DNZ-12-NA-041

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 12, Text 41, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །ཤངས་ལུགས་རྒྱུད་སྡེ་ལྔའི་དཀྱིལ་འཁོར་ཆེན་པོར་དབང་བསྐུར་བའི་མཚམས་སྦྱོར་སྣང་བའི་

གོ་འབྱེད་ཅེས་བྱ་བ་བཞུགས་སོ། །

ན་མོ་གུ་རུ་པཉྩ་ཏནྟྲ་སེ་ན་ཛྙཱ་ན་ནཱ་ཐ་ཡེ། མཐར་ཐུག་སྟོན་པ་རྣམ་ལྔའི་དཀྱིལ་འཁོར་དང༌། །མྱུར་མཛད་ཡེ་ཤེས་མགོན་པོའི་བྱིན་རླབས་ཀྱིས། །གྲུབ་པ་གཉིས་སྩོལ་འདི་ཕྱིའི་བར་ཆད་སོལ། །ཟབ་གསང་བསྟན་པ་རྒྱས་པའི་དགེ་ལེགས་སྩོལ། །རྗེ་བཙུན་ཆེན་པོ་ཏཱ་ར་ན་ཐས་མཛད་པའི་སྒྲུབ་དཀྱིལ་ལ་ཁོ་བོས་གསལ་བྱེད་ཞབས་འདེགས་ཞུས་པ་ལ་བརྟེན་ནས་དབང་བསྐུར་བའི་ཚེ། ཐོག་མར་སྒྲུབ་དཀྱིལ་དེ་ཉིད་ལས་ཞིབ་པར་བརྟགས་ཏེ་བཤམ་བཀོད། འདོན་འགྲིགས། ལག་ལེན་སོགས་ཤིན་ཏུ་ངེས་པར་བྱ་བ་དེ་ལས་གསལ་བར་སྨོས་མ་དགོས། སྒྲུབ་གནས་རྙིང་པ་དང་རས་བྲིས་ཀྱི་དཀྱིལ་འཁོར་སྐབས་ས་ཆོག་མི་དགོས། ཐོག་མར་བརྒྱུད་འདེབས་རྣམས་དང༌། སྔོན་འགྲོ་ཕྱོགས་སྐྱོང་དང༌། གནས་བདག་ཡུལ་བདག་གཏོར་མ་བཏང༌། གནས་ཁང་མཆོད་རྫས་བྱིན་བརླབ། སྒྲུབ་ཐབས་ལྟར་སྐྱབས་འགྲོ་ནས་བརྩམས་ཏེ་བདག་བསྐྱེད། བཟླས་པ་ཉེར་བསྡུ། ཐུན་མཚམས་ཀྱི་ལྷར་ལྡང་བའི་བར་རྫོགས་པར་བཏང༌། དེ་ནས་སྟ་གོན་ལ་འཇུག་པས་ཆོག་ཀྱང༌། སྲུང་བའི་དོན་དུ་སྤྱི་དང་མཐུན་པར་ཕུར་གདབ་སྤྲོ་ན་ས་བཟུང་བའི་སྐབས་སུ་འབྱུང་བ་ལྟར། བདག་ཉིད་ཀྱི་ལུས་ཀྱི་དཀྱིལ་འཁོར་དང་སོགས་ནས་བགེགས་གཏོར་བཏང༌། ཧཱུྃ་དཀྱིལ་འཁོར་ཆེན་པོའི་སོགས་ཀྱིས་བཀའ་བསྒོས་ལ། ཕུར་གདབ་རྫོགས་པར་བྱ། དེ་ནས་སའི་ལྷ་མོ་ལྷག་གནས། ལྷ་ལྷག་གནས། བུམ་པ་ལྷག་གནས་བཅས་གྲུབ་ནས། སློབ་མ་ལྷག་གནས་བྱ་སྟེ། སློབ་མ་རྣམས་སྒོ་དྲུང་དུ་འདུས་ཏེ་ལས་བུམ་ཆུས་ཁྲུས་བྱ། གྲལ་དུ་འཁོད་པ་ལ་མེ་ཏོག་བཀྲམ་བསྡུ་བྱས་ལ་སྟ་གོན་གྱི་ཆོས་བཅུ་བདུན་ལས། དང་པོ་ཐུན་མོང་གི་བསླབ་བྱ་