DNZ-13-PA-002

Previous Text Back to Volume PageNext Text

Wylie title	zhi byed snga phyi bar gsum gyi dbang chog rnams phyogs gcig tu bsgrigs pa bklags pas grub pa	Rigpe Dorje Publications, 2024
Location	gdams ngag rin po che'i mdzod Volume 13, Text 2, Pages 49-367 (Folios 1a1 to 160a4)
Author	སྨིན་གླིང་ལོ་ཆེན་དྷརྨ་ཤྲཱི་
Citation	Smin gling lo chen d+harma shrI. Zhi byed snga phyi bar gsum gyi dbang chog rnams phyogs gcig tu bsgrigs pa bklags pas grub pa. In Gdams ngag rin po che'i mdzod, Vol. 13: 49-367. Kalimpong: Rigpe Dorje Publications, 2024.	Shechen Publications, 1999
Side notes	Recto: zhi byed dbang chog   Verso: zhi byed skor
More details More details
Genre	Empowerment Ritual - dbang chog - dbang skur
Colophon	།ཞེས་གསུངས་པ་ལ་ངེས་ཤེས་བསྐྱེད་ནས་ཟབ་ཆོས་འདི་དག་དེང་སང་མིང་གི་ལྷག་མ་ཙམ་དུ་གྱུར་པ་གསོ་ཐུབ་ན་ཅི་མ་རུང་སྙམ་པའི་དམ་བཅའ་བརྟན་པོས་རྐྱེན་དབང་དུ་མ་བཏང་བར་དལ་ཁོམས་འབྱོར་བརྡོགས་ཀྱི་སུག་རིས་སུ་རིམ་པར་སྤེལ་བ་ལས། མི་ཟད་པ་མེ་ཁྱིའི་ལོ་ཧོར་ཟླ་དྲུག་པའི་ཡར་ངོའི་ཚེས་དྲུག་གི་སྔ་དྲོ་བུ་མོའི་དུས་སྦྱོར་ཐོག །ཨོ་རྒྱན་སྨིན་གྲོལ་གླིང་གི་ཆོས་གྲྭར་གྲུབ་པར་བགྱིས་པ་སྟེ། ཉིས་བྲིས་མ་ཁོམས་པས་མཚམས་སྦྱོར་དང་ཚིག་ཕྲད་སོགས་འགལ་ཟློས་སུ་གྱུར་ན་དམ་པ་རྣམས་ཀྱིས་བཟོད་པར་མཛོད་ཅིག །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དར་རྒྱས་འཕེལ། ཤུ་བྷ་མསྟུ། ཨིནྡྲ་བྷུ་ཏི་ནཻ་ཀ་པྲཙྪ།།
	zhes gsungs pa la nges shes bskyed nas zab chos 'di dag deng sang ming gi lhag ma tsam du gyur pa gso thub na ci ma rung snyam pa'i dam bca' brtan pos rkyen dbang du ma btang bar dal khoms 'byor brdogs kyi sug ris su rim par spel ba las/_mi zad pa me khyi'i lo hor zla drug pa'i yar ngo'i tshes drug gi snga dro bu mo'i dus sbyor thog_/o rgyan smin grol gling gi chos grwar grub par bgyis pa ste/_nyis bris ma khoms pas mtshams sbyor dang tshig phrad sogs 'gal zlos su gyur na dam pa rnams kyis bzod par mdzod cig_/'dis kyang bstan pa dang sems can la phan pa rgya chen po 'byung bar gyur cig_/dar rgyas 'phel/__shu b+ha mastu/__in+d+ra b+hu ti nai ka prats+tsha//

Tibetan Text

Subtexts

Tsagli

Mandalas

[edit]

༄༅། །ཞི་བྱེད་སྔ་ཕྱི་བར་གསུམ་གྱི་དབང་ཆོག་རྣམས་ཕྱོགས་གཅིག་ཏུ་བསྒྲིགས་པ་བཀླགས་པས་གྲུབ་པ་ཞེས་བྱ་བ་བཞུགས་སོ། །

