རྗེ་བཙུན་ཆེན་པོ་མི་ལ་རས་པས་མཛད་པའི་སྙན་བརྒྱུད་གསལ་བ་སྐོར་གསུམ་སོགས་།

Previous TextLast text in section.

Wylie title	rje btsun chen po mi la ras pas mdzad pa'i snyan brgyud gsal bskor gsum sogs	Rigpe Dorje Publications, 2024
Location	gdams ngag rin po che'i mdzod Volume 7, Text 1, Subtext 19, Pages 142-157 (Folios 71b3 to 79a1)
Author	མི་ལ་རས་པ་
Citation	Mi la ras pa. Rje btsun chen po mi la ras pas mdzad pa'i snyan brgyud gsal bskor gsum sogs. In Gdams ngag rin po che'i mdzod, Vol. 7: 142-157. Kalimpong: Rigpe Dorje Publications, 2024.
Side notes	Recto: phyag chos gces btus Verso: bka' brgyud skor
More details More details
Genre	Completion Stage - rdzogs rim
Notes	There are four texts included in this entry: rje btsun mi las mdzad pa'i dngos po gsal bar byed pa (pp. 142-147) rje btsun mi la'i ma rig gsal byed (pp. 147-153) rje btsun mi la'i rnam rtog dri ma dag byed (pp. 153-156) phyag rgya chen po ye shes gsal byed kyi ngo sprod (pp. 156-157)

[edit]

༈ །།རྗེ་བཙུན་ཆེན་པོ་མི་ལ་རས་པས་མཛད་པའི་སྙན་བརྒྱུད་ ཟུར་མང་སྙན་བརྒྱུད་ གསལ་བ་སྐོར་གསུམ་སོགས་བཞུགས་སོ། །རྗེ་བཙུན་མི་ལས་མཛད་པའི་དངོས་པོ་གསལ་བར་བྱེད་པ་ཞེས་བྱ་བ། བླ་མ་དམ་པ་རྣམས་ལ་ཕྱག་འཚལ་ལོ། །བླ་མ་རིན་ཆེན་ལྟ་བུ་ཡི། །ཞབས་ཀྱི་པདྨ་ལ་བཏུད་དེ། །ལུས་ངག་ཡིད་གསུམ་སྤྲིན་ཚོགས་ཀྱིས། །དུས་གསུམ་དུ་ནི་མངོན་ཕྱག་འཚལ། །བླ་མ་དམ་པའི་དྲིན་ཐོབ་ནས། །གཉིས་མེད་གསལ་བ་ཆོས་ཀྱི་དབྱིངས། །ལམ་མཆོག་དེ་ལའང་ཕྱག་འཚལ་ལོ། །མ་རིག་མུན་པ་སེལ་མཛད་པའི། །ཡེ་ཤེས་སྒྲོན་མེ་ལ་ཕྱག་འཚལ། །འཁོར་བ་རྒྱུན་གཅོད་རབ་བསལ་བ། །རབ་སྣང་དེ་ལའང་ཕྱག་འཚལ་ལོ། །བླ་མ་ཏེ་ལོ་པས་ནཱ་རོ་ལ་གནང༌། དེས་མར་པ་ལ་གནང༌། དེ་ཉིད་ཀྱིས་མི་ལ་ ཐོས་པ་དགའ་ ལ་གནང༌། ཞབས་དྲུང་དུ་འཁོར་བ་ཡུན་རིང༌། །དོད་ཅིང་ནི་ཐོས་གྱུར་ན། །ཐུགས་རྗེས་ནི་དགོངས་ནས་གནང༌། །གདམས་ངག་ནི་དང་དུ་བླངས། །རྩོལ་སྒྲུབ་ནི་དྲག་ཏུ་བྱས། །བསྒོམས་པས་ནི་ཡོན་ཏན་བྱུང༌། །ལུས་ལ་ནི་གཏུམ་མོ་འབར། །རས་གོས་ནི་རྐྱང་རེས་དྲོས། །སེམས་ལ་ནི་འོད་གསལ་ཤར། །བརྒྱུད་ལུགས་ནི་མང་གིས་ཀྱང༌། །བོད་ཡུལ་དུ་བརྒྱུད་པ་ལ། །འདི་དང་ནི་གཞན་མི་མཉམ། །ཁྱད་པར་ནི་བྱེ་བྲག་ལྟོས། །ཉམས་སུ་ལེན་པའི་དུས་ཙམ་ན། །ཤིན་ཏུ་དབེན་པའི་གནས་ཉིད་དུ། །དངོས་པོའི་གནས་ལུགས་ལམ་ གྱི་རིམ་པ་ དང་ནི། །འབྲས་བུ་སྐྱེ་བའི་རིམ་པའོ། །ལུས་ནི་བྱང་ཆུབ་རྣམ་ལྔ་དང༌། །རྩ་དང་བྱང་ཆུབ་སེམས་དང་ནི། །མི་གཙང་རྫས་དང་རྣམ་རྟོག་གིས། །ལུས་ནི་ཆོས་ཀྱི་གནས་པ་ཡིན། །དེ་ལ་གནད་ནི་རྣམ་གསུམ་སྟེ། །ལུས་དང་ཡུལ་དང་དུས་ཀྱང་ངོ༌། །དབུགས་ལ་བཞིར་ལྡན་ དབུགས་གནད་རྔུབ་པ་དགང་བ་གཞི་ཡབ་མདའ་ལྟར་འཕེན་པའོ། །མ་ཤེས་ན། །གང་གི་ཡོན་ཏན་འབྱུང་བར་དཀའ། །ལྀ་རྀ་བཞིན་དུ་ཁོང་སྒྲིམ་བྱ། །རྒྱ་མདུད་བཞིན་དུ་བསྒོམ་པར་བྱ། །ལྕགས་ཀྱུ་བཞིན་དུ་དགུག་པར་བྱ། །རེའུ་མིག་བཞིན་དུ་བསྣོལ་བར་བྱ། །མདའ་ལྟར་གྱེན་དུ་འཕང་བར་བྱ། །ནམ་མཁའི་བ་ནི་རིམ་གྱིས་ ཡུལ་གྱི་གནད། བཞོ། །འཁོར་ལོ་བཞི་ཡི་བསམ་གཏན་བྱ། །ཨ་ཝ་དྷཱུ་ཏིའི་སྟོང་ར་འདི། །སྟོང་པའི་ནང་ནས་སྟོང་པ་མཆོག །གདམས་ངག་ཁྱད་པར་མང་གི་ཀྱང༌། །རྩ་རླུང་གདམས་པ་ཁྱད་པར་འཕགས། །ཉམས་སུ་བླངས་ན་ཡོན་ཏན་འབྱུང༌། །དེས་ན་བླ་མ་དམ་པ་སྤྱི་བོར་བཀུར། །མིག་གི་འབྲས་བུ་བཞིན་དུ་བཙའ་བར་བྱ། །ཕོ་ཉའི་ལམ་ལ་དགའ་བ་ལ། །རིག་མ་བསྟེན་པའི་དུས་ཙམ་ན། །རང་གིས་དབང་བསྐུར་དད་པ་ཅན། །ཁྲོ་སེམས་མེད་ཅིང་སྙིང་རྗེ་ཆེ། །ཤིན་ཏུ་བཞིན་བཟང་མིག་ཡངས་མ། །གཟུགས་མཛེས་ལང་ཚོས་རྣམ་པར་བརྒྱན། །བུ་སྲིང་ཚུལ་ལམ་བྲན་མོའི་ཚུལ། །ཤིན་ཏུ་ངོ་ཚ་བསྡམ་པར་བྱ། །རིག་མ་བསྟེན་པའི་དུས་དག་ཏུ། །ཤིན་ཏུ་དབེན་པའི་ བླ་མ་དང་དཀོན་མཆོག་ལ་གསོལ་བ་བཏབ་ནས་ཕྱག་འཚལ་ནས་ཤེས་པ་སྦྱོང་བ་ལ་སོགས་ཚོགས་ལམ། སྙོམས་འཇུག་སྦྱོར་ལམ། སྐད་ཅིག་ལ་ཤེས་པ་མཐོང་ལམ། གནས་ཉིད་དུ། །ལམ་གསུམ་མན་ངག་ཤེས་བྱས་ཏེ། །སྒོ་གཉིས་ཁེགས་པའི་རྣལ་འབྱོར་པས༑ ༑རིག་མ་བསྟེན་ཀྱང་འགལ་བ་མེད། །ཁྱད་པར་རྒྱུད་ནས་སྤངས་པ་དང༌། །ཡོན་ཏན་མེད་པ་སྤང་བའོ། །དེ་ལ་ལོག་རྟོག་བློ་མ་སྐྱེ། །རྡོ་རྗེ་འཆང་གིས་སྤྲུལ་པ་ལ། །རྡོ་རྗེ་འཆང་གིས་གསུངས་པ་ཡིན། །སྲོག་དང་རྩོལ་བ་འཛིན་ དམིགས་པ་ཡུལ་གྱི་གནད། དུས་སུ། །མི་རྟོག་དོན་ལ་དམིགས་ཀྱང་རུང༌། །ཐིག་ལེ་ཉ་གང་གཅིག་ལ་དམིགས་ཀྱང་རུང༌། །ཕྱག་རྒྱ་མཚན་ལྡན་ཞིག་ལ་དམིགས་ཀྱང་རུང༌། །གཏུམ་མོ་མེ་ཁབ་ཙམ་ལ་དམིགས་ཀྱང་རུང༌༑ ༑ཡར་འདྲེན་མར་འདྲེན་བཞུ་བཏུལ་བྱེད་ཀྱང་རུང༌། །ཤེས་པ་རྣམ་རྟོག་ཡུལ་ལ་མ་འཕྲོས་ན། །དེ་རྣམས་གསལ་བ་མེད་ཀྱང་ནི། །རྣམ་པར་རྟོག་པ་ངང་གིས་འགག །ཡོན་ཏན་རྣམས་ནི་རིམ་གྱིས་འབྱུང༌། །ཐབས་ལམ་ཁྱད་དུ་འཕགས་པའི་མན་ངག་འདི། །སློབ་མ་སྙིང་དང་འདྲ་བ་མ་གཏོགས་པ། །སྣོད་ངན་གཞན་ལ་སྦྱིན་པའི་ཆོས་མ་ཡིན། །དེས་ན་གདམས་ངག་སྙིང་གི་དཀྱིལ་དུ་སྦོས། །ལས་ལ་བརྟེན་ནས་ཡུལ་དེ་མཐོང་བར་ངེས། །ཐབས་ལ་བརྟེན་ནས་ཡོན་ཏན་འབྱུང་བར་ངེས། །རྒྱུ་ལ་བརྟེན་ནས་འབྲས་བུ་འབྱུང་བར་ངེས། །ཁ་གསག་གཡོ་སྒྱུ་ཅན་ལ་སྦྱིན་མི་བྱ། །རྒྱུ་དང་འབྲས་བུ་གདོད་ནས་གཉིས་མེད་ཀྱང༌། །རྣམ་རྟོག་དབང་གིས་རྒྱུ་དང་འབྲས་བུར་སྣང༌། །དེ་ལྟར་ ཕྱི་རབས་ཀྱི་ རྟོགས་པ་མེད་པའི་གང་ཟག་རྣམས། །ཚིག་ཙམ་དོན་དུ་ཁྱེར་ན་རང་གཞན་བསླུ། །དེ་དེ་ཡིན་ཏེ་དེ་ཉིད་མིན། །དེ་དེ་མཐོང་ཡང་དེ་མ་མཐོང༌། །དེས་ན་གདོད་ནས་སངས་རྒྱས་ཁས་ལེན་པ། །སེང་གེ་གཡང་སར་མཆོང་བའི་རྗེས་བཞིན་དུ། །བོང་བུ་མཆོང་ན་སྲོག་དང་འབྲལ་བར་འགྱུར། །སྐལ་ལྡན་ལས་ཅན་རྣམས་ཀྱི་བདུད་རྩི་འདི། །སྐལ་མེད་འབྱུང་པོ་རྣམས་ཀྱི་དུག་ཏུ་འགྱུར། །མཐུ་རྩལ་ལྡན་པ་སྟག་གི་ལད་མོ་འདི། །དུར་ཁྲོད་ཝ་སྤྱང་རྣམས་ཀྱིས་སྤྱད་པར་དཀའ། །བསྐོས་པར་གྱུར་ན་ས་ལ་ཆུ་ཡང་འབྱུང༌། །བཙུབས་པར་གྱུར་ན་ཤིང་ལ་མེ་ཡང་འབྱུང༌། །མིས་ནི་རྩོལ་སྒྲུབ་དག་ནི་བྱས་གྱུར་ན། །མི་འགྲུབ་པ་ཡི་ཆོས་ནི་གང་ཡང་མེད། །དེས་ན་ཉམས་སུ་བླངས་པ་རབ་ཏུ་གཅེས། །ཉོན་མོངས་རྣམ་རྟོག་རིམ་གྱིས་འགགས་གྱུར་ན། །རང་རིག་ཡེ་ཤེས་གསལ་བའི་ངོ་བོ་གསལ། །དགེ་བཅུ་སྤྱད་པས་ཐར་པ་ཐོབ་པ་དཀའ། །སྡིག་བཅུ་སྤངས་པས་མྱ་ངན་འདའ་བར་དཀའ། །སྤང་ལེན་གཉིས་ཀྱིས་མི་རྟོག་འཆར་བ་དཀའ། །ལུས་ཅན་དག་ནི་ཀུན་ལ་ཡང༌། །སྙིང་པོ་དོན་འདི་གདོད་ནས་གནས། །དེས་ན་སེམས་ཅན་སངས་རྒྱས་རྒྱུ། །རྒྱུ་ལས་འབྲས་བུ་བཏབ་པ་ལ། །གདོད་ནས་ཐེབས་ཀྱིས་ད་ལྟར་མིན། །ད་ལྟར་འདེབས་བྱེད་རྣམ་རྟོག་ཡིན། །རྣམ་རྟོག་དོན་དུ་འདེབས་བྱེད་པ། །མེ་ཡིས་མ་བསད་ཇི་བཞིན་དུ། །སྨིག་རྒྱུ་དག་ལ་ཆུར་འཁྲུལ་བཞིན། །ལྟ་བ་ཉམས་སུ་མི་ལེན་པར། །ཐབས་ཀྱི་ཁྱད་པར་ཉམས་སུ་ལོངས། །མ་མཐོང་ཡུལ་དེ་བལྟ་འདོད་ན། །ཡུལ་དེ་ཡིད་ལ་མ་བྱེད་པར། །ལམ་གྱི་ཁྱད་པར་ཉམས་སུ་ལོངས། །ཐབས་ལ་བསྟེན་པའི་དུས་ཙམ་ན། །རྒྱུ་ཡི་དུས་ན་འབྲས་བུ་དངོས། །ལས་ཅན་རྣམས་ཀྱིས་རྟོགས་པར་རིགས། །སྟོང་པ་མ་ཡིན་ སྟོང་པ་གང་ཞེ་ན་ མི་སྟོང་མིན། །དེ་ཉིད་སུ་ལ་ཡོད་ཅེ་ན། །རྫོགས་པའི་སངས་རྒྱས་ཉིད་ལ་མངའ། །རྣལ་འབྱོར་རིག་པའི་བློ་ལ་འཆར། །ཐུན་མོང་ སེམས་ཅན་ཐམས་ཅད་ ཡོད་ཀྱང་རྟོགས་ལྡན་ལ་ ཁྱད་པར་འཕགས། །དེ་ཡང་ཐབས་ལ་བསྟེན་པས་འབྱུང༌། །རབ་ཀྱིས་ཡོན་ཏན་བདེ་སྟོང་རྒྱུན་པར་གནས། །མཉམ་བཞག་རྗེས་ཐོབ་མེད་པའོ། །འབྲིང་གིས་རྗེས་ཐོབ་སྟོང་པར་རྟོགས། །ཐ་མས་རྗེས་ཐོབ་སྒྱུ་མར་མཐོང༌། །ཡང་དག་དོན་ལ་ཁྱད་མེད་ཀྱང༌། །རྣམ་རྟོག་ལ་ནི་ཁྱད་དུ་སྣང༌། །ཆུ་བོ་ཡི་རྒྱུན་བཞིན་དུ། །ཡུན་ནི་བསྲིང་བར་གསུངས། །ནམ་མཁའི་སྤྲིན་བཞིན་དུ། །ན་བུན་ནི་གློ་བུར་བ། །བཙན་ཐབས་ཀྱིས་མི་དགག་པར། །ཤུགས་འབྱུང་གི་སྟོབས་ཀྱིས་དགག །དངོས་པོ་གསལ་བར་བྱེད་པ་ཞེས་བྱ་བ་རྗེ་བཙུན་མི་ལ་ཉིད་ཀྱིས་མཛད་པ་རྫོགས་སོ།། །།སྙི་བ་རིན་པོ་ཆེ་ལས་བརྒྱུད་དེ་འོངས་པ། ལྷོ་བ་རིན་པོ་ཆེ་ ལ་ཡག་པ་བྱང་ཆུབ་དངོས་གྲུབ༑ ལ་གནང་བའོ། །དེས་བདག་ དུས་གསུམ་མཁྱེན་པ། ལ་གནང་བའོ། ༈ །རྗེ་བཙུན་མི་ལའི་མ་རིག་གསལ་བྱེད་ཅེས་བྱ་བ། བླ་མ་གྲུབ་ཐོབ་རྣམས་ལ་ཕྱག་འཚལ་ལོ། །བླ་མ་དམ་པའི་དྲིན་ཐོབ་ནས། །མཐུན་པའི་གནས་དང་གྲུབ་པའི་རྫས། །འཚོ་བའི་ཡོ་བྱེད་བསགས་བྱས་ལ། །རྐྱེན་བཞི་ལྡན་པ་ཤིན་ཏུ་གཅེས། །བྱ་བ་བཏང་བའི་སྐྱེས་བུ་ཡིས། །ཇི་ལྟར་ཆུ་དག་དྭངས་པ་ལས། །ཉ་དག་མྱུར་དུ་འཕར་བ་ལྟར། །སྐད་ཅིག་ཙམ་གྱིས་ལྷ་རུ་བསྐྱེད། །ལམ་ནི་རྣམ་པ་གཉིས་གསུངས་ཏེ། །སྨིན་པར་བྱེད་པ་ཉིད་དང་ནི། །གྲོལ་བར་བྱེད་པ་ཉིད་ཡིན་ནོ། །སྨིན་པར་བྱེད་ལ་ལམ་དང་ནི། །དབང་ནི་རྣམ་པ་གསུམ་དུ་གསུངས། །སྨིན་ཏེ་གྲོལ་བར་བྱེད་པ་ནི། །བསྐྱེད་པ་དང་ནི་རྫོགས་པའོ། །བསྐྱེད་པ་དེ་ཡང་གཉིས་ཡིན་ཏེ། །བསྐྱེད་པ་དང་ནི་སྐྱེས་པའོ། །རྫོགས་པ་ལ་ཡང་གཉིས་ཡིན་ཏེ། །སྤྲོས་དང་ལྷན་ཅིག་སྐྱེས་པའོ། །སྤྲོས་བཅས་ལུས་ལ་རྩ་དང་རླུང༌། །རླུང་ལ་ཤེས་པ་ཐིག་ལེས་བརྟན། །དེ་ལ་མི་རྟོག་སྐྱེ་བར་རིགས། །ལུས་གནས་ལུས་ལ་སྐྱེས་པའོ། །ལུས་ལ་གནས་ཀྱང་ལུས་སྐྱེས་མིན། །དཔེར་ན་གྲུ་དང་ཁང་པ་བཞིན། །ངེས་ལམ་འབྲས་བུར་བཅས་པ་ནི། །བླ་མ་དམ་པའི་དྲིན་ཐོབ་ནས། །ཐབས་ལམ་ལས་ནི་མ་གཏོགས་པ། །ཡང་དག་ཡིན་ནོ་ང་མི་ཟེར། །རྟོགས་པའི་ཁྱད་པར་ཅི་བྱུང་ཡང༌། །ངག་གི་ལམ་གྱི་ཡུལ་ལས་འདས། །ཆགས་ལམ་པ་ཡི་གྲོལ་ལམ་པ། །ཙུམྤ་ཀ་ཡི་སྦྱོར་བ་ཡིས། །རྩོལ་བ་དྲག་ཏུ་བསྒྲུབ་པར་བྱ། །སྲོག་རྩོལ་གནས་སུ་འཇུག་པར་ངེས། །འབྱུང་བ་གཅིག་ལ་གཅིག་ཐིམ་འགྱུར། །ཙཎྜ་ལཱི་ནི་ཤུགས་ལ་འབར། །བྱང་ཆུབ་སེམས་ནི་འབར་བར་ངེས། །ནང་གི་ཚ་གྲང་འདྲེས་པའི་རྟགས། །དང་པོ་དྲོ་བ་ལྟ་བུ་འབྱུང༌། །གཉིས་པ་དུ་བ་ལྟ་བུ་འབྱུང༌། །འདུ་བ་རྣམ་བཞིས་གནོད་མི་ནུས། །དེ་ལ་ལུས་ནི་བསྒྲུབ་པ་གཅེས། །ལུས་ནི་བརྟན་པར་གྱུར་པ་ལ། །རྟགས་ནི་རྣམ་པ་སྣ་ཚོགས་འབྱུང༌། །དགའ་བ་རྣམ་བཞི་རིམ་གྱིས་འབྱུང༌། །ཕྱི་ཡི་ཚ་གྲང་བཟོད་པ་དང༌། །ལུས་ལ་སྲོག་ཆགས་ཉུང་བ་དང༌། །ཤ་བཀྲག་གཏིང་ནས་འབར་བ་དང༌། །ལུས་ལ་དྲི་མ་མི་ཆགས་དང༌། །ཤིང་བལ་ལྟར་ནི་ཡང་བ་དང༌། །བརྐྱང་བསྐུམ་གང་ཡང་བདེ་བ་དང༌། །ཁ་སྣའི་སྣབས་ལུད་ཉུང་བ་དང༌། །ལུས་ལ་དྲི་ཞིམ་འབྱུང་བ་དང༌། །ཟས་སྐོམ་འདུ་ཤེས་ཆུང་བ་དང༌། །རྣ་བས་སྒྲ་སྙན་ཐོས་པ་དང༌། །གཉིད་ཀྱི་རྟོག་པ་ཆུང་བ་དང༌། །དྲི་བའི་ལན་ལ་མཁས་པ་དང༌། །སྨྲ་རྒུ་སྙན་པར་སྨྲ་བ་དང༌། །ཚིག་གི་སྡེབ་སྦྱོར་མཁས་པ་དང༌༑ ༑རང་གི་སྐྱོན་རྣམས་འཆོས་པ་དང༌། །སྨྲ་བ་དོན་དང་མཐུན་པ་དང༌། །ཕ་རོལ་སྐྱོན་རྣམས་འཆོས་པ་དང༌། །རྫས་ལ་ཆོག་ཤེས་ཡོད་པ་དང༌། །འཁོར་བར་སྐྱོ་བ་སྐྱེས་པ་དང༌། །དབེན་པའི་གནས་ལ་དགའ་བ་དང༌། །གཅིག་པུར་སྡོད་སྙིང་འདོད་པ་དང༌། །ཡང་ཡང་བསྒོམ་སྙིང་འདོད་པ་དང༌། །ལུས་ཉིད་ཡོད་དུ་མི་ཚོར་དང༌། །ཡུལ་ལ་ངེས་པ་མེད་པ་དང༌། །གནས་གཅིག་ཐེར་ཟུག་མི་གནས་དང༌། །ཌཱ་ཀིའི་ཚོགས་རྣམས་འདུ་བ་དང༌། །རྨི་ལམ་ལུང་བསྟན་ཐོབ་པ་དང༌། །ཆོས་ལ་བྱན་པོ་ཐོབ་པ་དང༌། །མངོན་ཤེས་རིམ་གྱིས་འབྱུང་བ་དང༌། །དྲི་ལུགས་ལ་སོགས་འབྱུང་བ་དང༌། །ཕྱི་ནང་བསྲེ་བར་ནུས་པ་དང༌། །བསྡམ་བྱ་གནོད་པ་མེད་པ་དང༌༑ ༑དུས་ལ་བབ་ན་གཏོང་བ་དང༌། །དུས་མིན་ལྷ་ནི་གསོད་པར་བྱེད། །དེ་ལ་ཡིད་ཆེས་བྱར་མི་རུང༌། །དེ་ལ་ཡིད་ཆེས་སྐྱེས་གྱུར་ན། །རྣམ་རྟོག་བདུད་ཀྱི་དབང་དུ་འགྲོ། །དེ་ད་ཡིན་ཏེ་དེ་ཉིད་མིན། །སྡོང་བུ་ཡིན་ཏེ་འབྲས་བུ་མིན། །ཡོན་ཏན་ཡིན་ཏེ་རྟོག་མེད་མིན། །ཉམས་དང་ལྟ་བ་འཛོམ་པ་ལ། །བདུད་བཞིའི་དགྲ་ཡིས་མི་ཚུགས་ཤིང༌། །སྣང་བ་ཧད་པོར་འགྲོ་བར་ངེས། །ཕྱི་ཡི་ཡུལ་ནི་བརྟག་མི་ཐུབ། །རང་གི་རང་གསལ་ནང་ན་གསལ། །དཔེར་ན་ལྐུགས་པའི་རྨི་ལམ་མམ། །གཞོན་ནུ་མ་ཡི་བདེ་བ་བཞིན། །ཐ་སྙད་ཚིག་ཏུ་བརྗོད་ཙམ་ན། །ཚ་གྲང་འདྲེས་པའི་ཡོན་ཏན་གྱིས། །འདུ་བ་རྣམ་བཞིས་གནོད་མི་ནུས། །བཟའ་བཏུང་ལ་སོགས་མི་དགོས་པས། །བཤང་གཅི་ལ་སོགས་འབྱུང་མི་འགྱུར། །མཆོག་གི་དངོས་གྲུབ་ཤུགས་ཀྱིས་འབྱུང༌། །ལམ་ལ་བརྟེན་པའི་ཚོང་པ་ཡིས། །མ་བགྲོད་བསམ་ཀྱང་ཕྱིན་མི་འགྱུར། །ཚོང་བྱས་ཟས་ནོར་འཕེལ་བ་ལྟར། །ལམ་ལ་བརྟེན་པའི་རྣལ་འབྱོར་གྱིས། །ཉམས་མྱོང་རིམ་གྱིས་སྐྱེ་བར་འགྱུར། །ཐབས་ལ་མ་བརྟེན་ཆོས་ཀྱིས་ནི། །ཉམས་སུ་བླངས་ཀྱང་རེས་འཇོག་ཙམ། །རྟོགས་སྙམ་བྱེད་ཅིང་བོགས་མི་ཐོན། །སངས་རྒྱས་རྣམས་ཀྱིས་ལྡེམ་དགོངས་ལ། །སེམས་ཅན་རིགས་སྤྱོད་བཅུག་པ་ཙམ། །དེ་ཉིད་ཡིན་ན་དེ་ཉིད་འགལ། །ཐོས་བསམ་མཁས་པའི་མི་རྣམས་ཀྱང༌། །ཚིག་ལ་རྣོ་ལ་དོན་ལ་བརྟུལ། །གོལ་སྒྲིབ་གདར་ཤ་གཅད་པ་ལ། །ཤུགས་འབྱུང་སྙིང་ལས་མ་ཆོད་ན༑ ༑ཐོས་པ་མང་པོས་དེ་མི་ཆོད། །ཐོས་པ་མང་པོས་ཆོད་གྱུར་ན། །མཁས་པ་དམྱལ་བར་ག་ལ་འགྱུར། །རང་རིག་རང་ལ་ཤར་བ་ལ། །ཐོས་པ་མང་པོས་དེར་མི་སྐྱོབ། །དཔེར་ན་སྨན་དཔྱད་བཀླག་པ་ཡིས། །ནད་པའི་ནད་སེལ་ག་ལ་ནུས། །མ་བསྒོམས་ཆོས་ཀྱང་དེ་བཞིན་ནོ། །ཤེས་རབ་ཡེ་ཤེས་དབང་གི་དུས། །ཁ་ཅིག་དེ་ཉིད་མཐོང་ཞེས་ཟེར། །ང་ནི་དེ་ལ་འཐད་པ་མེད། །ཟླ་བ་ཡིན་ཏེ་བཅོ་ལྔ་མིན། །ཤེས་པ་ཡིན་ཏེ་རྟོག་མེད་མིན། །གྲིབ་མ་ཡིན་ཏེ་ལུས་པོ་མིན། །མཚོན་པར་བྱ་བ་ཙམ་དུ་བས། །དེས་ན་ཐབས་ལམ་བརྟེན་པར་བྱ། །ཚོགས་ལམ་བརྒལ་བའི་གང་ཟག་ལ། །དངོས་དང་ཡིད་ལ་བྱེད་པའོ། །ཡིད་ལ་བྱེད་པའི་དུས་ཙམ་ན། །གང་འདོད་ཡིད་ཀྱིས་བླང་བར་བྱ། །དེ་དང་ལྷན་ཅིག་རོལ་པ་ན། །བསམ་པ་ཇི་ལྟར་འདོད་པར་བྱེད། །དེ་ནི་ཡིད་ཀྱི་སྤྱོད་ཡུལ་ལོ། །རིག་མ་དངོས་སུ་བསྟེན་བྱེད་ན། །མཚན་ལྡན་རྒྱུད་སྡེ་ཀུན་ནས་བཤད། །རྣལ་འབྱོར་ང་ཡི་འདོད་པ་ནི། །ཡིད་དུ་གང་འོང་མཚན་ལྡན་ཡིན། །མང་པོ་འཚོགས་ན་སྤྱོད་ལམ་མཛེས། །གསང་སྤྱོད་བྱེད་ན་ཁྲེལ་དང་བྲལ། །དེ་དང་དབེན་པའི་གནས་ཉིད་དུ། །ཉམ་ང་མེད་པའི་སྤྱོད་པ་བྱ། །མ་དང་བུ་མོ་སྲིང་མོ་ཡང༌། །ཁྱད་པར་ཅན་གྱི་རྟེན་དུ་འགྱུར། །