DNZ-13-PA-005

Previous Text Back to Volume PageNext Text

Wylie title	grub chen dam pa sangs rgyas nas brgyud pa'i dam chos sdug bsngal zhi byed kyi lam lnga'i khrid yig dri med snang ba grub pa mchog gi zhal lung	Rigpe Dorje Publications, 2024
Location	gdams ngag rin po che'i mdzod Volume 13, Text 5, Pages 511-545 (Folios 1a1 to 18a4)
Author	སྙེ་མདོ་བསོད་ནམས་དཔལ་
Citation	Snye mdo bsod nams dpal. Grub chen dam pa sangs rgyas nas brgyud pa'i dam chos sdug bsngal zhi byed kyi lam lnga'i khrid yig dri med snang ba grub pa mchog gi zhal lung. In Gdams ngag rin po che'i mdzod, Vol. 13: 511-545. Kalimpong: Rigpe Dorje Publications, 2024.	Shechen Publications, 1999
Side notes	Recto: lam lnga'i khrid yig   Verso: zhi byed skor
More details More details
Genre	Contemplative Guide Books and Instructional Manuals - khrid yig
Colophon	།ཅེས་པ་འདི་ནི་སྙེ་མདོ་བ་ཐམས་ཅད་མཁྱེན་པ་བསོད་ནམས་དཔལ་ཞེས་མཁས་པ་དང་གྲུབ་པའི་ཅོད་པན་གྱི་གཙུག་ན་ཞབས་བསྟེན་གྱི་པདྨོ་ངལ་འཚོ་བ་དེ་ཉིད་ཀྱིས་མཛད་པའི་ལེགས་བཤད་རྨད་དུ་བྱུང་བར་མཐོང་ནས་རིས་མེད་པའི་བསྟན་པ་ཀུན་ལ་དག་པའི་སྣང་བ་དང་བློ་གྲོས་ཀྱི་པདྨོ་ཁ་ཡོངས་སུ་བྱེ་བ་ཤཱཀྱའི་དགེ་སློང་རྡོ་རྗེ་འཛིན་པ་མཉྫུ་གྷོ་ཥས་གོང་གཤོམ་གྱི་ཚིགས་བཅད་གསར་བསྣན་དང་བཅས་ཏེ་ལུང་གི་རྒྱུན་སྤེལ་བའི་དགེ་བས་གྲུབ་པའི་ལམ་བཟང་འདི་ཉིད་བསྐལ་པ་རྒྱ་མཚོར་འཚོ་ཞིང་གཞེས་པ་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་བསམ་གྱིས་འཇུག་པ་ཆོས་དབྱིངས་སུ་ཞི་བའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།།
	ces pa 'di ni snye mdo ba thams cad mkhyen pa bsod nams dpal zhes mkhas pa dang grub pa'i cod pan gyi gtsug na zhabs bsten gyi pad+mo ngal 'tsho ba de nyid kyis mdzad pa'i legs bshad rmad du byung bar mthong nas ris med pa'i bstan pa kun la dag pa'i snang ba dang blo gros kyi pad+mo kha yongs su bye ba shAkya'i dge slong rdo rje 'dzin pa many+dzu g+ho Shas gong gshom gyi tshigs bcad gsar bsnan dang bcas te lung gi rgyun spel ba'i dge bas grub pa'i lam bzang 'di nyid bskal pa rgya mtshor 'tsho zhing gzhes pa la brten nas sems can thams cad sdug bsngal bsam gyis 'jug pa chos dbyings su zhi ba'i rgyur gyur cig_/sarba dA ka l+yA NaM b+ha ba tu//

Tibetan Text

[edit]

༄༅། །གྲུབ་ཆེན་དམ་པ་སངས་རྒྱས་ནས་བརྒྱུད་པའི་དམ་ཆོས་སྡུག་བསྔལ་ཞི་བྱེད་ཀྱི་ལམ་ལྔའི་ཁྲིད་ཡིག་དྲི་མེད་སྣང་བ་གྲུབ་པ་མཆོག་གི་ཞལ་ལུང་ཞེས་བྱ་བ་བཞུགས་སོ། །

༄༅། །ༀ་སྭ་སྟི་སིདྡྷཾ། བྱ་བ་གཞི་ཡི་རྣལ་འབྱོར་རྣམ་དག་ཚུལ་ཁྲིམས་ཕུང་པོས་བརྒྱན་པའི་སྐུ། །ལམ་ལྔའི་ཟབ་དོན་བདུད་རྩིའི་ཆར་འབེབས་བརྗོད་བྲལ་བདེ་ཆེན་ནཱ་དའི་གསུང༌། །དོན་གཉིས་འབྲས་བུའི་ཕ་མཐར་སོན་པ་བསམ་གྱིས་མི་ཁྱབ་ཡེ་ཤེས་ཐུགས། །མི་ཟད་ཞི་བ་དམ་པའི་རང་བཞིན་སངས་རྒྱས་ཀུན་དངོས་དེས་སྐྱོངས་ཤིག །གང་གིས་མཐོང་རེག་དྲན་པ་ཙམ་གྱིས་ནི། །མི་བཟད་སྡུག་བསྔལ་ཟུག་རྔུ་ཞི་བ་དང༌། །ཟག་མེད་བདེ་བ་ཆེན་པོས་ཚིམ་མཛད་པའི། །བླ་མའི་ཞབས་རྡུལ་སྤྱི་བོས་བླངས་པའི་མཐུས། །ཕྱག་བཞེས་དམར་བྱང་ལམ་ལྔར་ཁྲིད་པའི་ཚུལ། །དྲི་མེད་རྒྱུད་དང་གྲུབ་པའི་ཞལ་ལུང་དང༌། །རྡོ་རྗེའི་གསུང་གི་སྣང་བ་ལ་བརྟེན་ནས༑ ༑མ་ནོར་ཇི་བཞིན་ཕན་པའི་སེམས་ཀྱིས་བྲི། །དེ་ལ་འདིར་བླ་མ་བྱང་ཆུབ་སེམས་དཔའ་ཀུན་དགའི་ལུགས་ཀྱི་དྲི་མེད་ཐིགས་པ་ཕྱག་བཞེས་དམར་ཁྲིད་ལམ་ལྔ་ཉམས་སུ་ལེན་པར་བྱེད་པ་འདི་ལ་གསུམ་སྟེ། བྱ་བ་གཞིའི་རྣལ་འབྱོར་དང༌། བྱེད་པ་ལམ་གྱི་རྣལ་འབྱོར་དང༌། བྱ་བྲལ་འབྲས་བུའི་རྣལ་འབྱོར་རོ། །དང་པོ་བྱ་བ་གཞིའི་རྣལ་འབྱོར་ནི། རྟེན་སྡོམ་པ་གསུམ་ལྡན་ཞིག་གིས་རྣལ་འབྱོར་རང་ས་དྲུག་མ་ཉམས་པར་སྲུང་བ་སྟེ། སྡོམ་པ་གསུམ་ནི། སྡིག་པའི་ལས་ལུས་ངག་ཡིད་གསུམ་གྱི་ཁ་ན་མ་ཐོ་བ་ཕྲ་ཞིང་ཕྲ་བ་ལའང་འཛེམས་པ་ཉན་ཐོས་ཀྱི་འདུལ་ཁྲིམས། སེམས་ཅན་གྱི་དོན་དུ་དགེ་བའི་བྱ་བ་ལ་ཆོག་མི་ཤེས་པར་འཇུག་པ་བྱང་ཆུབ་སེམས་དཔའི་བསླབ་པ། བླ་མ་ལ་སངས་རྒྱས་ཀྱི་འདུ་ཤེས་ཀྱིས་ཅི་གསུང་གི་བཀའ་ཅི་ནུས་སུ་སྒྲུབ་པ་གསང་སྔགས་ཀྱི་དམ་ཚིག་གོ །རྣལ་འབྱོར་གྱི་རང་ས་དྲུག་ནི། གསོལ་བ་ལྷ་ལ་མི་གདབ་སྟེ། ལྷ་ཀུན་བརྟགས་ཀྱི་བློས་ཕུག་མི་ཐུབ་པའི་ཕྱིར་རོ། །སངས་རྒྱས་ཐམས་ཅད་ཀྱི་ངོ་བོ་མཚན་ཉིད་དང་ལྡན་པའི་བླ་མ་ལས་རེ་ལྟོས་གཞན་དུ་མི་བྱའོ། །དངོས་གྲུབ་འདྲེ་ལ་མི་ཞུ་སྟེ། ནོར་བདག་གི་འབྱུང་པོ་བསྒྲུབ་པ་ལས་བྱུང་བའི་འདུ་ལོང་བར་ཆད་ཀྱི་གཡབ་མོ་ཁོ་ན་བས་ཉམས་ལེན་པས་ལྟོ་གོས་ལ་གྱོང་བསྐུར་ཏེ་འཚོ་བ་གྱི་ན་ཙམ་ལ་བརྟེན་ནས་ཉམས་ལེན་མཐར་དབྱུང་ངོ༌། །ཕོ་སྒོ་ཚེ་འདིར་མི་དབྱུང་སྟེ། ཚེ་འདིའི་ཆེ་ཐབས་གང་ཡང་ནམ་ཞིག་གཏན་གྱི་ཆུང་ཐབས་སུ་འདུག་པས། འཇིག་རྟེན་གྱི་འདུན་མ་དང་ཆེ་ཐབས་ལ་ཕྱི་མིག་ཙམ་ཡང་མི་ལྟ་བར་དམན་པའི་ས་བཟུང་ངོ༌། །སྣ་ཐག་མི་ལ་མི་གཏད་དེ། བྱང་ཆུབ་ངོས་དགར་ཤོར་ན་ཆོས་ཀྱི་དགོས་པ་སྟོར་བ་ཡིན་པས། རང་སྙིང་ནས་ཆོས་བྱེད་པའི་རང་དབང་རང་གིས་ཐོབ་པར་བྱའོ། །གསང་བ་མཆུ་སྒོར་མི་འདོན་ཏེ། རང་ལ་ཤར་བའི་ལམ་རྟགས་གཞན་ལ་བཤད་ན་ཉམས་རྟོགས་ཀྱི་འཕེལ་བ་ཆད་པས་ཡོན་ཏན་གསང་ཞིང་ཡེལ་བར་བྱའོ། །གོས་ངན་རྒྱལ་མཚན་གྱི་རྩེ་ལ་མི་ཕྱར་ཏེ། ཉམས་ལེན་མངོན་ཚན་ཅན་བར་ཆད་ཀྱི་བདུད་འཇུག་པའི་རྒྱུ་ཡིན་པས། སྒྲུབ་པ་གསང་སྤྱོད་ཀྱི་སྒོ་ནས་མཐར་ཕྱིན་པར་བྱ་དགོས་ཏེ། རྒྱལ་པོ་ཟླ་བ་འོད་ཟེར་གྱི་ཞལ་ནས། རྣལ་འབྱོར་གྱི་རང་ས་མ་ཉམས་པས་ཆོས་མིན་ཡིད་ལ་མི་རྒྱུ་བར་བྱེད། ལོག་པའི་ཤེས་པ་ཚར་གཅོད་པར་བྱེད་པའི་གནད། ཅེས་བསྟན་ཏོ། །གཉིས་པ་བྱེད་པ་ལམ་གྱི་རྣལ་འབྱོར་ལ་གཉིས་ཏེ། དངོས་དང༌། དཀའ་ཐུབ་གསུམ་གྱི་སྲང་ནས་འདོན་པའོ། །བྱེད་པ་ལམ་གྱི་རྣལ་འབྱོར་དངོས་ལ་ལྔ་སྟེ། ཚོགས་ལམ་བློ་སྦྱོང༌། སྦྱོར་ལམ་དཀའ་ཐུབ། མཐོང་ལམ་རྗེས། སྒོམ་ལམ་རོ་སྙོམས། མཐར་ལམ་བྱ་བྲལ་ལོ། །དང་པོ་ཚོགས་ལམ་བློ་སྦྱོང་ལ་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་རྒྱུད་ལ་བསྐུར་ལུགས། རྗེས་ལམ་གྱི་ཚར་ཚད་བསླབ་བྱ་དང་བཅས་པའོ། །དང་པོ་སྦྱོར་བ་སྐྱབས་འགྲོ་སེམས་བསྐྱེད་ལ་གསུམ། རྟེན་བསྐྱེད་པ། ཚོགས་བསགས་པ། ལམ་བརྟེན་པའོ། །དང་པོ་རྟེན་བསྐྱེད་པ་ལའང་གསུམ་ལས། རྒྱས་པར་བསྐྱེད་པ། འབྲིང་དུ་བསྐྱེད་པ༑ བསྡུས་པར་བསྐྱེད་པའོ། །དང་པོ་རྟེན་རྒྱས་པར་བསྐྱེད་པ་ནི། རང་གི་སྤྱི་བོར་པདྨའི་སྡོང་པོ་ཡལ་ག་ལོ་འདབ་མེ་ཏོག་འབྲས་བུ་ཕུན་སུམ་ཚོགས་པ་དང་ལྡན་པའི་དབུས་ཀྱི་པདྨ་འདབ་མ་ཁ་བྱེ་བ་ཡོངས་སུ་རྒྱས་པའི་ནང་དུ། སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླ་དང་བཅས་པའི་གདན་ལ་དངོས་ཀྱི་བླ་མ་མཚན་དཔེ་བྱད་དང་ལྡན་པ། ཞལ་གཟི་མདངས་དང་ལྡན་པ། ཐུགས་བདག་ལ་དགྱེས་པས་རྗེས་སུ་འཛིན་པ་གཅིག་བཞུགས་པར་བསམ་མོ། །དེའི་དབུའི་སྟེང་དུ་པདྨའི་སྡོང་པོ་རྩེ་མོ་གསུམ་དུ་གྱེས་པའི་འདབ་མ་ལ་རྩ་བའི་བླ་མ་སྐུ་མཆེད་རིན་པོ་ཆེ་རྣམ་པ་གསུམ་གྲལ་འཕྲེད་དུ་དཀྲིག་གེ་བཞུགས་པར་བསམ། དེ་དག་གི་དབུའི་སྟེང་པདྨའི་སྡོང་པོ་གཅིག་ཏུ་འདྲིལ་བའི་སྟེང་དུ་བརྒྱུད་པའི་བླ་མ་བཞི་བརྩེགས་ཀྱི་དང་པོར་བླ་མ་གྲུབ་ཐོབ་ཆེན་པོ། དེ་བཞིན་ཏུ་བླ་མ་པ་ཚབ་སྐུ་དྲིན་ཅན། བླ་མ་བྱང་ཆུབ་སེམས་དཔའ་ཀུན་དགའ། རྗེ་བཙུན་དམ་པ་རྒྱ་གར་རིན་པོ་ཆེ་སྐུ་མདོག་སྨུག་ལ་དམར་བའི་མདངས་ཆགས་པ། དབུ་སྐྲ་བྷོ་ལོ་ལྟར་གཟེངས་པ། སྐུ་ལ་རས་ཁྲ་བོའི་ཨཾ་ག་རག་གསོལ་བ། སྣང་སྲིད་ཐམས་ཅད་མནན་ན་ནོན་པ། བཏེགས་ན་ཐེག་པ༑ ཕྱག་རྒྱ་རྩེ་བསྣོལ་དུ་ལག་གེ་བ། སྤྲུལ་པའི་སྐུ་རྣམས་གོང་འོག་རིམ་པ་བཞིན་བཞི་བརྩེགས་སུ་བཞུགས་པར་བསམ། དེ་ཉིད་ཀྱི་དབུའི་སྟེང་དུ་པདྨའི་སྡོང་པོ་ཡལ་ག་ལྔ་བཅུ་རྩ་བཞིར་གྱེས་པ་ལ། ཐུན་མོང་མིའི་བླ་མ་ལྔ་བཅུ་རྩ་བཞི་སྟེ། དེའང་རྒྱབ་ཏུ་ཀླུ་སྒྲུབ་སྙིང་པོ་ལ་སོགས་པ་མཚན་ཉིད་དང་སྒྲ་རིག་པའི་བླ་མ་བཅུ་གཅིག །གཡས་སུ་བུདྡྷ་གུ་ཧྱ་ལ་སོགས་པ་ཕ་རྒྱུད་གཡོ་བ་རླུང་གི་བླ་མ་བཅུ་གཅིག །གཡོན་དུ་མཚོ་སྐྱེས་རྡོ་རྗེ་ལ་སོགས་པ་མ་རྒྱུད་བདེ་བ་ཉམས་ཀྱི་བླ་མ་བཅུ་གཅིག །མདུན་དུ་དཔལ་ས་ར་ཧ་ལ་སོགས་པ་ཕྱག་རྒྱ་ཆེན་པོ་བརྡའི་བླ་མ་བཅུ་གཅིག །མཚམས་རྣམས་སུ་སུ་ཁ་མ་ཧཱ་སིདྡྷི་ལ་སོགས་པ་མཁའ་འགྲོ་མ་རིག་པ་ངོ་སྤྲོད་ཀྱི་བླ་མ་བཅུའོ། །དེ་དག་གི་དབུའི་སྟེང་དུ་པདྨའི་ཡལ་འདབ་སུམ་ཅུ་རྩ་དྲུག་ཏུ་གྱེས་པའི་སྟེང་དུ་ངོ་མཚར་མཁའ་སྤྱོད་ཀྱི་བླ་མ་དཔལ་ལྡན་སུམ་ཅུ་སོ་དྲུག །སྟེ་རང་ས་སྟོན་པའི་རྒྱལ་པོ་དྲུག །བློ་སྦྱོང་སྟོན་པའི་བཙུན་མོ་དྲུག །དཀའ་ཐུབ་སྟོན་པའི་དྲང་སྲོང་དྲུག །རྗེས་སྟོན་པའི་བླ་མ་དྲུག །རོ་སྙོམས་སྟོན་པའི་ཁྱིམ་བདག་དྲུག །བདག་གཏོང་བའི་དེད་དཔོན་དྲུག་དང་སོ་དྲུག་གོ །དེ་དག་གི་དབུའི་སྟེང་དུ་པདྨ་འདབ་མ་ཉི་ཤུ་རྩ་བཞིར་གྱེས་པའི་སྟེང་དུ། བྱིན་གྱིས་རློབས་པ་མཁའ་འགྲོ་མའི་བླ་མ་ཡུལ་ཉི་ཤུ་རྩ་བཞིའི་དཔའ་མོ། ཉེར་བཞི་སྟེ། ས་འོག་སྤྱོད་པའི་སྐུའི་མཁའ་འགྲོ་དཀར་མོ་བརྒྱད། ས་སྟེང་སྤྱོད་པའི་གསུང་གི་མཁའ་འགྲོ་དམར་མོ་བརྒྱད། བར་སྣང་སྤྱོད་པའི་ཐུགས་ཀྱི་མཁའ་འགྲོ་སྔོན་མོ་བརྒྱད་དེ། ཐམས་ཅད་གཡས་གྲི་ཁུག་གཡོན་ཐོད་ཁྲག་བསྣམ་པར་བསམ་མོ། །དེ་དག་གི་དབུའི་སྟེང་དུ་པདྨའི་འདབ་མ་བཅུ་གཉིས་སུ་གྱེས་པའི་སྟེང་ཐུགས་དམ་བདེ་བར་གཤེགས་པའི་བླ་མ་ ཞི་བ་བཞི། ཁྲོ་བོ་བཞི། ལྷ་མོ་བཞི་སྟེ། བཅུ་གཉིས། དེ་དག་གི་དབུའི་སྟེང་དུ་པདྨའི་སྡོང་པོ་གཅིག་ཏུ་གྱུར་པའི་གེ་སར་ལ་བཅོམ་ལྡན་འདས་ཆོས་སྐུ་རྡོ་རྗེ་འཆང་ཆེན་པོ་བདག་མེད་ལྷ་མོ་དང་ཞལ་སྦྱོར་དུ་ ལོངས་སྐུ་རྣམ་པར་སྣང་མཛད། སྤྲུལ་སྐུ་ཤཱཀྱ་ཐུབ་པ། ངོ་བོ་ཉིད་སྐུ་གསང་བདག་རྣམས། བཞུགས་པར་བསམ་མོ། །འབྲིང་དུ་བསྐྱེད་པ་ནི༑ དངོས་ཀྱི་བླ་མ། རྩ་བའི་བླ་མ། བརྒྱུད་པའི་བླ་མ་གྲུབ་ཐོབ་ཆེན་པོ། པ་ཚབ། བྱང་སེམས་ཀུན་དགའ། དམ་པ་རིན་པོ་ཆེ། བདག་མེད་མ་རྣམས་ཏེ་བདུན་བརྩེགས་སོ། །བསྡུས་པར་བསྐྱེད་ན། དངོས་ཀྱི་བླ་མ་གཅིག་པུ་བསྒོམ་པས་ཆོག་སྟེ། དེ་ནི་དུས་གསུམ་གྱི་སངས་རྒྱས་མ་ལུས་པ་དང་དབྱེར་མེད་པའི་ཕྱིར་རོ། །དེའང་བྱིན་རླབས་ཀྱི་ཚན་ཆུང་ངམ། ཉམས་ཀྱི་བོགས་ཆུང་ངམ། དངོས་ཀྱི་བླ་མ་ལ་ཡིད་ཆེས་ཆུང་ན་རྟེན་རྒྱས་པ་བསྐྱེད། བྱིན་རླབས་ཚན་ཆེ། ཉམས་མྱོང་བོགས་ཆེ། དངོས་ཀྱི་བླ་མ་ལ་ཡིད་རབ་ཏུ་ཆེས་ན་བསྡུས་པ། དེ་དག་ཅི་རིགས་པ་ལ་འབྲིང་དུའོ། །གང་ལྟར་ནའང་འདིར་བླ་མ་ཆོས་སྐུར་སྒྲུབ་པས་ཀུན་ཀྱང་ཆ་ལུགས་ཀྱི་སྤྲོས་པ་མེད་པ་ནམ་མཁའི་གོས་ཅན་ནོ། །གཉིས་པ་ཚོགས་བསགས་པ་ལ་གསུམ་ལས། དང་པོ་མཎྜལ་གྱི་སྒོ་ནས་ཚོགས་བསགས་པ་ནི། ༀ་ན་མོ་གུ་རུ་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་བརྗོད་དེ་རིན་པོ་ཆེ་སྣ་ཚོགས་པའི་འབྱུང་གནས་སུ་གྱུར་པའི་རྒྱ་མཚོ་གླིང་བཞི་རི་རབ་ཁོར་ཡུག་དང་བཅས་པ། ལྷ་དང་མིའི་མཆོད་རྫས་སྣ་ཚོགས་ཀྱིས་གང་བར་དམིགས་ཏེ་འབུལ་ལོ། །གཉིས་པ་རང་ལུས་ཀྱི་སྒོ་ནས་ཚོགས་བསགས་པ་ནི། ཏྲཾ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་པས་རང་གི་ལུས་འདི་བླ་མ་ལ་མཁོ་བའི་ཡོ་བྱད་རིན་པོ་ཆེ་སྣ་ཚོགས་པའི་ཕུང་པོར་བསམས་ལ་འབུལ་ལོ། །སྣ་ཚོགས་པའི་མཆོད་པ་ནི། སརྦ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་པས་བདག་གི་སྙིང་ག་ནས་ལྷག་པའི་ལྷའི་ས་བོན་ལས་འཕྲོས་པའི་འོད་ཟེར་གྱི་རྩེ་མོ་ལས་འདོད་པའི་ཡོན་ཏན་གྱི་ལྷ་མོ་དཔག་ཏུ་མེད་པ་བྱུང་སྟེ། སྣ་ཚོགས་པའི་མཆོད་པ་ཕུལ་ནས་དགྱེས། མཉེས། ཚིམ་པར་བསམ་མོ། །གསུམ་པ་ལམ་བརྟེན་པ་ནི། བླ་མ་དམ་པ་རྣམས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་བླ་མ་དམ་པ་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཡི་དམ་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡི་དམ་གྱི་ལྷ་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མཁའ་འགྲོ་མའི་ཚོགས་རྣམས་ལ་གུས་པར་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་མཁའ་འགྲོ་མའི་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། བླ་མ་ཡི་དམ་མཁའ་འགྲོ་མ་རྣམས་བདག་ལ་དགོངས་སུ་གསོལ། བདག་གིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་དགེ་བའི་རྩ་བ་རྣམས་གཅིག་ཏུ་བསྡུས་ཏེ་བླ་མ་དམ་པ་རྣམས་ལ་འབུལ་བར་བགྱིའོ། །དེ་ལྟར་ཕུལ་བས་བླ་མ་རིན་པོ་ཆེ་རྣམས་ཀྱི་ཐུགས་དགོངས་ཁྱད་པར་ཅན་ཡོངས་སུ་རྫོགས་པར་གྱུར་ཅིག །དེ་ལྟར་གྱུར་པའི་དགེ་བའི་རྩ་བ་དེ་བདེ་བར་གཤེགས་པ་རྣམས་ཀྱི་སྤྱན་ལམ་ན་འབུལ་བར་བགྱིའོ། །དེ་ལྟར་ཕུལ་བས་བདེ་བར་གཤེགས་པ་རྣམས་ཀྱི་སྤྱན་ལམ་དུ་མཆོད་པའི་བྱེ་བྲག་ནམ་མཁའ་དང་མཉམ་པར་གྱུར་ཅིག །དེ་ལྟར་གྱུར་པའི་དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ཏེ་བླ་ན་མེད་པའི་བྱང་ཆུབ་ཏུ་བསྔོ་བར་བགྱིའོ། །དེ་ལྟར་བསྔོས་པས་སེམས་ཅན་ཐམས་ཅད་འཁོར་བ་སྲིད་པ་སྡུག་བསྔལ་གྱི་རྒྱ་མཚོ་ལས་གྲོལ་ཞིང་ཐར་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་གྱུར་ཅིག །དེ་ལྟ་བུ་མ་ཐོབ་ཀྱི་བར་དུ་ཡང་བདག་མྱུར་དུ་མངོན་པར་རྫོགས་པར་སངས་རྒྱས་ནས། འགྲོ་བ་མ་ལུས་པ་རྣམས་ཀྱི་བླ་མ་བྱེད་པར་གྱུར་ཅིག །དེ་དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་མཆོག་ཏུ་གྱུར་པའི་སྐྱབས་འགྲོ། ངོ་མཚར་ཅན་གྱི་མཆོད་པ། བླ་ན་མེད་པའི་སེམས་བསྐྱེད། སེམས་ཅན་དང་མི་ཕྱེད་པའི་བསྔོ་བ། གཞན་དོན་དུ་འགྱུར་ངེས་ཀྱི་སྨོན་ལམ་འདི་རྣམས་གསུམ་མམ། ལྔའམ། བདུན་ལ་སོགས་པ་མདོར་ན་རང་རྒྱུད་ལ་བྱིན་རླབས་ཀྱི་དྲོད་ཆིལ་གྱིས་མ་བབས་ཀྱི་བར་དུ་བྱ་སྟེ། རྒྱལ་པོ་སྟོབས་ལྡན་སྙིང་པོའི་ཞལ་ནས། སྐྱབས་ཀྱི་ཡུལ་བཅུད་ལ་བོར་བས་རྒྱུད་ལ་དངོས་གྲུབ་རྣམ་གཉིས་ཐོབ་པར་བྱེད་པ་བྱིན་རླབས་བརྒྱུད་པའི་གནད་གོང་ནས་གོང་དུ་སྤོར་ཅིག །ཅེས་བསྟན་ཏོ། །གཉིས་པ་དངོས་གཞི་རྒྱུད་ལ་བསྐུར་ལུགས་ལ་བཞི་སྟེ། གྲགས་པ་སྒྲའི་བརྗོད་ཚུལ་ཡི་གེའི་ལམ་ཁྱེར། དབང་བཞི་དམིགས་པའི་ཁྱད་པར་འཁོར་ལོ་བསྒོམ་ཐབས། རྩ་བའི་ངོས་སྤྲོད་ཀྱི་ཁྱད་པར་མཉམ་རྗེས་གཉིས་ཀྱི་ལག་ལེན། རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་སོ། །དང་པོ་གྲགས་པ་སྒྲའི་བརྗོད་ཚུལ་ཡི་གེའི་ལམ་ཁྱེར་ནི། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཞེས་ལན་བཞིར་བརྗོད་པའི་དང་པོས་མིག་གིས་མཐོང་བའི་ཡུལ་དུ་གྱུར་ཚད་ཀྱི་གཟུགས་རྣམས་རྣམ་པ་ཡི་གེ་ལ་ངོ་བོ་བླ་མའི་སྐུ། གཉིས་པས་རྣ་བས་ཐོས་པའི་ཡུལ་དུ་གྱུར་ཚད་ཀྱི་སྒྲ་རྣམས་རྣམ་པ་ཡི་གེ་ལ་ངོ་བོ་བླ་མའི་གསུང༌། གསུམ་པས་ཡིད་ཀྱི་དྲན་པའི་ཡུལ་དུ་གྱུར་ཚད་ཀྱི་རྟོག་པ་རྣམས་རྣམ་པ་ཡི་གེ་ལ་ངོ་བོ་བླ་མའི་ཐུགས། བཞི་པས་དེ་ཐམས་ཅད་ཀྱང་རང་གི་སེམས་ཉིད་སྟོང་པའི་རང་རྩལ་ཙམ་དུ་ཤེས་པར་བྱའོ། །དེས་ནི་ཆེད་དུ་འབད་པ་རྒྱུན་ཆགས་སུ་བསྙེན་པ་ལ་ལྟོས་པ་མེད་པར་གསང་སྔགས་ཀྱི་བཟླས་བརྗོད་ཀུན་ཐེམས་ནས། ཡུལ་ལ་དག་པའི་སྣང་བ་ཕྱོགས་མེད་དུ་འབྱོངས་པར་འགྱུར་བ་ཡིན་ཏེ། བཙུན་མོ་ལྷ་དཔལ་འོད་ཟེར་གྱི་ཞལ་ནས། ངག་ནས་བྲེ་མའི་གཏམ་བརྗོད་པས་གསང་སྔགས་ཀྱི་བཟླས་བརྗོད་ཐེམས་པར་བྱེད་པ་ཨཱ་ལི་ཀཱ་ལིའི་གནད་འདི་ལྟར་རོ། །ཞེས་བསྟན་ཏོ། །དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ནི། ངག་ཏུ། ཨ་བྷི་ཥིཉྩ་ༀ། ཞེས་པས་སྤྱི་བོ་བདེ་བ་ཆེན་པོའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བ་ལ་བླ་མའི་སྐུའི་ས་བོན་ༀ་དཀར་པོ་གཅིག་ལས་བྱང་སེམས་ཀྱི་ཆུ་རྒྱུན་དཀར་ནར་གྱིས་བྱུང་སྟེ། རྐང་པའི་མཐིལ་ནས་སྤྱི་གཙུག་གི་བར་དུ་ལུས་ཀྱི་ནང་ཀུན་དཀར་མེར་གྱིས་ཁེངས་པར་ བསམ་མོ། །ཨ་བྷི་ཥིཉྩ་ཨཱཿ ཞེས་པས་མགྲིན་པ་ལོངས་སྤྱོད་ཀྱི་འཁོར་ལོའི་དབུས་སུ་པདྨ་འདབ་མ་བརྒྱད་པའི་ལྟེ་བ་ལ་བླ་མའི་གསུང་གི་ས་བོན་ཨཱཿ དམར་པོ་གཅིག་ལས་བྱང་སེམས་ཀྱི་ཆུ་རྒྱུན་དམར་ལྷུག་ལྷུག་བྱུང་སྟེ༑ ལུས་ཀྱི་ནང་ཀུན་དམར་མེར་གྱིས་ཁེངས་པར་བསམ་མོ། །ཨ་བྷི་ཥིཉྩ་ཧཱུྃ། ཞེས་པས་སྙིང་ག་ཆོས་ཀྱི་འཁོར་ལོའི་དབུས་སུ་རྡོ་རྗེ་རྩེ་ལྔ་པའི་ལྟེ་བ་ལ་བླ་མའི་ཐུགས་ཀྱི་ས་བོན་ཧཱུྃ་སྔོན་པོ་གཅིག་ལས་བྱང་སེམས་ཀྱི་ཆུ་རྒྱུན་སྔོ་སིང་སིང་བྱུང་བས། རྡོ་རྗེའི་ལུས་ཀྱི་དཔའ་བོ་དང་དཔའ་མོ་རྣམས་གཉིས་སུ་མེད་པའི་སྦྱོར་བ་མཛད་པར་བསྐུལ་ཏེ་སྦྱོར་བ་མཛད་པས་ལུས་ཐམས་ཅད་ཟག་མེད་ཀྱི་བདེ་བས་གང་བར་བསྒོམ་མོ། །ཨ་བྷི་ཥིཉྩ་ཧྲཱིཿ ཞེས་པས་ལྟེ་བ་སྤྲུལ་པའི་འཁོར་ལོའི་དབུས་སུ་རིན་པོ་ཆེ་ཟུར་བརྒྱད་པའི་ལྟེ་བ་ལ་བླ་མའི་ཡོན་ཏན་གྱི་ས་བོན་ཧྲཱིཿ སེར་པོ་ཞིག་ལས་བྱང་སེམས་ཀྱི་ཆུ་རྒྱུན་ཁ་དོག་སྣ་ཚོགས་སུ་བྱུང་བས། ལུས་སེམས་སྣང་བའི་དངོས་པོ་ཀུན་ནམ་མཁའ་ལ་སྤྲིན་དེངས་པ་ལྟར་རང་བཞིན་མེད་པར་སྟོང་རྗེན་གྱིས་གྱུར་པར་བསམ་མོ། །དེས་རྟེན་ལུས་ཀྱི་ཆོས་བྱང་སེམས་རྩ་རླུང་དང་བཅས་པ་ཀུན་སྟེང་འོག་གི་སྒོ་ལ་མ་བརྟེན་པར་ལུས་ལས་སུ་རུང་བར་འགྱུར་བ་ཡིན་ཏེ། བཙུན་མོ་ཡེ་ཤེས་འོད་ཟེར་གྱི་ཞལ་ནས། རིང་ལམ་འཁོར་ལོས་བསྡུས་པས། རྟེན་སྨིན་པར་བྱེད་པ་དབང་བཞི་ལམ་ཁྱེར་བློ་སྦྱོང་གི་གནད་འདི་ལྟར་རོ། །ཞེས་བསྟན་ཏོ། །རྩ་བ་ངོས་སྤྲོད་ཀྱི་ཁྱད་པར་མཉམ་རྗེས་གཉིས་ཀྱི་ལག་ལེན་ལ་གཉིས་ཏེ། དང་པོ་མཉམ་བཞག་གི་རྒྱུ་ལུས་ཀྱི་འཁྲུལ་འཁོར་ཆོས་དྲུག་རྡོ་རྗེའི་གནས་ཐབས་སུ་བྱ་སྟེ། རྐང་པ་རྡོ་རྗེའི་སྐྱིལ་ཀྲུང་བཅའ། ལག་པ་མཉམ་བཞག་གི་ཕྱག་རྒྱ་བསྣོལ། སྒལ་ཚིགས་མདའ་སྨྱུག་བཞིན་དུ་བསྲང༌། མགྲིན་པ་རྨ་བྱ་བཞིན་དུ་དགུག །དཔུང་པ་རྒོད་གཤོག་བཞིན་དུ་བརྒྱང༌། མཆུ་དང་སོ་ཐ་མལ་དུ་བཞག་ཅིང༌། དབང་པོའི་གཏད་ཐབས་ཀྱང་མིག་འབྲས་མི་འགུལ་བར་སྣ་རྩེ་ལ་བལྟ་བར་བྱ་སྟེ། རྒྱལ་སྲས་དྲི་མེད་གྲགས་པ་ཟླ་བ་འོད་ཀྱི་ཞལ་ནས་ཀྱང༌། རྟེན་འབྲེལ་ལུས་ལ་བསྒྲིགས་པའི་ཆེ་བས། ཉམས་མྱོང་སེམས་ལ་འཆར་བར་བྱེད་པ་འཁྲུལ་འཁོར་འདུག་སྟངས་ཀྱི་གནད་འདི་ལྟར་རོ། །ཞེས་བསྟན་ཏོ། །ངག་གི་འཁྲུལ་འཁོར་ནི། རྩོལ་མེད་བྱང་ཆུབ་སེམས་ཀྱི་རླུང་བཟུང་སྟེ་དབུགས་སོས་དལ་དུ་རྒྱུར་གཞུག་གོ །སེམས་ཀྱི་འཁྲུལ་འཁོར་ནི། ཡིད་ལ་བྱེད་པ་བཟང་ངན་གྱི་རྣམ་པར་རྟོག་པ་གང་གིས་ཀྱང་མ་བསླད་པར་མིག་རྩེ་སྣ་རྩེ་སེམས་རྩེ་གསུམ་གཅིག་ཏུ་བསྒྲིལ་ཏེ། གསལ་ལ་རྟོག་པ་མེད་པ་རང་ལུགས་སུ་རྩེན་གྱིས་བཞག་པས་རྣམ་པར་མི་རྟོག་པའི་ཡེ་ཤེས་རང་གི་ངོ་བོ་དེ་རང་ལུགས་སུ་གནས་ཤེས་པར་འབྱུང་སྟེ། བཙུན་མོ་ལྷ་དཀར་གྱི་སེང་གེའི་ཞལ་ནས། ངོ་བོ་སྦས་པ་གསེར་གྱི་ཉི་མའི་མིག་ཕྱེ་བས། རྟོགས་པའི་ཡེ་ཤེས་ཕྱོགས་མེད་དུ་འཆར་བར་བྱེད་པ་ཕྱག་རྒྱ་ཆེན་པོ་བརྡའི་གནད་རིག་པར་གྱིས་ཤིག་ཅེས་བསྟན་ཏོ། །དེ་ཡང་གསལ་བདོ་བ་ཤིགས་ཀྱིས་བཤིགས་ཏེ། སྒྲིམ་ཀློད་རེས་མོ་རུ་ལམ་དུ་འཁྱེར་ཏེ། དེད་དཔོན་དཔལ་གྱི་སྙིང་པོའི་ཞལ་ནས། མཉམ་བཞག་གསལ་བའི་མདངས་ལ་བཤིགས་པས། གནས་པའི་རྗེས་བཟང་བར་བྱེད་པ་ཐུང་ལ་གྲངས་མང་བས་བྱིང་རྒོད་ཀྱིས་མི་ཟིན་པའི་གནད་ཡིན་ནོ། །ཞེས་བསྟན་ཏོ། །རྗེས་སྤྱོད་ལམ་གྱི་དུས་ཐམས་ཅད་དུ། གཟུགས་སུ་སྣང་ཚད་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུ། སྒྲ་རྣམས་གྲགས་སྟོང་གཉིས་སུ་མེད་པ་སེ་གོལ་གྱི་སྒྲ་ལྟ་བུ། དྲན་པའི་རྣམ་པར་རྟོག་པ་གང་ལ་ཡང་བདེན་ཞེན་མེད་པ་རྨི་ལམ་གྱི་ལྟད་མོ་སད་པ་ལྟ་བུར་ཤེས་པར་བྱ་སྟེ། དེ་ལྟར་ཆོས་ཐམས་ཅད་ལ་བདེན་ཞེན་ཟད་ཕྱིན་ཆད། ལུས་ངག་ཡིད་གསུམ་ཆེད་དུ་འཆོས་པ་མེད་པར་ཐ་མལ་ལྟར་འདུག་ཀྱང་ཚོགས་གཉིས་ངང་གིས་རྫོགས་པར་འགྱུར་བ་ཡིན་ཏེ། དེད་དཔོན་ནམ་མཁའི་སྙིང་པོའི་ཞལ་ནས། སྒོ་གསུམ་ཐ་མལ་དུ་བསྡད་པས། རྒྱུད་ལ་ཚོགས་གཉིས་རྫོགས་པར་བྱེད་པ་སྐམ་ཐག་ཆུ་ནང་དུ་གཅོད་པ་གྱ་ལོག་གི་གནད་ལྟོས་ཤིག །ཅེས་བསྟན་ཏོ། །རྗེས་གནང་ལུང་གི་ཁྱད་པར་བླ་མའི་ཐུགས་དམ་གྱི་བསྐུལ་ལུགས་བསྟན་པ་ནི། རང་གི་སྤྱི་བོའི་སྟེང་དུ་རྟེན་རྒྱས་འབྲིང་བསྡུས་པ་གང་ཡང་རུང་བ་བསྐྱེད་དེ། ༀ་ཨཱཿ ཧྲཱིཿ གུ་རུ་སིདྡྷི་ཧཱུྃ། ཞེས་པ་བློ་སྦྱོང་གི་སྙིང་པོ་འབྲུ་བརྒྱད་པ་འདི་བདག་ཉིད་ཀྱིས་མོས་གུས་གདུང་ཤུགས་དྲག་པོ་དང་བཅས་པས་བགྲངས་ཏེ། སྤྱི་གཙུག་ན་བཞུགས་པའི་དངོས་ཀྱི་བླ་མ་ལ་གསོལ་བ་གདབ། དེས་ཀྱང་དེ་བཞིན་དུ་བློ་སྦྱོང་གི་སྙིང་པོ་གདུང་ཤུགས་དང་བཅས་པས་འདྲེན་ཞིང་བདག་གི་གྲོགས་མཛད་དེ་རྩ་བའི་བླ་མ་ལ་གསོལ་བ་བཏབ་པས། དེ་བཞིན་དུ་དེ་ཡན་ཆད་ཀུན་གྱིས་ཀྱང་སྔ་མ་ལྟར་བདག་གི་གྲོགས་མཛད་དེ། བརྒྱུད་པའི་བླ་མ་གྲུབ་ཐོབ་ཆེན་པོ། པ་ཚབ་སྐུ་དྲིན་ཅན། བྱང་ཆུབ་སེམས་དཔའ་ཀུན་དགའ། དམ་པ་སངས་རྒྱས་རིན་པོ་ཆེ་རྣམས་དང༌། ཐུན་མོང་ལུང་གི་བླ་མ་གྲུབ་ཐོབ་ཕོ་མོ་ལྔ་བཅུ་རྩ་བཞི་ངོ་མཚར་མཁའ་སྤྱོད་ཀྱི་བླ་མ་དཔལ་ལྡན་སུམ་ཅུ་སོ་དྲུག །བྱིན་གྱིས་རློབ་པ་མཁའ་འགྲོ་མའི་བླ་མ་ཡུལ་ཉི་ཤུ་རྩ་བཞིའི་དཔའ་མོ། ཐུགས་དམ་བདེ་བར་གཤེགས་པའི་བླ་མ་བཅུ་གཉིས་ཀྱི་བར་དུ་སྔ་མ་ལྟར་ཤེས་པར་བྱ་སྟེ། གསོལ་བ་མས་རིམ་གྱིས་གདབ་ཅིང༌། བྱིན་རླབས་ནི་ཡས་རིམ་གྱིས་ཞུ་སྟེ། ཐུགས་དམ་བདེ་བར་གཤེགས་པའི་བླ་མ་ཡན་ཆད་ཀྱིས་ཕྱོགས་གཅིག་ཏུ་བསྟེན་པ་སྤྱིའི་བླ་མ་རྡོ་རྗེ་འཆང་ཡབ་ཡུམ་ལ་གསོལ་བ་བཏབ་པས། དེ་ཉིད་ཚད་མེད་པའི་ཐུགས་རྗེ་དང་བྱིན་རླབས་ཀྱི་རང་བཞིན་དུ་འོད་དུ་ཞུ་ནས་ཐུགས་དམ་བདེ་བར་གཤེགས་པའི་བླ་མ་ལ་ཐིམ། དེ་ཁོ་ན་བཞིན་དུ་དངོས་ཀྱི་བླ་མའི་བར་གྱི་བྱིན་རླབས་ཞུ་བར་བྱ་སྟེ། དངོས་ཀྱི་བླ་མ་ནི་སྤྱི་བོར་མི་བསྟིམ་པར། དེ་ཉིད་ཀྱི་སྐུ་གསུང་ཐུགས་ཀྱི་གནས་གསུམ་ནས་ཚད་མེད་པའི་ཐུགས་རྗེ་དང་བྱིན་རླབས་ཆེན་པོའི་འོད་ཟེར་དཀར་དམར་མཐིང་གསུམ་བྱུང་སྟེ། བདག་གི་སྤྱི་གཙུག་ནས་བྱེ་མ་ལ་མར་ཐིམ་པ་བཞིན་དུ་ཏིམ་ཏིམ་ཐིམ་པས་ལུས་ངག་ཡིད་གསུམ་གྱི་དྲི་མ་དག་ཅིང་སྐུ་གསུང་ཐུགས་སྣང་སྟོང་གྲགས་སྟོང་བདེ་སྟོང་གཉིས་སུ་མེད་པའི་བྱིན་རླབས་ཞུགས་པར་བསམ་སྟེ། ཐུན་གཏོང་བའི་ཚེ་གྲུབ་པར་གྱུར་ཅེས་བརྗོད་དོ། །འདིས་ནི་ཉོན་མོངས་པ་ཅན་གྱི་ཡིད་ལ་ཏིང་ངེ་འཛིན་གྱི་རྩལ་རྫོགས་པར་འགྱུར་རོ། །སྔགས་གཅིག་གིས་དོན་ཕྱོགས་མེད་དུ་འགྲུབ་ཅེས་བྱ་སྟེ་ཡང་དག་པའི་དོན་རྟོགས་པ་དང་ཉམས་མྱོང་མ་སྐྱེས་པ་སྐྱེ་བར་བྱེད། སྐྱེས་པ་གོང་ནས་གོང་དུ་སྦར་བར་བྱེད། ཚེ་འདིར་རྟོགས་པ་དང་ཉམས་མྱོང་དང་རྟགས་དང་ཡོན་ཏན་ཅི་མེད་ཀྱང་དོན་ཇི་ལྟ་བར་འགྲུབ་པར་འགྱུར་བ་ཡིན་ཏེ། བཙུན་མོ་ལྷ་དཔལ་གྱི་འོད་ཟེར་གྱི་ཞལ་ནས། རིང་ལམ་འཁོར་ལོས་བཏུང་བ། རྟེན་སྨིན་པར་བྱེད་པ་དབང་བཞི་ལམ་ཁྱེར་གྱི་བློ་སྦྱོང་གི་གནད་འདི་ལྟར་རོ། །ཞེས་བསྟན་ཏོ། །རྗེས་ཀྱི་ཆོས་བོ་ཟགས་ལྟེམས་ལོག་ལམ་གྱི་དྲི་མ་སྲུང་ལུགས་ནི། འདིར་བློ་སྦྱོང་བས་བླ་མ་ལ་གུས་པའི་བློ་ཤོར་ན་བོ་བའི་དྲི་མ་ཡིན་པས་བསྲུང༌། སེམས་ཅན་ལ་བྱམས་སེམས་སྤངས་ན་ཟགས་པའི་དྲི་མ། དོན་མེད་ཀྱི་སྤྱོད་པ་གཞི་དང་བཅས་ཏེ་མ་སྤངས་ན་ལྟེམས་པའི་དྲི་མ། རོ་མ་མྱོང་བར་སྟན་ལས་འཕགས་ན་ལོག་པའི་དྲི་མར་བྱས་ལ་བསྲུང༌། དེ་ཡང་བོ་ན་དགང་སྟེ། བླ་མའི་ཡོན་ཏན་དང་སྐུ་དྲིན་བསམས་ལ་སངས་རྒྱས་ཀྱི་འདུ་ཤེས་བསྐྱེད། ཟགས་ན་བསྡམ་སྟེ། བྱམས་པ་དང་སྙིང་རྗེ་ཚད་མེད་པ་ནན་གྱིས་བསྒོམ། ལྟེམས་ན་བསྲང་སྟེ། སྐྱོ་ཤས་ཆེན་པོའི་ལྕག་གིས་བསྐུལ་ཏེ་འབུངས་པ་དགེ་སྦྱོར་ལ་འདོན། ལོག་ན་བཟུང་སྟེ། ཟབ་མོའི་གདམས་པ་ལ་ངེས་ཤེས་ཀྱིས་ས་རྡོ་གཟུགས་པར་བྱའོ། །དེ་ལྟ་བུའི་ཚོགས་ལམ་བློ་སྦྱོང་མཐར་ཕྱིན་ཅིང་ཚར་བའི་ཚད་ནི། ངོ་བོས་ཐེམས་ན་ཆོས་ཐམས་ཅད་སེམས་སུ་ཤེས་པས་འཁྲུལ་པའི་ཁམས་ལ་སྐྱོ་བ་སྐྱེ་ཞིང༌། སེམས་ཀྱི་ངོ་བོ་སྟོང་ཉིད་དུ་ངེས་པར་ཤེས་པ་འབྱུང་ངོ༌། །རྟགས་ཀྱིས་ཐེམས་ན་རྒྱུ་སྒྲིབ་པ་དག་པའི་རྟགས་སྐྱུགས་པ་དང༌། འཁྲུ་བ་དང༌། ལུས་ལས་རྣག་ཁྲག་ལ་སོགས་པ་ཟགས་ཤིང༌། སེམས་ཅན་ཐོན་པ་དང༌། གོས་གསར་པ་གོན་པ་དང༌། ཆུ་ཆེན་པོ་རྒྱུན་ལས་བརྒལ་ཞིང་ཁྲུས་བྱེད་པ་ལ་སོགས་པ་འབྱུང་ཞིང༌། ལམ་རླུང་ལྔ་ཟིན་པའི་རྟགས་ལ་མེའི་རླུང་ཟིན་པའི་རྟགས་སུ་དུ་བ་ལྟར་སྔོ་ནག་བུན་བུན་སྣང་བ། ཆུའི་རླུང་ཟིན་པའི་རྟགས་སུ་སྨིག་རྒྱུ་ལྟར་དཀར་སེང་སེང་དུ་སྣང་བ། རླུང་གི་རླུང་ཟིན་པའི་རྟགས་སུ་སྲིན་བུ་མེ་ཁྱེར་ལྟར་དམར་ཙིག་ཙིག་སྣང་བ། སའི་རླུང་ཟིན་པས་མར་མེ་ལྟར་དམར་ཏ་ལ་ལ་སྣང་བ། ནམ་མཁའི་རླུང་ཟིན་པས་ནམ་མཁའ་ལྟར་ཅི་ལ་ཡང་ཐོགས་པ་མེད་པར་མཐོང་བ་དང༌། འབྲས་བུ་དག་སྣང་ཤར་བའི་རྟགས་ནི། སྐུ་གསུང་ཐུགས་ཀྱི་རྟེན་མཐོང་བ་དང༌། ཉི་ཟླ་རང་ལ་ཤར་བ་དང༌། ནམ་མཁའ་ལ་འཕུར་བ་ལ་སོགས་པ་དག་སྣང་འདིར་ཕལ་ཆེར་རྨི་ལམ་དུ་འབྱུང་ངོ༌། །ཡོན་ཏན་གྱིས་ཐེམས་ན། ཡོངས་སུ་གྲགས་པའི་རྟགས་ཚོགས་ལམ་གྱི་ཡོན་ཏན་གསོ་སླ་ཞིང་དགང་སླ་བ་ལ་སོགས་པ་འབྱུང་ངོ༌། །གྲངས་ཀྱིས་ཐེམས་ན་བྱེ་བ་ཕྲག་བཅུ། དུས་ཟླ་བ་དྲུག་གིས་ཏེ། གསང་བ་བསམ་གྱིས་མི་ཁྱབ་པ་ལས། གསང་བའི་སྙིང་པོ་བླ་མ་སྒྲུབ་པའི་སྔགས། །ས་ཡ་གཅིག་གིས་རིག་འཛིན་ས་ལ་སྐྱེལ༑ ༑ཞེས་སོ། །སྤྱིར་ནི་ངོ་བོས་ཐེམས་ན་ཚེ་འདི་ཉིད་དུ། རྟགས་ཀྱིས་འཆི་ཁར། གྲངས་ཀྱིས་བར་དོར། ཡོན་ཏན་གྱིས་སྐྱེ་བ་བརྒྱུད་ནས་འབྱུང་བ་བླ་མའི་གསུང་ངོ༌། །ཚོགས་ལམ་བློ་སྦྱོང་གི་ལམ་ཁྲིད་དོ། །གཉིས་པ་སྦྱོར་ལམ་གཅོད་པར་བྱེད་པ་དཀའ་ཐུབ་ཀྱི་ཁྲིད་ལའང་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་ལེན་ཚུལ། རྗེས་བསླབ་པར་བྱ་བའི་ཆོས་ཚར་ཚད་དང་བཅས་པ་ལས། དང་པོ་སྦྱོར་བ་སྐྱབས་འགྲོ་སེམས་བསྐྱེད་ནི། སྔར་དང་འདྲ་མོད་ཀྱི། ཁྱད་པར་དུ་བླ་མ་ལོངས་སྤྱོད་རྫོགས་པའི་སྐུར་བསྒྲུབ་པའི་དུས་ཡིན་པས་རྟེན་རྒྱས་བསྡུས་གང་རུང་དུ་བསྐྱེད་དེ་ལོངས་སྐུ་དག་པའི་མཚན་དཔེ་བྱད་དང༌། རྒྱན་དང་ཆ་ལུགས་ཕུན་སུམ་ཚོགས་པ་འབའ་ཞིག་ཏུ་བསམ་མོ། །དངོས་གཞི་རྒྱུད་ལ་བསྐུར་ལུགས་ལ་བཞི་ལས། དང་པོ་གྲགས་པ་སྒྲའི་བརྗོད་ཚུལ་ཡི་གེའི་ལམ་ཁྱེར་ནི། ཨཱ་ལི་ཀཱ་ལི་རྣམས་ལན་བཞིར་བརྗོད་པའི་དང་པོས་གཟུགས་སུ་སྣང་ཚད་ཀུན་ཡི་དམ་གྱི་ལྷའི་སྐུ་རིགས་ལྔའི་རྣམ་པ། གཉིས་པས་སྒྲ་གྲགས་ཚད་ཐམས་ཅད་གསང་སྔགས་ཀྱི་སྒྲ་དང་སྙིང་པོ། གསུམ་པས་ཡིད་ལ་གང་འགྱུ་ཡང་མངོན་ཤེས་དང་ཡེ་ཤེས། བཞི་པས་སྔར་དང་མཚུངས་ ཐམས་ཅད་ཆོས་ཉིད་སྟོང་པའི་རང་རྩལ་དུ་ཤེས་པར་བྱའོ། །སོ། །དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ནི། སྤྱི་བོ་བདེ་ཆེན་གྱི་འཁོར་ལོའི་དབུས་ཀྱི་བླ་མའི་སྐུའི་ས་བོན་འོད་དུ་ཞུ་བ་ལས། བཅོམ་ལྡན་འདས་རྣམ་སྣང་སྐུ་མདོག་དཀར་པོ་བྱང་ཆུབ་མཆོག་གི་ཕྱག་རྒྱ་ཅན། ཡུམ་སངས་རྒྱས་སྤྱན་མ་དང་ཞལ་སྦྱོར་དུ་བཞུགས་པ། མགྲིན་པ་ལོངས་སྤྱོད་ཀྱི་འཁོར་ལོའི་བླ་མའི་གསུང་གི་ས་བོན་འོད་དུ་ཞུ་བ་ལས། བཅོམ་ལྡན་འདས་འོད་དཔག་མེད་དམར་པོ་ཏིང་ངེ་འཛིན་གྱི་ཕྱག་རྒྱ་ཅན། གོས་དཀར་མོ་དང་ཞལ་སྦྱོར་དུ་བཞུགས་པ། སྙིང་ག་ཆོས་ཀྱི་འཁོར་ལོའི་བླ་མའི་ཐུགས་ཀྱི་ས་བོན་འོད་དུ་ཞུ་བ་ལས༑ མི་བསྐྱོད་པ་སྔོན་པོ་ས་གནོན་གྱི་ཕྱག་རྒྱ་ཅན། རྡོ་རྗེ་དབྱིངས་མ་དང་ཞལ་སྦྱོར་དུ་བཞུགས་པ། ལྟེ་བ་སྤྲུལ་པའི་འཁོར་ལོའི་བླ་མའི་ཡོན་ཏན་གྱི་ས་བོན་འོད་དུ་ཞུ་བ་ལས། རིན་ཆེན་འབྱུང་ལྡན་སེར་པོ་སྐྱབས་སྦྱིན་གྱི་ཕྱག་རྒྱ་ཅན། མཱ་མ་ཀཱི་དང་ཞལ་སྦྱོར་དུ་བཞུགས་པར་བསམ་པ་བྱ་སྟེ། ཀུན་ཀྱང་ཞལ་གཅིག་ཕྱག་གཉིས་པ་ཚོན་གང་བ། དར་སྣ་ཚོགས་པའི་སྟོད་གཡོགས། སྨད་དཀྲིས། སྐེ་རགས། གསང་གོས། ཟེའུ་ལྡིང༌། རིན་པོ་ཆེ་སྣ་ཚོགས་པའི་སྲོག་ཞུ། ཟེའུ་ཁ། དཔུང་རྒྱན། རྣ་ཆ། མགུར་ཆུ། དོ་ཤལ། གདུ་བུ། སེ་མོ་དོ་སྟེ་རྒྱན་ཆ་བཅུ་གསུམ་གྱིས་བརྒྱན་པ། པདྨ་དང་ཟླ་བའི་གདན་ལ་རྡོ་རྗེའི་སྐྱིལ་ཀྲུང་གིས་བཞུགས་པའོ། །དེ་དག་ལ་དབང་བཞི་བླང་བ་དམིགས་པའི་ཁྱད་པར་ཡང་འདི་མན་ཆད་ཀུན་ལ་མཚུངས་སོ། །རྩ་བ་ངོ་སྤྲོད་ཀྱི་ཁྱད་པར་མཉམ་རྗེས་གཉིས་ཀྱི་ལམ་ཁྱེར་ལ། དེའང་ལུས་ཆོས་དྲུག །ངག་འོག་རླུང་འཐེན་སྟེང་རླུང་མནན་ཏེ་དབུགས་ཀྱི་འགྱུ་བ་བཅད་ལ། སེམས་རང་བཞིན་སྣ་ཚོགས་སུ་གསལ་བ་ལ་རྩལ་སྦྱང་བའི་ཕྱིར། ཕྲ་རགས་ཕྱི་རྟོག་པ་སྣ་ཚོགས་ལ་སྤྱན་ལྔས་བལྟ་བར་བྱ་སྟེ། དེད་དཔོན་རིན་ཆེན་སྙིང་པའི་ཞལ་ནས། འགྱུ་བའི་འཕྲང་བཙན་ཐབས་སུ་བཅད་པས། རླུང་སེམས་གཉུག་མའི་གནད་འོད་གསལ་ལ་འཆིང་བར་བྱེད་སྤྱན་ལྔའི་ལྟ་སྟངས་ཀྱི་གནད་འདི་ལྟར་རོ། །ཞེས་བསྟན་ཏོ། །དེ་ཡང་རྟོག་པ་འགྱུ་བ་ཚོར་མི་ཚོར་དེ་ལ་རྩ་སྦལ་ལྟ་བུའི་སྤྱན་གྱིས་བཙུམས་ལ་བལྟ་སྟེ། རླུང་དང་རྟོག་པ་འགྲོ་འོང་བཅད་ལ་ཆུན་བདོ་ལ་ཕཊ་ཅེས་པས་ཤིགས་ཀྱིས་བཤིགས་པའི་རྗེས་ལ་བློ་བྲལ་དུ་ཁྲེས་སེ་བཞག་གོ །རྟོག་པ་བྱུང་ཚོར་ཙམ་ལ་མགྲོན་བུ་ལྟ་བུའི་སྤྱན་བག་ཙམ་བཙུམས་ལ་ཟིམ་མེ་བལྟ། ཐ་མལ་གྱི་རྣམ་རྟོག་རང་གར་འགྱུ་བ་ལ་ཟླ་བ་ཚེས་པ་ལྟ་བུའི་སྤྱན་ཅུང་ཟད་ཕྱེ་ལ་བལྟ། རྟོག་པ་ཅུང་ཟད་རགས་པ་ལ་མཁལ་མ་ལྟ་བུའི་སྤྱན་གྱིས་ཅུང་ཟད་དཔང་བསྟོད་ལ་བལྟ། ཉོན་མོངས་པ་རྟོག་པ་གཉེན་པོ་མེད་པར་སྐྱེས་པ་རང་བཞིན་དུ་རགས་པར་འགྱུ་བ་ལ་ཟླ་བ་ཉ་རྒྱས་པ་ལྟ་བུའི་སྤྱན་གྱིས་བར་སྣང་ལ་བགྲད་པར་བལྟ་སྟེ། ཆུན་བདོ་ལ་བཤིག་ཅིང་རྗེས་བློ་དང་བྲལ་བ་ནི་ཀུན་ལ་ཤེས་པར་བྱའོ། །ཀུན་གྱི་རྗེས་སྤྱོད་ལམ་གྱི་དུས་ཐམས་ཅད་དུ་གཟུགས་རྣམས་སྒྱུ་མ། སྒྲ་རྣམས་བྲག་ཆ། དྲན་རྟོག་རྣམས་རྗེས་མེད་དེ་དྲན་སྟོང་ཆུའི་ལྦུ་བ་ལྟར་བསྐྱང་བར་བྱའོ། །རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་བསྟན་པ་ནི། ༀ་ཨཱཿ ཧྲཱིཿ གུ་རུ་སིདྡྷི་ཕ་ལ་ཧཱུྃ༔ ཞེས་པ་དྲོད་ཀྱི་ཡེ་ཤེས་བཙན་ཐབས་སུ་སྐྱེད་པར་བྱེད་པ་སྒྲུབ་པ་གནད་ཀྱི་སྙིང་པོ་འབྲུ་བཅུ་པ་སྔ་མ་ལྟར་བསམས་ལ། གསོལ་བ་མས་གདབ་ཅིང༌། བྱིན་རླབས་ཡས་ཞུ་བའི་སྒོ་ནས་བགྲང་བར་བྱའོ། །རྗེས་བསླབ་པར་བྱ་བའི་ཆོས་བོ་ཟགས་ལྟེམས་ལོག་ལམ་གྱི་དྲི་མ་སྲུང་ལུགས་ནི། དཀའ་ཐུབ་པས་གཞན་དོན་སྔས་ན་བོ་བའི་དྲི་མ་ཡིན་པས་དེའི་བར་དུ་ཆོས་མི་བཤད། སྲུང་བ་དང་བྱིན་རླབས་མི་བྱའོ། །བསྙེན་བཀུར་ཟོས་ན་ཟགས་པའི་དྲི་མ་ཡིན་པས་རང་གི་རྫས་གཞན་ལ་མི་སྦྱིན། གཞན་གྱི་བསྙེན་བཀུར་རང་གིས་མི་སྤྱོད། སྲུང་སྡོམ་ལྷོད་ན་ལྟེམས་པའི་དྲི་མ་ཡིན་པས་ཁྲུས་མི་བྱ། གོས་གདན་མི་སྤྲུག །སྐྲ་སེན་མི་འབྲེག །གཏོར་མ་བྱ་ཁྱི་ལ་མི་སྟེར། སྣབ་ལུད་མི་འདོར། ཕྱགས་བདར་མི་བྱ། རྒྱུད་མི་ལ་མི་བསྟན། ཁ་ཕོར་མི་བཀྲུ། ངག་གི་སྨྲ་བ་བསྡམ་མོ། །ཆོས་བརྒྱད་དྲན་ན་ལོག་པའི་དྲི་མ་ཡིན་པས་ཚེ་འདིའི་སྙན་གྲགས་རྒྱབ་ཏུ་དོར་བར་བྱའོ། །དེ་ལྟ་བུའི་སྦྱོར་ལམ་དཀའ་ཐུབ་ཚར་བའི་ཚད་ལའང༌། ངོ་བའི་ཚར་ཚད་དྲན་རྟོག་ཅི་སྐྱེས་པ་ལམ་དུ་འཁྱེར་ཤེས་པ། རྟགས་ཀྱི་ཚར་ཚད་སྔར་གྱི་རྒྱུའམ་འབྲས་བུའི་རྟགས་ཉམས་སྣང་ལ་འབྱུང་བ། ཡོན་ཏན་གྱི་ཚར་ཚད་ལུས་ཕྱི་ནང་གི་སྲོག་ཆགས་ཀྱིས་མི་འཚེ་བ་ལ་སོགས་པའོ། །གྲངས་ཀྱི་ཚར་བའི་ཚད་བྱེ་བ་ཕྲག་ལྔ་སྟེ། དུས་ཟླ་བ་གསུམ་གྱིས་སོ། །སྦྱོར་ལམ་དཀའ་ཐུབ་ཀྱི་ལམ་ཁྲིད་དོ། །གསུམ་པ་མཐོང་ལམ་གཅོད་པ་རྗེས་ཀྱི་ཁྲིད་ལའང་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་བླང་ལུགས། རྗེས་བསླབ་བྱ་ཚར་ཚད་དང་བཅས་པ་ལས། དང་པོ་སྦྱོར་བ་སྐྱབས་འགྲོ་སེམས་བསྐྱེད་དུ་མི་འདྲ་བའི་ཁྱད་པར་ལ། འདིར་བླ་མ་སྣང་སྟོང་གཉིས་མེད་རྡོ་རྗེའི་སྐུར་སྒྲུབ་པའི་དུས་ཡིན་པས་རྟེན་རྒྱས་བསྡུས་གང་རུང་དུ་བསྐྱེད་དེ། སྐུ་གཅེར་བུ་སྐུ་མདོག་མཐིང་ག་རུས་པའི་རྒྱན་དང་ལྡན་པ་འབའ་ཞིག་ཏུ་བསམ། དངོས་གཞི་རྒྱུད་ལ་བསྐུར་ལུགས་ལའང་བཞི་ལས། དང་པོ་གྲགས་པ་སྒྲའི་བརྗོད་ཚུལ་ཡི་གེའི་ལམ་ཁྱེར་ནི། ཨཱ་ལི་ཀཱ་ལི་རྣམས་ལན་བཞིར་བརྗོད་པའི་སྣང་གྲགས་དྲན་པའི་ཡུལ་ངོ་བོ་བླ་མ་ལ་རྣམ་པ་ཡི་དམ་གྱི་ལྷ་རིགས་ལྔའི་སྐུ་གསུང་ཐུགས་སུ་གསལ་བ་དེ་དག་ཀྱང་དང་པོར་སྐྱེ་བ་མེད་པ། ཐ་མར་འགག་པ་མེད་པ། བར་དུ་གནས་པ་མེད་པ། བདེན་པའི་ངོ་བོ་དངོས་པོར་གྲུབ་པ་མེད་པ་སྟེ། གཟུགས་སྣང་སྟོང༌། སྒྲ་གྲགས་སྟོང༌། ཡིད་དྲན་སྟོང༌། སེམས་བདེ་སྟོང་གཉིས་མེད་དུ་ཤེས་པར་བྱའོ། །དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་སུ། རིགས་བཞིའི་བདེ་བར་གཤེགས་པ་ཡབ་ཡུམ་རྣམས་སྔ་མ་ལྟར་སྐྱེ་མེད། འགག་མེད། གནས་མེད། དངོས་མེད་དུ་རྒྱས་གདབ་བོ། །རྩ་བ་ངོས་སྤྲོད་ཀྱི་ཁྱད་པར་མཉམ་རྗེས་རྩ་བའི་ཉམས་ལེན་དུ། ངོ་བོ་སྟོང་པ། རང་བཞིན་གསལ་བ། མཚན་ཉིད་གཉིས་སུ་མེད་པར་གྲོལ་བར་བྱ་བའི་ཕྱིར། ལྟ་སྟངས་ལྔ་བསྒྱུར་ཏེ། འཁོར་བ་དང་ངན་སོང་དུ་འཁྱམས་ཤིང་ལྟུང་བའི་དོགས་པ་བཅད་པའི་ཕྱིར་ཉན་ཐོས་ཞི་བའི་ལྟ་སྟངས་ཐད་དུ་བལྟ། ཐར་པ་མཐོ་རིས་ཐོབ་འདོད་ཀྱི་རེ་བ་བཅད་པའི་ཕྱིར་མུ་སྟེགས་ཚངས་པའི་ལྟ་སྟངས་གྱེན་དུ་བལྟ། ཞེ་སྡང་གི་ཀུན་ཏུ་རྟོག་པ་བཅད་པའི་ཕྱིར་སེམས་དཔའི་ལྟ་སྟངས་གཡས་སུ་བལྟ། འདོད་ཆགས་ཀྱི་ཀུན་ཏུ་རྟོག་པ་གཅད་པའི་ཕྱིར་སེམས་མའི་ལྟ་སྟངས་གཡོན་དུ་བལྟ། བསྒོམ་བྱ་སྒོམ་བྱེད་དུ་རྟོག་པ་ཅན་བསམ་གཏན་གྱི་འཆིང་བ་གཅད་པའི་ཕྱིར་བདེ་བར་གཤེགས་པའི་ལྟ་སྟངས་ཐད་ཀར་བསྒྱུར་བར་བྱ་སྟེ། བྲམ་ཟེ་གསེར་གྱི་སྐེ་རགས་ཅན་གྱི་ཞལ་ནས། ཤེས་རབ་གཅོད་ཐབས་ལམ་དུ་འཁྱེར་བས་གཉིས་མེད་ལམ་དུ་སློང་བར་བྱེད་པ། ཟུང་འཇུག་རྒྱུད་ལ་སྐྱེ་བར་བྱེད་པའི་གནད་དོ། །ཞེས་བསྟན་ཏོ། །དེ་དག་གི་དུས་ཐམས་ཅད་དུ་ལུས་ངག་ཡིད་ཀྱི་འཁྲུལ་འཁོར་དང༌། སེམས་སྒྲིམ་ཀློད་ཀྱི་ལམ་ཁྱེར་ཀུན་སྔར་དཀའ་ཐུབ་དང་བློ་སྦྱོང་གི་གནས་སྐབས་དང་མཚུངས་སོ། །རྗེས་སྤྱོད་ལམ་གྱི་དུས་ཐམས་ཅད་དུ་གཟུགས་སྣང་ཚད་ཡང་དག་པར་མ་གྲུབ་སྟེ། རང་བཞིན་གྱིས་སྟོང་ཞིང༌། དེ་གནས་སྐབས་རྟེན་འབྲེལ་གྱི་སྣང་བ་མ་འགགས་པར་གཟུགས་སུ་སྣང་ལ། སྣང་ཙམ་ཉིད་ན་ངོ་བོ་སྟོང་པ་ཉིད་ལས་མ་གཡོས་པས་གཟུགས་སྟོང་པ་ལས་གཞན་མ་ཡིན་ཞིང༌། ངོ་བོ་སྟོང་པ་ཉིད་ལས་མ་གཡོས་པ་བཞིན་རྩལ་གཟུགས་སུ་མ་འགགས་པར་སྣང་བས་སྟོང་པ་ཉིད་ལས་གཟུགས་གཞན་དུ་མ་ཡིན་ཏེ། དེ་ལྟ་བུ་མཚན་ཉིད་བཞི་ལྡན་དུ་ཚོར་བ་ནས་རྣམ་མཁྱེན་གྱི་བར་དུ་ཤེས་པར་བྱའོ། །རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་ནི༑ ༀ་ཨཱཿ ཧྲཱིཿ གུ་རུ་ཛི་ན་མི་ཏྲི་ཧཱུྃ། ཞེས་པ་རྣམ་པར་མི་རྟོག་པའི་ཡེ་ཤེས་ཅིག་ཅར་དུ་སྐྱེ་བར་བྱེད་པ་རྟོག་པ་རྗེས་ཀྱི་སྙིང་པོ་འབྲུ་བཅུ་པ་འདི། སྔ་མ་ལྟར་གསོལ་བ་མས་གདབ་ཅིང་བྱིན་རླབས་ཡས་ཞུ་བའི་སྒོ་ནས་བགྲང་བར་བྱའོ། །མཇུག་བསླབ་པར་བྱ་བའི་ཆོས་བོ་ཟགས་ལྟེམས་ལོག་ལམ་གྱི་དྲི་མ་སྲུང་ལུགས་ནི། རྗེས་ཀྱི་དུས་འདིར་གཞི་ལ་གཡའ་ཆག་ན་གཞི་ཐོག་ཏུ་བོ་བའི་དྲི་མ་ཡིན་པས་སོ་མའི་མལ་བརྗེ། གཉེན་པོའི་བྱ་ར་བ་མ་འགྱེལ་ན་ཉམས་ཐོག་ཏུ་ཟགས་པའི་དྲི་མ་ཡིན་པས་ཉམས་མྱོང་གཞི་ཐོག་ཏུ་བཞག །རང་ལྟ་ལ་མཆོག་ཏུ་བཟུང་ན་གོ་ཐོག་ཏུ་ལྟེམས་པའི་དྲི་མ་ཡིན་པས་ཡང་དག་པའི་དོན་ལ་འདི་ཡིན་གྱི་ཡུས་མི་བཟུང༌། གྲུབ་མཐའི་འདོད་པ་མ་ཞིག་ན་ཚིག་ཐོག་ཏུ་ལོག་པའི་དྲི་མ་ཡིན་པས་གང་དུའང་ཁས་མི་བླང་ངོ༌། །དེ་ལྟ་བུའི་མཐོང་ལམ་རྗེས་ཚར་བའི་ཚད་ལའང་ངོ་བོས་ཚར་ན་མཚན་ཉིད་བློ་བྲལ་གྱི་རྟོགས་པ་ཡང་དག་པར་སྐྱེ། རྟགས་ཀྱིས་ཚར་ན་རྒྱུ་ལམ་འབྲས་བུའི་རྟགས་རྣམས་མངོན་སུམ་དུ་འཆར། ཡོན་ཏན་གྱིས་ཚར་ན་སངས་རྒྱས་བརྒྱའི་ཞལ་མཐོང་ཞིང༌། ཞིང་ཁམས་བརྒྱ་གཡོ་བར་ནུས་པ་ལ་སོགས་པ་འབྱུང་ངོ༌། །གྲངས་ཀྱིས་ཚར་ན་བྱེ་བ་ཕྲག་ཕྱེད་དང་གསུམ། དུས་ཟླ་བ་ཕྱེད་གསུམ་གྱིས་སོ། །མཐོང་ལམ་རྗེས་ཀྱི་ལམ་ཁྲིད་དོ། །བཞི་པ་སྒོམ་ལམ་གཅོད་པར་བྱེད་པ་རོ་སྙོམས་ཀྱི་ཁྲིད་ལ་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་བླང་ལུགས། རྗེས་བསླབ་བྱ་ཚར་ཚད་བཅས་པའོ། །དང་པོ་སྦྱོར་བ་སྐྱབས་འགྲོ་སེམས་བསྐྱེད་དུ་མི་འདྲ་བའི་ཁྱད་པར་ལ། འདིར་བླ་མ་བདེ་བ་ཆེན་པོ་མཉམ་པ་ཉིད་ཀྱི་སྐུར་སྒྲུབ་པའི་དུས་ཡིན་པས་སྐུ་དང་ཆ་ལུགས་ལ་ངེས་པ་མེད་དེ་གང་བདེའོ། །དངོས་གཞི་རྒྱུད་ལ་བསྐུར་ལུགས་ལ་བཞི་ལས། དང་པོ་གྲགས་པ་སྒྲའི་བརྗོད་ཚུལ་ཡི་གེའི་ལམ་ཁྱེར་ནི། ཨཱ་ལི་ཀཱ་ལི་རྣམས་ལན་བཞིར་མས་བཟློག་ཏུ་བརྗོད་པས༑ སྣང་གྲགས་དྲན་པའི་ཆོས་རྣམས་བླ་མའི་སྐུ་གསུང་ཐུགས་དང་ཐ་མལ་གྱི་ལུས་ངག་ཡིད་གསུམ་སྣང་བ་ལ་ཁྱད་པར་ཅུང་ཟད་ཀྱང་མེད་དེ། སྣང་སྟོང་གྲགས་སྟོང་བདེ་སྟོང་གཉིས་སུ་འཛིན་པ་ཙམ་དུའང་མི་བྱའོ། ། དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ཀྱང༌། གནས་འཁོར་ལོ་བཞིའི་བདེ་བར་གཤེགས་པ་རྣམས་ཐིམ་མ་ངེས་པར་གསལ་གདབ་ཅིང༌། དབང་ཡང་གོ་རིམ་མ་ངེས་པར་བླང་ངོ༌། །རྩ་བ་ངོས་སྤྲོད་ཀྱི་ཁྱད་པར་མཉམ་རྗེས་ཀྱི་ལག་ལེན་དུའང༌། སྔར་གྱི་མཚན་ཉིད་གཉིས་མེད་བློ་བྲལ་གྱི་རྟོགས་པ་ཕྱིན་ཅི་མ་ལོག་པ་དེ། སྤྱོད་ལམ་གྱི་དུས་དང༌། བདེ་སྡུག་གི་རྐྱེན་གང་ལའང་ཁྱད་མེད་དུ་བསྲེ་ཞིང་ཆུ་བོ་རྒྱུན་གྱི་རྣལ་འབྱོར་དུ་བྱེད་པ་སྟེ། བདག་ཉིད་ཆེན་པོ་ཀ་མ་ལ་ཤྲཱི་བཛྲའི་ཞལ་ནས། ལམ་ལ་གང་ཕན་གྲོགས་སུ་བསྟེན་པས་ཨ་འཐས་ཀྱི་དངོས་འཛིན་འཇིག་པར་བྱེད། གྲལ་རིམ་སྒྱེལ་བ་རྒྱ་ཡན་གྱི་གནད་ཡིན་ནོ། །ཞེས་བསྟན་ཏོ༑ ༑དེའང་རྩ་བའི་སྤྱོད་ལམ་བཞི། ཡན་ལག་གི་སྤྱོད་ལམ་ཉི་ཤུར་ཕྱེ་ལ་ཉམས་སུ་བླང་བར་བྱ་སྟེ། དེའང་འདུག་པའི་སྤྱོད་ལམ་ལྔ་བསྟན་པ་ནི། རྟེན་འབྲེལ་གསུམ་དག་པའི་རྡོ་རྗེའི་སྐྱིལ་ཀྲུང༌། ཕྱེད་སྐྱིལ། ཙོག་པུ། བསྙེས་པ༑ རྒྱལ་པོ་རོལ་པའི་འདུག་སྟངས་སོ། །འགྲོ་བའི་ལྔ་ནི། འགྲོ་བ། འགྲོ་འཕྲོ་ལ་འཆམས་པ། རྒྱུག་པ། རྒྱུག་འཕྲོ་ལ་འཆམས་པ། ངལ་བསོ་བའོ། །ལངས་པའི་ལྔ་ནི། ལངས་ཀ །ཕྱེད་ལངས། ལངས་པ། གོས་ཚགས་བྱེད་པ། གོམ་པ་འདོར་བའོ། །ཉལ་བའི་ལྔ་ནི། གཡས་ཉལ། གཡོན་ཉལ། གན་རྐྱལ། ཁ་སྦུབ། མགོ་བཏུམ། བརླ་བཏུམ་པའོ། །དེ་དག་ཉི་ཤུ་པོ་རེ་རེ་ལའང་འོག་རླུང་དང་སྟེང་རླུང་མནན་ཏེ། དབུགས་དྲག་ཏུ་བསྡམ་ཞིང་ཆུན་བདོ་ལ་བཤིག་ཅིང༌། བཤིགས་པའི་རྗེས་ལ་སེམས་གང་དུའང་མ་བཅོས་པར་ཀློད་དེ། ཁྲེས་སེ་རྟོག་མེད་རང་ངང་དུ་རྗེན་ནེ་བཞག་གོ །ལར་ན་སྤྱོད་ལམ་གྱི་དུས་ཐམས་ཅད་དུ་རྩ་བའི་ཉམས་མྱོང་དང་མ་བྲལ་བ། བདེ་སྡུག་གི་རྐྱེན་གང་ལའང་རིག་པ་ཐོག་རྡུགས་མེད་པ་ཕྱལ་ཕྱལ་བ། ཡེད་ཡེད་པ། བུན་ལོང་ལོང་བར་ལམ་དུ་འཁྱེར་ཞིང་བསྐྱང་བར་བྱ་སྟེ། བྲམ་ཟེ་ཡེ་ཤེས་སྙིང་པོའི་ཞལ་ནས། རིག་པ་སིང་ཡེར་གྱིས་ཧྲིག་བཏོན་པས། རྣོ་ངར་གྱི་རྩི་ཆགས་པར་བྱེད་པ་བྱིང་རྨུགས་ཀྱི་གདན་འཇིག་པའི་གནད་ཡིན་ནོ། །ཞེས་བསྟན་ཏོ། །གཞན་ཡང་རྗེས་སྤྱོད་ལམ་གྱི་དུས་ཐམས་ཅད་དུ་ཕར་ཕྱིན་ནས་གསུངས་པའི་རྣམ་དག་ཆེན་པོའི་འགྲེས་རྐང་བཞིན་དུ་ཤེས་པར་བྱ་སྟེ། ཆོས་ཐམས་ཅད་རང་བཞིན་གྱིས་རྣམ་པར་དག་པས་གཟུགས་རྣམ་པར་དག་པ། གཟུགས་རྣམ་པར་དག་པས་བདག་རྣམ་པར་དག་པ་སྟེ། དེ་ལྟར་ན་གཟུགས་རྣམ་པར་དག་པ་དང༌༑ བདག་རྣམ་པར་དག་པ་དང༌། ཆོས་ཐམས་ཅད་རང་བཞིན་གྱིས་རྣམ་པར་དག་པ་འདི་ལ་གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ། །དེ་བཞིན་དུ་ཚོར་བ་ནས་རྣམ་མཁྱེན་གྱི་བར་རོ། །ཞེས་གྲགས་པའི་སྒྲ་དང༌༑ དྲན་པའི་སེམས་ལའང་མཐུན་པར་སྦྱར་རོ། །རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་ནི། ༀ་ཨཱཿ ཧྲཱིཿ གུ་རུ་པྲ་མ་ཎ་ཡེ་ཧཱུྃ། ཞེས་པ་རོ་སྙོམས་ཆེན་པོའི་རྟོགས་པ་རྒྱུད་ལ་སྐྱེ་བར་བྱེད་པའི་སྙིང་པོ་འབྲུ་བཅུ་པ་འདིས་སྔ་ལྟར་གསོལ་བ་མས་གདབ་ཅིང༌། བྱིན་རླབས་ཡས་ཞུ་བའི་ཚུལ་གྱིས་བགྲང་བར་བྱའོ། །རྗེས་བསླབ་པར་བྱ་བའི་ཆོས་བོ་ཟགས་ལྟེམས་ལོག་ལམ་གྱི་དྲི་མ་བསྲུང་བ་ནི། རོ་སྙོམས་ཀྱི་དུས་འདིར་བདག་གི་ཁ་འཛིན་མ་ཐེངས་ན་རང་ཐོག་ཏུ་བོ་བའི་དྲི་མ། འཁོན་འཛིན་རྒྱུད་ལ་བརྟེན་ན་གཞན་ཐོག་ཏུ་ཟགས་པའི་དྲི་མ། གཉིས་སྣང་གི་མཐའ་མ་གྲོལ་ན་གོ་ཐོག་ཏུ་ལྟེམས་པའི་དྲི་མ། ཟགས་པའི་འཕན་ལངས་ན་འཁྲུལ་ཐོག་ཏུ་ལོག་པའི་དྲི་མ་ཡིན་པས་ལེགས་པར་བསྲུང་ངོ༌། །དེ་ལྟ་བུའི་སྒོམ་ལམ་རོ་སྙོམས་ཚར་ཚད་ཀྱང༌། ངོ་བོས་ཚར་ན་ཡུལ་ལ་སྤང་བླང་མེད་པར་སྤྱོད་ལམ་ལ་ཁྱད་པར་མེད་ཅིང་མཚན་ཉིད་བློ་བྲལ་གྱི་རྟོགས་པ་ཆུ་བོ་རྒྱུན་གྱི་རྣལ་འབྱོར་དུ་འགྱུར་རོ། །རྟགས་ཀྱིས་ཚར་ན་རྒྱུ་ལམ་འབྲས་བུའི་རྟགས་རྣམས་སྔར་བས་མང་པོར་འཕེལ་ཞིང་གསལ་ལ་བརྟན་པར་འགྱུར། ཡོན་ཏན་གྱིས་ཚར་ན་སྔར་མཐོང་ལམ་གྱི་ཡོན་ཏན་ལས་མང་པོར་འཕེལ། གྲངས་ཀྱིས་ཚར་ན་འབུམ་ཚོ་བཅུ་གསུམ། དུས་ཟླ་བ་གཅིག་གོ །སྒོམ་ལམ་རོ་སྙོམས་ཀྱི་ལམ་ཁྲིད་དོ། །ལྔ་པ་མཐར་ལམ་བྱ་བྲལ་གྱི་ཁྲིད་ལ་གསུམ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་བླང་ལུགས། རྗེས་བསླབ་བྱ་ཚར་ཚད་དང་བཅས་པའོ། །དང་པོ་སྦྱོར་བ་སྐྱབས་འགྲོ་སོགས་སྔར་དང་འདྲ་བ་ལས། ཁྱད་པར་ནི། འདིར་བླ་མ་སྤྲུལ་པའི་སྐུར་སྒྲུབ་པའི་དུས་ཡིན་པས། མཆོག་གི་སྤྲུལ་པ་དགེ་སྦྱོང་གི་ཆ་ལུགས་ཅན་ནོ། །དངོས་གཞི་ཉམས་སུ་བླང་ལུགས་ལ་བཞི་ལས། དང་པོ་གྲགས་པ་སྒྲའི་བརྗོད་ཚུལ་ཡི་གེའི་ལམ་ཁྱེར་ནི། ཡི་གེ་རྣམས་ཨ་འབའ་ཞིག་ཏུ་མས་རིམ་ནས་ལན་བཞིར་བརྗོད་པས། སྣང་གྲགས་དྲན་པའི་ཆོས་རྣམས་རང་སྣང་ལ་སྣང་བ་མེད་པ་ནམ་མཁའ་ལ་སྤྲིན་དེངས་པའམ། རྒྱ་མཚོ་ལ་འཁྱག་པ་ཞུ་བ་ལྟར་གྱུར། གཞན་སྣང་ལ་སངས་རྒྱས་སྤྲུལ་པའི་སྐུ་སྐུ་གསུང་ཐུགས་སྣ་ཚོགས་སུ་སྣང་བས་ཕྲིན་ལས་རྒྱུན་མི་འཆད་པར་བསམ་མོ། །དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ནི། བདེ་ཆེན་འཁོར་ལོའི་རྣམ་སྣང་བྱང་ཆུབ་སེམས་ཀྱི་རང་བཞིན་དུ་ཞུ་ནས་ཡུམ་ལ་ཐིམ་སྟེ། ཡུམ་ཉིད་གཞན་དོན་ཕྲིན་ལས་རྗེས་སུ་སྒྲུབ་པའི་ཡན་ལག་སངས་རྒྱས་མཁའ་འགྲོ་དཀར་མོ་ཕྱག་ན་འཁོར་ལོ་དང་ཐོད་ཁྲག་བསྣམས་པར་གྱུར་ཏེ་གཞན་སྣང་ཟིལ་གྱིས་གནོན། ལོངས་སྤྱོད་འཁོར་ལའི་འོད་དཔག་མེད་ཀྱང་སྔར་བཞིན་འོད་དུ་ཞུ་ནས་ཡུམ་ལ་ཐིམ་སྟེ། ཡུམ་ཉིད་སྔ་མའི་ཡན་ལག་ལྟར་པདྨ་མཁའ་འགྲོ་དམར་མོ་པདྨ་དང་ཐོད་ཁྲག་བསྣམས་པར་གྱུར་ཏེ། གཞན་སྣང་བདག་གིས་དབང་དུ་འདུས། ཆོས་ཀྱི་འཁོར་ལོའི་མི་བསྐྱོད་པ་སྔར་བཞིན་འོད་དུ་ཞུ་ནས་ཡུམ་ལ་ཐིམ་སྟེ། ཡུམ་ཉིད་སྔ་མའི་ཡན་ལག་རྡོ་རྗེ་མཁའ་འགྲོ་སྔོན་མོ་རྡོ་རྗེ་དང་ཐོད་ཁྲག་བསྣམས་པར་གྱུར་ཏེ། དབང་དུ་འདུས་པའི་གདུལ་བྱ་བདག་ལ་དད་ཅིང་འདུན་པར་བྱས། སྤྲུལ་པའི་འཁོར་ལའི་རིན་ཆེན་འབྱུང་ལྡན་ཀྱང་སྔར་བཞིན་འོད་དུ་ཞུ་ནས་ཡུམ་ལ་ཐིམ་སྟེ། ཡུམ་ཉིད་སྔ་མའི་ཡན་ལག་རིན་ཆེན་མཁའ་འགྲོ་སེར་མོ་རིན་པོ་ཆེ་དང་ཐོད་ཁྲག་བསྣམས་པར་གྱུར་ཏེ། དད་པར་གྱུར་པ་རྣམས་ཡང་དག་པའི་ཆོས་ཀྱིས་ཚིམ་པར་བསམས་ཏེ། དེ་དག་ཀུན་ཀྱང་ཞལ་གཅིག་ཕྱག་གཉིས་ཕྱག་གཡས་པ་རྣམས་རང་རྟགས་ཀྱི་ཕྱག་མཚན་འཁོར་ལོ་ལ་སོགས་པ་ནམ་མཁར་འཕྱར་ཞིང༌། གཡོན་པ་རྣམས་ཐོད་པ་ཁྲག་གིས་བསྐང་བ་ཐུགས་ཀར་འཛིན་པ། རུས་པའི་རྒྱན་ཆ་ལྔས་བརྒྱན་ཏེ། ཞབས་གཡས་བསྐུམ་ཞིང་གཡོན་པ་རྣམས་བརྐྱངས་པའི་གར་སྟབས་ཀྱིས་བཞུགས་པའོ། །རྩ་བ་ངོས་སྤྲོད་ཀྱི་ཁྱད་པར་ནི༑ མཉམ་རྗེས་གཉིས་སུ་མེད་པར་འདྲེས་ནས། ད་ཕྱིན་ཆད་སེམས་ཅན་གྱི་དོན་ལས་མིན་པ་རང་དོན་ལ་ལྟ་རྒྱུ་མེད་དེ། མི་ལྟ། ལྟ་རེ་ཤི། ལྟ་ནའང་ང་ལ་སྡིག །ད་ཕྱིན་ཆད་སེམས་ཅན་གྱི་དོན་ལས་མིན་པ་རང་དོན་ལ་སྒོམ་རྒྱུ་མེད་དེ། མི་སྒོམ། སྒོམ་རེ་ཤི། སྒོམ་ནའང་ང་ལ་སྡིག །མི་སྤྱོད། སྤྱོད་རེ་ཤི། སྤྱོད་ནའང་ང་ལ་སྡིག །མི་སྒྲུབ། སྒྲུབ་རེ་ཤི། སྒྲུབ་ནའང་ང་ལ་སྡིག་སྙམ་དུ་རང་དོན་དུ་རང་ལ་འཁྲིས་པའི་གཉེན་པོ་ཞིག །ཞེ་མནའ་བསྐྱལ། བློ་ཐག་བཅད་ལ་གཞན་དོན་ཅི་འགྱུར་བྱ་སྟེ། བདག་ཉིད་ཆེན་པོ་རཏྣ་བཛྲའི་ཞལ་ནས། འཆིང་བའི་གྲོགས་སུ་ཆོས་མ་བཏང་བས། དེས་ལྷ་བདུད་དུ་མི་འབབ་པར་བྱེད། དེས་ནི་ཐར་ལམ་འབྲས་བུའི་གེགས་སུ་མི་འགྲོ་བའི་གནད་ཡིན་ནོ། །ཞེས་བསྟན་ཏོ། །རྗེས་གནང་ལུང་གི་ཁྱད་པར་བླ་མའི་ལུང་གི་ཐུགས་དམ་བསྐུལ་ལུགས་ནི། ༀ་ཨཱཿ ཧྲཱིཿ གུ་རུ་བྷུ་ཧཱུཾ་ཀུ་རུ་ཧཱུྃ། ཞེས་པས་གཞན་དོན་ཕུན་སུམ་ཚོགས་པ་སྒྲུབ་པའི་སྙིང་པོ་འབྲུ་བཅུ་པོ་འདི་སྔ་མ་ལྟར་བགྲང་བར་བྱའོ། །རྗེས་བསླབ་པར་བྱ་བའི་ཆོས་བོ་ཟགས་ལྟེམས་ལོག་གི་དྲི་མ་སྲུང་ལུགས་ནི། བདག་གཏོད་བྱ་བྲལ་གྱི་དུས་འདིར། འབྲས་བུའི་སྒྲུབ་བློ་མ་དག་ན་རེ་བའི་ཐོག་ཏུ་བོ་བའི་དྲི་མ། འཁོར་བ་སྤང་བྱར་མཐོང་ན་དོགས་པའི་སྟེང་དུ་ཟགས་པའི་དྲི་མ། གཉིས་འཛིན་གྱི་བློ་མ་དག་ན་བྱས་པའི་དགེ་བ་འཁྲིས་པའི་ལྟེམས་པའི་དྲི་མ། སྤྱོད་ལམ་ཐ་མལ་དུ་ཤོར་ན་གཞན་དོན་ཆོས་བརྒྱད་དུ་འཆོར་བས་ལོག་པའི་དྲི་མ་ཡིན་པས་བསྲུང་ངོ༌། །དེ་ལྟ་བུའི་མཐར་ལམ་བྱ་བྲལ་གྱི་ལམ་ཚར་བའི་ཚད་ཀྱང༌། དགེ་སྦྱོར་དྲན་པས་བཟུང་མི་དགོས་ཤིང་འབྲལ་མེད་དུ་གྱུར་ན་ངོ་བོས་ཚར་བ། རྒྱུ་ལམ་འབྲས་བུའི་རྟགས་རྣམས་ཤིན་ཏུ་གསལ་ཞིང་བརྟན་པར་གྱུར་ན་རྟགས་ཀྱིས་ཚར་བ། འབྲས་བུ་སངས་རྒྱས་ཀྱི་སའི་ཡོན་ཏན་གྱི་ཆོས་དངོས་སུ་ཐོབ་པ་ལ་རེག་པ་ནི་ཡོན་ཏན་གྱིས་ཚར་ཚད། དཔའ་ཆེན་བྱ་བྲལ་གྱི་སྙིང་པོ་འདུན་འབུམ་ཟླ་བ་ཕྱེད་ལ་བགྲང་བ་ནི་གྲངས་ཀྱིས་ཚར་ཚད་དོ། །མཐར་ལམ་བདག་གཏོད་བྱ་བྲལ་གྱི་ལམ་ཁྲིད་དོ། །གཉིས་པ་དེའང་དཀའ་ཐུབ་གསུམ་གྱི་སྲང་ནས་བཏོན་པ་ལའང་བཞི། དཔེ་གསུམ། གང་ཟག་གསུམ། དུས་གསུམ། བསྐུར་ལུགས་གསུམ་མོ། །དང་པོ་དཀའ་ཐུབ་ཀྱི་དཔེ་གསུམ་ནི། སློབ་དཔོན་ལ་ལྟོས་ཤིང་སྒྲོ་འདོགས་གཅོད་པར་བྱེད་པ་ཉན་ཐོས་ལྟ་བུའི་དཀའ་ཐུབ་དང༌། རང་གཅིག་པུར་སྒྲུབ་པ་ཉམས་སུ་ལེན་པར་བྱེད་པ་བསེ་རུ་ལྟ་བུའི་དཀའ་ཐུབ་དང༌། རང་དོན་མཐར་ཕྱིན་ནས་གཞན་དོན་ཉམས་སུ་ལེན་པ་བྱང་ཆུབ་སེམས་དཔའི་དཀའ་ཐུབ་བོ། །དེ་ལའང་དང་པོ་ནི། བླ་མའི་ཞབས་དྲུང་དུ་མོས་གུས་ཀྱིས་བླ་མ་གནད་ལ་བོར་ཏེ་ཕྱག་བཞེས་ཀྱི་ཁྲིད་ལུགས་ལེགས་པར་ཞུ་ཞིང་ཤེས་པར་བྱེད་པ། གཉིས་པ་ནི། དབེན་པའི་གནས་སུ་དག་སྣང་གིས་ཡི་དམ་ལ་ས་རྡོ་བཙུགས་ཏེ་དངོས་གྲུབ་ཚེ་འདིར་ཐོབ་པར་བྱེད་པ། གསུམ་པ་ནི། ཕྲིན་ལས་ཀྱི་རྟེན་འབྲེལ་འགྲིགས་པའི་གནས་སུ་བྱང་སེམས་ཀྱི་མཁའ་འགྲོ་མ་ལས་ལ་བཀོལ་ཏེ་གཞན་དོན་གྱི་བྱ་བ་ཡང་དག་པར་སྒྲུབ་པའོ། །གཉིས་པ་གང་ཟག་གསུམ་ནི། འཇིག་རྟེན་གྱི་བྱ་བ་སྤང་བ་རབ་ཏུ་བྱུང་བའི་ཕྱོགས། འཇིག་རྟེན་གྱི་བྱ་བ་ཀློད་དུ་མེད་པ་ཁྱིམ་པའི་ཕྱོགས། སྤྱོད་ལམ་སྦྱངས་པའི་ཡོན་ཏན་ལ་གནས་པ་ཡོ་བྱད་གསོག་འཇོག་མེད་པ་ལྡོམ་བུ་བའི་ཕྱོགས་སོ། །གསུམ་པ་དུས་གསུམ་ནི། རབ་འབྲིང་གི་དབྱེ་བས་གང་ཟག་རེ་རེ་ལའང་རིང་ཐུང་གསུམ་གསུམ་འབྱུང་སྟེ། རབ་ཏུ་བྱུང་བ་ལ་རང་རྒྱལ་ལྟ་བུའི་དཀའ་ཐུབ་རབ་ལོ་བཅུ་གཉིས། འབྲིང་ལོ་དྲུག །ཐ་མ་ལོ་གསུམ་མོ། །ཁྱིམ་པས་རབ་ཟླ་བ་གསུམ། འབྲིང་གཉིས། ཐ་མས་གཅིག་གོ །ལྡོམ་བུ་བ་ལ་རབ་ཞག་གསུམ། འབྲིང་གཉིས། ཐ་མ་ཐུན་གཅིག་གོ །བཞི་པ་དབང་བསྐུར་ལུགས་ནི། རབ་བྱུང་ལ་རྐྱང་པ་ཞེས་བྱ་སྟེ། ལམ་འོག་མ་མཐར་མ་ཕྱིན་པར་གོང་མ་ཉམས་སུ་ལེན་དུ་མི་གཞུག་པར་མཐར་ཆགས་ཀྱིས་མཐར་ཕྱིན་པར་བྱའོ། །ཁྱིམ་པ་ལ་ཁུགས་པ་ཞེས་བྱ་སྟེ། ཟླ་བ་གཅིག་ལ་སོགས་པ་ཅི་ཙམ་ལན་ཅིག་ཁོམ་པ་དེ་ལ་ལམ་ལྔ་ཆར་དུ་རྫོགས་པ་དང༌། ཡང་ཕྱི་མ་ཕྱི་མ་ཅི་ཙམ་ཁོམ་པ་ལ་སྔ་མ་དེ་ཉིད་ལ་བསྐྱར་ཏེ། ལས་མཐར་ཕྱིན་དུ་གཞུག །ལྡོམ་བུ་བ་ལ་སྦྲགས་མ་ཞེས་བྱ་སྟེ། ཞག་གཅིག་གིས་ཐུན་གཅིག་ཉིད་ལ་ལམ་ལྔ་ཀར་རྫོགས་པ་རེ་ཉམས་སུ་ལོང་ཞིག་པར་བསྐུར་བས༑ གང་ཟག་ཕྱོགས་གསུམ་ཀ་ཕྱིས་སྒྲུབ་པའི་དམ་བཅའ་མ་ཉམས་པར་མཐར་ཕྱིན་པར་འགྱུར་བ་ཡིན་ཏེ། དྲང་སྲོང་བདེ་བའི་གོ་ཆའི་ཞལ་ནས། དཀའ་ཐུབ་ཀྱི་སྲང་ན་རིམ་གསུམ་དུ་ཕྱེ་བས་སྒྲུབ་པ་བོ་ཟག་ལ་མི་འགྲོ་བར་བྱེད། དྲི་མ་ངོས་འཛིན་སྲུང་སྡོམ་གྱི་གནད་ཟུང་ཞིག །ཅེས་བསྟན་ཏོ། །གསུམ་པ་བྱ་བྲལ་འབྲས་བུའི་རྣལ་འབྱོར་ནི། དེ་ཡང་རང་གཞན་གྱི་དོན་ཕུན་སུམ་ཚོགས་པ་སྐུ་བཞིའི་ཕྲིན་ལས་དང་བཅས་པ་རབ་ཀྱིས་ཚེ་འདི་ཉིད་དུ། འབྲིང་གིས་འཆི་ཁ་བར་དོ། ཐ་མས་ཀྱང་བར་དོ་ལས་མི་འགྱང་བར་ཐོབ་པར་འགྱུར་ཏེ། དེ་ཡང་ངོ་བོས་ཐེམས་ན་ཚེ་འདི་ཉིད་དུ། རྟགས་ཀྱིས་ཐེམས་ན་འཆི་ཁར། གྲངས་ཀྱིས་ཐེམས་ན་བར་དོ་ལ་ངེས་པར་འགྲུབ་བོ། །ཡོན་ཏན་གྱིས་སྐྱེ་བ་བརྒྱུད་ནས་འབྱུང་ངོ༌། །བླ་མས་སྔོན་ཆད་སྨིན་ལམ་དབང་གི་ཕྱོགས། །གཙོར་མཛད་ཕྱག་ལེན་གསལ་བར་བྲིས་མོད་ཀྱི། །གང་ཞིག་རྨོངས་པས་གྲོལ་ལམ་འཇུག་ཚུལ་དག །མི་ཤེས་བཞིན་དུ་ཉམས་ལེན་བྱེད་པ་མཐོང༌། །དེ་ལ་བརྩེ་ཞིང་ཕན་པའི་དོན་དུ་ནི། །ལམ་ཁྲིད་ཡི་གེ་འདི་བྱས་བརྒྱ་ལམ་ན། །དཔལ་ལྡན་བཀའ་སྲུང་མཁའ་འགྲོ་མང་པོ་དག །མ་མཉེས་གྱུར་ན་བཟོད་མཛོད་རྗེས་གཟུང་གསོལ། །ལེགས་པར་བཤད་ལས་བྱུང་བའི་དགེ་བས་མཁའ་ཁྱབ་ཡིད་ཅན་རྒྱ་མཚོ་ཀུན། །སྡུག་བསྔལ་གསུམ་གྱི་སྡུག་བསྔལ་རབ་ཞི་སྣང་གསུམ་འཕོ་ཆགས་སེལ་བ་དང༌། །མཐའ་ཡས་གྲོལ་བ་གསུམ་གྱི་དཔལ་ཐོབ་སྒྲིབ་པ་ཀུན་ལས་རྣམ་པར་གྲོལ། །མཁའ་ལྟར་མཉམ་པ་ཉིད་ལ་གནས་བཞིན་དོན་གཉིས་ལྷུན་གྱིས་གྲུབ་པར་ཤོག །ལམ་ལྔའི་ཁྲིད་ཀྱི་གདམས་པ་དྲི་མེད་སྣང་བ་ཞེས་བྱ་བ། རྡོ་རྗེ་འཛིན་པའི་རྣལ་འབྱོར་པ་ཇོ་སྲས་བསོད་ནམས་དཔལ་གྱིས་བྲིས་པའོ། །ཡི་གེ་འདིས་འགྲོ་བ་རྣམས་སྡུག་བསྔལ་གྱི་རྒྱ་མཚོ་ལས་སྒྲོལ་བའི་གྲུ་དང་གཟིངས་སུ་གྱུར་ཅིག །ཐར་པའི་ལམ་མ་ནོར་བར་བགྲོད་པའི་ཐེམ་སྐས་སུ་གྱུར་ཅིག །སངས་རྒྱས་ཀྱི་དགོངས་པ་གསལ་བར་བྱེད་པའི་སྒྲོན་མེར་གྱུར་ཅིག །སྒྲུབ་བརྒྱུད་བསྟན་པའི་རྒྱལ་མཚན་འཛུགས་པའི་སྲོག་ཤིང་དུ་གྱུར་ཅིག །དགོས་འདོད་ཐམས་ཅད་འབྱུང་བའི་ནོར་བུ་རིན་པོ་ཆེར་གྱུར་ཅིག །ཅེས་པ་འདི་ནི་སྙེ་མདོ་བ་ཐམས་ཅད་མཁྱེན་པ་བསོད་ནམས་དཔལ་ཞེས་མཁས་པ་དང་གྲུབ་པའི་ཅོད་པན་གྱི་གཙུག་ན་ཞབས་བསྟེན་གྱི་པདྨོ་ངལ་འཚོ་བ་དེ་ཉིད་ཀྱིས་མཛད་པའི་ལེགས་བཤད་རྨད་དུ་བྱུང་བར་མཐོང་ནས་རིས་མེད་པའི་བསྟན་པ་ཀུན་ལ་དག་པའི་སྣང་བ་དང་བློ་གྲོས་ཀྱི་པདྨོ་ཁ་ཡོངས་སུ་བྱེ་བ་ཤཱཀྱའི་དགེ་སློང་རྡོ་རྗེ་འཛིན་པ་མཉྫུ་གྷོ་ཥས་གོང་གཤོམ་གྱི་ཚིགས་བཅད་གསར་བསྣན་དང་བཅས་ཏེ་ལུང་གི་རྒྱུན་སྤེལ་བའི་དགེ་བས་གྲུབ་པའི་ལམ་བཟང་འདི་ཉིད་བསྐལ་པ་རྒྱ་མཚོར་འཚོ་ཞིང་གཞེས་པ་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་བསམ་གྱིས་འཇུག་པ་ཆོས་དབྱིངས་སུ་ཞི་བའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །།