DNZ-01-KA-005

Previous Text Back to Volume PageNext Text

Wylie title	ma mo gsang ba las kyi thig le	Rigpe Dorje Publications, 2024
Location	gdams ngag rin po che'i mdzod Volume 1, Text 5, Pages 139-151 (Folios 1a1 to 7a3)
Author	པདྨ་འབྱུང་གནས་
Citation	Pad+ma 'byung gnas. Ma mo gsang ba las kyi thig le. In Gdams ngag rin po che'i mdzod, Vol. 1: 139-151. Kalimpong: Rigpe Dorje Publications, 2024.
Side notes	Recto: gsang ba la thig   Verso: rnying ma'i skor
More details More details
Genre	Activity Practices - las tshogs
Deity	ma mo

Tibetan Text

[edit]

༄༅། །མ་མོ་གསང་བ་ལས་ཀྱི་ཐིག་ལེ་ཞེས་བྱ་བ་བཞུགས་སོ། །

སློབ་དཔོན་པདྨ་སཾ་བྷཱ་བའི་ཐུགས་དམ་མངའ་བདག་བཙད་པོ་ལ་གནང་བའོ། །

༄༅། །འདི་ལ་གསུམ་སྟེ། ཀླད། གཞུང༌། མཇུག་གོ །གཞུང་ལ་གསུམ། གཞི། ལམ། འབྲས་སོ། །མཇུག་ལ་གཉིས་ཏེ། ལུང་བསྟན་པ་དང༌། མཚན་བསྟན་པའོ། །དཔལ་དཀྱིལ་འཁོར་གྱི་གཙོ་བོ་བཅོམ་ལྡན་འདས། ལྡན་ཆེན་པོ་ཀུན་ཏུ་བཟང་པོ་ཧེ་རུ་ཀ་དང༌། མཁའ་འགྲོམའི་ཚོམ་བུ་ཚོགས་བཅས་ལ། །སྒོ་གསུམ་གུས་པས་རྣམ་པར་བཏུད་མཇལ་འདྲེན་ཡེ་ཤེས་ཀྱི་དེ་ཕྱག་འཚལ་ལོ། །མཁའ་དགུ་དབྱིངས་དང་ཡེ་ཤེས་ཀློང་དགུ་དབྱེར་མེད་དུ་གནས་པའི་པའི། །མཁའ་འགྲོ་མའི་ཚོགས་ཀྱི་རྣམ་གྲངས་དྲུག་ཅུ་རྩ་བརྒྱད་ཀྱི། །གཙོ་མོར་གྱུར་པ་ཡུམ་སྲིད་པ་བདེ་འགྲོའི་སྤྱི་དོན་གཏན་ལ་དབབ་པ་ལ་གསུམ། ཐུགས། །གནས་ལུགས་གཞི་དང༌། ཐབས་ལམ་དང་འབྲས་བུ་མངོན་གྱུར་པའོ། །གནས་ལུགས་ནི་བྱང་ཆུབ་སྙིང་པོའི་དོན་ཡིན་ཏེ། །དུས་གསུམ་གྱི་སངས་རྒྱས་ ཁམས་གསུམ་སེམས་ཅན་གཉིས་མེད་ཀྱི་ལམ་པ་རྣམས་ཀྱི་ཡུམ། །དུ་གྱུར་པས། དབྱིངས་དང་ཡེ་ཤེས་གཉིས་སུ་མེད་པའི་སྲས། བདེ་ཆེན་རང་བྱུང་གི་ཡེ་ཤེས་སྤྲོས་པ་ཐམས་ཅད་དང་བྲལ་བའི་དོན་དེ་འབྱུང་བའི་གནས། ། ཡིན་བསམ་མོ། །མ་མོ་ཐུགས་ཀྱི་ཐིག་ལེ་ཞེས་སུ་བཤད། །གཉིས་པ་ཐབས་ནི་ལམ་ཡིན་རྣམ་གསུམ་སྟེ། །སྒོམ་གྱི་སྔོན་འགྲོ་དང་། དངོས་གཞི་དང་རྗེས་ཤེས་སོ། ། སྔོན་འགྲོ་ལ་སྤྱི་དང་ཁྱད་པར་གཉིས་སུ་བསྟན་ཏེ། །སྤྱི་ནི་ཕྱི་བུམ་དབང་དང༌། ནང་དམ་རྫས་ཀྱི་དབང་དང༌། གསང་བ་ཤེས་རབ་ཡེ་ཤེས་ཀྱི། ཡི། །དབང་རྣམས་སྔོན་དུ་རྫོགས་པར་ཐོབ་པའོ༑ ༑ཁྱད་པར་གྱི་སྔོན་འགྲོ་ལ་འཁོར་ལོ་རྣམ་པ་གཉིས་ཀྱིས་བསྟན་ཏེ། །བསྲུང་བ་དང་ནི་རྣམ་རྟོག་སྦྱང་བའོ། །ཕྱི་ནང་གསང་བའི་བར་ཆོད་བསྲུང་བ་མཚམས་ཀྱི་འཁོར་ལོ་ནི། ། ཐབས་དང་ཚད་དང་དགོས་ཆེད་དོ། །ཐབས་ནི་རང་གི་ལུས་དང༌། སེམས་ལ། །གནས་པའི་རྩ། ཁྲག །དྲོད། དབུགས། རྣམ་པར་ཤེས་པའི་དྭངས་མ་རྣམ་པ་ལྔ། །རིགས་ཀྱི་ཁྲོ་མོ་ལྔར་གསལ་བར་བསྒོམ་སྟེ། །དེ་ལྟར་གསལ་བར་གྱུར་པ་དང༌། ཕར་འགྲོ་བ་དང་ཚུར་འོང་བ་དང་འགྲོ་འོང་མེད་པར་གནས་པའི་ཐབས་ཀྱིས་བར་ཆད་བསྲུང༌བར་བྱའོ། །། །ཚད་ནི་ཐུན་གྱི་ཚད་དང་བརྟན་པ་ ཐོབ་པའི་ཚད་གཉིས་ཡིན་སྟེ། །དང་པོ་ཐུན་ནི་རབ་འབྲིང་ཐ་མ་ཡིས། །བཅུ་དྲུག་བརྒྱད་དང་བཞི་བར་བསྒོམ། །བརྟན་པ་ཐོབ་པའི་ཚད་ནི། གསལ་བ་གསུམ་དང༌ལྡན་པ་ཡིན་ཏེ། །གཟུགས་སུ་སྣང་བ་ཐམས་ཅད་སྐུར་གསལ་བ་དང་སྒྲ་གྲགས་པ་ཐམས་ཅད་གསུང་དུ་གསལ་བ་དང་སེམས་ཏིང་ངེ་འཛིན་གྱི་དཀྱིལ་འཁོར་དུ་གསལ་བའོ། །དགོས་ཆེད་ནི། ཕྱི་སྣང་བ་དང༌། ནང་ཕུང་པོ་དང༌། གསང་བ་རྣམ་པར་རྟོག་པ་ཡི། །བར་ཆད་གསུམ་པོ་དང་ལས་གྲོལ་བར་བཤད། །རྣམ་རྟོག་སྦྱང་བར་བྱ་བའི་འཁོར་ལོའང༌གསུམ་སྟེ། །ཐབས་དང་ཚད་དང་དགོས་པ་སྟེ། །ཐབས་ནི་ཕྱི་སྣང་བ་དང༌། ནང་ཕུང་པོ་དང༌། གསང་བ་རིག་པ་ཡི། །རིག་པའི་རྩལ་སྦྱོང་རྣམ་པ་གསུམ་གྱིས། །ཕྱི་ནང་གསང་བའོ། །དངོས་པོ་གསུམ་ལ་ཞེན་པ་ཡི། །རྣམ་རྟོག་ཕྲ་རགས་ཐམས་ཅད་ཆོས་ཀྱི་དབྱིངས་སུ་སྦྱང༌། །ཚད་ནི་ཐུན་གྱི་ཚད་དང་བརྟན་པ་ཐོབ་པ་གཉིས་ཡིན་སྟེ། །ཐུན་ནི་རྣལ་འབྱོར་པ་རབ་འབྲིང་ཐ་མ་ཡིས། །བསྲུང་བའི་གོ་ཆ་བཞིན་ཏུ་བསྒོམ། །རབ་བཞི་འབྲིང་བརྒྱད་ཐ་མ་བཅུ་དྲུག་ཏུ་བྱས་ལ། བརྟན་པ་ཐོབ་པའི་ཚད་ནི་ཕྱི་ནང་གསང་བ་ཡི། །རྟོག་པ་གསུམ་གྱི་མཐའ་ལས་གྲོལ་བ་ཡིན། །དགོས་ཆེད་ནི་རྣལ་འབྱོར་པའི་ཉམ་ཆག་ཐམས་ཅད་སྐོང་བ་དང༌། །བླ་མ་དང་ཡི་དམ་གྱི་བྱིན་རླབས་རང་གི་རྒྱུད་ལ་འཇུག་པའོ༑ ༑གཏུམ་མོ་དངོས་གཞི་བསྒོམ་པའི་རིམ་པ་ནི། །སྤྱི་དོན་གསུམ་གྱིས་སྟོན་ཏེ། དང་པོ་རླུང་སེམས་བྲིད་པར་བྱ་བ་དང་བར་དུ་རླུང་སེམས་གཞུན་པ་དང༌། །ཐ་མ་གཏུམ་མོ་ལམ་དུ་བསླང་བའོ། །དང་པོ་རླུང་སེམས་བྲིད་པ་བྱ་བ་ལ། རྣམ་ གཉིས་ལས། །བྲིད་པ་རླུང་ནི་ཟས་བཅུད་ཅན་དང་སྤྱོད་ལམ་དལ་བ་དང༌། །འོག་རླུང་ལྟེ་བར་འཇམ་པར་གཟུང་བའི་ཐབས་ཀྱིས་བྲིད་པ་སྟེ། །རྟགས་རབ་འབྲིང་ཐ་མ་གསུམ་འཆར་བའོ། །སེམས་ཉིད་བྲིད་པ་ནི། གོ་ཆ་དང་པོ་ཚད་དང་བཅས་པ་ དང༌༑ ༑བར་པ་དང༌ཐ་མ་ཚད་དང་བཅས་པ་དག་གིས་སོ། །བར་དུ་རླུང་སེམས་གཞུན་པ་ལ་རྣམ་གཉིས་ཏེ། །རྩ་རླུང་གནད་ལ་དབབ་པ་དང༌། །རིག་པ་ལམ་དུ་གཞུག་པའོ། །རྩ་རླུང༌གནད་ལ་དབབ་པ་ལ་ཐབས་དང་ཚད་དང་ནི། ། གནད་ལ་ཕེབས་པའི་དགོས་པ་དག་གིས་ཤེས་པར་བྱ། །དེ་ལས་དང་པོ་རྩ་རླུང་གནད་ལ་དབབ་པའི་ཐབས་ནི་གསུམ་སྟེ། ལུས་དང་རྩ་དང་རླུང༌། །གནད་ལ་དབབ་པར་བསྟན་པ་སྟེ། །དང་པོ་ལུས་གནད་ལ་དབབ་པ་ལ་བདུན་ཏེ། ལུས་ལ་བདེ་བ་བསྐྱེད་པ་ནི་རྐང་པ་རྡོ་རྗེའི་སྐྱིལ་ཀྲུང་དུ་བྱས། ལག་པས་དྲོད་ཀྱི་མེ་ལོང་བསྡམས་པས་དྲོད་བསྐྱེད་པ་དང༌། །རླུང་སོར་གཞུག་པ་ནི་འཁོར་ལོ་ཉི་ཤུ་རྩ་བརྒྱད་གནད་ལ་དབབ་པ་དང༌། དར་ཡུག་ནམ་མཁའི་མཐོངས་སུ་བསྟན་པ་དང༌། ཉི་ཟླའི་དལ་བསྐོར་བའི་ཐབས་དང་རླུང་ཐམས་ཅད་རང་སོར་ཚུད་པར་བྱེད་པ་ཡིན། མི་རྟོག་བསྐྱེད། །པ་ནི་དཔག་བསམ་ཤིང་གི་ལོ་མ་དགུག་པ་དང༌། འདོད་ཆགས་ཀྱི་རྩ་གནད་ལ་བོར་བ་དང༌། ཉི་ཟླ་རི་བོའི་རྩེ་ལ་མནན་པ་སྐྱེ་བ་ཡིན། དྲོད་དང་བདེ་བ་མྱུར་བར་བྱེད་པའི་ལུས་གནད་ནི་དང་པོར་བསྡམས། བར་དུ་སྤྲུགས། ཐ་མར་སྒྲིམས་པའི་ཐབས་ དང་རླུང་ནད་གཞོམ་པ་ནི་དཔུང་མགོ་དྲང་པོར་ཚིགས་དཀྲུག །ཡུལ་ལྗོངས་དཀྲུག །ལུས་བྱིང་དུ་བསྒུལ་ཞིང་བརྡེག་པའི་ཐབས་དང་། །དྲོད་དང་བདེ་བ་གསལ་བར་བྱེད་པ་ལུས་ཀྱི་གནད། །ནི་ཐབས་དེ་རྣམས་ཐམས་ཅད་ཀྱིས་སོ། །གཉིས་པ་རྩ་གནད་ལ་དབབ་པ་ལ་བཞི་ལས། དང་པོ་འཁོར་ལོ་དྲུག་བརྩེགས་ༀ་དང་། ཨཱཿ དང་། ཧཱུྃ་དང༌། ཀྵ་དང༌། རཾ་དང༌། ཡྃ་གི་འཁོར་ལོའི་སྲོག་ཤིང་གསུམ། །ནི་རོ་མ་དང་རྐྱང་མ་དང་ཀུན་འདར་མའོ། །དེ་ལས་རོ་མ་ལ་ཆོས་དྲུག་དང་ལྡན་ཏེ། དབྱིབས་སྦྲུལ་གྱི་ཕྲུ་གུ་ལྟ་བུ་རྩ་བ་ཟླུམ་པ། སྐེད་པ་བགས་ཀྱིས་ལྡིར་བ། རྩེ་མོ་ཕྲ་བའོ༑ ༑སྦོམ་ཕྲ་ནི་རྟ་རྔ་སུམ་སྒྲིལ་ཙམ་མོ། །གནས་ནི་སྒལ་ཚིགས་པའི་སྟེ་ཀུན་འདར་མའི་གཡས་ན་གནས་སོ། །རྟེན་ནི་དྲི་ཆུ་དང་ཞེ་སྡང་གི་རྟེན་བྱེད་དོ། །ལས་ནི་ཡེ་ཤེས་ཀྱི་སྒོ་འཆར་བར་བྱེད་པའོ། །རྐྱང་མའི་དབྱིབས་དང་སྦོམ་ཕྲ་ནི་གོང་མ་དང་མཐུན་ནོ། །ཁ་ཅིག་ནི་སྨུག་ལ་དབལ་དམར་བའོ། ། གནས་ནི་སྒལ་ཚིགས་པའི་སྟེ་ཀུན་འདར་མོའི་གཡོན་ན་གནས་སོ། །རྟེན་ནི་རཀྟ་དང་འདོད་ཆགས་ཀྱི་རྟེན་བྱེད་དོ། །ལས་ནི་དབྱིབས་ཀྱི་དོན་གསལ་བར་བྱེད་དོ། །ཀུན་འདར་མའི་དབྱིབས་ནི་རག་དུང་གྱེན་དུ་བསླང་བ་ལྟར་གནས་སོ། །ཁ་དོག་སྨུག་ལ་དབལ་མཐིང་པའོ། །སྦོམ་ཕྲ་ནི་རྟ་རྔ་རྐྱང་མ་ཙམ་མོ༑ ༑གནས་ནི་རོ་རྐྱང་གཉིས་ཀྱི་དབུས་ན་གནས་སོ། །རྟེན་ནི་བྱང་སེམས་དང་གཏི་མུག་གི་རྟེན་བྱེད་དོ། །ལས་ནི་དབྱིངས་དང་ཡེ་ཤེས་གཉིས་སུ་མེད་པའི་དོན་གསལ་བར་བྱེད་དོ། །ལྗོན་པའི་ཚལ་གྱིས་རྒྱས་པ་ནི་ཙཀྲ་དྲུག་གི་རྩ་འདབ་ཡིན་ཏེ། གདུགས་དང་ཡུ་བ་དང་འཁོར་ལོ་དང་ཉི་མའི་འོད་ཟེར་དང་དྲག་པོའི་ཨེ་ཁུང་དང༌། འོད་མའི་གཞུ་བདུངས་པ་ལྟ་བུའི་རྣམ་པ་དང་ལྡན་པ་ཡིན། སྟེ། །སྡོང་པོ་དང་ཡལ་ག་དང་ལོ་མ་དང་མེ་ཏོག་གི་ཚུལ་ལོ། །ཡན་མན་གཉིས་སུ་ཟུག་པ་ཡིས། །ཞེས་པ་ནི་རོ་མ་དང་རྐྱང་མའི་ཡར་སྣ་སྨིན་མའི་ནང་ཟུར་གཉིས་ལ་བྱ་རོག་གི་སྡེར་མོ་ལྟར་ཟུག་གོ །མར་སྣ་མེ་རླུང་གཉིས་ཀྱི་མཚམས་སུ་འདམ་གྱི་ཕུར་པ་ལྟར་ཟུག་གོ །ཀུན་འདར་མའི་ཡར་སྣ་སྨིན་མཚམས་སུ་པདྨ་ཁ་འབུས་པ་བཞིན་ཟུག་གོ །མར་སྣ་རོ་རྐྱང་གཉིས་དང་འབྲེལ་ནས་ཡོད་དོ། །རྩ་དེ་རྣམས་ཀྱིས་ལུས་ཀྱི་རྟེན་བྱེད། སྲོག་གི་ཟུངས་འཛིན་པས་རྩ་གནད་ལ་ དབབ་པའི་དེ་ཁོ་ན་ཉིད་དོ། །དང་པོ་རླུང་གནད་ལ་དབབ་པ་ལ་བཞི་ལས། དང་པོ་རླུང༌དབང་དུ་བྱེད་པ་ལ་གཉིས་ཏེ། སྟེང་རླུང་དབང་དུ་བྱ་བ་དང༌། འོག་རླུང་དབང་དུ་བྱ་བའོ། །སྟེང་རླུང་ལ་གཉིས་ཏེ། རླུང་སྦྱང་བ་དང༌། རླུང་བུམ་པར་གཞུག་པའོ། །སྦྱང་བ་ནི་ཕྱིར་འགྲོ་ཚད་དུ་བཏང༌། ནང་དུ་འདྲོངས་ཚད་དུ་དྲང་ངོ༌། །བུམ་པར་གཞུག་པ་ནི་གཞི་འཛིན་པར་བྱེད་པའི་ལྟོ་བ་རུ་འབྱུང་འཇུག་མེད་པར་ཐུབ་ཐང་དུ་གཟུང་བའོ། །འོག་རླུང་ལའང་གཉིས་ཏེ། རླུང་སྦྱང་བ་དང༌། བུམ་པར་གཞུག་པའོ། །སྦྱང་བ་ནི་ཨ་ལོང་ནས་ལྟེ་བའི་བར་དུ་འགྲོ་ལྡོག་བྱེད་པའོ། །བུམ་པར་གཞུག་པ་ནི་དྲོད་ཀྱི་མེ་ལོང་གི་སྟེང་དུ་རྩོལ་བ་བསྐྱེད་ལ་ཐུབ་ཚད་བཟུང་བར་བྱའོ། །དང་གཉིས་པ་རྒྱས་པར་བྱ་བ་ལ་གསུམ་སྟེ། རོ་མ་ལ་བཙུད་ལ་ཡེ་ཤེས་ཆེན་པོའི་སྣང་བ་རྒྱས་པར་བྱེད་པ་དང༌། རྐྱང་མ་ལ་བཙུད་ལ་བདེ་བ་ཆེན་པོའི་སྟོང་ཉིད་རྒྱས་པར་བྱ་བ་དང༌། ཀུན་འདར་མོ་ལ་བཙུད་ལ་གཉིས་སུ་མེད་པའི་ཆོས་ཉིད་རྒྱས་པར་བྱ་བའོ། །རྩ་རོ་མ་ལ་རླུང་བཟུང་བ་ནི་སྣ་བུག་གཡས་པ་ནས་རླུང་རྒྱུ་བའི་དུས་སུ་འོག་རླུང་བཛྲ་བོ་ཏི་ས་མ་ཡ་ཧཱུྃ་གིས་དྲག་པོར་བཟུང༌། སྟེང་རླུང་རྡོ་རྗེ་རི་རབ་ཀྱི་སྦྱོར་བས་འཇམ་པར་གཟུང༌། རླུང་དེ་གཉིས་གཞི་འཛིན་པའི་ལྟེ་བར་ཁ་སྤྲད་ལ་ཅུང་ཞིག་བསྒོམ། དེ་ནས་ཁམས་གསེང་ལ་དྲོད་ཀྱི་མེ་ལོང་གི་སྟེང་དུ་ཕབ་ལ་བསྒོམ། དེ་ནས་ཁམས་གསེང་ལ་མེ་རླུང་བརྩིགས་པའི་ཙཀྲ་ལ་ཕབ་ལ་བསྒོམ། དེ་ནས་རླུང་སེམས་འདུས་པའི་རང་བཞིན་འོད་དཀར་པོའི་ཐིག་ལེ་སྲན་མའི་གའུ་ཙམ་དུ་གྱུར་ནས། རྩ་རོ་མའི་ནང་ན་ཡར་རྩེག་ཆི་ལི་ལི་སོང་བས། རྩ་དེ་སྦྲུལ་གྱི་ཕྲུ་གུ་འོ་མས་གསོས་པ་བཞིན་ཏུ་དཀར་ལྡང་གིས་སོང་ནས། ཕྱི་ནང་དང་སྒྲིབ་གཡོགས་མེད་པར་གསལ་དྭངས་ཀྱིས་སོང་བར་བསྒོམ་མོ། །རྩ་རྐྱང་མ་ལ་རླུང་གཟུང་བ་ནི། རླུང་སྣ་བུག་གཡོན་ནས་རྒྱུ་བའི་དུས་སུ། འོག་རླུང་བཛྲ་ཀྲོ་ཏི་ཤྭ་རི་བ་ག་པད་མ་རྒྱ་ཧཱུྃ་གིས་དྲག་པོར་གཟུང༌། སྟེང་རླུང་པདྨ་ཁ་ འཐུམས་ཀྱི་སྦྱོར་བས་འཇམ་པར་གཟུང༌། རླུང་དེ་གཉིས་གཞི་འཛིན་པའི་ལྟེ་བར་ཁ་སྦྱར་ལ་ཅུང་ཞིག་བསྒོམ། དེ་ནས་ཁམས་གསེངས་ལ་དྲོད་ཀྱི་མེ་ལོང་གི་སྟེང་དུ་ཕབ་ལ་བསྒོམ་མོ། །དེ་ནས་ཁམ་གསེངས་ལ་མེ་རླུང་བརྩེགས་པའི་འཁོར་ལོ་ལ་ཕབ་ལ་བསྒོམ། དེ་ནས་རླུང་སེམས་འདུས་པའི་རང་བཞིན་འོད་དམར་པོའི་ཐིག་ལེ་སྲན་མའི་གའུ་ཙམ་དུ་གྱུར་ནས་རྩ་རྐྱང་མའི་ནང་ན་ཡར་རྩེག་ཆི་ལི་ལི་སོང་བས། རྩ་དེ་དར་དཀར་གྱི་སྐུད་པ་མཚལ་ཆུ་ནས་དྲངས་པ་བཞིན་ཏུ་དམར་ལྡང་གིས་སོང་ནས། ཕྱི་ནང་དང་སྒྲིབ་གཡོགས་མེད་པར་དྭངས་སང་གིས་སོང་བར་བསྒོམ། རྩ་ཀུན་འདར་མ་ལ་རླུང་གཟུང་བ་ནི། རླུང་སྣ་བུག་གཉིས་ནས་རྒྱུ་བའི་དུས་སུ། འོག་རླུང་ཧཱུྃ་གཏུམ་ཆོད་ཀྱིས་དྲག་པོར་གཟུང༌། སྟེང་རླུང་ཧཱུྃ་ནས་འདྲེན་གྱིས་འཇམ་པར་གཟུང༌། རླུང་དེ་གྲ་གཞི་འཛིན་པའི་ལྟེ་བར་ཁ་སྤྲད་ལ་ཅུང་ཞིག་བསྒོམ། དེ་ནས་ཁམས་གསེངས་ལ་དྲོད་ཀྱི་མེ་ལོང་གི་སྟེང་དུ་བབ་ལ་བསྒོམ། དེ་ནས་ཁམས་གསེངས་ལ་མེ་རླུང་བརྩེགས་པའི་འཁོར་ལོར་བབ་པ་བསྒོམ། དེ་ནས་རླུང་སེམས་འདུས་པའི་རང་བཞིན་འོད་དཀར་དམར་མཐིང་གསུམ་འདྲེས་པའི་ཐིག་ལེ་སྲན་མའི་གའུ་ཙམ་དུ་གྱུར་ནས། རྩ་ཀུན་འདར་མ་ན་ཡར་ལ་རྩེག་ཆི་ལི་ལི་སོང་བས། རྩ་དེ་བྱི་རང་གི་རྒྱུ་མ་དངུལ་ཆུས་བཀང་བ་ལྟར་ཅི་དྲག་ལ་གདབ། དྲོད་དང་བདེ་བ་མྱུར་དུ་སྐྱེ། རླུང་གི་ནད་དུ་མི་འགྱུར་བའི་དགོས་པ་ཡོད་དོ། །རྒྱས་མ་ཐེབས་ན། དེ་ལས་ཟློག་པའི་སྐྱོན་དུ་འགྱུར་རོ། །པ་དང་། །གསུམ་པ་རླུང༌ཞི་བར་བྱེད་པ་ལ་གསུམ་སྟེ། རབ་ཚངས་པའི་བུ་གའི་སྦྱོར་བས་ཞི་བར་བྱ་བ་དང༌། ཐ་མ་ན་ཀློད་པའི་སྦྱར་བས་ཞི་བར་བྱའོ༑ ༑རབ་ནི་དང་པོ་རླུང་སེམས་གཉིས་སུ་མེད་པར་དྲིལ་ལ་དྭངས་སྙིགས་འབྱེད་པའི་འཁོར་ལོར་ཐུབ་ཐང་གིས་མནན། དེ་མི་ཐུབ་པར་གཟོ་ཙམ་ན་རྩོལ་བ་དྲག་པོ་ལུས་གཅུ་བ་དང་བསིག་པ་དང་རྔུབ་པའི་སྦྱོར་བ་བྱ། དེས་ཀྱང་མི་ཐུབ་པར་གཟོ་ཙམ་ན། ཚངས་པའི་བུ་ག་ནས་ཡར་ལ་རླུང་སྔོ་བ་ མྱུར་བ་ཚ་བའི་ངད་དང་བཅས་པ་ཆི་ལི་ལི་སོང་བས་ཞི་བར་བསྒོམ། འབྲིང་ནི་གོང་མ་ལྟར་བྱས་ལ་མི་ཐུབ་བར་གཟོ་ཙམ་ན་བ་སྤུའི་བུ་ག་ཐམས་ཅད་ནས་གོང་མ་ལྟར་སོང་བས་ཞི་བར་བསྒོམ། ཐ་མ་ནི་གོང་མ་ལྟར་བྱས་ལ་མི་ཐུབ་པར་གཟོ་ཙམ་ན། ན་སའི་སྒོ་སློད་ལ་བཞི་ཆ་དང་ཕྱེད་དང་སུམ་གཉིས་ཙམ་ཁ་ཕྲི་ལ་བསྒོམ་པས། དང་ཡར་སྐྱེ་མར་བྲིའི་རིམ་པར་ཤེས་པར་བྱའོ། །བཞི་པ་རླུང༌དྲག་པོ་ཡིས། །ཚར་བཅད་པ་ནི་སེང་གེ་རྣམ་རོལ་གྱི་ཕྱག་རྒྱས་རླུང་གི་སྒོ་བཀག་ལ་ཙཀྲ་དྲུག་དང་པོར་ཚིགས་ཐམས་ཅད་དུ་རྣམ་ཤེས་རླུང་དང་སྦྲགས་ལ་དྲངས། དེ་ལྟར་ཐུབ་ཚད་དུ་བཟུང་བས་འཁོར་ལོ་སོར་ཚིགས་ཀུན་ཏུ་རྩེག་ཆི་ལི་ལི་སོང་བར་བསྒོམ། ལུས་ལ་ན་ཚ་ལ་སོགས་པ་ཡོད་པར་ཀྱང་རྣམ་ཤེས་རླུང་ཞོན་དྲངས་ལ་བ་སྤུའི་བུ་ག་ནས་ཡར་ལ་ནད་ཀྱི་རླངས་པ་ཕྱུ་རུ་རུ་སོང་བར་བསྒོམ་མོ། །འོག་རླུང༌དྲང་བ་དང་སྟེང་རླུང་མནན་པ་དང་བར་རླུང་དཀྲུགས་པ་དང༌། །གསུམ་ནི་རླུང་སེམས་སྦྱོར་བ་གསུམ་དང་ལྡན་པ་སྟེ་གནད་གཞི་ཀུན་ལ་འཇུག་པ་ཡིན་ནོ། །རླུང་གི་འགགས་དང་བྲལ་བ་ནི་ལུས་ལ་བཀུ་མཉེ་འཐགས་པར་བྱ། སྣ་སྒོར་རྒོད་བཞིན་དུ་བུད་རླུང་འཇམ་རིང་དུ་མནན་ལ་གཡས་དང་གཡོན་ཏུ་གཞུན་སྒལ་ཚིགས་ལེགས་པར་བསྲང་ལ་རླུང་ཕྱིར་དྲག་ཏུ་འཕང་བར་བྱས། ཙཀྲ་བཞི་ལ་བླ་མ་བསྒོམ་པ་ནི་རླུང་གི་གནད། །ཆག་ཚད་ལ་གཉིས་ཏེ། ཐུན་གྱི་ཚད་དང་བརྟན་པ་ཐོབ་པའི་ཚད་སྟེ། །ཐུན་ནི་རབ་འབྲིང་ཐ་མ་ལས། །ཐུན་གསུམ་དང་ཐུན་དྲུག་དང་ཐུན་དགུ་བར་བསྒོམ། །བརྟན་པ་ ཐོབ་པའི་ཚད་ལ་བཞི་སྟེ། ལུས་སྣུམ་པ་དང་མཉེན་པ་དང༌། འཇམ་པ་དང༌། །ལུས་ལ་གོས་ཀྱི་འཁྲི་བ་ཆོད་པའོ། །དགོས་ཆེད་ནི་ལུས་ཀྱི་དྲོད་དང་སེམས་ཀྱི་དྲོད། །ཐ་མ་ལ་རིམ་གྱིས་སྐྱེ་བ། དང་རྣལ་འབྱོར་པ་རབ་ལ། ཆིག་ཆར་དག་ཏུ་སྐྱེ། །བས་སོ༑ ༑རིག་པ་ལམ་དུ་གཞུག་པ་ལ་གསུམ་ལས། དང་པོ་བྱིང་བ་གསེང་བ་ནི། རླུང་སེམས་གཅིག་ཏུ་དྲིལ་ལ་ཙ་ཀུན་འདར་མ་ན་ཡར་ལ་དཀར་ཆི་ལི་ལི་དྲངས་ལ་ཚངས་པའི་བུ་ག་ན་ཡར་བཏོན་ལ་ཤེས་པ་ནམ་མཁའི་མཐོངས་སུ་བཞག་གོ །གཉིས་པ་རྒོད་པ་དགུག་པ་ནི། མེ་རླུང་འདུས་པའི་འཁོར་ལོ་ན་གཏུམ་མོ་སྦར་ཏེ་ཀྵ་དང་ཧཱུྃ་ལ་སོགས་པ་ཞུ་ནས་འཁོར་ལོ་བཞིའི་རྟོག་པ་ཆོས་ཉིད་དུ་སྦྱངས་ལ་བདེ་སྟོང་གི་ངང་ལ་ཕྲིལ་གྱིས་བསྒོམ་མོ། །དང༌། །གསུམ་པ་ལྐུགས་པའི་སྐྱོན་རྣམས་བསལ་བ་ནི་གནས་ལུགས་ངོས་མ་ཟིན་ན་སྣང་བ་ལ་སྟོང་པས་རྒྱས་གདབ། སྟོང་པ་ལ་སྣང་བས་རྒྱས་གདབ་ལ་གཉིས་མེད་ཀྱི་དོན་འབྱངས་པར། བྱས་ལ། །སེམས་པའི་ལྟ་སྟངས་ཀྱིས་སྣང་སྟོང་གཉིས་མེད་ཀྱི་དགོངས་པ་གསལ་གདབ་བོ། །བདེ་བ་བསྒོམ་པ་ནི་ཐིག་ལེ་འབར་འཛག་གི་གཏུམ་མོ་ཡིན། གསལ་བ་བསྒོམ་པ་ནི་འཁོར་ལོ་འོད་འབར་གྱི་གཏུམ་མོ་ ཡིན༑ མི་རྟོག་པ་བསྒོམ་པ་ནི་བདེ་གསལ་གཉིས་ལ་རྒྱས་འདེབས་པའི་གཏུམ་མོ་ཡིན།། །བདེ་གསལ་མི་རྟོག་པ་གསུམ་འདྲེས་པའི་ངང་ལས་གཞན་དུ་མ་གཡོས་མཉམ་པར་བཞག །པ་ནི་རིག་པ་ལམ་དུ་གཟུད་པའོ། །གཏུམ་མོ་ལམ་དུ་བསླང་བ་ནི། །དོན་གསུམ་སྟེ༑ ལམ་དུ་བླང་བའི། ཐབས་དང་ལམ་དུ་སློངས་པའི་ཚད་དང་ལམ་དུ་སློངས་པའི་དགོས་ཆེད་དོ། །དེ་ལ་དང་པོ་ལམ་སློངས་པའི་ཐབས་ཀྱིས་གནང་བ། རླུང་གི་འཁོར་ལོ་ནས། །ཡི་གེ་ཡཾ་ལས་ཡེ་ཤེས་རླུང་ལྔ་སྐྱེ་བ། རྡོ་རྗེའི་ཆད་པ་ལྡན་པ། ཁ་ཐོད་ཁའི་མཆོག་མ་དང་ལྡན་པའི་གཞུ་དྲག་ཏུ་བརྡུངས་ཏེ། གཞུ་དེ་ལ་རླུང་གི་འོད་ཟེར་ཕྱོགས་བཅུར་འཕྲོ་བ་དེས་སུམ་མདོའི་མེའི་འཁོར་ལོའི་རྃ་ལས། །ཤེས་རབ་ཡེ་ཤེས་མེའི་མདེའུ་འི་རང་བཞིན་གསལ་བ་བརྟན་པ་མྱུར་བ་ཕྱི་ནང་མེད་པ་དེ་ལ་ཡེ་ཤེས་ཀྱི་མེ་དམར་སེར་དུ་འཕྲོ་བ་རྣམ་པར་རྟོག་པ་ཐམས་ཅད་འཇོམས་པར་བྱེད་པའི་ཆོས་དང་ལྡན་པ། སྣང་བའི་རྫས་སུ་གྲུབ་ལ། རྟོག་པའི་རྫས་སུ་མ་གྲུབ་པ་རང་བཞིན་དག་པའི་བདེ་བ་ཆེན་པོ་ནི། ལས། །སྤྲོས་པའི་སྟོང་གསལ་མེའི་ཐིག་ལེ་དགུ་པོ་དེ་རྣམས་ཡི་གེ་ཀྵཿ ལས་གྱེན་དུ་འཕང༌ངོ་། ། འཕངས་པས་ཡི་གེ་ཀྵའི་འཁོར་ལོ་འོད་ཀྱི་རང་བཞིན་དུ་བཞུ་ནས་ཡར་འབར་ཞིང་མར་འཛག་པར་བསྒོམས། དེ་ནས་ཧཱུྃ་དང་ཨྃ་་དང་ༀ་གྱི་འཁོར་ལོ་ལའང་དེ་བཞིན་དུ་འབར་འཚག་བྱའོ། །ཆག་ཚད་ལ་གཉིས་ཏེ། ཐུན་གྱི་ཚད་དང་བརྟན་པའོ། །ཐོབ་པའི་ཚད། ཐུན་ནི་རབ་འབྲིང་ཐ་མ་སྟེ། །དྲུག་དང་བཞི་དང་གཉིས་པར་བསྒོམ། །བརྟན་པ་ཐོབ་པའི་ཚད་ནི། ལས་དང་ཡེ་ཤེས་ཀྱི། །གཏུམ་མོ་ལུས་དང་སེམས་ལ་འབར་བའོ། །གཏུམ་མོ་ལམ་དུ་སློངས་པའི་དགོས་ཆེད་ནི་དཀྱིལ་འཁོར་གྱི་གཙོ་བོ་དཔའ་ཆེན་པོ་དང༌ལྡན་པའི་རིགས་ལྔ་ཡེ་ཤེས་ལྔ་ཡི། །མཁའ་འགྲོའི་མ་མོའི་ཚོམ་བུ། ཚོགས་དང་ཀྱི་དཀྱིལ་འཁོར་དུ། །བཅས་པའི་ངོ་བོ་ཡེ་གདོད་མ་ཉིད་ནས་ལྷུན་གྲུབ་ཏུ་གནས་པའི་དོན། །དེ་ཉིད། རང་ལ་རྟོགས་པ་མངོན་གྱུར་དུ་འབར་བར་བྱེད་པའོ༑ ༑སྒོམ་པ་དག་གི་རྗེས་ཤེས་ནི་བསྒོམ་པའི་ཐུན་ཚོད་ཅིག་ཅིག་དག་ཏུ། །ཆེད་འཛིན་གྱི་རྟོག་པ་དང་བྲལ་བའི་བདེ་བ་ཡེ་ཤེས་རང་སྣང་གི་འཁོར་ལོ་མ་འགགས་པའི་གསལ་བ་རྩ་དང་རླུང་དང་བདེ་བ་ཙམ་དུའང༌མི་རྟོག་པའི། །ངང་ལ་རིག་པ་མཉམ་པར་བཞག་པར་བྱས་ནས་ནི། །ཕྱི་ནང་གསང་བའི་སྤྱོད་ཡུལ་ཀུན་དང་སྒོམ་དུ་བསྲེ་བར་བྱའོ།། །གསུམ་པ་གཏུམ་མོ་མངོན་ཏུ་གྱུར་པའི་འབྲས་བུ་ནི། །བདག་དོན་དང་གཞན་དོན་ལྷུན་གྱིས་གྲུབ་པ་སྟེ། །དོན་དམ་ངེས་པའི་སྐུ་ལྔ་དང་ གསུང་ལྔ་དང་ཐུགས། །ལྔ་དང༌། ཡོན་ཏན་ལྔ་དང༌ཕྲིན་ལས་རྣམ་པ་ལྔ། །སྟེ་ཉི་ཤུ་རྩ་ལྔ་པོ་དེ་རྣམས། རིག་པ་བྱང་ཆུབ་སེམས་ཀྱི་བདེ་ཀློང་དུ། །གཅིག་ཏུ་འཁྱིལ་པ་སྤྲོས་པ་དང་བྲལ་བ་ནི་བདག་གི་དོན། ཏོ། །།ཀུན་བཟང་ཧེ་རུ་ཀ་ཡི་ཐུགས་ སྤྲོས་པ་དང་བྲལ་བའི་ངང༌ལས་ནི། །བདག་དོན་ཐུགས་རྗེ་ཆེན་པོ་སྤྲུལ་པའི་ཡི་གེ་ཧཱུྃ་དུ་ཤར། ནས་ །ཧཱུྃ་གིས་འགྲོ་བ་རིགས་དྲུག་གི་སེམས་ཅན་ཐམས་ཅད་གྱི། །ཡུལ་ལྔ་དབང་པོ་ལྔའི་བག་ཆགས་ཀུན་གཞི་ལ་བཞག་ནས་ཡོད་པ་དེ། སྦྱོང་བར་བྱེད་པ་གཞན་གྱི་དོན། ཏོ། །།ཡེ་ཤེས་ཀྱི་མཁའ་འགྲོ་མ་དང༌། མ་མོའི་ཚོགས་སུ་གྱུར་པ་དེ་དག་ཐམས་ཅད་ཀྱི། །ཕྱི་ནང་གསང་བའི་རྒྱུད་ཆེན་རྒྱ་མཚོ་ལྟར་དཔག་པར་དཀའ་བ་མཐའ་ཡས་པར་བཞུགས་པའི། །དགོངས་པ་ཀུན་བསམ་གཏན་གྱི་མན་ངག་འདི་ལ་འདུས་པའི་ཕྱིར། གསང་བའི་བཅུད། །དུ་གྱུར་པའི་མན་ངག་འདི་རིག་པ་བྱང་ཆུབ་སེམས་ཀྱི་གཏེར་དུ་སྦ། །འོ་ཞེས་ཀུ་མཱ་ར་ལ་གདམས་སོ། །རྒྱ་གར་གྱི་ཡུལ་དུར་ཁྲོད་ཆེན་པོ་བརྒྱད་ཀྱི་ནང་ནས་བསིལ་བའི་ཚལ་གྱི་བྲག་ཕུག་དུ། ཨུ་རྒྱན་གྱི་མཁན་པོ་ ཆེན་པོ། པདྨ་འབྱུང་གནས་ལ། དཔལ་ལྡན་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་དངོས་སུ་ལུང་བསྟན་པའི་དགོངས་ཉམས། འདི་ནི་ཕྱི་རབས་ཀྱི་རྣལ་འབྱོར་པ་རྣམས་ཀྱི་ཡིད་བཞིན་ནོར་བུ་རིན་པོ་ཆེ་ཉིད་དོ། །མཁའ་འགྲོ་མའི་ སྙན་བརྒྱུད་བསམ་གཏན་སྒྲོན་མ་ཞེས་བྱ་བ་རྫོགས་སོ།། །།ཆོས་འདི་ལ་བཞི་སྟེ། མཚན་དང༌། ཕྱག་དང༌། གཞུང་དང༌། མཇུག་གོ །མཚན་ལ་གཉིས་ཏེ། རྒྱ་གར་གྱི་མཚན་དང༌། བོད་ཀྱི་མཚན་ནོ། །གཞུང་ལ་གསུམ་སྟེ། ཆོས་རྣམས། ཤེས་པར་བྱ་བའི་ཡུལ་དང༌། ཉམས་སུ་ བླང་བའི་ཐབས་དང༌། མངོན་དུ་གྱུར་པའི་འབྲས་བུའོ། །ཉམས་སུ་བླང་བའི་ཐབས་ལ་དྲུག་སྟེ། རྒྱལ་བའི། གནས་ལུགས་ངོ་སྤྲོད་པ་དང༌། ངོ་བོ་ཉིད། འཕྲོད་པའི་རྟགས་དང༌། ཚད་དང༌། རིག་པ་བཞག་ཐབས་ དབྱིངས་ཀྱི། དང༌། ཉམས་དང༌། དེ་ཐོག་ཏུ་གནས་སུ་མ་བཏུབ་ན་བཅོས་ཐབས་བསྟན་པའོ། །ཉམས་ལ་གསུམ་སྟེ། དབྱིངས་ཀུན་ཏུ་བཟང་ རིགས་དང༌། མོའི་ཉམས་དང༌། ཡེ་ཤེས་ཀུན་ཏུ་ དབྱིངས་ཀྱི། བཟང་མོའི་ཉམས་དང༌། དབྱིངས་ཡེ་ཤེས་དབྱེར་མེད་བདེ་བ་ བདེ་གསལ། ཆེན་པོའི་ཉམས་སོ། །འབྲས་བུ་ལ་གཉིས། རྣམ་གྲངས་སུ་ ཀུན་དང་། དབྱེ་བ་དང༌། ངོ་བོ་ཉིད་དུ་བསྡུ་ཚུལ་ལོ། །མཇུག་གི་དོན་ལ་གཉིས། ཟུང་ཅིག་ བླང་དོར། པར་གདམས་པ་དང༌། དགེ་ ཆོས་དབྱིངས། བ་བསྔོ་བའོ། །བསྡུས་དོན། ཨྠིྀ༔།། །།