DNZ-07-JA-014

Previous Text Back to Volume PageLast text in volume.

Wylie title	bde mchog mkha' 'gro snyan brgyud kyi lam rim mdor bsdus pa yid bzhin nor bu'i snying po	Rigpe Dorje Publications, 2024
Location	gdams ngag rin po che'i mdzod Volume 7, Text 14, Pages 511-560 (Folios 1a1 to 25b6)
Author	འཇམ་དབྱངས་མཁྱེན་བརྩེའི་དབང་པོ་
Citation	'jam dbyangs mkhyen brtse'i dbang po. Bde mchog mkha' 'gro snyan brgyud kyi lam rim mdor bsdus pa yid bzhin nor bu'i snying po. In Gdams ngag rin po che'i mdzod, Vol. 7: 511-560. Kalimpong: Rigpe Dorje Publications, 2024.	Shechen Publications, 1999
Side notes	Recto: lam rim   Verso: bka' brgyud skor
More details More details
Genre	Mahamudra - phyag rgya chen po  ·  Stages of the Path - lam rim
Colophon	Author colophon: །ཅེས་རྗེ་བཙུན་འཇའ་ཚོན་གྱི་སྐུ་ཅན་རས་ཆུང་ཞབས་ནས་གཙོ་བོར་བརྒྱུད་པའི་དཔལ་འཁོར་ལོ་བདེ་མཆོག་གི་སྙན་བརྒྱུད་ཡིད་བཞིན་ནོར་བུའི་ལམ་རིམ་སྙིང་པོར་དྲིལ་བ་འདི་ཡང༌། རང་ཉིད་ཀྱི་དྲན་པ་གསོ་བ་དང༌། ལས་དང་པོ་བ་གཞན་དག་ལ་ཅུང་ཟད་ཕན་པའི་བསམ་པས། རྣལ་འབྱོར་གྱི་དབང་ཕྱུག་མི་ལ་བཞད་པའི་རྡོ་རྗེ་དང༌། གཙང་སྨྱོན་ཧེ་རུ་ཀ་ཡབ་སྲས་སོགས་ཀྱི་གསུང་ལ་གཞི་བྱས། ལམ་འདི་ལ་མཁས་ཤིང་དངོས་གྲུབ་བརྙེས་པའི་རྡོ་རྗེའི་སློབ་དཔོན་ཆེན་པོ་བཀའ་རྒྱུད་ཕྲིན་ལས་དབང་ཕྱུག་གི་གསུང་གི་བདུད་རྩིས་ཟུར་བརྒྱན་ཏེ། རྒྱལ་ཁམས་ཉུལ་བའི་བྱ་བྲལ་བ། འཇམ་དབྱངས་མཁྱེན་བརྩེའི་དབང་པོས། གྲུབ་པའི་བསྟི་གནས་རས་ཆུང་ཕུག་ཏུ་མགོ་བརྩམས། འོག་མིན་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོར་གྲུབ་པར་བགྱིས་པ་འདིས་ཀྱང་སྒྲུབ་བརྒྱུད་རིན་པོ་ཆེའི་བསྟན་པ་ཕྱོགས་དང་དུས་ཐམས་ཅད་དུ་དར་ཞིང་རྒྱས་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། Contributor colophon: འདི་རྣམས་ཀྱི་གོ་དོན་རྒྱས་པར་རྗེ་བཙུན་མི་ལ་རས་པས་རས་ཆུང་པ་ལ་ཆིག་བརྒྱུད་དུ་གདམས་པའི་བུམ་དབང་ཡིད་བཞིན་ནོར་བུ། སྟེང་སྒོ་རྣམ་གྲོལ་ཆོས་དྲུག །ཕྱག་རྒྱ་ཆེན་པོ་ཡེ་ཤེས་གསལ་བྱེད། ལམ་བློ་ནས་གཅོད་པ་བར་དོ་ངོ་སྤྲོད་ཀྱི་ཁྲིད་ཡིག་རྣམས་གཞིར་བཟུང༌། གྲུབ་ཆེན་གཙང་སྨྱོན་ཡབ་སྲས་ཀྱིས་མཛད་པའི་རྡོ་རྗེའི་ཚིག་རྐང་གི་གཞུང་འགྲེལ་ཁྲིད་ཡིག་ཞལ་ཤེས་དང་བཅས་པ་དང༌། ཀུན་མཁྱེན་གྲུབ་མཆོག་དབང་པོས་མཛད་པའི་ཁྲིད་ཡིག་ཆེན་མོ་རྣམས་ཀྱིས་གསལ་བར་བྱ་ཕྱིར་བླ་མའི་ཞལ་ལུང་བཞིན་ཤེས་པར་བྱ་བ་ཁོ་ནའོ།།
	Author colophon: ces rje btsun 'ja' tshon gyi sku can ras chung zhabs nas gtso bor brgyud pa'i dpal 'khor lo bde mchog gi snyan brgyud yid bzhin nor bu'i lam rim snying por dril ba 'di yang /_rang nyid kyi dran pa gso ba dang /_las dang po ba gzhan dag la cung zad phan pa'i bsam pas/_rnal 'byor gyi dbang phyug mi la bzhad pa'i rdo rje dang /_gtsang smyon he ru ka yab sras sogs kyi gsung la gzhi byas/_lam 'di la mkhas shing dngos grub brnyes pa'i rdo rje'i slob dpon chen po bka' rgyud phrin las dbang phyug gi gsung gi bdud rtsis zur brgyan te/_rgyal khams nyul ba'i bya bral ba/_'jam dbyangs mkhyen brtse'i dbang pos/_grub pa'i bsti gnas ras chung phug tu mgo brtsams/_'og min o rgyan smin grol gling nges pa don gyi dga' ba'i tshal chen por grub par bgyis pa 'dis kyang sgrub brgyud rin po che'i bstan pa phyogs dang dus thams cad du dar zhing rgyas pa'i rgyur gyur cig_/sarba dA ka l+yA NaM b+ha ba tu/ Contributor colophon: 'di rnams kyi go don rgyas par rje btsun mi la ras pas ras chung pa la chig brgyud du gdams pa'i bum dbang yid bzhin nor bu/_steng sgo rnam grol chos drug_/phyag rgya chen po ye shes gsal byed/_lam blo nas gcod pa bar do ngo sprod kyi khrid yig rnams gzhir bzung /_grub chen gtsang smyon yab sras kyis mdzad pa'i rdo rje'i tshig rkang gi gzhung 'grel khrid yig zhal shes dang bcas pa dang /_kun mkhyen grub mchog dbang pos mdzad pa'i khrid yig chen mo rnams kyis gsal bar bya phyir bla ma'i zhal lung bzhin shes par bya ba kho na'o//

Tibetan Text

[edit]

༄༅། །བདེ་མཆོག་མཁའ་འགྲོ་སྙན་བརྒྱུད་ཀྱི་ལམ་རིམ་མདོར་བསྡུས་པ་ཡིད་བཞིན་ནོར་བུའི་སྙིང་པོ་ཞེས་བྱ་བ་བཞུགས་སོ། །

༄༅། །དཔལ་ལྡན་འཁོར་ལོ་བདེ་མཆོག་དང༌། །དབྱེར་མེད་བླ་མ་ལ་བཏུད་ནས། །སྙན་བརྒྱུད་ཡིད་བཞིན་ནོར་བུ་ཡི། །ཉམས་ལེན་སྙིང་པོ་ཅུང་ཟད་དབྱེ། །དེ་ལ་རྟེན་གྱི་གང་ཟག་བརྒྱུད་པ་ཡིད་བཞིན་ནོར་བུ་འདི་ཉིད་ལ་མི་ཕྱེད་པའི་དད་པ་དང་ལྡན་པ། སྨིན་ལམ་ཡིད་བཞིན་ནོར་བུས་རྒྱུད་སྨིན་ཅིང་དམ་ཚིག་དང་སྡོམ་པའི་ཀུན་སྤྱོད་རྣམ་པར་དག་པ་ལ་གནས་པས། གྲོལ་ལམ་ཡིད་བཞིན་ནོར་བུ་ཉམས་ཁྲིད་དུ་ཐོབ་ནས་རྒྱུན་དུ་མདོར་བསྡུས་པའི་ཚུལ་གྱིས་ཉམས་སུ་བླང་བ་ལ་གསུམ་སྟེ། སྔོན་འགྲོ༑ དངོས་གཞི། རྗེས་སོ། །དང་པོ་ནི། བསམ་གཏན་ལ་ཚེར་མ་མི་འབྱུང་བའི་གནས་དབེན་ཞིང་ཡིད་དང་མཐུན་པར་སྟན་བདེ་བ་ལ་འདུག་ནས་འདི་ལྟར་ངེས་པར་བྱ་སྟེ། ད་ལན་རྙེད་དཀའ་ཞིང་ཕན་འདོགས་ཆེ་བའི་དལ་འབྱོར་གྱི་རྟེན་ཁྱད་པར་ཅན་འདི་ལྟ་བུ་ཞིག་ཐོབ་ཀྱང་དོ་ནུབ་ཙམ་ཡང་མི་འཆི་བའི་གདིང་ནི་མེད་ཅིང༌། ཤི་བའི་འོག་ཏུ་ལས་དཀར་ནག་འབའ་ཞིག་གི་རྗེས་སུ་འབྲངས་ཏེ་འཁོར་བའི་གནས་རིས་མཐོ་དམན་གང་དུ་སྐྱེས་ཀྱང་སྡུག་བསྔལ་གསུམ་གྱི་རང་བཞིན་ཁོ་ན་ལས་མ་འདས་པས། སྡུག་བསྔལ་ཅན་གྱི་འཁོར་བ་དེ་ལས་རང་གཞན་སེམས་ཅན་ཐམས་ཅད་བསྒྲལ་བའི་སླད་དུ་བླ་མ་དང་དཀོན་མཆོག་ལ་སྐྱབས་དང་ར་མདར་ཞུ་བའི་འདུན་པས། གནས་ཡུལ་དག་པའི་ཞིང་དུ་གྱུར་པའི་མདུན་གྱི་ནམ་མཁར་སེང་ཁྲི་པད་ཉི་ཟླ་བའི་གདན་ལ་རྩ་བའི་བླ་མ་རྡོ་རྗེ་འཆང་ཡབ་ཡུམ་ལ་བརྒྱུད་པའི་བླ་མས་བསྐོར་བ། དེའི་མདུན་དུ་པད་ཉི་རོའི་གདན་ལ་དཔལ་འཁོར་ལོ་བདེ་མཆོག་གཙོ་བོར་གྱུར་པའི་ཡི་དམ་དཀྱིལ་འཁོར་གྱི་ལྷ་ཚོགས། གཡས་སུ་སེང་ཁྲི་པད་ཟླའི་གདན་ལ་སྟོན་པ་ཤཱཀྱའི་རྒྱལ་པོ་ལ་དུས་གསུམ་སངས་རྒྱས་སྤྲུལ་སྐུའི་རྣམ་པ་ཅན་རྣམས་ཀྱིས་བསྐོར་བ། རྒྱབ་ཏུ་རིན་པོ་ཆེའི་ཁྲིའི་སྟེང་དུ་ཆོས་དཀོན་མཆོག་གླེགས་བམ་བྲག་རི་བརྩེགས་པའི་རྣམ་པ་ཅན། གཡོན་དུ་པད་ཟླའི་གདན་ལ་ཉེ་སྲས་བརྒྱད་དང་མཆོག་ཟུང་སོགས་ཐེག་པ་ཆེ་ཆུང་གི་དགེ་འདུན། བར་མཚམས་དང་འོག་གི་ཆར་གནས་གསུམ་གྱི་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་མངོན་སུམ་ལྟ་བུར་གསལ་བའི་སྤྱན་སྔར་བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བར་དམིགས་ཏེ། བདག་སོགས་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ༴ རྫོགས་པའི་སངས་རྒྱས་རྣམས་ལ༴ དམ་པའི་ཆོས་རྣམས༴ འཕགས་པའི་དགེ་འདུན་རྣམས་ལ༴ མཁའ་འགྲོ་ཆོས་སྐྱོང་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །ཞེས་ཅི་ནུས་དང༌། སེམས་བསྐྱེད་ནི། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ལམ་ཟབ་མོ་ཉམས་སུ་བླང་བར་བགྱིའོ། །ལན་གསུམ། དེའི་མཐུ་ལ་བརྟེན་ནས་སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། མཐར་སྐྱབས་ཡུལ་རྣམས་གཅིག་ཅར་དུ་འོད་དུ་ཞུས་ནས་རང་གཞན་ཐམས་ཅད་ལ་ཐིམ་པས་རྒྱུད་བྱིན་གྱིས་བརླབས་པར་བསམ། རྡོར་སེམས་སྒོམ་བཟླས་ནི། རང་གི་སྤྱི་བོར་པད་ཟླའི་སྟེང་དུ་ཧཱུྃ་ལས་རྡོ་རྗེ་དཀར་པོ་རྩེ་ལྔ་པའི་ལྟེ་བ་ལ་ཧཱུྃ་གིས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་བསྣམས་པས་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། ཞབས་གཉིས་རྡོ་རྗེ་དང་པདྨའི་སྐྱིལ་མོ་ཀྲུང་གིས་བཞུགས་པ། དར་དང་རུས་པ་དང་རིན་པོ་ཆེའི་རྒྱན་གྱིས་བརྒྱན་ཅིང་མཚན་དཔེའི་གཟི་འོད་འབར་བའི་གནས་གསུམ་ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་ཡེ་ཤེས་པ་སྤྱན་དྲངས། ཛཿ ཧཱུྃ་བྃ་ཧོཿ གཉིས་སུ་མེད་པར་ཐིམ། བཅོམ་ལྡན་འདས་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས་སྦྱོར་མཚམས་དང་སྐུ་ལས་བདུད་རྩིའི་རྒྱུན་བབས། རང་གི་སྤྱི་བོ་ཚངས་པའི་བུ་ག་ནས་མར་ཞུགས། ལུས་ཀྱི་ནང་ཐམས་ཅད་གང༌། ནད་གདོན་སྡིག་སྒྲིབ་ཐམས་ཅད་བྱང་ཞིང་དག་པར་གྱུར། ཧེ་རུ་ཀའི་ཡི་གེ་བརྒྱ་པ་དང༌། ༀ་བཛྲ་ས་ཏྭ་ཧཱུྃ། ཅི་ནུས་བཟླ། བཤགས་སྡོམ་སྤྱི་ལྟར་མཐར། རྡོ་རྗེ་སེམས་དཔའི་ཡབ་ཡུམ་འོད་དུ་ཞུས་ནས་རང་ལ་ཐིམ་པར་བསམ། བླ་མའི་རྣལ་འབྱོར་ནི། རང་སྐད་ཅིག་གིས་བདེ་མཆོག་ལྷན་སྐྱེས་སུ་གསལ་བའི་མདུན་གྱི་ནམ་མཁར་སེང་ཁྲི་པད་ཉི་ཟླ་བའི་སྟེང་དུ་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་རྩ་བའི་བླ་མ་རྡོ་རྗེ་འཆང་སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པས་རང་འོད་ཀྱི་ཡུམ་དང་འཁྲིལ་བ། དར་དང་རུས་པ་དང་རིན་པོ་ཆེའི་རྒྱན་གྱིས་བརྒྱན་ཅིང༌། ཞི་འཛུམ་མཚན་དཔེའི་ཉམས་འགྱུར་ཡོངས་སུ་རྫོགས་པར་གསལ་བའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་མཆོད་འོས་ཐམས་ཅད་སྤྱན་དྲངས། ཛཿ ཧཱུྃ་བཾ་ཧོཿ གཉིས་སུ་མེད་པར་ཐིམ། སྐྱབས་གནས་ཀུན་འདུས་བླ་མ་ལ། །གུས་པས་ཕྱག་འཚལ་མཆོད་པ་འབུལ། །སྡིག་སྒྲིབ་ཉེས་ལྟུང་མཐོལ་ཞིང་བཤགས། །བསོད་ནམས་ཀུན་ལ་རྗེས་ཡི་རང༌། །ཆོས་འཁོར་བསྐོར་བཞིན་བཞུགས་གསོལ་འདེབས། །དགེ་ཚོགས་བྱང་ཆུབ་ཆེན་པོར་བསྔོ། །འགྲོ་ཀུན་སངས་རྒྱས་མྱུར་ཐོབ་ཤོག །མཎྜལ་རྒྱས་བསྡུས་གང་ཤེས་ཕུལ། སྡོམ་བཟུང་རྒྱས་པའམ། བསྡུ་ན། རྡོ་རྗེ་སློབ་དཔོན་དགོངས་སུ་གསོལ། །བདག་གིས་དེང་ནས་བྱང་ཆུབ་བར། །ཐུན་མོང་མཆོག་གི་སྡོམ་པ་རྣམས། །བསམ་སྦྱོར་བརྟན་པོས་བཟུང་ཞིང་བསྲུང༌། །སྤྲོ་ན་བརྒྱུད་འདེབས་དང༌། གང་ལྟར་ཡང༌། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །ཆོས་རྗེ་སངས་རྒྱས་བཀའ་དྲིན་ཅན་ལ༴ བླ་མ་ཀུན་ཁྱབ་ཆོས་ཀྱི་སྐུ་ལ༴ བླ་མ་ལོངས་སྤྱོད་རྫོགས་པའི་སྐུ་ལ༴ བླ་མ་ཐུགས་རྗེ་སྤྲུལ་པའི་སྐུ་ལ༴ ཞེས་གསོལ་བ་ཕུར་ཚུགས་སུ་བཏབ་མཐར། དཔལ་ལྡན་བླ་མ་རིན་པོ་ཆེས། །སྐུ་གསུང་ཐུགས་ལས་བྱུང་བ་ཡི། །དབང་བཞི་བསྐུར་བར་མཛད་དུ་གསོལ། །སྨིན་ཅིང་གྲོལ་བར་བྱིན་གྱིས་རློབས། །ཞེས་གསོལ་བ་བཏབ་པས་བླ་མ་ཡབ་ཡུམ་འོད་དུ་ཞུས་ནས་རང་ལ་ཐིམ། རང་གི་ལུས་ངག་ཡིད་གསུམ་དང་བླ་མའི་སྐུ་གསུང་ཐུགས་དབྱེར་མེད་དུ་གྱུར། དབང་བཞི་ཐོབ། སྒྲིབ་བཞི་དག །སྐུ་བཞིའི་གོ་འཕང་འགྲུབ་པའི་སྐལ་བ་ཅན་དུ་བྱས་པར་བསམ་ལ་སེམས་འཛིན་མེད་དུ་བཞག །གཉིས་པ་དངོས་གཞི་ལ་དབང་བཞི་དང་རྗེས་སུ་འབྲེལ་བའི་ལམ་བཞི་ལས། དང་པོ་གཙོ་བོར་བུམ་དབང་གི་ལམ་ལ་ཡབ་བཀའ་དང༌། ཡུམ་བཀའ་གཉིས། དང་པོ་ལ་མཉམ་བཞག་དང༌། རྗེས་ཐོབ་གཉིས་ཀྱི། དང་པོ་ལའང་དབང་པོའི་རིམ་པ་དང་མཐུན་པར་རྒྱས་འབྲིང་བསྡུས་གསུམ་གང་མོས་ཉམས་སུ་ལེན་པར་གསུངས་པས། འདིར་རེ་ཞིག་བསྡུས་པ་ལྷན་སྐྱེས་ཡབ་ཡུམ་གྱི་རྣལ་འབྱོར་ལྟར་ཉམས་སུ་བླང་བ་ལ་གསུམ་ལས། དང་པོ་སྤྲུལ་སྐུ་བསྐྱེད་རིམ་གྱི་རྣལ་འབྱོར་ནི། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྐད་ཅིག་གིས་སྟོང་པའི་ངང་ལས། ནམ་མཁའི་ཁམས་སུ་ཨེ་ལས་ཆོས་ཀྱི་འབྱུང་གནས་ཕྱི་དཀར་ལ་ནང་དམར་བ་ཁ་སྦྱོར་གྱི་ནང་དུ་པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་རྩེ་མོ་ལྔ་པ་ཤར་དཀར། ལྷོ་སེར། ནུབ་དམར། བྱང་ལྗང་བའི་ལྟེ་བ་མཐིང་ནག་ཧཱུྃ་གིས་མཚན་པ་ལས་འོད་ཟེར་ཕྱོགས་བཅུར་འཕྲོས་པས། འོག་རྡོ་རྗེའི་ས་གཞི། སྟེང་རྡོ་རྗེའི་གུར་དང་བླ་བྲེ། ཕྱོགས་མཚམས་རྡོ་རྗེའི་ར་བ་དང་དྲྭ་བ་ལས་ཡེ་ཤེས་ཀྱི་མེ་རབ་ཏུ་འབར་བའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བར་བསམས་ལ། ༀ་བཛྲ་རཀྵ་རཀྵ་ཧཱུྃ་ཧཱུྃ་ཕཊ་སྭཱ་ཧཱ། ཞེས་པ་ལན་གསུམ་གྱིས་བྱིན་གྱིས་བརླབས་ཏེ་སྲུང་འཁོར་བསྒོམ། དེའི་ནང་དུ་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་དབུས་སྣ་ཚོགས་རྡོ་རྗེའི་ལྟེ་བའི་སྟེང་དུ། པྃ་ལས་པདྨ། རྃ་ལས་ཉི་མ། འཇིགས་བྱེད་དང་དུས་མཚན་གན་རྐྱལ་དུ་འགྱེལ་བའི་གདན་གྱི་སྟེང་དུ་རང་གི་རྣམ་ཤེས་ཧཱུྃ་སྔོན་པོ་སྐད་ཅིག་གིས་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཞབས་གཉིས་གཡས་བརྐྱང་ཞིང་གཡོན་ཅུང་ཟད་བསྐུམ་པའི་རོལ་སྟབས་ཀྱིས་འཇིགས་བྱེད་དུས་མཚན་གྱི་གདན་ལ་བཞུགས་པ། ཁྲོ་གཉེར་གཡོ་བའི་ཞལ་མཆེ་བ་གཙིགས་ཤིང་སྤྱན་གསུམ་དང་ལྡན་པ། དབུ་སྐྲ་རལ་པའི་ཅོད་པན་གྱི་རྩེར་སྣ་ཚོགས་རྡོ་རྗེ་དང་ནོར་བུའི་ཕྲེང་བ་ཟླ་ཚེས་རྡོ་རྗེས་མཚན་པ། ཐོད་སྐམ་གྱི་རྩེར་རིན་ཆེན་འབར་བས་སྤྲས་པ་ལྔའི་དབུ་རྒྱན་དང༌། རློན་པ་ཁྲག་འཛག་པ་ལྔ་བཅུའི་དོ་ཤལ་འཆང་བ། གཅེར་བུ་ཁྲག་ཞག་ཐལ་ཆེན་བྱུགས་པའི་སྐུ་ལ་སྦྲུལ་དང་རུས་པའི་རྒྱན་དྲུག་གིས་བརྒྱན་པ། སྟག་ལྤགས་རློན་པའི་ཤམ་ཐབས་གསོལ་བ། སྒེག་པ་ལ་སོགས་གར་དགུའི་ཉམས་དང་ལྡན་པའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་སྤྱན་གསུམ་ཕྱག་གཉིས་གཡས་གྲི་གུག་སྡིགས་མཛུབ་དང༌། གཡོན་ཐོད་ཁྲག་འཛིན་པས་ཡབ་ཀྱི་མགུལ་ནས་འཁྱུད་པ། དབུ་སྐྲ་སིལ་བུའི་སྟོད་ཆ་གྱེན་དུ་བརྫེས་པའི་རྩེར་འཁོར་ལོ་དང་མེ་ཏོག་གི་ཕྲེང་བས་མཛེས་ཤིང་ལྷག་མ་ཐུར་དུ་གྲོལ་བས་སྐེད་པ་ནོན་པ་མི་མགོ་སྐམ་པོ་ལྔ་ཡི་དབུ་རྒྱན་དང༌། རློན་པ་ཁྲག་འཛག་པ་ལྔ་བཅུའི་དོ་ཤལ་ཅན་གཅེར་བུ་རུས་པའི་རྒྱན་དྲུག་གིས་བརྒྱན་ཅིང༌། ཞབས་གཉིས་གཡོན་བརྐྱང་ཞིང་གཡས་བསྐུམ་པས་ཡབ་ཀྱི་སྐུ་ལ་འཁྲིལ་བ། གཉིས་ཀའང་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པར་གྱུར། རང་གི་ཐུགས་ཀའི་ཧཱུྃ་ལས་འོད་ཟེར་སྐུ་དང་ཕྱག་མཚན་ཡིག་འབྲུ་ཐིག་ལེའི་རྣམ་པ་དཔག་ཏུ་མེད་པ་ཁྱམས་དང་དུར་ཁྲོད་དུ་འཕྲོས་པས་འཁོར་གྱི་ལྷར་གྱུར་པ་ནི། ཁྱམས་ཀྱི་བར་སྣང་སྟེང་འོག་རྣམས་སུ་འཇའ་འོད་སྤྲིན་གྱི་གུར་ཁང་གི་ངོས་ལ། རྒྱུད་སྡེ་བཞི་ཡི་ལྷ་ཚོགས་དང༌། འདོད་ཡོན་རྣམ་ལྔའི་མཆོད་པ་བཀོད་ལེགས་དུ་མ་ཐོགས་ནས་མཆོད་པ་ལ་བརྩོན་པའི་ལྷ་ཡི་བུ་དང་བུ་མོས་གང་བ། དུར་ཁྲོད་རྣམས་སུ་ཕྱོགས་སྐྱོང་ཞིང་སྐྱོང་ཀླུ་ལ་སོགས་པ་སྟེ་གཟུགས་བརྙན་དང་ཆ་ལུགས་སྣ་ཚོགས་འཆང་ཞིང་སྟོན་པའི་དཔའ་བོ་མཁའ་འགྲོའི་ཚོགས་དཔག་ཏུ་མེད་པས་གང་བར་བསམ་པ་ནི་དམ་ཚིག་པ་བསྐྱེད་པ་བསྙེན་པའི་ཡན་ལག་གོ །བཅོམ་ལྡན་འདས་ལ་སོགས་པའི་ཡབ་ཐམས་ཅད་ཀྱི་ཐུགས་ཀར་ༀ་ཧ་ལས་རྡོ་རྗེ་སེམས་དཔའ་དཀར་པོ། དཔྲལ་བར་ན་མ་ཧི་ལས་རྣམ་པར་སྣང་མཛད་དཀར་པོ། སྤྱི་གཙུག་ཏུ་སྭཱ་ཧཱ་ཧུ་ལས་པདྨ་གར་དབང་དམར་པོ། ཕྲག་པར་བཽ་ཥཊ་ཧེ་ལས་མི་བསྐྱོད་པ་སྔོན་པོ། མིག་ཏུ་ཧཱུྃ་ཧཱུྃ་ཧོ་ལས་རྡོ་རྗེ་ཉི་མ་སེར་པོ། ལྷུ་ཚིགས་ཐམས་ཅད་ལ་ རྒྱུད་ལས་ཕཊ་ཧཾ་ཞེས་གསུངས་ཀྱང་དཔེ་སྔ་མ་ལ་འདི་ལྟར་སྣང༌། ཕཊ་ཕཊ་ལས་རྟ་མཆོག་ལྗང་ཁུ་རྣམས་གཡས་རྡོ་རྗེ་འཕྱར་ཐབས་སུ་འཛིན་ཅིང་གཡོན་དྲིལ་བུ་སྡིགས་མཛུབ་དང་བཅས་པས་ཐུགས་ཀར་འཛིན་པ། གྲུ་མོ་ན་ཁ་ཊྭཾ་ག་འཆང་བ། གཅེར་བུ་དཔའ་བོའི་རྒྱན་ཆ་ལུགས་ཐམས་ཅད་ཡོངས་སུ་རྫོགས་པ། ཞབས་གཡས་བརྐྱང་ཞིང་གཡོན་ཅུང་ཟད་བསྐུམ་པའི་རོལ་སྟབས་ཀྱིས་པད་ཉི་རོའི་གདན་ལ་བཞུགས་པའོ། །རྡོ་རྗེ་ཕག་མོ་ལ་སོགས་པའི་རྣལ་འབྱོར་མ་ཐམས་ཅད་ཀྱི་ལྟེ་བར་ༀ་བཾ་ལས་ཕག་མོ་དམར་མོ། སྙིང་གར་ཧྃ་ཡ་ལས་གཤིན་རྗེ་མ་སྔོན་མོ། མགྲིན་པར་ཧྲཱ་མྃ་ལས་རྨོངས་བྱེད་མ་དཀར་མོ། དཔྲལ་བར་ཧྲཱ་ཧྲཱ་ལས་སྐྱོད་བྱེད་མ་སེར་མོ། སྤྱི་གཙུག་ཏུ་ཧཱུྃ་ཧཱུྃ་ལས་སྐྲག་བྱེད་མ་ལྗང་གུ། ཡན་ལག་ཐམས་ཅད་ལ་ཕཊ་ཕཊ་ལས་གཏུམ་མོ་དུད་ཁ་སྟེ་ཐམས་ཅད་གཡས་གྲི་གུག་འཕྱར་ཐབས་སུ་འཛིན་ཞིང༌། གཡོན་ཐོད་ཁྲག་ཐུགས་ཀར་འཛིན་པའི་གྲུ་མོ་ན་ཁ་ཊྭཱཾ་ག་འཆང་བ། ཞབས་གཡས་བསྐུམ་ཞིང་གཡོན་བརྐྱང་བའི་གར་སྟབས་ཀྱིས་པད་ཉི་རོའི་གདན་ལ་བཞུགས་པ། དཔའ་བོ་དང་དཔའ་མོ་ཐམས་ཅད་མེ་ལོང་ནང་གི་གཟུགས་བརྙན་ལྟར་སྣང་ལ་རང་བཞིན་མེད་པར་བསམ། དེ་ཐམས་ཅད་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོས་མཚན་པར་བསམ་པ་ནི་གོ་ཆ་བགོ་ཞིང་སྒོ་གསུམ་བྱིན་གྱིས་བརླབས་པ་སྟེ་ཉེ་བར་བསྙེན་པའི་ཡན་ལག་གོ །དེ་དག་ལས་འོད་འཕྲོས། ཕྱི་སྣོད་ཀྱི་འཇིག་རྟེན་ཐམས་ཅད་ལ་ཕོག་པས་གཞལ་ཡས་ཁང་དུ་གྱུར། ནང་བཅུད་ཀྱི་སེམས་ཅན་ཐམས་ཅད་ལ་ཕོག་པས། ཕོ་ཐམས་ཅད་འཁོར་ལོ་སྡོམ་པ། མོ་ཐམས་ཅད་རྡོ་རྗེ་ཕག་མོར་གྱུར། དེ་ཐམས་ཅད་དང་བླ་མ་ཡི་དམ་སངས་རྒྱས་བྱང་སེམས་ཐམས་ཅད་བདེ་མཆོག་ཡབ་ཡུམ་གྱི་རྣམ་པར་ཚུར་འདུས་ཛཿ ཧཱུྃ་བྃ་ཧོཿ རང་ལ་གཉིས་སུ་མེད་པར་ཐིམ། དེའི་རྐྱེན་གྱིས་སྤྱི་བོར་བཀའ་བརྒྱུད་བླ་མ། སྙིང་གར་འཁོར་ལོ་སྡོམ་པ། ཡན་ལག་ཚིགས་བཞི་དང་རྩ་དང་བ་སྤུའི་བུ་ག་ཐམས་ཅད་ལ་དཔའ་བོ་དང་རྣལ་འབྱོར་མ་ཆོས་སྐྱོང་སྲུང་མའི་ཚོགས་ཏེ། མདོར་ན་ལུས་རང་བཞིན་གྱིས་གྲུབ་པའི་དཀྱིལ་འཁོར་ཐམས་ཅད་གསལ་ཞིང་རྫོགས་པར་གྱུར་པར་བསམ་པ་ནི་སྣོད་བཅུད་སྦྱང་སྒྱུར་དང་ཡེ་ཤེས་པ་གཞུག་པ་སྒྲུབ་པའི་ཡན་ལག་གོ །ཕཻཾ་ཕཻཾ། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས་རང་བཞིན་གྱི་གནས་ནས་བླ་མ་དང་གཉིས་སུ་མེད་པའི་དབང་གི་ལྷ་རིགས་ལྔ་འཁོར་དང་བཅས་པ་ༀ་བཛྲ་ས་མཱ་ཛཿ ༀ་པཉྩ་ཀུ་ལ་ས་པཱ་རི་ཝཱ་ར་ཨརྒྷཾ་སོགས་ཀྱིས་མཆོད། བཅོམ་ལྡན་འདས་རིགས་ལྔ་འཁོར་དང་བཅས་པས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ས་མ་ཡ་ཤྲཱི་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང༌། དྲི་མ་དག །ཆུའི་ལྷག་མ་སྤྱི་བོར་འཁྱིལ་བ་ལས་རྡོ་རྗེ་འཆང་ཡབ་ཡུམ་གྱིས་དབུར་བརྒྱན་པར་བསམ་པ་ནི་དབང་བསྐུར་ཞིང་རིགས་ཀྱི་བདག་པོས་རྒྱས་འདེབས་པ་སྒྲུབ་པ་ཆེན་པོའི་ཡན་ལག་གོ །དེ་ལྟར་ཡན་ལག་བཞིའི་ཚུལ་གྱིས་ལྷ་ཡི་སྐུ་གསལ་བཏབ་ནས་སེམས་འཛིན་པའི་ཚུལ་ལ་གསུམ་ལས། དང་པོ་རྣམ་པ་གསལ་བ་ནི། ཐོག་མར་སྤྱན་དབུས་མ་ལྟ་བུ་ལ་མཚོན་ན་དཀར་ནག་སོ་སོར་མ་འདྲེས་ཤིང་སྐབས་ཕྱེད་པ། སྤྱན་རྩ་དམར་ཞིང་སྡང་མིག་ཏུ་གཟིགས་པ། གསལ་ཞིང་དོད་ལ་ངོས་གཟུང་མེད་པ་ལ་ཡིད་གཏད་དེ་རྣམ་རྟོག་གཞན་གྱིས་བར་མ་ཆོད་པ་རྩེ་གཅིག་ཏུ་བསྒོམ། མི་གསལ་ན་ངག་ཏུ་བརྗོད་པའི་མ་བྲིས་པའི་སྤྱན་དབུས་མ་ལ་བལྟ་ཞིང་ཡིད་ཡུལ་དུ་འཆར་བ་ན་སེམས་བཟུང༌། ཚུལ་དེ་བཞིན་གྱིས་སྤྱན་གསུམ་སྨིན་མ་དང་བཅས་པ་དང༌། ཞལ་ཡོངས་རྫོགས་སོགས་ནས་མཐར་སྐུ་མདོག་ཕྱག་མཚན་རྒྱན་ཆ་ལུགས་གསལ་རྫོགས་མ་འདྲེས་པར་སེམས་བཟུང་བ་དང༌། དེ་ལས་ཀྱང་དུ་མར་སྤྲོ་ཞིང་གཅིག་ཏུ་བསྡུ་བ་དང༌། སྐུ་ཆེ་ཆུང་མ་ངེས་པར་བསྒོམ་པ་སོགས་ཀྱིས་རྩལ་སྦྱངས་ཤིང་གསལ་བརྟན་ཐོབ་པར་བྱའོ། །གཉིས་པ་རྣམ་དག་དྲན་པ་ནི། དོན་དམ་པར་སྣོད་བཅུད་ཐམས་ཅད་གཟོད་མ་ནས་ལྷ་དང་ཡེ་ཤེས་ཀྱི་ངོ་བོར་རྣམ་པར་དག་ཅིང༌། ཀུན་རྫོབ་དཀྱིལ་འཁོར་གྱི་འཁོར་ལོ་བསྒོམ་པའང༌། ས་བཅུ། ལམ་ལྔ། སྐུ་དང་ཡེ་ཤེས་སོགས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་ངོ་བོར་དྲན་པས་ཐ་མལ་གྱི་སྣང་ཞེན་སྦྱང་ངོ༌། །གསུམ་པ་ང་རྒྱལ་བརྟན་པ་ནི། རྣམ་པ་གསལ་རུང་མི་གསལ་རུང༌། སེམས་ཀྱི་གཤིས་ཅི་ཡང་མ་ཡིན་པའི་རང་རྩལ་སྐུ་དང་ཡེ་ཤེས་མཁའ་ཁྱབ་ཏུ་འཆར་བའི་ཕྱིར། འབྲས་དུས་ཀྱི་ཡོན་ཏན་ཐམས་ཅད་རྫོགས་པའི་དཔལ་འཁོར་ལོ་སྡོམ་པ་དེ་ཉིད་ང་ཡིན་ནོ་སྙམ་པའི་ང་རྒྱལ་བརྟན་པོ་བཟུང་བར་བྱའོ། །དོན་གཉིས་པ་ལོངས་སྐུ་ཟུང་འཇུག་གི་རྣལ་འབྱོར་ལ་གསུམ་ལས། དང་པོ་མཆོད་བསྟོད་ནི། ཁམས་གསུམ་གྱི་སེམས་ཅན་ཐམས་ཅད་གཟུགས་དང་ལང་ཚོའི་ཉམས་འགྱུར་ཕུན་སུམ་ཚོགས་པའི་རྡོ་རྗེ་ལྷ་མོར་གྱུར་པས་རང་ལ་མཆོད་ཅིང་བསྟོད་པར་བསམ་པས། ༀ་ཤྲཱི་ཧེ་རུ་ཀ་ཙཀྲ་སམྦ་ར་བཱི་ར་ཡོ་གི་ནཱི་ས་པ་རི་ཝཱ་ར་མ་ཧཱ་ཨརྒྷཾ་དང༌། པུཥྤེ་སོགས་ཀྱིས་ཉེར་སྤྱོད་དང༌། ༀ་ཨཱཿ རཱུ་པ་བཛྲཱེ་ཧཱུྃ། སོགས་ཀྱིས་འདོད་ཡོན་ཏེ། ཕྱི་མཆོད་དང༌། ༀ་ཨཱཿ ཧཱུྃ་གིས་ནང་མཆོད། ལྷ་མོ་རྣམས་ཀྱིས་སྐུ་ལ་འཁྱུད་པས་སྙོམས་འཇུག་གི་བདེ་བ་སྐྱོད་པ་གསང་མཆོད། དེ་ཁོ་ན་ཉིད་ལ་བློ་བཞག་པ་བླ་ན་མེད་པའི་མཆོད་པ་རྣམས་ཀྱིས་མཆོད། ཡབ་ཡུམ་གྱི་རྐང་བརྒྱད་དམ། ཆོས་དབྱིངས་རྣམ་དག་ངང་ལས་མ་གཡོས་ཀྱང༌། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་བསྟོད། །ཅེས་དང༌། དཔའ་ལྡན་རྡོ་རྗེ་མཁའ་འགྲོ་མ། །སོགས་རྡོ་རྗེའི་གླུས་བསྟོད་ནས་ལྷ་མོ་རྣམས་ལ་ཐིམ་པར་བསམ། གཉིས་པ་བཟླས་པ་ནི། བྱིན་གྱིས་བརླབས་པའི་ཕྲེང་བ་བཟུང་སྟེ། རང་གི་སྙིང་གར་ཡེ་ཤེས་སེམས་དཔའི་ཐུགས་དབུས་སུ་ཨ་བ་དྷཱུ་ཏིའི་རང་བཞིན་གྱི་པདྨ་སྔོན་པོ་འདབ་མ་བརྒྱད་པའི་ཟེའུ་འབྲུ་ལ་གནས་པའི་ཁམས་དཀར་ཆ་ཟླ་བ་དང༌། དམར་ཆ་ཉི་མའི་དཀྱིལ་འཁོར་གྱི་སྟེང་དུ་རླུང་སེམས་གཉིས་མེད་ཀྱི་ངོ་བོ་ཧཱུྃ་སྔོན་པོའི་འོད་ཀྱིས་ནམ་མཁའི་ཁམས་ཐམས་ཅད་འགེང་ནུས་པ་དེའི་མཐར་ཐིག་ལེ་དཀར་དམར་འདྲེས་པ་ལས། ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊ། ཅེས་ཉེ་སྙིང་དང༌། ༀ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱ་ཀི་ནཱི་ཛྲྭ་ལ་སམྦ་རཾ་སྭཱ་ཧཱ། ཞེས་སྙིང་པོའི་སྔགས་ཕྲེང་གཡས་བསྐོར་དུ་འཁོར་བ༑ ཡུམ་གྱི་ཐུགས་ཀར་པད་ཟླ་ཉི་མའི་སྟེང་དུ་བཾ་དམར་པོའི་མཐར། ༀ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནི་ཡཻ་ཧཱུྃ་ཧཱུྃ་ཕཊ། ཞེས་ཉེ་སྙིང་དང༌། ༀ་བཛྲ་བཻ་རོ་ཙ་ནཱི་ཡཻ་ཧཱུྃ་ཧཱུྃ་ཕཊ། ཞེས་སྙིང་པོའི་སྔགས་གཡོན་བསྐོར་དུ་འཁོར་བ་ལ་སེམས་གཏད་དེ་བཟླ་བ་ངག་བཟླས་དང༌། དེའི་ཚེ་སྔགས་ཕྲེང་ལས་འོད་ཟེར་མཁའ་ཁྱབ་ཏུ་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཕྲིན་ལས་རྣམ་བཞི་ཐོགས་མེད་དུ་འགྲུབ་པར་བསམ་ལ་བཟླ་བ་ནི་སྤྲོ་བསྡུའི་བཟླས་པའོ། །མཐར་དབྱངས་གསལ་དང་རྟེན་སྙིང་ཚར་གསུམ་རེས་སྔགས་ཀྱི་ལྷག་ཆད་ཁ་བསྐང་ཞིང་བྱིན་རླབས་བརྟན་པར་བྱས་ནས། སྔར་བཞིན་མཆོད་ཅིང་བསྟོད་ལ། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་བཏབ། གསུམ་པ་ཟུང་འཇུག་གི་རྣལ་འབྱོར་དངོས་ནི་འོག་ཏུ་བཤད་པའི་དབང་གཉིས་པ་དང་གསུམ་པའི་ལམ་སྟེ་འདིར་ཡང་ཇི་ལྟར་རིགས་པར་བསྒོམ་མོ། །དོན་གསུམ་པ་ཆོས་སྐུ་འོད་གསལ་གྱི་རྣལ་འབྱོར་ནི། ཐུན་བསྡུ་བའམ། ནུབ་མོ་ཉལ་བའི་ཚེ། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་སྲུང་བའི་འཁོར་ལོ་ལ་ཐིམ། སྲུང་བའི་འཁོར་ལོ་དུར་ཁྲོད་བརྒྱད་ལ་ཐིམ། དུར་ཁྲོད་བརྒྱད་སྤྲུལ་པའི་འཁོར་དང་བཅས་པ་རང་ལ་ཐིམ། རང་ཐུགས་ཀའི་ས་བོན་ལ་ཐིམ། དེ་ཡང་མི་དམིགས་པ་འོད་གསལ་སྟོང་པ་ཉིད་ཀྱི་ངང་དུ་གྱུར་པར་བསམ་ལ་དབྱིངས་རིག་བསྲེས་ཏེ་དབང་བཞི་པའི་ཡེ་ཤེས་ཕྱག་རྒྱ་ཆེན་པོའི་ངང་དུ་མཉམ་པར་བཞག །སྤྱོད་ལམ་ལ་འཇུག་པ་ན། སླར་ཡང་རང་སྐད་ཅིག་གིས་བདེ་མཆོག་ལྷན་ཅིག་སྐྱེས་པ་གོ་ཆའི་ལྷ་དང་བཅས་པར་གསལ་བའི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོས་མཚན་པར་མོས་ཏེ། དགེ་བ་འདི་ཡིས་མྱུར་དུ་བདག །བདེ་མཆོག་འཁོར་ལོ་འགྲུབ་གྱུར་ནས། །སོགས་བསྔོ་སྨོན་གྱིས་རྒྱས་བཏབ་བོ། །དེ་རྣམས་ཀྱང་ཅུང་ཟད་རྒྱས་པའི་དབང་དུ་བྱས་པ་ཡིན་གྱི། ཤིན་ཏུ་བསྡུས་པ་ལྷན་སྐྱེས་ཀྱི་རྣལ་འབྱོར་དངོས་ནི། སྐྱབས་སེམས་ཚད་མེད་བཞི་བསྒོམ་པས་བསོད་ནམས་ཀྱི་ཚོགས་དང༌། ཤཱུ་ནྱ་ཏཱས་ཉམས་ལེན་སྟོང་ཉིད་ལ་བློ་འཇོག་པས་ཡེ་ཤེས་ཀྱི་ཚོགས་བསགས་ཏེ། སྟོང་པའི་ངང་ལས་སྣོད་བཅུད་ཐམས་ཅད་ཆོས་འབྱུང་ཁ་སྦྱོར་དང་རྡོ་རྗེ་སྲུང་བའི་གུར་ཁང་ཆེན་པོའི་དབུས་སུ་སྣ་ཚོགས་རྡོ་རྗེའི་ལྟེ་བར་པད་ཉི་འཇིགས་བྱེད་དུས་མཚན་དང་བཅས་པའི་གདན་གྱི་སྟེང་དུ་བདག་ཉིད་སྐད་ཅིག་གིས་བཅོམ་ལྡན་འདས་འཁོར་ལོ་བདེ་མཆོག་སོགས་ཡན་ལག་བཞི་རྫོགས་སམ། ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པར་གྱུར། ཞེས་པའི་བར་གྱིས་དམ་ཡེ་དབྱེར་མེད་དུ་གསལ་བཏབ་པའི་ཐུགས་ཀར་སྔགས་ཕྲེང་བཀོད་ལ་བཟླས་པ་ལ་འཇུག་པས་ཀྱང་རུང་ངོ༌། །གཉིས་པ་རྗེས་ཐོབ་ཐུན་མཚམས་ཀྱི་རྣལ་འབྱོར་ནི། སྤྱོད་ལམ་སོགས་ལ་འཇུག་པའི་ཚེ་ནའང་ཕྱི་སྣོད་ཀྱི་འཇིག་རྟེན་གཞལ་ཡས་ཁང་དང༌། ནང་རང་དང་བཅུད་ཀྱི་སེམས་ཅན་ཐམས་ཅད་ཡི་དམ་ལྷ་ཡི་ང་རྒྱལ་དང་མ་བྲལ་བའི་ངང་ནས་བཟའ་བཏུང་དང༌། གོས་རྒྱན་སོགས་འདོད་ཡོན་རྣམས་ལྷ་ལ་ལྷས་མཆོད་པ་དང༌། ཡེ་ཤེས་ལ་ཡེ་ཤེས་ཐིམ་པའི་ཚུལ་གྱིས་ཞེན་པ་མེད་པར་ལོངས་སྤྱོད། རང་གི་སྒོ་གསུམ་གྱི་བྱ་བ་འགུལ་བསྐྱོད་ཕྱག་དང་བསྐོར་བ། སྨྲ་བརྗོད་གསང་སྔགས་ཀྱི་རང་སྒྲ། དྲན་རྟོག་འོད་གསལ་གཉུག་མའི་ངོ་བོར་ལམ་དུ་འཁྱེར། མཆོད་སྦྱིན་གཏོར་མའི་རྣལ་འབྱོར་ནི། ཅི་འབྱོར་པའི་གཏོར་མ་ཆང་ཆུ་ནང་མཆོད་ཀྱིས་བྲན་ལ་ནང་མཆོད་ལྟར་བྱིན་གྱིས་བརླབ། རང་གི་སྙིང་ག་ནས་འོད་ཟེར་འཕྲོས་པས་བླ་མ་ཡི་དམ་དཔའ་བོ་དང་རྣལ་འབྱོར་མ་ཆོས་སྐྱོང་དམ་ཅན་རྒྱ་མཚོ་སོགས་གཏོར་མའི་མགྲོན་དུ་གྱུར་པ་ཐམས་ཅད་ༀ་བཛྲ་ས་མཱ་ཛཿ པདྨ་ཀ་མ་ལཱ་ཡ་སྟཾ། ༀ་གུ་རུ་མཎྜ་ལ་དེ་ཝ་ཌཱ་ཀི་ནཱི་དྷརྨ་པཱ་ལ་བཛྲ་ཡོ་ག་ཡོ་གི་ནཱི་ས་པ་རི་ཝཱ་ར་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དང༌། ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་ཕུལ༑ གོང་གི་སྔགས་མཐར། ཨརྒྷཾ་སོགས་བཏགས་པས་ཕྱི་མཆོད་དང༌། ༀ་ཨཱཿ ཧཱུྃ་གིས་ནང་མཆོད་འབུལ། བསྟོད་པར་འོས་པ་ཐམས་ཅད་ལ། །སོགས་ཀྱིས་བསྟོད། མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་ཕྲིན་ལས་བཅོལ། རྟེན་ཡོད་ན་བརྟན་བཞུགས་དང༌། མེད་ན། བཛྲ་མུཿ ས་གཤེགས་སུ་གསོལ། ནུབ་མོ་ཉལ་བའི་ཚེ་ཆོས་སྐུའི་རྣལ་འབྱོར་གྱིས་གཉིད་ཀྱི་འོད་གསལ་ལ་འཇུག །ནངས་པར་ཡུལ་ཉེར་བཞིའི་དཔའ་བོ་དང་རྣལ་འབྱོར་མས་ཌཱ་མ་རུ་སྔགས་ཀྱི་གདངས་སུ་བསྒྲགས་པས་སད་པར་བསམ་ཞིང་སྐད་ཅིག་གིས་ལྷའི་སྐུར་ལྡང༌། རྣལ་འབྱོར་གྱི་གྲོགས་སུ་འགྲོ་ན་དབང་གི་ལྷས་ཡེ་ཤེས་ཀྱི་བདུད་རྩིས་དབང་བསྐུར་བའི་མོས་པས་ཁྲུས་བྱ། སླར་ཡང་སྔོན་འགྲོ་ནས་བརྩམས་ཏེ་ཇི་སྐད་བཤད་པའི་རིམ་པ་རྣམས་ཐུན་བཞི་སོགས་སུ་འབད་པ་དྲག་པོས་ཉམས་སུ་བླང་བར་བྱའོ། །གཉིས་པ་ཡུམ་བཀའ་བསྡུས་པ་ལྷན་ཅིག་སྐྱེས་མའི་རྣལ་འབྱོར་གྱི་ཁྱད་པར་ནི། སྲུང་འཁོར་སྔར་བཞིན་གསལ་བཏབ་ལ། དེའི་ནང་དུ་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་སོགས་ནས། གདན་གྱི་སྟེང་དུ་རང་གི་རྣམ་ཤེས་ཀྱི་ངོ་བོ་ཡི་གེ་བྃ་དམར་པོ། དེ་ལས་འོད་ཟེར་དམར་པོ་དཔག་ཏུ་མེད་པ་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རང་ཉིད་རྡོ་རྗེ་རྣལ་འབྱོར་མ་གཅེར་བུ་སྐུ་མདོག་དམར་པོ་ཞལ་གཅིག་ཕྱག་གཉིས་མ༑ གཡས་གྲི་གུག་ཐུར་དུ་བཟུང་ནས་གདུག་པ་ཅན་རྣམས་ལ་བསྡིག་ཅིང༌། གཡོན་བདུད་བཞིའི་ཁྲག་གིས་གང་བའི་ཐོད་པ་ཐུགས་ཀར་གཏོད་དེ་འཛིན་པའི་གྲུ་མོ་ན་ཡབ་ཧེ་རུ་ཀ་མཚོན་པའི་ཁ་ཊྭཱཾ་ག་འཆང་བ་ལ་དམར་ལ་འཁྱུག་ཅིང་མཛེས་ལ་ཡངས་པའི་སྤྱན་གསུམ་ཟུར་གྱིས་གཟིགས་ཤིང་ཁྲོ་ལ་འཛུམ་པའི་ཞལ་མཆེ་བ་ཅུང་ཟད་གཙིགས་པ། དྲི་ཞིམ་ལི་བའི་དབུ་སྐྲ་སིལ་བུའི་སྟོད་ཆ་གྱེན་དུ་བརྫེས་པའི་རྩེར་འཁོར་ལོ་དང་མེ་ཏོག་གི་ཕྲེང་བས་མཚན་ཅིང་སྨད་ཆ་ཐུར་དུ་གྲོལ་བས་སྐུ་སྐེད་ནོན་པ། ཞབས་གཡས་བརྐྱང་བས་འཇིགས་བྱེད་ནག་པོའི་སྙིང་ག་མནན་ཞིང༌། གཡོན་ཅུང་ཟད་བསྐུམ་པས་དུས་མཚན་དམར་མོའི་ནུ་ཕྲག་མནན་པའི་རོལ་སྟབས་ཀྱིས་བཞུགས་པའི་སྐུ་ལ་མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ཁྲག་འཛག་པ་ལྔ་བཅུའི་དོ་ཤལ་ཅན། རུས་པའི་ཕྱག་རྒྱ་ལྔས་མཛེས་པ། གཟུགས་དང་ལང་ཚོ་དར་ལ་བབས་ཤིང༌། བྷ་ག་དང་ནུ་མ་རབ་ཏུ་རྒྱས་ལ་སྐེད་པ་ཕྲ་བ། བདེ་བ་ཆེན་པོས་རྣམ་པར་མྱོས་པའི་ཆ་བྱད་ཅན་སྣང་ལ་རང་བཞིན་མེད་པའི་སྐུའི་འོད་ཀྱིས་འཇིག་རྟེན་གྱི་ཁམས་ཐམས་ཅད་འགེང་ནུས་པ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་སུ་བྱོན་ཅིང་སྐྱེ་འགྲོ་ཀུན་གྱི་ཡིད་འཕྲོག་པའི་བདག་ཉིད་མ། བ་སྤུའི་བུ་ག་ཐམས་ཅད་ནས་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པར་གྱུར། རང་གི་ཐུགས་ཀའི་བཾ་ལས་འོད་ཟེར་སྐུ་དང་སོགས་ནས། དཔག་ཏུ་མེད་པས་གང་བར་གྱུར། གཙོ་འཁོར་ཐམས་ཅད་ཀྱི་ལྟེ་བར་ༀ་བྃ་ལས་ཕག་མོ་དམར་སོགས་ནས་བཞུགས་པ། དེ་ཐམས་ཅད་ཀྱང་མེ་ལོང་ནང་གི་སོགས་ནས། སངས་རྒྱས་བྱང་སེམས་ཐམས་ཅད་རྡོ་རྗེ་རྣལ་འབྱོར་མའི་རྣམ་པར་ཚུར་འདུས་ཛཿ ཧཱུྃ་བཾ་ཧོཿ རང་ལ་གཉིས་སུ་མེད་པར་ཐིམ། དེའི་རྐྱེན་གྱིས་སོགས་ནས། སྤྱི་བོར་འཁྱིལ་བ་ལས་རྣམ་པར་སྣང་མཛད་ཡབ་ཡུམ་གྱིས་དབུར་བརྒྱན། ༀ་བྷ་ག་ཝ་ཏཱི་བཛྲ་ཝཱ་ར་ཧཱི་ས་པ་རི་ཝཱ་ར་ཨརྒྷཾ་སོགས་ཕྱི་མཆོད་དང༌། ༀ་ཨཱཿ ཧཱུྃ་གིས་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། །སོགས་ཀྱིས་བསྟོད། རང་གི་སྙིང་གར་དྷཱུ་ཏིའི་རང་བཞིན་གྱི་པདྨ་སྔོན་པོ་འདབ་མ་བརྒྱད་པའི་ཟེའུ་འབྲུར་བྱང་སེམས་དཀར་དམར་ཉི་ཟླའི་གདན་གྱི་སྟེང་དུ་རླུང་སེམས་དབྱེར་མེད་ཀྱི་ངོ་བོ་བྃ་དམར་པོའི་མཐར་ཐིག་ལེ་དཀར་དམར་འདྲེས་པ་ལས། ༀ་སརྦ་བུདྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡཻ་ཧཱུྃ་ཧཱུྃ་ཕཊ། ཞེས་ཉེ་སྙིང་དང༌། ༀ་བཛྲ་བཻ་རོ་ཙ་ནཱི་ཡཻ་ཧཱུྃ་ཧཱུྃ་ཕཊ། ཅེས་སྙིང་པོའི་སྔགས་ཕྲེང༌གཡོན་བསྐོར་དུ་འཁོར་བ་ལ་སེམས་གཏད་དེ། ངག་བཟླས་དང༌། སྤྲོ་བསྡུའི་བཟླས་པ་བྱ། ཐུན་མཐར་མཆོད་བསྟོད་གསོལ་གདབ་རྫོགས་རིམ། ཐུན་མཚམས་ཀྱི་རྣལ་འབྱོར་སོགས་སྔར་བཤད་པ་བཞིན་ལ་དམིགས་བསལ་གྱི་ཁྱད་པར་ཅུང་ཟད་དང་བཅས་ཏེ་ཉམས་སུ་བླང་ངོ༌། །ཡང་ཤིན་ཏུ་བསྡུས་པ་ལ་མོས་ནའང༌། སྐྱབས་སེམས་ཚད་མེད་ཀྱི་རྗེས། སྐད་ཅིག་དྲན་རྫོགས་སུ་བསྐྱེད་ཚུལ་སོགས་ཡབ་བཀའི་འགྲོས་ལྟར་སྦྱར་བ་ཉིད་དོ། །ཞར་ལ་བསྙེན་པ་བྱེད་ཚུལ་གྱི་ལག་ལེན་ཅུང་ཟད་བཤད་ན། མར་ངོའི་ཚེས་བཅུ་སོགས་དུས་ཚེས་ཤིས་པའི་ཉིན་གནས་དབེན་པར་བདེ་མཆོག་ཡབ་ཡུམ་གྱི་བྲིས་སྐུ་དང༌། དེའི་མདུན་དུ་གཏོར་མ་དང་མཆོད་པའི་བྱེ་བྲག་ཇི་ལྟར་འབྱོར་པ་བཤམ། གཞན་ཡང་དགོས་པའི་ཡོ་བྱད་རྣམས་ཚགས་སུ་ཚུད་པར་བྱ། དེ་ནས་སྔོན་གཏོར་བཏང༌། སྒོ་དྲུང་དུ་ཐོ་བརྟན་པོར་བཙུག །ནང་དུ་ལོག་ལ་སྲུང་འཁོར་ནན་ཏན་གྱིས་གསལ་བཏབ་རྗེས། སྲོད་ཐུན་ནས་མགོ་བརྩམས་ཏེ་བརྒྱུད་འདེབས་དང༌། གནས་ཡོ་བྱིན་རླབས་སྐྱབས་སེམས་ནས་བཟུང་བདག་བསྐྱེད་བཟླས་པའི་བར་དང༌། བཟླས་པ་འོས་མཚམས་ཀྱི་མཐར་མཆོད་བསྟོད་གསོལ་བ་གདབ། གཏོར་མ་འབུལ། རྫོགས་རིམ་གྱི་རྣལ་འབྱོར་གྱིས་གཉིད་ཀྱི་འོད་གསལ་ལ་འཇུག །ནངས་པར་ལྡང་བའི་རྣལ་འབྱོར་གྱིས་ལྡང༌། སྔོན་འགྲོ་རྒྱས་པ་སྔར་བཏང་གྲུབ་ན་འདིར་མི་དགོས་ཤིང༌། མ་གྲུབ་ན་སྐྱབས་འགྲོ། ཡིག་བརྒྱ། མཎྜལ། གསོལ་འདེབས་རྣམས་རབ་རྟགས་མཐོང༌། འབྲིང་འབུམ་ཐེར། ཐ་མའང་ཁྲི་རེ་ལས་མི་ཉུང་བར་རིམ་པར་བསགས་པའི་ཐུན་མཚམས་རྣམས་སུ་ལྟུང་བ་བཤགས་པ་དང་སྦྲགས་ཏེ། ཕྱག་འབུམ་ཐེར་ཀྱང་འགྲོ་བར་བྱ། དེ་ནས་དངོས་གཞི་ལ་ཐུན་བཞིའི་རིམ་པས་བདག་བསྐྱེད་གཏོང་ཞིང༌། བཟླས་དམིགས་ངག་བཟླས་དང༌། སྤྲོ་བསྡུའི་བཟླས་པ་གཉིས་ལ་གཙོ་བོར་བྱ། གཞན་རླུང་འགྲོ་འོང་གནས་གསུམ་སྔགས་སུ་ཤེས་པའི་སྒོ་ནས་དམིགས་པ་དང་བཅས་ཏེ་བགྲང་བ་རགས་པ་རྡོ་རྗེའི་བཟླས་པ། ཡབ་ཡུམ་སྙོམས་པར་འཇུག་པའི་མཁའ་གསང་ལས་སྔགས་ཐམས་ཅད་འཁོར་བར་བསམས་ཏེ་བཟླས་པ་དོ་ལིའི་བཟླས་པ། དམིགས་པ་དེ་དང་བཅས་ཏེ་རླུང་བུམ་ཅན་བཟུང་ནས་སྔགས་བཟླ་བ་སྤྲོས་མེད་འགོག་པའི་བཟླས་པ། ཡིད་ཀྱི་ཏིང་ངེ་འཛིན་ཁོ་ན་ལས་མཆུ་སོར་རླུང་སྦྱོར་གཉིས་ཀ་སྤངས་ཏེ་བཟླ་བ་ཤིན་ཏུ་སྤྲོས་མེད་ཡིད་ཀྱི་བཟླས་པ། ངལ་གསོ་ཚེ་གནས་ལུགས་ཀྱི་ངང་ལ་འཇོག་པ་དོན་དམ་སྐྱེ་མེད་རྡོ་རྗེའི་བཟླས་པ་རྣམས་ཀྱང་ཇི་ལྟར་རིགས་པ་ཉམས་སུ་བླང༌། གྲངས་ཡབ་བཀའ་ལ་རབ་ཉེ་སྙིང་དང༌། སྙིང་པོ་གཉིས་ཀ་འབྲུ་འབུམ། འབྲིང་ཉེ་སྙིང་འབྲུ་འབུམ་དང༌། སྙིང་པོ་བཞི་འབུམ། ཐ་མ་ཉེ་སྙིང་བཞི་འབུམ་དང༌། སྙིང་པོ་ཉིས་འབུམ་རྣམས་ཁ་སྐོང་དང་བཅས་པ་བཟླ་ཞིང་ཡུམ་གྱི་ཉེ་སྙིང་ཡང་སུམ་འབུམ་བཞི་ཁྲི་བཟླའོ། །ཡུམ་རྐྱང་ལ་བསྙེན་པ་བྱེད་ན་ཉེ་སྙིང་སུམ་འབུམ་བཞི་ཁྲི་དང༌། སྙིང་པོ་བཞི་ཁྲིའོ། །ཐོར་ཐུན་མ་གཏོགས་པའི་ཐུན་གསུམ་ཀའི་རྗེས་སམ། མ་བྱུང་ཡང་ཕྱི་ཐུན་གྱི་མགོར་གནས་ཡོ་བྱིན་རླབས་དང༌། མཇུག་ཏུ་གཏོར་མ་བསྔོ། ཚེས་བཅུ་རྣམ་གཉིས་སོགས་དུས་ཁྱད་པར་ཅན་གྱི་ཚེ་ཚོགས་ཀྱི་མཆོད་པའང་བྱ། ཐུན་མཚམས་ཀྱི་རྣལ་འབྱོར་སོགས་སྔར་སྨོས་པ་ལྟར་ལ། བཟླས་པའི་གྲངས་ཐེམས་ནས་ལྷག་ཆད་ཁ་སྐོང་ཞི་བའི་སྦྱིན་སྲེག་སྔགས་ཀྱི་བཅུ་ཆ་བྱ་བའམ། མ་གྲུབ་ན་ཡི་གེ་བརྒྱ་པ་དེ་སྙེད་བཟླ། གཏོང་རག་གི་ཚུལ་དུ་སྒྲུབ་ཅིང་མཆོད་པ་དང༌། དབང་བླང་བ་དང༌། ཆོས་སྲུང་གི་སྐོང་བཤགས་དང༌། ཚོགས་ཀྱི་མཆོད་པ་སོགས་རྒྱས་པར་བསྟར་ནས་ཡར་ངོའི་དུས་དགེ་བའི་སྔ་དྲོའི་ཆར་ནང་མཚམས་ལས་གྲོལ་ལ། རིམ་གྱིས་གྲོགས་དམ་ཚིག་དང་ལྡན་པ་སོགས་དང་འཕྲད། གཞན་ཡང་སྤང་བླང་གི་རིམ་པ་དང༌། དམིགས་པའི་རྟེན་གོམས་པ་རྣམས་བསྙེན་ཡིག་སྤྱི་འགྲོ་ལྟར་ཤེས་པར་བྱའོ། །གཉིས་པ་གཙོ་བོར་གསང་དབང་གི་ལམ་སྟེང་སྒོ་རྣམ་པར་གྲོལ་བ་ཆོས་དྲུག་གི་རྣལ་འབྱོར་ལ་དྲུག་ལས༑ དང་པོ་གཏུམ་མོ་བདེ་དྲོད་རང་འབར་གྱིས་ལམ་གྱི་གཞུང་བསྲང་བ་ལ། ཐོག་མར་ཡབ་ཡུམ་གཉིས་ཀའམ། ཡུམ་བཀའ་ལྷན་ཅིག་སྐྱེས་མའི་བསྐྱེད་བཟླས་མཐར་ཕྱིན་པ་སྔོན་དུ་འགྲོ་བས། རྣལ་འབྱོར་དངོས་ལ། ཕྱི༑ ནང༌། གསང་བ། དེ་ཁོ་ན་ཉིད་ཀྱི་གཏུམ་མོ་སྟེ་བཞི་ལས། དང་པོ་ལའང་གཉིས་ཀྱི། དང་པོ་བཅའ་བ་ལུས་ཀྱི་གནད་ནི། ནམ་ཕྱེད་ནས་ནམ་ལངས་ཀྱི་བར་སོགས་ཁམས་སྙོམས་པའི་སྐབས་སུ། རླུང་སྣ་བུག་གཡོན་ནས་རྒྱུ་བའི་ཚེ་ཐོག་མར་མགོ་བརྩམས་ཏེ། དེ་ཡང་བདེ་བའི་སྟན་ལ་ལུས་གནད་རྣམ་སྣང་ཆོས་བདུན་སྤྱི་ལྟར་བཅའ། ལུས་སེམས་གཉིས་ཀ་དམ་ལྷོད་དུ་མ་སོང་བར་ཆ་ཆ་ནས་བསྒྲིམ། གཉིས་པ་དམིགས་པ་སེམས་ཀྱི་ལྟ་སྟངས་ལ་གསུམ་ལས། དང་པོ་སྒྱུ་མ་ལྷ་ཡི་སྟོང་ར་ནི། དེའི་ངང་ལས་སྐྱབས་སེམས་ནས་བླ་མའི་རྣལ་འབྱོར་གྱི་བར་བློ་རྒྱུད་དང་འདྲེས་ངེས་སུ་བྱས་པའི་མཐར། རང་ཡི་དམ་རྡོ་རྗེ་རྣལ་འབྱོར་མར་གསལ་བའི་ལུས་ཀྱི་ནང་ནས་སོར་མོའི་རྩེ་མོ་ཚུན་ཆད་ཕྲུ་མ་ཕུས་བཏབ་པ་ལྟར་སྟོང་གསལ་འོད་ཀྱི་རང་བཞིན་ཅན་དུ་གསལ་བཏབ་ལ། རླུང་རྒྱུ་བ་གཡས་གཡོན་གང་བདེའི་ཕྱོགས་ཀྱི་ལག་པ་རྡོ་རྗེ་ཁུ་ཚུར་གྱི་མཛུབ་མོས་རང་ཕྱོགས་ཀྱི་སྣ་བུག་བཀག །མི་བདེ་བའི་ཕྱོགས་ཀྱི་སྣ་ནས་དབུས་ཅུང་རགས་ལ་ཐོག་མཐའ་གཉིས་ཕྲ་བ་ནས་ཀྱི་དབྱིབས་ལྟ་བུ་དལ་བ་རིང་བ་ཁོང་འདར་མ་ཐོན་གྱི་བར་དུ་རླུང་ཞབས་མ་ལུས་པར་ལན་གསུམ་དུ་ཕུད་ལ་ཅུང་ཟད་ཕྱིར་བཞག །དེ་བཞིན་གཞན་ཕྱོགས་ལའང་བྱ་ཞིང་ཕྱིར་འབུད་དུས་སྟོང་འདྲེན་དུ་སོང་ན་ཚེ་ལ་གཟན་པས་རྒྱུ་ཞབས་ནན་ཙམ་བྱ། རྗེས་སུ་ལག་པའི་མཐེ་བོང་གཉིས་ཀྱིས་སྲིན་ལག་གི་འདྲེ་རྩ་མནན་པའི་རྡོ་རྗེ་ཁུ་ཚུར་བརླ་སྟེང་དུ་ཁ་སྦུབས་ནས་བཞག་སྟེ་སྣ་བུག་གཉིས་ཀ་ནས་ལན་གསུམ་སྟེ་རླུང་རོ་དགུ་ཕྲུགས་སུ་འབུད། དེའི་ཚེ་ཕྱིར་བསལ་བ་ན་ནད་གདོན་སྡིག་སྒྲིབ་ཐམས་ཅད་སྤྱི་བོ་ནས་དུད་པའི་རྣམ་པས་བུན་བུན་ཐོན། ནང་དུ་རྔུབ་པ་ན་སྲིད་ཞིའི་ཡོན་ཏན་ཐམས་ཅད་འོད་ཟེར་གྱི་རྣམ་པས་ཞུགས་པར་བསམ་ལ་ཤེས་པ་རྣལ་དུ་དབབ། དེ་ནས་རླུང་འབྱུང་འཇུག་སྔར་བཞིན་ལ། ནང་དུ་གནས་པའི་ཚེ་འོག་རླུང་ཅུང་ཟད་འཐེན་ཏེ་ཁ་སྦྱོར་དུ་ཐུབ་ཚད་བཟུང་བའི་འཇམ་རླུང་ཐུན་བཞི་བཞིའི་བར་ཡར་ལ་མི་བསོ་བར་མུ་མཐུད་དེ་བསྒོམས་པ་ལ་རླུང་བཞི་སྦྱོར་ཞེས་བྱ་སྟེ་འབྱོངས་ངེས་སུ་བསྐྱང་ངོ༌། །གཉིས་པ་དག་པ་རྩ་ཡི་སྟོང་ར་ནི། ལུས་ཀྱི་དབུས་དྲང་པོར་རྩ་དབུ་མ་ཁ་དོག་དམར་སེར་གྲོ་སོག་ཕྲ་མོ་ཙམ་པ། མར་སྣ་གསང་གནས་སུ་ཟུག་པ་དང༌། ཡར་སྣ་སྤྱི་བོར་ཟང་ཐལ་ལེ་ཟུག་པའི་སྟེང་དུ་བླ་མའི་རྣལ་འབྱོར་དཀྱུས་ལྟར་བསྒོམ། ལུས་གནད་གཞན་འདྲ་བ་ལ། ལག་པ་གཉིས་བསྡོམས་པའི་མཉམ་བཞག་སྐྱིལ་ཀྲུང་གི་སྟེང་དུ་བཞག་སྟེ་རླུང་སྔར་ལས་ཤུགས་དྲག་པས་སངས་ཀྱིས་བུས་ལ་ཕྱིར་ཐུབ་ཚད་བཞག །རྒྱུ་ཞབས་ནན་ཙམ་བྱ། མི་ཐུབ་པ་དང་དྲག་པོའི་ཚུལ་གྱིས་རྫོགས་པར་རྔུབ་རྗེས་ཁ་ན་གང་ཡོད་ཀྱི་མཆིལ་མ་ཁ་ཆང་གི་ཚུལ་དུ་རྔུབ་པ་བཅས་སྟེང་རླུང་ལྟེ་འོག་ཏུ་མནན་ནས་བཅུད་ལ་བོར་ཞིང༌། འོག་རླུང་ཡང་དྲག་ཏུ་འཐེན། བར་རླུང་ཐད་ཀར་བརྒྱང་ལ་དགང་བའི་སྦྱོར་བ་བྱ། དགང་བའི་རླུང་ཐོག་ཏུ་བསྐྱར་ཞིང་རྔུབས་ཏེ་འོག་རླུང་བསྒྲིལ་ནས་ཡང་ཡང་མཆིལ་མ་མིད་ཅིང་འཕོང་རྡེབ་པ་དང་བཅས་གཡས་གཡོན་དབུས་གསུམ་དུ་ཐུབ་ཐང་དུ་བསྡིག་ཅིང༌། མི་ཐུབ་པ་དང་ཐོག་མར་ནང་དུ་ཅི་ཐུབ་གཅིག་རྔུབ། དེ་ནས་ཀོང་ཀོ་བཏེགས་ཙམ་བྱས་ལ་ལྷག་མ་མ་ལུས་པར་ཕྱིར་འབུད་པ་ནི་དྲག་རླུང་སྦྱོར་བ་བཞི་ལྡན་ཏེ། དེའི་ཚེ་ཕྱིར་འབུད་པ་ན་སྤྱི་བོའི་བླ་མ་ཁྲུ་གང་ཙམ་གྱི་ནམ་མཁར་ཡེར་གྱིས་བྱོན་ཏེ་ནད་གདོན་སོགས་ཐོན་པ་དང༌། ནང་དུ་རྔུབ་པའི་ཚེ་སྲིད་ཞིའི་ཡོན་ཏན་བསྡུས་པའི་ཚེ་བླ་མ་སྔར་བཞིན་དུ་བཞུགས་པར་བསམ། དེ་ལྟར་བསྒོམས་པས་རླུང་ཐུན་རེ་བཞིན་དབུ་མ་གྲོ་སོག་སྦོམ་པ་ཙམ་དང༌། ནས་སོག་ཕྲ་སྦོམ་སོགས་ཀྱི་ཚད་ལྟར་ཇེ་སྦོམ་དུ་སོང་བའི་མཐར་ལྷ་སྐུའི་ནང་གི་སོར་མོའི་རྩེ་མོ་ཚུན་ཆད་རྩ་ཡི་སྟོང་རས་གང་སྟེ། ཕྱི་ནས་བལྟས་ན་ལྷ་སྐུ་དང༌། ནང་ནས་བལྟས་ན་རྩའི་སྟོང་རའི་རྣམ་པར་གྱུར་པར་བསྒོམ་མོ། །གསུམ་པ་བྱིན་རླབས་བླ་མའི་གཏུམ་མོ་ནི། སྤྱི་བོར་བླ་མའི་རྣལ་འབྱོར་སྔར་བཞིན་གསལ་བཏབ་ལ། དབུ་མ་སྦ་ལྕག་ཙམ་པའི་ལྟེ་འོག་སོར་བཞི་ལས་ཅུང་དམའ་བའི་ཐད་ནས་སྐྱེས་པའི་ཚུལ་གྱིས་གཡས་སུ་རོ་མ་དམར་ལ་དཀར་བའི་མདངས་ཅན། གཡོན་དུ་རྐྱང་མ་དཀར་ལ་སྔོ་བའི་མདངས་ཅན། གཉིས་ཀ་དབུ་མ་ལས་སུམ་འགྱུར་གྱིས་ཕྲ་བ། མར་སྣ་ཅུང་ཟད་འཁྱིལ་བའི་རྣམ་པ་ཅན་ཡི་གེ་ཆའི་འཕང་ལྟ་བུ། བར་དབུ་མ་ལྟར་དྲང་ཐལ་ལེ་བ༑ ཡར་སྣ་སྤྱི་བོའི་ཐོད་པ་ལ་སོར་གཉིས་མ་རེག་ཙམ་ནས་ཐུར་དུ་གུག་སྟེ་སྣ་བུག་གཉིས་སུ་ཟུག་པ་ཞིག་གསལ་བཏབ། དབུ་མའི་ནང་གི་ལྟེ་འོག་སོར་བཞིའི་ཐད་ཀྱི་ནང་ཐམས་ཅད་ཁེངས་ནུས་པའི་ཉི་མའི་དཀྱིལ་འཁོར་གྱི་སྟེང་དུ་རྩ་བའི་བླ་མ་གྲུབ་ཐོབ་ཀྱི་ཆ་ལུགས་ཅན་ཚོན་གང་བ། གཡས་རྡོ་རྗེ་ནམ་མཁར་བསྡིག་ཅིང༌། གཡོན་ཐོད་པ་བདུད་རྩིས་གང་བ་བསྣམས་པ། ཞབས་རྒྱལ་པོ་རོལ་པའི་སྟབས་ཀྱིས་བཞུགས་པ། མེའི་རང་བཞིན་ཅན་མེའི་འོད་ཕྲམ་ཕྲམ་འཕྲོ་བར་བསམ། དེ་ནས་བླ་མའི་སྐུ་ལས་བྱུང་བའི་འོད་ཟེར་དབུ་མའི་ལམ་ནས་ཐོན། འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་བླ་མ་ལ་ཐིམ་པས་སྐྱབས་གནས་ཀུན་འདུས་ཀྱི་ངོ་བོར་མོས་ལ། གསོལ་འདེབས་སྤྱི་དང༌། ཁྱད་པར། བླ་མ་རིན་པོ་ཆེས་བདག་ལ་གཏུམ་མོ་བདེ་དྲོད་ཀྱི་མེ་སྦར་དུ་གསོལ། ཡེ་ཤེས་ཀྱི་གཏུམ་མོའི་ཞུ་བདེ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞུ་བདེ་ལྷན་སྐྱེས་ཀྱི་ཡེ་ཤེས་རང་ངོ་འཕྲོད་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་ནས་རླུང་ནང་དུ་རྔུབ་པས་རོ་རྐྱང་གི་ལམ་བརྒྱུད། ཉི་གདན་དང་བླ་མའི་སྐུ་ལ་ཕོག་པས་དེ་ལས་འབར་བའི་མེས་དབུ་མ་དང་རོ་རྐྱང་གི་ནང་ཐམས་ཅད་ཁེངས། མཐར་རྩ་གསུམ་ཡང་མེར་འབར་བས་ལུས་ཀྱི་ནང་གང༌། ནད་གདོན་སྡིག་སྒྲིབ་ཐམས་ཅད་བསྲེག །དེ་ནས་རིམ་པར་གནས་ཁང༌། ལུང་པ། ཡུལ་གྲུ་སོགས་ནས་མཐར་འཇིག་རྟེན་གྱི་ཁམས་ཐམས་ཅད་ཀྱང་མེ་ལྕེ་གཅིག་ཏུ་འབར་བར་བསམ་ལ་རླུང་སྦྱོར་དང་སྦྲག །ཐུན་འཇོག་པ་ན་བླ་མ་གདན་དང་བཅས་པ་འོད་དུ་ཞུ་ནས་རྩ་གསུམ་དང་ལུས་ཐམས་ཅད་ལ་ཁྱབ་མཉམ་དུ་ཐིམ་པར་བསམ་ཞིང་སེམས་འཛིན་མེད་དུ་འཇོག །ཐུན་མཚམས་རྣམས་སུའང༌། ཟས་གོས་གནས་ཁང་སོགས་ཅིར་སྣང་ཐམས་ཅད་བླ་མའི་ངོ་བོ་མེའི་རྣམ་པར་ལམ་ལམ་གྱིས་གསལ་བཏབ་ལ་ལོངས་སྤྱོད་དོ། །འདི་ཡན་གྱི་ལམ་འདི་རྣམས་རེ་རེ་ནས་ཤིན་ཏུ་འབྱོངས་པ་བྱུང་ན། འོག་གི་དམིགས་པ་རྣམས་གནད་དུ་འགྲོ་ཞིང་གེགས་མི་འབྱུང་བ་ཡིན་པས་གལ་ཆེའོ་གསུངས། གཉིས་པ་ནང་གི་གཏུམ་མོ་ལ་གསུམ་ལས། དང་པོ་རྩ་ཡི་གཙོ་མོ་གཅིག་ལ་བརྟེན་པ་ནི། ལས་དང་པོ་བ་ལ་གེགས་ཅུང་ཟད་ཆེ་བས་འདིར་ཕྱག་ལེན་ལ་མི་མཛད། གཉིས་པ་རྩ་གསུམ་ལ་བརྟེན་པ་ནི། རྩ་གསུམ་སྔར་བཞིན་གསལ་བའི་ལྟེ་འོག་གི་དབུ་མའི་ནང་དུ་ཁམས་དམར་པོའི་དྭངས་མ་ཨ་ཤད་དམར་པོ་རྩ་བ་ཕྲ་བ་ཐུར་དུ་ཟུག་པ། ཚངས་བུག་གི་ནང་དུ་ཁམས་དཀར་པོའི་དྭངས་མ་ཧྃ་དཀར་པོ་མགོ་བོ་ཐུར་བསྟན་ཞིག་གསལ་ལ། སྤྱི་བོའི་བླ་མ་ལ་གསོལ་བ་བཏབ་ཅིང་རླུང་རྔུབ་པས་རོ་རྐྱང་གི་ལམ་བརྒྱུད། ཨ་ཤད་ལ་ཕོག་པས་མེ་འབར་ལ་ཁད་པ་དང༌། མེ་འབར་བས་ལྟེ་བ་མན་གང་བ་དང༌། དེ་ལས་མེ་ལྕེ་ཕྲ་མོ་རྟ་རྔ་ཙམ་པ་ཞིག་ཆད། དེ་སྤྱི་བོའི་ཧྃ་ལ་རེག །བྱང་སེམས་སྐྱ་ཆིལ་གྱིས་བབས། སྙིང་ག་ནས་སོར་བཞི་ཡན་གྱི་དབུ་མའི་ནང་ཐམས་ཅད་གང་བ་དང༌། དེ་ལས་ཀྱང་ཐིག་ལེའི་དྭངས་མ་བ་ཐག་ཙམ་པ་བྱུང༌། ཨ་ཤད་ལ་རེག་པས་མེ་ཆེར་འབར་བས་སྙིང་ག་ནས་སོར་བཞི་མན་ལ་ཁམས་འབབ་ཏུ་མི་སྟེར་ཞིང༌། དེ་ཡན་བྱང་སེམས་སྟོབས་རྒྱས་པས་མེ་འབར་མི་སྟེར་བར་བསམ་ལ་སོ་སོར་རླུང་སྦྱོར་དང་བཅས་ཏེ་བསྒོམ། མཐར་ལྟེ་སྙིང་གི་འབར་འཛག་ལ་སེམས་གཏད་དེ་ཁ་སྦྱོར་དུ་བཟུང༌། ཐུན་འཇོག་པ་ན། ལག་གཉིས་པུས་སྟེང་དུ་བཞག །ཁ་གཡས་སུ་གཅུ་བ་དང་རྐང་གཡས་གདན་ཁར་ཕབ་པས། གཏུམ་མོའི་མེ་ཧྃ་ལ་ཐུག་གི་བར་སོང་ནས་ལྟེ་སྙིང་གི་བར་དཀར་དམར་འདྲེས་པར་བསམ། འཁྲུལ་འཁོར་དེ་ལས་ལྡོག་པས་བྱང་སེམས་ཨ་ཤད་ལ་ཐུག་གི་བར་སོང་བས་དཀར་དམར་འདྲེས་པར་བསམ་ལ། རླུང་དཀྲུགས་དང་བཅས་ལུས་ཐམས་ཅད་དཀར་དམར་འདྲེས་པས་གང་བས་བདེ་དྲོད་བསམ་གྱིས་མི་ཁྱབ་པ་སྐྱེས་པར་མོས་ཏེ་ཐུན་མཚམས་རྣམས་སུའང་དེ་ཉིད་ཀྱི་ང་རྒྱལ་དང་མ་བྲལ་བར་བྱའོ། །གསུམ་པ་རྩ་གསུམ་འཁོར་ལོ་བཞི་ལ་བརྟེན་པ་ལའང་བཞི་ལས། དང་པོ་ཐིག་ལེ་ལ་བརྟེན་པ་ནི། རྩ་གསུམ་སྔར་བཞིན་ལ། སྙིང་ག་ནས་དབུ་མ་ལས་གྱེས་པའི་རྩ་འདབ་བཞི། དེ་ལས་རྩེ་མོ་གཉིས་སུ་གྱེས་པའི་བརྒྱད། ཚུལ་དེ་བཞིན་གྱིས་མགྲིན་པར་བཅུ་དྲུག །སྤྱི་བོར་སོ་གཉིས། ལྟེ་བར་དྲུག་ཅུ་རྩ་བཞི་དང་བཅས་པ་ཕྱི་དབྱིབས་ཀྱི་ལྷ་སྐུའི་པགས་པའི་བར་དུ་ཟུག་པའི་རྩེ་མོར་ཐིག་ལེ་དཀར་པོ་དངུལ་ཆུའི་རྡོག་མ་ལྟ་བུ་ཕྱེད་རྩ་ཡི་ཕྱི་དང༌། ཕྱེད་ནང་དུ་ནུབ་པ། སྟེང་འོག་ཏུ་ཨ་ཧྃ་དང༌། སྙིང་ཁའི་འདུས་སོ་ལས་ཅུང་དམའ་བར་ཧཱུྃ་སྔོན་པོ་མགོ་ཐུར་བསྟན་དང༌། མགྲིན་པར་ཨྃ་དམར་པོ་གྱེན་དུ་བལྟ་བ་རྣམས་གསལ་ལ་རླུང་སྦྱོར་དང་བཅས་ཨ་ཤད་ཀྱི་མེ་སྦར་བས་ལྟེ་བའི་རྩ་འཁོར་ནས་རིམ་པར་ཞུགས། ཐིག་ལེ་ལ་མ་རེག་ཙམ་ནས་ཐིག་ལེ་ལས་བདུད་རྩིའི་རྒྱུན་བབས་པས་མེ་མར་ལྡོག ༑རྩ་འདབ་རྣམས་ཀྱི་ཕྱེད་ཡན་ཐིག་ལེ་དང༌། མན་མེས་གང་བར་བསམ་ལ་རླུང་བཟུང༌། དེ་བཞིན་དུ་སྙིང་གར་སོན་པས་ཧཱུྃ་ཡང་མེའི་ཐིག་ལེ་ཟླུམ་པོར་གྱུར་པ་དང༌། མགྲིན་པ་ནས་ཨྃ་ཡང་དེ་བཞིན་གྱུར་ནས་ལྷན་ཅིག་འབར་བར་བསམ། སྤྱི་བོར་ཡང་འབར་འཛག་གོང་བཞིན་ལ། མཐར་ཧྃ་ལ་རེག་པས་བདུད་རྩིའི་རྒྱུན་གྱིས་མེ་མར་ལྡོག །མགྲིན་པ་དང་སྙིང་གའི་ཡི་གེ་སྔར་བཞིན་གསོས་བཏབ་སྟེ། ལྟེ་སྙིང་གི་འབར་འཛག་དང་རླུང་ འདིས་ཚེ་ལ་ཅུང་གཟན་པས། དེའི་གཉེན་པོར་རང་རྣལ་འབྱོར་མའི་ཞབས་གཉིས་དབང་ཆེན་གསེར་གྱི་ས་གཞིའི་བར་བརྐྱང་བར་བསམ་པ་ནི་སྐུ་བསྲིང་བའི་དམིགས་པ་ཞེས་བྱའོ་གསུངས། སེམས་དབྱེར་མེད་དུ་འཇོག །མཐར་རླུང་དཀྲུགས་སོགས་གོང་བཞིན་ནོ༑ ༑གཉིས་པ་ཡིག་འབྲུ་ལ་བརྟེན་པ་ནི། གཞན་འདྲ་བ་ལ་ཁམས་རྣམས་ཀྱི་ཕྱེད་ཧཱུྃ་དཀར་པོ་དང༌། ཕྱེད་ཨྃ་དཀར་ལ་དམར་བའི་མདངས་ཆགས་པ་ཞལ་སྦྱོར་དུ་བསྒོམས་ལ་འབར་འཛག་དང་རླུང་སྦྱོར་བྱ། དེ་བཞིན་དུ་གསུམ་པ་ཕྱག་མཚན་ལ་བརྟེན་པ་ནི། ཨྃ་རྣམས་ཐོད་པ་བདུད་རྩིས་གང་བ་དང༌། ཧཱུྃ་རྣམས་དེའི་ནང་དུ་རྡོ་རྗེ་དཀར་པོར་བསྒོམས་ལ་ཐོད་པའི་ཚངས་བུག་ནས་བདུད་རྩི་འཛག་པར་བསམ། བཞི་པ་ལྷ་སྐུ་ལ་བརྟེན་པ་ནི། རྡོ་རྗེ་ཧེ་རུ་ཀ་དཀར་པོ་རྡོར་དྲིལ་དང༌། ཐོད་པ་རྣལ་འབྱོར་མ་དམར་མོ་གྲི་ཐོད་འཛིན་པར་གསལ་བཏབ་ལ་སྙོམས་འཇུག་གི་བདུད་རྩི་བསྐུལ་ལོ། །གསུམ་པ་གསང་བའི་གཏུམ་མོ་ནི། སྟེང་རླུང་མནན་པས་ཧྃ་ལས་བྱང་སེམས་འཛག་པ་དང༌། འོག་རླུང་བསྐུམ་པས་ཨ་ཤད་ལས་མེ་འབར་བ་དང༌། སྟེང་འོག་གི་རླུང་ལྟེ་འོག་དང༌། འབར་འཛག་ལྟེ་སྙིང་གི་བར་དུ་ཁ་སྦྱར་བས་བདེ་དྲོད་དབྱེར་མེད་པ་སྟེ། མདོར་ན་རླུང་དང་གཏུམ་མོ་ཟུང་འཇུག་ཏུ་ཉམས་སུ་བླང་བའི་ཚུལ་ཡིན་ལ་ཁྱད་པར་རྡོ་རྗེའི་བཟླས་པ་དང༌། སྲོག་ཤིང་འཁོར་ལོའི་མན་ངག་ཞལ་ལས་ཤེས་སོ། །བཞི་པ་དེ་ཁོ་ན་ཉིད་ཀྱི་གཏུམ་མོ་ནི། ཇི་སྐད་བཤད་པའི་རིམ་པ་སྔ་མ་གསུམ་གྱིས་དྲོད་དང་བདེ་བ་དང་མི་རྟོག་པའི་ཉམས་མྱོང་དང༌། དེ་ལ་བརྟེན་ནས་ཐུན་མོང་དང་ཁྱད་པར་གྱི་ཡོན་ཏན་བསམ་གྱིས་མི་ཁྱབ་པ་སྐྱེས་པ་ཉིད། འདིར་ལྷན་ཅིག་སྐྱེས་པའི་ཡེ་ཤེས་སུ་ངོ་འཕྲོད་ཅིང་གོམས་པས་ཟུང་འཇུག་གི་གོ་འཕང་མངོན་དུ་འགྱུར་བའོ། །དེ་ཡང་སྤྱིར་གཏུམ་མོ་ནི་ཆོས་དྲུག་གཞན་ཐམས་ཅད་ཀྱི་ཡོན་ཏན་མཐའ་དག་སྐྱེད་པའི་རྩ་བ་ཡིན་ཅིང༌། ལྷག་པར་ལས་དང་པོ་པས་ལུས་གནད་དང་སྟོང་ར་ལེགས་པར་འབྱོངས་ནས། བྱིན་རླབས་བླ་མའི་གཏུམ་མོ་དང་འཇམ་རླུང་བུམ་པ་ཅན་སྒྲགས་ཏེ། ཕྱག་ཆེན་གྱི་ཉམས་ལེན་དང་ཟུང་འབྲེལ་དུ་བསྐྱང་བ་ཁོ་ན་གལ་ཆེའོ་གསུངས། གཉིས་པ་སྒྱུ་ལུས་ཆོས་བརྒྱད་རང་གྲོལ་གྱིས་ལམ་གྱི་བོགས་དབྱུང་བ་ལ་གསུམ་ལས། དང་པོ་འཁོར་བ་སྒྱུ་མར་སྦྱང་བ་ནི། རང་རྣལ་འབྱོར་མར་གསལ་བའི་ཐུགས་ཀ་ནས་རང་འདྲ་བའི་ཡེ་ཤེས་ཀྱི་སྐུ་དཔག་ཏུ་མེད་པ་སྤྲོས་ཏེ། ཐོག་མར་དམྱལ་བའི་གནས་ཐམས་ཅད་ཁྱབ། དེ་དག་ཐམས་ཅད་ཀྱི་སྡུག་བསྔལ་བསལ་གནས་སྐབས་དང་མཐར་ཐུག་གི་བདེ་བ་ལ་བཀོད་པས་རང་ལ་ཤིན་ཏུ་དགའ་ཞིང་གུས་པས་མཆོད་ཅིང་བསྟོད་པར་བསམས་ལ་སེམས་བཟུང༌། སེམས་ཟིན་པ་ན་དེ་ཐམས་ཅད་རང་བཞིན་གྱིས་མ་གྲུབ་པ་སྒྱུ་མ་དང་རྨི་ལམ་ལྟ་བུར་ཐག་བཅད། ངེས་ཤེས་བསྐྱེད། འཛིན་མེད་དུ་བཞག །ཡང་དེ་རྣམས་ཀྱིས་མཆོད་བསྟོད་སོགས་མི་བྱེད་པའི་སྟེང་དུ། རང་ལ་རྣམ་པ་དུ་མས་སྨད་ཅིང་བརྡུང་བརྡེག་སོགས་བྱེད་པར་བསམ་ལ་སེམས་གཟུང༌། སེམས་ཟིན་པ་ན་སྔར་བཞིན་སྒྱུ་མ་དང་རྨི་ལམ་ལྟ་བུར་ཐག་བཅད། དེ་བཞིན་དུ་རིགས་དྲུག་བར་དོ་དང་བཅས་པ་ལ་རིམ་གྱིས་བློ་སྦྱང་བར་བྱའོ༑ ༑གཉིས་པ་མྱང་འདས་སྒྱུ་མར་སྦྱང་བ་ནི། ཐོག་མར་སྣོད་བཅུད་ཐམས་ཅད་མངོན་པར་དགའ་བའི་ཞིང་ཁམས་སུ་གསལ་བའི་དབུས་སུ་རྩ་བའི་བླ་མ་མི་བསྐྱོད་པ་ལ་འཁོར་བསམ་གྱིས་མི་ཁྱབ་པས་བསྐོར་བའི་སྤྱན་སྔར་རང་གིས་བྱང་དྲངས་ཏེ་ཡན་ལག་བདུན་པ་འབུལ་བར་བསམ་ཞིང་ཡན་ལག་བདུན་པ་བྱ། དམིགས་པ་གསལ་བ་ན་སྔར་བཞིན་སྒྱུ་མ་དང་རྨི་ལམ་དུ་ཐག་བཅད། ཚུལ་དེ་ལྟ་བུས་ཞིང་ཁམས་གཞན་ལའང་དམིགས་པའི་རྩལ་སྦྱང་ངོ༌། །གསུམ་པ་ཆོས་ཐམས་ཅད་སྒྱུ་མར་སྦྱང་བ་ནི། ཚོགས་དྲུག་ལ་བཟང་ངན་བར་མའི་སྣང་བ་གང་ཤར་ཡང༌། ཆགས་སྡང་རྨོངས་གསུམ་གྱི་རྟོག་པ་སྤངས་ལ་སྔར་བཞིན་སྒྱུ་མ་དང་རྨི་ལམ་དུ་བསྲེ་བས་མཚམས་སྦྱར་ནས། མཐར་སྦྱང་བྱ་དང་སྦྱོང་བྱེད་གཉིས་ཀ་གཞི་མེད་རྩ་བྲལ་དུ་ཤེས་པས་ཉམས་ལེན་ཕྱག་ཆེན་གྱི་ངང་དུ་མཉམ་པར་བཞག་པ་སྟེ། འདི་ཁོ་ན་ལ་ལམ་གྱི་སྙིང་པོར་དྲིལ་ཏེ་ཉམས་སུ་བླང་ངོ་གསུངས། གསུམ་པ་རྨི་ལམ་འཁྲུལ་པ་རང་སངས་ཀྱིས་ལམ་གྱི་ཚད་བཟུང་བ་ལ། ཐོག་མར་སྔོན་འགྲོ་མོས་གུས་ཅན་བླ་མ། དག་སྣང་ཅན་ཡི་དམ། རྟོག་པ་ཅན་སྣང་བ་དྲན་པའི་ལྕགས་ཀྱུས་བཟུང་བ་སྟེ་གསུམ་ལས། འདིར་ཕྱག་བཞེས་ལ་དང་པོ་ཉིད་གཙོ་བོར་མཛད་པས། དེ་ཇི་ལྟར་ཉམས་སུ་བླངས་པའི་ཚུལ་ནི། ཉིན་པར་སྣང་གྲགས་རིག་གསུམ་གྱི་རྟོག་ཚོགས་ཐམས་ཅད་བླ་མའི་སྐུ་གསུང་ཐུགས་སུ་བལྟ་ཞིང་འོད་གསལ་ཕྱག་ཆེན་གྱི་ངང་དུ་བློ་བཞག །ནུབ་མོ་ཉལ་བའི་ཚེ་སྤྱི་བོའི་བླ་མ་ལ་རྨི་ལམ་ཟིན་པར་གསོལ་བ་གདབ་རྗེས། རབ་ཙོག་པུ། དེ་མིན་སེང་གེ་ཉལ་སྟབས་ཀྱིས་འཁོད་ལ། རང་རྣལ་འབྱོར་མར་གསལ་བའི་མགྲིན་པའི་ནང་དུ་པདྨ་དམར་པོ་འདབ་མ་བརྒྱད་པའི་ལྟེ་བའི་བླ་མ་ཡི་དམ་ཐམས་ཅད་འདུས་པའི་ངོ་བོ་ཨྃ་དམར་པོ་འོད་འབར་བ་རང་སྒྲ་དང་བཅས་པ་ལ་ཤེས་པ་གཏད་དེ། ཚོགས་དྲུག་གི་སྣང་བ་གང་ཤར་ཐམས་ཅད་རྨི་ལམ་གྱི་སྣང་བར་བལྟས་ནས་གཉིད་ལོག་པས་རྨི་ལམ་དུ་ཆོ་ཤེས་པ་འབྱུང་ཞིང༌། དེ་ལ་བརྟེན་ནས་དངོས་གཞི་སྦྱང་བ། སྤེལ་བ། བསྒྱུར་བ། སྤྲུལ་པ། གེགས་སེལ། བོགས་འདོན་ལམ་ཁྱེར་སོགས་ལའང་རིམ་གྱིས་བསླབ། མདོར་ན་རྨི་ལམ་ལ་འདུན་པ་གཙོ་ཆེ་བས་ཉིན་སྣང་ཐམས་ཅད་སྒྱུ་མ་དང་རྨི་ལམ་གྱི་དྲན་འདུན་རྒྱུན་ཆགས་སུ་བསྟེན་པ་གལ་ཆེའོ་གསུངས། བཞི་པ་འོད་གསལ་མ་རིག་མུན་བྲལ་གྱིས་ལམ་གྱི་གོལ་ས་བཅད་པ་ལ་བཞི་ལས། དང་པོ་ཐིག་ལེའི་རྣལ་འབྱོར་ནི། སྐྱབས་འགྲོ་ནས་རྡོར་སེམས་རང་ལ་ཐིམ་པའི་བར་སྔོན་འགྲོའི་དཀྱུས་ལྟར་ལ། དེའི་ངང་ནས་རང་རྣལ་འབྱོར་མར་གསལ་བའི་ལུས་དབུས་དྲང་པོར་རྩ་དབུ་མ་མར་སྣ་གསང་གནས་སུ་པདྨའི་ཡུ་བ་ལྟར་ཟུག་ཅིང༌། ཡར་སྣ་སྙིང་གར་སྣ་ཚོགས་པདྨ་འདབ་མ་བརྒྱད་པའི་ཚུལ་དུ་ཁ་བྱེ་བའི་སྟེང་དུ་ཉི་ཟླའི་གདན་ལ། རང་སེམས་བླ་མ་ཡི་དམ་དབྱེར་མེད་པའི་ངོ་བོ་ཐིག་ལེ་ལྔ་ཚོམ་སྲན་མ་ཙམ་པ། དབུས་སྔོན་པོ། ཕྱོགས་བཞིར་ཕྱོགས་མདོག་རང་འོད་དང་བཅས་པ། རང་གི་སྨིན་མཚམས་ཀྱི་སྤྱན་དབུས་མའི་ཚབ་ཏུ་ཐིག་ལེ་དངུལ་ཆུའི་མདོག་ཅན། ཕྱེད་ནང་དུ་ནུབ་ཅིང༌༑ ཕྱེད་ཕྱིར་འབུར་ཐབས་སུ་ཡོད་པ། དེའི་ཐད་ནས་གྲུ་གང་དང༌། གྱེན་དུ་མཐོ་གང་ཙམ་གཞལ་བའི་ནམ་མཁར་པདྨ་སྔོན་པོ་འདབ་མ་བརྒྱད་པའི་ཟེའུ་འབྲུར་ཉི་ཟླའི་གདན་ལ་སྣ་ཚོགས་རྡོ་རྗེ་རྒྱ་གྲམ། ཤར་གྱི་རྭ་དཀར་པོ་གདན་ལ་ཟུག་པའི་ལངས་ཐབས་ཅན། དེའི་སྟེང་གི་ནམ་མཁར་བླ་མའི་རྣལ་འབྱོར་དཀྱུས་བཞིན་གསལ་བཏབ་ལ་འོད་གསལ་ཟིན་པར་གསོལ་བ་གདབ། དབང་བཞི་བླངས་པའི་རྗེས་བླ་མ་ཡབ་ཡུམ་འོད་དུ་ཞུ་ནས་རང་གི་སྨིན་མཚམས་བརྒྱུད་དེ། སྙིང་གའི་ཐིག་ལེ་རྣམས་ལ་སིབ་སིབ་ཐིམ་པས། དེ་རྣམས་ལས་རང་རང་གི་ཁ་དོག་དང་མཐུན་པའི་འོད་ཟེར་འཇའ་ཚོན་ལྟ་བུ་བུན་གྱིས་འཕྲོས། སྨིན་མཚམས་ཀྱི་ཐིག་ལེ་ལ་ཕོག་པས་མེ་ཤེལ་ཉི་མས་ཕོག་པ་ལྟར་གསལ་ལམ་སྟེ་གྱུར་པ་ལས་འཕྲོས་པའི་འོད་ཀྱིས་སྣ་ཚོགས་རྡོ་རྗེ་ལ་ཕོག །དེའི་ལྟེ་བ་དང་རྭ་རྣམས་ལས་རང་རང་གི་ཁ་དོག་དང་མཐུན་པའི་འོད་ཟེར་བྱུང༌། སྨིན་མཚམས་དང་སྙིང་གའི་ཐིག་ལེ་སྔར་ལས་གསལ་བར་བྱས། དེ་ལྟ་བུའི་འོད་ཟེར་གྱི་འཕྲོ་འདུས་རང་གི་ལུས་ཀྱི་ཕྱི་ནང་དང༌། གནས་ཁང་སོགས་ནས་བརྩམ། མཐར་སྟོང་གསུམ་གྱི་འཇིག་རྟེན་ཐམས་ཅད་གསལ་ལམ་མེ་རེ་གྱུར་པ་ལ་ཡིད་གཏད་དེ་མིག་མི་འཛུམ་པར་གཉིད་ལོག །འཕྲལ་དུ་གཉིད་མ་བྱུང་ན་སྙིང་གའི་ཤར་གྱི་ཐིག་ལེ་ནས་བརྩམས་ཏེ། གཡས་བསྐོར་གྱིས་སེམས་འཛིན་ཅིང༌། མཐར་དབུས་ཀྱི་ཐིག་ལེ་སྔོན་པོ་ལ་སེམས་རྩེ་གཅིག་ཏུ་གཏད་དེ་ཉལ། གཉིད་སད་རེས་ཀྱིས་ཡང་ཡང་གསལ་བཏབ་པས་ཉམས་དང་རྟོགས་པའི་འོད་གསལ་རིམ་གྱིས་ཟིན་པར་འགྱུར་རོ། །གཉིས་པ་ཡིག་འབྲུའི་རྣལ་འབྱོར་ནི། ཐིག་ལེ་ལྔ་པོའི་ཚབ་ཏུ། དབུས་སུ་ཧཱུྃ་སྔོན་པོ། ཤར་ནས་གཡས་བསྐོར་གྱིས་ཨ་ནུ་ཏ་ར་བཞི་ཕྱོགས་མདོག་དང༌། གསུམ་པ་ཕྱག་མཚན་གྱི་རྣལ་འབྱོར་ནི། དབུས་སུ་རྡོ་རྗེ་དཀར་པོ་རྩེ་ལྔ་པ་དང༌། ཤར་ནས་འཁོར་ལོ་རིན་ཆེན་པདྨ་རལ་གྲི་རྣམས་ཕྱོགས་མདོག །བཞི་པ་ལྷ་སྐུའི་རྣལ་འབྱོར་ནི། དབུས་སུ་མི་བསྐྱོད་པ་ཡབ་ཡུམ་སོགས་རིགས་ལྔ་བསྒོམ་པ་སྟེ། གཞན་དམིགས་པའི་བྱེ་བྲག་རྣམས་ཐིག་ལེའི་སྐབས་ཇི་ལྟ་བ་བཞིན་ཉམས་སུ་བླང་ངོ་། །དེ་ཡང་འདི་ཉིད་ཁོ་ན་དམིགས་བསལ་དུ་སྦྱོང་བའི་སྐབས། གནས་དབེན་པར་མཚམས་ཤིན་ཏུ་དམ་པར་བཅད། ཟས་གོས་གནས་མལ་གྲིབ་ཅན་སོགས་སྤང༌། གཙང་སྦྲ་ཆེ་བར་བྱ། དྲི་ཆུ་བར་པ་དང༌། ཆང་དང༌། བདུད་རྩིས་ལུས་ཐམས་ཅད་བཀྲུ་ཞིང་ཚིལ་ཆེན་སོགས་ཀྱི་བཀུ་མཉེ་བསྟེན། ཟས་བཅུད་ཅན་བཟའ། ཉིན་པར་རླུང་སྦྱོར་དང་འཁྲུལ་འཁོར་ཙམ་མ་གཏོགས་ལུས་ཀྱི་བྱ་བ་གཞན་སྤང་ཞིང་སྒོ་གསུམ་གཡོ་མེད་དུ་བཞག །སྐབས་སྐབས་སུ་དམིགས་པའི་རྟེན་གོམས་ལ་བསླབ། ལྷག་པར་འོད་གསལ་བྱིན་རླབས་ཀྱི་གནད་བྱ་བ་ཡིན་པས་བླ་མ་ལ་མོས་གུས་དྲག་པོས་གསོལ་བ་བཏབ་ཅིང་སེམས་འཛིན་མེད་དུ་འཇོག་པ་གལ་ཆེའོ་གསུངས། ལྔ་པ་འཕོ་བ་མ་བསྒོམས་སངས་རྒྱས་གསེར་འགྱུར་གྱི་རྩིས་ལམ་གྱི་མཚམས་སྦྱར་བ་ལ་སྦྱང་བ་དང༌། ལས་ལ་སྦྱར་བ་གཉིས། དང་པོ་ལའང་སྐུ་གསུམ་གྱི་འཕོ་བ་གསུམ་ལས། འདིར་ལོངས་སྐུའི་འཕོ་བ་ཁྱད་པར་བ་ཉིད་ཕྱག་ལེན་དུ་མཛད་པས། སྐྱབས་སེམས་ཀྱི་རྗེས། རང་རྣལ་འབྱོར་མར་གསལ་བའི་ལུས་ཀྱི་དབུས་དྲང་པོར་རྩ་དབུ་མ་མར་སྣ་ལྟེ་འོག་སོར་བཞིའི་ཐད་ཙམ་དུ་ཟུགས་པ་ཕུག་རྡུག་གི་རྣམ་པ་ཅན། ཡར་སྣ་ཚངས་བུག་ནས་མཐོ་གང་ཙམ་ཕྱིར་འཐོན་པ་ཟང་ཐལ་ལེ་བ་ཀྵ་ཡིག་ནག་པོས་བཀག་པ། སྙིང་གར་རླུང་སེམས་དབྱེར་མེད་ཀྱི་ངོ་བོ་ཧཱུྃ་སྔོན་པོ་ཤིན་ཏུ་ཕྲ་བ་དྭངས་གསལ་དྲི་མ་མེད་པའི་འོད་ཟེར་ལྔ་འཕྲོ་བ། སྤྱི་བོར་རྩ་བའི་བླ་མ་དང་དབྱེར་མེད་པའི་ཡི་དམ་རྡོ་རྗེ་རྣལ་འབྱོར་མ་ཕྱག་གཉིས་གྲི་ཐོད་ཐུགས་ཀར་བསྣོལ་ཐབས་སུ་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་སྐུ་དབུས་དྲང་པོར་རྩ་དབུ་མ་ཡར་སྣ་གཙུག་ཏོར་དུ་ཁ་ཟུམ་ཞིང༌། མར་སྣ་གསང་གནས་སུ་ཐུག་པའི་ནང་དུ་རང་གི་དབུ་མ་ཚུད་པས་དེའི་སྲུབས་ལ་རླུང་ཡང་རྒྱུ་མི་ཐུབ་པ། ཐུགས་ཀར་གཉིས་སུ་མེད་པའི་ཡེ་ཤེས་ཀྱི་ངོ་བོ་བྃ་ཡིག་དམར་པོ་འོད་འཚེར་བ་རྣམས་གསལ་བཏབ་ནས༑ བཀའ་བརྒྱུད་བླ་མ་ལ་གསོལ་བ་འདེབས། ཆོས་སྐུ་མཁའ་ཁྱབ་ཏུ་འཕོ་བར་བྱིན་གྱིས་རློབས། ཡི་དམ་ལྷ་ཚོགས་ལ༴ མཁའ་སྤྱོད་འཕྱུགས་མེད་དུ༴ རྩ་བའི་བླ་མ་ལ༴ གནས་ལུགས་རང་གྲོལ་དུ༴ རང་སེམས་སྐྱེ་མེད་ལ༴ རིག་པ་རང་གྲོལ་དུ་འཕོ་བར་བྱིན་གྱིས་རློབས། །ཞེས་གསོལ་བ་ཕུར་ཚུགས་སུ་བཏབ། རླུང་ཕྱིར་འགྲོ་བ་ན་སྤྱི་བོའི་ཀྵ་ཡིག་བསལ། ནང་དུ་རྔུབ་པ་ན་བླ་མའི་ཐུགས་ཀ་ནས་འོད་ཟེར་བྱུང༌། རང་གི་སྙིང་གའི་ཧཱུྃ་ལ་ཐིམ་པས་བྱིན་རླབས་དངོས་གྲུབ་ཐམས་ཅད་ཐོབ། སླར་ཡང་རང་ཡིད་ཀྱིས་ཧིཀ་བརྗོད་ཅིང་རླུང་ཕྱིར་འཕུལ། ལྟོ་བ་སྒལ་པ་ལ་སྦྱར་བས་ཧཱུྃ་ཡིག་སྐར་མདའ་འཕང་བ་བཞིན་སོང་ནས་རྣལ་འབྱོར་མའི་ཐུགས་ཀའི་བྃ་ཡིག་ལ་རེག་པར་བསམ། ཡིད་ཀྱིས་ཀ་བརྗོད་པ་དང༌། རླུང་ནང་དུ་རྔུབ་ཅིང་ལྟོ་བ་ཕྱིར་འཕུལ་བས་མར་བབས་སྙིང་གར་གནས་པར་བསམ། དེ་ལྟ་བུའི་དམིགས་པ་ཡང་ཡང་བསྐྱར། ཐུན་འཇོག་པ་ན། རྣལ་འབྱོར་མ་འཆི་མེད་ཡེ་ཤེས་ཀྱི་བདུད་རྩིའི་རྣམ་པར་འོད་དུ་ཞུ་ནས་དབུ་མ་དང་ལུས་ཐམས་ཅད་གང༌། ཚངས་བུག་ཡན་གྱི་དབུ་མའང་འོད་དུ་ཞུ་ནས་ཀྵ་ཡིག་སྲ་ཞིང་འཐས་པ་བཅས་པས་བཀག་པར་བསམས་ལ། སྙིང་གའི་ཧཱུྃ་གཡོ་མེད་དུ་གནས་པ་ལ་སེམས་བཟུང་ནས་རླུང་བུམ་ཅན་འཛིན། འབྱོངས་རྟགས་སྤྱི་བོར་ཆུ་སེར་འབྱུང་བ། སྐྲངས་པ། འཕར་བ། ཟ་བ་སོགས་བྱུང་ན་སྐབས་སྐབས་སུ་མ་བརྗེད་ཙམ་སྦྱང་བས་ཆོག་གསུངས། གཉིས་པ་ལས་ལ་སྦྱར་བ་ནི། ངེས་པའི་འཆི་ལྟས་ཤར་ཞིང་མ་བསླུས་པའི་ཚེ། དག་པའི་ཞིང་ཁམས་ལ་དགའ་ཞིང་སྤྲོ་བའི་འདུན་པས། ཚེ་འདིའི་ལུས་ལོངས་སྤྱོད་སོགས་ལ་ཆགས་ཤིང་ཞེན་པ་བཏང༌། ཡོ་བྱད་ཐམས་ཅད་རྣམ་དཀར་གྱི་ཕྱོགས་སུ་བསྔོ་ཞིང་སྨོན་ལམ་རྣམ་པར་དག་པས་རྒྱས་བཏབ། ས་ཆུ་ལ་ཐིམ་པའི་དུས་ནས་དམིགས་པའི་མགོ་བརྩམ། ཕྱི་དབུགས་ཆད་ནས་ནང་དབུགས་མ་ཆད་པའི་སྐབས་སུ་འཕོ་བའི་དུས་དངོས་ཡིན་པས་དེ་ལྟར་ཤེས་པར་བྱས་ནས་དམིགས་པ་སྔར་ལྟར་ལ། ཧཱུྃ་ཡིག་རྣལ་འབྱོར་མའི་ཐུགས་ཀའི་བྃ་དང་དབྱེར་མེད་དུ་འདྲེས་པར་བསམས་ནས་འཛིན་མེད་དུ་མཉམ་པར་བཞག་གོ །དྲུག་པ་འབྱུང་ངེས་ཀྱི་ཚེས་ངོས་ཟིན་པས་སངས་རྒྱ་བ་བར་དོ་ཡང་དག་ཟབ་དོན་གྱིས་ལམ་གྱི་འབྲས་བུ་ངོ་སྤྲོད་པ་ལ། སྤྱིར་བར་དོ་ལ་རང་ཉིད་མའི་མངལ་དུ་ཉིང་མཚམས་སྦྱར་ནས་འཆི་ཁའི་འོད་གསལ་མ་ཤར་གྱི་བར་ལ་སྐྱེ་ཤིའི་བར་དོ། གཉིད་ཀྱི་འོད་གསལ་ཤར་ནས་བཟུང་མ་སད་པའི་བར་རྨི་ལམ་གྱི་བར་དོ། འཆི་དུས་ཀྱི་འོད་གསལ་ལས་ཡིད་ལུས་སུ་ཤར་བ་ནས་སྐྱེ་བ་ཕྱི་མར་ཉིང་མཚམས་མ་སྦྱར་གྱི་བར་ལ་སྲིད་པ་བར་དོ་ཞེས་རྣམ་པ་གསུམ་དུ་ཡོད་པ་ལས། སྔ་མ་གཉིས་ཀྱི་སྦྱོང་བྱེད་ནི་བསྐྱེད་རིམ། གཏུམ་མོ། སྒྱུ་ལུས། འོད་གསལ། རྨི་ལམ་རྣམས་གནས་ལུགས་ཕྱག་ཆེན་དང་ཟུང་འབྲེལ་དུ་བསྐྱངས་པས་དབང་པོ་ཡང་རབ་ཚེ་འདིར་ཟུང་འཇུག་གི་སྐུ་འགྲུབ་ཅིང་རབ་འཆི་བ་འོད་གསལ་ཆོས་ཀྱི་སྐུར་གྲོལ་བ་ཡིན་ལ། དེ་དག་ལ་བརྟན་པ་མ་ཐོབ་ན་འབྲིང་གིས་སྲིད་པ་བར་དོ་ལམ་དུ་འཁྱེར་དགོས་པས། ད་ལྟ་ནས་གང་ཤར་གྱི་སྣང་ཆ་ཐམས་ཅད་བར་དོའི་སྣང་བར་ཤེས་པར་བྱས་ཏེ༑ ཐུན་མོང་སྣང་གྲགས་རིག་གསུམ་སྒྱུ་མ་ལྟ་བུའི་ལྷ་སྔགས་ཆོས་ཉིད་ཀྱི་རོལ་པར་རྒྱས་བཏབ། ཁྱད་པར་འདོད་ཆགས་གཏུམ་མོ་དང་བསྲེ་བ། ཞེ་སྡང་སྒྱུ་ལུས་དང་བསྲེ་བ། གཏི་མུག་འོད་གསལ་དང་བསྲེ་བ། ང་རྒྱལ་བསྐྱེད་རིམ་དང་བསྲེ་བ། ཕྲག་དོག་དག་སྣང་དང་བསྲེ་བ་རྣམས་སྐབས་སུ་གང་བབས་པར་ཉམས་སུ་བླང༌། མདོར་ན་རྣམ་པ་ཀུན་ཏུ་ཐ་མལ་འཁྲུལ་སྣང་གི་གཞན་དབང་དུ་མ་སོང་བར་གང་ཤར་ལྷ་དང་ཡེ་ཤེས་སུ་འཆར་བ་ཞིག་བྱུང་ན་བར་དོའི་ཉམས་ལེན་ཐམས་ཅད་ཀྱང་དེ་ཀ་ལ་ཚང་བ་ཡིན་ནོ་གསུངས། དེ་ཡང་སྙན་བརྒྱུད་རང་གཞུང་ལྟར་ན། འཕོ་བ་དང་གྲོང་འཇུག་ཐ་དད་དུ་བགྲངས་ནས་ཆོས་དྲུག་ཏུ་བྱས། བར་དོ་འོག་ཏུ་འཆད་པ་སོགས་དབྱེ་བསྡུ་མི་འདྲ་བ་མང་ཡང༌། འདིར་ནི་ཡོངས་གྲགས་དང་སྒོ་བསྟུན་ནས། ཉིན་པར་མཉམ་བཞག་གི་ཉམས་ལེན་དུ་གཏུམ་མོ། རྗེས་ཐོབ་ཏུ་སྒྱུ་ལུས། མཚན་མོ་མཉམ་བཞག་ཏུ་འོད་གསལ། རྗེས་ཐོབ་ཏུ་རྨི་ལམ། འཆི་ཁར་འཚང་རྒྱ་བ་འཕོ་བ། སྲིད་པ་བར་དོར་འཚང་རྒྱ་བ་བར་དོའི་རྣལ་འབྱོར་སྐྱེ་ཤི་བར་དོ་གསུམ་སྦྱོང་བྱེད་ཀྱི་ལམ་ཚང་ལ་མ་ནོར་བར་ཡོངས་སུ་རྫོགས་པར་བསྟན་པ་ཡིན་ཅིང༌། གྲོང་འཇུག་གི་གདམས་པ་ནི་དེང་སང་ཕྱག་ལེན་ལ་འདེབས་པ་ཉུང་བས་འདིར་མ་བྲིས་སོ། །གསུམ་པ་གཙོ་བོར་ཤེས་རབ་ཡེ་ཤེས་ཀྱི་དབང་གི་ལམ་འོག་སྒོ་བདེ་བ་ཆེན་པོའི་སྐོར་ནི། གཞུང་འགྲེལ་དང་མན་ངག་གི་ལུང་ཙམ་མ་གཏོགས་དམིགས་བསལ་ཉམས་འཁྲིད་ཀྱི་རྒྱུན་མི་བཞུགས་ཀྱང་གཏུམ་མོའི་འབར་འཛག་གི་དམིགས་པ་ལ་གོམས་པ་བརྟན་པས་རང་ལུས་ཐབས་ལྡན་ནམ་སྤྱི་ལྟར་ཉམས་སུ་བླང་དུ་རུང་ཞིང༌། འདིར་ཞར་བྱུང་དེའི་ཡན་ལག་ཏུ་གཏོགས་པ་དཔལ་ནཱ་རོ་ཆེན་པོའི་གསང་སྤྱོད་ཀྱི་དམིགས་རིམ་རྒྱུན་དུ་ཉམས་སུ་བླང་བའི་ཚུལ་མདོ་ཙམ་འབྲི་ན། རང་གང་དུ་གནས་པའི་ས་ཕྱོགས་དེ་ཉིད་བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མའི་ཕོ་བྲང༌། སྟེང་རྣམས་གཞལ་ཡས་ཁང༌། འོག་དུར་ཁྲོད་ཀྱི་རྣམ་པ་འཇིགས་ཤིང་སྐྱི་གཡའ་བ་དེ་ན་གནས་པའི་གཞི་བདག་འཁོར་དང་བཅས་པ་རྣམས་མི་སྡུག་པའི་ཆ་བྱད་ཅན་དུ་བསམ་ལ། རང་གི་ལུས་འདི་དེ་རྣམས་ལ་སྦྱིན་བྱ་དང༌། དཀོན་མཆོག་མཆོད་པའི་རྒྱུར་བསམ། སེམས་འདི་དེ་དག་སྦྱིན་པ་པོ་དང༌། ཡིད་ལུས་བྱང་ཆུབ་སེམས་དཔར་བསམ་པས་སྐད་གཟེངས་མཐོན་པོས། སྣང་སྲིད་ཀྱི་ལྷ་སྲིན་སྡེ་བརྒྱད་འབྱུང་པོ་མི་མ་ཡིན་པ་གནས་བདག་གཞི་བདག་གནོད་བྱེད་གདོན་བགེགས་རིགས་དྲུག་གི་སེམས་ཅན་དང་བཅས་པ་ཐམས་ཅད་འདིར་འདུས་ཤིག །ཅེས་བརྗོད་པས། ལྷ་སྲིན་སྡེ་བརྒྱད་ཀྱིས་གཙོར་བྱས་པའི་སེམས་ཅན་ཐམས་ཅད་འུར་ཐིབས་སེ་འདུས་པར་བསམས་ལ། དེ་དག་ལ་སྙིང་རྗེ་ཆེན་པོ་སྔོན་དུ་འགྲོ་བས་སྐྱབས་ཡུལ་གསལ་བཏབ་སྟེ་སྐྱབས་སེམས། ཚད་མེད། བླ་མའི་རྣལ་འབྱོར་རྣམས་དཀྱུས་ལྟར་ལ། རྩ་བའི་བླ་མའི་དབུ་གཙུག་ནས་བརྒྱུད་པའི་བླ་མ་རྣམས་ཐོ་བརྩེགས་སུ་བཞུགས་པར་གསལ་བཏབ་སྟེ་ཡན་ལག་བདུན་པ། སྡོམ་བཟུང༌། གསང་སྤྱོད་བརྒྱུད་པའི་གསོལ་འདེབས་ཀྱི་མཐར། བདག་གཞན་ཐམས་ཅད་ཀྱིས་དབང་བླང་ཞིང་དེ་ཁོ་ན་ཉིད་ལ་མཉམ་པར་བཞག །དེ་ནས༑ ཕ ྄ཊ། ཅེས་དྲག་ཏུ་བརྗོད་པས། རང་སེམས་རྡོ་རྗེ་རྣལ་འབྱོར་མའི་རྣམ་པས་སྤྱི་བོ་ནས་ཐོན་རང་ལུས་ཆེ་བ། ཚོ་བ། སྣུམ་བཅུད་དང་ལྡན་པར་བསམ། ཕ ྄ཊ། བརྗོད་པས། རྣལ་འབྱོར་མའི་ཕྱག་གཡས་ཀྱི་གྲི་གུག་གིས་ཕུང་པོའི་ཐོད་པ་རྦད་ཀྱིས་བཅད་པས་སྟོང་གསུམ་གྱི་ཚད་དང་མཉམ་པའི་ཐོད་པ་ཕྱི་དཀར་ལ་ནང་དམར་བར་གྱུར་པ་དེ་ཉིད་མི་མགོ་སྐམ་པོའི་སྒྱེད་བུ་ཆེན་པོ་གསུམ་གྱི་སྟེང་དུ་དཔྲལ་བ་རང་ལ་བསྟན་ནས་བཞག་པའི་ནང་ལུས་དུམ་བུར་བཅད་དེ་བླུགས་པས་མ་ཤོང་བའི་ལྷག་མ་ཕྱི་རོལ་ཏུ་ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད་བསམ་གྱིས་མི་ཁྱབ་པར་གྱུར། ཕ ྄ཊ། ཐོད་པའི་ནང་གི་ཤ་རུས་བདུད་རྩི་དཀར་ལ་དམར་བའི་མདངས་ཆགས་པར་གྱུར་པ་དང༌། ཕྱི་རོལ་གྱི་ཤ་ཁྲག་རུས་པ་རྣམས་ལས་འོད་ཟེར་འཕྲོས། ཚོགས་ཞིང་རྣམས་ཀྱི་ཐུགས་ཀར་ཕོག །དེ་དག་གི་ཐུགས་རྒྱུད་བསྐུལ། སྐུ་གསུང་ཐུགས་ལས་ཡེ་ཤེས་ཀྱི་བདུད་རྩི་འོད་ཀྱི་ རང་བཞིན་ཅན་བབས་ཏེ་ཐོད་པའི་ཕྱི་ནང་གི་རྫས་རྣམས་ལ་ཐིམ་པས་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་ཤ་ཁྲག་རུས་པ་སོགས་འདོད་དགུ་འབྱུང་བའི་ཕུང་པོར་བསམས་ལ། ༀ་ཨཱཿ ཧཱུྃ། མང་དུ་བརྗོད་ཅིང༌། རང་སེམས་རྣལ་འབྱོར་མར་གསལ་བའི་ཐུགས་ཀ་ནས་མཆོད་པའི་ལྷ་མོ་བསམ་གྱིས་མི་ཁྱབ་པ་འཕྲོས་ཏེ། མཆོད་སྦྱིན་གྱི་མགྲོན་རྣམས་ལ་བདུད་རྩིའི་དགའ་སྟོན་དཔག་ཏུ་མེད་པ་ཕུལ་བས་སོ་སོས་ལོངས་སྤྱོད་པས་ཟག་མེད་ཀྱི་བདེ་བས་ཚིམ་པར་མོས་ཏེ། ༀ་ཨཱཿ ཧཱུྃ། དྲིན་ཆེན་རྩ་བརྒྱུད་བླ་མ་ལ། །ཕུང་པོའི་ཚོགས་མཆོད་བདུད་རྩིར་འབུལ། །བརྩེ་བས་དགེས་བཞིན་བཞེས་ནས་ཀྱང༌། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །དོན་གཉིས་འགྲུབ་པར་བྱིན་གྱིས་རློབས། །ཡི་དམ་དཀྱིལ་འཁོར་ལྷ་ཚོགས་ལ། །ཕུང་པོའི་ཚོགས་མཆོད་སོགས། དེ་བཞིན་དུ། ཆོས་བདག་དཔའ་བོ་མཁའ་འགྲོ་ལ། །ཆོས་སྐྱོང་མ་མགོན་ལྕམ་དྲལ་ལ། །མཆེད་ལྕམ་རྡོ་རྗེ་སྤུན་གྲོགས་ལ། །ཞེས་སོ་སོར་སྦྱར། ཡུལ་འདིའི་གནས་བདག་གཞི་བདག་ལ། །ཕུང་པོའི་ཚོགས་མཆོད་སྦྱིན་པར་བཏང༌། །དགའ་སྤྲོ་ལྡན་ཞིང་རོལ་ནས་ཀྱང༌། །ཟག་མེད་བདེ་བས་ཚིམས་པ་དང༌། །བུ་ལོན་འབྲེལ་ཆགས་བྱང་གྱུར་ཅིག །ལན་ཆགས་ཤ་འཁོན་དག་གྱུར་ཅིག །ཉེས་ལྟུང་དྲི་མ་བྲལ་གྱུར་ཅིག །ཚོགས་རྫོགས་སྒྲིབ་པ་བྱང་གྱུར་ནས། །མྱུར་དུ་སངས་རྒྱས་ཐོབ་པར་ཤོག །དེ་བཞིན་དུ། སྣང་སྲིད་ལྷ་སྲིན་སྡེ་བརྒྱད་ལ། །ཕུང་པོའི་ཚོགས་མཆོད་སྦྱིན་པར་བཏང༌། །སོགས་དང༌། རིགས་དྲུག་སེམས་ཅན་ཐམས་ཅད་ལ། །ཕུང་པོའི་ཚོགས་མཆོད་སོགས་སྦྱར་བས་བསྔོས། སླར་ཡང་རང་གི་གནས་གསུམ་གྱི་ཡིག་འབྲུ་གསུམ་ལས་འོད་ཟེར་དཔག་ཏུ་མེད་པ་འཕྲོས་པའི་རྩེ་ལས་འདོད་པའི་ཡོན་ཏན་རྒྱ་མཚོའི་སྤྲིན་ཆེན་པོ་ཆར་བཞིན་དུ་འབབས་ཏེ་མཆོད་སྦྱིན་གྱི་མགྲོན་རྣམས་མཉེས་ཤིང་ཚིམས་པར་བསམས་ལ༑ རྒྱལ་བ་མཆོད་པས་མཉེས་གྱུར་ཅིག །སོགས་བརྗོད། དེ་ནས་རང་བསྟན་པའི་གཙོ་བོ་ཤཱཀྱ་ཐུབ་པར་གསལ་བས་སྦྱིན་ཡུལ་རྣམས་ལ་ཆོས་ཀྱི་སྦྱིན་པས་དབུགས་དབྱུང་བར་མོས་ཏེ། ཆོས་རྣམས་གང་དག་སོགས་ཆོས་སྦྱིན་བྱ། སླར་ཡང་རྡོ་རྗེ་རྣལ་འབྱོར་མར་གྱུར་པའི་གནས་གསུམ་ཡི་གེ་གསུམ་ལས་འོད་ཟེར་དཀར་དམར་མཐིང་གསུམ་རིམ་དང་གཅིག་ཅར་དུ་འཕྲོས། སྦྱིན་ཡུལ་ཐམས་ཅད་ལ་ཕོག་པས་དབང་བཞི་ཐོབ༑ སྒྲིབ་བཞི་དག །སྐུ་བཞིའི་ས་བོན་རྒྱུད་ལ་བཞག །དེ་ནས་རང་ཉིད་ཐུགས་རྗེ་ཆེན་པོ་ཁ་སརྤཱ་ཎིར་གསལ་བའི་ཕྱག་གཡས་མཆོག་སྦྱིན་གྱི་རྩེ་ལས་བདུད་རྩིའི་རྒྱུན་བབས་པ་སྦྱིན་ཡུལ་རྣམས་ཀྱིས་ལོངས་སྤྱད་པས་སྡིག་སྒྲིབ་དག་ཅིང་བྱང་ཆུབ་ཀྱི་སེམས་རྒྱུད་ལ་སྐྱེས་ནས་རང་གཞན་ཐམས་ཅད་མགྲིན་གཅིག་ཏུ་དགེ་བ་བསྔོ་བར་བསམས་ལ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཅེས་སོགས་བསྔོ་སྨོན་ཇི་ལྟར་རིགས་པར་བྱས་རྗེས། གཞི་བདག་ལ་སོགས་པའི་མགྲོན་རྣམས་རང་རང་གི་གནས་སུ་སོང༌། གདུག་སེམས་མ་ཞི་བ་རྣམས་ཀྱང་རང་ལ་འདུས། ཚོགས་ཞིང་རྣམས་ཀྱང་རང་ལ་ཐིམ། རང་གི་ལུས་ངག་ཡིད་གསུམ་ༀ་ཨཱཿ ཧཱུྃ་གསུམ་བརྩེགས་མར་གྱུར། དེ་ཡང་ཡས་རིམ་གྱིས་ཐིམ་ནས་མཐར་ནམ་མཁའ་ལ་འཇའ་ཡལ་བ་ལྟར་གྱུར་པར་བསམས་ལ་གནས་ལུགས་མ་བཅོས་པའི་ངང་དུ་བློ་ལྷོད་ཀྱིས་གློད་ལ་བཞག །རྟོག་པ་གང་ཤར་ཡང༌༑ ཕཊ། ཅེས་བརྗོད་ལ་ཐད་ཀར་བཅད། ཁྱད་པར་འཇིགས་སྐྲག་གི་རྟོག་པ་བྱུང་ན། ལུས་ནི་མཆོད་སྦྱིན་དུ་བྱིན་ཚར་ནས་མེད། སེམས་ནི་ནམ་མཁའ་སྟོང་པ་དང་དབྱེར་མེད་པའི་ཕྱིར་ཇི་ལྟར་འཇིགས་སྙམ་དུ་རྟོགས་པའི་གདེང་བསྐྱེད། དེས་ཀྱང་མ་ཞི་ན། འཇིགས་པའི་ཚེ་འཇིགས་མཁན་གྱི་སེམས་གང་ན་འདུག །འཇིགས་མཁན་གྱི་ཚེ་འཇིགས་པ་གང་ན་འདུག་བལྟས་ལ་སེམས་ཀྱི་རྩ་བ་བདར་ཤ་བཅད་དེ་ཕཊ། ཅེས་བརྗོད་ལ་རང་བཞིན་གྱིས་མ་གྲུབ་པའི་ངང་དུ་མཉམ་པར་བཞག་གོ །དེ་ལྟར་ཐོག་མར་མལ་གཅོད་ལ་འབད་ཅིང༌། ཅུང་ཟད་གོམས་པ་ན་གཉན་ཁྲོད་འཇམ་ཞིང་བཀྲ་ཤིས་པ་དང༌། རིམ་གྱིས་འཇིགས་ཤིང་ཟིལ་ཆེ་བ་རྣམས་སུ་གསང་སྤྱོད་ལ་བརྩོན་པས་དང་པོར་མི་འདོད་པའི་སློང༌། བར་དུ་བཏང་སྙོམས། ཐ་མར་མཆོག་དངོས་གྲུབ་པའི་རྟགས་མངོན་སུམ་དུ་མཐོང་བར་འགྱུར་རོ་གསུངས། བཞི་པ་གཙོ་བོར་དབང་བཞི་པའི་ལམ་ཕྱག་རྒྱ་ཆེན་པོའི་འཁྲིད་ཚུལ་གྱི་རིམ་པ་ཅུང་ཟད་མི་འདྲ་བ་མང་ཡང༌། འདིར་ཟབ་ལམ་ཡི་གེ་བཞི་པ་ལྟར་ན། དང་པོ་སེམས་ཀྱི་གཞི་རྩ་བཅད་པ་ནི། གནས་དབེན་པར་ལུས་གནད་རྣམ་སྣང་ཆོས་བདུན་དང་ལྡན་པར་བྱས༑ ངག་གནད་རླུང་རང་སོར་འཇོག །སེམས་ཀྱི་གནད་སྐྱབས་སེམས་ནས་བླ་མའི་རྣལ་འབྱོར་གྱི་བར་ཉམས་སུ་བླང་ལ་གསོལ་བ་ཤུགས་དྲག་ཏུ་གདབ། དེ་ནས་དབང་བཞི་བླངས་ཤིང་ཐུགས་ཡིད་བསྲེས་པའི་ངང༌༑ ཆོས་ཐམས་ཅད་རྨི་ལམ་གྱི་སྣང་བ་ལྟར་རང་སེམས་ཀྱི་རྣམ་འཕྲུལ་ཙམ་དུ་ཐག་བཅད་ལ་དེ་ལས་གཞན་དུ་འདས་པའི་རྣམ་རྟོག་གི་རྗེས་མི་བཅད། མ་འོངས་པའི་སྔུན་མི་བསུ། ད་ལྟའི་ཤེས་པ་རྩིས་གདབ་མི་བྱ་བར་རང་བབས་སུ་བཞག་པས་དེ་ལ་མི་གནས་པར་རྣམ་རྟོག་ཞིག་ཐོལ་གྱིས་འཕྲོ་བའི་ཚེ། རྟོག་པ་དེ་དང་པོ་གང་ནས་སྐྱེས། བར་དུ་གང་དུ་གནས། ཐ་མ་གང་དུ་འགག་བརྟགས་པས་རང་སེམས་ལས་ཤར་ཞིང་རང་སེམས་སུ་ཐིམ་པར་མཐོང་ན། སེམས་དེ་ཉིད་ཀྱང་སྐྱེ་འགག་གནས་གསུམ། དབྱིབས་ཁ་དོག་གཅིག་དང་དུ་མ་སོགས་ལེགས་པར་བརྟགས་ཤིང་དཔྱད་པས། གང་དུའང་མ་གྲུབ་ཅིང་ཅིར་ཡང་འཆར་བ། ཉམས་སུ་མྱོང་ཡང་བསམ་བརྗོད་ལས་འདས་པར་རྟོགས་པའི་ཚེ། གཉིས་པ་སེམས་ཀྱི་བཞག་ཐབས་བསྟན་པ་ནི། དེ་ལྟར་རྟོགས་པའི་སྟེང་དུ་སེམས་མི་གནས་པ་གནས་པར་བྱེད་པའི་ཐབས་དྲུག་སྟེ། ཁྱུང་ཆེན་ནམ་མཁའ་ལ་ལྡིང་བ་བཞིན་དུ་མ་བཅོས་གཉུག་མའི་ངང་དུ་རྩོལ་སྒྲུབ་མེད་པར་བཞག །རྒྱ་མཚོ་རླབས་དང་བྲལ་བ་བཞིན་དུ་རྟོགས་ཚོགས་ཀྱིས་གཡོ་འགུལ་མེད་པར་བཞག །ཉི་ཟླ་སྤྲིན་དང་བྲལ་བ་བཞིན་དུ་སེམས་ཉིད་འོད་གསལ་བའི་ངང་མདངས་མ་བྲལ་བར་བཞག །བུ་ཆུང་ལྷ་ཁང་ལ་ལྟ་བ་བཞིན་དུ་གསལ་ལ་དེར་འཛིན་མེད་པར་བཞག །ཆུ་དང་རླབས་བཞིན་དུ་བྱུང་ཚོར་ཐམས་ཅད་རང་གྲོལ་གྱི་ངང་དུ་བཞག །ནམ་མཁའ་ལ་བྱ་འཕུར་བ་བཞིན་དུ་རིག་པ་རྗེས་མེད་ཀྱི་ངང་དུ་མཉམ་པར་བཞག་པ་སྟེ། མདོར་ན་རང་སེམས་བརྗོད་བྲལ་དུ་ཉམས་སུ་མྱོང་བ་ལྷག་མཐོང་དེའི་ངང་སྤང་བླང་བཟོ་བཅོས་མེད་པར་བཞག་པ་ཞི་གནས། དེ་གཉིས་དབྱེར་མེད་པ་ཟུང་འཇུག་སྟེ་མཉམ་རྗེས་ཐམས་ཅད་དུ་ལམ་ཁྱེར་འདི་དང་མ་བྲལ་བར་བྱའོ། །གསུམ་པ་སེམས་ཀྱི་གོལ་ས་བཅད་པ་ནི། ཡར་སངས་རྒྱས་ལ་རེ་བ། མར་འཁོར་བ་ལ་དོགས་པ། བར་སྣང་བ་ལ་བདེན་འཛིན། ནང་ཉམས་མྱོང་ལ་ཞེན་པ། ལས་རྒྱུ་འབྲས་ལ་ཁྱད་དུ་གསོད་པ་སོགས་བདེན་ཞེན་ཐམས་ཅད་གོལ་ས་ཡིན་པས། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་གི་སེམས་ཀྱིས་ཕར་བཏགས་པ་ཙམ་མ་གཏོགས་དོན་ལོགས་སུ་གྲུབ་པ་མེད་ཅིང་སེམས་དེའང་གཤིས་ཅི་ཡང་མ་ཡིན་ལ། གདངས་ཅིར་ཡང་མ་འགགས་པའི་སྟོང་པ་དང་རྟེན་འབྱུང་དབྱེར་མེད་པའི་དོན་ལ་ངེས་ཤེས་བསྐྱེད་དེ། དོན་དམ་པར་གང་ལའང་མ་ཞེན་ཅིང༌། ཀུན་རྫོབ་ཏུ་ལས་རྒྱུ་འབྲས་ཕྲ་མོ་ལའང་བླང་དོར་ཚུལ་བཞིན་དུ་བྱའོ། །བཞི་པ་སེམས་ཀྱི་ལམ་ཁྱེར་བསྟན་པ་ལ་དྲུག་ལས། ཉིན་མོ་སྣང་བ་རྒྱས་བཏབ་པའི་རྣལ་འབྱོར་ནི། འདི་ལྟར་སྣང་བ་ཐམས་ཅད་རང་སེམས་འཁྲུལ་པར་རྒྱས་བཏབ། སེམས་འཁྲུལ་པ་ངོས་བཟུང་མེད་པ་སྒྱུ་མ་དང་རྨི་ལམ་ལྟ་བུར་རྒྱས་བཏབ། སྒྱུ་མའང་རང་བཞིན་མེད་པ་ཆོས་ཉིད་སྐྱེ་མེད་དུ་རྒྱས་བཏབ་བོ། །ནང་ནུབ་འདོད་ཡོན་གྲོགས་སུ་ཁྱེར་བའི་རྣལ་འབྱོར་ནི། རབ་འདོད་ཡོན་ཐམས་ཅད་སྟོང་པ་ལ་སྟོང་པས་རོལ། ཆོས་ཉིད་ལ་ཆོས་ཉིད་ཐིམ་པའི་ཚུལ་གྱིས་ལོངས་སྤྱད། འབྲིང་སྒྱུ་མ་ལ་སྒྱུ་མས་རོལ། ཡེ་ཤེས་ལ་ཡེ་ཤེས་ཐིམ་པའི་ཚུལ་གྱིས་ལོངས་སྤྱད། ཐ་མ་བླ་མ་ཡི་དམ་ལ་ཚོགས་མཆོད་འབུལ་བའི་ཚུལ་གྱིས་ལོངས་སྤྱོད་དོ། །སྲོད་ལ་དབང་པོ་བཞི་ལ་བསྡུ་བའི་རྣལ་འབྱོར་ནི། འཁྲུལ་པའི་རྟོག་ཚོགས་གང་ཤར་གྱི་རང་ངོ་ལ་ཅེར་གྱིས་བལྟས་ནས། བརྟག་དཔྱད་བསམ་གཞིག་གི་སྤྲོས་པ་རང་སར་གྲོལ་བའི་ངང་དུ་བློ་འཇོག་གོ །ནམ་གུང་ཤེས་པ་བུམ་པར་གཞུག་པའི་རྣལ་འབྱོར་ནི། ནུབ་མོ་སྙིང་དཀྱིལ་དུ་པདྨ་ཉི་ཟླའི་གདན་ལ་བླ་མ་རྡོ་རྗེ་འཆང་སྐུ་ལས་འོད་ཟེར་ཁ་དོག་སྣ་ལྔ་འཕྲོ་བར་གསལ་བའི་འོད་ཀྱིས་སྣང་བ་ཐམས་ཅད་གསལ་ལམ་མེར་གྱུར་པ་ལ་སེམས་གཏད་དེ་ཉལ་བས་གཉིད་འོད་གསལ་དུ་འཆར་རོ། །ཐོ་རངས་རིག་པ་གསལ་གདབ་པའི་རྣལ་འབྱོར་ནི། རླུང་རིག་དྭངས་པའི་སྐབས་དེར་ཆོས་སྤྱི་དང་རང་གི་མཚན་ཉིད་དང༌། ཁྱད་པར་བླ་མའི་མན་ངག་རྣམས་བསམ་མནོས་ཞུན་ཐར་བཅད་དེ་བློ་ལ་ཡང་ཡང་གསལ་གདབ་བོ། །འཆི་ཁར་ཡེ་ཤེས་ཟང་ཐལ་གྱི་རྣལ་འབྱོར་ནི། ནམ་འཆི་བའི་ཚེ་ཕྱི་ནང་གི་དངོས་པོ་ལ་ཆགས་སྡང་གི་རྟོག་པ་སྤང༌། ཀུན་རྫོབ་ཏུ་ཡོ་བྱད་རྣམས་ཚོགས་སུ་བཏང༌། ཉེས་ལྟུང་བཤགས། སྡོམ་པ་བླང༌། ངེས་འབྱུང་དང༌། སྙིང་རྗེ་དང༌། སྨོན་ལམ་རྣམ་པར་དག་པས་མཚམས་སྦྱར་ཏེ། དོན་དམ་པར་རང་སེམས་སྐྱེ་འཆི་མེད་པས་ཕྱག་རྒྱ་ཆེན་པོ་ཡིད་ལ་བྱར་མེད་པར་ཁོ་ཐག་བཅད་དེ། བསྒོམ་མེད་ཀྱི་ངང་དུ་ཡེངས་མེད་དུ་བཞག་པས་བར་དོ་མེད་པར་ཟང་ཐལ་དུ་སངས་རྒྱའོ། །གཞན་ཡང་གེགས་སེལ་བོགས་འདོན་དང་ཉམས་རྟོགས་ཀྱི་སྐྱེ་ཚུལ་སོགས་ནི་བླ་མ་ཉམས་མྱོང་ཅན་གྱི་ཞལ་ལས་རིམ་པ་ཤེས་པར་བྱ་བ་ཁོ་ནའོ་གསུངས། གསུམ་པ་རྗེས་ནི། ཇི་སྐད་བཤད་པའི་ལམ་དེ་རྣམས་སྟན་ཐོག་གཅིག་ཏུ་ཉམས་སུ་བླང་བའི་ཚེ། སྤྱིར་བསྐྱེད་རིམ་ལྟ་བུ་རེ་རེ་ལའང་ལམ་ཐམས་ཅད་དོན་གྱིས་ཚང་བ་ཡིན་ཏེ། རྣམ་པ་ལྷར་གསལ་བ་བསྐྱེད་རིམ། གསལ་བཞིན་དུ་སྟོང་པ་རྫོགས་རིམ། དེ་གཉིས་དབྱེར་མེད་པ་ཟུང་འཇུག །དེ་ཐམས་ཅད་རང་སེམས་སྐད་ཅིག་མའི་ངང་དུ་རྫོགས་པ་ཕྱག་རྒྱ་ཆེན་པོའི་ཉམས་ལེན་ནོ། །འོན་ཀྱང་མདོར་བསྡུས་པའི་ཚུལ་གྱིས་སོ་སོར་ཉམས་སུ་ལེན་ན། སྐྱབས་སེམས་ནས་བླ་མའི་རྣལ་འབྱོར་བར་དཀྱུས་བཞིན་གྱི་མཐར། བསྐྱེད་ཆོག་རྒྱས་བསྡུས་ཇི་ལྟར་རིགས་པས་ཡབ་ཡུམ་གང་རུང་གི་བསྐྱེད་རིམ་གསལ་ལ་བཟླས་པ་བྱ། དེ་ནས་ཐུགས་ཀའི་སྔགས་འཁོར་སོགས་མི་དམིགས་པའི་ངང་སྟོང་ར་གསལ་བཏབ་ནས་བྱིན་རླབས་བླ་མའི་གཏུམ་མོ་དང༌། རླུང་སྦྱོར་བ་བཞི་ལྡན་བསྒོམ་ཞིང་རྫོགས་རིམ་དུ་བསྡུ། ཐུན་མཚམས་རྣམས་སུ་ཅིར་སྣང་སྒྱུ་མའི་དྲན་འདུན་དྲག་ཏུ་བྱ། ཉལ་བའི་ཚེ་རྨི་ལམ་དང་འོད་གསལ་གྱི་རྣལ་འབྱོར་གང་རུང་ལ་འཇུག །སྐབས་ཅི་རིགས་པར་འཕོ་བ་དང༌། གསང་སྤྱོད་ཀྱི་དམིགས་རིམ་ཀྱང་ཉམས་སུ་བླང༌། ཁྱད་པར་དུས་ཐམས་ཅད་དུ་གནས་ལུགས་ཕྱག་རྒྱ་ཆེན་པོའི་ཉམས་ལེན་དང་མ་བྲལ་བར་བྱ་ཞིང༌། གཞན་ཡང་ལམ་གྱི་ཡན་ལག་ཏུ་ཚེ་སྒྲུབ་གོང་ཁུག་མིའི་བསྐྱེད་རྫོགས་ཀྱང་ལོགས་སུ་གསལ་བ་བཞིན་འབད་པས་མྱུར་དུ་ཟུང་འཇུག་འཆི་མེད་ཡེ་ཤེས་ཀྱི་སྐུ་དཔལ་འཁོར་ལོ་སྡོམ་པའི་གོ་འཕང་ཐོབ་པར་འགྱུར་བ་ནི་ངེས་པའོ། །དེ་ལྟར་འཁོར་ལོ་བདེ་མཆོག་གི། །སྙན་བརྒྱུད་ཡིད་བཞིན་ནོར་བུ་ཡི། །ལམ་རིམ་ཅུང་ཟད་བཤད་པའི་དགེས། །འགྲོ་ཀུན་ཟུང་འཇུག་མྱུར་ཐོབ་ཤོག །ཅེས་རྗེ་བཙུན་འཇའ་ཚོན་གྱི་སྐུ་ཅན་རས་ཆུང་ཞབས་ནས་གཙོ་བོར་བརྒྱུད་པའི་དཔལ་འཁོར་ལོ་བདེ་མཆོག་གི་སྙན་བརྒྱུད་ཡིད་བཞིན་ནོར་བུའི་ལམ་རིམ་སྙིང་པོར་དྲིལ་བ་འདི་ཡང༌། རང་ཉིད་ཀྱི་དྲན་པ་གསོ་བ་དང༌། ལས་དང་པོ་བ་གཞན་དག་ལ་ཅུང་ཟད་ཕན་པའི་བསམ་པས། རྣལ་འབྱོར་གྱི་དབང་ཕྱུག་མི་ལ་བཞད་པའི་རྡོ་རྗེ་དང༌། གཙང་སྨྱོན་ཧེ་རུ་ཀ་ཡབ་སྲས་སོགས་ཀྱི་གསུང་ལ་གཞི་བྱས། ལམ་འདི་ལ་མཁས་ཤིང་དངོས་གྲུབ་བརྙེས་པའི་རྡོ་རྗེའི་སློབ་དཔོན་ཆེན་པོ་བཀའ་རྒྱུད་ཕྲིན་ལས་དབང་ཕྱུག་གི་གསུང་གི་བདུད་རྩིས་ཟུར་བརྒྱན་ཏེ། རྒྱལ་ཁམས་ཉུལ་བའི་བྱ་བྲལ་བ། འཇམ་དབྱངས་མཁྱེན་བརྩེའི་དབང་པོས། གྲུབ་པའི་བསྟི་གནས་རས་ཆུང་ཕུག་ཏུ་མགོ་བརྩམས། འོག་མིན་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོར་གྲུབ་པར་བགྱིས་པ་འདིས་ཀྱང་སྒྲུབ་བརྒྱུད་རིན་པོ་ཆེའི་བསྟན་པ་ཕྱོགས་དང་དུས་ཐམས་ཅད་དུ་དར་ཞིང་རྒྱས་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། འདི་རྣམས་ཀྱི་གོ་དོན་རྒྱས་པར་རྗེ་བཙུན་མི་ལ་རས་པས་རས་ཆུང་པ་ལ་ཆིག་བརྒྱུད་དུ་གདམས་པའི་བུམ་དབང་ཡིད་བཞིན་ནོར་བུ། སྟེང་སྒོ་རྣམ་གྲོལ་ཆོས་དྲུག །ཕྱག་རྒྱ་ཆེན་པོ་ཡེ་ཤེས་གསལ་བྱེད། ལམ་བློ་ནས་གཅོད་པ་བར་དོ་ངོ་སྤྲོད་ཀྱི་ཁྲིད་ཡིག་རྣམས་གཞིར་བཟུང༌། གྲུབ་ཆེན་གཙང་སྨྱོན་ཡབ་སྲས་ཀྱིས་མཛད་པའི་རྡོ་རྗེའི་ཚིག་རྐང་གི་གཞུང་འགྲེལ་ཁྲིད་ཡིག་ཞལ་ཤེས་དང་བཅས་པ་དང༌། ཀུན་མཁྱེན་གྲུབ་མཆོག་དབང་པོས་མཛད་པའི་ཁྲིད་ཡིག་ཆེན་མོ་རྣམས་ཀྱིས་གསལ་བར་བྱ་ཕྱིར་བླ་མའི་ཞལ་ལུང་བཞིན་ཤེས་པར་བྱ་བ་ཁོ་ནའོ།། །།