༄༅། །ༀ་སྭ་སྟི། བཀའ་བཞི་བརྒྱུད་པའི་བླ་མ་དང༌། །དཀྱིལ་འཁོར་ལྷ་ལ་གུས་བཏུད་ནས། །ཞི་བྱེད་བཀའ་བབས་རྣམ་གསུམ་གྱི། །དབང་ཆོག་ངག་འདོན་གསལ་བདེར་འགོད། །དེ་ལ་ཐོག་མར་བཀའ་བབས་དང་པོ་སྒྲོན་མ་རྣམ་པ་གསུམ་གྱི་དབང་ནི། དབེན་ཞིང་ཡིད་དུ་འོང་བའི་གནས་སུ་སྟེགས་བུ་བ་བྱུང་དང་བདུད་རྩིས་ཆག་ཆག་བཏབ་པ་ལ། དཀྱིལ་འཁོར་ལྟེ་བ་ཟླུམ་པོའི་དབུས་སུ་ཆོས་འབྱུང་བསྣོལ་མ། དེའི་ཕྱི་པད་འདབ་བརྒྱད་ཕྱོགས་ཚོན་རྡོ་ར་མེ་རིས་བསྐོར་བ་བྲིས་པའི་དབུས་སུ་མཉྫིའི་ཁར་ཐོད་པ་མཚན་ལྡན་བདུད་རྩིས་གང་བའི་སྟེང་དུ་རྡོ་རྗེ་རྩེ་ལྔ་པ་བཞག །ཤར་དུ་བུམ་པ་མགུལ་ཆིངས་འབྲས་བུ་ཅན་གྱི་ལྗོན་པས་ཁ་བརྒྱན་པའི་ནང་དུ་ལྔ་ཚན་ལྔ་དང་ཆུ་གཙང་བ་དམར་སེར་གྱི་འོ་མ་དང་བཅས་པས་བཀང་བ་གུ་གུལ་གྱི་དུད་པས་བདུག་པ་བཤམ། ལྷོར་དབུ་རྒྱན་ཅོད་པན་དང་བཅས་པ། ནུབ་ཏུ་རྡོ་རྗེ། བྱང་དུ་དྲིལ་བུ་རྣམས་བཀོད། མཆོད་གཏོར་སོགས་ཡོ་བྱད་རྣམས་ཚང་བར་བསགས་ལ། སྒྲུབ་མཆོད་ནི། ཁྲུས་བྱས་སྟན་ལ་འཁོད་དེ། རང་ཉིད་སྐད་ཅིག་གིས་འཇམ་དཔལ་སྨྲ་སེང་དུ་གསལ་བའི་ཐུགས་ཀའི་དྷཱིཿ ལས་འོད་ཟེར་འཕྲོས་པས་འཕགས་པའི་ཚོགས་ཐམས་ཅད་མདུན་གྱི་ནམ་མཁར་སད་པར་བསམས་ལ། ཐལ་མོ་སྦྱར་ཏེ། ན་མོ་བུདྡྷ་ཡ། ན་མོ་དྷརྨཱ་ཡ༑ ན་མཿ སཾ་གྷཱ་ཡ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །མཆོད་པ་བླ་ན་ཡོད་པ་དང༌། །མཆོད་པ་བླ་ན་མེད་པས་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང༌། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །ལུས་དབུལ་དགེ་བའི་རྩ་བ་བསྔོ། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །སྨོན་པའི་སེམས་དང་རབ་ལྡན་ཞིང༌། །འཇུག་པ་ཕ་རོལ་ཕྱིན་དྲུག་སྤྱད། །བྱང་ཆུབ་མཆོག་ཏུ་སེམས་བསྐྱེད་པས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང༌། །བཏང་སྙོམས་མཆོག་ལ་གནས་པར་ཤོག །ཅེས་ལན་གསུམ་གྱིས་བསོད་ནམས་ཀྱི་ཚོགས་བསགས། ༀ་སྭ་བྷཱ་ཝ་བི་ཤུདྡྷོ྅ཧཾ། ཞེས་པས་ཆོས་ཐམས་ཅད་སྟོང་པ་ཉིད་དུ་མོས་པས་ཡེ་ཤེས་ཀྱི་ཚོགས་བསགས། སྟོང་པའི་ངང་ལས་བདག་དང་མདུན་གྱི་དཀྱིལ་འཁོར་དབྱེར་མེད་སྲུང་འཁོར་གཞལ་ཡས་ཁང་མཚན་ཉིད་རྫོགས་པའི་དབུས་སུ་པད་ཉི་ཟླ་བ་སེང་གེ་སྔོན་པའི་སྟེང་དུ་དྷཱིཿ ཡིག་གནས་པ་ལས་འོད་ཟེར་སྤྲོ་བསྡུས་ཤེས་རབ་ཀྱི་འཁོར་ལོ། དེ་ཡོངས་སུ་གྱུར་པ་ལས་འཇམ་དཔལ་སྨྲ་བའི་སེང་གེ་སྐུ་མདོག་དམར་སེར་སེམས་དཔའི་སྐྱིལ་ཀྲུང་ཅན། ཕྱག་གཡས་རལ་གྲི་དང༌། གཡོན་ཨུཏྤལ་སྟེང་དུ་པུསྟི་བསྣམས་པ། དར་དང་རིན་པོ་ཆེས་བརྒྱན་ཅིང་ཟླ་བའི་རྒྱབ་ཡོལ་ཅན་གྱི་སྐུར་གྱུར་པའི་ཐུགས་ཀར་དྷཱིཿ ཡིག་དམར་སེར་འབར་བ་ལས་འོད་ཟེར་འཕྲོས། རང་འདྲའི་ཡེ་ཤེས་པ་བཛྲ་ས་མཱ་ཛཿ ས་སྤྱན་དྲངས་ལ། ༀ་བཛྲ་པུཥྤེ། དྷཱུ་པེ། དཱི་པེ། གནྡྷེ། ནེ་ཝིདྱེ། ཤབྡ་ཧཱུྃ་གིས་མཆོད་ནས། ཛཿ ཧཱུྃ་བྃ་ཧོཿ ས་གཉིས་སུ་མེད་པར་ཐིམ་པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ཡིག་རྣམས་ཀྱིས་རྒྱས་བཏབ་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་ཉིད་དུ་གྱུར། སླར་ཡང་ཐུགས་ཀའི་འོད་ཀྱིས་རིགས་ལྔ་བཛྲ་ས་མཱ་ཛཿ ས་སྤྱན་དྲངས་པའི་ཐུགས་ཀ་ནས་ཡུམ་ལྔ་རིན་པོ་ཆེའི་བུམ་པ་ཐོགས་པས། ༀ་བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ། ཞེས་དབང་བསྐུར་བས་བླ་མའི་ངོ་བོ་རིན་ཆེན་འབྱུང་ལྡན་གྱིས་དབུ་བརྒྱན་པར་གྱུར། མཆོད་གཏོར་རྣམས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ཨཱ་ལས་བདུད་རྩིའི་རང་བཞིན་ཅན་ཧཱུྃ་གིས་ཐིམ་པས་འདོད་ཡོན་ཅིར་ཡང་འཆར་བའི་སྤྲིན་དུ་གྱུར། ༀ་ཨཱཿ ཧཱུྃ། འཇིག་རྟེན་ཁམས་ནི་དཔག་མེད་ན། །མཆོད་པ་བླ་ན་ཡོད་པ་དང༌། །མཆོད་པ་བླ་ན་མེད་པ་ཀུན། །འབུལ་ལོ་བཞེས་ནས་དངོས་གྲུབ་སྩོལ། །ༀ་མཉྫུ་ཤྲཱི་ས་པ་རི་ཝཱ་ར་བཛྲ་པུཥྤེ་པྲ་ཏཱིཙྪ་སྭཱ་ ཧཱ༑ དེ་བཞིན་དུ། དྷཱུ་པེ། དཱི་པེ། གནྡྷེ། ནཻ་ཝིདྱེ། ཤབྡས་མཆོད། ཨ་ཀཱ་རའི་སྔགས་ཀྱིས་གཏོར་མ་ཕུལ་ལ། ཕྱོགས་བཅུར་བཞུགས་པའི་སངས་རྒྱས་ལ། །རྒྱ་ཆེན་སྤྱོད་པ་སྟོན་མཛད་པ། །འགྲོ་བའི་མགོན་པོ་སྟོན་པ་པོ། །འཇམ་དཔལ་དབྱངས་ལ་ཕྱག་འཚལ་བསྟོད། །ཅེས་བསྟོད། བཟླས་པ་ནི། སྙིང་གར་འཁོར་ལོ་དཀར་པོ་རྩིབས་དྲུག་པའི་ལྟེ་བར་ཟླ་བ་ལ་གནས་པའི་དྷཱིཿ ཡིག་གི་སྟེང་དུ་མཱུྃ་ལས་རལ་གྲི་ཚོན་གང་བ་ལ་སྔགས་ཕྲེང་གིས་བསྐོར་བ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་སངས་རྒྱས་ཐམས་ཅད་ཀྱི་བྱིན་རླབས་བདག་ལ་ཞུགས་པས་ལས་ཉོན་སྡིག་སྒྲིབ་སྦྱངས་ནས་སེམས་ཅན་མ་རིག་པའི་འཆིང་བ་ལས་ གྲོལ་བར་བསམས་ལ། ན་མོ་རཏྣ་ཏྲ་ཡཱ་ཡ། ན་མོ་མཉྫུ་ནཱ་ཐཱ་ཡ། ན་མོ་ཡ་མཱནྟ་ཀཱ་ཡ། ཏདྱ་ཐཱ། ༀ་ཝཱ་གི་ཤྭ་རི་མུཾ། མཉྫུ་གྷོ་ཥ། བོ་དྷི་ས་ཧོ་ཧ་རི་ནཱི་སྭཱ་ཧཱ། ཞེས་པ་ཅི་ནུས་བཟླ། དེ་ནས། སྟོང་པའི་ངང་ལས་བུམ་པ་རིན་པོ་ཆེ་ལས་ འཇམ་དཔལ་སྨྲ་བའི་སེང་གེར་གསལ་བར་གྱུར། ཐུགས་ཀའི་དྷཱིཿ ལས་འོད་ཟེར་འཕྲོས་པས་ཡེ་ཤེས་པ་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ ས་སྤྱན་དྲངས་ཤིང་བསྟིམ། བདག་གི་ཐུགས་ཀའི་སྔགས་འོད་ཀྱིས་བུམ་ནང་གི་ལྷ་ཡི་ཐུགས་རྒྱུད་བསྐུལ་བས་སྐུ་ལས་བདུད་རྩིའི་རྒྱུན་བབ་པར་མོས་ལ་གཟུངས་ཐག་ནས་འཇུས་ཏེ་གཟུངས་བཟླ། ༀ་ཨཱཿ ཧཱུྃ། ཞེས་པས། ལྷ་བདུད་རྩིར་ཞུ་བས་བུམ་པ་གང་བར་བསམ། ཡང༌། མདུན་གྱི་བདུད་རྩིའི་ཐོད་པ་མི་དམིགས་པ་ཧཱུྃ་གིས་མཚན་པ་ཡོངས་སུ་གྱུར་པ་ལས་འཇམ་དཔལ་གཤིན་རྗེ་གཤེད་མཐིང་ནག་དབྱུག་ཐོ་དང་སྡིགས་མཛུབ་མཛད་པ་དུར་ཁྲོད་ཀྱི་ཆས་ཅན་ཡུམ་རྡོ་རྗེ་ཕག་མོ་དང་རོལ་པའི་སྐུར་གྱུར། ཡེ་ཤེས་པ་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ རང་གི་ཐུགས་ཀའི་འོད་ཀྱིས་བསྐུལ་བས་ལྷ་ཡབ་ཡུམ་རྗེས་ཆགས་ཀྱི་སྦྱོར་བའི་མཁའ་གསང་ལས་བདུད་རྩིའི་རྒྱུན་བབས་པས་ཐོད་པ་གང་བར་མོས་ལ། ༀ་ཧྲཱི་ཥྚིཿ ཝིཿ ཀྲ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་སརྦ་བུདྡྷ་ཌཱ་ཀི་ནཱི་ཡཻ། ༀ་བཛྲ་བཻ་རོ་ཙ་ནཱི་ཡཻ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་མཐར་འབྲུ་གསུམ་གྱིས། ལྷ་ཞུ་བ་ཡེ་ཤེས་ཀྱི་བདུད་རྩིར་འཁྱིལ་བར་གྱུར། དཀྱིལ་འཁོར་དབང་རྫས་དང་བཅས་པའི་སྟེང་གི་ནམ་མཁའ་ལ་དུས་གསུམ་གྱི་བདེ་གཤེགས་མཁའ་འགྲོའི་ཚོགས་དང་བཅས་པ་མངོན་སུམ་དུ་སད་པ་ལ། ༀ་བཛྲ་པུཥྤེ་ནས་ཤབྡ་ཧཱུྃ་གི་བར་གྱིས་མཆོད། དེ་ནས་སློབ་མ་རྣམས་འབྲུ་གསུམ་བཟླས་པའི་དྲི་ཆུའི་ཁྲུས་དང༌། ཕྱག་བྱས་གྲལ་དུ་འཁོད་པ་ལ། སེམས་བསྐྱེད་དང་ཆོས་བཤད་ཅི་རིགས་པ་ སྔོན་དུ་འགྲོ་བ་དང༌། རྗེ་བཙུན་མི་ཕམ་མགོན་པོས། འགྲོ་བ་སྡུག་བསྔལ་གདུངས་པ་ལ། །ཞི་བྱེད་བསིལ་ལྡན་དྲི་མེད་བཤད། །ཅེས་གསུངས་པ་ལྟར། བྱེད་ལས་ལ་མིང་དུ་བཏགས་པ་སྤྱི་མིང་སྒོས་སུ་ཐོབ་པ་དམ་ཆོས་སྡུག་བསྔལ་ཞི་བྱེད་ལ་བཀའ་བབས་གསུམ་ལས། འདིར་བཀའ་བབས་དང་པོ་རྗེ་བཙུན་གྱིས་ཁ་ཆེ་ཛྙཱ་ན་གུ་ཧྱ་ལ་སྩལ་བ་སྒྲོན་མ་རྣམ་པ་གསུམ་གྱི་དབང་བསྐུར་བ་ལ་སློབ་དཔོན་གྱི་བྱ་བ་གྲུབ་ནས། ད་སློབ་མའི་བྱ་བ་ཐོག་མར་མཎྜལ་འབུལ་བ་ཡིན་ཏེ་མཎྜལ་ཕྱིས་ཏེ། བཛྲ་རེ་ཥེ་ཧཱུྃ་གིས་བརྐྱང་ནུལ་བྱ། དེ་ནས་མེ་ཏོག་ཚོམ་བུ་ལྔ། ན་མོ་རཏྣ་ཏྲ་ཡཱ་ཡ། ན་མོ་བོ་དྷི་ས་ཏྭཱ་ཡ། ན་མོ་མཉྫུ་ཤྲཱི་ཡེ། ན་མོ་སྭཱ་མི་གུ་རུ་བེ། ན་མོ་བཛྲ་ཌཱ་ཀི་ནཱི་ཡེ། ཞེས་བཀོད་ལ། ཀྱེ་དམ་པ་སྐྱེས་མཆོག་བདག་ལ་དགོངས་སུ་གསོལ། དབང་ཟབ་མོ་འདི་ཞུ་བའི་དོན་དུ་བདག་གི་མཎྜལ་དམ་པ་འདི་མཆོད་པར་བཞེས་ཤིག །ༀ་མཎྜལ་པུཥྤེ་པཱུ་ཛ་སྭཱ་ཧཱ། ཞེས་དབུལ། དེ་ནས་སློབ་དཔོན་གྱིས་དཀྱིལ་འཁོར་གྱི་ལྷ་ལ་མཆོད་པ་ལྔ་ཕུལ་ནས། ཐལ་མོ་སྦྱར་ཏེ། རྡོ་རྗེ་སློབ་དཔོན་བདག་ཉིད་ཀྱིས། །སློབ་མ་རྣམས་ལ་ཕན་ཕྱིར་དང༌། །ཁྱེད་རྣམས་ལ་ཡང་མཆོད་པའི་ཕྱིར། །དབང་རྣམས་རབ་ཏུ་བསྐུར་བར་འཚལ། །ཀུན་མཁྱེན་རྣམས་ཀྱིས་གནང་བར་མཛོད། །ཅེས་གསོལ་བས་གནང་བ་བྱིན་པར་བསམས་ལ། གུ་རུས། བདེ་བར་འདོད་པ་སུ་ཞིག་ཡིན། །ཞེས་པའི་ལན་དུ་བུས། སྐལ་ལྡན་བདེ་ཆེན་བདག་ཅག་ལགས། །གུ་རུས། དམ་ཚིག་སྡོམ་པ་སྲུང་ནུས་སམ། ། བུས༑ ནུས་ལགས་སོ། །དེ་ནས་རྒྱུད་དག་པར་བྱ་བའི་ཕྱིར་ཚོགས་ཞིང་རྣམས་མཁའ་ཁྱབ་ཏུ་མོས་ལ་ཐལ་མོ་སྦྱར་ཏེ་འདི་སྐད་བརྗོད་དུ་གཞུག །ན་མོ་བུདྡྷ་ཡ། ན་མོ་དྷརྨཱ་ཡ། ན་མོ་སངྒྷཱ་ཡ། དཀོན་མཆོག་གསུམ་ལ་ཕྱག་འཚལ་ལོ༑ ༑དཀོན་མཆོག་གསུམ་ལ་སྐྱབས་སུ་མཆི། །མཆོད་པ་བླ་ན་ཡོད་པ་དང༌། །མཆོད་པ་བླ་ན་མེད་པས་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང༌། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །ལུས་འབུལ་དགེ་བའི་རྩ་བ་བསྔོ། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །སྨོན་པའི་སེམས་དང་རབ་ལྡན་ཞིང༌། །འཇུག་པ་ཕ་རོལ་ཕྱིན་དྲུག་སྤྱད། །བྱང་ཆུབ་མཆོག་ཏུ་སེམས་བསྐྱེད་པས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ། དེ་ནས་དམ་ཚིག་དང་སྡོམ་པ་བཟུང་སྙམ་པས། སྲས་བཅས་རྒྱལ་བ་མ་ལུས་དང༌། །སློབ་དཔོན་བདག་ལ་དགོངས་སུ་གསོལ། །བདག་གིས་དེང་ནས་བྱང་ཆུབ་བར། །གསང་བ་སྔགས་ཀྱི་དམ་ཚིག་ནི། །བདེ་གཤེགས་རིགས་ལྔའི་སྡོམ་པ་དང༌། །བཅུ་བཞིར་ཕྱེ་བའི་ལྟུང་བ་དང༌། །ཡན་ལག་ཉེས་པ་ཐམས་ཅད་བསྲུང༌། ། ཞེས་ལན་གསུམ། དེ་ནས་སློབ་བུ་མི་དམིགས་པ་ལས་གཤིན་རྗེ་གཤེད་ཡབ་ཡུམ་གྱི་སྐུར་གྱུར། དྲི་ཆུའི་ཐིག་ལེས་བུའི་གནས་གསུམ་དུ་འབྲུ་གསུམ་བརྗོད་དེ་བྱིན་གྱིས་བརླབས་པས། སྤྱི་མགྲིན་སྙིང་གར་ༀ་ཨཱཿ ཧཱུྃ་གིས་མཚན་པས་རྡོ་རྗེ་ གསུམ་དུ་བྱིན་གྱིས་བརླབས། སླར་ཡང་ལྟེ་བར་ༀ་བྃ་དམར་པོ། སྙིང་གར་ཧྃ་ཡྃ་སྔོན་པོ། ཁར་ཧྲཱ་མྃ་དཀར་པོ། དཔྲལ་བར་ཧྲ་ཧྲ་སེར་པོ། སྤྱི་བོར་ཧཱུྃ་ཧཱུྃ་ལྗང་གུ། ཡན་ལག་ལ་ཕཊ་ཕཊ་དུད་ཁ་རྣམས་ཀྱིས་མཚན་པར་བསམ་པས་གོ་བསྒོས་ལ། ཚེ་གཅིག་གིས་འཚང་རྒྱ་བའི་ཐབས་དབང་ཟབ་མོ་བསྐུར་བ་བྱ་ཡིས་རྙེད་པའི་མཆོག་རབ་ཏུ་རྙེད་པར་གྱུར་ཏོ་སྙམ་དུ་སྤྲོ་བ་བསྐྱེད་པར་མཛོད་ཅིག །ཅེས་བརྗོད་དེ་སྟ་གོན་གྱི་དོད་དོ། ། དེ་ནས། ༀ་ཨཱཿ ཧཱུྃ་གིས་མིག་དར་བཅིངས། ཨཱ་ཁཾ་བཱི་ར་ཧཱུྃ་གིས་མེ་ཏོག་གཏད། ཧཱུྃ་ཛཿ ས་དཀྱིལ་འཁོར་དུ་བཅུག་ལ། དམ་ལ་བཞག་པ་ནི། རྡོ་རྗེ་སྤྱི་བོར། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བདུད་རྩི་ༀ་ཨཱཿ ཧཱུྃ་གིས་བྱིན་གྱིས་བརླབས་པ་བླུད་དེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ ཆུ་འདིས་འགྲུབ། །ༀ་སརྦ་པཉྩ་ཨ་མྲྀ་ཏ་ཧཱུྃ། རྡོ་རྗེ་སྤྱི་བོར། དེང་ནས་བརྩམས་ཏེ་བུ་ཁྱོད་ཀྱི། །ཧེ་རུ་ཀ་དཔལ་ང་ཡིན་གྱིས། །གང་ཞིག་ང་ལ་བརྙས་བྱེད་ན། །ཚེ་འཕོས་དམྱལ་བར་ལྟུང་ཏ་རེ། །དེ་ནས་བྱིན་དབབ་པ་ནི། སློབ་མ་རྣམས་ལུས་བསྲང༌། སྤོས་ཀྱིས་བདུག་ཅིང༌། སློབ་དཔོན་འཇམ་དཔལ་སྨྲ་བའི་སེང་གེའི་བདག་ཉིད་རྣམ་པ་རྣལ་འབྱོར་གྱི་དབང་ཕྱུག་ཀ་མ་ལ་ཤཱི་ལར་བསྒོམས་ལ་མོས་གུས་དྲག་ཏུ་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་ དམར་པོ་འབར་ཞིང་འཁྱུག་པ་བྱུང༌། ཁྱེད་རང་གི་སྙིང་གར་ཐིམ་པས་སེམས་ཀྱི་སྡིག་སྒྲིབ་སྦྱངས་ནས་བདེ་བའི་ཡེ་ཤེས་མཆོག་ཏུ་འབར་བར་སྒོམས་ཤིག །ཌཱ་དྲིལ་འཁྲོལ་ཞིང༌། ༀ་སརྦ་ས་ཏྭ་གུ་རུ་སརྦ་ཌཱ་ཀི་ནཱི་ཨཱ་བེ་ཤ་ཡ་ཨ་ཨ། ཞེས་དབབ་ལ། དཀྱིལ་འཁོར་གྱི་སྟེང་གི་བར་སྣང་ལ་ལྟོས་ལ་ཁ་དོག་ཇི་ལྟར་མཐོང་ཞེས་དྲི། དེའི་ཚེ་དཀར་པོར་མཐོང་ན་ཞི་བ་དང༌། སེར་པོས་རྒྱས་པ། དམར་པོས་དབང༌། ལྗང་གུའམ་ནག་པོས་དྲག་པོ། ཁྲ་བོར་མཐོང་ན་ལས་སྣ་ཚོགས་འགྲུབ་བོ་ཞེས་བརྗོད་ལ། སྔར་བཟུང་བའི་མེ་ཏོག་པྲ་ཏཱིཙྪ་བཛྲ་ཧོཿ ཞེས་དཀྱིལ་འཁོར་དུ་དོར་བས། གང་ལ་བབས་པའི་ལྷ་དེས་པྲ་ཏི་གྲྀཧྞ་སརྦ་མ་ཧཱ་བ་ལ། ཞེས་མེ་ཏོག་དེ་སྤྱི་བོར་བཅིངས། བཛྲ་པ་ཤྱ་ཞེས་པས་གདོང་གཡོགས་བསལ་བས་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་མངོན་སུམ་བཞིན་དུ་མཐོང་བའི་མོས་པ་བྱེད་དུ་བཅུག །དེ་ནས་དབང་བསྐུར་བ་དངོས་ནི། དབང་རྫས་བུམ་པ་དང་སློབ་བུ་མི་དམིགས་པ་ལས་མི་བསྐྱོད་པའི་སྐུར་གྱུར། ཡེ་ཤེས་པ་ཛཿ ཧཱུྃ་བྃ་ཧོཿ དབང་རྫས་ཀྱི་ལྷ་བདུད་རྩིས་གང་བའི་བུམ་པར་གྱུར། དེ་ཉིད་དཀྱིལ་འཁོར་གྱི་ལྷའི་ཐུགས་ཀ་ནས་སྤྲུལ་པའི་དབང་ལྷ་རྣམས་ཀྱིས་ཐོགས་ཏེ་དབང་བསྐུར། ན་མཿ སརྦ་ཏ་ཐཱ་ག་ཏ་ཨཱ་དརྴ་ཛྙཱ་ན་ཨ་བྷི་ཥིཉྩ་མཾ། ཞེས་བུམ་པ་སྤྱི་བོར་བཞག་ཅིང་ཆུ་གཏིགས་པ་དང་འཐུང་དུ་བཅུག་པས། བུའི་ལུས་ངག་ཡིད་གསུམ་མི་བསྐྱོད་པའི་རྡོ་རྗེ་གསུམ་གྱི་བདག་ཉིད་དུ་གྱུར། འོ་ཁྱོད་ལ་ཆུའི་དབང་བསྐུར་བས་ཀུན་གཞིའི་རྣམ་ཤེས་ གནས་གྱུར་པ་མེ་ལོང་ལྟ་བུའི་ཡེ་ཤེས་མངོན་དུ་བྱས་པ་ཡིན་ནོ། །དབང་རྫས་དབུ་རྒྱན་དང༌། སློབ་བུ་རིན་འབྱུང་དུ་གྱུར། ཛཿ ཧཱུྃ་བྃ་ཧོཿ དབང་རྫས་ཀྱི་ལྷ་དབུ་རྒྱན་དུ་གྱུར། དེ་ཉིད་སྤྲུལ་པའི་དབང་ལྷ་རྣམས་ཀྱིས་ཐོགས་ཏེ༑ ༀ་རཏྣ་ཨ་བྷི་ཥིཉྩ་མཾ། ཞེས་མགོ་ལ་བསྐོན་པས། བུའི་སྒོ་གསུམ་རིན་ཆེན་འབྱུང་ལྡན་གྱི་རྡོ་རྗེ་གསུམ་གྱི་བདག་ཉིད་དུ་གྱུར། འོ་ཁྱོད་ལ་དབུ་རྒྱན་གྱི་དབང་བསྐུར་བས་ཉོན་ཡིད་གནས་གྱུར། མཉམ་ཉིད་ཡེ་ཤེས་མངོན་དུ་བྱས་པ་ཡིན་ནོ། །དབང་རྫས་རྡོ་རྗེ་དང་སློབ་བུ་སྣང་མཐའི་སྐུར་གྱུར། ཛཿ ཧཱུྃ་བྃ་ཧོཿ དབང་རྫས་ཀྱི་ལྷ་རྡོ་རྗེར་གྱུར། དེ་ཉིད་སྤྲུལ་པའི་དབང་ལྷ་རྣམས་ཀྱིས་ཐོགས་ཏེ། ༀ་བཛྲ་ས་ཏྭ་ཨ་བྷི་ཥིཉྩ་མཾ། ཞེས་ལག་གཡས་པར་གཏད། བུའི་སྒོ་གསུམ་སྣང་མཐའི་རྡོ་རྗེ་གསུམ་གྱི་བདག་ཉིད་དུ་གྱུར། འོ་ཁྱོད་ལ་རྡོ་རྗེའི་དབང་བསྐུར་བས་ཡིད་ཀྱི་རྣམ་ཤེས་གནས་གྱུར། སོར་རྟོག་ཡེ་ཤེས་མངོན་དུ་བྱས་པ་ཡིན་ནོ། །དབང་རྫས་དྲིལ་བུ་དང་སློབ་བུ་དོན་ཡོད་གྲུབ་པར་གྱུར། ཛཿ ཧཱུྃ་བྃ་ཧོཿ དབང་རྫས་ཀྱི་ལྷ་དྲིལ་བུར་གྱུར། དེ་ཉིད་སྤྲུལ་པའི་ལྷ་རྣམས་ཀྱིས་ཐོགས་ཏེ། ༀ་བཛྲ་ཨ་དྷི་པ་ཏི་ཏྭམ་ཨ་བྷི་ཥིཉྩ་མཾ། ཏིཥྛ་བཛྲ་ས་མཱ་ཡ་སྟཾ། ཞེས་ལག་གཡོན་པར་གཏད་ལ་དཀྲོལ་དུ་བཅུག་པས། བུའི་སྒོ་གསུམ་དོན་ཡོད་གྲུབ་པའི་རྡོ་རྗེ་གསུམ་གྱི་བདག་ཉིད་དུ་གྱུར། འོ་ཁྱོད་ལ་དྲིལ་བུའི་དབང་བསྐུར་བས་སྒོ་ལྔའི་རྣམ་ཤེས་གནས་གྱུར་བྱ་གྲུབ་ཡེ་ཤེས་མངོན་དུ་བྱས་པ་ཡིན་ནོ། །སློབ་བུ་རྣམ་སྣང་གི་སྐུར་གྱུར། ཛཿ ཧཱུྃ་བྃ་ཧོཿ སྤྲུལ་པའི་དབང་ ལྷ་རྣམས་ཀྱིས་རྡོ་རྗེ་དང་བཅས་པའི་དྲིལ་བུ་ཐོགས་ཏེ། ༀ་བཛྲ་ས་ཏྭ་ཨ་བྷི་ཥིཉྩ་མཾ། ༀ་བཛྲ་ཨ་བྷི་ཥེ་ཀ་ཏ། དཔལ་རྡོ་རྗེ་སེམས་དཔའ་ཞེས་བྱ་བའི་དེ་བཞིན་གཤེགས་པའོ། །ཞེས་མིང་གི་དབང་བསྐུར་བས་སྒོ་གསུམ་རྣམ་སྣང་གི་རྡོ་རྗེ་གསུམ་གྱི་བདག་ཉིད་དུ་གྱུར། འོ་ཁྱོད་ལ་མིང་དབང་བསྐུར་བས་མིང་གཞིའི་ཕུང་པོ་གནས་གྱུར་ཆོས་དབྱིངས་ཡེ་ཤེས་མངོན་དུ་བྱས་པ་ཡིན་ནོ། །དེ་ལྟར་དབང་པོ་ལྔ་ཐོབ་པས་མ་རིག་པ་ལྔ་ལས་ལྡོག །རིག་པ་ཡེ་ཤེས་ལྔ་རྒྱུད་ལ་སྐྱེས་པས་ན་རིག་པའི་དབང་ལྔའོ། །དེ་ནས་ཁྱད་པར་ཅན་གྱི་བུམ་པའི་དབང་བཞི་ནི། བུམ་པ་སྔོན་དུ་བསྐྱེད་བཟླས་གྲུབ་པ་ཡིན་ནའང་སློབ་བུའི་ཡུལ་དུ་གསལ་འདེབས་པའི་ཕྱིར། དབང་རྫས་བུམ་པ་ཉིད་འཇམ་དཔལ་སྨྲ་བའི་སེངྒེའི་སྐུར་གྱུར། ཡེ་ཤེས་པ་ཛཿ ཧཱུྃ་བྃ་ཧོཿ ས་སྤྱན་དྲངས་བསྟིམ། ༀ་ཝཱ་གཱི་ཤྭ་རི་མུཾ། ཞེས་ཅུང་ཟད་བཟླས་ནས། སློབ་བུ་འཇམ་དཔལ་སྨྲ་བའི་སེངྒེར་གསལ་བའི་གནས་གསུམ་དུ་ༀ་ཨཱཿ ཧཱུྃ་གིས་སྐུ་གསུང་ཐུགས་རྡོ་རྗེར་བྱིན་གྱིས་བརླབས་པ་ལ། ན་མོ་རཏྣ་ཏྲ་ཡཱ་ཡ། ན་མོ་མཉྫུ་ནཱ་ཐཱ་ཡ། ན་མོ་ཡ་མཱནྟ་ཀ་ཡ། ཏདྱ་ཐཱ། ༀ་ཝཱ་གཱི་ཤྭ་རི་མུཾ། མཉྫུ་གྷོ་ཥ། བོ་དྷི་ས་ཧོ་ཧ་རི་ནི་སྭཱ་ཧཱ། ཞེས་གཟུངས་རིང་གི་ཤམ་བུར། ན་མཿ སརྦ་ཏ་ཐཱ་ག་ཏ་ཨ་བྷི་ཥིཉྩ་མཾ། ཞེས་བཏགས་པ་བཟླས་བཞིན་དུ་བུམ་པ་སྤྱི་བོར་བཞག་ཅིང་ཆུ་གཏིགས་པས། རང་ལུས་ལྷ་སྐུ་གསལ་སྟོང་འཇའ་ཚོན་ལྟ་བུར་གྱུར་པའི་མོས་པ་མཛོད། དེ་ནི་ལུས་ལྷ་རུ་དབང་བསྐུར་བ་སྟེ་བུམ་པའི་དབང་ངོ༌། །ཡང་གཟུངས་རིང་གི་རྗེས་ཟློས་ལན་གསུམ་བྱེད་དུ་བཅུག་ནས་བུམ་ཆུ་བླུད་ལ། ལྷ་ཞུ་བ་བདུད་རྩིའི་ཆུར་གྱུར་པ་མྱོང་བས་ངག་སྔགས་སུ་དབང་བསྐུར་བ་སྟེ་བུམ་པའི་དབང་ངོ༌། །གཟུངས་ལན་གཅིག་བརྗོད་ཅིང་བུམ་ཆུས་ཁྲུས་བྱེད་དུ་བཅུག་པས་སྒྲིབ་པ་ཐམས་ཅད་དག་ནས། ལུས་བདེ་སྟོང་གི་ཡེ་ཤེས་སུ་དབང་བསྐུར་བ་སྟེ་བུམ་པའི་ཤེར་དབང་ངོ༌། །ཁྱེད་རང་རྣམས་ལུས་སེམས་ཁོང་སློད་ལ། རང་ལུས་ལྷ་སྐུར་སྣང་བ་དེ་ཡང་སྣང་ལ་རང་བཞིན་མེད་པ་སྒྱུ་མ་ལྟ་བུ། དེ་ཡི་གཤིས་ཅིར་ཡང་མ་གྲུབ་པས་འོད་གསལ་སྤྲོས་པའི་མཐའ་དང་བྲལ་བ། དེ་ཉིད་ཟུང་དུ་འཇུག་པ་རང་བྱུང་གི་ཤེས་པ་སོ་མ་འདི་ལ་བཟོ་བཅོས་མེད་པར་ལྷན་ནེ་མཉམ་པར་ཞོག་ཅིག །དེ་ནི་ལྷན་ཅིག་སྐྱེས་པའི་ཡེ་ཤེས་ཕྱག་རྒྱ་ཆེན་པོ་སྟེ་བུམ་པའི་དབང་བཞི་པའོ། །དེ་ནས་སྤྱོད་པའི་བརྟུལ་ཞུགས་ཀྱི་དབང་ནི། སློབ་བུ་ཧཱུྃ་ལས་བྱུང་བའི་གཤིན་རྗེ་གཤེད་ཡབ་ཡུམ་གྱི་སྐུར་གྱུར། གྲི་ཐོད། ཁ་ཊྭཱཾ་ཚངས་སྐུད་རྣམས་གཏད། ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་ནི་ཌཱ་མ་རུ༑ ༑རྡོ་རྗེ་ཁ་ཊྭཱཾ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོག་ཅིང༌། །ཚངས་པའི་སྐུད་ཐོགས་རྣལ་འབྱོར་བདག །གྲི་གུག་དང་ནི་ཀ་པཱ་ལ། །དཔའ་བོ་ཆེན་པོས་བླང་བར་གྱིས། །ཁ་ཊྭཱཾ་ག་ལྷའི་སྐུ། ཌཱ་མ་རུ་སྟོང་པ་ཉིད་ཀྱི་སྒྲ། གྲི་ཐོད་ཤེས་རབ་དང་བདེ་བ་ཆེན་པོ། ཚངས་སྐུད་རྣམ་པར་མི་རྟོག་པའི་ངོ་བོ་ཉིད་དོ། །དེ་ནས་རྡོ་རྗེ་སློབ་དཔོན་གྱི་དབང་ནི་དབང་རྫས་རྡོར་དྲིལ་དང༌། སློབ་མ་སྐད་ཅིག་གིས་རིགས་འདུས་གཤིན་རྗེ་གཤེད་ཡབ་ཡུམ་གྱི་ སྐུར་གྱུར། དེ་བཞིན་གཤེགས་པ་ཐམས་ཅད་གཤིན་རྗེ་གཤེད་ཡབ་ཡུམ་གྱི་རྣམ་པར་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ དབང་རྫས་ཀྱི་ལྷ་ཡབ་རྡོ་རྗེ་དང་ཡུམ་དྲིལ་བུར་གྱུར་པ་ལག་ཏུ་གཏད་དེ་གསོར་ཞིང་དཀྲོལ་ནས་འཁྱུད་རྒྱས་འཛིན་དུ་བཅུག་ལ། རྡོ་རྗེ་ཆེ་དང་དྲིལ་ཆེན་ལོངས། །རྡོ་རྗེ་ལ་ཡང་རྡོ་རྗེ་གནས། །དེ་རིང་རྡོ་རྗེ་སློབ་དཔོན་འགྱུར། །སློབ་མའི་ཚོགས་རྣམས་བསྡུ་བར་གྱིས། །རྡོ་རྗེ་ཐུགས། དྲིལ་བུ་གསུང༌། ཕྱག་རྒྱ་སྐུའི་དམ་ཚིག་དང་མི་འབྲལ་བས་སེམས་ཅན་གྱི་དོན་གྱིས་ཤིག །སརྦ་ཏ་ཐཱ་ག་ཏ་ཨ་བྷི་ཥིཉྩ་མཾ། ཞེས་བུམ་པའི་ཆུས་དབང་བསྐུར་བས། རྡོ་རྗེ་སེམས་དཔས་དབུ་བརྒྱན། ཨརྒྷཾ་སོགས་ཀྱིས་མཆོད། སུ་པྲ་ཏིཥྛས་ཁམས་གསུམ་ཆོས་ཀྱི་རྒྱལ་པོར་མངའ་དབུལ་ལོ། །དེ་རྣམས་ཀྱིས་ཕྱི་བུམ་པ་ལ་བརྟེན་ནས་དབང་བཞི་སྟན་ཐོག་གཅིག་ཏུ་བསྐུར་བ་སོང༌། ད་གཉིས་པ་ནང་ཀ་པཱ་ལི་ལ་བརྟེན་པ་གསང་བའི་དབང་བཞི་ཞུ་བའི་ཡོན་དུ་མཎྜལ་འབུལ་དུ་བཅུག །ཁྱེད་རང་ལུས་གནད་ཐལ་མོ་སྦྱོར་ལ་རྩ་བཞི་སྒྲིམས། ངག་གནད་རླུང་ཁ་སྦྱོར་དུ་བཟུང༌། སེམས་གནད་སློབ་དཔོན་གཤིན་རྗེ་གཤེད་དུ་གསལ་བ་ལ། སངས་རྒྱས་དངོས་ཀྱི་འདུ་ཤེས་ཞོག་ལ་མོས་གུས་དྲག་པོ་གྱིས། རང་གི་སྤྱི་བོར་བྱིན་རླབས་ཀྱི་རྩ་བ་བླ་མ་ཀུན་འདུས་ཀ་མ་ལ་ཤཱི་ལ། སྙིང་གར་དངོས་གྲུབ་ཀྱི་རྩ་བ་ཡི་དམ་ཀུན་འདུས་འཇམ་དཔལ་སྨྲ་སེང་། ལྟེ་བར་དམ་ཚིག་གི་རྩ་བ་མཁའ་འགྲོ་ཀུན་འདུས་རྡོ་རྗེ་རྣལ་འབྱོར་མ་རྣམས་བསྒོམས་ལ་མ་ཡེངས་པར་ཞོག །སློབ་དཔོན་གྱིས་ཌཱ་དྲིལ་འཁྲོལ་བཞིན་དུ། ཡེ་ཧུ་ཏེ་ན་གྷ་ན་ར་ཙ། ཧཱུ་ན་ཏེ་ན་གྷ་ན་ར་ཙ། ཧེ་ན་ཧཱུ་ན་གྷ་ན་ར་ཙ། མ་ཧཱ་སུ་ཁ་ཏ་ཨ་ཧཾ། ཞེས་རྡོ་རྗེའི་གླུ་བླང་ཞིང༌། ༀ་བཛྲ་ཛོ་གི་ནཱི་ཨཱ་བེ་ཤ་ཡ་ཨ་ཨ། ཞེས་པས་བྱིན་ཕབ། དེ་ནས་སློབ་དཔོན་གྱིས་དཀྱིལ་འཁོར་དབུས་ཀྱི་རྡོ་རྗེ་དང་ཐོད་པ་བླངས་ལ། རྡོ་རྗེ་ལག་གཡས་པས་ལན་གསུམ་གསོར་ལ། འོ་རྡོ་རྗེ་འདི་ནི་འཇམ་དཔལ་གཤིན་རྗེ་གཤེད་དོ། །ལག་གཡོན་པས་ཐོད་པ་བཟུང་བ་བསྟན་ལ། འོ་ཐོད་པ་འདི་ནི་ཡུམ་རྡོ་རྗེ་ཕག་མའི་རང་བཞིན་ནོ། །རྡོ་རྗེས་ཐོད་པའི་བདུད་རྩི་དཀྲུགས་ལ། འོ་འདི་ནི་ཡབ་ཡུམ་གཉིས་སུ་མེད་པར་སྦྱོར་བ་མཛད་པའི་བརྡའོ། །ཐོད་པའི་བདུད་རྩི་རྡོ་རྗེས་སྦྲེང་ཞིང༌། འོ་འདི་ནི་བྱང་ཆུབ་ཀྱི་སེམས་དཀར་དམར་གཅིག་ཏུ་འདྲེས་པའི་བརྡའོ། ། བདུད་རྩིའི་ཐིགས་པ་བུའི་ལྕེ་ལ་བཞག་སྟེ། འོ་འདི་ནི་ཡབ་ཡུམ་གཉིས་ཀྱི་སྦྱོར་མཚམས་ནས་དཀར་དམར་འདྲེས་པའི་བྱང་ཆུབ་ཀྱི་སེམས་ཏེ་རང་གི་ལྕེ་ཐོག་ཏུ་བབས་པའི་མོས་པ་མཛོད། དེ་ནས་རྡོ་རྗེ་ཀ་པཱ་ལི་དང་བཅས་པ་སྤྱི་བོར་བཞག་ལ༑ དུས་གསུམ་གྱི་བདེ་བར་གཤེགས་པ་ཐམས་ཅད་ཐབས་ཤེས་གཉིས་མེད་ཀྱི་ཞུ་བདེ་ལྷན་ཅིག་སྐྱེས་པར་གྱུར་པ་དེ་ཁྱེད་རང་གི་སྤྱི་བོ་ནས་ཐིམ་པས་རང་ལུས་གཤིན་རྗེ་གཤེད་ཡབ་ཡུམ་གྱི་སྐུར་གྱུར་པར་མོས་ལ༑ བདུད་རྩི་སྤྱི་བོར་གཏིག །དེང་ཕྱིན་ཆད་ལྷ་སྐུ་སྒྱུ་མ་ལྟ་བུ་སྒོམ་པ་དང་མི་འབྲལ་བར་གྱིས་ཤིག །དེ་ནི་ཐོད་པའི་བུམ་དབང་ངོ༌། །གཤིན་རྗེ་གཤེད་ཡབ་ཡུམ་མཉམ་པར་སྦྱར་བའི་སྦྱོར་མཚམས་ནས་བྱང་སེམས་བབས་པས་ལྕེ་ཐོག་ཏུ་མྱོང་བའི་མོས་པ་མཛོད། བདུད་རྩི་འཐུང་དུ་གཞུག །དེང་ཕྱིན་ཆད་ངག་སྔགས་བཟླ་བ་དང་བདུད་རྩི་ལྔ་བརྟེན་པ་དང་མི་འབྲལ་བར་གྱིས་ཤིག །དེ་ནི་ཐོད་པའི་གསང་དབང་ངོ༌། །བདུད་རྩི་འཐོར་བས་ཁྲུས་བྱས་ལ། ༀ་ཨཱཿ ཧཱུྃ་ཞེས་སྒོ་གསུམ་བྱིན་གྱིས་བརླབས་པས། འོད་ཀྱི་རིག་མ་དང་སྙོམས་པར་འཇུག་པའི་འཇམ་དཔལ་ཁྲོ་བའི་སྐུར་གྱུར་པའི་མཁའ་གསང་ཧཱུྃ་དང་ཨ་ལས་རྡོ་རྗེ་དང་པདྨ་སྙོམས་པར་འཇུག་པའི་རྗེས་ཆགས་ཀྱིས་བྱང་སེམས་གནས་བཞིར་ཡས་བབས་ཀྱི་དགའ་བཞི་མྱང་ནས། སླར་ཡང་གྱེན་དུ་གཤེགས་ཏེ་མས་བརྟེན་གྱི་དགའ་བཞིའི་རིམ་པས་ལྷན་སྐྱེས་ཀྱི་ཡེ་ཤེས་བརྟན་པར་བྱས་པ་ནི་ཐོད་པའི་ཤེར་དབང་ངོ༌། །དེ་ཀའི་ངང་ལ་བཟོ་བཅོས་མེད་པར་ལྷན་ནེ་ཞོག་ཅིག །ཧཱུྃ་ལྟོས་ཤིག་རང་གི་སེམས་ལ་ལྟོས། །སེམས་ཉིད་ཅིར་ཡང་གྲུབ་པ་མེད། །གྲུབ་པ་མེད་པའི་སེམས་ཉིད་ལ། །སྣ་ཚོགས་སྣང་བ་ངོ་མཚར་ཆེ། །ཞེས་བརྗོད་དེ། ཐོད་པའི་དབང་བཞི་པའོ༑ ༑དེས་ནང་ཀ་པཱ་ལི་ལ་བརྟེན་པའི་དབང་བཞི་སྟན་ཐོག་གཅིག་ཏུ་བསྐུར་བ་སོང༌། ད་གསུམ་པ་གསང་བ་བྷ་ག་ལ་བརྟེན་པའི་དབང་བཞིའི་དོན་དུ་མཎྜལ་དང༌། བླ་མའི་ཞབས་ལ་ཕྱག་བྱས་པས། བླ་མ་ཡབ་ཡུམ་སྙོམས་པར་ཞུགས་པའི་སྒྲས་དེ་བཞིན་གཤེགས་པ་ཐམས་ཅད་སྤྱན་དྲངས་སློབ་མའི་སྤྱི་བོ་ནས་ཐིམ་པས་རང་ལུས་ལྷ་སྐུ་གསལ་སྟོང་དུ་གྱུར་པ་ནི་བྷ་གའི་བུམ་དབང༌། བླ་མ་ཡབ་ཡུམ་གྱི་བྱང་སེམས་བབས་པ་མགྲིན་པར་ཐིམ་པ་ནི་བྷ་གའི་ གསང་དབང༌། བླ་མའི་ཐུགས་ཀ་ནས་ཕྱག་རྒྱ་མ་གཟུགས་དང་ལང་ཚོ་རྒྱས་པ་ཞིག་བྱུང་བ་རང་ལ་འཁྱུད་ནས། འདུ་ཤེས་གསུམ་ལྡན་གྱིས་སྙོམས་པར་ཞུགས་པས་ཡས་བབས་དང་མས་འཛེགས་ཀྱི་དགའ་བཞིའི་ཡེ་ཤེས་མངོན་དུ་བྱས་པ་ནི་བྷ་གའི་ཤེར་དབང༌། ཡེ་ཤེས་དེ་ངོས་བཟུང་བའི་ངང་དེར་དམིགས་མེད་བསམ་མེད་དུ་རང་དགར་ཞོག །དེ་བྷ་གའི་ཚིག་དབང་ངོ༌། །དེས་གསང་བ་བྷ་ག་ལ་བརྟེན་པའི་དབང་བཞི་སྟན་ཐོག་གཅིག་ཏུ་བསྐུར་བ་སོང༌། ད་བཞི་པ་དེ་ཁོ་ན་ཉིད་ཀྱི་བརྡ་དོན་ལ་བརྟེན་པའི་དབང་བཞིའི་དོན་དུ་མཎྜལ། ཁྱེད་རང་རྣམས་ལུས་སེམས་ཁོང་སློད་ལ་མཚན་བཅས་ལྷ་སྐུའི་ཐིག་ལེ་སྣང་སྟོང༌། མཚན་མེད་ཅི་ལའང་རྟེན་མི་བཅའ་བར་རིག་པ་བཅུད་ལ་བོར་བས་ཉམས་བྱིང་རྨུགས་མེད་པར་གསལ་སིང་ངེ་བ་དེ་བཞི་པའི་བུམ་དབང༌། སྡུག་བསྔལ་མེད་པར་བདེ་ལྷན་ནེ་བ་དེ་བཞི་པའི་གསང་དབང༌། རྟོག་པ་མེད་པར་སྟོང་སང་ངེ་བ་དེ་བཞི་པའི་ཤེར་དབང༌། བདེ་གསལ་མི་རྟོག་པ་གསུམ་ཐ་མི་དད་པའི་དོན་དེ་ཉིད་བཞི་པའི་ཚིག་དབང་དེ་ཁོ་ན་ཉིད་ཀྱི་དབང་ངོ༌། །དེ་ནས་མ་སྐྱེས་པའི་འགྲེང་གཏམ་ཚིག་གཅིག་གདབ་སྟེ། བླ་མས་ཕྱག་མཛུབ་ནམ་མཁའ་ལ་ཀེ་རེ་བྱས་ལ། མ་ཡེངས་ཤིག །བརྡ་ཡོང་ངོ༌། །ཞེས་ལན་གསུམ་བརྗོད་པས། ཅི་ཡང་ཡིད་ལ་མི་བྱེད་པའི་ཤེས་པ་གསལ་སྟོང་གི་ངང་དུ་ཙན་ནེ་གནས་པའི་དུས་ན། ཕྱག་རྒྱ་ཆེན་པོ་རིག་པ་རྩལ་གྱི་དབང་སེམས་ཐོག་ཏུ་བསྐུར་བ་དེ་ཀ་ཡིན་ནོ། །དེ་ནས་བློ་དང་ བྲལ་བ་དེ་སྤྱོད་ལམ་རྣམ་བཞིར་ལམ་དུ་ཁྱེར་བ་ནི། ཉལ་བ་བུམ་དབང་གི་བརྡ་སྟེ། དེའི་གདམས་ངག་གཉིད་དང་བསྲེས་ལ་ལམ་དུ་ཁྱེར་འདུག་པ་ནི་གསང་དབང་གི་བརྡ་སྟེ། དེའི་གདམས་ངག་མཉམ་བཞག་ལ་ངོ་སྤྲད༑ འགྲོ་བ་ཤེས་རབ་ཡེ་ཤེས་ཀྱི་དབང་གི་བརྡ་སྟེ། དེའི་གདམས་ངག་རྗེས་ཐོབ་ལམ་དུ་ཁྱེར། འཆག་པ་ནི་དེ་ཁོ་ན་ཉིད་བཞི་པའི་དབང་གི་བརྡ་སྟེ། དེའི་གདམས་ངག་ཆོས་ཅན་རྟོག་པ་དང༌། ཆོས་ཉིད་བློ་བྲལ་དུ་རོ་སྙོམས་ལམ་དུ་ཁྱེར། དེ་ནི་ཁྱོད་དོན་ཆེན་པོ་དང་ལྡན་ནོ་དགའ་བར་གྱིས་ཤིག །སྙིགས་མའི་རྡོ་རྗེ་འཛིན་པ་དངོས་ཡིན་ནོ་ཞེས་གཟེངས་བསྟོད། དེ་ཕྱིན་ཆད་འཁོར་བ་ལ་མ་ཆགས་པའི་བློ་འདི་ལྟར་སྒྲུབས་ཤིག ༑ཅེས་ལུང་བསྟན། ཉམས་འདི་དང་མ་བྲལ་ན་ཚེ་འདི་ཉིད་ལ་སངས་རྒྱས་ཐོབ་ངེས་སོ། །ཞེས་དབུགས་དབྱུང་ངོ༌། །དེ་ནས། གཙོ་བོས་ཇི་ལྟར་སོགས་དང༌། གཏང་རག་གི་མཎྜལ། དེང་ནས་བརྩམས་ཏེ་སོགས་བྱ། དེས་ཞི་བྱེད་བཀའ་བབས་དང་པོ་སྒྲོན་མ་རྣམ་གསུམ་གྱི་དབང་ཚར་བ་ལགས་པས་རང་གཞན་གྱི་དོན་རྒྱ་ཆེན་པོ་མཛོད། དགེ་བ་བསྔོ། སླར་ཡང་མཆོད་པ་ཁ་གསོས་ལ། མདུན་བསྐྱེད་ལ་མཆོད་བསྟོད། བཟོད་གསོལ། ཡེ་ཤེས་པ་རྟེན་ཡོད་ན་བརྟན་བཞུགས་དང༌། མེད་ན་གཤེགས་སུ་གསོལ། དམ་ཚིག་པ་བསྡུ། བསྔོ་སྨོན་དང་བཀྲ་ཤིས་ཀྱིས་མཐའ་བརྒྱན་པར་བྱའོ།། ༈ །།ༀ་སྭ་སྟི། བཀའ་བབས་དང་པོ་སྒྲོན་མ་རྣམ་གསུམ་གྱི་བྱིན་རླབས་སུ་གྲགས་པ་ལྷ་གསུམ་གྱི་རྗེས་གནང་བྱེད་པར་ འདོད་ན། སྟེགས་བུ་དྲི་བཟང་གིས་ཆག་ཆག་བཏབ་པའི་སྟེང་གཡས་ཕྱོགས་སུ་དཀྱིལ་འཁོར་སྣ་ཚོགས་པདྨ་འདབ་བརྒྱད་ཀྱི་ལྟེ་བར་ཏཱྃ་ལྗང༌། མདུན་གྱི་འདབ་མ་ནས་རིམ་པར། ཏཱ། རེ། ཏུཏ། ཏཱ། རེ། ཏུ་རེ། སྭཱ་ཧཱ་ཞེས་བྲི། དབུས་སུ་དཀྱིལ་འཁོར་འཁོར་ལོ་སེར་པོ་རྩིབས་དྲུག་པའི་ལྟེ་བར་དྷཱིཿ དམར་སེར། རྩིབས་ལ་ༀ་ཝཱ་གི་ཤྭ་རི་མཱུྃ་ཞེས་བྲི། གཡོན་ཕྱོགས་སུ་དཀྱིལ་འཁོར་པདྨ་དཀར་པོ་འདབ་དྲུག་གི་ལྟེ་བར་ཧྲཱིཿ དཀར། འདབ་མར་ༀ་མ་ཎི་པད་མེ་ཧཱུྃ་ཞེས་བྲི། དཀྱིལ་འཁོར་གསུམ་ཀའི་མཐར་རྡོ་ར་དང་མེའི་ར་བས་བསྐོར། དཀར་གཏོར་གསུམ་དང་མཆོད་པ་ཅི་བདེར་བསྒྲིགས། དེ་ནས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། བདག་བསྐྱེད་ནི། ༀ་སྭ་བྷཱ་ཝ་བི་ཤུདྡྷོ྅ཧཾ། ཆོས་ཐམས་ཅད་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དང་ཟླ་བའི་གདན་ལ་ཧཱུྃ་ཡིག་དཀར་པོ་དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས། རང་ཉིད་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ་དར་དང་རིན་པོ་ཆེའི་རྒྱན་ཅན་སེམས་དཔའི་སྐྱིལ་མོ་ཀྲུང་གིས་བཞུགས་པ། དེའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བྃ་ཧོཿ ས་བསྟིམ། སླར་ཡང་ཐུགས་ཀའི་འོད་ཀྱིས་རིགས་ལྔ་སྤྱན་དྲངས། དེ་རྣམས་ཀྱིས་བུམ་པའི་ཆུས་དབང་བསྐུར་བས་བླ་མའི་ངོ་བོ་མི་བསྐྱོད་པས་དབུ་བརྒྱན། རང་གི་ཐུགས་ཀར་ཟླ་བ་ལ་གནས་པའི་ཧཱུྃ་ཡིག་དཀར་པོ་སྔགས་ཕྲེང་གིས་བསྐོར་བ་ལས་འཕྲོས་པའི་ འོད་ཟེར་གྱིས་རང་གཞན་གྱི་སྡིག་སྒྲིབ་ཐམས་ཅད་སྦྱངས་པར་གྱུར། ༀ་བཛྲ་ས་ཏྭ་ཨཱཿ ཞེས་ཅི་ནུས་བཟླས་མཐར། བཅོམ་ལྡན་འདས་དཔལ་རྡོ་རྗེ་སེམས་དཔས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ༀ་བཛྲ་པུཥྤེ་སོགས་ཀྱིས་མཆོད། ཧཱུྃ། ཆོས་སྐུ་སྤྲོས་བྲལ་མཁའ་དབྱིངས་ལས། །ལོངས་སྐུ་འཇའ་ཚོན་ལྟ་བུར་ཤར། །སྤྲུལ་སྐུ་འགྲོ་བའི་དོན་མཛད་པ། །སེམས་དཔའ་རྡོ་རྗེ་ཁྱེད་ལ་བསྟོད། །ཅེས་བསྟོད། དེ་ནས་མདུན་བསྐྱེད་ནི། མཆོད་གཏོར་རྣམས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ཨཱཿ ལས་ཡེ་ཤེས་ཀྱི་བདུད་རྩི་ཧཱུྃ་ལས་མཁའ་ཁྱབ་ཏུ་འཆར་བའི་འདོད་ཡོན་གྱི་སྤྲིན་ཆེན་པོར་གྱུར། ༀ་ཨཱཿ ཧཱུྃ། ལན་གསུམ། མདུན་གྱི་མཎྜལ་གསུམ། སྭ་བྷཱ་ཝས་སྦྱངས། སྟོང་པའི་ངང་ལས་སྲུང་འཁོར་གཞལ་ཡས་ཁང་མཚན་ཉིད་རྫོགས་པ་རེ་རེར་གྱུར་པའི་མཎྜལ་དང་པའི་དབུས་སུ་སྣ་ཚོགས་པདྨའི་སྟེང་དུ་ཏཱྃ་ལས་སྐྱེས་པའི་སྒྲོལ་མ་ལྗང་གུ་ཞལ་གཅིག་ཕྱག་གཉིས་སྐྱིལ་ཀྲུང་ཕྱེད་པ་ཅན། གཡས་མཆོག་སྦྱིན། གཡོན་ཨུཏྤལ་སྔོན་པའི་ཡུ་བ་ཐུགས་ཀར་འཛིན་པ་དར་གྱི་སྟོད་གཡོགས་སྨད་གཡོགས་ཅན་གྱི་ཐུགས་ཀར་པད་ཟླ་ལ་གནས་པའི་ཏཱྃ་ཡིག་ལྗང་གུས་མཚན་པའོ༑ ༑དཀྱིལ་འཁོར་གཉིས་པའི་དབུས་སུ་འཁོར་ལོ་སེར་པོ་རྩིབས་དྲུག་པའི་ལྟེ་བར་དྷཱིཿ ལས་རལ་གྲི་དྷཱིཿ ས་མཚན་པ་ཡོངས་སུ་གྱུར་པ་ལས་འཇམ་དཔལ་སྨྲ་བའི་སེང་གེ་དམར་སེར་སེམས་དཔའི་སྐྱིལ་ཀྲུང་ཅན། གཡས་རལ་གྲི། གཡོན་ཨུཏྤལ་སྟེང་དུ་པུསྟི་འཛིན་པ། ཉི་ཟླ་པདྨ་དང་སེང་གེ་སྔོན་པོའི་སྟེང་ན་བཞུགས་པ། དར་དང་རིན་པོ་ཆེས་བརྒྱན་ཅིང་ཟླ་བའི་རྒྱབ་ཡོལ་ཅན་གྱི་ཐུགས་ཀར་འཁོར་ལོ་སེར་པོ་རྩིབས་དྲུག་པའི་ལྟེ་བར་དྷཱིཿ ཡིག་དམར་སེར་གྱིས་མཚན་པའོ། །དཀྱིལ་འཁོར་གསུམ་པའི་ཆོས་འབྱུང་དབུས་སུ་པད་ཟླའི་སྟེང་དུ་ཧྲཱིཿ ཡོངས་སུ་གྱུར་པ་ལས་འཇིག་རྟེན་དབང་ཕྱུག་དཀར་པོ་ཞལ་གཅིག་ཕྱག་གཉིས་པ༑ གཡས་མཆོག་སྦྱིན། གཡོན་པད་དཀར་གྱི་ཡུ་བ་ཐུགས་ཀར་འཛིན་པ། ཞབས་མཉམ་པའི་སྟབས་ཀྱིས་བཞེངས་པ། དར་དང་རིན་པོ་ཆེས་བརྒྱན་པའི་ཐུགས་ཀར་པདྨ་དཀར་པོ་འདབ་མ་དྲུག་པའི་སྟེང་དུ་ཟླ་བ་ལ་གནས་པའི་ཧྲཱིཿ དཀར་པོས་མཚན་པར་གྱུར། རང་རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལྷ་གསུམ་གྱི་རྣམ་པར་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བྃ་ཧོཿ ས་གཉིས་སུ་མེད་པར་ཐིམ་པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ཡིག་གིས་མཚན་པར་གྱུར། སླར་ཡང་ཐུགས་ཀའི་འོད་ཀྱིས་རིགས་ལྔ་སྤྱན་དྲངས། དེ་རྣམས་ཀྱིས་བུམ་པའི་ཆུས་དབང་བསྐུར་བས་སྒྲོལ་མ། སྨྲ་སེང་འཇམ་དབྱངས་ལ་མི་བསྐྱོད་པའི་ངོ་བོ་རྡོ་རྗེ་རྩེ་ལྔ་པ། སྤྱན་རས་གཟིགས་ལ་འོད་དཔག་མེད་རྣམས་ཀྱིས་དབུ་བརྒྱན་པར་གྱུར། སྒྲོལ་མའི་ཐུགས་ཀའི་ས་བོན་གྱི་མཐར་པད་འདབ་བཅུ་ལ་སྔགས་ཀྱི་ ཡིག་འབྲུ་རེ་རེ་གནས་པ་ལས་འོད་འཕྲོས་པའི་འོད་ཀྱིས་གནས་སྐབས་དང་མཐར་ཐུག་གི་འཇིགས་པ་ཐམས་ཅད་བསལ་བར་བསམས་ལ། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བཟླ། འཇམ་དཔལ་གྱི་ཐུགས་ཀའི་ས་བོན་གྱི་མཐར་རྩིབས་དྲུག་ལ་སྔགས་ཡིག་འབྲུ་རེ་རེ་གནས་པ་ལས་འཕྲོས་པའི་འོད་ཀྱིས་མི་ཤེས་པའི་དྲི་མ་བསལ་བར་བསམས་ལ། ༀ་ཝཱ་གཱི་ཤྭ་རི་མཱུྃ། ཞེས་བཟླ། སྤྱན་རས་གཟིགས་ཀྱི་ཐུགས་ཀའི་འདབ་མ་དྲུག་ལ་གནས་པའི་འོད་ཀྱིས་སྡིག་སྒྲིབ་ཐམས་ཅད་བསལ་བར་བསམས་ལ། ༀ་མ་ཎི་པདྨེ་ཧཱུྃ། ཞེས་བཟླ། མཐར་དཀྱིལ་འཁོར་གསུམ་ལ། ༀ་བཛྲ་པུཥྤེ་པྲ་ཏཱིཙྪ་སྭཱ་ཧཱ། ནས། ཤབྡའི་བར་གྱིས་མཆོད། བསྟོད་པ་ནི། ༀ་སེང་ལྡེང་ནགས་ལ་རབ་གནས་ཤིང༌༑ ༑འགྲོ་ལ་བུ་བཞིན་རྟག་པར་གཟིགས། །འཇིགས་པ་བརྒྱད་ལས་སྐྱོབ་མཛད་པ། །སྒྲོལ་མ་ལ་ནི་ཕྱག་འཚལ་ལོ། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་བརྒྱན་ཞིང༌། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དབྱངས་ལ་ཕྱག་འཚལ་ལོ། །འཁོར་བའི་སྐྱོན་གྱིས་མ་གོས་པས། །འཇིག་རྟེན་གསུམ་གྱི་དཔག་བསམ་ཤིང༌། །པདྨ་དཀར་པོ་གཡོན་ན་བསྣམས། །རིག་སྔགས་འཆང་ལ་ཕྱག་འཚལ་ལོ༑ ༑ཞེས་བསྟོད། གཏོར་མ་སོ་སའི་སྔགས་མཐར། ཨ་ཀཱ་རོ་བཏགས་པས་ཕུལ་ལ། བདག་དང་སེམས་ཅན་ཐམས་ཅད་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ། དེ་ནས་སློབ་མ་རྣམས་ཁྲུས་དང༌། ཕྱག་བྱས་གྲལ་དུ་འཁོད་པ་ལ། སེམས་བསྐྱེད་དང་ཆོས་བཤད་སྔར་ལྟར་ལས། འདིར་བཀའ་བབས་དང་པོ་སྒྲོན་མའི་སྐོར་ལས་ལྷ་གསུམ་གྱི་རྗེས་གནང་ཟབ་མོ་སྒྲུབ་པ་ལ་སློབ་དཔོན་གྱི་བྱ་བ་གྲུབ་ནས། ད་ཁྱེད་རང་གི་བྱ་བ་ཐོག་མར་མཎྜལ་ཕུལ་མཛོད། དེ་ནས་སྙིམ་པ་མེ་ཏོག་དང་བཅས་པའི་ཐལ་མོ་སྦྱོར་ལ་གསོལ་བ་གདབ་པ་འདིའི་རྗེས་ཟློས་མཛོད། ཉོན་མོངས་དྲི་མ་རབ་སྤངས་ཤིང༌། །ཡིད་འོང་གསུང་གི་སྒྲ་སྒྲོགས་པ། །དམ་པ་ཆོས་ཀྱི་རིན་ཆེན་མཛོད། །བླ་མས་བདག་ལ་སྩལ་དུ་གསོལ། །ཞེས་ལན་གསུམ། དེ་ནས་སློབ་མ་སྒྲོལ་མ་སྙིང་གའི་ས་བོན་བཅས་པར་བསྐྱེད་ལ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་དཀྱིལ་འཁོར་དང་པོ་ལ་ཕོག་པས་སྒྲོལ་མ་པད་འདབ་ཀྱི་ཡིག་འབྲུ་དང་བཅས་པ་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱོན། ཁྱེད་རང་གི་སྙིང་ནང་གི་ཏཱྃ་ལ་ཐིམ་པས་སྒྲོལ་མའི་སྐུ་གསུང་ཐུགས་དང་ཁྱེད་རང་གི་ལུས་ངག་ཡིད་གསུམ་གཉིས་མེད་དུ་གྱུར་པའི་མོས་པ་མཛོད། སྟོང་ཉིད་སྙིང་རྗེ་སྒྲོལ་མའི་སྐུ། །བརྗོད་བྲལ་ཕར་ཕྱིན་སྒྲོལ་མའི་གསུང༌། །ཡེ་ཤེས་གསལ་བ་སྒྲོལ་མའི་ཐུགས། །སྒྲུབ་མཆོག་འདི་ལ་གནས་གྱུར་ཅིག །ཅེས་མེ་ཏོག་འཐོར་ཞིང་དྲིལ་བུ་འཁྲོལ། ཡང་སློབ་མ་འཇམ་དཔལ་དུ་གནས་བསྒྱུར་ལ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་མདུན་བསྐྱེད་ཀྱི་དཀྱིལ་འཁོར་གཉིས་པ་ལ་ཕོག་པས་དེ་ལས་འཇམ་དཔལ་སྨྲ་སེང་འཁོར་ལོའི་ཡིག་འབྲུ་དང་བཅས་པ་གཉིས་པ་ཞིག་བྱོན་ཏེ་ཁྱེད་རང་གི་སྙིང་ནང་གི་དྷཱིཿ ལ་ཐིམ་པས་ སྨྲ་སེང་གི་སྐུ་གསུང་ཐུགས་དང་ཁྱེད་རང་གི་ལུས་ངག་ཡིད་གསུམ་དབྱེར་མེད་དུ་གྱུར། སྟོང་ཉིད་སྙིང་རྗེ་སྨྲ་སེང་སྐུ། །བརྗོད་བྲལ་ཕར་ཕྱིན་སྨྲ་སེང་གསུང༌། །ཡེ་ཤེས་གསལ་བ་སྨྲ་སེང་ཐུགས། །སྒྲུབ་མཆོག་འདི་ལ་གནས་གྱུར་ཅིག །ཅེས་མེ་ཏོག་འཐོར་ཞིང་དྲིལ་བུ་འཁྲོལ། ཡང་སློབ་མ་སྤྱན་རས་གཟིགས་སུ་གནས་བསྒྱུར་ལ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་དཀྱིལ་འཁོར་གསུམ་པ་ལ་ཕོག་པས། དེ་ལས་ལོ་ཀེ་ཤྭ་ར་པད་འདབ་ཀྱི་ཡིག་འབྲུ་དང་བཅས་པ་གཉིས་པ་ཞིག་བྱོན་ཏེ་ཁྱེད་རང་གི་སྙིང་ནང་གི་ཧྲཱིཿ ལ་ཐིམ་པས་ལོ་ཀེ་ཤྭ་རའི་སྐུ་གསུང་ཐུགས་དང་ཁྱེད་རང་གི་ལུས་ངག་ཡིད་གསུམ་གཉིས་མེད་དུ་གྱུར། སྟོང་ཉིད་སྙིང་རྗེའི་འཇིག་རྟེན་དབང་ཕྱུག་སྐུ། །བརྗོད་བྲལ་ཕར་ཕྱིན་འཇིག་རྟེན་དབང་ཕྱུག་གསུང༌། །ཡེ་ཤེས་གསལ་བ་འཇིག་རྟེན་དབང་ཕྱུག་ཐུགས། །སྐལ་ལྡན་སྒྲུབ་མཆོག་འདི་ལ་གནས་གྱུར་ཅིག །མེ་ཏོག་འཐོར་ཞིང་དྲིལ་བུ་འཁྲོལ། མདུན་བསྐྱེད་ཀྱི་ལྷ་གསུམ་སོ་སའི་ཞལ་ནས་སྔགས་ཕྲེང་ཐོན་ཁྱེད་རང་ལྷ་དེ་དང་དེའི་རྣམ་པར་གསལ་བའི་ཞལ་དུ་ཞུགས། སྙིང་གའི་ས་བོན་ལ་ཐིམ་པར་བསམས་ལ་ལྷ་གསུམ་གྱི་སྔགས་ལན་གསུམ་བཟླར་གཞུག །སྤྲོ་ན་བཟླས་ལུང་གི་མཐར་མེ་ཏོག་འབུལ་སྦྱིན་བྱ་ཞིང༌། བཅོམ་ལྡན་བདག་གི་སོགས་དང༌། བཅོམ་ལྡན་འདི་ལ་སོགས་ཇི་ལྟར་བྱས་ཀྱང་མི་འགལ་ལོ། །དམ་ཚིག་བཟུང་བ་གཏོང་རག་གི་མཎྜལ་འབུལ་དུ་གཞུག །དེས་སྒྲོལ་མའི་བྱིན་རླབས་ཟབ་མོ་གྲུབ་པ་ལགས་པས་རང་གཞན་གྱི་ དོན་རྒྱ་ཆེན་པོ་མཛོད། དགེ་བ་བསྔོ། ཆོ་གའི་རྗེས་ཆོག་སྤྱི་ལྟར་བྱའོ། །འདི་ནི་ལྷ་གསུམ་གྱི་རྗེས་གནང་ཁོལ་དུ་ཕྱུང་ནས་སོ་སོར་བྱེད་ནའང་ཆོ་གའི་བསྒྱུར་ཚུལ་གྱི་གནད་ཤེས་པར་བྱའོ། །དམ་ཆོས་སྡུག་བསྔལ་ཞི་བྱེད་ཀྱི་དབང་ཆོག་བཀླགས་པས་གྲུབ་པ་ལས། བཀའ་བབས་དང་པའི་དབང་དང་རྗེས་གནང་བཤད་པའི་ལེ་ཚན་ནོ། །དར་རྒྱས་འཕེལ།། ༈ །།ༀ་སྭ་སྟི། བཀའ་བབས་བར་པ་གསུམ་ལས། དང་པོ་རྨ་ཕྱག་རྒྱ་ཆེན་པའི་སྨིན་བྱེད་དབང་གི་ཆོ་ག་ནི། སྟེགས་གཙང་མའི་སྟེང་དཀྱིལ་འཁོར་པདྨ་འདབ་བཞིའམ། ཡང་ན་མཎྜལ་ལ་མེ་ཏོག་གི་ཚོམ་བུ་བཀོད་པའི་དབུས་སུ་མཉྫིའི་ཁར་དཔལ་གྱི་གཏོར་མ་རྒྱན་ཅན་བཤམ། མཐའ་མཆོད་པས་བསྐོར། སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། སྭ་བྷཱ་ཝས་ཆོས་ཐམས་ཅད་སྟོང་པ་ཉིད་དུ་སྦྱངས། སྟོང་པའི་ངང་ལས་འོད་གསལ་མི་ཤིགས་པའི་རང་གདངས་སྲུང་བའི་འཁོར་ལོས་ཡོངས་སུ་བསྐོར་བའི་དབུས་སུ་བདག་དང་མདུན་གྱི་གཏོར་མ་གཉིས་ཀ་པད་ཉི་ཟླ་བ་སེང་གེ་སྔོན་པོ་ལ་གནས་པའི་དྷཱིཿ ལས་རལ་གྲི་དྷཱིཿ ས་མཚན་པ་ཡོངས་སུ་གྱུར་པ་ལས་འཇམ་དཔལ་སྨྲ་བའི་སེང་གེ་སྐུ་མདོག་དམར་སེར་སེམས་དཔའི་སྐྱིལ་ཀྲུང་ཅན། ཕྱག་གཡས་རལ་གྲི་དང༌། གཡོན་ཨུཏྤལ་སྟེང་དུ་པུསྟི་བསྣམས་པ། དར་དང་རིན་པོ་ཆེས་བརྒྱན་ཞིང་ཟླ་བའི་རྒྱབ་ཡོལ་ཅན་གྱི་སྐུར་གྱུར་པའི་ཐུགས་ཀར་དྷཱིཿ ཡིག་དམར་སེར་འབར་བ་ལས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་འཇམ་དཔལ་སྨྲ་བའི་སེང་གེའི་རྣམ་པར་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བྃ་ཧོཿ ས་གཉིས་སུ་མེད་པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ཡིག་རྣམས་ཀྱིས་མཚན་པར་མོས། སླར་ཡང་ཐུགས་ཀའི་འོད་ཀྱིས་དབང་ལྷ་སྤྱན་དྲངས་དབང་བསྐུར་བས་བླ་མའི་ངོ་བོ་རིན་ཆེན་འབྱུང་ལྡན་གྱིས་དབུ་བརྒྱན་པར་གྱུར། སྙིང་གའི་འཁོར་ལོ་རྩིབས་དྲུག་པའི་ལྟེ་བར་ཟླ་བ་ལ་གནས་པའི་དྷཱིཿ ཡིག་སྔགས་ཕྲེང་གིས་བསྐོར་བ་ལས་བདག་མདུན་འོད་ཟེར་སྤྲོ་བསྡུས་ཐུགས་དམ་བསྐུལ་ཞིང་མི་ཤེས་པའི་དྲི་མ་སྦྱངས་པར་བསམས་ལ། ༀ་ཝཱ་གཱི་ཤྭ་རི་མཱུྃ། ཞེས་ཅི་ནུས་བཟླ། མཆོད་པ་བྱིན་རླབས་ལ། ༀ་གུ་རུ་མཉྫུ་ཤྲཱི་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝིདྱེ། ཤབྡ་རྣམས་ཀྱིས་མཆོད། རྩ་སྔགས་ལ། ཨ་ཀཱ་རོ་བཏགས་པས་གཏོར་མ་ཕུལ། གཞོན་ནུའི་ཆ་ལུགས་འཆང་བ་པོ། །ཡེ་ཤེས་སྒྲོན་མེས་རབ་ཏུ་བརྒྱན། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དབྱངས་ལ་ཕྱག་འཚལ་བསྟོད། ། བཅོམ་ལྡན་འདས་རྗེ་བཙུན་སྨྲ་བའི་སེང་གེས་བདག་དང་སེམས་ཅན་ཐམས་ཅན་ཐམས་ཅད་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ་བོ། །དེ་ནས་སློབ་མ་རྣམས་དྲིའི་ཆུའི་ཁྲུས་དང༌། ཕྱག་བྱས་གྲལ་དུ་འཁོད་པ་ལ༑ སེམས་བསྐྱེད་དང་ཆོས་བཤད་པ་ཅི་རིགས་སྔོན་དུ་འགྲོ་བས། དམ་ཆོས་སྡུག་བསྔལ་ཞི་བྱེད་བཀའ་བབས་གསུམ་གྱི་འདིར་བཀའ་བབ་བར་པ། དེ་ལའང་རྨ་ལུགས་ཕྱག་རྒྱ་ཆེན་པའི་གདམས་པ། སོ་ལུགས་སྔགས་བླ་མེད་ཀྱི་ གདམས་པ། ཀཾ་ལུགས་ཕ་རོལ་ཏུ་ཕྱིན་པའི་གདམས་པ། སློབ་བུ་གཞན་ལ་གསུངས་པའི་གདམས་པ་ཁ་འཐོར་བ་རྣམས་སུ་ཡོད་པ་ལས། འདིར་རྨ་ལུགས། དེ་ལའང་སྨིན་བྱེད་ཀྱི་དབང་དང༌། གྲོལ་བྱེད་ཁྲིད་ཀྱི་ཕྱག་ལེན། སྒྲོ་འདོགས་གཅོད་བྱེད་རྒྱབ་སྐྱོར་སྙན་བརྒྱུད་དང་གསུམ་ལས། འདིར་སྨིན་བྱེད་དབང་བསྐུར་བ་སློབ་དཔོན་གྱི་བྱ་བ་སྒྲུབ་མཆོད་གྲུབ་ནས། ད་ཁྱེད་རང་གི་བྱ་བ་ཐོག་མར་མཎྜལ་ཕུལ་མཛོད། དེ་ནས། མདུན་གྱི་ནམ་མཁར་རྩ་བའི་བླ་མ་དང་གཉིས་སུ་མེད་པའི་རྗེ་བཙུན་འཇམ་དཔལ་དབྱངས་སྨྲ་བའི་སེང་གེ་ལ་བརྒྱུད་པའི་བླ་མ་སངས་རྒྱས་དང་བྱང་ཆུབ་སེམས་དཔའ་མཁའ་འགྲོ་དམ་ཅན་རྒྱ་མཚོའི་ཚོགས་ཀྱིས་བསྐོར་བ་མངོན་སུམ་པ་ལྟ་བུར་མོས་ལ་འདིའི་རྗེས་ཟློས་མཛོད། ན་མོ། བླ་མ་དཀོན་མཆོག་ཡི་དམ་ལྷ། །མཁའ་འགྲོ་སྲུང་མའི་ཚོགས་རྣམས་ལ། །དད་པའི་སེམས་ཀྱིས་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་འབུལ། །བདག་གིས་སྡིག་པ་ཅི་བགྱིས་པ། །དེ་དག་ཐམས་ཅད་སོ་སོར་བཤགས། །སེམས་ཅན་དོན་མཛད་རྒྱལ་སྲས་གང༌། །དེ་དག་ཀུན་ལ་རྗེས་ཡི་རང༌། །ཇི་སྲིད་འཁོར་བ་མ་སྟོང་བར། །མྱ་ངན་མི་འདའ་གསོལ་བ་འདེབས། །མགོན་པོ་ཐུགས་རྗེ་ཆེ་ལྡན་རྣམས། །ཆོས་ཀྱི་འཁོར་ལོ་བསྐོར་བར་བསྐུལ། །འགྲོ་ཀུན་བསགས་པའི་དགེ་བ་གང༌། །བྱང་ཆུབ་ཏུ་ནི་བདག་གིས་བསྔོ། །ཞེས་ལན་གསུམ། དེ་ནས་བྱང་ཆུབ་ཀྱི་སེམས་བསྒོམ་པ་ནི། འདི་ལྟར་ཐུགས་ལ་བཞག་འཚལ། མཁའ་ཁྱབ་ཀྱི་སེམས་ཅན་དཔག་ཏུ་མེད་པ་འདི་ཐམས་ཅད་ཀྱིས་རང་ཅག་གི་ཕ་མ་ལན་གྲངས་དཔག་ཏུ་མེད་པ་ཞིག་བྱས། དེ་བྱས་རེས་བཞིན་ཕན་ཚད་མེད་པ་བཏགས། གནོད་པ་ཚད་མེད་པ་ལས་སྐྱོབ་པའི་དྲིན་ཅན་ཤ་སྟག་ཡིན་པ་ལ། འདི་ཐམས་ཅད་ཐབས་ལ་རྨོངས་པས་འདོད་པ་བདེ་བ་འདོད་ནས་སྒྲུབ་པ་སྡུག་བསྔལ་གྱི་རྒྱུ་འབྲས་ཁོ་ན་ལ་སྤྱོད་པ་འདི་རྣམས་སྙིང་རེ་རྗེ། དེ་རྣམས་སྡུག་བསྔལ་ལས་བཏོན་ནས་བདེ་བ་ལ་འགོད་ནུས་པའི་རྫོགས་པའི་སངས་རྒྱས་ཀྱི་གོ་འཕང་བདག་གིས་བསྒྲུབ་པར་བྱ། དེའི་ཆེད་དུ་ཐེག་པ་ཆེན་པོ་གསང་སྔགས་ཀྱི་སྙིང་པོ་དོན་གྱི་མན་ངག་ཕྱག་རྒྱ་ཆེན་པའི་ལམ་ཟབ་མོ་ལ་འཇུག་པར་བྱའོ་སྙམ་དུ་སེམས་བསྐྱེད་གསལ་འདེབས་ཞུ། དེ་དག་སྦྱོར་བའི་ཆོ་གའོ། །དངོས་གཞི་ལ་གཉིས་ཀྱི། དང་པོ་མདོ་ལ་བརྟེན་ཏེ་ཐུན་མོང་གི་སེམས་བསྐྱེད་པ་ལ་གསུམ་ལས། དང་པོ་གསོལ་བ་གདབ་པ་ནི། སྙིམ་པ་མེ་ཏོག་དང་བཅས་པས་ཐལ་མོ་སྦྱར་ནས་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱང་ཕྱིར། །དེ་རིང་བཤད་པའི་རིན་ཆེན་འདི། །གཙོ་བོས་བདག་ལ་བཀའ་དྲིན་སྩོལ། །ཞེས་ལན་གསུམ། གཉིས་པ་སྐྱབས་འགྲོའི་སྡོམ་པ་བླང་བ་ནི། ཐལ་མོ་སྦྱར་ནས་ཙོག་པུའམ་པུས་བཙུགས་ཀྱིས་འདུག་ལ། བདག་གཞན་སེམས་ཅན་ཐམས་ཅད་འཁོར་བའི་སྡུག་བསྔལ་གྱིས་འཇིགས་ནས་སྐྱབས་ཞུ་ན་ཅི་མཛད་ བླ་མ་དཀོན་མཆོག་མཁྱེན་སྙམ་པས་འདིའི་རྗེས་ཟློས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་བཅོམ་ལྡན་འདས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཞི་བ་མྱ་ངན་ལས་འདས་པ་དམ་པའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །འཕགས་པ་ཕྱིར་མི་ལྡོག་པའི་དགེ་འདུན་རྣམས་ལ་སྐྱབས་སུ་མཆིའོ། །བདག་མིང་འདི་ཞེས་བགྱི་བ་དུས་འདི་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ་བྱང་ཆུབ་སེམས་དཔར་སློབ་དཔོན་གྱིས་བཟུང་དུ་གསོལ། ཞེས་ལན་གསུམ། དེས་སྐྱབས་གསུམ་འཛིན་པའི་སེམས་བསྐྱེད་ཀྱི་སྡོམ་པ་ཐོབ་པ་ཡིན་པས་ཐུན་མོང་དང་ཐུན་མོང་མ་ཡིན་པའི་སྐྱབས་འགྲོའི་བསླབ་བྱ་རྣམས་ལ་ཅི་ནུས་ཀྱིས་སློབ་པར་གྱིས་ཤིག །གསུམ་པ་བྱང་སྡོམ་བླང་བ་ནི། བདག་གིས་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་པར་བྱའོ་སྙམ་པས་མེ་ཏོག་ཐོགས་ནས་ཐལ་མོ་སྦྱོར་ལ་འདིའི་རྗེས་ཟློས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། སྐྱེ་བ་འདི་དང༌། སྐྱེ་བ་གཞན་དང་གཞན་དག་ཏུ་སྦྱིན་པའི་རང་བཞིན་དང༌། ཚུལ་ཁྲིམས་ཀྱི་རང་བཞིན་དང༌། སྒོམ་པའི་རང་བཞིན་གྱི་དགེ་བའི་རྩ་བ་བགྱིས་པ་དང༌། བགྱིད་དུ་སྩལ་བ་དང༌། བགྱིས་པ་ལ་རྗེས་སུ་ཡི་རང་གི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང༌། ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོར་སེམས་བསྐྱེད་པར་བགྱིའོ། །སེམས་ཅན་མ་གྲོལ་བ་རྣམས་དགྲོལ་བར་བགྱིའོ། །མ་བསྒྲལ་བ་རྣམས་བསྒྲལ་བར་བགྱིའོ། །དབུགས་མ་ཕྱུངས་པ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་མྱ་ངན་ལས་འདའ་བར་བགྱིའོ། །ཞེས་ལན་གསུམ། དེས་བྱང་སྡོམ་ཐོབ་པ་ཡིན་པས། དེང་ཕྱིན་ཆད་བྱང་ཆུབ་ཀྱི་སེམས་དྲན་པ་དང༌། གོང་ནས་གོང་དུ་འཕེལ་བ་དང༌། སེམས་ཅན་བློས་མི་སྤོང་བ་དང༌༑ ཚོགས་གསོག་པ་ལ་འབད་པ་དང༌། ནག་པའི་ཆོས་བཞི་སྤོང་ཞིང་དཀར་པའི་ཆོས་བཞི་བརྟེན་པ་ལ་སློབ་པར་བྱོས་ཤིག །དེ་ནི་མདོ་ལྟར་ཐུན་མོང་བའི་སེམས་བསྐྱེད་པའོ། །ད་ནི་རྒྱུད་ལ་བརྟེན་པའི་ཐུན་མོང་ མ་ཡིན་པའི་སེམས་བསྐྱེད་པ་ལ་བཞི་ལས། དང་པོ་སྡོམ་པ་བཟུང་བ་ནི། སྔགས་ཀྱི་ཐུན་མོང་མ་ཡིན་པའི་དམ་ཚིག་དང་སྡོམ་པ་རྣམས་བཟུང་སྙམ་པས་འདིའི་རྗེས་ཟློས་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཡང་དག་པར་རྫོགས་པའི་སངས་རྒྱས་མ་ཐོབ་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་དེང་ནས་བཟུང་བར་བགྱི། །སངས་རྒྱས་རྣལ་འབྱོར་སྡོམ་པ་ཡང༌། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་བཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང༌། །ཡང་དག་ཉིད་དུ་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི༑ ༑དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པདྨའི་རིགས་མཆོག་ཆེན་པོ་ལ། །སངས་རྒྱས་ཞལ་ནས་གསུངས་པ་ཡི། །ཕྱི་ནང་གསང་བའི་ཐེག་པ་གསུམ། ། དམ་པའི་ཆོས་ཀྱང་མ་ལུས་བཟུང༌། །ལས་ཀྱི་རིགས་མཆོག་ཆེན་པོ་ལ། །མཆོད་པའི་ལས་རྣམས་བྱ་བ་དང༌། །སྡོམ་པ་རྒྱ་མཚོ་མ་ལུས་ཀུན། །ཤིན་ཏུ་དམ་པར་བཟུང་བར་བགྱི། །ཞེས་ལན་གསུམ། དེས་གསང་སྔགས་ཀྱི་སེམས་བསྐྱེད་ཐོབ་པས། དེང་ཕྱིན་ཆད་རྩ་བ་དང་ཡན་ལག་གི་དམ་ཚིག་ཐམས་ཅད་ལ་བསླབ་པར་བྱོས་ཤིག །དེ་ནས་དབང་བསྐུར་བ་དངོས་ནི་བླ་མ་ལ་ཅི་འབྱོར་པའི་ཡོན་ཕུལ་བར་མོས་ལ་མཎྜལ་ཕུལ་མཛོད། བྱིན་རླབས་ཞུ་བའི་ཕྱིར་གསོལ་བ་གདབ་པ་འདིའི་རྗེས་ཟློས་མཛོད། དུས་འདི་ནས་ནི་བཟུང་ནས་སུ། །བདེ་གཤེགས་ཁྱོད་ཀྱི་བཀའ་བཞིན་དུ། །སེམས་ཅན་དོན་ཀུན་སྒྲུབ་ལགས་ཀྱིས། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་གསོལ་བ་བཏབ་པས། བླ་མ་འཇམ་དཔལ་སྨྲ་སེང་དུ་གསལ་བའི་ཞལ་ནས་བདུད་རྩིའི་ཆུ་རྒྱུན་བྱུང་བ་ཁྱེད་རང་གི་ཚངས་བུག་ནས་ཞུགས་པས་དྲི་མ་ཐམས་ཅད་སྦྱངས་ཤིང་བཀྲུས། ཡང་ཐུགས་ཀ་ནས་འོད་ཟེར་མེའི་རྣམ་པ་འཕྲོས་པས་སེམས་ཅན་གྱི་སྡིག་སྒྲིབ་དང་དེ་ལས་བྱུང་བའི་ལུས་ངག་ཀྱང་བསྲེགས་ཤིང་སྦྱངས་དེ་ཉིད་ཤངས་བུག་ནས་རླུང་བྱུང་བས་གཏོར་ཏེ་སྣང་མེད་སྟོང་པ་ཉིད་ཀྱི་ངང་ལ་དར་ཅིག་བཞག །དེ་ནས་སྐད་ཅིག་གིས་ཁྱེད་རང་འཇམ་དཔལ་སྨྲ་བའི་སེང་གེའི་སྐུར་ལམ་གྱིས་གྱུར་པའི་མོས་པ་མཛོད། དེ་ནས་གཏོར་མ་འདི་ཉིད་ཀྱང་ངོ་བོ་བླ་མ་ལ་རྣམ་པ་འཇམ་དཔལ་སྨྲ་བའི་སེངྒེའི་སྐུར་གྱུར་པ་ ཁྱེད་རང་རྣམས་ཀྱི་སྤྱི་བོར་བྱོན་པའི་སྐུ་ལས་འོད་ཟེར་སྣ་ཚོགས་བྱུང་བ་ལུས་ལ་སིབ་སིབ་ཐིམ་པས་སྐུ་གསུང་ཐུགས་ཀྱི་བྱིན་རླབས་ལུས་ངག་ཡིད་གསུམ་ལ་ཞུགས་པར་བསམ་དུ་བཅུག་ལ་སྤོས་བཏུལ་ཞིང་རོལ་མོའི་སྒྲ་དང་བཅས་པས་གཏོར་མ་སྤྱི་བོར་བཞག་ལ། ན་མོ་རྩ་བརྒྱུད་ཀྱི་བླ་མ་དམ་པ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་བྱང་སེམས་དཔའ་བོ་མཁའ་འགྲོ་དམ་ཅན་རྒྱ་མཚོའི་ཚོགས་སྤྱི་དང༌། ཁྱད་པར་བླ་མ་འཇམ་དཔལ་སྨྲ་བའི་སེངྒེས་རྡོ་རྗེ་སློབ་མ་འདི་ལ་ད་ལྟ་ཉིད་དུ་བྱིན་གྱིས་རློབས་ཤིག །ༀ་ཝཱ་གཱི་ཤྭ་རི་མུཾ། ཛཿ ཧཱུྃ་བྃ་ཧོཿ ཞེས་དབང་བསྐུར་བས་ལུས་ཀྱི་སྡིག་སྒྲིབ་དག་ནས་རང་ལུས་དང་སྣང་བ་ཐམས་ཅད་ལྷ་སྐུ་སྣང་སྟོང་དབྱེར་མེད་མེ་ལོང་ནང་གི་གཟུགས་བརྙན་ལྟ་བུར་གྱུར་པ་ནི་བུམ་པའི་དབང་ངོ༌། །དེ་ནས་གཏོར་མའི་ལྷ་བདེ་བ་ཆེན་པོའི་ངོ་བོར་ཞུ་བར་བསམས་ལ་གཏོར་ཟན་མྱང་བས་ངག་གི་སྡིག་སྒྲིབ་དག་ནས་སེམས་གསལ་སྟོང་དུ་ཤར་བ་ནི་གསང་དབང་ངོ༌། །དེ་ལྟར་མྱང་བའི་བདུད་རྩིས་ལུས་གང་སེམས་ཡིད་ཀྱི་སྡིག་སྒྲིབ་དག་ནས་བདེ་སྟོང་གི་ཡེ་ཤེས་འབར་བ་ནི་ཤེས་རབ་ཡེ་ཤེས་ཀྱི་དབང་ངོ༌། །དེ་ཀའི་ངང་ལ་ལུས་སེམས་ཧྲིལ་གྱིས་བསྒྲིམས་ལ༑ ཕཊ་ཅེས་བརྗོད་པས། རིག་པ་གཞི་ཐོག་ནས་ཡེར་གྱིས་བསླང༌། མིག་མ་འགུལ་བར་ཆེར་གྱིས་ལྟོས། རིག་པ་འདིར་གཏད་ཀྱི་ཡུལ་མེད་པར་སྤོབ་ཀྱིས་ཞོག །གསལ་བརྡོ་བ་ལ་ཤིགས་ཀྱིས་བཤིག་ལ་མཉམ་པར་ ཞོག་མཛོད། དེ་ལྟར་བསྒོམ་བློ་བསམ་གཏན་གྱི་གཉེན་པོ་བཤིག་པས་འདས་པའི་ཤེས་པ་འགགས། མ་འོངས་པའི་ཤེས་པ་མ་སྐྱེས། ད་ལྟར་གྱི་རིག་པ་གཅེར་བུ། སང་ངེ་བ། རྗེན་ནེ་བ། ལྷོད་དེ་བ། རང་དྭངས་སུ་ལྷག་གེ་བ་འདི་རང་བློ་བྲལ་ཕྱག་རྒྱ་ཆེན་པོ་ཡིན་པས། རིག་པ་རྗེན་པ་རྟེན་མེད་དེ་ཀ་ངོས་བཟུང་ལ་སྒོམ་མེད་དུ་ཤིགས་སེ་བོར་ལ་སྐྱོངས་ཤིག །དེས་སྒོ་གསུམ་ཕྲ་བའི་སྒྲིབ་པ་དག་ནས་སེམས་ཉིད་གཤིས་ཐོག་ངོ་འཕྲོད་པར་འགྱུར་ཏེ་དབང་བཞི་པའོ། །དེས་རྨ་ལུགས་ཕྱག་རྒྱ་ཆེན་པོ་སྙིང་པོ་དོན་གྱི་དབང་བསྐུར་བ་གྲུབ་པ་ཡིན་པས་གཏོང་རག་གི་ཡོན་དུ་མཎྜལ་ཕུལ། དེ་ལྟ་བུའི་དགེ་བ་བླ་ན་མེད་པའི་བྱང་ཆུབ་ཏུ་སྨོན་ལམ་གདབ་པ་འདིའི་རྗེས་ཟློས་མཛོད། བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །སླར་ཡང་མཆོད་བསྟོད་བྱས་ལ། ༀ། ལྷག་པ་དང་ནི་ཆད་པ་དང༌། །བདག་གིས་བརྗེད་ངས་གང་བགྱིས་པ། །གང་ཕྱིར་ལུས་ཅན་མགོན་གྱུར་པ། །མགོན་པོ་ཁྱེད་ཀྱིས་བཟོད་པར་གསོལ། །ཞེས་ལན་གསུམ་གྱིས་ནོངས་པ་བཤགས། དཀྱིལ་འཁོར་གཤེགས་བསྡུ་དང༌། བསྔོ་ཤིས་ཀྱིས་མཐའ་བརྒྱན་པར་བྱའོ།། ༈ །།ༀ་སྭ་སྟི། བཀའ་བབས་བར་པའི་ནང་ཚན་སོ་ལུགས་བླ་མའི་བྱིན་རླབས་གཏོར་མའི་དབང་ནི། དཀྱིལ་འཁོར་པདྨ་འདབ་བཞིའི་དབུས་སུ་མཉྫིའི་ཁར་གཏོར་ཟླུམ་ འཁོར་བཞིས་བསྐོར་བ་དང༌། བདུད་རྩིའི་ཐོད་པ་བཤམས། མཐའ་མཆོད་པ་ཅི་འབྱོར་བས་བསྐོར། སྐྱབས་སེམས་ཚད་མེད་བཞི་སྔོན་དུ་འགྲོ་བས། སྭ་བྷཱ་ཝས་སྦྱངས། སྟོང་པའི་ངང་ལས་སྲུང་བའི་འཁོར་ལོ་མི་ཕྱེད་པར་བཅིངས་པའི་དབུས་སུ་པདྨ་དང་ཟླ་བའི་གདན་ལ་རང་ཉིད་ཇོ་བོ་ཐུགས་རྗེ་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐལ་མོ་སྦྱར་བ། འོག་མ་གཉིས་ཤེལ་ཕྲེང་དང་པད་དཀར་གྱི་སྡོང་བུ་འཛིན་པ། དར་དང་རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་ཐུགས་ཀར་པད་འདབ་བཞིའི་ལྟེ་བར་ཧྲཱིཿ ཡིག་གི་མཐར་སྔགས་ཕྲེང་གིས་བསྐོར་བ། ཧྲཱིཿ ལས་འོད་ཟེར་འཕྲོས་རི་བོ་པོ་ཏ་ལ་ནས་མགོན་པོ་སྤྱན་རས་གཟིགས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་བཛྲ་ས་མཱ་ཛཿ ས་སྤྱན་དྲངས། ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝིདྱ། ཤཔྡས་མཆོད། ཧྲཱིཿ འཁོར་བའི་སྐྱོན་གྱིས་མ་གོས་པ། །འཇིག་རྟེན་གསུམ་གྱི་དཔག་བསམ་ཤིང༌། །པདྨ་དཀར་པོ་གཡོན་ན་བསྣམས། །རིག་སྔགས་འཆང་ལ་ཕྱག་འཚལ་ལོ། །ཞེས་བསྟོད། ཛཿ ཧཱུྃ་བྃ་ཧོཿ ས་དམ་ཚིག་པ་ལ་ཡེ་ཤེས་པ་གཉིས་སུ་མེད་པར་གྱུར། རང་གི་ཐུགས་ཀའི་ཧྲཱིཿ ཡིག་སྔགས་ཕྲེང་དང་བཅས་པ་ལས་འོད་ཟེར་འཕྲོས། སྣང་གྲགས་འགྱུ་གསུམ་ལྷ་སྔགས་ཡེ་ཤེས་ཀྱི་རོལ་པར་ཤར་བར་བསམས་ལ། ༀ་མ་ཎི་པདྨེ་ཧཱུྃ། ཞེས་ཅི་ནུས་བཟླ། དེ་ནས་མདུན་གྱི་ གཏོར་མ་མི་དམིགས་པ་ལས་རང་གི་སྤྱི་བའི་ཐད་ཀའི་ནམ་མཁར་པདྨ་འདབ་བཞི་པ་ཡོངས་སུ་རྒྱས་པའི་དབུས་སུ་རིན་པོ་ཆེའི་ཁྲི་པད་ཉི་ཟླ་བའི་གདན་ལ་རང་གི་རྩ་བའི་བླ་མ་དང་དབྱེར་མེད་པའི་རྗེ་བཙུན་དམ་པ་རྒྱ་གར་བ་སྐུ་མདོག་སྨུག་ལ་དམར་བའི་མདངས་ཆགས་པ། གཅེར་བུ་མཆོག་ཏུ་འབར་བའི་གཟི་བྱིན་ཅན། རས་ཀྱི་ཨཾ་རག་གསོལ་ཞིང་རུས་པའི་རྒྱན་གྱིས་བརྒྱན་པ། ཕྱག་གཉིས་རྡོ་རྗེ་དང་དྲིལ་བུ་འཛིན་ཅིང༌། སྣང་སྲིད་ཟིལ་གྱིས་གནོན་པའི་ལྟ་སྟངས་མཛད་པ། དེའི་ཕྱི་རོལ་གྱི་པདྨའི་འདབ་མ་བཞི་ལ་གཡས་སུ་ཐུབ་དབང༌། གཡོན་དུ་འཇམ་དཔལ་དབྱངས། མདུན་དུ་སྤྱན་རས་གཟིགས། རྒྱབ་ཏུ་རྡོ་རྗེ་ཕག་མོ་དམར་མོ་རྣམས་བཞུགས་པའི་མཐའ་སྐོར་དུ་བརྒྱུད་པའི་བླ་མ་རྣམས་དང༌། སངས་རྒྱས་བྱང་སེམས། དཔའ་བོ་མཁའ་འགྲོ། ཆོས་སྐྱོང་སྲུང་མའི་ཚོགས་ཐམས་ཅད་སྤྲིན་ཕུང་གཏིབ་པ་ལྟར་གསལ་བའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བྃ་ཧོཿ ས་གཉིས་སུ་མེད་པར་བསྟིམས་ལ། མཆོད་པ་རཾ་ཡཾ་ཁཾ་གིས་བསངས་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ཨཱཿ ལས་མཆོད་རྫས་ཡེ་ཤེས་ཀྱི་བདུད་རྩིའི་རོལ་པ་ཧཱུྃ་གིས་མཁའ་ཁྱབ་ཏུ་འཕེལ་ཞིང་རྒྱས་པར་གྱུར། ༀ་ཨཱཿ ཧཱུྃ་ལན་གསུམ། རབ་འབྱམས་རྒྱ་མཚོ་དཔག་མེད་ན། །ཕྱི་ནང་གསང་བ་དེ་ཁོ་ནའི། ། མཆོད་པ་ཇི་སྙེད་ཡོད་པ་དང༌། །བདག་གི་ལུས་དང་ལོངས་སྤྱོད་དང༌། །དུས་གསུམ་དགེ་བའི་དངོས་པོ་ཀུན། །རྩ་བརྒྱུད་བླ་མ་དམ་པ་དང༌། །རྒྱལ་བ་སྲས་དང་བཅས་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། ནས་ཤབྡའི་བར་གྱིས་མཆོད། གང་གིས་འཁོར་བའི་ཉེས་པ་ནི། །དྲན་པ་ཙམ་གྱིས་རབ་བསལ་ནས། །བླ་མེད་བྱང་ཆུབ་ཐོབ་མཛད་པ། །བླ་མ་མཆོག་ལ་ཕྱག་འཚལ་ལོ། །ཞེས་བསྟོད་ལ། རྩ་བའི་བླ་མའི་ཐུགས་ཀ་ནས་ཐུགས་རྗེ་ཆེན་པའི་བདུད་རྩིའི་རྒྱུན་བབས། རང་གཞན་སེམས་ཅན་ཐམས་ཅད་ལ་ཐིམ་པས་ལུས་ངག་ཡིད་གསུམ་གྱི་སྡིག་སྒྲིབ་སྦྱངས་ནས་བླ་མའི་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་ཀྱི་བྱིན་རླབས་རྒྱུད་ལ་ཞུགས་པར་བསམས་ལ། ༀ་ཨཱཿ ཧྲཱིཿ གུ་རུ་དྷརྨ་ཀཱ་ཡ་སིདྡྷི་ཧཱུྃ། ༀ་ཨཱཿ ཧྲཱིཿ གུ་རུ་སམྦྷོ་ཀཱ་ཡ་སིདྡྷི་ཧཱུྃ། ༀ་ཨཱཿ ཧྲཱིཿ གུ་རུ་ནིརྨ་ཀཱ་ཡ་སིདྡྷི་ཧཱུྃ། ཞེས་ཅི་ནུས་བཟླས་མཐར། རྩ་བརྒྱུད་ཀྱི་བླ་མ་དམ་པ་རྣམས་ལ་གསོལ་བ་འདེབས་སོ། །བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་རིག་པ་དྲི་མེད་ཀྱི་དོན་རྟོགས་པར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། དེ་ནས་སློབ་མ་རྣམས་ཁྲུས་དང་ཕྱག་བྱས༑ གྲལ་དུ་འཁོད་པ་ལས། སྔོན་གཏོར་བཏང་ཞིང་མཚམས་བཅད་ནས། སེམས་བསྐྱེད་དང་ཆོས་བཤད་ཅི་རིགས་སྔོན་དུ་འགྲོ་བས། དམ་ཆོས་སྡུག་བསྔལ་ཞི་བྱེད་ལ་བཀའ་བབས་གསུམ་ལས། འདིར་བཀའ་བབས་བར་པ་ཞེས་རྗེ་བཙུན་དམ་པ་ རྒྱ་གར་བའི་ཐུགས་ཀྱི་སྲས་གཙོ་བོར་སྣང་བ་རྨ་སོ་སྐམ་གསུམ་ལས། འདིར་སོ་དགེ་འདུན་འབར་ལ་གསུངས་པ་སོ་ལུགས་སུ་གྲགས་པ་དེ་ལགས། དེའང་སྨིན་གྲོལ་གྱི་གདམས་པ་གཉིས་ལས། འདིར་སྨིན་བྱེད་དབང་གི་ཚུལ་དུ་བླ་མའི་བྱིན་རླབས་གཏོར་མའི་དབང་བསྐུར་བ་ལ་སློབ་དཔོན་གྱི་བྱ་བ་གྲུབ་ནས། ད་ཁྱེད་རང་གི་བྱ་བ་ཐོག་མར་མཎྜལ་ཕུལ་མཛོད། དེ་ནས་སྙིམ་པ་མེ་ཏོག་དང་བཅས་ཏེ་ཐལ་མོ་སྦྱར་ནས་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་དང༌། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ཞེས་གསུམ། དེ་ནས་མདུན་གྱི་ནམ་མཁར་རྩ་བའི་བླ་མ་དང་གཉིས་སུ་མེད་པའི་རྗེ་བཙུན་དམ་པ་རྒྱ་གར་བ་ལ་བརྒྱུད་པའི་བླ་མ་སངས་རྒྱས་བྱང་སེམས་མཁའ་འགྲོ་དམ་ཅན་རྒྱ་མཚོའི་ཚོགས་ཀྱིས་བསྐོར་བ་མངོན་སུམ་དུ་སད་པའི་སྤྱན་སྔར་ཅི་མཛད་བླ་མ་དཀོན་མཆོག་མཁྱེན་སྙམ་པས་འདིའི་རྗེས་ཟློས་མཛོད། བདག་གིས་དེང་ནས་བྱང་ཆུབ་སྙིང་པོ་ལ་མཆིས་ཀྱི་བར་དུ། བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་མཆིའོ། །སངས་རྒྱས་ཆོས་དང་དགེ་འདུན་གསུམ་ལ་སྐྱབས་སུ་མཆིའོ། །ལྟ་བ་སྒོམ་པ་སྤྱོད་པ་གསུམ་ལ་སྐྱབས་སུ་མཆིའོ། །ལན་གསུམ། གཞན་དོན་རླབས་པོ་ཆེ་སྒྲུབ་པའི་ལྷག་བསམ་བརྟན་པོས། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། ། བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ལན་གསུམ། ཚོགས་ཞིང་ཁྱད་པར་ཅན་རྣམས་ཀྱི་དྲུང་དུ་ཚོགས་བསགས་པ་འདིའི་རྗེས་ཟློས་མཛོད། དམིགས་བཅས་དམིགས་མེད་གཉིས་སུ་མེད་པ་ཡི། །རང་རིག་བླ་མའི་སྐུ་ལ་ཕྱག་འཚལ་ལོ། །མཆོད་བྱ་མཆོད་བྱེད་དབྱེར་མེད་ཟུང་འཇུག་དངོས། །རྣམ་དག་ཆོས་ཀྱི་སྐུ་ལ་མཆོད་པར་འབུལ། །ཉོན་མོངས་ཡེ་ཤེས་བླང་དོར་མེད་པ་ཡི། །རིག་པ་དྲི་མེད་ངང་དུ་སྡིག་ཀུན་བཤགས། །ཡེ་ནས་སངས་རྒྱས་བློ་ཡིས་མ་བཅོས་པ། །བཅིང་གྲོལ་མེད་པར་སྐྱོང་ལ་ཡི་རང་ངོ༌། །སེམས་ཉིད་གདོད་ནས་དག་པ་ཆོས་སྐུའི་ཀློང༌། །རྩོལ་མེད་ཡང་དག་དྲན་པའི་ཆོས་འཁོར་བསྐོར། །བདེ་སྡུག་ལ་སོགས་རྐྱེན་དང་འཕྲད་པའི་ཚེ། །སྒོམ་པ་མྱ་ངན་མི་འདའ་བཞུགས་སུ་གསོལ། །དགེ་བ་འཁོར་གསུམ་དམིགས་མེད་དག་པ་ཡིས། །མཚན་འཛིན་མེད་པར་བྱང་ཆུབ་ཆེན་པོར་བསྔོ། །བྱ་བྱེད་མེད་པར་བྱ་བ་ཀུན་རྫོགས་པའི། །ཆོས་ཉིད་སྤྲོས་བྲལ་རྒྱུན་དུ་སྐྱོང་བར་ཤོག །ཅེས་གསུམ། བ་སྤུ་ལྡང་ཞིང་མཆི་མ་འཁྲུགས་པའི་མོས་གུས་ཀྱིས་གསོལ་བ་གདབ་པ་འདིའི་རྗེས་ཟློས་མཛོད། མཉམ་རྗེས་ཀུན་ཏུ་འོད་གསལ་འབའ་ཞིག་དང༌། །གང་ཡང་མ་སྐྱེས་ཅི་ཡང་མ་འགག་པར། །མཁྱེན་གཉིས་ལྡན་པའི་འགྲོ་མགོན་རིན་པོ་ཆེ། །དྲིན་ཅན་རྩ་བའི་བླ་མར་གསོལ་བ་འདེབས། །རིག་པ་དྲི་མེད་རྟོགས་པར་བྱིན་གྱིས་རློབས། ། ཞེས་བརྗོད། དེ་དག་ནི་དབང་གི་སྔོན་འགྲའོ། །དངོས་གཞི་ལ་མདུན་གྱི་གཏོར་མ་འདི་ཉིད་པདྨ་འདབ་བཞིའི་དབུས་སུ་གདན་བཞི་རྫོགས་ལ་རྩ་བའི་བླ་མ་དང་གཉིས་སུ་མེད་པའི་རྗེ་བཙུན་དམ་པ་སངས་རྒྱས་གཟི་བརྗིད་མཆོག་ཏུ་འབར་བའི་གཡས་སུ་ཐུབ་དབང༌། གཡོན་དུ་འཇམ་དབྱངས། མདུན་དུ་སྤྱན་རས་གཟིགས། རྒྱབ་ཏུ་ཕག་མོ་རྣམས་ལ་བརྒྱུད་པའི་བླ་མ་སངས་རྒྱས་བྱང་སེམས་ཡི་དམ་མཁའ་འགྲོ་སྲུང་མའི་ཚོགས་ཀྱིས་བསྐོར་བ་བཞུགས་པར་མོས་ལ་འདིའི་རྗེས༴ ཀྱཻ་དམ་པ་རྗེ་བཙུན་རྣམས་བདག་ལ་དགོངས་སུ་གསོལ། རྩ་བརྒྱུད་བླ་མ་ཡི་དམ་ལྷ། །སངས་རྒྱས་བྱང་ཆུབ་སེམས་དཔའི་ཚོགས། །དཔའ་བོ་མཁའ་འགྲོ་ཆོས་སྐྱོང་རྣམས། །བདག་ལ་དབང་བསྐུར་བྱིན་གྱིས་རློབས། །ཞེས་གསོལ་བ་བཏབ་པས། ཁྱེད་རང་སྐད་ཅིག་གིས་འཕགས་པ་སྤྱན་རས་གཟིགས་ཕྱག་བཞི་པའི་རྣམ་པ་ཅན་དུ་གྱུར་པའི་སྤྱི་བོར་གཏོར་མ་རྩ་གསུམ་རྒྱལ་བ་རབ་འབྱམས་ཀྱི་རྣམ་པ་ཅན་དུ་བྱོན་པ་དེ་ཉིད་ལ་མོས་གུས་གདུང་ཤུགས་དྲག་པོས་གསོལ་བ་བཏབ་པས། གཏོར་མ་ལྷར་གསལ་བའི་སྐུའི་ཆ་ཐམས་ཅད་ལས་འོད་ཟེར་ཁ་དོག་སྣ་ཚོགས་པ་བྱུང༌། ཁྱེད་རང་རྣམས་ཀྱི་ལུས་ལ་ཐིམ་པས་ནད་གདོན་སྡིག་སྒྲིབ་ཐམས་ཅད་སྦྱངས། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཆར་ལྟར་བབས་ནས་རྒྱུད་ལ་ཞུགས་པའི་མོས་པ་མཛོད། སྤོས་འཐུལ་ཞིང་རོལ་མའི་སྒྲ་དང་བཅས་པས་གཏོར་མ་སྤྱི་བོར་བཞག་ལ། ཧཱུྃ། རྩ་བརྒྱུད་བླ་མ་ཡི་དམ་ལྷ། །སངས་རྒྱས་བྱང་ཆུབ་སེམས་དཔའི་ཚོགས། །དཔའ་བོ་མཁའ་འགྲོ་ཆོས་སྐྱོང་རྣམས། །ཐུགས་རྗེ་བརྩེ་བས་འདིར་དགོངས་ཤིག །སྐལ་ལྡན་རིགས་ཀྱི་བུ་འདི་ལ། །དབང་བསྐུར་བྱིན་གྱིས་བརླབ་ཏུ་གསོལ། །མཆོག་ཐུན་དངོས་གྲུབ་ཆར་ལྟར་ཕོབ། །རིག་པ་དྲི་མེད་རྟོགས་པར་མཛོད། །ༀ་ཨཱཿ ཧཱུྃཿ ཧྲཱིཿ གུ་རུ་སིདྡྷི་ཨ་བྷི་ཥིཉྩ་ཧཱུྃ། ཞེས་དབང་བསྐུར་བས་ལུས་ཀྱི་སྡིག་སྒྲིབ་དག་ནས། ལུས་ལྷ་སྐུ་འཇའ་ཚོན་ལྟ་བུར་གྱུར་པས་བུམ་པའི་དབང་རྫོགས། ཕྲིན་ལས་བཞི་ལ་དབང་ཐོབ་པར་གྱུར་པའོ། །དེ་ནས་ཁྱེད་རང་སྤྱན་རས་གཟིགས་སུ་གསལ་བའི་ལུས་ཀྱི་དབུས་སུ་མཁའ་འགྲོ་མ་གསུམ་གྱི་རང་བཞིན་རྩ་གསུམ་གསལ་བའི་སྟེང་དུ་པད་ཟླ་ཉི་མའི་གདན་ལ་རྩ་བརྒྱུད་ཀྱི་བླ་མ་དང་དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོ་རྗེ་བཙུན་དམ་པའི་སྐུ་གཟི་མདངས་དང་ལྡན་པ། ལྟེ་འོག་རྩ་གསུམ་འདུས་མདོར་རྡོ་རྗེ་དམར་པོ་མཚོན་གང་བ་ཧཱུྃ་གིས་མཚན་པ་བསྒོམས་ལ་རླུང་ཁ་སྦྱོར་དུ་བཅིངས་པས་རྡོ་རྗེ་དེ་འདར་ཁྲིལ་ལི་ལི་གནས་པའི་ལྟེ་བའི་ཧཱུྃ་ལས་ཧཱུྃ་ཡིག་དཔག་མེད་སྤྲོས་པ་དབུ་མའི་ལམ་བརྒྱུད་ཚངས་བུག་ནས་འཐོན་མཁའ་འགྲོ་དཔག་ཏུ་མེད་པར་གྱུར་སྙམ་དུ་བསམ་པར་བྱ་ཞིང༌། དེའི་ཚེ་གཏོར་མ་ལྷར་གསལ་བའི་སྐུ་ལས་བདུད་རྩིའི་རྒྱུན་བབས་པ་མྱངས་པའི་མོས་པའང་མཛོད། བདུད་རྩི་བྱིན་ཏེ། ༀ་ཨཱཿ ཧཱུྃཿ ཧྲཱིཿ གུ་རུ་སིདྡྷི་ཨ་བྷི་ཥིཉྩ་ཧཱུྃ། ཞེས་བདུད་རྩི་མྱང་བས་ངག་སྒྲིབ་དག་ནས་གསང་དབང་རྫོགས། རྩ་རླུང་སྒོམ་པ་ལ་དབང་ཐོབ་པར་གྱུར་པའོ། །དེ་ནས་ཚངས་བུག་ནས་འཐོན་པའི་མཁའ་འགྲའི་ཚོགས་རྣམས་ཀྱིས་མེ་ཏོག་ལ་སོགས་པ་ཕྱི་ནང་གསང་བའི་མཆོད་སྤྲིན་སྤྱི་བོའི་བླ་མ་ལ་ཕུལ་བས། བླ་མ་དགྱེས་པ་ཆེན་པོས་བཞད་ཅིང་སྐུའི་གནས་གསུམ་ལས་བདུད་རྩི་དཀར་དམར་མཐིང་གསུམ་འོད་ཟེར་གྱི་ཚུལ་དུ་བྱུང་བ་ཁྱེད་རང་གི་གནས་གསུམ་དུ་ཐིམ་པས་ལུས་སེམས་བདེ་བ་ཆེན་པོ་ལྷན་ཅིག་སྐྱེས་པའི་ངོ་བོར་བདེ་ཁྲིལ་གྱིས་གང་ཞིང་ཁྱབ་པར་བསམ་དུ་བཅུག་ལ། སྤོས་རོལ་བྱ་ཞིང་ཉམས་སྤར། དེས་ཡིད་སྒྲིབ་དག་ནས་ཤེས་རབ་ཡེ་ཤེས་ཀྱི་དབང་རྫོགས། བདེ་སྟོང་ལྷན་སྐྱེས་ཀྱི་ཡེ་ཤེས་སྒོམ་པ་ལ་དབང་ཐོབ་པའོ། །དེ་ལྟར་ཉམས་འབར་ན་དེ་ཀར་རེ་ཞིག་བསྐྱང་དུ་བཅུག །རྗེས་སུ་དེའི་ངང་ལ་ལྷོད་ཀྱིས་ཀློད་པས་མི་རྟོག་པའི་ཏིང་ངེ་འཛིན་ཤུགས་ཀྱིས་འཆར། དེ་ལ་ངོ་སྤྲོད་དེ། འོ་ཁྱེད་ ཀྱི་ཤེས་པ་ལ་ད་ལྟ་ཅི་དྲན་པར་འདུག །སྔར་བྱིན་རླབས་བྱས་དུས་ཀྱང་ཇི་འདྲ་ཞིག་དྲན་བྱུང༌། དེ་ངོས་བཟུང་ལ་ལྟོས་དང་བལྟས་པས་དེ་དང་དེའི་ཚེ་རྣམ་པར་རྟོག་པ་གང་ཡང་ཡིད་ལ་མི་འགྱུ་ཞིང་གསལ་རིག་རྗེན་པ་ཡེ་རེ་བ་ཞིག་སྣང་ན་དེ་ཀ་སེམས་ཉིད་རང་བཞིན་གྱིས་འོད་གསལ་ལམ་རང་རིག་དྲི་མེད་ཆོས་སྐུ་ཕྱག་རྒྱ་ཆེན་པོ་ཞེས་བྱ་བ་དེ་ཡིན་པས། དེ་ལྟར་ཡིད་ལ་མི་བྱེད་པའི་ཤེས་པ་དྭངས་སང་ངེ་བ་ལ་གནས་པ་ དེ་ནི་ཁྱེད་ཅག་བླ་མའི་དྭངས་མ་ཐུགས་ཀྱི་དཀྱིལ་འཁོར་དུ་བཅུག་པ་ལགས་ཀྱིས། ཨེ་མའོ་ཡིད་ལ་མི་བྱེད་པའི་ཤེས་པ་དེ་ཀ་རིག་པ་དྲི་མ་མེད་པའི་འོད་གསལ་དུ་འདུག་སྙམ་དུ་ངེས་ཤེས་སྐྱེས་པ་དེ་ནི་ནང་གི་དཀྱིལ་འཁོར་དུ་ཚུད་ནས་ཆོས་ཉིད་དོན་གྱི་དབང་ཐོབ་པ་སྟེ། སྐུ་གདུང་འབར་བའི་རྒྱུད་ལས། གང་ལ་སྟོང་ཉིད་འདི་རུང་བས། །དེ་ལ་ཐམས་ཅད་རུང་བ་ཡིན། །སྟོང་ཉིད་རྟོགས་པར་གྱུར་ན་ནི། །དབང་རྣམས་བསྐུར་བར་གྱུར་པ་ཡིན། །ཞེས་དང༌། སྡོམ་འབྱུང་ལས། འོད་གསལ་བ་ཡི་གོ་འཕང་ཐོབ། །ཧེ་རུ་ཀ་དཔལ་ཡང་དག་གནས། །ཞེས་གསུངས། དེས་བག་ཆགས་ཀྱི་སྒྲིབ་པ་དག་ནས་ཚིག་དབང་རིན་པོ་ཆེ་རྫོགས། འོད་གསལ་ཕྱག་རྒྱ་ཆེན་པའི་དོན་རྗེན་པར་རྟོགས་པ་ལ་དབང་ཐོབ་པའོ། །དེ་རྣམས་ཀྱིས་ནི་བླ་མའི་ཐུགས་ཀྱི་དཀྱིལ་འཁོར་དུ་དོན་གྱི་དབང་བཞི་ཐོབ་པས་སྒྲིབ་བཞི་དག་ཟུང་འཇུག་གི་ལམ་སྒོམ་པ་དང༌། འབྲས་བུ་རྡོ་རྗེ་འཆང་གི་གོ་འཕང་ལ་སྦྱོར་བའི་ནུས་པ་ཁྱད་པར་ཅན་བཞག་པ་ཡིན་ནོ། །སླར་ཡང་བརྟན་པར་བྱ་བའི་ཕྱིར་གཏོར་མའི་ལྷ་ལ་མོས་གུས་བྱས་པས་ལྷ་ཚོགས་འོད་དུ་ཞུ་ནས་སོ་སོ་རང་རང་ལ་ཐིམ། དེ་དག་གི་སྐུ་གསུང་ཐུགས་རང་རང་གི་ལུས་ངག་ཡིད་གསུམ་དབྱེར་མེད་པའི་ངང་ལ་མཉམ་པར་བཞག་གོ །དེ་ཡི་ངང་ལས་ཨ་ཀྵ་ལྔ་བཅུ་བརྗོད་པས། སྣང་གྲགས་དྲན་པའི་ཆོས་ཐམས་ཅད་བླ་མའི་སྐུ་གསུང་ཐུགས་ཀྱི་རོལ་པར་ཤེས་པ་དང་རྟག་ཏུ་མི་འབྲལ་བར་གྱིས་ཤིག །ཅེས་བརྗོད། དེ་ནས་གཙོ་བོས་ཇི་ལྟར་སོགས་ཀྱིས་དམ་ཚིག་བཟུང༌། གཏོང་རག་གི་མཎྜལ་འབུལ་དུ་གཞུག །བསྔོ་བ་བྱ་ཞིང༌། ཆོ་གའི་རྗེས་ཆོག་རྣམས་ཀྱང་སྔར་གྱི་འགྲོས་ཀྱིས་ཤེས་པར་བྱའོ། །དར་རྒྱས་འཕེལ།། ༈ །།ༀ་སྭ་སྟི། བཀའ་བབས་བར་པའི་ནང་ཚན་གསུམ་པ་སྐམ་ལུགས་ནི། ཕ་རོལ་ཏུ་ཕྱིན་པའི་གདམས་པ་ཡིན་པས་དབང་གི་ཆོས་སྒོ་འབྱེད་པ་ལ་མི་ལྟོས་མོད། འོན་ཀྱང་བླ་མ་རྣམས་ཀྱི་ཕྱག་བཞེས་སུ་བཀའ་བབས་དང་པོའི་ལྷ་ལྔའི་ཡ་གྱལ་ཡུམ་ཤེར་ཕྱིན་མའི་རྗེས་གནང་འདིར་མཛད་པ་ལྟར་སྤྲོ་ན། སྟེགས་བུ་དྲིས་ཆག་ཆག་བཏབ་པ་ལ་དཀྱིལ་འཁོར་སྣ་ཚོགས་པདྨ་འདབ་བརྒྱད་ཀྱི་ལྟེ་བར་ཟླ་བའི་དཀྱིལ་འཁོར་ཉ་གང་བ་ལ་དྷཱིཿ ཡིག་སེར་པོས་མཚན་པ་བྲི། དཀར་གཏོར་དང་མཆོད་པ་ཅི་བདེར་བཤམས་ལ། སྟན་བདེ་བ་ལ་འདུག་ནས། རང་གི་སྙིང་གའི་དྷཱིཿ ལས་འོད་ཟེར་འཕྲོས་པས་ཡུམ་ཆེན་མོ་ལ་སངས་རྒྱས་དང་བྱང་སེམས་ཀྱིས་བསྐོར་བ་མདུན་གྱི་ནམ་མཁར་སད་པར་བསམས་ལ། དཀོན་མཆོག་གསུམ་ལ་བདག་སྐྱབས་མཆི༑ ཞེས་སོགས་ཀྱིས་རྒྱུན་བཤགས་བྱ། དེ་ནས་བདག་མདུན་གྱི་མཎྜལ་གཉིས་ཀ་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བདག་མདུན་གཉིས་ཀ་པཾ་ལས་པདྨ་དང་ཨཱཿ ལས་ཟླ་བའི་སྟེང་དུ་དྷཱིཿ ཡིག་སེར་པོ་དེ་ལས་འོད་ཟེར་འཕྲོས་འཕགས་པ་མཆོད་སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་ཞལ་གཅིག་ཕྱག་གཉིས་མ་གཡས་ཆོས་འཆད་ཀྱི་ཕྱག་རྒྱ་ཅན། པུསྟི་དང་ བཅས་པའི་ཨུཏྤལ་སྔོན་པའི་སྡོང་བུ་གཡོན་ལོགས་ན་འཛིན་པ། དར་བཟང་པོའི་སྟོད་གཡོགས་དང་ན་བཟས་བརྒྱན་པ། རལ་པའི་ཅོད་པན་ལ་བརྟེན་པའི་མི་བསྐྱོད་པས་དབུར་བརྒྱན་པ། ཐུགས་ཀར་ཟླ་བ་ལ་གནས་པའི་དྷཱིཿ སེར་པོ། དེ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་མདུན་གྱི་ནམ་མཁར་བཛྲ་ས་མཱ་ཛཿ ས་སྤྱན་དྲངས་པ་ལ། ༀ་བཛྲ་པུཥྤེ་པྲ་ཏཱིཙྪ་སྭཱ་ཧཱ་ནས། ཤབྡའི་བར་གྱིས་མཆོད། ཛཿ ཧཱུྃ་བཾ་ཧོཿ ས་རང་དང་མདུན་བསྐྱེད་ཀྱི་ དམ་ཚིག་པ་ལ་གཉིས་སུ་མེད་པར་ཐིམ་པར་བསམ། བདག་མདུན་གཉིས་ཀའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ཡིག་རྣམས་ཀྱིས་མཚན་པར་གྱུར། བདག་མདུན་གྱི་ཐུགས་ཀར་ཟླ་བ་ལ་གནས་པའི་དྷཱིཿ ཡིག་སྔགས་ཕྲེང་གིས་བསྐོར་བ་རང་གི་ཐུགས་ཀའི་འོད་ཀྱིས་མདུན་བསྐྱེད་ཀྱི་ཐུགས་རྒྱུད་བསྐུལ། དེའི་འོད་ཀྱིས་འཁོར་འདས་ཀྱི་ཤེས་རབ་ཕུན་སུམ་ཚོགས་པ་ཐམས་ཅད་བསྡུས་ཏེ་རང་ལ་ཐིམ་པས་མི་ཤེས་པའི་དྲི་མ་སངས་པར་མོས་ལ། དྷཱིཿ ཤྲུ་ཏི་སྨྲྀ་ཏི་བི་ཛ་ཡེ་སྭཱ་ཧཱ། ཞེས་བཟླས། མཐར་མཆོད་གཏོར་རྣམས་བསངས་སྦྱངས་འབྲུ་གསུམ་གྱིས་བྱིན་གྱིས་བརླབས་ལ། ༀ་བཛྲ་པུཥྤེ་པྲ་ཏཱིཙྪ་སྭཱ་ཧཱ་ནས། ཤབྡའི་བར་གྱིས་མཆོད། སྨྲ་བསམ་བརྗོད་མེད་སོགས་ཀྱིས་བསྟོད། གཏོར་མ་རང་སྔགས་ལ་ཨ་ཀཱ་རོ་བཏགས་པས་ཕུལ་ལ། བདག་དང་སེམས་ཅན་ཐམས་ཅད་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ། དེ་ནས་སློབ་མ་རྣམས་ཁྲུས་དང་ཕྱག་བྱས་གྲལ་དུ་འཁོད་ལ། སེམས་བསྐྱེད་ཆོས་བཤད་ཇི་ལྟར་རིགས་པ་བཤད་ལ། འདིར་བཀའ་བབས་བར་པ་རྨ་སོ་སྐམ་གསུམ་ལས། འདིར་སྐམ་ལུགས་ཕ་རོལ་ཏུ་ཕྱིན་པའི་གདམས་པ་འདེབས་པའི་སྔོན་དུ་བླ་མ་རྣམས་ཀྱི་ཕྱག་བཞེས་ལྟར་ཤེར་ཕྱིན་མའི་རྗེས་གནང་ཟབ་མོ་སྒྲུབ་པར་བྱེད་པ་ཡིན། དེ་ལའང་གཉིས་ལས། སློབ་དཔོན་གྱི་སྒྲུབ་མཆོད་གྲུབ་ནས། ད་ཁྱེད་རང་གི་བྱ་བ་ཐོག་མར་མཎྜལ་ཕུལ་མཛོད། དེ་ནས་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ནས་འདིའི་རྗེས་ཟློས་མཛོད། ཉོན་མོངས་དྲི་མ་རབ་སྤངས་ཤིང༌། །ཡིད་འོང་གསུང་གི་སྒྲ་སྒྲོག་པ། །དམ་པ་ཆོས་ཀྱི་རིན་ཆེན་མཛོད། །བླ་མས་བདག་ལ་སྩལ་དུ་གསོལ། །ཞེས་ལན་གསུམ། དེ་ནས་ཁྱེད་རང་རྣམས་མི་དམིགས་པ་ལས༑ པད་ཟླར་དྷཱིཿ ལས་ཡུམ་ཆེན་མོ་གསེར་མདོག་ཆོས་འཆད་དང་པུསྟིས་མཚན་པའི་ཨུཏྤལ་བསྣམས་པའི་སྙིང་གར་ཟླ་བ་ལ་དྷཱིཿ ཡིག་སེར་པོས་མཚན་པར་གྱུར། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་དཀྱིལ་འཁོར་ལ་ཕོག་པས་ཡུམ་ཆེན་མོའི་ཐུགས་ཀའི་ཟླ་བ་སྔགས་ཀྱི་ཡིག་འབྲུ་དང་བཅས་པ་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱོན། ཁྱེད་རང་གི་སྙིང་གའི་དྷཱིཿ ཡིག་ལ་ཐིམ་པས་ཡུམ་ཆེན་མོའི་སྐུ་གསུང་ཐུགས་དང༌། ཁྱེད་རང་གི་ལུས་ངག་ཡིད་གསུམ་དབྱེར་མེད་དུ་གྱུར་པའི་མོས་པ་མཛོད། སྟོང་ཉིད་སྙིང་རྗེ་ཡུམ་ཆེན་སྐུ། །བརྗོད་བྲལ་ཕར་ཕྱིན་ཡུམ་གྱི་གསུང༌། །ཡེ་ཤེས་གསལ་བ་ཡུམ་གྱི་ཐུགས། ། སྒྲུབ་མཆོག་འདི་ལ་གནས་གྱུར་ཅིག །ཅེས་མེ་ཏོག་འཐོར་ཞིང་དྲིལ་བུ་འཁྲོལ། དེ་ནས་མདུན་བསྐྱེད་ཀྱི་ཞལ་ནས་སྔགས་ཕྲེང་ཐོན། ཁྱེད་རང་གི་ཞལ་དུ་ཞུགས། སྙིང་གའི་དྷཱིཿ ཡིག་ལ་ཐིམ་པའི་མོས་པས་འདིའི་རྗེས་ཟློས༑ དྷཱིཿ ཤྲུ་ཏི་སྨྲ་ཏི་བི་ཛ་ཡེ་སྭཱ་ཧཱ། ཞེས་ལན་གསུམ། དཀྱིལ་འཁོར་ལ་མེ་ཏོག་འཐོར་བཞིན་དུ་འདིའི་རྗེས་ཟློས། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཞེས་མེ་ཏོག་འདི་ཉིད་བྱིན་གྱིས་བརླབས་ནས་སྤྱི་བོར་ཕུལ་བའི་མོས་པ་མཛོད། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །དེ་ནས་གཙོ་བོས་སོགས་ཀྱིས་དམ་ཚིག་བཟུང༌། གཏོང་རག་གི་མཎྜལ་འབུལ་དུ་གཞུག །བསྔོ་བ་བྱ། ཆོ་གའི་རྗེས་ཆོག་སྔར་ལྟར་བྱའོ༑ ༑དམ་ཆོས་སྡུག་བསྔལ་ཞི་བྱེད་ཀྱི་དབང་ཆོག་བཀླགས་པས་གྲུབ་པ་ལས། བཀའ་བབས་བར་པ་རྨ་སོ་སྐམ་གསུམ་གྱི་གཏོར་དབང་དང་རྗེས་གནང་ལེ་ཚན་ནོ། །དར་རྒྱས་འཕེལ།། ༈ །།ༀ་སྭ་སྟི། ན་མོ་གུ་རུ་ཤྲཱི་བཛྲ་ཌཱ་ཀི་ནི་བྷྱཿ འདིར་དམ་པའི་ཆོས་སྡུག་བསྔལ་ཞི་བྱེད་ཀྱི་རྩ་བ་བཀའ་བབས་ཕྱི་མ་ལས། དྲི་མེད་ཐིགས་པ་ཕྱག་བཞེས་ཀྱི་སྐོར་ཞེས་བྱང་ཆུབ་སེམས་དཔའ་ཀུན་དགའི་ལུགས་ཀྱི་རྟེན་མ་སྨིན་པ་སྨིན་པར་བྱེད་པ་ལམ་ལྔའི་གླེགས་བམ་གྱི་དབང་བསྐུར་བ་ནི༑ དབང་ཐོབ་ཅིང་གྲངས་དུས་རྟགས་ཀྱི་བསྙེན་པ་གང་རུང་ཐེམས་པའི་སློབ་དཔོན་གྱིས་སྣོད་ལྡན་གྱི་སློབ་བུ་རྗེས་སུ་འཛིན་པར་འདོད་པས། ཐོག་མར་ཨཱ་ལི་ཀཱ་ལིའི་སྟ་གོན་དུ་གནས་པར་བྱ་སྟེ། རྒྱུ་གསེར་ཟངས་ སོགས་ལ་ཕུལ་དུ་བྱས་པའམ། གཞི་ཇི་ལྟར་རིགས་པ་ལ་གསེར་དངུལ་ལྟ་བུས་བྲིས་པས་ཀྱང་རུང་སྟེ། ཨཱ་ལི་བཅུ་དྲུག་ཚན་བཞི། སྡེ་པ་ལྔ། མཐར་གནས། དྲོ་བའི་ཤ་ཥ་ས་དང༌། ཧ་ཀྵཿ སྟེ་ཚན་པ་བཅུ་གཉིས་སུ་བྱས་པ་བྲིས་ལ། སྐར་མ་རྒྱལ་གྱི་ཉིན་གཟའ་ཚེས་ལེགས་པ་ལ་རབ་གནས་བརྒྱ་རྩ་བརྒྱད་བྱ། དེ་ནས་དབེན་པའི་གནས་སུ་མཁོ་བའི་ཡོ་བྱད་རྣམས་ཚོགས་པར་བྱས་ཏེ། སྟན་བདེ་བ་ལ་འདུག་པའི་མདུན་དུ་མཎྜལ་གྱི་སྟེང་ཡི་གེ་ལྔ་བཅུ་པོ་ནས་དང་བསྲེས་ནས་ཐོད་པ་མཚན་ལྡན་དུ་བླུགས་ལ་བཀོད། འཕང་ལོ་ཐི་གུ་དང་བཅས་པ་ཕྱོགས་བཞིར་བཞག་ལ། ༀ་ཨཱཿ ཧཱུྃ་ཧྲཱིཿ གུ་རུ་སིདྡྷི་ཨ་བྷི་ཥིཉྩ་ཧཱུྃ། ཞེས་འབུམ་ཕྲག་བཞི་བཟླ་སྟེ། བསྙེན་པའོ། །དེ་ནས་མི་སྐད་མི་ཐོས་པའི་དབེན་པར་སོང་ལ། ཐོད་པ་དེ་ཐོད་པ་གཅིག་གི་ནང་དུ་བཅུག །སྟེང་ནས་ཐོད་པ་གཞན་ཞིག་བཀབ་སྟེ་དར་དམར་གྱིས་དྲིལ་ལ་མདུན་དུ་མེ་ལོང་གི་ཁར་བཞག་ཅིང༌། འཕང་ལོས་མཐའ་བསྐོར་ཏེ། ༀ་ཨཱཿ ཧཱུྃ་ཧྲཱིཿ གུ་རུ་སིདྡྷི་ཕ་ལ། ཤཱནྟ། པུཥྚཾ། པཱ་ཤཾ། ཀརྨ་ཀུ་རུ་ཧཱུྃ། ཞེས་འབུམ་ཕྲག་གཉིས་བཟླས་ཏེ། སྒྲུབ་པའོ། །དེ་ནས་ཐོད་པ་དེ་ཉིད་ཤེས་རབ་མ་སྟེ་རང་གི་ཕྱག་རྒྱ་མའམ་གྲོང་པས་མ་གོས་པའི་བུ་མོ། དེ་དག་མེད་ན་རང་གི་ལག་གཡོན་པས་བླངས་ཏེ། མདུན་དུ་མཎྜལ་ལ་མངལ་ཁྲག་དང་སིནྡྷུ་རས་ཆོས་འབྱུང་བྲིས་པའི་སྟེང་དུ་བཞག་ལ། གནས་དེ་དུར་ཁྲོད་དུ་བྱིན་གྱིས་རློབས་ཤིང་བསྒོམས་ནས། ༀ་ཨཱཿ ཧྲཱིཿ གུ་རུ་པྲ་མ་ཎ་ཡེ་ཛི་ན་མཻ་ཏྲི་བྷུ་ཧུ་ཀུ་རུ་ཧཱུྃ། ཞེས་འབུམ་ཕྲག་གཅིག་བཟླས་ཏེ། ལས་སྦྱོར་རོ། །དེ་ནས་རང་གི་སྤྱི་བོར་བཟུང་སྟེ། ༀ་ཨཱཿ ཧཱུྃ་ཧྲཱིཿ ཞེས་སྟོང་ཕྲག་བཞི། དེ་བཞིན་དུ། མཛོད་སྤུ། ཨོལ་མདུད། སྙིང་ག །ལྟེ་བ། གསང་གནས་རྣམས་སུ་བཞག་ནས་ སྔགས་དེ་སྟོང་ཕྲག་རེ་རེ་བཟླ་སྟེ། དངོས་གྲུབ་ལེན་པའོ། །དེ་ནས་མདུན་དུ་བཞུགས་སུ་བཅུག་ལ་མཆོད་བསྟོད་གཏོར་མ་དབུལ། བཀྲ་ཤིས་བརྗོད་དོ། །དེ་ལྟར་བྱས་པས་བདག་ཉིད་རྣལ་འབྱོར་གྱི་དབང་ཕྱུག་ཆེན་པོ་ཞེས་བྱ་བའི་མིང་ཐོབ་ཅིང༌། གཞན་ནུས་ལྡན་དུ་བྱེད་པ་བླ་མའི་ལྡང་ཚད་དེ་བསྙེན་པ་ཁ་གསོ་བ་དང་མཐུན་པ་ཡིན་གསུང་ངོ༌། །དེ་ལྟར་རང་གི་བྱ་བ་རྣམས་ལེགས་པར་ཚར་ནས། སློབ་མ་ལས་འཕྲོ་ཅན་ཆེ་བ་བཞི་ལྡན་ཏེ་བླ་མ་ལ་གུས་པ། དཀོན་མཆོག་ལ་དད་པ། ཤེས་རབ་དང་སྙིང་རྗེ་ཆེན་པའི་སློབ་མ་ལ་རིམ་པ་གསུམ་ལས། འདིར་དང་པོ་དབང་རྟུལ་གྱི་གང་ཟག་སྨིན་པར་བྱེད་པ་ལས། དབང་ལྔའི་དང་པོ་བློ་སྦྱོང་གི་དབང་ནི། དུས་གཟའ་སྐར་ཚེས་གྲངས་བཟང་པའི་ཉི་མ་ལ། ཉམས་དགའ་ཞིང་བར་ཆད་མེད་པའི་གནས་དབེན་པར། གནས་ཁང་ཕྱགས་དར་བྱས། བླ་མ་དང་དཀོན་མཆོག་གི་རྟེན་རྣམས་ཁྲི་བཀོད་ལེགས་པ་ལ་བཞུགས་སུ་གསོལ། བླ་མའི་མདུན་དུ་བྲམ་ཟེའམ་དགེ་སློང་གཙང་མའི་ལག་ནས་བྱུང་བའམ། དུར་ཁྲོད་ནས་བྱུང་བའི་རས་དམར་པོ་བཏིང་བའི་སྟེང་དུ་ཤེར་ཕྱིན་གྱི་གླེགས་བམ་བཞག་ལ་འབྲས་དཀར་རམ་ནས་ བྲེ་བརྒྱད་ལས་མི་ཉུང་བ། བཟང་པོས་གཅེར་བ་གླེགས་བམ་གྱི་དབྱིབས་སུ་བཞེངས། དེའི་སྟེང་ལོགས་ལ་འབྲས་སོགས་ཀྱི་ཕྱེ་དཀར་པོས། གླང་ཆེན་ བེར་ཀ་རིས། སྣ་ལྟ་བུ་དང༌། བཙོད་ཀྱི་རུ་རུ་གཤིབས་པ་ཤད་གཉིས། ལྟ་བུ་དང༌། ཟླ་ཚེས་ཚིག་གུ་གཉིས། ལྟ་བུ་དང༌། སྐར་མདའ་ཁ་ཐིག་གཉིས། རྒྱུག་པ་ལྟ་བུ་དང༌། ཉི་ཟླ་ཤར་བ་ལྟ་བུ་ མིག་ཀོར་གཉིས། དང༌། ཨཱ་ལི་ཀཱ་ལི་ཆ་ལྔ་དཔེ་ཆུང་ལྟར་བྲི། དེའི་ཐིག་ཁོངས་སུ་ཆུད་པར་རིན་པོ་ཆེ་ལས་གྲུབ་པའི་ཨ་ཀྵཿ ལྔ་བཅུའི་བྱང་བུ་རབ་གནས་ཅན་གྱིས་བསྐོར་ལ་དགྲམ། དེའི་དབུས་སུ་ཐོད་པ་མཚན་ལྡན་དུ་ཆང་བཟང་པོ་ལ་བདུད་རྩི་རིལ་བུ་བཏབ་ཅིང་ཕྲད་བུ་རམ་བཟང་པོ་དང་སྦྱར་བ་བཀོད་ལ་དར་དམར་གྱིས་ཁ་བཅད། སྟེང་དུ་རྒྱལ་བ་ཡུམ་གྱི་བླ་རེ་ལྷའམ་ཨ་རང་ལ་ཞལ་བསྟན་པ་དབུབ་པའང་ཕྱག་ལེན་ལ་གནང༌། གླེགས་བམ་གྱི་མཐའི་ཕྱོགས་མཚམས་སུ་འབྲས་སམ་ནས་ཀྱི་ཕྱེ་མ་དཀར་པོས་པདྨ་འདབ་བརྒྱད་བྲིས་པ་དུར་ཁྲོད་བརྒྱད་དུ་མོས་ལ། དེ་རྣམས་ཀྱི་སྟེང་དུ་ཕྱོགས་སྐྱོང་ལ་གཏོར་མ། མཁའ་འགྲོ་ལ་ཤ་ཆེན། ཞིང་སྐྱོང་ལ་སྲུང་སྐུད། གྲུབ་ཐོབ་ལ་ཕྲེང་བ་རྣམས་བཀོད་དེ་དུར་ཁྲོད་ཀྱི་རྫས་སུ་མོས། མཐའ་ཅི་འབྱོར་བའི་མཆོད་པས་བསྐོར། ལས་བཞིའི་འབྲང་རྒྱས། ཤར་དུ་དཀར་ཟླུམ། ལྷོར་གྲུ་བཞི་སེར། ནུབ་ཏུ་ཟླ་གམ་དམར། བྱང་དུ་གྲུ་གསུམ་ནག་པོ་རྣམས་བཤམས། གཞན་ཡང་དཀྱིལ་འཁོར་མཆོད་པའི་གཏོར་མ་བཞི་རྒྱན་བཅས་པ་དང༌། བཟའ་བཅའ་བཏུང་བ་ལ་སོགས་པའི་ཚོགས་ཀྱི་ཡོ་བྱད་རྣམས་ཅི་བདེར་བཤམ་མོ། །དེ་ནས་རང་ཉིད་སྟན་བདེ་བ་ལ་འདུག་སྟེ། སྔོན་གཏོར་རྃ་ཡྃ་ཁྃ་གིས་བསངས། སྟོང་པའི་ངང་ལས་ ༀ་ལས་རིན་པོ་ཆེའི་སྣོད་དུ་ཨཱཿ ལས་ཡེ་ཤེས་ཀྱི་བདུད་རྩི་ཧཱུྃ་གིས་མཁའ་ཁྱབ་ཏུ་འཕེལ་བར་གྱུར། ༀ་ཨཱཿ ཧཱུྃ་ལན་གསུམ་གྱིས་གཏོར་མ་བསྔོས་ལ། ཕྱོགས་སྐྱོང་བ་བཅུ་དང་གཞི་བདག་དཀར་ཕྱོགས་པ་རྣམས་ལ་འབུལ་ལོ། ། ཕན་པ་དང་བདེ་བའི་སེམས་ཀྱིས་སྟོང་གྲོགས་མཛོད་ཅིག །གང་དག་སྡང་བ་དང༌། གདུག་པའི་སེམས་དང་ལྡན་པ་ལོག་པར་བལྟ་བའི་བགེགས་དང་ལོག་འདྲེན་ཐམས་ཅད་ཀྱང་གཏོར་མ་འདིས་ཚིམས་པར་གྱིས་ལ་འདིར་མ་གནས་པར་གཞན་དུ་སོང་ཞིག །ཅེས་གཏོར་མ་ཕྱིར་དོར་རོ། །ༀ་བཛྲ་རཀྵ་རཀྵ་ཧཱུྃ་ཕཊ་ཅེས་པས་རྡོ་རྗེའི་ས་གཞི་ར་བ་དྲྭ་བ་གུར་དང་བླ་བྲེས་གཏམས་པ་ལས་ཡེ་ཤེས་ཀྱི་མེ་འབར་བས་ཅིས་ཀྱང་མི་ཤིགས་ པར་གྱུར། རང་གི་སྙིང་གའི་འོད་ཟེར་གྱིས་ཚོགས་ཞིང་རྣམས་མདུན་གྱི་ནམ་མཁར་སད་པར་བསམ་ལ། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་ལན་གསུམ་གྱིས་སྐྱབས་སུ་འགྲོ། ཤེས་རབ་སྙིང་རྗེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བགྱིས་ནས། །བྱང་ཆུབ་མཆོག་ཏུ་སེམས་བསྐྱེད་བགྱི། །ཞེས་ལན་གསུམ་གྱིས་སེམས་བསྐྱེད། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་གྱུར་ཅིག །བདེ་དང་རྟག་ཏུ་མི་འབྲལ་ཞིང༌། །བཏང་སྙོམས་མཆོག་ལ་གནས་པར་ཤོག །ཅེས་གསུམ་དང༌། ན་མོ། བླ་མ་དཀོན་མཆོག་ཡི་དམ་ལྷ། །མཁའ་འགྲོ་སྲུང་མའི་ཚོགས་བཅས་ལ། །དང་བའི་སེམས་ཀྱིས་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་འབུལ། །བདག་གིས་སྡིག་པ་ཅི་བགྱིས་པ། །དེ་དག་ཐམས་ཅད་སོ་སོར་བཤགས། །སེམས་ཅན་དོན་མཛད་རྒྱལ་སྲས་གང༌། །དེ་དག་ཀུན་ལ་རྗེས་ཡི་རང༌། །ཇི་སྲིད་འཁོར་བ་མ་སྟོང་བར། །མྱ་ངན་མི་འདའ་གསོལ་བ་འདེབས། །མགོན་པོ་ཐུགས་རྗེ་ཆེ་ལྡན་རྣམས། །ཆོས་ཀྱི་འཁོར་ལོ་བསྐོར་བར་བསྐུལ། །འགྲོ་ཀུན་བསགས་པའི་དགེ་བ་གང༌། །བྱང་ཆུབ་ཏུ་ནི་བདག་གིས་བསྔོ། །ཞེས་ལན་གསུམ་གྱིས་བསོད་ནམས་ཀྱི་ཚོགས་བསག་གོ །སྭ་བྷཱ་ཝས་ཆོས་ཐམས་ཅད་སྟོང་པ་ཉིད་དུ་སྦྱངས་ཏེ་ཡེ་ཤེས་ཀྱི་ཚོགས་སོ། ། འདི་རྩ་བར། རང་ལྷ་གང་ཡིན་གྱི་བསྐྱེད་བཟླས་བྱ་བར་བཤད་ཀྱང༌། ཕྱག་ལེན་དུ་བདག་མེད་མ་བསྒོམས་པར་མཛད་པས་དེའི་དབང་དུ་བྱས་ཏེ། སྟོང་པའི་ངང་ལས་རྡོ་རྗེ་སྲུང་བའི་གུར་ཁང་ཡེ་ཤེས་ཀྱི་མེ་འབར་བས་ཡོངས་སུ་བསྐོར་བའི་ནང་པད་ཉི་སྣ་ཚོགས་རྡོ་རྗེའི་ལྟེ་བ་ལ་གནས་པའི་གཞལ་ཡས་ཁང་གྲུ་བཞི་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པད་ཉི་རོའི་གདན་ལ་ༀ་ཡིག་ཡོངས་སུ་གྱུར་པ་ལས། རང་ཉིད་རྗེ་བཙུན་རྡོ་རྗེ་བདག་མེད་མ་སྐུ་མདོག་ནག་མོ་ཞལ་གཅིག་ཕྱག་གཉིས་ཀྱིས་གཡས་གྲི་གུག་ནམ་མཁའ་ལ་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པའི་གྲུ་མོ་ན་ཁ་ཊྭཱཾ་ག་བསྣམས་པ། སྤྱན་གསུམ་པ། ཞལ་མཆེ་བའི་མྱུ་གུ་ཅུང་ཟད་གཙིགས་ཤིང་ཁྲོ་འཛུམ་བཞད་པའི་ཉམས་ཅན། དབུ་སྐྲ་སེར་པོ་གྱེན་དུ་འཁྱིལ་བ་གཅེར་བུ་ཕྱག་རྒྱ་ལྔས་བརྒྱན་པ་གར་དགུའི་ཉམས་ཀྱིས་སྒེག་པ། ཞབས་གཉིས་གཡས་བསྐུམ་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པ་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ཡིག་རྣམས་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་བདག་ཉིད་དུ་གྱུར། ཐུགས་ཀའི་ཧཱུྃ་གི་འོད་ཟེར་གྱིས་རང་འདྲའི་ཡེ་ཤེས་པ་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བཾ་ཧོཿ ས་ཡེ་ཤེས་པ་དམ་ཚིག་པ་ལ་རོ་གཅིག་ཏུ་གྱུར། སླར་ཡང་ཐུགས་ཀའི་འོད་ཟེར་གྱིས་དབང་གི་ལྷ་བཛྲ་ས་མཱ་ཛཿ ས་སྤྱན་དྲངས། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། རིགས་ལྔ་ཡབ་ཡུམ་གྱི་ཐུགས་ཀ་ནས་བྱུང་བའི་ཡུམ་ལྔས་བྱང་ཆུབ་སེམས་ཀྱི་ཆུས་གང་བའི་བུམ་པ་ཐོགས་ནས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། ཞེས་དབང་བསྐུར་ཆུ་ལྷག་མ་སྤྱི་བོར་འཁྱིལ་བ་ལ་རྡོ་རྗེ་སེམས་དཔས་དབུ་བརྒྱན། རང་གི་ཐུགས་ཀར་ཉི་མ་ལ་གནས་པའི་ༀ་ཡིག་སྔགས་ཕྲེང་གིས་བསྐོར་བ་ལས་སྤྲོས་པའི་འོད་ཟེར་གྱིས་སྣོད་བཅུད་ཐམས་ཅད་དག་པའི་འཁོར་ལོར་སྦྱངས་པར་བསམས་ལ། ༀ་ཨཱཿ ཨཾ་སྭཱ་ཧཱ། ཞེས་བཟླས་ཤིང༌། དེས་སྐྱོ་ན་རང་གི་ཐུགས་ཀ་ནས་སྤྲོས་པའི་ལྷ་མོ་རྣམས་ཀྱིས་མཆོད་པར་བསམས་ལ། མཆོད་པ་བསངས་སྦྱངས། སྟོང་པའི་ངང་ལས་ༀ་ལས་བྱུང་བའི་མཆོད་སྣོད་ཡངས་ཤིང་རྒྱ་ཆེ་བ་རྣམས་སུ་ཨཱཿ ཡིག་ཞུ་བ་ལས་བྱུང་བའི་མཆོད་རྫས་རྣམས་འདོད་ཡོན་གྱི་རོལ་མོར་འཆར་བའི་བདུད་རྩིའི་རང་བཞིན་ཅན་ཧཱུྃ་ཡིག་གིས་ཡུལ་དུས་ཚད་མེད་པར་འཕེལ་བའི་མཆོད་སྤྲིན་དུ་གྱུར། ༀ་ཨཱཿ ཧཱུྃ། ཞེས་བདུན་ནམ་གསུམ་གྱིས་བརླབས་ལ། རབ་འབྱམས་རྒྱ་མཚོ་དཔག་མེད་ན། །མཆོད་རྫས་ཇི་སྙེད་ཡོད་པ་དང༌། །བདག་གིས་གུས་པར་བཤམས་པ་འདི། །རྗེ་བཙུན་བཅོམ་ལྡན་འདས་མར་འབུལ། །ༀ་ནཻ་རཏྣཱ་སཱ་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ། པུཥྤེ། དྷཱུ་པེ། ཨཱ་ལཱོ་ཀེ། གནྡྷེ། ནཻ་ཝིདྱེ། ཤཔྡ། ཞེས་བཅུག་པ་དང༌། ནང་མཆོད་འབྲུ་གསུམ་གྱིས་ཕུལ་ལ། བསྟོད་པ་ནི། རྣམ་དག་དྲི་མེད་དབྱིངས་ལས་སྐུ་སྤྲུལ་ཞིང༌། །སྒྱུ་མའི་སྐུ་མཆོག་མཛེས་པའི་ཆ་ལུགས་འཆང༌། །རབ་བརྗིད་གར་གྱིས་རྣམ་པར་བརྒྱན་པ་མོ། །འགྲོ་བའི་ཡིད་འཕྲོག་རྣམ་དག་སྐུ་ལ་བསྟོད། །བརྗོད་མེད་ངང་ལས་སྤྲུལ་པའི་གསུང་མཆོག་ནི། །གྲགས་སྟོང་ངོ་བོ་གཉིས་མེད་བྲག་ཆའི་སྒྲ། །འགྲོ་ཀུན་ཐར་ལམ་བདེ་ལ་འགོད་མཛད་པའི། །རྣམ་དག་དྲི་བྲལ་གསུང་ལ་གུས་པས་འདུད། །མི་རྟོག་དབྱིངས་ནས་ཐུགས་རྗེའི་འོད་ཟེར་འཕྲོ། །མཐར་ཕྱིན་ཐབས་ཀྱི་མཛད་པས་གདུལ་བྱ་སྒྲོལ། །དཔག་མེད་ཡོན་ཏན་དུ་མའི་མཆོག་མངའ་བ། །ཐུགས་མཆོག་ཡོན་ཏན་ཕྲིན་ལས་ བཅས་ལ་འདུད། །ཅེས་བསྟོད། དེ་ནས་ཚོགས་རྫས་རྣམས་རྃ་ཡྃ་ཁྃ་གིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨཱཿ ལས་ཐོད་པ་ཡངས་ཤིང་རྒྱ་ཆེ་བའི་ནང་དུ་ༀ་ལས་ཚོགས་རྫས་བདུད་རྩི་ལྔའི་རང་བཞིན། ཧཱུྃ་ལས་ཡེ་ཤེས་ཀྱི་བདུད་རྩི་སྤྱན་དྲངས་ཏེ་ཐིམ་པས་འདོད་ཡོན་གྱི་རྣམ་པ་ཅིར་ཡང་འཆར་བར་བསམས་ལ། ༀ་ཨཱཿ ཧཱུྃ། ཞེས་ལན་གསུམ་བརྗོད་པས་བྱིན་གྱིས་བརླབས། དེ་ནས་གླེགས་བམ་བྱིན་གྱིས་བརླབ་པ་ནི། ལྕགས་ཀྱུའི་ཕྱག་རྒྱ་བཅས་ལ་ཛཿ ཧཱུྃ་བཾ་ཧོ་ཞེས་པས་འོག་མིན་གྱི་གནས་ནས་ཡེ་ཤེས་ཀྱི་གླེགས་བམ་སྤྱན་དྲངས་ཏེ་ཐིམ་པར་བསམས་ལ། ༀ་ཨཱཿ ཧཱུྃ་ཧྲཱིཿ ཞེས་བཞི་བརྒྱ་བཟླས། ཡང་སྔགས་རྒྱས་ཡེ་ཤེས་ཀྱི་ཡིག་འབྲུ་ཨཱ་ལི་ཀཱ་ལི་ལྔ་བཅུའི་རྣམ་པར་སྤྱན་དྲངས་པར་བསམས་ལ། ཨ་ཀྵ་ལྔ་བཅུ་པོ་ལན་བཞི་བཟླས་ནས་བླ་མ་ཆོས་ཀྱི་སྐུའི་ངོ་བོར་བྱིན་གྱིས་བརླབ་བོ། །ཡང་ཐོད་པའི་བདུད་རྩི་བརླབ་པ་ནི། བདུད་རྩིའི་སྟེང་དུ་ཟླ་བའི་གདན་ལ་ཡི་དམ་གྱི་ས་བོན་ཨཾ་ཡིག་འབར་བ། དེ་ལས་འོད་ཟེར་འཕྲོས། བླ་མ་དང་གཉིས་སུ་མེད་པའི་སངས་རྒྱས་ རྡོ་རྗེ་འཆང་ཡབ་ཡུམ་སྤྱན་དྲངས། བདག་གི་སློབ་མ་འདི་དག་སྨིན་པར་མཛད་དུ་གསོལ། ཞེས་གསོལ་བ་བཏབ་པས་ཡབ་ཡུམ་མཉམ་པར་སྦྱོར་བའི་བྱང་སེམས་དཀར་དམར་བབས་པས་ཐོད་པ་ཁེངས་པར་བསམས་ལ། ཨ་མྲྀ་ཏ་ཧཱུྃ། ཞེས་པ་བཞི་བརྒྱ་བཟླས་རྗེས། ༀ་ཨཱཿ ཧཱུྃ་མང་དུ་བཟླས་པས་དཀྲུགས་ཤིང་རྒྱས་བཏབ་ལ་བཞག་གོ །ཡང་སྔགས་རྒྱས་ཕྲིན་ལས་བཞི་གྲུབ་པའི་རྫས་དེ་སྤྱན་དྲངས་འབྲང་རྒྱས་ལ་ཐིམ་པར་བསམས་ལ། ཤཱནྟིང་ཀུ་རུ་སྭཱ་ཧཱ། པུཥྚ་ཀུ་རུ་སྭཱ་ཧཱ༑ བ་ཤཾ་ཀུ་རུ་སྭཱ་ཧཱ། རཀྴ་ཀུ་རུ་སྭཱ་ཧཱ། ཞེས་བཟླས་པས་ཕྲིན་ལས་ཐོགས་མེད་དུ་འགྲུབ་པའི་རྫས་སུ་གྱུར་པར་བསམ་ཞིང༌། ཨ་བྷི་ཥིཉྩ་ཧཱུྃ་ཞེས་ཀྱང་བཟླས་སོ། །དེ་ནས་སློབ་མ་རྣམས་ཁྲུས་དང་ཕྱག་བྱས་ནས་གྲལ་དུ་འཁོད་པ་ལ། འོ་རྒྱུ་སེམས་ཅན་ལ་འབྲས་བུ་རྫོགས་པའི་སངས་རྒྱས་ཐོབ་པར་འདོད་པ་རྣམས་ཀྱིས་དམ་པའི་ཆོས་རིན་པོ་ཆེ་ཉམས་སུ་ལེན་དགོས་ལ། དེ་ཡང་གང་ཟག་བློའི་རིམ་པ་མི་གཅིག་པ་ལ་དགོངས་ནས་རྫོགས་པའི་སངས་རྒྱས་ཀྱིས་ཐེག་པ་སྣ་ཚོགས་གསུངས་པ་ལས། འདིར་ཐེག་པ་ཆེན་པོ། དེ་ལའང་སྔགས་མཚན་ཉིད་གཉིས་ལས་འདིར་སྔགས་གཙོ་བོར་སྟོན་པ། དེ་ལའང་རྒྱུད་སྡེ་རིན་པོ་ཆེ་བཞི་ལས་འདིར་བླ་མེད། དེ་ལ་གསུམ་ལས་འདི་སྙིང་པོ་དོན་གྱི་རྒྱུད། འདི་ཉམས་སུ་བླངས་པས་གྲུབ་པ་ཐོབ་པའི་གང་ཟག་དཔག་མེད་བྱོན་པ་ལས་འདིར་ནི་དམ་པ་རིན་པོ་ཆེའི་ལུགས་དམ་པའི་ཆོས་སྤྱིའི་མིང་བྱེ་བྲག་ལ་བཏགས་ནས། སྤྱི་མིང་སྒོས་སུ་ཐོབ་པའི་ཆོས་སྡུག་བསྔལ་ཞི་བྱེད། དེ་ལ་ཡང་སྔ་ཕྱི་བར་གསུམ་ལས་འདི་ནི་ཞི་བྱེད་བརྒྱུད་པ་ཕྱི་མ་བྱ་བ། སྒོ་བའི་རྣལ་འབྱོར་པ་བཞི་ལ་གསུངས་པ་ལས། འདི་བླ་མ་བྱང་ཆུབ་སེམས་དཔའ་ཀུན་དགའི་ལུགས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པའི་གདམས་ངག །གསང་སྔགས་དང་རྗེས་སུ་མཐུན་པ། རྩ་བ་དང་བརྒྱུད་ལ་བསྐུར་བ། སྙིང་པའི་དོན་ཐབས་རྟེན་འབྲེལ་གྱི་ཆེ་བ་དུ་མས་བརྒྱན་པ། སངས་རྒྱས་ཀྱི་བསྟན་པ་ཐམས་ཅད་སྟན་གཅིག་གི་སྟེང་དུ་དུས་གཅིག་ལ་ཉམས་སུ་ལེན་པ་དྲི་མེད་ཐིག་པ་ཕྱག་བཞེས་ཀྱི་སྐོར་བྱ་བ་དེ་ལགས། འདི་འཆད་པ་ལ་ཡན་ལག་ལྔ་སྟེ། ཡིད་ཆེས་བསྐྱེད་པ་གཏམ་རྒྱུད་ཀྱི་ཡན་ལག །རྟེན་སྨིན་པར་བྱེད་པ་དབང་གི་ཡན་ལག །ཉམས་སྐྱེ་བར་བྱེད་པ་ཁྲིད་ཀྱི་ཡན་ལག །རྟོགས་པ་འཆར་བར་བྱེད་པ་བླ་མའི་བྱིན་རླབས་ཀྱི་ཡན་ལག །སྤྲོས་པ་གཅོད་བྱེད་ཚིག་ཚོགས་ཀྱི་ཡན་ལག་དང་ལྔ་ལས། འདིར་རྟེན་མ་སྨིན་པ་སྨིན་པར་བྱེད་པ་དབང་གི་ཡན་ལག་གི་སྐབས་ཡིན་པས། ཐོག་མར་དབང་ཞུ་བའི་ཡོན་དུ་མཎྜལ་ཕུལ་མཛོད། ཅེས་མཎྜལ་ཕུལ་དུ་གཞུག །དེ་ནས་སྙིམ་པ་མེ་ཏོག་དང་བཅས་ཏེ་ཐལ་མོ་སྦྱར་ནས་འདིའི་རྗེས་ཟློས་མཛོད། བླ་མ་རིན་པོ་ཆེ། བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། ཞེས་ལན་གསུམ། དེ་ནས་བླ་མས། ཁྱེད་རྣམས་སེམས་ཅན་གྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ཨཱ་ལི་ཀཱ་ལིའི་བྱིན་རླབས་ཡི་གེ་ ཕྱི་མའི་དབང་བསྐུར་ལྷན་ཅིག་སྐྱེས་པ་བཞི་རྫོགས་ཞུས་ལ་ཉམས་སུ་བླང་སྙམ་པས་མ་ཡེངས་པར་གསན་འཚལ། དེའང་དབང་འཁོར་རྩ་བ་ལས། གསོལ་བ་བཏབ་པའི་རྗེས་སུ། བླ་མས་ལྷག་པའི་ལྷ་མཆོད་ཅིང་ཚོགས་མཆོད་གླེགས་བམ་བྱིན་གྱིས་བརླབ་པར་བྱའོ། །དེ་ནས་སེམས་བསྐྱེད་པར་ལྡན་པས་ཐེག་པའི་རིམ་པ་ངོས་བཟུང་ལ། སྙིང་པོ་དོན་གྱི་ཆེ་བ་བརྗོད་པར་བྱའོ། །ཞེས་གསུངས་པ་ལས་ལག་ཏུ་བླང་བདེ་བའི་ཕྱིར་དེ་རྣམས་གསོལ་འདེབས་ཀྱི་གོང་དུ་གྲུབ་པས། ད་ཁྱད་འཕགས་ལྔའི་སྒོ་ནས་ལས་ཅན་སྤྲོ་བ་བསྐྱེད་པར་བྱ་སྟེ། དྲི་མེད་ཐིག་པ་ཕྱག་བཞེས་ཀྱི་སྐོར་འདི་ཉམས་སུ་ལེན་པ་ལ། དབྱིངས་རྣལ་འབྱོར་གསུམ་དུ་གནས་ཏེ། དང་པོ་བྱ་བ་གཞིའི་རྣལ་འབྱོར་རྟེན་སྡོམ་པ་གསུམ་ལྡན་དུ་བྱས་ནས་རྣལ་འབྱོར་གྱི་རང་ས་དྲུག་མ་ཉམས་པར་བསྲུང༌། དེའི་སྟེང་ནས་བྱེད་པ་ལམ་གྱི་རྣལ་འབྱོར་འཕགས་པའི་ལམ་རིམ་པ་ལྔ་དཀའ་ཐུབ་རྣམ་པ་གསུམ་གྱི་སྲང་ནས་བཏོན་པས། མཐར་བྱ་བྲལ་འབྲས་བུའི་རྣལ་འབྱོར་སངས་རྒྱས་སྐུ་བཞི་མངོན་དུ་འགྱུར་བ་ལ་ཚེགས་མེད་པ་ལགས། འདི་ལའང་ལམ་རིམ་པ་ལྔ་ལས། ད་རེས་ཀྱི་དབང་འདི་ཚོགས་ལམ་བགྲོད་པར་བྱེད་པ་བློ་སྦྱོང་གི་དབང་དང་བྱིན་རླབས་བྱ་བ་དེ་ཡིན། འདི་ནི་དབང་བསྐུར་བ་གཞན་ལས་ཁྱད་པར་ལྔས་འཕགས་པ་ཡིན་ཏེ། དང་པོ་དཀྱིལ་འཁོར་མི་བཤམ་གླེགས་བམ་བཤམས་པས་ཁྱད་པར་འཕགས་ཏེ༑ དཀྱིལ་འཁོར་ནི་ལྷ་དབང་ལུས་ལ་བསྐུར་བའི་རྟེན་ཙམ་ཡིན་ལ། གླེགས་བམ་ནི་ཆོས་དབང་སེམས་ལ་བསྐུར་བ་ཡིན་པས་ཁྱད་པར་འཕགས། འདི་ལ་གསུམ་ལས། རི་མོ་གཟུགས་ཀྱི་གླེགས་བམ་སངས་རྒྱས་ སྐུ་གསུམ་གྱི་ཞིང་ཁམས། མཐའ་བསྐོར་རྟོགས་པ་དོན་གྱི་གླེགས་བམ་སྐུ་གསུམ་གྱི་དགོངས་པ། རྒྱབ་ན་མཚོན་བྱེད་སྒྲའི་གླེགས་བམ་གསུང་རབ་རིན་པོ་ཆེ་སྐུ་གསུམ་གྱི་ཕྲིན་ལས། དེ་ལྟར་གླེགས་བམ་འདི་མཐོང་བ་ཙམ་གྱིས་སྐྱོན་ཐམས་ཅད་འདགས་ཤིང་ཡོན་ཏན་ཐམས་ཅད་འབྱུང་བ་ཡིན་ནོ། །གཉིས་པ་དཀྱིལ་འཁོར་གྱི་སྟེང་དུ་ས་ཚོན་མི་འགྲེམ་པར་གླེགས་བམ་གྱི་སྟེང་དུ་ཡིག་འབྲུ་བཀྲམ་པས་འཕགས་ཏེ། ས་ཚོན་གྱིས་ཡེ་ཤེས་ལྔའི་མདངས་ལས་མི་མཚོན་ལ། ཡིག་འབྲུ་ནི་ཡེ་ཤེས་དངོས་སུ་རྒྱུད་ལ་སྐྱེ་བར་བྱེད་པའི་ས་བོན་ཡིན་པས་ཡང་དག་པའི་ལམ་རིམ། བདེ་བར་གཤེགས་པའི་ཞལ་ངོ༌། འཁོར་འདས་ཀུན་གྱི་རྩ་བ། མཐོང་བས་ཆོག་པའི་ལམ་ཡིན་ནོ། །གསུམ་པ་དཀྱིལ་འཁོར་གྱི་སྟེང་དུ་བུམ་པ་མི་འཆའ་བར་གླེགས་བམ་གྱི་སྟེང་དུ་བྷནྡྷ་འཆའ་བས་འཕགས་ཏེ། བུམ་པ་ནི་བཟོ་བོས་གསར་དུ་བསྒྲུབས་ཤིང་རྫས་ཆུས་བྱས་པས་བདེ་བར་གཤེགས་པའི་རྟེན་རྫས་ཙམ་ཡིན་ལ། བྷནྡྷ་ནི་རང་བྱུང་ལྷུན་གྲུབ་བསམ་འཕེལ་གྱི་ནོར་བུ་རིན་པོ་ཆེ། འདིའི་ནང་དུ་བླུགས་པའི་བདུད་རྩི་བྱང་སེམས་ནི། བདེ་བར་གཤེགས་པ་ཐམས་ཅད་མཉེས་པར་བྱེད་པའི་དམ་རྫས་ཏེ། ཟིན་པས་ཆོག་པའི་རྩི། རྫས་གཅིག་གིས་ཐུགས་དམ་སྐོང་བར་བྱེད་པ་ཡིན་ནོ། །བཞི་པ་དཀྱིལ་འཁོར་གྱི་གཙོ་བོ་ལྷས་མ་བྱས་པར་གླེགས་བམ་གྱི་གཙོ་བོ་བླ་མས་བྱས་ནས་དབང་བསྐུར་བས་འཕགས་ཏེ། ལྷས་སེམས་ཀྱི་ སྒྲོ་འདོགས་དངོས་སུ་མི་ཆོད་ལ། བླ་མས་དངོས་སུ་གཅོད་དེ་རབ་རྟོགས་ལྡན་གྱི་བླ་མ་སངས་རྒྱས་ཐམས་ཅད་ཀྱི་བྱེད་པ་པོ། འབྲིང་ཉམས་མྱོང་དང་ལྡན་པའི་བླ་མ་ནི་སངས་རྒྱས་ཐམས་ཅད་ཀྱི་རྣམ་འཕྲུལ། ཐ་མ་གདམས་ངག་དང་ལྡན་པའི་བླ་མས་ཀྱང་སངས་རྒྱས་ཀྱི་ཕྲིན་ལས་ཙམ་སྒྲུབ་ནུས་པ་ཡིན་ནོ། །ལྔ་པ་དབང་བཞི་གྱེར་ཐབས་སུ་མི་བསྐུར་བར་ངོ་སྤྲོད་དུ་བསྐུར་བས་འཕགས་ཏེ། གྱེར་ཐབས་ནི་དོན་སྤྱི་ལ་བརྟེན་པ་ལམ་མོས་སྒོམ་ཙམ་ཡིན་ལ། ངོ་སྤྲོད་ཀྱི་ལམ་དངོས་སུ་རྫོགས་པར་བྱེད་པ་ཡིན་ཏེ། སློབ་མ་རབ་དབང་བསྐུར་བའི་དུས་དེ་ཉིད་རྟོགས་ཐོབ་དུས་མཉམ་དུ་འགྲོལ་ནུས། འབྲིང་གིས་རྩ་བྲལ་གྱི་དོན་རྙེད། ཐ་མས་ཀྱང་བྱང་སེམས་ཀྱི་ངོ་བོ་མཐོང་ངེས་པ་ཡིན་ནོ། །དེ་ལྟར་ཁྱད་དུ་འཕགས་པའི་དབང་འདི་རྒྱ་བོད་ཀྱི་མཁས་པ་གཞན་ལ་མ་གྲགས་ཤིང༌། སྔོན་ཆད་བོད་དུའང་མ་བསྒྱུར་བའི་ཁྱད་ཆོས་དམ་པ་རིན་པོ་ཆེས་བོད་ཀྱི་གདུལ་བྱ་རྣམས་ལ་ཐུགས་རྗེས་དགོངས་ནས། ཕྱི་སྡེ་སྣོད་གསུམ་གྱི་སྙིང་ཕྱུང༌། ནང་རྒྱུད་སྡེ་བཞིའི་སྲོག་བཅད། གསང་བ་སྙིང་པོ་དོན་གྱི་མིག་ཕྱེ། དེ་ཁོ་ན་ཉིད་མཁའ་འགྲོ་མ་རྣམས་ཀྱི་བཀའ་རྒྱ་བཀྲོལ་ནས། ཕྱི་རབས་ཀྱི་དོན་དུ་བླ་མ་བྱང་ཆུབ་སེམས་དཔའ་ཀུན་དགའ་ལ་ཆིག་བརྒྱུད་དུ་གནང་བ་ཡིན། དེ་ལྟ་བུའི་བྱིན་རླབས་འདི་ལ་དབང་གི་ཆུ་བོ་ཆེན་པོ་བཞི་རུ་ཡོད་པ་ལས། ཐོག་མར་བུམ་དབང་གི་བརྒྱུད་པ་ནི། ཆོས་སྐུ་རྡོ་རྗེ་འཆང་གིས་ལོངས་སྐུ་ལྷ་མོ་ བདག་མེད་འདི་ལྟར་བྱིན་གྱིས་བརླབས་ཏེ། སེམས་ཉིད་ཀྱི་གཤིས་སྐྱེ་བ་མེད་པའི་གླེགས་བམ་ལ་རྩལ་མ་འགགས་རྟོགས་པའི་རི་མོ་ཤར་བ་དེ་ལ། ཐབས་མ་ཡེངས་པར་དྲན་པའི་དབང་བསྐུར་མཛད་པར་གདའ། བདག་མེད་མས་སྤྲུལ་སྐུ་དམ་པ་རིན་པོ་ཆེ་ལ་འདི་ལྟར་བྱིན་གྱིས་བརླབས་ཏེ། ཤིང་ཏཱ་ལ་བདུན་སྲིད་ཙམ་གྱི་བར་སྣང་ལ་བཞུགས་ཏེ། ཕྱག་མཛུབ་ཀྱིས་བར་སྣང་ལ་ནམ་མཁའ་དོན་གྱི་གླེགས་བམ་བྲིས་ནས། ཀུན་ཏུ་བཟང་པའི་མཆོད་ཚོགས་དངོས་སུ་སྤྲུལ་ནས་དབང་བཞི་རྫོགས་པར་བསྐུར། སྤྲུལ་པའི་སྐུ་དམ་པ་རིན་པོ་ཆེས་བླ་མ་བྱང་ཆུབ་སེམས་དཔའ་ཀུན་དགའ་ལ་འབྲས་དཀར་བརྡལ་བའི་གླེགས་བམ་ལ་དུང་གི་ཡིག་འབྲུ་བཀོད་ནས་མཆོད་ཚོགས་ཕུན་སུམ་ཚོགས་པ་བཅས་ནས་དབང་བཞི་བསྐུར། ཚུལ་དེ་ཁོ་ན་བཞིན་དུ་རིམ་པར་བླ་མ་བྱང་ཆུབ་སེམས་དཔའ་མཁས་བཙུན་སྤ་ཚབ་སྒོམ་པ་ལ། དེས་རྒྱལ་བ་ཏེ་ནེ་ལ། དེས་ཞིག་པོ་ཉི་མ་སེངྒེ་སྐུ་མཆེད་ལ། དེས་ཐམས་ཅད་མཁྱེན་པ་བསོད་ནམས་དཔལ་ལ། དེས་རྒྱལ་སྲས་ཀུན་དགའ་སྐུ་མཆེད་ལ། དེས་མཚན་ལྡན་རི་ཁྲོད་དབང་ཕྱུག་ལ། དེས་མཁན་ཆེན་ཚུལ་ཁྲིམས་ཕན་པ་ལ། དེས་དྲིན་ཅན་སངས་རྒྱས་དབོན་པོ་ལ། དེ་དང་རྒྱལ་སྲས་ཀུན་དགའ་སྐུ་མཆེད་ཀྱི་སློབ་མ་རྒྱ་སྟོན་སྨོན་ལམ་ཤེས་རབ་གཉིས་ཀྱིས། ཆོས་རྗེ་ཀུན་མཁྱེན་སྐུ་མཆེད་ལ། དེས་རྒྱ་སྒོམ་རྡོ་རྗེ་གདན་པ་ལ། དེས་བྱང་སེམས་རྒྱ་མཚོ་སྦྱིན་པ་ལ། དེས་སྐུ་གསུམ་བདེ་ཆེན་ལྷུན་གྲུབ་ལ། དེས་མཁས་གྲུབ་ནམ་མཁའ་བཟང་པོ་ལ། དེས་འཇམ་དབྱངས་དཔལ་འབྱོར་ལྷུན་གྲུབ་ལ། དེས་ཁྱབ་བདག་དཔལ་འབྱོར་ཕུན་ཚོགས་ལ། དེས་མཚུངས་མེད་བཀྲ་ཤིས་བཟང་པོ་ལ། དེས་དིང་རི་བ་ཆེན་པོ་རྗེ་བཙུན་བློ་གྲོས་བརྟན་པ་ལ། དེས་བདག་ལ་གནང་བ་ལགས་ཏེ་བྱིན་རླབས་སྣོད་གཅིག་ནས་གཅིག་ཏུ་བླུགས་པ་ལྟ་བུའི་ལུགས་ཡིན་པས། ཁྱེད་ཀྱིས་ཀྱང་འདིའི་ནང་བཞིན་ཉམས་སུ་བླངས་ན། ཉམས་རྟོགས། ལམ་རྟགས། ཡོན་ཏན་རྣམས་མར་མེ་གཅིག་ནས་གཅིག་ཏུ་སྤར་བ་ལྟར་འཆར་བའི་བཀའ་སྲོལ་འགྲན་ཟླ་དང་བྲལ་བ་ལགས་པས། བཀའ་བརྒྱུད་དྲི་མ་མེད་པ། སྒྲུབ་བརྒྱུད་ཐམས་ཅད་ཀྱི་ལན་ཚྭ། མཐོང་བས་ཆོག་པའི་ལམ༑ ཟིན་པས་ཆོག་པའི་རྩི། ཤེས་པས་ཆོག་པའི་གནད། འཕྲད་པས་ཆོག་པའི་བརྒྱུད་པ་འདི་ལ་ན་སོ་ལ་རྒན་གཞོན་ནམ། དབང་པོ་ལ་རྣོ་བརྟུལ་ལམ། གང་ཟག་ལ་ཉེ་རིང་མེད་པར་ཕན་ཐོགས་ཏེ། དབུལ་ཕོངས། ནད་པ་ཞྭ་ལོང་རྒན་བྱིས་གང་ཡིན་ཡང་རུང༌། དབང་འདི་དང་འཕྲད་པ་ཐམས་ཅད་སྐལ་ལྡན་ཡིན་པར་གསུངས་པས། འདི་རེ་འཚེངས་སྙམ་དུ་ཐུགས་ལ་སྤྲོ་བ་བསྐྱེད་པར་མཛད་འཚལ། ཆོ་ག་དངོས་ལ་གསུམ་ལས། དང་པོ་སྦྱོར་བ་རྟེན་སྡོམ་པ་གསུམ་ལྡན་དུ་བྱེད་པ་སྐྱབས་འགྲོ་སེམས་བསྐྱེད་མཆོད་པ་བསྔོ་བ་སྨོན་ལམ་དང་བཅས་པ་འདིའི་རྗེས་ཟློས་མཛོད། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་ རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་བླ་མ་དམ་པ་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཡི་དམ་གྱི་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་ཡི་དམ་གྱི་ལྷ་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མཁའ་འགྲོ་མའི་ཚོགས་རྣམས་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་མཁའ་འགྲོ་མའི་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། བླ་མ་ཡི་དམ་མཁའ་འགྲོ་མའི་ཚོགས་རྣམས་བདག་ལ་དགོངས་སུ་གསོལ། བདག་གིས་འདས་པ་དང་མ་འོངས་པ་དང་ད་ལྟར་བྱས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཏེ་བླ་མ་ལ་དབུལ་བར་བགྱིའོ། །བླ་མ་ལ་ཕུལ་བས་བླ་མ་རིན་པོ་ཆེ་རྣམས་ཀྱི་ཐུགས་དགོངས་ཁྱད་པར་ཅན་ཡོངས་སུ་རྫོགས་པར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེས་བདེ་བར་གཤེགས་པ་རྣམས་ཀྱི་སྤྱན་ལམ་དུ་མཆོད་པའི་བྱེ་བྲག་ནམ་མཁའ་དང་མཉམ་པ་འབྱུང་བར་གྱུར་ཅིག །དེ་ལས་བྱུང་བའི་ དགེ་བའི་རྩ་བ་དེ་སེམས་ཅན་ཐམས་ཅད་ལ་ཐུན་མོང་དུ་བསྔོ་བར་བགྱིའོ། །དེ་ལྟར་བསྔོས་པས་སེམས་ཅན་ཐམས་ཅད་འཁོར་བ་སྲིད་པ་སྡུག་བསྔལ་གྱི་རྒྱ་མཚོ་ལས་བསྒྲལ་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་གྱུར་ཅིག །དེ་མ་ཐོབ་ཀྱི་བར་དུ་ཡང་བདག་མྱུར་དུ་མངོན་པར་རྫོགས་པར་སངས་རྒྱས་ནས་འགྲོ་བ་མ་ལུས་པ་མཐའ་དག་གི་བླ་མ་བྱེད་པར་གྱུར་ཅིག །དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་ལན་གསུམ། དེ་ལྟར་མཆོག་ཏུ་གྱུར་པའི་སྐྱབས་འགྲོ། བླ་ན་མེད་པའི་སེམས་བསྐྱེད། ངོ་མཚར་ཅན་གྱི་མཆོད་པ། གཞན་དོན་དུ་འགྱུར་ངེས་ཀྱི་བསྔོ་བ། སེམས་ཅན་དང་མི་ཕྱེད་པའི་སྨོན་ལམ་དང་ལྔ་པོ་འདི་རང་ལ་ཐུགས་དམ་མཛད་ན་ཡང་ལམ་ལྔའི་ཉམས་རྟོགས་ཐམས་ཅད་སྐྱེ་བ་ཡིན་གསུང་ངོ༌། །དངོས་གཞི་དབང་བཞི་ཡོངས་སུ་རྫོགས་པར་བསྐུར་བ་ལ་བཞི་ལས། དང་པོ་ལུས་ཀྱི་སྒྲིབ་པ་དག་ནས༑ སངས་རྒྱས་ལོངས་སྤྱོད་རྫོགས་པའི་སྐུ་ཐོབ་པར་བྱ་བ་དང༌། དེ་མ་ཐོབ་ཀྱི་བར་དུའང་ཕུང་ཁམས་སྐྱེ་མཆེད་ལ་སོགས་པ་སྣང་གྲགས་དྲན་པའི་ཆོས་ཐམས་ཅད་བླ་མའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པར་བྱིན་གྱིས་བརླབས་ནས། དག་པའི་སྣང་བ་ཡུལ་དྲུག་ལ་སྦྱང་བའི་ཕྱིར་གླེགས་བམ་གྱི་ཡིག་འབྲུ་ལ་བརྟེན་ནས་བུམ་པའི་དབང་བཞི་བསྐུར་བ་ལས། དང་པོ་ཐུར་མས་བརྡ་སྤྲད་པའི་ཡིག་འབྲུ་ལ་མིག་མ་ཡེངས་པར་ལྟོས་ལ་གཟུགས་སུ་སྣང་བ་ཐམས་ཅད་ངོ་བོ་བླ་མའི་སྐུ་ལ་རྣམ་པ་ཡི་གེར་ཤེས་པར་བྱོས་ལ་འདིའི་རྗེས་ཟློས། ཨ་ཀྵ་ལྔ་བཅུ་ལ་རིན་པོ་ཆེའི་ཐུར་མ་རིམ་པར་བཙུགས་ལ། ཨ་ཨཱ། ཨི་ཨཱི། ཨུ་ཨུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས། ཧ་ཀྵཿ ཞེས་རྗེས་ཟློས་ཀྱིས་བཀླག །དེ་ནི་སྣང་བ་གཟུགས་ཀྱི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས། དབང་གང་གིས་ཐོབ་ན། ཡིག་འབྲུ་ལ་མིག་ལྟ་ཞིང་བླ་མའི་རྗེས་ཟློས་བྱས་པས་ཐོབ། ངོ་ཇི་ལྟར་འཕྲོད་ན་མིག་གི་ཡུལ་དུ་མཐོང་བའི་གཟུགས་ཐམས་ཅད་ཡི་གེ །ཡི་གེ་བླ་མའི་སྐུ་རུ་ངོ་འཕྲོད། བླ་མ་སངས་རྒྱས་ཆོས་ཀྱི་སྐུ་རུ་ངོ་འཕྲོད་དོ། །འབྲས་བུ་གང་འབྱུང་ན། ཕྱི་ཡུལ་གྱི་སྣང་བ་ཐམས་ཅད་ངོ་སྤྲོད་དུ་འཆར་བ་ཡིན་ནོ། །གཉིས་པ་སྒྲ་ཐམས་ཅད་ངོ་བོ་བླ་མའི་གསུང་ལ་རྣམ་པ་ཡི་གེར་ཤེས་པ་འདིའི་རྗེས་ཟློས། ཐུར་མ་བཙུགས་ནས། ཨཀྵ་བརྗོད། དེ་ནི་གྲགས་པ་སྒྲའི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས། དབང་གང་གིས་ཐོབ་ན་ཡི་གེ་ཀློག་པའི་གསུང་རྣ་བར་ལྷང་ལྷང་ཐོས་པས་ཐོབ། ངོ་ཇི་ལྟར་འཕྲོད་ན། རྣ་བའི་ཡུལ་དུ་ཐོས་པའི་སྒྲ་ཐམས་ཅད་ཡི་གེ །ཡི་གེ་བླ་མ་ཆོས་ཀྱི་སྐུའི་གསུང་ངོ་འཕྲོད། འབྲས་བུ་གང་འབྱུང་ན། ཕྱི་ཡུལ་དུ་གྲགས་པའི་སྒྲ་ཐམས་ཅད་གནད་ཀྱི་གདམས་པ་སངས་རྒྱས་ཀྱི་གསུང་རབ་འབའ་ཞིག་ཏུ་ འཆར་བ་ཡིན་ནོ། །གསུམ་པ་དྲན་རྟོག་ཅི་འགྱུས་ཐམས་ཅད་ངོ་བོ་བླ་མའི་ཐུགས་ལ་རྣམ་པ་ཡི་གེར་ཤེས་པས་འདིའི་རྗེས། ཐུར་མ་བཙུགས་ལ་ཨཀྵ་བརྗོད། དེ་ནི་དྲན་པ་སེམས་ཀྱི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས༑ དབང་གང་གིས་ཐོབ་ན་བླ་མའི་གསུང་ལ་ཡིད་གཏད་དེ་དྲན་པ་མ་ཡེངས་པས་ཐོབ། ངོ་ཇི་ལྟར་འཕྲོད་ན། དྲན་པའི་རྣམ་རྟོག་ཅི་འགྱུས་ཐམས་ཅད་ཡི་གེ །ཡི་གེ་བླ་མ་ཆོས་སྐུའི་ཐུགས་སུ་ངོ་འཕྲོད། འབྲས་བུ་གང་འབྱུང་ན། དྲན་རྟོག་ཐམས་ཅད་རྟགས་དང་ཡོན་ཏན། ཏིང་ངེ་འཛིན་དང་སངས་རྒྱས་ཀྱི་ཐུགས་རྗེ་རུ་འཆར་བ་ཡིན་ནོ། །བཞི་པ་སྣང་གྲག་འགྱུ་བ་ཐམས་ཅད་ཀྱང་རང་གི་སེམས་ཉིད་སྟོང་པའི་རང་རྩལ་ཙམ་དུ་ཤེས་པས་འདིའི་རྗེས་ཟློས། ཐུར་མ་བཙུགས་ལ། ཨཀྵ་བརྗོད། དེ་ནི་ཡང་དག་དོན་གྱི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས། དབང་གང་གིས་ཐོབ་ན་དྲན་པ་མ་ཡེངས་པའི་སྟེང་དུ་བླ་མ་ལ་མོས་གུས་དུང་ངེ་བྱས་པས་ཐོབ། ངོ་ཇི་ལྟར་འཕྲོད་ན། འཁོར་འདས་ཀྱི་ཆོས་ཐམས་ཅད་རང་གི་སེམས། སེམས་ཉིད་གདོད་ནས་སྟོང་པ་ཉིད། སྟོང་ཉིད་ཆོས་ཀྱི་སྐུར་ངོ་འཕྲོད། འབྲས་བུ་གང་འབྱུང་ན་གཟུང་འཛིན་གྱི་འཁྲུལ་པ་རང་སར་ཞིག་ནས་འཁོར་འདས་མིང་ཙམ་དུ་གྲོལ་ནས་འགྲོ་བ་ཡིན་ནོ། །ད་བུམ་པའི་དབང་དེ་ཉིད་བརྟན་པར་བྱ་བའི་ཆོ་ག་གསུམ་བྱ་སྟེ། ཐོད་པ་སོ་སོའི་དབུ་ཐོག་ཏུ་ལན་གསུམ་བཞག་ལ་ཨཀྵ་ཚར་གཅིག་བརྗོད་པའི་ཚེ། བདུད་རྩི་བྱང་སེམས་ཡིག་འབྲུའི་ ཚུལ་དུ་བྱིན་གྱིས་བརླབས་པ་རྣམས་ཐོད་པའི་ཚངས་བུག་ནས་འཛགས་ཏེ། ཁྱེད་རང་རྣམས་ཀྱི་ཚངས་བུག་ནས་མར་ཐིག་པ། ལུས་ཐམས་ཅད་རྩའི་རང་བཞིན། རྩ་ཡི་གེའི་རང་བཞིན། ཡི་གེ་རང་སྣང་དག་མ་དག་གི་ས་བོན་དུ་གནས་པ་ལ་ཐིམ་པས་རྩ་ཁམས་ཀྱི་སྒྲིབ་པ་ཐམས་ཅད་དག་པའི་སྣང་བ་འབའ་ཞིག་ཏུ་འཆར་བ་ཡིན་ནོ། །དེས་གླེགས་བམ་གྱི་ཡི་གེ་ལ་བརྟེན་ནས་བུམ་པའི་དབང་བཞི་བསྐུར་བ་སོང༌། ད་གཉིས་པ་བདུད་རྩི་གསང་བའི་དབང་བཞི་བསྐུར་བར་བྱ་སྟེ། དབང་གི་ཆུ་བོ་འདི་ནི་སངས་རྒྱས་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་དང༌། ཡུམ་ཀུན་ཏུ་བཟང་མོ་གཉིས་ཀྱིས། རིག་འཛིན་མཁའ་སྤྱོད་ཀྱི་བླ་མ་དཔལ་ལྡན་སུམ་ཅུ་རྩ་དྲུག་ལ་བསྐུར། དེ་རྣམས་ཀྱིས་དམ་པ་རིན་པོ་ཆེ་ལ་བསྐུར་བ་ཡིན། དེ་ཡང་དབང་འདིས་ངག་གི་སྒྲིབ་པ་དག་ནས། སངས་རྒྱས་སྤྲུལ་པའི་སྐུ་ཐོབ་པར་བྱ་བ་དང༌། དེ་མ་ཐོབ་ཀྱི་བར་དུ་ཡང་བཟའ་བ་དང་བཟའ་བ་མ་ཡིན་པའི་རྣམ་པར་རྟོག་པ་ཐམས་ཅད་བཅོམ་ནས་ནང་གི་རྩ་རླུང་ལས་སུ་རུང་བར་བྱ་བ་དང༌། སྐུ་གསུང་ཐུགས་ཡོན་ཏན་ཕྲིན་ལས་གྲགས་པ་སྟེ་དབང་ཕྱུག་ཆེན་པོ་དྲུག་བླ་མའི་སྐུ་གསུང་ཐུགས་ཡོན་ཏན་ ཕྲིན་ལས་དང་བཅས་པའི་བྱིན་རླབས་ལ་བསྟེན་ནས་སྒྲུབ་པའི་ཕྱིར་གསང་བའི་དབང་བཞི་བསྐུར་བ་ནི། ཐོད་པའི་བདུད་རྩི་ནས་བླ་མའི་སྲིན་ལག་གིས་བླངས་ལ་སློབ་མའི་གནས་བཞིར་ཐིག་ལེ་བྱེད་པ་སྟེ་ཐོག་མར། དཔྲལ་བར་ ཐིག་ལེ་བྱ་ཞིང་ཨ་བྷི་ཥིཉྩ་ༀ། ཞེས་བརྗོད་པས་ལུས་ཐ་མལ་དུ་འཛིན་པའི་སྒྲིབ་པ་དག་ནས། རང་ལུས་བླ་མ་དང་དེ་བཞིན་གཤེགས་པ་རྣམས་ཀྱི་སྐུར་བལྟ་ཞིང༌། ཇི་ལྟར་སྣང་བ་ཐམས་ཅད་སྣང་སྟོང་ཞེན་བྲལ་དུ་འཆར་བར་བྱིན་གྱིས་བརླབས། བདུད་རྩིའི་ཐིག་ལེ་དེ་ཉིད་ཡོངས་སུ་གྱུར་པ་ལས། སྤྱི་བོར་བདེ་ཆེན་གྱི་འཁོར་ལོའི་ལྟེ་བར་བླ་མའི་སྐུའི་ས་བོན་ༀ་ཡིག་དཀར་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་ལ་མ་ཡེངས་པར་དྲན་པས་ཟིན་པར་བྱས་ན་བླ་མའི་སྐུའི་བྱིན་རླབས་རྒྱུན་ཆད་མེད་པར་འབྱུང་བ་ཡིན་ནོ། །ཞེས་ངོ་སྤྲད། ཡང་མགྲིན་པར་ཐིག་ལེ་བྱ་ཞིང༌། ཨ་བྷི་ཥིཉྩ་ཨཱཿ ཞེས་བརྗོད་པས་ངག་ཐ་མལ་དུ་འཛིན་པའི་བག་ཆགས་ཀྱི་སྒྲིབ་པ་དག་ནས། རང་གི་ངག་བླ་མ་དང་དེ་བཞིན་གཤེགས་པ་ཐམས་ཅད་ཀྱི་གསུང་གྲག་སྟོང་དུ་འཆར་བར་བྱིན་གྱིས་བརླབས། ཐིག་ལེ་ཡོངས་སུ་གྱུར་པ་ལས་མགྲིན་པ་ལོངས་སྤྱོད་ཀྱི་འཁོར་ལོའི་ལྟེ་བར་བླ་མའི་གསུང་གི་ས་བོན་ཨཱཿ ཡིག་དམར་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་མ་བརྗེད་པར་དྲན་པས་ཟིན་ཙམ་བྱས་ན་བླ་མའི་གསུང་གི་བྱིན་རླབས་རྒྱུན་ ཆད་མེད་པར་འབྱུང་བ་ཡིན་ནོ། །ཡང་སྙིང་གར་ཐིག་ལེ་བྱ་ཞིང༌། ཨ་བྷི་ཥིཉྩ་ཧཱུྃ། ཞེས་བརྗོད་པས་ཡིད་ཐ་མལ་དུ་འཛིན་པའི་བག་ཆགས་ཀྱི་སྒྲིབ་པ་དག་ནས། རང་གི་ཡིད་བླ་མ་དང་དེ་བཞིན་གཤེགས་པ་རྣམས་ཀྱི་ཐུགས་དྲན་སྟོང་དུ་བྱིན་གྱིས་བརླབས། ཐིག་ལེ་དེ་ཡོངས་སུ་གྱུར་པ་ལས་སྙིང་ག་ཆོས་ཀྱི་འཁོར་ལའི་ལྟེ་བར་བླ་མའི་ཐུགས་ཀྱི་ས་བོན་ཧཱུྃ་ཡིག་སྔོན་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་མ་བརྗེད་པར་དྲན་པས་ཟིན་པར་བྱས་ན་བླ་མའི་ཐུགས་ཀྱི་བྱིན་རླབས་རྒྱུན་ཆད་མེད་པར་འབྱུང་བ་ཡིན་ནོ། །ཡང་ལྟེ་བར་ཐིག་ལེ་བྱ་ཞིང༌། ཨ་བྷི་ཥིཉྩ་ཧྲཱིཿ ཞེས་བརྗོད་པས་སེམས་ཐ་མལ་དུ་འཛིན་པའི་སྒྲིབ་པ་དག་ནས་རང་སེམས་བླ་མ་དང་དེ་བཞིན་གཤེགས་པ་རྣམས་ཀྱི་ཐུགས་རིག་སྟོང་དུ་བྱིན་གྱིས་བརླབས། ཐིག་ལེ་ཡོངས་སུ་གྱུར་པ་ལས་ལྟེ་བ་སྤྲུལ་པའི་འཁོར་ལོའི་དབུས་སུ་བླ་མའི་ཡོན་ཏན་གྱི་ས་བོན་ཧྲཱིཿ སེར་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་མ་བརྗེད་པར་དྲན་པས་ཟིན་པར་བྱས་ན། བླ་མའི་ཡོན་ཏན་ཐམས་ཅད་བསླབ་མི་དགོས་པར་རང་ལ་ནང་ནས་འཆར་བ་ཡིན་ནོ༑ ༑ད་གསང་བའི་དབང་བཞི་པོ་དེ་བརྟན་བྱེད་ཀྱི་ཆོ་ག་གསུམ་བྱ་སྟེ། ཁྱེད་ཀྱིས་དབང་གོང་མ་དེ་དག་ཐོབ་པ་དེས། ལུས་ཀྱི་རྩ་ཁམས་ཐམས་ཅད་དཔའ་བོ་དང་དཔའ་མོར་སངས་རྒྱས་ནས་གཉིས་མེད་བྱང་ཆུབ་ཀྱི་ སེམས་ལུས་ལ་རྒྱས་པས་རྒྱུད་སྡེའི་ལྷ་ཚོགས་ཐམས་ཅད་རང་ལུས་ལ་ཚང་བར་བཞུགས་པ་ལགས་ཀྱིས། དེ་རྣམས་ལ་མཆོད་པའི་ཕྱིར་ཧུབ་གསུམ་གསོལ་ཅིག །ཅེས་བརྗོད་ཅིངༀ་ཨཱཿ ཧཱུྃ་ཞེས་བདུད་རྩི་བླུད། རྫས་གཅིག་པུ་དེ་རང་ལུས་ལ་ཞུགས་པས་བླ་མ་ཡི་དམ་མཁའ་འགྲོ་ཐམས་ཅད་མཉེས་ཏེ་ཐུགས་དམ་བསྐོང༌། ཡབ་ཡུམ་སྦྱོར་བ་མཛད་པས་རྩ་ཁམས་ཐམས་ཅད་དྲོས་ཏེ་ཉམས་རྟོགས་ཁྱད་པར་ཅན་རྒྱུད་ལ་སྐྱེ་བ་ཡིན་ནོ༑ ༑དེས་བདུད་རྩི་གསང་བའི་དབང་བཞི་བསྐུར་བ་སོང༌། ད་གསུམ་པ་སྙིང་པོ་དོན་གྱི་ངོ་སྤྲོད་ལ་བརྟེན་ནས་ཤེས་རབ་ཡེ་ཤེས་ཀྱི་དབང་བསྐུར་བར་བྱ་སྟེ། འདི་ལ་དོན་གསུམ་ལས། དང་པོ་རྩ་བ་དོན་གྱི་འབྱུང་ཁུངས་ནི། སངས་རྒྱས་མཆོག་གི་སྤྲུལ་པའི་སྐུ་ཤཱཀྱ་ཐུབ་པས་རྟེན་འབྲེལ་དག་པ་གསུམ་གྱིས་མཉམ་པར་བཞག་པས་ངོ་བོ་སྟོང་པ་ཉིད་ཐུགས་སུ་ཆུད་དེ། རང་རིག་པའི་ཡེ་ཤེས་ཁོང་ནས་ཤར་བ་འདུས་པའི་འཁོར་རྣམས་ལ་དག་པའི་རྟེན་འབྲེལ་བརྡར་བསྟན་པས། འཕགས་པ་སྤྱན་རས་གཟིགས་ཀྱིས་རྟོགས། ཤཱ་རིའི་བུས་དྲིས། རབ་འབྱོར་གྱིས་ཞུས། ཀུན་དགའ་བོས་བསྡུས། བྱམས་པ་ལ་དོན་བརྒྱུད་གཏད། དེས་ཐོགས་མེད་ལ། དེས་དབྱིག་གཉེན་ལ། དེས་ཨཱརྱ་དེ་བ་ལ། དེས་དམ་པ་རིན་པོ་ཆེ་ལ་གནང་བའོ། །གཉིས་པ་རྩ་བ་དེ་སློབ་མའི་རྒྱུད་ལ་ཇི་ལྟར་བསྐུར་ན། འཁྲུལ་འཁོར་གསུམ་ལ་བརྟེན་ནས་བསྐུར་ཏེ། ལུས་ཀྱི་འཁྲུལ་འཁོར་ནི། རྐང་པ་སྐྱིལ་ཀྲུང༌། ལག་པ་མཉམ་བཞག །སྒལ་ཚིགས་གསེར་གྱི་དོང་རྩེ་ལྟར་བརྩེགས། དཔུང་པ་རྒོད་གཤོག་ལྟར་བརྒྱངས། མགྲིན་པ་རྨ་བྱ་ལྟར་མནན། སོ་དང་མཆུ་ཐ་མལ་དུ་འཇོག་པ་སྟེ། ཆོས་དྲུག་རྡོ་རྗེའི་གནས་ཐབས་སོ། །ངག་གི་འཁྲུལ་འཁོར་ནི། མིག་རྩེ། སྣ་རྩེ། སེམས་རྩེ་གསུམ་གཅིག་ཏུ་དྲིལ་ནས་ཤེས་པ་ལ་བསོར་བཅུག་པས་རླུང་ལྔ་དབུ་མར་ཚུད་དེ་ཡོན་ཏན་ཐམས་ཅད་སྐྱེ་བ་ཡིན་ནོ། །ཡིད་ཀྱི་འཁྲུལ་འཁོར་ནི། སྒོམ་འདོད་ཀྱི་རྟོག་པ་ཕྱིར་ཕུད་ནས། མི་སྒོམ་པའི་ཤེས་པ་རྟེན་མེད་ལ་བློ་བཞག་ས་མེད་པར་ཐག་བཅད་ནས་ཅར་ཕོག་ཏུ་ངོ་སྤྲད་པར་བྱ་སྟེ། ཁྱེད་ཅག་སེམས་རྣམ་པར་རྟོག་པའི་དབང་དུ་མ་སོང་བར། རང་ལུགས་སུ་རྩེན་གྱིས་ཞོག་ཅིག ༑ཅེས་ལན་གསུམ་དུ་བླ་མས་ངག་བསྲིངས་ལ་བརྗོད་དོ། །དེའི་ཉམས་ལེན་ལའང་གསུམ། ཐ་མལ་གྱི་ཤེས་པ་ངོས་བཟུང་བར་བྱ་བའི་ཕྱིར་རྩེན་གྱིས་འཇོག །དེས་གནས་སུ་མ་གཏུབ་ན་སློད་ཀྱིས་གློད་ལ་བཞག །དེ་ངོས་བཟུང་ཞིང་གནས་ན། ཉམས་བཤིག་ཅིང་སྒོམ་དུ་བཅུག་པས། རྗེས་ཉམས་རྟོགས་ཇེ་བཟང་ལ་འགྲོ་བ་ཡིན་ནོ། །གསུམ་པ་རྩ་བ་ཟིན་མི་ཟིན་དྲོད་ཚད་བཟུང་བ་ནི། སློབ་མ་མོས་གུས་རབ་ལ་དུས་དེ་ཉིད་དུ་རྟོགས་པ་འཆར་ཏེ། སྐྱེས་བུ་གཉིད་སད་པ་ལྟར་གྲོལ་བའང་འབྱུང༌། འབྲིང་ལ་རྟོགས་པ་རྩ་བྲལ་དུ་གོ་ནས་དགེ་སྦྱོར་གཤའ་མ་ཟིན། ཐ་མའང་སེམས་ཀྱི་ངོ་བོ་གདོད་ནས་སྟོང་པ་དེ་ངོས་ཟིན་ནས་ཏིང་ངེ་འཛིན་བཟང་པོ་སྐྱེ་ཞིང༌། རྟོག་པས་མ་འཕྲོགས་པར་སེམས་ཤིན་ཏུ་གསལ་དྭངས་སུ་འཆར། དེ་མ་ཡིན་པ་རྣམས་ལའང༌། བགས་ཀྱིས་ཏིང་ངེ་འཛིན་འཆར་ཞིང་དེ་ལ་རྩ་བྲལ་གྱི་དགེ་སྦྱོར་སྐྱེས་ནས། གདོད་རྟོགས་པ་བཟང་པོ་འཆར་རོ། །མདོར་ན་ཚེ་འདིའམ། འཆི་ཀའམ་བར་དོ་གསུམ་གང་རུང་ལ་དོན་མི་འགྲུབ་མི་སྲིད་གསུང་ངོ༌། །ད་དབང་གསུམ་པའི་དོན་དེ་ཉིད་བརྟན་བྱེད་ཀྱི་བརྡ་གསུམ་སྟེ། དང་པོ་མེ་ལོང་བསྟན་ལ། ཀྱེ་རིགས་ཀྱི་བུ་ཀུན་མིག་ཡུལ་དུ་མཐོང་བའི་གཟུགས་ཐམས་ཅད། དེ་རིང་ནས་འདིའི་ནང་དུ་ཤར་བའི་གཟུགས་བརྙན་ལྟར་ཤེས་པར་གྱིས་ཤིག །ཅེས་ལན་གསུམ། དེས་གཟུགས་ཐམས་ཅད་ཡང་དག་པར་ན་བདེན་པར་མ་གྲུབ་པའི་སྣང་སྟོང་ཞེན་བྲལ་དུ་ངོ་སྤྲད་པ་ཡིན་ནོ། །གཉིས་པ་སེ་གོལ་ལན་གསུམ་གཏོག་ཅིང༌། ཀྱེ་རིགས་ཀྱི་བུ་ཀུན་རྣ་བའི་ཡུལ་དུ་ཐོས་པའི་སྒྲ་ཐམས་ཅད། དེ་རིང་ནས་སེ་གོལ་གྱི་སྒྲ་འདི་ལྟར་ཤེས་པར་གྱིས་ཤིག །ལན་གསུམ། དེས་སྒྲ་ཐམས་ཅད་གྲག་སྟོང་གཉིས་སུ་མེད་པར་ངོ་སྤྲད་པ་ཡིན་ནོ། །གསུམ་པ་སྔར་རྨི་བའི་རྨི་ལམ་གྱི་སྣང་བ་དྲན་པར་གྱིས་ཤིག །ཀྱེ་རིགས་ཀྱི་བུ་ཀུན་ཡིད་ལ་དྲན་པའི་རྣམ་རྟོག་ཐམས་ཅད། དེ་རིང་ནས་མདངས་སུམ་གྱི་རྨི་ལམ་ལྟར་ཤེས་པར་གྱིས་ཤིག །ཅེས་ལན་གསུམ། དེས་བདེ་སྡུག་བཏང་སྙོམས་ཀྱི་རྟོག་པ་ཐམས་ཅད་བདེན་ཞེན་མེད་པར་རིག་སྟོང་དུ་ངོ་སྤྲད་པ་ཡིན་ནོ། །དེས་ཤེས་རབ་ཡེ་ཤེས་ཀྱི་དབང་བསྐུར་བ་སོང༌། ད་བཞི་པ་ཚིག་དབང་རིན་པོ་ཆེའི་ལྡེ་མིག་གིས་ཡེ་ཤེས་ཀྱི་སྒོ་འབྱེད་པའི་དབང་བསྐུར་བར་བྱ་སྟེ། དབང་གི་ཆུ་བོ་འདིའི་བརྒྱུད་པ་ནི། ངོ་བོ་ཉིད་སྐུ་གསང་བདག་ཕྱག་ན་རྡོ་རྗེས་གསང་བའི་མཁའ་འགྲོ་མ་རྣམས་ལ་བསྐུར། གསང་བའི་མཁའ་འགྲོ་མ་རྣམས་ཀྱིས་དམ་པ་རིན་པོ་ཆེ་ལ་བསྐུར་བ་ལགས་པས་འདི་ནི་སྔགས་གཅིག་གིས་འཚང་རྒྱ་བར་བྱེད་པའི་གདམས་པ་དབང་བཞི་ལམ་ཁྱེར་གྱི་གནད། ལམ་ཕྱག་རྒྱ་བཞིའི་སྒྲུབ་ཐབས། ལམ་ཟབ་མོ་བླ་མའི་གསང་སྒྲུབ་ལྟ་སྒོམ་བསྙེན་སྒྲུབ་ཏུ་བསྐྱལ་བས། ཉམས་རྟོགས་ཆན་བཟང་ཕབས་ཀྱིས་གླུམ་དུ་ལངས་པ་ལྟར་ཁོང་ནས་རང་ཤར་དུ་འོང་བ། ཡང་དག་དོན་གྱི་སྒྲིབ་སྦྱོང༌། ཚོགས་གཉིས་མྱུར་དུ་རྫོགས་པར་བྱེད་པའི་སྙིང་པོ་བློ་སྦྱོང་གི་ལུང་འདི་ལོང་ཞིག །ཅེས་བརྡ་སྤྲད་ལ། བླ་མའི་ཐུགས་ཀ་ནས་སྔགས་ཀྱི་ཡིག་འབྲུ་རྣམས་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་གར་འཁོར་བར་མོས་ལ་སྔགས་འདིའི་རྗེས་ཟློས་མཛོད། རང་གི་ཕྲེང་བ་ལ་འཇུར་བཅུག་ལ། ༀ་ཨཱཿ ཧྲཱིཿ གུ་རུ་སིདྡྷི་ཧཱུྃ། ཞེས་ལན་གསུམ་གྱིས་བཟླས་ལུང་བྱིན་ནས། འདི་ལ་ལམ་གྱི་ཡོན་ཏན་ཐམས་ཅད་སྐྱེ་བའི་གནད་རྣམ་པ་བཞི་ཡོད་དེ། ༀ་ཡེ་ཤེས་ལྔ་ལྡན་བུམ་དབང་གི་སྙིང་པོ་ཡིན་པས་ཡི་དམ་གྱི་ལྷ་ཕྱོགས་མེད་ལ་དག་སྣང་སྣ་ཚོགས་འཆར་བར་བྱེད། ལམ་ཕྱག་རྒྱ་བཞི་པས་གཞི་དམ་ཚིག་གི་ཕྱག་རྒྱ་འགྲུབ་པ་ཡིན་ནོ། །ཨཱཿ གསལ་བ་གསུམ་ལྡན་གསང་དབང་གི་སྙིང་པོ་ ཡིན་པས། རྩ་རླུང་གི་རྟགས་དང་ཡོན་ཏན་སྣ་ཚོགས་འཆར། དོན་ཆོས་ཀྱི་ཕྱག་རྒྱ་འགྲུབ་པ་ཡིན་ནོ། །ཧྲཱིཿ དགའ་བ་བཞི་ལྡན་ཤེས་རབ་ཡེ་ཤེས་ཀྱི་སྙིང་པོ་ཡིན་པས། ཐིག་ལེ་ལས་སུ་རུང་ཞིང་ཁམས་ལྔ་དྭངས་པར་བྱེད། དཔེ་ལས་ཀྱི་ཕྱག་རྒྱ་འགྲུབ་པ་ཡིན་ནོ། །ཧཱུྃ། རྣམ་ཤེས་དྲུག་ལྡན་ཚིག་དབང་གི་སྙིང་པོ་ཡིན་པས་རྟོགས་པའི་ཡེ་ཤེས་ཕྱོགས་མེད་དུ་འཆར། འབྲས་བུ་ཕྱག་རྒྱ་ཆེན་པོ་འགྲུབ་པ་ཡིན་ནོ། །དེ་ལྟར་ཚིག་གི་དབང་བཞི་པོ་དེ་དག་བརྟན་པར་བྱེད་པ་ནི། གླེགས་བམ་གྱི་དབུས་ནས་མེ་ཏོག་བླངས་ཏེ། བློ་སྦྱོང་གི་སྙིང་པོ་བཟླས་པ་སློབ་མའི་ལུས་ལ་གཏོར་ཞིང་གྲུབ་པར་གྱུར་ཅིག །ཅེས་ལན་གསུམ། དེ་ནས་ཁྱེད་རང་རྣམས་བླ་མ་ལ་མོས་གུས་དྲག་པོ་བྱས་པས། བླ་མའི་སྐུ་གསུང་ཐུགས་གདན་ཁྲིའི་སྟེང་དུ་མ་ལུས་པར་སློབ་མའི་ལུས་ངག་ཡིད་གསུམ་ཆུ་ལ་ཆུ་བཞག་པ་ལྟར་སིབ་ཀྱིས་ཐིམ་ནས་ཁྲུག་གིས་འདྲེས་པའི་མོས་པ་མཛོད། དེས་བྱིན་རླབས་རྒྱུན་དུ་འབྱུང་བས་ལམ་རྟགས་མྱུར་དུ་འཆར། ཚོགས་གཉིས་རྒྱུན་ཆད་མེད་པས་སྒྲིབ་གཉིས་མྱུར་དུ་འདག །ཐུགས་རྗེའི་ནུས་མཐུ་ཕོག་པས་ལམ་གྱི་བར་ཆད་སེལ་བའི་གནད་གསུམ་པོ་ཡོད་གསུང་ངོ༌། །དེ་ལྟར་དབང་བཞི་ལ། དབང་ཉམས་བཅུ་དྲུག་དང༌། བརྟན་བྱེད་བཅུ་གཉིས་ཏེ། དབང་གི་ངོ་སྤྲོད་ཉི་ཤུ་རྩ་བརྒྱད་པོ་དེས་དབང་གི་དངོས་གཞི་རྣམས་ཚར་བ་ཡིན། ད་མཇུག་བསླབ་པར་བྱ་བའི་ཆོས་གསུམ་ལ་སློབ་པར་གདམས་ཏེ། དང་པོ་རྟེན་སྡོམ་པ་གསུམ་ལ་སློབ་པ་ནི། རྗེ་བཙུན་དམ་པ་རིན་པོ་ཆེའི་ལུགས་ཀྱིས་མ་གྲུབ་ཁས་ལེན་གྱི་སྡོམ་པ་ཙམ་ལ་མ་ལུས་པར། ཡང་དག་དོན་གྱི་སྡོམ་པ་གསུམ་བསྲུང་དགོས་པས། ལས་རྒྱུ་འབྲས་ལ་སྙིང་ཐག་པ་ནས་འཛེམས་པ་ཉན་ཐོས་ཀྱི་འདུལ་ཁྲིམས་དམ་པ། དགེ་བ་ཅི་བྱེད་གཞན་དོན་དུ་འཇུག་པ་བྱང་སེམས་ཀྱི་བསླབ་ཁྲིམས་ཡངས་པ། བླ་མ་ལ་སངས་རྒྱས་དངོས་སུ་བལྟ་བ་གསང་སྔགས་ཀྱི་དམ་ཚིག་གཙང་བ་གསུམ་གལ་ཆེ་བ་ཡིན་ནོ། །གཉིས་པ་རྣལ་འབྱོར་གྱི་རང་ས་དྲུག་བསྲུང་བར་གདམས་པ་ནི། གསོལ་བ་ལྷ་ལ་མི་འདེབས་ཏེ། བླ་མ་ལས་ལྷག་པའི་སྐྱབས་གཞན་མེད། དངོས་གྲུབ་འདྲེ་ལ་མི་ཞུ་སྟེ། འདུ་ལོང་བར་ཆད་ཀྱི་གཡབ་མོ་ཡིན། སྣ་ཐག་མི་ལ་མི་གཏད་དེ། ཤ་ཚ་རང་ལ་བྱེད་དགོས། ཕོ་རྒོད་ཚེ་འདིར་མི་འབྱིན་ཏེ། ཆོས་མིན་གྱི་བྱ་བ་ཐམས་ཅད་སྡུག་བསྔལ་གྱི་རྒྱུ་ཡིན་ནོ། །གོས་ངན་རྒྱལ་མཚན་གྱི་རྩེ་ལ་མི་འཕྱར་ཏེ་མིས་མཐོང་ཁྱིས་ཚོར་གྱི་སྒྲུབ་པ་བར་ཆད་མང་བ་ཡིན། གསང་བ་མཆུ་སྒོར་མི་འདོན་ཏེ། ཉམས་རྟོགས་གཞན་ལ་ངོམ་ན་ཉམས་ཀྱི་འཕེལ་བ་ཆད་པའི་རྒྱུ་ཡིན་ནོ། །གསུམ་པ་བོ་ཟགས་ལྟེམས་ལོག་གི་དྲི་མ་བཞི་བསྲུང་བར་གདམས་པ་ནི། བློ་སྦྱོང་གི་དུས་སུ་བླ་མ་ལ་མ་གུས་པའི་བློ་ཤོར་ན་བོ་བའི་དྲི་མ་ཡིན་པས་ཅི་མཛད་ཡོན་ཏན་དུ་བལྟ། སེམས་ཅན་ལ་བྱམས་པའི་བློ་སྤངས་ན་ཟགས་པའི་དྲི་མ་ཡིན་པས་སེམས་ཅན་གྱི་ འཁྲུལ་པ་ལ་དོན་དུ་མི་བཟུང༌། དོན་མེད་པའི་སྤྱོད་པ་བཞི་དང་བཅས་པ་མ་སྤངས་ན་ལྟེམས་པའི་དྲི་མ་ཡིན་པས་ཚེ་འདིའི་བྱ་བ་དོན་དུ་མི་གཉེར། རོ་མ་མྱོང་བར་སྟན་ལས་འཕགས་ན་ལོག་པའི་དྲི་མ་ཡིན་པས་ལམ་རྟགས་དང་རྡོ་རུས་འཕྲོད་པར་བྱའོ། །དེ་ལྟར་སྦྱོར་བ་ལ་སྐྱབས་སེམས་མཆོད་བསྔོ་སྨོན་ལམ་སྟེ་ཆོས་ལྔ། དངོས་གཞི་ལ་དབང་བཞི། མཇུག་བསླབ་པར་བྱ་བའི་ཆོས་གསུམ་གྱིས་ཨཱ་ལི་ཀཱ་ལིའི་བྱིན་རླབས། ཡི་གེ་ཕྱི་མའི་དབང་བསྐུར། དོན་ལྷན་ཅིག་སྐྱེས་པ་བཞི་རྫོགས་ཞེས་བྱ་བ། ཤིན་ཏུ་ཟབ་པ་དེ་ཚར་བ་ལགས་པས་བཀའ་དྲིན་རེ་ཆེ་སྙམ་པས་བླ་མ་ལ་ཕྱག་གསུམ་འཚོལ། དེ་ནས་བཀའ་དྲིན་ཆེ་ལགས་ཞེས་བརྗོད། རྗེས་ཆོག་ལ་བདུན་ལས། གཏོར་མ་བཏང་བ་ནི། ལྷག་པའི་ལྷའི་འདས་གཏོར་དང་མགོན་པོ་ཨ་གྷོ་ར། མཁའ་འགྲོ་སྡེ་བཞི། ཞིང་སྐྱོང་ཀུན་ཏུ་རི་ཀ། ཨ་པ་རཱ་ཛི་ཏ། ཀླུ་ཆེན་བཏང་བཟུང་སོགས་ཆོས་སྲུང་རྣམས་དང༌། གཞི་བདག་སྤྱི་གཏོར་སོགས་སོ་སའི་གཞུང་བཞིན་བྱ། བཀྲ་ཤིས་བརྗོད་ལ་སྔར་བྱིན་རླབས་བྱས་པའི་འབྲང་རྒྱས་བཞི་དངོས་གྲུབ་ཀྱི་རྫས་སུ་རོལ། ཚོགས་རྫས་རྣམས་བྱིན་རླབས་གོང་དུ་གྲུབ་པས། ཚོགས་ཞིང་བླ་མ་ཡི་དམ་མཁའ་འགྲོ་དམ་ཅན་སྲུང་མའི་ཚོགས་དང་བཅས་པ་མདུན་གྱི་ནམ་མཁར་བཛྲ་ས་མཱ་ཛཿ ས་སད་པར་བསམ་ཞིང༌༑ ཚོགས་ཕུད་གཏོར་མར་བྲན་ལ། ༀ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་ས་པ་རི་ཝཱ་ར་ལ་ཨ་ཀཱ་རོ་བཏགས་པས་ཕྱི་གཏོར་དང༌། བ་ལ་ཨི་དཾ། ཁཱ་ཧི་ཁཱ་ཧི། བཛྲ་ཡོ་གི་ནཱི། ཀ་མ་རུ་པི་ནི། ཛ་ལ་མུ་ཀི་ཧྲཱིཿ ཁ་ཁ་ཁཱ་ཧི་ཁཱ་ཧི། ཧཱུྃ་ཧཱུྃ་ཕཊ་སྭཱ་ཧཱ། ཞེས་བཏགས་པས་ནང་གཏོར་བསྔོས་ལ་བླ་མེད་མཆོག་གི་མཐར་ༀ་གུ་རུ་སོགས་ལ་ག་ན་ཙཀྲ་པཱུ་ཛ་སྭཱ་ཧཱ། ཞེས་བཏགས་པས་ཚོགས་ཕུལ། དེ་ནས་ལས་རྡོར་གྱིས་བླ་མ་ལ་ཕྱག་བྱས་ལ་ཐབས་ཤེས་ཀྱི་རྫས་བསྣོལ་མར་ཐོགས་ནས། ༀ་པཱུ་ཛཿ སྭཱ་ཧཱ། ཞེས་མཆོད་པ་ལྔས་མཆོད་པར་བསམས་ལ། གཟིགས་ཤིག་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱར་མི་རུང༌། །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་པས་དགོངས་སུ་གསོལ། །ཞེས་རྟོག་པ་བསལ་བས་དྲངས། བླ་མས་པད་ཀོར་སྔོན་འགྲོས་རྩེ་གསུམ་གྱི་རྒྱ་སྟོན་བཞིན་དུ། བདེ་བར་གཤེགས་པ་ཆོས་ཀྱི་མཆོག །འདོད་ཆགས་དྲི་མ་བྲལ་བ་འདི། །བཟུང་འཛིན་དྲི་མ་རྣམ་པར་མེད། །དེ་བཞིན་ཉིད་ལ་བདག་ཕྱག་འཚལ། །ཞེས་པས་བླངས་ལ། རང་ལྷའི་ང་རྒྱལ་གྱིས། ༀ་ཨཱཿ ཧཱུྃ་ཞེས་ཚོགས་རྫས་བདུད་རྩིར་གྱུར་པར་ལག་སོར་འདོད་ཡོན་གྱི་ལྷ་མོར་བསམ་པས། ༀ་ཨ་མྲྀ་ཏེ་ཧཱུྃ། ཞེས་ལུས་ཀྱི་ལྷ་རྣམས་མཆོད་པར་མོས་ནས་ཚོགས་ལ་རོལ། ལྷག་མ་བསྡུས་ལ་ༀ་ཨཱཿ ཧཱུྃ་གིས་སྣོད་རིན་པོ་ཆེའི་ནང་དུ་བཅུད་བདུད་རྩིར་གྱུར་པ་ཐིམ་པར་མོས་ལ། གཏོར་མ་ཁ་ཕྲུ་བཏབ་ཅིང༌། ༀ་ཨུ་ཙྪིཥྚ་པིཎྜ་བྷྱཿ སྭཱ་ཧཱ། ཞེས་བཟླས་ནས་གཙང་གཏོར་དང་བསྲེས་ནས་ༀ་ཨཱཿ ཧཱུྃ་ཨུཙྪིཥྚ་བ་ལ་ཏ་བྷཀྵ་ཡེ་སྭཱ་ཧཱ། འབྱུང་པོ་ལྷག་མ་ལ་དབང་བ་རྣམས་ཚིམས་པར་གྱུར་ཅིག །ཀྱཻ་མཁའ་འགྲོ་ཞིང་སྐྱོང་ཚོགས། །ལས་འདི་བདག་གིས་བསླབ་པར་བགྱི། །བདག་ལ་བདེ་ལེགས་བསྡུ་བ་དང༌། །ཕན་དང་ཡིད་འོང་བདེ་བ་དང༌། །གྲོང་དང་ཡུལ་འཁོར་ཤིས་པར་མཛོད། །ཅེས་བརྗོད་ལ་གཙང་སར་འབུལ་ལོ། །དེ་ནས་བདག་བསྐྱེད་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷར་ལངས་ལ་ གླེགས་བམ་བསྡུ། དེ་ནས་ལམ་གྱི་བར་ཆད་ཞི་ཕྱིར་སྨོན་ལམ་གདབ། བསགས་པའི་དགེ་བ་དོན་ཡོད་པར་བྱ་ཕྱིར་དགེ་བ་བྱང་ཆུབ་ཆེན་པོར་བསྔོ་བར་བྱ་ཞིང༌། དེ་ནས་ནངས་པར་བླ་མས་སློབ་མ་རྣམས་ལ་བློ་སྦྱོང་གི་ལུང་དབོག་ཅིང་བསླབ་བྱ་རྒྱས་པར་བྱའོ། །དཀའ་ཐུབ་སོགས་དབང་ཆུན་གཅིག་ཏུ་བྱེད་ན། འབྲང་རྒྱས་ཀྱི་དངོས་གྲུབ་ལ་རོལ་པ་དང༌། གཏོར་མ་བཏང་ཞིང་གླེགས་བམ་བསྡུ་བ་རྣམས་ནུབ་ཐ་མ་བར་མི་བྱེད་དོ། །ལམ་ལྔ་ལས་ཚོགས་ལམ་བགྲོད་པར་བྱེད་པ་བློ་སྦྱོང་གི་དབང་ཆོག་ཚར་རོ། ། ཨྠིྀ།། ༈ །།ༀ་སྭ་སྟི། གཉིས་པ་སྦྱོར་ལམ་བསྒྲོད་ པར་བྱེད་པ་དཀའ་ཐུབ་ཀྱི་དབང་ལ། གླེགས་བམ་བཤམ་ལུགས་སོགས་གོང་དང་འདྲ་བ་ལས། ཁྱད་པར་དམ་རྫས་བདུད་རྩིའི་ཕྲད་ཀ་ར་ལ་བྱ་ཞིང༌། བདག་བསྐྱེད་སྔོན་དུ་འགྲོ་བས་ཚོགས་དང་དབང་རྫས་བྱིན་རླབས་སྔར་ལྟར་ལས། ཁྱད་པར་ཡིག་འབྲུ་རྣམས་ལོངས་སྐུ་རིགས་ལྔའི་ལྷ་ཚོགས་སུ་བྱིན་གྱིས་བརླབ་བོ། །དེ་ནས་སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལ། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་སྦྱོར་ལམ་དྲོད་ཀྱི་ཡེ་ཤེས་སྐྱེད་པར་བྱེད་པ་ལམ་དཀའ་ཐུབ་ཀྱི་བྱིན་རླབས་ཞུས་ལ་ཉམས་སུ་བླང་སྙམ་དུ་མ་ཡེངས་པར་གསན་འཚལ། ཇི་ལྟར་ཉམས་སུ་ལེན་ལུགས་ལ། དབྱིངས་རྣལ་འབྱོར་གསུམ་ལས། བྱེད་པ་ལམ་གྱི་རྣལ་འབྱོར་ལ་ལམ་ལྔར་ཡོད་པའི། འདི་ནི་སྦྱོར་ལམ་དྲོད་ཀྱི་ཡེ་ཤེས་ཐོབ་པར་བྱེད་པ་དཀའ་ཐུབ་ཀྱི་དབང་བྱ་བ་ཡིན། འདི་ཡང་དབང་གཞན་ལས་ཁྱད་པར་ལྔས་འཕགས་ཏེ། གླེགས་བམ་བཤམས་པས་ལྷ་དབང་མ་ཡིན་པ་ ཆོས་དབང་ཡིན་པ་དང༌། དཀྱིལ་འཁོར་འགྲེམས་པ་མདངས་ལ་བརྟེན་པའི་རྗེས་དཔག་མ་ཡིན་ཡེ་ཤེས་དངོས་སྐྱེད་བྱེད་ཡིན་པ་དང༌། བྷཉྫ་ནི་རྟེན་རྫས་ཙམ་མ་ཡིན་དམ་རྫས་ཡིན་པ་དང༌། བླ་མ་ནི་སྤྲུལ་པ་ཙམ་མ་ཡིན་སངས་རྒྱས་དངོས་ཡིན་པ་དང༌། དབང་རྣམ་གཞག་ཙམ་དུ་བསྐུར་བ་མ་ཡིན་ངོ་སྤྲོད་པའི་ཐབས་ཀྱི་ལམ་ཡོངས་རྫོགས་ལ་སྐྱེད་བྱེད་ཡིན་པས་ཁྱད་པར་དུ་འཕགས་སོ། །དེ་ལྟ་བུའི་དབང་བཀའ་འདི། བུམ་དབང་རྡོ་རྗེ་འཆང་ནས་བདག་མེད་མ། གསང་དབང་རྣམ་སྣང་ནས་མཁའ་བསྐྱོད་ཀྱི་བླ་མ། ཤེར་དབང་ཐུབ་པ་ནས་བྱམས་མགོན་ལ། ཚིག་དབང་གསང་བདག་ནས་གསང་བའི་མཁའ་འགྲོ་མ་རྣམས་ལ་བརྒྱུད་དེ། དམ་པ་རིན་པོ་ཆེས་བྱང་སེམས་ཀུན་དགའ་ལ་ཆིག་བརྒྱུད་དུ་གནང་བ་བྱིན་རླབས་སྣོད་གཅིག་ཏུ་བླུགས་པ་ལྟ་བུའི་བཀའ་སྲོལ་འགྲན་ཟླ་དང་བྲལ་བ་ལགས་པས་ཐུགས་སྤྲོ་བ་བསྐྱེད་པར་མཛོད། དབང་དངོས་ལ་གསུམ་གྱི༑ ཐོག་མ་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས༴ བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུའང་བླ་མ་དམ་པ་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཡི་དམ་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་ མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུའང་ཡི་དམ་ལྷ་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མཁའ་འགྲོ་མའི་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུའང་མཁའ་འགྲོ་མའི་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། བླ་མ་ཡི་དམ་མཁའ་འགྲོའི་ཚོགས་རྣམས་བདག་ལ་དགོངས་སུ་གསོལ། བདག་གིས་འདས་མ་འོངས་ད་ལྟར་བྱས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཏེ་བླ་མ་ལ་དབུལ་བར་བགྱིའོ། །བླ་མ་ལ་ཕུལ་བས་བླ་མ་རིན་པོ་ཆེ་རྣམས་ཀྱི་ཐུགས་དགོངས་ཁྱད་པར་ཅན་ཡོངས་སུ་རྫོགས་པར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེས་བདེ་བར་གཤེགས་པ་རྣམས་ཀྱི་སྤྱན་ལམ་དུ་མཆོད་པའི་བྱེ་བྲག་ནམ་མཁའ་དང་མཉམ་པ་འབྱུང་བར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེ་སེམས་ཅན་ཐམས་ཅད་དང་ཐུན་མོང་དུ་བསྔོ་བར་བགྱིའོ། །དེ་ལྟར་བསྔོས་པས་སེམས་ཅན་ཐམས་ཅད་འཁོར་བ་སྲིད་པ་སྡུག་བསྔལ་གྱི་རྒྱ་མཚོ་ལས་བསྒྲལ་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་ གྱུར་ཅིག །དེ་མ་ཐོབ་ཀྱི་བར་དུའང་བདག་མྱུར་དུ་མངོན་པར་རྫོགས་པར་སངས་རྒྱས་ནས་འགྲོ་བ་མ་ལུས་པ་མཐའ་དག་གི་བླ་མར་གྱུར་ཅིག །དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་ལན་གསུམ། དངོས་གཞི་དབང་བཞི་ཡོངས་སུ་རྫོགས་པར་བསྐུར་བ་ལས། དང་པོ་བུམ་པའི་དབང་བཞི་བསྐུར་བ་ནི་ཡིག་འབྲུ་ལ་ལྟོས་ལ། གཟུགས་སྣང་ཐམས་ཅད་རྒྱལ་བ་རིགས་ལྔའི་སྐུར་བྱིན་གྱིས་བརླབས་པར་མོས་ལ་འདིའི་རྗེས་ཟློས༑ ཐུར་མ་བཙུགས་ལ་ཨཀྵཿ ཚར་གཅིག །སྒྲ་ཐམས་ཅད་རིགས་ལྔའི་གསུང་དུ་བྱིན་གྱིས་བརླབས་པར་མོས་ལ་འདིའི༴ ཨཀྵ་བརྗོད། དྲན་རྟོག་ཐམས་ཅད་རིགས་ལྔའི་ཐུགས་སུ་བྱིན་གྱིས་བརླབས་པར་མོས་ལ་འདིའི༴ ཨཀྵ་བརྗོད། སེམས་ཀྱི་ངོ་བོ་གདོད་ནས་སྐྱེ་བ་མེད་པ་ལས་སྣང་གྲགས་དྲན་པའི་ཆོས་ཐམས་ཅད་རང་བཞིན་མ་འགགས་པའི་རྩལ་སྣང་ཙམ་དུ་བྱིན་གྱིས་བརླབས་པར་མོས་ལ་འདིའི༴ ཨཀྵ་བརྗོད། ད་བུམ་དབང་དེ་ཉིད་བརྟན་པར་བྱ་བའི་ཕྱིར་ཡེ་ཤེས་ཀྱི་བདུད་རྩིའི་དམ་ཚིག་པའི་རྩ་ཡིག་རྣམས་ལ་ཕོག་པས། རང་ལུས་ཀྱི་རྩ་ཁམས་ཐམས་ཅད་རིགས་ལྔའི་ངོ་བོ་དཔའ་བོ་དཔའ་མའི་རང་བཞིན་དུ་རྣམ་པར་དག་པར་གྱུར་སྙམ་དུ་མོས་པ་མཛོད། ཅེས་ཐོད་པ་མགོ་ཐོག་ཏུ་བཞག་ལ་ཨཀྵ་བརྗོད་དོ། །དེས་བུམ་པའི་དབང་བཞི་སོང༌། ད་གསང་བའི་དབང་བསྐུར་བ་ནི། བདུད་རྩི་སྲིན་ལག་གིས་བླངས་ཏེ་སློབ་མའི་གནས་བཞིར་ཐིག་ལེ་བྱེད་པ་སྟེ། ཨ་བྷི་ཥིཉྩ་ༀ། ཞེས་དཔྲལ་བར་ བཞག་པས་ༀ་དེ་ཉིད་སྤྱི་བོ་བདེ་ཆེན་གྱི་འཁོར་ལོ་རྣམ་སྣང་དཀར་པོ་འཁོར་ལོ་དང་དྲིལ་བུ་འཛིན་པ་ཚོན་གང་བ་གཅིག་གསལ་བར་གྱུར། ཨ་བྷི་ཥིཉྩ་ཨཱཿ ཞེས་མགྲིན་པར་བཞག་པས་ཨཱཿ དེ་ཉིད་ལོངས་སྤྱོད་ཀྱི་འཁོར་ལོ་འོད་དཔག་མེད་དམར་པོ་པདྨ་དང་དྲིལ་བུ་འཛིན་པ་གསལ་བར་གྱུར། ཨ་བྷི་ཥིཉྩ་ཧཱུྃ། ཞེས་སྙིང་གའི་ཐིག་ལེ་ཧཱུྃ་དེ་ཉིད་ཆོས་ཀྱི་འཁོར་ལོ་མི་བསྐྱོད་པ་སྔོན་པོ་རྡོ་རྗེ་དང་དྲིལ་བུ་འཛིན་པ་གསལ་བར་གྱུར༑ ཨ་བྷི་ཥིཉྩ་ཧྲཱིཿ ཞེས་ལྟེ་བའི་ཐིག་ལེ་ཧྲཱིཿ དེ་ཉིད་སྤྲུལ་པའི་འཁོར་ལོ་རིན་འབྱུང་སེར་པོ་རིན་པོ་ཆེ་དང་དྲིལ་བུ་འཛིན་པ་གསལ་བར་གྱུར། དེ་ལྟར་ལྷ་བཞི་པོ་དེ་ཡང་སྐུ་ཞི་བའམ་ཁྲོ་བོ་དཔའ་བོ་གཅིག་གམ་ཡབ་ཡུམ་གང་མོས་སུ་གསལ་ཐོབ་ལ་ཡང་ཡང་དྲན་པར་བྱོས་ཤིག །དེ་ཉིད་བརྟན་བྱེད་དུ་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས། འཁོར་ལོ་བཞིའི་ལྷ་རྣམས་ཀྱིས་གཙོ་མཛད་རྩ་ཁམས་ཀྱི་དཔའ་བོ་དང་དཔའ་མོ་ཐམས་ཅད་མཉེས་ནས་བདེ་གསལ་མི་རྟོག་པའི་ཉམས་བཟང་པོ་ནང་ནས་འཆར་བ་ཡིན་ནོ། །དེས་བདུད་རྩི་གསང་བའི་དབང་བསྐུར་བ་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་ཡང་དག་རྫོགས་པའི་སངས་རྒྱས་ཤཱཀྱ་ཐུབ་པས་བྱང་ཕྱོགས་ཀམྦྷི་རའི་མཆོད་རྟེན་གྱི་རྩར་རྩ་གསུམ་གཅིག་ཏུ་དྲིལ་ནས་རིག་པ་དྭངས་སུ་བཅུག་པས། དང་པོ་སེམས་ཀྱི་ངོ་བོ་སྟོང་པར་ངོས་ཟིན་ནས་རང་རིག་གི་ཡེ་ཤེས་ཁོང་ནས་སད་ཀྱང་ད་དུང་བསམ་གྱིས་མི་ཁྱབ་པའི་ཡེ་ཤེས་རྩལ་དུ་མ་ཤར་བས། གཉིས་པ་ཆུ་བོ་ནཻ་རཱཉྫ་ནའི་འགྲམ་དུ་ལོ་དྲུག་དཀའ་ཐུབ་ཀྱི་ཁོག་པར་ཞུགས་ཏེ་སྤྱན་ལྔས་དུག་ལྔའི་ཕྲ་རགས་ལ་གཟིགས་པས། རྩ་བྲལ་གྱི་རྟོག་པ་རང་སར་གྲོལ་ནས་བསམ་གྱིས་མི་ཁྱབ་པའི་ཡེ་ཤེས་རྩལ་དུ་ཤར། དེ་ནས་ཕྱིས་ཆོས་འཁོར་བར་པ་བསྐོར་དུས་འདུས་པའི་འཁོར་ལ་སྤྱན་ལྔའི་རྟེན་འབྲེལ་བརྡར་བསྟན་པས་སྤྱན་རས་གཟིགས་ཀྱིས་རྟོགས། ཤཱ་རིའི་བུས་དྲིས། དེར་འདུས་པའི་འཁོར་ཕལ་ཆེ་བས་བརྡའི་དོན་ཁོང་དུ་ཆུད་ནས་གླེངས། ཀུན་དགའ་བོས་བསྡུས། བྱམས་པ་ལ་དོན་བརྒྱུད་གཏད། དེ་ལ་ཐོགས་མེད་ཀྱིས་ཞུས་ནས། དབྱིག་གཉེན། ཨཱརྱ་དེ་བ། དམ་པ་རིན་པོ་ཆེས་ཆིག་བརྒྱུད་གསུམ་ལ་རིམ་པར་བབས་པའོ། །རྩ་བ་དེ་སློབ་མའི་རྒྱུད་ལ་ཇི་ལྟར་བསྐུར་ན། ལུས་གནད་རྣམ་སྣང་ཆོས་བདུན། ངག་གནད་སྟེང་འོག་གི་རླུང་འགྱུ་བ་བཅད་ནས་རླུང་དབུ་མར་གཞུག ། ཡིད་སྒོམ་འདོད་སྤངས་ནས་སྤྱན་ལྔའི་ལྟ་སྟངས་ཀྱིས་རྟོག་པའི་རྩ་བ་བཅད་པར་བྱ་སྟེ། དེའང་དང་པོར་ལུང་མ་བསྟན་གཏི་མུག་གི་རྟོག་པ་ལ། རུས་སྦལ་ལྟར་མིག་བཙུམ་ནས་བལྟ། གཉིས་པ་བྲལ་བ་འདོད་ཆགས་ཀྱི་རྟོག་པ་ལ་མགྲོན་བུའི་རྒྱབ་ལྟར་ཟིམ་མེ་བལྟ། གསུམ་པ་དེ་བས་རགས་པ་ཞེ་སྡང་གི་རྟོག་པ་ལ་ཟླ་བ་ཚེས་པ་ལྟར་གཞུ་གང་ཙམ་དུ་བལྟ། བཞི་པ་དེ་བས་ཀྱང་རགས་པ་ཕྲག་དོག་གི་རྟོག་པ་ལ་མཁལ་མ་ལྟར་རང་ཐད་དུ་བལྟ། ལྔ་པ་ཤིན་ཏུ་རགས་པ་ང་རྒྱལ་གྱི་རྟོག་པ་ལ་ཟླ་བ་ཉ་གང་བ་ལྟར་བར་སྣང་ལ་མིག་བལྟའོ། །དེ་དག་གང་བྱེད་ཀྱང་རླུང་ཁ་སྦྱར་ལ་ལུས་སེམས་སྒྲིམས་ནས། རླུང་སེམས་འོད་གསལ་གྱི་མདངས་ལ་བཅིངས་ཏེ༑ གསལ་བདོ་བ་ལ་བཤིག་ཅིང་ཉམས་སུ་བླངས་པས། རྗེས་ལ་འཁོར་འདས་ཀྱི་ཆོས་ཐམས་ཅད་མཚན་ཉིད་མེད་པར་ཉམས་སུ་མྱོང་ནས་འོང་བ་ཡིན་ནོ། །གསུམ་པ་དེའི་དྲོད་ཚད་བཟུང་བ་ལ་དུས་བཞི་སྟེ། དང་པོར་རྒྱལ་བ་ཡུམ་གྱི་ཞལ་བལྟ་དུས་ཞེས་བྱ་སྟེ། བླ་མའི་སྤྱན་ལ་བལྟ། གཉིས་པ་ཞལ་མཐོང་དུས་བྱ་སྟེ། བླ་མའི་ལད་མོ་བཟླ། གསུམ་པ་དེ་གོམས་པར་བྱེད་དུས་ཞེས་བྱ་སྟེ། གོམས་པ་ཀློང་དུ་མ་གྱུར་གྱི་བར་དུ་འབད་པས་སྒོམ༑ བཞི་པ་མངོན་དུ་གྱུར་པའི་དུས་ཞེས་བྱ་སྟེ། རྟོག་པ་ཐམས་ཅད་རྩ་བྲལ་དུ་ཤེས་ཙ་ན་ཆེད་དུ་སྤྱན་ལྔས་བལྟ་མི་དགོས་སོ། །དེ་ལྟར་གོམས་པའི་ཚེ། གསུམ་པའི་དབང་དེ་ཉིད་བརྟན་པར་བྱ་བའི་ཕྱིར། གཟུགས་སྒྲ་དྲན་རྟོག་ཐམས་ཅད་སྒྱུ་མ་བྲག་ཆ་ལྦུ་བ་ལྟ་བུར་ཤེས་པར་བྱ་སྟེ། ཕྲ་བའི་བརྡ་ཞེས་བྱའོ། །དེས་ཤེས་རབ་ཡེ་ཤེས་ཀྱི་དབང་བསྐུར་བ་སོང༌། ད་བཞི་པ་ཚིག་དབང་བསྐུར་བ་ནི། རྒྱུ་རྩལ་བཞི་དང་བཅས་པས་ཉེ་བའི་བཟླས་ལུང་དབོག་པ་ཡིན་པས། དྲོད་ཀྱི་ཡེ་ཤེས་བཙན་ཐབས་སུ་སྐྱེ་བར་བྱེད་པའི་སྙིང་པོ་སྦྱོར་ལམ་དཀའ་ཐུབ་ཀྱི་ལུང་འདི་ལོངས་ཤིག །ༀ་ཨཱཿ ཧཱུྃ་གུ་རུ་སིདྡྷི་ཕ་ལ་ཧཱུྃ། ཞེས་ལན་གསུམ་གྱིས་བཟླས་ལུང་སྦྱིན་ནས་འདི་ལ་ རྒྱུ་རྩལ་བཞི་སྟེ། དང་པོ་ནུས་པ་སྔགས་ཀྱི་རྩལ་རིན་པོ་ཆེའི་ལྷ་སྐུ་ལ་རང་འོད་འདོན་པ་དང་འདྲ་བས་སྙིང་པོ་གསལ་ལ་དག་པར་བཟླ། གཉིས་པ་རིག་པ་སེམས་ཀྱི་རྒྱུ་རྩལ་ཟད་པར་གྱི་སྐྱེ་མཆེད་སྒོམ་པ་དང་འདྲ་སྟེ། ཏིང་ངེ་འཛིན་གསལ་ལ་བརྟན་པར་བསྒོམ། གསུམ་པ་རྟེན་འབྲེལ་རྒྱུ་རྩལ་མཉྫི་ཀའི་མེ་ཏོག་རྫས་ཀྱིས་ཁ་བསྒྱུར་བ་དང་འདྲ་སྟེ། གང་ལ་དམིགས་པའི་རྟེན་རྫས་རྣམས་མདུན་དུ་དགྲམ། བཞི་པ་མཚམས་སྦྱོར་དུས་ཀྱི་རྒྱུ་རྩལ་གནམ་ལྕགས་དང་ཁྲེགས་རྡོ་འཕྲད་པའི་མེ་དང་འདྲ་སྟེ་བླ་མས་ཐུགས་ལ་འདོགས་དུས་སྒྲུབ་པ་ལ་ཕྱི་བཤོལ་མི་བྱ་བར་འབད་དགོས་པ་ཡིན་ནོ། །དེ་ལྟར་ཚིག་དབང་གི་ནུས་པ་དེ་ཉིད་བརྟན་པར་བྱ་བའི་ཕྱིར༑ གླེགས་བམ་གྱི་མེ་ཏོག་བླངས་པ་ལ་དཀའ་ཐུབ་ཀྱི་སྙིང་པོ་བཟླས་པ་བུ་ལ་འཐོར་ཞིང༌། གྲུབ་པར་གྱུར་ཅིག་ཅེས་ལན་གསུམ། དེས་བླ་མའི་སྐུ་གསུང་ཐུགས་ལྷའི་རང་བཞིན་དུ་གནས་པ་དེ་སློབ་མའི་ལུས་ངག་ཡིད་གསུམ་ལ་ཐིམ་པས་ཚོགས་གཉིས་རྫོགས། སྒྲིབ་གཉིས་བྱང་ནས། ལམ་རྟགས་དང་ཡོན་ཏན་འཆར་བ་ལ་ཚེགས་མེད་པ་ཡིན་ནོ། །མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང་རྣལ་འབྱོར་གྱི་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ། གཞན་དོན་སྔས་ན་བོ་བའི་དྲི་མ་ཡིན་པས་དམ་བཅའ་མ་གྲོལ་བར་དུ་སློབ་དཔོན་མི་བྱ། བསྙེན་བསྐུར་ཟོས་ན་ཟགས་པའི་དྲི་མ་ཡིན་པས་རང་རྫས་མི་ སྟེར་ཞིང་གཞན་རྫས་མི་སྤྱོད། བསྲུང་སྡོམ་ལྷོད་ན་ལྟེམས་པའི་དྲི་མ་ཡིན་པས། བསྙེན་པ་བྱེད་དུས་ཁྲུས་མི་བྱ། གོས་སྟན་མི་སྤྲུག །སྐྲ་སེན་མི་འབྲེག །ངག་གི་སྨྲ་བ་གཅོད། མཆིལ་སྣབས་མི་འདོར། གཏོར་མ་སྦ་བ་སོགས་བསླབ་བྱ་རྣམས་དམ་དུ་བསྲུང་ངོ༌། །ཆོས་བརྒྱད་དྲན་ན་ལྡོག་པའི་དྲི་མ་ཡིན་པས་ཚེ་འདིའི་སྙན་གྲགས་རྒྱབ་ཏུ་དོར་བར་བྱའོ། །དེ་ལྟར་སྦྱོར་དངོས་རྗེས་གསུམ་གྱི་ཕྱག་ལེན་ལ་བརྟེན་ནས་སྦྱོར་ལམ་སྐྱེད་བྱེད་ཟབ་མོ་དཀའ་ཐུབ་ཀྱི་བྱིན་རླབས་ཚར་བ་ལགས་པས་བླ་མ་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས་ཞེས་བརྗོད། རྗེས་ཆོག་རྣམས་བློ་སྦྱོང་ལྟར་བྱའོ། །ལམ་ལྔ་ལས་སྦྱོར་ལམ་བགྲོད་པར་བྱེད་པ་དཀའ་ཐུབ་ཀྱི་དབང་ཆོག་ཚར་རོ། །ཨྠིྀ།། ༈ །།ༀ་སྭ་སྟི། གསུམ་པ་མཐོང་ལམ་མི་རྟོག་པའི་ཡེ་ཤེས་འཆར་བྱེད་རྗེས་བློ་བྲལ་གྱི་བྱིན་རླབས་ལ། གླེགས་བམ་སོགས་སྔར་ལྟར་བཤམ། ཁྱད་པར་བདུད་རྩིའི་འཕྲད་སྦྲང་རྩིས་བྱ། བདག་བསྐྱེད་སྔོན་འགྲོས་ཚོགས་དང་དབང་རྫས་སྔར་ལྟར་ལས། ཁྱད་པར་ཡིག་འབྲུ་ལས་བྱུང་བའི་རིགས་ལྔའི་ལྷ་ཚོགས་རྣམས་སྣང་ལ་རང་བཞིན་མེད་པ་འཇའ་ཚོན་ལྟར་བྱིན་གྱིས་བརླབས་སོ། །དེ་ནས་སློབ་མ་རྣམས་ཁྲུས་བྱས། ཕྱག་སྔོན་འགྲོས་གྲལ་དུ་འཁོད་པ་ལ། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་མཐོང་ལམ་རྣམ་པར་མི་རྟོག་པ་རྒྱུད་ལ་སྐྱེད་བྱེད་རྗེས་ཀྱི་བྱིན་རླབས་ཞུས་ལ་ཉམས་སུ་བླང་སྙམ་དུ་མ་ཡེངས་པར་གསན་འཚལ། དེ་ཇི་ལྟར་ཉམས་སུ་ ལེན་ལུགས་ལ། དབྱིངས་རྣལ་འབྱོར་གསུམ་ལས། བྱེད་པ་ལམ་གྱི་རྣལ་འབྱོར་ལ་ལྔ་ཡོད་པའི་ནང་ནས། འདི་ནི་མཐོང་ལམ་ཉམས་སུ་ལེན་པ་རྗེས་ཀྱི་དབང་བྱ་བ་དེ་ཡིན། དེ་ཡང་དབང་གཞན་ལས་ཁྱད་པར་འཕགས་ཏེ། གླེགས་བམ་འདི་དཀྱིལ་འཁོར་ཐམས་ཅད་ཀྱི་འབྱུང་གནས་ཡིན་པས་དང༌། ཡིག་འབྲུ་འདི་ཆོས་ཐམས་ཅད་ཀྱི་ས་བོན་ཡིན་པས་དང༌། བྷཉྫ་འདི་དངོས་གྲུབ་ཐམས་ཅད་འབྱུང་བའི་རྫས་ཡིན་པས་དང༌༑ བླ་མ་ནི་སངས་རྒྱས་ཐམས་ཅད་ཀྱི་བྱེད་པ་པོ་ཡིན་པས་དང༌། ངོ་སྤྲོད་ཟབ་མོ་འདི་ཡང་དག་པའི་ལམ་དངོས་ཡིན་པས་ཁྱད་པར་དུ་འཕགས་པར་གདའ་སྟེ། དེ་ལྟ་བུའི་དབང་བཀའ་འདི་དམ་པ་རྒྱ་གར་གྱི་ཁྱད་ཆོས༑ བྱང་སེམས་ཀུན་དགའི་ཐུགས་དམ། རང་ཅག་རྣམས་ཆོས་འདི་འདྲ་དང་འཕྲད་པ་ཁར་རྗེ་ཡིན་པས་འཚེངས་པ་ལགས་སྙམ་དུ་སྤྲོ་བ་བསྐྱེད་པར་མཛོད། དབང་དངོས་ལ་གསུམ་གྱི། ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་དབང་བཞི་ཡོངས་སུ་རྫོགས་པར་བསྐུར་བ་ལ། དང་པོ་བུམ་པའི་དབང་བཞི་བསྐུར་བ་ནི་ཡིག་འབྲུ་ལ་ལྟོས་ལ་ཇི་ལྟར་སྣང་བ་ཐམས་ཅད་ངོ་བོ་བླ་མ། རྣམ་པ་ཡི་དམ་རིགས་ལྔའི་སྐུ་མཚན་ཉིད་བཞི་ལྡན་དུ་བྱིན་གྱིས་བརླབས་པར་མོས་ལ་འདིའི་ རྗེས་ཟློས། ཡི་གེ་རེ་རེ་བཞིན་ཐུར་མ་བཙུགས་ལ་ཨཀྵཿ ཚར་གཅིག །དེ་ཐམས་ཅད་དང་པོར་སྐྱེ་བ་མེད། བར་དུ་གནས་པ་མེད། ཐ་མར་འགག་པ་མེད། བདེན་པའི་དངོས་པོར་གྲུབ་པ་མེད་དེ་གཟུགས་སྣང་སྟོང་ངོ༌༑ ༑ཞེས་བརྗོད་དུ་བཅུག །ཇི་ལྟར་གྲགས་པའི་སྒྲ་ཐམས་ཅད་ངོ་བོ་བླ་མ་ལ་རྣམ་པ་རིགས་ལྔའི་གསུང་མཚན་ཉིད་བཞི་ལྡན་དུ་མོས་ལ་འདིའི༴ ཨཀྵ་དང༌། སྐྱེ་མེད། གནས་མེད། འགག་མེད། དངོས་མེད་དེ་སྒྲར་གྲགས་ཐམས་ཅད་གྲག་སྟོང་ངོ༌། །ཞེས་བརྗོད། ཇི་ལྟར་དྲན་པའི་ཆོས་ཐམས་ཅད་ངོ་བོ་བླ་མ་ལ་རྣམ་པ་རིགས་ལྔའི་སྐུ་གསུང་ཐུགས་མཚན་ཉིད་བཞི་ལྡན་དུ་མོས་ལ་འདིའི༴ ཨཀྵ་དང༌། སྐྱེ་མེད། གནས་མེད། འགག་མེད། དངོས་མེད་དེ་ཡིད་དྲན་སྟོང་ངོ༌། །ཇི་ལྟར་སྣང་གྲག་འགྱུ་གསུམ་རང་གི་སེམས་ངོ་བོ་བླ་མ་ལ་རྣམ་པ་རིགས་ལྔའི་སྐུ་གསུང་ཐུགས་མཚན་ཉིད་བཞི་ལྡན་དུ་མོས་ལ་འདིའི༴ ཨཀྵ་དང༌། སྐྱེ་མེད། གནས་མེད། འགག་མེད༑ དངོས་མེད་དེ་སེམས་སུ་བདེ་སྟོང་གཉིས་སུ་མེད་པའོ། །ཞེས་བརྗོད། ད་བུམ་དབང་དེ་ཉིད་བརྟན་བྱེད་དུ་ལུས་ཀྱི་རྩ་ཁམས་ལྷ་དང་ལྷ་མོར་གསལ་བ་དེ་རྣམས་ཀྱང་སྐྱེ་མེད་སོགས་མཚན་ཉིད་བཞི་ལྡན་དུ་བྱིན་གྱིས་བརླབས་པས་དག་པའི་སྣང་བ་སྣ་ཚོགས་སུ་འཆར་བར་མོས་པ་མཛོད། ཐོད་པ་སྤྱི་བོར་བཞག་ལ་ཨཀྵཿ ཚར་གཅིག །མཇུག་ཏུ་རྩ་ཁམས་ཀྱི་ལྷ་ཐམས་ཅད་དང་པོར་སྐྱེ་མེད། བར་དུ་གནས་མེད། ཐ་མར་འགག་མེད། བདེན་པའི་དངོས་པོར་གྲུབ་པ་མེད་དོ། །ཞེས་བརྗོད་དོ། །དེས་བུམ་པའི་དབང་བཞི་སོང༌། ད་གསང་བའི་དབང་བསྐུར་བ་ནི། བདུད་རྩི་ལས་སྲིན་ལག་གིས་བླངས་ཏེ་བུའི་གནས་བཞིར་ཐིག་ལེ་བྱེད་པ་སྟེ། དཔྲལ་བར་ཨ་བྷི་ཥིཉྩ་ༀ། སྐྱེ་མེད། གནས་མེད༑ འགག་མེད། དངོས་མེད་དོ། །ཞེས་བརྗོད་པས། བདེ་ཆེན་འཁོར་ལོ་ༀ་ལས་རྣམ་སྣང་གི་སྐུ་མཚན་ཉིད་བཞི་ལྡན་གྱིས་རྒྱས་གདབ། མགྲིན་པར་ཐིག་ལེ། ཨ་བྷི་ཥིཉྩ་ཨཱཿ སྐྱེ་མེད། གནས་མེད། འགག་མེད། དངོས་མེད་དོ༑ ༑ཞེས་བརྗོད་པས་མགྲིན་པའི་འཁོར་ལོ་ཨཱཿ ལས་འོད་དཔག་མེད་ཀྱི་སྐུ་མཚན་ཉིད་བཞི་ལྡན་གྱིས་རྒྱས་གདབ། སྙིང་གར་ཨ་བྷི་ཥིཉྩ་ཧཱུྃ། སྐྱེ་མེད་སོགས་བརྗོད་པས། སྙིང་གའི་འཁོར་ལོ་ཧཱུྃ་ལས་མི་བསྐྱོད་པའི་སྐུ་མཚན་ཉིད་བཞི་ལྡན་གྱི་རྒྱས་གདབ། ལྟེ་བར་ཨ་བྷི་ཥིཉྩ་ཧྲཱིཿ སྐྱེ་མེད་སོགས་བརྗོད་པས་ལྟེ་བའི་འཁོར་ལོ་རིན་འབྱུང་གི་སྐུ་མཚན་ཉིད་བཞི་ལྡན་གྱི་རྒྱས་གདབ་བོ། །ད་དེ་ཉིད་བརྟན་བྱེད་དུ་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད། སྐྱེ་མེད་སོགས་བརྗོད་པས་རྩ་ཁམས་ཀྱི་དཔའ་བོ་དང་དཔའ་མོ་ཐམས་ཅད་མཉེས་པ་ལས་ཤར་བའི་ཉམས་རྟོགས་ཀུན་ཀྱང་མཚན་ཉིད་བཞི་ལྡན་དུ་འཆར་བ་ཡིན་ནོ། །དེས་གསང་བའི་དབང་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་སྟོན་པ་ཐུབ་པའི་དབང་པོས་ཆུ་བོ་ནཻ་རཉྫ་ནའི་འགྲམ་དུ་སྤྱན་ལྔའི་གཟིགས་པས་བསམ་གྱིས་མི་ཁྱབ་པའི་ཡེ་ཤེས་རྩལ་དུ་ཤར་ཡང༌། ད་དུང་སངས་རྒྱས་ཀྱི་ཡེ་ཤེས་ཁྱད་པར་ཅན་ དེ་རྗེས་སུ་མ་མཐོང་ནས་རྡོ་རྗེ་གདན་དུ་བྱོན་ཏེ་བདུད་བཏུལ། སྤྱན་ལྔའི་ལྟ་སྟངས་སྒྱུར་བས་དེར་སངས་རྒྱས་ཀྱི་ཡེ་ཤེས་ཐོབ་ནས་ཆོས་འཁོར་བར་པའི་དུས། འདུས་པའི་འཁོར་ལ་ལྟ་སྟངས་སྒྱུར་བས། ཟབ་མོའི་བརྡ་དེ་སྤྱན་རས་གཟིགས་ཀྱིས་རྟོགས། ཤཱ་རིའི་བུས་དྲིས། འདུས་པའི་འཁོར་གྱིས་དོན་ཁོང་དུ་ཆུད་ནས་གླེངས། ཀུན་དགའ་བོས་བསྡུས། བྱམས་པ་ལ་དོན་བརྒྱུད་གཏད་ནས། ཐོགས་མེད། དབྱིག་གཉེན། ཨཱ་དེ་བ། དམ་པ་རིན་པོ་ཆེས་ཆིག་བརྒྱུད་ཀྱི་བླ་མ་གསུམ་ལ་རིམ་པར་བབས་ཏེ། ད་ལྟ་ཡན་མ་ཆད་པ་ཡིན་ནོ། །རྩ་བ་དེ་སློབ་མའི་རྒྱུད་ལ་ཇི་ལྟར་བསྐུར་ན། ལུས་གནད་ཆོས་བདུན་བཅའ། ངག་གནད་སྟེང་འོག་གི་རླུང་ཁ་སྦྱར་ལ་འགྱུ་བ་བཅད་དེ་དབུ་མར་གཞུག །ཡིད་སྒོམ་འདོད་ཀྱི་རྟོག་པ་སྤངས་ལ། ངོ་བོ་སྟོང་པ། རང་བཞིན་གསལ་བ། མཚན་ཉིད་གཉིས་མེད་དུ་གྲོལ་བར་བྱ་བའི་ཕྱིར། ལྟ་སྟངས་ལྔ་བསྒྱུར་ཏེ། ངན་སོང་དུ་ལྟུང་བའི་དོགས་པ་ཆོད་ཕྱིར་ཉན་ཐོས་ཞི་བའི་ལྟ་སྟངས་ཐུར་དུ་སྒྱུར། མཐོ་རིས་ཐོབ་འདོད་ཀྱི་རེ་བ་གཅོད་ཕྱིར་མུ་སྟེགས་ཚངས་པའི་ལྟ་སྟངས་གྱེན་དུ། ཞེ་སྡང་གི་རྟོག་པ་གཅོད་ཕྱིར་སེམས་དཔའི་ལྟ་སྟངས་གཡས་སུ༑ འདོད་ཆགས་ཀྱི་ཀུན་རྟོག་གཅོད་ཕྱིར་སེམས་མའི་ལྟ་སྟངས་གཡོན་དུ། སྒོམ་བློ་བསམ་གཏན་གྱི་འཆིང་བ་གཅོད་ཕྱིར་བདེ་བར་གཤེགས་པའི་ལྟ་སྟངས་ཐད་ཀར་བསྒྱུར་བར་བྱའོ། །དེ་ལྟར་ལྟ་སྟངས་གང་བསྒྱུར་ ཡང༌༑ སྟེང་རླུང་མནན། འོག་རླུང་འཐེན། འགྱུ་བ་བཅད། སྒྲིམ་ཤ་བཏོན། རླུང་སེམས་འོད་གསལ་གྱི་མདངས་ལ་བཅིངས་ཏེ། གསལ་རྡོ་བ་ལ་བཤིག་ཅིང་སྒོམ་པས་རྗེས་ལ་བློ་བྲལ་ཐུགས་སུ་ཆུད་དེ་འཁོར་འདས་ཀྱི་ཆོས་ཐམས་ཅད་མཚན་ཉིད་མེད་པར་ཉམས་སུ་མྱོང་བར་བྱེད་དོ། །ད་དེའི་དྲོད་ཚད་བཟུང་བ་ལ་བཞི་སྟེ། དང་པོར་རྒྱལ་བ་ཡུམ་གྱི་ཞལ་བལྟ་དུས། བླ་མའི་སྤྱན་ལ་བལྟ། གཉིས་པ་མཐོང་དུས་བླ་མའི་ལད་མོ་བྱ༑ གསུམ་པ་དེ་གོམས་པར་བྱེད་དུས་དམ་ཇི་ལྟར་བཅས་ཀྱི་བར་དུ་ཉམས་སུ་བླངས། བཞི་པ་མངོན་དུ་གྱུར་དུས་ཆོས་ཐམས་ཅད་ལ་བདེན་འཛིན་ཞིག་ནས་ཀུན་རྫོབ་དག་སྣང་དུ་འཆར་ཙ་ན་ལྟ་སྟངས་ལྔ་པོ་ཆེད་དུ་བསྒྱུར་མི་དགོས་སོ། །དེ་ལྟར་གསུམ་པའི་དབང་དེ་བརྟན་པར་བྱ་བའི་ཕྱིར་རྗེས་སྤྱོད་ཐམས་ཅད་མཚན་ཉིད་བཞི་ལྡན་དུ་ངོ་སྤྲད་པར་བྱ་སྟེ། གཟུགས་སྣང་ཙམ་ནས་མ་གྲུབ་སྟེ་རང་བཞིན་གྱིས་སྟོང་པའོ། །རྟེན་འབྲེལ་གྱི་སྣང་བ་མ་འགགས་པས་སྟོང་ཉིད་ཀྱི་རྩལ་གཟུགས་སུ་སྣང་ལ། སྣང་ཙམ་ཉིད་ན་ངོ་བོ་སྟོང་ཉིད་ལས་མ་གཡོས་པས་གཟུགས་ལས་ཀྱང་སྟོང་པ་ཉིད་གཞན་མ་ཡིན་ཞིང༌། ངོ་བོ་སྟོང་པ་ཉིད་ལས་མ་གཡོས་ཀྱང་རྩལ་སྣང་གཟུགས་སུ་མ་འགགས་པས་སྟོང་པ་ཉིད་ལས་ཀྱང་གཟུགས་གཞན་མ་ཡིན་ཏེ། དེ་ལྟ་བུའི་མཚན་ཉིད་བཞི་ལྡན་དུ་རྣམ་མཁྱེན་གྱི་བར་གྱི་ཆོས་ཐམས་ཅད་ལ་ཤེས་པར་བྱ་ཞིང༌། དེ་ལྟར་ཤེས་ཙ་ན་ རྣམ་གྲངས་ཀྱི་སྟོང་པ་དང༌། ལོག་པའི་ཀུན་རྫོབ་ཅེས་བྱ་བ་ཡུལ་དུ་མི་གནས་པ་ཡིན་ནོ། །དེས་ཤེར་དབང་སོང༌། ད་ཚིག་དབང་བསྐུར་བ་ནི། ༀ་ཨཱཿ ཧྲཱིཿ ཧཱུྃ་བཞི་དབང་བཞིའི་སྙིང་པོ་ཛཱི་ན་མི་ཏྲ་སྒྲུབ་པའི་སྙིང་པོ་སྟེ། རྣམ་པར་མི་རྟོག་པའི་ཡེ་ཤེས་ཅིག་ཅར་དུ་འཆར་བྱེད་རྟོག་པ་རྗེས་ཀྱི་སྙིང་པོའི་ལུང་འདི་ལོང་ཞིག །ༀ་ཨཱཿ ཧྲཱིཿ གུ་རུ་ཛཱི་ན་མི་ཏྲ་ཧཱུྃ་ཞེས་ལན་གསུམ་གྱིས་བཟླས་ལུང་བྱིན་ནས། ས་ལམ་ཐམས་ཅད་སྙིང་པོས་གཅོད་པ་ཡིན་པས་བཟླས་པ་ལ་རེམ་པར་བྱ་ཞིང་ལམ་རྟགས་རིག་པ་དྭངས་པ་ལས་འཆར་བས་དབེན་པར་མ་ཡེངས་ཙམ་དུ་སྒོམ། ཡོན་ཏན་ཚོགས་རྫོགས་པ་ལས་འབྱུང་བས་ཚོགས་བསགས་པ་ལ་འབད་པར་བྱའོ༑ ༑དེ་ཉིད་བརྟན་ཕྱིར་གླེགས་བམ་གྱི་སྟེང་ནས་མེ་ཏོག་བླངས་པ་ལ་རྗེས་ཀྱི་སྙིང་པོ་ལ་བཟླས་ནས་བུ་ལ་འཐོར་ཞིང༌། གྲུབ་པར་གྱུར་ཅིག་ཅེས་ལན་གསུམ། དེས་བླ་མ་དང་རང་སེམས་འདྲེས་པར་བསམ་པས་མཐོང་ལམ་གྱི་ཡེ་ཤེས་རྒྱུད་ལ་སྐྱེ་བ་ལ་ཚེགས་མེད་པར་གསུངས་སོ། །ད་མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང༌། རྣལ་འབྱོར་གྱི་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ༑ གཞི་ལ་གཡའ་ཆགས་ན་གཤིས་ཐོག་ཏུ་བོ་བས་ཆོས་གོ་ཐོག་ཏུ་མ་ལུས་པར་ཉམས་སུ་བླངས། གཉེན་པའི་བྱ་ར་མ་འགྱེལ་ན་ཉམས་ཐོག་ཏུ་ཟགས་པས་ཉམས་མྱོང་གཤིས་ཐོག་ཏུ་གཞིག །རང་ལྟ་ལ་མཆོག་ཏུ་ བཟུང་ན་གོ་ཐོག་ཏུ་ལྟེམས་པས་ཆོས་ལ་ཕྱོགས་རིས་མི་བྱ། གྲུབ་མཐའི་འདོད་པ་མ་ཞིག་ན་ཚིག་ཐོག་ཏུ་ལོག་པས་རྟོག་པ་གཟུགས་བརྙན་དུ་མི་གཏོང་བར་བསླབ་པར་བྱའོ། །དེ་ལྟར་སྦྱོར་དངོས་རྗེས་གསུམ་གྱིས་མཐོང་ལམ་བགྲོད་པར་བྱེད་པ་རྗེས་ཀྱི་བྱིན་རླབས་ཚར་བ་ལགས་པས་བླ་མ་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས། ཞེས་བརྗོད། རྗེས་ཆོག་རྣམས་བློ་སྦྱོང་ལྟར་བྱའོ། །ལམ་ལྔ་ལས་མཐོང་ལམ་བགྲོད་བྱེད་ཀྱི་དབང་ཆོག་ཚར་རོ། ། ཨྠིྀ། གོམྦྷི་ར།། ༈ །།ༀ་སྭ་སྟི། བཞི་པ་སྒོམ་ལམ་ས་བཅུ་དུས་གཅིག་ལ་ནོན་པར་བྱེད་པ་རོ་སྙོམས་ཀྱི་བྱིན་རླབས་ལ། གླེགས་བམ་སོགས་སྔར་ལྟར་བཤམ། ཁྱད་པར་བདུད་རྩིའི་འཕྲད་ཀ་ར་བུ་རམ་སྦྲང་གསུམ་བྱ། བདག་བསྐྱེད་སྔོན་འགྲོས་ཚོགས་དང་དབང་རྫས་བྱིན་རླབས་གཞན་རྣམས་སྔར་ལྟར་ལས། ཁྱད་པར་ཡིག་འབྲུའི་ལྷ་རྣམས་གོ་རིམ་དང་བཟང་ངན་ཆེ་ཆུང་མེད་པར་མཉམ་ཉིད་དུ་བྱིན་གྱིས་བརླབ་བོ། །དེ་ནས་སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལས། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་བྱ། དེའི་ཆེད་དུ་སྒོམ་ལམ་ས་བཅུ་དུས་གཅིག་ལ་ནོན་པར་བྱེད་པ་རོ་སྙོམས་ཀྱི་དབང་ཟབ་མོ་ཞུས་ནས་ཉམས་སུ་བླངས་སྙམ་དུ་མ་ཡེངས་པར་གསན་འཚལ། དེ་ལ་བྱིན་རླབས་དབང་གི་ཆུ་བོ་འདི་དབང་གཞན་ལས་ཁྱད་པར་ལྔས་འཕགས་ཏེ། གླེགས་བམ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔ་མཚོན་པའི་རི་མོ་ཡིན་པས་དང༌། ཡིག་འབྲུ་ནི་འབྲས་ཆོས་ལྔ་པོ་དེ་ཡི་ ས་བོན་གྲུངས་པོ་ཡིན་པས་དང༌། བྷཉྫ་ནི་དེ་བཞིན་གཤེགས་པ་ཐམས་ཅད་ཀྱིས་སྒྲུབ་པའི་དམ་རྫས་ཡིན་པས་དང༌། བླ་མ་ནི་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཡིན་པས་དང༌། ངོ་སྤྲོད་ཟབ་མོ་འདི་དེ་བཞིན་གཤེགས་པ་ཐམས་ཅད་ཀྱི་ལམ་དངོས་ཡིན་པས་ཁྱད་པར་དུ་འཕགས་པ་ལགས། དེ་ལྟ་བུའི་དབང་བཀའ་འདི་སྤྲུལ་པའི་སྐུ་དམ་པ་རྒྱ་གར་གྱིས་ཡུམ་བདག་མེད་མ། རིག་འཛིན་མཁའ་སྤྱོད་ཀྱི་བླ་མ། མགོན་པོ་བྱམས་པ། གསང་བའི་མཁའ་འགྲོ་མ་རྣམས་ལས་དབང་བཞི་པོ་འདི་གསན་ནས། ཆུ་བོ་ཆེན་པོ་བཞི་དྲིལ་གྱིས་བྱང་སེམས་ཀུན་དགའ་ལ་བསྩལ་བ་ལས་རིམ་པར་བརྒྱུད་དེ་དོན་བརྒྱུད་མ་ཆད་པས་འདི་དང་འཕྲད་པ་སྐལ་བ་རེ་བཟང་སྙམ་དུ་སྤྲོ་བ་བསྐྱེད་པར་མཛད་འཚལ། དབང་དངོས་ལ་གསུམ་གྱི། ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས་དེ་ཁོ་ན་ཉིད་བཞིན་དུ་འགྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་དབང་བཞི་རྫོགས་པའི་ངོ་སྤྲོད་བྱ་བ་ལས། དང་པོ་བུམ་པའི་དབང་བཞི་བསྐུར་བ་ནི། འདི་ལྟར་སྣང་བའི་ཆོས་ཐམས་ཅད། བླ་མ་དང་ཡི་དམ་གྱི་སྐུ་གསུང་ཐུགས་དང༌། ཐ་མལ་པའི་ལུས་ངག་ཡིད་གསུམ་གྱི་སྣང་བ་ལ་བཟང་ངན་མེད་པར་སྣང་སྟོང་གཉིས་མེད་དུ་འཛིན་པ་ཙམ་ཡང་མི་བྱ་བར་ཐག་བཅད་དེ་འདིའི་རྗེས། ཡི་གེ་ལ་ཐུར་མ་བཙུགས་ཏེ་ཀྵ་ནས་ ཨའི་བར་མས་བཟློག་གིས་ཚར་གཅིག །ཨ་ནས་ཀྵའི་བར་ལུགས་འབྱུང་དུ་ཚར་གཅིག །ཡང་ཨཿ ཨཾ་ནས་ཨའི་བར་དབྱངས་ལྡོག་པ་དང༌། གསལ་བྱེད་ཀ་ནས་ཀྵའི་བར་ལུགས་འབྱུང་དུ་ཚར་གཅིག །ཡང་གསལ་བྱེད་སྡེ་པ་ལྔ། མཐའ་གནས་བྲོ་བ་ཀྵཿ སྟེ་བརྒྱད་པོ་སོ་སོར་བཅད་པའི་བར་དུ་དབྱངས་བཅུ་དྲུག་པོ་གཉིས་རེ་བཅུག་ནས་ཀློག་པ་ཚར་གཅིག་སྟེ་བཞིའོ། །འདི་ནི་གླང་འཁོར་བ་ཆེན་པོའི་ཕྱག་བཞེས་ཏེ་དབང་དཔེ་རྙིང་པ་རྣམས་སུ་ཐམས་ཅད་ལུགས་ལྡོག་ཏུ་ཀློག་པར་བཤད་དོ། །དེ་ལྟར་སྣང་གྲག་དྲན་པའི་ཆོས་ཐམས་ཅད་གོ་རིམ་ངེས་མེད་དུ་བྱིན་གྱིས་བརླབས་པས་སྒོམ་ལམ་ཤེས་བྱའི་སྒྲིབ་པ་ཐམས་ཅད་དག་ནས་ས་ལམ་ཆིག་རྫོགས་སུ་གྲོལ་བ་ཡིན་ནོ། །ད་བུམ་དབང་དེ་ཉིད་བརྟན་བྱེད་དུ་རང་ལུས་རྩ་ཁམས་ཀྱི་ལྷ་རྣམས་གོ་རིམ་དང་བཟང་ངན་མེད་པར་བྱིན་གྱིས་བརླབས་པས་དག་སྣང་ཕྱོགས་མེད་དུ་འཆར་བའི་མོས་པ་མཛོད། ཅེས་ཐོད་པ་སྤྱི་བོར་བཞག་ལ་དབྱངས་གསལ་མས་ལྡོག་ཚར་གཅིག་བརྗོད་དོ། །དེས་བུམ་པའི་དབང་བཞི་སོང༌། ད་གསང་དབང་བསྐུར་བ་ནི། བདུད་རྩིའི་ཐིག་ལེ་སྙིང་གར་ཨ་བྷི་ཥིཉྩ་ཧཱུྃ། ལྟེ་བར་ཨ་བྷི་ཥིཉྩ་ཧྲཱིཿ མགྲིན་པར་ཨ་བྷི་ཥིཉྩ་ཨཱཿ དཔྲལ་བར་ཨ་བྷི་ཥིཉྩ་ༀ། ཞེས་བཞག་པས། འཁོར་ལོ་བཞིའི་བདེ་བར་གཤེགས་པ་རྣམས་རིམ་པ་མ་ངེས་པར་གསལ་བཏབ་པས་བྱིན་རླབས་ཐུག་ཕྲད་དུ་འཆར་བ་ཡིན་ནོ། །དེ་ཉིད་བརྟན་བྱེད་དུ་ཧཱུྃ་ཨཱཿ ༀ་ཞེས་བདུད་རྩི་ལན་གསུམ་བླུད་པས། རྩ་ཁམས་ཀྱི་དཔའ་བོ་དང་དཔའ་མོ་ཐམས་ཅད་མཉེས་པ་ལས་ཤར་བའི་ཉམས་སྣང་ཐམས་ཅད་ གསལ་བདེ་མི་རྟོག་པར་གོ་རིམ་ངེས་མེད་དུ་འཆར་བ་ཡིན་ནོ། །དེས་གསང་བའི་དབང་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་སྟོན་པ་ཐུབ་པའི་དབང་པོས་རྡོ་རྗེ་གདན་དུ་ལྟ་སྟངས་ལྔས་སངས་རྒྱས་ཀྱི་ཡེ་ཤེས་རྗེས་ལ་ཐོབ་ཀྱང༌། བཞི་པ་མཁྱེན་པའི་ཡེ་ཤེས་ཡུལ་ལ་མ་ཁེལ་ནས་ཞག་བདུན་ཕྲག་བདུན་དུ་འཇིག་རྟེན་གྱི་ཁམས་ཀུན་བཅགས་ནས་སྤྱོད་ལམ་བཞི་ལ་བསླབ་པས་མཁྱེན་པའི་ཡེ་ཤེས་ཡུལ་ལ་འཁེལ་ཏེ། འཁོར་ལོ་བསྐོར་བ་ལས་བར་པའི་དུས་འཁོར་འདུས་པའི་དབུས་སུ་སྤྱོད་ལམ་བསྒྱུར་བས་བརྡའི་དོན་དེ་སྤྱན་རས་གཟིགས་ཀྱིས་ཁོང་དུ་ཆུད། ཤཱ་རིའི་བུས་དྲིས། འདུས་པའི་འཁོར་གྱིས་སྒྲོ་ཞིང་གླེང་བ་རྣམས། ཀུན་དགའ་བོས་བསྡུས། དོན་གྱི་བརྒྱུད་པ་བྱམས་མགོན་ལ་གཏད། ཐོགས་མེད་ནས་རིམ་པར་དམ་པ་རིན་པོ་ཆེ་ལ་བརྒྱུད་དེ་ད་ལྟའི་བར་དུ་མ་ཆད་པ་ཡིན་ནོ། །རྩ་བའི་དོན་དེ་སློབ་བུའི་རྒྱུད་ལ་ཇི་ལྟར་བསྐུར་ན། སྔར་སྦྱོར་ལམ་དུ་བསྟན་པའི་སྤྱན་ལྔ་དང༌། མཐོང་ལམ་དུ་བསྟན་པའི་ལྟ་སྟངས་ལྔ་པོ་འདིར་སྤྱོད་ལམ་བཞི་དང་བསྲེས་ནས་ཉམས་སུ་ལེན་པ་སྟེ། དེ་ཡང་རྩ་བའི་སྤྱོད་ལམ་འགྲོ་འཆགས་ཉལ་འདུག་བཞི་ལས། ཡན་ལག་གི་སྤྱོད་ལམ་ཉི་ཤུར་ཕྱེ་ལ་ཉམས་སུ་བླངས་ཏེ། དེའང་འདུག་པའི་སྤྱོད་ལམ་ལྔ་ནི། རྟེན་འབྲེལ་དག་པ་རྡོ་རྗེའི་སྐྱིལ་ཀྲུང༌། ཕྱེད་སྐྱིལ། ཙོག་པུ། བསྙེས་པ། རྒྱལ་པོ་རོལ་པའི་འདུག་སྟངས་སོ། ། ཉལ་བ་ལྔ་ནི། གཡས་ཉལ། གཡོན་ཉལ། གན་རྐྱལ། ཁ་སྦུབས། མགོ་གཏུམས། བརླ་སྒྲིལ་ལོ། །ལངས་པ་ལྔ་ནི། ལངས་ཀ །ཕྱེད་ལངས། ལངས་པ། གོས་གྱོན་པ། ལས་ཀ་བྱེད་པའོ། །འགྲོ་བ་ལྔ་ནི། འགྲོ་བ། འགྲོ་འཕྲོ་ལ་འཆམས་པ། རྒྱུག་པ། རྒྱུག་འཕྲོ་ལ་འཆམས་པ། ངལ་བསོ་བའོ། །དེ་རྣམས་ལྟ་སྟངས་ལྔ་དང་ལྟ་སྟངས་རེ་རེ་ཡང་སྤྱན་སྔ་དང་སྦྱར་བས་མཉམ་བཞག་གི་དུས་སུ་བལྟས་ནས། རྗེས་ཀྱི་དུས་སུ་སློད་པ་ནི། ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ནོ། །གང་ལྟར་སྒོམ་ཡང༌། སྟེང་རླུང་མནན། འོག་རླུང་འཐེན། རླུང་འགྱུ་བ་བཅད་སྒྲིམ་ཤ་བཏོན་ལ། ཆུན་བདོ་བ་ལ་བཤིག །བཤིག་རྗེས་སོ་མར་ལྷོད་དེ། ཁྲེས་སེ༑ རྟོག་མེད་རང་དྭངས་སུ་རྗེན་ནེ་བཞག་ལ། བདེ་སྡུག་གི་རྐྱེན་གང་ལའང་ཐོགས་རྡུག་མེད་པར་ལམ་དུ་ཁྱེར་བས། སྒོམ་བློའི་འཆིང་བྱེད་བྲལ། ཐ་མལ་གྱི་རྟོག་པ་གསར་པས་མ་སླེབས་ཀྱི་བར་དེར། ཆོས་ཉིད་གཞིའི་དོན་ལ་ངེས་ཤེས་སད་ནས་ཐམས་ཅད་མཚན་ཉིད་མེད་པར་ཉམས་སུ་མྱོང་བར་འགྱུར་རོ། །དབང་དེ་བརྟན་པར་བྱ་བའི་ཕྱིར་རྗེས་སྤྱོད་ཐམས་ཅད་རྣམ་པར་དག་པར་ངོ་སྤྲོད་པར་བྱ་སྟེ། རྟེན་དག་པ་ཉན་ཐོས༑ སྒྲུབ་པ་དག་པ་རང་རྒྱལ། ལམ་དག་པ་བྱང་ཆུབ་སེམས་དཔའ། འབྲས་བུའི་དག་པ་སངས་རྒྱས་ཀྱི་རྣམ་པར་དག་པ་དང་བཞི་ཡིན་ནོ། །དེས་ཤེར་དབང་ངོ༌། །ད་ཚིག་དབང་བསྐུར་བ་ནི། པྲ་མ་ཎ་ཡེ་ཞེས་ སྔགས་འབྲུ་བཅུས་རོ་སྙོམས་ཀྱི་རྟོགས་པ་འཆར་བྱེད་སྒྲུབ་པ་ཆེན་པོའི་སྔགས་ཡིན་པས། དེ་ཡང་དམིགས་པ་བླ་མ་ལ་གཏད་དེ་མཐོང་སྟངས་སྦྱངས་འགོད་པ་གནས་བཞིའི་ལྷ་རྣམས་གསལ་བཏབ་ལ་གུས་པ་བསྐྱེད། དགྲམ་པ་རྟེན་འབྲེལ་གྱི་རྫས་རྣམས་སྟེང་འོག་ཕྱོགས་བཞིར་དགྲམ། བརྗོད་པ་རོ་སྙོམས་ཀྱི་སྙིང་པོ་འདི་གསལ་ལ་དག་པར་བཟླ་དགོས་པས་འདིའི་ལུང་ལོང་ཞིག །ༀ་ཨཱཿ ཧྲཱིཿ གུ་རུ་པྲ་མ་ཎ་ཡེ་ཧཱུྃ། ཞེས་ལན་གསུམ། དེ་བརྟན་ཕྱིར་སྙིང་པོ་བཟླས་པའི་མེ་ཏོག་འཐོར་ཞིང༌། གྲུབ་པར་གྱུར་ཅིག །ཅེས་ལན་གསུམ། དེས་རོ་སྙོམས་ཀྱི་རྟོགས་པ་མྱུར་དུ་འཆར་བ་ཡིན་ནོ། །ད་མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ། བདག་འཛིན་གྱི་ཁ་མ་ཐེངས་ན་རང་ཐོག་ཏུ་བོ་བས། ཕོ་ངས་བྱས་ཀྱི་ངོ་སོ་མི་བྱ། འཁོན་འཛིན་བརྟེན་ན་གཞན་ཐོག་ཏུ་ཟགས་པས་གཞན་གྱིས་བརྙས་པ་ལ་ཀོ་ལོང་མི་བྱ། གཉིས་སྣང་གི་མཐའ་མ་ཁྲོལ་ན་གོ་ཐོག་ཏུ་ལྟེམས་པས་བདག་གཞན་གཉིས་སུ་མ་བཟུང༌། ཟག་པའི་འཕན་ལངས་ན་འཕྲུལ་ཐོག་ཏུ་ལོག་པས་ཆགས་སྡང་གི་རྗེས་མི་བཅད་པ་ལ་བསླབ་པར་བྱའོ། །དེ་ལྟར་སྦྱོར་དངོས་རྗེས་གསུམ་གྱིས་སྒོམ་ལམ་རོ་སྙོམས་ཀྱི་དབང་བྱིན་རླབས་ཚར་བ་ཡིན་པས་བླ་མ་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས། ཞེས་བརྗོད། རྗེས་ཆོག་རྣམས་བློ་སྦྱོང་ལྟར་རོ། །ལམ་ལྔ་ལས་སྒོམ་ལམ་རོ་སྙོམས་ཀྱི་དབང་ཆོག་ཚར་རོ། ། ཨྠིྀ།། ༈ །།ༀ་སྭ་སྟི། ལྔ་པ་ཐར་ལམ་བྱ་བྲལ་གྱི་ཡེ་ཤེས་འཐོབ་པར་བྱེད་པ་སྒོམ་པ་བདག་གཏོད་ཀྱི་བྱིན་རླབས་ལ། གླེགས་བམ་སོགས་བཤམ་ལུགས་གཞན་འདྲ་བ་ལས། ཁྱད་པར་བདུད་རྩིའི་ཕྲད་རྩི་མར་ལ་བྱ། བདག་བསྐྱེད་སྔོན་འགྲོས་ཚོགས་དང་དབང་རྫས་བྱིན་རླབས་སྔར་བཞིན་ལས། ཁྱད་པར་ཡིག་འབྲུ་ལས་བྱུང་བའི་རིགས་ལྔའི་ལྷ་རྣམས་རྡོ་ཚན་ལ་མར་བཞག་པ་ལྟར་ཞུ་ལ་ཁད་དམ་ནམ་ལངས་ཀྱི་སྐར་མ་ལྟར་ཡལ་ལ་ཁད་དུ་བྱིན་གྱིས་བརླབ་བོ། །དེ་ནས་སློབ་མ་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལ། འོ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་ཐར་ལམ་བགྲོད་པར་བྱེད་པ་སྒོམ་པ་བདག་གཏོད་ཀྱི་དབང་བསྐུར་མཁྱེན་པའི་ཡེ་ཤེས་གཞན་འཇུག་གི་བྱིན་རླབས་འདི་ཞུས་ནས་ཉམས་སུ་བླངས་སྙམ་པས་མ་ཡེངས་པར་གསན་འཚལ། དེ་ལ་འདིར་ནི་ཐེག་པ་ཐམས་ཅད་ཀྱི་རྩེ་བསྡུས་མི་ཤིགས་པ་རྡོ་རྗེ་ལྟ་བུའི་དབང་བསྐུར་ཞེས་བྱ་བ་འདི་གཞན་ལས་ཁྱད་པར་ལྔས་འཕགས་ཏེ། གླེགས་བམ་འདི་ནི་དྲན་པས་ཆོག་པའི་དབང་ཡིན་པ་དང༌། ཨཱ་ལི་ཀཱ་ལིའི་ཡིག་འབྲུ་འདི་ནི་མཐོང་བས་ཆོག་པའི་ལམ་ཡིན་པ་དང་། བྷཉྫའི་རྫས་འདི་ནི་ཟིན་པས་ཆོག་པའི་རྩི་ཡིན་པས་དང༌། དབང་ངོ་སྤྲོད་ཀྱིས་བསྐུར་བ་འདི་ནི་ཤེས་པས་ཆོག་པའི་གནད་ཡིན་པས་དང༌། ལྷའི་དོད་བླ་མས་མཛད་པ་འདི་ནི་འཕྲད་པས་ཆོག་པའི་བརྒྱུད་པ་ཡིན་པའི་ཕྱིར་ཁྱད་པར་འཕགས་པ་ལགས། དེ་ལྟ་བུའི་དབང་བཀའ་འདི་ནི། བདེ་གཤེགས་རྡོ་རྗེ་འཆང༌། ཡུམ་བདག་མེད་མ། རྗེ་བཙུན་དམ་པ་རིན་པོ་ཆེ། བྱང་སེམས་ཀུན་དགའ། སྤ་ཚབ། རྒྱལ་བ་ཏེ་ནེ། ཞིག་པོ་རིན་པོ་ཆེ་སྐུ་མཆེད་ནས་ད་ལྟ་ཡན་ཆོད་དུ་དབང་གི་ཆུ་བོ་འབབ་འཕྲོ་མ་ཆད། ཉམས་རྟོགས་ཀྱི་ན་བུན་འཐུལ་འཕྲོ་མ་ཆད། ལམ་རྟགས་ཀྱི་འཇའ་ཚོན་འཆར་འཕྲོ་མ་ཆད། བྱིན་རླབས་ཀྱི་ཆར་རྒྱུན་འབབ་འཕྲོ་མ་ཆད། ཡོན་ཏན་གྱི་ལོ་ཐོག་སྐྱེ་འཕྲོ་མ་ཆད། གྲུབ་ཐོབ་ཀྱི་ཕྲེང་ཐག་མ་ཆད་པ་ཡིན་པས་འདི་དང་འཕྲད་པ་སྐལ་བ་རེ་བཟང་སྙམ་དུ་སྤྲོ་བ་བསྐྱེད་པར་མཛད་འཚལ། དབང་དངོས་ལ་གསུམ་གྱི་ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་དབང་བཞིའི་ངོ་སྤྲོད་བྱ་བ་ལས། དང་པོ་བུམ་པའི་དབང་བཞི་བསྐུར་བ་ནི། འདི་ལྟར་སྣང་གྲག་དྲན་པའི་ཆོས་རྣམས་རང་ལ་སྣང་བ་མེད་པར་ནམ་མཁའ་ལ་སྤྲིན་དེངས་པ་ལྟར་གྱུར། གཞན་སྣང་ལས་སངས་རྒྱས་སྤྲུལ་པའི་སྐུ་གསུང་ཐུགས་སྣ་ཚོགས་སུ་སྣང་བས་ཕྲིན་ལས་རྒྱུན་མི་འཆད་པའི་རྟེན་འབྲེལ་སྒྲིགས་པར་བསམ་ལ་འདིའི་རྗེས། ཡིག་འབྲུ་རྣམས་ལ་མས་ནས་ཡར་ཐུར་མ་ལུགས་ལྡོག་གིས་བཙུགས་ཏེ། ཡི་གེ་རྣམས་ཨ་འབའ་ཞིག་ཏུ་ལན་བཞིར་བཀླག་པས། དང་པོས་གཟུགས་སྣང་ལྷ་སྐུ། གཉིས་པས་གྲགས་པ་སྒྲ། གསུམ་པས་འགྱུ་བྱེད་དྲན་རྟོག་རྣམས་མི་དམིགས་པར་གྱུར། བཞི་པས་ཆོས་ཉིད་ལ་ཡང་དག་ཏུ་འཛིན་པའི་རྟོག་པ་ཡང་ བློ་བྲལ་གྱི་དབྱིངས་སུ་ཡལ་ཞིང༌། དེ་ལྟར་ཡལ་བའི་རང་བཞིན་མ་འགགས་ཙམ་འདི་སངས་རྒྱས་སྤྲུལ་པས་སངས་རྒྱས་ཀྱི་ཕྲིན་ལས་ཐམས་ཅད་མཛད་པ་ཡིན་ནོ། །ད་བུམ་དབང་དེ་ཉིད་བརྟན་བྱེད་དུ་ཡེ་ཤེས་ཀྱི་བདུད་རྩི་རང་ལུས་རྩ་ཁམས་ཀྱི་ལྷ་རྣམས་ལ་ཕོག་པ་རིགས་ལྔའི་ལྷ་ཚོགས་རྣམས་བར་སྣང་གི་ན་བུན་ལྟར་རང་བཞིན་མེད་པར་ཡལ་བའི་མོས་པ་མཛོད། ཅེས་བྷཉྫའི་བདུད་རྩི་སྤྱི་བོར་བཞག་ལ་ཨ་འབའ་ཞིག་ལྔ་བཅུ་བརྗོད། དེ་ལྟར་རང་སྣང་གི་འཛིན་པ་མི་དམིགས་པར་ཡལ་བས་དག་པའི་སྣང་བ་གདུལ་བྱ་གཞན་ངོར་འཆར་བའི་ཡོན་ཏན་འགགས་པ་མེད་པར་སྣང་བར་འགྱུར་བ་ཡིན་ནོ། །དེས་བུམ་པའི་དབང་བཞི་སོང༌། ད་གསང་དབང་བསྐུར་བ་ནི། གནས་བཞིར་བདུད་རྩིའི་ཐིག་ལེ་གཉིས་བཏུད་དུ་བཞག་ཅིང་སྔགས་ལན་གཉིས་བརྗོད་པར་བྱ་བ་སྟེ། དཔྲལ་བར་བོ་དྷི་ཙིཏྟ་ཨཿ ཞེས་དང་པོས་དོན་དམ་བྱང་སེམས་ཀྱི་རྟོགས་པ་བརྟན་པར་གྱུར་པས་བདེ་ཆེན་འཁོར་ལོ་ལྷ་རྣམ་སྣང་འོད་དུ་ཞུ་སྟེ་མི་དམིགས་པར་གྱུར། གཉིས་པ་ཀུན་རྫོབ་བྱང་ཆུབ་ཀྱི་སེམས་ལ་ཐུགས་རྗེའི་ནུས་པ་རྒྱས་ཏེ་རང་ལུས་འགྲོ་བ་གང་གིས་མཐོང་བ་དེའི་ལུས་ཀྱི་སྡིག་སྒྲིབ་འདག་ནུས་པར་གྱུར། ཡང་མགྲིན་པར་བོ་དྷི་ཙིཏྟ་ཨཱཿ ཞེས་དང་པོས་ལོངས་སྤྱོད་འཁོར་ལའི་འོད་དཔག་མེད་མི་དམིགས་པར་ཡལ། གཉིས་པ་ཀུན་རྫོབ་བྱང་སེམས་ཀྱི་ནུས་པ་རྒྱས་ཏེ་རང་གི་གསུང་སུས་ཐོས་ཀྱི་ངག་གི་སྡིག་སྒྲིབ་འདག་ནུས་པར་གྱུར། ཡང་སྙིང་གར་བོ་དྷི་ཙིཏྟ་ཧཱུྃ། ཞེས་དང་པོས་ཆོས་ཀྱི་འཁོར་ལོའི་མི་བསྐྱོད་པ་མི་དམིགས་པར་ཡལ། གཉིས་པས་ཀུན་རྫོབ་ཀྱི་ནུས་པ་རྒྱས་ཏེ་རང་གི་ཉམས་རྟོགས་མངོན་ཤེས་ཀྱིས་གཞན་བདེ་བ་ལ་འགོད་ཅིང་སུས་དྲན་གྱི་ཡིད་སྒྲིབ་འདག་ནུས་པར་གྱུར། ཡང་ལྟེ་བར་བོ་དྷི་ཙིཏྟ་ཧྲཱིཿ ཞེས་དང་པོས་སྤྲུལ་པའི་འཁོར་ལོ་རིན་འབྱུང་མི་དམིགས་པར་ཡལ། གཉིས་པས་ཀུན་རྫོབ་ལ་ནུས་པ་ཐོབ་སྟེ་རྗེས་སུ་འཇུག་པའི་སློབ་མ་ལ་ཡོན་ཏན་སྐྱེས་ནས་དྲན་རྟོག་ཐམས་ཅད་སངས་རྒྱས་ཀྱི་ཕྲིན་ལས་སུ་འཆར་ནུས་པར་འགྱུར། དེ་ཉིད་བརྟན་བྱེད་དུ་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས་རྩ་ཁམས་ཀྱི་དཔའ་བོ་དང་དཔའ་མོ་རྣམས་དགྱེས་པ་ལས་སྐལ་ལྡན་ལ་དག་སྣང་དུ་ཤར་བའི་དངོས་རྟགས་རང་ལ་ང་རྒྱལ་མེད་པར་མཚན་དཔེ་སོགས་སངས་རྒྱས་ཀྱི་ཡོན་ཏན་གཞན་ངོ་ལ་སྣང་བར་འགྱུར་ཏེ། འགྲོ་དོན་རྩོལ་མེད་ལྷུན་གྲུབ་ཏུ་འབྱུང་བ་ཡིན་ནོ། །དེས་གསང་དབང་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་སྟོན་པ་ཐུབ་པའི་དབང་པོས་སྙིང་པོ་དོན་གྱི་བསམ་གཏན་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ལ་བརྟེན་ནས། ཡེ་ཤེས་བཞི་པོ་ཐུགས་སུ་ཆུད་དེ། གཞན་དོན་མཛད་པར་དགོངས་པ་ལ། ལྷ་ཚངས་པས་གསོལ་བ་བཏབ་པས་ཞལ་གྱིས་བཞེས་ཏེ། མཆོད་རྟེན་རྣམ་དག་ལ་ལྟ་སྒོམ་གྱི་ཞེན་པ་ཕུལ་ནས་སྒོམ་པ་བདག་པོ་ལ་གཏད། གཞན་དོན་ཕྲིན་ལས་ཀྱི་ལུང་བླངས་ཏེ་ཝཱ་ར་ཎ་སིར་བདེན་པ་བཞིའི་ཆོས་འཁོར་བསྐོར། དེ་ནས་བྱ་རྒོད་ཕུང་པོའི་རི་དང་རྒྱལ་པོའི་ཁབ་ཏུ་སྙིང་པོ་དོན་གྱི་འཁོར་ལོ་བསྐོར་བ་རྣམས། ཀུན་དགའ་བོས་བསྡུས། དོན་བརྒྱུད་འཕགས་པ་བྱམས་པས་ཟིན་ཏེ། རིམ་པར་ཐོགས་མེད་སོགས་འཕགས་པའི་བརྒྱུད་པ་གསུམ། སྤྲུལ་པའི་སྐུ་གཅིག །གྲུབ་ཐོབ་ཀྱི་བརྒྱུད་པ་གསུམ་སྟེ་བདུན་གྱི་བར་ཆིག་བརྒྱུད་དུ་བབས་པ་ལས། ཞིག་པོ་སྐུ་མཆེད་དང་ཐམས་ཅད་མཁྱེན་པ་ཡབ་སྲས་སོགས་མཁས་གྲུབ་ཀྱི་སྐྱེས་བུ་དམ་པ་རྣམས་ཀྱིས་ལེགས་པར་སྤེལ་བས་ད་ལྟའི་བར་དུ་སྙིང་པའི་དོན་བརྒྱུད་མ་ཆད་པ་ཡིན་ནོ། །རྩ་བའི་དོན་དེ་སློབ་མའི་རྒྱུད་ལ་ཇི་ལྟར་བསྐུར་ན། གླེགས་བམ་གྱི་དབུས་སུ་མཉྫིའི་སྟེང་དུ་ཞི་བའི་འབྲང་རྒྱས་བཞག་པ་ལ་གཟུངས་ཐག་བཏགས་ཏེ་དེ་ལ་དཔོན་སློབ་ཐམས་ཅད་ཀྱིས་འཇུས་ནས། འོ་བཟླས་ལུང་དབོག་ཅིང་སྒོམ་པ་བདག་པོ་ལ་གཏོད་པ་ཡིན་པས་འདིའི་རྗེས་ཟློས། ༀ་ཤཱནྟིང་ཀུ་རུ་སྭཱ་ཧཱ། ཞེས་ཉི་ཤུ་རྩ་གཅིག་དང༌། ད་ནི་བདག་མཉམ་རྗེས་དབྱེར་མེད་དུ་འདྲེས་ཕྱིན་ཆད་ནས། སེམས་ཅན་གྱི་དོན་ལས་རང་དོན་དུ་བལྟ་རྒྱུ་མེད་དོ། །མི་ལྟ། ལྟ་རེ་ཤི། ལྟ་ནའང་ང་ལ་སྡིག །མི་སྒོམ། སྒོམ་རེ་ཤི། སྒོམ་ནའང་ང་ལ་སྡིག །མི་སྤྱོད། སྤྱོད་རེ་ཤི༑ སྤྱོད་ནའང་ང་ལ་སྡིག །མི་སྒྲུབ། སྒྲུབ་རེ་ཤི། སྒྲུབ་ནའང་ང་ལ་སྡིག །ཅེས་བྲོ་བོར། སློབ་དཔོན་གྱིས། འོ་རང་འདོད་ཀྱི་ལྟ་སྤྱོད་སྒོམ་སྒྲུབ་རྣམས་སྤོངས་ལ། རྗེས་སྤྱོད་ཞི་བའི་ཕྲིན་ལས་ཀྱིས་སེམས་ཅན་གྱི་དོན་མཛོད་ཅིག །ཅེས་བརྗོད། དེ་བཞིན་དུ་ཞི་བའི་འབྲང་རྒྱས་ཤུལ་དུ་རྒྱས་པ་སོགས་ཀྱི་འབྲང་རྒྱས་རིམ་པར་སྤོ་བ་ལ་གཟུངས་ཐག་ནས་འཇུས་ཏེ། རྒྱས་པ་ལ། ༀ་པུཥྚིང་ཀུ་རུ་སྭཱ་ཧཱ། དབང་ལ། ༀ་ཝ་ཤཾ་ཀུ་རུ་སྭཱ་ཧཱ། དྲག་པོ་ལ། ༀ་རཀྵ་ཀུ་རུ་སྭཱ་ཧཱ། ཞེས་ཉེར་གཅིག་རེའི་རྗེས་སུ། ལྟ་སྤྱོད་སྒོམ་སྒྲུབ་བཞི་རང་དོན་ལ་འཁྲིས་པའི་གཉེན་པོ་བཤིག་བྱེད་ཀྱི་མནའང་སྐྱལ་དུ་གཞུག་ཅིང༌། རྗེས་སྤྱོད་ཕྲིན་ལས་གང་བྱེད་ཀྱིས་སེམས་ཅན་གྱི་དོན་མཛོད་ཅིག །ཅེས་གདམས་སོ། །དེ་ནས་ལུང་སྟོན་པའི་སྒོ་ནས་སྤྲོ་བ་བསྐྱེད་པ་ནི། ཨཀྵཿ ལྔ་བཅུ་པོ་ནས་དང་བསྲེས་པ་ཐོད་པའི་ནང་དུ་བླུགས་ལ་བླ་མས་རྟེན་འབྲེལ་སྙིང་པོ་མང་དུ་བཟླས་རྗེས། དཀོན་མཆོག་གསུམ་གྱི་བདེན་པ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས་པ་དང༌། ཆོས་ཉིད་རང་བཞིན་གྱིས་རྣམ་པར་དག་པའི་རྩལ་སྣང་རྟེན་འབྲེལ་བསླུ་བ་མེད་པའི་བདེན་པས་ལུང་གསལ་པོར་སྟོན་ཅིག །ཅེས་དམོད་དོར་ནས། སློབ་མར་ཡི་གེ་ལེན་དུ་བཅུག་ལ། དེ་བླ་མ་ལ་ཕུལ་ནས༑ བླ་མས་ལུང་སྟོན་ཏེ། ཀ་ཁ་ག་གྷ་ང༌ཨཱི་ར་ཡ་ཤ་རྣམས་གང་རིགས་འདུག་ན། འདི་ནི་ཤར་ཕྱོགས་རླུང་གི་ཡི་གེ་ཡིན་པས། ཁྱོད་ཞིང་ཁམས་མངོན་པར་དགའ་བར་སངས་རྒྱས་མི་བསྐྱོད་པའི་རིགས་སུ་འཚང་རྒྱ། མཚན་རྡོ་རྗེའམ་ཡི་གེ་གང་ཡིན་ལས་གྲས་པའི་མཚན་ཐོབ། བརྒྱུད་པ་ཟིན་པའི་སློབ་མ་ཤར་ནས་འོང༌། ཡི་དམ་རྡོ་རྗེའི་རིགས་སྒྲུབ་ཐག་ཉེ། ནད་རླུང་ནད་ལྡང༌། གདོན་རྒྱལ་འགོང་གནོད། མི་རིགས་རླུང་ཤས་ཆེ། ལྷ་མིན་གྱི་སྐྱེ་སྒོ་དགག་པའི་ཐབས་ལ་འབད་པར་བྱ། རང་གི་མིང་ཡིག་ཐོག་མ་དང་ངོས་བཟུང་བའི་ཡི་གེ་གཅིག་ཏུ་བབས་ན་རབ། མ་བུ་གྲོགས་སུ་གྱུར་པ་འབྲིང༌། དགྲ་གཤེད་དུ་གྱུར་ན་ཐ་མའོ། །ཡང༌། ཙ་ཚ་ཛ་ཛྷ་ཉ་ཨེ་ཨཽ་རཱ་ར་ཥ། འདི་ནི་ལྷོ་ཕྱོགས་མེའི་ཡི་གེ་ཡིན་པས། ཁྱོད་ཞིང་ཁམས་དཔལ་དང་ལྡན་པར་རིན་ཆེན་འབྱུང་གནས་ཀྱི་རིགས་སུ་འཚང་རྒྱ། མཚན་རིན་ཆེན་ནམ་རང་ཡིག་ལས་གྲས་པ། བརྒྱུད་འཛིན་ལྷོ། ལྷོ་རིན་ཆེན་རིགས། ནད་ཚད་པ། གདོན་ཕོ་གདོན། མི་རིགས་མེ། དམྱལ་བའི་སྐྱེ་སྒོ་བགག །རང་གི་མིང་ཐོག་བབས་པ་རབ། མ་བུ་གྲོགས་གསུམ་འབྲིང༌། དགྲ་གྱུར་ཐ་མའོ། །ཡང༌། ཊ་ཋ་ཌ་ཌྷ་ཎ་ཨ་ཨཱ་ཨཾ་ཨཱཿ ཀྵ། འདི་ནི་ནུབ་ཕྱོགས་ནམ་མཁའ་ལྕགས་ཀྱི་ཡི་གེ་ཡིན་པས། ཁྱོད་བདེ་བ་ཅན་དུ་སྣང་མཐའི་རིགས་སུ་འཚང་རྒྱ། མིང་པདྨའམ་རང་ཡིག་ལ་གྲས་པ། བརྒྱུད་འཛིན་ནུབ། ལྷ་པདྨའི་རིགས། ནད་ལྷ་ནད། གདོན་ལྷ་གདོན། མི་རིགས་ནམ་མཁའ། ལྷའི་སྐྱེ་སྒོ་དགག །མིང་ཡིག་ཐོག་མ་ལ་བབས་པ་རབ། མ་བུ་གྲོགས་གསུམ་འབྲིང༌། དགྲ་གྱུར་ཐ་མའོ། །ཡང༌། པ་ཕ་བ་བྷ་མ་ཨུ་ཨཱུ་ལ་ཧ་ཝ། འདི་ནི་བྱང་ཕྱོགས་ཆུའི་ཡི་གེ་ཡིན་པས། ཞིང་ཁམས་ལས་རབ་ཏུ་དོན་ཡོད་གྲུབ་པའི་རིགས་སུ་འཚང་རྒྱ། མིང་ཀརྨའམ་རང་ཡིག་ལས་དྲངས་པ་བརྒྱུད་འཛིན་བྱང༌། ལྷ་ལས་རིགས། ནད་གྲང་བ། གདོན་མོ་གདོན། མི་རིགས་ཆུ། ཡི་དྭགས་ཀྱི་སྐྱེ་སྒོ་དགག །རང་གི་མིང་ཡིག་ཐོག་མ་བྱུང་ན་རབ། མ་བུ་གྲོགས་གསུམ་འབྲིང༌། དགྲར་གྱུར་ཐ་མའོ། །ཡང༌། ཏ་ཐ་ད་དྷ་ན་ཨོ་ཨཽ་ལ་ལ་ས། འདི་ནི་དབུས་དང་མཚམས་ཀྱི་ཡི་གེ་ཡིན་པས། ཞིང་སྟུག་པོ་བཀོད་པར་རྣམ་སྣང་གི་རིགས་སུ་འཚང་རྒྱ། མཚན་དེ་བཞིན་གཤེགས་པའམ་ཡི་གེ་གང་ཡིན་ལས་གྲས་པ། བརྒྱུད་འཛིན་དབུས་སམ་མཚམས་ནས་འོང༌། ལྷ་བུདྡྷའི་རིགས། ནད་ས་ནད། གདོན་ས་གདོན། མི་རིགས་ས། འདོད་ལྷའི་སྐྱེ་སྒོ་དགག་པ་ལ་འབད། རང་གི་མིང་ཡིག་ཐོག་མ་བྱུང་ན་རབ། མ་བུ་གྲོགས་གསུམ་འབྲིང༌། དགྲ་གྱུར་ཐ་མའོ། །དེ་ཡང་ཡི་གེའི་རིགས་དང་མ་བུ་དགྲ་གྲོགས་ལ་བརྟེན་ནས། རབ་ཏུ་གྱུར་ན་བླ་མ་བརྟེན་དུས་ནས་རང་གཞན་གྱི་དོན་གྲུབ༑ འབྲིང་གིས་དཀའ་ཐུབ་ཐེམས་དུས་ནས་རང་གཞན་གྱི་དོན་གྲུབ། ཐ་མས་དཔའ་ཆེན་ལས་ལ་སྦྱར་དུས་ནས་རང་གཞན་གྱི་དོན་སྒྲུབ་ནུས་པ་ཡིན་ནོ། །དེས་ཤེར་དབང་སོང༌། ད་ཚིག་དབང་བསྐུར་བ་ནི། ལས་ལ་སྦྱར་བའི་སྔགས་སྒོམ་པ་བདག་གཏོད་ཀྱི་སྙིང་པོ་ཅི་བྱས་གཞན་དོན་འབའ་ཞིག་ཏུ་འགྲོ་བའི་སྔགས་ཡིན་པས་འདིའི་ལུང་ལོང་ཞིག །ༀ་ཨཱཿ ཧྲཱིཿ གུ་རུ་བྷུ་ཧུ་ཀུ་རུ་ཧཱུྃ། ཞེས་ལན་གསུམ། དེ་བརྟན་བྱེད་ཀྱི་སྙིང་པོ་བཟླས་པའི་མེ་ཏོག་འཐོར་ཞིང༌༑ གྲུབ་པར་གྱུར་ཅིག །ཅེས་ལན་གསུམ། དེས་སངས་རྒྱས་ཐམས་ཅད་ཀྱི་ཕྲིན་ལས་པ་བླ་མ་སྤྲུལ་པའི་སྐུའི་སྐུ་གསུང་ཐུགས་སློབ་མའི་ལུས་ངག་ཡིད་གསུམ་ལ་གཉིས་མེད་དུ་ཐིམ་པས་ཤེས་སྒྲིབ་ཕྲ་མོ་རྣམས་ཀྱང་དག ། ཚོགས་ཆེན་རྫོགས་ནས་དབང་ཕྱུག་ཆེན་པོ་དྲུག་ཀ་དུས་གཅིག་ལ་ཐོབ་པར་འགྱུར་བ་ཡིན་ནོ། །ད་མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང༌། རྣལ་འབྱོར་གྱི་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ། འཁོར་བ་སྤང་བྱར་མཐོང་ན་རང་ཐོག་ཏུ་བོ་བས་རིགས་དྲུག་རང་སེམས་སུ་ཤེས་པར་བྱ། འབྲས་བུའི་སྒྲུབ་བློ་མ་དག་ན་གཞན་ཐོག་ཏུ་ཟགས་པས་སྐུ་བཞི་རང་ཆས་སུ་ཤེས་པར་བྱ། རེ་དོགས་ཀྱི་མཐའ་མ་སེལ་ན་གོ་ཐོག་ཏུ་ལྟེམས་པས་ཡུལ་སེམས་ཐམས་ཅད་བསམ་པའི་རང་གཟུགས་སུ་ཤེས་པར་བྱ། སྤྱོད་ལམ་ཐ་མལ་དུ་ཤོར་ན་ཚེ་འདིར་ལོག་པས་མི་ཚེ་སྒྲུབ་པ་ལ་བསྐྱལ་བར་བྱའོ། །དེ་ལྟར་སྦྱོར་དངོས་རྗེས་གསུམ་གྱི་མཐར་སྒྲུབ་པ་སྒོམ་པ་བདག་གཏད་ཀྱི་དབང་བསྐུར་བ་ཚར་བ་ཡིན་པས་ངེད་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས་ཞེས་བརྗོད། ལམ་ཕྱི་མ་བཞི་ལའང་འཇུག་ཡོན་དང་ལམ་ལྔ་ཀའི་རྗེས་སུ་གཏོང་རག་གི་མཎྜལ་འབུལ་བ་དབང་ཆོག་ལས་མི་འབྱུང་ཡང་སྤྱི་འགྲོ་ལྟར་ཕྱག་ལེན་དུ་གནང་བ་མི་འགལ་ལོ། །རྗེས་ཆོག་བདུན་པོ་བློ་སྦྱོང་ལྟར་བྱའོ། །ལམ་ལྔ་ལས་ཐར་ལམ་སྒོམ་པ་བདག་གཏོད་ཀྱི་དབང་སྟེ་ལམ་ལྔའི་དབང་ཆོག་ཚར་རོ། ། ཨྠིྀ།། ༈ །།ༀ་སྭ་སྟི། གཉིས་པ་དབང་པོ་འབྲིང་གི་གང་ཟག་སྨིན་པར་བྱེད་པ་ལམ་གསུམ་གཞུང་མའི་དབང་ལ་གསུམ་ལས། དང་པོ་བློ་སྦྱོང་ནི་སྔ་མ་དང་འདྲ་བ་ལས་ལམ་ལྔ་ཐོབ་པ་དེས་གོ་ཆོད་མོད། མ་ཐོབ་ན་འདིར་བླངས་ནས་བསྐུར་རོ། །གཉིས་པ་དཀའ་ཐུབ་ལ། བཤམས་བཀོད་དང་བདུད་རྩིའི་ཕྲད་ཀ་རས་ བྱ་བ་རྣམས་འདྲ་བ་ལས། ཁྱད་པར་ཡིག་འབྲུ་རྣམས་བླ་མ་ལོངས་སྐུ་བདེ་མཆོག་གི་ལྷ་ཚོགས་སུ་བྱིན་གྱིས་བརླབས། དེ་ནས་སློབ་མ་རྣམས་འདུས་པ་དང༌། འོ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དབང་འབྲིང་སྨིན་བྱེད་ལམ་གསུམ་གཞུང་མ་ལ་ལེགས་པའི་ལམ་གསུམ་ལས་བློ་སྦྱོང་ཚར་ནས་འདིར་དཀའ་ཐུབ་ཀྱི་དབང་ཞུས་ནས་ཉམས་སུ་བླང་སྙམ་པས་གསན་འཚལ། དེའང་དབྱིངས་རྣལ་འབྱོར་གསུམ་ལས། བྱེད་པ་ལམ་གྱི་རྣལ་འབྱོར་ལ་ཡང་གསུམ་གྱི་གཉིས་པ་དཀའ་ཐུབ་ཀྱི་དབང་གི་སྐབས་ཡིན། འདི་ལའང་གཞན་ལས་ཁྱད་པར་ལྔས་འཕགས་པའི་དབང་བཀའ་སྲོལ་འགྲན་ཟླ་དང་བྲལ་བ་ལགས་པས་ཐུགས་སྤྲོ་བ་བསྐྱེད་ནས༑ ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་ལ་དབང་བཞི་ལས། དང་པོ་བུམ་པའི་དབང་ནི༑ མིག་ཡུལ་གྱི་གཟུགས་སྣང་དང་རང་གི་ཕུང་ཁམས་སྐྱེ་མཆེད་སྐྲ་སེན་སོགས་ཐམས་ཅད་བླ་མ་བདེ་མཆོག་ཡབ་ཡུམ་གྱི་སྐུར་སྒོམ་ལ་འདིའི་རྗེས་ཟློས། ཐུར་མ་བཙུགས་ལ་ཨཱཀྵཿ བརྗོད། རྣ་བའི་ཡུལ་གྱི་སྒྲ་གྲགས་དང༌། རང་གི་བརྗོད་པ་ཐམས་ཅད་བླ་མ་བདེ་མཆོག་གི་གསུང་དུ་མོས་ལ་ཨཱཀྵཿ བརྗོད། གཞན་སྣང་གི་དྲན་རྟོག་དང་རང་གི་འཆར་སྒོ་ཐམས་ཅད་བླ་མ་བདེ་མཆོག་གི་ཐུགས་སུ་མོས་ལ་ཨཱཀྵཿ སྣང་གྲགས་དྲན་པའི་ཆོས་ཐམས་ཅད་ ཀྱང་རང་གི་སེམས་ལས་བྱུང་ཞིང་སེམས་གདོད་ནས་སྟོང་པ་ཉིད་དུ་དག་པ་ལས་སྣང་གྲག་དྲན་པ་ཐམས་ཅད་རང་བཞིན་མ་འགགས་པའི་རང་རྩལ་ཙམ་དུ་ཤེས་པ་འདིའི༴ ཨཱཀྵཿ བརྗོད། བརྟན་བྱེད་བདུད་རྩིའི་རྡུལ་ཕྲ་རབ་རེ་རེ་བཞིན་བདེ་མཆོག་ཏུ་གྱུར་པ་སྤྱི་བོ་ནས་ཐིམ་པས་རྩ་ཁམས་ཀྱི་ཡི་གེའི་སྒྲིབ་པ་དག་ནས་ཡི་གེ་རྣམས་བླ་མ་བདེ་མཆོག་ཡབ་ཡུམ་གྱི་སྐུར་གྱུར་པའི་མོས་པས། ཐོད་པའི་བདུད་རྩི་སྤྱི་བོར་བཞག་ཅིང་ཨཱཀྵཿ ཚར་གཅིག་བརྗོད་དོ། །གསང་དབང་བསྐུར་བ་ནི། ཨ་བྷི་ཥིཉྩ་ༀ། ཨ་བྷི་ཥིཉྩ་ཨཱཿ ཨ་བྷི་ཥིཉྩ་ཧཱུྃ། ཨ་བྷི་ཥིཉྩ་ཧྲཱིཿ ཞེས་གནས་བཞིར་སྲིན་ལག་གིས་བདུད་རྩིའི་ཐིག་ལེ་བཀོད་པས་བླ་མ་དང་དབྱེར་མེད་པའི་བདེ་མཆོག་སྤྱི་བོར་དཀར་པོ། མགྲིན་པར་དམར་པོ། ཐུགས་ཀར་སྔོན་པོ༑ ལྟེ་བར་སེར་པོ་རྣམས་ཚོན་གང་བ་རེ་རེས་རྒྱས་བཏབ་པར་གྱུར། བརྟན་བྱེད་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས། ཡི་དམ་གྱི་ལྷ་ཐམས་ཅད་ཀྱི་ཐུགས་དམ་དུས་གཅིག་ལ་སྐོང་ནས་ཉམས་རྟོགས་དངོས་གྲུབ་ཐམས་ཅད་ཐོབ་པར་བསམ་མོ། །ཤེར་དབང་བསྐུར་བ་ནི། ལུས་ཆོས་བདུན་བཅའ། ངག་རླུང་ཁ་སྦྱར། རླུང་སེམས་འོད་གསལ་གྱི་མདངས་ལ་བཅིངས་ཏེ། ཐུན་འགོར་སྒྲིམས་སློད་ཀྱི་ཚུལ་གྱིས་སྤྱན་ལྔ་དང་སྦྱར་བས་དུག་ལྔའི་རྟོག་པ་ཕྲ་རགས་བཅད། ཐུན་མཇུག་ཏུ་ལྟ་སྟངས་ལྔས་རེ་དོགས་ཆགས་སྡང་ཆེ་ཐབས་དང་ལྔ་པོ་རང་སར་འདག་ཏུ་བཅུག །མཉམ་བཞག་དེ་ལས་ལངས་ནས་ཐུན་མཚམས་སུ་སྤྱོད་ལམ་བཞི་ཀ་ལ་ལྟ་སྟངས་ལྔ་བསྒྱུར། ལྟ་སྟངས་རེ་ལ་སྤྱན་ལྔས་སྒྲིམ་སློད་ཀྱི་ཚུལ་གྱིས་ཉམས་སུ་བླང་འཚལ། བརྟན་བྱེད་སྣང་གྲགས་འགྱུ་གསུམ། སྒྱུ་མ། བྲག་ཆ། ཆུ་བུར་ལྟར་ཤེས་པར་མཛོད་ཅིག །ཚིག་དབང་བསྐུར་བ་ནི། དམ་པ་རིན་པོ་ཆེ་བརྒྱུད་པ་དང་བཅས་པའི་བླ་མ་གྲུབ་ཐོབ་རྣམས་ཀྱི་ཡི་དམ་བདེ་མཆོག་ལགས་པས་སྙིང་པོ་འདིའི་རྗེས། ༀ་ཨཱཿ ཧྲཱིཿ གུ་རུ་ཧ་ཧ་ཧཱུྃ་ཧཱུྃ་ཕཊ་ཧཱུྃ། ཞེས་ཅི་འགྲུབ་བཟླ། བརྟན་བྱེད་བླ་མ་དང་གཉིས་སུ་མེད་པའི་བདེ་མཆོག་རང་ལ་ཐིམ་པར་སྒོམས་ཤིག །མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་ལན་གསུམ། དེ་ལྟར་དབང་བཞི་རྫོགས་ནས་མཇུག་གི་ཆོས་གསུམ་ནི། རྟེན་སྡོམ་པ་གསུམ་དང་ལྡན་ཞིང༌། རྣལ་འབྱོར་གྱི་རང་ས་དྲུག་མ་ཉམས་པའི་སྒོ་ནས༑ དཀའ་ཐུབ་ཀྱི་བོ་ཟགས་ལྟེམས་ལོག་བཞིའི་དྲི་མ་བསྲུང་བ་ལ་འབད་པར་མཛོད་ཅིག །དེས་དཀའ་ཐུབ་ཀྱི་བྱིན་གྱིས་བརླབས་ཚར་བས་དྲིན་ཕྱག་གསུམ་འཚོལ་ལ། བཀའ་དྲིན་ཆེ་ལགས། ཞེས་བརྗོད། རྗེས་ཆོག་བདུན་སྔར་ལྟར་རོ།། ༈ །།གསུམ་པ་ཐར་ལམ་བདག་གཏོད་ལ། བཤམས་བཀོད་བདུད་རྩིའི་ཕྲད་སོགས་སྔར་གྱི་ཐར་ལམ་ལྟར་ལས། ཁྱད་པར་ཡིག་འབྲུའི་ལྷ་རྣམས་མི་དམིགས་པར་ཡལ་བ་ལས་མཁའ་འགྲོ་སྡེ་ལྔར་བྱིན་གྱིས་བརླབ་བོ། །དེ་ནས་སློབ་མ་རྣམས་གྲལ་དུ་འཁོད་པ་དང༌། སེམས་ཅན་གྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ལེགས་པའི་ལམ་གསུམ་པ་ཐར་ལམ་བདག་གཏོད་ཡེ་ཤེས་གཞན་འཇུག་གི་དབང་ཞུས་ནས་ཉམས་སུ་བླང་སྙམ་པས་གསན་འཚལ། དབང་འདི་ཡང་དབང་གཞན་ལས་ ཁྱད་པར་ལྔས་འཕགས་པས་ཐུགས་སྤྲོ་བ་བསྐྱེད་ནས་ཐོག་མར་སྦྱོར་བ་སྐྱབས་སེམས་ཀྱི་རྗེས་ཟློས། བླ་མ་དམ་པ་རྣམས་ལ་སོགས་ལན་གསུམ་བརྗོད། དངོས་གཞི་ལ་དབང་བཞི་ལས། བུམ་དབང་ནི། གླེགས་བམ་གྱི་ཡིག་འབྲུ་ལ་ཐུར་མ་ལུགས་ལྡོག་གིས་བཙུགས་པ་ལ་ཨ་འབའ་ཞིག་ལྔ་བཅུ་ཚར་བཞི་བརྗོད། དང་པའི་ཚེ་སྐད་ཅིག་དང་པོ་ལ་ལྷར་འཛིན་གྱི་སྣང་བ་དབྱིངས་སུ་ཐིམ་ནས། སྐད་ཅིག་གཉིས་པ་ལ་མ་འགགས་པའི་རང་རྩལ་དུ་སྣང་བ་ཐམས་ཅད་བླ་མ་དང་གཉིས་སུ་མེད་པའི་མཁའ་འགྲོ་སྡེ་ལྔའི་སྐུར་ཤེས་པར་གྱིས་ཤིག །ལན་གཉིས་པའི་ཚེ། སྐད་ཅིག་དང་པོ་ལ་གྲག་པ་གསུམ་འཛིན་དབྱིངས་སུ་ཐིམ་ནས། སྐད་ཅིག་གཉིས་པར་མ་འགགས་པའི་རང་རྩལ་སྒྲ་ཐམས་ཅད་བླ་མ་མཁའ་འགྲོའི་གསུང་དུ་ཤེས་པར་གྱིས་ཤིག །ལན་གསུམ་པའི་ཚེ། སྐད་ཅིག་དང་པོ་ལ་དྲན་རྟོག་ཐུགས་འཛིན་དབྱིངས་སུ་ཐིམ་ནས། སྐད་ཅིག་གཉིས་པར་མ་འགགས་པའི་རང་རྩལ་དུ་དྲན་རྟོག་ཐམས་ཅད་བླ་མ་མཁའ་འགྲའི་ཐུགས་སུ་ཤེས་པར་གྱིས་ཤིག །བཞི་པའི་ཚེ། སྐད་ཅིག་དང་པོ་ལ་སྣང་གྲགས་དྲན་རྟོག་སེམས་ལས་བྱུང་ཞིང་སེམས་སྟོང་པ་ཉིད་ཀྱི་དབྱིངས་སུ་ཐིམ་ནས། སྐད་ཅིག་གཉིས་པ་ལ་དེའི་རང་རྩལ་ལས་འགྲོ་དོན་ཕྱོགས་མེད་དུ་གྲུབ་པའི་མོས་པ་མཛོད། བརྟན་བྱེད་བདུད་རྩིའི་ཆར་གྱི་རྣམ་པར་ཚངས་བུག་ནས་ཐིམ་པས་རྩ་ཁམས་ཀྱི་ལྷ་ཚོགས་དབྱིངས་སུ་ཐིམ་ནས་རྩ་ཁམས་ཐམས་ཅད་མཁའ་འགྲོ་སྡེ་ལྔར་གྱུར་པར་སྒོམས་མཛོད། ཅེས་ཐོད་པའི་ བདུད་རྩི་སྤྱི་བོར་བཞག་ཅིང་ཨཀྵཿ ལྔ་བཅུ་བརྗོད། གསང་དབང་ནི། བོ་དྷི་ཙིཏྟ་ༀ། བོ་དྷི་ཙིཏྟ་ཨཱཿ བོ་དྷི་ཙིཏྟ་ཧཱུྃ། བོ་དྷི་ཙིཏྟ་ཧྲཱིཿ ཞེས་སྔགས་བཞི་པོ་རེ་རེ་ནས་ཚར་གཉིས་བཟླས་པ་དང་བསྟུན། གནས་བཞིར་བདུད་རྩིའི་ཐིག་ལེ་གཉིས་རེ་བྱས་པའི་དང་པའི་རྐྱེན་གྱིས༑ འཁོར་ལོ་བཞིའི་ལས་བཞི་པོ་འོད་དུ་ཞུ་ནས་མི་དམིགས་པས་ལྷར་འཛིན་གྱི་རྟོག་པ་དབྱིངས་སུ་ཐིམ། གཉིས་པས་མཁའ་འགྲོ་སྤྱི་བོར་དཀར་མོ། མགྲིན་པར་དམར་མོ། སྙིང་གར་སྔོན་མོ། ལྟེ་བར་སེར་མོ་རྣམས་བླ་མའི་སྐུ་གསུང་ཐུགས་ཡོན་ཏན་དབྱེར་མེད་པའི་མོས་པ་མཛད་འཚལ། བརྟན་བྱེད་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས། འགྲོ་དོན་རྩོལ་མེད་ལྷུན་གྲུབ་ཏུ་ཤར་བར་འགྱུར། ཤེར་དབང་ནི། གླེགས་བམ་གྱི་ཁར་མཉྫི་བཞག་པའི་འོག་ཏུ་ཐོད་པའི་ནང་དུ་ཨཀྵཿ ལྔ་བཅུ་ནས་དང་བསྲེས་པ་ལ་རྟེན་འབྲེལ་སྙིང་པོས་རབ་གནས་བྱས་ནས་མཎྜལ་ཚོམ་བུ་བདུན་བཀོད་པ་ཞིག་གིས་ཁ་བཅད་ལ་བཞག །མཉྫིའི་ཁར་ལས་བཞི་གང་ཡིན་གྱི་འབྲང་རྒྱས་བཀོད་པ་ལ་གཟུངས་ཐག་བཏགས་ནས། དེ་ལ་ཐམས་ཅད་ཀྱིས་འཇུས་ཏེ། བཟླས་ལུང་དབོག་ཅིང་སྒོམ་པ་བདག་པོ་ལ་གཏོད་པ་འདིའི་རྗེས་ཟློས། ཞི་བར། ༀ་ཤཱནྟིང་ཀུ་རུ་སྭཱ་ཧཱ། རྒྱས་པར། པུཥྚ༴ དབང་ལ། ཝཱ་ཤཾ༴ དྲག་པོ་ལ། རཀྵས༴ རྗེས་ལ། ལན་གསུམ་རེ་བཟླས། དེ་བཞི་རེ་རེའི་གཤམ་དུ། ད་ཕྱིན་ཆད་རང་དོན་དུ་མི་ལྟ། ལྟ་རེ་ཤི། ལྟ་ནའང་ང་ལ་སྡིག །མི་སྒོམ། མི་སྤྱོད། མི་སྒྲུབ་སོགས་རིགས་འགྲེ་སྦྱར། མཇུག་ཏུ་བླ་མས། འོ་རིགས་ཀྱི་བུ་ཁྱེད་རྣམས་ཀྱིས་གང་དང་གང་གིས་འདུལ་བའི་ཕྲིན་ལས་ཀྱིས་སེམས་ཅན་གྱི་དོན་གྱིས་ཤིག ། ཅེས་གདམས། རྡོ་རྗེས་བྷནྡྷའི་ཡིག་འབྲུ་ལ་དམོད་བོར་ནས་ལེན་དུ་བཅུག་ལ། བླ་མས་སྔར་ལྟར་ལུང་སྟོན། འོན་ཀྱང་ལམ་ལྔའི་བདག་གཏོད་ཐོབ་ན་འདིར་མ་བྱས་ཀྱང་ཆོག་གསུང་ངོ༌། །ཚིག་དབང་ནི་སྒོམ་པ་བདག་གཏོད་ཀྱི་སྙིང་པོ་ཡིན་པས་འདིའི་ལུང་ལོང་ཞིག །ༀ་ཨཱཿ ཧྲཱིཿ ཧ་རི་ནི་ས་ཧཱུྃ། ཞེས་བཟླར་བཅུག །བརྟན་བྱེད་བླ་མ་རྡོ་རྗེ་རྣལ་འབྱོར་མར་གསལ་བ་དེ་ཁྱེད་རང་ལ་ཐིམ་པའི་མོས་པ་མཛོད། མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་ལན་གསུམ་བརྗོད། དེ་ལྟར་དབང་བཞི་ཐོབ་ནས་མཇུག་གི་ཆོས་གསུམ་ནི། རྟེན་སྡོམ་པ་གསུམ་དང་ལྡན་ཞིང་རང་ས་དྲུག་མ་ཉམས་པའི་སྒོ་ནས་བདག་གཏོད་ཀྱི་བོ་ཟགས་ལྟེམས་ལོག་བཞིའི་དྲི་མ་བསྲུང་བ་ལ་འབད་པར་མཛོད་ཅིག །དེས་བདག་གཏོད་ཀྱི་བྱིན་རླབས་ཚར་བས་བླ་མ་ལ་དྲིན་ཕྱག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས་ཞེས་བརྗོད། རྗེས་ཆོག་བདུན་སྔར་ལྟར་བྱའོ། །དབང་པོ་འབྲིང་སྨིན་བྱེད་ལམ་གསུམ་གཞུང་མའི་དབང་ཆོག་ཚར་རོ།། ༈ །།ༀ་སྭ་སྟི། གསུམ་པ་དབང་རྣོན་ལ་རྫོགས་པའི་དབང་གཅིག་མའམ་ཟབ་མོ་ཀུ་སུ་ལུའི་དབང་ཞེས་པ་ལམ་གསུམ་གླེགས་བམ་ལ་མི་ལྟོས་པར་བླ་མའི་སྐུའི་དཀྱིལ་འཁོར་ལ་བརྟེན་ནས་བསྒྲུབ་པ་ཏིང་ངེ་འཛིན་ལམ་གསུམ་གྱི་དབང་བསྐུར་བ་ནི༑ ཕྱག་བཞེས་སུ་གླེགས་བམ་བཤམས་པར་མཛད་ཅིང༌། དེ་ཡང་མི་འདྲ་བའི་ཁྱད་པར་འདིར་གླེགས་བམ་གྱི་ཁར་ནས་ཕུང་པོར་སྤུངས་པས་དབྱིབས་སྒྱུར་མོར་བྱས་པའི་སྟེང་དུ་བྷཉྫ་དམ་རྫས་གུར་དང་བཅས་པ་བཤམས་ཤིང་ཕྱོགས་བཞིར་འབྲང་རྒྱས་ཀྱིས་བསྐོར་བ་ སོགས་གཞན་འདྲ་བར་མཛད། ཆོ་ག་ནི་བདག་བསྐྱེད་སྔོན་དུ་འགྲོ་བས་ཚོགས་དང་དབང་རྫས་བྱིན་རླབས་བྱས་ལ། སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་དང༌། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དབང་རྣོན་སྨིན་པར་བྱེད་པ་ཟབ་མོ་ཀུ་སུ་ལུའི་དབང་ཏིང་ངེ་འཛིན་ལམ་གསུམ་གྱི་བྱིན་རླབས་ཞུས་ལ་ཉམས་སུ་བླང་སྙམ་པས་གསན་འཚལ། དེས་ན་སྤྲུལ་པའི་སྐུ་རྗེ་བཙུན་དམ་པ་རྒྱ་གར་བའི་བཀའ་དྲིན་གྱིས་བརྡ་ལ་བརྟེན་ནས་དོན་གཅེར་མཐོང་དུ་རྟོགས་ཤིང༌། བྱིན་རླབས་རང་བྱུང་དུ་བབས་པ། ཉམས་ཡེ་ཤེས་སུ་འབར་བ་བླ་མ་རྫོང་པའི་ལུགས་ཀྱི་བློ་སྦྱོང་དཀའ་ཐུབ་བདག་གཏོད་གསུམ་དུས་གཅིག་ཏུ་བསྐུར་བའི་བཀའ་སྲོལ་གྱི་དབང་འདི་སྒྲུབ་པར་བྱེད་པ་ལ། ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་ལ་ལན་གསུམ་གྱི། དང་པོ་བླ་མ་ཆོས་སྐུར་སྒྲུབ་པ། བསྙེན་པ་བློ་སྦྱོང་གི་དབང་བཞི་ལས། བུམ་དབང་གི་ལམ་ཁྱེར་ནི། སློབ་དཔོན་དང་སློབ་མ་གཉིས་ཀ་ཡི་དམ་བདེ་མཆོག་གི་སྐུར་གསལ་བའི་ལུས་ཀྱི་དབུས་སུ་རྩ་དབུ་མ་ཆོས་བཞི་ལྡན། སྤྱི་མགྲིན་སྙིང་ལྟེའི་གནས་བཞིར་འཁོར་ལོ་བཞི་རེ་རེ་ལའང་རྩ་འདབ་ལྔ་བཅུར་གནས་པའི་འདབ་མ་ལ་ཨཱ་ལི་ཀཱ་ལིའི་ཡིག་འབྲུ་རྣམས་སྤྱི་བོར་དཀར་པོ། མགྲིན་པར་དམར་པོ། སྙིང་གར་སྔོན་པོ། ལྟེ་བར་སེར་པོ་རྣམས་གསལ་བར་གྱུར། དེ་ནས་ཨཱཀྵཿ ལན་བཞི་རྗེས་ཟློས་བྱས་པའི་ལན་དང་པོས། བླ་མ་རྣམ་པ་ཡི་དམ་ལ་ངོ་བོ་ཆོས་སྐུའི་བདག་ཉིད་ཅན་དུ་བཞུགས་པའི་སྤྱི་བའི་ཡིག་འབྲུ་ལས་འོད་ཟེར་དཀར་པོ་འཕྲོས་སྨིན་མཚམས་ནས་ཐོན། རང་རང་གི་ཚངས་བུག་ནས་ཞུགས་ཏེ་སྤྱི་བའི་ཡིག་འབྲུ་རྣམས་ལ་ཐིམ་པས། ཡིག་འབྲུ་རྣམས་ལས་འོད་དཀར་པོ་གཅིག་ནས་གཅིག་ཏུ་བརྒྱུད་དེ་ལུས་ཀྱི་ནང་ཐམས་ཅད་གང༌། ལུས་ཀྱི་སྡིག་སྒྲིབ་ཐམས་ཅད་སྦྱངས། ལུས་ཤེལ་སྒོང་ལྟར་གྱུར། གཟུགས་སྣང་ཐམས་ཅད་བླ་མའི་སྐུར་ཤར་བའི་མོས་པ་སྒོམ་དུ་གཞུག །ལན་གཉིས་པས། བླ་མའི་མགྲིན་པའི་ཡིག་འབྲུ་ལས་འོད་དམར་པོ་འཕྲོས་ལྗགས་སྟེང་ནས་ཐོན། རང་རང་གི་མགྲིན་པར་ཐིམ་པས་ཡིག་འབྲུ་ལས་བྱུང་བའི་འོད་དམར་པོས་ལུས་གང༌། ངག་གི་སྡིག་སྒྲིབ་སྦྱངས། ལུས་མཆོང་ལྟར་དམར་ལྟེམ་གྱིས་སོང༌། སྒྲ་གྲགས་ཐམས་ཅད་བླ་མའི་གསུང་དུ་ཤར་བར་མོས། ཡང་ལན་གསུམ་པས། བླ་མའི་ཐུགས་ཀའི་ཡིག་འབྲུ་ལས་འོད་སྔོན་པོ་འཕྲོས། རང་རང་གི་སྙིང་གར་ཐིམ་པས་ཡིག་འབྲུ་ལས་བྱུང་བའི་འོད་སྔོན་པོས་ལུས་ནང་གང༌། སེམས་ཀྱི་སྡིག་སྒྲིབ་སྦྱངས། རང་ལུས་འཇའ་ཚོན་ལྟར་དྭངས་པར་གྱུར། དྲན་རྟོག་ཐམས་ཅད་བླ་མའི་ཐུགས་སུ་ཤར་བར་མོས། ཡང་ལན་བཞི་པས། བླ་མའི་ལྟེ་བའི་ཡིག་འབྲུ་ལས་འོད་ཟེར་སེར་པོ་ཐོན། རང་རང་གི་ལྟེ་བར་ ཐིམ་པས་ཡིག་འབྲུ་ལས་བྱུང་བའི་འོད་སེར་པོས་ལུས་ནང་གང༌། སྒོ་གསུམ་ཕྲ་བ་བག་ཆགས་ཀྱི་སྒྲིབ་པ་སྦྱངས། རང་ལུས་ནམ་མཁའ་གསེར་གྱི་ཁ་དོག་ལྟ་བུར་དྭངས། སྣང་གྲགས་དྲན་པའི་ཆོས་ཐམས་ཅད་སྟོང་ཉིད་ཀྱི་རྩལ་ཙམ་ལས་ཡང་དག་པར་བདེན་པར་མ་གྲུབ་པའི་གཤིས་རྣམ་པར་དག་པ་དེ་བླ་མའི་དགོངས་པ་ཆུ་ལ་ཆུ་བཞག་པ་ལྟར་དབྱེར་མེད་དུ་མོས་ལ་མཉམ་པར་བཞག་གོ །གསང་དབང་གི་ལམ་ཁྱེར་ནི། ཨ་བྷི་ཥིཉྩ་ༀ། ཨ་བྷི་ཥིཉྩ་ཨཱཿ ཨ་བྷི་ཥིཉྩ་ཧཱུྃ། ཨ་བྷི་ཥིཉྩ་ཧྲཱིཿ ཞེས་སྲིན་ལག་གིས་བདུད་རྩིའི་ཐིག་ལེ་གནས་བཞིར་བཀོད་པས། སྤྱི་བོར་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ༀ་དཀར་པོ། མགྲིན་པར་པདྨ་འདབ་མ་བརྒྱད་ཀྱི་ལྟེ་བར་ཨཱཿ དམར་པོ། སྙིང་གར་རྡོ་རྗེ་སྔོན་པོའི་ལྟེ་བར་ཧཱུྃ་སྔོན་པོ། ལྟེ་བར་རིན་ཆེན་སེར་པོ་ཟུར་བརྒྱད་པའི་ལྟེ་བར་ཧྲཱིཿ སེར་པོ་རྣམས། བླ་མའི་སྐུ་རྡོ་རྗེ། གསུང་རྡོ་རྗེ། ཐུགས་རྡོ་རྗེ། ཡོན་ཏན་ཕྲིན་ལས་འདུས་པའི་རྡོ་རྗེའི་ངོ་བོར་མོས་པ་མཛོད། ཤེར་དབང་གི་ལམ་ཁྱེར་ནི། ལུས་གནད་ཆོས་བདུན་བཅའ། རླུང་སྟེང་འོག་ཁ་སྦྱར་ལ་དབུ་མར་བཅུག །ཡིད་བྲལ་བ་གསུམ་ངང་དུ་ངལ་བསོ་བའོ། །སེམས་མ་བཅོས་པར་རྩེན་གྱིས་ཞོག་ལ་སྒྲིམ་སློད་ཀྱིས་ཉམས་སུ་བླངས་པས་ཉམས་རྟོགས་ཇེ་བཟང་ལ་འགྲོ་བ་ཡིན་ནོ། །ཚིག་དབང་ལམ་ཁྱེར་ནི། སྤྱི་བོར་བླ་མ་ཆོས་ཀྱི་སྐུ་ནམ་མཁའི་གོས་ཅན་གྱི་རྣམ་པར་གསལ་ཐོབ་ལ་བློ་སྦྱོང་བའི་སྙིང་པོ་འདིའི་ལུང་ལོངས་ཤིག །ༀ་ཨཱཿ ཧྲཱིཿ གུ་རུ་སིདྡྷི་ཧཱུྃ། ལན་གསུམ། སྤྱི་བའི་བླ་མ་རང་ལ་ཐིམ་པས་བྱིན་གྱིས་བརླབས་པའི་མོས་པ་མཛོད། མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་བརྗོད། གཉིས་པ་བླ་མ་ཡི་དམ་གྱི་ལྷར་སྒྲུབ་པར་བྱེད་པ་སྒྲུབ་པ་དཀའ་ཐུབ་ཀྱི་དབང་ལ་བཞི་ལས། བུམ་དབང་གི་ལམ་ཁྱེར་ནི། ཨཱཀྵཿ འི་རྗེས་ཟློས་ལན་བཞི་བྱས་པའི་དང་པོས། བླ་མ་བདེ་མཆོག་ལྷན་སྐྱེས་སུ་གསལ་བའི་སྨིན་མཚམས་ནས་ཡི་གེའི་འོད་ཟེར་དཀར་པོ་ཐོན། རང་གི་སྤྱི་བོར་ཐིམ་པས། རང་ལུས་དང་ཕྱིའི་ཡུལ་སྣང་ཐམས་ཅད་བདེ་མཆོག་ལྷན་སྐྱེས་ཀྱི་སྐུ་སྣང་སྟོང་དུ་གྱུར་པར་མོས། ལན་གཉིས་པས། ཞལ་ནས་ཡིག་འབྲུའི་འོད་དམར་པོ་ཐོན། རང་གི་མགྲིན་པར་ཐིམ་པས་རང་གི་ངག་ནས་ཅི་བརྗོད་དང་ཕྱི་རོལ་གྱི་སྒྲ་ཐམས་ཅད་ལྷན་སྐྱེས་ཀྱི་གྲགས་སྟོང་གཞོམ་མེད་དུ་མོས། ལན་གསུམ་པས། ཐུགས་ཀ་ནས་ཡིག་འབྲུའི་འོད་ཟེར་མཐིང་ག་ཐོན། རང་གི་སྙིང་གར་ཐིམ་པས། རང་གི་རྟོག་པ་ཅི་འགྱུས་དང་གཞན་རྒྱུད་ཀྱི་དྲན་རྟོག་ཐམས་ཅད་ཀྱང་ལྷན་སྐྱེས་སུ་ཡོད་པས་དེ་དག་ཐམས་ཅད་ཀྱང་དེ་ལས་མ་འདས་པར་ཐག་བཅད་དོ། །ལན་བཞི་པས། ལྟེ་བ་ནས་ཡིག་འབྲུའི་འོད་ཟེར་སེར་པོ་ཐོན། རང་གི་ལྟེ་བར་ཐིམ་པས་བླ་མ་བདེ་མཆོག་ཏུ་གསལ་བའི་སྐུ་གསུང་ཐུགས་ཡོན་ཏན་དང་བཅས་རང་ལ་བརྒྱན་པར་མོས་ལ་མཉམ་པར་བཞག་གོ །གསང་དབང་ལམ་ཁྱེར་ནི། འཁོར་ལོ་བཞིའི་ལྟེ་བའི་ཡི་གེ་ༀ་ཨཱཿ ཧཱུྃ་ཧྲཱིཿ རྣམས་འོད་དུ་ ཞུ་བ་ལས། སྤྱི་བོར་སྐུའི་བདེ་མཆོག་དཀར་པོ། མགྲིན་པར་གསུང་གི་བདེ་མཆོག་དམར་པོ། སྙིང་གར་ཐུགས་ཀྱི་བདེ་མཆོག་སྔོན་པོ། ལྟེ་བར་ཡོན་ཏན་གྱི་བདེ་མཆོག་སེར་པོ་རྣམས་ཀྱིས་རྒྱས་བཏབ་པར་གྱུར༑ ཤེར་དབང་ལམ་ཁྱེར་ནི། ལུས་གནད་ཆོས་བདུན་བཅའ། རླུང་གནད་ཁ་སྦྱོར་ལ་འགྱུ་བ་བཅད། ཡིད་སྒོམ་འདོད་ཀྱི་རྟོག་པ་སྤངས་ལ། སྤྱན་ལྔ་བསྒྱུར་བར་བྱ་སྟེ། དེའང་ཉོན་མོངས་པའི་རྟོག་པ་ཤིན་ཏུ་རགས་པ་ལ་རུས་སྦལ་ལྟ་བུ། ཐ་མལ་རང་ག་ལ་ཟླ་ཚེས་ལྟ་བུ། ཐ་མ་རྐུན་བུ་ལ་མཁལ་མ་ལྟ་བུ། ཤེས་པ་དྲན་མེད་འཐིབས་པོ་ལ་ཟླ་བ་ཉ་གང་བ་ལྟ་བུའི་སྤྱན་གྱིས་ནམ་མཁའི་དབྱིངས་སུ་ལྟ་ཞིང༌། གསལ་བདོ་བ་ལ་བཤིག་པས་རྗེས་བློ་བྲལ་དུ་འཆར་རོ། །ཐུན་མཚམས་སུ་ཉལ་འདུག་ལངས་འགྲོའི་རྩ་བའི་སྤྱོད་ལམ་བཞི་ལ་ཡན་ལག་ལྔ་ལྔར་ཕྱེ་བའི་ཉི་ཤུ་དང༌། ལྟ་སྟངས་ལྔ་ལ་སྤྱན་ལྔ་བསྒྱུར་བས་ཐམས་ཅད་དུ་ཡེངས་པ་མེད་པར་བསྐྱང་བར་བྱོས་ཤིག ༑ཚིག་དབང་ལམ་ཁྱེར་ནི། རྒྱུ་རྩལ་བཞི་དང་ལྡན་པའི་སྒོ་ནས་ཡི་དམ་བདེ་མཆོག་གི་སྙིང་པོ་འདི་ཡི་ལུང་ལོང་ཞིག །ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊ། ལན་གསུམ། བླ་མ་བདེ་མཆོག་ཏུ་གསལ་བ་རང་ལ་ཐིམ་པའི་མོས་པ་གྱིས། མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་བརྗོད། གསུམ་པ་བླ་མ་མཁའ་འགྲོར་སྒྲུབ་པ་ལས་སྦྱོར་སྒོམ་པ་བདག་གཏོད་ཀྱི་དབང་ལ་བཞི་ལས། བུམ་དབང་ལམ་ཁྱེར་ནི། ཨ་ཡིག་ལྔ་བཅུའི་རྗེས་ཟློས་ལན་བཞིའི་དང་པོས། བླ་མ་རྡོ་རྗེ་མཁའ་འགྲོར་གསལ་བའི་སྨིན་མཚམས་ནས་ཨ་དཀར་པོ་ཐོན། རང་གི་སྤྱི་བོར་ཐིམ་པས། ཕྱི་རོལ་གྱི་སྣང་བ་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་སྣང་དུ་ཤར་བའི་གཟུགས་ཐམས་ཅད་རྡོ་རྗེ་ཌཱ་ཀིའི་སྐུ་སྣང་སྟོང་དུ་གྱུར་པར་མོས། ལན་གཉིས་པས། ལྗགས་སྟེང་ནས་ཨ་དམར་པོ་ཐོན། རང་གི་མགྲིན་པར་ཐིམ། སྒྲར་གྲགས་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་དུ་ཤར་བའི་སྒྲ་ཐམས་ཅད་རྡོ་རྗེ་ཌཱ་ཀིའི་གསུང་གྲགས་སྟོང་གཞོམ་མེད་དུ་མོས། ལན་གསུམ་པས། ཐུགས་ཀ་ནས་ཨ་སྔོན་པོ་ཐོན། རང་གི་སྙིང་གར་ཐིམ། དྲན་རྟོག་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་དུ་ཤར་བའི་དྲན་རྟོག་ཐམས་ཅད་རྡོ་རྗེ་ཌཱ་ཀིའི་ཐུགས་བདེ་སྟོང་དུ་མོས། ལན་བཞི་པས། ལྟེ་བ་ནས་ཨ་སེར་པོ་ཐོན། རང་གི་ལྟེ་བར་ཐིམ། སྣང་གྲགས་འགྱུ་གསུམ་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་དུ་ཤར་བའི་སྣང་གྲགས་དྲན་རྟོག་ཐམས་ཅད་རྡོ་རྗེ་ཌཱ་ཀིའི་སྐུ་གསུང་ཐུགས་ཀྱི་རོལ་པར་མོས་ལ་མཉམ་པར་བཞག་གོ །གསང་དབང་ལམ་ཁྱེར་ནི། འཁོར་ལོ་བཞིའི་ལྟེ་བའི་བདེ་མཆོག་ཡབ་ཡུམ་ལ་ཐིམ། ཡུམ་རྣམས་ཡོངས་སུ་གྱུར་པ་ལས་མཁའ་འགྲོ་བཞིར་གྱུར་ཏེ། སྤྱི་བོར་སངས་རྒྱས་མཁའ་འགྲོ་དཀར་མོ་གཡས་འཁོར་ལོ་དཔྲལ་བར་འཕྱར་བས་སྣང་བ་ཐམས་ཅད་ཟིལ་གྱིས་གནོན་པ། མགྲིན་པར་པདྨ་མཁའ་འགྲོ་དམར་མོ་གཡས་པདྨ་མགྲིན་པར་ འཛིན་པས་སྣང་བ་ཐམས་ཅད་དབང་དུ་སྡུད་པ། སྙིང་གར་རྡོ་རྗེ་མཁའ་འགྲོ་སྔོན་པོ་གཡས་རྡོ་རྗེ་ཐུགས་ཀར་འཛིན་པས་སྣང་བ་དག་ཅིང་ལས་སུ་རུང་བར་བྱེད་པ། ལྟེ་བར་རིན་ཆེན་མཁའ་འགྲོ་སེར་མོ་རིན་ཆེན་ལྟེ་བར་འཛིན་པས་དགོས་འདོད་ཐམས་ཅད་སྒྲུབ་པ། ཐམས་ཅད་ཀྱང་གཡོན་ཐོད་ཁྲག་འཛིན་ཅིང༌། ཕྱག་རྒྱ་ལྔས་བརྒྱན་པ་རོའི་གདན་ལ་གར་སྟབས་ཀྱིས་མེའི་དབུས་སུ་བཞུགས་པས་རྒྱས་བཏབ་པའོ༑ ༑ཤེར་དབང་ལམ་ཁྱེར་ནི། ད་ཕྱིན་ཆད་སེམས་ཅན་གྱི་དོན་མ་གཏོགས་རང་དོན་དུ་མི་ལྟ། མི་སྒོམ། མི་སྤྱོད། མི་སྒྲུབ་སྙམ་དུ་རང་དོན་དུ་རང་ལ་འཁྲིལ་བའི་གཉེན་པོ་བཤིག་ཅིང༌། བློ་ཐག་བཅད་ནས་གཞན་དོན་དུ་ཅི་འགྱུར་ལ་བསླབ་པར་བྱོས་ཤིག །ཚིག་དབང་ལམ་ཁྱེར་ནི། མཁའ་འགྲོ་རྣམས་ལས་ལ་བཀོལ་བའི་ཕྱིར་འཁོར་ལོ་བཞིའི་མཁའ་འགྲོ་མ་རྣམས་ལ་དམིགས་པ་གཏད་ནས་བླ་མ་མཁའ་འགྲོར་སྒྲུབ་པའི་ལུང་འདི་ལོངས་ཤིག །ༀ་ཨཱཿ ཧྲཱིཿ ཧ་རི་ནི་ས་ཧཱུྃ། ལན་གསུམ། བླ་མ་ཌཱ་ཀིར་གསལ་བ་རང་ལ་ཐིམ་པས་བྱིན་གྱིས་བརླབས་པར་མོས། འགྲུབ་པར་གྱུར་ཅིག །ཅེས་མེ་ཏོག་དོར། དེས་བློ་སྦྱོང་དཀའ་ཐུབ་བདག་གཏོད་གསུམ་ཏིང་ངེ་འཛིན་ལ་བརྟེན་ནས་སྟན་ཐོག་གཅིག་ཏུ་བསྐུར་བ་ཀུ་སུ་ལུའི་ཉམས་ལེན་རྫོང་པའི་དབང་གཅིག་མར་གྲགས་པ་དེ་ཚར་བ་ལགས་པས་བླ་མ་ལ་དྲིན་ཕྱག་གསུམ་འཚོལ། བཀའ་དྲིན་ཆེ་ལགས། ཞེས་བརྗོད། དེ་ནས་རྗེས་ཀྱི་ཆོ་ག་རྣམས་སྔར་གྱི་འགྲོས་ལྟར་ཤེས་པར་བྱའོ། །དམ་ཆོས་སྡུག་བསྔལ་ཞི་བྱེད་ཀྱི་དབང་ ཆོག་བཀླག་པས་གྲུབ་པ་ལས། བཀའ་བབས་ཕྱི་མའི་རྩ་བ་གླེགས་བམ་གྱི་དབང་རྒྱས་འབྲིང་བསྡུས་གསུམ་བཤད་པའི་ལེ་ཚན་ནོ། །དར་རྒྱས་འཕེལ།། ༈ །།ༀ་སྭ་སྟི། ན་མོ་གུ་རུ་ཀཱ་མ་ལ་ཤཱི་ལཱ་ཡ། འདིར་རྟེན་འབྲེལ་གྱི་སྔོན་དུ་རྟེན་འབྲེལ་གྱི་བདག་པོ་གཏོད་པ་ཞེས་བྱ་བ་དམ་པ་རིན་པོ་ཆེ་ཕྱི་ནང་གསང་གསུམ་གྱི་བླ་སྒྲུབ་ཀྱི་དབང་བསྐུར་བ་ནི། སྟེགས་བུའི་སྟེང་དུ་དཀྱིལ་འཁོར་པདྨ་འདབ་བརྒྱད་ཀྱི་ཕྱིར་རྡོ་ར་མེ་འོད་དང་བཅས་པས་བསྐོར་བའི་ལྟེ་བར་ཀྲཥྞ་སཱ་རའི་པགས་པ་མགོ་གཡས་སུ་བསྟན་པའི་སྟེང་དུ་དམ་པའི་སྐུ་བྲིས་འབུར་གང་རིགས་བཞུགས་པའི་མདུན་དུ་ཧཱུྃ་ཡིག་བྲི། མཆོད་གཏོར་ཅི་འབྱོར་པ་བཤམས་ལ། བདག་བསྐྱེད་ནི། སྐྱབས་སེམས་ཚད་མེད་བཞི་སྒོམ་པ་སྔོན་དུ་འགྲོ་བས། སྭ་བྷཱ་ཝས་ཆོས་ཐམས་ཅད་རང་བཞིན་མེད་པར་སྦྱངས། དེའི་ངང་ལས་གཟུང་འཛིན་དག་པའི་སེམས་ཉིད་དེ། ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊཿ ཅེས་པའི་སྔགས་སྒྲས་སད་པ་ལས། སྐད་ཅིག་གིས་པད་ཉི་ཟླ་བའི་སྟེང་དུ་བཅོམ་ལྡན་འདས་འཁོར་ལོ་བདེ་མཆོག་སྔོན་པོ་ཞལ་གཅིག་ཕྱག་གཉིས་པ་རྡོར་དྲིལ་འཛིན་པས་ཡུམ་ལ་འཁྱུད་པ། རལ་པའི་ཐོར་ཚུགས་ཀྱི་རྩེ་མོར་ནོར་བུ་དང་ངོས་ལ་སྣ་ཚོགས་རྡོ་རྗེ། གཡོན་ངོས་སུ་ཟླ་ཕྱེད། མི་བསྐྱོད་པས་དབུ་བརྒྱན་པ། རུས་པའི་འཁོར་ལོ་ལ་སོགས་པའི་རྒྱན་དྲུག །ཐོད་པ་སྐམ་པོའི་དབུ་རྒྱན། ཁྲག་འཛག་པའི་མགོ་བའི་དོ་ཤལ། དཔའ་བའི་དར་དཔྱང་། སྟག་ཤམ་གྲོལ་བ། ཞབས་གཉིས་གཡས་བརྐྱང་བའི་སྟབས་ཀྱིས་དུས་མཚན་དང་འཇིགས་བྱེད་མནན་པ། གར་གྱི་ཉམས་དགུས་སྒེག་པ། ཡུམ་ཕག་མོ་དམར་མོ་ གཡས་རྡོ་རྗེ་དང་བཅས་པའི་སྡིགས་མཛུབ་དང༌། གཡོན་ཐོད་ཁྲག་བསྣམས་པས་ཡབ་ལ་འཁྱུད་པ། གཅེར་བུ་སྐྲ་གྲོལ་ཞིང་ཐོད་སྐམ་གྱི་དབུ་རྒྱན་དང་དོ་ཤལ་ཕྱག་རྒྱ་ལྔས་བརྒྱན་པ། གཉིས་ཀའང་གཉུག་སེམས་ལྷན་སྐྱེས་བདེ་སྟོང་ཟུང་འཇུག་གི་སྣང་བརྙན་མཁའ་ཁྱབ་ཀྱི་སངས་རྒྱས་ཐམས་ཅད་དང་དབྱེར་མེད་པའི་བདག་ཉིད་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཡབ་ཀྱི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་སྔགས་ཕྲེང་གིས་བསྐོར་བ་ལས་འོད་ཟེར་དཀར་པོ་འཕྲོས། སྣོད་བཅུད་ཐམས་ཅད་དག་པའི་འཁོར་ལོ་སྦྱངས། སླར་འདུས་ནས་རང་ལ་ཐིམ་པར་མོས་ལ། ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊཿ ཅེས་བཟླས་མཐར། མཆོད་གཏོར་རྣམས། སྟོང་པའི་ངང་ལས་ༀ་ལས་སྣོད་ཕུན་སུམ་ཚོགས་པར། ཨཱ་ལས་མཆོད་པའི་ཡོ་བྱད་རང་བཞིན་བདེ་སྟོང༌། རྣམ་པ་མཆོད་རྫས། བྱེད་ལས་ཟག་མེད་ཀྱི་བདེ་བས་ཚིམ་པར་བྱེད་པ། ཧཱུྃ་གིས་མཁའ་ཁྱབ་ཏུ་སྤེལ་བར་གྱུར། ༀ་ཨཱཿ ཧཱུྃ་ལན་གསུམ། ཐུགས་ཀ་ནས་སྤྲོས་པའི་མཁའ་འགྲོ་མ་རྣམས་ཀྱིས་རང་ལ་མཆོད་པར་བསམས་ལ། ༀ་བཛྲ་ཨ?ཾ་པྲ་ཏཱིཙྩ་སྭཱ་ཧཱ་ནས་ཤབྡའི་བར་གྱིས་ཕྱི་མཆོད། རྩ་སྔགས་ལ་འབྲུ་གསུམ་བཏགས་པས་ནང་མཆོད། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་གསང་མཆོད་ཕུལ་ནས། དཔལ་ལྡན་བདེ་མཆོག་འཁོར་ལོ་ནི། །མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབས་ལ་ཕྱག་འཚལ་ལོ། ། ཞེས་པས་བསྟོད། སྣོད་བཅུད་འོད་དུ་ཞུ་ནས་ཐུགས་ཀའི་ཧཱུྃ་གི་བར་རིམ་གྱིས་ཐིམ། དེ་ཡང་གྱེན་རྫོགས་འོད་གསལ་གྱི་དབྱིངས་སུ་ཐིམ་པར་གྱུར། ཅུང་ཟད་མཉམ་པར་བཞག །འོད་གསལ་གྱི་ངང་ལས་སླར་ཡང་ཧེ་རུ་ཀའི་སྐུར་གྱུར། མདུན་བསྐྱེད་ནི། སྭ་བྷཱ་ཝས་མདུན་གྱི་དཀྱིལ་འཁོར་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་བསྲུང་བའི་འཁོར་ལོས་མི་ཕྱེད་པར་བཅིངས་པའི་ནང་དུ་སྣ་ཚོགས་པདྨ་འདབ་མ་བརྒྱད་པ་ཡོངས་སུ་རྒྱས་པའི་དབུས་སུ་མི་འཇིགས་པ་སེང་གེའི་ཁྲི། མ་ཆགས་པ་པདྨའི་གདན། ཐུགས་རྗེ་ཉི་མའི་གདན། བྱང་སེམས་ཀྲཥྞ་ས་རའི་པགས་པའི་སྟེང་དུ་རྗེ་བཙུན་དམ་པ་རྒྱ་གར་བ་དྲང་སྲོང་ཆེན་པོ་དུ་བའི་མདོག་ཅན༑ མིག་དམར་སྐྲའི་ལྭ་བ་ཅན་ཕྱག་གཡས་སྐྱབས་སྦྱིན་དང་གཡོན་རྟེན་འབྲེལ་གྱི་པར་བུ་ཐུགས་ཀར་འཛིན་པ། སྐུ་སྟོད་གཅེར་བུར་ཕྱུང་ཞིང་སྐུ་སྨད་ལ་བལ་ཐུལ་དཀར་པོ་གསོལ་བ། རུས་པའི་ཕྱག་རྒྱ་དྲུག་གིས་བརྒྱན་ཅིང༌། འཁོར་འདས་ཟིལ་གྱིས་གནོན་པའི་ལྟ་སྟངས་མཛད་པ། གང་འདུལ་སྐུ་གསུམ་གྱི་རོལ་པ་མ་འགགས་པར་སྟོན་པའི་སྒྱུ་མ་ལྟ་བུའི་སྐུ་ཅན་དུ་བཞུགས་པ། ཕྱི་རོལ་གྱི་འདབ་མ་བརྒྱད་ལ་མདུན་ནས་གཡས་སྐོར་དུ་རྩ་བརྒྱུད་ཀྱི་བླ་མ། ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དཀོན་མཆོག །ཆོས་དཀོན་མཆོག་ཡུམ་ཆེན་མོའི་རྣམ་པ་ཅན། དགེ་འདུན་དཀོན་མཆོག་ས་བཅུའི་བྱང་སེམས། གནས་ གསུམ་གྱི་མཁའ་འགྲོ། ཞིང་སྐྱོང༌། དམ་ཅན་སྲུང་མ་རྣམས་སྤྲིན་ཕུང་གཏིབས་པ་ལྟར་བཞུགས་པར་གྱུར། དེ་ལྟར་གསལ་བའི་གཙོ་བའི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོ། དེ་རྣམས་ལས་འོད་ཟེར་འཕྲོས་པས་དུས་གསུམ་གྱི་སངས་རྒྱས་བྱང་སེམས་ཡི་དམ་མཁའ་འགྲོ་ཆོས་སྐྱོང་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་ཟེར་དཀར་དམར་མཐིང་གསུམ་གྱི་རྣམ་པར་བསྡུས། ཡི་གེ་གསུམ་ལ་ཐིམ་པས་སྐྱབས་གནས་ཀུན་འདུས་ཀྱི་ངོ་བོར་མོས་ལ། ཚོགས་བསགས་པ་ནི། ས་བཅུའི་དབང་ཕྱུག་མི་ཕམ་མགོན། །དམ་པ་སངས་རྒྱས་འགྲོ་བའི་རྗེ། །བཀའ་བབས་གསུམ་གྱི་ཆོས་འཁོར་བསྐོར། །རྣལ་འབྱོར་དབང་ཕྱུག་ལ་ཕྱག་འཚལ། །རྩ་བརྒྱུད་བླ་མ་ཡི་དམ་ལྷ། །སངས་རྒྱས་ཆོས་དང་འཕགས་པའི་ཚོགས། །གནས་གསུམ་མཁའ་འགྲོ་ཞིང་སྐྱོང་དང༌། །དམ་ཅན་བཅས་ལ་གུས་ཕྱག་འཚལ། །མཆོད་པ་བླ་ན་མེད་པས་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང༌། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། ། བདག་གིས་དགེ་བ་ཅི་བསགས་པ། །སེམས་ཅན་ཀུན་ལ་བསྔོ་བར་བགྱི། །ཞེས་ལན་གསུམ་ལ་སོགས་པ་ཅི་ནུས་བྱའོ། །དེ་ནས་བྱིན་རླབས་དབབ་པའི་བཟླས་པ་བྱ་སྟེ། དམ་པའི་ཐུགས་ཀ་ནས་འོད་ཟེར་དཀར་པོ་བྱུང༌། རང་གི་སྙིང་གར་ ཐིམ་པས་རྗེ་བཙུན་གྱི་ཐུགས་ལ་མངའ་བའི་ཏིང་ངེ་འཛིན་དང་བྱང་ཆུབ་ཀྱི་སེམས་དང༌། ཉམས་དང་རྟོགས་པ་ཁྱད་པར་ཅན་ཐམས་ཅད་བདག་རྒྱུད་ལ་སྐྱེས་པར་མོས་ལ། ༀ་གུ་རུ་ཀ་མ་ལ་ཤཱི་ལ། ན་མ་བདག་ལ་ཛྙཱ་ན་ཨཱ་བེ་ཤ་ཡ་གུ་རུ་ཧྲཱིཿ བཾ་སྭཱ་ཧཱ། ཞེས་ངར་དང་བཅས་པས་ཅི་ནུས་བཟླའོ། །དེ་རྗེས་སློབ་མ་བྱིན་གྱིས་བརླབས་པའི་ཕྱིར་སྐུ་གསུམ་གྱི་བཟླས་པའང་ཅུང་ཟད་རེ་བྱ་སྟེ། མདུན་གྱི་བླ་མ་སྤྲུལ་སྐུའི་བདག་ཉིད་དུ་བཞུགས་པའི་ཐུགས་ཀའི་འོད་ཀྱིས་རེག་པས་ལུས་ཀྱི་དྲི་མ་དག་ནས་གང་འདུལ་གྱི་ཕྲིན་ལས་འགྲུབ་པར་མོས་ལ། ༀ་ཨཱཿ ཧྲཱིཿ གུ་རུ་ནིརྨ་ཀཱ་ཡ་སིདྡྷི་ཧཱུྃ། ཞེས་བཟླས། ཡང་བླ་མ་ལོངས་སྐུའི་བདག་ཉིད་དུ་བཞུགས་པའི་སྐུའི་འོད་ཀྱིས་ངག་སྒྲིབ་དག་ནས་སྣང་བ་ཐམས་ཅད་དག་པ་རབ་འབྱམས་སུ་འཆར་བར་མོས་ལ། ༀ་ཨཱཿ ཧྲཱིཿ གུ་རུ་སམྦྷོ་ཀཱ་ཡ་སིདྡྷི་ཧཱུྃ། ཞེས་བཟླ། ཡང་བླ་མ་ཆོས་སྐུའི་བདག་ཉིད་དུ་བཞུགས་པའི་སྐུའི་འོད་ཀྱིས་ཡིད་སྒྲིབ་དག་ནས་རིག་པ་སྤྲོས་བྲལ་དུ་འཆར་བར་མོས་ལ། ༀ་ཨཱཿ ཧཱུྃ་གུ་རུ་དྷརྨ་ཀཱ་ཡ་སིདྡྷི་ཧཱུྃ། ཞེས་བཟླའོ། །དེ་ནས་བྱིན་རླབས་ཞུ་བ་ནི། དམ་པ་རིན་པོ་ཆེས་བདག་གི་ལུས་གཟི་བརྗིད་དང་ལྡན་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། དམ་པའི་སྨིན་མཚམས་ཀྱི་མཛོད་སྤུ་ནས་འོད་ཟེར་དཀར་པོ་འཕྲོས་རང་གི་དཔྲལ་བར་ཐིམ་པས་ལུས་ཀྱི་སྡིག་སྒྲིབ་དག་ནས་ལུས་དམ་པའི་སྐུར་གྱུར། ཡང་དམ་པ་རིན་པོ་ཆེས་བདག་གི་ངག་ནུས་པ་དང་ལྡན་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། དམ་པའི་མགྲིན་པ་ནས་འོད་ཟེར་དམར་པོ་འཕྲོས་རང་གི་མགྲིན་པར་ཐིམ་པས་ངག་གི་སྡིག་སྒྲིབ་དག་ནས་ངག་ནུས་པ་དང་ལྡན་པར་གྱུར། ཡང་དམ་པ་རིན་པོ་ཆེས་བདག་གི་སེམས་རྟོགས་པ་དང་ལྡན་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། དམ་པའི་ཐུགས་ཀ་ནས་འོད་ཟེར་སྔོན་པོ་འཕྲོས་རང་གི་སྙིང་གར་ཐིམ་པས་རང་རྒྱུད་ཀྱི་སྡིག་སྒྲིབ་ཐམས་ཅད་དག་ནས་ཉམས་རྟོགས་ཁྱད་པར་ཅན་སྐྱེས་པར་གྱུར། མདུན་གྱི་དམ་པའི་སྐུ་འོད་དུ་ཞུ་བ་རང་གི་སྙིང་གར་ཐིམ་པས། རང་ལུས་ཀྱང་འོད་དུ་ཞུ་སྟེ་ཨ་དཀར་པོ་གཅིག་ཏུ་གྱུར་པ་ལ་སེམས་བཟུང༌། དེའང་ནམ་མཁའ་ལ་སྤྲིན་དེངས་པ་ལྟར་འོད་གསལ་གྱི་དབྱིངས་སུ་ཐིམ་པར་གྱུར། དེ་ཡི་ངང་ལས་བདག་དང་མདུན་གྱི་དཀྱིལ་འཁོར་ཐམས་ཅད་སྔར་བཞིན་བཀྲ་ལམ་གྱིས་གསལ་བར་གྱུར། དེ་ནས་སློབ་མ་ཁྲུས་དང་ཕྱག་བྱས་གྲལ་དུ་འཁོད་པ་ལ་སེམས་བསྐྱེད་ཆོས་བཤད་ཅི་རིགས་སྔོན་དུ་བཏང་ནས། འདིར་ཞི་བྱེད་བཀའ་བབས་ཕྱི་མའི་ནང་ཚན་རྟེན་འབྲེལ་གྱི་སྔོན་དུ་རྟེན་འབྲེལ་གྱི་བདག་པོ་གཏོད་པ་ཞེས་བྱ་བ་དམ་པ་རིན་པོ་ཆེ་སྐུ་གསུམ་གྱི་སྒྲུབ་པ་ཕྱི་ནང་གསང་གསུམ་གྱི་བླ་སྒྲུབ་ཟབ་མོའི་བྱིན་རླབས་བསྐུར་བ་ལ་སློབ་དཔོན་གྱིས་བགྱི་འོས་རྣམས་གོང་དུ་སོང༌། ད་སློབ་མའི་བྱ་བ་ཐོག་མར་མཎྜལ་ཕུལ་མཛོད། དེ་ནས་རྒྱུད་དག་པར་བྱ་བའི་ཕྱིར་སྐྱབས་སེམས་མཆོད་བསྔོ་སྨོན་ལམ་དང་བཅས་པ་ འདིའི་རྗེས་ཟློས། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དེ་ནས་དངོས་གཞིའི་སླད་དུ་ཐལ་མོ་སྦྱར་ཏེ་བླ་མ་དང་དམ་པ་དབྱེར་མེད་པ་ལ་གསོལ་བ་གདབ་པ་འདིའི་རྗེས་ཟློས། བླ་མ་རིན་པོ་ཆེས། བདག་དང་སེམས་ཅན་ཐམས་ཅད་ཀྱི་དོན་དུ་དམ་པ་རིན་པོ་ཆེ་ཕྱི་ནང་གསང་གསུམ་གྱི་ངོ་བོ་སྤྲུལ་སྐུ་ལོངས་སྐུ་ཆོས་སྐུར་སྨིན་པར་མཛད་དུ་གསོལ། ཞེས་ལན་གསུམ། དེ་ནས་སློབ་མ་བདེ་མཆོག་ལྷན་སྐྱེས་ཀྱི་སྐུར་གསལ་བའི་སྤྱི་བོར་རྗེ་བཙུན་དམ་པ་རྒྱ་གར་ལ་རྩ་བརྒྱུད་ཀྱི་བླ་མས་བསྐོར་བ། མགྲིན་པར་དཀོན་མཆོག་གསུམ། སྙིང་གར་བདེ་མཆོག་ལ་ཡི་དམ་ཐམས་ཅད་ཀྱིས་བསྐོར་བ། ལྟེ་བར་སྐུ་གསུང་ཐུགས་ཀྱི་མཁའ་འགྲོ་གསུམ་ལ་མཁའ་འགྲོའི་ཚོགས་ཀྱིས་བསྐོར་བར་གྱུར། དེ་ཐམས་ཅད་ཀྱི་ཐུགས་ཀའི་ཧཱུྃ་ལས་འོད་ཟེར་འཕྲོས། རང་བཞིན་གྱི་གནས་ནས་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་དཔའ་མོ་ཐམས་ཅད་དང༌། ཁྱད་པར་དམ་པ་རིན་པོ་ཆེ་སྤྲུལ་པའི་སྐུ་སྨུག་ནག་གཟི་བྱིན་ཅན་ཕྱག་གཡས་རྡོ་རྗེ་རིན་ཆེན་སོགས་རིགས་ལྔའི་རྒྱ་དང་གཡོན་དྲིལ་བུ་འཁྲོལ་བ་དཔག་ཏུ་མེད་པ་སྤྱན་དྲངས་སོ་སོ་རང་རང་ལ་སིབ་སིབ་ཐིམ་པས་བྱིན་རླབས་ཞུགས་པར་མོས་ལ། ༀ་ཨཱཿ ཧྲཱིཿ གུ་རུ་ནིརྨ་ཀཱ་ཡ་སིདྡྷི་ཧཱུྃ་ཛྙཱ་ན་ཨ་བེ་ཤ་ཡ་ཧྲཱིཿ བཾ་སྭཱ་ཧཱ། ཞེས་སྤོས་རོལ་བྱ། དེ་རྗེས་སུ་སེམས་མ་བཅོས་པའི་ ངང་ལ་དར་གཅིག་མཉམ་པར་བཞག་གོ །ཡང་ཐུགས་ཀའི་ཧཱུྃ་ལས་འོད་ཟེར་འཕྲོས། རྩ་བརྒྱུད་ཀྱི་བླ་མ་སོགས་དང༌། ཁྱད་པར་དམ་པ་རིན་པོ་ཆེ་ལོངས་སྤྱོད་རྫོགས་པའི་སྐུ་རིན་པོ་ཆེ་དང་རུས་པའི་རྒྱན་ཅན་རྡོར་དྲིལ་ཐུགས་ཀར་བསྣོལ་ཞིང་སྐྱིལ་ཀྲུང་གིས་བཞུགས་པ་སྤྱན་ནམ་མཁའ་ལ་གཟིགས་པ་དཔག་ཏུ་མེད་པ་སྤྱན་དྲངས་ཏེ་ཐིམ་པས་བྱིན་རླབས་ཞུགས་པར་མོས། ༀ་ཨཱཿ ཧྲཱིཿ གུ་རུ་སམྦྷོ་ཀཱ་ཡ་སིདྷཱི་ཧཱུྃ་ཛྙཱ་ན་ཨ་བེ་ཤ་ཡ་ཧྲཱིཿ བཾ་སྭཱ་ཧཱཿ སྤོས་རོལ་བྱ། དེའི་ངང་མདངས་བསྐྱང་ལ་མཉམ་པར་ཞོག །ཡང་ཐུགས་ཀའི་ཧཱུྃ་ལས་འོད་ཟེར་འཕྲོས། རྩ་བརྒྱུད་ཀྱི་བླ་མ་སོགས་དང་ཁྱད་པར་དམ་པ་རིན་པོ་ཆེ་ཆོས་ཀྱི་སྐུ་ནམ་མཁའི་ཆོས་གོས་ཅན་དཔག་ཏུ་མེད་པ་སྤྱན་དྲངས་ཏེ་ཐིམ་པས་བྱིན་རླབས་ཞུགས་པར་མོས། ཧཱུྃ་ཧཱུྃ། ཧྲིང་ཧྲིང༌། ཕཊ་ཕཊ། ༀ་ཨཱཿ ཧྲཱིཿ གུ་རུ་དྷརྨཱ་ཀ་ཡ་སིདྡྷི་ཧཱུྃ་ཛྙཱ་ན་ཨ་བེ་ཤ་ཡ་ཧྲཱིཿ བཾ་སྭཱ་ཧཱ། ཞེས་དང༌སྤོས་རོལ་བྱ། སེམས་ཉིད་རྩོལ་བྲལ་གྱི་ངང་ལ་མཉམ་པར་བཞག །དེ་ནས་རྩ་བ་གསུམ་གཅུད་ལ་བོར་ཏེ་དབང་བྱིན་པ་ལས། དང་པོ་བླ་མ་གཅུད་ལ་བོར་ཏེ་གསོལ་བ་གདབ་པ་འདིའི་རྗེས། ཀུན་རྫོབ་ཏུ་བླ་མ་དམ་པ་རྣམས་ཀྱི་བཀའ་བདེན་ནམ་མི་བདེན། ཀུན་རྫོབ་ཏུ་བླ་མ་རྣམས་ཀྱི་བཀའ་བདེན་ན། བདག་དམ་པ་རིན་པོ་ཆེ་སྤྲུལ་སྐུ་ལོངས་སྐུ་ཆོས་སྐུ་སྒྱུ་མ་ལྟ་བུར་ད་ལྟ་ཉིད་དུ་འགྲུབ་པར་མཛད་དུ་གསོལ། ཞེས་ལན་གསུམ། ཁྱེད་རང་གི་སྤྱི་བའི་བླ་མ་དང་མདུན་བསྐྱེད་ཀྱི་བླ་མ་རྣམས་ཀྱི་ཐུགས་ཀའི་ཧཱུྃ་ལས་འོད་ཟེར་འཕྲོས་པས། ཕྱོགས་བཅུ་དུས་གསུམ་གྱི་བླ་མ་ཐམས་ཅད་རྣམ་པ་དམ་པ་རིན་པོ་ཆེ་ཆོས་ལོངས་སྤྲུལ་སྐུའི་རྣམ་པར་སྤྱན་དྲངས་པ་དང༌། མདུན་བསྐྱེད་ཀྱི་བླ་མ་རྣམས་ལས་ཀྱང་དེ་འདྲ་བ་དཔག་ཏུ་མེད་པ་བྱོན་ནས་རང་ལ་སིབ་ཀྱིས་ཐིམ་པས་བླ་མའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཐོབ་པར་མོས་ལ། ༀ་གུ་རུ་ཀཱ་མ་ལ་ཤཱི་ལ་ན་མོ་བཛྲ་པི་ ཥྱཾ་ཛྙཱ་ཨ་བེ་ཤ་ཡ་ཧྲཱིཿ བཾ་ སྭཱ་ཧཱ། ཞེས་དང་སྤོས་རོལ་བྱ། ཡང་ཡི་དམ་གཅུད་ལ་བོར་ཏེ་གསོལ་བ་གདབ་པ་འདིའི། ཀུན་རྫོབ་ཏུ་སྔགས་དང་ཕྱག་རྒྱ་དང་ཏིང་ངེ་འཛིན་དང་ཡི་དམ་གྱི་ལྷ་ཚོགས་རྣམས་ཀྱི་བཀའ་བདེན་ནམ་མི་བདེན། ཀུན་རྫོབ་ཏུ་སྔགས་དང་ཕྱག་རྒྱ་དང་ཏིང་ངེ་འཛིན་དང་ཡི་དམ་ལྷ་ཚོགས་རྣམས་ཀྱི་བཀའ་བདེན་ན་བདག་དམ་པ་རིན་པོ་ཆེ་སྤྲུལ་སྐུ་ལོངས་སྐུ་ཆོས་སྐུ་སྒྱུ་མ་ལྟ་བུར་ད་ལྟ་ཉིད་དུ་གྲུབ་པར་མཛད་དུ་གསོལ། ལན་གསུམ། ཁྱེད་རང་གི་མགྲིན་པ་དང་སྙིང་གའི་ལྷ་ཚོགས་རྣམས་དང་མདུན་བསྐྱེད་ཀྱི་ཡི་དམ་ལྷ་ཚོགས་སངས་རྒྱས་བྱང་སེམས་རྣམས་ཀྱི་ཐུགས་ཀའི་ཧཱུྃ་ལས་འོད་ཟེར་འཕྲོས། ཕྱོགས་དུས་ཀྱི་ཡི་དམ་སངས་རྒྱས་བྱང་སེམས་ཐམས་ཅད་དམ་པ་རིན་པོ་ཆེ་སྐུ་གསུམ་གྱི་རྣམ་པར་སྤྱན་དྲངས་པ་དང༌། མདུན་བསྐྱེད་ཀྱི་ཡི་དམ་སངས་རྒྱས་བྱང་སེམས་རྣམས་ལས་དེ་འདྲ་བ་དཔག་ཏུ་མེད་པ་བྱོན་ནས་རང་ལ་ཐིམ་པས་མཆོག་དང་ཐུན་མོང་གི་ དངོས་གྲུབ་ཐམས་ཅད་ཐོབ་པར་མོས་ལ། ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊ། ༀ་བཱ་གཱི་ཤྭ་རི་མཱུྃ། ༀ་མཉྫུ་གྷོ་ཥ་ཧཱུྃ། ༀ་བྷ་རི་སིདྡྷི་ཧཱུྃ། ༀ་གུ་རུ་ཀ་མ་ལ་ཤཱི་ལ། ན་མོ་བཛྲ་པི་ཥྱཾ་ཛྙཱ་ན་ཨཱ་བེ་ཤ་ཡ་གུ་རུ་ཧྲཱིཿ སྭཱ་ཧཱ། ཞེས་དང་སྤོས་རོལ་བྱ། ཡང་མཁའ་འགྲོ་ཆོས་སྐྱོང་ཐམས་ཅད་གཅུད་ལ་བོར་ཏེ་གསོལ་བ་བཏབ་པ་འདིའི། ཀུན་རྫོབ་ཏུ་དམ་པ་ཆོས་སྐྱོང་བའི་སྲུང་མ་མཁའ་འགྲོ་ཞིང་སྐྱོང་རྣམས་ཀྱི་བཀའ་བདེན་ནམ་མི་བདེན། ཀུན་རྫོབ་ཏུ་དམ་པ་ཆོས་སྐྱོང་བའི་སྲུང་མ་མཁའ་འགྲོ་ཞིང་སྐྱོང་རྣམས་ཀྱི་བཀའ་བདེན་ན། བདག་དམ་པ་རིན་པོ་ཆེ་སྤྲུལ་སྐུ་ལོངས་སྐུ་ཆོས་སྐུ་སྒྱུ་མ་ལྟ་བུར་ད་ལྟ་ཉིད་དུ་གྲུབ་པར་མཛད་དུ་གསོལ། ལན་གསུམ། ཁྱེད་རང་གི་ལྟེ་བ་དང་མདུན་བསྐྱེད་ཀྱི་མཁའ་འགྲོ་ཞིང་སྐྱོང་དམ་ཅན་རྣམས་ཀྱི་ཐུགས་ཀའི་ཧཱུྃ་ལས་འོད་ཟེར་འཕྲོས། ཕྱོགས་དུས་ཀྱི་མཁའ་འགྲོ་ཞིང་སྐྱོང་སྲུང་མ་ཐུགས་དམ་ཅན་ཐམས་ཅད་དམ་པ་རིན་པོ་ཆེ་སྐུ་གསུམ་གྱི་རྣམ་པར་སྤྱན་དྲངས་པ་དང༌། མདུན་བསྐྱེད་ཀྱི་མཁའ་འགྲོ་ཞིང་སྐྱོང་དམ་ཅན་རྣམས་ལས་ཀྱང་དེ་འདྲ་དཔག་ཏུ་མེད་པ་བྱོན་ནས་རང་ལ་ཐིམ་པས་ཕྲིན་ལས་ཐོགས་པ་མེད་པའི་མཐུ་དང་ནུས་པ་ཐོབ་པར་བསམས་ལ། ༀ་སརྦ་བུདྡྷ་ཌཱ་ཀི་ནཱི་ཧ་རི་ནི་ས་མ་མ་ཛྙཱ་ན་ཨཱ་བེ་ཤ་ཡ་ཧྲཱིཿ བཾ་སྭཱ་ཧཱ། ༀ་བཛྲ་ཌཱ་ཀི་ནཱི་ཛྙཱ་ན་ཨཱ་བེ་ཤ་ཡ་ཧྲཱིཿ བཾ་སྭཱ་ཧཱ། ༀ་རཏྣ་ཌཱ་ཀི་ནཱི་ཛྙཱ་ན་ཨཱ་བེ་ཤ་ཡ་ཧྲཱིཿ བཾ་སྭཱ་ཧཱ། ༀ་པདྨ་ཌཱ་ཀི་ནཱི་ཛྙཱ་ན་ཨཱ་བེ་ཤ་ཡ་ཧྲཱིཿ བཾ་སྭཱ་ཧཱ། ༀ་ཀརྨ་ཌཱ་ཀི་ནཱི་ ཛྙཱ་ན་ཨཱ་བེ་ཤ་ཡ་ཧྲཱིཿ བཾ་སྭཱ་ཧཱ། ཞེས་དང་སྤོས་རོལ་བྱ། དེ་ནས་བཟླས་ལུང་ནི། དཔོན་སློབ་གཉིས་ཀ་དམ་པ་རིན་པོ་ཆེར་གསལ་བའི་སློབ་དཔོན་གྱི་ཐུགས་ཀའི་ཧཱུྃ་ལས་སྔགས་ཕྲེང་ཞལ་ནས་ཐོན། སློབ་མའི་ཞལ་དུ་ཞུགས་ཏེ་སྙིང་གའི་ཧཱུྃ་ལ་ཐིམ་པར་བསམས་ལ། ༀ་གུ་རུ་ཀ་མ་ལ་ཤཱི་ལ་ན་མ་བདག་ལ་ཛྙཱ་ན་ཨཱ་བེ་ཤ་ཡ་གུ་རུ་ཧྲཱིཿ བཾ་སྭཱ་ཧཱ། ཞེས་ལན་གསུམ། ཡང་གཉིས་ཀ་དམ་པ་སྐུ་གསུང་ཐུགས་ཀྱི་མངོན་རྟོགས་སོ་སོར་སྒྱུར་ལ། ༀ་ ཨཱཿ ཧྲཱིཿ གུ་རུ་ནིརྨ་ཀཱ་ཡ་སིདྡྷི་ཧཱུྃ། ཞེས་ནིརྨའི་ཚབ་ཏུ་སམྦྷོ་དང་དྷརྨ་བཅུག་པ་རེ་རེ། ཡང་ལན་གསུམ་རེ་བཟླས་མཐར། དམ་པ་ཆོས་ལོངས་སྤྲུལ་གསུམ་གྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་སྐལ་ལྡན་སློབ་མ་འདི་རྣམས་ཀྱི་རྒྱུད་ལ་འཇུག་པར་གྱུར་ཅིག །ཅེས་མེ་ཏོག་གཏོར། དེས་དམ་པ་ཕྱི་ནང་གསང་གསུམ་གྱི་བྱིན་རླབས་གྲུབ། དམ་ཚིག་བཟུང་བ་གཏོང་རག་གི་མཎྜལ། དགེ་བ་བསྔོ་བ་རྣམས་དང༌། མདུན་བསྐྱེད་ལ་མཆོད་བསྟོད། བཟོད་གསོལ། གཤེགས་བསྡུ། བསྔོ་ཤིས་ཀྱིས་མཐའ་ བརྒྱན་ནོ།། ༈ །།ༀ་སྭ་སྟི། ན་མོ་གུ་རུ་མཎྜལ་པཱ་ད་བྷྱཱཿ ཞི་བྱེད་བརྒྱུད་པ་ཕྱི་མའི་ཡི་དམ་གྱི་སྐོར་ལ། དང་པོ་ཐུགས་དམ་བདེ་གཤེགས་བཅུ་གཉིས་ཀྱི་དཀྱིལ་འཁོར་དུ་དབང་བསྐུར་བའི་ཆོ་ག་ལ་གསུམ་ལས། སྦྱོར་བ་ལ་གཉིས་ཀྱི། དང་པོ་ས་ཆོག་ནི། བསྙེན་པ་ཐེམས་པའི་སློབ་དཔོན་གྱིས་ཡིད་དང་མཐུན་པའི་གནས་སུ་བདག་བསྐྱེད་ཡོངས་རྫོགས་སམ་གཙོ་བོ་བསྐྱེད་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷར་ལྡང་བའི་བར་བྱས་ལ། ས་བསླང་བ་ནི། ལྷའི་ང་རྒྱལ་གྱིས་གཞི་བདག་དང་ཞིང་སྐྱོང་གི་མཆོད་གཏོར། རྃ་ཡྃ་ཁྃ་གིས་བསངས་ སྦྱངས། འབྲུ་གསུམ་གྱིས་བརླབ། རང་གི་སྙིང་གའི་འོད་དང་ༀ་བཛྲ་ཨཱ་ཀརྵ་ཡ་ཛཿ ས་མགྲོན་བཀུག །ཨརྒྷཾ་སོགས་ཀྱིས་མཆོད། ཨ་ཀཱ་རོས་གཏོར་མ་བྱིན་ནས། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བྱ། །དཀྱིལ་འཁོར་དོན་དུ་སྩལ་དུ་གསོལ། །ཞེས་མཆོད་གཏོར་གཤེགས། གཞི་དེར་དྲིའི་མཎྜལ་ཚོམ་བུ་ཅན་མཆོད་གཏོར་དང་བཅས་བཤམས་ལ་བྱིན་གྱིས་བརླབས། ས་གནོན་གྱི་རྒྱས་སོར་མོ་དབུས་མ་གསུམ་ས་ལ་རེག་པས། སའི་ལྷ་མོ་སེར་མོ་བུམ་པ་འཛིན་པ་དར་དང་རིན་པོ་ཆེའི་རྒྱན་ཅན་ལྟེ་བ་ཡན་ཆད་སའི་སྟེང་དུ་ཐོན་ནས་བཞུགས་པར་གྱུར་པ་ལས། ༀ་པྲི་ཐི་དེ་ཝཱི་བྷྱཿ ཞེས་པའི་མཐར་ཨརྒྷཾ་ནས་ཤབྡའི་བར་དང༌། ཨ་ཀཱ་རོ་བཏགས་པས་གཏོར་མ་ཕུལ་ནས། སྐྱོབ་པ་ཤཱཀྱ་སེང་གེ་ཡིས། །མཆོད་ཅིང་རིན་ཆེན་སྣ་ཚོགས་འཛིན། །ལྷ་མོ་ཁྱོད་ནི་དཔང་དུ་གྱུར། །ས་འདིར་དཀྱིལ་འཁོར་བྲི་བར་བྱ། །ཞེས་བརྗོད་པས་གནང་བ་བྱིན་ནས་དེ་ཉིད་དུ་ཐིམ་པར་བསམ། ས་སྦྱོང་བ་ནི། ལག་མཐིལ་སར་བཞག་ལ། ༀ་བྷཱུ་ཁཾ། ས་གཞི་ནམ་མཁའི་རང་བཞིན་དུ་གྱུར། ༀ་ལྃ་ཧཱུྃ། ས་གཞི་རྡོ་རྗེའི་རང་བཞིན་དུ་གྱུར། ༀ་ཧ་ཧ་ཧ་ན་ཀྲོ་དྷ་ཧཱུྃ་ཕཊ། ས་གཞི་བྱིན་གྱིས་བརླབས་པར་གྱུར། ས་བཟུང་བ་ནི། ས་འདིར་དཀྱིལ་འཁོར་བྲིའོ་སྙམ་པའི་བློས། རང་ཉིད་སྐད་ཅིག་གིས་ཁྲོ་བོ་བགེགས་མཐར་བྱེད་ལྗང་གུ་རྒྱ་གྲམ་དང་དྲིལ་བུ་འཛིན་པ་ཆེར་ཁྲོས་པའི་ཉམས་ཅན་སྤྲུལ་པའི་ཁྲོ་ཚོགས་དཔག་མེད་སྤྲོ་བའི་སྐུར་གྱུར། ཧཱུྃ། དཀྱིལ་འཁོར་ ཆེན་པའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ངས་ནི་གནས་འདིར་དཀྱིལ་འཁོར་ཆེན་པོ་བྲི། །ཁྱེད་རྣམས་འདི་ནས་གཞན་དུ་འགྲོ་བར་གྱིས། །ཞེས་བརྗོད་ཅིང་དྲག་སྔགས་སྤོས་རོལ་དང་བཅས་སྤྲུལ་པའི་ཁྲོ་ཚོགས་མེ་མཚོན་གྱི་ཆར་འབེབས་པས་བདུད་བགེགས་ཐམས་ཅད་བསྐྲད་པར་གྱུར། ས་བསྲུང་བ་ནི། སླར་འདུས་པ་ལས་ཁྲོ་བོའི་རང་བཞིན་གྱི་རྡོ་རྗེ་སྲུང་བའི་ར་བས་བཅིངས་ཏེ་ཅིས་ཀྱང་མི་ཤིགས་པར་བསམ་མོ། །སྦྱོར་ཆོག་གཉིས་པ་ལ་གསུམ་གྱི། ལྷ་སྟ་གོན་ནི། སྐྱ་ཐིག་བཏབ་པ་ལ། ལྷ་གནས་རྣམས་སུ་དྲིའི་ཐིག་ལེ་ཚོམ་བུ་དང་བཅས་པ་བཀོད། མཆོད་པ་བཤམས་ཤིང་བརླབས་ལ། སྭ་བྷཱ་ཝས་སྦྱངས། སྟོང་པའི་ངང་ལས་འབྱུང་བཞི་རི་རབ་དང་བཅས་པའི་སྟེང་དུ་བྷྲཱུྃ་ལས་གཞལ་ཡས་ཁང་མཚན་ཉིད་ཡོངས་སུ་རྫོགས་པའི་དབུས་སུ་པདྨ་འདབ་མ་བཞི་དང༌། དེའི་ཕྱིར་འཁོར་ལོ་རྩིབས་བརྒྱད་པའི་ལྟེ་བར་ༀ་ལས་བདག་མེད་མ་ནག་མོ་གྲི་ཐོད་ཁ་ཊྭཱཾ་ག་བསྣམས་པ། གཡོན་བརྐྱང་བའི་ཕྱེད་སྐྱིལ་ཅན་ལ། འདབ་མ་བཞིར་མཾ་པྲཾ་བཾ་ཏཱཾ་དང༌། རྩིབས་བརྒྱད་ལ། ཨ་ཧཱུྃ། དྷཱི་ཧཱུྃ། ཧྲཱི་ཧྲཱི། གཾ་ཧཱུྃ་ཡོངས་སུ་གྱུར་པ་ལས་བདེ་གཤེགས་བཅུ་གཉིས་ཀྱི་ལྷ་ཚོགས་ཀྱིས་བསྐོར་བ་བཀྲ་ལམ་གྱིས་གསལ་བར་གྱུར། གནས་གསུམ་བརླབ། ཡེ་ཤེས་པ་སྤྱན་དྲང་ལ་བསྟིམ། དབང་བསྐུར་མཆོད་བསྟོད་རྣམས་བྱས་ལ། སྤོས་བཟུང་ནས། ལྕེ་ཧཱུྃ་ལས་རྡོ་རྗེར་གྱུར། མ་ལུས་ཕྱོགས་ན་བཞུགས་པ་ཡི། །སངས་རྒྱས་རྣམས་ནི་བདག་ལ་དགོངས། །བདག་མིང་འདི་ཞེས་བགྱི་བ་ཡིས། ། འདིར་ནི་དཀྱིལ་འཁོར་བྲི་བར་བྱ། །སངས་རྒྱས་ལ་སོགས་ཀུན་འབྱོན་འཚལ། །དངོས་གྲུབ་འདིར་ནི་ཡང་དག་སྩོལ། །ཞེས་ལན་གསུམ་གྱིས་སྙན་གསན་དབབ། བུམ་པ་སྟ་གོན་ནི། བུམ་པ་གཉིས་ཆས་སུ་བཅུག་པ་རྣམ་རྒྱལ་དབུས་ཀྱི་ཚོམ་བུའི་སྟེང་དུ་མཉྫི་ལ་བཀོད། ལས་བུམ་བྱང་ཤར་དུ་བཞག་༼ཀ༽ ༼ཁ༽ལ་མཆོད་པས་བསྐོར་ནས། བུམ་པ་བསྐྱེད་བཟླས་འོད་ཞུའི་བར་འོག་ནས་འབྱུང་བའི་བུམ་བསྐྱེད་ལྟར་བྱའོ། །སློབ་མ་སྟ་གོན་ནི། དཀྱིལ་འཁོར་ཡོལ་བས་བསྒྲིབས་ལ། སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལ། སེམས་བསྐྱེད་གསལ་གདབ་ཅིང་ཆོས་བཤད་ཅི་རིགས་སྔོན་དུ་བཏང་ནས། འདིར་ཞི་བྱེད་བཀའ་བབས་ཕྱི་མའི་ཐུགས་དམ་བདེ་གཤེགས་བཅུ་གཉིས་ཀྱིས་དབང་བསྐུར་བའི་སྐབས་ཡིན། དེ་ལའང་དཀྱིལ་འཁོར་སྔོན་དུ་འགྲོ་དགོས་པ་ལས༑ དེང་སང་གི་གང་ཟག་ཕལ་ཆེར་སྨིན་བྱེད་ཀྱི་རྟེན་དུ་བྱ་བའི་དཀྱིལ་འཁོར་ནི་རྡུལ་ཚོན་དང་རས་བྲིས་གཉིས་ལས། རྡུལ་ཚོན་ལྟར་ན་ནུབ་གཉིས་པ་དང༌། རས་བྲིས་ལྟར་ན་ནུབ་དང་པོ་སྟ་གོན་གྱི་སྐབས་ལགས། དེ་ལས་ལྷ་དང་བུམ་པའི་སྟ་གོན་གྲུབ་ནས། ད་སློབ་མ་སྟ་གོན་གྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། དེ་ནས་བསམ་པ་འཆོས་པ་ནི། སྔགས་ཀྱི་དངོས་གྲུབ་དོན་གཉེར་གང༌། །དཀྱིལ་འཁོར་འདིར་ནི་གཞུག་པར་བྱ༑ ༑ཞེས་གསུངས་པ་ལྟར། འདི་ཕྱིའི་ལྷ་མིའི་བདེ་འབྱོར་དང་ཞི་བདེ་ཉན་རང་གི་བྱང་ཆུབ་དོན་དུ་གཉེར་བ་སྤངས་ཏེ། གཞན་དོན་དུ་བླ་ན་མེད་པའི་བྱང་ཆུབ་མཆོག་གི་དངོས་གྲུབ་ཐོབ་པའི་ཆེད་དུ་དཀྱིལ་འཁོར་ཆེན་པོ་ འདིར་འཇུག་པར་བྱ་སྙམ་དུ་སེམས་བསྐྱེད་འཚལ། དེ་ནས་བུར་བྱ་བ་ནི། རང་གི་ཐུགས་ཀའི་འོད་ཀྱིས་སློབ་མའི་སྒོ་གསུམ་གྱི་སྡིག་སྒྲིབ་སྦྱངས་ཏེ་འོད་དུ་ཞུ་བ་ལས། བདག་མེད་མའི་སྐུར་གྱུར་པ་པདྨའི་༼ག༽ ༼ང༽གདན་ལ་འཁོད་པར་བསམ། དེ་ནས་གསོལ་བ་གདབ་པ་འདིའི། ན་མོ། དགའ་ཆེན་ཁྱོད་བདག་སྟོན་པ་སྟེ། །ཧེ་རུ་ཀ་དཔལ་དགོངས་སུ་གསོལ། །བྱང་ཆུབ་སེམས་ལས་རྨད་བྱུང་བའི། །སྡོམ་པ་རྒྱ་མཚོ་བདག་ལ་སྩོལ། ། ལན་གསུམ། གནང་བ་བྱིན་པ་ནི། བུ་ཁྱོད་ཚུར་ཤོག་ཐེག་ཆེན་སྔགས། །ཁྱོད་ནི་ཚུལ་ཆེན་སྣོད་དང་ལྡན། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །དེ་ནས་ཐུན་མོང་དང་ཁྱད་པར་གྱི་སྡོམ་པ་མཐའ་དག་བཟུང་སྙམ་པས་འདིའི། སངས་རྒྱས་ཆོས་དང་དགེ་འདུན་ལ། །ཐར་པ་འདོད་ཕྱིར་སྐྱབས་སུ་མཆི། །སེམས་ཅན་ཀུན་དོན་སྒྲུབ་པའི་ཕྱིར། །བྱང་ཆུབ་སེམས་གསུམ་བསྐྱེད་པར་བགྱི། །སེམས་ཅན་དོན་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤོང༌། །གསང་བ་སྔགས་ཀྱི་དམ་ཚིག་ནི། །བདེ་གཤེགས་ལྔ་ཡི་སྡོམ་པ་བཟུང༌། །བཅུ་བཞིར་ཕྱེ་བའི་ལྟུང་བ་དང༌། །ཡན་ལག་ཉེས་པ་སྤོང་བར་བགྱི། །ཞེས་ལན་གསུམ། དེ་ནས་རྡོ་རྗེ་དང་བཅས་པའི་དྲི་ཆུས་གནས་གསུམ་དུ་རེག་སྟེ། ༀ་ཨཱཿ ཧཱུྃ་ཞེས་བརྗོད་པས། ཁྱེད་རང་རྣམས་བདག་མེད་མར་གསལ་བའི་དཔྲལ་བར་འཁོར་ལོ་ལ་ༀ་དཀར་པོ། མགྲིན་པར་པདྨ་ལ་ཨཱཿ དམར་པོ། སྙིང་གར་རྡོ་རྗེའི་ ལྟེ་བར་ཧཱུྃ་མཐིང་ག་རྣམས་ཀྱིས་མཚན་པས་སྒོ་གསུམ་རྡོ་རྗེ་གསུམ་དུ་གྱུར། ཡང་མས་ནས་ཡར་རེག་སྟེ་ཧཱུྃ་ཨཱཿ ༀ་ཞེས་བརྗོད་པས་བརྟན་པར་བྱས་པའི་མོས་པ་མཛོད། དེ་ཉིད་མཆོད་ཡུལ་དུ་བཟུང་བ་ཡིན་པས༑ ༀ་བཛྲ་པུཥྤེ་པྲ་ཏཱིཙྪ་སྭཱ་ཧཱ། ཞེས་སོགས་ཉེར་སྤྱོད་ཀྱིས་མཆོད། དེ་ནས་དངོས་གྲུབ་ཀྱི་སྐལ་བ་བརྟག་པ་ལ་གཉིས་ལས། དང་པོ་སོ་ཤིང་དོར་བ་ནི། ཧཱུྃ་ལས་བྱུང་བའི་སོ་ཤིང་དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་བསམ་ལ་བྱིན༑ དེས་ཀྱང་མཎྜལ་གྱི་ར་བར་ༀ་བཛྲ་ཧ་ས་ཧ་ཞེས་དོར་ལ་སློབ་དཔོན་གྱིས་ལུང་སྟོན་གཉིས་པ་རྨི་ལམ་བརྟག་པའི་སྦྱོར་བ་ལ་གསུམ་ལས། རྨི་ལམ་གསལ་བའི་ཕྱིར་ཁྱོར་ཆུ་ༀ་ཧྲཱིཿ བི་ཤུདྡྷ་སྭཱ་ཧཱ། ཞེས་ལན་གསུམ་བླུད་ལ་ལྷག་མ་རྒྱབ་ཏུ་དོར། བར་ཆད་སྲུང་བའི་ཕྱིར་ཧཱུྃ་ལས་རྡོ་རྗེའི་སྲད་བུ་བར་ཆད་བསྲུང་བའི་ནུས་ལྡན་དུ་གྱུར། ཡེ་ཤེས་ཀྱི་སྲད་བུ་ཛཿ ཧཱུྃ་བཾ་ཧོཿ ས་སྤྱན་དྲངས་ལ་བསྟིམ། དེ་སྐྱེས་པའི་དཔུང་པ་གཡོན་དང་བུད་མེད་ཀྱི་གཡས་སུ་ཉིས་བསྐོར་གྱིས་བཅིངས། ལས་བུམ་གྱི་ཆུ་གཏོར་ནས་ༀ་ཨཱཿ བིགྷཱ་ནཱནྟ་ཀྲ་ཏ་ཧཱུྃ་ཕཊ། ཞེས་རྡོ་རྗེ་རྒྱ་གྲམ་དུ་རྒྱས་བཏབ། དེ་ནས་དྷཱི་དང་ཧ་ལས་བྱུང་བའི་ཀུ་ཤ་རྨི་ལམ་མི་འཁྲུགས་པའི་ནུས་པ་དང་ལྡན་པར་བསམ་ལ། དྷཱིཿ བཟླས་པའི་ཆུང་བ་སྔས་ཀྱི་དོན་དུ་གཡས་དང༌། ཧ་བཟླས་པའི་ཆེ་བ་སྟན་གྱི་དོན་དུ་གཡོན་པར་གཏད། དེ་ནས་མི་ལྡོག་པའི་ཕྱིར་ཆོས་བཤད་པ་ནི། ཁྱེད་ཅག་གསང་སྔགས་རྡོ་རྗེ་ཐེག་པའི་བསྟན་པ་དང་མཇལ་བ་འདི་འདྲ་ ཨུ་དུམ་བཱ་རའི་མེ་ཏོག་ལྟར་རྙེད་དཀའ་ཞིང་རྙེད་པ་དོན་ཆེན་པོ་དང་དཀྱིལ་འཁོར་མཐོང་བ་ཙམ་གྱིས་བསྐལ་མང་བསགས་པའི་སྡིག་སྒྲིབ་འདག་ནུས་པ་དང༌། དེར་ཞུགས་ཤིང་དབང་ཐོབ་ནས་ལམ་ལ་འབད་ན་ཚེ་འདི་ཁོ་ན་ལ་བླ་ན་མེད་པའི་བྱང་ཆུབ་ཐོབ་པར་ངེས་པས་རྙེད་པའི་མཆོག་རབ་ཏུ་རྙེད་པར་གྱུར་ཏོ་སྙམ་དུ་དགའ་བ་བསྒོམ་པར་མཛད་འཚལ། དེ་ནས་དངོས་གཞི་རྨི་ལམ་བརྟག་པ་ནི། དོ་ནུབ་ཀུ་ཤའི་སྔས་སྟན་ལ་སེང་གེ་ཉལ་སྟབས་དང་དགེ་བའི་སེམས་ཀྱིས་ཉོལ་ཞིག །རྨི་ལམ་གྱི་མཚན་མ་བཟང་ངན་དག་མཐོང་བར་འགྱུར་རོ། །དེས་སྟ་གོན་གྱི་ཆོས་གྲུབ། དངོས་གཞིའི་དབང་བསྐུར་བ་དེ་ནངས་པར་འབྱུང་བ་ཡིན་ནོ། །ཞེས་བརྗོད་ལ་དགེ་བ་བསྔོས་ལ་རང་གནས་སུ་བཏང༌། ༀ་བཛྲ་བེ་ག་ཀྲ་མ་ཧོཿ ཞེས་པས་སྟ་གོན་གྱི་དཀྱིལ་འཁོར་ནམ་མཁར་བཏེགས། ནང་མཆོད་ལ་ལས་ཐམས་ཅད་པའི་སྔགས་དང་ཆུས་མཐའ་བཅིངས་ལ་བཞག་གོ །ནངས་པར་དྲིས་ལ་རྨི་ལམ་དགེ་ན་ཞེན་པ་མེད་པར་གཟེངས་གཏོད། ངན་ན་སྒྱུ་མ་ལྟ་བུར་ཤེས་པས་བཟློག་པར་བྱའོ། །གཉིས་པ་དངོས་གཞིའི་ཆོ་ག་ལ་བཞི་ལས། དང་པོ་དཀྱིལ་འཁོར་བྲི་བ་ནི། ཐིག་སྐུད་དང་རྡུལ་ཚོན་ཁ་དོག་ལྔ་རེ་བཅུ་སྡེབ་ནས་དཀྱིལ་འཁོར་གྱི་དབུས་སུ་ལྔ་ཚོམ་དུ་བཀོད་པའི་མཐར་མཆོད་པ་བཤམས་ཤིང་བརླབ། བདག་ཉིད་ལྷར་གསལ་བས་ཐིག་ཚོན་བསང་སྦྱངས། སྟོང་པའི་ངང་ལས་ༀ་ཧཱུྃ་ཏྲཱྃ་ཧྲཱིཿ ཨཱཿ ལས་དེ་བཞིན་གཤེགས་པ་རིགས་ལྔའི་སྐུར་གྱུར། ཡེ་ཤེས་པ་བཛྲ་སཱ་མཱ་ཛཿ ས་སྤྱན་དྲངས། ཛཿ ཧཱུྃ་བཾ་ཧོཿ ས་བསྟིམ། ཨརྒྷཾ་ནས་ཤབྡའི་བར་གྱིས་མཆོད། ཆོས་སྐུ་ ནམ་མཁས་བསྟོད། རིགས་ལྔ་ཞུ་བ་ལས་བྱུང་བའི་ཐིག་ཚོན་དུ་གྱུར། ཚོན་ལ། ༀ་བཛྲ་ཙི་ཏྲ་ས་མ་ཡ་ཧཱུྃ། ཞེས་ཀྱང་བཟླ། དེ་ནས་ཐིག་གདབ་པ་ནི། སློབ་དཔོན་གཙོ་བོའི་ང་རྒྱལ་གྱིས་ཤར་དུ་ཕྱོགས་པས་སྐུད་པ་ཛཿ ཛཿ ཛཿ ཞེས་སློབ་མ་འོད་ཟེར་ཅན་ལ་སོགས་རང་གི་སྙིང་ག་ནས་སྤྲུལ་པའི་ང་རྒྱལ་ཅན་ལ་ཐིག་སྣ་གཏད་དེ། འབྲུ་ལྔ་ཟློས་པས་གཅིག་ཏུ་སྒྲིལ་ནས་ནམ་མཁར་རང་བཞིན་གྱི་དཀྱིལ་འཁོར་ལམ་གྱིས་གྲུབ་པར་མོས་ལ། ༀ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུྃ། ཞེས་རྡོ་རྗེ་དང་བཅས་པའི་མཐེབ་མཛུབ་ཀྱིས་ཐིག་ཆེན་བརྒྱད་བསྐོར་འདུག་གིས་ཕྱོགས་མ་ནོར་བའི་སྒོ་ནས་མཁའ་ལ་གདབ་རྗེས་ཐིག་སྐུད་ཀྱི་ཡེ་ཤེས་པ་གཤེགས་སུ་གསོལ། དེ་ནས་ཕྱོགས་ཐམས་ཅད་མཉམ་ཉིད་དུ་ཤེས་པར་བྱས་ནས་ལས་ཐིག་གདབ་སྟེ། སྒོ་བཞིར་རྟ་བབས་བཞི་མ་ཕྱིར་པད་ར་དུར་ཁྲོད་རྡོ་ར་མེ་ཕྲེང་དང་བཅས་པའི་རྩ་ཐིག་གི་ནང་དུ་ཟླུམ་བསྐོར་གྱི་མུ་ཁྱུད་ནང་འཁོར་ལོ་རྩིབས་བརྒྱད། དེའི་ནང་པད་འདབ་བཞི་ཟེའུ་འབྲུ་ལྟེ་བ་དང་བཅས་པའི་ཐིག་སྤྱི་ལྟར་བཏབ་ཅིང༌། བེ་གཱས་བཏགས་ལ་ནང་དུ་ཞུགས་ཏེ་ཧི་ཞེས་ལྟས་ལ་སྒོ་ཕྱེ། དེ་ནས་ཚོན་དགྱེ་བ་ནི། སློབ་དཔོན་དབུས་སུ་ཕྱིན་ནས། ཆོས་དབྱིངས་འདི་ནི་རྣམ་པར་དག །སེམས་ཅན་ཁམས་རྣམས་རྣམ་པར་གྲོལ། །རྡོ་རྗེ་སེམས་དཔའི་གཞལ་ཡས་ཁང༌། །དཀྱིལ་འཁོར་སྙིང་པོ་བྲི་བར་བྱ། །ཞེས་དབང་ལྡན་ནས་བརྩམས་ཏེ་རྩིག་པ་ཕྱི་ནས་དཀར་སེར་དམར་ལྗང་སྔོ་བའི་རེ་ཁཱ་ལྔ་སྒོ་ཚད་ཙམ་དུ་བྲིས་ཏེ་ཐོད་པས་བཀབ། དེ་ནས་སློབ་མས་ཀྱང་བྲིས་ཏེ། ལྟེ་བ་སྔོན་པོ། གེ་སར་སེར། པདྨ་ཕྱོགས་མདོག །འཁོར་ལའི་རྩིབས་ཤར་ནས་གཡས་བསྐོར་གྱིས་དཀར། སྔོ། དམར། དཀར། དཀར་པོ། སྔོ་ལྗང༌། མུ་ཁྱུད་སྔོན་པོ། དེ་ཕན་ཆད་སྤྱི་དང་མཐུན་ནོ། །ལྷ་མཚན་ནི་སོ་སའི་སྐུའམ་ཕྱག་མཚན་དང༌། མི་ནུས་ན་ལྷ་མདོག་དང་མཐུན་པའི་ཐིག་ལེ་བྲི་ཞིང་ཚོན་ལྷའི་ཡེ་ཤེས་པ་གཤེགས་སོ། །གཉིས་པ་ཡོ་བྱད་དགྲམ་པ་ནི། ལྷག་གནས་བྱས་པའི་བུམ་པ་སྤོས་ཀྱིས་སྣ་དྲངས་ཏེ་དཀྱིལ་འཁོར་ལ་གཡས་སུ་བསྐོར་ཏེ་རྣམ་རྒྱལ་དཀྱིལ་འཁོར་གྱི་དབུས་སུ་མཉྫི་ལ་བཀོད། ལས་བུམ་སྒོའི་ཕྱིའི་བྱང་ཤར་དུ་བཞག །སྤྱི་མཆོད་བྱང་ཤར་དུ། མཚམས་འཛིན་གྱི་མེ་ཏོག་ནས་བརྩམས་ཏེ་ཆུ་གཉིས་ཉེར་སྤྱོད་ལྔ་གཡས་བསྐོར་དུ་བཤམས། འགྲུབ་ན་སྤོས་མར་མེ་ལྷ་བཤོས་གསུམ་ལྷ་གྲངས་དང་མཉམ་པས་མཐའ་བསྐོར། འདས་མ་འདས་ཀྱི་གཏོར་མ་དང༌། སྨན་ཕུད། ཚོགས་ཀྱི་ཡོ་བྱད། རོལ་མའི་ཁྱད་པར། སྤྱན་གཟིགས། དབང་རྫས་སོགས་འདིར་དགོས་པ་ཐམས་ཅད་ཚང་བར་འདུ་བྱའོ། །གསུམ་པ་སྒྲུབ་མཆོད་ནི། སྔོན་གཏོར་ལ་ལས་བུམ་གྱི་ཆུ་འཐོར་ཞིང་ༀ་ཨཱཿ བིགྷྣའན་གྱིས་བསང༌། སྭ་བྷ་ཝས་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ཨཱཿ ལས་ཡེ་ཤེས་ཀྱི་བདུད་རྩི་ཧཱུྃ་གིས་མཁའ་ཁྱབ་ཏུ་འཕེལ་བར་གྱུར། ༀ་ཨཱཿ ཧཱུྃ་ལན་གསུམ་གྱིས་བྱིན་གྱིས་བརླབས། སྙིང་གའི་འོད་དང་ཨཱ་ཀརྵ་ཡ་ཛཿ ས་མགྲོན་བཀུག །ཨ་ཀཱ་རོ་བདུན་ནམ་གསུམ་གྱིས་བསྔོས་ལ། གང་དག་འདིར་གནས་ལྷ་དང་ཀླུ། །སོགས་ཀྱིས་དཀར་ཕྱོགས་པ་རྣམས་དང༌། གསང་སྤྱོད་བལྟ་བར་མི་དབང་བའི། །འབྱུང་པའི་ཚོགས་རྣམས་གང་ཡིན་པ། །གཏོར་མའི་ལྷག་མ་འདི་ལོངས་ལ། །ད་ལྟ་ཉིད་དུ་གཞན་དུ་དེངས། །ཞེས་ནག་ཕྱོགས་པ་རྣམས་དྲག་སྔགས་དང་བཅས་པས་བསྐྲད་ལ་གཏོར་མ་ཕྱིར་དོར་རོ། །རང་ཉིད་སྐད་ཅིག་གིས་བདག་མེད་མའི་སྐུར་གྱུར་པའི་ཐུགས་ཀའི་ས་བོན་ལས་ར་དང་ཧཱུྃ་ཡིག་འོག་ཏུ་ཆད། ཉི་མ་ལ་གནས་པའི་སྣ་ཚོགས་རྡོ་རྗེའི་ས་གཞི༑ དེ་ལས་འཕྲོས་པའི་རྡོ་རྗེའི་ར་བ་དྲྭ་བ་གུར་བླ་རེས་བར་མཚམས་མེད་པར་གཏམས་པ་ཉི་མ་ལས་འབར་བའི་མེས་བཞུ་ལུགས་སུ་འབྲེལ་ཞིང་འབར་བ་མེའི་འོད་ཟེར་ཀུན་ཏུ་འཕྲོ་བས་ཅིས་ཀྱང་མི་ཤིགས་པར་གྱུར༑ ༀ་བཛྲ་རཀྵ་རཀྵ་ཧཱུྃ་ཧཱུྃ་ཕཊ། ཅེས་ལན་གསུམ། གནས་ཡོ་བསང་སྦྱངས། སྟོང་པའི་ངང་ལས་སྲུང་འཁོར་གྱི་ནང་དུ་ཆུད་པའི་གནས་ཁང་དག་པའི་གཞལ་ཡས་ཁང་དུ་ༀ་ལས་སྣོད་ཕུན་སུམ་ཚོགས་པར་ཨཱཿ ལས་མཆོད་པའི་ཡོ་བྱད་རང་བཞིན་བདེ་སྟོང༌། རྣམ་པ་མཆོད་རྫས། བྱེད་ལས་ཟག་མེད་ཀྱི་བདེ་བས་ཚིམ་པར། ཧཱུྃ་གིས་མཁའ་ཁྱབ་ཏུ་སྤེལ་བས་ཕྱི་ནང་ཀུན་ཏུ་གང་བར་གྱུར། ༀ་བཛྲ་ཨརྒྷཾ་ཨཱཿ ཧཱུྃ། དེ་བཞིན་དུ། པཱ་དྱཾ། པུཥྤེ། དྷུ་པེ། ཨཱ་ལོ་ཀེ། གནྡྷེ། ནེ་ཝིདྱེ། ཤབྡ་ཨཱཿ ཧཱུྃ། ༀ་བཛྲ་སྥ་ར་ན་ཁཾ། ཞེས་པས་བྱིན་གྱིས་བརླབ་བོ། །དེ་ནས་བདག་བསྐྱེད་ནི། རང་གི་སྙིང་གའི་ས་བོན་གྱི་འོད་ཟེར་གྱིས་བླ་མ་ཡི་དམ་སངས་རྒྱས་བྱང་སེམས་ཐམས་ཅད་མདུན་གྱི་ ནམ་མཁར་སད་པར་གྱུར། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ལན་གསུམ། ཤེས་རབ་སྙིང་རྗེ་དང་ བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བགྱིས་ནས། །བྱང་ཆུབ་མཆོག་ཏུ་སེམས་བསྐྱེད་བགྱི། །ལན་གསུམ། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང༌། །བཏང་སྙོམས་མཆོག་ལ་གནས་པར་ཤོག །ལན་གསུམ། སྐྱབས་ཡུལ་རྣམས་རང་ལ་ཐིམ་པར་གྱུར། རང་གི་སྤྱི་བོར་པད་ཉི་ཟླ་བ་ལས་རྡོ་རྗེ་སེམས་དཔའ་དཀར་པོ་ཞི་ཞིང་འཛུམ་པ་གཡས་རྡོ་རྗེ་ཐུགས་ཀ་དང་གཡོན་དྲིལ་བུ་དཀུར་བརྟེན་པ་དར་དང་རིན་པོ་ཆེའི་རྒྱན་ཅན་ཞབས་གཡས་བརྐྱང་བའི་ཕྱེད་སྐྱིལ་གྱིས་བཞུགས་པའི་ཐུགས་ཀར་ཧཱུྃ་ཡིག་དཀར་པོ་དེ་ལས་བདུད་རྩིའི་རྒྱུན་གཡས་པའི་མཐེ་བོང་ལས་བབས་པས་སྡིག་སྒྲིབ་ཐམས་ཅད་སྦྱངས་ཏེ་ལུས་དག་པའི་ཤེལ་སྒོང་ལྟར་གྱུར་པར་བསམ་ལ། ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བཟླས་མཐར་རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ། སླར་ཡང་སྙིང་ག་ནས་འོད་ཟེར་འཕྲོས། བདག་མེད་མ་ལ་བདེ་གཤེགས་བཅུ་གཉིས་ཀྱིས་བསྐོར་བའི་དཀྱིལ་འཁོར་བླ་མ་རིགས་ཀྱི་བདག་པོར་བཞུགས་པ་མདུན་གྱི་ནམ་མཁར་སད་པར་གྱུར། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཚེ་རབས་ཀུན་གྱི་སྐྱབས་གྱུར་ཅིང༌། །མི་འདོད་པ་ཀུན་རབ་སྤངས་ནས། །འདོད་པའི་དོན་རྣམས་སྟེར་མཛད་པའི། །ཡི་དམ་ལྷ་ལ་ཕྱག་འཚལ་ལོ། །ཞེས་ཕྱག་བྱས། ཨརྒྷཾ་ནས་ཤབྡའི་བར་གྱིས་མཆོད། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །མཆོད་པ་བླ་ན་མེད་པས་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང༌། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །བདག་གིས་དགེ་བ་ཅི་བསགས་པ། །སེམས་ཅན་ཀུན་ལ་བསྔོ་བར་བགྱི། །ཞེས་ལན་གསུམ། དེ་དག་རྒྱུ་བསོད་ནམས་ཀྱི་ཚོགས་སོ། །དེ་ནས་ༀ་སྭ་བྷཱ་ཝ་ཤུདྡྷཿ སརྦ་དྷརྨཿ སྭ་བྷཱ་ཝ་ཤུདྡྷོ྅ཧཾ། ༀ་ཤཱུ་ནྱ་ཏཱ་ཛྙ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། གཟུང་བ་དང་འཛིན་པས་བསྡུས་པའི་ཆོས་ཐམས་ཅད་རང་བཞིན་གྱིས་མི་དམིགས་པ་སྟོང་པ་ཉིད་དུ་གྱུར། ཞེས་མཉམ་པར་འཇོག་སྟེ་འབྲས་བུ་ཡེ་ཤེས་ཀྱི་ཚོགས་སོ། །སྟོང་པའི་ངང་ལས་སྲུང་འཁོར་གྱི་དབུས་སུ་ཨེ་ལས་ཆོས་འབྱུང་གྲུ་གསུམ་ཕྱི་དཀར་ལ་ནང་དམར་བའི་ནང་དུ། ཡཾ་ལས་རླུང་དཀྱིལ་སྔོན་པོ་ཟླ་གམ། རཾ་ལས་མེ་དཀྱིལ་དམར་པོ་གྲུ་གསུམ། བཾ་ལས་ཆུ་དཀྱིལ་དཀར་པོ་ཟླུམ་པོ། ལཾ་ལས་ས་དཀྱིལ་སེར་པོ་གྲུ་བཞི། སུཾ་ལས་རིན་ཆེན་སྣ་བཞི་ལས་གྲུབ་པའི་རི་རབ་རྣམས་བརྩེགས་མར་གནས་པའི་སྟེང་དུ། པཾ་ལས་སྣ་ཚོགས་པདྨའི་ལྟེ་བར། ཧཱུྃ་ལས་སྣ་ཚོགས་རྡོ་རྗེའི་རྭ་ཕྱོགས་མདོག་ལྟེ་བ་མཐིང་ནག་གྲུ་བཞི་པའི་སྟེང་དུ་བྷྲཱུྃ་ལས་རིན་པོ་ཆེའི་གཞལ་ཡས་ཁང་གྲུ་བཞི་རྟ་བབས་བཞིས་བརྒྱན་པ། འདོད་སྣམ་དང༌། ཕ་གུ་དང༌། དྲྭ་བ་དང་དྲྭ་ཕྱེད་ཤར་བུ་དང་མདའ་ཡབ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ། ཕྱི་རོལ་དུ་དངོས་གྲུབ་འབྱུང་བའི་དུར་ཁྲོད་ཆེན་པོ་བརྒྱད་ཀྱིས་བསྐོར་བ། ནང་ཕྱོགས་ཀྱི་མདོག་ཅན་དུ་གྱུར་པའི་དབུས་སུ་འཁོར་ལོ་རྩིབས་བརྒྱད་པའི་ནང་དུ་པདྨ་འདབ་མ་བཞི་པ་གེ་སར་ལྟེ་བ་དང་བཅས། ལྷ་གནས་སོ་སོར་གདན་གྱི་རིམ་པ་གཙོ་བོ་དང་འཁོར་ལའི་མེ་སྲིན་དབང་ལྡན་རྣམས་སུ་པད་ཉི་དང་གཞན་ཐམས་ཅད་དུ་པད་ཟླའི་གདན་རེ་རེ། གཙོ་བའི་གདན་གྱི་སྟེང་དུ་ༀ་ཡིག་སྔོན་པོ། དེ་ལས་འཁོར་གྱི་ས་བོན་སྤྲོས་ནས་སོ་སའི་གནས་སུ་འཁོད་པ་ནི། པད་འདབ་བཞིར་ཤར་ནས་རིམ་པར་མཱཾ་པྲཾ་བཾ་ཏཱཾ། རྩིབས་བརྒྱད་ཀྱི་ཕྱོགས་བཞིར་ཨ་དྷཱི་ཧྲཱིཿ ཀཾ །མཚམས་ཀྱི་རླུང་དུ་ཧྲཱིཿ དང་གཞན་གསུམ་དུ་ཧཱུཾ་རྣམས་ལྷ་རང་རང་གི་ཁ་དོག་ཏུ་གསལ་བ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཏེ་ཡོངས་སུ་གྱུར་པ་ལས་ལྷ་སོ་སོའི་སྐུར་གྱུར་པ་ནི། དབུས་ཀྱི་གདན་གྱི་སྟེང་དུ་ཨཾ་ལས་རྗེ་བཙུན་རྡོ་རྗེ་བདག་མེད་མ་སྐུ་མདོག་ནག་མོ་ཞལ་གཅིག་ཕྱག་གཉིས་མ། གཡས་གྲི་གུག་མཁའ་ལ་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པའི་གྲུ་མོར་ཁ་ཊཱྃ་ག་བརྟེན་པ། སྤྱན་གསུམ་པ། ཞལ་མཆེ་བའི་མྱུ་གུ་ཅུང་ཟད་གཙིགས་ཤིང་ཁྲོ་འཛུམ་བཞད་པའི་ཉམས་ཅན། དབུ་སྐྲ་སེར་པོ་གྱེན་དུ་འཁྱིལ་བ། གཅེར་བུ་ཕྱག་རྒྱ་ལྔ་དང་མགོ་བོ་སྐམ་པའི་ ཕྲེང་བ་སོགས་ལྷ་མའི་ཆ་བྱད་ཡོངས་སུ་རྫོགས་པ། ཞབས་གཉིས་གཡས་བསྐུམ་གཡོན་བརྐྱང་བའི་སྟབས་ཀྱིས་རའི་གདན་ལ་ཡེ་ཤེས་ཀྱི་མེ་ཕུང་འབར་བའི་དབུས་ན་བཞུགས་པའོ། །པད་འདབ་བཞིའི་བྱང་དུ་ཏཱཾ་ལས་སྒྲོལ་མ་ལྗང་གུ་གཡས་མཆོག་སྦྱིན་དང༌། གཡོན་པའི་མཐེབ་སྲིན་གྱིས་ཨུཏྤལ་སྔོན་པའི་ཡུ་བ་ནས་འཛིན་པ། ཞབས་གཡས་ཅུང་ཟད་བརྐྱང་བའི་ཕྱེད་སྐྱིལ་ཅན། ཤར་དུ་མཾ་ལས་འོད་ཟེར་ཅན་དཀར་མོ་ཞལ་གཅིག་ཕྱག་བཞིའི་དང་པོ་གཉིས་མདའ་གཞུ་འགེངས་པ། འོག་མ་གཉིས་རིན་པོ་ཆེའི་སྙེ་མ་དང་ཕྲེང་བ། རྡོ་རྗེའི་སྐྱིལ་ཀྲུང་གིས་བཞུགས་པ། ལྷོར་པྲཾ་ལས་རང་བྱུང་རྒྱལ་མོ་གསེར་མདོག་ཕྱག་བཞིའི་དང་པོ་གཉིས་པུསྟི། འོག་མ་གཉིས་པད་ཕྲེང༌། ཞབས་སྐྱིལ་ཀྲུང་ཅན། ནུབ་ཏུ་བཾ་ལས་རྡོ་རྗེ་ཕག་མོ་དམར་མོ། གཡས་ཕག་ཞལ་གྱེན་དང་གཡོན་ཁྲོ་ཞལ་ཐུར་དུ་གཟིགས་པ། གཡས་གྲི་གུག་འཕྱར་ཞིང༌། གཡོན་ཐོད་པ་ཐུགས་ཀར་འཛིན་པ་ཞབས་གཡོན་བརྐྱང་བའི་ཕྱེད་སྐྱིལ་གྱི་གར་སྟབས་ཀྱིས་རའི་གདན་ལ་གནས་པ། འཁོར་ལོ་རྩིབས་བརྒྱད་ཀྱི་ཤར་དུ་ཨཱཿ ལས་བྱང་ཆུབ་སེམས་དཔའ་ཀུན་ཏུ་བཟང་པོ་སྐུ་མདོག་སྔོན་པོ་དཀར་པོ་མཉམ་བཞག་རྡོ་རྗེའི་སྐྱིལ་ཀྲུང་ཅན། ལྷོར་དྷཱིཿ ལས་འཇམ་དཔལ་སྨྲ་བའི་སེང་གེ་དམར་སེར་གཡས་རལ་གྲི་དང་གཡོན་ཨུཏྤ་ལའི་སྟེང་དུ་ཤེས་རབ་ཀྱི་པུསྟི་བསྣམས་པ། སེམས་སྐྱིལ་གྱིས་སེངྒེ་སྔོན་པོའི་ཁྲི་ལ་བཞུགས་པ། ནུབ་ཏུ་ཧྲཱིཿ ལས་སྤྱན་རས་གཟིགས་དམར་པོ་ཕྱག་བཞིའི་དང་པོ་གཉིས་ཐལ་མོ་སྦྱར་ཞིང་འོག་མ་གཉིས་ཕྲེང་བ་དང་པད་དཀར་འཛིན་པ། ཞབས་རྡོ་རྗེའི་སྐྱིལ་ཀྲུང་ཅན། བྱང་དུ་ཀཾ་ལས་སྒྲིབ་སེལ་དམར་པོ་ཕྱག་གཡས་པདྨ་དང་ཞགས་པ། གཡོན་ཕྲེང་བ་དང་རིན་པོ་ཆེ་བསྣམས་པ་ཕྱེད་སྐྱིལ་ཅན། མེར་ཧཱུྃ་ལས་ཕྱག་ན་རྡོ་རྗེ་མཐིང་ག་གཡས་རྡོ་རྗེ་འཕྱར་ཞིང་གཡོན་སྡིགས་མཛུབ་ཐུགས་ཀར་བསྒྲེང་བ། སྟག་ལྤགས་ཀྱི་ཤམ་ཐབས། སྦྲུལ་དང་རིན་པོ་ཆེས་བརྒྱན་པ༑ གཡས་བསྐུམ་གཡོན་བརྐྱང་བའི་དོར་སྟབས་ཀྱིས་བཞུགས་པ། སྲིན་པོར་ཧཱུྃ་ལས་གཤིན་རྗེ་གཤེད་ནག་པོ་གཡས་རྡོ་རྗེས་ཡུ་བ་བྱས་པའི་རལ་གྲི་དང༌། གཡོན་སྡིགས་མཛུབ་ཨུཏྤ་ལས་མཚན་པ། དུར་ཁྲོད་ཆས་བརྒྱད་ཀྱིས་བརྒྱན་པ། གཡོན་བརྐྱང་གིས་མ་ཧེའི་སྟེང་དྲེགས་པ་ཁ་སྦུབས་སུ་བརྫིས་པ། རླུང་དུ་ཧྲཱིཿ ལས་ཁ་སཱརྤ་ཎི་དཀར་པོ་གཡས་མཆོག་སྦྱིན་དང་གཡོན་ཤེལ་ཕྲེང་ཐུགས་ཀར་བསྣམས་པ། གཡས་ཅུང་ཟད་བརྐྱང་བའི་ཕྱེད་སྐྱིལ་གྱིས་བཞུགས་པ། དབང་ལྡན་དུ་ཧཱུྃ་ལས་མི་གཡོ་བ་སྔོན་པོ་གཡས་རལ་གྲི་འཕྱར་ཞིང་གཡོན་ཞགས་པ་སྡིགས་མཛུབ་ལ་ལན་གཉིས་དཀྲིས་ནས་ཐུགས་ཀར་གཏོད་པ། ཞབས་གཡོན་གྱི་པུས་མོ་དང་ གཡས་ཀྱི་མཐིལ་གདན་ལ་བཞག་པའི་བཞེངས་སྟབས། སྟག་ཤམ་འཆང་ཞིང་དར་དང་རིན་པོ་ཆེ་དང་སྦྲུལ་གྱིས་བརྒྱན་པ། ཕག་མོ་དང་ཁྲོ་བོ་གསུམ་མ་གཏོགས་པ་འཁོར་ཐམས་ཅད་དར་དང་རིན་པོ་ཆེའི་རྒྱན་གྱིས་མཛེས་པར་སྤྲས་པའོ། །ལྷ་ཐམས་ཅད་ཀྱི་དཔྲལ་བར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོ་རྣམས་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་བདག་ཉིད་དུ་གྱུར། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བདག་མེད་མ་ལ་བདེ་གཤེགས་བཅུ་གཉིས་ཀྱི་ལྷ་ཚོགས་ཀྱིས་བསྐོར་བའི་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བཾ་ཧོཿ ས་གཉིས་སུ་མེད་པར་ཐིམ། སླར་ཡང་ཐུགས་ཀའི་འོད་ཟེར་གྱིས་དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ས་སྤྱན་དྲངས། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། ཡབ་ཀྱི་ཐུགས་ཀ་ནས་རིགས་ཀྱི་ཡུམ་ལྔ་བདུད་རྩིའི་བུམ་པ་ཐོགས་པ་སྤྲོས། ཇི་ལྟར་བལྟམས་པ་སོགས་ཀྱི་མཐར། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང༌། དྲི་མ་དག །ཆུ་ལྷག་མ་སྤྱི་བོར་འཁྱིལ་བ་ལས་ལྷ་ཐམས་ཅད་ལ་རྡོ་རྗེ་སེམས་དཔས་དབུ་བརྒྱན་པར་གྱུར། ལྷ་སོ་སའི་ཐུགས་ཀར་གཙོ་བོ་དང་ཁྲོ་བོ་བཞི་ལ་ཉི་མ་དང་གཞན་བརྒྱད་པོ་ཟླ་བ་ལ་གནས་པའི་རང་རང་གི་ས་བོན་ལ་བཟླ་བྱའི་སྔགས་ཕྲེང་གིས་བསྐོར་བ་ལས་ འོད་ཟེར་འཕྲོས་རྒྱལ་བ་རྣམས་མཆོད་ཅིང་ཐུགས་དམ་བསྐུལ། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། འཁོར་འདས་ཀྱི་ཡོན་ཏན་ཐམས་ཅད་འོད་ཟེར་གྱི་རྣམ་པར་བསྡུས་ནས་རང་ལ་ཐིམ་པས་སྣང་གྲགས་འགྱུ་གསུམ་ལྷ་སྔགས་འོད་གསལ་གྱི་འཁོར་ལོར་དག་པར་བསམ་ལ། བཟླ་བྱའི་སྔགས་ནི། ༀ་ཨཱཿ ཨཾ་སྭཱ་ཧཱ། ཞེས་པ་གཙོ་མོའི་སྔགས་སོ། །ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སྒྲོལ་མའོ། །ༀ་མ་རི་ཙྱཻ་མཱཾ་སྭཱ་ཧཱ། འོད་ཟེར་ཅན་ནོ། །ༀ་པྲཾ་ཧ་རི་ནི་ཧཱུྃ༑ རང་བྱུང་རྒྱལ་མོའོ། །ༀ་བཛྲ་ཝཱ་ར་ཧཱི་བཻ་རོ་ཙ་ནཱི་ཧཱུྃ་ཕཊ། ཕག་མའོ། །ༀ་བཛྲ་ས་ཏྭ་ཐླྷ່་ས་རཾ་ཧཱུྃ་ཕཊ། སྒྲིབ་སེལ་ལོ། །ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཕྱག་རྡོར་རོ། །ༀ་པྲཛྙ་བཱ་གཱི་ཤྭ་རི་མུཾ། འཇམ་དཔལ་ལོ། །ༀ་ཧྲཱིཿ ཥྚཱི་ཝི་ཀྲ་ཏཱ་ན་ན་ཧཱུྃ་ཕཊ། གཤིན་རྗེ་གཤེད་དོ། །ༀ་པདྨ་ཙིནྟཱ་མ་ཎི་ཛྭ་ལ་ཧཱུྃ་ཕཊ། སྤྱན་རས་གཟིགས་སོ། །ༀ་ཧྲཱིཿ མ་ཎི་ཁ་སརྤ་ཎི་ཧཱུྃ་ཕཊ། སྤྱན་རས་གཟིགས་ཁ་སརྤ་ཎིའོ། །ༀ་སྭཱ་ར་ཙ་ཡ་ཧཱུྃ་ཕཊ། ཀུན་བཟང་གིའོ། །ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། མི་གཡོ་བའི་སྔགས་སོ། །ཞེས་གཙོ་འཁོར་ཕྱི་འགྲོས་རྩིས་ནས་ཅི་ནུས་བཟླའོ། །དེ་ནས་རང་གི་སྙིང་ག་ནས་འོད་ཟེར་འཕྲོས། ཁམས་གསུམ་སྣོད་བཅུད་ཐམས་ཅད་དག་པའི་འཁོར་ལོར་སྦྱངས། དེ་ཐམས་ཅད་བདག་ཉིད་ཀྱིས་བསྒོམ་པའི་ དཀྱིལ་འཁོར་ལ་ཐིམ། རྟེན་གཞལ་ཡས་ཁང་འཁོར་རྣམས་ལ་ཐིམ། འཁོར་རྣམས་གཙོ་བོ་ལ་ཐིམ་ནས་བདག་ཉིད་བདག་མེད་མའི་སྐུར་གནས་པར་གྱུར། དེ་ནས་བུམ་སྒྲུབ་ནི། ལས་སྔགས་ཀྱིས་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་པད་ཟླའི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ་ལྟོ་བ་ལྡིར་བ། ཞབས་ཞུམས་པ། མགྲིན་པ་ཕྲ་བ། ཁ་གཡེལ་ཞིང་མཆུ་འཕྱང་བ་ལྷའི་གོས་ཀྱིས་མགུལ་པ་བཅིངས་པ། དཔག་བསམ་ ཤིང་གི་ཁ་རྒྱན་ཅན། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བའི་རྣམ་རྒྱལ་བུམ་པའི་དབུས་སུ་འཁོར་ལོ་རྩིབས་བརྒྱད་ཀྱི་ནང་དུ་པད་འདབ་བཞིའི་ལྟེ་བར་ༀ་ལས་བདག་མེད་མ། འདབ་མ་བཞིར། མཱཾ་པྲཾ་བཾ་ཏཱཾ་ལས་ཡུམ་བཞི། རྩིབས་བརྒྱད་ལ། ཨཱ་ཧཱུྃ་དྷཱི་ཧཱུྃ་ཧྲཱིཿ ཧྲཱིཿ ཀཾ་ཧཱུྃ་རྣམས་ལས་ཡབ་བརྒྱད་དེ་ལྷ་བཅུ་གསུམ་པོ་བཀྲ་ལམ་གྱིས་གསལ་བར་གྱུར། ལས་བུམ་གྱི་ནང་དུ་པད་ཉི་ལ་ཧཱུྃ་ལས་ཁྲོ་བོ་བགེགས་མཐར་བྱེད་ལྗང་ནག་རྒྱ་གྲམ་དང་དྲིལ་བུ་འཛིན་པ་ཁྲོས་པའི་ཉམས་ཅན་ནོ། །ལྷ་ཚོགས་དེ་རྣམས་ཐམས་ཅད་ཀྱི་གནས་གསུམ་དུ་ༀ་ཨཱཿ ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པའི་ལྷ་ཚོགས་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བཾ་ཧོཿ ས་གཉིས་སུ་མེད་པར་གྱུར། སླར་ཡང་ཐུགས་ཀའི་འོད་ཟེར་གྱིས་དབང་ལྷ་རིགས་ལྔ་བཛྲ་ས་མཱ་ཛཿ ས་སྤྱན་དྲངས། ཡུམ་ལྔས་བུམ་པའི་ཆུས་ཨ་བྷི་ཥེ་ཀ་ཏ་ཞེས་སོགས་ཀྱིས་དབང་བསྐུར། ཐམས་ཅད་རྡོ་རྗེ་སེམས་དཔས་དབུ་བརྒྱན། ཆུ་གཉིས་ཉེར་སྤྱོད་ལྔ་རོལ་མོར་བཅས་པས་མཆོད། འབྲུ་གསུམ་གྱིས་ནང་མཆོད་འབུལ་ལ། ཧཱུཾ། ཆོས་དབྱིངས་སྐྱེ་འགགས་མེད་པའི་མཁའ་ཀློང་ལས། །གཟུགས་སྐུ་འཇའ་ཚོན་ལྟ་བུར་མ་འདྲེས་གསལ། །རྡོ་རྗེ་བདག་མེད་བདེ་གཤེགས་བཅུ་གཉིས་བཅས། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད། །འཇིགས་པའི་ཧཱུྃ་སྒྲ་ངེས་སྒྲོག་ཅིང༌། །བགེགས་རྣམས་མ་ལུས་ནས། བགེགས་ཀྱི་དགྲ་ལ་ ཕྱག་འཚལ་བསྟོད། །ཅེས་བསྟོད་ནས། གཟུངས་ཐག་ལ་འཇུས་ཏེ། རང་གི་ཐུགས་ཀ་ནས་སྔགས་ཀྱི་འོད་ཟེར་གཟུངས་ཐག་ལ་འཁྲིལ་ཏེ་སོང་བས་བུམ་པའི་ལྷ་རྣམས་ཀྱི་ཐུགས་རྒྱུད་བསྐུལ། སྐུའི་ཆ་ཐམས་ཅད་ནས་བྱང་སེམས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ། རྣམ་བུམ་ལ་ལྷ་བཅུ་གསུམ་གྱི་སྔགས་རྣམས་ཅི་འགྲུབ་དང༌། ཨ་བྷི་ཥེ་ཀའི་སྔགས་ཀྱང་ཉེར་གཅིག་ཙམ་བཟླ། ལས་བུམ་ལ། ༀ་ཨཱཿ བིགྷྣའན་ཏ་ཀྲི་ཏ་ཧཱུྃ་ཕཊ་ཅེས་བཟླས་ལ། ༀ་ཨཱཿ ཧཱུྃ་གིས་མཆོད་ཡོན་ཕུལ་ལ། ལྷ་ཐམས་ཅད་ཡེ་ཤེས་ཀྱི་བདུད་རྩིར་ཞུ་སྟེ་བུམ་ཆུ་དང་རོ་གཅིག་ཏུ་གྱུར་པར་བསམ་མོ། །རང་ཉིད་བདག་མེད་མའང་འོད་དུ་ཞུ་སྟེ་ༀ་ལ་ཐིམ། དེའང་འོད་གསལ་གྱི་དབྱིངས་སུ་ཐིམ་པར་གྱུར། འོད་གསལ་གྱི་ངང་ལས་སླར་ཡང་བདག་མེད་མའི་སྐུར་གྱུར། དེ་ནས་མདུན་བསྐྱེད་ནི། མདུན་གྱི་དཀྱིལ་འཁོར་བསང་སྦྱངས། སྟོང་པའི་ངང་ལས་སྲུང་འཁོར་གྱི་དབུས་སུ་ཨེ་ལས་ཆོས་འབྱུང་གྲུ་གསུམ། ཞེས་པ་ནས། གཞན་ཐམས་ཅད་དུ་པད་ཟླའི་གདན་རེ་རེ། ཞེས་པའི་བར་སོང་རྗེས། གཙོ་བའི་གདན་གྱི་སྟེང་དུ་རང་ཉིད་གནས་པར་གྱུར། བདག་ཉིད་ༀ་ཡིག་སྔོན་པོ་ཞེས་པ་ནས། ལྷ་ཐམས་ཅད་རྡོ་རྗེ་སེམས་དཔས་དབུ་བརྒྱན་པར་གྱུར། ཞེས་པའི་བར་བདག་བསྐྱེད་བཞིན་ནོ། །དེ་ནས་མཆོད་པ་ནི། གཙོ་བའི་ཐུགས་ཀ་ནས་རང་ཉིད་བདག་མེད་མའི་རྣམ་པར་ལོགས་སུ་ཕྱེ་བས་མཆོད་བསྟོད་སོགས་ལས་རིམ་ལ་འཇུག་པར་མོས་ལ། མཆོད་ཡོན་ཡན་ལག་བརྒྱད་ལྡན་སོགས། །དངོས་འབྱོར་ཡིད་ཀྱིས་ སྤྲུལ་བྱས་ཏེ། །གང་གཱའི་རྒྱུན་བཞིན་ཕྱོགས་ཀུན་ནས། །རྒྱལ་བ་སྲས་བཅས་མཆོད་པར་བགྱི། །ༀ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་པུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཨཱཿ ཧཱུྃ། གཞན་འདྲ་བ་ལས་རྐང་པ་དང་པོའི་རྗེས་ཨརྒྷཾ་གྱི་གནས་སུ་པཱདྱཾ་སོགས་བཅུག་སྟེ། ཞབས་ཀྱི་དྲིལ་བསིལ་གསང་ཆབ་སོགས། པཱདྱཾ༴ མེ་ཏོག་པདྨ་ཨུཏྤལ་སོགས། པུཥྤེ༴ བདུག་སྤོས་ཨ་ཀར་ཙནྡན་སོགས། དྷུ་པེ། སྣང་གསལ་སྒྲོན་མ་ཉི་ཟླ་སོགས། ཨཱ་ལོ་ཀེ། དྲི་ཆབ་ག་བུར་གླ་རྩི་སོགས། གནྡྷེ། ཞལ་ཟས་འབྲས་ཆན་ཀ་ར་སོགས། ནེ་ཝིདྱེ། སིལ་སྙན་རྔ་དུང་གླུ་དབྱངས་སོགས། ཤབྡ་ཞེས་དང༌། རིན་ཆེན་བདུན་དང་རྟགས་བརྒྱད་འདོད་ཡོན་ལྔ། །དགའ་བཞི་ཉམས་འགྱུར་བཞི་བཞིར་རྣམ་རོལ་བའི། །ཡིད་འོང་རྡོ་རྗེ་ ལྷ་མོ་བཅུ་དྲུག་སོགས། །མཁའ་ཁྱབ་མཆོད་སྤྲིན་རྒྱལ་བའི་འཁོར་ལོར་འབུལ། །ༀ་སརྦ་ཏ་ཐཱ་ག་ཏ་སརྦ་མ་ཧཱ་པཱུ་ཛ་མེ་གྷ་ས་མུ་སོགས་ཏེ་ཕྱི་མཆོད་དོ། །ནང་མཆོད་བསང་སྦྱངས། སྟོང་པའི་ངང་ལས་ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ༀ་ལས་ཤ་ལྔ་བདུད་རྩི་ལྔ་དང་མྱོས་བྱེད་ཀྱིས་གང་བ་རྣམས་ཞུ་ཞིང་འདྲེས་པའི་དམ་རྫས་བདུད་རྩིའི་རང་བཞིན་གྱིས་གང་བ་ལ་ཧཱུྃ་གིས་འཁོར་འདས་ཀྱི་བདུད་རྩི་ཐམས་ཅད་སྤྱན་དྲངས་ཏེ་ཐིམ་པས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ། ཞེས་ལན་གསུམ་གྱིས་བརླབས་ལ། ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ངོ་བོར་གྱུར་པ་རྩ་བརྒྱུད་ཀྱི་ བླ་མ་དམ་པ་རྣམས་ཀྱི་ཞལ་དུ་ༀ་ཨཱཿ ཧཱུྃ། བཅོམ་ལྡན་འདས་བདག་མེད་མ་དང་ཐུགས་དམ་བདེ་གཤེགས་བཅུ་གཉིས་སོགས་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ༴ ནག་པོ་ཆེན་པོ་ལྕམ་དྲལ་འཁོར་དང་བཅས་པའི་ཞལ་དུ་ༀ༴ མཁའ་འགྲོ་སྡེ་བཞི་ཞིང་སྐྱོང་ཀུན་ཏུ་རི་ཀ །ཨ་པ་རཱ་ཛི་ཏ། ཀླུ་ཆེན་བཏང་གཟུངས་སོགས་སྲུང་མ་ཐུགས་དམ་ཅན་རྣམས་ཀྱི་ཞལ་དུ༴ རིགས་དྲུག་གི་སེམས་ཅན་དཀྱིལ་འཁོར་འཁོར་ལའི་ངོ་བོར་རྣམ་པར་དག་པ་རྣམས་ཀྱི་ཞལ་དུ༴ ཞེས་ནང་མཆོད་ཕུལ། སྙོམས་འཇུག་གི་བདེ་བའི་ཡེ་ཤེས་ལ་དགྱེས་དགུར་རོལ་པར་མོས་ལ། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་གསང་མཆོད། འདིར་ནི་ཐོག་མ་དབུས་ཐ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་སྟེ། །འདི་ནི་མཆོག་ཏུ་བདེ་ཆེན་ཉིད། །ཅེས་པའི་དོན་ལ་མཉམ་པར་འཇོག་པ་དེ་ཁོ་ན་ཉིད་ཀྱི་མཆོད་པའོ། །དེ་ནས་བསྟོད་པ་ནི། ཧཱུྃ། གང་གི་འཁོར་བའི་ཉེས་པ་རྣམས། །དྲན་པ་ཙམ་གྱིས་འཇོམས་མཛད་ཅིང༌། །བླ་མེད་བྱང་ཆུབ་བསྐྱེད་མཛད་པ། །བླ་མའི་ཞབས་ཀྱི་པདྨོར་འདུད། །རྣམ་དག་དྲི་མེད་དབྱིངས་ལས་སྐུ་སྤྲུལ་ཞིང༌། །སྒྱུ་མའི་སྐུ་མཆོག་མཛེས་པའི་ཆ་ལུགས་འཆང༌། །རབ་བརྗིད་གར་གྱིས་རྣམ་པར་བརྒྱན་པ་མོ། །འགྲོ་བའི་ཡིད་འཕྲོག་རྣམ་དག་སྐུ་ལ་བསྟོད། །མརྒད་མདངས་འཛིན་རབ་ཏུ་མཛེས་པའི་སྐུ། །ཕྱག་གཡས་མཆོག་སྦྱིན་གཡོན་པས་ཨུཏྤ་ལ། ། དུས་གསུམ་རྒྱལ་བའི་ཡུམ་གྱུར་འཇིགས་པ་བརྒྱད། །སྒྲོལ་མཛད་སྒྲོལ་མ་ཡུམ་ལ་ཕྱག་འཚལ་བསྟོད། །གངས་རིའི་མདོག་ཅན་ཡིད་འཕྲོག་ལྷ་མའི་སྐུ། །མདའ་གཞུ་རིན་ཆེན་སྙེ་མ་ཕྲེང་བ་བསྣམས། །འགྲོ་རྣམས་དབང་སྡུད་བློ་ཡི་མུན་པ་སེལ། །དབང་གི་ལྷ་མོ་འོད་ཟེར་ཅན་ལ་བསྟོད། །གསེར་གྱི་མདོག་ཅན་བདེ་བའི་གར་གྱིས་རོལ། །བདེན་གཉིས་ཟུང་འཇུག་ཞལ་གཅིག་ཕྱག་གཉིས་མ། །རིན་ཆེན་གླེགས་བམ་པདྨའི་ཕྲེང་བ་བསྣམས། །ཆོས་ཀུན་གདོད་ནས་སྤང་བླང་བྲལ་བའི་དོན། །ཟག་མེད་རང་བྱུང་རྒྱལ་མོར་ཕྱག་འཚལ་བསྟོད། །པད་རཱག་མདོག་ཅན་བདེ་བའི་གར་གྱིས་རོལ། །བདེན་གཉིས་ཟུང་འཇུག་ཞལ་གཅིག་ཕྱག་གཉིས་མ༑ ༑གྲི་གུག་ཐོད་འཆང་རབ་འཇིགས་ཁྲོ་མའི་སྐུ། །རྡོ་རྗེ་ཕག་མའི་སྐུ་ལ་ཕྱག་འཚལ་བསྟོད། །ཟླ་བའི་མདོག་ཅན་རིན་ཆེན་རྒྱན་གྱིས་སྤྲས། །རྡོ་རྗེ་སྐྱིལ་ཀྲུང་མཉམ་བཞག་གཡོ་བ་མེད། །མཁའ་ལྟར་དྲི་མེད་སྤྱོད་ཡུལ་ཡོངས་སུ་དག །རྗེ་བཙུན་ཀུན་ཏུ་བཟང་ལ་ཕྱག་འཚལ་བསྟོད། །གུར་གུམ་མདོག་ཅན་རིན་ཆེན་རྒྱན་གྱིས་སྤྲས། །མི་འཇིགས་སེངྒེའི་སྟན་ལ་ཕྱེད་སྐྱིལ་བཞུགས། །རལ་གྲི་ཨུཏྤལ་ཤེས་རབ་པུསྟི་བསྣམས། །མ་རིག་མུན་སེལ་འཇམ་དཔལ་དབྱངས་ལ་བསྟོད། །ཞལ་གཅིག་ཕྱག་བཞི་པདྨ་རཱ་གའི་མདོག །གནས་ལུགས་ཐུགས་ཆུད་དང་པོ་ཐལ་མོ་སྦྱར། །འོག་མ་གཉིས་ཀྱིས་ཕྲེང་བ་པད་དཀར་བསྣམས། །ཐུགས་རྗེའི་དབང་ཕྱུག་ སྤྱན་རས་གཟིགས་ལ་བསྟོད། །བྱི་རུའི་མདོག་ཅན་པདྨ་ཞགས་པ་གཡས། །ཕྲེང་བ་རིན་ཆེན་གཡོན་པའི་ཕྱག་ན་བསྣམས། །འགྲོ་ཀུན་ལས་ཀྱི་སྒྲིབ་ཀུན་འཇོམས་མཛད་པ། །བྱང་སེམས་སྒྲིབ་པ་རྣམ་པར་སེལ་ལ་བསྟོད། །ཆོས་དབྱིངས་མི་འགྱུར་ནམ་མཁའི་མདངས་འཕྲོག་ཅིང༌། །ཕྱག་གཡས་རྡོ་རྗེ་གཡོན་པས་སྡིགས་མཛུབ་སྒྲེངས། །བརྐྱང་བསྐུམ་སྟབས་ཀྱིས་བདུད་ཚོགས་འཐག་མཛད་པ། །གསང་བདག་རྡོ་རྗེ་བསྣམས་ལ་ཕྱག་འཚལ་བསྟོད། །གདོད་ནས་རྣམ་དག་འགྱུར་མེད་སྐུ་མདོག་ནག །རྡོ་རྗེའི་རལ་གྲི་སྡིགས་མཛུབ་ཨུཏྤལ་མཚན། །མངོན་སྤྱོད་ལས་ཀྱིས་ལོགས་འདྲེན་མཐར་མཛད་པ། །རབ་འཇིགས་གཤིན་རྗེ་གཤེད་ལ་ཕྱག་འཚལ་བསྟོད། །སྐྱོན་གྱིས་མ་གོས་གངས་རི་ལྟར་དཀར་སྐུ། །རིན་ཆེན་རྒྱན་སྤྲས་མཆོག་སྦྱིན་ཕྲེང་བའི་ཕྱག །ཕྱེད་ཀྲུང་གིས་རོལ་འགྲོ་རྣམས་སངས་རྒྱས་སར། །ལུང་སྟོན་ཁ་སརྤ་ཎིའི་སྐུ་ལ་བསྟོད། །ཆོས་དབྱིངས་རང་བཞིན་ཨིནྡྲ་ནཱི་ལའི་མདོག །ཞལ་གཅིག་ཕྱག་གཉིས་ཞབས་ཟུང་བརྗིད་པའི་སྐུ། །ཡེ་ཤེས་རལ་གྲི་རྡོ་རྗེ་ཞགས་པ་བསྣམས། །ཁྲོ་རྒྱལ་མི་གཡོ་མགོན་ལ་ཕྱག་འཚལ་བསྟོད། །དེ་ནས་བཟླས་པ་བྱ་བ་ནི། རང་གི་ཐུགས་ཀའི་འོད་ཟེར་གྱིས་མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་དམ་བསྐུལ་བས་འོད་ཟེར་མཁའ་ཁྱབ་ཏུ་སྤྲོས། སངས་རྒྱས་ཀྱི་མཛད་པ་བསྒྲུབས། རྡོ་རྗེ་གསུམ་གྱི་བྱིན་རླབས་དང་དངོས་གྲུབ་ཐམས་ཅད་བསྡུས་ནས་རང་དང་ མདུན་བསྐྱེད་ཀྱི་དཀྱིལ་འཁོར་ལ་ཐིམ་པར་མོས་ལ། གཙོ་འཁོར་བཅུ་གསུམ་གྱི་སྔགས་རྣམས་ཅི་ནུས་བཟླས་མཐར་ཡིག་བརྒྱ་ལན་གསུམ་གྱིས་བརྟན་པར་བྱའོ། །དེ་ནས་གཏོར་མ་འབུལ་བ་ནི། བསང་སྦྱངས། སྟོང་པའི་ངང་ལས་ཨ་ལས་ཀ་པཱ་ལའི་སྣོད་དུ་ༀ་ལས་ཤ་ལྔ་དང་བཟའ་བཅའ་བཏུང་བའི་བྱེ་བྲག་རྣམས་ཞུ་ཞིང་འདྲེས་པའི་གཏོར་རྫས་ཀྱིས་གང་བ་ལ་ཧཱུྃ་གིས་ཡེ་ཤེས་ཀྱི་བདུད་རྩི་བཀུག་སྟེ་བསྟིམ་པས་གཏོར་མ་ཡེ་ཤེས་ཀྱི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ་མང་དུ་བརྗོད། རང་གི་མདུན་གྱི་ནམ་མཁར་བླ་མ་དང་བདག་མེད་མ་ལ་བདེ་གཤེགས་བཅུ་གཉིས་ཀྱིས་བསྐོར་བའི་དཀྱིལ་འཁོར་གྱི་འཁོར་ལོ་མཁའ་འགྲོའི་ཚོགས་དང་བཅས་པ་སད་པར་གྱུར། ལྷ་རྣམས་ཀྱི་ལྗགས་རྡོ་རྗེའི་སྦུ་གུས་གཏོར་མ་གསོལ་བར་མོས་ལ། ༀ་གུ་རུ་དེ་བ་ཌཱ་ཀི་ནཱི་ས་པ་རི་ཝཱ་ར་ཨི་དཾ་བ་ལ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་ལན་བདུན་ནམ་གསུམ་གྱིས་དབུལ། ཨརྒྷཾ་སོགས་དང༌། འབྲུ་གསུམ་གྱིས་ནང་མཆོད། གང་གི་དྲིན་གྱིས་བདེ་ཆེན་སོགས་ཀྱིས་བླ་མ་དང༌། ཚེ་རབས་ཀུན་གྱི་སྐྱབས་གྱུར་ཅིང༌། །མི་འདོད་ཐམས་ཅད་སྤངས་ནས་ནི། །འདོད་པའི་དོན་རྣམས་སྟེར་མཛད་པ། །ཡི་དམ་ལྷ་ལ་ཕྱག་འཚལ་བསྟོད། །སོགས་ཀྱིས་དཀྱིལ་འཁོར་པ་ལ་བསྟོད་ནས། བླ་མ་ཡི་དམ་མཁའ་འགྲོར་བཅས། །ཁྱོད་ལ་མཆོད་ཅིང་བསྟོད་པ་ཡིས། །རྣལ་འབྱོར་བདག་ཅག་འཁོར་བཅས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་ཕྲིན་ལས་གཞོལ། མགོན་པོ་ཨ་གྷོ་ར་སོགས་སྲུང་མ་རྣམས་ཀྱི་གཏོར་ཆོག་དང༌། འཇིག་རྟེན་པ་ལ་ཆ་གསུམ་གྱི་ཆོ་གས་གཏོར་མ་བྱིན་ནོ། །བཞི་པ་དབང་བསྐུར་བ་ལ་གཉིས་ལས། རང་དོན་བདག་འཇུག་ནི། འོག་ནས་འབྱུང་བའི་དབང་རྣམས་ཆོ་ག་རྒྱས་བསྡུས་ཅི་རིགས་པས་བདག་འཇུག་གི་ཚུལ་དུ་བླང་བའོ། །གཞན་དོན་སློབ་མ་ལ་དབང་བསྐུར་བ་ལ། སྔོན་འགྲོ་འཇུག་པ་ནི། སློབ་བུ་རྣམས་ལས་བུམ་གྱིས་ཁྲུས་བྱས། ཕྱག་བྱས་ཏེ་གྲལ་དུ་འཁོད་པ་ལ། སེམས་བསྐྱེད་གསལ་འདེབས་དང་ཆོས་བཤད་ཇི་ལྟར་རིགས་པ་སྔོན་དུ་འགྲོ་བས། འདིར་རྗེ་བཙུན་དམ་པ་སངས་རྒྱས་ལ་བཀའ་བབས་རྣམ་བཞིའི་གདམས་པ་མངའ་བ་ལས། འདི་ནི་མཆོག་གི་བཀའ་བབས་བདེ་གཤེགས་བཅུ་གཉིས་ཀྱི་དབང་བསྐུར་བའི་སྐབས་ལགས། དེའང་སྔོན་བདག་མེད་མས་དམ་པ་ཉིད་རང་གི་ལུས་ཀྱི་དཀྱིལ་འཁོར་དུ་བཅུག་ནས་དབང་བསྐུར་བ་ལྟར་འདིར་སྐལ་ལྡན་གྱི་སློབ་མ་ལས་དང་པོ་བ་ལ་དབང་བསྐུར་བའི་སྔོན་དུ་དེ་མཚོན་བྱེད་མཚན་མའི་དཀྱིལ་འཁོར་དུ་འཇུག་དགོས་པ་ཡིན་པས་ཐོག་མར་འཇུག་པའི་ཆོས་རྣམས་ཞུ་བ་ལ་ཡོན་དུ་མཎྜལ་ཕུལ། ཆོས་སུ་གཞུག་པ་ནི་ཨ་ཁཾ་ཝཱི་ར་ཧཱུྃ་ལན་གཉིས་ཀྱིས་མིག་དར་དགབ་ཅིང་མེ་ཏོག་བྱིན། དེ་ནས་རྗེ་བཙུན་དམ་པ་དང་གཉིས་སུ་མེད་པའི་བླ་མ་བདེ་གཤེགས་བཅུ་གཉིས་ཀྱི་ངོ་བོར་བཞུགས་པ་ལ་ཐལ་མོ་སྦྱར་ཏེ་གསོལ་བ་གདབ་པ་འདིའི་རྗེས། ན་མོ་དགའ་ཆེན་ཁྱོད་བདག་སྟོན་པ་སྟེ། །ཧེ་རུ་ཀ་དཔལ་དགོངས་སུ་གསོལ། །བྱང་ཆུབ་སེམས་ལས་རྨད་བྱུང་བའི། །སྡོམ་པ་རྒྱ་མཚོ་བདག་ལ་སྩོལ། །ལན་གསུམ། གནང་བ་བྱིན་པ་ནི། བུ་ཁྱོད་ཚུར་ཤོག་ཐེག་ཆེན་སྔགས། །ཁྱོད་ནི་ཚུལ་ཆེན་སྣོད་དང་ལྡན། །གསང་སྔགས་ སྤྱོད་ཚུལ་ཆོ་ག་འདི། །ཁྱོད་ལ་ཡང་དག་བསྟན་པར་བྱ། །བདག་གཞན་སེམས་ཅན་ཐམས་ཅད་འཁོར་བའི་སྡུག་བསྔལ་གྱིས་འཇིགས་ནས་སྐྱབས་ཞུ་ན་ཅི་མཛད་ན་བླ་མ་དཀོན་མཆོག་མཁྱེན་སྙམ་པས་འདིའི༴ སངས་རྒྱས་ཆོས་དང་དགེ་འདུན་ལ། །ཐར་པ་འདོད་ཕྱིར་སྐྱབས་སུ་མཆི། །ལན་གསུམ། སྔོན་རྒྱལ་བ་སྲས་བཅས་ཀྱིས་ཇི་ལྟར་ཐུགས་བསྐྱེད་པ་ལྟར་བདག་གིས་ཀྱང་གཞན་དོན་དུ་འབྲས་བུ་ལ་སྨོན་པ་དང༌། དེའི་རྒྱུ་ལམ་ལ་འཇུག་པ་དང༌། དོན་དམ་པར་ཆོས་ཐམས་ཅད་ལ་དགག་སྒྲུབ་མེད་པར་བཞག་པས་གང་ཤར་རང་གྲོལ་དུ་ཐལ་ལེར་སྣང་བ་དེ། དེ་ལྟར་སེམས་གསུམ་བསྐྱེད་སྙམ་པ་འདིའི༴ སེམས་ཅན་དོན་ཀུན་བསྒྲུབ་པའི་ཕྱིར། །བྱང་ཆུབ་སེམས་གསུམ་བསྐྱེད་པར་བགྱི། །ལན་གསུམ། དེ་ནས་སྔགས་ཀྱི་དམ་ཚིག་བཟུང་བ་ལ། སྤྱིར་རང་དོན་དུ་མི་དགེ་བ་ཐམས་ཅད་སྤང་སྙམ་པས་འདིའི༴ སེམས་ཅན་དོན་ཕྱིར་མ་གཏོགས་པ། །བྱ་བ་རང་དོན་ཐམས་ཅད་སྤང༌། །ལན་གསུམ། ཁྱད་པར་བུམ་དབང་གཙོ་བོར་གྱུར་པའི་དབང་གི་དམ་ཚིག་རྣམས་ཚུལ་བཞིན་དུ་བཟུང་སྙམ་པས་འདིའི༴ གསང་བ་སྔགས་ཀྱི་དམ་ཚིག་ནི། །བདེ་གཤེགས་རིགས་ལྔའི་སྡོམ་པ་བཟུང༌། །བཅུ་བཞིར་ཕྱེ་བའི་ལྟུང་བ་དང༌། །ཡན་ལག་གཉིས་པ་སྤང་བར་བགྱི། །ལན་གསུམ། དེ་ནས་ལས་ཀྱི་རྡོ་རྗེས་ཁྲིད་དེ་སྒོ་བཞི་ནས་ཚད་མེད་པ་བཞིས་དཀྱིལ་འཁོར་དུ་ཞུགས་པའི་ མོས་པ་མཛོད། ༀ་ཨ་ཁཾ་ཝཱི་ར་ཧཱུྃ་ཞེས་ཡོལ་བའི་ནང་དུ་བཅུག །ཁྱམས་ལ་གནས་པས་ཕྱོགས་བཞི་ནས་ཕྱག་བྱས་པའི་མོས་པས་འདིའི༴ ན་མོ་སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །དཔའ་བོ་རྣལ་འབྱོར་མ་འཁོར་ལོ། །དཀྱིལ་འཁོར་ལྷ་ལ་ཕྱག་འཚལ་ལོ། །དེ་ནས་དམ་ལ་བཞག་པ་ནི། ན་མོ་ཆོས་འདི་ཟབ་སྟེ་མཐོང་བར་དཀའ། །ཀུན་དང་ཐུན་མོང་མ་ཡིན་པས། །ཚུལ་བརྗོད་པས་ནི་ཉམས་པ་སྐྱེད། །ཉམས་ན་བདུད་ཀྱིས་བཟུང་བར་འགྱུར། །ཞེས་གདམས་ནས་བྲོ་བོར་བ་འདིའི༴ ས་མ་ཡ་ན་ར་ཀན། ལན་གསུམ། དེ་ནས་ནང་འཇུག་གི་དངོས་གཞི་ནི་ཡེ་ཤེས་དབབ་པའི་སླད་དུ་མཎྜལ་ཕུལ། གསོལ་བ་གདབ་པ་འདིའི༴ དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །བདེ་བར་གཤེགས་པ་བཅུ་གཉིས་བདག་ལ་དབབ་ཏུ་གསོལ། ལན་གསུམ། དེ་ནས་ལུས་བསྲང༌། རླུང་ཁ་སྦྱོར་དུ་བཅིངས་ལ། ཁྱེད་རང་བཅོམ་ལྡན་འདས་ཕག་མོ་དམར་མོ་ཞལ་གཉིས་མ་གྲི་ཐོད་འཛིན་ཅིང་ཞབས་གར་སྟབས་ལིང་ལིང་བསྒྱུར་བར་སྒོམས་མཛོད། བླ་མ་དང་དཀྱིལ་འཁོར་གྱི་ལྷའི་ཐུགས་ཀ་ནས་འོད་ཟེར་འཕྲོས། སངས་རྒྱས་ཐམས་ཅད་བདེ་གཤེགས་བཅུ་གཉིས་ཀྱི་རྣམ་པར་ཁ་ཆར་དང་བུ་ཡུག་འཚུབས་པ་ལྟར་བྱུང༌། ཁྱེད་རང་ལ་སིབ་སིབ་ཐིམ་པས་ལུས་སེམས་ཐམས་ཅད་བདེ་བས་ཁྱབ་ཅིང་འབར་བར་གྱུར་སྙམ་དུ་མོས་པ་མཛོད། ཁྱད་པར་གྱི་སྤོས་བསྲེག་ཅིང་རོལ་མོའི་སྒྲ་དང་བཅས། ༀ་ཏིཥྛ་མ་ཧཱ་ཀྲོ་དྷཱ་ཨཱ་བེ་ཤ་ཡ་ཧཱུཾ། ཞེས་བཟླས་པས་དབབ། དེ་བརྟན་ཕྱིར་རྡོ་རྗེ་སྤྱི་བོར་རྒྱ་གྲམ་དུ་བཞག་ལ་ཏིཥྛ་བཛྲ། རིགས་བརྟག་ཕྱིར་འདིའི་རྗེས་ཟློས་དང་བཅས་མེ་ཏོག་དོར་བར་མཛོད། ཐར་པའི་གྲོང་མཆོག་གཞལ་ཡས་འདིར། །རིག་པའི་མེ་ཏོག་འདི་དོར་བས། །སྔོན་ནས་ལས་ཀྱིས་འབྲེལ་བའི་ལྷ། །གང་ཡིན་དེ་དང་འཕྲད་པར་ཤོག །ༀ་པྲ་ཏཱིཙྪ་བཛྲ་ཧོ། གང་གིས་བཞེས་པའི་ལྷས། མེ་ཏོག་དེ་རང་གི་སྤྱི་བོར་བཅིངས་པའི་མོས་པས། ༀ་པྲ་ཏཱི་གྲིཧྞ་ཨི་མཾ་ས་ཏྭ་མ་ཧཱ་བ་ལ། ཞེས་སྤྱི་བོར་བཀོད། མ་རིག་པའི་ལིང་ཏོག་མིག་དར་དང་ལྷན་དུ་བསལ་བར་མོས་ལ། སྔོན་གྱི་མིག་མཁན་མཁས་པ་ཡིས། །འཇིག་རྟེན་ལིང་ཏོག་བསལ་བ་ལྟར། །ཤེས་རབ་ཐབས་དང་ཐུར་མ་ཡིས། ། ཁྱོད་ཀྱི་མི་ཤེས་སྒྲིབ་པ་བསལ། །ཞེས་མིག་དར་བཤུ། ཡེ་ཤེས་ཀྱི་མིག་ཐོབ་པ་ལ་མཐོང་བ་བསྟན་ཏེ། ཧེ་བཛྲ་པཱ་ཤྱ། འདི་ལྟར་བཅོམ་ལྡན་འདས་བདག་མེད་མ་ལ་བདེ་གཤེགས་བཅུ་གཉིས་ཀྱིས་བསྐོར་བའི་དཀྱིལ་འཁོར་ཆེན་པོ་རྟེན་དང་བརྟེན་པར་བཅས་པ་ཐམས་ཅད་མངོན་སུམ་བཞིན་དུ་མཐོང་བར་གྱུར་སྙམ་པ་དང༌། དེའང་སེམས་ཉིད་རང་བྱུང་གི་ཡེ་ཤེས་མ་འགགས་པའི་རོལ་རྩལ་ལྷའི་དཀྱིལ་འཁོར་དུ་ཤར་བའོ་སྙམ་དུ་ངེས་པར་གྱིས་ཤིག །དེས་འཇུག་པའི་ཆོས་རྣམས་སོང༌། དབང་དངོས་གཞི་ལ་ལྔ་ལས། དང་པོ་དཀྱིལ་འཁོར་གྱི་ཤར་ཕྱོགས་སུ་བླ་མ་ལ་བུམ་དབང་གི་དོན་དུ་མཎྜལ་ཕུལ་མཛོད། དེ་ནས་གསོལ་བ་གདབ་པ་འདིའི༴ བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་ཆེ་བའི་ཆེ་སྦྱིན་ལྟར། །བདག་ཀྱང་སྐྱོབ་པའི་དོན་སླད་དུ། །ནམ་མཁའི་རྡོ་རྗེ་བདག་ལ་སྩོལ། །ལན་གསུམ། དེའི་ལན་དུ་བླ་མས། ཀྱེ་ཧོ་རྣལ་འབྱོར་དབང་ཕྱུག་ཚོགས། །འཇིག་རྟེན་འཁྲུལ་པའི་ལུས་སྤངས་ནས། །ཧེ་རུ་ཀ་དཔལ་རྡོ་རྗེ་ཡི། །དཀྱིལ་འཁོར་ཆེན་པོར་ཁྱོད་རོལ་ལམ། །ཞེས་སྤྲོ་བ་དྲིས་པ་ལ། དེ་ལྟར་རོལ་པར་སྤྲོ་ལགས། ཞེས་ལན་བཏབ། དེ་ནས་ཐོག་མར་གསེར་འགྱུར་གྱི་རྩིས་ལྕགས་གསེར་དུ་བསྒྱུར་བ་ལྟར་ཆོ་གའི་ཐབས་ཀྱིས་ལུས་ལྷའི་སྐུར་སྨིན་པར་བྱེད་པ་བུམ་དབང་ཡིན་པས། ལྷ་སོ་སའི་དབང་བསྐུར་བའི་ཚེ་དཀྱིལ་འཁོར་གྱི་ལྷ་རྣམས་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱོན་ནས་ཁྱོད་རང་གི་སྤྱི་བོ་ནས་སིབ་སིབ་ཐིམ་པས། ཐ་མལ་གྱི་ལུས་འདི་མ་སྤངས་པར་ལྷ་དེ་དང་དེའི་སྐུར་ལམ་ལམ་དུ་གྱུར་པའི་མོས་པ་མཛོད། ལྷ་ཙཀ་རྣམས་ཀྱིས་དབང་རིམ་པར་བསྐུར་ལ། སྐྱེ་མེད་དབྱིངས་ལས་འགགས་མེད་སྐུ། །སྒྱུ་མ་ལྟ་བུར་ཡོངས་ཤར་བ། །བདག་མེད་ལྷ་མོའི་དབང་བསྐུར་བས། །རང་ལུས་ལྷ་སྐུར་སྨིན་པར་ཤོག །ༀ་ཨཱཿ ཨཾ་སྭཱ་ཧཱ་ཨ་བྷི་ཥིཉྩ་མི། རྐང་པ་དང་པོ་གཉིས་འདྲ་བ་ལས། རྗེ་བཙུན་སྒྲོལ་མའི་དབང་བསྐུར་བས། །ཕྲིན་ལས་ཐོགས་མེད་གྲུབ་པར་ཤོག །ༀ་ཏུ་རེ་ཏུཏྟཱ་རེ་ཏུ་རེ་སྭཱ་ཧཱ་ཨ་བྷི་ཥིཉྩ་མི། འོད་ཟེར་ཅན་མའི་དབང་བསྐུར་བས། །འགྲོ་ཀུན་དབང་དུ་འདུས་པར་ཤོག །ༀ་མཱ་རི་ཙྱཻ་མཾ་སྭཱ་ཧཱ་ཨ་བྷི་ཥིཉྩ་མི། རང་བྱུང་རྒྱལ་མའི་དབང་བསྐུར་བས། ། འདོད་ཡོན་ལམ་དུ་ལོངས་པར་ཤོག །ༀ་པྲཾ་ཧ་རི་ནི་ས་ཧཱུྃ་ཨ་བྷི་ཥིཉྩ་མི། རྡོ་རྗེ་ཕག་མའི་དབང་བསྐུར་བས། །ཟག་མེད་བདེ་བ་རྒྱས་པར་ཤོག །ༀ་བཛྲ་ཝཱ་ར་ཧཱི་བཻ་རོ་ཙ་ནཱི་ཧཱུྃ་ཕཊ་ཨ་བྷི༴ ཀུན་ཏུ་བཟང་པའི་དབང་བསྐུར་བས། །གཉུག་མའི་སེམས་ཉིད་རྟོགས་པར་ཤོག །ས་རཱ་ཛ་ཡ་ཧཱུྃ་ཕཊ་ཨ་བྷི༴ འཇམ་དཔལ་དབྱངས་ཀྱི་དབང་བསྐུར་བས། །ཤེས་རབ་ཐོགས་པ་མེད་པར་ཤོག །ༀ་པྲཛྙཱ་ཝཱ་གཱི་ཤྭ་རི་མུཾ་ཨ་བྷི༴ སྤྱན་རས་གཟིགས་ཀྱི་དབང་བསྐུར་བས། །ཚད་མེད་ཐུགས་རྗེ་སྐྱེ་བར་ཤོག །ༀ་པདྨ་ཙིནྟཱ་མ་ཎི་ཛྭ་ལ་ཧཱུྃ་ཕཊ་ཨ་བྷི༴ སྒྲིབ་པ་རྣམ་སེལ་དབང་བསྐུར་བས། །རང་རྒྱུད་སྒྲིབ་པ་དག་པར་ཤོག །ༀ་བཛྲ་ས་ཏྭ་ཐལྷ་ས་རཾ་ཧཱུྃ་ཕཊ་ཨ་བྷི༴ ཕྱག་ན་རྡོ་རྗེའི་དབང་བསྐུར་བས། །གདུག་པ་འདུལ་བའི་མཐུ་ཐོབ་ཤོག །ༀ་བཛྲ་ཙཎྜ་མཱ་ཧཱ་རོ་ཥ་ཎི་ཧཱུྃ་ཕཊ་ཨ་བྷི༴ གཤིན་རྗེ་གཤེད་ཀྱི་དབང་བསྐུར་བས། །ཁམས་གསུམ་སྒྲོལ་བའི་མཐུ་ཐོབ་ཤོག །ༀ་ཧྲཱིཿ ཥྚི་ཝི་ ཀྲ་ཏཱ་ན་ན་ཧཱུྃ་ཕཊ་ཨ་བྷི༴ ཁ་སརྤ་ཎིའི་དབང་བསྐུར་བས། །སངས་རྒྱས་ཞིང་དུ་ལུང་སྟོན་ཤོག །ༀ་ཧྲཱིཿ མ་ཎ་ཁ་སརྤ་ཎ་ཧཱུྃ་ཕཊ་ཨ་བྷི༴ མི་གཡོ་མགོན་པོའི་དབང་བསྐུར་བས། །རིག་པ་ཡེ་ཤེས་སྒོ་ཕྱེ་ཤོག །ༀ་ཙཎྜ་མཱ་ཧཱ་རོ་ཥ་ཎ་ཧཱུྃ་ཕཊ་ཨ་བྷི་ཥིཉྩ་མི། ཞེས་དབང་བསྐུར་བས་རང་ལུས་ཀྱིས་མཚོན་པའི་ཆོས་ཐམས་ཅད་སྣང་སྟོང་ལྷའི་སྐུར་སྨིན་པ་དེ་ཉིད་བརྟན་བྱེད་བུམ་པའི་དབང་བསྐུར་བ་དངོས་ནི། དཀྱིལ་འཁོར་གྱི་གཙོ་བའི་ཐུགས་ཀ་ ནས་སྤྲུལ་པའི་དབང་ལྷ་རྣམས་ཀྱིས་བདུད་རྩིས་གང་བའི་བུམ་པ་ཐོགས་ཏེ་བཀྲ་ཤིས་པའི་རྣམ་པ་དུ་མས་དབང་བསྐུར་བའི་མོས་པ་མཛོད། ༀ་རྣམ་པར་དག་པའི་བུམ་པ་འདིས། །བདེ་གཤེགས་སྐུ་ཡི་དབང་བསྐུར་བས༑ ༑ལུས་ཀྱི་སྒྲིབ་པ་དག་གྱུར་ནས། །བུམ་པའི་དབང་མཆོག་ཐོབ་པར་ཤོག །ༀ་ཨཱཿ ཧཱུྃ་སྭཱ་ཧཱ་ཨ་བྷི་ཥིཉྩ་མི། སྤྱི་བོར་བཞག་ཅིང་བུམ་ཆུ་བླུད། ཅེས་བུམ་པའི་དབང་བསྐུར་བས་སྐུ་གང་དྲི་མ་དག་ཆུ་ལྷག་མ་ཡར་ལུད་པ་ལས་རྡོ་རྗེ་སེམས་དཔས་དབུར་བརྒྱན་པར་གྱུར། དེས་གཙོ་བོར་ལུས་ཀྱི་དྲི་མ་དག་ཅིང༌། སངས་རྒྱས་ཀྱི་སྐུ་རྡོ་རྗེ་སྣང་སྟོང་གཉིས་སུ་མེད་པ་ཐོབ་པར་བྱེད། དེ་ཐོབ་པའི་ཐབས་ལྷའི་ཏིང་ངེ་འཛིན་སྒོམ་པའི་སྐལ་པ་ཅན་དུ་བྱས་པ་ཡིན་ནོ། །གཉིས་པ་དཀྱིལ་འཁོར་གྱི་ལྷོར་གསང་དབང་གི་དོན་དུ་མཎྜལ་ཕུལ། གསོལ་བ་གདབ་པ་འདིའི༴ ཀུན་མཁྱེན་མགོན་པོ་ཐུགས་རྗེ་ཅན། །ཡོན་ཏན་རྒྱ་མཚོའི་བཀའ་དྲིན་གྱིས། །དེང་ནུབ་བཀའ་དྲིན་ཆེན་པོ་གསོལ། །ལན་གསུམ། དེའི་ལན་དུ་བླ་མས། ཀྱེ་ཧོ་ཁྱོད་ནི་ཇི་ལྟ་བུ། །སེམས་ཅན་འཁྲུལ་པའི་ངག་སྤངས་ནས། །རྩ་རླུང་བདེ་ཆེན་བྱང་སེམས་ཀྱི། །དཀྱིལ་འཁོར་ཆེན་པོར་ཁྱོད་རོལ་ལམ། །ཞེས་པའི་ལན་དུ། དེ་ལྟར་རོལ་བར་སྤྲོ་ལགས། ཞེས་བཏབ། ཇི་ལྟར་དུག་འགྱུར་གྱི་སྨན་གྱིས་དུག་སྨན་དུ་བསྒྱུར་བ་ལྟར་ཆོ་གའི་ཐབས་ཀྱིས་ངག་སྔགས་སུ་སྨིན་པར་བྱེད་པ་གསང་དབང་ཡིན་པས་དཀྱིལ་འཁོར་གྱི་ལྷ་རྣམས་ཀྱི་མགྲིན་པ་ནས་སྔགས་ཀྱི་ ཡིག་འབྲུ་རྣམས་ཐོན་པ་ཁྱོད་རང་གི་མགྲིན་པའི་གནས་སུ་ཐིམ་པས། ཐ་མལ་གྱི་ངག་འདི་མ་སྤངས་པར་ལྷ་དེ་དང་དེའི་གསང་སྔགས་ཀྱི་སྒྲ་གདངས་སུ་ལྷང་ལྷང་དུ་གྱུར་པའི་མོས་པ་མཛོད། སྔགས་བྱང་མགྲིན་པར་བཞག་ནས་སློབ་དཔོན་གྱིས་སོ་སོའི་སྔགས་མཐར་ཨ་བྷི་ཥིཉྩ་མཾ་ཞེས་བཏགས་ནས་བརྗོད། ཅེས་དབང་བསྐུར་བས་རང་གི་ངག་གིས་མཚོན་པའི་འཁོར་འདས་ཀྱི་སྒྲ་སྐད་ཐམས་ཅད་གྲགས་སྟོང་གཞོམ་མེད་ཀྱི་རང་སྒྲར་སྨིན་པ་དེ་ཉིད་བརྟན་བྱེད་བདུད་རྩིའི་ཐིག་ལེས་གསང་དབང་བསྐུར་བ་དངོས་ནི། ༀ་ཞེས་སངས་རྒྱས་ནམ་མཁའ་གང་བར་སྤྱན་དྲངས་པ་སློབ་དཔོན་བདག་མེད་མར་གསལ་བའི་ཞལ་དུ་བཅུག །ཨཱཿ ཞེས་སྐུའི་དབྱིབས་བརྒྱུད་དེ་བྱང་ཆུབ་ཀྱི་སེམས་སུ་ཞུ་བ། ཧཱུྃ་ཞེས་མཁའ་གསང་ནས་སྤྲོས་པ་ཐོད་པའི་བདུད་རྩི་དང་འདྲེས་པར་མོས་ལ། རླུང་འཇུག་གནས་ལྡང་གསུམ་དང་སྦྱར་བའི་ༀ་ཨཱཿ ཧཱུྃ་གི་བཟླས་པ་ལན་གསུམ་གྱིས་བདུད་རྩི་བྱིན་གྱིས་བརླབས་ནས། ཨཱཿ དྲི་མེད་བདུད་རྩིའི་ཐིག་ལེ་འདིས། །བདེ་གཤེགས་གསུང་གི་དབང་བསྐུར་བས། །ངག་གི་སྒྲིབ་པ་དག་གྱུར་ནས། །གསང་བའི་དབང་མཆོག་ཐོབ་པར་ཤོག །བདུད་རྩི་སྲིན་ལག་གིས་བླངས་ནས། ཨ་བྷི་ཥིཉྩ་ༀ་ཞེས་དཔྲལ་བར་ཐིག་ལེ་བཞག་པས༑ བདེ་ཆེན་འཁོར་ལོའི་གནས་སུ་ༀ་ཡིག་དཀར་པོ། ཨ་བྷི་ཥིཉྩ་ཨཱཿ ཞེས་མགྲིན་པར་བཞག་པས། ལོངས་སྤྱོད་འཁོར་ལོའི་གནས་སུ་ཨཱཿ ཡིག་དམར་པོ། ཨ་བྷི་ཥིཉྩ་ཧཱུྃ་ཞེས་སྙིང་གར་བཞག་པས། ཆོས་ཀྱི་འཁོར་ལོའི་གནས་སུ་ ཧཱུྃ་ཡིག་སྔོན་པོ། ཨ་བྷི་ཥིཉྩ་ཧྲཱིཿ ཞེས་ལྟེ་བར་བཞག་པས་སྤྲུལ་པའི་འཁོར་ལོའི་དབུས་སུ་ཧྲཱིཿ སེར་པོ་རྣམས་ལམ་གྱིས་གྲུབ་པར་གྱུར། དེ་ནི་གཏུམ་མོ་འབར་བས་རྩ་མདུད་གྲོལ་ནས་རོ་རྐྱང་གི་རླུང་དབུ་མར་འགགས་པ་འཁོར་ལོ་བཞིའི་གནས་སུ་འཆིང་ནུས་པའི་རྟེན་འབྲེལ་བསྒྲིག་པ་སྟེ། སེམས་གསལ་སྟོང་བརྗོད་བྲལ་གྱི་ཡེ་ཤེས་རྒྱུད་ལ་སྐྱེས་པར་བསམ་མོ། །དེས་གཙོ་བོར་ངག་གི་དྲི་མ་དག་ཅིང༌། སངས་རྒྱས་ཀྱི་གསུང་རྡོ་རྗེ་གསལ་སྟོང་གཉིས་སུ་མེད་པ་ཐོབ་པར་བྱེད། དེ་ཐོབ་པའི་ཐབས་རྫོགས་རིམ་རླུང་སྒོམ་པའི་སྐལ་བ་ཅན་དུ་བྱས་པ་ཡིན་ནོ། །གསུམ་པ་དལ་གྱི་ནུབ་ཏུ་ཤེར་དབང་གི་དོན་དུ་མཎྜལ་ཕུལ། གསོལ་བ་གདབ་པ་འདིའི༴ བཅོམ་ལྡན་ཞི་བ་ཆེན་པོ་ཀྱེ། །ཉོན་མོངས་དགྲ་ལས་རྒྱལ་བའི་བདག །དོ་ནུབ་བཀའ་དྲིན་ཆེན་པོ་འདི། །བདེ་བ་དེ་ཉིད་བརྟན་དུ་གསོལ། །ལན་གསུམ། དེའི་ལན་དུ་གུ་རུས། ཀྱེ་ཧོ་སྐལ་ལྡན་ཐུགས་རྗེ་ཅན། །འཁྲུལ་པའི་ཟག་རྒྱུ་གཏན་སྤངས་ནས༑ ༑ཟག་མེད་བདེ་ཆེན་བྱང་སེམས་ཀྱི། །དཀྱིལ་འཁོར་ཆེན་པོ་ཅང་རོལ་ལམ། །ཞེས་པའི་ལན་དུ། དེ་ལྟར་རོལ་བར་སྤྲོ་ལགས། ཞེས་བཏབ། ཇི་ལྟར་ནོར་བུ་ཆུ་དྭངས་དེ་ཆུ་རྙོགས་མ་ཅན་གྱི་ནང་དུ་བཅུག་པས། རྙོགས་མ་རང་དྭངས་ལ་འགྲོ་བ་ལྟར་ཆོ་གའི་ཐབས་ཀྱིས་ཡིད་བདེ་སྟོང་གི་ཡེ་ཤེས་སྨིན་པར་བྱེད་པ་ཤེས་རབ་ཡེ་ཤེས་ཀྱི་དབང་ཡིན་པས། དཀྱིལ་འཁོར་གྱི་ལྷ་རྣམས་ཀྱི་ཐུགས་ཡེ་ཤེས་མཚོན་བྱེད་ཕྱག་མཚན་རྣམས་ ཁྱེད་རང་ལ་གཏད་པས་ཐ་མལ་གྱི་ཡིད་མ་སྤངས་པར་ཐུགས་རྣམ་པར་གྲོལ་བའི་ཡེ་ཤེས་སུ་ལྷག་ལྷག་འཆར་བའི་མོས་པ་མཛོད། ཕྱག་མཚན་རྣམས་སོ་སོའི་སྔགས་ལ་ཨ་བྷི་ཥིཉྩ་མཾ་ཞེས་བཏགས་པས་ལག་ཏུ་གཏད་དོ། །དེ་ལྟར་དབང་བསྐུར་བས་འཁོར་འདས་ཀྱི་རྟོག་ཚོགས་ཐམས་ཅད་རིག་སྟོང་སྤྲོས་བྲལ་བདེ་བ་ཆེན་པོར་སྨིན་པར་བྱས། དེ་ཉིད་བརྟན་བྱེད་བདུད་རྩི་བླུད་པས་ཤེར་དབང་བསྐུར་བ་དངོས་ནི། སློབ་དཔོན་སྐད་ཅིག་གིས་ཧེ་རུ་ཀར་གནས་བསྒྱུར་ནས་བདག་མེད་མ་དང་སྙོམས་པར་ཞུགས་པའི་བྱང་ཆུབ་ཀྱི་སེམས་དཀར་དམར་འདྲེས་པའི་དྭངས་མ་བདུད་རྩི་དང་གཉིས་མེད་དུ་གྱུར་པར་མོས་ལ། ཧཱུྃ་བྱང་ཆུབ་སེམས་ཀྱི་བདུད་རྩི་འདིས། ། བདེ་གཤེགས་ཐུགས་ཀྱི་དབང་བསྐུར་བས། །ཡིད་ཀྱི་སྒྲིབ་པ་དག་གྱུར་ནས། །གསུམ་པའི་དབང་མཆོག་ཐོབ་པར་ཤོག །འདི་རྩ་ཁམས་ཀྱི་བདེ་གཤེགས་དཔའ་བོ་དང་རྣལ་འབྱོར་མ་རྣམས་མཆོད་པའི་རྫས་ཡིན་པས་འཐུང་ཞིག །ༀ་ཨཱཿ ཧཱུྃ་ཞེས་བདུད་རྩི་ཧུབ་གསུམ་བླུད་པས། རྩ་རླུང་ཐིག་ལེ་གསུམ་བྱིན་གྱིས་བརླབས་པའི་རྐྱེན་གྱིས་ལྟེ་བའི་གཏུམ་མོ་འབར་བས་སྤྱི་བའི་ཧཾ་ཞུ་བའི་དགའ་བཞིའི་ཡེ་ཤེས་བདེ་བ་ཆེན་པོས་རྒྱུད་ཡོངས་སུ་གང་བའི་མོས་པ་མཛོད། དེས་གཙོ་བོར་ཡིད་ཀྱི་དྲི་མ་དག་ཅིང༌། སངས་རྒྱས་ཀྱི་ཐུགས་རྡོ་རྗེ་བདེ་སྟོང་གཉིས་སུ་མེད་པ་ཐོབ་པར་བྱེད། དེ་ཐོབ་པའི་ཐབས་རྫོགས་རིམ་ཕོ་ཉའི་ལམ་ཞུ་བདེ་སྒོམ་པའི་སྐལ་བ་ཅན་དུ་ བྱས་པ་ཡིན་ནོ། །བཞི་པ་དཀྱིལ་འཁོར་གྱི་བྱང་དུ་ཚིག་དབང་རིན་པོ་ཆེ་ཞུ་བའི་དོན་དུ་མཎྜལ་ཕུལ། གསོལ་བ་གདབ་པ་འདིའི༴ མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པའི་ཡེ་ཤེས་གཙོ། །རྣམ་པ་ཀུན་ཏུ་མཆོག་གྱུར་པ། །རང་གི་དེ་ཉིད་བསྟན་དུ་གསོལ། །ལན་གསུམ། དེའི་ལན་གུ་རུས། ཀྱེ་ཧོ་རིག་པའི་སྐྱེས་བུ་རྣམས། །མཚན་མའི་རྟོག་པ་རབ་སྤངས་ནས། །སྤྲོས་མེད་བདེ་ཆེན་བྱང་སེམས་ཀྱི། །དཀྱིལ་འཁོར་ཆེན་པོ་ཁྱོད་རོལ་ལམ། །ཞེས་དྲིས་པའི་ལན་དུ། དེ་ལྟར་རོལ་བར་སྤྲོ་ལགས། ཞེས་བཏབ། ཇི་ལྟར་བར་སྣང་གི་སྤྲིན་ནམ་མཁའི་ཀློང་དུ་དྭངས་པ་ལྟར་ཐབས་ཟབ་མའི་གནད་ཀྱིས་ཕྲ་བའི་ལུས་ངག་ཡིད་གསུམ་གྱི་ཆགས་རྟོག་ཐམས་ཅད་དབྱིངས་སུ་གྲོལ་བས་རྒྱུད་ཡོངས་སུ་དག་པ་རྡོ་རྗེ་བཞི་ཡི་བདག་ཉིད་སྐུ་དང་ཡེ་ཤེས་ཟུང་འཇུག་བསམ་མི་ཁྱབ་ཀྱི་ལྷན་སྐྱེས་དེ་ཁོ་ན་ཉིད་སྤྲོས་བྲལ་བདེ་སྟོང་དུ་རང་ཤར་བ་ནི་དབང་བཞི་པའི་ཡེ་ཤེས་ཏེ༑ དེ་ལྟར་ཉམས་སུ་མྱོང་བར་མོས་ལ་ཅུང་ཟད་མཉམ་པར་ཞོག་མཛོད། མཆོག་གི་བརྡ་དང་བདེ་གཤེགས་ཀྱི་སྒྲུབ་ཐབས་གླེགས་བམ་སྤྱི་བོར་འཇོག་ཅིང༌། ཧྲཱིཿ ལུས་འདི་དག་པ་རྒྱལ་བའི་སྐུ། །ངག་ནི་གྲགས་སྟོང་སྔགས་ཀྱི་སྒྲ། །ཡིད་ནི་བདེ་སྟོང་སྤྲོས་དང་བྲལ། །བཞི་པའི་དབང་མཆོག་ཐོབ་པར་ཤོག །ༀ་མ་ཧཱ་མུ་དྲ་ཨ་བྷི་ཥིཉྩ་མཾ། དེས་གཉེན་པོའི་དྲི་མ་དག་ཅིང༌། སངས་རྒྱས་ཀྱི་སྐུ་གསུང་ཐུགས་རྡོ་རྗེ་དབྱེར་མེད་པའི་བདེ་ཆེན་ཐོབ་པར་བྱེད། དེ་ཐོབ་པའི་ཐབས་ཀྱིས་བསམ་མི་ཁྱབ་པའི་རིམ་པས་ཕྱག་རྒྱ་ཆེན་པོ་སྒོམ་པའི་སྐལ་བ་ཅན་དུ་བྱས་པ་ཡིན་ནོ། །ལྔ་པ་བཟླས་ལུང་བྱིན་པ་ནི། དཔོན་སློབ་གཉིས་ཀས་བཟླས་ལུང་གང་བྱེད་ཀྱི་ལྷ་གང་ཡིན་དེའི་སྐུའི་རྣམ་པ་གསལ་བཏབ་པའི་ཐུགས་ཀར་གཙོ་མོ་དང་ཁྲོ་བོ་བཞི་ལ་ཉི་མ་དང་གཞན་བརྒྱད་པོར་ཟླ་བའི་སྟེང་དུ་རང་རང་གི་ས་བོན་གྱིས་མཚན་པར་གྱུར། སློབ་དཔོན་གྱི་ཐུགས་ཀའི་ས་བོན་གྱི་མཐར་བཟླ་བྱའི་སྔགས་ཀྱིས་བསྐོར་བ་ལས་སྔགས་ཕྲེང་བྱུང་བ་ཞལ་ནས་ཐོན། ཁྱེད་རང་གི་ཞལ་དུ་ཞུགས། སྙིང་གའི་ས་བོན་གྱི་མཐར་པར་བཏབ་པ་ལྟར་འཁོར་བར་མོས་ལ་འདིའི་རྗེས༴ བདག་མེད་མ་དང་བདེ་གཤེགས་བཅུ་གཉིས་ཀྱི་སྔགས་རྣམས་གསུམ་རེ་བརྗོད། དེ་ནས་སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས༴ བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཅེས་ལན་གསུམ། མེ་ཏོག་དེ་ཉིད་སླར་ཡང་ཁྱེད་རང་གི་སྤྱི་བོར་གཏོར་བས་རྒྱུད་བྱིན་གྱིས་བརླབས་པའི་མོས་པ་མཛོད། ཅེས་སློབ་དཔོན་གྱིས་མེ་ཏོག་དེ་བཟུང་ལ། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ཅེས་ལན་གསུམ་བརྗོད་ཅིང་རྟེན་འབྲེལ་ སྙིང་པོ་བཟླས་ནས་སྤྱི་བོར་གཏོར་ཏེ། བདེ་གཤེགས་བཅུ་གཉིས་ཀྱི་གསུང་རིག་སྔགས་ཀྱི་བྱིན་རླབས་དང་ནུས་མཐུ་མ་ལུས་པ་རྡོ་རྗེ་སློབ་མ་འདིའི་རྒྱུད་ལ་ཡོངས་སུ་འཇུག་པར་གྱུར་ཅིག །ཅེས་བརྗོད། སློབ་མས་ཀྱང་བཟླས་ལུང་ཐོབ་པས་ཕྲིན་ལས་ཐོགས་པ་མེད་པ་དང༌། འགྲོ་ཀུན་དབང་དུ་འདུ་བ་སོགས་སྔར་ལྷ་དབང་དུ་བཤད་པ་ལྟར་གྱི་སོ་སའི་ཡོན་ཏན་རྣམས་ཐོབ་པར་གྱུར་ཏོ་སྙམ་པའི་ང་རྒྱལ་འཛིན་དུ་བཅུག །དེ་ནས་སློབ་མ་རྣམས་བདེ་གཤེགས་བཅུ་གཉིས་ཀྱི་ངོ་བོར་གྱུར་པ་ལ་མཆོད་པས་མངའ་གསོལ་བའི་མོས་པ་མཛོད། ཅེས་གུ་རུས། ༀ་བཛྲ་པུཥྤེ་པྲ་ཏཱིཙྪ་སྭཱ་ཧཱ། ནས་ནེ་ཝིདྱེའི་བར་ཉེར་སྤྱོད་ལྔས་མཆོད། གཙོ་བོས་ཇི་ལྟར་སོགས་ཀྱིས་དམ་ཚིག་ཁས་བླངས་བཀའ་དྲིན་གཏོང་རག་གི་དོན་དུ་མཎྜལ་དང༌། དེང་ནས་བརྩམས་ཏེ་སོགས་ཀྱིས་ལུས་འབུལ། དགེ་བ་བསྔོ་བ་རྣམས་བྱའོ། །ཚོགས་མཆོད་བྱ་བར་སྤྲོ་ན། བདག་འཇུག་གི་སྔ་ཕྱི་གཉིས་གང་རིགས་སུ་བྱ་བ་ཤས་ཆེ་ནའང་། དབང་ཆོག་རྩ་བར་སྐབས་འདིར་བཤད་པ་ལྟར་དེ་གསུམ་གང་དུ་བྱས་ཀྱང་རུང་ངོ༌། །ཆོ་ག་ནི། བྱིན་རླབས་སྔར་བཤད་ཀྱི་གཏོར་མ་ལྟར་ལས་གཏོར་རྫས་དང་གཏོར་མ་ཞེས་པ་ཚོགས་རྫས་དང་ཚོགས་ཀྱི་ལོངས་སྤྱོད་ཡེ་ཤེས་ཀྱི་བདུད་རྩི་ཞེས་བསྒྱུར་བ་ལས་གཞན་འདྲ། མགྲོན་དྲང་བ་ནས་ལྷག་གཏོར་གྱི་བར་ལམ་ལྔའི་དབང་ཆོག་ཏུ་བཤད་པ་ལྟར་ཏེ། ཁྱད་པར་བདག་འཇུག་གི་སྔ་ཕྱི་གང་རིགས་སུ་བྱེད་པ་ལྟར་ན་རོལ་པ་མན་ཆད་སྐབས་འདིར་བྱ་བ་ལག་ལེན་ལ་བདེའོ། །དེ་ནས་རྗེས་ཆོག་ནི། མཆོད་པ་ཁ་གསོས་ཏེ་བྱིན་རླབས་བྱ། ཨརྒྷཾ་ནས་ཤབྡའི་བར་དང༌། འབྲུ་གསུམ་གྱིས་ནང་མཆོད་ཕུལ། བུམ་བསྐྱེད་ལྟར་ཆོས་དབྱིངས་སྐྱེ་འགག་མེད་པའི་སོགས་ཤློ་ཀ་གཅིག་པོས་བསྟོད། ཡིག་བརྒྱ་བཟླ་ཞིང་མ་རྙེད་ཡོངས་སུ་སོགས་ཀྱིས་བཟོད་པར་གསོལ། རྡུལ་ཚོན་གྱི་ནུབ་ཐ་མ་ལ་ཡིན་ན། ༀ་ཁྱེད་ཀྱིས་སེམས་ཅན་སོགས་ཀྱིས་གཤེགས་གསོལ་དང༌། ཨ་ཀཱ་རོས་དབྱི་བ་ཆུ་བོར་སྐྱེལ་བ་རྣམས་བྱ། ཉིན་དང་པོ་ རྣམས་དང་རས་བྲིས་ལ་རྣམ་པ་ཀུན་ཏུ་འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། དམ་ཚིག་པ་འོད་གསལ་དུ་བསྡུ་ཞིང་ལངས་ལ་བསྔོ་ཤིས་ཀྱིས་མཐའ་བརྒྱན་ནོ། །དར་རྒྱས་འཕེལ།། ༈ །།ༀ་སྭ་སྟི། ན་མཿ ཤྲཱི་ཧེ་རུ་ཀཱ་ཡ། བདེ་མཆོག་ཐུན་མོང་བའི་དབང་ལྷ་བཅུ་གསུམ་མའི་དཀྱིལ་འཁོར་དུ་བསྐུར་བའི་རིམ་པ་ནི། སྟ་གོན་དང་རྡུལ་ཚོན་གྱི་བྱ་བ་སོགས་སྤྲོ་ན་བདེ་གཤེགས་བཅུ་གཉིས་ལྟར་ལས་སྒོས་ཆོས་རྣམས་བསྒྱུར་ཏེ་བྱས་པས་ཆོག་མོད། འོན་ཀྱང་ཡིག་རྙིང་ལས་མ་བཤད་ཅིང་རས་བྲིས་ལ་བརྟེན་པའི་ཕྱོགས་ལ་མ་གྲུབ་ཀྱང་འགལ་བ་མེད། དེ་ལ་ཐོག་མར་བཤམས་བཀོད་ནི། སྟེགས་བུའི་སྟེང་དུ་དུར་ཁྲོད་མེའི་ཕྱི་རོལ་དུ་བྱས་པའི་དཀྱིལ་འཁོར་སྒོ་བཞི་རྟ་བབས་སྣམ་བཞི་མ་སྤྱི་ལྟར་ལས། རྩ་ཐིག་གི་ནང་དུ་ཟླུམ་པོར་བསྐོར་བའི་དབུས་སུ་འདབ་བརྒྱད་ལྟེ་བར་ཆོས་འབྱུང་སྔོ་དམར་བརྩེགས་མ། ལྷ་མཚན་ལྟེ་བར་རྡོ་རྗེ། འདབ་མའི་ཕྱོགས་བཞི་དང་གྲུ་བཞིར་སྒོ་བཞི་རྣམས་སུ་གྲི་ཐོད། འདབ་མའི་མཚམས་བཞིར་བུམ་པ་ཐོད་པས་ཁ་བརྒྱན་པ་རྣམས་རྡུལ་ཚོན་གྱིས་བྲིས་པའམ། ཡང་ན་རས་བྲིས་དཀྲམ། དེའི་དབུས་སུ་མཉྫིའི་སྟེང་དུ་རྣམ་རྒྱལ་བུམ་པ་བཅུད་ལྡན་ཆས་སུ་བཅུག་པ་བཀོད་པའི་ཁར་གསང་རྫས་ཀྱིས་གང་བའི་ཐོད་པ་དར་དམར་དང་མེ་ལོང་ལ་སིནྡྷུ་རའི་དཀྱིལ་འཁོར་ཆོས་འབྱུང་བསྣོལ་མ་བཾ་ཡིག་དགའ་འཁྱིལ་དང་བཅས་བྲིས་པས་ཁ་བཅད། ལས་བུམ་བྱང་ཤར་རམ་སློབ་དཔོན་གྱི་མདུན་དུ་བཤམས། མཆོད་གཏོར་ཚོགས་ཀྱི་ཡོ་བྱད་སོགས་ཅི་འབྱོར་པས་བསྐོར། ཌཱ་དྲིལ་ལག་མཆོད་སོགས་ཡོ་བྱད་ཐམས་ཅད་ཚང་བར་འདུ་བྱས་ནས། སྒྲུབ་མཆོད་ནི། སྔོན་གཏོར་སུམྦྷས་བསང༌། སྭ་བྷཱ་ཝས་སྦྱངས། ༀ་ཨཱཿ ཧཱུྃ་ཧྲཱིཿ ས་བྱིན་གྱིས་བརླབས། འབར་བའི་རྒྱ་བཅས་ལ་ཕ་བཛྲ་ཨཱ་རལླི་ཧོཿ ཛཿ ཧཱུྃ་བཾ་ཧོཿ བཛྲ་ཌཱ་ཀི་ནཱི་ས་མ་ཡ་སྟཾ། དྲ་ཤྱ་ཧོཿ ས་མགྲོན་བཀུག །ༀ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ། རཀྵ་ས། བྷུ་ཏ། པྲེ་ཏ། པི་ཤཱ་ཙ། ཨུནྨཱ་དཱ། ཨ་པ་སྨཱ་རཱ། ཌཱ་ཀ་ཌཱ་ཀི་ནྱཱ་ད་ཡ། ཨི་དཾ་བ་ལ། གྲ་ཧྞཱནྟུ། ས་མ་ཡ་རཀྵཱནྟུ། མ་མ་སརྦ་སིདྡྷི་མྨེ་པྲ་ཡ་ཙྪནྟུ། ཡ་ཐེ་བཾ། ཡ་ཐཻཥྛཾ༑ བྷུཉྫ་ཐཱ། པི་ཝ་ཐཱ། ཛཱི་གྷྲ་ཐཱ། མ་ཏི་ཀྲ་མ་ཐཱ། མ་མ་སརྦ་ཀརྟཱ་ཡ། སད་སུ་ཁཾ། བི་ཤུདྡྷ་ཡེ་ས་ཧཱ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་ལན་གསུམ་གྱིས་གཏོར་མ་དང༌། ཨརྒྷཾ་ནས་ཤབྡའི་བར་གྱིས་མཆོད། ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །འཇིག་རྟེན་སྐྱོང་བ་བརྒྱད་པོ་དང༌། །གནོད་སྦྱིན་ཚོགས་རྣམས་མ་ལུས་དང༌། །སྲིན་པའི་ཚོགས་རྣམས་མ་ལུས་དང་། །འབྱུང་པའི་ཚོགས༴ ཡི་དྭགས་ཚོགས༴ ཤ་ཟའི་ཚོགས༴ སྨྱོ་བྱེད་ཚོགས༴ བརྗེད་བྱེད༴ མཁའ་འགྲོའི༴ མ་མའི་ཚོགས༴ དེ་ལ་སོགས་ཏེ་འབྱུང་པའི་ཚོགས། །མ་ལུས་ཇི་སྙེད་ཡོད་པ་རྣམས། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་ཕྲིན་ལས་བཅོལ། ནག་ཕྱོགས་པ་རྣམས་ལ། གསང་སྤྱོད་ལྟ་བར་མི་དབང་བའི། །འབྱུང་པའི་ཚོགས་རྣམས་གང་ཡིན་པས། །གཏོར་མའི་ལྷག་མ་འདི་ལོངས་ལ། །ད་ལྟ་ཉིད་དུ་གཞན་དུ་དེངས། །ཞེས་དྲག་སྔགས་དང་བཅས་པས་བསྐྲད་ལ་གཏོར་མ་ཕྱིར་དོར་རོ། །ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ། ཅེས་ལན་གསུམ་གྱིས་མཚམས་བཅད། དེ་ནས་གནས་ཡོ་བྱིན་གྱིས་བརླབ་པ་ནི། བསང་སྦྱངས། སྟོང་པའི་ ངང་ལས་གནས་ཁང་བྷྲཱུཾ་ལས་གཞལ་མེད་ཁང་དུ་ཨཱཿ ལས་སྣོད་ཀ་པཱ་ལར་བཅུད་ཧཱུྃ་ལས་ལྷ་རྫས་ལས་གྲུབ་པའི་མཆོད་པའི་ཡོ་བྱད་འདོད་ཡོན་གྱི་རྣམ་འཕྲུལ་དུ་མར་འཆར་བ། རང་བཞིན་བདེ་སྟོང་རྣམ་པ་མཆོད་རྫས་བྱེད་ལས་ཟག་མེད་ཀྱི་བདེ་བས་ཚིམ་པར་བྱེད་པས་ནམ་མཁའི་ཁམས་ཐམས་ཅད་གང་བར་གྱུར། ༀ་ཨརྒྷཾ་ཨཱཿ ཧཱུྃ་ནས་ཤབྡའི་བར་དང༌། ༀ་སརྦ་བིད་པཱུ་ར་པཱུ་ར་སུ་ར་སུ་ར་ཨཱ་བརྟ་ཡ་ཨཱ་བརྟ་ཡ་ༀ་བཛྲ་སྥ་ར་ཎ་ཁཾ། ཞེས་པས་བྱིན་གྱིས་བརླབས། དེ་ནས་བདག་བསྐྱེད་ནི། སྙིང་གའི་ཧཱུྃ་ལས་འོད་ཀྱིས་སྐྱབས་ཡུལ་རྣམས་མདུན་གྱི་ནམ་མཁར་སད་པར་བསམ་ལ། སངས་རྒྱས་ཆོས་དང་དགེ་འདུན་དང༌། །བླ་མ་ཡི་དམ་མཁའ་འགྲོ་དང༌༑ ༑ཁྲོ་བོ་མཁའ་འགྲོར་བཅས་པ་ལ། །བདག་ནི་གུས་པས་སྐྱབས་སུ་མཆི། །ལན་གསུམ། ཀྱེ་མ་སེམས་ཅན་སྡུག་བསྔལ་ཞིང༌། །ཀུན་རྟོག་ལ་ནི་མངོན་པར་ཞེན། །དེ་ཡི་རྟོག་པ་གཞོམ་ཕྱིར་བདག །ཧེ་རུ་ཀ་དཔལ་བསྒོམ་པར་བྱ། །ལན་གསུམ། སྐྱབས་ཡུལ་རྣམས་རང་ལ་ཐིམ་པར་གྱུར། རང་གི་སྤྱི་བོར་པད་ཟླའི་སྟེང་དུ་རྡོར་སེམས་ཧེ་རུ་ཀ་དཀར་པོ་རྡོར་དྲིལ་འཛིན་པས་སྙེམས་མ་གྲི་ཐོད་ཅན་ལ་འཁྲིལ་བ་རུས་པའི་རྒྱན་གྱིས་སྤྲས་པ༑ ཡབ་ཀྱི་ཐུགས་ཟླ་བ་ལ་གནས་པའི་ཧཱུྃ་གི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡེ་ཤེས་ཀྱི་བདུད་རྩི་སྤྱན་དྲངས་ཏེ་ཧཱུྃ་ལ་ཐིམ། དེ་ལས་བདུད་རྩིའི་རྒྱུན་བབས་སྡིག་སྒྲིབ་ཐམས་ཅད་ སྦྱང་བར་བསམ་ལ། ༀ་བཛྲ་ཧེ་རུ་ཀ་ས་མ་ཡ་མ་ནུ་པཱ་ལ་ཡ། བཛྲ་ཧེ་རུ་ཀ་ཏེ་ནོ་པ། ཞེས་པ་ནས། བཛྲ་ཧེ་རུ་ཀ་མ་མེ་མུཉྩ་ཧེ་རུ་ཀོ྅་བྷ་བ། ཞེས་བསྒྱུར་བའི་ཡིག་བརྒྱ་བཟླས་མཐར། མགོན་པོ་བདག་ནི་ཞེས་སོགས། རྡོར་སེམས་ འོད་དུ་ཞུ་ནས་རང་ལ་ཐིམ་པར་བསམ། རང་ཉིད་སྐད་ཅིག་གིས་བདེ་མཆོག་ལྷན་སྐྱེས་ཀྱི་སྐུར་གསལ་བའི་སྙིང་གའི་ཧཱུྃ་ལས་འོད་ཟེར་འཕྲོས། དཔལ་ཧེ་རུ་ཀ་ལྷ་བཅུ་གསུམ་མའི་དཀྱིལ་འཁོར་བླ་མ་དང་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་མདུན་གྱི་ནམ་མཁར་སད་པར་བསམས་ལ། འཁོར་བའི་འདམ་རྫབ་ནང་གནས་པ། །ཐུགས་རྗེའི་ཕྱག་གིས་དྲང་ནས་ནི། །ཡེ་ཤེས་བདུད་རྩིས་ཚིམས་མཛད་པ། །བླ་མའི་ཞབས་ཀྱི་པདྨོར་འདུད། །དཔལ་ལྡན་བདེ་མཆོག་འཁོར་ལོ་ནི། །མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །ཞེས་ཕྱག་འཚལ། ༀ་བཛྲ་ཨརྒྷཾ་སོགས་ཀྱིས་མཆོད་ནས། བདག་གིས་ཐོག་མ་མེད་པའི་དུས་མཐའ་ནས། །བྱས་དང་བྱེད་དུ་བཅུག་དང་ཡི་རང་བའི། །སྡིག་པ་མ་ལུས་སྐྱོན་ཀུན་འཇིག་མཛད་པའི། །སྤྱན་སྔར་སོ་སོར་བཤགས་ཤིང་སླད་མར་ཡང༌། །མི་བགྱིད་སྡོམ་པ་བརྟན་པོར་བཟུང་བར་བགྱི། །ཉན་ཐོས་རང་རྒྱལ་བླ་མེད་རྒྱལ་བ་དང༌། །རྒྱལ་བའི་སྲས་པོས་སྒྲུབ་པའི་དགེ་བ་སོགས། །དེ་དག་ཀུན་ལ་རྗེས་སུ་ཡི་རང་ངོ༌། །བྱང་ཆུབ་ཏུ་ནི་བདག་གིས་དགེ་བ་བསྔོ། །རྒྱལ་བ་དཀོན་མཆོག་ གསུམ་པོ་ལ་སོགས་ལ། །དངོས་སམ་ཡིད་ཀྱིས་བདག་ནི་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དེ་བཞིན་དུ། །བླ་ན་མེད་པའི་ལམ་ལ་བསྟེན་པར་བགྱི། །ཞེས་ལན་གསུམ་དང༌། ཚད་མེད་བཞི་སྤྱི་ལྟར་ལན་གསུམ་བྱ་སྟེ་བསོད་ནམས་ཀྱི་ཚོགས་སོ། །དེ་ནས་ༀ་སྭ་བྷཱ་ཝ་སོགས་དང༌། ༀ་ཤཱུ་ནྱཱ་ཏའི་སྔགས་ཀྱིས་གཟུང་བ་དང་འཛིན་པས་བསྡུས་པའི་ཆོས་ཐམས་ཅད་རང་བཞིན་མི་དམིགས་པ་སྟོང་པ་ཉིད་དུ་གྱུར། ཞེས་མཉམ་པར་འཇོག་སྟེ་ཡེ་ཤེས་ཀྱི་ཚོགས་སོ༑ ༑སྟོང་པའི་ངང་ལས་རང་གི་བར་དོའི་རྣམ་ཤེས་ཀྱི་ངོ་བོ་ནཱ་ད་དཀར་ལ་དམར་བའི་མདངས་ཅན་རྩ་སྔགས་ཀྱི་སྒྲ་སྒྲོགས་པ། དེའི་འོད་ཟེར་ལས་བྱུང་བའི་ཡི་གེ་རིམ་པར་འཆད་པ་ལས། ཡཾ་ལས་རླུང་དཀྱིལ་སྔོན་པོ་ཟླ་གམ༑ རཾ་ལས་མེ་དཀྱིལ་དམར་པོ་གྲུ་གསུམ། བཾ་ལས་ཆུ་དཀྱིལ་དཀར་པོ་ཟླུམ་པོ། ལཾ་ལས་ས་དཀྱིལ་སེར་པོ་གྲུ་བཞི། སུཾ་ལས་རིན་ཆེན་སྣ་བཞི་ལས་གྲུབ་པའི་རི་རབ་རྣམས་བརྩེགས་མར་གནས་པའི་སྟེང་དུ་པཾ་ལས་སྣ་ཚོགས་པདྨའི་ལྟེ་བར་ཧཱུྃ་ལས་བྱུང་བའི་སྣ་ཚོགས་རྡོ་རྗེ་རྭ་ཕྱོགས་མདོག་ལྟེ་བ་སྔོན་པོ་ལ་ཧཱུྃ་གིས་མཚན་པ། ༀ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། ༀ་གྲཧྣ་གྲཧྣ་ཧཱུྃ་ཧཱུྃ་ཕཊ། ༀ་གྲཧྣ་པཱ་ཡ་གྲཧྣ་པཱ་ཡ་ཧཱུྃ་ཧཱུྃ་ཕཊ། ༀ་ཨཱ་ན་ཡ་ཧོ་བྷ་ག་ཝཱན་བིདྱཱ་རཱ་ཛ་ཧཱུྃ་ཧཱུྃ་ཕཊ། ཅེས་ཕྱོགས་གཡོན་དང་མཚམས་གཡས་བསྐོར་ཏེ་ལན་གཉིས་བརྗོད་ཅིང་གཡོན་པའི་སྡིགས་མཛུབ་ཕྱོགས་བཅུར་བསྟན་ནས་སེ་གོལ་བརྡབས་པས། ཧཱུྃ་ལས་ཁྲོ་བོ་གནོད་མཛེས་འཕྲོས་པས་བགེགས་ཐམས་ཅད་བསྐྲད་ཅིང་ བརླག་པར་བྱས། སླར་ཡང་ཧཱུྃ་ལས་འོག་ཏུ་སྣ་ཚོགས་རྡོ་རྗེ་དཔག་མེད་སྤྲོས་པ་ལས་རྡོ་རྗེའི་ས་གཞི། ༀ་མེ་དྷེ་ནི་བཛྲཱི་བྷ་བ་བྷནྡྷ་ཧཱུྃ། ཕྱོགས་མཚམས་སུ་འཕྲོས་པས་ལོགས་ཐམས་ཅད་རྡོ་རྗེའི་ར་བ། ༀ་བཛྲ་པྲ་ཀ་ར་ཧཱུྃ་བཾ་ཧཱུྃ། སྟེང་དུ་འཕྲོས་པས་རྡོ་རྗེའི་གུར་དང་དྲྭ་བ། ༀ་བཛྲ་པཉྫ་ར་ཧཱུྃ་བཾ་ཧཱུྃ། དེའི་འོག་ཏུ་རྡོ་རྗེའི་བླ་རེ། ༀ་བཛྲ་བི་ཏ་ན་ཧཱུྃ་ཁཾ་ཧཱུྃ། དེའི་ཕྱི་རོལ་ཏུ་མདེའུ་བསྣོལ་བ་ཕྱིར་བསྟན་གྱི་མདའི་དྲྭ་བ། ༀ་བཛྲ་ས་ར་ཛ་ལ་ཏྲྃ་སཾ་ཏྲྃ༑ དེ་ཐམས་ཅད་ཀྱི་ཕྱི་རོལ་ཏུ་ཡེ་ཤེས་ཀྱི་མེ་འབར་བས་བཅིངས་པར་གྱུར། ༀ་བཛྲ་ཛྭ་ལ་ཨ་ན་ལརྐ་ཧཱུྃ་ཧཱུྃ་ཧཱུྃ། ཞེས་སྔགས་རྣམས་ལན་གསུམ་གསུམ་བརྗོད་དོ། །སྤྲོ་ན་གཞི་སྣ་ཚོགས་རྡོ་རྗེའི་ལྟེ་བ་གྲུ་བཞི་པའི་སྟེང་དུ་བྷྲཱུྃ་ལས་རིན་པོ་ཆེའི་གཞལ་ཡས་ཁང་གྲུ་བཞི་པ་ནང་ནས་ནག་ལྗང་དམར་སེར་དཀར་བའི་རྩིགས་པ་རིམ་པ་ལྔ་པ། སྒོ་བཞིར་རྟ་བབས་བཞིས་བརྒྱན་པ། འདོད་སྣམ་དང༌། ཕ་གུ་དང༌། དྲྭ་བ་དྲྭ་ཕྱེད། ཤར་བུ་དང༌། མདའ་ཡབ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ། ཕྱི་རོལ་ཏུ་དངོས་གྲུབ་འབྱུང་བའི་དུར་ཁྲོད་ཆེན་པོ་བརྒྱད་ཀྱིས་བསྐོར་བ། ནང་ཕྱོགས་ཀྱི་མདོག་ཅན་གྱི་དབུས་སུ་སྣ་ཚོགས་པདྨ་འདབ་མ་བརྒྱད་པ། གེ་སར་གྱི་ཟེའུ་འབྲུའི་ལྟེ་བར་རཾ་ལས་ཉི་མའི་སྟེང་དུ་འཇིགས་བྱེད་དུས་མཚན་དང་བཅས་པ། པད་འདབ་ཀྱི་ཕྱོགས་ཀྱི་ཕྱོགས་བཞི་དང༌། གྲྭ་བཞི་དང་སྒོ་བཞིར་ཉི་མ་དང་རོ། པདྨའི་མཚམས་ཀྱི་འདབ་མ་བཞིར་ཟླ་བའི་གདན་རེ་རེ་ གསལ་བར་གྱུར། དབུས་ཀྱི་གདན་སྟེང་མཚན་བཟང་གི་ངོ་བོ། ཨ་ཨ། ཨི་ཨཱི། ཨུ་ཨཱུ། ར་རཱ། ལ་ལཱ། ཨེ་ཨཻ། ཨོ་ཨཽ། ཨཾ་ཨཱཿ ཕྲག་གཉིས་གཡོན་བསྐོར་དུ་གནས་པ་ཞུ་བ་ལས་ཟླ་བའི་དལ་མེ་ལོང་ལྟ་བུའི་ཡེ་ཤེས། དེའི་སྟེང་དུ་གཡས་སྐོར་གྱིས་དཔེ་བྱད་ཀྱི་ངོ་བོ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ན། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཡ་ར་ལ་ཌ་ཌྷ་ཎ། ཕྲག་གཉིས་ལས་ཉི་མའི་དཀྱིལ་འཁོར་མཉམ་ཉིད་ཡེ་ཤེས། ཉི་ཟླའི་བར་དུ་བར་དོའི་ནཱ་ད་ཞུགས་པ་ཧཱུྃ་དང་བྃ་ལས་རྡོ་རྗེ་དང་གྲི་གུག་ཧཱུྃ་དང་བྃ་གྱིས་མཚན་པ་སོ་སོར་རྟོགས་པའི་ཡེ་ཤེས། དེ་ལས་འོད་འཕྲོས་སེམས་ཅན་གྱི་དོན་བྱས། ཚུར་འདུས་ཐམས་ཅད་གཅིག་ཏུ་འདྲེས་པ་བྱ་གྲུབ་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་དབྱིངས་ཡེ་ཤེས་ཀྱི་ངོ་བོར་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་མཐིང་ནག་ཁྲོ་ཆགས་ཀྱི་ཉམས་ཅན། ཞལ་བཞི་ཕྱག་བཅུ་གཉིས་པ། རྩ་ཞལ་སྔོ་ནག །གཡས་སེར། གཡོན་ལྗང༌། རྒྱབ་ཞལ་སེར་པོ། ཞལ་ཐམས་ཅད་རྣམ་པར་འགྱུར་བའི་ཁྲོ་གཉེར་དང་སྤྱན་གསུམ་པ། མཆེ་བ་གཙིགས་པ། ཕྱག་དང་པོ་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་ཀྱི་གསུམ་པ་ན་ཌཱ་མ་རུ། བཞི་པ་ན་དགྲ་སྟྭ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་པ། གཡོན་གྱི་གསུམ་པ་ན་ཁ་ཊྭྃ་ག །བཞི་པ་ན་ཐོད་ཁྲག །ལྔ་པ་ན་རྡོ་རྗེ་ཞགས་པ། དྲུག་པ་ན་ཚངས་པའི་མགོ་བོ་བསྣམས་པ། ཞབས་གཡས་བརྐྱང་བས་དུས་མཚན་དམར་མའི་ནུ་མ་དང་ལྟེ་བ་གཡོན་བསྐུམ་པས་འཇིག་བྱེད་ནག་པོ་ཁ་སྦུབ་ཀྱི་སོག་དབྲག་ཏུ་མགོ་བོ་བལྟབ་པའི་གདོང་མནན་པ། རལ་པའི་ཐོར་ཚུགས་ཀྱི་རྩེར་ཡིད་བཞིན་གྱི་ནོར་བུ་ངོས་ལ་སྣ་ཚོགས་རྡོ་རྗེ། གཡོན་ངོས་སུ་ཟླ་ཕྱེད། མི་མགོ་སྐམ་པོ་ལྔའི་དབུ་རྒྱན། རློན་པ་ལྔ་བཅུའི་དོ་ཤལ། རུས་པའི་ཕྱག་རྒྱ་དྲུག །དཔའ་བའི་དར་དཔྱངས། སྟག་ཤམ་གྲོལ་བ། གར་གྱི་ཉམས་དགུས་སྒེག་པ། དེའི་པང་ན་ཡུམ་ཕག་མོ་གྲི་གུག་དང་ཐོད་ཁྲག་འཛིན་པས་ཡབ་ལ་འཁྱུད་ཅིང་སྟོབས་པ། དབུ་སྐྲ་གྲོལ་ཞིང་ཐོད་སྐམ་གྱི་དབུ་རྒྱན་དང་དོ་ཤལ། རུས་པའི་ཕྱག་རྒྱ་ལྔས་བརྒྱན་པ། ཞབས་བྱིན་པ་གཉིས་ཀྱིས་ཡབ་ལ་འཁྲིལ་བ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཤར་གྱི་འདབ་མ་ལ་མཁའ་འགྲོ་མ་སྔོན་མོ། བྱང་དུ་ལཱ་མ་ལྗང་གུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ། མཚམས་ཀྱི་འདབ་མ་བཞིར་བདུད་རྩི་ལྔས་གང་བའི་བུམ་པའི་སྟེང་དུ་བྱང་སེམས་ཀྱིས་གང་བའི་ཐོད་པ་གནས་པ། ཤར་སྒོར་ཁྭ་གདོང་མ་སྔོ་སྐྱ། བྱང་སྒོར་འུག་གདོང་མ་ལྗང་སྐྱ། ནུབ་སྒོར་ཁྱི་གདོང་མ་དམར་སྐྱ། ལྷོ་སྒོར་ཕག་གདོང་མ་སེར་སྐྱ། གྲྭ་བཞིའི་ཤར་ལྷོར་གཤིན་རྗེ་བརྟན་མ་གཡས་དཀར་གཡོན་སེར། ལྷོ་ནུབ་ཏུ་ གཤིན་རྗེ་ཕོ་ཉ་མོ་གཡས་སེར་གཡོན་དམར། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང༌། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་དཀར་ཏེ་ཕྱེད་གཟུགས། བཅུ་གཉིས་པོ་ཐམས་ཅད་ཀྱང་ཞལ་གཅིག་ཕྱག་བཞི་སྤྱན་གསུམ་པ་མཆེ་བ་གཙིགས་པ། སྐྲ་གྲོལ་ཞིང་ཐོད་སྐམ་གྱི་དབུ་རྒྱན་དང་དོ་ཤལ། ཕྱག་རྒྱ་ལྔས་བརྒྱན་པ། ཕྱག་དང་པོ་གཉིས་གྲི་གུག་དང་ཐོད་ཁྲག །འོག་མ་གཉིས་ཅང་ཏེའུ་དང་ཁ་ཊྭྃ་ག་འཛིན་པ། ཞབས་གཡས་བརྐྱང་བའི་གར་སྟབས་ཀྱིས་རོ་གདན་ལ་བཞུགས་པའོ། །དེ་ཐམས་ཅད་ཀྱི་དཔྲལ་བར་ༀ་དཀར་པོ་སྐུ་རྡོ་རྗེ། མགྲིན་པར་ཨཱཿ དམར་པོ་གསུང་རྡོ་རྗེ། སྙིང་གར་ཧཱུྃ་སྔོན་པོ་ཐུགས་རྡོ་རྗེ། གཙོ་བའི་སྙིང་གར་ༀ་ཧ་དཀར་པོ་རྡོ་རྗེ་སེམས་དཔའ། མཚོག་མར་ན་མ་ཧི་རྣམ་སྣང༌། སྤྱི་གཙུག་ཏུ་སྭཱ་ཧཱ་ཧཱུྃ་དམར་པོ་པདྨ་གར་དབང༌། ཕྲག་པ་གཉིས་སུ་བཽ་ཥཊ་ཧེ་ནག་པོ་ཧེ་རུ་ཀ །མིག་གཉིས་སུ་ཧཱུྃ་ཧཱུྃ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་གུ་རྟ་མཆོག་གི་ངོ་བོ། ཕག་མོ་དང་ལྷ་མོ་གཉིས་ཀྱི་ལྟེ་བར་ༀ་བྃ་དམར་མོ་རྡོ་རྗེ་ཕག་མོ། སྙིང་གར་ཧྃ་ཡྃ་སྔོན་མོ་གཤིན་རྗེ་མ། ཁར་ཧྲཱ་མྃ་དཀར་མོ་རྨོངས་བྱེད་མ། མགོ་བོར་ཧྲ་ཧྲ་སེར་མོ་བསྐྱོད་བྱེད་མ། སྤྱི་གཙུག་ཏུ་ཧཱུྃ་ཧཱུྃ་ལྗང་གུ་སྐྲག་བྱེད་མ། ཚིགས་ཆེན་བརྒྱད་ལ་ཕཊ་ཕཊ་དུད་ཁ་ཙཎྜི་ཀའི་ངོ་བོར་གྱུར། རང་གི་སྙིང་གའི་ཧཱུྃ་ལས་འོད་ཟེར་འཕྲོས་སངས་རྒྱས་ཐམས་ཅད་ འཁོར་ལོ་བདེ་མཆོག་ལྷ་བཅུ་གསུམ་མའི་དཀྱིལ་འཁོར་གྱི་རྣམ་པར་ཕ་ཞེས་འབར་བའི་རྒྱས་སྤྱན་དྲངས། ཛཿ ཧཱུྃ་བྃ་ཧོཿ ས་གཉིས་སུ་མེད་པར་ཐིམ། སླར་ཡང་སྙིང་གའི་ཧཱུྃ་ལས་འོད་འཕྲོས་དབང་གི་ལྷ་ཐམས་ཅད་ཕ་ཞེས་སྤྱན་དྲངས། ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་དེ་བཞིན་གཤེགས་པ་ལྷ་མའི་ཚོགས་དང་བཅས་པ་རྣམས་ཀྱིས། ༀ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་བུམ་པའི་ཆུས་དབང་བསྐུར། སྐུ་གང་དྲི་མ་དག་ཆུ་ལྷག་མ་ཡར་ལུད་པ་ལས་གཙོ་བོ་ལ་མི་བསྐྱོད་པ། གཙོ་མོ་ལ་རྣམ་སྣང༌། རྣལ་འབྱོར་མ་བཞི་ལ་རིན་འབྱུང༌། སྒོ་མ་བཞི་ལ་སྣང་མཐའ། མཚམས་མ་བཞི་ལ་དོན་ཡོད་གྲུབ་པས་དབུ་བརྒྱན་པར་གྱུར། དེ་ནས་སྙིང་གའི་ཧཱུྃ་ལས་འོད་འཕྲོས་གཟུགས་སོགས་འདོད་ཡོན་གྱི་སྣང་བ་ཐམས་ཅད་བསྡུས། ཡབ་ཀྱི་ཞལ་དུ་བཅུག །སྙིང་གར་ཞུ་བ། ཡུམ་གྱི་པདྨར་བབས། སྦྱོར་མཚམས་ནས་གཟུགས་རྡོ་རྗེ་མ་སོགས་མཆོད་པའི་ལྷ་མོའི་རྣམ་པར་སྤྲོས་པས་དཀྱིལ་འཁོར་གྱི་ལྷ་རྣམས་མཆོད་ནས་གཙོ་བོ་ཡབ་ཡུམ་ལ་ཐིམ་པས། ཡབ་ཡུམ་གཉིས་ཁ་སྦྱོར་ནང་གི་འདོད་ཡོན་གྱི་བདེ་བ་ཆེན་པོའི་དགྱེས་པས་འོད་དུ་ཞུ་ནས༑ ཐིག་ལེའི་རང་བཞིན་འོད་ཀྱི་ཕུང་པོ་དཀར་ལ་དམར་བའི་མདངས་ཅན་དུ་གྱུར་པ་ལ། འཁོར་རྣམས་ཀྱིས། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ནི་མཆོག་མཉེས་ཏེ། །ཁྱོད་ཀྱིས་ རྒྱུ་དང་མི་རྒྱུའི་འགྲོ་བ་བརྒྱན་མཛད་དེ། །སྙིང་རྗེའི་ཐུགས་ཀྱིས་སེམས་ཅན་སད་མཛད་པ། །སྒྱུ་མའི་སྤྲུལ་པས་དོན་ཀུན་སྒྲུབ་མཛད་པ། །མགོན་པོ་དཔལ་ལྡན་བདེ་མཆོག་དགྱེས་པར་བཞེངས། །ཞེས་བསྐུལ་བས༑ ཐིག་ལེ་དེ་ཉིད་ཧཱུྃ་དང་བྃ་ལས་རྡོ་རྗེ་དང་གྲི་གུག་ཧཱུྃ་དང་བྃ་གྱིས་མཚན་པར་གྱུར། དེ་ཡོངས་སུ་གྱུར་པ་ལས་བཅོམ་ལྡན་འདས་འཁོར་ལོ་བདེ་མཆོག །ཅེས་པ་ནས། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཞེས་པའི་བར་གྱིས་རྒྱུ་རྡོ་རྗེ་འཛིན་པ་ཡུམ་བཅས་ཇི་ལྟ་བ་བཞིན་དུ་འབྲས་བུ་རྡོ་རྗེ་འཛིན་པའི་སྐུར་བཞེངས་པར་བསམ་མོ། །དེ་ནས་རྫོགས་རིམ་བསྒོམ་པ་ནི། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལས་འགྱུར་བ་མེད། །དེ་སྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་པའི་དོན་རང་གི་སྙིང་གར་ཟླ་དཀྱིལ་སྲན་མ་ཙམ་གྱི་སྟེང་བྱང་ཆུབ་སེམས་ཀྱི་ཐིག་ལེ་ཡུངས་འབྲུ་ཙམ་པ་ཁ་དོག་དཀར་པོ། ངོ་བོ་བདེ་སྟོང༌། གསལ་ལ་དྭངས་པ་མེ་ལོང་ནང་གི་གཟུགས་བརྙན་ལྟར་བསྒོམས་ནས། དེ་ལ་སེམས་རྩེ་གཅིག་ཏུ་མཉམ་པར་འཇོག་གོ །དེས་སྐྱོ་ན་བཟླས་པ་ལ་འཇུག་སྟེ། ཤུབ་བུ་དང་བརྗོད་པ་དང་འགོག་པ་དང་སྤྲོ་བསྡུ་དང་དོ་ལི་དང་ཁྲོ་བའི་བཟླས་པ་རྣམས་གང་འགྲུབ་བྱ་ཞེས་འབྱུང་བས། འདིར་སྤྲོ་བསྡུའི་དབང་དུ་བྱས་ན་ཐུགས་ཀར་ཉི་མ་ལ་གནས་པའི་ཧཱུྃ་ཡིག་སྔགས་ཕྲེང་གིས་བསྐོར་བ་ལས་འོད་ཟེར་དམར་པོ་འཕྲོས། སྣོད་བཅུད་ཐམས་ཅད་དག་པའི་འཁོར་ལོར་སྦྱངས། སླར་འདུས་ནས་རང་ལ་ཐིམ་པར་མོས་ལ། དུང་ཆེན་གྱི་ཕྲེང་བ་གཡོན་པའི་མཐེབ་སྲིན་གྱིས་འདྲེན་ཞིང༌། ༀ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱ་ཀི་ནཱི་ཛྭ་ལ་སམྦ་རཾ་སྭཱ་ཧཱ། ཡབ་ཀྱི་སྙིང་པོའོ། །ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊ། ཉེ་སྙིང་ངོ༌། །ༀ་བཛྲ་བཻ་རོ་ཙ་ནི་ཡེ་ཧཱུྃ་ཕཊ། ཡུམ་གྱི་སྙིང་པོའོ། །ༀ་སརྦ་བུདྡྷ་ཌཱ་ཀི་ནི་ཡེ་ཧཱུྃ་ཕཊ། ཉེ་སྙིང་ངོ༌། །འཁོར་སྔགས་ནི། ༀ་ཌཱ་ཀི་ནཱི་ཡེ་ཧཱུྃ་ཧཱུྃ་ཕཊ། ༀ་ལཱ་མེ་ཧཱུྃ་ཧཱུྃ་ཕཊ། ༀ་ཁཎྜ་རོ་ཧེ་ཧཱུྃ་ཧཱུྃ་ཕཊ། ༀ་རཱུ་པི་ནཱི་ཡེ་ཧཱུྃ་ཧཱུྃ་ཕཊ། ༀ་ཀཱ་ཀཱ་སྱཻ་ཧཱུྃ་ཧཱུྃ་ཕཊ། ༀ་ཨུ་ལུ་ཀཱ་སྱཻ་ཧཱུྃ་ཧཱུྃ་ཕཊ། ༀ་ཤྭ་ན་སྱཻ་ཧཱུྃ་ཧཱུྃ་ཕཊ༑ ༀ་སཱུ་ཀཱ་ར་སྱཻ་ཧཱུྃ་ཧཱུྃ་ཕཊ། ༀ་ཡ་མ་དཱ་དྷི་ཡེ་ཧཱུྃ་ཧཱུྃ་ཕཊ། ༀ་ཡ་མ་དཱུ་ཏི་ཡེ་ཧཱུྃ་ཧཱུྃ་ཕཊ། ༀ་ཡ་མ་དཾཥྚཱི་ཎཱ་ཡེ་ཧཱུྃ་ཧཱུྃ་ཕཊ། ༀ་ཡ་མ་མ་ཐ་ནཱི་ཡེ་ཧཱུྃ་ཧཱུྃ་ཕཊ། ཅེས་བཟླས་སོ། །དེ་ནས་རང་གི་ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱིས་མཆོད་པར་བསམས་ལ། ཨརྒྷཾ་ནས་ཤབྡའི་བར་གྱིས་མཆོད། ཧཱུྃ། ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང༌། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་དཔལ་འཁོར་ལོར་བསྟོད། །ཅེས་བསྟོད་དོ། །དེ་ནས་བུམ་སྒྲུབ་ནི། སུམྦྷ་ནིས་བསང༌། སྭཱ་བྷཱ་ཝས་སྦྱངས། སྟོང་པའི་ངང་ལས་པད་ཟླའི་སྟེང་དུ་བྷྲཱུཾ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཚང་བ་ནང་ཆུ་དང་བཅུད་སྣ་ཚོགས་ཀྱིས་གང་བའི་རྣམ་རྒྱལ་བུམ་པའི་དབུས་སུ་པདྨ་འདབ་མ་བརྒྱད་པའི་ཕྱིར་གྲུ་བཞི་པའི་གཞལ་ཡས་ཁང་གི་ལྟེ་བར་ཧཱུྃ་བྃ་ལས་བཅོམ་ལྡན་འདས་འཁོར་ལོ་བདེ་མཆོག་ཞལ་བཞི་ཕྱག་བཅུ་གཉིས་པ། ཞབས་གཡས་ བརྐྱང་གཡོན་བསྐུམ་པས་དུས་མཚན་དང་འཇིགས་བྱེད་མནན་པ། ཡུམ་རྡོ་རྗེ་ཕག་མོ་དམར་མོ་དང་མཉམ་པར་སྦྱོར་བ། ཕྱོགས་ཀྱི་འདབ་མ་བཞི་ལ་སྙིང་པོའི་རྣལ་འབྱོར་མ་བཞི། མཚམས་ཀྱི་འདབ་མར་བུམ་ཐོད། སྒོ་དང་གྲུ་བཞི་ལ་སྒོ་མཚམས་མ་བརྒྱད་དེ། གཙོ་འཁོར་ཐམས་ཅད་རྒྱན་དང་ཆ་བྱད་ཡོངས་སུ་རྫོགས་པ། ལས་བུམ་གྱི་ནང་དུ་ཁྲོ་བོ་བདུད་རྩི་འཁྱིལ་བ་རྣམས་སྐད་ཅིག་གིས་གསལ་བར་གྱུར། དེ་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ སྙིང་གར་ཧཱུྃ། ཡབ་ཀྱི་སྙིང་གར་ༀ་ཧ། མཚོག་མར་ན་མ་ཧི། སྤྱི་གཙུག་ཏུ་སྭཱ་ཧཱ་ཧཱུྃ། ཕྲག་པར་བཽ་ཥཊ་ཧེ། མིག་གཉིས་སུ་ཧཱུྃ་ཧཱུྃ་ཧོ། ཚིགས་ཆེན་བརྒྱད་ལ་ཕཊ་ཧཾ། ཡུམ་གྱི་ལྟེ་བར་ༀ་བྃ། སྙིང་གར་ཧྃ་ཡྃ། ཁར་ཧྲཱ་མྃ། མགོ་བོར་ཧྲ་ཧྲ། སྤྱི་གཙུག་ཏུ་ཧཱུྃ་ཧཱུྃ། ཚིགས་ཆེན་བརྒྱད་ལ་ཕཊ་ཕཊ། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་ཀྱི་འཁོར་ལོ་ཕ། ཞེས་སྤྱན་དྲངས། ཛཿ ཧཱུྃ་བྃ་ཧོཿ ས་གཉིས་སུ་མེད་པར་གྱུར། སླར་ཡང་སྙིང་གའི་ཧཱུྃ་འོད་ཀྱིས་དབང་ལྷ་ཐམས་ཅད་ཕ། ༀ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་དབང་བསྐུར་བས་སོ་སོའི་རིགས་བདག་གིས་དབུ་བརྒྱན། ཆུ་གཉིས་ཉེར་སྤྱོད་རོལ་མོར་བཅས་པས་མཆོད། འབྲུ་གསུམ་གྱིས་ནང་མཆོད་ཕུལ། ཧཱུྃ། དཔལ་ལྡན་བདེ་མཆོག་འཁོར་ལོ་ནི། །མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབས་ལ་ཕྱག་འཚལ་བསྟོད། །འཇིགས་པའི་ཧཱུྃ་སྒྲ་ངེས་སྒྲོགས་ཤིང༌། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །རང་གི་སྙིང་ག་ནས་སྔགས་ཕྲེང་དམར་པོ་གཟུངས་ཐག་ལ་འཁྲིལ་ཏེ་སོང་བས་ལྷ་ཐམས་ཅད་ཀྱི་ཐུགས་རྒྱུད་བསྐུལ། སྐུ་ལས་བྱང་སེམས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ། གཟུངས་ཐག་ལ་འཇུས་ཏེ། རྣམ་བུམ་ལྷ་གཙོ་བོ་ཡབ་ཡུམ་གྱི་སྔགས་བརྒྱ་རྩ་བརྒྱད་དང་འཁོར་གྱི་ལྷ་མོ་རྣམས་ཀྱི་སྔགས་བདུན་ལས་མི་ཉུང་བ་དང༌། ཨ་བྷི་ཥེ་ཀ་ཉེར་གཅིག་ཙམ་རེ་བཟླས། ལས་བུམ་ལ་སུམྦྷ་མང་དུ་བཟླས་ལ། ༀ་ཨཱཿ ཧཱུྃ་གིས་མཆོད་ཡོན་ཕུལ་བས། ལྷ་རྣམས་རྗེས་ཆགས་ཆེན་པོའི་མེས་བྱང་ཆུབ་ཀྱི་སེམས་སུ་ཞུ་བར་གྱུར། དེ་ནས་མདུན་བསྐྱེད་ནི། རྡུལ་ཚོན་ནམ་རས་བྲིས་ཀྱི་དཀྱིལ་འཁོར་བསང་སྦྱངས། སྟོང་པའི་ངང་ལས་འབྱུང་བཞི་རི་རབ་དང་བཅས་པའི་སྟེང༌། རྡོ་རྗེའི་ས་གཞི་ར་བ་དྲྭ་བ་གུར་བླ་རེ། མདའི་དྲྭ་བ་ཡེ་ཤེས་ཀྱི་མེ་འབར་བ་དང་བཅས་པའི་དབུས་སུ་སྣ་ཚོགས་རྡོ་རྗེའི་ལྟེ་བ་ལ་གནས་པའི་བྷྲཱུྃ་ལས་རིན་པོ་ཆེའི་གཞལ་ཡས་ཁང་གྲུ་བཞི་པ་ནང་ནས་ནག་ལྗང་དམར་སེར་དཀར་བའི་རྩིག་པ་རིམ་པ་ལྔ་པ་ཞེས་པ་ནས་ཞབས་གཡས་བརྐྱང་བའི་གར་སྟབས་ཀྱིས་རོ་གདན་ལ་བཞུགས་པའོ། །ཞེས་པའི་བར་རྟེན་དང་བརྟེན་པ་ཐམས་ཅད་བདག་བསྐྱེད་ལྟར་སྐད་ཅིག་གིས་གསལ་བཏབ། དེ་ནས་བདག་མདུན་བསྲེ་བ་ནི། བདག་གིས་སྒོམ་པའི་འབྱུང་བཞི་རི་རབ་སྲུང་འཁོར་གཞལ་ཡས་ཁང་ལྷའི་གདན་ཕྱི་རོལ་དུར་ཁྲོད་དང་བཅས་པའི་རྟེན་དང་བརྟེན་པ་ ལྷ་བཅུ་གསུམ་ཐོད་པ་བཞི་དང་བཅས་པ་ཐམས་ཅད་གཅིག་ཏུ་འདྲེས་ཏེ་གཉིས་སུ་མེད་པར་གྱུར། ༀ་ཨཱཿ ཧཱུྃ་དང༌། སུམྦྷ་ལན་གསུམ་བཟླ། དེ་ཐམས་ཅད་ཀྱི་དཔྲལ་བར་ༀ་དཀར་པོ་སྐུ་རྡོ་རྗེ་ཞེས་པ་ནས། མཚམས་མ་བཞི་ལ་དོན་ཡོད་གྲུབ་པས་དབུ་བརྒྱན་པར་གྱུར། ཞེས་པའི་བདག་བསྐྱེད་ལྟར་བྱའོ། །དེ་ནས་མཆོད་པ་ལ་སྤྱི་དང་ཁྱད་པར་བ་གཉིས་ཀྱི། དང་པོ་སྤྱི་ལ་ལྔ་ལས། ཕྱི་མཆོད་ནི། རང་གི་ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱིས་མཆོད་པར་བསམས་ལ། རབ་འབྱམས་རྒྱ་མཚོ་དཔག་མེད་ན། །ཆུ་གཉིས་ཉེར་སྤྱོད་རོལ་མོར་བཅས། །མཆོད་རྫས་ཇི་སྙེད་ཡོད་པ་རྣམས། །བདག་གིས་གུས་པས་བཤམས་པ་འདི། །མཆོག་ཏུ་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ༀ་ཤྲཱི་ཙཀྲ་སམྦྷ་ར་མཎྜ་ལ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུྃ། དེ་བཞིན་དུ་ཨརྒྷཾ་གྱི་གནས་སུ། པཱ་དྱཾ། པུཥྤེ། དྷཱུ་པེ། ཨ་ལོ་ཀེ། གནྡྷེ། ནེ་ཝིདྱེ། ཤབྡ་ཞེས་བཅུག་པས་མཆོད། ནང་མཆོད་ནི། བསང་སྦྱངས། སྟོང་པའི་ངང་ལས་མེ་རླུང་གི་དབུས་སུ་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་བདུད་རྩི་ལྔ་བཀོད། ༀ་ཨཱཿ ཧཱུྃ། ཞེས་བཟླས་པས་ཞུ་ཞིང་འདྲེས། ༀ་ལས་འོད་འཕྲོས་པས་ཡེ་ཤེས་ཀྱི་བདུད་རྩི་ཐམས་ཅད་བཀུག་ནས་ཐིམ་པར་གྱུར་པ་ལས། གཡོན་པའི་མཐེབ་སྲིན་གྱིས་བླངས་ནས། དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྩ་བརྒྱུད་ཀྱི་བླ་མ་དམ་པ་རྣམས་ཀྱི་ཞལ་དུ་ༀ་ཨཱཿ ཧཱུྃ། བཅོམ་ལྡན་འདས་འཁོར་ལོ་སྡོམ་པ་ཡབ་ཡུམ། བདེ་ཆེན་གྱི་ལྷ་མོ་བཞི། སྒོ་མཚམས་མ་བརྒྱད་སོགས་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ༴ ནག་པོ་ཆེན་པོ་ལྕམ་དྲལ་འཁོར་དང་བཅས་པའི་ཞལ༴ མཁའ་འགྲོ་ཞིང་སྐྱོང་ཕྱོགས་སྐྱོང་གནས་ཡུལ་གྱི་བདག་པོ་སྲིད་གསུམ་འབྱུང་པའི་ཚོགས་དང༌། རིགས་དྲུག་གི་སེམས་ཅན་དཀྱིལ་འཁོར་འཁོར་ལའི་ངོ་བོར་དག་པ་རྣམས་ཀྱི་ཞལ་དུ་ༀ་ཨཱཿ ཧཱུྃ། ངག་ཏུ་མྱོང་བས་ལུས་ཀྱི་ལྷ་ཐམས་ཅད་ཀྱང་དགྱེས་པར་གྱུར། གསང་མཆོད་ནི། འདིར་ནི་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་སྟེ། །འདི་ནི་མཆོག་ཏུ་བདེ་ཆེན་ཉིད། །ཅེས་པའི་དོན་བསྒོམ། བསྟོད་པའི་མཆོད་པ་ནི། ༀ། བཅོམ་ལྡན་མགོན་པོ་དཔའ་བོ་ཆེན་པོ་ནི། །བསྐལ་པའི་མེ་ཆེན་ལྟ་བུར་རབ་ཏུ་འབར། །རལ་པའི་ཅོད་པན་དབུ་ཡི་རྒྱན་དུ་བཅིངས། །མཆེ་བ་རབ་གཙིགས་ཤིན་ཏུ་འཇིགས་པའི་ཞལ། །སྐུ་ལ་སྤྱན་སྟོང་གཟི་བརྗིད་ལྡན་པ་པོ། །དགྲ་སྟྭ་ཞགས་པ་ཁ་ཊྭཱཾ་མདུང་བསྣམས་ཤིང༌། །རབ་འཇིགས་སྟག་གི་པགས་པ་གོས་སུ་གྱོན། །སྐུ་ཆེན་དུད་ཁ་བགེགས་མཐར་མཛད་ལ་འདུད། །བཅོམ་ལྡན་འདས་མ་རྡོ་རྗེ་ཕག་མོ་ནི། །འཇིག་རྟེན་གསུམ་གྱིས་རྒོལ་བས་མི་ཚུགས་ཤིང༌། །འབྱུང་པོ་མ་ལུས་གྲི་གུག་ཆེན་པོས་འཇོམས། །རྡོ་རྗེ་གདན་བཞུགས་ཚངས་དབང་ཐོད་པ་འཛིན། །ཁྲོ་མའི་གཟུགས་ཅན་ཤིན་ཏུ་དྲག་སྙེམས་མ། །རྨུགས་བྱེད་རེངས་བྱེད་རྨོངས་པས་རབ་བརྒྱལ་ཞིང༌། །བདུད་ཀྱི་འཇིགས་པ་སྙེམས་ཤིང་ཞི་བར་མཛད། ། རྣལ་འབྱོར་འདོད་པའི་དབང་ཕྱུག་མ་ལ་འདུད། །མཛེས་པའི་ཞལ་མདོག་རིགས་བཞིའི་ཁྲོ་མོར་སྤྲུལ། །མཚམས་ཀྱི་འདབ་བཞིར་དངོས་གྲུབ་བུམ་པས་མཚན། །མི་འགྱུར་བདེ་མཆོག་སྟེར་བར་མཛད་པ་ཡི༑ ༑ཡེ་ཤེས་མཁའ་འགྲོ་བཞི་ལ་ཕྱག་འཚལ་ལོ། །དེ་ཡི་ཕྱི་རོལ་ཕྱོགས་བཞི་མཚམས་བཞི་རུ། །ཁྭ་ཏ་འུག་པ་ཁྱི་དང་ཕག་པའི་གདོང༌། །གཤིན་རྗེ་བརྟན་མ་ཕོ་ཉ་མཆེ་བ་མ། །འཇོམས་མ་མཁའ་འགྲོ་རྣམས་ལ་ཕྱག་འཚལ་ལོ། །གཉིས་པ་ཁྱད་པར་གྱི་མཆོད་པ་ལ་བཞི་ལས། བཟླས་པའི་མཆོད་པ་ནི། རང་གཙོ་བོ་ལས་ཧེ་རུ་ཀ་ཞལ་གཅིག་ཕྱག་གཉིས་པ་རྣམ་པར་དབྱེ་བའི་ཐུགས་ཀའི་འོད་ཟེར་གྱིས་མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་དམ་བསྐུལ་བས་འོད་ཟེར་མཁའ་ཁྱབ་ཏུ་འཕྲོས། དོན་གཉིས་བྱས༑ རྡོ་རྗེ་གསུམ་གྱི་བྱིན་རླབས་དང་དངོས་གྲུབ་ཐམས་ཅད་བསྡུས་ནས་རང་དང་མདུན་བསྐྱེད་ཀྱི་དཀྱིལ་འཁོར་ལ་ཐིམ་པར་མོས་ལ་གཙོ་བོ་ཡབ་ཡུམ་གྱི་སྔགས་བརྒྱ་རྩ་བརྒྱད། འཁོར་ལྷ་མོ་བཅུ་གཉིས་པོ་ལ་བདུན་གྱིས་ཉུང་མཐའ་བྱས་པ་དང༌། དབྱངས་གསལ་དང་ཧེ་རུ་ཀའི་ཡིག་བརྒྱའང་ཅུང་ཟད་བཟླས་མཐར། བཅོམ་ལྡན་འདས་དཔལ་ཧེ་རུ་ཀའི་དཀྱིལ་འཁོར་གྱི་ལྷ་ཚོགས་ཐམས་ཅད་ཀྱིས་བདག་དང་སློབ་མར་བཅས་པ་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་བཏབ་ལ་མེ་ཏོག་དོར། བྱ་བའི་མཆོད་པ་ནི༑ སྤྲོ་ཞིང་ནུས་ན་རྗེས་ཆགས་དང་ཆོ་གའི་གར་དང༌། རྡོ་རྗེའི་གླུ་དང་རོལ་མོ་སོགས་ཀྱིས་ཀྱང་མཆོད་པའོ། །ཚོགས་ཀྱི་འཁོར་ལའི་མཆོད་པ་ནི། ཚོགས་རྫས་རྣམས་བྱིན་རླབས་བདེ་གཤེགས་བཅུ་གཉིས་ལྟར་དང༌། མགྲོན་དྲངས་མཆོད་རོལ་པ་ལྷག་གཏོར་རྣམས་ལམ་ལྔའི་དབང་ ཆོག་ཏུ་བཤད་པ་བཞིན་ལས། རོལ་པ་མན་ཆད་དབང་གི་མཐར་མཛད་པ་ཕྱག་ལེན་ནོ། །གཏོར་མའི་མཆོད་པ་ནི། བསང་སྦྱངས། སྟོང་པའི་ངང་ལས་ཨ་ལས་ཀ་པཱ་ལའི་ནང་དུ་འབྲུ་གསུམ་ཞུ་བ་ལས་བྱུང་བའི་བདུད་རྩིའི་རྒྱ་མཚོར་གྱུར། ༀ་ཨཱཿ ཧཱུྃ་ཧ་ཧོ་ཧྲཱིཿ ལན་གསུམ་གྱིས་བྱིན་གྱིས་བརླབས། འཁོར་ལོ་བདེ་མཆོག་ལྷ་བཅུ་གསུམ་པའི་དཀྱིལ་འཁོར་ལ་སངས་རྒྱས་དང་བྱང་སེམས་མཁའ་འགྲོའི་ཚོགས་དང་བཅས་པ་རྣམས་དང༌། རིགས་དྲུག་གི་སེམས་ཅན་ཐམས་ཅད་ཀྱང་ཧེ་རུ་ཀའི་རྣམ་པར་སད་པ་ཕ་ཞེས་སྤྱན་དྲངས། ལྷ་རྣམས་ཀྱི་ལྗགས་རྡོ་རྗེའི་སྦུ་གུས་གཏོར་མ་གསོལ་བར་གྱུར། ༀ་བཛྲ་ཨ་རཱལླི་ཧོཿ ཛཿ ཧཱུྃ་བཾ་ཧོཿ ཌཱ་ཀི་ནཱི་ས་མ་ཡ་སྟཾ། དྲ་ཤྱ་ཧོ། ༀ་ཨཱཿ ཧཱུྃ་ཞེས་ལན་གསུམ་གྱིས་ལྷ་ལ་འབུལ། དེ་ནས་གཏོར་ཆོག་ལྟར་མགོན་པོ་ལྕམ་དྲལ་སོགས་སྲུང་མ་རྣམས་ལ་ཕུལ། དེ་ནས་ༀ་ཁ་ཁ་ཁཱ་ཧི་ཁཱ་ཧི་སོགས་སྔོན་གཏོར་ལན་གསུམ་གྱིས་དུར་ཁྲོད་ན་གནས་པ་དང་འབྱུང་པའི་ཚོགས་ལ་འབུལ། ཨརྒྷཾ་སོགས་ཀྱིས་མཆོད། འབྲུ་གསུམ་གྱིས་ནང་མཆོད་ཕུལ། དཔལ་ལྡན་བདེ་མཆོག་འཁོར་ལོ་ནི། །མཁའ་འགྲོ་མ་ཡི་འཁོར་ལོས་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །ཞེས་པས་བསྟོད། བཅོམ་ལྡན་བདེ་མཆོག་འཁོར་དང་བཅས། །ཁྱེད་རྣམས་མཆོད་ཅིང་བསྟོད་པ་ཡིས། །རྣལ་འབྱོར་བདག་ཅག་འཁོར་བཅས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་ཕྲིན་ལས་གཞོལ། དེ་ནས་དབང་བསྐུར་བ་ལ་གཉིས་ལས། སློབ་དཔོན་བདག་འཇུག་ནི། རང་ཉིད་སློབ་མ་འཇུག་པ་ལྟར་ དཀྱིལ་འཁོར་དུ་ཞུགས་ནས་བླ་མ་དང་ཐ་མི་དད་པའི་དཀྱིལ་འཁོར་གྱི་གཙོ་བོ་ལས་དབང་རྣམས་ཆོ་ག་རྒྱས་བསྡུས་ཅི་རིགས་པས་རྫོགས་པར་བླང་ངོ༌། །དེ་ནས་སློབ་མ་དཀྱིལ་འཁོར་དུ་གཞུག་ཅིང་དབང་བསྐུར་བ་ནི། སློབ་བུ་རྣམས་ལས་བུམ་གྱིས་ཁྲུས་བྱས། ཕྱག་བྱས་ཏེ་གྲལ་དུ་འཁོད་པ་ལ། སེམས་བསྐྱེད་གསལ་འདེབས་དང་ཆོས་བཤད་ཇི་ལྟར་རིགས་པ་སྔོན་དུ་འགྲོ་བས། འདིར་བདེ་མཆོག་ཐུན་མོང་བ་མཻ་ཏྲི་པས་རྗེ་བཙུན་མི་ཕམ་མགོན་པོ་ལ་གནང་བ་ལྷ་བཅུ་གསུམ་མའི་དཀྱིལ་འཁོར་ལ་བརྟེན་ནས་བསྐུར་བ་ལ་བསྙེན་སྒྲུབ་ལས་གསུམ་དུ་གསུངས་པ་ལས། དང་པོ་བསྙེན་པ་བཞིས་སྟ་གོན་བྱ་བ་སྟེ། དེ་ལ་བླ་མ་ཉེ་བར་བསྙེན་པའི་ཕྱིར། ཕྱག་དང་མཎྜལ་སྔོན་དུ་འགྲོ་བའི་སྒོ་ནས་གསོལ་བ་གདབ་དགོས་པ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ། དེ་ནས་བདག་ཅག་བླ་མའི་ཞབས་སྤྱི་བོར་ལེན་ན་བདེ་ཆེན་ཐར་པའི་གྲོང་དུ་གཞུག་ཏུ་གསོལ་སྙམ་པས་འདིའི༴ ཀྱཻ་ཧོ་བདག་ཅག་སྐལ་བར་ལྡན། །ཁྱོད་ཞབས་པདྨོ་སྤྱི་བོར་ལེན། །ཚེ་འདི་ཉིད་ལ་བདེ་བླག་ཏུ། །ཐར་པའི་གྲོང་མཆོག་བསྟན་དུ་གསོལ། །ལན་གསུམ། སློབ་མ་ཉེ་བར་བསྙེན་པ་ནི། ཁོ་བོས་བར་ཆད་དྲི་བ་ཡིན་པས་ལན་དྲང་པོར་ཐོབ་ཅིག །བསོད་ནམས་ཀྱི་བར་ཆད་སྤོང་བ་ཡོ་བྱད་གཏོང་བའི་བློ་དང་ལྡན་ནམ། བུས་ལྡན་ལགས། རྟེན་གྱི་བར་ཆད་སྤོང་བ་དབང་པོ་ཡན་ལག་ཚང་ངམ། ཚང་ལགས། སྣོད་ཀྱི་བར་ཆད་སྤོང་བ་རྒྱུད་སྡོམ་པ་གསུམ་དང་ལྡན་པར་བྱེད་དམ། བྱེད་ལགས། ཞེས་ཁས་ལེན་དུ་གཞུག་གོ ། དངོས་གྲུབ་བླང་བའི་རྫས་རིག་མ་ཉེ་བར་བསྙེན་པ་ནི། མཚན་ལྡན་གྱི་གཟུངས་མ་དེ་རབ་ཆོས་བཤད་ཅིང་དབང་བསྐུར། འབྲིང་ཐབས་མཁས། ཐ་མ་རིན་གྱིས་བསླུས་ལ་དབང་བྱ་བ་སྟེ། ད་ལྟའི་དུས་སུ་དངོས་རིག་ལ་བརྟེན་ནས་དབང་བསྐུར་བ་ཕྱག་ལེན་ལ་མི་མཛད་པས་འདིར་བཏང་སྙོམས་སུ་བྱས། ཡི་དམ་གྱི་ལྷ་ཉེ་བར་བསྙེན་པ་ནི། དཀྱིལ་འཁོར་གྱི་ལྷ་ལག་མཆོད་ཀྱི་མཆོད་པས་མཉེས་པར་བྱེད་པ་སྟེ། སྒྲུབ་མཆོད་དང་འབྲེལ་བར་སྔོན་དུ་གྲུབ། གཉིས་པ་ཆས་འཇུག་རྣམ་པ་བཞིའི་སྒོ་ནས་སྒྲུབ་པ་ཉམས་སུ་བླང་བར་བྱ་སྟེ། དེ་ལ་སློབ་མ་ཆས་སུ་གཞུག་པ་ནི། རྒྱུད་སྡོམ་པ་གསུམ་ལྡན་དུ་སྒྲུབ་པ་སྟེ། སྐྱབས་སུ་འགྲོ་བས་སོ་ཐར། ཀུན་རྫོབ་སྨོན་འཇུག་དང་དོན་དམ་བྱང་སེམས་བཟུང་བས་བྱང་སྡོམ། རིག་འཛིན་སྔགས་ཀྱི་སྡོམ་པ་ལ་སྤྱིར་རྩ་ལྟུང་བཅུ་བཞི། ཡན་ལག་གི་ལྟུང་བ་བརྒྱད། བྱེ་བྲག་བདེ་གཤེགས་རིགས་ལྔའི་དམ་ཚིག་དང་སྡོམ་པ་སྟེ། དེ་ཐམས་ཅད་ཚུལ་བཞིན་དུ་བཟུང་སྙམ་པས་འདིའི༴ སངས་རྒྱས་ཆོས་དང་དགེ་འདུན་ལ། །ཐར་པ་འདོད་ཕྱིར་སྐྱབས་སུ་མཆི། །ངན་འགྲའི་སྲིད་པ་དགག་པའི་ཕྱིར། །བྱ་བ་དམན་པ་ཐམས་ཅད་སྤང༌། །སེམས་ཅན་དོན་ཀུན་སྒྲུབ་པའི་ཕྱིར། །བྱང་ཆུབ་སེམས་གསུམ་བསྐྱེད་པར་བགྱི། །བཅུ་བཞིར་ཕྱེ་བའི་རྩ་བ་དང༌། །སྡོམ་པ་ཐམས་ཅད་བདག་གིས་བཟུང༌། །ཞེས་ལན་གསུམ། དེ་ནས་ཧཱུྃ་ཛཿ ཞེས་ལས་རྡོར་གྱིས་དཀྱིལ་འཁོར་གྱི་ནང་དུ་ཁྲིད་དེ་ཤར་ཕྱོགས་སུ་ཧེ་རུ་ ཀ་ཕྱག་གཉིས་པའི་རྣམ་པས་འཁོད་པར་གྱུར། དེ་ནས་དམ་ལ་བཞག་པ་ནི། ན་མོ་ཆོས་འདི་ཟབ་སྟེ་མཐོང་བར་དཀའ། །ཀུན་དང་ཐུན་མོང་མ་ཡིན་པས། །ཚུལ་བརྗོད་པས་ནི་ཉམས་པར་བྱེད། །ཉམས་ན་བདུད་ཀྱིས་བཟུང་བར་འགྱུར། །ཞེས་གདམས་ནས་བྲོ་བོར་བ་འདིའི། ས་མ་ཡ་ན་ར་ཀན། ཅེས་ལན་གསུམ། ཡི་དམ་གྱི་ལྷ་ཆས་སུ་གཞུག་པ་ནི། དཀྱིལ་འཁོར་གྱི་ལྷ་རྣམས་སྒྲུབ་ཅིང་མཆོད་པ་སྟེ་ཁོ་བོས་སྔོན་དུ་ཆད་ལྷག་མེད་པར་གྲུབ་པ་ལགས། གསུམ་པ་ལས་ལ་སྦྱར་བ་ནི། དངོས་གཞི་དབང་བསྐུར་བའི་ཆོ་ག་སྟེ། དེ་ལ་དབང་རིམ་པ་བཞི་ལས། དང་པོ་བུམ་དབང་ཞུ་བའི་ཡོན་དུ་མཎྜལ་ཕུལ། དེ་ནས་གསོལ་བ་འདེབས་པ་འདིའི༴ ན་མོ་བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་ཆེ་བའི་ཆེ་སྦྱིན་ལྟར། །བདག་ཀྱང་སྐྱོབ་པའི་དོན་སླད་དུ། །ནམ་མཁའི་རྡོ་རྗེས་བདག་ལ་སྩོལ། །ལན་གསུམ། བུམ་དབང་གི་དམ་ཚིག་བཟུང་བ་ཡིན་པས་འདིའི་རྗེས་ཟློས་མཛོད། ན་མོ་བཅུ་བཞིར་ཕྱེ་བའི་དམ་ཚིག་དང༌། །ཡན་ལག་ཉེས་པ་སྤང་བར་བགྱི། ། སེམས་ཅན་འདུལ་དོན་མ་གཏོགས་པའི། །བྱ་བ་དམན་པ་ཐམས་ཅད་སྤོང༌། །ཞེས་ལན་གསུམ། དེ་ལ་བུམ་པའི་དབང་བདུན་པོ་འདིར་བརྟན་བྱེད་བུམ་པ་དངོས་ཀྱི་དབང་དུ་བསྡུས་ནས་བསྐུར་བར་བྱ་བ་ཡིན་པས། དཀྱིལ་འཁོར་གྱི་གཙོ་བའི་ཐུགས་ཀ་ནས་སྤྲུལ་པའི་དབང་ལྷ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ཏེ་ངོ་མཚར་བའི་དགེ་མཚན་དུ་མས་དབང་བསྐུར་བའི་མོས་པ་མཛོད། ཧཱུྃ། བྱང་ཆུབ་སེམས་ཆུས་རབ་ བཀང་བའི། །རྣམ་པར་དག་པའི་བུམ་པ་འདིས། །སྐལ་ལྡན་ཁྱོད་ལ་དབང་བསྐུར་བས། །སྐུ་ཡི་རྡོ་རྗེ་འགྲུབ་པར་ཤོག །ཨ་བྷི་ཥིཉྩ་ༀ། ཨ་བྷི་ཥིཉྩ་ཨཱཿ ཨ་བྷི་ཥིཉྩ་ཧཱུྃ། ཨ་བྷི་ཥིཉྩ་སྭཱ། ཨ་བྷི་ཥིཉྩ་ཧཱ། ན་མོ་གུ་རུ་ཧཱུྃ། ཞེས་བུམ་པ་མགོ་བའི་གནས་ལྔ་དང་སྙིང་གར་གཏུག་ཅིང༌། བུམ་ཆུ་བླུད། ཞེས་བུམ་པའི་ཆུས་དབང་བསྐུར། ལུས་ཐམས་ཅད་གང་། ཉོན་མོངས་པའི་དྲི་མ་དག །བདེ་བ་ཆེན་པོ་མྱོང༌། ཆུའི་ལྷག་མ་སྤྱི་བོར་འཁྱིལ་བ་ལ་རྡོ་རྗེ་སེམས་དཔས་དབུར་བརྒྱན། ནམ་མཁའི་དབང་ལྷ་ཐམས་ཅད་ཀྱིས་བཀྲ་ཤིས་ཀྱི་མེ་ཏོག་འཐོར་བཞིན་དུ། ༀ་སུ་པྲ་ཏིཥྛ་བཛྲེ་སྭཱ་ཧཱ། ཞེས་བརྗོད་པས་ཆོས་ཀྱི་རྒྱལ་པོར་མངའ་གསོལ་བར་བྱའོ། །དེ་ལྟར་ན་ཕྱི་དབྱིབས་ཀྱི་དཀྱིལ་འཁོར་དུ་ཞུགས། བུམ་དབང་ཐོབ། བསྐྱེད་རིམ་བསྒོམ་པ་ལ་དབང༌། སྤྲུལ་སྐུ་རང་བཞིན་ལྷུན་གྲུབ་མངོན་དུ་བྱས་པ་ཡིན་ནོ། །གཉིས་པ་གསང་དབང་ཞུ་བའི་ཡོན་དུ་མཎྜལ་ཕུལ། དེ་ནས་གསོལ་བ་གདབ་པ་འདིའི༴ བཅོམ་ལྡན་ཞི་བ་ཆེན་པོ་ཀྱེ། །ཡོན་ཏན་རྒྱ་མཚོའི་བཀའ་དྲིན་གྱིས། །དོ་ནུབ་བླ་མེད་ཤེས་རབ་འཚལ། །དོ་ནུབ་བདག་ལ་བཀའ་དྲིན་མཛོད། །ལན་གསུམ། གསང་དབང་གི་དམ་ཚིག་བཟུང་བ་འདིའི་རྗེས༴ གསང་བ་ཆེན་པའི་དམ་ཚིག་ནི། །བཤང་གཅི་ཁུ་བ་རཀྟ་དང༌། །སྣབས་དང་མཆིལ་མ་མི་འདོར་ཞིང༌། །འདོད་ཡོན་ལྔ་ལ་ཡ་ང་སྤངས། །ལན་གསུམ། བླ་མ་ཧེ་རུ་ཀ་ཡབ་ཡུམ་རྗེས་ཆགས་ཀྱིས་སྙོམས་པར་ཞུགས་པའི་བདེ་བའི་སྒྲས་སངས་རྒྱས་ཐམས་ཅད་སྤྱན་དྲངས། འདོད་ཆགས་ཆེན་པོས་ བྱང་སེམས་ཀྱི་ངོ་བོར་ཞུ་བ་རང་ལ་ཐིམ། དགའ་བཞིའི་རིམ་པས་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་ནས། བདེ་བའི་རྟེན་ཀུན་ད་དང་རྡུལ་གྱི་དྭངས་མ་སྦྱོར་མཚམས་ནས་སྤྲོས་པ་ཐོད་པའི་བདུད་རྩི་དང་འདྲེས་པ་ལྕེ་ཐོག་ཏུ་སྦྱིན་པར་མོས་ལ། ཧཱུྃ། ཐབས་དང་ཤེས་རབ་ལས་བྱུང་བའི། །ཡེ་ཤེས་བདུད་རྩི་དྲི་མེད་འདིས། །སྐལ་ལྡན་ཁྱོད་ལ་དབང་བསྐུར་བས། །གསུང་གི་རྡོ་རྗེ་འགྲུབ་པར་ཤོག །ༀ་བཛྲ་བྷོ་དྷི་ཙིཏྟ་ཨ་མྲྀ་ཏ་ ཨཱཿ ཧཱུྃ། ཞེས་མྱོང་བས་རང་བཞིན་བརྒྱད་ཅུའི་རྟོག་པ་འགགས། སེམས་གསལ་སྟོང་ནམ་མཁའ་དང་མཉམ་པའི་ཡེ་ཤེས་རྒྱུད་ལ་སྐྱེས་པར་གྱུར། དེ་ནས་བླ་མའི་ཡུམ་དེས་ཕྱིའི་ཐིག་ལེ་ཉི་ཤུ་རྩ་བཞི་དགོད་པ་ནི། གནས་སོ་སོར་བདུད་རྩིའི་ཐིག་ལེ་བྱ་ཞིང་ཡུལ་ཉེར་བཞིའི་མིང་ཡིག་དང་པོ་བརྗོད་དེ། མཚོག་མར་པུ། སྤྱི་གཙུག་ཏུ་ཛ། རྣ་བ་གཡས་ཨོ། ལྟག་པར་ཨ། རྣ་གཡོན་གཽ། སྨིན་ཕྲག་རཱ། མིག་གཉིས་སུ་དེ། དཔུང་པ་གཉིས་མ། ཞེས་མཁའ་སྤྱོད་ཀྱི་གནས་བརྒྱད། མཆན་ཁུང་གཉིས་སུ་ཀཱ། ནུ་མ་གཉིས་སུ་ཨོ། ལྟེ་བར་ཏྲི། སྣ་རྩེར་ཀོ། ལྐོག་མར་ཀ། མགྲིན་པར་ལ། སྙིང་གར་ཀ། མཚན་མར་ཧི། ཞེས་པས་ས་སྤྱོད་ཀྱི་གནས་བརྒྱད། གསང་གནས་སུ་ཏྲེ། བཤང་ལམ་དུ་གྲ། བརླར་སཽ། བྱིན་པར་པུ། སོར་མོར་ནཱ། བོལ་གོང་གཉིས་སུ་ངི་། མཐེ་བོང་གཉིས་སུ་མ། པུས་མོ་གཉིས་སུ་ཀུ། ཞེས་པས་ས་འོག་སྤྱོད་ཀྱི་གནས་བརྒྱད་དེ། ཕྱི་གནས་ཉི་ཤུ་རྩ་བཞིའི་ཐིག་ལེའོ། །དེ་ནས་ནང་གི་ཐིག་ལེ་ བདུན་ནི། སྙིང་གའི་ཧཱུྃ་གི་མཐར་གཡོན་བསྐོར་དུ་ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊ། ཅེས་བཀོད། གསང་བའི་ཐིག་ལེ་ལྔ་ནི། སྙིང་པོའི་མཐར་ༀ་ཨཱཿ ཧཱུྃ་སྭཱ་ཧཱ། མཱཾ་ལཱཾ་ཏཱཾ་པཱཾ་ཁཱཾ་རྣམས་སྔར་ལྟར་བཀོད། དེ་ནས་བླ་མའི་ཡུམ་གྱིས་སློབ་མ་པང་དུ་བླངས་ཏེ། སྨན་ཕུད་བླུད་རེས་ཀྱིས་བདེ་བ་རྒྱས་པར་བྱས། རྩ་བཙལ་བ་ནི་རྩ་སྒོ་དབྱེ་བ་ཞལ་སྦྱར། སྣ་བུག་གཉིས་སྤྲད་དེ། རླུང་འབུད་རྔུབས་སྤེལ་མས་རླུང་ལས་རུང་དུ་བྱེད་པས་རླུང་ལམ་བསྟན། སྲུབས་པ་དང་བསྲུབས་པའི་སྦྱོར་བས་བྱང་སེམས་ཡས་བབས། འོག་རླུང་གི་སྦྱོར་བས་སྟེང་རླུང་ཧཱུྃ་ཧཱུྃ་ཞེས་སྤྱི་བོར་དྲངས། ཕན་ཚུན་ཐིག་ལེ་སྤྲོ་རེས་བྱེད་པ་ནི་ཐིག་ལེ་སྲོ་བ་དང་འཕོ་བ་སྦྱང་བའོ། །དེས་བདེ་བའི་ཡེ་ཤེས་བརྗོད་བྲལ་རྒྱུད་ལ་སྐྱེ་ཞིང་སྐྱེས་ཟིན་བརྟན་པར་བྱས་པའོ། །དེ་ལྟར་ན་ཀུན་རྫོབ་བྱང་སེམས་ཀྱི་དཀྱིལ་འཁོར་དུ་ཞུགས། གསང་དབང་ཐོབ་སྟེང་སྒོ་རྣམ་པར་གྲོལ་བའི་ལམ་གཏུམ་མོ་སྒོམ་པ་ལ་དབང༌། ལོངས་སྐུ་རང་བཞིན་ལྷུན་གྲུབ་མངོན་དུ་བྱས་པ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་ཞུ་བའི་ཡོན་དུ་མཎྜལ་ཕུལ། དེ་ནས་གསོལ་བ་བཏབ་པ་འདིའི༴ ན་མོ། དཔལ་ལྡན་བདེ་མཆོག་མགོན་པོ་ཡིས། །དཔལ་ལྡན་ཆོས་ཀྱི་རྡོ་རྗེ་ལ། །བདེ་བའི་དེ་ཉིད་བསྟན་པ་ལྟར། །དེང་ནུབ་བདག་ལ་བཀའ་དྲིན་མཛོད། །ལན་གསུམ། ཤེར་དབང་གི་དམ་ཚིག་བཟུང་བ་འདིའི་རྗེས༴ མཆོག་ཏུ་གསང་བའི་དམ་ཚིག་ནི། །བུད་མེད་སྤང་བར་མི་བྱ་ཞིང༌། ། ཚངས་པར་སྤྱོད་ལ་གནས་པར་བྱ། །སེམས་ཅན་འདུལ་དོན་མ་གཏོགས་པ། །མི་དགེ་བཅུ་ལ་ཡ་ང་སྤངས། །ལན་གསུམ། དེ་ནས་སློབ་མས་བླ་མ་ཡབ་ཡུམ་གྱི་ཞབས་ལ་ཕྱག་བྱ་ཞིང་མོས་གུས་དྲག་པོ་བྱས་པས༑ བླ་མ་ཐུགས་རྡོ་རྗེ་ཧེ་རུ་ཀའི་ངོ་བོར་བཞུགས་པའི་ཕྱག་གཡོན་པས་ཕྱག་རྒྱ་མ་གཟུགས་དང་ལང་ཚོ་ཕུན་སུམ་ཚོགས་པའི་ཕྱག་གཡས་པ་ནས་བཟུང་སྟེ། ཧཱུྃ། དགའ་སྟེར་གནས་སྟེར་ལྷ་མོ་འདི། །སྣ་ཚོགས་གཟུགས་ཅན་ཡིད་དུ་འོང༌། །མཐའ་ཡི་བདེ་བ་སྦྱིན་པ་མོ། །རྣམ་པ་ཀུན་ཏུ་ཕྱག་རྒྱར་ལོངས། །ལོངས་ལ་མཆོད་པ་རྟག་ཏུ་གྱིས། །ༀ་མ་ཧཱ་སུ་ཁ་ཧོཿ ཞེས་བརྗོད་ཅིང་སློབ་མའི་ལག་པ་གཡོན་པར་གཏད་པར་མོས་ལ་སིནྡྷུ་རའི་མཎྜལ་གཏོད། ལྷ་མོ་དེས་ཀྱང་ལུས་གཅེར་བུར་ཕྱུང་ནས་གསང་རྩ་རྒྱས་པའི་པདྨ་མཚོན་བཞིན་དུ་འདི་སྐད་ཅེས། ང་ཡི་གསང་བའི་པདྨོ་འདི། །ཡོན་ཏན་ཀུན་གྱི་འབྱུང་གནས་ཡིན། །མཁས་པ་གང་གིས་འདི་བརྟེན་ན། །དེ་ཡི་མདུན་ན་སངས་རྒྱས་བཞུགས། །ༀ་བཛྲ་ཨཉྫ་ལི་ཧོ། ཞེས་བརྗོད་ནས་ཐབས་ཀྱི་པང་དུ་བྱོན་པར་གྱུར། དེ་ནས་སློབ་མ་དང་རིག་མ་ཧེ་རུ་ཀ་ཡབ་ཡུམ་དུ་གསལ་བཏབ་ལ། ཡབ་ཡུམ་གཉིས་ཀའི་སྐུ་ལ་བྱང་སེམས་ཀྱི་ཐིག་ལེ་གསུམ་ཕན་ཚུན་འཁོད་རེས་ཀྱིས་བཀོད་པའི་མོས་པ་མཛོད་བྱས་ལ་བུའི་གནས་རྣམས་སུ་གསང་དབང་ལྟར་ཐིག་ལེ་བྱ། ཐབས་ཀྱི་རྡོ་རྗེ་རྩེ་ལྔ་པ་ནོར་བུའི་རྩེ་ༀ་གྱིས་མཚན་པ། ཤེས་རབ་ཀྱི་པདྨ་ཨཱཿ ལས་ ཟེའུ་འབྲུའི་རྩེ་མོ་ཨས་མཚན་པ། དེ་ནས་རྩ་སྒོ་དབྱེ་ཞིང་རླུང་ལམ་བསྟན་པ་སྔོན་དུ་འགྲོ་བས་ཐབས་ཤེས་སྙོམས་འཇུག་རྗེས་ཆགས་ཀྱི་རྐྱེན་གྱིས་འཁོར་ལོ་བཞིར་ཡས་འབབ་མས་འཛེག་གི་བདེ་བ་བརྟན་པའི་མོས་པ་མཛོད། དེའང་གང་ཟག་ཅིག་ཅར་བ་ལ་རྒྱུ་དུས་ཀྱི་དབང་བསྐུར་ཏེ། འཁོར་ལོ་བཞིར་བྱང་སེམས་རིམ་པར་བབས་པས། མགྲིན་པར་དགའ་བ། སྙིང་གར་མཆོག་དགའ། ལྟེ་བར་ཁྱད་དགའ། གསང་བར་གཡོ་མེད་བརྟན་པ་ལྷན་སྐྱེས་ཏེ་ཡས་བབས་ཀྱི་དགའ་བ་བཞི་དང༌། སླར་ཡང་ཧཱུྃ་ཧཱུྃ་ཞེས་གྱེན་དུ་གཤེགས་མས་བརྟན་གྱི་དགའ་བཞིའི་རིམ་པ་དོན་དམ་རང་རིག་ལྷན་སྐྱེས་ཀྱི་ཡེ་ཤེས་བདེ་སྟོང་ཟུང་འཇུག་མངོན་དུ་བྱས་པའོ༑ ༑ཡང་རིམ་གྱིས་པ་ལམ་དུས་ཀྱི་དབང་བསྐུར་ཏེ། བྱང་སེམས་དབབ་བཟུང་ལྡོག་དགྲམ་སྟེ། མཁས་པ་བཞི་ལ་ངོ་སྤྲོད་པ་ཡིན་ནོ། །ཐོད་རྒལ་བ་ལ་འབྲས་བུའི་དུས་ཀྱི་དབང་བསྐུར་ཏེ། འཁོར་ལོ་བཞི་ལ་རིམ་པར་བརྟན་པས་ཚད་མེད་བཞི་ལ་སོགས་པ་འབྲས་བུའི་ཡོན་ཏན་སྐྱེ་བའི་རིམ་པ་རྣམས་ཤེས་པར་མཛོད་ཅིག །དེ་ལྟར་ན་བྷ་གའི་དཀྱིལ་འཁོར་དུ་ཞུགས། ཤེར་དབང་ཐོབ། གཞན་ལུས་ཕོ་ཉའི་ལམ་སྒོམ་པ་ལ་དབང༌། ཆོས་སྐུ་རང་བཞིན་ལྷུན་གྲུབ་མངོན་དུ་བྱས་པ་ཡིན་ནོ། །བཞི་པ་ཚིག་དབང་རིན་པོ་ཆེ་ཞུ་བའི་ཡོན་དུ་མཎྜལ་ཕུལ། དེ་ནས་གསོལ་བ་གདབ་པ་འདིའི༴ ན་མོ། མགོན་པོ་ཐུགས་རྗེ་ཆེ་ལྡན་པ། །དབང་བསྐུར་གསུམ་པོ་ བདག་ལ་གནང༌། །རྣམ་པ་ཀུན་ཏུ་མཆོག་གྱུར་པའི། །བཞི་པ་ཡང་ནི་བདག་ལ་སྩོལ། །ལན་གསུམ། བཞི་པ་དམ་ཚིག་བཟུང་བ་འདིའི་རྗེས༴ ན་མོ། བསྲུང་དུ་མེད་པའི་དམ་ཚིག་ནི། །ཐམས་ཅད་རོ་མཉམ་ཆོས་ཉིད་ངང༌། །འཁོར་བ་སྤང་བར་མི་བྱ་ཞིང༌། །མྱ་ངན་འདས་པ་མི་སྒྲུབ་བོ། །ལན་གསུམ། དེ་ནས་སློབ་མ་རྣམས་ལུས་གནད་ཆོས་བདུན་བཅའ། ངག་གནད་རླུང་རང་སོར་བཞག །སེམས་གནད་གང་ཤར་གྱི་རང་ངོ་ལ་ཅེར་གྱིས་ལྟོས། དེ་ཀའི་ངང་ལ་མ་བཅོས་པར་རང་ལུགས་སུ་མཉམ་པར་ཞོག་བྱས་ལ། ངོ་སྤྲད་པ་ནི། ཧཱུྃ། ཡེ་ཤེས་འདི་ནི་ཆེས་ཕྲ་ཞིང༌། །རྡོ་རྗེ་སྙིང་པོ་མཁའ་དང་མཚུངས། །རྡུལ་བྲལ་མཐར་ཕྱིན་བདེ་བ་སྟེ། །ཁྱོད་ཀྱི་ཕ་ཡང་ཁྱོད་རང་ཉིད། །ཅེས་བསམ་གྱིས་མི་ཁྱབ་པའི་ལྷན་ཅིག་སྐྱེས་པའི་སྐུ་དང་ཡེ་ཤེས་ཟུང་འཇུག་ཏུ་གདོད་མ་ནས་རང་ཤར་བ་ནི་དབང་བཞི་པའི་ཡེ་ཤེས་སོ། །དེ་ལྟར་ན་དོན་དམ་བྱང་སེམས་ཀྱི་དཀྱིལ་འཁོར་དུ་ཞུགས། དབང་བཞི་པ་ཐོབ། ཕྱག་རྒྱ་ཆེན་པོ་བསྒོམ་པ་ལ་དབང༌། ངོ་བོ་ཉིད་སྐུ་རང་བཞིན་ལྷུན་གྲུབ་མངོན་དུ་བྱས་པ་ཡིན་ནོ། །དེ་ནས་གཙོ་བོས་ཇི་ལྟར་སོགས་ཀྱི་དམ་ཚིག་ཁས་བླངས། བཀའ་དྲིན་གཏོང་རག་གི་དོན་དུ་མཎྜལ་དང༌༑ དེང་ནས་བརྩམས་ཏེ་སོགས་ཀྱིས་ལུས་དབུལ་དགེ་བ་བསྔོ་བ་རྣམས་བྱའོ། །དེ་ནས་རྗེས་ཆོག་ནི། ཚོགས་ལ་རོལ། ལྷག་མ་བཏང༌། མཆོད་པ་ཁ་གསོས་ལ་བྱིན་གྱིས་བརླབས། ཨརྒྷཾ་ནས་ཤབྡའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ། དཔལ་ལྡན་བདེ་མཆོག་ འཁོར་ལོ་ནི། །ཞེས་སོགས་ཀྱིས་བསྟོད། བླ་མ་འཁོར་ལོ་སྡོམ་པའི་ལྷ་ཚོགས་རྣམས་ཀྱིས་བདག་དང་སློབ་མར་བཅས་པ་ལ། ཐུགས་བརྩེ་བ་ཆེན་པོས་གཟིགས་ཏེ། བར་ཆད་ཞི་བ་དང་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་གསོལ། ཡིག་བརྒྱ་བཟླ་ཞིང༌། མ་རྙེད་ཡོངས་སུ་སོགས་ཀྱིས་བཟོད་པར་གསོལ། རྣམ་པ་ཀུན་ཏུ་མགྲོན་རྣམས་དང་རྡུལ་ཚོན་གྱི་ཡེ་ཤེས་པ་ནུབ་ཐ་མའི་ཚེ། ༀ་ཁྱེད་ཀྱིས་སེམས་ཅན་དོན་ཀུན་གྱིས་གཤེགས། རྡུལ་ཚོན་གྱི་ཉིན་དང་པོ་རྣམས་དང་རས་བྲིས་ལ་རྣམ་པ་ཀུན་ཏུ་འདིར་ནི་གཟུགས་དང་སོགས་ཀྱིས་ཡེ་ཤེས་པ་བརྟན་བཞུགས་བྱ། དམ་ཚིག་པ་རྣམས་རང་གི་སྙིང་ག་ནས་འོད་ཟེར་འཕྲོས་ཁམས་གསུམ་སྣོད་བཅུད་ཐམས་ཅད་དག་པའི་འཁོར་ལོར་སྦྱོང༌། དེ་ཐམས་ཅད་སྲུང་འཁོར་གཞལ་ཡས་ཁང་དང་བཅས་པ་ལ་ཐིམ། དེ་འཁོར་རྣམས་ལ། འཁོར་རྣམས་ཕྱོགས་གཡོན་བསྐོར་དང་མཚམས་གཡས་བསྐོར་གྱིས་གཙོ་བོ་ལ། ཡུམ་ཡབ་ལ། དེ་ཧཱུྃ་ལ། དེ་བདེ་གསལ་གྱི་དབྱིངས་སུ་ཐིམ་པར་མོས་ལ་མཉམ་པར་བཞག །ༀ་ཧྲཱིཿ ཧ་ཧ་ཧཱུཾ་ཕཊ་ཅེས་བརྗོད་པས་འོད་གསལ་གྱི་ངང་ལས་རང་ཉིད་ཧེ་རུ་ཀ་ཕྱག་གཉིས་པའི་སྐུར་གྱུར་པའི་སྙིང་གར་ༀ་ཧ། མཚོག་མར་ན་མ་ཧི། སྤྱི་གཙུག་ཏུ་སྭཱ་ཧཱ་ཧཱུ། ཕྲག་པར་བཽ་ཥཊ་ཧེ། མིག་ལ་ཧཱུཾ་ཧཱུཾ་ཧོཿ ཚིགས་ཆེན་བརྒྱད་ལ་ཕཊ་ཧཾ། སུམྦྷ་ལན་གཉིས་ཀྱིས་ཕྱོགས་བཅིངས། སྣང་གྲགས་དྲན་རིག་ཐམས་ཅད་ལྷ་སྔགས་བདེ་ཆེན་གྱི་རང་བཞིན་དུ་དག་པར་མོས་ལ། བསྔོ་སྨོན་དང་ཤིས་པ་བརྗོད་པས་མཐའ་བརྒྱན་ནོ། །བླ་མ་གོང་མ་རྣམས་འདི་ཐོབ་པས་བདེ་མཆོག་ཐམས་ཅད་ཀྱི་དབང་ཐོབ་པར་འགྱུར་བས་ཐུན་མོང་བའོ་གསུངས། དེ་ལ་སྟོད་ལུགས་པ་རྣམས་མཻ་ཏྲི་པས་དམ་པ་ལ་གསུངས་པ་བཅུ་གསུམ་མའི་དཀྱིལ་འཁོར་ལ་བརྟེན་ནས་བསྐུར་བར་མཛད། སྨད་ལུགས་པ་རྣམས་ནག་པོ་ལུགས་ཌོམྦྷི་པས་དམ་པ་ལ་གསུངས་པ་བདེ་མཆོག་ལྷན་སྐྱེས་ཀྱི་དཀྱིལ་འཁོར་ལ་བརྟེན་ནས་བསྐུར་བར་མཛད། འདིར་བླ་མའི་ཕྱག་བཞེས་ལྟར་བཅུ་གསུམ་མ་ལ་སྦྱར་བ་ཡིན་ལ། གལ་ཏེ་ལྷན་སྐྱེས་ཀྱི་དཀྱིལ་འཁོར་དུ་བསྐུར་བར་འདོད་ན། དཀྱིལ་འཁོར་རྩ་ཐིག་གི་ཟླུམ་སྐོར་དབུས་ཆོས་འབྱུང་སྔོ་དམར་བརྩེགས་མ་ལ་ལྷ་མཚན་འགོད། བཅས་གཞན་རྣམས་འདྲ། སྒྲུབ་མཆོད་ནི། སྔོན་གཏོར་བཏང༌། གནས་ཡོ་བརླབ། བདག་བསྐྱེད་སྐྱབས་སེམས་ནས་བཟླས་པའི་བར་དམ་པ་ཕྱི་ནང་གསང་གསུམ་གྱི་བདག་བསྐྱེད་དུ་བཀོད་པ་ལྟར་བྱ། དེ་ནས་མདུན་གྱི་དཀྱིལ་འཁོར་དང་བུམ་པ་སྟབས་ཅིག་ཏུ་བསང་སྦྱངས། སྟོང་པའི་ངང་ལས་མཎྜལ་དང་བུམ་པའི་ནང་དུ་པད་ཉི་ཟླ་བའི་གདན་ལ་བཅོམ་ལྡན་འདས་འཁོར་ལོ་བདེ་མཆོག་ཅེས་པ་ནས་མེ་འབར་བའི་དབུས་ན་བཞུགས་པའོ། །ཞེས་པའི་བར་བདག་བསྐྱེད་ལྟར་དང༌། ལས་བུམ་དུ་བདུད་རྩི་འཁྱིལ་བ་སྐད་ཅིག་གིས་གསལ་བཏབ། དེ་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་གི་འོད་ཟེར་གྱིས་ཡེ་ཤེས་པ་ཕ་ཞེས་སྤྱན་དྲངས། ཛཿ ཧཱུྃ་བཾ་ཧོཿ ས་བསྟིམ། ཆུ་གཉིས་ཉེར་སྤྱོད་ལྔ་དང༌། འབྲུ་གསུམ་གྱིས་ནང་མཆོད་ཕུལ། ཆོས་དབྱིངས་རྣམ་དག་མས་བསྟོད། མདུན་བསྐྱེད་ལ་དམིགས་པ་དང་བུམ་པར་གཟུངས་ཐག་བཏགས་ནས་ཡི་གེ་བདུན་པ་ཅི་ནུས་དང༌། ལས་བུམ་ལ་སུམྦྷ་བཟླ་ཞིང་བུམ་པའི་ལྷ་འོད་དུ་ཞུ། འདས་མ་འདས་ཀྱི་གཏོར་མ་དང་ཚོགས་མཆོད་སྔར་ལྟར་བྱ། དེ་ནས་སློབ་དཔོན་བདག་ཉིད་འཇུག་ཅིང་སློབ་མ་ དཀྱིལ་འཁོར་དུ་བཅུག་ནས་དབང་བསྐུར་ཞིང་རྗེས་ཆོག་སྤྱི་དང་འདྲ་བ་ཡིན་ནོ།། ༈ །།ༀ་སྭ་སྟི། ན་མོ་བྷ་ག་ཝ་ཏཱི་བཛྲ་ཡོ་གི་ནྱེ། རྡོ་རྗེ་ཕག་མོ་ཕྱི་སྒྲུབ་ཞལ་གཉིས་མ་ལྷ་དགུའི་དཀྱིལ་འཁོར་དུ་དབང་བསྐུར་བ་ལ། ཐོག་མར་བཤམས་བཀོད་ནི། སྟེགས་བུའི་སྟེང་དཀྱིལ་འཁོར་རྒྱས་པར་སྒོ་རྫོགས་སྤྱི་དང་འདྲ་བའི་དབུས་སམ། བསྡུ་ན་མེའི་འོད་ཕྲེང་དང་རྡོ་རའི་དབུས་སུ་པདྨ་འདབ་བརྒྱད་ཀྱི་ནང་དུ་ཆོས་འབྱུང་བསྣོལ་མའི་ལྟེ་བར་གྲི་ཐོད་དམ་བཾ་ཡིག་དམར་པོ་ཟུར་དྲུག་ལ་དགའ་འཁྱིལ་གཡོན་དུ་འཁོར་བ་རེ། འདབ་མ་བརྒྱད་ལ་ཅང་ཏེའུ་རེ་བྲི༑ དེའི་དབུས་སུ་མཉྫིའི་སྟེང་བུམ་པ་བཅུད་ལྡན་ཆས་སུ་བཅུག་པའི་ཁར་ཀ་པཱ་ལར་འདི་ནི་དེ་ལྟ་ཕྱག་ལེན་མཛད་པའི་དབང་ཆོག་ལྟར་ཏེ། ཡིག་རྙིང་ལ་ལར་བུམ་པའི་གཡས་སུ་ཐོད་ཆང་དང༌། གཡོན་དུ་སིནྡྷུ་རའི་མཎྜལ་འགོད་པར་བཤད་པའང་སྣང་ངོ༌། །ཆང་ལ་བདུད་རྩི་སྦྱར་བས་བཀང་བ་བཀོད། དར་དམར་དང་མེ་ལོང་སིནྡྷུ་རའི་ཆོས་འབྱུང་བསྣོལ་མའི་ལྟེ་བར་བཾ་ཡིག་ལ་རྩ་སྔགས་ཀྱིས་བསྐོར་བ་བྲིས་པས་ཁ་བཅད། སྟེང་ན་དར་དམར་གྱིས་བཀབ། མཐའ་མཆོད་པ་དང་གཏོར་མ་ཚོགས་ཀྱི་ཡོ་བྱད་སོགས་ཀྱིས་བསྐོར། ནང་མཆོད་ཌཱ་དྲིལ་སོགས་ཡོ་བྱད་ཐམས་ཅད་ཚོགས་པར་འདུ་བྱའོ། །དེ་ནས་སྒྲུབ་མཆོད་ནི། སྔོན་གཏོར་བསང་སྦྱངས། ༀ་ཨཱཿ ཧཱུྃ་ཧ་ཧོ་ཧྲཱིཿ ས་བྱིན་གྱིས་བརླབ། འབར་བའི་རྒྱ་དང་བཅས་གཏོར་མགྲོན་དགུག །ཨ་ཀཱ་རོ་བདུན་ནམ་གསུམ་གྱིས་བསྔོས་ལ། གང་དག་འདིར་གནས་སོགས་ཀྱིས་དཀར་ཕྱོགས་པ་རྣམས་དང༌༑ གསང་སྤྱོད་བལྟ་བར་མི་དབང་བའི། །འབྱུང་པོའི་ཕྱོགས་རྣམས་གང་ཡིན་པ། །གཏོར་མའི་ལྷག་མ་འདི་ལོངས་ལ། །ད་ལྟ་ཉིད་དུ་གཞན་དུ་དེངས། །དྲག་སྔགས་དང་བཅས་པས་གཏོར་མ་ཕྱིར་དོར། དེ་ནས་སྐྱབས་ཡུལ་གསལ་ བཏབ་ལ། འགྲོ་རྣམས་བསྒྲལ་འདོད་སོགས་ཀྱིས་སྐྱབས་སུ་འགྲོ། ཤེས་རབ་སྙིང་རྗེ་སོགས་ཀྱིས་སེམས་བསྐྱེད། རང་གི་སྤྱི་བོར་པད་ཉི་ཟླ་བར་རྡོར་སེམས་དཀར་པོ་ཞི་འཛུམ་རྡོ་རྗེ་དང་དྲིལ་བུ་འཛིན་པ། གཡས་བརྐྱང་བའི་ཕྱེད་སྐྱིལ་གྱིས་བཞུགས་པའི་ཐུགས་ཀར་ཧཱུྃ་ཡིག་དཀར་པོ། དེ་ལས་བདུད་རྩིའི་རྒྱུན་གཡས་ཀྱི་མཐེ་བོང་ལས་བབས་པས་སྡིག་སྒྲིབ་ཐམས་ཅད་སྦྱངས་པར་བསམས་ལ། ཡིག་བརྒྱ་བཟླས་མཐར་རྡོར་སེམས་འོད་དུ་ཞུ་ནས་རང་ལ་བསྟིམ་མོ། །དེ་ནས་ཡན་ལག་བྱིན་གྱིས་བརླབ་པ་ནི། རང་གི་ལག་པ་གཡོན་པའི་མཐེའུ་ཆུང་ལ་ༀ་བཾ་དམར་པོ། སྲིན་ལག་ལ་ཧྃ་ཡྃ་སྔོན་པོ། གུང་མོར་ཧྲཱ་མྃ་དཀར་མོ། མཛུབ་མོར་ཧྲ་ཧྲ་སེར་མོ། མཐེ་བོང་ལ་ཧཱུྃ་ཧཱུྃ་ལྗང་གུ༑ ལག་མཐིལ་དུ་ཕཊ་ཕཊ་དུད་ཁ་རྣམས་གྲུབ་པར་གྱུར། སྲིན་ལག་གཡོན་པས་ནང་མཆོད་སྟེང་ཆོས་འབྱུང་འབྲི་ཚུལ་བྱ་ཞིང༌། ཀ་པཱ་ལའི་གཡས་ཟུར་དུ་རེག་པས་ༀ་དཀར་པོ། གཡོན་ཟུར་དུ་རེག་པས་ཨཱཿ དམར་པོ། མདུན་ཟུར་དུ་རེག་པས་ཧཱུྃ་སྔོན་པོ། དབུས་སུ་རེག་པས་བཾ་དམར་པོ། བཾ་ལས་འོད་ཟེར་འཕྲོས། དཔའ་བོ་དང་རྣལ་འབྱོར་མ་ཐམས་ཅད་སྤྱན་དྲངས། སྙོམས་པར་ཞུགས་པའི་སྦྱོར་མཚམས་ནས་བདུད་རྩི་བབས་པ་བཾ་ལ་ཐིམ། བཾ་ཡིག་ཞུ་བ་བདུད་རྩི་ལ་ཐིམ་པས་ནང་མཆོད་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། གཡོན་པའི་སྲིན་ལག་གིས་ༀ་ཨཱཿ ཧཱུྃ་ཞེས་རང་ལུས་ལ་རྡོ་རྗེའི་ཁྲུས་བྱས་པར་གྱུར། སུམྦྷའི་སྔགས་ཀྱིས་མཆོད་རྫས་ལ་གཏོར་བས་བསང་སྦྱངས། སྟོང་པའི་ངང་ལས་ཨ་ལས་ཀ་པཱ་ལ་ཡངས་ཤིང་ རྒྱ་ཆེ་བ་རྣམས་སུ་ཧཱུྃ་ཡིག་ཞུ་བ་ལས། མཆོད་རྫས་ཡེ་ཤེས་ཀྱི་བདུད་རྩི་ས་དང་བར་སྣང་ཐམས་ཅད་ཡོངས་སུ་གང་བར་གྱུར། ༀ་བཛྲ་ཨརྒྷཾ་ཨཱཿ ཧཱུྃ་ནས་ཤབྡའི་བར་བརྗོད། དེ་ནས་བསྲུང་བ་ནི། གཡོན་པའི་སྲིན་ལག་གིས་ལུས་ཀྱི་གནས་དྲུག་ཏུ་བདུད་རྩི་འཐོར་ཞིང་རང་སྐད་ཅིག་གིས་རྗེ་བཙུན་མར་གསལ་བའི་ལྟེ་བར་ༀ་བྃ་དམར་པོ། སྙིང་གར་ཧྃ་ཡྃ་སྔོན་མོ། མགྲིན་པར་ཧྲཱ་མྃ་དམར་མོ། དཔྲལ་བར་ཧྲ་ཧྲ་སེར་མོ། སྤྱི་བོར་ཧཱུྃ་ཧཱུྃ་ལྗང་གུ། ཡན་ལག་ཐམས་ཅད་ལ་ཕཊ་ཕཊ་དུད་ཁ་རྣམས་དཔའ་མོ་དྲུག་གི་རང་བཞིན་དུ་གྱུར། ཅེས་པས་བདག་དང་རྣལ་འབྱོར་བསྲུང་བའོ། །བདུད་རྩི་ཕྱོགས་གཡོན་དང་མཚམས་གཡས་བསྐོར་དུ་འཐོར་ཞིང༌། ༀ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུྃ། གྲིཧྞ་པཱ་ཡ་གྲྀཧྞ་པཱ་ཡ་ཧཱུྃ། ཨཱ་ན་ཡ་ཧོཿ བྷ་ག་ཝཱན་བིདྱཱ་རཱ་ཛ་ཧཱུྃ་ཕཊ། ཅེས་ལན་གཉིས་དང༌། ཕྱོགས་ཀུན་འཐོར་ཞིང༌། ཨ་ཧྲཱཿ གྷ་གྷ་གྷཱ་ཏ་ཡ་སརྦ་དུཥྚཱཾ་ཧཱུྃ་ཕཊ། ཅེས་བརྗོད་པས་བདུད་རྩིའི་ཟེགས་མ་དཔའ་མོ་དྲུག་དང་ཌཱ་ཀི་དཔག་ཏུ་མེད་པར་གྱུར་པས་བགེགས་ཐམས་ཅད་བསྐྲད། ཚུར་འདུས་པ་ལས་ཕྱོགས་ཐམས་ཅད་ཌཱ་ཀི་མའི་རང་བཞིན་གྱི་རྡོ་རྗེའི་ས་གཞི་ར་བ་དྲྭ་བ་གུར་བླ་རེ་ཡེ་ཤེས་ཀྱི་མེ་འབར་བས་བཅིངས་པར་གྱུར། བདུད་རྩི་འཐོར་ཞིང་ༀ་བཛྲ་རཀྵ་རཀྵ་ཧཱུྃ། ༀ་ཨཱཿ ཧཱུྃ༑ ཞེས་བརྗོད་དེ་གནས་བསྲུང་བའོ། །དེ་ནས་བདག་བསྐྱེད་ལས། སྦྱོར་བ་ཚོགས་བསགས་པ་ནི། རང་གི་ལྟེ་བའི་བཾ་ལས་འོད་ཟེར་འཕྲོས་བླ་མ་རྗེ་བཙུན་རྡོ་རྗེ་རྣལ་འབྱོར་མའི་དཀྱིལ་འཁོར་གྱི་ལྷ་ཚོགས་ཐམས་ཅད་མདུན་གྱི་ནམ་མཁར་ སད་པར་གྱུར། བླ་མ་རྡོ་རྗེ་འཛིན་པ་དང༌། །ཡི་དམ་རྡོ་རྗེ་རྣལ་འབྱོར་མ། །ཌཱ་ཀིའི་ཚོགས་དང་བཅས་པ་ལ། །ཀུན་ནས་དང་བས་ཕྱག་འཚལ་ལོ། །དངོས་སུ་བཤམས་པའི་མཆོད་པ་དང༌། །ཏིང་འཛིན་ཡིད་ཀྱིས་སྤྲུལ་པ་དང༌། །ཕྱོགས་བཅུ་གང་བའི་མཆོད་རྫས་རྣམས། །བློ་ཡིས་བླངས་ཏེ་དབུལ་བར་བགྱི། །སྐྱེ་བ་འདི་དང་གཞན་དག་ཏུ། །བདག་གིས་བགྱིས་དང་བགྱིད་སྩལ་བ། །རྗེས་སུ་ཡི་རང་བགྱིས་པ་ཡི། །སྡིག་པ་མ་ལུས་མཐོལ་ཞིང་བཤགས། །བླ་མ་སངས་རྒྱས་སྲས་བཅས་དང༌། །ཕན་མཛད་རྣམས་ཀྱི་དགེ་བ་གང༌། །ཉན་ཐོས་རང་རྒྱལ་ཚོགས་བཅས་ལ། །དང་བས་རྗེས་སུ་ཡི་རང་ངོ༌། །སེམས་ཅན་རྣམས་ལ་ཕན་དོན་དུ། །ཁྱེད་ཀྱི་ཐུགས་རྗེ་ཆེར་དགོངས་ཏེ། །དབང་པོའི་རིམ་པ་དང་སྦྱར་ནས། །ཆོས་ཀྱི་འཁོར་ལོ་བསྐོར་དུ་གསོལ། །སྔོན་ནས་འབྲེལ་བའི་ཡི་དམ་ལྷ། །སྐྱེ་མེད་དབྱིངས་ལས་མ་གཡོས་ཀྱང༌། །ཐུགས་རྗེས་གཟུགས་ཀྱི་སྐུར་བསྟན་ནས༑ ༑མྱ་ངན་མི་འདའ་བཞུགས་སུ་གསོལ། །གདུལ་བྱའི་བསམ་པ་རྫོགས་མཛད་པ། །ཁྱེད་ལ་གུས་པས་གསོལ་འདེབས་ན། །སྒྲུབ་པ་པོ་ལ་བྱིན་གྱིས་རློབས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཞེས་དང༌། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང༌། །བཏང་སྙོམས་མཆོག་ལ་གནས་པར་ཤོག །ཚོགས་ཞིང་རྣམས་རང་ལ་ཐིམ་པར་གྱུར། དེ་དག་བསོད་ནམས་ཀྱི་ཚོགས་སོ། ། ༀ་སྭ་བྷཱ་ཝ་ཤུདྡྷཿ སརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། ༀ་བཛྲ་ཤུདྡྷཿ སརྦ་དྷརྨཱ་བཛྲ་ཤུདྡྷོ྅ཧཾ། ༀ་ཡོ་ག་ཤུདྡྷཿ སརྦ་དྷརྨཱ་ཡོ་ག་ཤུདྡྷོ྅ཧཾ། ཞེས་དག་པ་གསུམ་གྱི་སྔགས་བརྗོད་པས་ལུས་ངག་ཡིད་གསུམ་སྦྱངས་ཤིང་གཞི་ལམ་རྣམ་པར་དག་པའི་སྟོང་པ་ཉིད་དུ་གྱུར་པར་བསམ་པ་ཡེ་ཤེས་ཀྱི་ཚོགས་སོ། །དངོས་གཞི་ནི། སྟོང་པའི་ངང་ལས་རང་ལུས་གཞལ་ཡས་ཁང་གྲུ་བཞི་སྒོ་བཞི་རྟ་བབས་དང་བཅས་པ་མཚན་ཉིད་ཐམས་ཅད་རྫོགས་པ། ཕྱི་རོལ་དུར་ཁྲོད་བརྒྱད་སྲུང་འཁོར་དང་བཅས་པས་ཡོངས་སུ་བསྐོར་བའི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ཆོས་འབྱུང་ཉིས་བརྩེགས་དེའི་ནང་དུ་གསང་སྔགས་ཀྱི་ཡིག་འབྲུ་དང་སེམས་ལྷ་སྐུའི་རྣམ་པར་གྱུར་པ་ནི། པཾ་ལས་པདྨའི་ལྟེ་བར་མི་རོ་སེར་པོ་མགོ་གཡོན་དུ་བསྟན་པའི་སྙིང་གར་ༀ་ལས་ཉི་མའི་དལ། དེའི་སྟེང་དུ་བཾ་དམར་པོ་ཡོངས་སུ་གྱུར་པ་ལས་བདག་ཉིད་རྡོ་རྗེ་རྣལ་འབྱོར་མ་སྐུ་མདོག་དམར་མོ། རྩ་ཞལ་ཁྲོ་ཆགས་འདྲེས་པའི་རྣམ་པ་ཅན། གཡས་ཞལ་ཕག་གདོང་ཁྲོ་ཞིང་གྱེན་དུ་ཕྱོགས་པ། ཞལ་གཉིས་ཀ་ལ་སྤྱན་གསུམ་གསུམ་དང་ལྡན་པ། ཕྱག་གཡས་རྡོ་རྗེ་གྲི་གུག་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། མཆན་ཁུང་གཡོན་དུ་ཁ་ཊྭཱཾ་ག་དཀར་པོ་གྱེན་དུ་སྒྲེང་བ། གཅེར་བུ་སྐྲ་གྲོལ་བ། ཐོད་སྐམ་ལྔ་ཡི་དབུ་རྒྱན་དང་རློན་པ་ཁྲག་འཛག་པ་ལྔ་བཅུའི་དོ་ཤལ་འཕྱང་བ། མི་རུས་ཀྱི་ཕྱག་རྒྱ་ལྔས་བརྒྱན་པ། བཅུ་དྲུག་ལོན་པ་ལྟར་ལང་ཚོ་དར་ལ་བབས་པ། ཞབས་གཡོན་ བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་སྒེག་ཅིང་རོལ་བའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ལྟེ་བར་བཾ། བཾ་ལས་འོད་ཟེར་འཕྲོས། རང་བཞིན་གྱི་གནས་ནས་རྗེ་བཙུན་མ་ལ་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ། འབར་རྒྱ་དཔྲལ་བར་བསྐོར་ཞིང་ཕ་ཞེས་སྤྱན་དྲངས། ཛཿ ཧཱུྃ་བཾ་ཧོཿ ས་གཉིས་སུ་མེད་པར་གྱུར། ལྟེ་བར་ༀ་བྃ་དམར་མོ་རྡོ་རྗེ་ཕག་མོ། སྙིང་གར་ཧྃ་ཡྃ་སྔོན་མོ་གཤིན་རྗེ་མོ༑ མགྲིན་པར་ཧྲཱ་མྃ་དཀར་མོ་རྨོངས་བྱེད་མ། དཔྲལ་བར་ཧྲ་ཧྲ་སེར་མོ་སྐྱོད་བྱེད་མ། སྤྱི་བོར་ཧཱུྃ་ཧཱུྃ་ལྗང་གུ་སྐྲག་བྱེད་མ། ཡན་ལག་ཐམས་ཅད་ལ་ཕཊ་ཕཊ་དུད་ཁ་ཙཎྜི་ཀའི་ངོ་བོ་རྣམས་སུ་གྱུར། སླར་ཡང་བཾ་ལས་འོད་ཟེར་འཕྲོས་དབང་གི་ལྷ་དཔལ་ཧེ་རུ་ཀའི་དཀྱིལ་འཁོར་མདུན་གྱི་ནམ་མཁར་ཕ། བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་བདུད་རྩིས་གང་བའི་སྣོད་ཐོགས་ཏེ། ཇི་ལྟར་བལྟམས་པ་སོགས་ཀྱི་མཐར། ༀ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་དབང་བསྐུར། སྐུ་གང༌། དྲི་མ་དག །ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་བསམ། དེ་ལྟར་ལྷ་སྐུ་སྣང་ལ་རང་བཞིན་མེད་པ་གསལ་སྟོང་འཛིན་མེད་ཀྱི་ངང་ལ་མཉམ་པར་བཞག །དེས་སྐྱོ་ན་བཟླས་པ་ལ་འཇུག་སྟེ། ལྟེ་བའི་བཾ་ལས་སྔགས་ཀྱི་འོད་ཟེར་ཁ་དོག་དམར་པོ་བྱུང་བ་དྷཱུ་ཏི་བརྒྱུད་དེ་ཞལ་ནས་འཐོན། འཕགས་པ་མཆོད་ཅིང་སེམས་ཅན་གྱི་དོན་བྱས་ཚུར་འདུས་ལྟེ་བའི་བཾ་ལ་ཐིམ་པས་སྡིག་སྒྲིབ་དག་ཅིང་ དངོས་གྲུབ་ཐོབ་པར་བསམས་ལ། ༀ་ༀ་ༀ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྣ་ནཱི་ཡེ། བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་དང་པོར་ངག་བཟླས་དང་ཕྱི་ནས་ཡིད་བཟླས་སམ་འགོག་པའི་བཟླས་པ་ཅི་རིགས་པར་བྱའོ། །དེས་སྐྱོ་ན་ལྟེ་བའི་བཾ་ཡིག་ལས་སྤྲོས་པའི་མཁའ་འགྲོ་མའི་ཚོགས་ཀྱིས་མཆོད་བསྟོད་ཀྱི་ལས་མཛད་པར་མོས་ལ། ༀ་བཛྲ་ཝཱ་ར་ཧི་ས་པ་རཱི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པཱདྱཾ་ནས། ཤབྡའི་བར་བཅུག་པས་ཕྱི་མཆོད། ༀ་ཨཱཿ ཧཱུྃ་གིས་ནང་མཆོད་ཕུལ། རྡོ་རྗེ་ཕག་མོ་བདེ་གཤེགས་ཡུམ། །ཧེ་རུ་ཀ་དང་ཡང་དག་སྦྱོར། །ཐོད་པ་དང་ནི་ཁ་ཊྭཱཾ་འཛིན། །ཧཱུྃ་དང་ཕཊ་ཀྱི་འབྲུག་སྒྲ་ཅན། །ཁྲོ་བའི་གཟུགས་ཀྱིས་ཁམས་གསུམ་འཇོམས། །མ་ལུས་གདུག་པ་སྲེག་པར་བྱེད། །ཡིད་འོང་དངོས་གྲུབ་ཀུན་སྟེར་བའི། །ཕག་མོ་ཁྱོད་ལ་ཕྱག་འཚལ་བསྟོད། །ཅེས་བསྟོད་ནས་མཁའ་འགྲོ་མ་རྣམས་ལྟེ་བའི་བཾ་ལ་ཐིམ་པར་གྱུར། དེ་ནས་མདུན་བསྐྱེད་ནི་དལ་བསང་སྦྱངས། སྟོང་པའི་ངང་ལས་འབྱུང་བཞི་རི་རབ་དང་བཅས་པའི་སྟེང་དུར་ཁྲོད་ཆེན་པོ་བརྒྱད་དང་རྡོ་རྗེའི་ས་གཞི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་འབར་བས་ཡོངས་སུ་བསྐོར་བའི་ནང་དུ་བྷྲཱུྃ་ལས་རིན་པོ་ཆེའི་གཞལ་ཡས་ཁང་གྲུ་བཞི་སྒོ་བཞི་པ་རྟ་བབས་བཞིས་བརྒྱན་པ༑ མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ཆོས་འབྱུང་ཉིས་བརྩེགས་ཀྱི་ནང་དུ་པཾ་ལས་པདྨ་ལ་གནས་པའི་མི་རོ་སེར་པོ་མགོ་གཡོན་དུ་བསྟན་པའི་སྙིང་གར་ ༀ་ལས་ཉི་མའི་དཀྱིལ་འཁོར། དེའི་སྟེང་དུ་བཾ་དམར་པོ་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་མོ་རྩ་ཞལ་ཁྲོ་ཆགས་འདྲེས་པའི་ཉམས་ཅན། གཡས་ཞལ་ཕག་གདོང་ཁྲོ་ཞིང་གྱེན་དུ་ཕྱོགས་པ། ཞལ་གཉིས་ཀ་ལ་སྤྱན་གསུམ་དང་ལྡན་ཞིང་མཆེ་བ་གཙིགས་པ། ཕྱག་གཡས་རྡོ་རྗེའི་གྲི་གུག་འཕྱར་ཞིང་གཡོན་ཐོད་ཁྲག་ཐུགས་ཀར་འཛིན་པ། མཆན་ཁུང་གཡོན་དུ་ཁ་ཊྭཱཾ་ག་དཀར་པོ་གྱེན་དུ་བསྒྲེང་བ། གཅེར་བུ་སྐྲ་གྲོལ་བ། ཐོད་སྐམ་ལྔའི་དབུ་རྒྱན་དང་ཁྲག་འཛག་པ་ལྔ་བཅུའི་དོ་ཤལ་འཕྱང་བ། མི་རུས་ཀྱི་ཕྱག་རྒྱ་ལྔས་བརྒྱན་ཅིང་བཅུ་དྲུག་ལོན་པ་ལྟར་ལང་ཚོ་དར་ལ་བབས་པ། ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་སྒེག་ཅིང་རོལ་བ། འདབ་མ་བརྒྱད་ལ་ཤར་དུ་ཁྭ་གདོང་མ་སྔོན་མོ། བྱང་དུ་འུག་གདོང་མ་ལྗང་གུ། ནུབ་ཏུ་ཁྱི་གདོང་མ་དམར་མོ། ལྷོར་ཕག་གདོང་མ་སེར་མོ། མེར་གཤིན་རྗེ་བརྟན་མ། བདེན་བྲལ་དུ་ཕོ་ཉ་མོ། རླུང་དུ་གཤིན་རྗེ་མཆེ་བ་མ། དབང་ལྡན་དུ་གཤིན་རྗེ་འཇོམས་མ་རྣམས་ཕྱེད་གཟུགས། བརྒྱད་ཀའང་ཞལ་གཅིག་ཕྱག་གཉིས་ཅང་ཏེའུ་དང་ཐོད་ཁྲག་ཁ་ཊྭཱཾ་ག་འཛིན་པ༑ རའི་གདན་ལ་ཕྱེད་སྐྱིལ་གྱིས་རོལ་པ། རྒྱན་ཆ་ལུགས་གཙོ་མོ་དང་མཐུན་པའོ། །དེ་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ལྟེ་བར་བཾ། བཾ་ལས་འོད་ཟེར་འཕྲོས། རྗེ་བཙུན་རྡོ་རྗེ་ཕག་མོ་ལྷ་དགུའི་དཀྱིལ་འཁོར་ལ་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་ཕ་ཞེས་འབར་རྒྱ་དང་བཅས་སྤྱན་དྲངས། ཛཿ ཧཱུྃ་བཾ་ཧོཿ ས་གཉིས་སུ་མེད་པར་གྱུར། གཙོ་འཁོར་ཐམས་ཅད་ཀྱི་ལྟེ་བར་ༀ་བཾ་དམར་མོ་རྡོ་རྗེ་ཕག་མོ༑ ཞེས་པ་ནས་མི་བསྐྱོད་པའི་ངོ་བོ་རྡོ་རྗེ་རྩེ་ལྔ་པས་དབུ་བརྒྱན་པར་གྱུར་གྱི་བར་བདག་བསྐྱེད་ལྟར་བྱས་རྗེས། ལྷ་སྐུ་གསལ་སྟོང་གི་ངང་ལ་ཅི་གནས་སུ་མཉམ་པར་བཞག །ལྟེ་བའི་བཾ་ཡིག་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་སྡིག་སྒྲིབ་སྦྱངས་ནས་རྗེ་བཙུན་མའི་གོ་འཕང་ལ་བཀོད། ཚུར་འདུས་ལྟེ་བའི་བཾ་ལ་ཐིམ་པར་བསམ་ལ། ༀ་གསུམ་བཟླས་པ་ཅི་འགྲུབ་བྱ། དེ་ནས་མཆོད་པ་བསང་སྦྱངས། སྟོང་པའི་ངང་ལས་ཨ་ལས་ཀ་པཱ་ལ་ཡངས་ཤིང་རྒྱ་ཆེ་བ་རྣམས་སུ་ཧཱུྃ་ཡིག་ཞུ་བ་ལས་ལྷ་རྫས་ལས་གྲུབ་པའི་མཆོད་རྫས་རྣམས་བཟང་ཞིང་རྒྱ་ཆེ་བ། དྭངས་ཤིང་ཐོགས་པ་མེད་པ། ནམ་མཁའི་ཁམས་ཐམས་ཅད་གང་བར་གྱུར། ༀ་བཛྲ་ཨརྒྷཾ་ཨཱཿ ཧཱུྃ་ནས་ཤབྡའི་བར་བརྗོད་པས་བྱིན་གྱིས་བརླབས། རབ་འབྱམས་རྒྱ་མཚོ་དཔག་མེད་ན། །ཆུ་གཉིས་ཉེར་སྤྱོད་རོལ་མོར་བཅས། །མཆོད་རྫས་ཇི་སྙེད་ཡོད་པ་དང༌། །བདག་གིས་གུས་པས་བཤམས་པ་འདི། །མཆོག་ཏུ་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ༀ་བཛྲ་ཝཱ་ར་ཧཱི་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ་ནས་ཤབྡའི་བར་གྱིས་མཆོད། ནང་མཆོད་བསང་སྦྱངས། སྟོང་པའི་ངང་ལས་ཡཾ་ལས་རླུང༌། རཾ་ལས་མེ། ཀཾ་ལས་མི་མགོའི་སྒྱེད་པུ་གསུམ་ལ་གནས་པའི་ཨ་ལས་ཐོད་པ་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་ར་ཤུ་མ་མུ་ལས་བདུད་རྩི་ལྔ་རྣམས། བྷྲུཾ་ཁཾ་ཛྲ་ཁྃ་ཧཱུྃ་ཡེ་ཤེས་ལྔའི་ངོ་བོས་མཚན་པའི་སྟེང་དུ་ༀ་དཀར་པོ་མགོ་ཐུར་དུ་བསྟན་པ། དེའི་སྟེང་དུ་ཨ་ལས་ཟླ་བའི་ཁར་པཾ་ལས་ཁ་ཊྭཱཾ་ག་དཀར་པོ་པཾ་གྱིས་མཚན་པ། རླུང་གཡོས་མེ་སྦར་རྫས་རྣམས་ཞུ་ཞིང་ཁོལ་བའི་རླངས་པས་དཔའ་བོ་དང་རྣལ་འབྱོར་མ་ཐམས་ཅད་སྤྱན་དྲངས། སྙོམས་པར་ཞུགས་པའི་སྦྱོར་མཚམས་ནས་བྱང་སེམས་བབས་པ་པཾ་ཡིག་ཁ་ཊྭཱཾ་ག་དང་ཟླ་བ་ༀ་བཅས་ལ་ཐིམ་པས་རིམ་བཞིན་འོད་དུ་ཞུ་ནས་བདུད་རྩི་ལ་ཐིམ་པས་ཁ་དོག་དྲི་རོ་ནུས་པ་ཕུན་སུམ་ཚོགས་པའི་ཟག་མེད་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ་ཧ་ཧོ་ཧྲཱིཿ ཞེས་མང་དུ་བརྗོད་པས་བརླབས་ལ། གཡོན་པའི་མཐེབ་སྲིན་གྱིས་བླངས་ནས། རྗེ་བཙུན་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་ཞལ་དུ་ༀ་ཨཱཿ ཧཱུྃ། རྡོ་རྗེ་ཕག་མོ་ལྷ་དགུའི་དཀྱིལ་འཁོར་གྱི་ཞལ་དུ༴ ནག་པོ་ཆེན་པོ་ལྕམ་དྲལ་འཁོར་དང་བཅས་པའི་ཞལ་དུ༴ ཆོས་བདག་མཁའ་འགྲོ་སྡེ་ལྔ། ཞིང་སྐྱོང་ཀུན་ཏུ་རི་ཀ །བཀའ་སྲུང་མཁའ་འགྲོ་སྡེ་བཞི། ཡོན་བདག་ནོར་བུ་བཟང་པོ། ཀླུ་ཆེན་བཏང་བཟུང༌། གཞི་བདག་གཉུག་མར་གནས་པ་རྣམས་ཀྱི་ཞལ་དུ༴ ཁམས་གསུམ་གྱི་སེམས་ཅན་རྗེ་བཙུན་མའི་ངོ་བོར་རྣམ་པར་དག་པ་ རྣམས་ཀྱི་ཞལ་དུ་ༀ་ཨཱཿ ཧཱུྃ། འབྲུ་གསུམ་བརྗོད་པས་རང་གི་གནས་གསུམ་དུ་རེག་ཅིང་བདུད་རྩི་མྱོང༌། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་འཁྱུད་རྒྱ་བྱས། གསང་མཆོད་ཕུལ། བསྟོད་པ་ནི། ལྟེ་བའི་དབུས་ན་རྣལ་འབྱོར་མ། ། ཞེ་སྡང་གཅོད་མཛད་སྒྲུབ་པ་མོ། །མེ་ལོང་ཡེ་ཤེས་ངོ་བོ་ཉིད། །རྡོ་རྗེ་ཕག་མོར་ཕྱག་འཚལ་བསྟོད། །མེ་དཔུང་འབར་བའི་ལྟེ་དབུས་ན། །སྐུ་གསུང་ཐུགས་དང་ཡེ་ཤེས་ལྔ། །བདེ་བའི་བདེ་ཆེན་བདེ་སྟེར་མ། །སངས་རྒྱས་ཡུམ་ལ་ཕྱག་འཚལ་བསྟོད། །དྷཱུ་ཏི་འོད་ཀྱི་རང་བཞིན་ལ། །རྩ་བ་ལྟ་བུ་ཉིད་ལ་བཞུགས། །ཞུ་བ་རང་བཞིན་བདེ་ཆེན་མ། །བདེ་སྟེར་ཡུམ་ལ་ཕྱག་འཚལ་བསྟོད། །དངོས་པོ་གཤིས་ཀྱི་དོན་སྟོན་མ། །སྐུ་གསུམ་དབྱེར་མེད་བཞུགས་པའི་ངང༌། །བདེ་བ་ཆེན་པོའི་ངོ་བོ་ཉིད། །རྡོ་རྗེ་མཁའ་འགྲོར་ཕྱག་འཚལ་བསྟོད། །བདེ་ཆེན་སྣ་འདྲེན་མཁའ་འགྲོ་མ། །དུ་མ་རོ་གཅིག་དོན་གཅིག་སྟོན། །སྣང་སྟོང་དབྱེར་མེད་ངོ་བོ་ཉིད། །ཡེ་ཤེས་ མཁའ་འགྲོར་ཕྱག་འཚལ་བསྟོད། །བདུད་བཞིའི་དམག་ལས་རབ་རྒྱལ་ཞིང༌། །བདེ་ཆེན་བྱིན་གྱིས་རློབ་མཛད་མ། །རྩ་རླུང་ཐིག་ལེའི་ངོ་བོ་ཉིད། །ལས་ཀྱི་མཁའ་འགྲོར་ཕྱག་འཚལ་བསྟོད། །བདུད་དང་ལོག་འདྲེན་ཞི་མཛད་ཅིང༌། །བར་ཆད་འདུལ་བའི་བྱིན་རླབས་ཅན། །མཐུ་དང་རྫུ་འཕྲུལ་ངོ་བོ་ཉིད། །འཇིག་རྟེན་མཁའ་འགྲོར་ཕྱག་འཚལ་བསྟོད། །ཅེས་བསྟོད། དེ་ནས་གཏོར་མ་ནང་མཆོད་ལྟར་བྱིན་གྱིས་བརླབས་ལ། རོལ་མོ་དང་བཅས་པས། ཧཱུྃ། བདེ་བ་ ཆེན་པོའི་གཞལ་ཡས་ནས། །བླ་མ་རྗེ་བཙུན་སྤྱན་འདྲེན་གྱི། །འཁོར་དང་བཅས་ཏེ་གཤེགས་སུ་གསོལ། །འོག་མིན་ཆོས་དབྱིངས་ཞིང་ཁམས་ནས། །ཡི་དམ་ལྷ་ཚོགས་སྤྱན་འདྲེན་གྱི། །འཁོར་དང་བཅས་ཏེ་གཤེགས་སུ་གསོལ། །རྡོ་རྗེ་རིགས་ཀྱི་ཞིང་ཁམས་ནས། །རྡོ་རྗེ་མཁའ་འགྲོ་སྤྱན༴ འཁོར་དང་བཅས་ཏེ་གཤེགས༴ རིན་ཆེན་རིགས་ཀྱི་ཞིང་ཁམས་ནས། །རིན་ཆེན་མཁའ་འགྲོ་སྤྱན་འདྲེན་གྱི། །འཁོར་དང་བཅས་ཏེ༴ པདྨ་རིགས་ཀྱི་ཞིང་ཁམས་ནས། །པདྨ་མཁའ་འགྲོ་སྤྱན་འདྲེན་གྱི། །འཁོར་དང་བཅས་ཏེ༴ ལས་ཀྱི་རིགས་ཀྱི་ཞིང་ཁམས་ནས། །ལས་ཀྱི་མཁའ་འགྲོ་སྤྱན་འདྲེན་གྱི། །འཁོར་དང་བཅས་ཏེ༴ དུར་ཁྲོད་ཆེན་པོའི་གནས་བརྒྱད་ནས༑ ༑ཆོས་སྐྱོང་སྲུང་མ་སྤྱན་འདྲེན་གྱི། །འཁོར་དང་བཅས་ཏེ༴ ས་འོག་ས་སྟེང་ས་བླ་ནས། །གནས་གསུམ་མཁའ་འགྲོ་སྤྱན་འདྲེན་གྱི། །འཁོར་དང་བཅས་ཏེ་གཤེགས་སུ་གསོལ། །འབར་བའི་རྒྱ་དང་བཅས་ཕ། ༀ་ཨཱ་རལླི་ ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ། དྲ་ཤྱ་ཧོཿ ཛཿ ཧཱུྃ་བཾ་ཧོཿ ཞེས་གཏོར་མགྲོན་རྣམས་མདུན་གྱི་ནམ་མཁར་སྤྱན་དྲངས། ལྗགས་རྡོ་རྗེའི་སྦུ་གུས་གཏོར་མ་གསོལ་བར་མོས་ལ། རྡོར་ཐལ་ཕྱེད་པའི་རྒྱ་དང་བཅས། ༀ་གསུམ་མའི་མཐར་པུཥྤཾ་བ་ལ་ཏ་ཨི་དཾ་གྲྀཧྞ་ གྲྀཧྞ་མ་མ་རཀྵ་རཀྵ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལན་ལྔའམ་གསུམ་གྱིས་བླ་མ་དང་ཡི་དམ་ལ་ཕུལ། ༀ་ཧྲཱ་ཧྲཱ་ཧཾ་ཧཾ་ཧེ་ཧེ་ཧ་ཧ་ཧི་ཧི་ཕ་བ་ལ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཆོས་སྐྱོང་དང་ལས་ཀྱི་མཁའ་འགྲོར་ཕུལ། ༀ་ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཀྵ་ ས་བྷཱུ་ཏ། པྲེ་ཏ་པི་ཤཱ་ཙ། ཨུནྨཱ་དཱ། ཨ་པ་སྨཱ་ར། ཌཱ་ཀཱ་ཌཱ་ཀི་ནྱ་ད་ཡ། ཨི་མཾ་བ་ལཾ་གྲྀཧྞཱནྟུ་ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཙྪནྟུ། ཡ་ཐེ་བཾ། ཡ་ཐཻཥྛཾ། བྷུཉྫ་ཐཱ། ཛི་གྷྲ་ཐཱ། པི་བ་ཐཱ། མ་ཏི་ཀྲ་མ་ཐཱ། མ་མ་སརྦ་ཀརྟཱ་ཡ༑ སད་སུ་ཁཾ། བི་ཤུདྡྷ་ཡེ། ས་ཧཱ་ཡི་ཀ་བྷ་བནྟུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་གསུམ་གྱིས་འཇིག་རྟེན་གྱི་མཁའ་འགྲོ་མ་རྣམས་ལ་ཕུལ། གཞི་བདག་ལ་ཨ་ཀཱ་རོས་བསྔོས་ལ། ཨརྒྷཾ་ནས། ཤབྡའི་བར་གྱིས་མཆོད་ནས། བླ་མ་དཀོན་མཆོག་ཡི་དམ་ལྷ༑ ༑མཁའ་འགྲོ་ཆོས་སྐྱོང་སྲུང་མ་དང༌། །ལྷ་ཀླུ་འཇིག་རྟེན་སྐྱོང་བ་དང༌། །གནོད་སྦྱིན་འབྱུང་པོ་སྲིན་པོ་དང༌། །ཡི་དྭགས་ཤ་ཟ་བརྗེད་བྱེད་དང༌། །སྨྱོ་བྱེད་མཁའ་འགྲོ་ལུས་སྲུལ་ཀུན། །མཆོད་སྦྱིན་གཏོར་མ་འདི་བཞེས་ལ༑ ༑བདག་གི་བླ་མ་དམ་པ་དང༌། །བདག་ཅག་འཁོར་དང་བཅས་རྣམས་ལ། །ནད་མེད་ཚེ་དང་དབང་ཕྱུག་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་ཕྲིན་ལས་བཅོལ། དེ་ནས་བུམ་པ་བསང་སྦྱངས། སྟོང་པའི་ངང་ལས་པད་ཟླའི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཚང་བ་ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་རྣམ་རྒྱལ་བུམ་པའི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ཆོས་འབྱུང་ཉིས་བརྩེགས་ནང་དུ། ཞེས་པ་ནས། རྒྱན་དང་ཆ་ལུགས་གཙོ་མོ་དང་མཐུན་པའོ། །ཞེས་པའི་བར་གྱིས་ལྷ་དགུ་མདུན་བསྐྱེད་ལྟར་བསྐྱེད། ལས་བུམ་དུ་པད་ཉི་རའི་གདན་ལ་ཧཱུྃ་ལས་ཁྲོ་བོ་བགེགས་མཐར་བྱེད་སྔོན་པོ་རྡོ་རྗེ་དང་སྡིགས་མཛུབ་ཅན་སྟག་ཤམ་དང༌། སྦྲུལ་དང༌། རུས་པས་བརྒྱན་པའི་སྐུར་གྱུར། དེ་ཐམས་ཅད་ཀྱི་དཔྲལ་བར་ༀ་ཞེས་པ་ནས། མི་བསྐྱོད་པའི་རྡོ་རྗེ་རྩེ་ལྔ་པས་དབུ་བརྒྱན་པར་གྱུར། ཞེས་པའི་བར་སྔར་ལྟར་བྱས་རྗེས། ༀ་བཛྲ་ཝཱ་ར་ཧི་ས་པ་རི་ཝཱ་ར་བཛྲ་ཨརྒྷཾ་སོགས་ཀྱིས་མཆོད། འབྲུ་གསུམ་གྱིས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །འཇིགས་པའི་ཧཱུྃ་སྒྲ་ངེས་སྒྲོག་ཅིང༌། །ཞེས་སོགས་ཀྱིས་བསྟོད། རང་གི་སྙིང་ག་ནས་སྔགས་ཕྲེང་གཟུངས་ཐག་ལ་འཁྲིལ་ཏེ་སོང་བས་ལྷའི་ཐུགས་དམ་བསྐུལ། སྐུ་ལས་བདུད་རྩིའི་རྒྱུན་བབས་ པས་བུམ་པ་གང་བར་གྱུར། གཟུངས་ཐག་ལ་འཇུས་ཏེ། རྣམ་བུམ་ལ་ༀ་གསུམ་མ་དང༌། ཨ་བྷི་ཥེ་ཀ་ཏ། ལས་བུམ་དུ་སུམྦྷ་བཟླས་ལ། ༀ་ཨཱཿ ཧཱུྃ་གིས་མཆོད་ཡོན་ཕུལ་ལ། ལྷ་འོད་དུ་ཞུ་ནས་བུམ་ཆུ་ནུས་ལྡན་དུ་གྱུར། དེ་ནས་ཚོགས་རྫས་རྣམས་ནང་མཆོད་ལྟར་བྱིན་གྱིས་བརླབས། ཚོགས་ཞིང་གི་མགྲོན་རྣམས་ཕ་ཞེས་སད་པར་མོས་ལ། ཕྱག་བྱས་བླ་མ་དཀོན་མཆོག་གི་དྲུང་དུ་རྣམ་ལྔ་འདོད་པའི་རྒྱས་ཆང་ཕུད་དབུལ་ཞིང༌། དམན་པའི་ཡུལ་ལས་རབ་འདས་ཤིང༌། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པའི། །བདུད་རྩི་མཆོག་གིས་མཆོད་པར་བགྱི། །ཞེས་བརྗོད་ནས། ཚོགས་ཕུད་གཏོར་མར་བྲན་ཞིང་ནང་མཆོད་གཏོར་ལ། གཟུགས་དང་སྒྲ་དང་དྲི་དང་རོ། །རེག་བྱ་འདོད་པའི་ཡོན་ཏན་ལྔ། །བླ་ན་མེད་པའི་ མཆོད་པ་འབུལ། །བདེ་བ་ཆེན་པོས་མཉེས་གྱུར་ཅིག །ༀ་གུ་རུ་བཛྲ་བཱ་ར་ཧི་ཌཱ་ཀ་ཌཱ་ཀི་ནཱི་ཤྲཱི་དྷརྨཱ་པཱ་ལ་ས་པ་རི་ཝཱ་ར་ཨ་མྲྀ་ཏ་པཱུ་ཛ་ཧོཿ མ་ཧཱ་བ་ལ་ཏ་པཱུ་ཛ་ཧོཿ མ་ཧཱ་ག་ཎ་ཙཀྲ་པཱུ་ཛ་ཧོཿ ཞེས་ཕུལ་ནས། ན་མོ། བླ་མ་དཀོན་མཆོག་གསུམ་དང་ཡི་དམ་མཁའ་འགྲོ་ཆོས་སྐྱོང་ཐམས་ཅད་བདག་ལ་དགོངས་སུ་གསོལ། བདག་ཅག་འདིར་འདུས་པ་རྣམས་ཀྱིས་ཐོག་དྲངས་རྡོ་རྗེ་ཐེག་པའི་སྒོར་ཞུགས་པའི་རྣལ་འབྱོར་ཕོ་མོ་ཐམས་ཅད་ཀྱི་དམ་ཚིག་ཉམས་ཆག་ཞིག་རལ་དུ་གྱུར་པ་ཐམས་ཅད་ཚོགས་ཀྱི་འཁོར་ལོ་འདི་ལ་བརྟེན་ནས་སོར་ཆུད་པ་དང༌། སྡིག་སྒྲིབ་དག་ཅིང་ཚོགས་རྫོགས་པར་མཛད་དུ་གསོལ། ཞེས་བརྗོད། དེ་ནས་ཀ་པཱ་ལའི་རང་ས་ཕར་བསྟན་ནས་མཐེབ་སྲིན་གྱིས་འཐོར་ཞིང༌། ཧཱུྃ། དགོངས་སམ་རྡོ་རྗེ་མཁའ་འགྲོའི་ཚོགས། །རྡོ་རྗེ་མཁའ་འགྲོ་སྐད་པ་དེ། །ཕྱག་རྒྱ་ཆེན་པོ་མ་ལགས་སམ། །དེ་ལ་མཆོད་པ་འབུལ་བ་ནི། །སྣང་བ་ཐམས་ཅད་མཆོད་པ་འབུལ། །ཕྱི་ནང་གསང་བའི་མཆོད་པ་འབུལ། །བྱིན་གྱིས་བརླབ་ཕྱིར་གཤེགས་སུ་གསོལ། །དགོངས་སམ་ཡེ་ཤེས་མཁའ་འགྲོའི་ཚོགས། །ཡེ་ཤེས་མཁའ་འགྲོ་སྐད་པ་དེ། །ཆོས་ཀྱི་ཕྱག་རྒྱ་མ་ལགས་སམ། །དེ་ལ་མཆོད་པ་འབུལ་བ་ནི། །འདུས་བྱས་ཐམས་ཅད་མཆོད་པ་འབུལ། །ཕྱི་ནང་གསང་བའི་མཆོད་པ་འབུལ། །དགོངས་སམ་ལས་ཀྱི་མཁའ་འགྲོའི་ཚོགས། །འཇིག་རྟེན་མཁའ་འགྲོ་སྐད་པ་དེ། །དམ་ཚིག་ཕྱག་རྒྱ་མ་ལགས་སམ། །དེ་ལ་མཆོད་པ་འབུལ་བ་ནི། ། བདུད་རྩི་ལྔ་ཡི་མཆོད་པ་འབུལ། །ཕྱི་ནང་གསང་བའི་མཆོད་པ་འབུལ། །དགོངས་སམ་ཆོས་སྐྱོང་སྲུང་མའི་ཚོགས། །ཆོས་སྐྱོང་སྲུང་མ་སྐད་པ་དེ། །བར་ཆད་བསྲུང་བ་མ་ལགས་སམ། །དེ་ལ་མཆོད་པ༴ མཆོད་བསྟོད་རྒྱས་པའི་མཆོད༴ ཕྱི་ནང་གསང་བའི༴ དེ་ནས་རང་ས་རང་ལ་བསྟན། །བརྒྱུད་པའི་བླ་མའི་དངོས་གྲུབ་སྩོལ། །ཕྱག་རྒྱ་ཆེན་པོའི་དངོས་གྲུབ་སྩོལ། །རྡོ་རྗེ་མཁའ་འགྲོ་ལེགས་གྲུབ་པའི། །རིག་འཛིན་ཚེ་ཡི་དངོས་གྲུབ་སྩོལ། །རིན་ཆེན་མཁའ་འགྲོ་ལེགས་གྲུབ་པའི། །ས་དབང་གཏེར་གྱི་དངོས་གྲུབ་སྩོལ། །པདྨ་མཁའ་འགྲོ་ལེགས་གྲུབ་པའི། །ཐུན་མོང་མཆོག་གི་དངོས་གྲུབ་སྩོལ། །ལས་ཀྱི་ཌཱ་ཀི་ལེགས་གྲུབ་པའི། །ལས་ལ་དབང་བའི་དངོས་གྲུབ་སྩོལ། །འཇིག་རྟེན་མཁའ་འགྲོ་ལེགས་གྲུབ་པའི། །རྫུ་འཕྲུལ་མཐུ་ཡི་དངོས་གྲུབ་སྩོལ། །ཆོས་སྐྱོང་སྲུང་མ་ལེགས་གྲུབ་པའི། །བར་ཆད་བསྲུང་བའི་དངོས་གྲུབ་སྩོལ། །ནད་མེད་བདེ་བའི་དངོས་གྲུབ་སྩོལ། ། འཆི་མེད་ཚེ་ཡི༴ ཐུན་མོང་མཆོག་གི༴ མྱུར་བ་ཉིད་དུ༴ ནམ་མཁའ་ལྟ་བུའི༴ བདུད་རྩི་ལྟ་བུའི༴ ནོར་བུ་ལྟ་བུའི་དངོས་གྲུབ་སྩོལ། །གང་བར་མཛད་དུ་གསོལ། སྨིན་པར་མཛད་དུ་གསོལ། ཡོངས་སུ་སྨིན་པར་མཛད་དུ་གསོལ། ༀ་ཨཱཿ ཧཱུྃ་ཨ་ལ་ལ་ཧོཿ ཞེས་བརྗོད་ཅིང་བདུད་རྩི་མྱོང་བས་དངོས་གྲུབ་ཐོབ་པར་བསམ་མོ། །དེ་ནས་དབང་བསྐུར་བ་ལ་གཉིས་ལས། དང་པོ་སློབ་དཔོན་བདག་ཉིད་སློབ་མ་ལ་ཇི་ལྟར་བྱ་བ་ལྟར་དལ་དུ་ཞུགས་ནས་དབང་རྫོགས་པར་བླངས་པའོ། །གཉིས་པ་སློབ་མ་འཇུག་ཅིང་ དབང་བསྐུར་བ་ནི། སློབ་བུ་རྣམས་ལས་བུམ་གྱིས་ཁྲུས་བྱ། བགེགས་བསྐྲད། ཕྱག་བྱས་གྲལ་དུ་འཁོད་པ་ལ། སེམས་བསྐྱེད་གསལ་འདེབས་དང་ཆོས་བཤད་ཇི་ལྟར་རིགས་པ་སྔོན་དུ་འགྲོ་བས། འདིར་རྣལ་འབྱོར་བླ་ན་མེད་པའི་ནང་ཚན་མཆོག་ཏུ་ཟབ་པ་མ་རྒྱུད་རྣལ་འབྱོར་གསང་མཐའི་ཆོས་གཙོ་བོར་སྟོན་པ་དཔལ་བདེ་མཆོག་འཁོར་ལའི་ཡུམ་རྡོ་རྗེ་རྣལ་འབྱོར་མ་ཕྱི་སྒྲུབ་ཞལ་གཉིས་མའི་དཀྱིལ་འཁོར་དུ་དབང་དང་བྱིན་རླབས་བསྒྲུབ་པ་ལ་སློབ་དཔོན་གྱི་བྱ་བ་རྣམས་སྔོན་དུ་སོང་ནས༑ ད་སློབ་མའི་བྱ་བ་ཐོག་མར་མཎྜལ་ཕུལ་མཛོད། དེ་ནས་བླ་མ་དང་རྡོ་རྗེ་རྣལ་འབྱོར་མ་དབྱེར་མེད་པ་ལ་གསོལ་བ་གདབ་པ་འདིའི་རྗེས༴ དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པའི། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །སྡོམ་པ་ཐམས་ཅད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། ། སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་ལན་གསུམ། དེ་ནས་ཁོ་བོས་བར་ཆད་དྲི་བ་ཡིན་པས་ལན་དྲང་པོར་ཐོབ་ཅིག །ཁྱོད་གསང་སྔགས་ཀྱི་ཆོས་ལ་མོས་སམ། བུས་མོས་ལགས། རྟེན་སྡོམ་པ་གསུམ་ལྡན་དུ་སྒྲུབ་ནུས་སམ། ནུས་ལགས། བླ་མ་ལ་སངས་རྒྱས་སུ་ལྟའམ། བལྟ་ལགས། ཞེས་ཁས་ལེན་དུ་གཞུག །དེ་ནས་སྤྲོ་བ་བསྐྱེད་པ་ནི། བླ་མས། བུ་ཁྱོད་ཚུར་ཤོག་ཐེག་ཆེན་གྱི། །ཁྱོད་ནི་ཚུལ་ཆེན་སྣོད་ཡིན་པས། །གསང་སྔགས་སྤྱོད་ཚུལ་ཆོ་ག་འདི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་འདས་གང་དང༌། །དེ་བཞིན་མ་བྱོན་སངས་རྒྱས་དང༌། ། ད་ལྟར་བཞུགས་པའི་རྫོགས་སངས་རྒྱས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པའི་ཆོ་ག་རྙེད། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་བཏུལ། །དེ་བས་ཀུན་མཁྱེན་ཐོབ་བྱའི་ཕྱིར༑ ༑ཁྱེད་ཀྱིས་བློ་གྲོས་འདི་གྱིས་ཤིག །ཅེས་བསྟོད། དེ་ནས་སྡོམ་པ་ལེན་པའི་སྔོན་འགྲོ་བསགས་སྦྱངས་ལ་སློབ་དགོས་པས་ཚོགས་ཞིང་བླ་མ་དང་རྗེ་བཙུན་རྡོ་རྗེ་རྣལ་འབྱོར་མའི་དཀྱིལ་འཁོར་གྱི་ལྷ་ལ་སངས་རྒྱས་བྱང་སེམས་དཔའ་བོ་མཁའ་འགྲོ་དམ་ཅན་སྲུང་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་སད་པར་མོས་ལ། དངོས་སུ་བཤམས་པ་དེ་མཆོད་པ་ལྔ་འབུལ་བའི་འདུན་པས་འདིའི་རྗེས༴ ལྷ་རྫས་ལས་གྲུབ་མེ་ཏོག་བདུག་སྤོས་དང༌། །མར་མེ་དྲི་ཆབ་ཞལ་ཟས་རོལ་མོར་བཅས། །བླ་མ་ཡི་དམ་རྒྱལ་བ་སྲས་བཅས་ལ། །འབུལ་ལོ་རྫོགས་པའི་སངས་རྒྱས་མྱུར་ཐོབ་ཤོག །དེ་ནས་བདག་པོས་མ་བཟུང་བའི་མཆོད་པ་ཐམས་ཅད་བློས་བླངས་ཏེ་འབུལ་སྙམ་པས་འདིའི་རྗེས༴ དབུས་ཀྱི་རི་རྒྱལ་གསེར་གྱི་རི་བདུན་དང༌། །གླིང་བཞི་གླིང་ཕྲན་གུར་གུམ་སྤང་རི་དང༌། །ཙན་དན་ནགས་རི་དཔག་བསམ་ལྗོན་པའི་ཤིང༌། །མ་རྨོས་ལོ་ཏོག་འདོད་འཇོའི་བ་མོ་དང༌། ། གཏེར་བུམ་རིན་ཆེན་བདུན་སོགས་བློས་བླངས་ཏེ། །རྩ་བརྒྱུད་བླ་མ་ཡི་དམ་ལྷ་ཚོགས་དང༌། །སངས་རྒྱས་བྱང་སེམས་བསྟན་སྲུང་ཐམས་ཅད་ལ། །གུས་འབུལ་མཁའ་ཁྱབ་སེམས་ཅན་མ་ལུས་པ། །རྫོགས་པའི་སངས་རྒྱས་མྱུར་དུ་ཐོབ་པར་ཤོག །དེ་ནས་ཡིད་བྱུང་གི་མཆོད་པ་རང་གི་སྙིང་ག་ནས་འདོད་ཡོན་ལྔ་སྤྲོས་ཏེ་འབུལ་སྙམ་པས་འདིའི༴ མཛེས་སྡུག་ཡིད་འོང་གཟུགས་དང་སྙན་པའི་སྒྲ། །ཚིམ་བྱེད་བསུང་དང་དྲི་དང་ཞིམ་པའི་རོ༑ ༑མཉེན་འཁྲིལ་འཇམ་ལེགས་ལྡན་པའི་ན་བཟའ་སྟེ། །དབང་པོ་ཚིམ་བྱེད་ཁྱད་པར་འདོད་ཡོན་ལྔ། །རྩ་བརྒྱུད་བླ་མ་ཡི་དམ་སོགས་འདྲ། དེ་ནས་ཏིང་འཛིན་གྱི་མཆོད་པ་ཀུན་བཟང་མཆོད་སྤྲིན་ནམ་མཁའ་གང་བར་མོས་པ་འདིའི༴ ཀུན་བཟང་རྣམ་འཕྲུལ་མཆོད་པའི་སྤྲིན་ཚོགས་ཀྱིས། །ཕྱོགས་ཀུན་ནམ་མཁའི་ཁྱོན་རྣམས་ཀུན་བཀང་སྟེ། །རྩ་བརྒྱུད་བླ་མ་སོགས་འདྲ། དེ་ནས་ཟབ་པའི་མཆོད་པ་རང་གི་ལུས་ངག་ཡིད་གསུམ་ལྟོས་པ་མེད་པར་འབུལ་སྙམ་པས་འདིའི༴ ཡོན་གནས་དམ་པ་ཁྱེད་རྣམས་ལ། །བདག་གི་སྒོ་གསུམ་གཏན་དུ་འབུལ། །སེམས་དཔའ་མཆོག་རྣམས་ཐུགས་བརྩེ་བས། །བདག་གི་སྒོ་གསུམ་ཡོངས་བཞེས་ཤིག །ཅེས་བརྗོད། དེ་ནས་བདག་གཞན་སེམས་ཅན་ཐམས་ཅད་ཀྱིས་ཚེ་རབས་ཐོག་མེད་ནས་བསགས་པའི་ལས་ཐམས་ཅད་ལ་འགྱོད་སྡོམ་གྱི་བསམ་པ་དྲག་པོས་བཤགས་པར་བགྱིའོ་སྙམ་པས་འདིའི་རྗེས༴ བདག་དང་སེམས་ཅན་གྱིས་ ཐོག་མ་མེད་པ་ནས་ད་ལྟ་ལ་ཐུག་གི་བར་དུ་དུག་གསུམ་གྱིས་ཀུན་ནས་བསླངས་ཏེ་སྒོ་གསུམ་གྱིས་བསགས་པའི་སྡིག་པ་མི་དགེ་བ་མཐོལ་ལོ་བཤགས་སོ། །མི་སྦེད་སླན་ཆད་ཀྱང་བསྡོམ་པར་བགྱིའོ་ཞེས་བརྗོད། དེ་ནས་སྡོམ་པ་ལེན་པ་དངོས་ལ་གསུམ་ལས། སོ་ཐར་ནི། བདག་གཞན་སེམས་ཅན་ཐམས་ཅད་འཁོར་བའི་སྡུག་བསྔལ་གྱིས་འཇིགས་ནས་སྐྱབས་ཞུ་ན་ཅི་མཛད་བླ་མ་དཀོན་མཆོག་མཁྱེན་སྙམ་པས་འདིའི༴ ཕྱོགས་བཅུ་ན་བཞུགས་པའི་བླ་མ་དང་དཀྱིལ་འཁོར་གྱི་ལྷ་ཚོགས་བྱང་སེམས་ཐམས་ཅད་དགོངས་སུ་གསོལ། བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ༑ ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཕྱོགས་བཅུ་ན་བཞུགས་པའི་དམ་པའི་ཆོས་རྣམས་ལ་སྐྱབས་སུ་མཆིའོ། །ཕྱོགས་བཅུ་ན་བཞུགས་པའི་འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ལན་གསུམ། དེ་ནས་བྱང་སྡོམ་ནི། སྔོན་གྱི་རྒྱལ་བ་སྲས་བཅས་ཀྱིས་ཇི་ལྟར་ཐུགས་བསྐྱེད་པ་ལྟར་བདག་གིས་ཀྱང་བསྐྱེད་སྙམ་པས་འདིའི༴ ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ལན་གསུམ་གྱིས་སྨོན་པ་དང༌། སྡོམ་པ་ཡི་ནི་ཚུལ་ཁྲིམས་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ ཁྲིམས་གསུམ། །སོ་སོར་བརྟན་པོར་བཟུང་བར་བགྱི། །ཞེས་ལན་གསུམ་གྱིས་འཇུག་སེམས། དེ་གཉིས་ཀྱི་མཇུག་སྡུད་ནི། མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། །ཅེས་གསུམ། དེ་ནས་སྔགས་སྡོམ་ནི། རིགས་ལྔའི་དམ་ཚིག་དང་རྩ་བ་ཡན་ལག་གི་དམ་ཚིག་རྣམས་ཚུལ་བཞིན་དུ་བསྲུང་སྙམ་པས་འདིའི༴ སངས་རྒྱས་རྣལ་འབྱོར་སྡོམ་པ་ལ། ། སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སྐྱབས་གསུམ་དག་ཀྱང་བཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ནི། །ཡང་དག་ཉིད་དུ་བཟུང་བར་བགྱི། ། སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པདྨའི་རིགས་མཆོག་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ཀུན་བཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །དམ་ཚིག་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བཅུ་བཞིར་ཕྱེ་བའི་དམ་ཚིག་ཏུ། །ཡན་ལག་ཉེས་པ་ཐམས་ཅད་སྤང༌། །ལན་གསུམ། དེ་རྣམས་ཀྱི་མཇུག་སྡུད་འདིའི། བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །དམ་ཚིག་སྡོམ་པ་ཐམས་ཅད་བཟུང༌། ། ཞེས་བརྗོད། དེ་ལྟར་དམ་ཚིག་དང་སྡོམ་པ་དེ་དག་མ་བསྲུངས་ན་ཉེས་དམིགས་དང༌། བསྲུངས་ན་ཕན་ཡོན་ཆེན་པོ་ཡོད་པས་མི་འདའ་བའི་ཕྱིར་དམ་ལ་བཞག་པ་ནི། བདུད་རྩི་བླུད་དེ། འདི་ནི་ཁྱོད་ཀྱི་དམྱལ་བའི་ཆུ༑ ༑དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨ་མྲྀ་ཏ་ཨུ་ད་ཀ་ཋ་ཋ་ཧཱུྃ། དེ་ནས། ༀ་ཙཀྵུ་བྷནྡྷ་བ་རཱ་མ་ནཱ་ཡ་ཧཱུྃ། ཞེས་པས་མིག་དར་དང༌། ཨ་ཁཾ་ཝཱི་ར་ཧཱུྃ་གིས་མེ་ཏོག་གཏད། ཚད་མེད་པ་བཞིའི་འཇུག་པས་དལ་དུ་ཞུགས་པའི་མོས་པ་མཛོད། ས་མ་ཡ་ཧཱུྃ་ཞེས་ཡོལ་བའི་ནང་དུ་བཅུག །དེ་ནས་སྐུ་གསུང་ཐུགས་ཀྱི་བྱིན་རླབས་དབབ་པའི་སླད་དུ་གསོལ་བ་གདབ་པ་འདིའི༴ དཔལ་རྡོ་རྗེ་རྣལ་འབྱོར་མ་བདག་ལ་དབབ་ཏུ་གསོལ། ལན་གསུམ། དེ་ནས་རེ་ཁཱ་ཟླུམ་པོ་བྲིས་པའི་སྟེང་དུ་སློབ་མ་རྣམས་མཉམ་པའི་སྟབས་ཀྱིས་ལངས་ནས་ཐལ་མོ་སྤྱི་བོར་སྦྱོར་ལ། རང་ལུས་རྡོ་རྗེ་རྣལ་འབྱོར་མ་དམར་མོ་གྲི་ཐོད་ཁ་ཊྭཱཾ་ག་བསྣམས་པའི་སྐུར་ལམ་གྱིས་བསྐྱེད་ལ་ཐ་མལ་གྱི་འཛིན་བློ་སྐྱུར། ངག་གནད་རླུང་ཁ་སྦྱོར་དུ་བཅིངས། སེམས་དུས་གསུམ་གྱི་སྤྲོས་པ་དོར་ནས་བླ་མ་ལ་མོས་གུས་དྲག་ཏུ་བྱས་པས་བླ་མའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་རྣལ་འབྱོར་མ་ཐམས་ཅད་རྡོ་རྗེ་རྣལ་འབྱོར་མའི་རྣམ་པར་བདེ་བའི་གར་སྟབས་ལིང་ལིང་ཁ་ཆར་དང་བུ་ཡུག་འཚུབས་པ་ལྟར་བྱོན་ནས་ཁྱེད་རང་ལ་ཐིམ་པའི་མོས་པ་མཛོད། སྤོས་བདུག་ ཅིང་རོལ་མོ་འཁྲོལ་བས། ཧཱུྃ། འདི་ནི་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་དམ་ཚིག་བླ་མེད་པ། །ད་ལྟ་ཉིད་དུ་འབབ་པར་ཤོག །ཨཱ་བེ་ཤ་ཡ་ཧྲཱཿ ཨ་ཨ་ཕ་ཕ་ཞེས་དབབ་ཅིང༌། དེ་ཀའི་ངང་ལ་སེམས་མ་བཅོས་པར་ཞོག་ཅིག །ཅེས་བསྐྱང་དུ་གཞུག །འོ་ཁྱོད་རང་ལྷར་སྒོམ་པ་དེ་མཚོན་བྱེད་རྟགས་ཀྱི་རྣལ་འབྱོར་མ་བྱ་བ་བསྐྱེད་རིམ། སྤྲོས་མེད་འཛིན་མེད་དུ་འཇོག་པ་དེ་མཚོན་བྱ་དོན་གྱི་རྣལ་འབྱོར་མ་བྱ་བ་རྫོགས་རིམ་ཡིན་ནོ༑ ༑ཞེས་ངོ་སྤྲད། ཡང་ཁྱོད་རང་གི་སྤྱི་བོར་རྡོ་རྗེ་རྣལ་འབྱོར་མ་གར་བྱེད་པ་ལ་ཤེས་པ་རྩེ་གཅིག་ཏུ་གཏོད་ཅིག །ཅེས་དབབ། དེ་སྤྱི་བོར་ཐིམ་པས་སྣང་སྟོང་འཛིན་མེད་ཀྱི་ཉམས་སྐྱེ་བས་དེའི་ངང་ལ་ཞོག་ཅིག །ཡང་མགྲིན་པར་རྡོ་རྗེ་རྣལ་འབྱོར་མ་གར་བྱེད་པ་ལ་རྩེ་གཅིག་ཏུ་གཏོད་ཅིག །དེ་མགྲིན་པར་ཐིམ་པས་གྲག་སྟོང་འཛིན་མེད་ཀྱི་ཉམས་སྐྱེ་བས་དེའི་ངང་ལ་ཞོག་ཅིག །ཡང་སྙིང་གར་རྡོ་རྗེ་རྣལ་འབྱོར་མ་གར་བྱེད་པ་ལ་རྩེ་གཅིག་ཏུ་གཏོད་ཅིག །དེ་སྙིང་གར་ཐིམ་པས་གསལ་སྟོང་འཛིན་མེད་ཀྱི་ཉམས་སྐྱེ་བས་དེའི་ངང་ལ་ཞོག་ཅིག །ཡང་ལྟེ་བར་རྡོ་རྗེ་རྣལ་འབྱོར་མ་གར་བྱེད་པ་ལ་རྩེ་གཅིག་ཏུ་གཏོད་ཅིག །དེ་ལྟེ་བར་ཐིམ་པས་རིག་སྟོང་འཛིན་མེད་ཀྱི་ཉམས་སྐྱེ་བས་དེའི་ངང་ལ་ཞོག་ཅིག །ཡང་གསང་བར་རྡོ་རྗེ་རྣལ་འབྱོར་མ་གར་བྱེད་པ་ལ་རྩེ་གཅིག་ཏུ་གཏོད་ཅིག །དེ་ཡང་གསང་བར་ཐིམ་པས་བདེ་སྟོང་འཛིན་མེད་ཀྱི་ཉམས་སྐྱེ་བས་དེའི་ངང་ལ་ཞོག་ཅིག ། ཅེས་ངོ་སྤྲད་ཅིང་རེ་རེ་བཞིན་ཡང་སྔགས་རོལ་དང་བཅས་པས་དབབ་བོ། །དེ་ནས་མདུན་བསྐྱེད་རྣལ་འབྱོར་མའི་སྐུ་ལ་མེ་ཏོག་ཕུལ་བར་མོས་ལ་འདིའི༴ ༀ་པྲ་ཏཱིཙྪ་བཛྲ་ཧོཿ སླར་ཡང་མེ་ཏོག་དེ་ཉིད་རང་གི་སྤྱི་བོར་བཅིངས་པའི་མོས་པ་མཛོད། ༀ་པྲ་ཏི་གྷྲིཧྞ་སྟྭཾ་ཨི་མཾ་ས་ཏྭ་མ་ཧཱ་བ་ལ། དེ་ནས་ཙཀྵུ་པྲ་བེ་ཤ་ཡ་ཕཊ། ཅེས་མིག་ཕྱེ། ཧེ་བཛྲ་པཱ་ཤྱ་ཧོཿ ཁྱེད་རྣམས་ལ་རྗེ་བཙུན་རྡོ་རྗེ་རྣལ་འབྱོར་མའི་ཞལ་བསྟན་དུ་ཡོད་པས་ཞལ་མཐོང་བ་རེ་དགའ་སྙམ་པའི་མོས་པ་མཛོད་བྱས་ལ། སིནྡྷུ་རའི་དཀྱིལ་འཁོར་གཏད་ཅིང་མགོ་ཐོག་ཏུ་བཞག་ལ། རྣལ་འབྱོར་མ་ནི་སྔགས་ཀྱི་གཟུགས། །སྔགས་ནི་རྣལ་འབྱོར་མ་ཡི་གཟུགས། །ལྷ་དང་སྔགས་ལ་ཐ་དད་མེད། །དཀྱིལ་འཁོར་བཟང་པོ་འདི་ལ་ལྟོས། །ཞེས་བརྗོད། དེས་སྐུ་གསུང་ཐུགས་ཕེབས་པ་གསུམ་དང༌། སྐུ་གསུང་ཐུགས་མཐོང་བ་གསུམ་གང་རུང་རེ་ཐོབ་པས་ངོ་ཤེས་པར་མཛོད་ཅིག །དེ་ཡན་ཆད་ཀྱིས་རྡོ་རྗེ་རྣལ་འབྱོར་མའི་བྱིན་རླབས་བྱ་བ་དེ་ཚར་བ་ལགས། ད་དབང་བཞི་བསྐུར་བ་ལ། དང་པོ་བུམ་པའི་དབང་ནི། དཀྱིལ་འཁོར་གྱི་གཙོ་མའི་ཐུགས་ཀ་ནས་སྤྲུལ་པའི་དབང་ལྷ་རྣམས་ཀྱིས་ཡེ་ཤེས་བདུད་རྩིས་གང་བའི་བུམ་པ་ཐོགས་ཏེ་དབང་བསྐུར་བའི་མོས་པ་མཛོད། ཧཱུྃ། ཀུན་གཞི་མ་བཅོས་རྣལ་མ་ལ། །གནས་ལུགས་རིག་པའི་ཉི་མ་ཤར། །རང་སྣང་མ་འགགས་ཐམས་ཅད་གསལ། །བྱིན་རླབས་ཞེས་ནི་འདི་ལ་བྱ། །རྗེ་བཙུན་མ་ཡི་བྱིན་རླབས་ཀྱིས། །བུམ་པའི་དབང་བསྐུར་ ཐོབ་པར་ཤོག །ཅེས་བུམ་པ་སྤྱི་བོར་བཞག་ཅིང་བུམ་ཆུ་བླུད། དེས་ལུས་ཀྱི་དྲི་མ་དག །འབྲས་བུ་སྤྲུལ་པའི་སྐུ་ཐོབ། དེ་མ་ཐོབ་ཀྱི་བར་དུའང་ཕུང་ཁམས་སྐྱེ་མཆེད་ལྷར་སྒོམ་ཞིང་སྒོམ་པ་ལ་དབང༌། ཉམས་ཡུལ་སྣང་སྟོང་དུ་འཆར་བས་ཞེན་བྲལ་དུ་བསྐྱང་བར་མཛོད། དེ་བརྟན་ཕྱིར་དཀྱིལ་འཁོར་ལྷས་བཀྲ་ཤིས་ཀྱི་མེ་ཏོག་འཐོར་ཞིང༌། ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་བརྗོད་ཅིང་དབང་ལྷ་རྣམས་རང་ལ་ཐིམ་པའི་མོས་པ་མཛོད། གཉིས་པ་གསང་དབང་ནི། བླ་མ་བདེ་མཆོག་ཡབ་ཡུམ་མཉམ་པར་སྦྱོར་བའི་བྱང་སེམས་མཁའ་གསང་ནས་ཐོན་པ་ཀ་པཱ་ལའི་བདུད་རྩི་དང་འདྲེས་པ་དེ་ཉིད་ལྕེ་ཐོག་ཏུ་བྱིན་པའི་མོས་པ་མཛོད། ཧཱུྃ། གཡོ་བ་མེད་པའི་ཆོས་ཀྱི་དལ། །དངོས་པོ་མེད་པའི་སེམས་ཉིད་གསལ། །འཛིན་པའི་རྟོག་པ་རང་སར་བྲོས། །བྱིན་རླབས་ཞེས་ནི་འདི་ལ་བྱ། །རྗེ་བཙུན་མ་ཡི་བྱིན་རླབས་ཀྱིས། །གསང་བའི་དབང་མཆོག་ཐོབ་པར་ཤོག །ཅེས་བདུད་རྩི་ལན་གསུམ་བླུད། དེས་ངག་གི་དྲི་མ་དག ༑འབྲས་བུ་ལོངས་སྐུ་ཐོབ། དེ་མ་ཐོབ་ཀྱི་བར་དུ་བཟའ་བ་མ་ཡིན་པའི་རྟོག་པ་བཅོམ་ནས་རྩ་རྡོ་རྗེ་ལུས་ཀྱི་གནས་ལུགས་དང༌། རླུང་སྦྱོར་བ་བཞི་ལྡན་སྒོམ་པ་ལ་དབང༌། ཉམས་སེམས་གསལ་སྟོང་དུ་འཆར་བས་ཞེན་མེད་དུ་བསྐྱང་འཚལ་ལོ། །གསུམ་པ་ཤེར་དབང་ནི། སིནྡྷུ་རའི་དཀྱིལ་འཁོར་ལས་གཡོན་པའི་མཐེབ་སྲིན་གྱིས་བླངས་ཏེ་གནས་བཞིར་ཐིག་ལེ་བྱས་ལ་བླ་མ་དང༌། ཡི་དམ་མཁའ་འགྲོ་རྣམས་བསྟིམ་པའི་བྱིན་རླབས་ཀྱིས་གཏུམ་མོ་འབར་བས་ཁམས་ བཞུ་བའི་དགའ་བཞིའི་ཡེ་ཤེས་སྐྱེས་པའི་མོས་པ་མཛོད། ཧཱུྃ། སེམས་ཀྱི་མེ་ལོང་ཕྱིས་པ་ལས། །རང་སྣང་དག་པའི་གཟུགས་བརྙན་ཤར། །བདེ་བ་དངོས་མེད་ཉམས་སུ་མྱོང༌། །བྱིན་རླབས་ཞེས་ནི་འདི་ལ་བྱ༑ ༑རྗེ་བཙུན་མ་ཡི་བྱིན་རླབས་ཀྱིས། །གསུམ་པའི་དབང་མཆོག་ཐོབ་པར་ཤོག །ཅེས་བརྗོད་ཅིང༌། ༀ་ཨཱཿ ཧཱུྃ་ཧྲཱིཿ ཞེས་སྤྱི་མགྲིན་སྙིང་ལྟེར་སིནྡྷུ་རའི་ཐིག་ལེ་བྱའོ། །དེས་ཡིད་ཀྱི་སྒྲིབ་པ་དག །འབྲས་བུ་ཆོས་སྐུ་ཐོབ། དེ་མ་ཐོབ་ཀྱི་བར་དུ་ཐབས་ཤེས་ཡ་བྲལ་གྱི་ཉེས་པ་བཅོམ་ནས་ལམ་ཕྱག་རྒྱ་བརྟེན་པ་ལ་དབང༌། ཉམས་བདེ་སྟོང་དུ་འཆར་བས་ཞེན་བྲལ་དུ་བསྐྱང་བར་མཛོད། བཞི་པ་ཚིག་དབང་ནི། ལུས་གནད་ཆོས་བདུན་བཅའ། རླུང་རང་བབས་སུ་བཞག །སེམས་གང་ཤར་གྱི་རང་ངོ་ལ་གཅེར་གྱིས་ལྟོས་ལ་བསལ་བཞག་མེད་པར་ཞོག་མཛོད། ཧཱུྃ། ལྟོས་ཤིག་རང་གི་སེམས་ལ་ལྟོས། །བལྟས་པས་ཅིར་ཡང་གྲུབ་པ་མེད། །གྲུབ་པ་མེད་པའི་སེམས་ཉིད་ལ། །སྣ་ཚོགས་སྣང་བ་ངོ་མཚར་ཆེ། །དངོས་པོར་བཟུང་བས་བག་ཆགས་གསོག །རང་བཞིན་མེད་ན་སངས་རྒྱས་ཡིན། །རྗེ་བཙུན་མ་ཡི་བྱིན་རླབས་ཀྱིས། །བཞི་པའི་དབང་མཆོག་ཐོབ་པར་ཤོག །དོན་རང་སེམས་རྩ་བྲལ་བདེ་ཆེན་ལྷན་ཅིག་སྐྱེས་པའི་ཡེ་ཤེས་སུ་ངོ་ཤེས་པར་གྱིས་ཤིག །དེས་ཕྲ་བའི་སྒོ་གསུམ་གྱི་དྲི་མ་དག །འབྲས་བུ་ངོ་བོ་ཉིད་སྐུ་ཐོབ། དེ་མ་ཐོབ་ཀྱི་བར་དུ་འཁོར་འདས་ཐ་དད་དུ་འཛིན་པའི་རྟོག་པ་སྤངས་ནས་ཕྱག་རྒྱ་ཆེན་པོ་ བསྒོམ་པ་ལ་དབང༌། ཉམས་སེམས་ཉིད་རྩ་བྲལ་གྱི་རྟོགས་པ་འཆར་བས་ཞེན་བྲལ་དུ་བསྐྱང་བར་མཛོད་ཅིག །དེས་དངོས་གཞི་སོང་ནས། མཇུག་རྗེས་སུ་གནང་བ་ལ་ལྔ་ལས། དང་པོ་བླ་མ་བརྒྱུད་པ་གཏད་པའི་རྗེས་གནང་ནི། དབང་འདི་རྗེ་བཙུན་རྡོ་རྗེ་རྣལ་འབྱོར་མ། ཛ་ལཱནྡྷ་ར། ནག་པོ་པ། ཌོམྦྷི་པ། རྗེ་དམ་པ་རྒྱ་གར་བ་ནས་ད་ལྟའི་བར་དུ་བྱིན་རླབས་དབང་གི་ཆུ་རྒྱུན་མ་ཆད་པའི་བཀའ་བབས་ཁྱད་པར་ཅན་ཡིན་པས། ཁྱོད་ཀྱིས་ཀྱང་བླ་མའི་བརྒྱུད་པ་ཟུངས་ལ་གཞན་དོན་གྱིས་ཤིག །གཉིས་པ་ཡི་དམ་གཏད་པ་ནི། སློབ་དཔོན་གྱིས་དག་པ་གསུམ་གྱི་སྔགས་བརྗོད་པས་ལུས་ངག་ཡིད་གསུམ་སྦྱངས་ཏེ་མི་དམིགས་པ་ལས། པདྨ་མི་རོ་ཉི་མའི་གདན་སྟེང་བཾ་ལས་ཁྱེད་རང་རྣལ་འབྱོར་མ་དམར་མོ་རྩ་ཞལ་ཁྲོ་མོ། གཡས་ཞལ་ཕག་གདོང་གྲི་ཐོད་ཁ་ཊྭཱཾ་ག་བསྣམས་པ། གཅེར་བུ་སྐྲ་གྲོལ་བ། ཐོད་སྐམ་གྱི་དབུ་རྒྱན། རློན་པའི་དོ་ཤལ། རུས་པའི་ཕྱག་རྒྱ་ལྔས་བརྒྱན་ཅིང༌། གཡོན་བརྐྱང་བའི་ཕྱེད་སྐྱིལ་གྱི་གར་གྱིས་བཞུགས་པར་གསལ་ཐོབ། ཁྱོད་ཀྱིས་ཕྱིན་ཆད་རྗེ་བཙུན་མ་ཡི་དམ་གྱི་ལྷར་བཟུང་ལ་འདི་ལྟར་རྒྱུན་དུ་སྒོམས་ཤིག །གསུམ་པ་དཀྱིལ་འཁོར་གཏད་པ་ནི༑ ད་ཕྱིན་ཆད་རྗེ་བཙུན་རྡོ་རྗེ་རྣལ་འབྱོར་མའི་དཀྱིལ་འཁོར་བཞེངས་ལ་སྒྲུབ་མཆོད་ཚུལ་བཞིན་དུ་གྱིས་ཤིག །བཞི་པ་མཆོད་པའི་རྗེས་གནང་ནི། ངེད་ཀྱིས་སྔགས་ཀྱི་རྗེས་ཟློས་དང༌། ཕྱག་རྒྱའི་ལད་མོ་གྱིས་ལ་སློབ་དཔོན་ དཀྱིལ་འཁོར་དང་བཅས་པ་ལ་མཆོད་པ་ཕུལ་ཅིག །ཕྱག་རྒྱ་དང་བཅས། ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། ནས་ཤབྡའི་བར་བྱེད་དུ་བཅུག་ནས། དེང་ཕྱིན་ཆད་ཕྱི་ནང་གསང་བ་དེ་ཁོ་ན་ཉིད་དང་གཏོར་མའི་མཆོད་པས་ལྷ་དང་བླ་མ་མཉེས་པར་གྱིས་ཤིག །ལྔ་པ་གསུང་སྔགས་ཀྱི་རྗེས་གནང་ནི། སློབ་དཔོན་དང་ཁྱེད་རང་གཉིས་ཀ་རྡོ་རྗེ་རྣལ་འབྱོར་མའི་སྐུར་གསལ་བ་ལས། སློབ་དཔོན་ལ་མོས་གུས་བྱས་པའི་རྐྱེན་གྱིས། སློབ་དཔོན་གྱི་ལྟེ་བའི་བྃ་ལས་སྔགས་ཕྲེང་དམར་པོ་བྱུང་བ་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ལྟེ་བའི་བྃ་ལ་ཐིམ་པར་མོས་ལ་འདིའི་རྗེས་ཟློས། ༀ་ༀ་ༀ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྣ་ནཱི་ཡེ། བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་ལན་གསུམ། སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས༴ བཅོམ་ལྡན་བདག་ལ་སྩལ་ལགས་ཀྱིས། །བདག་ལ་འགོ་བར་མཛད་དུ་གསོལ། །ལན་གསུམ། མེ་ཏོག་དེ་ཁྱེད་རང་གི་སྤྱི་བོར་གཏོར་བས་བྱིན་གྱིས་བརླབས་པའི་མོས་པ་མཛོད། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ཞེས་བུའི་སྤྱི་བོར་མེ་ཏོག་འཐོར། དེང་ཕྱིན་ཆད་སྔགས་ཀྱི་བཟླས་པ་ལ་བརྩོན་པར་མཛོད་ཅིག །དེ་ནས་གཙོ་བོས་ཇི་ལྟར་སོགས་ཀྱིས་དམ་ཚིག་ཁས་བླངས། གཏོང་རག་གི་མཎྜལ་དང༌། དེང་ནས་བརྩམས་ཏེ་སོགས་ཀྱིས་ལུས་དབུལ། དགེ་བ་བསྔོ་བ་རྣམས་སྤྱི་ལྟར་རོ། །དེ་ནས་རྗེས་ཆོག་ནི། ལས་ཀྱི་རྡོ་རྗེས་ཐབས་ཤེས་ཀྱི་རྫས་བསྣོལ་མར་ཐོགས་ནས། གཟིགས་ཤིག་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱར་མི་རུང༌། །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་ཏུ་དགོངས་ཏེ་རོལ། །ཨ་ཧོ་མ་ཧཱ་སུ་ཁ་ཧོ། ལེན་པ་པོས་པད་བསྐོར་སྔོན་འགྲོས་རྩེ་གསུམ་གྱི་རྒྱ་སྟོན་བཞིན་དུ། བདེ་གཤེགས་ཆོས་ལ་རིན་ཐང་མེད། །འདོད་ཆགས་ལ་སོགས་དྲི་མ་བྲལ། །གཟུང་དང་འཛིན་པ་རྣམ་སྤངས་པ། །དེ་བཞིན་ཉིད་ལ་བདག་ཕྱག་འཚལ། །ཨ་ཧོ་མ་ཧཱ་སུ་ཁ་ཧོ། ཞེས་བླངས་ལ། ནང་གི་སྲེགས་བླུགས་ཀྱི་སྒོ་ནས་ཚིམ་པར་རོལ་བའི་མཐར་ལྷག་མ་ལ་ༀ་ཨཱཿ ཧཱུྃ་ཞེས་འབར་བའི་ཕྱག་རྒྱས་ཁ་ཕྲུ་བཏབ་ཅིང་གཙང་གཏོར་དང་བསྲེས་ལ་དཔལ་འབར་བཙུགས་ཏེ། ༀ་ཨཱཿ ཧཱུྃ་ཨུ་ཙྪིཥྚ་བ་ལ་ཏ་བྷཀྵ་སཱི་སྭཱ་ཧཱ། འབྱུང་པོ་ལྷག་མ་ལ་དབང་བ་རྣམས་ཚིམ་པར་གྱུར་ཅིག །ཀྱེ་ཀྱེ་རྡོ་རྗེ་མཁའ་འགྲོའི་ཚོགས། །ལས་འདི་བདག་གིས་བསླབ་པར་བགྱིས། །བདག་ལ་བདེ་ལེགས་བསྡུ་བ་དང༌། །ཕན་དང་ཡིད་འོང་བདེ་བ་དང༌། །གྲོང་དང་ཡུལ་འཁོར་ཤིས་པར་མཛོད། །ཅེས་བརྗོད་ནས་གཙང་སར་དབུལ་ལོ། །དེ་ནས་མཆོད་པ་ཁ་གསོས་ལ་བྱིན་གྱིས་བརླབས། ཨརྒྷཾ་ནས་ཤབྡའི་བར་གྱིས་ཕྱི་མཆོད་དང༌། འབྲུ་གསུམ་གྱིས་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱིས་བསྟོད། བླ་མ་དང་རྗེ་བཙུན་རྡོ་རྗེ་རྣལ་འབྱོར་མའི་ལྷ་ཚོགས་རྣམས་ཀྱིས་བདག་ཅག་དཔོན་སློབ་འཁོར་དང་བཅས་པ་ལ་ཐུགས་བརྩེ་བས་གཟིགས་ཏེ། བར་ཆད་ཞི་བ་དང་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་དོན་གསོལ། ཡིག་བརྒྱ་བཟླ་ཞིང་མ་རྙེད་ཡོངས་སུ་སོགས་ཀྱིས་ནོངས་པ་བཟོད་པར་གསོལ། རྡུལ་ཚོན་གྱི་ཡེ་ཤེས་པ་ནུབ་ཐ་མའི་ཚེ་དང་རྒྱུན་དུ་མགྲོན་རྣམས་ཁྱེད་ཀྱིས་སེམས་ཅན་སོགས་ཀྱིས་གཤེགས། རྡུལ་ཚོན་ཉིན་སྔ་མ་རྣམས་དང་རས་བྲིས་རྣམ་པ་ཀུན་ཏུ་འདིར་ནི་གཟུགས་དང་སོགས་ཀྱིས་ཡེ་ཤེས་པ་བརྟན་བཞུགས་བྱ། དམ་ཚིག་པ་རྣམས་རང་གི་ལྟེ་བའི་བྃ་ལས་འོད་ཟེར་འཕྲོས། ཁམས་གསུམ་སྣོད་བཅུད་ཐམས་ཅད་དག་པའི་འཁོར་ལོ་སྦྱངས། དེ་ཐམས་ཅད་འཁོར་གཞལ་ཡས་ཁང་ལ་ཐིམ། དེ་རྣམས་གཙོ་བོ་ལ་ཐིམ། དེ་བྃ་ལ་ཐིམ། དེའང་ཐིག་ལེ་ལ། དེ་ནཱ་ད་དང༌། ནཱ་ད་ཡང་མི་དམིགས་པར་གྱུར། སླར་ཡང་རང་ཉིད་རྡོ་རྗེ་རྣལ་འབྱོར་མའི་སྐུར་གྱུར། ༀ་བྃ། ཧྃ་ཡྃ། ཧྲཱ་མྃ། ཧྲ་ཧྲ། ཧཱུྃ་ཧཱུྃ། ཕཊ་ཕཊ། སུམྦྷ་ལན་གཉིས་ཀྱིས་ཕྱོགས་བཅིངས། སྣང་གྲགས་འགྱུ་གསུམ་རྡོ་རྗེ་རྣལ་འབྱོར་མའི་སྐུ་གསུང་ཐུགས་ཀྱི་རང་བཞིན་དུ་རྣམ་པར་དག་པར་མོས་ལ་བསྔོ་སྨོན་དང་བཀྲ་ཤིས་བརྗོད།། ༈ །།ༀ་སྭ་སྟི། རྡོ་རྗེ་རྣལ་འབྱོར་མ་ནང་སྒྲུབ་ཞལ་གཅིག་མའི་དཀྱིལ་འཁོར་དུ་དབང་བསྐུར་བ་ལ། བཤམས་བཀོད་ནི་སྟེགས་གཙང་མར་དཀྱིལ་འཁོར་རྒྱས་པར་སྒོ་རྫོགས་ཀྱི་དབུས་སམ༑ བསྡུ་ན་མེ་འོད་དང་རྡོ་རའི་དབུས་སུ་ཆོས་འབྱུང་རྐྱང་པའི་ལྟེ་བར་གྲི་ཐོད་དམ་བཾ་ཡིག་དམར་པོ་བྲི། མེ་ལོང་གི་སིནྡྷུ་རའི་དཀྱིལ་འཁོར་ཡང་ཆོས་འབྱུང་རྐྱང་པའི་དབུས་སུ་བཾ་ཡིག་རྩ་སྔགས་ཀྱིས་བསྐོར་བ་བྲི། བཅས་གཞན་རྣམས་ལྷ་དགུ་དང་འདྲའོ། །དེ་ནས་སྒྲུབ་མཆོད་ནི། སྔོན་གཏོར་ནས་བཟུང་ཡེ་ཤེས་ཚོགས་གསོག་གི་བར་ལྷ་དགུ་ལྟར་བྱ་ཞིང༌། བདག་བསྐྱེད་དངོས་གཞི་ནི། སྟོང་པའི་ངང་ལས་རང་ལུས་དག་པའི་གཞལ་ཡས་ཁང་ལྟེ་བར་ཆོས་འབྱུང་གི་ནང་དུ་པད་ཉི་དུས་མཚན་གྱི་སྟེང་ན་ངག་དག་པ་བཾ་ཡིག་དམར་པོ། དེ་ཡོངས་སུ་གྱུར་པ་ལས། སེམས་དག་པ་རྗེ་བཙུན་མའི་སྐུར་གྱུར་པ་ནི། རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། ཁྲོ་ཆགས་འདྲེས་པའི་ཉམས་ཅན། ཕྱག་གཡས་རྡོ་རྗེ་གྲི་གུག་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པའི་མཆན་ན་ཁ་ཊྭཱཾ་ག་བསྣམས་པ། ཐོད་སྐམ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ། རུས་པའི་ཕྱག་རྒྱ་ལྔ་སོགས་དུར་ཁྲོད་ཀྱི་ཆས་ཅན། གར་གྱི་ཉམས་དགུ་དང་ལྡན་ཞིང༌། ཞབས་གཡས་བསྐུམ་པའི་མཐིལ་གཡོན་པའི་བརླ་ལ་སྦྱར་བའི་གར་སྟབས་ཀྱིས་དུས་མཚན་མ་བརྫིས་པའོ། །དེ་ནས་ལྟེ་བར་བཾ་ཡིག་དམར་པོ་གནས་པ་ལས་འོད་ཟེར་འཕྲོས་ནུབ་ཕྱོགས་ཨོ་རྒྱན་སྤྲུལ་པའི་ཞིང་ཁམས་ནས་རང་འདྲ་བའི་ཡེ་ཤེས་པ་ཕ་ཞེས་འབར་རྒྱ་དང་བཅས་པས་སྤྱན་དྲངས། ཛཿ ཧཱུྃ་བཾ་ཧོཿ ས་གཉིས་སུ་མེད་པར་གྱུར། སླར་ཡང་ལྟེ་བར་ༀ་བྃ་དམར་མོ། སྙིང་གར་ཧྃ་ཡྃ་སྔོན་མོ། མགྲིན་པར་ཧྲཱ་མྃ་དཀར་མོ། དཔྲལ་བར་ཧྲ་ཧྲ་སེར་མོ། སྤྱི་བོར་ཧཱུྃ་ཧཱུྃ་ལྗང་གུ། ཡན་ལག་ཐམས་ཅད་ལ་ཕཊ་ཕཊ་དུད་ཁ་རྣམས་གོ་ཆའི་དཔའ་མོ་དྲུག་གི་ངོ་བོར་གྱུར། ཡང་བཾ་ལས་འོད་ཟེར་འཕྲོས་པས་འོག་མིན་ནས་དབང་གི་ལྷ་ཕ་ཞེས་སྤྱན་དྲངས། བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། ཞེས་བུམ་པའི་ཆུས་དབང་བསྐུར། སྐུ་གང༌། དྲི་མ་དག །ཆུ་ལྷག་མ་ཡར་ལུད་པ་ལས་ མི་བསྐྱོད་པའི་ངོ་བོ་རྡོ་རྗེ་རྩེ་ལྔ་པས་དབུ་བརྒྱན་པར་གྱུར། དབང་ལྷ་བཛྲ་མུཿ ས་གཤེགས་སུ་གསོལ། དེ་ནས་ལྟེ་བའི་བཾ་ལས་མཆོད་པའི་ལྷ་མོ་དཔག་མེད་བྱུང་ནས་རྗེ་བཙུན་མ་གོ་ཆའི་དཔའ་མོ་དྲུག་དང་བཅས་པ་ལ་མཆོད་ཅིང་བསྟོད་པར་མོས་ལ༑ སོ་སའི་ཕྱག་རྒྱ་དང་བཅས། ༀ་ཤྲཱི་བཛྲ་ཡོ་གཱི་ནི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། ནས་ཤབྡའི་བར་དང༌། འབྲུ་གསུམ་གྱིས་ནང་མཆོད་ཕུལ་ལ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པའི་འཆིང་གཅོད་ཅིང༌། །འཇིག་རྟེན་བྱ་བ་རབ་འཇུག་མ། །དེ་སྙེད་རྣམས་ལ་ཕྱག་འཚལ་ལོ། །ཞེས་བསྟོད་ནས་ལྷ་མོ་རྣམས་ཀྱིས་བཀྲ་ཤིས་པའི་གླུ་ལེན་ཞིང་བཾ་ལ་ཐིམ་པར་གྱུར། དེ་ནས་ལྟེ་བར་ཉི་མ་ལ་གནས་པའི་བཾ་ཡིག་གི་མཐར་བཟླ་བྱའི་སྔགས་ཀྱིས་སུམ་རིམ་དུ་བསྐོར་བ་ལས་འོད་ཟེར་འཕྲོས། བདེ་བར་གཤེགས་པ་ཐམས་ཅད་ཀྱི་ཐུགས་དམ་བསྐུལ། སེམས་ཅན་གྱི་སྡིག་སྒྲིབ་སྦྱངས། ཚུར་འདུས་རང་ལ་ཐིམ་པར་མོས་ལ། ༀ་ༀ་ༀ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྣ་ནཱི་ཡཻ། བཛྲ་བཻ་རོ་ཙ་ནཱི་ཡཻ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་ངག་བཟླས་དང་ཡིད་བཟླས་ཅི་རིགས་པར་བྱའོ། །དེ་ནས་རྫོགས་རིམ་བསྒོམ་པ་ནི། སྐུ་དེ་ཉིད་ལས་མ་གཡོས་པར་གནས་བཞིར་འཁོར་བཞིའི་མཁའ་འགྲོ་རྣམས་ལ་གསལ་བཏབ་ལ་འཇམ་རླུང་འཛིན། ཡང་དེ་ལྟར་གསལ་བའི་ངང་ནས་སྤྱི་བོར་བླ་མ་ སྒོམ་ལ་མོས་གུས་དྲག་ཏུ་བྱ། བསྒོམ་བློ་བསམ་གཏན་གྱི་འཆིང་བ་དང་ཐ་མལ་གྱི་རྣམ་རྟོག་སྤངས་ཏེ་རང་སེམས་མ་བཅོས་པར་བཞག་གོ །དེ་ནས་མདུན་གྱི་དཀྱིལ་འཁོར་དང་བུམ་པ་སྟབས་ཅིག་ཏུ་བསང་སྦྱངས། སྟོང་པའི་ངང་ལས་གཞལ་ཡས་ཁང་མཚན་ཉིད་ཡོངས་སུ་རྫོགས་པ་ལྟེ་བ་ཆོས་འབྱུང་གི་ནང་དང་རྣམ་རྒྱལ་བུམ་པའི་དབུས་སུ་པད་ཉི་དུས་མཚན་གྱི་གདན་ལ་བཾ་ཡིག་ཡོངས་སུ་གྱུར་པ་ལས་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། ཞེས་པ་ནས། དེ་སྙེད་རྣམས་ལ་ཕྱག་འཚལ་ལོ། །ཞེས་བསྟོད་པའི་བར་བདག་བསྐྱེད་དང་འདྲ་བ་ལས། ལས་བུམ་སྒྲུབ་ན་དུས་མཚན་མ་བརྫིས་པའོ། །ཞེས་པའི་མཇུག་ཏུ་ལས་བུམ་དུ་ཁྲོ་བོ་བགེགས་མཐར་བྱེད་གསལ་བར་གྱུར། ཞེས་སྦྲེལ་ལོ། །བསྟོད་པ་སོང་བ་དང༌། མདུན་བསྐྱེད་ལ་དམིགས་ནས། ལྟེ་བའི་བཾ་ཡིག་སྔགས་ཕྲེང་དང་བཅས་པ་ལས་འོད་ཟེར་འཕྲོས། དོན་གཉིས་བྱས། ཚུར་འདུས་བཾ་ཡིག་ལ་ཐིམ་པར་མོས་ནས། ༀ་གསུམ་མ་ཅི་འགྲུབ་བཟླ། བུམ་པར་གཟུངས་ཐག་གཏད་ལ། རང་གི་སྙིང་ག་ནས་སྔགས་ཕྲེང་གཟུངས་ཐག་ལ་འཁྲིལ་ཏེ་སོང་བས་ཐུགས་དམ་བསྐུལ། སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་མོས་ལ། རྣམ་བུམ་ལ་ༀ་གསུམ་མ་དང༌། ལས་བུམ་སུམྦྷ་བཟླས་ལ། འབྲུ་གསུམ་གྱིས་མཆོད་ཡོན་ཕུལ་བས་ལྷ་འོད་དུ་ཞུ་ནས་བུམ་ཆུ་ནུས་ལྡན་དུ་གྱུར། དེ་ནས་གཏོར་མ་བསང་སྦྱངས། སྟོང་པའི་ངང་ལས་ཡཾ་ལས་རླུང་རཾ་ལས་མེ། ཧཱུྃ་གསུམ་ལས་ཐོད་པའི་སྒྱེད་པུ་ལ་ གནས་པའི་ཨཱ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔ་ཡེ་ཤེས་ལྔའི་ངོ་བོར་གནས་པ། ཡེ་ཤེས་ཞེས་བརྗོད་པས་རླུང་གཡོས་མེ་སྦར་རྫས་རྣམས་ཞུ་ཞིང་འཕར་བས་ལུད་པའི་ལྦུ་བ་ཁ་ཊྭཱཾ་གར་གྱུར་པ་ལས་ༀ་ཨཱཿ ཧཱུྃ་གིས་མཚན་པ་ལས་འོད་ཟེར་འཕྲོས། འཕགས་པ་རྣམས་མཆོད་པས་དགྱེས་པ་ཆེན་པོས་མཉམ་པར་སྦྱོར་བའི་བྱང་སེམས་བབས་པ་འབྲུ་གསུམ་ཁ་ཊྭཱཾ་ག་དང་བཅས་པ་ལ་ཐིམ་ནས་རིམ་པར་ཞུ་བ་བདུད་རྩི་དང་གཅིག་ཏུ་འདྲེས་པས་སྣང་སྲིད་ཐམས་ཅད་བདུད་རྩིའི་རང་བཞིན་དུ་གྱུར། ༀ་ཨཱཿ ཧཱུྃ་ལན་གསུམ་མམ་བདུན་བརྗོད། ༀ་ཨཱ་རལླི་ཧོཿ ཛཿ ཧཱུྃ་བཾ་ཧོཿ ས་མ་ཡ་ཧོཿ ས་མ་ཡ་སྟཾཿ དྲ་ཤྱཱ་ཧོཿ ཧཱུྃ་ཧཱུྃ། ཧེ་ཧེ་ཧ་ཧ་ཧི་ཧི། ཕ་ཕ་ཕ། ཞེས་འབར་བའི་རྒྱ་དང་བཅས་པས་གཏོར་མགྲོན་རྣམས་མདུན་གྱི་ནམ་མཁའ་ལ་ཐིབས་ཀྱིས་བྱོན་པར་གྱུར། དེ་ནས་རྡོར་ཐལ་ཕྱེ་བའི་རྒྱ་དང་བཅས། ༀ་ན་མོ་གུ་རུ་ཤྲཱི་བཛྲ་ཡོ་གི་ནཱི། ཀཱ་ལ་རུ་པཱི་ནཱི། ཛྭ་ལ་མུ་ཁི་ནཱི་ཧྲི། ཨི་དཾ་བ་ལ་ཏ་ཁ་ཁ་ཁཱ་ཧི་ཁཱ་ཧི། ཞེས་གསུམ་མམ་བདུན་གྱིས་གཙོ་བོ་ལ་ཕུལ། ༀ་བུདྡྷ་ཌཱ་ཀི་ནཱི། བཛྲ་ཌཱ་ཀི་ནཱི། རཏྣ་ཌཱ་ཀི་ནཱི། པདྨ་ཌཱ་ཀི་ནཱི། ཀརྨ་ཌཱ་ཀི་ནཱི། བི་ཤྭ་ཌཱ་ཀི་ནཱི། ས་མ་ཡ་ཌཱ་ཀི་ནཱི། ལོ་ཀ་སརྦ་ཌཱ་ཀི་ནཱི་བ་ལ་ཏ་ཁ་ཁ་ཁཱ་ཧི་ཁཱ་ཧི། ཞེས་པས་འཁོར་རྣམས་ལ་ཕུལ། ༀ་ཨིནྡྲ་ཡ། ཨགྣི་ཡ། ཡ་མཱ་ཡ། རཀྵ་ས་ཡེ། ནཱིརྟྱ། ནཱ་ག་ཡ། ཝཱ་ཡ་ཝེ། ཀུ་བེ་རཱ་ཡ། ཨཱི་ཤྭ་ནཱ་ཡ། དེ་བ་ནི། སུ་ནི། ཙནྡྲ་ནི། ལོ་ཀ་དེ་བ། སརྦ་ཨི་མཾ་བ་ལ་ཏ་ཁ་ཁ་ཁཱ་ཧི་ཁཱ་ཧི། ཞེས་པས་ཕྱོགས་སྐྱོང་དང༌། ཞིང་སྐྱོང་རྣམས་ལ་ཕུལ་ནས། བསྟོད་པ་དང་ཕྲིན་ལས་བཅོལ་བ་ནི། བཅོམ་ལྡན་འདས་མ་རྡོ་རྗེ་ཕག་མོ་ནི། །འཇིག་རྟེན་གསུམ་སོགས་རྒོལ་བས་མི་ཚུགས་ཤིང༌། །འབྱུང་པོ་མ་ལུས་གྲི་གུག་ཆེན་པོས་འཇོམས། །རྡོ་རྗེ་གདན་བཞུགས་ཚངས་དབང་ཐོད་པ་འཛིན། །ཁྲོ་མའི་གཟུགས་བརྙན་ཤིན་ཏུ་དྲག་སྙེམས་མ། །རྨུགས་བྱེད་རེངས་བྱེད་རྨོངས་པས་རབ་རྒྱལ་ཞིང༌། །བདུད་ཀྱི་འཇིགས་པ་སྙེམས་ཤིང་ཞི་བར་མཛད། །རྣལ་འབྱོར་འདོད་པའི་དབང་ཕྱུག་ཁྱེད་ལ་འདུད། །བླ་མ་རྡོ་རྗེ་སློབ་དཔོན་དང༌། །དུས་གསུམ་བདེ་གཤེགས་ཡི་དམ་ལྷ། །མ་དང་མཁའ་འགྲོའི་ཚོགས་རྣམས་དང༌། །ཆོས་སྐྱོང་སྲུང་མའི་ཚོགས་བཅས་ལ། །མཆོད་སྦྱིན་གཏོར་མ་འདི་ཕུལ་བས། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་ཕྲིན་ལས་བཅོལ་ལོ། །དེ་ནས་ཚོགས་མཆོད་དང༌། སློབ་དཔོན་བདག་འཇུག་སློབ་མ་དཀྱིལ་འཁོར་དུ་འཇུག་ཅིང་དབང་བསྐུར་བ་རྣམས་ལྷ་དགུ་ལྟར་ལས། དབང་བཤད་སྐབས་ཕྱི་སྒྲུབ་ཞལ་གཉིས་མའི་ཞེས་པ་ནང་སྒྲུབ་དམར་ཆུང་མའི་ཞེས་དང༌། ཡི་དམ་བསྟོད་པའི་སྐབས་པདྨ་མི་རོ་ཉི་མའི་ཞེས་པ་པད་ཉི་དུས་མཚན་མའི་ཞེས་དང་རྩ་ཞལ་ཁྲོ་བོ། གཡས་ཞལ་ཕག་གདོང་ཞེས་པ་གཉིས་སུ། ཞལ་གཅིག་ཕྱག་གཉིས་མ་ཞེས་བསྒྱུར་བ་ཁྱད་པར་རོ། །མཇུག་ཆོག་ནི་གཏོང་རག་མཆོད་བསྟོད། འདོད་གསོལ། དཀྱིལ་འཁོར་གཤེགས་བསྡུ་རྣམས་ཀྱང་ལྷ་དགུ་ལྟར་བྱའོ། །བསྔོ་སྨོན་ནི། སྐྱེ་ཞིང་སྐྱེ་བ་དག་ནི་ཐམས་ཅད་དུ། །བློ་ལྡན་རིགས་བཟང་ང་རྒྱལ་མེད་པ་དང༌། །སྙིང་རྗེ་ཆེ་ཞིང་ བླ་མ་ལ་གུས་ལྡན། །རྡོ་རྗེ་ཕག་མོའི་འབྲས་བུ་མྱུར་ཐོབ་ཤོག །བཀྲ་ཤིས་ནི། རྡོ་རྗེ་ཌཱ་ཀིས་ལེགས་བྱིན་པའི། །ཐོགས་པ་མེད་པའི་བཀྲ་ཤིས་ཤོག །རིན་ཆེན་ཌཱ་ཀིས་ལེགས་བྱིན་པའི། །དབང་བསྐུར་མཆོག་གི་བཀྲ་ཤིས་ཤོག །པདྨ་ཌཱ་ཀིས་ལེགས༴ ཤེས་རབ་མཆོག་གི༴ ལས་ཀྱི་ཌཱ་ཀིས༴ ལས་རྣམས་གྲུབ་པའི༴ ཕྲིན་ལས་རྨད་དུ་བྱུང་བ་ཡི། །བདེ་ཆེན་དག་པའི་བཀྲ༴ བླ་མ་དམ་པས་ལེགས་བྱིན་པའི། །ཐུགས་རྗེ་གྲུབ་པའི༴ སྒྲུབ་ན་དངོས་གྲུབ་ལེགས་བྱིན་པའི། །རྣལ་འབྱོར་མ་ཡི༴ གང་ལ་སེམས་ཀྱི་དབང་ཐོབ་པའི། །འོད་གསལ་རྟོགས་པའི༴ སྐུ་གསུང་ཐུགས་ནི་དག་པ་ཡི། །ཕྱག་རྒྱ་ཆེན་པའི་བཀྲ་ཤིས་ཤོག །ཅེས་ཤིས་བརྗོད་ཀྱིས་མཐའ་བརྒྱན་ནོ། །དམར་ཆུང་མ་འདི་ནི་བརྒྱུད་པ་དང་པའི་ལུགས་གཙོ་ཆེ་ཡང༌། བརྒྱུད་པ་ཕྱི་མའི་ནང་ནའང་འདིའི་སྒྲུབ་ཐབས་བཞུགས་པ་ལྟར་དེ་ཉིད་དབང་བཙན་དུ་མཛད་ནས་བླ་མ་རྣམས་ཀྱིས་བཀའ་ཕྱི་མའི་ཆོས་སྡེའི་ཁོག་ཏུ་བསྡེབས་པར་མཛད་དོ། །ཤུ་བྷཾ།། ༈ །།ༀ་སྭ་སྟི། གསང་སྒྲུབ་ཁྲོས་མ་ནག་མོའི་དཀྱིལ་འཁོར་དུ་དབང་བསྐུར་བ་ལ། བཤམས་བཀོད་ནི། སྟེགས་བུ་ཆང་དང་བདུད་རྩིས་ཆག་ཆག་བཏབ་ལ། དཀྱིལ་འཁོར་ལྟེ་བ་ཟླུམ་པའི་ནང་དུ་ཆོས་འབྱུང་སྔོན་པོ་ཟུར་མདུན་བསྟན་གྱི་དབུས་སུ་བཾ་ཡིག་ནག་པོ། དེའི་ཕྱོགས་བཞིར་པདྨ་འདབ་བཞིར་ཕྱོགས་མདོག་ལ་ཧ་རི་ནི་ས་བྲི། མཐའ་རྡོ་ར་མེ་རིས་བསྐོར་བའོ། །དེའི་དབུས་སུ་མཉྫིའི་སྟེང་དུ་གཏོར་མ་ནག་པོ་རྩེ་ཟླུམ་སྟོད་ཟུར་གསུམ་པ་དར་ནག་གི་གདུགས་ཕུབ་པ་ཞིག་དང༌། ཕྱོགས་བཞིར་གཏོར་ཆུང་དཀར་ཟླུམ་བཞི། ཤར་དུ་ཁྲོས་མའི་ལྷ་ཙཀ །ལྷོར་བདུད་རྩིས་གང་བའི་ཐོད་པ། ནུབ་ཏུ་མེ་ལོང་ལ་སིནྡྷུ་ར་བཀྲམ་སྟེ་ཆོས་འབྱུང་རྐྱང་པ་རྡོ་ར་མེ་རི་དང་བཅས་པའི་དབུས་སུ་བཾ་ལ་ཧ་རི་ནི་སས་བསྐོར་བ་བྲིས་པ། བྱང་དུ་སྒྲུབ་ཐབས་ཀྱི་གླེགས་བམ་རྣམས་བཀོད། མཐའ་མཆོད་པས་བསྐོར། གཞན་ཡང་ཉེ་བར་མཁོ་བའི་ཡོ་བྱད་ཐམས་ཅད་ཚོགས་པར་བྱའོ། །དེ་ནས་སྒྲུབ་མཆོད་ནི། སྔོན་གཏོར་དཀར་དམར་གཉིས་བཤམས་པ་བསང་སྦྱངས། ༀ་ཨཱཿ ཧཱུྃ་ཧ་ཧོ་ཧྲཱིཿ ས་བྱིན་གྱིས་བརླབས། འབར་བའི་རྒྱ་དང་བཅས་ཕ་ཞེས་མགྲོན་དགུག །གཏོར་མ་དམར་པོ་དེ་ༀ་ཌཱ་ཀ་ཌཱ་ཀི་ཀྵེ་ཏྲ་པཱ་ལ་ད་ཤ་དིཀློ་ཀ་པཱ་ལ་ས་པ་རི་ཝཱ་ར་ཨི་དཾ་བ་ལ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་བསྔོས་ལ། མཁའ་འགྲོ་ཞིང་སྐྱོང་ཕྱོགས་སྐྱོང་སོགས་སྲུང་མའི་ཚོགས་ལ་འབུལ་ལོ། །བདག་ཅག་དཔོན་སློབ་འགལ་རྐྱེན་སོལ་མཐུན་རྐྱེན་སྒྲུབ་པའི་གྲོགས་མཛོད། ཅེས་ཕུལ། དཀར་གཏོར་དེ་ཨ་ཀཱ་རོས་ལན་གསུམ་གྱིས་གཞི་བདག་རྣམས་ལ་འབུལ་ལོ། །གནོད་པའི་བསམ་སྦྱོར་སྤངས་ལ་ཕན་བདེའི་བསམ་པས་བདག་གི་སྟོང་གྲོགས་མཛོད་ཅིག །ཅེས་ཕྱིར་དོར་ཞིང་ནག་ཕྱོགས་རྣམས་སུམྦྷའི་དྲག་སྔགས་ཀྱིས་བསྐྲད་དོ། །དེ་ནས་བླ་མ་དང་རྡོ་རྗེ་རྣལ་འབྱོར་མའི་ལྷ་ཚོགས་མདུན་གྱི་ནམ་མཁར་སད་པར་བསམས་ལ། འགྲོ་རྣམས་བསྒྲལ་འདོད་སོགས་དང༌། ཤེས་རབ་སྙིང་རྗེ་སོགས་ཀྱིས་སྐྱབས་སེམས་སྔོན་དུ་འགྲོ་བས། ཡན་ལག་བདུན་པ་ནི། བླ་མ་རྡོ་རྗེ་རྣལ་འབྱོར་མ། །འཁོར་དང་བཅས་ལ་ཕྱག་འཚལ་ལོ། །མཆོད་པ་བླ་ན་མེད་པས་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རངས། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། ། བདག་གིས་དགེ་བ་ཅི་བསགས་པ། །སེམས་ཅན་ཀུན་ལ་བསྔོ་བར་བགྱི། །ཚོགས་ཞིང་རྣམས་རང་ལ་ཐིམ་པར་གྱུར། ནང་མཆོད་ལ། སྲིན་ལག་གིས་ཆོས་འབྱུང་འབྲི་ཚུལ་བྱ་ཞིང༌། དམ་རྫས་འབར་བའི་སྣོད་དུ་ཆོས་འབྱུང་གི་དབུས་སུ་པདྨ་འདབ་བཞི་ལ་ཧ་རི་ནི་ས་གསལ་བར་གྱུར། དེ་ལས་འོད་ཟེར་འཕྲོས་སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས། དམ་ཚིག་གི་བདུད་རྩི་ལ་ཐིམ་པས་ཞུ་ཞིང་འདྲེས་པ་ལས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ་ཞེས་བྱིན་གྱིས་བརླབས། དེ་ལས་གཡོན་པའི་མཐེབ་སྲིན་གྱིས་ནང་མཆོད་བླངས་ཏེ་ༀ་ཨཱཿ ཧཱུྃ་ཞེས་རང་ལུས་ལ་གཏོར་ཞིང་ཁྲུས་བྱས་པས་བདག་དང་རྣལ་འབྱོར་བསྲུང༌། ཕྱོགས་གཡོན་དང་མཚམས་གཡས་བསྐོར་གྱིས་བདུད་རྩི་འཐོར་ཞིང་སུམྦྷ་ལན་གཉིས་བརྗོད་པས། བདུད་རྩིའི་ཟེགས་མ་ཌཱ་ཀིས་སྤྲིན་དུ་གྱུར་པས་བགེགས་ཐམས་ཅད་བསྐྲད། གཞོམ་མེད་བསྲུང་བའི་འཁོར་ལོས་ཕྱོགས་ཐམས་ཅད་བཅིངས་པར་བསམས་པ་ནི་གནས་བསྲུང་བའོ། །དེ་ནས་མཆོད་རྫས་རྣམས་བསང༌། སྟོང་པའི་ངང་ལས་ཨཱཿ ལས་ཀ་པཱ་ལ་ཡངས་ཤིང་རྒྱ་ཆེ་བ་རྣམས་སུ་ཧཱུྃ་ཡིག་ཞུ་བ་ལས་མཆོད་རྫས་རྣམས་བཟང་ཞིང་རྒྱ་ཆེ་བ། དྭངས་ཤིང་ཐོགས་པ་མེད་པ། ནམ་མཁའི་ཁམས་གང་བར་གྱུར། ༀ་བཛྲ་ཨརྒྷཾ་ཨཱཿ ཧཱུྃ་ནས་ཤབྡའི་བར་བརྗོད་པས་བྱིན་གྱིས་བརླབས། དེ་ནས་དངོས་གཞི་ནི། ཤཱུནྱ་ཏཱའི་སྔགས་ཀྱིས་བདག་དང་མདུན་གྱི་དཀྱིལ་འཁོར་གྱིས་མཚོན་པའི་ཆོས་ཐམས་ཅད་སྟོང་པར་སྦྱངས། སྟོང་པའི་ངང་ལས་རང་ལུས་སྲུང་འཁོར་དུར་ཁྲོད་བརྒྱད་ གཞལ་ཡས་ཁང་གི་ནང་དུ་པདྨ་འདབ་བཞི་ཆོས་འབྱུང་གི་ལྟེ་བར་པད་ཉི་རའི་གདན་དང་བཅས་པར་གྱུར། རང་སེམས་ལྷའི་འཁོར་ལོ་རྫོགས་པ་ནི། གདན་གྱི་སྟེང་བཾ་ཡིག་ཡོངས་སུ་གྱུར་པ་ལས། བཅོམ་ལྡན་འདས་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་ནག་མོ་རྩ་ཞལ་ཀུན་རྫོབ་རྣམ་པར་དག་པ་ཁྲོ་མའི་ཞལ་དང༌། སྟེང་ཞལ་དོན་དམ་རྣམ་པར་དག་པ་ཕག་གདོང་གཡས་ཕྱོགས་ནས་གྱེན་དུ་ཕྱོགས་པ་ལས་ཕག་སྐད་སྔགས་ཀྱི་སྒྲར་སྒྲོགས་པ། སྤྱན་གསུམ་པ། དབུ་སྐྲ་དམར་སེར་གྱེན་དུ་འབར་བ། ཕྱག་གཡས་གྲི་གུག་འཕྱར་ཞིང་གཡོན་ཐོད་ཁྲག་ཐུགས་ཀར་འཛིན་པ། རུས་པའི་ཆ་བྱད་ལྔས་བརྒྱན་ཅིང་སྨྱོན་པའི་ཆ་བྱད་ཅན། ཞབས་གཡས་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་མི་རའི་སྙིང་ག་ནས་བརྫིས་པ། མེ་དཔུང་འབར་བའི་དབུས་ན་བཞུགས་པའོ། །དེའི་སྤྱི་བོར་རྩ་བའི་བླ་མ་ལ་བརྒྱུད་པའི་བླ་མས་བསྐོར་བ། སྙིང་གར་ཡི་དམ་རྡོ་རྗེ་རྣལ་འབྱོར་མ་དམར་མོ་གྲི་ཐོད་ཁ་ཊྭཱཾ་ག་བསྣམས་པ་ལ་ཡི་དམ་ཐམས་ཅད་ཀྱིས་བསྐོར་བ། ཕོ་བར་འཁོར་ལོ་རྩིབས་བཞི་པའི་ལྟེ་བར་ཕྱག་རྡོར་སྔོན་པོ་རྡོར་དྲིལ་འཛིན་པ་གཡོན་བརྐྱང་བའི་དོར་སྟབས་ཅན། རྩིབས་བཞིའི་ཤར་དུ་ར་ལས་ཡུལ་འཁོར་སྲུང་དཀར་པོ་གཡས་པི་ཝཾ། ལྷོར་ཙ་ལས་འཕགས་སྐྱེས་པོ་སྔོན་པོ་གཡས་རལ་གྲི། ནུབ་ཏུ་ཏྲི་ལས་མིག་མི་བཟང་དམར་པོ་གཡས་བུ་ཆུང་གི་རོ། བྱང་དུ་ཡཾ་ལས་རྣམ་སྲས་ལྗང་གུ་ གཡས་མཆོད་རྟེན། བཞི་ཀ་གཡོན་རིན་པོ་ཆེའི་བུམ་པ་འཛིན་པས་སྒྲུབ་པ་པོ་ལ་དགོས་འདོད་སྟེར་བའོ། །ལྟེ་བར་པདྨ་འདབ་བཞིའི་དབུས་སུ་རང་འདྲ་བའི་རྗེ་བཙུན་ཁྲོས་མ་ནག་མོ། འདབ་བཞིའི་ཤར་དུ་ཧ་ལས་རྡོ་རྗེ་མཁའ་འགྲོ་སྔོན་མོ་གཡས་རྡོ་རྗེས་ཡུ་བ་བྱས་པའི་གྲི་གུག །ལྷོར་རི་ལས་རིན་ཆེན་མཁའ་འགྲོ་སེར་མོ་གཡས་རིན་པོ་ཆེའི་གྲི་གུག །ནུབ་ཏུ་ནི་ལས་པདྨ་མཁའ་འགྲོ་དམར་མོ་གཡས་པདྨའི་གྲི་གུག །བྱང་དུ་ས་ལས་ལས་ཀྱི་མཁའ་འགྲོ་ལྗང་གུ་གཡས་རྒྱ་གྲམ་གྱི་གྲི་གུག །གཡོན་ཐམས་ཅད་ཐོད་ཁྲག་འཛིན་པའོ། །དེ་ལྟར་གཉུག་མའི་སེམས་ཉིད་ལྷའི་འཁོར་ལོར་རྫོགས་པ། དེ་ཉིད་སངས་རྒྱས་ཐམས་ཅད་ཀྱི་ཡེ་ཤེས་གདོད་མ་ཉིད་ནས་རང་བཞིན་དབྱེར་མེད་པའི་བདག་ཉིད་ཆེན་པོར་རྣམ་པར་དག་པར་གྱུར། དེ་ལྟར་གསལ་བའི་ངང་ནས་ལུས་གནད་བཅའ་ཞིང་སྐབས་སྐབས་སུ་ལྟོ་བ་ཕུལ་བ་དང་གཡོན་དུ་བསྐོར། རླུང་སྟེང་འོག་ཁ་སྦྱར་ལ་ཡིད་བཟླས་བྱ། སེམས་བདེ་སྟོང་གི་ཉམས་ལ་ཆེ་རེ་བལྟ། ཡིད་ཆོས་ཉིད་ཀྱི་ངང་ལ་མ་ཡེངས་པར་འཇོག་ཅིང་དྲན་པ་བཞིས་བསྐུལ་གདབ་ལ་བཟླས་པ་བྱ་སྟེ། སྤྱི་བོའི་བླ་མ་དྲན་པས། ཧ་རི་ནི་ས་ཨེ་རཾ་ཞེས་བཟླ། སྙིང་གའི་ཡི་དམ་དྲན་པས། ཧ་རི་ནི་ས་ཡན་ཏེ༑ ཞེས་བཟླ། ལྟེ་བའི་མཁའ་འགྲོ་དྲན་པས། ཧ་རི་ནི་ས་ཨེ་འདུ། ཞེས་བཟླ། ཕོ་བའི་ཆོས་སྐྱོང་དྲན་ལ། ཧ་རི་ནི་ས་ཧཱུྃ་ཕཊ། ཅེས་བཟླའོ། །འདིར་བདག་མདུན་དབྱེར་མེད་དུ་སྒྲུབ་ཅིང་བཟླ་བའི་ལུགས་ཡིན་པས་མདུན་བསྐྱེད་ ལོག་སྒྲུབ་མི་དགོས་སོ། །དེ་ལྟར་ཅི་ནུས་བཟླས་མཐར་མཆོད་བསྟོད་ནི། ༀ་བཛྲ་ཝཱ་ར་ཧི་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། ནས། ཤབྡའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ་ནས། པདྨ་ཉི་མ་རྟོག་མེད་གདན་ལ་གར་མཛད་ཅིང༌། །མཐིང་ནག་ཞལ་གཅིག་ཕྱག་གཉིས་རུས་པའི་རྒྱན་གྱིས་སྤྲས། །ཁྲོས་པའི་ཕག་སྐད་འགྲོས་ཀྱིས་འགྲོ་རྣམས་དབང་དུ་སྡུད། །རྡོ་རྗེ་ཕག་མོ་བདེ་བའི་སྟོབས་ལྡན་ཁྱོད་ལ་བསྟོད། །རྩ་བརྒྱུད་བླ་མ་ཡི་དམ་ལྷ་ཚོགས་དང༌། །ཕྱག་ན་རྡོ་རྗེ་ཕྱོགས་སྐྱོང་རྒྱལ་ཆེན་བཞི། །རྡོ་རྗེ་ཕག་མོ་ལས་བཞི་སྒྲུབ་བྱེད་པའི། །མཁའ་འགྲོ་རྣམས་ལ་སྒོ་གསུམ་གུས་པས་བསྟོད། །ཅེས་བསྟོད། དེ་ནས་གཏོར་མ་བསང་སྦྱངས། སྟོང་པའི་ངང་ལས་ཡཾ་ལས་རླུང༌༑ རཾ་ལས་མེའི་སྟེང་དུ་ཨ་ལས་ཀ་པཱ་ལ་ཤ་ལྔ་བདུད་རྩི་ལྔས་གང་བ། སྟེང་དུ་ཟླ་ཕྱེད་རྡོ་རྗེས་བརྒྱན་པ། རླུང་གཡོས་མེ་སྦར་རྫས་རྣམས་ཞུ། ཡེ་ཤེས་ཀྱི་བདུད་རྩི་བཀུག་སྟེ་ཐིམ་པར་གྱུར། ༀ་ཨཱཿ ཧཱུྃ་ཞེས་བཟླས་པས་བྱིན་གྱིས་བརླབ། དེ་ནས་འབར་བའི་རྒྱ་དང་བཅས་ཕ་ཞེས་བརྗོད་པས་གཏོར་མགྲོན་རྣམས་སྤྱན་དྲངས་ལ། ༀ་གུ་རུ་བཛྲ་ཡོ་གཱི་ནི་བཛྲ་པཱ་ཎི་ཤྲཱི་བཛྲ་ཝཱ་ར་ཧཱི་མ་ཧཱ་ཡོ་གི་ནཱི་ཧ་རི་ནི་ས་ར་ཙ་ཏྲི་ཡཾ་ཨི་དཾ་བ་ལ་ཏ་སོགས་སྦྱར་བས་ཕྱོགས་གཏོར་བཞི་པོ་མཁའ་འགྲོ་སྡེ་བཞི་དང་རྒྱལ་པོ་སྡེ་བཞི་ལ་ཕུལ། ཐུན་མོང་དུ། ཨརྒྷཾ་ནས། ཤབྡའི་བར་གྱིས་ཕྱི་མཆོད། འབྲུ་གསུམ་གྱིས་ནང་མཆོད་འབུལ། བཅོམ་ལྡན་རྡོ་རྗེ་ཕག་མོ་ཆེན་མོ་ནི། །འཇིག་རྟེན་གསུམ་དང་ཕྱོགས་གཞན་རྒོལ་བ་འཇོམས། །རྨོངས་བྱེད་སྐྲག་བྱེད་ རེངས་པར་བྱེད་པ་མོ། །རྡོ་རྗེ་རྣལ་འབྱོར་མ་ལ་ཕྱག་འཚལ་བསྟོད། །བླ་མ་བདེ་གཤེགས་ཡི་དམ་ལྷ། །མ་དང་མཁའ་འགྲོ་ཆོས་སྐྱོང་ལ། །ཕྱག་འཚལ་བསྟོད་ཅིང་གུས་པས་མཆོད། །རྨད་དུ་བྱུང་བའི་གཏོར་མ་འབུལ། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་འདོད་དོན་གསོལ་བ་བཏབ། ཚོགས་མཆོད་ནི་ཕྱི་སྒྲུབ་ཞལ་གཉིས་མ་ལྟར་བྱའོ། །དེ་ནས་དབང་བསྐུར་བ་ལ་གཉིས་ལས་དང་པོ་སློབ་དཔོན་བདག་འཇུག་ནི། འོག་ནས་འབྱུང་བའི་སློབ་མ་ལ་ཇི་ལྟར་བྱ་བ་ལྟར་བདག་འཇུག་དབང་བསྐུར་ཏིང་ངེ་འཛིན་གྱི་ཚུལ་དུ་བླངས། གཉིས་པ་སློབ་མ་གཞུག་ཅིང་དབང་བསྐུར་བ་ནི། སློབ་བུ་རྣམས་ཁྲུས་དང་ཕྱག་བྱས་གྲལ་དུ་འཁོད་པ་ལ། སེམས་བསྐྱེད་གསལ་འདེབས་དང་ཆོས་བཤད་ཅི་རིགས་སྔོན་དུ་འགྲོ་བས། འདིར་བླ་ན་མེད་པ་རྣལ་འབྱོར་གསང་མཐའི་རྒྱུད་དང་རྗེས་སུ་འབྲེལ་བ། དེ་ལའང་རྒྱུད་ལུང་མན་ངག་གསུམ་ལས། མན་ངག་གི་རྗེས་སུ་འབྲང་བ་ཌཱ་ཀི་མ་སྙིང་གི་དུམ་བུ་དྲུག་ཅུ་རྩ་བཞི་ཞེས་བཀའ་སྲུང་མཁའ་འགྲོ་སྡེ་བཞིས་རྗེ་བཙུན་དམ་པ་སངས་རྒྱས་ལ་གསུངས་པའི་ཁྲོས་མ་ནག་མའི་དཀྱིལ་འཁོར་དུ་དབང་བསྐུར་བ་ལ་སློབ་དཔོན་གྱི་བྱ་བ་རྣམས་གྲུབ་ནས། ད་ཁྱེད་རང་གི་ངོ་སྐལ་དུ་གྱུར་པ་ལ་ཐོག་མར་མཎྜལ་ཕུལ་མཛོད། ཨ་ཁཾ་ཝཱི་ར་ཧཱུྃ་ཞེས་ལན་གཉིས་ཀྱིས་མིག་དར་དང་མེ་ཏོག་གཏད། དེ་ནས་བླ་མ་དང་རྡོ་རྗེ་རྣལ་འབྱོར་མ་གཉིས་སུ་མེད་པ་ལ་གསོལ་བ་གདབ་པ་འདིའི་རྗེས༴ དགའ་ཆེན་ཁྱོད་བདག་སྟོན་པ་སྟེ། ། རྣལ་འབྱོར་མ་དཔལ་དགོངས་སུ་གསོལ། །བྱང་ཆུབ་སེམས་ལས་རྨད་བྱུང་བའི། །སྡོམ་པ་རྒྱ་མཚོ་བདག་ལ་སྩོལ། །ཞེས་ལན་གསུམ། དེ་ནས་བླ་མ་དང་རྡོ་རྗེ་རྣལ་འབྱོར་མའི་དཀྱིལ་འཁོར་གྱི་ལྷ་ཚོགས་མདུན་གྱི་ནམ་མཁར་སད་པར་མོས་ལ་འདིའི༴ བླ་མ་རྡོ་རྗེ་རྣལ་འབྱོར་མ། །འཁོར་དང་བཅས་ལ་ཕྱག་འཚལ་བསྟོད། །མཆོད་པ་བླ་ན་མེད་པས་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང༌། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །བདག་གིས་དགེ་བ་ཅི་བསགས་པ། །སེམས་ཅན་ཀུན་ལ་བསྔོ་བར་བགྱི། །ལན་གསུམ། དེ་ནས་སྤྱི་དང་ཁྱད་པར་གྱི་སྡོམ་པ་མཐའ་དག་ཟུང་སྙམ་པས་འདིའི༴ སྲས་བཅས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་མ་ཚོགས་ཀུན། །ཐམས་ཅད་བདག་ལ་དགོངས་སུ་གསོལ། །བདག་གིས་དེང་ནས་བྱང་ཆུབ་བར། །སངས་རྒྱས་ཆོས་དང་དགེ་འདུན་ལ། །ཐར་པ་འདོད་ཕྱིར་སྐྱབས་སུ་མཆི། །སེམས་ཅན་ཀུན་དོན་བསྒྲུབ་པའི་ཕྱིར། །བྱང་ཆུབ་སེམས་གསུམ་བསྐྱེད་པར་བགྱི། །བདེ་གཤེགས་རིགས་ལྔའི་སྡོམ་པ་བཟུང༌། །བཅུ་བཞིར་ཕྱེ་བའི་ལྟུང་བ་དང༌། །ཡན་ལག་ཉེས་པ་སྤང་བར་བགྱི། །ལན་གསུམ། ཛཿ ཧཱུྃ་བཾ་ཧོཿ ཞེས་པས་དཀྱིལ་འཁོར་དུ་བཅུག་པར་མོས་ལ་ཡོལ་བ་བསལ། དམ་བཞག་ནི། བདུད་རྩི་བླུད་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་ བདུད་རྩིའི་ཆུ་འདིས་འགྲུབ། །ཨ་མྲྀ་ཏ་ཨུ་ད་ཡ་ཀ་ཋ་ཋ་ཧཱུྃ། དེ་ནས་ཁྱེད་རང་མཉམ་པའི་སྟབས་ཀྱིས་ལངས་ལ་ཐལ་མོ་སྤྱི་བོར་སྦྱོར། ངག་རླུང་ཁ་སྦྱོར་དུ་འཆིངས། སེམས་ཀྱི་གནད་ལུགས་རྡོ་རྗེ་རྣལ་འབྱོར་མ་ནག་མོ། རྩ་ཞལ་ཁྲོ་མོ། གཡས་ཞལ་ཕག་གདོང་གྲི་གུག་དང་ཐོད་ཁྲག་བསྣམས་པ། ཞབས་གར་སྟབས་ལིང་ལིང་བསྒྱུར་བ་ཞིག་ཏུ་ལམ་གྱིས་བསྐྱེད་ལ་བླ་མ་ལ་མོས་གུས་དྲག་པོ་བྱས་པས། བླ་མའི་ཐུགས་ཀ་ནས་འོད་ཟེར་འཕྲོས་ཨོ་རྒྱན་མཁའ་འགྲོའི་གནས་ནས་ཡེ་ཤེས་ཀྱི་མཁའ་འགྲོ་མ་དཔག་ཏུ་མེད་པ་སྤྱན་དྲངས་ནས་ཁྱེད་རང་ལ་ཐིམ་པར་མོས་ལ་སེམས་འཛིན་མེད་ཀྱི་ངང་དུ་ཁྲེས་སེ་བསྐྱུར་ལ་ཞོག་ཅིག །སྤོས་རོལ་དང་བཅས་པས་ཧ་རི་ནི་ས་ཨཱ་བེ་ཤ་ཡ་ཨ་ཞེས་དྲག་ཏུ་དབབ། དེ་ནས་རྣལ་འབྱོར་མའི་སྐུ་ལ་མེ་ཏོག་ཕུལ་བར་མོས་ལ་འདིའི་རྗེས༴ ༀ་པྲ་ཏཱིཙྪ་བཛྲ་ཧོཿ ཞེས་མེ་ཏོག་དོར། དེ་ཉིད་སྤྱི་བོར་བཅིངས་པར་མོས་ལ། ༀ་པྲ་ཏི་གྲྀཧྞ་སྟྭཾ་ཨི་མཾ་སརྦ་མ་ཧཱ་བ་ལ། དེ་ནས་ཛྙཱ་ན་ཙཀྵུ་མཎྜལ་ཛྙཱ་ན་པྲ་བེ་ཤ་ཡ་ཕཊ། ཅེས་མིག་དར་བསལ། ཧེ་བཛྲ་པ་ཤྱ། རྟེན་དང་བརྟེན་པར་བཅས་པའི་དལ་ཐམས་ཅད་མངོན་སུམ་བཞིན་དུ་མཐོང་བར་གྱུར་སྙམ་པའི་མོས་པ་མཛོད། དེ་ནས་དབང་བསྐུར་བ་དངོས་ལ་བཞི་ལས། དང་པོ་བུམ་དབང་ཞུ་བའི་སླད་དུ་གསོལ་བ་གདབ་པ་འདིའི་རྗེས༴ བླ་མ་རིན་པོ་ཆེ། བདག་ལ་རྡོ་རྗེ་རྣལ་འབྱོར་མའི་གསང་སྒྲུབ་ཀྱི་བུམ་པའི་དབང་སྩལ་དུ་གསོལ། ལན་གསུམ། སློབ་དཔོན་གྱིས་ ཤར་གྱི་ཙཀ་ལིའི་སྐུ་མིག་ཏུ་བསྟན་ཅིང་ལག་ཏུ་གཏད་ལ། ཁྱེད་རྣམས་ལུས་ཐ་མལ་དུ་འཛིན་པའི་རྟོག་པ་བོར་ལ། དེང་ཕྱིན་ཆད་མཁའ་འགྲོ་མ་འདི་ཡི་དམ་དུ་བཟུང་ལ། འདི་ལྟར་སྒོམ་པ་ལ་སྣང་སྟོང་ཞེན་བྲལ་དུ་བསྐྱང་བར་གྱིས་ཤིག ། དེས་བུམ་དབང་ཐོབ་པས་ལྷ་སྐུ་བསྒོམ་པ་ལ་དབང་བར་བྱས་པ་ཡིན་ནོ། །དེ་ནས་གསང་དབང་ཞུ་བའི་སླད་དུ་འདིའི་རྗེས༴ བླ་མ་རིན་པོ་ཆེ། བདག་ལ་རྡོ་རྗེ་རྣལ་འབྱོར་མའི་གསང་སྒྲུབ་གསང་བའི་དབང་སྩལ་དུ་གསོལ། ལན་གསུམ། ལྷོའི་བདུད་རྩི་ཐོགས་ཏེ་ཁྱེད་ཀྱི་ངག་ཐ་མལ་དུ་འཛིན་པའི་དྲི་མ་སྦྱང་བའི་ཕྱིར། བཅོམ་ལྡན་བདེ་མཆོག་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་དཀར་དམར་འདི་ལ་བྱིན་གྱིས་བརླབས་པས། དེང་ཕྱིན་ཆད་ངག་རྗེ་བཙུན་མའི་སྔགས་སུ་ཤེས་པར་གྱིས་ལ་གྲག་སྟོང་ཞེན་མེད་དུ་སྐྱོང་བར་མཛོད་ཅིག་བྱས་ལ། ༀ་ཨཱཿ ཧཱུྃ་ཞེས་བདུད་རྩི་ཧུབ་གསུམ་འཐུང་དུ་གཞུག །དེས་གསང་དབང་ཐོབ་པས་རླུང་སྔགས་བཟླས་སྒོམ་ལ་དབང་བར་བྱས་པ་ཡིན་ནོ། །དེ་ནས་ཤེས་རབ་ཡེ་ཤེས་ཀྱི་དབང་ཞུ་བའི་སླད་དུ་འདིའི་རྗེས༴ བླ་མ་རིན་པོ་ཆེ། བདག་ལ་རྡོ་རྗེ་རྣལ་འབྱོར་མའི་གསང་སྒྲུབ་ཀྱི་ཤེས་རབ་ཡེ་ཤེས་ཀྱི་དབང་སྩལ་དུ་གསོལ། ལན་གསུམ། ནུབ་ཀྱི་སིནྡྷུ་རའི་དལ་སྟོན་ཅིང༌། ཁྱེད་ཀྱི་ཡིད་ཀྱི་དྲི་མ་དག་པར་བྱེད་པ་ལ། སིནྡྷུ་རའི་དཀྱིལ་འཁོར་གྱི་ཡི་གེ་འདི་རྣམས་རྣལ་འབྱོར་མ་དངོས་ཡིན། དེ་ཐིམ་པས་འདི་རྣམས་ཀྱིས་བྱིན་གྱིས་བརླབས་པ་ལས་བདེ་སྟོང་གི་ཉམས་ཁྱད་པར་ཅན་དང་མ་བྲལ་བར་མཛོད། སྔགས་འདི་རྣལ་འབྱོར་མ་ཡི་གཟུགས། །རྣལ་འབྱོར་མ་ཡང་སྔགས་ཀྱི་གཟུགས། །དངོས་གྲུབ་གོ་འཕང་མཆོག་འདོད་ན། །དེ་འདྲ་ཐ་དད་མི་བལྟའོ། །ཞེས་བརྗོད་ཅིང༌། སིནྡྷུ་ར་གཡོན་པའི་སྲིན་ལག་གིས་བླངས་ལ་སློབ་མའི་གནས་བཞིར་ཐིག་ལེ་བྱའོ། །དེས་ཤེར་དབང་ཐོབ་པས་ཞུ་བདེ་སྒོམ་པ་ལ་དབང་བྱས་པ་ཡིན་ནོ། །དེ་ནས་དབང་བཞི་པ་ཞུ་བའི་སླད་དུ་འདིའི་རྗེས༴ བླ་མ་རིན་པོ་ཆེ། བདག་ལ་རྡོ་རྗེ་རྣལ་འབྱོར་མའི་གསང་སྒྲུབ་ཀྱི་དབང་བཞི་པ་ཚིག་དབང་སྩལ་དུ་གསོལ། ལན་གསུམ། བྱང་གི་སྒྲུབ་ཐབས་ཀྱི་དཔེ་མགོ་ཐོག་ཏུ་བཞག་ནས་མཆོག་དང་ཐུན་མོང་གི་དངོས་གྲུབ་ཐམས་ཅད་དཔེ་འདི་ནས་བཤད་པ་བཞིན་ཉམས་སུ་བླངས་ནས་འབྱུང་བས་ཚུལ་བཞིན་དུ་ཉམས་སུ་ལོངས་ལ། སེམས་ཉིད་རྩ་བྲལ་གྱི་དོན་རྟོགས་པར་མཛོད་ཅིག །དེ་ནས་དཔོན་སློབ་གཉིས་ཀ་ཁྲོས་མ་ནག་མོ་ཞལ་གཉིས་མ་གྲི་ཐོད་བསྣམས་པ་གཡས་བརྐྱང་གི་གར་སྟབས་ཀྱིས་བཞུགས་པའི་སྤྱི་བོར་རྩ་བརྒྱུད་ཀྱི་བླ་མ་སྙིང་གར་རྣལ་འབྱོར་མ་དམར་མོ་ལ་ཡི་དམ་གྱིས་བསྐོར་བ། ལྟེ་བར་པདྨ་འདབ་བཞིར་ཁྲོས་ནག་རང་འདྲ་བ་ལ་མཁའ་འགྲོ་སྡེ་བཞིས་བསྐོར་བ། ཕོ་བར་འཁོར་ལའི་རྩིབས་བཞི་པར༑ ཕྱག་རྡོར་ལ་རྒྱལ་ཆེན་སྡེ་བཞིས་བསྐོར་བ་རྣམས་གསལ་ཐོབ། དེ་ནས་དྲན་པ་བཞི་དང་ལྡན་པ་སྔགས་ཀྱི་རྗེས་ཟློས་བྱས་པའི་ཚེ་བླ་མའི་གནས་སོ་སོ་ལས་འོད་ཟེར་བྱུང་བ་སློབ་མའི་གནས་དེ་དང་དེར་ཐིམ་པས་ བྱིན་གྱིས་བརླབས་པར་མོས་ལ། དང་པོ་སྤྱི་བོའི་བླ་མ་དྲན་པས་འདིའི་རྗེས༴ ཧ་རི་ནི་ས་ཨེ་རཾ། སྙིང་གའི་ཡི་དམ་དྲན་པས་འདིའི་རྗེས༴ ཧ་རི་ནི་ས་ཡན་ཏེ། ལྟེ་བའི་མཁའ་འགྲོ་དྲན་པས་འདིའི་རྗེས༴ ཧ་རི་ནི་ས་ཨེ་འདུ། ཕོ་བའི་ཆོས་སྐྱོང་དྲན་པས་རྗེས༴ ཧ་རི་ནི་ས་ཧཱུྃ་ཕཊ། ཅེས་སྔགས་རྣམས་ལན་གསུམ་རེ་བཟླའོ། །ཁྱེད་རྣམས་ཀྱི་རྒྱུད་ལ་རྗེ་བཙུན་རྡོ་རྗེ་རྣལ་འབྱོར་མའི་བྱིན་རླབས་དང་ནུས་མཐུ་ཐམས་ཅད་འཇུག་པར་གྱུར་ཅིག །ཅེས་མེ་ཏོག་འཐོར། དེས་དབང་བཞི་པ་ཐོབ་དེ་ཁོ་ན་ཉིད་བསྒོམ་པ་ལ་དབང་བར་བྱས་པ་ཡིན་ནོ། །དེ་ནས་སློབ་མའི་རྗེས་ཀྱི་བྱ་བ་དམ་ཚིག་ཁས་བླངས་གཏོང་རག་གི་མཎྜལ་དང་ལུས་འབུལ། དགེ་བ་བསྔོ་བ་རྣམས་དང༌། དཀྱིལ་འཁོར་གྱི་རྗེས་ཆོག་གཏོང་རག་གི་མཆོད་བསྟོད་བསྔོ་སྨོན་བཀྲ་ཤིས་ཀྱི་བར་ཕྱི་སྒྲུབ་ལྟར་བྱའོ། །དར་རྒྱས་འཕེལ། །ཤུ་བྷཾ།། ༈ །།ༀ་སྭ་སྟི། རྡོ་རྗེ་གཏུམ་མོ་མཁའ་འགྲོ་མ་བདུད་རྩི་བུམ་པའི་དབང་བསྐུར་བར་འདོད་པས། བཤམས་བཀོད་ནི། སྟེགས་བུ་ལ་ཁྲག་དང་བདུད་རྩིས་ཆག་ཆག་གདབ། དཀྱིལ་འཁོར་ལྟེ་བ་ཟླུམ་པོ་ཇི་ལྟར་རིགས་པ་བསྐོར་བའི་ནང་དུ་ཆོས་འབྱུང་དམར་པོ་ཉིས་བརྩེགས་ཀྱི་དབུས་སུ་ཧྲཱིཿ ཡིག་དམར་པོ། དེའི་ཕྱིར་རིམ་པར་མུ་ཁྱུད་ཐོད་སྐམ་གྱི་ཕྲེང་བ། པདྨ་འདབ་བརྒྱད་ཀྱི་ཕྱོགས་ཀྱི་འདབ་བཞི་དཀར་སེར་དམར་ལྗང་ལ་ཧ་རི་ནི་ས། མཚམས་ཀྱི་བཞིའི་ནང་དུ་ཐོད་སྐམ་གྱི་མུ་ཁྱུད་ཟླུམ་པོ་རེ་བསྐོར་བའི་ཆོས་འབྱུང་ཟུར་ནང་བསྟན་མེ་ནས་རིམ་པར་སྔོ་སེར་དམར་ལྗང་ལ་ཧྲཱིཿ ཡིག་རེ་རེ་བྲིས་པ། དེ་རྣམས་ཀྱི་མཐའ་ཐོད་སྐམ་གྱི་ར་བ། རྡོ་ར་མེ་རི་རྣམས་ཀྱིས་བསྐོར་བ་བྲིའོ། །དཀྱིལ་འཁོར་གྱི་དབུས་སུ་མཉྫིའི་སྟེང་དུ་བུམ་པ་བཅུད་ལྡན་ཆས་སུ་བཅུག་པའི་ཁར་བདུད་རྩི་དང་ སྦྱར་བའི་ཐོད་པ་དར་དམར་གྱིས་ཁ་བཅད་པ། དེའི་སྟེང་དུ་མེ་ལོང་ལ་སིནྡྷུ་རའི་ཆོས་འབྱུང་བསྣོལ་མའི་དབུས་སུ་གཙོ་མའི་སྙིང་པོ་དང་ཟུར་དྲུག་ལ་གཡུང་དྲུང་གཡས་བསྐོར་རེ། མཐའ་ཐོད་ཕྲེང་དང་འོད་ཕྲེང་གིས་བསྐོར་བ་བཀོད། བུམ་པའི་མདུན་དུ་མཉྫིའི་སྟེང་གཏོར་མ་རྩ་ཟླུམ་སྟོད་ཟུར་གསུམ་པ་དམར་པོ་དར་དམར་གྱི་གདུགས་དང་གཙོ་མོའི་ཙཀླི་བཙུགས་པ། འདབ་མ་བརྒྱད་ཀྱི་སྟེང་དུ་འཁོར་བརྒྱད་གཏོར་མ་གཙོ་བོ་དང་འདྲ་བ་ལ་སོ་སའི་ལྷ་ཙཀ་བཙུགས་པ་རེ་བཀོད། རྒྱུད་ཀྱི་པུསྟི་ཡང་ཅི་བདེར་བཞག །སྟེང་ན་དར་དམར་གྱི་གུར་ཕུབ། མཐའ་མཆོད་པ་དང་ཚོགས་ཀྱི་ཡོ་བྱད་ཀྱིས་བསྐོར། ནང་མཆོད་ཌཱ་དྲིལ་མེ་ཏོག་སོགས་ཐམས་ཅད་ཚང་བར་འདུ་བྱའོ། །དེ་ནས་སྒྲུབ་མཆོད་ནི། སྔོན་གཏོར་བསང་སྦྱངས། ༀ་ཨཱཿ ཧཱུྃ་ཧ་ཧོ་ཧྲཱིཿ ས་བརླབ། ཕ་གྱིས་མགྲོན་དགུག །ཨ་ཀཱ་རོ་བདུན་ནམ་གསུམ་གྱིས་བསྔོས་ལ། གང་དག་འདིར་གནས་སོགས་ཀྱིས་དཀར་ཕྱོགས་པ་དང༌། གསང་སྤྱོད་ལྟ་བར་མི་དབང་བའི། །འབྱུང་པའི་ཚོགས་རྣམས་གང་ཡིན་པ། །གཏོར་མའི་ལྷག་མ་འདི་ལོངས་ལ། །ད་ལྟ་ཉིད་དུ་གཞན་དུ་དེངས། །དྲག་སྔགས་དང་བཅས་པས་ནག་ཕྱོགས་བསྐྲད་ལ་གཏོར་མ་ཕྱིར་དོར། སྐྱབས་ཡུལ་གསལ་བཏབ་ནས། འགྲོ་རྣམས་བསྒྲལ་འདོད་སོགས་ཀྱིས་སྐྱབས་འགྲོ། ཤེས་རབ་སྙིང་རྗེ་སོགས་ཀྱིས་སེམས་བསྐྱེད། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །མཆོད་པ་བླ་ན་མེད་པས་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རངས། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །བདག་གིས་དགེ་བ་ཅི་བསགས་པ། ། སེམས་ཅན་ཀུན་དོན་བསྔོ་བར་བགྱི། །ཞེས་བདུན་རྣམ་དག་དང༌། སེམས་ཅན་བདེ་དང་ལྡན་གྱུར་ཅིག །ཅེས་སོགས་ཚད་མེད་བཞི་བསྒོམ་པ་རྣམས་ཀྱིས་བསོད་ནམས་ཀྱི་ཚོགས་བསགས་རྗེས། ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་པ་ཉིད་དུ་མོས་པར་གྱུར་པ་ནི་ཡེ་ཤེས་ཀྱི་ཚོགས་སོ། །དེ་ནས་ནང་མཆོད་བསང་སྦྱངས། སྟོང་པའི་ངང་ལས་རླུང་མེ་ཐོད་པའི་སྒྱེད་པུ་གསུམ་ལ་གནས་པའི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔ་ལ་ཡེ་ཤེས་ལྔའི་ངོ་བོ་དཔའ་མོ་འབྲུ་ལྔས་མཚན་པའི་སྟེང་དུ་ༀ་དཀར་པོ་མགོ་ཐུར་བསྟན་གྱི་ཁར་ཟླ་བ་ལ་གནས་པའི་ཁ་ཊྭཱཾ་ག་དཀར་པོ་བཾ་གྱིས་མཚན་པ། རླུང་མེ་སྦར་བས་རྫས་ཞུ་ཞིང་ཁོལ་བའི་རླངས་པས་དཔའ་བོ་དང་རྣལ་འབྱོར་མ་ཐམས་ཅད་སྤྱན་དྲངས། སྙོམས་པར་ཞུགས་པའི་སྦྱོར་མཚམས་ནས་བྱང་སེམས་བབས། བཾ་ཡིག་ཁ་ཊྭཱཾ་ག་ཟླ་བ་ༀ་བཅས་ལ་ཐིམ་པ་རིམ་བཞིན་འོད་དུ་ཞུ་ནས་བདུད་རྩི་ལ་ཐིམ་པས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་འཁྱིལ་བར་གྱུར། ༀ་ཨཱཿ ཧཱུྃ་ཧ་ཧོ་ཧྲཱིཿ ཞེས་བཟླས་པས་བརླབས་ལ། གཡོན་པའི་མཐེབ་སྲིན་གྱིས་བླངས་ནས། རྩ་བརྒྱུད་ཀྱི་བླ་མ་དམ་པ་ཡི་དམ་དཀྱིལ་འཁོར་གྱི་ལྷ་ཚོགས་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་ཞལ་དུ་ༀ་ཨཱཿ ཧཱུྃ། ཞེས་འཐོར་བས་ལག་མཆོད་འབུལ། དེ་ནས་སྲུང་འཁོར་ནི། གཡོན་པའི་མཐེབ་སྲིན་གྱིས་སེ་གོལ་རེ་རེ་གདབ་ཅིང༌། ༀ་སུམྦྷ་ནི་སུམྦྷ་ཧཱུྃ་ཧཱུྃ། འོག་ཐམས་ཅད་རྡོ་རྗེའི་ས་གཞི། ༀ་གྲྀཧྞ་གྲྀཧྞ་ཧཱུྃ་ཧཱུྃ། ལོགས་ཐམས་ཅད་རྡོ་རྗེའི་ར་བ་དང་དྲྭ་བ། ༀ་གྲྀཧྞ་པཱ་ཡ་གྲྀཧྞ་པཱ་ཡ་ཧཱུྃ་ཧཱུྃ། སྟེང་ཐམས་ཅད་རྡོ་རྗེའི་གུར་དང་བླ་རེ། ༀ་ཨ་ན་ཡ་ཧོཿ བྷ་ག་ཝཱན་བིདྱཱ་རཱ་ཛ་ཧཱུྃ་ཧཱུྃ་ཕཊ་ཕཊ། ཕྱི་རོལ་ཐམས་ཅད་ཡེ་ཤེས་ཀྱི་མེ་འབར་བས་བཅིངས་ཏེ་ཅིས་ཀྱང་མི་ཤིགས་པར་གྱུར་པར་བསམ་མོ། །དངོས་གཞི་ནི། སྲུང་འཁོར་གྱི་ནང་དུ་ༀ་སྭ་བྷཱ་ཝ་ཤུདྡྷཱ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། ཞེས་པས་རང་གི་ལུས་རྣམ་པར་དག་པ་ཆོས་འབྱུང་བསྣོལ་མ་ཡངས་ཤིང་རྒྱ་ཆེ་བ། དེའི་དབུས་སུ་ༀ་ཡོ་ག་ཤུདྡྷཿ སརྦ་དྷརྨཱཿ ཡོ་ག་ཤུདྡྷོ྅ཧཾ། ཞེས་པས་ངག་རྣམ་པར་དག་པ་ཁྲག་གི་རྦ་ཀློང་འཁྲུགས་པའི་དཀྱིལ་ན་པད་ཉི་རའི་གདན་ལ་ཧྲཱིཿ དམར་པོ་གནས་པ་ལས་འོད་ཟེར་ཕྱོགས་བཅུར་འཕྲོས་པས་བཛྲ་ཙཎྜ་ལིའི་སྒྲ་སྒྲོག་པར་གྱུར། ༀ་ཨཱཿ ཧཱུྃ་བཛྲ་སརྦ་དྷརྨཱ་བཛྲ་ཤུདྡྷོ྅ཧཾ། ཞེས་པས་ཧྲཱིཿ ཡོངས་སུ་གྱུར་པ་ལས་ཡིད་རྣམ་པར་དག་པ་བདག་ཉིད་རྡོ་རྗེ་གཏུམ་མོ་ཁྲོས་པའི་སྐུ་དམར་མོ་ཞལ་གཉིས་ཕྱག་བཞི་མ། དོན་དམ་ཚངས་ཞལ་ཕག་གདོང་གི་སྤྱན་གྱེན་ལ་གཟིགས་ཤིང༌། ཀུན་རྫོབ་ཁྲོ་ཞལ་གྱི་སྤྱན་ཐུར་ལ་གཟིགས་པ། ཕྱག་གཡས་ཀྱི་དང་པོས་རྡོ་རྗེ་རྩེ་ལྔ་པ་སྤྱི་བོར་འཛིན་པ། འོག་མས་པདྨ་དམར་པོ་མགྲིན་པར་འཛིན་པ། གཡོན་དང་པོས་རིན་པོ་ཆེ་ཐུགས་ཀར་འཛིན་པ། འོག་མས་སྣ་ ཚོགས་རྡོ་རྗེ་རྒྱ་གྲམ་ལྟེ་བར་འཛིན་པ། ཐོད་སྐམ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན། རུས་པའི་ཕྱག་རྒྱ་ལྔས་བརྒྱན་པ། ཤིན་ཏུ་སྒེག་ཅིང་ཁྲོས་པའི་ཉམས་རྒྱས་པ། ཞབས་གྱད་ཀྱི་དོར་སྟབས་ཀྱིས་ དུས་མཚན་མ་མནན་པ། ཞལ་ནས་བཛྲ་ཙཎྜ་ལིའི་སྒྲ་སྒྲོག་ཅིང་ཐོད་མཁར་གྱི་ནང་ན་བཞུགས་པར་གྱུར། རང་གི་ཐུགས་ཀར་ཧྲཱིཿ ཡིག་དམར་པོ་གནས་པ་ཧྲཱིཿ དམར་གཉིས་པ་ཆད་མདུན་གྱི་དལ་གྱི་དབུས་སུ་སོང་བ་ལས་སྐད་ཅིག་གིས་ཆོས་འབྱུང་བསྣོལ་མ་ཁྲག་གི་རྦ་ཀློང་འཁྲུགས་པའི་དཀྱིལ་ན་པད་ཉི་རའི་སྟེང་དུ་རྡོ་རྗེ་གཏུམ་མོ་ཁྲོས་མའི་སྐུ་རང་འདྲ་བ་ཞིག་གསལ་བར་གྱུར། བདག་མདུན་གཉིས་ཀའི་ཚངས་ཞལ་གྱིས་ཚངས་པའི་འཇིག་རྟེན་དུ་སླེབ་ཅིང༌། ཁྲོ་ཞལ་གྱི་སྤྱན་གྱིས་དུས་གསུམ་སལ་ལེར་གཟིགས་པ། ཞལ་ནས་བཛྲ་ཙཎྜ་ལི་སྒྲ་སྒྲོག་པས་སྣང་སྲིད་ལྷ་སྲིན་སྡེ་བརྒྱད་ཐམས་ཅད་དམ་ལ་འདོགས་ཤིང་དབང་དུ་སྡུད་པར་གྱུར། མདུན་བསྐྱེད་ ཀྱི་ཐུགས་སྲོག་ལས་ཧྲཱིཿ བཞི་ཕྱོགས་ཀྱི་པད་འདབ་བཞིའི་སྟེང་དུ་འཕྲོས་པ་ཡོངས་སུ་གྱུར་པ་ལས། ཤར་དུ་ལག་ན་རྡོར་འཆང་དཀར་མོ་གཡས་རྡོ་རྗེ་དང་གཡོན་སྡིགས་མཛུབ་ཞབས་གཡས་བརྐྱང་གིས་བཞུགས་པ། ལྷོར་གཙུག་ན་མེ་ཁྱེར་ཕྱག་གཉིས་སྤྱི་གཙུག་ཏུ་མེ་འབར་བ་འཛིན་ཞིང་གཡོན་བརྐྱང་གིས་གནས་པ། ནུབ་ཏུ་མཐའ་ནས་གཤོག་སྡུད་མ་དམར་མོ་ཕྱག་གཉིས་བརྐྱང་བའི་རྒྱབ་ན་གཤོག་པ་དཀར་པོ་ཅུང་ཟད་ཕབ་ཅིང་ ཞབས་ས་གའི་སྟབས་ཀྱིས་བཞུགས་པ། བྱང་དུ་ཁ་ནས་ཁུས་འདེབས་མ་ལྗང་གུ་ཞི་མ་ཁྲའི་ཉམས་ཅན་ཕྱག་གཉིས་ཀྱིས་དུང་འཛིན་ཅིང་འབུད་པ་ཟླུམ་པའི་སྟབས་ཀྱིས་བཞུགས་པའོ། །སླར་ཡང་ཐུགས་སྲོག་ལས་ཧྲཱིཿ བཞི་ མཚམས་བཞིར་འཕྲོས་པ་ཡོངས་སུ་གྱུར་པ་ལས། ཐོད་མཁར་གྱི་ནང་ཆོས་འབྱུང་ཁྲག་གི་རྦ་ཀློང་འཁྲུགས་པའི་དབུས་སུ་རའི་གདན་རེ་རེ་ལ། ཤར་ལྷོར་དགའ་རབ་དབང་ཕྱུག་གི་བུ་མོ་སེང་གདོང་མ་སྔོན་མོ་གཡས་གསེར་གྱི་རྡོ་རྗེ་རྩེ་དགུ་པ་བསྣམས་ཤིང༌། དཔུང་སྟེང་ནས་སེང་ཕྲུག་འཕྱོ་བ། ལྷོ་ནུབ་ཏུ་ལངྐ་མགྲིན་བཅུའི་བུ་མོ་སྟག་གདོང་མ་སེར་མོ་གཡས་འཕྲུལ་གྱི་མེ་ལོང་བསྣམས་ཤིང་དཔུང་སྟེང་ན་སྟག་ཕྲུག་འཕྱོ་བ། ནུབ་བྱང་དུ་དབང་ཕྱུག་ཆེན་མའི་བུ་མོ་སྤྲེལ་གདོང་མ་དམར་མོ་གཡས་དབང་སྡུད་ཀྱི་འཁོར་ལོ་བསྣམས་ཤིང༌། དཔུང་སྟེང་ན་སྤྲེལ་ཕྲུག་འཕྱོ་བ། བྱང་ཤར་དུ་གནོད་སྦྱིན་འབྲོག་གནས་ཀྱི་བུ་མོ་སྤྱང་གདོང་མ་ལྗང་གུ་གཡས་པ་ནེའུ་ལེའི་རྐྱལ་པ་བསྣམས་ཤིང༌། དཔུང་སྟེང་ན་སྤྱང་ཕྲུག་འཕྱོ་བ། བཞི་ཀ་གཡོན་བདུད་རྩིས་གང་བའི་བུམ་པ་བསྣམས་པ། སངས་རྒྱས་སྟོང་གི་དབུ་རྒྱན་ཅན། ལྟོ་བ་ན་མཁའ་འགྲོའི་རྫིང་བཅས་ཤིང་མཁའ་འགྲོ་འབུམ་གྱི་འཁོར་གྱིས་བསྐོར་བའོ། །དེ་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པས་རྡོ་རྗེ་གསུམ་གྱི་ངོ་བོར་གྱུར། ཁྱད་པར་ཐུགས་སྲོག་གི་གོར་ཧྲཱིཿ དམར་གནས་པ་ལས་འོད་ཟེར་འཕྲོས་རྡོ་རྗེ་གཏུམ་མོ་ལྷ་དགུའི་ཡེ་ཤེས་ཀྱི་འཁོར་ལོ་ཕ་ཞེས་འབར་རྒྱ་དང་བཅས་པས་སྤྱན་དྲངས། ཛཿ ཧཱུྃ་བཾ་ཧོཿ གཉིས་སུ་མེད་པར་གྱུར། སླར་ཡང་ཧྲཱིཿ ལས་འོད་ཟེར་འཕྲོས་དབང་གི་ལྷ་ཚོགས་མདུན་གྱི་ནམ་ མཁར་ཕ་བདག་ལ་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས་ༀ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་བདུད་རྩིས་གང་བའི་བུམ་པ་ཐོགས་པས་དབང་བསྐུར། སྐུ་གང༌། དྲི་མ་དག །ཆུ་ལྷག་མ་ཡར་ལུད་པ་ལས་མི་བསྐྱོད་པ་རེ་རེས་དབུ་བརྒྱན་པར་གྱུར། དེ་ནས་ལྷ་སྐུའི་གསལ་སྣང་ལ་ཅི་གནས་མཉམ་པར་བཞག་ནས། དེས་སྐྱོ་ན་བཟླས་པ་ལ་འཇུག་སྟེ། བདག་མདུན་གྱི་གཙོ་མའི་ཐུགས་སྲོག་ཧྲཱིཿ ཡིག་གི་མཐར་སྔགས་ཕྲེང་གིས་བསྐོར་བ། བདག་གི་ཐུགས་ཀ་ནས་སྔགས་ཀྱི་འོད་ཟེར་སྤྲོས་པ་མདུན་བསྐྱེད་ཀྱི་ལྷ་ཚོགས་མཆོད་ཅིང་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། འོད་ཟེར་ཚུར་འདུས་རང་ལ་ཐིམ་པས་སྡིག་སྒྲིབ་སྦྱངས་ཤིང་དངོས་གྲུབ་ཐམས་ཅད་ཐོབ་པར་བསམས་ལ། ཨེ་མ་དིང་རི་དིང་རི་བཛྲ་ཙཎྜ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་གཙོ་བའི་སྙིང་པོའོ། །འཁོར་རྣམས་ཀྱི་བཟླས་པ་ནི། བདག་གི་ཐུགས་ཀའི་སྔགས་འོད་ཀྱིས་མདུན་བསྐྱེད་ཀྱི་གཙོ་མོ་བསྐུལ་བས་དེའི་ཐུགས་ཀ་ནས་འོད་འཕྲོས་འཁོར་རྣམས་ལ་ཕོག་པས། མཁའ་འགྲོ་མ་བཞི་དང་མཆུ་ཆུང་མ་བཞི་ལས་རང་འདྲའི་སྤྲུལ་པ་དཔག་མེད་སྤྲོས་པས་སྟོང་གསུམ་ཟིལ་གྱིས་མནན། སྲིད་གསུམ་དབང་དུ་སྡུད། ཕྲིན་ལས་བཞིའི་དངོས་གྲུབ་ཀྱི་སྐལ་བ་ཐམས་ཅད་བདག་ལ་ཕུལ་བར་བསམ་ཞིང༌། ཨེ་མ་དིང་རི་དིང་རི་བཛྲ་ཌཱ་ཀི་ནཱི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། བཛྲ་གྱི་གནས་སུ། རཏྣ། པདྨ། བི་ཤྭ་བཅུག །སྲིང་ལྟར་སྒྲུབ་པ་མཁའ་འགྲོ་བཞིའི་སྔགས་དང༌། ཡང་སིང་ཧ་ར་མ། ཀམ་ཀ་ར་ཏི། ཧན་ཛ་ན་ཧཱུྃ། རཱ་ག་རཱ་ཏི། བཞི་བཅུག་པ་བྲན་ལྟར་བཀོལ་བ་མཆུ་ཆུང་མ་བཞིའི་སྔགས་ཏེ་མང་ཉུང་གཙོ་འཁོར་གྱི་འགྲོས་སྦྱར་ནས་བཟླའོ། །བཟླས་པས་སྐྱོ་ན་མཆོད་བསྟོད་བྱ་སྟེ། མཆོད་རྫས་བསང་སྦྱངས། སྟོང་པའི་ངང་ལས་སྣོད་ཀ་པཱ་ལར་བཅུད་མཆོད་རྫས་རྣམས་ཡེ་ཤེས་ཀྱི་བདུད་རྩི་བཟང་ཞིང་རྒྱ་ཆེ་བ་ནམ་མཁའ་གང་བར་བསམ་ཞིང་འབྲུ་གསུམ་བཟླས་པས་བརླབ། དེ་ནས་རང་གི་ཐུགས་ཀ་ནས་སྤྲོས་པའི་མཁའ་འགྲོ་མ་རྣམས་ཀྱིས་མཆོད་ཅིང་བསྟོད་པར་མོས་ལ། ༀ་བཛྲ་ཙཎྜཱ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ་ནས་ཤབྡའི་བར་གྱིས་མཆོད། ནང་མཆོད་རྩ་བརྒྱུད་ཀྱི་བླ་མ་དམ་པ་རྣམས་ཀྱི་ཞལ་དུ་ༀ་ཨཱཿ ཧཱུྃ། རྡོ་རྗེ་གཏུམ་མོ་ལྷ་དགུའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ༀ་ཨཱཿ ཧཱུྃ། མཁའ་འགྲོ་ཆོས་སྐྱོང་ཞིང་སྐྱོང་གཞི་བདག་རྣམས་ཀྱི་ཞལ་དུ་ༀ་ཨཱཿ ཧཱུྃ། ཁམས་གསུམ་གྱི་སེམས་ཅན་ཐམས་ཅད་རྗེ་བཙུན་མའི་ངོ་བོར་རྣམ་པར་དག་པའི་ཞལ་དུ་ༀ་ཨཱཿ ཧཱུྃ། ཞེས་ཕུལ། བསྟོད་པ་ནི། ཧཱུྃ། མཁའ་ལྟར་དག་པ་ཆོས་ཀྱི་དབྱིངས། །འཇའ་ལྟར་སྒྲིབ་མེད་གཞལ་ཡས་ཁང༌། །ཉི་ལྟར་འཇམ་པའི་ཐུགས་རྗེ་ལས། །ཟླ་ལྟར་གསལ་བའི་ཕྲིན་ལས་ཅན། །ཧྲཱིཿ ལས་བྱུང་བའི་དཔའ་མའི་སྐུ། །ཡི་གེ་ཨི་དང་ཡང་དག་ལྡན། །གཅེར་བུ་པདྨ་རཱ་གའི་མདོག །ཀེང་རུས་མཆེ་གཙིགས་སྲིན་མའི་གཟུགས། །རིན་ཆེན་ཁྲག་གི་རྦ་ཀློང་ན། །ཨེ་མ་དིང་རིའི་སྒྲ་སྒྲོག་མ། །ཞལ་གཅིག་ཕྱག་ནི་བཞི་པ་སྟེ། །ཞབས་གཉིས་གྱད་ཀྱི་དོར་སྟབས་ཅན། །ཀུན་རྫོབ་ཁྲོ་ཞལ་ཐུར་ལ་གཟིགས། །དོན་དམ་ ཚངས་ཞལ་གྱེན་དུ་གཟིགས། །ཕྱག་རྒྱ་ལྔ་དང་རབ་ལྡན་ཅིང༌། །དུར་ཁྲོད་དབྱིངས་ནས་འགྱིང་བག་ཅན། །འཁོར་དུ་ཤ་ཟ་འབུམ་གྱིས་བསྐོར། །འཇིག་རྟེན་གསུམ་པོ་འཆིངས་མཛད་མ། །ཧེ་རུ་ཀ་དང་གཉིས་མེད་འཁྲིལ། ། ལྷ་ཆེན་བཙུན་མོ་ཁྱོད་ཕྱག་འཚལ། །བདུད་བཞི་ལས་ནི་རྒྱལ་བ་མོ། །སྙིང་རྗེའི་ཁྲག་འཛག་འགྲོ་བ་འདུལ། །སྐྱེ་མེད་ཡེ་ཤེས་དག་པའི་སྐུ། །ཨེ་ཡི་དབུས་སུ་ལྷུན་གྱིས་གྲུབ། །རྟོག་མེད་རོ་ཡི་གདན་སྟེང་ན། །དབང་གི་ཆ་བྱད་སྐུ་མདོག་དམར། །མི་མགོ་རློན་པའི་དོ་ཤལ་ཅན། །ཙཎྜ་ཧཱུྃ་གི་སྒྲ་སྒྲོག་ཅིང༌། །ཕཊ་ཕཊ་ཐོག་གི་སྒྲ་འཕེན་མ། །སྭཱ་ཧཱ་འཁོར་བའི་དབུགས་འབྱིན་མ། །བདེ་བའི་དངོས་གྲུབ་སྟེར་མཛད་མ། །བདེ་ཆེན་ཕུལ་དུ་གྱུར་པའི་མཆོག །དོན་དམ་ཕ་རོལ་ཕྱིན་པ་མོ། །ཀུན་རྫོབ་ཁྲོ་མའི་གཟུགས་འཛིན་ཅིང༌། །སྙིང་རྗེ་སྟོང་པའི་རང་བཞིན་ཅན། །ཕྱག་མཚན་གྲི་ཐོད་རྟགས་མཚན་རྣམས། །དག་བྱེད་ཚངས་པའི་སྐུད་པ་ནི། །ཅོད་པན་ཚུལ་དུ་ཕྱོགས་བཅུར་འཕྱར། །ཞལ་གདོང་དམར་ལ་མཆེ་བ་གཙིགས། །ཟ་བྱེད་རྔམ་ཞལ་སྤྱན་རྩ་དམར། །ཕྱོགས་རྣམས་ཀུན་ཏུ་ལྟ་བྱེད་ཅིང༌། །སེམས་ཅན་དོན་ཀུན་སྒྲུབ་མཛད་མ། །རྡོ་རྗེ་གཏུམ་མོ་ཁྱོད་ལ་བསྟོད། །འབྱུང་བ་བཞི་པོ་རྣམ་དག་ཅིང༌། །ཚད་མེད་བཞི་ཡི་ངོ་བོ་ཉིད། །དུས་གསུམ་སངས་རྒྱས་བསྐྱེད་པའི་ཡུམ། །སྤྱན་སོགས་ལྷ་མོ་བཞི་ལ་བསྟོད། །ཡེ་ཤེས་རང་སྣང་དཀྱིལ་འཁོར་ནས། །བདག་མེད་ལྷ་མའི་རྣམ་འཕྲུལ་ལས། །དབྱིངས་ནས་ བཞེངས་པའི་དཔའ་མོ་བཞི། །ལས་བཞིའི་དངོས་གྲུབ་སྟེར་ལ་བསྟོད། །ལུང་སྟོན་ཞིང་སྐྱོང་སྲིད་པ་ཡི། །རྒྱལ་མོ་ཡིད་བཞིན་ནོར་བུ་བཞི། །གྲོགས་ལྟར་བརྟེན་ན་དངོས་གྲུབ་ནི། །སྩོལ་མཛད་ཌཱ་ཀི་བཞི་ལ་བསྟོད། །སྒྲུབ་པ་པོ་དང་སངས་རྒྱས་ཀྱི། །བསྟན་པའི་བར་ཆོད་བསྲུང་མཛད་ཅིང༌། །བརྩེ་བའི་གྲོགས་དང་ལས་མཛད་མ། །བཀའ་སྲུང་མཁའ་འགྲོ་བཞི་ལ་བསྟོད། །ཅེས་བསྟོད་ནས། མཁའ་འགྲོ་རྣམས་རང་གི་ཐུགས་ཀའི་ཧྲཱིཿ ལ་ཐིམ་པར་བསམ་མོ། །དེ་ནས་གཏོར་མ་འབུལ་བ་ནི། དལ་ལ་བཀོད་པའི་གཏོར་མ་རྣམས་ཕུད་བྲན་ཞིང་བསང་སྦྱངས་ནང་མཆོད་ལྟར་བྱིན་གྱིས་བརླབས་ལ། འབར་རྒྱ་དང་བཅས་པས་ཕ། ༀ་ཨཱ་རལླི་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ། དྲ་ཤྱ་ཧོཿ ཛཿ ཧཱུྃ་བཾ་ཧོཿ ཞེས་པས་གཏོར་མགྲོན་རྣམས་མདུན་མཁར་སྤྱན་དྲངས། ལྗགས་རྡོ་རྗེའི་སྦུ་གུས་གཏོར་མ་གསོལ་བར་བསམས་ལ། གཙོ་མོ་དང་མཁའ་འགྲོ་མ་བཞི་དང་མཆུ་ཆུང་མ་བཞི་རྣམས་ཀྱི་སྔགས་མཐར་བ་ལ་ཏ་ཨི་དཾ་གྲྀཧྞ་ཁ་ཁ་ཁཱ་ཧི་ཁཱ་ཧི། ཞེས་བཏགས་པ་ལན་གསུམ་གྱིས་བླ་མ་དང་དལ་གྱི་ལྷ་ལ་འབུལ། ཨ་ཀཱ་རོས་འཇིག་རྟེན་གྱི་མཁའ་འགྲོའི་ཚོགས་དང་གཞི་བདག་ལ་ཕུལ་ལ། ཨརྒྷཾ་སོགས་ཀྱིས་མཆོད་ནས། བླ་མ་དཀོན་མཆོག་ཡི་དམ་ལྷ། །མཁའ་འགྲོ་ཆོས་སྐྱོང་སྲུང་མ་དང༌། །ལྷ་ཀླུ་འཇིག་རྟེན་སྐྱོང་བ་དང༌། །གནོད་སྦྱིན་འབྱུང་པོ་སྲིན་པོ་དང༌། །ཡི་དྭགས་ཤ་ཟ་བརྗེད་བྱེད་དང༌། །སྨྱོ་བྱེད་མཁའ་འགྲོ་ལུས་སྲུལ་ཀུན། །མཆོད་སྦྱིན་གཏོར་མ་འདི་བཞེས་ལ། །བདག་གི་བླ་མ་དམ་པ་དང༌། །བདག་ཅག་འཁོར་དང་བཅས་རྣམས་ལ། ། ནད་མེད་ཚེ་དང་དབང་ཕྱུག་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་ཕྲིན་ལས་བཅོལ་ནས། ཁྱད་པར་མཆུ་ཆུང་མ་བཞི་ལ་ཕྲིན་ལས་བཅོལ་བ་ནི། ཧཱུྃ། བཞེངས་ཤིག་ཆོས་ཀྱི་དབྱིངས་ནས་བཞེངས། །དབྱིངས་ནས་བཞེངས་པའི་མཁའ་འགྲོ་ནི། །སངས་རྒྱས་བསྟན་པ་བསྲུང་སླད་དུ། །འབར་བའི་གདན་ལས་སྐུར་བཞེངས་ཤིག །ཕྱོགས་ཕྱོགས་དག་ནི་ཕ་གི་ན། །ཉི་མ་ནུབ་ཕྱོགས་མཚམས་བཞི་ན། །གསེར་གྱི་རི་བདུན་ཕ་རོལ་ན༑ ༑ལྕགས་རི་ནག་པའི་ཚུ་རོལ་ན། །རི་བོ་ཐམས་ཅད་རུས་པའི་རི། །རྩི་ཤིང་ཐམས་ཅད་མདའ་དང་མདུང༌། །ཆུ་བོ་ཐམས་ཅད་རྣག་དང་ཁྲག །ས་གཞི་ཐམས་ཅད་ཞག་དང་ཚིལ། །སྐུ་མཁར་ཐོད་པའི་གཞལ་ཡས་ཁང༌། ། སྐུ་མཁར་སོ་སའི་མངའ་བདག་མོ། །ཤར་ལྷའི་མཁའ་འགྲོ་སེང་གེའི་གདོང༌། །དགའ་རབ་དབང་ཕྱུག་བུ་མོ་སྟེ། །སྔོན་མོ་རྡོ་རྗེ་བུམ་པ་བསྣམས། །ལྷོ་ནུབ་མཁའ་འགྲོ་སྟག་གདོང་མ། །ལངྐ་མགྲིན་བཅུའི་བུ་མོ་སྟེ། །སེར་མོ་མེ་ལོང་བུམ་པ་བསྣམས། །ནུབ་བྱང་མཁའ་འགྲོ་སྤྲེལ་གདོང་མ། །དབང་ཕྱུག་ཆེན་པའི་བུ་མོ་སྟེ། །དམར་མོ་འཁོར་ལོ་བུམ་པ་བསྣམས། །བྱང་ཤར་མཁའ་འགྲོ་སྤྱང་གདོང་མ། །འབྲོག་གནས་ཆེན་པའི་བུ་མོ་སྟེ། །ལྗང་མོ་ནེའུ་ལེ་བུམ་པ་བསྣམས། །ཀུན་ཀྱང་མཁའ་འགྲོ་འབུམ་གྱིས་བསྐོར། །དཔུང་པའི་སྟེང་ནས་སྤྲུལ་པ་སྤྲོ། །སངས་རྒྱས་སྟོང་གི་དབུ་རྒྱན་ཅན། །ལྟེ་བར་མཁའ་འགྲོའི་རྫོང་བཅས་མ། །སྐུ་ནི་སྐད་ཅིག་གློག་འགྱུ་མ། ། གསུང་གི་ང་རོ་འབྲུག་ལྡིར་མ། །ཐུགས་རྗེའི་བྱིན་རླབས་ཆར་འབེབས་མ། །དོན་གྱི་སངས་རྒྱས་ཡིན་མོད་ཀྱང༌། །སྒྲུབ་པ་པོ་ལ་བརྩེ་བའི་ཕྱིར། །མཁའ་འགྲོ་སྡེ་བཞིའི་བཀའ་བྱུང་གིས། །བྲན་མོའི་ཚུལ་དུ་ཁས་ལོངས་ལ། །ཚུར་གཤེགས་བཀའ་ཡི་གཏོར་མ་ལོངས། །རྒྱན་གྱི་གཏོར་མས་མཉེས་མཛོད་ལ། །བཅོལ་བའི་ཕྲིན་ལས་སྒྲུབ་པར་མཛོད། །ཁྱད་པར་རྩོད་ལྡན་ལྔ་བདོའི་དུས། །སྡུག་བསྔལ་ཞི་བྱེད་བསྟན་པ་ནི། །དར་བར་ལུང་བསྟན་དགོངས་མཛོད་ལ། །བསྟན་པ་དར་ཞིང་རྒྱས་པར་མཛོད། །བདག་ཅག་རྣལ་འབྱོར་སྒྲུབ་པ་པོའི། །གདོན་བགེགས་བར་ཆད་ཀུན་ཞི་ནས། །ཚེ་རིང་ནད་མེད་བདེ་སྐྱིད་ལྡན། །བསམ་པའི་དོན་རྣམས་འགྲུབ་པར་མཛོད། །ཅེས་བཅོལ་ལོ། །དེ་ནས་རྫས་བྱིན་གྱིས་བརླབས་པ་ནི། དྲིའི་དུང་ཞལ་དུ་བགེགས་མཐར་བྱེད་སྐད་ཅིག་གིས་བསྐྱེད་ལ། སུམྦྷའི་སྔགས་བཟླས་ནས་ཧཱུྃ་ཞེས་པས་བདུད་རྩིར་ཞུ་བར་བསམ་ཞིང༌། དེས་དབང་རྫས་རྣམས་བསང་ལ། རང་གི་ཐུགས་ཀ་ནས་འཕྲོས་པའི་འོད་ཟེར་གྱིས་སྦྱངས་པས་བུམ་པ་རིན་པོ་ཆེ་ལས་གྲུབ་པ་ཡངས་ཤིང་རྒྱ་ཆེ་བའི་ནང་གཞལ་ཡས་ཁང་དུ་གསལ་བའི་དབུས་སུ་ཧཱུྃ་ༀ་སྭཱ་ཨྃ་ཧཱ་མཱུྃ་ལྃ་མཱྃ་པྃ་ཏཱྃ་ལས་དེ་བཞིན་གཤེགས་པ་རིགས་ལྔ་ཡབ་ཡུམ་མཉམ་པར་སྦྱོར་བ་ཅན། སྣོད་ཐོད་པ་ཡུམ་གྱི་མཁའ་ཀློང་དུ་བཅུད་རྫས་རྣམས་བདེ་མཆོག་ལྷན་སྐྱེས་ཡབ་ཡུམ་དང༌། མེ་ལོང་གི་དཀྱིལ་འཁོར་རྡོ་རྗེ་གཏུམ་མོ་གོ་ཆའི་ལྷ་མོ་དྲུག་དང་བཅས་པའི་རང་བཞིན་དུ་མོས་ལ། ཡེ་ཤེས་པ་ཕ་ཞེས་སྤྱན་དྲངས། ཛཿ ཧཱུྃ་བཾ་ཧོཿ ས་བསྟིམ། ཨརྒྷཾ་ནས་ཤབྡའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ་ལ། བུམ་པར་གཟུངས་ཐག་བཏགས་པར་འཇུས་ཏེ། རང་གི་ཐུགས་ཀ་ནས་སྔགས་ཀྱི་འོད་ཟེར་གཟུངས་ཐག་ལ་འཁྲིལ་ཏེ་སོང་བ་བུམ་ནང་གི་ལྷའི་ཐུགས་རྒྱུད་བསྐུལ། རིགས་ལྔ་ཡབ་ཡུམ་གྱི་བྱང་སེམས་བདུད་རྩིའི་རྒྱུན་བབས་པས་བུམ་པ་གང༌། བྱང་ཆུབ་སེམས་དེའི་འོད་ཟེར་གྱིས་བསྐུལ་བའི་ཐོད་ནང་གི་ཧེ་རུ་ཀ་ཡབ་ཡུམ་སྦྱོར་བའི་བྱང་སེམས་བབས་པ་ཐོད་པའི་བདུད་རྩི་དང་འདྲེས། དེ་ལས་ཀྱང་འོད་ཟེར་དཀར་དམར་འཕྲོས་པས་མེ་ལོང་ལ་རེག་པ་ཙམ་གྱིས་ལྷ་མོ་གཙོ་འཁོར་བདུན་བདེ་བ་ཆེན་པོར་འབར་ཞིང་གསལ་བ་ལས་འཕྲོས་པའི་འོད་ཀྱིས་རྒྱུད་ཀྱི་པུསྟིའི་ཡི་གེ་རྣམས་སྤྲུལ་པའི་སྐུར་བྱོན་ནས་འགྲོ་བའི་དོན་བྱེད་པར་བསམ་ཞིང་ཧཱུྃ་ༀ་སོགས་རིགས་ལྔའི་ས་བོན་བཅུ། ཨ་བྷི་ཥེ་ཀ་བདེ་མཆོག་གི་ཡིག་བདུན། གཙོ་མའི་སྔགས་རྣམས་སྒྲིལ་ནས་བཟླས་མཐར་བུམ་པ་ལ་ༀ་ཨཱཿ ཧཱུྃ་ཞེས་མཆོད་ཡོན་ཕུལ༑ བུམ་ཐོད་མེ་ལོང་དང་བཅས་པའི་ལྷ་རྣམས་འོད་དུ་ཞུ་ནས་དབང་རྫས་ནུས་ལྡན་དུ་གྱུར་པར་བསམ་མོ། །དེ་ནས་དབང་ལ་གཉིས་ལས། དང་པོ་སློབ་དཔོན་འཇུག་ཅིང་དབང་ནོད་པ་ཏིང་ངེ་འཛིན་གྱི་ཚུལ་དུ་བླངས་ལ། གཉིས་པ་སློབ་མ་གཞུག་ཅིང་དབང་བསྐུར་བ་ནི༑ བུ་རྣམས་ཁྲུས་དང་ཕྱག་བྱས་གྲལ་དུ་འཁོད་པ་ལ། སེམས་བསྐྱེད་གསལ་འདེབས་དང་ཆོས་བཤད་ཅི་རིགས་སྔོན་དུ་བཏང་ནས། འདིར་མ་རྒྱུད་བླ་ན་མེད་པ་གསང་མཐའི་རྒྱུད་དང་འབྲེལ་བའི་སྒྲུབ་ཐབས་ཟབ་མོ་འདི་ལ་རྒྱུད་ལུང་མན་ངག་གསུམ་ལས། རྒྱུད་མཁའ་འགྲོ་རྒྱ་མཚོ་དང༌། ཕག་མོ་མངོན་འབྱུང་གི་ནང་ནས་བཏོན་ནས་དབྱིངས་ཀྱི་གཙོ་མོ་རྣམས་ཀྱི་བརྒྱུད་པ་གཏད་པའི་ཆོས་བརྒྱད་ཀྱི་ནང་ཚན་འདི་ནི་རྣམ་རྟོག་ཡེ་ཤེས་སུ་བསླངས་ནས་སྣང་བ་དབང་དུ་སྡུད་པར་བྱེད་པ་མཁའ་འགྲོ་མ་བདུད་རྩི་བུམ་པའི་དབང་བསྙེན་སྒྲུབ་ལས་སྦྱོར་སྦྲགས་པའི་ཆོས་སྡེ་རྗེ་བཙུན་དམ་པ་རྒྱ་གར་བས། བླ་མ་བྱང་ཆུབ་སེམས་དཔའ་ཀུན་དགའ་དང༌། རྒྱ་སྒོམ་གཉིས་ལ་གནང་བ་མཆུ་བཞི་སྒྲུབ་ཐབས་དང་བཅས་ཁྱད་པར་དུ་འཕགས་པའི་དབང་འདི་བསྐུར་བ་ལ། སློབ་དཔོན་གྱིས་སྔོན་དུ་བྱ་རྒྱུའི་ཆོས་རྣམས་གྲུབ་ནས། ད་ཁྱེད་རང་གི་ངོ་སྐལ་དུ་གྱུར་པ་ལ་ཐོག་མར་མཎྜལ་ཕུལ་མཛོད། ཨ་ཁཾ་ཝཱི་ར་ཧཱུྃ་ལན་གཉིས་ཀྱིས་མིག་བཀབ་ཅིང་མེ་ཏོག་གཏད་ལ། སྙིམ་པ་མེ་ཏོག་དང་བཅས་ཏེ་ཐལ་མོ་སྦྱོར་ལ་འདིའི་རྗེས་ཟློས། བླ་མ་རིན་པོ་ཆེ། བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། ཞེས་ལན་གསུམ་གྱིས་གསོལ་བ་བཏབ་པའི་ལན་དུ་བླ་མས། བུ་ཁྱོད་རྣལ་འབྱོར་བླ་ན་མེད་པའི་ཆོས་ལ་མོས་སམ། སྒྲུབ་པ་ཉམས་སུ་ལེན་ནམ། འབྲས་བུ་སེམས་ཅན་གྱི་དོན་བྱེད་པར་སྤྲོའམ། ཞེས་དྲིས་པའི་ལན་དུ་སློབ་མས། མོས་ལགས། ལེན་ལགས། སྤྲོ་ལགས་ཞེས་རིམ་པར་གདབ་བོ། །སྔོན་འགྲོ་རྟེན་སྡོམ་པ་གསུམ་ལྡན་དུ་བྱ་བའི་ཕྱིར་སོ་བྱང་སྔགས་གསུམ་གྱི་སྡོམ་པ་བཟུང་སྙམ་པས་འདིའི༴ སྲས་བཅས་སངས་རྒྱས་ཐམས་ཅད་དང༌། །དཔའ་བོ་ རྣལ་འབྱོར་མ་ཚོགས་ཀུན། །ཐམས་ཅད་བདག་ལ་དགོངས་སུ་གསོལ། །བདག་གིས་དེང་ནས་བྱང་ཆུབ་བར། །སངས་རྒྱས་ཆོས་དང་དགེ་འདུན་ལ། །ཐར་པ་འདོད་ཕྱིར་སྐྱབས་སུ་མཆི། །སེམས་ཅན་ཀུན་དོན་བསྒྲུབ་པའི་ཕྱིར། །བྱང་ཆུབ་སེམས་གསུམ་བསྐྱེད་པར་བགྱི། །བདེ་གཤེགས་རིགས་ལྔའི་སྡོམ་པ་བཟུང༌། །བཅུ་བཞིར་ཕྱེ་བའི་ལྟུང་བ་དང༌། །ཡན་ལག་ཉེས་པ་སྤང་བར་བགྱི། །ལན་གསུམ། དངོས་གཞི་ཡེ་ཤེས་དབབ་པའི་སླད་དུ་བླ་མ་ཡི་དམ་མཁའ་འགྲོ་རྣམས་མཁའ་ཁྱབ་ཏུ་སད་པ་ལ་ཕྱག་གསུམ་སྔོན་དུ་འགྲོ་བས་མཎྜལ་འབུལ་དུ་གཞུག །དེ་ནས་མཁྱེན་པར་གསོལ་བ་ནི་མེ་ཏོག་འཐོར་བཞིན་དུ་འདིའི༴ ཀྱེ། བླ་མ་རྗེ་བཙུན་པ་རྣམས་དང༌། ཡི་དམ་གྱི་ལྷ་ཚོགས་དང༌། མཁའ་འགྲོ་མ་ཐམས་ཅད་མཁྱེན་པར་མཛོད་ཅིག །བདག་གི་རྒྱུད་སྨིན་ཅིང་གྲོལ་བའི་དབང་བསྐུར་བ་སྩལ་དུ་གསོལ། བདག་གི་རྒྱུད་ལ་ཕྱག་རྒྱ་ཆེན་པའི་རྟོགས་པ་ཁྱད་པར་ཅན་མ་སྐྱེས་པ་སྐྱེ་བ་དང༌༑ སྐྱེས་པ་བརྟན་པ་དང༌། བརྟན་པ་མཐར་ཕྱིན་པར་བྱིན་གྱིས་བརླབ་ཏུ་གསོལ། ཞེས་ལན་གསུམ། དེ་ནས་ཁྱེད་རང་རྣམས་ལུས་དྲང་པོར་བསྲང༌། རླུང་ཁ་སྦྱོར་དུ་འཆིངས། སེམས་དམིགས་པ་ལ་རྩེ་གཅིག་ཏུ་གཏོད་ཅིག་བྱས་ལ། སློབ་དཔོན་གྱིས་ༀ་ཨཱཿ ཧཱུྃ་ཧ་ཧོ་ཧྲཱིཿ ས་བདུད་རྩི་བྱིན་རླབས་དྲན་པར་བྱས་ལ་མཐེབ་སྲིན་གྱིས་བླངས་ཏེ་བླ་མ་ཡི་དམ་མཁའ་འགྲོའི་ཞལ་དུ་ༀ་ཨཱཿ ཧཱུྃ་ཞེས་ལག་མཆོད་བྱས་ནས་བདུད་རྩི་འཐོར་ཞིང་སུམྦྷའི་སྔགས་ཚན་བཞིར་བཅད་ནས་བརྗོད་པས། རྡོ་རྗེའི་ ས་གཞི་ར་བ་དྲྭ་གུར་བླ་རེ་ཡེ་ཤེས་ཀྱི་མེ་འབར་བས་མཚམས་བཅིངས་པར་བསམ། ༀ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། ༀ་ཡོ་ག་ཤུདྡྷ་སརྦ་དྷརྨཱ་ཡོ་ག་ཤུདྡྷོ྅ཧཾ། ༀ་བཛྲ་ཤུདྡྷོཿ སརྦ་དྷརྨཱཿ བཛྲ་ཤུདྡྷོ྅ཧཾ། ཞེས་དག་པ་གསུམ་གྱི་སྔགས་བརྗོད་པས། ཁྱེད་རང་གི་ལུས་དག་པ་ཆོས་འབྱུང་བསྣོལ་མ། ངག་དག་པ་དེའི་དབུས་སུ་ཁྲག་མཚོའི་དཀྱིལ་ན་པད་ཉི་རོ་གདན་ལ་གནས་པའི་ཧྲཱིཿ དམར་པོ་འོད་འཕྲོ་ཞིང་ཙཎྜའི་སྒྲ་སྒྲོག་པ་ཡོངས་སུ་གྱུར་པ་ལས་ཡིད་དག་པ་རྡོ་རྗེ་གཏུམ་མོ་ཁྲོས་མའི་སྐུར་གྱུར་པ་ནི། སྐུ་མདོག་དམར་མོ་ཞལ་གཉིས་ཕག་གདོང་གྱེན་དང་ཁྲོ་ཞལ་ཐུར་ལ་གཟིགས་པ། ཕྱག་བཞིའི་དང་པོ་གཉིས་རྡོ་རྗེ་པདྨ། འོག་མ་གཉིས་རིན་པོ་ཆེ་དང་རྒྱ་གྲམ་རྣམས་རང་གི་སྤྱི་མགྲིན་སྙིང་ལྟེའི་གནས་བཞིར་འཛིན་པ། ཞབས་དོར་སྟབས་ཀྱིས་དུས་མཚན་མ་མནན་པ། ཐོད་སྐམ་གྱི་དབུ་རྒྱན་དང༌། རློན་པའི་དོ་ཤལ། ཕྱག་རྒྱས་ལྔས་བརྒྱན་ཅིང་ཞལ་ནས་བཛྲ་ཙཎྜའི་སྒྲ་སྒྲོག་པའི་གནས་གསུམ་དུ་ༀ་ཨཱཿ ཧཱུྃ་དང་སྲོག་གི་གོར་ཧྲཱིཿ ཡིག་དམར་པོ་དེ་ལས་འོད་ཟེར་ཧྲཱིཿ ཡིག་གི་ཕྲེང་བའི་རྣམ་པ་ཉི་ཟེར་གྱི་རྡུལ་ལྟར་འཕྲོས། མདུན་གྱི་དཀྱིལ་འཁོར་ལ་ཐིམ་པས་ལྷ་དགུའི་དཀྱིལ་འཁོར་འཁོར་ལོ་གསལ་ཞིང་འབར་བར་གྱུར་པའི་གཙོ་མོའི་ཐུགས་ཀ་ནས་རང་འདྲ་བའི་མཁའ་འགྲོ་དཔག་ཏུ་མེད་པ་དང༌། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱང་རྡོ་རྗེ་གཏུམ་མོའི་རྣམ་པ་ཁ་ཆར་དང་བུ་ ཡུག་འཚུབས་པ་ལྟར་བྱོན། དེ་ཐམས་ཅད་ཀྱིས་སྟོང་གསུམ་ཟིལ་གྱིས་མནན། ཁམས་གསུམ་དབང་དུ་བསྡུས་ནས་ཁྱེད་རང་རྣམས་ལ་སིབ་སིབ་ཐིམ་པས་སྐུ་གསུང་ཐུགས་ཀྱི་བྱིན་གྱིས་བརླབས་པའི་མོས་པ་མཛོད། སྤོས་བདུག་ཅིང་ཅང་ཏེའུ་སོགས་རོལ་མོའི་སྒྲ་དང་སྦྱར་ཏེ། ཨེ་མ་དིང་རི་དིང་རི་བཛྲ་ཙཎྜ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་མང་དུ་བཟླས་ཤིང༌། བཛྲ་ཙཎྜ་ཨ་བཱེ་ཤ་ཡ་ཛཿ ཧཱུྃ་བཾ་ཧོཿ ཞེས་དབབ་པས་བདེ་བ་བཟོད་མེད་དུ་འབར་བར་བསམས་ལ་དེ་ཀའི་ངང་ལ་མ་བཅོས་པར་ཞོག་ཅིག །ཅེས་བསྐྱོང་དུ་གཞུག །དེ་ནས་མདུན་བསྐྱེད་ཀྱི་གཙོ་མའི་སྐུ་ལ་མེ་ཏོག་འབུལ་བའི་སྟངས་ཀས་འདིའི༴ ༀ་པྲ་ཏཱིཙྪ་བཛྲ་ཧོཿ དེ་ཉིད་ༀ་པྲ་ཏཱི་གྲྀཧྞ་ཨི་མཾ་ས་ཏྭ་མ་ཧཱ་བ་ལ། ཞེས་བུའི་སྤྱི་བོར་བཅིངས། ཙཀྵུ་པྲ་བེ་ཤ་ཡ་ཕཊ། ཅེས་པས་མིག་ཕྱེ་ནས་ཧེ་བཛྲ་པཱ་ཤྱ་ཧོཿ འདི་ན་རྗེ་བཙུན་རྡོ་རྗེ་གཏུམ་མོ་མཆུ་ཆུང་མ་བཞི་དང་བཅས་པ་ལྷ་དགུའི་དཀྱིལ་འཁོར་བཞུགས་པ་མངོན་སུམ་བཞིན་དུ་མཐོང་བར་གྱུར་སྙམ་པའི་མོས་པ་མཛོད། དེ་ནས་དབང་བསྐུར་བ་དངོས་གཞི་ཞུ་བའི་ཡོན་དུ་མཎྜལ་འབུལ་དུ་བཅུག་ནས། གསོལ་བ་གདབ་པ་ནི། མཆོག་གི་དངོས་གྲུབ་ཐོབ་ཕྱིར་དང༌། །ཞི་རྒྱས་དབང་དྲག་ཕྲིན་ལས་རྣམས། །མྱུར་དུ་འགྲུབ་པར་བྱ་བའི་ཕྱིར། །བླ་མ་མཁའ་འགྲོས་དབང་བསྐུར་སྩོལ། །ལན་གསུམ་གྱིས་གསོལ་བ་བཏབ་ནས། དབང་ལ་བཞི་ལས། དང་པོ་བུམ་དབང་ནི། དལ་གྱི་གཙོ་བོ་ལས་སྤྲུལ་པའི་དབང་ལྷ་རྣམས་ཀྱིས་ཡེ་ཤེས་ལྔའི་བདུད་རྩིས་གང་བའི་བུམ་པ་ཐོགས་ཏེ། ཁྱེད་རང་རྡོ་རྗེ་ གཏུམ་མོར་གསལ་བའི་མགོ་ཐོག་ཏུ་བཞག་པ་ལས་ཡེ་ཤེས་ལྔའི་ཆུ་རྒྱུན་བབས་པས་དབང་བསྐུར་བའི་མོས་པ་མཛོད། རིགས་ལྔ་ཡབ་ཡུམ་ཞུ་བའི་ཆུས། །ཕུང་པོ་ལྔ་ཡི་སྒྲིབ་པ་སྦྱངས། །ཉོན་མོངས་ལྔ་དག་དབང་བསྐུར་བས། །ལུས་ཀྱི་སྒྲིབ་པ་དག་གྱུར་ཅིག །ཅེས་བུམ་པ་སྤྱི་བོར་བཞག་ཅིང་བུམ་ཆུ་བླུད། དེ་བརྟན་ཕྱིར། ༀ་སུ་པྲ་ཏིཥྛ་བཛྲེ་སྭཱ་ཧཱ། ཞེས་མེ་ཏོག་འཐོར་ཞིང་རོལ་མོ་འཁྲོལ། དབང་ལྷ་རྣམས་ཀྱང་བུ་ལ་ཐིམ་པར་བསམ་མོ། །དེས་ལུས་ཀྱི་དྲི་མ་དག ༑ལམ་ལྷ་སྐུ་བསྒོམ་ཞིང༌། ཉམས་ཡུལ་སྣང་སྟོང་དུ་འཆར་བ་ལ་དབང༌། འབྲས་བུ་སྐུ་རྡོ་རྗེ་ཐོབ་པའི་སྐལ་བ་ཅན་དུ་བྱས་སོ། །གཉིས་པ་གསང་དབང་ནི། བདེ་མཆོག་ཡབ་ཡུམ་མཉམ་པར་སྦྱོར་བའི་བྱང་སེམས་འཐོར་བའི་བདུད་རྩི་བླུད་པས་རྩ་དཔའ་མོ། ཁམས་དཔའ་བོ། གཉིས་མེད་བྱང་ཆུབ་ཀྱི་སེམས་བདེ་སྟོང་དབྱེར་མེད་རྒྱུད་ལ་སྐྱེས་པའི་མོས་པ་མཛོད། འདི་དེ་དཔའ་བོ་དཔའ་མོ་རྣམས། །དམ་ཚིག་རྨད་བྱུང་ཆེན་པོ་སྟེ། །ཁམས་ལྔ་ལྡན་པས་རོ་རྟོག་བྱེད། །བདེ་བ་གང་དེ་མྱང་བར་གྱིས། །ཨ་ཧོ་མ་ཧཱ་སུ་ཁ། ཞེས་བདུད་རྩི་བླུད། དེས་ངག་གི་དྲི་མ་དག །ལམ་རྩ་རླུང་སྒོམ་ཞིང༌། ཉམས་སེམས་གསལ་སྟོང་དུ་འཆར་བ་ལ་དབང༌། འབྲས་བུ་གསུང་རྡོ་རྗེ་ཐོབ་པའི་སྐལ་བ་ཅན་དུ་བྱས་སོ། །གསུམ་པ་ཤེར་དབང་ནི། སིནྡྷུ་རའི་དཀྱིལ་འཁོར་སྤྱི་བོར་བཞག་ཅིང་གཡོན་པའི་སྲིན་ལག་གིས་བླངས་ནས་གནས་བཞིར་ཐིག་ལེར་བྱས་ནས་བླ་མ་ཡི་དམ་མཁའ་འགྲོ་རྣམས་བསྟིམ་པའི་བྱིན་རླབས་ཀྱིས་གཏུམ་མོ་ཞུ་བའི་ དགའ་བཞིའི་ཡེ་ཤེས་སྐྱེས་པའི་མོས་པ་མཛོད། ཀུན་གཞི་མེ་ལོང་དག་པ་ལ། །ཚོགས་དྲུག་མ་འགགས་གཟུགས་བརྙན་ཤར། །སྣང་སྟོང་མ་བཅོས་ངོ་བོར་གསལ། །སེམས་ཀྱི་དྲི་མ་རང་སར་གྲོལ། །ཞེས་མེ་ལོང་སྤྱི་བོར་བཞག་ཅིང་ༀ་ཨཱཿ ཧཱུྃ་ཧྲཱིཿ ཞེས་སྤྱི་མགྲིན་སྙིང་ལྟེར་སིནྡྷུ་རའི་ཐིག་ལེ་རེ་བྱས་པར་བླ་མ། ཡི་དམ་ལྷན་སྐྱེས། མཁའ་འགྲོ་གཙོ་མོ་ཌཱ་ཀི་བཞི་བཅས་མཆུ་ཆུང་མ་བཞི་རྣམས་རིམ་པར་བསྟིམ་མོ། །དེས་ཡིད་ཀྱི་དྲི་མ་དག །ཕོ་ཉའི་ལམ་བསྒོམ་ཞིང་ཉམས་བདེ་སྟོང་དུ་འཆར་བ་ལ་དབང༌། འབྲས་བུ་ཐུགས་རྡོ་རྗེ་ཐོབ་པའི་སྐལ་བ་ཅན་དུ་བྱས་པའོ། །བཞི་པ་ཚིག་དབང་ནི། ཁྱེད་རང་རྣམས་ལུས་གནད་བསྲང༌། རླུང་སོ་མར་བཞག་གོ །སེམས་གང་ཤར་གྱི་རང་ངོ་ལ་ཆེ་རེ་ལྟོས་ལ་གསལ་བཞག་མེད་པར་སྐྱོངས་ཤིག་བྱས་ལ། རྒྱུད་སྒྲུབ་ཐབས་དང་བཅས་པའི་དཔེ་ལག་ཏུ་གཏད་དེ་མ་ཡེངས་པར་གསོན་ཅིག །ལྟ་བ་རྣམ་པར་དག་པའི་རྡོ་རྗེ་ལུང་སྟོན་གྱི་མཆུ་བྱ་བ་ལགས་པས། ཁྱོད་ཀྱིས་ཆོས་འདི་སྒྲོ་འདོགས་ཆོད་པར་སློབ་ཅིག །སྒོམ་པ་ཉམས་སུ་མྱོང་བ་རྡོ་རྗེ་ཞིང་སྐྱོང་གི་མཆུ་བྱ་བ་ལགས་པས་ཆོས་འདི་ནས་ཇི་ལྟར་བཤད་པ་བཞིན་སྒྲུབས་ཤིག །སྤྱོད་པ་ཡུལ་དང་བསྲེ་བ་སྲིད་པའི་རྒྱལ་མའི་མཆུ་བྱ་བ་ལགས་པས། ཁྱོད་ཀྱིས་ཆོས་འདི་ལ་དཀའ་བ་དང་དུ་ལོངས་ཤིག །འབྲས་བུ་མངོན་དུ་གྱུར་པ་ཡིད་བཞིན་ནོར་བུའི་མཆུ་བྱ་བ་ལགས་པས། ཁྱོད་ཀྱིས་ཆོས་འདི་ལ་ནུས་པ་ཐོན་པར་མཛོད་ཅིག །ཅེས་བརྗོད་ཅིང་བཀྲ་ཤིས་དང་རོལ་མོ་བྱ། དེས་ཕྲ་བའི་ སྒོ་གསུམ་གྱི་དྲི་མ་དག །ལམ་ཕྱག་རྒྱ་ཆེན་པོ་སྒོམ་ཞིང་ཉམས་སེམས་ཉིད་རྩ་བྲལ་གྱི་རྟོག་པ་འཆར་བ་ལ་དབང༌། འབྲས་བུ་ཡེ་ཤེས་རྡོ་རྗེ་ཐོབ་པའི་སྐལ་བ་ཅན་དུ་བྱས་སོ། །དེ་ཡན་ཆད་ལྷ་སྒྲུབ་པའི་བྱིན་རླབས་ཀྱི་ཆོ་ག་སྟེ་ནུབ་དང་པོ་ལ་བྱས་ནས། ནུབ་གཉིས་པ་བསྙེན་སྒྲུབ་ལས་སྦྱོར་གསུམ་དང༌། གསུམ་པར་མཆུ་ཆུང་བཞིའི་བཟླས་ལུང་འབོགས་པར་བཤད་ཀྱང་ད་ལྟའི་ཕྱག་བཞེས་སུ་ནུབ་གསུམ་པ་སྦྲེལ་ནས་དུས་གཅིག་ལ་མཛད་པས། དེའི་དབང་དུ་བྱས་ཏེ་དང་པོ་མ་ལྟར་བསྟེན་པའི་བཟླས་ལུང་ནི། བླ་མ་དང་གཉིས་སུ་མེད་པའི་མདུན་བསྐྱེད་ཀྱི་གཙོ་མོ་རྡོ་རྗེ་གཏུམ་མའི་ཐུགས་ཀར་ཧྲཱིཿ ཡིག་དམར་པོ་ལ་སྔགས་ཀྱིས་བསྐོར་བའི་རང་སྒྲས་ཁམས་གསུམ་དབང་དུ་བསྡུས། སྲིད་གསུམ་ཟིལ་གྱིས་མནན། གནོད་བྱེད་རྣམས་ཚར་བཅད། རང་འདྲའི་མཁའ་འགྲོ་དཔག་ཏུ་མེད་པ་ཁ་ཆར་བུ་ཡུག་འཚུབས་པ་ལྟ་བུས་མ་ལྟར་བྱམས་པའི་དངོས་གྲུབ་ཐམས་ཅད་སྩོལ་ཞིང༌། ཁྱེད་རང་ལ་ཐིམ་པའི་མོས་པས་འདིའི་རྗེས༴ ཨེ་མ་དིང་རི་དིང་རི་བཛྲ་ཙཎྜ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་འཇམ་ལ་རིང་བར་བཟླར་གཞུག །གཉིས་པ་སྲིང་ལྟར་བསྙེན་པའི་བཟླས་ལུང་ནི། གཙོ་མོའི་ཐུགས་སྲོག་གིས་ཕྱོགས་བཞིའི་མཁའ་འགྲོ་ལག་ན་རྡོར་འཆང༌། གཙུག་ན་མེ་ཁྱེར། མཐའ་ནས་གཤོག་སྡུད། ཁ་ན་ཁུས་འདེབས་བཞི་བསྐུལ་བས། དེ་དག་ལས་རང་འདྲའི་སྤྲུལ་པ་གྲངས་མེད་པ་སྤྲོས་པས་དངོས་གྲུབ་སྩོལ་ཞིང་ཐིམ་པར་མོས་པས་གཞན་སྔར་ལྟར་ལས་བཛྲ་ཙཎྜའི་ཚབ་ཏུ། བཛྲ་ཌཱ་ཀི་ནི་ཡེ། རཏྣ་ཌཱ༴ པདྨ་ཌཱ༴ བི་ཤྭ་ཌཱ་ཀི་ནཱི་རྣམས་ བཅུག་པ་བཟླ། གསུམ་པ་གྲོགས་ལྟར་སྒྲུབ་པའི་ལུང་ནི། མཁའ་འགྲོ་ཐམས་ཅད་ཀྱིས་སྔགས་མགྲིན་གཅིག་ཏུ་དིར་དིར་བརྗོད་པས། རྡོ་རྗེ་ལུང་སྟོན། རིན་ཆེན་ཞིང་སྐྱོང་སྲིད་པའི་དབང་མོ། ཡིད་བཞིན་ནོར་བུ་རྣམས་དང༌། བཞི་སྙིང་དྲིལ་བ་ལ་ཞིང་སྐྱོང་ཀུན་ཏུ་རི་ཀ་རྣམས་སྒོམ་ཞིང་སྤྲུལ་པའི་འཕྲོ་འདུ་བྱེད་པར་མོས་པས། ཛྙཱ་ན་སིདྡྷི། ས་ལི་སིདྡྷི། པ་ཤཾ་སིདྡྷི། རཏྣ་སིདྡྷི། དཔེ་གཅིག་ལ་དཱ་ན་སིདྡྷི་སྣང༌། བཞི་སྙིང་དྲིལ་བ་ཧ་རི་ནི་ས་རྣམས་བཅུག་ནས་བཟླ། བཞི་པ་བྲན་ལྟར་སྒྲུབ་པ་དངོས་གྲུབ་ལེན་པ་ལས་སྦྱོར་གྱི་ལུང་ནི། གཙོ་མོའི་ཐུགས་སྲོག་གི་འོད་ཀྱིས་བསྐུལ་བའི་མཁའ་འགྲོ་མ་རྣམས་ཀྱིས་སྐལ་ལྡན་གྱི་སློབ་བུའི་ཟས་ནོར་འགུགས། ནད་གདོན་བར་ཆད་ཐམས་ཅད་བསལ། ཁྱད་པར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་ཐམས་ཅད་ཐོགས་པ་མེད་པར་སྩོལ་ཞིང་ཐོབ་པར་མོས་ལ། ཀཱ་ཡ་སིདྡྷི། ཝཱ་ཀ་སིདྡྷི། ཙིཏྟ་སིདྡྷི། གུ་ཎ་སིདྡྷི། ཀརྨ་སིདྡྷི་རྣམས་སྔར་ལྟར་བཅུག་ནས་བཟླར་གཞུག་གོ །དེ་ནས་ལོང་སྒྲུབ་མཆུ་ཆུང་མ་བཞིའི་སྒྲུབ་ལུང་ནི། གཙོ་མའི་ཐུགས་ཀའི་འོད་ཀྱིས་བསྐུལ་བས་མཚམས་བཞི་ཐོད་པའི་སྐུ་མཁར་ནས་མཁའ་འགྲོ་ཕྲ་མེན་མ་བཞི་རང་རང་གི་འཁོར་འབུམ་ཕྲག་གིས་བསྐོར་ནས་ཇེ་ཉེ་ཇེ་ཉེར་བྱོན་ནས་ལས་ཅི་བགྱི་ཞེས་གང་བཅོལ་ཐོགས་པ་མེད་པར་སྒྲུབ་པར་མོས་མཛོད། ཅེས་སྒྲུབ་ལུང་རྣམས་བླ་མས་བརྗོད་པས་བརྡ་སྤྲོད་ཅིང༌། བཟླས་པ་རྣམས་རྗེས་ཟློས་བྱར་བཅུག་ལ་འདི་སྐད་དོ། །ཤར་ལྷོ་མཚམས་ཀྱི་ལས་མཁན་མ། །ལྷ་མའི་ལུས་ལ་སེང་གེའི་གདོང༌། །དགའ་རབ་ དབང་ཕྱུག་བུ་མོ་སྟེ། །འཁོར་དུ་ནག་མོ་འབུམ་དང་བཅས། །ཇེ་ཉེ་ཇེ་ཉེར་བྱོན་པར་བསམ། །ཨེ་མ་དིང་རི་དིང་རི་སིངྷ་ར་མ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལྷོ་ནུབ་མཚམས་ཀྱི༴ ལྷ་མའི་ལུས་ལ་སྟག་གདོང་མ། །ལངྐ་མགྲིན་བཅུའི་བུ༴ འཁོར་དུ་སེར་མོ༴ ཇེ་ཉེ༴ གཞན་འདྲ་བ་ལས་ཀཾ་ཀ་པ་རི། དཔེ་གཅིག་ར་ཏི་ལ་སྣང༌། ནུབ་བྱང་མཚམས་ཀྱི༴ ལྷ་མའི་ལུས་ལ་སྤྲེལ་གདོང་མ། །དབང་ཕྱུག་ཆེན་མའི༴ འཁོར་དུ་དམར་མོ༴ ཇེ་ཉེ༴ ཧ་ན་ཛ་ན་ཧཱུྃ། བྱང་ཤར་མཚམས༴ ལྷ་མའི་ལུས་ལ་སྤྱང་ཀིའི་གདོང༌། །འབྲོག་གནས་ཆེན་པའི་བུ་མོ་སྟེ། །འཁོར་དུ་སྔོན་མོ་འབུམ་དང་བཅས། །ཇེ་ཉེ་ཇེ་ཉེར༴ རཱ་ག་རཱ་ཏི། ཞེས་བཟླར་གཞུག་གོ །དེ་ལྟར་ནུབ་དང་པོ་ལྷ་སྒྲུབ་པའི་བྱིན་རླབས་དབང་གི་ཆུ་བོ་བཞི། ནུབ་གཉིས་པ་བསྙེན་སྒྲུབ་ལས་གསུམ་གྱི་སྒྲུབ་ལུགས། ནུབ་གསུམ་པ་ལ་སོགས་སྒྲུབ་བྲན་ལྟར་བཀོད་པའི་བྱེ་བྲག་མཆུ་ཆུང་བཞིའི་སྒྲུབ་ལུང་དང་བཅས་པ་རྣམས་འདིར་སྟན་ཐོག་གཅིག་ཏུ་དྲིལ་ནས་བསྐུར་བ་ཡིན་པས་ཇི་སྐད་གདམས་པ་ལྟར་བསྒྲུབ་པར་བགྱིའོ་སྙམ་པ་འདིའི༴ གཙོ་བོས་ཇི་ལྟར་སོགས་དང༌། གཏོང་རག་གི་མཎྜལ། དེང་ནས་བརྩམས་ཏེ་སོགས་ལུས་འབུལ། དགེ་བ་བསྔོ་བ་རྣམས་སྤྱི་ལྟར་དང༌། རྗེས་ཆོག་གཏོང་རག་མཆོད་བསྟོད་འདོད་དོན་གསོལ་བ་བཟོད་གསོལ་རྡུལ་ཚོན་དང་རས་བྲིས་ཀྱི་ཁྱད་པར་གྱི་གཤེགས་གསོལ་བརྟན་བཞུགས་བྱ་བ་རྣམས་ཕྱི་སྒྲུབ་ཞལ་གཉིས་མ་ལྟར་བྱས་རྗེས་བདག་དང་མདུན་བསྐྱེད་ཀྱི་གཙོ་མོ་དབྱེར་མེད་དུ་བྱས་ལ། རང་གི་ཐུགས་ཀའི་ཧྲཱིཿ འི་འོད་ཀྱིས་སྣོད་བཅུད་ཐམས་ཅད་དག་པའི་ འཁོར་ལོ་སྦྱངས། དེ་ཐམས་ཅད་རིམ་བཞིན་ཐུགས་སྲོག་ཧྲཱིཿ ཡིག་གི་བར་དུ་བསྡུས། དེའང་འོད་གསལ་རྣམ་པར་མི་རྟོག་པའི་དབྱིངས་སུ་ཐིམ་པར་མོས། དེའི་ངང་ལས་སླར་ཡང་རང་ཉིད་རྡོ་རྗེ་གཏུམ་མའི་སྐུར་ལངས་ལ་བསྔོ་སྨོན་དང་ཤིས་བརྗོད་ཀྱིས་མཐའ་བརྒྱན་ནོ། །དམ་ཆོས་སྡུག་བསྔལ་ཞི་བྱེད་ཀྱི་དབང་ཆོག་བཀླགས་པས་གྲུབ་པ་ལས་བཀའ་བབས་ཕྱི་མ་དཀྱིལ་འཁོར་ལ་བརྟེན་པའི་བླ་མ་ཡི་དམ་རྣམས་ཀྱི་དབང་ཆོག་བཤད་པའི་ལེ་ཚན་ནོ། །དར་རྒྱས་འཕེལ།། ༈ །།ༀ་སྭ་སྟི། ན་མོ་གུ་རུ་ཤྲཱི་མ་ཧཱ་ཀཱ་ལཱ་ཡ། ཞི་བྱེད་བརྒྱུད་པ་ཕྱི་མའི་བཀའ་སྲུང་ཆོས་སྐྱོང་གི་སྐོར་ལ། དང་པོ་གསང་བ་ལས་ཀྱང་ཆེས་གསང་བ་མགོན་པོ་བེར་ནག་གི་དབང་བསྐུར་བའི་ཆོ་ག་ལ། ཡོ་བྱད་བཤམས་པ་ནི། ཤིས་པའི་གནས་སུ་ཉེར་དགུ་ལ་སོགས་པ་དུས་ཁྱད་པར་ཅན་ལ། རྒྱས་པར་དཀྱིལ་འཁོར་སྒོ་རྫོགས་སམ། བསྡུ་ན་རྡོ་ར་མེ་རིས་ཟླུམ་པོར་བསྐོར་བའི་དབུས་ཆོས་འབྱུང་གྲུ་གསུམ་མཐིང་ནག་རྩེ་མོ་མདུན་བསྟན། ཟླ་གམ་དམར་པོ་དུར་ཁྲོད་ཀྱི་མཚན་མ་བཀོད་པའི་ཕྱིར་མུ་ཁྱུད་ཐོད་ཕྲེང་དཀར་པོ་གྲུ་གསུམ་གྱི་དབུས་སུ་མགོན་པོ་ལྕམ་དྲལ་གསུམ་དང་གཙོ་བོའི་མདུན་དུ་ལས་བདག་ཕོ་མོའི་མཚན་མ་འགོད། དེར་མཉྫིའི་སྟེང་དུ་བུམ་པ་ཆས་ལྡན་བཅུད་ཀྱིས་གཏམས་པ་དང༌། མདུན་དུ་དཔལ་གཏོར་གྱི་གྲས་ཧ་ཅང་མི་རྣོ་བ་ལ་རྩེར་ཙཀླི་དང་མདའ་དར་གྱིས་བརྒྱན་པ་ལ། འཁོར་གཡས་གཡོན་དུ་གྲུ་གསུམ་རེ། མདུན་དུ་གྲུ་གསུམ་ཆུང་བ་གཉིས་དང་མཐེབ་ཀྱུས་བསྐོར་བ། རྒྱབ་ཏུ་འབུལ་གཏོར་དང་སྨན་རཀ །གཞན་ཡང་མིག་དར་དང་མེ་ཏོག་སྔོན་པོ། མགོན་པོའི་སྐུ། ཨཱ་ལི་ཀཱ་ལིའི་སྔགས་བྱང༌། བིང༌། པར་བུ་ཁྲག་གིས་གང་བ། ཐུབ་པའི་སྐུ། མཁར་གསིལ། ལྷུང་བཟེད། སྣམ་སྦྱར། གདིང་བ། ཐོད་པ། གྲི་སྙིང་སོགས་ལས་སྦྱོར་ལ་དགོས་པའི་རྫས་ཅི་འབྱོར་ བསགས་ལ་ཅི་བདེར་བསྒྲིག །མཐའ་མཆོད་པས་བསྐོར་ཞིང་ཟུར་བཞིར་བིང༌། གྲི་སྙིང་དང་དར་སྣས་བརྒྱན་པ་རེ་འཛུག་པའང་བྲི། སྟེང་ན་དར་ནག་གི་གུར་ཕུབ། སློབ་དཔོན་གྱི་མདུན་དུ་ལས་བུམ། ཌཱ་དྲིལ་སོགས་འོག་ཏུ་དགོས་པའི་ཡོ་བྱད་ཐམས་ཅད་ཚང་བར་འདུ་བྱའོ། །དེ་ནས་སྒྲུབ་མཆོད་ལ་ཐོག་མར་བདག་བསྐྱེད་ནི། ཚོགས་ཞིང་རྣམས་མཁའ་ཁྱབ་ཏུ་སད་པར་མོས་ལ། ན་མོ། བླ་མ་དཀོན་མཆོག་ཡི་དམ་ལྷར། །དང་བའི་སེམས་ཀྱིས་ཕྱག་འཚལ་ལོ། །མཁའ་འགྲོ་ཆོས་སྐྱོང་ཐམས་ཅད་ལ། །ཡིད་ཀྱིས་སྤྲུལ་ཏེ་མཆོད་པ་འབུལ། །བདག་གིས་སྡིག་པ་ཅི་བགྱིས་པ། །དེ་དག་ཐམས་ཅད་སོ་སོར་བཤགས། །སེམས་ཅན་དོན་མཛད་རྒྱལ་སྲས་གང༌། །དེ་དག་ཀུན་ལ་རྗེས་ཡི་རང༌། །ཇི་སྲིད་འཁོར་བ་མ་སྟོང་བར། །མྱ་ངན་མི་འདའ་གསོལ་བ་འདེབས། །མགོན་པོ་ཐུགས་རྗེ་ཆེ་ལྡན་རྣམས། །ཆོས་ཀྱི་འཁོར་ལོ་བསྐོར་བར་བསྐུལ། །འགྲོ་ཀུན་བསགས་པའི་དགེ་བ་གང༌། །བྱང་ཆུབ་ཏུ་ནི་བདག་གིས་བསྔོ། །སངས་རྒྱས་ཆོས་དང་དགེ་འདུན་ལ། །ཐར་པ་འདོད་ཕྱིར་སྐྱབས་སུ་མཆི། །སེམས་ཅན་དོན་ཀུན་སྒྲུབ་པའི་ཕྱིར། །བྱང་ཆུབ་སེམས་གསུམ་བསྐྱེད་པར་བགྱི། །ཞེས་ལན་གསུམ་བརྗོད་ལ་ཚོགས་ཞིང་རྣམས་རང་ལ་བསྟིམ་མོ། །དེ་ནས་སྭ་བྷཱ་ཝའི་སྔགས་ཀྱིས་གཟུང་འཛིན་གྱི་དངོས་པོ་ཐམས་ཅད་འོད་གསལ་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླ་ཉི་མའི་གདན་སྟེང་རང་སེམས་ཧཱུྃ་ཡིག་སྔོན་པོ་འཕྲོ་འདུ་ཞུ་བ་ལས་རྡོ་རྗེ་ཧཱུྃ་གིས་མཚན་པ་དེ་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། ཚུར་འདུས་འོད་དུ་ ཞུ་བ་ལས། ༀ་བཛྲ་པཱ་ཎི་ཧཱུྃ་ཕཊ། ཅེས་བརྗོད་པས་བདག་ཉིད་རྡོ་རྗེ་གཏུམ་པོ་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ། ཞལ་གདངས་ཤིང་མཆེ་བ་གཙིགས་པ། ཕྱག་གཡས་རྡོ་རྗེ་བསྡིགས་པའི་ཚུལ་དང༌༑ གཡོན་སྡིགས་མཛུབ་རྔམས་པའི་ཚུལ་ཅན། དར་གྱི་ཅོད་པན་དང་སྦྲུལ་དང་རིན་པོ་ཆེའི་རྒྱན་གྱིས་བརྒྱན་པ། མེ་དཔུང་འབར་བའི་ཀློང་ན་གཡོན་བརྐྱང་བའི་དོར་སྟབས་ཀྱིས་བཞུགས་པའི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་སྔོན་པོ་དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་རང་འདྲའི་ཡེ་ཤེས་པ་བཛྲ་ས་མཱ་ཛཿ ས་སྤྱན་དྲངས་ལ། ཨ་ཏི་པཱུ་ཧོཿ པྲ་ཏི་ཙ་ཧོ་ཞེས་པས་ཕྱག་བྱས། ཨརྒྷཾ་ནས། ཤབྡའི་བར་གྱིས་མཆོད། ཧཱུྃ། ལྕང་ལོ་ཅན་གྱི་གནས་མཆོག་ནས། །བཅོམ་ལྡན་རྡོ་རྗེ་གཏུམ་པོ་ནི། །ཡོན་ཏན་ཐམས་ཅད་སྐུ་ལ་རྫོགས། །སྐྱོན་མེད་སྐུ་ལ་ཕྱག་འཚལ་བསྟོད། །ཅེས་བསྟོད་ལ་ཛཿ ཧཱུྃ་བཾ་ཧོཿ ས་གཉིས་སུ་མེད་པར་ཐིམ། རང་གི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་སྔོན་པོ་བཟླ་བྱའི་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས། རྒྱལ་བ་རྣམས་མཆོད། སེམས་ཅན་གྱི་སྡིག་སྒྲིབ་སྦྱངས། ཚུར་འདུས་རང་ལ་ཐིམ་པས་སྣང་གྲག་འགྱུ་གསུམ་ལྷ་སྔགས་འོད་གསལ་གྱི་འཁོར་ལོར་དག་པར་བསམ་ལ། ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཅེས་ཅི་ནུས་བཟླས་མཐར་རང་གི་སྙིང་གའི་འོད་ཀྱིས་རེག་པས་སྣོད་བཅུད་འོད་དུ་ཞུ་ནས་ཐུགས་སྲོག་ཧཱུྃ་གི་བར་བསྡུས། དེའང་གྱེན་རྫོགས་ མི་དམིགས་པའི་དབྱིངས་སུ་ཐིམ་པར་བསམ། དེའི་ངང་ལས་ༀ་བཛྲ་པཱ་ཎི་ཧཱུྃ་ཕཊ། ཅེས་པས་བདག་ཉིད་རྡོ་རྗེ་གཏུམ་པའི་སྐུར་གྱུར། དེ་ནས་ༀ་བཛྲ་སརྦ་བིགྷྣན་ནཱ་ཤ་ཡ་ནཱ་ཤ་ཡ་ཧཱུྃ་ཕཊ། ཅེས་བརྗོད་པས་རང་གི་ཐུགས་ཀ་ནས་མཚོན་ཆ་རྣོན་པའི་སྤྲིན་ལས་འབར་བའི་མེ་འོད་ཚ་ཞིང་རྩུབ་པ་སྤྲོས། དགྲ་བགེགས་གདུག་པ་ཅན་ཐམས་ཅད་བསྡིགས་བསྐྲད་བརླག་པར་བྱས། ཚུར་འདུས་རྡོ་རྗེའི་ས་གཞི་ར་བ་དྲྭ་བ་གུར་བླ་རེ་ཡེ་ཤེས་ཀྱི་མེ་འབར་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་གྱུར། མཆོད་རྫས་བརླབ་པ་ནི། བདག་གི་ཐུགས་ཀ་ནས་རཾ་ཡཾ་ཁཾ་སྤྲོས་མཆོད་རྫས་ཀྱི་དངོས་འཛིན་ཉེས་སྐྱོན་ཐམས་ཅད་བསྲེགས་གཏོར་བཀྲུས་ཏེ་སྟོང་པར་གྱུར། སྟོང་པའི་ངང་ལས་རིན་པོ་ཆེ་དང་པདྨ་འབར་བའི་སྣོད་དུ་ཧཱུྃ་ལས་ཕྱི་ནང་གི་ཉེར་སྤྱོད་ཐམས་ཅད་སོ་སའི་མཚན་ཉིད་རྫོགས་པ་ནམ་མཁའ་གང་བར་གྱུར། ༀ་བཛྲ་པུཥྤེ་ཨཱཿ ཧཱུྃ་ནས། ཤབྡའི་བར་བརྗོད། ཨ་ལས་སྣོད་ཀ་པཱ་ལར་བཅུད་ཤ་ལྔ་བདུད་རྩི་ལྔ་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་མ་ཧཱ་སརྦ་པཉྩ་ཨ་མྲྀ་ཏ་ༀ་ཨཱཿ ཧཱུྃ། ཨ་ལས་འདབ་བརྒྱད་རིན་པོ་ཆེའི་པད་ཕོར་སྟོང་གསུམ་ཁྱབ་པའི་ནང་དུ་འབྲུ་གསུམ་ཞུ་བ་ལས་བྱུང་བའི་གཏོར་མ་འདོད་ཡོན་གྱི་ཕུང་པོ་ཟད་མི་ཤེས་པའི་གཏེར་དུ་གྱུར། ༀ་བ་ལ་ཏ་མ་ཧཱ་བ་ལིངྟ་ༀ་ཨཱཿ ཧཱུྃ། ཨ་ལས་དམར་གྱི་དུང་ཆེན་དུ་ར་ཡིག་ཞུ་བ་ལས་བྱུང་བའི་ཆགས་མེད་རཀྟའི་ རྒྱ་མཚོ་ཆེན་པོར་གྱུར། ༀ་མ་ཧཱ་རཀྟ་ཛྭ་ལ་ཨཱཿ ཧཱུྃ། ཞེས་པའི་སྔགས་རྣམས་བདུན་ནམ་གསུམ་རེ་བརྗོད་པས་བྱིན་གྱིས་བརླབ་བོ། །དེ་ནས་མདུན་རྟེན་སྭ་བྷཱ་ཝས་བསང་སྦྱངས། སྟོང་པའི་ངང་ལས་མདུན་གྱི་ནམ་མཁར་དུར་ཁྲོད་ཆེན་པོ་འཇིགས་སུ་རུང་ཞིང་སྐྱི་གཡའ་བའི་གནས་སུ་དུར་ཁྲོད་རོལ་པའི་གཞལ་ཡས་ཁང་ཆེན་པོའི་ནང་གྲུ་གསུམ་མཐིང་ནག་འབར་བའི་དབུས་སུ་པཾ་ལས་པདྨ་རཾ་ལས་ཉི་མའི་གདན་སྟེང་དུ་ཧཱུྃ་ལས་ཙནྡན་གྱི་བེང་ཆེན་ཧཱུྃ་གིས་མཚན་པ་ལས་འོད་ཟེར་འཕྲོས་དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཧཱུྃ་ལ་ཐིམ། དེ་ཡང་ཡོངས་སུ་གྱུར་པ་ལས་དཔལ་ཡེ་ཤེས་ཀྱི་མགོན་པོ་ནག་པོ་ཆེན་པོ་ཨ་གྷོ་ར་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། གཡས་ཙནྡན་གྱི་བིང་ཆེན་དང༌། གཡོན་ཁྲག་གིས་གང་བའི་པར་བུ་དཀུ་ལ་བརྟེན་པ། སྤྱན་གསུམ་སྡང་མིག་ཏུ་བལྟ་བ། ཞལ་གདངས་ཤིང་མཆེ་བ་གཙིགས་པ། སྨ་ར་དང་སྨིན་མ་འབར་ཞིང༌། རལ་པ་ཁམ་ནག་གྱེན་དུ་བརྫེས་པ། སྐུ་ལ་དར་ནག་སྔོ་ཁྲའི་འཇོལ་བེར་གསོལ་ཞིང་གསེར་སྐེད་བཅིངས་པ། ཐོད་སྦྲུལ་དང་རིན་པོ་ཆེའི་རྒྱན་ཅན། སག་ཏིའི་ལྷ ྭ མ་ཡུ་རིང་གསོལ་ནས་གཡོན་བརྐྱང་གི་སྟབས་ཀྱིས་མི་རའི་སྟེང་ན་འགྱིང་ཞིང་བརྗིད་པ། མེ་དཔུང་འབར་བའི་དབུས་ན་བཞུགས་པའོ། །དེའི་ཐུགས་ཀར་ཉི་མ་ལ་གནས་པའི་ཧཱུྃ་མཐིང་ནག་ལས་རཾ་ཆད་པ་དེ་ཡོངས་སུ་གྱུར་པ་ལས་གཡས་སུ་བདུད་པོ་ལེགས་ལྡན་ནག་པོ་ དར་ནག་གི་བེར་ཅན་རལ་པ་ནག་པོ་རྒྱབ་ཏུ་གཏིབས་པ། གཡས་མདུང་དར་རུ་མཚོན་འཕྱར་ཞིང༌། གཡོན་དགྲ་སྙིང་ཟ་བ། སྟག་རལ་དང་གཟིག་ཤུབས་བཏགས་ཤིང་རྟ་ནག་རྟིང་དཀར་ལ་ཆིབས་པ། གཡོན་དུ་བྷྱོ་ཆད་པ་ལས་རེ་མ་ཏཱི་སྔོ་སྐྱ་གཡས་ཁྲམ་ཤིང་དང་གཡོན་ནད་རྐྱལ་ཐོགས་པ། མ་མའི་ཆས་ཅན་དྲེལ་རྟ་རྐང་གསུམ་ལ་ཆིབས་པ། གཙོ་མའི་མདུན་དུ་ཏྲག་ཡིག་རེ་རེ་ཆད་པ་ལས་ཕོ་ཉ་ལས་བདག་ཕོ་མོ་གཉིས་ཀ་ཁྲག་མདོག་བསྭེའི་ལན་ཕྲན་ཅན་སྤྲིན་དམར་གྱི་གཡང་གཞི་གྱོན་ཅིང་སྲིན་པོའི་སྙིང་དྲོན་མོ་ཟ་བ། གཞན་ཡང་སྤྲུལ་པ་ཡང་སྤྲུལ་ཕོ་ཉ་ལས་བྱེད་དྲེགས་པའི་ཚོགས་བསམ་གྱིས་མི་ཁྱབ་པས་བསྐོར་བའི་གཙོ་འཁོར་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་མགོན་པོ་འཁོར་བཅས་བཛྲ་ས་མཱ་ཛཿ ཧསྟ་གཡབ་ཅིང་རོལ་མོ་དང་བཅས་པས། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་མ་ཧཱ་ཀཱ་ལ་ཆེ། །དཀྱིལ་འཁོར་གནས་འདིར་གཤེགས་སུ་གསོལ། །བདག་གི་ལས་བཅོལ་སྒྲུབ་པར་མཛོད། །ༀ་མ་ཧཱ་ཀཱ་ལ་རཀྵ་དུ་བིང་ནི་ཛཿ ཛཿ ཛཿ ཧཱུྃ་བཾ་ཧོཿ ཞེས་པས་སྤྱན་དྲངས་ཤིང་བསྟིམ་ལ། ས་མ་ཡ་ཏིཥྛ་ལྷན། ཞེས་བཞུགས་སུ་གསོལ། ༀ་མ་ཧཱ་ཀཱ་ལ་ཨ་ཏི་པཱུ་ཧོཿ པྲ་ཏིཙྪ་ཧོཿ ཞེས་ཕྱག་འཚལ། ཧཱུྃ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་ བཞེས་སུ་གསོལ། །ༀ་མ་ཧཱ་ཀཱ་ལ་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། ༀ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧིས་བདུད་རྩི། མ་ཧཱ་རཀྟ་ཁཱ་ཧིས་ཁྲག་སྐྱེམས་བྲན། གཏོར་མ་ༀ་མ་ཧཱ་ཀཱ་ལ་དུ་བིང་ནི་ཛཿ ས་པ་རི་ཝཱ་ར་ཨི་དཾ་བ་ལ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་ཕུལ་ལ། བསྟོད་པ་ནི། ཧཱུྃ། བདེ་ཆེན་འདུ་འབྲལ་མེད་པའི་ཀློང་དཀྱིལ་ནས། །ཡང་དག་གསང་བའི་སྐུ་གཅིག་བྱུང་བ་ནི། །མཐིང་ནག་མི་སྲུན་འཇིགས་བྱེད་འབར་བའི་སྐུ། །ཉིད་ཀྱི་སྐུ་མདོག་མཐིང་ནག་འཇིགས་པ་ལ། །དབུ་སྐྲ་ཁམ་ནག་རལ་པ་གྱེན་དུ་འཁྱིལ། །སྨིན་མ་དམར་སེར་ཁྲོ་གཉེར་བརྗིད་པའི་ཞལ། །སྤྱན་ལྡོག་ཞལ་བགྲད་རྣོ་གདུག་མཆེ་བ་གཙིགས། །སྡང་བའི་དགྲ་བགེགས་མ་ལུས་སྲོག་རྩ་གཅོད། ། ཕྱག་གཉིས་ཐབས་དང་ཤེས་རབ་ཟུང་དུ་འབྲེལ། །གཡས་ཀྱི་ཕྱག་ན་ཙནྡན་བིང་ཆེན་བསྣམས། །གསོར་ཞིང་དགྲ་བགེགས་ཀླད་པའི་རྒྱས་སུ་བརྡེག །གཡོན་གྱི་ཕྱག་ན་པར་བུ་དཀུ་ལ་བརྟེན། །དམ་ཉམས་དགྲ་བོ་ཀུན་གྱི་སྙིང་ཁྲག་གསོལ། །སྐུ་ལ་དར་ནག་སྔོ་ཁྲའི་འཇོལ་བེར་གསོལ། །གསེར་སྐ་རིན་ཆེན་འབར་བ་སྐེད་ལ་བཅིངས། །ཞབས་ལ་སག་ཏིའི་ཟ་འོག་འབོལ་ཅན་གསོལ། །མ་ཧཱ་ཀཱ་ལའི་ཚོགས་ནི་སྤྲིན་ལྟར་གཏིབས། །དམ་ཉམས་དགྲ་བགེགས་མ་ལུས་རྩད་ནས་གཅོད། །དཔལ་མགོན་ནག་པོ་ཆེན་པོ་ཁྱོད་ལ་བསྟོད། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །གཞན་གྱིས་མི་ཐུབ་ལེགས་ལྡན་ནག་པོ་ཆེ། །ལྷ་མོ་གཤིན་རྗེའི་ལྕམ་གཅིག་ བདུད་ཀྱི་ཡུམ། །ལས་ཀྱི་གནོད་སྦྱིན་ཕོ་མོ་སྲོག་དབུགས་བདག །འཁོར་ཚོགས་དྲེགས་པའི་དཔུང་དང་བཅས་ལ་བསྟོད། །དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་སྒྲུབ་པར་མཛོད། །ཅེས་བསྟོད་ནས། མགོན་པའི་ཐུགས་ཀར་ཉི་མ་ལ་གནས་པའི་ཧཱུྃ་མཐིང་ནག་བཟླ་བྱའི་སྔགས་ཀྱིས་བསྐོར་བ་ལ་བདག་གི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས་ཐུགས་རྒྱུད་བསྐུལ་ཏེ་བཀའ་ནོད་ཅིང་ཕྲིན་ལས་སྒྲུབ་པར་བསམས་ལ། ༀ་མ་ཧཱ་ཀཱ་ལ་དུ་བིང་ནི་ཛཿ ༀ་ཤྲཱི་མ་ཧཱ་ཀཱ་ལ་རཱུ་པ་ཧཱུྃ་ཕཊ། གཙོ་སྔགས་སོ། །ༀ་མ་ཧཱ་ཀཱ་ལ་ཏྲཀྴད་མ་མ་རུ་ཙི་ཧཱུྃ། ལས་མགོན། ༀ་མ་མ་རུ་རུ་ཙི་རཀྨོ་ཙ་ལེ་ཙ་ལེ་བྷྱོ། རེ་མ་ཏཱིའོ། །ཏྲཀ་རཀྴ་ཡ༑ སྙིང་ཁ་ལ་རཀྴ་ཡ། བཛྲ་དུན་རྦད། དུ་བིང་ཛཿ ཛཿ སྙིང་ཁ་ལ་ཡ་རཀྴ་ལེ་ཛཿ ཛཿ ཐུན་ཡ་ཛཿ ཛཿ མོགྴ་དགྲ་བོ་ཛཿ ཛཿ ༀ་རུ་ལུ་རུ་ལུ་ཧཱུྃ་བྷྱོ་ཧཱུཾ། རཀྴ་ཙིཏྟ་ཤམ་ལོང་། སྙིང་ཁ་ལ་མ་རཀྴ་ཡ། ཨ་མུ་ཀ་ཐུམ་རི་ལི་ལི། རྦད་ཕཊ་སོད་མཱ་ར་ཡ་ཕཊ། དགྲ་བའི་ཤ་ལ་ཡཾ་ཡཾ། དགྲ་བའི་སྙིང་ལ་རྒྱུག །ཅེས་པ་ལས་བདག་ཕོ་མོའི་སྲོག་སྙིང་ངོ༌། །དེ་ལྟར་གཙོ་འཁོར་གྱི་འགྲོས་སྦྱར་ནས་ཅི་ནུས་བཟླའོ། །དེ་ནས་ལས་བུམ་དུ། བགེགས་མཐར་བྱེད་ལྗང་ནག་རྒྱ་གྲམ་དང་དྲིལ་བུ་འཛིན་པ་སྐད་ཅིག་གིས་གསལ་བར་བསམས་ལ། ༀ་ཨཱཿ བིགྷྣའན་ཏ་ཀྲི་ཏ་ཧཱུྃ་ཕཊ། ཅེས་བཟླས་ནས་ཧཱུྃ་ཞེས་པས་བདུད་རྩིར་ཞུ་བར་བསམ་ཞིང༌། དེས་རྣམ་བུམ་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ ཡོངས་སུ་རྫོགས་པའི་ནང་གྲུ་གསུམ་མཐིང་ནག་འབར་བའི་དབུས་སུ་པད་ཉིའི་གདན་སྟེང་ཧཱུྃ་ལས་བེང་ཆེན་ཧཱུྃ་གིས་མཚན་པ་ལས་འོད་ཟེར་སྤྲོ་བསྡུས་དཔལ་ཡེ་ཤེས་ཀྱི་མགོན་པོ་ནག་པོ་ཆེན་པོ། དེའི་ཐུགས་ཀ་ནས་རཾ་དང་བྷྱོ་སྤྲོས་པ་ལས་གཡས་གཡོན་དུ་ལེགས་ལྡན་དང་རེ་མ་ཏཱི་མདུན་དུ་ཏྲག་ཡིག་ལས་ཕོ་ཉ་ལས་བདག་ཕོ་མོ་རྣམས་སྐད་ཅིག་གིས་གསལ་བའི་གནས་གསུམ་དུ་ༀ་ཨཱཿ ཧཱུྃ། ཧཱུྃ་ལས་འོད་ཟེར་འཕྲོས་པས་ཡེ་ཤེས་པ་བཛྲ་ས་མཱ་ཛཿ ༀ་མ་ཧཱ་ཀཱ་ལ་དུ་བིང་ནི་ཛཿ ཛཿ ཧཱུྃ་བཾ་ཧོཿ ས་སྤྱན་དྲངས་ཤིང་བསྟིམ། ས་མ་ཡ་ཏིཥྛ་ལྷན། ཨ་ཏི་པུ་ཧོཿ པྲ་ཏཱི་ཙ་ཧོཿ ས་བཞུགས་སུ་གསོལ་ཞིང་ཕྱག་བྱ། ༀ་མ་ཧཱ་ཀཱ་ལ་ས་པ་རི་ཝཱ་ར་ཨརྒྷཾ་ནས་ཤབྡའི་བར་དང༌། ཨ་མྲྀ་ཏ་རཀྟ་བ་ལ་ཏ་ཁ་ཁ་ཁཱ་ཧི་ཁཱ་ཧིས་མཆོད། ཧཱུྃ། ལྷ་མིན་གདུག་པའི་དམག་ཚོགས་གཡུལ་བཟློག་ཅིང༌། །སྟོབས་ལྡན་ལྷ་དབང་དཀར་པོ་འབུམ་དང་བཅས། །བགེགས་འདུལ་དཔལ་ལྡན་མགོན་པོ་འཁོར་བཅས་ལ། །དད་པའི་སེམས་ཀྱིས་བསྟོད་ཅིང་ཕྱག་འཚལ་ལོ། །ཞེས་བསྟོད། རང་གི་སྙིང་ག་ནས་སྔགས་ཕྲེང་གཟུངས་ཐག་ལ་འཁྲིལ་ཏེ་སོང་བས་ཐུགས་དམ་བསྐུལ། སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ། གཟུངས་ཐག་ལ་འཇུས་ཏེ། ཀཱ་ལ་དུ་བིང་དང༌། ཀཱ་ལ་རཱུ་པ། ཨ་བྷི་ཥེ་ཀ་ཏ་རྣམས་ཅི་རིགས་བཟླས་ནས། ༀ་ཨཱཿ ཧཱུྃ་གིས་མཆོད་ཡོན་ཕུལ་བས་ལྷ་འོད་དུ་ཞུ་བས་བུམ་ཆུ་ནུས་ལྡན་དུ་བསམ་མོ། །དེ་ནས་དབང་ལ་གཉིས་ལས། དང་པོ་སློབ་དཔོན་འཇུག་ཅིང་དབང་ནོད་པ་ཆོ་ག་རྒྱས་བསྡུས་ ཅི་རིགས་པས་བླང་བར་བྱའོ། །གཉིས་པ་སློབ་མ་གཞུག་ཅིང་དབང་བསྐུར་བ་ནི། སློབ་མ་རྣམས་ཁྲུས་དང་ཕྱག་བྱས། གོས་ནག་པོ་གྱོན་ནས་གྲལ་དུ་འཁོད་པ་ལ། བགེགས་བསྐྲད་སེམས་བསྐྱེད་གསལ་བཏབ་ནས། འདིར་རང་ཅག་རྣམས་ཀྱིས་རྟེན་ཕུན་སུམ་ཚོགས་པའི་མི་ལུས་རིན་པོ་ཆེ་ཐོབ་པའི་དུས་འདིར་དམ་པའི་ཆོས་རྣམ་པར་དག་པ་ཞིག་བསྒྲུབ་དགོས་སོ། །དེ་སྒྲུབ་པ་ལ་འགལ་རྐྱེན་བར་ཆད་བསལ་ཞིང་མཐུན་རྐྱེན་ཡིད་བཞིན་དུ་སྒྲུབ་པར་ནུས་པའི་སྲུང་མ་མཐུ་ལྡན་ཞིག་ལ་བརྟེན་པ་གལ་ཆེ། དེ་ཡང་འཇིག་རྟེན་པའི་ལྷས་ནི་གནས་སྐབས་སུ་ཕྲིན་ལས་ཕྲ་མོ་འགྲུབ་ཏུ་སྲིད་ཀྱང་མཐར་ཐུག་ལོག་པའི་ལམ་ལ་སྦྱོར་ཞིང་འཁུ་ལྡོག་ཕྲ་མོ་ཙམ་ལ་ཡང་ལུས་སྲོག་ལ་བར་དུ་གཅོད་པ་སོགས་ཉེས་དམིགས་ཆེ་ཞིང་ཕན་ཡོན་ཆུང་བས་བློ་གྲོས་དང་ལྡན་པ་རྣམས་ཀྱིས་ནི་འཇིག་རྟེན་ལས་འདས་པའི་སྲུང་མ་ཁྱད་པར་ཅན་ཞིག་བརྟེན་དགོས། དེ་ལའང་དཔལ་ཆེན་པོ་ཉིད་གང་འདུལ་གྱི་གཉེན་པོར་རྒྱུད་གསུམ་དྲེགས་པའི་རྣམ་པར་བཞེངས་པའི་རྒྱུད་སྒྲུབ་ཐབས་ཕྲིན་ལས་ཀྱི་རིམ་པ་ཇི་སྙེད་ཅིག་མཆིས་པ་ལས། འདིར་ཆུ་ཀླུང་ཆེན་པའི་རྒྱུད་ལས། ལྷ་ཆེན་མ་ཧཱ་ཀཱ་ལ་ཁྱོད་ལ་གཏད། །ཅེས་གསུངས་པ་ལྟར། དམ་པའི་ཆོས་སྡུག་བསྔལ་ཞི་བྱེད་ཀྱི་བཀའ་སྲུང་དཔལ་ཡེ་ཤེས་ཀྱི་མགོན་པོ་ཨ་གྷོ་ར་ཉིད་གསང་བ་པར་ནག་ཅན་དུ་སྒྲུབ་པའི་དབང་གི་བཀའ་གསང་བ་ལས་ཀྱང་ཆེས་གསང་བ་ཤིན་ཏུ་ཟབ་ཅིང་གཉན་པ་འདི་སྒྲུབ་པར་བྱེད་པ་ལ། སློབ་དཔོན་གྱི་བྱ་བ་རྣམས་ སྔོན་དུ་སོང༌། ད་སློབ་མའི་ངོ་སྐལ་དུ་གྱུར་པ་ལ་ཐོག་མར་མཎྜལ་ཕུལ་མཛོད། དེ་ནས་སློབ་དཔོན་གསང་བའི་བདག་པོ་དང་གཉིས་སུ་མེད་པ་ལ་པུས་བཙུགས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས༴ བླ་མ་རྡོ་རྗེ་འཛིན་པ་དང༌། །དཔལ་ཆེན་ཡེ་ཤེས་མགོན་པོ་ལ། །གུས་པ་མཆོག་གིས་སྐྱབས་མཆི་ཡིས། །བདག་ལ་དབང་བསྐུར་བཀའ་དྲིན་སྐྱོངས། །ཞེས་ལན་གསུམ། ཁྱེད་རང་རྣམས་ཡེ་ཤེས་ཀྱི་མགོན་པོར་སྐད་ཅིག་གིས་གསལ་བར་མོས་ལ་ཆས་སུ་གཞུག་པ་ནི། བུ་ལ་བདུད་རྩི་གཏོར་ཞིང༌། ཨ་ཁཾ་ཝཱི་ར་ཧཱུྃ་ལན་གཉིས་ཀྱིས་མིག་དར་སྔོན་པོ་བཀབ་ཅིང་མེ་ཏོག་སྔོན་པོ་གཏད། བུའི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུྃ་ཡིག་རྣམས་ཀྱིས་མཚན་པར་བསམ། དེ་ནས་རྒྱུད་དག་པར་བྱ་བའི་ཕྱིར་མདུན་གྱི་ནམ་མཁར་ཚོགས་ཞིང་སད་པར་མོས་ལ་འདིའི་རྗེས༴ ན་མོ་བླ་མ་དཀོན་མཆོག་ཡི་དམ་ལྷ། །ཞེས་པ་ནས། བྱང་ཆུབ་སེམས་གསུམ་བསྐྱེད་པར་བགྱི། །ཞེས་པའི་བར་ལན་གསུམ། གསང་སྔགས་ཀྱི་དམ་ཚིག་རྣམས་ཚུལ་བཞིན་དུ་གཟུང་སྙམ་པས་འདིའི༴ གསང་བ་སྔགས་ཀྱི་དམ་ཚིག་ནི། །བདེ་གཤེགས་རིགས་ལྔའི་སྡོམ་པ་བཟུང༌། །བཅུ་བཞིར་ཕྱེ་བའི་ལྟུང་བ་དང༌། །ཡན་ལག་ཉེས་པ་སྤང་བར་བགྱི། །ལན་གསུམ། སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་གནས་པར་བསམ་ལ་འདིའི༴ ༀ་ཡོ་ག་ཙིཏྟ་ཨུཏྤཱ་དཱ་ཡ་མི། སློབ་དཔོན་གྱིས་རྡོ་རྗེ་སྙིང་གར་བཞག་ལ། སུ་ར་ཏེ་ས་མ་ཡ་སྟྭཾ། བོ་དྷི་ཙིཏྟ་ཡ་ཐཱ་སུ་ཁཾ། ཞེས་རྣལ་འབྱོར་དུ་སེམས་བསྐྱེད། དེ་ནས་ཧཱུྃ་ཛཿ ཞེས་ལས་ཀྱི་རྡོ་རྗེས་ཁྲིད་དེ་དཀྱིལ་འཁོར་དུ་བཅུག་ནས་ཤར་ཕྱོགས་སུ་འཁོད་པའི་མོས་པ་མཛོད། དམ་ལ་བཞག་པ་ནི། རྡོ་རྗེ་སྙིང་གར༑ མགོན་པོ་ནག་པོ་དེང་ཁྱོད་ཀྱི། །སྙིང་ལ་ཡང་དག་ཞུགས་གྱུར་པས། །ཚུལ་འདི་གཞན་ལ་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །མནའ་ཆུ་བླུད་པ་ནི། བདུད་རྩི་བྱིན་ལ། ༀ་བཛྲ་ས་མ་ཡ་ཨུ་ད་ཀ་ཧཱུྃ། དེ་ནས་ནང་འཇུག་གི་དངོས་གཞི་ཡེ་ཤེས་དབབ་པའི་སླད་དུ་གསོལ་བ་གདབ་པ་འདིའི་རྗེས༴ དཔལ་ཡེ་ཤེས་ཀྱི་མགོན་པོ་འཁོར་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོས་བདག་ལ་བྱིན་གྱིས་བརླབ་ཏུ་གསོལ། ཞེས་ལན་གསུམ། དེ་ནས་ལུས་ཀྱི་གནད་ཙོག་པུར་འདུག་ལ། སྒལ་ཚིགས་བསྲང༌། ཐལ་མོ་སྤྱི་བོར་སྦྱོར། ངག་རླུང་ཁ་སྦྱོར་དུ་འཆིང༌། སེམས་ཀྱི་གནད་ཁྱེད་རང་གི་ལུས་མི་དམིགས་པ་སྟོང་པའི་ངང་ལས་པད་ཉི་རའི་གདན་ལ་སེམས་ཉིད་ཧཱུྃ་ལས་བིང་ཆེན་ཧཱུྃ་གིས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་མགོན་པོ་ནག་པོ་ཆེན་པོ་མཐིང་ནག་བིང་དང་ཁྲག་གིས་གང་བའི་ལྕགས་པར་བསྣམས་པ། དར་ནག་གི་བེར་དང་གསེར་སྐེད་སཀྟིའི་ལྷྭམ་གསོལ་ཞིང་ཐོད་སྦྲུལ་དང༌། རིན་པོ་ཆེས་བརྒྱན་པ། གཏུམ་ཞིང་མི་བསྲུན་པའི་ཉམས་ཅན་གཡོན་བརྐྱང་གི་སྟབས་ཀྱིས་བཞུགས་པར་བསྒོམ་མཛོད། བླ་མ་ལ་གུས་འདུད་ དྲག་པོ་བྱས་པས་བླ་མའི་ཐུགས་ཀ་ནས་འོད་ཟེར་འཕྲོས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཔལ་ཡེ་ཤེས་ཀྱི་མགོན་པོ་ལྕམ་དྲལ་གསུམ་ལས་བདག་ཕོ་མོ་དང་བཅས་པའི་རྣམ་པར་ཁ་ཆར་དང་བུ་ཡུག་འཚུབས་པ་ལྟར་བྱོན་ནས་ཁྱེད་རང་ལ་སིབ་སིབ་ཐིམ་པའི་མོས་པ་མཛོད། ཤ་ཆེན་གྱི་སྤོས་བདུག་ཅིང་རོལ་མོ་སྣ་ཚོགས་པའི་སྒྲ་སྦྱར་ཏེ། ༀ་ཨ་གྷོ་ར་མ་ཧཱ་ཀཱ་ལ་དུ་བིང་ཛཿ ཨཱ་ཝེ་ཤ་ཡ་ཨ་ཨ་ཞེས་དྲག་ཏུ་བརྗོད་པས་དབབ། དེ་བརྟན་ཕྱིར་མེ་ཏོག་འཐོར་ལ་ཏིཥྛ་བཛྲ་ཞེས་བརྟན་པར་བྱ། དེ་ནས་ཡེ་ཤེས་ཀྱི་མགོན་པའི་དབུ་ལ་མེ་ཏོག་ཕུལ་བར་མོས་ལ་འདིའི༴ པྲ་ཏཱིཙྪ་བཛྲ་ཧོཿ ཞེས་དོར། སླར་ཡང་མེ་ཏོག་དེ་རང་གི་སྤྱི་བོར་བཅིངས་པའི་མོས་པ་མཛོད། ༀ་མ་ཧཱ་ཀཱ་ལ་ཧཱུྃ་ཛཿ ཞེས་སྤྱི་བོར་བཀོད། ཙཀྵུ་པྲ་བེ་ཤ་ཡ་ཕཊ་ཅེས་པས་མིག་དར་བསལ་ལ། ཧེ་བཛྲ་པཱ་ཤྱ། འདི་ན་དཔལ་ཡེ་ཤེས་ཀྱི་མགོན་པོ་ཨ་གྷོ་ར་པར་བུ་ནག་པོ་ལྕམ་དྲལ་འཁོར་དང་བཅས་པའི་དཀྱིལ་འཁོར་ཆེན་པོ་བཞུགས་པ་ལ་མངོན་སུམ་བཞིན་དུ་མཐོང་བར་གྱུར་སྙམ་པ་མཛོད། དེས་འཇུག་པའི་ཆོས་རྣམས་སོང༌། དབང་དངོས་ལ་བཞི་ལས། དང་པོ་བུམ་དབང་ཞུ་བའི་དོན་དུ་གསོལ་བ་གདབ་པ་འདིའི༴ སངས་རྒྱས་བསྟན་པ་སྲུང་བྱེད་པའི། །དཔལ་ཆེན་མགོན་པོ་ཆེན་པོ་ཡི། །དྲག་ཅིང་གསང་བའི་དབང་མཆོག་དེ། །དེ་རིང་བདག་གིས་ཐོབ་པར་མཛོད། །ལན་གསུམ། དེ་ནས་བླ་མ་ལ་མོས་གུས་དུང་བ་བྱས་པས་ཐུགས་ཀ་ནས་འོད་ཟེར་འཕྲོས། ཁྱེད་རང་གི་ལུས་ལ་ཕོག ། སྡིག་སྒྲིབ་ཐམས་ཅད་བསྲེགས། མ་དག་པའི་སྣང་བ་ཐམས་ཅད་སྦྱངས། སྟོང་པའི་ངང་ལས་དུར་ཁྲོད་རོལ་པའི་གཞལ་ཡས་ཁང་ནང་ཆོས་འབྱུང་མཐིང་ནག་གི་ལྟེ་བར་པད་ཉི་རའི་གདན་ལ་ཧཱུྃ་ལས་བིང་ཆེན་ཧཱུྃ་གིས་མཚན་པ་ཡོངས་སུ་གྱུར་པ་ལས་ཁྱེད་རང་དཔལ་ཡེ་ཤེས་ཀྱི་མགོན་པོ་ཨ་གྷོ་ར་མཐིང་ནག་དར་ནག་གི་བེར་ཅན་བིང་དང་ལྕགས་པར་འཛིན་པའི་སྐུར་གྱུར། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་རང་བཞིན་གྱི་གནས་ནས་ཡེ་ཤེས་ཀྱི་མགོན་པོ་སྤྱན་དྲངས་ཁྱེད་རང་ལ་ཐིམ་པའི་མོས་པ་མཛོད། ༀ་མ་ཧཱ་ཀཱ་ལ་དུ་བེང་ནི་ཛཿ ཛཿ ཧཱུྃ་བཾ་ཧོཿ ཞེས་རོལ་མོ་བྱ། སླར་ཡང་སློབ་དཔོན་གྱི་ཐུགས་ཀ་ནས་འོད་འཕྲོས་དབང་གི་ལྷ་རིགས་ལྔ་འཁོར་བཅས་བཛྲ་ས་མཱ་ཛཿ ས་སྤྱན་དྲངས། ཨརྒྷཾ་ལ་སོགས་པས་མཆོད། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ལ་ཤ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས་དེ་རྣམས་ཀྱིས་བུམ་པའི་ཆུས་དབང་བསྐུར་བའི་མོས་པ་མཛོད། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ལ་ཨ་བྷི་ཥིཉྩ་ཧཱུཾ། ཞེས་བུམ་ཆུ་སྤྱི་བོ་ནས་གཏིགས་ཤིང་བླུད་པས་དབང་བསྐུར། ལུས་ངག་ཡིད་གསུམ་གྱི་དྲི་མ་དག །ཆུ་ཞབས་འཁྱིལ་བ་ལས་སྤྱི་བོར་མི་བསྐྱོད་པས་དབུ་བརྒྱན་པར་གྱུར། དེ་ནས་མདུན་བསྐྱེད་ཀྱི་གཙོ་བའི་སྐུ་ལས་མགོན་པོ་གཉིས་པ་སྤྲོས་ཏེ་ཁྱེད་ རང་གི་དཔྲལ་བར་ཐིམ་པས་མགོན་པའི་སྐུའི་མཐུ་སྟོབས་དང་ནུས་པའི་བྱིན་རླབས་ཐམས་ཅད་ཞུགས་པའི་མོས་པ་མཛོད། མགོན་པའི་ལྷ་ཙཀ་སྤྱི་བོར་བཞག་ལ། ནག་པོ་ཆེན་པའི་ཕྱག་རྒྱ་འདི། །བུ་ཡིས་དུས་རྣམས་ཐམས་ཅད་དུ། །ཀུན་ཏུ་མ་འབྲལ་སྒོམ་པར་གྱིས། །ལས་རྣམས་ཀུན་ལ་ཐོགས་པ་མེད། །ༀ་མ་ཧཱ་ཀཱ་ལ་ཡ་ཨ་བྷི་ཥིཉྩ་ཧཱུྃ། ཞེས་བསྐུར། མདུན་བསྐྱེད་ཀྱི་གཙོ་བའི་མགྲིན་པ་ནས་ཨཱ་ལི་ཀཱ་ལིའི་ཡི་གེ་བྱུང་ཁྱེད་རང་རྣམས་ཀྱི་མགྲིན་པར་ཐིམ་པས་གསུང་གི་མཐུ་ནུས་བྱིན་རླབས་ཐམས་ཅད་ཞུགས་པར་མོས་ལ། དབྱངས་གསལ་བྲིས་པའི་སྔགས་བྱང་མགྲིན་པར་བཞག་ལ། བརྗོད་མེད་གྲགས་སྟོང་སྔགས་འདི་ཡིས། །མགོན་པོ་གནས་ནས་སྤྱན་འདྲེན་པ། །བུ་ཡིས་དུས་རྣམས་ཐམས་ཅད་དུ། །གུས་པའི་ངག་གིས་བཟླ་བར་གྱིས། །ༀ་མ་ཧཱ་ཀཱ་ལ་ཝཱ་ཀ་ཨ་བྷི་ཥིཉྩ་ཧཱུྃ། ཞེས་བརྗོད། དེ་ནས་སློབ་དཔོན་མདུན་བསྐྱེད་ཀྱི་གཙོ་བོ་དང་གཉིས་སུ་མེད་པར་གྱུར་པའི་ཐུགས་ཀར་ཉི་མ་ལ་ཧཱུྃ་ཡིག་སོགས་འཁོར་དང་བཅས་པ་ལས་སྔགས་ཕྲེང་ཐོན། སློབ་མའི་ཁར་ཞུགས་སྙིང་གར་ཉི་སྟེང་ཧཱུྃ་ཡིག་གིས་མཚན་པའི་མཐར་གཡས་བསྐོར་དུ་འཁོད་པའི་མོས་པས་འདིའི༴ ༀ་མ་ཧཱ་ཀ་ལ་དུ་བེང་ནི་ཛཿ ༀ་ཤྲཱི་ཀཱ་ལ་རཱུ་པ་ཧཱུྃ་ཕཊ༑ ཅེས་པ་ཙམ་མོ། །སློབ་མ་ཁྱད་པར་བ་ལ་འཁོར་སྔགས་རྣམས་ཀྱང་བྱིན་ཏེ། རེ་རེ་ནས་ལན་གསུམ་རེ་བཟླར་གཞུག །སློབ་དཔོན་ལ་མེ་ཏོག་འཐོར་བཞིན་དུ། བཅོམ་ལྡན་བདག་གིས་བཟུང་སོགས་དང༌། མེ་ཏོག་བུ་ཡི་སྤྱི་བོར་བཞག་ལ། བཅོམ་ལྡན་འདི་ལ་སོགས་ཀྱིས་ བྱིན་གྱིས་བརླབས། དེ་ནས་མདུན་བསྐྱེད་ཀྱི་གཙོ་བའི་ཐུགས་ཀ་ནས་ཕྱག་མཚན་བེང་ཆེན་བྱུང་བ་ཁྱེད་རང་གི་སྙིང་གར་ཐིམ་པས་ཐུགས་ཀྱི་བྱིན་རླབས་ནུས་མཐུ་ཐམས་ཅད་རྒྱུད་ལ་ཞུགས་པར་མོས་ལ། ལག་གཡས་པར་བེ་ཅོན་གཏད་དེ། བེ་ཅོན་རབ་ཏུ་འབར་བ་འདིས། །མ་རུངས་པ་རྣམས་བཏུལ་ནས་ཀྱང༌། །གཉིས་མེད་ཐུགས་སུ་སྦྱོར་བྱེད་པའི། །ཐུགས་མཆོག་ཕྱག་རྒྱས་དབང་བསྐུར་རོ། །ༀ་མ་ཧཱ་ཀཱ་ལ་དུ་བིང་ཙིཏྟ་ཨ་བྷི་ཥིཉྩ་ཧཱུྃ། གཙོ་བའི་ལྟེ་བ་ནས་པར་བུ་བྱུང་བ་ཁྱེད་རང་གི་ལྟེ་བར་ཐིམ་པས་ཡོན་ཏན་གྱི་ནུས་མཐུ་ཐམས་ཅད་ཐོབ་པར་བསམ་ལ། པར་བུ་ཁྲག་གིས་གང་བ་གཡོན་པར་གཏད་དེ། བདུད་ཀྱི་ཁྲག་གིས་གང་བའི་སྣོད། །དངོས་གྲུབ་མཆོག་གི་འབྱུང་བའི་གནས། །དེ་རིང་བུ་ཡིས་བཟུང་བར་གྱིས། །ཡོན་ཏན་ཐམས་ཅད་འབྱུང་བར་འགྱུར། །ༀ་མ་ཧཱ་ཀཱ་ལ་ཀ་པཱ་ལ་སྱ་ཨ་བྷི་ཥིཉྩ་ཧཱུྃ། དེ་ནས་ཕྲིན་ལས་ཀྱི་དབང་ནི། སློབ་བུ་འདིང་བའི་སྟེང་བཞག་ལ་སྣམ་སྦྱར་བཀོན། ལག་གཡས་སུ་མཁར་གསིལ་དང༌། གཡོན་དུ་པར་བུ་ཐོད་པ། གྲི་སྙིང་རྣམས་གཏད། མགོ་ཐོག་ཏུ་ཐུབ་དབང་གི་སྐུ་བཞག་ལ། མདུན་བསྐྱེད་གཙོ་བའི་གསང་གནས་ནས་འོད་ཟེར་ལྗང་ནག་གི་རྩེ་ནས་ལས་བདག་ཕོ་མོ་གྲངས་མེད་བྱུང་ཁྱེད་རང་གི་གསང་བར་ཐིམ་པས་དྲག་པོ་མངོན་སྤྱོད་ཀྱི་ལས་ལ་ཐོགས་པ་མེད་པའི་ནུས་པ་ཐོབ་པར་བསམ་ལ། ཐུབ་པའི་བསྟན་པ་བསྲུང་བའི་ཕྱིར། །དྲག་པོ་ལས་ཀྱང་ཆེར་དྲག་པ། །ལས་མཐའ་ནག་པོའི་ སྦྱོར་བ་ཡི། །བཀའ་ཡི་གནང་བ་ཁྱོད་ལ་བྱིན། །ༀ་མ་ཧཱ་ཀཱ་ལ་ཀརྨ་ཨ་བྷི་ཥིཉྩ་ཧཱུཾ། ཞེས་དབང་བསྐུར་ཏེ། དབང་འདི་ཐོབ་ཕན་ཆད་མགོན་པོ་དང་ལས་བདག་ཕོ་མའི་རྒྱུད་སྒྲུབ་ཐབས་ལས་སྦྱོར་གྱི་མན་ངག་རྣམས་ལ་ཅི་དགར་སྤྱོད་པའི་དབང་ཐོབ་པ་ཡིན་ནོ། །མཐའ་རྟེན་གཏོར་མའི་བཀའ་བསྒོ་ནི་གཏོར་མ་དཔལ་འབར་བཙུགས་པ་སློབ་བུའི་སྤྱི་བོར་བཞག་ལ། འོ་གཏོར་མ་འདི་མགོན་པོ་འཁོར་བཅས་སུ་གསལ་བ་ལ་མོས་གུས་དུང་བ་བྱས་པས་ཁྱེད་རང་གི་སྤྱི་བོར་བྱོན། སློབ་དཔོན་གྱིས་བཀའ་བསྒོས་པའི་ཚེ་རིགས་ཀྱི་བུ་ཁྱོད་ཀྱི་འགལ་རྐྱེན་བར་ཆད་བསྲུང་བ་དང༌། མཐུན་རྐྱེན་ཕྲིན་ལས་རྣམ་པ་བཞི་ངས་བསྒྲུབ་བོ་ཞེས་ཞལ་གྱིས་བཞེས་པའི་མོས་པ་མཛོད། ཅེས་བརྡ་སྦྱར་ལ་སྤོས་བསྲེག་ཅིང་རོལ་མའི་སྒྲ་དང་བཅས་པས། ཧཱུྃ། སངས་རྒྱས་སྟོང་གི་བཀའ་ཡིས་ནི། །སྲུང་མ་ཆེན་པོར་ཞལ་བཞེས་པ། །དཔལ་ལྡན་མགོན་པོ་ཆེན་པོ་ཡིས། །བདག་གི་སློབ་མ་འདི་སྲུངས་ཤིག །དཔལ་ཡེ་ཤེས་ཀྱི་མགོན་པོ་ཨ་གྷོ་ར་འཁོར་དང་བཅས་པ་རྣམས་ཀྱིས་ཆོས་སྐུ་རྡོ་རྗེ་འཆང་ཆེན། ལོངས་སྐུ་ལྷ་མོ་བདག་མེད་མ། སྤྲུལ་སྐུ་ཡེ་ཤེས་མགོན་པོ། རྗེ་བཙུན་དམ་པ་སངས་རྒྱས། སྐྱེ་མེད་བྱང་སེམས་ཀུན་དགའ། མཁས་བཙུན་སྤ་ཚབ་སྒོམ་པ། གྲུབ་ཐོབ་རྒྱལ་བ་ཏེ་ནེ། ཆོས་རྒྱལ་ཉི་སེང་སྐུ་མཆེད། ཐམས་ཅད་མཁྱེན་པ་བསོད་ནམས་དཔལ། རྒྱལ་སྲས་ཀུན་དགའ་སྐུ་མཆེད། རྒྱ་སྨོན་ལམ་ཤེས་རབ། ཀུན་མཁྱེན་སྐུ་མཆེད། རྡོ་རྗེ་གདན་པ། རྒྱ་མཚོ་སྦྱིན་པ། བདེ་ཆེན་ ལྷུན་གྲུབ། ནམ་མཁའ་བཟང་པོ། དཔལ་འབྱོར་ལྷུན་གྲུབ། དཔལ་འབྱོར་ཕུན་ཚོགས། བཀྲ་ཤིས་བཟང་པོ། མཁན་ཆེན་བློ་གྲོས་བརྟན་པ་སྟེ་རྩ་བརྒྱུད་ཀྱི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་རིགས་ཀྱི་བུ་འདི་ཡི་སྲུང་མ་མཛོད་ལ་ལུས་དང་གྲིབ་མ་བཞིན་དུ་འགྲོགས་ཏེ། འགལ་རྐྱེན་མི་མཐུན་པའི་ཕྱོགས་ཐམས་ཅད་ཞི་ཞིང་མཐུན་རྐྱེན་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པ་དང༌། ཕྲིན་ལས་རྣམ་པ་བཞི་ཐོགས་མེད་དུ་སྒྲུབ་པ་སོགས་མདོར་ན་འདི་ཉིད་ཁྱོད་ཀྱིས་བསྲུང་བ་དང་སྐྱོབ་པ་དང་ཐུགས་རྗེས་བཟུང་བར་མཛད་དུ་གསོལ། ༀ་མ་ཧཱ་ཀཱ་ལ་དུ་བིང་ནི་ཛཿ ཨ་བྷི་ཥིཉྩ་ཧཱུྃ། ཞེས་བཀའ་བསྒོས་པས་གཏོར་མའི་ལྷ་འོད་དུ་ཞུ་ནས་སློབ་མ་ལ་ཐིམ་པར་བསམ་ཞིང་། སུ་པྲ་ཏིཥྛ་བརྗོད་ཅིང་མེ་ཏོག་གི་ཆར་དབབ་བོ། །དེས་བུམ་པའི་དབང་ཐོབ། ལུས་སྒྲིབ་དག །སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པའོ། །གཉིས་པ་གསང་དབང་ཞུ་བའི་དོན་དུ་གསོལ་བ་གདབ་པ་འདིའི༴ དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ལས་བྱུང་བ་ཡི། །བཞི་གྲུབ་བདེ་བ་ཆེན་པའི་སྐུ། །གསང་བ་ཡེ་ཤེས་བདག་ལ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ལ་གུ་ཧྱེ་ཨ་བྷི་ཥིཉྩ་ཏུ་མཾ། ཞེས་ལན་གསུམ། བླ་མ་ཡེ་ཤེས་ཀྱི་མགོན་པོ་ཡབ་ཡུམ་མཉམ་པར་སྦྱོར་བའི་བྱང་སེམས་ཐོད་པའི་བདུད་རྩི་དང་འདྲེས་པ་ལྕེ་ཐོག་ཏུ་བྱིན་པར་མོས་ལ། དབང་བསྐུར་ཆེན་པོ་རྡོ་རྗེ་ནི། །ཁམས་གསུམ་ཀུན་གྱིས་ ཕྱག་བྱས་པས། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ༀ་མ་ཧཱ་ཀཱ་ལ་བོ་དྷི་ཙིཏྟ་ཨ་བྷི་ཥིཉྩ་ཧཱུྃ། ཞེས་བདུད་རྩི་བླུད་ཅིང༌། དེས་ཀྱང་ཨ་ཧོ་མ་ཧཱ་སུ་ཁ་ཞེས་མྱོང་བས་རང་བཞིན་བརྒྱད་ཅུའི་རྟོག་པ་འགགས་ནས་སེམས་གསལ་སྟོང་གི་ཡེ་ཤེས་རྒྱུད་ལ་སྐྱེས་པར་གྱུར། དེས་གསང་དབང་ཐོབ། ངག་སྒྲིབ་དག །ལོངས་སྐུ་ཐོབ་པའི་སྐལ་བ་ཅན་དུ་བྱས་སོ། །གསུམ་པ་ཤེར་དབང་ཞུ་བའི་དོན་དུ་གསོལ་བ་གདབ་པ་འདིའི་རྗེས༴ དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ལས་བྱུང་བ་ཡི། །གསང་ཆེན་མཆོག་གི་དམ་ཚིག་ནི། །བླ་ན་མེད་པ་བདག་ལ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ལ་པྲཛྙཱ་ཛྙཱ་ན་ཨ་བྷི་ཥིཉྩ་ཏུ་མཾ། ལན་གསུམ། ཕྱག་རྒྱ་མ་གཟུགས་དང་ལང་ཚོས་བརྒྱན་པ་ཡུམ་དུ་གསལ་བ་གཏད་པར་མོས་ལ། གཟུངས་མ་ཡིད་འོང་མཚན་ལྡན་འདི། །བརྟེན་བྱར་སངས་རྒྱས་རྣམས་ཀྱིས་གསུངས། །འཁོར་ལོའི་རིམ་པའི་སྦྱོར་བ་ཡིས། །བདེ་བ་དག་ནི་མྱང་བར་གྱིས། །དེ་ནས་སློབ་མ་མགོན་པོ་དང་རིག་མ་ཡུམ་རེ་མ་ཏཱི་གསལ་བའི་མཁའ་གསང་རྡོ་རྗེ་པདྨར་བྱིན་གྱིས་བརླབས་ནས་སྙོམས་པར་ཞུགས་པས་ཡས་འབབ་མས་འཛེག་གི་དགའ་བ་བཞིའི་ཡེ་ཤེས་བརྟན་པར་མོས་ལ་ལག་འཁྱུད་རྒྱ་དང་བཅས་པས་འདིའི་རྗེས༴ ཨ་ནུ་རཱ་ག་ཏཱ་སྭ་བྷཱ་ཝ་བཛྲ་ཨཱཏྨ་ཀོ྅ཧཾ། དེས་ཤེར་དབང་ཐོབ། ཡིད་སྒྲིབ་དག །ཆོས་སྐུ་ཐོབ་པའི་སྐལ་བ་ཅན་དུ་བྱས་སོ། །བཞི་པ་ཚིག་དབང་ཞུ་བའི་དོན་དུ་གསོལ་བ་གདབ་པ་འདིའི༴ ཁྱོད་ཞབས་པདྨོའི་བཀའ་དྲིན་གྱིས། །གཙོ་བོས་དབང་བསྐུར་རྣམ་གསུམ་བྱིན། །དེ་རིང་རིན་ཆེན་བཞི་པ་ཡང༌། །ཐུགས་ཀྱི་གཏེར་གྱིས་བདག་ལ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ལ་ཏ་ཐཱ་ཨ་བྷི་ཥིཉྩ་ཏུ་མཾ། ཞེས་ལན་གསུམ། སེམས་དུས་གསུམ་གྱི་རྟོག་པ་སྤངས་ནས་བསམ་གྱིས་མི་ཁྱབ་པའི་ལྷན་སྐྱེས་དེ་ཁོ་ན་ཉིད་ཀྱི་ངང་ལ་རྩེན་གྱིས་ཞོག་ཅིག །དུས་གསུམ་རྟོག་པའི་ཚོགས་སྤངས་ནས། །ཡིད་བྱེད་བྲལ་བའི་ངང་ལ་ཞོག །རྣལ་འབྱོར་སྒོམ་པ་བླ་ན་མེད། །ཡེ་ཤེས་སྐུ་ཉིད་འགྲུབ་པར་འགྱུར། །ཞེས་ངོ་སྤྲད། དེས་དབང་བཞི་པ་ཐོབ། སྒོ་གསུམ་ཕྲ་བའི་དྲི་མ་དག །ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། །དེ་ནས་གཙོ་བོས་ཇི་ལྟར་སོགས་ཀྱིས་དམ་ཚིག་ཁས་བླངས། བཀའ་དྲིན་གཏོང་རག་གི་དོན་དུ་མཎྜལ་དང༌། དེང་ནས་བརྩམས་ཏེ་སོགས་ཀྱིས་ལུས་དབུལ་དགེ་བ་བསྔོ་བ་རྣམས་བྱའོ། །དེ་ནས་རྗེས་ཆོག་ནི། སྤྲོ་ན་བསྐང་བཤགས་དང་ཚོགས་མཆོད་བྱ་བའམ། མ་བྱས་ཀྱང་རུང་སྟེ། གཏོར་མར་དམིགས་བྱ་འགུག་ཅིང་བདུད་རྩིར་བརླབས་ནས། རྩ་སྔགས་གཏོར་སྔགས་བཏགས་པས་བསྔོས་ལ། ཧཱུྃ་དཔལ་ལྡན་མགོན་པོ་མ་ཧཱ་ཀཱ་ལ་ཡེ། །ཞེས་སོགས་སམ། ཡང་ན། དཔལ་མགོན་ལྕམ་དྲལ་འཁོར་བཅས་ཀྱིས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་ལྟ་བུས་གཏོར་མ་གཙང་སར་འབུལ། གཏོང་རག་གི་མཆོད་བསྟོད་བྱས་ལ་ཡིག་བརྒྱ་དང༌། མ་རྙེད་ཡོངས་སུ་སོགས་ཀྱིས་ བཟོད་པར་གསོལ། རས་བྲིས་སམ་མིན་ནའང་ཡེ་ཤེས་པ་སྐུ་རྟེན་ཙཀླི་ལ་བསྟིམ་ནས་བརྟན་བཞུགས་བྱ། དམ་ཚིག་པ་རང་ལ་ཐིམ། དགེ་བ་བསྔོ་ཞིང་བཀྲ་ཤིས་ཀྱིས་མཐའ་བརྒྱན་ནོ། །འདི་ནི་གསང་བ་ལས་ཀྱང་ཆེས་གསང་བའི་དབང་ཡིན་པས། ཆོས་རྒྱུད་ལ་སེལ་ཡོད་པ་དང་ཆོས་སྒོར་མ་ཞུགས་པའི་ཁྱིམ་པ་སོགས་ལ་ལྟ་ཅི་སྨོས། ཐུན་མོང་མ་ཡིན་པའི་སློབ་མ་གྲངས་བཅད་རེ་རེ་གཉིས་གཉིས་མ་གཏོགས་ཁྱབ་བརྡལ་དུ་མི་གནང་བ་ཕྱག་ལེན་ནོ། །དར་རྒྱས་འཕེལ། །ཤུ་བྷཾ།། ༈ །།ༀ་སྭ་སྟི། ཡེ་ཤེས་ཀྱི་མགོན་པོ་ཨ་གྷོ་རའི་རྗེས་གནང་བྱ་བར་འདོད་པས་སྟེགས་བུ་ཁྲག་ཆང་གིས་ཆག་ཆག་བཏབ་པ་ལ་དཀྱིལ་འཁོར་དབུས་གྲུ་གསུམ་མཐིང་ནག་གི་ཕྱིར་ཟླ་གམ་གསུམ་ཐོད་སྐམ་གྱི་ཕྲེང་བ་རྡོ་རྭ་མེ་རི་དང་བཅས་པས་ཟླུམ་པོར་བསྐོར་བའི་ལྟེ་བར་ལྕམ་དྲལ་གསུམ་དང་སྟོང་བརྒྱད་ཀྱི་ལྷ་མཚན་འགོད། དེའི་དབུས་སུ་མཉྫིའི་ཁར་བཤོས་བུ་གྲུ་གསུམ་གྲི་གྲས་ཧ་ཅང་མི་རྣོ་བའི་རྩེར་གྲི་སྙིང་ལྷ་ཙཀ་དར་ནག་གི་བ་དན་འཛུག་པར་བཤད་ཀྱང༌། ཕྱག་ལེན་གྲི་སྙིང་འདོགས་པར་མི་མཛད། འཁོར་གཡས་གཡོན་དུ་གྲུ་གསུམ་རེ་དང༌། མཐར་བཤོས་ཕྲན་བརྒྱད་མཐེབ་ཀྱུ་དང་བཅས་པས་བསྐོར་བ་བཀོད། མདུན་རྒྱབ་གང་རིགས་སུ་མཆོད་གཏོར་སྨན་རཀ །མཐའ་མཆོད་པས་བསྐོར། ནང་མཆོད་ཌཱ་དྲིལ་མེ་ཏོག་སོགས་ཚོགས་པར་བཤམས་ལ། བདག་བསྐྱེད་ནི། ཕྱག་བཞེས་སུ་བདེ་མཆོག་ལྷན་སྐྱེས་མཛད་པ་ལྟར་ན་སྐྱབས་སེམས་ནས་བཟླས་པའི་བར་དམ་པ་ཕྱི་ནང་གསུམ་གྱི་བདག་བསྐྱེད་དུ་བཀོད་པ་ལྟར་བྱ་བའམ། ཡང་ན་ཕྱག་རྡོར་གྱི་བདག་བསྐྱེད་བཟླས་པའི་བར་པར་ནག་གི་དབང་ཆོག་ཏུ་བཤད་མ་ཐག་པ་ལྟར་བྱ། མདུན་བསྐྱེད་ནི། ཉེར་སྤྱོད་སྨན་གཏོར་རཀྟ་རྣམས་པར་ནག་ལྟར་བྱིན་གྱིས་བརླབས་ནས། དཀྱིལ་འཁོར་གཏོར་མ་དང་བཅས་པ། ༀ་སྭ་བྷཱ་ཝས་སྦྱངས། སྟོང་པའི་ངང་ལས་རང་གི་མདུན་དུ་ཀ་ལིངྐའི་དུར་ཁྲོད་ཆེན་པོ་ འཇིགས་ཤིང་སྐྱི་གཡའ་བའི་དབུས་སུ་གྲུ་གསུམ་མཐིང་ནག་འབར་བའི་ནང་དུ་པད་ཟླ་མི་རོའི་གདན་ལ་ཧཱུྃ་ལས་ཙནྡ་གྱི་བིང་ཧཱུྃ་གིས་མཚན་པ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། ༀ་ཨ་གྷོ་ར་ མ་ཧཱ་ཀཱ་ལ་དུ་རེ་སྭ་ཧཱ་ཧཱུྃ་ཧཱུྃ། དཔལ་ཡེ་ཤེས་ཀྱི་མགོན་པོ་ཨ་གྷོ་ར་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་གཡས་ཙན་དན་གྱི་བིང་ཆེན་དང༌། གཡོན་ཐོད་ཁྲག་སྐུ་ལ་བརྟེན་པ། སྤྱན་གསུམ་མཆེ་གཙིགས་སྨ་ར་སྨིན་མ་འབར་ཞིང༌། རལ་པ་ཁམས་ནག་གྱེན་དུ་བརྫེས་པ་དར་ནག་གི་འཇོལ་བེར་གསོལ་ཞིང་གསེར་སྐེད་བཅིངས་པ། ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ། སྤྲུལ་དང་རིན་པོ་ཆེའི་རྒྱན་ཅན། ཟངས་ཀྱི་ལྷ ྭ མ་ཡུ་ རིང་གསོལ་ནས་གཡོན་བརྐྱང་གིས་མེ་འབར་བའི་དབུས་ན་བཞུགས་པའོ། །དེའི་ཐུགས་ཀ་ནས་ཧཱུྃ་དང་བྷྱོ་སྤྲོས་པ་ལས། ༀ་མ་ཧཱ་ཀཱ་ལ་རཀྴ་ཧཱུྃ་ཕཊ་གཡས་སུ་ཧཱུྃ་ལས་ལེགས་ལྡན་ནག་པོ་གཡས་ཙན་དན་གྱི་བིང་འཕྱར་ཞིང༌༑ གཡོན་ཐོད་ཁྲག་གཙོ་བོ་ལ་སྟོབ་པ། རྒྱན་དང་ཆ་ལུགས་གཙོ་བོ་དང་མཐུན་པ། ༀ་མ་མ་རུ་རུ་ཙེ་རཀྨོ་ཙ་ལེ་ཙ་ལེ་བྷྱོ། གཡོན་དུ་བྷྱོ་ལས་དཔལ་ལྡན་ལྷ་མོ་སྔོ་སྐྱ་བོང་བུ་གྭ་དམར་ལ་ཞོན་པ། གཡས་རལ་གྲི་འཕྱར་ཞིང༌༑ གཡོན་ཐོད་ཁྲག་ཐུགས་ཀར་བསྣམས་པ། མ་མའི་ཆས་ཀྱིས་བརྒྱན་པའོ། །དེའི་ཕྱི་བསྐོར་དུ་ཤར་ནས་གཡས་བསྐོར་གྱིས་གཏུམ་ཆེན་ཤ་ལ་རྔམས་པའི་སྲིན་པོ་སྟོང༌། སྲིད་གསུམ་ཁྲག་མཚོ་འཐུང་བའི་མ་མོ་སྟོང༌། དུས་བཞི་སྲང་ལ་རྒྱུ་བའི་གཟའ་བདུད་སྟོང༌། ལས་སུ་རྒྱུ་ཞགས་འཕེན་པའི་བཙན་དམར་སྟོང༌། སྐྱེ་འགྲོའི་སྲོག་རྩ་གཅོད་པའི་གིང་ཆེན་སྟོང༌། བདེན་རྫུན་ཤན་སྟངས་འགྱེད་པའི་རྨུ་རྒོད་སྟོང༌། སྣང་སྲིད་གཡབ་མོས་འདེབས་པའི་བདུད་རིགས་སྟོང༌། མཐུན་པ་གཉིས་སུ་འབྱེད་པའི་གཤིན་རྗེ་སྟོང༌། དེ་དག་གི་ཕྱི་རོལ་དུ་ཕོ་ཉ་ལས་བྱེད་དྲེགས་པའི་དམག་ཚོགས་བསམ་གྱིས་མི་ཁྱབ་པས་བསྐོར་བའོ། །དེ་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་གི་འོད་ཟེར་གྱིས་དགྲ་བགེགས་བཀུག །ༀ་མ་ཧཱ་ཀཱ་ལ་ཧཱུྃ་ཕཊ། ཀ་ལ་རཀྴ་ཧཱུྃ་ཕཊ། རཀྨོ་ཙ་ལེ་བྷྱོ། ཞེས་བརྗོད་པས་དེ་ཐམས་ཅད་བསྡིགས་བསྐྲད་བརླག་པར་བྱས། ༀ་སུམྦྷ་སོགས་བརྗོད་པས་རྡོ་རྗེའི་རང་བཞིན་ཡེ་ཤེས་ཀྱི་མེ་འབར་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་གྱུར། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཀ་ལིངྐའི་དུར་ཁྲོད་སོགས་རང་བཞིན་གྱི་གནས་ནས་མགོན་པོ་འཁོར་བཅས་བཛྲ་ས་མཱ་ཛཿ ཧསྟ་གཡབ་ཅིང་སྤོས་རོལ་དང་བཅས་པས། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་དཔལ་ལྡན་མགོན་པོའི་ཚོགས། །འཁོར་དང་བཅས་པ་འདིར་གཤེགས་ཤིག །འབར་བའི་སྐུར་སྟོན་མཆོད་པ་བཞེས། །ༀ་ ཨ་གྷོ་ར་མ་ཧཱ་ཀཱ་ལ་ཛཿ ཧཱུྃ་བཾ་ཧོཿ ས་མ་ཡ་ཏིཥྛ་ལྷན། ཞེས་སྤྱན་དྲངས་ཤིང་བཞུགས་པ་ལ། ༀ་མ་ཧཱ་ཀཱ་ལ་ཨ་ཏི་པུ་ཧོཿ པྲ་ཏཱི་ཛཿ ཧོཿ ས་ཕྱག་བྱ། ༀ་ཨ་གྷོ་ར་མ་ཧཱ་ཀཱ་ལ་བཛྲ་པུཥྤེ་ཨཱཿ ཧཱུྃ་ནས་ཤབྡའི་བར་གྱིས་མཆོད། མ་ཧཱ་པཉྩ་ཨ་མྲྀ་ཏ་ ༀ་ཨཱཿ ཧཱུྃ་གིས་ནང་མཆོད། མཆོད་གཏོར་ལ་རཀྟ་སྦྲེང་ཞིང་ལྗགས་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་བསམས་ལ། ཧཱུྃ། དབུས་ཀྱི་གནས་མཆོག་དམ་པ་ནས། །ཁྱོད་དང་མཐུན་པའི་དམ་རྫས་ནི། །འདབ་བརྒྱད་རིན་ཆེན་པད་ཕོར་དུ། །དམ་རྫས་གཏོར་མ་མི་ཟད་པ། །མཐུན་དགུར་སྦྱར་བའི་དམ་རྫས་དང༌། །དགྱེས་དགུར་སྦྱར་བའི་ཞལ་ཟས་ཚོགས། །དཔལ་མགོན་འཁོར་དང་བཅས་ལ་འབུལ། ། ཐུགས་དམ་གཉན་པོ་བསྐང་གྱུར་ཅིག །ༀ་ཨ་གྷོ་ར་མ་ཧཱ་ཀཱ་ལ་མ་ཧཱ་མཱཾ་ས་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། མ་ཧཱ་བ་སུ་ཏ་ཁཱ་ཧི། མ་ཧཱ་བ་ལ་ཏ་ཁཱ་ཧི། ཞེས་གཏོར་སྔགས་བཞི་བཅུ་རྩ་བརྒྱད་པ་ལན་གསུམ་ལ་སོགས་པས་གཏོར་མ་ཕུལ་ལ། བསྟོད་པ་ནི༑ ཧཱུྃ། དུར་ཁྲོད་ཆེན་པོ་ཀ་ལིངྐ་ཡི་དབུས། །འོད་ཕུང་བསྐལ་པའི་མེ་ལྟར་འབར་བའི་ཀློང༌། །ཉི་ཟླ་པདྨ་མི་རོའི་གདན་སྟེང་དུ། །ཧཱུྃ་ལས་སྐྱེས་པའི་དཔལ་ལྡན་མགོན་པོ་ནི། །ཤིན་ཏུ་མི་བཟད་མ་ཧཱ་ཀཱ་ལའི་སྐུ། །ཞལ་གཅིག་ཕྱག་གཉིས་མདོག་ནག་འཇིགས་པའི་ཚུལ། །དར་ནག་བེར་གསོལ་གསེར་སྐ་སྐེད་ལ་བཅིངས། །དབུ་སྐྲ་ཁམས་ནག་སྲིད་གསུམ་གྱེན་ལ་བརྫེས། །ཞལ་གྱི་ཁྲོ་གཉེར་སྤྱན་གསུམ་གློག་ལྟར་འཁྱུག །ཤངས་ནས་ཧཱུྃ་འབྱིན་ཞལ་ནས་ཕཊ་སྒྲོག་ཅིང༌། །ཞལ་གདངས་ལྗགས་འདྲིལ་རྣོ་དཀར་མཆེ་བ་གཙིགས། །གཡས་གཡོན་ཕྱག་ན་བེང་དང་ཐོད་ཁྲག་བསྣམས། །སྦྲུལ་དང་ཐོད་རློན་ཕྲེང་བའི་རྒྱན་གྱིས་བརྒྱན། །དཔལ་ལྡན་མགོན་པའི་ སྐུ་ལ་ཕྱག་འཚལ་བསྟོད། །རྒྱུ་སྐར་དཔལ་གྱི་རོལ་པའི་གནས་མཆོག་དང༌། །ཀ་ལིངྐ་ཡི་དུར་ཁྲོད་ཆེན་པོ་སོགས། །རབ་འཇིགས་གནས་ནས་བསྟན་པ་སྐྱོང་མཛད་པའི། །དཔལ་ལྡན་ནག་པོ་ཁྱོད་ལ་ཕྱག་འཚལ་བསྟོད། ། མགོན་པའི་ལྕམ་གཅིག་དཔལ་ལྡན་བོང་ཞོན་མ། །ནག་པའི་གཟུགས་ལ་རྔམ་པའི་ཆ་ལུགས་ཅན། །ཞལ་གཅིག་ཕྱག་གཉིས་རལ་གྲི་ཐོད་ཁྲག་འཛིན། །དཔལ་ལྡན་ལྷ་མའི་སྐུ་ལ་ཕྱག་འཚལ་བསྟོད། །མགོན་པའི་བཀའ་འཁོར་འཇིག་རྟེན་དྲེགས་པ་བརྒྱད། །སེམས་ཅན་ཀུན་གྱི་སྲོག་འཕྲོག་ཞེ་སྡང་ཅན། །དྲག་ཏུ་བསྐུལ་ན་འཇིག་རྟེན་སྟོངས་པར་བྱེད། །སྟོང་བརྒྱད་དྲེགས་པའི་ཚོགས་ལ་ཕྱག་འཚལ་བསྟོད། །ཅེས་བསྟོད་ནས། མགོན་པའི་ཐུགས་ཀར་ཉི་མ་ལ་གནས་པའི་ཧཱུྃ་མཐིང་ནག་བཟླ་བྱའི་སྔགས་ཀྱིས་བསྐོར་བ་ལ། བདག་གི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས་ཐུགས་རྒྱུད་བསྐུལ་ཏེ་བཀའ་ནོད་ཅིང་ཕྲིན་ལས་སྒྲུབ་པར་བསམ། ༀ་ཨ་གྷོ་ར་མ་ཧཱ་ཀཱ་ལ་དུ་རེ་སྭཱ་ཧཱ་ཧཱུྃ་ཧཱུྃ་ཞེས་གཙོ་བའོ། །ༀ་མ་ཧཱ་ཀཱ་ལ་རཀྴ་ཧཱུྃ་ཕཊ། ལས་མགོན། ༀ་མ་མ་རུ་རུ་རཀྨོ་ཙ་ལེ་ཙ་ལེ་བྷྱོ། ལྷ་མའོ། །དེ་གསུམ་ལྕམ་དྲལ་གྱི་བསྙེན་སྔགས་ཏེ་དེ་ཙམ་མོ། །མགོན་པའི་སྒྲུབ་སྔགས་དང་ལས་སྔགས་ཀྱང་བཟླ་བར་འདོད་ན། ༀ་མ་ཧཱ་ཀཱ་ལ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། གྷཱ་ཏ་ཡ་གྷཱ་ཏ་ཡ། ཆེ་གེ་མོ་མཱ་ར་ཡ་ཛཱི་བི་ཏཾ། ཧ་ར་ཧ་ར་ཧཱུྃ་ཧཱུྃ་ཕཊ་ཕཊ། ཅེས་སྒྲུབ་སྔགས་སོ། །རཀྴ་རཀྴ་མ་ཧཱ་རཀྴ་ཀ་ལ་རཀྴ། ཙིཏྟ་རཀྴ། ལེ་ལེ། དྷ་ར་དྷ་ར། གྷི་ལ་ཡ། གྷི་ལ་ཡ། མཱ་ར་ཡ་ཧཱུྃ་ཕཊ། ཅེས་ལས་སྔགས་སོ། །ཧཱུྃ། དཔལ་ལྡན་མགོན་པོ་འཁོར་བཅས་ཀྱིས། །དམ་རྫས་མཆོད་གཏོར་འདི་བཞེས་ཤིག །བདག་ལ་ཐུགས་རྗེས་བརྩེར་དགོངས་ལ། །རྟག་པར་བསྲུང་ཞིང་སྐྱོབ་པར་མཛོད། །ཅེས་ཕྲིན་ལས་བཅོལ་ལོ། །དེ་ནས་རྗེས་གནང་དངོས་ནི། སློབ་མ་རྣམས་ཁྲུས་དང་ཕྱག་བྱས་གྲལ་ལ་འཁོད་པ་ན་བགེགས་བསྐྲད། སེམས་བསྐྱེད་གསལ་བཏབ་ནས། དེ་ཡང་རང་ཅག་རྣམས་ཀྱིས་རྙེད་དཀའི་རྟེན་དལ་འབྱོར་གྱི་ཆོས་ཕུན་སུམ་ཚོགས་པའི་མི་ལུས་རིན་པོ་ཆེ་ཐོབ་པའི་དུས་འདིར། དལ་འབྱོར་ལ་སྙིང་པོ་ལེན་པའི་ཐབས་དམ་པའི་ཆོས་ལ་བསླབ་དགོས་ཤིང༌། ཆོས་སྒྲུབ་པ་ལ་འགལ་རྐྱེན་ཞི་ཞིང་མཐུན་རྐྱེན་སྒྲུབ་ནུས་པའི་ཆོས་སྐྱོང་མཐུ་ལྡན་རེ་བརྟེན་པ་གལ་ཆེ༑ དེ་ལ་ཆོས་སྐྱོང་བའི་སྲུང་མ་ཁྱད་པར་ཅན་འདི་ནི་དྲི་མེད་ཁྲོ་རྒྱུད་ལས། དགེ་སློང་ཤཱཀྱ་སེངྒེ་ཡི། །བསྟན་པ་འདི་དང་སངས་རྒྱས་སྟོང༌། །བསྐལ་ཆེན་གཅིག་ཏུ་བསྟན་པ་བསྲུང༌། །དེ་ཡི་འོག་ཏུ་རང་ཅག་ཀུན། །ཐལ་བ་ཅན་གྱི་ཞིང་ཁམས་སུ། །ཐལ་བའི་དབང་པོར་སངས་རྒྱས་སྨོན། །ཞེས་འབྱུང་བ་ལྟར་སྤྱིར་སངས་རྒྱས་སྟོང་དང༌། སྒོས་སྟོན་པ་ཤཱཀྱ་ཐུབ་པའི་བསྟན་པ་དང༌། ཡང་སྒོས་ཆུ་ཀླུང་ཆེན་པོ་ལས། ལྷ་ཆེན་མ་ཧཱ་ཀཱ་ལ་ཁྱོད་ལ་གཏད། །ཅེས་རྒྱུད་ཀྱི་སྲུང་མར་བསྐོས་པ་ལྟར་རྗེ་བཙུན་དམ་པ་སངས་རྒྱས་ཀྱི་བསྟན་པ་དམ་པའི་ཆོས་སྡུག་བསྔལ་ཞི་བྱེད་བཀའ་བབས་བཀའ་སྲུང་འགྲན་ཟླ་དང་བྲལ་བ་འདིའི་བྱིན་རླབས་རྗེས་གནང་གི་བཀའ་བརྒྱུད་པ་ སྔ་ཕྱི་བར་གསུམ་ཆུ་བོ་གཅིག་འདུས་ཀྱི་ཚུལ་དུ་སྒྲུབ་པར་བྱེད་པ་ལ། སློབ་དཔོན་གྱི་བྱ་བ་རྣམས་སྔོན་དུ་སོང་ནས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་ཐོག་མར་མཎྜལ་ཕུལ་མཛོད། དེ་ནས་སློབ་དཔོན་ལྷག་པའི་ལྷ་དང་གཉིས་སུ་མེད་པ་ལ་ཡེ་ཤེས་ཀྱི་མགོན་པོ་ཨ་གྷོ་རའི་བྱིན་རླབས་ཞུ་བའི་སླད་དུ་གསོལ་བ་གདབ་པ་འདིའི༴ དུས་གསུམ་སངས་རྒྱས་ཐམས་ཅད་ཀྱི། །ཕྲིན་ལས་གཅིག་ཏུ་འདུས་པ་པོ། །གང་གི་མཚན་ནི་ཨ་གྷོ་ར། །སྟོབས་ཆེན་ཁྲོ་བོ་ཆེན་པོ་ཡི། །སྐུ་གསུང་ཐུགས་ཀྱི་དབང་བསྐུར་སྩོལ། །ཞེས་ལན་གསུམ། དེ་ནས་རྒྱུད་དག་པར་བྱ་བའི་ཕྱིར་ཚོགས་ཞིང་ཁྱད་པར་ཅན་གྱི་སྤྱན་སྔར་ཡན་ལག་བདུན་པ་རྣམ་དག་ཕུལ་བའི་འདུན་པས་འདིའི༴ ན་མོ་དཀོན་མཆོག་ཡི་དམ་ལྷར། །དང་བའི་སེམས་ཀྱིས་ཕྱག་འཚལ་ལོ། །མཁའ་འགྲོ་ཆོས་སྐྱོང་ཐམས་ཅད་ལ། །ཡིད་ཀྱིས་སྤྲུལ་ཏེ་མཆོད་པ་འབུལ། །བདག་གིས་སྡིག་པ་ཅི་བགྱིས་པ། །དེ་དག་ཐམས་ཅད་སོ་སོར་བཤགས། ། སེམས་ཅན་དོན་མཛད་རྒྱལ་སྲས་གང༌། །དེ་དག་ཀུན་ལ་རྗེས་ཡི་རངས། །ཇི་སྲིད་འཁོར་བ་མ་སྟོང་བར། །མྱ་ངན་མི་འདར་གསོལ་བ་འདེབས། །མགོན་པོ་ཐུགས་རྗེ་ཆེ་ལྡན་རྣམས། །ཆོས་ཀྱི་འཁོར་ལོ་བསྐོར་བར་བསྐུལ། ། འགྲོ་ཀུན་བསགས་པའི་དགེ་བ་གང༌། །བྱང་ཆུབ་ཏུ་ནི་བདག་གིས་བསྔོ། །ཞེས་ལན་གསུམ། བདག་གཞན་སེམས་ཅན་ཐམས་ཅད་ཀྱིས་སྐྱབས་གནས་རེ་ས་བླ་མ་དཀོན་མཆོག་ལ་ཞུ་སྙམ་པ་དང༌། གཞན་དོན་དུ་སྨོན་འཇུག་ དོན་དམ་པའི་སེམས་གསུམ་དེང་ནས་བསྐྱེད་པར་བགྱིའོ་སྙམ་པས་འདིའི༴ སངས་རྒྱས་ཆོས་དང་དགེ་འདུན་ལ། །ཐར་པ་འདོད་ཕྱིར་སྐྱབས་སུ་མཆི། །སེམས་ཅན་ཀུན་དོན་སྒྲུབ་པའི་ཕྱིར། །བྱང་ཆུབ་སེམས་གསུམ་བསྐྱེད་པར་བགྱི། །ཞེས་ལན་གསུམ། དེ་ནས་དཀྱིལ་འཁོར་དུ་གཞུག་ཅིང་ལྷ་ངོ་བསྟན་པའི་དོད་མདུན་བསྐྱེད་ཀྱི་མགོན་པོ་འཁོར་བཅས་སློབ་མའི་བློ་ཡུལ་དུ་གསལ་འདེབས་པ་ཡིན་ཏེ། ཁྱེད་རང་རྣམས་ཀྱི་མདུན་གྱི་ནམ་མཁར་ཀ་ལིངྐའི་དུར་ཁྲོད་ཀྱི་དབུས་གྲུ་གསུམ་མཐིང་ནག་འབར་བ་པད་ཟླ་ཉི་མ་རའི་གདན་ལ་དཔལ་ཡེ་ཤེས་ཀྱི་མགོན་པོ་ཨ་གྷོ་ར་སྐུ་མདོག་མཐིང་ནག་ཞལ་གཅིག་ཕྱག་གཉིས་ཙན་དན་གྱི་བིང་དང་ཐོད་ཁྲག་བསྣམས་པ༑ དར་ནག་གི་བེར་དང་གསེར་སྐེད་ཟངས་ཀྱི་ལྷམ་གསོལ་ཞིང་ཐོད་སྦྲུལ་རིན་པོ་ཆེས་བརྒྱན་པ་གཡོན་བརྐྱང་གིས་མེ་དཔུང་འབར་བའི་དབུས་ན་བཞུགས་པའི་གཡས་སུ་ལེགས་ལྡན་ནག་པོ་བེང་འཕྱར་ཞིང་ཐོད་ཁྲག་གཙོ་བོ་ལ་སྟོབས་པ་རྒྱན་ཆ་ལུགས་གཙོ་བོ་ལྟ་བུ། གཡོན་དུ་དཔལ་ལྡན་ལྷ་མོ་སྔོ་སྐྱ་རལ་གྲི་དང་ཐོད་ཁྲག་བསྣམས་པ་མ་མའི་ཆས་ཅན་བོང་བུ་གྭ་དམར་ལ་ཞོན་པ། དེ་དག་གི་ཕྱི་རོལ་ཤར་ནས་གཡས་བསྐོར་དུ་སྲིན་པོ། མ་མོ། གཟའ་བདུད། བཙན་དམར། གིང་ཆེན་རྨུ་རྒོད། བདུད་རིགས། གཤིན་རྗེ་རེ་རེ་ལའང་སྟོང་སྟོང་སོགས་དྲེགས་པའི་དམག་ཚོགས་བསམ་གྱིས་མི་ཁྱབ་པས་བསྐོར་བའོ། །དེ་ནས་བྱིན་རླབས་ཀྱི་གཞི་བཅའ་བའི་ སླད་དུ་བླ་མ་མདུན་བསྐྱེད་ཀྱི་གཙོ་བོ་དང་དབྱེར་མེད་དུ་བལྟས་ལ་མོས་གུས་དུང་བ་བྱས་པས་ཐུགས་ཀ་ནས་འོད་ཟེར་འཕྲོས་པས་ཁྱེད་རང་ལ་ཕོག །སྡིག་སྒྲིབ་ཐམས་ཅད་བསྲེགས། མ་དག་པའི་སྣང་བ་ཐམས་ཅད་སྦྱངས། སྟོང་པའི་ངང་ལས་པད་ཟླ་ཉི་མ་རོའི་གདན་ལ་ཁྱེད་རང་གི་སེམས་ཉིད་ཧཱུྃ་ལས་ཙནྡན་གྱི་བིང་ཆེན་ཧཱུྃ་གིས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་དཔལ་ཡེ་ཤེས་ཀྱི་མགོན་པོ་ཨ་གྷོ་ར་ཞེས་པ་ནས་གཡོན་བརྐྱང་གིས་མེ་དཔུང་འབར་བའི་དབུས་ན་བཞུགས་པ། ཞེས་པའི་བར་བཤད་མ་ཐག་པ་ལྟར་ལས། རང་དང་མདུན་བསྐྱེད་ཀྱི་མགོན་པོའི་དཔྲལ་བར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོ་རྣམས་ཀྱིས་མཚན་པར་གྱུར། དེ་ནས་སྐུ་གསུང་ཐུགས་ཀྱི་བྱིན་རླབས་དངོས་ནི། སློབ་དཔོན་གྱི་དཔྲལ་བའི་ༀ་ལས་འོད་ཟེར་དཀར་པོ་འཕྲོས། མདུན་བསྐྱེད་ཀྱི་དཔྲལ་བའི་ༀ་ལ་ཐིམ། དེ་ལས་ཡེ་ཤེས་ཀྱི་མགོན་པའི་སྐུ་དཔག་ཏུ་མེད་པ་ཁ་ཆར་དང་བུ་ཡུག་འཚུབས་པ་ལྟར་བྱོན་ནས་ཁྱེད་རང་གི་དཔྲལ་བའི་ༀ་ལ་ཐིམ་པས་སྐུའི་བྱིན་རླབས་ཐོབ་པའི་མོས་པ་མཛོད། གཏོར་མ་སྤྱི་བོར་བཞག་ལ། གཏོར་སྣོད་རྣམ་དག་ཆོས་ཀྱི་དབྱིངས། །གཏོར་མ་ཡེ་ཤེས་བདུད་རྩི་ལྔ། །སྐལ་ལྡན་ཁྱོད་ལ་དབང་བསྐུར་བས། །སྐུའི་དབང་མཆོག་ཐོབ་པར་ཤོག །སྙིང་པའི་མཐར་ཀཱ་ཡ་ཨ་བྷི་ཥིཉྩ་ཧཱུྃ། ཞེས་རོལ་མོ་བྱ། དེས་ཡེ་ཤེས་ཀྱི་མགོན་པོའི་སྐུའི་བྱིན་རླབས་ཐོབ་པ་ ཡིན་ནོ། །ཡང་སློབ་དཔོན་གྱི་མགྲིན་པའི་ཨཱཿ ལས་འོད་ཟེར་དམར་པོ་འཕྲོས། མདུན་བསྐྱེད་ཀྱི་མགྲིན་པའི་ཨཱཿ ལ་ཐིམ། དེ་ལས་ཡེ་ཤེས་ཀྱི་མགོན་པའི་གསུང་སྔགས་ཀྱི་ཡིག་འབྲུ་རྣམས་སྔགས་སྒྲ་སྒྲོག་བཞིན་དུ་བྱོན་ནས་ཁྱེད་རང་གི་མགྲིན་པའི་ཨཱཿ ལ་ཐིམ་པས་གསུང་གི་བྱིན་རླབས་ཐོབ་པའི་མོས་པ་མཛོད། གཏོར་མ་མགྲིན་པར་འཇོག་ཅིང༌། གཏོར་སྣོད་རྣམ་དག༴ གཏོར་མ༴ སྐལ་ལྡན༴ གསུང་གི་དབང་མཆོག༴ སྙིང་པོའི་མཐར་ཝ་ཀ་ཨ་བྷི་ཥིཉྩ་ཨཱཿ རོལ་མོ་བྱ། དེས་ཡེ་ཤེས་ཀྱི་མགོན་པའི་གསུང་གི་བྱིན་རླབས་ཐོབ་པ་ཡིན་ནོ། །ཡང་སློབ་དཔོན་གྱི་ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། མདུན་བསྐྱེད་ཀྱི་ཐུགས་ཀའི་ཧཱུྃ་ལ་ཐིམ། དེ་ལས་ཡེ་ཤེས་ཀྱི་མགོན་པའི་ཐུགས་ཕྱག་མཚན་གྱི་རྣམ་པ་དཔག་ཏུ་མེད་པ་བྱུང་ཁྱེད་རང་གི་སྙིང་གའི་ཧཱུྃ་ལ་ཐིམ་པས་ཐུགས་ཀྱི་བྱིན་རླབས་ཐོབ་པའི་མོས་པ་མཛོད། གཏོར་མ་སྙིང་གར་འཇོག་ཅིང༌། གཏོར་སྣོད༴ གཏོར་མ༴ སྐལ༴ ཐུགས་ཀྱི་དབང་མཆོག་ཐོབ་པར་ཤོག །སྙིང་པའི་མཐར་ཙིཏྟ་ཨ་བྷི་ཥིཉྩ་ཧཱུྃ། རོལ་མོ་བྱ། དེས་ཡེ་ཤེས་ཀྱི་མགོན་པའི་ཐུགས་ཀྱི་བྱིན་རླབས་ཐོབ་པ་ཡིན་ནོ། །དེ་ནས་སྔགས་གཏད་པའི་རྗེས་གནང་ངམ་བཟླས་ལུང་ནི། སློབ་དཔོན་མདུན་བསྐྱེད་ཀྱི་གཙོ་བོ་ཡེ་ཤེས་མགོན་པོ་དང་དབྱེར་མེད་དུ་གྱུར་པའི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་སྔགས་ཕྲེང་གིས་བསྐོར་བ་ལས་སྔགས་ཀྱི་ཕྲེང་བ་སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་གར་ཉི་མའི་གདན་ལ་ཧཱུྃ་ཡིག་གནས་པའི་མཐར་སྤར་བཏབ་པ་བཞིན་འཁོད་པས་མགོན་པའི་གསུང་སྔགས་ཀྱི་བྱིན་རླབས་ཀྱིས་བརྒྱུད་རླན་པར་གྱུར་སྙམ་པས་འདིའི༴ བསྙེན་སྔགས་ཙམ་མམ། སློབ་མ་ཁྱད་པར་ཅན་ལ་བསྙེན་སྒྲུབ་ལས་གསུམ་ཀའི་སྔགས་ཀྱི་རྗེས་ཟློས་ལན་གསུམ་བྱེད་དུ་བཅུག །དེ་ནས་སློབ་དཔོན་ལ་མེ་ཏོག་འཐོར་བཞིན་དུ་འདིའི༴ མགོན་པོས་བདག་ལ་སྩལ་ལགས་ཀྱི། །བདག་ལ་འགོ་བར་མཛད་དུ་གསོལ། །དཔལ་ཡེ་ཤེས་ཀྱི་མགོན་པོ་ཨ་གྷོ་རས་བདག་སྐྱེ་བ་འདི་དང་བྱང་ཆུབ་མ་ཐོབ་ཀྱི་བར་དུ་བྱང་ཆུབ་སྒྲུབ་པའི་བར་ཆད་ཞི་བ་དང༌། མཐུན་རྐྱེན་ཐམས་ཅད་སྒྲུབ་པའི་ཕྲིན་ལས་མཛད་དུ་གསོལ། ཞེས་ལན་གསུམ། སློབ་དཔོན་གྱིས་མེ་ཏོག་དེ་བཟུང་ལ། མགོན་པོས་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །དཔལ་ཡེ་ཤེས་ཀྱི་མགོན་པོ་ཨ་གྷོ་རས་བདག་གི་སློབ་མ་འདི་རྣམས་སྐྱེ་བ་འདི་དང་བྱང་ཆུབ་མ་ཐོབ་ཀྱི་བར་དུ་བྱང་ཆུབ་སྒྲུབ་པའི་བར་ཆད་ཐམས་ཅད་བསྲུང་ཞིང༌༑ མཐུན་རྐྱེན་ཐམས་ཅད་སྒྲུབ་པའི་ཕྲིན་ལས་མཛད་དུ་གསོལ། ཅེས་བརྗོད་ཅིང་སློབ་མའི་སྤྱི་བོར་མེ་ཏོག་གཏོར། དེ་ནས་དམ་ཚིག་ཁས་བླངས་པ་དང༌། གཏོང་རག་གི་མཎྜལ་ལུས་དབུལ་དགེ་བ་བསྔོ་བ་རྣམས་དང༌། རྗེས་ཆོག་རྣམས་པར་ནག་གི་དབང་ལྟར་སྦྱར་ཚུལ་འགྲོས་ཤེས་པར་བྱའོ། །ཤུ་བྷཾ།། ༈ །།ༀ་སྭ་སྟི། ཞིང་སྐྱེས་མཁའ་འགྲོ་ཀུན་ཏུ་རི་ཀའི་རྗེས་གནང་བྱ་བར་འདོད་པས་དཀྱིལ་འཁོར་པདྨ་འདབ་བཞི་ལ་བྃ་ཧ་རི་ནི་སའི་ས་བོན་ནམ་ཕྱག་མཚན་ལྟ་བུ་ལྷ་མཚན་དགོད། དེའི་སྟེང་དུ་མཉྫིའི་ཁར་དཀར་གཏོར་རྩ་ཟླུམ་སྟོད་ གཤོག་པ་གསུམ་རྩེ་མོ་ཧ་ཅང་མི་རྣོ་བ་ལ་རང་འདྲའི་འཁོར་བཞིས་བསྐོར་བ་ལ་སོ་སའི་ཙཀ་ལི་འཛུགས་ཤིང་གཙོ་བོར་དར་དཀར་གྱི་གདུགས་ཕུབ་མཐའ་མཆོད་པས་བསྐོར། ཌཱ་དྲིལ་ནང་མཆོད་མེ་ཏོག་སོགས་ཚོགས་པར་བཤམས་ལ། བདག་མེད་མའམ་རྡོ་རྗེ་གཏུམ་མོ་གཙོ་རྐྱང་ལྟ་བུ་ཡི་དམ་གང་ཡང་རུང་བའི་བདག་བསྐྱེད་སྔོན་དུ་འགྲོ་བས། མཆོད་གཏོར་རྣམས་རྃ་ཡྃ་ཁྃ་གིས་སྦྱངས། སྟོང་པའི་ངང་ལས་ༀ་ལས་མཆོད་སྣོད་ཡངས་ཤིང་རྒྱ་ཆེ་བར་ཨཱཿ ལས་མཆོད་རྫས་རྣམས་ཡེ་ཤེས་ཀྱི་བདུད་རྩི་ཧཱུྃ་གིས་མཁའ་ཁྱབ་ཏུ་སྤེལ་བར་གྱུར། ༀ་ཨཱཿ ཧཱུྃ་ལན་གསུམ་གྱིས་བརླབ། མདུན་བསྐྱེད་ནི། དཀྱིལ་འཁོར་དང་གཏོར་མ་སྭ་བྷཱ་ཝས་སྦྱངས། སྟོང་པའི་ངང་ལས་རང་ཡི་དམ་དུ་གསལ་བའི་མདུན་དུ་གཏོར་རྫས་ཡེ་ཤེས་ཀྱི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པས་ཡོངས་སུ་གང་བའི་སྟེང་གི་ནམ་མཁར་པདྨ་དང་ཟླ་བ་སེང་གེ་དཀར་མོའི་སྟེང་དུ་བྃ་ཡིག་ཡོངས་སུ་གྱུར་པ་ལས་ཞིང་སྐྱེས་ཀུན་ཏུ་རི་ཀ་སྐུ་མདོག་དཀར་མོ་འོད་འབར་བ་ཞལ་གཅིག་ཕྱག་གཉིས་སྤྱན་གསུམ་མ༑ གཡས་གསེར་གྱི་རྡོ་རྗེ་དང༌། གཡོན་བདུད་རྩིས་གང་བའི་བུམ་པ་དཔག་བསམ་ལྗོན་པའི་ཁ་རྒྱན་ཅན་བསྣམས་པ། དར་དང་རིན་པོ་ཆེ་དང་ཤིང་ལོས་བརྒྱན་པ་གཤོག་པ་དཀར་པོ་ཅུང་ཟད་ཕབ་སྟེ་བརྐྱང་བ་པུས་སྟེང་ན་ཉི་ཟླ་འཆར་བའི་སྐུར་གྱུར། དེའི་ཕྱི་རོལ་པདྨ་འདབ་བཞི་ལ། ཤར་དུ་ལག་ན་རྡོར་འཆང་དཀར་མོ་རྡོ་རྗེ་དང་སྡིགས་མཛུབ་ཞབས་གཡས་བརྐྱང༌། ལྷོར་གཙུག་ན་མེ་ཁྱེར་སེར་མོ་སྤྱི་བོར་མེ་དཔུང་འཛིན་པ་ཞབས་ གཡོན་བརྐྱང༌། ནུབ་ཏུ་མཐའ་ན་གཤོག་སྡུད་དམར་མོ་ཕྱག་གཉིས་བརྐྱང་བའི་རྒྱབ་ན་གཤོག་པ་ཅུང་ཟད་ཕབ་པ་ཞབས་ས་གའི་སྟབས། བྱང་དུ་ཁ་ནས་ཁུས་འདེབས་ལྗང་གུ་དུང་འབུད་པ་ཞབས་ཟླུམ་པའི་སྟབས་ཀྱིས་བཞུགས་པའོ༑ ༑གཙོ་འཁོར་ཐམས་ཅད་ཀྱི་གནས་གསུམ་དུ་ༀ་ཨཱཿ ཧཱུྃ་གསུམ་དང་གཙོ་མའི་ལྟེ་བར་བྃ། དེ་ལས་འོད་ཟེར་འཕྲོས་རང་འདྲའི་ཡེ་ཤེས་པ་སྤྱན་དྲངས་པར་བསམ་ཞིང་སྤོས་བསྲེག །རོལ་མོ་འཁྲོལ་ཞིང༌། ཧཱུྃ། བཞེངས་ཤིག་རང་ རང་གནས་ནས་བཞེངས། །ཆོས་བདག་མཁའ་འགྲོ་སྡེ་ལྔའི་ཚོགས། །ཞི་རྒྱས་དབང་དྲག་ཕྲིན་ལས་ཀྱི། །དངོས་གྲུབ་སྩོལ་ཕྱིར་གཤེགས་སུ་གསོལ། །ༀ་བཛྲ་བ་སུ་དྷ་རི་ཧ་རི་ནི་ས་སཱ་མཱ་ཛཿ ས་སྤྱན་དྲངས། ཛཿ ཧཱུྃ་བཾ་ཧོཿ ས་གཉིས་སུ་མེད་པར་བསྟིམ། སླར་ཡང་དབང་གི་ལྷ་བཛྲ་ས་མཱ་ཛཿ དེ་རྣམས་ཀྱིས་ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། ཞེས་དབང་བསྐུར་བས་སྐུ་གང༌། དྲི་མ་དག །ཆུ་ལྷག་མ་ཡར་ལུད་པ་ལས་སངས་རྒྱས་རིགས་ཀྱིས་དབུ་བརྒྱན་པར་གྱུར། ༀ་བཛྲ་བ་སུ་དྷ་རི་ཧ་རི་ནི་ས་ཨརྒྷཾ་ནས་ཤབྡའི་བར་གྱིས་མཆོད། ༀ་ཨཱཿ ཧཱུྃ་གིས་ནང་མཆོད་ཕུལ། ༀ་བཛྲ་བ་སུ་དྷ་རི་ཧ་རི་ནི་ས་བ་ལ་ཏ་ཁཱ་ཧི། ཞེས་ལན་གསུམ་གྱིས་གཏོར་མ་ཕུལ། བསྟོད་ཅིང་ཕྲིན་ལས་བཅོལ་བ་ནི༑ ཧཱུྃ། ནམ་མཁའ་དབྱིངས་ཀྱི་གཞལ་ཡས་སུ། །འཇའ་དང་འོད་ཀྱི་ཕོ་བྲང་ན། །ཉི་ཟླ་ལྟ་བུའི་གཟི་བརྗིད་ཅན། །ཀུན་ཏུ་རི་ཀའི་སྐུ་ལ་བསྟོད། །ཞིང་སྐྱོང་ཀུན་ཏུ་རི་ཀ་དང༌། །བཀའ་སྲུང་མཁའ་འགྲོ་སྡེ་བཞིའི་ཚོགས། །སྔོན་གྱི་ ཐུགས་དམ་བརྩེར་དགོངས་ལ། །རྟག་ཏུ་བརྩེ་བས་སྤྱན་གྱིས་གཟིགས། །མཛེས་པའི་སྐུ་ཞལ་མྱུར་དུ་སྟོན། །ལུང་སྟོན་གསུང་གི་རྗེས་གནང་མཛོད། །སྒྲུབ་མཆོག་བདག་ལ་མངོན་དགོངས་ལ། །སྐུ་གསུང་ཐུགས་ཀྱི་དངོས་གྲུབ་སྩོལ། །འཆི་མེད་ཚེ་དང་ནད་མེད་བདེ། །འཛད་མེད་ཟས་ནོར་བུ་སློབ་འཁོར། །དཔལ་འབྱོར་སྙན་གྲགས་དངོས་གྲུབ་སྩོལ། །ཕྱི་ནང་འགལ་རྐྱེན་བར་ཆད་སོལ། །ཞི་བྱེད་བསྟན་པ་ཕྱོགས་བཅུར་སྤེལ། །འཁོར་འདས་ཆོས་ཀུན་དབང་དུ་བསྡུས། །དགྲ་བགེགས་ཞིང་བཅུ་དྲག་པོས་སྒྲོལ། །ཕྲིན་ལས་བསམ་པའི་དོན་ཀུན་སྒྲུབས། །དེ་ནས་རང་གི་ཐུགས་ཀའི་ཧཱུྃ་འོད་ཀྱིས་ཐུགས་རྒྱུད་བསྐུལ་བས་ཅི་བཅོལ་གྱི་ལས་སྒྲུབ་པར་བསམས་ལ༑ ༀ་བཛྲ་བ་སུ་དྷ་རི་ཧ་རི་ནི་ས་ཧཱུྃ་ཕཊ། ཅེས་ཅི་ནུས་བཟླ། དེ་ནས་རྗེས་གནང་ནི། སློབ་མ་རྣམས་ཁྲུས་ཕྱག་སྔོན་འགྲོས་འཁོད་པ་ལ། སེམས་བསྐྱེད་གསལ་བཏབ་ནས། འདིར་རྩ་རླུང་ཆེན་པའི་རྒྱུད་ལས། ཀུན་གསལ་ཀླུ་མོས་བསྟན་པས་ཉ་ར་མཛོད། ། ཅེས་གཏད་ཅིང་རྒྱུད་དེར་ཞིང་སྐྱེས་མཁའ་འགྲོ་ལས་ལ་བཀོལ་བའི་ཐབས་ཞེས་སྒྲུབ་ཐབས་དང་བཅས་པ་གསུངས་ཤིང༌། རྗེ་བཙུན་དམ་པ་རིན་པོ་ཆེས་འདིའི་གསང་སྒྲུབ་རིགས་མི་འདྲ་བ་བརྒྱ་རྩ་བརྒྱད་མཛད་པ་ལས། དེ་རྣམས་ཀྱི་ཉིང་ཁུ་ལྟ་བུ་ནི་རྒྱུད་ཀྱི་རྗེས་སུ་འབྲངས་པ་བདུད་རྩི་བུམ་ཆུང༌། ལུང་གི་རྗེས་སུ་འབྲངས་པ་ལེའུ་བདུན་པ། སྒྲུབ་ཐབས་ཀྱི་རྗེས་སུ་འབྲངས་པ་ལས་བཅུ་མ། མན་ངག་གི་རྗེས་སུ་འབྲངས་པ་སྙིང་གི་དུམ་བུ་སྟེ་ བཞི་ལས། འདི་ནི་བདུད་རྩི་བུམ་ཆུའི་གསང་སྒྲུབ། གདོང་ཅན་མ་བཞིའི་མཆུ་སྒྲུབ། ཀུན་ཏུ་རི་ཀའི་ཀླུ་སྒྲུབ་རྣམས་ལས་འདི་ཕྱི་མ། དཔལ་དིང་རི་གླང་འཁོར་གྱི་གཞི་བདག་ཀླུ་ཡི་རྒྱལ་པོ་བཏང་བཟུང་ཞེས་པ་ནོར་རྒྱས་ཀྱི་སྲིང་མོར་གྱུར་པ་མཁའ་འགྲོ་མ་ཀུན་ཏུ་རི་ཀ་རླུང་གཤོག་ཅན་ཞེས་གྲགས་པ་འདིའི་རྗེས་གནང་སྒྲུབ་པར་བྱེད་པ་ལ་སློབ་དཔོན་གྱི་བྱ་བ་རྣམས་སྔོན་དུ་སོང་ནས་ད་སློབ་མའི་ངོ་སྐལ་དུ་གྱུར་པ་ལ། ཐོག་མར་མཎྜལ་ཕུལ་མཛོད། དེ་ནས་གསོལ་བ་གདབ་པ་འདིའི་རྗེས་ཟློས། འདོད་དགུ་རབ་རྫོགས་རིན་ཐང་མེད་པ་ཡི། །ཕུན་ཚོགས་དངོས་གྲུབ་མྱུར་དུ་ཐོབ་པའི་ཕྱིར། །བདག་ལ་ཞིང་སྐྱེས་མཁའ་འགྲོ་སྡེ་ལྔ་ཡིས། །རྗེས་སུ་གནང་བ་མ་ལུས་སྩལ་དུ་གསོལ། །ཞེས་ལན་གསུམ། དེ་ནས་རྒྱུད་དག་པར་བྱ་བའི་ཕྱིར། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་གུར་ནས་འབྱུང་བའི་རྒྱུན་བཤགས་ཚར་གསུམ་བྱེད་དུ་བཅུག །དེ་ནས་དམིགས་པ་འདི་ལྟར་མཛོད། གཏོར་མའི་སྟེང་གི་ནམ་མཁར་པདྨ་དང་ཟླ་བ་སེང་གེ་དཀར་མོའི་སྟེང་དུ་ཞིང་སྐྱོང་ཀུན་ཏུ་རི་ཀ་སྐུ་མདོག་དཀར་མོ། ཞེས་པ་ནས། ཞབས་ཟླུམ་པའི་སྟབས་ཀྱིས་བཞུགས་པའོ། །ཞེས་པའི་བར་གྱིས་གཙོ་འཁོར་ལྔ་གསལ་བཏབ་ནས། བླ་མ་ལ་མོས་གུས་དུང་བ་བསྐྱེད་དེ་གསོལ་བ་གདབ་པ་འདིའི༴ བླ་མ་རིན་པོ་ཆེ། བདག་ལ་བུམ་པའི་དབང་བསྐུར་དུ་གསོལ། ཞེས་གསོལ་བ་བཏབ་པས་གཏོར་མའི་སྟེང་གི་གཙོ་མོ་སངས་རྒྱས་མཁའ་འགྲོའི་སྐུ་ལས་བྱང་ཆུབ་སེམས་ཀྱི་ ཆུ་རྒྱུན་དཀར་ནར་གྱིས་བྱུང་བ་སྤྱི་བོ་ནས་ཞུགས་རྐང་མཐིལ་ཡན་ཆད་ཀྱི་ནང་ཐམས་ཅད་སྐྱ་མེར་གྱིས་ཁེངས་པའི་མོས་པ་མཛོད། གཏོར་མ་སྤྱི་བོར་བཞག་ལ། ༀ་བཛྲ་བ་སུ་དྷ་རི་ཧ་རི་ནི་ས་ཧཱུྃ་ཕཊ་ཨ་བྷི་ཥིཉྩ་ༀ། རོལ་མོ་བྱ། ཞེས་བུམ་དབང་ཐོབ་པས་རང་ལུས་ཀུན་ཏུ་རི་ཀའི་སྐུ་གསལ་སྟོང་འཇའ་ཚོན་ལྟ་བུར་གྱུར་པའི་མོས་པ་མཛོད། དེ་ནས་བླ་མ་རིན་པོ་ཆེས་བདག་ལ་གསང་བའི་དབང་བསྐུར་དུ་གསོལ། ཞེས་གསོལ་བ་བཏབ་པས་འཁོར་གྱི་པདྨ་མཁའ་འགྲོའི་སྐུ་ལས་བྱང་ཆུབ་སེམས་ཀྱི་ཆུ་རྒྱུན་དམར་ལྷུག་ལྷུག་བྱུང་སྟེ་ལུས་ནང་དམར་མེར་གྱིས་གང་བའི་མོས་པ་མཛོད། སྙིང་པའི་མཐར་ཨ་བྷི་ཥིཉྩ་ཨཱཿ ཞེས་གཏོར་མ་སྤྱི་བོར་བཞག་ཅིང་རོལ་མོ་བྱ། དེས་གསང་དབང་ཐོབ་པས་སེམས་གསལ་སྟོང་ཉིད་ཡེ་ཤེས་ལྷག་གིས་ཤར་བའི་མོས་པ་མཛོད། དེ་ནས་བླ་མ་རིན་པོ་ཆེ། བདག་ལ་ཤེས་རབ་ཡེ་ཤེས་ཀྱི་དབང་བསྐུར་དུ་གསོལ། ཞེས་གསོལ་བ་བཏབ་པས་འཁོར་གྱི་རྡོ་རྗེ་མཁའ་འགྲོའི་སྐུ་ལས་བྱང་ཆུབ་སེམས་ཀྱི་ཆུ་རྒྱུན་སྔོ་བྲེང་གིས་བྱུང་བས་བསྐུལ་ཏེ་རྡོ་རྗེ་ལུས་ཀྱི་དཔའ་བོ་དང་རྣལ་འབྱོར་མ་རྣམས་སྦྱོར་བ་མཛད་པའི་བྱང་སེམས་ཀྱི་དྭངས་མས་ལུས་གང་བའི་མོས་པ་མཛོད། སྙིང་པོའི་མཐར་ཨ་བྷི་ཥིཉྩ་ཧཱུྃ། གཏོར་མ་སྤྱི་བོར་འཇོག་ཅིང་རོལ་མོ་བྱ། དེས་ཤེར་དབང་ཐོབ་པས་ལུས་བདེ་སྟོང་གི་ཡེ་ཤེས་སུ་ལྷག་ལྷག་ཤར་བའི་མོས་པ་མཛོད། དེ་ནས་བླ་མ་རིན་པོ་ཆེ། བདག་ལ་དབང་བཞི་པ་བསྐུར་དུ་གསོལ། ཞེས་ གསོལ་བ་བཏབ་པས་འཁོར་གྱི་རིན་ཆེན་མཁའ་འགྲོའི་སྐུ་ལས་བྱང་ཆུབ་སེམས་ཀྱི་ཆུ་རྒྱུན་ཁ་དོག་སྣ་ཚོགས་པ་བྱུང་བས་ལུས་སེམས་སྣང་བའི་དངོས་པོ་ཐམས་ཅད་ནམ་མཁའ་ལ་སྤྲིན་དེངས་པ་ལྟར་རྗེན་གྱིས་སོང་བའི་མོས་པ་མཛོད། སྙིང་པོའི་མཐར་ཨ་བྷི་ཥིཉྩ་ཧྲཱིཿ ཞེས་གཏོར་མ་སྤྱི་བོར་འཇོག་ཅིང་རོལ་མོ་བྱ། དེས་དབང་བཞི་པ་ཐོབ་པས་ལྷན་ཅིག་སྐྱེས་པ་དེ་ཁོ་ན་ཉིད་ཀྱི་ཡེ་ཤེས་རྒྱུད་ལ་སྐྱེས་པའི་མོས་པ་མཛོད། དེ་ནས་དམ་ཚིག་ཁས་བླང་བ། གཏོང་རག་གི་མཎྜལ་དང་ལུས་དབུལ་དགེ་བ་བསྔོ་བ་རྣམས་སྔར་ལྟར་རོ། །རྗེས་ཆོག་ནི། གཏོང་རག་གི་མཆོད་བསྟོད་དང་ནོངས་པ་བཤགས། ཡེ་ཤེས་པ་སྐུ་རྟེན་ལ་བསྟིམ་ནས་བརྟན་བཞུགས་བྱ། དམ་ཚིག་པ་རང་ལ་བསྡུ། དགེ་བ་བསྔོ་ཞིང་བཀྲ་ཤིས་ཀྱིས་མཐའ་བརྒྱན་ནོ། །ཤུ་བྷཾ།། ༈ །།ༀ་སྭ་སྟི༑ གནོད་སྦྱིན་ཨ་པ་རཱ་ཛི་ཏའམ་ཡོན་བདག་ནོར་བུ་བཟང་པོར་གྲགས་པའི་རྗེས་གནང་ནི། དཀྱིལ་འཁོར་ཚོན་སེར་པོས་ལྟེ་བ་ནས་ཆ་མཉམ་པ་གཉིས་བསྐོར་བ་སོ་སའི་ནང་དུ་མུ་ཁྱུད་རེ་རེ་བསྐོར་བའི་དབུས་སུ་རིན་པོ་ཆེའི་ཁ་རྒྱན་ཅན་གྱི་བུམ་པ་དང༌། མུ་ཁྱུད་གཉིས་ལ་ནོར་བུའི་ཕྲེང་བ། དེ་གཉིས་ཀྱི་བར་ཕྱོགས་བཞིར་ནོར་བུ་འབར་བ་རེ་བྲི། དེའི་སྟེང་དུ་རིན་པོ་ཆེའི་སྣོད་དུ་གཏོར་མ་ཟླུམ་པོ་ལྟོ་བ་ལྡིར་བའི་ཕྱོགས་བཞིར་པད་འདབ་སྦྱར་བ་ཁ་འབུས་ཀྱི་རྣམ་པ་ཅན་ཤིང་ཏོག་དང་ནོར་སྣས་བརྒྱན་པའི་རྩེར་སྐུ་རྟེན་དར་སེར་པོའི་གདུགས་དང་བཅས་བཙུགས་པ་དགོད། མཐའ་མཆོད་པས་བསྐོར། ཡོ་བྱད་ཐམས་ཅད་ཚོགས་པར་བྱས་ནས་ཕྱག་རྡོར་གྱི་བདག་བསྐྱེད་བཟླས་པའི་བར་བེར་ནག་གི་དབང་ཆོག་ཏུ་བཤད་པ་ལྟར་དང༌། མཆོད་གཏོར་བྱིན་རླབས་ཞིང་སྐྱེས་ལྟར་བྱ། མདུན་བསྐྱེད་ནི། དཀྱིལ་འཁོར་དང་གཏོར་མ་སྭ་བྷཱ་ཝས་སྦྱངས། སྟོང་པའི་ངང་ལས་སྲུང་འཁོར་གྱི་དབུས་སུ་རིན་པོ་ཆེའི་ཁྲི་ལ་ཨཾ་ཡིག་སེར་པོ་ལས་གནོད་སྦྱིན་ཨ་པ་རཱ་ཛི་ཏ་སྐུ་མདོག་སེར་པོ་སྦོམ་ཞིང་རབ་ཏུ་བཞད་པ། གཡས་རིན་པོ་ཆེའི་བུམ་པ་དང༌། གཡོན་ནེའུ་ལེའི་རྐྱལ་པའི་ཁ་ནས་ནོར་བུ་རིན་པོ་ཆེ་འཛག་པ། དར་དང་རིན་པོ་ཆེའི་རྒྱན་གྱིས་བརྒྱན་པ། རྒྱལ་པོ་རོལ་པའི་འདུག་སྟངས་ཀྱིས་བཞུགས་པའི་གནས་གསུམ་ༀ་ཨཱཿ ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ ས་མཱ་ཛཿ ས་སྤྱན་དྲངས། ཛཿ ཧཱུྃ་བཾ་ཧོཿ ས་གཉིས་སུ་མེད་པར་བསྟིམ། ༀ་ཨ་པ་རཱ་ཛི་ཏ་ས་པ་རི་ཝཱ་ར་ཨརྒྷཾ་ནས་ཤབྡའི་བར་གྱིས་མཆོད། རིན་ཆེན་མཛེས་པའི་ཁྲི་སྟེང་ན། །འདོད་དགུའི་མཆོག་སྩོལ་དཔལ་དང་ལྡན། །གནོད་སྦྱིན་ཆེན་པོ་ནོར་བུ་བཟང༌། །གཞན་གྱིས་མི་ཐུབ་ཁྱོད་ལ་བསྟོད། །ཅེས་བསྟོད། རང་གི་ཐུགས་ཀའི་འོད་ཀྱིས་ནེའུ་ལེའི་ཁ་ནས་རིན་པོ་ཆེ་འཛག་པ་དགོས་འདོད་ཐམས་ཅད་འབྱུང་བར་བསམས་ལ། ༀ་ཧྲཱིཿ ཛ་ཨ་པ་རཱ་ཛི་ཏ་ཛཿ ས་མ་དུ་དུ། ལིང་ལིང༌། ཀྲམ་ཀྲམ། ཧཱུྃ་ཧཱུྃ། ཛ་ཛཿ ཞེས་བསྙེན་སྔགས་ཅི་ནུས་བཟླས་མཐར། ༀ་ཨ་པ་རཱ་ཛི་ཏ་ཞེས་མཚན་སྔགས་མཐར་ཨ་ཀཱ་རོ་བཏགས་པ་ལན་གསུམ་གྱིས་གཏོར་མ་ཕུལ་ལ། མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་པའི་བར་གྱིས་ཕྲིན་ལས་བཅོལ། དེ་ནས་རྗེས་གནང་དངོས་ནི། སློབ་མ་རྣམས་ཀྱིས་ཁྲུས་ཕྱག་སྔོན་དུ་འགྲོ་བས་གྲལ་དུ་འཁོད་པ་ལ། སེམས་བསྐྱེད་གསལ་བཏབ་ནས། འདིར་གནོད་སྦྱིན་ཨ་པ་རཱ་ཛི་ཏ་འདི་ནི་ཆུ་ཀླུང་ཆེན་པའི་རྒྱུད་ལས། གནོད་སྦྱིན་ ནོར་བཟང་ཁྱེད་ལ་ལེགས་པར་གཏད། །ཅེས་སྟོན་པས་རྒྱུད་གཏད་པ་ལྟར་རྗེ་བཙུན་དམ་པ་རྒྱ་གར་བའི་བསྟན་པ་དམ་ཆོས་སྡུག་བསྔལ་ཞི་བྱེད་ཀྱི་སྲུང་མ་ཁྱད་པར་ཅན། སྒྲུབ་པ་པོ་རྣམས་དཔལ་ཆེན་གཞན་དོན་གྱི་དུས་སུ་མི་ནོར་དབང་དུ་བསྡུ་བ་སོགས་ལས་སྒྲུབ་པ་ལ་ཐོགས་པ་མེད་པའི་ནོར་བདག་རིན་པོ་ཆེ་ལྟ་བུ་འདིའི་རྗེས་སུ་གནང་བ་ཟབ་མོ་སྒྲུབ་པར་བྱེད་པ་ལ་སློབ་དཔོན་གྱི་བྱ་བ་རྣམས་སྔོན་དུ་སོང་ནས། ད་སློབ་མའི་ངོ་སྐལ་དུ་གྱུར་པ་ལ་ཐོག་མར་མཎྜལ་ཕུལ་མཛོད། དེ་ནས་གསོལ་བ་གདབ་པ་འདིའི་རྗེས༴ ཐུགས་རྗེའི་མངའ་བདག་གསང་བའི་བདག །སློབ་དཔོན་ཁྱོད་ནི་བདག་ལ་དགོངས། །བདག་གི་དབུལ་བ་བསལ་བའི་ཕྱིར། །ནོར་བདག་དངོས་གྲུབ་བདག་ལ་སྩོལ། །ཞེས་ལན་གསུམ། དེ་ནས་རྒྱུད་དག་པར་བྱ་བའི་ཕྱིར་གུར་ནས་འབྱུང་བའི་རྒྱུན་བཤགས་ཚར་གསུམ། དེ་ནས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་ལ་ཕོག་པས་སྡིག་སྒྲིབ་ཐམས་ཅད་བསྲེགས། མ་དག་པའི་སྣང་བ་ཐམས་ཅད་སྦྱངས། སྟོང་པའི་ངང་ལས་པད་ཟླ་ཉི་མའི་གདན་ལ་ཁྱེད་རང་གི་སེམས་ཉིད་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་འོད་ཟེར་སྤྲོ་བསྡུས་སྐད་ཅིག་གིས་རྡོ་རྗེ་གཏུམ་པོ་མཐིང་ནག་ཕྱག་གཉིས་རྡོ་རྗེ་དང་སྡིགས་མཛུབ་མཛད་པ། དར་གྱི་ཅོད་པན་དང་སྦྲུལ་དང་རིན་པོ་ཆེས་བརྒྱན་པ། ཁྲོ་གཏུམ་འཇིགས་པའི་ཉམས་ཅན་གཡོན་བརྐྱང་བའི་དོར་སྟབས་ཀྱིས་མེའི་ཀློང་ན་བཞུགས་པར་བསྒོམས། དེ་ནས་སློབ་དཔོན་གྱིས། ༀ་སྭ་ བྷཱ་ཝ་སོགས་ཀྱི་སྔགས་བརྗོད་པས་མདུན་གྱི་གཏོར་མ་མི་དམིགས་པ་ལས་རིན་པོ་ཆེའི་ཁྲི་ལ་ཨཾ་ཡིག་སེར་པོ་ལས་གནོད་སྦྱིན་ཨ་པ་རཱ་ཛི་ཏ་ཞེས་པ་ནས། རྒྱལ་པོ་རོལ་པའི་འདུག་སྟངས་ཀྱིས་བཞུགས་པའི་གནས་གསུམ་དུ་ༀ་ཨཱཿ ཧཱུྃ་ཞེས་པའི་བར་སྔར་ལྟར་དང༌། སློབ་དཔོན་གྱི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ནོར་བདག་ཆེན་པོ་ཨ་པ་རཱ་ཛི་ཏ་བཛྲ་ས་མཱ་ཛཿ ཞེས་མདུན་གྱི་ནམ་མཁར་སྤྱན་དྲངས། ༀ་ཨ་པ་རཱ་ཛི་ཏ་ས་པ་རི་ཝཱ་ར་ཨརྒྷཾ་ནས་ཤབྡའི་བར་གྱིས་མཆོད། ཛཿ ཧཱུྃ་བཾ་ཧོཿ ཞེས་བརྗོད་པས་གཏོར་མ་ལྷར་གསལ་བ་ལ་ཐིམ་སྟེ་དམ་ཡེ་གཉིས་སུ་མེད་པར་ཁྱེད་རང་རྣམས་ལ་ཐུགས་ཤིན་ཏུ་མཐུན་པའི་སྒོ་ནས་བཞུགས་པར་གྱུར་སྙམ་དུ་མོས་པ་མཛོད། དེ་ནི་སྐུའི་རྗེས་གནང་ངོ༌། །དེ་ནས་བླ་མའི་ཐུགས་ཀའི་འོད་ཟེར་གྱིས་བསྐུལ་བས་ནོར་བདག་གི་ཐུགས་ཀ་ནས་སྔགས་ཕྲེང་བྱུང་བའི་འོད་ཀྱིས་འགྲོ་བའི་དབུལ་བ་བསལ་ཞིང་མི་ནོར་ལོངས་སྤྱོད་ཀྱི་དངོས་གྲུབ་བསྡུས་ནས་སྩལ་བར་མོས་ལ་འདིའི༴ ༀ་ཧྲཱིཿ ཛ་ཨ་པ་རཱ་ཛི་ཏ་ཛཿ ས་མཱ་ཡ་དུ་དུ། ལིང་ལིང༌། ཀྲམ་ཀྲམ། ཧཱུྃ་ཧཱུྃ། ཛ་ཛཿ ཞེས་ལན་གསུམ་བཟླར་གཞུག །སློབ་དཔོན་ལ་མེ་ཏོག་འཐོར་བཞིན་དུ་འདིའི༴ བཅོམ་ལྡན་བདག་ལ་སྩལ་ལགས་ཀྱིས། །བདག་ལ་འགོ་བར་མཛད་དུ་གསོལ། །ལན་གསུམ། སློབ་དཔོན་གྱིས་མེ་ཏོག་དེ་བཟུང་ལ། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ཞེས་སྤྱི་བོར་མེ་ཏོག་འཐོར། དེ་ནི་གསུང་གི་རྗེས་གནང་ངོ༌། །དེ་ནས་ཁྱེད་རང་ གསང་བའི་བདག་པོ་ཕྱག་ན་རྡོ་རྗེ་ཆེ་བཙན་འགྲན་ཟླ་ཐམས་ཅད་དང་བྲལ་བའོ་སྙམ་དུ་ང་རྒྱལ་བསྐྱེད་ཅིག །གཏོར་མར་དཔལ་འབར་བཙུགས་ལ་ལག་ཏུ་གཏད་དེ། གཏོར་མ་འདི་གནོད་སྦྱིན་ཨ་པ་རཱ་ཛི་ཏར་གསལ་བ་ཁྱེད་རང་ལ་གཏད་ཅིང་བཀའ་བསྒོས་པའི་ཚེ་རྡོ་རྗེ་འཛིན་པ་ཁྱེད་ཀྱིས་ཅི་བཅོལ་བའི་ལས་བདག་གིས་བགྱིད་དོ་ཞེས་ཞལ་གྱིས་བཞེས་པའི་མོས་པ་མཛོད། གནོད་སྦྱིན་གྱི་སྡེ་དཔོན་ཆེན་པོ་ཨ་པ་རཱ་ཛི་ཏ་འཁོར་དང་བཅས་པ་རྣམས་ཀྱིས་གསང་བདག་ཕྱག་ན་རྡོ་རྗེ། རྗེ་བཙུན་དམ་པ་སངས་རྒྱས། བྱང་སེམས་ཀུན་དགའ། སྒྲོ་ཆོས་བརྩོན། ཆུས་པ་དར་མ་བརྩོན་འགྲུས། རྒྱལ་བ་ཏེ་ནེ། ཆོས་རྒྱལ་ཞིག་པོ་སྐུ་མཆེད། དྲིན་ཆེན་རྩ་བའི་བླ་མའི་བར་དུ་བྱོན་པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་རིགས་ཀྱི་བུ་འདི་ཡི་ལུས་དང་གྲིབ་མ་བཞིན་དུ་འགྲོགས་ཏེ། ནད་གདོན་སོགས་འགལ་རྐྱེན་མི་མཐུན་པའི་ཕྱོགས་ཐམས་ཅད་ཞི་བ་དང༌། ཚེ་དང་བསོད་ནམས་དཔལ་འབྱོར་ལོངས་སྤྱོད་སོགས་མཐུན་ཕྱོགས་ཐམས་ཅད་ཡར་ངོའི་ཟླ་ལྟར་འཕེལ་ཞིང་རྒྱས་པ་དང༌། འགྲོ་བ་མ་ལུས་པ་དབང་དུ་བསྡུ་བ་དང༌། བསམ་སྦྱོར་ངན་པའི་གདུག་པ་ཐམས་ཅད་ཚར་བཅད་པ་སོགས་བསམ་པ་ཐམས་ཅད་ཡིད་བཞིན་དུ་སྒྲུབ་པའི་ཕྲིན་ལས་ཐོགས་པ་མེད་པར་སྒྲུབ་པར་མཛོད་ཅིག །ཅེས་བཀའ་བསྒོ་བ་ནི་ཐུགས་ཀྱི་རྗེས་གནང་ངོ༌། །དེ་ནས་དམ་ཚིག་ཁས་བླང་བ། གཏོང་རག་གི་མཎྜལ། ལུས་དབུལ་བསྔོ་བ་རྣམས་སྔར་ལྟར་དང༌། རྗེས་ཆོག་ནི། གཏོང་རག་གི་མཆོད་བསྟོད། ནོངས་བཤགས། ཡེ་ཤེས་པ་རྟེན་ཡོད་ན་བརྟེན་བཞུགས་དང༌། མེད་ན་བཛྲ་མུཿ ས་གཤེགས་གསོལ། དམ་ཚིག་པ་བསྡུ། བསྔོ་ཤིས་ཀྱིས་མཐའ་བརྒྱན་ནོ། །དམ་ཆོས་སྡུག་བསྔལ་ཞི་བྱེད་ཀྱི་དབང་ཆོག་བཀླགས་པས་གྲུབ་པ་ལས་བཀའ་སྲུང་ཆོས་སྐྱོང་རྣམས་ཀྱི་དབང་རྗེས་གནང་གི་ཆོ་ག་བཤད་པའི་ལེ་ཚན་ནོ།། ༈ །།ༀ་སྭ་སྟི། ན་མཿ ས་མནྟ་གུ་རུ་པཱ་དཱ་ཡ། ཤ་ར་ཎ་གཙྪ་མི། དམ་པའི་ཆོས་སྡུག་བསྔལ་ཞི་བྱེད་རྒྱུད་པ་ཕྱི་མའི་ལུགས་ཀྱི་སྐལ་ལྡན་གྱི་སློབ་མ་ཁྲིད་ཚུལ་ལ། བརྡ་རྒྱུད་ལས། ཉན་ཐོས་རང་རྒྱལ་དཔལ་ཆེན་དུས་དང་སྦྱོར། །ཞེས་པས་དཔོན་ལ་ལྟོས་པས་ཉན་ཐོས་ལྟ་བུའི་དཀའ་ཐུབ། གཅིག་པུར་སྒྲུབ་པས་རང་རྒྱལ་ལྟ་བུའི་དཀའ་ཐུབ། གཞན་དོན་ལའང་འཇུག་པ་དཔའ་ཆེན་གྱི་དཀའ་ཐུབ་གསུམ་ལས། དང་པའི་སྐབས་སུ་སྔར་བཤད་ཀྱི་དབང་རྣམས་ཕལ་ཆེར་དུས་དང་བསྟུན་ནས་སྦྱིན་ལ། གཅིག་པུར་སྒྲུབ་པ་བྱེད་པ་ཡིན་པས་དམར་ཁྲིད་ཅེས་བྱ་སྟེ། དེ་སྒྲུབ་པར་བྱེད་པ་ལ་སྔོན་དུ་རྟེན་འབྲེལ་གྱི་ཁང་པར་འཇུག་དགོས་པས་དེའི་བྱིན་རླབས་ཀྱི་ཆོ་ག་ནི། ཁང་པ་དངོས་བརྩིག་པའམ་མ་ནུས་ན་ས་གཞི་ལ་རིན་ཆེན་བརྡར་ཕྱེ་དང་སྨན་སྣ་དྲི་བཟང་རྣམས་བ་བྱུང་དང་སྦྱོར་བས་ཆག་ཆག་གདབ། དེ་ལ་དཀྱིལ་འཁོར་རྩ་ཐིག་ནས་རྩ་ཐིག་གི་བར་འདོམ་དོ་ལས་མི་ཆེ་ཞིང་འདོམ་གང་ལས་མི་ཆུང་བ་སྒོ་བཞི་སྒོ་རྐྱང་རྒྱན་མེད་ཀྱི་ཐིག་བཏབ། དེའི་དབུས་སུ་པད་འདབ་དྲུག་གི་ལྟེ་བར་ཨ་དང་ཀྵཿ ཤར་ནས་གཡས་བསྐོར་གྱིས་ས་ཙན་སི་ཀ་ར་རྣམས་འདབ་མ་ལ་བྲི། སྒོ་བཞིར་ཤར་ནས་རིམ་པ་བཞིན་ཨེ་བཾ་མ་ཡ་བྲི། མེ་ནས་རིམ་བཞིན་གྲུ་ཆད་བཞི་ལ་མཾ་ཁ་ལ་ཝོ་བྲི། རྩིབས་ནང་གི་ཕྱོགས་བཞིར་ཨཀྵ་ལྔ་བཅུ་ཚར་རེའམ། མ་གྲུབ་ན་ཚར་གཅིག་བགོས་ཏེ་ཤར་དང་ནུབ་ཏུ་འབྲུ་བཅུ་གསུམ་རེ་དང༌། ལྷོ་དང་བྱང་དུ་བཅུ་གཉིས་རེ་བྲི་བའམ་བླ་རེ་ལ་བཏགས་ཏེ་བཀྲམ་ཡང་ཆོག །སྒོའི་ཕྱིར་རྒྱ་བདུན་ མཚོན་པའི་རེ་ཁཱ་བདུན་རིམ་ཟླུམ་འཁོར་བྱེད་པའི་རྣམ་པར་བསྐོར། དཀྱིལ་འཁོར་གྱི་རི་མོ་རྣམས་མི་ཞིག་པའི་ཆུ་ཚོན་གྱིས་བརྣན་རྟེན་འབྲེལ་འཕང་ལོ་བཞི་སོ་སའི་ལས་ཀྱི་ཁ་དོག་དང་མཐུན་པའི་སྲད་བུ་བཏགས་ལ་སྒོ་བཞིའི་ཤར་དུ་དཀར་པོ་ཟླུམ་པོ། ལྷོར་སེར་པོ་གྲུ་བཞི། ནུབ་ཏུ་དམར་པོ་ཟླ་གམ། བྱང་དུ་ལྗང་གུ་ཟུར་གསུམ། རྣམས་བཞག །དཀྱིལ་འཁོར་གྱི་སྟེང་དུ་རྒྱལ་བ་ཡུམ་གྱི་བླ་རེ་ལྷའམ་ཨ་ཞལ་ཤར་བསྟན་གྱིས་དབུབས། སྒོ་བཞིར་འཇུག་པའི་ལམ་ལ་ཨཀྵ་ལྔ་བཅུ། ཚོན་དཀར་པོས་འབྲི་བའམ་ཡང་ན་དར་རས་གང་རིགས་ཀྱི་ཡུག་དཀར་པོ་ལ་བྲིས་པ་བཞིའམ། མ་འབྱོར་ན་གཅིག་རིམ་པར་སྤོས་ཆོག་པ་བྱེད། ཕྱི་ནང་གི་མཆོད་པ་རྫས་དང་གཏོར་མ་ཚོགས་ཀྱི་ཡོ་བྱད་རྣམས་རྒྱས་པར་བསགས་ལ། གོ་ཡུལ་གྱིས་ཤོང་ན་མཆོད་གཏོར་རྣམས་དཀྱིལ་འཁོར་ནང་གི་ཟུར་གཅིག་ཏུ་བཤམས་ཀྱང་ཆོག །མ་ཤོང་ན་དཀྱིལ་འཁོར་ཕྱིའི་འདོད་སྣམ་གྱི་རི་མའི་སྟེང་དུ་བསྐོར་ནས་བཤམས་ཀྱང་མི་འགལ་གསུང༌། གཞན་ཡང་ཌཱ་དྲིལ་མེ་ཏོག་སོགས་འདིར་དགོས་པ་ཐམས་ཅད་ཚང་བར་བསག་གོ །དེ་ནས་སློབ་དཔོན་གྱིས་ཕྱོགས་སྐྱོང་བཞི་བགེགས་ཀྱི་གཏོར་མ་བཏང་བ། སྲུང་འཁོར་སྒོམ་པ། སྐྱབས་སེམས་ཚད་མེད་བཞི་དང་བདུན་རྣམ་དག་གིས་བསོད་ནམས་ཀྱི་ཚོགས་བསགས་པ་དང༌༑ སྭ་བྷཱ་ཝས་ཡེ་ཤེས་ཀྱི་ཚོགས་གསོག་རྣམས་ལམ་ལྔའི་དབང་ཆོག་ལྟར་སྔོན་དུ་འགྲོ་བས། སྟོང་པའི་ངང་ལས་སྲུང་འཁོར་གྱིས་མི་ཕྱེད་པར་བཅིངས་པའི་ནང་དུ་རྟེན་འབྲེལ་ཁང་པ་ཉིད་ས་བཅུ་དང་ལམ་ལྔའི་ཐེམ་སྐས་རྣམ་པར་ཐར་པའི་སྒོ་ལ་སོགས་ཏེ་ཐར་པ་ཆེན་པོའི་ཕོ་བྲང་ཡེ་ཤེས་ཀྱི་སྣང་བ་ལས་གྲུབ་པའི་དབུས་སུ་པདྨ་དང་ཟླ་བའི་གདན་ལ་སློབ་དཔོན་བདག་ཉིད་སྐད་ཅིག་དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ། སྐུ་མདོག་སེར་མོ་ཞལ་གཅིག་ཕྱག་བཞི་མ་ཞི་ཞིང་འཛུམ་པ་དང་བཅུ་དྲུག་ལོན་པའི་ལང་ཚོ་ཅན། སྐེད་སྐབས་ཕྲ་ཞིང་ནུ་འབུར་རྒྱས་པ། དབུ་སྐྲ་རལ་པའི་ཐོར་ཚུགས་ཅུང་ཟད་བཅིངས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཕྱག་དང་པོ་གཉིས་སྐྱབས་སྦྱིན་དང་མཉམ་བཞག །འོག་མ་གཉིས་པུསྟི་དང་རྡོ་རྗེ་བསྣམས་པ་ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པའི་ཐུགས་ཀར་ཟླ་བ་ལ་གནས་པའི་ཨ་ཡིག་དཀར་པའི་མཐར། ཏདྱ་ཐཱ། ༀ་གཱ་ཏེ་གཱ་ཏེ་པ་ར་གཱ་ཏེ་པ་ར་སཾ་ག་ཏེ་བོ་དྷི་སྭཱ་ཧཱ། ཞེས་པས་བསྐོར་བ། ཨ་ལས་འོད་ཟེར་འཕྲོས་རང་འདྲའི་ཡེ་ཤེས་པ་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུཾ་བཾ་ཧོཿ ས་གཉིས་སུ་མེད་པར་ཐིམ། དེ་ནས་སྐུ་སྣང་སྟོང༌། གསུང་གྲགས་སྟོང༌། ཐུགས་རིག་སྟོང་དུ་བལྟས་ལ། དེ་ལྟར་མ་རྟོགས་པའི་སེམས་ཅན་རྣམས་ལ་སྙིང་རྗེ་ཆེན་པོས་ཀུན་ནས་བླངས་ཏེ་བཟླས་པས་ཐུགས་ཀའི་སྔགས་ཀྱི་འོད་ཟེར་གྱིས་རང་དང་སེམས་ཅན་ཐམས་ཅད་ཀྱི་སྡིག་སྒྲིབ་ཐམས་ཅད་སངས་ཀྱིས་དག་པར་བསམས་ལ། ཏདྱ་ཐཱ། གཱ་ཏེ་སོགས་ཅི་ནུས་བཟླས་མཐར་ཨརྒྷཾ་ནས་ཤབྡའི་བར་གྱིས་མཆོད། སྨྲ་བསམ་བརྗོད་མེད་ཀྱིས་བསྟོད་པར་བྱའོ། །དེ་ནས་མ་ལུས་སེམས་ཅན་མ་ལྟ་བུས་ཕྱོགས་བཅུའི་རྒྱལ་བ་སྲས་དང་བཅས་པ་མདུན་གྱི་ནམ་མཁར་སྤྱན་དྲངས་ནས་བཞུགས་པར་བསམས་ལ། བཟང་སྤྱོད་ནས་འབྱུང་བའི་ཡན་ལག་བདུན་པ་ཕུལ་ནས། འབྲུ་དཀར་པོའི་མེ་ཏོག་རྡུལ་མེད་པ་ལ་རྟེན་འབྲེལ་སྙིང་པོ་ཉེར་གཅིག་བཟླས་ལ་བཀྲ་ཤིས་བརྗོད་ཅིང་ མེ་ཏོག་གཏོར་བས་ཁང་པའི་རབ་གནས་བྱའོ། །དེ་ནས་དབང་བསྐུར་བ་ནི། ཕྱི་རོལ་ཏུ་སློབ་མ་རྣམས་ལ་སྒྲུབ་པའི་དམ་བཅའ་དྲིས་ཏེ་ཁས་བླངས་པ་རྣམས་འདག་ཆལ་དང་དྲིའི་ཆུས་ལུས་རིལ་པོའམ་ཐ་ནའང་ཡན་ལག་ལྔ་ལེགས་པར་བཀྲུས། ཁྱད་པར་རྐང་པ་ལ་དྲི་བཟང་པོའི་སྤོས་དང་ཙན་དན་གྱི་ཆུས་བྱུགས་ལ་དར་དཀར་རམ་རས་དཀར་གྱིས་དཀྲི། ཕྱག་བྱས་ཏེ་དཀྱིལ་འཁོར་ཤར་ཕྱོགས་ནས་ནུབ་ཏུ་ཕྱོགས་པར་འཁོད་པ་ལ། བླ་མས་འདི་སྐད་ཅེས། འོ་རྒྱུ་སེམས་ཅན་ལ་འབྲས་བུ་རྫོགས་པའི་སངས་རྒྱས་ཐོབ་པར་འདོད་པས་དམ་པའི་ཆོས་རིན་པོ་ཆེ་ཉམས་སུ་བླང་དགོས། དེ་ལའང་གང་ཟག་གི་བློའི་རིམ་པ་སྣ་ཚོགས་པ་གསུངས་པ་ལས། འདིར་ཐེག་པ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་གདམས་ངག །གསང་སྔགས་དང་རྗེས་སུ་མཐུན་པ་སྙིང་པོ་དོན་གྱི་རྒྱུད་སྡུག་བསྔལ་ཞི་བྱེད་ལས་དྲི་མེད་ཐིགས་པ་ཕྱག་བཞེས་ཀྱི་སྐོར་ཞེས་བླ་མ་བྱང་ཆུབ་སེམས་དཔའ་ཀུན་དགའི་ལུགས་འདི་ལ། རྗེ་བཙུན་དམ་པ་སངས་རྒྱས་ཀྱི་བཀའ་ལས་བརྒྱུད་པ་མི་འཛིན་པའི་མི་ལ་རྟེན་འབྲེལ་ལག་ཏུ་མི་གཏད་པ་ལམ་གྱི་སྲང་ལས་མ་བརྒལ་བར་བསྒོམ་པ་བདག་པོ་ལ་མི་གཏད། ཅེས་གསུངས་པས་ལམ་འདིར་ཞུགས་ནས་བརྒྱུད་པ་འཛིན་ཅིང་སྒྲུབ་པ་བྱེད་པའི་གང་ཟག་ལ་རྟེན་འབྲེལ་ལག་ཏུ་གཏོད་པའི་ཆོ་ག་འདི་གལ་ཆེ་བས། ལམ་ལྔའི་སྲང་ནས་ཐོན་ཅིང་སྒོམ་པ་བདག་པོ་ལ་གཏོད་པའི་སྒྲུབ་པ་པོ་དེས་སེམས་ཅན་གྱི་དོན་བྱེད་པ་ལ་རྟེན་འབྲེལ་སྣ་ཚོགས་འཆར་བའི་ཆེད་དུ་བླ་མས་ཁང་པར་གཞུག་ཅིང་ཆོ་ག་བྱ་དགོས་པས། དེའི་ཕྱིར་ རྟེན་འབྲེལ་ཁང་པར་འཇུག་པའི་བྱིན་རླབས་ཞུས་ནས་སྒྲུབ་པ་ཉམས་སུ་ལེན་པས་དཀའ་ཐུབ་མཐར་ཕྱིན་པར་བྱ་སྟེ། དཔའ་ཆེན་གཞན་དོན་གྱི་དཀའ་ཐུབ་ཀྱིས་སེམས་ཅན་ཐམས་ཅད་ཀྱི་དོན་བྱའོ་སྙམ་དུ་བྱང་ཆུབ་མཆོག་ཏུ་ཐུགས་བསྐྱེད་པ་གསལ་བཏབ་ནས་གསན་པར་ཞུ། དེ་ལ་ཡིད་ཆེས་བསྐྱེད་པ་གཏམ་རྒྱུད་ཀྱི་ཡན་ལག་ལས། ཐོག་མར་བརྒྱུད་པའི་ལོ་རྒྱུས་ནི། ཡང་དག་པར་རྫོགས་པའི་སངས་རྒྱས་ཐུབ་པ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་དོན་གྱི་བརྒྱུད་པ་རྒྱལ་ཚབ་བྱམས་པ་མགོན་པོ་ལ་གཏད། དེས་འཕགས་པ་ཐོགས་མེད་ལ། དེས་མཁས་མཆོག་དབྱིག་གཉེན་ལ། དེས་བྲམ་ཟེ་ཨཱ་དེ་བ་ལ། དེས་རྗེ་བཙུན་དམ་པ་སངས་རྒྱས་སམ༑ ཉེ་བརྒྱུད་ལ་བྱམས་པ་ཉིད་ཀྱིས་དམ་པ་རིན་པོ་ཆེར་དགའ་ལྡན་དུ་གསུངས་པར་གདའ། དམ་པས་བྱང་ཆུབ་སེམས་དཔའ་ཀུན་དགའ་ལ། དེས་མཁས་བཙུན་སྤ་ཚབ་ལ། དེས་རྒྱལ་བ་ཏེ་ནེ་ལ། དེས་ཞིག་པོ་རིན་པོ་ཆེ་སྐུ་མཆེད་ལ། དེས་མཚན་ལྡན་རི་ཁྲོད་དབང་ཕྱུག་དང་རྒྱ་སྒོམ་སྨོན་ལམ་ཤེས་རབ་ལ་གནང་བ་ལས་རིམ་པར་བརྒྱུད་དེ་ད་ལྟར་གྱི་རྩ་བའི་བླ་མའི་བར་དུ་བྱིན་རླབས་ཀྱི་བརྒྱུད་པ་མ་ཆད་པར་བཞུགས་པ་ལགས། གཉིས་པ་རྟེན་འབྲེལ་གྱི་ཁང་པ་ཇི་ལྟར་བརྩིགས་པའི་ལོ་རྒྱུས་ནི། རྗེ་དམ་པ་བོད་དུ་ལན་མང་བྱོན་པའི་ཕྱི་མ་ལ་བལ་བོད་གཉིས་ཀྱི་སོ་མཚམས་ལ་སྟོད་དཔལ་གྱི་དིང་རི་བྱ་བ་རྗེ་བཙུན་མ་ཀུན་ཏུ་རི་ཀའི་བཞུགས་གནས་མཁའ་འགྲོ་ རང་བཞིན་གྱིས་འདུ་བ་ངོ་མཚར་གྱི་རྫས་བཞིས་བརྒྱན་ཅིང་གཡུ་ཡི་མཎྜལ་ལ་དུང་གི་རྒྱན་བཀྲམ་པ་འདྲ་བ་ཁྱད་པར་དུ་འཕགས་པའི་གནས་དེར་གདན་ཕབ་ནས་ལོ་གསུམ་ལོན་པའི་ཚེ། བྱང་སེམས་ཀུན་དགས་མཇལ་ཏེ་ལོ་གཅིག་དཀར་ཁྲིད་བློ་སྦྱོང་གི་ཉམས་ལེན་བྱེད་དུ་བཅུག །ལོ་བཞི་ལོན་པའི་དུས་དམ་པའི་ཞལ་ནས། དིང་རིར་རྟེན་འབྲེལ་གྱི་ཁང་པ་བརྩིགས་པ་ཡིན་པས་རྒྱ་སྒོམ་ལས་མི་རྣམས་ཀྱི་ཟ་ར་གྲབས་གྱིས་གསུངས་ནས་དམ་པས་རང་འདྲའི་ཨ་ཙཱ་ར་མང་པོ་སྤྲུལ་ཏེ་རྟེན་འབྲེལ་གྱི་ཁང་པ་བརྩིགས་ཤིང༌། རྒྱ་སྒོམ་པའི་བཤོས་ཀྱང་ལས་མི་ཐམས་ཅད་ང་རང་ཡིན་གསུངས་ནས་དམ་པ་ཉིད་ཀྱིས་གསོལ། ཁང་པ་དེའང་རྒྱུ་རིན་པོ་ཆེ་སྣ་ཚོགས་ལས་གྲུབ་པ་བྱང་གི་རྨང་དུ་མེ་ཤེལ་བཅུག་པས་གྲང་ནད་མི་འོང༌། ནུབ་བྱང་དུ་ཆུ་ཤེལ་བཅུག་པས་ཚད་ནད་མི་འབྱུང༌། ལྷོ་ནུབ་ཏུ་ཨ་རུ་ར་རྣམ་རྒྱལ་ཡོད་པས་རིམས་ནད་མི་འབྱུང༌། དེའི་ནང་དུ་བླ་མ་བྱང་ཆུབ་སེམས་དཔའ་ལ་ལམ་ལྔའི་ཁྲིད་གསུངས། ཁང་པ་དེར་སྒོ་བའི་རྣལ་འབྱོར་པ་བཞི་དང་རྒྱ་སྒོམ་སོགས་སློབ་མ་ཁྱད་པར་ཅན་འགའ་ཟུང་མ་གཏོགས་གཞན་སུའང་མི་གཏོང་སྐད། དེ་ཉིད་དུ་དམ་པས་ལམ་ལྔའི་སྤོགས་ཆོག་གི་སྒྲུབ་པ་སོགས་མཛད་ནས་སྐལ་པ་དང་ལྡན་པ་ཐམས་ཅད་སྨིན་ཅིང་གྲོལ་བའི་གནས་ལ་བཀོད་པ་ཡིན་ནོ། །ཚུལ་དེ་ཁོ་ན་བཞིན་དུ་བརྒྱུད་པའི་བླ་མ་རྣམས་ཀྱིས་ཀྱང་རྟེན་འབྲེལ་ཁང་པར་ཞུགས་ནས་སྒྲུབ་པ་མཛད་པས་གྲུབ་ཐོབ་ཀྱི་ ཕྲེང་བ་རྒྱུན་མ་ཆད་པར་བྱུང་ལྟར། ཁྱེད་རང་རྣམས་ཀྱང་སྐུ་གསུམ་གྱི་ཞིང་ཁམས་ལ་སྤྱོད་པའི་ཕྱིར་རྟེན་འབྲེལ་གྱི་ཁང་པར་འཇུག་པར་འདོད་པས་བླ་མ་ལ་མོས་གུས་དྲག་པོ་བསྐྱེད་དེ་མཎྜལ་ཕུལ་མཛོད། ཅེས་བརྡ་སྦྱར་ལ་སློབ་མ་རྣམས་ཀྱིས་མཎྜལ་ཕུལ། དེ་ནས་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་གདབ་པ་འདིའི་རྗེས་ཟློས། བླ་མ་རིན་པོ་ཆེ། བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། ཞེས་ལན་གསུམ། དེ་ནས་སྦྱོར་བ་སྐྱབས་འགྲོ་སེམས་བསྐྱེད་འདིའི༴ བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས། དེ་ཁོ་ན་ཉིད་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དེ་ནས་བླ་མས། ཀྱེ་རིགས་ཀྱི་བུ་ས་བཅུ་དང་ལམ་ལྔའི་སྐས་ལ་འཛེགས་ལ། རྣམ་པར་ཐར་པ་གསུམ་གྱི་སྒོ་ཕྱེ་ནས་ཐར་པའི་ཡང་ཁང་དུ་ཤོག་ཅིག །ཅེས་ལན་གསུམ་གྱིས་བོས་པས། སློབ་མས། དེའི་ལན་གསོལ་བ་འདིའི་རྗེས་ཟློས། ཀྱེ་བླ་མ་རིན་པོ་ཆེ། ས་བཅུ་དང་ལམ་ལྔའི་སྐས་གང་ལ་ཇི་ལྟར་བགྲོད་པར་བགྱི། རྣམ་པར་ཐར་པ་གསུམ་གྱི་སྒོ་ཇི་ལྟར་དབྱེ་བར་བགྱི། ཞེས་ཞུ། བླ་མས་གསོལ་བ་བཏབ་པའི་ལན་འདི་ལ་གསན་པར་ཞུ་འཚལ། རིགས་ཀྱི་བུ་ཚོགས་ཀྱི་ལམ་དུ་དྲན་པ་ཉེ་བར་བཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་ལ་སློབས་ཤིག །སྦྱོར་བའི་ལམ་དུ་དབང་པོ་ལྔ་དང༌། སྟོབས་ལྔ་ལ་སློབས་ཤིག །མཐོང་བའི་ལམ་དུ་བྱང་ཆུབ་ཀྱི་ལམ་ཡན་ལག་བདུན་ལ་ སློབས་ཤིག །སྒོམ་པའི་ལམ་དུ་འཕགས་པའི་ལམ་ཡན་ལག་བརྒྱད་ལ་སློབས་ཤིག །མཐར་ཕྱིན་པའི་ལམ་དུ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་གསུམ་གྱི་སྒོ་ཕྱེ་ལ་རྣམ་པ་བཅུའི་སྐས་ལ་འཛེགས་ནས་ཤོག་ཅིག །དེས་ནི་ཐར་པའི་ཡང་ཁང་དུ་ཞུགས་ནས་སྐུ་གསུམ་གྱི་ཞིང་ཁམས་མཐོང་བར་འགྱུར་རོ། །དེའང་ཤུལ་ལམ་དུ་འགྲུལ་པའི་གོམ་པས་བགྲོད་པའི་འགྲོས་ལྟར་རིམ་པར་རིམ་པར་བགྲོད་པ་ནི་མ་ཡིན་གྱིས། ཇི་ལྟར་གཟིངས་ཀྱི་བ་དན་རླུང་གིས་བསྐྱོད་པ་བཞིན་དུ་དེ་ཁོ་ན་ཉིད་ཀྱི་ཡེ་ཤེས་ཆེན་པོ་རྟོགས་པའི་སྒོ་ནས་བགྲོད་དུ་མེད་པའི་ཚུལ་གྱིས་ཆིག་ཆོད་དུ་བགྲོད་ལ་ཤོག་ཅིག །དེ་ནས་ཁང་པར་གཞུག་པ་དངོས་ནི། སློབ་དཔོན་གྱིས་དཀྱིལ་འཁོར་གྱི་ནང་དུ་ནུབ་ནས་ཞལ་ཤར་ཕྱོགས་སུ་བལྟས་ཏེ། ཤར་གྱི་འཕང་ལོ་ཕྱག་ཏུ་བཟུང་བའི་སྲད་བུ་སྒོའི་ཕྱིར་དྲངས་པའི་སྣེ་སློབ་བུའི་ལག་ཏུ་གཏད་ལ། བླ་མས། འོ། སེམས་ཀྱི་དེ་ཁོ་ཉིད་ཀྱི་ཡེ་ཤེས་རྟོགས་པའི་སྒོ་ནས་ཐབས་དང་ཤེས་རབ་ཟུང་དུ་འཇུག་པའི་ཚུལ་གྱིས་ས་ལམ་ཆིག་ཆོད་དུ་བགྲོད་དེ་ཐར་པའི་ཡང་ཁང་དུ་བརྟོལ་སྐུ་གསུམ་གྱི་ཞིང་ཁམས་མཐོང་བའི་མོས་པས་ཨཱ་ལི་ཀཱ་ལི་བརྗོད་བཞིན་དུ་ཤོག་ཅིག །ཅེས་གདམས་པས་སློབ་མ་རྣམས་ཀྱིས་རྐང་པ་དར་རས་ཀྱིས་དྲིལ་བ་ཡིག་འབྲུའི་ལམ་གྱི་སྟེང་དུ་རྩེན་རྩེན་རེ་མོས་ཀྱིས་སྤོ་ཞིང་ཡི་གེ་དེ་དང་དེ་ངག་ཏུ་འདོན་པའི་སྒོ་ནས་ནང་དུ་ཞུགས་ལ་དཀྱིལ་འཁོར་གྱི་དབུས་སུ་སློབ་དཔོན་ལ་ ཕྱོགས་པར་འདུག་སྟེ། འཕང་ལའི་སྲད་བུ་ནས་འཛིན་བཞིན་དུ་འདུག་པ་ལ་ལུང་འབོག་པར་བྱ་སྟེ། རྩ་བ་རྒྱུད་ལ་བསྐུར་ཅིང་ལམ་ལྔ་གསོ་བར་བྱེད་པའི་སྙིང་པོའི་ལུང་བླང་བར་བྱ་སྙམ་པས་འདིའི༴ ༀ་ཨཱཿ ཧྲཱིཿ ཏདྱ་ཐཱ། ༀ་གཱ་ཏེ་གཱ་ཏེ་པ་ར་གཱ་ཏེ་པ་ར་སངྒཱ་ཏེ་བོ་དྷི་སྭཱ་ཧཱ། ཞེས་ལན་གསུམ། དེ་ནས་རིག་པ་དྭངས་ཤིང་རྟེན་འབྲེལ་འཆར་བར་བྱེད་པའི་སྔགས་འདི་ཡི་རྗེས་ཟློས། རྟེན་འབྲེལ་འཁོར་ལོ་སློབ་མའི་མགོ་ཐོག་ཏུ་བཞག །བླ་མའི་ཕྲེང་བ་ལ་འཆང་དུ་བཅུག་ལ། ༀ་ཨཱཿ ཧྲཱིཿ གུ་རུ་ཧྱ་བ་དད་ཏེ་ཧཱུྃ། ཞེས་ལན་གསུམ། དེ་ནས་མཁྱེན་པའི་ཡོན་ཏན་ཕྱོགས་མེད་དུ་འཆར་བར་བྱེད་པའི་སྔགས་འདིའི་རྗེས༴ ༀ་མུ་ནི་མུ་ནི་མ་ཧཱ་མུ་ནི་ཧཱུྃ། ཞེས་ལན་གསུམ། བར་འདིར་ལམ་ལྔའི་སྙིང་པོའི་ལུང་འབོགས་པར་ཡིག་རྙིང་ལས་བཤད། དེ་ནས་བཀྲ་ཤིས་ཤིང་རྟེན་འབྲེལ་བརྟན་པར་བྱ་བའི་སྔགས་འདིའི༴ ༀ་ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་དུནྟེ་ཥནྟ་ཐཱ་ག་ཏོ་ཧྱ་བ་དཏྟེ་ཥཉྩ་ཡོ་ནི་རོ་དྷཱ་ཨེ་ཝཾ་བཱ་དི་མ་ཧཱ་ཤྲ་མ་ཎ་སྭཱ་ཧཱ། ཞེས་ལན་གསུམ་བཟླས་ནས་ཕྲེང་བ་བསྡུས་ཏེ། འཕང་ལོ་སློབ་བུའི་མགོར་བཞག་ལ། བླ་མ་ཡི་དམ་མཁའ་འགྲོ་རྣམས་ཀྱིས་རྡོ་རྗེའི་སློབ་བུ་འདི་ལ་རྟོགས་པའི་ཡེ་ཤེས་མཆོག་ཏུ་གྱུར་པ་སྐྱེ་བར་བྱིན་གྱིས་བརླབ་ཏུ་གསོལ། སྐྱེས་པ་བརྟན་ཅིང་བོགས་ཐོན་པར་མཛད་དུ་གསོལ། ཅེས་བརྗོད། སྤྱི་བོར་མེ་ཏོག་འཐོར་བ་དང་བཅས། སེམས་ཉིད་ངོ་བོ་སྟོང་ཉིད་ཆོས་ཀྱི་དབྱིངས། །རང་བཞིན་གཉུག་མ་འདུ་འབྲལ་མེད་པའི་རྩལ། །མཚན་ཉིད་གཉིས་མེད་རྟོགས་པའི་ངང་དུ་གྲོལ། །མ་ནོར་དོན་ཆེན་རྟོགས་པའི་ བཀྲ་ཤིས་ཤོག །ཅེས་བཀྲ་ཤིས་ཀྱི་ཚིགས་སུ་བཅད་པ་བརྗོད་ཅིང་རོལ་མོ་འཁྲོལ་ལོ། །དེ་ནས་སློབ་མ་ཤར་སྒོ་ནས་ཕྱིར་བཏོན་ལ་ཤར་གྱི་འཕང་ལོ་དེ་བཞིན་དུ་བཞག །སླར་ཡང་བསྐོར་ཕྱོགས་ཀྱིས་སློབ་དཔོན་བྱང་ནས་ལྷོར་ཞལ་ཕྱོགས་ཏེ་ལྷོའི་འཕང་ལོ་ཕྱག་ཏུ་བཟུང་བའི་སྲད་བུའི་སྣེ་བུའི་ལག་ཏུ་གཏད་ལ། ཨཀྵཿ བགྲང་བཞིན་དུ་ནང་དུ་དྲངས་ཏེ། ལམ་ལྔ་གསོ་བྱེད། རྟེན་འབྲེལ་འཆར་བྱེད། ཡོན་ཏན་འཆར་བྱེད། རྟེན་འབྲེལ་བརྟན་བྱེད་ཀྱི་སྔགས་ཀྱི་ལུང་བཞི་དབོག་ཅིང༌། འཕང་ལོ་མགོར་བཞག་ནས་ཤིས་པ་བརྗོད་པ་རྣམས་སྔར་བཞིན་བྱའོ། །དེ་བཞིན་དུ་ནུབ་སྒོ་དང་བྱང་སྒོ་ནས་འཇུག་པའང་འགྲེའོ། །མཐར་བྱང་སྒོ་ནས་འཐོན་ཏེ། བླ་མ་སྟན་ལ་བཞུགས་པའི་མདུན་དུ་སློབ་བུ་རྣམས་འདུག་ཏུ་བཅུག་ལ་འདི་སྐད་ཅེས། དེ་ལྟར་རྟེན་འབྲེལ་ཁང་པར་ཞུགས་པས་རིག་པ་དྭངས་པའི་མེ་ལོང་དུ་རྟེན་འབྲེལ་གྱི་གཟུགས་བརྙན་སྣ་ཚོགས་མ་འགགས་པར་ཤར་ནས། མཁྱེན་པའི་ཡོན་ཏན་ཕྱོགས་མེད་དུ་རྒྱས་པར་འགྱུར་བ་ཡིན་པས་དགའ་བ་སྒོམས། དེར་ཞུགས་ནས་ཀྱང་བོ་ཟགས་ལྟེམས་ལོག་གི་དྲི་མ་བཞི་བསྲུང་ཞིང་རྣལ་འབྱོར་གྱི་རང་ས་མ་ཉམས་པའི་སྒོ་ནས་ལམ་ལྔའི་སྒྲུབ་པ་ལ་ཚུལ་བཞིན་ཉམས་སུ་བླངས་ཏེ་རང་གཞན་གྱི་དོན་རྒྱ་ཆེན་པོ་མཛོད་ཅིག །དེས་རྟེན་འབྲེལ་ཁང་འཇུག་གི་དབང་བསྐུར་ཟིན་པས་བཀའ་དྲིན་གཏོང་རག་གི་དོན་དུ་མཎྜལ་དང་ཕྱག་འབུལ་དུ་བཅུག་ནས་དགེ་བ་བསྔོའོ། །དེ་ནས་རྗེས་ཆོག་ནི། གཏོར་མ་བཏང་བ་དང༌། ཚོགས་མཆོད་ལམ་ལྔའི་དབང་ཆོག་ལྟར་དང༌། ཡིག་བརྒྱས་ལྷག་ཆད་ཀྱི་ ནོངས་བཤགས་རྟེན་འབྲེལ་ཁང་པ་དངོས་ཡིན་ན་བརྟན་བཞུགས་དང༌། མིན་ན་གཤེགས་སུ་གསོལ་ལ་རྗེས་མི་མངོན་པར་བྱའོ། །བསྔོ་སྨོན་དང་བཀྲ་ཤིས་ཀྱིས་མཐའ་བརྒྱན་ནོ། །སྒྲུབ་པའི་དམ་བཅའ་མི་འབུལ་བའི་རྟེན་འབྲེལ་ཁང་པར་མི་གཞུག་ཅེས་གསུངས་པ་ལྟར་དེང་སང་ཡང་ཕྱག་ལེན་ལ་མ་འཆུགས་པར་མཛད་དོ། །གམྦྷི་ར་ཧོ་གུ་ཧྱ།། ༈ །།ༀ་སྭ་སྟི། དེ་ལྟར་རྟེན་འབྲེལ་ཁང་པར་ཆུག་ནས་བར་དུ་སྒྲུབ་པ་རང་རྒྱལ་ལྟ་བུའི་དཀའ་ཐུབ་ཐེམས་པ་དང༌། དཀའ་ཐུབ་གསུམ་པ་ནི། དཔའ་ཆེན་གཞན་དོན་བྱེད་པ་ལ་འཇུག་པའི་དུས་ཏེ་བདག་གཏོད་ཀྱི་དབང་ཁྲིད་ཚར་ནས་ནག་ཁྲིད་ཅེས་པ་ཡི་གེ་རྣམས་ཀྱི་བཤད་ལུང་ཐམས་ཅད་རྫོགས་པར་བྱིན་ནོ། །དེ་ལྟར་དབང་ཁྲིད་ལུང་རྣམས་ཡོངས་སུ་རྫོགས་ནས་གཞན་དོན་ཕེར་བ་ན་བཀའ་བབས་ཀྱི་བརྒྱུད་པ་གཏོད་པའི་ཆོ་ག་མཛད་སྲོལ་ལ། བླ་མའི་གསུང་གིས། དེང་སང་འདིའི་བཀའ་མི་བཞུགས་གསུངས་ནས་གླེགས་བམ་གཏོད་པ་དང༌། ཆོས་སྐྱོང་གི་གཏོར་མ་མགོར་འཇོག་པ་རྣམས་མི་མཛད་ཅིང༌། དཔལ་ལྡན་བསོད་ནམས་ཀྱི་ཡི་གེའི་སྟེང་ནས་མི་ཉུང་འདུས་ལ་ལམ་ལྔ་སོ་སོར་དུས་བཅད་ནས་བདག་གཏོད་ཀྱི་དབང་རྗེས་ལ་བྱེད་ན་དེ་དུས་སམ། ལམ་ལྔའི་དབང་བསྐུར་བར་མ་ཆད་དུ་བྱས་ན་རྟེན་འབྲེལ་ཁང་འཇུག་ལྟ་བུའི་མཇུག་ཏུ་བཀླག་ལུང་ལྟར་འདོན་པ་མཛད་དེ། བདག་ཅག་ལ་མི་ཉུང་ཁྱད་ཀྱིས་པར་ནག་གི་དབང་གི་རྗེས་འབྲེལ་དུ་གནང་ངོ༌། །དེ་ལ་རང་གི་གོ་སར་བཀའ་ཆད་གནང་བ་དམ་དོག་གི་གསུང་དཀྱུས་ཤོར་དང་གཏོར་མ་འཇོག་པ་ཕྱིས་ལག་ལེན་རྒྱས་སུ་སོང་བ་མ་གཏོགས་ཡིག་རྙིང་དུ་མི་གསལ་ཞིང༌༑ གླེགས་བམ་རྣམས་དབང་ལུང་རྫོགས་པའི་ས་དེར་བཞུགས་པས་གོ་བཅད་ནས་ཟོར་ཡང་ཙམ་དུ་སོང་བ་ལ་ཕྱིས་བཀའ་ཆད་པར་བརྟགས་སམ་སྙམ་པས། ཕྱག་ལེན་བཞིན་དུ་བཏང་ན་གཞུང་བཞིན་བྱས་ཀྱང་མི་འགལ་ལམ་སྙམ་པ་རང་གི་རྣམ་རྟོག་སྟེ། ཆོས་ཀྱི་སྤྱན་ལྡན་རྣམས་ཀྱིས་དཔྱད་པར་ཞུ༑ གང་ལྟར་ཡང་བཀླག་ཆོག་རེ་མཛད་པའི་རྒྱུན་ལྟར་དེ་ཉིད་མི་ནུབ་པའི་ཕྱིར། འདིར་ཡང་དཔལ་ལྡན་བསོད་ནམས་ཀྱི་ཡི་གེ་ལ་བཟོ་བཅོས་མེད་པར་འགོད་པ་ནི་འདི་ལྟ་སྟེ། བཀའ་བབས་ཀྱི་བརྒྱུད་པ་གཏོད་པའི་དབང་ནི། དབང་ལུང་ཐམས་ཅད་ཡོངས་སུ་རྫོགས་པར་ཐོབ་ནས། དཀོན་མཆོག་དང་ཁྱད་པར་ཞི་བྱེད་ཀྱི་པུསྟིའི་མདུན་དུ་མཆོད་གཏོར་རྒྱས་པར་བཤམས། བླ་མས་སྔར་ལྷག་པའི་ལྷའི་བསྐྱེད་རིམ་བཟླས་པ་མཆོད་བསྟོད་གཏོར་མའི་བར་ལེགས་པར་གྲུབ་ནས། བླ་མ་རྣམས་བསྒོམས་ནས་གསོལ་བ་འདེབས་ཤིང་མཆོད་བསྟོད་བྱ། དེ་ནས་སློབ་མ་ལ་སྐྱབས་འགྲོ་སེམས་བསྐྱེད་མཆོད་བསྔོ་སྨོན་ལམ་དང་བཅས་ཕོག་ནས་རྟེན་སྡོམ་པ་གསུམ་ལྡན་དུ་བྱས་ཏེ། སློབ་མ་དེའི་ལག་ཏུ་བརྒྱུད་ཕྱིའི་པུསྟི་རྣམས་གཏད་ནས་བཀའ་བབས་བརྒྱུད་པ་ཕྱི་མའི་ཆོས་འདི་ལ། དབང་གི་ཆུ་བོ་ཆེན་པོ་བཞི་ཡོད་པའི་བུམ་དབང་ནི། རྡོ་རྗེ་འཆང་ལ་བདག་མེད་མས་གསན། དེས་དམ་པ་ལ་གནང༌། གསང་དབང་ནི་རྣམ་སྣང་ལ་ངོ་མཚར་མཁའ་སྤྱོད་ཀྱི་བླ་མ་སུམ་ཅུ་རྩ་དྲུག་གིས་གསན་ནས། དེ་རྣམ་སྣང་གིས་དམ་པ་ལ་གནང༌། ཤེས་རབ་ཡེ་ཤེས་ནི། སངས་རྒྱས་ཐུབ་པ་ཆེན་པོས་དམ་པ་ལ་དོན་བརྒྱུད་གཏད། དེ་ནས་ཐོགས་མེད། དབྱིག་གཉེན། ཨཱ་དེ་བ། དེས་དམ་པ་ལ་གནང༌། ཚིག་དབང་ནི། གསང་བདག་ཕྱག་ན་རྡོ་རྗེ་ལ་གསང་བའི་མཁའ་འགྲོ་མ་རྣམས་ཀྱིས་གསན་ནས། དེ་རྣམས་ཀྱིས་དམ་པ་རིན་པོ་ཆེ་ལ་དོན་བརྒྱུད་གཏད་པ་དེ་བཞིན་དུ། དམ་པས་ཀྱང་བླ་མ་བྱང་ཆུབ་སེམས་དཔའ་ཀུན་དགའ་ལ་གཏད། དེས་མཁས་བཙུན་སྤ་ཚབ་སྒོམ་པ་ལ། དེས་རྒྱལ་བ་ཏེ་ནེ་ལ། དེས་ཞིག་པོ་ཉི་མ་སེང་གེ་ལ། དེས་ཐམས་ཅད་ མཁྱེན་པ་བསོད་ནམས་དཔལ་ལ། དེས་རྒྱལ་སྲས་ཀུན་དགའ་བཟང་པོ་ལ། དེས་བླ་མ་ཀུན་དགའ་དོན་གྲུབ་ལ། དེས་མཚན་ལྡན་རི་ཁྲོད་དབང་ཕྱུག་ལ། དེས་མཁན་ཆེན་ཚུལ་ཁྲིམས་ཕན་ལ། དེས་དྲིན་ཆེན་སངས་རྒྱས་དབོན་པོ་ལ། དེས་ཀུན་མཁྱེན་བྱང་ཆུབ་བཟང་པོ་ལ། ཅེས་པ་ལྟར་བརྒྱུད་པ་རིམ་བཞིན་མཚན་ནས་བརྗོད་དེ། རྩ་བའི་བླ་མས་བདག་ལ་ཆུ་བོ་ཆེན་པོ་བཞི་དགྱེས་བཞིན་དུ་བསྐུར་ཞིང་བྱིན་གྱིས་བརླབས་ཏེ་ཚིག་མ་ལུས་པ་གནང་ནས་དོན་བརྒྱུད་གཏད་པ་ལགས་སོ། །དེ་བཞིན་དུ་ཁྱེད་ལ་ཡང་གཏོད་པ་ལགས་པས་བཀའ་བབས་ཀྱི་དབང་བཞི་པོ་འདི་བཀའ་བབས་སྐུ་བཞི་ནས་ད་ལྟ་བདག་ཡན་དུ་དབང་གི་ཆུ་བོ་འབབ་འཕྲོ་མ་ཆད། ཉམས་རྟོགས་ཀྱི་ན་བུན་འཐུལ་འཕྲོ་མ་ཆད། ལམ་རྟགས་ཀྱི་འཇའ་ཚོན་འཆར་འཕྲོ་མ་ཆད་དེ། མདོར་ན་གྲུབ་ཐོབ་ཀྱི་ཕྲེང་ཐག་མ་ཆད་པའི་ཆོས་ལགས། དེའང་དོན་གྱི་ཆིངས་བཞི་སྟེ། མདོ་རྒྱུད་ཕྱག་ལེན་དང་བཅས་པ། བཀའ་བབས་སྙན་བརྒྱུད་དང་བཅས་པ། དྲི་མེད་ཕྲ་ཐིགས་དང་བཅས་པ། དར་ཚགས་བཤད་འབུམ་དང་བཅས་པའི་དབང་བྱིན་རླབས་ཚིག་དོན་གྱི་བཀའ་མ་ལུས་པ་ཁར་སང་ནས་བགྱིས་ཟིན་ནས། དོན་གྱི་བརྒྱུད་པ་གཏོད་པ་ལགས་པས་ཁྱེད་ཀྱིས་ཀྱང་ཆོས་འདི་རྣམས་ཀྱི་ནང་ན་མར་ཇི་སྐད་བཤད་པ་བཞིན་ཉམས་སུ་ལེན་ཅིང༌། གཞན་དོན་སེམས་ཅན་ལ་ཕན་འདོགས་རྒྱ་ཆེན་པོ་མཛད་པར་ཞུ། ཞེས་བརྗོད། ལན་དུ་སློབ་མས། བླ་མ་རིན་པོ་ཆེས་ཇི་ལྟར་བཀའ་སྩལ་བ་བཞིན་དུ་སྒྲུབ་པར་ཞུ་ཞེས་ཁས་བླངས། དེ་ནས་ཆོས་སྐྱོང་གི་གཏོར་མ་མགོ་ཐོག་ཏུ་བཞག་ནས། ༀ་ཨ་གྷོ་ར་མ་ཧཱ་ཀ་ལ་དུ་བེང་ནི་ཛ་ཧཱུྃ་ཕཊ། ཅེས་ལན་བདུན་དང༌། བཾ་ཧ་རི་ནི་ས་ཧཱུྃ། ཞེས་ལན་གསུམ་གྱི་རྗེས་ལ། ཆོས་སྐྱོང་བའི་སྲུང་མ་ཡེ་ཤེས་ཀྱི་མགོན་པོ་ཨ་གྷོ་ར་དང༌། བཀའ་སྲུང་ལག་ན་རྡོར་འཆང༌། གཙུག་ན་མེ་ཁྱེར། རྒྱབ་ན་གཤོག་ཐོགས། ཁ་ནས་ཁུས་འདེབས། ཞིང་སྐྱོང་ཀུན་ཏུ་རཱི་ཀ་སོགས་བཀའ་སྲུང་རྣམས་ཀྱིས། སྔར་བླ་མ་གོང་མ་རྣམས་ཀྱི་ཕྲིན་ལས་ཇི་ལྟར་སྒྲུབ་པ་བཞིན། ཁོང་ཆྒཻ་མོའི་ཡང་འགལ་རྐྱེན་ཞི་ཞིང་མཐུན་རྐྱེན་སྒྲུབ་པའི་ཕྲིན་ལས་མཛོད་ཅིག །ཅེས་བཀའ་སྲུང་གཏོད། འདི་བརྒྱུད་པ་གཏད་པའི་དབང་སྟེ། གཞན་དོན་མི་འགྲུབ་པའི་སློབ་མ་ལ་བརྒྱུད་པ་མི་གཏོད། ཅེས་གསུངས་འདི་ལ་བཀའ་དོག་པར་མཛད་དོ། །དེས་བརྒྱུད་པ་གཏད་པའི་དབང་ཚར་བས་མཎྜལ་དང་དྲིན་ཕྱག་འཚལ་དུ་གཞུག །བླ་མས་དཀྱིལ་འཁོར་གྱི་རྗེས་ཆོག་གཞུང་བཞིན་བྱའོ། །དམ་ཆོས་སྡུག་བསྔལ་ཞི་བྱེད་ཀྱི་དབང་ཆོག་བཀླག་པས་གྲུབ་པ་ལས་རྟེན་འབྲེལ་ཁང་འཇུག་དང་བརྒྱུད་པ་གཏོད་པའི་ཆོ་ག་བཤད་པའི་ལེ་ཚན་ནོ། །ཞི་བྱེད་སྔ་ཕྱི་བར་གསུམ་གྱི། །དབང་ཆོག་མིང་དོན་མཐུན་པ་འདི། །དགེ་སློང་དྷརྨ་ཤྲཱིས་བཀོད། །ནོངས་ན་མཁས་རྣམས་བཟོད་པར་མཛོད། །དེ་ལྟར་འབད་པའི་དགེ་འདིས་ཀྱང༌། །ལུས་བསྐྱེད་མ་ཡིས་ཐོག་དྲངས་ནས། །དཔག་ཡས་སེམས་ཅན་མ་ལུས་ཀུན། །རྫོགས་པའི་སངས་རྒྱས་མྱུར་ཐོབ་ཤོག །ཞི་བྱེད་སྔ་ཕྱི་བར་གསུམ་གྱི་དབང་ཆོག་རྣམས་ཕྱོགས་གཅིག་ཏུ་བསྒྲིགས་པ་བཀླགས་པས་གྲུབ་པ་ཞེས་བྱ་བ་དགེ་སློང་རྒན་པོ་དྷརྨ་ཤྲཱིས་ཤིང་བྱ་ལོར་ཟངས་རི་ལྷུན་གྲུབ་རབ་བརྟན་དུ་དབུ་བརྩམས་ཏེ། དུས་ཀྱི་འགྱུར་བ་ཡ་ང་བས་རང་དབང་འདུས་པ་དཀའ་བར་བྱུང་ཡང་ཇི་སྐད་དུ། སྲིད་པ་ལས་དང་རྐྱེན་གྱི་དབང་གྱུར་པས། །གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཟུང༌། །ཞེས་གསུངས་པ་ལ་ངེས་ཤེས་བསྐྱེད་ནས་ཟབ་ཆོས་འདི་དག་དེང་སང་མིང་གི་ལྷག་མ་ཙམ་དུ་གྱུར་པ་གསོ་ཐུབ་ན་ཅི་མ་རུང་སྙམ་པའི་དམ་བཅའ་བརྟན་པོས་རྐྱེན་དབང་དུ་མ་བཏང་བར་དལ་ཁོམས་འབྱོར་བརྡོགས་ཀྱི་སུག་རིས་སུ་རིམ་པར་སྤེལ་བ་ལས། མི་ཟད་པ་མེ་ཁྱིའི་ལོ་ཧོར་ཟླ་དྲུག་པའི་ཡར་ངོའི་ཚེས་དྲུག་གི་སྔ་དྲོ་བུ་མོའི་དུས་སྦྱོར་ཐོག །ཨོ་རྒྱན་སྨིན་གྲོལ་གླིང་གི་ཆོས་གྲྭར་གྲུབ་པར་བགྱིས་པ་སྟེ། ཉིས་བྲིས་མ་ཁོམས་པས་མཚམས་སྦྱོར་དང་ཚིག་ཕྲད་སོགས་འགལ་ཟློས་སུ་གྱུར་ན་དམ་པ་རྣམས་ཀྱིས་བཟོད་པར་མཛོད་ཅིག །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དར་རྒྱས་འཕེལ། ཤུ་བྷ་མསྟུ། ཨིནྡྲ་བྷུ་ཏི་ནཻ་ཀ་པྲཙྪ།། །།

