DNZ-16-MA-002

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 16, Text 2, Pages (Folios to )
Author	འཇམ་མགོན་ཀོང་སྤྲུལ་
Citation	'jam mgon kong sprul. '. In Gdams ngag rin po che'i mdzod, Vol. 16: . Kalimpong: Rigpe Dorje Publications, 2024.	Shechen Publications, 1999
Side notes	Verso: khrid thor bu ba'i skor
More details More details
Genre

Tibetan Text

[edit]

༄༅། །འཕགས་ཡུལ་གྱི་གྲུབ་ཆེན་བརྒྱད་ཅུ་རྩ་བཞི་ལ་མཆོད་ཅིང་གསོལ་བ་གདབ་པའི་ཆོ་ག་དངོས་གྲུབ་ཀུན་འབྱུང་ཞེས་བྱ་བ་བཞུགས་སོ། །

༄༅། །ན་མོ་གུ་རུ་ཡོ་གེ་ཤྭ་རཱ་ཡ། བླ་མེད་སྔགས་ཀྱི་ལམ་ལས་སྒྲ་ཇི་བཞིན། །སྐུ་ཚེ་གཅིག་གིས་མི་སློབ་ཟུང་འཇུག་བརྙེས། །གྲུབ་མཆོག་རྣལ་འབྱོར་ཕོ་མོའི་ཞབས་པད་ལ། །གུས་པས་འདུད་དོ་བདག་རྒྱུད་བྱིན་གྱིས་རློབས། །མཚན་ཙམ་གྱིས་ཀྱང་དོན་ཆེན་མཛད་གྱུར་ན། །མཆོད་ཅིང་གུས་གསོལ་བཏབ་ན་སྲིད་དང་ཞིའི། །འཆིང་སྒྲོལ་གྲུབ་གཉིས་འབད་མེད་སྩོལ་བ་ལ། །ཡིད་གཉིས་སྤངས་པས་དེ་དོན་གསལ་བར་བརྗོད། །སློབ་དཔོན་དཔའ་བོ་འོད་གསལ་ལུགས་ཀྱི་གྲུབ་ཆེན་བརྒྱད་ཅུ་རྩ་བཞི་ལ་མཆོད་ཅིང་གསོལ་བ་གདབ་སྟེ་ཚོགས་གསོག་རྒྱས་པར་བྱ་བའི་ཚུལ་བླ་མ་མཆོད་པ་སྤྱི་མཐུན་གྱི་ས་བཅད་རྗེ་བཙུན་ཏཱ་ར་ནཱ་ཐས་གནང་བ་ལྟར་ཉམས་སུ་ལེན་པ་ལ་གསུམ། སྦྱོར་བ་ཡོ་བྱད་ཀྱི་གཤོམ། དངོས་གཞི་ཚོགས་གསོག་གི་རིམ་པ། རྗེས་བྱིན་རླབས་ཞུ་བསྟིམས་སོགས་སོ། །དང་པོ་ནི། དབེན་ཞིང་ཡིད་དུ་འོང་བའི་གནས་ཁང་བྱི་དོར་བྱས་ཤིང་བླ་བྲེ་རྒྱལ་མཚན་ལ་སོགས་པ་རྒྱན་གྱི་ཡོ་བྱད་གང་འཛོམ་ལྟར། གུང་དུ་གྲུབ་བརྒྱའི་བྲིས་སྐུས་མཚོན་པའི་རྟེན་བཀྲམ། དེ་མདུན་སྟེགས་བུ་ཁེབས་ལྡན་གྱི་དབུས་སུ་མཉྫིའམ་མཎྜལ་འཇོག་པའི་སྟེགས་མཐོ་བར་བཀོད། མདུན་དུ་ཆུ་གཉིས་དང༌། འབྱོར་པས་ལྕོགས་ན་མེ་ཏོག ། སྤོས། མར་མེ། དྲི་ཆབ། ཞལ་ཟས་རྣམས་རེ་རེ་བརྒྱ་རྩ་སོགས་བསྐོར་ཏེ་བཤམ། མ་འབྱོར་ན་ཚར་གསུམ་མམ་གཅིག་ཕྲེང་ཚར་དུ་བཀོད། གཟུགས་སྒྲ་དྲི་རོ་རེག་བྱ། བཀྲ་ཤིས་རྫས་རྟགས། རྒྱལ་སྲིད་སྣ་བདུན། རིག་མ་བཅུ་དྲུག་ལ་སོགས་པ་མཆོད་པའི་རྫས་གང་འབྱོར་གཟུགས་སམ་རི་མོར་བྲིས་པ་འཛོམས་ན་བཤམ། མ་འཛོམས་ན་དམིགས་པས་འཐུས། ནང་མཆོད་ཐོད་པའི་བདུད་རྩི། ཚོགས་ཀྱི་ཡོ་བྱད་ཅི་ལྟར་འབྱོར་པ་རྣམས་འདུ་བྱ། རང་གི་མདུན་དུ་རིན་པོ་ཆེའི་མཎྜལ་ཆེ་ལེགས། ཚོམ་བུའི་རྒྱུ་འབྲུ་གཙང་དག །དུང་ཞལ་ཆུ་གཙང་བླུགས་པ་དང༌། བ་བྱུང་དྲི་བཟང་གི་ཆུ་སྦྱར་བ་གཉིས་རྣམས་དང༌། མཆོད་པའི་མཎྜལ། རྡོར་དྲིལ་དང་རོལ་མོའི་རིགས་རྣམས་ཀྱང་ཉེ་བར་བསྡོག་གོ །གཉིས་པ་ལ། ཐོག་མར་རང་ཉིད་ཐུན་མཚམས་ལྷའི་ང་རྒྱལ་དང་ལྡན་པའི་གནས་དང་ཡོ་བྱད་བྱིན་གྱིས་བརླབ་པ་ནི། ༀ་བཛྲ་ཨ་མྲ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ༀ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། གིས་བསང་སྦྱང༌། སྟོང་པའི་ངང་ལས་གནས་ཁང་བྷྲཱུྃ་ལས་རིན་པོ་ཆེ་ལས་གྲུབ་པའི་གཞལ་མེད་ཁང་བརྩེགས་མཚན་ཉིད་ཐམས་ཅད་ ཡོངས་སུ་རྫོགས་པའི་དབུས་སུ། ༀ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས༑ སྣང་གསལ། དྲི་ཆབ། ཞལ་ཟས། རོལ་མོ་ལ་སོགས་པ་མཆོད་རྫས་བཟང་ཞིང་དགེ་བས་ནམ་མཁའི་ཁམས་ཐམས་ཅད་གང་བར་གྱུར། ༀ་བཛྲ་ཨ?ཾ་སྭཱ་ཧཱ། ༀ་བཛྲ་པཱ་དྱཾ་སྭཱ་ཧཱ། ༀ་བཛྲ་པུཥྤེ་ཨཱཿ ཧཱུྃ་སྭཱ་ཧཱ། ༀ་བཛྲ་དྷཱུ་པེ་ཨཱཿ ཧཱུྃ། ཨཱ་ལོ་ཀེ། གནྡྷེ། ནཻ་ཝིདྱ། ཤབྡ་ཨཱཿ ཧཱུྃ། ཞེས་རོལ་མོས་བྱིན་དབབ། སྐྱབས་འགྲོ་སེམས་བསྐྱེད་ཚིག་རྒྱས་བསྡུས་གང་རུང་སྤྱི་མཐུན་ནམ་བསྡུ་ན། སངས་རྒྱས་ཆོས་ཚོགས་ལན་གསུམ་བྱ། སེམས་ཅན་ཐམས་ཅད་བདེ་བ་དང་སོགས་ཀྱིས་ཚད་མེད་བཞི་བསྒོམ། སྐད་ཅིག་གིས་བླ་མ་རྡོ་རྗེ་འཆང་གྲུབ་ཐོབ་ཕོ་མོའི་ཚོགས་དང་བཅས་པ་མདུན་གྱི་ནམ་མཁར་བཞུགས་པར་གྱུར། ཆུ་བྱིན་རླབས་ནི། ༀ་བཛྲ་ཨུ་ད་ཀེ་ཧཱུྃ་སྭཱ་ཧཱ། དུང་ཆོས་བླངས་ལ། ༀ་ཧྲཱིཿ སྭཱ་ཧཱ། ཁ་བཤལ་ལ། ༀ་ཝཾ་སྭཱ་ཧཱ། མགོ་དང་གདོང་བཀྲུ་ཞིང༌། ཇི་ལྟར་བལྟམས་པ་སོགས། ༀ་སརྦ་ཏ་ཐཱ་ག་ཏ་ཨཱ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། གནས་གསུམ་དུ་རེག་ལ། ༀ་ཨཱཿ ཧཱུྃ། གདན་ལ་མེ་ཏོག་བཞག་ཅིང༌། ༀ་ཏིཥྛ་བཛྲ་ཨཱ་ས་ན་ཧཱུྃ། ༀ་བཛྲ་ བ་བ་ན་བ་ན་ཡ་སྭཱ་ཧཱ། མེ་ཏོག་རྣ་ལྟག་ཏུ་གཟེར་ལ། ༀ་བཛྲ་ཨ་མྲ་ཏ་ཀུཎྜ་ལི་རཀྵ་མཱཾ། སརྦ་བིགྷྣའན་བྷྱཿ དྲི་བཟང་ཆབ་བྱིན་རླབས་ནི། ༀ་བཛྲ་ཨུ་ད་ཀེ་ཧཱུྃ་སྭཱ་ཧཱ། མེ་ཏོག་བྱིན་རླབས་ནི། ༀ་ན་མོ་བྷ་ག་ཝ་ཏེ་པུཥྤེ་ཀེ་ཏུ་རཱ་ཛཱ་ཡ་ཏ་ཐཱ་ག་ཏཱ་ཡ། ཨརྷ་ཏེ་སམྱཀ་སམྦུདྡྷའ་ཡ། ཏདྱ་ཐཱ། ༀ་པུཥྤེ་པུཥྤེ་མ་ཧཱ་པུཥྤེ། སུ་པུཥྤེ་པུཥྤེ་སཾ་བྷ་ཝེ་པུཥྤེ´བྷ་ཝེ་པུཥྤེ་ཀིརྞེ་སྭཱ་ཧཱ། ལན་གསུམ་མམ་བདུན་བརྗོད། བ་བྱུང་སོགས་བྱིན་རླབས་ནི། ༀ་གོ་མ་ཡེ་སྭཱ་ཧཱ། བགེགས་སྦྱང་བ་ནི། ༀ་བཛྲ་ས་ཏྭ་བིགྷྣ་་་ན་སཱ་ར་ཡ་ཧཱུྃ་ཕཊ། མཎྜལ་རེ་ཁ་བྲི། ༀ་བཛྲ་རེ་ཁེ་སྭཱ་ཧཱ། བ་ལྕི་ཆུར་བཅས་སྦྱིན་པ་སྟེ། །བྱི་དོར་བྱས་པ་ཚུལ་ཁྲིམས་ཡིན། །གྲོགས་སྦུར་བསལ་བ་བཟོད་པ་སྟེ། །བརྩོན་འགྲུས་བྱ་བ་བྱེད་ལ་བརྩོན། །བསམ་གཏན་དེར་སེམས་སྐད་ཅིག་མ། །རི་མོ་ལེགས་འབར་ཤེས་རབ་བོ། །ཕ་རོལ་ཕྱིན་པ་དྲུག་རྣམས་ཀྱིས། །ཐུབ་པའི་མཎྜལ་ལེགས་བྱས་པའོ། །འདིར་ནི་ལུས་ཀྱི་ལས་བྱས་ན། །ཁ་དོག་གསེར་ལྟར་འགྱུར་བ་དང༌། །ནད་རྣམས་ཀུན་ལས་རྣམ་པར་གྲོལ། །ལྷ་དང་མི་ལས་ཆེས་ལྷག་ཅིང༌། །ཟླ་བ་ལྟ་བུའི་གཟི་བརྗིད་ཅན། །ནོར་དང་གསེར་ནི་ཕུན་སུམ་ཚོགས། །རྒྱལ་པོའི་རིགས་དང་སངས་རྒྱས་པ། །མཆོག་གི་ཁྱིམ་དུ་སྐྱེ་བ་ཉིད། །སླར་ཡང་རེ་ཁཱ་བྱས་ལ། ༀ་བཛྲ་རེ་ཁེ་སརྦ་བུདྡྷ་ཨདྷིཥྛཱནྟུ་སྭཱ་ཧཱ། ཆུ་དེས་མཎྜལ་བཀྲུ། ༀ་ཝཾ་སྭཱ་ཧཱ། མཎྜལ་ཕྱིས་ལ། ༀ་ཙནྡྲ་ཨརྐ་བི་མ་ལེ་སྭཱ་ཧཱ། མེ་ཏོག་བཀྲམ་ལ། ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད། དེ་ནས་ཚོམ་བུ་ཉེར་གསུམ་པ་རིམ་བཞིན་བཀོད་པའི་དང་པོ་དབུས་སུ་ཚོམ་བུ་གཅིག་བཞག་ལ། ༀ་ཧཾ་སུ་མེ་རུ་ན་མཿ ཤར་དུ། ཡཾ་བི་དེ་ཧ་དྭཱི་པ་ན་མཿ ལྷོར། རི་ཛམྦུ་དྭཱི་པ་ན་མཿ ནུབ་ཏུ། ལཾ་གོ་ད་ནཱི་དྭཱི་པ་ན་མཿ བྱང་དུ། ཝཾ་ཀུ་རུ་དྭཱི་པ་ན་མཿ ཤར་གྱི་གཡས་གཡོན་གཉིས་སུ། ཡཿ ཡཿ ཨུ་པ་དྭཱི་པ་ན་མཿ ལྷོའི་གཡས་གཡོན། རཿ རཿ ཨུ་པ་དྭཱི་པ་ན་མཿ ནུབ་ཀྱི་གཡས་གཡོན། ལཿ ལཿ ཨུ་པ་དྭཱི་པ་ན་མཿ བྱང་གི་གཡས་གཡོན། ཝཿ ཝཿ ཨུ་པ་དྭཱི་པ་ན་མཿ ནུབ་བྱང༌། ལཿ ཏུ་རངྒ་རཏྣཱ་ཡ་ན་མཿ ལྷོ་ནུབ། རཿ ཧསྟི་རཏྣ་ཡ་ན་མཿ ཤར་ལྷོར། ཡཿ ག་ཛ་རཏྣཱ་ཡ་ན་ན་མཿ བྱང་ཤར། ཝཿ སྟྲཱི་རཏྣཱ་ཡ་ན་མཿ ཤར་དབུས། ཡཿ ཁཌྒ་རཏྣཱ་ཡ་ན་མཿ ལྷོ་དབུས། རཿ མ་ཎི་རཏྣཱ་ཡ་ན་མཿ བྱང་དབུས། ཝཿ ནི་དྷི་རཏྣཱ་ཡ་ན་མཿ ནུབ་དབུས། ལཿ ཙཀྲ་རཏྣཱ་ཡ་ན་མཿ ཤར། ༀ་ཨཾ་ཙནྡྲ། ནུབ། ༀ་ཨཱཿ སཱུ། ༀ་ༀ། འཇིག་རྟེན་དང་འཇིག་རྟེན་ལས་འདས་པའི་ཞིང་འབྱོར་པ་ཚད་མེད་པ་ཀུན་ཏུ་བཟང་པོའི་རྣམ་འཕྲུལ་ལས་བྱུང་བ་ལྟ་བུ་མཆོད་པའི་སྤྲིན་རབ་འབྱམས་ཀྱི་ངོ་བོ་ཉིད་ན་མཿ བདག་གཞན་ལུས་ངག་ཡིད་གསུམ་དུས་གསུམ་དགེ་བའི་ཚོགས། །རིན་ཆེན་ཀུན་བཟང་མཎྜལ་བཟང་པོའི་མཆོད་པ་འདི། །བློ་ཡིས་བླངས་ནས་དཔལ་ལྡན་བླ་མའི་ཚོགས་ལ་འབུལ། །ཐུགས་རྗེའི་དབང་གིས་བཞེས་ནས་བྱིན་གྱིས་བརླབ་ཏུ་གསོལ། །ཞེས་བརྗོད་ལ་མཎྜལ་སྟེགས་བུའི་དབུས་སུ་འཇོག །རྟེན་བསྐྱེད་པ་ནི། མཎྜལ་འདི་ཉིད་དག་པ་ཡེ་ཤེས་ཀྱི་ཞིང་ཁམས་རྒྱ་དང་ཚད་ཡོངས་སུ་ཆད་པ་མེད་པ། རྒྱན་གྱི་བཀོད་པ་ཕུན་སུམ་ཚོགས་པ་དང་བཅས་པ། ཕྱི་རོལ་སྲུང་བའི་འཁོར་ལོ་གཞོམ་དུ་མེད་པས་ཡོངས་སུ་བསྐོར་བའི་སྙིང་པོར་ཐར་པ་ཆེན་པོའི་གཞལ་མེད་ཁང་རྒྱུ་དང་བཀོད་པའི་བྱེ་བྲག་ངོ་མཚར་རྨད་དུ་བྱུང་བ། དུར་ཁྲོད་རོལ་པའི་ཡོ་བྱད་དང་ལྷ་རྫས་ཀྱི་ཉེར་སྤྱོད་མཐའ་ཀླས་པས་བརྒྱན་པའི་ དབུས་སུ་སེང་གེའི་ཁྲི་ཆེན་པོ་པདྨ་ཉི་མ་ཟླ་བའི་གདན་དང་བཅས་པ། ཕྱི་རོལ་ཕྱོགས་མཚམས་ཀུན་ཏུ་སོ་སོ་ལ་འོས་པའི་གདན་གྱི་ཁྱད་པར་རྣམས་ཀྱང་གསལ་བར་གྱུར། ཚོགས་ཞིང་སྤྱན་འདྲེན་པ་ནི། ༀ། ཁྱབ་བདག་དངོས་པོ་ཀུན་གྱི་ངོ་བོ་ཉིད། །གནས་མེད་འགྲོ་འོང་བྲལ་བ་ནམ་མཁའ་བཞིན། །གཤེགས་དང་བཞུགས་པའི་མཚན་མ་མི་མངའ་ཡང༌། །བདེ་ཆེན་དགྱེས་པ་དཔལ་ལྡན་ཧེ་རུ་ཀ། །གྲུབ་ཐོབ་ཕོ་མོ་རྣལ་འབྱོར་དབང་ཕྱུག་ཚོགས། །བླ་མ་ཡི་དམ་མཁའ་འགྲོ་འཁོར་དང་བཅས། །བདག་གིས་དད་པས་དེང་འདིར་གསོལ་འདེབས་ན། །དམིགས་མེད་སྙིང་རྗེའི་དབང་གིས་འདིར་གསལ་མཛོད། །སྐྱེས་མཆོག་གཉིས་མེད་ཡེ་ཤེས་སྤྱན་ཅན་རྣམས། །ཆོས་ཀྱི་སྐུ་ལ་གཤེགས་འབྱོན་མི་མངའ་ཡང༌། །གཟུགས་སྐུ་བརྩེ་བ་ཆེན་པོའི་རྣམ་འཕྲུལ་གྱིས། །དད་ལྡན་མཆོད་པའི་ཞིང་དུ་གཤེགས་སུ་གསོལ། །ༀ་གུ་རུ་བཛྲ་དྷ་ར་སརྦ་ཡོ་གེ་ཤྭ་ར་དེ་བ་ཌཱ་ཀི་ནཱི་ཨེ་ཧྱེ་ཧི་བཛྲ་ས་མཱ་ཛཿ ཞེས་པས་ཚོགས་ཞིང་རྣམས་སྤྲིན་གཏིབས་པ་ལྟར་བྱོན་ཏེ་སོ་སོའི་གདན་ལ་བཞུགས་པར་བསམ། དབུས་ཀྱི་ཁྲི་སྟེང་དུ་རྩ་བའི་བླ་མ་ཁྱབ་བདག་རྡོ་རྗེ་འཆང་ཆེན་པོ་སྐུ་མདོག་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་བས་རང་སྣང་གི་ཤེས་རབ་མ་ལ་འཁྱུད་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། མཚན་དང་དཔེ་བྱད་ཐམས་ཅད་ཡོངས་སུ་ རྫོགས་ཤིང༌། རང་ལ་དགྱེས་པའི་ཞལ་འཛུམ་བག་དང་ལྡན་པ། འོད་དང་འོད་ཟེར་གྱི་ཚོགས་མཐའ་ཡས་པ་འཕྲོ་བའི་སྐུ་ཅན། མཐའ་བསྐོར་ཕྱོགས་མཚམས་རྣམས་སུ་གྲུབ་པའི་སློབ་དཔོན་ཆེན་པོ་ལཱུ་ཡི་པས་ཐོག་དྲངས་པའི་རྣལ་འབྱོར་དབང་ཕྱུག་བརྒྱད་ཅུ། སྲིང་མོ་ཌཱ་ཀི་བཞི་དང་བཅས་པ་ཐམས་ཅད་ཀྱང་ལྷན་ཅིག་སྐྱེས་པའི་བདེ་བ་ཆེན་པོའི་ཡེ་ཤེས་ཀྱི་གཟི་འོད་ཕྱོགས་བརྒྱར་འབར་བས་བཟོད་པར་དཀའ་བའི་ཟིལ་ཅན་ཉི་མའི་སྙིང་པོ་ལྟ་བུ། སྲིད་པ་གསུམ་ཟིལ་གྱིས་གནོན་པའི་ལྟ་སྟངས་ཀྱིས་རབ་ཏུ་དཔའ་བའི་ཉམས་ཅན། གསུང་གསང་སྔགས་རྡོ་རྗེ་མི་ཤིགས་པའི་སྒྲ་དབྱངས་རྟག་ཏུ་སྒྲོགས་པ། ཐུགས་གཉིས་སུ་མེད་པའི་ཡེ་ཤེས་ཕྱག་རྒྱ་ཆེན་པོའི་ངང་དུ་མཉམ་པར་བཞག་པ་ལས་མི་གཡོ་བ། ལྷུན་གྱིས་གྲུབ་ཅིང་རྒྱུན་མི་འཆད་པའི་ཕྲིན་ལས་ཀྱི་རྣམ་པར་རོལ་པ་ཟད་མི་ཤེས་པ་ཅན། དཔའ་བོ་དང་ཌཱ་ཀི་རྒྱ་མཚོ་ལྟ་བུས་མཆོད་ཅིང་བརྗོད་པ་དང༌༑ ས་གསུམ་གྱི་དབང་པོ་རྣམས་ཀྱིས་རི་མོར་བྱེད་བཞིན་པ་རྣམས་དགྱེས་པས་དགོངས་ཏེ་བཞུགས་པ། གཞན་ཡང་བརྒྱུད་པའི་བླ་མ་རྣམས་དང༌། ཡི་དམ་དཀྱིལ་འཁོར་གྱི་ལྷ་ཚོགས། སངས་རྒྱས་བྱང་སེམས། འཕགས་པ་ཉན་རང༌། ཆོས་སྐྱོང་སྲུང་མ་ཐམས་ཅད་བཞུགས་པར་གྱུར། མགོན་པོ་འགྲོ་བའི་དོན་ལ་བྱོན་པ་ལེགས། །བདག་གི་མཆོད་ཡོན་འདི་ཉིད་བཞེས་ནས་ཀྱང༌། །ཇི་སྲིད་མཆོད་པའི་བྱ་བ་མ་རྫོགས་བར། ། ཡིད་འོང་གདན་ལ་བདེ་བར་བཞུགས་སུ་གསོལ། །ༀ་པྲ་ཝ་ར་སཏྐ་ར་ཨ?ཾ་པྲ་ཏཱིཙྪ་སྭཱ་ཧཱ། ཞེས་པས་མཆོད་ཡོན་ཕུལ་ལ། ༀ་པདྨ་ཨཱ་ས་ན་སྟྭཾ། ཞེས་པས་གདན་ལ་བཞུགས་པར་བསམ། ཕྱག་འཚལ་བ་ནི། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཡོན་ཏན་ཀུན་གྱི་གཏེར་གྱུར་པས། །གང་གི་མཚན་ཙམ་དྲན་པས་ཀྱང༌། །བདག་བློའི་རྒུད་པ་ཞི་མཛད་པ༑ ༑དཔལ་ལྡན་བླ་མ་ལ་ཕྱག་འཚལ། །དྲི་མེད་ཡོན་ཏན་རབ་རྒྱས་པས། །འགྲོ་ཀུན་གཙུག་གི་རྒྱན་གྱུར་པའི། །དགོས་འདོད་འབྱུང་བའི་རིན་པོ་ཆེ། །བླ་མའི་ཞབས་ལ་ཕྱག་འཚལ་ལོ། །བླང་དོར་རྟོགས་པའི་སྣང་བ་ཡིས། །འགྲོ་ཀུན་མི་ཤེས་མུན་སེལ་བ། །དྲི་མེད་ཉི་མའི་དཀྱིལ་འཁོར་མཆོག །བླ་མའི་ཞབས་ལ་ཕྱག་འཚལ་ལོ། །བསོད་ནམས་ཡེ་ཤེས་བསིལ་ཟེར་གྱིས། །ཕན་བདེའི་ཚལ་རབ་རྒྱས་མཛད་པ། །རྣམ་དག་ཟླ་བའི་དཀྱིལ་འཁོར་མཆོག །བླ་མའི་ཞབས་ལ་ཕྱག་འཚལ་ལོ། །དམ་ཆོས་བདུད་རྩིའི་སྨན་མཆོག་གིས། །ཉོན་མོངས་སྡུག་བསྔལ་ནད་སེལ་བ། །ཐབས་མཁས་འགྲོ་བའི་སྨན་པ་མཆོག །བླ་མའི་ཞབས་ལ་ཕྱག་འཚལ་ལོ༑ ༑ཐབས་དང་ཤེས་རབ་གྲུ་ཆེན་གྱིས། །སྲིད་ཞིའི་རྒྱ་མཚོའི་མཐར་སྒྲོལ་བ། །སྟོབས་ལྡན་འགྲོ་བའི་དེད་དཔོན་མཆོག །བླ་མའི་ཞབས་ལ་ཕྱག་འཚལ་ལོ། །གནོད་པ་ཀུན་ལས་སྐྱོབ་བྱེད་ཅིང༌། །ཕན་པ་དཔག་མེད་ སྒྲུབ་མཛད་པའི། །བྱམས་མགོན་འགྲོ་བའི་གཉེན་གཅིག་པོ། །བླ་མའི་ཞབས་ལ་ཕྱག་འཚལ་ལོ། །སྟོང་ཉིད་སྙིང་རྗེ་ཟུང་འཇུག་པས། །སྲིད་ཞིའི་མཐའ་ལ་མི་གནས་པའི། །མྱ་ངན་འདས་པ་མཆོག་བརྙེས་པ། །སྐྱབས་མགོན་ཁྱེད་ལ་ཕྱག་འཚལ་འདུད། །ཕ་རོལ་ཕྱིན་པ་བཅུ་རྫོགས་ཤིང༌། །ཉེར་བཞིའི་རྩ་རླུང་དབང་འདུས་པས། །ཡན་ལག་བཅུ་གཉིས་རྣམ་འགགས་པས། །ས་བཅུའི་མཐར་སོན་ཁྱེད་ལ་འདུད། །ཡོད་མིན་མེད་མིན་གཉིས་ཀ་མིན༑ ༑གཉིས་ཀ་མིན་པའང་མ་ཡིན་པ། །རྣམ་དག་ཟག་མེད་ཆོས་ཀྱི་དབྱིངས། །སྤྲོས་བྲལ་ཆོས་སྐུ་ཁྱེད་ལ་འདུད། །མཚན་དང་དཔེ་བྱད་དཔལ་འབར་བས། །དག་པའི་ཞིང་གི་གདུལ་བྱ་ལ། །རྟག་པར་ཐེག་མཆོག་ཆོས་སྟོན་པ། །བདེ་ཆེན་ལོངས་སྐུ་ཁྱེད་ལ་འདུད། །སྣ་ཚོགས་གདུལ་བྱའི་བསམ་པ་ལྟར། །སངས་རྒྱས་རྣམ་འཕྲུལ་དཔག་མེད་ཀྱིས། །འགྲོ་ཀུན་ཕན་བདེས་ཚིམ་མཛད་པ། །ཐབས་མཁས་སྤྲུལ་སྐུ་ཁྱེད་ལ་འདུད། །གཟུགས་སྐུའི་རྣམ་འཕྲུལ་སྣ་ཚོགས་ཀྱང༌། །དེ་ཡི་རང་བཞིན་འགྱུར་མེད་པ། །ཨེ་མ་ཧོ་བརྗོད་བྲལ་ཟུང་འཇུག་དངོས། །ངོ་བོ་ཉིད་སྐུ་ཁྱེད་ལ་འདུད། །རྣམ་ཤེས་ཚོགས་བརྒྱད་གནས་གྱུར་ཞིང༌། །ཉོན་མོངས་སྒྲིབ་པ་ཀུན་སྤངས་པས༑ ༑ཕུང་པོ་ལྔ་ལས་ཡོངས་གྲོལ་བའི། །ཡེ་ཤེས་ལྔ་བདག་ཁྱེད་ལ་འདུད། །སོ་སོ་རིགས་བཞིའི་ཐུགས་མངའ་བས། །སྟོབས་བཅུའི་བདུད་ཀྱི་དཔུང་བཅོམ་ནས། །མི་འཇིགས་བཞི་ཡིས་ཆོས་སྟོན་པ། །ཡོན་ཏན་མངའ་ བདག་ཁྱེད་ལ་འདུད། །སྤྱོད་པ་རྟོགས་པ་ཡེ་ཤེས་དང༌། །ཕྲིན་ལས་གཞན་དང་མ་འདྲེས་པའི། །སངས་རྒྱས་ཡོན་ཏན་བཅོ་བརྒྱད་ཅན། །མཚུངས་མེད་དམ་པ་ཁྱེད་ལ་འདུད། །རྡོ་རྗེ་འཆང་ཆེན་ལཱུ་ཡི་ལཱི་ལ་པ༑ ༑མཐུ་སྟོབས་དབང་ཕྱུག་ཌོམྦི་ཤ་བ་རི། །ས་ར་ཧ་པ་ཀངྐ་ལི་པ་དང༌། །མཱི་ན་གོ་རཀྵ་ལ་ཕྱག་འཚལ་ལོ། །ཙཽ་རིངྒ་དང་ཝཱི་ཎ་ཤཱནྟི་པ། །ཏནྟི་ཙ་མ་རི་དང་ཁཌྒ་པ། །ཀླུ་སྒྲུབ་སྤྱོད་འཆང་དབང་པོ་འཕགས་པ་ལྷ། །ཐ་ག་ནཱ་རོ་པ་ལ་ཕྱག་འཚལ་ལོ། །ཤྱ་ལི་ཏེ་ལོ་ཙ་ཏྲ་བྷ་དྲ་པ། །དྷཱུ་ཁནྡྷི་དང་སྦྱོར་བྲལ་ཀ་ལ་པ། །དྷཱུ་ཏི་ཀངྐ་ན་དང་ཀམྦ་ལ། །ཌིངྒི་བནྡྷེ་པ་ལ་ཕྱག་འཚལ་ལོ། །ཏནྟེ་ཀུ་ཀུ་རི་དང་ཀུ་ཛི་པ། །དྷ་མ་མ་ཧི་པ་དང་ཨ་ཙིནྟ། །བ་བྷ་ནཱ་ལི་ནཱ་བ་ཞི་བ་ལྷ། །ཨིནྡྲ་བོ་དྷི་རྣམས་ལ་ཕྱག་འཚལ་ལོ། །མེ་ཀོ་ཏོག་རྩེ་བ་དང་ཀམྦྷ་རི། །ཛ་ལནྡྷ་ར་རཱ་ཧུ་དྷརྨ་པ། །དྷོ་ཀ་མེ་དྷི་ནི་པ་པངྐ་ཛ། །རྡོ་རྗེ་དྲིལ་བུ་པ་ལ་ཕྱག་འཚལ་ལོ། །ཛོ་གི་ཙ་ལུ་ཀི་པ་ཀོ་རུ་ར། །ལུ་ཙི་ཛ་ཡ་ནནྟི་ན་གུ་ཎ། །པ་ཙ་རི་དང་ཙམྦ་ཀ་བྷིཀྵ། །དྷི་ལི་ཀུམྦྷ་རི་ལ་ཕྱག་འཚལ་ལོ། །ཙརྤ་ཊི་པ་མ་ཎི་བྷ་དྲ་དང༌། །མེ་ཁཱ་ལི་མ་ཀ་ན་ཁ་ལཱ་མ། །ཀ་ལ་ཀ་ལ་པ་དང་ཀནྟ་ལི། །དྷ་ཧུ་ཨུ་དྷི་ལི་ལར་ཕྱག་འཚལ་ལོ། །ཀ་པཱ་ལ་པ་ཀི་ར་པཱ་ལ་པར༑ ༑ས་ཀ་ར་པ་སརྦ་བྷཀྵ་པ། །ནཱ་ག་བོ་དྷི་དཱ་རི་ཀ་པ་ཆེ། །པུ་ཏ་ལི་པ་རྣམས་ལ་ཕྱག་འཚལ་ལོ། །པ་ཧ་ན་པ་ཀོ་ཀི་ལ་པ་དང༌། །ཨ་ནོངྒ་པ་ལཀྵྨཱི་ཀ་ར། །ས་མུ་དྲ་པ་བྱཱ་ལི་པ་ད་བཅས། །གྲུབ་ཆེན་བརྒྱད་ཅུ་རྩ་བཞིར་ ཕྱག་འཚལ་ལོ། །ལྷག་པའི་ལྷ་དང་གྲུབ་པས་རྗེས་སུ་བཟུང༌། །དམ་པའི་རིགས་སད་ཆོས་ཉིད་བདེན་པ་གཟིགས། །མི་སློབ་ལམ་ལ་ཟུང་འཇུག་སྐུ་མཆོག་བརྙེས། །རྣལ་འབྱོར་དབང་ཕྱུག་རྣམས་ལ་ཕྱག་འཚལ་ལོ། །རྩ་བརྒྱུད་བླ་མ་ཡི་དམ་ལྷ་ཡི་ཚོགས། །སངས་རྒྱས་བྱང་སེམས་མཁའ་འགྲོ་ཆོས་སྐྱོང་ལ། །མ་ལུས་ཞིང་རྡུལ་གྲངས་སྙེད་རབ་སྤྲུལ་ནས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །དེ་ནས་མཆོད་པ་ཕུལ་བ་ལ་ཐོག་མར་ཆུ་གཉིས་དང་ཉེར་སྤྱོད་ལྔ་ནི། དྲི་མེད་རྣམ་དག་ཡིད་འོང་ལྷ་ཡི་རྫས། །ཡན་ལག་བརྒྱད་ལྡན་རྡོ་རྗེ་ཨ?