ཡོན་ཏན་འབྱུང་གིས་སྐྱོན་དུ་མིན། །ཡོན་ཏན་མེད་པའི་གདམས་ངག་གིས། །དེ་ལ་བསམ་པར་མི་བྱའོ། །རྒྱུད་སྡེ་ཀུན་ནས་བཤད་པ་ལ། །མ་སྲིང་བསྟེན་ནོ་བཤད་པ་ནི། །སངས་རྒྱས་བཀའ་ནི་ལྡེམ་དགོངས་ལ། །ཁ་ཅིག་གིས་ནི་དམན་པར་མཐོང༌། །དོན་དང་མཐུན་པར་མི་བསྒྲུབ་པར། །དེས་ན་གང་ཟག་སྤྱོད་པར་བླང༌། །སྦྱོར་ཐབས་མི་ཤེས་རྣལ་འབྱོར་དང༌། །སྟན་ཡང་གཅིག་ལ་བསྟེན་གྱུར་ན། །སོ་སོ་སྐྱེ་བོའི་སྤྱོད་པ་རྣམས། །ཕན་ཡོན་མི་འབྱུང་སྐྱོན་དུ་འགྱུར། །དེས་ན་སྦྱོར་ཐབས་མཁས་པས་བསྟེན། །འགའ་དང་འགའ་ཡི་སྤྱོད་ཡུལ་ལས། །ཀུན་གྱི་སྤྱོད་ཡུལ་འདི་མ་ཡིན། །དེས་ན་གསང་སྔགས་སྤྱོད་པ་རྣམས། །ཐབས་ལམ་མ་སོང་ཐོ་ཅོར་སོང༌། །ཡོ་ཏན་མ་སོང་འཕྱས་ལམ་སོང༌། །དེས་ན་གསང་བ་སྤྱད་པར་བྱ། །གསང་སྔགས་ཟབ་མོའི་གདམས་ངག་འདི། །ཐབས་ལམ་ཙམ་ལས་མ་གཏོགས་པ། །ལྟ་བས་འཕགས་སོ་ང་མི་ཟེར། །ཇི་ལྟར་རྣ་བར་ཆུ་ཞུགས་པ། །ཆུ་གཞན་གྱིས་ནི་འགུགས་པར་བྱེད། །ཇི་ལྟར་ཁོང་དུ་དུག་ཞུགས་པ། །སླར་ཡང་དུག་གིས་འབྱིན་པར་བྱེད། །ཁྱེའུས་ཁྱེའུ་འབྱིན་པ་དང༌། །དྲི་མས་དྲི་མ་འཁྲུད་པ་བཞིན། །ནད་རྣམས་འཚོ་བར་བྱེད་འདོད་ན། །སྨན་གྱི་ཡན་ལག་བསམ་མི་ཁྱབ། །དེས་ན་ཐབས་ཀྱི་ལམ་འདི་གཅེས། །གཞན་དུ་ཁ་ཅིག་འདི་སྐད་ཟེར། །བསྐྱེད་རིམ་བསྒོམ་པའི་ཡོན་ཏན་གྱིས། །ཆོས་སྐུ་སྐྱེ་བ་མེད་པ་ལས། །གཟུགས་སྐུ་གཉིས་སུ་ལྡང་ནས་ནི། །སེམས་ཅན་འགྲོ་དོན་བྱེད་དོ་ཟེར། །ང་ནི་དེ་ལ་འཐད་པ་མེད། །ཆོས་སྐུ་རྣམ་དག་མེད་པ་ལ། །གཟུགས་སྐུ་རྣམ་དག་འབྱུང་རིགས་སམ། །འོ་ན་ཇི་ལྟར་ཡིན་ཞེ་ན། །ས་ལ་གནས་པའི་བྱང་སེམས་དང༌། །སེམས་ཅན་བསམ་པ་དག་པ་ལ། །སྔོན་གྱི་བསོད་ནམས་སྟོབས་དག་དང༌། །ཐུགས་རྗེ་ཆེན་པོའི་སྟོབས་དག་གིས། །དེ་ལྟར་སྣང་གི་དངོས་སུ་མིན། །སྒྱུ་མ་མཁན་གྱིས་ཅི་སྤྲུལ་ཡང༌། །སྒྱུ་མ་མཁན་ཉིད་དེར་སོང་མེད། །རྟོགས་པར་དཀའ་བའི་དོན་འདི་ནི། །གཉིས་སུ་མེད་པའི་ལྟ་བ་ཡིན། །མ་ཧཱ་མུ་དྲའི་དགོངས་པ་ལ། །རང་གི་འོད་གསལ་གྱི་ཤེས་པ། །ཅིར་ཡང་མི་རྟོག་དོན་དེ་ཉིད། །ཚིག་དང་ཡི་གེས་མཚོན་ནས་ནི། །སངས་རྒྱས་ཞལ་ནས་གསུངས་པ་ན། །རང་ལ་ཡོད་དེ་རྟོགས་པ་མེད། །ཅེ་རེ་འདུག་ཀྱང་ལོང་བ། །དམིགས་པ་མེད་པའི་ཐབས་ལམ། །མཚན་མའི་སྐུ་ལ་སློབ་པ། །རྣམ་དག་བཤུར་ལ་འདེབས་པ། །ཉོན་མོངས་རིམ་གྱིས་འགགས་པ༑ ༑མི་རྟོག་ཤུགས་ལས་འབྱུང་བ། །རྣལ་འབྱོར་ལམ་གྱི་རིམ་པ། །གཞན་ལ་བསྟན་དུ་འཕང་པ། །སྣོད་དང་ལྡན་ལ་སྦྱིན་པ། །ཉམས་ཅན་རྣམས་ཀྱི་ལྟ་བ། །ཉམས་སུ་མྱོང་ན་ཚིམ་པ། །ཚིག་དང་ཡི་གེ་བསྡེབས་པ། །ཀུན་གྱི་སྤྱོད་ཡུལ་མིན་པ། །སྤྱོད་པ་ཡངས་དོག་མེད་པ། །བླ་མའི་དྲིན་ལན་སོབ་པ། །གཅིག་པུར་དབེན་པར་སྡོད་པ། །རང་སེམས་གཏན་ལ་འབེབས་པ། །འཆི་བ་རྗེས་སུ་དྲན་པ། །ངན་སོང་གསུམ་གྱི་འཇིགས་པ་ལ། །བླ་མ་བརྒྱུད་པའི་རིམ་པ་བསྟན། །གཞན་དུ་རྣལ་འབྱོར་ལུས་དང་གཅིག །ཉམས་སུ་བླངས་པའི་ཆོས་དང་གཉིས། །ཉམས་མྱོང་སྐྱེས་པའི་ལུས་དང་གསུམ། །འདི་གསུམ་ཤིན་ཏུ་གསང་ན་ལེགས། །དད་པ་ཅན་གྱི་ངོར་བྱས་པའོ། །དྲིན་དུ་གཟོ་བར་གྱིས་ཤིག །རྗེ་མི་ལ་རས་པའི་ཉམས་མྱོང་ཡི་གེར་བཀོད་པ། མ་རིག་གསལ་བྱེད་ཅེས་བྱ་བ་རྫོགས་སོ།། །།ས་མཱཔྟཾ། སྙི་བ་རིན་པོ་ཆེ་ལས་བརྒྱུད། ༈ རྗེ་བཙུན་མི་ལའི་རྣམ་རྟོག་དྲི་མ་དག་བྱེད་ཅེས་བྱ་བ། དམ་པ་དེ་ལ་ཕྱག་འཚལ་ལོ། །སྣོད་དུ་རུང་བར་བྱ་བའི་ཕྱིར། །དབང་གི་གོ་བ་རྣམ་པ་གཉིས། །གདོད་ནས་རང་ཆས་གནས་པ་དང༌། །རྐྱེན་གྱི་དབང་གིས་བསྐུར་ཚུལ་ལོ། །ཉམས་སུ་བླང་བའི་ཐབས་ཚུལ་དང༌། །ཉམས་བླངས་རྟོགས་པ་ཤར་ཚུལ་གཉིས། །དེ་ནི་དབང་གི་གོ་བར་མཐོང༌། །དམ་ཚིག་ལ་ཡང་གཉིས་སུ་འདོད། །བསྲུང་དང་ཡེ་བསྲུང་ཆེན་པོའོ། །བཟའ་བསྲུང་གཉིས་སུ་འདོད་པ་ནི༑ ༑དེ་ནི་བསྲུང་བའི་དམ་ཚིག་གོ །ཡེ་བསྲུང་ཆེན་པོ་འབྲས་བུ་དངོས། །ལྟ་བ་ཡང་ནི་གཉིས་སུ་འདོད། །ལྟ་བ་གཏན་ལ་འབེབ་ལུགས་དང༌། །ལྟ་བ་གཏན་ལ་ཕེབས་ལུགས་སོ། །ལྟ་བ་གཏན་ལ་འབེབ་ཐབས་ནི། །རྩ་རླུང་འཁོར་ལོ་གཙིགས་སུ་ཆེ། །སྲོག་རྩོལ་གནད་དུ་མ་ཚུད་ན། །དབབ་ཐབས་འབྱུང་བ་རིག་མ་ཡིན། །དེས་ན་ཐབས་ལམ་ཁྱད་དུ་འཕགས། །གཏན་ལ་ཕེབས་པའི་ལྟ་བ་ནི། །ང་འདྲ་རྨོངས་པ་མ་ཡིན་གྱི། །ཡང་དག་རྫོགས་སངས་རྒྱས་ཀྱིས་ཀྱང༌། །ལྐུགས་དང་གཞོན་ནུ་ཇི་བཞིན་དུ། །མཚོན་པ་ཙམ་ལས་མ་གཏོགས་པ། །ངོ་བོ་བསྟན་པར་ནུས་མ་ཡིན། །སྒོམ་པ་ལ་ཡང་རྣམ་གཉིས་ཏེ། །བསྒོམ་དུ་ཡོད་དང་མེད་པ་གཉིས། །མཚན་མའི་སྐུ་ཡི་རྣལ་འབྱོར་པས། །དེ་ནི་བསྒོམ་དུ་ཡོད་པ་ཡིན། །ངོ་བོ་ཉིད་ཀྱང་དེ་ལ་བྱ། །སྐྱོན་ཡོན་གཉིས་ཀྱང་དེ་འབྱུང་རིགས། །བཅོས་ཐབས་གྲངས་ཀྱིས་མི་ལོང་གིས། །སྟོང་པའི་གོ་ཆ་གཙིགས་སུ་ཆེ། །ངེས་པའི་ཤེས་པ་མི་སྐྱེ་བར། །ཉམས་རྟོགས་འབྱུང་བར་ག་ལ་རིགས། །ངེས་པའི་ཤེས་པ་སྐྱེ་བ་ལ། །བླ་མ་དམ་པའི་དྲིན་ཐོབ་ནས། །གཅིག་པུ་དབེན་པའི་གནས་བསྟེན་ནས། །སྲོག་རྩོལ་གནས་སུ་ཚུད་གྱུར་ན། །ནང་གི་ཚ་གྲང་འདྲེས་པར་ངེས༑ ༑ངེས་པའི་ཤེས་པ་སྐྱེ་བར་ངེས། །རྣམ་པར་རྟོག་པ་རིམ་གྱིས་འགོགས། །ཕྱི་ཡི་སྣང་བ་ན་བུན་ཙམ། །བླ་མེད་ཡུལ་དེས་གནོད་མི་ནུས། །ཡང་དག་དོན་གྱི་དེ་ཉིད་ལ། །བསྒོམ་བྱ་སྒོམ་བྱེད་གཉིས་སུ་མེད། །སྤྱོད་པ་ལའང་གཉིས་སུ་འདོད། །སྤྱོད་དུ་ཡོད་དམ་མེད་གཉིས་སོ། །སྤྱོད་དུ་ཡོད་པའི་དུས་ཙམ་ན། །ལྐུགས་པ་སྨྱོན་པའི་ཚུལ་དུ་སྤྱོད། །སྤྱད་དུ་མེད་པའི་དུས་ཙམ་ན། །དེ་ཉིད་སྤྱོད་པའི་མཆོག་ཡིན་ནོ། །འབྲས་བུ་ལ་ཡང་རྣམ་པ་གཉིས། །ཆོས་སྐུ་གཟུགས་སྐུ་གཉིས་སུ་འདོད། །ཆོས་སྐུའི་རང་བཞིན་ངོ་བོ་ནི། །ནམ་མཁའི་ཕྱོགས་ཆ་ཁ་གཏིང་མེད། །འདི་ཞེས་བྱ་བར་གདགས་མི་ནུས། །རེ་དོགས་སྤང་བླང