DNZ-10-THA-024-001

Previous TextNext Text

Wylie title	skyes mchog 'ba' ra ba rgyal mtshan dpal bzang gis mdzad pa'i bla sgrub phyag chen chos drug bcas mdor bsdus snying por dril ba	Rigpe Dorje Publications, 2024
Location	gdams ngag rin po che'i mdzod Volume 10, Text 24, Subtext 1, Pages 479-517 (Folios 1a1 to 20a1)
Author	འཇམ་གླིང་པ་བློ་གྲོས་ཆོས་འཕེལ་
Citation	'jam gling pa blo gros chos 'phel. Skyes mchog 'ba' ra ba rgyal mtshan dpal bzang gis mdzad pa'i bla sgrub phyag chen chos drug bcas mdor bsdus snying por dril ba. In Gdams ngag rin po che'i mdzod, Vol. 10: 479-517. Kalimpong: Rigpe Dorje Publications, 2024.
Side notes	Recto: gter gzhung   Verso: bka' brgyud skor
More details More details
Tertön	འཇམ་གླིང་པ་བློ་གྲོས་ཆོས་འཕེལ་ (Blo gros chos 'phel)
Source Author(s)	འབའ་ར་བ་རྒྱལ་མཚན་དཔལ་བཟང་ (rgyal mtshan dpal bzang)
Genre	Guru Yoga Texts - bla ma'i rnal 'byor  ·  Root Treasure - gter gzhung
Colophon	ཅེས་པའི་ཟབ་ཆོས་འདི་ཉིད་ཁོ་བོ་དྷརྨའི་མིང་ཅན་གྱིས་རང་ལོ་སོ་བཞི་ལོན་པ། ས་ཕོ་སྟག་གི་ལོ་ཧོར་ཟླ་དགུ་པའི་ཚེས་བཅུའི་ཉིན་ཤངས་འབའ་ར་དོན་གྲུབ་སྡིང་ནས་དངོས་གྲུབ་ཀྱི་སྐལ་པར་ཐོབ་ནས་ལོ་ཉི་ཤུ་རྩ་གསུམ་སོང་བ། རང་ལོ་ལྔ་བཅུ་ང་དྲུག་ལ་སླེབས་པ་ལྕགས་ཕོ་བྱི་བའི་ལོ་ཧོར་ཟླ་དང་པོ་ཆོ་འཕྲུལ་གྱི་ཟླ་བའི་ཚེས་བཅོ་ལྔའི་ཉིན་ཤོག་དྲིལ་བུ་ཡིག་ལས་དཔེ་ཐོག་ཏུ་ཕབ་པ་འདིས་འགྲོ་དོན་ནམ་མཁའི་མཐའི་བར་ཁྱབ་པར་གྱུར་ཅིག །སརྦ་མངྒ་ལཾ།
	ces pa'i zab chos 'di nyid kho bo d+harma'i ming can gyis rang lo so bzhi lon pa/_sa pho stag gi lo hor zla dgu pa'i tshes bcu'i nyin shangs 'ba' ra don grub sding nas dngos grub kyi skal par thob nas lo nyi shu rtsa gsum song ba/_rang lo lnga bcu nga drug la slebs pa lcags pho byi ba'i lo hor zla dang po cho 'phrul gyi zla ba'i tshes bco lnga'i nyin shog dril bu yig las dpe thog tu phab pa 'dis 'gro don nam mkha'i mtha'i bar khyab par gyur cig_/sarba mang+ga laM/

Tibetan Text

[edit]

༄༅། །སྐྱེས་མཆོག་འབའ་ར་བ་རྒྱལ་མཚན་དཔལ་བཟང་གིས་མཛད་པའི་བླ་སྒྲུབ་ཕྱག་ཆེན་ཆོས་དྲུག་བཅས་མདོར་བསྡུས་སྙིང་པོར་དྲིལ་བ་བཞུགས་སོ། ། ༄༅། །རྡོ་རྗེ་འཆང་དང་དབྱེར་མེད་པའི་བླ་མ་དམ་པ་རྣམས་ལ་ཕྱག་འཚལ་ལོ། །ཁོ་བོ་ཤངས་སྒོམ་རྒྱལ་མཚན་དཔལ་བཟང་ངས། །མཁས་ཤིང་གྲུབ་པའི་དམ་པ་དུ་མ་བསྟེན། །གསར་རྙིང་རྒྱུད་སྡེ་ཀུན་ལ་འདྲིས་པར་བྱས། །གདམས་པའི་ཡང་སྙིང་ཐམས་ཅད་ཉམས་སུ་བླངས། །དངོས་ཉམས་རྨི་ལམ་རྣམས་སུ་བླ་མ་དང༌། །ཡི་དམ་མཁའ་འགྲོས་ལུང་བསྟན་གདམས་པ་གནང༌། །ཟབ་ཆོས་ཐར་གྲུ་སྐོར་གསུམ་ལ་སོགས་པ། །སྙིང་མཛོད་ཕྱེས་ནས་ཟབ་ཆོས་ཐང་མར་བརྡལ། །རིས་མེད་སྐལ་ལྡན་ཀུན་ལ་རྒྱ་ཆེར་སྤེལ། །ད་ནས་མི་རབས་མང་པོ་སོང་བ་ན། །དམ་ཆོས་ཚུལ་བཞིན་བྱེད་པ་ཤིན་ཏུ་དཀོན། །བསོད་ནམས་དམན་ཞིང་བརྩོན་འགྲུས་ཆུང་བ་ཡིས། །དམ་ཆོས་རྒྱ་ཆེན་ཉམས་སུ་ལེན་པ་ཉུང༌། །ང་ཡི་ཟབ་ཆོས་ཐར་གྲུ་སྐོར་གསུམ་གྱི། །དབང་ཁྲིད་ལུང་གསུམ་ཕྱག་བཞེས་གདམས་པ་རྣམས། །འཆད་ཉན་སྒྲུབ་པའི་གང་ཟག་ཉིན་སྐར་ཙམ། །རེ་རེ་བྱུང་ཡང་ཀུན་གྱིས་བཀུར་བ་མེད། །མ་འོངས་དུས་ཀྱི་ཐ་མར་གྱུར་པ་ན། །རབ་བྱུང་ཚུལ་བཟུང་ཁྲིམས་ལྡན་ཤིན་ཏུ་དཀོན། །ངུར་སྨྲིག་གྱོན་ནས་འདུལ་ཁྲིམས་རླུང་ལ་བསྐུར། །གསང་སྔགས་ཐབས་ལམ་རྣལ་འབྱོར་ཡིན་ཟེར་ཞིང༌། །རྒྱུད་དང་འགལ་བའི་ཐོ་ཅོའི་སྤྱོད་པ་བྱེད། །པདྨ་ཅན་སོགས་ཕྱག་རྒྱ་རྣམ་པ་དྲུག །བརྟགས་དང་འགུགས་དང་སྦ་ཞིང་དབང་བྱས་ནས། །ཁྲིམས་བཅུ་ནོས་སོགས་དབང་གིས་སྨིན་བྱས་ཏེ། །དབེན་པའི་གནས་སུ་གསང་སྤྱོད་བྱེད་རྒྱུ་ལ། །བག་མེད་སྤྱོད་པས་ཡ་ཕོའི་ཆུང་མ་བཞིན། །འགྲོ་འདུག་འབྲལ་མེད་དམ་ཚིག་ཁྱད་དུ་གསོད། །སྔོན་འགྲོ་ཁམས་ལ་རང་དབང་མ་ཐོབ་པར། །དངོས་གཞིའི་དུས་སུ་རྗེས་ཆགས་དབང་གྱུར་པས། །བྱང་སེམས་མདའ་འཕང་བཞིན་དུ་གནས་ནས་འཕོ། །ཁུ་བ་ཉམས་པས་མནར་མེད་དམྱལ་བར་འགྲོ། །དེ་འདྲའི་ཆགས་ལམ་རྣལ་འབྱོར་ཡི་རེ་མུག །དེ་བས་རབ་ཏུ་བྱུང་བའི་ཚུལ་བཟུང་ལ། །རྩ་བཞི་ཆང་སོགས་དུག་བཞིན་སྤངས་བྱས་ནས། །ཟབ་ལམ་ཉུང་འདུས་འདི་ལ་ཡི་དམ་བགྱི། །དུས་ངན་མི་ངན་སྤྱོད་ངན་དར་བའི་དུས། །ཁོ་བོའི་ཟབ་ཆོས་ཉམས་པས་གཞུ་རྒྱུད་ཙམ། །གྱུར་ཚེ་བསྟན་པའི་མེ་རོ་གསོ་གྱུར་ན། །དེ་ནི་ཤངས་སྒོམ་རྒན་པོའི་སྤྲུལ་པ་ཡིན། །དམ་ཆོས་ཟབ་ལ་ཉམས་སུ་ལེན་མི་ཉུང༌། །མ་འོངས་དུས་མཐར་ཉུང་ལ་འདུས་པའི་ཆོས། །ཀུན་གྱི་བཅུད་བསྡུས་འདི་ཉིད་ཉམས་སུ་ལོངས། །ཆོས་ཀུན་རྩ་བ་སྐྱབས་སེམས་ཅི་ནུས་འབད། །བྱང་ཆུབ་སེམས་སྦྱང་དལ་འབྱོར་རྙེད་དཀའ་བསམ། །འཆི་བ་མི་རྟག་ལས་འབྲས་ནན་ཏན་བསླབ། །སྐྱབས་ཡུལ་གསལ་གདབ་ཕྱག་མཆོད་མཎྜལ་དང༌། །རྡོར་སེམས་ཡིག་བརྒྱ་བླ་མའི་རྣལ་འབྱོར་སོགས། །སྔོན་འགྲོ་སྦྱོར་བ་བཞི་ལྡན་དག་ལ་ནི། །ཉིན་མཚན་མེད་པར་ཉམས་སུ་བླང་བར་བྱོས། །མཆོག་ཐུན་དངོས་གྲུབ་ཀུན་གྱི་རྩ་བ་ནི། །བླ་མ་སྒྲུབ་པ་ཕྱི་ནང་གསང་བ་གསུམ། །ཡིན་པས་དེ་ལ་ནན་ཏན་འབད་པར་བྱ། །ཕྱི་ལྟར་སྒྲུབ་པ་ནི། ༀ་སྭ་བྷཱ་ཝ་ཤུདྡྷོཿ སརྦ་དྷརྨཱཿ སྭ་བྷ་ཝ་ཤུདྡྷོ྅ཧཾ། སྟོང་པར་གྱུར། སྟོང་པའི་ངང་ལས་རང་ལུས་ཡི་དམ་འཁོར་ལོ་སྡོམ་པར་གསལ་བའི་སྤྱི་བོར་སེང་གེ་བཞིས་བཏེག་པའི་རིན་པོ་ཆེའི་ཁྲིའི་སྟེང་དུ་སྣ་ཚོགས་པདྨ་འདབ་མ་སྟོང་ལྡན་གྱི་སྟེང་དུ། ཉི་མ་དང་ཟླ་བའི་གདན་གྱི་དབུས་སུ། མ་ཧཱ་གུ་རུ་རྡོ་རྗེ་འཛིན་པ་ཆེན་པོ་དྷྭ་ཛ་ཤྲཱི་བྷ་དྲ་རབ་བྱུང་གི་ཆ་ལུགས་ཅན། སྐུ་མདོག་དཀར་ལ་དམར་བའི་མདངས་ཅན། ཕྱག་གཉིས་རྡོ་རྗེ་དྲིལ་བུ་འཛིན་པ། ཞབས་རྡོ་རྗེ་སྐྱིལ་ཀྲུང་དུ་བཞུགས་པའི་སྐུ་ལ་ཆོས་གོས་རྣམ་པ་གསུམ་གསོལ་ཞིང་དབུ་ལ་པཎ་ཞྭ་དམར་པོ་ཟླུམ་བརྗིད་ཅན་གསོལ་བ། བག་དྲོ་ལྷུན་ཆགས་གཟི་བརྗིད་འོད་དུ་འབར་ཞིང་དང་བ་འདྲེན་པ་བལྟ་བས་ཆོག་མི་ཤེས་པ་འོད་ཕུང་གི་དབུས་ན་བཞུགས་པར་བསམ། དེའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་འཕྲོས་པས་རང་གི་རྩ་བའི་བླ་མས་གཙོས་པའི་ཆོས་འབྲེལ་ཡོད་པའི་བླ་མ་ཐམས་ཅད་དང་རྡོ་རྗེ་འཆང་ནས་རྩ་བའི་བླ་མའི་བར་གྱི་བཀའ་བརྒྱུད་ཀྱི་བླ་མ་ཐམས་ཅད་དང༌། རྒྱུད་སྡེ་བཞིའི་ཡི་དམ་ཐམས་ཅད་དང༌། ཕྱོགས་བཅུའི་སངས་རྒྱས་བྱང་སེམས། དཔའ་བོ་མཁའ་འགྲོ་ཆོས་སྐྱོང་ཐམས་ཅད་སྤྱན་དྲངས། བླ་མ་རྡོ་རྗེ་འཛིན་པ་ཆེན་པོ་ལ་ཐིམ་པར་བསམས་ལ། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད༑ ༑དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །ༀ་བཛྲ་ཨརྒྷཾ་པྲ་ཏཱིཙྪ་ཡེ་སྭཱ་ཧཱ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝིདྱ། ཤབྡ་པྲ་ཏཱིཙྪ་ཡེ་སྭཱ་ཧཱ། ཞེས་མཆོད་ལ། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ། །བླ་མ་ལོངས་སྤྱོད་རྫོགས་པའི་སྐུ་ལ་སྐྱབས་སུ༴ བླ་མ་ཐུགས་རྗེ་སྤྲུལ་པའི་སྐུ་ལ༴ བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ། །ཞེས་ཅི་ནུས་སུ་གསོལ་བ་བཏབ། བླ་མ་རིན་པོ་ཆེས་བདག་ལ་བུམ་པའི་དབང་བསྐུར་དུ་གསོལ། ཞེས་གསོལ་བ་བཏབ་པས། བླ་མའི་གསང་གནས་ནས་བྱང་ཆུབ་ཀྱི་སེམས་སྐྱ་ན་ར་ར་བྱུང༌། རང་གི་སྤྱི་གཙུག་ཚངས་བུག་ནས་ཞུགས། སྨིན་མཚམས་ཡན་ཆད་གང༌། བུམ་པའི་དབང་ཐོབ། ལུས་ཀྱི་དྲི་མ་དག །ལམ་བསྐྱེད་རིམ་སྒོམ་པ་ལ་དབང༌། འབྲས་བུ་སྤྲུལ་པའི་སྐུའི་རྟེན་འབྲེལ་མངོན་དུ་བྱས། བྱང་སེམས་ཀྱིས་མགྲིན་པ་ཡན་ཆད་གང༌༑ གསང་དབང་ཐོབ། ངག་སྒྲིབ་དག །ལམ་གཏུམ་མོ་སྒོམ་པ་ལ་དབང༌། འབྲས་བུ་ལོངས་སྐུའི་རྟེན་འབྲེལ་མངོན་དུ་བྱས། བྱང་སེམས་ཀྱིས་སྙིང་ཁ་ཡན་ཆད་གང༌། ཤེས་རབ་ཡེ་ཤེས་ཀྱི་དབང་ཐོབ། སེམས་ཀྱི་དྲི་མ་དག །ལམ་འོད་གསལ་སྒོམ་པ་ལ་དབང༌། འབྲས་བུ་ཆོས་སྐུའི་རྟེན་འབྲེལ་མངོན་དུ་བྱས། བྱང་སེམས་ཀྱིས་རྐང་མཐིལ་ཡན་ཆད་གང༌། དབང་བཞི་པ་ཐོབ། ལུས་ངག་ཡིད་གསུམ་གྱི་དྲི་མ་དག །ལམ་ཕྱག་རྒྱ་ཆེན་པོ་སྒོམ་པ་ལ་དབང༌། འབྲས་བུ་ངོ་བོ་ཉིད་ཀྱི་སྐུའི་རྟེན་འབྲེལ་མངོན་དུ་བྱས། མཐར་སྤྱི་བོའི་བླ་མ་འོད་དུ་ཞུ་ནས་རང་ལ་ཐིམ་པས། བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་པས། རང་ཉིད་བླ་མར་སྐད་ཅིག་གིས་དཀྲོང་ཙེར་གྱུར་པའི་ཐུགས་ཁར་ཟླ་སྟེང་དུ་ཧཱུྃ་ཡིག་དཀར་པོ། དེའི་མཐའ་སྐོར་དུ། ༀ་ཨཱཿ གུ་རུ་སརྦ་སིདྡྷི་ཧཱུྃ། ཞེས་བརྒྱ་སྟོང་སོགས་བཟླ། ཐུགས་ཀའི་ཧཱུྃ་ལས་འོད་འཕྲོས་པས་འཁོར་འདས་སྣོད་བཅུད་ཐམས་ཅད་རང་ལ་བསྡུ། རང་ཧཱུྃ་ལ། ཧཱུྃ་ཞབས་ཀྱུ་ལ། དེ་ཁོག་པ་ལ། དེ་མགོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། དེ་ནམ་མཁར་སྟོང་པར་ཡལ་བར་བསམས་ལ། ཕྱག་རྒྱ་ཆེན་པོ་ལ་ཡུན་རིང་དུ་མཉམ་པར་བཞག་གོ །དེ་ནི་བླ་མ་ཕྱི་ལྟར་སྒྲུབ་པའོ། །ནང་ལྟར་སྒྲུབ་པ་ནི། རང་གི་སྤྱི་གཙུག་པདྨ་དང་ཉི་མའི་སྟེང་དུ་མ་ཧཱ་གུ་རུ་དྷྭ་ཛ་ཤྲཱི་བྷ་དྲ་དེ་ཉིད་སྐུ་མདོག་དམར་པོ་ལྕགས་གོང་མེས་བསྲེགས་པ་ལྟ་བུ་ཚ་ཞིང་རྩུབ་པ་སྐུ་གཅེར་བུ་སྤྱན་གཉིས་ལྟ་སྟངས་སུ་ཧྲིག་གེ་གཟིགས་པ། མེ་ཐབ་དྲུག་བཅིང་གི་ཕྱག་རྒྱ་མཛད་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་དཔྲལ་བར་ༀ། མགྲིན་པར་ཨཱཿ ཐུགས་ཁར་ཧཱུྃ། ཧཱུྃ་ལས་འོད་འཕྲོས་པས་རྩ་བརྒྱུད་བླ་མ། ཡི་དམ་ལྷ་ཚོགས། སངས་རྒྱས་བྱང་སེམས། དཔའ་བོ་མཁའ་འགྲོ་ཐམས་ཅད་དཔལ་ལྡན་བླ་མའི་རྣམ་པར་སྤྱན་དྲངས། ཛཿ ཧཱུྃ་བཾ་ཧོཿ གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ༀ་བཛྲ་ཨརྒྷཾ་ནས། ཤབྡ་པྲ་ཏཱིཙྪ་ཡེ་སྭཱ་ཧཱ། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ། །ཞེས་བརྒྱ་སྟོང་སོགས་ཀྱིས་གསོལ་བ་བཏབ། བདག་ལ་བུམ་པའི་དབང་བསྐུར་དུ་གསོལ། བླ་མའི་ལྟེ་འོག་སོར་བཞི་ན་ཡོད་པའི་གཏུམ་མོ་ཨ་ཐུང་ལས་ཡེ་ཤེས་ཀྱི་མེ་ཆེར་འབར། གསང་ལམ་ནས་མར་ནར་བྱུང༌། རང་གི་ཚངས་བུག་ནས་ཞུགས། སྨིན་མཚམས་ཡན་ཆད་ཀྱི་ནད་གདོན་སྡིག་སྒྲིབ་ཐམས་ཅད་ཡེ་ཤེས་ཀྱི་མེས་བསྲེགས་ཤིང་གང༌། ལུས་སྒྲིབ་དག །བུམ་དབང་ཐོབ། བསྐྱེད་རིམ་ལྷའི་རྣལ་འབྱོར་སྒོམ་པ་ལ་དབང༌། འབྲས་བུ་སྤྲུལ་པའི་སྐུའི་རྟེན་འབྲེལ་མངོན་དུ་བྱས། བདག་ལ་གསང་དབང་བསྐུར་དུ་གསོལ། ཡེ་ཤེས་ཀྱི་མེས་མགྲིན་པ་ཡན་ཆད་གང༌། ནད་གདོན་སྡིག་སྒྲིབ་མེས་བསྲེགས་ཤིང་གང༌། གསང་དབང་ཐོབ། ངག་སྒྲིབ་དག །ལམ་གཏུམ་མོ་སྒོམ་པ་ལ་དབང༌། འབྲས་བུ་ཆོས་སྐུ་ཐོབ། བདག་ལ་ཤེར་དབང་བསྐུར་དུ་གསོལ། ཡེ་ཤེས་ཀྱི་མེས་སྙིང་ཁ་ཡན་ཆད་གང༌། ནད་གདོན་སྡིག་སྒྲིབ་བསྲེགས། ཤེས་རབ་ཡེ་ཤེས་ཀྱི་དབང་ཐོབ། སེམས་ཀྱི་དྲི་མ་དག །ལམ་འོད་གསལ་སྒོམ་པ་ལ་དབང༌། འབྲས་བུ་ཆོས་སྐུ་ཐོབ། བདག་ལ་དབང་བཞི་པ་བསྐུར་དུ་གསོལ། རྐང་མཐིལ་ཡན་ཆད་ཡེ་ཤེས་ཀྱི་མེས་གང༌། ནད་གདོན་སྡིག་སྒྲིབ་ཐམས་ཅད་བསྲེགས། དབང་བཞི་པ་ཐོབ། ལུས་ངག་ཡིད་གསུམ་གྱི་དྲི་མ་དག །ལམ་ཕྱག་རྒྱ་ཆེན་པོ་སྒོམ་པ་ལ་དབང༌། འབྲས་བུ་ངོ་བོ་ཉིད་ཀྱི་སྐུ་ཐོབ། སྤྱི་བོའི་བླ་མ་འོད་དུ་ཞུ་ནས་རང་ལ་ཐིམ་པས་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་པའི་ཐུགས་ཀར་ཉི་མའི་སྟེང་དུ་ཧཱུྃ་ཡིག་དམར་པོའི་མཐའ་མར་སྔགས་ཕྲེང་གིས་བསྐོར་བར་བསམ་ལ། །ༀ་ཨཱཿ གུ་རུ་སརྦ་སིདྡྷི་ཧཱུྃ། མང་དུ་བཟླས་པས། རང་གི་ནད་གདོན་སྡིག་སྒྲིབ་དང་ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་ཡེ་ཤེས་ཀྱི་མེས་བསྲེགས་ནས། བདེ་སྟོང་ཆེན་པོ་དང་དྲོད་ཀྱི་ཏིང་ངེ་འཛིན་ཁྱད་པར་ཅན་སྐྱེ་བར་འགྱུར་རོ། །གསང་སྒྲུབ་ནི། རང་གི་སྤྱི་གཙུག་ཏུ་པདྨ་དང་ཉི་མའི་སྟེང་དུ། གུ་རུ་དྷྭ་ཛ་ཤྲཱི་བྷ་དྲ་སྐུ་མདོག་སྔོན་པོ་བཻ་ཌཱུརྱའི་ཕུང་པོ་ལྟ་བུ། ཞལ་གཅིག་ཕྱག་གཉིས་པ། སྐུ་གཅེར་བུ་རལ་པའི་ཐོར་ཅོག་ཅན། རུས་པའི་རྒྱན་དྲུག་གསོལ་བ། ཕྱག་གཉིས་རྡོར་དྲིལ་འཛིན་པས་ཡུམ་ལ་འཁྱུད་པ༑ ཞབས་རྡོ་རྗེ་སྐྱིལ་ཀྲུང་དུ་བཞུགས་པ། པང་དུ་ཡུམ་ཡེ་ཤེས་ཀྱི་མཁའ་འགྲོ་དམར་མོ་གྲི་ཐོད་འཛིན་པ་དང་མཉམ་པར་སྦྱོར་བ་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་དཔྲལ་བར་ༀ། མགྲིན་པར་ཨཱཿ ཐུགས་ཁར་ཧཱུྃ། ཧཱུྃ་ལས་འོད་འཕྲོས་རྩ་བ་བརྒྱུད་པའི་བླ་མ། ཡི་དམ་ལྷ་ཚོགས་སངས་རྒྱས་བྱང་སེམས་དཔའ་བོ་རྣལ་འབྱོར་མའི་ཚོགས་ཐམས་ཅད་བླ་མ་རྡོ་རྗེ་འཛིན་པ་ཆེན་པོའི་རྣམ་པར་སྤྱན་དྲངས། ཛཿ ཧཱུྃ་བཾ་ཧོཿ གཉིས་སུ་མེད་པར་གྱུར། ༀ་བཛྲ་ཨརྒྷཾ་ནས་ཤབྡའི་བར། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སོགས་བརྒྱ་སྟོང་གིས་གསོལ་བ་བཏབ། བདག་ལ་བུམ་དབང་བསྐུར་དུ་གསོལ། བླ་མའི་སྐུ་ལས་སྐུ་དཔག་ཏུ་མེད་པ་འཕྲོས། རང་གི་ལུས་ལ་མཚོ་ལ་ཆར་བབས་པ་བཞིན་ཐིམ། རང་ཉིད་བླ་མ་ཧེ་རུ་ཀའི་སྐུ་སྣང་ལ་རང་བཞིན་མེད་པར་གྱུར། བུམ་དབང་ཐོབ། ལུས་སྒྲིབ་དག །བསྐྱེད་རིམ་སྒོམ་པ་ལ་དབང༌། འབྲས་བུ་སྤྲུལ་པའི་སྐུའི་རྟེན་འབྲེལ་མངོན་དུ་བྱས། བདག་ལ་གསང་དབང་བསྐུར་དུ་གསོལ། བླ་མ་ཧེ་རུ་ཀ་ཡབ་ཡུམ་གྱི་སྦྱོར་མཚམས་ནས་བྱང་སེམས་དཀར་ལ་དམར་བའི་མདངས་ཆགས་པ་བྱུང༌། རང་གི་ལྕེ་ཐོག་ནས་ཞུགས་ལུས་ཐམས་ཅད་བདུད་རྩིས་གང༌། གསང་བའི་དབང་ཐོབ། ངག་སྒྲིབ་དག །ལམ་གཏུམ་མོ་སྒོམ་པ་ལ་དབང༌། འབྲས་བུ་ལོངས་སྤྱོད་རྫོགས་པའི་རྟེན་འབྲེལ་མངོན་དུ་བྱས། བདག་ལ་ཤེར་དབང་བསྐུར་དུ་གསོལ། བླ་མ་ཧེ་རུ་ཀའི་ཡུམ་ལས་ཡུམ་གཅིག་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང་བ་རང་ལ་གནང༌། དེ་དང་སྙོམས་པར་ཞུགས་པས་ལུས་ཐམས་ཅད་ཟག་མེད་ཀྱི་བདེ་བས་གང༌། ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ལམ་འོད་གསལ་སྒོམ་པ་ལ་དབང༌། འབྲས་བུ་ཆོས་སྐུའི་རྟེན་འབྲེལ་མངོན་དུ་བྱས། བདག་ལ་དབང་བཞི་པ་བསྐུར་དུ་གསོལ། བླ་མ་ཧེ་རུ་ཀ་ཡབ་ཡུམ་སྙོམས་པར་ཞུགས་པ་འོད་དུ་ཞུ་རང་ལ་ཐིམ་པས། སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར། ཕྱག་རྒྱ་ཆེན་པོ་ལ་མཉམ་པར་བཞག །དབང་བཞི་པ་ཐོབ། ལུས་ངག་ཡིད་གསུམ་གྱི་དྲི་མ་དག །ལམ་ཕྱག་རྒྱ་ཆེན་པོ་སྒོམ་པ་ལ་དབང༌། འབྲས་བུ་ངོ་བོ་ཉིད་ཀྱི་སྐུའི་རྟེན་འབྲེལ་མངོན་དུ་བྱས། རང་ཉིད་བླ་མ་ཧེ་རུ་ཀ་ཡབ་ཡུམ་དུ་གསལ་བའི་ཐུགས་ཀར་པད་ཉིའི་སྟེང་དུ་ཧཱུྃ་མཐིང་ཁའི་མཐའ་མར་སྔགས་ཕྲེང་གིས་བསྐོར་བར་བསམ། ༀ་ཨཱཿ གུ་རུ་སརྦ་སིདྡྷི་ཧཱུྃ། བརྒྱ་སྟོང་སོགས་བཟླ། བདག་སོགས་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་སྔགས་ཀྱི་འོད་ཟེར་གྱིས་བསྲེགས། འཁོར་འདས་ཐམས་ཅད་བླ་མ་ཧེ་རུ་ཀ་ཡབ་ཡུམ་གྱི་རྣམ་པར་རང་ལ་ཐིམ་པས། བདག་ཉིད་བླ་མ་ཧེ་རུ་ཀ་ཡབ་ཡུམ་གྱི་བསྐྱེད་རིམ་རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པ། བརྟན་པ་ཐོབ་པའི་ང་རྒྱལ་གཟུང་བར་བྱའོ། །རྗེས་སུ་དགེ་བའི་རྩ་བ་བསྔོ་བར་བྱའོ། །ཕྱག་མཆོད་འབུལ་དུས་བླ་མ་མདུན་གྱི་མཁའ་ལ་བསྒོམ། གསོལ་བ་བཏབ་དུས་སྤྱི་བོར། ཕྱག་ཆེན་སྒོམ་དུས་སྙིང་ཁར། གཏུམ་མོ་སྒོམ་དུས་ནང་སྒྲུབ་ཀྱི་བླ་མ་ལྟེ་བར། སྤྱི་ཁྱབ་ཏུ་ཕྱི་སྒྲུབ་ཀྱི་བླ་མ་བསྒོམ་པ་ཡིན་ནོ། །རང་ལུས་ཡི་དམ་གྱི་སྐུར་གསལ་བ་ནི། ༀ་སྭ་བྷཱ་ཝ་ཤུདྡྷོཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་པད་ཉིའི་སྟེང་དུ་རང་ཉིད་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་མཐིང་ཤུན་གྱི་མདོག་ལྟར་སྔོ་ལ་དྭངས་པ། ཞལ་གཅིག་ཕྱག་གཉིས་པ། ཞལ་མཆེ་བ་གཙིགས་པ། སྤྱན་གསུམ་པ། རལ་པའི་ཐོར་ཚུགས་སྤྱི་བོར་བཅིངས་པའི་རྩེར་ནོར་བུ་རིན་པོ་ཆེ་དང༌། གཡོན་དུ་ཚེས་གཅིག་གི་ཟླ་བ། མཚོག་ཁར་སྣ་ཚོགས་རྡོ་རྗེས་མཚན་པ། ཕྱག་གཉིས་རྡོར་དྲིལ་བསྣོལ་བས་ཡུམ་ལ་འཁྱུད་པ། ཞབས་གཡས་བརྐྱངས་པས་དུས་མཚན་དམར་མོའི་ལྟོ་བ་དང་སྐྱེ་གནས་མནན་ཞིང༌། གཡོན་བསྐུམས་པས་འཇིགས་བྱེད་ནག་པོ་ཁ་སྦུབ་ཀྱི་སོག་ཕྲག་མནན་པ། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་བྱས་པ། རུས་པའི་རྒྱན་དྲུག་དང་སྟག་ལྤགས་ཀྱི་ཤམ་ཐབས་ཅན། གར་དགུའི་ཉམས་དང་ལྡན་པའི་པང་དུ་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་སྤྱན་གསུམ་པ། གཅེར་བུ་མཆེ་བ་གཙིགས་ཤིང་དབུ་སྐྲ་ནག་པོ་ཐུར་དུ་གྲོལ་བ། ཕྱག་གཡས་གྲི་གུག་འཕྱར་ཞིང་གཡོན་ཐོད་ཁྲག་འཛིན་པས་ཡབ་མགུལ་འཁྱུད་པ། ཞབས་གཡས་བསྐུམ་པས་ཡབ་ལ་འཁྱུད་ཅིང༌། གཡོན་བརྐྱངས་པས་དུས་མཚན་མནན་པ། མི་མགོ་སྐམ་པོའི་དབུ་རྒྱན་དང་དོ་ཤལ་ཅན། རུས་པའི་རྒྱན་ལྔས་བརྒྱན་པ། གཉིས་ཀ་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་བསམ་མོ༑ ༑དེ་ལྟར་གསལ་བའི་ངང་ནས་རྫོགས་རིམ་ནི། རང་ལུས་འཁོར་ལོ་སྡོམ་པར་གསལ་བའི་ཐུགས་ཀ་རུ་ཟླ་བའི་དཀྱིལ་འཁོར་རྒྱ་སྲན་ཕྱེད་གཤགས་ཙམ་ཞིག་སྐྱ་སྒོ་རེ་བ། དེའི་སྟེང་དུ་ཐིག་ལེ་དཀར་པོ་ཉུངས་འབྲུ་ཙམ་ཞིག་བསམས་ལ། སེམས་མི་ཡེངས་པར་ལྷོད་གློད་པའི་ངང་ལ་ཡུན་ཅི་གནས་སུ་བཞག་པར་བྱའོ། །དེས་ཡེ་ཤེས་སྐྱེ་བར་འགྱུར་རོ། །ཕྱག་རྒྱ་ཆེན་པོ་བསྒོམ་པར་བྱ་བ་ནི། ལུས་གནད་རྣམ་སྣང་ཆོས་བདུན་བྱ་སྟེ། རྐང་པ་རྡོ་རྗེ་སྐྱིལ་ཀྲུང་ལག་པ་མཉམ་བཞག་སྒལ་ཚིགས་བསྲང༌། དཔུང་པ་རྒོད་གཤོག་ལྟར་བརྒྱངས། མགྲིན་པ་དགུག །མཆུ་ཐད་སོར་བཞག །ལྕེ་ཡ་རྐན་ལ་སྦྱར། མིག་སྣ་རྩེར་ཕབ་ཅིང་མིག་འབྲས་མི་འགུལ་བར་བྱ་ཞིང༌། སྙིང་ནང་དུ་བླ་མ་ཕྱི་སྒྲུབ་ལྟར་གསལ་བ་ལ་གསོལ་བ་གདབ། སེམས་འདི་འདྲ་ཞིག་བསྒོམ་བྱ་བའི་གཟུགས་དབྱིབས་གྲུ་བཞི་ཟླུམ་པོ་གྲུ་གསུམ་སོགས་བསྒོམ་དུ་མེད། ཁ་དོག་ཀྱང་དཀར་ནག་སོགས་ཅི་ཡང་མི་བསྒོམ། བསམ་དུ་མེད། གང་ཡང་ཡིད་ལ་མི་བྱ། སེམས་མི་ཡེངས་པའི་ངང་ལ་མ་ཡེངས་མཁན་དེ་ལ་ཆེར་རེ་བལྟ། ཡུན་རིང་ན་ཡེངས་འགྲོ་བས་ཐུན་ཐུང་ཐུང་བྱས་ལ་དྲན་པ་གསལ་བཏབ་ལ་གོང་བཞིན་བསྒོམ། དེ་ལ་སེམས་མི་གནས་པར་རྟོག་པ་འཕྲོ་ན། རྟོག་པ་འཕྲོ་མཁན་གྱི་སེམས་དེ་ལ་ཆེར་རེ་བལྟས་པས། རང་ཡལ་དུ་འགྲོ། བལྟས་ཀྱང་ཡལ་མི་འགྲོ་ན་བསམ་མནོའི་འཕྲོ་མ་ཆོད་པ་ཡིན་པས། དེ་ལ་བསམ་མནོའི་འཕྲོ་རྦད་ཀྱིས་བཅད། འདོད་ཆགས་སོགས་ཉོན་མོངས་པའི་སེམས་སྐྱེས་ན་ཡང༌། སྐྱེ་མཁན་གྱི་སེམས་དེ་ལ་ནན་ཏན་དུ་བལྟའོ། །མིག་གི་ཡུལ་དུ་གཟུགས་དང༌། རྣ་བའི་ཡུལ་དུ་སྒྲ་གང་བྱུང་བ་དེ་ལ་འདི་ནི་ཆེའོ་སྙམ་པ་དང༌༑ འདི་ནི་ཆུང་ངོ་སྙམ་པ་མི་བསམ། ཡུལ་དེའི་སེམས་ངོ་བོ་ལ་ཆེར་རེ་བལྟས་པས། ཡུལ་དེ་མེད་པར་མ་སོང་ཡང༌། འཛིན་པ་མ་ཞུགས་ཙམ་བྱུང་ན་ཆོག་ལ། ཁ་ཟས་ཟ་བ་དང་འགྲོ་སྡོད་སོགས་སྤྱོད་ལམ་ཐམས་ཅད་ཀྱི་དུས་སུ་ཡང་དྲན་པ་མ་ཡེངས་པར་བྱའོ། །དེ་ལྟར་མ་ཡེངས་པར་རྩེ་གཅིག་ཏུ་བསྒོམས་པས། རྣམ་པར་རྟོག་པའི་འགྱུ་བ་སྣ་ཚོགས་པ་རང་ཤུགས་ལ་འགག་པར་འགྱུར་ཞིང༌། བཟང་ངན་མཐོ་དམན་རེ་དོགས་གང་ཡང་ཡིད་ལ་མི་བྱེད་པ། ཐང་ཆད་པའི་མི་ངལ་གསོ་བ་ལྟར་ལྷོད་དེ་བཞག །ཡང་གང་བྱས་ཀྱང་སེམས་གནས་སུ་མི་གཏུབ་པར་ཆུ་ལས་ཆུ་ལྦུར་བརྡོལ་བ་ལྟར་རྣམ་རྟོག་སྣ་ཚོགས་སུ་ཐོལ་ཐོལ་སྐྱེ་བར་གྱུར་ན། དང་པོ་རྟོག་པའི་བྱུང་ས་རྩད་བཅད་པས་འདི་ནས་བྱུང་བྱ་བའི་བྱུང་ས་མི་རྙེད། མཐར་འགྲོ་ས་རྩད་བཅད་པས་འདིར་འགྲོ་ས་མི་རྙེད། བར་དུ་རང་གི་ངོ་བོ་དབྱིབས་ཁ་དོག་གི་ངོ་བོར་མ་གྲུབ་སྟེ། སྐྱེ་འགག་གནས་གསུམ་གྱི་སྟོང་པར་ཤེས་ནས་དྲན་རྟོག་ཅི་སྐྱེས་ཡང་དག་པར་རྣམ་པར་མི་རྟོག་པའི་ཆོས་ཀྱི་དབྱིངས་སུ་གྲོལ་བས་ཕན་གནོད་མ་ནུས་པ་ནི། ཆུའི་ལྦུ་བ་ཆུར་ཞིག་པ་ལྟ་བུའོ། །སེམས་མ་ཡེངས་པར་མ་ཡེངས་མཁན་དེ་ལ་ཅེ་རེ་ལྟ་བ་འདི་ལས་སྒོམ་དུ་གཅིག་ཀྱང་མེད་དོ། །འགག་ཏུ་དྲིལ་ན། སེམས་དེ་རང་ངོ་མ་ཤེས་པས་འཁོར་བར་འཁྱམས། ངོ་ཤེས་ན་སངས་རྒྱས་ཐོབ་པས་འཁོར་འདས་གཉིས་ཀྱི་གཞིར་འདུག་པས་ན་གཞི་ཕྱག་རྒྱ་ཆེན་པོ་ཟེར་ལ། སེམས་འདིས་འཁོར་འདས་གཉིས་ཀའི་གཞི་བྱེད་ཀྱང༌། སེམས་འདི་ལ་གཟུགས་དང་ཁ་དོག་མ་གྲུབ་པས། འདི་ཡིན་བྱ་བའི་དངོས་པོ་མི་འདུག །དེ་བཞིན་དུ་དགའ་མི་དགའ་སོགས་ངོ་ཤེས་ཤིང༌། རང་གི་རང་ངོ་ཤེས་རྒྱུའི་གསལ་ལ་དྭངས་པ་ཞིག་འདུག་པས་མེད་པ་ཡང་མ་ཡིན་ཏེ། ཡོད་མེད་གཉིས་དང་བྲལ་བས་གནས་ལུགས་རང་ངོ་ཤེས་ཤིང་སྒྲོ་འདོགས་ཆོད་པ་ལ་ལྟ་བ་ཟེར་བ་ཡིན། སྒྲོ་འདོགས་ཆོད་པའི་ངང་ལ་མ་ཡེངས་པར་སྒོམ་པ་ལ་སྒོམ་པ་ཞེས་བྱའོ། །སྒོམ་པ་དེ་ལ་རྒྱུན་ཆད་མེད་པར་འགྲོ་སྡོད་གང་བྱེད་ཀྱང་མི་འབྲལ་བར་སྒོམ་པ་ལ་སྤྱོད་པ་ཞེས་ཟེར། དེ་ལྟར་བསྒོམས་པས་གཞིའི་གནས་ལུགས་ཇི་ལྟ་བ་ངོ་ཤེས་ནས་གོམས་པ་མངོན་དུ་གྱུར་པས་ཆོས་ཉིད་གསལ་སྒྲིབ་མེད་པར་རྟོགས་པ་དེ་ལ་འབྲས་བུ་ཟེར་རོ། །དེ་ལྟར་དབྱིབས་གཟུགས་འགྲོ་འོང་ཐམས་ཅད་དང་བྲལ་བ། རང་གི་སེམས་སྣང་ལ་རང་བཞིན་མེད་པ་དེ་ཉིད་སྤྲུལ་པའི་སྐུ་ཡིན། བདེ་ལ་ཞེན་པ་མེད་པ་དེ་ཉིད་ལོངས་སྤྱོད་རྫོགས་པའི་སྐུ་ཡིན། གསལ་ལ་འཛིན་པ་མེད་པ་དེ་ཉིད་ཆོས་ཀྱི་སྐུ་ཡིན། དེ་རྣམས་ཟུང་འཇུག་མཚན་མ་མེད་པ་དེ་ཉིད་ངོ་བོ་ཉིད་ཀྱི་སྐུ་ཡིན་ནོ། །དེས་ན་རང་གི་སེམས་ཉིད་སངས་རྒྱས་སྐུ་བཞིའི་བདག་ཉིད་ཅན་ཡིན། རང་གི་སེམས་ཀྱི་ཆོས་ཉིད་བརྗོད་པ་དང་སྤྲོས་པའི་མཐའ་ཐམས་ཅད་དང་བྲལ་བ་ནི་ཆོས་ཀྱི་སྐུ་ཡིན་ལ། རང་གི་སེམས་ཆོས་ཅན་སྣ་ཚོགས་སུ་སྣང་ཞིང་ཀུན་ལ་ཁྱབ་པ་གཟུགས་ཀྱི་སྐུ་ཡིན་ཅིང༌། རང་གི་སེམས་ལས་ལྷག་པའི་སངས་རྒྱས་གཞན་ན་མེད་དེ། རང་གི་སེམས་འདི་སངས་རྒྱས་ཀྱང་ཡིན། སངས་རྒྱས་གཞན་དུ་བསྟན་པ་ཡང་མེད། སངས་རྒྱས་རྣམས་ཀྱི་ཡེ་ཤེས་ཀྱིས་གཞན་དུ་བཙལ་བས་རྙེད་པ་ཡང་མེད་དོ། །རང་གི་སེམས་དང་ཡིད་བཞིན་གྱི་ནོར་བུ་འདྲ་སྟེ། ཡིད་བཞིན་གྱི་ནོར་བུ་རིན་པོ་ཆེ་དེ་ཉིད་ལ་བྱི་དོར་བྱས་ནས་རྒྱལ་མཚན་གྱི་རྩེ་ལ་བཏགས་ཏེ་གསོལ་བ་བཏབ་ན་དགོས་འདོད་ཐམས་ཅད་འབྱུང་བ་བཞིན། རང་གི་སེམས་ཀྱང་སངས་རྒྱས་སུ་ངོ་འཕྲོད་ན། ཕན་བདེའི་དགེ་ལེགས་ཐམས་ཅད་འབྱུང་ཞིང༌། ནོར་བུ་འདམ་དུ་བྱིང་ན་དོན་བྱེད་མི་ནུས་པ་བཞིན། སེམས་སངས་རྒྱས་སུ་ངོ་མ་འཕྲོད་ན་ཐ་མལ་དུ་ལུས་ནས་སྡུག་བསྔལ་མྱོང་དགོས་པས། སེམས་སངས་རྒྱས་ཡིན་པ་ལ་ཡིན་པར་ངོ་ཤེས་པར་བྱས་ནས། རང་གི་སེམས་ཉིད་སྣང་ལ་རང་བཞིན་མེད་པ། བདེ་ལ་ཞེན་པ་མེད་པ། གསལ་ལ་འཛིན་པ་མེད་པ། གཟུང་འཛིན་མཚན་མ་མེད་པ། བྱིང་རྒོད་སྤྲོས་པའི་མཐའ་ཐམས་ཅད་དང་བྲལ་བ་འདི་ལ་ཕྱག་རྒྱ་ཆེན་པོ་ཞེས་ཟེར་རོ། །ཡང་དག་པའི་དོན་ཡང་ཟེར་བས། འགྲོ་འཆགས་ཉལ་འདུག་གང་བྱེད་ཀྱང་ཕྱག་རྒྱ་ཆེན་པོའི་ངང་ལ་ཉིན་མཚན་མེད་པར་འཇོག་པ་གལ་ཆེའོ། །དེ་ལྟར་ཉམས་སུ་བླངས་པས་སྐུ་གསུམ་ཡེ་ཤེས་ལྔ་ལྡན་དུ་སངས་རྒྱའོ། །གཏུམ་མོ་སྒོམ་པ་ནི། སྐྱབས་སེམས་སོགས་བྱས་ལ། རང་གི་ལུས་འདི་ཡི་དམ་བདེ་མཆོག་ལྷན་སྐྱེས་ཡབ་ཡུམ་དུ་གསལ་བའི་ལུས་ཀྱི་ནང་ཐམས་ཅད་སྟོང་སང་བ་ཕྲུ་མ་ཕུས་བཏབ་པ་ལྟ་བུ། སྤྱི་བོ་ནས་རྐང་མཐིལ་སོར་མོའི་རྩ་ཐམས་ཅད་སྟོང་སང་བ་སྲབ་སེང་ངེ་ཡོད་པའི་སྟོང་རའི་ནང༌། ལྟེ་འོག་སོར་བཞིའི་ཐད་དུ་ཉི་མའི་དཀྱིལ་འཁོར་འཕང་ལོའི་རྒྱ་ཙམ་གྱི་སྟེང་དུ། གུ་རུ་དྷྭ་ཛ་ཤྲཱི་བྷ་དྲ་དེ་ཉིད་སྐུ་གཅེར་བུ་མེ་ཐབ་དྲུག་འཆིང་གི་ཕྱག་རྒྱ་མཛད་པ། སྐུ་མདོག་དམར་པོ་ལྕགས་གོང་མེས་བསྲེགས་པ་ལྟ་བུ་ཚོན་གང་བ་ཞིག་གསལ་གདབ་ལ། དེ་ལ་བཀའ་བརྒྱུད་ཀྱི་བླ་མ་རྣམས་དང༌། གཞན་ཡང་དབང་རྒྱུད་མན་ངག་ཐོབ་པའི་བླ་མ་ཐམས་ཅད་དང༌། ཡི་དམ་གྱི་ལྷ་ཐམས་ཅད། སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་སྤྱན་དྲངས་ལ་བསྟིམ། ཀུན་འདུས་པའི་བདག་ཉིད་ཆེན་པོར་བསམ་ལ་གསོལ་བ་དྲག་པོ་སྙིང་གི་དཀྱིལ་ནས་གདབ་བོ། །དེ་ནས་རླུང་སྦྱང་སྟེ། སྣ་གཡས་གཡོན་དབུས་དང་གསུམ་ནས་འཇམ་ལ་རིང་བ་འབུད་ནས་ཕྱིར་ཐུབ་ཚད་བཟུང༌། དེ་ཡང་དང་པོ་ནུད་ཙམ་འབུད་ལ་དེ་ནས་ཤུགས་དྲག་ལ་རིང་བ་འབུད་དེ་སང་སང་འབུད། རླུང་བར་དུ་རླུང་རྒྱུར་མི་གཞུག་པར། ཁ་ནས་མ་སོང་བ་སྣ་ནས་དྲངས་ལ་ཤུགས་རྫོགས་པ་དང་མཆིལ་མ་དང་སྦྲགས་ནས་མིད་ལ་རླུང་བསྐྱུར་གྱི་གནད་དེས་ལྟོ་བར་ལྡིག་རྩེར་བསྐྱུར་རོ། །མི་ཐུབ་པ་དང་ཕྱིར་འབུད་ལ། ཡང་བཟུང་ལ་མནན་ནོ། །དེ་ནས་རྩ་སྦྱང་སྟེ། རང་ལུས་སྟོང་རར་གསལ་བའི་ནང་དུ་རྩ་དབུ་མ་ཆོས་བཞི་ལྡན་ཏིལ་གྱི་མར་མེ་ལྟར་གསལ་བ། རྒྱ་སྐྱེགས་ཀྱི་ཁུ་བ་ལྟར་དམར་བ། ཆུ་ཤིང་གི་སྡོང་པོ་ལྟར་དྲང་བ། པདྨའི་སྣལ་མ་ལྟར་ཕྲ་བ་སྟེ། སྦོམ་ཕྲ་མདའ་སྨྱུག་འབྲིང་པོ་ཙམ་ཡར་རྩེ་སྤྱི་བོ་དང༌། མར་རྩེ་གསང་གནས་ལ་ཟུག་པར་བསྒོམ། དེ་ཇེ་ཆེར་གྱུར་ནས་སྦ་དབྱུག་ཙམ། ཞོ་དོང་ཙམ། དེ་ནས་ལུས་ཐམས་ཅད་རྩ་དབུ་མའི་རང་བཞིན་དུ་གྱུར་ཏེ། དམར་སེང་ངེ་སྲབ་སེང་ངེ་ཡོད་པའི་ནང་དུ། ཡང་རྩ་དབུ་མ་ཆོས་བཞི་ལྡན་ཡར་སྣ་སྤྱི་བོ་དང༌། མར་སྣ་ལྟེ་འོག་སོར་བཞིར་ཟུག་པར་བསྒོམས་པའི་མར་སྣ་རུ་རིག་པ་ཧྲིལ་གཏད་ལ་མ་ཡེངས་པར་བསྒོམ་མོ། །སྔོན་འགྲོའོ། །དངོས་གཞི་ནི་གསུམ་སྟེ། དང་པོ་ལུས་གནད་ནི། འཁྲུལ་འཁོར་མེ་ཐབ་དྲུག་འཆིང་བྱ་སྟེ། རྐང་པ་རེ་མིག་ལྟར་བསྣོལ་ཏེ། རྐང་པ་གཡས་ཕྱི་གཡོན་ནང་དུ་བཅུག་ལ་བསྣོལ་བའི་གཡོན་པའི་རྟིང་པས་བཤང་གཅི་གཉིས་ཀྱི་བར་ཐེམ་པར་བལྟེམ། ལག་པ་ཞགས་པ་ལྟར་བསྡམ་སྟེ། མཐེ་བོང་གཡོན་པ་གཡས་ཀྱི་གུང་མོས་བསྣོལ་བའི་མཐེབ་སྙིང་གཉིས་སྦྱར་བ་གཡས་པའི་མཛུབ་མོ་བཞིས་བསྡམས། དེའི་ཕྱི་ནས་གཡོན་པའི་མཛུབ་མོ་བཞིས་དམ་དུ་བསྡམས་པ་དེ་ལྟ་བུའི་ཕྱག་རྒྱ་ལྟེ་འོག་སོར་བཞིའི་ཐད་དུ་བཅའ། མགྲིན་པ་ལྕགས་ཀྱུ་ལྟར་བཀུག་སྟེ་མགྲིན་པ་རང་སར་ཨོལ་མདུད་པ་ལ་ཆར་སྦྱར། སྐེད་པ་མདའ་ལྟར་དྲང་པོར་བསྲང༌། དཔུང་པ་རྒོད་གཤོག་ལྟར་བརྒྱང་སྟེ་བྲང་མདུན་དུ་དེངས་བྱ༑ ལུས་སེམས་ལི་རི་ལྟར་བསྒྲིམ་སྟེ་སྒོམ་ཐག་རབ་གནས་དང་ལྡན་པས་དམ་ལྷོད་རན་པར་བསྡམ་མོ། །དེ་ནས་རླུང་ལམ་བསལ་བ་ནི། འབུད་པ་དགུ་ཕྲུགས་ཏེ། གཡས་གཡོན་དབུས་གསུམ་དུ་དྲག་ལ་ཡུན་རིང་བ་གསུམ་འབུད། རོ་སྟོད་གཅུ་ཞིང་དྲག་ལ་ཐུང་བ་གསུམ་འབུད། འཇམ་ལ་རིང་བ་གསུམ་འབུད་དོ། །རླུང་རང་གནས་སུ་བཟུང་བ་ནི། ཁ་ནས་མ་སོང་བར་ཕྱི་ནས་སྣ་སྒོའི་ནང་ན་མར་རླུང་འཇམ་ལ་རིང་བ་དྲངས་ལ། དེའི་ཤུགས་རྫོགས་པ་དང༌། མཆིལ་མ་དང་སྦྲགས་ཏེ་མིད་ནས་ལྟེ་འོག་ཏུ་ལྡིག་རྩེར་བསྐྱུར། དེ་ནས་མར་རྩིར་མི་མནན་པར་རོ་སྟོད་སེང་གསེང་ལ་སོ་བར་བག་ཙམ་བཞག །དེ་ནས་འོག་རླུང་གཡས་གཡོན་དབུས་དང་གསུམ་དུ་ཐེང་གསུམ་འཐེན། རྒྱུ་ཞབས་སོ་ལ་བཞག །དེ་ནས་གཞིལ་བ་ནི། རླུང་མི་ཐུབ་ལ་ཁད་པ་དང༌། གོང་བཞིན་དུ་བསྐྱར་ལ་རྔུབས་ནས་མནན་ཏེ་མི་ཐུབ་པ་དང་རླུང་ལྷག་མ་མ་ལུས་པར་ཕྱིར་སངས་འབུད་དེ། གཏོང་དུས་ལྟེ་བ་ནང་དུ་ཅུང་ཟད་འཐེན་ལ་སྣ་ནས་ཐོག་མར་ནུད་ཙམ་ལ། དེ་ནས་ཤུགས་ཡོད་ཚད་ཀྱིས་འབུད་དེ་དྲག་ལ་ཡུན་རིང་བ་ནར་ཙེར་འབུད་དོ། །དམིགས་པ་ལྟེ་འོག་ཏུ་གཏད་དོ། །དེ་ལ་བར་རླུང་རྒྱུ་རུ་མི་གཞུག་པར་ཕྱིར་གནས་ཚད་བཞག །ཕྱིར་མི་གནས་པ་དང་སྔར་བཞིན་ནང་དུ་རྔུབས་ལ་རླུང་སྦྱོར་དེ་རྣམས་ཚང་བར་གཡས་སུ་གཅིག །རྒྱབ་ཏུ་གཅིག །གཡོན་དུ་གཅིག །མདུན་དུ་གཅིག་སྟེ་བཞི་བསྐོར་གཅིག་གོ །དེ་ལྟ་བུའི་རླུང་བཞི་སྐོར་རེ་ལ་ངལ་མི་གསོ་བར་བྱའོ། །དམིགས་པ་སེམས་ཀྱི་གཏད་པ་ནི་གསུམ་སྟེ། མེའི་དམིགས་པ། ཐིག་ལེའི་དམིགས་པ། རླུང་འོད་གསལ་དུ་གཞུག་པ་གསུམ། དང་པོ་ལ་རྩ་གསལ་བཏབ་པ་དང༌། མེ་དམིགས་སྒོམ་པའོ། །རྩ་ལ་ཡང་རྩ་གསུམ་གསལ་གདབ་པ་དང༌། འཁོར་ལོ་བཞི་གསལ་གདབ་པའོ། །དང་པོ་ནི། ལུས་ཡི་དམ་དུ་གསལ་བའི་ལུས་ཀྱི་སྟོང་ར་དང༌། རྩའི་སྟོང་ར་གཉིས་ཀྱི་ནང་དུ་དབུས་ན་ཡར་རྩ་དབུ་མ་ཆོས་བཞི་ལྡན་ཡར་སྣ་སྤྱི་གཙུག་དང་མར་སྣ་ལྟེ་འོག་སོར་བཞིར་ཟུག་པ། དེའི་གཡས་སུ་རོ་མ། གཡོན་དུ་རྐྱང་མ་སྟེ། རྩ་གཉིས་ཀྱི་ཡར་སྣ་སྣ་བུག་གཉིས་སུ་ཟུག་ནས་ཡར་སྤྱི་བོར་སོང༌། དེ་མར་གུག་སྟེ་ལྟེ་འོག་ཏུ་དབུ་མར་ཚུད་ལ་ཁད་ལ་རྩ་གསུམ་གྱི་འཛོམ་ས་ཡི་གེ་ཆའི་འཕོངས་བཞིན་དུ་ཡོད་པ། མི་སྒོམ་ཙ་ན་ཁ་དོག་སེར་པོ། བསྒོམས་པས་ཁ་དོག་དམར་པོར་སོང་བར་བསམ་མོ། །གཉིས་པ་འཁོར་ལོ་བཞི་ནི། སྤྱི་བོ་བདེ་ཆེན་གྱི་འཁོར་ལོ་ན་རྩ་འདབ་སུམ་ཅུ་རྩ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་འདབ་བཅུ་དྲུག །སྙིང་ཁ་ཆོས་ཀྱི་འཁོར་ལོ་ལ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་ལ་རྩ་འདབ་དྲུག་ཅུ་རྩ་བཞི་བསྒོམ་སྟེ། འཁོར་ལོ་བཞི་པོ་དེ་གདུགས་ཕུབ་པའི་རྩིབ་མ་བཞིན་དུ་ཤབ་བེ་ཡོད་པ། རྩ་གསུམ་པོ་གདུགས་ཀྱི་ཡུ་བ་བཞིན་དུ་ཡོད་པ། མི་སྒོམ་དུས་ཁ་དོག་སེར་པོ། སྒོམ་དུས་དམར་པོ་བསམ་མོ། །རླུང་རྔུབས་པས་རོ་རྐྱང་གཉིས་ན་མར་ལུག་རྫུད་ཀྱི་རྒྱུ་མ་ཕུས་བཏབ་པ་བཞིན་སོང་ནས། དབུ་མའི་མར་སྣར་སིབ་སིབ་བུས་པས། རྩ་གསུམ་དང་འཁོར་ལོ་བཞི་དམར་ཧུར་རེ་སོང་བ་ལ་དམིགས་པ་གཏད་དོ། །མེ་དམིགས་སྒོམ་པ་ནི། རྩ་གསུམ་འཁོར་ལོ་བཞིའི་མར་སྣ་ལྟེ་འོག་སོར་བཞི། རྩ་གསུམ་འཛོམ་སར་མ་ལས་ཐོབ་པའི་རཀྟའི་དྭངས་མ་ཨ་ཤད་ཀྱི་རྣམ་པ་སྐྱེར་པའི་ཚེར་མ་ལྟ་བུ་རིང་ཐུང་སོར་གཅིག་པ། རྩེ་མོ་ཤིན་ཏུ་ཕྲ་བ་ཐུར་དུ་བསྟན་པ། རྩ་བ་སྦོམ་པ་གྱེན་དུ་ཕྱོགས་པའི་སྣེ་མོ་དབུ་མའི་ནང་དུ་ཚུད་ཙམ་དུ་བསམ། སྤྱི་བོའི་དབུ་མའི་ནང་དུ་ཧཾ་ཡིག་དཀར་པོ་གསལ་བཏབ། དེ་ནས་རླུང་རྔུབས་པས་རླུང་རོ་རྐྱང་གཉིས་ནས་སོང༌། ཨ་ཐུང་ལ་སིབ་སིབ་བུས་པས། ཨ་ཐུང་མེའི་རང་བཞིན་དུ་དམར་ལྷིང་སོང་བ་དེ་ཉིད་ཚ་བ་ཚིག་པ་ངར་དང་ལྡན་པར་བསམ། ཨ་ཤད་ལ་བུས་པས་མེ་ཧུར་ཙེར་འབར་ལ་ཁད་པ་ལ་རིག་པ་མ་ཡེངས་པར་གཏད། ཡང་ཨ་ཐུང་ལ་སྟེང་འོག་གི་རླུང་གིས་བུས་པ་ཨ་ཐུང་གི་ཡར་སྣ་ལས་མེ་སོར་གཅིག་དབུ་མའི་ནང་དུ་འབར་བས། ཨ་ཐུང་གི་ཡར་སྣ་ཕྲ་ནར་སོང་བས་ནས་ཀྱི་དབྱིབས་ལྟ་བུ་དཀྱིལ་ལྡིར་བ་སྟོད་སྨད་ཕྲ་བ་ལ། མེ་མཚན་ཉིད་བཞི་ལྡན་མེའི་རང་བཞིན་དུ་ཚ་བ། ཚིག་པ། ངར་དང་བཅས་པ་རླུང་གི་རང་བཞིན་དུ་གཡོ་བ། རྩེ་མོ་རྣོ་བ། ཁ་དོག་དམར་པོར་སྒོམ་མོ། །ཡང་མེ་ལྕེ་དེ་རིང་དུ་སོང་ནས་སོར་བཞི་ཙམ་འབར་བས་ལྟེ་བའི་རྩ་མདུད་ལ་མེ་ལྕེ་རེག་ཡོད་པ་ཙམ་བསྒོམ། དེ་ནས་རང་གི་ལུས་ཡི་དམ་དུ་ཡོད་པའི་སྐེད་མན་ཆད་ཇེ་རིང་ལ་སོང་ནས་ས་འོག་ན་མར་སོང་བས། དབང་ཆེན་གསེར་གྱི་ས་གཞི་ལ་འཕོངས་འོག་གི་གདན་ལྷན་ཙེར་འབྱར་བའི་ལྟེ་འོག་གི་ཨ་ཐུང་ལས་མེ་འབར་བས་དབུ་མའི་ནང་ན་ཡར་ཇེ་རིང་ཇེ་རིང་ལ་སྙིང་གའི་རྩ་མདུད་ལ་མེ་ལྕེ་རེག་རེག་ཡོད་པར་བསྒོམ། དེ་ནས་ཡང་མེ་ཇེ་རིང་ལ་མགྲིན་པར་སླེབ་པར་བསྒོམ། དེ་ཐམས་ཅད་ལ་མེ་མཚན་ཉིད་བཞི་ལྡན་དུ་འབར་བའི་མེའི་རྩ་བ་ཨ་ཤད་ལ་རིག་པ་གཏད་པ་གལ་ཆེའོ། །ཐིག་ལེའི་དམིགས་པ་ལ་གཉིས་ཏེ། འབར་འཛག་སྒོམ་པ་དང༌། བོགས་འདོན་པའོ། །དང་པོ་ལ་གསུམ། འཁོར་ལོ་བཞི་ལ་བརྟེན་པའི་འབར་འཛག་དང༌། འཁོར་ལོ་གཉིས་ལ་བརྟེན་པའི་འབར་འཛག །ཙནྜ་ལཱིའི་འབར་འཛག་གོ །དང་པོ་ནི། མེ་ཤིན་ཏུ་ཚ་བ་དབུ་མ་ན་ཡར་སོང༌། སྙིང་ཁ་དང་མགྲིན་པའི་ཕུང་ཁམས་སྐྱེ་མཆེད་ཀྱི་སྙིགས་མ་ཐམས་ཅད་བསྲེགས། དེ་ནས་མེའི་འོད་ཀྱིས་སྤྱི་བོའི་ཧཾ་ལ་བསྣུན་པས་ཁམས་དྭངས་མ་བྱང་ཆུབ་ཀྱི་སེམས་ཧཾ་ཡིག་དངུལ་ཆུའི་མདོག་ལྟ་བུ་ཅོག་སྒོང་ཙམ་སྐྱ་མེར་རེ་ཡོད་པ་དེ་མེར་ཙེར་བཞུ་བས་ཐིགས་ལ་ཁད་པ་ལ་དམིགས་པ་གཏད། དེ་ཡང་མེར་ཞུ་ནས་ནར་བྱུང་བས། ཧཾ་གི་དབྱིབས་མགོ་བོ་ཐུར་ལ་བསྟན་པ་ཐིགས་ལ་ཁད་པ་ལ་དམིགས་པ་གཏད་དོ། །དེ་ནས་མེའི་དྲོད་ཀྱིས་ཐིགས་ལ་ཁད་པ་དེ་མེར་ཞུ་ནས་སྐྱ་ནར་ནར་བྱུང་བས་སྤྱི་བོའི་རྩ་འདབ་ཐམས་ཅད་ཁྲིག་མེར་གང་བར་བསྒོམ། ཡང་སྤྱི་བོ་ནས་ཐིག་ལེ་སྐྱ་ནར་བྱུང་མེ་ལྕེ་ཐུང་ཧྲིལ་སོང༌། མགྲིན་པའི་རྩ་འདབ་གང༌། མེས་ཡར་ཕུལ་ཐིག་ལེས་མར་མནན་པས་བ་སྤུའི་བུ་ག་ཚུན་ཆད་ཐིག་ལེས་གང་བས་བདེ་མེར་རེ་ཡོད་པར་བསམ། དེ་བཞིན་དུ་སྙིང་ཁ་དང་ལྟེ་བའི་རྩ་འདབ་རྣམས་ཀྱང་གོང་བཞིན་བསྒོམ། དེ་ནས་ཐིག་ལེ་ལྟེ་འོག་ནས་མར་བབས་པས། མེ་ཇེ་ཐུང་ལ་ཨ་ཤད་ལ་ལྷན་སོང་བས་སྤྱི་བོ་ནས་རྐང་མཐིལ་ཡན་ཆད་ཁམས་དཀར་དམར་གྱིས་གང༌། ལུས་མགོ་ཞབས་མེད་པ་བདེ་མེར་སོང་བར་བསྒོམ། ཐིག་ལེ་བསྲུང་དཀའ་ཞིང་དྲོད་ཆུང་ན། ཨ་ཐུང་ལས་མེ་སོར་བཞིའམ་སྙིང་ཁ་དང་མགྲིན་པའི་བར་དུ་འབར་བ་བདེ་ཉམས་དང་བསྟུན་ཏེ། མེ་དེས་ལྟེ་བ་ཡན་ཆད་ཀྱི་ཐིག་ལེ་རྣམས་ཡར་ལྟེ་བ་སྙིང་ཁ། མགྲིན་པ་སྤྱི་བོ་རྣམས་གང་འདོད་ཀྱི་གནས་སུ་བསྐྱལ་ནས་མར་འབབ་ཏུ་མི་སྟེར། ཐིག་ལེས་མེ་དེ་འོག་ཏུ་མནན་ནས་ཡར་འབར་དུ་མི་སྟེར་བར་བསམ། འཛག་པ་མ་ཆོད་ན་སྤྱི་བོའི་ཧཾ་གྱེན་ལ་བཞེངས་པར་བསྒོམ། ཐིག་ལེ་ཐམས་ཅད་ཧཾ་ལ་བསྟིམས་ནས་ཧཾ་མེ་ལྕེའི་རྩེ་མོས་ཁྱེར་ཏེ་སྤྱི་བོ་ནས་མེ་སོར་བཞི་གྱེན་དུ་འབར་བའི་རྩེ་མོ་ལ་ཧཾ་ཡེར་རེ་ཡོད་པར་བསྒོམ། བདེ་བ་ཆུང་ན་སྔར་བཞིན་དུ་ཐིག་ལེ་མར་དབབ་བོ། །འཁོར་ལོ་གཉིས་ལ་བསྟེན་པ་ནི། མེ་མགྲིན་པར་སླེབས་པའི་འོད་ཀྱིས་ཐིག་ལེ་རྒྱུན་མ་ཆད་པར་ཨ་ཐུང་ལ་ཕོག །ལུས་བདེ་བས་གང༌། མེ་ཡར་འབར། ཐིག་ལེ་མར་བབས་པས་ཁམས་དཀར་དམར་རྒྱུན་མ་ཆད་པ་ན་རེ་ཡོད་པར་བསྒོམ། ཙནྜ་ལཱིའི་འབར་འཛག་ནི། དབུ་མ་ལས་གྱེས་པའི་རྩ་སྟོང་ཕྲག་བདུན་ཅུ་རྩ་གཉིས་བསྒོམ་སྟེ། དེ་ནས་ཨ་ཐུང་ལས་མེ་འབར་བས་དབུ་མ་ན་ཡར་སོང་བས་རྩ་ཐམས་ཅད་ཀྱི་ནང་ན་ཡར་མེ་དམར་ཤིག་ཤིག་འབར་བས་ཧཾ་ཞུ་ནས་ཐིག་ལེ་ཡང་རྩ་ནང་ཐམས་ཅད་དུ་སོང་བས། རྩ་རེ་རེའི་ནང་དུ་འབར་འཛག་རྒྱུན་མི་ཆད་དུ་ཡོད་པར་བསྒོམ་མོ། །བོགས་འདོན་པ་ལ་གཉིས་ཏེ། དྲོད་དང་བདེ་བ་ལའོ། །དང་པོ་ནི། གཙུབས་ཤིང་མ་མེའི་འཁོར་ལོ་འདི་བྱ་སྟེ། རླུང་ལམ་འབུད་པ་དགུས་བསལ་ལ། རང་གི་ལུས་ཡི་དམ་ལྷན་སྐྱེས་ཧེ་རུ་ཀ་ནང་སྟོང་རའི་དབུས་སུ་རྩ་གསུམ་འཁོར་ལོ་བཞི་བསྒོམ། དབུ་མ་ལས་གྱེས་པའི་ཁྲག་འབབ་པའི་རྩ་སྟོང་ཕྲག་བདུན་ཅུ་རྩ་གཉིས་གཏོར་སྐུ་ལ་རྒྱང་བུ་བཙུགས་པ་བཞིན་དུ་བསམ། སྤྱི་བོ་བདེ་ཆེན་འཁོར་ལོར་ཧཾ་ཡིག་བདེ་བའི་རང་བཞིན་དང༌། གསང་གནས་བདེ་སྐྱོང་འཁོར་ལོར་ཨ་ཤད་དྲོད་ཀྱི་རང་བཞིན་དུ་བསམ། ལུས་གནད་ཙོག་པུ་རེ་མིག་ལྟར་བསྣོལ། རྐང་པའི་མཐེབ་ཆེན་གཉིས་ལ་མེ་རྩ་ཐུར་འགྱུ་བའི་རཾ་རེ་རེ་ཡོད་པར་བསམས་ལ་ལག་པས་བཟུང༌། སྟེང་འོག་གི་རླུང་གིས་རཾ་ལས་མེ་འབར་བ་རྐང་ངར་གྱི་ནང་ནས་ཞུགས་པས་ཨ་ཤད་ལ་མེ་འབར། དབུ་མའི་ནང་ན་ཡར་ཞུགས། སྟོང་ཕྲག་བདུན་ཅུ་རྩ་གཉིས་ལས་གྱེས་པའི་རྩ་རེ་རེའི་ནང་དུ་ཡང་མེ་ཆེར་འབར་ནས། ཁམས་མར་འཛག་པའི་དཀར་དམར་དུ་ཤིག་ཤིག །འབར་འཛག་དུཾ་འུར་འུར་འབར་བར་བསྒོམས་ལ། གཡས་གཡོན་གཉིས་དྲག་ཏུ་སྤྲུགས་ཤིང༌། རླུང་འབུད་ཁར་བཅག་སྤྲུགས་ལ་འབུད་དོ། །རླུང་གི་གནད་ནི་སྦྱོར་བ་བཞི་ལྡན་བྱའོ། །རྗེས་ཐམས་ཅད་དུ་རང་ལུས་མེ་རུ་འུར་འུར་འབར་བར་བསམ་ཞིང༌། བཟའ་བཏུང་དང་གོས་སོགས་ཀྱང་མེ་རུ་བྱིན་གྱིས་བརླབ། སྣང་བ་ཐམས་ཅད་མེར་འབར་བར་བསྒོམ་མོ། །གཉིས་པ་བདེ་བའི་བོགས་འདོན་ནི། ཐིག་ལེ་ཞལ་སྦྱོར། སྟེང་འོག་གི་བདེ་བ་སྒོམ་པ། ཡེ་ཤེས་ཀྱི་རིག་མ་བསྟེན་པ་སོགས་ཞིབ་པར་ནི་གཏུམ་མོའི་ཁྲིད་ཡིག་རྒྱས་པར་ལྟའོ། །ཉམས་ལེན་མདོར་བསྡུས་ནི། མདུན་དུ་ཡིད་རིག་གསལ་ལ། ལུས་གནད་མེ་ཐབ་དྲུག་འཆིང༌། རླུང་སྦྱོར་བ་བཞི་ལྡན། སེམས་གནད་རང་ཉིད་ལྷན་སྐྱེས་ཧེ་རུ་ཀར་གསལ་བའི་སྟོང་ར་དར་ཟབ་སྔོན་པོའི་གུར་ཕུབ་པ་ལྟ་བུའི་ལུས་ཀྱི་ནང་དུ་རྩ་གསུམ་དང་འཁོར་ལོ་བཞི་གསལ་བཏབ། སྤྱི་བོར་ཧཾ་དང༌། ཨ་ཤད་སྔར་བཞིན་བསྒོམ། རླུང་གིས་ཨ་ཤད་ལས་མེ་སྦར། མེའི་དྲོད་ཀྱིས་ཧཾ་ཡིག་ཞུ་བའི་ཐིགས་པ་ལྷུང༌། ཨ་ཤད་ལ་ཕོག་པས་མེ་ལྕེ་མར་ཐུར་དུ་སོང༌༑ སླར་དེ་ལས་ཀྱང་ཆེར་འབར་བས་ལྟེ་བར་སླེབས། ཧཾ་ཡིག་ཆེར་ཞུ་བའི་ཐིགས་པ་ཕོག་པས་མར་བྲོས་པ་ལྟར་སོང༌། ཡང་དེ་ལས་ཆེར་འབར། མེ་ལྕེ་སྙིང་ཁར་སླེབས། མགྲིན་པ་དང་སྤྱི་བོར་སོང༌། ཧཾ་ཡིག་ཆིལ་གྱིས་བཞུ་བའི་རྒྱུན་མགྲིན་པའི་རྩ་འཁོར་གང་བས་དགའ་བའི་བདེ་བ་དང༌། སྙིང་ཁའི་རྩ་འཁོར་གང་བས་མཆོག་དགའ་དང༌། ལྟེ་བའི་རྩ་འཁོར་གང་བས་དགའ་བྲལ་དང༌། གསང་གནས་ཀྱི་སྣ་རྩེའི་མཐར་ཐུག་པར་བབས་པས་ལྷན་ཅིག་སྐྱེས་པའི་དགའ་བའི་ཉམས་དྲན་པར་བྱ་ཞིང༌། དེ་ལྟར་ཕྱག་རྒྱ་ཆེན་པོའི་ངང་ནས་འཛག་མེད་དུ་བཟུང་བས་ལྟེ་བ་སྙིང་ཁ་མགྲིན་པ་སྤྱི་བོ་གང་བ་དགའ་བ་ནས་ལྷན་སྐྱེས་ཀྱི་དགའ་བའི་བར་ངོས་བཟུང་བར་བྱའོ། །རླུང་འོད་གསལ་དུ་གཞུག་པ་ནི། དེ་ལྟར་བསྒོམས་ནས་བདེ་དྲོད་ཞེན་མེད་དུ་ཕྱག་རྒྱ་ཆེན་པོར་སྐྱེལ་བ་དང༌། རིག་རླུང་འོད་གསལ་དུ་གཞུག་པ། རླུང་སྟེང་འོག་ཁ་སྦྱར་ལ་སེམས་ཨ་ཤད་ལ་ཅུང་ཟད་གཏད་ལ། བསམ་དུ་མེད་པའི་ངང་ལ་དྲན་པ་མི་ཡེངས་པར་བདེ་བའི་ངོ་བོ་ལ་བལྟ་བར་བྱའོ། །རྩ་རླུང་ཐིག་ལེའི་གེགས་བསལ་བ་ལ། སྤྱོད་ལམ་དང་གེགས་བསལ་བའོ། །དང་པོ་ནི། གཏུམ་མོ་སྒོམ་དུས་འགྲངས་ཆེས་པ། ལྟོགས་ཆེས་པ་མི་བྱ༑ མེ་དང་ཉི་མ་མི་འདེ། རྐང་རྗེན་ཆུ་བརྒལ་བ་གཡེར་མ་སྒ་དང་ཆང་སྐྱུར་ཤ་རུལ་ཟ་ཚོད་སོགས་སྔོ་ངད་རི་སྒོག་ཉ་ཤ་སོགས་སྤང༌། རྔུལ་ཐོན་པའི་ལས་མི་བྱ། དུས་ཐམས་ཅད་དུ་འཁྲུལ་འཁོར་དྲང་སིང་བ་བྱ། ཟས་ཟ་བ་ཉལ་ལྡངས་གང་བྱེད་ཀྱང་རླུང་རོ་འབུད། ཕྲུག་དང་སྐྱི་ཆགས་གྲིབ་ཅན་གྱི་གོས་རྣམས་མི་གྱོན། ལུས་སྦྱོང་དང་མར་ནག་གི་བསྐུ་བྱུག་བྱའོ། །གེགས་བསལ་བ་ནི། སྔར་གྱི་གེགས་སེལ་བདུད་རྩིའི་གཏེར་མཛོད་སོགས་ཡིག་ཆ་རྣམས་སུ་རྒྱས་པར་བཤད་པ་ལས་ཤེས་པར་བྱའོ། །འབྲས་བུ་སྐྱེ་བའི་རིམ་པ་ནི་གཉིས་ཏེ། ཡོན་ཏན་སྐྱེ་ཚུལ་དང་འབྲས་བུའོ། །དང་པོ་ནི། གཏུམ་མོ་ལ་དུས་གསུམ་ཡོད་དེ། གཏུམ་མོ་དུཿ ཁའི་དུས། གཏུམ་མོ་འདོད་ཆགས་ཀྱི་དུས། གཏུམ་མོ་ཡོན་ཏན་གྱི་དུས་དང་གསུམ་ཡོད་པས་དེ་རྣམས་ཀྱི་རྣམ་དབྱེ་རྒྱས་པར་གཞུང་ཁྲིད་ཆེན་མོར་ཞིབ་པར་ཡོད་དོ། །འོད་གསལ་ནི། ལུས་གནད་རླུང་གནད་དམིགས་པའི་གནད་གསུམ། དང་པོ་ནི། མལ་མགོ་བྱང་དུ་བསྟན། ཁ་ནུབ་གཡས་འོག་གི་འགྲམ་འོག་ཏུ་ལག་པ་བཅུག །གཡོན་དཔྱི་ལ་བཀབ། གཉིས་པ་ནི། ལུས་ཡི་དམ་ལྷན་སྐྱེས་བསྒོམ། སྙིང་པདྨ་འདབ་བརྒྱད་ཀྱི་སྟེང་དུ། བླ་མ་ཆོས་སྐུའི་རང་བཞིན་དུ་བཞུགས་པ་ལ་གསོལ་བ་བཏབ། རླུང་དྲག་པོ་ཞིག་རྔུབས་ལ་ཐུབ་ཚད་བཟུང༌། མིག་གྱེན་ལ་བགྲད། རིག་པ་སྙིང་ཁར་གཏད། རླུང་བུམ་ཅན་བདུན་ཡན་ཆད་བསྒོམ། གསུམ་པ་ནི། སྙིང་ཁའི་འཁོར་ལོའི་དབུས་སུ་བྷ་སན་ཏ་ཁ་བྱེ་བའི་སྟེང་དུ་པདྨ་འདབ་བཞིའི་དབུས་སུ་ཧཱུྃ་སྔོན་པོ། མདུན་དུ་ཨ། གཡས་སུ་ནུ། རྒྱབ་ཏུ་ཏ། གཡོན་དུ་ར་བསམ། ཧཱུྃ་ལས་འོད་འཕྲོས་ལུས་ཀྱི་ནང་ཁྲོལ་སོགས་མི་གཙང་བ་དང༌། སྡིག་སྒྲིབ་ཐམས་ཅད་བསྲེགས། སྟོང་སངས་སོང༌། ལུས་ནང་ཐམས་ཅད་ཧཱུྃ་འོད་ཀྱིས་སྐྱ་ལམ་མེ་སོང་བར་བསམ། དེ་ནས་གཉིད་སོང་མ་ཐག་འོད་གསལ་འཆར་བ་ངོ་ཤེས་པར་བྱ་སྙམ་པའི་འདུན་པ་བཏང༌། ཧཱུྃ་ལ་རིག་པ་གཏད་ཕྱག་རྒྱ་ཆེན་པོ་ལ་བཞག །དེའི་ངང་ནས་གཉིད་ལ་ཐིམ་སོང་བ་དང་གསལ་སྟོང་ནམ་མཁའ་དྭངས་པའི་དཀྱིལ་ལྟ་བུ་ཞིག་ཡེར་འཆར། ཡང་ཧཱུྃ་གི་ཚབ་འོད་སྔོན་པོ་ཅོག་སྒོང་ཙམ་ལ་དམིགས་པ་གཏད། ཡང་སྙིང་དབུས་སུ་བླ་མའི་སྐུ་ཆུང་ལ་རྫོགས་པ་ཞིག་བསྒོམ། དེའི་ཐུགས་ཁར་ཧཱུྃ་སྔོན་པོ་ནས་ཙམ་ཞིག་སྒོམ་པ་གོང་བཞིན་བྱ་ཞིང༌། དེའི་ངོ་བོ་ལ་སེམས་གཏད་ནས་གཉིད་ལོག་པས། མཐོང་སྣང་སྣ་ཚོགས་སུ་འབྱུང་སྟེ། འཇིག་རྟེན་གྱི་ཁམས་དང༌། ལུང་པ་དང་ཡུལ་ཁམས་དང༌། ཐ་མ་ཡང་རང་གི་སྤྱིལ་པོའི་ནང་ན་གང་ཡོད་མཐོང་བར་འགྱུར་རོ། །ཚེ་འདིར་སྦྱོང་ལོང་བྱུང་ན་བཙོན་འགྲུས་ཅན་ཚེ་འདིར་སངས་རྒྱས་ལ། སྦྱོང་ལོང་མ་བྱུང་ན་འཆི་ཁའི་བར་དོ་དང་ལམ་གོམས་པའི་འོད་གསལ་དང༌། འོད་གསལ་གཉིས་ཆུ་ལ་ཆུ་བླུགས་པ་བཞིན་དུ་འདྲེས་ནས་འཆི་བ་ཆོས་སྐུའི་ཞིང་ཁམས་སུ་སངས་རྒྱའོ། །སྒྱུ་ལུས་ནི། རང་གི་མགྲིན་པར་བླ་མ་བསྒོམས་ལ་གསོལ་བ་གདབ། སྣོད་སྒྱུ་མར་སྦྱང་བ་དང༌། བཅུད་སྒྱུ་མར་སྦྱང་བ་དང༌། འཇིག་རྟེན་ཆོས་བརྒྱད་སྒྱུ་མར་སྦྱང་བའོ། །དང་པོ་ནི། ངོ་བོ་ལ་བལྟས་ན་བདེན་པར་སྐད་ཅིག་ཀྱང་མ་གྲུབ། འཁྲུལ་ངོ་ན་སྣ་ཚོགས་སུ་སྣང་གི་འདུག་པས་མི་བདེན་བཞིན་དུ་སྣང་བ་འདི་དང༌། དྲོད་གཤེར་དང་ས་བོན་ལས་མྱུ་གུ་སྐྱེས། ཡལ་ག་ལོ་འདབ་མེ་ཏོག་འབྲས་བུ་སྨིན་ནས་ནམ་ཟླ་དུས་ཀྱིས་བྲུལ་ཅིང༌། དབྱར་ཞུ་དགུན་འཁྱག་རིམ་གྱིས་འགྱུར་འགྲོ། ངོ་བོ་ལ་བལྟས་པས་བདེན་པར་མ་གྲུབ། ལྷོ་འཛམ་བུ་གླིང་པའི་དགུན་ལ་བྱང་སྒྲ་མི་སྙན་པའི་དབྱར་བྱེད། འཛམ་བུ་གླིང་པའི་ཉི་མ་ཕྱེད་ལ། སྒྲ་མི་སྙན་པའི་ནམ་ཕྱེད་བྱེད། དཔེ་ལོ་དང་ཉིན་མཚན་སྐྱིད་སྡུག་ལ་འགྲེ། གླིང་བཞི་ཀའི་ཉི་མ་འཆར་ནུབ་ལ་ཕྱོགས་འཛིན་པར་འདུག་གེ། གཅིག་གི་ཤར་ལ་གཅིག་གི་ནུབ། གཅིག་སྟེང་ལ་གཅིག་གི་འོག་བྱེད། དེ་བཞིན་ཀུན་ལ་འགྲེ། ངོ་བོ་ལ་བལྟས་པས་བདེན་པར་སྐད་ཅིག་ཀྱང་མ་གྲུབ། འཁྲུལ་ངོ་ན་སྣ་ཚོགས་སུ་སྣང་གིན་འདུག་པས། ཞེན་མེད་དུ་སྣང་བ་འདི་སྒྱུ་ལུས་ཀྱི་ཉམས་ལེན་ཡིན་ནོ། །གཉིས་པ་བཅུད་སྒྱུ་མར་སྦྱང་བ་ནི། རང་ལུས་དང་གཞན་ལུས་གཉིས་ཀའི་སྤྱོད་པ་སྒྱུ་མར་སྦྱང་བའོ། །དང་པོ་ནི། ཤ་ཁྲག་གདོས་བཅས་ཀྱི་ཕུང་པོ་འདི། བར་དོའི་རྣམ་ཤེས་དང༌། ཕ་མའི་ཁུ་ཁྲག་འཛོམས་པ་ལས་བྱུང་ཞིང༌། རྟེན་འབྲེལ་ཚོགས་པའི་རྫུན་སྣང་གི་ལུས་ལ་སོ་སོ་ལ་མིང་རེ་དུམ་བུར་བསིལ་ན་ལུས་གཞི་མ་གྲུབ། གཉིས་པ་ནི། མའི་མངལ་དུ་ཆགས་ནས་རྒ་ཤིའི་བར་རིམ་གྱིས་འགྱུར་འགྲོ། རང་གི་སེམས་ཐོག་ཏུ་བདེ་སྡུག་ཅི་ཤར་ཀྱང༌། སྐད་ཅིག་རེ་ཡང་ཚུགས་མི་ཐུབ་པས། ངོ་བོ་ལ་བལྟས་པས་བདེན་པར་མ་གྲུབ། གསུམ་པ་གཉིས་ཀའི་སྤྱོད་པ་སྒྱུ་མར་སྦྱང་བ་ནི། ཁྱིམ་ཐབས་བྱེད་པ་དང༌། ལུས་ལ་བུ་ཚ་བྱུང་བ་དང༌། སྐྱེས་པ་སོགས་ལ་ངོ་མི་ཚ་བར། ཕོ་མཚན་དང་མོ་མཚན་ལ་ངོ་ཚར་བྱེད། ངོ་བོ་ལ་བལྟས་པས་བདེན་པར་མ་གྲུབ་བོ། །འཇིག་རྟེན་ཆོས་བརྒྱད་སྒྱུ་མར་སྦྱང་བ་ནི། སྟོད་སྨད་བདེ་སྡུག་སྙན་མི་སྙན་དང༌། གྲགས་མ་གྲགས་བརྗོད་པ་ལ་གྲུབ་པ་འདུག་མི་འདུག་བལྟ། དག་པའི་སྒྱུ་ལུས་སྒྱུ་མར་སྦྱང་བ་ནི། རང་གི་རྒྱབ་ཏུ་ཡི་དམ་ལྷའི་བྲིས་སྐུ་བཀྲམ་ལ༑ མདུན་དུ་མེ་ལོང་གཡའ་མེད་བཞག་པར་གཟུགས་བརྙན་འཆར་དུ་བཅུག་ལ། རིམ་གྱིས་བག་ཆགས་སྦྱངས་ཤིང༌། མཐར་སྣོད་བཅུད་ཐམས་ཅད་ཡི་དམ་དུ་བསྒོམས་ལ་སྒྱུ་མ་ལྟ་བུའི་ངང་ནས་སྨོན་ལམ་བཏབ། རྫོགས་རིམ་སྒྱུ་མ་ནི། སེམས་འདས་པའི་རྗེས་མི་བཅད་ཅིང་མ་འོངས་པའི་སྔུན་མི་བསུ། ད་ལྟ་བར་བཟོ་མ་བྱས་པར་མ་ཡེངས་པར་བར་སྣང་སྟོང་སང་ངེ་བ་ལ་རྩེ་གཅིག་ཏུ་བལྟས་པས། རླུང་སེམས་དབུ་མར་ཚུད། རྣམ་རྟོག་ཞི་ནས་དུ་བ་དང་སྨིག་རྒྱུ་དང་མེ་འཁྱེར་དང་སྒྲོན་མའམ་སྐྱ་རེངས་དང༌། སྤྲིན་མེད་པའི་ནམ་མཁའ་ལྟ་བུ་ལ་སོགས་པའི་ཉམས་ཀྱི་སྣང་བ་ཆུ་ཟླའམ། མེ་ལོང་ལ་གཟུགས་བརྙན་ཤར་བ་ལྟར་དྭངས་ཤིང་གསལ་ལ་སྒྲིབ་པ་མེད་པ་མཚན་དཔེ་ལྡན་པའི་སྤྲུལ་པའི་སྐུ་མཐོང་ཞིང༌། དེ་ནས་སྒྲར་སྣང་བའི་ལོངས་སྐུ་འབྱུང་ངོ༌། །གཉིས་བསྡུས་ཀྱི་ཆོས་ཐམས་ཅད་སྒྱུ་མར་སྦྱང་བ་ནི། མཉམ་བཞག་བརྟན་པ་དང༌། རྗེས་ཤེས་ཀྱི་སྣང་བའི་སྟེང་དུ་སྟོང་གཟུགས་དྲངས་ནས་བལྟས་པས། འཁོར་འདས་ལ་སོགས་པའི་གཉིས་སུ་སྣང་བའི་ཆོས་ཐམས་ཅད་གཉིས་སུ་མེད་པའི་ཡེ་ཤེས་ཀུན་རྫོབ་ཀྱི་བདེན་པ་སྒྱུ་མའི་ཏིང་ངེ་འཛིན་དུ་འཆར་ཞིང༌། དེ་ཉིད་ལ་མཉམ་པར་བཞག་པས་འོད་གསལ་དུ་དག་པར་འགྱུར་རོ། །རྨི་ལམ་ནི། ཉིན་པར་གྱི་དུས་སུ་འགྲོ་འཆག་ཉལ་འདུག་ཅི་བྱེད་ཀྱང༌། རྨི་ལམ་ཡིན་ཟེར་བ་ངག་ཏུ་ཡང་བརྗོད་ཅིང༌། གཉིད་ལོག་པའི་དུས་སུ་མགྲིན་པར་ཨ་དམར་པོ་ལ་སེམས་གཏད་ནས། རྨི་ལམ་ལ་རྨི་ལམ་དུ་ངོ་ཤེས་པར་བྱའོ་སྙམ་པའི་ངང་ནས་རྨི་ལམ་ཟིན་པ་དང༌། ཁྱི་ཞིག་བྱུང་ཡང་དེ་བླ་མ་དང་ཡི་དམ་གྱི་ལྷར་གྱུར་ནས། དེ་ལ་དབང་ཆོས་ཞུས་སངས་རྒྱས་ཀྱི་ཞིང་དུ་ཕྱིན་ནས། སངས་རྒྱས་ཀྱི་ཞིང་ཐམས་ཅད་ལ་བལྟ་ཞིང༌། རང་གང་འདོད་པའི་ཞིང་ལ་བལྟ་བར་བྱའོ། །རྨི་ལམ་གྱི་ངང་ལ་ཕྱག་རྒྱ་ཆེན་པོ་ལ་བཞག་པས་མངོན་དུ་འགྱུར་རོ། །འཕོ་བ་ནི། ལུས་གནད་རྣམ་སྣང་ཆོས་བདུན་བྱས་ལ། རང་ལུས་ཡི་དམ་ལྷན་སྐྱེས་ཧེ་རུ་ཀ །ནང་སྟོང་རར་གསལ་བའི་ནང་དུ་རྩ་དབུ་མ་མདའ་སྨྱུག་འབྲིང་པོ་ཙམ་ཡར་རྩེ་སྤྱི་གཙུག་ཏུ་ཁ་དང་ངེ་ཡོད་པ། མར་སྣ་ལྟེ་འོག་སོར་བཞིར་ཟུག་པ་ཁ་དོག་དམར་པོ། སྤྱི་བོ་ཁྲུ་གང་བའི་ནམ་མཁའ་ལ་གུ་རུ་དྷྭ་ཛ་ཤྲཱི་བྷ་དྲ་རབ་བྱུང་གི་ཆ་ལུགས་ཅན། ཕྱག་གཉིས་མཉམ་བཞག་ཞབས་རྡོ་རྗེ་སྐྱིལ་ཀྲུང་དུ་བཞུགས་པའི་མཐར་ཆོས་དྲུག་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པར་བསྒོམ། ལྟེ་འོག་སོར་བཞིར་དབུ་མའི་ནང་དུ་རྣམ་པར་ཤེས་པའི་ངོ་བོ་ཐིག་ལེ་དཀར་པོ་ཤ་བའི་རིལ་མ་ཙམ་ཞིག་གི་དབུས་ན་ཧཱུྃ་དམར་པོ་ནས་འབྲུ་ཙམ་ཞིག་བསྒོམ། དེ་གསལ་ཐེབས་པ་ན། ངག་ཏུ་ཧིག་ཅེས་བརྗོད་པས༑ ཐིག་ལེ་དེ་སྤྱི་གཙུག་ཏུ་ཐལ་སླེབས། ཚངས་བུག་ཁང་པའི་མཐོང་ཁུང་ལྟར་སྐྱ་ཐལ་ལེ་འདུག་པར་བསམ། ཡང་ཧིཀ་ཅེས་བརྗོད་པས། ཚངས་བུག་ནས་རྒྱངས་ཐོན། གྱེན་དུ་མདའ་འཕངས་པ་བཞིན་སོང༌། གུ་རུའི་ཐུགས་ཁར་སླེབས། ཟན་ཁམས་གཅིག་ཟ་ཡུན་ནས། ཀ་ཞེས་བརྗོད་པས་ཐིག་ལེ་དེ་དལ་བུས་ཚངས་བུག་ནས་ལྟེ་འོག་སོར་ཞིར་ཕབ། ཡང་ཧིག་ཅེས་པས་སྤྱི་བོར་སླེབས། ཡང་ཧིཀ་བརྗོད་པས་གུ་རུའི་ཐུགས་ཀར་སླེབས། ཀ་ཞེས་པས་ལྟེ་འོག་ཏུ་ཕབ། དེ་ལྟར་དམིགས་པ་གསལ་བའི་ངང་ནས་སྦྱོང་ཐེབས་རེ་ལ་ཚར་ཉི་ཤུ་རྩ་གཅིག་ལས་མི་ཉུང་བར་བསྒོམ་པར་བྱའོ། །ཡང་ཐོ་རངས་གཉིད་སད་མ་ཐག །བདེ་བ་ཅན་ནམ་མངོན་དགའ་འམ༑ ཨོ་རྒྱན་སྤྲུལ་པའི་ཞིང་སོགས་གང་དུ་འགྲོ་འདོད་པའི་ཞིང་དེར་འགྲོ་དགོས་སྙམ་པས། ཞིང་དེའི་བཀོད་པ་ཡིད་ལ་དུང་ངེ་དྲན་པར་བྱ་ཞིང༌། ཞིང་ཁམས་དེར་ཕྱིན་ནས་པདྨའི་སྟེང་དུ་དགེ་སྦྱོར་བྱེད་པར་བསམས་ལ། སེམས་ཡུན་རིང་དུ་མཉམ་པར་བཞག་གོ །དེ་ལ་དམིགས་སྐོར་གཅིག །ཡང་ཧིག་ཅེས་བརྗོད་པས་དབུ་མའི་ནང་གི་ཐིག་ལེ་ཧཱུྃ་དང་བཅས་པ་སྤྱི་གཙུག་ནས་རྒྱངས་ཐོན། གུ་རུའི་ཐུགས་ཀར་ཐིམ་པ་ལ་ཅུང་ཟད་མཉམ་པར་བཞག །ཀ་ཞེས་པས་མར་ལྟེ་འོག་ཏུ་ཕབ། ཅུང་ཟད་བཞག །དེ་ལ་དམིགས་སྐོར་གཅིག །ཡང་སྔར་ལྟར་དམིགས་པ་གསལ་བའི་སྤྱི་གཙུག་ཁྲུ་གང་གི་ནམ་མཁར་བཞུགས་པའི་གུ་རུ་དང་དབྱེར་མེད་པའི་ཞིང་ཁམས་གང་ལ་མོས་པའི་སྟོན་པ་དབྱེར་མེད་པར་བསྒོམ་ལ། ཧིཀ་ཅེས་པས་ཐིག་ལེ་སྤྱི་གཙུག་ནས་བྱོན། སྟོན་པའི་ཐུགས་ཀར་ཐིམ་པར་བསམ། ཡང་ཀ་ཞེས་པས་མར་ཕབ་པ་གོང་བཞིན་ནོ། །དེ་ལྟར་བསྒོམས་པས་རྟགས་སུ་སྤྱི་གཙུག་གཡའ་ཞིང་ཚ་བ། ཆུ་སེར་ཐོན་ཅིང་སྐྲངས་པ་ལ་སོགས་པ་འབྱུང་ལ། དེ་རྣམས་མ་བྱུང་བར་བསྒོམ་པར་བྱའོ། །ཡང་སྔར་བཞིན་བསྒོམས་པས་ཐིག་ལེ་ཧཱུྃ་གིས་མཚན་པ་དེ་བླ་མའི་ཐུགས་ཁར་ཐིམ་པ་དང༌། བླ་མ་བདེ་བ་ཅན་ནམ་མངོན་དགའ་སོགས་སུ་མདའ་འཕངས་པ་བཞིན་སོང་ནས་འོད་དཔག་མེད་དམ་མི་འཁྲུགས་པའི་ཐུགས་ཁར་ཐིམ་པ་ལ་ཤེས་པ་མ་ཡེངས་པར་བསྒོམ་ཐོག་ཏུ་གཞག་པར་བྱའོ། །ཉལ་བའི་དུས་སུ་ཤེས་པ་སྙིང་ཁ་ནས་འཐོན། ཞིང་ཁམས་གང་མོས་དེར་འཕངས། རང་ཞིང་ཁམས་དེར་ཡོད་པའི་ངང་དུ་གཉིད་ལོག་གོ །ལས་ལ་སྦྱར་བ་ནི། དུས་ལ་བབ་པའི་ཚེ་ལུས་གནད་ཙོག་པུའམ་སེང་གེའི་ཉལ་སྟབས་བྱ། རང་ལུས་ཕྱི་ཡི་དམ་ནང་སྟོང་ར་རྩ་དབུ་མ་སོགས་གོང་བཞིན་གསལ་བཏབ། སྤྱི་བོར་བླ་མ་དང་གང་མོས་ཀྱི་ཞིང་གི་སྟོན་པ་དབྱེར་མེད་དུ་བསྒོམ། དེ་ལ་སྐྱབས་སེམས་ཡན་ལག་བདུན་པ་གསོལ་འདེབས་བྱ། རང་གང་འདོད་པའི་ཞིང་དེར་འགྲོ་སྙམ་པའི་འདུན་པ་དྲག་པོ་ཡང་ཡང་བྱ། རང་གི་སེམས་ཐིག་ལེ་དཀར་པོ་ཧཱུྃ་གིས་མཚན་པ་དེ་དབུ་མའི་ནང་ནས་ཡར་སོང༌། སྤྱི་གཙུག་ནས་ཐོན། བླ་མའི་ཐུགས་ཀར་ཐིམ་པར་བསམས་ལ་རླུང་ཕྱིར་འབུད། མིག་གྱེན་ལ་བསྒྲེང༌། ཧིཀ་དྲག་པོ་ལན་འགའ་བརྗོད་པའི་རྟིང་ལ་བླ་མ་དེ་གང་དུ་འགྲོ་བའི་ཞིང་དེའི་སངས་རྒྱས་ཀྱི་དྲུང་དུ་སྐར་མདའ་འཕང་བ་བཞིན་སོང་ནས། དེའི་ཐུགས་ཀར་ཐིམ་པར་བསམ་མོ། །དེས་དོན་འགྲུབ་བོ། །བར་དོ་ནི། འཆི་བའི་དུས་སུ་དབང་པོ་ཕྲ་རགས་ཐིམ་པའི་རྗེས་ལ། རྣམ་རྟོག་ཐམས་ཅད་དང་བྲལ་བ། ནམ་མཁའི་དྭངས་པའི་དཀྱིལ་ལྟ་བུ། ངོ་བོ་སྟོང་པའི་གནས་ལུགས་མ་བཅོས་པ་ཇི་ལྟ་བ་བཞིན་དུ་དེར་འཆར་བས། དེ་འཆི་བ་འོད་གསལ་ཆོས་ཀྱི་སྐུ་ཡིན་ཏེ། དེ་ཡིན་པ་ལ་ཡིན་པར་ཤེས་པར་བྱས་ཏེ། དེའི་དུས་སུ་ཕྱག་རྒྱ་ཆེན་པོ་ལ་མཉམ་པར་བཞག་པས། འཆི་བ་འོད་གསལ་ཆོས་སྐུར་སངས་རྒྱའོ། །སྲིད་པ་བར་དོའི་དུས་སུ། དབང་པོ་ཀུན་ཚང་ཐོགས་མེད་རྒྱུ་ཞིང་རྫུ་འཕྲུལ་འོད་དང་ལྡན་པའི་དུས་ཤིག་འོང་སྟེ། དེ་བར་དོ་ལོངས་སྤྱོད་རྫོགས་པའི་སྐུ་ཡིན་ཏེ། དེ་ཡིན་པ་ལ་ཡིན་པར་ཤེས་པར་བྱས་ལ། ཡི་དམ་གྱི་ལྷ་སྐུར་གྱུར་པར་བསྒོམས་པས། ཤིང་བསྲེགས་པའི་སོལ་བ་དེ་ཤིང་དུ་མི་ལྡོག་པ་བཞིན། རླུང་སེམས་ལས་གྲུབ་པའི་རྒྱུ་མཚན་ཉིད་ཡིན་པ་སྟེ། ཡི་དམ་ལྷར་གྱུར་ནས་བར་དོ་ལོངས་སྤྱོད་རྫོགས་པའི་སྐུར་སངས་རྒྱའོ། །དྲི་ཟ་མངལ་སྒོ་འཚོལ་བའི་དུས། ཕོ་མོ་སྦྱོར་བ་བྱེད་པ་ལ་ཆགས་སྡང་སྐྱེ་བས། ཕ་མ་དེ་ཡི་དམ་ཡབ་ཡུམ་དུ་སྒོམ་ཞིང༌། རང་ཉིད་གཏུམ་མོའི་འབར་འཛག་ལ་དམིགས་པ་གཏད་ནས་མངལ་དུ་མི་འཇུག་སྙམ་པའི་འདུན་པ་ཡང་ཡང་བྱས་ནས། ཕྱིན་ཆད་ཤེས་བཞིན་དུ་སྐྱེ་བ་ལེན་པ་ཞིག་ཡོང་སྟེ། དེ་ཡིན་པ་ལ་ཡིན་པར་ངོ་ཤེས་པར་བྱས་ཏེ། གྲུབ་ཐོབ་ཕོ་མོ་སྦྱོར་བ་བྱེད་པའི་མངལ་དུ་ཞུགས་པས། སྐྱེ་བ་སྣ་ཚོགས་སྤྲུལ་པའི་སྐུར་སངས་རྒྱའོ། །དེ་རྣམས་ཆོས་དྲུག་གི་སྙིང་པོ་བསྡུས་ནས་ཉམས་སུ་བླངས་ཚུལ་ཡིན། ཁོ་བོས་ནཱ་རོའི་ཆོས་དྲུག་ལ་ཡིག་ཆ་རྒྱས་འབྲིང་བསྡུས་གསུམ་ཆ་ལག་ཚང་ཞིང་ཟབ་པར་བྲིས་ཡོད་ཅིང༌། སྐལ་ལྡན་གྱི་སློབ་མ་རྣམས་ལའང་རང་གི་མྱོང་ཆོས་ཟབ་མོ་རྣམས་མ་སྦས་ལྷུག་པར་བྱིན་ཡོད་པས་ཉམས་སུ་བླངས་ཤིང་སྐལ་ལྡན་རྣམས་ལ་སྤེལ་ཅིག །ང་ཤངས་སྒོམ་རྒད་པོའི་མྱོང་ཆོས་འདི་རྣམས་ཀྱི་ཡིག་ཆ་དབང་ཁྲིད་ལུང་གསུམ་གྱི་རྒྱུན་ནི། ཉི་འོག་ཐམས་ཅད་དུ་ཕྱོགས་དང་རིས་སུ་མེད་པར་ཁྱབ་པར་གྱུར་ཡོད་དེ། མ་འོངས་པའི་དུས་ན་ཡོངས་སུ་རྫོགས་པར་ཉམས་སུ་ལེན་ཅིང་འཆད་པ་དང་ཉན་པ་དང་སྒྲུབ་པ་ནི་ཉིན་སྐར་ལས་དཀོན་པར་འགྱུར་ལ། ཡིག་ཆ་རྣམས་ཀྱང་གཅིག་ཏུ་འདུས་པར་མི་འགྱུར་ཞིང༌། བླ་མ་འབའ་ར་བ་ཞེས་པའི་མིང་རྐམ་པོ་ནི་སྐལ་པ་མ་སྟོང་གི་བར་དུ་གནས་སོ། །དུས་མ་འོངས་སྙིགས་མའི་དུས་ན། སྐྱེས་བུ་ཤེས་རབ་དང་བརྩོན་འགྲུས་ཆུང་བ། ཆེ་འདོད་དང་ནོར་འདོད་ཆེ་བ། དད་པ་དང་མོས་གུས་ཆུང་བ། འདོད་ཆགས་དང་ཕྲག་དོག་ཆེ་བ། བླ་མ་དང་ཆོས་ལ་ཡིད་མི་ཆེས་ཤིང་ལོག་ལྟ་ཆེ་བ། སྒྲུབ་པ་མི་ནུས་ཤིང་སྡུག་སྲན་ཆུང་བ། སྡོམ་པ་དང་དམ་ཚིག་ཁྱད་དུ་གསོད་པ། ཅི་བྱེད་ཀྱང་སྡིག་དང་འདྲེས་པའི་ལས་ཁོ་ན་བྱེད་པའི་དུས་སུ་ངའི་མྱོང་ཆོས་འདི་རྣམས་ཀྱང་སྣུམ་ཟད་མར་མེ་ཙམ་དུ་འགྲོ་བས། དེ་དུས་ལས་དང་སྐལ་བར་ལྡན་པ་རེ་གཉིས་འབྱུང་སྟེ། དེས་ཚེ་གཅིག་གིས་སངས་རྒྱས་སྒྲུབ་པའི་ཐབས་ཟབ་མོ། ནཱ་རོའི་ཆོས་དྲུག་གི་གདམས་པ་ཟབ་ལ་འདུས་པ་ཤིན་ཏུ་བསྡུས་པ་འདི་ཉིད་ཉམས་སུ་བླངས་ཤིང་སྤེལ་བར་བྱོས་ཤིག །རབ་རྣམས་ཀྱིས་ཐར་པར་འཇུག་པའི་གྲུ་བོ་ཆེའི་རྩ་འགྲེལ་ལྷན་ཐབས་དང་བཅས་པ་ལ་འཆད་ཉན་དང༌། ཕྲིན་ལས་སྐོར་གྱི་སྒྲུབ་ཐབས་དབང་བསྐུར་སོགས་གང་ལ་ཡང་བསྙེན་ཅིང་སྒྲུབ་པ་དང་ལག་ལེན་སོགས་མཐར་ཕྱིན་ཞིང་ཐེ་ཚོམ་གྱི་སྒྲོ་འདོགས་ཆོད་པར་བྱས་ནས། ཕྱག་ཆེན་སོགས་ཟབ་ཁྲིད་མཐའ་དག་ལའང་མྱོང་ཁྲིད་ལོ་དང་ཟླ་བ་དུ་མར་སྦྲེལ་ནས་སྒྲུབ་པའི་རྟགས་མཚན་ཐོན་པར་བྱ་ཞིང༌། འབྲིང་རྣམས་ཀྱིས་ཀྱང་ཐར་པར་འཇུག་པའི་གྲུ་བོ་སྐོར་གསུམ་གྱི་དབང་ཁྲིད་ལུང་གསུམ་ཐོབ་པ། ཁྱད་པར་ནཱ་རོ་ཆོས་དྲུག་དང་ཕྱག་རྒྱ་ཆེན་པོ་ལ་རྩལ་ཐོན་པ། གདམས་པ་འདི་སྐོར་གྱི་དབང་ཁྲིད་ལུང་གསུམ་འཆད་ཐུབ་པ་བྱ། ཐ་མས་ཀྱང་གདམས་པ་ཟབ་བསྡུས་འདི་ཙམ་ལ་ཉམས་ལེན་གྱི་སྙིང་པོར་བསྒྲིལ་ལ། སྙིགས་མའི་སེམས་ཅན་འདུལ་དཀའ་ཞིང་དད་པ་དང་མོས་གུས་ཆུང་བའི་དུས་དེར་རྟགས་ཆ་ལུགས་ཀྱང་འདུལ་བ་དང་མཐུན་པ་གཙང་སིང་བ་རེ་བགྱི། ཆགས་ལམ་གྱི་ཉམས་ལེན་མཐར་མ་ཕྱིན་པར་བག་མེད་ཀྱི་སྤྱོད་པ་དང་ཆ་ལུགས་འདིས་དམྱལ་བར་འཕེན་པའི་གྲོགས་ལས། ཐར་ལམ་བགྲོད་པ་ཞིག་དཀའ་བས་ལས་རྒྱ་བསྟེན་པ་དང་ལུང་མ་བསྟན་གྱི་ཆ་ལུགས་མ་བྱེད། དགོན་གནས་འབའ་ར་འདི་ཡང་དར་རྒུད་ཤིན་ཏུ་མང་བ་ཞིག་འབྱུང་སྟེ། སྐབས་སྐབས་སུ་ངེད་རང་གི་སྐྱེ་བ་འདྲ་ཡོང་བར་སྲིད་ཅིང༌། གདམས་པ་འདི་ཡང་རྙེད་པར་འགྱུར་རོ། །ཡང་ན་ཕྱོགས་ངེས་མེད་ནས་ཁོ་བོ་རང་གི་རྗེས་སུ་འཇུག་པའི་སྐལ་ལྡན་རིགས་རུས་ཕུན་སུམ་ཚོགས་པ། ཁོ་བོ་ལ་ལྷག་པར་དད་པ། དཔའ་རྟགས་དཔྲལ་བར་ཐོད་སྐམ་གྱི་རི་མོ་ཡོད་པའམ། གདོང་སྨེའམ། རོ་སྟོད་ལ་སྨེ་བའི་སེ་རལ་ཁའམ། རོ་སྨད་ལ་སྟག་ཤམ་གྱི་རི་མོ་དོད་པ་ཡོད་པ། བློ་སྣ་མང་ཞིང་བྱིས་པའི་སྤྱོད་པ་བྱེད་པ། སྐབས་སྐབས་སུ་ལྷག་པའི་ལྷའི་ཞལ་ཡུད་ཙམ་ཡུད་ཙམ་མཐོང་བའི་སྐལ་ལྡན་ཞིག་གིས་ཆོས་འདི་རྙེད་པར་འགྱུར་བས། འདི་རྙེད་པ་ན་གསང་ཞིང་དམ་པར་གྱིས་ལ། ཆོས་འདིའི་ཚིག་དོན་བློ་ལ་ཆུད་པར་བྱས་ནས་ཤོག་དྲིལ་འདི་སླར་ཡང་སྨོན་ལམ་དང་གསོལ་བ་ཐོབ་ལ་གནས་དེ་ཉིད་དུ་སྔར་བཞིན་ཞོག་ཅིག །སྦོས་ཤིག །འདི་རྙེད་པའི་གང་ཟག་དེས་ཆོས་འདི་ཉིད་རྙེད་ནས་ལོ་འགའ་སོང་བ་ན། སྙིང་དང་འདྲ་བའི་བུ་ཞིག་ལ་གཏོད་ལ། དར་རྒྱས་ཡུན་རིང་དུ་འབྱུང་བའི་རྟེན་འབྲེལ་བསྒྲིགས། དེས་ཉམས་སུ་བླངས་ཤིང་སྤེལ་ན། སློབ་མ་ལས་ཀྱང་ཡང་སློབ་བཟང་བར་འབྱུང་ངོ༌། །སྙིང་གི་བུ་གཅིག་ལས་གཞན་ལ་ཆོས་འདིའི་དཔེ་ཡང་མི་སྟོན་ཞིང༌ལུང་ཡང་མི་བྱེད། ཅིའི་ཕྱིར་ན་དད་པ་དང་དམ་ཚིག་ཚུལ་བཞིན་མི་བྱེད་པས་ཀུན་ལ་གསང་ཞིང་དམ་པར་བྱེད་པ་ནི་གནད་དམ་པའོ། །འདིའི་ཆོས་བཀའ་འབྱེད་པ་ན། བླ་མ་ཡི་དམ་མཁའ་འགྲོ་ལ་ཚོགས་གཏོར་རྒྱ་ཆེན་པོ་ཕུལ་ཞིང༌། ཆོས་སྐྱོང་སྲུང་མ་ལ་སྐོང་བཤགས་ཚོགས་གཏོར། གནས་བདག་དགེ་བསྙེན་པ་ལ་གཏོར་མ་བསྔོ་ཞིང་བདེན་ཚིག་བརྗོད་ལ། བླ་མ་དང་མཁའ་འགྲོ་ལ་གནང་བ་ཞུས་ནས། སློབ་མ་སྙིང་དང་འདྲ་བ་ཞིག་ལ་བཤད་པར་བྱའོ། །ཆོས་འདིའི་རྒྱབ་ཆོས་ཁོ་བོས་བརྩམས་པའི་ཐར་པར་འཇུག་པའི་གྲུ་བོ་སྐོར་གསུམ་ཆ་ལག་དང་བཅས་པའི་ཡིག་ཆ་ཐམས་ཅད་ལ་ཞིབ་ཏུ་ལྟོས་ཤིག །ཁྱད་པར་སྒྲུབ་པའི་ལག་ལེན་རིན་པོ་ཆེའི་གཏེར་མཛོད་ཅེས་བྱ་བའི་བསྟན་བཅོས་ལའང་ནན་ཏན་དུ་ལྟོས་ཤིག །མ་འོངས་པའི་སྐྱེ་འགྲོ་ཁོ་བོ་ལ་དད་ཅིང་འདུན་པ་ཐམས་ཅད། ཁོ་བོས་བརྩམས་པའི་བསྟན་བཅོས་རྣམས་ལ་ལྟོས་ཤིག །ཀློགས་ཤིག །ཚིག་ཁ་འདོན་གྱིས་ཤིག །ཉམས་སུ་ལོངས་ཤིག །གླེགས་བམ་དུ་བྲིས་ཤིག །ཕྱག་དང་མཆོད་པའི་རྟེན་དུ་གྱིས་ཤིག །དོན་ཉམས་སུ་ལོངས་ཤིག །དེ་ལྟར་བྱས་ན་ཤངས་སྒོམ་རྒྱལ་མཚན་དཔལ་བཟང་དང་དངོས་སུ་འཕྲད་པ་ཡིན་ནོ། །བསྟན་པ་ལ་བྱ་བ་བྱས་པ་ཡིན་ནོ། །བཀྲ་ཤིས་བདེ་ལེགས་དཔལ་འབར་དོན་འགྲུབ་ཤོག ༑ཅེས་པའི་ཟབ་ཆོས་འདི་ཉིད་ཁོ་བོ་དྷརྨའི་མིང་ཅན་གྱིས་རང་ལོ་སོ་བཞི་ལོན་པ། ས་ཕོ་སྟག་གི་ལོ་ཧོར་ཟླ་དགུ་པའི་ཚེས་བཅུའི་ཉིན་ཤངས་འབའ་ར་དོན་གྲུབ་སྡིང་ནས་དངོས་གྲུབ་ཀྱི་སྐལ་པར་ཐོབ་ནས་ལོ་ཉི་ཤུ་རྩ་གསུམ་སོང་བ། རང་ལོ་ལྔ་བཅུ་ང་དྲུག་ལ་སླེབས་པ་ལྕགས་ཕོ་བྱི་བའི་ལོ་ཧོར་ཟླ་དང་པོ་ཆོ་འཕྲུལ་གྱི་ཟླ་བའི་ཚེས་བཅོ་ལྔའི་ཉིན་ཤོག་དྲིལ་བུ་ཡིག་ལས་དཔེ་ཐོག་ཏུ་ཕབ་པ་འདིས་འགྲོ་དོན་ནམ་མཁའི་མཐའི་བར་ཁྱབ་པར་གྱུར་ཅིག །སརྦ་མངྒ་ལཾ།