DNZ-15-BA-019

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 15, Text 19, Pages (Folios to )
Author	འཇམ་མགོན་ཀོང་སྤྲུལ་
Citation	'jam mgon kong sprul. '. In Gdams ngag rin po che'i mdzod, Vol. 15: . Kalimpong: Rigpe Dorje Publications, 2024.
Side notes	Verso: sbyor drug skor
More details More details
Genre

Tibetan Text

[edit]

༄༅། །ཆོས་རྒྱལ་རིགས་ལྡན་གཙོ་བོར་གྱུར་པ་རྡོ་རྗེའི་རྣལ་འབྱོར་བརྒྱུད་པའི་བླ་མ་མཆོད་པའི་ཆོ་ག་རྡོ་རྗེ་ཉི་མའི་སྣང་བ་ཆེན་པོ་ཞེས་བྱ་བ་བཞུགས་སོ། །

༄༅། །ན་མོ་གུ་རུ་ཤྲཱི་ཀཱ་ལ་ཙཀྲ་ཡ། ཉི་རྡུལ་ནོར་བུར་བརྟན་ཅིང་གཙུག་ཏོར་དུ། །བྱང་སེམས་ཟླ་བ་གང་བས་སྲིད་ཞི་ལ། །མི་གནས་དང་པོའི་མགོན་གྱུར་བར་མ་ཆད། །བྱོན་པའི་བླ་མ་སངས་རྒྱས་རྣམས་ལ་འདུད། །གང་ལ་མཆོད་ན་དོན་ཆེ་བ། །དེ་ཉིད་མཆོད་དང་གསོལ་འདེབས་ཐབས། །རྡོ་རྗེའི་ཚིག་རྣམས་བཏུས་ནས་དགོད། །དད་སྐལ་ལྡན་རྣམས་ཡི་རང་བྱོས། །དེའང་དབེན་པའི་གནས་གཙང་ཞིང་ཡིད་དུ་འོང་བར་རྒྱན་གྱིས་བརྒྱན་ལ། ཐུབ་དབང་དུས་འཁོར་ཆོས་རྒྱལ་རིགས་ལྡན་བརྒྱུད་པའི་བླ་མ་རྣམས་ཀྱི་སྐུ་བརྙན་བྲིས་འབུར་གྱིས་མཚོན། བསོད་ནམས་གསོག་པའི་རྟེན་གང་འབྱོར་བཀྲམ། གུང་དུ་སྟེགས་བུ་ཁེབས་བཟང་པོས་བཀབ་པའི་སྟེང་དུ་རིན་པོ་ཆེའི་མཎྜལ་དྲིའི་ཆུ་དང་ཆང་གིས་བརླན་པ་ལ་དབུས་སུ་ཚོམ་བུ་ཆེ་གཅིག་དང་གཡས་གཡོན་ཆུང་གཉིས། དེ་རྒྱབ་ཚོམ་བུ་ཉེར་དགུ། དེ་རྒྱབ་གྲངས་མ་ངེས་པ་བཀོད་ལ་ཁྲིའུའི་ཁར་བཞག །མདུན་དུ་འབུལ་གཏོར་ཟླུམ་པོ་ཁ་ཟས་བཟང་དགུས་བསྐོར་བ་དང་ནང་མཆོད་ཐོད་པའི་བདུད་རྩི་བཞག །མཆོད་པ་བཅུ་གཉིས་ཆ་གྲངས་འཛོམས་ན་ཕྱོགས་བཞི་ཀ་དང་ཆ་གཅིག་ལས་མེད་ན་ཤར་དུ་དྲི་ཆབ་དང་མེ་ཏོག །ལྷོར་སྤོས་དང་མར་མེ། བྱང་དུ་ཞལ་ཟས་དང་ཤིང་ཐོག །ནུབ་ཏུ་སྒེག་མོ་མ་དང་བཞད་མ་མཚོན་པའི་ན་བཟའ་དང་མེ་ལོང༌། སྟེང་གི་སྒྲ་མའི་ཏིང་ཤག་སོགས་རོལ་མོ་གང་རུང་དང༌། གར་མའི་རྡོར་དྲིལ་ལྟ་བུ། འོག་གི་འདོད་མའི་ཆོས་འབྱུང་ནང༌༑ གླུ་མ་མཚོན་བྱེད་པི་ཝཾ་རྣམས་མ་འཆོལ་བར་བཤམ། དེ་མདུན་ཆུ་བཞིའི་སྣོད་ཕྲེང་ཚར་དང༌། ཆུ་སྣོད་བྱ་མ་བུམ་ཉེ་བར་བསྡོགས། གཞན་ཡང་མཆོད་པའི་མཎྜལ། ཐབས་ཤེས་ཀྱི་ཚོགས་རྫས། མཁའ་འགྲོ་སྤྱི་གཏོར་སོགས་མཁོ་བའི་ཡོ་བྱད་རྣམས་ཀྱང་ཚོགས་པར་བྱའོ། །ཆོ་ག་དངོས་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྐྱབས་སེམས་ཡིག་རྙིང་ལྟར་ན། སྲིད་པའི་འཇིགས་པ་འཕྲོག་བྱེད་པ། །སངས་རྒྱས་ཆོས་དང་དགེ་འདུན་ལ། །འགྲོ་བ་ཀུན་གྱི་དོན་གྱི་ཕྱིར། །བྱང་ཆུབ་བར་དུ་སྐྱབས་སུ་མཆི། །འགྲོ་བ་ཀུན་ལ་ཕན་པའི་ཕྱིར། །བླ་མེད་སངས་རྒྱས་འགྲུབ་པར་ཤོག །བྱང་ཆུབ་ཏུ་ནི་སེམས་བསྐྱེད་ཅིང༌། །བསམ་པ་རྣམ་པར་དག་པར་བགྱིད། །ལན་གསུམ། དེ་ནས། རང་སྐད་ཅིག་གིས་དུས་ཀྱི་འཁོར་ལོའི་སྐུར་གྱུར། ཐོག་མར་ནང་མཆོད་ལ་དམིགས་ཏེ། ༀ་ཨཱཿ ཧཱུྃ་ཧྲཿ ཕཊ། ༀ་སྭ་བྷཱ་ཝ་ཤུདྡྷཿ སརྦ་དྷརྨཿ སྭ་བྷཱ་ཝ་ཤུདྡྷོ྅ཧཾ། ༀ་ཨཱཿ ཧཱུྃ་ཧོཿ ཞེས་ལན་གསུམ་ལ་སོགས་པས་བྱིན་རླབས་བགེགས་བསལ་བ་ནི། ལྷ་དང་ལྷ་མིན་གསང་བ་པ། །ལུས་སྲུལ་ལ་སོགས་གང་ཅིའང་རུང༌། །ལུས་ངག་སེམས་ལ་གནས་པ་ཡི། །བགེགས་ཀྱི་ཚོགས་རྣམས་གཞན་དུ་དེངས། །ང་ནི་དཔལ་ལྡན་རྡོ་རྗེ་ཤུགས། །སྲུང་བའི་འཁོར་ལོ་སྦྱོར་བ་པོ། །རྡོ་རྗེ་འབར་བའི་སྐུ་ཡིས་ནི། །ལུས་གསུམ་ལས་སྐྱེས་དགས་པར་བྱ། །གལ་ཏེ་ཁ་ཅིག་བདག་ལས་འདའ། །རྣམ་པར་བརླག་འགྱུར་གཞན་དུ་མིན། །ༀ་ཨཱཿ ཧཱུྃ་ཧོཿ ཧཾ་ཀྵཿ ཧྲཱཿ ཧྲཱཿ ཧྲཱཿ ཧྲཱཿ ར་ར་ར་ར་བཛྲ་ཨཱ་ན་ལ། སརྦ་ཨཱ་ཝ་ར་ཎ་དྷརྨ་པྲ་ལ་ཡ་སྭ་བྷཱ་ཝ་སརྦ་མཱ་ར་ཀཱ་ཡི་ཀ །བིགྷྣ་བི་ནཱ་ཡ་ཀ་ཨཱ་དཱི་ནཱཾ། ད་ཤ་དི་ཀ་ག་ཏཱ་ནཱཾ། ཀཱ་ཡ་ཝཱ་ཀ་ཙིཏྟ་ནི། ད་ཧ་ད་ཧ། པ་ཙ་པ་ཙ། བྷསྨི་ཀུ་རུ་ཀུ་རུ་ཧཱུྃ་ཧཱུྃ་ཕཊ་ཕཊ། ཅེས་བདུད་སྲེག་པའི་སྔགས་ཀྱིས་བགེགས་བསྐྲད། ཚམས་རྔམས་དང་རལ་མོའི་སྒྲ་བྱ། དེ་ནས་གནས་དང་ཡོ་བྱད་བྱིན་གྱིས་བརླབ་པ་ནི། ༀ་ཨཱཿ ཧཱུྃ་ཧྲཿ ཕཊ་ཀྱིས་བསང༌། ༀ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། སྟོང་པར་གྱུར། སྟོང་པའི་ངང་ལས་གནས་ཁང་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་པ་གྲུ་བཞི་བསྒོ་བཞི་པ། མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་ཤེལ་གྱི་སྣོད་སོར་བཅུ་གཉིས་པ་རྣམས་ཀྱི་ནང་དུ། ༀ་ཨཱཿ ཧཱུྃ་ཧོཿ རྣམས་ལས་བྱུང་བའི་ཆུ་དང་མཆོད་ཡོན་དང་དྲི་དང་མེ་ཏོག་དང་བདུག་པ་དང་སྣང་གསལ་དང༌། ཞལ་ཟས་དམ་པ་དག་དང་ རྣམ་པ་མང་པོའི་འབྲས་བུ་མ་ཉམས་པ་དང༌། གོས་དང་རྒྱན་དང༌། བ་དན་དང་བླ་བྲེ་ལ་སོགས་པ་དང་གླུ་དང་གར་དང་མེ་ལོང་དང་དྲིལ་བུ་ལ་སོགས་པ་སིལ་སྙན་གྱི་ཚོགས་དུ་མ་དང༌། ཨིནྡྲ་ནཱི་ལ་ལ་སོགས་པ་རྣམ་པ་མང་པོའི་རིན་པོ་ཆེ་དང༌། ནང་གི་དམ་ཚིག་རྣམས་དང༌། དམ་ཚིག་རྣམ་པ་བཞིའི་རྫས་ལ་སོགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་ལྟ་བུ་དཔག་ཏུ་མེད་ཅིང་དྲི་མ་དང་བྲལ་བར་གྱུར། ༀ་བཛྲ་གནྡྷཾ་སྭཱ་ཧཱ། ༀ་བཛྲ་པུཥྤཾ་སྭཱ་ཧཱ། དེ་བཞིན་དུ་སྦྱར་ཏེ། བཛྲ་དྷཱུ་པཾ༴ བཛྲ་དཱི་པཾ༴ བཛྲ་ན་ཝིདྱཾ༴ བཛྲ་ཨཱཀྵ་ཏཾ༴ བཛྲ་ལཱ་སྱཾ༴ བཛྲ་ཧཱ་སྱཾ༴ བཛྲ་ཝཱདྱཾ༴ བཛྲ་ནྲ་ཏྱཾ༴ བཛྲ་གཱི་ཏཾ༴ ༀ་བཛྲ་ཀཱ་མཾ་སྭཱ་ཧཱ། རོལ་ཆེན་དང་བཅས་ཏེ། ༀ་ཧོཿ བཛྲ་གྷཱནྚེ་སརྦ་དྷརྨ་ཨེ་ཀ་པྲཛྙཱ་དྷ་ནི་སྭ་བྷཱ་ཝེ། སརྦ་ཨཱ་ཀ་རེ་སརྦ་དྷརྨ་པྲ་བོ་དྷ་ནི་སརྦ་དྷརྨཱ་ཎ་སྭ་བྷཱ་ཝཱ་ན་པྲ་བོ་དྷ་ཡ་པྲ་བོ་དྷ་ཡ་སྭཱ་ཧཱ། ཞེས་ལན་གསུམ་བརྗོད། གཉིས་པ་དངོས་གཞིའི་ཐོག་མར་ཚོགས་རྟེན་གསལ་གདབ་པ་ནི༑ སའི་ཕྱོགས་རང་བཞིན་གྱིས་རྣམ་པར་དག་པ་སངས་རྒྱས་དང་བྱང་ཆུབ་སེམས་དཔའི་སྨོན་ལམ་ལས་གྲུབ་པ། གཞི་དང་རྒྱན་དང་དབྱིབས་དང་བཀོད་པ་བསམ་གྱིས་མི་ཁྱབ་པར་གྱུར་པའི་དབུས་སུ་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པ་ཕྱོགས་ཀུན་ཏུ་ཡེ་ཤེས་ཀྱི་འོད་ཟེར་མཐའ་ཡས་པ་ཀུན་ཏུ་འཕྲོ་བ། དབང་པོའི་གཞུ་དང་མེ་ལོང་གི་གཟུགས་བརྙན་དང་པྲ་ཕབ་བརྒྱད་དང་ མཚུངས་པ། སྣང་ལ་རང་བཞིན་མེད་པ། རང་གི་སེམས་ཉིད་ཀྱིས་སོ་སོར་སྣང་བ་གཞོམ་དུ་མེད་ཅིང་རྡུལ་ཕྲ་རབ་ཀྱི་ཆོས་ལས་འདས་པ། དྭངས་ཤིང་སྒྲིབ་པ་མེད་ལ་ཕྱི་ནང་ཀུན་ཏུ་འོད་གསལ་བ། མཚན་ཉིད་ཐམས་ཅད་ཡོངས་སུ་རྫོགས་ཤིང་རྒྱན་གྱི་རྣམ་པ་མཆོག་ཏུ་བཀྲ་བ་དུ་མས་མཛེས་པར་གྱུར། དེའི་དབུས་སུ་པདྨ་དང་ཟླ་བའི་དཀྱིལ་འཁོར་གྱི་གདན་ལ་རྩ་བའི་བླ་མ་དང་གཉིས་སུ་མེད་པའི་ཆོས་རྒྱལ་ཆེན་པོ་ཟླ་བ་བཟང་པོ་སྐུ་མདོག་མཐིང་སྔོན་ཕྱག་གཡས་རྡོ་རྗེ་ཐུགས་ཀར་འཛིན་ཅིང༌། གཡོན་དྲིལ་བུ་དཀུར་བསྟེན་པ། གཡས་སུ་པད་ཟླའི་གདན་ལ་རིགས་ལྡན་འཇམ་དཔལ་གྲགས་པ་གུར་གུམ་གྱི་མདོག་ཅན་ཆོས་འཆད་ཕྱག་རྒྱས་ཨུཏྤ་ལའི་སྡོང་བུ་ཐུགས་ཀར་བསྣམས་པའི་མེ་ཏོག་ཕྲག་གོང་གཡས་གཡོན་དུ་ཁ་ཕྱེ་བའི་ཟེའུ་འབྲུར་རལ་གྲི་དང་གླེགས་བམ་གྱིས་མཚན་པ། གཡོན་དུ་པད་ཟླའི་གདན་ལ་རིགས་ལྡན་པདྨ་དཀར་པོ་གངས་རིའི་མདངས་ལྡན་ཕྱག་གཡས་མཆོག་སྦྱིན་དང་གཡོན་ཐུགས་ཀར་མཐེབ་སྲིན་སྦྱར་བས་པད་དཀར་རྒྱས་པའི་ཡུ་བ་ནས་འཛིན་པ། གསུམ་ཀའང་ཞི་ཞིང་འཛུམ་པའི་ཉམས་དང་ལྡན་ཅིང་དར་དང་རིན་པོ་ཆེའི་རྒྱན་གྱིས་སྤྲས་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པའི་མཐའ་བསྐོར་དུ་ཉི་མའི་འོད་ལ་སོགས་པའི་ཆོས་རྒྱལ་ཆེན་པོ་བདུན། བཟང་པོ་རྣམ་རྒྱལ་ལ་སོགས་པའི་རིགས་ལྡན་ཕྱེད་སྐྱོང་དུམ་བུར་སྐྱོང་བ་དང་བཅས་པས་བསྐོར་ནས་ བཞུགས་པའོ། །དེ་དག་གི་མདུན་དུ་རྒྱལ་དབང་རང་བྱུང་རྡོ་རྗེ། དབུ་ལ་ཞྭ་ནག་གསེར་མདངས་ཅན་གསོལ་བ། གཡས་སུ་ཀུན་མཁྱེན་དོལ་པོ་བ་ཆེན་པོ་པཎ་ཞུ་བརྗིད་ཆགས་གསོལ་བ། དེ་གཉིས་ཀ་ས་གནོན་གྱི་ཕྱག་རྒྱ་ཅན། གཡོན་དུ་མཁས་མཆོག་བུ་སྟོན་ཆེན་པོ་ཕྱག་གཉིས་ཆོས་འཆད་མཛད་པ་གསུམ་ཀའང་རབ་བྱུང་གི་ཆ་བྱད་ཅན། ཞབས་སྐྱིལ་ཀྲུང་གིས་བཞུགས་པ། ཕྱོགས་མཚམས་རྣམས་སུ་ཙི་ལུ་པཎྜི་ཏ། པིཎྜོ་ཨཱ་ཙ༑ དུས་འཁོར་ཞབས་ཆེ་ཆུང༌། གྲུབ་ཆེན་ཤ་བ་རི། པཎ་ཆེན་ནཱ་རོ་པ། ཁ་ཆེ་ཟླ་བ་མགོན་པོ། ས་མནྟ་ཤྲཱི། ཙ་མི་སངས་རྒྱས་གྲགས། པཎ་ཆེན་ཤཱཀྱ་ཤྲཱི། བི་བྷུ་ཏི་ཙནྡྲ་ལ་སོགས་རྒྱ་གར་གྱི་མཁས་གྲུབ་རྣམས་དང༌། གྱི་ཇོ་ཟླ་བའི་འོད་ཟེར། འབྲོ་ལོ་ཤེས་རབ་གྲགས་པ། ར་ལོ་ཆོས་རབ། དཔལ་ཆེན་རྒຎ་ལོ་ཙཱ། ཆགས་ལོ་ཆོས་རྗེ་དཔལ་བ། དེ་དག་སོ་སོ་ནས་བརྒྱུད་པ་གཙོ་བོར་གྱུར་པའི་དཔལ་དུས་ཀྱི་འཁོར་ལོའི་དབང་བཤད་མན་ངག་གི་བརྒྱུད་པ་འཛིན་པ་རྣམས་ཀྱིས་བསྐོར་ནས་བཞུགས་པ། གཞན་ཡང་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་རྣམས་ནམ་མཁའ་ལ་སྤྲིན་ཕུང་གཏིབས་པ་ལྟར་གསལ་བའི༑ གཙོ་བོ་གསུམ་གྱི་གནས་བཞིར་རྡོ་རྗེ་བཞིའི་ཡི་གེས་མཚན་པ་དང༌། ཐུགས་ཀ་ནས་རྡོ་རྗེ་ལྕགས་ཀྱུ་དྲི་མ་མེད་པའི་འོད་ཟེར་འཕྲོ་བ་སྤྲོས། རང་བཞིན་གྱི་གནས་ནས་རྩ་བརྒྱུད་བླ་མ་ཡི་དམ་ལྷ་ཚོགས་སངས་རྒྱས་ བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་ཐམས་ཅད་མཆོད་པའི་ཡུལ་དུ་བཛྲ་ས་མཱ་ཛཿ ཕྱོགས་དུས་ཀུན་ཁྱབ་སྐྱབས་གསུམ་བཀའ་སྡོད་བཅས། །ཉོན་མོངས་འགྲོ་ལ་མཁྱེན་བརྩེས་རབ་དགོངས་ནས། །དཔག་མེད་ཞིང་ནས་ཐོགས་མེད་རྫུ་འཕྲུལ་གྱིས། །འདིར་གཤེགས་མཆོད་སྤྲིན་རྒྱ་མཚོའི་དབུས་བཞུགས་གསོལ། །ༀ་ཤྲཱི་མཱཾ་གུ་རུ་ཀཱ་ལ་ཙཀྲ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨེ་ཧྱེ་ཧི། ཛཿ ཧཱུྃ་བཾ་ཧོཿ སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པ་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །ༀ་པདྨ་ཀ་མ་ལ་ཡ་ཨཱ་ས་ན་སྟྭཾ། དེ་ནས་བསགས་སྦྱོང་ཡན་ལག་བདུན་རིམ་པར་བྱ་བ་ལ༑ ཐོག་མར་ཕྱག་འཚལ་བ་ནི། རྣམ་པར་བཅས་ཀྱང་རྣམ་མེད་བཅོམ་ལྡན་འདས་མ་ཤེས་རབ་མ་སྟེ་དེ་ཡིས་འཁྱུད། །སྐྱེ་འཇིག་སྤངས་པའི་འགྱུར་མེད་བདེ་བ་དང་ལྡན་བཞད་པ་ལ་སོགས་བདེ་བ་སྤངས། །སངས་རྒྱས་རྣམས་ཀྱི་སྐྱེད་མཛད་སྐུ་གསུམ་དག་དང་ལྡན་ཞིང་དུས་གསུམ་ཡང་དག་རིག །ཀུན་མཁྱེན་མཆོག་གི་དང་པོའི་སངས་རྒྱས་བཅོམ་ལྡན་གཉིས་མེད་དེ་ཉིད་ལ་ཕྱག་འཚལ། །སངས་རྒྱས་སེང་གེའི་ཁྲིར་བཞུགས་རྡོ་རྗེའི་རྣལ་འབྱོར་རྣམ་པར་དག་པ་སྲིད་པ་གསུམ་གྱིས་མཆོད། །དེ་ཉིད་གཅིག་པུ་སྐུ་ཡིས་རབ་ཏུ་དབྱེ་བས་རྣམ་པ་བཅུ་དྲུག་སྲིད་མེད་སྲིད་པར་གནས། །ཤེས་དང་ཤེས་བྱ་གཅིག་གྱུར་རྒྱལ་བ་མཆོག་གི་དམ་ཚིག་ཡན་ལག་རྣམ་པ་བཅུ་གཉིས་ཀྱི། །བདེན་དོན་བྱང་ཆུབ་སེམས་ནི་རྒྱལ་བའི་རྡོ་རྗེའི་ཚིག་གྱུར་དུས་ཀྱི་འཁོར་ལོ་ལ་ཕྱག་འཚལ། །ཀུན་མཁྱེན་ཡེ་ཤེས་སྐུ་ནི་རྒྱལ་བའི་བདག་པོའི་ལྷན་ཅིག་སྐྱེས་དང་དེ་བཞིན་ཆོས་ཀྱི་སྐུ། །ལོངས་སྤྱོད་རྫོགས་དང་སྤྲུལ་པའི་སྐུ་ཡང་ཉིན་བྱེད་སྐུ་དང་པདྨའི་འདབ་མ་རྒྱས་པའི་སྤྱན། །རྣམ་པར་ཐར་དང་སྐུ་གསུང་ཐུགས་ཆགས་སྲིད་འདས་འབྱོར་པ་རྣལ་འབྱོར་དག་པ་ཤེས་རབ་དང༌། །ཐབས་ནི་གཉིས་མེད་གང་ཞིག་ལྷ་མི་ལྷ་མིན་གྱིས་བསྟོད་དང་པོའི་སངས་རྒྱས་དེ་ལ་འདུད། །གང་གི་བཀའ་དྲིན་འོད་ཀྱིས་གསལ་བྱས་བདག་ཉིད་ནི། །དེ་ཉིད་རིན་ཆེན་འོད་ཀྱི་ཚོགས་ཀྱིས་མུན་བཅོམ་སྟེ། །མིག་སྐྱོན་མེད་རྣམས་རོལ་པར་བཅས་པས་སྟེང་དུ་ནི། །ལྟ་གྱུར་བླ་མ་ཉི་མ་དེ་ལ་ཕྱག་འཚལ་ལོ། །ཁྱོད་ནི་མ་དང་ཁྱོད་ནི་ཕ་སྟེ་ཁྱོད་ནི་འགྲོ་བའི་བླ་མ་ཁྱོད་ནི་གཉེན་དང་གྲོགས་བཟང་ཡང༌། །ཁྱོད་ནི་མགོན་པོ་ཁྱོད་ནི་བྱེད་པོ་ཕན་དང་སྡིག་འཕྲོག་ཁྱོད་ནི་གོ་འཕང་ཕུན་སུམ་ཚོགས་པ་ཡང༌། །ཁྱོད་ནི་འགའ་ཞིག་གནས་དང་ཁྱོད་ནི་ཡོན་ཏན་མཆོག་གི་གནས་ཏེ་སྐྱོན་རྣམས་བཅོམ་པ་ཁྱོད་ཉིད་དོ། །ཁྱོད་ནི་དམན་པ་རྣམས་ཀྱི་མགོན་དང་ཡིད་བཞིན་ནོར་བུ་རྒྱལ་བའི་དབང་པོ་ཁྱོད་ལ་བདག་སྐྱབས་མཆི། །དངོས་གྲུབ་རྒྱ་མཚོ་ཡོན་ཏན་རིན་ཆེན་གཏེར། །སྲིད་དང་ཞི་བའི་གདུང་བ་སེལ་བའི་སྨན། །ལྷ་དང་བཅས་པའི་འགྲོ་བ་ཀུན་གྱི་སྐྱབས། །དཔལ་ལྡན་རྡོ་རྗེ་འཆང་ལ་ཕྱག་འཚལ་ལོ། །ཉི་མའི་འོད་དང་ཟླ་བཟང་ ལྷ་དབང་དང༌། །གཟི་བརྗིད་ཟླས་བྱིན་ལྷ་ཡི་དབང་ཕྱུག་དང༌། །སྣ་ཚོགས་གཟུགས་དང་ལྷ་ཡི་དབང་ལྡན་ཏེ། །ཆོས་རྒྱལ་ཆེན་པོ་བརྒྱད་ལ་ཕྱག་འཚལ་ལོ། །འཇམ་དབྱངས་གྲགས་པ་པདྨ་དཀར་པོ་དང༌། །བཟང་པོ་རྣམ་རྒྱལ་བཤེས་གཉེན་བཟང་པོ་དང༌། །ཕྱག་ན་རིན་ཆེན་ཁྱབ་འཇུག་སྦས་པ་དང༌། །ཉི་མ་གྲགས་པ་རྣམས་ལ་ཕྱག་འཚལ་ལོ། །ཤིན་ཏུ་བཟང་པོ་རྒྱ་མཚོ་རྣམ་རྒྱལ་དང༌། །རྒྱལ་བར་དཀའ་དང་ཉི་མ་སྣ་ཚོགས་གཟུགས། །ཟླ་འོད་མཐའ་ཡས་ས་སྐྱོང་དཔལ་སྐྱོང་དང༌། །སེང་གེ་རྣམ་གནོན་རྣམས་ལ་ཕྱག་འཚལ་ལོ། །སྟོབས་ཆེན་མ་འགགས་མི་ཡི་སེང་གེ་དང༌། །དབང་ཕྱུག་ཆེན་པོ་མཐའ་ཡས་རྣམ་པར་རྒྱལ། །དྲག་པོ་འཁོར་ལོ་ཅན་ཏེ་ཉི་ཤུ་ལྔ། །ས་གཞི་རྫོགས་པར་སྐྱོང་ལ་ཕྱག་འཚལ་ལོ། །ཚངས་པ་ལྷ་དབང་ཕྱེད་ཕྱེད་སྐྱོང་བ་དང༌། །འོད་སྲུང་ལ་སོགས་དུམ་བུར་སྐྱོང་བ་བརྒྱད། །རིགས་ཀུན་གཅིག་ཏུ་བྱེད་པ་གསང་སྔགས་ཀྱི། །རིགས་ལྡན་བརྒྱུད་པ་རྣམས་ལ་ཕྱག་འཚལ་ལོ། །དུས་ཞབས་གཉིས་དང་ན་ལེནྡྲ་པ་དང༌། །ཟླ་བ་མགོན་པོ་འབྲོ་སྟོན་ལོ་ཙཱ་དང༌། །ལྷ་རྗེ་སྒོམ་པ་སྒྲོ་སྟོན་གནམ་བརྩེགས་དང༌། །གྲུབ་ཆེན་ཡུ་མོ་རྣམས་ལ་ཕྱག་འཚལ་ལོ། །ཆོས་ཀྱི་དབང་ཕྱུག་ནམ་མཁའ་འོད་ཟེར་དང༌༑ ༑སྤྲུལ་སྐུ་ཇོ་འབུམ་གྲུབ་ཐོབ་སེ་ཆེན་དང༌། །ཆོས་རྗེ་འཇམ་གསར་ཆོས་སྐུ་འོད་ཟེར་དང༌། །ཀུན་སྤང་ཆོས་རྗེ་རྣམས་ལ་ཕྱག་འཚལ་ལོ། །བྱང་སེམས་ཆེན་པོ་ཡོན་ཏན་རྒྱ་མཚོ་དང༌། །ཀུན་མཁྱེན་ཆོས་རྗེ་སྒྲ་བསྒྱུར་སྐུ་མཆེད་དང༌། །ཕྱོགས་ལས་རྣམ་རྒྱལ་ཉ་དབོན་ཆོས་རྗེ་དང༌། །གྲུབ་ཆེན་ཀུན་བློ་རྣམས་ལ་ཕྱག་འཚལ་ལོ། །འཇམ་དབྱངས་དཀོན་བཟང་ནམ་མཁའ་ཆོས་སྐྱོང་དང༌། །ནམ་མཁའ་དཔལ་བཟང་རཏྣ་བྷ་དྲ་དང༌། །རྗེ་བཙུན་གྲོལ་མཆོག་ཞབས་ལ་ཕྱག་འཚལ་ལོ། །ལུང་རིག་རྒྱ་མཚོ་ཀུན་དགའ་སྙིང་པོ་དང༌། །རིན་ཆེན་རྒྱ་མཚོ་བློ་གྲོས་རྣམ་པར་རྒྱལ། །ངག་དབང་ཕྲིན་ལས་ཀུན་བཟང་དབང་པོ་དང༌། །ཚེ་དབང་ནོར་བུའི་ཞབས་ལ་ཕྱག་འཚལ་ལོ། །བསྟན་པའི་ཉིན་བྱེད་ཕྲིན་ལས་རྣམ་པར་རྒྱལ། །པདྨ་ཉིན་བྱེད་དབང་པོ་ལ་སོགས་པ། །འབྲོ་ལུགས་གཙོར་གྱུར་སྒྲུབ་པའི་བཀའ་བབས་པ། །བརྒྱུད་འཛིན་སྐྱེས་ཆེན་རྣམས་ལ་ཕྱག༴ ཙི་ལུས་པ་དང་པིཎྜོ་ཨཱ་ཙ། ། དུས་ཞབས་ཆེ་ཆུང་བོ་དྷི་བྷ་དྲ་དང༌། །ཙ་མི་སངས་རྒྱས་གྲགས་དང་རྒྭ་ལོ་ཙཱ། །ཁམས་པ་ཨ་སེང་རྣམས་ལ༴ སེ་ལོ་གཞོན་ཚུལ་དར་འོད་བཀྲ་ཤིས་མཚན། །སངས་རྒྱས་རྡོ་རྗེ་མཁས་གྲུབ་ཨོ་རྒྱན་པ། །ཀུན་དགའ་དོན་གྲུབ་རང་བྱུང་རྡོ་རྗེའི་ཞབས། །དོན་གྲུབ་འོད་ཟེར་རྣམས་ལ༴ མཉྫུ་ཀིརྟྟི་ས་མནྟ་ཤྲཱི། །རྭ་ལོ་ཆོས་རབ་ཡེ་ཤེས་སེང་གེ་བ། །འབུམ་སེང་རྣམ་རྒྱལ་རྡོ་རྗེ་ཤེར་སེང་དང༌། །དཔལ་ལྡན་སེང་གེ་རྣམས་ལ་ཕྱག་འཚལ་ལོ། །རྡོ་རྗེ་རྒྱལ་མཚན་བུ་སྟོན་རིན་ཆེན་གྲུབ། །བསོད་ནམས་རྒྱལ་མཚན་རིན་ཆེན་རྣམ་རྒྱལ་སོགས། །རྭ་ལུགས་གཙོར་གྱུར་བཤད་པའི་བཀའ་བབས་པ། །བརྒྱུད་འཛིན་སྐྱེས་ཆེན་རྣམས་ལ༴ པཎ་ཆེན་ཤཱཀྱ་ཤྲཱི་དང་བི་བྷཱུ་ཏི། །དཔྱལ་ལོ་ ཆོས་བཟང་ཆག་ལོ་དགྲ་བཅོམ་པ། །ས་སྐྱ་པཎ་ཆེན་གོ་ལུང་གཞོན་ནུ་དཔལ། །མར་སྟོན་གཡང་འབར་རྣམས་ལ༴ རོང་གླིང་སྟེང་པ་ཤེའུ་ལོ་ཙཱ་བ། །ལྡི་རི་ར་བྱིང་བ་རི་ལོ་ཙཱ་དང༌། །མན་ལུང་གུ་རུ་ཀོ་བྲག་བསོད་རྒྱལ་མཚན། །ངོ་མཚར་སྐྱེས་མཆོག་རྣམས་ལ༴ གྲུབ་པའི་དབང་ཕྱུག་རི་ཁྲོད་མགོན་པོ་དང༌། །ནགས་ཀྱི་རིན་ཆེན་བསོད་ནམས་རྒྱ་མཚོའི་སྡེ། །འགོས་ལོ་གཞོན་ནུ་སྤྱན་སྔ་ཆོས་གྲགས་སོགས། །ཉེ་བརྒྱུད་བཀའ་བབས་རྣམས་ལ༴ སྐུ་བཞི་རྡོ་རྗེ་བཞི་ཡི་བདག་ཉིད་དང༌། །ཚད་མེད་རྣམ་ཐར་ཆོས་ཀྱི་ཕུང་པོ་དང༌། །དམ་ཆོས་སྟོན་པ་འཕགས་པའི་ཚོགས་རྣམས་ཏེ། །སྐྱབས་གནས་དཀོན་མཆོག་གསུམ་ལ༴ དཔལ་ལྡན་རྒྱུ་སྐར་ཆོས་དབྱིངས་གསུང་དབང་སོགས། །ཡི་དམ་དཀྱིལ་འཁོར་སངས་རྒྱས་བྱང་ཆུབ་སེམས། །དཔའ་བོ་མཁའ་འགྲོ་ཆོས་སྐྱོང་བཅས་རྣམས་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །མཁའ་ལྟར་ཁྱབ་པའི་རྒྱལ་བ་སྲས་བཅས་ལ། ། བདག་དང་མཁའ་མཉམ་སེམས་ཅན་ཐམས་ཅད་ཀྱི། །ལུས་འདི་ཞིང་རྡུལ་མཉམ་པར་སྤྲུལ་ནས་ནི། །རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ། །དེ་ནས་མཆོད་པ་འབུལ་བ་ལ་ཆུ་བཞི་དང་ཉེར་སྤྱོད་ནི། རྣམ་དག་ཡེ་ཤེས་བདུད་རྩིའི་ཆུ་གཏེར་ནི། །རབ་དྭངས་ཁ་དོག་དྲི་རོ་ཕུན་སུམ་ཚོགས། །ཞལ་གྱི་རྙོགས་པའི་དྲི་སེལ་ཡོན་ཆབ་འདི། །བླ་མ་རྒྱལ་བ་སྲས་བཅས་མཉེས་ཕྱིར་འབུལ། །ༀ་ཨཱཿ ཧྲི་པྲ་ཝ་ར་སད་ཀ་རཾ་ཨརྠཾ་ཨཱཉྩ་མ་ནཾ་པྲ་ཏཱིཙྪ་ན་མཿ རྣམ་དག་ ཡེ་ཤེས་བདུད་རྩིའི༴ རབ་དྭངས་ཁ་དོག༴ ཞབས་ཀྱི་པདྨའི་དྲི་སེལ་སྤོས་ཀྱི་ཆུ། །བླ་མ་རྒྱལ་བ་སྲས་བཅས༴ ༀ་ཨཱཿ ཧྲི་པྲ་ཝ་ར་སད་ཀ་རཾ་ཨརྠཾ་པཱདྱཾ་པྲ་ཏཱིཙྪ་ན་མཿ ཚིག་རྐང་དང་པོ་གཉིས་དང་ཕྱི་མ་འདྲ་བའོ། །རྣམ་དག་ཡེ་ཤེས༴ རབ་དྭངས་ཁ་དོག༴ ཀུན་ཏུ་འཕོ་བའི་གདུང་སེལ་འཐོར་འཐུང་འདི། །བླ་མ་རྒྱལ་བ་སྲས་བཅས་མཉེས༴ ༀ་ཨཱཿ ཧྲི་པྲ་ཝ་ར་སད་ཀ་རཾ་ཨརྠཾ་པྲོཀྵ་ཎཾ་པྲ་ཏཱིཙྪ་ན་མཿ རྣམ་དག་ཡེ་ཤེས༴ རབ་དྭངས་ཁ་དོག༴ ཡན་ལག་བརྒྱད་ལྡན་རྡོ་རྗེ་ཨ?ཾའི་རྒྱུན། །བླ་མ་རྒྱལ་བ༴ ༀ་ཨཱཿ ཧྲི་པྲ་ཝ་ར་སད་ཀ་རཾ་ཨརྠཾ་ཨ?ཾ་པྲ་ཏཱིཙྪ་ན་མཿ ཞེས་པས་ཆུ་བཞི་ཕུལ། ཆོས་རྒྱལ་རིགས་ལྡན་སུམ་ཅུ་གཉིས། །རྩ་བརྒྱུད་བླ་མའི་དཀྱིལ་འཁོར་རྣམས། །རྣམ་དག་རྡོ་རྗེའི་དྲི་མཆོག་འདི། །བཞེས་ནས་བདག་ལ་མཆོག་སྩོལ་མཛོད། །ༀ་ཤྲཱི་མཱཾ་གུ་རུ་ཀཱ་ལ་ཙཀྲ་ས་པ་རི་ཝཱ་ར་བྷྱཿ བཛྲ་གནྡྷཾ་པྲ་ཏཱིཙྪ་ན་མཿ ཆོས་རྒྱལ་རིགས་ལྡན་སུམ་ཅུ་གཉིས། །རྩ་བརྒྱུད་བླ་མའི༴ རྡོ་རྗེ་མེ་ཏོག་རྣམ་བཀྲའི་ཚོགས། །བཞེས་ནས་བདག་ལ༴ བཛྲ་པུཥྤཾ་པྲ་ཏཱིཙྪ་ན་མཿ ཆོས་རྒྱལ་རིགས་ལྡན་སུམ་ཅུ་གཉིས། །རྩ་བརྒྱུད་བླ་མའི་དཀྱིལ་འཁོར་རྣམས། །རྡོ་རྗེ་བདུག་སྤོས་བླ་ན་མེད། །བཞེས་ནས་བདག་ལ་མཆོག་སྩོལ་མཛོད། ། བཛྲ་དྷཱུ་པཾ་པྲ་ཏཱིཙྪ་ན་མཿ ཆོས་རྒྱལ་རིགས་ལྡན༴ རྩ་བརྒྱུད་བླ་མའི༴ རྡོ་རྗེ་སྒྲོན་མ་འོད་རབ་འབར། །བཞེས་ནས༴ བཛྲ་དཱི་པཾ་པྲ་ཏཱིཙྪ་ན་མཿ ཆོས་རྒྱལ་རིགས་ལྡན༴ རྩ་བརྒྱུད་བླ་མའི༴ རྡོ་རྗེ་ཞལ་ཟས་རོ་མཆོག་ལྡན། ། བཞེས་ནས༴ བཛྲ་ནཻ་ཝིདྱཾ་པྲ་ཏཱིཙྪ་ན་མཿ ཆོས་རྒྱལ་རིགས་ལྡན་སུམ་ཅུ་གཉིས། །རྩ་བརྒྱུད་བླ་མའི་དཀྱིལ་འཁོར་རྣམས། །རྡོ་རྗེ་མ་ཉམས་འབྲས་བུའི་མཆོག །བཞེས་ནས་བདག་ལ་མཆོག་སྩོལ་མཛོད། །བཛྲ་ཨཱཀྵ་ཏཾ་པྲ་ཏཱིཙྪ་ན་མཿ ཆོས་རྒྱལ༴ རྩ་བརྒྱུད་བླ་མའི༴ རྡོ་རྗེ་སྒེག་མོའི་མཆོད་པ་ནི། །བཞེས་ནས༴ བཛྲ་ལཱ་སྱཾ་པྲ་ཏཱིཙྪ་ན་མཿ ཆོས་རྒྱལ༴ རྩ་བརྒྱུད་བླ་མའི༴ རྡོ་རྗེ་བཞད་མའི་མཆོད་པ་འདི། །བཞེས་ནས༴ བཛྲ་ཧཱ་སྱཾ་པྲ་ཏཱིཙྪ་ན་མཿ ཆོས་རྒྱལ༴ རྩ་བརྒྱུད་བླ་མའི༴ རྡོ་རྗེ་སིལ་སྙན་རྣམ་མང་པོ། །བཞེས་ནས༴ བཛྲ་པཱདྱཾ་པྲ་ཏཱིཙྪ་ན་མཿ ཆོས་རྒྱལ་རིགས་ལྡན་སུམ༴ རྩ་བརྒྱུད༴ རྡོ་རྗེ་གར་གྱི་མཆོད་སྤྲིན་འདི། །བཞེས་ནས༴ བཛྲ་ནྲ་ཏྱཾ་པྲ་ཏཱིཙྪ་ན་མཿ ཆོས་རྒྱལ༴ རྩ་བརྒྱུད་བླ་མའི༴ རྡོ་རྗེ་གླུ་དབྱངས་ཡིད་འཕྲོག་ལྡན། །བཞེས་ནས༴ བཛྲ་གཱི་ཏཾ་པྲ་ཏཱིཙྪ་ན་མཿ ཆོས་རྒྱལ་རིགས་ལྡན༴ རྩ་བརྒྱུད་བླ་མའི༴ རྡོ་རྗེ་འདོད་པའི་མཆོད་པ་མཆོག །བཞེས་ནས་བདག་ལ་མཆོག་སྩོལ་མཛོད། །བཛྲ་ཀཱ་མཾ་པྲ་ཏཱིཙྪ་ན་མཿ ཞེས་རིག་མ་བཅུ་གཉིས་ཀྱིས་མཆོད། གོས་ཟུང་འབུལ་ལ། སྲབ་འཇམ་ཡང་བ་ལྷ་ཡི་གོས། །མི་ཕྱེད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །མཆོད་པ་བཅུ་གསུམ་ནི། རབ་འབར་ནོར་བུ་རིན་ཆེན་ཨིནྡྲ་རྙིལ། །གསེར་དངུལ་ལ་སོགས་རིན་ཆེན་མེ་ཏོག་དང༌། །རེག་ན་བདེ་བ་རྣམ་མང་གོས་ཀྱི་ཚོགས། །ཙནྡན་ལ་སོགས་དྲི་བཟང་སྦྱར་བའི་ཆབ། །དྲི་ཞིམ་བདུག་སྤོས་བསྲེག་པའི་ སྤྲིན་ཚོགས་དང༌། །རྩི་བཅུད་འབྲུ་མར་དང་བཅས་སྒྲོན་མེའི་ཚོགས། །གྲགས་སྟོང་གཉིས་སུ་མེད་པ་དྲིལ་བུའི་སྒྲ། །གསལ་སྣང་གཟུགས་བརྙན་འཆར་བའི་མེ་ལོང་དང༌། །ལྷ་རྫས་བླ་བྲེ་ནམ་མཁའི་ཚད་འཇལ་བྱེད༑ ༑རྣམ་མང་འབྲས་བུ་སྣ་ཚོགས་བཅུད་སྟེར་ཞིང༌། །ལྷབ་ལྷུབ་གཡོ་བ་བ་དན་རྣམ་ལྔའི་ཚོགས། །འཇོ་སྒེག་རྣམ་འགྱུར་སྤྲོ་བའི་གར་མཁན་དང༌། །སྒྲ་སྙན་སྣ་ཚོགས་རོལ་མོའི་མཆོད་པ་སྟེ། །བཅུ་གསུམ་དཀྱིལ་འཁོར་ལྷ་ཚོགས་རྣམས་ལ་འབུལ། །ཡན་ལག་བཅུ་གཉིས་འཕོ་བ་རབ་འགགས་ནས། །བཅུ་གསུམ་རྡོ་རྗེ་འཛིན་པའི་ས་ཐོབ་ཤོག །མཆོད་པ་རྣམ་བཅུ་ནི། རབ་དྭངས་ཡན་ལག་བརྒྱད་ལྡན་ཆུ་གཙང་དང༌། །འོ་ཆབ་མེ་ཏོག་བཅས་པའི་མཆོད་ཡོན་བཟང༌། །རླུང་གིས་བསྐྱོད་པའི་དྲི་བཟང་མཁའ་ཁྱབ་དང༌། །ལྷན་ཅིག་སྐྱེས་དང་སྦྱར་བའི་བདུག་སྤོས་དང༌། །ཨུཏྤལ་པདྨ་ལ་སོགས་མེ་ཏོག་བཀྲ། །མ་ཉམས་ས་ཧཱ་ཀ་རའི་འབྲས་བུ་སྨིན། །སྨན་མཆོག་དབང་པོ་ལ་སོགས་འབྲུ་སྣ་ཚོགས། །ཉི་ཟླ་ནོར་བུ་ལ་སོགས་སྣང་གསལ་ཚོགས། །བདུད་རྩི་རོ་བརྒྱ་ལྡན་པའི་ལྷ་བཤོས་དང༌། །པཉྩ་ལི་ཀཱ་ལྷ་ཡི་གོས་ཀྱི་མཆོག །མཆོད་པ་རྣམ་བཅུ་ཕུལ་བས་ས་བཅུ་ཐོབ། །དཀྱིལ་འཁོར་རྣམ་བཅུ་སྒྲིབ་བྲལ་ཐོབ་པར་ཤོག །བཀྲ་ཤིས་རྟགས་བརྒྱད་ནི། ཇི་ལྟར་སྔོན་གྱི་སངས་རྒྱས་ལ། །བཀྲ་ཤིས་དཔལ་བེའུ་གཡུ་དྲུང་འཁྱིལ། །དགེ་བའི་དོན་དུ་མངའ་བ་ལྟར། །དེ་བཞིན་བདག་ཀྱང་དབུལ་བར་བགྱི། ། ཇི་ལྟར་སྔོན་གྱི་སངས་རྒྱས་ལ། །གསེར་གྱི་འཁོར་ལོ་མུ་ཁྱུད་ཅན། །ཚངས་པ་ཆེན་པོས་ཕུལ་བ་ལྟར། །དེ་བཞིན་བདག་ཀྱང་དབུལ་བར་བགྱི། །ཇི་ལྟར་སྔོན་གྱི༴ འདམ་གྱི་སྐྱོན་གྱིས་མ་གོས་པའི། །པདྨ་དཀར་པོ་ཕུལ་བ་ལྟར། །དེ་བཞིན་བདག་ཀྱང་དབུལ་བར་བགྱི། །ཇི་ལྟར་སྔོན་གྱི༴ ཉོན་མོངས་བདུད་ལས་རྒྱལ་བ་ཡི། །ཆོས་ཀྱི་རྒྱལ་མཚན་ཕུལ་བ་ལྟར། །དེ་བཞིན༴ ཇི་ལྟར༴ གདུགས་དཀར་གསེར་གྱི་ཡུ་བ་ཅན། །ཕུལ་བ་དེ་བཞིན་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ཇི་ལྟར༴ རེ་བ་ཐམས་ཅད་རྫོགས་མཛད་པའི། །བུམ་པ་བཟང་པོ་ཕུལ་བ་ལྟར། །དེ་བཞིན༴ ཇི་ལྟར༴ སྙན་པ་ཕྱོགས་བཅུར་སྒྲོག་པ་ཡི། །འབུད་དུང་གཡས་འཁྱིལ་ཕུལ་བ་ལྟར། །དེ་བཞིན་བདག་ཀྱང་དབུལ་བར་བགྱི། །ཇི་ལྟར༴ ན་བཟའ་གསེར་གྱི་ཉ་རིས་ཅན། །ཕུལ་བ་དེ་བཞིན་བདག་འབུལ་ན། །ཅི་བདེ་བར་ནི་བཞེས་སུ་གསོལ། །རྒྱལ་སྲིད་རྫས་བརྒྱད་མཁོ་བའི་ཡོ་བྱད་སྣ་ཚོགས་འབུལ་བ་ནི༑ ཕྱོགས་ལས་རྣམ་རྒྱལ་གསར་གྱི་འཁོར་ལོ་དང༌། །དགོས་འདོད་མ་ལུས་སྩོལ་བའི་ཡིད་བཞིན་ནོར། །གཟུགས་མཛེས་སྐྱོན་ཀུན་བྲལ་བ་བཙུན་མོའི་མཆོག །བང་མཛོད་མ་ལུས་འགེངས་བྱེད་བློན་པོའི་ཕུལ། །ཡིད་འོང་སྟོབས་ལྡན་གླང་པོའི་བདག་པོ་དང༌། །ཅང་ཤེས་སྤྲིན་གྱི་ཤུགས་ཅན་རྨད་བྱུང་རྟ། །རྒོལ་བ་ཀུན་འཇོམས་ཁྱིམ་བདག་དཔའ་བོ་ཆེ། །དེ་ལྟར་རིན་ཆེན་བདུན་གྱིས་དཀྱིལ་འཁོར་མཆོད། །དྲི་མེད་ཆོས་ཀུན་གསལ་བའི་ མེ་ལོང་དང༌། །གཡས་འཁྱིལ་ཆོས་སྒྲ་མི་ཟད་སྒྲོག་པའི་དུང༌། །དུག་གསུམ་ཉོན་མོངས་འཇོམས་པའི་གི་ཧཾ་དང༌། །རྩི་བཅུད་སྙིང་པོ་བདུད་རྩིའི་རང་བཞིན་ཞོ། །ཁམས་གསུམ་དབང་དུ་སྡུད་པའི་ལི་ཁྲིའི་རྫས༑ ༑རྡོ་རྗེ་སེམས་དཔའི་ཚེ་སྒྲུབ་དུར་བའི་རྩ། །དོན་མཆོག་བླ་མེད་སྒྲུབ་པའི་བིལ་བའི་འབྲས། །བགེགས་དང་བར་ཆད་ཀུན་འཇོམས་ཡུངས་དཀར་ཏེ། །རྒྱལ་བས་བྱིན་བརླབས་བཀྲ་ཤིས་རྫས་བརྒྱད་པོ། །ཕུལ་བས་འགྲོ་ལ་དགེ་ལེགས་འཕེལ་བར་ཤོག །ཉོན་མོངས་མ་ལུས་གཅོད་པའི་སྟག་ལྤགས་དང༌། །སྒྲིབ་པ་ཀུན་བྲལ་གླང་ཆེན་ལྤགས་པའི་གོས། །འཇིགས་བྱེད་ཧེ་རུ་ཀ་དཔལ་མཉེས་བྱེད་པ། །སྣ་ཚོགས་ན་བཟའི་མཆོད་པ་དབུལ་བར་བགྱི། །དབང་སྔོན་ཀརྐེ་ཏ་ན་ཆུ་ཤེལ་དང༌། །པད་དམར་མ་ར་ཏ་ཀ་མུ་ཏིག་དང༌། །ཛམ་བུ་ཆུ་བོའི་གསེར་དང་དངུལ་ལ་སོགས། །བཟའ་དང་བཅའ་བ་རྣམ་པ་དུ་མ་དང༌། །རྩ་བ་སྡོང་བུ་འདབ་མ་མེ་ཏོག་དང༌༑ ༑ལྗོན་ཤིང་ལ་སོགས་རྣམ་པ་སྣ་ཚོགས་པ། །བསོད་ནམས་སྤེལ་ཕྱིར་དཀྱིལ་འཁོར་ལྷ་ལ་འབུལ། །རལ་གྲི་ཁང་པ་པགས་པ་སྐྱེད་མོས་ཚལ། །མལ་ཆ་གོས་དང་མཆིལ་ལྷམ་རིན་པོ་ཆེ། །པདྨ་ཅན་སོགས་བཀྲ་ཤིས་ལྷ་མོ་བརྒྱད། །སྣ་ཚོགས་རིན་ཆེན་ལས་གྲུབ་ཁང་བཟང་དང༌། །དཔག་བསམ་ཤིང་དང་བུམ་པ་བཟང་པོ་དང༌། །འདོད་འཇོའི་བ་དང་རིན་ཆེན་རི་བོ་སོགས། །མཆོད་སྤྲིན་རྒྱ་མཚོས་བླ་མའི་དཀྱིལ་འཁོར་མཆོད། ། མཆོད་པ་བཅུ་གཉིས་ཀྱི་ངེས་དོན་དྲན་པས་མཆོད་པ་ནི། ཀུནྡ་རབ་ཏུ་ཁྱབ་བྱེད་དྲི་བཟང་དང༌། །རྣམ་དག་ཉི་མས་དག་བྱེད་མེ་ཏོག་ཕྲེང༌། །དོན་དམ་དབྱིངས་ཀྱི་བླ་མ་ལྷ་ལ་འབུལ། །འགྲོ་བས་རྣམ་དག་ཟླ་ཉི་ཐོབ་པར་ཤོག །གཏུམ་མོ་འབར་བས་ཀུན་རྟོག་བསྲེགས་པའི་སྤོས། །སྙིང་ནང་གཞོམ་མེད་འབར་བའི་སྣང་གསལ་ཚོགས། །དོན་དམ་དབྱིངས་ཀྱི༴ སྤྲོས་བྲལ་ཡེ་ཤེས་སྣང་བ་ཐོབ་པར་ཤོག །འདོད་ཡོན་གཞན་མཆོག་བདུད་རྩི་ཞལ་ཟས་ལྔ༑ ༑ཐིག་ལེ་ནོར་བུར་བཅིངས་པའི་མ་ཉམས་འབྲུ། །དོན་དམ་དབྱིངས་ཀྱི༴ སྟོང་པའི་གཟུགས་ཀྱིས་བྱང་སེམས་འཆིང་བར་ཤོག །མ་དག་གནས་གྱུར་ཡེ་ཤེས་སྒེག་མོའི་ལུས། །ལས་རླུང་དྷཱུ་ཏིར་ཐིམ་པས་བཞད་སྒྲའི་དབྱངས། །དོན་དམ་དབྱིངས་ཀྱི༴ རྡོ་རྗེའི་སྐུ་དང་བཅུ་གཉིས་ས་ཐོབ་ཤོག །གཞོམ་མེད་ནཱ་དའི་རོལ་མོ་སིལ་སྙན་མཆོག །རྣམ་གསུམ་ཕྱག་རྒྱའི་རོལ་པ་བདེ་བའི་གར། །དོན་དམ་དབྱིངས་ཀྱི༴ གྲགས་སྟོང་སྒྲ་དང་སྒྱུ་རྩལ་མཆོག་ཐོབ་ཤོག །སྒྲ་དབྱངས་རྒྱ་མཚོ་ཆོས་ཉིད་རྡོ་རྗེའི་གླུ། །མི་འགྱུར་བདེ་སྒྲུབ་ཕྱག་ཆེན་འདོད་པ་མོ། །དོན་དམ་དབྱིངས་ཀྱི་བླ་མ་ལྷ་ལ་འབུལ། །རྡོ་རྗེའི་གསུང་དང་མི་འགྱུར་བདེ་ཐོབ་ཤོག །ན་མཿ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ལན་གསུམ་ལ་སོགས་པ་ཅི་རིགས་པར་བརྗོད། བདུད་རྩི་འབུལ་བ་ལ། ཆོས་རྒྱལ་རིགས་ལྡན་སུམ་ཅུ་རྩ་གཉིས་དང༌། །འཕགས་བོད་དུས་ཞབས་ཆེ་ རྣམས་གཙོར་གྱུར་པའི། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །སངས་རྒྱས་བྱང་སེམས་མཁའ་འགྲོའི་ཚོགས་རྣམས་ལ། །དམ་རྫས་བདུད་རྩི་མཆོག་གི་མཆོད་པ་འབུལ། །འགྲོ་ཀུན་ཡེ་ཤེས་བདུད་རྩིའི་རྒྱ་མཚོ་ལ། །མཆོག་ཏུ་རོལ་པས་བདེ་ཆེན་ཐོབ་པར་ཤོག །ༀ་ཨཱཿ ཧཱུྃ། ༀ་སརྦ་གུ་རུ་བུདྡྷ་བོ་དྷི་ས་ཏྭ་དེ་བ་ཌཱ་ཀི་ནཱི་བྷྱཿ ན་མོ་ན་མཿ གཏོར་མ་གོང་གི་སྔགས་ཚན་བཞིས་བྱིན་བརླབས། ནམ་མཁའ་མཛོད་ཀྱི་སྔགས་ལན་གསུམ་དང༌། ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། །ལེགས་སྦྱར་འདི་ནི་རྒྱལ་བ་སྲས་བཅས་ལ། །དད་པས་ཕུལ་བས་འགྲོ་བ་འདི་རྣམས་ཀྱང༌། །འབྱོར་ལྡན་ཏིང་འཛིན་ཟས་ལ་སྤྱོད་པར༴ ཅེས་འབུལ། མཁའ་འགྲོ་གཏོར་མ། ༀ་ཨཱཿ ཧཱུྃ་ཧོཿ ལན་གསུམ་གྱིས་བརླབ། ༀ་ཨཱཿ ཧཱུྃ་ཧོཿ བཛྲ་ཌཱ་ཀི་ནཱི་བྷྱཿ ཨི་དཾ་བ་ལི། གནྡྷཾ། པུཥྤཾ། དྷཱུ་པཾ། པྲ་དཱི་པཾ། ཨཱཀྵ་ཏཾ། ད་དཱ་མ་ཧེ། ས་པ་རི་ཝཱ་རཿ ཤཱི་གྷྲཾ། ཨཱ་གཙྪ་ཏུ། ཛཿ ཧཱུྃ་བཾ་ཧོཿ ཨཱི་དཾ་བ་ལ། གྲ་ཧྞ་ཏུ། ཁཱ་ད་ཏུ། པི་ཝ་ཏུ། ས་པ་རི་ཝཱ་ར་ཀ །སརྦ་ས་ཏྭ་ནཱཾ། ཤཱནྟ། པུཥྚ། རཀྵ་ཨ་ཝ་ར་ཎ། གུཔྟ་ཀ་རོ་ཏུ། ཨི་དཾ་སྠའ་ནཾ། ཏྱཀྟྭ ཱ། བཱ་ཧྱ་མཎྜལ་བྷཱུ་མྱཾ་ཏིཥྛ་ཏུ་ཧཱུཾ་ཧཱུཾ་ཕཊ། བཛྲ་དྷ་ར་ཨཱ་ཛྙཱ་པཱ་ཡ་ཏི་སྭཱ་ཧཱ། ཞེས་པས་འབུལ། དེ་ནས་བཤགས་པ་སོགས་ཡན་ལག་ལྷག་མ་རྣམས་ནི༑ སྲིད་འགྲོ་ཉམ་ང་བྱིས་པའི་བློ་ཡིས་ནི། །ཤིན་ཏུ་མི་བཟད་སྡིག་པ་གང་བགྱིས་པ། །སྟོབས་བཅུ་མངའ་བའི་སྤྱན་སྔར་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །སྐྱེ་བ་ཉམ་ང་སྲིད་པ་ཉམ་ང་དང༌། ། འཇིག་རྟེན་ཉམ་ང་གཡོ་སེམས་ཉམ་ང་བ། །ལུས་ཀྱི་སྤྱོད་པ་ཉམ་ང་སྣ་ཚོགས་ཀྱིས། །བདག་གི་སྡིག་པ་གང་བསགས་དེ་འཆགས་སོ། །བྱིས་པ་བླུན་བྱས་ཉོན་མོངས་ཉམ་ང་དང༌། །སྡིག་པའི་གྲོགས་དང་འཕྲད་པ་ཉམ་ང་དང༌། །སྲིད་པ་ཉམ་ང་འདོད་ཆགས་ཉམ་ང་དང༌། །ཞེ་སྡང་གཏི་མུག་མུན་པ་ཉམ་ང་དང༌། །ངལ་བའི་ཉམ་ང་དུས་ཀྱི་ཉམ་ང་དང༌། །བསོད་ནམས་བསྒྲུབ་པ་ཉམ་ང་དག་གིས་ཀྱང༌། །རྒྱལ་བ་ཡང་དག་མངོན་སུམ་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་རྣམས་དང་འཕགས་པའི་ཚོགས་ཀྱིས་རྣམ་མང་དགེ་བ་གང་མཛད་པ། །དེ་དག་མཐའ་དག་ལ་ནི་སྡིག་པ་རྣམ་བྲལ་བྱང་ཆུབ་སྤྱོད་ལ་རྗེས་སུ་གནས་པས་རྗེས་ཡི་རང༌། །སངས་རྒྱས་ཆོས་དང་དགེ་འདུན་སྲིད་པའི་འཇིགས་འཕྲོག་ལ་ཡང་བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གི་ལུས་འབུལ་ཆོས་ཀྱི་འཁོར་ལོ་བསྐོར་ཞིང་མྱ་ངན་མི་འདའ་ཡུན་རིང་བཞུགས་པར་གསོལ་བ་འདེབས། །རྫོགས་སངས་རྒྱས་སུ་བདག་གྱུར་ཅིག་ཅེས་འདིར་ནི་སྨོན་ལམ་སེམས་ཅན་དོན་གྱི་སླད་དུ་བདག་བགྱིད་དོ། །ལམ་བསྟེན་པ་ནི། བྱང་ཆུབ་མཆོག་གི་སེམས་དང་ནི། །ལྷག་བསམ་རྣམ་པར་དག་པ་དང༌། །བདག་དང་བདག་གིར་འཛིན་སྤོང་བའི། །རྩ་བ་བསྟེན་བགྱི་ཚོགས་གསུམ་ཕྱིར། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ ཐབས་དང་ནི། །སྨོན་ལམ་སྟོབས་དང་ཡེ་ཤེས་ཀྱི། །ཕ་རོལ་ཕྱིན་བཅུ་རྫོགས་པར་བགྱི། །བྱམས་དང་སྙིང་རྗེ་དགའ་བ་དང༌། །བཏང་སྙོམས་རྣམས་ལ་གནས་བགྱི་ཞིང༌། །སྦྱིན་དང་སྙན་པར་སྨྲ་བ་དང༌། །དོན་སྤྱོད་པ་དང་དོན་མཐུན་སྤྱད། །སྲོག་གཅོད་མ་བྱིན་གཞན་གྱི་བུད་མེད་དང༌། །རྫུན་དང་ཚིག་རྩུབ་རྣམས་དང་ཕྲ་མ་དང༌། །འཁྱལ་བར་གྱུར་པའི་ཚིག་དང་བརྣབ་སེམས་དང༌། །གནོད་སེམས་ལྟ་བ་ངན་པ་རྣམ་པར་སྤང༌། །འགྱོད་དང་གཉིད་རྨུགས་རྒོད་དང་ཐེ་ཚོམ་སྟེ། །སྒྲིབ་པ་ལྔ་པོ་ཡོངས་སུ་སྤང་བགྱི་ཞིང༌། །འདོད་ཆགས་ཞེ་སྡང་གཏི་མུག་ང་རྒྱལ་གྱི། །ཉོན་མོངས་བཞི་རྣམས་བདག་གིས་ཀུན་ཏུ་སྤང༌། །འདོད་དང་སྲིད་པ་མ་རིག་ལྟ་བ་ཡི། །ཟག་པ་བཞི་ཡང་ཡོངས་སུ་སྤང་བགྱིའོ། །སྡོམ་པ་བཟུང་བ་ནི། བླ་མ་རྡོ་རྗེ་འཛིན་པ་ཆེན་པོ་རྣམས་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། ། སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང༌། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ནི། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། ། རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་གཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང༌། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་སྒྲོལ། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། །ལན་གསུམ་བྱ། དེ་ནས་བསྟོད་ཅིང་གསོལ་བ་འདེབས་པ་ནི། ཆོས་རྗེ་ཀུན་མཁྱེན་དོལ་པོ་བའི་གསུང་བྱིན་རླབས་ཅན་མང་དུ་བཞུགས་པ་ལས་རྒྱལ་བ་རིགས་བཞིའི་གསོལ་འདེབས་ནི། ༀ་གུ་རུ་བུདྡྷ་བྷོ་དྷི་ས་ཏྭེ་བྷྱོ་ན་མོ་ན་མཿ རྒྱལ་བ་སྐུ་བཞིའི་རང་བཞིན་དཔལ་ལྡན་བླ་མ་དམ་པའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་དུ་གསོལ། སོར་སྡུད་བསམ་གཏན་བསྙེན་པའི་ཡན་ལག་གིས། །སད་པའི་གནས་སྐབས་སྤངས་ནས་སད་པ་གཞན། །བདེ་གཤེགས་སྙིང་པོའི་སད་པའི་སྣ་ཚོགས་གཟུགས། །མངོན་སུམ་སྟོན་མཛད་བླ་མའི་ཞབས་ལ་འདུད། །སྲོག་རྩོལ་འཛིན་པ་ཉེར་བསྒྲུབ་ཡན་ལག་གིས། །རྨི་ལམ་གནས་སྐབས་སྤངས་ནས་རྨི་ལམ་གཞན། །བདེ་གཤེགས་སྙིང་པོའི་རྨི་ལམ་གཞོམ་མེད་སྒྲ། །མངོན་སུམ་སྟོན་མཛད་བླ་མའི་ཞབས་ལ་འདུད། །རྗེས་སུ་དྲན་པ་བསྒྲུབ་པའི་ཡན་ལག་གིས། །གཉིད་འཐུག་གནས་སྐབས་སྤངས་ནས་གཉིད་འཐུག་གཞན། །བདེ་གཤེགས་སྙིང་པོའི་གཉིད་འཐུག་བསམ་དུ་མེད། །མངོན་སུམ་སྟོན་མཛད་བླ་མའི་ཞབས་ལ་འདུད། །ཏིང་འཛིན་ཡན་ལག་བསྒྲུབ་པ་ཆེན་པོ་ཡིས། །ཆགས་པའི་གནས་སྐབས་སྤངས་ནས་ཆགས་པ་གཞན། །བདེ་གཤེགས་སྙིང་པོའི་ཆགས་པ་འགྱུར་མེད་བདེ། །མངོན་སུམ་སྟོན་མཛད་བླ་མའི་ཞབས་ལ་འདུད། །འདུ་མི་བྱེད་པའི་རྣམ་ཐར་སྙིང་རྗེ་ཡིས། །ལུས་ཀྱི་བྱ་བ་སྤངས་ནས་ལུས་གཞན་མཆོག །བདེ་གཤེགས་སྙིང་པོའི་ལུས་མཆོག་རྡོ་རྗེའི་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །སྨོན་པ་མེད་པའི་རྣམ་ཐར་དགའ་བ་ཡིས། །ངག་གི་བྱ་བ་སྤངས་ནས་ངག་གཞན་མཆོག །བདེ་གཤེགས་སྙིང་པོའི་ངག་མཆོག་རྡོ་རྗེའི་གསུང༌། །མངོན་སུམ་སྟོན་མཛད་བླ་མའི་ཞབས་ལ་འདུད། །མཚན་མ་མེད་པའི་རྣམ་ཐར་བྱམས་པ་ཡིས། །སེམས་ཀྱི་བྱ་བ་སྤངས་ནས་སེམས་ གཞན་མཆོག །བདེ་གཤེགས་སྙིང་པོའི་སེམས་མཆོག་རྡོ་རྗེའི་ཐུགས། །མངོན་སུམ་སྟོན་མཛད་བླ་མའི་ཞབས་ལ་འདུད། །སྟོང་པ་ཉིད་ཀྱི་རྣམ་ཐར་བཏང་སྙོམས་ཀྱིས། །ཆགས་པའི་བྱ་བ་སྤངས་ནས་ཆགས་པ་གཞན། ། བདེ་གཤེགས་སྙིང་པོའི་ཆགས་པ་རྡོ་རྗེའི་བདེ། །མངོན་སུམ་སྟོན་མཛད་བླ་མའི་ཞབས་ལ་འདུད། །དགའ་བའི་དགའ་བ་བུམ་པའི་དབང་མཆོག་གིས། །ལུས་ཀྱི་ཐིག་ལེ་འགགས་ནས་ཐིག་ལེ་གཞན། །བདེ་གཤེགས་སྙིང་པོའི་ཐིག་ལེ་སྤྲུལ་པའི་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །མཆོག་དགའི་དགའ་བ་གསང་བའི་དབང་མཆོག་གིས། །ངག་གི་ཐིག་ལེ་འགགས་ནས་ཐིག་ལེ་གཞན། །བདེ་གཤེགས་སྙིང་པོའི་ཐིག་ལེ་ལོངས་སྤྱོད་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །ཁྱད་པར་དགའ་བ་གསུམ་པའི་དབང་མཆོག་གིས། །སེམས་ཀྱི་ཐིག་ལེ་འགགས་ནས་ཐིག་ལེ་གཞན། །བདེ་གཤེགས་སྙིང་པོའི་ཐིག་ལེ་ཆོས་ཀྱི་སྐུ༑ ༑མངོན་སུམ་སྟོན་མཛད་བླ་མའི་ཞབས་ལ་འདུད། །ལྷན་ཅིག་སྐྱེས་དགའ་བཞི་པའི་དབང་མཆོག་གིས། །ཆགས་པའི་ཐིག་ལེ་འགགས་ནས་ཐིག་ལེ་གཞན། །བདེ་གཤེགས་སྙིང་པོའི་ཐིག་ལེ་ལྷན་སྐྱེས་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །སོར་སྡུད་བསམ་གཏན་དབྱིབས་ཀྱི་རྣལ་འབྱོར་གྱིས། །ལུས་ཀྱི་སྒྲིབ་པ་ཕུང་པོའི་བདུད་བཅོམ་ནས། །དམ་ཚིག་སེམས་དཔའ་པད་འདབ་ཡངས་པའི་སྤྱན། །མངོན་སུམ་སྟོན་མཛད་ བླ་མའི་ཞབས་ལ་འདུད། །སྲོག་རྩོལ་འཛིན་པ་སྔགས་ཀྱི་རྣལ་འབྱོར་གྱིས། །ངག་གི་སྒྲིབ་པ་ཉོན་མོངས་བདུད་བཅོམ་ནས། །སེམས་དཔའ་ཆེན་པོ་ཉིན་མོར་བྱེད་པའི་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །རྗེས་དྲན་ཡན་ལག་ཆོས་ཀྱི་རྣལ་འབྱོར་གྱིས། །སེམས་ཀྱི་སྒྲིབ་པ་འཆི་བདག་བདུད་བཅོམ་ནས། །བྱང་ཆུབ་སེམས་དཔའ་ཡེ་ཤེས་ཆེན་པོའི་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །ཏིང་འཛིན་ཡན་ལག་དག་པའི་རྣལ་འབྱོར་གྱིས། །མ་རིག་སྒྲིབ་པ་ལྷ་ཡི་བདུད་བཅོམ་ནས། །རྡོ་རྗེ་སེམས་དཔའ་ཐམས་ཅད་མཁྱེན་པའི་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །ལུས་ཀྱི་ལོངས་སྤྱོད་ཀུན་ལ་མི་ལྟོས་པར། །ལུས་ལ་ཆགས་པ་ལུས་ཀྱི་ཉེས་བཅོམ་ནས། །དྲི་བྲལ་འབྲས་བུ་རྣམ་པ་ཀུན་མཁྱེན་སྐུ། །མངོན་སུམ་སྟོན་མཛད་བླ་མའི་ཞབས་ལ་འདུད། །ངག་གི་ལོངས་སྤྱོད་ཀུན་ལ་མི་ལྟོས་པར། །ངག་ལ་ཆགས་པ་ངག་གི་ཉེས་བཅོམ་ནས། །སྐྱེས་བུ་བྱེད་པའི་འབྲས་བུ་ལམ་མཁྱེན་ཉིད། །མངོན་སུམ་སྟོན་མཛད་བླ་མའི་ཞབས་ལ་འདུད། །ཡིད་ཀྱི་ལོངས་སྤྱོད་ཀུན་ལ་མི་ལྟོས་པར། །སེམས་ལ་ཆགས་པ་སེམས་ཀྱི་ཉེས་བཅོམ་ནས། །རྣམ་སྨིན་འབྲས་བུ་ལམ་གྱི་རྣམ་མཁྱེན་ཉིད། །མངོན་སུམ་སྟོན་མཛད་བླ་མའི་ཞབས་ལ་འདུད། །འཕོ་བའི་ལོངས་སྤྱོད་ཀུན་ལ་མི་ལྟོས་པར། །འཕོ་ལ་ཆགས་པས་འཕོ་བའི་ཉེས་བཅོམ་ནས། །རྒྱུ་མཐུན་འབྲས་བུ་ཐམས་ཅད་ མཁྱེན་པ་ཉིད། །མངོན་སུམ་སྟོན་མཛད་བླ་མའི་ཞབས་ལ་འདུད། །ༀ་ཡིག་རྣམ་པ་སྣ་ཚོགས་སྐད་ཅིག་མས། །སྤྱི་བོའི་འཁོར་ལོ་དག་པའི་ཧེ་རུ་ཀ །སྒྱུ་འཕྲུལ་དྲྭ་བས་མངོན་པར་བྱང་ཆུབ་པ། །མངོན་སུམ་སྟོན་མཛད་བླ་མའི་ཞབས་ལ་འདུད། །ཨཱཿ ཡིག་རྣམ་པར་སྨིན་པའི་སྐད་ཅིག་མས། །མགྲིན་པའི་འཁོར་ལོ་དག་པའི་ཧེ་རུ་ཀ། །རྣམ་པ་ཉི་ཤུས་མངོན་རྫོགས་བྱང་ཆུབ་པ། །མངོན་སུམ་སྟོན་མཛད་བླ་མའི་ཞབས་ལ་འདུད། །ཧཱུྃ་ཡིག་རྣམ་པར་ཉིད་པའི་སྐད་ཅིག་མས། །སྙིང་ཁའི་འཁོར་ལོ་དག་པའི་ཧེ་རུ་ཀ། །རྣམ་པ་ལྔ་ཡིས་མངོན་རྫོགས་བྱང་ཆུབ་པ། །མངོན་སུམ་སྟོན་མཛད་བླ་མའི་ཞབས་ལ་འདུད། །ཧོཿ ཡིག་མཚན་ཉིད་བྲལ་བའི་སྐད་ཅིག་མས། །ལྟེ་བའི་འཁོར་ལོ་དག་པའི་ཧེ་རུ་ཀ། །སྐད་ཅིག་གཅིག་གི་མངོན་རྫོགས་བྱང་ཆུབ་པ། །མངོན་སུམ་སྟོན་མཛད་བླ་མའི་ཞབས་ལ་འདུད། །གདན་བཞི་བདེན་བཞི་དེ་ཉིད་བཞི་ལ་སོགས། །རིགས་བཞིའི་འཁོར་ལོ་དཀྱིལ་འཁོར་བླ་མ་དང༌། །སངས་རྒྱས་སྲས་བཅས་ཀུན་ལ་ཕྱག་འཚལ་མཆོད། །སྡིག་པ་ཀུན་བཤགས་དགེ་ལ་རྗེས་ཡི་རང༌། །ཆོས་ཀྱི་འཁོར་ལོ་བླ་མེད་བསྐོར་དུ་གསོལ། །མྱ་ངན་མི་འདའ་ཡུན་རིང་བཞུགས་གསོལ་འདེབས། །ལུས་འབུལ་སྐྱབས་མཆི་བྱང་ཆུབ་སེམས་བསྐྱེད་བགྱི། །དགེ་བ་གང་བསགས་སྐུ་བཞི་ཐོབ་ཕྱིར་བསྔོ། །ཞེས་དང༌། གཞན་ཡང་སྦྱོར་དྲུག་བརྒྱུད་པའི་གསོལ་འདེབས་སོགས་ཅི་ནུས་ཀྱིས་གསོལ་བ་བཏབ། འདོད་དོན་ཞུ་བ་ནི། ལྷ་བདེ་གཤེགས་སྙིང་པོའི་བཀའ་དྲིན་གྱིས། །ཡིད་རྣམ་རྟོག་འགྱུ་བ་སོ་སོར་བཅད། །ཉམས་འོད་གསལ་རྟགས་བཅུ་མངོན་གྱུར་ནས། །ལམ་སོར་སྡུད་འབྱོངས་པར་བྱིན་གྱིས་རློབས། །ཕ་དྲིན་ཅན་བླ་མ་ལ་གསོལ་བ་འདེབས། །འདྲེན་མཆོག་ཡབ་སྲས་རྣམས་ཀྱིས་བྱིན་གྱིས་རློབས། །ལྷ་བདེ་གཤེགས༴ ཡིད་རླུང་སེམས་ངག་རྣམས་མི་གཡོ་ཞིང༌། །ཉམས་ཤེས་རབ་རྟོག་དཔྱོད་དགའ་བདེ་འཕེལ། །ལམ་བསམ་གཏན་འབྱོངས་པར་བྱིན་གྱིས༴ ཕ་དྲིན་ཅན༴ འདྲེན་མཆོག༴ ལྷ་བདེ་གཤེགས༴ རྩ་རོ་རྐྱང་རླུང་བཅུ་དབུ་མར་ཚུད། །ཉམས་གཏུམ་མོ་འབར་བས་ཧཾ་ཡིག་ཞུ། །ལམ་སྲོག་རྩོལ་འབྱོངས་པར་བྱིན༴ ཕ་དྲིན་ཅན༴ འདྲེན་མཆོག༴ ལྷ་བདེ་གཤེགས༴ ཁམས་འཛག་མེད་ཐིག་ལེ་དཔྲལ་བར་བརྟན། །ཉམས་ཞུ་བདེ་འགྱུར་མེད་རྒྱུད་ལ་སྐྱེས། །ལམ་འཛིན་པ་འབྱོངས་པར་བྱིན༴ ཕ་དྲིན་ཆེན༴ འདྲེན་མཆོག༴ ལྷ་བདེ༴ ལུས་རྩ་འདབ་བདེ་ཆེན་ཐིག་ལེས་གང༌། །ཉམས་ཕྱག་རྒྱ་གསུམ་ལ་མངའ་བརྙེས་པས། །ལམ་རྗེས་དྲན་འབྱོངས༴ ཕ་དྲིན་ཅན༴ འདྲེན་མཆོག༴ ལྷ་བདེ་གཤེགས༴ རྩ་འཁོར་ལོ་དྲུག་པོ་བདེ་བས་གང༌། །ཉམས་སྤྲོས་པ་མེད་ལ་དབང་འབྱོར་བའི། །ལམ་ཏིང་འཛིན་འབྱོངས་པར༴ དྲིན་ཆེན༴ འདྲེན་མཆོག༴ ལྷ་བདེ་གཤེགས༴ ལུས་བྱེད་བཅིངས་གནད་དང་མ་བྲལ་ཞིང༌། །ཆོས་མ་ནོར་མན་ངག་ཟབ་མོ་ཡིས། །ལམ་སྦྱོར་དྲུག་འབྱོངས་པར་བྱིན་གྱིས་རློབས། །ཕ་དྲིན་ཆེན་བླ་མ་ལ་གསོལ་བ་འདེབས། ། འདྲེན་མཆོག་ཡབ་སྲས་རྣམས་ཀྱིས་བྱིན་གྱིས་རློབས། །ཞེས་དང༌། གཞན་ཡང་ཆོས་རྗེ་ཀུན་མཁྱེན་པའི་གསུང་སོགས་འདོད་གསོལ་གཞན་ཡང་སྤྲོ་ན་བྱ། དེ་ནས་ཚོགས་མཆོད་ཕུལ་ན། ཚོགས་རྫས་བྱིན་རླབས་ནི། ༀ་ཨཱཿ ཧཱུྃ་ཧྲཿ ཕཊ་ཀྱིས་བསང༌། སྭ་བྷཱ་ཝས་སྦྱང༌། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་ནག་པོ་གཞུའི་དབྱིབས་ཅན་རྒྱལ་མཚན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཨཱཿ ལས་མི་ མགོའི་སྒྱེད་པུ་གསུམ་ལ་གནས་པའི་ༀ་ཡོངས་སུ་གྱུར་པ་ལས་ཐོད་པ་དུམ་བུ་གཅིག་པ། དེའི་ནང་གི་དབུས་སུ་ཨ་ལས་བྱང་སེམས། ཤར་དུ་ཨི་ལས་རྐང་མར། ལྷོར་ར་ལས་རཀྵ། བྱང་དུ་ཨུ་ལས་དྲི་ཆུ། ནུབ་ཏུ་ལ་ལས་དྲི་ཆེན། རླུང་མཚམས་སུ་ལཱ་ལས་གླང་པོ་ཆེའི་ཤ། དབང་ལྡན་དུ་ཨཱུ་ལས་བ་གླང་གི་ཤ། བདེན་བྲལ་དུ་རཱ་ལས་རྟའི་ཤ། མེ་མཚམས་སུ་ཨཱི་ལས་ཁྱིའི་ཤ། དབུས་ཀྱི་སྟེང་དུ་ཨཱ་ལས་མིའི་ཤ། རླུང་གཡོས་མེ་སྦར་རྫས་རྣམས་ཞུ། ལག་པ་གཡོན་པའི་མཐིལ་དུ་ཟླ་བ་ལ་གནས་པའི་ༀ་སྐུ་རྡོ་རྗེའི་ངོ་བོ། དེའི་འོད་ཟེར་གྱིས་མ་དག་པའི་རྫས་རྣམས་སྦྱངས། ༀ་ༀ་བཛྲ་ཙཎྜ་སརྦ་དྷརྨ་སུ་བི་ཤུདྡྷ་སྭ་བྷ་ཝ་སརྦ་དྷརྨཱ་ན་བི་ཤོ་དྷ་ཡ་སྭཱ་ཧཱ། ལག་པ་གཡས་པའི་མཐིལ་དུ་ཉི་མ་ལ་གནས་པའི་ཨཱཿ གསུང་རྡོ་རྗེའི་ངོ་བོ། དེའི་འོད་ཟེར་གྱིས་དག་པའི་རྫས་རྣམས་སྤེལ་བར་གྱུར། ༀ་ཨཱཿ བཛྲ་སཱུརྱ་སརྦ་དྷརྨྨ་པྲ་བོ་དྷ་ཀ་སརྦ་དྷརྨཱ་ན་པྲ་བོ་དྷ་ཡ་སྭཱ་ཧཱ། ལག་པ་གཉིས་ཀ་སྦྱར་བའི་དབུས་སུ་སྒྲ་གཅན་གྱི་དཀྱིལ་འཁོར་ལ་གནས་པའི་ཧཱུྃ་ཐུགས་རྡོ་རྗེའི་ངོ་བོ། དེའི་འོད་ཀྱིས་རྫས་རྣམས་ཁ་དོག་དྲི་རོ་ནུས་མཐུ་གཟི་བརྗིད་ཕུན་སུམ་ཚོགས་པ་འབར་བར་གྱུར། ༀ་ཧཱུྃ་བཛྲ་ཨ་ན་ལ་སརྦ་དྷརྨྨ་ པྲ་དཱི་པ་ཀ་སརྦ་དྷརྨཱ་ན་པྲ་དཱི་པ་ཡ་སྭཱ་ཧཱ། མཁའ་ལྡིང་གི་ཕྱག་རྒྱའི་དབུས་སུ་དུས་མེ་ལ་གནས་པའི་ཧོཿ ཡིག་ཡེ་ཤེས་རྡོ་རྗེའི་ངོ་བོ། དེའི་འོད་ཟེར་གྱིས་ཟག་མེད་ཡེ་ཤེས་མཆོག་གི་བདུད་རྩིར་བྱས་པར་གྱུར། ༀ་ཧོཿ སརྦ་དྷརྨྨ་བཛྲ་ཨ་མྲ་ཏ་ཀ་ར་སརྦ་དྷརྨཱ་ན་བཛྲ་ཨ་མྲ་ཏཾ་ཀུ་རུ་ཀུ་རུ་སྭཱ་ཧཱ། ན་མོ། ཐབས་དང་ཤེས་རབ་གཉིས་སུ་མེད་པའི་ཚོགས་ཀྱི་འཁོར་ལོ་རྒྱ་ཆེན་པོ་རང་བཞིན་རྣམ་པར་དག་པ་སྐྱེ་བ་མེད་པ། མཚན་ཉིད་རྣམ་པར་དག་པ་ཨཱ་ལི་ཀཱ་ལི། ངོ་བོ་རྣམ་པར་དག་པ་ཤ་ལྔ་བདུད་རྩི་ལྔས་རྒྱས་བཏབ་པ་འདི་ཉིད། བྱིན་རླབས་ཀྱི་རྩ་བ་རྩ་བརྒྱུད་བླ་མ་རྣམས་ལ་འབུལ་བར་བགྱིའོ། །ༀ་ག་ཎ་ཙཀྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་བཞིན་དུ་སྦྱར་ཏེ། དངོས་གྲུབ་ཀྱི་རྩ་བ་ཡི་དམ་ལྷ་ཚོགས་རྣམས༴ ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས༴ དམ་ཚིག་གི་རྩ་བ་མཆེད་གྲོགས་རྡོ་རྗེ་སྤུན་གྲོགས་རྣམས་ལ་འབུལ་བར་བགྱིའོ། །ༀ་ག་ཎ་ཙཀྲ༴ ༀ་མི་འབྲལ་སྙིང་གི་གཞལ་མེད་ཁང༌། །མོས་གུས་གཞོམ་མེད་ཕོ་བྲང་ན། །དྲིན་ཅན་རྩ་བའི་བླ་མ་མཆོག །བཀའ་དྲིན་མཉམ་མེད་དམ་པ་རྗེ། །རྣམ་འཕྲུལ་མཁའ་ལ་སྤྲིན་བཞིན་གཏིབས། །འདིར་གཤེགས་ཚོགས་ཀྱི་མཆོད་པ་བཞེས། ། གནས་ཁང་འདི་ལ་བྱིན་ཕོབ་ལ། །ཚོགས་རྫས་འདི་ལ་བཅུད་ཅིག་ཆུག །འདིར་འདུས་རྣལ་འབྱོར་བདག་ཅག་ལ། །མཆོག་དང་ཐུན་མོང་དངོས་གྲུབ་སྩོལ། །རྣམ་དག་བདེ་ཆེན་འགྱུར་མེད་དངོས། །བདེ་གཤེགས་རྒྱ་མཚོའི་དཀྱིལ་འཁོར་དུ། །དུས་ཀྱི་འཁོར་ལོ་རྡོ་རྗེ་སེམས། །མཁའ་ཁྱབ་དང་པོའི་སངས་རྒྱས་ཉིད། །རྣམ་འཕྲུལ་སོགས་རྐང་པ་དྲུག་ཀུན་ལ་འགྲེས། སྤྲོས་བྲལ་དག་པ་ཨེ་ཡིག་དབྱིངས། །རྣམ་ཀུན་མཆོག་ལྡན་མཁའ་སྤྱོད་ནས། །འཁོར་ལོའི་དབང་མོ་སྣ་ཚོགས་ཡུམ། །དབྱིངས་ཕྱུག་ཤེས་རབ་ཕ་རོལ་ཕྱིན། །རྣམ་འཕྲུལ༴ ས་བཅུའི་དབང་ཕྱུག་རྣམ་འཕྲུལ་མཆོག །ཆོས་རྒྱལ་རིགས་ལྡན་འཁོར་བཅས་དང༌། །རྩོད་ལྡན་དུས་འདིར་རྡོ་རྗེ་འཆང༌། །བརྒྱུད་ལྡན་བླ་མའི་ཚོགས་ཀུན་ཀྱང༌། །རྣམ་འཕྲུལ༴ གང་ལ་གང་འདུལ་སྐུར་སྟོན་པ། །སངས་རྒྱས་བྱང་སེམས་ཡི་དམ་ལྷ། །གནས་གསུམ་དཔའ་བོ་རྣལ་འབྱོར་མ། །ཕྱག་བརྙན་ཕོ་ཉ་འབྱུང་པོའི་ཚོགས། །རྣམ་འཕྲུལ༴ བླ་མ་ཡི་དམ་མཁའ་འགྲོའི་ཚོགས། །རིགས་ཀྱི་ཅོད་པན་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །རྒྱན་ཆ་མང་པོ་ཁྲ་ལ་ལ། །རོལ་མོ་མང་པོ་དི་རི་རི། །ཀླུ་ལེན་གར་བྱེད་ཁྱུགས་སེ་ཁྱུག །འཁོར་ཚོགས་འབུམ་སྡེ་ཤ་ར་ར། །སྒྱུ་མའི་རང་སྣང་རྗེན་ནེ་ནེ། །གཏད་མེད་རིག་པ་ས་ལ་ལ། །བརྗོད་མེད་དབྱིངས་སུ་ཐ་ལ་ལ། །བདེ་བ་ཆེན་པོ་ཁྲི་ལི་ལི། །བྱིན་གྱིས་བརླབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དངོས་གྲུབ་སྩོལ། །བགེགས་དང་ལོག་འདྲེན་བར་ཆད་སོལ། །འཁོར་གསུམ་གཉིས་སུ་མེད་པར་རོལ། །དེ་ནས་ཕུད་དང་པོ་བཅད་ལ། གཏོར་མ་ལ་ཡང་ཅུང་ཟད་སྒྲོན། དངོས་སུ་འབྱོར་དང་ཡིད་ཀྱིས་སྤྲུལ་པ་དང༌། །ཕྱོགས་དུས་ ཀུན་གྱི་མཆོད་རྫས་བཟང་རྒུ་རྣམས། །བླ་མ་རྒྱལ་བ་སྲས་དང་བཅས་ལ་འབུལ། །མཁའ་ཁྱབ་འགྲོ་བའི་དོན་ཏུ་བཞེས་སུ་གསོལ། །ཞེས་འབུལ། དེ་ནས་ལས་རྡོར་གྱིས་ལག་གཡོན་པས་ཐོད་པའི་བདུད་རྩི་བཟུང༌། གཡས་རྩེ་གསུམ་གྱིས་ཕྱག་རྒྱས་བཀབ་སྟེ། ཀྱེ། འདིར་ནི་ཆོས་རྣམས་བཟང་པོར་ལྟོས། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་པ་ཉིད་དུ་རོལ། །ཞེས་དྲངས། བདེ་གཤེགས་ཆོས་ལ་རིན་ཐང་མེད། །འདོད་ཆགས་ལ་སོགས་དྲི་མ་བྲལ། །གཟུང་དང་འཛིན་པ་དང་བྲལ་བ། །དེ་བཞིན་ཉིད་ལ་བདག་ཕྱག་འཚལ། །ཞེས་བླངས། སླར་ཡང་ཚོགས་རྫས་གཞན་རྣམས་ལ་བསྲེ། ཡང་ཕུད་གཅིག་བཅད་དེ། ཕྱེད་སྔར་གྱི་ཕུད་དང་བསྲེ། ཕྱེད་ལྷག་གཏོར་ལ་བསྲེ་བའི་ཕྱིར་ལོགས་སུ་བཞག་གོ །ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། །ལེགས་སྦྱར་འདི་ནི་རྒྱལ་བ་སྲས་བཅས་ལ། །དད་པས་ཕུལ་བས་འགྲོ་བ་འདི་རྣམས་ཀྱང༌། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །བླ་མ་ཡི་དམ་མཁའ་འགྲོའི་ཚོགས་བཅས་དང༌། །མཆོད་ཡུལ་རྒྱ་མཚོའི་ཚོགས་ལ་མཆོད་པ་འབུལ། །འགྲོ་ཀུན་ཡེ་ཤེས་བདུད་རྩིའི་རྒྱ་མཚོ་ལ། །མཆོག་ཏུ་རོལ་བས་བདེ་ཆེན་ཐོབ་པར་ཤོག །དམན་པའི་ཡུལ་ལས་རབ་འདས་ཤིང༌༑ ༑རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གི་མཆོད་པར་བགྱི། །སྒྲིབ་པའི་དྲི་མ་ཀུན་སེལ་ཞིང༌། །རྟོག་པ་ཀུན་ལས་ངེས་གྲོལ་བ། །བླ་ན་མེད་པའི་བྱང་ཆུབ་སེམས། ། བདེ་བ་ཆེན་པོས་མཉེས་གྱུར་ཅིག །དེ་ནས་སོ་སོའི་ཕུད་བཅད་ནས། ༀ་ཨཱཿ གུ་རུ་བུདྡྷ་བོ་དྷི་ས་ཏྭ་བྷྱཿ བཛྲ་ནཻ་ཝིདྱ་ཧཱུྃ། ཆང་བུ་གཉིས་པ་བྱས། ༀ་ཧ་རི་ཏྱཻ་པིཎྜ་ཀེ་པྲ་ཏཱིཙྪ་སྭཱ་ཧཱ། ཡང་ཆང་བུ་གསུམ་པ་བྱས་ལ། ༀ་སརྦ་དཱུ་ཏཱི་ཀེ། ཨ་གྲཱ་གྲ་སཾ་པྲ་ཏཱིཙྪ་སྭཱ་ཧཱ། དེ་ནས་ནང་གི་སྦྱིན་སྲེག་གི་དམིགས་པ་གསལ་བཏབ་ལ་སོ་སོར་ལོངས་སྤྱོད། ལྷག་མ་བསྡུས་ལ་བསང་སྦྱང༌། སྟོང་པའི་ངང་ལས་ལྷག་མའི་གཏོར་མ་བཟང་ཞིང་རྒྱ་ཆེ་བ་འདོད་དགུའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ་ཧ་ཧོཿ ཧྲཱིཿ ༀ་ཨ་ཀཱ་རོ་སོགས། ༀ་ཁ་ཁ་ཁཱ་ཧི་ཁཱ་ཧི་ཨུ་ཙྪིཥྚ་བྷཀྵ་བྷཀྵ་སྭཱ་ཧཱ། ལན་གསུམ། རོལ་མོའི་སྒྲ་དང་བཅས་ཏེ་ཕྱིར་བཏང༌། དྲག་སྔགས་ཀྱིས་མཚམས་བཅད། དེ་ནས་རྡོ་རྗེའི་གླུ་བླངས་པ་ནི། དྲིལ་བུའི་སྒྲ་དང་བཅས། ཀོལླ་ཨི་རེཊྛི་ཨ་བོ་ལླ། མུམྨུ་ཎི་རེ་ཀཀྐོ་ལཱ། གྷ་ཎ་ཀྲི་པི་ཊ་ཧོ་བཱཛྫ་ཨ། ཀ་རུ་ཎི་ཀེ་ཨ་ཨི་ཎ་རོ་ལཱ། ཏ་ཧ་བ་ལ་ཁཛྫ་ཨཱི། གཌྷ໊་མ་ཨ་ཎཱ་བིཛྫ་ཨ་ཨི། ཧ་ལེ་ཀཱ་ལིཉྩ་ར་པ་ནི་ཨ་ཨི། དུ་དྷུ་ར་བཛྫི་ཨ་ཨི། ཙ་ཨུ་ས་མ་ཀཙྪུ་རཱི་སིཧླ། ཀཱ་པུ་ར་ལཱ་ཨི་ཨ་ཨི། མཱ་ལ་ཨིནྡྷ་ན་སཱ་ལ་ཛཿ ཏ་ཧ་བྷ་རུ་ཁཱ་ཨི་ཨ་ཨི། ཕྲ໊་ཁ་ཎ་ཁ໊་ཊ་ཀ་རནྟེ། ཤུདྡྷ་ཨ་ཤུདྡྷ་ཎ་མ་ཎི་ཨ་ཨི། ནི་རཱཾ་སུ་ཨཾ་གེ་ཙ་ཌཱ་ཝི། ཏ་ཧ་ཛ་ས་རཱ་ཝ་པ་ཎི་ཨ་ཨི། མཱ་ལ་ཨ་ཛེ་ཀུནྡུ་རུ་བཱ་ཊྚ་ཨི། ཌིཎྜི་མ་ཏ་ཧིནྣ་བཛྫི་ཨ་ཨི། ཞེས་བརྗོད། ལྟེ་བར་གཏུམ་མོ་འབར་བ་ཡིས། ། དེ་བཞིན་གཤེགས་པ་ལྔ་བསྲེགས་ཤིང༌། །སྤྱན་མ་མིག་ལ་སོགས་པ་དག །བསྲེགས་པས་རི་བོང་ཅན་ཧྃ་འཛག །ཅེས་བརྗོད་ཅིང་དོན་བསྒོམ། སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། །གང་གི་ལམ་གྱིས་གྲོལ་འགྱུར་བ། །དེ་ཡིས་སངས་རྒྱས་མྱུར་ཐོབ་ཤོག །མ་བརྒལ་བ་རྣམས་བསྒྲལ་བ་དང༌། །མ་གྲོལ་བ་རྣམས་དགྲོལ་བར་བགྱི། །རྣལ་འབྱོར་གཙུག་ལག་བསྟན་བཅོས་ལ། །ད་ལྟ་ཉིད་དུ་གནས་པར་ཤོག །ཅེས་སྨོན་ལམ་བཏབ། གསུམ་པ་རྗེས་ཀྱི་བྱ་བ་ལ། ཡན་ལག་བདུན་པ་མདོར་བསྡུས་ཏེ་འབུལ་ཞིང་ཕུར་ཚུགས་སུ་གསོལ་བ་འདེབས་པ་དང༌། དབང་བླང་བ་བཅས་ཆོས་རྗེ་ཀུན་མཁྱེན་ཆེན་པོའི་གསུང་ལས་བྱུང་བ་ནི། མི་འགྱུར་ཡིད་འོང་མཚན་དཔེས་ལེགས་སྤྲས༑ ༑འགག་མེད་ཚངས་དབྱངས་ཕྱོགས་བཅུར་སྒྲོགས་མཛད། །འཁྲུལ་མེད་ཕྱག་རྒྱ་ཆེ་ལ་གནས་པའི། །བླ་མའི་སྐུ་གསུང་ཐུགས་ལ་ཕྱག་འཚལ། །སོར་སྡུད་ལ་སོགས་སྦྱོང་བྱེད་དྲུག་གིས། །ཕུང་པོ་ལ་སོགས་སྦྱང་བྱ་དྲུག་དྲུག །ལེགས་པར་སྦྱངས་པའི་བདེ་གཤེགས་སོ་དྲུག །གཅིག་ཏུ་བསྡུས་པའི་སྐུ་ལ་ཕྱག་འཚལ། །ལུས་ངག་ཡིད་གསུམ་དུས་གསུམ་དགེ་ཚོགས། །མཆོད་པའི་སྤྲིན་དཔུང་དཔག་ཏུ་མེད་པ། །ཀུན་ཏུ་བཟང་པོའི་རྣམ་འཕྲུལ་ཅི་བཞིན། །བདག་ཡིད་དང་བས་མཆོད་པར་འབུལ་ལོ། །ལུས་ངག་ཡིད་ཀྱི་སྒོ་ནས་བསགས་པའི། །སྡིག་པའི་ཚོགས་ཀུན་མཐོལ་ལོ་བཤགས་སོ། །དགེ་ལ་ཡི་རང་ཆོས་འཁོར་སྐོར་མཛོད། །རྟག་ཏུ་བཞུགས་པར་གསོལ་བ་འདེབས་སོ། །ཚོགས་གསུམ་མཐར་ཕྱིན་བཅུ་གཉིས་ལམ་བགྲོད། །རྡོ་རྗེ་འཛིན་པ་ཀུན་གྱི་གཙོ་བོ། །སྐུ་བཞིའི་མངའ་བདག་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག ། གཉིས་མེད་ཡེ་ཤེས་རྩེ་གཅིག་བསྒོམས་པས། །གཉིས་སྣང་ཚོགས་བརྒྱད་གནས་གྱུར་ཐོབ་པའི། །ཡེ་ཤེས་ལྔ་ལྡན་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །བསྐྱེད་རྫོགས་མཐར་ཕྱིན་བཅུ་གཉིས་དབང་གིས། །སྐལ་ལྡན་གདུལ་བྱ་སྨིན་གྲོལ་མཛད་པའི། །བླ་མ་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །ཁྱོད་ཕུང་རིགས་དྲུག་སྐྱེ་མཆེད་སྲས་བརྒྱད། །ཕྱག་ཞབས་ལ་སོགས་ཁྲོ་བོའི་ཚོགས་ཀུན། །ཡི་དམ་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །དོན་གཉིས་མཐར་ཕྱིན་ཆོས་སྐུའི་ངོ་བོ། །སྣ་ཚོགས་སྤྲུལ་པས་འགྲོ་བའི་དོན་མཛོད། །སངས་རྒྱས་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །དོན་དམ་བརྗོད་བྲལ་རྣམ་བྱང་བདེན་པས། །གསུང་རབ་གླེགས་བམ་རྣམ་པར་སྟོན་མཛད། །དམ་ཆོས་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །རིགས་གྲོལ་གཉིས་ལྡན་ས་བཅུའི་མངའ་བདག །འགྲོ་བའི་མགོན་སྐྱབས་བཤེས་གཉེན་དམ་པ། །དགེ་འདུན་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་ རློབས་ཤིག །དམིགས་མེད་སྙིང་རྗེ་བདེ་ཆེན་ངོ་བོ། །ཐབས་ཀྱི་སྒོ་ནས་དགྲ་བགེགས་འཇོམས་མཛད། །ཆོས་སྐྱོང་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །ཞི་རྒྱས་དབང་དྲག་ལས་ལ་མངའ་བརྙེས། །མཆོག་དང་ཐུན་མོང་དངོས་གྲུབ་སྟེར་མཛད། །དངོས་གྲུབ་འབྱུང་གནས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །མདོ་རྒྱུད་མན་ངག་བསྟན་བཅོས་ཀུན་ལ༑ ༑འཆད་རྩོད་རྩོམ་གྱིས་ལོག་རྟོག་སེལ་མཛད། །མ་རིག་མུན་སེལ་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །དེང་ནས་བདག་ནི་བླ་མ་ཁྱེད་དང༌། །ལུས་དང་གྲིབ་མ་ལྟ་བུར་འགྲོགས་ཏེ། ། ཟབ་དོན་མན་ངག་བདུད་རྩི་འཐུང་བར། །དཔལ་ལྡན་བླ་མས་བྱིན་གྱིས་རློབས་ཤིག །མ་དག་ལོག་པའི་འཚོ་བ་སྤངས་ནས། །བདུད་རྩི་ལྕེ་སྦྱོར་ཉམས་སུ་བླངས་ཏེ། །ཟས་གོས་སོགས་ལ་ལྟོས་པ་མེད་པར། །དཔལ་ལྡན་བླ་མས་བྱིན་གྱིས་རློབས་ཤིག །དབེན་པའི་གནས་སུ་ཟབ་མོའི་དོན་ལ། །རྩེ་གཅིག་བསམ་གཏན་བསྒྲུབས་པར་བྱས་ནས། །ཚེ་འདི་ཉིད་ལ་ཕྱག་ཆེན་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །བཟོད་གསོལ་ནི། བདག་ནི་མི་ཤེས་བག་མེད་དབང་གྱུར་པས། །མ་རིག་ཉེས་པའི་ཚོགས་རྣམས་གང་བགྱིས་པ། །བརྩེ་ལྡན་ཁྱོད་ཀྱི་སྤྱན་སྔར་བཤགས་པར་བགྱི། །ཐུགས་རྗེའི་རང་བཞིན་ཅན་གྱིས་བཟོད་པར་གསོལ། ། ཅེས་དང་ཡིག་བརྒྱ་བརྗོད། ཐུགས་རྗེ་ཆེ་ལྡན་བླ་མ་དཀོན་མཆོག་རྣམས། །དབང་བཞི་བསྐུར་ལ་བདག་རྒྱུད་བྱིན་གྱིས་རློབས། །དྲི་མ་བཞི་དག་ལམ་བཞི་འབྱོང་བ་དང༌། །སྐུ་བཞིའི་གོ་འཕང་འཐོབ་པར་མཛད་དུ་གསོལ། །ཅེས་གསོལ་བ་བཏབ་པས་འཁོར་རྣམས་འོད་དུ་ཞུ་ནས་གཙོ་བོ་ལ་ཐིམ། གཙོ་བོ་རྩ་བའི་བླ་མ་དཀོན་མཆོག་ཀུན་འདུས་ཀྱི་ངོ་བོར་གྱུར་པའི་གནས་བཞིར་རྡོ་རྗེ་བཞིའི་རང་བཞིན་ༀ་ཨཱཿ ཧཱུྃ་ཧོཿ རྣམས་ཀྱིས་མཚན་པར་གྱུར༑ དཔྲལ་བའི་ༀ་ལས་ༀ་ཡིག་དཀར་པོ། །རང་གི་ལུས་ཀྱི་དཔྲལ་བར་ཞུགས་ཤིང༌། །དེ་ལ་བརྟེན་ནས་བུམ་དབང་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །ལུས་དང་སད་པའི་སྒྲིབ་པ་དག་ནས། ། དགའ་བའི་དགའ་བཞི་ཉམས་སུ་མྱོང་བས། །སྐུ་ཡི་རྡོ་རྗེ་སྤྲུལ་སྐུ་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །མགྲིན་པའི་ཨཱཿ ལས་ཨཱཿ ཡིག་དམར་པོ། །རང་གི་ལུས་ཀྱི་མགྲིན་པར་ཞུགས་ཤིང༌། །དེ་ལ་བརྟེན་ནས་གསང་དབང་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །ངག་དང་རྨི་ལམ་སྒྲིབ་པ་དག་ནས། །མཆོག་གི་དགའ་བཞི་ཉམས་སུ་མྱོང་བས། །གསུང་གི་རྡོ་རྗེ་ལོངས་སྐུ་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །ཐུགས་ཀའི་ཧཱུྃ་ལས་ཧཱུྃ་ཡིག་ནག་པོ། །རང་གི་ལུས་ཀྱི་སྙིང་ཁར་ཞུགས་ཤིང༌། །དེ་ལ་བརྟེན་ནས་ཤེར་དབང་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །ཡིད་དང་གཉིད་འཐུག་ སྒྲིབ་པ་དག་ནས། །ཁྱད་པར་དགའ་བཞི་ཉམས་སུ་མྱོང་བས། །ཐུགས་ཀྱི་རྡོ་རྗེ་ཆོས་སྐུ་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །ལྟེ་བའི་ཧོཿ ལས་ཧོཿ ཡིག་སེར་པོ། །རང་གི་ལུས་ཀྱི་ལྟེ་བར་ཞུགས་ཤིང༌། །དེ་ལ་བརྟེན་ནས་བཞི་དབང་ཐོབ་པར། །དཔལ་ལྡན་བླ་མས་བྱིན་གྱིས་རློབས་ཤིག །ཆགས་པའི་བག་ཆགས་དྲི་མ་དག་ནས། །ལྷན་སྐྱེས་དགའ་བཞི་ཉམས་སུ་མྱོང་བས། །ཡེ་ཤེས་རྡོ་རྗེ་བདེ་སྟོང་ཐོབ་པར༑ ༑དཔལ་ལྡན་བླ་མས་བྱིན་གྱིས་རློབས་ཤིག །སྤྱི་བོའི་བླ་མ་འོད་དུ་ཞུ་ནས། །རང་གི་ལུས་ལ་གཉིས་མེད་ཐིམ་ཞིང༌། །སྙིང་ཁའི་པདྨ་འདབ་བརྒྱད་དབུས་སུ། །བརྟན་པར་བཞུགས་ནས་བྱིན་གྱིས་རློབས་ཤིག །ཅེས་བླ་མའི་གསང་བ་གསུམ་དང་རང་གི་སྒོ་གསུམ་དབྱེར་མི་ཕྱེད་པའི་ངང་དུ་མཉམ་པར་འཇོག །སྨོན་ལམ་གདབ་པ་ནི། བསོད་ནམས་འདི་ཡིས་འགྲོ་རྣམས་དུ་བ་ལ་སོགས་ལམ་གྱི་ལྷན་སྐྱེས་བདེ་བ་མཆོག་བསྒོམ་སྟེ། །འགྲོ་བའི་བླ་མ་སུམ་ཅུ་རྩ་གཉིས་མཚན་ལྡན་སྐུ་ནི་ཆོས་ཀྱི་འཁོར་ལོར་ཡང་དག་གནས། །ལྷ་རྣམས་མགོ་ཡི་གཙུག་གི་ནོར་བུའི་འོད་ཟེར་ཚོགས་ཀྱིས་ཞབས་ཀྱི་པདྨ་ལ་གཏུགས་ཤིང༌། །དམ་པའི་ལམ་སྟོན་ཉིན་བྱེད་བཞིན་དུ་མུན་པ་ཀུན་འཇོམས་དུས་ཀྱི་འཁོར་ལོ་ཉིད་གྱུར་ཅིག །ཇི་ལྟར་སངས་རྒྱས་མཐུ་ཡིས་བདག་གིས་ལྟ་བ་ནི། །ཞི་གྱུར་དེ་བཞིན་མི་རྣམས་ལ་ནི་འགྱུར་བར་ཤོག །ཐམས་ཅད་དུ་ནི་དུ་བའི་ལམ་ལ་བརྟེན་པ་ཡི། །སེམས་ནི་རྒྱལ་བའི་ཐུགས་རྗེ་ ཆེན་པོར་འགྱུར་བར་ཤོག །དུས་འཁོར་གསང་བ་ལེགས་རྟོགས་དམ་ཚིག་ཡོངས་ལྡན་ཞིང༌། །འདི་སྟོན་བླ་མའི་རྗེས་འབྲང་རྡོ་རྗེ་སྤུན་ལ་སོགས། །ཕན་ཚུན་ལེགས་པར་སྨྲ་ཞིང་འཁོན་དུ་མི་འཛིན་དང༌། །དམ་ཚིག་རྡོ་རྗེ་གླེང་སློང་དལ་གྱིས་གནས་པར་ཤོག །མ་རུང་དམ་བྲལ་ངན་པའི་ལམ་བྱེད་ཅིང༌། །རྣལ་འབྱོར་ཆེད་དུ་མི་གཉེར་སྐྱེ་བོ་གང༌། །དེ་དང་མི་འགྲོགས་དེ་ཡིས་མི་མཐོང་དང༌། །རང་སྡུག་བླ་མ་རྡོ་རྗེ་མཆོད་པར་ཤོག །རྩོད་ལྡན་དུས་སུ་གསང་ཆེན་སྟོན་བྱེད་དང༌། །མུ་སྟེགས་སྐྱེ་བོ་ངན་པའི་ལྟ་འཇོམས་ཤིང༌། །གང་དེའི་ལྟ་བ་དབྱིངས་ནས་འདོན་བྱེད་པའི། །དེ་དག་འདུལ་བའི་དེད་དཔོན་དེ་བྱེད་ཤོག །མགོ་བོར་བླ་མའི་ཅོད་པན་འཆང༌། །ལག་ཏུ་རྡོ་རྗེ་དྲིལ་བུ་འཛིན། །ངག་ཏུ་གསང་སྔགས་རྒྱལ་པོ་བཟླ། །ཡིད་ཀྱིས་ཟུང་འཇུག་བསྒོམ་པར་ཤོག །རྡོ་རྗེ་དྲིལ་བུ་ལ་སོགས་རྟག་ཏུ་འཆང༌། །ཟབ་ཅིང་རྒྱ་ཆེའི་ཆོས་དོན་རྟོགས་པ་དང༌། །གོ་ཀུ་ཤུ་ཀྲ་ལ་སོགས་རྟག་བཟའ་ཞིང༌། །མཐར་ཐུག་བདེ་ཆེན་སྒྲུབ་པའི་སྐལ་ལྡན་ཤོག །བདག་གིས་དུས་གསུམ་དགེ་བ་ཅི་སྤྱད་པས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །བླ་མེད་རྡོ་རྗེ་ཐེག་པའི་སྣོད་གྱུར་ཏེ། །ཀུན་ཀྱང་རྡོ་རྗེ་འཛིན་པའི་ས་ཐོབ་ཤོག །སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང༌། །སྙིང་རྗེ་ཆེ་ཞིང་བླ་མ་ལ་གུས་ལྡན། །དཔལ་ལྡན་བླ་མའི་དམ་ཚིག་ལ་གནས་ཤོག །ཤིས་བརྗོད་ནི། ཞལ་ནས་ གསུངས་པའི་དཀོན་མཆོག་གསུམ་གྱི་ཤིས་ཚིག་གིས་ཐོག་དྲངས་ཏེ་ཇི་ལྟར་འོས་པའི་ཚིག་ཕྲེང་རྒྱས་པར་སྤེལ་ལ་མེ་ཏོག་གི་ཆར་བསྙིལ་བ་སོགས་བྱའོ། །འདི་ལྟར་མཆོད་པའི་བྱིན་རླབས་ཤུགས་ཆེན་པོས། །ཉི་ཁྲི་ཆིག་སྟོང་འཕོ་བའི་དབུགས་བཀག་སྟེ། །དེ་སྙེད་མི་འགྱུར་བདེ་བའི་གནས་པ་ཐོབ། །ཨེ་ཝཾ་ཟུང་འཇུག་མཆོག་དངོས་མྱུར་འགྲུབ་ཤོག །ཅེས་པའང་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་རིང་ལུགས་གཅེས་པ་བསྡུས་པ་གདམས་ངག་རིན་པོ་ཆེའི་མཛོད་ལས་སྦྱོར་བ་ཡན་ལག་དྲུག་པའི་རྣལ་འབྱོར་ལ་ཉེ་བར་མཁོ་བའི་ཟུར་འདེབས་ཀྱི་ཚུལ་དུ་འདུ་གསུམ་གྱི་རྣལ་ འབྱོར་སྤྱོད་པ་ཀརྨ་ངག་དབང་ཡོན་ཏན་རྒྱ་མཚོའམ་བློ་གྲོས་མཐའ་ཡས་སུ་འབོད་པས་ཀུན་མཁྱེན་དོལ་པོ་སངས་རྒྱས་སོགས་བྱིན་རླབས་ཅན་གྱི་ཚིག་ཚོགས་རྣམས་ལས་གཞིར་བླངས་ཏེ་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་བགྱིས་པ་དགེ་ལེགས་འཕེལ། །མངྒ་ལཾ།། །།