་དགག་སྒྲུབ་མེད། །མཛུབ་མོས་ཟླ་བ་སྟོན་པ་བཞིན། །ཚིག་ལ་བརྟེན་ནས་མཚོན་པ་ཙམ། །དོན་ཉིད་རང་ཡང་མ་གྲུབ་པར། །འདི་འདྲ་བསྟན་དུ་ག་ལ་ཡོད། །ཡོད་ན་བསྟན་པས་མཐོང་བར་རིགས། །སྨྲ་བ་མཁན་གྱིས་དོན་སྟོན་ཡང༌། །ཚིག་ཕྱིར་བློ་འབྲང་སྙིང་རེ་རྗེ། །ཡོད་མེད་གཉིས་ལས་འདས་པའམ། །རྟག་ཆད་གཉིས་ཀྱིས་སྟོང་པ་ལ། །ལན་ཅིག་ཚིག་གིས་མཚོན་དུ་བས། །དེ་ལྟ་བུ་ཡི་མཚན་ཉིད་ལ། །གཟུགས་སྐུ་འབྱུང་བར་ག་ལ་རིགས། །སངས་རྒྱས་ལྡེམ་པོར་དགོངས་པ་ལ། །ཁ་ཅིག་དེ་ལས་འབྱུང་ངོ་ཟེར། །ང་ནི་དེ་ལ་འཐད་པ་མེད། །འོ་ན་ཇི་ལྟར་འབྱུང་ཞེ་ན། །གཟུགས་སྐུ་གཉིས་སུ་འབྱུང་བ་ནི། །སེམས་ཅན་སྣང་བ་དག་པ་ལ། །སྔོན་གྱི་སྨོན་ལམ་སྟོབས་དག་གིས། །ཇི་ལྟར་འདུག་བཞིན་སོ་སོར་སྣང༌། །སྣང་བ་ཡིན་ཕྱིར་དེ་ཉིད་མིན། །ཕལ་ལ་སྨྲས་ན་སྐྲག་པར་འགྱུར། །སངས་རྒྱས་སེམས་ཅན་དོན་མི་འཆད། །ཆོས་ཀྱང་ནུབ་པར་ག་ལ་འགྱུར། །རྣམ་རྟོག་དྲི་མ་དག་བྱེད་འདི། །སློབ་མ་རྣམས་ཀྱི་ངོར་བཤད་དོ། །ཚིག་ཏུ་སྨྲས་ཀྱིས་ཉམས་སུ་ལོངས། །ཉམས་མྱོང་སྨྲ་ཐབས་ང་ལ་མེད། །རྒྱས་པར་སྨྲ་རུ་སྡུས་ཤིག་ཟེར། །ཚིག་ཏུ་གོ་སླ་སྨྲས་ནས་བཞག །རྣམ་རྟོག་དྲི་མ་དག་བྱེད་ཅེས་བྱ་བ་རྗེ་བཙུན་མི་ལ་རས་པས་མཛད་པ་རྫོགས་སོ།། ༈ །།ཕྱག་རྒྱ་ཆེན་པོ་ཡེ་ཤེས་གསལ་བྱེད་ཀྱི་ངོ་སྤྲོད་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །ཕྱག་རྒྱ་ཆེན་པོ་ཡེ་ཤེས་གསལ་བྱེད་ཀྱི་མན་ངག་འདི་ལ། ཕྱག་རྒྱ་ཆེན་པོའི་མཚན་ཉིད་བསྟན་པ་ལ་གསུམ། གཞི་ཕྱག་རྒྱ་ཆེན་པོ། ལམ་ཕྱག་རྒྱ་ཆེན་པོ། འབྲས་བུ་ཕྱག་རྒྱ་ཆེན་པོ། དང་པོ་དངོས་པོ་གཤིས་ཀྱི་གནས་ལུགས་སངས་རྒྱས་ཀྱི་དགོངས་པ། སེམས་ཅན་གྱི་ཆོས་ཉིད༑ ཁ་དོག་བྱིབས་སུ་མ་གྲུབ། མཐའ་དང་དབུས་སུ་མ་གྲུབ་པ། རྒྱ་ཆད་ཕྱོགས་ལྷུང་དང་བྲལ་བ། ཡོད་མ་མྱོང༌། མེད་མ་མྱོང༌། མ་འཁྲུལ་མ་གྲོལ། རྒྱུས་མ་བསྐྱེད། རྐྱེན་གྱིས་མ་བསྒྱུར། སངས་རྒྱས་མཁས་ཏེ་མ་བཅོས། སེམས་ཅན་བསྒྲིན་ཏེ་མ་བསླད། རྟོགས་པས་བཟང་དུ་མ་སོང༌། འཁྲུལ་པས་ངན་དུ་མ་སོང༌། དེ་ནི་གཞི་ལ་གནས་པས། གཞི་ཕྱག་རྒྱ་ཆེན་པོའོ། །ལམ་ཕྱག་རྒྱ་ཆེན་པོ་ནི། གཞི་དེའི་སྟེང་དུ་ཉམས་སུ་བླངས་པས་ཆོག ༑འཇོག་དུས་དམིགས་མེད་དུ་འཇོག །གནས་ན་ཡེངས་མེད་དུ་གནས། ཁྱེར་དུས་འཛིན་མེད་དུ་ཁྱེར། འཆར་ན་ཆོས་ཉིད་དུ་འཆར། གྲོལ་དུས་ན་རང་གྲོལ་དུ་འགྲོ་བ་གཅིག་ཉམས་སུ་ལེན་པའོ། །འབྲས་བུ་ཕྱག་རྒྱ་ཆེན་པོ་ནི། གྲོལ་བྱ་དང་གྲོལ་བྱེད་དང་བྲལ་བ། རེ་དོགས་དང་བྲལ་བ། བློ་ཟད་ཆོས་ཟད་འཛིན་མེད་ཞེན་པ་དང་བློ་ལས་འདས་པས་བསམ་བརྗོད་བྲལ་བ། གཞི་ལམ་འབྲས་བུ་གསུམ་དབྱེར་མེད་དུ་ཉམས་སུ་ལེན་པའོ། །ཕྱག་རྒྱ་ཆེན་པོ་ཡེ་ཤེས་གསལ་བྱེད་ཀྱི་ཞལ་གྱི་གདམས་པ་རྗེ་བཙུན་མི་ལ་རྣལ་འབྱོར་གྱིས་མཛད་པའོ། ། ཨྠིྀ།། །།