DNZ-13-PA-004

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 13, Text 4, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །ཞི་བྱེད་སྔ་ཕྱི་བར་གསུམ་གྱི་ཁྲིད་ཡིག་རྣམས་ཕྱོགས་གཅིག་ཏུ་བསྡེབས་པ་བདུད་རྩིའི་ཉིང་ཁུ་ཞེས་བྱ་བ་བཞུགས་སོ། །

ༀ་སིདྡྷི་རསྟུ། རྒྱལ་བ་སྐུ་བཞིའི་མ་དྲོས་མཚོ་ཆེན་ལས། །བཀའ་བབས་རྣམ་བཞིའི་རྒྱུན་ཕབ་སྐལ་ལྡན་གྱི། །གདུང་སེལ་མཛད་པོ་བླ་མ་ལ་བཏུད་ནས། །སྡུག་བསྔལ་ཞི་བྱེད་བདུད་རྩིའི་ཉིང་ཁུ་བྲི། །འདི་ལྟར་འཁོར་བ་ཉིད་སྣང་དུས་ཉིད་ནས་ཡང་དག་ཏུ་མ་གྲུབ་པས་རང་བཞིན་གྱིས་རྣམ་པར་དག་པ་ཡིན་ཀྱང༌། ཕྱིན་ཅི་ལོག་གི་རྟོག་པའི་རྐྱེན་ལས་སྡུག་བསྔལ་གྱིས་འཁོར་མོར་མནར་བས་ཉམ་ཐག་པར་གྱུར་པ་སྟེ། དེ་ལས་རྣམ་པར་གྲོལ་བར་བྱ་བའི་ཕྱིར། དམ་པའི་ཆོས་ཉམས་སུ་ལེན་དགོས་ལ། དེ་ཡང་གང་ཟག་གི་བློའི་རིམ་པ་ལ་དགོངས་ནས་སངས་རྒྱས་ཀྱིས་ཐེག་པའི་སྒོ་མཐའ་ཡས་པ་ཞིག་གསུངས་པ་ལས། ད་རེས་ཀྱི་ཆོས་འདི་ནི། རྗེ་བཙུན་དམ་པའི་ཞལ་ནས༑ འགྲོ་བ་སྡུག་བསྔལ་གདུངས་པ་ལ། །ཞི་བྱེད་བསིལ་ལྡན་དྲི་མེད་བཤད། །ཅེས་པ་ལྟར་དམ་པའི་ཆོས་སྤྱིའི་མིང་བྱེ་བྲག་ལ་བཏགས་ནས་གཅེས་མིང་སྒོས་སུ་ ཐོབ་པའི་ཆོས་སྡུག་བསྔལ་ཞི་བྱེད་བྱ་བ་དེ་ལགས། འདི་ལའང་དམ་པ་རིན་པོ་ཆེ་བོད་དུ་ལན་གྲངས་མང་དུ་བྱོན་པའི་སྟོབས་ཀྱིས། བརྒྱུད་པ་སྔ་ཕྱི་བར་གསུམ་ལ་གདམས་པའི་མན་ངག་གི་བཀའ་སྲོལ་གསུམ་ལས། ཐོག་མར་བཀའ་བབས་དང་པའི་ཁྲིད་ལ་བླ་མ་བརྒྱུད་པའི་རིམ་པ་དང༌། དེ་ལས་བྱུང་བའི་གདམས་པའོ། །དང་པོ་ནི། ཐུབ་དབང༌། ཕྱག་རྡོར། སྒྲོལ་མ། ཀླུ་སྒྲུབ། བརྫུས་སྐྱེས་ཨཱ་དེ་བ། དམ་པ་སངས་རྒྱས། ཁ་ཆེ་ཛྙཱ་ན་གུ་ཧྱ། དབོན་པོ་དཔལ་ལྡན་ཤེས་རབ། དེ་གཉིས་ཀ་ལས་དབུས་པ་ལོ་སྟོན་བཙུན་ཆུང་གིས་གསན། དེ་ནས་སྲས་རྡོ་རྗེ་རྒྱལ་མཚན། ཆུས་པ་དར་མ་བརྩོན་འགྲུས། ཆུས་པ་དར་མ་སེང་གེ། རོག་ཤེས་རབ་འོད། ཐམས་ཅད་མཁྱེན་པ་བསོད་ནམས་དཔལ། རྒྱལ་སྲས་ཀུན་དགའ་སྐུ་མཆེད། རྒྱ་སྟོན་སྨོན་ལམ་ཤེས་རབ། ཀུན་མཁྱེན་སྐུ་མཆེད། རྒྱ་སྒོམ་རྡོ་རྗེ་གདན་པ། བྱང་སེམས་སྦྱིན་པ་རྒྱ་མཚོ། སྐུ་གསུམ་བདེ་ཆེན་ལྷུན་གྲུབ། མཁས་གྲུབ་ནམ་མཁའ་བཟང་པོ། འཇམ་དབྱངས་དཔལ་འབྱོར་ལྷུན་གྲུབ། ཁྱབ་བདག་དཔལ་འབྱོར་ཕུན་ཚོགས། ཀུན་སྤང་བཀྲ་ཤིས་བཟང་པོ། རྗེ་བཙུན་བློ་གྲོས་བརྟན་པ། དེས་བདག་དྷརྨ་ཤྲཱི་ལའོ། །གཉིས་པ་ལ། སྔོན་འགྲོ། དངོས་གཞི། རྗེས་གསུམ། དང་པོ་ལ་བཞི། དང་པོ་ཐར་ལམ་རྒྱུད་ལ་སྐྱེ་བའི་སྒོ་ཚེ་འདི་དང་འཁོར་བའི་ཞེན་འཁྲིས་ཀྱིས་བཀག་པ་ཡིན་པས། དལ་འབྱོར་རྙེད་དཀའ། འཆི་བ་མི་རྟག་པ། འཁོར་བའི་ཉེས་དམིགས། ལས་འབྲས་སྨིན་ཚུལ་བསམ་པ་རྣམས་རྒྱུད་ལ་མྱོང་བ་སྐྱེས་སྐྱེས་སུ་སྒོམ་དུ་གཞུག །གཉིས་པ་གདམས་ངག་རྒྱུད་ལ་འཆར་བའི་སྒོ་ལས་ཀྱི་སྒྲིབ་པས་བཀག་པ་ཡིན་པས། དེ་སྦྱོང་བའི་ཕྱིར། སྐྱབས་སེམས་སྔོན་དུ་འགྲོ་བས། རང་གི་སྤྱི་བོར་པད་ཟླ་ལ་བཅོམ་ལྡན་འདས་མི་འཁྲུགས་པ་སྔོན་པོ་གཡས་ས་གནོན་དང་གཡོན་མཉམ་བཞག་གི་སྟེང་རྡོ་རྗེ་འཛིན་པ་ཚངས་པར་སྤྱོད་པའི་ཆས་ཅན་རྡོ་རྗེ་སྐྱིལ་ཀྲུང་གིས་བཞུགས་པའི་སྐུ་ལས་འོད་ཟེར་འཕྲོས་པས་རང་གཞན་སེམས་ཅན་གྱི་ལས་སྒྲིབ་ཐམས་ཅད་སྦྱངས་པར་བསམས་ནས་ཀཾ་ཀ་ནིའི་བཟླས་པ་ཅི་ནུས་བྱས་མཐར་ལྷ་རང་ལ་བསྟིམ་མོ། །གསུམ་པ་ཉམས་དང་རྟོགས་པ་འཆར་བའི་སྒོ་དམ་ཚིག་ཉམས་ཆགས་ཀྱིས་བཀག་པ་ཡིན་པས་དེ་སྦྱང་བའི་ཕྱིར་སྤྱི་བོར་པད་ཟླ་ལ་བླ་མ་རྡོ་རྗེ་སེམས་དཔའ་དཀར་པོ་གཡས་རྡོ་རྗེ་ཐུགས་ཀ་དང༌། གཡོན་དྲིལ་བུ་དཀུར་བརྟེན་པ། དར་དང་ རིན་པོ་ཆེའི་རྒྱན་ཅན། ཞབས་གཡས་བརྐྱང་བའི་ཕྱེད་སྐྱིལ་གྱིས་བཞུགས་པའི་ཐུགས་ཀར་ཧཱུྃ་ཡིག་དཀར་པོ། དེ་ལས་བདུད་རྩི་དཀར་བའི་རྒྱུན་ཞབས་གཡས་པའི་མཐེ་བོང་ལས་བབས་པ་ཚངས་བུག་ནས་ཞུགས་ལུས་ཀྱི་ཕྱི་ནང་ཐམས་ཅད་ན་མར་ཤམ་ཤམ་སོང་བས་སྡིག་སྒྲིབ་ཉེས་ལྟུང་ཐམས་ཅད་བཤང་གཅིའི་ལམ་དང་རྐང་སེན་ནས་ཉིལ་ཉིལ་སྦྱངས་པས་མཐར་ལུས་ནང་ཤེལ་སྒོང་ཕྱིས་པ་ལྟར་དག་པར་བསམས་ལ། ཡིག་བརྒྱ་ཅི་ནུས་བཟླས་རྗེས་སྤྱི་བོའི་རྡོ་རྗེ་སེམས་དཔའ་རང་ལ་བསྟིམ་མོ། །བཞི་པ་ངེས་ཤེས་དང་བྱིན་རླབས་འཇུག་པའི་སྒོ་བླ་མ་ལ་ཚད་མར་མ་བཟུང་བས་བཀག་པ་ཡིན་པས། སྐྱབས་འགྲོ་དང་གསོལ་འདེབས་བྱ་སྟེ། རང་གི་སྤྱི་བོར་རྩ་བརྒྱུད་ཀྱི་བླ་མ་ཀུན་འདུས་རྗེ་བཙུན་དམ་པ་རྒྱ་གར་བ་ཞལ་འཛུམ་བག་དང་ལྡན་པ། དེའི་སྤྱི་བོར་འཇམ་དཔལ་སྨྲ་བའི་སེང་གེ། དེ་གཉིས་ཀའི་མཐའ་བསྐོར་དུ་ཡེ་ཤེས་ཀྱི་མཁའ་འགྲོ་ནམ་མཁའ་གང་བར་བསམས་ལ། རེ་ལྟོས་ལིངས་སྐྱུར་གྱི་མོས་གུས་དྲག་པོས། སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །བླ་མ་ལ་སྐྱབས་སུ་མཆིའོ། །ཞེས་ཅི་ནུས་དང༌༑ དུས་གསུམ་སངས་རྒྱས་ཐམས་ཅད་འདུས་པའི་བདག་ཉིད་བླ་མ་རིན་པོ་ཆེ་མཁྱེན། བདག་ལ་རྟོགས་པ་མཆོག་ཏུ་གྱུར་པ་བསྐྱེད་དུ་གསོལ། ཞེན་འཁྲིས་མེད་པའི་ཕན་སེམས་དང་སྙིང་རྗེ་ཆེན་པོ་རྒྱུད་ལ་སྐྱེ་བར་ མཛད་དུ་གསོལ། དག་པའི་སྣང་བ་སྣ་ཚོགས་འཆར་བར་མཛད་དུ་གསོལ། ཞེས་ཅི་ནུས་དང༌། སྤྲོ་ན། ན་མོ་གུ་རུ། གནས་བྱ་རྒོད་ཕུང་པོའི་རི་བོ་རུ། །ཞེས་སོགས་བརྒྱུད་འདེབས་ཀྱང་འདོན་ཞིང༌། དེ་ལྟར་གསོལ་བ་བཏབ་པས་དེ་རྣམས་ལས་ཡེ་ཤེས་ཀྱི་འོད་ཟེར་དཀར་པོ་བྱུང་བ་རང་གི་སྤྱི་བོ་ནས་ཐིམ་པས་སྡིག་སྒྲིབ་ཐམས་ཅད་དག །བདེ་སྟོང་གི་ཡེ་ཤེས་རྒྱུད་ལ་སྐྱེས། མཐར་རྟེན་རྣམས་ཚད་མེད་པའི་ཐུགས་རྗེས་འོད་དུ་ལྟེམ་གྱིས་ཞུ་ནས་རང་གི་སྤྱི་བོ་ནས་མར་ཐིམ་པས་བྱིན་གྱིས་བརླབས་པར་བསམ་པའོ། །གཉིས་པ་དངོས་གཞི་ནི། རྗེ་བཙུན་དམ་པས་གྲུབ་ཐོབ་ལྔ་བཅུ་རྩ་ལྔའི་གདམས་པ་རྣམས་གནད་ལྔར་བསྡུས་ནས་གསུངས་པ་སྟེ། དེས་ན་འདི་ན་དཔེ་ལྔས་མཚོན་པའི་དོན་གྱི་གདམས་པ་ལྔ་ལས། དང་པོ་མཚན་ཉིད་སྒྲ་དང་རིག་པའི་བརྒྱུད་པ་བཅུ་གཉིས་ཀླུ་སྒྲུབ་ལ་བརྒྱུད་དེ་ནམ་མཁའ་ལྟ་བུའི་གདམས་ངག་ལ་འདུས་པས། འདི་ལ་བཞི་སྟེ། ཀུན་རྫོབ་ལ་སློབ་པ། དོན་དམ་ལ་སློབ་པ། ཟུང་འཇུག་ལ་སློབ་པ། དེ་ཡང་རབ་ཏུ་མི་གནས་པའོ། །དང་པོ་ནི། ལས་དང་པོ་བས་ཕྱི་ནང་གི་སྣང་བ་ལ་ཞེན་པ་ལྡོག་པའི་ཕྱིར་བསྒོམ་པ་སྟེ། དབེན་པའི་གནས་སུ་སྟན་བདེ་བ་ལ་རྐང་པ་རྡོར་སྐྱིལ་དང་ལག་པ་མཉམ་བཞག་སོགས་ཆོས་བདུན་ལྡན་གྱིས་ལུས་གནད་བཅས་ལ་ཕྱི་ནང་དུ་སྣང་བའི་དངོས་པོ་འདི་དག་སྣང་བ་ལྟར་བདེན་བདེན་འདྲ་བ་འདུག་ཀྱང༌། རང་སེམས་ཀྱི་འཁྲུལ་སྣང་དུ་ཤར་བ་ལས། དོན་ལ་ཅུང་ཟད་ཀྱང་གྲུབ་པ་མེད་པས། རྨི་ལམ་དང་འདྲ་ཞེས་འདུན་པ་ཡང་ཡང་སྦྱངས། དེ་ལྟར་བསྒོམ་པས་ཉམས་མྱོང་ནི། སྣང་བ་ལ་བདེན་ཞེན་གྱི་བློ་ལོག་སྟེ། གཟུགས་སྣང་ཚད་ཆུ་ཟླ་ལྟ་བུ། སྒྲ་གྲག་ཚད་བྲག་ཆ་ལྟ་བུ། དྲི་ཚོར་ཚད་དྲི་ཟའི་གྲོང་ཁྱེར་ལྟ་བུ། རོ་མྱོང་ཚད་སྒྱུ་མའི་ཁ་ཟས་ལྟ་བུ། རེག་མྱོང་ཚད་རྨི་ལམ་གྱི་སྒེག་མོ་དང་འགྲོགས་པ་ལྟ་བུའི་ཉམས་འཆར་རོ། །གཉིས་པ་ནི། དེ་ལྟར་སྣང་བ་ལ་ཞེན་པ་ལོག་ནས་དོན་དམ་སྐྱེ་མེད་ལ་འདྲིས་པར་བྱ་བའི་ཕྱིར་སྒོམ་པ་སྟེ། ལུས་གནད་སྔར་ལྟར་ལས། རང་སེམས་ཀྱི་ངོ་བོ་ལ་ཆེར་གྱིས་བལྟས་ཤིང་བཙལ་བ་ན། དབྱིབས་ཁ་དོག་སོགས་ངོ་བོ་གང་དུ་ཡང་མ་གྲུབ་པས་སྐྱེ་མེད་དུ་ཐག་བཅད་ནས། གདོད་ནས་རྣམ་པར་དག་པའི་རིག་པ་སྤྲོས་མེད་འོད་གསལ་གྱི་ངང་དུ་ལྷན་གྱིས་བཞག་གོ །དེ་ལྟར་བཞག་ཙ་ན། རྣམ་རྟོག་གི་འགྱུ་བ་ཆད་ནས། རིག་པ་གསལ་དྭངས་མི་གཡོ་བར་གནས་ཏེ། མུན་ཁུང་དུའང་སྣང་བ་འཆར་བ་དང༌། ལུས་ཀྱི་རྩ་རྣམས་མཐོང་བ་དང༌། རིག་པ་གང་ལའང་ཐོགས་པ་མེད་པ་འབྱུང་ཞིང་བྱིང་རྒོད་མེད་པར་ཡེ་རེ་སིང་ངེ་གནས་པས་རྣམ་པར་མི་རྟོག་པའི་ཡེ་ཤེས་རང་ལུགས་སུ་སྐྱེའོ། ། གསུམ་པ་ནི། རིག་པ་ལ་བཟླ་བའི་ཕྱིར་སྒོམ་པ་སྟེ། སྣང་བའི་ཆོས་ཐམས་ཅད་སྒྱུ་མ་ལྟ་བུར་སྣང་ཙམ་ཉིད་ན་རང་བཞིན་གྱིས་སྟོང་པའི་ཕྱིར། ཀུན་རྫོབ་སྒྱུ་མ་ལྟ་བུ་དང་དོན་དམ་སྤྲོས་བྲལ་གཉིས་སོ་སོ་ཐ་མི་དད་པར་ ཟུང་འཇུག་ཏུ་ཐག་བཅད་དེ་སྒོམ་མོ། །བཞི་པ་ནི། ཟུང་འཇུག་དེ་ཀའི་རང་ངོ་ལ་བལྟས་པས་གཏད་མེད་དུ་ཡལ་ནས་ཅི་ཡང་མ་མཐོང་བའི་བློའི་བྱ་བྱེད། ཡིད་ཀྱི་འགྲོ་འོང་ཆད་ནས་ཁས་ལེན་ཐམས་ཅད་དང་བྲལ་བའི་ངང་ལ་སོ་མར་འཇོག་པ་སྟེ། དབུ་མ་རབ་ཏུ་མི་གནས་པའོ། །གཉིས་པ་ཕ་རྒྱུད་བྱིན་རླབས་རླུང་གི་བརྒྱུད་པ་བཅུ་གཅིག་བུདྡྷ་ཛྙཱ་ན་ནས་བརྒྱུད་དེ་རྡོ་རྗེ་ལྟ་བུའི་གདམས་ངག་ཏུ་འདུས་པས། འདི་ལ་བཞི་སྟེ། ལུས་ཀྱི་འཁྲུལ་འཁོར་གྱིས་རླུང་བཟུང་བ། རྡོ་རྗེའི་བཟླས་པས་རླུང་བཟུང་བ། སེམས་ལ་གཏད་པས་རླུང་བཟུང་བ། དེ་ཡང་འོད་གསལ་དྲི་མ་མེད་པའོ། །དང་པོ་ནི། སྟན་བདེ་བ་ལ་རྐང་པ་རྡོར་སྐྱིལ། སྒལ་ཚིགས་དྲང་པོར་བསྲངས། ལག་གཉིས་གཉའ་གོང་དུ་བཞག་ལ་སོག་པ་སྣ་སྤྲད། ཐོང་ཀ་སྒྱེད་ཅིང་མགོ་བཀུག་ལ་མནན། མིག་སྣ་རྩེར་ཕབ་ལ་ཉྭ་བཞི་སྒྲིམས་པས་རླུང་རང་ཤུགས་ལ་ཟིན་པའོ། །གཉིས་པ་ནི། རང་ལུས་རྡོ་རྗེ་རྩེ་གསུམ་པ་སྦུབས་སྟོང་དུ་སྒོམ་པའི་ལྟེ་བར་རིག་པ་ཧཱུྃ་ཡིག་ཡུངས་འབྲུ་ཙམ་གཅིག་གསལ་བཏབ་རླུང་བུམ་པ་ཅན་དང་སྦྱར་ཏེ་རླུང་ཕྱིར་འཕང་བའི་ཚེ་ཧཱུྃ་ཡིག་དེ་རྡོ་རྗེ་མས་སྣའི་ལམ་ནས་མར་སོང་བས་རླུང་གི་དུག་དབྱུང༌། རླུང་ནང་དུ་རྔུབས་པའི་ཚེ་རླུང་དེ་ཚངས་པའི་བུ་ག་ནས་ཡར་སོང་བས་ཡེ་ཤེས་ཀྱི་མཐོང་ཕྱེ་བའོ། །གསུམ་པ་ནི། རླུང་ནང་དུ་གནས་པའི་ཚེ་ཧཱུྃ་ཡིག་ལྟེ་བར་གནས་པ་ལ་སེམས་གཏད་དེ་བདེ་ལྷན་ནེའི་ངང་ལ་རིག་པ་སྐྱེ་མེད་དུ་སེང་ངེ་ཧྲིག་གེ་ གཏད་དེ་སྒོམ་མོ། །བཞི་པ་ནི། དེ་ལྟར་ཡུན་ཇེ་རིང་དུ་གོམས་པས་རླུང་ཟིན་པའི་རྟགས་སུ། ས་རླུང་ཟིན་པས་མིག་སྒྱུ་ལྟ་བུ། ཆུ་རླུང་ཟིན་པས་དུ་བ་ལྟ་བུ། རླུང་གི་རླུང་ཟིན་པས་མར་མེ་ལྟ་བུ། ནམ་མཁའི་རླུང་ཟིན་པས་སྤྲིན་དང་མཁའ་སྣང་ལྟ་བུ་འབྱུང་སྟེ། འོད་གསལ་དྲི་མ་མེད་པའི་སྣང་བའོ། །གསུམ་པ་མ་རྒྱུད་བདེ་བ་ཉམས་ཀྱི་བརྒྱུད་པ་བཅུ་གཅིག་མཚོ་སྐྱེས་ནས་བརྒྱུད་དེ་པདྨ་ལྟ་བུའི་གདམས་ངག་ཏུ་འདུས་པས། འདི་ལ་བཞི་སྟེ། འོག་གི་བདེ་བ་སྤར་བ། སྟེང་གི་བདེ་བ་འཛག་པ། བསྐྱིལ་བཟློག་དགྲམ་གསུམ་གྱི་མན་ངག །དེ་ལ་སྐྱོན་གྱིས་མ་གོས་པའོ། །དང་པོ་ནི། སྟན་བདེ་བ་ལ་རྐང་པ་པད་སྐྱིལ་བཅའ། སྒལ་ཚིགས་བསྲང་སྟེ་སྐེད་པ་མཐེབ་མཛུབ་གཉིས་ཀྱིས་བསྡོམས་ལ་སོར་མོ་བརྒྱད་ཀྱིས་ལྟེ་བའི་འོག་ཏུ་བཙིར། རང་ཉིད་གཤིན་རྗེ་གཤེད་དུ་གསལ་བའི་ལུས་ཀྱི་དབུས་སུ་རྩ་གསུམ་བསྒོམས་པའི་དབུ་མའི་མས་སྣར་ཨ་ཤད་དམར་པོ་མེའི་རང་བཞིན། དེ་ནས་སྟེང་རླུང་མནན་རྩ་བཞི་སྒྲིམས་ལ་འོག་སྒོ་འབྱེད་འཛུམ་གྱིས་བདེ་བ་ནང་དུ་རྔུབ། དེས་ཙཎྜ་ལཱི་འབར་བས་རླུང་མེའི་དྲོད་ཅན་ཨ་བ་དྷཱུ་ཏི་ནས་ཡར་ཞུགས་ནས་ལུས་བདེ་དྲོད་དུ་འབར་བའོ། །གཉིས་པ་ནི། དངོས་རིག་གམ་ཡིད་རིག་གང་རུང་ཡུམ་རྣལ་འབྱོར་མ་སྒོམ་པའི་ཐབས་ཤེས་ཀྱི་མཁའ་གསང་རྡོ་རྗེ་དང་པདྨར་བྱིན་གྱིས་བརླབས་ནས་སྙོམས་པར་ཞུགས་ནས། གཏུམ་མོ་འབར་བའི་དྲོད་ཀྱིས་དབུ་མའི་ ཡས་སྣ་ན་ཧཾ་ཡིག་བདུད་རྩིའི་རང་བཞིན་ཅན་གནས་པ་ཞུ་བའི་བྱང་སེམས་ཀྱི་རྒྱུན་འཛག་པས་བདེ་བའི་ཉམས་སྐྱེས་པའོ། །གསུམ་པ་ནི། བསྐྱིལ་བའི་ཐབས་ལ་མཁས་པ་བ་མའི་ནུ་མ་ལྟ་བུ་སྟེ། ལུས་ཀྱི་ཀ་ར་ཎ་བཅིང་བ་ཞེས་མིག་གྱེན་ལ་ལྡོག །སྟེང་རླུང་བསལ་ཏེ་ལྟོ་བ་ཚིགས་པ་ལ་སྦྱར། ཡན་ལག་བཞི་བསྐུམ། ལྕེ་དྲིལ། འོག་རླུང་དྲག་ཏུ་གློད་ཅིང༌། དབུ་མའི་སྤྱན་ལ་སེམས་བཟུང་ངོ༌། །དེ་ནས་ལྡོག་པའི་ཐབས་ལ་མཁས་པ་ལྕགས་སྦུབས་ཀྱིས་ཆུ་འདྲེན་པ་ལྟ་བུ་ནི། དཔྱངས་ཐག་ཁོངས་འདྲེན་གྱི་རླུང་གནད་དང་འགྱུར་བཞིས་དྲང་ངོས། དགྲམ་པའི་ཐབས་ལ་མཁས་པ་དཔག་བསམ་གྱི་ཤིང་རྒྱས་པ་ལྟ་བུ་ནི། སེང་གེ་རྣམ་རོལ་གྱིས་ཁྱབ་པར་དགྲམ་མོ། །མཐར་བསྟིམ་པའི་ཐབས་ལ་མཁས་པ་མཁའ་ལ་སྤྲིན་དེངས་པ་ལྟ་བུ་ནི། བུམ་པ་ཅན་འགའ་ཞིག་སྒོམ་ཞིང་རྣམ་པར་མི་རྟོག་པའི་ངང་ལ་བཞག་པས་རླུང་གི་ཡོན་ཏན་སེམས་ལ་བསྟིམ་པའོ། །བཞི་པ་ནི། དེ་ལྟ་བུའི་ཐབས་ཀྱིས་ཟིན་ན་དངོས་རིག་བསྟེན་ཀྱང་འཁོར་བའི་སྐྱོན་གྱིས་མི་གོས་ཏེ། པདྨ་འདམ་ན་གནས་ཀྱང་དེའི་སྐྱོན་གྱིས་མི་གོས་པ་བཞིན་ནོ། །བཞི་པ་ཕྱག་རྒྱ་ཆེན་པོ་བརྡའི་བརྒྱུད་པ་བཅུ་གཅིག་པ་ས་ར་ཧ་ནས་བརྒྱུད་དེ་བདུད་རྩི་ལྟ་བུའི་གདམས་ངག་ཏུ་འདུས་པས་འདི་ལ་བཞི་སྟེ། བརྡ་དབང་བསྐུར་བ། བརྡ་ངོ་སྤྲོད་པ། བརྡ་ལམ་དུ་ཁྱེར་བ། མ་སྐྱེས་པའི་འགྲེང་གཏམ་ཚིག་གཅིག་གོ །དང་པོ་ནི། ས་ཕྱོགས་དབེན་པར་སློབ་མ་ རྣམས་མདུན་དུ་བཞག་ནས། མཎྜལ་སྔོན་འགྲོས་ལུས་གནད་བསྲངས་ཏེ། ལྟ་སྟངས་མི་འགྱུར་བས་རླུང་དང་ཤེས་པ་སོ་མར་གློད་དུ་བཅུག་ལ། བླ་མས་ཏིང་ངེ་འཛིན་གྱི་ངར་དང་ལྡན་པས། རྩ་བའི་སྤྱོད་ལམ་བཞི་ལ་ཡན་ལག་ལྔ་ལྔ་ཕྱེ་བའི་བརྡ་ཉི་ཤུ་བསྒྱུར་ཏེ་རྡོར་སྐྱིལ། ཕྱེད་སྐྱིལ། ཙོག་པུ། མཉེ་ཐབས། རྒྱལ་པོ་རོལ་པའི་འདུག་སྟངས་ཏེ་འདུག་པ་ལྔ། གཡས་ཉལ། གཡོན་ཉལ། གན་རྐྱལ། ཁ་སྦུབས། མགོ་བསྟུམས་ཏེ་ཉལ་བ་ལྔ། ལངས་ཀ །ཕྱེད་ལངས། ལངས་པ། གོས་གྱོན་པ། ལས་ཀ་བྱེད་པ་སྟེ་འཆགས་པ་ལྔ། འགྲོ་བ། འགྲོ་འཕྲོ་ལ་འཆམས་པ། རྒྱུག་པ། རྒྱུག་འཕྲོ་ལ་འཆམས་པ། ངལ་བསོ་བ་སྟེ་འགྲོ་བ་ལྔ། དེ་ལྟར་ཉི་ཤུ་བསྒྱུར་བས་སྐལ་ལྡན་རྣམས་ལ་ཡེ་ཤེས་ཕེབས་པ་དང་ཤེས་རབ་ཟིན་པ་འོང་ངོ༌། །གཉིས་པ་ནི། འདུག་པའི་བརྡ་ལྔ་མཉམ་བཞག་ལ་ངོ་སྤྲད་དེ། དེ་ལ་ཕྱིར་བཅུད་པ་ནི། སྒོ་ལྔའི་ཡུལ་དུ་གང་ཤར་ལ་ཆེ་རེ་བལྟས་ཏེ་དུས་གསུམ་གྱི་ཤེས་པ་བཅད་ནས་ཤེས་པ་སྐད་ཅིག་མ་དྭངས་སང་ངེ་བའི་ངང་ལ་བཞག་གོ །ནང་དུ་བཅུད་པ་ནི། རྣམ་རྟོག་ཕྲ་རགས་ཅི་སྐྱེས་དེ་ཀ་ཧྲིལ་གྱིས་སྒྲིམས་ལ་ཡེར་གྱིས་བཟུང་ནས་ཧྲིག་གེ་རྗེན་ནེ་བའི་ངང་ལ་དྭངས་སང་ངེ་སོ་མར་བཞག་གོ །སོར་བཞག་པ་ནི། རིག་པ་ཅུང་ཟད་དུབས་པ་དང༌། ལུས་གློད། དབུགས་འདོན་ཤེས་པ་ལྷོད་དེ་ཤིགས་སེ་གཟུང་འཛིན་དང་བྲལ་བར་བཞག་གོ །དེ་ལྟར་མཉམ་བཞག་གསུམ་ཉམས་སུ་བླངས་པས་ བོགས་ཆུང་ན། ལུས་བསྒུལ་བ་དང༌། ངག་ཧཱུྃ་དང་ཕཊ་བརྗོད་པའི་ལྕག་གཉིས་གདབ་སྟེ་གསལ་བདོ་བ་ལ་བཤིག་པས་ཡུལ་རང་སྟོང་དང༌། སེམས་ཉིད་རིག་སྟོང་དུ་ཤར་ནས་སྟོང་གསལ་བདེ་བའི་ཉམས་འཆར་རོ། །ཉལ་བའི་བརྡ་ལྔ་བསམ་གཏན་གཉིད་དང་བསྲེ་བ་སྟེ། མཚན་མོ་རྨི་ལམ་དུ་སློང་བའི་འདུན་པས་ཨ་ཡིག་ལ་སེམས་གཏད་དེ་ཉལ་བས་གཉིད་འོད་གསལ་དང་རྨི་ལམ་སྒྱུ་མར་འཆར་རོ། །འགྲོ་བའི་བརྡ་ལྔ་རྗེས་ཐོབ་དང་དེ་ཡང་འཆག་པའི་བརྡ་ལྔས་རོ་སྙོམས་ལ་ངོ་སྤྲད་དེ། འདི་ལ་གསུམ་ལས། སྙིང་པོ་བློས་མ་རེག་པའི་བརྡ་ནི། མཉམ་བཞག་གི་ཉམས་དེ་ད་དུང་བློ་ཡིན་པ་སྲིད་པས། དེ་བཤིག་ནས་རང་སོར་ལྷན་གྱིས་བཞག་ནས་བལྟས་པས༑ སྣང་བ་རང་སྟོང༌། ཤེས་པ་རང་དག །སྣང་རིག་གཉིས་ཀ་རང་གྲོལ་དུ་སོང་ནས་རོ་སྙོམས་པའོ། །དོན་སྐྱེ་མེད་ཀྱི་བརྡ་ནི། དེའི་དུས་ན་སྤང་བྱ་རྟོག་པ་དང༌། བསྒྲུབ་བྱ་ཡེ་ཤེས་གཉིས་ཀ་ལ་མ་རྙེད་དེ་རང་བཞིན་སྐྱེ་བ་མེད་པའོ། །མ་ཡེངས་པ་དྲི་མ་མེད་པའི་བརྡ་ནི། ཉམས་དེ་ལས་ཕྱིར་ལྟས་ལ་སྐད་ཅིག་ཀྱང་མ་ཤོར་ལ། བསྒོམ་བྱའི་བསྒྲུབ་བྱ་རྡུལ་ཙམ་ཡང་མེད་པའི་བློ་བྲལ་ཆུ་བའི་གཞུང་ལྟ་བུ་རྗེས་ཐོབ་ཀྱི་གནས་སྐབས་ཀུན་ཏུ་ལམ་དུ་ཁྱེར་བའོ། །གསུམ་པ་ནི། སྤྱོད་ལམ་བཞི་དང་ཉམས་མཉམ་རྗེས་གཉིས་མི་འབྲལ་བར་ཡུལ་མཐུན་ཕྱོགས་དང་མི་མཐུན་ཕྱོགས་དང་ལུང་མ་བསྟན་གསུམ་ཀ་ལ་དབང་པོ་བཅོལ་ནས་ཉམས་སུ་ལེན་པའོ། །བཞི་པ་ནི། བླ་མས་ཕྱག་མཛུབ་ནམ་མཁའ་ལ་སྦྲེངས་ཏེ། མ་ཡེངས་ཤིག །བརྡ་ཡོང་ངོ་ཞེས་བྱས་པས། སློབ་མའི་ཤེས་པ་ཅི་ལ་མི་བྱེད་པའི་ངང་དུ་ཙེན་ནེ་གནས་པ་དེ་ཀ་ཕྱག་རྒྱ་ཆེན་པོ་ཡིན་ནོ། །མ་ཡེངས་པར་དེ་ཀ་ངོས་བཟུང་ལ་སྐྱོངས་ཤིག་ཅེས་གདབ་བོ། །ལྔ་པ་མཁའ་འགྲོའི་བརྡ་དང་ཡེ་ཤེས་ཀྱི་བརྒྱུད་པ་བཅུ་གཅིག་ཡི་དམ་ལྷ་ནས་བརྒྱུད་དེ་འཁོར་ལོ་ལྟ་བུའི་གདམས་ངག་ཏུ་འདུས་པས། འདི་ལ་བཞི་སྟེ། མདའ་ལྟར་བསྲིང་བ། ཐོག་ལྟར་དབབ་པ། འཁོར་ལོ་ལྟར་བསྐོར་བ། མར་མེ་ལྟར་བཞག་པའོ། །དང་པོ་ནི། སྟན་བདེ་བ་ལ་རྐང་པ་རྡོར་སྐྱིལ། རྐེད་པ་བསྲངས། མིག་གྱེན་ལ་ལྡོག་ཏེ་ཤེས་པ་ཁར་འཕངས་ལ། རིག་པ་མདའ་ལྟར་བསྲིངས་ཏེ་རྒྱང་ངེ་ཆོད་དེ་རྟེན་མེད་དུ་བཞག་གོ །གཉིས་པ་ནི། དེ་ལས་འཕྲོ་ན་མིག་ཐུར་དུ་ཕབ། རིག་པ་ལྟེ་བའི་ནང་ལོག་ཙམ་དུ་སེང་ཡེར་གྱིས་སྐྱེ་མེད་དུ་ངོ་སྤྲད་ལ་མཉམ་པར་བཞག་གོ །གསུམ་པ་ནི། དེས་བྱིང་ན། རིག་རྩལ་སྦྱོང་སྟེ། ནམ་མཁའ་ཙམ་དུ་སྐོར། ཡུངས་འབྲུ་ཙམ་དུ་བསྡུ། ཡར་རྒྱང་མར་རྒྱང་འཁོར་ལོ་ལྟར་དྲག་ཏུ་བསྐོར་རོ། །བཞི་པ་ནི། དེ་ལྟར་བཅུད་པས་རིག་ཐངས་ཕྱེ་ནས་སོ་མར་སིང་ངེ་གནས་པ་མར་མེ་རླུང་གིས་མ་བསྐྱོད་པ་ལྟར་བཞག ། དེ་ཡང་ཤེས་པ་སྔ་སོར་མ་ཤོར། ཕྱི་སོར་མ་འབྱམས། ད་ལྟའི་རིག་པ་སྐད་ཅིག་མ་དྭངས་སིང་ངེ་བ་འདི་ཉིད་སྙིང་ཐད་ཙམ་དུ་ཡེར་གྱིས་གསལ་ངར་དང་བཅས་ཏེ་བཞག་པས་ལས་སུ་རུང་སྟེ། དེ་ཙ་ན་རྩ་བ་མཐོང་བ། དམིགས་པ་གསལ་བ། རྣོ་ལ་འཁྱུག་པ། བཏང་སར་འགྲོ། བཞག་སར་སྡོད། དགོས་དུས་སླེབ། གནད་དུ་ཚུད། བཀོལ་དུ་བཏུབ། རིག་པ་ལ་བྱན་ཚུད། སེམས་ལ་དབང་ཐོབ་སྟེ་མཆོག་ཏུ་གྱུར་པའི་ཡེ་ཤེས་གྲུབ་ནས། དེ་ལས་སྐུ་བཞིའི་ཡེ་ཤེས་ལྔ་ལྷུན་གྱིས་གྲུབ་བོ་གསུང༌། གསུམ་པ་རྗེས་ལ། འཕྲོས་དོན་བར་དོའི་གདམས་པ་དང༌། སྤྱིའི་སྤྱོད་འབྲས་བསྟན་པའོ། །དང་པོ་ནི། སྣང་བ་སྒྱུ་མའི་བར་དོ་ལ་དེ་ལྟར་ཉམས་སུ་བླངས་པས། རྨི་ལམ་བག་ཆགས་ཀྱི་བར་དོ་ལ་རྟགས་འཆར། དེ་ཤར་ནས་འཆི་ཁ་སྡུག་བསྔལ་གྱི་བར་དོ་ལ་རྩལ་འབྱོངས། དེ་འབྱོངས་ན་སྲིད་པ་འཁྲུལ་པའི་བར་དོ་ལ་གྲོལ་ངེས་སོ། །གྲོལ་ལུགས་ནི། གང་གི་མཉམ་བཞག་གི་ཉམས་ཀྱིས་ཉོན་སྒྲིབ་དག་ནས་བདེན་ཞེན་གྱི་འཁྲུལ་པ་མེད་དེ། དེའི་གནད་ཀས་ཁམས་གསུམ་ལས་འདས། རྗེས་ཐོབ་ཀྱི་ཉམས་ཀྱིས་ཤེས་སྒྲིབ་དག་ནས་སྣང་བ་ཙམ་གྱིས་འཁྲུལ་པ་མེད། དེའི་གནད་ཀས་ས་བཅུ་ལས་འདས་ནས་ཆོས་སྐུ་སྐྱེ་མེད་མངོན་སུམ་དུ་བྱེད་པར་འགྱུར་རོ། །གཉིས་པ་ལ། གྲོགས་སྤྱོད་པ་བསྟན་པ་དང༌། གནས་སྐབས་དང་མཐར་ཐུག་གི་འབྲས་བུ་བསྟན་པའོ། །དང་པོ་ནི། སྡོམ་པ་གསུམ་གྱི་སྤྱོད་པ་དུས་ཚོད་དང་འབྲེལ་བར་སྤྱད་པར་བྱ་སྟེ། སོ་ཐར་གྱི་བསླབ་བྱ་གཞན་གནོད་གཞི་བཅས་སྤང་བ། བྱང་སྡོམ་གྱི་ཕར་ཕྱིན་དྲུག་དང་བསྡུ་དངོས་བཞིས་གཞན་དོན་ལ་སྤྱོད་པ། སྔགས་སྡོམ་གྱི་བླ་མ་ལ་སངས་རྒྱས་དངོས་སུ་བལྟ་ཞིང་ མ་དག་པའི་སྣང་ཞེན་ཐམས་ཅད་དག་པ་རབ་འབྱམས་སུ་བསྒྱུར་བ་ལ་བསླབ་པའོ། །གཉིས་པ་ནི། གནས་སྐབས་སུ་རྟོག་པ་སྤང་བླང་ལ་རོ་སྙོམས། གདོན་ཕོ་མོ་ལ་ཐོག་བརྫིས། ནད་འདུ་བ་བཞི་ལ་དབང་བསྒྱུར། མཚན་རྟོག་གིས་ཅིས་ཀྱང་མི་གནོད་པར་ཡེ་ཤེས་སྐྱེ་བའི་གྲོགས་བྱེད་པའོ། །མཐར་ཐུག་རང་དོན་དུ་ཆོས་སྐུ་ཐོབ་ནས། གཞན་དོན་དུ་གཟུགས་སྐུ་གཉིས་ཀྱིས་འགྲོ་བའི་དོན་འབད་མེད་ལྷུན་གྲུབ་ཏུ་བྱེད་ནུས་པ་འབྱུང་བར་འགྱུར་རོ། །ཞི་བྱེད་ཀྱི་ཁྲིད་ཡིག་བདུད་རྩིའི་ཉིང་ཁུ་ལས། བཀའ་བབས་དང་པོ་སྒྲོལ་མ་གསུམ་གྱི་ཁྲིད་ཡིག་རྩ་བའི་ཡིག་རྙིང་ཇི་ལྟ་བ་ལ་ཞལ་ཤེས་ཀྱིས་བརྒྱན་ཏེ་བཤད་པའི་ལེ་ཚན་ནོ། །དར་རྒྱས་འཕེལ། ༈ །ༀ་སྭ་སྟི༑ བཀའ་བབས་བར་པ་ལ་རྨ་སོ་ཀམ་གསུམ་ལས། དང་པོ་རྨའི་ཕྱག་རྒྱ་ཆེན་པོ་སྙན་བརྒྱུད་ཀྱི་གདམས་ངག་ཅེས་གྲགས་པའི་ཁྲིད་ལ། བླ་བརྒྱུད་དང༌། དེ་ལས་བྱུང་བའི་གདམས་པའོ། །དང་པོ་ནི། རྡོ་རྗེ་འཆང་། འཇམ་དབྱངས་སྨྲ་སེང༌། རྗེ་དམ་པ་རྒྱ་གར། རྨ་སྒོམ་ཆོས་ཀྱི་ཤེས་རབ། སོག་པོ་མདོ་སྡེ་གྲགས། གྲུབ་ཐོབ་རྒྱལ་བ་ཏེ་ནེ། རོག་ཤེས་རབ་འོད། ཞིག་པོ་ཉི་མ་སེང་གེ། ཐམས་ཅད་མཁྱེན་པ་བསོད་ནམས་དཔལ་མན་ཆད་བཀའ་བབས་དང་པོ་ལྟར་རོ། །གཉིས་པ་དེ་ལས་བྱུང་བའི་གདམས་པ་ལ་སྦྱོར་དངོས་གཉིས་ལས། དང་པོ་ནི། ཚེ་འདི་དང་འཁོར་བ་ལ་བློ་ལྡོག་པའི་ཐབས་ཀྱིས་ཐར་ལམ་རྒྱུད་ལ་སྐྱེ་བའི་གཞི་ཐིངས་པར་བྱས་ནས། ལམ་གྱི་རྨང་ རྡོ་སྐྱབས་སེམས་དང་བསགས་སྦྱངས་ཀྱི་ཁྲིད་ཅི་རིགས་བསྒོམ་ཞིང༌། ཁྱད་པར་བླ་མའི་རྣལ་འབྱོར་གྱི་དུས། ན་མོ་གུ་རུ། འོག་མིན་ཆོས་དབྱིངས་ཕོ་བྲང་དུ་སོགས་གསོལ་འདེབས་ཀྱང་འདོན་ནོ། །གཉིས་པ་དངོས་གཞི་ལ་གཉིས་ཏེ། དོན་གྱི་བརྒྱུད་པ་ལ་བརྟེན་ནས་ངོ་སྤྲད་པ་ལག་ཁྲིད་བཅུ་དྲུག་དང༌། ཚིག་གི་བརྒྱུད་པ་ལ་བརྟེན་ནས་སྒྲོ་འདོགས་གཅོད་བྱེད་གནད་ཆེན་བཅུ་དྲུག་གོ །དང་པོ་ལ་ལྔ་སྟེ། བཅུད་ཀྱི་གདམས་པ་བཞིས་རང་རིག་པའི་ཡེ་ཤེས་ངོས་བཟུང་བ། ཐུན་གྱི་གདམས་པ་བཞིས་སྲང་དུ་གཞུག་པ། རྩལ་སྦྱངས་བཞིས་བོགས་འདོན་པ། སོར་བཞག་གཉིས་ཀྱིས་ཕྱག་རྒྱ་ཆེན་པོ་ངོས་བཟུང་བ། ལ་བཟླ་བ་གཉིས་ཀྱིས་སྒོམ་དུ་མེད་པར་གཏན་ལ་དབབ་པའོ། །དང་པོ་ལ་བཞི་སྟེ། མཚན་བཅས། མཚན་མེད། ཤིན་ཏུ་མཚན་མེད། ལ་བཟླ་ནམ་མཁའ་ལམ་ཁྱེར་ལ་བཅུད་པའོ། །དང་པོ་མཚན་བཅས་ལ་བཅུད་པ་ལུས་ངག་སེམས་གསུམ་ལས། ལུས་བཅུད་ལ་བོར་བ་ནི། རྐང་པ་རྡོར་སྐྱིལ། ལག་པ་མཉམ་བཞག །སྒལ་ཚིགས་བསྲང༌། མགྲིན་པ་རྒུ། ལྕེ་ཡར་རྐན་ལ་སྦྱར། མཆུ་དང་སོ་ཐ་མལ་དུ་འཇོག་སྟེ། ཆོས་བདུན་བཅས་ལ་སེམས་ནང་དུ་གཞུག་པའོ། །ངག་བཅུད་ལ་བོར་བ་ནི། སྟེང་རླུང་མནན། འོག་རླུང་འཐེན། ངག་གི་འགྱུ་བ་བཅད་པའོ། །སེམས་བཅུད་ལ་བོར་བ་ནི། ལུས་སེམས་གྲིམ་གྱིས་བསྒྲིམས་ལ་ཤུགས་འདོན། ཞེས་ཤེས་པ་གཞི་ཐོག་ནས་ཡེར་གྱིས་བསླང་། མིག་གི་དབང་པོ་མ་འགུལ་བར་ཧྲིག་གེ་སྒྲིག །གང་ལ་སེམས་འཛིན་པ་དེ་ལ་སྤོབ་ཀྱིས་བཞག་གོ །དེ་ཡང་དམིགས་རྟེན་ཕྱི་ནང་གཉིས་ལས། ཕྱི་ནི་དང་པོ་སློབ་པའི་དུས་སུ་བླ་མ་དང་སློབ་དཔོན་རྟེན་ལ་བཅུད་རེ་བྱ་ཞིང༌། ལམ་དུ་ཁྱེར་དུས་དམིགས་རྟེན་གང་རུང་ལ་བཅུད་དོ། །ནང་ནི་སྙིང་དཀར་ནག་གི་མཚམས་སུ་ཐིག་ལེ་ཡུངས་འབྲུ་ཙམ་ལ་དམིགས་པ་གཏད་ནས་བཅུད་དོ། །དེ་ཡང་སེམས་འཛིན་བདོ་བ་ལ་ཤིགས་ཀྱིས་བཤིག་ལ་སྒོམ་བློ་བསམ་གཏན་གྱི་གཉེན་པོ་ཞིག་པས་རིག་པ་གཅེར་བུ་བློ་བྲལ་ཕྱག་རྒྱ་ཆེན་པོར་ངོ་སྤྲོད། དེས་སོ་སྐྱེའི་དངོས་ཞེན་དང་ཉན་རང་གཟུང་འཛིན་དོན་དམ་དུ་འཛིན་པ་གཅོད་དོ། །གཉིས་པ་མཚན་མེད་ལ་བཅུད་པ་ལའང་ལུས་ངག་སེམས་གསུམ་ལས། ལུས་བཅུད་པ་ནི། ནཱ་རའི་ཆོས་བཞི་སྟེ། གླིང་བཞི་བསྡུ། རྒྱ་མཚོ་རི་རབ་ལ་སྦྱར། ལྕེ་དར་ཁུགས་སུ་གཞུག །བྱ་རྒོད་ཟུང་གཅིག་ནམ་མཁའ་ལ་སྤར་བའོ། །ངག་བཅུད་པ་ནི། འོག་རླུང་འཐེན། སྟེང་རླུང་མནན། འགྱུ་བ་རྦད་ཀྱིས་བཅད་པའོ། །སེམས་བཅུད་པ་ནི། གྲིམ་གྱིས་བསྒྲིམས། ཡེར་གྱིས་བསླང༌། ཧྲིག་གིས་སྒྲིག །སྤོབ་ཀྱིས་བཞག །དེའང་བར་སྣང་སྟོང་པ་གཞུ་གང་ཙམ་དུ་རིག་པ་གཏད་ལ་སེམས་བཟུང༌། གསལ་བདོ་བ་ལ་ཤིག་གེ་ངེས་ཤེས་བསྐྱེད་ཅིང་ངོ་སྤྲོད། དེས་སེམས་ཙམ་པ་རང་རིག་ཙམ་དུ་འཛིན་པ་གཅོད་དོ། །གསུམ་པ་ཤིན་ཏུ་མཚན་མེད་ལ་བཅུད་པ་ལའང་གསུམ་ལས། ལུས་བཅུད་ པ་ནི། ཐབ་འགལ་གྱི་འདུག་སྟངས་ཏེ། རྐང་པའི་ལོང་རྩ་བསྣོལ་ལ་སྙིང་རྩ་མནན། མཐེ་བོང་བཀུག་པའི་ཁུ་ཚུར་གཉིས་མཆན་འོག་ཏུ་བཅུག་ལ་སྙིང་གི་ཨ་སོ་མནན། གྲུ་མོ་གཉིས་ཀྱིས་བརླའི་རྩ་བོ་ཆེ་གཉིས་མནན་ཏེ༑ ལུས་ཐབས་འགལ་བཅས་པས་རྩ་སྒོ་ཆེན་པོ་བཞི་ཕྱི་ནང་གཉིས་སུ་གནས་པའི་ཕྱིར་རླུང་དང་རྟོག་པའི་རྒྱུ་ལམ་གཅོད་པའོ། །ངག་བཅུད་པ་ནི། འོག་རླུང་འཐེན། སྟེང་རླུང་མནན། སྣ་བུག་གཡས་ནས་རླུང་རྔུབས་པ་མཆིལ་མའི་རྟ་ལ་བསྐྱོན་ཏེ་མིད། འགྱུ་བ་རྦད་ཀྱིས་བཅད་དོ། །དེ་ནི་དཔྱངས་རྡོ་ཐུར་ལ་སྐྱུར་བའི་གནད་ཡིན་ནོ། །སེམས་བཅུད་པ་ནི། ལུས་སེམས་གྲིམ་གྱིས་བསྒྲིམས་ལ། ཕཊ་ཅེས་རིག་པ་གཞི་ཐོག་ནས་ཡེར་གྱིས་བསླང༌། མིག་འབྲས་མ་འགུལ་བར་ཧྲིག་གེ་སྒྲིག །རིག་པ་འདིར་གཏད་ཀྱི་ཡུལ་མེད་པར་སྤོབ་ཀྱིས་བཞག །གསལ་བདོ་བ་ལ་བཤིག །ངེས་ཤེས་བསྐྱེད་ཅིང་ངོ་སྤྲད། དེས་དབུ་མ་པ་སྟོང་པ་ཙམ་དུ་ཞེན་ཅིང་འཛིན་པ་གཅོད་དོ། །བཞི་པ་ལ་བཟླ་ནམ་མཁའ་ལམ་ཁྱེར་ལ་བཅུད་པ་ནི། རླུང་དང་ཉི་ཟེར་གྱི་ཕྱོགས་སུ་ཁ་མི་བལྟ་བར་ལུས་གནད་ཅི་བདེར་འདུག །འདི་གཞི་ལམ་འབྲས་གསུམ་གྱི་ངོ་སྤྲོད་ཡིན་པས། གཞི་ནམ་མཁའ་ལ་འདུས་བྱས་འདུས་མ་བྱས་གཉིས་ལས་འདིར་འདུས་མ་བྱས་ཀྱི་ནམ་མཁའ་སྟེ། གཞི་འདུས་མ་བྱས་ཡིན་པས། ཕྱོགས་ཐམས་ཅད་དུ་བཙལ་བས་མ་རྙེད། སེམས་ཀྱི་གཞི་རྟེན་མེད་དུ་སོང་བའོ། །དེས་སེམས་ཉིད་ངོས་བཟུང་ལས་ འདས་པར་རྟོགས། ལམ་རིག་པ་ནི། འཚོལ་མཁན་གྱི་རིག་པ་དེ་ཉིད་རྩད་བཅད་པས། ཅིར་ཡང་མ་གྲུབ་པར་མཐོང་སྟེ། འདི་ཞེས་བལྟས་པས་མ་མཐོང༌། བཙལ་བས་མ་རྙེད་དེ། ངོས་བཟུང་མེད་པར་རྟོགས་པའོ། །འབྲས་བུ་རིག་པ་དང་ནམ་མཁའ་གཉིས་སུ་མེད་པ་ནི། རྟེན་མེད་ཀྱི་རིག་པ་དེ་གཞི་མེད་ཀྱི་ནམ་མཁའ་ལ་ཕཊ་ཅེས་རྒྱངས་ཀྱིས་སྐྱུར་བས། གཉིས་སུ་མེད་པའི་ནམ་མཁའ་དང་འདྲེས་ཏེ། ཕྱེ་བས་མ་ཕྱེད་ཕྲལ་བས་མ་ཕྲོལ། གཞི་མེད་ཀྱི་ནམ་མཁའ་ལ་རྟེན་མ་བྱས་པས། རིག་མེད་ཀྱི་ནམ་མཁའ་ལ་བརྟེན་པ་མ་བཅོལ། གཉིས་མེད་ཀྱི་ནམ་མཁའ་ལམ་དུ་ཁྱེར་བས། ཆོས་ཐམས་ཅད་མཁའ་དཀྱིལ་ལྟར་མི་སྒོམ་པའི་ཤེས་པ་རྟེན་མེད་དུ་འཆར་ཏེ། བསམ་གྱིས་མི་ཁྱབ་པ། རང་བྱུང་གི་ཡེ་ཤེས་འདུས་མ་བྱས་པའོ། །དེ་ལ་སྒོམ་མི་སྒོམ་མེད། མཉམ་རྗེས་མེད། བྱས་མ་བྱས་མེད། བདེ་སྡུག་མེད། དགག་སྒྲུབ་མེད། བླང་དོར་མེད། རྩལ་གྱིས་བོགས་འདོན་དུ་མེད། ཉམས་རྟོགས་མེད། ཐུན་བཅུད་མེད། སེམས་བསྐྱེད་དང་ཁ་འཐོར་མེད། ཐམས་ཅད་དེའི་ནང་དུ་འདུས་པས་གྲུབ་མཐའི་མིང་འདོགས་དང་ཁས་ལེན་ཐམས་ཅད་མེད། དེ་ཙམ་ན་ཆོས་ཐམས་ཅད་ཞིག་པས་ཉམས་སུ་ལེན་མ་ཤེས། གང་ཟག་གི་བཅོས་མ་ཞིག །འདུ་ཤེས་ཀྱི་དྲན་པ་གཏོར། ད་སངས་རྒྱས་ལ་དོགས་པ་མི་གདའ། ཉམས་སུ་བླང་རྒྱུ་ཅི་ཡང་མི་གདའ། ཐ་མལ་ཡེངས་ཐོག་ཏུ་ཡེངས་ཀྱང་ ཐབས་དྲག་པོས་བཅུད་མི་དགོས། དྲན་པ་ཙམ་གྱིས་རྩ་རྙེད་པའོ། །འདི་དང་འཆི་ཁ་བར་དོ་གསུམ་དུ་ལ་བཟློས་པས་ཕྱི་མར་ལུས་མི་ལེན། ད་འཁོར་བ་ལ་དོགས་པ་མེད། སངས་རྒྱས་ལ་རེ་འདོད་མེད། གང་ལའང་འདོད་པ་མེད་པར་རྟོགས་པས། སེམས་བསྐྱེད་དང༌། སྟོང་ཐུན་དང་ཁ་འཐོར་དང་ཁར་འཕོག་ཐམས་ཅད་ཀྱང་རྩ་བ་དེར་འདུས། རོ་བརྒྱ་བཤལ་གཅིག་གིས་བཤལ། བྱ་བརྒྱ་འུར་རྡོ་གཅིག་གིས་དེད། དེ་ལྟར་རྩ་བ་གཅིག་ཏུ་སྡུད་ཤེས་པ་ནི། ཕ་འདྲའི་བུ། རྗེ་འདྲའི་འབངས། ས་བོན་འདྲ་བའི་མྱུ་གུ། སྔ་མ་གཤེགས་པ་ཕྱི་མའི་ལམ་ཡིན་གསུང་ངོ༌། །དེ་ལྟར་ངོ་སྤྲོད་པའི་ཚེ། སྤྲད་བྱའི་གང་ཟག་འབྱུང་ལུས་དར་བ་ལ། ངར་འདོགས་རྩལ་གྱིས་གནད་ནས་བསྐུལ་ཏེ། བཅུད་དང་རྩལ་སྦྱོང་དྲག་པོ་ལ་གཞུག །ལུས་གུད་པ་ལ་གནས་ལུགས་རང་སའི་གནད་ནས་བསྐུལ་ཏེ། སེམས་བསྐྱེད་ལ་བརྟེན་ནས་འཇམ་དྭངས་ཀྱིས་ངོ་སྤྲད། དྲན་རྟོག་རྒོད་ན་དམིགས་པ་གཅིག་ལ་དྲིལ་ཏེ། ངོ་སྤྲོད་སྣ་ཁ་མང་པོ་སྤངས་ནས་གཅིག་ལ་འཇུན་དུ་གཞུག །དམན་རྨོངས་གླེན་བླུན་ལ་ངེས་ཤེས་གཅིག་གིས་བསྐྱེད་དེ་སྤྲོས་པ་མང་པོ་མི་འཆད་པར་ཚིག་ཉུང་ངུས་ངོ་སྤྲད། ཐོས་བསམ་གྱི་ཤེས་རབ་ཅན་རྣམས་སྣ་ཚོགས་པའི་ལམ་དུ་བཅུད་དེ། ཁོ་རང་གིས་ཤེས་པའི་ཚིག་ལ་བརྟེན་ནས་ངོ་སྤྲད། སྒོམ་ཆེན་པ་ལ་ཁོ་རང་སྔར་གོམས་ཀྱི་ཐོག་ཏུ་འཇུན་དུ་བཅུག་ལ། དེའི་གཉེན་པོ་བཤིག་པའི་ རྗེས་ལ་ངོ་སྤྲད། སྡིག་པོ་ཆེ་ལ་བློ་ངོས་འབྲེལ་མེད་དུ་བསྟན་ཏེ། རིག་པ་གཅེར་བུ་ལ་དགེ་སྡིག་གིས་མ་གོས་པར་ངོ་སྤྲོད་དོ། །དེ་རྣམས་ཀྱི་བཅུད་ཀྱིས་རང་རིག་ཡེ་ཤེས་ངོས་བཟུང་བ་ཞེས་བྱ་སྟེ། རྟ་རྒོད་འདུལ་བ༑ སེམས་རྒོད་འཇུན་པ། སྒྲིམ་སྒྲིམ་ནས་ཀློད་པ། བཀང་བཀང་ནས་འཕེན་པའི་གནད་ཡིན་ནོ། །གཉིས་པ་ཐུན་གྱིས་ཏིང་འཛིན་སྲང་དུ་གཞུག་པ་ལ་བཞི་ལས། དང་པོ་མཉམ་བཞག་རྩ་བ་ཟིན་ཐུན་རིང་པོར་ཁྲིད་པ་ནི་ཟིན་རྟགས་དབང་པོ་ཐུང་ཐུང༌། བཞིན་མདངས་གསལ། གོས་ཀྱི་ཆ་ག་འདར་ན་མཉམ་བཞག་གནད་དུ་ཚུད་པ་ཡིན་པས་ཐུན་རིང་དུ་ཁྲིད་ལ་ངོ་སྤྲད་དོ། །གཉིས་པ་རྩ་བ་མ་ཟིན་ན་ཐུན་ཐུང་ངུར་ཁྲིད་པ་ནི། རྟགས་དེ་གསུམ་མ་བྱུང་བར་མི་འགུལ་སྣ་བུག་གཡོན་མཉམ་བཞག་མ་ཆུན་པས་བཤིག་ཀྱང་རྗེས་མི་མཐོང་སྟེ། ཐུན་ཐུང་ངུར་བཅད་ནས་ཁྲིད་དེ་དྲག་ཏུ་སྒྲིམ་ཞིང་མྱུར་དུ་གློད་དོ། །གསུམ་པ་སྤྱོད་ལམ་གྱི་དུས་སུ་ཐུན་དུམ་བུར་ཁྱེར་བ་ནི། འགྲོ་འཆག་ཉལ་འདུག་ཐམས་ཅད་དུ་རྩ་བའི་ཉམས་དྲན་པས་བཟུང༌། ཕཊ་ཅེས་དུམ་བུར་བཅུད་ཀྱིན་རྗེན་རྟེན་མེད་དུ་ཁྱེར་ལ་སྤྱོད་ལམ་བྱའོ། །བཞི་པ་རྩལ་འབྱོངས་ནས་ཐུན་རྒྱུན་པར་ཁྱེར་བ་ནི། རྩལ་འབྱོངས། གཉེན་པོ་ཞིག །མཉམ་བཞག་འདྲེས་པའི་ཚེ་བཅུད་དང་རྩལ་སྦྱོང་ཐུན་དུ་གཞུག་མི་དགོས་ཏེ། མ་བཅོས་པའི་རང་ཉམས་ལ་རྒྱུན་པར་གནས་སོ། །དྲན་པས་ཟིན་ཙམ་ལས་བྱར་མེད། གལ་ཏེ་ཡེངས་ཀྱང་ཐབས་ཀྱིས་ བཅུད་མི་དགོས་ཏེ། དྲན་པ་ཟིན་ཙམ་གྱིས་རྩ་བ་རྙེད་ནས་འོང་ངོ༌། །དེ་ལྟར་ཐུན་དུ་འཇུག་པའི་ཚེ་ན། གསལ་བདོ་བ་ལ་བཤིག །བཟང་བདོ་བ་ལ་འཕྲོ་བཅད། འབད་བདོ་བ་ལ་སྤྱོད་ལམ་དང་བསྲེ། གནས་པ་རྒྱུན་མི་བསྲིང༌། ཉམས་ལེན་དུམ་བུར་ཁྱེར། རྗེས་ཐོབ་རྟེན་མེད་དུ་བསྐྱང་བར་བྱའོ། །གསུམ་པ་རྩལ་སྦྱོང་གིས་བོགས་འདོན་པ་ལའང་བཞི་ལས། དང་པོར་ཡར་རྩལ་སྦྱོང་བ་ནི། གཟུགས་དང་གཟུགས་མེད་ཀྱི་ཁམས་སུ་རིག་པ་འཕངས་ཏེ་རྩལ་སྦྱངས་ལྷ་གནས་ཐམས་ཅད་ལམ་ལམ་གསལ་བཏབ་ཅིང་བཅུད། རྗེས་གཉེན་པོས་བཤིག །དེས་མཐོ་རིས་ཀྱི་བདེ་བ་ལ་མི་ཞེན་ཏེ། ལྷ་ཡི་ལོངས་སྤྱོད་རྣམས་རང་བཞིན་སྤྲོས་བྲལ་དུ་འཆར་བའོ༑ ༑གཉིས་པ་མར་རྩལ་སྦྱང་བ་ནི། ངན་སོང་གསུམ་གསལ་བཏབ་ལ་རིག་པ་དཀྲུག་ཅིང་རྩལ་སྦྱང་། རྗེས་གཉེན་པོ་བཤིག །དེས་ངན་སོང་གི་སྡུག་བསྔལ་རྣམས་རང་བཞིན་སྤྲོས་བྲལ་རྟོགས་པས་ཉམས་མི་ང་བའོ༑ ༑གསུམ་པ་རིག་པ་ཕྱོགས་བཞི་མཚམས་བརྒྱད་དུ་རྩལ་སྦྱང་བ་ནི། རིག་པ་སྐད་ཅིག་ཀྱང་མི་གནས་པར་ཡུལ་སྣ་ཚོགས་ལ་རྒྱུག་ཏུ་བཅུག་ཅིང༌། རྗེས་གཉེན་པོ་བཤིག །དེས་མཚན་ཉིད་བསམ་མི་ཁྱབ་ཀྱི་ཉམས་སྐྱེ་བས་ཡུལ་སྣང་ཐམས་ཅད་སྤྲོས་བྲལ་དུ་རྟོགས་པའོ། །བཞི་པ་རིག་པ་རྗེན་པར་རྩལ་སྦྱང་བ་ནི། རིག་པ་འདིར་གཏད་མེད་པར་ཡུལ་མེད་དུ་དཀྲུག །དམིགས་མེད་དུ་བསྒུལ་བའོ། །དེས་ཀྱང་རྩ་བ་མ་ཟིན་ན་རིག་པ་ འཇུར་བཅད་པ་ལ་བཞི་ལས། སོ་གཟུག་པ་ནི། དར་ཅིག་བར་སྣང་སྟོང་པ་ལ་བཅུད་དོ། །དེ་ནས་གདོང་བཟློག་པ་ནི། འདིར་གཏད་མེད་པར་དྲག་ཏུ་དཀྲུག་གོ །དེ་ནས་བྱུངས་གདབ་པ་ནི། རིག་པ་ནམ་མཁའི་མཐའ་དང་མཉམ་པར་ཐང་གིས་རྒྱང་ངོ༌། །དེའི་ངང་ལ་བློ་གོ་ར་ནས་བདའ་བ་ནི། ཤིགས་ཀྱིས་འཇོག་པའོ། །དེ་དག་གིས་ཕྱག་རྒྱ་ཆེན་པའི་རླུང་ཐོག་བབས་སུ་ཚུད་པས་གཉུག་མའི་དོན་རྗེན་པར་རྟོགས་པའོ། ། དེ་རྣམས་ནི་མཉམ་བཞག་ཏུ་རྩལ་སྦྱང་བའོ། །ད་རྗེས་ཐོབ་ཏུ་རྩལ་སྦྱང་བ་ལ། གཞི་ལམ་འབྲས་གསུམ་ལས། གཞི་ངར་དང་བཅས་པ་ནི། དུས་གནས་ཐམས་ཅད་དུ་རིག་པ་ངར་དང་བཅས་པ། མདངས་དང་བཅས་པ༑ ཧྲིག་ཆགས་པར་བྱའོ། །ལམ་རྩལ་དང་བཅས་པ་ནི། འགྲོ་འདུག་ཉལ་སད་གང་གི་ཚེ་ཡང་རིག་པའི་ངར་མ་ཤོར་བར་བྱ། རིག་པ་གཡེར་ཞིང་དཀྲུག་པ་དར་རླུང་གིས་བསྐྱོད་པ་ལྟར་རོ། །འབྲས་བུ་བྱིན་རླབས་ཐུགས་རྗེ་རྣོ་ངར་དང་བཅས་པ་ནི། དམིགས་པ་རྣོན་པོ་མཚོན་ཆ་ལྟ་བུས། ནད་དང་གདོན། ཉོན་མོངས་པ་དང་རྣམ་རྟོག་གང་ལ་གཏད་པ་ཐམས་ཅད་རང་སར་གྲོལ་ཏེ་རང་བཞིན་སྤྲོས་བྲལ་དུ་ལྷག་ལྷག་འཆར་བས་ཡུལ་ལམ་དུ་ལོངས་ནས་གྲོགས་སུ་ཤར་བ་ཡིན་ནོ། །བཞི་པ་སོར་བཞག་དང༌། ལྔ་པ་ལ་བཟླ་གཉིས་གཉིས་ཏེ་ཐུན་མོང་དུ་ཆོས་བཞི་ལས། དང་པོ་ཆུན་སར་འཇུག་པ་ནི། མཉམ་བཞག་ཏུ་བཅུད་ཀྱིས་ཆུན་པ་གལ་ཆེ་སྟེ། མ་ཆུན་ན་བཤིག་ཀྱང་རྗེས་མི་གསལ། གལ་ཏེ་བཅུད་ཀྱིས་རིག་པ་མ་ཆུན་ན་རྩལ་སྦྱོང་གིས་འཇུན་ཞིང༌། ཆུན་ནས་ཀྱང་ཉམས་བོགས་དབྱུང་བའི་ཕྱིར་རྩལ་སྦྱང་ངོ༌། །དེ་ལྟར་བཅུད་དང་རྩལ་སྦྱོང་གི་སེམས་རྒོད་འདུལ་བ་ནི། བཀང་བཀང་ནས་འཕེན་པའམ། སྒྲིམ་སྒྲིམ་ནས་གློད་པ་ལྟ་བུ་ཡིན་གསུང་ངོ༌། །གཉིས་པ་ཤིགས་སར་བཤིགས་པ་ནི། བཅུད་དང་རྩལ་སྦྱོང་གིས་འབར་བདོ་བ་ལ་ཤིགས་ཀྱིས་བཤིག་པ་ཡིན་ནོ། །མཉམ་བཞག་གི་གཉེན་པོ་ཆགས་ན་སྒོམ་ཉམས་ཀྱིས་བཅིངས་ནས་གཤིས་མི་མཐོང་བས། ལུས་ཀྱི་རྩོལ་བ་འཁྲུལ་འཁོར་བཤིག །ངག་གི་རྩོལ་བ་ཕཊ་ཅེས་བཤིག སེམས་ཀྱི་རྩོལ་བ་ལྷོད་ཀྱིས་སློད། ཤིགས་ཀྱིས་བཤིགས་ལ། བློ་བྲལ་རྟེན་མེད་དུ་བཞག་གོ །གསུམ་པ་ངོས་འཛིན་པ་ནི། གཉེན་པོ་བཤིགས་པའི་ཤུལ་དུ་རྗེས་ངོས་འཛིན་པ་ཡིན་ཏེ། འདིས་བཅུད་དང་རྩལ་སྦྱོང་གི་རྗེས་ཐམས་ཅད་དུ་ངོ་སྤྲོད་དོ། །དེ་ཡང་སྒོམ་བློ་བསམ་གཏན་གྱི་གཉེན་པོ་ཤིགས་ཀྱིས་བཤིག་པའི་ཤུལ་དུ། འདས་པའི་ཤེས་པ་འགགས། མ་འོངས་པ་མ་སྐྱེས། ད་ལྟར་གྱི་རིག་པ་སང་ངེ༌། ལྷོད་དེ་བ། རང་དྭངས་སུ་རྗེན་ནེ་བ་འདི་རང་ཡིན་གསུང་ངོ༌། །དེ་ཡང་ངོ་བོ་རིག་པ། རང་བཞིན་གསལ་བ། མཚན་ཉིད་བློ་བྲལ། རྗེན་པ། གཅེར་བུར་གནས་པ། འགྱུ་བ་ཆད་ནས་ཅི་སེམས་ཆ་མེད་པ། འདུས་མ་བྱས་ཀྱི་རིག་པ་མཁའ་དཀྱིལ་ལྟ་བུ། ཡིད་འགྱུ་བ་དང་བྲལ་བའི་སྒོམ་དུ་མེད་པ་དེ་ངོས་ཟིན་པའོ། ། ལར་སྐབས་འདིར་དྲི་མ། རྣམ་པ། རྩ་བ་གསུམ་ངོས་ཟིན་དགོས་པས། དྲི་མ་ནི། ངན་རྟོག་སེམས་ཅན་གྱི་བློ་སྟེ། དེ་རྩལ་སྦྱོང་གིས་གཅོད། རྟོག་པ་གང་སྐྱེས་ལ་བཅུད་པའོ། །རྣམ་པ་ནི། དེ་ལྟར་བཅུད་ཅིང་རྩལ་སྦྱོང་བའི་རྗེས་སུ་བཟང་རྟོག་ཉམས་ལ་ཞེན་ནས་སྟོང་མི་ཕོད་པ་སྟེ། དེ་ལས་ཕཊ་ཅེས་གཉེན་པོ་ཡང་གཞིག་གི་གདམས་པས་བཤིག་ལ་བློ་བྲལ་དུ་བཞག་གོ །རྩ་བ་ནི། ལྟ་སྒོམ་དང་ཉམས་མྱོང་གང་ལའང་ཕཊ་ཅེས་རིག་པ་རྗེན་པ་རྟེན་མེད་དུ་བཞག་སྟེ། དེས་ནི་རྩ་བའམ། གཤིས་སམ་ཡིན་ལུགས་ངོས་ཟིན་པའོ། །བཞི་པ་ལ་བཟློ་བ་ནི། སྔར་བསྟན་པའི་ནམ་མཁའ་ལམ་ཁྱེར་གྱི་བཅུད་ཀྱིས་འདིར་ངོ་སྤྲད་ལ། དེ་ཡང་ལ་བཟླ་བ་ལ་གསུམ། བཤིག་པ་ལ་བཟླ་བ་ནི། ཉམས་ཀྱི་ལ་བཟླ་སྟེ། མྱོང་བློ་ཐམས་ཅད་བཤིག་ལ་བཞག །གདམས་པས་ལ་བཟླ་བ་ནི། ནམ་མཁའ་ལམ་ཁྱེར་ཏེ། འདིར་ངོ་སྤྲད། རྟོག་པས་ལ་བཟླ་བ་ནི། རྩ་བའི་དོན་ལྟ་བུ་དེ་རྟོགས་ནས་དེ་ལས་མ་རྟོགས་པའི། ཡར་སངས་རྒྱས་ལ་ཐོབ་རྒྱུ་དང་མར་འཁོར་བར་ལྟུང་ས་མེད། ཡིད་ལ་བྱ་བའི་ཆོས་ཤིག་ཆེད་དུ་བྱས་པའི་ཐ་སྙད་གཏོར། འདུ་ཤེས་ཤིག །དྲན་པ་གཏོར། རྩ་བ་བྲལ། གཉེན་པོ་འགྱེལ། བློ་ཟད་ཆོས་ཟད་གཞི་ལ་སྤྲོས་པ་དང་བྲལ་བས་རྩ་བ་མེད། རྩ་བ་དམིགས་པ་དང་བྲལ་བས་སྒོམ་པ་མེད། དོན་དུ་རྣམ་པ་དང་བྲལ་བས་ཉམས་མྱོང་མེད། འཁྲུལ་མེད་རང་སར་གྲོལ་བས་རྗེས་ཐོབ་མེད། ཁ་ཡན། གོ་བྲལ། བློ་བྲལ། རྟེན་འབྲེལ་དུ་རྟོགས་པའོ། །དེ་ལྟར་ངོ་སྤྲོད་པའི་འདི་སྐད་ཅེས་གདམས་ཏེ། མཉམ་བཞག་མ་ཆུན་པར་རྗེས་ཐོབ་ལ་ངོ་མི་སྤྲད། རྩལ་མ་འབྱོངས་པར་ལམ་ལ་མི་སྦྱར། ཐུན་དུ་མ་ཚུད་པར་བླ་མ་དང་མི་འབྲལ། ངོས་མ་ཟིན་གྱི་བར་ཁྲིད་འཕྲོ་མི་བཅད། རྟོགས་ཚོད་མ་སྐྱེས་ཀྱི་བར་དུ་ལ་མི་བཟླ། ཉམས་མ་རྫོགས་ཀྱི་བར་ཡི་གེ་མི་བསྟན། ཁྲིད་བྱེད་དུས་གཞུང་མི་བཤད། སློབ་དཔོན་མི་བྱེད་པ་ལ་གདམས་པའི་ཚད་མ་སྦྱིན་ཅིག །ཅེས་གསུངས་སོ། །དེ་རྣམས་ཀྱིས་དོན་རྒྱུད་ལ་བརྟེན་ནས་ལག་ཁྲིད་བཅུ་དྲུག་གིས་ངོ་སྤྲོད་པ་གདམས་ཚར་རོ། །གཉིས་པ་ཚིག་གི་བརྒྱུད་པ་ལ་བརྟེན་ནས་གནད་བཅུ་དྲུག་གིས་སྒྲོ་འདོགས་གཅོད་པ་ལ་དོན་ལྔ་སྟེ། སེམས་བསྐྱེད་ལམ་ཁྱེར་གྱིས་སེམས་ལམ་དུ་ཁྱེར་བ། སྟོང་ཐུན་གྱིས་གཞི་བཅའ་བ། ཁ་འཐོར་གྱི་དོན་གྱིས་མདོ་བཟུང་བ། ཁར་ཕོག་སྣར་ཕོག་གིས་གཏན་ལ་དབབ་པ། ཐ་མ་ཐ་རྒྱས་གཉིས་སུ་ལ་བཟླ་བའོ། །དང་པོ་ལ་བཞི་ལས། ལྟ་ཡུལ་ཤེས་པ་ནི། འཁྲུལ་མ་འཁྲུལ་གཉིས་ལ་བལྟ་བའོ། །ལྟ་ཐབས་ཤེས་པ་ནི། དེ་གཉིས་ཀྱི་སྟེང་དུ་ཐོག་བབས་སུ་བལྟ་བའོ། །མཐོང་ཚད་ཤེས་པ་ནི། ལྟ་བ་མཚན་ཉིད་བཞི་ལྡན་དུ་མཐོང་བའོ། །དཔེ་དང་ཕན་ཡོན་ཤེས་པ་ནི། དཔེ་ནོར་བུ་ཆུ་དྭངས་ལྟ་བུ་དང༌། ཕན་ཡོན་སྒྱུ་མ་རྣམ་དག་ཏུ་གྲོལ་བའོ། །གཉིས་པ་ལ་བཞི་ལས། ཡོད་པའི་ཡོད་ལུགས་ནི། སེམས་ཉིད་གཉུག་མའི་དོན་དེ་ ཐམས་ཅད་ལ་ཁྱབ་པར་ཡོད་པའོ། །ཡིན་པའི་ཡིན་ལུགས་ནི། ཅི་ཡང་མ་ཡིན་པས། ཅིར་ཡང་ཁས་བླང་དུ་མེད་པའོ། །སྣང་བའི་སྣང་ལུགས་ནི། རྟོགས་མ་རྟོགས་ཀྱིས་བྱེད་པས་འཁོར་འདས་གཉིས་སུ་སྣང་བའོ༑ ༑རྟོགས་པའི་རྟོགས་ལུགས་ནི། འཁོར་འདས་སྤང་བླང་མེད་པར་རྟོགས་པའོ། །གསུམ་པ་ལ་བཞི་ལས། ཤེས་བྱ་གཞི་མེད་ནི། གཤིས་གཞི་མེད་མཐའ་བྲལ་དུ་གནས་པའོ། །ངོ་བོ་རྟེན་མེད་ནི། བཅུད་དང་རྩལ་སྦྱོང་གི་ངོ་སྤྲད་པའི་རྗེས་བློ་བྲལ་རྟེན་མེད་དོ། །ཉམས་མྱོང་འགྱུར་མེད་ནི། རྗེས་ཤེས་སངས་རྒྱས་ཀྱི་ཐུགས་མཐོང་བས་ཉམས་མྱོང་ལ་འགྱུར་བ་མེད་པའོ། །མཚན་མ་རང་གྲོལ་ནི། སྣང་བ་ཐ་མལ་གྱི་རྟོག་པ་གང་སྐྱེས་རང་གྲོལ་བའོ། །བཞི་པ་ལ་བཞི་ལས། རང་སེམས་མགོ་མེད་མཇུག་མེད་ནི་སེམས་ཉིད་ངོས་བཟུང་བ་མེད་པའོ། །རྣམ་རྟོག་བྲལ་མེད་འཕྲད་ནི་སྣང་བ་ཐུག་མལ་གྱི་རྟོག་པ་གོ་རིམ་མེད་པར་སྐྱེ་བའོ། །གདམས་པ་ཁར་ཕོག་སྣར་ཕོག་ནི་རྟོག་པ་གང་སྐྱེས་ཀྱི་སྟེང་དུ་བཅུད་པའོ། །འཕོས་འགྱེལ་དུ་གཏོང་བའི་ལག་ལེན་ནི། དེས་རྟོག་པ་ཐམས་ཅད་ཆོས་ཉིད་དུ་འགྲོ་བའོ། །ལྔ་པ་མཐའ་རྒྱས་གཉིས་སུ་ལ་བཟླ་བ་ནི། ཁ་འཐོར་གྱི་ཁོངས་སུ་གཏོགས་ཀྱི་གནས་ལོགས་སུ་བགྲང་དུ་མེད་དོ། །རྨའི་ལག་ཁྲིད་ཚིག་བརྒྱུད་ཀྱི་གནད་དང་བཅས་པའི་ཁྲིད་ཡིག་རོག་བདེ་གཤེགས་ཆེན་པོའི་ཡི་གེ་ལྟར་ཟིན་ཐུན་དུ་བྱས་པ་དར་རྒྱས་འཕེལ། །ༀ་སྭ་སྟི། བཀའ་བབས་བར་པའི་ནང་ཚན་གཉིས་པ་སོ་རིག་པ་གཅེར་མཐོང་གི་ཁྲིད་ལ། བླ་མ་བརྒྱུད་པའི་རིམ་པ་དང༌། དེ་ལས་བྱུང་བའི་གདམས་པའོ། །དང་པོ་ནི། འཇམ་དཔལ་སྨྲ་སེང༌། བི་པ། ཨཱ་དེ་བ། རྗེ་བཙུན་དམ་པ་སངས་རྒྱས། སོ་དགེ་འདུན་འབར། ཤ་མི་སྨོན་ལམ་འབར། འཁྲུལ་ཞིག་མེས་སྟོན་ནམ། ཡང་ན། ཤ་མི་ནས་ཆུས་པ་དར་བརྩོན། ཆུས་པ་བརྩོན་སེང༌། དེ་དང་མེས་སྟོན་གྱིས་རོག་ཤེས་རབ་འོད། དེ་ནས་ཆོས་རྗེ་ཐམས་ཅད་མཁྱེན་པ་སོགས་བཀའ་བབས་དང་པོ་ལྟར་ལས། ཁྱབ་བདག་དཔལ་འབྱོར་ཕུན་ཚོགས་ལ། རྗེ་བློ་གྲོས་བརྟན་པས་གསན། དེ་ལས་བདག་གིས་ཐོབ། ཡང་སྐྱེས་མཆོག་པའི་ལུགས་ལྟར་ན། ཤ་མི་སྨོན་ལམ་འབར་ནས། ལྕེ་སྟོན་ཤེར་ཚུལ། བ་རི་སྒོམ་ཆེན། འཕྲང་ཁ་ཇོ་བཙུན། ཉང་པོ་བ་འབྱུང་གནས་ཡེ་ཤེས། སངས་རྒྱས་སྒོམ་པ། བྱང་ཆུབ་རྡོ་རྗེ། རྒྱ་བྲག་པ་ཡེ་ཤེས་གཞོན་ནུ། སྐྱེས་མཆོག་བསམ་གཏན་དཔལ། དེ་གཉིས་ཀས་སྨྲ་བཅད་པ་བསྟན་པའི་རྒྱལ་མཚན། དེས་ཀུན་མཁྱེན་བྱང་ཆུབ་བཟང་པོ། དེ་ནས་རྒྱ་སྒོམ་རྡོ་རྗེ་གདན་པ་མན་ཆད་འདྲའོ། །གཉིས་པ་ལ། སྔོན་འགྲོ། དངོས་གཞི། རྗེས་གསུམ་གྱི། དང་པོ་ལ་ཚོགས་བསགས་སྐྱབས་འགྲོ། མི་རྟག་སེམས་བསྐྱེད། བླ་མའི་རྣལ་འབྱོར། ཡི་དམ་གྱི་ལྷ་བསྒོམ་པ་དང་བཞིའོ། །མདུན་གྱི་ནམ་མཁར་དཔག་བསམ་གྱི་ལྗོན་ཤིང་ཡལ་ག་ལོ་འདབ་མེ་ཏོག་འབྲས་བུ་ཕུན་སུམ་ཚོགས་པའི་དབུས་སུ་སེང་ཁྲི་པད་ཉི་ཟླ་བའི་ གདན་ལ་རྩ་བའི་བླ་མ་དང་དབྱེར་མེད་པ་རྗེ་བཙུན་དམ་པ་རྒྱ་གར་བ་གཅེར་བུ་རུས་པའི་རྒྱན་ཅན་རྡོར་དྲིལ་འཛིན་པ་གཟི་མདངས་རྒྱས་ལ་ཞལ་འཛུམ་པའི་ཉམས་དང་ལྡན་པ་དེའི་དབུ་ཐོག་ཏུ་འཇམ་དབྱངས་སྨྲ་སེང་དང་རྡོ་རྗེ་འཆང༌། དམ་པའི་གཡས་སུ་བི་པ། གཡོན་དུ་ཨཱ་དེ་བ། མདུན་དུ་ཀླུ་སྒྲུབ། རྒྱབ་ཏུ་སུ་ཁ་སིདྡྷི། དེ་དག་གི་མཐའ་བསྐོར་དུ་བརྒྱུད་པའི་བླ་མ། ཕྱོགས་བཅུའི་སངས་རྒྱས་དང་ཡི་དམ་བླ་མ། དམ་པའི་ཆོས་རྣམས་གླེགས་བམ་བརྩེགས་པའི་རྣམ་པ། དེ་མདུན་བྱང་སེམས་དང་ཉན་རང་འཕགས་པ། མཁའ་འགྲོ་ཆོས་སྐྱོང་ཡེ་ཤེས་པ་རྣམས་སྤྲིན་ཕུང་གཏིབས་པ་ལྟར་བཞུགས་པའི་སྤྱན་སྔར། རང་གཞན་སེམས་ཅན་ཐམས་ཅད་བྱ་བྱེད་མཐུན་པར་འཁོད་པས་ཕྱི་ནང་གསང་བའི་མཆོད་པ་དངོས་འབྱོར་ཡིད་སྤྲུལ་དང༌། བདག་པོས་བཟུང་མ་བཟུང་ཐམས་ཅད་བསྡུས་ཤིང༌། ཁྱད་པར་ལུས་ལོངས་སྤྱོད་དུས་གསུམ་གྱི་དགེ་རྩ་ཐམས་ཅད་བློས་བླངས་ནས་ཕུལ་བར་བསམས་ལ་མཆོད་པའི་ཚིག་ཅི་རིགས་པར་བརྗོད་ཅིང་ཁྱད་པར་མཎྜལ་ཕུལ་ནས། ཚོགས་ཞིང་དེ་དག་གི་སྤྱན་སྔར་ཅི་མཛད་ཁྱེད་ཤེས་ཀྱི་རེ་ལྟོས་ལིངས་བསྐྱུར་གྱིས་རང་དང་སེམས་ཅན་ཐམས་ཅད་ཀྱིས་ཕྱི་ནང་གསང་བའི་སྐྱབས་འགྲོ་མགྲིན་གཅིག་ཏུ་བྱེད་པར་མོས་ལ། མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད། དེང་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་མཆིའོ། །སངས་རྒྱས་ཆོས་དང་དགེ་འདུན་གསུམ་ལ་སྐྱབས་སུ་མཆིའོ། །ལྟ་བ་སྒོམ་པ་སྤྱོད་པ་གསུམ་ལ་སྐྱབས་སུ་མཆིའོ། །ཞེས་བློ་དང་འདྲེས་ངེས་སུ་འབད་ནས། མཐར་སྐྱབས་ཡུལ་རྣམས་ཀྱི་གནས་གསུམ་ལས་འོད་ཟེར་དཔག་མེད་བྱུང༌། རང་གི་གནས་གསུམ་དུ་ཐིམ་པས། ལུས་ངག་ཡིད་གསུམ་གྱི་སྡིག་སྒྲིབ་དག །སྐྱབས་ཡུལ་རྣམས་ཀྱི་རྡོ་རྗེ་གསུམ་དང་རང་གི་སྒོ་གསུམ་དབྱེར་མི་ཕྱེད་པའི་ངང་ལ་མཉམ་པར་བཞག་གོ །གཉིས་པ་ནི། རྗེ་དམ་པས། འཆི་བ་མི་རྟག་པ་བསམ་ཙ་ན་ཅི་ཡང་དགོས་པ་མི་གདའ། འཁོར་བའི་སྡུག་བསྔལ་བསམ་ཙ་ན་ཅི་ཡང་དགོས་པ་མི་གདའ། སེམས་ཅན་གྱི་འཁྲུལ་པ་ལ་བསམ་ཙ་ན་སྙིང་རྗེ་བཙན་ཐབས་སུ་སྐྱེ་བར་གདའ། ཞེས་གསུངས་པས་འདི་ལྟར་བསམ་སྟེ། ག་རེ་བདག་གིས་རྙེད་དཀའི་མི་ལུས་རིན་པོ་ཆེ་ཐོབ་ཏུ་ཟིན་ཀྱང༌། སྐྱེས་པ་ན་འཆི་བ་ལས་མ་འདས། ཚེ་ཐར་དུ་ལུས་པ་ནི་སུ་ཡང་མི་འདུག་པས་ངེས་པར་འཆི། དེ་ཡང་འཆི་རྐྱེན་མང་ཞིང་གསོན་རྐྱེན་ཉུང་བས་མྱུར་དུ་འཆི། ནམ་འཆི་ཆ་མེད་པས་དོ་ནུབ་ཤི་ན་ཅི་ཙུག་བྱེད། མི་འཆི་བའི་གདིང་ནི་མེད། ཤི་བའི་རྗེས་སུ་ལས་ཀྱི་དབང་གིས་འཁོར་བ་མཐོ་དམན་གང་དུ་སྐྱེས་ཀྱང་སྐྱིད་མེད། དེས་ན་འཆི་བ་མི་རྟག་པ་དང་པོར་སྐྱེས་ན་ཆོས་ལ་འཇུག་པའི་རྒྱུ་བྱེད། བར་དུ་དྲན་ན་བརྩོན་འགྲུས་ཀྱི་ལྕག་བྱེད། ཐ་མར་དྲན་ན་མི་རྟག་པ་དྲན་པ་དང་ཆོས་ཉིད་དུ་ གོ་བ་དུས་མཉམ་པ་ཡིན་གསུང༌། དེ་ལྟར་འཆི་བ་མི་རྟག་པ་གཤའ་མ་ཞིག་དྲན་ན་སེམས་ཅན་ལ་སྙིང་རྗེ་བཅོས་མིན་དུ་སྐྱེ་སྟེ། མཁའ་ཁྱབ་ཀྱི་སེམས་ཅན་འདི་ཐམས་ཅད་ཀྱིས་བདག་གི་ཕ་མ་ལན་གྲངས་དཔག་ཏུ་མེད་པ་བྱས་པའི་དྲིན་ཅན་ཤ་སྟག་ཡིན་པ་ལ། འདི་ཐམས་ཅད་ཀྱང་འཆི་བ་མ་དྲན་པས། རང་རང་གི་ཚེ་འདི་ལྟོས་ཀྱི་འདུ་འཛི་ལ་གཡེངས་ནས། ཆོས་མི་དྲན་པ་འདི་དག་སྙིང་རེ་རྗེ། འདི་དག་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་ནས། བདེ་བ་དང་བདེ་བའི་རྒྱུ་ལ་བདག་ཉིད་ཀྱིས་འགོད། དེའི་ཆེད་དུ་བདག་གིས་དགེ་སྦྱོར་ལ་འབད་པར་བྱའོ་སྙམ་པས། མ་ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རིག་པ་དྲི་མ་མེད་པའི་དོན་བསྒོམ་པར་བྱའོ། །ཞེས་བརྗོད་ཅིང་དོན་བསམ་མོ། །གསུམ་པ་ནི། རྗེ་དམ་པས། གསོལ་བ་མོས་གུས་ཀྱིས་ཐོབ་ཅིག །བྱིན་རླབས་རང་འབར་དུ་འབྱུང་བའི་དགོས་པ་ཡོད། ཅེས་དང༌། མོས་གུས་ཀྱིས་བྱིན་རླབས་ཆུན་ན་རྒྱུད་རང་གྲོལ་ལ་འགྲོ། ཞེས་དང༌། བླ་མ་སངས་རྒྱས་སུ་མཐོང་བ་དང་བྱིན་རླབས་ཞུགས་པ་དུས་མཉམ་ཞེས་གསུངས་པས། རང་གི་སྤྱི་བའི་ཐད་ཀྱི་མདུན་གྱི་ནམ་མཁར་སེང་ཁྲི་པད་ཉི་ཟླ་བའི་གདན་ལ་རང་གི་རྩ་བའི་བླ་མ་དེ་ཉིད་སྐུ་གཅེར་བུ་རུས་པའི་རྒྱན་གྱིས་བརྒྱན་པ། ཕྱག་གཉིས་རྡོར་དྲིལ་ཐུགས་ཀར་བསྣོལ་བ། སྐུ་གཟི་མདངས་ རྒྱས་ཤིང༌། ཞལ་འཛུམ་པ་དང་བཅས་པ། ཐུགས་འོད་གསལ་རྣམ་པར་མི་རྟོག་པའི་ངང་ནས་བྱིན་རླབས་འབད་རྩོལ་མེད་པར་སྩོལ་བ་ཞིག་སྒོམ་ནས། དེའི་ཐུགས་ཀ་ནས་འོད་ཟེར་འཕྲོས། བརྒྱུད་པའི་བླ་མ། སངས་རྒྱས་བྱང་སེམས། ཡི་དམ་ལྷ་ཚོགས། ཉན་རང་འཕགས་པ། མཁའ་འགྲོ་ཆོས་སྐྱོང་ཐམས་ཅད་སྤྱན་དྲངས་ནས་བསྟིམ་སྟེ། སྐྱབས་གནས་ཀུན་འདུས་སུ་བསྒོམ། དེ་ལ་རང་གིས་བྱང་དྲངས་ཏེ། སེམས་ཅན་ཐམས་ཅད་ཀྱིས་སྒོ་གསུམ་གུས་པས་ཅི་མཛད་ཁྱེད་ཤེས་ཀྱི་གསོལ་བ་འདེབས་པར་མོས་ལ། དྲིན་ཅན་རྩ་བའི་བླ་མ་ལ་གསོལ་བ་འདེབས་སོ། །རིག་པ་དྲི་མེད་དུ་རྟོགས་པར་བྱིན་གྱིས་བརླབ་ཏུ་གསོལ། ཞེས་ཅི་ནུས་དང༌། སྤྲོ་ན༑ ན་མོ་གུ་རུ། བྲག་སེང་གེ་འདྲ་བའི་གནས་མཆོག་ཏུ། །ཞེས་སོགས་བརྒྱུད་འདེབས་ཀྱང་འདོན། མཐར་རྩ་བའི་བླ་མའི་གནས་གསུམ་ལས་འོད་ཟེར་དཔག་མེད་འཕྲོས། རང་གི་གནས་གསུམ་དུ་ཕོག་པས་སྡིག་སྒྲིབ་ཐམས་ཅད་དག །དབང་བཞི་ཐོབ། བླ་མའི་སྐུ་གསུང་ཐུགས་ཀྱི་བྱིན་རླབས་ཞུགས་པར་བསམ་ཞིང༌། བླ་མ་རང་ལ་བསྟིམ་ནས་འཛིན་མེད་བློ་བྲལ་གྱི་ངང་ལ་རང་ལུགས་སུ་མཉམ་པར་བཞག །བཞི་པ་ནི། དམ་པས༑ རྒྱུད་མ་སྨིན་པའི་རྟེན་ལ་བྱིན་རླབས་ཀྱི་རྩི་མི་ཆགས་པས། ཐོག་མར་རྒྱུད་སྦྱོང་བ་འདི་ཌོམྦྷི་པའི་གདམས་ངག་ཡིན། ཞེས་དང༌། རྒྱུད་ལ་ཚོགས་གཉིས་རྫོགས་པ་དང༌། འབྲས་བུ་སྐུ་གསུམ་ཐོབ་པ་དུས་མཉམ། ཞེས་གསུངས་པས། འཇུག་སྒོའི་གཏོར་དབང་བསྐུར་ནས། སྟོང་པའི་ངང་ལས་པད་ཟླ་ལ་རང་ཉིད་ཇོ་བོ་སྤྱན་རས་གཟིགས་དཀར་པོ་ཕྱག་བཞི་པའི་རྣམ་པ་ཅན་དུ་བསྐྱེད་པ་ལ་ཡི་དམ་ཐམས་ཅད་སྤྱན་དྲངས་ལ་བསྟིམ། དབང་བསྐུར་བས་སྤྱི་བོར་རིགས་བདག་སྣང་བ་མཐའ་ཡས་རྩ་བའི་བླ་མ་དང་དབྱེར་མེད་སྒོམ། དེ་ཡང༌། རྣམ་པ་གསལ་ཞིང་ང་རྒྱལ་བརྟན་པས་བསོད་ནམས་ཀྱི་ཚོགས་རྫོགས། རྣམ་དག་དྲན་པས་ལྷ་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུར་རྒྱས་བཏབ་སྟེ་གསལ་སྟོང་དུ་བསྒོམ་པས་ཡེ་ཤེས་ཀྱི་ཚོགས་རྫོགས་པའོ། །དེ་ལྟར་ཟུང་འཇུག་ཏུ་ཤེས་པའི་ངང་ལ་མཉམ་པར་བཞག་པར་བྱའོ། །གཉིས་པ་དངོས་གཞི་ལ་གནད་གསུམ་སྟེ། བཅའ་བ་ལུས་ཀྱི་གནད། དགང་བ་རླུང་གི་གནད། བཞག་པ་སེམས་ཀྱི་གནད་དོ། །དང་པོ་ནི། དམ་པས། ཉམས་མྱོང་སྐྱེ་བར་འདོད་ན་ལུས་ལ་རྟེན་འབྲེལ་སྒྲིགས། ཞེས་པས་ལུས་གནད་རྣམ་སྣང་གི་ཆོས་བདུན་ལྡན་ལས་མི་གཡོ་བར་འཆིང་སྟེ། བརྡའ་རྒྱུད་ལས། ཆོས་བདུན་ཚུལ་གྱིས་རླུང་སེམས་ཚང་དུ་གཞུག །ཅེས་གསུངས། ལྟ་སྟངས་ནི། དང་པོ་དམའ་བར་བྱ། དེ་ནས་ཇེ་མཐོར་བསླབ་པས་གེགས་ཆུང་ཞིང་ཡོན་ཏན་ཆེ། དེ་ཡང་སེམས་མ་ཟིན་གྱི་བར་ཉན་ཐོས་ཀྱི་སྤྱན་ཞི་བ་མཐར་ལྟས་ཀྱིས་སེམས་བཟུང༌། ཟིན་པ་དང་བྱང་སེམས་ཐད་ཀའི་ལྟ་སྟངས་ཀྱིས་སོ་མར་གློད། ཉམས་ལ་ཆགས་ན་ཁྲོ་བོའི་ ལྟ་སྟངས་ཕྱོགས་བཅུར་བསྒྱུར་བས་རྗེས་ཤེས་ངོ་སྤྲད་དོ། །གཉིས་པ་ནི། དམ་པས། རྩ་བའི་རླུང་ལྔ་གཏོད་ལ་མནན་པས། ཡན་ལག་གི་རླུང་ལྔ་ལས་སུ་རུང་སྟེ། རྟེན་འབྲེལ་གྱི་འཆར་སྒོ་དུ་མ་རྟོགས་པ་འདི་ནི་ཀརྨ་བཛྲ་གྱི་གདམས་པ་ཡིན། ཞེས་གསུངས་པས། འབྱུང་འཇུག་གནས་གསུམ་སོ་མར་བཞག་པས་རླུང་བཅུ་དབང་དུ་འདུའོ། །གསུམ་པ་ལ། དབང་པོ་རབ་ཁྱབ་བརྡལ་ཆེན་པའི་ངང་ལ་བཞག་པ། དབང་པོ་འབྲིང་གཅེར་མཐོང་ཐུག་ཕྲད་ལ་བཞག་པ། དབང་པོ་ཐ་མ་བཅུན་ཐབས་སྣ་ཚོགས་ཀྱིས་བཅུན་ནས་བཞག་པ་དང་གསུམ་མོ། །དང་པོ་ནི། ལུས་གནད་བཅའ། སེམས་ཁོང་གློད་དེ། གང་ཡང་ཡིད་ལ་མི་བྱེད་པར་སོ་མ་ལྷུག་པ། མ་བཅོས་པར་རང་སོར་འཇོག །དམ་པས། མ་བཅོས་པ་ཅོག་གེ་བཞག་གོ །བཅོས་ན་རྟ་ལས་བབས་ནས་བོང་བུར་ཞོན་པ་འདྲ། ཞེས་གསུངས་པས། རྣམ་རྟོག་སྐྱེས་ན། དེ་ལ་ལྟ་ཡང་མི་ལྟ། རྗེས་སུ་ཡང་མི་འབྲང༌། རང་སོར་མ་བཅོས་པར་བཞག །གསལ་བདོ་བ་ལ་ཤིགས་སེ་བཤིག་སྟེ་རང་ལུགས་སུ་བཞག་གོ །གཉིས་པ་ནི། སྨྲ་སེང་གིས་དམ་པ་ལ་གསུངས་པ་ལས། གང་ཤར་ལ་ཆེར་གྱིས་ལྟོས། ཡིན་ཐོག་ཏུ་ལྷུན་གྱིས་བཞོག །ཟིན་ཙ་ན་བཤིག་ལ་བོར། དེ་ཉིད་ལ་རྩལ་སྦྱོངས། གང་བྱུང་ཐོག་ཏུ་ཁུར། ཞེས་གསུངས། འདི་ལ་གཉིས་ལས། ཕྱི་སྣང་བ་གང་ཤར་ཉམས་སུ་བླང་བ་ནི། དབང་པོ་མ་བཀག་པར་ཚོགས་དྲུག་གི་ཡུལ་དུ་གང་ཤར་དེ་ལ་ གཅེར་གྱིས་བལྟས་ལ། རང་བཞིན་མེད་པར་མཐོང་བ་དེའི་སྟེང་དུ་ལྷན་གྱིས་འཇོག །གསལ་བདོ་བ་ལ་ཕཊ་ཅེས་བཤིག་ནས་ཐ་མལ་རང་སོར་བཞག །དེ་ལྟར་བཞག་པས། གདངས་མ་འགགས་ལ། གཤིས་ཅིར་ཡང་མ་གྲུབ་པའི་ཐལ་ལེ་བ། སྣང་སྟོང་དབྱེར་མེད་དུ་རྟོགས་པ་དེ་ལ་རང་བྱུང་གི་ཡེ་ཤེས་ཟེར་བ་ཡིན་པས་རྒྱུན་དུ་ཉམས་སུ་བླང་ངོ༌། །ནང་རིག་པ་གང་ཤར་ཉམས་སུ་བླང་བ་ནི། ས་ར་ཧས་དམ་པ་ལ་གསུངས་པ་ལས༑ སེམས་ཉིད་མེ་ལོང་གཟུགས་བརྙན་ཤར་བ་དེ། །རྐྱེན་ཤར་ཡིན་གྱིས་དོན་ལ་མ་སྐྱེས་ཀྱཻ། །ཞེས་པས། སེམས་ལ་རྣམ་རྟོག་གང་ཤར་ཡང་ངོ་བོ་ཅིར་འདུག་ཅེར་གྱིས་ལྟོས། བལྟས་པས་རྣམ་རྟོག་སོགས་རགས་པ་རྣམས་སྣང་སྟོང་གྲག་སྟོང་དུ་འཆར། ཕྲ་བ་རྣམས་རང་དྭངས་རང་སྟོང་དུ་སིང་སིང་འགྲོ། དེའི་སྟེང་དུ་ལྷན་གྱིས་བཞོག །གསལ་སྟོང་དུ་བཤིག་ལ་རང་སོར་བཞག་གོ །བདེ་སྡུག་རྐྱེན་སྣང་ཅི་བྱུང་ཡང་དེ་ལྟར་ཉམས་སུ་བླང་ངོ༌། །གསུམ་པ་ལ། མཚན་བཅས་དང༌། མཚན་མེད་གཉིས། དང་པོ་ལ་གསུམ་ལས། སྣང་བ་གཙུབ་སྟན་ལྟ་བུ་ལ། རིག་པ་གཙུབ་ཤིང་ལྟ་བུས་རྣོ་བཏོན་ཏེ་རིག་པ་ཡེ་ཤེས་གཅེར་མཐོང་དུ་ངོ་སྤྲོད་པ་ནི། ཨིནྡྲ་བོ་དྷིས་དམ་པ་ལ་གསུངས་པའི་གདམས་པ་སྟེ། རང་གི་མདུན་དུ། ཤིང་བུའམ་རྡེའུ་ལྟ་བུ་དམིགས་རྟེན་གྱི་མཚན་མ་གཅིག་བཞག་ལ། དེ་ལ་ལྟ་སྟངས་དང་རིག་པ་བཅུན་ནས་ཐད་ཀར་གཏད། རིག་པ་ལ་ངར་བསྐྱེད། དབང་པོ་ལ་བཀྲག་བཏོན་ནས་ཧྲིག་གེ་བཞག །གསལ་བདོ་ཙ་ན་ཤིགས་སེ་བཤིག་ལ་རང་སོར་བཞག་གོ །མཚན་མོ་སྙིང་འོད་ཀྱི་གོང་བུའི་ནང་དུ་བླ་མའི་སྐུ་ཆུང་ལ་དོད་པ་དགྱེས་པའི་ཞལ་མདངས་ཡལ་ལེ་བ། དེའི་ཐུགས་ཀར་ཧཱུྃ་ཡིག་སྔོན་པོ་འབར་བ་ལ་ཡིད་གཏད་དེ་སྔར་བསྒོམ་པའོ། །ལྟ་སྟངས་ཀྱིས་རིག་པ་འགལ་མེ་ལྟར་བསྐོར་ནས་རིག་པ་ཡེ་ཤེས་གཅེར་མཐོང་དུ་ངོ་སྤྲད་པ་ནི། རྡོ་རྗེ་དྲིལ་བུ་པས་དམ་པ་ལ་གསུངས་པ་སྟེ༑ དྲག་རླུང་བཙན་ཐབས་སུ་བཟུང༌། ལྟ་སྟངས་བཅུན། རིག་པ་མདུན་གྱི་ནམ་མཁར་འགལ་མེའི་འཁོར་ལོ་ལྟར་བསྐོར་བ་ལ་ཡིད་དྲག་ཏུ་གཏད། གསལ་བདོ་བ་ལ་ཕཊ་ཅེས་བཤིག་ནས་ལྷོད་ཀློད་ལ་རང་སོར་བཞག་གོ ༑ལྟ་སྟངས་ཀྱིས་རིག་པ་མདུང་ཚུགས་སུ་ཉེ་རིང་གསུམ་ལ་གཏད་དེ་རིག་པ་ཡེ་ཤེས་གཅེར་མཐོང་དུ་ངོ་སྤྲད་པ་ནི། ཡན་ལག་མེད་པའི་རྡོ་རྗེས་དམ་པ་ལ་གསུངས་པ་སྟེ། རང་གི་མདུན་དུ་དམིགས་རྟེན་ཉེ་བ་ཁྲུ་དོ་ཙམ༑ བར་པ་ཁང་མཚམས་ཙམ། རིང་བ་རི་རྩེ་ལྟ་བུར་མཚན་མ་བྱས་པ་ལ། ལྟ་སྟངས་བཅུན་ནས་རིག་པ་མདུང་བཙུག་པ་ལྟར་གཏད་དེ། གསལ་བདོ་བ་ལ་ཕཊ་ཅེས་བཤིག་ནས་རང་སོར་བཞག་གོ །གཉིས་པ་མཚན་མེད་ལའང་གསུམ་ལས། སྟེང་དང་འོག་གི་ལྟ་སྟངས་ཀྱིས་རིག་པ་ཡེ་ཤེས་ཅེར་མཐོང་དུ་ངོ་སྤྲད་པའོ། །ཤེས་རབ་བཟང་པའི་གདམས་པ་སྟེ། རང་ལུས་ཡི་དམ་གྱི་སྐུའི་རྣམ་པ་ལ། ནང་ཁོག་པ་སྟོང་སང་ངེ་བ་ཟོ་སྟོང་ ཞབས་མེད་པ་ལྟ་བུར་བསམས་ལ། ལྟ་སྟངས་བཅུན་ཏེ་རིག་པ་ཚངས་བུག་ནས་ཡར་རྒྱང་གིས་བཏོན་ཏེ་འོག་མིན་དུ་ཐལ་ལེ་བཏང་ལ་བཞག །གསལ་བདོ་བ་ལ་ཕཊ་ཅེས་བཤིག་ནས་རང་སོར་བཞག །ཡང་རིག་པ་འོག་སྒོ་ནས་མར་རྒྱང་གིས་བཏོན་ཏེ་གསེར་གྱི་ས་གཞིའི་བར་ཐལ་ལེ་བཏང་ལ་བཞག །གསལ་བདོ་བ་ལ་བཤིག་ནས་རང་སོར་བཞག །དེ་ཀ་ལ་སུ་ནི་བྷི་ཀ་མས། རིག་པ་བྱ་འཕུར་དུམ་བུའི་གནད། །ལྟ་སྟངས་འཇོག་དོར་རེས་མོར་གྱིས། །མི་རྟོག་ལྟེངས་པོ་བསྲུངས་ནས་ནི། །ཐ་མལ་དངོས་ཞེན་ལྡོག་པར་བྱ། །ཞེས་གསུངས་པ་ལྟར་རོ། །རིག་པ་འགྱུར་མེད་དུ་བཅིང་ནས་གཅེར་མཐོང་དུ་ངོ་སྤྲད་པ་ནི། ཏོག་རྩེ་བའི་གདམས་པ་སྟེ༑ རིག་པ་ལ་ངར་བཏོན་ནས། མདུན་གྱི་ནམ་མཁར་ལྟ་སྟངས་ཀྱིས་རིག་པ་འགྱུར་མེད་དུ་གཏད། གསལ་བདོ་བ་ལ་ཕཊ་ཅེས་བཤིག་ནས་བཞག །དེ་ལྟར་ཐུན་ཆུང་ལ་གྲངས་མང་བར་བསྒོམ། འཇམ་དཔལ་ཡེ་ཤེས་སེམས་དཔའི་ལྟ་སྟངས་ཀྱིས་མདའ་ལྟར་འཕང་ཞིང༌། གཞུ་ལྟར་བཀུག་ནས་ནམ་མཁའ་ལྟར་སྐྱེ་མེད་དུ་རིག་པ་ཡེ་ཤེས་ཅེར་མཐོང་དུ་ངོ་སྤྲད་པ་ནི། བི་པའི་གདམས་པ་སྟེ། རང་གི་མདུན་ན་ཕར་ལྟ་སྟངས་ཀྱིས་སེམས་མདའ་ལྟར་རྒྱངས་ཀྱིས་འཕངས་ནས་ནམ་མཁའ་དང་བསྲེས་ལ་རྒྱ་སྐྱེད་དེ་བཞག །གསལ་བདོ་བ་ལ་བཤིག་ལ། ལྟ་སྟངས་ནང་དུ་བལྟ་ཞིང་སེམས་ཚུར་བཀུག་ལ་དེ་ཁའི་ངང་དུ་ལྷོད་ཀྱིས་སློད་དེ་མ་བཅོས་པར་བཞག ། དེ་ལྟར་རེས་ཡུན་ཐུང་ལ་ཐུན་མང་བར་སྒོམ། རེས་ཐུན་རིང་ལ་གྲངས་ཉུང་བར་སྒོམས། དེ་ལྟར་དབང་པོ་དང་བསྟུན་ནས་ཉམས་སུ་བླངས་པས་རང་རིག་མཐའ་བྲལ་བསྒོམ་བྱ་སྒོམ་བྱེད་དང་བྲལ་བའི་ཡེ་ཤེས་ལ་རྒྱུན་དུ་གནས་པ་འབྱུང་ན་ངོ་སྤྲད་པ་བྱ་སྟེ། དེ་ལ་ངོ་སྤྲད་པའི་ཐབས་གསུམ་སྟེ། དབང་པོ་རབ་ཡེ་ཤེས་བཙན་ཐབས་སུ་ངོ་སྤྲད། འབྲིང་དཔེ་དང་ཚིག་གིས་ངོ་སྤྲད། ཐ་མ་ཡིད་ཆེས་ཚིག་ལ་བརྟེན་ནས་ངོ་སྤྲད་པའོ། །དང་པོ་ནི༑ ལུས་གནད་བཅའ། རླུང་བཟུང༌། རིག་པ་དཔངས་བསྟོད་ལ་ཤེས་པ་རང་སོར་བཞག་གོ །དེ་ལྟར་བཞག་པས་ཤེས་པ་མ་བཅོས་པའི་སོ་མ་འདི་ཀ་རང་རིག་དྲི་མེད་ཆོས་སྐུ་བྱ་བ་དེ་ཡིན་ནོ། །དེ་ཡང་སྔར་མ་རིག་པ་ད་རིག་པས་རང་རིག་གཟུང་འཛིན་གང་གིས་ཀྱང་མ་གོས་པས་དྲི་མེད་སེམས་ཀྱི་ཡིན་ལུགས། ཡེ་གདོད་མ་ནས་དེ་ལྟར་རང་ཆས་སུ་གནས་པས་ཆོས་སྐུའོ། །དེ་ལྟར་ཡང་འཇམ་དཔལ་མཚན་བརྗོད་ལས། དང་པའི་སངས་རྒྱས་རྒྱུ་མེད་པ། །ཞེས་དང༌། སྨྲ་སེང་གི་དོན་རྒྱུད་ལས། ཚོགས་བསགས་སྐལ་ལྡན་གང་ཟག་དང༌། །བླ་མ་དམ་པ་འཕྲད་ཙ་ན། །བླ་མས་མཚན་ཉིད་ངོ་སྤྲད་པས། །ཆོས་ཉིད་ཡེ་ཤེས་སྒོམ་ཙ་ན། །སྒོམ་མ་མྱོང་ལ་འབྲལ་མ་མྱོང༌། །མ་བསྒོམས་དོན་དང་མི་འབྲལ་བའི། །ཡེ་ཤེས་ཆེན་པོ་རྒྱུན་ཆད་མེད། །རྣལ་འབྱོར་མཆོག་གི་ཏིང་འཛིན་ཡིན། །དབང་པོ་རབ་ཀྱི་ངོ་སྤྲོད་དོ། །ཞེས་དང༌། དམ་པས། རིག་པ་དྲི་མེད་སྒོམ་པ་ལ་བློས་སྒོམ་གྱི་ ཞབས་ཏོག་མི་བྱ། ཞབས་འདྲེན་དུ་འགྲོ། ཞེས་གསུངས་སོ། །གཉིས་པ་ལ་གསུམ་ལས། དང་པོ་ཆུའི་ཆུ་ལྦུར་ལྟར་ངོ་སྤྲད་པ་ནི། ཆུའི་ཆུ་ལྦུར་དེ་བྱུང་ཡང་ཆུ་ལས་བྱུང༌། གནས་ཀྱང་ཆུའི་ངོ་བོར་གནས། ཐིམ་ཡང་ཆུ་ལ་ཐིམ་པ་ལྟར། རང་གི་རྟོག་པ་ཏོལ་གྱིས་སྐྱེས་དུས་ཀྱང༌། སེམས་གསལ་སྟོང་ཆོས་སྐུ་ལས་སྐྱེས། གནས་དུས་ཀྱང་གསལ་སྟོང་ཆོས་སྐུའི་ངོ་བོར་གནས། འགགས་དུས་ཀྱང་གསལ་སྟོང་ཆོས་སྐུའི་ངང་དུ་འགགས་པ་ཡིན་ནོ། །དམ་པས། འདས་པའི་རྟོག་པའང་ཆོས་ཉིད་སྐྱེ་བ་མེད་པའི་ངང་དུ་གྲོལ། མ་འོངས་པའི་རྟོག་པའང་ཆོས་ཉིད་སྐྱེ་བ་མེད་པའི་ངང་དུ་འཆར། ད་ལྟར་གྱི་རྟོག་པའང་ཆོས་ཉིད་སྐྱེ་བ་མེད་པའི་ངང་དུ་གནས་པ་ཡིན། ཞེས་དང༌། རིག་པ་ཅེར་མཐོང་གི་གདམས་པ་གང་ལགས་ཞུས་པས། ཏོལ་སྐྱེས་ཀྱི་ཤེས་པ་ངོས་བཟུང་དང་བྲལ་བ་དེ་ལ་ཟེར། ཞེས་གསུངས་སོ། །གཉིས་པ་སོས་ཀའི་མེ་ཏོག་ལྟར་ངོ་སྤྲོད་པ་ནི། དཔེར་ན་སོས་ཀའི་མེ་ཏོག་ལ་མཚན་མོ་ཆར་བབས་ནས་སྔ་དྲོའི་ཉི་མའི་འོད་ཕོག་པ་དང་མེ་ཏོག་ཁ་དོག་དྭངས་པ། གསལ་བ། དྭངས་གསལ་མི་ཕྱེད་པར་བཀྲ་བ། མདོག་གཞན་དུ་མི་འགྱུར་བ་ལྟར། རིག་པ་ལ་ངར་ཐོགས་པས་གསལ་བ༑ དྭངས་པ། གསལ་སྟོང་དབྱེར་མི་ཕྱེད་པ་ཁོའི་རང་བཞིན་འགྱུར་མེད་དུ་ཧྲིག་གིས་གནས་པ། དེ་ཀ་ཆོས་སྐུ་ཡིན་ཏེ། ཐ་མལ་གྱི་ཤེས་པ་སྒོམ་དུ་ཤར་བ་ཟེར་བ་ཡིན་ནོ། །སྨྲ་སེང་གི་དོན་རྒྱུད་ལས། དེ་ཉིད་གཉུག་མའི་ ངང་ལ་དྭངས། །དེ་ཉིད་གཉུག་མའི་ངང་ལ་གསལ། །དེ་ཉིད་གཉུག་མའི་ངང་ལ་དབྱེར་མི་ཕྱེད། །དེ་ཉིད་གཉུག་མའི་ངང་ལས་མི་འགྱུར་བ། །ཐ་མལ་ཤེས་པ་རང་བཞིན་དུ་སྒོམ་ཤེས་པའོ། །ཞེས་སོ། །གསུམ་པ་ཚིག་གིས་ངོ་སྤྲད་པ་ནི། ད་ལྟར་གྱི་ཤེས་པ་སོ་མ། མ་བཅོས་པ། རྟག་ཆད་ཀྱི་མཐའ་དང་བྲལ་བ། དེ་ཀ་རང་རིག་དྲི་མེད་ཆོས་སྐུ་ཕྱག་རྒྱ་ཆེན་པོ་བྱ་བ་ཡིན་ཏེ། རྗེ་དམ་པས། རྟོག་པ་སྔ་མ་འགགས། ཕྱི་མ་མ་སྐྱེས་པའི་རྟག་པའི་མཐའ་དང་བྲལ། ད་ལྟར་གྱི་ཤེས་པ་སལ་ལེ། ཧྲིག་གེ་བ་དེས་ཆད་པའི་མཐའ་དང་བྲལ། རྟག་ཆད་གཉིས་དང་བྲལ་བ་དེ། སངས་རྒྱས་ཀྱི་དགོངས་པ་དེ་རང་ཡིན། ཞེས་གསུང་ངོ༌། །ངོ་མཚར་བརྒྱུད་པའི་བཀའ་བབས་ལས་ཀྱང༌། ངོ་སྤྲོད་གཅིག་གི་ཡུལ་ལ་རྩ་བ་ཟིན་པས། ཟབ་མོའི་དོན་ཕྱོགས་མེད་དུ་མཐོང་བར་བྱེད། འཚང་རིག་པས་གོ་རྟོགས་ཀྱིས་གནད་ཟུང་ཞིག །ཅེས་སོ། །དེས་ན་དབང་པོ་ཐ་མའི་ངོ་སྤྲོད་ནི། རང་གི་རིག་པ་སྔ་མ་འགགས་ཤིང་ཕྱི་མ་མ་སྐྱེས་པའི་ད་ལྟར་བ། སོ་མ་རང་རིག་པ་མ་བཅོས་མ་བསླད་པ་འདི་ཀ་སངས་རྒྱས་ཀྱི་དགོངས་པ་ཆོས་སྐུ་ཕྱག་རྒྱ་ཆེན་པོ་ལྷན་ཅིག་སྐྱེས་པ་བྱ་བ་ཡིན་ཏེ། དམ་པས་སོ་ཆུང་བ་ལ། ཁྱོད་རང་གི་མིག་གི་ཐད་ཀའི་ནམ་མཁའ་ལ་ཅེར་རེ་ལྟོས་ལ་ལྟ་བྱེད་ཀྱི་ཤེས་པ་དེ་ཉིད་ལ་ལྟོས་དང༌། དེའི་དུས་ན་རྣམ་པར་རྟོག་པ་ཐམས་ཅད་བྲལ་བ་ཅིའི་ངོ་བོར་ཡང་མ་གྲུབ་པའི་ཉམས་ཤིག་འཆར། དེ་མ་ཤར་ན་ང་ལ་ གདམས་ངག་གི་གནད་མེད་པ་ཡིན་ནོ། །ཞེས་དང༌། ཏོལ་ཏེ་སྐྱེས་པའི་ཤེས་པ་ལ་ཅེར་རེ་བལྟས་པས་བུན་ཞིག་ནས། ལྷག་གིས་འཆར་བ་ཆོས་ཉིད་ཡིན། ཞེས་གསུངས། ཡང་འདི་སྐད་དུ། གཞན་དག་སྟོང་པ་ལམ་དུ་བྱེད་དེ། ང་ཅག་རིག་པ་ལམ་དུ་བྱེད། ཅེས་དང༌། གཞན་དག་མི་རྟོག་པ་ལམ་དུ་བྱེད་དེ། ང་ཅག་རྟོག་པ་ལམ་དུ་བྱེད། ཅེས་སོ། །གསུམ་པ་རྗེས་ལ་གཉིས་ཏེ། དྲོད་ཚད་བལྟ་ཞིང་གེགས་བསལ་བ་དང༌། བོགས་འདོན་ཞིང་མན་ངག་གི་ཆིངས་བསྟན་པའོ། །དང་པོ་ལ་གཉིས་ལས་དྲོད་བལྟ་བ་ནི། བླ་མས་ངོ་སྤྲད་ཀྱང་མ་འཕྲོད་པར་ངེས་ཤེས་མ་སྐྱེས་ན་བོ་བའི་རྟགས། དང་པོ་ངེས་ཤེས་ཅུང་ཟད་སྐྱེས་ཀྱང་སྐྱོང་མ་ཤེས་ན་ཟགས། ཉམས་སུ་ལེན་ཤེས་ཀྱང་གཡེང་བས་མི་བསྐྱང་བར་དྲེད་ན་ལྟེམས། སྐྱོན་ཡོན་ཡོད་བཞིན་དུ་ལོག་པར་འཛིན་པས་ཉམས་སུ་མི་ལེན་ན་ལོག་པ་ཡིན་པས་ངོ་ཤེས་པར་བྱས་ལ་འབད་པར་བྱ། གཉིས་པ་གེགས་བསལ་བ་ལ་བྱིང་རྒོད་གཉིས་ལས། བྱིང་བ་ནི། རིག་པ་རྨུགས་འཐིབས་སུ་སོང་བ་སྟེ། དེ་བསལ་བ་ལ་ཆུང་འབྲིང་ཆེ་གསུམ་གྱི། ཆུང་ངུས་ཉམས་དེ་ལ་ངོ་བོ་ཅི་འདུག་ཡང་ཡང་བལྟ་ཞིང་ཉམས་སུ་བླང༌། འབྲིང་དེ་བྱུང་དུས་ཕཊ་སོགས་ལུས་ངག་གི་སྤྱོད་པ་སྣ་ཚོགས་བྱ་ཞིང༌། རྗེས་ཀྱི་ཤེས་པ་ངོས་བཟུང་ལ་བསྒོམ། ཆེན་པོ་ནི། སྒོམ་བློ་ཕྱིར་བསལ་ཏེ། སྒོམ་ཁྱེད་རང་དེ་རིང་ཕན་ཆད། ང་ཅག་ལས་དཔག་ཚད་ཀྱི་ཕ་རོལ་དུ་སོང་ལ། ང་ཅན་མ་འོང་ ཞིག་བྱས་ལ་རྒྱང་གིས་སྐྱུར་ཏེ། གང་ཤར་དེ་ལ་རང་རྗེན་པར་ཁྲེས་སེ་བཞག །དེ་ལྟར་ཡང་ཡང་བྱས་པས་རང་གསལ་འཛིན་མེད་དུ་འཆར། དེ་ཡང་བཤིག་ཅིང་བསྐྱང་ངོ༌། །རྗེ་དམ་པས། རྫ་ཆུ་དྲག་པོ་རྡབས་ཀྱིན་དྭངས། ། དངུལ་དཀར་མེ་ལོང་ཕྱིས་ཀྱིན་གསལ། །རྣལ་འབྱོར་ཤེས་པ་བཤིག་གིན་བཟང༌། །ཞེས་གསུང་ངོ༌། །གཉིས་པ་ལ་གཉིས་ཀྱི་དང་པོ་ངོས་བཟུང་བ་ནི། སྤྱིར་རྣམ་པ་མང་ནའང༌། རྒོད་པ་ནི། རྣམ་རྟོག་ཧྲགས་པོར་འཕྲོ་ཞིང་གནས་སུ་མ་བཏུབ་པ། འཕྲོ་བ་ནི། མི་དྲན། དགུ་དྲན། ཕྲ་བ། སྣ་ཚོགས་འཕྲོ་བ། འཐོར་བ་ནི། སྒོམ་པ་ཡིན་པ་ཙུག་འདུག་ཀྱང་ཤེས་པ་མ་ཆུན་པས་འཕྲོ་བ་ཆུ་ཟངས་ཀྱི་ཉ་ལྟ་བུ། ཡས་པ་ནི། གནས་པ་སྲབས་པས་ཆུ་ཟངས་ཀྱི་སྙེ་མ་ལྟ་བུ་སྟེ། རིགས་དང་ཡོན་ཏན་སོགས་ཀྱིས་དྲེགས་ཤིང་ང་རྒྱལ་བའི་འཕོ་བ་དང༌། ང་འདྲ་བས་ཆོས་འདི་ཉམས་སུ་མི་ལོང་སྙམ་པ་ཞུམ་ཞིང་སྒྱིད་ལུག་པའི་འཕྲོ་བའོ། །གཉིས་པ་གེགས་དེ་བསལ་ཚུལ་ནི༑ རིམ་བཞིན་ངོ་ཤེས་པས་ཀྱང་ཀུན་སེལ་མོད། འོན་ཀྱང་ཁྱད་པར་གྱི་གནད་ཡུལ་གང་ཡང་རུང་བ་ལ་ལྟ་སྟངས་བཅུན། སེམས་ཁོང་གློད། སྟོད་སྨད་ཀྱི་ཉྭ་བཞི་སྒྲིམས་པས་སྔ་མ་གསུམ་སེལ་ལ། ཡས་པ་ནི་དེ་ཉིད་ལས་མ་ཡེངས་པར་རིག་པ་བཅུན་པས་སེལ་ཞིང༌། རིགས་དང་ཡོན་ཏན་དེ་ཉིད་རྩ་བ་བཅད་དེ། རང་ལས་གཞན་སུ་ཡང་མེད་པའམ། ལྷག་པར་བློ་གདིང་ཐུབ་པ་ཅི་འདུག་བལྟ། གཞན་གྱི་ཡོན་ཏན་བསམ་ནས་མཉམ་པར་ བཞག་གོ །ཞུམ་པ་ལ་བླ་མར་གསོལ་བ་བཏབ་ཅིང་རིག་པ་ལ་ངར་བསྐྱེད་པས་སེལ་ལོ། །གཉིས་པ་ལ་གཉིས་ཀྱི་དང་པོ་བོགས་འདོན་པ་ལ། དེ་ལྟར་གེགས་བསལ་ཞིང་ཉམས་སུ་བླངས་ཀྱང་བསྐྱེད་མེད་ན༑ ངོ་བོ་རང་བཞིན། མཚན་ཉིད་གསུམ་གྱིས་ངོ་སྤྲོད་ཅིང་བོགས་འདོན་ཏེ། དང་པོ་ངོ་བོ་ནི། ངོ་བོ་རང་རིག་གསལ་ལ་བརྟན་པ་དེ། གསལ་བའི་དཔེ་མེ་ཏོག་ཁ་ཕྱེ་བ་ལྟ་བུ་དང་ཆུ་རྙོག་པ་དྭངས་པ་ལྟ་བུ་དང༌། བཅུ་དྲུག་གི་ནམ་ལངས་པ་ལྟ་བུའོ། །བརྟན་པའི་དཔེ་རུས་སྦལ་འཁར་གཞོང་དུ་བཞག་པ་ལྟ་བུ་ནི། ཞི་གནས་མ་གནས་མཐུག་ཐུག་པས་ཉིན་མཚན་ངོ་མི་ཤེས་པའོ། །གར་སྤྱིན་ལ་སྦྲང་མ་འབྱར་བ་ལྟ་བུ་ནི། རྟོག་པའི་ཕུ་ཐག་ཆོད་ཀྱང་སངས་དྭངས་ནས་འགྲོ་མ་ནུས་པ་ལྟ་བུའོ། །འདག་པ་སྨིན་པོ་ལ་རྡོ་རྒྱབ་པ་ལྟ་བུ་ནི། ཉམས་ཕྱི་བཤིག་ནང་བཤིག་ནས་བཞག་ནའང་གང་བཞག་ལ་སྡོད་པའོ། །རང་བཞིན་གསལ་བ་ཤེད་ཆེ་བའི་དཔེ། རིགས་དྲུག་གི་གཡང་ས་ལ་ཉམ་ང་དང་བྲལ་བ་ཁྱུང་ནམ་མཁའ་ལ་འཕྱོ་བ་ལྟ་བུ། ཐེག་པ་གཞན་ལ་ཉམ་ང་དང་བྲལ་བ་སེང་གེ་རྩལ་རྫོགས་པ་ལྟ་བུ། རིག་པ་རྐྱེན་གྱིས་བསླུར་མི་འདོད་པ་དར་ཆེན་རླུང་གིས་བསྐྱོད་པ་ལྟ་བུའི་ཉམས་འཆར་རོ། །མཚན་ཉིད་སྟོང་གསལ་དྭངས་པའི་དཔེ། ཀུན་ལ་ཁྱབ་ཅིང་མཐའ་དང་བྲལ་བ་ནམ་མཁའ་ལྟ་བུ། མཉམ་རྗེས་རྒྱུན་མི་འཆད་པར་ཡོང་བ་ཆུ་བོ་ཆེན་པོ་ལྟ་བུ། གཉེན་པོ་བཀོལ་དུ་བཏུབ་པ་ཤེལ་ཡུངས་འབྲུ་ ཙམ་ལ་གཟུགས་བརྙན་འཆར་བ་ལྟ་བུའོ། །མདོར་ན། ངོ་བོ་མཉམ་བཞག །རང་བཞིན་རྗེས་ཐོབ། མཚན་ཉིད་མཉམ་རྗེས་ཟུང་འཇུག་གི་རྟོགས་པའོ། །ཡང༌། དབང་པོ་རབ་ངོ་འཕྲོད་པ་ཙམ་གྱིས་རྟོགས་ཐོབ་དུས་གཅིག་ཏུ་གྲོལ་བ། འབྲིང་དྲན་པ་ཙམ་གྱིས་སྣང་རྟོག་ཐམས་ཅད་ཡེ་ཤེས་སུ་འཆར་བ། ཐ་མ་ལུས་གནད་ལྟ་སྟངས་ཀྱི་སྒོ་ནས་ཐུན་ཆུང་ལ་གྲངས་མང་བར་ཉམས་སུ་བླངས་པས་དབང་པོ་ཐ་མ་འབྲིང་དུ་འགྲོ། འབྲིང་རབ་ཏུ་འགྲོའོ། །གཉིས་པ་ལ་གཉིས་ཀྱི། དང་པོ་འགྱུར་མེད་ཐག་ཆོད་ལྟ་བ་མན་ངག་གི་ཆིངས་ནི། རང་རིག་དྲི་མེད་ཆོས་སྐུར་ཐག་ཆོད་པ་ན། མཁས་པ་ཤེས་རབ་ཅན་གྱིས་ཀྱང༌། དེ་ཉིད་ལས་ལྷག་པའི་གྲུབ་མཐའ་བློས་དཔྱད་པས་མ་རྙེད་དེ། ཡིད་ཆེས་དད་གུས་ཀྱིས་འདི་ལྟར་སྒོམ་པས་དོན་རྟོགས་ནས་ཡིད་ཆེས་ཀྱི་ངེས་པ་རྙེད་པའོ། །གཉིས་པ་མྱུར་མགྱོགས་འཁྱོགས་མེད་སྒོམ་པ་མན་ངག་གི་ཆིངས་ནི། ཉམས་ལེན་དྲན་པའི་ལམ་གྱི་སྣང་རྟོག་ཐམས་ཅད་ཡེ་ཤེས་སུ་འཆར་བས་ན། འདི་ཉིད་སྒོམ་པས་འབྲས་བུ་ཚེ་གཅིག་གིས་ཐོབ་པས་མགྱོགས། དུས་གསུམ་གྱི་སངས་རྒྱས་ཀུན་གྱི་བགྲོད་པ་གཅིག་པའི་ལམ་ཡིན་པས་གཞན་དུ་འཁྱོགས་པ་མེད་པའོ། །གསུམ་པ་བརྟན་པ་མཐར་ཕྱིན་འབྲས་བུ་མངོན་དུ་གྱུར་པའི་ཆིངས་ནི། རང་རིག་དྲི་མེད་ཆོས་སྐུར་ངོ་སྤྲད་པས། ཡིད་ཆེས་ནས་ཉམས་ལེན་མཐར་ཕྱིན་ཙ་ན། སངས་རྒྱས་གཞན་ནས་འཚོལ་མི་དགོས་པར་ རང་ཡིན་པ་མངོན་དུ་འགྱུར་བའོ། །བཞི་པ་གནས་སྐབས་བློ་ལྡོག་འབྱུང་བ་རོ་སྙོམས་ཀྱི་ཆིངས་ནི། གང་ཤར་དྲི་མེད་དུ་བསྐྱང་ཞིང༌། ས་ཤས་ཆེ་ན་རླུང་གིས་རོ་སྙོམས་པ་སོགས་འབྱུང་བ་རོ་སྙོམས་དང༌། དེ་ཡང་གནས། ལོངས་སྤྱོད། སྤྱོད་ལམ། ཁ་ཟས། གྲོགས། ཏིང་འཛིན་ཐམས་ཅད་ལ་ཆེད་འཛིན་སྤངས་ལ་རོ་སྙོམས་པའོ། །ལྔ་པ་དྲོད་ཚད་འཛིན་པ་སྨན་པ་མཁས་པ་ལྟ་བུའི་ཆིངས་ནི། ལས་དང་པོ་བས་ཐུན་ཆུང་ལ་གྲངས་མང་བར་བསྒོམ་ཞིང༌། གོམས་པ་སྤྱོད་ལམ་དང་བསྲེ། སྨིན་ནས་གནས་གྲོགས་སྤྱོད་ལམ་ཐམས་ཅད་ངེས་མེད་དུ་བསྐྱང་ངོ༌། །དེ་ཡང་ཕྱི་ནང་གི་ཆོས་ཐམས་ཅད་ཁྲོལ་ཤེས་པ་རྒྱ་འབག་གི་མིག་ལྟ་བུ་སྟེ། ཕྱི་ནང་གསང་བ་ན་ཚ་བདེ་སྡུག་ཐམས་ཅད་གང་ཤར་ཁོ་རང་གི་སྟེང་དུ་ཉམས་སུ་བླངས་པས་རང་རིག་དྲི་མེད་ཆུ་རྒྱུན་ལྟ་བུས་སྒྲིབ་གཉིས་བག་ཆགས་ཀྱི་དྲི་མ་དག་པའོ། །དྲུག་པ་ཉམས་རྟོགས་མཐར་ཕྱིན་གསེར་གླིང་དུ་ཕྱིན་པ་ལྟ་བུའི་ཆིངས་ནི། གསེར་གླིང་དུ་རྡོ་ཕལ་པ་མི་རྙེད་པ་ལྟར། རྣལ་འབྱོར་པ་ཉམས་རྟོགས་ཀྱི་རྩལ་རྒྱས་པ་ལ། སྣང་རྟོག་ཐམས་ཅད་ཆོས་ཉིད་སྐྱེ་མེད་དུ་ཉམས་སུ་མྱོང་ཞིང༌། རྣམ་རྟོག་བཙལ་ཡང་མི་རྙེད་པར་ཆོས་ཉིད་དུ་མཐར་ཕྱིན་པར་འགྱུར་རོ། །བདུན་པ་དགོས་འདོད་འབྱུང་བ་ནོར་བུ་རིན་པོ་ཆེ་ལྟ་བུའི་ཆིངས་ནི། དེ་ལྟར་ཉམས་སུ་ལེན་པའི་རྣལ་འབྱོར་པ་དེ་ལ། ཟས་ནོར་དགོས་དགུ་གང་འདོད་འབྱུང་བ་ལྟ་ཅི་སྨོས། ལས་དང་ སྒྲིབ་གཉིས་ཀྱི་དྲི་མ་སངས་ནས། ཐུན་མོང་དང་མཆོག་གི་དངོས་གྲུབ་མྱུར་དུ་ཐོབ་ཅིང༌། སྐུ་གཉིས་ཟུང་འཇུག་གི་ཕྲིན་ལས་ཀྱིས་དོན་གཉིས་ལྷུན་གྲུབ་ཏུ་འབྱུང་བའོ། །བརྒྱད་པ་དགའ་བྲོད་འཆི་ཁ་ཉམས་ལེན་གྱི་ཆིངས་ནི། ནམ་འཆི་བའི་ཚེ་གཉེན་ནོར་སོགས་གང་ལ་ཆགས་ཀྱང་འཆིང་བས། བདག་ཤི་ཕན་ཆོད་གཞན་གྱི་ནོར་ཡིན་པས་སུ་དགའ་གྱིས། གཉེན་ནོར་ལ་ཆགས་ཀྱང་ལས་ཟད་སྨོན་ལམ་གྱི་འཕེན་པ་རྫོགས་པས་སྐད་ཅིག་འགྲོགས་པའི་དབང་ནི་མེད། དེས་ན་གང་དགའ་གྱིས་སྙམ་དུ་ཞེན་ཆགས་ཐམས་ཅད་རྦད་ཀྱིས་བཅད། མགོ་བརྒྱའི་ནང་ནས་རང་མགོ་འདོན་པའི་དཔེ་ལྟར་ཉམས་ལེན་ལ་འབུང་གསུམ་འདོན། ཡེངས་མེད་དུ་བསྐྱང༌། འཆི་ལྟས་རྣམས་ཤེས་པར་བྱས་ནས་བལྟ་ཞིང༌། དེ་ཉིད་ལ་ཉམས་ལེན་འབྲལ་མེད་དུ་བྱའོ། །ལུས་ལ་ཞེན་པ་སྤང་ཞིང་ཡི་དམ་སྒོམ། སེམས་གང་ཤར་ངོ་ཤེས་འབྲལ་མེད་བརྟེན། ཞུམ་ན་རིག་པ་སྟོང་པ་ལ་འཆི་རྒྱུ་མེད། གང་སྣང་དྲི་མེད་ཆོས་སྐུ་ཡིན་པས་གཟེངས་བསྟོད། ད་མན་ངག་ཟབ་མོ་འདི་འདྲ་དང་འགྲོགས་ནས་འཆི་བས་འོད་གསལ་ཆོས་སྐུར་འཚང་རྒྱ་བ་ཡིན་པས་རེ་དགའ་སྙམ་དུ་ངར་བསྐྱེད་ལ། བྱིང་རྨུགས་སུ་མི་བཏང༌། འཚེར་ངས་དང་འཇིགས་སྣང་བྱུང་ན། འཆི་བ་ཞེས་བྱ་རྣམ་རྟོག་སྟེ། །མཁའ་སྤྱོད་གནས་སུ་འཁྲིད་པར་བྱེད། །ཅེས་གསུངས་པས་ལུས་ལོངས་སྤྱོད་ཐམས་ཅད་རང་འདོད་ཀྱི་འཁྲི་བ་མེད་པར་སེམས་ཅན་ ཐམས་ཅད་ཀྱི་དོན་དུ་བླ་མ་དཀོན་མཆོག་ཡི་དམ་མཁའ་འགྲོ་ཆོས་སྲུང་ལ་ཕུལ་ནས་བླ་མ་སྤྱི་བོར་སྒོམ། རང་ཡི་དམ་དུ་གསལ་བཏབ་ནས། བདག་སེམས་ཅན་ཐམས་ཅད་ཀྱི་དོན་དུ་འཆི་ཁར་འོད་གསལ་ཆོས་སྐུ་ཐོབ་པར་བྱིན་གྱིས་བརླབ་ཏུ་གསོལ། བར་དོའི་མ་དག་པའི་འཁྲུལ་སྣང་རྣམས་དག་པ་ལོངས་སྐུར་ཤར་ནས་ལོངས་སྐུ་ཐོབ་པར་བྱིན་གྱིས་བརླབ་ཏུ་གསོལ། སྐྱེ་བ་སྤྲུལ་སྐུར་ཤེས་བཞིན་དུ་སྐྱེ་བ་བླངས་ནས་སྐུ་གསུམ་དབྱེར་མེད་སངས་རྒྱས་ཐོབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་བཏབ་ནས། བདག་གིས་བླ་མ་དཀོན་མཆོག་ལ་གསོལ་བ་བཏབ་པའི་མཐུ་དང༌། གདམས་པ་ཟབ་མོ་ཉམས་སུ་བླངས་པས་མཚམས་སྦྱར་ནས་འཆི་ཁའམ། བར་དོའམ། སེམས་ཅན་གྱི་དོན་དུ་སྤྲུལ་སྐུར་སྐྱེ་བ་བླངས་ཏེ། གཞན་དོན་རླབས་ཆེན་བྱ་སྙམ་དུ་སེམས་བསྐྱེད་ནས་འཁྲུལ་སྣང་གང་གི་ཡང་རྗེས་སུ་མི་འབྲང་བར་ཡེངས་མེད་དུ་ཉམས་སུ་བླངས། དེ་ལྟར་ཉམས་སུ་བླངས་པས་སྔར་གྱི་འདུན་པ་དྲག་པོ་དང་ངོ་ཤེས་ཀྱིས་སྐྱེལ་མ་བྱས། རང་བཞིན་བརྒྱད་ཅུའི་རྟོག་པ་འགགས་པའི་འོད་གསལ་གྱིས་བསུན་མ་བྱས་ནས། སྔར་འདྲིས་ཀྱི་མི་དང་འཕྲད་པ་བཞིན། ཐེ་ཚོམ་མེད་པར་མ་བུ་འཕྲོད་པའི་འོད་གསལ་དེ་ལས་ལྷག་པའི་རྟོགས་བྱ་གཞན་མེད་པས། དེ་ད་རེས་ཐོབ་པ་རེ་དགའ་སྙམ་དུ་བསམས་ལ། འཆི་རྟགས། ཐིམ་རྟགས། འོད་གསལ་རྣམས་འབྱུང་རིམ་ནས་ངོ་ ཤེས་པར་བྱས་ནས་དེ་ཁའི་ངང་ལ་མ་བཅོས་པར་བསྐྱང་ངོ༌། །འདི་ནི་འོད་གསལ་གྱི་འཕོ་བའམ། རབ་བླ་མའི་འཕོ་བ་བྱ་བ་མཆོག་ཏུ་གྱུར་པའོ། །གཉིས་པ་དེ་ལྟར་ཉམས་སུ་བླངས་པས་ཇི་ལྟར་གྲོལ་ཚུལ་ནི་དབང་རབ་ཚེ་འདིར་སངས་རྒྱས་པ་མུན་པས་བར་མ་ཆོད་པར་ཇེ་གསལ་ལ་འགྲོ་བ་ཚེས་བཅུ་དྲུག་གི་ནམ་ལངས་པ་ལྟ་བུར་སངས་རྒྱས་ཐོབ། འབྲིང་བར་དོར་འཚང་རྒྱ་བ་སྐྱེ་བ་གཞན་གྱིས་བར་མ་ཆོད་པར་ཆུ་ལ་འོར་པ་རྒྱབ་པས་ཞིང་སྟེང་ཆུ་རྒྱུན་མ་ཆད་པར་འབྱུང་བ་ལྟར་སངས་རྒྱས་ཐོབ། ཐ་མ་སྐྱེ་བ་བླངས་ནས་འཚང་རྒྱ་བ། ངོ་སྤྲོད་ལ་ཡིད་ཆེས་བརྟན་ཅིང་གོམས་པས་རྒྱུན་མཐུད་ནས་བྱང་སེམས་ཤེས་བཞིན་དུ་སྐྱེ་བ་བླངས་ཏེ་སེམས་ཅན་གྱི་དོན་བྱེད་པ་ལྟར་སངས་རྒྱས་ཐོབ། དེས་ན་ཚེ་འདིའམ། འཆི་ཁའམ་བར་དོ། སྐྱེས་ནས་སངས་རྒྱས་མི་ཐོབ་པ་མི་སྲིད་པས་གདམས་པ་ཁྱད་པར་དུ་འཕགས་པ་ལ་ཡིད་ཆེས་པས་ཉམས་ལེན་ལ་བརྩོན་པ་གཅེས་སོ། །སོ་རིག་པ་གཅེར་མཐོང་གི་ཁྲིད་ཡིག་དིང་རི་བ་དཔལ་ལྡན་བསོད་ནམས་ཀྱི་ཡི་གེ་ལ་གཞི་བྱས་ཁྱབ་བདག་དཔལ་འབྱོར་ཕུན་ཚོགས་ཀྱི་ཟིན་རིས་ནས་ལེགས་ཆ་བླངས་ཏེ་ཟིན་ཐུན་དུ་བྱས་པ་དར་རྒྱས་འཕེལ། །ༀ་སྭ་སྟི། བཀའ་བབས་བར་པའི་ནང་ཚན་གསུམ་པ་སྐམ་ལུགས་ཤེར་ཕྱིན་སྙིང་པོ་དོན་གྱི་ཁྲིད་བྱ་བ་སྟེ། བླ་མ་སྔོན་མ་རྣམས་ཀྱི་ཕྱག་བཞེས་སུ་ཁྲིད་འདི་སྔོན་ལ་བཏང་ནས་སྐམ་ལུགས་ཀྱི་ཁྲིད་ གཞན་རྣམས་མཛད་པ་ཡིན་ཀྱང༌། ད་ལྟ་འདི་ཉིད་མ་གཏོགས་གཞན་རྣམས་ལ་ལུང་ཙམ་ལས་ཁྲིད་རྒྱུན་མ་བཞུགས་སོ། །འདི་ལ་གཉིས་ཏེ། བླ་མ་བརྒྱུད་པའི་རིམ་པ་དང༌། དེ་ལས་བྱུང་བའི་གདམས་པའོ། ། དང་པོ་ནི། ཐུབ་དབང༌། བྱམས་པ། ཐོགས་མེད། དབྱིག་གཉེན། བྲམ་ཟེ་ཨཱ་དེ་བ། རྗེ་དམ་པ་སངས་རྒྱས། སྐམ་སྟོན་ཡེ་ཤེས་རྒྱལ་མཚན། ཁུ་སྟོན་དབང་ཕྱུག་བླ་མ། ཆག་སྟོན་རིན་ཆེན་གྲུབ། སྟོད་སྟོན་ཤཱཀྱ་སེངྒེ། ཞང་སྟོན་དར་མ་བསོད་ནམས། རྗེ་ཀོ་བྲག་པ། མཚན་ལྡན་རི་ཁྲོད་དབང་ཕྱུག །མཁན་ཆེན་དུས་གསུམ་སངས་རྒྱས། དྲིན་ཅན་སངས་རྒྱས་དབོན། ཀུན་མཁྱེན་སྐུ་མཆེད་མན་བཀའ་བབས་དང་པོ་དང་འདྲའོ། །གཉིས་པ་དེ་ལས་བྱུང་བའི་གདམས་པ་སྙིང་པོ་དོན་གྱི་ཁྲིད་ལ་དོན་དྲུག་སྟེ། གསོལ་བ་གདབ་པ། མོས་གུས་བྱ་བ། སྒྲིབ་པ་སྦྱོང་བ། ཚོགས་བསགས་པ། བྱམས་སྙིང་རྗེ་བསྒོམ་པ། སེམས་བསྐྱེད་དོན་གྱི་ཁྲིད་དོ། །དང་པོ་ནི༑ རང་གི་མདུན་གྱི་ནམ་མཁར་པདྨ་དང་ཉི་ཟླ་བརྩེགས་པའི་གདན་མཐོ་ཞིང་ཡངས་པ་ལ་རྩ་བའི་བླ་མ། དེའི་དབུ་ཐོག་ནས་ཡར་བརྒྱུད་པའི་བླ་མ་རྣམས་ཐོ་བརྩེགས་སུ་བཞུགས་པའི་མཐའ་བསྐོར་སངས་རྒྱས་བྱང་སེམས་རྣམས་སྤྲིན་ཕུང་གཏིབས་པ་ལྟར་བཞུགས་པར་མོས་ལ། མོས་གུས་དྲག་པོས་མཎྜལ་དང་མཆོད་པ་ཅི་རིགས་པ་འབུལ་བ་སྔོན་དུ་འགྲོ་བས། རྩ་བ་དང་བརྒྱུད་པར་བཅས་པའི་བླ་མ་རིན་པོ་ཆེ་རྣམས་མཁྱེན། བདག་ལ་ཐེག་པ་ཆེན་པོའི་ཆོས་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། རྟོགས་པ་ཕུན་སུམ་ཚོགས་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་ཅི་ནུས་དང༌། སྤྲོ་ན། ན་མོ་གུ་རུ། བྱ་རྒོད་ཕུང་པོའི་རི་བོ་རུ། །ཞེས་བརྒྱུད་འདེབས་ཀྱང་འདོན། དེ་ལྟར་གསོལ་བ་བཏབ་པས་བརྒྱུད་པའི་བླ་མ་རྣམས་རིམ་གྱིས་འོད་དུ་ཞུ་སྟེ་རྩ་བའི་བླ་མ་ལ་ཐིམ་པར་བསམས་ལ་མཉམ་པར་བཞག་གོ །གཉིས་པ་ནི། དེ་ལྟར་བརྒྱུད་པའི་བླ་མ་རྣམས་རྩ་བའི་བླ་མ་ལ་བསྡུས་ནས། རྩ་བའི་བླ་མ་ཉིད་རང་གི་སྤྱི་བོར་པད་ཉི་ཟླ་བའི་གདན་སྟེང་བྱོན་ནས་བཞུགས་པར་བསམས་ལ། བླ་མ་དམ་པས་བདག་འཁོར་བའི་སྡུག་བསྔལ་ལས་དྲངས་ཏེ་ཐར་པ་མྱ་ངན་ལས་འདས་པའི་གོ་འཕང་ལ་འགོད་པར་མཛད་པ་ཡིན་པས་བཀའ་དྲིན་ཆེ་སྙམ་དུ་རེ་ལྟོས་ལིང་སྐྱུར་གྱི་མོས་གུས་ཚད་མེད་པ་དུང་དུང་བ་བསྒོམ་པར་བྱའོ། །གསུམ་པ་ནི། བླ་མ་དེ་ཉིད་རང་གི་སྤྱི་བོ་ནས་མར་ཞུགས་ཏེ་སྙིང་འོད་ཀྱི་གུར་ཁང་གི་ནང་དུ་བཞུགས་པར་བསམས་ལ། མོས་གུས་དུང་བ་བྱས་པས་དེའི་ཐུགས་ཀ་ནས་འོད་ཟེར་ཁ་དོག་ལྔ་ལྡན་ཟེར་རེ་རེ་འཕྲོས། དེས་རང་གི་ཚེ་རབས་ཐོག་མ་མེད་པ་ནས་བསགས་པའི་ལས་དང་ཉོན་མོངས་པའི་སྒྲིབ་པ་རྣམས་དེད་དེ་བ་སྤུའི་ཁུང་བུ་ནས་དུད་པ་ལྟར་ཐོན་ཏེ་སོང་བ་རང་ལུས་ཤེལ་སྒོང་ཕྱིས་པ་ལྟར་དག་པར་བསམ་པའོ། །བཞི་པ་ནི། མདུན་གྱི་ནམ་མཁར་གཞལ་ཡས་ཁང་གདན་དང་ བཅས་པ་མཛེས་ཤིང་ཡིད་དུ་འོང་བ་ཡངས་ཤིང་རྒྱ་ཆེ་བར་བསམ། དེ་ནས་རང་གི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་ཞིང་ནས་བླ་མ་དང་དཀོན་མཆོག་སྤྱན་དྲངས་ནས་གཞལ་ཡས་ཁང་དུ་བཞུགས་པར་མོས། ཡང་འོད་ཟེར་འཕྲོས་པས་ཡི་དམ་དཀྱིལ་འཁོར་གྱི་ལྷ་ཚོགས་སྤྱན་དྲངས་ནས་སྔར་ལྟར་ཞུགས། ཡང་འོད་ཟེར་འཕྲོས་པས་མཁའ་འགྲོ་ཆོས་སྐྱོང་རྣམས་སྤྱན་དྲངས་ནས་དེ་དག་གི་འཁོར་དུ་བཞུགས་པར་བསམ། ཡང་འོད་ཟེར་འཕྲོས་པས་རིགས་དྲུག་གི་སེམས་ཅན་རྣམས་བཀུག་པ་དང༌། ཡང་འོད་ཟེར་གྱིས་གནོད་བྱེད་གདོན་བགེགས་རྣམས་བཀུག་སྟེ། གཞལ་ཡས་ཁང་གི་ཕྱིའི་འཁོར་ཡུག་ལ་རིམ་པར་འཁོད་པར་བསམ་མོ། །དེ་ནས་རང་གི་ལུས་འདི་ཆེ་ཞིང་ཚོ་ལ་སྣུམ་པ་གཞོན་མཛེས་ཡིད་དུ་འོང་བ་དེ་ཉིད་འོད་དུ་ལྟེམ་གྱིས་ཞུ་ནས་ཟག་མེད་ཡེ་ཤེས་ཀྱི་བདུད་རྩི་རོ་མཆོག་བརྒྱ་པ་འདོད་ཡོན་གྱི་རྣམ་པ་ཅིར་ཡང་འཆར་བའི་མཆོད་རྫས་སུ་བྱིན་གྱིས་བརླབས་ཏེ། ཡར་བླ་མ་དཀོན་མཆོག་ཡི་དམ་ལྷ་ཚོགས། མཁའ་འགྲོ་ཆོས་སྐྱོང་རྣམས་ལ་རིམ་གྱིས་ཕུལ། མར་འགྲོ་དྲུག་གི་སེམས་ཅན་དང་གནོད་བྱེད་ལན་ཆགས་ཀྱི་མགྲོན་རྣམས་ལ་སྦྱིན་པས་ཐམས་ཅད་མཉེས་ཤིང་ཚིམ་པར་གྱུར་པ་ལ་དགའ་སྤྲོ་བསྒོམ་པར་བྱའོ། །ལྔ་པ་ནི། ནམ་མཁའ་ལ་མཐའ་མེད་པ་བཞིན་དུ་དེ་ཐམས་ཅད་སེམས་ཅན་གྱིས་གོ་མཚམས་མེད་པར་གང་བས་སེམས་ཅན་ལའང་ མཐའ་མེད། སེམས་ཅན་དེ་ཐམས་ཅད་ཀྱིས་བདག་གི་ཕ་མ་ལན་གྲངས་དཔག་ཏུ་མེད་པ་ཞིག་བྱས། བྱས་རེས་བཞིན་རང་གི་ཚེ་འདིའི་མས་ཇི་ལྟར་ཕན་གདགས་པ་བཞིན་དུ་དེ་ཐམས་ཅད་ཀྱིས་ཕན་ཚད་མེད་བཏགས་པའི་དྲིན་ཅན་ཤ་སྟག་ཡིན་ཨང་སྙམ་དུ་བསམ་པ་ནི་བྱམས་པ་སྒོམ་པའོ། །དྲིན་ཅན་གྱི་ཕ་མ་འདི་རྣམས་མི་འདོད་བཞིན་དུ་འཁོར་བའི་གནས་སུ་སྡུག་བསྔལ་སྣ་ཚོགས་མྱོང་བས་ཉམ་ཐག་པར་མ་ཟད། ད་དུང་སྡུག་བསྔལ་གྱི་རྒྱུ་མི་དགེ་བ་རྔམ་པོ་ཆེ་ལ་ཚམ་ཚོམ་མེད་པར་འཇུག་པ་འདི་རྣམས་སྙིང་རེ་རྗེ། བདག་གི་ཕ་མ་སྡུག་བསྔལ་གྱི་རྒྱུ་འབྲས་ལ་སྤྱོད་པ་འདི་ཀུན་ཅི་ཙུག་རང་བྱ། ཞེས་སེམས་ཅན་སྡུག་བསྔལ་མྱོང་བ་ལ་མི་བཟོད་པའི་སེམས་སྙིང་གས་གས་སུ་ཅི་དྲག་གང་དྲག་གི་ཚུལ་དུ་བསམ་པ་སྙིང་རྗེ་སྒོམ་པའོ། །དེ་ལྟར་བྱམས་སྙིང་རྗེ་སྒོམ་སྟེ་སྙིང་རྗེའོ་ཞེས་སྙིང་རྗེ་སར་བཞག་པས་མི་ཕན། འདི་དག་འཁོར་བའི་སྡུག་བསྔལ་ལས་བསྒྲལ་ཏེ། ཐར་པ་བླ་ན་མེད་པའི་མྱང་འདས་མཆོག་ལ་འགོད་པར་བྱའོ་སྙམ་དུ་དྲག་ཏུ་སྒོམ་མོ། །དྲུག་པ་མཉམ་བཞག་དང་རྗེས་ཐོབ་གཉིས་ལས། དང་པོ་མཉམ་བཞག་ཏུ་རྣམ་པར་རྟོག་པ་བཙན་ཐབས་སུ་གཅོད་པ་ནི། སྟན་བདེ་བ་ལ་ལུས་གནད་ཆོས་བདུན་བཅའ། ངག་གནད་རླུང་སོ་མར་བཞག །སེམས་ཀྱི་གནད་འདས་མ་འོངས་ད་ལྟར་གྱི་རྟོག་པ་ཐམས་ཅད་རྦད་ཀྱིས་བཅད་ནས། ངོས་བཟུང་མེད་པའི་སེམས་གཏད་མེད་ཀྱིས་གཤིས་ལུགས་ དེ་ཁའི་ངང་ལ་ས་ལེ་སིང་ངེ་མ་བཅོས་པར་བཞག །དེ་ལས་རྟོག་པ་གྱ་གྱུ་བ་འགྱུ་ན་རང་སར་རྦད་བཅད་ལ་རྟོག་མེད་དུ་སིང་ངེ་བཞག་གོ །གཉིས་པ་རྗེས་ཐོབ་ཏུ་རྣམ་པར་རྟོག་པ་ཆོས་ཉིད་དུ་ཁྱེར་བ་ནི། སྔར་རྟོག་མེད་དུ་བཞག་པའི་ཤེས་པ་དེ་དང༌། ཕྱིས་ཡུལ་རྐྱེན་གྱིས་བསྐྱེད་པའི་རྟོག་པ་དེ་གཅིག་ཏུ་འདུག་གམ་ཐ་དད་དུ་འདུག་བརྟགས་པས། དེ་གཉིས་པོ་སོ་སོ་ཐ་དད་དུ་མི་འདུག་སྟེ། གཅིག་གི་ངོ་བོ་ལས་མ་འདས་པར་ཐག་བཅད་ནས་བསྐྱང་བར་བྱ་བ་གནད་དོ། །དེ་ལྟར་མཉམ་རྗེས་དབྱེར་མེད་དུ་གྱུར་མ་གྱུར་སོགས་བླ་མ་ཉམས་མྱོང་ཅན་བསྟེན་ནས་བློ་ཐག་བཅད་པར་བྱའོ། །སྐམ་ལུགས་དོན་གྱི་ཁྲིད་ཡིག་རྙིང་ལས་ཅུང་ཟད་གོ་བདེ་བར་བཅོས་པའོ། །ཞི་བྱེད་ཀྱི་ཁྲིད་ཡིག་བདུད་རྩིའི་ཉིང་ཁུ་ལས། བཀའ་བབས་བར་པ་རྨ་སོ་སྐམ་གསུམ་གྱི་ཁྲིད་ཡིག་བཤད་པའི་ལེ་ཚན་ནོ། །ༀ་སྭ་སྟི། བླ་མ་དང་དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ༑ ༑ཞི་བྱེད་ཆོས་ཀྱི་རྩ་བ་བཀའ་བབས་ཕྱི་མ་ལས་བསྒོ་བའི་རྣལ་འབྱོར་བཞིའི་གདམས་པ་ལས། འདིར་བླ་མ་བྱང་ཆུབ་སེམས་དཔའ་ཀུན་དགའི་ལུགས། ཤེས་རབ་ཀྱི་ཕ་རོལ་ཏུ་ཕྱིན་པའི་གདམས་ངག་གསང་སྔགས་དང་རྗེས་སུ་མཐུན་པ། རྩ་བརྒྱུད་ལ་བསྐུར་བ་སྙིང་པོ་དོན་གྱི་ངོ་སྤྲོད། ཐབས་རྟེན་འབྲེལ་གྱི་ཆེ་བ་དུ་མས་བརྒྱན་ནས་སངས་རྒྱས་ཀྱི་བསྟན་པ་ཐམས་ཅད་གདན་གཅིག་གི་སྟེང་དུ་དུས་གཅིག་ལ་ཉམས་སུ་ ལེན་པའི་མན་ངག །དྲི་མེད་ཐིག་པ་ཕྱག་བཞེས་ཀྱི་སྐོར་ཞེས་བྱ་བ་འདི་འཆད་པ་ལ་དོན་ལྔ་སྟེ། ཡིད་ཆེས་བསྐྱེད་པ་བླ་མ་བརྒྱུད་པའི་ལོ་རྒྱུས། རྟེན་མ་སྨིན་པ་སྨིན་པར་བྱེད་པ་དབང༌། ཉམས་མྱོང་མ་སྐྱེས་པ་སྐྱེ་བར་བྱེད་པ་ཁྲིད། རྟོགས་པ་མ་ཤར་བ་ཤར་བར་བྱེད་པ་བླ་མའི་བྱིན་རླབས། སྤྲོས་པ་མ་ཆོད་པ་ཆོད་པར་བྱེད་པ་ཚིག་ཚོགས་ཀྱི་དོན་རྣམས་སོ། །དང་པོ་ནི། ཆོས་སྐུ་རྡོ་རྗེ་འཆང་ཆེན། ལོངས་སྐུ་ལྷ་མོ་བདག་མེད་མ༑ ཐུགས་དམ་བདེ་གཤེགས་བཅུ་གཉིས། གནས་གསུམ་མཁའ་འགྲོ་ཉེར་བཞི། དཔལ་ལྡན་སུམ་ཅུ་རྩ་དྲུག །གྲུབ་ཐོབ་ལྔ་བཅུ་རྩ་ལྔ་ལ། རྗེ་བཙུན་དམ་པ་སངས་རྒྱས། སྐྱེ་མེད་བྱང་སེམས་ཀུན་དགའ། མཁས་བཙུན་སྤ་ཚབ་སྒོམ་པ། གྲུབ་ཐོབ་རྒྱལ་བ་ཏེ་ནེ། ཆོས་རྒྱལ་ཉི་སེང་སྐུ་མཆེད། ཐམས་ཅད་མཁྱེན་པ་བསོད་ནམས་དཔལ། རྒྱལ་སྲས་ཀུན་དགའ་སྐུ་མཆེད་ནས། མཚན་ལྡན་རི་ཁྲོད་དབང་ཕྱུག །མཁན་ཆེན་ཚུལ་ཁྲིམས་ཕན། དྲིན་ཅན་བསོད་ནམས་དབོན། ཡང་ན། རྒྱ་སྟོན་སྨོན་ལམ་ཤེས་རབ། དེ་གཉིས་ལ་ཆོས་རྗེ་ཀུན་མཁྱེན་སྐུ་མཆེད་ཀྱིས་གསན། དེ་ནས། རྒྱ་སྒོམ་རྡོ་རྗེ་གདན་པ། བྱང་སེམས་རྒྱ་མཚོ་སྦྱིན་པ། སྐུ་གསུམ་བདེ་ཆེན་ལྷུན་གྲུབ་བམ། ཡང་ན། ཀུན་མཁྱེན་བྱང་ཆུབ་བཟང་པོ་ནས། ཆོས་རྗེ་བློ་གྲོས་རྒྱ་མཚོ། རས་ཆེན་དཔལ་ལྡན་བསོད་ནམས། ཐུགས་སྲས་བསོད་ནམས་འོད་ཟེར། ལུང་ཆེན་པ་བསོད་ནམས་དཔལ་བཟང༌། སྐུ་གསུམ་བདེ་ཆེན་ལྷུན་གྲུབ་བོ། །དེ་ནས་མཁས་གྲུབ་ནམ་མཁའ་བཟང་པོ། འཇམ་དབྱངས་དཔལ་འབྱོར་ལྷུན་གྲུབ། ཁྱབ་བདག་དཔལ་འབྱོར་ཕུན་ཚོགས། མཚུངས་མེད་བཀྲ་ཤིས་བཟང་པོ། དིང་རི་མཁས་གྲུབ་བློ་གྲོས་བརྟན་པ། དེས་བདག་དྷརྨ་ཤྲཱི་ལའོ། །དེ་རྣམས་ཀྱི་རྣམ་ཐར་ལོ་རྒྱུས་ནི་གཞན་ལས་ཤེས་པར་བྱའོ། །གཉིས་པ་ལ་བཞི་སྟེ། ལུས་སྨིན་བྱེད་བུམ་དབང་ནི། མཐོང་བས་ཆོག་པའི་རྩི་སྟེ། ཕུང་ཁམས་སྐྱེ་མཆེད་རང་བཞིན་གྱིས་རྣམ་པར་དག་པ་ལ་བརྟེན་ནས་ཕྱི་ཡུལ་ལ་དག་སྣང་སྦྱོང་བར་བྱེད་པའི་གནད་དོ། །ངག་སྨིན་བྱེད་གསང་དབང་ནི། ཟིན་པས་ཆོག་པའི་རྩི་སྟེ། འཁོར་ལོ་བཞིའི་ཡིག་འབྲུ་ལ་བརྟེན་ནས་ནང་འཛིན་པ་ཡིད་སྒྲིབ་བམ་བག་ཆགས་སྦྱོང་བའི་གནད་དོ། །སེམས་སྨིན་བྱེད་ཤེར་དབང་ནི། ཤེས་པས་ཆོག་པའི་གནད་དེ། འཁྲུལ་འཁོར་བཞི་ལ་བརྟེན་ནས་ཡེ་ཤེས་བཞི་རྒྱུད་ལ་སྐྱེ་བར་བྱེད་པའི་གནད་དོ། །ཡིད་སྨིན་བྱེད་ཚིག་དབང་ནི། འཕྲད་པས་ཆོག་པའི་བརྒྱུད་པ་སྟེ། ཡིག་འབྲུའི་གནད་བཞི་ལ་བརྟེན་ནས་ས་ལམ་གཉེན་པོས་གཅོད་ཅིང་བགྲོད་པར་བྱ་བའི་གནད་ཡིན་ཏེ། དེ་རྣམས་དབང་ཆོག་ལས་ཤེས་པར་བྱའོ། །གསུམ་པ་ལ་བཞི་སྟེ། ལམ་དཀར་ཁྲིད་བློ་སྦྱོང་གཅིག་པུ་ལ་འབུང་བ་དང༌། དམར་ཁྲིད་ལམ་ལྔའམ་ལམ་གསུམ་ཉམས་སུ་ལེན་པ། ནག་ཁྲིད་ཡི་གེ་རིགས་ལ་རྟོགས་པར་བྱེད་པ། དེ་རྣམས་ཀྱང་དཀའ་ཐུབ་ཀྱི་སྲང་ནས་འདོན་པའོ། ། བཞི་པ་ལ་བཞི་སྟེ། དང་པོར་བླ་མ་ཆོས་སྐུར་གསོལ་བ་ཐེབས་ན་རྟོགས་པ་ཕྱོགས་མེད་དུ་འཆར། བར་དུ་བླ་མ་ལོངས་སྐུར་གསོལ་བ་ཐེབས་ན་ཡོན་ཏན་ཕྱོགས་མེད་དུ་འཆར། ཐ་མར་བླ་མ་སྤྲུལ་སྐུར་གསོལ་བ་ཐེབས་ན་འགྲོ་དོན་ཕྱོགས་མེད་དུ་འབྱུང༌། རྗེས་ལ་བླ་མ་བདེ་བ་ཆེན་པའི་སྐུར་གསོལ་བ་ཐེབས་ན་སངས་རྒྱས་ཀྱི་ཕྲིན་ལས་ཟད་འཕེལ་མེད་པར་འབྱུང་བ་ཡིན་ནོ། །ལྔ་པ་ལ་བཞི་སྟེ། མདོ་རྒྱུད་ཕྱག་ལེན་དང་བཅས་པ། བཀའ་བབས་སྙན་བརྒྱུད་དང་བཅས་པ། དྲི་མེད་ཕྲ་ཐིག་དང་བཅས་པ། དར་ཚགས་བཤད་འབུམ་དང་བཅས་པ་རྣམས་སོ། །དེ་དག་ལས་འདིར་གང་བཤད་པར་བྱ་བ་ནི། ཉམས་མྱོང་སྐྱེད་བྱེད་ཀྱི་སྐོར་ལས། དམར་ཁྲིད་ལམ་ལྔར་ཁྲིད་པར་བྱེད་པའི་སྐབས་ཡིན། དེ་ལ་གསུམ་སྟེ། གང་གིས་འཆད་པའི་བླ་མ། གང་ལ་འཆད་པའི་སློབ་མ། ཇི་ལྟར་འཆད་པའི་གདམས་པའོ། །དང་པོ་ནི། མཚན་ཉིད་བཞི་ལྡན་ཏེ། ཚིག་གི་གདམས་པས་སྒྲོ་འདོགས་གཅོད་ནུས་པ། དོན་གྱི་ངོ་སྤྲོད་ཀྱིས་རྟོགས་པ་བསྐྱེད་ནུས་པ། བྱིན་རླབས་ཀྱིས་སྣང་བ་བསྒྱུར་ནུས་པ། མྱོང་བའི་མཚན་ཉིད་ཀྱིས་གེགས་སེལ་ནུས་པ་སྟེ། འདི་ལྟ་བུའི་བླ་མ་དེ་ཐག་ཉེ་རིང་དང༌། ལུས་ངལ་དུབ་དང༌༑ ནོར་ཟད་འཕངས་ལ་མི་ལྟ་བར་བཙལ་ལ། རྙེད་ནས་གཟུ་ལུམ་དང་རས་ཆོད་སྤངས་ཏེ། བསྙེན་བཀུར་ལ་ཚད་བཟུང་མེད་པའི་སྒོ་ནས་ལུས་དང་གྲིབ་མ་བཞིན་དུ་འབྲལ་མེད་དུ་བསྟེན་པར་བྱའོ། །དེ་ལྟར་ཡང༌། སྡུད་པ་ལས། བླ་མ་མཁས་པ་རྣམས་ནི་རྟག་ཏུ་བསྟེན་བྱ་སྟེ། །ཅིའི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ཞེས་སོ། །གཉིས་པ་ནི། ཆོས་སུམ་ལྡན་ཏེ། རྒྱུད་དད་པའི་རླན་དང་མ་བྲལ་བ། གྲོགས་བརྩོན་འགྲུས་ཀྱི་ངང་ཆགས་པ། ངོ་བོ་ཤེས་རབ་ཀྱི་དབང་པོ་རྣོ་བའོ། །དེ་ལ་དད་པ་ནི་ཆོས་སྒོར་འཇུག་པ་ལ་མེད་ཐབས་མེད་དེ། ཐར་པའི་རྟེན་དུ་དད་པ་དགོས། ཡོན་ཏན་གྱི་གཞི་ཡང་དད་པས་བྱེད། བརྩོན་འགྲུས་ཀྱི་གྲོགས་ཀྱང་དད་པས་བྱེད། ཤེས་རབ་ཀྱི་མཛོད་ཀྱང་དད་པས་བྱེད། མན་ངག་གི་སྣོད་ཀྱང་དད་པས་བྱེད། དེས་ན་དཀར་པོའི་ཆོས་ཐམས་ཅད་ཀྱི་རྩ་བ་ནི་ལས་འབྲས་ལ་ཡིད་ཆེས་ཀྱི་དད་པ། ཡོན་ཏན་ཐོབ་ཕྱིར་ཆོས་ཀྱི་གདུངས་པ་འདོད་པའི་དད་པས། ཆོས་བྱེད་ཀྱི་གང་ཟག་ལ་དང་བའི་དད་པ་དང་ལྡན་པ་ཞིག་དགོས་ཏེ། མདོ་ལས། རང་བྱུང་རྣམས་ཀྱི་དོན་དམ་ནི། །དད་པ་ཉིད་ཀྱིས་རྟོགས་བྱ་ཡིན། །ཞེས་སོ། །དེ་ཡང་དད་པས་བློ་ཆོས་ལ་སོང་ཡང༌། བརྩོན་འགྲུས་མེད་ན་ཆོས་ལམ་དུ་མི་ལོངས་པས་གྲོགས་བརྩོན་འགྲུས་ཀྱིས་ཟིན་པ་ཞིག་དགོས་ཏེ། སྦྱོར་བའི་བརྩོན་འགྲུས་ཀྱིས་ཆོས་ལ་ཕྱི་བཤོལ་མེད་པར་འཇུག །གོ་ཆའི་བརྩོན་འགྲུས་ཀྱིས་སྐྱོ་དུབ་མེད་པར་མཐར་སྐྱེལ། ཆོག་མི་ཤེས་པའི་བརྩོན་འགྲུས་ཀྱིས་ཆོས་ལ་ངོམས་པ་མེད་པར་སློབ་པའོ། །ཆོས་ལམ་དུ་ལོངས་ཀྱང་ཤེས་རབ་མེད་ན་ལམ་གྱི་འཁྲུལ་པ་སེལ་མི་ནུས་པས་ངོ་བོ་ཤེས་རབ་ཀྱི་ དབང་པོ་རྣོ་བ་ཞིག་དགོས་ཏེ། ཐོས་པའི་ཤེས་རབ་ཀྱིས་ཆོས་སྤྱིའི་རྣམ་པ་ལ་སྒྲོ་འདོགས་གཅོད། བསམ་ཤེས་ཀྱིས་ཆོས་ལ་ངེས་ཤེས་བསྐྱེད། སྒོམ་པའི་ཤེས་རབ་ཀྱིས་དོན་རང་གི་མཚན་ཉིད་རྟོགས་ནུས་པ་ཡིན་ནོ༑ ༑དེ་ལྟར་ཡང་སྡུད་པ་ལས། ཤེས་རབ་མེད་ན་ཕ་རོལ་ཕྱིན་ལྔ་འདི་དག་གིས། །དམིགས་བུ་མེད་པས་བགྲོད་པར་ནུས་པ་མ་ཡིན་ནོ། །ཞེས་སོ། །གསུམ་པ་ལ་ལམ་གྱི་སྣོད་རུང་དུ་སྒྲུབ་པ་སྔོན་འགྲོ། དངོས་གཞི་ལམ་ལྔའི་དམར་ཁྲིད། ཞར་བྱུང་ཉེར་མཁོའི་ཐབས་ཀྱི་ཡན་ལག་གཞན་བཤད་པའོ། །དང་པོ་ལ། སྤྱིའི་སྔོན་འགྲོས་འཁོར་བའི་ཞེན་འཁྲིས་བཅད་པ་དང༌། ཁྱད་པར་གྱི་སྔོན་འགྲོས་ལམ་གྱི་གཞི་སྒྲུབ་ཅིང་བསགས་སྦྱོང་བྱེད་པའོ། །དང་པོ་ལ་བཞི་ལས། དལ་འབྱོར་རྙེད་དཀའ་བསམ་པའི་ཁྲིད་ནི། འཇིགས་རུང་འཁོར་བའི་སྡུག་བསྔལ་ལས། ད་རེས་དལ་འབྱོར་གྱི་ཆོས་བཅོ་བརྒྱད་ཚང་བའི་མི་ལུས་རིན་པོ་ཆེ་ཐོབ་པའི་སྐབས་འདིར་ཐར་བ་ཞིག་བྱ་དགོས། དེའི་རྒྱུ་མཚན་ཆོས་སྒྲུབ་པའི་རྟེན་འདི་ཁོ་ན་ལས་གཞན་མེད་ཅིང༌། འདི་ནི་ཤིན་ཏུ་རྙེད་དཀའ་བ་ཨུ་དུམྦཱ་རའི་མེ་ཏོག་དང་འདྲ། རྙེད་ན་དོན་ཆེ་བས་ཡིད་བཞིན་གྱི་ནོར་བུ་དང་འདྲ་བས། ཆོས་ཀྱི་རྟེན་མི་ལུས་གཙང་མ་ཐོབ་པའི་དུས་འདིར། གྲུ་ཡོད་དུས་ཆུ་བོ་ལས་བརྒལ་དགོས་པ་བཞིན་དུ། ད་རེས་སྐྱེ་བ་གཏན་གྱི་སོ་ནམ་བསྟན་པའི་སྙིང་པོ་དྲི་མ་མེད་པ་འདི་ལ་འབད་པར་བྱ་དགོས་ཏེ། ཞི་བ་ལྷས། དལ་འབྱོར་ འདི་ནི་ཤིན་ཏུ་རྙེད་པར་དཀའ། །སྐྱེས་བུས་དོན་གྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་ནི་ཡང་དག་འབྱོར་བར་ག་ལ་འགྱུར། །ཞེས་དང༌། རྗེ་བཙུན་དམ་པས། དལ་འབྱོར་མི་ལུས་རིན་ཆེན་གླིང་དང་འདྲ། །མདོ་མེད་སྟོང་ལོག་མ་བྱེད་དིང་རི་བ། །ཞེས་སོ། །གཉིས་པ་འཆི་བ་མི་རྟག་པ་བསམ་པ་ནི། སྔར་བསགས་ཀྱི་དགེ་བའི་ལས་ཀྱིས་ཚེ་འདིར་མཐོ་རིས་ཀྱི་རྟེན་ཕུན་སུམ་ཚོགས་པའི་གནས་སྐབས་ཅུང་ཟད་ཐོབ་ཏུ་ཟིན་ཀྱང༌། རྟག་པ་མ་ཡིན་ཏེ། ཚེ་སྟོན་ཀའི་ན་བུན་བས་ཡུན་ཐུང༌། ལུས་ཆུ་ལྦུར་བས་འཇིག་སླ། ལོངས་སྤྱོད་སྒྱུ་མ་ལྟར་རྟག་མི་ཐུབ། གཉེན་འཁོར་སྲིན་བལ་གྱི་འདབ་མ་བས་གྱེས་སླ་བ་ཡིན་ཏེ། མདོ་ལས། ལང་ཚོ་རྣམས་ནི་རི་གཟར་ཆུ་ལྟར་འགྲོ། །སྐད་ཅིག་སྐད་ཅིག་ཡུད་ཙམ་ཤིན་ཏུ་མྱུར། །སྟོན་ཀའི་སྤྲིན་སྟུག་སྙིང་པོ་མེད་པ་དང༌། །དབྱར་ཁའི་ཆུ་དྲག་ཡུན་དུ་མི་གནས་ལྟར། །ལོངས་སྤྱོད་མི་རྟག་སྙིང་པོ་མེད་པར་རྟོགས། །ཞེས་གསུངས། དེས་ན་སྐྱེས་ཕན་ཆད་ཚེ་ཐར་དུ་ལུས་པ་སུ་ཡང་མེད་པས་ངེས་པར་འཆི་ཞིང༌། ཚེ་ལ་ལོང་མེད་པས་ནམ་འཆི་ཆ་མེད། འཆི་བའི་ཚེ་ཟས་ནོར་ལོངས་སྤྱོད་གནས་ལུས་དབང་ཐང་སོགས་གང་ཡང་རྗེས་སུ་མི་འབྲང་བས། ཚེ་འདི་ལྟོས་ཀྱི་བྱ་བྱེད་ལ་ཅིས་ཀྱང་དགོས་པ་མེད། འཆི་བའི་ནང་པར་ཆོས་མིན་པ་གང་གིས་ཀྱང་མི་སྟོངས་པས། སྡར་མའི་པང་དུ་སྦྲུལ་ཞུགས་པའམ། སྒེག་མའི་མགོ་ལ་ མེ་ཤོར་བ་ལྟར། ད་ལྟ་ཉིད་ནས་དམ་ཆོས་ལ་བརྩོན་འགྲུས་དྲག་པོས་འབད་དགོས་ཏེ། དམ་པས། ཡེངས་པའི་བར་ལ་འཆི་བདག་བདུད་ཀྱིས་འཛིན། །ད་ལྟ་ཉིད་དུ་སྒྲུབས་ཤིག་དིང་རི་བ། །ཞེས་སོ། །གསུམ་པ་རྒྱུ་འབྲས་ལ་བསམ་པ་ནི། དེ་ལྟར་ཤི་ནས་ཀྱང་གཏན་མེད་དུ་མི་འགྲོ་སྟེ། དགེ་སྡིག་གཉིས་པོ་ནི་ལུས་དང་གྲིབ་མ་བཞིན་དུ་ངེས་པར་རྗེས་སུ་འབྲང༌། སྡིག་པ་བྱས་ཟིན་པ་སྐྱུར་དབང་ནི་མེད། དགེ་བ་རང་གིས་མ་བྱས་པ་ཁྱེར་རྒྱུ་ནི་མེད། མི་དགེ་བའི་ལས་ཀྱིས་ངན་སོང་དུ་ལྟུང་ན་ཅི་ཙུག་བྱེད། དེར་མི་སྐྱེ་བའི་གདིང་ནི་མེད། གལ་ཏེ་མཐོ་རིས་སུ་སྐྱེས་སུ་ཟིན་ཀྱང་དེར་ཡང་སྡུག་བསྔལ་གྱི་ཆ་ཐམས་ཅད་མི་དགེ་བས་བསྐྱེད་པར་འདུག །དེས་ན་དེང་ཕྱིན་ཆད་སྡིག་པ་སྲོག་ལ་བབས་ཀྱང་མི་བྱེད། དགེ་བའི་ལས་ཕྲ་མོ་ཁྱད་དུ་མི་གསོད། རླབས་པོ་ཆེའི་དགེ་བ་ལ་དཔའ་མི་ཞུམ་པར། ལུས་ངག་ཡིད་གསུམ་བར་མཚམས་མེད་པར་དགེ་བའི་ལས་ལ་འགལ་མེའི་འཁོར་ལོ་ལྟར་སློབ་དགོས་པས་དགེ་སྡིག་ལ་སྤང་ལེན་ནན་ཏན་བྱའོ་སྙམ་དུ་ཞེ་དམ་འཆའ་སྟེ། དམ་པས། ལས་ཀྱི་རྣམ་སྨིན་རྒྱུ་འབྲས་བདེན་པར་ངེས། །མི་དགེ་སྡིག་ལ་འཛེམས་ཤིག་དིང་རི་བ། །ཞེས་སོ༑ ༑བཞི་པ་འཁོར་བའི་ཉེས་དམིགས་ལ་བསམ་པ་ནི། རང་ཅག་རྣམས་ལས་ཀྱི་དབང་གིས་འཁོར་བའི་མཐོ་དམན་གང་དུ་སྐྱེས་ཀྱང་སྡུག་བསྔལ་འབའ་ཞིག་མ་གཏོགས་བདེ་བའི་གོ་སྐབས་ནམ་ཡང་མེད་དེ། ལུས་ངག་ ཡིད་གསུམ་འདོད་པའི་ནད་ཀྱིས་གདུངས། བདག་ཏུ་འཛིན་པའི་ལྕགས་སྒྲོག་གིས་བཅིངས། སྡུག་བསྔལ་སྣ་ཚོགས་ཀྱི་དྲྭ་བར་ཚུད། འགྲོ་བ་རིགས་དྲུག་གང་དུ་སྐྱེས་ཀྱང་སྐྱིད་མེད་དེ། དམྱལ་བ་ཚ་གྲང་གི་སྡུག་བསྔལ། ཡི་དྭགས་བཀྲེས་སྐོམ་གྱི་སྡུག་བསྔལ། བྱོལ་སོང་གི་གནས་ན་གླེན་ལྐུགས་དང་བཀོལ་སྤྱོད་ཀྱི་སྡུག་བསྔལ། བདེ་འགྲོ་ལྷ་མིའི་གནས་ཐོབ་ཀྱང་སྡུག་བསྔལ་གྱི་མཐའ་ལས་མ་འདས་ཏེ། འཁོར་བ་ནི་ཟུག་གཟེར་རྒྱུན་མི་འཆད་པའི་ནད་པའམ་ནག་ཅན་བཙོན་དོང་དུ་ཚུད་པ་དང་འདྲ་བས། ད་རེས་ཆོས་སྒྲུབ་པའི་མཐུན་རྐྱེན་ཚང་བའི་སྐབས་འདིར་འཇིགས་རུང་འཁོར་བའི་གནས་ལས་ངེས་པར་ཐར་བ་ཞིག་བྱ་དགོས་ཏེ༑ རྗེ་དམ་པས། འཁོར་བའི་ཉེས་དམིགས་བསམ་ན་སྙིང་རླུང་ལྡང༌། །འདི་ལ་གད་མོ་མི་བྲོ་དིང་རི་བ། །ཞེས་སོ། །དེ་ལྟར་བསམ་བྱ་རྣམ་པ་བཞིའི་སྒོ་ནས་ཚེ་འདིའི་ཆེ་ཐབས་ལ་བློ་ལོག་པར་གྱུར་ན་གཟོད་ཐར་ལམ་རྣལ་མ་ཞིག་རྒྱུད་ལ་སྐྱེ་བ་ཡིན་ནོ། །གཉིས་པ་ལ་ལྔ་སྟེ། ཐེག་པ་སྤྱིའི་རྨངས་རྡོ་སྐྱབས་འགྲོ། ཐེག་ཆེན་གྱི་རྨངས་རྡོ་སེམས་བསྐྱེད། མཐུན་རྐྱེན་ཚོགས་གསོག་མཎྜལ། འགལ་རྐྱེན་སྒྲིབ་པ་སྦྱོང་བྱེད་ཡིག་བརྒྱའི་སྒོམ་བཟླས། རྒྱུད་གྲོལ་བར་བྱེད་པའི་ཐབས་བླ་མའི་རྣལ་འབྱོར་རོ། །དང་པོ་ནི། ཐོག་མར་ལམ་ཐམས་ཅད་ཀྱི་སྔོན་དུ་འགྲོ་བ་སྐྱབས་འགྲོའི་ཁྲིད་འདི་གལ་ཆེ་སྟེ། ལམ་ཉམས་སུ་ལེན་པའི་དུས་སུ་ཡང་སྐྱབས་འགྲོ་བྱས་པས་ ལམ་གྱི་བར་ཆད་སེལ། བསླབ་པ་ལེན་པའི་དུས་སུའང་སྐྱབས་འགྲོ་བྱས་པས་བསླབ་པའི་གཞི་འཛིན། བྱང་ཆུབ་མཆོག་ཏུ་སེམས་བསྐྱེད་པའི་དུས་སུའང་སྐྱབས་འགྲོ་བྱས་པས་ཐེག་པ་ཆེན་པའི་བློ་ཁྱད་པར་ཅན་དུ་བྱེད༑ དབང་བསྐུར་ཞུ་བའི་དུས་སུའང་སྐྱབས་འགྲོ་བྱས་པས་ཐ་མལ་གྱི་རྒྱུད་སྨིན། ཕྱི་ནང་གི་འཇིགས་པ་བྱུང་ནའང་སྐྱབས་འགྲོ་བྱས་པས་འཇིགས་པ་ཐམས་ཅད་སེལ། དེས་ན། རྗེ་དམ་པས། བློ་སྙིང་བྲང་གསུམ་དཀོན་མཆོག་ཕྱོགས་སུ་གཏོད། །བྱིན་རླབས་འབྱུང་བར་ངེས་ཀྱིས་དིང་རི་བ། །ཞེས་ཕན་ཡོན་དཔག་ཏུ་མེད་པ་གསུངས་པའི་ཕྱིར་དུས་རྟག་ཏུ་དཀོན་མཆོག་གསུམ་ལ་སྐྱབས་སུ་འགྲོ་བ་གལ་ཆེ་བས། རང་གི་སྤྱི་བོའི་ཐད་ཀའི་མདུན་གྱི་ནམ་མཁར་སེང་ཁྲི་པད་ཉི་ཟླ་བའི་གདན་ལ་སྐྱབས་གནས་ཀུན་འདུས་རྩ་བའི་བླ་མ་ཉིད་རྣམ་པ་རྡོ་རྗེ་འཆང་ཆེན་པོའི་ཆ་ལུགས་ཅན་དུ་བཞུགས་པའི་མཐའ་བསྐོར་དུ་སངས་རྒྱས་བྱང་སེམས་དཔའ་བོ་མཁའ་འགྲོ་སྤྲིན་ཕུང་གཏིབས་པ་ལྟ་བུར་བཞུགས་པར་མོས་ནས་རང་གཞན་སེམས་ཅན་ཐམས་ཅད་རེ་ལྟོས་ལིང་སྐྱུར་གྱིས་སྐྱབས་འགྲོ་བྱེད་པར་མོས་ལ། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་ཅི་ནུས་བཟླས་མཐར་འཁོར་རྣམས་རྩ་བའི་བླ་མ་ལ་བསྡུས། དེ་ཉིད་རང་གི་སྤྱི་བོ་ནས་ཐིམ་པའི་ངང་ལ་ ཅི་གནས་བཞག་གོ །གཉིས་པ་ནི། ཐོག་མར་བྱམས་སྙིང་རྗེ་སྒོམ་དགོས་ཏེ། རྗེ་དམ་པས། འགྲོ་དྲུག་སེམས་ཅན་དྲིན་ཅན་ཕ་མ་ཡིན། །བྱམས་དང་སྙིང་རྗེ་སྒོམས་ཤིག་དིང་རི་བ། །ཞེས་གསུངས་པ་ལྟར། དང་པོ་རང་གི་ཚེ་འདིའི་ཕ་མས་དྲིན་གདགས་ཚུལ་ལ་བསམ། དེ་བཞིན་དུ་སེམས་ཅན་ཐམས་ཅད་རང་གི་ཕ་མ་མ་གྱུར་པ་མེད་པས། དེ་ཐམས་ཅད་ཀྱིས་ཕ་མ་ལན་གྲངས་དཔག་མེད་བྱས་ནས། དེ་ལྟར་ཕན་བཏགས་པ་ཤ་སྟག་ཡིན་པ་ལ་འདི་རྣམས་བདེ་བ་དང་སྐྱིད་པ་ཁོ་ན་འདོད་ཀྱང་ཐབས་མི་མཁས་པས་རྟག་ཏུ་སྡུག་བསྔལ་སྣ་ཚོགས་མྱོང་བར་མ་ཟད། ད་དུང་སྡུག་བསྔལ་གྱི་རྒྱུ་མི་དགེ་བ་རྔམ་པོ་ཆེ་ལ་འཇུག་པ་འདི་རྣམས་སྙིང་རེ་རྗེ། འོ་ན་སྙིང་རྗེ་བའི་སར་བཞག་པས་མི་ཕན། འདི་ཐམས་ཅད་སྡུག་བསྔལ་གྱི་གནས་ནས་བདག་ཁོ་ནས་དྲངས་ནས་བླ་ན་མེད་པའི་བྱང་ཆུབ་ལ་འགོད་པར་བྱ། དེའི་ཆེད་དུ་བདག་གིས་འགྲོ་ཀུན་སྒྲོལ་ནུས་པའི་གོ་འཕང་བསྒྲུབ་པར་བགྱིའོ་སྙམ་དུ་ཞེ་ཐག་པ་ནས་བསམ་ལ། ཤེས་རབ་སྙིང་རྗེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བགྱིས་ནས། །བྱང་ཆུབ་མཆོག་ཏུ་སེམས་བསྐྱེད་བགྱི༑ ༑ཞེས་ལྷག་བསམ་དྲག་པོས་ཅི་ནུས་སྒོམ་ནས། མཐར་ཡུལ་སེམས་ཅན་མི་དམིགས་པའི་ངང་ལ་མཉམ་པར་བཞག་གོ །གསུམ་པ་ལ་གཉིས་ལས། སྒྲུབ་པའི་མཎྜལ་ནི། རྒྱུ་གསེར་དངུལ་ལྟ་བུ་རིན་པོ་ཆེ་མཆོག་ ཡིན་ན་སོར་བཞི་ལས་མི་ཆུང་བ་དང༌། འཁར་བ་ལྟ་བུ་རིན་པོ་ཆེ་ཕལ་པ་ཡིན་ན་མཐོ་གང་ལས་མི་ཆུང་བའི་མཎྜལ་མཚན་ཉིད་ལྡན་པ་དྲི་བཟང་གི་ཆུས་ཆག་ཆག་གདབ། མཎྜལ་གཡས་པས་བཟུང་ལ་གཡོན་པས་ནང་བསྐོར་དུ་ཕྱི་བཞིན་དུ་ༀ་བཛྲ་བྷུ་མི་ཨཱཿ ཧཱུྃ། ཞེས་པས་མཎྜལ་དེ་རིན་པོ་ཆེའི་འབྱུང་གནས་རྒྱ་མཚོ་ཆེན་པོར་གྱུར། དེ་མ་ཐག་དེ་ཉིད་དང་མ་བྲལ་བཞིན་དུ་མཎྜལ་གྱི་མཐར་སྲིན་ལག་གིས་རེག་ཅིང༌། ༀ་བཛྲ་རཀྵ་རཀྵ་ཨཱཿ ཧཱུྃ། ཞེས་པས་སྲུང་འཁོར་སྒོམ། དེ་ནས། ༀ་ན་མོ་རཏྣ་གུ་རུ་ཨཱཿ ཧཱུྃ། ཞེས་མཎྜལ་གྱི་དབུས་སུ་ཚོམ་བུ་གཅིག །ༀ་ན་མོ་རཏྣ་ཏྲ་ཡཱ་ཡ་ཨཱཿ ཧཱུྃ། ཞེས་མདུན་དུ་གཅིག །ༀ་ན་མོ་མ་ཧཱ་ཤྲཱི་ཧེ་རུ་ཀཱ་ཡ་ཨཱཿ ཧཱུྃ། ཞེས་གཡས་སུ་གཅིག །ༀ་ན་མོ་བཛྲ་ཌཱ་ཀི་ནཱི་ཨཱཿ ཧཱུྃ། ཞེས་རྒྱབ་ཏུ་གཅིག །ༀ་ན་མོ་དྷརྨ་པཱ་ལ་ཨཱཿ ཧཱུྃ། ཞེས་གཡོན་དུ་ཚོམ་བུ་གཅིག་རྣམས་བཀོད་པས་ལྔ་ཀའི་གནས་སུ་པདྨའི་སྡོང་པོ་འདབ་མ་རྒྱས་པ་ཡངས་ཤིང་མཛེས་པ་རེ་རེར་གྱུར་པ་ལས། དབུས་ཀྱི་པད་སྡོང་གི་སྟེང་དུ་སེང་ཁྲི་པད་ཉི་ཟླ་བའི་གདན་ལ་རང་གི་རྩ་བའི་བླ་མ་བཞུགས་པའི་མཐར་མོས་གུས་ཀྱི་གནས་སུ་གྱུར་པའི་བླ་མ་ཐམས་ཅད་བཞུགས་པར་བསམ། དེ་བཞིན་དུ་མདུན་སྟེང་སེང་ཁྲི་ཡངས་པར་སྟོན་པ་ཐུབ་དབང་ལ་ཕྱོགས་བཅུའི་སངས་རྒྱས་ཀྱིས་བསྐོར་བ་དང༌། ཆོས་དཀོན་མཆོག་པུསྟི་བརྩེགས་པའི་རྣམ་པ། དགེ་འདུན་དཀོན་མཆོག་བྱང་སེམས་འཕགས་པ་ཉན་ རང་རྣམས་བཞུགས་པ། གཡས་ཀྱི་རི་རབ་ཆུ་སྐྱེས་ཉི་ཟླ་འཇིགས་བྱེད་དུས་མཚན་གྱི་གདན་ཁར་བདེ་མཆོག་ལྷན་སྐྱེས་ཡབ་ཡུམ་ལ་རྒྱུད་སྡེ་བཞིའི་ཡི་དམ་ལྷ་ཚོགས་ཀྱིས་བསྐོར་བ། རྒྱབ་ཀྱི་སྟེང་ཆོས་འབྱུང་བསྣོལ་མ་མི་རའི་གདན་ཁར་རྡོ་རྗེ་རྣལ་འབྱོར་མ་ལ་ལས་དང་ཡེ་ཤེས་ཀྱི་མཁའ་འགྲོ་མ་སྟོང་ཕྲག་བདུན་ཅུ་རྩ་གཉིས་ཀྱིས་བསྐོར་བ། གཡོན་སྟེང་དགྲ་བགེགས་ཀྱི་གདན་གྱི་སྟེང་དུ་ཡེ་ཤེས་ཀྱི་མགོན་པོ་ཨ་གྷོ་ར་ལྕམ་དྲལ་ལ་དཔལ་མགོན་བདུན་ཅུ་རྩ་གཉིས་སོགས་ཆོས་སྐྱོང་སྲུང་མས་བསྐོར་བ་རྣམས་བཞུགས་པ། སླར་ཡང་གཡོན་དུ་སུརྱཱ་ཡ་ཨཱཿ ཧཱུྃ། ཞེས་ཚོམ་བུ་གཅིག་བཀོད་པ་ཉི་གདན་དང༌། གཡས་སུ་ༀ་ན་མོ་ཨ་ཙནྡྲ་ཡ་ཨཱཿ ཧཱུྃ། ཞེས་ཚོམ་བུ་གཅིག་བཀོད་པ་ཟླ་བའི་གདན་ཡངས་པ་གཉིས་ཀྱི་སྟེང་དུ་ཕྱོགས་བཅུའི་ཆོས་མཛད་སྒྲུབ་པ་པོ་ཐམས་ཅད་བཞུགས་པར་བསམ་ལ། མཎྜལ་དེ་ཉིད་མདུན་དུ་བཏེགས་ལ་བཀོད་དེ། དེའི་མདུན་མཆོད་པའི་མཎྜལ་ནི། རྒྱས་པ་ལ་ཚོམ་བུ་ཉེར་གསུམ། འབྲིང་ལ་བཅུ་གཅིག །བསྡུས་པ་ལ་བདུན་བཤད་པ་ལས། ད་ལྟ་བསྡུས་པ་ཕྱག་ལེན་དུ་མཛད་པ་ལྟར་ན། རིན་པོ་ཆེའི་མཎྜལ་ལ་དྲིས་ཆག་ཆག་བཏབ་ལ་སྔགས་གཉིས་ཀྱིས་འཕྱི་བ་དང་སྲུང་འཁོར་སྒོམ་པ་སྔར་ལྟར་བྱས་རྗེས། དབུས་སུ་རི་རབ། ཕྱོགས་བཞིར་གླིང་བཞི། ཤར་ནུབ་གཉིས་ཀྱི་ནང་དུ་ཉི་ཟླའི་ཚོམ་བུ་སྟེ་བདུན་བཀོད་ལ་ངག་ཏུ། རིན་ཆེན་རི་རབ་གསེར་རི་ རོལ་མཚོས་བརྒྱན། །ཤར་གླིང་ལུས་འཕགས་བུམ་པ་བཟང་པོས་མཛེས། །སྒྲ་མི་སྙན་གླིང་དཔག་བསམ་ལྗོན་པའི་ཤིང༌། །བ་ལང་སྤྱོད་ནི་འདོད་འཇོའི་བས་བརྒྱན་ཅིང༌། །འཛམ་གླིང་ཡིད་བཞིན་ནོར་བུས་ལེགས་པར་བརྒྱན། །གསལ་བྱེད་ཉི་ཟླ་ཟུང་ཞིག་བསྐོར་བ་བྱེད། །བར་མཚམས་ཐམས་ཅད་རིན་ཆེན་བདུན་ལ་སོགས། །ལྷ་ཀླུ་མི་ཡི་མཆོད་རྫས་ཀྱིས་བཀང་བས། །བླ་མ་དཀོན་མཆོག་རྣམ་གསུམ་ཡི་དམ་ལྷ། །མཁའ་འགྲོ་ཆོས་སྐྱོང་སྲུང་མའི་ཚོགས་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ༀ་ན་མོ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་སྣོད་བཅུད་ཀྱི་ཞིང་ཁམས་ལུས་ལོངས་སྤྱོད་དང་བཅས་པ་ཕུལ་བས། དེའི་ཚེ་སྟེང་ནས་ལྷ་རྣམས་ཀྱིས་མེ་ཏོག་གི་ཆར་ཕབ། འོག་ནས་ཀླུ་རྣམས་ཀྱིས་རིན་པོ་ཆེའི་དབྱིག་ཕུལ། བར་ནས་མཆོད་པའི་ལྷ་མོ་རྣམས་ཀྱིས་ཕྱི་ཉེར་སྤྱོད་ལྔ། ནང་འདོད་ཡོན་ལྔ༑ གསང་བ་བདུད་རྩི་ལྔ་ལ་སོགས་པའི་མཆོད་སྤྲིན་དཔག་ཏུ་མེད་པ་ཕུལ་བར་བསམ་ཞིང༌། དེ་ལྟར་མཎྜལ་ཅི་ནུས་དབུལ་ནས་མཐར་གསོལ་བ་གདབ་པ་ནི། དད་ཅིང་གུས་པས་པུས་བཙུག་ཐལ་མོ་སྦྱར་ཏེ། རྗེ་བཙུན་བླ་མ་དམ་པ་རྣམས་དང༌། དཀོན་མཆོག་རིན་པོ་ཆེ་རྣམ་པ་གསུམ། ཡི་དམ་དཀྱིལ་འཁོར་གྱི་ལྷ་ཚོགས། མཁའ་འགྲོ་ཆོས་སྐྱོང་སྲུང་མའི་ཚོགས་རྣམས་ཀྱིས། བདག་ལ་རྟོགས་པ་མཆོག་ཏུ་གྱུར་པ་བསྐྱེད་དུ་གསོལ། ཞེན་འཁྲིས་མེད་པའི་ཕན་སེམས་དང་སྙིང་རྗེ་ཆེན་པོ་རྒྱུད་ལ་སྐྱེ་བར་མཛད་དུ་གསོལ། དག་པའི་སྣང་བ་སྣ་ཚོགས་འཆར་བར་མཛད་དུ་གསོལ། ཅེས་ལན་གསུམ་མམ་བདུན་བརྗོད། དེ་ལྟར་གསོལ་བ་བཏབ་ནས་སྒྲུབ་པའི་མཎྜལ་གྱི་རྟེན་དེ་རྣམས་ཚད་མེད་པའི་ཐུགས་རྗེ་ཆེན་པོས་འོད་དུ་ཞུ་ནས་རང་གི་སྤྱི་བོ་ནས་སིབ་ཀྱིས་ཐིམ་པར་བསམ་ཞིང༌། ལག་གཡོན་གྱི་ཟླ་བའི་ཚོམ་བུ་ནས་མས་ཡར་རིམ་པས་བསྡུས་པ་ཐལ་མའི་བར་དུ་བཟུང་ནས་སྙིང་གར་བཅངས་པས་ཚོགས་ཞིང་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་དང༌། ཡོན་ཏན་ཕྲིན་ལས་བྱེད་པ་དང་བཅས་པ་བདག་རྒྱུད་ལ་བརྟན་པར་བསམ་ལ་བསྔོ་སྨོན་བྱའོ། །བཞི་པ་ནི༑ རང་ལུས་ཐ་མལ་དུ་གནས་པའི་སྤྱི་བོར་སྣ་ཚོགས་པདྨ་དང་ཉི་ཟླ་བརྩེགས་པའི་གདན་ལ། བླ་མ་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞི་ཞིང་འཛུམ་ལ་མཚན་དཔེའི་ལང་ཚོ་རྒྱས་པ་གཡས་རྡོ་རྗེ་ཐུགས་ཀ་དང་གཡོན་དྲིལ་བུ་དཀུར་བརྟེན་པ། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང༌། དར་ཁྲའི་ཤམ་ཐབས་སོགས་དར་དང་རིན་པོ་ཆེའི་རྒྱན་གྱིས་བརྒྱན་པ་ཞབས་ཕྱེད་སྐྱིལ་དུ་བཞུགས་པའི། གཡས་པའི་མཐེ་བོང་རང་གི་ཚངས་བུག་ཏུ་རེག་གེ་བཞུགས་པར་བསམ་ལ། དམ་ཚིག་ཉམས་ཆགས་སྡིག་སྒྲིབ་ཉེས་ལྟུང་རྣམས་ལ་འགྱོད་སྡོམ་དྲག་པོས་ཡིག་བརྒྱ་གསོལ་འདེབས་ཀྱི་ཚུལ་དུ་བཟླས་པས། རྡོར་སེམས་ཀྱི་ ཐུགས་ཀར་དུས་གསུམ་སངས་རྒྱས་ཐམས་ཅད་ཀྱི་ཐུགས་རྗེ་དང་བྱིན་རླབས་ཚད་མེད་པའི་རང་བཞིན་ཧཱུྃ་ཡིག་དཀར་པོ་ལས་བདུད་རྩིའི་རྒྱུན་དངུལ་ཆུ་འདྲིལ་བ་ལྟར་དཀར་ནར་གྱིས་བྱུང་བ་ཞབས་གཡས་པའི་ལམ་ནས་བརྒྱུད་མཐེ་བོང་ལས་བབས་པ་རང་གི་སྤྱི་བོ་ནས་ལུས་ཀྱི་ཕྱི་ནང་ཐམས་ཅད་དུ་དཀར་དུ་རུ་རུ་དཀར་ཤམ་ཤམ་བབས་པས་བདག་རྒྱུད་ཀྱི་སྡིག་སྒྲིབ་ཐམས་ཅད་བཤང་ལམ་དང་ཆུ་ལམ་རྐང་སེན་གྱི་བར་སོགས་ནས་ནག་ཉིལ་ཉིལ་ཐོན་ཏེ་རང་ལུས་ཤེལ་སྒོང་ཕྱིས་པ་ལྟར་གཙང་སིང་གིས་སོང༌། མཐར་རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ། སྦྱང་བྱ་སྦྱོང་བྱེད་སྦྱོང་མཁན་ཐམས་ཅད་རྣམ་པར་མི་རྟོག་པའི་ངང་ལ་སྐྱུར་ཏེ་མཉམ་པར་བཞག་ལ་བསྔོ་བ་བྱའོ། །ལྔ་པ་ནི། རང་རྒྱུད་གྲོལ་བར་བྱེད་པའི་བདག་རྐྱེན་བླ་མ་དམ་པ་ཁོ་ན་ལ་བརྟེན་དགོས་ཏེ། སྔོན་གྱི་སངས་རྒྱས་བྱང་སེམས་རྣམས་ཀྱང་དང་པོ་ལམ་ཉམས་སུ་ལེན་པའི་ཐོག་མར་དགེ་བའི་བཤེས་གཉེན་ལ་བརྟེན་ནས་བླང་དོར་ཤེས་པ་ལ་འཇུག་དགོས་ཤིང༌། བར་དུ་ལམ་གྱི་དངོས་གཞི་ཉམས་སུ་ལེན་པ་ཡང་བླ་མ་ལ་རག་ལུས་པའི་ཕྱིར། བླ་མའི་རྣལ་འབྱོར་ལ་བརྩོན་པས་སློབ་པ་གལ་ཆེ་སྟེ། བླ་མ་སངས་རྒྱས་སུ་མཐོང་བ་དང་རྟོགས་པ་རྒྱུད་ལ་ཤར་བ་དུས་མཉམ་པར་གསུངས་པའི་རྒྱུ་མཚན་གྱིས་སོ། །དེ་ལྟར་ཡང༌། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་ བརྟེན་པ་དང༌། །བདག་གི་བསོད་ནམས་ལས་ཤེས་བྱ། །ཞེས་དང༌། རང་གི་རིག་པ་ཡེ་ཤེས་ནི། །ཚིག་གི་ལམ་འདས་སྤྱོད་ཡུལ་ཉིད། །འདི་ནི་བྱིན་རླབས་རིམ་པའི་ཕྱིར། །ཞེས་སོ། །དེ་ལ་བླ་མའི་ཕྱག་བཞེས་སུ། རྟེན་འབྲེལ་གྱི་སྔོན་དུ་རྟེན་འབྲེལ་གྱི་བདག་པོ་གཏོང་བྱ་བ་ཡིན་གསུངས་ནས། འདིར་དམ་པ་ཕྱི་སྒྲུབ་དང་སྦྱར་ནས་མཛད་པ་ལའང་འགལ་བ་མེད་མོད་ཀྱི། འོན་ཀྱང་འདིར་གླེགས་བམ་ལས་འབྱུང་བ་ལྟར་སྔོན་འགྲོ་ཆོས་གསུམ་གྱི་ནང་གི་བླ་མའི་རྣལ་འབྱོར་ཉིད་སྦྱར་བ་འབྲེལ་བས་རང་ཡི་དམ་དུ་གསལ་བའི་སྤྱི་བའི་ཐད་ཀྱི་མདུན་གྱི་ནམ་མཁར་སེང་གེས་བཏེགས་པའི་རིན་པོ་ཆེ་འོད་འབར་བའི་ཁྲི་སྣ་ཚོགས་པདྨ་དང་ཉི་ཟླའི་གདན་ཡངས་པ་ལ། རང་གི་རྩ་བའི་བླ་མ་དེ་ཉིད་སྐུ་མཚན་དཔེས་སྤྲས་ཤིང་ཞལ་གཟི་མདངས་དང་ལྡན་པ། ཐུགས་བདག་ལ་དགྱེས་པའི་ཚུལ་གྱིས་བྱིན་གྱིས་བརླབས། ཆ་ལུགས་སྤྲུལ་སྐུ་རབ་བྱུང་གི་ཆས་སམ། ལོངས་སྐུ་འཁོར་ལོས་བསྒྱུར་བའི་ཆས་སམ། ཆོས་སྐུ་ཆ་ལུགས་ཀྱི་འཛིན་པ་མེད་པ་གཅེར་བུ་ནམ་མཁའི་གོས་ཅན་རྣམས་གང་མོས་ཀྱི་རྣམ་པར་བཞུགས་པའི་མཐའ་བསྐོར་དུ། མོས་གུས་བྱེད་ཚད་ཀྱི་བླ་མ་རྣམས་དང༌༑ དཔའ་མོ་རྣལ་འབྱོར་མའི་ཚོགས་དཔག་མེད་སྤྲིན་ཕུང་གཏིབས་པ་ལྟ་བུ། སྐུ་ལས་ཚད་མེད་པའི་ཐུགས་རྗེ་དང་བྱིན་རླབས་ཀྱི་འོད་ཟེར་དཀར་པོས་འཇིག་རྟེན་གྱི་ཁམས་ཐམས་ཅད་ཁྱབ་པར་བསམ་མོ། །དེ་ནས་ སེམས་ཅན་ཐམས་ཅད་ཀྱི་བྱང་རང་གིས་དྲངས་ཏེ། ཐམས་ཅད་ཀྱང་ལུས་ཞིང་གི་རྡུལ་སྙེད་དུ་སྤྲུལ་ཏེ་ཕྱག་འཚལ་བ་དང༌། ཕྱི་ཉེར་སྤྱོད། ནང་འདོད་ཡོན། གསང་བ་བདུད་རྩི་ལྔ། ལུས་ལོངས་སྤྱོད་དང་བཅས་པས་མཆོད་པ་དང༌། སྡིག་སྒྲིབ་འགྱོད་སྡོམ་གྱི་བཤགས་པ་དང༌། རྨད་བྱུང་གི་མཛད་པ་ལ་རྗེས་སུ་ཡི་རང་བ་དང༌། བླ་ན་མེད་པའི་ཆོས་འཁོར་བསྐོར་བར་བསྐུལ་བ་དང༌། མྱ་ངན་ལས་མི་འདའ་བར་གསོལ་བ་འདེབས་པ་དང༌༑ དགེ་རྩ་བླ་ན་མེད་པའི་བྱང་ཆུབ་ཏུ་བསྔོ་བ་རྣམས་ཚིག་ཇི་ལྟར་རིགས་པ་འབུལ་བ་སྔོན་དུ་བཏང་ནས། ལུས་གུས་པས་ཞབས་ལ་བཏུད་ཅིང་གདུང་ཤུགས་ཀྱི་མཆི་མ་འབྲུལ། ངག་སྙན་པའི་གདུང་དབྱངས་ཀྱིས། བླ་མ་སངས་རྒྱས་ཆོས་ཀྱི་སྐུ་ལ་གསོལ་བ་འདེབས་སོ། །དེ་ཁོ་ན་ཉིད་ཀྱི་རྟོགས་པ་མྱུར་དུ་འཆར་བར་བྱིན་གྱིས་རློབས་ཤིག །བླ་མ་སངས་རྒྱས་ལོངས་སྤྱོད་རྫོགས་པའི་སྐུ་ལ་གསོལ་བ་འདེབས་སོ། །སྣང་བ་ཐམས་ཅད་དག་པ་རབ་འབྱམས་སུ་འཆར་བར་བྱིན་གྱིས་རློབས་ཤིག །བླ་མ་སངས་རྒྱས་སྤྲུལ་པའི་སྐུ་ལ་གསོལ་བ་འདེབས་སོ། །གཞན་དོན་རླབས་པོ་ཆེ་འགྲུབ་པར་བྱིན་གྱིས་རློབས་ཤིག །ཅེས་ཅི་ནུས་དང༌། སྤྲོ་ན། གནས་འོག་མིན་ཆོས་དབྱིངས་ཕོ་བྲང་དུ། །ཞེས་སོགས་བརྒྱུད་འདེབས་ཀྱང་འདོན། ཡིད་གུས་པས་ཅི་མཛད་ཁྱེད་ཤེས་ཀྱི་རེ་ལྟོས་བཀལ་ནས་གསོལ་བ་འདེབས། དེ་ལྟར་ཁ་ཙམ་ཚིག་ཙམ་མ་ཡིན་པར་སྙིང་ཐག་པ་ནས་ གསོལ་བ་བཏབ་ན་བྱིན་རླབས་བཙན་ཐབས་སུ་འཇུག་པ་ཡིན་ནོ། །མཇུག་ཏུ་བླ་མའི་སྤྱི་མགྲིན་སྙིང་གའི་གནས་གསུམ་ནས་ཆད་མེད་ཐུགས་རྗེ་ཆེན་པོའི་འོད་ཟེར་དཀར་དམར་སྔོ་གསུམ་གྱི་རྣམ་པར་འཕྲོས། རང་དང་སེམས་ཅན་ཐམས་ཅད་ཀྱི་སྤྱི་མགྲིན་སྙིང་གའི་གནས་གསུམ་དང་བ་སྤུའི་བུ་ག་ཐམས་ཅད་ནས་ཐིམ་པས་ལུས་ནང་ཐམས་ཅད་འོད་དེས་མེར་གྱིས་ཁེངས་པ་བདེ་བ་ཆེན་པོའི་ཡེ་ཤེས་སུ་ཕྲིལ་གྱིས་གྱུར་པར་བསམ། མཐའ་བསྐོར་གྱི་བླ་མ་དཔའ་བོ་རྣལ་འབྱོར་མ་རྣམས་ཡུད་ཀྱིས་རང་བཞིན་གྱི་གནས་སུ་གཤེགས། རྩ་བའི་བླ་མ་དེ་རང་གི་སྤྱི་བོར་བྱོན་ནས་བཞུགས་པར་བསམ་ལ། སྤྱོད་ལམ་རྣམ་བཞི་ཐམས་ཅད་དུ་ཡེངས་པ་མེད་པའི་མོས་གུས་དུང་དུང་བ་བྱའོ། །དེ་ལྟར་བླ་མའི་རྣལ་འབྱོར་ལ་འབད་ན། རྟོགས་པའི་ཡེ་ཤེས་མ་སྐྱེས་པ་བསྐྱེད། སྐྱེས་པ་འཕེལ། འཕེལ་བ་མཐར་ཕྱིན་པ་སོགས་ཡོན་ཏན་དཔག་མེད་འབྱུང་བས་ལམ་གྱི་ནང་ནས་མཆོག་ཏུ་གྱུར་པའི་མྱུར་ལམ་ཡང་དག་པ་ཡིན་ནོ། །ཐུན་བསྡུ་བ་ཐམས་ཅད་ཀྱི་མཇུག་ཏུ་དམ་པའི་སྨོན་ལམ་སུམ་ཅུ་མའམ། ཀུན་དགའི་སྨོན་ལམ་བཅུ་གསུམ་མ། ཡང་ན་སྨོན་ལམ་ཡེ་ཤེས་ནོར་བུ་ཞེས་རྡོ་རྗེའི་ཚིག་དྲུག་མ་འདི་འདོན་ཏེ། ན་མོ་བདག་དང་བདག་གི་རིགས་བདག་ལ་སོགས་པ། །མཐའ་ཡས་རྒྱུད་ཀྱིས་བསྡུས་པའི་འགྲོ་བ་རྣམས། །འདི་ནས་ཚེ་འཕོས་རིན་ཆེན་ཅན་གྱི་ཞིང༌། །བྱང་སེམས་སྨོན་ལམ་གྲུབ་པས་ དཀྲིགས་པའི་ནང༌། །རྒྱན་གྱི་འཁོར་ལོ་ཕོ་བྲང་རྣམ་མཛེས་པ། །ཡོངས་བདག་གཞལ་མེད་ཁང་དུ་སྐྱེ་བར་ཤོག །ཅེས་ཀྱང་བརྗོད་དོ། །ལམ་གྱི་སྣོད་རུང་དུ་གྲུབ་པའི་སྔོན་འགྲོའི་ཆོས་རྣམས་ཡིག་རྙིང་གི་དོན་ལྟར་བཀོད་པ་ཡིན་ནོ། །གཉིས་པ་དངོས་གཞི་ལམ་ལྔའི་དམར་ཁྲིད་བཤད་པ་ལ་གསུམ་སྟེ། བྱ་བ་གཞིའི་རྣལ་འབྱོར། བྱེད་པ་ལམ་གྱི་རྣལ་འབྱོར། བྱ་བྲལ་འབྲས་བུའི་རྣལ་འབྱོར་རོ། །དང་པོ་ནི། རྟེན་སྡོམ་པ་གསུམ་དང་ལྡན་ཞིང་རྣལ་འབྱོར་གྱི་རང་ས་དྲུག་མ་ཉམས་པར་བསྲུང་བའོ། །དེ་ལ་སྡོམ་པ་གསུམ་ནི། ལུས་ངག་ཡིད་གསུམ་གྱི་ཁ་ན་མ་ཐོ་བའི་སྡིག་པ་ཕྲ་ཞིང་ཕྲ་བ་ནས་འཛེམ་པ་ཉན་ཐོས་ཀྱི་འདུལ་ཁྲིམས། སེམས་ཅན་གྱི་དོན་ལ་ཆོག་མི་ཤེས་པར་འཇུག་པ་བྱང་སེམས་ཀྱི་བསླབ་པ། བླ་མ་ལ་སངས་རྒྱས་སུ་བལྟས་ནས་ཅི་གསུང་གི་བཀའ་སྒྲུབ་པ་གསང་སྔགས་ཀྱི་དམ་ཚིག་སྟེ་གཞི་ཉན་ཐོས་ཀྱི་འདུལ་ཁྲིམས་དམ་པ། ནང་བྱང་སེམས་ཀྱི་སྡོམ་པ་ཡངས་པ། འབྲས་བུ་གསང་སྔགས་ཀྱི་དམ་ཚིག་གཙང་མ་ཞེས་ཀྱང་བྱའོ། །དེ་ལྟར་ཡང༌། རྡོ་རྗེ་རྩེ་མོ་ལས། སོ་སོ་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པའོ། །ཞེས་སོ། །རྣལ་འབྱོར་གྱི་རང་ས་དྲུག་བསྲུང་བ་ནི། འཇིག་རྟེན་པའི་ལྷ་ལ་གསོལ་བ་མི་འདེབས་ཏེ། ཀུན་བཏགས་ཡིན་པས་བསླུ་ཞིང་རྫུན་པ་ཉིད་ཀྱིས་བློ་ཕུག་མི་ཐུབ་པའི་ཕྱིར་རོ། །དེས་ན་སངས་རྒྱས་ཐམས་ཅད་ཀྱི་ངོ་བོ་བླ་མ་ལས་རེ་ལྟོས་གཞན་དུ་ མི་འཚོལ་ལོ། །དངོས་གྲུབ་འདྲེ་ལ་མི་ཞུ་སྟེ། རྣལ་འབྱོར་བདག་གིས་འབྱུང་པོ་སྒྲུབ་པའི་འདུ་ལངས་བར་ཆད་ཀྱི་གཡབ་མོས་ཐར་ལམ་ལ་གནོད་དེ། ཞོ་ལམ་དར་བས་འགགས་པ་ལྟར་རོ། །དེས་ན་ཉམས་ལེན་པ་ལྟོ་གོས་ལ་གྱོང་ཁུར་ཏེ་འཚོ་བ་གྱི་ན་ལ་བརྟེན་ཅིང་ཉམས་ལེན་མཐར་དབྱུང་ངོ༌། །ཕོ་སྒོ་ཚེ་འདིར་མི་འབྱིན་ཏེ། ཚེ་འདིའི་ཆེ་ཐབས་ཐམས་ཅད་ནམ་བཞག་གཏན་གྱི་ཆུང་ཐབས་སུ་འདུག་པས། འདི་བས་ཕྱི་མ་ཤུལ་ཐག་རིང་བའི་ཕྱིར་འཇིག་རྟེན་གྱི་ཆེ་ཐབས་དང༌། འདུན་མ་མི་སྒྲུབ་པར་དམན་ས་བཟུང་ནས་ཐར་ལམ་ཁོ་ན་བཙལ་བར་བྱའོ། །སྣ་ཐག་མི་ལ་མི་གཏད་དེ། བྱ་བ་ངོ་དགར་ཤོར་ན་ཆོས་ཀྱི་དགོས་པ་འཆོར་བས༑ རང་ཞེ་ནས་ཆོས་བྱེད་པའི་རང་དབང་རང་གིས་ཐོབ་པར་བྱའོ། །གསང་བ་མཆུ་སྒོར་མི་འདོན་ཏེ། རང་ལ་ཤར་བའི་ཉམས་རྟོགས་གཞན་ལ་བཤད་ན་ཉམས་རྟོགས་ཀྱི་འཕེལ་བ་ཆད་འགྲོ་བས། ཡོན་ཏན་གསང་ཞིང་སྤེལ་བར་བྱའོ། །ངོ་སོ་རྒྱལ་མཚན་གྱི་རྩེ་ལ་མི་འཕྱར་ཏེ། མིས་མཐོང་ཁྱིས་ཚོར་གྱི་ཉམས་ལེན་མངོན་མཚན་ཅན་ལ་བར་ཆད་ཀྱི་བདུད་འབྱུང་བས་གསང་སྤྱོད་ཀྱི་སྒོ་ནས་མཐར་ཕྱིན་པར་བྱའོ། །དེ་ཡང་རྒྱལ་པོ་ཟླ་བ་འོད་ཟེར་གྱི་ཞལ་ནས། རྣལ་འབྱོར་གྱི་རང་ས་མ་ཉམས་པ་ཆོས་མིན་ཡིད་ལ་མི་འགྱུ་བར་བྱེད། ལོག་པའི་ཤེས་པ་ཚར་གཅོད་པའི་གནད་ཡིན། ཞེས་བསྟན་ཏོ། །འདིར་རང་སའི་དྲི་མ་བཞི་ཡང་ཤེས་པར་བྱ་སྟེ། ཆོས་བརྒྱད་ཀྱི་ངད་ཆགས་ན་བོ་བའི་དྲི་མ་ཡིན་པས་ཆོས་བརྒྱད་མགོ་སྙོམས་པར་བྱ། སྤྱོད་ལམ་འཇིག་རྟེན་པ་དང་བསྟུན་ན། ཟགས་པས་རང་ཚུགས་ཐུབ་པར་བྱ། འཁོར་བར་བློ་མ་ལོག་ན་ལྟེམས་པས། འཁོར་བའི་རང་བཞིན་སྡུག་བསྔལ་དུ་བསམ། འཁོར་བར་ཡིད་མ་ལོག་ན་ལོག་པས་མི་རྟག་པར་ཤེས་པས་གཏན་འདུན་བསྒྲུབ་པར་བྱའོ། །གཉིས་པ་བྱེད་པ་ལམ་གྱི་རྣལ་འབྱོར་ལ། དངོས་དང་དེ་དཀའ་ཐུབ་གསུམ་གྱི་བསྲང་ནས་འདོན་པའོ། །དང་པོ་བྱེད་པ་ལམ་གྱི་རྣལ་འབྱོར་དངོས་ལ་ལྔ་སྟེ། ཚོགས་ལམ་བློ་སྦྱོང༌། སྦྱོར་ལམ་དཀའ་ཐུབ། མཐོང་ལམ་རྗེས། སྒོམ་ལམ་རོ་སྙོམས། མཐར་ལམ་བྱ་བྲལ་ལོ། །དང་པོ་ཚོགས་ལམ་བློ་སྦྱོང་ལ་གསུམ་སྟེ༑ སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་རྒྱུད་ལ་དབང་བསྐུར་ལུགས། རྗེས་ལམ་གྱི་ཚར་ཚད་བསླབ་བྱ་དང་བཅས་པའོ། །དང་པོ་ལ། རྟེན་བསྐྱེད་པ། ཚོགས་བསགས་པ། ལམ་བརྟན་པ་དང་གསུམ། དང་པོ་ལ་རྟེན་རྒྱས་འབྲིང་བསྡུས་གསུམ་ལས། རྟེན་རྒྱས་པར་བསྐྱེད་པ་ནི། རང་གི་སྤྱི་བོར་པདྨའི་སྡོང་པོ་ཡལ་ག་ལོ་འདབ་མེ་ཏོག་འབྲས་བུ་ཕུན་སུམ་ཚོགས་པ་དང་ལྡན་པའི་དབུས་ཀྱི་པདྨ་འདབ་མ་ཁ་བྱེ་བ་ཡོངས་སུ་རྒྱས་པའི་ནང་དུ་སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་མ་ཟླ་བའི་གདན་ལ། དངོས་ཀྱི་བླ་མ་སྐུ་མཚན་དཔེ་དང་ལྡན་པ། ཞལ་གཟི་མདངས་དང་ལྡན་པ། ཐུགས་བདག་ཁོ་ན་ལ་དགྱེས་པས་རྗེས་སུ་ འཛིན་པ་ཞིག་བཞུགས་པར་བསམ་མོ། །དེའི་དབུའི་སྟེང་དུ་པདྨའི་སྡོང་བུ་གཅིག་དྲིལ་གྱི་སྟེང་དུ་བརྒྱུད་པའི་བླ་མ་དྲུག་བརྩེགས་ལ་མས་ནས་རིམ་བཞིན་མཁས་གྲུབ་བློ་གྲོས་བརྟན་པ། མཚུངས་མེད་བཀྲ་ཤིས་བཟང་པོ། ཁྱབ་བདག་དཔལ་འབྱོར་ཕུན་ཚོགས། འཇམ་དབྱངས་དཔལ་འབྱོར་ལྷུན་གྲུབ། མཁས་གྲུབ་ནམ་མཁའ་བཟང་པོ། སྐུ་གསུམ་བདེ་ཆེན་ལྷུན་གྲུབ། དེའི་དབུའི་སྟེང་དུ་སྡོང་བུ་གཉིས་སུ་གྱེས་པའི་བླ་མ་གསུམ་བརྩེགས་ཀྱི་བྱང་སེམས་རྒྱ་མཚོ་སྦྱིན་པ། རྒྱ་སྒོམ་རྡོ་རྗེ་གདན་པ། མཁས་བཙུན་བསོད་ནམས་དཔལ་བཟང༌། སྡོང་བུ་གཅིག་ཤོས་ལ་བླ་མ་བཞི་བརྩེགས་ཀྱི་སྙ་ནང་ལུང་ཆེན་པ་བསོད་ནམས་དཔལ་བཟང༌། ཐུགས་སྲས་བསོད་ནམས་འོད་ཟེར། རས་ཆེན་དཔལ་ལྡན་བསོད་ནམས། ཆོས་རྗེ་བློ་གྲོས་རྒྱ་མཚོ། དེ་གཉིས་ཀྱི་དབུའི་སྟེང་པད་སྡོང་གཅིག་ཏུ་དྲིལ་བར། ཀུན་མཁྱེན་བྱང་ཆུབ་བཟང་པོ། དེ་ཡི་སྟེང་སྡོང་བུ་གཉིས་སུ་གྱེས་པའི་གཅིག་ལ་རྒྱ་སྟོན་སྨོན་ལམ་ཤེས་རབ། ཅིག་ཤོས་ལ་དྲིན་ཅན་སངས་རྒྱས་དབོན། མཁན་ཆེན་ཚུལ་ཁྲིམས་ཕན། མཚན་ལྡན་རི་ཁྲོད་དབང་ཕྱུག་རྣམས་གསུམ་བརྩེགས་སུ་བཞུགས་པ། རྒྱ་སྟོན་དང་མཚན་ལྡན་པའི་དབུའི་སྟེང་དུ་སྡོང་པོ་གཉིས་གྱེས་ལ་རོག་རྒྱལ་སྲས་ཀུན་དགའ་བཟང་པོ་དང་ཀུན་དགའ་དོན་གྲུབ་སྐུ་མཆེད། དེ་གཉིས་ཀྱི་དབུ་སྟེང་སྡོང་བུ་གཅིག་ཏུ་དྲིལ་བ་ལ་རོག་ཐམས་ཅད་མཁྱེན་པ་བསོད་ནམས་དཔལ། དེའི་དབུ་སྟེང་པད་སྡོང་རྩེ་མོ་གསུམ་དུ་གྱེས་པའི་འདབ་མ་ལ་རོག་ཤེས་འོད། ཞིག་པོ་ཉི་མ་སེང་གེ། སྙེ་མདོ་སྨྲ་བའི་སེངྒེ་སྟེ་སྐུ་མཆེད་རིན་པོ་ཆེ་རྣམ་པ་གསུམ་གྲལ་འཕྲད་དུ་ཀྲིག་གེ་བཞུགས་པ། དེ་དག་གི་དབུའི་སྟེང་པདྨའི་སྡོང་བུ་གཅིག་ཏུ་འདྲིལ་བའི་སྟེང་དུ་བླ་མ་བཞི་བརྩེགས་ལ་གྲུབ་ཐོབ་རྒྱལ་བ་ཏེ་ནེ། མཁས་བཙུན་སྤ་ཚབ་སྒོམ་པ། སྐྱེ་མེད་བྱང་སེམས་ཀུན་དགའ། རྗེ་བཙུན་དམ་པ་རྒྱ་གར་རིན་པོ་ཆེ་སྐུ་མདོག་སྨུག་ལ་དམར་བའི་མདངས་ཆགས་པ། དབུ་སྐྲ་ཡོ་འབོག་གི་སྡོང་པོ་ལྟར་གཟེངས་པ། སྐུ་ལ་རས་ཁྲ་བོའི་ཨང་རག་གསོལ་བ། སྣང་སྲིད་ཐམས་ཅད་མནན་ན་ནོན་པ། བཏེགས་ན་ཐེག་པ། ཕྱག་རྒྱ་རྩ་བསྣོལ་དུ་བཞུགས་ པར་བསམ་མོ། །དེ་དག་གི་དབུའི་སྟེང་དུ་པདྨའི་སྡོང་བུ་ཡལ་འདབ་ལྔ་བཅུ་རྩ་བཞིར་གྱུར་པ་ལ་ཐུན་མོང་མིའི་བླ་མ་གྲུབ་ཐོབ་ཕོ་མོ་ལྔ་བཅུ་རྩ་བཞི་སྟེ། མདུན་དུ་ས་ར་ཧ་སོགས་ ཙཱ་པ། གུ་ཎ་ཏི། ཏོག་ཙེ་པ། ཀོ་ཥ་པ། ཤ་བ་ཏ༑ མཻ་ཏྲི་པ། ཧཱ་ག་ར་སིདྡྷི། ཉི་མ་སྦས་པ། ཨཱ་ཀ་ར་སིདྡྷི། རཏྣ་བཛྲ་རྣམས་སོ། །ཕྱག་རྒྱ་ཆེན་པོ་བརྡའི་བླ་མ་བཅུ་གཅིག །གཡས་སུ་སངས་རྒྱས་གསང་བ་སོགས་ པདྨ་བཛྲ། ངག་གི་དབང་ཕྱུག །གོ་དྷ་རི། ཀརྨ་བཛྲ། ཛ་པ་ཏི། ཡེ་ཤེས་ཞབས། ཀླུ་བྱང༌། སྭ་ནནྟྭ། ཀྲིཥྞ་བ། བ་སུ་དྷ་རི་རྣམས་སོ། །ཕ་བརྒྱུད་གཡོ་བ་རླུང་གི་བླ་མ་བཅུ་གཅིག །གཡོན་དུ་མཚོ་སྐྱེས་རྡོ་རྗེ་སོགས་ ཨིནྡྲ་བྷུ་ཏི། ཌོམྦྷི་པ། རྡོ་རྗེ་དྲིལ་བུ་པ། ཏི་ལི་པ། ནག་པོ་ཞབས། སྒེག་པ་རྡོ་རྗེ། ལཱུ་ཧི་པ། བི་རཱུ་པ། ཀུན་སྙིང༌། ཀུ་ཀུ་རི་པ་རྣམས་སོ། །མ་རྒྱུད་བདེ་བ་ ཉམས་ཀྱི་བླ་མ་བཅུ་གཅིག །རྒྱབ་ཏུ་ཀླུ་སྒྲུབ་སྙིང་པོ་སོགས་ ཤེས་རབ་བཟང་པོ། ཡོན་ཏན་འོད། ཆོས་གྲགས། ཨཱ་ཀ་རི་སིདྡྷི། ཤངྒ་ར། ཡེ་ཤེས་སྙིང་པོ། ཐོགས་མེད། ཨཱ་དེ་བ། ཞི་བ་ལྷ། གསེར་གླིང་པ་རྣམས་སོ། །མཚན་ཉིད་སྒྲ་དང་རིག་པའི་བླ་མ་བཅུ་གཅིག །མཚམས་རྣམས་སུ་ཌཱ་ཀི་སུ་ཁ་སིདྡྷི་སོགས་ རི་ཁྲོད་མ། པདྨོ་ཞབས། ཀུ་མུ་ད། བདེ་བའི་འབྱུང་གནས། གངྒཱ་བཟང་མོ། ཙི་ཏོ་མ། ལཀྵི་མ། ཤིང་ལོ་མ་རྣམས་སོ། །མཁའ་འགྲོ་མ་རིག་པ་ངོ་སྤྲོད་ཀྱི་བླ་མ་བཅུའོ། །དེ་དག་གི་སྟེང་དུ་པདྨའི་སྡོང་བུ་ཡལ་འདབ་སུམ་ཅུ་རྩ་དྲུག་ཏུ་གྱུར་པ་ལ། ངོ་མཚར་མཁའ་སྤྱོད་ཀྱི་བླ་མ་དཔལ་ལྡན་སུམ་ཅུ་རྩ་དྲུག་སྟེ། དེ་ཡང་རང་ས་སྟོན་པའི་རྒྱལ་པོ་དྲུག །བློ་སྦྱོང་སྟོན་པའི་བཙུན་མོ་དྲུག །དཀའ་ཐུབ་སྟོན་པའི་དྲང་སྲོང་དྲུག ༑རྗེས་སྟོན་པའི་བྲམ་ཟེ་དྲུག །རོ་སྙོམས་སྟོན་པའི་ཁྱིམ་བདག་དྲུག །བདག་གཏོད་སྟོན་པའི་དེད་དཔོན་དྲུག་རྣམས་སོ། །དེ་དག་གི་དབུའི་སྟེང་དུ་པད་སྡོང་ཡལ་འདབ་ཉི་ཤུ་རྩ་བཞིར་གྱུར་པ་ལ། བྱིན་རླབས་མཁའ་འགྲོ་མའི་བླ་མ་ཉི་ཤུ་རྩ་བཞི་སྟེ། དེ་ཡང་ས་འོག་སྤྱོད་པ་སྐུའི་མཁའ་འགྲོ་དཀར་མོ་བརྒྱད། ས་སྟེང་སྤྱོད་པ་གསུང་གི་མཁའ་འགྲོ་དམར་མོ་བརྒྱད། བར་སྣང་སྤྱོད་པ་ཐུགས་ཀྱི་མཁའ་འགྲོ་སྔོན་མོ་བརྒྱད་པོ་ཐམས་ཅད་ཀྱང་གྲི་ཐོད་ཁ་ཊྭཱཾ་ག་བསྣམས་པའོ། །དེ་དག་གི་དབུའི་སྟེང་དུ་པད་འདབ་བཅུ་གཉིས་སུ་གྱུར་པ་ལ། འཇམ་དབྱངས། སྤྱན་རས་གཟིགས། ཕྱག་རྡོར། སྒྲོལ་མ། ཁ་སཱརྤ་ཎི། གཤིན་རྗེ་གཤེད། རང་བྱུང་རྒྱལ་མོ། སྒྲིབ་སེལ། འོད་ཟེར་ཅན་མ། ཀུན་བཟང༌། ཕག་མོ། མི་གཡོ་བ་སྟེ་ཐུགས་དམ་བདེ་གཤེགས་བཅུ་གཉིས་ཀྱི་བླ་མ་བཅུ་གཉིས། དེ་དག་གི་དབུའི་སྟེང་དུ་པད་འདབ་བཞིར་གྱུར་པ་ལ་སངས་རྒྱས་སྐུ་བཞིའི་བླ་མ་སྟེ། དེ་ཡང་ཆོས་སྐུ་རྡོ་རྗེ་འཆང་ཆེན་ཡུམ་བདག་མེད་མ་དང་ཞལ་སྦྱོར་དུ་བཞུགས་པ། ལོངས་སྐུ་རྣམ་པར་སྣང་མཛད། སྤྲུལ་སྐུ་ཤཱཀྱ་ཐུབ་པ། ངོ་བོ་ཉིད་སྐུ་གསང་བདག་ཕྱག་ན་རྡོ་རྗེ་རྣམས་བཞུགས་པར་བསམ་མོ། །རྟེན་འབྲིང་དུ་བསྐྱེད་ན༑ དངོས་ཀྱི་བླ་མ་རྗེ་བཙུན་དམ་པ་རྒྱ་གར་བའི་བར་སྔར་ལྟར་ལས། དམ་པའི་དབུ་ཐོག་ཏུ་བདག་མེད་མ་བསྒོམ་པའོ། །རྟེན་བསྡུས་པར་བསྒོམ་ན། རྩ་བའི་བླ་མ་གཅིག་པུ་བསྒོམ་པས་ཆོག་སྟེ། དེ་ནི་དུས་གསུམ་སངས་རྒྱས་ཐམས་ཅད་དང་དབྱེར་མེད་པའི་བདག་ཉིད་སྐྱབས་གནས་ཀུན་འདུས་ཡིན་པའི་ཕྱིར་རོ། །དེ་ཡང་བྱིན་རླབས་ཀྱི་ཚན་ཆུང་ཉམས་ཀྱི་བོགས་ཆུང༌། དངོས་ཀྱི་བླ་མ་ལ་ཡིད་ཆེས་ཤས་ཆུང་ན་རྟེན་རྒྱས་པའི་ལུགས་སྒོམ༑ ཡང་བྱིན་རླབས་ཚན་ཆེ། དངོས་ཀྱི་བླ་མ་ལ་ཡིད་རབ་ཏུ་ཆེས་ན་བསྡུས་པའི་ལུགས་སུ་སྒོམ། དེ་དག་ཅི་རིགས་པ་ལ་འབྲིང་དུ་བསྐྱེད་པའི་ལུགས་སུ་སྒོམ་མོ། །གང་ལྟར་ཡང་འདིར་བླ་མ་ཆོས་སྐུར་སྒྲུབ་པའི་སྐབས་ཡིན་པས་རྒྱན་གྱི་སྤྲོས་པ་མེད་པ་གཅེར་བུ་ནམ་མཁའི་ཆོས་གོས་ཅན་ནོ། །གཉིས་པ་ཚོགས་བསགས་པ་ལ་གསུམ་ལས། དང་པོ་མཎྜལ་གྱི་སྒོ་ནས་ཚོགས་བསགས་པ་ནི། རང་གི་མདུན་དུ་མཎྜལ་ཚོམ་བུ་བཞི་པ་ཞིག་ བཤམས་པ་དེ་ཉིད་རིན་པོ་ཆེ་སྣ་ཚོགས་པའི་འབྱུང་གནས་སུ་གྱུར་པའི་རྒྱ་མཚོ་དྭངས་པའི་དབུས་རི་རབ་གླིང་བཞི་ཉི་ཟླ་མཐའ་འཁོར་ཡུག་དང་བཅས་པ་ལྷ་མིའི་མཆོད་རྫས་སྣ་ཚོགས་ཀྱིས་གང་བར་དམིགས་ཏེ། ༀ་ན་མོ་གུ་རུ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་ལན་ལྔའམ་གསུམ་གྱིས་འབུལ་ལོ། །གཉིས་པ་རང་ལུས་ཀྱི་སྒོ་ནས་ཚོགས་བསགས་པ་ནི། རང་གི་སྤྱི་བོར་ཡི་གེ་ཏྲཾ་སེར་པོ་གནས་པ་ཞུ་ནས་རང་ལ་ཐིམ་པས། རང་གི་ལུས་འདི་ཡིད་བཞིན་གྱི་ནོར་བུ་རིན་པོ་ཆེའི་ཕུང་པོ་བླ་མ་ལ་མཁོ་བའི་ཡོ་བྱད་འདོད་རྒུ་སྣ་ཚོགས་པའི་འབྱུང་གནས་སུ་བསམ་སྟེ། ༀ་ན་མོ་གུ་རུ་ཏྲཱྃ་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་ལན་གསུམ་གྱིས་འབུལ་ལོ། །གསུམ་པ་སྣ་ཚོགས་པའི་སྒོ་ནས་ཚོགས་བསགས་པ་ནི། བདག་གི་སྙིང་གའི་ས་བོན་ལས་འོད་ཟེར་འཕྲོས་པའི་རྩེ་མོ་ལས་འདོད་ཡོན་གྱི་ལྷ་མོ་དཔག་ཏུ་མེད་པ་བྱུང་ནས་མཆོད་རྫས་སྣ་ཚོགས་ཀྱི་སྤྲིན་སྤྲོ་བར་བསམ་སྟེ། ༀ་ན་མོ་གུ་རུ་སརྦ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་ལན་གསུམ་གྱིས་ཕུལ་བས་དགྱེས་མཉེས་ཚིམ་པར་བསམ་མོ། །གསུམ་པ་ལམ་བརྟེན་པ་ནི། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་བླ་མ་དམ་པ་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཡི་དམ་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་ཡི་དམ་ལྷ་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མཁའ་འགྲོ་མའི་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། ། བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་མཁའ་འགྲོ་མའི་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། བླ་མ་ཡི་དམ་མཁའ་འགྲོ་མའི་ཚོགས་རྣམས་བདག་ལ་དགོངས་སུ་གསོལ། བདག་གིས་འདས་པ་དང་མ་འོངས་པ་དང་ད་ལྟར་བྱས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཏེ་བླ་མ་ལ་དབུལ་བར་བགྱིའོ། །བླ་མ་ལ་ཕུལ་བས་བླ་མ་རིན་པོ་ཆེ་རྣམས་ཀྱི་ཐུགས་དགོངས་ཁྱད་པར་ཅན་ཡོངས་སུ་རྫོགས་པར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེས་བདེ་བར་གཤེགས་པ་རྣམས་ཀྱི་སྤྱན་ལམ་དུ་ མཆོད་པའི་བྱེ་བྲག་ནམ་མཁའ་དང་མཉམ་པ་འབྱུང་བར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེས་སེམས་ཅན་ཐམས་ཅད་དང་ཐུན་མོང་དུ་བསྔོ་བར་བགྱིའོ། །དེ་ལྟར་བསྔོས་པས་སེམས་ཅན་ཐམས་ཅད་འཁོར་བ་སྲིད་པ་སྡུག་བསྔལ་གྱི་རྒྱ་མཚོ་ལས་བསྒྲལ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་གྱུར་ཅིག །དེ་མ་ཐོབ་ཀྱི་བར་ཡང་བདག་མྱུར་དུ་མངོན་པར་རྫོགས་པར་སངས་རྒྱས་ནས་འགྲོ་བ་མ་ལུས་པ་མཐའ་དག་གི་བླ་མ་བྱེད་པར་གྱུར་ཅིག །དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་མཆོག་ཏུ་གྱུར་པའི་སྐྱབས་འགྲོ། བླ་ན་མེད་པའི་སེམས་བསྐྱེད། ངོ་མཚར་ཅན་གྱི་མཆོད་པ། སེམས་ཅན་དང་མི་ཕྱེད་པའི་བསྔོ་བ། གཞན་དོན་དུ་འགྱུར་ངེས་ཀྱི་སྨོན་ལམ་དང་ལྔ་པོ་འདི་ལན་གསུམ་མམ་ལྔའམ་བདུན་སོགས་མདོར་ན་རང་རྒྱུད་ལ་དྲོད་ཆིལ་གྱིས་མ་བབས་ཀྱི་བར་དུ་བྱ་སྟེ། རྒྱལ་པོ་སྟོབས་ལྡན་སྙིང་པའི་ཞལ་ནས། སྐྱབས་གནས་ཀྱི་ཡུལ་བཅུད་ལ་བོར་བས། རྒྱུད་ལ་དངོས་གྲུབ་རྣམ་གཉིས་ཐོབ་པར་བྱེད། བྱིན་རླབས་བརྒྱུད་པའི་གནད་གོང་ནས་གོང་དུ་སྤོར་ཅིག །ཅེས་གསུངས་སོ། །གཉིས་པ་དངོས་གཞི་རྒྱུད་ལ་དབང་བསྐུར་ལུགས་ལ། གྲགས་པ་སྒྲའི་བརྗོད་ཚུལ་ཡི་གེ་ལམ་ཁྱེར། དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས། རྩ་བ་ངོ་སྤྲོད་ཀྱི་ཁྱད་པར་མཉམ་རྗེས་གཉིས་ཀྱི་ལག་ལེན། རྗེས་གནང་ལུང་གི་ ཁྱད་པར་བླ་མའི་ཐུགས་དམ་བསྐུལ་ལུགས་སོ། །དང་པོ་ནི། ཨ་ཨཱ། ཨི་ཨཱི། ཨུ་ཨཱུ། ར་རཱ། ལ་ལཱ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཞེས་ལན་བཞི་བརྗོད་པའི་དང་པོ་མིག་ཡུལ་དུ་སྣང་ཚད་ཀྱི་གཟུགས་ཐམས་ཅད་རྣམ་པ་ཡི་གེ་ལ་ངོ་བོ་བླ་མའི་སྐུར་བསམ། གཉིས་པ་རྣ་བར་གྲག་ཚད་ཀྱི་སྒྲ་ཐམས་ཅད་རྣམ་པ་ཡི་གེ་ལ་ངོ་བོ་བླ་མའི་གསུང༌། གསུམ་པ་དྲན་རྟོག་ཡིད་ལ་ཅི་འགྱུས་ཐམས་ཅད་རྣམ་པ་ཡི་གེ་ལ་ངོ་བོ་བླ་མའི་ཐུགས། བཞི་པ་སྣང་གྲག་འགྱུ་གསུམ་བླ་མའི་སྐུ་གསུང་ཐུགས་སུ་ཤར་བ་དེ་ཐམས་ཅད་ཀྱང་རང་གི་སེམས་ཉིད་སྟོང་པའི་རང་རྩལ་ཙམ་དུ་ཤེས་པར་བྱའོ། །དེས་ནི་ཆེད་དུ་དྲན་པ་རྒྱུན་ཆགས་སུ་བརྟེན་མི་དགོས་པར་གསང་སྔགས་ཀྱི་བཟླས་བརྗོད་ཀུན་ཐེམས་ནས་ཡུལ་ལ་དག་སྣང་ཕྱོགས་མེད་དུ་འབྱོངས་པར་འགྱུར་ཏེ། བཙུན་མོ་ལྷ་དཔལ་འོད་ཟེར་གྱི་ཞལ་ནས༑ ངག་ནས་བྲེ་མོའི་གཏམ་བརྗོད་པས་སྔགས་ཀྱི་བཟླས་བརྗོད་ཐེམས་པར་བྱེད། ཨཱ་ལི་ཀཱ་ལི་གནད་འདི་ལྟར་རོ། །ཞེས་བསྟན་ཏོ། །གཉིས་པ་དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ནི། རང་གི་སྤྱི་བོར་བདེ་ཆེན་གྱི་འཁོར་ལོའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་བླ་མའི་སྐུའི་ས་བོན་ༀ་ཡིག་དཀར་པོ་བསམ་སྟེ། ཨ་བྷི་ཥིཉྩ་ༀ། ཞེས་བརྗོད་པས། ༀ་ལས་བྱང་ཆུབ་སེམས་ཀྱི་ཆུ་རྒྱུན་དཀར་ནར་གྱིས་ བབས་པས་ལུས་ཀྱི་ནང་ཀུན་དཀར་མེར་གྱིས་ཁེངས་པར་བསམ་མོ། །མགྲིན་པ་ལོངས་སྤྱོད་ཀྱི་འཁོར་ལོའི་དབུས་སུ་པདྨ་འདབ་མ་བརྒྱད་པའི་ལྟེ་བར་བླ་མའི་གསུང་གི་ས་བོན་ཨཱཿ ཡིག་དམར་པོ། ཨ་བྷི་ཥིཉྩ་ཨཱཿ ཞེས་པས་ཨཱཿ ལས་བྱང་ཆུབ་སེམས་ཀྱི་ཆུ་རྒྱུན་དམར་པོ་ལྷུག་ལྷུག་བབས་པས་ལུས་ཀྱི་ནང་ཐམས་ཅད་དམར་མེར་གྱིས་ཁེངས་པར་བསམ་མོ། །སྙིང་ག་ཆོས་ཀྱི་འཁོར་ལའི་དབུས་སུ་རྡོ་རྗེ་རྩེ་ལྔ་པའི་ལྟེ་བར་བླ་མའི་ཐུགས་ཀྱི་ས་བོན་ཧཱུྃ་ཡིག་སྔོན་པོ། ཨ་བྷི་ཥིཉྩ་ཧཱུྃ། ཞེས་པས་ཧཱུྃ་ལས་བྱང་སེམས་ཀྱི་ཆུ་རྒྱུན་སྔོ་བྲེང་གིས་བྱུང་བས་རྡོ་རྗེ་ལུས་ཀྱི་དཔའ་བོ་དང་དཔའ་མོ་རྣམས་བསྐུལ་ཏེ། དེ་རྣམས་གཉིས་སུ་མེད་པར་སྦྱོར་བ་མཛད་པས་ལུས་ཐམས་ཅད་ཟག་མེད་ཀྱི་བདེ་བས་གང་བར་བསམ་མོ། །ལྟེ་བ་སྤྲུལ་པའི་འཁོར་ལའི་དབུས་སུ་རིན་པོ་ཆེ་ཟུར་བརྒྱད་པའི་ལྟེ་བར་བླ་མའི་ཡོན་ཏན་གྱི་ས་བོན་ཧྲཱིཿ སེར་པོ། ཨ་བྷི་ཥིཉྩ་ཧྲཱིཿ ཞེས་པས་ཧྲཱིཿ ལས་བྱང་སེམས་ཀྱི་ཆུ་རྒྱུན་ཁ་དོག་སྣ་ཚོགས་པ་བྱུང་བས་ལུས་སེམས་སྣང་བའི་དངོས་པོ་ཐམས་ཅད་མཁའ་ལ་སྤྲིན་དེངས་པ་ལྟར་ཡལ་ནས་སྟོང་རྗེན་གྱིས་སོང་བར་བསམ་མོ། །དེས་ནི་ལུས་ཀྱི་ཆོས་བྱང་སེམས་རྩ་རླུང་དང་བཅས་པ་སྟེང་འོག་གི་སྒོ་ལ་མ་བརྟེན་པར་ལས་སུ་རུང་བར་འགྱུར་ཏེ། བཙུན་མོ་ཡེ་ཤེས་འོད་ཟེར་གྱི་ཞལ་ནས། རིང་ལམ་འཁོར་ལོས་བསྟུངས་པས་རྟེན་སྨིན་པར་བྱེད་པ་དབང་བཞི་ལམ་ཁྱེར་ བློ་སྦྱོང་གི་གནད་འདི་ལྟར་རོ། །ཞེས་བསྟན་ཏོ། །གསུམ་པ་རྩ་བ་ངོ་སྤྲོད་ཀྱི་ཁྱད་པར་མཉམ་རྗེས་ཀྱི་ལག་ལེན་ལ་གཉིས་ལས། དང་པོ་མཉམ་བཞག་ལ་ངོ་སྤྲད་པ་ནི། འཁྲུལ་འཁོར་གསུམ་ལ་བརྟེན་ནས་སེམས་ཀྱི་ངོ་བོ་ངོས་འཛིན་ཏེ། དེ་ལ་ལུས་ཀྱི་འཁྲུལ་འཁོར་ནི། རྣམ་སྣང་གི་ཆོས་བདུན་བཅའ་སྟེ། རྐང་པ་རྡོ་རྗེའི་སྐྱིལ་ཀྲུང་བྱ། ལག་མཉམ་བཞག་གི་ཕྱག་རྒྱ་བཅའ། སྒལ་ཚིགས་དྲང་པོ་བསྲངས། མགྲིན་པ་ཡིད་ཙམ་རྒུ། དཔུང་པ་རྒོད་གཤོག་ལྟར་བརྒྱང༌། ལྕེ་ཡ་རྐན་ལ་སྦྱར་ཞིང་མཆུ་དང་སོ་རང་ལུགས་སུ་བཞག །ལྟ་སྟངས་རྫི་མ་མི་འཐབ་ཅིང་མིག་འབྲས་མི་འགུལ་བར་སྣ་རྩེ་ལ་ཕབ་སྟེ་བཞག་གོ །དེ་ཡང་རྒྱལ་སྲས་དྲི་མེད་གྲགས་པ་ཟླ་བ་སེང་གེའི་ཞལ་ནས། རྟེན་འབྲེལ་ལུས་ལ་སྒྲིགས་པའི་ཆེ་བས་ཉམས་མྱོང་སེམས་ལ་འཆར་བར་བྱེད་པ་འཁྲུལ་འཁོར་འདུག་སྟངས་ཀྱི་གནད་འདི་ལྟར་རོ། །ཞེས་སོ། །ངག་གི་འཁྲུལ་འཁོར་ནི། རྩོལ་མེད་བྱང་ཆུབ་སེམས་ཀྱི་རླུང་བཟུང་བ་ཞེས་བྱ་སྟེ། རྩོལ་སྒྲུབ་མེད་པར་དབུགས་སོ་མར་བཞག་གོ །སེམས་ཀྱི་འཁྲུལ་འཁོར་ནི། ཡིད་མིག་སྣ་རྩེ་གསུམ་གཅིག་ཏུ་སྒྲིལ་ཏེ། སེམས་བཟང་རྟོག་ངན་རྟོག་གང་གིས་ཀྱང་མ་བསླད་པར་རང་ལུགས་སུ་རྩེན་གྱིས་འཇོག་ཏུ་བཅུག །དེ་ལྟར་བཞག་པས་རྣམ་པར་མི་རྟོག་པའི་ཡེ་ཤེས་རང་གི་ངོ་བོ་དེ་རང་ལུགས་སུ་གནས་ཤེས་པ་འབྱུང་སྟེ། བཙུན་མོ་ལྷ་མོ་དཔལ་གྱི་སེང་གེའི་ཞལ་ནས། ངོ་བོ་སྦལ་པ་གསེར་གྱི་ཉི་མའི་འོད་ཕྱེ་བས། རྟོགས་པའི་ཡེ་ཤེས་ཕྱོགས་མེད་དུ་འཆར་བར་བྱེད། ཕྱག་རྒྱ་ཆེན་པོ་བརྡའི་གནད་རིག་པར་གྱིས་ཤིག །ཅེས་གདམས་སོ། །དེ་ཡང་ཐ་མལ་གྱི་ཤེས་པ་གདོད་ནས་སྟོང་པ་དེ་ངོ་ཤེས་པའི་ཕྱིར་ རྩེན་གྱིས་འཇོག །དེ་ལ་གནས་སུ་མ་བཏུབ་ཅིང་སྟོང་པ་དེ་ངོས་མ་ཟིན་ན་རྟོག་པ་དེ་ཉིད་ལྷོད་ཀྱིས་གློད་དུ་གཞུག་སྟེ། དོ་ཧ་ལས། འཇུར་བུས་བཅིངས་པའི་སེམས་ཉིད་འདི། །གློད་ན་གྲོལ་བར་ཐེ་ཚོམ་མེད༑ ༑ཅེས་སོ། །གལ་ཏེ་སྟོང་པ་དེ་ངོས་ཟིན་ན་གསལ་བདོ་བ་ལ་ཤིགས་ཀྱིས་བཤིག་ཅིང་བསྒོམས་པས་རྗེས་ཇེ་བཟང་དུ་འགྲོ་བ་ཡིན་ཏེ། དེད་དཔོན་དཔལ་གྱི་སྙིང་པོའི་ཞལ་ནས། མཉམ་བཞག་གསལ་བའི་གདངས་ལ་བཤིག་པས་གནས་པའི་ཕྱིར་རྗེས་བཟང་བར་བྱེད་པས་ཐུན་ཐུང་ལ་གྲངས་མང་བས་བྱིང་རྒོད་ཀྱིས་མི་ཟིན་པའི་གནད་ཡིན་ནོ། །ཞེས་གསུངས་སོ། །དེ་ལྟར་ཐུན་ཆེ་ཆུང་དང་གྲངས་མང་ཉུང་ཁམས་ཚོད་དང་བསྟུན་ཅིང༌༑ བྱིང་རྒོད་ཀྱི་དབང་དུ་མི་བཏང་བར་སྒྲིམས་གློད་རེ་མོས་སུ་ཉམས་སུ་བླངས་པས་རྟོག་པ་རྩ་བྲལ་དུ་གོ་ནས་གསལ་ལ་མི་རྟོག་པའི་ཡེ་ཤེས་ལ་གནས་པ་འབྱུང་ན་ངོ་སྤྲད་པར་བྱ་སྟེ། དེ་ལ་གསུམ། ངོ་བོ་སྟོང་པ་ལ་ངོ་སྤྲད་པ། རང་བཞིན་གསལ་བ་ལ་གནས་ཤེས་པ། མཚན་ཉིད་འཕྲོ་བ་ལ་གྲོལ་ཤེས་པའོ། །དང་པོ་ངོ་བོ་སྟོང་པ་ལ་ངོ་སྤྲད་པ་ནི། འཁྲུལ་འཁོར་གསུམ་གྱིས་ཤེས་པ་རྟེན་མེད་དུ་འཇོག་ཏུ་བཅུག་ལ། ངོ་སྤྲོད་ཚུལ་ལ་གསུམ་ལས་ཕྱིའི་སྒྲོ་འདོགས་བཅད་པ་ནི། ཕྱི་རོལ་གྱི་སྣང་བ་འདི་དག་ཇི་ལྟར་སྣང་ཇི་ལྟར་གསལ་ཀྱང་ཕྱི་རོལ་ན་བདེན་པར་གྲུབ་པ་མེད་དེ། རང་སེམས་འཁྲུལ་པའི་སྣང་བ་རྨི་ལམ་གྱི་ལྟད་མོ་ལྟ་བུའོ། །མདོ་ལས། འདི་དག་ རྣམ་པར་རིག་ཙམ་ཉིད། །ཡོད་པ་མ་ཡིན་དོན་སྣང་ཕྱིར། །དཔེར་ན་རབ་རིབ་ཅན་དག་གིས། །སྐྲ་ཟླ་ལ་སོགས་མེད་སྣང་བཞིན། །ཞེས་སོ། །ནང་གི་སྒྲོ་འདོགས་བཅད་པ་ནི། སྣང་བ་རང་སེམས་ཀྱི་འཁྲུལ་སྣང་ཡིན་ན། སེམས་དེ་རང་ཇི་ལྟ་བུ་ཞིག་ཡོད་སྙམ་ན། སེམས་ཀྱིས་སེམས་ལ་བལྟས་པས། སེམས་དེ་ལ་སྐྱེ་བའི་རྒྱུ་མེད། གནས་པའི་གཞི་མེད། རང་གི་ངོ་བོ་ཅིར་ཡང་མ་གྲུབ་པ་ནམ་མཁའ་དྭངས་པ་ལྟ་བུའོ། །ཡུམ་ལས། སེམས་ལ་སེམས་མ་མཆིས་ཏེ། སེམས་ཀྱི་རང་བཞིན་ནི་འོད་གསལ་བའོ། །ཞེས་དང༌། མདོ་སྡེ་རྒྱན་ལས། ཆོས་རྣམས་རང་གི་སེམས་སུ་བློས་རྟོགས་ནས། །དེ་ནས་སེམས་ཀྱང་མེད་པ་ཉིད་དུ་རྟོགས། །ཞེས་སོ། །བར་གྱི་སྒྲོ་འདོགས་བཅད་པ་ནི། སྣང་བ་རང་སེམས་ཀྱི་འཁྲུལ་སྣང་དང༌། སེམས་ཉིད་ཅིར་ཡང་མ་གྲུབ་པའི་སྟོང་ཉིད་ཡིན་ན། དེ་ལ་དྲན་རིག་སྣ་ཚོགས་འགྱུ་བ་འདི་ཅི་ཡིན་སྙམ་ན། འདི་སྟོང་པའི་རང་རྩལ་འགགས་མེད་ཤར་བ་བར་སྣང་གི་རླུང་ངམ། ཆུའི་ལྦུ་བ་ལྟ་བུ་ཞིག་ཡིན་ཏེ། དང་པོ་བྱུང་ས་མེད། ཐ་མར་འགྲོ་ས་མེད། བར་དུ་གནས་ས་མེད། རང་གི་ངོ་བོ་ཅིར་ཡང་མ་གྲུབ་པ་རྩལ་ཅིར་ཡང་མ་འགགས་པར་འཆར་བ་ཞིག་ཡིན་ཏེ། དོ་ཧ་ལས། གང་ཞིག་སེམས་ལས་རྣམ་འཕྲོས་པས། །དེ་ནི་མགོན་པོའི་རང་བཞིན་ཏེ། །ཆུ་དང་ཆུ་རླབས་གཞན་ཡིན་ནམ། །ཞེས་སོ། །གཉིས་པ་རང་བཞིན་གསལ་བ་ལ་གནས་ཤེས་པ་ནི། སྔར་སྒྲོ་འདོགས་ཆོད་དོན་ལ་གནས་ཤིང་གོམས་པར་བྱེད་པ་ཡིན་ཏེ། ཅེར་གྱིས་བལྟས་ལ་ཅིར་ཡང་མ་གྲུབ་པའི་ངང་ལ་བཞག །ལྷོད་ཀྱིས་གློད་ལ་རྩོལ་སྒྲུབ་མེད་པའི་དོན་ལ་བཞག །ཤིགས་ཀྱིས་བཤིག་ལ་བྱ་རྩོལ་མེད་པའི་གཤིས་ལ་བཞག །དེ་ལྟར་བཞག་པས་ཉམས་གསུམ་འཆར་ཏེ། ཡུལ་རྗེས་མི་འབྲེང་རྟོག་པ་དང་བྲལ་བ། ཉམས་ལ་མ་ཞེན་འཛིན་པ་དང་བྲལ་བ། བསམ་དུ་མེད་དེ་སྒོམ་པ་དང་བྲལ་བའི་ཉམས་འཆར་རོ། །གསུམ་པ་མཚན་ཉིད་འཕྲོ་བ་ལ་གྲོལ་ཤེས་པ་ནི། དེ་ལྟར་བཞག་པའི་ངང་ལས་རྣམ་རྟོག་འཕྲོ་ན། ཇི་ལྟར་བྱ་སྙམ་ན། དེའི་ཚེ་རྟོག་པ་སྤངས་མི་དགོས་ཏེ། རྟོག་པ་དེ་ཉིད་ལ་ཆེར་གྱིས་བལྟས་པས། ཅིར་ཡང་གྲུབ་པ་མེད་དེ། ཆུའི་རླབས་སམ༑ བར་སྣང་དྭངས་པའི་རླུང་བཞིན། འགྱུ་བ་རང་ཤར་སངས། ཅེར་མཐོང་ཅེར་གྲོལ་དུ་འགྲོ་བས། དེའི་ངང་ལས་མ་གཡོས་པར་མཉམ་པར་བཞག་གོ །གཉིས་པ་རྗེས་ཐོབ་ལ་ངོ་སྤྲད་པ་ནི། མཉམ་བཞག་ལས་ལངས་ནས་སྤྱོད་ལམ་བྱེད་པའི་ཚེ། གཟུགས་སུ་སྣང་ཚད་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟར་སྣང་སྟོང་ཞེན་བྲལ་དུ་ལྷག་གེ་བ། སྒྲ་གྲག་ཚད་སེ་གོལ་གྱི་སྒྲའམ་བྲག་ཆ་ལྟར་གྲག་སྟོང་དུ་ཝང་ངེ་བ། སེམས་ཀྱི་དྲན་རྟོག་ཐམས་ཅད་རྨི་ལམ་གྱི་ལྟད་མོ་གང་ལའང་བདེན་ཞེན་མེད་པར་རྗེན་ནེ་བ་རིག་སྟོང་དུ་ངོ་སྤྲོད་དོ། །དེ་ལྟར་ཆོས་ཐམས་ཅད་བདེན་ཞེན་ཟད་ཕྱིན་ཆད། ཡུལ་ལ་བརྟེན་ནས་སྐྱེ་བའི་ཀུན་འབྱུང་དུག་གསུམ་གྱི་ལས་མི་སོག་ཅིང༌། ལུས་ངག་ཡིད་གསུམ་ཆེད་དུ་བཅོས་པ་མེད་པར་ཐ་མལ་ལྟར་འདུག་ཀྱང་ཚོགས་གཉིས་ངང་གིས་རྫོགས་པར་འགྱུར་བ་ཡིན་ཏེ། དེད་དཔོན་ནམ་མཁའི་སྙིང་པོའི་ཞལ་ནས། སྒོ་གསུམ་ཐ་མལ་དུ་སྡད་པས་རྒྱུད་ལ་ཚོགས་གཉིས་རྫོགས་པར་བྱེད། སྐམ་ཐག་ཆུ་ནང་ནས་ཆོད་པ་བྱ་ལོག་གི་གནད་འདི་ལྟོས་ཤིག །ཅེས་བསྟན་ཏོ། །བཞི་པ་རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་ནི༑ རང་གི་སྤྱི་བའི་སྟེང་དུ་རྟེན་རྒྱས་འབྲིང་བསྡུས་གསུམ་གང་མོས་བསྐྱེད་པའི་དངོས་ཀྱི་བླ་མའི་གནས་བཞིར། ༀ་ཨཱཿ ཧཱུྃ་ཧྲཱིཿ རྣམས་གསལ་བཏབ་ལ། ༀ་ཨཱཿ ཧྲཱིཿ གུ་རུ་སིདྡྷི་ཧཱུྃ། ཞེས་བློ་སྦྱོང་གི་སྙིང་པོ་འབྲུ་བརྒྱད་པ་འདི་བདག་ཉིད་ཀྱི་སྤྱི་བོའི་བླ་མ་ལ་མོས་གུས་གདུང་ཤུགས་དྲག་པོ་དང་བཅས་པས་བགྲང་ཞིང་གསོལ་བ་བཏབ་པས། དེ་བཞིན་དུ་རྟེན་རྒྱས་འབྲིང་གཉིས་བསྐྱེད་པ་ལྟར་ན། བླ་མ་འོག་མ་འོག་མས་གོང་མ་གོང་མ་ལ་རིམ་གྱིས་མོས་གུས་གདུང་ཤུགས་བཅས་པས་སྙིང་པོ་འདྲེན་ཅིང་བདག་གི་གྲོགས་མཛད་དེ་གསོལ་བ་མས་བཏབ་ཀྱི་ཚུལ་དུ་འདེབས་པར་བསམ་མོ། །དེ་ནས་བྱིན་རླབས་ཡས་ཞུས་ཚུལ་དུ་གསོལ་བ་འདེབས་པ་ནི། དེ་ལྟར་གསོལ་བ་བཏབ་པས་བརྒྱུད་པའི་བླ་མ་གོང་མ་གོང་མ་རྣམས་ཀྱི་ཚད་མེད་པའི་ཐུགས་རྗེ་བྱིན་རླབས་ཀྱི་འོད་ཟེར་དུ་རིམ་པར་ཞུ་ནས་འོག་མ་འོག་མ་ལ་ཐིམ་པས་དངོས་ཀྱི་བླ་མའི་བར་དུ་བྱིན་རླབས་ཞུ་བར་བྱ་ཞིང༌། དངོས་ཀྱི་བླ་མ་དེ་འོད་དུ་མ་ཞུ་བར་བརྒྱུད་པ་ཀུན་འདུས་ཀྱི་ངོ་བོར་བཞུགས་པ་ལ་མོས་གུས་གདུང་ཤུགས་དྲག་པོས་སྙིང་པོ་བགྲངས་པས། བླ་མའི་གནས་བཞི་ལས་ཚད་མེད་པའི་ཐུགས་རྗེ་དང་བྱིན་རླབས་ཆེན་པོའི་འོད་ཟེར་དཀར་དམར་མཐིང་ག་སྣ་ཚོགས་པའི་རྣམ་པར་བྱུང་སྟེ། རང་གི་གནས་བཞིར་ཆུ་ལ་ཆུ་བཞག་པ་ལྟར་ཐིམ་པས། སྒོ་གསུམ་ཆ་མཉམ་དང་བཅས་པའི་སྒྲིབ་པ་དག །སྐུ་གསུང་ཐུགས་སྣང་སྟོང་གྲགས་སྟོང་དྲན་སྟོང་གཉིས་སུ་མེད་པའི་བྱིན་རླབས་ཞུགས་ནས་ཉམས་དང་རྟོགས་པ་འར་འུར་དུ་འབར་བར་བསམ་མོ། །ཐུན་བསྡུ་བའི་ཚེ། དཔལ་ལྡན་བླ་མ་ཆོས་སྐུའི་བདག་ཉིད་ཅན་འགྲུབ་པར་གྱུར་ཅིག །ཅེས་བརྗོད་ཅིང༌། སྤྱོད་ལམ་ཀུན་ཏུ་སྤྱི་བོའི་བླ་མ་དྲན་པར་བྱས་ལ་མོས་གུས་དུང་དུང་བ་བྱའོ། །འདིས་ནི་ཉོན་མོངས་པ་ཅན་གྱི་ཡིད་ལ་ཏིང་ངེ་འཛིན་གྱི་རྩལ་རྫོགས་པར་འགྱུར་ཞིང་སྔགས་གཅིག་གིས་དོན་ཕྱོགས་མེད་དུ་འགྲུབ་པ་ཞེས་བྱ་སྟེ། ཡང་དག་པའི་རྟོགས་པ་དང་ཉམས་མྱོང་མ་སྐྱེས་པ་སྐྱེ་བར་བྱེད། སྐྱེས་པ་གོང་ནས་གོང་དུ་འཕེལ་བར་བྱེད། ཚེ་འདིར་རྟོགས་པ་དང་ཉམས་མྱོང་རྟགས་དང་ཡོན་ཏན་ཅི་ཡང་ མེད་ཀྱང་བར་དོ་ན་ཇི་ལྟ་བ་འགྲུབ་པར་འགྱུར་ཏེ། བཙུན་མོ་ཡེ་ཤེས་འོད་ཟེར་གྱི་ཞལ་ནས། རིང་ལམ་འཁོར་ལོ་བརྡུངས་ཏེ་རྟེན་སྨིན་པས། ས་ལམ་ཆིག་རྫོགས་སུ་གཅོད་པར་བྱེད་པ། དབང་བཞི་ལམ་ཁྱེར་བློ་སྦྱོང་གི་གནད་འདི་ལྟར་རོ། །ཞེས་བསྟན་ཏོ། །གསུམ་པ་རྗེས་ལམ་གྱི་ཚར་ཚད་བསླབ་བྱ་དང་བཅས་བཤད་པ་ལ་གཉིས་ཏེ། དྲི་མ་བཞི་བསྲུང་བའི་བསླབ་བྱ་བཤད་པ་དང༌། ཚར་བའི་ཚད་བཞི་བསྟན་པའོ། །དང་པོ་ནི། བོ་ཟགས་ལྟེམས་ལོག་གི་དྲི་མ་བཞི་བསྲུང་ལུགས་ཏེ། བློ་སྦྱོང་གི་དུས་འདིར་བླ་མར་མ་གུས་པའི་བློ་ཤོར་ན་བོ། སེམས་ཅན་ལ་བྱམས་པའི་བློ་སྤངས་ན་ཟགས། དོན་མེད་པའི་སྤྱོད་པ་བཞི་དང་བཅས་པ་མ་སྤངས་ན་ལྟེམས། རོ་མ་མྱོང་བར་སྟན་ལས་འཕགས་ན་ལོག་པའི་དྲི་མར་ཤེས་པར་བྱས་ལ་བསྲུང་དགོས་པས། བོ་ན་དགང་སྟེ། བླ་མའི་ཡོན་ཏན་དང་བཀའ་དྲིན་བསམ་ལ་སངས་རྒྱས་ཀྱི་འདུ་ཤེས་བསྐྱེད། ཟགས་ན་བསྡམས་ཏེ༑ སེམས་ཅན་ལ་བྱམས་སྙིང་རྗེ་ཚད་མེད་སྒོམ། ལྟེམས་ན་སྲང་སྟེ། སྐྱོ་ཤས་དྲག་པོས་ཚེ་འདིའི་བྱ་བ་སྤངས་ནས་དགེ་སྦྱོར་ལ་འབུངས་པ་འདོན། ལོག་ན་བཟུང་སྟེ། གདམས་པ་ཟབ་མོ་ལ་ངེས་ཤེས་བསྐྱེད་ནས་ས་སྡེ་གཟུག་པར་བྱའོ། །གཉིས་པ་ལ། ངོ་བོའི་ཚར་ཚད། རྟགས་ཀྱི་ཚར་ཚད། ཡོན་ཏན་གྱི་ཚར་ཚད། གྲངས་ཀྱི་ཚར་ཚད་དང་བཞི་ལས། དང་པོ་ནི། ཆོས་ཐམས་ཅད་སེམས་སུ་ཤེས་པས་གང་ལའང་བདེན་ཞེན་མེད་ཅིང་སེམས་ཀྱི་ངོ་བོ་སྟོང་ཉིད་བརྗོད་བྲལ་དུ་ཤེས་པའི་དོན་ནང་ནས་འཆར་བའོ། །གཉིས་པ་ལ་རྒྱུ་ལམ་འབྲས་བུའི་རྟགས་གསུམ་ལས། རྒྱུ་སྒྲིབ་པ་དག་པའི་རྟགས་ནི། སྐྱུགས་པ་དང༌། འཆུགས་པ་དང༌། ལུས་ལ་རྣག་ཁྲག་ ཟགས་ཤིང་སེམས་ཅན་འཐོན་པ་དང༌། གོས་གསར་པ་གྱོན་པ་དང༌། ཁྲུས་བྱས་པ། ཆུ་བོ་ལས་བརྒལ་བ་སོགས་འབྱུང་ངོ༌། །ལམ་རླུང་ལྔ་ཟིན་པའི་རྟགས་ནི། གྱེན་རྒྱུ་ས་རླུང་ཟིན་པས་སྨིག་རྒྱུ་ལྟར་དཀར་བྲེང་བྲེང་པ། སྲོག་འཛིན་ཆུ་རླུང་ཟིན་པས་དུ་བ་ལྟར་སྔོ་བུན་བུན་པ། ཐུར་སེལ་རླུང་གི་རླུང་ཟིན་པས་སྲིན་བུ་མེ་ཁྱེར་ལྟར་དམར་ཙིག་ཙིག་པ། མཉམ་གནས་མེ་རླུང་ཟིན་པས་མར་མེ་ལྟར་དམར་ཏལ་ལེ་བ། ཁྱབ་བྱེད་ནམ་མཁའི་རླུང་ཟིན་པས་སྤྲིན་མེད་ཀྱི་ནམ་མཁའ་ལྟར་ཅིར་ཡང་ཐོགས་པ་མེད་པའི་སྣང་བ་འཆར་རོ། །འབྲས་བུ་དག་སྣང་ཤར་བའི་རྟགས་ནི། རྟེན་གསུམ་མཐོང་བ། ཉི་ཟླ་རང་ལ་ཤར་བ། མཁའ་ལ་འཕུར་བ་སོགས་ཕལ་ཆེར་རྨི་ལམ་དུ་འབྱུང་ངོ༌། །གསུམ་པ་ནི། ཡོངས་སུ་གྲགས་པའི་རྟགས་ཚོགས་ལམ་གྱི་ཡོན་ཏན་གསོ་སླ་ཞིང་དགང་སླ་བ་སོགས་འབྱུང་ངོ༌། །བཞི་པ་ནི། ཆུ་ཀླུང་ཆེན་པའི་རྒྱུད་ལས། གསང་བའི་སྙིང་པོ་བླ་མ་སྒྲུབ་པའི་སྔགས། །ས་ཡ་གཅིག་གིས་རིག་འཛིན་གནས་སུ་སྐྱོལ། །ཞེས་པས་བློ་སྦྱོང་གི་སྙིང་པོ་འདི་གྲངས་བྱེ་བ་སྔོན་དུ་བཏང་བའི་ས་ཡ་གཅིག་དང་དུས་ཟླ་བ་དྲུག་གིས་འཐེམས་པར་གསུངས་སོ། །དེ་ལྟར་ཚར་ཚད་བཞི་ལས། ངོ་བོས་ཐེམས་ན་ཚེ་འདིར། རྟགས་ཀྱིས་འཆི་ཁར། གྲངས་ཀྱིས་བར་དོར། ཡོན་ཏན་གྱིས་སྐྱེ་བ་བརྒྱུད་ནས་གྲོལ་ཞེས་གོང་མ་རྣམས་གསུང་བ་ཡིན་ནོ། །ཚོགས་ལམ་བློ་སྦྱོང་གི་ཁྲིད་ཡིག་གོ །གཉིས་པ་ སྦྱོར་ལམ་དཀའ་ཐུབ་ལའང་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་བླང་ཚུལ། རྗེས་བསླབ་བྱ་ཚར་ཚད་དང་བཅས་པའོ། །དང་པོ་ལའང་གསུམ་ལས། རྟེན་བསྐྱེད་པ་ནི། རྒྱས་འབྲིང་བསྡུས་གསུམ་གང་བསྐྱེད་ཀྱང་ལོངས་སྐུ་དག་པའི་མཚན་དཔེ་དང༌། ཆ་ལུགས་ཕུན་སུམ་ཚོགས་པ་འབའ་ཞིག་ཏུ་བསྐྱེད་པར་བྱ་སྟེ། འདིར་བླ་མ་ལོངས་སྐུ་སྒྲུབ་པའི་དུས་ཡིན་པའི་ཕྱིར་རོ། །གཉིས་པ་ཚོགས་བསགས་པ་དང༌། གསུམ་པ་ལམ་བརྟེན་པ་སྔར་དང་འདྲའོ། །གཉིས་པ་དངོས་གཞི་ལ་བཞི་ལས། དང་པོ་གྲགས་པ་སྒྲའི་བརྗོད་ཚུལ་ཡི་གེ་ལམ་ཁྱེར་ནི། དབྱངས་གསལ་ལན་བཞི་བརྗོད་པའི། དང་པོ་གཟུགས་སུ་སྣང་ཚད་རྣམ་པ་ཡི་དམ་གྱི་ལྷ་རིགས་ལྔའི་སྐུ་ལ་ངོ་བོ་བླ་མའི་སྐུ། གཉིས་པ་སྒྲར་གྲག་ཚད་རྣམ་པ་སྔགས་ཀྱི་རང་སྒྲའམ་སྙིང་པོ་འབའ་ཞིག་པ་ལ་ངོ་བོ་བླ་མའི་གསུང༌། གསུམ་པ་ཡིད་ལ་འགྱུ་ཚད་རྣམ་པ་མངོན་ཤེས་དང་ཡེ་ཤེས་ལ་ངོ་བོ་བླ་མའི་ཐུགས། བཞི་པ་དེ་ཐམས་ཅད་ཀྱང་རང་སེམས་ཀྱི་འཆར་ལུགས་ཙམ་དུ་ཤེས་པར་བྱའོ། །གཉིས་པ་དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ནི། སྤྱི་བོ་བདེ་ཆེན་གྱི་འཁོར་ལོའི་དབུས་སུ་བླ་མའི་སྐུའི་ས་བོན་ༀ་ཡིག་དཀར་པོ། ཨ་བྷི་ཥིཉྩ་ༀ་ཞེས་པས་ༀ་འོད་དུ་ཞུ་བ་ལས། རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན་སྤྱན་མ་དང་འཁྲིལ་སྦྱོར་དུ་བཞུགས་པའི་སྦྱོར་མཚམས་ནས་ བྱང་སེམས་ཀྱི་ཆུ་རྒྱུན་དཀར་ནར་གྱིས་བབས་པས་ལུས་གང༌། མགྲིན་པ་ལོངས་སྤྱོད་ཀྱི་འཁོར་ལའི་དབུས་སུ་བླ་མའི་གསུང་གི་ས་བོན་ཨཱཿ དམར་པོ། ཨ་བྷི་ཥིཉྩ་ཨཱཿ ཞེས་པས་ཨཱཿ འོད་དུ་ཞུ་བ་ལས་འོད་དཔག་མེད་དམར་པོ་མཉམ་བཞག་གི་ཕྱག་རྒྱ་ཅན་གོས་དཀར་མོ་དང་འཁྲིལ་སྦྱོར་དུ་བཞུགས་པའི་སྦྱོར་མཚམས་ནས་བྱང་སེམས་ཀྱི་ཆུ་རྒྱུན་དམར་ལྷུག་ལྷུག་འབབ་པ་སོགས་འདྲ། སྙིང་ག་ཆོས་ཀྱི་འཁོར་ལོའི་དབུས་སུ་བླ་མའི་ཐུགས་ཀྱི་ས་བོན་ཧཱུྃ་སྔོན་པོ། ཨ་བྷི་ཥིཉྩ་ཧཱུྃ། ཞེས་པས་ཧཱུྃ་འོད་དུ་ཞུ་བ་ལས་མི་བསྐྱོད་པ་སྔོན་པོ་ས་གནོན་མཉམ་བཞག་ཅན་དབྱིངས་ཕྱུག་མ་དང་འཁྲིལ་བའི་སྦྱོར་མཚམས་ནས་བྱང་སེམས་ཀྱི་ཆུ་རྒྱུན་སྔོ་བྲེང་གིས་བྱུང་བ་སོགས་འདྲ། ལྟེ་བ་སྤྲུལ་པའི་འཁོར་ལོའི་དབུས་སུ་བླ་མའི་ཡོན་ཏན་གྱི་ས་བོན་ཧྲཱིཿ སེར་པོ། ཨ་བྷི་ཥིཉྩ་ཧྲཱིཿ ཞེས་པས་ཧྲཱིཿ འོད་དུ་ཞུ་བ་ལས་རིན་འབྱུང་སེར་པོ་མཆོག་སྦྱིན་གྱི་ཕྱག་རྒྱ་ཅན་མ་མཱ་ཀཱི་དང་འཁྲིལ་བའི་སྦྱོར་མཚམས་ནས་བྱང་སེམས་ཁ་དོག་སྣ་ཚོགས་པ་འབྱུང་བ་སོགས་འདྲ། ལྷ་དེ་དག་སྐུ་ཚོན་གང་ལ་དར་གྱི་ཆས་གོས་ལྔ་དང༌། རིན་པོ་ཆེའི་རྒྱན་བརྒྱད་དེ་ཞི་བའི་རྒྱན་ཆས་བཅུ་གསུམ་གྱིས་བརྒྱན་པ། པད་ཟླ་ལ་རྡོ་རྗེའི་སྐྱིལ་ཀྲུང་གིས་བཞུགས་པའོ། །གསུམ་པ་རྩ་བ་ངོ་སྤྲོད་ཀྱི་ཁྱད་པར་ལ་མཉམ་རྗེས་གཉིས་ལས། མཉམ་བཞག་ལ་ལུས་ཀྱི་གནད་ཆོས་བདུན་སྔར་ལྟར་འདྲ། ངག་གི་གནད་འོག་རླུང་འཐེན། སྟེང་རླུང་དྲག་ཏུ་མནན། དབུགས་ཀྱི་འགྱུ་བ་བཅད། སེམས་ཀྱི་གནད་རང་བཞིན་སྣ་ཚོགས་སུ་སྣང་བ་ལ་རྩལ་སྦྱང་བའི་ཕྱིར། ཕྲ་རགས་ཀྱི་རྟོག་པ་སྣ་ཚོགས་ལ་སྤྱན་ལྔས་བལྟ་བར་བྱ་སྟེ། དེད་དཔོན་རིན་པོ་ཆེའི་ཞལ་ནས། འགྱུ་བའི་འཕྲང་བཙན་ཐབས་སུ་བཅད་པས། རླུང་སེམས་གཉུག་མའི་གནས་འོད་གསལ་དུ་འཆིང་བར་བྱེད། སྤྱན་ལྔའི་ལྟ་སྟངས་ཀྱི་གནད་འདི་ལྟར་རོ། །ཞེས་སོ། །དེ་ཡང་རྟོག་པ་འགྱུ་བ་ཚོར་མི་ཚོར་དེ་ལ༑ རུས་སྦལ་ལྟ་བུའི་སྤྱན་མིག་ལྤགས་འབྱར་ཙམ་དུ་བཙུམ་ནས་བལྟ་སྟེ། རླུང་དང་རྟོག་པའི་འགྲོ་འོང་བཅད་དེ། འཆུན་བདོ་བ་ལ་ཕཊ་ཅེས་ཤིགས་ཀྱིས་བཤིག་པའི་བློ་བྲལ་དུ་ཁྲེས་སེ་བཞག་གོ །རྟོག་པ་ཚོར་ཙམ་ལ་མགྲོན་བུ་ལྟ་བུའི་སྤྱན་བག་ཙམ་བཙུམ་ལ་བལྟ། ཐ་མལ་གྱི་རྟོག་པ་རང་དགར་འགྱུས་ན་ཟླ་ཚེས་ལྟ་བུའི་སྤྱན་གྱིས་ཅུང་ཟད་ཕྱེ་ལ་བལྟ། རྟོག་པ་ཅུང་ཟད་རགས་པ་ལ་མཁས་པ་ལྟ་བུའི་སྤྱན་གྱིས་ཅུང་ཟད་དཔངས་བསྟོད་ལ་བལྟ། ཉོན་མོངས་པའི་རྟོག་པ་གཉེན་པོ་མེད་པར་སྐྱེ་བ་ཤིན་ཏུ་རགས་པར་འགྱུར་བ་ལ་ཟླ་བ་ཉ་གང་བའི་སྤྱན་གྱིས་བར་སྣང་ལ་བགྲད་དེ་བལྟ། དེ་ཐམས་ཅད་འཆུན་བདོ་བ་ལ་བཤིག་ཅིང་རྗེས་བློ་བྲལ་གྱི་ངང་ལ་མ་བཅོས་པར་སལ་ལེ། རྗེན་ནེ། ཁྲེས་སེ། དྭངས་སེ་བཞག །དེ་ཡང་ངོ་བོ་སྟོང་པ། རང་བཞིན་གསལ་བ། མཚན་ཉིད་བློ་བྲལ་དུ་གནས་པའི་དོན་སྔར་བློ་སྦྱོང་དུ་ངོ་སྤྲད་པ་དེ་འདིར་གོམས་པར་བྱས་ལ། དྭངས་མའི་ ཤེས་པ་རྒྱུན་མཐུད་ཅིང་མཉམ་རྗེས་བསྲེས་ནས་ཟུང་འཇུག་མངོན་དུ་འགྱུར་བར་བྱའོ། །རྗེས་ཐོབ་སྤྱོད་ལམ་གྱི་དུས་ཐམས་ཅད་དུ། གཟུགས་རྣམས་སྣང་ཙམ་ནས་བདེན་པར་མ་གྲུབ་པ་སྒྱུ་མ་ལྟ་བུ། སྒྲ་རྣམས་གྲགས་ཙམ་ནས་བདེན་པར་མ་གྲུབ་པ་བྲག་ཆ་ལྟ་བུ། དྲན་རྟོག་རྣམས་རྗེས་མེད་དྲན་སྟོང་ཆུའི་ལྦུ་བ་ལྟར་བསྐྱང་བར་བྱའོ། །བཞི་པ་རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་ནི། ༀ་ཨཱཿ ཧྲཱིཿ གུ་རུ་སིདྡྷི་ཕ་ལ་ཧཱུྃ། ཞེས་དྲོད་ཀྱི་ཡེ་ཤེས་བཙན་ཐབས་སུ་སྐྱེ་བར་བྱེད་པ་སྒྲུབ་པ་གནད་ཀྱི་སྙིང་པོ་འབྲུ་བཅུ་པ་འདི་སྔར་ལྟར་གསོལ་བ་མས་གདབ་དང༌། བྱིན་རླབས་ཡས་ཞུའི་ཚུལ་གྱིས་བགྲང་བར་བྱ་ཞིང༌། ཐུན་བསྡུ་བའི་ཚེ། དཔལ་ལྡན་བླ་མ་ལོངས་སྐུའི་བདག་ཉིད་ཅན་འགྲུབ་པར་གྱུར་ཅིག །ཅེས་བརྗོད་དོ། །གསུམ་པ་ལ་གཉིས་ལས། བསླབ་བྱ་བོ་ཟགས་ལྟེམས་ལོག་གི་ལམ་གྱི་དྲི་མ་བསྲུང་ལུགས་ནི། དཀའ་ཐུབ་པས་གཞན་དོན་སྔས་ན་བོ་བའི་དྲི་མ་ཡིན་པས་དེའི་བར་དུ་ཆོས་མི་འཆད། སྲུང་བ་དང་བྱིན་རླབས་མི་བྱའོ། །བསྙེན་བཀུར་ཟོས་ན་ཟགས་པས་རང་རྫས་གཞན་ལ་མི་སྟེར། གཞན་གྱི་རྫས་རང་གིས་མི་སྤྱོད། བསྲུང་སྡོམ་ལྷོད་ན་ལྟེམས་པས་སྐྲ་སེན་མི་འབྲེག །ཁྲུས་མི་བྱ། གོས་གདན་མི་སྤྲུག །མལ་མི་སྤོ། ངག་གི་སྨྲ་བ་བཅད་དོ། །ཆོས་བརྒྱད་དྲན་ན་ལོག་པས་ཚེ་འདིའི་སྙན་གྲགས་རྒྱབ་ཏུ་དོར་བར་བྱའོ། །གཉིས་པ་ཚར་ཚད་ལ་བཞི་ལས། ངོ་བོ་ཚར་ན་སྔར་བློ་སྦྱོང་དུ་སེམས་ངོ་བོ་སྟོང་པར་ཤེས་པའི་སྟེང་དུ་འདིར་རང་བཞིན་གསལ་བའི་དེར་འཛིན་དང་བྲལ་བས། དྲན་རྟོག་ཅི་སྐྱེས་ལམ་དུ་ཁྱེར་ཤེས་པའོ། །རྟགས་ཀྱི་ཚར་ཚད་སྔར་གྱི་རྒྱུ་ལམ་འབྲས་བུའི་རྟགས་རྣམས་འདིར་ཉམས་སྣང་གི་ཡུལ་མངོན་དུ་འཆར་རོ། །ཡོན་ཏན་གྱི་ཚར་ཚད་ཕྱི་ནང་གི་སྲོག་ཆགས་ཀྱིས་མི་འཚེ་བ་སོགས་སོ། །གྲངས་ཀྱི་ཚར་ཚད་བྱེ་བ་ཕྲག་ལྔ་དང་དུས་ཟླ་བ་གསུམ་མོ། །སྦྱོར་ལམ་དཀའ་ཐུབ་ཀྱི་ཁྲིད་ཡིག་གོ །གསུམ་པ་མཐོང་ལམ་སྤྱོད་པ་རྗེས་ཀྱི་ཁྲིད་ལ་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་བླང་ཚུལ། རྗེས་བསླབ་བྱ་ཚར་ཚད་དང་བཅས་པའོ། །དང་པོ་ལ་གསུམ་ལས༑ རྟེན་བསྐྱེད་པ་ནི། རྒྱས་འབྲིང་བསྡུས་གསུམ་གང་བསྐྱེད་ཀྱང་འདིར་བླ་མ་སྣང་སྟོང་དབྱེར་མེད་རྡོ་རྗེའི་སྐུར་སྒྲུབ་པའི་སྐབས་ཡིན་པས། བླ་མ་སྐུ་གཅེར་བུ་ལ་རུས་པའི་རྒྱན་དང་ལྡན་ཞིང་སྐུ་མདོག་མཐིང་ག་འབའ་ཞིག་ཏུ་སྒོམ་པ་ཡིན་ནོ། །གཉིས་པ་ཚོགས་བསགས་པ་དང༌། གསུམ་པ་ལམ་བརྟེན་པ་སྔར་དང་འདྲའོ། །གཉིས་པ་དངོས་གཞི་ལ་བཞི་ལས། དང་པོ་གྲགས་པ་སྒྲའི་བརྗོད་ཚུལ་ཡི་གེ་ལམ་ཁྱེར་ནི། དབྱངས་གསལ་ལན་བཞི་བརྗོད་པའི། དང་པོ་གཟུགས་སུ་སྣང་ཚད་ངོ་བོ་བླ་མ་ལ་རྣམ་པ་ཡི་དམ་གྱི་ལྷ་རིགས་ལྔའི་སྐུར་གསལ་བ་དེ་ཡང་དང་པོ་སྐྱེ་བ་མེད། བར་དུ་གནས་པ་མེད། ཐ་མར་འགག་པ་མེད། བདེན་པའི་དངོས་པོར་གྲུབ་པ་མེད་ དེ་གཟུགས་སྣང་སྟོང་དུ་ཤེས་པར་བྱའོ། །གཉིས་པ་སྒྲར་གྲགས་ཚད་ངོ་བོ་བླ་མ་ལ་རྣམ་པ་ཡི་དམ་རིགས་ལྔའི་གསུང་སྔགས་ཀྱི་རང་སྒྲར་གྲགས་པ་དེའང༌། དང་པོ་སྐྱེ་བ་མེད། བར་དུ་གནས་པ་མེད། ཐ་མར་འགག་པ་མེད། བདེན་པའི་དངོས་པོར་གྲུབ་པ་མེད་དེ་སྒྲ་གྲགས་སྟོང་དུ་ཤེས་པར་བྱ། གསུམ་པ་སེམས་ཀྱི་དྲན་རྟོག་འགྱུ་ཚད་ངོ་བོ་བླ་མ་ལ་རྣམ་པ་ཡི་དམ་རིགས་ལྔའི་ཐུགས་ཡེ་ཤེས་སུ་གསལ་བ་དེའང༌། དང་པོར་སྐྱེ་མེད། བར་དུ་གནས་པ་མེད། ཐ་མར་འགག་མེད། བདེན་དངོས་སུ་གྲུབ་པ་མེད་དེ་ཡིད་དྲན་སྟོང་དུ་ཤེས་པར་བྱ། བཞི་པ་སྣང་གྲག་འགྱུ་གསུམ་ཐམས་ཅད་ཀྱང་རང་གི་སེམས་ངོ་བོ་བླ་མ་ལ་རྣམ་པ་ཡི་དམ་རིགས་ལྔའི་སྐུ་གསུམ་ཐུགས་སུ་གནས་པ་དེའང༌། དང་པོར་སྐྱེ་མེད། བར་དུ་གནས་མེད། ཐ་མར་འགག་མེད་བདེན་དངོས་སུ་གྲུབ་པ་མེད་དེ། སེམས་བདེ་སྟོང་གཉིས་མེད་དུ་ཤེས་པར་བྱའོ། །གཉིས་པ་དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ནི། རྩ་འཁོར་ལོ་བཞིའི་དབུས་སུ་བླ་མའི་རྡོ་རྗེ་བཞིའི་ས་བོན་ༀ་ཨཱཿ ཧཱུྃ་ཧྲཱིཿ གནས་པ་རྣམས་ཨ་བྷི་ཥིཉྩ་ༀ་སོགས་སྔགས་བཞིས་རིམ་པར་རིགས་བཞིའི་བདེ་བར་གཤེགས་པ་ཡབ་ཡུམ་གྱི་སྐུར་བཞུགས་པར་གསལ་བཏབ་ལ། སྐུ་བཞི་ཀའང་སྐྱེ་མེད་གནས་མེད་འགག་མེད་དངོས་མེད་དོ། །ཞེས་བརྗོད་པས་མཚན་ཉིད་བཞི་ལྡན་གྱི་རྒྱས་གདབ་བོ། །གསུམ་པ་རྩ་བ་ངོ་སྤྲོད་ཀྱི་ ཁྱད་པར་ལ་གཉིས་ལས། མཉམ་རྗེས་རྩ་བའི་ལམ་ཁྱེར་ནི། ངོ་བོ་སྟོང་པ་རང་བཞིན་གསལ་བ། མཚན་ཉིད་གཉིས་སུ་མེད་པར་གྲོལ་བར་བྱ་བའི་ཕྱིར་ལྟ་སྟངས་ལྔ་བསྒྱུར་བར་བྱ་སྟེ། འཁོར་བ་དང་ངན་སོང་དུ་འཁྱམས་ཤིང་ལྷུང་བའི་དོགས་པ་གཅོད་པའི་ཕྱིར་ཉན་ཐོས་ཞི་བའི་ལྟ་སྟངས་ཐུར་དུ། མཐོ་རིས་དང་ཐར་པ་ཐོབ་འདོད་ཀྱི་རེ་བ་གཅོད་པའི་ཕྱིར་མུ་སྟེགས་ཚངས་པའི་ལྟ་སྟངས་གྱེན་དུ། ཞེ་སྡང་གི་རྟོག་པ་གཅོད་པའི་ཕྱིར་སེམས་དཔའི་ལྟ་སྟངས་གཡས་སུ། འདོད་ཆགས་ཀྱི་རྟོག་པ་གཅད་པའི་ཕྱིར་སེམས་མའི་ལྟ་སྟངས་གཡོན་དུ། བསྒོམ་བྱ་སྒོམ་བྱེད་ཀྱི་རྟོག་པ་ཅན་བསམ་གཏན་འཆིང་བ་གཅོད་པའི་ཕྱིར་བདེ་བར་གཤེགས་པའི་ལྟ་སྟངས་ཐད་ཀར་བསྒྱུར་བར་བྱ་སྟེ། བྲམ་ཟེ་གསེར་གྱི་སྐ་རགས་ཅན་གྱིས། ཤེས་རབ་ཀྱི་གཅོད་ཐབས་ལམ་དུ་ཁྱེར་བས། གཉིས་མེད་ལམ་དུ་སློང་བར་བྱེད། དེས་ན་ཟུང་འཇུག་རྒྱུད་ལ་སྐྱེ་བར་བྱེད་པའི་གནད་ཡིན། ཞེས་སོ། །དེ་དག་གི་དུས་ཐམས་ཅད་དུ་ལུས་ངག་གི་འཁྲུལ་འཁོར་དང་སེམས་སྒྲིམ་གློད་ཀུན་དཀའ་ཐུབ་དང་མཚུངས་མོད། འདིར་དཀའ་ཐུབ་ཀྱི་རྗེས་ལ་སེམས་ཀྱི་གཤིས་རྩ་བའི་དོན་ཇི་ལྟར་འབྱོངས་པ་དེ་ལ་སྤྱོད་ལམ་བཞིར་དྲན་པས་བཟུང་ནས་ཉམས་ཡེངས་མེད་དུ་བསྐྱང་བ་ཡིན་ནོ། །རྗེས་སྤྱོད་ལམ་གྱི་དུས་ཐམས་ཅད་དུ་གཟུགས་སུ་སྣང་ཚད་ཡང་དག་པར་མ་གྲུབ་སྟེ། རང་བཞིན་གྱིས་སྟོང་ཞིང༌། དེ་ཡང་གནས་སྐབས་རྟེན་འབྲེལ་གྱི་ སྣང་བ་མ་འགགས་པར་གཟུགས་སུ་སྣང་ལ། སྣང་ཙམ་ཉིད་ན་ངོ་བོ་སྟོང་པ་ཉིད་ལས་མ་གཡོས་པར། གཟུགས་སྟོང་པ་ལས་གཞན་མ་ཡིན་ཞིང༌། ངོ་བོ་སྟོང་པ་ཉིད་ལས་མ་གཡོས་བཞིན་དུ་རྩལ་གཟུགས་སུ་མ་འགགས་པར་སྣང་བས། སྟོང་པ་ཉིད་ལས་གཟུགས་གཞན་མ་ཡིན་ཏེ། དེ་ལྟ་བུའི་མཚན་ཉིད་བཞི་ལྡན་དུ་འཆར་བས་ན། རྣམ་མཁྱེན་གྱི་བར་ཆོས་ཐམས་ཅད་ལ་དེ་བཞིན་དུ་འགྲེ་ཤེས་པར་བྱའོ། །བཞི་པ་རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་ནི། ༀ་ཨཱཿ ཧཱུྃ་ཧྲཱིཿ གུ་རུ་ཛི་ན་མི་ཏྲ་ཧཱུྃ། ཞེས་རྣམ་པར་མི་རྟོག་པའི་ཡེ་ཤེས་གཅིག་ཅར་དུ་འཆར་བར་བྱེད་པ་རྟོག་པ་རྗེས་ཀྱི་སྙིང་པོ་འབྲུ་བཅུ་པ་འདི་སྔར་ལྟར་གསོལ་བ་མས་གདབ་དང༌། བྱིན་རླབས་ཡས་ཞུའི་ཚུལ་གྱིས་བགྲང་ཞིང༌། ཐུན་གཏོང་བའི་ཚེ། དཔལ་ལྡན་བླ་མ་སྣང་སྟོང་དབྱེར་མེད་རྡོ་རྗེའི་སྐུ་གྲུབ་པར་གྱུར་ཅིག །ཅེས་བརྗོད་དོ། །གསུམ་པ་ལ་གཉིས་ལས། བསླབ་བྱ་ལམ་གྱི་དྲི་མ་བསྲུང་ལུགས་ནི། རྗེས་ཀྱི་དུས་འདིར་གཞི་ལ་གཡའ་ཆགས་ན་གཤིས་ཐོག་ཏུ་བོ་བས་སོ་མའི་མལ་རྗེས། གཉེན་པོའི་བྱ་ར་མ་འགྱེལ་ན་ཉམས་ཐོག་ཏུ་ཟགས་པས་ཉམས་མྱོང་གཤིས་ཐོག་ཏུ་གཞིག །རང་ལྟ་ལ་མཆོག་ཏུ་ཞེན་ན་གོ་ཐོག་ཏུ་ལྟེམས་པས་ཡང་དག་པའི་དོན་ལ་འདི་ཡིན་དུ་མི་བཟུང༌། གྲུབ་མཐའི་འདོད་པ་མ་ཞིག་ན་ཚིག་ཐོག་ཏུ་ལོག་པས་གང་དུའང་ཁས་མི་བླང་ངོ༌། །གཉིས་པ་ ཚར་ཚད་ལ་བཞི་ལས། ངོ་བོས་ཚར་ན་གཉིས་མེད་བློ་བྲལ་རང་གི་མཚན་ཉིད་དུ་རྟོགས། རྟགས་ཀྱིས་ཚར་ན་རྒྱུ་ལམ་འབྲས་བུའི་རྟགས་རྣམས་འདིར་མངོན་སུམ་དུ་འཆར། ཡོན་ཏན་གྱིས་ཚར་ན་སངས་རྒྱས་བརྒྱའི་ཞལ་མཐོང་ཞིང་ཁམས་བརྒྱ་གཡོ་བའི་ནུས་པ་སོགས་འབྱུང༌། གྲངས་ཀྱིས་ཚར་ན་བྱེ་བ་ཕྲག་ཕྱེད་དང་གསུམ། དུས་ཟླ་བ་ཕྱེད་དང་གཉིས་སོ། །མཐོང་ལམ་རྗེས་ཀྱི་ཁྲིད་ཡིག་གོ །བཞི་པ་སྒོམ་ལམ་སྤྱོད་པ་རོ་སྙོམས་ཀྱི་ཁྲིད་ལ་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་བླང་ལུགས། རྗེས་བསླབ་བྱ་ཚར་ཚད་དང་བཅས་པའོ། །དང་པོ་ལ་གསུམ་ལས། རྟེན་བསྐྱེད་པ་ནི། འདིར་བླ་མ་བདེ་བ་ཆེན་པོ་མཉམ་པ་ཉིད་ཀྱི་སྐུར་སྒྲུབ་པའི་དུས་ཡིན་པས་རྟེན་རྒྱས་བསྡུས་གང་ལྟར་ཡང་སྐུ་ཆ་ལུགས་ལ་ངེས་པ་མེད་པ་གང་མོས་སུ་བསྒོམ་པར་བྱ། གཉིས་པ་ཚོགས་བསགས་པ་དང༌། གསུམ་པ་ལམ་བརྟེན་པ་སྔར་དང་འདྲའོ། །གཉིས་པ་དངོས་གཞི་ལ་བཞི་ལས། དང་པོ་གྲག་པ་སྒྲའི་བརྗོད་ཚུལ་ཡི་གེ་ལམ་ཁྱེར་ནི། དབྱངས་གསལ་གྱི་ཡི་གེ་རྣམས་མས་ནས་ལུགས་ལྡོག་ཏུ་ལན་བཞིར་བརྗོད་པའི། དང་པོ་གཟུགས་སུ་སྣང་ཚད་བླ་མ་ཡི་དམ་གྱི་སྐུ་དང་ཐ་མལ་གྱི་ལུས་སུ་སྣང་བ་ལ་བཟང་ངན་གྱི་ཁྱད་པར་ཅུང་ཟད་ཀྱང་མེད་དེ་སྣང་སྟོང༌། གཉིས་པ་སྒྲར་གྲག་ཚད་བླ་མ་ཡི་དམ་གྱི་གསུང་དང་སེམས་ཅན་གྱི་སྐད་དུ་སྣང་བ་ལ་བཟང་ངན་མེད་དེ་གྲག་སྟོང༌། གསུམ་པ་དྲན་རྟོག་ཐམས་ཅད་བླ་མ་ཡི་དམ་གྱི་ཐུགས་དང་སེམས་ཅན་གྱི་ཡིད་དུ་སྣང་བར་བཟང་ངན་མེད་དེ་བདེ་སྟོང་གཉིས་མེད། བཞི་པ་དེ་ཐམས་ཅད་ཀྱང་རང་སེམས་སྐྱེ་མེད་ལ་བཟང་ངན་དང་གོ་རིམ་སྤང་བླང་མེད་དེ་གཉིས་མེད་དུ་འཛིན་པ་ཙམ་དུའང་མི་བྱ་བར་ཐམས་ཅད་མཉམ་པ་ཉིད་དུ་རྒྱས་གདབ་བོ། །གཉིས་པ་དབང་བཞི་དམིགས་པའི་ཁྱད་པར་འཁོར་ལོ་བཞིའི་སྒོམ་ཐབས་ནི། སྙིང་ལྟེ་མགྲིན་དཔྲལ་གྱི་འཁོར་ལོ་བཞིར་ཧཱུྃ་ཧྲཱིཿ ཨཱཿ ༀ་སྒོམ་པ་རྣམས། ཨ་བྷི་ཥིཉྩ་ཧཱུྃ་སོགས་ཀྱིས་འཁོར་ལོ་བཞིར་བདེ་བར་གཤེགས་པ་བཞི་གོ་རིམ་མ་ངེས་པར་གསལ་གདབ་ཅིང༌། དབང་ཡང་གོ་རིམ་མ་ངེས་པར་བླང་བར་བྱའོ། །གསུམ་པ་རྩ་བ་ངོ་སྤྲོད་ཀྱི་ཁྱད་པར་ལ་གསུམ་ལས། རྩ་བ་དོན་གྱི་ལམ་ཁྱེར་དུ། སྔར་གྱི་མཚན་ཉིད་གཉིས་མེད་བློ་བྲལ་གྱི་རྟོགས་པ་ཕྱིན་ཅི་མ་ལོག་པ་དེ་སྤྱོད་ལམ་གྱི་དུས་དང་བདེ་སྡུག་གི་རྐྱེན་གང་ལའང་ཁྱད་མེད་དུ་བསྲེ་ཞིང་ཆུ་བོ་རྒྱུན་གྱི་རྣལ་འབྱོར་དུ་བྱེད་པ་སྟེ། བདག་ཉིད་ཆེན་པོ་ཀ་མ་ལ་ཤཱི་བཛྲ་གྱི་ཞལ་ནས། ལམ་ལ་གང་ཕན་གྲོགས་སུ་བསྟེན་པས་ཨ་འཐས་ཀྱི་དངོས་འཛིན་འཇིག་པར་བྱེད། གྲལ་རིམ་འགྱེལ་བ་རྒྱ་ཡན་གྱི་གནད་ཡིན། ཞེས་བསྟན་ཏོ། །དེ་ཡང་སྔར་གྱི་རྟེན་འབྲེལ་གྱི་བརྡ་སྤྱན་ལྟ་སྟངས་ལྔ་པོ་དེ་དག་སྤྱོད་ལམ་བཞི་དང་བསྲེས་ནས་ཉམས་སུ་ལེན་པ་སྟེ། དེས་ན་རྩ་བའི་སྤྱོད་ལམ་བཞི་ལས་ཡན་ལག་གི་སྤྱོད་ལམ་ཉི་ཤུར་ ཕྱེ་ལ་ཉམས་སུ་བླང་ངོ༌། །དེ་ཡང་འདུག་པའི་སྤྱོད་ལམ་ལྔ་ནི། རྟེན་འབྲེལ་དག་པ་རྡོ་རྗེ་སྐྱིལ་ཀྲུང༌། ཕྱེད་སྐྱིལ། ཙོག་པུ། སྙེས་པ། རྒྱལ་པོ་རོལ་པའི་འདུག་སྟངས་སོ། །ཉལ་བ་ལྔ་ནི། གཡས་ཉལ། གཡོན་ཉལ། གན་རྐྱལ༑ ཁ་སྦུབས། མགོ་བསྟུམ། བརླ་སྒྲིམ་མོ། །ལངས་པ་ལྔ་ནི། ལངས་ཀ །ཕྱེད་ལངས། ལངས་པ། གོས་ཚགས་བྱེད་པ། གོམས་པ་འདོར་བའོ། །འགྲོ་བ་ལྔ་ནི། འགྲོ་བ། འགྲོ་འཕྲོ་ལ་འཆམས་པ། རྒྱུག་པ། རྒྱུག་འཕྲོ་ལ་འཆམས་པ། ངལ་བསོ་བའོ། །སྡུད་པ་ལས། འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན། །ཞེས་པས། བྱེ་བྲག་གི་སྤྱོད་ལམ་ཉི་ཤུ་པོ་རེ་རེ་ལའང་ལྟ་སྟངས་ལྔ་ལྔ། དེ་རེ་རེ་ལའང་སྤྱན་ལྔ་ལྔ་སྦྱར་ནས་མཉམ་བཞག་གི་དུས་སུ་བལྟས་ནས་རྗེས་གློད་པ་སྟེ། ཏིང་ངེ་འཛིན་ལྔ་བརྒྱ་ཕྲག་གཅིག་ཏུ་སྒྲིམ་གྱིན་གློད་པ་ནི་ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ཞེས་བྱའོ། །གང་ལྟར་སྒོམ་ཡང༌། འོག་རླུང་འཐེན། སྟེང་རླུང་མནན། རླུང་འགྱུ་བ་བཅད་དེ། ཆུན་བདོ་ལ་ཤིགས་ཀྱིས་བཤིག་ཅིང་རྗེས་སེམས་གང་དུའང་མ་བཅོས་པར་ལྷོད་དེ་ཁྲེས་སེ། རྟོག་མེད་རང་དྭངས་སུ་རྗེན་ནེ་བཞག་གོ །ལར་སྤྱོད་ལམ་གྱི་དུས་ཐམས་ཅད་དུ་རྩ་བའི་ཉམས་མྱོང་དང་མ་བྲལ་བར་བྱ་ཞིང༌། བདེ་སྡུག་གི་རྐྱེན་གང་ལ་རང་རིག་པ་ཐོག་རྡུག་མེད་པ་ཆམ་ཆམ་པ་ཡེད་ཡེད་པ། བུན་ལོང་ལོང་བ་ལམ་དུ་ཁྱེར་ཞིང་བསྐྱང་བར་བྱ་སྟེ། བྲམ་ཟེ་ཡེ་ཤེས་སྙིང་པའི་ ཞལ་ནས། རིག་པ་ལ་སེང་ཡེར་གྱིས་ཧྲིག་བཏོན་པས་རྣོ་ངར་གྱི་རྩི་ཆགས་པར་བྱེད། བྱིང་རྨུགས་ཀྱི་གདན་འཇིག་པའི་གནད་ཡིན་ནོ། །ཞེས་སོ། །རྗེས་སྤྱོད་ལམ་གྱི་དུས་ཐམས་ཅད་དུ་ཕ་རོལ་ཏུ་ཕྱིན་པ་རྣམ་དག་ཆེན་པའི་འགྲེས་རྐང་དང་བསྟུན་ཞིང་མ་ཡེངས་པར་བསྐྱང་སྟེ། འདི་ལྟར། ཆོས་ཐམས་ཅད་ཀྱི་རང་བཞིན་རྣམ་པར་དག་པས། གཟུགས་རྣམ་པར་དག་པ། གཟུགས་རྣམ་པར་དག་པས། བདག་རྣམ་པར་དག་པ༑ དེ་ལྟར་གཟུགས་རྣམ་པར་དག་པ་དང༌། བདག་རྣམ་པར་དག་པ་དང༌། ཆོས་ཐམས་ཅད་རང་བཞིན་གྱིས་རྣམ་པར་དག་པ་འདི་ལ་གཉིས་སུ་མེད་དེ། གཉིས་སུ་བྱར་མེད་དེ་སོ་སོ་མ་ཡིན་ཐ་མི་དད་དོ། །ཞེས་པ་གྲགས་པའི་སྒྲ་དང༌། དྲན་པའི་སེམས་ལའང་མཐུན་པར་སྦྱར་རོ། །བཞི་པ་རྗེས་གནང་ལུང་གི་ཁྱད་པར་བླ་མའི་ཐུགས་དམ་བསྐུལ་ལུགས་ནི། ༀ་ཨཱཿ ཧྲཱིཿ གུ་རུ་པྲ་མ་ཎ་ཡེ་ཧཱུྃ། ཞེས་རོ་སྙོམས་ཆེན་པོའི་རྟོགས་པ་རྒྱུད་ལ་སྐྱེ་བར་བྱེད་པའི་འབྲུ་བཅུ་པ་འདི་སྔར་ལྟར་གསོལ་བ་མས་གདབ་དང༌། བྱིན་རླབས་ཡས་ཞུའི་ཚུལ་དུ་བགྲང་ཞིང༌། ཐུན་བསྡུ་བ་ན། དཔལ་ལྡན་བླ་མ་བདེ་བ་ཆེན་པོ་མཉམ་པ་ཉིད་ཀྱི་སྐུ་འགྲུབ་པར་གྱུར་ཅིག །ཅེས་བརྗོད་དོ། ། གསུམ་པ་ལ་གཉིས་ལས། བསླབ་བྱ་དྲི་མ་བཞི་བསྲུང་ལུགས་ནི། རོ་སྙོམས་པས་དུས་འདིར། བདག་འཛིན་གྱི་ཁ་མ་ཐེངས་ན་རང་ཐོག་ཏུ་བོ་བས་ངས་བྱས་ཀྱི་ངོ་སོ་མི་བྱ། འཁོན་འཛིན་རྒྱུད་ལ་བརྟེན་ན་གཞན་ཐོག་ཏུ་ ཟགས་པས་གཞན་གྱིས་བརྙས་པ་ལ་ཀོ་ལོང་མི་བྱ། གཉིས་སྣང་གི་མཐའ་མ་ཁྲོལ་ན་གོ་ཐོག་ཏུ་ལྟེམས་པས། བདག་གཞན་གཉིས་སུ་མི་བཟུང༌། ཟགས་པའི་འཕན་ལངས་ན་འཁྲུལ་ཐོག་ཏུ་ལོག་པས་ཆགས་སྡང་གི་རྗེས་མི་གཅད་དོ། །གཉིས་པ་ཚར་ཚད་ལ་བཞི་ལས། ངོ་བོས་ཚར་ན་ཡུལ་ལ་སྤང་བླང་མེད་ཅིང་སྤྱོད་ལམ་ལ་ཁྱད་པར་མེད་པར་མཚན་ཉིད་བློ་བྲལ་གྱི་རྟོགས་པ་ཆུ་བོ་རྒྱུན་གྱི་རྣམ་ཐར་དུ་འཆར་རོ། །རྟགས་ཀྱིས་ཚར་ན་རྒྱུ་ལམ་འབྲས་བུའི་རྟགས་རྣམས་སྔར་ལས་འཕེལ་ཞིང་གསལ་བརྟན་དུ་འགྱུར་རོ། །ཡོན་ཏན་གྱིས་ཚར་ན་སྔར་མཐོང་ལམ་གྱི་ཡོན་ཏན་ལས་མང་པོར་འཕེལ་ལོ། །གྲངས་ཀྱིས་ཚར་ན་འབུམ་ཚོ་ཕྱེད་དང་བཅུ་གསུམ། དུས་ཟླ་བ་གཅིག་གོ །སྒོམ་ལམ་རོ་སྙོམས་ཀྱི་ཁྲིད་ཡིག་གོ །ལྔ་པ་མཐར་ལམ་བྱ་བྲལ་གྱི་ཁྲིད་ལ་གསུམ་སྟེ། སྦྱོར་བ་སྐྱབས་འགྲོ་སེམས་བསྐྱེད། དངོས་གཞི་ཉམས་སུ་བླང་ལུགས། རྗེས་བསླབ་བྱ་ཚར་ཚད་དང་བཅས་པའོ། །དང་པོ་ལ་གསུམ་ལས། རྟེན་བསྐྱེད་པ་ནི། རྒྱས་བསྡུས་གང་ལྟར་བསྒོམས་ཀྱང་འདིར་བླ་མ་སྤྲུལ་པའི་སྐུར་སྒྲུབ་པའི་དུས་ཡིན་པས་མཆོག་གི་སྤྲུལ་སྐུ་དགེ་སློང་གི་ཆ་བྱད་ཅན་ནོ། །གཉིས་པ་ཚོགས་བསགས་དང༌། གསུམ་པ་ལམ་བརྟེན་པ་སྔར་དང་འདྲའོ། །གཉིས་པ་དངོས་གཞི་ལ་བཞི་ལས། དང་པོ་གྲག་པ་སྒྲའི་བརྗོད་ཚུལ་ཡི་གེ་ལམ་ཁྱེར་ནི། ཨཱཀྵ་ལྔ་བཅུ་པོ་མས་ནས་ཨ་ཡིག་འབའ་ཞིག་ཏུ་ལན་བཞི་བརྗོད་པའི། དང་པོ་གཟུགས་ སུ་སྣང་ཚད་རང་སྣང་ལ་སྣང་བ་མེད་པ་ནམ་མཁའ་ལ་སྤྲིན་དེངས་པ་ལྟར་ཐིམ་པ་ལས་གཞན་སྣང་ལ་སངས་རྒྱས་སྤྲུལ་པའི་སྐུའི་སྐུར་སྣང་བས་ཕྲིན་ལས་རྒྱུན་མི་ཆད་པར་གྱུར། གཉིས་པ་སྒྲར་གྲགས་ཚད་རང་སྣང་ལ་སྣང་བ་མེད་པ་ནམ་མཁའ༴ གཞན་སྣང་ལ་སངས་རྒྱས་སྤྲུལ་པའི་སྐུའི་གསུང་དུ་སྣང་བས་ཕྲིན་ལས་རྒྱུན་མི་ཆད་པར་གྱུར། གསུམ་པ་འགྱུ་བྱེད་དྲན་རྟོག་ཐམས་ཅད་རང་སྣང་ལ་སྣང་བ༴ གཞན་སྣང་ལ་སངས་རྒྱས་སྤྲུལ་པའི་སྐུའི་ཐུགས༴ བཞི་པ་དེ་ཐམས་ཅད་རང་སེམས་སུ་ཐག་བཅད་ཅིང༌། དེའང་རང་སྣང་ལ་སྣང་བ་མེད་པར་ནམ་མཁའ་ལ་སྤྲིན་དེངས་པའམ། རྒྱ་མཚོ་ལ་ཁྱགས་པ་ཞུ་བ་ལྟར་ཆོས་ཉིད་ལ་ཡང་དག་ཏུ་འཛིན་པའི་རྟོག་པའང་བློ་བྲལ་གྱི་དབྱིངས་སུ་ཐིམ་པ་ལས་གཞན་སྣང་ལ་སྤྲུལ་པའི་སྐུའི་ཌཱ་ཀི་མ་བཞིར་སྣང་བ་འགྲོ་དོན་ལ་བསྐུལ་བས་ཕྲིན་ལས་རྒྱུན་མི་ཆད་པར་མཛད་པར་བསམ་མོ། །གཉིས་པ་དབང་བཞི་དམིགས་པའི་ཁྱད་པར་འཁོར་ལོའི་བསྒོམ་ཐབས་ནི། བོ་དྷི་ཙིཏྟ་ༀ། ཞེས་པས་བདེ་ཆེན་འཁོར་ལོའི་རྣམ་སྣང་ཡབ་ཡུམ་དུ་གསལ་བའི་ཡབ་བྱང་ཆུབ་སེམས་ཀྱི་རང་བཞིན་དུ་ཞུ་ནས་ཡུམ་ལ་ཐིམ་པས། ཡུམ་ཉིད་གཞན་དོན་གྱི་ཕྲིན་ལས་ སྒྲུབ་ཕྱིར་སངས་རྒྱས་མཁའ་འགྲོ་དཀར་མོ་འཁོར་ལོ་དང་ཐོད་ཁྲག་བསྣམས་པར་གྱུར་ཏེ་གཞན་སྣང་ཟིལ་གྱིས་གནོན་པར་གྱུར། བོ་དྷི་ཙིཏྟ་ཨཱཿ ས་ལོངས་སྤྱོད་འཁོར་ལའི་འོད་དཔག་མེད་བྱང་སེམས་སུ་ཞུ་ནས་ཡུམ་ལ་ཐིམ་པས་ཡུམ་ཉིད་ཕྲིན་ལས་སྒྲུབ་ཕྱིར་པདྨ་མཁའ་འགྲོ་དམར་མོ་པདྨ་དང་ཐོད་ཁྲག་བསྣམས་པར་གྱུར་ཏེ། གཞན་སྣང་བདག་གི་དབང་དུ་སྡུད། བོ་དྷི་ཙིཏྟ་ཧཱུྃ་གིས་ཆོས་ཀྱི་འཁོར་ལའི་མི་བསྐྱོད་པ་བྱང་སེམས་སུ་ཞུ་ནས་ཡུམ་ལ་ཐིམ་པས་ཡུམ་ཉིད་ཕྲིན་ལས་སྒྲུབ་ཕྱིར་རྡོ་རྗེ་མཁའ་འགྲོ་སྔོན་མོ་རྡོ་རྗེ་དང་ཐོད་ཁྲག་བསྣམས་པར་གྱུར་ཏེ་དབང་དུ་འདུས་པའི་གདུལ་བྱ་རྣམས་བདག་ལ་དད་ཅིང་འདུན་པར་བྱས། བོ་དྷི་ཙིཏྟ་ཧྲཱིཿ ས་སྤྲུལ་པའི་འཁོར་ལའི་རིན་འབྱུང་བྱང་སེམས་སུ་ཞུ་ནས་ཡུམ་ལ་ཐིམ་པས་ཡུམ་ཉིད་ཕྲིན་ལས་བསྒྲུབ་ཕྱིར་རིན་ཆེན་མཁའ་འགྲོ་སེར་མོ་རིན་པོ་ཆེ་དང་ཐོད་ཁྲག་བསྣམས་པར་གྱུར་ཏེ་དད་པར་གྱུར་པའི་གདུལ་བྱ་རྣམས་དམ་པའི་ཆོས་ཀྱིས་རང་རང་གི་བསམ་པ་ཚིམ་པར་བྱེད་པ་སྟེ། ཌཱ་ཀི་བཞི་ཀའང་ཞལ་གཅིག་ཕྱག་གཉིས་པ་གཡས་རང་རྟགས་ནམ་མཁར་འཕྱར་སྟབས་དང༌། གཡོན་ཐོད་ཁྲག་ཐུགས་ཀར་འཛིན་པ། རུས་པའི་ཕྱག་རྒྱ་ལྔས་བརྒྱན་ཅིང༌། ཞབས་གཡས་བསྐུམ་གཡོན་བརྐྱང་བའི་གར་སྟབས་སོ། །གསུམ་པ་རྩ་བ་ངོ་སྤྲོད་ཀྱི་ཁྱད་པར་ལ་གཉིས་ལས། རྩ་བ་དོན་གྱི་ལམ་ཁྱེར་དུ། མཉམ་རྗེས་གཉིས་སུ་མེད་པར་འདྲེས་ཕྱིན་ཆད་ནས། ལྟ་སྒོམ་གྱི་འཛིན་པ་ཐམས་ཅད་བཤིག་ལ། ཀྱེ་མ་ཆོས་ཐམས་ཅད་སྟོང་པའི་ངོ་བོར་ཡང་མ་གྲུབ་པར་འདུག་པས། ད་ཕྱིན་ཆད་སེམས་ཅན་གྱི་དོན་ལས། རང་དོན་དུ་བལྟ་རྒྱུ་མི་འདུག་སྟེ། མི་ལྟ། བལྟ་རེ་ཤི། བལྟས་ ནའང་ང་ལ་སྡིག །མི་སྒོམ། སྒོམ་རེ་ཤི། བསྒོམ་ནའང་ང་ལ་སྡིག །མི་སྤྱོད། སྤྱོད་རེ་ཤི། སྤྱོད་ནའང་ང་ལ་སྡིག །མི་སྒྲུབ། སྒྲུབ་རེ་ཤི། བསྒྲུབ་ནའང་ང་ལ་སྡིག་སྙམ་དུ། རང་དོན་དུ་རང་ལ་འཁྲིས་པའི་གཉེན་པོ་བཤིག་ནས་ཞེ་མནའ་སྐྱལ། བློ་ཐག་བཅད་ལ་གཞན་དོན་དུ་ཅི་འགྱུར་བྱ་སྟེ། བདག་ཉིད་ཆེན་པོ་རཏྣ་བཛྲ་གྱི་ཞལ་ནས། འཆིང་བའི་གྲོགས་སུ་ཆོས་མ་བཏང་བས། དེས་ལྷ་བདུད་དུ་མི་འབབ་པར་བྱེད། དེས་ཐར་ལམ་འབྲས་བུའི་གྲོགས་སུ་འགྲོ་བའི་གནད་ཡིན། ཞེས་བསྟན་ནོ། །རྗེས་སྤྱོད་ཀྱི་དུས་སུའང༌། དེ་ལྟར་མ་རྟོགས་པའི་སེམས་ཅན་རྣམས་ལ་བྱམས་སྙིང་རྗེས་ཀུན་ནས་བསླངས་ཏེ། ཐ་ན་དུད་འགྲོའི་རྣ་བར་ཀཾ་ཀ་ནིའི་གཟུངས་སྒྲོགས་པ་དང༌། གཞན་སྐྱབས་སེམས་དང་དབང་ཆོག་སྟེར་བ་སོགས་གང་འཚམས་ཀྱི་སྒོ་ནས་ཀུན་གཞི་ལ་ཐར་པའི་ས་བོན་འཇོག །ད་ལྟ་དངོས་སུ་ཕན་མ་ཐོགས་པ་རྣམས་ཀྱང་ནམ་ཞིག་བདག་གི་གདུལ་བྱར་སྨོན་ལམ་གདབ་པར་བྱའོ། །བཞི་པ་རྗེས་གནང་གི་ཁྱད་པར་བླ་མའི་ཐུགས་དམ་བསྐུལ་ལུགས་ནི། ༀ་ཨཱཿ ཧྲཱིཿ གུ་རུ་བྷུ་ཧུ་ཀུ་རུ་ཧཱུྃ། ཞེས་གཞན་དོན་ཕུན་ཚོགས་སྒྲུབ་པའི་ལས་སྦྱོར་སྒོམ་པ་བདག་གཏོད་ཀྱི་སྙིང་པོ་འབྲུ་བཅུ་པ་འདི་གསོལ་བ་མས་གདབ་དང་བྱིན་རླབས་ཡས་ཞུའི་ཚུལ་དུ་བགྲང་ཞིང༌། ཐུན་བསྡུ་བ་ན་དཔལ་ལྡན་བླ་མ་སྤྲུལ་སྐུའི་བདག་ཉིད་ཅན་གྲུབ་པར་གྱུར་ཅིག །ཅེས་བརྗོད་དོ། །གསུམ་པ་ལ་གཉིས་ལས། བསླབ་བྱ་དྲི་མ་བཞི་བསྲུང་ལུགས་ནི། བདག་གཏོད་བྱ་བྲལ་གྱི་དུས་འདིར། འབྲས་བུའི་སྒྲུབ་བློ་མ་དག་ན་རེ་བའི་ཐོག་ཏུ་བོ་བས་རང་དོན་དུ་སངས་རྒྱས་ཐོབ་འདོད་སྤངས། འཁོར་བ་སྤང་བྱར་མཐོང་ན་དགོས་སྟེང་དུ་ཟགས་པས་འཁོར་བ་མ་སྟོངས་པར་འཁོར་བར་གནས་ནས་སེམས་ཅན་གྱི་དོན་བྱེད་པའི་གོ་ཆ་བགོ །གཉིས་འཛིན་གྱི་བློ་མ་དག་ན་བྱས་པའི་དགེ་བ་ལ་ཞེན་འཁྲིས་ཀྱིས་ལྟེམས་པས་ཅི་བྱེད་གཞན་དོན་བྱ། སྤྱོད་ལམ་ཐ་མལ་དུ་ཤོར་ན་ཆོས་བརྒྱད་དུ་འཆོར་བས་ལོག་པའི་དྲི་མ་ཡིན་པས་ཚེ་འདིའི་ཞེན་འཁྲིས་སྤངས་ནས་མི་ཚེ་སྒྲུབ་པ་ལ་བསྐྱལ་ལོ། །གཉིས་པ་ཚར་ཚད་ལ་བཞི་ལས། ངོ་བོས་ཚར་ན་དྲན་པས་བཟུང་མི་དགོས་པར་བློ་རྟོག་ཐམས་ཅད་གཉུག་མ་ཆོས་དབྱིངས་སུ་ཐིམ་ནས་དགེ་སྦྱོར་དང་འབྲལ་བ་མེད་པ་འབྱུང༌། རྟགས་ཀྱིས་ཚར་ན་རྒྱུ་ལམ་འབྲས་བུའི་རྟགས་རྣམས་ཤིན་ཏུ་གསལ་བརྟན་དུ་འགྱུར། ཡོན་ཏན་གྱིས་ཚར་ན་སངས་རྒྱས་པའི་ཡོན་ཏན་གྱི་ཆོས་དངོས་སུ་ཐོབ་པ་ལ་རེག་པའོ། །གྲངས་ཀྱིས་ཚར་ན་བདུན་འབུམ་དང༌། དུས་ཟླ་བ་ཕྱེད་དོ། །མཐར་ལམ་བདག་གཏོད་བྱ་བྲལ་གྱི་ཁྲིད་ཡིག་གོ །གཉིས་པ་དེ་དཀའ་ཐུབ་གསུམ་གྱི་བསྲང་ནས་འདོན་པ་ལ་གསུམ་ཚན་བཞི་ལས། དང་པོ་དཔེ་གསུམ་གྱི། དཔེ་དང་པོ་དཔོན་ལ་ལྟོས་ཤིང་སྒྲོ་འདོགས་གཅོད་པ་ཉན་ཐོས་ལྟ་བུའི་དཀའ་ཐུབ་ནི། མོས་གུས་ཀྱིས་བླ་མ་གནད་ལ་བོར་ཏེ་ཕྱག་བཞེས་ཀྱི་ཁྲིད་ ལེགས་པར་ཞུས་ནས་ཤེས་པར་བྱེད་པའོ། །དཔེ་གཉིས་པ་རང་གཅིག་པུར་སྒྲུབ་པ་ཉམས་སུ་ལེན་པ་རང་རྒྱལ་ལྟ་བུའི་དཀའ་ཐུབ་ནི། དབེན་པར་དག་སྣང་གིས་ཡི་དམ་ལ་ས་སྡེ་བཙུགས་དངོས་གྲུབ་ཚེ་འདིར་ཐོབ་པར་བྱེད་པའོ། །དཔེ་གསུམ་པ་རང་དོན་མཐར་ཕྱིན་ནས་གཞན་དོན་བྱེད་པ་དཔའ་ཆེན་བྱང་སེམས་ཀྱི་དཀའ་ཐུབ་ནི། ཕྲིན་ལས་ཀྱི་རྟེན་འབྲེལ་འགྲིག་པའི་གནས་རྣམས་སུ་མཁའ་འགྲོ་ལས་ལ་བཀོལ་ཏེ་གཞན་དོན་འབའ་ཞིག་ལྷུར་ལེན་པའོ། །གཉིས་པ་གང་ཟག་གསུམ་ནི། འཇིག་རྟེན་གྱི་བྱ་བ་སྤངས་པ་རབ་ཏུ་བྱུང་བའི་ཕྱོགས། འཇིག་རྟེན་གྱི་བྱ་བ་པང་དུ་ལེན་པ་ཁྱིམ་པའི་ཕྱོགས། སྤྱོད་ལམ་སྦྱངས་པའི་ཡོན་ཏན་ལ་གནས་པས་ཡོ་བྱད་གསོག་འཇོག་མེད་པ་ལྡོམ་བུ་བའི་ཕྱོགས་སོ། །གསུམ་པ་དུས་གསུམ་ནི། གང་ཟག་གསུམ་པོ་རེ་རེ་ལའང་རིང་ཐུང་གསུམ་སྟེ། རབ་བྱུང་ལ་རང་རྒྱལ་ལྟ་བུའི་དཀའ་ཐུབ་ཀྱི་བོགས་རབ་ལོ་བཅུ་གཉིས། འབྲིང་ལོ་དྲུག །ཐ་མ་ལོ་གསུམ། ཁྱིམ་པར་རབ་ཟླ་བ་གསུམ། འབྲིང་ཟླ་བ་གཉིས། ཐ་མ་ཟླ་བ་གཅིག་གོ །ལྡོམ་བུ་བ་རབ་ཞག་གསུམ། འབྲིང་ཞག་གཉིས། ཐ་མ་ཞག་གཅིག་གོ །བཞི་པ་བསྐུར་ལུགས་གསུམ་ནི༑ རབ་བྱུང་རྐྱང་པ་ཞེས་བྱ་སྟེ། ལམ་སྔ་མ་སྔ་མ་མཐར་མ་ཕྱིན་པར་ཕྱི་མ་མི་སྦྱིན་ཞིང་ཉམས་སུ་ལེན་དུ་མི་འཇུག་པས་མཐར་ཆགས་ཀྱི་ལམ་མཐར་ཕྱིན་པ་ལ་སྦྱོར་བའོ། །ཁྱིམ་པ་གུག་པ་ཞེས་བྱ་སྟེ། ཟླ་བ་གཅིག་ སོགས་ཇི་ཙམ་ཁོམས་པ་དེ་སྲིད་དུ་ལམ་ལྔ་ཆར་རྫོགས་པ་དང༌། ཡང་ཕྱིས་ཇི་ཙམ་ཁོམས་པ་དེ་ལ་སྔ་མ་བསྐྱར་ཏེ་ལམ་མཐར་ཕྱིན་པར་འཇུག་པའོ། །ལྡོམ་བུ་བ་ལ་སྦྲགས་མ་ཞེས་བྱ་སྟེ་ཞག་གཅིག་གམ་ཐུན་གཅིག་གི་ནང་དུ་ལམ་ལྔ་ཆར་རྫོགས་པར་ཉམས་སུ་ལེན་དུ་འཇུག་པའོ། །དེ་ལྟར་བསྐུར་ལུགས་གསུམ་དུ་ཕྱེ་བས་གང་ཟག་ཕྱོགས་གསུམ་ཆར་གྱིས་སྒྲུབ་པའི་དམ་བཅའ་མ་ཉམས་པར་མཐར་ཕྱིན་པར་འགྱུར་བ་ཡིན་ཏེ༑ དྲང་སྲོང་བདེ་བའི་གོ་ཆའི་ཞལ་ནས། དཀའ་ཐུབ་ཀྱི་སྲང་རིམ་པ་གསུམ་དུ་ཕྱེ་བས་སྒྲུབ་པ་བོ་ཟག་ལ་མི་འགྲོ་བར། དྲི་མ་ངོས་འཛིན་བསྲུང་སྡོམ་གྱི་གནད་ཟུང་ཞིག །ཅེས་བསྟན་ནོ། །གསུམ་པ་བྱ་བྲལ་འབྲས་བུའི་རྣལ་འབྱོར་ནི། རང་གི་སེམས་ཀྱི་ངོ་བོ་རང་བཞིན་གྱིས་རྣམ་པར་དག་པ་དེ་ཉིད་ལམ་གྱི་རྩོལ་བ་དང་བླ་མའི་བྱིན་རླབས་ཀྱིས་མངོན་དུ་གྱུར་ནས་གློ་བུར་གྱི་དྲི་མ་རྣམ་པར་དག་པ་མཐར་ཐུག་པས་དབྱིངས་ཀྱི་ངང་དུ་རིག་པའི་ཡེ་ཤེས་གྲོལ་བ་ཆོས་ཀྱི་སྐུ་དང༌། དེའི་སྟེང་ནས་རང་བཞིན་གསལ་བའི་རྩལ་ཕྱོགས་མེད་དུ་རྫོགས་ཤིང་རིག་པ་ལ་དབང་ཐོབ་པས་དག་པའི་སྐུ་མཚན་དཔེས་བརྒྱན་པ་གདུལ་བྱ་དག་པའི་ངོར་སྣང་བ་ལོངས་སྤྱོད་རྫོགས་པའི་སྐུ་དང༌། དེའི་སྟེང་ནས་སེམས་ཀྱི་མཚན་ཉིད་སྣང་སྟོང་དབྱེར་མེད་ཀྱི་ངང་ལས་ཐབས་མཁས་ཀྱི་མཛད་པ་གང་ལ་གང་འདུལ་དུ་སྣང་བ་ནི། སྤྲུལ་པའི་སྐུ་དང༌། སྐུ་གསུམ་པོ་དེ་དག་ཀྱང་ དབྱེར་མེད་དུ་གྱུར་པ་ནི་བདེ་བ་ཆེན་པའི་སྐུ་སྟེ། དེ་ལྟར་སྐུ་བཞི་བརྙེས་ནས་ཇི་ལྟ་ཇི་སྙེད་མཁྱེན་པའི་ཡེ་ཤེས་ཀྱིས་གདུལ་བྱ་འདུལ་བའི་ཕྲིན་ལས་ཕྱོགས་རིས་མེད་པར་ཁྱབ། འཁོར་བ་མ་སྟོངས་ཀྱི་བར་དེ་སྲིད་དུ་འབད་མེད་ལྷུན་གྲུབ་ཏུ་འབྱུང་བ་ཡིན་ནོ། །ཐོབ་པའི་དུས་ནི་རབ་ཀྱིས་མཐོང་བའི་ཆོས་ཚེ་འདི་ཉིད་ལ། འབྲིང་གིས་འཆི་ཀར། ཐ་མས་བར་དོ་ལས་མི་འགྱང་བར་ཐོབ་པར་འགྱུར་ཏེ། དེ་ཡང་ངོ་བོས་ཚར་ན་ཚེ་འདི་ཉིད་ལ། རྟགས་ཀྱིས་འཆི་ཁར། གྲངས་ཀྱིས་བར་དོར་ངེས་པར་འགྲུབ། ཡོན་ཏན་གྱིས་སྐྱེ་བ་བརྒྱུད་ནས་འབྱུང་བ་ཡིན་ཞེས་འབྱུང་ངོ༌། །དེ་དག་གིས་དངོས་གཞི་ལམ་ལྔའི་དམར་ཁྲིད་ཀྱི་ཁྲིད་ཡིག་ཐམས་ཅད་མཁྱེན་པ་བསོད་ནམས་དཔལ་གྱིས་མཛད་པ་ལ་གཞི་བྱས་ཏེ་ཁ་འགེངས་དགོས་པ་རྣམས་ནག་འགྲོས་བཀླག་ཆོག་མར་བཀོད་པ་ཚར་རོ། །གསུམ་པ་ཞར་བྱུང་ཐབས་ཀྱི་ཡན་ལག་གཞན་བཤད་པ་ལ་གསུམ་སྟེ། གེགས་བསལ་བ། བོགས་འདོན་པ། སྒྲུབ་པ་ཇི་ལྟར་བྱ་བའི་གནད་ཀྱི་སྒོ་བསྟན་པའོ། །དང་པོ་ལ། འབྱུང་བ་ཆ་མ་མཉམ་པའི་གེགས་སེལ། ཐབས་ཤེས་ཀྱི་འབྱམས་གཅོད། ལམ་སོ་སའི་དྲི་མ་བཞི་བསལ་ཚུལ་ལོ། །དང་པོ་ནི༑ སྒྲུབ་པ་པོ་མེ་ཤས་ཆེ་བས་ཉམས་རྒོད་ཅིང་ཚིག་པ་ཟ་ན། ཟླ་བ་ཚེས་པ་ལྟ་བུའི་སྤྱན་གྱིས་སེམས་གཞི་ཐོག་ལ་གློད་ལ། ༀ་ཨུ་ཨཱུ་པ་ཕ་བ་བྷ་མ་ཝ་ཧ་སྭཱ་ཧཱ། ཞེས་བརྒྱ་རྩ་སོགས་བགྲངས་པས་རིག་པ་རང་གནས་སུ་ ཆགས་པར་འགྱུར་རོ། །རླུང་ཤས་ཆེ་བས་རིག་པ་འཕྲོས་ནས་མི་གནས་ན་ཉ་ལྟ་བུའི་སྤྱན་གྱིས་རིག་པ་ཡུལ་ལ་གཏོད་ཅིང༌། ༀ་ཨོ་ཨ໋ཱ་ཏ་ཐ་ད་དྷ་ན་ལ་ས་སྭཱ་ཧཱ། ཞེས་བཟླས་པས་རིག་པ་གནས་པར་འགྱུར་རོ། །ས་ཤས་ཆེ་བས་ལྕི་ཞིང་འཐིབས་ན། མཁལ་མ་ལྟ་བུའི་སྤྱན་གྱིས་རིག་པ་ངར་བསྐྱེད་ཅིང་སེངས་ཏེ་བར་སྣང་ལ་གཏད་ནས། ༀ་ཨི་ཨཱི་ཙ་ཚ་ཛ་ཛྷ་ཉ་ཡ་ཤ་སྭཱ་ཧཱ། ཞེས་བཟླས་པས་ཉམས་དང་རིག་པ་རྣོ་ངར་དང་ལྡན་པར་འགྱུར་རོ། །ཆུ་ཤས་ཆེ་བས་ཉམས་འདར་ཞིང་འཐིབས་ན་ཟླ་བ་ཉ་གང་བ་ལྟ་བུའི་སྤྱན་གྱིས་རིག་པ་དཔངས་བསྟོད་དེ། ༀ་ཨེ་ཨཻ་ཊ་ཋ་ཌ་ཌྷ་ཎ་ར་ཤ་སྭཱ་ཧཱ། ཞེས་བཟླས་པས་ཉམས་རིག་པ་རྣོ་ངར་དང་ལྡན་པར་འགྱུར་རོ༑ ༑གཉིས་པ་ནི། ཤེས་རབ་ཀྱི་རིག་པ་བརྟག་དཔྱད་ལ་འབྱམས་ན། རུས་སྦལ་གྱི་ལྟ་སྟངས་ཀྱིས་རིག་པ་གཞི་ཐོག་ཏུ་གློད་ལ། ༀ་དང་སྭཱ་ཧཱའི་བར་དུ་གསལ་བྱེད་སོ་བཞི་བཅུག་ནས་བཟླས་པས་ཉམས་ཀྱི་རྩི་དང་ལྡན་པར་འགྱུར་རོ། །ཐབས་ཀྱི་རིག་པ་ཉམས་ལ་འབྱམས་ཤིང་ལྟེམས་ན་ལྟ་སྟངས་ཕྱོགས་མེད་དུ་བསྒྱུར་ཞིང༌། ར་རཱ་ལ་ལཱ་བཞི་སྤངས་པའི་དབྱངས་བཅུ་གཉིས་ༀ་དང་སྭཱ་ཧཱའི་བར་དུ་བཅུག་ནས་བཟླས་པས་རིག་རྩལ་ཕྱོགས་མེད་དུ་འཆར་རོ། །ཐབས་ཡ་བྲལ་དུ་གྱུར་ན། ལྟ་སྟངས་འབག་གི་མིག་བཞིན་བསྐོར་ཏེ། ༀ་ར་རཱ་ལ་ལཱ་སྭཱ་ཧཱ། ཞེས་བཟླས་པས་ཟུང་འཇུག་གི་རྟོགས་པ་སྐྱེ་བར་འགྱུར་རོ། །གསུམ་པ་ནི། རང་སའི་བོ་ཟགས་ ལྟེམས་ལོག་བཞི་ལ་རིམ་པར། ཨ་ཀན་དྷཱི་མ་ཧཱ་ཀན་དྷི་སྭཱ་ཧཱ། ཨ་ཀན་ཏ་པ་ར་ནི་དྷི་སྭཱ་ཧཱ། ཨི་སུ་མ་བ་ར་ཏི་ན་ལ་སྭཱ་ཧཱ། ཨཱི་ན་ར་སི་པ་ཏ་ལ་སྭཱ་ཧཱ། ཞེས་དྲི་མ་གང་བྱུང་གི་སྔགས་ཁྲི་ཕྲག་རེ་བཟླས་པས་སེལ་ཞིང༌༑ རྫས་ཀྱི་རྟེན་འབྲེལ་ནི། ཕྱི་བ་དང་གྲུམ་པའི་སྡེར་མོ། ཁྱི་གུའི་མིག་དང་འཁྲིག་མ་བཞི་དྲི་མ་གང་བྱུང་གི་རིམ་པ་ལྟར་ལུས་ལ་བཅངས་པས་སེལ་ལོ། །བློ་སྦྱོང་གི་དྲི་མ་བཞིའི་སྔགས་རྫས་ཀྱི་རྟེན་འབྲེལ་ནི། ཨུ་ཧུ་ཏ་མ་ཀུ་ལུ་ཛི་མ་སྭཱ་ཧཱ། ཨཱུ་མེ་སུ་ར་ཏྲི་པ་ཏི་ལེ་སྭཱ་ཧཱ། ར་པྲ་ཙ་རི་ཧ་རི་ལི་ཏ་སྭཱ་ཧཱ། རཱ་དོ་ཧ་བྷ་ཏོ་ལ་ཧྲཱིཿ ཧྲཱིཿ སྭཱ་ཧཱ། ཞེས་བགྲང་ཞིང༌། མུ་ཏིག །གསེར། གདུང་ཤ་རཱི་རམ། བླ་མའི་ཐུགས་དམ་སྙིང་པོ་རྣམས་བཅང་ངོ༌། །དཀའ་ཐུབ་ཀྱི་དྲི་མ་བཞིའི་སྔགས་རྫས། ལ་ཤོ་བ་ར་གུ་དྷེ་ཧྲི་ཏ་སྭཱ་ཧཱ། ལཱ་བྷ་ལ་བྷི་སུ་མ་ཧྲི་དྷ་བ་ར་སྭཱ་ཧཱ། ཨེ་ཀུན་དྷ་ལི་ཏ་ན་ས་རི་སྭཱ་ཧཱ། ཨཻ་བྷ་ར་བྷ་རི་ཧཱུྃ་ཛ་ལ་སྭཱ་ཧཱ། ཞེས་བཟླ་ཞིང༌། སྤྲེའུའི་སྲིན་ལག །དབྱིའི་སེན་མོ། བའི་ནུ་མ༑ བུད་མེད་ཀྱི་རྐང་སེན་རྣམས་ལུས་ལ་བཅང་ངོ༌། །རྗེས་མཐོང་ལམ་གྱི་དྲི་མ་བཞིའི་སྔགས་རྫས། ཨོ་ཧ་ཀུ་ཧ་ན་བ་ད་ས་སྭཱ་ཧཱ། ཨཽ་མ་ཧཱ་ཀུན་དྷི་ཧ་ཧེ་ལ་སྭཱ་ཧཱ། ཨཾ་མ་གྷུ་དྷེ་བི་ཤི་ལེ་རེ་སྭཱ་ཧཱ། ཨཿ དེ་ལ་ར་མེ་ན་ཧ་ད་སྭཱ་ཧཱ། ཞེས་བཟླ་ཞིང༌། ཕག་པ་དང་རའི་རྣ་བ། ཤ་བ་དང༌། གཡག་རྒོད་ཀྱི་རྭ་རྩེ་ལུས་ལ་བཅང་ངོ༌། །རོ་སྙོམས་ཀྱི་དྲི་མ་བཞིའི་སྔགས་རྫས། ཀ་ཨ་ན་ཙ་མ་དྷ་ལ་ན་སྭཱ་ཧཱ། ཁ་ཧི་སཾ་བུདྡྷི་བི་ཤ་ན་སྭཱ་ཧཱ། ག་དྷརྨ་པུ་ཧཱུྃ་ཧྲི་ པ་ར་སྭཱ་ཧཱ། གྷ་མ་ཧཱ་ཏེ་སེ་རི་ས་རི་སྭཱ་ཧཱ། ཞེས་བཟླ་ཞིང༌། ཕག་སྣ། གླ་བའི་མཆེ་བ། རྨ་བྱའི་མདོངས། ཀརྴ་པ་ཎ་རྣམས་ལུས་ལ་བཅང་ངོ༌། །མཐར་ལམ་གྱི་དྲི་མ་བཞིའི་སྔགས་རྫས། ད་བི་མ་ཏི་པྲ་མ་ཧ་རི་ཏི་སྭཱ་ཧཱ། ཙ་ཏོ་མ་ཏི་ཀུ་རུ་དྷ་ནི་སྭཱ་ཧཱ། ཚ་ཏི་ལ་མ་ཏི་གྷ་ཤ་མ་ལ་སྭཱ་ཧཱ། ཛ་ཧ་ར་ཧ་ར་པྲ་ག་ཤི་སྭཱ་ཧཱ། ཞེས་བཟླ་ཞིང༌། སྤྲེའུ། ཁྱིའུ། མགར་བ། རྐུན་མོ་བཞིའི་སྲིན་ལག་ལུས་ལ་བཅང་ངོ༌། །ལམ་རེ་རེ་ལའང་སྔགས་རྫས་བཞི་བཞི་ཡོད་པ་བོ་ཟགས་ལྟེམས་ལོག་བཞི་ལས་གང་བྱུང་ལ་སེལ་ཐབས་གོ་རིམ་དུ་སྦྱར་བར་བྱའོ། །གཉིས་པ་བོགས་འདོན་ལ། བླ་མ་ལ་མོས་གུས་ཀྱིས་བསྐུལ་བ་དང༌། མཁའ་འགྲོའི་གསང་ཚིག་སྒྱུ་རྩལ་གྱི་གནད་བཞིས་བོགས་འདོན་པའོ། །དང་པོ་ནི། སྙིང་པོ་དོན་གྱི་ལམ་འདིའི་ལུགས་ལ་བླ་མའི་མོས་གུས་ཁོ་ནས་བོགས་འདོན་ཞིང་ལམ་གྱི་ཡོན་ཏན་རྫོགས་པར་འདོད་དེ། བླ་མའི་ཐུགས་དམ་བསྐུལ་བ། ཤིན་ཏུ་བསྐུལ་བ། གནད་ནས་བསྐུལ་བའི་སྔགས་དམིགས་རྣམས་འཇུར་པོར་བྱེད་པ་ཁོ་ན་སྟེ། དེ་ལམ་ལྔ་ཀའི་ཐུགས་དམ་བསྐུལ་བ་ཁྲིད་ཡིག་གི་དཀྱུས་སུ་སོང་བས། འདིར་ཤིན་ཏུ་དང་གནད་ནས་བསྐུལ་བ་གཉིས་བྲི་བར་བྱའོ། །བསྐུལ་བ་གསུམ་པོ་སྔ་མ་སྔ་མ་ལ་ལམ་རྟགས་མ་རྫོགས་ན་ཕྱི་མ་ཕྱི་མ་ལ་སྦྱོར་བ་ཡིན་ནོ། །དེ་ལ་བློ་སྦྱོང་གིས་ཤིན་ཏུ་བསྐུལ་བ་ནི། རང་གི་སྤྱི་བོར་འཁོར་ལོ་རྩིབས་བརྒྱད་དཀར་པའི་དབུས་སུ་བླ་མའི་སྐུའི་རང་བཞིན་ ༀ་དཀར་པོ་དང༌། རྩིབས་བརྒྱད་ལ་སྐུ་བསྐུལ་བའི་སྔགས་ༀ་ཨཱཿ ཧྲཱིཿ གུ་རུ་སིདྡྷི་ཧཱུྃ་ཞེས་པ་ཁ་དོག་དཀར་པོས་བསྐོར་བར་བསམ་ལ། ཐུན་དང་པོ་ལ་བླ་མའི་སྐུ་བསྐུལ་བའི་མོས་པས་སྤྱི་བའི་སྔགས་ཕྲེང་ཀློག་པའི་ཚུལ་དུ་བཟླའོ། །དེ་བཞིན་ཐུན་ཕྱི་མ་གསུམ་ལ་རིམ་པ་ལྟར། མགྲིན་པར་པདྨ་དམར་པོ་འདབ་མ་བརྒྱད། སྙིང་གར་དཔལ་བེའུ་རྩེ་བརྒྱད་པ་ཁ་དོག་ལྔ་ལྡན། ལྟེ་བར་རིན་པོ་ཆེ་ཟུར་བརྒྱད་སེར་པོ་རྣམས་ཀྱི་དབུས་སུ་རིམ་བཞིན་གསུང་གི་ས་བོན་ཨཱཿ དམར། ཐུགས་ཧཱུྃ་མཐིང༌། ཡོན་ཏན་ཕྲིན་ལས་ཀྱི་ས་བོན་ཧྲཱིཿ ལྗང་སེར་གསུམ་ལ་རང་མདོག་དང་མཚུངས་པའི་བློ་སྦྱོང་གི་སྔགས་འབྲུ་བརྒྱད་པས་བསྐོར་བར་བསམས་ནས༑ གསུང་དང་ཐུགས་དང་ཡོན་ཏན་ཕྲིན་ལས་བསྐུལ་བའི་མོས་པས་ཐུན་གསུམ་པོ་རེ་རེ་ལ་མགྲིན་སྙིང་ལྟེ་བའི་སྔགས་ཕྲེང་ཀློག་པའི་ཚུལ་གྱིས་བཟླའོ། །གནད་ནས་བསྐུལ་བ་ནི། སྤྱི་བའི་བླ་མའི་རྩ་འཁོར་བཞིའི་གནས་སུ་ཡང་བདག་ཁོ་ན་བཞིན་དུ་བསྒོམས་ལ། ཐུན་དང་པོ་ལ་བླ་མའི་སྐུ་བསྐུལ་བའི་མོས་པས། རང་གི་སྤྱི་བའི་ཡིག་འབྲུ་ཀློག་པའི་ཚུལ་དུ་བཟླས་པས་ཡིག་འབྲུ་རྣམས་ལས་འོད་ཟེར་དཀར་པོ་བཀྲག་མེད་མི་གསལ་བའི་རྣམ་པར་རང་གི་སྣ་བུག་ནས་ཐོན། བླ་མའི་ཤངས་བུག་ནས་ཞུགས་ནས་སྤྱི་བའི་ས་བོན་སྔགས་ཕྲེང་དང་བཅས་པ་ལ་ཐིམ་པས་སྐུ་བསྐུལ་ནས། སྐུའི་བྱིན་རླབས་ཡིག་འབྲུ་རྣམས་ལས་འོད་ཟེར་ཤིན་ཏུ་གསལ་ ཞིང་བཀྲག་དང་ལྡན་པ་བླ་མའི་ཤངས་བུག་ནས་ཐོན་པ་རང་གི་སྣ་བུག་ཏུ་ཞུགས་ནས་སྤྱི་བའི་ཡིག་འབྲུ་ལ་ཐིམ་པས་བུམ་དབང་ཐོབ། ལུས་སྒྲིབ་སྦྱངས། སྐུའི་དངོས་གྲུབ་ཐོབ་ནས་རང་ལུས་རྡོ་རྗེའི་སྐུར་གྱུར་པར་བསམ། དེ་བཞིན་དུ་ཐུན་གཉིས་པ་ལ་གསུང་གནད་ནས་བསྐུལ་བ་སོགས་རིགས་འགྲེ་ཤེས་པར་བྱའོ། །དཀའ་ཐུབ་ཀྱིས་ཤིན་ཏུ་བསྐུལ་བ་ནི། རང་དང་བླ་མའི་གནས་བཞིའི་རྩ་འཁོར་ལ་བླ་མའི་རྡོ་རྗེ་བཞིའི་རང་བཞིན་རྣམ་སྣང་སོགས་རིགས་བཞི་ཡབ་ཡུམ་གྱི་རྣམ་པར་བཞུགས་པའི་ཡབ་ཀྱི་ཐུགས་ཀར་རིམ་བཞིན་འཁོར་ལོ་རྩིབས་བརྒྱད། པད་འདབ་བཅུ། དཔལ་བེའུ་རྩ་བརྒྱད། རིན་ཆེན་ཟུར་བརྒྱད་རྣམས་ཀྱི་ལྟེ་བར་ས་བོན༑ མགྲིན་པར་མ། གཞན་གསུམ་གྱི་ས་བོན་གྱི་གཡས་གཡོན་དུ་གུ་རུ་དང༌། ལྷག་མ་ༀ་ཨཱཿ ཧྲཱིཿ སིདྡྷི་ཕ་ལ་ཧཱུྃ་རྣམས་རྩིབས་སོགས་ལ་བཀོད། མགྲིན་པར་གུ་རུའང་དཀྱུས་ལྟར་བཀོད་ནས། ཐུན་བཞི་ལ་རིམ་བཞིན་གནས་བཞིའི་ཡིག་འབྲུ་རྣམས་རང་དང་བླ་མའི་སྔགས་ཕྲེང་ལ་རེ་མོས་ཀྱིས་ཀློག་པའི་ཚུལ་དུ་བཟླས་པས་བསྐུལ་ལོ། །གནད་ནས་བསྐུལ་བ་ནི། རང་གི་ཡིག་འབྲུ་ཀློག་པའི་ཚུལ་དུ་བཟླས་པའི་འོད་ཟེར་གྱིས་སྤྱི་བའི་བླ་མ་བསྐུལ་ཏེ་དེ་ལས་སྐུའི་བྱིན་རླབས་བསྡུས་པས་དབང་ཐོབ་པ་སོགས་བློ་སྦྱོང་ལྟར་སྦྱར་བར་བྱ་སྟེ། གནས་བཞིར་རིགས་བཞིའི་ལྷ་བསྒོམ་པའི་ཁྱད་པར་ཙམ་མོ། །རྗེས་ཀྱིས་ཤིན་ཏུ་བསྐུལ་བ་ནི། རང་དང་བླ་མའི་ གནས་བཞིར་བླ་མ་རིགས་བཞིའི་རྣམ་པར་བཞུགས་པའི་ཐུགས་ཀར་འཁོར་ལོ་སོགས་ལ་ཡིག་འབྲུ་བཀོད་པ་དཀའ་ཐུབ་དང་འདྲ་བ་ལས། ཁྱད་པར་དེ་ལ་སྐྱེ་མེད་སོགས་ཀྱི་རྒྱས་འདེབས། དེ་ནས་ཐུན་བཞིར་རེས་ཀློག་གི་ཚུལ་ཀྱང་འདྲའོ། །གནད་ནས་བསྐུལ་བ་དང༌། དེ་ལས་འོད་ཟེར་སྤྲོ་བསྡུས་ཐུན་བཞིར་དབང་ཐོབ་པ་སོགས་སྔར་དང་འདྲའོ། །རོ་སྙོམས་ཀྱིས་ཤིན་ཏུ་བསྐུལ་བ་ནི། རང་དང་བླ་མའི་གནས་བཞིར་བླ་མ་རིགས་བཞིའི་ངོ་བོར་བཞུགས་པའི་ཐུགས་ཀར་འཁོར་ལོ་སོགས་ལ་ཡིག་འབྲུ་རྣམས་དཀའ་ཐུབ་ལྟར་ལས། འདིར་གོ་རིམ་ངེས་མེད་དུ་གསལ་འདེབས་ཤིང༌། ཐུན་བཞིའང་ངེས་མེད་དུ་ཀློག་པའི་ཚུལ་དུ་བསྐུལ་ལོ༑ ༑གནད་ནས་བསྐུལ་བའང༌། དེ་ལས་འོད་ཟེར་སྤྲོ་བསྡུས་བསྐུལ་ཞིང་བྱིན་རླབས་བསྡུ་བའང་གཞན་འདྲ་བ་ལས་འདིར་གོ་རིམ་ངེས་མེད་དུ་བྱེད་པ་ཙམ་ཁྱད་པར་རོ། །བྱ་བྲལ་གྱིས་ཤིན་ཏུ་བསྐུལ་བ་ནི། རང་དང་བླ་མའི་གནས་བཞིར་མཁའ་འགྲོ་མ་བཞི་བཞུགས་པའི་ཐུགས་ཀར་འཁོར་ལོ་སོགས་ལ་ཡིག་འབྲུ་སྔར་ལྟར་བསྒོམ་ལ། ཐུན་བཞིར་རེས་ཀློག་གི་ཚུལ་གྱིས་བསྐུལ་ལོ། །གནད་ནས་བསྐུལ་བ་ནི་སྔར་ལྟར་འོད་ཟེར་སྤྲོ་བསྡུས་ཐུན་བཞིར་གནད་ནས་བསྐུལ་བའོ། །དེ་ལྟར་ཐུགས་དམ་བསྐུལ་བ་ཁོ་ནས་ལམ་རྟགས་རྫོགས་ན་དེས་ཆོག་མོད། མ་རྫོགས་ན་བསྐུལ་བ་ཕྱི་མ་གཉིས་རྟགས་དང་སྦྱར་ཏེ་བཟླས་པས་རྟགས་དང་ཡོན་ཏན་ མི་རྫོགས་མི་སྲིད་དོ་ཞེས་གསུང་ངོ༌། །ཐུགས་དམ་བསྐུལ་བ་གསུམ་ཡོང་བའི་རྒྱུ་མཚན་ཡང་མདོ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པ་ལ་ཞུགས་ནས། མྱུར་དུ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་པས་ཐོག་མར་བླ་མ་བསྟེན་པར་བྱ། མཉེས་པར་བྱ། བསྙེན་བཀུར་བར་བྱའོ། །ཞེས་གསུང་བའི་དོན་དུ་བཞེད་དོ། །གལ་ཏེ་བསྐུལ་བ་གསུམ་ལ་འབད་ཀྱང་དེས་འགའ་ཞིག་ལམ་རྟགས་མི་རྫོགས་པ་སྲིད་ན། དམ་པའི་ཞལ་ནས། ཚོགས་བསགས་པ་ལ་སྒོམ་གཏད་མེད་དུ་སྐྱེ། ཞེས་གསུངས་པས་ཐུགས་དམ་བསྐུལ་བའི་གནད་བླ་མ་མཆོད་པ་གང་འགྲུབ་ཕུལ། དེས་མཉེས་ནས་བྱིན་རླབས་ཀྱིས་རྟོགས་པ་འཆར། ཤིན་ཏུ་བསྐུལ་བའི་གནད་འབུལ་རྒྱུའི་རྫས་བླ་མ་ལ་མཁོ་མཉེས་འདྲའམ་རང་ལ་མཁོ་བ་དེ་ཕུལ་བའི་སྟོབས་ཀྱིས་རྟོགས་པ་འཆར། གནད་ནས་བསྐུལ་བའི་ཐབས་རང་ལ་མཁོ་སྤྱད་ཅི་འདྲའང་བླ་མ་གང་མཉེས་ཀྱི་རྫས་ལྟོས་པ་མེད་པར་ཕུལ་བས་དེའི་སྟོབས་ཀྱིས་རྟོགས་པ་སྐྱེ་བ་ཡིན་ནོ། །གཉིས་པ་སྒྱུ་རྩལ་གྱི་གནད་བཞིས་བོགས་འདོན་པ་ལ་བཞི་ལས། དང་པོ་ངག་ཏུ་ཅི་སྨྲས་གསང་སྔགས་ཀྱི་བཟླས་བརྗོད་དུ་འགྲོ་བའི་གནད་ནི། འཁོར་ལོ་འགྲིབ་མཚམས་ཞེས་དགོང་ཞོགས་ལག་རིས་མཐོང་མི་མཐོང་གི་མཚམས་ཏེ། དེ་ཡང་སྔ་དྲོ་དང་པོ་བྱ་རོག་གི་སྐད་མ་བསྒྲགས་ཤིང་སྨྲ་བ་གཞན་མ་ལབས་པའི་གོང་དུ། ༀ་གྱིས་མགོ་དྲངས་པའི་ཨཱ་ལི་བཅུ་དྲུག་ཚར་གསུམ་འདོན། དགོང་བྱིའུའི་སྐད་ཆག་ནས་ཉལ་དུས་སྭཱ་ཧཱས་མཐའ་བརྟེན་པའི་ཀཱ་ལི་སོ་བཞི་ཚར་གསུམ་འདོན། དེ་ཉིན་ཞག་ཕྲུགས་གཅིག་ལ་ངག་ཅི་སྨྲས་སྔགས་སུ་གྱུར་ནས་ཅི་བསྒྲུབ་ཀྱང་ནུས་པ་ཐོགས་མེད་དུ་འབྱུང་ངོ༌། །གཉིས་པ་ལུས་ཐ་མལ་དུ་སྡད་པས་རྒྱུད་ལ་ཚོགས་གཉིས་རྫོགས་སུ་འགྲོ་བའི་གནད་ནི། མཚན་མོ་གཉིད་ལོག་དུས་གཞོག་གཡས་ཕབ་ལ། ཀཱ་ལི་ཚར་གསུམ་བརྗོད་པས་འགྱུ་བྱེད་ཀྱི་རྟོག་པ་ཐམས་ཅད་སེམས་ཉིད་སྟོང་པའི་རང་རྩལ་དང༌། སེམས་སྐྱེ་མེད་ནམ་མཁའ་ལྟ་བུར་རྒྱས་བཏབ་ནས་ཉལ་ལོ། །ནངས་པར་གཉིད་སད་པའི་ཚེ་ཨཱ་ལི་ཚར་གསུམ་བརྗོད་པས་ཕྱི་ཡུལ་སྣང་ཐམས་ཅད་རང་སེམས་ཀྱི་འཆར་སྒོར་མ་འགགས་པར་སྣང་བ་སྒྱུ་མ་ལྟ་བུར་རྒྱས་བཏབ་བོ། །དེས་ནི་ལུས་ངག་ཐ་མལ་དུ་བསྡད་ཀྱང་ཚོགས་གཉིས་མ་བརྩལ་བར་ངང་གིས་རྫོགས་པར་འགྱུར་རོ། །གསུམ་པ་ཉོན་མོངས་པ་ཅན་གྱི་ཡིད་ལ་ཏིང་ངེ་འཛིན་གྱི་རྩལ་རང་རྫོགས་སུ་འགྲོ་བའི་གནད་ནི། ཉོན་མོངས་པ་སེམས་ཀྱི་རང་རྩལ་ཡིན་པས་སྤངས་ཀྱང་མི་སྤོང་སྟེ། ཐབས་ཁྱད་པར་ཅན་གྱིས་ལམ་དུ་བྱེད་པའོ། །དེ་ཡང་རྣལ་འབྱོར་པ་ལ་འདོད་ཆགས་ཀྱི་རྟོག་པ་ཤར་ན། འདོད་ཆགས་རང་གི་ངོ་བོ་ལ་གཅེར་གྱིས་བལྟས་པས་རྩ་བྲལ་དུ་སོང༌། དེའི་ངང་དུ་ༀ་པ་ཕ་བ་བྷ་མ་ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཱཿ སྭཱ་ཧཱ། ཞེས་བརྒྱའམ་ཉེར་གཅིག་ བཟླས་པས་ཉོན་མོངས་པ་དེ་ཉིད་རང་བཞིན་སྟོང་པའི་དབྱིངས་སུ་ཐིམ་པས་འདོད་ཆགས་སོར་རྟོགས་ཡེ་ཤེས་སུ་འཆར་རོ། །དེ་བཞིན་དུ་སྦྱར་ཏེ་ཞེ་སྡང་སྐྱེས་ན་སྔར་ལྟར་ངོས་བཟུང་སྟེ། ཊ་སྡེ་དང་དབྱངས་བཅུ་གཉིས་བཟླས་པས་མེ་ལོང་ལྟ་བུའི་ཡེ་ཤེས་སུ་འཆར་རོ། །ཕྲག་དོག་སྐྱེས་ན་ངོས་བཟུང་ལ་ཙ་སྡེ་དང་དབྱངས་བཅུ་གཉིས་བཟླས་པས་བྱ་གྲུབ་ཡེ་ཤེས་སུ་འཆར་རོ། །ང་རྒྱལ་གྱིས་ཁེངས་ན་ངོས་བཟུང་ནས། ཀ་སྡེ་དབྱངས་བཅུ་གཉིས་བརྗོད་པས་མཉམ་ཉིད་ཡེ་ཤེས་སུ་འཆར་རོ། །གཏི་མུག་གིས་རྨོངས་ན་ངོས་བཟུང་ལ་ཏ་སྡེ་དང་དབྱངས་བཅུ་གཉིས་བཟླས་པས་ཆོས་དབྱིངས་ཡེ་ཤེས་སུ་འཆར་རོ། །དེ་ཡང་ལམ་གྱི་ཆ་རྐྱེན་ཡུལ་གྱི་བྱེད་པས་ཡུལ་གང་དང་གང་ལ་ཉོན་མོངས་པ་སྐྱེས་པ་དེ་ཀ་ལ་དཔངས་པོ་བཅོལ་ནས་ཉམས་སུ་ལེན་པ་སྟེ། ཉོན་མོངས་པ་གང་སྐྱེས་ལ་ཆེར་གྱིས་བལྟས་པས་ཁོ་རང་རང་ཚུགས་མ་ཐུབ་པར་རྩ་བྲལ་དུ་གྲོལ། དེའི་ངང་བསྐྱང་ཞིང་བརྟན་བྱེད་དུ་སྔགས་སོ་སོ་བཟླ་བ་ཡིན་ནོ། །བརྡ་རྒྱུད་ཀྱི་འགྲེལ་པ་དང་ཁྲིད་ཡིག་རྙིང་པར་དེ་ཙམ་ལས་མི་འབྱུང་མོད། འོན་ཀྱང་ལུས་གནད་ལྟ་སྟངས་བསྒྱུར་ལུགས་བླ་མས་མཛད་པ་མཐོང་བ་ལ། ལུས་གནད་སྤྱིར་རྐང་པ་རྡོ་རྗེའི་སྐྱིལ་ཀྲུང་དང་ལུས་དྲང་པོར་བསྲང་ནས། བྱེ་བྲག་ཏུ་ཞེ་སྡང་ལ་ལག་གཉིས་སོར་བསྣོལ་བརྐྱང་བས་པུས་མོ་གཡོན་ལ་འཁྱུད་ཅིང་ལྟ་སྟངས་གཡས་སུ་གཅུན། འདོད་ཆགས་ལ་དེ་ལས་ལྡོག་སྟེ་ལག་ གཉིས་པུས་མོ་གཡས་ལ་འཁྱུད་ཅིང་ལྟ་སྟངས་གཡོན་དུ་གཅུན། གཏི་མུག་ལ་ལག་གཉིས་མཐེ་བོས་སྲིན་ལག་བསྡམས་པའི་མཉམ་བཞག་དང་ལྟ་སྟངས་སྣ་རྩེར་ཕབ། ཕྲག་དོག་ལ་ལག་གཉིས་གྲུ་མོ་ཅུང་ཟད་བརྒྱངས་པའི་ཐལ་མོ་ཕྱེད་བསྣོལ་པང་དུ་བཞག་ཅིང་ལྟ་སྟངས་མདུན་དུ་ཐད་ཀར་གཅུན། ང་རྒྱལ་ལ་ལག་གཉིས་ས་གནོན་དང་མིག་གྱེན་དུ་གཅུན་པར་མཛད་དོ། །བཞི་པ་སྟེང་འོག་གི་སྒོ་ལ་མ་བརྟེན་པར་རྩ་རླུང་ལས་སུ་རུང་བའི་གནད་ནི། དགེ་སྦྱོར་གང་བྱེད་ཀྱང་ཐུན་མགོར་རང་གི་སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་ཀྱི་དབུས་སུ་བླ་མའི་སྐུའི་ས་བོན་ༀ་དང་འདབ་མ་ལ་གསལ་བྱེད་སུམ་ཅུ་རྩ་གཉིས། མགྲིན་པ་ལོངས་སྤྱོད་ཀྱི་འཁོར་ལའི་དབུས་སུ་གསུང་གི་ས་བོན་ཨཱཿ དང་རྩ་འདབ་ལ་དབྱངས་ཡིག་བཅུ་དྲུག །སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་དབུས་སུ་ཐུགས་ཀྱི་ས་བོན་ཧཱུྃ་དང་འདབ་མར་ཨ་ཀ་ཙ་ཊ་ཏ་པ་ཡ་ཤ་བརྒྱད། ལྟེ་བ་སྤྲུལ་པའི་འཁོར་ལའི་རྩ་འདབ་དྲུག་ཅུ་རྩ་བཞིའི་དབུས་སུ་ཧྲཱིཿ དང་འདབ་མ་ལ་གསལ་བྱེད་སུམ་ཅུ་སོ་གཉིས་ཚར་གཉིས་གཡས་བསྐོར་གཡོན་བསྐོར་དུ་གསལ་བཏབ། དེ་ཡང་རྩ་དཔའ་མོ་ལ་ཡིག་འབྲུ་དཔའ་བོའི་ཚུལ་ལོ། །དེ་ལྟར་ཐུན་མགོར་ཡི་གེ་རྣམས་ལན་རེ་བརྗོད་ཅིང་ཡས་རིམ་གྱིས་གསལ་བཏབ་ནས་ཐུན་ལ་འཇུག །ཐུན་ཐོན་པ་དང་ཡིག་འབྲུ་རྣམས་ལན་གསུམ་གསུམ་བརྗོད་པས། ཡི་གེ་རྣམས་ཐིག་ལེ་བྱང་ཆུབ་ཀྱི་ སེམས་སུ་རིམ་པར་ཞུ་ནས་དྷཱུ་ཏིའི་ནང་དུ་ཞུགས་ཏེ་ཐིམ་པས་ཆོས་ཐམས་ཅད་ཁམས་དྭངས་མ་བྱང་ཆུབ་སེམས་ཀྱི་རང་བཞིན་སྤྲོས་བྲལ་ནམ་མཁའ་ལྟ་བུར་རྗེན་སངས་ཀྱིས་སོང་བར་བསམས་ལ་མ་བཅོས་པའི་ངང་ལ་བཞག་གོ །དེ་ཡང་ཐབས་ཡིག་འབྲུ། རྩ་ཤེས་རབ། ཡིག་འབྲུ་དྷཱུ་ཏིར་འབབ་པས་ཁམས་ཀྱི་དྭངས་མ་ཞུ་ནས་བདེ་བ་ཆེན་པོར་འབར་བ་ཟུང་འཇུག །དེས་ཕྱི་ནང་གི་དཔའ་བོ་མཁའ་འགྲོ་མ་རྣམས་མཉེས་ནས་རྩ་རླུང་ལས་སུ་རུང་བར་འགྱུར་བས་རང་གཞན་གྱི་དོན་ཀུན་འགྲུབ་པར་གསུངས་སོ། །གསུམ་པ་སྒྲུབ་པ་ཇི་ལྟར་བྱ་བའི་གནད་ཀྱི་སྒོ་བསྟན་པ་ནི། བརྡ་རྒྱུད་ལས། གཅིག་ལ་གཅིག་དང་གཅིག་གསུམ་གཅིག་ལ་གཅིག །ཅེས་གསུངས་པའི་གཅིག་ལ་གཅིག་ནི་བློ་སྦྱོང་གི་དུས་ཏེ། རང་གི་ཆིག་རྐྱ་མི་ཐུབ་བར་དུ་བླ་མའི་དྲུང་དུ་འདུག་ནས་རྟག་ཏུ་ངུས་ཆོས་འཕགས་བསྟེན་པ་ལྟར། ལུས་ལོངས་སྤྱོད་ཀྱིས་བླ་མ་ཅི་མཉེས་སྒྲུབ་ཅིང་བློ་སྦྱོང་གི་བསྙེན་པ་བྱེད་པའོ། །གཅིག་གསུམ་ནི། དཀའ་ཐུབ་རྗེས་རོ་སྙོམས་གསུམ་མོ། །དེ་ཡང་བློ་སྦྱོང་མཐར་ཕྱིན་པ་དེས་བློ་སྦྱོང་གི་དབང་ནོས་ནས། ནམ་ཟླ་དྲོད་ཕེབས་པའི་དུས་སུ་རྩ་རླུང་གནད་དུ་ཕེབས་པས༑ དེ་དུས་བླ་མས་གནས་དབེན་པར་ཁྲིད་དེ། ཚོགས་ཀྱི་འཁོར་ལོས་མཁའ་འགྲོ་མཉེས་པར་བྱས་ནས། སློབ་བུའི་ལུས་པོ་རང་གི་ཆུས་བཀྲུས་ཏེ། ཏིལ་མར་དང་འབྲུ་མར་གྱིས་བཀུ་མཉེ་བྱས་ལ་རྩ་རླུང་གཉེན་ ལྡབས་ཀྱིས་གཏང་། དེ་ནས་གནས་ཡངས་པར་བླ་མས་ལྟ་སྟངས་བཅོ་ལྔ་བསླབ་ཅིང་དྲོད་ཚད་བལྟ། རྩ་བ་ཟིན་ཅིང་ལྟ་སྟངས་འབྱོངས་ནས་བླ་མ་ལ་གཏོང་རག་ཕུལ་ཏེ་དཀའ་ཐུབ་ལ་ཞུགས་པས་ཆོག་གསུངས། དེ་ལ་ཐོག་མར་གང་དུ་སྒྲུབ་པའི་གནས་དབེན་པར། ཡར་ངའི་གཟའ་སྐར་དགེ་བ་ལ་རྟེན་འབྲེལ་ཁང་པའི་ནང་གི་ཞེང་ལ་འདོམ་གང་དང་དཀྱུས་ལ་འདོམ་ཕྱེད་ཡོད་པ་བརྩིགས་ལ་རྩིག་པའི་གསེབ་ཏུ་རིན་པོ་ཆེ་འབྲུ་སྨན་དར་སྣ་སོགས་བཀྲ་ཤིས་པའི་རྫས་ཅི་འབྱོར་གཞུག །ཤར་ཕྱོགས་ལ་སྒོ་བསྟན། ཕྱོགས་གཞན་གསུམ་ལའང་ནང་དུ་སྒོའི་དབྱིབས་སམ་རི་མོ་ལྟ་བུ་དང་ཕྱིར་དཀར་ཁུང་ཆུང་ངུ་རེ་བཏོན། ནང་ཞལ་གྱི་འཇིམས་པ་ལ་སྨན་སྣ་ཚོགས་བསྲེ་བའམ་ཆག་ཆག་འདེབས་ཤིང་ཐོག་ལེགས་པར་ཕུབ། དེའི་ནང་སྟེང་དུ་རྒྱལ་བ་ཡུམ་གྱི་བླ་རེ་ཕུབ། འོག་ཏུ་སའི་ལྷ་མའི་དཀྱིལ་འཁོར་བྲི། སྒོ་བཞི་ལ་ཨེ་ཝཾ་མ་ཡ། གྲུ་ཆད་བཞི་ལ་མམ་ཁ་ལ་ཝོ། ལོག་ལ་བུ་མོ་གཙང་མའི་སོ་སེན་ལ་བྲིས་པའི་ཨཀྵཿ རྣམས་དགྲམ། འཕང་ལོ་ཕྱོགས་བཞིར་གདགས། སྒོ་རྒྱབ་བཞིར་རྒྱ་མདུད་ཀྱི་རི་མོ་ཡང་བྱ། དེ་ལ་རབ་གནས་ནི། སྔར་རང་གི་ཁང་འཇུག་ཐོབ་པའི་བླ་མ་བཞུགས་ན་སྤྱན་དྲངས་ལ་རབ་གནས་ཞུ། མ་བཞུགས་པའམ་ས་ཐག་རིང་བས་སྤྱན་མ་འདྲོངས་ན། སྔར་ཁང་འཇུག་བྱས་པའི་མེ་ཏོག་ཡོད་ན་གཏོར་བས་ཁྱབ། མེད་ན་དགེ་སློང་བཞི་ལ་བཤོས་དྲངས་ ནས་རབ་གནས་ཞུ་བའམ། ཡང་ན་རང་གི་བླ་མ་ལ་གསོལ་བ་དྲག་ཏུ་བཏབ་ནས། འབྲུ་ལ་རྟེན་འབྲེལ་སྙིང་པོ་བཟླས་པ་གཏོར་ཞིང༌། མཇུག་ཏུ། རབ་ཏུ་གནས་པར་གྱུར་ཅིག །བཀྲ་ཤིས་པར་གྱུར་ཅིག །ཅེས་བརྗོད་པས་རབ་གནས་སུ་འགྲོ་བ་ཡིན་ནོ། །དེ་ལྟར་ཁང་པ་དངོས་གྲུབ་ན་ལེགས། མ་གྲུབ་ནའང་ཁང་འཇུག་གི་དབང་ཐོབ་ཕྱིན་ཁང་པ་རུང་མཐུན་ལ་དེ་ཡིན་པར་མོས་ནས་སྔར་ལྟར་མེ་ཏོག་གཏོར་ནས་རབ་གནས་བྱས་པས་ཆོག་གསུངས། དེར་ཞུགས་ནས་སྒྲུབ་པ་བྱེད་པ་ལ། ལམ་ལྔ་སྟན་གཅིག་ཏུ་བྱེད་ན་དེར་ཟད། དེ་མིན་དཀའ་ཐུབ་རྗེས་རོ་སྙོམས་གསུམ་བྱ་སྟེ། དེ་ལ་ཐོག་མར་ཆ་རྐྱེན་གསུམ་བསགས་པ་ནི། འཚོ་བའི་རྐྱེན་ཁམས་དང་མཐུན་པའི་སྨན་དང་ཁ་ཟས་བལྡབ་ཐང་དུ་བསོག །གྲོགས་ཀྱི་རྐྱེན་གཡོག་ཡིད་དུ་འོང་བ་བརྟེན། རྟེན་འབྲེལ་རྫས་ཀྱི་ཆ་རྐྱེན་དཀའ་ཐུབ་ཀྱི་གྲོགས་སུ་འགྲོ་བ་བརྟེན་ནོ། །རྒྱུ་གསུམ་སྤངས་ཏེ། རྫས་ཀྱི་རྟེན་འབྲེལ་ཉམས་པའི་རྒྱུ་རང་གི་ཟས་གོས་མི་ལ་མི་སྦྱིན་ཞིང་མིའི་ཟས་གོས་རང་མི་བརྟེན། ལུས་ཀྱི་རྟེན་འབྲེལ་ཉམས་པའི་རྒྱུ་སྐྲ་སེན་མི་འབྲེག །གཞན་ལ་བྱིན་རླབས་མི་བྱ། མཆིལ་སྣབས་མི་འདོར། ཁྲུས་མི་བྱ། གོས་སྟན་མི་སྤྲུག་གོ །ངག་གི་རྟེན་འབྲེལ་ཉམས་པའི་རྒྱུ་ཆོས་མི་འཆད། སྔགས་མི་རྒྱགས། ཉམས་རྟོགས་མི་སྨྲ། རྟགས་མཚན་མི་བཤད་དོ། །བྱིན་རླབས་གསུམ་བྱ་སྟེ། ལུས་ཐ་མལ་གྱི་རྟོག་པ་སྤངས་ཏེ་ལྷར་བརླབ། ངག་སྨྲ་བ་བཅད་ལ་སྔགས་བགྲང༌། སེམས་ལྟ་སྟངས་ཀྱིས་གཅུན་ནས་རྟོག་པ་སྔ་ཕྱིའི་རྒྱུན་མི་མཐུད་དོ། །སྦྱོར་བ་གསུམ་མངོན་དུ་གཏོང་བ་ནི། གནས་ཀྱི་སྦྱོར་བ་ཕྱགས་བརྡར་དང་མཎྜལ་རྐྱང་ནུལ་བྱ། རྟེན་གྱི་སྦྱོར་བ་བླ་མ་དཀོན་མཆོག་གི་རྟེན་དགྲམ། གཏོར་མ་གཏའ་གཏོར་ཆེ་བ་ཞིག་གཏའ་མར་བཟུང་ལ་ཆོས་སྐྱོང་ལ་ཁས་བླང༌། རྒྱུན་གཏོར་ཅི་འབྱོར་གཏོང་ལ་གཏོར་མ་ཕྱིར་མི་དབྱེ་བར་སྣོད་དུ་བསགས། འཇུག་དུས་གདོན་བགེགས་ལ་བརྔན་བྱིན་ལ་བཀའ་བསྒོ་ཞིང་བསྐྲད། གཞི་བདག་ལ་གཏོར་མ་བསྔོས་ལ་གནས་པོ་བཅོལ་ནས་རོགས་དན་ཞུ། བརྡའ་རྒྱུད་ལས། ཚང་སྤོས་རྨ་བྱའི་ཕྲུ་གུ་སྨིན་མི་བྱེད། །ཅེས་པས་རོ་སྙོམས་མ་ཐེམས་ཀྱི་བར་སྒྲུབ་གནས་མི་སྤོ། སྒྲུབ་པའི་དམ་བཅའ་ཡུན་ཐུང་དུ་བླངས་ཏེ་བར་མ་ཆད་པར་ཡུན་བསྲིང་ནས་སྒྲུབ་པས་བར་གཅོད་མི་འབྱུང་ཞིང་དངོས་གྲུབ་ཐོབ་པའི་དགོས་པ་ཡོད། སྔར་གྱི་བསྲུང་བྱ་ཕལ་ཆེར་དཀའ་ཐུབ་བར་པ་རང་རྒྱལ་གྱི་དུས་འདིར་བསྲུང་ཞིང་ཁྱད་པར་སྦྱོར་ལམ་གྱི་དུས་སུ་ཤིན་ཏུ་དམ་པར་བསྲུང་དགོས་སོ། །གང་ལྟར་ཡང༌། ཚེ་འདི་ལྟོས་ཀྱི་འདོད་པའི་བདག་འཛིན་གྱི་བློའི་ཞེན་འཁྲིས་རྦད་བཅད་ནས་རྟེན་སྡོམ་པ་ གསུམ་དང་ལྡན་ཞིང་རྣལ་འབྱོར་གྱི་རང་ས་དྲུག་མ་ཉམས་པའི་སྒོ་ནས་སྒྲུབ་པ་བོ་ཟགས་ལྟེམས་ལོག་གི་དྲི་མས་མ་གོས་པར་སྒྲུབ་ཅིང༌། གོས་ན་རང་རང་གི་བསལ་ཐབས་སོགས་ལམ་གྱི་གེགས་སེལ་བོགས་འདོན་རྣམས་སྔར་བཤད་པ་ལྟར་སྐབས་བབས་སུ་སྦྱར་ནས་ལམ་གྱི་ཚར་ཚད་མཐར་མ་ཕྱིན་གྱི་བར་དུ་ས་སྡེ་བཙུགས་ལ་བསྒྲུབ་པར་བྱའོ། །དེ་ནས་གཅིག་ལ་གཅིག་ནི་དཔའ་ཆེན་གྱི་དུས་བདག་གཏོད་ཀྱི་སྒྲུབ་པ་མཐར་ཕྱིན་ནས་གཞན་དོན་ལ་འཇུག་པའོ། །ཡང་རྟེན་འབྲེལ་མི་འཆར་ཞིང་སྒྲུབ་པ་པོ་ཟགས་སུ་སོང་བ་དང༌། དྲི་མས་ཐེམས་པ་ལ་སོགས་པའི་དུས་སུ་རང་ཁྲུས་བྱས་ནས་རྟེན་འབྲེལ་ཁང་པར་ཞུགས་ལ། དཀོན་མཆོག་ལ་མཆོད་པ་ཕུལ། བླ་མ་ལ་གསོལ་བ་གདབ། དེ་ནས་ཐུན་ལ་ཞུགས་ནས་ལམ་ལྔ་ལམ་གསུམ་གང་བྱེད་ཀྱང༌། ལམ་ལྔ་གསོ་བའི་སྔགས་དང་རྟེན་འབྲེལ་འཆར་བྱེད་ཀྱི་སྔགས་ཅི་རིགས་པ་དང༌། སྐབས་སྐབས་སུ་རྟེན་འབྲེལ་སྙིང་པོ་དང༌། མུ་ནེའི་སྙིང་པོ་ཡང་བཟླ་ཞིང༌། དེའི་དུས་སུ་སྟོན་པའི་སྐུའམ་མུ་ནེའི་སྔགས་རྩིག་ལྡེབས་ལ་འབྲི་བར་བཤད་ལ། ཁང་པའི་ནང་དུ་མི་གཞན་མི་གཏོང་ངོ༌། །ཞི་བྱེད་ཀྱི་ཁྲིད་ཡིག་བདུད་རྩིའི་ཉིང་ཁུ་ལས་བཀའ་བབས་ཕྱི་མ་ལམ་ལྔའི་ཁྲིད་ཡིག་འཕྲོས་དོན་དང་བཅས་པ་བཤད་པའི་ལེ་ཚན་ནོ། །ཞེས་ཞི་བྱེད་བཀའ་བབས་གསུམ་གྱི་ཁྲིད་རྒྱུན་གང་བཞུགས་ཕྱོགས་གཅིག་ཏུ་བསྡེབས་ནས་བཀླགས་ཆོག་ཏུ་བཀོད་པའི་ཁྲིད་ཡིག་བདུད་རྩིའི་ཉིང་ཁུ་ཞེས་བྱ་བ་འདི་ཡང་གཉོས་ཀྱི་དགེ་སློང་རྨོངས་པ་དྷརྨ་ཤྲཱིས་ཉིས་བྲིས་སྤངས་ཏེ་ཨོ་རྒྱན་སྨིན་གྲོལ་གླིང་གི་ཆོས་གྲྭར་ཟིན་ཐུན་དུ་སྤེལ་བའོ། །འདིས་ཀྱང་བསྟན་པ་དང་སེམས་ཅན་ལ་ ཕན་པ་བླ་ན་མེད་པའི་རྒྱུར་གྱུར་ཅིག །དར་རྒྱས་འཕེལ།། །།