DNZ-KARCHAG-001

Back to Volume Page"karchag" is not a number.

<ul><li>"karchag" is not a number.</li> <!--br--><li>Property "Volumepage" (as page type) with input value "DNZ-KARCHAG"karchag" is not a number." contains invalid characters or is incomplete and therefore can cause unexpected results during a query or annotation process.</li></ul>

Tibetan Text

[edit]

༄༅། །གདམས་ངག་མཛོད་ཀྱི་དཔེ་སྐྲུན་གསལ་བཤད་ཅེས་བྱ་བ་བཞུགས་སོ། ། ༄༅། །སྤྱིར་དམ་པའི་ཆོས་ནི་འགྲོ་བའི་སྡུག་བསྔལ་མ་ལུས་པ་ཞི་བར་བྱེད་པའི་སྨན་དང་གཏན་གྱི་བདེ་བ་དམ་པ་མཐའ་དག་འབྱུང་བའི་གནས་གཅིག་པུ་སྟེ་འགྲོ་བ་ཀུན་གྱི་རེ་བའི་ཡོལ་གོ་ཕྱུར་བུར་འགེངས་པའི་ཐབས་མཆོག་ཏུ་གྱུར་པ་ཡིན། ཁྱད་པར་བདག་ཅག་གི་སྟོན་པ་མཉམ་མེད་བུ་རམ་ཤིང་པའི་བསྟན་པ་ནི་བསྐལ་བཟང་སངས་རྒྱས་སྟོང་གི་བསྟན་པ་གཞན་ཀུན་ལས་ཁྱད་དུ་འཕགས་པ་མདོ་སྔགས་ཟུང་དུ་འབྲེལ་བས་རྨད་དུ་བྱུང་བ་སྟེ། དེ་འདྲའི་བསྟན་པ་ཡོངས་རྫོགས་སྔར་འཕགས་ཡུལ་དུ་ཤིན་ཏུ་དར་ཁྱབ་ཆེ་བས་གྲུབ་པའི་གོ་འཕང་བརྙེས་པ་དང་འབྲས་བུ་བཞི་ཐོབ་པའི་སྐྱེ་བོ་ས་ཡི་རྡུལ་གྲངས་དང་མཉམ་པ་བྱུང་མོད། འོན་ཀྱང་བསྟན་ལ་སྡང་བའི་དགྲའི་གནོད་པ་བསྟུད་མར་བྱུང་བའི་རྐྱེན་པས་མིང་གི་ལྷག་མ་ཙམ་དུ་གྱུར། དེ་ལས་ཁྱིམ་མཚེས་རྒྱལ་ཁབ་རྣམས་སུ་བསྟན་པ་དར་ཁྱབ་བྱུང་བ་ལས་ཡུལ་ལྗོངས་ གཞན་རྣམས་སུ་ཕྱོགས་རེ་ཙམ་ལས་དར་ཁྱབ་བྱུང་མེད་ཀྱང་། བོད་ཡུལ་འདིར་ནི་ཆོས་རྒྱལ་མེས་དབོན་རྣམ་གསུམ་གྱི་སྐུ་དྲིན་ལས་མདོ་སྔགས་ཀྱི་བསྟན་པ་ཡོངས་རྫོགས་འཕགས་ཡུལ་དང་གཉིས་སུ་མེད་པ་དར་ཁྱབ་བྱུང་ཡོད། དེས་ན་བཤད་བརྒྱུད་འདེགས་པའི་བཀའ་ཆེན་བཅུ་གཉིས་དང་། སྒྲུབ་བརྒྱུད་འདྲེན་པའི་རིང་ལུགས་ལ་ཆེ་ཕྲ་དུ་མ་བྱུང་ཡང་གཙོ་བོའི་རིགས་སུ་བསྡུས་ན་ཤིང་རྟ་ཆེན་པོ་བརྒྱད་དུ་གནས་པ་ཡིན། དེ་ཡང་འདི་ལྟར་སངས་རྒྱས་གཉིས་པ་པདྨ་ཀ་ར་སོགས་སྒྲུབ་པའི་སློབ་དཔོན་རྣམས་ལས་བརྒྱུད་པ་བསྟན་པའི་གཞུང་ཤིང་འདུས་པ་མདོ་དང་སྒྱུ་འཕྲུལ་སེམས་སྡེ་བཅས་ལ་སྒྲུབ་སྡེ་བརྒྱད་ཡན་ལག་དང་བཅས་པའི་ཟབ་ཆོས་ཀྱིས་ཟུར་བརྒྱན་པའི་རྫོགས་པ་ཆེན་པོ་ཐིག་ལེ་གསང་སྐོར་སྲོག་ཐིག་དྭངས་མའི་ཚུལ་དུ་གནས་པའི་ཆོས་ཚུལ་བཀའ་མ་དང་། གུ་རུའི་རྣམ་འཕྲུལ་མཆོག་གཉིས་ གླིང་པ་བརྒྱད་ལ་སོགས་པས་གཏེར་ལས་བཞེས་པའི་གཏེར་མའི་ཆོས་ཚུལ་གཉིས་སུ་གནས་པ་སྔ་འགྱུར་རྙིང་མ་དང་། སངས་རྒྱས་སྣང་བ་མཐའ་ཡས་ཀྱི་རྣམ་འཕྲུལ་ཇོ་བོ་རྗེ་དཔལ་ལྡན་ཨ་ཏི་ཤས་སྐྱེས་བུ་གསུམ་གྱི་ལམ་གྱི་རིམ་པ་ཡོངས་སུ་རྫོགས་ཤིང་གཞུང་ལུགས་གདམས་ངག་དང་ཟུང་དུ་འབྲེལ་བའི་བསྟན་བཅོས་བྱང་ཆུབ་ལམ་གྱི་སྒྲོན་མ་མཛད་ནས། དེ་ཡི་ནང་དུ་དམ་པའི་ཆོས་སྒོ་མདོ་སྔགས་ཡོངས་རྫོགས་འདུས་ཤིང་དབུ་མའི་ལྟ་བ་དང་འདུལ་བའི་སྤྱོད་པ་གཙོར་སྟོན་པའི་བཀའ་སྲོལ་གཏོད་པ་བཀའ་གདམས་པ་དང་། སྤྱིར་བི་རཱུ་པ་སོགས་རྒྱ་གར་གྲུབ་ཆེན་རྣམས་ཀྱིས་དགྱེས་རྡོར་གཙོ་བོར་གྱུར་པའི་བླ་མེད་རྒྱུད་སྡེ་རྣམས་ཀྱི་སྙིང་བཅུད་ལམ་འབྲས་བུ་དང་བཅས་པའི་ལམ་སྐོར་སོགས་ལམ་སྐོར་དགུ་བླ་ཆེན་འབྲོག་མི་ལོ་ཙཱ་བ་ཤཱཀྱ་ཡེ་ཤེས་ལ་བཀའ་བབས་པ་དང་། ཁྱད་པར་གྲུབ་ཆེན་ག་ཡ་དྷ་ར་བོད་དུ་ལན་གསུམ་ཕེབས་པའི་ཐོག་མར་འབྲོག་མི་ལ་དགྱེས་རྡོར་མན་ངག་ལུགས་ཀྱི་གདམས་པ་ཡོངས་སུ་རྫོགས་པར་བསྩལ་བ་ལས་སྲོལ་དུ་གཏོད་པ་ལམ་འབྲས་བུ་དང་བཅས་པའི་རིང་ལུགས་དང་། སྒྲ་སྒྱུར་གྱི་རྒྱལ་པོ་མར་པ་ལོ་ཙཱ་བ་ལུས་སྲོག་འབེན་དུ་འཛུགས་པའི་སྙིང་སྟོབས་ཀྱིས་འཕགས་ཡུལ་དུ་ལན་གསུམ་བརྟོལ་ཏེ། ནཱ་རོ་མེ་ཏྲིས་གཙོས་གྲུབ་ཐོབ་ཀྱི་བླ་མ་མང་པོ་བསྟེན་ཅིང་བཀའ་བབས་བཞི་ལྡན་གྱི་གདམས་པ་གཙོ་བོར་གྱུར་པའི་གདམས་པའི་ཉི་འོད་མ་ལུས་པ་ དད་བརྩོན་ཤེས་རབ་ཆེན་པོས་གཉེན་དུ་བཀུག་པས་ཉམས་རྟོགས་ཀྱི་སྦྲང་རྩི་རབ་ཏུ་གཏམས་པའི་བློ་གྲོས་ཀྱི་འདབ་སྟོང་མངོན་པར་བཞད་པས། རྗེ་ནཱ་རོ་དང་མེ་ཏྲི་ཟུང་གིས་བྱང་ཕྱོགས་ཁ་བ་ཅན་འདུལ་བའི་རྒྱལ་ཚབ་ཏུ་མངའ་གསོལ་པ་བཞིན་བོད་ཀྱི་མགོན་དུ་བྱོན་ཏེ། ཇི་སྐད་དུ། དྲི་ལྡན་མེ་ཏོག་རྒྱང་རིང་ཡང་། །བུང་བ་སྤྲིན་གྱི་ཚོགས་བཞིན་འཁོར། །ཞེས་པ་བཞིན་སྐལ་ལྡན་གྱི་གདུལ་བྱ་མང་པོ་ངང་གིས་མགྲོན་དུ་འདུ་ཞིང་རྒྱུད་དང་མན་ངག་གི་སྦྲང་རྩི་ངོམས་པར་སྤྱོད་པས་མཁས་གྲུབ་ཀྱི་ཚང་བརྡོལ་ཏེ་བཤད་བརྒྱུད་དང་སྒྲུབ་བརྒྱུད་ཀྱི་བཀའ་སྲོལ་དར་ཞིང་རྒྱས་པ་བྱུང་བ་མངའ་བདག་མར་པ་བཀའ་བརྒྱུད་དང་། རྡོ་རྗེ་འཆང་དངོས་ལས་ཆོས་གསན་པའི་ཡེ་ཤེས་ཀྱི་ཌཱ་ཀི་ནི་གུ་མ་དང་། སུ་ཁ་སིདྡྷི་རྣམ་གཉིས་གཙོས་མཁས་གྲུབ་ཀྱི་བླ་མ་བརྒྱ་དང་ལྔ་བཅུའི་ཐུགས་བཅུད་ཆོས་ཀྱི་གསང་མཛོད་མ་ལུས་པ་གྲུབ་ཐོབ་ཁྱུང་པོ་རྣལ་འབྱོར་གྱིས་བླངས། གཏུམ་མོ་མཐར་ཐུག་དགྱེས་རྡོར། ལས་རྒྱ་མཐར་ཐུག་བདེ་མཆོག །སྒྱུ་ལུས་དང་འོད་གསལ་མཐར་ཐུག་གསང་འདུས། རྨི་ལམ་མཐར་ཐུག་མ་ཧཱ་མ་ཡཱ། འཕྲིན་ལས་མཐར་ཐུག་རྡོ་རྗེ་འཇིགས་བྱེད་མཛད་དེ་རྒྱུད་སྡེ་ལྔ་སྐུ་ཡི་གནས་ལྔར་དངོས་སུ་བསྒྲུབས་པས། ཡེ་ཤེས་ཀྱི་སྐུ་བརྙེས་པ་མདའ་བསྣུན་ཞབས་སོགས་དང་མི་གཉིས་པའི་གྲུབ་པའི་སར་བཞུགས་ཤིང་། བསམ་གྱིས་མི་ཁྱབ་པའི་ཆོ་འཕྲུལ་ཆེན་པོས་ཆོས་ཀྱི་འཁོར་ལོ་ མཐའ་ཡས་པ་བསྐོར་བའི་ལམ་སྲོལ་བཤད་པ་དང་། རྩོད་པ་དང་། སྒྲུབ་པའི་ལམ་རིམ་གསུམ་དུ་གནས་པ་ལས་ཕྱི་མ་སྒྲུབ་པའི་ལམ་རིམ་གྱི་སྙིང་པོའི་བཅུད་གསེར་ཆོས་གཙོ་བོར་གྱུར་པའི་ཆོས་སྐོར་ལྔ་མན་ངག་ཐོར་བུ་དང་བཅས་པ་ནི་ཤངས་པ་བཀའ་བརྒྱུད་པའི་ཤིང་རྟའི་ལམ་སྲོལ་དང་། རྗེ་བཙུན་ཀ་མ་ལ་ཤཱི་ལས་གྲུབ་ཐོབ་ཕོ་མོ་ལྔ་བཅུ་རྩ་བཞི་བསྟེན་ཅིང་ཐུན་མོང་གི་དངོས་གྲུབ་བརྙེས་ཏེ་དགུང་ལོ་ལྔ་བརྒྱ་དང་བདུན་ཅུ་བཞུགས། ཐུགས་དམ་བདེ་གཤེགས་བཅུ་གཉིས་སོགས་སངས་རྒྱས་དུ་མ་དང་མཁའ་སྤྱོད་ཀྱི་བླ་མ་སུམ་ཅུ་རྩ་དྲུག་ཞལ་གཟིགས་ཏེ་བྱིན་རླབས་དང་དམ་པའི་བཅུད་བརྙེས་པས་མཆོག་གི་དངོས་གྲུབ་ཐོབ། བོད་དང་རྒྱ་ནག་ཏུ་ལན་ལྔར་ཕེབས་པའི་མཐར་དིང་རིར་བཞུགས། གཞུང་ཨཱ་ལི་ཀཱ་ལི་ཆུ་ཀླུང་ཆེན་པོའི་རྒྱུད་དང་། ཕྱག་རྒྱ་ཆེན་པོ་བརྡའ་ཡི་རྒྱུད་སོགས་ལ་བརྟེན་ནས་ཐབས་ཉིད་ཀྱི་རྣམ་པར་ཐར་པ། རྟེན་སྡོམ་པ་གསུམ་ལྡན། ལམ་བཀའ་ཐུབ་ཀྱི་སྲང་། འབྲས་བུ་གཞན་དོན་སྤྱོད་པ་གསུམ་སོགས་ཟབ་མོའི་ཆོས་ཚུལ་གྱིས་ལས་ཅན་འགྲོ་བ་གནམ་གྱི་སྐར་མའི་གྲངས་ལྡན་མང་པོ་སངས་རྒྱས་ཀྱི་ས་ལ་བསྒྲལ་བར་མཛད་པའི་ཆོས་ཚུལ་དེ་ནི་ཆོས་གཞན་དང་མི་འདྲ་བར་འབྲས་བུ་སྡུག་བསྔལ་དངོས་སུ་སྦྱངས་པའི་ཤུགས་ལ་ཉོན་མོངས་དྲུངས་འབྱིན་པའི་ཐབས་ཤིན་ཏུ་ཟབ་པས་སྤྱི་མིང་སྒེར་དུ་ཆགས་པ་དམ་ཆོས་སྡུག་བསྔལ་ཞི་བྱེད་ཀྱི་ཤིང་རྟའི་བཀའ་སྲོལ་དང་། གསང་བདེ་དགྱེས་དུས་སོགས་རྒྱུད་སྡེ་རྣམས་ཀྱི་རྫོགས་རིམ་ཐམས་ཅད་ཀྱི་སྙིང་བཅུད་རྡོ་རྗེ་གསུམ་གྱི་རྣལ་འབྱོར་དང་འབྲེལ་བའི་སྦྱོར་བ་ཡན་ལག་དྲུག་ཅེས་བྱ་བ་བླ་མེད་རྒྱུད་ནས་གསུངས་པའི་རིམ་གཉིས་ཐམས་ཅད་ཀྱི་སྐྱེལ་སོ་རྣལ་འབྱོར་ཀུན་གྱི་རྩེ་མོ་རྡོ་རྗེའི་རྣལ་འབྱོར་གྱི་བཀའ་སྲོལ་དང་། རྒྱལ་ཡུམ་རྡོ་རྗེ་རྣལ་འབྱོར་མ་དངོས་ཀྱིས་གྲུབ་ཆེན་ཨོ་རྒྱན་པ་རིན་ཆེན་དཔལ་ལ་ཐུགས་ཀྱི་ཟུངས་བཅུད་དུ་བསྩལ་བ། སྦྱང་གཞི་གཞི་ལམ་འབྲས་བུའི་གནས་སྐབས་གསུམ་དུ་རྒྱུན་ཆགས་པའི་རང་བཞིན་སྐུ་གསུང་ཐུགས་ཀྱི་རྡོ་རྗེ་གསུམ་པོ། སྦྱང་བྱ་ལུས་ངག་ཡིད་གསུམ་གློ་བུར་འཁྲུལ་འཛིན་བག་ཆགས་དང་བཅས་པས་བསྒྲིབས་པ་དེ་ཉིད། སྦྱོང་བྱེད་སོར་བསམ་བསྙེན་པའི་ཡན་ལག །སྲོག་འཛིན་སྒྲུབ་པའི་ཡན་ལག །དྲན་ཏིང་སྒྲུབ་པ་ཆེན་པོའི་ཡན་ལག་གིས་སྦྱངས་པའི་འབྲས་བུ་དབང་རྣོན་བརྩོན་འགྲུས་ཅན་ཚེ་གཅིག་ལ་སྐུ་གསུམ་མངོན་དུ་བྱེད་པའི་མན་ངག་རྡོ་རྗེའི་བསྙེན་སྒྲུབ་ཀྱི་ཤིང་རྟའི་ལམ་སྲོལ་བཅས་བརྒྱད་ཀ་ཆ་མཉམ་དུ་བོད་ཡུལ་མཐའ་དབུས་ཀུན་ཏུ་ས་དར་རྡོ་དར་དུ་ཁྱབ་བརྡལ་བྱུང་མོད། རིམ་གྱིས་བསྟན་པའི་བབ་ཡོལ་ཏེ་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་ནང་ནས་ས་དགེ་བཀའ་རྙིང་ཙམ་ལས་གཞན་རྣམས་ཀྱི་བརྒྱུད་པ་རང་རྐང་དུ་འཛིན་མཁན་མེད་པར་གདམས་པའི་སྲོལ་ཀ་ནུབ་ལ་ཉེ་བ་ན། རྣམ་པར་སྣང་མཛད་ངུར་སྨྲིག་གི་གར་དུ་ རྣམ་པར་རོལ་པ་རིས་མེད་བསྟན་པ་ཡོངས་ཀྱི་འཁོར་ལོ་སྒྱུར་བ་ᨊརྗེ་འཇམ་མགོན་བློ་གྲོས་མཐའ་ཡས་གང་ཉིད་བསམ་གྱི་མི་ཁྱབ་པའི་ཐུགས་བསྐྱེད་དང་སྨོན་ལམ་གྱི་མཐུ་བཙན་པོ་དུས་སུ་སད་པའི་སྟོབས་ཀྱིས། བཀའ་གཏེར་མདོ་སྔགས་བསྟན་པ་རྒྱ་མཚོ་རིས་སུ་མེད་པའི་ངོ་མཚར་ཡོངས་སུ་རྫོགས་པ་མཛོད་ཆེན་རྣམ་ལྔའི་ཤིང་རྟའི་བཀའ་སྲོལ་ལེགས་པར་འབྱེད་ཅིང་། འཆད་ཉན་གྱི་རྒྱུན་སྤེལ་བས་བསྟན་པ་འཆི་ཁའི་སྲོག་མཐུད་ལྟ་བུར་ཉམས་པ་སོར་ཆུད། མི་ཉམས་རྒྱུན་འཛིན་གྱི་འཕྲིན་ལས་རླབས་སུ་ཆེ་བ་བསྐྱངས། དེ་ཡི་ཡ་གྱལ་སྒྲུབ་བརྒྱུད་འདྲེན་པའི་ཤིང་རྟ་བརྒྱད་ཀྱི་སྨིན་གྲོལ་གྱི་གདམས་པ་གནད་ཅན་ཕལ་ཆེར་ཕྱོགས་གཅིག་ཏུ་བསྒྲིགས་པ་གདམས་ངག་མཛོད་ནི། རྒྱལ་ཕྱི་ནང་ཀུན་ཏུ་འཆད་ཉན་གྱི་རྒྱུན་ཉིན་རེ་བཞིན་ཇེ་འཕེལ་དུ་འགྲོ་བཞིན་ཡོད་པས་དེ་སྔ་དཔེ་སྐྲུན་ཡང་འདྲ་མིན་གཉིས་གསུམ་ཙམ་བྱུང་ཟིན་པ་ཡིན་རུང་། གཏན་པ་མེད་པའི་མཆོད་སྦྱིན་གྱི་མངའ་བདག་ཙཱ་འདྲ་ཐེབས་རྩ་ཚོགས་པའི་ངེས་སྟོན་པ་ཆེན་པོ་བསྟན་འཛིན་བྱམས་ཆེན་ནམ་(Director Sean Price)མཆོག་ནས་དེ་རྣམས་ལ་དཔེ་ཆའི་བཀོད་སྒྲིག་དང་ཡི་གེའི་གཟུགས་དབྱིབས་དང་ཚིག་སྦྱོར་གྱི་དག་ཐེར་སོགས་ཀྱི་ཐད་ནས་ལེགས་བཅོས་དགོས་ངེས་ཀྱི་དགོངས་བཞེད་ཟབ་མོས། བསྐྱར་དུ་སྤར་སྐྲུན་བྱ་དགོས་པའི་གསུང་བསྐུལ་ནན་ཏན་དུ་གནང་བའི་རྐྱེན་བྱས། ༸རྗེ་འཇམ་མགོན་བླ་མའི་འཕྲིན་ལས་ཀྱི་གཙོ་བོ་གསུང་རབ་རྣམས་དག་ཐེར་གྱིས་ཁྱབ་སྤེལ་དུ་བྱ་བ་ནི་རིག་པའི་རྡོ་རྗེ་དཔེ་སྐྲུན་ཁང་འདི་ཉིད་ཀྱི་འདོར་ཐབས་མེད་པའི་ལས་སུ་བྱ་བ་གཙོ་བོ་ཉིད་དུ་འཁུམས་ནས་དཔེ་སྐྲུན་སྤུས་ལེགས་ཚད་དུ་འཁྱོལ་བ་ཉིད་བསྒྲུབ་བྱར་བཟུང་ནས། ནུས་པ་ཡོད་དགུ་རྩལ་སྤྲུགས་ཀྱིས་འབད་འབུངས་ཁོ་ན་སྙིང་པོར་བྱས་ཏེ་གདམས་ངག་མཛོད་ཀྱི་ཞུ་དག་དང་བཀོད་སྒྲིག་སྤེལ་ལུགས་ཀྱི་གཏམ་རགས་ཙམ་བརྗོད་པ་ལ་དོན་ཚན་གསུམ་དུ་གནས་པ་ལས། དང་པོ་མ་དཔེ་གང་ལ་གཞི་བཅོལ་ཏེ་ཞུ་དག་གཏོང་ལུགས་ནི། དཔལ་སྤུངས་སྤར་མ་ཉིད་ལ་ཁུངས་གཏུགས་ཀྱི་གཙོ་བོའི་མ་ཕྱིར་གཞི་བཅོལ་ཏེ། དེ་དང་ལྷན་དུ་ཞེ་ཆེན་སྤར་མ་དང་། གཞན་ཡང་དྲྭ་ཐོག་བརྒྱུད་ནས་ས་དགེ་བཀའ་རྙིང་སོགས་མ་དཔེ་ཇི་སྙེད་ཅིག་ལག་སོན་བྱུང་བ་དག་ལའང་ཞིབ་བསྡུར་གྱིས་རྟོག་དཔྱོད་ནན་ཏན་བྱས་ཡོད། དེ་ཡང་ཞུ་དག་སྐབས་མ་ཕྱི་གཙོ་བོ་དཔལ་སྤུངས་དཔར་མ་ནི་ཡི་གེ་ཆུང་ཞིང་སྐབས་འགར་ཡིག་འབྲུ་མི་གསལ་བ་དང་། སྐབས་འགར་ཚེག་མི་གསལ་བ་སོགས་ཀྱི་རྐྱེན་པས་ཡི་གེ་ཕན་ཚུན་རུ་འཛིངས་ཏེ་ཇི་བཞིན་དུ་ངོས་འཛིན་བྱ་དཀའ་བ་མ་ཟད། ཡིག་ནོར་ཤོར་བའང་མི་ཉུང་བ་ཞིག་སྣང་སྟེ། འདིར་དེ་དག་གི་དཔེ་མཚོན་ཙམ་ཞུ་ན། ཡི་གེ་ང་ད་ར་གསུམ་དང་། གཞན་ཡང་པ་བ་ས་གསུམ་གྱི་ཐད་གསལ་ཁ་མེད་པ་དང་། ལྷག་པར་དུ་ཡི་གེ་དེ་དག་འདྲ་ཆེ་བའི་དབང་གིས་ཕན་ཚུན་ནོར་ནས་བྲིས་པ་དང། ཡང་འགའ་ཞིག་ལ་དབྱངས་ཡིག་དང་། དེ་བཞིན་མགོ་ཅན་དང་། འདོགས་ཅན་རྣམས་ཆད་པ་དང་། ལྷག་པར་དུ་གཞུང་ཕན་ཚུན་བསྣོར་མར་ཤོར་བ་དེ་འདྲ་ཡང་མི་ཉུང་བ་ཞིག་མཆིས་པས། དེ་དག་སྙོམ་ལས་ཀྱིས་རས་སུ་མ་བོར་བར། མ་དཔེ་ཁག་གཞན་རྣམས་ལ་ཞིབ་བསྡུར་ནན་ཏན་གྱིས་དཔྱད་འབྲས་སུ་མ་དཔེ་གཅིག་ཏུ་མི་གསལ་བ་ཅིག་ཤོས་སུ་གསལ་ཁ་འབྱུང་བར་བརྟེན། ཆད་ལྷག་ཏུ་ཤོར་བ་དག་ལ་འཕྲི་སྣོན་དང་། གཞུང་ཕན་ཚུན་བསྣོར་མར་ཤོར་བ་དེ་དག་ཀྱང་གོ་རིམ་མ་འཆོལ་བར་བསྒྲིགས་ཐུབ་པ་ཁོ་ན་ལ་ནུས་ཚད་ཀྱིས་འབད་འབུངས་བཏོན་པ་ནི་གསུང་རབ་དག་ཐེར་གྱི་སྲི་ཞུ་ཆ་ཙམ་ཞུ་ཁུལ་དུ་རློམས་པ་ལགས། འོན་ཀྱང་ལྷག་བསམ་ཆེ་ཁུལ་གྱིས་གསུང་རབ་ལ་གཟུ་ལུམ་དང་རས་གཅོད་ཀྱིས་ཆོས་ཚུལ་ཤིག་པའི་ལས་སུ་སོང་གིས་དོགས་ཏེ། སྙིང་ཁམས་འབའ་ཞིག་ལྷུར་ལེན་པའི་ཅི་བརྟོལ་དུ་མ་སོང་བར་གཙོ་བོ་དཔལ་སྤུངས་པར་མ་གཞིར་བྱས་ཀྱིས་ནོར་བ་མངོན་གསལ་དོད་པོའི་རིགས་རྣམས་བཅོས་པ་མ་གཏོགས་གཞན་རྣམས་མ་དཔེ་ཇི་བཞིན་རང་སོར་བཞག་ཡོད་ཅིང་། ཁྱད་པར་ཆོས་ཚན་འགའ་ཞིག་ནང་ཀླད་དུ་ས་བཅད་ཕྱེས་ནས་བཀྲམ་ཡོད་ཀྱང་དེ་ཉིད་དངོས་དོན་གཞུང་ཚིག་གི་ཐད་དུ་མ་སྦྱར་བ་ཡང་མི་ཉུང་བ་ཞིག་མཆིས་ན། དེ་དག་ཆད་སྐྱོན་དུ་འགྱུར་གྱིས་དོགས་ནས་( )གུག་རྟགས་འདིའི་ནང་དུ་བཅུག་སྟེ་ ཐད་ཀར་གཞུང་ཚིག་དང་གུང་བསྒྲིགས་ནས་བཀོད་ཡོད། མ་དཔེར་བཅོས་བསླད་ཀྱི་དྲི་མས་མ་གོས་པའི་ཐབས་ཚུལ་ཁོ་ན་ལ་ནུས་ཚད་ཀྱིས་འབད་འབུངས་བཏོན་པ་དང་། གལ་ཏེ་མ་དཔེར་ཡིག་ནོར་ཤོར་བ་དེ་འདྲ་སྲིད་དུ་ཆུག་ཀྱང་དེ་ནི་རང་འདྲའི་སྐྱེས་བུ་ཐ་མལ་པས་ཁ་ཚོན་གཅོད་དུ་ག་ལ་རུང་སྟེ་མི་རུང་མོད། འོན་ཀྱང་དེ་ལྟར་བགྱིས་པའི་ངལ་བ་ལྷུར་བླངས་པ་ནི་ཅུང་ཟད་ཕན་དུ་རེ་བའི་ལྷག་བསམ་གྱིས་གསུང་རབ་དག་ཐེར་གྱི་རྣམ་དཀར་གྱི་བགྱི་བར་རློམས་པ་ལགས། གཉིས་པ་པོད་གྲངས་ཀྱི་དབྱེ་བསྡུ་བྱེད་ལུགས་ནི། དེ་ཉིད་ཀྱི་སྤར་བྱང་སྨོན་ཚིག་ཏུ་གསལ་བ་ལྟར་ན་པོད་གྲངས་དགུར་བཞུགས་པ་སྟེ། ཀ་པ་སྔ་འགྱུར་རྙིང་མ༑ ཁ་པ་བཀའ་གདམས། ག་པ་ས་སྐྱའི་ལམ་འབྲས། ང་པ་དང་ཅ་པ་མར་པ་བཀའ་བརྒྱུད་སྤྱི་བྱེ་བྲག །ཆ་པ་ཤངས་པ་བཀའ་བརྒྱུད། ཇ་པ་ཞི་བྱེད་དང་གཅོད་ཡུལ། ཉ་པ་རྡོ་རྗེའི་རྣལ་འབྱོར་དང་ཨོ་རྒྱན་བསྙེན་སྒྲུབ། ཏ་པ་ཁྲིད་ཕྲན་སྐོར། ཨ་པ་ཇོ་ནང་ཁྲིད་བརྒྱ་ཞེས་དགུར་དབྱེ་དགོས་པ་དེ་ལྟར་ལགས་མོད་ཀྱང་། འདིར་གླེགས་བམ་དུ་བགོ་བའི་ཚེ་གླེགས་བམ་གྱི་སྲབ་མཐུག་ཆ་སྙོམས་ཤིང་། ཤོག་གྲངས་མང་ཉུང་གི་ཚད་རན་པ་སོགས་ཀྱི་དགོས་མཁོར་དམིགས་ཏེ་ཀ་ནས་ཚའི་བར་ཏེ། དགོས་དབང་གིས་གླེགས་བམ་བཅོ་བརྒྱད་དུ་བགོས་ནས་བཀོད་སྒྲིག་བྱས་ཡོད། དེ་ཡང་དང་པོ་ཀ་པ་དང་ཁ་པ་རྙིང་མའི་སྐོར། ག་པ་དང་ང་པ་བཀའ་གདམས་སྐོར། ཅ་པ་དང་ཆ་པ་ལམ་འབྲས་སྐོར། ཇ་པ་དང་། ཉ་པ་དང་། ཏ་པ་དང་། ཐ་པ་བཞི་བཀའ་བརྒྱུད་སྐོར། ད་པ་དང་ན་པ་ཤངས་པའི་སྐོར། པ་པ་དང་ཕ་པ་ཞི་བྱེད་དང་གཅོད་ཡུལ་སྐོར། བ་པ་སྦྱོར་དྲུག་དང་བསྙེན་སྒྲུབ་སྐོར། མ་པ་དང་ཙ་པ་ཁྲིད་ཐོར་བུ་བའི་སྐོར། ཚ་པ་ཀུན་གྱི་རྒྱབ་རྟེན་རྗེ་བཙུན་གྲོལ་མཆོག་གི་ཁྲིད་བརྒྱའི་སྐོར་ཏེ་པོད་གྲངས་བཅོ་བརྒྱད་དུ་ཕྱེ་ཡོད་པ་དང་། ཁྱད་པར་དུ་འདི་ཉིད་ཀྱི་དཀར་ཆག་ནི་མ་དཔེ་ལྟར་ན་པོད་མཐའ་མའི་ནང་དུ་བཞུགས་ཡོད་ཀྱང་འདིར་གསུང་རབ་སྤྱི་འགྲོས་ལྟར་ཀློག་པ་པོ་རྣམས་འཇུག་པ་བདེ་བའི་དགོས་ཆེད་དུ་(གདམས་ངག་རིན་པོ་ཆེའི་མཛོད་ཀྱི་དཀར་ཆག་བཀྲ་ཤིས་གྲགས་པའི་རྒྱ་མཚོ་)ཞེས་པའི་གླེགས་བམ་ཟུར་དུ་ཕྱེས་ཡོད། གསུམ་པ་གྲངས་བཅོ་བརྒྱད་དུ་ཕྱེ་བའི་གླེགས་བམ་ནང་དུ་ཆོས་སྐོར་སོ་སོའི་ཆོས་ཚན་གོ་རིམ་སྒྲིག་སྟངས་ནི། དེ་ཡང་སྤར་སྐྲུན་སྔ་ཕྱི་རྣམས་སུ་གླེགས་བམ་ནང་གི་ཆོས་ཚན་རྣམས་གོ་རིམ་སྒྲིག་ཚུལ་འདྲ་མིན་འགའ་ཞིག་མཆིས་པ་ལས་འདིར་ནི་དཔལ་སྤུངས་སྤར་མ་གཞིར་བཟུང་བཀོད་སྒྲིག་བྱས་ཡོད། འོན་ཀྱང་དཔལ་སྤུངས་སྤར་མའི་ནང་དུ་མ་འཁོད་པའི་སྒྲུབ་བརྒྱུད་ཤངས་པའི་ཆོས་ཚན་འགའ་ཞིག་ཞེ་ཆེན་སྤར་མར་གསར་སྣོན་མཛད་འདུག་པ་འདི་དག་ནི་ཤངས་ཆོས་ཉམས་བཞེས་མཛད་མཁན་སྤྱི་དང་། ཁྱད་པར་དུ་ལོ་གསུམ་ཕྱོགས་གསུམ་གྱི་སྒྲུབ་པ་མཛད་མཁན་རྣམས་ལ་མེད་ཐབས་མེད་པའི་དམིགས་རྐྱེན་ དམ་པར་ངེས་པ་མ་ཟད། འདི་དག་གི་སྨིན་གྲོལ་རྒྱབ་རྟེན་གྱི་རྒྱུན་ཡང་ཤིན་ཏུ་དཀོན་ཅིང་ཆད་ལ་ཉེ་བའི་གཉན་འཕྲང་འགྲིམ་པར་གསལ་བས། སྐལ་བཟང་སངས་རྒྱས་གཞན་རྣམས་ཀྱི་བསྟན་པར་ཡང་རྙེད་དཀའ་ཞིང་དོན་ཆེ་བའི་ཆོས་ཚན་ཡིད་བཞིན་ནོར་བུ་ལས་ལྷག་པ་འདི་དག་རྒྱུན་ཆད་པར་ཤིན་ཏུ་ཕངས་པའི་བློས་ཕན་བདེའི་གཞི་རྩར་མ་ཉམས་པར་འཛིན་སྐྱོང་སྤེལ་བའི་ཐབས་མཆོག་ཁོ་ནར་དམིགས་ཏེ་ཤངས་པའི་ལོ་གསུམ་ཕྱོགས་གསུམ་གྱི་སྒྲུབ་ཐབས་ཕྱོགས་སྒྲིག་ལས་བཏུས་ནས་པོད་ཕྲེང་འདིར་ཤངས་ཆོས་པོད་གཉིས་པའི་གཤམ་དུ་ཟུར་བཀོལ་བྱས་ཡོད། མཐའ་དོན་ཇི་ལྟར་གོང་དུ་གསལ་བ་བཞིན་སླ་ཆོས་སུ་མ་སོང་བར་དཔལ་སྤུངས་སྤར་མ་རྙིང་པ་གཞིར་བཞག་ཐོག་ཞེ་ཆེན་སྤར་མ་དང་ཞིབ་བསྡུར་བྱས་ཏེ་ཚིག་དོན་མི་གསལ་བ་དང་མི་མཐུན་པ་ཅི་ཡོད་སྒྲུབ་དཔོན་མཁན་པོ་བློ་རྣམ་གཙོས་མཁས་པའི་དབང་པོ་རྣམས་ཀྱི་སྤྱན་སྔར་བཀའ་འདྲི་ཞུས་ཤིང་དཔྱད་བསྡུར་བྱས་མཐར་ཐག་ཆོད་པ་ཁག་ཅིག་བཅོས་པ་ལས་གཞན་དག་དཔལ་སྤུངས་སྤར་མ་ལྟར་རང་སོར་བཞག་ཡོད་ཅིང་། ཡིག་ནོར་མངོན་གསལ་ཅན་ལ་དགོས་ངེས་ཀྱི་དག་བཅོས་བཏང་བའི་ཁུལ་ལགས་ཀྱང་། རྨོངས་བརྟུལ་སོ་སྐྱེ་རང་ག་བར་སོང་ཞུ་སྒྲིག་གི་བྱ་བ་འདི་ལ་ནོངས་པ་ཅི་མཆིས་སྲས་བཅས་རྒྱལ་བའི་སྤྱན་སྔར་སྙིང་ནས་མཐོལ་ཞིང་བཤགས་པ་དང་ཆབས་ཅིག །མཁྱེན་ལྡན་ རྣམས་ཀྱིས་དགེ་འདོན་སྐྱོན་སེལ་གྱི་དགོངས་འཆར་ལྷུག་སྩོལ་ཅི་ནས་ཀྱང་ཡོང་བ་ཞུ། དེ་ཡང་གཏན་པ་མེད་པའི་མཆོད་སྦྱིན་གྱི་མངའ་བདག་ཙཱ་འདྲ་ཐེབས་རྩ་ཚོགས་པ་ནས་རབ་དཀར་ལྷག་བསམ་དག་ཅིང་གཏོང་ཕོད་རབ་ཏུ་ཡངས་པས་གདམས་ངག་མཛོད་དཔེ་སྐྲུན་གྱི་འགྲོ་གྲོན་ཡོངས་རྫོགས་རོགས་མགོན་བཀའ་དྲིན་བསྐྱངས་པ་དང་། གཞན་ཡང་གདམས་ངག་མཛོད་གློག་ཀླད་དུ་བཅུག་པ་དང་། ཞུ་དག་དང་དཔེ་བསྡུར་སོགས་བགྱིས་པའི་ལས་རིམ་གྱི་འགྲོ་གྲོན་ཐད་ལ་ཨ་རི་དང་ཐའི་ཝན་གྱི་དད་ལྡན་ཆོས་མཛད་ཁག་ཅིག་གིས་ལྷག་བསམ་དག་པས་རོགས་སྐྱོར་བཀའ་དྲིན་བསྐྱངས་པར་འདི་གའི་དཔེ་སྐྲུན་སྡེ་ཚན་གྱིས་སྙིང་ནས་དགའ་མགུ་ཡི་རངས་བཅས་ཐུགས་རྗེ་ཆེ་ཞུ། དེ་ལྟར་ཞུ་དག་གི་ལས་རིམ་ཐད་ཕྲན་གྱི་ལས་རོགས་སུ་རང་དགོན་གྱི་གྲྭ་ཟུར་ཚེ་རིང་བཀྲ་ཤིས་དང་སློབ་དཔོན་ཤེས་རབ་བསྟན་འཕེལ་གཉིས་ནས་གཙོ་བོར་འགན་ཁུར་གནང་ཡོད༑ ཚེ་རིང་བཀྲ་ཤིས་ནི་བཤད་གྲྭ་འདི་ཉིད་དུ་ལོ་གྲངས་བཅུ་ཕྲག་ལས་འདས་པར་གཞུང་དང་རིག་གནས་ལ་སློབ་གཉེར་ཟིན་ཅིང་། དེ་ནས་འབྲུག་གཞུང་གི་མཐོ་སློབ་ཅིག་ཏུ་རིག་གནས་དགེ་རྒན་གྱི་ཕྱག་འགན་བཞེས་མྱོང་ཡོད་པས། གཞུང་དང་རིག་གནས་གཉིས་ཀ་ལ་ཕྱོགས་རེར་མ་སོང་བའི་མཁྱེན་རྒྱ་ཡངས་པས་གསུང་རབ་ཀྱི་བརྗོད་དོན་དང་ཚིག་སྦྱོར་གཉིས་ཀྱི་ཕྱོགས་རེར་མ་ལྷུང་བར་གུང་བསྒྲིགས་ནས་དག་ཐེར་བྱེད་ ནུས་པའི་ཤེས་ཚད་ལོན་ཞིང་བསྟན་ལ་ལྷག་བསམ་ཆེ་བས་རས་གཅོད་དང་སླ་ཆོས་སུ་མ་སོང་བར་ཡིད་བརྟན་འཕེར་ངེས་ཀྱི་ཞུ་དག་མཆོག་ཏུ་ལེགས་པར་འབུངས་གསུམ་བཏོན་པ་ཁོ་ན་སྙིང་པོར་མཛད་ཅིང་༑ སློབ་དཔོན་ཤེས་རབ་བསྟན་འཕེལ་ཉིད་ཀྱང་གློག་ཀླད་དང་བཟོ་དབྱིབས་བཀོད་སྒྲིག་གི་སྒྱུ་རྩལ་ལ་སྦྱངས་པ་ཆེ་ཞིང་ལྷག་བསམ་དག་པས་དཔེ་ཆའི་བཟོ་དབྱིབས་དང་བཀོད་སྒྲིག་སོགས་མཛེས་བརྗིད་ལྡན་པ་ཁོ་ནར་འབད་འབུངས་མཛད་འབྲས་སུ་གཟིགས་པ་པོ་ཡོངས་ཀྱི་འདྲེན་བྱེད་ཀྱི་རྒྱན་དང་རྣལ་འབྱོར་ལམ་གྱི་དམིགས་རྐྱེན་མཆོག་ཏུ་ངེས་པར་བསྒྲུབས་ནུས་པ་བྱུང་ཡོད། གཞན་ཡང་སློབ་དཔོན་ཀརྨ་ངེས་དོན་དང་དོལ་པོ་བ་སློབ་དཔོན་ནོར་བུ་རྒྱལ་མཚན་གཙོས་རང་དགོན་གྱི་བཤད་གྲྭའི་སློབ་གཉེར་བ་འགའ་ཞིག་ནས་ཀྱང་ཐོག་མཐའ་བར་གསུམ་དུ་ཞུ་དག་དཔེ་བསྡུར་སོགས་ཀྱི་ཐད་སྤྱིར་ཉིན་རེའི་མཛད་རིམ་ཛ་དྲག་ཆེ་བའི་བར་གསེང་དང་༑ ཁྱད་པར་ལོ་འཁོར་གུང་སེང་གི་དུས་སྐབས་རྣམས་སུ་ཡང་བདེ་སྐྱིད་བློས་བཏང་དང་ངལ་བ་དང་ལེན་གྱིས་ངང་པ་མཚོར་ཞུགས་ཀྱི་ཚུལ་དུ་སྤྲོ་བས་ཐུགས་ཁུར་རོགས་རམ་གནང་བར་འདི་ག་རིག་པའི་རྡོ་རྗེའི་ཡིག་གསོག་དང་རྩོམ་སྒྲིག་སྡེ་ཚན་ནས་ལེགས་གསོལ་རྗེས་སུ་ཡི་རང་བཅས་གསན་བསམ་སློབ་གཉེར་གེགས་མེད་མཐར་ཕྱིན་ཏེ་ཚེ་དང་སྒྲུབ་པ་མཉམ་པར་འགྱུར་བའི་སྨོན་འདུན་རྩེ་གཅིག་ཏུ་ཞུ་བ་དང་། ཁྱད་པར་ སྤྱི་མཐུན་དུ་རྒྱལ་བའི་བསྟན་ལ་རྣམ་དཀར་གྱི་བགྱི་བ་འདི་ཙམ་བགྱིས་པས་ཀྱང་འགྲོ་བ་རྣམས་ཀྱི་རྒྱུད་ལ་ཤེས་རབ་གསུམ་གྱི་སྣང་བ་བདེ་བླག་ཏུ་རྒྱས་ཤིང༌། ས་ལམ་རིམ་བགྲོད་ཀྱིས་བླ་མེད་བྱང་ཆེན་མྱུར་དུ་འཐོབ་པའི་རྒྱུར་གྱུར་ཅིག་ཅེས་སྨོན་ཚིག་གིས་མཐའ་བརྒྱན་ཏེ་དཔེ་སྐྲུན་གསལ་བཤད་དུ་རིག་པའི་རྡོ་རྗེ་གཙུག་ལག་སློབ་གཉེར་ཁང་གི་ཡིག་གསོག་དང་རྩོམ་སྒྲིག་སྡེ་ཚན་གྱི་འགན་འཛིན་མཁན་པོའི་མིང་ཙམ་ འཛིན་པ་ཤེས་རབ་རྒྱལ་མཚན་ནེ་གཱི་ནས་སྤྱི་ལོ་༢༠༢༣ སྤྱི་ཟླ་༡༡ ཚེས་༤ ཉིན་སྤེལ་བ་དགེའོ།། །།