DNZ-16-MA-026-003: Difference between revisions
From Damngak Dzö
DNZ-16-MA-026-003
(Imported new text files with Wyckibaat for processing) |
No edit summary |
||
| Line 1: | Line 1: | ||
༈ །སེམས་ཉིད་ངལ་གསོའི་ཁྲིད་ཀྱི་ཟིན་བྲིས་འཇམ་དབྱངས་མཁྱེན་བརྩེའི་དབང་ཕྱུག་གིས་མཛད་པ་བཞུགས་སོ། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྗེ་བཙུན་རྡོ་རྗེ་འཆང་བློ་གསལ་རྒྱ་མཚོ་གྲགས་པ་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་ཞབས་ལ་དུས་ཐམས་ཅད་དུ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། འདིར་འཕགས་པ་སྤྱན་རས་གཟིགས་ཀྱི་རྣམ་པར་འཕྲུལ་པ་གྲུབ་ཆེན་མི་ཏྲ་ཛོ་ཀི་ཞེས་བྱ་བ་དེ་ཉིད་ཀྱིས་ལོ་བཅུ་གཉིས་སུ་སྒྲུབ་པ་མཛད་པའི་མཐར། རྡོ་རྗེའི་ཤིང་སྟན་མེ་ལོང་ལྟར་འཇམ་པའི་སྟེང་དུ་འཕགས་པ་ཐུགས་རྗེ་ཆེན་པོ་ཁ་སར་པ་ཎིའི་ཞལ་མངོན་སུམ་དུ་བསྟན་ཏེ། སེམས་ཅན་ཐམས་ཅད་ཀྱི་སེམས་ཐོག་མ་མེད་པ་ནས་སྡུག་བསྔལ་གྱིས་དུབ་པར་གྱུར་པ་ངལ་གསོ་བར་བྱེད་པའི་ཐབས་ཤེས་རབ་ཀྱི་ཕ་རོལ་ཏུ་ཕྱིན་པའི་བརྗོད་བྱ་ཐམས་ཅད་སྒོ་ཉི་ཤུ་རྩ་ལྔར་འདུས་པ་བཞིན། དོ་ཧ་རྡོ་རྗེའི་ཚིགས་སུ་བཅད་པ་ཉི་ཤུ་རྩ་ལྔ་བཀའ་སྩལ་པ་གསན་པས་མཆོག་གི་གྲུབ་པ་བརྙེས་པའི་རྣལ་འབྱོར་གྱི་དབང་པོ་དེ་ཉིད་ལ། ཁྲོ་ཕུ་ལོ་ཙཱ་བ་ཆེན་པོས་ལེགས་པར་གསན་ཅིང༌། ཐུགས་ཉམས་སུ་བཞེས་པའི་མན་ངག །སེམས་ཉིད་ངལ་གསོ་ཞེས་གྲགས་པའི་ཁྲིད་ཀྱི་རྣལ་འབྱོར་ཉམས་སུ་ལེན་པར་བྱེད་པའི་ཚུལ་ལ། སྔོན་འགྲོ། དངོས་གཞི། རྗེས་གསུམ་གྱིས་བསྡུས་པར་གྱུར་པ་ལས། དང་པོ་ལའང༌། ཐུན་མོང་དང༌། ཐུན་མོང་མ་ཡིན་པ། ཁྱད་པར་གྱི་སྔོན་འགྲོ་གསུམ་ཡོད་པའི། དང་པོ་ནི། རང་ཉིད་བདེ་བའི་གདན་ལ་བསམ་གཏན་གྱི་རོལ་པས་འདུག་སྟེ། ལུས་ངག་ཡིད་གསུམ་རང་སོར་མ་ཚུད་ཀྱི་བར་དུ་ཆད་དེ་ངལ་གསོ། དེ་ནས་རང་ཉིད་གང་དུ་གནས་པའི་ས་ཕྱོགས་དེ་ཉིད་ཡེ་ཤེས་ཀྱི་རང་སྣང་ལས་གྲུབ་པའི་དག་པའི་ཞིང་ཁམས་ཐ་གྲུ་ཡངས་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་ཡངས་ཤིང་རྒྱ་ཆེ་ལ་དཔང་མཐོ་བའི་སྟེང་ན་སྣ་ཚོགས་པདྨ་ཁྲ་ཤིག་གེ་བའི་ལྟེ་བར་ཟླ་བའི་དཀྱིལ་འཁོར་ཉ་གང་བ། དེའི་མཐའ་སྐོར་དུ་རིན་པོ་ཆེའི་ཁྲི་པདྨ་ཟླའི་གདན་དང་བཅས་པ་ཅུང་ཟད་དམའ་བའི་རྣམ་པ་གྲངས་མེད་པས་ཁྱིར་ཏེ་བསྐོར་བ། དབུས་ཀྱི་གདན་གྱི་སྟེང་དུ། རང་གི་རྩ་བའི་བླ་མ་སྐུའི་རྣམ་པ་ཇི་ལྟ་བ་ལང་ཚོ་དར་ལ་བབ་པ། ཞབས་སེམས་དཔའི་སྐྱིལ་ཀྲུང་ལས་ཅུང་ཟད་བརྐྱངས་པ་རྒྱལ་པོ་རོལ་པའམ། གཞོན་ནུ་རོལ་པའི་འདུག་སྟངས་ཀྱིས་བཞུགས་པ། དེའི་ཕྱི་རིམ་གྱི་གདན་ལ་མགོན་པོ་ཁ་སར་པ་ཎི་ནས། རྗེ་བཙུན་རྡོ་རིང་པ་ཆེན་པོའི་བར་དུ་བྱོན་པའི་ངལ་གསོ་བརྒྱུད་པའི་བླ་མ་རྣམས་སྐུའི་རྣམ་པ་ཇི་ལྟ་བ་མུ་ཏིག་བསྟར་ལ་བརྒྱུས་པ་བཞིན་གཡས་སྐོར་དུ་ཁྱིར་གྱིས་བཞུགས་པ། དེའི་ཕྱི་རིམ་གྱི་གདན་ལ་རིམ་བཞིན་གདན་གྱི་སྟེང་དུ་རང་གི་དུས་གསུམ་དང་འབྲེལ་བའི་རྩ་བརྒྱུད་ཀྱི་བླ་མ། ཡི་དམ་དཀྱིལ་འཁོར་གྱི་ལྷ་ཚོགས། ལོངས་སྤྲུལ་གྱི་སངས་རྒྱས། དམ་པའི་ཆོས་པུ་ཏི་བྲག་རི་བརྩེགས་པ་ལྟ་བུ་གདོང་དར་ནང་དུ་བསྟན་པའི་རྣམ་པ་ཅན། བྱང་སེམས། ཉན་ཐོས། རང་རྒྱལ་གྱི་ཚུལ་བཟུང་བའི་དགེ་འདུན། མཁའ་འགྲོ་ཆོས་སྐྱོང་སྲུང་མ་ཐམས་ཅད་གཡས་སྐོར་དུ་ཁྱིར་གྱིས་བཞུགས་པར་བསམ། དེ་དག་གི་མདུན་ཐད་ཀྱི་ས་གཞིའི་དབུས་སུ་རང་ཉིད། གཡས་གཡོན་དུ་ཕ་མ། མདུན་དུ་བདུད་སྡིག་ཅན་གྱིས་གཙོས་བྱས་པའི་བདུད་དགྲ། མཐར་རིགས་དྲུག་བར་དོ་དང་བཅས་པའི་སེམས་ཅན་ཐམས་ཅད་འཁོད་དེ། དེ་ཐམས་ཅད་སྒོ་གསུམ་འཇུག་པ་གཅིག་ཏུ་དྲིལ་ནས་སྐྱབས་འགྲོ་བྱེད་པར་བསམས་ལ་ངག་ཏུ། བདག་དང་འགྲོ་བ་མ་རྒན་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ ཡི་དམ་དཀྱིལ་འཁོར་ལྷ་ཚོགས་རྣམས་ལ༴ མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །ཞེས་བརྒྱུད་པ་འདི་ཁ་རང་གི་སྐྱབས་འགྲོ་དྲུག་སྐོར་འབྱུང་བ་ལྟར་རམ། བསྡུ་ན་བཞི་སྐོར་ཡང་རུང༌། དེ་ལྟ་བུའི་ཚུལ་གྱིས་བརྒྱ་ཕྲག་སོགས་ལུས་སེམས་ལ་འགྱུར་བ་མ་བྱུང་གི་བར་དུ་བྱ། མཐར་རྡོ་རྗེ་ཐལ་མོ་སྙིང་ཁར་སྦྱར། སྐྱབས་གསོལ་གྱི་ཚིག་བརྗོད། སེམས་བསྐྱེད་ནི། སེམས་ཅན་ཐམས་ཅད་ཡིད་ཡུལ་དུ་བྱས་ཏེ། འགྲོ་རྣམས་བསྒྲལ་འདོད་བསམ་པ་ཡིས། །སོགས་ཚར་གསུམ་བརྗོད། དེ་ནས་བདག་གཞན་ཐམས་ཅད་ཀྱི་ལུས་རྡུལ་ཕྲ་རབ་ཀྱི་གྲངས་དང་མཉམ་པར་སྤྲུལ་ནས། མཇལ་བ་དོན་ཡོད་པའི་ཡན་ལག་ཏུ་ཕྱག་འཚལ་བ། ལོངས་སྤྱོད་དོན་ཡོད་པའི་ཡན་ལག་ཏུ་མཆོད་པ་འབུལ་བ། སྔར་བྱས་ཀྱི་སྡིག་པ་ལ་དུག་བྱུང་བ་ལྟ་བུའི་འགྱོད་པ། ཕྱིན་ཆད་སྲོག་ལ་བབས་ཀྱང་མི་བགྱིད་སྙམ་པའི་སྡོམ་སེམས་སོགས་སྟོབས་བཞི་ཚང་བའི་སྒོ་ནས་སྡིག་པ་བཤགས་པ། བསོད་ནམས་ཀྱི་ཕུང་པོ་རྒྱ་ཆེར་འཕེལ་བའི་ཕྱིར་རྗེས་སུ་ཡི་རང་བ། བསྟན་པ་ཡུན་དུ་གནས་པའི་ཕྱིར་ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་གདབ་པ། དེས་མཚོན་པའི་དགེ་བའི་རྩ་བ་དུས་གསུམ་དང་འབྲེལ་བར་གྱུར་པ་ཐམས་ཅད་རྫོགས་པའི་བྱང་ཆུབ་བསྔོ་བ་རྣམས་དོན་དྲན་བཞིན་པས། བཟང་སྤྱོད་ལས་འབྱུང་བའི་ཡན་ལག་བདུན་པ་ཚར་གྲངས་གསུམ་མམ། མི་ཤེས་ན་ཕྱག་འཚལ་བ་དང་སོགས་ཚར་གསུམ་བརྗོད། དངོས་སམ་ཡིད་ཀྱིས་མཎྜལ་ཚོམ་བུ་བདུན་པ་དང༌། ས་གཞི་སྤོས་ཆུས་བྱུགས་པ་སོགས་ནས། ནི་ཏ་ཡཱ་མིའི་བར་བརྗོད་པ་ཅི་མང་དབུལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་གསོལ་བ་འདེབས་སོ། །བདག་གིས་གཞི་གཉུག་མའི་དོན་ངོས་ཟིན་པར་མཛད་དུ་གསོལ། ཞེས་གསོལ་བ་སྙིང་གི་དཀྱིལ་ནས་གྲངས་མང་དུ་བཏབ། རིགས་ཀྱི་བུ་ཁྱོད་ཀྱི་སྡིག་པ་ཐམས་ཅད་དག་གོ་ཞེས་གསུང་ལྷང་གིས་གནང་བར་མཛད་པར་བསམ། ཐུན་དེ་ལས་ལྡང་བར་འདོད་ན། སྐྱབས་ཡུལ་རྣམས་ཀྱི་ཐུགས་ཀ་ནས་འོད་ཟེར་འཕྲོས། སེམས་ཅན་ཐམས་ཅད་ལ་ཕོག་སོང་བས། དེ་ཐམས་ཅད་ཟག་མེད་ཀྱི་འོད་ལུས་འབའ་ཞིག་ཏུ་གྱུར། སྐྱབས་ཡུལ་དེ་རྣམས་ཀྱང་མཐའ་ནས་རིམ་བཞིན་འོད་དུ་ཞུ། རྩ་བའི་བླ་མ་ལ་ཐིམ། དེ་ཡང་ཞབས་གཡས་པའི་མཐེ་བོང་ནས་རིམ་བཞིན་འོད་དུ་ཡ་ལ་ལ་སོང་སྟེ་དབུའི་གཙུག་གཏོར་གྱི་བར་དུ་ཐིམ། དེ་ཡང་ནམ་མཁའ་ལ་འཇའ་ཡལ་བ་ལྟར་བུན་གྱིས་སོང་བར་བསམ་ལ་རིག་པ་བརྗོད་མེད་དུ་གནས་ཚད་བཞག །མཐར་དགེ་བ་བསྔོ་བ་སོགས་ཚུལ་བཞིན་དུ་བྱས་ཏེ་ཐུན་བཞི་ལ་སོགས་པར་འབད་གསུངས། གཉིས་པ་རྒྱུད་ལ་བྱིན་རླབས་འབེབས་པ་ཡི་གེ་བརྒྱ་པའི་སྒོམ་བཟླས་ནི། སྐྱབས་སེམས་ཡན་ལག་བདུན་པ་ཡན་གོང་བཞིན་བྱས་པའི་མཐར། རང་གི་སྤྱི་བོར་པྃ་ལས་པདྨ་དཀར་པོ་དང༌། ཨ་དཀར་པོ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་དཀར་པོ། དེ་ཡོངས་སུ་གྱུར་པ་ལས་དཔལ་རྡོ་རྗེ་སེམས་དཔའ་སྐུ་མདོག་སྟོན་ཀའི་ཟླ་བ་ལྟར་དཀར་བ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་འཛིན་པ། གཡོན་གསེར་གྱི་རྡོ་རྗེ་ཕྱེད་པས་ཡུ་བ་བྱས་པའི་དངུལ་གྱི་དྲིལ་བུ་དཀུར་བསྟེན་པ། དར་དང་རིན་པོ་ཆེས་བརྒྱན་ཅིང༌༑ མཚན་དང་དཔེ་བྱད་ཀྱིས་སྤྲས་པ། ཞབས་གཞོན་ནུ་རོལ་པའི་འདུག་སྟངས་ཀྱིས་བཞུགས་པའི་མཐེ་བོང་བདག་གི་ཚངས་བུག་ལ་རེག་པའི་རྣམ་པར་བསམ། དེའི་ཐུགས་ཀར་ཟླ་བའི་སྟེང་དུ་ཧཱུྃ་དཀར་པོའི་མཐར་ཡི་གེ་བརྒྱ་པའི་སྔགས་ཕྲེང་ཁ་དོག་དཀར་པོ། མགོ་གྱེན་བསྟན་གཡས་སྐོར་དུ་ཁྱིར་ཏེ་བཞུགས་པ་གསལ་བཏབ་པའི་སྔགས་ཕྲེང་ལས་འོད་འཕྲོས། ཧཱུྃ་ལ་ཕོག །ཧཱུྃ་ལས་འོད་འཕྲོས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་འོད་དཀར་པོའི་རྣམ་པས་ནམ་མཁའི་ཁམས་ཐམས་ཅད་གང་བར་ཐིབ་ཐིབ་བྱོན། རྡོ་རྗེ་སེམས་དཔའི་དབུ་གཙུག་ནས་ཞུགས། ཐུགས་ཀའི་ཧཱུྃ་ལ་སིབ་སིབ་ཐིམ་པས། ཧཱུྃ་དེ་ཇེ་ཆེ་ལ་བདུད་རྩིའི་རང་བཞིན་མཐེ་བོང་གི་སོར་ཚིགས་ཙམ་དུ་གྱུར་པ་རྡོལ་བའི་རྣམ་པས་ཞབས་ཀྱུ་ནས་བདུད་རྩིའི་རྒྱུན་སྐྱ་ཁྲལ་གྱིས་བབས། སྐུ་ལུས་ཐམས་ཅད་མེར་གྱིས་ཁེངས། ཞབས་གཡས་པའི་མཐེབ་ཆེན་གྱི་རྩེ་ནས་ཐེམ་བུ་བཏང་བ་བཞིན་སྐྱ་ནར་གྱིས་བབས། བདག་གི་ཚངས་བུག་ནས་ཞུགས། ལུས་ཐམས་ཅད་གང་བས། སྡིག་སྒྲིབ་ཉེས་ལྟུང་དམ་ཚིག་ཉམས་པ་ཐམས་ཅད་ཉི་མ་ཤར་བས་མུན་པ་རང་སངས་ལ་སོང་བ་བཞིན་སངས་ཀྱིས་དག་པར་བསམས་ལ་ཡི་གེ་བརྒྱ་པ་བརྗོད། བདུན་བདུན་ཙམ་སོང་བ་དང་འོད་ཟེར་སྤྲོ་བསྡུ་གོང་བཞིན་བསྐྱར་ཞིང་བྱས་པའི་བརྒྱ་སྟོང་སོགས་ཅི་འགྲུབ་བརྗོད་མཐར། བདག་ནི་མི་ཤེས་སོགས་བཤགས་སྡོམ་སྤྱི་དང་མཐུན་པར་བརྗོད་ཀྱང་རུང༌། འདིར་མ་གསུངས་པས་མ་བྱས་ཀྱང་ཆོག །བདག་གི་སྡིག་སྒྲིབ་དག་པ་ལ་རྡོ་རྗེ་སེམས་དཔའ་མཉེས་ཏེ་ལེགས་སོ་སྦྱིན་པའི་ཚུལ་དུ་རིགས་ཀྱི་བུ་ཁྱོད་ཀྱི་སྡིག་པ་དང་སྒྲིབ་པ་ཐམས་ཅད་དག་གོ །ཉམས་ཆག་ཐམས་ཅད་བསྐངས་སོ། །ཞེས་གསུང་ལྷང་གིས་བཏོན་ནས་འོད་དུ་ཞུ་རང་ལ་ཐིམ་པས། ལུས་ཤེལ་གོང་ཕྱིས་པ་ལྟར་གྱུར༑ ངག་ནུས་པ་དང་ལྡན་པས་སེམས་བདེ་སྟོང་གཉིས་མེད་དུ་གྲོལ། རང་གཞན་གྱི་དོན་ཐམས་ཅད་འགྲུབ་པ་ཡིན་སྙམ་དུ་སེམས་འཛིན་མེད་དུ་ཇི་ཙམ་གནས་ཀྱི་བར་དུ་འཇོག་པར་བྱེད། གསུམ་པ་ཁྱད་པར་གྱི་སྔོན་འགྲོ་ཡི་གེ་ལྔ་བཅུ་པས་ཤེས་རྒྱུད་དབང་དུ་བྱ་བ་ནི། རང་གི་སྤྱི་བོར་སེངྒེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཟླ་བའི་གདན་གྱི་སྟེང་དུ་རྩ་བའི་བླ་མ་ཚར་ཆེན་རྡོ་རྗེ་འཆང་སྐུ་མདོག་དམར་སྨུག །ཞལ་ཁྲོ་འཛུམ། ཟིལ་ཤིན་ཏུ་ཆེ་བ་ན་བཟའ་ཕྱར་བུ་སྐབས་རེ་བཙེམས་པ་གསོལ་བ། ཕྱག་པུས་མོ་ལ་བཀབ་པའི་མཉམ་བཞག །སྐུ་ཤིན་ཏུ་ཆེ་བ་ཁྲི་ཁར་ཤོང་ཚད་ལྟ་བུ། དེའི་དབུ་གཙུག་ཏུ་རྗེ་བཙུན་རྡོ་རིང་བ་སྐུ་མདོག་དམར་ལ་སྨུག་པའི་མདངས་ཆགས་པ། ཞལ་ཁྲོ་ཞིང་འཛུམ་ལ་ཡིད་དུ་འོང་བ། སྤྱན་ནམ་མཁའ་ལ་ཆེ་རེ་གཟིགས་པ། དབུ་ལ་སྤྱི་ཐེར་ཡོད་པ། ན་བཟའ་བེར་ཐུལ་གསོལ་བ། དེའི་སྤྱི་བོར་དྲིན་ཅན་མཁྱེན་རབ་ཆོས་རྗེ་སྐུ་མདོག་དཀར་ལ་དམར་པོའི་མདངས་ཆགས་པ། དབུ་སེ་ཡེ་རེ་བ། དེའི་སྤྱི་བོར་འཁྲུལ་ཞིག་ཚུལ་ཁྲིམས་རྒྱལ་མཚན་སྐུ་སྒེག་པ། སྤྱན་ཟུར་གསུམ་མེ་བ། དེའི་སྤྱི་བོར་མཁས་མཆོག་ཙནྡྲ་ཤྲཱི་སྐུ་ཕྲ་ལ་རིང་བ། མགུལ་ཅུང་ཟད་རིང་ཞིང་དབུ་སྐྱ་ཡེ་རེ་བ། དེའི་སྤྱི་བོར་ཆོས་རྒྱལ་ནམ་མཁའི་མཚན་ཅན་སྐུ་ཤིན་ཏུ་སྦོམ་པ། དེའི་སྤྱི་བོར་ཐུགས་སྲས་སེམས་དཔའ་ཆེན་པོ་སྐུ་ཤ་རྒྱས་ཤིང་མཚར་བ། དབུགས་ཆེ་བ། དེའི་སྤྱི་བོར་ཆོས་རྗེ་ཐམས་ཅད་མཁྱེན་པ་སྐུ་མདོག་ཅུང་ཟད་དམར་བ། ཕྱག་གཡས་ཆོས་འཆད་གཡོན་མཉམ་བཞག །དེའི་དབུ་གཙུག་ཏུ་བླ་མ་ཡང་རྩེ་བ་རིན་ཆེན་སེང་གེ་སེར་སེང་ངེ་བ་སྐུ་རིད་པའི་རྣམ་པ། དེའི་སྤྱི་བོར་ཚད་མའི་སྐྱེས་བུ། དེའི་སྤྱི་བོར་ཁྲོ་ཕུ་སེམས་དཔའ་ཆེན་པོ་སྐུ་མདོག་དཀར་དམར་སྐུ་ཤ་རྒྱས་ཤིང༌། ཞལ་སྐྱོང་བའི་རྣམ་པ། དེའི་སྤྱི་བོར་བླ་ཆེན་བསོད་ནམས་དབང་ཕྱུག་སྐུ་མདོག་དམར་སྨུག་ཕྱར་བུ་གསོལ་བ། དེའི་སྤྱི་བོར་ཁྲོ་ཕུ་ལོ་ཙཱ་བ་སྐུ་མདོག་དཀར་དམར་ཅུང་ཟད་ཐུང་ལ་སྒེག་པ། དེ་རྣམས་རབ་བྱུང༌། ཕྱག་དམིགས་བསལ་ཅན་མ་གཏོགས་པ་མཉམ་བཞག་དང༌། དེའི་སྤྱི་བོར་གྲུབ་ཆེན་མི་ཏྲ་ཛོ་ཀི་ལོ་བཅུ་དྲུག་ལོན་པའི་ན་ཚོད༑ སྐུ་མདོག་དཀར་ལ་དམར་བའི་མདངས་ཆགས་པ་རྣལ་འབྱོར་པའི་ཆ་ལུགས། {{TibChung|རས་སེར་པོའི་སྨད་གཡོགས་ཅན་མེ་ཏོག་གི་ཕྲེང་བས་བརྒྱན་པ་ཞེས་དཔེ་རྙིང་ན་འདུག}} །ཕྱག་གཡས་ཆོས་འཆད། གཡོན་མཉམ་བཞག་གི་སྟེང་ན་བདུད་རྩིས་གང་བའི་ཐོད་པ། མཆན་ཁུང་ན་རྡོ་རྗེའི་ཤིང་སྟན་འཛིན་པ། དེའི་སྤྱི་བོར་གྲུབ་ཆེན་རོལ་པའི་རྡོ་རྗེ་པཎྜི་ཏའི་ཆ་ལུགས། གཡས་ཆོས་འཆད་གཡོན་པོ་ཏི། དེའི་སྤྱི་བོར་ཏེ་ལོ་ཤེས་རབ་བཟང་པོ་སྐུ་མདོག་དུད་ཁ་རལ་པའི་ཐོར་ཚུགས་དང་རུས་པའི་རྒྱན་ཅན། གཡས་ཆོས་འཆད། གཡོན་མཉམ་བཞག་མཛད་པ། དེའི་སྤྱི་བོར་བྱང་སེམས་བློ་གྲོས་རིན་ཆེན་སྐུ་མདོག་གསེར་བཙོ་མ་ལྟ་བུའི་ལྷའི་བུའི་ཆ་བྱད་ཕྱག་གཡས་ཆོས་འཆད། གཡོན་རིན་པོ་ཆེའི་སྙེ་མ་འོད་འབར་བའི་ཡུ་བ་ཐུགས་ཀར་བཟུང་ནས་སྙན་གྱི་ཐད་དཀར་འོད་ལམ་མེ་བ། དེའི་སྤྱི་བོར་འཕགས་པ་ཁ་སར་པ་ཎི་སྐུ་མདོག་དཀར་པོ། གཡས་མཆོག་སྦྱིན་གཡོན་པདྨ་ཐུགས་ཀར་འཛིན་པ། གཞོན་ནུ་རོལ་པའི་འདུག་སྟངས་ཀྱིས་བཞུགས་པ། དེ་རེ་རེའི་ཐུགས་ཀར་ཡང་ཟླ་བའི་དཀྱིལ་འཁོར་ཉ་གང་བའི་དབུས་ན་ཧཱུྃ་དཀར་པོ་རེ་རེའི་མཐར་ཡི་གེ་ལྔ་བཅུ་པས་གཡས་སྐོར་དུ་ཁྱིར་གྱིས་བསྐོར་བའི་ཡི་གེ་རེ་རེ་བཞིན་མགོ་བོ་གྱེན་བསྟན་ཞབས་ཟླ་བའི་སྟེང་ན་རེག་ལ་མ་འབྱར་བའི་རྣམ་པ་འོད་ཀྱི་རང་བཞིན་རེ་གསལ་འདེབས་པར་བྱེད། དེ་ནས་སྤྱན་རས་གཟིགས་ཀྱི་ཐུགས་ཀའི་ཧཱུྃ་ལས་འོད་འཕྲོས། ཕྱོགས་བཅུའི་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ནུས་མཐུ་ཐམས་ཅད་སྤྱན་དྲངས། དབུ་གཙུག་ནས་ཞུགས། ཐུགས་ཀའི་ཧཱུྃ་ལ་ཐིམ་པར་བསམས་ལ༑ ༀ་ཨཱཿ བཛྲ་ས་ཏྭ། {{TibChung|རྡོ་རྗེ་སེམས་དཔའ།}} གུ་རུ་ཤྲཱི། {{TibChung|དཔལ་ལྡན་བླ་མ།}} ཁ་སར་པ་ཎི། {{TibChung|ཁ་སར་པ་ཎི།}} ལོ་ཀ་ནཱ་ཐ། {{TibChung|འཇིག་རྟེན་མགོན་པོ།}} སརྦ་བུདྡྷ། {{TibChung|སངས་རྒྱས་ཐམས་ཅད་དང༌།}} བོ་དྷི་ས་ཏྭ། {{TibChung|བྱང་ཆུབ་སེམས་དཔས།}} སྭ་བྷ་ཝ། {{TibChung|རང་བཞིན་གྱིས།}} ཨ་དྷིཥྛ་ནཾ། {{TibChung|བྱིན་གྱིས་བརླབས་པས།}} མ་མ་ཎིརྟཾ། {{TibChung|བདག་གི་སྙིང་ལ།}} བཛྲ་ཏྲཊ། {{TibChung|རྡོ་རྗེ་ཕོ་བ།}} ཛྙཱ་ན་ཛྭ་ལ་ཛྭ་ལ། {{TibChung|ཡེ་ཤེས་འབར་ཞིང་འབར།}} སྥ་ར་ཎ་སྥ་ར་ཎ། {{TibChung|འཕྲོ་ཞིང་འཕྲོ་བའི།}} ཧཱུྃ་ཧཱུྃ་ཕཊ་སྭཱ་ཧཱ། {{TibChung|གཞི་ཚུགས།}} ཞེས་ལན་བདུན་ནམ་ཉེར་གཅིག་བརྗོད། གསོལ་འདེབས་ནི། འཕགས་མཆོག་ཐུགས་རྗེ་ཆེན་པོ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་མོས་གུས་དྲག་པོས་གསོལ་བ་ལན་གསུམ་བཏབ་པས། ཐུགས་ཀའི་ཟླ་བ་ཧཱུྃ་ཡིག་སྔགས་ཕྲེང་དང་བཅས་པ་འོད་དུ་ལྟེམ་གྱིས་ཞུ་སྐུའི་ཆ་ཤས་ཐམས་ཅད་མེར་གྱིས་ཁེངས། སྤྲིན་ལས་ཆར་བབས་པའམ། གངས་རི་ལས་ཆུ་རྒྱུན་འབབ་པ་བཞིན་དུ་སྐུའི་ཆ་ཤས་ཐམས་ཅད་ལས་བདུད་རྩིའི་རྒྱུན་ཁྲ་ལ་ལ་བབས། བྱང་སེམས་བློ་གྲོས་རིན་ཆེན་གྱི་དབུ་གཙུག་ནས་ཞུགས། ཐུགས་ཀའི་ཧཱུྃ་ཡིག་སྔགས་ཕྲེང་དང་བཅས་པ་ལ་ཐིམ་པས། ཐུགས་རྗེ་ཆེན་པོའི་བྱིན་རླབས་ཐམས་ཅད་འདུས་པར་བསམ། ཡང་ཧཱུྃ་ལས་འོད་ཟེར་འཕྲོས། སེམས་ཅན་ཐམས་ཅད་སྨིན་གྲོལ་ལ་བཀོད། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་སྤྱན་དྲངས། ཧཱུྃ་ལ་ཐིམ། དེ་ལ་སེམས་གཏད་དེ་ཡི་གེ་ལྔ་བཅུ་པའི་བཟླས་བརྗོད་དང༌། བྱང་སེམས་བློ་གྲོས་རིན་ཆེན་ལ་ཞེས་སོགས་ཀྱི་གསོལ་འདེབས་ལན་གསུམ་བྱས་པས། ཐུགས་ཀའི་ཟླ་བ་ཧཱུྃ་ཡིག་སྔགས་ཕྲེང་དང་བཅས་པ་འོད་དུ་ལྟེམ་གྱིས་ཞུ་བའི་བདུད་རྩིས་སྐུ་ཐམས་ཅད་ཁེངས། སྐུའི་ཆ་ཤས་ཐམས་ཅད་ལས་བདུད་རྩིའི་རྒྱུན་བབས། ཏེ་ལོ་ཤེས་རབ་བཟང་པོའི་དབུ་གཙུག་ནས་ཞུགས། ཐུགས་ཀའི་ཧཱུྃ་ལ་ཐིམ། ཡང་འོད་ཟེར་སྤྲོ་བསྡུ་སོགས་རྩ་བའི་བླ་མ་དམ་པ་ལ་ཐུག་གི་བར་གོང་བཞིན་ཁ་ཙམ་ཚིག་ཙམ་མ་ཡིན་པར་ལུས་ངག་ཡིད་གསུམ་འཇུག་པ་གཅིག་ཏུ་དྲིལ་ནས་གསོལ་བ་འདེབས་པར་བྱེད། དེ་མཐར་རྩ་བའི་བླ་མའི་ཐུགས་ཀའི་ཟླ་བ་ཧཱུྃ་ཡིག་སྔགས་ཕྲེང་དང་བཅས་པ་འོད་དུ་ཞུ་ནས་སྐུའི་ཁྱོན་ཐམས་ཅད་ཁེངས། སྤྲིན་ལས་ཆར་གངས་རི་ལས་ཆུ་རྒྱུན་འབབས་པ་ལྟར། སྐུའི་ཆ་ཤས་ཐམས་ཅད་ནས་ཐུགས་གཉིས་སུ་མེད་པའི་ཡེ་ཤེས་ཀྱི་བདུད་རྩིའི་བདེ་བ་ཆེན་པོའི་རང་བཞིན་སྐྱ་ཁྲལ་གྱིས་བབས། རང་གི་སྤྱི་བོ་ནས་ཞུགས་ལུས་ཐམས་ཅད་ཁེངས། སྡིག་སྒྲིབ་ཐམས་ཅད་ཉི་མ་ཤར་བས་མུན་པ་རང་སངས་ལ་སོང་བ་བཞིན་དུ་སངས་ཀྱིས་དག །བླ་མ་བརྒྱུད་པ་བཅས་པའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་རྒྱུད་ལ་ཞུགས་བྱུང་སྙམ་པ་བྱས། དེ་ཀའི་ངང་དུ་འཛིན་པ་མ་ཞུགས་པར་ཆད་དེ་འཇོག་པར་བྱེད། མཐར་བླ་མ་བརྒྱུད་པ་དང་བཅས་པའི་ཞལ་ནས། རིགས་ཀྱི་བུ་ཁྱོད་ནི་ཕུན་སུམ་ཚོགས་པ་དང་ལྡན་པ་ཡིན་ནོ། །ཞེས་གསུང་ལྷང་གིས་བཏོན་བྱུང་བས་རང་གི་རྒྱུད་ལ་སྤྲོ་དགའ་ཁྱད་པར་ཅན་བསྐྱེད་དེ་དགའ་ཡལ་ལེ་བཞག །དེ་ནས་བླ་མ་བརྒྱུད་པ་དང་བཅས་པ་ནམ་མཁའ་ལ་འཇའ་ཡལ་བ་བཞིན་དུ་ཡལ་གྱིས་སོང༌། རང་སེམས་སྟོང་པ་དང་དབྱེར་མེད་དུ་འདྲེས་སོང་སྙམ་པའི་ངང་ལ་ཆད་དེ་ཇི་ཙམ་གནས་ཀྱི་བར་འཇོག །མཐར་དགེ་བ་བསྔོ་བ་སོགས་ཚུལ་བཞིན་དུ་བྱ། གལ་ཏེ་ཡི་གེ་ལྔ་བཅུ་པ་ཡེ་མི་ཤེས་ན་ཐུགས་ཀའི་ཧཱུྃ་གི་མཐར། ༀ་ཨཱ་ཧྲཱིཿ ཧཱུྃ། ཞེས་པས་བསྐོར་བར་བསམ་ཞིང་བཟླས་པས་ཀྱང་གོ་ཆོད་པ་བླ་མ་བརྒྱུད་པའི་གསུང་སྒྲོས་ཡིན་གསུངས། དེ་ལྟར་སྔོན་འགྲོ་དེ་ཐམས་ཅད་དང༌། ཁྱད་པར་བླ་མའི་རྣལ་འབྱོར་ནན་ཏན་ཆེན་པོས་ཉམས་སུ་མ་བླངས་ན་དངོས་གཞིའི་དགེ་སྦྱོར་ཡེ་མི་སྐྱེ་ཞིང༌། ཡུན་རིང་པོ་ནས་ཆ་ཙམ་སྐྱེ་སྲིད་ཀྱང་མི་བརྟན་པ་སོགས་མདོར་ན་ཇི་ལྟ་བ་བཞིན་མི་འབྱུང་བས། སྔོན་འགྲོ་ལ་འབད་པ་དྲག་པོས་ཉམས་སུ་ལེན་པ་གལ་ཆེ་གསུངས་སོ། །དགོས་མེད་ཚེ་འདིའི་ཟར་ཟིར་བུན་ལོང་རྣམས། །རྒྱངས་སུ་དོར་ཏེ་མི་མེད་ལུང་སྟོང་དུ། །འཁྲུལ་མེད་ཕ་རྒོད་བླ་མའི་གསུང་འདི་དག །འབད་པས་བསྒོམ་པའི་དུས་གཅིག་ནམ་ཡོང་ན། །གཉིས་པ་དངོས་གཞི་ལ། རྡོ་རྗེའི་ཚིག་ཉི་ཤུ་རྩ་ལྔའི་ནང་ནས་གཉུག་མ་ངོ་སྤྲོད་པའི་ཐབས་ཚིགས་བཅད་ལྔའི་དོན་ {{TibChung|གཞུང་ལས། བུ་ཉོན་ཁྱོད་གང་རྣམ་པར་རྟོག །ནས། གཡེང་བའི་རྡུལ་དང་བྲལ་བ་ཉིད། །བར་རོ། མཆན།}} ཉམས་སུ་ལེན་པ་སྟེ། དེའང་སེམས་ཉིད་གཉུག་མ་ཞེས་པའི་དོན། དགོན་པར་རྒྱུན་བཞུགས་ཀྱི་དགེ་འདུན་ལ་གཉུག་མར་གནས་པའི་དགེ་འདུན་ཟེར་བ་ལྟར། སེམས་ཉིད་ཡེ་གདོད་མ་ནས་མ་བཅོས་ཤིང་རང་བཞིན་གྱིས་དག་པར་གནས་པས་གཉུག་མ་ཞེས་པའམ་མ་བཅོས་པའམ། སོ་མའམ། ཐ་མལ་གྱི་ཤེས་པ་ཞེས་བྱ་ལ། དེའང་ངོ་བོ་ལ་ལྟོས་ཏེ་གནས་འགྱུར་མེད་ལ། རྣམ་པ་ལ་ལྟོས་ཏེ་གནས་འགྱུར་ཡོད་པ་སྟེ། ཟངས་གཅིག་ཉིད། ཁྱི་སྣོད་དང༌། རྒྱན་ཆ་དང༌༑ ལྷའི་སྐུ་གཟུགས་ཀྱི་གནས་སྐབས་གསུམ་ན། ཟངས་ཀྱི་ངོ་བོ་ལ་བཟང་ངན་དུ་སོང་བ་ཏིལ་འབྲུ་ཙམ་མེད་མོད། གནས་སྐབས་ཀྱི་རྣམ་པ་མི་འདྲ་བ་ལ་བརྟེན་ནས་སྐྱུགས་བྲོ་བ་དང༌། རྒྱན་ཆར་ཤེས་པ་དང༌། ཐམས་ཅད་ཀྱི་མཆོད་པའི་གནས་སུ་བྱེད་པ་ལྟར། སེམས་ཀྱང་དམྱལ་བ་མནར་མེད་ནས་སངས་རྒྱས་ཀྱི་བར་ཁོ་རང་གི་ངོ་བོ་བཟང་ངན་དུ་སོང་བ་མེད་ནའང༌། རང་ངོ་མ་ཤེས་པའི་སྐབས་སུ་འཁོར་བ། བླ་མ་དམ་པའི་མན་ངག་གིས་དྲི་མ་ཅུང་ཟད་སྲབ་པའི་དུས་ལམ་པ། དྲི་མ་མཐའ་དག་སྤངས་པའི་ཚེ་སངས་རྒྱས་ཞེས་ཁྱད་པར་བྱས་པ་ཙམ་ཡིན། དེའང༌། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །ཞེས་སེམས་ཀྱི་རང་བཞིན་འོད་གསལ་བ་གཞི་དུས་ཀྱི་སངས་རྒྱས་ཡིན་ཡང༌། ཡིན་པ་ལ་ཡིན་པར་ངོ་མ་ཤེས་པས་སྣང་བ་སྣ་ཚོགས་སུ་ཤར། ཤར་བ་ལ་བདེན་ཞེན་ཞུགས་པས་མེད་བཞིན་དུ་འཁོར་བའི་འཁྲུལ་སྣང་ཉམས་སུ་མྱོང་སྟེ། སངས་རྒྱས་ཀྱིས་སངས་རྒྱས་ཀྱི་བྱ་བ་བྱེད་མ་ནུས་པ་ནི་རྒྱུའི་རྒྱུད་ཅེས་བྱ་སྟེ། རྒྱུ་ནི་འཁོར་འདས་གཉིས་ཀའི་རྒྱུན་དུ་གྱུར་པ་ཡིན་ལ། དེ་ཉིད་སེམས་ཅན་ནས་སངས་རྒྱས་ཀྱི་བར་དུ་རྒྱུན་མ་ཆད་པར་གནས་པས་རྒྱུད་ཅེས་བྱ། དེ་བསལ་ནས་ནི་ཞེས་བླ་མ་དམ་པའི་མན་ངག་གིས་གློ་བུར་གྱི་དྲི་མ་སྦྱོང་བའི་ཐབས་ཉམས་སུ་བླངས་པས་འཁྲུལ་པའི་སྣང་བ་བསྲབས་པར་གྱུར་པ་ནི་ཐབས་རྒྱུད་ཡིན་ལ། སངས་རྒྱས་ཉིད་ཅེས་ལམ་དེས་སྤང་བྱ་མཐའ་དག་སྤངས། ཐོབ་བྱ་མཐའ་དག་ཐོབ་སྟེ། དག་པ་གཉིས་ལྡན་གྱི་སངས་རྒྱས་མངོན་དུ་གྱུར་པ་ནི་འབྲས་བུའི་རྒྱུད་ཅེས་བྱ་བ་ཡིན་པས། མངོན་དུ་བྱེད་པའི་ཐབས་ཉམས་སུ་ལེན་པ་ལ༑ ཤེས་རབ་ལྟ་བས་ཐག་བཅད་པ་དང༌། ཐབས་བསྒོམ་པས་ཉམས་སུ་བླང་བ་གཉིས་ཀྱི། དང་པོ་ལ། ཡུལ་རང་བཞིན་ཉམས་དགའ་བར་བཞག་པ་དང༌། ཡུལ་ཅན་གཉིས་མེད་ཡེ་ཤེས་ལྟ་བར་བཞག་པ་གཉིས་འབྱུང་བ་ལས། འདིར་ཕྱི་མ་སྟེ། དེའང་གོང་དུ་བསྟན་པ་ལྟར། རང་གི་སེམས་རང་བཞིན་གྱིས་འོད་གསལ་བ་དེ་ཉིད་མངོན་དུ་བྱེད་པའི་ཐབས་ལ། གློད་པ་ལ་བསླབ་པ་དང༌། དེའི་གེགས་བསལ་བ་གཉིས། དང་པོ་ལ། དབེན་པ་གསུམ་དང༌། མི་གཡོ་བ་གསུམ་མམ། འདི་བས་ཕྱག་རྒྱ་གསུམ་ཞེས་པའི་ཐ་སྙད་མཛད་པ་ལྟར་ན། ལུས་ཀྱི་ཕྱག་རྒྱ་རྣམ་སྣང་གི་ཆོས་བདུན། ལག་པ་མཉམ་བཞག །མཐེ་བོང་ལྟོ་སྦྱར་བ་དང་བཅས་པ་ལེགས་པར་བཅས། ངག་གི་ཕྱག་རྒྱ་རླུང་འགྲོ་འོང་རང་སོར་བཞག །སེམས་ཀྱི་ཕྱག་རྒྱ་དུས་གསུམ་ཡིད་བྱེད་ཀྱི་རྟོག་པ་ཐམས་ཅད་སྤངས་ཏེ་སྨིན་མཚམས་མཐོ་བདུན་ཙམ་འདས་པའི་སར་མིག་གཏད་དེ། ཆད་དེ་འཇོག་ཅིང༌། དེའང་གཙོ་བོར་སེམས་ཁོངས་གློད་དེ་འཇོག །མ་གློད་པའི་སྐྱོན་ནི། སྒོམ་ཡོང་ལ་རེ་བ་ལྟ་བུའི་ཚབ་ཚུབ་ཀྱིས་སླར་སེམས་གཡེངས་རྐྱེན་དུ་འགྱུར་ལ། གློད་པའི་ཡོན་ཏན་ནི། དེ་ལྟར་ལྷོད་ཀྱིས་གློད་ནས་བཞག་པའི་ཚེ་ན། སེམས་ཁོ་རང་གི་རང་ངོ་རྗེན་ནེ་ཝལ་གྱིས་ཤེས་ཡོང་བ། དཔེར་ན་ཆུ་རྙོག་མ་ཅན་དྭངས་སུ་རེ་བའི་བཅས་བཅོས་མང་ན་སླར་རྙོག་མ་འཕེལ་ཞིང༌། རང་བབས་སུ་བཞག་པས་མྱུར་དུ་དྭངས་འགྲོ་བ་དང་འདྲ་བ་ཡིན། དེའང༌། ཕྱག་རྒྱ་གསུམ་པོ་དྭངས་སིང་ངེ་བ་བཅས་ཏེ། སྒོམ་ཡོང་ངམ་མི་ཡོང་ངམ་སྙམ་པ་ལ་སོགས་པའི་རེ་དོགས་ཀྱི་རྟོག་པ་ཅི་ཡང་ཡིད་ལ་མི་བྱ་བར། སེམས་ཁོ་རང་རང་བབས་སུ་གློད་ནས་ལྷན་ནེར་འཇོག །དེ་ལྟར་བཞག་པའི་ཚེ་མི་སྡོད་པར། རྣམ་རྟོག་ཐོལ་ཐོལ་སྐྱེ་བ་ཆོས་ཉིད་ཡིན་པས་གང་སྐྱེས་ཀྱང་རྟོག་པ་དེའི་རྗེས་སུ་མི་འབྲང་བར་རྦད་ཀྱིས་བཅད་ལ། སྔ་མའི་རྟོག་པ་འདས། ཕྱི་མའི་རྟོག་པ་མ་སྐྱེས་ཀྱི་བར་དེར། སེམས་ཐ་མལ་གྱི་ཤེས་པ་རྗེན་གྱིས་འཆར་བ་དེ་ཁའི་ངང་དུ་འཇོག་པར་བྱེད། དེ་ལྟར་སྐད་ཅིག་ཀྱང་མ་ཡེངས་པར་ཉམས་སུ་བླངས་པས། ཇི་ཞིག་ནས། ཕྱི་རོལ་གྱི་སྣང་བ་སྣ་ཚོགས་ལ་བདེན་པར་ཞེན་པ་ཞིག་ནས། སྣང་བ་འདི་ཐམས་ཅད་རང་སེམས་སུ་རྟོགས་པ་ཞིག་འབྱུང་དེ་ལྟ་ན་སེམས་ཙམ་པའི་ལྟ་བ་རྒྱུད་ལ་སྐྱེས་པ་ཡིན་ལ། འདིར་སེམས་དུབ་པ་ངལ་གསོ་བའི་གནས་དང་པོ་ངོ་འཕྲོད་པ་ཡིན་གསུངས། དེ་ལྟར་སྣང་སེམས་དབྱེར་མེད་དུ་ཤེས་པ་དེའི་ངོ་བོ་ལ་ཆེར་གྱིས་བལྟས་པའི་ཚེ་ན། དང་པོ་ཡུལ་འདི་ནས། དབྱིབས་འདི་འདྲས། དུས་འདི་ཙམ་ན་སྐྱེས་ཞེས་བྱ་བ་མི་དམིགས། བར་དུ་རང་གི་སྤྱི་བོ་ནས་རྐང་མཐིལ་གྱི་བར་དུ་ལུས་ཕྱི་ནང༌། དེས་མཚོན་པའི་སྣོད་བཅུད་འཁོར་འདས་འདི་འདྲ་ཞིག་ལ་གནས་ཞེས་བྱ་བའམ། དབྱིབས་ཁ་དོག །མཚན་མ་འདིའོ་ཞེས་མི་རྙེད་པས་བར་དུ་གནས་པ་མ་གྲུབ། དེ་ལྟར་སྐྱེ་བ་དང་གནས་པ་མ་གྲུབ་པས། དེ་ལ་ལྟོས་པའི་འགགས་པའང་མི་འགྲུབ་སྟེ། དུས་འདི་ཙམ་ན། འདི་འདྲ་ཞིག་ཏུ་འགགས་པའམ་ཟད་སོང་ཞེས་མི་རྙེད་དེ། མདོར་ན་སྐྱེ་འགག་གནས་གསུམ་གྱིས་སྟོང་ཞིང༌། དེས་མཚོན་བྱར་གྱུར་པའི་ཡོད་མེད་རྟག་ཆད་སོགས་མཐའ་བཞིའམ་བརྒྱད་དང་བྲལ་བར་རྟོགས་པ་འབྱུང་སྟེ། དེ་ནི་དབུ་མའི་ལྟ་བ་རྒྱུད་ལ་སྐྱེས་པའམ་དུབ་པ་ངལ་གསོ་བའི་གནས་གཉིས་པ་ངོ་འཕྲོད་པ་ཡིན་ནོ་གསུངས། དེ་ལྟར་མཉམ་པར་བཞག་པའི་དུས་ན། རྣམ་རྟོག་གི་འཕྲོ་རྒོད་དུ་མ་འབྱུང་བ་སོགས་སེམས་ཇི་ལྟ་བར་གནས་སུ་མ་གཏུབ་ན། ཡང་གོང་དུ་བཤད་པ་ལྟ་བུའི་བླ་མའི་རྣལ་འབྱོར་བསྒོམས་ཏེ། ལུས་སེམས་ཐང་མ་ཆད་ཀྱི་བར་དུ་གསོལ་བ་བཏབ། བླ་མ་རང་སེམས་དབྱེར་མེད་དུ་ནམ་མཁར་ཡལ་བ་དེ་ཁའི་ངང་དུ་མ་བཅོས་པར་གློད་ལ་བཞག །མདོར་ན་བླ་མ་ལ་མོས་གུས་དྲག་པོས་ལན་གཅིག་མ་ཡིན་པར་སྙིང་ཐག་པ་ནས་གསོལ་བ་བཏབ་ན་བྱིན་རླབས་རྒྱུད་ལ་ཞུགས་ཏེ། རང་སེམས་གཉུག་མའི་གནས་ལུགས་ནང་ནས་རང་ལ་ཤར་བའི་ཚུལ་དུ་རྗེན་པར་རྟོགས་པ་ཞིག་འབྱུང༌། བླ་མའི་བྱིན་རླབས་མ་ཞུགས་ན་ཇི་ཙམ་བསྒོམས་ཀྱང་དོན་སྤྱིའི་རྣམ་པ་གོ་ཡུལ་ཙམ་དུ་ཡུལ་ལེ་བ་འཆར་གྱིས། རྟོགས་པ་ཕྱིན་ཅི་མ་ལོག་པར་མི་སྐྱེ་བས་བླ་མའི་མོས་གུས་ཁོ་ན་ལ་ནན་ཏན་དུ་བྱ་བ་གལ་ཆེའོ་གསུངས། ལམ་གྱི་མཐར་ཐུག་བླ་མའི་མོས་གུས་ལ། །ཁ་ཙམ་མིན་པའི་ཉམས་ལེན་ཁོར་ཡུག་གིས། །རང་སེམས་མ་བཅོས་གཉུག་མའི་ཞལ་བཟང་མཆོག །རང་བྱུང་རྗེན་པ་མཐོང་དུས་ནམ་ཡོང་ན། །གཉིས་པ་ཐབས་བསྒོམ་པས་ཉམས་སུ་བླང་བ་ནི། དེ་ལྟར་སེམས་ཀྱི་ངོ་བོ་མཐོང་ཡང་དེའི་རྒྱུན་མ་བསྐྱངས་ན། འཁོར་བ་ཐོག་མ་མེད་པ་ནས་གོམས་པའི་བག་ཆགས་ཀྱིས་གནས་ལུགས་རང་ངོ་ཤེས་པ་སྤྲིན་བར་གྱི་ཉི་ཞུར་བཞིན་དུ་འགྲིབ་པར་འགྱུར་བས་ན། དེ་མི་འབྱུང་བའི་ཆེད་དུ་དུས་གནས་སྐབས་ཀུན་ཏུ་མ་ཡེངས་པར་བསྐྱང་དགོས་ལ། ཇི་ལྟར་སྐྱོང་བའི་ཚུལ་ལའང་གསུམ་ལས། དང་པོར་མི་གནས་པ་གནས་པར་བྱེད་པའི་ཐབས་མ་ཡེངས་པར་སྐྱོང་བ་ལ་མཁས་པ་རལ་སྐོར་མཁན་གཡུལ་དུ་ཞུགས་པ་ལྟ་བུ་ཞེས་བྱ་བ༑ རྒྱ་གར་ན་འཐབ་མོ་བྱེད་པ་ན། རལ་གྲི་བཟུང་བ་ནས། འུར་རྡོ་ཐོགས་པའི་བར་སོ་སོར་འཐབ་པར་བྱེད་པས་ན། རལ་སྐོར་མཁན་དེའང་ཐེ་ཚོམ་ཡེངས་པ་མེད་ཅིང་མ་ཡེངས་པར་རལ་གྲི་བསྐོར་བས་ཚུལ་སུས་ཀྱང་མི་ཚུགས་ལ། ཕར་ཐམས་ཅད་བཅོམ་སྟེ་གཡུལ་ལས་རྒྱལ་ངེས་པ་ཞིག་འབྱུང་ལ། གལ་ཏེ་སེམས་གཡེང་བའམ་ཐེ་ཚོམ་དུ་ལུས་ན། དེའི་བར་གཞན་གྱིས་ཚུར་བསྣུན་ཏེ་རང་ཉིད་འཆི་བར་མ་ཟད་གཡུལ་ཡང་ཕམ་པར་འགྱུར་བ་བཞིན་དུ། རྣལ་འབྱོར་པ་སེམས་ཀྱི་ངོ་བོ་མཐོང་བ་དེས། དེ་ཁའི་ཐོག་ཏུ་སྐད་ཅིག་ཀྱང་མ་ཡེངས་པར་ཉམས་སུ་བླང་ན། ཚུར་རྣམ་རྟོག་གིས་མི་ཚུགས་པར་མ་ཟད། ཕར་རྣམ་རྟོག་ཐམས་ཅད་འཇོམས་པར་འགྱུར་ལ༑ ཐེ་ཚོམ་དང་གཡེང་བས་དེ་ཐོག་ཏུ་འཇོག་མ་ནུས་ན། ཡེངས་འཁྲུལ་རྒྱ་འབྱམས་ཀྱི་དབང་དུ་གྱུར་ཏེ། འཁོར་བའི་རྒྱ་མཚོ་འདིར་ལྟུང་ནས་ཐར་པའི་དུས་མེད་པ་ཞིག་འབྱུང་བས་དུས་དང་རྣམ་པ་ཐམས་ཅད་དུ་མ་ཡེངས་པའི་དྲན་པ་གལ་ཆེ་གསུངས། དེའང་སྐྱབས་འགྲོ་ནས་བཟུང་སྟེ་རང་སེམས་སྤྲོས་བྲལ་གྱི་ངང་དུ་འཇོག་པའི་བར་གོང་བཞིན་ལ། དེ་ཁའི་ངང་དུ་ཡེ་མ་ཡེངས་པར་ཆད་དེ་འཇོག་པར་བྱེད། རྣམ་རྟོག་གང་སྐྱེས་ཀྱང་རྦད་ཀྱིས་བཅད་ལ། ཡང་འཛིན་མེད་དུ་འཇོག་པ་དེ་ལྟ་བུ་ཡང་ཡང་གོམས་པས། སེམས་སྤྲོས་བྲལ་དུ་ལྷན་ནེར་གནས་པ་ཞིག་འབྱུང་སྟེ། དུབ་པ་ངལ་གསོ་བའི་གནས་གསུམ་པ་ངོ་འཕྲོད་པ་ཡིན་གསུངས། གཉིས་པ་གནས་པ་བརྟན་པར་བྱེད་པའི་ཐབས། བར་དུ་མ་བཅོས་པར་བཙའ་བ་ལ་མཁས་པ་གླང་རྫི་མཁས་པས་གླང་པོ་ཆེ་སྐྱོང་བ་ལྟ་བུ་ནི། དཔེར་ན་གླང་པོ་ཆེ་དེ་སེམས་ཅན་སྟོབས་ཆེ་ཞིང་མ་རུངས་པ་ཞིག་ཡིན་པས། དེ་བསྐྱང་བ་ན། འགྲོ་ལྡོག་ལ་མཁས་པ་ཞིག་དགོས་ཀྱི། ལྕག་དང་ལྕགས་ཀྱུ་སོགས་ཙབ་ཙོབ་མང་ན། ཁོ་ཁྲོས་ནས་གང་དགར་ཁྱེར། མ་འཆུན་ན་ལམ་དུ་མི་ཆུག །དེས་ན་ཁོ་རང་ལམ་ལ་འགྲོ་བ་ན་རང་སོར་བཞག །ལམ་མིན་དུ་འཇུག་པ་ན། ལྕག་དང་ལྕགས་ཀྱུ་སོགས་ཀྱིས་བཏུལ་བས་འདོད་པར་ཕྱིན་པ་བཞིན་དུ། སེམས་འདིའང་གང་དགར་བཞག་ན་འཁྲུལ་པ་རྒྱ་འབྱམས། གཉེན་པོ་ཙབ་ཙོབ་མང་ན་སླར་འཁྲུལ་པའི་བསྣོན་ཁར་འགྱུར་བས༑ ཕྱི་ལྷོད་ལ་ཁོང་གྲིམ་པའི་ཚུལ་དུ་ཧ་ཅང་ཅུར་ཅུར་དུའང་མ་སོང་བ་མ་ཡེངས་པའི་རྒྱངས་སོ་བཙུགས་ནས། སེམས་ཁོ་རང་རང་བབས་སུ་གནས་ཀྱི་འདུག་ན། དེ་ཀའི་ངང་ལ་ཆམ་མེ་འཇོག །འགྱུ་ཡི་འདུག་ན་དྲན་པས་ཚིར་གྱིས་བཟུང་ལ་རྣམ་རྟོག་གང་ཤར་བ་དེ་ཀའི་ཐོག་ཏུ་འཛིན་མེད་དུ་ཆམ་གྱིས་འཇོག །དེ་ལྟར་བཞག་པས་རྣམ་རྟོག་གཅིག་ཤར། དེ་ཀའི་ངོ་བོ་ལ་བལྟས་པས་འཛིན་མེད་དུ་ལྷང་ངེ༌། སེམས་གཉུག་མའི་ཞལ་གཅིག་མཐོང་བ་ཡིན་མོད། དེས་མཚོན་རྣམ་རྟོག་གི་འགྱུ་བ་དགག་པར་མི་ནུས་པས། གང་ཤར་བ་དེ་ཐོག་ཏུ་འཛིན་པ་མ་ཞུགས་པར་ཆམ་ཆམ་འཇོག་པར་བྱེད། དེ་ལྟ་བུ་གོམས་པས་རྣམ་རྟོག་གང་སྐྱེས་ཀྱང་རང་ངོ་རྗེན་པར་ཤེས་པ་ནི་འགྱུ་བ་རང་སར་གྲོལ་བ་ཞེས་བྱ་སྟེ། དུབ་པ་ངལ་གསོ་བའི་གནས་བཞི་པ་ངོ་འཕྲོད་པ་ཡིན་ནོ་གསུངས། གསུམ་པ་བརྟན་ནས་བོགས་འབྱིན་པར་བྱེད་པ། ཐ་མ་ཅི་དགར་བཏང་བ་ལ་མཁས་པ་གཟིངས་ཐོག་ནས་འཕུར་བའི་བྱ་ལྟ་བུ་ཞེས་བྱ་རྒྱ་གར་ན་ཚོགས་པ་རྒྱ་མཚོར་འགྲོ་བ་རྣམས་རི་དང་ཆུ་སྲིན་བརྟགས་པའི་ཆེད་དུ། ཕུག་རོན་དང་བྱ་རོག་སོགས་ཁྱེར་བ་ན་འཛམ་བུ་གླིང་དང་ཉེ་བའི་ཕྱོགས་རྣམས་སུ། བྱ་རྫི་སོགས་ཀྱིས་ཉེར་ཅག་ལེགས་པོ་བྱས། གང་བྱུང་ལ་མ་ཤོར་བ་མ་བྱས་ན། ཁོ་འཛམ་བུ་གླིང་དུ་ལོག་ན་རི་དང་ཆུ་སྲིན་བརྟག་པ་སོགས་མི་ཡོང་བས་ཁྱེར་བ་དོན་མེད་དུ་འགྱུར་བས་མི་ཕུར་བའི་ཐབས་བྱ་དགོས་ལ། རྒྱ་མཚོའི་དབུས་སུ་སླེབས་ན་རྒྱ་མཚོ་དང་ནམ་མཁའ་གཉིས་ཁ་སྦྱར་བ་ལྟ་བུའི་མཐའ་བྱས་རྙེད་པར་མི་ནུས་པས། དེ་ཙམ་ན་ཉེར་ཅག་མི་དགོས་པར་རང་དགར་འཕུར་བཏང་བས། ཁོ་རང་གང་དུའང་འགྲོ་ས་མི་རྙེད་ལ༑ ཆུ་ལ་སྡོད་མི་ཚུགས་པས་སླར་གཟིངས་ཐོག་ཏུ་ཁྱིར་ཏེ་བབས་ཡོང་བ་ལྟར། སེམས་ཀྱང་འགྱུ་བ་རང་གྲོལ་དུ་མ་སོང་གི་བར་མ་ཡེངས་པར་གཅུན། རྣམ་རྟོག་གང་སྐྱེས་ཀྱང་དེ་ཐོག་ཏུ་འཛིན་པ་མ་ཞུགས་པར་མ་བསྐྱངས་ན། སེམས་ཡུལ་ལ་འབྱམས་ན་དགེ་སྦྱོར་བྱེད་བློ་ཙམ་མ་གཏོགས། ཐར་པ་དང་ཐམས་ཅད་མཁྱེན་པའི་ལམ་སྒྲུབ་པར་མི་ནུས་པས་དོན་མེད་དུ་འགྱུར་བ་ཡིན་པས། འགྱུ་བ་རང་གྲོལ་དུ་ཤེས་པ་ན། དེ་བརྟན་མི་བརྟན་བརྟག་པའི་ཆེད་དུ། སེམས་འདོད་ཆགས་ཞེ་སྡང་སོགས་ཉོན་མོངས་སྐྱེས་པའི་ཡུལ་ལ་ཆེད་དུ་སྤྲོས་ཏེ་ཆམ་གྱིས་བཏང་ནས། དེ་དང་དེའི་རྩལ་རྫོགས་སུ་བཅུག་པས། རྣམ་པ་ཉོན་མོངས་དེ་དང་དེར་ལམ་མེར་གནས་ཀྱང༌། ངོ་བོ་གཉིས་མེད་ཀྱི་ཡེ་ཤེས་སུ་རྗེན་ནེ་གནས་པ་སྟེ། ཡུལ་དེར་མི་གནས་པར་སེམས་ཁོ་རང་བརྗོད་བྲལ་གྱི་ངང་དུ་ལྷོད་དེ་གནས་པ་ཞིག་འབྱུང༌། དེ་གོམས་ན། གནས་གཉེན་པོར་ཕྱིན་ལ་བགེགས་ཀྱི་ཆོ་འཕྲུལ་དང་བསྲེ། རིམ་གྱིས་མེ་དང༌། ཆུ་དང༌། མཚོན་ལ་སོགས་པའི་ཐོག་ཏུ་བསྲེས་པས། དེ་དང་དེས་གནོད་པར་མི་ནུས་ཀྱི་སྟེང་དུ་ཉམས་དང་རྟོགས་པ་ལ་བོགས་རྒྱངས་རྒྱངས་ཐོན་ཡོང་བ་ཡིན་ཏེ། དེ་ནི་དུབ་པ་དང་ངལ་གསོ་བའི་གནས་ལྔ་པ་ངོ་འཕྲོད་པ་ཡིན་གསུངས། མ་ཡེངས་དྲན་པའི་མ་མས་རིང་དུ་བསྐྱང༌། །མ་བཅོས་གཉུག་མའི་ཀློང་དུ་ཆོས་ཀུན་གྲོལ། །མ་བཅིངས་རང་ངོ་ཤེས་པའི་རྒྱ་ཡན་གྱིས༑ ༑མ་ནོར་གནས་ལུགས་རྟོགས་དུས་ནམ་ཡོང་ན། །གཉིས་པ་གེགས་བསལ་བ་ནི། དེ་ལྟར་ཤེས་རབ་ལྟ་བས་ཐག་བཅད་པའི་དོན་དེ་ཐབས་བསྒོམ་པའི་གནས་གསུམ་པོ་དེས་སྐད་ཅིག་ཀྱང་ཡེངས་པ་མེད་པས་ཉམས་སུ་བླངས་པས། ཇི་ཞིག་ན་བདེ་གསལ་མི་རྟོག་པའི་ཉམས་སྐྱེ་ཞིང༌། དེ་དག་ལ་ཞེན་ན་ཁམས་གསུམ་འཁོར་བའི་རྒྱུར་འགྱུར་གྱི། ཐམས་ཅད་མཁྱེན་པའི་ལམ་དུ་མི་འགྲོ་བས། གེགས་དེ་བསལ་དགོས་ལ། དེའང་ཉམས་དེ་མ་སྐྱེས་ནའང་ལམ་དུ་མི་འགྱུར་བས་ཐོག་མར་མ་སྐྱེས་ཀྱི་བར་དུ་བསྐྱང༌། ཉམས་དེ་དག་ལ་ཞེན་ནའང་ལམ་དུ་མི་འགྱུར་བས། ལམ་དུ་བསྲེལ་དགོས་ཏེ། དཔེར་ན་རྒྱ་གར་རྡོ་རྗེ་གདན་དུ་འགྲོ་བའི་ལམ་ན། དཔལ་མོ་དཔལ་ཐང་ལྟ་བུ་ཐང་བདེ་ཞིང་ཡིད་ཆགས་པའང་ཡོད། གཅན་ཕྲང་དང་གཡང་ས་སོགས་ལམ་འཇིགས་པའང་ཡོད་མོད། དེ་དག་ལ་མ་ཕྱིན་པར་ཡང་རྡོ་རྗེ་གདན་དུ་སླེབས་མི་ནུས་ན། དེ་དག་ལ་ཆགས་ནས་དེར་བསྡད་པའམ་འཇིགས་ནས་འགྲོ་མ་ནུས་པར་ལོག་ནའང་རྡོ་རྗེ་གདན་དུ་སླེབ་པའི་གེགས་སུ་འགྱུར་བ་དང་ཚུལ་མཚུངས་པ་ཡིན་ཏེ། དེའང་དེ་ལྟར་མཉམ་པར་བཞག་པའི་དུས་ན། རྣམ་རྟོག་གི་འགྱུ་བ་ཐམས་ཅད་འགགས་ཀྱང་སེམས་ཀྱི་རང་ངོ་རྗེན་པར་མ་ཤེས་པའི་མུན་ནེ་བ་ནི་ཞི་གནས་ལྟེངས་པོ་ཞེས་བྱ་བའམ། མི་རྟོག་པའི་ཉམས་ཞེས་བྱ་བ་ཡིན་ལ། དེ་ལ་ཞེན་ན་གཟུགས་མེད་ཀྱི་ལྷར་སྐྱེ་བ་མ་གཏོགས་པར་ཐམས་ཅད་མཁྱེན་པའི་ལམ་དུ་མི་འགྱུར་བས་དེ་བསལ་བ་ནི། ལུས་གནད་བསྒྲིམ། ལྟ་སྟངས་དཔང་བསྟོད། རིག་པ་ཧུར་ཕྱུངས། ཤེས་པ་གཟེངས་བསྟོད་དེ། སལ་ལེ་སིང་ངེ༌། ཡེ་རེ། སེམས་མ་བཅོས་པའི་ངང་དུ་བཞག་པས་གསལ་སྟོང་ཟུང་འཇུག་ཏུ་འགྱུར། དེ་ལྟར་ཡང་ཡང་གོམས་པས། གསལ་བའི་ཉམས་ཧྲིག་གེ་བ། ཡེ་རེ་བ། གསལ་ཆ་ལ་བདེན་འཛིན་དང་བཅས་པ། སེམས་གསལ་བ་དེ་ལས་འབྲལ་མི་ཕོད་པ་ལྟ་བུ་འབྱུང་ཞིང༌༑ དེ་ལ་ཞེན་ན་གཟུགས་ཁམས་ཀྱི་ལྷར་སྐྱེ་བས། དེ་བསལ་བ་ནི། ལུས་གནད་ཁོང་ལྷོད་དང༌། ལྟ་སྟངས་སྨད། ཤེས་པ་ཁོང་གློད་དེ་རང་བབས་སུ་ཆམ་མེ་བཞག་པས། མི་རྟོག་པ་དང་གསལ་བ་ཟུང་འཇུག་ཏུ་འགྱུར། དེ་ལྟར་གསལ་སྟོང་ཟུང་དུ་འཇུག་པ་ན། ཐབས་ཤེས་རབ་ཀྱི་རྟེན་འབྲེལ་གྱིས་བརྗོད་མེད་ཀྱི་བདེ་བ་ལྷང་གིས་སྐྱེས། བདེ་ཉམས་གང་ལའང་ཞེན་པ་མི་བྱེད། ཞེན་ན་འདོད་ཁམས་ཀྱི་གནས་ཅི་རིགས་པར་སྐྱེ་བ་ལས་ཐམས་ཅད་མཁྱེན་པའི་ལམ་དུ་མི་འགྱུར་བས། བདེ་བ་དེའི་ངོ་བོ་ལ་མི་ཞེན་པར་སེམས་ནམ་མཁའི་མཐའ་ཀླས་སུ་ཆམ་གྱིས་བཏང་ཤེས་པ་རྒྱ་བསྐྱེད། འཛིན་མེད་དུ་བཞག་པས་བདེ་སྟོང་ཟུང་འཇུག་ཏུ་འགྱུར་ཏེ། མདོར་ན་ཁལ་ཁལ་བསྲེལ་བ་བཞིན་དུ། གསལ་བ་ཤས་ཆེ་ན་མི་རྟོག་པ། མི་རྟོག་པ་ཤས་ཆེ་ན་གསལ་བའི་ཐབས། བདེ་བ་ཤས་ཆེ་ན་སྟོང་ཉིད་ཀྱི་ངང་དུ་བསྲེལ་བས་ཞེན་འཛིན་ཐམས་ཅད་དག་སྟེ། སེམས་གཉུག་མའི་ངང་ཐོག་ཏུ་གནས་པ་ཞིག་འབྱུང༌། དེ་ལྟར་གཞི་དུས་ཀྱི་ཆོས་སྐུ་སེམས་མ་བཅོས་གཉུག་མར་གནས་པ་དེ་ཉིད། ལམ་དུས་ཀྱི་ཆོས་སྐུ་སེམས་མ་བཅོས་པར་བཞག་པའི་ཐབས་ཀྱིས་ཉམས་སུ་བླངས་པས༑ འབྲས་དུས་ཀྱི་ཆོས་སྐུ་སེམས་ཉིད་མ་བཅོས་པའི་རང་ངོ་རྗེན་པར་ཤེས་པ་ཉིད་ལ་སངས་རྒྱས་ཞེས་བྱ་བ་ཡིན་གྱི། སེམས་ལས་གཞན་པའི་ཆོས་སྐུ་གཤེད་ན་ཡོད་ན། རང་རེ་རྣམས་ཀྱིས་ལེན་ཀྱང་མི་ཐུབ་ལ༑ བླངས་ཀྱང་འདྲེ་བ་དཀའ། མདོར་ན་རང་སེམས་རང་ངོ་མ་ཤེས་པའི་བློ་བུར་གྱི་དྲི་མ་མཐའ་དག་དབྱིངས་སུ་ཐིམ། སེམས་ཉིད་དག་པ་གཉིས་ལྡན་མངོན་དུ་གྱུར་པ་སངས་རྒྱས་ཞེས་ཐ་སྙད་བྱས་ཡིན་གསུངས། དེ་དག་ནི་དངོས་གཞིའི་རིམ་པའི་བསྒོམ་བྱ་གང་ཟིན་བྲིས་པའོ། །གསལ་སྟོང་བདེ་བའི་ཉམས་མྱོང་རྒྱུད་ལ་སྐྱེས། །སོ་སོར་མ་ཞེན་ཟུང་འཇུག་ཉམས་སུ་ལོངས། །བློ་འདས་གཉུག་མ་རང་སེམས་ཕྱག་རྒྱ་ཆེ། །དག་པ་གཉིས་ལྡན་རྟོགས་དུས་ནམ་ཡོང་ན། །གསུམ་པ་རྗེས་ལ། ཡུན་དུ་གནས་པའི་ཐབས་ནི། གོང་དུ་བསྟན་པ་ལྟ་བུའི་སྤྲོས་བྲལ་གྱི་དོན་ལ་མ་ཡེངས་པའི་དྲན་པས། སྐད་ཅིག་ཀྱང་མ་ཡེངས་པར་ཉམས་སུ་བླངས་པས། ནུབ་མོ་རྨི་ལམ་དུ་ཡང་དགེ་སྦྱོར་ཟིན་པ་འབྱུང༌། མདོར་ན་ཉིན་མཚན་འཁོར་ཡུག་ཏུ་འབད་པ་དྲག་པོས་ཉམས་སུ་ལེན་པ་ཉིད་ཡིན་ལ། སྣང་བ་ལམ་དུ་ཁྱེར་བའི་ཐབས་ཀྱང་ནད་གདོན་ཉོན་མོངས་སོགས་གང་བྱུང་ཡང་དེ་ཐོག་ཏུ་སེམས་ཆེར་གྱིས་གཏད་དེ། གང་ཡིན་པ་དེའི་རྩལ་རྫོགས་པ་ན། རིག་པ་བཟོ་མེད་དུ་ཆམ་ཆམ་འཇོག་པ་སོགས། མདོར་ན་སྣང་བ་གང་ཤར་དེ་ཁའི་སྣང་བ་ལ་མི་དཔྱོད་པར། ངོ་བོའི་ཐོག་ཏུ་གློད་ཀྱིན་འཇོག་པར་བྱེད། ཅི་བྱས་འགྲོ་དོན་དུ་འགྱུར་བའི་ཐབས་ནི། དེ་ལྟར་སེམས་ཀྱི་གནས་ལུགས་སྤྲོས་པ་ཐམས་ཅད་དང་བྲལ་བ་སེམས་ཅན་ཐམས་ཅད་ལ་རང་ཆས་སུ་བཞུགས་ཀྱང༌། གློ་བུར་གྱི་དྲི་མས་བཞུགས་པ་ལ་བཞུགས་པར་ངོ་མ་ཤེས་པས་འཁྲུལ་སྣང་འབའ་ཞིག་ལ་ལོངས་སྤྱོད་པ་འདི་རྣམས་སྙིང་རེ་རྗེ་ན། བདག་གིས་ཇི་ལྟར་ཕན་ཕན་བྱ་སྙམ་དུ། ཅི་བྱས་སེམས་ཅན་གྱི་དོན་དུ་འགྱུར་བའི་ཐབས་ལ་འབད་པ་ཡིན་ནོ་གསུངས། མཉམ་རྗེས་བྲལ་བའི་དགེ་སྦྱོར་ཁོར་ཡུག་གིས། །སྣང་སྲིད་བདེ་ཆེན་ཆོས་སྐུར་ཤར་བའི་ངང༌། །དངོས་དང་བརྒྱུད་པས་དྲིན་ཅན་མ་རྣམས་ལ། །ཕན་བདེ་རབ་འབྱམས་སྩལ་དུས་ནམ་ཡོང་ན། །དེ་སྐད་རྒྱལ་བ་ཀུན་དངོས་ཚར་པ་རྗེའི། །ཞབས་སེན་ནོར་བུའི་ཅོད་པན་སྤྱི་གཙུག་ཏུ། །འབྲལ་མེད་བཅིངས་པས་ཆོས་ཀྱི་རྒྱལ་སྲིད་ལ། །དབང་ཐོབ་མཁྱེན་བརྩེའི་མིང་དེས་ཡི་གེར་བཀོད། །དགེ་འདིས་སྲིད་ལམ་འཁྱམས་པས་ཆེས་དུབ་པའི། །མ་རྣམས་གཉུག་མའི་མལ་དུ་ངལ་གསོས་ནས། །ཟག་མེད་བདེ་བ་ནམ་མཁའི་ཁྱོན་འདས་པ། །ཟུང་འཇུག་འཇིག་རྟེན་དབང་ཕྱུག་ཐོབ་པར་ཤོག །སརྦ་དཱ་མངྒ་ལཾ། | {{Text | ||
|classification=Tibetan Publications | |||
|subclass=Tibetan Texts | |||
|collectiontitle=gdams ngag rin po che'i mdzod | |||
|collectiontitletib=གདམས་ངག་རིན་པོ་ཆེའི་མཛོད། | |||
|totalvolumes=18 | |||
|author='jam mgon kong sprul | |||
|authortib=འཇམ་མགོན་ཀོང་སྤྲུལ་ | |||
|citation= | |||
|language=Tibetan | |||
|pagestatus=Temporary stub only | |||
|volumenumber=16 | |||
|volumeLetter=MA | |||
