DNZ-16-MA-021

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 16, Text 21, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །ཛམ་བྷ་ལ་སེར་པོའི་ཁྲིད་དངོས་གྲུབ་ཆར་འབེབས་བཞུགས་སོ། །

ཚོགས་གཉིས་རྒྱ་མཚོ་ཡོངས་སུ་རྫོགས་པའི་མཐུས། །འགྲོ་ལ་དགོས་འདོད་ཆར་ཆེན་རྟག་འབེབས་པ། །དགེ་བའི་ལོ་ཏོག་འབྲས་བུ་སྨིན་མཛད་པའི། །ཆུ་དབང་མགོན་པོའི་སྐུ་ལ་ཕྱག་འཚལ་ལོ། །གང་ལ་གསོལ་བ་བཏབ་པས་སྐད་ཅིག་ལ། །བཀྲ་ཤིས་བདེ་ལེགས་ཕུན་སུམ་ཚོགས་པ་ཀུན། །འབད་མེད་ལྷུན་གྱིས་གྲུབ་པར་སྩོལ་མཛད་པའི། །བཅོམ་ལྡན་ཛཾ་བྷ་ལ་དེས་བདག་སྐྱོངས་ཤིག །དེ་ཉིད་མན་ངག་བསྒོམ་པའི་རིམ་པ་རྣམས། །སྙན་བརྒྱུད་དགོས་འདོད་ཀུན་འབྱུང་གདམས་པ་མཆོག །འགྲོ་ལ་ཕན་ཕྱིར་ཡི་གེར་བཀོད་པ་ལ། །བླ་མ་མཁའ་འགྲོ་ཛཾ་ལྷས་བྱིན་གྱིས་རློབས། །འདིར་འཕགས་པ་ཛཾ་བྷ་ལའི་ཁྲིད་དངོས་གྲུབ་ཆར་འབེབས་ཞེས་བྱ་བ་འདི་ལ་དོན་གསུམ་སྟེ། སྔོན་འགྲོ། དངོས་གཞི། རྗེས་དང་གསུམ་མོ། །དང་པོ་ལ་གསུམ་སྟེ། བླ་མ་བརྒྱུད་པའི་བྱུང་ཚུལ། ཐུན་མོང་གི་སྔོན་འགྲོ། ཁྱད་པར་གྱི་ སྔོན་འགྲོ་དང་གསུམ་མོ། །དང་པོ་ནི། རྣལ་འབྱོར་གྱི་དབང་ཕྱུག་མི་ཏྲ་ཛོ་ཀི་དེ་ཉིད། དུར་ཁྲོད་སོ་ས་གླིང་དུ་ཐུགས་དམ་ལྷ་ལྔ་བསྒྲུབས་པས། གྲུབ་པ་བརྙེས་ཏེ༑ ལྷ་སོ་སོའི་ཞལ་བསྟན་ནས། ཁྲིད་ཀྱི་རིམ་པ་རྣམས་གནང་ཞིང༌། མི་རབས་བདུན་གྱི་བར་དུ་བྱིན་གྱིས་རློབ་པར་ལུང་བསྟན། དེའི་ཚེ་བཅོམ་ལྡན་འདས་འཕགས་པ་ཛམ་བྷ་ལའི་ཁྲིད་འདི་དག་ཉམས་སུ་ལེན་པའི་རྣལ་འབྱོར་པ་རྣམས་ལ། དགོས་འདོད་ཆར་ལྟར་བདག་གིས་འབེབས་ཤིང༌། ཕྱི་མའི་མཐར་ཐུག་གི་བར་བདག་གིས་དགོས་འདོད་བསྒྲུབ་པར་བྱའོ། །ཡོངས་སུ་བསྲུང་ཞིང་བདེ་ལེགས་དང་ལྡན་པར་འཚལ་ལོ། །ཞེས་གསུངས་ནས་བསྐྱེད་རྫོགས་ཀྱི་ཁྲིད་ཀྱི་རིམ་པ་གསུངས་སོ། །རྣལ་འབྱོར་གྱི་དབང་ཕྱུག་མི་ཏྲས་རྗེས་སུ་བཟུང་བ་ནི། པཎ་ཆེན་ཤྲཱི་པུ་ཏྲའོ། །དེ་ཉིད་ཀྱིས་རྗེས་སུ་བཟུང་བ་ནི། མཚུངས་མེད་གཱིརྟི་རཏྣའོ། །གཉིས་པ་ལ་བཞི་སྟེ། དལ་འབྱོར་ རྙེད་པར་དཀའ་བ་བསྒོམ་པ་དང༌། འཆི་བ་མི་རྟག་པ་བསྒོམ་པ་དང༌། ལས་རྒྱུ་འབྲས་ཀྱི་དོན་བསྒོམ་པ་དང༌། འཁོར་བའི་ཉེས་དམིགས་བསྒོམ་པ་ནི་སྤྱི་དང་མཚུངས་སོ། །གསུམ་པ་ལ་བཞི་སྟེ། དང་པོ་ཅི་བྱས་བྱང་ཆུབ་ཀྱི་ལམ་དུ་འགྲོ་བ་སྐྱབས་འགྲོ་སེམས་བསྐྱེད་ཀྱི་ཁྲིད་ནི། མདུན་གྱི་ནམ་མཁར་རིན་པོ་ཆེ་དུ་མ་ལས་ཀུན་ནས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ་རང་གི་རྩ་བའི་བླ་མ་རིན་པོ་ཆེ་ལ་བླ་མ་རྒྱ་མཚོས་བསྐོར་བ། མདུན་དུ་ཡི་དམ། གཡས་སུ་སངས་རྒྱས། རྒྱབ་ཏུ་དམ་ཆོས། གཡོན་དུ་དགེ་འདུན་རྒྱ་མཚོས་བསྐོར་བར་བསམ་ལ་སྐྱབས་འགྲོ་བྱ། མཐར་སྐྱབས་གནས་རང་ལ་བསྟིམ་ལ་མི་དམིགས་པར་བཞག་གོ ། གཉིས་པ་སྡིག་སྒྲིབ་དག་བྱེད་རྡོ་རྗེ་སེམས་དཔའི་སྒོམ་བཟླས་ནི་སྤྱི་དང་མཐུན་ནོ། །བཞི་པ་བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ནི། སྤྱི་བོར་རིན་པོ་ཆེའི་ཁྲི་དང་པད་ཟླའི་སྟེང་དུ་རང་གི་རྩ་བརྒྱུད་ཀྱི་བླ་མ་ཡི་དམ། སངས་རྒྱས། ཆོས། དགེ་འདུན། མཁའ་འགྲོ་ཆོས་སྐྱོང་ཀུན་འདུས་སུ་བསྒོམ་ལ། མཎྜལ་ཕུལ། དགོས་འདོད་ཆར་ལྟར་དུ་འབེབ་པར་གསོལ་བ་བཏབ། དབང་བསྐུར་རྣམ་གསུམ་ཞུ༑ མཐར་བླ་མ་རང་ལ་བསྟིམ་ལ། མ་བཅོས་པའི་ངང་ལ་མཉམ་པར་བཞག་གོ །སྔོན་འགྲོ་འདི་དག་རྒྱས་པར་མི་ཏྲའི་ཁྲིད་ལྔ་ལྟར་རོ། །དངོས་གཞི་ལ་གཉིས་ཏེ། བསྐྱེད་རིམ་གྱི་ཁྲིད། རྫོགས་རིམ་གྱི་ཁྲིད་དོ། ། དང་པོ་ལ་གཉིས་ཏེ། བསྐྱེད་རིམ་དང་བཟླས་པའོ། །དང་པོ་བསྐྱེད་རིམ་ལ་ཡང་གསུམ་སྟེ། དང་པོ་བསྙེན་པའི་ཁྲིད་ནི། གནས་དབེན་ཞིང་ཉམས་དགའ་བར། ཚངས་པའི་གནས་བཞི་ལ་གནས་པས། ཆོས་ཐམས་ཅད་སྟོང་པ་ཉིད་དུ་བསྒོམ། སྟོང་པའི་ངང་ལས། ས་གཞི་རིན་པོ་ཆེ་སྣ་ལྔ་ལས་གྲུབ་པའི་དབུས་སུ་གཞལ་ཡས་ཁང་གྲུ་བཞི་སྒོ་བཞི། རྒྱན་རྟ་བབས་བང་རིམ་བཞི་པ། ཆོས་འཁོར་གདུགས་ཏོག་དང་བཅས་པ། དབུས་ཕྱུར་བུར་གྱུར་པའི་སྟེང་ནོར་བུའི་ཏོག་གིས་མཚན་པ། ལྕགས་རི་དང་ལྕོག་གིས་བསྐོར་བ། རྡོ་རྗེའི་ཕྲེང་བ་དང༌། སྐྱེད་མོས་ཚལ་གྱི་ནང་དུ་བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན་གྱིས་བསྐོར་བའི་གཞལ་ཡས་ཁང་གི་དབུས་སུ། རིན་པོ་ཆེ་དུ་མ་ལས་ཀུན་ནས་གྲུབ་པའི་ཁྲི་ཡངས་ཤིང་རྒྱ་ཆེ་བ། རིན་པོ་ཆེ་སྣ་ལྔས་བཀང་བའི་བུམ་བསྣོལ་གྱིས་བརྒྱན་པ། དེའི་སྟེང་དུ་སྣ་ཚོགས་པདྨ་འབུམ་ལྡན། ཨ་ལས་ཉ་རྒྱས་པའི་ཟླ་བའི་སྟེང་དུ་ནོར་བདག་སེར་པོ་གན་རྒྱལ་དུ་འགྱེལ་བའི་སྟེང་དུ། ཛཾ་ཡིག་གསེར་གྱི་མདོག་ཅན་ལས་དཔག་ཏུ་མེད་པའི་འོད་ཟེར་སྣ་ལྔ་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་བཅས་ཐམས་ཅད་མཆོད་པའི་སྤྲིན་ཕུང་གིས་མཆོད། སེམས་ཅན་ཐམས་ཅད་ལ་ཕོག་པས་སེར་སྣ་ལ་སོགས་པའི་སྡིག་སྒྲིབ་ཐམས་ཅད་སྦྱངས། རིན་ཆེན་འབྱུང་ལྡན་གྱི་གོ་འཕང་ལ་བཀོད། ཚུར་འདུས་ཡོངས་སུ་གྱུར་པ་ལས་ ཛཾ་ལས་བཱི་ཛ་པུ་ར་ཛཾ་གྱིས་མཚན་པ། དེ་ཡོངས་སུ་གྱུར་པ་ལས་རང་ཉིད་ཛཾ་བྷ་ལ་སྐུ་མདོག་གསེར་བཙོ་མའི་མདོག་འོད་འབར་བ། ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས་པ། དར་སྣ་ཚོགས་ཀྱིས་སྨད་གཡོགས་ཅན། གསེར་གྱི་སྐུ་རགས་ལ་ལྟེ་བ་ནོར་བུས་མཚན་པ་བཅིངས་པ། གསུས་ཁྱིམ་ཆེ་ཞིང་ཡན་ལག་དང་ལྷུ་ཚིགས་རྒྱས་པ། ཕྱག་གཡས་མཆོག་སྦྱིན་པུས་མོའི་སྟེང་དུ་མཛད་ནས་ཤིང་ཐོག་པཉྩ་པུ་ར་ཀའི་ལྟེ་བ་ཡིད་བཞིན་གྱི་ནོར་བུ་འོད་འབར་བས་མཚན་པ་འཛིན་པ། གཡོན་པས་རིན་པོ་ཆེ་སྣ་ཚོགས་སྐྱུགས་པའི་ནེའུ་ལེ་འཛིན་ཅིང༌། ཞལ་ཅུང་ཟད་ཁྲོ་ཞིང་ཡིད་ཙམ་འཛུམ་པ། ཉི་མའི་དཀྱིལ་འཁོར་ལྟར་རབ་ཏུ་རྒྱས་པ། དབུ་སྐྲ་རལ་པའི་ཐོར་ཅོག་གྱེན་ལ་བཅིངས་ཤིང༌། ལྷག་མ་ཐུར་དུ་འཕྱང་བ། མེ་ཏོག་གི་ཕྲེང་བས་སྐྲ་ཆིངས་དང༌། ཡིད་བཞིན་ནོར་བུ་འོད་འབར་བ་ལྔའི་རྩེ་བྲན་གྱིས་བརྒྱན་པ། རིན་པོ་ཆེ་དུ་མས་སྙན་ཆ་དང་མགུལ་རྒྱན། དཔུང་རྒྱན་དང་ཕྱག་གདུབ། རྐང་རྒྱན་དང་ཞབས་གདུབ། ཨུཏྤལ་སྣ་ལྔའི་ཕྲེང་བ་བཟང་པོ་འཕྱང་བ། མུ་ཏིག་སྣ་ལྔའི་ཕྲེང་བ་དང༌། དར་གྱི་ཅོད་པན་གྱིས་མཛེས་པ། འོད་ཟེར་སྣ་ལྔའི་ཕྲེང་བས་བསྐོར་བའི་དབུས་ན་བཞུགས་པ། པདྨ་འདབ་བརྒྱད་ལ་ནོར་བདག་བརྒྱད་ལ་རང་ལྟ་བུའི་ཆ་ལུགས་ཀྱིས་བཞུགས་པ། གཞན་ཡང་འཁོར་ལྷ་དང་ཀླུ། གནོད་སྦྱིན། དྲི་ཟ། ཉི་མ། ཟླ་བ། སྲིན་པོ། ནོར་ལྷ་ལ་སོགས་པའི་ཚོགས་ དུ་མས་བསྐོར་བའི་བདག་ཉིད་དུ་བསམ་ལ། དེ་དག་རྣམས་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོ་ལས་འོད་འཕྲོས། ལྕང་ལོ་ཅན་ནས་རང་ལྟ་བུའི་ཡེ་ཤེས་པ་སྤྱན་དྲངས། དབྱེར་མེད་དུ་བསྟིམ། སླར་འོད་འཕྲོས། རིགས་ལྔ་སྤྱན་དྲངས། དབང་བསྐུར། སྡིག་སྒྲིབ་དག །བདུད་རྩིའི་ལྷག་མ་ཡར་ལུད་པ་ལས་རིན་འབྱུང་ལ་སོགས་པ་རིགས་ལྔས་དབུ་བརྒྱན་པར་བསམ་ལ། ཐུགས་ཀར་པད་ཟླའི་སྟེང་དུ། ནོར་བུ་ཛཾ་སེར་པོས་མཚན་པ། དེ་ལ་ཡི་གེ་བཅུ་པ་བསམ་ལ། སྤྱི་བོར་ༀ། དཔྲལ་བར་ཛཾ། ལྕེ་ལ་བྷ། མགྲིན་པར་ལ། སྙིང་ཁར་ཛ། ལྟེ་བར་ལེན། བརླ་གཡས་པ་ལ་དྲ། གཡོན་པ་ལ་ཡེ། རྐང་པ་གཡས་སུ་སྭཱ། གཡོན་དུ་ཧཱ། ཞེས་པའི་སྔགས་རྣམས་པད་ཟླའི་སྟེང་དུ། དམར་སེར་འོད་འབར་བ་ལས་འོད་ཟེར་འཕྲོས། འོད་ཟེར་གྱི་རྩེར་འཕགས་པའི་སྐུ་རེ་རེ་བཞུགས་ཤིང༌། དེ་དག་རྣམས་ཀྱི་ཕྱག་ན་རིན་པོ་ཆེ་དང་ནེའུ་ལེ་ལས་རིན་པོ་ཆེ་སྣ་ལྔའི་ཆར་བབས་པར་བསམ་ལ་བསྙེན་པ་བྱ་བ་ནི། ༀ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པའི་བསྙེན་པ་བསྐྱལ་བའི་ཚེ། སྔགས་རྣམས་ལས་འོད་འཕྲོས། ཕྱི་སྣོད་ལ་ཕོག །གཞལ་ཡས་ཁང་དུ་བྱས། ནང་བཅུད་ལ་ཕོག །ཛཾ་བྷ་ལར་བྱས། ཐམས་ཅད་ཀྱི་ཞལ་ནས་སྔགས་ཀྱི་སྒྲ་སྒྲོག་ཅིང༌། རིན་པོ་ཆེ་སྣ་ལྔའི་ཆར་ཆེན་པོ་བབས་པར་བསམ་ལ་སྙིང་པོ་འདྲེན་ནོ། །མཐར་སྣོད་བཅུད་རང་ལ་བསྡུ། རང་ས་བོན་ ལ་བསྡུ། དེ་དམིགས་མེད་ཀྱི་ངང་ལ་བཞག་གོ །གཉིས་པ་རིགས་ལྔ་ལ་བརྟེན་ནས་བསོད་ནམས་དང་ཡེ་ཤེས་ཀྱི་སྟོབས་རྒྱས་པར་བྱེད་པའི་ཁྲིད་ནི། རང་གི་བསྙེན་པའི་དུས་ཀྱི་ལྟར་ཛཾ་བྷ་ལར་བསྐྱེད་པའི་སྤྱི་བོར་པད་ཟླའི་སྟེང་དུ། རྣམ་པར་སྣང་མཛད་སྐུ་མདོག་དཀར་པོ། གཡས་འཁོར་ལོ་ཐུགས་ཀར་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་དཀར་པོ་ༀ་ཡིག་དཀར་པོས་མཚན་པ། མགྲིན་པར་པད་ཟླའི་སྟེང་དུ་འོད་དཔག་མེད་དམར་པོ་གཡས་པདྨ་ཐུགས་ཀར་འཛིན་ཅིང༌། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་དམར་པོ་ཧྲཱིཿ ས་མཚན་པ། སྙིང་ཁར་པད་ཟླའི་སྟེང་དུ་མི་བསྐྱོད་པ་སྔོན་པོ་གཡས་རྡོ་རྗེ་ཐུགས་ཀར་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་སྔོན་པོ་ཧཱུྃ་གིས་མཚན་པ། ལྟེ་བར་པད་ཟླའི་སྟེང་དུ་རིན་ཆེན་འབྱུང་ལྡན་སེར་པོ། གཡས་ནོར་བུ་ཐུགས་ཀར་འཛིན་ཅིང༌། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ནོར་བུ་སེར་པོ་ཏྲཱཾ་གྱིས་མཚན་པ། གསང་གནས་སུ་པད་ཟླའི་སྟེང་དུ་དོན་ཡོད་གྲུབ་པ་སྐུ་མདོག་ལྗང་ཁུ་གཡས་རྒྱ་གྲམ་ཐུགས་ཀར་གཏོད་དེ་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པའི་ཐུགས་ཀར་པད་ཟླའི་སྟེང་དུ་ ནོར་བུ་ལྗང་ཁུ་ཨཱཿ ས་མཚན་པ། ཐམས་ཅད་ཞལ་གཅིག་ཕྱག་གཉིས། ཞབས་རྡོ་རྗེ་སྐྱིལ་ཀྲུང་མཛད་པ། དར་དང་རིན་པོ་ཆེའི་རྒྱན་དུ་མས་བརྒྱན་པ། ལོངས་སྤྱོད་རྫོགས་པའི་ཆ་ལུགས་ཅན་དུ་བསྒོམ་པའི་ཡིད་བཞིན་གྱི་ནོར་བུ་ས་བོན་དང་བཅས་པ་ལྔ་ལས། འོད་ཟེར་དཀར་དམར་སྔོ་སེར་ལྗང་ཁུ་ལྔ་འཕྲོས་པས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ལ་མཆོད་པའི་སྤྲིན་ཕུང་བསམ་གྱིས་མི་ཁྱབ་པས་མཆོད། མཆོད་པས་མཉེས་པར་བྱས་ནས། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཡེ་ཤེས་ལྔ་བསོད་ནམས་ཀྱི་སྟོབས་ཐམས་ཅད་འོད་ཟེར་དཀར་དམར་སྔོ་སེར་ལྗང་ཁུ་ལྔར་བསྡུས་ནས། རང་གི་གནས་ལྔའི་ཐུགས་ཀའི་ནོར་བུ་དང་ས་བོན་ལ་ཐིམ་པས། རང་ཉིད་བསོད་ནམས་དང་ཡེ་ཤེས་ཀྱི་སྟོབས་རྒྱས་པར་བསམ་ལ་རླུང་བུམ་པ་ཅན་བཟུང་ངོ༌། །སླར་ཡང་འོད་ཟེར་དཀར་དམར་མཐིང་སེར་ལྗང་ཁུ་ལྔ་འཕྲོས། རིགས་དྲུག་གི་སེམས་ཅན་ལ་ཕོག །དེ་དག་རྣམས་ཀྱི་འདོད་ཆགས། ཞེ་སྡང༌། གཏི་མུག །ང་རྒྱལ། ཕྲག་དོག་ལྔ་སྦྱངས། རིགས་ལྔའི་གོ་འཕང་ལ་བཀོད། དེ་དག་གི་ཚེ་དང་བསོད་ནམས་དཔལ་དང་གྲགས་པ་སྟོབས་དང་གཟི་བརྗིད་འོད་ཟེར་དཀར་དམར་སྔོ་སེར་ལྗང་ཁུའི་དབྱིབས་སུ་བསྡུས་ནས། རང་གི་གནས་ལྔར་ཐིམ། རང་གི་ཚེ་དང་བསོད་ནམས་དཔལ་དང་གྲགས་པ། སྟོབས་དང་གཟི་བརྗིད་ཐམས་ཅད་རྒྱས་པར་བསམ་ལ་རླུང་བུམ་པ་ཅན་ བཟུང་ངོ༌། །སླར་ཡང་གནས་ལྔའི་ནོར་བུ་དང་ས་བོན་ལས་འོད་ཟེར་ལྔ་འཕྲོས། གཟུགས་ཁམས་ཀྱི་ལྷའི་ནོར་བུ་དང༌། འདོད་ཁམས་ཀྱི་ལྷ་དང༌། ལྷ་མིན། ཀླུ། གནོད་སྦྱིན། དྲི་ཟ། མིའམ་ཅི། མི་རྣམས་ཀྱི་ནོར་བུ་དང༌། མདོར་ན་ཉི་ཟླའི་འོད་དང༌། འབྱུང་བ་ལྔའི་བཅུད་དང༌། བཀྲག་དང་གཟི་མདངས་ཡོན་ཏན་ཐམས་ཅད་འོད་ཟེར་ལྔར་བསྡུས་ནས། གནས་ཁང་དང༌། ཡུལ་འཁོར་ཐམས་ཅད་དུའང་རིན་པོ་ཆེ་དང་ལོངས་སྤྱོད་ཀྱི་ཆར་ཆེན་པོ་བབས་པར་བསམ་ལ་རླུང་བུམ་པ་ཅན་བཟུང༌། དེ་ལ་རྩ་འཁོར་ལྔ་ལ་དམིགས་ཐེབས་གསུམ་རེ་རྫོགས་པར་བྱའོ། །རྒྱས་པར་བསྒོམ་ན་རྩ་འཁོར་རེ་རེ་ལ་དམིགས་ཐེབས་རེ་རེ་བྱ་སྟེ། དམིགས་ཐེབས་ལྔའོ། །སྦྱོར་བ་འདིས་ནི་བསོད་ནམས་ཀྱི་སྟོབས་རྒྱས་ཤིང༌། ལོངས་སྤྱོད་ཀྱི་ཆར་ཆེན་པོ་འབབ་པར་འགྱུར་རོ། །འོད་ཟེར་གྱི་སྣ་ལ་ལྷ་བསྒོམ་པ་ནི་ཞལ་ལས་ཤེས་སོ། །གསུམ་པ་ཞི་རྒྱས་དབང་དྲག་གི་སྒོ་ནས་དམིགས་ཡུལ་དབང་དུ་བྱས་པའི་སྦྱོར་བ་ནི། རང་ཉིད་ཛཾ་བྷ་ལ་སྔར་བསྙེན་པའི་དུས་ལྟར་བསྐྱེད་པའི་གནས་ལྔར། རང་ལྟ་བུའི་ཛཾ་བྷ་ལ་རིགས་ལྔ་ནི། སྤྱི་བོར་རྣམ་སྣང་ཛཾ་བྷ་ལ་དཀར་པོ། མགྲིན་པར་པདྨའི་ཛཾ་བྷ་ལ་དམར་པོ། སྙིང་གར་རྡོ་རྗེའི་ཛཾ་བྷ་ལ་སྔོན་པོ། ལྟེ་བར་རིན་འབྱུང་ཛཾ་བྷ་ལ་སེར་པོ། གསང་གནས་སུ་དོན་གྲུབ་ཛཾ་བྷ་ལ་ལྗང་ཁུ་རྣམས། རིན་པོ་ཆེའི་ཁྲི་དང༌། པད་ཟླའི་སྟེང་ན་རང་ལྟ་བུའི་ཆ་ལུགས་ཀྱིས་བཞུགས་པའི་ཐུགས་ཀར་པད་ ཟླའི་སྟེང་དུ། ནོར་བུ་དཀར་དམར་སྔོ་སེར་ལྗང་ཁུ་ལྔ་གནས་པར་བསྒོམ། དེ་ལ་དང་པོ་ཞི་བའི་སྒོ་ནས་དབང་དུ་བྱ་བ་ནི། སྤྱི་བོར་རྣམ་སྣང་ཛཾ་བྷ་ལའི་ཐུགས་ཀར་པད་ཟླའི་སྟེང་དུ་ཡིད་བཞིན་གྱི་ནོར་བུ་དཀར་པོ་འོད་འབར་བ་ལས། འོད་ཟེར་དཀར་པོ་ཞགས་པ་དང་ལྕགས་ཀྱུའི་དབྱིབས་ཅན་དཔག་ཏུ་མེད་པ་འཕྲོས། གྲུབ་པ་ཐོབ་པ་དང༌། མཁའ་ལ་སྤྱོད་པ་དང༌། རིག་པ་འཛིན་པ་དང༌། གནས་ལྔ་རིག་པའི་མཁས་པ་རྣམས་དང༌༑ མདོར་ན་བླ་མ་ཐམས་ཅད་ཀྱི་སྨིན་མཚམས་སུ་ཕོག །ཐུགས་རྒྱུད་མཉེས་ཤིང་བདེ་བས་གང་ནས། རང་དབང་མེད་པར་སྤྱི་བོར་བཀུག་ནས། བླ་མ་དབང་དུ་འདུས་ནས་བདག་ལ་རབ་ཏུ་མཉེས་ཤིང་རང་རྒྱུད་སྐུ་གསུང་ཐུགས་ཀྱིས་བྱིན་གྱིས་བརླབས་པར་བསམ་པ་ནི་བླ་མ་དབང་དུ་བྱ་བའོ། །གཉིས་པ་ཡི་དམ་དབང་དུ་བྱ་བ་ནི། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་དེས། ཡི་དམ་གྱི་ཐུགས་ཀར་རེག་པས། ཡི་དམ་ཐུགས་རྒྱུད་བདེ་གསལ་གྱིས་གང་ཞིང༌། ཐུགས་བརྩེ་བ་ཆེན་པོ་དང་ལྡན་པས་རང་དབང་མེད་པར་བྱོན་ནས། རང་གི་སྤྱི་བོའི་ནོར་བུ་ལ་ཐིམ་པས་མཆོག་ཐུན་མོང་གི་དངོས་གྲུབ་ཐོབ་པར་བསམ་པ་ནི་ཡི་དམ་དབང་དུ་བྱ་བའོ། །གསུམ་པ་དགེ་བའི་བཤེས་གཉེན་ལ་སོགས་པ་བཙུན་པ་དབང་དུ་བྱ་བ་ནི། འོད་ཟེར་དཀར་པོ་ལྕགས་ཀྱུ་དང་ཞགས་པ་ལྟ་བུ་དེས། དགེ་བའི་བཤེས་གཉེན་རྣམས་ཀྱི་སྤྱི་བོར་ཕོག་ནས། རང་དབང་མེད་པར་ བཀུག་ཅིང་སྤྱི་བོའི་ནོར་བུ་ལ་ཐིམ་པར་བསམ་པས་བཙུན་པ་དབང་དུ་འགྱུར་རོ། །བཞི་པ་རྒྱལ་པོ་དབང་དུ་བྱ་བ་ནི། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་དེས། རྒྱལ་པོའི་ཐོད་པ་ལ་སོགས་པ་སྤྱི་བོར་ཕོག་སྟེ་ཛཾ་བྷ་ལར་བྱས། རང་དབང་མེད་པར་བདག་ལ་དགའ་ཞིང་མདུན་དུ་འདུས་ནས། སྤྱི་བོའི་ནོར་བུ་ལ་ཐིམ་པར་བསམ་མོ། །ལྔ་པ་བློན་པོ་ལ་སོགས་པ་མི་སྐྱ་དབང་དུ་བྱ་བ་ནི། འོད་ཟེར་དཀར་པོ་ལྕགས་ཀྱུ་དང་ཞགས་པ་ལྟ་བུ་དེས། བློན་པོ་ལ་སོགས་པ་རྣམས་ཀྱི་སྙིང་ནས་བཟུང་སྟེ། བདག་ལ་འདུན་པ་དང༌། དད་པ་དང༌། དགའ་བ་དང་བཅས་ནས་རང་དབང་མེད་པར་དབང་དུ་འདུས་ནོར་བུ་ལ་ཐིམ་པར་བསམ་མོ། །དྲུག་པ་བཙུན་མོ་ལ་སོགས་པའི་བུད་མེད་དབང་དུ་བྱ་བ་ནི། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་དེས། བཙུན་མོ་དང་བུད་མེད་རྣམས་ཀྱི་ལྟེ་བ་དང་པདྨའི་ཟེའུ་འབྲུ་ནས་བཟུང་ཞིང་རང་དབང་མེད་པར་བདག་ལ་དགའ་བཞིན་དུ་དབང་དུ་འདུས་ནས་སྤྱི་བོའི་ནོར་བུ་ལ་ཐིམ་པར་བསམ་མོ། །བདུན་པ་ལོངས་སྤྱོད་དབང་དུ་བྱ་བ་ནི། སྤྱི་བོའི་ནོར་བུ་ས་བོན་དང་བཅས་པ་ལས། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་འཕྲོས། འཇིག་རྟེན་ཁམས་ཀྱི་ནོར་བུ་ཐམས་ཅད་དང་རིན་པོ་ཆེ་སྣ་ལྔ། འབྲུ་ཐམས་ཅད་དང༌། གོས་ཐམས་ཅད། ཟས་ཐམས་ཅད། ནོར་ཞིང་ཡུལ་གྲུ་ཐམས་ཅད་འོད་ཟེར་གྱིས་བསྡུས་ནས་ནོར་བུ་ལ་ཐིམ་པར་བསམ་མོ། །བརྒྱད་པ་ཐམས་ཅད་དབང་དུ་བྱ་བ་ནི། སྤྱི་བོའི་ཛམྦྷ་ལའི་ཐུགས་ཁའི་ནོར་བུ་ལས། འོད་ཟེར་དཀར་པོ་ཞགས་པ་དང་ལྕགས་ཀྱུ་ལྟ་བུ་འཕྲོས་ནས། བླ་མ་དང་རྒྱལ་བ་སྲས་བཅས་ཐམས་ཅད་ལ་ཕོག ། མཆོད་པས་མཉེས་པར་བྱས། སེམས་ཅན་ཐམས་ཅད་ལ་ཕོག་པས་ཛཾ་བྷ་ལར་བྱས། ཕྱི་སྣོད་ལ་ཕོག་པས་རིན་པོ་ཆེ་སྣ་ལྔ་ལས་གྲུབ་པའི་སངས་རྒྱས་ཀྱི་ཞིང་ཁམས་རྣམ་པར་དག་པར་སྦྱངས། དེ་ནས་དེ་དག་ཐམས་ཅད་འོད་ཟེར་གྱིས་བསྡུས་ནས་སྤྱི་བོའི་ནོར་བུ་ལ་ཐིམ་པར་བསམས་པས་ཐམས་ཅད་དབང་དུ་འགྱུར་རོ། །ལས་ཚོགས་བརྒྱད་པོ་ཐམས་ཅད་ཀྱི་ཐོག་མར་རླུང་རོ་ལན་གསུམ་བུས་ལ། སེར་སྣ་ལ་སོགས་པའི་སྒྲིབ་པ་ལྔ་དག་པར་བསམ། རླུང་ཚུར་འཛིན་པའི་ཚེ། བསྒྲུབ་བྱ་དེ་དག་འོད་ཟེར་དཀར་པོ། ལྕགས་ཀྱུ་དང་ཞགས་པ་ལྟ་བུས། གནས་སོ་སོར་ཕོག་པའི་ཚེ། དེ་དག་གི་ལུས་སེམས་ཐམས་ཅད་དགའ་བ་དང་བདེ་བ་ཆེན་པོས་ཁྱབ་ཅིང༌། རང་ལ་དད་པ་དང༌། མོས་པ་དང༌། བརྩེ་གདུང་དྲག་པོ་དང་བཅས་ནས་རང་དབང་མེད་པར་མདུན་དུ་འདུས་ནས། ཐམས་ཅད་རྣམ་སྣང་ཛཾ་བྷ་ལར་གྱུར་ཏེ་མདུན་དུ་འཁོད་པ་ལ། སླར་ཡང་འོད་ཟེར་གྱིས་རེག་པ་ཙམ་གྱིས། ཐམས་ཅད་འོད་དཀར་པོར་ཞུ་ནས་སྤྱི་བོའི་ཛཾ་བྷ་ལའི་ཐུགས་ཀའི་ནོར་བུ་ལ་ཐིམ་པའི་ཚེ། སྤྱི་བོའི་ཛཾ་བྷ་ལའི་ནོར་བུ་དང་ཕྱག་མཚན་ལས་དགོས་འདོད་ཀྱི་ལོངས་སྤྱོད་ཆར་ཆེན་པོ་བབས་པས༑ ལུས་ཀྱི་ནང་དང་རང་གི་གནས་ཐམས་ཅད་གང་བར་བསམ་ལ་རླུང་བཟུང༌། དེ་ནི་ཞི་བའི་སྒོ་ནས་དབང་དུ་བྱེད་པའོ། །གཉིས་པ་དབང་གི་སྒོ་ནས་དབང་དུ་བྱེད་པ་ནི། རང་ཉིད་ཛཾ་བྷ་ལར་གནས་པའི་མགྲིན་པ༑ རིན་པོ་ཆེའི་ཁྲི་དང༌། པད་ཟླའི་སྟེང་དུ། རང་ལྟ་བུའི་ཛཾ་བྷ་ལ་དམར་པོའི་སྙིང་གར་ནོར་བུ་དམར་པོས་མཚན་པ་ལས་འོད་ཟེར་དམར་པོ་ཞགས་པ་དང་ལྕགས་ཀྱུ་ལྟ་བུ་འཕྲོས། བླ་མ་ལ་ཕོག་ནས་དབང་དུ་བྱ་བ་དང་གཅིག །ཡི་དམ་དང་གཉིས། དགེ་བའི་བཤེས་གཉེན་དང་གསུམ། རྒྱལ་པོ་དང་བཞི། བློན་པོ་ལ་སོགས་མི་སྐྱ་དང་ལྔ། བཙུན་མོ་ལ་སོགས་བུད་མེད་དང་དྲུག །ནོར་རྫས་ལ་སོགས་ལོངས་སྤྱོད་དང་བདུན། མདོར་ན་ཐམས་ཅད་དབང་དུ་བྱ་བ་དང་བརྒྱད་དེ། སྔར་ལྟར་སོ་སོའི་གནས་ལ་ཕོག་པས། ལུས་སེམས་ཐམས་ཅད་དགའ་བ་དང་བདེ་བ་ཆེན་པོས་ཁྱབ་ཅིང༌། རང་ལ་དད་པ་དང་མོས་པ་དང༌། བརྩེ་གདུང་དྲག་པོ་དང་བཅས་ནས༑ རང་དབང་མེད་པར་དབང་དུ་འདུས་ཏེ་པདྨའི་ཛཾ་བྷ་ལར་གྱུར་ནས་མདུན་དུ་འཁོད་པ་ལ། སླར་ཡང་འོད་ཟེར་གྱིས་རེག་པས། དགའ་བདེ་ཆེན་པོ་སྐྱེས་ནས། འོད་ཕུང་དམར་པོར་ལྟེམ་གྱིས་ཞུ་ནས་མགྲིན་པའི་པདྨའི་ཛཾ་བྷ་ལའི་སྙིང་ཁའི་ནོར་བུ་ལ་ཐིམ་པས། མཆོག་ཐུན་མོང་གི་དངོས་གྲུབ་རྣམ་གཉིས་ཐོབ་ཅིང༌། རང་གི་ལུས་ཀྱི་ནང་དང༌། གནས་ཐམས་ཅད་དུ་ཡང་ལོངས་སྤྱོད་སྣ་ཚོགས་ཀྱི་ཆར་ཆེན་པོ་བབས་པར་ བསམ་ལ་རླུང་བཟུང་ངོ༌། །དེ་ནི་དབང་གི་སྒོ་ནས་དབང་དུ་བྱེད་པའོ། །གསུམ་པ་རྒྱས་པའི་སྒོ་ནས་དབང་དུ་བྱ་བ་ནི། རང་ཉིད་ཛཾ་བྷ་ལར་གནས་པའི་ལྟེ་བར། རིན་པོ་ཆེའི་ཁྲི་པད་ཟླའི་སྟེང་དུ། རིན་འབྱུང་ཛཾ་བྷ་ལ་རང་ལྟ་བུ་སྙིང་ཁར་པད་ཟླའི་སྟེང་དུ། ནོར་བུ་སེར་པོ་ཛཾ་སེར་པོས་མཚན་པ་ལས། འོད་ཟེར་སེར་པོ་ཞགས་པ་དང་ལྕགས་ཀྱུ་ལྟ་བུར་ཕྱོགས་བཅུར་འཕྲོས། ཕྱོགས་བཅུའི་བླ་མ་ལ་སོགས་ཐམས་ཅད་ལ་ཕོག་སྟེ༑ སྔར་ལྟར་རང་དབང་མེད་པར་དབང་དུ་འདུས་ནས། རིན་འབྱུང་ཛཾ་བྷ་ལར་གྱུར་ཏེ་མདུན་དུ་འཁོད་པ་ལ་སླར་ཡང་འོད་ཟེར་གྱིས་རེག་པས། དགའ་བདེ་ཆེན་པོ་སྐྱེས་ནས་འོད་ཀྱི་ཕུང་པོ་མེར་གྱིས་ཞུ་ནས། ལྟེ་བའི་རིན་འབྱུང་ཛཾ་བྷ་ལའི་ལྟེ་བའི་ནོར་བུ་ལ་ཐིམ་པས། མཆོག་ཐུན་མོང་གཉིས་ཀྱི་དངོས་གྲུབ་ཐོབ་ཅིང་ལུས་ཀྱི་ནང་དང༌། གནས་ཁང་ཐམས་ཅད་ལོངས་སྤྱོད་ཀྱི་ཆར་ཆེན་པོ་བབས་ནས་གང་བར་བསྒོམས་ནས་རླུང་བུམ་པ་ཅན་བཟུང་ངོ༌། །དེ་ནི་རྒྱས་པའི་སྒོ་ནས་དབང་དུ་བྱེད་པའོ། །བཞི་པ་དྲག་པོའི་སྒོ་ནས་དབང་དུ་བྱ་བ་ནི། རང་ཉིད་ཛཾ་བྷ་ལར་གནས་པའི་གསང་གནས་སུ། རིན་པོ་ཆེའི་ཁྲི་པད་ཟླའི་སྟེང་དུ་ལས་ཀྱི་ཛཾ་བྷ་ལ་ལྗང་ནག་གམ། ནག་པོའི་སྙིང་གར་པད་ཟླའི་སྟེང་དུ་ནོར་བུ་ལྗང་ཁུ་ཛཾ་ནག་པོས་མཚན་པ་ལས་འོད་ཟེར་ལྗང་ནག་ཞགས་པ་དང་ལྕགས་ཀྱུ་ལྟ་བུ་ཕྱོགས་བཅུར་འཕྲོས། ཕྱོགས་བཅུའི་བླ་མ་སོགས་ཐམས་ཅད་ལ་ཕོག་པས། དབང་དུ་བྱ་བ་རྣམ་པ་བརྒྱད་དེ། སྔར་ལྟར་སོ་སོའི་གནས་ལ་ཕོག་པས། ལུས་སེམས་ཐམས་ཅད་དགའ་བདེ་ཆེན་པོས་ཁྱབ་ཅིང༌། ཁྱད་པར་བསྒྲུབ་བྱ་ཐམས་ཅད་སྐྲག་ཅིང་འདར་བ་དང༌། སྔངས་པ་དང༌། རྨོངས་པ་བཅས་ནས། རང་དབང་མེད་པར་དབང་དུ་འདུས་ཏེ། ལས་ཀྱི་ཛཾ་བྷ་ལར་གྱུར་ཏེ་མདུན་དུ་འཁོད་པ་ལས། སླར་འོད་ཟེར་གྱིས་རེག་པས། དགའ་བདེ་ཆེན་པོ་སྐྱེས་ནས་འོད་ལྗང་ཁུའི་ཕུང་པོར་མེར་གྱིས་ཞུ་སྟེ། གསང་གནས་ཀྱི་ཛཾ་བྷ་ལའི་སྙིང་ཁའི་ནོར་བུ་ལ་ཐིམ་པས་མཆོག་ཐུན་མོང་གི་དངོས་གྲུབ་ཐོབ་ཅིང༌། ལུས་ཀྱི་ནང་དང༌། རང་གི་གནས་ཐམས་ཅད་ན་ལོངས་སྤྱོད་སྣ་ལྔའི་ཆར་ཆེན་པོ་བབས་པས་གང་བར་བསམ་ལ་རླུང་བུམ་པ་ཅན་བཟུང་ངོ༌། །དེ་ནི་དྲག་པོའི་སྒོ་ནས་དབང་དུ་བྱ་བའོ། །ལྔ་པ་ལས་སྣ་ཚོགས་པའི་སྒོ་ནས་དབང་དུ་བྱ་བ་ནི། རང་ཉིད་ཛཾ་བྷ་ལར་གནས་པའི་སྙིང་ཁར་རིན་པོ་ཆེའི་ཁྲི་པད་ཟླའི་སྟེང་དུ་མི་བསྐྱོད་པ་ཛཾ་བྷ་ལ་སྔོན་པོ་རང་ལྟ་བུའམ། ཡང་ན་ཛཾ་བྷ་ལ་ནག་པོ་ཁྲོས་པར་བསྒོམ་ཀྱང་རུང་གསུངས། དེའི་སྙིང་ཁར་པད་ཟླའི་སྟེང་དུ། ནོར་བུ་སྔོན་པོ་ཛཾ་སྔོན་པོས་མཚན་པ། དེ་ལས་འོད་ཟེར་དཀར་པོ་དང་དམར་པོ་སྔོན་པོ་སེར་པོ་ལྗང་གུ་སྣ་ཚོགས་ཏེ། ཁ་དོག་སྣ་ལྔ། ཞགས་པ་དང་ལྕགས་ཀྱུའི་དབྱིབས་ཅན་དཔག་ཏུ་མེད་པ་ཕྱོགས་བཅུར་འཕྲོས། ཕྱོགས་བཅུའི་བླ་མ་རྣམས་དང༌། ཡི་དམ་ཐམས་ཅད་དེ་བསྒྲུབ་བྱ་བརྒྱད་ལ་ཕོག་པས། དབང་དུ་བྱ་བ་རྣམ་པ་བརྒྱད་དེ། སྔར་ལྟར་དེ་དག་སོ་སོའི་གནས་ལ་ཕོག་པས། ལུས་སེམས་ཐམས་ཅད་དགའ་བདེས་ཁྱབ་ཅིང༌། རང་ལ་བྱིན་གྱིས་བརླབ་པ་དང༌། དད་མོས་བརྩེ་གདུང་དྲག་པོ་དང་བཅས་ནས། རང་དབང་མེད་པར་དབང་དུ་འདུས་ཤིང་མི་བསྐྱོད་པ་ཛཾ་བྷ་ལར་གྱུར་ཏེ་མདུན་དུ་འཁོད་པར། སླར་འོད་ཟེར་སྣ་ལྔས་རེག་པས་དགའ་བདེ་ཆེན་པོ་སྐྱེས་ནས། འོད་ཀྱི་ཕུང་པོ་སྔོ་མེར་གྱིས་སོང་བར་བསམ། དེ་དག་འོད་ཟེར་ཁ་དོག་སྣ་ལྔའི་རང་བཞིན་དུ་ཞུ་ནས་སྙིང་ཁའི་ཛཾ་བྷ་ལའི་སྙིང་ཁའི་ནོར་བུ་ལ་ཐིམ་པས། མཆོག་ཐུན་མོང་གི་དངོས་གྲུབ་རྣམ་གཉིས་ཐོབ་ཅིང༌། ལུས་ཀྱི་ནང་དང་གནས་ཁང་ཐམས་ཅད་དུ་རིན་པོ་ཆེ་སྣ་ལྔ་དང་ལོངས་སྤྱོད་ཀྱི་ཆར་ཆེན་པོ་བབས་པས་གང་བར་བསམ་ལ་རླུང་བུམ་པ་ཅན་བཟུང་ངོ༌། །དེ་ནི་ལས་སྣ་ཚོགས་པའི་སྒོ་ནས་དབང་དུ་བྱ་བའོ། །འདི་དག་གི་སྐབས་སུ་འོད་ཟེར་གྱི་རྩེ་ལ་ལྷ་བསྒོམ་པ་ནི་ཞལ་ལ་ཡོད་ཅིང༌། ནོར་བདག་བརྒྱད་ལུས་ལ་བཀོད་པ་ཡང་ཞལ་ལས་ཤེས་སོ། །གཉིས་པ་བཟླས་པ་གསུང་གི་ཁྲིད་ལ་གསུམ་སྟེ། ཕྱི་ནང་གསང་གསུམ་མོ། །དང་པོ་ནི། རང་ཉིད་ཛཾ་བྷ་ལར་གནས་པའི་སྤྱི་བོར་ༀ། དཔྲལ་བར་ཛམ། དཔུང་པ་གཡས་པ་བྷ། གཡོན་དུ་ལ། སྙིང་ཁར་ཛ། ལྟེ་བར་ལེན། བརླ་གཡས་པ་ལ་དྲ། གཡོན་དུ་ཡེ། བོལ་གཡས་ལ་སྭཱ། གཡོན་ལ་ཧཱ་བསྐྱེད་དོ། །དེ་དག་གི་འོད་འཕྲོས་པའི་རྩེར། ཡི་གེ་བཅུ་པ་ལས་རིན་པོ་ཆེ་སྣ་ལྔའི་ཆར་ བབས་པར་བསམ་ལ་སྔགས་འདྲེན་ནོ། །གཉིས་པ་ནི། རང་ཉིད་ཛཾ་བྷ་ལ་སྔར་ལྟར་གསལ་བའི་གནས་ལྔར། ཛཾ་བྷ་ལ་རིགས་ལྔའི་སྙིང་ཁར་ནོར་བུ་ལྔ་ཛཾ་ལྔས་མཚན་པ་ལས། སྔགས་ཀྱི་ཁ་དོག་དེ་ལྟ་བུ་ལྔ་འཁོར་བར་དམིགས་ནས་སྔགས་འདྲེན་ནོ། །གསུམ་པ་ནི། རང་ཉིད་ཛཾ་བྷ་ལར་གསལ་བའི་གནས་ལྔར་ཛཾ་བྷ་ལ་རིགས་ལྔའི་སྙིང་ཁར་པད་ཟླའི་སྟེང་དུ། ནོར་བུ་ཛཾ་རིགས་ལྔས་མཚན་པ་ལྔ་ལས། སྔགས་ཕྲེང་ཁ་དོག་སྣ་ལྔས་བསྐོར་བ་ལས་འོད་ཟེར་འཕྲོས། འོད་ཟེར་གྱི་རྩེ་ལ་ཛཾ་བྷ་ལ་རིགས་ལྔ་འཕྲོས། ལུས་ཀྱི་ནང་ཐམས་ཅད་ཛཾ་བྷ་ལ་རིགས་ལྔས་ཐེམ་འགགས་སུ་གང༌། ཕྱིར་འཕྲོས། བ་སྤུའི་རྩ་བ་ཐམས་ཅད་ཀྱང་ཛཾ་བྷ་ལས་གང༌། སྣོད་ཀྱི་འཇིག་རྟེན་ལ་ཕོག །སངས་རྒྱས་ཀྱི་ཞིང་དུ་བྱས། ནང་བཅུད་ཀྱི་སེམས་ཅན་ཐམས་ཅད་ལ་ཕོག་པས་ཐམས་ཅད་ཛཾ་བྷ་ལར་བྱས་ནས། འོད་ཟེར་གྱིས་བར་སྣང་གང་ཞིང༌། འོད་ཟེར་དེ་དག་གི་རྩེ་ལ་ཛཾ་བྷ་ལ་རིགས་ལྔ་བཞུགས་ནས་ཐམས་ཅད་ཀྱི་ཞལ་ནས་སྔགས་སྒྲ་དི་རི་རི་སྙན་པའི་དབྱངས་དང་བཅས་ནས་བགྲངས་པས། རིན་པོ་ཆེ་སྣ་ལྔ་དང་ལོངས་སྤྱོད་ཀྱི་ཆར་ཆེན་པོ་བབས་པར་བསམ་ལ་ཡིད་ཀྱིས་བཟླས་པ་བྱའོ། །དེ་ནི་གསང་བའི་བཟླས་པའོ། །དེ་དག་གིས་བཟླས་པ་གསུང་གི་ཁྲིད་སོང༌། །གཉིས་པ་རྫོགས་རིམ་གྱི་ཁྲིད་ལ་གསུམ་སྟེ། ཞི་གནས། ལྷག་མཐོང༌། འཕོ་བ་སྟེ་གསུམ་མོ། །གོང་མ་གཉིས་པོ་ནི་སྤྱན་རས་གཟིགས་ལམ་རིམ་དང་འདྲ་བར་འདུག་པས་འདིར་མ་བྲིས། གསུམ་པ་འཕོ་བ་ནི། རང་ཉིད་ཛཾ་བྷ་ལ་བསྒོམ་པའི་སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་ལྔར། ཛཾ་བྷ་ལ་རིགས་ལྔ་བསྐྱེད་ལ། གསང་གནས་ཀྱི་ཛཾ་བྷ་ལ་ཐིག་ལེ་ལྗང་ཁུར་གྱུར་ནས་ལྟེ་བའི་ཛཾ་བྷ་ལ་ལ་ཐིམ། དེ་ཐིག་ལེ་སེར་པོར་གྱུར་ནས་སྙིང་ཁའི་མི་བསྐྱོད་པ་ལ་ཐིམ། དེ་ཐིག་ལེ་སྔོན་པོར་གྱུར་ནས་མགྲིན་པའི་སྣང་བ་མཐའ་ཡས་ལ་ཐིམ། དེ་ཐིག་ལེ་དམར་པོར་གྱུར་ནས་སྤྱི་བོའི་རྣམ་པར་སྣང་མཛད་ལ་ཐིམ། དེ་ཐིག་ལེ་དཀར་པོ་འོད་འཕྲོ་བར་གྱུར་ནས་སྤྱི་བོ་ནས་རྒྱངས་ཀྱིས་ཐོན་ནས། སྤྱི་བོར་བླ་མ་རིན་འབྱུང་དུ་བསྒོམ་པའི་ཐུགས་ཀར་ཐིམ། དེ་ནམ་མཁའ་ལ་འཇའ་ཚོན་སྣ་ལྔར་གྱུར་ནས༑ འོད་དང་འཇའ་ཚོན་གྱིས་ནམ་མཁའ་གང་བར་བསམ་ལ། དམིགས་མེད་ཕྱག་རྒྱ་ཆེན་པོའི་ངང་ལ་མཉམ་པར་བཞག་གོ །དེ་ནི་འཕོ་བ་འཇའ་ཚོན་མ་ཞེས་བྱ་སྟེ་སྦྱང་བ་དང་ལས་སྦྱོར་སྟབས་སུའོ། །དེས་ཁྲིད་ཀྱི་དངོས་གཞི་སོང་ནས། གསུམ་པ་རྗེས་ནི། བསྔོ་བ་དང་སྨོན་ལམ་གྱིས་རྒྱས་འདེབས་བྱ་ཞིང་དུས་རྒྱུན་དུ་ཉམས་སུ་བླངས་པས་མཆོག་ཐུན་མོང་གི་དངོས་གྲུབ་ལྷུན་འགྲུབ་ཏུ་འབྱུང་བར་འགྱུར་རོ། །ཁྲིད་འདི་ནི་རྒྱུད་པ་འཛིན་པ་དང༌། སྣོད་དང་ལྡན་ངེས་པ་མ་གཏོགས་པ་སྣོད་མིན་ལ་མི་སྦྱིན་པའི་བཀའ་རྒྱས་བཏབ་བོ། ། ཨྠ ི། གང་ཞིག་དགོས་འདོད་འབྱུང་བའི་ཡིད་བཞིན་ནོར། །གང་གི་གདམས་པ་དངོས་གྲུབ་གཉིས་འབྱུང་བ། །གང་དེ་ བླ་མའི་དྲིན་གྱིས་ལེགས་མཐོང་བས། །གང་གང་འགྲོ་ལ་ཕན་ཕྱིར་ཡི་གེར་བཀོད། །དགེ་བས་འགྲོ་ཀུན་འཁོར་བའི་རྒྱ་མཚོ་ལས། །བརྒལ་ནས་སེམས་ཉིད་ཡིད་བཞིན་ནོར་རྙེད་ནས། །རང་གཞན་འཁོར་བའི་སྡུག་བསྔལ་ལས་གྲོལ་ཏེ། །བདེ་ཆེན་མཆོག་གི་གོ་འཕང་འགྲུབ་གྱུར་ཅིག །བཅོམ་ལྡན་འདས་འཕགས་པ་ཛམ་བྷ་ལའི་ཁྲིད་དངོས་གྲུབ་ཆར་འབེབས་ཞེས་བྱ་བ། བླ་མའི་གསུང་ལས་བྱོན་པ་བཞིན་རྣལ་འབྱོར་པ་འོད་དཔག་ རྡོ་རྗེས་ཡི་གེར་བཀོད་པ་རེ་ཞིག་རྫོགས་སོ།། །།དགེའོ། །དགེའོ། །དགེའོ།། །།