བླ་མེད་ལྷན་སྐྱེས་རྣམ་བཞིའི་རྫོགས་རིམ་སྙིང་པོ་དོན་གྱི་ཕྲེང་བ།

Previous Text Back to Volume PageNext Text

Wylie title	bla med lhan skyes rnam bzhi'i rdzogs rim snying po don gyi phreng ba	Rigpe Dorje Publications, 2024
Location	gdams ngag rin po che'i mdzod Volume 9, Text 25, Pages 583-641 (Folios 1a1 to 30a4)
Author	འབྲི་གུང་རིག་འཛིན་ཆོས་ཀྱི་གྲགས་པ་
Citation	Drikung Kyabgon Chungtsang, 1st (Chos kyi grags pa). Bla med lhan skyes rnam bzhi'i rdzogs rim snying po don gyi phreng ba. In Gdams ngag rin po che'i mdzod, Vol. 9: 583-641. Kalimpong: Rigpe Dorje Publications, 2024.	Shechen Publications, 1999
Side notes	Recto: lhan skyes rdzogs rim   Verso: bka' brgyud skor
More details More details
Genre	Pith Instructions - man ngag  ·  Completion Stage - rdzogs rim
Colophon	།ཅེས་པ་ཡང་འབྲི་དམ་པ་ཆོས་ཕྱུག་གི་ཀླུང་ཕོ་བྲང་བཀྲ་ཤིས་ཚུགས་ཀྱི་རེའུ་མིག་ལྕང་ལོ་ཅན་རྡོ་རྗེ་ཐེག་པའི་གན་མཛོད་དུ་བྲིས་པའི་ཡི་གེ་པ་ནི་བཀའ་འབངས་ཀྱི་ཡང་ཐ་འཕྱོངས་རྒྱས་གྲགས་པ་དབང་པོས་བགྱིས་པ་སྟེ་འདིས་སེམས་ཅན་ཐམས་ཅད་ལ་སྨན་པར་གྱུར་ཅིག །ཤུ་བྷམྨསྟུ་སརྦ་ཛ་ག་ཏམ། སརྦ་པཀྵེ་བཛྲ་ཡཱ་ན་ཤཱ་ས་ནོ་ད་ཡ་པུཥྚིཾ་ཀུརྦནྟུ།།
	ces pa yang 'bri dam pa chos phyug gi klung pho brang bkra shis tshugs kyi re'u mig lcang lo can rdo rje theg pa'i gan mdzod du bris pa'i yi ge pa ni bka' 'bangs kyi yang tha 'phyongs rgyas grags pa dbang pos bgyis pa ste 'dis sems can thams cad la sman par gyur cig__/shu b+ham+mastu sarba dza ga tam/__sarba pak+She badz+ra yA na shA sa no da ya puSh+TiM kurban+tu//

Tibetan Text

[edit]

༄༅། །བླ་མེད་ལྷན་སྐྱེས་རྣམ་བཞིའི་རྫོགས་རིམ་སྙིང་པོ་དོན་གྱི་ཕྲེང་བ་ཞེས་བྱ་བ་བཞུགས་སོ། །

ཨུ་པ་དེ་ཤ་གམྦྷི་ར།

༄༅། །ན་མོ་བཛྲ་གུ་རུ་ཨ་ཏི་དེ་ཝ་ཏཱ་ཡ། འདིར་དབང་ཐོབ་ཅིང་དམ་སྡོམ་ལ་གནས་པའི་སློབ་མ་ལ། མཚན་ཉིད་དང་ལྡན་པའི་སློབ་དཔོན་གྱིས་ལྷན་སྐྱེས་རྣམ་པ་བཞིའི་རྫོགས་རིམ་ཟབ་མོ་ཤིན་ཏུ་བསྡུས་པའི་ཚུལ་གྱིས་སྟོན་པ་ནི། རྫོགས་རིམ་བཞི་གའི་སྔོན་འགྲོ་ཐུན་མོང་ལས་དལ་འབྱོར་རྙེད་དཀའ་བ། དེ་མི་རྟག་པ། ལས་འབྲས། རིགས་དྲུག་གི་སྡུག་བསྔལ་རྣམས་དང༌། ཐུན་མོང་མ་ཡིན་པ། སྐྱབས་འགྲོ། སེམས་བསྐྱེད། རྡོར་སེམས། མཎྜལ། བླ་མའི་རྣལ་འབྱོར་རྣམས་སྤྱི་འགྲོ་ལྟར་གྱིས་རྒྱུད་ལེགས་པར་སྦྱངས་ཟིན་ནས། དངོས་གཞིའི་དང་པོ་ཕ་རྒྱུད་གསང་བ་འདུས་པ་མི་བསྐྱོད་པའི་རྫོགས་རིམ་རྡོ་རྗེའི་ཕྲེང་བ་སོགས་བཤད་རྒྱུད་ཆེན་པོ་བརྒྱད་ཀྱི་དགོངས་པ། འཕགས་ལུགས་མར་མཚུར་ཡབ་སྲས་ཀྱི་བཞེད་སྲོལ་ལྟར་རིགས་ལྔ་གདན་གཅིག་འཁོར་ལོ་མེད་པའི་ལུགས་ཤིན་ཏུ་བསྡུས་པ་ནི། དང་པོ་རྡོ་རྗེའི་བཟླས་པའི་བསྐྱེད་རིམ་པ་ནི་ཁྱད་པར་གྱི་སྔོན་འགྲོ་ཡིན་ཏེ། ལུས་རྣམ་སྣང་གི་ཆོས་བདུན་དང་ལྡན་པས། མཚན་བཅས་རྡོ་རྗེའི་བཟླས་པ་ནི། རང་ཞེ་སྡང་རྡོ་རྗེ་དཔའ་བོ་གཅིག་པར་གསལ་བའི་ཐུགས་ཀར་འོད་ཀྱི་དཀྱིལ་འཁོར་མེ་ལོང་ཙམ་སྒྲེང་བའི་འདབ་དབུས་སུ་ཐིག་ལེ་དཀར་པོ་ཨ་ཤད་ནག་པོས་མཚན་པ་ཞིག་བསམ་པའི་ངང་ནས་རླུང་རོ་བསལ་ཏེ༑ སླར་སྣ་བུག་ནས་རླུང་རྒྱུ་བ་ཧཱུྃ་གི་རྣམ་པས་སྣ་སྒོར་ཐོན་པའི་ཚེ་ཧཱུྃ་དེ་དག་སྤྲུལ་པའི་སྐུ་དཔག་ཏུ་མེད་པར་གྱུར། འགྲོ་བའི་དོན་བྱས་མི་བསྐྱོད་རྡོ་རྗེའི་གོ་འཕང་ལ་བཀོད། ཚུར་རྔུབས་པའི་ཚེ་ཕྱོགས་བཅུའི་རྒྱལ་བ་སྲས་བཅས་ཀྱི་བྱིན་རླབས་ཨོཾ་གྱི་རྣམ་པར་རྩ་ནང་ནས་མར་སིབ་སིབ་སོང་བར་དམིགས་ནས་ནང་དུ་གནས་པའི་ཚེ་ཨཱཿ ཡིག་གི་རྣམ་པར་བསམ་ལ་ཅི་མང་དུ་དམིགས་སོ། །མཚན་མེད་ནི། རང་ལྷར་གསལ་ཙམ་ནས་རླུང་སྔགས་དབྱེར་མེད་མ་བཅོས་གཞོམ་བྲལ་དོན་དམ་བརྗོད་ཡུལ་ལས་འདས་པ་རླུང་ནང་དུ་རྔུབས་པ་ཨོཾ། གནས་པ་ཨཱཿ ཕྱིར་རོ་འབྱུང་བ་ཧཱུྃ་རྣམས་གདོད་ནས་གྲུབ་པ་ཡིན་པ་ལ་ཡིན་པའི་དྲན་ཤེས་ཀྱིས་ཡུན་རིང་དུ་བསྒོམ། དེ་ཡང་འབྱུང་འཇུག་གནས་གསུམ་ཡི་གེ་གསུམ་དུ་བཅོས་ནས་བསྒོམ་པ་མ་ཡིན་ཞིང་ངག་ནས་བརྗོད་པ་ཡང་མ་ཡིན་གྱི་དེ་ལྟར་དོན་གྱི་བཟླས་པ་རླུང་སེམས་ཐ་མི་དད་དུ་འཁྲུལ་པའི་རྗེས་སུ་མི་འབྲང་བར་རྩེ་གཅིག་ཏུ་གནས་པ་སྟེ་མ་ཡེངས་པར་བསྒོམ་དགོས་པ་ཡིན་ནོ། །སྔོན་འགྲོ་རྒྱས་པ་དབེན་གསུམ་སོགས་གསུངས་པ་ཡང་འདིར་འདུའོ། །དེ་ལྟར་ཡུན་རིང་དུ་སྦྱངས་པས་རྩ་བའི་རླུང་ལྔ་འདུས་པའི་རྟགས་སུ། དུ་བ་ལྟ་བུ་སེར་ལྗང་དང༌། སྨིག་རྒྱུ་ལྟ་བུ་སྔོ་ལྗང་དང༌། མེ་ཁྱེར་ལྟ་བུ་དམར་ལྗང་དང༌༑ སྒྲོན་མེ་ལྟ་བུ་དཀར་ལྗང་རྣམས་གཡོ་བཞིན་པ་དང༌། ནམ་མཁའ་ལྟར་གསལ་དྭངས་ངོས་བཟུང་མེད་པ་འབྱུང༌། དེའི་ཚེ་ཕྲག་དོག་དག་པ་བྱ་གྲུབ་ཡེ་ཤེས་སངས་རྒྱས་དོན་ཡོད་གྲུབ་པ་འཆར། གཉིས་པ་སེམས་ལ་དམིགས་པ་ཡང་ཁྱད་པར་གྱི་སྔོན་འགྲོ་ཡིན། སྟེང་འོག་གི་རླུང་འཐེན་པ་ལ་བཟུང་ནས། རང་ལྷར་གསལ་བ་ལ་མ་ཡེངས་པར་སེམས་གཏད་ཅིང་རླུང་བཟུང་བ་ནི་འབྱུང་བཞིའི་རླུང་ཟིན་པ་ཡིན། རྣམ་པར་ཤེས་པ་སྣང་བ་ལ་ཐིམ་པ་ནི་སྟོང་པའི་ཡེ་ཤེས་ཀྱི་སྐབས་ཏེ་སེམས་ཟིན་པའི་རྟགས་རྣ་བར་ཙེ་རིང་རིང་བ་དང༌། ལུས་འཇག་མ་ལྟར་ལྡེམ་ལྡེམ་པའོ། །རང་ལྷར་གསལ་བ་ལ་མ་ཡེངས་པར་སེམས་སྙིང་གའི་འོད་མེ་ལོང་ལྟ་བུ་ལ་ཐིམ་པར་དམིགས་ནས་འོད་དཀྱིལ་ལ་སེམས་མ་ཡེངས་པར་གཏད། རླུང་བཟུང་བས་སྣང་བ་མཆེད་པ་ལ་ཐིམ་པས་སྟོང་པ་ཆེན་པོའི་ཡེ་ཤེས་ཞེ་སྡང་ལས་གྱུར་པའི་རང་བཞིན་སུམ་ཅུ་རྩ་གསུམ་ཐིམ། རྟགས་ཟླ་འོད་ལྟ་བུ་སྐྱ་ལམ་ལམ་པ་འབྱུང༌། ཡང་རླུང་དང་བཅས་འོད་ཀྱི་མེ་ལོང་ཐིག་ལེ་ལ་བསྡུས། ཐིག་ལེ་ལ་སེམས་མ་ཡེངས་པར་བསྒོམས་པས་མཆེད་པ་ཉེར་ཐོབ་ལ་གནས་ནས་ཤིན་ཏུ་སྟོང་པའི་ཡེ་ཤེས་འདོད་ཆགས་ལས་གྱུར་པའི་རང་བཞིན་བཞི་བཅུ་ཐིམ། རྟགས་ཉི་འོད་ལྟ་བུ་དམར་ལམ་ལམ་པ་བྱུང༌། རྟགས་ཅན་ནམ་མཁའ་ལྟར་སྔོ་སང་སང་བ་དང་གནག་ལིང་ལིང་བ་འོང་ངོ་། །ཡང་རླུང་བཅས་ཐིག་ལེ་ཨ་ཐུང་ལ་བསྡུས་ནས་ཨ་ཐུང་ལ་སེམས་མ་ཡེངས་པར་བསྒོམས་པས། ཉེར་ཐོབ་འོད་གསལ་ལ་ཐིམ་པས་ཐམས་ཅད་སྟོང་པའི་ཡེ་ཤེས་མ་རིག་པ་ལས་གྱུར་པའི་རང་བཞིན་བདུན་ཐིམ། རྟགས་མུན་པ་ལྟ་བུ་ནག་ཐམ་ཐམ་པ་བྱུང༌། རྟགས་ཅན་རང་ལུས་འོད་ཕུང་ལྟ་བུའི་འོད་འཕྲོ་བ་འབྱུང༌། ལར་རྟགས་འདི་ཚོ་ཁྲིགས་ཆགས་ཀྱི་ངེས་པ་མེད་པར་གོ་རིམ་འཆོལ་བའང་འབྱུང་སྲིད། དེ་རྣམས་ནི་འདོད་ཆགས་དག་པ་སོར་རྟོག་ཡེ་ཤེས་སངས་རྒྱས་འོད་དཔག་མེད་དུ་འཆར་རོ། །དེ་དག་ནི་ཁྱད་པར་གྱི་སྔོན་འགྲོ་ཡང་ཡིན་ནོ། །དངོས་གཞི་བདེན་པ་གཉིས་ཀྱི་ཚུལ་ཉམས་སུ་བླང་བ་ལ། ཀུན་རྫོབ་ཀྱི་བདེན་པ་མེད་བཞིན་དུ་སྣང་བ་སྒྱུ་མ་ལྟ་བུའི་ཚུལ་བསྒོམ་པའི་ཕྱིར་སྒྱུ་ལུས་ཀྱི་རིམ་པ་ནི། ཨ་ཐུང་སྣང་ལ་རང་བཞིན་མེད་པ་གནག་ཕྲིག་ཕྲིག་པ་ཤིན་ཏུ་ཕྲ་བ་ལ་སེམས་གཏད། དེ་ཡང་སྣང་ལ་རང་བཞིན་མེད་པ་སོགས་སྒྱུ་མའི་དཔེ་བཅུ་གཉིས་ཀྱིས་མཚོན་པར་བསྒོམ། ཡང་སྒྱུ་མ་བཟུང་བ་ནི། མདུན་དུ་ལྷ་སྐུ་མེ་ལོང་ལ་ཤར་བ་ལ་བསྟོད་སྨད་བྱས་པས། དགའ་སྡུག་སོགས་འདུག་གམ་མི་འདུག་བལྟ། དེ་མི་འདུག་པ་དང་ལྷ་སྐུ་དེ་དམིགས་པས་མདུན་དུ་ཕྱུང་ནས་དེ་ལ་བསྟོད་སྨད་བྱས་པས་དགའ་སྡུག་སོགས་འདུག་གམ་མི་འདུག་བལྟ༑ མི་འདུག་ན་དེ་ཉིད་སྒྱུ་མའི་དཔེ་བཅུ་གཉིས་སོགས་ཀྱིས་བརྟགས་ནས་བསྒོམ། དེ་སྒྱུ་མ་མེད་བཞིན་དུ་སྣང་བར་རྟོགས་ནས་མདུན་དུ་ལྷ་དམིགས་པ་རང་ལ་བསྟིམས་ནས་རང་ལྷ་སྐུ་སྒྱུ་མ་ལྟ་བུར་བསྒོམ། རང་ལྷར་གསལ་བ་ལ་བསྟོད་སྨད་དང༌། གཡས་ནས་ཙནྡན་གྱི་ལྡེ་གུས་བྱུགས་པ་ལ་དགའ་ཞིང་ཆགས་པ་མེད་པར། གཡོན་ནས་སྟེའུས་གཞོག་པ་ལ་མི་འཇིགས་ཤིང་སྡང་བ་མེད་པ་སྒྱུ་མ་ལྟ་བུར་སྦྱང་ངོ་། །དེ་ཡང་དངོས་པོ་ཐམས་ཅད་ལ་རང་དབང་མེད་པར་ཁྱབ་པ་སྒྱུ་མའི་སྤྲུལ་པ་ལྟ་བུ། གསལ་ལ་མ་འདྲེས་པ་འཇའ་ཚོན་ལྟ་བུ། རླུང་དང་འོད་ཟེར་ལས་གྲུབ་པ་མིག་འཁྲུལ་ལྟ་བུ། གཅིག་ལ་གཉིས་སམ་མང་པོར་སྣང་ཡང་མིག་ཡོར་ལྟ་བུ། གང་གིས་ཀྱང་གཞིག་པར་མི་ནུས་པ་གྲིབ་མ་ལྟ་བུ། གཅིག་གིས་ཀུན་ལ་ཁྱབ་པ་ཆུ་ནང་གི་ཟླ་བ་ལྟ་བུའམ་ཡ་མ་བརླ་ལྟ་བུ། ཡན་ལག་དང་ཉིང་ལག་ཏུ་སྣང་བ་མེ་ལོང་ནང་གི་གཟུགས་བརྙན་ལྟ་བུ། གནས་ཡུལ་དུ་སྣང་བ་དྲི་ཟའི་གྲོང་ཁྱེར་ལྟ་བུ། ཉམས་སུ་མྱོང་ཡང་ངོ་བོ་མེད་པ་རྨི་ལམ་ལྟ་བུ། རོ་གཅིག་ལ་དུ་མར་སྣང་བ་ཆུ་བུར་ལྟ་བུ། འཕྲོ་བ་མྱུར་བ་བྲག་ཆ་ལྟ་བུ། འཇུག་པ་མྱུར་བ་གློག་ལྟ་བུ་སྟེ་སྒྱུ་མའི་དཔེ་བཅུ་གཉིས་ཀྱིས་མཚོན་ནས་ཚོགས་དྲུག་ཐམས་ཅད་སྒྱུ་མར་སྦྱང་བ་ཤིན་ཏུ་གལ་ཆེའོ། །སླར་ལྷ་སྐུ་བསྡུས་ནས་ཨ་ཤད་སྣང་ལ་རང་བཞིན་མེད་པ། སྒྱུ་མ་ལྟ་བུ་ལ་སེམས་གཏད་ནས་རླུང་བཟུང༌། དེའི་ཚེ་ནམ་མཁའ་འགྲོ་བ་སོགས་ཀྱི་ཉམས་བྱུང་ན་སྒྱུ་མ་འབྱོངས་པའི་རྣམ་ཐར་སྐྱེས་པ་ཡིན་ནོ། །དེ་ནས་སྒྱུ་མ་སྦྱང་བ་ནི། ཉམས་ཅི་སྐྱེས་ཀྱང་དགའ་ཞིང་རློམས་པ་མེད་པར་ངམ་གྲོགས་དང་གཡང་ས་དང་ཆུ་དང་རི་བྲག །མེ་ཕུང་སོགས་ལ་ཐོགས་པ་མེད་པར་སྟོང་པར་སྟོང་ཐལ་ཐལ་བཏང་ལ། སྒྱུ་མའི་རྣམ་ཐར་སྤེལ་བ་སོགས་བྱ། བདག་གིས་བར་དོའི་དུས་སུ་སྒྱུ་མའི་ལུས་ཀྱང་སྒྱུ་ལུས་སུ་ཤེས་ཤིང་ལོངས་སྤྱོད་རྫོགས་པའི་སྐུར་ལྡང་བར་བྱའོ་སྙམ་དུ་འཕེན་པ་ཡང་ཡང་བཏང༌། དེ་ལྟར་ཉིན་མོ་བསྒོམ། མཚན་མོ་རྨི་ལམ་སྒྱུ་མར་སྦྱང་བ་ཡང་གོང་ལྟར་ལྷར་གསལ་བའི་ཐུགས་ཀའི་ཨ་ཐུང་ལ་སེམས་གཏད། རྨི་ལམ་ལ་རྨི་ལམ་དུ་ཤེས་པར་བྱའོ་སྙམ་དུ་འཕེན་པ་བཏང་ལ་གཉིད་ལོག །རྨི་ལམ་ཟིན་པའི་ཚེ། རྨི་ལམ་ཡིན་རྨི་ལམ་སྒྱུ་མ་ཡིན་པས་ཅིར་ཡང་བསྒྱུར་ཏུ་གཏུབ་བསམ་པས་སྤེལ་ཞིང་སྦྱང་བ་དང་བསྒྱུར་བ་ལ་བསླབ། བདག་གིས་རྨི་ལམ་སྒྱུ་མའི་སྣང་བ་འདི་ལོངས་སྐུར་ལྡང་བར་བྱའོ་སྙམ་ནས་ལྡང་བ་སོགས་བྱ། ཡང་རྨི་ལམ་བར་དོ་ཡིན། སྲིད་པ་བར་དོ་ཡང་ཚུལ་འདི་ལྟར་ཉམས་སུ་བླང་བར་བྱའོ་སྙམ་དུ་འཕེན་པ་ཡང་ཡང་བཏང༌། དེས་ནི་ཞེ་སྡང་དག་པ་མེ་ལོང་ལྟ་བུའི་ཡེ་ཤེས་སངས་རྒྱས་མི་བསྐྱོད་པ་ཡང་འཆར་རོ།། །།བཞི་པ་དོན་དམ་བདེན་པ་སྣང་ཡང་ངོ་བོས་མ་གྲུབ་པར་རང་བཞིན་མེད་པར་འོད་གསལ་གྱི་རིམ་པ་ནི། སྒྱུ་མར་སྣང་ཙམ་པའི་གཉིས་སྣང་གི་རྟོག་པ་དེ་ཡང་འོད་གསལ་སྟོང་པ་ཆེན་པོའི་མེས་སྦྱང་བ་ཡིན་ལ། འདི་ལ་ཡང་གཞི་ལམ་འབྲས་བུའི་འོད་གསལ་གསུམ། གཞིའི་འོད་གསལ་ལ་ཡང་གཞིའི་སྤྱི་དོན་གྱི་འོད་གསལ་ནི་སེམས་ཉིད་རང་བཞིན་འོད་གསལ་བ་ཉིད་ཡིན། གཞིའི་སྦས་དོན་གྱི་འོད་གསལ་ནི་འཆི་བའི་ཚེ་ཉེར་ཐོབ་འོད་གསལ་ལ་ཐིམ་མ་ཐག་བརྗོད་མེད་ཀྱི་འོད་གསལ་བདེ་བ་ཆེན་པོར་ཡུད་ཙམ་རེ་འཆར་བ་དེ་ཉིད་ཡིན་ནོ། །དེ་དག་གི་ངོ་བོར་འཚང་རྒྱ་བའི་ཐབས་ནི། ལམ་གྱི་འོད་གསལ་ཉམས་སུ་བླང་བ་སྟེ༑ དེ་ཡང་ཉིན་པར་འོད་གསལ་འཛིན་པའི་ཚེ་ཞི་བ་དང་དྲག་པོ་གཉིས་ལས་ཞི་བར་འཛིན་པ་ནི་རང་ལྷར་གསལ་བ་རིལ་འཛིན་ནམ། རྗེས་གཞིག་གི་བསམ་གཏན་གཉིས་པོ་གང་རུང་གིས་སྟོང་པ་ཆེན་པོར་བསྡུས་ལ་སེམས་ནམ་མཁའ་ལྟར་མཐའ་དབུས་མེད་པ། ཉི་ཟླ་ལྟར་གསལ་བ། རྒྱ་མཚོ་ལྟར་དྭངས་པ། རི་བོ་ལྟར་གཡོ་འགུལ་མེད་པར་བཞག་གོ །དྲག་པོར་འཛིན་ན་རང་ལྷར་ཝལ་ཙམ་གསལ་བས་རང་ངམ་གྲོགས་ཀྱིས་རྩ་རྦ་རླབས་རིམ་གྱིས་བཙིར་བས། སྲོག་འགོགས་པའི་ཚེ་འབྱུང་བ་བཞི་དང་སྣང་མཆེད་ཐོབ་གསུམ་ཐིམ་པའི་རྟགས་མན་ངག་ལྟར་ངོས་བཟུང་བའི་མཐར་སྲོག་འགགས་པ་དང་ལྷན་ཅིག་ལ་སྐད་ཅིག་མའི་འོད་གསལ་ཤི་བའི་དུས་དང་ཆ་འདྲ་བ་འབྱུང་བ་དེ་ལ་ཡུན་རིང་དུ་འཇོག་ཅིང༌། ཚུལ་དེ་ནི་ཤི་བའི་ཚེ་ཡང་ཉམས་སུ་བླང་བའི་མན་ངག་དམ་པའོ། །མཚན་མོ་གཉིད་མཐུག་གི་འོད་གསལ་འཛིན་པ་ཡང༌། བླ་མ་སྤྱི་བོར་བསྒོམ། མདུན་དུ་ཡི་དམ་བསྒོམ་ལ་འོད་གསལ་ཟིན་པར་གསོལ་བ་བཏབ། དཀོན་མཆོག་གི་རྟེན་ལ་མཆོད་པ་འབུལ། ཡི་དམ་མཁའ་འགྲོ་ཆོས་སྐྱོང་ལ་མི་ཤས་བརྒྱན་པའི་གཏོར་མ་འབུལ་ནས་གོང་ལྟར་གསོལ་བ་བཏབ། དཀར་མེ་མཚན་ཐུབ་བཏང༌། སྔས་བྱང་དུ་བསྟན་སེང་གེའི་ཉལ་སྟབས་བྱས་ལ་བླ་མ་སྤྱི་བོར་བསྟིམ། གཉིད་མཐུག་གི་གཏི་མུག་འོད་གསལ་དུ་འཛིན་པའི་འཕེན་པ་བཏང༌། རང་ལྷར་གསལ་བའི་སྙིང་གར་པདྨ་སྔོན་པོ་འདབ་མ་བཞི་པའི་ལྟེ་བར་མི་ཤིགས་པའི་ཐིག་ལེ་སྔོན་པོ་འོད་འབར་བ་ལ་ཤེས་པ་གཏད། གཉིད་ཀྱི་ཐིམ་རིམ་ངོས་བཟུང༌། གཉིད་ལ་འགྲོ་བའི་ཚེ་ཐིག་ལེ་ལ་སེམས་མ་ཡེངས་པར་གཏད་ནས་གཉིད་དུ་བཏང༌། གྲོགས་ཀྱིས་བལྟས་པས་དབུགས་བདེ། ངོ་མདངས་གསལ་ན་ཟིན་པ་ཡིན། དེ་ལས་བཟློག་ན་མ་ཟིན་པ་ཡིན་པས་གཉིད་སད་ནས་སླར་འཛིན་པ་ཡིན། དེའི་ཚེ་གཉིད་ལོག་ཏུ་མ་གཏུབ་ན་སྟོང་འབྱམས་ཡིན་པས་ཟས་བཅུད་ཅན་བསྟེན། སྨིན་མཚམས་སུ་ཐིག་ལེ་ནག་པོ་བསྒོམ། དེས་ཀྱང་མ་བྱུང་ན་གཉིད་ལོག་དུས་བརླ་རྩ་གཉིས་ཅུང་ཟད་མནན། གཉིད་མཐུག་དྲག་པོ་ནི་རྡུག་འབྱམས་ཡིན་པས་གོས་སྲབ་ཏུ་བཏང༌། རླུང་བུམ་པ་ཅན་བཟུང༌། ཟིན་ལ་ཁད་དུས་གཉིད་སད་ན་སད་འབྱམས་ཡིན་པས་དེའི་གཉེན་པོར་སྟོང་འབྱམས་དང་འདྲ་ཞིང་གཉིད་ཀྱི་གེགས་རྣམས་སྤང༌། རྨི་ལམ་ཁོ་ནས་ཁྱེར་ན་དྲེད་འབྱམས་ཡིན་པས། གོང་གི་ཐིག་ལེ་དེ་ཉིད་ནག་པོར་བསྒོམ་རླུང་མི་བཟུང༌། དེ་ལྟར་བྱས་པས་གཉིད་སྲབ་མོས་ཟིན་ན་གཉིད་དུ་འགྲོ་བ་དང་ལྷན་ཅིག་ཉི་མ་ཤར་བ་ལྟར་དྭངས་ཤིང་གསལ་ལ་བློའི་འཛིན་པ་དང་ཚོགས་དྲུག་གི་དེར་སྣང་ཅུང་ཟད་ཙམ་ཡོད་པ་ལ་དེའི་འཁྲུལ་བློའི་རྗེས་སུ་མི་འབྲང་བ་འབྱུང༌། གཉིད་མཐུག་པོས་ཟིན་ན་གསལ་སྟོང་ནམ་མཁའ་ལྟ་བུ་འཛིན་མེད་ཀྱི་ཏིང་ངེ་འཛིན་ཆེས་བརྟན་པ་འབྱུང༌། དེ་ལྟར་ཟིན་ནས་གྲོགས་དང་མར་མེ་སོགས་མི་དགོས་པར་རང་ཉིད་ཁོ་ནས་སྦྱང༌༑ དེ་ལ་འབད་པས་རབ་ཚེ་འདི། འབྲིང་འཆི་ཁར་འོད་གསལ་ངོས་ཟིན་ནས་གྲོལ་བར་འགྱུར་རོ། །འཆི་བའི་ཚེ་གང་ལ་ཡང་མ་ཆགས་པའི་ངོས་ནས་བླ་མ་ཡབ་ཡུམ་ལ་འཆི་བ་ལམ་དུ་སློང་བར་གསོལ་བ་བཏབ་ལ་ཐིམ་རིམ་ངོས་བཟུང༌། ཐ་མའི་ཚེ་གོང་གི་བཙན་ཐབས་སམ་གཉིད་མཐུག་གི་སྐབས་ལྟར་འཛིན། གྲོགས་ཀྱིས་བརྡ་སྦྱར་བས་འཆི་བ་འོད་གསལ་ཆོས་སྐུར་གྲོལ་བ་གདོན་མི་ཟའོ། །ཞིབ་ཆ་ཞལ་ལས་དྲིས། འདིའི་རྟགས་སྤྲིན་མེད་པའི་ནམ་མཁའ་རྐྱེན་གསུམ་དང་བྲལ་བ་ལྟ་བུ་འབྱུང༌། དེ་ནི་གཏི་མུག་དག་པ་ཆོས་དབྱིངས་ཡེ་ཤེས་སངས་རྒྱས་རྣམ་པར་སྣང་མཛད་དུ་འཆར་རོ།། །།ལྔ་པ་ཟུང་འཇུག་གི་རིམ་པ་ནི། དེ་ལྟར་ལམ་གྱི་དངོས་གཞི་སྒྱུ་ལུས་དང་འོད་གསལ་གྱི་ཉམས་སུ་བླང་བ་ཡང་ཐ་དད་ཡ་བྲལ་མ་ཡིན་པ་སྣང་ཕྱོགས་སྒྱུ་མ་ལྟ་བུ། སྟོང་ཕྱོགས་འོད་གསལ་སྟོང་ཉིད་ནམ་མཁའ་ལྟ་བུ་ཟུང་འཇུག་ཏུ་ཉམས་སུ་བླང་བ་ཡིན་ཏེ། ཉིན་མཚན་འཆི་དུས་ཀྱི་འོད་གསལ་གང་ཡིན་ཀྱང་སྟོང་པ་ཆེན་པོ་ཁྱབ་བདལ་གསལ་དྭངས་དེའི་ངང་ནས་ཁམས་གསུམ་ཐམས་ཅད་རྡོ་རྗེ་འཆང་གི་སྐུར་སྣང་བའམ་ཚོགས་དྲུག་ཐམས་ཅད་མ་བསྒྲིབས་པར་གསལ་ལ་དེར་འཛིན་མེད་པ་སྟོང་པ་དང་སྣང་བ་ཕྱོགས་གཅིག་གང་དུ་ཡང་བརྗོད་དུ་མེད་པ་གཉིས་སུ་མེད་པའི་ཉམས་འཆར་བ་ནི་ལམ་དུས་ཀྱི་ཟུང་འཇུག་ཡིན་ལ། ཤི་བ་དང་སྐད་ཅིག་མ་དང་འོད་གསལ་ཆེན་པོར་ལམ་གྱི་ཚེ་ཆོས་སྐུ་མཉམ་ཡངས་མཐའ་བྲལ་ཆེན་པོ་རང་གིས་མ་བསྒྲུབས་ཀྱང་འགྲུབ་ལ། དེ་ལས་མ་གཡོས་བཞིན་དུ་ཚོགས་དྲུག་གི་སྣང་ཆ་སྒྱུ་མ་ལྟ་བུ་དག་པའི་སྣང་བ་འབའ་ཞིག་ཏུ་འཆར་བ་རྣམས་དེར་འཛིན་འཁྲུལ་བློ་མེད་པར་སྣང་སྟོང་ཆུ་ཟླ་ལྟ་བུར་འཆར་བས་ཟུང་འཇུག་ལོངས་སྤྱོད་རྫོགས་པའི་སྐུ་སྐད་ཅིག་ལ་འབད་པ་མེད་པར་འགྲུབ་པ་ཡིན་ནོ། །དེས་ནི་ང་རྒྱལ་དག་པ་མཉམ་ཉིད་ཡེ་ཤེས་སངས་རྒྱས་རིན་ཆེན་འབྱུང་ལྡན་དུ་འཆར་རོ། །མཇུག་རྣམས་སུ་བསྔོ་བས་རྒྱས་བཏབ། ཐུན་མཚམས་ཐམས་ཅད་ཚོགས་དྲུག་སྣང་ལ་རང་བཞིན་མེད་པ་སེམས་དང་སེམས་བྱུང་ཐ་དད་མེད་ཅིང་བརྗོད་མེད་བཟོ་བྲལ་འོད་གསལ་ཆེན་པོ་དེའི་ངང་ལས་རང་མདངས་བསྐྱེད་རིམ་ལྷ་སྐུ་སྒྱུ་མ་ལྟ་བུར་ནན་གྱིས་སྤྱོད། ཡན་ལག་འཕོ་བ་དང་གྲོང་འཇུག་གཏུམ་མོ་སོགས་ནག་ཁྲིད་དུ་ཤེས་པར་བྱའོ། །ཞེས་པ་ནི་ཕ་རྒྱུད་གསང་བ་འདུས་པའི་རྫོགས་རིམ་ལམ་རིམ་པ་ལྔ་པ་འཁོར་ལོ་མེད་པ་ཅན་མདོར་བསྡུས་པ་ཟབ་མོར་གདམས་པའི་སྐབས་སོ།། །།ཡང་མ་རྒྱུད་འཁོར་ལོ་སྡོམ་པའི་རྫོགས་པའི་རིམ་པ་གྲུབ་ཆེན་དྲིལ་བུ་ཞབས་ཀྱི་དགོངས་པ་ལྟར་ཉམས་སུ་བླང་བ་ནི། སྔོན་འགྲོ་རྣམས་གོང་ལྟར་ལས། དངོས་གཞིའི་ལམ་དྲིལ་བུ་རིམ་ལྔར་གྲགས་པ་ལ་ཡང་རིམ་པ་དང་པོ་དང་གཉིས་པ་ཁྱད་པར་གྱི་སྔོན་འགྲོ། གསུམ་པ་དངོས་གཞི། བཞི་པ་ཆ་ལག །ལྔ་པ་ངོ་སྤྲོད་ཀྱི་ཚུལ་དུ་སྟོན་ཏེ། དང་པོ་ཡིད་དག་པར་བྱེད་པ་རང་བྱིན་གྱིས་བརླབ་པའི་རིམ་པ་ལ་གསུམ་གྱི་ས་བོན་མེད་པའི་ཆེན་པོ་ནི། ལུས་རྣམ་སྣང་གི་ཆོས་བདུན་དང་ལྡན་པས་རང་གི་སེམས་ཡུལ་ལ་འཇུག་པ་འདི་ཉིད་ཚོགས་དྲུག་གི་རྣམ་རྟོག་དེར་འཛིན་དང་བཅས་པ་བཀག་ནས་རྣམ་པར་མི་རྟོག་པའི་ངང་དུ་ཅི་གནས་སུ་འཇོག་པ་ཉིད་དོ། །ས་བོན་དང་བཅས་པ་ནི། གལ་ཏེ་དེ་ལྟ་བུས་སེམས་གནས་པར་མ་ནུས་ན་རང་འཁོར་ལོ་སྡོམ་པ་ཡབ་རྐྱང་དུ་གསལ་བའི་ཐུགས་ཀར་ཨྃ་ལས་ཟླ་བ་ ཕྱེད་པ་སྲན་མ་ཕྱེད་གཤག་ཙམ་གྱི་སྟེང་མི་ཤིགས་པའི་ཐིག་ལེ་ཡུངས་འབྲུ་ཙམ་དཀར་ལ་དམར་བའི་མདངས་ཅན། རང་བཞིན་སྟོང་པ། རྣམ་པ་གསལ་བ། ངོ་བོ་ཟུང་དུ་འཇུག་པ་ལ་སེམས་གཏད་ལ་མི་སྤྲོ་བར་བསྒོམ། དེ་ལ་སེམས་ཟིན་ཀྱང་དབང་ཤེས་ཡུལ་ལ་འཕོ་ནས། མིག་དབང་གཟུགས་ལ་འཕོ་ན། མིག་ཏུ་ཐིག་ལེ་དཀར་པོ། དེ་བཞིན་དུ་རྣ་བ་སྒྲར་འཕོ་ན་ཐིག་ལེ་ནག་པོ། སྣ་དྲིར་འཕོ་ན་སེར་པོ། ལྕེ་རོར་འཕོ་ན་དམར་པོ༑ ལུས་རེག་བྱར་འཕོ་ན་རྡོ་རྗེའི་རྩེར་ལྗང་གུ་རྣམས་གང་རུང་བསྒོམ་པ་ལ་སེམས་བཟུང༌། མཐར་ཚོགས་དྲུག་གང་ལ་འཕོ་བ་དང༌། དེའི་དབང་ཤེས་དབྱེར་མེད་རྩོལ་བྲལ་དུ་བསྒོམ་མོ། །ས་བོན་མེད་པ་ཞེས་བྱ་བ་ནི། རླུང་སེམས་ལྷན་ཅིག་ཏུ་འཆིང་བ་སྟེ། རང་གི་ལུས་ཀྱི་རླུང་ཟླ་ཉི་ཟུང་འཇུག་གི་བདག་ཉིད་གསུམ་དུ་གནས་པ་ལུས་ཀྱི་སྟེང་དུ་གཡས་གཡོན་མཉམ་པ་གསུམ། བར་དུ་སྟེང་འོག་བར་གསུམ། སྨད་དུ་རྩ་གསུམ་གྱི་དབྱེ་བ་གསུམ་སྟེ། ཐམས་ཅད་ཀྱང་རྡོ་རྗེ་གསུམ་དུ་མོས་ནས། ལུས་གནད་སྔ་མ་ལྟ་བུ་ལ་ལག་གཉིས་པུས་མོའི་སྟེང་དུ་ས་གནོན་བྱས་ལ། སྣ་བུག་གང་ནས་རླུང་རྒྱུ་བ་དེ་འཇུག་གནས་འབྱུང་གསུམ་མ་བཅོས་རང་བབ་ལ་སེམས་བཟུང༌། རླུང་དེའི་ཁ་དོག་དམར་སྨུག་གམ་དམར་སྐྱ་ལ་སེམས་བཟུང༌། རླུང་དེ་ཉིད་ནང་དུ་ཞུགས་ཚེ་ལུས་ཐམས་ཅད་ཁྱབ་པར་བསྒོམ། དེ་བཞིན་དུ་རླུང་གི་རྒྱུ་བའི་ཕྱོགས་ཀྱི་སྣ་བུག་ལ་སྦྱར་མཐར་གཉིས་ཀ་ལ་ཡང་སྦྱར། ཡང་སྟེང་འོག་གི་རླུང་མན་ངག་ལྟ་བུ་བུམ་པ་ཁ་སྦྱོར་དང༌། ལོགས་རླུང་རྒྱབ་རླུང་གཉིས་ལའང་དེ་ལྟར་སྦྱར་ནས་བསྒོམ། མཐར་གོང་གི་ཐིག་ལེ་དང་རླུང་སྟབས་གཅིག་ལ་སྦྱར་ལ་བསྒོམ། དེས་ནི་ལྷའི་མིག་སོགས་ཐོབ་པར་བྱེད་དོ།། །།གཉིས་པ་རླུང་དག་པར་བྱེད་པ་སྣ་ཚོགས་རྡོ་རྗེའི་རིམ་པ་ལ་ཡང༌ས་བོན་དང་བཅས་པ་དང་ས་བོན་མེད་པ་གཉིས་ལས། ས་བོན་དང་བཅས་པ་ནི། ལུས་གནད་གོང་ལྟར་ལ། རླུང་རོ་བསལ། སྟེང་འོག་གི་རླུང་ཁ་སྦྱོར་དྲག་པོས་བཟུང་ལ། ལུས་ནང་འོད་ཀྱི་རང་བཞིན་ཅན་གྱི་རླུང་གིས་གང་བར་བསམ། སྤྱི་བོར་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང༌། ལྟེ་བ་མཐིང་གའི་དབུས་སུ་ཨ་ལས་ཆོས་འབྱུང་གི་ནང་དུ་ཧཱུྃ་ལས་རྡོ་རྗེ་དམར་པོ་རྩེ་ལྔ་པའི་ལྟེ་བར་ཟླ་བ་ལ་ཧཱུྃ་དཀར་ལ་དམར་བས་མཚན་པ་ལ་སེམས་གཏད། མཐར་ཧཱུྃ་གི་ཐིག་ལེ་ལ་སེམས་ཅི་གནས་སུ་བཞག །དེ་ལས་གཡོ་ན་ལུས་ནང་དུ་དྷཱུ་ཏི་གསལ། རླུང་གི་འོད་དྷཱུ་ཏིའི་ནང་དུ་མར་སོང་བས་བདེ་བ་སྐྱེས་པར་བསམ་ལ་བསྒོམ། དེ་བཞིན་དུ་གསང་གནས་སུ་ཡང་སྣ་ཚོགས་རྡོ་རྗེ་སོགས་སྔ་མ་ལྟ་བུ་བསྒོམ་པའི་རླུང་འོད་ཕྲེང་དུ་འགྲོ་བ་ལ་སེམས་གཏད། ཡུལ་ལ་སེམས་འཕོ་ན་གོང་དུ་འཕོ་བའི་མིག་སོགས་ཀྱི་དབང་པོ་སོགས་ཀྱང་སྣ་ཚོགས་རྡོ་རྗེར་བསྒོམ། དེ་ལྟར་འབད་པས་ཉི་མ་སྐར་མ་ལྟ་བུའི་རྟགས་སྣང་འཆར། ཡང་ལུས་གནད་གོང་ལྟར་ལ་སྣ་བུག་གཡས་ནས་རླུང་བུས། མཛོད་སྤུའི་ཐད་དུ་ཉི་མའི་དཀྱིལ་འཁོར་ལ་སེམས་གཏད། ཡང་གཡོན་ནས་བུས་ཉི་མའི་དཀྱིལ་འཁོར་དེའི་སྟེང་དུ་ཟླ་བའི་དཀྱིལ་འཁོར་དུ་གྱུར་པ་ལ་སེམས་གཏད། ཡང་གཉིས་ཀ་ནས་བུས་པས་ཟླ་དཀྱིལ་གྱི་དབུས་སུ་ཐིག་ལེ་སྔོན་པོ། ཤར་དཀར། ལྷོ་སེར། ནུབ་དམར། བྱང་ལྗང་བའི་ཐིག་ལེ་ལྔར་གྱུར་པར་བསམ་སྟེ། ཐིག་ལེ་རྣམས་རེས་མོས་སུ་སེམས་གཏད། དེ་རྣམས་ཀྱི་ཚེ་རླུང་བུས་ནས་ནང་དུ་མི་རྔུབས་པར་ཕྱིར་འཛིན་ལ་ཅི་ཐུབ་ཏུ་བཟུང༌། མི་ཐུབ་པའི་ཚེ་ནང་དུ་རྔུབ། དམིགས་པ་དེ་ཉིད་རིམ་པ་ལྟར་གསང་བར་བསྒོམ། དེ་ནས་མིག་ལ་སོགས་པ་དབང་པོའི་སྒོ་རྣམས་སུ་ཡང་བསམ། སེམས་དང་ཡང་བསྲེ༑ དེས་ནི་སྔ་མའི་བོགས་འདོན་ཞིང་ལྷའི་མིག་སོགས་རྒྱུད་ནས་གསུངས་པ་རྣམས་ངེས་པར་འཐོབ་པའོ། །གསུམ་པ་ནོར་བུ་འགེངས་པའི་རིམ་པ་ཞེས་སམ་དངོས་གཞི་བསྒོམ་པ་ལ། དམ་ཚིག །ལས། ཆོས། ཕྱག་རྒྱ་ཆེན་པོ་དང་བཞི་ལས། དང་པོ་དམ་ཚིག་གི་ཕྱག་རྒྱ་ནི། ལུས་རྣམ་སྣང་ཆོས་བདུན་དང་ལྡན་པས། རང་འཁོར་ལོ་སྡོམ་པར་གསལ་བའི་པང་དུ་ཡུམ་རྡོ་རྗེ་རྣལ་འབྱོར་མར་གསལ་བཏབ་པའི་ཡུམ་གྱི་མཁའ་གསང་སྒྲུབ་ཐབས་ལྟར་བྱིན་གྱིས་བརླབས་རྗེས། རང་གི་ལྟེ་བར་ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུྃ་ཕཊ། སྙིང་གར་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧུཾ་ཧཱུྃ་ཕཊ། མགྲིན་པར་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧུཾ་ཧཱུྃ་ཕཊ་ཌཱ་ཀི་ནཱི་ཛྭ་ལ་སམྦྷ་རཾ་སྭཱ་ཧཱ། དཔྲལ་བར་ཨོཾ་ཧྲཱིཿ ཧ་ཧ་ཧུཾ་ཧཱུྃ་ཕཊ། ཡུམ་གྱི་ལྟེ་བར་ཨོཾ་ཤྲཱི་བཛྲ༴ སྙིང་གར་ཨོཾ་ཧྲཱིཿ ཧ༴ མགྲིན་པར་ཨོཾ་བཛྲ་བཻ་རོ༴ དཔྲལ་བར་ཨོཾ་སརྦ་བུདྡྷ༴ དེ་ལྟར་གསལ་བཏབ་ནས་འདུ་ཤེས་གསུམ་ལྡན་གྱིས་སྙོམས་པར་ཞུགས་པ་བྱང་སེམས་སྤྱི་བོ་ནས་མགྲིན་པར་སླེབས་པ་དགའ་བ། སྙིང་གར་མཆོག་དགའ། ལྟེ་བར་དགའ་བྲལ། གསང་བར་ལྷན་སྐྱེས་རྣམས་སོ་སོར་མཉམ་པར་བཞག །ནོར་བུའི་རྩེ་མོར་སོན་པ་དང་ལྡོག་པ་གསུམ་གྱི་སྦྱོར་བས་ཧཱུྃ་ཞེས་ཡར་བཟློག་པས་ལྟེ་བར་དགའ་བ། སྙིང་གར་མཆོག་དགའ། མགྲིན་པར་དགའ་བྲལ། སྤྱི་བོར་ལྷན་སྐྱེས་ལ་མཉམ་པར་བཞག །དམིགས་པ་རྣོ་བས་ཀུནྡ་འཕོ་བར་ཉེ་ན་ལག་གཉིས་ཁུ་ཚུར་བཅངས་པ་སྙིང་གར་བསྣོལ། མིག་གཉིས་གྱེན་དུ་ལྡོག །ལྕེ་ཡ་རྐན་ལ་སྦྱར། ཧྲིཾ་ཞེས་རླུང་སེམས་གྱེན་དུ་འཐེན་ལ་བྱང་སེམས་དྷཱུ་ཏིའི་ནང་དུ་ཡར་འཕོས་པས་སྤྱི་བོའི་ཧྃ་ལ་ཐིམ་པར་བསམ་མོ། །ལས་ཀྱི་ཕྱག་རྒྱ་ནི། པདྨ་ཅན་སོགས་བསྟེན་བྱར་འོས་པ་དྲང་ངེས་ཀྱི་ཆོས་བཤད་པས་བློ་བཅོས། དབང་གིས་སྨིན་པར་བྱས་ནས་ཚུལ་དང་མཐུན་པའི་གནས་སུ་རང་དང་རིག་མ་འཁོར་ལོ་སྡོམ་པ་ཡབ་ཡུམ་དུ་བསྐྱེད་པའི་མཁའ་གསང་བྱིན་གྱིས་བརླབས་ནས་སོ་སོར་སྔགས་རྣམས་བགོད་ནས། བརྡ་དང་སྔགས་ཀྱི་སྦྱོར་བས་འདུ་ཤེས་གསུམ་ལྡན་གྱིས་སྙོམས་འཇུག་བྱ། བྱང་སེམས་ཕབ་ཅིང་དགའ་བཞིའི་ཡེ་ཤེས་ལ་མཉམ་པར་བཞག །འཕོར་ཉེ་བའི་ཚེ། རབ་ཏིང་ངེ་འཛིན། འབྲིང་དམིགས་ལུགས། ཐ་མ་འཁྲུལ་འཁོར་གྱི་སྒོ་ནས་དབབ་འཛིན་ཟློག་འདྲེན་དགྲམ། རྩ་མིག་ཏུ་གདབ་པར་བྱ་ཞིང་འཁྲུལ་འཁོར་དགོས་པ་བྱུང་ན་རུང་མཐུན་གཞན་ནས་ཁ་སྐོང་དུ་རུང་ངོ༌། །ཞིབ་ཆ་ཞལ་དུ་གབ་བོ། །ཆོས་ཀྱི་ཕྱག་རྒྱ་ནི། བཤད་མ་ཐག་པའི་ཡིད་རིག་དང་དངོས་རིག་གང་ཡིན་ཡང་སྙོམས་འཇུག་གི་བྱ་བ་བྱས་ཟིན་མ་ཐག་རིག་པ་ཧཱུྃ་དམར་སྐྱར་གྱུར་པ་རང་གི་རྡོ་རྗེའི་ལམ་ནས་རྒྱུ་བ་སྐད་ཅིག་གིས་ཐུར་སེལ་རླུང་གློག་གི་ཞགས་པ་ལྟ་བུས་བཀུག་ཅིང་དྲངས་པ་གསང་ལྟེ་སྙིང་མགྲིན་དཔྲལ་བར་སླེབས་པའི་ཚེ། དགའ་བཞི་སོ་སོར་སེམས་བཟུང་མཐར་སྤྱི་བོའི་ཧྃ་ལ་བསྟིམ་དམིགས་མེད་དུ་བཞག །སླར་ཚོགས་དྲུག་གི་ཡུལ་སྣང་གང་ཤར་བ་བདེ་སྟོང་ལྷན་སྐྱེས་ཀྱི་མྱོང་བ་དང་བསྲེ། རང་བབ་བཅོས་མིན་གྱི་ཉམས་བཟོ་མེད་གཅེར་ཡན་དུ་སྐྱོང༌། ཕྱག་རྒྱ་ཆེན་པོ་ནི། སེམས་གསལ་སྟོང་ཟུང་འཇུག །ལམ་བདེ་སྟོང་ལྷན་སྐྱེས་ཀྱི་གདམས་པ། རྣམ་པར་མི་རྟོག་པ་ཟུང་འཇུག་ལྷན་སྐྱེས་ཀྱི་བསམ་དུ་མེད་པའི་ངོ་བོར་བཞག་ཅིང༌། དེའི་རྩལ་སྣང་རྣམས་ཀྱང་ཉི་མ་དང་འོད་ཟེར་ལྟར་གཅིག་ཡིན་ཐ་དད་མིན་པའི་ངོ་བོར་བཟོ་མེད་དུ་བསྒོམས་པས་དུ་སོགས་རྣམ་ཀུན་མཆོག་ལྡན་གྱི་སྟོང་པ་ཉིད་འཆར་ཞིང་དེ་ལ་གོམས་པར་བྱའོ།། །།བཞི་པ་ཛ་ལནྡྷ་རའི་རིམ་པ་ཞེས་གྲོལ་ལམ་པའི་དབང་དུ་མཛད་པ་ལམ་གྱི་ཆ་ལག་ནི། ལུས་རྣམ་སྣང་གི་ཆོས་བདུན་ལྟར་ལ་ལག་པ་གཡས་གཡོན་བསྣོལ་ནས་དཔུང་པའི་བར་ལྷུ་འཇུས་ཏེ། རང་གི་ལྟེ་བའི་འོག་སོར་བཞིར་ཆོས་འབྱུང་ཕྱི་དཀར་ནང་དམར་བའི་དབུས་སུ་ཐིག་ལེ་སྔོན་པོ། མདུན་དུ་དཀར་པོ། གཡས་སུ་སེར་པོ༑ རྒྱབ་ཏུ་དམར་པོ། གཡོན་དུ་ལྗང་གུ་རྣམས་བསྒོམ། རླུང་རོ་བསལ་ནས་སྲོག་ཐུར་གྱི་རླུང་བུམ་པ་ཅན་ཁ་སྦྱོར་བྱས་པས། ཐིག་ལེ་སོ་སོ་ལས་གཏུམ་མོའི་མེ་རང་རང་གི་མདོག་ཅན་ཤིན་ཏུ་ཕྲ་ཞིང་རྣོ་བ་འབར་བ་ལ་སེམས་རྩེ་གཅིག་ཏུ་གཏད། དེ་ལ་གོམས་ནས། མེ་རྣམས་ཆེར་འབར་བའི་འོད་འདྲེས་པ་སྣ་བུག་གཡས་ནས་ཕྱིར་ཐོན། ཕྱོགས་ཐམས་ཅད་དུ་འཕྲོས་པས་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པ་ན་བཞུགས་པའི་སངས་རྒྱས་ཐམས་ཅད་ཀྱི་ཤངས་བུག་གཡས་སུ་ཞུགས་ནས། སྐུའི་དབྱིབས་བརྒྱུད་ལྟེ་བར་སོང་ནས་གྱེན་དུ་འབར་ནས་དེ་དག་གི་སྐུའི་ལྟེ་བ། ཐུགས་ཀ། མགྲིན་པ། སྤྱི་བོའི་གནས་རྣམས་བསྲེགས་ཏེ་བྱང་ཆུབ་ཀྱི་སེམས་དཀར་དམར་རྣམས་སྤྱན་དྲངས་ནས་ཤངས་བུག་གཡོན་པ་ནས་ཐོན། རང་གི་སྣ་བུག་གཡོན་དུ་ཞུགས་ནས་སྤྱི་བོར་སོང་དྷཱུ་ཏིའི་ནང་བརྒྱུད། ལྟེ་བའི་མེ་ལྔ་ལ་འདྲེས་པས་བདེ་དྲོད་གསལ་སྟོང་ཟུང་འཇུག་གི་ཉམས་ཚད་མེད་པ་སྐྱེས། སླར་རང་གི་ལྟེ་བའི་མེ་ལྔ་ཆེར་འབར་བ་རྒྱལ་བ་འཁོར་བཅས་ཀྱི་བྱང་ཆུབ་སེམས་དང་ཐ་མི་དད་པས་རང་གི་སྤྱི་བོ་ནས་རྐང་མཐིལ་ཡན་ཆད་པར་མེས་གང་བ་ལ་སེམས་གཏད། སྲོག་ཐུར་བུམ་ཅན་དུ་བཟུང༌། འདི་ལ་གོམས་པས་ལྟེ་བ་སོགས་གནས་གང་དུ་བྱང་སེམས་བརྟན་པ་དེ་དག་གི་ཡོན་ཏན་རྒྱུད་ནས་ཇི་སྐད་གསུངས་པ་ལྟར་འབྱུང་བས་ན་ནན་ཏན་དུ་བསྒོམ་པ་གལ་ཆེའོ།། །།ལྔ་པ་བསམ་གྱིས་མི་ཁྱབ་པའི་རིམ་པ་ཞེས་པ་ངོ་འཕྲོད་ནས་ཉམས་མྱོང་བསྐྱང་བ་ཡིན་ཏེ། ཚོགས་དྲུག་གི་ཡུལ་སྣང་གང་ཤར་བ་དེ་ཉིད་བཅོས་མིན་གྱི་སེམས་མི་ཤིག་པའི་མིང་ཅན་དང་རོ་མཉམ་པར་བྱས་ཏེ། དེ་ཡང་སེམས་ཚོགས་དྲུག་གི་ཕྱིར་མ་འབྲང༌། ཚོགས་དྲུག་སེམས་ཀྱི་ཡུལ་དུ་མ་འདྲེས། དེའི་རྗེས་སུ་མ་འབྲངས་པར་སྣང་ལ་རང་བཞིན་མེད་པ་སྒྱུ་མའི་དཔེ་ལྟར་ཉམས་སུ་མྱོང་བ་ཉིད་ཡུལ་དུ་བསྒོམས་པས་སྣང་སེམས་ཟུང་དུ་འཇུག་པར་འགྱུར་ཏོ། །སྣ་ཚོགས་སུ་སྣང་བ་ཇི་སྙེད་པ་དེ་སྙེད་རང་རིག་བདེ་བ་ཆེན་པོ་དང་ཐ་དད་མེད་པར་འཆར་བ་འབྱུང་བ། གལ་ཏེ་གོམས་འདྲིས་ཆུང་བ་སོགས་ཀྱིས་དེ་ལྟར་སྣང་སེམས་ཐ་དད་དུ་མཉམ་པར་འཇོག་ཏུ་མ་ནུས་ན༑ བརྟན་གཡོ་ཚོགས་དྲུག་གི་སྣང་བ་ཐམས་ཅད་རང་ལྷར་གསལ་བ་ལ་བསྡུ། དེ་ཡང་ཐུགས་ཀའི་ཧཱུྃ་ལ་བསྡུས་ལ་ནཱ་དའི་བར་དུ་བསྡུས་ནས། ནཱ་ད་ཡང་ཇེ་ཕྲར་གྱུར་པ་ཅི་ཡང་མི་དམིགས་པའི་ངང་དུ་ཅི་གནས་སུ་མ་བཅོས་སོ་མ་ལྷུག་པ་རང་བབས་སུ་བཞག་ནས་རིམ་གྱིས་སྔ་མ་ལྟར་རོ་མཉམ་དུ་བྱས་ལ་བསྒོམ་པར་བྱའོ། །ཐུན་མཚམས་རྣམས་སུ་བསྔོ་བས་རྒྱས་གདབ་ཅིང་དུས་ཐམས་ཅད་དུ་བསྒོམས་པས་རབ་ཚེ་འདིར་མཆོག་གི་གྲུབ་པ་ཐོབ། འབྲིང་ཤི་བའི་ཚེ་འོད་གསལ་ཆོས་ཀྱི་སྐུར་འཚང་རྒྱ། ཐ་མས་ཀྱང་བར་དོར་དཔའ་བོ་དང་རྣལ་འབྱོར་མ་རྣམས་ཀྱིས་བསུས་ཏེ་འོག་མིན་བདེ་བ་ཆེན་པོའི་ཞིང་ཁམས་སུ་ལོངས་སྐུ་ངེས་པ་ལྔ་ལྡན་དུ་འཚང་མི་རྒྱ་བ་མི་སྲིད་པའི་གདམས་པ་དྲིལ་བུ་རིམ་ལྔར་གྲགས་པ་ཆད་པའི་སྐྱོན་མེད་ཤིན་ཏུ་བསྡུས་པར་བགྱིས་པའི་སྐབས་སོ།། །།ཡང་སྙིང་པོ་དགྱེས་པ་རྡོ་རྗེའི་རྫོགས་པའི་རིམ་པ་གྲུབ་པའི་དབང་ཕྱུག་ཆེན་པོ་ནཱ་རོ་པའི་གདམས་པ་ཆོས་དྲུག་ཏུ་གྲགས་པ་ཉམས་སུ་བླང་བ་ཡང༌། སྔོན་འགྲོ་སྔར་ལྟར་ལ། ཁྱད་པར་གྱི་སྔོན་འགྲོ་རྩ་རླུང་ཐིག་ལེ་སྦྱང་བ་གསུམ་ལས། རྩ་སྦྱང་བ་ནི། རང་དགྱེས་པ་རྡོ་རྗེ་དཔའ་བོ་གཅིག་པར་གསལ་བའི་སྤྱི་བོ་ནས་གསང་གནས་བར་དུ་རྩ་དབུ་མ་པདྨ་རཱ་གའི་མདོག་ལྟ་བུ། གཡས་སུ་རོ་མ་དམར་མོ། གཡོན་དུ་རྐྱང་མ་དཀར་པོ་གཉིས་ཡས་སྣ་ཀླད་རྒྱའི་སྟེང་ནས་སྣ་བུག་གཉིས་སུ་ཟུག་པ། མས་སྣ་ཡི་གེ་ཆ་ལྟར་གནས་ནས་དབུ་མའི་སྟེང་དུ་ཚུད་པ་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞིར་གྱེས་པ། སྙིང་ག་ཆོས་ཀྱི་འཁོར་ལོ་འདབ་མ་བརྒྱད། མགྲིན་པ་ལོངས་སྤྱོད་ཀྱི་འཁོར་ལོ་འདབ་མ་བཅུ་དྲུག །སྤྱི་བོ་བདེ་ཆེན་གྱི་འཁོར་ལོ་འདབ་མ་སོ་གཉིས་པ། རྩ་གསུམ་འཁོར་ལོ་བཞི་རྣམས་དྲང་བ། ཕྲ་བ་རྐྱང་མ་མ་གཏོགས་དམར་བ། གསལ་བ་སྟེ་མཚན་ཉིད་བཞི་ལྡན་དུ་བསམ་མོ། །རླུང་སྦྱང་བ་ནི། ལུས་བསམ་གཏན་གྱི་ཆོས་དྲུག་དང་ལག་པ་རྡོ་རྗེ་ཁུ་ཚུར་པུས་སྟེང་སོ་སོར་བཞག་ནས་འབུད་པ་དགུ་ཕྲུགས་བྱས་ལ་ཕྱིར་བུས་པའི་ཚེ་སྡིག་སྒྲིབ་ཐམས་ཅད་སང་སང་དག །ནང་དུ་རྔུབས་པའི་ཚེ་སངས་རྒྱས་བྱང་སེམས་ཐམས་ཅད་ཀྱི་བྱིན་རླབས་བསྡུས་པར་བསམ། དེ་ནས་སྒྲ་མེད་དུ་སྣ་བུག་གཉིས་ནས་དལ་བུས་རྔུབས། མཆིལ་མ་ཞིག་དང་མཉམ་དུ་ལྟེ་འོག་ཏུ་ཧྲིལ་གྱིས་དགང༌། དེའི་ཚེ་རྒྱབ་རླུང་ཡར་བསྡམས་ལ་བུམ་ཅན་ཅི་ཐུབ་བཟུང༌། མི་ཐུབ་ལ་ཉེ་བའི་ཚེ་ལུས་གཡས་གཡོན་དུ་ཅུང་ནེམ་ནེམ་གྱིས་རྩ་མིག་ཏུ་གཞིལ་ལ་བཟུང༌། མི་ཐུབ་པའི་ཚེ་ཅུང་ཟད་ཕྱིར་བཏང་ལ་མནན་ནས་བཟུང་དལ་བུས་སངས་ཀྱིས་སྣ་བུག་ནས་བཏང་ལ་མཇུག་ཏུ་དབྱིངས་རིག་བསྲེ། རླུང་རྔུབས་པ་དང་བཏང་བ་མཐའ་དག་ཁ་ནས་མ་སོང་བ་ཤིན་ཏུ་གལ་ཆེ། ཐིག་ལེ་སྦྱང་བ་ནི། སྨིན་མཚམས་སུ་ཐིག་ལེ་སྔོན་པོ་སྲན་མ་ཙམ་ཞིག་གནས་པ་རླུང་རྔུབས་པའི་ཚེ་དབུ་མའི་ནང་ནས་གསང་བའི་བར་འགྲོ། དགང་ཞིང་གཞིལ་བའི་ཚེ་རྩ་འཁོར་རྣམས་སུ་སིང་སྒྲ་དང་བཅས་མྱུར་བར་རྒྱུ། རླུང་བཏང་བའི་ཚེ་ཕྱིར་བཏོན་པར་བསམ་མོ། །སྐབས་འདིར་སྤྲོ་ན་ནཱ་རོ་དྲུག་སྐོར་ལག་ལེན་ལྟར་བྱ། དེ་ལྟར་རྩ་རླུང་ཐིག་ལེའི་ལམ་འབྱོངས་ནས། དངོས་གཞི་ཉམས་སུ་བླང་བ་ནི། རྩ་བའི་ཆོས་བཞི་དང༌། ཡན་ལག་གི་ཆོས་གཉིས་ལས། དང་པོ་འཛག་བཅས་འཇིག་རྟེན་པའི་ལྷན་སྐྱེས་ཀྱི་གཉེན་པོར་གཏུམ་མོ་ལམ་གྱི་གཞུང་ཤིང་ཉམས་སུ་བླང་བ་ནི། རྐང་པ་ཙོག་པུར་བསྣོལ། ལག་པ་མཉམ་བཞག་པུས་འཁྱུད། གཞན་བསམ་གཏན་གྱི་ཡན་ལག་དྲུག་པོ་འདྲ། རབ་གནས་དང་ལྡན་པའི་སྒོམ་ཐག་གིས་བཅིང༌། སྐྱབས་སེམས་དང་བླ་མའི་རྣལ་འབྱོར་གསལ་བཏབ། ཙཎྜ་ལཱིའི་དོན་ཉམས་སུ་མྱོང་བར་གསོལ་བ་བཏབ། རང་ལ་བསྟིམ། ཉམས་ལེན་གྱི་ཐོག་མ་གཏུམ་མོ་མ་ཟིན་པ་འཛིན་པ་ནི། རྩ་གསུམ་འདུས་མདོར་ལྟེ་འོག་སོར་བཞིའི་རོ་རྐྱང་གི་སྣེ་མོའི་སྟེང་དུ་ཆོས་འབྱུང་དམར་པོའི་དབུས་སུ་གཏུམ་མོ་ཨ་ཤད་ཀྱི་རྣམ་པའི་རང་བཞིན་སྲ་ཞིང་གཞོམ་གཞིག་དང་བྲལ་བ། ཆུ་དང་དམར་ཆའི་དྭངས་མ་རློན་ཞིང་གཤེར་བ། མེའི་རང་བཞིན་རྣོ་ཞིང་ཚ་བ་སྲེག་པའི་ངར་ཅན། རླུང་གི་རང་བཞིན་གཡོ་ཞིང་ཀུན་ཏུ་ཁྱབ་པ། གཞན་ཡང་ཁ་དོག་དམར་བ། རེག་བྱ་ཚ་བ། ངོ་བོ་བདེ་བ། རྩེ་མོ་རྣོ་ཞིང་འཁྱོག་པའི་རྣམ་པ་ཅན་དུ་བསམ་མོ། །ཟིན་པ་བརྟན་པར་བྱ་བ་ནི། ནམ་མཁའི་རླུང་ཞེས་མཉམ་རྒྱུའི་སྐབས་སྦྱོང་བའི་སྐབས་ལྟར་བུམ་ཅན་མཚན་ཉིད་བཞི་ལྡན་དུ་བཟུང་བའི་ཚེ་རོ་རྐྱང་ནས་སྲོག་རྩོལ་གྱི་སྦུད་པས་ཨ་ཤད་ལ་བསྣུན་མ་ཐག་དེ་ལས་མེ་ཆེར་བུས་ནས་དབུ་མའི་ནང་དུ་འབར་བའི་མེ་ལྕེ་ཡང་གོང་ལྟར་མཚན་ཉིད་བཞི་ལྡན་དུ་མཉམ་པར་བཞག་གོ །བརྟན་པ་བོགས་འདོན་པ་ལ། དྲོད། བདེ་བ། མི་རྟོག་པ་གསུམ་ལས། དྲོད་བོགས་འདོན་ནི། གོང་ལྟར་རླུང་བཟུང་བས་མེ་ཆེས་ཆེར་འབར་བས་རྩ་གསུམ་འཁོར་ལོ་བཞི་ལུས་ཀྱི་ཕྱི་ནང་ཐམས་ཅད་ལ་མེས་གང་བར་བསམ། སྤྲོ་ན་དྲོད་ཀྱི་འཁྲུལ་འཁོར་བྱ། ལུས་རྔུལ་ན་སྲན་ཕྱེས་འཕུར་བ་སོགས་མན་ངག་ལྟར་དང་སོ་བདུན་མའི་འཁྲུལ་འཁོར་བྱའོ། །ཡང་རླུང་བཟུང་བས་མེ་ཆེས་ཆེར་འབར་བས་སྟོང་གསུམ་མེ་ལྕེ་གཅིག་ཏུ་འབར་བར་བསམ་མོ། །འདིའི་སྐབས་སུ་གཏུམ་མོ་བདེ་དྲོད་ཀྱི་ལང་ཚོ་དམ་ཞིང་གོས་ཀྱི་འཁྲི་བ་གཅོད་པའི་ཕྱིར་རས་འབུད་བྱ་བ་ནི། རབ་ལྟ་བ་གཉིས་མེད་ཟུང་འཇུག་རྟོགས་པ། འབྲིང་དམིགས་པ་ཡུལ་གང་ལ་རང་དབང་ཆུབ་པ། ཐ་མས་ནི་འདི་ལྟར་ཁྲུས་བྱ། བགེགས་བསྐྲད། སྲུང་འཁོར་བསྒོམ། ཤིས་བརྗོད་བྱ། དམིགས་པ་མལ་སྟན་མེའི་དཀྱིལ་འཁོར། གྲུ་གསུམ་འབར་བའི་སྟེང་དུ་རང་ལུས་ལྕགས་བསྲེགས་པ་ལྟ་བུ། ལག་གཉིས་གཡས་འོག་གཡོན་སྟེང་ཉི་དཀྱིལ་མེ་འབར་བར་བསམ། སྣོད་བཅུད་ཀྱི་མེ་རྣམས་བསྡུས་པ་ལྟེ་འོག་སོར་བཞིར་བྱ་སྒོང་ཙམ་ལ་སེམས་གཏད། རས་རྐྱང་གི་བགོ་བས་སེང་གེའི་ཉལ་སྟབས་སུ་མགོ་བྱང་དུ་བསྟན་ལ་བདེ་བར་ཉལ། དྲོས་དཀའ་ན་རྗེ་བཙུན་རཏྣའི་དག་པའི་སྣང་བ་གཏུམ་མོ་ཙཎྜ་ལཱིའི་དམིགས་པ་བཅུ་བཞི་འཕུལ་གཅིག་གིས་འཁྲུལ་འཁོར་དང་བཅས་པ་བླ་མའི་ཞལ་རྒྱུན་ལྟར་བྱ། ཆུ་རས་སོགས་ཀྱང་སྐབས་སུ་བབ་ན་བྱ་བ་ཡིན་ནོ། །བདེ་བ་བོགས་འདོན་པ་ནི། ལུས་གནད་རྩ་གསུམ་འཁོར་ལོ་བཞི་གཏུམ་མོ་རྣམས་སྔར་ལྟར་ལ། སྙིང་གར་དབུས་སུ་བྷྲཱུྃ། ཕྱོགས་བཞིར་ཨཾ་ཛྲཱིཾ་ཁྃ་ཧཱུྃ། མགྲིན་པར་དབུས་སུ་མྃ། ཕྱོགས་བཞིར་ལཱྃ་པཱྃ་ཏཱྃ་ཨཱྃ་རྣམས་རྩ་མདུད་ཀྱི་རྣམ་པ།སྤྱི་བོར་དཀར་ཆའི་དྭངས་མ་ཧྃ་ཡིག་མགོ་ཐུར་བསྟན་དུ་ཡོད་པར་བསམ། རླུང་བཟུང་བས་ཨ་ཤད་ལས་མེ་འབར་བས་གཡོན་རྐྱང་མ་ཟླ་བའི་རྒྱུ་བ་བཀག་གཡས་རོ་མའི་ནང་དུ་འབར་བས་སྙིང་གའི་རྩ་མདུད་ལྔ་པོ་དཀྲོལ། མེས་གཡས་རོ་མ་ཉི་མའི་རྒྱུ་བ་བཀག །གཡོན་རྐྱང་མའི་ནང་དུ་འབར་བས་མགྲིན་པའི་རྩ་མདུད་ལྔ་པོ་དཀྲོལ། མེ་ལྕེས་གཡས་གཡོན་རོ་རྐྱང་ཉི་ཟླའི་རྒྱུ་བ་བཀག །དབུ་མའི་ནང་དུ་མར་བབས་ཨ་ཤད་ལ་ཐིམ་ལ་ཁད་སོར་བཞི་ཙམ་འབར་བ་ལ་སེམས་གཏད། ཡང་རླུང་བཟུང་བས་སྦུད་ནས་མེ་ཆེར་འབར། དབུ་མའི་ནང་བརྒྱུད་འཁོར་ལོ་བཞི་རིམ་གྱིས་བགྲོད་པས། ཧྃ་ལ་རེག་པའི་ཚེ་ཧྃ་ལས་དཀར་ཆ་སྐྱ་ཤར་གྱིས་བབས་པ། མེ་ལྕེ་ལ་རེག་ལ་ཁྱད་དུ་ཉེ་བ་ན་ཇེ་དམའ་དང་དཀར་ཆ་ཇེ་རིང་དུ་འཕྲོས་དེད་བྱས་ནས་ཐུར་དུ་བབ་པའི་ཚེ་མགྲིན་པར་བྱང་སེམས་སླེབས་པ་དགའ་བ། སྙིང་གར་མཆོག་དགའ། ལྟེ་བར་དགའ་བྲལ། གསང་བར་ལྷན་སྐྱེས་ལ་མཉམ་པར་བཞག །ཡང་རླུང་གི་སྦྱོར་བས་ཨ་ཤད་ལ་མེ་འབར་བའི་ཚེ་མེ་ཇེ་རིང་དང༌། དཀར་ཆ་ཇེ་ཐུང་གྱེན་ལ་འཛེག་པའི་ཚེ་ལྟེ་བར་དགའ་བ། སྙིང་གར་མཆོག་དགའ། མགྲིན་པར་དགའ་བྲལ། སྤྱི་བོར་ལྷན་སྐྱེས་ལ་མཉམ་པར་བཞག །འདིའི་སྐབས་བདེ་བ་འབར་བས་བྱང་སེམས་འཕོར་ཉེ་ན་གསུམ་ཆོས་ཀྱི་གནད་ནི། བདེ་ཉམས་ཉོན་མོངས་ཀྱི་རྟོག་པ་ཙིར་གྱིས་བཟུང་གཞུ་བདུངས་པའི་ཡུན་ཙམ་ལམ་དུ་བཏང༌། སླར་ཤེར་སྙིང་ཀློག་པའི་ཡུན་ཙམ་དེའི་ངོ་བོར་བལྟས་ལ་གནད་དུ་དབབ། དེ་ནས་བྱང་ཆུབ་ཀྱི་སེམས་ཡུད་ཙམ་བསྒོམས་པས་དུག་ལ་སྔགས་བཏབ་པས་སྨན་དུ་འགྱུར་བ་ལྟར་བྱང་ཆུབ་སེམས་གཉིས་དང་བདེ་བ་རོ་གཅིག་ཏུ་གྱུར་ཏེ་གནས་སྐབས་སུ་སངས་རྒྱས་བྱང་སེམས་མང་པོའི་ཞལ་མཐོང་ཞིང་མཐར་ཐུག་འདོད་ཆགས་དག་པ་པདྨ་རིགས་སུ་འཚང་རྒྱ་བའི་དགོས་པ་ཡོད། དེ་རྗེས་ལུས་ལྷར་གསལ་བཏབ་བ་སྤུའི་ཁུང་བུ་ཚུན་ཁྲེམ་པར་བཀྲམ་པས་ཡོན་ཏན་དང་དངོས་གྲུབ་ཐམས་ཅད་མྱུར་དུ་ཐོབ་པར་འགྱུར་བར་གསུངས་སོ། །རྐང་པ་འགུམ་པ་སོགས་བྱུང་ན་གཏུམ་མོ་སྐུ་བསྲིང་བ་མན་ངག་ལྟར་བྱའོ། །གཞན་ཡང་རྗེ་རིན་པོ་ཆེའི་མན་ངག་ནི། ལྟེ་འོག་རྩ་གསུམ་འདུས་མདོར་ཐིག་ལེ་དཀར་ཞིང་དམར་ལ་མདངས་ཆགས་པ་སྣུམ་ལ་འདྲིལ་བ་བདེ་བའི་རང་བཞིན་བྱ་སྒོང་ཙམ་ཞིག་བསྒོམ། དེ་ལ་གོམས་ནས་དེ་འདྲ་བ་བརྒྱད་དང་བཅུ་དྲུག་ཏུ་གྱེས་པར་བསྒོམ། དེ་ལ་གོམས་ནས་དེ་འདྲ་བ་དཔག་ཏུ་མེད་པར་གྱེས་པར་ཡང་བསྒོམ། མཐར་ཐིག་ལེ་ཐམས་ཅད་རྩ་བའི་ཐིག་ལེ་ལ་ཐིམ་པར་བསམ་པས་བདེ་དྲོད་མི་བཟོད་པར་འབྱུང་བར་གསུངས་སོ། །འདིའི་ཚེ་དྲོད་ཤས་ཆུང་ན་དྲོད་བོགས་འདོན། བདེ་བ་ཤས་ཆུང་ན་བདེ་བ་བོགས་འདོན་སོགས་སྐབས་སུ་གང་བབ་བརྩོན་པར་བྱའོ། །མི་རྟོག་པ་བོགས་འདོན་པ་ནི། རང་ལྷར་གསལ་བ་རྗེས་གཞིག་གམ་རིལ་འཛིན་གྱིས་བསྡུས་ནས་རྩ་གསུམ་འཁོར་ལོ་བཞི་སོགས་ཀྱང་མི་དམིགས་པར་གང་ཤར་འཛིན་མེད་གཉེན་པོ་དྲོད་འཛིན་གྱི་བཅོས་བསླད་མེད་པར་གཅེར་ཡན་དུ་བདེ་སྟོང་ལྷན་སྐྱེས་ཀྱི་ངོ་བོར་འཛིན་མེད་ཡེངས་མེད་དུ་བསྐྱང་ངོ་། །དེ་ལྟར་རྩ་རླུང་ཐིག་ལེ་ལ་གནད་དུ་བསྣུན་པས་རྩ་ཐམས་ཅད་རླུང་དང་ཐིག་ལེས་ཁྱབ་ཅིང༌། བདེ་དྲོད་མི་རྟོག་པའི་ཡེ་ཤེས་མྱུར་དུ་རྒྱུད་ལ་སྐྱེ་བར་འགྱུར་རོ། །གཏུམ་མོའི་དམ་ཚིག་ཏུ་རྐང་རྗེན་མི་བྱ། དུང་མི་འབུད། ཆུ་མི་བརྒལ། འཁྱག་པ་ཡིད་ལ་མི་བྱ། ལན་ཚྭ་སྒོག་བཙོང་རུལ་སུངས་ཅན་གྱི་ཟས་དང་ཚ་སྐྱུར་གྱི་བཏུང་བ་སྤང་ངོ༌། །བདེ་དྲོད་ཀྱི་གེགས་སུ་གྱུར་པ་རྣམས་ལ་འཛེམ་མོ། །དེ་ལྟར་ལྟེ་བ་སྤྲུལ་པའི་འཁོར་ལོ་ལ་བསྟེན་ནས་གཏུམ་མོ་ལ་གནད་དུ་བསྣུན་པས་འཕོ་བའི་གནས་སྐབས་ཀྱི་དྲི་མ་དག་ནས་དོན་དམ་ཡེ་ཤེས་རྡོ་རྗེའི་སྐུར་འཚང་རྒྱ་བ་ཡིན་ནོ། །གཉིས་པ་སེམས་རང་བཞིན་གྱིས་རྨོངས་པའི་གཉེན་པོར་འོད་གསལ་ལམ་གྱི་སྒྲོན་མེ་ཉམས་སུ་བླང་བ་ནི། དབེན་པར་མཚམས་བཅད་ཁྲུས་དང་བཀུ་མཉེ་བྱ། གྲིབ་ལ་འཛེམ། ཟས་བཅུད་ཅན་བསྟེན། ལུས་ངག་ཡིད་གསུམ་རྣམ་གཡེང་སྤང་ལ། བླ་མ་ཡི་དམ་མཁའ་འགྲོ་ཆོས་སྐྱོང་ལ་གཏོར་མ་འབུལ། འོད་གསལ་ཟིན་པའི་གྲོགས་བཅོལ། ཞག་གསུམ་གཉིད་སྤང༌། ཉིན་པར་དང་སྲོད་ལ་གཏུམ་མོ་བསྒོམ། ནམ་གུང་དང་ཐོ་རངས་ལ་བབ་པའི་ཚེ་ལུས་ལྷར་བསྒོམ་པའི་ནང་དུ་རྩ་གསུམ་འཁོར་ལོ་བཞི་གསལ་བཏབ། སྤྱི་བོར་བླ་མའི་རྣལ་འབྱོར་བསྒོམས་ནས་བདག་དོ་ནུབ་རྨི་ལམ་འོད་གསལ་ཟིན་པའི་གསོལ་བ་བཏབ། རང་ལ་བསྡུ། རང་གི་སྙིང་ག་ཆོས་ཀྱི་འཁོར་ལོའི་དབུས་སུ་དབུ་མའི་ནང་དུ་པདྨ་སྔོན་པོ་འདབ་མ་བཞི་པའི་ལྟེ་བའི་ཉི་མའི་སྟེང་དུ་བླ་མ་རྡོ་རྗེ་འཆང་སྐུ་ཆུང་ལ་དོད་ཅིང་གསལ་ལ་རང་བཞིན་མེད་པ་འོད་འཕྲོ་བའི་འོད་ཀྱིས་ལུས་ཕྱི་ནང་མེད་པ་གང་སྟེ་ཤེལ་བུམ་གྱི་ནང་དུ་མར་མེ་བཅུག་པ་ལྟ་བུར་བསམ་པའི་ངང་ནས་བླ་མའི་སྐུ་ལ་སེམས་མ་ཡེངས་པར་གཏད་ལ་འཇམ་རླུང་བུམ་པ་ཅན་བཟུང་ནས། མགོ་བྱང་དུ་ལྟ་བས་སེང་གེའི་ཉལ་སྟབས་ཀྱིས་ཉལ། རྣམ་རྟོག་འཕྲོ་ན་ལུས་སྣང་ཐམས་ཅད་འོད་ཀྱི་རྣམ་པར་བསྡུས་ནས་བླ་མའི་སྐུ་ལ་བསྟིམ། དེས་ཟིན༑ ཡང་ན་བླ་མའི་ཐུགས་ཀར་པདྨ་སྔོན་པོ་འདབ་མ་བཞི་པའི་ལྟེ་བར་ཧཱུྃ་མཐིང་ག་འོད་འཕྲོ་བ་ལ་སེམས་གཏད། གཞན་གོང་དང་འདྲ། ཡང་ན་བླ་མའི་ཐུགས་ཀར་པདྨའི་ལྟེ་བར་འོད་ཀྱི་ཐིག་ལེ་སྔོན་པོ་ཡུངས་འབྲུ་ཙམ་ལ་སེམས་གཏད་ལ་བསྒོམ་མོ། །དེ་ལྟར་འབད་པས་ཅིས་ཀྱང་ཟིན་པར་འགྱུར་རོ། །འོད་གསལ་ཟིན་ནས་བོགས་འདོན་པ་ནི། ཐོག་མར་འོད་གསལ་ངོས་བཟུང་སྟེ། གཞིའི་འོད་གསལ་ནི་སེམས་རང་བཞིན་འོད་གསལ་བ་ཉིད་དོ། །ལམ་གྱི་འོད་གསལ་ལ་ཉམས་དང་རྟོགས་པ་གཉིས་ཏེ། ཉམས་ཀྱི་འོད་གསལ་ནི། གཉིད་ཀྱི་ངང་ལས་རྣམ་རྟོག་ཆེར་མེད་པ་ལུས་ཕྱི་ནང་གནས་ཁང་ཡོ་བྱད་སོགས་མཐོང་བའི་ཉི་མ་ཤར་བ་ལྟ་བུ་སྟོང་ཉིད་ཀྱི་གཟུགས་ཙམ་པོ་བ་མཐོང་བའོ། །རྟོགས་པའི་འོད་གསལ་ནི། གཉིད་ཀྱི་སྣང་མཆེད་ཐོབ་གསུམ་ངོས་ཟིན་པའི་མཐར་ཉེར་ཐོབ་འོད་གསལ་ལ་ཐིམ་མ་ཐག་གཉིད་མཐུག་མེད་པ་འོད་གསལ་ནམ་མཁའ་ལྟ་བུ་གསལ་དྭངས་ཟུང་འཇུག་ཏུ་འཆར་བ་ཡིན་ནོ། །འབྲས་བུའི་འོད་གསལ་ལ། སྤྱི་དོན་གྱི་འོད་གསལ་ནི། སངས་རྒྱས་པའི་ཐུགས་ཟབ་གསལ་གཉིས་མེད་ཀྱི་འོད་གསལ་དེ་ཉིད་ཡིན་ལ། སྦས་དོན་འོད་གསལ་ནི། འཆི་བའི་ཐིམ་རིམ་གྱི་ཐ་མར་འཆི་བ་འོད་གསལ་ཆོས་སྐུར་འཚང་རྒྱ་བ་དེ་ཉིད་ཡིན་ནོ། །དེ་ཉིད་ཉམས་མྱོང་གིས་བོགས་དབྱུང་བ་ནི། ཉིན་པར་གཏུམ་མོ་བསྒོམ། དེའི་ཉམས་མྱོང་བདེ་དྲོད་ཀྱི་ཏིང་ངེ་འཛིན་གྱི་རང་བཞིན་སྤྲོས་བྲལ་དུ་རྟོགས་པ་དེ་དང་མཚན་མོའི་གཉིད་འོད་གསལ་ཟུང་འཇུག་ཏུ་བསྒོམ། ཡང་མཚན་མོའི་འོད་གསལ་དེས་ཉིན་སྣང་གི་དགེ་སྦྱོར་ལ་རྒྱས་བཏབ་སྟེ་བསྒོམ་པ་སོགས་བླ་མའི་མན་ངག་གི་གནད་དང་སྦྱོར་བ་ཡིན་ནོ། །དེ་ལྟར་སྙིང་ག་ཆོས་ཀྱི་འཁོར་ལོ་ལ་བསྟེན་ནས་འོད་གསལ་གནད་དུ་བསྣུན་པས་གཉིད་མཐུག་གཏི་མུག་གནས་སྐབས་ཀྱི་དྲི་མ་དག་ནས་རབ་ཚེ་འདིར་ཐ་མས་ཀྱང་འཆི་བ་འོད་གསལ་ལམ་དུ་བསླངས་ནས་ཆོས་ཀྱི་སྐུར་འཚང་རྒྱ་བ་ཡིན་ནོ། །གསུམ་པ་བག་ཆགས་ཉིང་འཁྲུལ་གྱི་གཉེན་པོར་རྨི་ལམ་ལམ་གྱི་ཚོད་འཛིན་ཉམས་སུ་བླང་བ་ལ་ཡང༌། སྦྱོར་ཆོས་འོད་གསལ་དང་འདྲ་བ་ལ་འདུས་བྱས་ཐམས་ཅད་མི་རྟག་པས་གང་གིས་ཀྱང་དགོས་པ་མེད་སྙམ་པ་རྟག་ཏུ་བསམ་ཞིང་ངག་ཏུ་ཡང་བརྗོད། ཉིན་པར་གཏུམ་མོ་བསྒོམ་ཞིང་དེའི་རྗེས་ཐོབ་ཉིན་སྣང་ཐམས་ཅད་རྨི་ལམ་ཡིན་སྙམ་དུ་སྦྱང༌། དེ་ནས་འཛིན་པ་དངོས་ནི། རང་ལྷར་གསལ་བའི་སྤྱི་བོར་བླ་མ་བསྒོམ། མཆོད་ནས་རྨི་ལམ་ཟིན་པར་གསོལ་བ་བཏབ། རང་ལ་བསྟིམ། སྲོག་ཐུར་གྱི་རླུང་བུམ་ཅན་གསུམ་བཟུང༌། དོ་ནུབ་རྨི་ལམ་དུ་ཤེས་པར་བྱ་སྙམ་པ་བྱས་ལ། རང་ལྷར་གསལ་བའི་ནང་དུ་རྩ་གསུམ་འཁོར་ལོ་བཞིར་གསལ་བའི་མགྲིན་པའི་རྩ་འདབ་ཀྱི་དབུས་དབུ་མའི་ནང་དུ་གདན་བཞི་བརྩེགས་ཀྱི་སྟེང་དུ་བླ་མ་རྡོ་རྗེ་འཆང་འོད་འཕྲོ་བ་གསལ་བའི་བླ་མས་ཀྱང༌། ཆོས་ཐམས་ཅད་རྨི་ལམ་ཡིན་ཞེས་གསུང་བཞིན་པ་བླ་མའི་མགྲིན་པར་པདྨ་སྔོན་པོ་འདབ་མ་བཞི་པའི་ལྟེ་བར་ཨོཾ་དཀར་པོ། མདུན་གྱི་འདབ་མར་ཨ་སྔོན་པོ། གཡས་སུ་ནུ་སེར་པོ། རྒྱབ་ཏུ་ཏ་དམར་པོ། གཡོན་ཏུ་ར་ལྗང་གུ་བསམ། སེང་གེའི་ཉལ་སྟབས་ཀྱིས་མགོ་བྱང་དུ་བསྟན། འཇམ་རླུང་བུམ་པ་ཅན་བདུན་བཟུང་ལ། ཐོག་མར་མདུན་གྱི་ཨ་ལ་སེམས་གཏད། གཉིད་བྲོ་བའི་ཚེ་ནུ་ལ་སེམས་གཏད། ཆེར་བྲོ་བའི་ཚེ་ཏ། ཆེས་ཆེར་འཐིམ་པའི་ཚེ་ར་དང༌། གཉིད་དུ་འགྲོ་ཁར་ཨོཾ་ལ་མ་ཡེངས་པར་གཏད། རྟོག་པ་གཞན་གྱིས་བར་མ་ཆོད་པར་སེམས་གཏད་ནས་གཉིད་པས་ཟིན་པར་འགྱུར་རོ། །དེས་མ་ཟིན་ན་རང་ལྷར་གསལ་བའི་སྨིན་མཚམས་སུ་ཟླ་དཀྱིལ་ཐིག་ལེ་དཀར་པོ་སྲན་མ་ཙམ་གྱིས་མཚན་པ་ལ་སེམས་བཟུང༌། དེས་ཀྱང་མ་ཟིན་ན་རང་གི་འོག་ཏུ་ཐིག་ལེ་དམར་པོ་དང་སྟེང་དུ་དཀར་པོ་གཉིས་གསལ་བ་ཆུ་ནང་དུ་རྡོ་བསྐྱུར་བའི་རི་མོ་ལྟར་ཇེ་ཆེར་སོང་ནས་གྭའུ་ལྟ་བུར་གྱུར་པའི་ནང་དུ་གནས་པར་བསམ། འདི་རྣམས་ལ་འཇམ་རླུང་དང་ལུས་གནད་སོགས་སྔ་མ་ལྟར་བྱའོ། །དེ་ལྟར་བྱས་པས་རྨི་ལམ་ཟིན་པའི་རྟགས་ནི། རྨི་ལམ་བཟང་ངན་གང་རྨིས་ཐམས་ཅད་རྨི་ལམ་དུ་འདུག་སྙམ་ངོས་ཙིར་ཙིར་ཟིན་པ་དེ་ག་ཡིན་ནོ། །རྨི་ལམ་ཟིན་འཕྲོ་སད་ན་ཉིན་སྣང་དུ་ཐུན་མཐར་སད་པར་མི་བྱའོ་སྙམ་པའི་འདུན་པ་བཏང༌། ཉལ་བའི་ཚེ་ནོར་བུའི་རྩེར་ཐིག་ལེ་ནག་པོ་སྲན་མ་ཙམ་ལ་སེམས་གཏད། རླུང་བུམ་ཅན་ཉེར་གཅིག་བྱ༑ ཡང་རྨི་ལམ་རེ་གཉིས་ཙམ་ཟིན་ནས་གཞན་ཉིང་འཁྲུལ་དུ་སོང་ན་ཉིན་མོ་ཅི་ནས་ཀྱང་མ་འཁྲུལ་བར་བྱ་སྙམ་དུ་བསམ། རྨི་ལམ་ཟིན་མ་ཐག་འཇམ་རླུང་བུམ་ཅན་འཛིན་པར་བྱའོ། །ཟིན་ཅིང་བརྟན་པར་གྱུར་ནས་སྦྱང་བ་ནི། འདི་རྨི་ལམ་ཡིན་པས་ཇི་ལྟར་བྱས་ཀྱང་བཏུབ་སྙམ་དུ་བསམ་ནས་ཉི་ཟླར་ཞོན་ནས་དགའ་ལྡན་དུ་འགྲོ་བ་དང༌། དག་པའི་ཞིང་གཞན་དང་རིགས་དྲུག་གི་གནས་བལྟ་བ་སོགས་སུ་འགྲོ་བ་དང༌། དག་པའི་ཞིང་དུ་རྒྱལ་བ་རྣམས་མཇལ་ཞིང་ཆོས་ཉན་པ་སོགས་རྣམ་པ་སྣ་ཚོགས་ལ་བསླབ་བོ། །འབྱོངས་ནས་སྤེལ་བ་ནི། རྨི་ལམ་གྱི་སྣང་བ་དེ་དག་ལ་གཅིག་ལས་དུ་མར་སྤེལ་བ་དང༌། དུ་མ་གཅིག་ཏུ་བསྒྱུར་བ་ལ་བསླབ། དེ་གོམས་ནས་བསྒྱུར་བ་ནི། རྨི་ལམ་གྱི་བརྟན་གཡོ་རྣམས་བླ་མར་བསྒྱུར་ནས་ཆོས་ཞུ་བ་དང༌། ཡི་དམ་དུ་བསྒྱུར་ནས་དངོས་གྲུབ་བླང་བ་སོགས་བྱའོ། །དེ་གོམས་ནས་ཡ་ང་བ་སྤང་ཞིང་སྒྱུ་མར་བསླབ་པ་ནི། རྨི་ལམ་དེ་ཐམས་ཅད་ནི་སྣང་ལ་རང་བཞིན་མེད་པ་སྒྱུ་མར་སྦྱང་ཞིང༌། མེ་ཆུ་གཡང་སར་མཆོང་བ་དང༌། ནམ་མཁའ་ལ་འཕུར་བ་དང༌། མི་ཕོད་པ་ཐམས་ཅད་ཐོག་བརྫིས་བྱའོ། །རྨི་ལམ་གྱི་དེ་ཁོ་ན་ཉིད་ནི། ཉིན་སྣང་ཐམས་ཅད་རྨི་ལམ་ལྟ་བུ། རྨི་ལམ་ཡང་ཉིན་སྣང་ལྟ་བུ། དེ་ཐམས་ཅད་རང་སེམས་ཀྱི་ཆོ་འཕྲུལ་འབའ་ཞིག་ཏུ་ཤེས་ཤིང་རྟོགས་པར་བྱས་ནས་ཉིན་མཚན་གྱི་ཡུལ་སྣང་ཐམས་ཅད་སྒྱུ་མ་ལྟ་བུར་གོ་བས་སེམས་མི་རྟོག་པ་དོན་དམ་མཆོག་གི་གཏུམ་མོ་ལས་རྣམ་པ་ཀུན་ཏུ་མི་གཡོ་བར་ཏིང་ངེ་འཛིན་གྱིས་དུས་འདའ་བར་བྱའོ། །དེ་ལྟར་མགྲིན་པ་ལོངས་སྤྱོད་ཀྱི་འཁོར་ལོ་ལ་བརྟེན་ནས་རྨི་ལམ་ལ་གནད་དུ་བསྣུན་པས་བག་ཆགས་ཉིང་འཁྲུལ་གྱི་གནས་སྐབས་ཀྱི་དྲི་མ་དག་ནས་ལོངས་སྐུ་ངེས་པ་ལྔ་ལྡན་དུ་འཚང་རྒྱ་བར་འགྱུར་རོ། །བཞི་པ་སྣང་བ་བདེན་འཛིན་གྱི་གཉེན་པོར་སྒྱུ་ལུས་ལམ་གྱི་གཞི་མ་ཉམས་སུ་བླང་བ་ནི། གནས་དབེན་པར་དཀོན་མཆོག་གསུམ་དང་བླ་མ་ཡི་དམ་མཁའ་འགྲོ་ཆོས་སྐྱོང་ལ་མཆོད་གཏོར་ཕུལ་ནས། ཆོས་ཐམས་ཅད་སྒྱུ་མ་ལྟ་བུར་མྱུར་དུ་རྟོགས་པར་གསོལ་བ་བཏབ། མཚམས་བཅད་ནས་ཐོག་མར་མ་དག་པའི་སྒྱུ་ལུས་སྒྱུ་མར་སྦྱང་བ་ལ། ལུས་སྒྱུ་མར་སྦྱང་བ་ནི། རང་གི་མདུན་དུ་ཤིང་ཁྲུ་གང་པར་མེ་ལོང་དྲི་བྲལ་བཏགས་པའི་ནང་དུ་རང་གི་བཞིན་རས་ཤར་བ་ལ་བལྟས་ནས། རེས་བསྟོད་རེས་སྨད་པས་དེ་ལ་དགའ་དང་མི་དགའ་བའི་སྣང་བ་ཅི་འདུག་བལྟ། རེས་འགའ་བཞིན་རས་དེ་མེ་ལོང་ལས་བྱུང་ངམ་བཞིན་ལས་བྱུང༌། མེ་ལོང་ལས་བྱུང་ན་ནི་བཞིན་རས་སྦས་པའི་ཚེ་བཞིན་རས་མེ་ལོང་དུ་མི་སྣང༌། བཞིན་རས་ལས་བྱུང་ན་ནི་མེ་ལོང་མེད་ན་མདུན་གྱི་བཞིན་རས་མི་སྣང་བས་ཇི་ལྟར་ཡིན་བརྟགས། འོན་ཏེ་ཡུལ་ཡུལ་ཅན་ཚོགས་པ་ལས་མེད་བཞིན་དུ་སྣང་བར་སྦྱང༌། དེ་ལ་སོགས་པ་ཚུལ་དུ་མས་སྦྱང་ཞིང༌། དེ་ཡང་སྒྱུ་མའི་དཔེ་བཅུ་གཉིས་ལས་དཔེའི་གཙོ་བོ་མེད་བཞིན་དུ་སྣང་བ་མེ་ལོང་གི་གཟུགས་བརྙན་ལྟ་བུ། རྒྱུ་ཀུན་ཚོགས་པ་ལས་སྣང་ཡང་རང་བཞིན་མ་གྲུབ་པ་ནམ་མཁའི་འཇའ་ལྟ་བུ། གཅིག་ལས་དུ་མར་སྣང་ཞིང་ངོས་བཟུང་དང་བྲལ་བ་ཆུ་ནང་གི་ཟླ་བ་ལྟ་བུ་སྟེ། དཔེའི་གཙོ་བོ་གསུམ་གྱིས་མཚོན་ནས་ཤེས་པར་བྱ་ཞིང་སྦྱང༌། ངག་སྒྱུ་མར་བསླབ་པ་ནི། བྲག་དབེན་པའི་རྩ་བར་ཕྱིན་ནས་བོས་ཤིང་ལབ་པའི་ཚེ། རང་གིས་ཇི་ལྟར་སྨྲས་པ་ཉིད་དེ་ལས་སྒྲ་ཆེ་ཞིང་གསལ་བར་ཚུར་སྨྲ་བ་ལྟར་སྣང་ཡང༌། དེ་ནི་བྲག་ཆ་ལས་ཀྱང་མ་བྱུང༌། རང་ཁོ་ནའི་ངག་ལས་ཀྱང་མ་བྱུང་བར་མེད་བཞིན་དུ་སྨྲ་བ། སྨྲས་མ་ཐོག་ཏུ་སྟོང་པའི་རང་སྒྲ། གྲགས་པ་ཙམ་ནས་ངོ་བོས་སྟོང་པ། སྒྱུ་མ་མཁན་གྱིས་སྤྲུལ་པའི་མིས་ཚིག་བརྗོད་པའམ། རྨི་ལམ་གྱི་ངག་ལྟར་གྲགས་སྟོང་སྒྱུ་མར་སྦྱང་ཞིང་བསླབ་བོ། །སེམས་སྒྱུ་མར་བསླབ་པ་ནི། དཔེར་ན་ནམ་མཁའ་འདི་རྒྱུ་རྐྱེན་གང་གིས་ཀྱང་མ་སྐྱེས། བར་དུ་གང་དུ་ཡང་མི་གནས། མཐར་གང་དུ་ཡང་མི་འགག །ནམ་མཁའ་ཞེས་མིང་ཙམ་ཡང་ངོ་བོ་སྟོང་ཞིང་རྣམ་པ་གསལ་བ་ཁ་དོག་སྔོན་པོ་སོགས་ལྷུན་པོའི་ཕྱོགས་ཀྱི་མདོག་གིས་བསྒྱུར་བས་གང་དུ་ཡང་བསྒྱུར་དུ་བཏུབ་པ། སྤྲིན་ལ་སོགས་པ་སྣ་ཚོགས་པའི་སྣང་བ་ལྟར་འདུག་ཀྱང་ངོ་བོ་ལ་འགྱུར་བ་མེད་པ་གསལ་ཞིང་ཙམ་ནས་སྟོང་པ། སྟོང་ཙམ་ནས་གསལ་ཞིང་སྣང་བ། དེ་གཉིས་ཀྱང་རྒྱུ་ཐ་མི་དད་པར་ཟུང་དུ་འཇུག་པ་ལྟར་རང་སེམས་ཀྱང་ངོ་བོ་ངོས་བཟུང་དང་བྲལ་བ། སེམས་བྱུང་རྣམ་རྟོག་སྣ་ཚོགས་འཕྲོ་ཡང་སེམས་ལས་ལོགས་སུ་མ་གྲུབ་པ་ཚོགས་དྲུག་གི་སྣང་ཡུལ་དུ་མ་སྣང་ཡང་རང་རང་གི་ངོ་བོས་སྟོང་པ་སེམས་ལས་གཞན་དུ་མེད་པ་དཔེར་ན་སྒྱུ་མ་མཁན་གྱིས་རྟ་གླང་ཤིང་རྟ་བརྟན་གཡོ་ཐམས་ཅད་ཇི་སྙེད་ཅིག་སྤྲུལ་ཡང་འཁྲུལ་ངོར་མེད་བཞིན་དུ་སྣང་ཡང་རྩ་བ་སྒྱུ་མ་མཁན་རང་ཉིད་ཀྱིས་བྱས་པ་མ་གཏོགས་གཞན་གང་ཡང་མེད་པ་སོགས་དཔེ་དུ་མས་མཚོན་ནས་སེམས་སྣང་ཐམས་ཅད་སྒྱུ་མར་སྦྱང༌༑ འབྱོངས་ནས་ཉིན་མཚན་གྱི་སྣང་བ་ཚོགས་དྲུག་ལ་སོགས་པ་འཁོར་འདས་ཀྱི་ཆོས་དང་ཆོས་ཅན་ཐམས་ཅད་སྒྱུ་མའི་དཔེས་མཚོན་ནས་སྒྱུ་མའི་རྣམ་པར་ཐར་པ་ཉིད་དུ་སྦྱང་བར་བྱའོ། །དག་པའི་སྒྱུ་ལུས་སྒྱུ་མར་སྦྱང་བ་ནི། རང་གི་རྒྱབ་ཏུ་ལྷའི་སྐུ་དང་ཞལ་ཕྱག་གྱང་ལོགས་ལ་གཞལ་ཡས་ཁང་གི་ནང་དུ་ཡོད་པ་བྲིས་པ་ཞིག་བཤམ། དེ་འཆར་བའི་མེ་ལོང་མདུན་དུ་བཞག །གྱང་ལོགས་མེད་ན་མདུན་དུ་བྲིས་སྐུ་བཀྲམ། དེའི་གཟུགས་དེ་རང་གི་རྒྱབ་ཏུ་མེ་ལོང་ཆེ་བ་ཞིག་ལ་འཆར་བར་བྱ། དེའི་གཟུགས་མདུན་གྱི་མེ་ལོང་ལ་འཆར་བར་བྱས་ལ། གང་ལྟར་དེའི་སྣང་བརྙན་རྟེན་དང་བརྟེན་པར་བཅས་པ་མེད་བཞིན་སྣང་བ་མེ་ལོང་གི་གཟུགས་བརྙན་ལྟ་བུ། ཁ་དོག་གསལ་ཡང་ངོ་བོས་མ་གྲུབ་པ་འཇའ་ཚོན་ལྟ་བུ། དུ་མར་ཁྱབ་ཀྱང་ཆུ་ཟླ་ལྟ་བུ་སོགས་སྒྱུ་མའི་དཔེས་མཚོན་ནས་སྒྱུ་མ་ལྟ་བུར་བསམ་ཞིང་སྦྱང༌། ཐུན་མཚམས་སོགས་ཐམས་ཅད་དུ་གཟུགས་སུ་སྣང་བ་ཐམས་ཅད་ལྷའི་སྐུ་གསལ་སྟོང་སྒྱུ་མ་ལྟ་བུ། སྒྲ་གྲགས་པ་ཐམས་ཅད་སྔགས་ཀྱི་རང་སྒྲ་གྲགས་སྟོང་སྒྱུ་མ་ལྟ་བུ། སེམས་ཀྱི་དྲན་རྟོག་ཐམས་ཅད་ཐུགས་ཏིང་ངེ་འཛིན་གསལ་སྟོང་སྒྱུ་མ་ལྟ་བུར་བསླབ་ཅིང་སྦྱངས་པས་ཆོས་ཐམས་ཅད་རང་བཞིན་མེད་པ་ཞེས་བྱ་བ་གང་ཟག་དང་ཆོས་ཀྱི་བདག་མེད་གཅིག་དང་དུ་མ་བྲལ་བ་སོགས་ལུང་རིགས་རྟོག་བརྟག་ཐ་སྙད་མཁན་པོའི་འཁྲུལ་རློམས་ཅལ་སྒྲོག་ལ་ལྟོས་མི་དགོས་པར་སྣང་སྲིད་སྒྱུ་མ་ལྟ་བུར་ཤར་བས་སྣང་སེམས་ཐ་དད་མེད་པར་རྟོགས་པར་འགྱུར་བ་ཡིན་ནོ། །དེ་ལྟར་སྤྱི་བོའི་བདེ་ཆེན་འཁོར་ལོ་ལ་བརྟེན་ནས་སྒྱུ་ལུས་ལ་གནད་དུ་བསྣུན་པས་སད་པའི་གནས་སྐབས་ཀྱི་དྲི་མ་དག་ནས་སྤྲུལ་པའི་སྐུར་འཚང་རྒྱ་བ་ཡིན་ནོ། །ལྔ་པ་དང་དྲུག་པ་ལས་རྒྱ་མྱུར་ལམ་ཕོ་ཉའི་ལམ་གོང་དུ་འཕོ་བ་དང༌། བར་དོའི་གདམས་པ་གཉིས་ལས། ཐོག་མར་ལམ་གྱི་བསུ་སྐྱེལ་འཕོ་བའི་གདམས་པ་ནི་གསུམ། དབང་པོ་རབ་ཀྱིས་གཉིས་སྣང་ཆོས་ཐམས་ཅད་རྗེས་གཞིག་དང་རིལ་འཛིན་གྱིས་སྟོང་པ་བཞིར་བསྡུས་པའི་ཐ་མ་འོད་གསལ་བ་དང་བཙན་ཐབས་རྡོ་རྗེ། རྦ་རླབས་བཅིང་བའི་སྦྱོར་བས་སྲོག་རྩོལ་འགགས་པའི་ཐིམ་རིམ་ངོས་བཟུང་བའི་མཐར་གཉིད་མཐུག་གི་འོད་གསལ་གོམས་འདྲིས་བྱས་པ་དག་གིས་འཆི་བའི་དུས་ལ་བབས་པའི་ཚེ། རགས་པ་དང་ཕྲ་བ་ཤིན་ཏུ་ཕྲ་བའི་ཐིམ་རིམ་ངོས་བཟུང་ནས་འཆི་བའི་འོད་གསལ་ཤར་མ་ཐག་ངོས་བཟུང་ནས་དེ་དང་སྦྱངས་པའི་འོད་གསལ་ཐ་མི་དད་དུ་རྟོགས་པས་བར་དོ་བརྒྱུད་མ་དགོས་པར་སྐད་ཅིག་མ་དང་པོར་ཆོས་ཀྱི་སྐུར་འཚང་རྒྱའོ། །དབང་པོ་འབྲིང་གིས་ཉིན་སྣང་འོད་གསལ་སྟོང་པ་ཉིད་ལས་ལྷའི་སྐུར་ལྡང་བ་དང༌། བཙན་ཐབས་རྦ་རླབས་བཅིང་ནས་སྲོག་འགགས་པའི་འོད་གསལ་གྱི་ངང་ནས་སྲོག་རྩོལ་ཅུང་ཟད་རྒྱུ་བས་རྣམ་རྟོག་ཕྲ་བ་ནས་ལྡང་བའི་ཚེ་ལྷའི་སྐུར་བསྒོམ་ཞིང༌། གཉིད་ཀྱི་འོད་གསལ་ཁོ་ནར་གནས་མ་ཐུབ་པས་རླུང་གཡོས་པས་རྨི་ལམ་གྱི་འཁྲུལ་པ་ཅུང་ཟད་འགོ་རྩོམ་པའི་ཚེ་དེ་ཉིད་རྨི་ལམ་དུ་ཤེས་ནས་སྤྲུལ་བསྒྱུར་གྱི་གདམས་པས་ལྷ་སྐུར་ལྡང་བ་ལ་གོམས་པས། འཆི་བའི་འོད་གསལ་ངོས་བཟུང་ནས་སྣང་མཆེད་ཐོབ་པ་འོད་གསལ་ལས་རླུང་དང་བསྡོང་ནས་གཡོ་ཞིང་ལྡང་བར་ཉེ་བའི་ཚེ། ལྷ་སྐུ་སྒྱུ་མ་ལྟ་བུར་སྐད་ཅིག་ལ་ཤར་ནས་ལོངས་སྤྱོད་རྫོགས་པའི་སྐུར་འཚང་རྒྱ་བ་ཡིན་ནོ། །དབང་པོ་ཐ་མ་འོད་གསལ་དང་སྒྱུ་ལུས་གཉིས་ཀ་ལ་བསྒོམ་བློ་བྱས་ཀྱང་བརྟན་པ་མ་ཐོབ་པ་དག་ནི་སྤྲུལ་སྐུར་འཕོ་བས་མཚམས་སྦྱོར་བ་སྟེ་འདི་ལ་སྦྱང་བ་དང་ལས་ལ་སྦྱོར་བ་གཉིས་ལས། སྦྱང་བ་ནི། གནས་དབེན་པར་རྣམ་སྣང་གི་ཆོས་བདུན་དང་ལྡན་པས་སྤྱི་བོར་བླ་མ་བསྒོམ། འཕོ་བའི་ལམ་འབྱོངས་པར་གསོལ་བ་བཏབ་རང་ལ་བསྟིམ། རང་ཡི་དམ་དུ་གསལ་བའི་ཁོང་པར་སྤྱི་བོ་ནས་གསང་གནས་བར་རྩ་དབུ་མ་ཀ་བ་བཙུགས་པ་ལྟ་བུའི་ལྟེ་བའི་ཐད་ཀྱི་ནང་དུ་ཨཱཿ དམར་པོ། སྙིང་གར་སེམས་ཀྱི་ངོ་བོ་ཧཱུྃ་ནག་པོ། སྤྱི་བོའི་ཚངས་བུག་ཀྵ་དཀར་པོས་བཀག་པར་བསམ། སྟེང་རླུང་རྔུབ་ཅིང་རྒྱབ་རླུང་འཐེན་ལ་བུམ་པ་ཁ་སྦྱོར་བྱ། སླར་རླུང་གཉིས་ཀ་གྱེན་དུ་ཆེས་ཆེར་དྲངས་ཤིང་རླུང་མིག་སེམས་གསུམ་ཀྵ་ལ་གཏད་པས་སྲོག་ཐུར་གྱི་རླུང་སྟེང་དུ་འོང་བས་ལྟེ་བའི་ཨཱཿ གཡོས་གྱེན་དུ་སྦུད་པས་དབུ་མའི་ནང་བརྒྱུད་ཧཱུྃ་ལ་ཐུག་པས་ཧཱུྃ་ཕུལ་ནས་གྱེན་དུ་འཕོས་ནས་སྤྱི་བོའི་ཀྵ་ཕུལ་ནས་སྟེང་དུ་ཐོན་ལ་ཁད་དུ་བསམ། རླུང་མ་ཐུབ་པའི་ཚེ་ཧཱུྃ་དང་ཀྵ་རང་སར་ཕབ། དེ་འདྲ་ཐུན་རེ་རེར་རླུང་དྲག་པོ་བུམ་པ་ཅན་སྒང་དྲིལ་ཉེར་གཅིག་རེ་ལས་མི་ཉུང་བ་བསྒོམ། མཐར་བསྔོ་བ་བྱ། འབྱོངས་རྟགས་སྤྱི་ལྟར་འབྱུང༌། འབྱོངས་ནས་ཐུན་རེར་མ་བརྗེད་པ་དྲན་ཙམ་རེ་བྱ། ཆེར་མི་བསྒོམ་མོ། །ལས་ལ་སྦྱར་བ་ནི། འཆི་བར་ཤེས་ཤིང་དུས་ལ་བབས་པའི་ཚེ་ཐིམ་རིམ་རྣམས་ངོས་བཟུང༌། ཡོ་བྱད་ལ་མ་ཆགས་པར་དཀོན་མཆོག་གསུམ་གྱི་ཕྱོགས་སུ་བཏང༌། འཕོ་བའི་དམིགས་པ་སྦྱོང་བའི་སྐབས་ལྟར་ཡང་ཡང་གསལ་བཏབ། འཆི་བ་ལ་ཐུག་པའི་ཚེ་ལུས་གནད་ཙོག་པུའམ། ཆོས་བདུན་ནམ་སེང་གེའི་ཉལ་སྟབས་སམ། གྲོགས་སོགས་ཀྱིས་བསྐྱོར་བ་གང་བདེའི་ངང་ནས་རང་ལུས་ཡི་དམ་གྱི་ནང་ནས་དབུ་མ་ཐིག་ལེ་དང་བཅས་གསལ་བཏབ། སྤྱི་བོར་འདོམ་གང་ཙམ་དུ་རྩ་བའི་བླ་མ་མཆོག་གསུམ་འདུས་པའི་བདག་ཉིད་ཡི་དམ་གྱི་སྐུའི་རྣམ་པར་བསྒོམ། མཆོད་ཅིང་འཆི་བ་ལམ་དུ་སློང་བར་གསོལ་བ་བཏབ། དབང་བཞི་བླང༌། རང་ལ་མི་བསྡུ་བ་དེ་ཉིད་དུ་གསལ་བའི་ངང་ནས་སྲོག་རྩོལ་གྱི་རླུང་ཤིན་ཏུ་དྲག་པོ་སྟོད་དུ་འཐེན་པའི་ངང་ནས་ཨ་ཧིཀ ྄་དྲག་པོ་བཅུ་གཅིག་བརྗོད་པས་ལྟེ་བའི་ཨ་གྱེན་དུ་དྲག་པོར་འཕོས་པས་སྙིང་གའི་ཧཱུྃ་ལ་བསྟིམ། དེ་མ་ཐག་རླུང་རྩོལ་དང་ཨ་ཧིཀ ྄་དྲག་པོ་བཅུ་གཅིག་གིས་རླུང་ཆེར་གཡོས་ནས་མགྲིན་པར་སླེབས། ཡང་རླུང་དང་ཨ་ཧིཀ ྄་དྲག་པོ་ལྔ་བརྗོད་པས་སྤྱི་བོའི་ཀྵ་ལ་རེག་མ་ཐག་ཀྵ་རང་བཞིན་མེད་པར་གསལ་ནས་ཧཱུྃ་ཚངས་བུག་ཏུ་ཐོན་པར་བསམ། སླར་རླུང་དང་ཨ་ཧིཀ ྄་དྲག་པོ་མང་དུ་བརྗོད་པ་ཧཱུྃ་སྐར་མདའ་ལྟར་སོང་བ་ཡི་དམ་གྱི་ཐུགས་ཀར་ཐིམ་པར་བསམ་ཞིང་རླུང་ཨ་ཧིཀ྄་དྲག་ལ་མང་བས་འཕོ། རང་གིས་མ་ནུས་ན་གྲོགས་ཀྱིས་ཨ་ཧིཀ྄་དྲག་ལ་མང་བར་བརྗོད་ཅིང་རང་གིས་རླུང་དམིགས་ལ་འབད། ལུས་ལ་ཕྱི་མིག་མི་ལྟ་བ་གནད་ཆེ། འཕོས་ཟིན་ནས་བླ་མའི་ཐུགས་དང་རང་སེམས་དབྱེར་མེད་ཕྱག་རྒྱ་ཆེན་པོའི་ངང་དུ་བཞག་གོ །གཞན་ལ་འདེབས་ནའང་ཚུལ་དེ་ཉིད་མན་ངག་གནད་དང་ལྡན་པར་སྦྱར་རོ། །ཚུལ་འདི་ནི་མ་བསྒོམས་ཀྱང་དབང་པོ་རབ་འབྲིང་ཐ་མ་གསུམ་སྐུ་གསུམ་དུ་འཚང་རྒྱ་བའི་མྱུར་ལམ་མ་བསྒོམས་སངས་རྒྱས་འཕོ་བའི་གདམས་པ་ཞེས་བྱའོ། །དྲུག་པ་ལམ་གྱི་བློ་ཆོད་བར་དོའི་གདམས་པ་ནི། འཆི་བའི་རྟགས་རྣམས་ངོས་བཟུང་ནས་འཆི་བ་ལ་ཐུག་པའི་ཚེ་ཆགས་ཞེན་མེད་ཅིང་འཆི་བ་ལ་བྲོད་པའི་ངང་ནས་རང་ལྷར་གསལ་བའི་སྤྱི་བོར་བླ་མ་བསྒོམ། མཆོད་ནས་བར་དོ་ལམ་དུ་སློང་བར་གསོལ་བ་བཏབ། རང་ལ་བསྟིམ། འཆི་བ་ལ་ཐུག་པའི་ཚེ། ཐོག་མར་སྣང་མཆེད་ཐོབ་གསུམ་ཐིམ་པ་ངོས་བཟུང༌། ཉེར་ཐོབ་འོད་གསལ་ལ་ཐིམ་པའི་དེ་མ་ཐག་འོད་གསལ་ངོས་བཟུང་ཞིང་འོད་གསལ་གྱི་ངང་ལ་མཉམ་པར་བཞག །འདི་ལ་ཇི་ཙམ་སྡོད་ཀྱང་རང་དབང་ཡོད་པས་དེའི་ངང་དུ་གྲོལ་བར་བྱ། དེ་ཙམ་མི་ནུས་ན་འོད་གསལ་དེའི་ངང་ནས་ལྷ་སྐུ་སྒྱུ་མ་ལྟ་བུར་ལྡང་བའི་སྦྱོར་བ་བྱ། དེ་ཡང་མ་ནུས་ན་བར་དོའི་གདམས་པ་འདི་ལྟར་ཉམས་སུ་བླངས་ཏེ། གང་ཟག་རབ་ཚེ་འདིར་འོད་གསལ་ཕྱག་རྒྱ་ཆེན་པོ་ལ་འདྲིས་པ་དག་གིས་བར་དོར་འཇུག་བྱ་དགག་པ་ནི། བདག་ཤི་བ་དང་གནས་གྲོགས་ལུས་སོགས་བར་དོ་ཡིན་པར་ངོ་ཤེས་པར་བྱས་ནས། རང་ལྷ་སྐུར་བསྒོམས་ལ་རྗེས་གཞིག་གམ་རིལ་འཛིན་གང་རུང་གིས་འོད་གསལ་སྟོང་ཉིད་ཕྱག་རྒྱ་ཆེན་པོའི་ངང་དུ་མཉམ་པར་གཞག་པས་མངལ་དུ་འཇུག་བྱ་ཁེགས་པར་འགྱུར་རོ། །དེ་ཙམ་མི་ནུས་པའི་གང་ཟག་འབྲིང་ཚེ་འདིར་བསྐྱེད་རིམ་ལ་འདྲིས་པ་དག་གིས་བར་དོར་རང་ཉིད་ཕོར་སྐྱེ་ན་ཕོ་ལ་སྡང་ཞིང་མོ་ལ་ཆགས་པ་དང༌། མོར་སྐྱེ་ན་དེ་ལས་ལོག་པའི་སྣང་བ་དང༌། ཕོ་མོ་འདུ་འཕྲོད་བྱེད་པ་མཐོང་ན་དེ་ལ་ཆགས་སྡང་མིག་སེར་འབྱུང་བས་དེའི་ཚེ་བདག་སྔོན་ཡང་ཆགས་སྡང་བྱས་པས་འཁོར་བར་འཁོར་བ་ཡིན། ད་ནི་ཆགས་སྡང་མི་བྱའོ་སྙམ་ནས་དྲན་པས་གསོས་བཏབ། དེས་མ་ཁེགས་ན་ཕོ་མོ་གཉིས་བླ་མ་ཡབ་ཡུམ་དུ་བསྒོམས་ནས་གསང་བའི་དབང་ཞུ་བར་བསམ། དེས་ཀྱང་མ་ཁེགས་ན་བླ་མ་ཡི་དམ་ཡབ་ཡུམ་སོགས་སྣང་སྲིད་འཁོར་འདས་ཀྱི་ཆོས་ཐམས་ཅད་མེད་བཞིན་དུ་སྣང་བ་རྨི་ལམ་སྒྱུ་མ་ལྟ་བུ་ཡིན་མོད། སྔོན་ཆད་ཀྱང་དེ་ལྟར་མ་རྟོགས་པས་འཁོར་བར་འཁྱམས་པ་ཡིན། ད་ནི་ཡང་དག་པའི་བདེན་པ་འཁོར་འདས་དབྱེར་མེད་རིག་གྲོལ་རང་ཤར་གྱི་དེ་ཁོ་ན་ཉིད་འདི་ལ་མཉམ་པར་བཞག་པར་བྱའོ་སྙམ་དུ་བློས་བཅད་ཀྱིས་ཉམས་སུ་བླང༌། དེས་བདུན་ཕྲག་དང་པོར་ཁེགས་པར་འགྱུར། བདུན་ཕྲག་ཕྱི་མ་རྣམས་སུ་ཡང་ཚུལ་དེ་ལྟར་འབད་པས་མངལ་སྒོ་ཁེགས་པར་ཚེགས་མེད་པ་ཡིན་ནོ། །གང་ཟག་ཐ་མ་ལམ་རིམ་པ་གཉིས་ལ་གོམས་པ་ཆུང་བ་དག་གིས་མངལ་མ་ཁེགས་པས་མངལ་འདམ་ནས་ཆོས་སྒྲུབ་པའི་རྟེན་བཟུང་བ་ནི། བར་དོར་གནས་པའི་ཚེ་སེམས་ཅན་ཐམས་ཅད་ཀྱི་དོན་དུ་བདག་བར་དོ་འདི་ནས་འཕོས་ཏེ་སངས་རྒྱས་ཀྱི་ཞིང་བདེ་བ་ཅན་ལ་སོགས་པར་ཅི་ནས་ཀྱང་སྐྱེ་བའི་ཉིང་མཚམས་སྦྱར་བར་བྱའོ་སྙམ་པའི་འདུན་པ་དྲག་པོས་མཚམས་སྦྱར་རོ། །དེ་ཙམ་མི་ནུས་ན་བདག་སེམས་ཅན་གྱི་དོན་ནུས་པའི་རིགས་རྣམ་པར་དག་ཅིང་གཙང་བར་སྐྱེ་བའི་ཉིང་མཚམས་སྦྱོར་གྱི་མ་དག་པ་རྣམས་སུ་མི་སྐྱེའོ་སྙམ་པའི་འཕེན་པ་བྱ་ཞིང༌། སྐབས་འདིར་མའི་མངལ་དངོས་སུ་མི་མཐོང་བས་འཇིགས་སྐྲག་གི་སྣང་བས་འབྲོས་པར་རྩོམ་པས་གནས་ངན་པ། མི་གཙང་བའི་འདམ་དང་ས་ཕུག །གངས་ཁུང་གཅོང་རོང་ལ་སོགས་པ་གནས་ངན་སྐྱུགས་བྲོ་བ་རྣམས་སུ་མི་འགྲོ་བར་ལྷ་ཁང་མཆོད་རྟེན་ཕོ་བྲང་ལ་སོགས་པར་འགྲོ་བར་བརྩམས་པས་མིའི་ལུས་རྟེན་ཆོས་སྒྲུབ་ནུས་པ་རིགས་མཐོ་ཞིང་གཙང་མར་སྐྱེ་བ་སྟེ། འདི་ནི་ཉམས་ལེན་ཐ་མ་བར་དོར་ལུས་ངན་སྤང་ཞིང༌། ལུས་བཟང་པོ་ལེན་པའི་ཐབས་མངལ་གདམ་པའི་སྦྱོར་བ་ཞེས་བྱ་བ་སྟེ་བར་དོར་གྲོལ་བའི་གདམས་པ་ཡིན་ཏེ། འདི་ལ་ཡང་གོམས་པ་སྔོན་དུ་འགྲོ་དགོས་པས་ཉིན་མཚན་གྱི་སྣང་བ་བར་དོར་བསྒོམས་ནས། རབ་འོད་གསལ། འབྲིང་སྒྱུ་ལུས། ཐ་མ་མངལ་དགག་པ། དེ་ཙམ་མི་ནུས་ཀྱང་མངལ་འདམ་པའི་སྦྱོར་བ། བློས་བྱས་ཀྱི་སྒོ་ནས་སྦྱངས་ཤིང་འདྲིས་པས་གོམས་པ་ལྟ་བུར་བྱ་བ་གལ་ཆེའོ། །རྗེས་ནི་དུས་ཐམས་ཅད་དུ་མཉམ་བཞག་གི་གཙོ་བོར་གཏུམ་མོ་བསྒོམ། རྗེས་ཐོབ་སྒྱུ་ལུས་ཀྱི་ཆོས་ཐམས་ཅད་སྒྱུ་མ་ལྟ་བུར་སྦྱང༌། མཚན་མོ་གཉིད་འཐུག་འོད་གསལ་དང་བག་ཆགས་རྨི་ལམ་འཁྲུལ་པར་ལྡང་ན་རྨི་ལམ་སྦྱངས། སྐབས་སུ་འཕོ་བ་དང་ཐུན་མཚམས་རྣམས་སུ་བར་དོ་སྦྱངས་པས་རབ་ཚེ་འདི། འབྲིང་འཆི་བའི་ཚེ། ཐ་མས་ཀྱང་བར་དོར་མཆོག་གི་དངོས་གྲུབ་ཟུང་འཇུག་རྡོ་རྗེ་འཆང་གི་གོ་འཕང་མི་ཐོབ་མི་སྲིད་དོ། །ཞེས་པ་ནི་ཟབ་ལམ་ནཱ་རོའི་ཆོས་དྲུག་མར་ལུགས་ཀྱི་གདམས་པ་མ་ཚང་བ་མེད་ཅིང་ཚིག་མདོར་བསྡུས་ནས་བཤད་པའི་སྐབས་སོ།། །།ཡང་གཉིས་མེད་དུས་ཀྱི་འཁོར་ལོའི་རྫོགས་རིམ་ཀསྨིར་སཽ་མ་ནཱ་ཐའི་ལུགས་སྦྱོར་བ་ཡན་ལག་དྲུག་པ་ལ་ཡང༌། ཐུན་མོང་དང་ཐུན་མོང་མ་ཡིན་པའི་སྔོན་འགྲོ་སྔར་ལྟར་ལ། ཁྱད་པར་གྱི་སྔོན་འགྲོ་དབེན་གསུམ་ནི། ལུས་ངག་ཡིད་གསུམ་འཇིག་རྟེན་དང་མཐུན་པའི་རྣམ་གཡེང་དང༌། ཆོས་ཀྱི་བསྐྱེད་རིམ་སྔགས་དང་ཆོས་སྤྱོད་བསམ་གཏན་གང་ཡང་མི་བྱེད་པར་ཁྱབ་གདལ་དུ་ཟོ་གློད་པ་ཞག་བདུན་སོགས་བྱའོ། །དངོས་གཞི་ལ་སྦྱོར་བ་ཡན་ལག་དྲུག་པ་སྐུ་གསུང་ཐུགས་རྡོ་རྗེའི་རྣལ་འབྱོར་ཐོག་མཐའ་བར་གསུམ་དུ་དགེ་བ་ལས། དང་པོ་ཐོག་མར་དགེ་བ་སྐུ་རྡོ་རྗེའི་རྣལ་འབྱོར་ལ་སོར་བསམ་གཉིས་ཀྱི། དང་པོ་སོ་སོར་སྡུད་པ་ནི། ལུས་གནད་རྐང་པ་རྡོར་སྐྱིལ། ལག་གཉིས་རྡོ་རྗེ་ཁུ་ཚུར་སོ་སོར་བསྒྲེང་བ་བརླ་ཁུད་དུ་ཁ་སྦུབ། གཞན་བསམ་གཏན་གྱི་ཡན་ལག་སྤྱི་ལྟར་ལ། ལྟ་སྟངས་རྡོ་རྗེ་གཙུག་ཏོར་གྱི་ལྟ་བ་ཞེས་པ་སྣ་རྩེ་ནས་སོར་ཉི་ཤུ་གྱེན་དུ་འཕགས་པའི་ཐད་ཀྱི་བར་སྣང་ལ་མིག་བསྒྲད་ནས། རང་དུས་འཁོར་དཔའ་བོ་གཅིག་པར་བསམ་པས་མུན་པའི་ཁང་བུར་སེམས་རབ་ཏུ་གཡོ་བ་འདི་མདུན་གྱི་ལྟ་སྟངས་ལ་གཏད་ནས་བསྒྲིམས་ཏེ་བསྒོམ། ཡང་ཉིན་མོ་བླ་གབ་མེད་པ་ནི། སྔ་དྲོ་དང་ནུབ་དང་ཕྱི་དྲོ་ཤར་དུ་ཕྱོགས་པས་ལུས་གནད་ལྟ་སྟངས་སྒོམ་ཚུལ་སོགས་གོང་མ་ལྟ་བུས་རེས་འགའ་མདུན་གྱི་ནམ་མཁའ་སྤྲིན་མེད་པ་ལ་སེམས་འཛིན། རེས་འགའ་མདུན་གྱི་རི་རྩེ་དང་ནམ་མཁའི་མཚམས་སུ་སེམས་བཟུང༌། འདི་དག་གི་ཚེ་འོག་རླུང་ཅུང་ཟད་འཐེན་ནོ། །དེ་ལྟར་ཡང་ཉིན་མཚན་གཉིས་སུ་བཅད་ནས་བསྒོམས་པས་དུ་བ་ལ་སོགས་པའི་རྟགས་བཅུ་འཆར། གལ་ཏེ་འཆར་དཀའ་ན་སྤོགས་པའི་ཆོ་ག་དང་བྱིང་རྒོད་ན་བ་སོགས་བྱུང་ན་གེགས་སེལ་རྒྱས་པ་སོགས་ཁྲིད་གཞུང་ན་གསལ་ལོ། །རྟགས་བཅུ་ལ་མཚན་ལྟས་དུ་བ། སྨིག་རྒྱུ། ནམ་མཁའ། མར་མེ་ལྟ་བུ་སྟེ་བཞི། ཉིན་ལྟས་འབར་བ། ཟླ་བ། ཉི་མ། རྡོ་རྗེ། ཆ་ལང༌། ཐིག་ལེ་ལྟ་བུ་སྟེ་དྲུག་འཆར་རོ། །དེས་ནི་དབང་པོ་དང་ཚོགས་དྲུག །རྩ་བ་དང་ཡན་ལག་གི་རླུང་གིས་གཡོས་པས་དེར་འཛིན་འཁྲུལ་བློར་འཕྱན་པ་བཀག་ཅིང༌། འོད་ལྔ་སྒྲ་གཅན། ཐིག་ལེ་ཐིག་ཕྲན་སྐུ་དང་ཡིག་འབྲུ་ཕྱག་མཚན་ལ་སོགས་པར་སྣང་བའི་རྟགས་དང༌། རྟགས་ཅན་བདེན་ཚིག་གྲུབ་ཅིང་མཆོག་སྦྱིན་ནུས་པས། འདི་སྐབས་ཤི་ནའང་ལུས་བཟང་པོ་བླངས་ཏེ། ལམ་གྱི་འཕྲོ་མཐུད་པས་སྐྱེ་བ་བདུན་ལ་སངས་རྒྱས་ཐོབ་ལ་མཐར་ཐུག་རྡོ་རྗེ་སེམས་དཔའ་གདན་གསུམ་ཚང་བའི་གོ་འཕང་འགྲུབ་པར་བྱེད་དོ། །གཉིས་པ་སོར་སྡུད་ཀྱི་ངོ་བོ་བརྟན་བྱེད་བསམ་གཏན་བསྒོམ་པ་ནི། ལུས་གནད་སྔ་མ་ལྟ་བུས་བསམ་གཏན་ལྔ་བསྒོམ་སྟེ། དུ་སོགས་རྟགས་གང་རུང་མཐོང་བ་ནི་ཤེས་རབ། དེ་ལ་དེར་འཛིན་གྱི་འཁྲུལ་བློ་མེད་པར་མངོན་སུམ་དུ་མཐོང་བ་རྟོགས་པ། སྟོང་གཟུགས་དེ་གཅིག་ནས་དུ་མའི་བར་དུ་ཤར་ཡང་འཛིན་པ་མེད་པ་དཔྱོད་པ། ཕྱིའི་སྟོང་གཟུགས་དེ་རྣམས་དང་ནང་གི་སེམས་དབྱེར་མེད་དུ་རྟོགས་པ་དགའ་བ། དབྱེར་མེད་རོ་གཅིག་གི་རྟགས་སྣང་ཤར་ཡང་འཛིན་མེད་དུ་འཇོག་ཅིང་བྱན་ཚུད་པ་ནི་གཡོ་མེད་ཀྱི་བདེ་བ་སྟེ། དེ་ལྟར་ཆོས་ལྔ་པོས་གཟུགས་སྒྲ་དྲི་རོ་རེག་ཆོས་ཕྱི་ནང་གི་ཚོགས་དྲུག་སྟོང་གཟུགས་ཐམས་ཅད་ཚུལ་དེ་ལྔས་གནད་དུ་བསྣུན་ནས་བསྒོམ་པ་ཡིན་ནོ། །དེ་ལ་ཉམས་མྱོང་སྐྱེས་ནས་བོགས་འདོན་པ་ནི་ཐབས་སྣ་ཚོགས་ཀྱི་སྒོ་ནས་འདོན་དགོས་ཏེ། ཉིན་མོ་སོར་སྡུད་ཀྱི་སྐབས་ལྟར་ནམ་མཁའ་སྟོང་པར་སྟོང་གཟུགས་ལ་སེམས་འཛིན། དེ་རྗེས་ལྟ་སྟངས་དང་སྟོང་གཟུགས་མར་ཕབ་ནས་མདུན་གྱི་ཀ་བ་སོགས་ལ་སེམས་བཟུང༌། ལས་སྣང་དེ་དག་དང་སྟོང་གཟུགས་ཀྱང་ཡུལ་ཡུལ་ཅན་དབྱེར་མེད་དུ་མ་རྟོགས་ཀྱི་བར་སྦྱང༌། མཚན་མོ་སྣ་བུག་གི་རླུང་ལ་སེམས་གཏད་ནས་བསྒོམ། ཡང་མཚན་མོ་རང་ལྷ་སྟོང་རར་གསལ་བའི་ཁོང་དབུས་རྩ་དབུ་མ་སྔོན་པོ་ཡས་སྣེ་ཚངས་བུག་དང་མས་སྣེ་གསང་གནས་སུ་སླེབས་པ། གཡས་སུ་རོ་མ་དམར་པོ་གཡོན་དུ་རྐྱང་མ་དཀར་པོ་གཉིས། ཡས་སྣེ་སྣ་བུག་དང་མས་སྣེ་དབུ་མར་འདུས་པའི་མར་སྣེ་འདུས་མཚམས་སུ་སེམས་གཏད་ལ་བསྒོམ། སྒོམ་ཚུལ་གྱི་ཡན་ལག་ལྔ་བསམ་གཏན་གྱི་དུས་ལྟར་བྱ། སྣ་བུག་གི་རླུང་ལ་སེམས་གཏད་པའི་ཚེ་རླུང་གི་ཁ་དོག་མཐོང་ཚེ་ཁ་དོག་དང་མཐུན་པའི་ལས་འགྲུབ་པའི་སྨོན་ལམ་བཏབ་ན་གང་བཏབ་འགྲུབ་པར་གསུངས་སོ། །ཡང་རང་ལུས་ཐ་མལ་པའི་སྤུ་དཀར་ནག་མཚམས་སུ་རླུང་སེམས་མ་ཡེངས་པར་གཏད། བདེ་དྲོད་སྐྱེས་ཚེ་མདུན་དུ་རི་མོ་ནག་པོ་ལ་སེམས་གཏད་ནས་བསྒོམས་པས་རྩ་དུང་པ་མཐོང༌། དེ་ནས་རིམ་གྱིས་རྩ་འཁོར་རྣམས་མཐོང༌། མཐར་གསང་སྔགས་ཀྱི་ཆོས་ཐམས་ཅད་རང་བཞིན་གྱིས་ཤེས་པར་འགྱུར་ཏེ་ས་དང་པོའི་བདེན་པ་མཐོང་བ་ཡིན་ནོ། །དེ་ནས་འོད་གསལ་དང་བསྲེས་ནས་བོགས་འདོན་པ་ནི། གཉིད་ཁར་ལུས་གནད་སོགས་སྔར་ལྟར་གྱིས་མདུན་གྱི་སྟོང་གཟུགས་ལ་རླུང་མིག་སེམས་གསུམ་གཏད། གཉིད་ལ་འགྲོ་ཁར་རླུང་མིག་སེམས་གསུམ་སྣ་རྩེར་ཕབ་ལ་དར་ཅིག་བསྒོམ་པས་བརྟན་པར་འགྱུར་བ་དང་ལུས་གནད་བཀྲོལ་ནས་སེང་གེའི་ཉལ་སྟབས་ཀྱིས་གཉིད་ལོག་པས་འོད་གསལ་མཐུག་སྲབ་གང་རུང་ཟིན་པར་འགྱུར་རོ། །ཟིན་པའི་ཚེ་སྔར་ལྟར་བསམ་གཏན་གྱི་ཡན་ལག་ལྔས་ཉམས་སུ་བླང་ངོ༌། །ཐུན་མཚམས་སུ་བསྲེ་བས་བོགས་དབྱུང་བ་ནི། བདེ་སྡུག་བར་མའི་ནད་གདོན་ལ་སོགས་པ་ཅི་བྱུང་ཡང་འོད་གསལ་སྟོང་པ་ཉིད་ལས་མ་གཡོས་བཞིན་དུ་བསམ་གཏན་གྱི་ཡན་ལག་ལྔས་གནད་དུ་བསྣུན་ལ་བསྒོམ་མོ། །དེ་ལྟར་འབད་པས་སྟོང་གཟུགས་ཐམས་ཅད་འོད་གསལ་ཉིད་དུ་རོ་མཉམ་ཞིང༌། རྟགས་ནི་སྟོང་གཟུགས་རྣམས་ཕྲ་འཚེར་འདར་གཞིག་དཀའ་བ་འོད་སྣ་ཚོགས་འཕྲོ་བ་སྟེ་མཚན་ཉིད་ལྔ་ལྡན་དུ་འབྱུང༌། རང་སེམས་རྣམ་རྟོག་གི་མཚན་འཛིན་ཐམས་ཅད་དང་བྲལ་བའི་གསལ་སྟོང་ཟུང་འཇུག་གིས་དུས་འདའ་བ་འབྱུང་ངོ༌། །ཡོན་ཏན་ནི་ལྷའི་མིག་སོགས་སྔོན་གནས་དྲན་པ་གཞན་སེམས་ཤེས་པ་འཆི་འཕོ་བ་རྟོགས་པ་སྟེ་མངོན་ཤེས་ལྔ་དང༌། མཐར་ཐུག་གདན་གསུམ་ཚང་བའི་སངས་རྒྱས་མི་བསྐྱོད་རྡོ་རྗེའི་གོ་འཕང་འགྲུབ་པའོ།། །།དེ་ནས་བར་དུ་དགེ་བ་གསུང་རྡོ་རྗེའི་རྣལ་འབྱོར་ལ་སྲོག་འཛིན་གཉིས་ལས། དང་པོ་སྲོག་རྩོལ་ནི། དེ་ཡང་རྒྱུད་སྡེ་གཞན་གྱི་ལུགས་ལ་སྣ་བུག་གི་རླུང་གཡས་སྲོག་གཡོན་རྩོལ་བ་ཞེས་བཤད་ཀྱང༌། འདིར་སྣ་བུག་གཉིས་ཀའི་རླུང་ནི་སྲོག་ཡིན་ལ་དེ་གནད་དུ་བསྣུན་པ་ལ་འབད་པ་རྩོལ་བ་ཞེས་དགོངས་སོ། །དུས་ནི་སྟོང་གཟུགས་རྣམས་བརྟན་པར་མཐོང་ནས་སྣ་བུག་གི་རླུང་མཉམ་རྒྱུ་སྟོང་གཟུགས་མ་འགགས་ཀྱི་བར་དུ་ཡིན་ནོ། །དེ་ཡང་མུན་ཁང་དུ་ལུས་གནད་སྨིན་མཚམས་ནས་གྱེན་དུ་སོར་བཅོ་བརྒྱད་ཀྱི་མཚམས་སུ་གཏད། རྐང་པ་གཡས་བསྐུམས་པའི་རྟིང་པས་གསང་རྩ་གཉིས་མནན། གཡོན་དེའི་མདུན་དུ་བཞག །ལག་པ་ནི་བསྣོལ་ནས་བརླ་སྟེང་དུ་བཞག་པ་དང༌། ཁུ་ཚུར་བཅང་བའི་སྙིང་གར་བསྣོལ་བ་གཉིས་གང་བདེ་བྱའོ། །ཉམས་ལེན་ནི་དྲུག་ལས། ཐོག་མར་རྡོར་བཟླས་ཀྱིས་རྩ་ལམ་སྦྱང་བ་ནི། སྲོག་གི་རླུང་རྔུབས་པ་ཨོཾ་སྐུ་རྡོ་རྗེ། གནས་པ་ཧཱུྃ་ཐུགས་རྡོ་རྗེ། དབྱུང་བ་ཨཱཿ གསུང་རྡོ་རྗེ། དབྱུང་བ་ཧཱུྃ་དུ་གསུངས་ཀྱང་འདིར་དེ་ལས་གོ་ལོག་པ་ནི་འདི་ཀའི་ཁྱད་ཆོས་སུ་གསུང༌། རླུང་རྡོར་བཟླས་ཀྱི་སྐབས་སེམས་རླུང་ལ་གཏད་ཅིང༌། དེ་ཡང་བསམ་གཏན་གྱི་སྐབས་ལྟར་ཡན་ལག་ལྔས་ཉམས་སུ་བླང་ངོ༌། །དེ་འབྱོངས་ནས་འཇམ་རླུང་དགང་སྟོང་གི་སྦྱོར་བས། སྲོག་དབུ་མར་འཛུད་པ་ནི། རླུང་མཉམ་རྒྱུའི་དུས་བྱ་བས་མཉམ་རྒྱུར་མི་འདུག་ན་ཡོན་པོ་སྲོང་བའི་འཁྲུལ་འཁོར་གྱིས་མཉམ་རྒྱུར་བཅུག་ནས། རླུང་རོ་བུས་ཤིང་རྔུབས་ནས་སྦྱོར་བ་བཞི་ལྡན་ལ་རྒྱུན་རིང་དུ་བཟུང་ཞིང་སེམས་བསམ་གཏན་གྱི་ཡན་ལག་ལྔ་བྱའོ། །དེ་ཚུད་ནས། རྩུབ་རླུང་བུམ་ཅན་གྱིས་སྲོག་དབུ་མར་འཆིང་བ་ནི། དགུ་ཕྲུགས་སུ་བུས་ལ་སྣ་གཉིས་ནས་རྔུབ་ཅིང་དགང་བ་དང་ལྷན་ཅིག་རྒྱབ་རླུང་དྲག་པོས་བསྡམ་ནས་བུམ་པ་ཁ་སྦྱོར་གྱིས་ཡུན་རིང་དུ་བཟུང་ཞིང་སེམས་གོང་ལྟར་བྱའོ། །དེས་སྲོག་དབུ་མར་ཚུད་ཅིང་ཆིངས་པའི་རྟགས་སྲོག་གི་རྒྱུ་བ་མི་མངོན་པར་བུམ་པ་ཅན་ཇེ་རིང་ལ་སོང་ནས་སྲོག་འགགས་ཤིང་རྣམ་རྟོག་རྒྱུན་ཆད་པར་འབྱུང་ངོ༌། །དེ་གཉིས་ཀས་མ་ཚུད་མ་ཆིངས་ན། དྲག་རླུང་བཙན་ཐབས་ཀྱིས་ཉི་ཟླའི་ལམ་འགོག་པ་ནི། ལུས་གནད་གོང་ལྟར་ལས་ལག་པས་རྦ་རླབས་འཆིང་བ་ཐོག་མར་གཅིག་ནས་མཐར་བརྒྱ་སྟོང་གི་བར་དུ་ཇེ་མང་བཅིངས་པས་དང་པོར་འཁྲུལ་སྣང་འཆར། དེའི་ཚེ་བསམ་གཏན་གྱི་ཡན་ལག་ལྔས་གནད་དུ་བསྣུན་པས་མཐར་སྤྲོས་བྲལ་བདེ་སྟོང་འོད་གསལ་སྒྱུ་མ་ལྟ་བུར་འཆར་བ་ནི་གནད་ཟབ་པའི་མཐར་ཐུག་པ་སྟེ་ལག་ལེན་ཞལ་ལ་དྲིས་ཤིག །འདིའི་ལས་ཕྲན་བཙན་ཐབས་ཀྱི་འཕོ་བ་ནི། རང་ལྷར་གསལ་བའི་ཁོང་པར་རྩ་དབུ་མ་ལྟེ་བ་ཡན་ཆད་ལྗང་གུ། དེ་མན་སྔོན་པོ་ཡས་སྣེ་ཚངས་བུག་དང་མས་སྣེ་གསང་གནས་སུ་ཟུག་པའི་ལྟེ་བའི་ཐད་དུ་དམར་ཆ་ཨ་ཐུང་བཤོས་བུ་ཟུར་གསུམ་པའི་དབྱིབས་ཅན་ནས་ཙམ་པ་དང༌། སྤྱི་བོར་དཀར་ཆ་མཐོ་གང་ཐུར་བསྟན། སྙིང་གར་སེམས་ཀྱི་ངོ་བོ་ཧཱུྃ་ནག་པོ་བསམ། ཐོག་མར་རླུང་སྦྱངས་ནས་སྟེང་རླུང་རྔུབས་ནས་མནན་པའི་ཚེ་ཧྃ་ཞུ་ནས་སྙིང་གའི་ཧཱུྃ་ལ་ཐིམ། རྒྱབ་རླུང་དྲག་ཏུ་འཐེན་པས་ལྟེ་བའི་ཨ་ཤད་ཡར་འཕོས་ཧཱུྃ་ལ་ཐིམ། རྦ་རླབས་བཅིངས་ནས་ཧཱུྃ་སྤར་བས་རླུང་སེམས་ཐ་མི་དད་ཚངས་བུག་ཏུ་ཐོན་པར་བསམ། སྦྱངས་པའི་ཚེ་ཚངས་བུག་རྡོ་རྗེ་རྒྱ་གྲམ་གྱིས་བཅད་ནས་ཧཱུྃ་ཚངས་བུག་ནས་ཡར་མི་འདོན་པར་དམིགས། ངལ་གསོ་དུས་སྲོག་གཏོང་བས་ཡི་གེ་གསུམ་པོ་རང་སར་བབ་པར་བསམ། འབྱོངས་རྟགས་སྤྱི་དང་འདྲ། ལས་སྦྱོར་ནི་འཆི་བའི་དུས་ལ་བབ་ན་རྒྱ་གྲམ་བསལ་ཧཱུྃ་ནམ་མཁར་འཕང་རྦ་རླབས་དྲག་ལ་ཡུན་རིང་བར་བཅིངས། མཐར་དབྱིངས་རིག་བསྲེས་པས་མཆོག་འགྲུབ་པར་འགྱུར་རོ། །དེ་ལྟར་བཀག་པས་འོག་སྒོ་འགགས་ན། སྲོག་རླུང་སྟེང་དུ་བཏང་བས་གྲོལ་བ་ནི་དྲི་ཆེན་འགགས་ན་སྣ་བུག་གཡོན་བཀག་གཡས་ནས་སྲོག་དྲག་ཏུ་རྔུབས་ལ་ལྟེ་བར་མནན། མི་ཐུབ་པའི་ཚེ་གཡས་བཀག་གཡོན་དུ་དྲག་པོས་བཏང་བས་གྲོལ། དྲི་ཆུ་འགགས་ན་དེ་ལས་གོ་ལྡོག་ལ་ཉམས་སུ་བླང་བས་གྲོལ། འདིའི་འཕྲོས་དོན་སྲོག་རླུང་གི་སྦྱོར་བས་ལས་མང་དུ་འགྲུབ་པ་ནི་ཁོ་བོས་བགྱིས་པའི་ཁྲིད་ཆེ་བར་གསལ་ལོ། །འདིའི་རྗེས་སུ་བསྐྱེད་རིམ་དང་བསྡུ་རིམ་གྱི་དཀྱིལ་འཁོར་བཅུ་འགོགས་པ་ནི་ཡན་ལག་ཡིན་པས་མ་བྲིས་སོ། །དེས་ནི་ལས་རླུང་ཐམས་ཅད་ཡེ་ཤེས་ཀྱི་རླུང་འབའ་ཞིག་ཏུ་རྒྱུ་ཞིང་འགགས་ལ། རྟགས་ནི་རང་གི་མཛོད་སྤུ་ཤ་ལྤགས་འཕྲིག་ཅིང་ཟ་བ་དང་གཡའ་བ་འབྱུང༌། སྤྱི་བོར་མི་བཟོད་པའི་ཚ་ཚག་དང་སྟོང་གཟུགས་ཐམས་ཅད་ཆེས་ཆེར་གསལ་ཞིང་འབར་བ་འབྱུང་ངོ༌། །རྟགས་ཅན་བྱང་ཆུབ་སེམས་དཔའ་ཐམས་ཅད་ཀྱིས་རང་ཉིད་ལ་མཆོད་པ་བྱེད་པར་འགྱུར་རོ། །དེས་ནི་གདན་གསུམ་ཚང་བའི་སངས་རྒྱས་དོན་ཡོད་གྲུབ་པའི་གོ་འཕང་མྱུར་དུ་འགྲུབ་པ་གདོན་མི་ཟའོ།། །།གཉིས་པ་སྲོག་རྩོལ་སྦྱངས་པས་རླུང་སེམས་དབུ་མར་ཚུད་པ་དེ་ཉིད་རྩ་འཁོར་རྣམས་སུ་འཛིན་པའི་ཕྱིར་འཛིན་པའི་རྣལ་འབྱོར་ལ། སྔོན་འགྲོ་སྲོག་ཐུར་བསྲེ་བ་ནི། རླུང་ཡོན་པོ་སྲོང་བའི་འཁྲུལ་འཁོར་གྱིས་བཅོས་ནས་མཉམ་རྒྱུར་བྱུང་བའི་ཚེ། ཧཱུྃ་ཞེས་རིང་པོས་སྲོག་ཕྱིར་བུས་ནས། ནང་དུ་མ་རྔུབ་པའི་ངང་ནས་ཧཱུྃ་ཞེས་ཐུང་ངུས་ཐུར་སེལ་དྲག་ཏུ་འཐེན་ཅིང་རྒྱ་མཚོ་རི་རབ་ལ་སྦྱར་བ་གྲངས་མང་དུ་བྱ། དེ་ལྟར་མང་དུ་བྱས་པས་ཐུར་སེལ་དབང་དུ་འདུས་རྟགས་ཕོ་སྨད་སྦོམ་ཞིང་ཁྲེགས་འབྱུང༌། དེའི་ཚེ་སྲོག་སྟེང་ནས་དྲངས་པ་ཁ་སྦྱར་བ་ཡུན་རིང་དུ་སྦྱང་ངོ༌། །དངོས་གཞི་བུམ་པ་ཅན་དུས་ཀྱི་གནས་དྲུག་ཏུ་བཅིངས་པ་འཛིན་པའི་དངོས་གཞི་ནི། རང་ལྷར་གསལ་བའི་ཁོང་པར་རྩ་གསུམ་ཁ་དོག་སྔར་ལྟ་བུ་ལ་དབུ་མའི་ཡར་སྣེ་གཙུག་ཏོར་ནས་མདུན་དུ་དགུག་པ་སྨིན་མཚམས་དང་མར་སྣེ་གསང་གནས་སུ་མདུན་དུ་རྡོ་རྗེའི་བུ་གར་ཟུག་པ་ཁུ་བ་འབབ་པ། རོ་རྐྱང་གཉིས་ཡར་སྣེ་སྣ་བུག་གཉིས་སུ་ཟུག་པ་རོ་མའི་མར་སྣེ་ལྟེ་འོག་ནས་མདུན་དུ་འཁྱོགས་པ་རྡོ་རྗེ་ཟུག་པ་དྲི་ཆུ་འབབ་པ། རྐྱང་མའི་མར་སྣེ་ལྟེ་འོག་ནས་རྒྱབ་ཏུ་འཁྱོགས་པ་དྲི་ཆེན་འབབ་པ། རྩ་གསུམ་འདུས་མཚམས་ལྟེ་བར་ས་ཁམས་ཀྱི་འཁོར་ལོ་རྩ་འདབ་དྲུག་ཅུ་བཞི་པ། སྙིང་གར་ཆུ་ཁམས་ཀྱི་རྩ་འདབ་ནང་རིམ་བཞི་དང་ཕྱི་རིམ་བརྒྱད། མགྲིན་པར་མེ་ཁམས་ནང་རིམ་བརྒྱད་དང་ཕྱི་རིམ་བཅུ་དྲུག་དེའི་ཕྱི་སོ་གཉིས། དཔྲལ་བར་རླུང་ཁམས་ནང་རིམ་བཞི་དང་ཕྱི་རིམ་བརྒྱད་དེའི་ཕྱི་བཅུ་དྲུག །གཙུག་ཏོར་ནམ་མཁའི་ཁམས་སྔོན་པོ་ཚངས་བུག་ལས་སོར་གཅིག་གི་འོག་ཏུ་འདབ་མ་བཞི༑ གསང་གནས་སུ་ཡེ་ཤེས་ཀྱི་ཁམས་ལྗང་གུ་འདབ་མ་ནང་རིམ་པ་བཅུ་དང་ཕྱི་རིམ་བཅུ་དྲུག་རྣམས་གསལ་གདབ། ལུས་གནད་སྔར་རྡོར་བཟླས་ཀྱི་སྐབས་ལྟར་བྱས་ནས་ཧཱུྃ་རིང་གིས་སྲོག་ཕྱིར་བུས་ནས་རྔུབས་པའི་གོང་དུ་ཧཱུྃ་ཐུང་གིས་ཐུར་སེལ་ཡར་རྔུབ། སླར་སྲོག་དལ་བུས་རྔུབས་ནས་དགང་ཞིང་ལྕེ་ཡ་རྐན་ལ་སྦྱར་ཞིང་མིག་གྱེན་དུ་བསྒྲད་ནས་བུམ་ཅན་གསུམ་ནས་བརྒྱའི་བར་གང་ཐུབ་བཟུང་བའི་རིང་རླུང་སེམས་ལྟེ་བའི་རྩ་འཁོར་ལ་མ་ཡེངས་པར་བཟུང་བའི་མཐར་ལྟེ་བའི་རྩ་འཁོར་ལོ་འོད་དུ་ཞུ་ནས་སྙིང་གའི་རྩ་འཁོར་ལ་ཐིམ་པར་བསམ་པ་ནི་ལྟེ་བའི་བུམ་ཅན་ནོ། །ཡང་ཧཱུྃ་རིང་ཐུང་སོགས་གོང་ལྟར་བུམ་ཅན་དང་རླུང་སེམས་སྙིང་གར་བཟུང་བའི་མཐར་སྙིང་གའི་རྩ་འཁོར་འོད་དུ་ཞུ་བ་མགྲིན་པའི་རྩ་འཁོར་ལ་ཐིམ་པ་ནི་སྙིང་གའི་བུམ་ཅན་ནོ། །ཡང་ཧཱུྃ་རིང་ཐུང་བུམ་ཅན་སོགས་སྔར་ལྟར་རླུང་སེམས་མགྲིན་པར་བཟུང་རྗེས་མགྲིན་པའི་རྩ་འཁོར་ལ་བསྟིམ་པ་ནི་མགྲིན་པའི་བུམ་ཅན་ནོ། །ཡང་ཧཱུྃ་རིང་ཐུང་བུམ་ཅན་སོགས་སྔར་ལྟར་གྱིས་དཔྲལ་བར་རླུང་སེམས་བཟུང་རྗེས་དཔྲལ་བའི་རྩ་འཁོར་ལོ་འོད་དུ་ཞུ་བ་གཙུག་ཏོར་གྱི་རྩ་འཁོར་ལ་བསྟིམ་པ་ནི་དཔྲལ་བའི་བུམ་ཅན་ནོ། །ཡང་ཧཱུྃ་རིང་ཐུང་བུམ་ཅན་རླུང་སེམས་སོགས་སྔར་ལྟར་གཙུག་ཏོར་དུ་བཟུང་རྗེས་གཙུག་ཏོར་གྱི་རྩ་འཁོར་འོད་དུ་ཞུ་བ་གསང་གནས་ཀྱི་རྩ་འཁོར་ལ་བསྟིམ་པ་ནི་གཙུག་ཏོར་གྱི་བུམ་ཅན་ནོ། །ཡང་ཧཱུྃ་རིང་ཐུང་བུམ་ཅན་རླུང་སེམས་སོགས་སྔར་ལྟར་གསང་གནས་སུ་བཟུང་རྗེས་གསང་གནས་ཀྱི་རྩ་འཁོར་ལོ་འོད་དུ་ཞུ་བ་ཧཱུྃ་ནག་པོར་གྱུར་པ་དབུ་མའི་ནང་ནས་ཡར་ཕྱུང་བ་སྙིང་གར་སླེབས་པ་འོད་ལྔར་གྱུར་པས་རང་ལུས་རྩ་གསུམ་དང་བཅས་པ་འོད་དུ་མེར་མེར་འབར་བ་ལ་ཤེས་པ་གཏད་ནས་བུམ་ཅན་ཅི་ཐུབ་བཟུང་བའི་མཐར་འོད་ལྔ་འཇའ་ཡལ་བ་ལྟར་དམིགས་མེད་དུ་ཅི་གནས་སུ་བཞག་གོ །འདིའི་སྐབས་བདེ་བ་གཡོ་ཆེས་པ་ན་དམིགས་པ་དང་འཁྲུལ་འཁོར་གྱིས་སྤོགས་པ་སོགས་ནི་ཁོ་བོས་བགྱིས་པའི་སྦྱོར་དྲུག་གི་ཁྲིད་ཡིག་ཆེ་བར་གསལ་བ་ལྟར་བྱའོ། །དེ་ནས་བཅུད་ལེན་གྱི་མཆོག་ལྕེ་གསུམ་པ་སྐྱོད་པས་ནང་གི་བདུད་རྩི་འཐུང་བ་ནི་ལུས་གནད་སོར་སྡུད་ཀྱི་སྐབས་ལྟར་ལ། ཚངས་བུག་གི་ཐད་ཀླད་རྒྱའི་སྟེང་དུ་ཟླ་དཀྱིལ་མཐེ་བོང་ཙམ་པའི་ལྟེ་བར་བྱང་སེམས་ཀྱི་རང་བཞིན་ནུ་མའི་དབྱིབས་ཅན་བདུད་རྩི་འཛག་ལ་ཁད་པའི་མཐར་དབྱངས་བཅུ་དྲུག་གིས་བསྐོར་བར་བསམ། མཆུ་ཅུང་ཟད་གདངས་ནས་ཧཱུྃ་རིང་གིས་སྲོག་བུས། ཧཱུྃ་ཐུང་གིས་ཐུར་སེལ་དྲང༌། སླར་སྲོག་ཁ་སྣ་གསུམ་ག་ནས་རྔུབས་ནས་བཀང་བས་རང་བྱུང་གི་གཏུམ་མོའི་དྲོད་རླུང་གིས་བསྐུལ་བས་དཀར་ཆ་ནུ་མ་ལྟ་བུ་དབྱངས་ཡིག་དང་བཅས་པ་བདུད་རྩི་སྐྱ་ནུར་གྱིས་བབ་པ་ཡ་རྐན་གྱི་ལྕེའུ་ཆུང་བརྒྱུད་ནས་བབས་པ་གཞིབས་པས་ལུས་ཐམས་ཅད་བདུད་རྩིས་གང་ནས་བསམ་གཏན་ཟག་མེད་ཀྱི་བདེ་བས་མྱོས་ཤིང་ཚིམ་པར་བསམ་ནས་ལྕེས་ལྕེའུ་ཆུང་བསྐུལ་ཞིང་གཞིབས་པས་དང་པོར་མཆིལ་མ་འབབ་མཐར་རོ་མངར་བ་དང་བཅས་པ་བབས། མྱོང་བས་བཅུད་ལེན་ཐམས་ཅད་ཀྱི་མཆོག་ཡིན་པར་རྒྱུད་ནས་གསུངས་སོ། །དེ་ལྟར་འཛིན་པ་བུམ་ཅན་དྲུག་བསྒོམས་པས་རྟགས་ཚད་ནི། སྔར་གྱི་སྟོང་གཟུགས་རྣམས་ཉམས་མྱོང་དང་འདྲེས་ཤིང་ཆེར་གསལ་བ་དང༌། གཞོམ་དུ་མེད་པའི་གཟུགས་སྒྲ་དྲི་རོ་རེག་ཆོས་ལ་ལོངས་སྤྱོད་པ། སྲོག་ཐུར་འདྲེས་པས་ཡེ་ཤེས་ཀྱི་གཏུམ་མོའི་ཡོན་ཏན་མངོན་དུ་འགྱུར། བཟའ་རྒྱུ་རི་རབ་ཙམ་ཟོས་ཀྱང་འཇུ་ལ། ཏིལ་འབྲུ་ཙམ་མ་ཟོས་ཀྱང་བཀྲེས་སྐོམ་གྱི་སྣང་བ་མི་འབྱུང༌། མཐར་གདན་གསུམ་ཚང་བའི་སངས་རྒྱས་རིན་ཆེན་འབྱུང་ལྡན་གྱི་གོ་འཕང་མངོན་དུ་བྱེད་པ་ཡིན་ནོ། །བུམ་ཅན་དྲུག་གི་སྐབས་རྩ་འཁོར་དྲུག་གི་དམིགས་པ་དང་རླུང་དང་སྟོང་གཟུགས་སྣང་བ་གསུམ་དབྱེར་མེད་བསལ་བཞག་མེད་པ་དེ་འཛིན་བྲལ་ཞིང་ལྷན་སྐྱེས་སུ་ཉམས་སུ་བླང་བ་ལ་རྣམ་གསུམ་རོ་གཅིག་པ་ཞེས་ཐ་སྙད་མཛད་དོ། །གསུམ་པ་ཐ་མར་དགེ་བ་ཐུགས་རྡོ་རྗེའི་རྣལ་འབྱོར་ལ་རྗེས་དྲན་དང་ཏིང་འཛིན་གཉིས་ལས། དང་པོ་རྗེས་སུ་དྲན་པའི་རྣལ་འབྱོར་ནི། སྔོན་དུ་སྦྱངས་པའི་སྟོང་གཟུགས་དང་ཉམས་མྱོང་ཇི་སྙེད་པ་རྣམས་ཕྱག་རྒྱ་གསུམ་གྱི་གདམས་པས་བོགས་འདོན་ཞིང་ཡོན་ཏན་འཕེལ་བར་བྱེད་པ་ཡིན་པས། དེ་ཡང་རྣལ་འབྱོར་པའི་ཁམས་སླ་བ་དང་སྐ་བ་དང་ཤིན་ཏུ་སྐ་བའི་དབྱེ་བས་ཕྱག་རྒྱ་གསུམ་དུ་གསུངས་པ་ལས། ཐོག་མར་ཁམས་སླ་བའི་གང་ཟག་གིས་དམན་པ་ལས་ཀྱི་ཕྱག་རྒྱ་བསྟེན་པ་ནི། སྲོག་རྩོལ་རྩ་རླུང་སྦྱང་བའི་ཕྱིར་བཞུགས་སྟངས་གསུམ་དང་ཐིག་ལེ་སྦྱང་བའི་ཕྱིར་འཁྲུལ་འཁོར་དྲུག །དངོས་གཞི་རང་ལུས་གཞན་ལུས་ཐབས་ལྡན་གཉིས་སོགས་ནི་འདིར་མ་བཤད་པས་རྟོགས་པར་འདོད་ན་ཁོ་བོས་བགྱིས་པའི་སྦྱོར་དྲུག་གི་ཁྲིད་ཡིག་རྣམ་འབྱེད་ཤིང་རྟར་བཤད་པ་ལྟར་བྱའོ། །ཁམས་སྐ་བའི་གང་ཟག་གིས་གཏུམ་མོ་བཏགས་པའི་ཕྱག་རྒྱ་ཉམས་སུ་བླངས་ཏེ། རང་ལྷར་གསལ་བའི་ཁོང་པར་རྩ་གསུམ་གྱི་འཁྱོགས་ཚུལ་འཛིན་པའི་སྐབས་ལྟར་གསལ་བའི་ལྟེ་བར་རྩ་འདབ་བདུན་ཅུ་རྩ་གཉིས་པའི་ལྟེ་བར་གཏུམ་མོའི་མེ་ཧོཿ ཡིག་མཚན་ཉིད་བཞི་ལྡན་དང༌། དབུ་མའི་ཡར་སྣེ་མཛོད་སྤུའི་ཕྱོགས་སུ་ཐིག་ལེ་དཀར་པོ་མཐེ་བོང་ཙམ་ཞིག་དངུལ་ཆུ་ལྟར་འདྲིལ་བར་བསམ། ཧཱུྃ་རིང་ཐུང་གིས་སྲོག་ཐུར་བུམ་ཅན་དུ་བཀང་བས་ལྟེ་བའི་ཧོཿ ལས་ཡེ་ཤེས་ཀྱི་མེ་འབར་བས་དབུ་མའི་ནང་བརྒྱུད་ཐིག་ལེ་ལ་རེག་པས་བྱང་སེམས་བབས་པས་དཔྲལ་བར་དགའ་བ། མགྲིན་པར་མཆོག་དགའ། སྙིང་གར་དགའ་བྲལ། ལྟེ་བར་ལྷན་སྐྱེས་ལ་མཉམ་པར་བཞག །སླར་སྲོག་རྩོལ་གྱིས་སྦར་བས་བྱང་སེམས་མེ་དང་འདྲེས་པས་གྱེན་དུ་ལོག་པ་ལྟེ་བར་དགའ་བ། སྙིང་གར་མཆོག་དགའ། མགྲིན་པར་དགའ་བྲལ། དཔྲལ་བར་ལྷན་སྐྱེས། མཐར་དམར་ཆའི་མེ་དང་དཀར་ཆའི་རྒྱུན་འདྲེས་པས་གཙུག་ཏོར་ནས་རྐང་མཐིལ་ཡན་བ་སྤུའི་ཁུང་བུ་ཚུན་དཀར་དམར་འདྲེས་པས་ཁྲིག་མེར་གང་བས་བདེ་དྲོད་ཀྱི་ཡེ་ཤེས་ཆེར་འབར་བས་རྣམ་རྟོག་ཚོགས་དྲུག་གི་སྣང་བ་ཐམས་ཅད་ཤི་ནས་བདེ་ཆེན་མི་རྟོག་པའི་ངང་དུ་བརྒྱལ་བ་ཡུན་རིང་དུ་བསྒོམ་པའོ། །ཁམས་ཤིན་ཏུ་སྐ་བའི་གང་ཟག་གིས་གདམས་ངག་གི་ཕྱག་རྒྱ་ཉམས་སུ་བླང་བ་ནི། རང་དུས་འཁོར་ཡུམ་དང་ཁ་སྦྱོར་བའི་ལྷན་སྐྱེས་སྒྲུབ་ཐབས་ལྟར་གསལ་བའི་ཡབ་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་ནག་པོ། ལྟེ་བར་ཧོཿ སེར་པོ། གཙུག་ཏོར་དུ་སྭཱ་ལྗང་གུ། གསང་བར་ཧཱ་སྔོན་པོ་བསམ། མཁའ་གསང་བྱིན་རླབས་སྒྲུབ་ཐབས་ལྟར་བྱས་ནས་ཡབ་ཀྱི་ཁོང་པར་རྩ་གསུམ་དཔྲལ་མགྲིན་སྙིང་ལྟེ་གསང་བའི་འཁོར་ལོ་ལྔ་གསལ་བཏབ། སྙོམས་འཇུག་བྱས་པས་དཔྲལ་བའི་འཁོར་ལོ་ནས་བྱང་སེམས་བབས་པ་དགའ་བ༑ སྙིང་གར་མཆོག་དགའ། ལྟེ་བར་དགའ་བྲལ། གསང་བར་ལྷན་སྐྱེས་སུ་མཉམ་པར་བཞག །ཆེས་བསྲུབས་པའི་ཚེ་ནོར་བུའི་རྩེ་མོར་སོན་པ་འཕོར་ཉེ་བ་ན་ཧཱུྃ་རིང་ཐུང་སོགས་སྲོག་རྩོལ་གྱི་རླུང་བུམ་ཅན་འཛིན་པའི་སྐབས་ལྟ་བུས་བཟུང་ཞིང་བཟློག་པས་ལྟེ་བར་དགའ་བ། སྙིང་གར་མཆོག་དགའ། མགྲིན་པར་དགའ་བྲལ། དཔྲལ་བར་ལྷན་སྐྱེས་སུ་མཉམ་པར་བཞག །མཐར་བདེ་སྟོང་ལྷན་སྐྱེས་ཀྱི་རང་ཞལ་བཟོ་བྲལ་བརྗོད་མེད་ཀྱི་བདེ་བ་དང་རྣམ་ཀུན་མཆོག་ལྡན་གྱི་སྟོང་པ་གཉིས་ཟུང་འཇུག་ཏུ་འཇོག་པ་ནི་ཕྱག་རྒྱ་ཆེན་མོ་སྟེ། འདི་ནི་གོང་གི་ཕྱག་རྒྱ་གསུམ་གའི་ཉམས་ལེན་ལ་སྦྱར་བ་ཤིན་ཏུ་གལ་ཆེའོ། །དེ་ལྟར་ཕྱག་རྒྱ་གསུམ་ལ་འབད་པས་རྟགས་ཚད་ནི། ས་བཅུ་རྣམ་པར་དག་པས་རྟགས་བཅུའི་སྟོང་གཟུགས་ཤིན་ཏུ་བརྟན་པ་དང༌། གནས་སྐབས་བཅུའི་དྲི་མ་དག །རྟགས་སྣང་ནི། རང་གི་ལུས་ལྷར་གསལ་བ་ལས་འོད་འཕྲོས་པས་ནམ་མཁའི་ཁམས་གང་ཞིང་རང་ལུས་འོད་ཀྱི་ནང་དུ་ཚུད་པ་ཐིམ་པ་སོགས་འབྱུང༌། མཐར་གདན་གསུམ་ཚང་བའི་སངས་རྒྱས་འོད་དཔག་མེད་ཀྱི་གོ་འཕང་ངེས་པར་འགྲུབ་པའོ།། །།གཉིས་པ་ཏིང་ངེ་འཛིན་གྱི་རྣལ་འབྱོར་ནི༑ ལུས་གནད་རྣམ་སྣང་ཆོས་བདུན་དང་ལྡན་པས། རླུང་གནད་ནི། མ་ནིང་གི་རླུང་ཞེས་བྱ་བ་སྲོག་ཐུར་གཉིས་ཀ་རྩོལ་བ་སྤོང་ནས་རང་སོར་བཞག་ལ། སེམས་ཀྱི་བསམ་གཏན་ནི། དུས་ཞབས་སྙན་བརྒྱུད་ལས། སྒོམ་པ་དམིགས་བཅས་སྟོང་གཟུགས་དང༌། །དམིགས་མེད་བདེ་བ་རོ་མཉམ་ལས། །སེམས་ནི་མི་གཡོ་བརྟན་པར་གནས། །དངོས་པོ་ཐམས་ཅད་བདེར་འཆོར་རོ། །ཞེས་གསུངས་སོ། །སྔར་གྱི་སོར་སྡུད་དང་བསམ་གཏན་གྱི་སྐབས་སུ་མཐོང་བའི་སྟོང་གཟུགས་རྣམས་སྣང་སྟོང༌། སྲོག་རྩོལ་དང་འཛིན་པའི་དུས་ཤར་བའི་ཤེས་པ་གསལ་སྟོང༌། རྗེས་དྲན་གྱི་དུས་ཉམས་སུ་མྱོང་བའི་མྱོང་བ་ནི་བདེ་སྟོང་། དེ་ཐམས་ཅད་རོ་གཅིག་ཏུ་འདྲེས་པའི་ཏིང་ངེ་འཛིན་ལ་མཉམ་པར་བཞག་གོ །དེ་ཡང་འདྲེས་པ་ཞེས་རྒྱུ་མི་གཅིག་ལ་ཆུ་དང་འོ་མ་འདྲེས་པ་ལྟ་བུ་མ་ཡིན་པ། རྒྱུ་གཅིག་པ་ཆུ་གཉིས་བསྲེས་པ་ལྟ་བུ་ཡང་མ་ཡིན་པ། བདེ་བ་དང་བྲལ་བའི་སྟོང་པ་ཕྱལ་ཆད། སྟོང་པ་དང་བྲལ་བའི་སྟོང་པ་སྐྱིད་འདོད། གསལ་བ་དང་བྲལ་བའི་སྟོང་པ་མེད་དགག །སྟོང་པ་དང་བྲལ་བའི་གསལ་སྣང་རྟག་ལྟ་ལ་སོགས་པ་ཕྱག་རྫོགས་དབུ་གསུམ་གྱི་ལམ་གྱིས་མ་བསླད་པའི་རྣམ་ཀུན་མཆོག་ལྡན་གཞོམ་མེད་དོན་དམ་པའི་དུས་ཀྱི་འཁོར་ལོ་གསལ་བཞག་སྤང་བའི་ངང་དུ་གདོད་ནས་གྲུབ་པ་ལ་དེར་འཛིན་གྱི་འཛིན་སྟོང་མེད་པར་མཉམ་པར་འཇོག་པ་ནི་དོན་གྱི་སྙིང་པོ་རྫོགས་རིམ་གྱི་རྩ་བ་ཉམས་ལེན་གྱི་ཉིང་ཁུ་ཁོ་ན་ཡིན་ནོ། །དེ་ལྟར་བསྒོམས་པས་རྟགས་ཚད་ནི། ལུས་སེམས་སྣང་ཆ་ཚོགས་དྲུག་ཐམས་ཅད་བདེ་སྟོང་གཉིས་མེད་དུ་འཆར་བ་སོགས་རྟགས་སྣང་ཐམས་ཅད་ལྐོག་གྱུར་དུ་མ་ལུས་པ་རྣལ་འབྱོར་པའི་མངོན་སུམ་ཚད་གྲུབ་ཏུ་ཉམས་སུ་མྱོང་བ་སོགས་ཐུན་མོང་གི་ཡོན་ཏན་མཐའ་དག་ཐོབ། མཐར་ཐུག་རྩ་རླུང་ཐིག་ལེ་ཐམས་ཅད་ཡེ་ཤེས་རྡོ་རྗེའི་ངོ་བོར་དག་པས་གདན་གསུམ་ཚང་བའི་སངས་རྒྱས་རྣམ་པར་སྣང་མཛད་ཆེན་པོའི་ངོ་བོར་འཚང་རྒྱ་བར་འགྱུར་རོ། །དེ་ལྟར་ཡན་ལག་དྲུག་པོ་བསྒོམས་པས་རྣལ་འབྱོར་པ་རབ་སྔོན་བསགས་དང་ལྡན་པས་ནི་ཟླ་བ་གསུམ་ཚུན་ལ་མཆོག་འགྲུབ་ཅིང༌། ཐ་མ་སྐལ་བ་དམན་པས་བར་དོ་ཚུན་ལ་མཆོག་འགྲུབ་ལ། སྐལ་བ་འབྲིང་དག་གིས་ནི། ལོ་གསུམ་དང་ཟླ་བ་གསུམ་ལ་འབད་པས་བསྒོམས་པས་ཞག་རེ་ལ་རླུང་ཉི་ཁྲི་ཆིག་སྟོང་དྲུག་བརྒྱ་རེ་འགྱུ་བ་རྣམས་ལོ་གསུམ་ཕྱོགས་གསུམ་ལ་ཉིན་ཞག་ཕྲུགས་སྟོང་ཕྲག་གཅིག་དང་ཉིས་བརྒྱ་བདུན་ཅུ་ཐམ་པ་འབྱུང་བའི་རིང༌། ཉིན་མཚན་གཡེལ་མེད་རྩེ་གཅིག་ཏུ་ཉམས་སུ་བླང་བའི་ཚེ། ཞག་གྲངས་དེ་རྣམས་ཀྱི་རིང་བདེ་སྟོང་ལྷན་སྐྱེས་བྱང་ཆུབ་ཀྱི་སེམས་རླུང་དང་ཐ་མི་དད་པ་ཟག་བཅས་འཇིག་རྟེན་པའི་བདེ་བ་ལས་འདས་པ་དག་གིས་གསང་གནས་ཀྱི་འཁོར་ལོ་ཕྱེད་གང་བའི་ཚེ་ས་དང་པོ་ཐོབ། རིལ་པོར་གང་བས་ས་གཉིས་པ། ལྟེ་བའི་ཕྱེད་གང་བས་ས་གསུམ་པ། རིལ་པོར་གང་བས་ས་བཞི་པ། སྙིང་གའི་ཕྱེད་གང་བས་ས་ལྔ་པ། རིལ་པོར་གང་བས་ས་དྲུག་པ། མགྲིན་པའི་ཕྱེད་གང་བས་ས་བདུན་པ། རིལ་པོར་གང་བས་ས་བརྒྱད་པ། དཔྲལ་བའི་ཕྱེད་གང་བས་ས་དགུ་པ། རིལ་པོར་གང་བས་ས་བཅུ་པ། གཙུག་ཏོར་གྱི་ཕྱེད་གང་བས་ས་བཅུ་གཅིག་པ། རིལ་པོར་གང་བས་བཅུ་གཉིས་པ། ལུས་ཐམས་ཅད་གང་བས་བཅུ་གསུམ་པ་ཐོབ་བོ། །རྩ་བའི་རླུང་ལྔ། ཡན་ལག་གི་རླུང་སྟོང་དང་བརྒྱད་བརྒྱ། ཁམས་སོ་གཉིས། རྩ་ཉི་ཁྲི་དགུ་འབུམ། ཆ་བཅུ་དྲུག་ལ་སོགས་པ་དག་ནས་རྣམ་ཀུན་མཆོག་ལྡན་རྣམ་མེད་རྣམ་པ་ཅན་གྱི་རང་གཟུགས་སྐུ་དྲུག་ཡོངས་སུ་རྫོགས་པ་ཁྱབ་བདག་དང་པོའི་སངས་རྒྱས་དུས་ཀྱི་འཁོར་ལོའི་གོ་འཕང་ཐོབ་པར་བྱེད་པ་ནི་མི་བསླུ་བ་ཡང་དག་པའི་ཚད་མ་ཡིན་ནོ། །ཞེས་བྱ་བ་རྫོགས་རིམ་ཐམས་ཅད་ཀྱི་མཐར་ཐུག་སྦྱོར་བ་ཡན་ལག་དྲུག་པའི་སྐབས་སོ། །དེ་ལྟར་བླ་མེད་ལྷན་སྐྱེས་རྣམ་བཞིའི་རྫོགས་རིམ་ཤིན་ཏུ་བསྡུས་པ་སྟེ། དེང་སང་དུས་སྙིགས་མ་ལྔ་བདོ་ཞིང་མི་རྣམས་ཚེ་ཐུང་བ་དང་ཤེས་རབ་དམན་པས་ཡིག་ཆ་དང་དམིགས་པ་ཆེས་མང་ན་བློ་གྲོས་ཀྱི་ཁྱོན་ཆུང་ངུར་མི་ཤོང་བའི་ཉེས་པ་འགོགས་པ་དང༌། རང་ཉིད་ཀྱང་རྣམ་གཡེང་གི་དབང་དང་བློ་གྲོས་དམན་ཞིང་སྔོན་བསགས་ཀྱི་སྐལ་བའི་ཕུལ་ཆེས་ཆེར་ཞན་པས་བརྗེད་ངས་ཀྱི་དྲན་པ་གསོ་བའི་ཕྱིར། རྡོ་རྗེ་ཐེག་པའི་ལམ་གྱི་སྙིང་པོ་རྣམས་ལེགས་པར་ཐོས་ཤིང་འདོམས་པར་བྱས་ནས༑ སླར་རྫོགས་རིམ་འདི་རྣམས་ལུང་རིགས་འཕྲོས་དོན་གྱི་སྤྲོས་པ་བསྐྱུངས་ཤིང་དམིགས་པ་རྣམས་ཀྱང་གཙོ་ཆེ་བ་མེད་མི་རུང་བ་རྣམས་བསྡུས། དེ་དག་ཀྱང་ས་བཅད་ཐོ་ཙམ་མ་གཏོགས་ཚིག་ཚོགས་ཤིན་ཏུ་ཉུང་བར་བགྱིས་པ་འདི་ཡང༌། དུས་མཐའི་རྡོ་རྗེ་འཛིན་པ་འབྲི་གུང་པ་ཆོས་ཀྱི་གྲགས་པས་མེ་མོ་གླང་ལོ་ནག་པ་ཅན་གྱི་ཕྱོགས་སྔ་མའི་རྫོགས་པ་གསུམ་པ་རྒྱལ་བས་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར་ཆོས་རྒྱལ་ཟླ་བ་བཟང་པོ་ལ་མཆོག་གི་དང་པོའི་སངས་རྒྱས་ཀྱི་རྒྱུད་ཆེན་གསུངས་པའི་དུས་དགེ་བར་སྦྱར་བ་ཡིན་གྱི། ལམ་ལ་བརྩོན་པ་ལྷུར་བྱེད་པ་དག་གིས་ནི་འདི་ཙམ་ལ་ནན་ཏན་བགྱིས་པས་ཀྱང་རྡོ་རྗེ་འཆང་ཆེན་པོ་འགྲུབ་པ་གདོན་མི་ཟ་ལ། ཡང་ལུང་རིགས་ཚིག་དོན་རྒྱས་པ་ལ་མོས་པ་དག་གིས་ནི་འདི་རྣམས་རྩ་བར་བྱས་ཏེ་མཐའ་གཅོད་རང་རང་གི་ཁྲིད་ཡིག་ཆེན་མོ་རྣམས་དང༌། རྒྱུད་གཞུང་འགྲེལ་པ་དང་བཅས་པ་རྣམས་སུ་རྟོགས་པར་བྱོས་ཤིག །ཅེས་པ་ཡང་འབྲི་དམ་པ་ཆོས་ཕྱུག་གི་ཀླུང་ཕོ་བྲང་བཀྲ་ཤིས་ཚུགས་ཀྱི་རེའུ་མིག་ལྕང་ལོ་ཅན་རྡོ་རྗེ་ཐེག་པའི་གན་མཛོད་དུ་བྲིས་པའི་ཡི་གེ་པ་ནི་བཀའ་འབངས་ཀྱི་ཡང་ཐ་འཕྱོངས་རྒྱས་གྲགས་པ་དབང་པོས་བགྱིས་པ་སྟེ་འདིས་སེམས་ཅན་ཐམས་ཅད་ལ་སྨན་པར་གྱུར་ཅིག །ཤུ་བྷམྨསྟུ་སརྦ་ཛ་ག་ཏམ། སརྦ་པཀྵེ་བཛྲ་ཡཱ་ན་ཤཱ་ས་ནོ་ད་ཡ་པུཥྚིཾ་ཀུརྦནྟུ།། །།