[edit]

There are 19 subtexts included in this text

1 50-66	ཁ་ཆེ་ལུགས་སྒྲོན་མ་རྣམ་གསུམ་གྱི་དབང་། kha che lugs sgron ma rnam gsum gyi dbang Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

2 66-73	ལྷ་གསུམ་གྱི་རྗེས་གནང་། lha gsum gyi rjes gnang Permission to Invoke (anujñā) - rjes gnang	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

3 73-82	རྨ་ལུགས་ཕྱག་ཆེན། rma lugs phyag chen Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

4 82-92	སོ་ལུགས་བླ་མའི་བྱིན་རླབས། so lugs bla ma'i byin rlabs Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

5 92-95	སྐམ་ལུགས་ཤེར་ཕྱིན་མའི་རྗེས་གནང་། skam lugs sher phyin ma'i rjes gnang Permission to Invoke (anujñā) - rjes gnang	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

6 95-168	དམ་པ་ཀུན་དགའི་ལུགས་ཀྱི་ལམ་ལྔའི་གླེགས་བམ་གྱིས་དབང་རྒྱས་པ། dam pa kun dga'i lugs kyi lam lnga'i glegs bam gyis dbang rgyas pa Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

7 168-178	རྟེན་འབྲེལ་བདག་གཏོད་དམ་པའི་བྱིན་རླབས། rten 'brel bdag gtod dam pa'i byin rlabs Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

8 178-215	ཐུགས་དམ་བདེ་གཤེགས་བཅུ་གཉིས་གྱི་དབང་། thugs dam bde gshegs bcu gnyis gyi dbang Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

9 215-244	བདེ་མཆོག་ཐུན་མོང་བའི་དབང་། bde mchog thun mong ba'i dbang Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

10 244-273	རྡོ་རྗེ་ཕག་མོ་ཕྱི་སྒྲུབ་པའི་དབང་། rdo rje phag mo phyi sgrub pa'i dbang Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

11 273-279	རྡོ་རྗེ་རྣལ་འབྱོར་མ་ནང་སྒྲུབ་པའི་དབང་། rdo rje rnal 'byor ma nang sgrub pa'i dbang Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

12 279-290	གསང་སྒྲུབ་ཁྲོས་མ་ནག་མོའི་དབང་། gsang sgrub khros ma nag mo'i dbang Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

13 290-312	རྡོ་རྗེ་གཏུམ་མོ་མཁའ་འགྲོ་མ་བདུད་རྩི་བུམ་པའི་དབང་། rdo rje gtum mo mkha' 'gro ma bdud rtsi bum pa'i dbang Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

14 312-332	མགོན་པོ་བེར་ནག་གི་དབང་བསྐུར་བའི་ཆོ་ག། mgon po ber nag gi dbang bskur ba'i cho ga Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

15 332-342	མགོན་པོ་ཨ་གྷོ་རའི་རྗེས་གནང་། mgon po a g+ho ra'i rjes gnang Permission to Invoke (anujñā) - rjes gnang	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

16 342-348	ཞིང་སྐྱེས་མཁའ་འགྲོ་ཀུན་ཏུ་རི་ཀའི་རྗེས་གནང་། zhing skyes mkha' 'gro kun tu ri ka'i rjes gnang Permission to Invoke (anujñā) - rjes gnang	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

17 348-353	གནོད་སྦྱིན་ཨ་པ་རཱ་ཛི་ཏའམ་ཡོན་བདག་ནོར་བུ་བཟང་པོའི་རྗེས་གནང་། gnod sbyin a pa rA dzi ta'am yon bdag nor bu bzang po'i rjes gnang Permission to Invoke (anujñā) - rjes gnang	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

18 353-363	དམ་པའི་ཆོས་སྡུག་བསྔལ་ཞི་བྱེད་རྒྱུད་པ་ཕྱི་མའི་ལུགས་ཀྱི་སྐལ་ལྡན་གྱི་སློབ་མ་ཁྲིད་ཚུལ། dam pa'i chos sdug bsngal zhi byed rgyud pa phyi ma'i lugs kyi skal ldan gyi slob ma khrid tshul Contemplative Guide Books and Instructional Manuals - khrid yig	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

19 363-367	བཀའ་བབས་ཀྱི་བརྒྱུད་པ་གཏོད་པའི་ཆོ་ག། bka' babs kyi brgyud pa gtod pa'i cho ga Empowerment Ritual - dbang chog - dbang skur	Text page View PDF
	སྨིན་གླིང་ལོ་ཆེན་དྷརྨ་ཤྲཱི་ (Smin gling lo chen d+harma shrI)

[edit]

[edit]