བཤད་པ་ནི། མཁའ་ཁྱབ་ཀྱི་སེམས་ཅན་ཐམས་ཅད་ཀྱི་དོན་དུ་སྐུ་བཞི་ཡེ་ཤེས་ལྔའི་བདག་ཉིད་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ། དེའི་ཆེད་དུ་རྒྱུད་སྡེ་ལྔའི་དཀྱིལ་འཁོར་ཆེན་པོར་སྨིན་བྱེད་ཀྱི་དབང་བསྐུར་བ་ཞུས་ཏེ་གྲོལ་བྱེད་རིམ་པ་གཉིས་ཀྱི་རྣལ་འབྱོར་ཟབ་མོ་མཐར་ཕྱིན་པར་བགྱིའོ་སྙམ་དུ་བྱང་ཆུབ་མཆོག་ཏུ་སེམས་བསྐྱེད་པ་དང༌། ཆོས་གསན་པའི་ཀུན་སྤྱོད་དང་ཀུན་སློང་རྣམ་པར་དག་པ་མདོ་རྒྱུད་རྣམས་ལས་ཇི་སྐད་གསུངས་པ་བཞིན་ལེགས་པར་གསལ་བཏབ་ནས་གསན་འཚལ། དེའང་འོ་སྐོལ་རྣམས་དལ་འབྱོར་གྱི་ཆོས་ བཅོ་བརྒྱད་དང་ལྡན་པའི་མི་ལུས་རིན་པོ་ཆེ་རྙེད་པར་དཀའ་བ་ཐོབ་ཀྱང་འདུས་བྱས་ཐམས་ཅད་མི་རྟག་པའི་རང་བཞིན་ཡིན་པས་འཆི་བ་ནམ་འོང་ཆ་མེད། ཤི་བའི་འོག་ཏུ་རྣམ་ཤེས་ལས་ཀྱི་རྗེས་སུ་འབྲང་བས་དགེ་སྡིག་གི་བླང་དོར་མ་ནོར་བ་ལ་འབད་རྩོལ་བྱ་དགོས། འཁོར་བའི་གནས་རིས་མཐོ་དམན་གང་དུ་སྐྱེས་ཀྱང་སྡུག་བསྔལ་གསུམ་གྱི་རང་བཞིན་ལས་མ་འདས་ཤིང་ཐོག་མ་མེད་པ་ནས་འཁོར་བར་འཁྱམས། སླར་ཡང་མཐའ་མེད་པའི་འཁོར་བའི་སྡུག་བསྔལ་མྱོང་དགོས་ལ་ངེས་འབྱུང་གི་བློ་ཤུགས་དྲག་པོར་བསྐྱེད་ནས་ཐར་པའི་ལམ་ལ་འཇུག་དགོས། ཐར་པའི་ལམ་བཟང་པོ་ནི་ཕྱི་རོལ་མུ་སྟེགས་པ་སོགས་གྲུབ་མཐའ་ངན་པ་གཞན་ལ་མེད། ནང་པ་སངས་རྒྱས་ཁོ་ན་ལ་ཡོད་པས་དཀོན་མཆོག་གསུམ་ལ་སྐྱབས་སུ་འགྲོ་བ་རྩ་བར་བཟུང་ནས་སངས་རྒྱས་ཀྱི་བསྟན་པ་རིན་པོ་ཆེ་ལ་འཇུག་དགོས། དེའང་བདག་ཅག་གི་སྟོན་པ་ཐུགས་རྗེ་དང་བཀའ་དྲིན་ཚད་མ་མཆིས་པ་མཉམ་མེད་ཤཱཀྱའི་དབང་པོ་འདི་ཉིད་ཀྱིས་ཐོག་མར་འདྲེན་པ་གཞན་གྱིས་སྤངས་པའི་རྩོད་ལྡན་སྙིགས་མའི་འགྲོ་བ་རྣམས་ལ་དགོངས་ནས་བྱང་ཆུབ་མཆོག་ཏུ་ཐུགས་བསྐྱེད་པའང་སངས་རྒྱས་གཞན་ལས་ཁྱད་པར་དུ་འཕགས་པར་མཛད། བར་དུ་བསྐལ་པ་གྲངས་མེད་པ་གསུམ་དུ་ཚོགས་བསགས་བསམ་གྱིས་མི་ཁྱབ་པས་ས་བཅུ་དང་ལམ་ལྔ་མཐར་ཕྱིན་ནས་རྩོད་ལྡན་ཚེ་ལོ་བརྒྱ་པའི་དུས