DNZ-16-MA-018

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 16, Text 18, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །བཅོམ་ལྡན་འདས་ཕྱག་ན་རྡོ་རྗེ་ཐུགས་ཀྱི་ཁྲིད་བདུད་དཔུང་འཇོམས་བྱེད་འོད་ཟེར་རྒྱས་པ་བཞུགས་སོ།

མི་གཡོ་གཞན་གྱིས་བསྐྱེད་པའི་ཡུལ་ལས་འདས། །དུས་གསུམ་རྒྱལ་བའི་མཐུ་སྟོབས་གཅིག་བསྡུས་པ། །འགྲོ་བའི་འཁྲུལ་པ་ཀུན་འཇོམས་རྡོ་རྗེ་འཛིན། ། བླ་མ་གསང་འཛིན་དང་བཅས་ཞབས་ལ་འདུད། །གང་དུ་བསྐྱེད་རྫོགས་ཁྲིད་ཀྱི་རིམ་པ་ནི། །རྒྱལ་བའི་བཀའ་དང་བླ་མའི་མན་ངག་རྣམས། །བརྗེད་པས་འཇིགས་ཕྱིར་ཡི་གེར་བཀོད་པ་ལ། །རྡོ་རྗེ་གཏུམ་པོས་བདག་རྒྱུད་བྱིན་གྱིས་རློབས། །འདིར་དུས་གསུམ་སངས་རྒྱས་ཐམས་ཅད་ཀྱི་གསང་བའི་སྙིང་པོ་བསྡུས་ཤིང་མཐུ་སྟོབས་ཀྱི་ཕ་རོལ་ཏུ་ཕྱིན་པ། བཅོམ་ལྡན་འདས་ཕྱག་ན་རྡོ་རྗེ་ཐུགས་ཀྱི་ཁྲིད་བདུད་དཔུང་འཇོམས་བྱེད་འོད་ཟེར་རྒྱས་པ་འདི་ལ་དོན་གསུམ་སྟེ། སྔོན་འགྲོ་དངོས་གཞི་རྗེས་སོ། །དང་པོ་སྔོན་འགྲོ་ལ་ཡང་གསུམ་སྟེ། བརྒྱུད་པའི་བྱུང་ཚུལ་དང༌། ཐུན་མོང་དང་། ཁྱད་པར་གྱི་སྔོན་འགྲོའོ། །དང་པོ་ནི། རྣལ་འབྱོར་གྱི་དབང་ཕྱུག་ མི་ཏྲ་ཛོ་ཀི་དེ་ཉིད་ཀྱིས། དུར་ཁྲོད་ཆེན་པོ་སོ་ས་གླིང་དུ་ཐུགས་དམ་ལྷ་ལྔ་བསྒྲུབ་པ་ནི་འོད་དཔག་མེད། འཇམ་དབྱངས། ཐུགས་རྗེ་ཆེན་པོ། ཕྱག་ན་རྡོ་རྗེ༑ སྒྲོལ་མ་དང་ལྔའོ། །ལྷ་དེ་དག་བསྒྲུབས་པས། སོ་སོའི་ཞལ་བསྟན་ནས་ཏིང་ངེ་འཛིན་གྱིས་དབང་བསྐུར། བསྐྱེད་རྫོགས་གཉིས་ཀྱི་གདམས་པ་བསྟན་ནས་རྗེས་སུ་གནང་བ་ནི། ཁྲིད་འདི་དག་གཅིག་བརྒྱུད་དུ་སྟོན་པ་དང༌། མི་རབས་བདུན་གྱི་བར་བདག་ཅག་རྣམས་ཀྱིས་བྱིན་གྱིས་བརླབས་པའི་གང་ཟག་ཤ་སྟག་འབྱུང་བ་ཡིན་གསུངས་སོ། །ཛམ་བྷ་ལ་དང་བྲག་ལྷ་མགོན་པོས་ནི་མཐུན་རྐྱེན་བསྒྲུབ་པ་དང་བཀའ་སྲུང་ཡིན་གསུངས་སོ། །རྣལ་འབྱོར་གྱི་དབང་ཕྱུག་དེས་ཕྱག་ན་རྡོ་རྗེ་ལ་དངོས་སུ་གསན་ནས། སླར་པཎྜི་ཏ་ཤྲཱི་པུ་ཏྲ་ལ་གནང༌། དེས་རྟོགས་ལྡན་གཱིརྟི་རཏྣ་ལ་གནང༌། དེས་བདག་ལའོ། །དེ་དག་རྣམས་ནི་བརྒྱུད་པའི་བྱུང་ཚུལ་རྣམས་སོང་ངོ༌། ། གཉིས་པ་ཐུན་མོང་གི་སྔོན་འགྲོ་ལ་ཡང་དོན་རྣམ་པ་བཞི་སྟེ། དལ་འབྱོར་རྙེད་པར་དཀའ་བ། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་བསྒོམ་པ་རྣམས་ནི་གཞན་དང་མཐུན་ནོ། །གསུམ་པ་ཁྱད་པར་གྱི་སྔོན་འགྲོ་ལའང་བཞི་སྟེ། དང་པོ་ཅི་བྱས་བྱང་ཆུབ་ཀྱི་ལམ་དུ་འགྲོ་བ་ལ་སྐྱབས་འགྲོ་སེམས་བསྐྱེད་ཀྱི་ཁྲིད་ནི། རང་གི་མདུན་གྱི་ནམ་མཁར་རིན་པོ་ཆེ་དུ་མ་ལས་གྲུབ་པའི་ཁྲི་མཆོག་ཏུ་ཡངས་ཤིང་རྒྱ་ཆེ་བ། ལྷའི་དར་སྣ་ཚོགས་ཀྱིས་ཁྲི་དག་པ་ཅན་གྱི་སྟེང་དུ། པདྨ་འདབ་མ་འབུམ་ལྡན་གྱི་ལྟེ་བར་ཉ་རྒྱས་པའི་གདན་ལ། རང་གི་རྩ་བའི་བླ་མ་རྡོ་རྗེ་འཆང་གི་ཆ་ལུགས་སུ་བཞུགས་པ་ལ་ཕྱོགས་བཅུའི་རྒྱལ་བ་རྒྱ་མཚོས་བསྐོར་བ༑ མདུན་དུ་ཡི་དམ་ཕྱག་ན་རྡོ་རྗེ་ལ་ཡི་དམ་རྒྱུད་སྡེ་བཞིའི་ཚོགས་ཀྱིས་བསྐོར་བ། གཡས་སུ་སངས་རྒྱས་ཤཱཀྱ་ཐུབ་པ་ལ་སངས་རྒྱས་སྟོང་རྩ་གཉིས་ལ་སོགས་སངས་རྒྱས་རྒྱ་མཚོས་བསྐོར་བ། རྒྱབ་ཏུ་ཡུམ་ཆེན་མོ་ལ་པོ་ཏི་གླེགས་བམ་གྱིས་བསྐོར་བ། གཡོན་དུ་བྱམས་པ་མགོན་པོ་ལ་ཐེག་པ་མཆོག་དམན་གྱི་དགེ་འདུན་རྒྱ་མཚོས་བསྐོར་བ། ཕྱོགས་མཚམས་ཐམས་ཅད་དཔའ་བོ་མཁའ་འགྲོ་སྤྲིན་འཐིབས་པ་བཞིན་བཞུགས་པ༑ འོག་ཏུ་ཆོས་སྐྱོང་རྒྱ་མཚོ་རྣམས་བཞུགས་པ། དེ་དག་གི་སྐྱབས་ཞབས་ན་བདག་དང་མཐའ་ཡས་པའི་སེམས་ཅན་ཐམས་ཅད་ཚུད་པར་བསམ་ལ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ ཕྱག་ན་རྡོ་རྗེའི་གོ་འཕང་ཐོབ་པར་བྱ་སྙམ་དུ་སེམས་བསྐྱེད་ནས། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ། །ཞེས་སོགས་སྐྱབས་འགྲོ་སེམས་བསྐྱེད་སྤྱན་རས་གཟིགས་ཀྱི་ཁྲིད་དང་མཐུན་པར་བརྗོད་དོ། །མཐར་སྐྱབས་ཡུལ་དེ་དག་འོད་དུ་ཞུ་ནས་རང་ལ་ཐིམ་ནས། དེ་དག་གི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་པར་ཆུ་ལ་ཆུ་བཞག་པ་ལྟར་མ་བཅོས་པའི་ངང་ལ་མཉམ་པར་བཞག་གོ །གཉིས་པ་སྡིག་སྒྲིབ་མྱུར་དུ་དག་པར་བྱེད་པ་རྡོ་རྗེ་སེམས་དཔའི་སྒོམ་བཟླས་ཀྱི་ཁྲིད་ནི། རང་གི་སྤྱི་བོར་པཾ་ལས་སྣ་ཚོགས་པདྨ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ཧཱུྃ་གིས་མཚན་ལ། དེ་ལས་འོད་ཟེར་འཕྲོས་འཕགས་པའི་ཚོགས་མཆོད། སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཁར་གཏོད་དེ་འཛིན་པ། གཡོན་པ་དེས་ཡུ་བ་བྱས་པའི་དྲིལ་བུ་དཀུ་ལ་བརྟེན་པ། ཞལ་འཛུམ་པ་སྤྱན་དཀྱུས་རིང་ཞིང་དབུ་སྐྲ་རལ་པའི་ཟུར་ཕུད་ལྔ་ཕྱེད་བཅིངས་ཤིང༌། ལྷག་མའི་ཟར་བུ་རྐེད་པར་སླེབ་པ། རིན་པོ་ཆེ་ལྔས་རྩེ་ཕྲན་དང་སྙན་ཆ། མགུལ་རྒྱན་དང་དོ་ཤལ། དཔུང་རྒྱན་དང་ཕྱག་གདུབ་དང་འོག་པག་ལ་སོགས་དར་གྱི་ཅོད་པན་གྱིས་བརྒྱན་པའི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། སྙིང་གར་ཧཱུྃ་སྔོན་པོ་ལས་འོད་ཟེར་འཕྲོས་པས། རང་ལྟ་བུའི་ཡེ་ཤེས་པ་སྤྱན་དྲངས་ལ། དམ་ཚིག་པ་ལ་དབྱེར་མེད་དུ་ཐིམ་པར་བསམ་ལ། ཛཿ ཧཱུྃ་བཾ་ཧོཿ ཞེས་བརྗོད། བཅོམ་ལྡན་འདས་བདག་དང་མཐའ་ཡས་པའི་སེམས་ཅན་ཐམས་ཅད་ལ་བྱིན་གྱིས་བརླབས་ནས་སྡིག་སྒྲིབ་མཐའ་དག་དག་པར་མཛད་དུ་གསོལ་ལོ། །ཞེས་གསོལ་བ་བཏབ་པས། བདུད་རྩིའི་རྒྱུན་ཐིམ་བུ་རྡོལ་བ་ལྟ་བུ་ཞབས་ཀྱི་མཐེ་བོང་ལས་བབས། རང་གི་སྤྱི་བོའི་ཚངས་བུག་ནས་ཞུགས། ནད་གདོན་སྡིག་སྒྲིབ་ཐམས་ཅད་དུད་ཁུ་དང་སོལ་ཁུའི་རྣམ་པར་དེད་ནས་རྐང་ཞབས་རྩ་སྒོ་ཆུ་སྒོ་ནས་བུད་ཅིང༌། ས་རིམ་པ་དགུའི་འོག་ཏུ་ཐིམ་ཞིང༌། ལུས་ཀྱི་ནང་ཐམས་ཅད་ཡེ་ཤེས་ཀྱི་བདུད་རྩིས་དཀར་མེར་གྱིས་གང་བ་ལ་ཤེས་པ་གཏད་ནས། ཡི་གེ་བརྒྱ་པ་འདོན་པའི་མཐར། རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ་པས། རྡོ་རྗེ་སེམས་དཔའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་ཆུ་ལ་ཆུ་བཞག་གི་ཚུལ་དུ། ལུས་ངག་ཡིད་གསུམ་མ་བཅོས་པར་བཞག་གོ །དེ་ལྟར་ནད་གདོན་སྡིག་སྒྲིབ་དག་པའི་ལྟས་མ་བྱུང་གི་བར་དུ་བསྒོམ་པར་བྱའོ། །གསུམ་པ་མཎྜལ་གྱི་ཁྲིད་ལ་གཉིས་ཏེ། སྒྲུབ་པའི་མཎྜལ་དང་མཆོད་པའི་མཎྜལ་ལོ། །དང་པོ་ནི། རྒྱུ་རིན་པོ་ཆེ་སྣ་ལྔ་ལས་ གྲུབ་པའི་མཎྜལ་གྱི་སྟེང་དུ། མེ་ཏོག་གི་ཚོམ་བུ་ལྔ་བཀོད་ལ། ལྕགས་རིའི་འཁོར་ཡུག་གི་དབུས་སུ། རྒྱུ་རིན་པོ་ཆེ་སྣ་ལྔ་ལས་གྲུབ་པའི་གླིང་བཞི། རི་བོ་མཆོག་རབ་ཀྱི་སྟེང་དུ་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་པ་གྲུ་བཞི་སྒོ་བཞི་རྟ་བབས་བང་རིམ་ཏོག་གིས་མཚན་པའི་དབུས་སུ། པད་ཟླའི་སྟེང་དུ་བླ་མ། མདུན་དུ་ཡི་དམ། གཡས་སུ་སངས་རྒྱས། རྒྱབ་ཏུ་དམ་ཆོས། གཡོན་དུ་དགེ་འདུན། ཕྱོགས་དང་ཕྱོགས་མཚམས་སུ་དཔའ་བོ་མཁའ་འགྲོ་ཆོས་སྐྱོང་གི་ཚོགས་རྣམས་བཞུགས་པར་བསམ་པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ལས་འོད་ཟེར་འཕྲོས། ཡེ་ཤེས་སེམས་དཔའ་སྤྱན་དྲངས་ལ་དབྱེར་མེད་དུ་ཐིམ་པར་བསམས་པ་ནི་བསྒྲུབ་པའི་མཎྜལ་ལོ། །གཉིས་པ་མཆོད་པའི་མཎྜལ་ནི། མཎྜལ་གཉིས་ཡོད་ན་ལོགས་སུ་བཤམས། གཉིས་མེད་ན་སྒྲུབ་པའི་མཎྜལ་མདུན་གྱི་ནམ་མཁར་བཏེགས་ལ། སླར་མཆོད་པའི་མཎྜལ་ནི༑ ༀ་བཛྲ་བྷཱུ་མི་ཨཱཿ ཧཱུྃ། དབང་ཆེན་གསེར་གྱི་ས་གཞི། ༀ་བཛྲ་རེ་ཁེ་ཨཱཿ ཧཱུྃ། ཕྱི་ལྕགས་རི་འཁོར་ཡུག །དབུས་སུ་རིན་པོ་ཆེ་སྣ་ལྔ་ལས་གྲུབ་པའི་རི་བོ་མཆོག་རབ། ཤར་ལུས་འཕགས་པོ་ཟླ་གམ་ཤེལ་ལས་གྲུབ་པ་མ་རྨོས་པའི་ལོ་ཏོག་གིས་བརྒྱན་པ། ལྷོ་འཛམ་བུ་གླིང་སོག་ཁ་བཻཌཱུ་ལས་གྲུབ་པ་ནོར་བུས་བརྒྱན་པ། ནུབ་བ་ལང་སྤྱོད་ཟླུམ་པོ་པདྨ་རཱ་ག་ལས་གྲུབ་པ་འདོད་འཇོའི་བས་བརྒྱན་པ། བྱང་སྒྲ་མི་སྙན་གྲུ་བཞི་གསེར་ལས་ གྲུབ་པ་དཔག་བསམ་ཤིང་གིས་བརྒྱན་པ། གླིང་ཕྲན་བརྒྱད་ཀྱིས་བསྐོར་བ། ཤར་ལྷོ་གཉིས་ཀྱི་ནམ་མཁར་མེ་ཤེལ་ལས་གྲུབ་པའི་ཉི་མ། ནུབ་བྱང་གཉིས་ཀྱི་བར་ན་ཆུ་ཤེལ་ལས་གྲུབ་པའི་ཟླ་བ། བྱང་ཤར་དུ་དུས་མེ། ལྷོ་ནུབ་ཏུ་སྒྲ་གཅན། རི་རབ་ཀྱི་སྟེང་དུ་འཁོར་ལོ་རིན་པོ་ཆེ། ནོར་བུ་རིན་པོ་ཆེ། བློན་པོ་རིན་པོ་ཆེ། བཙུན་མོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། རྒྱལ་སྲིད་སྣ་བདུན། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། གསེར་ལས་གྲུབ་པའི་ཉ། རབ་ཏུ་མཛེས་པའི་པདྨོ། ཆོས་ཀྱི་སྒྲ་དབྱངས་སྒྲོགས་པའི་དུང༌། གཏེར་ཆེན་པོའི་བུམ་པ། དགོས་འདོད་འབྱུང་བའི་དཔལ་བེའུ། ཆོས་ཀྱི་འཁོར་ལོ་བསྐོར་བའི་འཁོར་ལོ་སྟེ། བཀྲ་ཤིས་རྟགས་བརྒྱད། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ་སྟེ་ཕྱིའི་སྒེག་མོ་བཞི། སྒེག་མོ་མ། ཕྲེང་བ་མ། གླུ་མ། གར་མ་སྟེ། ནང་གི་སྒེག་མོ་བཞི། མདོར་ན་ལྷ་དང་མིའི་ལོངས་སྤྱོད་མ་ཚང་བ་མེད་པ་དུ་མས་ཀུན་ཏུ་གང་ཞིང་ལུས་ལོངས་སྤྱོད་དང་བཅས་པ་འདི་དག་བླ་མ་དཀོན་མཆོག་མཆོད་འོས་རྒྱ་མཚོའི་ཚོགས་དང་བཅས་པ་རྣམས་ལ་འབུལ་ལོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ཞེས་ཉི་ཤུ་རྩ་གཅིག་གམ་བདུན་ནམ་བཅུའི་བར་དུ་མཎྜལ་ཕུལ་ལ་བསོད་ནམས་ཀྱི་ཚོགས་བསགས་པའོ། །དེ་དག་གིས་ཚོགས་གཉིས་རྫོགས་པར་ བྱེད་པ་མཎྜལ་གྱི་ཁྲིད་སོང་ངོ༌། །བཞི་པ་བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ལ་བཞི་སྟེ། དང་པོར་བླ་མ་སྤྱི་བོར་བསྒོམ་པ་ནི། རང་གི་སྤྱི་བོའི་གཙུག་ཏུ་རིན་པོ་ཆེ་དུ་མ་ལས་ཀུན་ནས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ་སྣ་ཚོགས་པདྨ་འབུམ་ལྡན་དང༌། ཟླ་བ་ཉ་རྒྱས་པའི་སྟེང་དུ། རང་གི་རྩ་བའི་བླ་མ་རྡོ་རྗེ་འཆང་གི་ཆ་ལུགས། དེའི་སྤྱི་བོར་རྟོགས་ལྡན་གཱིརྟི་རཏྣ། དེའི་སྤྱི་བོར་ཤྲཱི་པུ་ཏྲ། དེའི་སྤྱི་བོར་གྲུབ་ཐོབ་མི་ཏྲ་ཛོ་ཀི །སྐུ་མདོག་དཀར་པོ་གཡས་གསེར་གྱི་ཌཱ་མ་རུ་སྒྲ་དང་བཅས་པ་གཡོན་དངུལ་གྱི་དྲིལ་བུ་སྙན་པའི་སྒྲ་དབྱངས་དང་བཅས་པ། རས་དཀར་པོའི་སྨད་གཡོགས་ཅན། རུས་པའི་རྒྱན་དྲུག་གསོལ་ཞིང༌༑ སྤྱན་ནམ་མཁར་གཟིགས་པ། དེའི་སྤྱི་གཙུག་ཏུ་ཕྱག་ན་རྡོ་རྗེ་ཞལ་གཅིག་ཕྱག་གཉིས་པ་པད་ཟླའི་སྟེང་ན་སྐྱིལ་ཀྲུང་གིས་བཞུགས་པ། གཡས་རྡོ་རྗེ་དང་གཡོན་དྲིལ་བུ་འཛིན་པ། དར་དང་རིན་པོ་ཆེས་བརྒྱན་པའི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོ་ལས་འོད་ཟེར་དཀར་དམར་མཐིང་གསུམ་འཕྲོས། ཕྱོགས་བཅུའི་བླ་མ་ཡི་དམ། སངས་རྒྱས། ཆོས། དགེ་འདུན། མཁའ་འགྲོ་ཆོས་སྐྱོང་རྣམས་འོད་ཟེར་གྱིས་བསྡུས་ནས། བླ་མ་རྣམས་ཀྱི་སྐུ་ལུས་ཀྱི་སྟོད་སྨད་རྣམས་ལ་ཐིམ་པས། བླ་མ་ཀུན་འདུས་ཀྱི་བདག་ཉིད་དུ་གྱུར་པར་བསྒོམ། གཉིས་པ་ནི་བསྟོད་པ་དང༌། ཡན་ལག་བདུན་པ་དང༌། མཎྜལ་ཀྱང་འབུལ་ལོ། ། གསུམ་པ་ནི་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད། བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །ཞེས་བྱ་བ་ལ་སོགས་པའི་མཐར། འདོད་པའི་དོན་ལ་གསོལ་བ་གདབ། བཞི་པ་ནི་བླ་མའི་སྤྱི་བོ། མགྲིན་པ། སྙིང་ཁ་རྣམས་སུ་ༀ་ཨཱཿ ཧཱུྃ། དཀར་དམར་མཐིང་གསུམ་ལས་འོད་ཟེར་བྱུང་ནས་རང་གི་ལུས་ངག་ཡིད་གསུམ་ལ་ཕོག །སྒྲིབ་པ་གསུམ་དག །སྐུ་གསུང་ཐུགས་ཀྱི་དབང་ཐོབ་པར་བསམ། སླར་ཡང་ༀ་ཨཱཿ ཧཱུྃ་གསུམ་ལས་བདུད་རྩིའི་རྒྱུན་དཀར་དམར་མཐིང་གསུམ་བྱུང་བས་ལུས་ཀྱི་ནང་གང་བས། སྐུ་གསུང་ཐུགས་ཀྱི་དབང་ཐོབ་ཅིང་མཐར་ཡིག་འབྲུ་གསུམ་གདན་དང་བཅས་པ་ཆད་ནས་རང་གི་གནས་གསུམ་དུ་ཐིམ་པས། དབང་གསུམ་བརྟན་པར་བྱས་པར་བསྒོམ། དེ་ནས་བརྒྱུད་པའི་བླ་མ་འོད་དུ་ཞུ་ནས་གཅིག་ལ་གཅིག་ཐིམ་ནས་ཐམས་ཅད་རྩ་བའི་བླ་མ་ལ་ཐིམ། དེ་འོད་དུ་ཞུ་ནས་རང་ལ་ཐིམ་པས་རང་གི་ལུས་ངག་ཡིད་གསུམ་དང་བླ་མའི་སྐུ་གསུང་ཐུགས་འབྲལ་མེད་དུ་ཕྲུགས་ཀྱིས་འདྲེས་ནས། ཆུ་ལ་ཆུ་བཞག་པ་ལྟར་ལུས་ངག་ཡིད་གསུམ་མ་བཅོས་པའི་ངང་དུ་རང་བབས་སུ་གློད་ལ་མཉམ་པར་བཞག་པ་ནི། བླ་མའི་རྣལ་འབྱོར་མཐར་ཐུག་གོ །དེ་དག་གིས་ཁྱད་པར་གྱི་སྔོན་འགྲོ་སོང་ནས། གསུམ་པ་བསྐྱེད་རིམ་གྱི་ཁྲིད་ལ་གསུམ་སྟེ། དང་པོ་བསྐྱེད་པའི་རིམ་པ་དངོས་ནི། ཚད་མེད་བཞི་དང་ལྡན་པས་ཨ་མྲ་ཏས་བགེགས་བསྐྲད། སྭ་བྷཱ་ཝས་སྟོང་ པར་སྦྱང༌། སྟོང་པའི་ངང་ལས་འོག་གཞི་སངས་རྒྱས་ཀྱི་ཞིང་ལྕང་ལོ་ཅན་དུ་གྱུར་པའི་དབུས་སུ། པད་ཉིའི་སྟེང་དུ་ཧཱུྃ་ལས་འོད་འཕྲོས། འོག་རྡོ་རྗེའི་ས་གཞི། སྲ་བརྟན་མི་འགྱུར་བ། ཕྱོགས་མཚམས་རྡོ་རྗེའི་ར་བ༑ དྲྭ་བ། སྟེང་རྡོ་རྗེའི་གུར་དང་བླ་བྲེ། ཕྱི་རོལ་གནམ་ལྕགས་ལས་གྲུབ་པའི་འཁོར་ལོ་རྩིབས་སྟོང་དང་ལྡན་པས་བསྐོར་བ། དེའི་ཕྱི་རོལ་ཏུ་མཚོན་ཆ་བསྣོལ་བའི་ཚལ་དང༌། མེ་རི་འབར་བའི་སྲུང་འཁོར་ཡངས་པར་བསྒོམ། དབུས་སུ་བྷྲཱུྃ་ལས་གཞལ་ཡས་ཀྱི་ཁང་པ་གྲུ་བཞི་སྒོ་བཞི་རྒྱན་རྟ་བབས་དང་བཅས་པའི་དབུས་སུ་པཾ་ལས་སྣ་ཚོགས་པདྨ་འདབ་མ་བཅུ་དང་དབུས་སུ་རཾ་ལས་ཉི་མའི་དཀྱིལ་འཁོར་བཅུ་གཅིག་གི་སྟེང་དུ་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པ་དེ་ལས་འོད་འཕྲོས། འཕགས་པའི་ཚོགས་མཆོད། གདུག་པ་ཅན་ཐམས་ཅད་ཚར་བཅད། སངས་རྒྱས་ཀྱི་བསྟན་པ་ལ་བཀོད། ཚུར་འདུས་ཡོངས་སུ་གྱུར་པ་ལས། རང་ཉིད་ཕྱག་ན་རྡོ་རྗེ་ནམ་མཁའི་མདོག་ལྟར་སྔོ་བ་ཞལ་གཅིག་ཕྱག་གཉིས་ཞབས་གཉིས་གྱད་ཀྱི་འདོར་སྟབས་ཀྱིས་བཞུགས་པ། སྟག་ལྤགས་རློན་པའི་ཤམ་ཐབས་ཅན། གསུས་ཁྱིམ་ཆེ་ཞིང་སྐུ་སྟོད་རྒྱས་པ། ཕྱག་གཡས་གསེར་གྱི་རྡོ་རྗེ་རྩེ་དགུ་པ་ནམ་མཁར་གདེངས་པ། གཡོན་པས་སྡིགས་མཛུབ་དང་བཅས་པའི་དྲིལ་བུ་ཐུགས་ཁར་འཛིན་པ། ཞལ་གདངས་ཤིང་མཆེ་བ་བཞི་གཙིགས་པ། ལྗགས་འདྲིལ་བ། ཁྲོ་གཉེར་བསྡུས་ཤིང་སྤྱན་གསུམ་བསྐལ་པའི་ མེ་འོད་འཕྲོ་བ། སྨ་ར་སྨིན་མ་འཁྱུག་ཅིང་རལ་པ་དཀར་སེར་གྱེན་དུ་འཁྱིལ་བ། སྐུ་ཆེ་ལ་ཡན་ལག་དང་ཉིང་ལག་རགས་པ། རྒྱལ་རིགས་དཀར་ཁྲས་དབུ་ལ་བརྒྱན་པ། རྗེ་རིགས་སེར་ཁྲས་སྙན་ཆ་བྱས་པ། བྲམ་ཟེ་དམར་ཁྲས་མགུལ་རྒྱན། དམངས་རིགས་ལྗང་ཁྲས་ཕྱག་གདུབ་དང་ཞབས་གདུབ། གདོལ་པ་ནག་ཁྲས་སྐུ་རགས་དང་སེ་རལ་ཁར་བརྒྱན་པ། འོད་འཕྲོ་བའི་རིན་ཆེན་སྣ་ལྔས་བརྒྱན་པ། དར་གྱི་ཅོད་པན་གྱིས་མཛེས་པ༑ ཡེ་ཤེས་ཀྱི་མེ་འབར་བའི་དབུས་ན་བཞུགས་པ། པདྨའི་འདབ་མའི་ཧཱུྃ་བཅུ་ཡང་ཁྲོ་བོ་བཅུ། རང་ལྟ་བུའི་ཆ་ལུགས་ཀྱིས་ཞལ་ནང་དུ་གཟིགས་ནས་བཞུགས་པ། ལྷ་ཚོགས་དེ་རྣམས་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། སྙིང་ཁར་ཧཱུྃ་མཐིང་ཁ། དེ་ལས་འོད་འཕྲོས། ལྕང་ལོ་ཅན་ནས་རང་འདྲ་བའི་ཡེ་ཤེས་པ་སྤྱན་དྲངས་ནས། ཛཿ ཧཱུྃ་བཾ་ཧོཿ དབྱེར་མེད་དུ་བསྟིམ། སླར་འོད་འཕྲོས་པས་དེ་བཞིན་གཤེགས་པ་རིགས་ལྔ་སྤྱན་དྲངས། དབང་བསྐུར་བར་གསོལ་བས་རིགས་ལྔས་དབང་བསྐུར། ལུས་ཀྱི་ནང་ཡེ་ཤེས་ཀྱི་བདུད་རྩིས་གང༌། ལྷག་མ་ཡར་ལུད་པས་མི་བསྐྱོད་པས་དབུ་བརྒྱན་པར་བསམ། རང་གི་སྙིང་གར་པད་ཉིའི་སྟེང་དུ་རྡོ་རྗེ་སྔོན་པོའི་ལྟེ་བར་ཧཱུྃ་གི་མཐར། ༀ་བཛྲ་པཱ་ཎི་ཧཱུྃ། ཞེས་པ་བཻཌཱུའི་ཕྲེང་བ་ལྟ་བུས་འཁོར་བར་བསྒོམ་པ་ནི། ཞི་བའི་བསྙེན་པའོ། །དྲག་པོའི་བསྙེན་པ་ནི། ༀ་བཛྲ་ཙནྜ་མ་ཧཱ་རོ་ཥ་ཎ་ཧཱུྃ་ཕཊ། ཅེས་པའི་ཡིག་འབྲུ་རྣམས་འོད་ དམར་པོ་ཚ་ཞིང་བསྲེག་པའི་རྣམ་པར་འཁོར་བར་བསྒོམ་པ་ནི་དྲག་པོའི་བསྙེན་པའོ། །སླར་ཡང་སྙིང་ཁའི་ཧཱུྃ་ལས་འོད་ཟེར་འཕྲོས་ཕྱི་སྣོད་ལ་ཕོག་པས་ལྕང་ལོ་ཅན་དུ་བྱས། ནང་བཅུད་ལ་ཕོག་པས་ཕྱག་ན་རྡོ་རྗེར་བྱས་ནས། ཐམས་ཅད་ཀྱི་ཞལ་ནས་སྔགས་ཀྱི་སྒྲ་སྒྲོགས་པར་བསྒོམ་ལ་རྟགས་རྣམས་མ་རྫོགས་ཀྱི་བར་བསྙེན་པའི་ཁྲིད་བྱའོ། །མཐར་ཕྱི་སྣོད་ནང་བཅུད་ལ་ཐིམ། ནང་བཅུད་རང་ལ་ཐིམ། རང་ཐུགས་ཁའི་ཧཱུྃ་ལ་ཐིམ༑ ཧཱུྃ་ནམ་མཁའ་ལ་འཇའ་ཡལ་བ་ལྟར་དམིགས་མེད་ཀྱི་ངང་དུ་བཞག་གོ །དེས་ནི་བསྐྱེད་རིམ་གྱི་ཁྲིད་སོང༌། གཉིས་པ་རིགས་ལྔ་ལ་བརྟེན་ནས། འོད་ཟེར་སྤྲོ་བསྡུའི་ཁྲིད་ལ་གཉིས་ཏེ། དང་པོ་ཕྱག་ན་རྡོ་རྗེ་རིགས་ལྔའི་འོད་ཟེར་སྤྲོ་བསྡུ་ནི། རང་ཉིད་སྔར་ལྟར་ཕྱག་ན་རྡོ་རྗེ་གསལ་བར་བསྒོམ་པའི་སྤྱི་མགྲིན་སྙིང་ཁ་ལྟེ་བ་གསང་གནས་ལྔར། པདྨ་དང་ཉི་མའི་སྟེང་དུ་ཧཱུྃ་ཡིག་དཀར་དམར་མཐིང་སེར་ལྗང་ཁུ་ལྔ་ལས་བྱུང་བའི་བཅོམ་ལྡན་འདས། སྤྱི་བོར་རྣམ་སྣང་ཕྱག་ན་རྡོ་རྗེ་དཀར་པོ། མགྲིན་པར་པདྨའི་ཕྱག་ན་རྡོ་རྗེ་དམར་པོ། སྙིང་གར་རྡོ་རྗེའི་ཕྱག་ན་རྡོ་རྗེ་སྔོན་པོ། ལྟེ་བར་རིན་འབྱུང་ཕྱག་རྡོར་སེར་པོ། གསང་གནས་སུ་ལས་ཀྱི་ཕྱག་རྡོར་ལྗང་ཁུ། རྣམ་སྣང་ལྟ་བུའི་ཆ་ལུགས་ཀྱིས་མེ་དཔུང་གི་དབུས་ན་བཞུགས་པ། འོད་ཟེར་དཀར་པོ། དམར་པོ། སྔོན་པོ། སེར་པོ། ལྗང་ཁུ་ལྔ་འཕྲོས་ནས། ཕྱོགས་བཅུའི་རྒྱལ་བ་སྲས་བཅས་ལ་མཆོད་པའི་སྤྲིན་བསམ་གྱིས་མི་ཁྱབ་པས་ མཆོད་པར་བསམ་པ་ནི་རླུང་ཕར་འགྲོ་བའི་དམིགས་པའོ། །རླུང་ཚུར་འཛིན་པའི་ཚེ། ཕྱོགས་བཅུའི་རྒྱལ་བ་སྲས་བཅས་ཀྱི་སྐུ་གསུང་ཐུགས་ཡོན་ཏན་ཕྲིན་ལས། མཐུ་སྟོབས་ནུས་པ་ཡེ་ཤེས་དང་མཛད་པ་བྱིན་རླབས་གཟི་བརྗིད་ཐམས་ཅད་ཕྱག་ན་རྡོ་རྗེ་རིགས་ལྔའི་སྐུའི་རྣམ་པར་བསྡུས་ནས་སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་ལྔར་ཐིམ་པར་བསམ་ལ། རླུང་ཐེབས་རེ་རེ་བཟུང༌། ཡང་རླུང་ཕར་འགྲོ་བ་དང་སྦྱར་ལ་འོད་ཟེར་ལྔ་འཕྲོས། རིགས་དྲུག་གི་སེམས་ཅན་ལྷ་དང་ལྷ་མ་ཡིན་དང༌། མི་དང་དུད་འགྲོ་ཡི་དྭགས་དང་དམྱལ་བ་རྣམས་ལ་ཕོག་པས་དེ་དག་གི་སྒྲིབ་པ་དུག་ལྔ་སྦྱངས། ཕྱག་ན་རྡོ་རྗེ་རིགས་ལྔའི་གོ་འཕང་ལ་བཀོད་པར་བསམ་མོ༑ ༑རླུང་འཛིན་པའི་ཚེ། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མཐུ་སྟོབས་ནུས་པ། ཡེ་ཤེས་ཡོན་ཏན་མཛད་པ་ཕྲིན་ལས་གཟི་བརྗིད་བྱིན་རླབས་ཐམས་ཅད། ཕྱག་ན་རྡོ་རྗེའི་རིགས་ལྔའི་རྣམ་པ། འོད་ཟེར་དཀར་དམར་མཐིང་སེར་ལྗང་ཁུའི་དབྱིབས་སུ་བསྡུས་ནས། སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་ཀྱི་ཕྱག་རྡོར་ལྔ་ལ་ཐིམ་པས། རང་ཉིད་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ནུས་སྟོབས་ཡེ་ཤེས་མཛད་པ་གཟི་བརྗིད་བྱིན་རླབས་མཐའ་ཡས་པ་དང་ལྡན་པར་བསམ་ལ། རླུང་བུམ་པ་ཅན་གནས་ལྔར་བཟུང༌། མཐར་སྣོད་འོད་དུ་ཞུ་ནས་སེམས་ཅན་ལ་ཐིམ། སེམས་ཅན་ཐམས་ཅད་སངས་རྒྱས་ལ་ཐིམ། སངས་རྒྱས་ སྲས་བཅས་རང་ལ་ཐིམ། རང་སྙིང་ཁའི་ཧཱུྃ་ལ་ཐིམ། ཧཱུྃ་ནམ་མཁའ་ལ་འཇའ་ཡལ་བ་ལྟར་དམིགས་མེད་ཀྱི་ངང་ལ་མཉམ་པར་བཞག་གོ །དེ་དག་ནི་རྫོགས་རིམ་མོ། །གཉིས་པ་ཁྱུང་རིགས་ལྔའི་འོད་ཟེར་སྤྲོ་བསྡུ་ལ་གསུམ་སྟེ། དང་པོར་སྤྱི་བོར་དབུ་རྒྱན་གྱི་ཚུལ་དུ་བསྒོམ་པ་ནི། སྤྱི་བོར་སངས་རྒྱས་རིགས་ཀྱི་ཁྱུང་དཀར་པོ། དཔྲལ་བར་རྡོ་རྗེ་རིགས་ཀྱི་ཁྱུང་སྔོན་པོ། རྣ་ལྟག་གཡས་པར་རིན་ཆེན་རིགས་ཀྱི་ཁྱུང་སེར་པོ། ལྟག་པར་པདྨ་རིགས་ཀྱི་ཁྱུང་དམར་པོ། རྣ་ལྟག་གཡོན་པར་ལས་ཀྱི་རིགས་ཀྱི་ཁྱུང་ལྗང་ཁུ་རྣམས། གནམ་ལྕགས་ལས་གྲུབ་པའི་མཆུ་སྡེར་ཅན། རྡོ་རྗེའི་གཤོག་པ་བརྐྱངས་པ། རྭ་རྣོན་པོ་གཉིས་ཀྱི་བར་ན་ནོར་བུས་བརྒྱན་པ༑ ཕྱག་གཉིས་ཀྱིས་དུག་སྦྲུལ་བཟུང་ནས་ཞལ་དུ་གསོལ་བ། མེ་འབར་བའི་དབུས་ན་བཞུགས་པའི་ཁྱུང་རྣམས་ལས་འོད་ཟེར་ཁ་དོག་ལྔ་འཕྲོས་ནས་རྒྱལ་བ་སྲས་བཅས་མཆོད། སེམས་ཅན་རིགས་དྲུག་ལ་ཕོག་པས་དུག་ལྔ་སྦྱངས་ནས་ཁྱུང་རིགས་ལྔའི་གོ་འཕང་ལ་བཀོད་ནས། སླར་དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མཐུ་སྟོབས་ནུས་པ། ཡེ་ཤེས་གཟི་བརྗིད་བྱིན་རླབས་ཐམས་ཅད་འོད་ཟེར་དཀར་དམར་མཐིང་སེར་ལྗང་ཁུའི་དབྱིབས་སམ། ཁྱུང་རིགས་ལྔའི་རྣམ་པར་བསྡུས་ནས་དབུ་རྒྱན་གྱི་ཁྱུང་རིགས་ལྔ་ལ་ཐིམ་པས་རང་ཉིད་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མཐུ་སྟོབས་ནུས་པ་ཡེ་ཤེས་གཟི་བརྗིད་བྱིན་རླབས་ མཐའ་དག་ཐོབ་པར་བསམ་ལ། རླུང་བུམ་པ་ཅན་བཟུང་ངོ༌། །གཉིས་པ་གནས་ལྔར་བཀོད་པ་ནི། རང་ཉིད་རྡོ་རྗེ་གཏུམ་པོར་བསྒོམ་པའི་སྤྱི་བོར་སངས་རྒྱས་རིགས་ཀྱི་ཁྱུང་དཀར་པོ། མགྲིན་པར་པདྨ་རིགས་ཀྱི་ཁྱུང་དམར་པོ། སྙིང་གར་རྡོ་རྗེ་རིགས་ཀྱི་ཁྱུང་སྔོན་པོ། ལྟེ་བར་རིན་ཆེན་རིགས་ཀྱི་ཁྱུང་སེར་པོ། གསང་གནས་སུ་ལས་ཀྱི་རིགས་ཀྱི་ཁྱུང་ལྗང་ཁུ་རྣམས་ནི་གནམ་ལྕགས་ལས་གྲུབ་པའི་མཆུ་སྡེར་ཅན། རྡོ་རྗེའི་གཤོག་པ་བརྐྱངས་པ། རྭ་རྣོན་པོ་གཉིས་ཀྱི་བར་ན་ནོར་བུས་བརྒྱན་པ། ཕྱག་གཉིས་ཀྱིས་དུག་སྦྲུལ་བཟུང་ནས་ཞལ་དུ་གསོལ་བ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་ཁྱུང་རིགས་ལྔའི་འོད་ཟེར་དཀར་དམར་མཐིང་སེར་ལྗང་ཁུ་ལྔ་རིམ་པར་འཕྲོས་ནས། རྒྱལ་བ་སྲས་བཅས་མཆོད། སེམས་ཅན་གྱི་དུག་ལྔ་སྦྱངས་ནས་རིགས་ལྔའི་གོ་འཕང་ལ་བཀོད། སླར་དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མཐུ་སྟོབས་ནུས་པ་ཡེ་ཤེས་དང་མཛད་པ་གཟི་བརྗིད་བྱིན་རླབས་ཐམས་ཅད་ཁྱུང་རིགས་ལྔའི་རྣམ་པ་ཅན། འོད་ཟེར་ལྔའི་བྱིན་རླབས་སུ་བསྡུས་ནས་གནས་ལྔའི་ཁྱུང་ལ་ཐིམ་པས། རང་ཉིད་སྐུ་གསུང་ཐུགས་ཡོན་ཏན་ཕྲིན་ལས་མཐུ་སྟོབས་ནུས་པ་ཡེ་ཤེས་མཛད་པ་གཟི་བརྗིད་དང་བྱིན་རླབས་དཔག་མེད་དང་ལྡན་པར་བསམ་ལ། རླུང་བུམ་པ་ཅན་བཟུང་ངོ༌། །གསུམ་པ་ཡན་ལག་ལྔར་བཀོད་ནས་ཀླུ་འདུལ་བ་ནི། སྤྱི་བོར་སངས་རྒྱས་རིགས་ཀྱི་ཁྱུང་དཀར་པོ། ཕྱག་གཡས་པར་རྡོ་རྗེ་རིགས་ཀྱི་ཁྱུང་སྔོན་པོ། ཕྱག་གཡོན་པར་རིན་ཆེན་རིགས་ཀྱི་ཁྱུང་སེར་པོ། བརླ་གཡས་པར་པདྨའི་ཁྱུང་དམར་པོ། གཡོན་པར་ལས་ཀྱི་ཁྱུང་ལྗང་གུ་རྣམས། སྤྱན་གསུམ་དང་ལྡན་པ༑ གནམ་ལྕགས་ཀྱི་མཆུ་སྡེར་ཅན། རྡོ་རྗེའི་གཤོག་པ་བརྐྱངས་པ། རྭ་རྣོན་པོ་གཉིས་ཀྱི་བར་ན་ནོར་བུ་རིན་པོ་ཆེ་འབར་བས་བརྒྱན་པ། ཕྱག་གཉིས་དུག་སྦྲུལ་བཟུང་ནས་ཞལ་དུ་གསོལ་བ། ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པའི་ཁྱུང་རིགས་ལྔ་ལ་འོད་ཟེར་དཀར་དམར་མཐིང་སེར་ལྗང་གུ་ལས་འཕྲོས་པའི་ཕྱི་ནང་གསང་གསུམ་གྱིས་མཆོད། རིགས་དྲུག་ལ་ཕོག་པས་ཁྱུང་རིགས་ལྔའི་གོ་འཕང་ལ་བཀོད། ཁྱད་པར་དུ་ཀླུ་རྒྱལ་རིགས་རྗེ་རིགས་དམངས་རིགས་བྲམ་ཟེ་གདོལ་པའི་རིགས་ལྔ་ལ་ཕོག་པས། དེ་དག་གི་དུག་ལྔ་སྦྱངས་ནས། ཁྱུང་རིགས་ལྔའི་གོ་འཕང་ལ་བཀོད། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་མཐུ་སྟོབས་ནུས་པ་ཡེ་ཤེས་མཛད་པ་ཐམས་ཅད་འོད་ཟེར་དཀར་དམར་མཐིང་སེར་ལྗང་ཁུ་ལྔའི་རྣམ་པར་བསྡུས་ནས་ཁྱུང་རིགས་ལྔ་ལ་སོ་སོར་ཐིམ་པས། རང་ཉིད་སྐུ་གསུང་ཐུགས་ཡོན་ཏན་ཕྲིན་ལས་མཐུ་སྟོབས་ནུས་པ་ཡེ་ཤེས་མཛད་པ་གཟི་བརྗིད་བྱིན་རླབས་ཀྱི་སྟོབས་རྒྱས་པར་བསམ་ལ། རླུང་བུམ་པ་ཅན་བཟུང་ངོ༌། །དེ་ལྟར་ཕྱག་ན་རྡོ་རྗེ་རིགས་ལྔ་དང་ཁྱུང་རིགས་ལྔ་རེ་རེ་དང༌། རླུང་བུམ་པ་ཅན་རེ་རེ་བཟུང་ངོ༌། །མཐར་ནི་སྣང་བ་ཐམས་ཅད་སེམས་ཅན་ལ་ཐིམ། དེ་སངས་རྒྱས་ལ། དེ་རང་ལ་ཐིམ་པར་བསམ་ལ། རང་གི་སྙིང་གའི་ཧཱུྃ་ལ་བསྡུ། དེ་འཇའ་ཡལ་བ་ལྟར་བློ་འདས་ཡིད་ལ་མི་བྱེད་པའི་ངང་དུ་བཞག་གོ །གསུམ་པ་བཟླས་པ་གསུང་གི་ཁྲིད་ལ་གཉིས་ཏེ། ཕྱག་ན་རྡོ་རྗེའི་བཟླས་པ་དང༌། ཁྱུང་གི་བཟླས་པའོ། །དང་པོར་ཕྱག་རྡོར་གྱི་བཟླས་པ་ལ་གསུམ་སྟེ། དང་པོ་ཕྱིའི་བཟླས་པ་ནི། རང་ཉིད་ཕྱག་ན་རྡོ་རྗེ་རིགས་ལྔ་གསལ་བའི་སྙིང་ཁར། པད་ཟླའི་སྟེང་དུ་ཧཱུྃ་སྔོན་པོའི་མཐའ་མར། ༀ་བཛྲ་པཱ་ཎི་ཧཱུྃ། ཞེས་བཻཌཱུ་སྔོན་པོའི་ཕྲེང་བ་ལྟར་དམིགས་ནས། ༀ་བཛྲ་པཱ་ཎི་ཧཱུྃ། ཞེས་བགྲང༌། གཉིས་པ་ནང་གི་བཟླས་པའི་ཁྲིད་ནི། རང་ཉིད་ཕྱག་ན་རྡོ་རྗེར་གསལ་བའི་སྙིང་ཁར་པད་ཉིའི་སྟེང་དུ་རྡོ་རྗེ་སྔོན་པོ་མེ་འབར་བའི་ལྟེ་བར་ཧཱུྃ་ཡིག་གི་མཐའ་མར། འོད་དམར་པོ་ཚ་ཞིང་བསྲེག་པའི་རང་བཞིན་གྱི་ཡི་གེ་བཅུ་པའི་སྔགས་འཁོར་འཁོར་བ་ལས། ཡེ་ཤེས་ཀྱི་མེ་འབར་བས་ལུས་ཀྱི་ནང་གང༌། ནད་གདོན་སྡིག་སྒྲིབ་ཐམས་ཅད་བྱ་སྒྲོ་མེ་ལ་བསྲེག་པ་ལྟར་བསམ་ལ། ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཅེས་བགྲང་ངོ༌། །གསུམ་པ་གསང་བ་ཡིད་ཀྱི་བཟླས་པ་ནི། རང་ཉིད་ཕྱག་ན་རྡོ་རྗེར་རབ་ཏུ་གསལ་བའི་སྙིང་གར་པད་ཉིའི་སྟེང་དུ་ཧཱུྃ་ཡིག་ཞི་དྲག་ལ་སྔགས་ཀྱིས་བསྐོར་བ་ལས་འོད་ཟེར་སྣ་ལྔ་འཕྲོས། ལུས་ཀྱི་ནང་གང༌། བ་སྤུའི་རྩེ་ནས་འཕྲོས། སྣོད་ཀྱི་འཇིག་རྟེན་ལ་ཕོག །ལྕང་ལོ་ཅན་དུ་བྱས། སེམས་ཅན་ལ་ཕོག །ཕྱག་ན་རྡོ་རྗེ་རིགས་ལྔའི་སྐུར་ གྱུར། ཞལ་ནས་སྔགས་སྒྲ་དི་རི་རི་འདོན་པར་བསམ། འོད་ཟེར་དེ་ཚུར་འདུས་ལུས་ལ་ཐིམ་པས། ལུས་ཀྱི་སྐུ་དང་བ་སྤུའི་ཚོགས་ཐམས་ཅད་ཕྱག་ན་རྡོ་རྗེའི་སྐུ་རིགས་ལྔར་གྱུར་ནས། ཞལ་ཕྱིར་གཟིགས་ནས་མེ་དཔུང་གི་དབུས་ན་སྔགས་སྒྲ་སྒྲོགས་པར་བསྒོམ། སླར་ཡང་འོད་ཟེར་དེ་ལུས་ཀྱི་ནང་དུ་ཞུགས་པས། ལུས་ཀྱི་ནང་ཐམས་ཅད་ཕྱག་ན་རྡོ་རྗེ་རིགས་ལྔའི་སྐུས་ཐམ་འགགས་སུ་གང་ནས། ཞལ་ནང་དུ་གཟིགས་ནས་སྔགས་སྒྲ་སྒྲོགས་པར་བསྒོམ་ལ་བཟླས་པ་བྱའོ། །གཉིས་པ་ཁྱུང་གི་བཟླས་པའི་ཁྲིད་ལ་གསུམ་སྟེ། དང་པོ་ཕྱིའི་བཟླས་པ་ནི། ཁྱུང་རིགས་ལྔའི་ཐུགས་ཀར་པད་ཉིའི་སྟེང་དུ། ཁྲ་དཀར་དམར་མཐིང་སེར་ལྗང་ཁུ་ལྔ་ལ། ༀ་ག་རུ་ཌ་ཙ་ལེ་ཙ་ལེ་ཧཱུྃ། ཞེས་ལྔ་འཁོར་བར་བསམ་ལ་བསྙེན་པ་བསྐྱལ་བ་ཕྱིའི་བཟླས་པའི་ཁྲིད་དོ། །གཉིས་པ་ནང་གི་བཟླས་པའི་ཁྲིད་ནི། ཁྱུང་རིགས་ལྔའི་སྙིང་ཁར་པད་ཉིའི་སྟེང་དུ་ཁྲ་དཀར་དམར་མཐིང་སེར་ལྗང་ཁུ་ལྔ་ལས། ༀ་ཧཱུྃ་ཏྲཱཾ་ཧྲཱིཿ ཨཱཿ ག་རུ་ཌ་ཙ་ལེ་ཙ་ལེ་ཧཱུྃ་ཕཊ། ཅེས་པའི་སྔགས་འདི་ཚ་ཞིང་མེ་འབར་བའི་རྣམ་པར་འཁོར་བས། ལུས་ཀྱི་ནང་གི་ནད་གདོན་སྡིག་སྒྲིབ་བྱ་སྒྲོ་མེ་ལ་བསྲེག་པ་ལྟར་བསྲེག་ཅིང༌། ལུས་ཀྱི་ནང་ཡེ་ཤེས་ཀྱི་མེས་གང་བར་བསམ་ལ་བསྙེན་པ་བསྐྱལ་ལོ། །གསུམ་པ་གསང་བ་ཡིད་ཀྱི་བཟླས་པ་ནི། ཁྱུང་རིགས་ལྔའི་སྙིང་ཁར་པད་ཉིའི་སྟེང་དུ། ཁྲ་དཀར་དམར་མཐིང་སེར་ལྗང་ཁུ་ལྔས་བསྐོར་བ་ལས་ འོད་ཟེར་ལྔ་འཕྲོས། ལུས་ཀྱི་ནང་གང༌། བ་སྤུའི་རྩ་བ་ནས་ཕྱིར་འཕྲོས། སྣོད་ཀྱི་འཇིག་རྟེན་ལྕང་ལོ་ཅན་དུ་བྱས། སངས་རྒྱས་བྱང་སེམས་རྣམས་ལ་ཕོག །ཐམས་ཅད་ཁྱུང་རིགས་ལྔར་གྱུར། རིགས་དྲུག་གི་སེམས་ཅན་ལ་ཕོག །ཐམས་ཅད་ཁྱུང་རིགས་ལྔར་གྱུར་ནས། སྔགས་སྒྲ་དྲག་ཏུ་དི་རི་རི་འདོན་པར་བསམ། འོད་ཟེར་ཚུར་འདུས་ལུས་ཀྱི་ཕྱི་རོལ་གྱི་སྐྲ་དང་བ་སྤུ་ཐམས་ཅད་ཁྱུང་རིགས་ལྔ། སྐུ་ཆུང་ལ་ཡན་ལག་དོད་པ་དཔག་ཏུ་མེད་པར་གྱུར་ཅིང༌། ཐམ་འགགས་སུ་ཞལ་ཕྱིར་གཟིགས་ནས་སྔགས་འདྲེན་པར་བསམ། སླར་འོད་ཟེར་དེ་ལུས་ཀྱི་ནང་དུ་འདུས། ལུས་ཀྱི་ནང་ཐམས་ཅད་ཡེ་ཤེས་ཀྱི་ཁྱུང་རིགས་ལྔས་ཐམ་འགགས་སུ་གྱུར་ནས་ཞལ་ནང་དུ་གཟིགས་ནས་མེ་དཔུང་གི་དབུས་ན་སྔགས་སྒྲ་སྒྲོགས་ཤིང་བཞུགས་པར་བསྒོམ་མོ། །དེ་ལྟར་མ་ཡེངས་པར་ཡིད་ཀྱིས་བཟླས་པ་བྱའོ། །མཐར་སྣོད་བཅུད་རང་ལ་ཐིམ། རང་སྙིང་ཁའི་ས་བོན་ལ་ཐིམ། ས་བོན་དམིགས་མེད་ཀྱི་ངང་ལ་མཉམ་པར་བཞག་གོ །དེ་ནི་བཟླས་པ་གསུང་གི་ཁྲིད་དོ། །བཞི་པ་སེམས་ཉིད་ཐུགས་ཀྱི་ཁྲིད་རྫོགས་པའི་རིམ་པ་ལ་དོན་བཞི་སྟེ། དང་པོ་ཞི་གནས་བསྐྱེད་པ་ལ་དོན་གསུམ་སྟེ། ཐོག་མར་མཚན་མ་ལ་སེམས་བཟུང་བའོ། །འདི་ལ་བཞི་སྟེ་དང་པོ་མ་དག་པ་ཀ་བ་བུམ་པ་ལ་སེམས་བཟུང་བ་ནི། ཀ་བ་བུམ་པ་ཤིང་བུ་རྡེའུ་གང་ཡང་རུང་བ་ཞིག་ལ་ལུས་གནད་ལྟ་སྟངས་དང་བཅས་པར་སེམས་བཟུང༌། དེ་ལ་ཡེངས་སུ་ཡང་མི་འཇུག །རྟོག་པ་ཡང་མི་འགྱེད་པར། དེ་ཐོག་ཏུ་ལྷོད་དེ་གློད་ལ་རྟོག་མེད་དུ་མ་བཅོས་པར་བཞག་གོ །དེ་ལ་བྱིང་རྒོད་བྱུང་ན་སྟེང་འོག་དང་གཡས་གཡོན་དུ་སེམས་འཛིན་པ་ཡང་ཤེས་པར་བྱའོ། །གཉིས་པ་དག་པ་རྒྱལ་བའི་སྐུ་ལ་སེམས་འཛིན་པ་ནི། མདུན་དུ་ཕྱག་ན་རྡོ་རྗེའི་སྐུ་གཟུགས་བཞག་པའམ་མེད་ཀྱང་བསྒོམ་ལ། དེ་ལ་རྟོག་པ་ཡང་མི་སྤྲོ། ཡེངས་སུ་ཡང་མི་འཇུག །དེ་ཐོག་ཏུ་མ་ཡེངས་ཙམ་དུ་གློད་ལ་སེམས་འཇོག་པ་ནི་དག་པ་རྒྱལ་བའི་སྐུ་ལ་སེམས་བཟུང་བའོ། །གསུམ་པ་ནང་མ་དག་པའི་ཐིག་ལེ་ལ་སེམས་བཟུང་བ་ནི། རང་གི་སྙིང་གར་ཐིག་ལེ་སྔོ་ལ་འཚེར་བ་སྲན་འབྲུ་ཙམ་ཞིག་བསྒོམ་ལ། དེ་ལ་ཡེངས་སུ་ཡང་མི་འཇུག །རྟོག་པ་ཡང་མི་འགྱེད་པར་སེམས་བཟུང་ངོ༌། །བཞི་པ་ནི། རང་གི་སྙིང་ཁར་པད་ཉིའི་སྟེང་དུ་ཕྱག་ན་རྡོ་རྗེ་ཚོན་གང་བ་མེ་དཔུང་དང་བཅས་པ་ལ་སེམས་ཡེངས་སུ་ཡང་མི་འཇུག་རྟོག་པ་ཡང་མི་འགྱེད་པར་མ་ཡེངས་ཙམ་དུ་སེམས་བཟུང༌། དག་མ་དག་གཉིས་ཀའི་སྐབས་སུ་བྱིངས་ན་དཔྲལ་བར་སེམས་བཟུང་ངོ༌། །གཉིས་པ་རྟོག་པ་ལ་སེམས་བཟུང་བ་ནི། རྣམ་པར་རྟོག་པ་ཐོལ་གྱིས་སྐྱེས་པ་ངོས་བཟུང་ནས། རྟོག་མེད་ཀྱི་མིག་གིས་ཅེར་ཅེར་བལྟས་པས་འཛིན་མེད་དུ་ཞིག་ནས། རང་རིག་གསལ་སྟོང་ཡུལ་མེད་དུ་གསལ་གསལ་འཆར་བར་འགྱུར་ཏེ། རྣམ་རྟོག་གང་སྐྱེས་པའི་ངོ་བོ་ལ་གཏད་ནས། རིག་པ་རང་ངོ་རང་གིས་ཤེས་པར་བྱས་ལ་ བསྐྱང་ངོ༌། །དེ་ནི་རྟོག་པ་ལ་སེམས་བཟུང་བའོ། །གསུམ་པ་མི་རྟོག་པ་ལ་སེམས་བཟུང་བ་ནི། ལུས་རྣམ་སྣང་གི་ཆོས་བདུན་དང་ལྡན་པ་ལ་མིག་ནམ་མཁར་གཏད་ནས། འདས་མ་འོངས་ད་ལྟ་དུས་གསུམ་གྱི་རྟོག་པའི་རྒྱུ་འགྲུལ་ཐམས་ཅད་རྦད་ཆོད་ལ་བཏང་ལ། ཡིད་ལ་ཅི་ཡང་མི་བསམ་པར་སྟོང་གསལ་མཐའ་དབུས་མེད་པ། སེམས་ཉིད་མ་བཅོས་པ་རྟོག་མེད་དུ་གསལ་ལེ་ཧྲིག་གེར་མཉམ་པར་བཞག་གོ །དེ་ལས་རྟོག་པ་སྐྱེས་ན། ཐོལ་སྐྱེས་རྦད་ཆོད་དུ་བཏང༌། སླར་ཡང་རྟོག་མེད་ཡིད་ལ་བྱེད་པ་མཐའ་དག་དང་བྲལ་བའི་ངང་ལ་མཉམ་པར་བཞག་གོ །དེས་བདེ་གསལ་མི་རྟོག་པའི་ཉམས་སྐྱེ་བར་འགྱུར་རོ། །དེ་དག་གིས་ཞི་གནས་སོང་ངོ༌། །གཉིས་པ་ལྷག་མཐོང་ལ་དོན་གསུམ་སྟེ། དང་པོ་རྒྱུའི་ལྷག་མཐོང་གི་སེམས་ལ་རྣམ་པར་བརྟག་ཅིང་དཔྱད་པ་ནི། བདག་གི་སེམས་འདི་གང་ནས་བྱུང་ཞིང་གང་དུ་གནས། གང་དུ་འགྲོ་བར་འགྱུར། ཞེས་སྐྱེ་འགག་གནས་གསུམ་གྱི་ངོ་བོ་ལ་བརྟག་ཅིང༌། འབྱུང་བ་ལྔ་དང་རང་ལུས་ལ་འབྱུང་གནས་འགྲོ་གསུམ་འདུག་གམ་སྙམ་དུ་བརྟག་ཅིང་དཔྱད་པར་བྱའོ། །གཞན་ཡང་སེམས་ལ་ཁ་དོག་དཀར་དམར་སྔོ་སེར་ལྗང་ཁྲ་ལ་སོགས་པའི་ཁ་དོག་ཡོད་པ་ཞིག་གམ་འོན་ཏེ་མེད་པ་ཞིག་སྙམ་དུ་བརྟག་ཅིང་དཔྱད། གང་དུ་བདག་གི་སེམས་ནི། ས་ཆུ་མེ་རླུང་ནམ་མཁའི་དབྱིབས་སམ། ཟླུམ་པོ། གྲུ་བཞི། ཟླ་གམ། གྲུ་གསུམ། ནར་མོ་ལ་སོགས་པའི་དབྱིབས་སུ་གྲུབ་པ་ ཞིག་ཡིན་ནམ་སྙམ་དུ་བརྟག་ཅིང་དཔྱད། སེམས་ལས་རྣམ་པར་རྟོག་པ་ལོགས་ཤིག་ཡིན་ནམ། འོན་ཏེ་རྣམ་པར་རྟོག་པ་སེམས་ཡིན་ཞེས་བརྟག་ཅིང་དཔྱད། གཞན་ཡང་ཕྱི་རོལ་གྱི་སྣང་བ་ལས་སེམས་བྱུང་ངམ། སེམས་ལས་ཕྱི་རོལ་གྱི་སྣང་བ་བྱུང་དཔྱད་དོ། །སླར་ཡང་བརྟག་མཁན་གྱི་སེམས་ལ་ཡང་སེམས་ཀྱིས་བརྟག་ཅིང་དཔྱད། སེམས་དེ་ཉིད་ཡོད་པ་ཞིག་གམ། འོན་ཏེ་མེད་པ་ཞིག །གསལ་བ་ཞིག་གམ་འོན་ཏེ་མི་གསལ་བ་ཞིག །བདེ་བ་ཞིག་གམ་འོན་ཏེ་སྡུག་བསྔལ་བ་ཞིག །རྟག་པ་ཞིག་གམ་འོན་ཏེ་མི་རྟག་པ་ཞིག །སྣང་བ་ཞིག་གམ་འོན་ཏེ་མི་སྣང་བ་ཞིག །རིག་པ་ཞིག་གམ་འོན་ཏེ་མ་རིག་པ་ཞིག །བདག་ཡོད་པ་ཞིག་གམ་འོན་ཏེ་བདག་མེད་པ་ཞིག་ཅེས་བརྟག་ཅིང་དཔྱད་དུ་གཞུག་གོ །དེའི་ཚེ་སེམས་ཀྱི་ངོ་བོ་སྐྱེ་འགག་གནས་གསུམ་དང་བྲལ་བ་ངོ་བོ་རང་བཞིན་གྱིས་སྟོང་པ་ནམ་མཁའ་ལྟ་བུ་ལ་དབྱིངས་རང་བཞིན་གྱིས་འོད་གསལ་ཞིང༌༑ རིག་པ་འགག་མེད་ཅིར་ཡང་འཆར་ཞིང་སྣང་བ་འདི་ཐམས་ཅད། སྐྱེ་བ་མེད་པར་རོ་མཉམ་གནས་པ་མེད་པ་དང་འགག་པ་མེད་པར་རོ་མཉམ་ཞེས། བརྟག་ཅིང་དཔྱད་པས་གསལ་རིག་སྣང་སྟོང་བཞི་དབྱེར་མེད་པ་བློ་འདས་ནམ་མཁའ་ལྟ་བུའི་དོན་མཐོང་ན། དེ་ཁོ་ན་ཉིད་དོ་ཞེས། གཞི་ལམ་འབྲས་བུའི་ཡོན་ཏན་ཐམས་ཅད་སེམས་ཉིད་རྟོགས་པའི་སྟེང་དུ་ཚང་བར་ངོ་སྤྲད་པར་བྱའོ། །གཉིས་པ་ངོ་བོའི་ལྷག་མཐོང་ཐ་མལ་གྱི་ཤེས་པ་ སོ་མ་ཅིག་ཅར་དུ་ཉམས་སུ་བླང་བར་བྱ་བ་ནི། སེམས་ཉིད་སྐྱེ་འགག་གནས་གསུམ་གྱི་མཐའ་དང་བྲལ་བ། བདེ་གསལ་མི་རྟོག་པ་ནམ་མཁའ་ལྟ་བུ། བདག་དང་བདག་གིར་འཛིན་པའི་གཟུང་འཛིན་ལས་གྲོལ་ཞིང༌། ངོ་བོ་སྟོང་པ། རང་བཞིན་གསལ་བ། རྣམ་པ་འགག་མེད་ཀྱི་རིག་པ་ཡུལ་མེད་དུ་མར་འཆར་ཞིང་སྣང་བ། མཐོང་བྱ་མཐོང་བྱེད་ཀྱི་འཛིན་པའི་ཡུལ་ལས་འདས་པ། བསྒོམ་བྱ་སྒོམ་བྱེད་ཀྱི་དམིགས་པའི་མཚན་འཛིན་ཞིག་པའོ༑ ༑གང་ཡང་ཡིད་ལ་མི་བྱེད་པས་ཡིད་བྱེད་དང་བྲལ་བ། དེ་ཉིད་ལ་བཟོ་བཅོས་མ་བྱས་པས་ལྷུགས་པ། བྱ་རྩོལ་ཐམས་ཅད་དང་བྲལ་བས་བྱར་མེད། གང་ཤར་ངོས་བཟུང་དང་བྲལ་བས་འཛིན་མེད། མཉམ་བཞག་གི་ཤེས་པ་བཅོས་བསླད་དང་བྲལ་བས་ཧད་དེ་བ། མཚན་མ་མེད་པས་སྟོང་སང་ངེ་བ། རང་བཞིན་གྱིས་འོད་གསལ་བས་གསལ་ལེ་བ། རྣམ་རྟོག་གཟུང་འཛིན་གྱིས་མ་གོས་པས་རྗེན་ནེ་བ། རང་ངོ་རང་གིས་ཤེས་པས་ཧྲིག་གེ་བ། རིག་པ་མ་བཅོས་པར་རང་ལུགས་སུ་འཇོག་པས་ཐ་མལ་གྱི་ཤེས་པ། རྣམ་རྟོག་ལུ་གུ་རྒྱུད་དུ་སྙིང་མི་འཇུག་པས་རིག་པ་སོ་མ་ཞེས་བྱ་སྟེ། ཡུལ་ཡུལ་ཅན་གྱི་འཛིན་པ་དང་བྲལ་བ། སྣང་སེམས་དབྱེར་མེད་ཟང་ཐལ་ལེ་བ། འཛིན་མེད་དུ་ཕྱལ་ལེ་བ། རིག་པ་རང་ངོ་ཤེས་ཤིང་རང་ངོ་མཐོང་བ་འདི་ཉིད་ལྷག་མཐོང་དུ་ཉམས་སུ་བླངས་པའི་དངོས་གཞི་ཡིན་ནོ། །ཞེས་ངོ་སྤྲད་པར་བྱའོ། །གསུམ་པ་མཐར་ཐུག་གི་ལྷག་མཐོང་ ཞི་ལྷག་ཟུང་འཇུག་ཏུ་ཉམས་སུ་བླང་བར་བྱ་བ་ནི། སེམས་ཉིད་སྐྱེ་འགག་གནས་གསུམ་དང་བྲལ་བ། བདེ་གསལ་མི་རྟོག་པ་ནམ་མཁའ་ལྟ་བུའི་ངང་ལ་འཇོག་པ་ནི་ཞི་གནས། དེའི་རང་བཞིན་མཐོང་ཞིང་ཤེས་པ་ནི་ལྷག་མཐོང་ཡིན་ཏེ། དེ་ཡང་སེམས་ཉིད་མཐའ་གཉིས་དང་བྲལ་བ་ནི་གནས་ལུགས་ཀྱི་ཞི་ལྷག་ཟུང་འཇུག་སྟེ། སེམས་ཉིད་སྐྱེ་བ་མེད་པས་རྟག་པའི་མཐའ་དང་བྲལ། དེ་ཉིད་འགག་པ་མེད་པས་ཆད་པའི་མཐའ་དང་བྲལ་བ་སྟེ། རང་བཞིན་སྟོང་པ་ཉིད་དུ་གནས་པས་རྟག་པའི་མཐའ་དང་བྲལ། སྣ་ཚོགས་དུ་མར་རིག་ཅིང་གསལ་བས་ཆད་པའི་མཐའ་དང་བྲལ། སེམས་ཀྱི་ངོ་བོ་ཁ་དོག་དབྱིབས་སུ་གྲུབ་པ་མེད་པས་རྟག་པའི་མཐའ་དང་བྲལ། རྩལ་སྣ་ཚོགས་སུ་ཤར་བས་ཆད་པའི་མཐའ་དང་བྲལ། དེ་རྟག་ཆད་མཚན་འཛིན་ལས་འདས་པའོ། །གསལ་རིག་སྟོང་གསུམ་དབྱེར་མེད་ཟུང་འཇུག་ཏུ་ཉམས་སུ་ལེན་པའི་ཚུལ་ནི། ཐབས་བསོད་ནམས་ཀྱི་ཚོགས་སྒྱུ་མ་ལྟ་བུ་ལ་སེམས་གནས་པ་ཞི་གནས། དེ་དག་རང་བཞིན་མེད་པ་སྟོང་པ་ཉིད་དུ་མཐོང་བ་ལྷག་མཐོང༌། མོས་གུས་བླ་མའི་རྣལ་འབྱོར་ལ་སེམས་གནས་པ་ཞི་གནས་ཡིན་ལ། ངོ་བོ་སྟོང་པ་ཉིད་སྐྱེ་འགག་གནས་གསུམ་དང་བྲལ་བར་མཐོང་བ་ནི་ལྷག་མཐོང་ངོ༌། །སེམས་ཅན་ཐམས་ཅད་ལ་ཁྱབ་པའི་བྱམས་པ་དང༌། སྙིང་རྗེའི་དམིགས་པ་ལ་སེམས་གནས་པ་ཞི་གནས་ཡིན་ལ། རང་བཞིན་སྟོང་པ་ཉིད་དུ་མཐོང་བ་ནི་ལྷག་ མཐོང་ངོ༌། །ལམ་གྱི་མཐར་ཐུག་བདེ་བ་ཆེན་པོ་ལ་སེམས་གནས་པ་ནི་ཞི་གནས་ཡིན་ལ། དེ་ཉིད་ཞེན་མེད་སྟོང་པ་ཉིད་དུ་མཐོང་བ་ལྷག་མཐོང་ངོ༌། །སྣང་བ་ཐམས་ཅད་སེམས་ཀྱི་འཁྲུལ་སྣང་རྨི་ལམ་གྱི་གྲོང་ཁྱེར་ལྟ་བུ་ལ་སེམས་གནས་ཤིང༌། དེ་དག་རྟེན་འབྲེལ་སྐྱེ་མེད་དུ་མཐོང་བ་ནི་ལྷག་མཐོང་ངོ༌། །སེམས་རང་བཞིན་གྱིས་འོད་གསལ་བའི་ངང་དུ་སེམས་གནས་ཤིང༌། ངོ་བོ་སྤྲོས་བྲལ་གསལ་སྟོང་སྐྱེ་མེད་དུ་མཐོང་བ་ནི་ལྷག་མཐོང་ངོ༌༑ ༑བཅོས་བསླད་དང་བྲལ་བའི་རིག་པ་སོ་མ་ལ་སེམས་གནས་ཤིང༌། བདག་མེད་རིག་སྟོང་ཡུལ་མེད་དུ་མཐོང་བ་ནི་ལྷག་མཐོང་ངོ༌། །མདོར་ན་ཆུ་ཟླ་དང་མེ་ལོང་གི་གཟུགས་བརྙན་དང་བྲག་ཅ་ལྟར་སྣང་བ་ལས་གཞན་པའི་སྟོང་པ་མེད། སྟོང་པ་ལས་གཞན་པའི་སྣང་བ་མེད། སྣང་སྟོང་དབྱེར་མེད་ནམ་མཁའ་ལ་འཇའ་ཤར་བ་ལྟར་རྟོགས་ནས་དེའི་ངང་དུ་གནས་ཤིང༌། གཉིས་འཛིན་མཐའ་དག་སངས་ནས། རང་རིག་ཡེ་ཤེས་རྒྱས་པ་ལས་སངས་རྒྱས་ཞེས་ཀྱང་གསུངས། ཕྱག་ན་རྡོ་རྗེ་ཞེས་ཀྱང་བྱ། ཕྱག་ན་ཞེས་པ་ནི་ཀུན་རྫོབ་ཐབས་ཀྱི་སྙིང་རྗེ་ཆེན་པོ། གཟུགས་སྐུ་ཟུང་དུ་འཇུག་ཅིང༌། རྡོ་རྗེ་ཞེས་པ་ནི། ངོ་བོ་སྟོང་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་སྐུའི་དོན་ནོ། །དེ་ལྟར་སྐུ་གསུམ་ཡེ་ཤེས་ལྔ་ལ་སོགས་པ་ལམ་དང་འབྲས་བུས་བསྡུས་པའི་ཡོན་ཏན་ཐམས་ཅད། སེམས་ལ་རྫོགས་པར་ངོ་སྤྲད་པར་བྱའོ། །གསུམ་པ་འཆི་ཁ་འཕོ་བའི་གདམས་པ་ལ་དོན་གཉིས། དང་པོ་སྦྱང་བ། གཉིས་པ་ལས་ལ་སྦྱར་བའོ། །དང་པོ་ནི། རང་གི་ལུས་སྟོང་རར་སྒོམ་ལ། ལུས་ཀྱི་དབུས་སུ་རྩ་དབུ་མ་ཕྱི་དཀར་ལ་ནང་དམར་བ་སྟོང་སང་ངེ་བ་ཕྲ་སྦོམ་སྨྱུག་མ་ཙམ་པ་མར་སྣེ་གསང་གནས་ལ་ཟུག་པ་ཕཊ་ཀྱིས་བཀག་པ། ཡར་སྣེ་སྤྱི་གཙུག་ལ་ཟུག་པ་རྒྱ་མཐོངས་ཁ་བྱེ་བ་ལྟར་གསལ་ཧ་རེ་ཡོད་པ། སྤྱི་བོའི་ཐད་ཀྱི་ནམ་མཁར་འདོམ་གང་ཙམ་གྱི་སར། སངས་རྒྱས་ཀྱི་ཞིང་ཁམས་རྣམ་པར་དག་པ། ལྕང་ལོ་ཅན་གྱི་ཕོ་བྲང་གི་དབུས་སུ་པད་ཉི་བརྩེགས་པའི་གདན་ལ་བླ་མ་དང་ཐ་མི་དད་པའི་བཅོམ་ལྡན་འདས་ཕྱག་ན་རྡོ་རྗེ་ལ་ཁྲོ་བོ་བཅུ་དང༌། རྒྱལ་བ་སྲས་བཅས་ཀྱིས་བསྐོར་བ་གསལ་བར་བསྒོམ་ལ། དེ་ནས་རང་གི་སེམས་ཀྱི་ངོ་བོ་གསང་གནས་སུ་ཐིག་ལེ་སྔོ་དམར་གཉིས་གཅིག་ཐོག་ན་གཅིག་བརྩེགས་ཏེ་གནས་པ་ལ། མར་མེ་གཅིག་ལས་གཅིག་ཆད་པ་ལྟར་སྔོན་པོ་ལམ་མཁན་གྱི་ཚུལ་དུ་དབུ་མའི་ནང་ནས་ཐོན། སྙིང་ཁར་ཧཱུྃ་བསམ་ལ་བསྐོར་བ་རེ་བྱས་ནས་སྤྱི་བོའི་ཚངས་བུག་ནས་རྒྱངས་སེ་བུད་ནས། ཕྱག་ན་རྡོ་རྗེའི་ཐུགས་ཁར་རེག་པ་རེ་བྱས། སླར་ཡང་སྙིང་ཁའི་ཧཱུྃ་ལ་བསྐོར་བ་རེ་བྱས་ནས་གཞིའི་ཐིག་ལེ་དམར་པོ་ལ་འཁོར་བར་བསྒོམ། དེའི་དུས་སུ་གྱེན་ལ་འཕེན་པའི་ཚེ་ཧིཀ་ཅེས་འཕེན་ཅིང༌། ཟུར་དུ་ཕབ་པའི་ཚེ་ཀ་ཞེས་བརྗོད་ཅིང༌། གཞིའི་ཐིག་ལེ་ལ་ཐིམ་པར་བསྒོམ། དེ་ལྟར་ཚར་ཉི་ཤུ་རྩ་གཅིག་གི་བར་དུ་སྦྱང་ངོ༌། །མཐར་བླ་མ་རང་ལ་ཐིམ། ཚངས་བུག་རྡོ་རྗེ་རྒྱ་གྲམ་གྱིས་བཀག་པར་བསམ་པ་ནི་སྦྱང་བའོ། །གཉིས་པ་ལས་ལ་སྦྱར་བ་ནི། འཆི་རྟགས་ཚང་བའི་ཚེ། འཇིག་རྟེན་གྱི་ཞེན་ཆགས་ཐམས་ཅད་སྤང་ལ། སྔར་ལྟར་རྩ་དབུ་མ་གསལ་བཏབ། སྙིང་ཁར་ཧཱུྃ་ཡིག་དང༌། གསང་གནས་སུ་ཐིག་ལེ་སྔོ་དམར་གསལ་གདབ་སྟེ། ཐོག་མར་ཐིག་ལེ་སྔོན་པོ་ཆད་ནས་ཧཱུྃ་ཡིག་ལ་ཐིམ་པས་ཧཱུྃ་ཡིག་སྐར་མདའ་ལྟུང་བ་ལྟར་ཕྱག་ན་རྡོ་རྗེའི་ཐུགས་ཁར་ཐིམ་པར་བསམ་ལ། དམིགས་པ་དང་རླུང་སེམས་དྲག་ཏུ་གཏད། དེའི་ཚེ་འཕོ་མ་ནུས་ཀྱི་བར་དུ་དམིགས་པ་ཡང་ཡང་བསྐྱར་རོ། །མཐར་ཕྱག་ན་རྡོ་རྗེ་དང་རང་སེམས་དབྱེར་མེད་དུ་ལྕང་ལོ་ཅན་དུ་རྫུ་འཕྲུལ་གྱིས་ཕྱིན་ནས། ངེས་པར་ལྕང་ལོ་ཅན་དུ་འཕོ་བར་འགྱུར་རོ། །བཞི་པ་བར་དོའི་ཁྲིད་ལ་དོན་གསུམ་སྟེ། དང་པོ་སྦྱང་བ་ནི། བསྐྱེད་རྫོགས་གཉིས་ཀྱི་སྒོ་ནས་སྦྱོང་བ་སྟེ། དང་པོ་འདུན་པ་ནི། བདག་ནི་ཤི་བ་ཡིན། འདི་བར་དོ་ཡིན། བར་དོའི་སྣང་བ་ཡིན། ལུས་ལ་བདེན་པ་མེད་སྙམ་དུ་ངེས་པར་བྱས་ལ། སྣང་བ་ཐམས་ཅད་ལྕང་ལོ་ཅན་གྱི་ཕོ་བྲང་དུ་བསྒོམ། སེམས་ཅན་ཐམས་ཅད་ཕྱག་ན་རྡོ་རྗེའི་ང་རྒྱལ་བརྟན་པས། སེམས་ཅན་ཐམས་ཅད་ཕྱག་ན་རྡོ་རྗེའི་རང་བཞིན་དུ་བསྒོམ། རིགས་ལྔ་ལ་བརྟེན་ནས་བསྐྱེད་རིམ་འོད་ཟེར་སྤྲོ་བསྡུའི་ཁྲིད་སྔར་ལྟར་བསྒོམ། མཐར་དེ་དག་སྒྱུ་མ་རྨི་ལམ་ཆུ་ཟླ་ལྟར་གསལ་སྟོང་སྐྱེ་མེད་བློ་འདས་ཡིད་ལ་མི་བྱེད་པའི་ངང་དུ་མཉམ་པར་ འཇོག་པ་ནི་རྫོགས་རིམ་གྱི་སྒོ་ནས་སྦྱངས་པའོ། །གཉིས་པ་ནི། འཆི་བའི་ཚེ་ས་ཆུ་ལ་ཐིམ་པའི་རྟགས་སུ་ལུས་པོ་ལྕི། ཆུ་མེ་ལ་ཐིམ་པའི་རྟགས་སུ་ཁ་སྣ་སྐམ། མེ་རླུང་ལ་ཐིམ་པའི་རྟགས་སུ་དྲོད་རྣམས་མཐའ་ནས་སྡུད། རླུང་ནམ་མཁའ་ལ་ཐིམ་པའི་རྟགས་སུ་ཕྱི་དབུགས་ཆད། ནམ་མཁའ་རྣམ་པར་ཤེས་པ་ལ་ཐིམ་པའི་རྟགས་སུ་དར་གཅིག་བརྒྱལ། དེའི་དུས་སུ་རིམ་བཞིན་དུ་ནང་རྟགས་སུ་དུ་བ། མེ་ཁྱེར་དང༌། མར་མེ་དང༌། སྤྲིན་མེད་པའི་ནམ་མཁའ་ལ་སོགས་པ་འཆར་བར་འགྱུར་རོ། །དེ་ནས་ཕ་ལས་ཐོབ་པའི་ཐིག་ལེ་ཐུར་དུ་ལྷུང་བས་དཀར་ལམ་འབྱུང༌། མ་ལས་ཐོབ་པའི་རཀྟ་གྱེན་དུ་འདྲིལ་བས་དམར་ལམ་འབྱུང༌། སྙིང་ཁར་རྩ་བ་སནྟའི་ནང་དུ་སེམས་དང་རླུང་བྱང་སེམས་དཀར་དམར་བཞི་སྦྲག་ཏུ་གནས་པ་དང་པོར་ནག་ལམ་འབྱུང་ཞིང༌། དེ་ནས་བདེ་གསལ་མི་རྟོག་པ་རྡོ་རྗེ་ལྟ་བུའི་ཏིང་ངེ་འཛིན་འཆར་བར་འགྱུར་རོ། །དེའི་ངང་དུ་གནས་ན་བར་དོ་དང་པོ་ཆོས་སྐུའི་ཞིང་དུ་སངས་རྒྱས་པར་འགྱུར་རོ། །གསུམ་པ་སྲིད་པ་བར་དོར་འཕོ་ན་སྣང་བ་ཐམས་ཅད་ལྕང་ལོ་ཅན་གྱི་ཞིང་དུ་བསྒོམ། བདག་དང་སེམས་ཅན་ཐམས་ཅད་ཕྱག་ན་རྡོ་རྗེར་བསྒོམ། གནས་ལྔར་རིག་ལྔ་བཀོད་ལ་འོད་ཟེར་སྤྲོ་བསྡུ་བྱ། སྒྲ་ཐམས་ཅད་སྔགས་སྒྲར་བསྒོམ། དྲན་རྟོག་ཐམས་ཅད་ཆོས་སྐུ་སྐྱེ་མེད་དུ་རང་ངོ་ཤེས་པར་བྱའོ། །ཕྱག་ན་རྡོ་རྗེའི་ཞིང་ཁམས་ལྕང་ལོ་ཅན་དུ་འདུན་པ་ཡང་ཡང་གཏད། དེས་ནི་བར་དོར་ཕྱག་ན་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་ནས་ཕྱག་ན་རྡོ་རྗེའི་ཞིང་ཁམས་ལྕང་ལོ་ཅན་དུ་སྐྱེ་བར་འགྱུར་རོ། །བཅོམ་ལྡན་འདས་རྡོ་རྗེ་གཏུམ་པོའི་བསྐྱེད་རྫོགས་ཁྲིད་ཀྱི་རིམ་པ་རྫོགས་སོ། །དུས་མཐའི་མེ་ལྕེའི་ཕྲེང་བ་ཆེར་འཕྲོས་པས༑ ༑སྲིད་གསུམ་སེམས་ཅན་སྒྲིབ་ཚོགས་ཀུན་བསྲེག་སྟེ། །སྐུ་གསུམ་རྡོ་རྗེ་འཛིན་པའི་ས་ཐོབ་ནས། །ཕྱག་ན་རྡོ་རྗེའི་གོ་འཕང་མཆོག་ཐོབ་ཤོག །ཅེས་གྲུབ་ཆེན་མི་ཏྲ་ཛོ་ཀི་ནས་བརྒྱུད་པའི་ཕྱག་ན་རྡོ་རྗེའི་ཐུགས་ཁྲིད་བདུད་དཔུང་འཇོམས་བྱེད་འོད་ཟེར་ཀུན་ཏུ་རྒྱས་པ་ཞེས་བྱ་བའི་ཁྲིད་ཀྱི་རིམ་པ་ངག་ཏུ་བརྒྱུད་པ་ལས། བརྗེད་པས་མི་ཕྲོག་པའི་ཕྱིར་རྣལ་འབྱོར་པ་འོད་དཔག་རྡོ་རྗེས་ཡི་གེར་བཀོད་པའི་བསོད་ནམས་ཀྱི་ཕུང་པོ་དེས། འགྲོ་ཀུན་བཅོམ་ལྡན་འདས་རྡོ་རྗེ་འཛིན་པའི་གོ་འཕང་མཆོག་འགྲུབ་པར་གྱུར་ཅིག །འདིས་ཀྱང་རྒྱལ་བའི་བསྟན་པ་ཕྱོགས་དུས་དང་གནས་སྐབས་ཐམས་ཅད་དུ་དགེ་ཞིང་བཀྲ་ཤིས་པར་གྱུར་ཅིག །སརྦ་དཱ་ཤུ་བྷཾ།། །།