ཾའི་རྒྱུན། །མཆོག་ཏུ་དད་པའི་ཡིད་ཀྱིས་བདག་འབུལ་ན། །ཅི་བདེ་བར་ནི་དགྱེས་པར་བཞེས་སུ་གསོལ། །ༀ་ཨཱཿ ཧྲི་པྲ་ཝ་ར་སཏྐ་རཾ་ཨ?ཾ་པྲ་ཏཱིཙྪ་སྭཱ་ཧཱ། དྲི་མེད་རྣམ་དག་ཡིད་འོང་ལྷ་ཡི་རྫས། །ཞབས་ཀྱི་པདྨོའི་རྙོགས་སེལ་སྤོས་ཀྱི་ཆུ། །མཆོག་ཏུ་དད་པའི་ཡིད་ཀྱིས་བདག་འབུལ་ན། །ཅི་བདེ་བར་ནི་དགྱེས་པར་བཞེས་སུ་གསོལ། ། སྔགས་གོང་ལྟར་ལ། ཨ?ཾ་མལ་དུ། པཱདྱཾ་སྦྱར། མདོག་བཟང་དབྱིབས་ལེགས་ཚིམ་པའི་དྲི་བསུང་ཅན། །མནྡ་ར་དང་ཨུཏྤལ་ཀུ་མུཏ་སོགས། །དངོས་འབྱོར་ཡིད་ཀྱིས་སྤྲུལ་པའི་མེ་ཏོག་ཀུན། །བླ་མ་གྲུབ་ཐོབ་དཀྱིལ་འཁོར་ཚོགས་ལ་འབུལ། །ༀ་གུ་རུ་བཛྲ་དྷ་ར་སརྦ་ཡོ་གེ་ཤྭ་ར་དེ་བ་ཌཱ་ཀི་ནཱི་ས་པ་རི་ཝཱ་ར་བཛྲ་པུཥྤེ་པྲ་ཏཱིཙྪ་སྭཱ་ཧཱ། རྒྱུ་བཟང་མནམ་ན་ཞིམ་པའི་དྲི་ངད་ཅན། །ཨ་ཀ་རུ་དང་ཙནྡན་སྦྲུལ་སྙིང་སོགས། །དངོས་འབྱོར་ཡིད་ཀྱིས་ སྤྲུལ་པའི་བདུག་སྤོས་ཀུན། །བླ་མ་གྲུབ་ཐོབ༴ བཛྲ་དྷཱུ་པེ༴ མུན་སེལ་དངོས་གྲུབ་གསལ་བའི་གཟི་བརྗིད་ཅན། །སྒྲོན་མེ་ཉི་ཟླ་ལུས་ཀྱི་འོད་ལ་སོགས། །དངོས་འབྱོར་ཡིད་ཀྱིས་སྤྲུལ་པའི་སྣང་གསལ་ཀུན། །བླ་མ་གྲུབ་ཐོབ༴ བཛྲ་ཨཱ་ལོ་ཀེ༴ དྲི་ཞིམ་བྱུགས་ན་བདེ་བའི་རེག་མཆོག་ཀུན། །ག་བུར་གླ་རྩི་མནམ་པའི་དྲི་ལ་སོགས། །དངོས་འབྱོར་ཡིད་ཀྱིས་སྤྲུལ་པའི་དྲི་མཆོག་ཀུན། །བླ་མ་གྲུབ་ཐོབ༴ བཛྲ་གནྡྷེ༴ མདོག་བཟང་མྱོང་ན་བདེ་བའི་རོ་བཅུད་ལྡན། །འབྲས་ཆེན་ཀ་ར་རྒྱ་བསྟར་ཁུ་བ་སོགས། །དངོས་འབྱོར་ཡིད་ཀྱིས་སྤྲུལ་པའི་ཞལ་ཟས་ཀུན། །བླ་མ་གྲུབ་ཐོབ༴ བཛྲ་ནི་ཝིདྱ༴ དོན་ཟབ་ཐོས་ན་སྙན་པའི་སྒྲ་དབྱངས་ཅན། །རྔ་ཆེན་དུང་དང་ཕེག་རྡོབ་རྒྱུད་མང་སོགས། །དངོས་འབྱོར་ཡིད་ཀྱིས་སྤྲུལ་པའི་སིལ་སྙན་ཀུན། །བླ་མ་གྲུབ་ཐོབ༴ བཛྲ་ཤབྡ་ཞེས་སྦྱར། དེ་ནས་མཆོད་པའི་མཎྜལ་ཕྱི་ཞིང་ལག་ལེན་ཚུལ་ལྡན་བྱས་ལ་ཚོམ་བུ་སོ་བདུན་མ་སོགས་རྒྱས་བསྡུས་ཚར་གྲངས་གང་ལྕོགས་དང༌། རི་མཆོག་གསེར་གྱི་རི་དང་རོལ་མཚོ་བརྒྱ་ལྡན་འཁོར་ཡུག་བཅས། །གླིང་རྣམས་ལྷ་དང་མི་ཡི་འབྱོར་པ་ཀུན་གྱིས་རྣམ་པར་བརྒྱན། །གཟུགས་མཛེས་ཡན་ལག་མཆོག་ལྡན་ཟག་མེད་བདེ་སྟེར་ལྷ་མོས་སྤྲས། །སངས་རྒྱས་ཀུན་གྱི་རྣམ་དག་ཞིང་དུ་ཡོངས་སུ་བསྔོ་བར་བགྱི། །རབ་ཡངས་འབྱུང་བཞིའི་དཀྱིལ་འཁོར་བརྟན་པ་ལ། །བཀོད་ལེགས་རི་གླིང་འཁོར་ཡུག་རྒྱ་མཚོས་སྤྲས། །བརྟན་གཡོའི་དཔལ་གྱིས་ཕྱུར་བུར་གཏམས་པ་ཡི། ། ཕུན་ཚོགས་འཇིག་རྟེན་ཁམས་ཀྱིས་བླ་མ་མཆོད། །སྣོད་ཀྱི་འཇིག་རྟེན་ས་ཕྱོགས་ཡིད་འོང་ན། །བཅུད་ཀྱི་སེམས་ཅན་མཆོད་པ་གང་གནས་པ། །བདག་པོས་བཟུང་དང་མ་བཟུང་དེ་དག་ཀུན། །བློ་ཡིས་བླངས་ནས་བླ་མའི་དཀྱིལ་འཁོར་མཆོད། །སྔགས་སྔ་མ་ལྟར་ལ། རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དྲི་མེད་བཻ་ཌཱུའི་ས་གཞི་ཡངས་པ་ལ། །གསེར་དངུལ་རྩིག་པ་བ་གམ་དྲྭ་བ་ཅན། །རིན་ཆེན་ཀ་བས་བཏེག་ཅིང་ཁྱོན་ཡངས་པ༑ ༑ཡིད་འོང་ཕོ་བྲང་གཞལ་མེད་དམ་པས་མཆོད། །བླ་བྲེ་རྒྱལ་མཚན་གདུགས་སོགས་སྟེང་ནས་མཛེས། །དར་དཔྱངས་ལྷབ་ལྷུབ་ཡོལ་བས་ལོགས་ནས་བརྒྱན། །ཁྲི་དང་གདན་སོགས་འོག་ནས་བརྗིད་གྱུར་པའི། ། ཕུན་ཚོགས་ཉེར་མཁོའི་གཟིམས་ཆ་ཀུན་གྱིས་མཆོད། །ཐར་པའི་རྒྱལ་མཚན་ཆོས་གོས་ངུར་སྨྲིག་དང༌། །སྲབ་འཇམ་ཡང་བའི་པཉྩ་ལི་ཀ་དང༌། །རྒྱུ་བཟང་དྲི་ཞིམ་ཀཱ་ཤིའི་རས་ལ་སོགས། །ཕུན་ཚོགས་ན་བཟའ་ཀུན་གྱིས་བླ་མ་མཆོད། །རིགས་ལྔའི་དབུ་རྒྱན་དར་གྱི་ཅོད་པན་དང༌། །མུ་ཏིག་དོ་ཤལ་ནོར་བུའི་ག་ཤ་དང༌། །རིན་ཆེན་ཕྲ་བཀོད་གསེར་གྱི་གདུ་བུ་སོགས། །ཕུན་ཚོགས་རྒྱན་མཆོག་ཀུན་གྱིས༴ བསོད་ནམས་དུ་མའི་དཔལ་ལས་གྲུབ་པའི་རྫས། །འཁོར་ལོ་ནོར་བུ་བཙུན་མོ་བློན་པོ་དང༌། །གླང་པོ་རྟ་མཆོག་དམག་མི་རིན་ཆེན་ཏེ། །རྒྱལ་སྲིད་རིན་ཆེན་ཀུན་གྱིས༴ ཉེ་བར་མཁོ་བའི་འདོད་རྒུ་འབྱུང་བའི་རྫས། །ནགས་ཚལ་རལ་གྲི་ཁང་བཟང་ མལ་སྟན་དང༌། །ལྷ་ཡི་གོས་དང་སྦྲུལ་གྱི་པགས་པ་ལྷམ། །ཉེ་བའི་སྣ་བདུན་ཀུན་གྱིས༴ སྐྱེ་དགུ་བདེ་ཞིང་དགེ་བར་བྱེད་པའི་རྫས། །རྩ་མཆོག་དཱུརྦ་བིལྦ་གི་ཝཾ་ཞོ། །མེ་ལོང་ལི་ཁྲི་ཡུངས་ཀར་གཡས་འཁྱིལ་དུང༌༑ ༑བཀྲ་ཤིས་རྫས་མཆོག་བརྒྱད་ཀྱིས༴ བསོད་ནམས་བརྒྱ་ལྡན་མཚན་བཟང་ལས་གྲུབ་པའི། །དཔལ་བེའུ་འཁོར་ལོ་པདྨ་རྒྱལ་མཚན་དང༌། །གདུགས་དང་བུམ་བཟང་དུང་དཀར་གསེར་ཉ་སྟེ། །བཀྲ་ཤིས་རྟགས་བརྒྱད་ཀུན་གྱིས༴ འདོད་འཇོའི་བ་མོ་དཔག་བསམ་ལྗོན་པའི་ཤིང༌། །མ་རྨོས་ལོ་ཏོག་ཡིད་བཞིན་ནོར་བུ་དང༌། །འཆི་མེད་བདུད་རྩི་རོ་བརྒྱའི་ཟས་ལ་སོགས། །ལོངས་སྤྱོད་ཕུན་ཚོགས་ཀུན་གྱིས་བླ་མ་མཆོད། །དཀོན་མཆོག་མཆོད་དང་སེམས་ཅན་དོན་བསྒྲུབ་ཕྱིར། །བསོད་ནམས་ལོངས་སྤྱོད་བཅས་པ་བདག་གི་ལུས། །སྐྱེས་མཆོག་ཁྱེད་ཀྱི་བྲན་དུ་ལེགས་ཕུལ་ནས། །ཇི་ལྟར་བགོ་བའི་དོན་ཀུན་བསྒྲུབ་བགྱིའོ། །ནང་མཆོད་འདོད་ཡོན་ལྔ་ནི། རབ་འབྱམས་ཕྱོགས་བཅུའི་འཇིག་རྟེན་ཇི་སྙེད་ན། །ཁ་དོག་དབྱིབས་ཀྱི་གཟུགས་མཆོག་མཆོད་འོས་ཀུན། །རབ་མཛེས་གཟུགས་ཀྱི་ལྷ་མོར་བློས་སྤྲུལ་ནས། །མགོན་པོ་སྒྲིབ་མེད་རྡོ་རྗེའི་སྤྱན་ལ་འབུལ། །སྔགས་གོང་ལྟར་ལ། རཱུ་པ་ཀཱ་མ་གུ་ཎ་པཱུ་ཛ་ཨཱཿ ཧཱུྃ། རབ་འབྱམས༴ ཟིན་དང་མ་ཟིན་སྒྲ་མཆོག་མཆོད་འོས་ཀུན། །རབ་མཛེས་སྒྲ་ཡི་ལྷ་མོར་བློས་སྤྲུལ་ནས། །མགོན་པོ་སྒྲིབ་མེད་རྡོ་རྗེའི་སྙན་ལ་འབུལ། །ཤབྡ་ཀཱ་མ༴ རབ་འབྱམས༴ ལྷན་སྐྱེས་སྦྱར་བའི་དྲི་མཆོག་ཇི་རྙེད་ཀུན། །རབ་མཛེས་དྲི་ཡི་ལྷ་མོར༴ མགོན་པོ་སྒྲིབ་མེད་རྡོ་རྗེའི་ཤངས་ལ་འབུལ། །གནྡྷེ༴ རབ་འབྱམས༴ བཟའ་བཅའ་བཏུང་བའི་རོ་མཆོག་མཆོད་འོས་ཀུན། །རབ་མཛེས་རོ་ཡི་ལྷ་མོར༴ མགོན་པོ་སྒྲིབ་མེད་རྡོ་རྗེའི་ལྗགས་ལ་འབུལ། །ར་ས་ཀཱ་མ༴ རབ་འབྱམས༴ སེམས་ཅན་སེམས་ཅན་མིན་པའི་རེག་མཆོག་ཀུན། །རབ་མཛེས་རེག་བྱའི་ལྷ་མོར༴ མགོན་པོ་སྒྲིབ་མེད་རྡོ་རྗེའི་སྐུ་ལ་འབུལ། །སྤརྴེ་ཀཱ་མ༴ ༀ་ཨཱཿ ཧཱུྃ། བདུད་རྩི་ལྔ་ཡི་བཟའ་བ་ནི། །དངོས་གྲུབ་ཀུན་གྱི་དེ་ཉིད་མཆོག །སྒྲོན་མ་ལྔ་ཡི་བཟའ་བ་ནི། །སངས་རྒྱས་ཀུན་གྱི་དམ་ཚིག་གཙོ། །ཉེས་བྲལ་ཞི་བའི་བཏུང་བ་མཆོག །སྦྲང་རྩི་བུ་རམ་འབྲུ་དང་ཤིང༌། ། བཅོས་པའི་མྱོས་བྱེད་རྣམ་པ་ལྔ། །ཤེས་རབ་རང་བཞིན་དབུལ་བར་བགྱི། །སྔགས་གོང་ལྟར་ལ། པཉྩ་ཨ་མྲ་ཏ༴ གསང་མཆོད་རིག་མ་བཅུ་དྲུག་ནི། བདེ་མཆོག་སྒྱུ་མའི་ལོངས་སྤྱོད་རྫོགས་གསལ་བ། །པི་ཝཾ་གླིང་བུ་རྔ་ཟླུམ་རྫ་རྔ་ཅན༑ ༑རྒོད་དང་སྒེག་དང་གླུ་ལེན་བྲོ་གར་མཁན། །མེ་ཏོག་བདུག་པ་སྣང་གསལ་དྲི་མཆོག་མ། །གཟུགས་མ་རོ་མ་རེག་མ་ཆོས་འབྱུང་མ། །བཅུ་དྲུག་དགའ་བའི་ཆ་ཤས་ཡོངས་རྫོགས་མ། །རྡོ་རྗེ་རིག་མ་དགའ་བའི་རོལ་པ་འདིས། །ཧེ་རུ་ཀ་ཁྱེད་རྡོ་རྗེའི་ཡིད་དགེས་མཛོད། །རྡོ་རྗེ་པདྨར་བྱིན་བརླབས་ནས། །སྙོམས་འཇུག་འཕོ་མེད་བདེ་ཆེན་ཐོབ། །རང་བཞིན་སྣང་བ་ཡོངས་དག་པ། །ཞུ་བདེས་ཁམས་གསུམ་ཀུན་ཁྱབ་པ། །གསང་བའི་ མཆོད་པས་མཉེས་པར་བགྱི། །སྔགས་མཐར། ཨ་ནུ་རཀྟོ་མ་ཧཱ་སུ་ཁ༴ དེ་ཁོ་ན་ཉིད་ཀྱི་མཆོད་པ་ནི། འགྲོ་བ་ཆུ་ཡི་ཟླ་བ་བཞིན་དུ་ལྟ་བ་དང༌། །ཐོས་པ་བྲག་ཆ་དང་ནི་མཚུངས་པར་ཡང་དག་འཇུག །སེམས་ཀྱང་མྱ་ངམ་སྨིག་རྒྱུ་ལྟ་བུར་བལྟ་བྱ་ཞིང༌། །འདི་ལྟར་བཟའ་དང་བཏུང་བ་དག་ནི་ནམ་མཁའ་ལྟ་བུ་སྟེ། །དྲི་ནི་ནམ་མཁའི་མེ་ཏོག་མཚུངས་པར་མནམ་པ་དང༌། །ཡིད་ནི་ཉི་མ་ཟླ་བ་ལྟ་བུར་ཁྱབ་པ་ཉིད། །ཡང་དག་གནས་པ་དེ་ཡང་རི་བོ་མཆོག་ཏུ་མཚུངས་པ་ཡིན། །གཞོན་ནུ་མ་ཡི་རྨི་ལམ་ཇི་བཞིན་རྨི་བར་བྱ། །ཐ་སྙད་དག་ནི་སྒྱུ་མ་མིག་འཕྲུལ་ལྟ་བུར་བརྗོད། །འདི་ལྟར་ཇི་བཞིན་ལྷན་སྐྱེས་བདེ་འབྱུང་དེ་བཞིན་ཏེ། །སྲིད་པའི་རང་བཞིན་བྲལ་བ་བསམ་གྱིས་མི་ཁྱབ་པ་ཡི་ཐུགས། །རྟག་ཏུ་འཆར་བ་བདེ་གཤེགས་ལམ་མཆོག་དག་གིས་མཆོད། །དེ་ནས་བསྟོད་པ་རྒྱ་བོད་བླ་མ་རྣམས་ཀྱིས་མཛད་པ་ཁུངས་ལྡན་ཇི་རིགས་པ་དང༌། སྤྱི་བསྟོད་ནི། རྣམ་དག་སྐུ་ནི་སྐྱོན་བྲལ་འཁྲུལ་པ་མེད། །ཕུན་ཚོགས་གསུང་དབྱངས་ཤེས་བྱ་མ་ལུས་ཁྱབ། །ཟབ་དང་རྒྱ་ཆེའི་དེ་ཉིད་མཁྱེན་པའི་ཐུགས། །རྡོ་རྗེ་གསུམ་དངོས་བླ་མའི་ཚོགས་ལ་བསྟོད། །ཉེས་པའི་སྐྱོན་ཀུན་རབ་སྤངས་ཤིང༌། །ལེགས་པའི་ཡོན་ཏན་ཀུན་ལྡན་པས། །ཕན་བདེ་དཔལ་འབྱོར་ཀུན་འབྱུང་བའི། །དཔལ་ལྡན་བླ་མ་ཁྱེད་ལ་བསྟོད། །གདུལ་བྱ་སྨིན་ཅིང་གྲོལ་བའི་ཕྱིར། །དུས་གསུམ་སངས་རྒྱས་ཐམས་ཅད་ཉིད། །འདྲེན་པའི་ཚུལ་དུ་རྣམ་འཕྲུལ་བའི། །དཔལ་ལྡན་བླ་མ་ཁྱེད་ལ་བསྟོད། ། ཁྱེད་སྐུ་ཤ་དང་རུས་བྲལ་ཡང༌། །ཡེ་ཤེས་གཟུགས་སུ་སྣང་བའི་སྐུ། །དད་པའི་མིག་རྐྱེན་མཆོག་གྱུར་པ། །སྐུ་ཡི་དབང་ཕྱུག་ཁྱེད་ལ་བསྟོད། །བརྗོད་འདོད་རྩོལ་བ་མི་མངའ་ཡང༌། །ཡན་ལག་དྲུག་ཅུའི་གསུང་དབྱངས་ཀྱིས༑ ༑ཟབ་དང་རྒྱ་ཆེའི་དོན་སྟོན་པ། །གསུང་གི་དབང་ཕྱུག་ཁྱེད་ལ་བསྟོད། །ཤེས་དང་ཤེས་བྱའི་སྤྲོས་བྲལ་ཡང༌། །ཤེས་བྱའི་དཀྱིལ་འཁོར་གསལ་བའི་ཐུགས། །སྙིང་རྗེའི་གཟུངས་སྤོབས་དུ་མའི་གཏེར། །ཐུགས་རྗེའི་དབང་ཕྱུག་ཁྱེད་ལ་བསྟོད། །ཡོན་ཏན་ཆ་ཙམ་འགྲོ་ཀུན་གྱིས། །བསྐལ་པར་བརྗོད་ཀྱང་མི་ཟད་པའི། །སྤྱན་དང་མངོན་ཤེས་རྫུ་འཕྲུལ་སོགས། །ཡོན་ཏན་དབང་ཕྱུག་ཁྱེད་ལ་བསྟོད། །མཐོང་ཐོས་དྲན་པས་དོན་ལྡན་ན༑ ༑བསྟེན་ན་གྲོལ་བ་ཅི་སྨོས་པ། །ལྷུན་གྲུབ་རྒྱུན་ཆད་མི་མངའ་བའི། །ཕྲིན་ལས་དབང་ཕྱུག་ཁྱེད་ལ་བསྟོད། །བདེ་དང་སྟོང་པ་དབྱེར་མེད་པས། །ཐབས་ཤེས་ཟུང་དུ་འཇུག་པའི་དངོས། །སྐུ་གསུང་ཐུགས་ཀྱི་རྡོ་རྗེ་ཅན། ། འགྲོ་བའི་དཔལ་མགོན་ཁྱེད་ལ་བསྟོད། །ཁྱེད་སྐུ་ཕུང་པོའི་རིགས་ལྔ་སྟེ། །འབྱུང་བ་ཡུམ་ལྔའི་ལྷ་མོ་དང༌། །ཟུང་འཇུག་ལྷན་སྐྱེས་རྡོ་རྗེའི་སྐུ། །འགྲོ་བའི་དཔལ་མགོན་ཁྱེད་ལ་བསྟོད། །དབང་པོ་རྣམས་ནི་སེམས་དཔའ་སྟེ། ། ཡུལ་དྲུག་སེམས་མའི་ཚོགས་རྣམས་དང༌། །ཟུང་འཇུག་ལྷན་སྐྱེས་རྡོ་རྗེའི་སྐུ། །འགྲོ་བའི་དཔལ་མགོན༴ ཡན་ལག་རྣམས་ནི་ཁྲོ་རྒྱལ་ཏེ། །བྱ་བ་རྣམ་བཅུའི་ཁྲོ་མོ་དང༌། །ཟུང་འཇུག༴ འགྲོ་བའི༴ ཁྱེད་སྐུའི་ཁམས་རྣམས་ དཔའ་བོ་སྟེ། །རྩ་གནས་དཔའ་མོའི་ཚོགས་རྣམས་དང༌། །ཟུང་འཇུག༴ འགྲོ་བའི༴ རྩ་བའི་རླུང་རྣམས་ཡབ་ལྔ་སྟེ། །འབྱུང་བ་ལྔ་ཡི་ཡུམ་རྣམས་དང༌། །ཟུང་འཇུག་ལྷན་སྐྱེས་རྡོ་རྗེའི་གསུང༌། །འགྲོ་བའི་དཔལ༴ ཁྱེད་ཐུགས་ཡེ་ཤེས་རང་བཞིན་སྟེ། །སྣང་ཡུལ་ཆོས་ཀྱི་དབྱིངས་རྣམས་དང༌། །ཟུང་འཇུག་ལྷན་སྐྱེས་རྡོ་རྗེའི་ཐུགས། །འགྲོ་བའི་དཔལ་མགོན་ཁྱེད་ལ་བསྟོད། །དཀྱུས་སུ་དེ་ཙམ་གྱིས་འཐུས། ཅུང་ཟད་སྤྲོ་ན། ཆོས་ཀུན་དབྱིངས་སུ་མངོན་བྱང་ཆུབ། །བདེ་སྟོང་ཟུང་འཇུག་སྲིད་ཞིའི་དཔལ། །རིགས་བརྒྱའི་ཁྱབ་བདག་འཁོར་ལོའི་མགོན། །རྡོ་རྗེ་འཆང་ལ་ཕྱག་འཚལ་བསྟོད། །རྒྱལ་སྲིད་སྤངས་ནས་གངྒཱའི་འགྲམ། །ཉ་ཡི་རྒྱུ་ལྟོས་འཚོ་བ་མཛད། །དངོས་གྲུབ་མཆོག་བརྙེས་ལཱུ་ཡི་པ། །རྣལ་འབྱོར་དབང་ཕྱུག་ཞབས་ལ་འདུད། །རྒྱལ་རིགས་འདོད་ཡོན་ལྔ་ཡིས་སྒེག །དྲན་པ་གཅིག་པའི་ཏིང་འཛིན་གྱིས། །དངོས་གྲུབ་མཆོག་བརྙེས་ལཱི་ལ་པ། །རྣལ་འབྱོར་དབང་ཕྱུག་ཞབས་ལ་འདུད། །ཕག་མོ་བསྒྲུབས་པས་དངོས་བྱིན་རླབས། །ངོ་མཚར་རྫུ་འཕྲུལ་དུ་མ་བསྟན། །དངོས་གྲུབ་མཆོག་བརྙེས་བི་རཱུ་པ། །རྣལ་འབྱོར༴ དགྱེས་པ་རྡོ་རྗེ་དངོས་སུ་གྲུབ། །སྟག་ལ་ཆིབས་ནས་སྤྱོད་པ་སྤྱད། །དངོས་གྲུབ་མཆོག་བརྙེས་ཌོམྦི་པ། །རྣལ་འབྱོར༴ སྤྱན་རས་གཟིགས་ཀྱིས་རྗེས་སུ་བཟུང༌། །ཡེ་ཤེས་སྐུ་ཡིས་འགྲོ་དོན་མཛད། །དངོས་གྲུབ་མཆོག་བརྙེས་ཤ་བ་རི། །རྣལ་འབྱོར༴ བྲམ་ཟེའི་རིགས་ལས་གཉིས་རྟོག་ཆོད། ། ཕྱག་རྒྱ་ཆེན་པོ་མཐར་ཐུག་རྟོགས། །དངོས་གྲུབ་མཆོག་བརྙེས་ས་ར་ཧ། །རྣལ་འབྱོར༴ ཐ་མལ་ཆུང་མའི་རྣམ་རྟོག་ཉིད། །བདེ་སྟོང་འོད་གསལ་དབྱིངས་སུ་སྟོར། །དངོས་གྲུབ་མཆོག་བརྙེས་ཀཾ་ཀ་རི། །རྣལ་འབྱོར༴ ཉ་ལྟོང་འཇིག་རྟེན་མཆོག་ཐོབ་ཅིང༌། །རིམ་པར་ས་ལམ་ཡོན་ཏན་རྫོགས། །དངོས་གྲུབ་མཆོག་བརྙེས་མཱི་ན་པ། །རྣལ་འབྱོར༴ བ་ལང་སྐྱོང་བཞིན་གདམས་པས་གྲོལ། །སེམས་ཅན་ས་ཡ་གཏན་བདེར་བཀོད། །དངོས་གྲུབ་མཆོག་བརྙེས་གོ་རཀྵ། །རྣལ་འབྱོར༴ བསམ་དུ་མེད་པའི་གདམས་ངག་གིས། །ཡན་ལག་བཅད་པ་རང་སོར་ཆུད། །དངོས་གྲུབ་མཆོག་བརྙེས་ཙཽ་རིངྒ་། །རྣལ་འབྱོར༴ པི་ཝཾ་སྒྲ་ལས་ཏིང་འཛིན་གྲུབ། །གྷ་ཧུའི་གྲོང་ཁྱེར་ཆོས་ལ་བཀོད། །དངོས་གྲུབ་མཆོག་བརྙེས་ཝཱི་ཎ་པ། །རྣལ་འབྱོར༴ མཁས་ཤིང་གྲུབ་པས་ཐུབ་བསྟན་སྐྱོང༌། །སློབ་མའི་གདམས་པས་བདེན་པ་གཟིགས། །དངོས་གྲུབ་མཆོག་བརྙེས་ཤཱནྟི་པ། །རྣལ་འབྱོར༴ ཐག་མཁན་རྒན་པོ་གཞོན་ནུའི་ལུས། །སནྡྷོའི་གྲོང་ཁྱེར་མཁའ་སྤྱོད་བཀོད། །དངོས་གྲུབ་མཆོག་བརྙེས་ཏནྟི་པ། །རྣལ་འབྱོར༴ ལྷམ་བཟོ་སེམས་སྦྱོང་ཕྲུགས་གཅིག་གིས། །དྲི་མ་ཀུན་དག་གནས་ལུགས་རྟོགས། །དངོས་གྲུབ་མཆོག་བརྙེས་ཙ་མ་རི། །རྣལ་འབྱོར༴ ཐུན་མོང་རལ་གྲིའི་གྲུབ་པ་ཐོབ། །སྒོ་གསུམ་འཁྲུལ་པའི་དྲི་མ་སངས། །དངོས་གྲུབ་མཆོག་བརྙེས་ཁཌྒ་པ། །རྣལ་འབྱོར༴ སངས་རྒྱས་གཉིས་པའི་མཛད་པ་སྐྱོང༌། །ཤིང་རྟ་ཆེན་པོའི་ལམ་སྲོལ་ གཏོད། །དངོས་གྲུབ་མཆོག་བརྙེས་འཕགས་པ་ཀླུ། །རྣལ་འབྱོར༴ སུམ་སྟོང་འཁོར་བཅས་བརྟུལ་ཞུགས་སྤྱོད། །བར་དོར་མངོན་པར་བྱང་ཆུབ་པའི། །དངོས་གྲུབ་མཆོག་བརྙེས་ཀཧྞ་པ། །རྣལ་འབྱོར༴ མངལ་གྱིས་མ་གོས་བརྫུས་ཏེ་འཁྲུངས། །ཉོན་མོངས་དགྲ་བཅོམ་ཆོས་ཉིད་མཐོང༌། །དངོས་གྲུབ་མཆོག་བརྙེས་འཕགས་པ་ལྷ། །རྣལ་འབྱོར༴ བརྫུན་སྨྲའི་གཉེན་པོར་བརྫུན་བསྒོམས་པས། །སྣང་སྲིད་བརྫུན་གྱི་ཆོས་སུ་རྟོགས། ། དངོས་གྲུབ་མཆོག་བརྙེས་ཐ་ག་ན། །རྣལ་འབྱོར༴ གནས་ལྔ་མཐར་ཕྱིན་པཎྜི་ཏ། །དཀའ་བ་ཆེན་པོ་བཅུ་གཉིས་སྤྱད། །དངོས་གྲུབ་མཆོག་བརྙེས་ནཱ་རོ་པ། །རྣལ་འབྱོར༴ སྒྲ་ཀུན་སྤྱང་ཀིའི་སྐད་དུ་ནུབ། །འཇིགས་མེད་རང་གྲོལ་ཉམས་རྟོགས་ཤར། །དངོས་གྲུབ་མཆོག་བརྙེས་ཤྱ་ལི་པ། །རྣལ་འབྱོར༴ བཀའ་བཞི་བརྒྱུད་པས་བྱིན་གྱིས་བརླབས། །རྡོ་རྗེ་འཆང་གིས་རྗེས་སུ་བཟུང༌། །དངོས་གྲུབ་མཆོག་བརྙེས་ཏིལླི་པ། །རྣལ་འབྱོར༴ སྟོང་ཉིད་སྙིང་རྗེའི་རྣལ་འབྱོར་བསྒོམས། །ལྔ་བརྒྱའི་འཁོར་བཅས་མཁའ་སྤྱོད་གཤེགས། །དངོས་གྲུབ་མཆོག་བརྙེས་ཙ་ཏྲ་པ། །རྣལ་འབྱོར༴ ལྟ་སྒོམ་སྤྱོད་པའི་བརྡའ་དོན་རྟོགས། །སྣང་སྲིད་འཁྲུལ་པའི་གཟུགས་བརྙན་མཐོང༌། ། དངོས་གྲུབ་མཆོག་བརྙེས་བྷ་དྲ་པ། །རྣལ་འབྱོར༴ ཕྱག་དར་ཁྲོད་ཀྱི་ཚེམ་དྲུབ་དང༌། །ལྷ་སྔགས་དབྱེར་མེད་ཆོས་སྐུར་རྟོགས། །དངོས་གྲུབ་མཆོག་བརྙེས་དྷཱུ་ཁནྡྷི། །རྣལ་འབྱོར༴ སྟེང་སྒོའི་སྣ་རྩེར་གསལ་སྣང་ཐོབ། ། མཚན་འཛིན་ཆོས་ཉིད་ངང་དུ་སྟོར། །དངོས་གྲུབ་མཆོག་བརྙེས་ཨ་ཛོ་གི །རྣལ་འབྱོར༴ གཟུགས་མཛེས་བསྐྱེད་རྫོགས་དོན་ལ་སྦྱངས། །ཤུགས་འབྱུང་ལྷུག་པའི་སྤྱོད་པ་སྤྱད། །དངོས་གྲུབ་མཆོག་བརྙེས་ཀ་ལ་པ། །རྣལ་འབྱོར༴ ཆུ་དང་ཏིང་འཛིན་ལྷན་ཅིག་པའི། །ཁྲུས་ཀྱིས་སྒྲིབ་གཉིས་རྩད་ནས་དག །དངོས་གྲུབ་མཆོག་བརྙེས་དྷཱུ་པི་པ། །རྣལ་འབྱོར༴ ཕྱག་གདུབ་སེམས་ཟིན་ལྔ་བརྒྱའི་ལོར། །བློན་འབངས་འཁོར་བཅས་མཁའ་སྤྱོད་གྲུབ། ། དངོས་གྲུབ་མཆོག་བརྙེས་ཀངྐ་ན། །རྣལ་འབྱོར༴ ཡུམ་གྱི་གདམས་པས་རང་རྒྱུད་གྲོལ། །ཕྲ་མན་མང་བཏུལ་ལྭ་བ་གསོལ། །དངོས་གྲུབ་མཆོག་བརྙེས་ཀམྦ་ལ། །རྣལ་འབྱོར༴ འབྲས་རྡུངས་ལས་ཀྱི་རྟོག་པ་སྦྱངས། ། བདུན་བརྒྱའི་འཁོར་བཅས་མཁའ་སྤྱོད་གྲུབ། །དངོས་གྲུབ་མཆོག་བརྙེས་ཌིངྒི་པ། །རྣལ་འབྱོར༴ ཚད་མེད་བཞི་ཡི་ལྟ་སྒོམ་སྤྱད། །བཞི་བརྒྱའི་འཁོར་བཅས་མཁའ་སྤྱོད་གཤེགས། །དངོས་གྲུབ་མཆོག་བརྙེས་བནྡྷེ་པ། ། རྣལ་འབྱོར༴ ཆོ་ལོས་ནོར་རྫས་ཟད་པའི་དཔེས། །ཁམས་གསུམ་རྣམ་རྟོག་དབྱིངས་སུ་ཟད། །དངོས་གྲུབ་མཆོག་བརྙེས་ཏནྟེ་པ། །རྣལ་འབྱོར༴ མངོན་ཤེས་ལྡན་ཞིང་ལྷ་ཡིས་མཆོད། །ཌཱ་ཀི་ཁྱི་གུའི་གཟུགས་ཅན་བསྟེན། ། དངོས་གྲུབ་མཆོག་བརྙེས་ཀུ་ཀུ་རི། །རྣལ་འབྱོར༴ ལྦ་བ་ཡོད་མེད་རྟོག་པ་ཡི། །མཐའ་གཉིས་སྤངས་པས་མཐའ་བྲལ་རྟོགས། །དངོས་གྲུབ་མཆོག་བརྙེས་ཀུ་ཛི་པ། །རྣལ་འབྱོར༴ ཐོས་པ་འཛིན་ལ་རབ་བརྩོན་ནས། ། དུ་མ་རོ་གཅིག་རྟོགས་པ་སྐྱེས། །དངོས་གྲུབ་མཆོག་བརྙེས་དྷ་མ་པ། །རྣལ་འབྱོར༴ སྟོབས་པོ་ཆེ་ཡི་ང་རྒྱལ་ཉིད། །དངོས་མེད་སྟོབས་ལྡན་གདམས་པས་བཅོམ། །དངོས་གྲུབ་མཆོག་བརྙེས་མ་ཧི་པ། །རྣལ་འབྱོར༴ ནོར་རྫས་འདོད་པའི་རྟོག་པ་ཀུན། །རྟོག་མེད་ནམ་མཁའི་ངང་དུ་ནུབ། །དངོས་གྲུབ་མཆོག་བརྙེས་ཨ་ཙིནྟ། །རྣལ་འབྱོར༴ རྩ་རླུང་ཐིག་ལེའི་རྣལ་འབྱོར་ལས། །འཕོ་མེད་བདེ་ཆེན་རོ་ཡིས་མྱོས། །དངོས་གྲུབ་མཆོག་བརྙེས་བ་བྷ་ཧི། །རྣལ་འབྱོར༴ པད་རྩས་འཚོ་ཞིང་ཞུ་བདེའི་ལམ། །མཐར་ཕྱིན་འཁྲུལ་པའི་དྲི་མ་སངས། །དངོས་གྲུབ་མཆོག་བརྙེས་ནཱ་ལི་ནཱ། །རྣལ་འབྱོར༴ བྷུ་སུ་ཀུ་ཡི་བརྟུལ་ཞུགས་བསྐྱང༌། །སྤྱོད་འཇུག་གསུངས་ཤིང་མཁའ་ལ་གཤེགས། །དངོས་གྲུབ་མཆོག་བརྙེས་ཞི་བ་ལྷ། །རྣལ་འབྱོར༴ བཙུན་མོ་ལྔ་བརྒྱའི་འཁོར་དང་བཅས། །འདོད་ཡོན་མ་སྤངས་ཆོས་ཉིད་རྒྱན། །གྲུབ་བརྙེས་ཨིནྡྲ་བོ་དྷི་ཆེ། །རྣལ་འབྱོར༴ གཉུག་མའི་དོན་རྟོགས་དུར་ཁྲོད་ཉུལ། །སྨྱོན་པའི་སྤྱོད་པས་འཇིགས་འཇིགས་ལྟ། །དངོས་གྲུབ་མཆོག་བརྙེས་མེ་ཀོ་པ། །རྣལ་འབྱོར༴ སེམས་ཀྱི་རི་བོ་རང་རིག་པའི། །ཏོག་རྩེས་རྒྱུན་ཆད་མེད་པ་བརྐོས། །དངོས་གྲུབ་མཆོག་བརྙེས་ཀོ་ཊ་ལི། །རྣལ་འབྱོར༴ མགར་གྱི་བཟོ་ཡིས་རང་རྒྱུད་ཀྱི། །རྣམ་རྟོག་ཉོན་མོངས་མཐའ་དག་སྦྱངས། །དངོས་གྲུབ་མཆོག་བརྙེས་ཀམྦྷ་རི། །རྣལ་འབྱོར༴ ཡེ་ཤེས་མཁའ་འགྲོས་སྨིན་གྲོལ་རྩལ། །གྲུབ་མཆོག་ཀུན་གྱི་འདྲེན་པ་མཛད། ། གྲུབ་བརྙེས་ཛ་ལནྡྷ་ར་པ། །རྣལ་འབྱོར༴ གཉིས་མེད་རྟོགས་པའི་སྒྲ་གཅན་གྱིས། །གཉིས་འཛིན་ཟླ་བ་དབྱིངས་སུ་ཟོས། །དངོས་གྲུབ་མཆོག་བརྙེས་རཱ་ཧུ་ལ། །རྣལ་འབྱོར༴ མཁས་པ་སྨྲ་བ་གཙོར་མཛད་པ། །རྒས་ཚེ་བསྒོམས་པས་ཡེ་ཤེས་འཆར། །དངོས་གྲུབ་མཆོག་བརྙེས་དྷརྨ་པ། །རྣལ་འབྱོར༴ སྟོང་པ་ཉིད་ཀྱི་སྣོད་ཁུར་ནས། །བདེ་ཆེན་འབྲས་བུ་རྟག་ཏུ་སློང༌། །དངོས་གྲུབ་མཆོག་བརྙེས་དྷོ་ཀ་རི། །རྣལ་འབྱོར༴ ཞིང་པའི་ལས་ཀྱིས་རྣམ་རྟོག་སྦྱངས། །ནམ་མཁར་འཕགས་ཏེ་འགྲོ་མང་སྒྲོལ། །དངོས་གྲུབ་མཆོག་བརྙེས་མེ་དྷི་ནི། །རྣལ་འབྱོར༴ པད་སྐྱེས་འཕགས་པའི་གདམས་པ་ནོས། །ཞག་བདུན་བསྒོམས་པས་འཆིངས་ལས་གྲོལ། །དངོས་གྲུབ་མཆོག་བརྙེས་པངྐ་ཛ། །རྣལ་འབྱོར༴ ཕོ་ཉའི་ལམ་གྱིས་བདེ་ཆེན་གྲུབ། །འཁོར་ལོ་སྡོམ་པའི་སྐུ་རུ་བཞེངས། །དངོས་གྲུབ་མཆོག་བརྙེས་དྲིལ་བུ་པ། །རྣལ་འབྱོར༴ གནས་ཆེན་ཉེར་བཞིར་སྒྲུབ་པ་མཛད། །བཅུ་གཉིས་ལོ་རུ་དྲི་མ་དག །དངོས་གྲུབ་མཆོག་བརྙེས་ཛོ་ཀི་པ། །རྣལ་འབྱོར༴ སྣང་སྲིད་ལུས་ངག་ཡིད་གསུམ་སྡུད། །ལ་ལ་ར་ས་དྷཱུ་ཏིར་ཆུད། །དངོས་གྲུབ་མཆོག་བརྙེས་ཙ་ལུ་ཀི། །རྣལ་འབྱོར༴ སྒྲ་ཀུན་འདབ་ཆགས་སྒྲར་སྦྱངས་པས༑ ༑གྲགས་སྟོང་དབྱེར་མེད་ཆོས་ཉིད་རྟོགས། །དངོས་གྲུབ་མཆོག་བརྙེས་གོ་རུ་ར། །རྣལ་འབྱོར༴ འཁོར་བར་བློ་ལོག་རིམ་གཉིས་བསྒོམས། །སྲིད་ཞི་མཉམ་ཉིད་ཆེན་པོར་གཟིགས། །དངོས་གྲུབ་མཆོག་བརྙེས་ ལུ་ཙི་ཀ། །རྣལ་འབྱོར༴ ཉལ་བཞིན་སྣང་སྟོང་ཟུང་འཇུག་བསྒོམས། །འཁྲུལ་པའི་རྒྱ་གྲོལ་མཁའ་སྤྱོད་གཤེགས། །དངོས་གྲུབ་མཆོག་བརྙེས་ན་གུ་ཎ། །རྣལ་འབྱོར༴ གཏོར་མས་འདབ་ཆགས་ཀུན་ཚིམས་མཛད། །གསང་སྟེ་ནང་གི་རྣལ་འབྱོར་བརྩོན། །གྲུབ་བརྙེས་ཛ་ཡ་ནནྟི་པ། །རྣལ་འབྱོར༴ དབུལ་པོས་འཕགས་པའི་སྤྲུལ་པ་ལ། །ཁུར་བ་ཕུལ་བས་རྗེས་སུ་བཟུང༌། །དངོས་གྲུབ་མཆོག་བརྙེས་པ་ཙ་རི། །རྣལ་འབྱོར༴ མེ་ཏོག་རྟོག་པ་ལམ་ཁྱེར་གྱིས། །ཆོས་ཀུན་མཉམ་པ་ཉིད་དུ་གྲོལ། །དངོས་གྲུབ་མཆོག་བརྙེས་ཙམྤ་ཀ། །རྣལ་འབྱོར༴ ཡེ་ཤེས་མཁའ་འགྲོར་ཚེམ་ཕུལ་བས། །སྣང་སྟོང་ཟུང་འཇུག་གདམས་པས་གྲོལ། །དངོས་གྲུབ་མཆོག་བརྙེས་བྷིཀྵ་ཎ། །རྣལ་འབྱོར༴ སྣུམ་ཚོང་འབྱོར་པའི་དཔལ་ལ་བརྟེན། །མཚན་མ་རང་གྲོལ་རྟོགས་པ་ཐོབ། །དངོས་གྲུབ་མཆོག་བརྙེས་མེ་དྷི་ལི། །རྣལ་འབྱོར༴ རྫ་མའི་ལས་ཀྱི་རྟོག་པ་དང༌། །མི་རྟོག་ཡེ་ཤེས་གཉིས་མེད་འདྲེས། །དངོས་གྲུབ་མཆོག་བརྙེས་ཀུམྦྷ་རི། །རྣལ་འབྱོར༴ བཅུད་ལེན་གྲུབ་པས་སྐྱེ་བོ་རྣམས། །དོན་ཆེན་པོ་ལ་ཡུད་ཀྱིས་འགོད། །དངོས་གྲུབ་མཆོག་བརྙེས་ཙརྤ་ཊི། །རྣལ་འབྱོར༴ གྲུབ་ཐོབ་གདམས་པས་རྒྱུད་སྨིན་ཞིང༌། ། རྫ་མ་ཆགས་པས་རང་བཞིན་གྲོལ། །གྲུབ་བརྙེས་མ་ཎི་བྷ་དྲ་ཞེས། །རྣལ་འབྱོར་དབང་མོའི་ཞབས་ལ་འདུད། །ཁྱིམ་བདག་བུ་མོས་གདམས་པས་གྲོལ། །དབུ་བཅད་སླར་ལ་འབྱོར་བར་མཛད། །དངོས་གྲུབ་མཆོག་བརྙེས་ མེ་ཁ་ལཱི། །རྣལ་འབྱོར་དབང་མོའི༴ ནག་པོ་སྤྱོད་པས་རྗེས་སུ་བཟུང༌། །སྤྲོས་བཅད་བརྡའ་དོན་བླ་མར་ཕུལ། །གྲུབ་བརྙེས་ཀ་ན་ཁ་ལཱ་ཞེས། །རྣལ་འབྱོར་དབང་མོའི༴ སྒྲ་རྟོག་ནམ་མཁའི་དབྱིངས་སུ་སྟོར། །སྣང་གྲགས་ཕྱག་རྒྱ་ཆེན་པོར་ཤར། །གྲུབ་བརྙེས་ཀ་ལ་ཀ་ལ་པ། །རྣལ་འབྱོར༴ ཚོམ་བུ་ཕྱི་དང་ནང་བསྲེས་པས། །སྟོང་ཉིད་སྙིང་རྗེ་ཟུང་འཇུག་རྟོགས། །དངོས་གྲུབ་མཆོག་བརྙེས་ཀནྟ་ལི། །རྣལ་འབྱོར༴ ཀུན་བརྟག་གཞན་དབང་རྩྭ་ཐག་ཉིད། །དངོས་གྲུབ་ངོ་བོ་གཉིས་མེད་རྟོགས། །དངོས་གྲུབ་མཆོག་བརྙེས་དྷ་ཧུ་ལི། །རྣལ་འབྱོར༴ གནས་ཆེན་ཉེར་བཞིར་སྨན་མཆོག་བཙལ། །མཁའ་ལ་འཕུར་བའི་རྫུ་འཕྲུལ་ཐོབ། །དངོས་གྲུབ་མཆོག་བརྙེས་ཨུ་དྷི་ལི༑ ༑རྣལ་འབྱོར༴ ཆུང་མའི་ཐོད་པས་ཕོར་སྣོད་དང༌། །བུ་ཚའི་རུས་པས་རྒྱན་དྲུག་བྱས། །དངོས་གྲུབ་མཆོག་བརྙེས་ཀ་པཱ་ལ། །རྣལ་འབྱོར༴ རྒྱལ་སྲིད་དཔུང་གི་བཀོད་པ་ལ། །བརྟེན་ནས་ལམ་གྱི་མངོན་རྟོགས་འབྱངས། ། གྲུབ་བརྙེས་ཀི་ར་པཱ་ལ་པ། །རྣལ་འབྱོར༴ འཕགས་པས་དབང་སྩལ་གདམས་པས་གྲོལ། །འདོད་རྒུའི་ཆར་པས་རྒུད་པ་སྐྱབས། །དངོས་གྲུབ་མཆོག་བརྙེས་ས་ཀ་ར། །རྣལ་འབྱོར༴ སྣང་སྲིད་བཟའ་དང་བཏུང་བར་སྤྱད། ། ཉི་ཟླ་གཉིས་ཀྱང་འཇིགས་ནས་བྲོས། །གྲུབ་བརྙེས་སརྦ་བྷཀྵ་པ། །རྣལ་འབྱོར༴ དཔལ་གྱི་རི་ལ་རྟག་ཏུ་བཞུགས། །འགྲོ་ལ་གྲུབ་ཆེན་བརྒྱད་པོ་སྩོལ། །དངོས་གྲུབ་མཆོག་བརྙེས་ཀླུའི་བྱང་ཆུབ། །རྣལ་འབྱོར༴ བླ་མའི་ རྗེས་བསྙགས་རྒྱལ་སྲིད་དོར། །གཟུགས་འཚོང་མ་ཡི་ཁོལ་པོ་མཛད། །དངོས་གྲུབ་མཆོག་བརྙེས་དཱ་རི་ཀ། །རྣལ་འབྱོར༴ དགྱེས་རྡོར་བྲིས་སྐུ་ཏིང་འཛིན་ཐོབ། །ལྷ་དང་འབྱུང་པོ་བླ་འོག་རྗེས། །དངོས་གྲུབ་མཆོག་བརྙེས་པུ་ཏ་ལི། །རྣལ་འབྱོར༴ མཆིལ་ལྷམ་སྒྲར་བཅས་རྒྱུག་པ་ལ། །མངོན་ཞེན་ལམ་ཁྱེར་གདམས་པས་གྲོལ། །དངོས་གྲུབ་མཆོག་བརྙེས་པ་ན་ཧ། །རྣལ་འབྱོར༴ སྐྱེད་ཚལ་ཁུ་བྱུག་སྒྲ་ལ་བརྟེན། །ཀུན་རྟོག་ཡེ་ཤེས་ཆེན་པོར་ཤར། །དངོས་གྲུབ་མཆོག་བརྙེས་ཀོ་ཀི་ལ། །རྣལ་འབྱོར༴ རང་གཟུགས་མཛེས་པའི་ང་རྒྱལ་ཅན། །ཚོགས་དྲུག་རང་གྲོལ་ལམ་དུ་ལོངས། །དངོས་གྲུབ་མཆོག་བརྙེས་ཨ་ནོངྒ་། །རྣལ་འབྱོར༴ རྒྱལ་ཆེན་རིགས་འཁྲུངས་ངེས་འབྱུང་བློས། །སྨྱོན་པའི་སྤྱོད་པས་ལམ་མཆོག་འབྱངས། །གྲུབ་བརྙེས་ལཀྵྨཱི་ཀ་ར། །རྣལ་འབྱོར་དབང་མོའི་ཞབས་ལ་འདུད། །ཕྱི་ནང་ཚད་མེད་དགའ་བ་བཞིས། །འཇིག་རྟེན་ཆོས་བརྒྱད་འཁྲུལ་པ་ཞིག ། དངོས་གྲུབ་མཆོག་བརྙེས་ས་མུ་དྲ། །རྣལ་འབྱོར༴ དངུལ་ཆུའི་བཅུད་ལེན་ལ་བརྟེན་ནས། །འཁོར་བཅས་འཆི་མེད་ལུས་སུ་གྱུར། །དངོས་གྲུབ་མཆོག་བརྙེས་བྱཱ་ལི་པ། །རྣལ་འབྱོར་དབང་ཕྱུག་ཞབས་ལ་འདུད། །གུས་པས་བསྟོད་པ་ཕུལ་བའི་མཐུས། །ལས་དང་བག་ཆགས་དྲི་མ་སངས། །རྣམ་གྲོལ་དུས་མཉམ་ཡེ་ཤེས་རྒྱས། །གྲུབ་མཆོག་ཁྱེད་དང་མཚུངས་པར་ཤོག །ཅེས་པས་ཀྱང་བསྟོད། དེ་ནས་གསོལ་བ་གདབ་པ་ནི། གྲུབ་ཆེན་རེ་རེའམ་སྤྱི་བསྡུས་ཀྱི་ གསོལ་འདེབས་གཞན་ནས་འབྱུང་བ་ཇི་ལྟར་རིགས་པ་འདིར་སྦྱར། རྡོ་རྗེ་འཆང་ཆེན་ལཱུ་ཡི་ལཱི་པ་ལ། །སོགས་གོང་གི་ཕྱག་འཚལ་གྱི་ཚིག་མཐའ། མཱི་ན་གོ་རཀྵ་ལ་གསོལ་བ་འདེབས། །ཞེས་བསྒྱུར་བ་དང༌། གཤམ་གྱི་ཤོ་ལོ་ཀ་གཅིག་པོ་བཞག་ནས། བྱམས་དང་སྙིང་རྗེ་ཕྱོགས་མེད་འབྱོངས་པ་དང༌། །དོན་དམ་ལྷན་ཅིག་སྐྱེས་པའི་ཡེ་ཤེས་དེ། །གྲུབ་མཆོག་རྣལ་འབྱོར་རྣམས་ཀྱིས་རྟོགས་པ་ལྟར། །བདག་གིས་མངོན་སུམ་རྟོགས་པར་བྱིན་གྱིས་རློབས། །ཞེས་བརྗོད། བླ་མ་རྒྱང་འབོད་རྒྱས་བསྡུས་གང་བདེ་སྐབས་འདིར་སྦྱོར་ནའང་ཆོག །དེ་ནས་བཤགས་པ་སོགས་ཡན་ལག་ལྷག་མ་རྣམས་ནི། ཐོག་མེད་དུས་ནས་ཉོན་མོངས་དབང་གྱུར་པས། །སྒོ་གསུམ་སྒོ་ནས་རང་བཞིན་བཅས་པའི་སྡིག །བགྱིས་དང་བགྱིད་སྩལ་ཡིད་རང་བགྱིས་པ་ཀུན། །གནོང་འགྱོད་སྡོམ་པའི་སེམས་ཀྱིས་མཐོལ་ཞིང་བཤགས། །ཁྱད་པར་རྡོ་རྗེ་ཐེག་པའི་ལྟ་སྤྱོད་ལ། །ཤེར་བརྩོན་དམན་པས་ཇི་བཞིན་སྒྲུབ་མ་ནུས། །ཐེ་ཚོམ་སེལ་ཞུགས་མ་ཚོར་དམ་ལས་ཉམས། ། གསང་སྔགས་འཆོལ་བར་གྱུར་སོགས་སྙིང་ནས་བཤགས། །སྐྱེས་མཆོག་སྲས་དང་བཅས་པའི་རྣམ་ཐར་དང༌། །གཞན་ཡང་འགྲོ་ཀུན་སྒོ་གསུམ་དགེ་བའི་ཚོགས། །བྱས་དང་བྱེད་འགྱུར་ད་ལྟ་མཛད་རྣམས་ལ། །རབ་ཏུ་དགའ་བའི་ཡིད་ཀྱིས་ཡི་རང་ངོ༌། །སྔགས་དང་འབྲེལ་བའི་ལེགས་སྤྱད་ཕྲ་མོར་ཡང༌། །རླབས་ཆེན་དགེ་བས་བསོད་ནམས་ཆར་མི་ཉེ། །དེས་ན་གསང་བ་ཆེན་པོའི་ཕྱོགས་བསླན་པའི། །རྨད་བྱུང་དགེ་ལ་ལྷག་པར་རྗེས་ ཡི་རང༌། །འགྲོ་ཀུན་ཕན་ཅིང་དགེ་བར་བགྱིད་པའི་སླད། །ཆོས་ཀྱི་རྒྱལ་པོ་སྲས་དང་བཅས་རྣམས་ཀྱིས། །གང་ལ་གང་འདུལ་ཟབ་དང་རྒྱ་ཆེ་བའི། །ཆོས་ཀྱི་འཁོར་ལོ་རྒྱུན་དུ་བསྐོར་དུ་གསོལ། །བཟོད་དཀའ་སྲིད་པའི་འཁྲུལ་འཁོར་རྒྱུན་རིང་བ། །མྱུར་དུ་གཅོད་ནས་མ་གྱུར་ལུས་ཅན་རྣམས། །གཏན་བདེར་འགོད་བྱེད་རྡོ་རྗེ་ནཱ་དའི་དབྱངས། །ཕྱོགས་དུས་རིས་སུ་མ་ཆད་སྒྲོགས་པར་མཛོད། །ཆོས་ཀྱི་སྐུ་ལ་སྐྱེ་འཇིག་མི་མངའ་ཡང༌༑ ༑གཟུགས་སྐུ་ཞིང་གཞན་དོན་ལ་མི་གཤེགས་པར། །མགོན་མེད་སྙིགས་མའི་འགྲོ་ལ་རྗེས་བརྩེ་བས། །མྱ་ངན་མི་འདའ་ཡུན་རིང་བཞུགས་པར་འཚལ། །མཁའ་སྤྱོད་ཞིང་བཟང་བསྟེན་པའི་སྐལ་མེད་པ། །འཇིག་རྟེན་འདིར་གནས་ལུས་ཅན་ཡོངས་ཀྱི་མགོན། །རྡོ་རྗེ་ཐེག་པ་སྟོན་པའི་སློབ་དཔོན་དུ། །སྤྲུལ་ནས་ཐུབ་བསྟན་ཇི་སྲིད་རྟག་བཞུགས་གསོལ། །འགྲོ་ཀུན་བླ་མེད་བྱང་ཆུབ་ཐོབ་དོན་དུ། །སྐྱབས་མཆོག་ཁྱེད་ལ་རྟག་པར་སྐྱབས་མཆི་ཞིང༌། །ཐུན་མོང་ཁྱད་པར་དམ་ཚིག་སྡོམ་པ་རྣམས། །དེང་ནས་བླངས་ཏེ་ཚུལ་བཞིན་བསྒྲུབ་པར་བགྱིའོ། །འདིས་མཚོན་ཟག་བཅས་ཟག་མེད་དགེ་བའི་མཐུས། །འགྲོ་ཀུན་སྲིད་པའི་འཆིང་བ་ཀུན་ལས་གྲོལ། ། བླ་མ་གྲུབ་ཐོབ་ཚོགས་ཀྱིས་རྗེས་བཟུང་ནས། །ཚེ་གཅིག་མི་སློབ་ལམ་མཆོག་མཐར་ཕྱིན་ཤོག །བདག་གིས་དུས་གསུམ་དགེ་བ་ཅི་སྤྱད་པས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །བླ་མེད་རྡོ་རྗེ་ ཐེག་པའི་སྣོད་གྱུར་ཏེ། །ཀུན་བཟང་རྡོ་རྗེ་འཛིན་པ་མྱུར་ཐོབ་ཤོག །དེ་ནས་ཚོགས་མཆོད་འབུལ་བ་ནི། དམ་ཚིག་གི་རྫས་སུ་འོས་པའི་བཟའ་བཅའ་བཏུང་བའི་རིགས་འབྱོར་པ་བཤམས་ལ། ནང་མཆོད་བདུད་རྩིས་བྲན། ༀ་སུམྦྷས་བསང༌། ༀ་སྭ་བྷཱ་ཝས་སྦྱང༌། ཚོགས་རྫས་རྣམས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་ཚོགས་རྫས་རྣམས་ཀྱི་འོག་ཏུ་ཡཾ་ལས་རླུང༌། རཾ་ལས་མེའི་དཀྱིལ་འཁོར་གྱི་སྟེང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔ་ཡེ་ཤེས་ལྔ་ཞུ་བ་ལས་བྱུང་བའི་ཚོགས་རྫས་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ་ཧ་ཧོཿ ཧྲཱིཿ ལན་གསུམ། ན་མོ་ཐབས་དང་ཤེས་རབ་གཉིས་སུ་མེད་པའི་ཚོགས་ཀྱི་འཁོར་ལོ་རྒྱ་ཆེན་པོ། རང་བཞིན་རྣམ་པར་དག་པ་སྐྱེ་བ་མེད་པ། མཚན་ཉིད་རྣམ་པར་དག་པ་ཨཱ་ལི་ཀཱ་ལི། ངོ་བོ་རྣམ་པར་དག་པ་ཤ་ལྔ་བདུད་རྩི་ལྔས་རྒྱས་བཏབ་པ་འདི་ཉིད། བྱིན་རླབས་ཀྱི་རྩ་བ་རྩ་བརྒྱུད་བླ་མ་རྣམས་ཀྱི་ཞལ་དུ་ག་ཎ་ཙཀྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་བཞིན་དུ་སྦྱར་ཏེ། ན་མོ་ཐབས་དང་ཤེས་རབ༴ ནས། རྒྱས་བཏབ་པ་འདི་ཉིད་དངོས་གྲུབ་ཀྱི་རྩ་བ་ཡི་དམ་ལྷ་ཚོགས་རྣམས་ཀྱི་ཞལ་དུ། སོགས། ན་མོ་ནས། འདི་ཉིད་ཕྲིན་ལས་ཀྱི་རྩ་བ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་རྣམས་ཀྱི༴ ན་མོ་ནས། འདི་ཉིད་དམ་ཚིག་གི་རྩ་བ་མཆེད་གྲོགས་རྡོ་རྗེ་སྤུན་གྲོགས་རྣམས་ཀྱི་ཞལ་དུ་སོགས། སླར་ཡང་བྱིན་འབེབས་ནི། དབྱིངས་བདེ་གསལ་ མི་རྟོག་ཕོ་བྲང་ཆེར། །རྗེ་རྡོ་རྗེ་འཆང་ཆེན་འགྲོ་བའི་མགོན། །དེ་རང་ལ་སྣང་བ་སྐྱབས་ཀྱི་གཙོ། །ཕ་དྲིན་ཅན་རྩ་བའི་བླ་མ་ཡང༌། །ཁྱེད་རྣམ་འཕྲུལ་མཁའ་ལ་སྤྲིན་བཞིན་གཏིབས། །འདིར་གཤེགས་ཚོགས་ཀྱི་མཆོད་པ་བཞེས། །གནས་ཁང་འདི་ལ་བྱིན་ཕོབས་ལ། །ཚོགས་གཏོར་འདི་ལ་བཅུད་ཅིག་ཆུགས། །འདིར་འདུས་རྣལ་འབྱོར་བདག་ཅག་ལ། །མཆོག་དང་ཐུན་མོང་དངོས་གྲུབ་སྩོལ། །ༀ་མ་ཧཱ་གུ་རུ་ཙ་ཏུ་རཱ་ཤཱི་ཏི་སིདྡྷི་ལབྡྷ་ཛྙཱ་ན་ཨཱ་བེ་ཤ་ཡ་ཨ་ཨ། ཡུལ་དབུས་འགྱུར་མ་ག་དྷ་ཡི་ཆར། །མ་འགྲོ་བའི་དོན་དུ་སྐུ་བལྟམས་པའི། །རྗེ་རྣལ་འབྱོར་དབང་ཕྱུག་གྲུབ་པའི་ཚོགས། །ཁྱེད་རྣམ་འཕྲུལ༴ འདིར་གཤེགས༴ གནས་ཁང༴ ཚོགས་གཏོར༴ འདིར་འདུས༴ མཆོག་དང༴ ༀ་མ་ཧཱ༴ ཡུལ་རྒྱ་གར་ཤར་ཕྱོགས་ཡུལ་ལྗོངས་སུ། །མ་འགྲོ་བའི༴ སོགས་གོང་ལྟར་རིགས་འགྲེ། ཡུལ་རྒྱ་གར་ལྷོ་ཕྱོགས་ཡུལ་ལྗོངས་སུ། །མ་འགྲོ་བའི་དོན་དུ༴ སོགས། ཡུལ་རྒྱ་གར་ནུབ་ཕྱོགས་ཡུལ་ལྗོངས་སུ། །མ་འགྲོ་བའི༴ སོགས། ཡུལ་རྒྱ་གར་བྱང་ཕྱོགས་ཡུལ་ལྗོངས་སུ། །མ་འགྲོ་བའི༴ སོགས། རིགས་རྒྱལ་རིགས་བྲམ་ཟེ་རྗེའུ་རིགས། །འབངས་དམངས་རིགས་ཕལ་པར་སྐུ་འཁྲུངས་པའི། །རྗེ་རྣལ་འབྱོར་དབང་ཕྱུག་སོགས། ཡབ་རྣལ་འབྱོར་དབང་པོ་མཐའ་ཡས་ཀྱི། །མ་ལྷན་ཅིག་སྤྱོད་པ་གསང་བའི་ཡུམ། །སྲིང་དགའ་བཞིའི་ཉམས་སྟེར་ཐམས་ཅད་ཀྱང༌། །ཁྱེད་རྣམ་འཕྲུལ་སོགས། ཕོ་རྟོགས་ཤིང་གྲོལ་བ་བརྒྱད་ཅུ་དང༌། ། མོ་རྟོགས་ཤིང་གྲོལ་བའི་སྲིང་མོ་བཞི། །རྗེ་གྲུབ་ཐོབ་བརྒྱད་ཅུ་རྩ་བཞིའི་ཚོགས། །ཁྱེད་རྣམ་འཕྲུལ་མཁའ་ལ་སྤྲིན་བཞིན་སོགས། སྟུག་པོའི་ཞིང་ཁམས་འཇིགས་མེད་པར། །དཔའ་བོ་དཔའ་མོ་འབུམ་སྡེའི་དབུས། །དཀྱིལ་འཁོར་ཁྱབ་བདག་རིགས་ལྔའི་རྒྱལ། །བཅོམ་ལྡན་ཧེ་རུ་ཀ་པ་ཡང༌། །རྣམ་འཕྲུལ༴ ཞེས་པ་ནས། གུ་རུ་དེ་ཝ་ཌཱ་ཀི་ནི་ཛྙཱ་ན་ཨཱ་བེ་ཤ་ཡ་ཨ་ཨ། མི་གཡོ་འོག་མིན་ཉམས་དགའི་ཞིང༌། །དག་པ་བདེ་སྟོང་མཁའ་སྤྱོད་གནས། ། རྒྱལ་བ་དགྱེས་པའི་བདེ་སྐྱེད་ཡུམ། །རྡོ་རྗེ་ཕག་མོ་མཁའ་འགྲོའི་གཙོ། །རྣམ་འཕྲུལ་མཁའ་ལ༴ བདུད་ཚོགས་ཀུན་འདུལ་ཕྲིན་ལས་ཞིང༌། །དུར་ཁྲོད་ཆེན་པོའི་གནས་བརྒྱད་ན། །བགེགས་འཇོམས་འདོད་དོན་ཀུན་སྒྲུབ་པའི༑ ༑དཔལ་ལྡན་མགོན་པོ་ལྕམ་དྲལ་ཡང༌། །རྣམ་འཕྲུལ་མཁའ་ལ༴ བླ་མ་ཡི་དམ་མཁའ་འགྲོའི་ཚོགས། །རིགས་ཀྱི་ཅོད་པན་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །རྒྱན་ཆ་མང་པོ་ཁྲོ་ལོ་ལོ། །རོལ་མོ་མང་པོ་དི་རི་རི། །གླུ་ལེན་གར་བྱེད་ཁྱུགས་སེ་ཁྱུག །འཁོར་ཚོགས་འབུམ་སྡེ་ཤ་ར་ར། །སྒྱུ་མའི་རང་སྣང་རྗེན་ནེ་ནེ། །གཏད་མེད་རིག་པ་ས་ལ་ལ། །བརྗོད་མེད་དབྱིངས་སུ་ཐ་ལ་ལ། །བདེ་བ་ཆེན་པོར་ཕྲི་ལི་ལི། །བྱིན་གྱིས་བརླབ་ཕྱིར་གཤེགས་སུ་གསོལ། །གནས་མཆོག་འདི་རུ་ཕྱིན་ཕོབས་ལ། །སྒྲུབ་མཆོག་བདག་ལ་དངོས་གྲུབ་སྩོལ། །བགེགས་དང་ལོག་འདྲེན་བར་ཆད་སོལ། །འཁོར་གསུམ་གཉིས་སུ་མེད་པར་འདྲེས། །གུ་རུ་དེ་ཝ་ཌཱ་ཀི་ནི་ཛྙཱ་ན་ ཨཱ་བེ་ཤ་ཡ་ཨ་ཨཱཿ ཞེས་བརྗོད་ལ་བར་མཚམས་རྣམས་སུ་ཌཱ་དྲིལ་སོགས་རོལ་མོས་བསྐུལ། དེ་ནས་ལས་ཀྱི་རྡོ་རྗེས་ལག་གཡོན་ཐོད་པ་བདུད་རྩིས་གང་བ་བཟུང༌། གཡས་རྩེ་གསུམ་ཕྱག་རྒྱས་སྟེང་འོག་ཁ་སྦྱོར་དུ་བཟུང་སྟེ། འདིར་ནི་ཆོས་རྣམས་བཟང་པོར་ལྟོས༑ ༑འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་གསུམ། །རང་བཞིན་གཅིག་ཏུ་དགོངས་ཏེ་རོལ། །ཨ་ཧོ་མ་ཧཱ་སུ་ཁཾ། ཚོགས་ཀྱི་གཙོ་བོ་ནས་བརྩམས་ཏེ་བསྐོར། དེ་དག་གིས། བདེ་གཤེགས་ཆོས་ལ་རིན་ཐང་མེད། ། འདོད་ཆགས་ལ་སོགས་དྲི་མ་བྲལ། །གཟུང་དང་འཛིན་པ་དང་བྲལ་བ། །དེ་བཞིན་ཉིད་ལ་བདག་ཕྱག་འཚལ། །ཨ་ཧོ་མ་ཧཱ་སུ་ཁཾ། ཞེས་བླངས་ལ། ཚོགས་ཕུད་འབུལ་བ་ནི། ཞལ་ཟས་རོ་བརྒྱ་ལྡན་ཞིང་ཡིད་འཕྲོག་པ། །ལེགས་སྦྱར་འདི་ནི་བླ་མ་ལྷ་ཚོགས་ལ། །དད་པས་ཕུལ་བས་འགྲོ་བ་འདི་དག་གིས། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ༀ་མ་ཧཱ་གུ་རུ་བཛྲ་དྷ་ར་ཙ་ཏུ་རཱ་ཤཱི་ཏི་སིདྡྷི་ལ་བྡྷ་བུདྡྷ་བོ་དྡྷི་ས་ཏྭ་ཝཱི་ར་ཌཱ་ཀི་ནི་ས་པ་རི་ཝཱ་རེ་བྷྱཿ ན་མཿ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲཧྞེ་དཾ་བ་ལིངྟ་སྭཱ་ཧཱ། ཞེས་པའམ། ༀ་ཨ་ཀཱ་རོ་བཏགས་པ་ལན་བདུན་གྱིས་བླ་མ་གྲུབ་ཐོབ་འཁོར་བཅས་ལ་ཕུལ། ༀ་ཤྲཱི་ཧེ་རུ་ཀ་བཛྲ་ཡོ་གི་ནི་ས་པ་རི་ཝཱ་ར་ཨ་ཀཱ་རོ་སོགས། ལན་གསུམ་གྱིས་ཡི་དམ། ༀ་ཤྲཱི་མ་ཧཱ་ཀཱ་ལ་ཡ་ཤཱ་ས་ན་སོགས་ནས་མཱ་ར་ཡ་ཧཱུྃ་ཕཊ་ཀྱིས་མགོན་པོ་ཆོས་སྐྱོང་ཚོགས་ལ་འབུལ། ༀ་ཨཱཿ ཧཱུྃ་ཧ་ཧོཿ ཧྲཱིཿ ཕ་བཛྲ་ཨཱ་རལླི་ཧོཿ ཛཿ ཧཱུྃ་བཾ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ་དྲ་ཤྱ་ ཧོཿ ༀ་ཁ་ཁ་སོགས་མཁའ་འགྲོ་སྤྱི་གཏོར་ལྟར་གྱིས་མགྲོན་གཞན་རྣམས་ལ་ཕུལ། ནང་མཆོད་ཐོགས་ལ། ༀ་མཆོད་དོ། །དམན་པའི་ཡུལ་ལས་རབ་འདས་ཤིང༌། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གིས་མཆོད་པར་བགྱི། །སྒྲིབ་པའི་དྲི་མ་ཀུན་སེལ་ཞིང༌། །རྟོག་པ་ཀུན་ལས་ངེས་གྲོལ་བ། །བླ་ན་མེད་པའི་བྱང་ཆུབ་སེམས། །བདེ་བ་ཆེན་པོས་མཉེས་གྱུར་ཅིག །ཅེས་པ་རྣམས་ཀྱིས་འབུལ། ནང་གི་སྲེག་བླུགས་ཀྱི་ཚུལ་གྱིས་ཚོགས་ལ་ལོངས་སྤྱད། ལྷག་མ་བསྡུས་ལ་ལམ་སྒྲོན་བཙུགས། བསང་སྦྱང༌། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ལྷག་མའི་གཏོར་མ་བཟང་ཞིང་རྒྱ་ཆེ་བ་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ་ཧ་ཧོཿ ཧྲཱིཿ ཨ་ཀཱ་རོ་ལན་གསུམ། ཕྱི་རོལ་སྒོ་དྲུང་ན་གནས་པའི་འབྱུང་པོ་འཆོལ་བའི་ཚོགས་དམ་ཚིག་གི་ཆོ་ག་བལྟ་བ་ལ་མི་དབང་བ་རྣམས་ལ་སྦྱིན་ནོ། །རྡོ་རྗེ་ཐེག་པ་ལ་གསང་བ་མཆོག་གི་རྣལ་འབྱོར་སྤྱོད་པའི་སྐལ་པ་དང་ལྡན་པར་གྱུར་ཅིག །ༀ་ཨུཙྪི་བ་ལ່་ཏ་བྷཀྵ་སི་སྭཱ་ཧཱ། ཞེས་པས་ཕྱི་རོལ་དུ་བཏང་ལ་དྲག་སྔགས་སོགས་ཀྱིས་མཚམས་བཅད། དེ་ནས་རྡོ་རྗེའི་གླུ་བླང་བ་ནི། ཀོལླ་ཨི་རེཊྛི་ཨ་བོལླ། །མུམྨུ་ནི་རེ་ཀཀྐོ་ལཱ། །གྷ་ཎ་ཀྲི་པི་ཊ་ཧོ་བཱཛྫ་ ཨི༑ ༑ཀ་རུ་ཎི་ཀེ་ཨ་ཨི་ཎ་རོ་ལཱ། །ཏ་ཧ་བ་ལ་ཁཛྫ་ཨཱི། །གཌྷ་མ་ཨ་ཎཱ་བིཛྫ་ཨ་ཨི། །ཧ་ལེ་ཀཱ་ལིཉྩ་ར་པ་ཎི་ཨ་ཨི། །དུ་དྷུ་ར་བཛྫི་ཨ་ཨི། །ཙ་ཨུ་ས་མ་ཀཙྖུ་རཱི་སིཧླ། །ཀཱ་པུ་ར་ལཱ་ཨི་ཨ་ཨི། །མཱ་ལ་ཨི་ཨིནྡྷ་ཎ་སཱ་ལ་ཛཿ ཏ་ཧ་ བྷ་རུ་ཁཱ་ཨི་ཨ་ཨི། །ཕྲ་ཁ་ཎ་ཁ་ཊ་ཀ་རནྟེ། །ཤུདྡྷ་ཨ་ཤུདྡྷ་ཎ་མ་ཎི་ཨ་ཨི། །ནི་རཱཾ་སུ་ཨཾ་གེ་ཙ་ཌཱ་ཝི། །ཏ་ཧ་ཛ་ས་རཱ་ཝ་པ་ཎི་ཨ་ཨི། །མཱ་ལ་ཨ་ཛེ་ཀུནྡུ་རུ་བཱ་ཊྚ་ཨི། །ཌིཎྜི་མ་ཏ་ཧིནྣ་བཛྫི་ཨ་ཨི། །ཞེས་སྦྱར་བའམ། ཡང་ན་དཀྱུས་ལྟར་ཐམས་ཅད་རྫོགས་པའི་མཐར་སྦྱར་བས་ཀྱང་རུང༌། གཞན་ཡང་རྡོ་རྗེའི་གླུ་ཅི་རིགས་བླང༌། དངོས་སམ་ཡིད་ཀྱི་ཕྱག་རྒྱར་སྦྱོར་བའི་བདེ་སྟོང་ལ་མཉམ་པར་བཞག་གོ །དེ་ནས་འདོད་དོན་གསོལ་བ་ནི། སྲས་བཅས་རྒྱལ་བ་ཀུན་འདུས་གྲུབ་པའི་དབང༌། །མགོན་པོ་ཁྱེད་ལ་ཞུ་ཞིང་གསོལ་བ་ནི། །ཕན་བདེའི་འབྱུང་གནས་ཐུབ་བསྟན་དམ་པའི་ཆོས། །ཐོས་བསམ་སྒྲུབ་པས་རྒྱས་པར་མཛད་དུ་གསོལ། །ཐར་པའི་དེད་དཔོན་བསྟན་འཛིན་བཤེས་གཉེན་རྣམས། །སྐུ་ལ་སྙུན་མེད་ཕྲིན་ལས་རབ་རྒྱས་པས། །རྟག་ཏུ་སྡུག་བསྔལ་གྱུར་པའི་འགྲོ་བ་རྣམས། །ཐར་པའི་བདེ་ལ་འགོད་པར་མཛད་དུ་གསོལ། །དམ་ཆོས་སྒྲུབ་ལ་བརྩོན་པ་ཐམས་ཅད་ཀྱིས། །ཟབ་ལམ་བླ་མའི་མོས་གུས་མཐར་ཕྱིན་ནས། །སྤངས་རྟོགས་མཐར་སོན་བླ་མའི་ས་ཐོབ་སྟེ། །གཞན་ཕན་ཚད་མེད་འགྲུབ་པར་མཛད་དུ་གསོལ། །དེ་མ་ཐོབ་ཀྱི་གནས་སྐབས་ཐམས་ཅད་དུའང༌། །བླ་མ་མཆོག་གིས་རྟག་ཏུ་རྗེས་འཛིན་ཅིང༌། །ལུས་དང་ལོངས་སྤྱོད་དགེ་བས་མཉེས་བྱས་ཏེ། ། བརྩེ་བས་བྱིན་རླབས་འཇུག་པར་མཛད་དུ་གསོལ། །གྲུབ་མཆོག་རྣམས་ཀྱི་སྐུ་དང་བདག་གི་ལུས། །དབྱེར་མེད་རྡོ་རྗེའི་སྐུ་རུ་བྱིན་གྱིས་རློབས། །རྣལ་འབྱོར་དབང་ཕྱུག་ཅི་གསུངས་བསྒྲུབ་པ་དང༌། །གསུང་ངག་དབྱེར་མེད་ གསུང་གི་རྡོ་རྗེར་ཤོག །ཐུགས་ཀྱི་གསང་བའི་མཛོད་ཀུན་འཛིན་པ་དང༌། །ཐུགས་ཡིད་དབྱེར་མེད་འདྲེས་པར་བྱིན་གྱིས་རློབས། །བླ་མ་དགེ་བའི་བྱ་བ་ཀུན་བསྒྲུབས་ནས། །མཛད་པ་ཕྲིན་ལས་མཚུངས་པར་བྱིན་གྱིས་རློབས། །དེ་ནས་ལམ་དབང་ཞུ་བའི་ཐོག་མར་ཕུར་ཚུགས་གསོལ་འདེབས་གང་ཤེས་བྱས་པས་ཆོག་མོད། རྒྱ་གར་བའི་གསུང་རྒྱུན་ནི། གྲུབ་ཆེན་བརྒྱད་ཅུ་རྩ་བཞི་ལ། །ཕྱག་འཚལ་སྙིང་ནས་གསོལ་བ་འདེབས། །བདག་གི་སྐྱིད་སྡུག་ཁྱེད་ཀྱིས་མཁྱེན། །ཁྱེད་ལས་སྐྱབས་གཞན་མ་མཆིས་སོ། །ཞེས་ཚར་གང་འགྲུབ་བརྗོད་ཅིང་མོས་གུས་དྲག་ཏུ་བསྐྱེད། དེ་ལྟར་གསོལ་བ་བཏབ་པས། བླ་མ་གྲུབ་ཐོབ་རྣལ་འབྱོར་གྱི་དབང་ཕྱུག་རྣམས་ཀྱི་དཔྲལ་བ་ནས་སྐུའི་བྱིན་རླབས་ཀྱི་རང་བཞིན་གཡོན་རྐྱང་མ་དང་རྗེས་སུ་འབྲེལ་བའི་ཀུན་ད་བྱང་སེམས་དཀར་པོའི་རྒྱུན་བྱུང༌། རང་གི་དཔྲལ་བར་ཐིམ། ལུས་ཀྱི་དྲི་མ་དག །བུམ་པའི་དབང་ཐོབ། སྐུ་རྡོ་རྗེའི་བྱིན་རླབས་ཞུགས། མགྲིན་པ་ནས་གསུང་གི་བྱིན་རླབས་ཀྱི་ངོ་བོ་གཡས་རོ་མ་དང་རྗེས་སུ་འབྲེལ་བའི་རཀྟ་བྱང་སེམས་དམར་པོའི་རྒྱུན་བྱུང༌། རང་གི་མགྲིན་པར་ཐིམ། ངག་གི་དྲི་མ་དག །གསང་བའི་དབང་ཐོབ། གསུང་རྡོ་རྗེའི་བྱིན་རླབས་ཞུགས། སྨིན་མཚམས་ནས་ཐུགས་ཀྱི་བྱིན་རླབས་དབུ་མ་དང་རྗེས་སུ་འབྲེལ་བའི་ཁུ་ཁྲག་འདྲེས་པའི་བྱང་སེམས་བྱོན། རང་གི་སྨིན་མཚམས་སུ་ཐིམ། ཡིད་ཀྱི་དྲི་མ་དག །ཤེས་རབ་ཡེ་ཤེས་ཀྱི་དབང་ཐོབ། ཐུགས་རྡོ་རྗེའི་བྱིན་རླབས་ཞུགས་ པར་གྱུར། དེ་ནས་གྲུབ་ཆེན་ཕོ་མོ་རྣམས་ཀྱིས་མགྲིན་གཅིག་ཏུ་ངོ་སྤྲོད་ཀྱི་གདམས་པ་སྩལ་བར་གྱུར། ཡེ་ཤེས་འདི་ནི་ཆེས་ཕྲ་ཞིང༌། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་ཀྱི་ཕ་ནི་ཁྱོད་ཉིད་དོ། །གཞི་ནས་མ་བཅོས་ཡེ་ནས་ལྷུན་གྲུབ་ལ། །ཐ་མལ་རང་ལུགས་ཆེན་པོར་བཞག་པ་ན། །སྐྱེ་འཆི་མེད་པ་ནམ་མཁའི་ཀློང་ཡངས་སུ། །འཕོ་འགྱུར་མེད་པ་ཆོས་སྐུའི་ལུས་མཐོང་འགྱུར། །དེ་ལྟར་རྡོ་རྗེའི་ཚིག་ཏུ་རྩལ་ཐོབ་ནས། །བསམ་མེད་ངང་དུ་ཅུང་ཟད་གློད་དེར་བཞག །མ་བཅོས་སོ་མ་རང་ཤར་ལྷན་ནེ་བ། །ལྷུན་གྲུབ་འབད་རྩོལ་མེད་པའི་ངང་དུ་བཏང༌། །ཞེས་པས་གསལ་བཏབ་ལ་ཅུང་ཟད་མཉམ་པར་བཞག །དེས་སྒོ་གསུམ་འཕོ་བའི་དྲི་མ་དག །དབང་བཞི་པ་ཐོབ། ཡེ་ཤེས་རྡོ་རྗེའི་བྱིན་རླབས་རྒྱུད་ལ་ཞུགས་པར་གྱུར། ནོངས་བཤགས་ནི། བདག་ནི་མི་ཤེས་བག་མེད་དབང་གྱུར་པས། །མི་རིགས་ཉེས་པའི་ཚོགས་རྣམས་གང་བགྱིས་པ། །བརྩེ་ལྡན་ཁྱེད་ཀྱི་སྤྱན་སྔར་བཤགས་པར་བགྱི། །ཐུགས་རྗེའི་རང་བཞིན་ཅན་གྱིས་བཟོད་པར་གསོལ། །ཡིག་བརྒྱ་ལན་གསུམ་བརྗོད། སླར་ཡང་མོས་གུས་དྲག་ཏུ་བསྐྱེད་ལ། སྐྱབས་མཆོག་ཁྱེད་ནི་འགྲོ་བའི་དོན་རབ་མཛད། །ཆོས་ཀྱི་སྐུ་ལ་འགྱུར་བ་མི་མངའ་ཡང༌། །གཟུགས་སྐུ་བདག་གི་ལུས་ལ་རབ་བསྐྱོད་ནས། །བརྩེ་བ་ཆེན་པོས་བྱིན་གྱིས་བརླབ་ཏུ་གསོལ། །ཞེས་གསོལ་བ་བཏབ་པས་འཁོར་གྱི་ལྷ་ཚོགས་ཐམས་ཅད་བླ་མའི་དཀྱིལ་འཁོར་ལ་ཐིམ། གྲུབ་ཐོབ་ ཕོ་མོ་ཐམས་ཅད་གཙོ་བོ་རྡོ་རྗེ་འཆང་ལ་ཐིམ། དེ་ཉིད་འོད་ཕུང་གི་རྣམ་པར་ལྟེམ་གྱིས་ཞུ་ནས་ངང་ལ་སིབ་ཀྱིས་ཐིམ་པས་སྐུ་གསུང་ཐུགས་ཀྱི་བྱིན་རླབས་མ་ལུས་པ་སྤར་བཏབ་པ་བཞིན་དུ་རྒྱུད་ལ་འཕོས་པར་གྱུར། ཞེས་མོས་ལ་ཆོས་ཉིད་ཀྱི་རང་ངོ་བསྐྱང༌། སྨོན་ལམ་གདབ་པ་ནི། སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང༌། །སྙིང་རྗེ་ཆེ་ཞིང་བླ་མ་ལ་གུས་བརྟན། །རྡོ་རྗེ་ཐེག་པའི་དམ་ཚིག་ལ་གནས་ཤོག །རྡོ་རྗེ་དྲིལ་བུ་ལ་སོགས་རྟག་ཏུ་འཆང༌། །ཟབ་དང་རྒྱ་ཆེའི་ཆོས་དོན་རྟོགས་པ་དང༌། །གོ་ཀུ་ཤཱུ་ཀྲ་ལ་སོགས་རྟག་བཟའ་ཞིང༌། །མཐར་ཐུག་བདེ་ཆེན་འགྲུབ་པའི་སྐལ་ལྡན་ཤོག །བདེ་གཤེགས་སྤྱན་སྔར་གནས་གསུམ་མཁའ་འགྲོ་ཡིས། །དམ་བཅས་སྲུང་ཞིང་དངོས་གྲུབ་མཆོག་སྩོལ་བར། །ཐུགས་དམ་བཅས་ཤིང་རྟག་སྲུང་དངོས་གྲུབ་ནི། །རྣམ་གསུམ་ཚེ་འདི་ཉིད་ལ་ཐོབ་པར་ཤོག །ཅེས་དང༌། དཔའ་བོ་གཉིས་མེད་མཆོད་པས་སྐྱེ་བ་འདི་ལ་ནི༑ ༑སྒྲིབ་པ་ཟད་དང་ཕྱག་རྒྱའི་དངོས་གྲུབ་འགྱུར་བར་ཤོག །སྐྱེ་བ་ཀུན་ཏུ་མཆོག་ཏུ་བདེ་བར་གཤེགས་པ་ཡི། །གྲུབ་པའི་འཇིག་རྟེན་དབུས་སུ་འགྲོ་བ་ཉིད་གྱུར་ཅིག །ཞིང་དང་ཉེ་བའི་ཞིང་སོགས་བཅུ་གཉིས་སུ། ། དམ་ཚིག་བརྡའ་དང་བདེ་སྤྱོད་རོལ་པ་ཡིས། །བུ་བཞིན་དགོངས་ནས་བདག་སྒྲིབ་དག་གྱུར་ཏེ། །བདེ་བ་མཆོག་གི་ས་ལ་འགོད་པར་ཤོག །བླ་མའི་ཞབས་ལ་རྟག་ཏུ་འདུད་བྱེད་ཅིང༌། །རྡོ་རྗེ་དབང་མོའི་ཞབས་དྲན་གྱུར་ནས་ཀྱང༌། །བཙུན་མོའི་ཤཱུ་ཀྲའི་ཚོགས་ལ་རྟག་སྤྱོད་ཅིང༌། །གསང་བའི་པདྨོར་རོལ་ཞིང་མཆོད་བྱེད་ཤོག །དཔལ་ལྡན་དཔའ་བོ་དཔའ་མོ་ཉི་ཤུ་བཞིའི། །ཞལ་མཐོང་དེ་ཡི་ངོ་བོར་བདག་གྱུར་ཏེ། །འགྲོ་བ་བདེ་བ་དམ་པས་འཕོངས་རྣམས་ཀྱི། །ཉེར་འཚོ་རིན་ཆེན་ལྟ་བུར་བདག་གྱུར་ཅིག །རྣམ་པ་མང་པོའི་བསོད་ནམས་འདི་དག་ཀྱང༌། །བདག་གཞན་དགེ་བ་མཆོག་ནི་བསྐྱེད་པའི་གཞི། །དེ་ཉིད་གསལ་བྱེད་རྨོངས་པ་རབ་འཇོམས་པ༑ ༑འགྲོ་ལ་མི་འཇིགས་སྟེར་བའི་མངའ་བདག་ཤོག །རྣམ་པར་རྟོག་པ་ཀུན་ལས་འདས་པ་ཡིས། །བདེ་ཆེན་འཁོར་ལོ་ཟག་པ་མེད་པའི་དབྱིངས། །ཨཱ་ལི་ཀཱ་ལི་རྟོག་མེད་སྙོམས་འཇུག་མར། །བསགས་པའི་དགེ་རྣམས་ཡོངས་སུ་བསྔོ་བར་བགྱི། །བདག་གི་བསོད་ནམས་འདི་ཡིས་ཡང་ཡང་སྐྱེ་བའི་རིམ་པ་རྣམས་སུ་ཡང༌། །ཡུན་རིང་འགྲོ་བའི་དོན་བསྒྲུབ་དོན་ལ་འཇིགས་པ་མེད་པར་དགའ་བ་དང༌། །གཙོ་བོ་སྐུ་ཡི་འོད་ཟེར་ནམ་མཁའ་ཁྱབ་པར་འགྲོ་བས་དབང་བསྐུར་བ། །སྲིད་གསུམ་རྡོ་རྗེ་རོལ་པར་ལྷན་ཅིག་དེ་ཡི་གོ་འཕང་ཐོབ་པར་ཤོག །རྣམ་རྟོག་གཏི་མུག་གྲོང་ཁྱེར་མཐའ་དག་བསལ་ནས་ཧེ་རུ་ཀ་གཙོ་མཁའ་འགྲོ་མའི། །འཁོར་ལོས་ཡོངས་བསྐོར་རྒྱལ་བ་བླ་མེད་ཡེ་ཤེས་འབྱུང་གནས་ཐར་པ་དམ་པའི་གྲོང༌། །སྦྱིན་པ་ལ་སོགས་རྣམས་ཀྱིས་འགྲོ་བའི་ཡིད་ལ་རེ་བ་ཡང་དག་རྫོགས་པའི་མཆོག །འདི་ནི་ཤིན་ཏུ་བརྩེ་བ་ཆེ་ལྡན་འཕགས་པའི་དཔལ་འབྱོར་རྟག་པར་ མྱོང་བར་ཤོག །ཅེས་ཐུན་མོང་མ་ཡིན་པའི་སྨོན་ལམ་རྒྱ་ཆེར་གདབ། དེ་ནས་བཀྲ་ཤིས་ནི། རྒྱལ་མཚན་རྩེ་མོ་སོགས་དང༌། ཕུན་སུམ་ཚོགས་པ་མངའ་བ་སོགས་རྒྱལ་བའི་བཀའ་ལས་འབྱུང་བ་ཞིག་གིས་ཐོག་དྲངས་ཏེ་འབྲེལ་ཆགས་པར་བརྗོད། མཐར། ཉིན་མོ་བདེ་ ལེགས་སོགས་དང༌། དཔལ་ལྡན་བླ་མས་དེང་འདིར་སྩོལ། །སངས་རྒྱས་རྣམས་ཀྱིས་དེང་འདིར་སྩོལ། །དེ་བཞིན་དུ་འདོན་པ་སྤོས་ལ། དམ་ཆོས་ཚོགས་ཀྱིས༴ དགེ་འདུན་རྣམས་ཀྱིས༴ མེས་པོ་ཡིས་ཀྱང༴ དབང་པོ་ཡིས་ཀྱང༴ འཇིག་རྟེན་སྐྱོང་བས༴ དཀར་ཕྱོགས་སྐྱོང་བས་དེང་འདིར་སྩོལ། །ཞེས་སོགས་བྱ་ཞིང་མེ་ཏོག་འཐོར། རོལ་མོའི་སྒྲ་འཇམ་ལ་སྙན་པར་བསྒྲག་གོ །གསང་སྔགས་སྟོན་པ་རྡོ་རྗེ་སློབ་དཔོན་ཉིད། །མཆོད་ལས་བསོད་ནམས་ཕུང་པོ་ཚད་མེད་པ། །རྒྱུད་རྣམས་ཀུན་ལས་ཆེད་དུ་བསྔགས་པའི་དོན། །གསལ་བར་བརྗོད་འདིར་བློ་ལྡན་ཡི་རང་བྱོས། །སྙིང་ནས་གུས་པས་མཆོད་ཅིང་གསོལ་བཏབ་ན། །གདོན་མི་ཟ་བར་བྱིན་གྱིས་རློབས་འགྱུར་བས། །རྡོ་རྗེ་ཐེག་ལ་ཞུགས་པའི་སྐལ་བཟང་རྣམས། །ཆོས་སྤྱོད་ཀུན་གྱི་མཆོག་འདིར་བརྩོན་པར་རིགས། །བསོད་ནམས་འདི་ཡིས་བདག་དང་འགྲོ་བ་ཀུན༑ ༑ཐོག་མེད་འཁྲུལ་པ་སྐད་ཅིག་ཉིད་ལ་སངས། །ལྷན་སྐྱེས་ཡེ་ཤེས་ཉི་མ་ཁོང་ནས་ཤར། །གྲུབ་མཆོག་རྣམས་དང་དབྱེར་མེད་ཉིད་གྱུར་ཅིག །ཅེས་པ་འདི་ཉིད་ཀུན་མཁྱེན་བླ་མ་རིན་པོ་ཆེ་འཇམ་དབྱངས་མཁྱེན་བརྩེའི་དབང་པོས་བཀའ་སྩལ་ཕེབས་པ་དང༌། རང་ཉིད་ཀྱིས་ཀྱང་འབྲེལ་འཇོག་ཚོགས་ གསོག་གི་ཆ་རྐྱེན་དུ་དམིགས་ཏེ་མཆོད་ཕྲེང་སོགས་ཀྱི་ཚིག་སྦྱོར་ཕལ་མོ་ཆེ་སྔོན་རབས་དམ་པ་རྣམས་ཀྱི་གསུང་བྱིན་རླབས་ཅན་དང་བསྡེབས་ཏེ། ཀུ་སཱ་ལི་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོས་རྫོང་གསར་བཀྲ་ཤིས་ལྷ་རྩེའི་ཆོས་གྲྭར་བཀོད་པ་དགེ་ལེགས་འཕེལ།། །།