་སུ་མ་ག་དྷ་རྡོ་རྗེའི་གདན་དུ་མངོན་པར་རྫོགས་པ་སངས་རྒྱས་པའི་ཚུལ་བསྟན་ཏེ་ཆོས་ཀྱི་འཁོར་ལོ་བསམ་གྱིས་མི་ཁྱབ་པར་བསྐོར་བ་རྣམས་ལ་ཉན་ཐོས་ཀྱི་ལུགས་སུ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དུ་གྲགས། དེ་དག་ཀྱང་གདུལ་བྱའི་དབང་པོ་དམན་འབྲིང༌། མཆོག་གི་དབང་དུ་བྱས་ནས་སྡེ་སྣོད་གསུམ་དུ་བསྡུ། དེའང་ཐེག་པ་ཆེ་ཆུང་གཉིས་སུ་དབྱེ་བ་ལས་ཐེག་དམན་ལས་ཁྱད་པར་དུ་མས་འཕགས་པ་ཐེག་པ་ཆེན་པོ་བྱང་ཆུབ་སེམས་ཀྱི་ཐེག་པས་ཁྱད་པར་དུ་བྱས་པ་ཡིན། དེ་ལའང་རྒྱུ་ལམ་དུ་བྱས་པ་མཚན་ཉིད་ཀྱི་ཐེག་པ་དང༌། འབྲས་བུ་ལམ་དུ་བྱས་པ་གསང་སྔགས་རྡོ་རྗེ་ཐེག་པ་གཉིས་སུ་དབྱེ་བ་ལས། གསང་སྔགས་རྡོ་རྗེ་ཐེག་པ་ནི་སངས་རྒྱས་འདི་ཉིད་ཀྱི་ཐུགས་བསྐྱེད་ཀྱི་སྟོབས་ཀྱིས་བསྟན་པ་འདི་ཁོ་ན་ལ་བྱོན་པ་ལས་འདས་པའི་སངས་རྒྱས་རྣམས་ཀྱིས་ཀྱང་མ་གསུངས། མ་འོངས་པའི་སངས་རྒྱས་རྣམས་ཀྱིས་ཀྱང་གསུང་བར་མི་འགྱུར་བས་ཨུ་དུམྦ་ར་ལྟར་དཀོན་ཅིང་གྲོལ་བ་བཞི་དང་ལྡན་པས་གསང་སྔགས་ཀྱི་སྒོར་ཞུགས་པ་ནི་ཤིན་ཏུ་སྐལ་པ་བཟང་པོ་དང་ལྡན་པ་ཡིན། གསང་སྔགས་ཉིད་སྡེ་སྣོད་གསུམ་པོ་སྤྱི་ཁྱབ་ཡིན་པར་བཞེད་པ་དང༌། ཁྱད་པར་ཅན་དུ་བྱས་པ་སོགས་མཆིས་ཀྱང་དཔུང་བཟང་གིས་ཞུས་པ་ལས། ལྷ་དང་ལྷ་མིན་མི་ལ་ཕན་གདགས་ཕྱིར། །གསང་སྔགས་རིག་སྔགས་རྣམ་པ་སྣ་ཚོགས་དང༌། །བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་བཤད་པར་རྒྱལ་བས་གསུངས། །ཞེས་དང༌། སློབ་དཔོན་སངས་རྒྱས་གསང་བས། སངས་རྒྱས་མཆོག་གིས་ཆོས་གསུངས་པ། །མདོ་སྡེ་འདུལ་བ་མངོན་པ་དང༌། །རིག་པ་འཛིན་པའི་སྡེ་བཞིར་གནས། །ཞེས་གསུངས་ཤིང་སློབ་དཔོན་གཞན་གྱིས་ཀྱང་དེ་ལྟར་བསྟན་པ་མང་བས་རིག་པ་འཛིན་པའི་སྡེ་སྣོད་ཅེས་ཁྱད་པར་དུ་འཕགས་པའི་སྡེ་སྣོད་བཞི་པར་བཞག་པ་ལ་ནང་གསེས་ཀྱི་དབྱེ་བ་གཉིས་ནས་བདུན་གྱི་བར་དུ་བཞག་པ་སོགས་རྣམ་གྲངས་མང་ཡང་སྦྱང་གཞི་དུས་བཞི། མི་རིགས་བཞི། འདོད་ཆགས་བཞི། དབང་པོ་བཞི་སོགས་བཞི་ཚན་རྣམས་ལ་དགོངས་ནས་རྒྱུད་སྡེ་བཞིར་དབྱེ་བ་ནི་གྲགས་ཆེ་སྟེ། རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལའོ། །སེམས་ཅན་མཆོག་ལ་རྣལ་འབྱོར་རྒྱུད། །རྣལ་འབྱོར་བླ་མེད་དེ་ལྟག་ལའོ། །ཞེས་སོགས་རྒྱུད་སྡེ་གཞན་ལའང་རྒྱ་ཆེར་འབྱུང་བ་ལྟར་བྱ་སྤྱོད་རྣལ་འབྱོར་བླ་མེད་ཀྱི་རིམ་པར་བཞུགས་པ་རྣམས་ཀྱི་མཆོག་ཏུ་གྱུར་པ་རྣལ་འབྱོར་བླ་མེད་ཀྱི་རྒྱུད་ལ་ཐབས་གཙོ་བོར་སྟོན་པ་ཕའི་རྒྱུད་དང་། ཤེས་རབ་གཙོ་བོར་སྟོན་པ་མའི་རྒྱུད་གཉིས་སུ་དབྱེ་བ་ལས་འདིར་སྐབས་སུ་བབ་པ་རྒྱུད་སྡེ་ལྔའི་དཀྱིལ་འཁོར་ཆེན་པོ་འདི་ནི་མཁས་གྲུབ་ཁྱུང་པོ་རྣལ་འབྱོར་དེ་ཉིད་དགུང་གྲངས་ལྔ་བཅུ་བར་རྒྱ་གར་འཕགས་པའི་ཡུལ་དུ་ཕེབས་ཏེ་རྡོ་རྗེ་འཆང་དངོས་ཀྱིས་རྗེས་སུ་བཟུང་བའི་ཡེ་ཤེས་ཀྱི་མཁའ་འགྲོ་རྣམ་པ་གཉིས་དང༌། མཁས་གྲུབ་བརྒྱ་དང་ལྔ་བཅུའི་ཞབས་པད་བསྟེན་ཏེ་རིག་པའི་གནས་དང་མདོ་རྒྱུད་མན་ངག་ཀུན་ལ་མཁས་པར་སྦྱངས་པས་ བཤད་པ་དང་རྩོད་པ་དང་སྒྲུབ་པའི་ལམ་རིམ་གྱི་བཀའ་བབ། གྲུབ་པའི་གོ་འཕང་མཐོན་པོར་གཤེགས། ཁྱད་པར་གཏུམ་མོ་སྟོན་པའི་མཐར་ཐུག་དགྱེས་རྡོར་མཚོན་ཆ་དང་ཐོད་པ་ཅན་ལྷ་དགུས་བསྐོར་བ་གྲུབ་ཆེན་ཌོམྦི་པ་དང་མཚོ་སྐྱེས་ཞབས་ཀྱི་ལུགས། ལས་རྒྱ་སྟོན་པའི་མཐར་ཐུག་བདེ་མཆོག་ལྷ་དྲུག་ཅུ་རྩ་གཉིས་པ་ལཱུ་ཧི་པའི་ལུགས། སྒྱུ་མ་རྨི་ལམ་སྟོན་པའི་མཐར་ཐུག་མ་ཧཱ་མ་ཡ་ལྷ་ལྔ་པ་ཀུ་ཀུ་རི་པའི་ལུགས། འོད་གསལ་སྟོན་པའི་མཐར་ཐུག་གསང་འདུས་མི་བསྐྱོད་རྡོ་རྗེ་ལྷ་སོ་གསུམ་པ་འཕགས་པ་ཡབ་སྲས་ཀྱི་ལུགས། མངོན་སྤྱོད་སྟོན་པའི་མཐར་ཐུག་རྡོ་རྗེ་འཇིགས་བྱེད་ཆེན་པོ་ལྷ་བཅུ་གསུམ་པ་ལ་ལི་ཏ་བཛྲའི་ལུགས་རྣམས་བརྒྱུད་པ་སོ་སོ་ལས་གསན་མོད་ཀྱི་འདིར་དེ་རྣམས་གཅིག་ཏུ་དྲིལ་བའི་བློས་བཏགས་ཀྱིས་དཀྱིལ་འཁོར་གཅིག་ཏུ་མཛད་པ་མ་ཡིན་ཏེ། བཅོམ་ལྡན་འདས་ཐུབ་པའི་དབང་པོས་