གཞི་ལམ་འབྲས་བུའི་རྣམ་གཞག།

Previous TextNext Text

Wylie title	gzhi lam 'bras bu'i rnam bzhag	Rigpe Dorje Publications, 2024
Location	gdams ngag rin po che'i mdzod Volume 11, Text 1, Subtext 4, Pages 12-13 (Folios 6b4 to 7a5)
Author	ནི་གུ་མ་
Citation	Niguma. Gzhi lam 'bras bu'i rnam bzhag. In Gdams ngag rin po che'i mdzod, Vol. 11: 12-13. Kalimpong: Rigpe Dorje Publications, 2024.
Side notes	Recto: rdo rje'i tshig rkang   Verso: shangs chos skor
More details More details
Genre	Root Verses - rtsa tshig - tshig rkang
Colophon	།ཌཱ་ཀི་མས་སེང་ལྡེང་ནགས་ཀྱི་ནམ་མཁའ་ནས་གསུངས་པ་རྫོགས་སོ།
	DA ki mas seng ldeng nags kyi nam mkha' nas gsungs pa rdzogs so/

Tibetan Text

[edit]

༈ །གཞི་ལམ་འབྲས་བུའི་རྣམ་གཞག་བཞུགས་སོ། །གཞི་ལམ་འབྲས་བུ་གསུམ་ནི། གཞི་དབང་བཞི་རྫོགས་པ། ལམ་བསྐྱེད་རྫོགས་ཟུང་འཇུག །འབྲས་བུ་སྐུ་གསུམ་བདེ་ཆེན། ཕྲིན་ལས་ལྷུན་གྲུབ་ཕྱོགས་མེད་རང་ཤར་རོ། །གནད་དྲུག་ནི། ཐབས་ལམ་རྩོལ་བའི་གནད། སྒྱུ་ལུས་བདེ་ཆེན་གྱི་གནད། རྨི་ལམ་འདུན་པའི་གནད། འོད་གསལ་མོས་གུས་ཀྱི་གནད། འཕོ་བ་དམིགས་པ་རྩེ་གཅིག་གི་གནད། བར་དོ་སྐྱོ་ཤས་ཀྱི་གནད་དོ། །ཆོས་དྲུག་གི་གེགས་དྲུག་ནི། ཐབས་ལམ་ལ་རྩོལ་བ་དྲེད། སྒྱུ་ལུས་ལ་བདེན་ཞེན་དུ་འཐས། རྨི་ལམ་ལ་གཉིས་སུ་གོལ་འབྱམས། འོད་གསལ་ལ་མོས་གུས་བརྡུག །འཕོ་བ་ལ་རྟོག་པ་སྣ་ཚོགས་འཕྲོས། བར་དོ་ལ་ཐ་མལ་དུ་འཁྲུལ་པའོ། །ལྟ་སྒོམ་སྤྱོད་འབྲས་ནི༑ ལྟ་བ་ཕྱོགས་མེད་མཐའ་བྲལ། སྒོམ་པ་གསལ་སྟོང་འཛིན་མེད། དམ་ཚིག་རང་སེམས་རྣམ་དག །སྤྱོད་པ་བླང་དོར་རང་གྲོལ། འབྲས་བུ་སྐུ་གསུམ་རང་ཤར། ཕྲིན་ལས་ཕྱོགས་མེད་ལྷུན་གྲུབ་བོ། །ཡང་གཞི་ལམ་འབྲས་གསུམ་ནི། བྱིན་རླབས་དབང་གི་གཞི། གཏུམ་མོ་ལམ་གྱི་བོགས་འདོན། རྨི་ལམ་ལམ་གྱི་ཚོད་འཛིན། འོད་གསལ་འབྲས་བུ་འཆར་བའོ། །གཞི་ལམ་འབྲས་བུའི་སྐུ་གསུམ་ནི། གཞི་སྐུ་གསུམ་རང་གནས། ལམ་སྐུ་གསུམ་ལམ་ཁྱེར། འབྲས་བུ་སྐུ་གསུམ་མངོན་གྱུར། ཕྲིན་ལས་ལྷུན་གྲུབ་ཕྱོགས་མེད་དོ། །ཌཱ་ཀི་མས་སེང་ལྡེང་ནགས་ཀྱི་ནམ་མཁའ་ནས་གསུངས་པ་རྫོགས་སོ། །རྡོ་རྗེ་འཆང་གིས་ནི་གུ་མ་ལ་གསུངས། དེས་ཁྱུང་པོ་རྣལ་འབྱོར་ལ། དེས་རྨོག་ལྕོག་པ། དེས་སྐྱེར་སྒང་པ་ལ། དེས་སངས་རྒྱས་སྟོན་པ་ལ། དེས་ཤངས་སྟོན་ལ། དེས་ཡོན་ཏན་རྒྱ་མཚོ་ལ། དེས་བྱམས་པ་དཔལ་བ། དེས་བློ་གྲོས་གསལ་བ་ལ། དེས་ཀུན་དགའ་དཔལ་བཟང་ལ། དེས་རྩ་བའི་བླ་མ་མཁས་གྲུབ་དཀོན་མཆོག་ལེགས་པ་ལ། དེས་བདག་ལའོ།