱུ་མེར་མེར་ཤིག་ཤིག་ཏུ་འདུག་པར་བསམ། དེ་རྣམས་ཚུར་འདུས། རང་གི་བ་སྤུའི་བུ་ག་ནས་ཞུགས། ཨ་ཤད་ལ་ཐིམ་པར་བསམ་ཞིང་རླུང་བུམ་པ་ཅན་བཟུང་ངོ༌། །དེ་ལྟར་བསྒོམས་པ་ལས། ཉིན་མོར་དང་གཉིད་དུ་འགྲོ་ཁ་དང༌། གཉིད་ཀྱི་འོད་གསལ་ཟིན་པའི་སྐབས་སུ་ཤེས་པ་ཤིན་ཏུ་དྭངས་ཤིང་གསལ་བའི་ཉམས་སྐྱེ་བར་འགྱུར་རོ། །དེ་རྣམས་ནི་རིམ་པ་བཞིན་དུ། སྣང་མཆེད་ཐོབ་པའི་འོད་གསལ་གྱི་ཡེ་ཤེས་རྣམས་སྒྲུབ་པར་བྱེད་པའོ། །ཡང་ན་རང་གི་ལུས་ཀྱི་དབུས་སུ་རྩ་དབུ་མ་དང༌། ལྟེ་བ་དང་སྤྱི་བོའི་རྩ་འཁོར་རྒྱས་བསྡུས་ཇི་ལྟར་རིགས་པ་ཞིག་གསལ་བཏབ་ལ། ལྟེ་བའི་དབུས་སུ་ཨ་ཤད་དང༌། སྤྱི་བོར་ༀ་དཀར་པོ་མགོ་ཐུར་བསྟན་ཞིག་བསྒོམས་ལ། ལྟེ་བའི་ཨ་ཤད་ལས་གཏུམ་མོའི་མེ་འབར་དབུ་མའི་ནང་ནས་ཡར་སོང༌། སྤྱི་བོའི་ༀ་ལ་རེག་པས། ༀ་ལས་བྱང་ཆུབ་ཀྱི་སེམས་ཁ་དོག་དཀར་པོ་བབས་ཏེ། ལྟེ་བའི་ཨ་ཤད་ལ་ཐིམ། བྱང་ཆུབ་ཀྱི་སེམས་ཀྱི་རྒྱུན་གྱི་འོད་ཟེར་ཁ་དོག་དཀར་པོས་ལུས་ཀྱི་ནང་ཐམས་ཅད་སྐྱ་ལམ་སྟེ་གང་བར་བསམས་ལ་རླུང་བུམ་པ་ཅན་བཟུང་ངོ༌། །ཡང་ན་ༀ་ཡིག་ལས་འོད་ཟེར་དཀར་པོ་དབུ་མའི་ནང་ནས་མར་སོང༌། ཨ་ཤད་ལ་ཐིམ་ཞིང་འོད་ཟེར་དཀར་པོས་ལུས་ཁྱབ་བར་བསམ། དེ་ལྟར་བསྒོམས་པ་ལས། ཉིན་པར་ལ་སོགས་པའི་གནས་སྐབས་གསུམ་པོ་དེར་དཀར་ལམ་པའི་སྣང་བ་ཤར་ཞིང༌། དེ་ཡང་བརྟན་པོར་གྱུར་པ་ན། མགྲིན་པའི་རྩ་འཁོར་རྒྱས་བསྡུས་ཇི་ལྟར་རིགས་པའི་དབུས་སུ། ཨ་ཡིག་དམར་པོ་མགོ་གྱེན་བསྟན་ཞིག་གསལ་བཏབ་ལ། ལྟེ་བའི་ཨ་ཤད་ལས་གཏུམ་མོ་ཡེ་ཤེས་ཀྱི་མེ་འབར་བ་མགྲིན་པའི་ཨ་ལ་རེག་པས་དེ་ལས་འོད་ཟེར་དམར་པོའི་རྒྱུན་བྱུང༌། དེའི་འོད་ཟེར་དམར་པོས་ལུས་ཐམས་ཅད་དམར་ལམ་སྟེ་ཁྱབ་པར་བསམ། མཐར་ལྟེ་བའི་ཨ་ཤད་ལ་ཐིམ་པར་བསམ་ཞིང་རླུང་བུམ་པ་ཅན་བཟུང་ངོ༌། །དེ་ལྟར་བསྒོམས་པས་གནས་སྐབས་གསུམ་པོ་དེར་དམར་ལམ་པའི་སྣང་བ་འཆར་བར་འགྱུར་ཞིང༌། དེ་ཡང་བརྟན་པོར་གྱུར་པ་ན། སྙིང་གའི་འཁོར་ལོ་རྒྱས་བསྡུས་ཇི་ལྟར་རིགས་པ་བསྒོམས་པའི་ལྟེ་བར་ཧཱུྃ་སྔོན་པོ་ཐུར་བསྟན་ཞིག་བསྒོམས་ལ། ཨ་ཤད་ལས་གཏུམ་མོའི་མེ་འབར། སྙིང་གའི་ཧཱུྃ་ལ་རེག །དེ་ལས་བདུད་རྩིའི་འོད་ཟེར་སྔོན་པོ་བབས། དེའི་འོད་ཟེར་སྔོན་པོས་ལུས་ཀྱི་ནང་ཐམས་ཅད་ཁྱབ་པར་བསམས་ལ་རླུང་བུམ་པ་ཅན་བཟུང༌། དེ་ལྟར་བསྒོམས་པས་གནས་སྐབས་གསུམ་པོ་དེར་ནག་ལམ་པའི་སྣང་བ་ཤར་ཞིང༌། དེ་ལས་བརྟན་པོར་གྱུར་པ་ན། སྤྱི་བོའི་ༀ་དང་མགྲིན་པའི་ཨཱཿ སྙིང་གའི་ཧཱུྃ་ལ་ཐིམ། ལྟེ་བའི་ཨ་ཤད་ཀྱང་སྙིང་གའི་ཧཱུྃ་ལ་ཐིམ། ཧཱུྃ་ཡིག་ཀྱང་མི་དམིགས་པར་ཡལ་བར་བསམས་ལ་རླུང་བུམ་པ་ཅན་བཟུང༌། དེ་ལྟར་གོམས་པས་ གནས་སྐབས་གསུམ་པོ་དེར་ཤེས་པ་དྭངས་ཤིང་གསལ་བའི་ཉམས་སྐྱེ་བར་འགྱུར་རོ། །བོགས་འདོན་གཉིས་པོ་འདི་ཇི་ལྟར་མོས་པ་ཞིག་བསྒོམས་པས་ཆོག་པ་ཡིན་ནོ། །དེ་ལྟར་ཡུན་རིང་དུ་གོམས་པ་ལས༑ སྣང་མཆེད་ཐོབ་པ་འོད་གསལ་གྱི་ཡེ་ཤེས་རྗེས་མཐུན་པ་རྒྱུད་ལ་སྐྱེ་བར་འགྱུར་ཞིང༌། དེ་ལ་བརྟེན་ནས་ཡུལ་སྣང་རེ་རེའི་སྟེང་དུ་ཡང་སྣང་མཆེད་ཐོབ་པ་གསུམ་ངོས་ཟིན་པ་དང༌། མཚན་མོ་གཉིད་ལ་འགྲོ་ཁར་ཡང་སྣང་མཆེད་ཐོབ་པ་གསུམ་ངོས་ཟིན་ཞིང༌། གཉིད་ཀྱི་འོད་གསལ་སྐྱོང་ཐུབ་པ་འབྱུང་ལ། འཆི་བའི་ཚེ་སྣང་མཆེད་ཐོབ་གསུམ་ངོས་ཟིན་ནས་འཆི་བ་འོད་གསལ་ངོ་འཕྲོད་པར་འབྱུང་བ་ཡིན་ནོ། །འོད་གསལ་གྱི་བོགས་འདོན་སྤོགས་ཆོག་ནི། རིལ་འཛིན་དང༌། རྗེས་གཞིག་གཉིས་བསྒོམ་པ་སྟེ། དང་པོ་རིལ་འཛིན་གྱི་དམིགས་པའི་གཞི་ནི། ལུས་གནད་ལེགས་པར་བཅས་ཏེ་ཅུང་ཟད་ཤེས་པ་རང་བབས་སུ་བཞག །དེ་ནས་རང་གཞན་སྣང་བ་ཐམས་ཅད་ལ་གཅིག་ཆར་དུ་ཤེས་པ་ཆེར་རེ་གཏད་ཅིང་གཞིག་ནས་བརྟགས་ཤིང་དཔྱད་པ་ན། བློ་ངོར་སྣང་བ་ཐམས་ཅད་དབྱིངས་སུ་ནུབ་པའི་ངང་ལ་ཅུང་ཟད་མཉམ་པར་བཞག་གོ །ཡང་རང་གཞན་སྣང་བ་ཐམས་ཅད་གཅིག་ཆར་ལྷ་སྐུར་བསྒོམ། དེ་རྣམས་ཀྱི་ངོ་བོ་ལ་བལྟས་ཤིང་བཙལ་བ་ན། གང་ཡང་མ་རྙེད་པའི་དབྱིངས་སྟོང་པའི་ངང་དེར་ཅུང་ཟད་ཅིག་བཞག་གོ །རྗེས་གཞིག་གི་དམིགས་པའི་གཞི་ནི། རང་གི་ མདུན་དུ་ཇི་ཙམ་སྣང་བའི་དངོས་པོ་རྣམས་ལ་ཤེས་པ་གཏད་ཅིང༌། ངོ་བོ་ལ་བལྟས་པ་ན། བློ་ངོར་སྣང་བ་དེ་གང་དུ་ཡང་མ་རྙེད་པའི་དབྱིངས་སྟོང་པའི་ངང་དེར་ཅུང་ཟད་བཞག་གོ །ཡང་དེ་རྣམས་ལྷ་སྐུར་བསྒོམ་ཞིང༌། དེའི་ངོ་བོ་ལ་བལྟས་པས་གང་ཡང་མ་རྙེད་པའི་དབྱིངས་ལ་འཇོག་པ་དང༌། རང་ལུས་ལ་བལྟས་ཤིང་གཞིག་པ་ན་རང་གི་བློ་ངོར་ལུས་སྣང་ཡོངས་སུ་ནུབ་པའི་སྟོང་པའི་ངང་ལ་མཉམ་པར་འཇོག་པ་དང༌། ཡང་རང་ཉིད་ལྷ་སྐུར་བསྒོམ་ཞིང༌། དེའི་ངོ་བོ་ལ་བལྟས་པས་ངོས་བཟུང་དང་བྲལ་བའི་ངང་ལ་བཞག་གོ །རིལ་འཛིན་རྗེས་གཞིག་གི་དམིགས་པ་དངོས་ལ། རིལ་འཛིན་རྐྱང་པ་བསྒོམ་པ་དང༌། རྗེས་གཞིག་རྐྱང་པ་བསྒོམ་པ་དང༌། དེ་གཉིས་སྦྲགས་ཏེ་བསྒོམ་པ་དང༌། གཉིས་ཀའི་གཞི་མཐུན་པར་བསྒོམ་པ་དང་བཞི་ལས། དང་པོ་ནི། རང་ཡི་དམ་གང་བྱེད་དུ་གསལ་བ་ལ། སེམས་དཔའ་སུམ་བརྩེགས་དངོས་སུ་བསྒོམ་པའམ། དེའི་མཚོན་དོན་ཐུགས་ཀར་ཐིག་ལེ་ཟླུམ་པོ། དེའི་དབུས་སུ་ཡི་དམ་གྱི་ས་བོན་བསྒོམས་ལ། དེ་ལས་འོད་ཟེར་འཕྲོས་ལུས་ཀྱི་ནང་ཐམས་ཅད་གང༌། རང་ལུས་འོད་ཀྱི་གོང་བུར་གྱུར་པ། མི་དམིགས་པར་ཡལ་བར་བསམ་མོ། །འདི་ལ་རང་ལུས་སྟོང་པར་ཐིམ་པའི་ཞོར་ལ་སྣང་བ་ཐམས་ཅད་ཀྱང་ནུབ་པར་བསམ་པས་ཆོག་གོ །གཉིས་པ་ནི། སྙིང་གའི་ས་བོན་ཐིག་ལེ་དང་བཅས་པ་ལས་འོད་ཟེར་འཕྲོས། སྣོད་ཐམས་ཅད་གཞལ་མེད་ཁང་དང༌། བཅུད་ཐམས་ཅད་ཡི་དམ་གྱི་ སྐུར་གྱུར། དེ་རྣམས་འོད་དུ་ཞུ། དེ་རྣམས་རིམ་པས་རྒྱ་ཇེ་ཆུང་དུ་འདུས་ཏེ་རང་ལུས་ལ་ཐིམ། རང་ལུས་འོད་ཀྱི་གོང་བུར་གྱུར་པ་ཡང་མཐའ་ནས་རིམ་པས་འདུས་ཏེ། སྙིང་གའི་ཐིག་ལེ་ལ་ཐིམ། དེ་ཡང་ས་བོན་ལ་ཐིམ། དེ་ཡང་རིམ་པས་ནཱ་དའི་བར་དུ་བསྡུས་ལ། སྟོང་པའི་ངང་ལས། སླར་ཡང་ཡི་དམ་གྱི་སྐུ་ཐིག་ལེ་ས་བོན་དང་བཅས་པ་གྲུབ་པར་བསམ། ས་བོན་དང་ཐིག་ལེ་ལས་འོད་ཟེར་འཕྲོས། སྣོད་བཅུད་ཐམས་ཅད་ལྷ་སྐུར་གྱུར༑ དེ་རྣམས་འོད་དུ་ཞུ། རིམ་པས་ཚུར་འདུས། རང་ལུས་ལ་ཐིམ། དེ་ཡང་འོད་དུ་ཞུ་སྟེ་སྙིང་གའི་ཐིག་ལེ་ལ་ཐིམ་པ་ན། ནཱ་ད་ཡང་མི་དམིགས་པར་བསྒོམ་པའོ། །བཞི་པ་ནི། རང་གཞན་ཐམས་ཅད་ལྷ་སྐུར་བསྒོམ་ཞིང༌། སྟོང་པར་བསྡུས་པ་ཡིན་ཡང༌། ལས་དང་པོ་བས་མཐའ་དག་དམིགས་པའི་ཡུལ་དུ་འཆར་དཀའ་བས། རང་གིས་ཇི་ལྟར་གསལ་བའི་འགྲོ་བ་བཅུ་ལ་སོགས་པ་དངོས་སུ་བསྒོམ། དེ་རྣམས་ལ་འགྲོ་བ་གཞན་ཐམས་ཅད་ཐིམ་པའི་མོས་པ་བྱ། རང་དང་དེ་རྣམས་ཀྱང་ཡི་དམ་གྱི་སྐུར་གསལ་བའི་སོ་སོའི་སྙིང་ཁར་ཐིག་ལེ་དང༌། ས་བོན་ཡང་བསྒོམ། སོ་སོའི་ས་བོན་ཐིག་ལེར་བཅས་པ་ལས་འོད་ཟེར་འཕྲོས། སྣོད་ཐམས་ཅད་གཞལ་ཡས་ཁང་དང༌། བཅུད་ཐམས་ཅད་ལྷ་སྐུར་བསྒོམ། དེ་རྣམས་འོད་དུ་ཞུ། རིམ་པས་ཚུར་འདུས། རང་རང་སོ་སོའི་ཡི་དམ་དུ་གསལ་བའི་ལུས་ལ་ཐིམ། དེ་ཡང་འོད་དུ་ཞུ་ནས་སོ་སོའི་སྙིང་གའི་ཐིག་ལེ་ལ་ཐིམ། དེ་སོ་སོའི་ས་བོན་ལ་ཐིམ་ནས་ ནཱ་ད་ཡང་མི་དམིགས་པར་སྟོང་པར་གྱུར་པའི་བར་དུ་བསྒོམ་མོ། །ལྔ་པ་ལས་ཀྱི་ཕྱག་རྒྱའི་མན་ངག་ལ། སྔོན་འགྲོའི་བླ་མའི་རྣལ་འབྱོར་ནི། རང་གི་སྤྱི་བོའམ། མདུན་དུ་སེང་ཁྲི། པདྨ། ཉི་མ། ཟླ་བའི་སྟེང་དུ། རྩ་བའི་བླ་མའི་སྐུ་ལ་རྡོ་རྗེ་དབྱིངས་ཕྱུག་མའི་ངོ་བོ་མི་མོའི་རྣམ་པས་འཁྱུད་པ། བླ་མའི་དཔྲལ་བར་རྣམ་སྣང་ཡབ་ཡུམ། མགྲིན་པར་འོད་དཔག་མེད་ཡབ་ཡུམ། སྙིང་གར་མི་བསྐྱོད་པ་ཡབ་ཡུམ། ལྟེ་བར་རིན་འབྱུང་ཡབ་ཡུམ། གསང་གནས་སུ་དོན་གྲུབ་ཡབ་ཡུམ་རྣམས་བསྒོམས་ལ། གསོལ་བ་བཏབ་པས་རྣམ་སྣང་ཡབ་ཡུམ་སྙོམས་པར་ཞུགས་པས་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་རྒྱུན་དཔག་ཏུ་མེད་པ་བྱུང༌། སྤྱི་བོ་ནས་ཞུགས། ལུས་ཐམས་ཅད་གང་བུམ་དབང་ཐོབ་པར་བསམ། མགྲིན་པའི་འོད་དཔག་མེད་ཡབ་ཡུམ་སྙོམས་པར་ཞུགས་པས་སྦྱོར་མཚམས་ནས་བྱང་ཆུབ་སེམས་ཀྱི་རྒྱུན་བྱུང༌། སྤྱི་བོ་ནས་ཞུགས། ལུས་ཐམས་ཅད་གང༌། གསང་དབང་ཐོབ་པར་བསམ། སྙིང་གའི་མི་བསྐྱོད་པ་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་རྒྱུན་བྱུང༌། སྤྱི་བོ་ནས་ཞུགས། ལུས་ཐམས་ཅད་གང༌། ཤེས་རབ་ཡེ་ཤེས་ཀྱི་དབང་ཐོབ་པར་བསམ། དེ་བཞིན་དུ་ལྟེ་བའི་རིན་འབྱུང་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་སེམས་ཀྱི་ཆུ་རྒྱུན་བབས་པས་ལུས་ཐམས་ཅད་གང་བར་བསམ། གསང་གནས་ཀྱི་དོན་གྲུབ་ཡབ་ཡུམ་སྙོམས་པར་ ཞུགས་པའི་སྦྱོར་མཚམས་ནས་བྱང་ཆུབ་སེམས་ཀྱི་ཆུ་རྒྱུན་བབས། སྤྱི་བོ་ནས་ཞུགས་ལུས་ཐམས་ཅད་གང་བས་དབང་བཞི་ཐོབ་པར་བསམ་མོ། །སྔོན་འགྲོ་གཉིས་པ་རྩ་ཁྲུས་ནི། རང་ཐ་མལ་པའི་ལུས་ལ་རྩ་གསུམ་འཁོར་ལོ་བཞི་རགས་པ་ཙམ་གསལ་བཏབ་པའི་སྤྱི་བོ་བདེ་བ་ཆེན་པོའི་འཁོར་ལོའི་དབུས་སུ་རྣམ་སྣང་ཧེ་རུ་ཀ་དཀར་པོ་འཁོར་ལོ་དྲིལ་བུ་འཛིན་པ། རུས་པའི་རྒྱན་གྱིས་སྤྲས་པ། ཞབས་གཡོན་བསྐུམས་གཡས་བསྐྱང་བའི་སྟབས་ཀྱིས་བཞུགས་པ། སངས་རྒྱས་སྤྱན་མ་དང་མཉམ་པར་སྦྱོར་བ་ཞིག་གསལ་བཏབ་ལ། མཆོད་པ་དཔག་ཏུ་མེད་པ་བློས་སྤྲུལ་ནས་ཕུལ་ཞིང་བདག་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། རྣམ་སྣང་ཡབ་ཡུམ་གྱི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་ཆུ་རྒྱུན་དཔག་ཏུ་མེད་པ་བྱུང༌། སྤྱི་བོའི་འཁོར་ལོ་བཀྲུས་ཤིང་དག་པར་བསམ། དེ་ནས་རིམ་པས་བརྒྱུད་དེ་རྩ་འཁོར་ལོ་བཞིའི་གནས་ཐམས་ཅད་དུ་ཁྱབ་པས། སྡིག་སྒྲིབ་ཐམས་ཅད་བཀྲུས་ཤིང་དག་པར་བསམས་ལ། འཇམ་རླུང་བུམ་པ་ཅན་འཛིན་པའམ། ཧེ་རུ་ཀའི་ཡི་གེ་བརྒྱ་པ་གང་རུང་བཟླའོ། །མགྲིན་པ་ལོངས་སྤྱོད་ཀྱི་འཁོར་ལོའི་དབུས་སུ། འོད་དཔག་མེད་ཧེ་རུ་ཀ་ཡབ་ཡུམ་བསྒོམས་ལ་མཆོད་པ་ཕུལ་ཞིང་གསོལ་བ་བཏབ་པས། འོད་དཔག་མེད་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་ཆུ་རྒྱུན་དཔག་ཏུ་མེད་པ་བྱུང༌། མགྲིན་པའི་འཁོར་ལོ་བཀྲུས། དེ་ནས་ཡས་མར་ཐམས་ཅད་དུ་སོང་སྟེ། འཁོར་ལོ་བཞི་པོ་ཐམས་ཅད་བཀྲུས་ཤིང་སྦྱངས་པར་བསམས་ལ། བུམ་པ་ཅན་ནམ་ཡིག་བརྒྱ་གང་རུང་བཟླའོ། །ཡང་སྙིང་ག་ཆོས་ཀྱི་འཁོར་ལོའི་དབུས་སུ་མི་བསྐྱོད་པ་ཧེ་རུ་ཀ་ཡབ་ཡུམ་བསྒོམ་པའི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་རྒྱུན་བྱུང༌། སྙིང་གའི་འཁོར་ལོ་བཀྲུས་ཤིང་སྦྱངས། དེ་ནས་ཡས་མར་ཐམས་ཅད་དུ་སོང་སྟེ་འཁོར་ལོ་བཞིའི་གནས་ཐམས་ཅད་བཀྲུས་ཤིང་དག་པར་བསམས་ལ། བུམ་ཅན་ནམ་ཡིག་བརྒྱ་གང་རུང་བཟླའོ། །ཡང་ལྟེ་བར་སྤྲུལ་འཁོར་གྱི་དབུས་སུ་རིན་ཆེན་འབྱུང་ལྡན་ཧེ་རུ་ཀ་ཡབ་ཡུམ་བསྒོམས་ལ། སྦྱོར་མཚམས་ནས་བྱང་ཆུབ་ཀྱི་སེམས་ཀྱི་ཆུ་རྒྱུན་དཔག་ཏུ་མེད་པ་བྱུང༌། ལྟེ་བའི་འཁོར་ལོ་བཀྲུས། དེ་ནས་ཡས་མར་ཐམས་ཅད་དུ་སོང་སྟེ། འཁོར་ལོ་བཞི་སོགས་ལུས་ཀྱི་རྩ་གནས་ཐམས་ཅད་བཀྲུས་པས་དག་པར་བསམས་ལ་བུམ་པ་ཅན་ནམ་ཡིག་བརྒྱ་གང་རུང་བཟླའོ། །ཡང་གསང་གནས་བདེ་སྐྱོང་གི་འཁོར་ལོའི་དབུས་སུ་དོན་ཡོད་གྲུབ་པ་ཧེ་རུ་ཀ་ཡབ་ཡུམ་བསྒོམས་ལ་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་ཆུ་རྒྱུན་དཔག་ཏུ་མེད་པ་བྱུང༌། གསང་གནས་ཀྱི་འཁོར་ལོ་བཀྲུས། དེ་ནས་ཡས་མར་ཐམས་ཅད་དུ་སོང་སྟེ། འཁོར་ལོ་བཞི་སོགས་ལུས་ཀྱི་གནས་ཐམས་ཅད་བཀྲུས་པས་དག་པར་བསམས་ལ། འཇམ་རླུང་བུམ་པ་ཅན་འཛིན་པའམ། ཧེ་རུ་ཀའི་ཡི་གེ་བརྒྱ་པ་གང་རུང་བཟླའོ། ། དེ་རྣམས་རེ་རེ་བཞིན་དམིགས་ཐུན་རེ་རེ་ཡིན་ནོ། །སྔོན་འགྲོ་གསུམ་པ་མཎྜལ་འབུལ་བ་ནི། རང་གི་མདུན་དུ་བླ་མ་བསྒོམས་ལ། མཎྜལ་འབུལ་ཚུལ་སྤྱི་དང་འདྲ་བ་ལས། ལྷ་མོ། ཀླུ་མོ། མི་མོ། གནོད་སྦྱིན་མོ་སོགས་རིག་མ་གྲངས་མེད་པས་ཕྱུར་བུར་བཀང་སྟེ་ཕུལ་བར་བསམ་མོ། །གཉིས་པ་དངོས་གཞི་ལ། གོང་གཏུམ་མོའི་སྐབས་སུ་བསྟན་པ་ལྟར་གྱི་བུམ་པ་ཅན་ལ་སོགས་པའི་རླུང་སྦྱོར་རྣམས་གོམས་པར་བྱས་ནས། ཐོག་མར་མཆོག་གི་འདྲེན་པ་ནི། ལུས་གནད་ལེགས་པར་བཅས། རླུང་རོ་བསལ་ལ། དེའི་རྗེས་སུ་རླུང་དལ་བུས་ཕྱིར་བུས། འབུད་པ་རྫོགས་མཚམས་སུ་འཕྲོ་བཅད་ཅིང༌། ཕྱིར་ཅུང་ཟད་བཟུང༌། ཡང་གཅིག་བུས་ལ་འཕྲོ་བཅད་ཅིང༌། ཕྱིར་ཅུང་ཟད་བཟུང༌། ཡང་བུས་ལ་དེ་ནས་དལ་བུས་ནང་དུ་རྔུབ་ཅིང༌། རྔུབ་པ་རྫོགས་མཚམས་སུ་ཡང༌། འཕྲོ་བཅད་ཅིང་རྔུབ། དེ་རྫོགས་པ་དང༌། ཡང་འཕྲོ་བཅད་ཅིང་རྔུབ་ལ། དེ་ནས་སྟེང་རླུང་རྒྱུ་ཞབས་ཕྱོགས་སུ་དྲག་ཏུ་མནན། འོག་རླུང་རྒྱབ་ཀྱི་ཕྱོགས་སུ་ཡར་འཐེན་ལ་རྐེད་པ་ཉག་རེ་བྱ་ཞིང་ཐུབ་ཚད་དུ་བཟུང༌། མི་ཐུབ་པ་དང་ཕྱིར་འབུད་ཚུལ་འབུད་ཐང་གཅིག་ལ་དུམ་བུ་གསུམ་དུ་བྱས་ཏེ་འབུད་ཚུལ་གོང་བཞིན་དང༌༑ ནང་དུ་རྔུབ་པ་ཡང༌། རྔུབ་ཐེངས་གཅིག་ལ་ཚན་པ་གསུམ་དུ་བྱས་ཏེ་རྔུབ་ལ། ནང་དུ་འཛིན་པ་སོགས་ཡང་ཡང་བསྒོམ་པའོ། །སེམས་ཀྱི་དམིགས་པ་ནི། ཕྱིར་འབུད་པའི་ཚེ། ལུས་ཀྱི་ནང་ནས་རླུང་རྣམས་དུ་བ་ ལྟ་བུའི་རྣམ་པས་བུན་བུན་དོན་པར་བསམ། རླུང་ནང་དུ་རྔུབ་པའི་ཚེ། རླུང་རྣམས་འོད་ཟེར་སྣ་ལྔའི་རྣམ་པས་ཞུགས་ཤིང་ཉམས་བདེ་བ་དང་ལྡན་པར་བསམ། ནང་དུ་བཟུང་བའི་ཚེ་སེམས་མི་རྟོག་པར་བཞག་གོ །གཉིས་པ་རྩ་བའི་འདྲེན་པ་ནི། ལུས་གནད་ལེགས་པར་བཅས། རླུང་རོ་མང་དུ་བསལ། དེ་རྗེས་རླུང་ནང་དུ་ཤར་ཏེ་རྔུབས་ལ། སྟེང་རླུང་ལྟེ་བར་མནན། ཐུར་སེལ་དྲག་ཏུ་འཐེན་ལ་རླུང་གཉིས་ཁ་སྦྱོར་དུ་བཟུང༌། སྟེང་རླུང་མནན་པའི་ཤུགས་མ་ཤོར་བར་ལྟག་པ་བསྐྱེད་བྱས་ལ་སྟོད་དུ་དྲག་ཏུ་འཐེན། ཡང་འོག་རླུང་བཤང་སྒོར་དྲག་ཏུ་བསྡམས་པའི་ཤུགས་མ་ཤོར་བར་རླུང་ཁ་སྦྱོར་དེ་ཉིད་རྒྱུ་ཞབས་ཕྱོགས་སྨད་ཀྱི་གནས་སུ་དྲག་ཏུ་མནན། དེ་འདྲ་ལན་གསུམ་ཙམ་བྱས་པའི་མཐར་རླུང་ཕྱིར་བཏང་ངོ༌། །ཐོག་མར་ཞག་བདུན་ཙམ་གྱི་རིང་རླུང་ཐེངས་རེ་རེ་ལ་རླུང་ཁ་སྦྱོར་སྟོད་སྨད་དུ་འཐེན་མནན་བྱེད་པ་ལན་གསུམ་ཙམ་བྱ། དེ་ནས་རིམ་པས་ཇེ་མང་ལ་བཏང་ངོ༌༑ ༑གསུམ་པ་ཡན་ལག་འདྲེན་པ་ནི། ལུས་གནད་ལེགས་པར་བཅས་ལ། རླུང་རོ་མང་དུ་བསལ། དེ་རྗེས་རླུང་ཡོངས་སུ་རྫོགས་པར་བུས་ལ། ཕྱིར་ཐུབ་ཚད་དུ་བཟུང༌། ལྟོ་བ་ཚིགས་པར་གཅེར་བྱ་ཞིང༌། ཐུར་སེལ་དྲག་ཏུ་གྱེན་དུ་འཐེན་པ་དང༌། ཁོང་ནང་གི་ཤུགས་སྟོད་དུ་ལན་གསུམ་ཙམ་འཐེན། རླུང་ཕྱིར་བཟུང་བཟུང་བར་བཤང་སྒོ་ལྷོད་ཅིང༌། ཁོང་ནང་གི་རླུང་གིས་ཤུགས་མཐུན་དུ་མནན། མི་བདེ་བ་སྐྱེས་པ་དང༌། རླུང་ནང་དུ་ རྔུབ་ཚུལ་དེ་ལྟ་བུ་ཡང་ཡང་བསྒོམ་པའོ། །འདི་ལ་ཡང་ཁོང་ནང་གི་རླུང་གི་ཤུགས་གྱེན་དུ་འཐེན་པ་དང༌། ཐུར་དུ་མནན་པ་ཡང་ཐོག་མར་གསུམ་ཙམ་དང༌། དེ་ནས་རིམ་པས་ཇེ་མང་བཏང་ངོ༌། །བཞི་པ་རབ་སྐོར་གྱི་རླུང་སྦྱོར་ནི། ལུས་གནད་ཅེ་སྤྱང་གི་འདུག་སྟངས་བྱ་བ། རྐང་པ་སེམས་དཔའི་སྐྱིལ་མོ་ཀྲུང་བྱས་པའི་ལོང་བུས་སྟོད་ཙམ་ནས་ལག་པ་གཉིས་ཀྱིས་བཟུང་ལ། ལུས་རྒུར་ཏེ་འདུག་པའམ་ཡང་ན་གླང་པོའི་འདུག་སྟངས་བྱ་བ། པུས་མོ་གཉིས་བཙུགས། ལག་པ་ཁུ་ཚུར་བཅངས་པ་མདུན་དུ་ས་ལ་བཙུགས་ལ་སྟོད་རྒུར་རོ། །དེ་ལྟར་ལུས་གནད་གཉིས་པོ་གང་རུང་དང་ལྡན་པས་རླུང་ཕྱིར་བུས་ལ། ཕྱི་རོལ་དུ་ཅི་ཐུབ་བཟུང༌། དེ་ཁའི་ངང་ལས་ཁོག་ནང་སྟོང་པའི་ཤུགས་དེ་ཉིད་གཡས་སུ་བསྐོར་བ་དང༌། གཡོན་དུ་བསྐོར་བ་བྱ། དེ་ནས་ནང་དུ་རྔུབས་ལ། རླུང་ཁ་སྦྱར་དུ་བཟུང་བ་དེ་གཉིས་གཡས་དང་གཡོན་དུ་བསྐོར་རོ། །འདི་ན་ཕྱི་རོལ་དུ་བཟུང་བ་ལ་བསྐོར་བ་ཡུན་རིང་བ་དང༌། ནང་དུ་འཛིན་ཞིང་བསྐོར་བ་ཡུན་ཐུང་བ་ཙམ་བྱའོ། །ལྔ་པ་འགྱུར་བ་དྲུག་ལྡན་ནི། ལུས་ཙོག་པུ་ལ། རྐང་པ་རེའུ་མིག་ལྟར་བསྣོལ། ལག་པ་ཁུ་ཚུར་བཅང་བ་བསྣོལ་ལ་མཆན་ཁུངས་གཉིས་ཀྱི་འོག་ཏུ་བཅང་ངོ༌། །ཉྭ་བཞི་བསྒྲིམ། མིག་གྱེན་དུ་བལྟ། ལྕེ་རྐན་ལ་སྦྱར། མགྲིན་པ་དགུག་ཅིང༌། ཐུར་སེལ་འཐེན་པ་དང་མཉམ་དུ། ཧཱུྃ་ཡིག་གི་སྒྲས་རླུང་ཕྱིར་བསལ། ལྟེ་བ་ཚིགས་པ་ལ་བཅར། ཕྱི་རོལ་དུ་ མི་བདེ་བ་མ་སྐྱེས་ཀྱི་བར་དུ་བཟུང་ལ། དེ་ནས་ནང་དུ་རྔུབ་ཡང་ལྟག་པ་བསྐྱེད་ཅིང་རླུང་སྦྱོར་སྔར་བཞིན་ནོ། །དམིགས་པ་ནི། ལྟེ་བར་ཧཱུྃ་ཡིག་གམ་ཨཾ་ཡིག་ལྟ་བུའི་ས་བོན་ནམ། ཐིག་ལེ་ཕྱག་མཚན་གང་རུང་ཞིག་བསྒོམས་ལ། ཐུར་སེལ་འཐེན་ཞིང༌། ཧཱུྃ་ཡིག་གི་སྒྲས་རླུང་བུས་པའི་ཚེ། དེ་ཉིད་ཡར་སོང་སྟེ་སྤྱི་བོ་ནས་ཐོན་པར་བསམ། དྲུག་པ་ཧཱུྃ་རིང་གི་སྦྱོར་བ་ནི། རྐང་ལག་གཉིས་བརྐྱངས་ཤིང༌། ཧཱུྃ་ཡིག་གིས་གདངས་ཉི་ཤུ་རྩ་གཅིག་གིས་རླུང་ཕྱིར་བུས་ལ་སྟོང་འདྲེན་བྱ་ཞིང༌། ཕྱིར་ཅུང་ཟད་བཟུང་ལ། ལྟོ་བ་ཚིགས་པ་ལ་གཅེར་ཏེ། ཐུར་སེལ་གྱེན་དུ་འཐེན་འཐེན་བྱའོ། །དེ་ནས་རླུང་ནང་དུ་རྔུབ་པ་དང་ལག་པ་གཉིས་ཀྱིས་རྐང་མགོ་ནས་བཟུང་ལ་སྒང་འཐེན་བྱའོ། །བདུན་པ་རང་འགགས་ནི། རླུང་རོ་བསལ་བ་སོགས་མི་བྱེད་པར། རླུང་རྒྱུ་བའི་འཕྲོ་རྦད་ཀྱིས་བཅད་ལ། ཁོང་ནང་གི་ཤུགས་ཐུར་དུ་མནན་ཅིང༌། ཐུར་སེལ་གློད་ཅི་ཐུབ་བྱེད་པའོ། །བརྒྱད་པ་ནི། རླུང་རོ་བསལ་ལ། སྟེང་རླུང་རྔུབ་ཅིང་མནན། ཐུར་སེལ་གློད་པར་བྱེད་པའོ། །དགུ་པ་ནི། རླུང་རོ་བསལ་བ་ནང་དུ་རྔུབ། ཐུར་སེལ་སྟེང་དུ་འཐེན་ལ། སྟེང་རླུང་གི་ཤུགས་གསང་གནས་སུ་གཏུན་བརྡུང་བ་ལྟ་བུའི་ཚུལ་གྱིས་ལན་གསུམ་བཞི་ཙམ། ལྔ་དྲུག་ཙམ་ཐུར་དུ་སྡིགས་པར་བྱེད་ཅིང༌། ལུས་འདར་ཐོན་པར་བྱེད་པའོ། །རླུང་སྦྱོར་ཕྱི་མ་ཆུང་བ་གསུམ་པོ་འདི་ལ། ལུས་གནད་རྟིང་པ་གཅིག་གིས་གསང་གནས་ཀྱི་རྩ་བ་ནས་བསྡོམ་པ་དང༌། རྟིང་པ་ གཅིག་གིས་གསང་གནས་ཀྱི་སྟེང་ནས་གནོན་པར་བྱེད་པའོ། །བཅུ་པ་ནི། རླུང་རོ་བསལ་ལ། དེ་ནས་སྣ་བུག་གི་རླུང་མ་བཟུང་བར་ཁོག་ནང་གི་ཤུགས་གསང་གནས་སུ་དྲག་ཏུ་མནན། དེ་ནས་དེ་རང་བབས་སུ་བཞག་ལ། ཐུར་སེལ་གྱེན་དུ་དྲག་ཏུ་འཐེན། དེ་རྗེས་ལྟོ་བ་ལྡིར་བྱས་ལ། བཤང་སྒོ་འབྱེད་འཛུམ་ལན་གསུམ་བྱའོ། །རླུང་སྦྱོར་དེ་རྣམས་ཡུན་རིང་དུ་གོམས་པར་བྱས་ལ། དེ་ནས་ཞག་ཤས་ཤིག་ཆུ་དྲོན་གྱིས་ལུས་ཐམས་ཅད་བཀྲུས་ལ་ཉི་མར་བདུགས་ཤིང་འཕུར་མཉེ་བྱ། དེ་ནས་དྲི་ཆུས་བཀྲུས་ཤིང༌། འཕུར་མཉེ་བྱ། དེ་ནས་དྷ་དྷུ་ར་སྟེ་ཐང་ཕྲོམ་གྱི་ཁུ་བས་བཀྲུས་ཤིང་འཕུར་མཉེ་བྱ། དེ་ནས་བ་ཡི་ལྕི་བ་མེ་ལ་བསྲེགས་པའི་ཐལ་བ་ཆུ་ལ་བཏབ་པའི་སྙིགས་མས་རྡོ་དང་འདྲེས་པ་དེ་མིན་པའི་དྭངས་མ་འཇམ་པོ་དེས་དབང་པོའི་སྒོ་རྣམས་མ་ཡིན་པའི་ལུས་ཐམས་ཅད་ལ་བྱུགས་ཤིང༌། ཉི་མ་ལ་འཕུར་མཉེ་བྱས་ལ་མཐར་ཆུས་བཀྲུ། དེ་ནས་འབྲས་བུས་གསུམ་དང༌། ཚ་བ་གསུམ་གྱི་ཁུ་བས་པུས་ལ་བྱུགས་ཤིང་འཕུར་མཉེ་བྱེད་པའམ། ཡང་ན་གོང་གི་དེ་རྣམས་ལ་འབྲས་བུ་གསུམ་དང་ཚ་བ་གསུམ་ཅུང་ཟད་རེ་བསྲེའོ། །དེ་རྣམས་ཀྱིས་ལུས་ཀྱི་བ་སྤུ་དང་རྩ་རྣམས་འཇམ་ཞིང་མཉེན་པར་འགྱུར་བས་གེགས་ཆུང་བར་བྱེད་པའོ། །དེ་ནས་ཡང་ཞག་འགའ་ལུས་སྟོང་སེང་ངེ་བར་འདུག་པར་བསམ་པ་དང༌། རྩ་འཁོར་ལོ་བཞི་སོགས་རྩ་ནང་རྣམས་སྟོང་སོང་ངེ་བར་འདུག་པ་ལ་སེམས་ གཏད་པའི་སྟོང་ར་བསྒོམ་མོ། །དེ་ནས་དངོས་གཞི་སྲོག་ཐུར་བསྲེ་བ་ལ། འཇམ་རླུང་ལ་བརྟེན་པ་དང༌། རྩུབ་རླུང་ལ་བརྟེན་པ་དང༌། རྡོ་རྗེ་གཙུག་ཏོར་གྱི་ཕྱག་རྒྱ་ལ་བརྟེན་ནས་བསྲེ་བ་དང་གསུམ་ལས། དང་པོ་ནི། ལུས་གནད་ལེགས་པར་བཅས་པའི་ལག་པ་མཉམ་བཞག་ལྟེ་བར་བཀན་ལ་བཞག །རླུང་རོ་བསལ། དེ་ནས་རླུང་ནང་དུ་རྔུབ་ལ་སླར་ཡང་དལ་བུས་ལྷག་མ་མ་ལུས་པར་ཕྱིར་བུས་ལ། ལྟོ་བ་ཚིགས་པ་ལ་གཅེར་བྱ། ཕྱི་རོལ་དུ་བཟུང་ལ་ཐུར་སེལ་གྱེན་དུ་འཐེན་ལ་ཁོང་ནང་སྟོང་པའི་ཤུགས་སྟེང་དུ་དྲངས་ཤིང༌། རླུང་རོ་ཅུང་ཟད་འབུད་རྒྱུ་བྱུང་བ་རྣམས་ཀྱང་སྣ་སྒོ་ནས་ཕྱིར་དབྱུང་བར་བྱེད་པའོ། །དེའི་སྐབས་སེམས་ཀྱི་དམིགས་པ་ནི། ཐུར་སེལ་གྱེན་དུ་འཐེན་པས་རྐང་མཐིལ་ནས་བཟུང༌། རླུང་ཐམས་ཅད་ཁ་དོག་སྔོན་པོའི་རྣམ་པས་ཡར་བྱུང༌། གསང་གནས་སུ་གཅིག་ཏུ་འདྲེས། ལུས་ཀྱི་དབུས་ན་ཡར་སྦོམ་ཕྲ་མདའ་སྨྱུག་ཙམ་གྱི་རྣམ་པ་བྱུང༌། སྤྱི་གཙུག་ནས་རྒྱངས་ཏེ་ཐོན། རྩ་བ་གདུགས་ཀྱི་རྐང་པ་ལྟ་བུ་མདའ་གང་ངམ། འདོམ་གང་ཙམ་གྱི་སྟེང་དུ་རླུང་རྣམས་འཁྱིལ་བ་གདུགས་ལྟ་བུར་སྒོར་འཁོར་བ་ལ་སེམས་གཏད་དོ། །དེ་ནི་ཐུར་སེལ་སྲོག་ལ་བསྲེ་བའི་མན་ངག་ཡིན་ལ། དེ་ཉིད་ཁོ་ན་འབད་པས་བསྒོམས་ན། ཐུར་སེལ་སྲོག་ལ་བསྲེ་བའི་རྟགས་འཕྲལ་དུ་འབྱུང་སླ་བ་ཡིན་ཡང་འཕྲལ་གེགས་སྡང་ཞིང༌། ཕུགས་བོགས་ཆུང་བས་སྲོག་ཐུར་སེལ་ལ་བསྲེ་བ་དང་གཉིས་སྤེལ་མར་བསྒོམས་ན་ལེགས་པས་དེ་ཀའི་འཕྲོ་ནས་རླུང་དལ་བུས་ནང་དུ་རྔུབས་ལ། སྟེང་རླུང་གསང་གནས་དང་བཤང་སྒོ་གཉིས་ཀར་དུ་མནན་ཅིང་སྒོ་དེ་ཉིད་ཀྱང་ཆ་མཉམ་དུ་ལྷོད་གློད། དམིགས་པ་ནི། མགོ་བོ་དང་ལག་པ་སོགས་ལུས་ཀྱི་སྟོད་ཀྱི་རླུང་རྣམས་མར་བྱུང་མགྲིན་པར་གཅིག་ཏུ་འདུས། ལུས་ཀྱི་ནང་ན་མར་སོང་བཤང་སྒོ་ནས་ཐོན། ས་འོག་ཐག་རིང་པོར་སོང་བར་བསམས་ལ། དེ་ཡང་རླུང་རྣམས་འཁྱིལ་དེ་འཁོར་ལོ་ལྟར་འཁོར་བ་ལ་སེམས་གཏད་དོ། །གཉིས་པ་ནི། རླུང་གནད་དང་དམིགས་པ་སྔར་དང་འདྲ་བ་ལས། རླུང་དྲག་ལ་མྱུར་བའི་ཚུལ་གྱིས་ཕྱིར་བུས། ཐུར་སེལ་གྱེན་དུ་འཐེན་ཞིང་ཁོང་ནང་གི་ཤུགས་སྟོད་དུ་འདྲེན་པའི་སྐབས་ཐོག་མར་རྒྱུ་ཞབས་གཡས་སུ་བསྐོར་ཞིང་སྟོད་དུ་འདྲེན། ཡང་གཡོན་དུ་བསྐོར་བ་སྟོད་དུ་འདྲེན། དེ་ནས་རྐེད་པ་གཡས་གཡོན་དུ་བསྐོར་ལ་སྔར་བཞིན་འདྲེན་པ་དང༌། སྙིང་གའི་སྟོད་ཀྱི་ཐད་གཡས་གཡོན་དུ་བསྐོར་བ་སྔར་བཞིན་འདྲེན་པའོ། །ཡང་སྲོག་ཐུར་སེལ་ལ་བསྲེ་བའི་སྟེང་རླུང་གསང་གནས་དང༌། བཤང་སྒོ་གཉིས་སུ་གནོན་པའི་སྐབས། སྙིང་གའི་ཐད་གཡས་སུ་བསྐོར་ལ་ཐུར་དུ་གནོན་པ་དང༌། གཡོན་དུ་ཡང་བསྐོར་ལ་ཐུར་དུ་གནོན་པ་དང༌། དེ་བཞིན་དུ་རྐེད་པ་གཡས་གཡོན་དུ་བསྐོར་ལ་ཐུར་དུ་གནོན་པ་དང༌། རྒྱུ་ཞབས་གཡས་གཡོན་དུ་བསྐོར་ལ་ཐུར་དུ་གནོན་པར་བྱེད། རླུང་ནང་དུ་རྔུབ་པའི་ཚེ་དྲག་ལ་མྱུར་བར་རྔུབ་བོ། །གསུམ་པ་ནི། འཕོངས་སྟེགས་བསྐུམ་ཁྲུ་གང་ཙམ་གྱི་སྟེང་དུ་འཕོངས་བཞག་ལ་ཁྱེལ་སྟེགས་ཀྱིས་འདུག །དེ་ནས་རླུང་བཟུང་ལ། ལག་པ་གཉིས་ཁུ་ཚུར་བཅངས་པ་པུས་མོའི་སྟེང་ནས་ཡར་དྲངས་པ་ལ་རྒྱབ་ཏུ་ཤད་ཀྱིས་བརྐྱང༌། རླུང་གསང་གནས་དྲག་ཏུ་མནན། ཡང་སྟེང་དུ་འདྲེན། དེ་འདྲ་ལན་གསུམ་རྫོགས་མཚམས། ལག་པ་གཉིས་མདུན་དུ་རྡོ་རྗེ་གཙུག་ཏོར་གྱི་ཕྱག་རྒྱ་བཅས་ལ། དེ་མགོ་མཇུག་སློག་པ་སྤྱི་བོའི་སྟེང་དུ་བཞག་ལ། ལང་ཞིང་དགང་འཐེན་གྱིས་རླུང་སྟོད་དུ་འདྲེན། དེ་ནས་ཕྱག་རྒྱ་དེ་བཀྲོལ་ལ། འཕོངས་ས་ལ་བརྡེག་པ་དང་མཉམ་དུ་རླུང་རྒྱུ་ཞབས་སུ་མནན་ནོ། །དེ་དག་གི་སྐབས་སུ་གེགས་སེལ་བ་ལ། ཧ་རིང་དང་ཧ་ཐུང་འདོན་པ་གཉིས་ལས། དང་པོ་ནི། རྐང་པ་སེམས་སྐྱིལ་ལ། ལག་པ་གཉིས་པུས་མོའི་སྟེང་དུ་བཞག་ལ། རོ་སྟོད་རྒུར་ཞིང་ཧ་ཞེས་འདོན། དེ་ནས་རོ་སྟོད་བསྐྱེད་ལ་བཅངས་ཕྲག་རྒྱག་པ་དང་མཉམ་དུ་ཧ་དྲག་ཏུ་འདོན་པར་བྱེད་པའོ། །གཉིས་པ་ནི། སྤྱི་དང་འདྲའོ། །གཞན་ཡང་གེགས་སེལ་ཞིང་བོགས་འདོན་པ་ལ། རབ་སྐོར་ནི། འཇམ་རླུང་བཟུང་ལ། ལྟོ་བ་གཡས་སུ་ལན་གསུམ་བཞི་ཙམ་བསྐོར། གཡོན་དུ་ལན་གསུམ་བཞི་ཙམ་བསྐོར། དེ་ནས་རླུང་ཕྱིར་བུས་ལ་ཕྱི་རོལ་དུ་བཟུང་ཞིང༌། ཁོག་ནང་གི་ཤུགས་དེ་ཉིད་གཡས་གཡོན་དུ་ལན་གསུམ་ཙམ་བསྐོར་བ་ནི་ནང་བསྐོར་དང༌། ཕྱི་བསྐོར་བ་ནི། མགོ་གཡས་གཡོན་དུ་བསྐོར་བ་དང༌། ལག་པ་ཁུ་ཚུར་བཅངས་པ་རྐྱོངས་ཏེ་ཕྱི་ནང་དུ་ ལན་གསུམ་གསུམ་བསྐོར་བ་དང༌། ལག་པ་གཡོན་ལ་ཡང་དེ་དང་འདྲའོ། །དེ་ནས་ལངས་ལ་ཐོག་མར་རྐང་པ་གཡས་ཕྱི་ནང་ལན་གསུམ་གསུམ་བསྐོར་བ་དང༌། དེ་ནས་གཡོན་པའང་ཕྱི་ནང་དུ་ལན་གསུམ་གསུམ་བསྐོར་བ་དང༌། དེ་ནས་འབེབས་རྒྱག་པར་བྱེད་པའོ། །བརྡེག་པ་ནི། རླུང་བཟུང་ལ་སྟེང་གི་ཤུགས་དབུས་དང་མདུན་དང༌། གཡས་དང༌། གཡོན་དང༌། རྒྱབ་ཏུ་རྟེན་པར་བྱེད་པའོ། །དེ་ནས་རླུང་བུས་ལ་ཕྱིར་བཟུང་ཞིང༌༑ ཁོག་ནང་གི་ཤུགས་དབུས་དང༌། མདུན་རྒྱབ་གཡས་གཡོན་རྣམས་སུ་རྡེག་པར་བྱེད་པ་ནི། ནང་གི་བརྡེག་པ་དང༌། ཕྱི་ལ་བརྡེག་པ་ནི། མགོ་མདུན་རྒྱབ་གཡས་གཡོན་རྣམས་སུ་ལན་གསུམ་གསུམ་བརྡེག་པ་དང༌། ལག་པ་གཡས་པ་ཁུ་ཚུར་བཅངས་པ། དཔུང་པ་གཡས་པའི་སྟེང་དུ་ལན་གསུམ་གསུམ་བརྡེག་པ་དང༌། གཡོན་པའང་དེ་དང་འདྲ། དེ་ནས་ལངས་ལ། རྐང་པ་གཡས་པ་འཕོངས་ལ་ལན་གསུམ་བརྡེག །གཡོན་པའང་དེ་དང་འདྲ། དེའི་རྗེས་སུ་འབེབས་རྒྱག་པར་བྱེད་པའོ། །སྤྲུག་པ་ལ། ནང་དང་ཕྱི་སྤྲུག་པ་གཉིས་ལས། དང་པོ་ནི། རྐང་པ་སེམས་སྐྱིལ་བྱས་ལ། ལག་པ་གཉིས་པུས་མོ་ལ་བཀབ། རླུང་ནང་དུ་དྲག་ཏུ་བཟུང་ཞིང་ཤུགས་དང་ལྡན་པས་ལན་གསུམ་ཙམ་སྤྲུག །དེ་ནས་རླུང་ཕྱིར་བུས་ལ་ཧ་ཞེས་བརྗོད་ཅིང་དྲག་ཏུ་སྤྲུག་གོ །དེ་ནས་མགོ་མདུན་རྒྱབ་ཏུ་བསྒྱུར་ཞིང་སྤྲུག །གཡས་གཡོན་དུ་གཅུ་ཞིང་སྤྲུག །ལྟག་པ་བསྐྱེད་ཅིང་སྤྲུག །ལག་པ་གཡས་ མགོ་ལ་བསྐོར་ཞིང༌། ཞགས་པ་འཕེན་པའི་ཚུལ་གྱིས་ལན་གསུམ་སྤྲུག །གཡོན་པའང་དེ་དང་འདྲ། ལག་པ་གཉིས་ཀ་དུས་གཅིག་ཏུ་ལན་གསུམ་སྤྲུག །དེ་ནས་ལངས་ལ་རྐང་པ་གཡས་ལན་གསུམ་སྤྲུག །གཡོན་པའང་དེ་དང་འདྲ། དེ་ནས་རླུང་བསྒྱུར་བྱས་ལ། ལག་པ་གཉིས་རྒྱབ་ཏུ་ལག་ཕུར་བཙུགས་ལ། རྐང་པ་གཡས་ལན་གསུམ་བརྐྱང་བསྐུམ་བྱ། གཡོན་པའང་དེ་དང་འདྲ། དེ་ནས་གན་རྐྱལ་དུ་རྐང་ལག་རྣམས་དུས་གཅིག་ཏུ་སྤྲུག་ཅིང་བརྐྱང་བསྐུམ་བྱའོ། །དེ་རྣམས་སྔོན་འགྲོའི་ཚུལ་དུ་བཏང་ནས། དངོས་གཞི་ལ་ཐོག་མར་ཡེ་ཤེས་ཀྱི་ཕྱག་རྒྱ་ལ་བསླབ་པ་ལ། རང་ཉིད་ཡི་དམ་དུ་གསལ་བས། ཡེ་ཤེས་ཀྱི་ཕྱག་རྒྱ་ལ་སྙོམས་པར་ཞུགས་པའི་རྗེས་ཆགས་ཀྱི་བདེ་བ་བསྒོམ་པའི། བྱང་ཆུབ་ཀྱི་སེམས་རྣམས་སྤྱི་བོ་ནས་མར་རིམ་པས་བབས་ཏེ། རྡོ་རྗེ་ནོར་བུར་སླེབ་པར་བསམས་ལ། དེར་བཟུང་བ་ནི། འགྱུར་བ་དྲུག་བྱ་བ། ལྟོ་བ་ཚིགས་པ་ལ་གཅེར་བ་དང༌། ཡན་ལག་བཞི་ཉྭ་བཞི་བསྒྲིམས་ཏེ་དྲག་ཏུ་བསྐུམ་པ་དང༌། ལྕེ་རྐན་ལ་སྦྱར། མིག་གྱེན་དུ་བསྒྲིམ། མགྲིན་པ་དགུག་པ་སོགས་འགྱུར་བ་དྲུག་དང་ལྡན་པས་སྟེང་རླུང་ཕྱིར་བསལ་ཞིང༌། ཐུར་སེལ་དྲག་ཏུ་གློད་ལ། སྤྱི་བོའི་ཐད་ཀྱི་ནམ་མཁར་སེམས་གཏད་དེ། འདྲེན་པ་ཧི་འདྲེན་དང༌། ཧཱུྃ་འདྲེན་དང༌། ཧྲ་འདྲེན་དང་གསུམ་ལས། དང་པོ་ནི། རླུང་ཧི་ཞེས་ཁ་ནས་སྒྲ་དང་བཅས་པས་ཕྱིར་བུས་ལ་སྟོང་འདྲེན་བྱ། ཡང་ནང་དུ་རྔུབས་ལ་སྒང་འཐེན་བྱའོ། ། གཉིས་པ་ནི། སྣ་སྒོ་ནས་ཧཱུྃ་གི་སྒྲས་ཕྱིར་བུས་ལ། སྟོང་འདྲེན་དང༌། སྒང་འདྲེན་སྔར་བཞིན་བྱ། གསུམ་པ་ནི། ཧྲ་གྱི་སྒྲས། རླུང་ཁ་ནས་ཕྱིར་བུས་ལ། སྟོང་འདྲེན་དང༌། སྒང་འདྲེན་སྔར་བཞིན་བྱའོ། །དེ་ནས་སེང་གེ་རྣམ་རོལ་གྱི་ཕྱག་རྒྱའི་འགྲོས་སྤྱི་དང་མཐུན་པར་བྱ། གཞན་ཡང་རྐང་པ་ཅིག་ཤོས་ཀྱི་རྟིང་པས་བོལ་གོང་མནན་ལ། ལུས་ཅུང་ཟད་རྒུར། ལག་པ་གཉིས་ཁུ་ཚུར་བཅངས་པ་མདུན་དུ་ས་ལ་བཙུགས་ལ་རླུང་བཟུང་ཞིང༌༑ སྟེང་རླུང་གི་ཤུགས་གསང་གནས་སུ་མནན། འཕོངས་ཅུང་ཟད་བཏེགས་ལ་སླར་འབེབས་ཀྱི་ཚུལ་གྱིས་གསང་གནས་ཀྱི་རྩ་བ་རྟིང་པ་ལ་ཐུག་པར་བྱ་བ་དེ་འདྲ་ལན་ཉི་ཤུ་རྩ་བདུན་བྱ་བ་ལས། དགུ་དགུའི་མཚམས་སུ་གཡས་གཡོན་དུ་གཅུད་ཅིང་གནོན་པ་ཡང་བྱའོ། །གསང་རྩ་མནན་པའི་རྐང་པའི་བོལ་གོང་གི་ཐད་དུ། ཅིག་ཤོས་ཀྱི་རྐང་པའི་རྟིང་པས་ལན་ཉི་ཤུ་རྩ་གཅིག་ཙམ་བརྡེག །གསང་བའི་རྩ་བ་གནོན་པ་རྐང་པ་གཡས་གཡོན་གྱི་རྟིང་པ་རེས་མོས་ཀྱིས་བྱའོ། །ཁྱབ་པར་བྱེད་པ་ནི། རླུང་བཟུང་བ་ལངས་ཤིང་ཤུགས་དང་ལྡན་པས་ལུས་རྒུར་ཏེ་ལག་པ་གཡས་པའི་མཐེ་བོང་གཡོན་པས་བཟུང་བ་མདུན་དུ་ས་ལ་བཙུགས། རྐང་པའི་བྲང་ཡང་ས་ལ་བཙུགས། རླུང་གི་ཤུགས་སྟོད་ཀྱི་ཕྱོགས་སུ་ཡོང་བར་བྱས་ལ། རྐང་པའི་བརླ་བྱིན་པ་ལ་སྦྱར་ཞིང་གནོན་པ་དང་སྟེང་དུ་བཏེག་ཅིང་འཐེན་པ་ལན་འགའ་བྱའོ། །ཐུན་རྟིང་མ་ལ་ལག་པ་གཡོན་པའི་མཐེ་བོང་ གཡས་པས་བཟུང་བ་སོགས་རེས་མོས་བྱའོ། །འཆིང་བར་བྱེད་པ། འཕོངས་སྟེགས་ཅུང་ཟད་ཅིག་བཅུག་ལ། ཙོག་པུའི་རྣམ་པས་རྐང་པ་གཉིས་ཀྱི་མགོ་མདུན་དུ་ཡོང་བར་བྱས། ལག་པ་ཐལ་མོ་སྦྱར་བ་ཐུར་དུ་བསྟན་པ་ལྟེ་བའི་སྨད་ཙམ་དུ་ཐོག་མར་ཡོང་བར་བྱས་ལ། རླུང་ཁ་སྦྱར་དུ་བཟུང་བ་དང༌། ལྟོ་བ་ཚིགས་པ་ལ་གཅེར་བྱ་ཞིང༌། ཐལ་མོ་རྩེ་ཐུར་བསྟན་དེ་ཉིད་ཡར་དྲངས་ཏེ། མགྲིན་པའི་ཐད་ཙམ་དུ་སླེབས་པ་ན། ཐལ་སྦྱར་རྩེ་གྱེན་དུ་བསྟན་ལ། ཐད་ཀར་ཡང་འདྲེན་ཅི་ཐུབ་བྱེད། དེ་མཚམས་ནས་ལངས་ཏེ། ལག་པ་གཉིས་རྐང་པ་ལ་ནང་ནས་འཁྱུད་དེ། རྐང་མགོ་གཉིས་ནས་ལག་པ་གཉིས་ཀྱིས་བཟུང་ལ། ལུས་རྒུར་ཞིང་གཡས་གཡོན་དབུས་གསུམ་དུ་གཅུད་པའོ། །དབྱིངས་སུ་སྐྱལ་བ་ནི། ལག་པ་གཉིས་མཉམ་བཞག་གི་ཕྱག་རྒྱས་ལྟོ་བསྐྱོར་བྱས་ཏེ། རླུང་ཁ་སྦྱོར་བཟུང་ཞིང་གསུས་པ་མདུན་དུ་ཧ་ཅང་མ་འཕེལ་བར་བྱས་ལ། རླུང་བུམ་པ་ཅན་མིག་ཐད་ཀར་བལྟ་ཞིང་ལུས་གཡས་གཅུ་གཡོན་གཅུ་བྱ། སེམས་མི་རྟོག་པར་བཞག་གོ །མེ་ཐབ་ནི། རྐང་པ་རེ་མིག་ལྟར་བསྣོལ། ལག་པ་གཉིས་བསྣོལ་བས་རྐང་པ་གཡས་གཡོན་གྱི་མཐེ་བོང་ནས་བཟུང་ལ། རླུང་བུམ་པ་ཅན་འཛིན་ཞིང་ཐོག་མར་ལྟོ་བའི་སྨད་གཡས་སུ་བསྐོར། གཡོན་དུ་བསྐོར་བ་ལན་གསུམ་གསུམ་བྱ། དེ་ནས་རྐེད་པ་གཡས་སུ་གཅུ་བ་དང༌། གཡོན་དུ་གཅུ་བ་དང༌། ལུས་བསྐྱེད་ཅིང་རྐེད་པ་མདུན་དུ་ཕུལ་བ་དང་ལུས་རྒུར་ཞིང་རྒྱབ་ཏུ་འཕུལ་བ་དང༌། དེ་ཀའི་ངང་ནས་འཕར་ཞིང་རྡེག་པ་རྣམས་ལན་གསུམ་གསུམ་བྱའོ། །ལུག་གི་འདུག་སྟངས་ནི། ལངས་ལ་རླུང་འཁྲབས་ཤིག་བྱས། དེ་ནས་ལུས་རྒུར་ཞིང་པུས་མོ་གཉིས་བར་ཐག་མཐོ་ཕྱེད་དོ་ཙམ་ཡོད་པར་བཅས་ཏེ་ས་ལ་བཙུགས། ལག་པ་གཉིས་ཀྱང་མདུན་དུ་མཐོ་གང་ཡོད་པར་བྱས་ལ་ས་ལ་བཙུགས། ལག་པ་གཡོན་མ་གུག་པར་བྱ་ཞིང༌། གཡས་པའི་ངར་དང་གྲུ་མོ་ས་ལ་བཞག་ཅིང༌། མགོ་གཡས་ཕྱོགས་ས་ལ་ཐུག་ཙམ་བྱ། དེ་ནས་ལག་པ་གཉིས་བསྲངས་ལ་ལུས་སྤྲུག་གོ །ལུས་འདར་ཐོན་པ་སྤྲུག །གཡོན་ཕྱོགས་སུའང་དེ་བཞིན་བྱ། དེ་ནས་ལག་པ་གཉིས་ཅར་གྱི་གྲུ་མོ་དང་ལག་ངར་ས་ལ་བཞག་ཅིང༌། དཔྲལ་བ་ས་ལ་ཐུག་ཙམ་བྱ། དེ་ནས་ལག་པ་གཉིས་བསྲངས་ལ་ལུས་སྤྲུག་གོ །བྱི་ལའི་འདུག་སྟངས་ནི། བུམ་པ་ཅན་བཟུང་ཞིང་རླུང་འཁྲབས་ཤིག་བྱས་ལ། དེ་ནས་ལུས་སྒུར་ཞིང་ལག་པ་གཉིས་མདུན་དུ་ས་ལ་བཙུགས། རྐང་མགོ་གཉིས་ཀྱང་ས་ལ་བཙུགས། ཨུཾ་གི་སྒྲས་སྟོང་འདྲེན་བྱ་ཞིང༌། མགོ་དང་རོ་སྟོད་རྒུར། རྒྱབ་ཤད་གྱེན་དུ་འཐེན་ཅི་ཐུབ་བྱ། དེ་ནས་མགོ་དང་རོ་སྟོད་བསྒྱེད་ཅིང༌། ལུས་སྨད་འབུར་གྱིས་ཡོང་བར་བྱའོ། །ཅེ་སྤྱང་གི་འདུག་སྟངས་ནི། འཕོངས་ས་ལ་མ་རེག་པར་རྐང་པའི་བྲང་ས་ལ་བཙུགས། ལག་པ་གཉིས་ཁུ་ཚུར་བཅངས་པ་མདུན་དུ་ས་ལ་བཞག །ཧཱུྃ་གི་སྒྲས་སྟོང་འདྲེན་བྱའོ། །དེ་ནས་སེང་གེའི་རྣམ་རོལ་ལོ། །འཁོར་ལོ་བསྐོར་བ་ནི། བུམ་པ་ཅན་གྱི་ངང་ལས། རྣ་བ་དཔུང་མགོ་ལ་ཐུག་པའི་མགོ་གཡས་སུ་ལན་གསུམ་བསྐོར་བ་དང༌། གཡོན་དུ་ལན་གསུམ་བསྐོར་བ་བྱ། དེ་ནས་ལག་པ་གཡས་ཁུ་ཚུར་བཅངས་པ་ཕྱི་ནང་དུ་ལན་གསུམ་གསུམ་བསྐོར་རོ། །དེ་བཞིན་དུ་གཡོན་པའང་བསྐོར། ལྟེ་བ་མན་ཆེར་མ་ཡོ་བར་བཅས་ལ། མགོ་དང་རོ་སྟོད་གཡས་གཡོན་དུ་ལན་གསུམ་གསུམ་བསྐོར། ཕོ་བ་སོགས་རོ་སྨད་གཡས་གཡོན་དུ་ལན་གསུམ་གསུམ་བསྐོར། དེ་ནས་ལངས་ལ་རྐང་པ་གཡས་ཕྱི་ ནང་དུ་ལན་གསུམ་གསུམ་བསྐོར་ལ། རྐང་མགོ་འཕོངས་ལ་བརྡེག །རྐང་པ་གཡོན་པའང་དེ་བཞིན་བྱའོ། །ཞགས་པ་འཕེན་པ་ནི། བུམ་པ་ཅན་གྱི་ངང་ནས། མགོ་མདུན་རྒྱབ་ཏུ་ཕྱང་ཕྱང་འཕེན་པ་དང༌། གཡས་གཡོན་དུའང་འཕེན་པ་སྟེ་ལན་གསུམ་གསུམ་མོ། །ལག་པ་གཡས་ཀྱི་སོར་མོ་རྣམས་བརྐྱངས་ཏེ་འཕེན་པ་དང༌། ཁུ་ཚུར་བཅངས་ཏེ་དཔུང་མགོ་ལ་བརྡེག་པ་ལན་གསུམ་གསུམ་བྱ་ཞིང་གཡོན་པའང་དེ་བཞིན་བྱ། དེ་ནས་སྐྱིལ་ཀྲུང་ས་ནས་བཏེགས་པར་བྱས་ལ། གན་རྐྱལ་དུ་འགྱེལ་བ་དང་ཡང་ལངས་ལ་མདུན་དུ་ཁ་སྦུབས་བྱས་ཏེ་དཔྲལ་བ་ས་ལ་རེག་པ་ཙམ་ཡོང་བར་བྱ་བ་སྟེ་མདུན་རྒྱབ་ཏུ་ལན་གསུམ་དང༌། གཡས་གཡོན་གྱི་པུས་མོ་ས་ལས་མ་བཏེགས་པར་བྱས་ལ། མགོ་གཡས་གཡོན་གྱི་ས་ལ་རེག་པ་ཙམ་ཡོང་བའང་ལན་གསུམ་གསུམ་བྱའོ། །དེ་ནས་ལངས་ལ་རྐང་པ་གཡས་མདུན་དུ་ལན་གསུམ་བརྐྱང་བསྐུམ་བྱེད་པ་དང༌། དེ་བཞིན་དུ་གཡས་དང་རྒྱབ་རྣམས་སུའང་བྱ་ཞིང༌། གཡོན་པའང་དེ་བཞིན་བྱས་ལ་མཐར་འབེབས་བྱའོ། །སྐེ་རགས་འཆིང་བ་ནི། ལག་གཉིས་ཁུ་ཚུར་གཤིབ་པ་རྐེད་པ་ལ་ཤུགས་དང་ལྡན་པས་སྐེ་རགས་འཆིང་བའི་ཚུལ་བྱ་ཞིང་རླུང་བུམ་པ་ཅན་དྲག་ཏུ་བཟུང་ལ། རོ་སྟོད་ཅུང་ཟད་གྱེན་དུ་བསྒྱེད་ཅིང་ལན་གསུམ་བྱའོ། །བཅོ་བརྒྱད་སྤྲུག་ནི། རླུང་བཟུང་ལ་བཅའ་གཞི་དང་བཅས་ལངས་ལ། དེ་ནས་ལག་པ་གཉིས་སྟེང་དུ་འཕངས་པ་མཉམ་དུ་ལན་གསུམ་འཕར་བ་དང༌། དེ་ནས་ཀྱང་ལན་གསུམ་འོག་ཏུ་སྡིགས་པ་དང༌། དེ་ནས་ལག་པ་གཉིས་ཀྱིས་རྐང་པའི་སོར་མོ་ནས་བཟུང་ལ་ལུས་རྒུར་ཞིང་དགང་འདྲེན་དང་སྟོང་འདྲེན་བྱ་བ་ནི། སྟེང་དུ་འཐེན་པ་དང༌། དེ་ནས་ལག་པ་གཉིས་ཀྱིས་རྐང་པའི་གཤོག་པ་ནས་བཟུང་ལ། དགང་འདྲེན་དང་སྟོང་འདྲེན་བྱ་བ་ནི། ཐད་ཀར་འཐེན་པ་དང༌། དེ་ནས་གན་རྐྱལ་དུ་བྱས་ལ། ལག་པ་གཉིས་ཀྱིས་རྐང་པའི་སོར་མོ་ནས་བཟུང་ཞིང༌། སྲུབ་པ་དང་བཅས་དགང་འདྲེན་སྟོང་འདྲེན་བྱ་བ་ནི། འོག་ཏུ་འཐེན་པ་དང༌། དེ་ནས་གན་རྐྱལ་དུ་བསྡད་པའི་ངང་ནས་རྐང་ལག་བཞི་དུས་གཅིག་ཏུ་སྤྲུག་ཅིང་བརྐྱངས་བསྐུམས་ལན་གསུམ་བྱས་པའི་མཐར་རྒྱབ་འཕར་གཅིག་བྱའོ། ། དེ་ལྟར་ལུས་སྦྱོང༌དང་། རླུང་སྦྱོར་དེ་རྣམས་ཡུན་རིང་དུ་གོམས་པར་བྱས་ལ། ཐོག་མར་ཡེ་ཤེས་ཀྱི་ཕྱག་རྒྱ་དང་ལག་པའི་ཕྱག་རྒྱ་ལ་བསླབ། དེ་ནས་མཚན་ཉིད་དང་ལྡན་པའི་ཕྱག་རྒྱ་རབ་ལམ་བསྒོམ་པ་ལ་ཡེ་ཤེས་ ཅུང་ཟད་སྐྱེས་པ། དེ་ལྟར་མིན་ཡང་དམ་ཚིག་དང་ལྡན་པ། གསང་སྔགས་ལ་མོས་པ་ཐོབ་པ་ཞིག་ངེས་པར་དགོས་པ་ཡིན་ནོ། །དེ་ཉིད་ཀྱི་ཐོག་མར་གཟུགས་ལ་བལྟ་བའི་རྗེས་ཆགས་ཀྱི་བདེ་བ་བསྒོམས་ལ། བཟུང་བ་དང༌། བཟློག་པ་དང༌། དགྲམ་པ་དང༌། ཁྱབ་པར་བྱ། དེ་བཞིན་དུ་སྒྲ་དང༌། དྲི་དང༌། རོ་དང༌། ཕྱིའི་རེག་བྱ་རྣམས་ལ་བརྟེན་ནས་རྗེས་ཆགས་ཀྱི་བདེ་བ་བསྒོམ་པའང་སྔར་བཞིན་བསླབ། དེ་ནས་རང་ཉིད་ལྷག་པའི་ལྷ་དང༌། ཕྱག་རྒྱ་འཁོར་ལོའི་དབང་ཕྱུག་མར་བསྒོམས་ལ་མཁའ་གསང་བྱིན་རླབས་དང༌། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས་པའང་དྲན་པར་བྱས་ལ། ཐབས་ཤེས་མཉམ་པར་སྦྱར་བའི་ཐོག་མར་དགའ་བ་ཙམ་ལ་བཟུང་བཟློག་ཁྱབ་དགྲམ་རྣམས་བྱ། དེ་ནས་མཆོག་དགའ་དང༌། ཁྱད་དགའ་དང༌། མཐར་ལྷན་སྐྱེས་ཀྱི་བར་དུ་བྱའོ། །དེ་ཡང་རྩ་མདུད་ཅུང་ཟད་གྲོལ་བ་རྣམས་ལ་དགའ་བ་བཞི་འཆར་བ་གསལ་པོ་ཤེས་ཀྱང༌། ལས་དང་པོ་བ་རྣམས་ལ་གསལ་པོར་ཤེས་པ་དཀའ་ཡང༌། སྤྱི་ཆ་ཤས་ཙམ་འཆར་བ་ནི་ངེས་པ་ཡིན་ནོ། །ཐབས་ཤེས་མཉམ་པར་སྦྱོར་བ་དང་མ་བྲལ་བའི་དུས་དེར་བཟུང་བའི་ཐབས་ནི་འོག་སྒོ་དྲག་ཏུ་ལྷོད། སྟེང་རླུང་ཕྱིར་བུས་ལ། ཕྱི་རོལ་དུ་བཟུང་བཞིན་པའི་ངང་ནས། ལྟོ་བ་ཚིགས་པ་ལ་གཅེར་བྱ། ཡང་རླུང་ཕྱི་རོལ་དུ་བཟུང་བཞིན་པའི་ངང་ནས། ལྟོ་བ་ཕྱིར་བསྐྱེད་པ་རྣམས་བྱ་ཞིང༌། སྟེང་རླུང་ནང་དུ་རྔུབ་པ་དང༌། གསང་གནས་དང༌། བཤང་སྒོའི་ བར་དུ་སྡིགས་ཤིང་གཏུན་བརྡུང་བ་ལྟར་བྱ་བ་ནི་བཟུང་བ་དང༌། བཟློག་པ་ནི་ཧཱུྃ་གི་སྒྲས་སྟོང་འདྲེན་བྱ་བ་དང༌། རླུང་ཁ་སྦྱོར་དུ་བཟུང་བ་བགྲང་འདྲེན་བྱ་བ་དང༌། མ་ནིང་གྲུག་གཞུད་རྣམས་བྱེད་དོ། །དགྲམ་པ་ནི་ཉྭ་བཞི་རྣམས་ལྷོད་གློད་པའོ། །དེ་ནས་གོང་དུ་བསྟན་པ་ལྟར་གྱིས་ལུས་སྦྱོང་འཁྲུལ་འཁོར་ཐམས་ཅད་བྱ་ཞིང༌། དེ་ནས་འཇམ་རླུང་བུམ་པ་ཅན་བཟུང་ལ། སེམས་ཀྱི་རང་ངོ་བལྟ་ཞིང་མི་རྟོག་པར་འཇོག་པ་ནི། རླུང་དང་བསྲེ་ཞིང་ཡེ་ཤེས་ཆེན་པོར་སྐྱེལ་བའོ། །དྲུག་པ་མན་ངག་ཐོར་བུ་ལ། ཐོག་མར་ཡི་དམ་བསྒོམ་པའི་མན་ངག་ནི། རང་གང་བསྒོམས་པའི་ཡི་དམ་རིགས་གང་ཡིན་པ་བརྟགས་ཏེ། རྡོ་རྗེའི་རིགས་ཡིན་ན་སྙིང་ག་དང༌། རིན་པོ་ཆེའི་རིགས་ཡིན་ན་ལྟེ་བ་དང༌། ལས་ཀྱི་རིགས་ཡིན་ན་གསང་གནས་དང༌། པདྨའི་རིགས་ཡིན་ན་མགྲིན་པ་དང༌། རྣམ་སྣང་རིགས་ཡིན་ན་སྤྱི་བོའི་འཁོར་ལོར་བསྒོམ་མོ། །དེ་ཡང་རང་ལུས་ཀྱི་རྩ་འཁོར་པདྨའི་གཞལ་ཡས་ཁང་གི་དབུས་སུ་ཡི་དམ་གྱི་ལྷ་བསྒོམ། དམིགས་པ་གསལ་ན། དེའི་ཐུགས་ཀར་ས་བོན་སྔགས་ཕྲེང་དང་བཅས་པའང་བསྒོམས་ལ་དེ་རྣམས་ལ་དམིགས་པ་གཏད་ཅིང༌། སྣང་སྟོང་སྒྱུ་མ་ལྟ་བུའི་ཤེས་པས་སྔགས་བཟླ་ཞིང༌། ཐུན་འཇོག་ཁར་མཆོད་པ་དཔག་ཏུ་མེད་པ་བློས་སྤྲུལ་ཏེ་ཕུལ་ལ་གསོལ་བ་གདབ། ཐུན་མཚམས་སུ་ཡང་ཁ་ཟས་ཟ་བའི་ཚེ། ཡི་དམ་ལ་མཆོད་པ་ཕུལ་བར་མོས་སོ། །ལྷ་བསྒོམ་པའི་ཚུལ་འདི་ནི་རང་ལུས་ཀྱི་ རྩ་འཁོར་རྣམས་སུ་བསྒོམས་པས་རྫོགས་རིམ་དང་ཤིན་ཏུ་མཐུན་པའི་རྣལ་འབྱོར་རོ། །བླ་མ་བསྒོམ་པའི་མན་ངག་ལ། ཕྱི་སྒྲུབ་དང་ནང་སྒྲུབ་གཉིས་ལས། དང་པོ་ལའང་ཕྱི་ནང་གསང་གསུམ་ལས། དང་པོ་ནི། རང་གི་མདུན་དུ་བླ་མ་བསྒོམ། དེའི་ཐུགས་ཀར་ཐུགས་གཉིས་སུ་མེད་པའི་ཡེ་ཤེས་བཅོམ་ལྡན་འདས་ཤཱཀྱ་ཐུབ་པ་ལ་འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་བར་བསམས་ལ། ཕྱག་འཚལ་བ་དང༌། མཆོད་པ་ཕུལ་བ་དང༌། གསོལ་བ་གདབ་པ་རྣམས་བྱས་རྗེས། བླ་མའི་མཚན་ལ་དེ་ཉིད་གསུམ་སྤེལ་བྱས་པའི་བཟླས་པ་བྱ་སྟེ། དཔེར་ན། ༀ་ཨཱཿ རིན་ཆེན་རྡོ་རྗེ་ཧཱུྃ་ཧཱུྃ་ཞེས་པ་ལྟ་བུའོ། །གཉིས་པ་ནི། བླ་མ་མདུན་དུ་བསྒོམས་པ་དེའི་ཐུགས་ཁར་ཐུགས་གཉིས་སུ་མེད་པའི་ཡེ་ཤེས་རྡོ་རྗེ་འཆང་དར་དང་རིན་པོ་ཆེས་བརྒྱན་པ་དང་འཁོར་ལོས་བསྒྱུར་བའི་རྣམ་པ་ཅན། འཁོར་སངས་རྒྱས་བྱང་ཆུབ་སེམས་དཔའ་འཁོར་ལོས་བསྒྱུར་བའི་རྣམ་པ་ཅན་དཔག་ཏུ་མེད་པས་བསྐོར་བ་བསམས་ལ། ཕྱག་འཚལ་ནས་བཟླས་པའི་བར་གོང་བཞིན་ནོ། །གསུམ་པ་ནི། བླ་མའི་ཐུགས་ཀར་ཐུགས་གཉིས་སུ་མེད་པའི་ཡེ་ཤེས་དཔལ་ཧེ་རུ་ཀའི་རྣམ་པས་བཞུགས་པ་ལ། འཁོར་དཔའ་བོ་མཁའ་འགྲོ་དཔག་ཏུ་མེད་པས་བསྐོར་བར་བསམས་ལ་ཕྱག་འཚལ་བ་སོགས་གོང་བཞིན་ནོ། །གཉིས་པ་ནང་སྒྲུབ་ནི། མདུན་དུ་བླ་མ་བསྒོམས་ལ་མོས་གུས་དུང་བ་བྱས་གསོལ་བ་བཏབ་པས། བླ་མ་འོད་དུ་ཞུ་ནས་རང་ལ་ཐིམ་པས། རང་གི་སྤྱི་བོའི་འཁོར་ལོ་པདྨའི་གཞལ་ཡས་ཁང་གི་དབུས་སུ། བླ་མ་རྣམ་པར་སྣང་མཛད་སྐུ་མདོག་དཀར་པོ་གཡས་འཁོར་ལོ་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་སྤྱན་མ་དཀར་མོ་དང་མཉམ་པར་སྦྱོར་བ། མགྲིན་པའི་བླ་མ་འོད་དཔག་མེད་སྐུ་མདོག་དམར་པོ་གཡས་པདྨ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་གོས་དཀར་མོ་དམར་མོ་དང་མཉམ་པར་སྦྱོར་བ། སྙིང་གར་བླ་མ་མི་བསྐྱོད་པ་སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པ་ཡུམ་རྡོ་རྗེ་དབྱིངས་ཀྱི་དབང་ཕྱུག་མས་འཁྱུད་པ། ལྟེ་བར་བླ་མ་རིན་ཆེན་འབྱུང་ལྡན་སྐུ་མདོག་སེར་པོ་གཡས་རིན་པོ་ཆེ་དང༌༑ གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་རིན་ཆེན་སྒྲོལ་མ་དང་མཉམ་པར་སྦྱོར་བ། གསང་གནས་སུ་བླ་མ་དོན་ཡོད་གྲུབ་པ་སྐུ་མདོག་ལྗང་གུ་གཡས་རལ་གྲི་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་དམ་ཚིག་སྒྲོལ་མ་དང་མཉམ་པར་སྦྱོར་བ་སྟེ། གནས་ལྔར་བླ་མ་རིགས་ལྔ་ཡབ་ཡུམ་བསྒོམས་ལ། བླ་མའི་མཚན་དང༌། རིགས་ལྔ་སོ་སོའི་ས་བོན་ལ་དེ་ཉིད་གསུམ་སྤེལ་བའི་བཟླས་པ་བྱ་བ་སྟེ། ༀ་ཨཱཿ རིན་ཆེན་རྡོ་རྗེ་བྷྲཱུྃ་ཧཱུྃ་ཞེས་པ་དང༌། དེ་བཞིན་དུ། ཛྲ་ཧཱུྃ་དང༌། ཧཱུྃ་ཧཱུྃ་དང༌། ཨཱཿ ཧཱུྃདང༌། ཁཾ་ཧཱུྃ་ཞེས་པ་རྣམས་བཏགས་པ་བཟླ་བར་བྱའོ། །བར་ཆད་བསལ་བའི་མན་ངག་ལ། གོ་རཀྵ་དང༌། བི་རཱུ་པའི་ལུགས་གཉིས་ལས། དང་པོ་ནི། ཐོག་མར་རང་གི་ལུས་ངག་ཡིད་གསུམ་ལ་ཤེས་པ་གཏད་དེ། འདི་ལྟར་དུ་སྣང་བ་ནི་མེད་བཞིན་དུ་འཁྲུལ་པ་སྒྱུ་མ་ལྟ་བུའོ་སྙམ་དུ་བསམས་ལ། དེ་ནས་རང་གི་ལུས་ངག་ཡིད་གསུམ་གྱི་ངོ་བོ་ལ་ཆེར་གྱིས་བལྟས་ཤིང་བཙལ་བ་ན། རིག་ངོར་གང་ཡང་མ་རྙེད་པའི་ངོས་བཟུང་ཐམས་ཅད་དང་བྲལ་བ་དེའི་ངང་ལ་ཅི་གནས་སུ་མཉམ་པར་བཞག་པ་ནི་དམིགས་སྐོར་དང་པོ་དང༌། དེ་ལ་ཅུང་ཟད་གོམས་པ་ན། དེ་ནས་རང་དབང་བའི་གནས་ཁང་དང་ལོངས་སྤྱོད་འཁོར་གཡོག་ལ་སོགས་པ་རྣམས་ལ་འདི་ཐམས་ཅད་མེད་བཞིན་དུ་སྣང་བ་སྒྱུ་མ་ལྟ་བུའོ་སྙམ་དུ་བསྒོམ་པ་དང༌། དེ་དག་གི་ངོ་བོ་ལ་ཆེར་གྱིས་བལྟས་ཏེ་ངོས་བཟུང་བྲལ་བའི་ངང་ལ་མཉམ་པར་འཇོག་པ་ནི་དམིགས་སྐོར་གཉིས་པ་དང༌། དེ་ནས་དགྲ་སྡང་བ་ལ་སྔར་བཞིན་བསྒོམ་པ་དམིགས་སྐོར་གསུམ་པ་དང༌། གཉེན་བྱམས་པ་ལ་བསྒོམ་པ་དམིགས་སྐོར་བཞི་པ་དང༌། དེ་ནས་མཐོང་ཐོས་སུ་གྱུར་པ་ཡུལ་ཉེ་སར་གནས་པ་རྣམས་ལ་བསྒོམ་པ་དམིགས་སྐོར་ལྔ་པ་དང༌། མཐར་སྣང་བ་ཐམས་ཅད་ལ་བསྒོམ་པ་དམིགས་སྐོར་དྲུག་པའོ། །དེ་རྣམས་ལ་རིམ་གྱིས་བསླབ་སྟེ་གོམས་པར་གྱུར་པ་ན། ཐོག་མར་ཚ་གྲང་ལ་སོགས་རྐྱེན་ཕྲན་བུ་ལ་ཧཱུྃ་གི་སྒྲས་རྣམ་པར་མི་རྟོག་པའི་དབྱིངས་སུ་བསྐྱེལ་བ་དང༌། དེ་ནས་ཆགས་སྡང་བདེ་སྡུག་འཇིགས་སྐྲག་སོགས་འཆར་སྒོ་ཐམས་ཅད་ཧཱུྃ་གི་སྒྲས་དབྱིངས་སུ་གཅོད་པས་རང་གི་ཁྱིམ་དུ་བསྒོམ་ཞིང༌། དེ་ནས་དུར་ཁྲོད་དང༌། ཚོང་འདུས་དང༌། འདྲེ་གདོན་གྱི་གནས་རྣམས་སུ་སྨྱོན་པར་བརྫུས་ཏེ་ཕྱིན་པ་ན། དེར་འདྲེ་གདོན་གྱི་ཆོ་འཕྲུལ་དང༌། སྐྱེ་བོ་རྣམས་ཀྱི་བསྟོད་སྨད་སོགས་རྐྱེན་བཟང་ངན་ཐམས་ཅད་ཧཱུྃ་གི་སྒྲས་རྣམ་པར་མི་རྟོག་པའི་དབྱིངས་སུ་བསྐྱལ་ལོ། །གཉིས་པ་བི་རཱུ་པའི་ལུགས་ལ་ཡང༌། ལས་དང་པོ་བའི་ཉམས་ལེན་དང༌། རང་གི་ཁྱིམ་དུ་རྐྱེན་དང་བསྲེ། མཐར་དུར་ཁྲོད་ལ་སོགས་པར་རྒྱུ་བ་སྟེ་སྔར་བཞིན་གསུམ་ལས། དང་པོ་ལ༑ སྙིང་རྗེ་བསྒོམ་པ་དང༌། སྟོང་ཉིད་བསྒོམ་པ་གཉིས་ལས། དང་པོ་ནི། སེམས་ཅན་ཐམས་ཅད་དྲིན་ཅན་གྱི་ཕ་མ་ཡིན། འདི་དག་གིས་བསྐྱེད་པའི་གནོད་པ་བདག་ལ་བྱུང་བའང་སྐྱེ་ཤི་འཕོས་ནས་ངོ་མ་ཤེས་པས་ལེན་པ་ཡིན་སྙམ་དུ་བསམས་ལ་སྙིང་རྗེ་དྲག་ཏུ་བསྒོམ་པ་ནི་དམིགས་སྐོར་དང་པོ་དང༌། དེ་ནས་བདག་བདེ་བ་འདོད་པ་བཞིན་དུ་སེམས་ཅན་རྣམས་ཀྱང་བདེ་བ་འདོད། བདག་སྡུག་བསྔལ་མི་འདོད་པ་བཞིན་དུ་སེམས་ཅན་རྣམས་ཀྱང་སྡུག་བསྔལ་མི་འདོད་པས། དེ་ལྟར་ན་ནམ་མཁའ་དང་མཉམ་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་སྙམ་དུ་བསྒོམ་པ་ནི་དམིགས་སྐོར་གཉིས་པ་དང༌། དེ་ནས་སེམས་ཅན་རྣམས་ཉོན་མོངས་པས་སེམས་དཀྲུགས་ཏེ་ལས་བསགས། དེས་འཁོར་བར་འཁྱམས་ཏེ་སྡུག་བསྔལ་མྱོང་བ་སྙིང་རེ་རྗེ་སྙམ་དུ་བསྒོམ་པ་ནི་དམིགས་སྐོར་ གསུམ་པ་དང༌། དེ་ནས་དོན་དམ་པར་སེམས་ཅན་ཀྱང་བདེན་པར་མ་གྲུབ། དེ་དག་གིས་མྱོང་བའི་སྡུག་བསྔལ་ཡང་བདེན་པར་མ་གྲུབ། རང་བཞིན་སྟོང་པ་ཉིད་ཡིན་ཡང་དེ་ལྟར་མ་རྟོགས་པར་སྡུག་བསྔལ་མྱོང་བའི་སེམས་ཅན་འདི་རྣམས་སྙིང་རེ་རྗེ་སྙམ་དུ་བསྒོམ་པ་ནི་དམིགས་སྐོར་བཞི་པའོ། །གཉིས་པ་ནི། སྣང་བ་ཐམས་ཅད་རང་གི་སེམས་ཡིན། སེམས་ལས་ལོགས་སུ་གྲུབ་པ་ཅུང་ཟད་ཀྱང་མེད་སྙམ་དུ་བསྒོམ་པ་ནི་དམིགས་སྐོར་དང་པོ་དང༌། དེ་ནས་སེམས་ཀྱི་ངོ་བོ་ཡང་མ་གྲུབ་སྟེ། ངོས་བཟུང་ཐམས་ཅད་དང་བྲལ་བ་སྟོང་པ་ཉིད་ཀྱི་ངང་ལ་བཞག་གོ །དེ་ནས་སྟོང་པའི་ངང་ལས་སྣང་བ་ཐམས་ཅད་ལྷ་སྐུར་ལམ་སྟེ་བསྒོམ་པ་ནི། སྟོང་པའི་ངང་ལས་དག་པའི་སྣང་བ་བསྒོམ་པ་དང༌། ཡང་ན་སྟོང་པའི་ངང་ལས་མ་དག་པའི་སྣང་བ་བསྒོམ་པ་ནི་ཤར་བའི་ཚེ། རང་གི་ལུས་དུམ་བུ་བརྒྱ་སྟོང་དུ་མར་བཏུབས་ཏེ། སངས་རྒྱས་བྱང་ཆུབ་སེམས་དཔའ་ཐམས་ཅད་ལ་མཆོད་པས་མཉེས། རིགས་དྲུག་རྣམས་རང་རང་སོ་སོའི་བསམ་པ་དང་མཐུན་པའི་ལོངས་སྤྱོད་བྱུང་སྟེ་ཚིམ་པར་བསམ། ཁྱད་པར་ཡང་ལོག་འདྲེན་བགེགས་ཀྱི་ཚོགས་རྣམས་ཤ་ཁྲག་གི་གཏོར་མས་ཚིམ་པར་མོས། མཐར་དེ་རྣམས་ཀྱི་སེམས་དང་རང་གི་སེམས་སྟོང་པ་ཉིད་དུ་བསྲེས་ལ་མཉམ་པར་བཞག་གོ །དེ་རྣམས་ལ་ཅུང་ཟད་གོམས་པར་གྱུར་པ་ན། རང་ཁྱིམ་དུ་ཚ་གྲང་ལ་སོགས་པའི་རྐྱེན་ཆེད་གཏད་ཡོང་བར་བྱས་ཏེ། སྟོང་ཉིད་སྙིང་རྗེ་ ལམ་དུ་ཁྱེར། དེ་ནས་རང་ཁྱིམ་དུ་རྐྱེན་སྣ་ཚོགས་དང་བསྲེ་བ་ལ་གོམས་པ་ན། དུར་ཁྲོད་དང༌། ཚོང་འདུས་དང༌། འདྲེ་གདོན་ཐམས་ཅད་ཀྱི་གནས་སུ་ཕྱིན་ལ་རྐྱེན་བཟང་ངན་ཐམས་ཅད་དང་བསྲེ་བར་བྱའོ། ། སེམས་འཛིན་གྱི་མན་ངག་ལ། སྤྱིར་བཀའ་བབས་དྲུག་ལྡན་གྱི་མན་ངག་འདི་ལ་སེམས་འཛིན་གྱི་རྣམ་གྲངས་ལྔ་བརྒྱ་ཙམ་ཡོད་ཀྱང༌། འདིར་དཀྱུས་སུ་གསུངས་པ་ལ་བཅུ་དྲུག་ཙམ་ལས། ཐོག་མར་ཞག་འགའ་ལུས་གནད་ཇི་ལྟར་བདེ་བ་ཞིག་བཅས་ལ། བྱ་བྱེད་ཐམས་ཅད་སྤངས་ཏེ་གང་ཡང་མི་བསྒོམ་པར་བསྡད། དེ་ནས་ཐོ་རངས་ལྟ་བུ་རིག་པ་དྭངས་པ་ཞིག་ལ། རང་ཉིད་ཀྱི་ལུས་རི་ཞིག་ཏུ་གྱུར་པར་བསམས་ལ། དེའི་རི་སུལ་དང༌༑ དེ་ལ་གནས་པའི་ཤིང་དང་ཆུ་འབབ་ཚུལ་སོགས་ལ་རིམ་གྱིས་སེམས་གཏད། ཡང་འཕྲོ་བཅད་ཅིང་བསྒོམ་པ་ནི་དམིགས་པ་དང་པོ་དང་། ཡང་རང་གི་ལྟེ་བའི་ཐད་ཙམ་དུ་ནེའུ་སེང་ཡིད་དུ་འོང་བ་ཞིག་བསམ། དེའི་ཕྱོགས་ཤིག་ཏུ་ཤིང་སྡོང་པོ་ལོ་འདབ་ལྡན་པ་ཞིག་ལྡེམ་ཅུག་གེ་འདུག་པ་ལ་སེམས་གཏད་ཅིང༌། ཡང་འཕྲོ་བཅད་ཀྱིན་བསྒོམ་པ་ནི་དམིགས་པ་གཉིས་པ་དང༌། ཡང་རང་གི་སྙིང་གའི་ཐད་དུ་ས་གཞིའི་དབུས་སུ་མཚོ་ཤིན་ཏུ་དྭངས་པ་མེ་རེ་བ་ལ་ཆུ་གཉེར་ཤིག་ཤིག་འདུག་པ་ལ་སེམས་འཛིན་ཞིང༌། སླར་འཕྲོ་བཅད་ཀྱིན་བསྒོམ་པ་ནི་དམིགས་པ་གསུམ་པ་དང༌། ཡང་རང་ཉིད་ཀྱི་སྤྱི་བོའི་སྟེང་ན་ནམ་མཁའ་དེའི་ཡང་སྟེང་ན་རྒྱལ་ཆེན་ རིགས་བཞི། དེའི་སྟེང་ན་སུམ་ཅུ་རྩ་གཉིས། དེའི་སྟེང་ན་གཟུགས་ཁམས། དེའི་སྟེང་ན་གཟུགས་མེད་ཁམས། དེའི་སྟེང་ན་འཇིག་རྟེན་གྱི་ཁམས་གཞན་ཞིག་གི་རླུང་གི་དཀྱིལ་འཁོར་ནས་གཟུགས་མེད་ཀྱི་ཁམས་ཀྱི་བར་དང༌༑ དེའི་སྟེང་ན་ཡང་འཇིག་རྟེན་གྱི་ཁམས་གཞན་ཞིག་གི་རླུང་གི་དཀྱིལ་འཁོར་ནས་གཟུགས་མེད་ཁམས་ཀྱི་བར་ལ་སེམས་གཏད་པ་སོགས་མང་པོ་ཞིག་སོང་བ་ན། དེ་བཞིན་གཤེགས་པ་ཚེ་དཔག་མེད་བཞུགས་པར་བསམས་ལ། དེར་ཤེས་པ་གཏད་ཅིང་སླར་འཕྲོ་བཅད་ཀྱིན་ཡང་ཡང་བསྒོམ་པ་ནི་དམིགས་པ་བཞི་པ་དང༌། ཡང་རང་གི་འོག་ཕྱོགས་ན་ས་ཡི་དཀྱིལ་འཁོར་དང༌། དམྱལ་བའི་གནས་རྣམས་རིམ་པ་བཞིན་དང༌། ཆུའི་དཀྱིལ་འཁོར་དང༌། དེའི་འོག་ན་རླུང་གི་དཀྱིལ་འཁོར་དང༌། དེའི་འོག་ན་འཇིག་རྟེན་ཁམས་གཞན་ཞིག་གི་གཟུགས་མེད་ཁམས་ནས་རླུང་གི་དཀྱིལ་འཁོར་གྱི་བར་དང༌། དེའི་ཡང་འོག་ནས་འཇིག་རྟེན་གྱི་ཁམས་གཞན་ཞིག་གི་གཟུགས་མེད་ཁམས་ནས་རླུང་གི་དཀྱིལ་འཁོར་གྱི་བར་ལ་ཤེས་པ་གཏོད་པ་སོགས་མང་པོ་ཞིག་སོང་བ་ན། དེ་བཞིན་གཤེགས་པ་ཐལ་བའི་དབང་པོ་བཞུགས་པར་བསམས་ལ་དེ་ལ་སེམས་ཅུང་ཟད་ཅིག་གཏད། སླར་འཕྲོ་བཅད་ཀྱིན་བསྒོམ་པ་ནི་དམིགས་པ་ལྔ་པ་དང༌། ཡང་ཡིད་ཀྱི་ཕོ་ཉ་བཏང་བ་བྱ་བ། རང་ཉིད་འདི་ཉིད་ན་ཡོད་པར་བསམས་པའི། རང་གཉིས་པ་ཞིག་ཕར་འགྲོ་བར་བསམ། རྒྱང་ཙམ་དུ་སླེབས་པ་ན། དེས་ཚུར་བལྟ་ཞིང༌། འདི་ནས་ཀྱང་ཕར་བལྟས་པར་བསམས་ལ། དེ་གཉིས་རིམ་པས་རི་བརྒལ་ཏེ་ཐག་རིང་པོར་ཕྱིན་པ་ན། ཡང་འདི་ནས་ཕར་བལྟ་བ་དང༌། ཕར་ནས་ཚུར་བལྟ་བར་བསམ་པ་ནི་དམིགས་པ་དྲུག་པ་དང༌། ཡང་རང་ཉིད་ཀྱི་འོག་ཕྱོགས་ལྟ་བུ་ཞིག་ཏུ་མཚོ་ཆུང་ངུ་ཞིག་བསྒོམ། དེ་རིམ་པས་ཇེ་ཆེ་དང༌། དཔང་ཇེ་མཐོ་ལ་སོང་ནས། མཐར་རང་གི་སྟེང་དང་ཕྱོགས་ཐམས་ཅད་ཆུས་བསྐོར་བའི་དབུས་ན། རང་ཉིད་འདུག་པར་བསམ་པ་ནི་དམིགས་པ་བདུན་པ་དང༌། ཡང་རང་གི་མདུན་ལྟ་བུ་ཕྱོགས་གང་ཡང་རུང་བ་ཞིག་ཏུ། དམིགས་རྟེན་གྱི་མར་མེ་ཞིག་བཞག །དེ་ལ་སྐབས་སྐབས་སུ་ཅུང་ཟད་བལྟ་ཞིང༌། གཞན་ཡིད་ཀྱིས་མར་མེ་གཡོ་བ་མེད་པ་ཞིག་བསྒོམ་སྟེ། དེ་ལ་སེམས་འཛིན་པ་ནི་དམིགས་པ་བརྒྱད་པ་དང༌། ཡང་རང་གི་གསང་གནས་སུ་མར་མེ་དགུ་རབ་ཏུ་གཡོ་བ་ལ་སེམས་འཛིན་པ་ནི་དགུ་པ་དང༌། ཡང་རང་ཉིད་ཡུལ་གང་ལ་སེམས་འཕྲོ་བར་གྱུར་པའི་དངོས་པོ་ཞིག་ལ་ཡིད་གཏོད་འཇོག །གཞན་ལ་སེམས་འཕྲོ་ན་དེ་ལ་འཕྲོ་བ་བཅད་དེ། སླར་དམིགས་རྟེན་སྔ་མ་དེ་ཀ་ལ་སེམས་འཇོག་པ་ནི་བཅུ་པ་དང༌། ཡང་རང་གི་ཡིད་དུ་འོང་བའི་དངོས་པོ་ཞིག་ལ་སེམས་འཛིན་རྣམ་རྟོག་གཞན་འཕྲོ་ན། སླར་རང་གི་གང་ཡིད་དུ་འོང་བའི་དངོས་པོ་དེ་ཀ་ལ་སེམས་འཇོག་པ་ནི་དམིགས་པ་བཅུ་གཅིག་པ་དང༌། ཡང་ལུས་གནད་རྐང་པ་མདུན་དུ་གཤིབས། རྒྱུ་མོ་ཁུང་གཉིས་ནས་ལག་པ་གཡས་གཡོན་གྱིས་ བཟུང་ལ། དེའི་ཐད་ཀྱི་རྐང་མཐིལ་དུ་འོད་ཟེར་འཕྲོ་བ་ལ་སེམས་འཛིན་པའམ། ཡང་ན་ཤིང་རིལ་མོ་སྦོམ་ཕྲ་འཚམས་པ་ཞིག་རྐང་པའི་རྒྱུ་མོ་ཁུད་དུ་བཅུག །རྐང་སོར་གཡས་གཡོན་ལག་པས་ཅུང་ཟད་བཟུང་ལ། ཤིང་གིས་རེག་པའི་རེག་བྱ་ཡོད་པ་དེར་སེམས་གཏོད་པ་ནི་གདན་ཁྲི་ལ་སེམས་འཛིན་པ་སྟེ་དམིགས་པ་བཅུ་གཉིས་པ་དང༌། ཡང་ཤོག་བུའམ་རས་ལྟ་བུའམ་གཞི་སྔོན་པོ་དེའི་དབུས་སུ་ལྗོན་ཤིང་ངམ་རི་ལྟ་བུ་ཞིག་བྲི། དེའི་རྩ་བར་མི་ཡི་གཟུགས་བརྙན་ཞིག་བྲིས་ལ། དེ་མདུན་དུ་དམིགས་རྟེན་དུ་བཞག་ལ། གཞི་སྔོན་པོ། ནེའུ་སེང་དང༌། དེའི་དབུས་སུ་རིའམ་ལྗོན་ཤིང་གང་རུང་ཞིག་ལ་རང་ཉིད་བསྐོར་བ་བྱེད་པ་ནི་དམིགས་པ་བཅུ་གསུམ་པ་དང༌། ཡང་རང་གི་སྤྱི་བོར་ཤིང་ལྟ་བུ་ཞིག་བཙུགས་ལ། དེའི་རེག་བྱ་ཡོད་པར་ནོར་བུ་འོད་འཕྲོ་བ་ཞིག་ལ་སེམས་འཛིན་པ་ནི་གཙུག་གི་ནོར་བུ་ལ་སེམས་འཛིན་པ་སྟེ་དམིགས་པ་བཅུ་བཞི་པ་དང༌། སྤྱི་བོར་ཤིང་ལྟ་བུ་འཇོག་པ་མི་བདེ་ན། ལག་པ་གཉིས་ཐལ་མོ་སྦྱར་བ་སྤྱི་བོར་བཞག་གོ །ཡང་ལག་པ་གཉིས་ཁུ་ཚུར་བརླ་སྟེང་དུ་བཞག །རོ་སྟོད་དང་ལྟག་པ་བསྒྱེད་བྱས་ལ། གདོང་གྱེན་དུ་ཕྱོགས་པས་མིག་བར་སྣང་ལ་བལྟ། ལུས་ ཀྱི་དབུས་སུ་འོད་ཀྱི་གོང་བུ་ཁ་དོག་ཇི་ལྟར་བདེ་བ་ཞིག་བསྒོམས་ལ། དེ་ལུས་ཀྱི་དབུས་ནས་ཡར་སོང༌། སྤྱི་བོ་ནས་ཐོན། ནམ་མཁའ་མཐོན་པོར་ཡལ་བར་བསྒོམ་པ་ནི་དམིགས་པ་བཅུ་དྲུག་པའོ། །གེགས་སེལ་གྱི་མན་ངག་ལ། རྩ་དང༌། རླུང་དང༌། ཐིག་ལེ་ལ་བརྟེན་པའི་གེགས་གང་ཡིན་ངོས་ཟིན་པར་བྱས་ལ། གྲང་བའི་ནད་རྣམས་ལྟེ་བའི་འཁོར་ལོའི་བྱེད་པ་ལ་བརྟེན་ནས་འབྱུང་བའི་དབང་དུ་མཛད་དེ། ཐོག་མར་བར་རླུང་བཟུང་བཞིན་པའི་ངང་ནས་རླུང་རོ་བསལ་སྟེང་རླུང་རྔུབ་ཅིང་འོག་རླུང་འཐེན་ལ་རླུང་གཉིས་ཁ་སྦྱོར་དུ་བཟུང༌། ལྟེ་བ་གཡས་གཡོན་དུ་ལན་གསུམ་བསྐོར་བ་དང༌། སྟེང་དུ་འཐེན་པ་དང༌། འོག་ཏུ་གནོན་པ་དང༌༑ ལྟོ་བ་ཚིགས་པ་ལ་གཅེར་ཏེ་རྒྱབ་ངོས་སུ་འཐེན་པ་དང༌། ལྟོ་བ་ཕྱིར་བསྐྱེད་པ་རྣམས་བྱས་ལ་རླུང་ཕྱིར་འབུད་པའི་ཚེ། གྲང་བའི་ནད་སོགས་མི་བདེ་བ་གང་ཡིན་པ་དེ་འོད་ཟེར་འཇའ་ཚོན་གྱི་རྣམ་པས་སྣ་སྒོ་དང་འོག་སྒོ་གཉིས་ནས་ཀྱང་བུན་བུན་ཐོན་པར་བསམ་མོ། །རླུང་ཕྱི་རོལ་དུ་འཛིན་པའི་ངང་ནས། ཁོང་ནས་སྟོང་པའི་ཤུགས་གཡས་གཡོན་དུ་བསྐོར་བ་དང༌། སྟེང་འོག་ཏུ་འཐེན་གནོན་བྱེད་པ་དང༌། རྒྱབ་མདུན་དུ་བཅོལ་བ་རྣམས་བྱེད་དོ། །ཁྲག་སོགས་ཚ་བའི་ནད་རྣམས་ལུས་ཀྱི་སྟོད་དུ་འབྱུང་བས། དེ་སེལ་བ་སྔར་བར་རླུང་བཟུང༌། དེ་རྗེས་རླུང་རྔུབས་ཏེ་ཁ་སྦྱོར་དུ་བཟུང༌། དེ་ཉིད་ཕོ་སྟོད་དུ་དྲངས་པ་ལ་ཕོ་སྟོད་དང༌། རོ་སྟོད་གཡས་གཡོན་དུ་བསྐོར་བ་དང༌། སྟེང་འོག་ཏུ་འཐེན་གནོན་དང༌། རྒྱབ་མདུན་དུ་བཅོལ་བ་རྣམས་བྱས་ལ། རླུང་ཕྱིར་བཏང་བའི་ཚེ། སྣ་བུག་དང་འོག་སྒོ་གཉིས་ནས་ནད་འཇའ་ཚོན་གྱི་རྣམ་པས་ཐོན་པར་བསམ། རླུང་ཕྱིར་ བཟུང་ལ་དེ་ཉིད་སྟོད་ཀྱི་ཆར་འཐེན་བྱས་ཏེ་མགོ་གཡས་གཡོན་དུ་བསྐོར་བ་དང༌། སྟེང་འོག་ཏུ་འཐེན་གནོན་དང༌། མདུན་རྒྱབ་ཏུ་བཅོལ་བ་རྣམས་བྱེད་པ་དང༌། ལག་པ་བསྐོར་ལ་བརྐྱང་བསྐུམ་བྱེད་ཅིང་སྤྲུག་པ་དང༌། རྐང་པ་ཡང་བརྐྱང་བསྐུམ་བྱེད་ཅིང་སྤྲུག་པ། རླུང་གཏོང་བའི་ཚེ་ནད་རྣམས་དབང་པོའི་སྒོ་རྣམས་དང༌། མགྲིན་པ་ཡན་གྱི་བ་སྤུའི་བུ་ག་རྣམས་དང༌། རྐང་ལག་གི་སེན་མོའི་གསེབ་རྣམས་ནས་བུན་བུན་ཐོན་པར་བསམ། རླུང་ཕྱི་རོལ་དུ་བཟུང་བཞིན་པས་མགོ་བོ་བསྐོར་བ་སོགས་བྱའོ། །རླུང་རེངས་བཅུའི་གེགས་སེལ་ནི། བུམ་པ་ཅན་ལ་སོགས་པའི་རླུང་གི་སྦྱོར་བ་བསྒོམ་པའི་གེགས་བྱུང་བའམ། དེ་ལྟ་མིན་ཡང་རྡོ་རྗེའི་ལུས་ལ་གནད་དུ་བསྣུན་པའི་རྫོགས་རིམ་གང་རུང་བསྒོམས་པས་རླུང་འདུ་བར་འགྱུར་ཞིང༌། དེ་ལ་བརྟེན་ནས་གེགས་བྱུང་ན་གེགས་སེལ་གྱི་མན་ངག་འདི་རྣམས་བསྒོམ་དགོས་པ་ཡིན་ནོ། །དེ་ཡང་སྲོག་རླུང་ལ་སྐྱོན་ཞུགས་ཏེ་རོ་སྟོད་གཟེར་བ་དང༌། སྙིང་མི་དགའ་བ་དང༌། ཤེས་པ་འཕྱོ་བ་ལ་སོགས་བྱུང་ན་རྡོ་རྗེ་ནོར་བུའི་རྩེ་མོར་སེམས་དྲག་ཏུ་གཏད་ལ། སྔར་བུམ་པ་ཅན་ལ་སོགས་གོམས་པ་ཞིག་ཡིན་ན། ཐུར་སེལ་འཐེན་འཐེན་བྱེད་པ་ཡིན་ཞིང༌། དེ་ལྟ་མིན་ན་སྟེང་རླུང་གསང་གནས་སུ་མནན་ལ། འོག་རླུང་རྣམས་རྡོ་རྗེ་ནོར་བུར་ཡལ་བར་བསམ་པ་ཡང་ཡང་བསྒོམས་པས་སེལ་ལོ། །རོ་སྟོད་ལ་ཆུ་ཚན་སོགས་ཆུ་དྲོན་མོས་བྲན་པས་ཀྱང་ཕན་པར་འགྱུར་རོ། །མེ་མཉམ་ལ་སྐྱོན་ ཞུགས་ན། ཕོ་བ་སྦོ་འཁྲོག་དང་སྒྲེགས་སྐྱུགས་སོགས་འབྱུང་བས། དེ་ལ་སེམས་མགྲིན་པར་གཏད་ལ་བར་རླུང་བཟུང་ཞིང༌། ལྟོ་བའི་སྨད་བར་རླུང་ཡོད་པར་བསྐོར་བ་དང༌། ཕོ་སྟོད་བསྐོར་བར་བྱས་པས་སེལ་ལོ༑ ༑འདི་ལ་ལྟོ་བ་ལ་ཐོག་མར་ཆང་གིས་བྱུགས་པར་བྱས་ལ། དེ་ནས་བྱེ་མ་བསྲེགས་མ་ལྟ་བུ་གང་ཡང་རུང་བས་གྲང་དུགས་བྱས་པས་ཀྱང་ཕན་པར་འགྱུར་རོ། །ཐུར་སེལ་ལ་སྐྱོན་ཞུགས་ཏེ་ཆུ་ལམ་དང༌། བཤང་ལམ་དུ་ན་ཚ་སྐྱེ་བ་དང༌། བཤང་གཅི་བསྡོམས་པ་དང༌། བཤང་གཅི་མི་ཐོན་པ་སོགས་བྱུང་ན་སེམས་སྤྱི་བོར་གཏད་ལ། བཤང་ལམ་དང་ཆུ་ལམ་གྱི་སར་དང༌། ཚང་ར་ལ་སོགས་པར་ཁུ་ཚུར་བརྡེག་ཅིང་འཕུར་མཉེ་བྱས་པས་སེལ་ལོ། །གྱེན་རྒྱུའི་རླུང་རེངས་ན། མགྲིན་པ་འགགས་པ་དང༌། ནང་དུ་ཤ་སྐྱེ་བ་དང༌། གྲེ་བ་ཚ་བ་ལ་སོགས་པ་དང༌། སྣ་བུག་ཚ་བ་ལ་སོགས་པ་འབྱུང་ཞིང༌། དེ་སེལ་བ་ལ་རླུང་དྲག་ཏུ་རྔུབས་ལ། རླུང་བཟུང་ཞིང་མགོ་བོ་བསྐོར་བར་བྱ། དྲག་ཏུ་རླུང་བུས་ལ་ཡང་མགོ་བསྐོར་རོ། །འདི་ལ་མགྲིན་པའི་བུམ་ཅན་ལྟ་བུ་དང་སྦྲགས་ཏེ་མགོ་བསྐོར་བར་བྱས་ན། གེགས་སེལ་མཆོག་ཏུ་འགྲོའོ། །ཁྱབ་བྱེད་ཀྱི་རླུང་རེངས་ན། ལུས་ཐམས་ཅད་ན་བའམ། སྦྲིད་པའམ། ལུས་ཁོལ་བུ་ཁོལ་བུར་ཚ་ཙག་པ་ལ་སོགས་འབྱུང་བས། ཡན་ལག་ཐམས་ཅད་སྤྲུག་ཅིང༌། ལུས་འདར་ཕྲུག་ཕྲུག་བྱའོ། །འདི་ལ་རྫས་ཀྱི་ཁྱད་པར་སྣུམ་དང་གཡེར་མ་བསྲེས་པས་ལུས་ལ་བྱུགས་པ་དང༌། འཁྲུལ་འཁོར་གྱི་ཁྱད་པར། ཀ་པཱ་ལ་ཨཱ་ས་ན་བྱ་བ། སྤྱི་བོ་ས་ལ་བཙུགས། རྐང་པ་གཉིས་གནམ་དུ་བསྟན་པའི་ལུས་སྦྱོང་བྱས་པས་ཀྱང་སེལ་བར་འགྱུར་རོ། །ཡན་ལག་གི་རླུང་རེངས་པ་སེལ་བ་ལ༑ མིག་ཏུ་རྒྱུ་བའི་རླུང་རེངས་ཏེ། མིག་ཚ་བ་དང་མི་གསལ་བར་འགྲོ་བ་ལ་སོགས་བྱུང་ན། ལྟོ་བ་ཕྱིར་བསྐྱེད་པའི་བུམ་པ་ཅན་བཟུང་ལ་ཤུགས་དང་ལྡན་པས་མིག་དྲག་ཏུ་གཡས་གཡོན་དུ་བསྐོར་བ་དང༌། ཡས་མར་དུ་བལྟ་བ་རྣམས་བྱས་ལ་མཐར་རླུང་འབུད་ཅིང་ལུས་དྲག་ཏུ་སྤྲུག་གོ །འདི་ལ་རྫས་ཀྱི་ཁྱད་པར་ཚ་བ་ལ་བརྟེན་ཏེ་མིག་ན་ན་གུར་གུམ་སོགས་འདེབས་པ་དང༌། གྲང་བ་ལ་བརྟེན་ན་སྐྱེར་པའི་ཁནྜ་སོགས་བྱུག་ཅིང༌། སྔ་དྲོ་སོ་བརྡར་བ་བྱུགས་པས་ཀྱང་ཕན་པར་འགྱུར་རོ། །རྣ་བར་རྒྱུ་བའི་རླུང་རེངས་ན། རྣ་བར་འུར་བ་དང༌། ན་ཟུག་སྐྱེ་བ་ལ་སོགས་པ་འབྱུང་བས་དེ་སེལ་བ་ལ། རླུང་དྲག་ཏུ་རྔུབས་ལ་ལྟོ་བ་བསྒྱེད་པས་བུམ་པ་ཅན་བཟུང་ལ། རྣ་བ་མི་བདེ་བའི་ཕྱོགས་དེ་བཀབ་ཅིང༌། མཐར་དྲག་ཏུ་འབུད་པའི་ཚེ་རླུང་རྣམས་རྣ་བ་མི་ན་བའི་ཕྱོགས་ནས་འཐོན་པར་བསམས་ལ། ལུས་ཐམས་ཅད་དྲག་ཏུ་སྤྲུག་གོ །འདི་ལ་རྫས་ཀྱི་ཁྱད་པར་དྲི་ཆུ་དྲོན་མོས་རྣ་བ་བཀང་སྟེ་མཐར་ཕྱིར་འབོའོ། །ཡང་དག་པར་རྒྱུ་བའི་རླུང་རེངས་ན། སྣ་བུག་གི་ལམ་ཚ་བ་སོགས་མི་བདེ་བ་འབྱུང་བས། དེ་སེལ་བ་ལ། རླུང་དྲག་ཏུ་རྔུབས་ལ། ལྟོ་བ་ཕྱིར་བསྐྱེད་པས་བུམ་པ་ཅན་བཟུང་ལ། ལག་པ་གཡས་ གཡོན་རེས་མོས་ཀྱིས་སྣའི་རྩེ་ནས་བཟུང་སྟེ་མཉེ་བ་དང༌། བྱ་གཤོག་གཡས་གཡོན་ནས་དུས་གཅིག་ཏུ་ལག་པ་གཡས་གཡོན་གྱིས་བཟུང་ལ་མཉེ་ཞིང༌། མཐར་དྲག་ཏུ་འབུད་ཅིང་ལུས་ཐམས་ཅད་སྤྲུག་གོ ༑རབ་ཏུ་རྒྱུ་བའི་རླུང་རེངས་ན། ལྕེ་མི་བདེ་བ་དང༌། སྦྲིད་པ་དང༌། ཐོར་བ་སྐྱེ་བ་སོགས་འབྱུང་བས་དེ་སེལ་བ་ལ། རླུང་དྲག་ཏུ་རྔུབས་ལ་ལྟོ་བ་ཕྱིར་བསྐྱེད་པའི་བུམ་པ་ཅན་བཟུང་ལ། ལྕེ་བརྐྱངས་ཤིང་བསྒྲིལ་ལ་རྐན་ལ་སྦྱོར་ཅི་ཐུབ་བྱ་བ་ལན་མང་དུ་བྱས་པའི་མཐར། རླུང་དྲག་ཏུ་འབུད་ཅིང་ལུས་ཐམས་ཅད་སྤྲུག་གོ །ངེས་པར་རྒྱུ་བའི་རླུང་རེངས་ན། ལུས་ཐམས་ཅད་ན་བ་དང༌། སྦྲིད་པ་དང༌། ལུས་ཁོལ་བུར་ན་བ་སོགས་འབྱུང་བས་དེ་སེལ་བ་ལ་རླུང་དྲག་ཏུ་རྔུབས་ལ། ལྟོ་བ་ཕྱིར་བསྐྱེད་པའི་བུམ་པ་ཅན་བཟུང་ལ། ལག་པ་གཉིས་ཀྱི་སོར་མོ་གཅན་གཟན་གྱི་སྡེར་མོ་ལྟར་བསྐུམས་ལ། ཉྭ་བཞི་བསྒྲིམ་པས་སྤྲུག་པ་དང༌། རྐང་པའི་སོར་མོ་ཡང་བསྐུམས་ལ་ཉྭ་བཞི་བསྒྲིམ་པས་སྤྲུག་པ་དང༌། ཁ་བགྲད་པས་ཉྭ་བཞི་བསྒྲིམས་ལ་མགོ་སྤྲུག་པ་དང༌། རོ་སྟོད་གཅུ་བ་དང༌། རྒྱ་མཚོ་བསྐྱོད་པ་སོགས་བྱས་ལ། མཐར་རླུང་དྲག་ཏུ་འབུད་ཅིང༌། ལུས་ཐམས་ཅད་སྤྲུག་གོ །ཚ་བའི་ནད་སེལ་བ་ལ། རང་གི་སྤྱི་བོར་ཧཾ་ཡིག་དཀར་པོ་མགོ་བོ་ཐུར་དུ་བསྟན་པ། འོད་ཟེར་དཀར་པོ་ཤིན་ཏུ་བསིལ་བ་འཕྲོ་བ་ལས། བདུད་རྩི་རེག་བྱ་ཤིན་ཏུ་བསིལ་བ་བབས་ཏེ། འོད་ཟེར་དང་བདུད་རྩིས་ལུས་ཀྱི་ནང་གྲང་བསིལ་ བསིལ་གྱུར་པ་ལ་སེམས་གཏད་པས་སེལ་ལོ། །གྲང་བའི་ནད་སེལ་བ་ལ། རང་གི་ལྟེ་བའམ་གསང་གནས་སུ་ཨ་ཡིག་དམར་པོ་ཤིན་ཏུ་ཚ་བའི་རང་བཞིན་ཅན་ལས། འོད་ཟེར་དམར་པོ་རེག་བྱ་ཤིན་ཏུ་ཚ་བ་འཕྲོས་ཏེ། དེས་ལུས་ཀྱི་ནང་ཐམས་ཅད་གང་བས་ཚ་འུར་རེ་གྱུར་པར་བསམས་པས་སེལ་ལོ། །འདུས་པའི་ནད་ཀྱིས་ལུས་ལྗི་བར་གྱུར་ན། གསང་གནས་སུ་ཡཾ་ཡིག་ཤིན་ཏུ་གཡོ་བའི་རང་བཞིན་ཅན་བསྒོམས་ལ། དེ་ལས་འོད་ཟེར་འཕྲོས་པས། ལུས་ཀྱི་ཤ་ཁྲག་པགས་པ་རུས་པ་བརྗིད་མེད་པ་དུ་བ་འདྲ་བ་ཞིག་ཏུ་གྱུར་པ་ཡཾ་ལས་འཕྲོས་པའི་རླུང་གིས་ཡར་ཡར་གྱེན་དུ་འདེགས་པར་བསམས་པས་སེལ་ལོ། །གཞན་ཡང་རླུང་རེངས་པ་སྟེ། རྩ་གནས་སུ་འགགས་པའི་གེགས་སེལ་སྤྱི་ཁྱབ་ནི། རང་གི་ལུས་ཀྱི་གནས་ཐམས་ཅད་ནས་རླུང་རྣམས་འོད་ཟེར་གྱི་རྣམ་པ་རྟ་རྔ་ལྟ་བུ་རྐང་དང་བཅས་པ་བྱུང་སྟེ་བཤང་སྒོ་ནས་འཐོན་ས་འོག་ཐག་རིང་པོར་སོང་སྟེ་མཐར་ཡལ་བར་བསམ། འདི་ལ་འཁྲུལ་འཁོར་ཡར་ལངས་ཏེ་རྐང་པ་གཉིས་དྲག་ཏུ་བསྒྲད་པ་དང་བཤང་སྒོ་ཕྱིར་ཕུལ་ཞིང་ལྷོད་པས་ཀྱང་སེལ་ལོ། །ཡང་རླུང་རྩ་གནས་རྣམས་སུ་འཁྱིལ་བའི་གེགས་ནི། རླུང་རེངས་པ་ལས་གེགས་དང་མི་བདེ་བའི་རྣམ་པ་ཆ་ཕྲ་བར་འབྱུང་སྟེ་དེ་སེལ་བ་ལ། རླུང་རྣམས་འོད་ཟེར་གྱི་རྣམ་པས་ལུས་ཀྱི་ནང་ནས་ཡར་བྱུང་སྟེ། སྤྱི་བོ་ནས་ཐོན་པ་བར་སྣང་ཐག་རིང་པོར་ཡལ་བར་བསམ་ཞིང་ཧ་རིང་དང༌། ཧ་ཐུང་ཡང་འདོན་ནོ། ། གཞན་ཡང་གཟེར་ལུས་ཀྱི་དབུས་སུ་སྟེང་འོག་ཏུ་འབྱུང་བའམ། སྟོད་ཀྱི་ཆར་རྒྱབ་མདུན་དུ་གཟེར་བ་ལྟ་བུ་བྱུང་ན། རྡོ་རྗེ་རྒྱ་གྲམ་གྱིས་སྟེང་དུ་གཟེར་བ་ལ་སྟེང་ནས་མནན་པར་བསམ་ཞིང༌། མདུན་རྒྱབ་ཏུ་གཟེར་ན་རྡོ་རྗེ་རྒྱ་གྲམ་གྱིས་ནང་ནས་མདུན་ཕྱོགས་སུ་མནན་པར་བསམ་མོ། །འཁོར་ལོ་བསྐོར་བ་ནི། རོ་སྟོད་དང༌། ལྟོ་བ་དང༌། རྒྱུ་ཞབས་རྣམས་ནས་མི་བདེ་བར་གྱུར་ན། ཐད་དེ་དང་དེར་འཁོར་ལོ་རྩེ་མོ་ཤིན་ཏུ་རྣོ་བ་ཁ་དོག་ཇི་ལྟར་རིགས་པ་ཞིག་བསྒོམས་ལ། དེ་དྲག་ཏུ་འཁོར་བས་ཇེ་ཆེར་གྱུར་ཏེ། རྩིབས་རྣམས་ཀྱིས་ཡོངས་སུ་བཅད་པའི་ལུས་ཀྱི་ཕྱི་ན་མར་ཐོན་པས་ལུས་ཉིད་སྨད་ཧར་གྱིས་བཅད་པར་བསམ། འདི་ལ་རླུང་སྦྱོར་བུམ་ཅན་གང་ན་སར་སྡིགས་པར་བྱེད་པའོ། །སྲད་བུ་ལ་བརྟེན་པ་ནི། རང་གང་ན་སར་སྲད་བུ་གྲུ་གུ་ལྟ་བུ་ཞིག་ཡོད་པ་དེ་ནར་གྱིས་ཕར་སོང༌། ལུས་ཀྱི་ན་སར་བུ་ག་བྱུང་སྟེ་སོང་བ་སྣེ་གཅིག་ལུས་ནང་ན་ཐོགས་པར་ཡོད་པ་སྟེ། སླར་གྲུ་གུ་འགྲིལ་བ་ལྟར་ཕར་ཧྲིལ་ཏེ་འགྲིལ་བར་བསམ། དེ་ལྟ་བུ་ཡང་ཡང་བསྒོམ་ཞིང༌། རླུང་སྦྱོར་བུ་ག་ནས་སྲད་བུ་ཕར་འགྲོ་བའི་ཚེ། རླུང་ཁ་སྣ་གཉིས་ཀ་ནས་དྲག་ཏུ་འབུད་དོ། །བུ་ག་མང་པོའི་སྦྱོར་བ་ནི། ལུས་ཐམས་ཅད་ཚགས་སེ་ལྟར་ཁྲོལ་ཚགས་སུ་འདུག་པ་ལ། འབེབས་ཆུང་དང་བཅས་ཧ་བཏོན་པས། རླུང་རྣམས་དུ་བའི་རྣམ་པས་བུ་ག་ནས་བུན་བུན་ཐོན་པར་བསམ་མོ། །འཁོར་ལོ་མེད་པ་ནི། རང་གི་གསང་གནས་ ཡན་ཆད་དང༌། མགྲིན་པ་མན་ཆད་ཀྱི་ལུས་སྦ་དོང་ལྟ་བུ་སྟོད་སྨད་ཟང་ཐལ་དུ་ཡོད་པ་དཔང་མཐོ་བ་ཞིག་བསྒོམ། ཤེས་པ་བྱིང་བ་དང༌། ཐུར་སེལ་ལ་སྐྱོན་ཞུགས་པའི་ནད་དང༌། ཆུ་སེར་དང༌། གྲང་བ་སོགས་ཀྱིས་རྐེད་པ་མན་ཆད་ན་ན། འོག་ནས་རླུང་གི་ཚོགས་དཔག་ཏུ་མེད་པ། རང་ལུས་སྦ་དོང་ལྟ་བུའི་ནང་ན་ཡར་ཤོང་ཚད་དུ་སོང༌། སྟེང་གི་བུ་ག་ནས་ཐོན། བར་སྣང་ཐག་རིང་པོར་ཡལ་བར་བསམ་ཞིང༌། རླུང་ཁ་སྣ་གཉིས་ཀ་ནས་དྲག་ཏུ་བུས་ལ། ལག་པ་དྲག་ཏུ་སྤྲུག་གོ །ཡང་རྒོད་པ་ཤས་ཆེ་བ་དང༌། ལྟེ་བ་ཡན་ཆད་ན་ན། སྟེང་ཕྱོགས་ཀྱི་ནམ་མཁའ་ནས་རླུང་གི་ཚོགས་དཔག་ཏུ་མེད་པ་བྱུང༌། ལུས་སྦ་དོང་ལྟ་བུའི་ནང་ནས་མར་ཞུགས་ཏེ་སོང༌། ས་འོག་ཐག་རིང་པོར་ཡལ་བར་བསམ། རླུང་ཁ་སྣ་གཉིས་ཀ་ནས་རྔུབས་ལ། སྡོད་ཡོད་ན་འབེབས་ཆུང་བྱ་བའམ། ལངས་ནས་རྐང་པ་གཉིས་རེས་མོས་ཀྱིས་དྲག་ཏུ་སྤྲུག་གོ །ལུས་རབ་ཏུ་ཞུ་བའི་སྦྱོར་བ་ནི། རང་གི་འོག་ཏུ་ཐོག་མར་མཚོ་ཆུང་མར་ཁུའམ་ཆུ་དྲོན་ལྟ་བུས་གང་བ་ཞིག་བསམས་ལ། དེ་ཀ་ཆེར་གྱུར་པའི་ནང་དུ་རང་གི་ལུས་ཀྱང་རིམ་པས་ནུབ་སྟེ། སྤྱི་བོ་མན་དེའི་ནང་དུ་ནུབ་ཅིང་བྱིང་བ་ན། རང་གི་ལུས་ཡོངས་སུ་ཞུ་སྟེ་དེ་དང་འདྲེས་པར་བསམ། འདིས་ནི་སེམས་མི་གནས་པར་རྣམ་རྟོག་དྲག་ཏུ་འཕྲོ་བའི་གེགས་སེལ་ལོ། །བོགས་འདོན་གྱི་དམིགས་པ་ནི། མཉམ་བཞག་ཏུ་རྟོག་མེད་རྣམ་པར་མི་རྟོག་པ་སྒོམ་པར་བྱེད་པ་ཞིག་ཡོད་ན། འགྲོ་འཆག་ ཉལ་འདུག་སོགས་ཐུན་མཚམས་རྣམས་སུ་ཡང་དྲན་སོའི་རྟེན་དངོས་པོ་ཇི་ལྟར་རིགས་པ་ཞིག་བཞག་ལ། དེ་ཡང་ཡང་མཐོང་བའི་རྐྱེན་གྱིས་བསྐུལ་ཏེ། མི་རྟོག་པ་ཡང་ཡང་དྲན་པར་བྱས་ཏེ་བསྒོམས་ཀྱང་མཉམ་བཞག་ལ་བོགས་ཐོན་པར་འགྱུར་རོ། །ཡང་མཉམ་བཞག་ཏུ་གཏུམ་མོ་ལྟ་བུ་རྟོག་བཅས་ཀྱི་རྣལ་འབྱོར་སྒོམ་པར་བྱེད་པ་ཞིག་ཡིན་ན། ཐུན་མཚམས་རྣམས་སུ། དཔེར་ན། ཟས་ཟ་བའི་ཚེ། ཟས་ཀྱི་དབུས་སུ་གཏུམ་མོ་ཨཾ་ཡིག་སྒོམ་པར་བྱེད་པ་དང༌། གཞན་ཡང་གཏམ་སྨྲ་བའི་ཚེ། དེའི་ཁའི་ནང་དུ་གཏུམ་མོ་ཨཾ་ཡིག་སྒོམ་པར་བྱེད་པ་སོགས་ལ་བསླབ་པས་ཀྱང་བོགས་ཐོན་པར་འགྱུར་རོ། །གཞན་བླ་མ་ཡི་དམ་རང་གང་མོས་ཤིག་བར་སྣང་ཐག་རིང་པོར་བཞུགས་པར་བསམས་ལ། རང་ཉིད་ལྗོན་ཤིང་ལྟ་བུ་ཞིག་ལ་འཛེགས་ཏེ་ཡར་ཕྱིན་ཞིང༌། བླ་མ་ཡི་དམ་བཞུགས་པ་དང་ཐད་མཉམ་པར་སླེབ་པ་ན། འདི་དག་ཐམས་ཅད་རང་སེམས་ཀྱི་སྣང་བ་ཙམ་ཡིན༑ བདེན་པར་གྲུབ་པ་ཅུང་ཟད་ཀྱང་མེད་སྙམ་པའི་འདུན་པ་ཅུང་ཟད་གཏད་ལ། རང་དང་བླ་མ་ཡི་དམ་དང་སྣང་བ་ཐམས་ཅད་སྟོང་པ་ཉིད་ཀྱི་ངང་དུ་ཐག་བཅད་དེ། ཡིད་ལ་མི་བྱེད་པའི་ཚུལ་གྱིས་ཅུང་ཟད་མཉམ་པར་བཞག །ཡང་དེ་ལས་ལངས་ཏེ་བླ་མ་ཡི་དམ་དེ་ལས་ཀྱང་མཐོ་བའི་ནམ་མཁའི་དབྱིངས་ནས་བཞུགས་པར་བསམས་ལ། རང་ཉིད་ཉི་ཟླའི་འོད་ཟེར་རམ། ལྗོན་ཤིང་ལྟ་བུ་གང་རུང་ཞིག་ལ་འཛེགས་ཏེ་ཕྱིན་པ་ན། བླ་མ་ཡི་དམ་ བཞུགས་པའི་ཐད་དང་མཉམ་པར་སླེབ་པ་ན། སྔར་བཞིན་སྟོང་ཉིད་ཀྱི་ངང་དུ་མཉམ་པར་འཇོག་པ་སོགས་མཐའ་མེད་ཀྱི་བར་དུ་བྱས་པས་ཀྱང་ཏིང་ངེ་འཛིན་ཐམས་ཅད་ལ་བོགས་ཐོན་ཞིང་ཡོན་ཏན་ཡར་འཕེལ་དུ་འགྱུར་རོ༑ ༑འདིར་སྨྲས་པ། ཚངས་སོགས་གྲགས་ལྡན་ལྷ་ཡིས་བཏུད་པའི་འོད་ཀྱིས་ཕྱོགས་ཀུན་མཐའ་བསྐོར་ཞིང༌། །ཐུགས་རྗེའི་ཆ་ཤས་ཡོངས་སུ་གང་བར་གྲུབ་པའི་རྟགས་རིས་མ་ཉམས་པ། །བགྲང་ཡས་ལུས་ཅན་རྒྱ་མཚོའི་གཉེན་གྱུར་ཕན་བདེའི་བདུད་རྩིས་སྤྲོ་བ་མཁན། །དཔལ་ལྡན་བདེ་ཆེན་རྡོ་རྗེའི་ཟླ་བ་འཕགས་ཡུལ་ཤར་རིའི་ཕྲག་པར་ཤར། །གང་དེས་དངོས་གྲུབ་མཆོག་བརྙེས་བྱེ་བ་བརྒྱའི། །རྨད་བྱུང་ཕན་བདེའི་ལམ་བཟང་ཇི་སྙེད་པ༑ ༑གཅིག་ཏུ་དྲིལ་བ་རྡོ་རྗེའི་ཐེག་པ་ཡི། །རིམ་གཉིས་རྣལ་འབྱོར་མཆོག་གི་དགའ་སྟོན་བསྐྲུན། །གང་འདི་རིགས་ཀྱི་ཁྱབ་བདག་རྡོ་རྗེ་འཆང༌། །བཤེས་གཉེན་དམ་པར་སྣང་བ་ཀུན་དགའི་མཚན། །འདྲེན་པ་མཆོག་དེས་གངས་རིའི་ཁྲོད་འདི་རུ། །སྔོན་མེད་ལེགས་བཤད་གསལ་བའི་བདུད་རྩི་བཀྱེ། །བརྒྱད་ཁྲི་བཞི་སྟོང་ཆོས་རྣམས་ཀྱི། །སྙིང་པོ་ལས་ཀྱང་ཆེས་སྙིང་པོ། །འདི་བྲིས་དགེ་བ་གང་ཐོབ་པས། །ཟུང་འཇུག་རྡོ་རྗེའི་སྐུ་ཐོབ་ཤོག ། ཅེས་པ་འདིའང་རྒྱལ་བ་ཀུན་འདུས་ཀྱི་ངོ་བོ་རྗེ་བཙུན་རྡོ་རྗེ་འཆང་ཀུན་དགའ་སྙིང་པོའི་གསུང་ལས་ཇི་ལྟར་བྱུང་བ་བཞིན། ཤཱཀྱའི་དགེ་སློང་ཡེ་ཤེས་རྒྱ་མཚོས་ཟིན་བྲིས་སུ་བགྱིས་པའོ། །མངྒ་ལམ།། །།