|textnuminvol=026 | |||
|textsubnumber=003 | |||
|pdflink=File:DNZ-16-MA-026-003.pdf | |||
|InitCategories=Damngak Rinpoché Dzö; DNZ-Volume-16-MA; DNZ-16-MA-026 | |||
}} | |||
<h1>Tibetan Text</h1> | |||
<onlyinclude> | |||
{{TibP|༈ །སེམས་ཉིད་ངལ་གསོའི་ཁྲིད་ཀྱི་ཟིན་བྲིས་འཇམ་དབྱངས་མཁྱེན་བརྩེའི་དབང་ཕྱུག་གིས་མཛད་པ་བཞུགས་སོ། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྗེ་བཙུན་རྡོ་རྗེ་འཆང་བློ་གསལ་རྒྱ་མཚོ་གྲགས་པ་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་ཞབས་ལ་དུས་ཐམས་ཅད་དུ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། འདིར་འཕགས་པ་སྤྱན་རས་གཟིགས་ཀྱི་རྣམ་པར་འཕྲུལ་པ་གྲུབ་ཆེན་མི་ཏྲ་ཛོ་ཀི་ཞེས་བྱ་བ་དེ་ཉིད་ཀྱིས་ལོ་བཅུ་གཉིས་སུ་སྒྲུབ་པ་མཛད་པའི་མཐར། རྡོ་རྗེའི་ཤིང་སྟན་མེ་ལོང་ལྟར་འཇམ་པའི་སྟེང་དུ་འཕགས་པ་ཐུགས་རྗེ་ཆེན་པོ་ཁ་སར་པ་ཎིའི་ཞལ་མངོན་སུམ་དུ་བསྟན་ཏེ། སེམས་ཅན་ཐམས་ཅད་ཀྱི་སེམས་ཐོག་མ་མེད་པ་ནས་སྡུག་བསྔལ་གྱིས་དུབ་པར་གྱུར་པ་ངལ་གསོ་བར་བྱེད་པའི་ཐབས་ཤེས་རབ་ཀྱི་ཕ་རོལ་ཏུ་ཕྱིན་པའི་བརྗོད་བྱ་ཐམས་ཅད་སྒོ་ཉི་ཤུ་རྩ་ལྔར་འདུས་པ་བཞིན། དོ་ཧ་རྡོ་རྗེའི་ཚིགས་སུ་བཅད་པ་ཉི་ཤུ་རྩ་ལྔ་བཀའ་སྩལ་པ་གསན་པས་མཆོག་གི་གྲུབ་པ་བརྙེས་པའི་རྣལ་འབྱོར་གྱི་དབང་པོ་དེ་ཉིད་ལ། ཁྲོ་ཕུ་ལོ་ཙཱ་བ་ཆེན་པོས་ལེགས་པར་གསན་ཅིང༌། ཐུགས་ཉམས་སུ་བཞེས་པའི་མན་ངག །སེམས་ཉིད་ངལ་གསོ་ཞེས་གྲགས་པའི་ཁྲིད་ཀྱི་རྣལ་འབྱོར་ཉམས་སུ་ལེན་པར་བྱེད་པའི་ཚུལ་ལ། སྔོན་འགྲོ། དངོས་གཞི། རྗེས་གསུམ་གྱིས་བསྡུས་པར་གྱུར་པ་ལས། དང་པོ་ལའང༌། ཐུན་མོང་དང༌། ཐུན་མོང་མ་ཡིན་པ། ཁྱད་པར་གྱི་སྔོན་འགྲོ་གསུམ་ཡོད་པའི། དང་པོ་ནི། རང་ཉིད་བདེ་བའི་གདན་ལ་བསམ་གཏན་གྱི་རོལ་པས་འདུག་སྟེ། ལུས་ངག་ཡིད་གསུམ་རང་སོར་མ་ཚུད་ཀྱི་བར་དུ་ཆད་དེ་ངལ་གསོ། དེ་ནས་རང་ཉིད་གང་དུ་གནས་པའི་ས་ཕྱོགས་དེ་ཉིད་ཡེ་ཤེས་ཀྱི་རང་སྣང་ལས་གྲུབ་པའི་དག་པའི་ཞིང་ཁམས་ཐ་གྲུ་ཡངས་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་ཡངས་ཤིང་རྒྱ་ཆེ་ལ་དཔང་མཐོ་བའི་སྟེང་ན་སྣ་ཚོགས་པདྨ་ཁྲ་ཤིག་གེ་བའི་ལྟེ་བར་ཟླ་བའི་དཀྱིལ་འཁོར་ཉ་གང་བ། དེའི་མཐའ་སྐོར་དུ་རིན་པོ་ཆེའི་ཁྲི་པདྨ་ཟླའི་གདན་དང་བཅས་པ་ཅུང་ཟད་དམའ་བའི་རྣམ་པ་གྲངས་མེད་པས་ཁྱིར་ཏེ་བསྐོར་བ། དབུས་ཀྱི་གདན་གྱི་སྟེང་དུ། རང་གི་རྩ་བའི་བླ་མ་སྐུའི་རྣམ་པ་ཇི་ལྟ་བ་ལང་ཚོ་དར་ལ་བབ་པ། ཞབས་སེམས་དཔའི་སྐྱིལ་ཀྲུང་ལས་ཅུང་ཟད་བརྐྱངས་པ་རྒྱལ་པོ་རོལ་པའམ། གཞོན་ནུ་རོལ་པའི་འདུག་སྟངས་ཀྱིས་བཞུགས་པ། དེའི་ཕྱི་རིམ་གྱི་གདན་ལ་མགོན་པོ་ཁ་སར་པ་ཎི་ནས། རྗེ་བཙུན་རྡོ་རིང་པ་ཆེན་པོའི་བར་དུ་བྱོན་པའི་ངལ་གསོ་བརྒྱུད་པའི་བླ་མ་རྣམས་སྐུའི་རྣམ་པ་ཇི་ལྟ་བ་མུ་ཏིག་བསྟར་ལ་བརྒྱུས་པ་བཞིན་གཡས་སྐོར་དུ་ཁྱིར་གྱིས་བཞུགས་པ། དེའི་ཕྱི་རིམ་གྱི་གདན་ལ་རིམ་བཞིན་གདན་གྱི་སྟེང་དུ་རང་གི་དུས་གསུམ་དང་འབྲེལ་བའི་རྩ་བརྒྱུད་ཀྱི་བླ་མ། ཡི་དམ་དཀྱིལ་འཁོར་གྱི་ལྷ་ཚོགས། ལོངས་སྤྲུལ་གྱི་སངས་རྒྱས། དམ་པའི་ཆོས་པུ་ཏི་བྲག་རི་བརྩེགས་པ་ལྟ་བུ་གདོང་དར་ནང་དུ་བསྟན་པའི་རྣམ་པ་ཅན། བྱང་སེམས། ཉན་ཐོས། རང་རྒྱལ་གྱི་ཚུལ་བཟུང་བའི་དགེ་འདུན། མཁའ་འགྲོ་ཆོས་སྐྱོང་སྲུང་མ་ཐམས་ཅད་གཡས་སྐོར་དུ་ཁྱིར་གྱིས་བཞུགས་པར་བསམ། དེ་དག་གི་མདུན་ཐད་ཀྱི་ས་གཞིའི་དབུས་སུ་རང་ཉིད། གཡས་གཡོན་དུ་ཕ་མ། མདུན་དུ་བདུད་སྡིག་ཅན་གྱིས་གཙོས་བྱས་པའི་བདུད་དགྲ། མཐར་རིགས་དྲུག་བར་དོ་དང་བཅས་པའི་སེམས་ཅན་ཐམས་ཅད་འཁོད་དེ། དེ་ཐམས་ཅད་སྒོ་གསུམ་འཇུག་པ་གཅིག་ཏུ་དྲིལ་ནས་སྐྱབས་འགྲོ་བྱེད་པར་བསམས་ལ་ངག་ཏུ། བདག་དང་འགྲོ་བ་མ་རྒན་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ ཡི་དམ་དཀྱིལ་འཁོར་ལྷ་ཚོགས་རྣམས་ལ༴ མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །ཞེས་བརྒྱུད་པ་འདི་ཁ་རང་གི་སྐྱབས་འགྲོ་དྲུག་སྐོར་འབྱུང་བ་ལྟར་རམ། བསྡུ་ན་བཞི་སྐོར་ཡང་རུང༌། དེ་ལྟ་བུའི་ཚུལ་གྱིས་བརྒྱ་ཕྲག་སོགས་ལུས་སེམས་ལ་འགྱུར་བ་མ་བྱུང་གི་བར་དུ་བྱ། མཐར་རྡོ་རྗེ་ཐལ་མོ་སྙིང་ཁར་སྦྱར། སྐྱབས་གསོལ་གྱི་ཚིག་བརྗོད། སེམས་བསྐྱེད་ནི། སེམས་ཅན་ཐམས་ཅད་ཡིད་ཡུལ་དུ་བྱས་ཏེ། འགྲོ་རྣམས་བསྒྲལ་འདོད་བསམ་པ་ཡིས། །སོགས་ཚར་གསུམ་བརྗོད། དེ་ནས་བདག་གཞན་ཐམས་ཅད་ཀྱི་ལུས་རྡུལ་ཕྲ་རབ་ཀྱི་གྲངས་དང་མཉམ་པར་སྤྲུལ་ནས། མཇལ་བ་དོན་ཡོད་པའི་ཡན་ལག་ཏུ་ཕྱག་འཚལ་བ། ལོངས་སྤྱོད་དོན་ཡོད་པའི་ཡན་ལག་ཏུ་མཆོད་པ་འབུལ་བ། སྔར་བྱས་ཀྱི་སྡིག་པ་ལ་དུག་བྱུང་བ་ལྟ་བུའི་འགྱོད་པ། ཕྱིན་ཆད་སྲོག་ལ་བབས་ཀྱང་མི་བགྱིད་སྙམ་པའི་སྡོམ་སེམས་སོགས་སྟོབས་བཞི་ཚང་བའི་སྒོ་ནས་སྡིག་པ་བཤགས་པ། བསོད་ནམས་ཀྱི་ཕུང་པོ་རྒྱ་ཆེར་འཕེལ་བའི་ཕྱིར་རྗེས་སུ་ཡི་རང་བ། བསྟན་པ་ཡུན་དུ་གནས་པའི་ཕྱིར་ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་གདབ་པ། དེས་མཚོན་པའི་དགེ་བའི་རྩ་བ་དུས་གསུམ་དང་འབྲེལ་བར་གྱུར་པ་ཐམས་ཅད་རྫོགས་པའི་བྱང་ཆུབ་བསྔོ་བ་རྣམས་དོན་དྲན་བཞིན་པས། བཟང་སྤྱོད་ལས་འབྱུང་བའི་ཡན་ལག་བདུན་པ་ཚར་གྲངས་གསུམ་མམ། མི་ཤེས་ན་ཕྱག་འཚལ་བ་དང་སོགས་ཚར་གསུམ་བརྗོད། དངོས་སམ་ཡིད་ཀྱིས་མཎྜལ་ཚོམ་བུ་བདུན་པ་དང༌། ས་གཞི་སྤོས་ཆུས་བྱུགས་པ་སོགས་ནས། ནི་ཏ་ཡཱ་མིའི་བར་བརྗོད་པ་ཅི་མང་དབུལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་གསོལ་བ་འདེབས་སོ། །བདག་གིས་གཞི་གཉུག་མའི་དོན་ངོས་ཟིན་པར་མཛད་དུ་གསོལ། ཞེས་གསོལ་བ་སྙིང་གི་དཀྱིལ་ནས་གྲངས་མང་དུ་བཏབ། རིགས་ཀྱི་བུ་ཁྱོད་ཀྱི་སྡིག་པ་ཐམས་ཅད་དག་གོ་ཞེས་གསུང་ལྷང་གིས་གནང་བར་མཛད་པར་བསམ། ཐུན་དེ་ལས་ལྡང་བར་འདོད་ན། སྐྱབས་ཡུལ་རྣམས་ཀྱི་ཐུགས་ཀ་ནས་འོད་ཟེར་འཕྲོས། སེམས་ཅན་ཐམས་ཅད་ལ་ཕོག་སོང་བས། དེ་ཐམས་ཅད་ཟག་མེད་ཀྱི་འོད་ལུས་འབའ་ཞིག་ཏུ་གྱུར། སྐྱབས་ཡུལ་དེ་རྣམས་ཀྱང་མཐའ་ནས་རིམ་བཞིན་འོད་དུ་ཞུ། རྩ་བའི་བླ་མ་ལ་ཐིམ། དེ་ཡང་ཞབས་གཡས་པའི་མཐེ་བོང་ནས་རིམ་བཞིན་འོད་དུ་ཡ་ལ་ལ་སོང་སྟེ་དབུའི་གཙུག་གཏོར་གྱི་བར་དུ་ཐིམ། དེ་ཡང་ནམ་མཁའ་ལ་འཇའ་ཡལ་བ་ལྟར་བུན་གྱིས་སོང་བར་བསམ་ལ་རིག་པ་བརྗོད་མེད་དུ་གནས་ཚད་བཞག །མཐར་དགེ་བ་བསྔོ་བ་སོགས་ཚུལ་བཞིན་དུ་བྱས་ཏེ་ཐུན་བཞི་ལ་སོགས་པར་འབད་གསུངས། གཉིས་པ་རྒྱུད་ལ་བྱིན་རླབས་འབེབས་པ་ཡི་གེ་བརྒྱ་པའི་སྒོམ་བཟླས་ནི། སྐྱབས་སེམས་ཡན་ལག་བདུན་པ་ཡན་གོང་བཞིན་བྱས་པའི་མཐར། རང་གི་སྤྱི་བོར་པྃ་ལས་པདྨ་དཀར་པོ་དང༌། ཨ་དཀར་པོ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་དཀར་པོ། དེ་ཡོངས་སུ་གྱུར་པ་ལས་དཔལ་རྡོ་རྗེ་སེམས་དཔའ་སྐུ་མདོག་སྟོན་ཀའི་ཟླ་བ་ལྟར་དཀར་བ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་འཛིན་པ། གཡོན་གསེར་གྱི་རྡོ་རྗེ་ཕྱེད་པས་ཡུ་བ་བྱས་པའི་དངུལ་གྱི་དྲིལ་བུ་དཀུར་བསྟེན་པ། དར་དང་རིན་པོ་ཆེས་བརྒྱན་ཅིང༌༑ མཚན་དང་དཔེ་བྱད་ཀྱིས་སྤྲས་པ། ཞབས་གཞོན་ནུ་རོལ་པའི་འདུག་སྟངས་ཀྱིས་བཞུགས་པའི་མཐེ་བོང་བདག་གི་ཚངས་བུག་ལ་རེག་པའི་རྣམ་པར་བསམ། དེའི་ཐུགས་ཀར་ཟླ་བའི་སྟེང་དུ་ཧཱུྃ་དཀར་པོའི་མཐར་ཡི་གེ་བརྒྱ་པའི་སྔགས་ཕྲེང་ཁ་དོག་དཀར་པོ། མགོ་གྱེན་བསྟན་གཡས་སྐོར་དུ་ཁྱིར་ཏེ་བཞུགས་པ་གསལ་བཏབ་པའི་སྔགས་ཕྲེང་ལས་འོད་འཕྲོས། ཧཱུྃ་ལ་ཕོག །ཧཱུྃ་ལས་འོད་འཕྲོས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་འོད་དཀར་པོའི་རྣམ་པས་ནམ་མཁའི་ཁམས་ཐམས་ཅད་གང་བར་ཐིབ་ཐིབ་བྱོན། རྡོ་རྗེ་སེམས་དཔའི་དབུ་གཙུག་ནས་ཞུགས། ཐུགས་ཀའི་ཧཱུྃ་ལ་སིབ་སིབ་ཐིམ་པས། ཧཱུྃ་དེ་ཇེ་ཆེ་ལ་བདུད་རྩིའི་རང་བཞིན་མཐེ་བོང་གི་སོར་ཚིགས་ཙམ་དུ་གྱུར་པ་རྡོལ་བའི་རྣམ་པས་ཞབས་ཀྱུ་ནས་བདུད་རྩིའི་རྒྱུན་སྐྱ་ཁྲལ་གྱིས་བབས། སྐུ་ལུས་ཐམས་ཅད་མེར་གྱིས་ཁེངས། ཞབས་གཡས་པའི་མཐེབ་ཆེན་གྱི་རྩེ་ནས་ཐེམ་བུ་བཏང་བ་བཞིན་སྐྱ་ནར་གྱིས་བབས། བདག་གི་ཚངས་བུག་ནས་ཞུགས། ལུས་ཐམས་ཅད་གང་བས། སྡིག་སྒྲིབ་ཉེས་ལྟུང་དམ་ཚིག་ཉམས་པ་ཐམས་ཅད་ཉི་མ་ཤར་བས་མུན་པ་རང་སངས་ལ་སོང་བ་བཞིན་སངས་ཀྱིས་དག་པར་བསམས་ལ་ཡི་གེ་བརྒྱ་པ་བརྗོད། བདུན་བདུན་ཙམ་སོང་བ་དང་འོད་ཟེར་སྤྲོ་བསྡུ་གོང་བཞིན་བསྐྱར་ཞིང་བྱས་པའི་བརྒྱ་སྟོང་སོགས་ཅི་འགྲུབ་བརྗོད་མཐར། བདག་ནི་མི་ཤེས་སོགས་བཤགས་སྡོམ་སྤྱི་དང་མཐུན་པར་བརྗོད་ཀྱང་རུང༌། འདིར་མ་གསུངས་པས་མ་བྱས་ཀྱང་ཆོག །བདག་གི་སྡིག་སྒྲིབ་དག་པ་ལ་རྡོ་རྗེ་སེམས་དཔའ་མཉེས་ཏེ་ལེགས་སོ་སྦྱིན་པའི་ཚུལ་དུ་རིགས་ཀྱི་བུ་ཁྱོད་ཀྱི་སྡིག་པ་དང་སྒྲིབ་པ་ཐམས་ཅད་དག་གོ །ཉམས་ཆག་ཐམས་ཅད་བསྐངས་སོ། །ཞེས་གསུང་ལྷང་གིས་བཏོན་ནས་འོད་དུ་ཞུ་རང་ལ་ཐིམ་པས། ལུས་ཤེལ་གོང་ཕྱིས་པ་ལྟར་གྱུར༑ ངག་ནུས་པ་དང་ལྡན་པས་སེམས་བདེ་སྟོང་གཉིས་མེད་དུ་གྲོལ། རང་གཞན་གྱི་དོན་ཐམས་ཅད་འགྲུབ་པ་ཡིན་སྙམ་དུ་སེམས་འཛིན་མེད་དུ་ཇི་ཙམ་གནས་ཀྱི་བར་དུ་འཇོག་པར་བྱེད། གསུམ་པ་ཁྱད་པར་གྱི་སྔོན་འགྲོ་ཡི་གེ་ལྔ་བཅུ་པས་ཤེས་རྒྱུད་དབང་དུ་བྱ་བ་ནི། རང་གི་སྤྱི་བོར་སེངྒེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཟླ་བའི་གདན་གྱི་སྟེང་དུ་རྩ་བའི་བླ་མ་ཚར་ཆེན་རྡོ་རྗེ་འཆང་སྐུ་མདོག་དམར་སྨུག །ཞལ་ཁྲོ་འཛུམ། ཟིལ་ཤིན་ཏུ་ཆེ་བ་ན་བཟའ་ཕྱར་བུ་སྐབས་རེ་བཙེམས་པ་གསོལ་བ། ཕྱག་པུས་མོ་ལ་བཀབ་པའི་མཉམ་བཞག །སྐུ་ཤིན་ཏུ་ཆེ་བ་ཁྲི་ཁར་ཤོང་ཚད་ལྟ་བུ། དེའི་དབུ་གཙུག་ཏུ་རྗེ་བཙུན་རྡོ་རིང་བ་སྐུ་མདོག་དམར་ལ་སྨུག་པའི་མདངས་ཆགས་པ། ཞལ་ཁྲོ་ཞིང་འཛུམ་ལ་ཡིད་དུ་འོང་བ། སྤྱན་ནམ་མཁའ་ལ་ཆེ་རེ་གཟིགས་པ། དབུ་ལ་སྤྱི་ཐེར་ཡོད་པ། ན་བཟའ་བེར་ཐུལ་གསོལ་བ། དེའི་སྤྱི་བོར་དྲིན་ཅན་མཁྱེན་རབ་ཆོས་རྗེ་སྐུ་མདོག་དཀར་ལ་དམར་པོའི་མདངས་ཆགས་པ། དབུ་སེ་ཡེ་རེ་བ། དེའི་སྤྱི་བོར་འཁྲུལ་ཞིག་ཚུལ་ཁྲིམས་རྒྱལ་མཚན་སྐུ་སྒེག་པ། སྤྱན་ཟུར་གསུམ་མེ་བ། དེའི་སྤྱི་བོར་མཁས་མཆོག་ཙནྡྲ་ཤྲཱི་སྐུ་ཕྲ་ལ་རིང་བ། མགུལ་ཅུང་ཟད་རིང་ཞིང་དབུ་སྐྱ་ཡེ་རེ་བ། དེའི་སྤྱི་བོར་ཆོས་རྒྱལ་ནམ་མཁའི་མཚན་ཅན་སྐུ་ཤིན་ཏུ་སྦོམ་པ། དེའི་སྤྱི་བོར་ཐུགས་སྲས་སེམས་དཔའ་ཆེན་པོ་སྐུ་ཤ་རྒྱས་ཤིང་མཚར་བ། དབུགས་ཆེ་བ། དེའི་སྤྱི་བོར་ཆོས་རྗེ་ཐམས་ཅད་མཁྱེན་པ་སྐུ་མདོག་ཅུང་ཟད་དམར་བ། ཕྱག་གཡས་ཆོས་འཆད་གཡོན་མཉམ་བཞག །དེའི་དབུ་གཙུག་ཏུ་བླ་མ་ཡང་རྩེ་བ་རིན་ཆེན་སེང་གེ་སེར་སེང་ངེ་བ་སྐུ་རིད་པའི་རྣམ་པ། དེའི་སྤྱི་བོར་ཚད་མའི་སྐྱེས་བུ། དེའི་སྤྱི་བོར་ཁྲོ་ཕུ་སེམས་དཔའ་ཆེན་པོ་སྐུ་མདོག་དཀར་དམར་སྐུ་ཤ་རྒྱས་ཤིང༌། ཞལ་སྐྱོང་བའི་རྣམ་པ། དེའི་སྤྱི་བོར་བླ་ཆེན་བསོད་ནམས་དབང་ཕྱུག་སྐུ་མདོག་དམར་སྨུག་ཕྱར་བུ་གསོལ་བ། དེའི་སྤྱི་བོར་ཁྲོ་ཕུ་ལོ་ཙཱ་བ་སྐུ་མདོག་དཀར་དམར་ཅུང་ཟད་ཐུང་ལ་སྒེག་པ། དེ་རྣམས་རབ་བྱུང༌། ཕྱག་དམིགས་བསལ་ཅན་མ་གཏོགས་པ་མཉམ་བཞག་དང༌། དེའི་སྤྱི་བོར་གྲུབ་ཆེན་མི་ཏྲ་ཛོ་ཀི་ལོ་བཅུ་དྲུག་ལོན་པའི་ན་ཚོད༑ སྐུ་མདོག་དཀར་ལ་དམར་བའི་མདངས་ཆགས་པ་རྣལ་འབྱོར་པའི་ཆ་ལུགས། {{TibChung|རས་སེར་པོའི་སྨད་གཡོགས་ཅན་མེ་ཏོག་གི་ཕྲེང་བས་བརྒྱན་པ་ཞེས་དཔེ་རྙིང་ན་འདུག}} །ཕྱག་གཡས་ཆོས་འཆད། གཡོན་མཉམ་བཞག་གི་སྟེང་ན་བདུད་རྩིས་གང་བའི་ཐོད་པ། མཆན་ཁུང་ན་རྡོ་རྗེའི་ཤིང་སྟན་འཛིན་པ། དེའི་སྤྱི་བོར་གྲུབ་ཆེན་རོལ་པའི་རྡོ་རྗེ་པཎྜི་ཏའི་ཆ་ལུགས། གཡས་ཆོས་འཆད་གཡོན་པོ་ཏི། དེའི་སྤྱི་བོར་ཏེ་ལོ་ཤེས་རབ་བཟང་པོ་སྐུ་མདོག་དུད་ཁ་རལ་པའི་ཐོར་ཚུགས་དང་རུས་པའི་རྒྱན་ཅན། གཡས་ཆོས་འཆད། གཡོན་མཉམ་བཞག་མཛད་པ། དེའི་སྤྱི་བོར་བྱང་སེམས་བློ་གྲོས་རིན་ཆེན་སྐུ་མདོག་གསེར་བཙོ་མ་ལྟ་བུའི་ལྷའི་བུའི་ཆ་བྱད་ཕྱག་གཡས་ཆོས་འཆད། གཡོན་རིན་པོ་ཆེའི་སྙེ་མ་འོད་འབར་བའི་ཡུ་བ་ཐུགས་ཀར་བཟུང་ནས་སྙན་གྱི་ཐད་དཀར་འོད་ལམ་མེ་བ། དེའི་སྤྱི་བོར་འཕགས་པ་ཁ་སར་པ་ཎི་སྐུ་མདོག་དཀར་པོ། གཡས་མཆོག་སྦྱིན་གཡོན་པདྨ་ཐུགས་ཀར་འཛིན་པ། གཞོན་ནུ་རོལ་པའི་འདུག་སྟངས་ཀྱིས་བཞུགས་པ། དེ་རེ་རེའི་ཐུགས་ཀར་ཡང་ཟླ་བའི་དཀྱིལ་འཁོར་ཉ་གང་བའི་དབུས་ན་ཧཱུྃ་དཀར་པོ་རེ་རེའི་མཐར་ཡི་གེ་ལྔ་བཅུ་པས་གཡས་སྐོར་དུ་ཁྱིར་གྱིས་བསྐོར་བའི་ཡི་གེ་རེ་རེ་བཞིན་མགོ་བོ་གྱེན་བསྟན་ཞབས་ཟླ་བའི་སྟེང་ན་རེག་ལ་མ་འབྱར་བའི་རྣམ་པ་འོད་ཀྱི་རང་བཞིན་རེ་གསལ་འདེབས་པར་བྱེད། དེ་ནས་སྤྱན་རས་གཟིགས་ཀྱི་ཐུགས་ཀའི་ཧཱུྃ་ལས་འོད་འཕྲོས། ཕྱོགས་བཅུའི་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ནུས་མཐུ་ཐམས་ཅད་སྤྱན་དྲངས། དབུ་གཙུག་ནས་ཞུགས། ཐུགས་ཀའི་ཧཱུྃ་ལ་ཐིམ་པར་བསམས་ལ༑ ༀ་ཨཱཿ བཛྲ་ས་ཏྭ། {{TibChung|རྡོ་རྗེ་སེམས་དཔའ།}} གུ་རུ་ཤྲཱི། {{TibChung|དཔལ་ལྡན་བླ་མ།}} ཁ་སར་པ་ཎི། {{TibChung|ཁ་སར་པ་ཎི།}} ལོ་ཀ་ནཱ་ཐ། {{TibChung|འཇིག་རྟེན་མགོན་པོ།}} སརྦ་བུདྡྷ། {{TibChung|སངས་རྒྱས་ཐམས་ཅད་དང༌།}} བོ་དྷི་ས་ཏྭ། {{TibChung|བྱང་ཆུབ་སེམས་དཔས།}} སྭ་བྷ་ཝ། {{TibChung|རང་བཞིན་གྱིས།}} ཨ་དྷིཥྛ་ནཾ། {{TibChung|བྱིན་གྱིས་བརླབས་པས།}} མ་མ་ཎིརྟཾ། {{TibChung|བདག་གི་སྙིང་ལ།}} བཛྲ་ཏྲཊ། {{TibChung|རྡོ་རྗེ་ཕོ་བ།}} ཛྙཱ་ན་ཛྭ་ལ་ཛྭ་ལ། {{TibChung|ཡེ་ཤེས་འབར་ཞིང་འབར།}} སྥ་ར་ཎ་སྥ་ར་ཎ། {{TibChung|འཕྲོ་ཞིང་འཕྲོ་བའི།}} ཧཱུྃ་ཧཱུྃ་ཕཊ་སྭཱ་ཧཱ། {{TibChung|གཞི་ཚུགས།}} ཞེས་ལན་བདུན་ནམ་ཉེར་གཅིག་བརྗོད། གསོལ་འདེབས་ནི། འཕགས་མཆོག་ཐུགས་རྗེ་ཆེན་པོ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་མོས་གུས་དྲག་པོས་གསོལ་བ་ལན་གསུམ་བཏབ་པས། ཐུགས་ཀའི་ཟླ་བ་ཧཱུྃ་ཡིག་སྔགས་ཕྲེང་དང་བཅས་པ་འོད་དུ་ལྟེམ་གྱིས་ཞུ་སྐུའི་ཆ་ཤས་ཐམས་ཅད་མེར་གྱིས་ཁེངས། སྤྲིན་ལས་ཆར་བབས་པའམ། གངས་རི་ལས་ཆུ་རྒྱུན་འབབ་པ་བཞིན་དུ་སྐུའི་ཆ་ཤས་ཐམས་ཅད་ལས་བདུད་རྩིའི་རྒྱུན་ཁྲ་ལ་ལ་བབས། བྱང་སེམས་བློ་གྲོས་རིན་ཆེན་གྱི་དབུ་གཙུག་ནས་ཞུགས། ཐུགས་ཀའི་ཧཱུྃ་ཡིག་སྔགས་ཕྲེང་དང་བཅས་པ་ལ་ཐིམ་པས། ཐུགས་རྗེ་ཆེན་པོའི་བྱིན་རླབས་ཐམས་ཅད་འདུས་པར་བསམ། ཡང་ཧཱུྃ་ལས་འོད་ཟེར་འཕྲོས། སེམས་ཅན་ཐམས་ཅད་སྨིན་གྲོལ་ལ་བཀོད། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་སྤྱན་དྲངས། ཧཱུྃ་ལ་ཐིམ། དེ་ལ་སེམས་གཏད་དེ་ཡི་གེ་ལྔ་བཅུ་པའི་བཟླས་བརྗོད་དང༌། བྱང་སེམས་བློ་གྲོས་རིན་ཆེན་ལ་ཞེས་སོགས་ཀྱི་གསོལ་འདེབས་ལན་གསུམ་བྱས་པས། ཐུགས་ཀའི་ཟླ་བ་ཧཱུྃ་ཡིག་སྔགས་ཕྲེང་དང་བཅས་པ་འོད་དུ་ལྟེམ་གྱིས་ཞུ་བའི་བདུད་རྩིས་སྐུ་ཐམས་ཅད་ཁེངས། སྐུའི་ཆ་ཤས་ཐམས་ཅད་ལས་བདུད་རྩིའི་རྒྱུན་བབས། ཏེ་ལོ་ཤེས་རབ་བཟང་པོའི་དབུ་གཙུག་ནས་ཞུགས། ཐུགས་ཀའི་ཧཱུྃ་ལ་ཐིམ། ཡང་འོད་ཟེར་སྤྲོ་བསྡུ་སོགས་རྩ་བའི་བླ་མ་དམ་པ་ལ་ཐུག་གི་བར་གོང་བཞིན་ཁ་ཙམ་ཚིག་ཙམ་མ་ཡིན་པར་ལུས་ངག་ཡིད་གསུམ་འཇུག་པ་གཅིག་ཏུ་དྲིལ་ནས་གསོལ་བ་འདེབས་པར་བྱེད། དེ་མཐར་རྩ་བའི་བླ་མའི་ཐུགས་ཀའི་ཟླ་བ་ཧཱུྃ་ཡིག་སྔགས་ཕྲེང་དང་བཅས་པ་འོད་དུ་ཞུ་ནས་སྐུའི་ཁྱོན་ཐམས་ཅད་ཁེངས། སྤྲིན་ལས་ཆར་གངས་རི་ལས་ཆུ་རྒྱུན་འབབས་པ་ལྟར། སྐུའི་ཆ་ཤས་ཐམས་ཅད་ནས་ཐུགས་གཉིས་སུ་མེད་པའི་ཡེ་ཤེས་ཀྱི་བདུད་རྩིའི་བདེ་བ་ཆེན་པོའི་རང་བཞིན་སྐྱ་ཁྲལ་གྱིས་བབས། རང་གི་སྤྱི་བོ་ནས་ཞུགས་ལུས་ཐམས་ཅད་ཁེངས། སྡིག་སྒྲིབ་ཐམས་ཅད་ཉི་མ་ཤར་བས་མུན་པ་རང་སངས་ལ་སོང་བ་བཞིན་དུ་སངས་ཀྱིས་དག །བླ་མ་བརྒྱུད་པ་བཅས་པའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་རྒྱུད་ལ་ཞུགས་བྱུང་སྙམ་པ་བྱས། དེ་ཀའི་ངང་དུ་འཛིན་པ་མ་ཞུགས་པར་ཆད་དེ་འཇོག་པར་བྱེད། མཐར་བླ་མ་བརྒྱུད་པ་དང་བཅས་པའི་ཞལ་ནས། རིགས་ཀྱི་བུ་ཁྱོད་ནི་ཕུན་སུམ་ཚོགས་པ་དང་ལྡན་པ་ཡིན་ནོ། །ཞེས་གསུང་ལྷང་གིས་བཏོན་བྱུང་བས་རང་གི་རྒྱུད་ལ་སྤྲོ་དགའ་ཁྱད་པར་ཅན་བསྐྱེད་དེ་དགའ་ཡལ་ལེ་བཞག །དེ་ནས་བླ་མ་བརྒྱུད་པ་དང་བཅས་པ་ནམ་མཁའ་ལ་འཇའ་ཡལ་བ་བཞིན་དུ་ཡལ་གྱིས་སོང༌། རང་སེམས་སྟོང་པ་དང་དབྱེར་མེད་དུ་འདྲེས་སོང་སྙམ་པའི་ངང་ལ་ཆད་དེ་ཇི་ཙམ་གནས་ཀྱི་བར་འཇོག །མཐར་དགེ་བ་བསྔོ་བ་སོགས་ཚུལ་བཞིན་དུ་བྱ། གལ་ཏེ་ཡི་གེ་ལྔ་བཅུ་པ་ཡེ་མི་ཤེས་ན་ཐུགས་ཀའི་ཧཱུྃ་གི་མཐར། ༀ་ཨཱ་ཧྲཱིཿ ཧཱུྃ། ཞེས་པས་བསྐོར་བར་བསམ་ཞིང་བཟླས་པས་ཀྱང་གོ་ཆོད་པ་བླ་མ་བརྒྱུད་པའི་གསུང་སྒྲོས་ཡིན་གསུངས། དེ་ལྟར་སྔོན་འགྲོ་དེ་ཐམས་ཅད་དང༌། ཁྱད་པར་བླ་མའི་རྣལ་འབྱོར་ནན་ཏན་ཆེན་པོས་ཉམས་སུ་མ་བླངས་ན་དངོས་གཞིའི་དགེ་སྦྱོར་ཡེ་མི་སྐྱེ་ཞིང༌། ཡུན་རིང་པོ་ནས་ཆ་ཙམ་སྐྱེ་སྲིད་ཀྱང་མི་བརྟན་པ་སོགས་མདོར་ན་ཇི་ལྟ་བ་བཞིན་མི་འབྱུང་བས། སྔོན་འགྲོ་ལ་འབད་པ་དྲག་པོས་ཉམས་སུ་ལེན་པ་གལ་ཆེ་གསུངས་སོ། །དགོས་མེད་ཚེ་འདིའི་ཟར་ཟིར་བུན་ལོང་རྣམས། །རྒྱངས་སུ་དོར་ཏེ་མི་མེད་ལུང་སྟོང་དུ། །འཁྲུལ་མེད་ཕ་རྒོད་བླ་མའི་གསུང་འདི་དག །འབད་པས་བསྒོམ་པའི་དུས་གཅིག་ནམ་ཡོང་ན། །གཉིས་པ་དངོས་གཞི་ལ། རྡོ་རྗེའི་ཚིག་ཉི་ཤུ་རྩ་ལྔའི་ནང་ནས་གཉུག་མ་ངོ་སྤྲོད་པའི་ཐབས་ཚིགས་བཅད་ལྔའི་དོན་ {{TibChung|གཞུང་ལས། བུ་ཉོན་ཁྱོད་གང་རྣམ་པར་རྟོག །ནས། གཡེང་བའི་རྡུལ་དང་བྲལ་བ་ཉིད། །བར་རོ། མཆན།}} ཉམས་སུ་ལེན་པ་སྟེ། དེའང་སེམས་ཉིད་གཉུག་མ་ཞེས་པའི་དོན། དགོན་པར་རྒྱུན་བཞུགས་ཀྱི་དགེ་འདུན་ལ་གཉུག་མར་གནས་པའི་དགེ་འདུན་ཟེར་བ་ལྟར། སེམས་ཉིད་ཡེ་གདོད་མ་ནས་མ་བཅོས་ཤིང་རང་བཞིན་གྱིས་དག་པར་གནས་པས་གཉུག་མ་ཞེས་པའམ་མ་བཅོས་པའམ། སོ་མའམ། ཐ་མལ་གྱི་ཤེས་པ་ཞེས་བྱ་ལ། དེའང་ངོ་བོ་ལ་ལྟོས་ཏེ་གནས་འགྱུར་མེད་ལ། རྣམ་པ་ལ་ལྟོས་ཏེ་གནས་འགྱུར་ཡོད་པ་སྟེ། ཟངས་གཅིག་ཉིད། ཁྱི་སྣོད་དང༌། རྒྱན་ཆ་དང༌༑ ལྷའི་སྐུ་གཟུགས་ཀྱི་གནས་སྐབས་གསུམ་ན། ཟངས་ཀྱི་ངོ་བོ་ལ་བཟང་ངན་དུ་སོང་བ་ཏིལ་འབྲུ་ཙམ་མེད་མོད། གནས་སྐབས་ཀྱི་རྣམ་པ་མི་འདྲ་བ་ལ་བརྟེན་ནས་སྐྱུགས་བྲོ་བ་དང༌། རྒྱན་ཆར་ཤེས་པ་དང༌། ཐམས་ཅད་ཀྱི་མཆོད་པའི་གནས་སུ་བྱེད་པ་ལྟར། སེམས་ཀྱང་དམྱལ་བ་མནར་མེད་ནས་སངས་རྒྱས་ཀྱི་བར་ཁོ་རང་གི་ངོ་བོ་བཟང་ངན་དུ་སོང་བ་མེད་ནའང༌། རང་ངོ་མ་ཤེས་པའི་སྐབས་སུ་འཁོར་བ། བླ་མ་དམ་པའི་མན་ངག་གིས་དྲི་མ་ཅུང་ཟད་སྲབ་པའི་དུས་ལམ་པ། དྲི་མ་མཐའ་དག་སྤངས་པའི་ཚེ་སངས་རྒྱས་ཞེས་ཁྱད་པར་བྱས་པ་ཙམ་ཡིན། དེའང༌། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །ཞེས་སེམས་ཀྱི་རང་བཞིན་འོད་གསལ་བ་གཞི་དུས་ཀྱི་སངས་རྒྱས་ཡིན་ཡང༌། ཡིན་པ་ལ་ཡིན་པར་ངོ་མ་ཤེས་པས་སྣང་བ་སྣ་ཚོགས་སུ་ཤར། ཤར་བ་ལ་བདེན་ཞེན་ཞུགས་པས་མེད་བཞིན་དུ་འཁོར་བའི་འཁྲུལ་སྣང་ཉམས་སུ་མྱོང་སྟེ། སངས་རྒྱས་ཀྱིས་སངས་རྒྱས་ཀྱི་བྱ་བ་བྱེད་མ་ནུས་པ་ནི་རྒྱུའི་རྒྱུད་ཅེས་བྱ་སྟེ། རྒྱུ་ནི་འཁོར་འདས་གཉིས་ཀའི་རྒྱུན་དུ་གྱུར་པ་ཡིན་ལ། དེ་ཉིད་སེམས་ཅན་ནས་སངས་རྒྱས་ཀྱི་བར་དུ་རྒྱུན་མ་ཆད་པར་གནས་པས་རྒྱུད་ཅེས་བྱ། དེ་བསལ་ནས་ནི་ཞེས་བླ་མ་དམ་པའི་མན་ངག་གིས་གློ་བུར་གྱི་དྲི་མ་སྦྱོང་བའི་ཐབས་ཉམས་སུ་བླངས་པས་འཁྲུལ་པའི་སྣང་བ་བསྲབས་པར་གྱུར་པ་ནི་ཐབས་རྒྱུད་ཡིན་ལ། སངས་རྒྱས་ཉིད་ཅེས་ལམ་དེས་སྤང་བྱ་མཐའ་དག་སྤངས། ཐོབ་བྱ་མཐའ་དག་ཐོབ་སྟེ། དག་པ་གཉིས་ལྡན་གྱི་སངས་རྒྱས་མངོན་དུ་གྱུར་པ་ནི་འབྲས་བུའི་རྒྱུད་ཅེས་བྱ་བ་ཡིན་པས། མངོན་དུ་བྱེད་པའི་ཐབས་ཉམས་སུ་ལེན་པ་ལ༑ ཤེས་རབ་ལྟ་བས་ཐག་བཅད་པ་དང༌། ཐབས་བསྒོམ་པས་ཉམས་སུ་བླང་བ་གཉིས་ཀྱི། དང་པོ་ལ། ཡུལ་རང་བཞིན་ཉམས་དགའ་བར་བཞག་པ་དང༌། ཡུལ་ཅན་གཉིས་མེད་ཡེ་ཤེས་ལྟ་བར་བཞག་པ་གཉིས་འབྱུང་བ་ལས། འདིར་ཕྱི་མ་སྟེ། དེའང་གོང་དུ་བསྟན་པ་ལྟར། རང་གི་སེམས་རང་བཞིན་གྱིས་འོད་གསལ་བ་དེ་ཉིད་མངོན་དུ་བྱེད་པའི་ཐབས་ལ། གློད་པ་ལ་བསླབ་པ་དང༌། དེའི་གེགས་བསལ་བ་གཉིས། དང་པོ་ལ། དབེན་པ་གསུམ་དང༌། མི་གཡོ་བ་གསུམ་མམ། འདི་བས་ཕྱག་རྒྱ་གསུམ་ཞེས་པའི་ཐ་སྙད་མཛད་པ་ལྟར་ན། ལུས་ཀྱི་ཕྱག་རྒྱ་རྣམ་སྣང་གི་ཆོས་བདུན། ལག་པ་མཉམ་བཞག །མཐེ་བོང་ལྟོ་སྦྱར་བ་དང་བཅས་པ་ལེགས་པར་བཅས། ངག་གི་ཕྱག་རྒྱ་རླུང་འགྲོ་འོང་རང་སོར་བཞག །སེམས་ཀྱི་ཕྱག་རྒྱ་དུས་གསུམ་ཡིད་བྱེད་ཀྱི་རྟོག་པ་ཐམས་ཅད་སྤངས་ཏེ་སྨིན་མཚམས་མཐོ་བདུན་ཙམ་འདས་པའི་སར་མིག་གཏད་དེ། ཆད་དེ་འཇོག་ཅིང༌། དེའང་གཙོ་བོར་སེམས་ཁོངས་གློད་དེ་འཇོག །མ་གློད་པའི་སྐྱོན་ནི། སྒོམ་ཡོང་ལ་རེ་བ་ལྟ་བུའི་ཚབ་ཚུབ་ཀྱིས་སླར་སེམས་གཡེངས་རྐྱེན་དུ་འགྱུར་ལ། གློད་པའི་ཡོན་ཏན་ནི། དེ་ལྟར་ལྷོད་ཀྱིས་གློད་ནས་བཞག་པའི་ཚེ་ན། སེམས་ཁོ་རང་གི་རང་ངོ་རྗེན་ནེ་ཝལ་གྱིས་ཤེས་ཡོང་བ། དཔེར་ན་ཆུ་རྙོག་མ་ཅན་དྭངས་སུ་རེ་བའི་བཅས་བཅོས་མང་ན་སླར་རྙོག་མ་འཕེལ་ཞིང༌། རང་བབས་སུ་བཞག་པས་མྱུར་དུ་དྭངས་འགྲོ་བ་དང་འདྲ་བ་ཡིན། དེའང༌། ཕྱག་རྒྱ་གསུམ་པོ་དྭངས་སིང་ངེ་བ་བཅས་ཏེ། སྒོམ་ཡོང་ངམ་མི་ཡོང་ངམ་སྙམ་པ་ལ་སོགས་པའི་རེ་དོགས་ཀྱི་རྟོག་པ་ཅི་ཡང་ཡིད་ལ་མི་བྱ་བར། སེམས་ཁོ་རང་རང་བབས་སུ་གློད་ནས་ལྷན་ནེར་འཇོག །དེ་ལྟར་བཞག་པའི་ཚེ་མི་སྡོད་པར། རྣམ་རྟོག་ཐོལ་ཐོལ་སྐྱེ་བ་ཆོས་ཉིད་ཡིན་པས་གང་སྐྱེས་ཀྱང་རྟོག་པ་དེའི་རྗེས་སུ་མི་འབྲང་བར་རྦད་ཀྱིས་བཅད་ལ། སྔ་མའི་རྟོག་པ་འདས། ཕྱི་མའི་རྟོག་པ་མ་སྐྱེས་ཀྱི་བར་དེར། སེམས་ཐ་མལ་གྱི་ཤེས་པ་རྗེན་གྱིས་འཆར་བ་དེ་ཁའི་ངང་དུ་འཇོག་པར་བྱེད། དེ་ལྟར་སྐད་ཅིག་ཀྱང་མ་ཡེངས་པར་ཉམས་སུ་བླངས་པས། ཇི་ཞིག་ནས། ཕྱི་རོལ་གྱི་སྣང་བ་སྣ་ཚོགས་ལ་བདེན་པར་ཞེན་པ་ཞིག་ནས། སྣང་བ་འདི་ཐམས་ཅད་རང་སེམས་སུ་རྟོགས་པ་ཞིག་འབྱུང་དེ་ལྟ་ན་སེམས་ཙམ་པའི་ལྟ་བ་རྒྱུད་ལ་སྐྱེས་པ་ཡིན་ལ། འདིར་སེམས་དུབ་པ་ངལ་གསོ་བའི་གནས་དང་པོ་ངོ་འཕྲོད་པ་ཡིན་གསུངས། དེ་ལྟར་སྣང་སེམས་དབྱེར་མེད་དུ་ཤེས་པ་དེའི་ངོ་བོ་ལ་ཆེར་གྱིས་བལྟས་པའི་ཚེ་ན། དང་པོ་ཡུལ་འདི་ནས། དབྱིབས་འདི་འདྲས། དུས་འདི་ཙམ་ན་སྐྱེས་ཞེས་བྱ་བ་མི་དམིགས། བར་དུ་རང་གི་སྤྱི་བོ་ནས་རྐང་མཐིལ་གྱི་བར་དུ་ལུས་ཕྱི་ནང༌། དེས་མཚོན་པའི་སྣོད་བཅུད་འཁོར་འདས་འདི་འདྲ་ཞིག་ལ་གནས་ཞེས་བྱ་བའམ། དབྱིབས་ཁ་དོག །མཚན་མ་འདིའོ་ཞེས་མི་རྙེད་པས་བར་དུ་གནས་པ་མ་གྲུབ། དེ་ལྟར་སྐྱེ་བ་དང་གནས་པ་མ་གྲུབ་པས། དེ་ལ་ལྟོས་པའི་འགགས་པའང་མི་འགྲུབ་སྟེ། དུས་འདི་ཙམ་ན། འདི་འདྲ་ཞིག་ཏུ་འགགས་པའམ་ཟད་སོང་ཞེས་མི་རྙེད་དེ། མདོར་ན་སྐྱེ་འགག་གནས་གསུམ་གྱིས་སྟོང་ཞིང༌། དེས་མཚོན་བྱར་གྱུར་པའི་ཡོད་མེད་རྟག་ཆད་སོགས་མཐའ་བཞིའམ་བརྒྱད་དང་བྲལ་བར་རྟོགས་པ་འབྱུང་སྟེ། དེ་ནི་དབུ་མའི་ལྟ་བ་རྒྱུད་ལ་སྐྱེས་པའམ་དུབ་པ་ངལ་གསོ་བའི་གནས་གཉིས་པ་ངོ་འཕྲོད་པ་ཡིན་ནོ་གསུངས། དེ་ལྟར་མཉམ་པར་བཞག་པའི་དུས་ན། རྣམ་རྟོག་གི་འཕྲོ་རྒོད་དུ་མ་འབྱུང་བ་སོགས་སེམས་ཇི་ལྟ་བར་གནས་སུ་མ་གཏུབ་ན། ཡང་གོང་དུ་བཤད་པ་ལྟ་བུའི་བླ་མའི་རྣལ་འབྱོར་བསྒོམས་ཏེ། ལུས་སེམས་ཐང་མ་ཆད་ཀྱི་བར་དུ་གསོལ་བ་བཏབ། བླ་མ་རང་སེམས་དབྱེར་མེད་དུ་ནམ་མཁར་ཡལ་བ་དེ་ཁའི་ངང་དུ་མ་བཅོས་པར་གློད་ལ་བཞག །མདོར་ན་བླ་མ་ལ་མོས་གུས་དྲག་པོས་ལན་གཅིག་མ་ཡིན་པར་སྙིང་ཐག་པ་ནས་གསོལ་བ་བཏབ་ན་བྱིན་རླབས་རྒྱུད་ལ་ཞུགས་ཏེ། རང་སེམས་གཉུག་མའི་གནས་ལུགས་ནང་ནས་རང་ལ་ཤར་བའི་ཚུལ་དུ་རྗེན་པར་རྟོགས་པ་ཞིག་འབྱུང༌། བླ་མའི་བྱིན་རླབས་མ་ཞུགས་ན་ཇི་ཙམ་བསྒོམས་ཀྱང་དོན་སྤྱིའི་རྣམ་པ་གོ་ཡུལ་ཙམ་དུ་ཡུལ་ལེ་བ་འཆར་གྱིས། རྟོགས་པ་ཕྱིན་ཅི་མ་ལོག་པར་མི་སྐྱེ་བས་བླ་མའི་མོས་གུས་ཁོ་ན་ལ་ནན་ཏན་དུ་བྱ་བ་གལ་ཆེའོ་གསུངས། ལམ་གྱི་མཐར་ཐུག་བླ་མའི་མོས་གུས་ལ། །ཁ་ཙམ་མིན་པའི་ཉམས་ལེན་ཁོར་ཡུག་གིས། །རང་སེམས་མ་བཅོས་གཉུག་མའི་ཞལ་བཟང་མཆོག །རང་བྱུང་རྗེན་པ་མཐོང་དུས་ནམ་ཡོང་ན། །གཉིས་པ་ཐབས་བསྒོམ་པས་ཉམས་སུ་བླང་བ་ནི། དེ་ལྟར་སེམས་ཀྱི་ངོ་བོ་མཐོང་ཡང་དེའི་རྒྱུན་མ་བསྐྱངས་ན། འཁོར་བ་ཐོག་མ་མེད་པ་ནས་གོམས་པའི་བག་ཆགས་ཀྱིས་གནས་ལུགས་རང་ངོ་ཤེས་པ་སྤྲིན་བར་གྱི་ཉི་ཞུར་བཞིན་དུ་འགྲིབ་པར་འགྱུར་བས་ན། དེ་མི་འབྱུང་བའི་ཆེད་དུ་དུས་གནས་སྐབས་ཀུན་ཏུ་མ་ཡེངས་པར་བསྐྱང་དགོས་ལ། ཇི་ལྟར་སྐྱོང་བའི་ཚུལ་ལའང་གསུམ་ལས། དང་པོར་མི་གནས་པ་གནས་པར་བྱེད་པའི་ཐབས་མ་ཡེངས་པར་སྐྱོང་བ་ལ་མཁས་པ་རལ་སྐོར་མཁན་གཡུལ་དུ་ཞུགས་པ་ལྟ་བུ་ཞེས་བྱ་བ༑ རྒྱ་གར་ན་འཐབ་མོ་བྱེད་པ་ན། རལ་གྲི་བཟུང་བ་ནས། འུར་རྡོ་ཐོགས་པའི་བར་སོ་སོར་འཐབ་པར་བྱེད་པས་ན། རལ་སྐོར་མཁན་དེའང་ཐེ་ཚོམ་ཡེངས་པ་མེད་ཅིང་མ་ཡེངས་པར་རལ་གྲི་བསྐོར་བས་ཚུལ་སུས་ཀྱང་མི་ཚུགས་ལ། ཕར་ཐམས་ཅད་བཅོམ་སྟེ་གཡུལ་ལས་རྒྱལ་ངེས་པ་ཞིག་འབྱུང་ལ། གལ་ཏེ་སེམས་གཡེང་བའམ་ཐེ་ཚོམ་དུ་ལུས་ན། དེའི་བར་གཞན་གྱིས་ཚུར་བསྣུན་ཏེ་རང་ཉིད་འཆི་བར་མ་ཟད་གཡུལ་ཡང་ཕམ་པར་འགྱུར་བ་བཞིན་དུ། རྣལ་འབྱོར་པ་སེམས་ཀྱི་ངོ་བོ་མཐོང་བ་དེས། དེ་ཁའི་ཐོག་ཏུ་སྐད་ཅིག་ཀྱང་མ་ཡེངས་པར་ཉམས་སུ་བླང་ན། ཚུར་རྣམ་རྟོག་གིས་མི་ཚུགས་པར་མ་ཟད། ཕར་རྣམ་རྟོག་ཐམས་ཅད་འཇོམས་པར་འགྱུར་ལ༑ ཐེ་ཚོམ་དང་གཡེང་བས་དེ་ཐོག་ཏུ་འཇོག་མ་ནུས་ན། ཡེངས་འཁྲུལ་རྒྱ་འབྱམས་ཀྱི་དབང་དུ་གྱུར་ཏེ། འཁོར་བའི་རྒྱ་མཚོ་འདིར་ལྟུང་ནས་ཐར་པའི་དུས་མེད་པ་ཞིག་འབྱུང་བས་དུས་དང་རྣམ་པ་ཐམས་ཅད་དུ་མ་ཡེངས་པའི་དྲན་པ་གལ་ཆེ་གསུངས། དེའང་སྐྱབས་འགྲོ་ནས་བཟུང་སྟེ་རང་སེམས་སྤྲོས་བྲལ་གྱི་ངང་དུ་འཇོག་པའི་བར་གོང་བཞིན་ལ། དེ་ཁའི་ངང་དུ་ཡེ་མ་ཡེངས་པར་ཆད་དེ་འཇོག་པར་བྱེད། རྣམ་རྟོག་གང་སྐྱེས་ཀྱང་རྦད་ཀྱིས་བཅད་ལ། ཡང་འཛིན་མེད་དུ་འཇོག་པ་དེ་ལྟ་བུ་ཡང་ཡང་གོམས་པས། སེམས་སྤྲོས་བྲལ་དུ་ལྷན་ནེར་གནས་པ་ཞིག་འབྱུང་སྟེ། དུབ་པ་ངལ་གསོ་བའི་གནས་གསུམ་པ་ངོ་འཕྲོད་པ་ཡིན་གསུངས། གཉིས་པ་གནས་པ་བརྟན་པར་བྱེད་པའི་ཐབས། བར་དུ་མ་བཅོས་པར་བཙའ་བ་ལ་མཁས་པ་གླང་རྫི་མཁས་པས་གླང་པོ་ཆེ་སྐྱོང་བ་ལྟ་བུ་ནི། དཔེར་ན་གླང་པོ་ཆེ་དེ་སེམས་ཅན་སྟོབས་ཆེ་ཞིང་མ་རུངས་པ་ཞིག་ཡིན་པས། དེ་བསྐྱང་བ་ན། འགྲོ་ལྡོག་ལ་མཁས་པ་ཞིག་དགོས་ཀྱི། ལྕག་དང་ལྕགས་ཀྱུ་སོགས་ཙབ་ཙོབ་མང་ན། ཁོ་ཁྲོས་ནས་གང་དགར་ཁྱེར། མ་འཆུན་ན་ལམ་དུ་མི་ཆུག །དེས་ན་ཁོ་རང་ལམ་ལ་འགྲོ་བ་ན་རང་སོར་བཞག །ལམ་མིན་དུ་འཇུག་པ་ན། ལྕག་དང་ལྕགས་ཀྱུ་སོགས་ཀྱིས་བཏུལ་བས་འདོད་པར་ཕྱིན་པ་བཞིན་དུ། སེམས་འདིའང་གང་དགར་བཞག་ན་འཁྲུལ་པ་རྒྱ་འབྱམས། གཉེན་པོ་ཙབ་ཙོབ་མང་ན་སླར་འཁྲུལ་པའི་བསྣོན་ཁར་འགྱུར་བས༑ ཕྱི་ལྷོད་ལ་ཁོང་གྲིམ་པའི་ཚུལ་དུ་ཧ་ཅང་ཅུར་ཅུར་དུའང་མ་སོང་བ་མ་ཡེངས་པའི་རྒྱངས་སོ་བཙུགས་ནས། སེམས་ཁོ་རང་རང་བབས་སུ་གནས་ཀྱི་འདུག་ན། དེ་ཀའི་ངང་ལ་ཆམ་མེ་འཇོག །འགྱུ་ཡི་འདུག་ན་དྲན་པས་ཚིར་གྱིས་བཟུང་ལ་རྣམ་རྟོག་གང་ཤར་བ་དེ་ཀའི་ཐོག་ཏུ་འཛིན་མེད་དུ་ཆམ་གྱིས་འཇོག །དེ་ལྟར་བཞག་པས་རྣམ་རྟོག་གཅིག་ཤར། དེ་ཀའི་ངོ་བོ་ལ་བལྟས་པས་འཛིན་མེད་དུ་ལྷང་ངེ༌། སེམས་གཉུག་མའི་ཞལ་གཅིག་མཐོང་བ་ཡིན་མོད། དེས་མཚོན་རྣམ་རྟོག་གི་འགྱུ་བ་དགག་པར་མི་ནུས་པས། གང་ཤར་བ་དེ་ཐོག་ཏུ་འཛིན་པ་མ་ཞུགས་པར་ཆམ་ཆམ་འཇོག་པར་བྱེད། དེ་ལྟ་བུ་གོམས་པས་རྣམ་རྟོག་གང་སྐྱེས་ཀྱང་རང་ངོ་རྗེན་པར་ཤེས་པ་ནི་འགྱུ་བ་རང་སར་གྲོལ་བ་ཞེས་བྱ་སྟེ། དུབ་པ་ངལ་གསོ་བའི་གནས་བཞི་པ་ངོ་འཕྲོད་པ་ཡིན་ནོ་གསུངས། གསུམ་པ་བརྟན་ནས་བོགས་འབྱིན་པར་བྱེད་པ། ཐ་མ་ཅི་དགར་བཏང་བ་ལ་མཁས་པ་གཟིངས་ཐོག་ནས་འཕུར་བའི་བྱ་ལྟ་བུ་ཞེས་བྱ་རྒྱ་གར་ན་ཚོགས་པ་རྒྱ་མཚོར་འགྲོ་བ་རྣམས་རི་དང་ཆུ་སྲིན་བརྟགས་པའི་ཆེད་དུ། ཕུག་རོན་དང་བྱ་རོག་སོགས་ཁྱེར་བ་ན་འཛམ་བུ་གླིང་དང་ཉེ་བའི་ཕྱོགས་རྣམས་སུ། བྱ་རྫི་སོགས་ཀྱིས་ཉེར་ཅག་ལེགས་པོ་བྱས། གང་བྱུང་ལ་མ་ཤོར་བ་མ་བྱས་ན། ཁོ་འཛམ་བུ་གླིང་དུ་ལོག་ན་རི་དང་ཆུ་སྲིན་བརྟག་པ་སོགས་མི་ཡོང་བས་ཁྱེར་བ་དོན་མེད་དུ་འགྱུར་བས་མི་ཕུར་བའི་ཐབས་བྱ་དགོས་ལ། རྒྱ་མཚོའི་དབུས་སུ་སླེབས་ན་རྒྱ་མཚོ་དང་ནམ་མཁའ་གཉིས་ཁ་སྦྱར་བ་ལྟ་བུའི་མཐའ་བྱས་རྙེད་པར་མི་ནུས་པས། དེ་ཙམ་ན་ཉེར་ཅག་མི་དགོས་པར་རང་དགར་འཕུར་བཏང་བས། ཁོ་རང་གང་དུའང་འགྲོ་ས་མི་རྙེད་ལ༑ ཆུ་ལ་སྡོད་མི་ཚུགས་པས་སླར་གཟིངས་ཐོག་ཏུ་ཁྱིར་ཏེ་བབས་ཡོང་བ་ལྟར། སེམས་ཀྱང་འགྱུ་བ་རང་གྲོལ་དུ་མ་སོང་གི་བར་མ་ཡེངས་པར་གཅུན། རྣམ་རྟོག་གང་སྐྱེས་ཀྱང་དེ་ཐོག་ཏུ་འཛིན་པ་མ་ཞུགས་པར་མ་བསྐྱངས་ན། སེམས་ཡུལ་ལ་འབྱམས་ན་དགེ་སྦྱོར་བྱེད་བློ་ཙམ་མ་གཏོགས། ཐར་པ་དང་ཐམས་ཅད་མཁྱེན་པའི་ལམ་སྒྲུབ་པར་མི་ནུས་པས་དོན་མེད་དུ་འགྱུར་བ་ཡིན་པས། འགྱུ་བ་རང་གྲོལ་དུ་ཤེས་པ་ན། དེ་བརྟན་མི་བརྟན་བརྟག་པའི་ཆེད་དུ། སེམས་འདོད་ཆགས་ཞེ་སྡང་སོགས་ཉོན་མོངས་སྐྱེས་པའི་ཡུལ་ལ་ཆེད་དུ་སྤྲོས་ཏེ་ཆམ་གྱིས་བཏང་ནས། དེ་དང་དེའི་རྩལ་རྫོགས་སུ་བཅུག་པས། རྣམ་པ་ཉོན་མོངས་དེ་དང་དེར་ལམ་མེར་གནས་ཀྱང༌། ངོ་བོ་གཉིས་མེད་ཀྱི་ཡེ་ཤེས་སུ་རྗེན་ནེ་གནས་པ་སྟེ། ཡུལ་དེར་མི་གནས་པར་སེམས་ཁོ་རང་བརྗོད་བྲལ་གྱི་ངང་དུ་ལྷོད་དེ་གནས་པ་ཞིག་འབྱུང༌། དེ་གོམས་ན། གནས་གཉེན་པོར་ཕྱིན་ལ་བགེགས་ཀྱི་ཆོ་འཕྲུལ་དང་བསྲེ། རིམ་གྱིས་མེ་དང༌། ཆུ་དང༌། མཚོན་ལ་སོགས་པའི་ཐོག་ཏུ་བསྲེས་པས། དེ་དང་དེས་གནོད་པར་མི་ནུས་ཀྱི་སྟེང་དུ་ཉམས་དང་རྟོགས་པ་ལ་བོགས་རྒྱངས་རྒྱངས་ཐོན་ཡོང་བ་ཡིན་ཏེ། དེ་ནི་དུབ་པ་དང་ངལ་གསོ་བའི་གནས་ལྔ་པ་ངོ་འཕྲོད་པ་ཡིན་གསུངས། མ་ཡེངས་དྲན་པའི་མ་མས་རིང་དུ་བསྐྱང༌། །མ་བཅོས་གཉུག་མའི་ཀློང་དུ་ཆོས་ཀུན་གྲོལ། །མ་བཅིངས་རང་ངོ་ཤེས་པའི་རྒྱ་ཡན་གྱིས༑ ༑མ་ནོར་གནས་ལུགས་རྟོགས་དུས་ནམ་ཡོང་ན། །གཉིས་པ་གེགས་བསལ་བ་ནི། དེ་ལྟར་ཤེས་རབ་ལྟ་བས་ཐག་བཅད་པའི་དོན་དེ་ཐབས་བསྒོམ་པའི་གནས་གསུམ་པོ་དེས་སྐད་ཅིག་ཀྱང་ཡེངས་པ་མེད་པས་ཉམས་སུ་བླངས་པས། ཇི་ཞིག་ན་བདེ་གསལ་མི་རྟོག་པའི་ཉམས་སྐྱེ་ཞིང༌། དེ་དག་ལ་ཞེན་ན་ཁམས་གསུམ་འཁོར་བའི་རྒྱུར་འགྱུར་གྱི། ཐམས་ཅད་མཁྱེན་པའི་ལམ་དུ་མི་འགྲོ་བས། གེགས་དེ་བསལ་དགོས་ལ། དེའང་ཉམས་དེ་མ་སྐྱེས་ནའང་ལམ་དུ་མི་འགྱུར་བས་ཐོག་མར་མ་སྐྱེས་ཀྱི་བར་དུ་བསྐྱང༌། ཉམས་དེ་དག་ལ་ཞེན་ནའང་ལམ་དུ་མི་འགྱུར་བས། ལམ་དུ་བསྲེལ་དགོས་ཏེ། དཔེར་ན་རྒྱ་གར་རྡོ་རྗེ་གདན་དུ་འགྲོ་བའི་ལམ་ན། དཔལ་མོ་དཔལ་ཐང་ལྟ་བུ་ཐང་བདེ་ཞིང་ཡིད་ཆགས་པའང་ཡོད། གཅན་ཕྲང་དང་གཡང་ས་སོགས་ལམ་འཇིགས་པའང་ཡོད་མོད། དེ་དག་ལ་མ་ཕྱིན་པར་ཡང་རྡོ་རྗེ་གདན་དུ་སླེབས་མི་ནུས་ན། དེ་དག་ལ་ཆགས་ནས་དེར་བསྡད་པའམ་འཇིགས་ནས་འགྲོ་མ་ནུས་པར་ལོག་ནའང་རྡོ་རྗེ་གདན་དུ་སླེབ་པའི་གེགས་སུ་འགྱུར་བ་དང་ཚུལ་མཚུངས་པ་ཡིན་ཏེ། དེའང་དེ་ལྟར་མཉམ་པར་བཞག་པའི་དུས་ན། རྣམ་རྟོག་གི་འགྱུ་བ་ཐམས་ཅད་འགགས་ཀྱང་སེམས་ཀྱི་རང་ངོ་རྗེན་པར་མ་ཤེས་པའི་མུན་ནེ་བ་ནི་ཞི་གནས་ལྟེངས་པོ་ཞེས་བྱ་བའམ། མི་རྟོག་པའི་ཉམས་ཞེས་བྱ་བ་ཡིན་ལ། དེ་ལ་ཞེན་ན་གཟུགས་མེད་ཀྱི་ལྷར་སྐྱེ་བ་མ་གཏོགས་པར་ཐམས་ཅད་མཁྱེན་པའི་ལམ་དུ་མི་འགྱུར་བས་དེ་བསལ་བ་ནི། ལུས་གནད་བསྒྲིམ། ལྟ་སྟངས་དཔང་བསྟོད། རིག་པ་ཧུར་ཕྱུངས། ཤེས་པ་གཟེངས་བསྟོད་དེ། སལ་ལེ་སིང་ངེ༌། ཡེ་རེ། སེམས་མ་བཅོས་པའི་ངང་དུ་བཞག་པས་གསལ་སྟོང་ཟུང་འཇུག་ཏུ་འགྱུར། དེ་ལྟར་ཡང་ཡང་གོམས་པས། གསལ་བའི་ཉམས་ཧྲིག་གེ་བ། ཡེ་རེ་བ། གསལ་ཆ་ལ་བདེན་འཛིན་དང་བཅས་པ། སེམས་གསལ་བ་དེ་ལས་འབྲལ་མི་ཕོད་པ་ལྟ་བུ་འབྱུང་ཞིང༌༑ དེ་ལ་ཞེན་ན་གཟུགས་ཁམས་ཀྱི་ལྷར་སྐྱེ་བས། དེ་བསལ་བ་ནི། ལུས་གནད་ཁོང་ལྷོད་དང༌། ལྟ་སྟངས་སྨད། ཤེས་པ་ཁོང་གློད་དེ་རང་བབས་སུ་ཆམ་མེ་བཞག་པས། མི་རྟོག་པ་དང་གསལ་བ་ཟུང་འཇུག་ཏུ་འགྱུར། དེ་ལྟར་གསལ་སྟོང་ཟུང་དུ་འཇུག་པ་ན། ཐབས་ཤེས་རབ་ཀྱི་རྟེན་འབྲེལ་གྱིས་བརྗོད་མེད་ཀྱི་བདེ་བ་ལྷང་གིས་སྐྱེས། བདེ་ཉམས་གང་ལའང་ཞེན་པ་མི་བྱེད། ཞེན་ན་འདོད་ཁམས་ཀྱི་གནས་ཅི་རིགས་པར་སྐྱེ་བ་ལས་ཐམས་ཅད་མཁྱེན་པའི་ལམ་དུ་མི་འགྱུར་བས། བདེ་བ་དེའི་ངོ་བོ་ལ་མི་ཞེན་པར་སེམས་ནམ་མཁའི་མཐའ་ཀླས་སུ་ཆམ་གྱིས་བཏང་ཤེས་པ་རྒྱ་བསྐྱེད། འཛིན་མེད་དུ་བཞག་པས་བདེ་སྟོང་ཟུང་འཇུག་ཏུ་འགྱུར་ཏེ། མདོར་ན་ཁལ་ཁལ་བསྲེལ་བ་བཞིན་དུ། གསལ་བ་ཤས་ཆེ་ན་མི་རྟོག་པ། མི་རྟོག་པ་ཤས་ཆེ་ན་གསལ་བའི་ཐབས། བདེ་བ་ཤས་ཆེ་ན་སྟོང་ཉིད་ཀྱི་ངང་དུ་བསྲེལ་བས་ཞེན་འཛིན་ཐམས་ཅད་དག་སྟེ། སེམས་གཉུག་མའི་ངང་ཐོག་ཏུ་གནས་པ་ཞིག་འབྱུང༌། དེ་ལྟར་གཞི་དུས་ཀྱི་ཆོས་སྐུ་སེམས་མ་བཅོས་གཉུག་མར་གནས་པ་དེ་ཉིད། ལམ་དུས་ཀྱི་ཆོས་སྐུ་སེམས་མ་བཅོས་པར་བཞག་པའི་ཐབས་ཀྱིས་ཉམས་སུ་བླངས་པས༑ འབྲས་དུས་ཀྱི་ཆོས་སྐུ་སེམས་ཉིད་མ་བཅོས་པའི་རང་ངོ་རྗེན་པར་ཤེས་པ་ཉིད་ལ་སངས་རྒྱས་ཞེས་བྱ་བ་ཡིན་གྱི། སེམས་ལས་གཞན་པའི་ཆོས་སྐུ་གཤེད་ན་ཡོད་ན། རང་རེ་རྣམས་ཀྱིས་ལེན་ཀྱང་མི་ཐུབ་ལ༑ བླངས་ཀྱང་འདྲེ་བ་དཀའ། མདོར་ན་རང་སེམས་རང་ངོ་མ་ཤེས་པའི་བློ་བུར་གྱི་དྲི་མ་མཐའ་དག་དབྱིངས་སུ་ཐིམ། སེམས་ཉིད་དག་པ་གཉིས་ལྡན་མངོན་དུ་གྱུར་པ་སངས་རྒྱས་ཞེས་ཐ་སྙད་བྱས་ཡིན་གསུངས། དེ་དག་ནི་དངོས་གཞིའི་རིམ་པའི་བསྒོམ་བྱ་གང་ཟིན་བྲིས་པའོ། །གསལ་སྟོང་བདེ་བའི་ཉམས་མྱོང་རྒྱུད་ལ་སྐྱེས། །སོ་སོར་མ་ཞེན་ཟུང་འཇུག་ཉམས་སུ་ལོངས། །བློ་འདས་གཉུག་མ་རང་སེམས་ཕྱག་རྒྱ་ཆེ། །དག་པ་གཉིས་ལྡན་རྟོགས་དུས་ནམ་ཡོང་ན། །གསུམ་པ་རྗེས་ལ། ཡུན་དུ་གནས་པའི་ཐབས་ནི། གོང་དུ་བསྟན་པ་ལྟ་བུའི་སྤྲོས་བྲལ་གྱི་དོན་ལ་མ་ཡེངས་པའི་དྲན་པས། སྐད་ཅིག་ཀྱང་མ་ཡེངས་པར་ཉམས་སུ་བླངས་པས། ནུབ་མོ་རྨི་ལམ་དུ་ཡང་དགེ་སྦྱོར་ཟིན་པ་འབྱུང༌། མདོར་ན་ཉིན་མཚན་འཁོར་ཡུག་ཏུ་འབད་པ་དྲག་པོས་ཉམས་སུ་ལེན་པ་ཉིད་ཡིན་ལ། སྣང་བ་ལམ་དུ་ཁྱེར་བའི་ཐབས་ཀྱང་ནད་གདོན་ཉོན་མོངས་སོགས་གང་བྱུང་ཡང་དེ་ཐོག་ཏུ་སེམས་ཆེར་གྱིས་གཏད་དེ། གང་ཡིན་པ་དེའི་རྩལ་རྫོགས་པ་ན། རིག་པ་བཟོ་མེད་དུ་ཆམ་ཆམ་འཇོག་པ་སོགས། མདོར་ན་སྣང་བ་གང་ཤར་དེ་ཁའི་སྣང་བ་ལ་མི་དཔྱོད་པར། ངོ་བོའི་ཐོག་ཏུ་གློད་ཀྱིན་འཇོག་པར་བྱེད། ཅི་བྱས་འགྲོ་དོན་དུ་འགྱུར་བའི་ཐབས་ནི། དེ་ལྟར་སེམས་ཀྱི་གནས་ལུགས་སྤྲོས་པ་ཐམས་ཅད་དང་བྲལ་བ་སེམས་ཅན་ཐམས་ཅད་ལ་རང་ཆས་སུ་བཞུགས་ཀྱང༌། གློ་བུར་གྱི་དྲི་མས་བཞུགས་པ་ལ་བཞུགས་པར་ངོ་མ་ཤེས་པས་འཁྲུལ་སྣང་འབའ་ཞིག་ལ་ལོངས་སྤྱོད་པ་འདི་རྣམས་སྙིང་རེ་རྗེ་ན། བདག་གིས་ཇི་ལྟར་ཕན་ཕན་བྱ་སྙམ་དུ། ཅི་བྱས་སེམས་ཅན་གྱི་དོན་དུ་འགྱུར་བའི་ཐབས་ལ་འབད་པ་ཡིན་ནོ་གསུངས། མཉམ་རྗེས་བྲལ་བའི་དགེ་སྦྱོར་ཁོར་ཡུག་གིས། །སྣང་སྲིད་བདེ་ཆེན་ཆོས་སྐུར་ཤར་བའི་ངང༌། །དངོས་དང་བརྒྱུད་པས་དྲིན་ཅན་མ་རྣམས་ལ། །ཕན་བདེ་རབ་འབྱམས་སྩལ་དུས་ནམ་ཡོང་ན། །དེ་སྐད་རྒྱལ་བ་ཀུན་དངོས་ཚར་པ་རྗེའི། །ཞབས་སེན་ནོར་བུའི་ཅོད་པན་སྤྱི་གཙུག་ཏུ། །འབྲལ་མེད་བཅིངས་པས་ཆོས་ཀྱི་རྒྱལ་སྲིད་ལ། །དབང་ཐོབ་མཁྱེན་བརྩེའི་མིང་དེས་ཡི་གེར་བཀོད། །དགེ་འདིས་སྲིད་ལམ་འཁྱམས་པས་ཆེས་དུབ་པའི། །མ་རྣམས་གཉུག་མའི་མལ་དུ་ངལ་གསོས་ནས། །ཟག་མེད་བདེ་བ་ནམ་མཁའི་ཁྱོན་འདས་པ། །ཟུང་འཇུག་འཇིག་རྟེན་དབང་ཕྱུག་ཐོབ་པར་ཤོག །སརྦ་དཱ་མངྒ་ལཾ། }} | |||
</onlyinclude> | |||
{{TsagliCall}} | |||
<headertabs/> | |||
Revision as of 11:01, 29 May 2025
| Wylie title | ||
|---|---|---|
| Location | gdams ngag rin po che'i mdzod Volume 16, Text 26, Subtext 3, Pages (Folios to ) | |
| Author | འཇམ་མགོན་ཀོང་སྤྲུལ་ | |
| Citation | ||
| Side notes | ||
| More details More details | ||
| Genre | ||