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར་དུས་འཁོར་རྩ་བའི་རྒྱུད་གསུང་བའི་སྐབས་བདེ་དགྱེས་སོགས་ཀྱི་རྩ་བའི་རྒྱུད་སྡེ་ཐམས་ཅད་སླར་ཡང་བསྟན་པ་དང༌། རྒྱུད་སྡེ་གཞན་ཡང་མང་དུ་གསུངས་པའི་ནང་ཚན་རིན་ཆེན་རྒྱ་མཚོ་ཞེས་བྱ་བའི་རྒྱུད་སྡེ་ཆེན་པོ་ལས་རྒྱུད་སྡེ་ལྔ་པོ་འདི་དཀྱིལ་འཁོར་གཅིག་ཏུ་སྒྲུབ་པའི་ཚུལ་གསལ་བར་བསྟན་པའི་རྒྱུད་དེ་ཉིད་ཁྱབ་བདག་རྡོ་རྗེ་འཆང༌། རྡོ་རྗེ་སྙིང་པོ། ཡེ་ཤེས་ཀྱི་མཁའ་འགྲོ་མ། ཨིནྡྲ་བྷུ་ཏི། ལྷ་ལྕམ་དཔལ་མོ། ས་མནྟ་བཛྲ། ཛ་ཡ་དེ་བ་ལས་རྡོ་རྗེ་གདན་པ་བར་པ། པུཎྱ་ཀ་རས་གསན་པ་ནི་རིང་བརྒྱུད་དང༌། རྡོ་རྗེ་འཆང༌། བློ་གྲོས་རིན་ཆེན། ཤ་བ་རི་པ། མངའ་བདག་མཻ་ཏྲི་པ། དྷཱ་བྱང་ཆུབ་སེམས་དཔའ་ལས་རྡོ་རྗེ་གདན་པ་བར་པས་གསན་པ་ནི་ཉེ་བརྒྱུད་དང་། རྡོ་རྗེ་འཆང༌། གྲུབ་པའི་དཔའ་བོ། རཏྣ་ཀ་ར། ཨརྱ་བཛྲ། གྲུབ་ཆེན་རཱ་ཧུ་ལས་གསན་པ་ནི་ཤིན་ཏུ་ཉེ་བརྒྱུད་དེ། མཁས་གྲུབ་དེ་གཉིས་ལས་ཁྱུང་པོ་རྣལ་འབྱོར་གྱིས་སྨིན་གྲོལ་རྫོགས་པར་གསན། རྒྱུད་ཆེན་འདི་འཕགས་ཡུལ་གྱི་མཁས་གྲུབ་གཞན་ལ་མ་གྲགས་ཤིང་བོད་དུའང་མ་བསྒྱུར། འདི་རིགས་གཞན་དུའང་མང་བར་ཡོད་པར་སྣང་བས་བོད་དུ་བསྒྱུར་བའི་གསུང་རབ་ཉུང་ཤས་ལ་བརྟེན་ནས་མདོ་རྒྱུད་ཀྱི་རིགས་དག་མ་དག་གི་ཁ་ཚོན་བཅད་པ་ནི་ནམ་མཁའ་འདོམ་འཇལ་བའི་དཔེར་སྣང་ངོ༌། །མཁས་གྲུབ་ཁྱུང་པོས་རྨོག་ལྕོག་པ་ལ་གནང་སྟེ་དབོན་སྟོན་སྐྱེར་སྒང་པ་སོགས་ནས་རིམ་པར་བརྒྱུད་ད་ལྟའི་བར་དུ་བརྒྱུད་པ་ཟམ་མ་ཆད་པར་བྱོན་པའི་དཀྱིལ་འཁོར་ཆེན་པོ་འདིའི་དབང་བསྐུར་བ་བསྒྲུབ་པར་བགྱི་བ་ལ་སློབ་མ་ལྷག་པར་གནས་པ་དང་དབང་བསྐུར་དངོས་གཞི་གཉིས་སུ་ཡོད་པ་ལས་དེ་རིང་གི་སྐབས་སུ་སྟ་གོན་གྱི་ཆོས་རྣམས་བསྒྲུབ་པར་བགྱི་བ་ཡིན། དེ་ལ་སློབ་དཔོན་གྱི་བྱ་བ་རྣམས་སྔོན་དུ་གྲུབ། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལྷག་གནས་ཀྱི་ཆོས་རྣམས་ཞུ་བའི་ཡོན་དུ་དམིགས་ཏེ་ཞིང་ཁམས་འབུལ་བར་ཞུ། ཞེས་མཎྜལ་འབུལ་དུ་གཞུག །དེ་ནས་དཀྱིལ་ཆོག་ལྟར། སྡོམ་པ་གསུམ་ལ་གནས་ པར་བྱ། །སོགས་ནས། དེ་རྣམས་ཀྱི་བསམ་པ་རྣམ་དག་བསྐྱེད་དགོས་སོ། །ཞེས་གདམས། གཉིས་པ་སྤྲོ་བ་བསྐྱེད་པ་ནི། སྔགས་ཀྱི་དངོས་གྲུབ་དོན་གཉེར་གང༌། །སོགས་ནས། འདི་འབྲས་འགྲུབ། ཅེས་གསུངས་ཏེ། སྔགས་ཀྱི་དངོས་གྲུབ་རྡོ་རྗེ་འཛིན་པའི་ཡེ་ཤེས་དོན་དུ་གཉེར་བ་དག་དཀྱིལ་འཁོར་ཆེན་པོར་གཞུག་པར་བྱའི། ཚེ་འདིའི་བདེ་སྐྱིད་དང་ཕྱི་མ་ལྷ་མིའི་གོ་འཕང་དང༌། རང་དོན་དུ་ཉན་རང་གི་བྱང་ཆུབ་འདོད་པ་རྣམས་ནི་མ་ཡིན་ཏེ། དེ་དག་ནི་དཀྱིལ་འཁོར་དུ་འཇུག་པ་ལ་མ་ལྟོས་པར་ཐབས་དམན་པ་གཞན་ལ་བརྟེན་ནས་བསྒྲུབ་ཏུ་ཡོད་པའི་ཕྱིར་རོ། །དེ་བས་ན་བདག་གཞན་ཐམས་ཅད་སྲིད་ཞིའི་ཕ་རོལ་ཏུ་སོན་པའི་མི་གནས་པའི་མྱ་ངན་ལས་འདས་པ་དོན་དུ་གཉེར་བའི་དད་པ་ཅན་བློ་གྲོས་དང་ལྡན་པ་དག་དཀྱིལ་འཁོར་ཆེན་པོར་གཞུག་པར་བྱ་སྟེ། ཚེ་འདིའི་བདེ་འབྲས་དོན་དུ་གཉེར་བས་ཞུགས་ན་ཕ་རོལ་གྱི་དོན་མི་འགྲུབ་ཅིང༌། གཞན་དོན་དུ་མི་གནས་པའི་མྱ་ངན་ལས་འདས་པ་ཐམས་ཅད་མཁྱེན་པའི་སངས་རྒྱས་ལ་དམིགས་ཏེ་ཞུགས་ན་རང་གཞན་གཉིས་ཀའི་དོན་བདེ་བླག་ཏུ་འགྲུབ་པ་ཡིན། ཞེས་གསུངས་པས་དོན་ཐུགས་ལ་ངེས་པར་ཞུ། གསུམ་པ་གསོལ་བ་བཏབ་པ་ནི། སྙིམ་པ་མེ་ཏོག་དང་བཅས་པའི་ཐལ་མོ་སྦྱོར་ལ་འདིའི་རྗེས་ཟློས་ལན་གསུམ་མཛོད། དགའ་ཆེན་ཁྱོད་བདག་སྟོན་པ་སྟེ། །སོགས་གསུམ། བཞི་པ་སྤྲོ་བ་བསྐྱེད་པ་ནི། ཁྱེད་རྣམས་ཁྱད་པར་ཅན་གྱི་ལམ་ཟབ་མོ་རྡོ་རྗེ་ཐེག་པ་ལ་དོན་གཉེར་གྱི་བློ་སྐྱེས་པ་དེ་ཤིན་ཏུ་ལེགས་པ་ཡིན་ནོ། །ཞེས་ཤེས་པའི་ཆེད་དུ་སྤྲོ་བ་བསྐྱེད་པ་འདི་ལ་གསན་པས་ཁྱབ་པར་གདའ། བུ་ཚུར་ཐེག་པ་ནས། བློ་གྲོས་འདི་གྱིས་ཤིག །ཅེས་དང༌། ལྔ་པ་རྟོག་པ་བསྡུ་བ་ནི། རྟོག་པ་ཐམས་ཅད་ནས། བྱིན་མི་རློབ། ཅེས་གསུངས་པས་དབང་གི་ཚིག་རྣ་བ་གཏད་དེ་མི་ཉན་པ་དང༌། དོན་ཇི་བཞིན་དུ་འཛིན་པར་མི་བྱེད་པ་རྣམས་སྣོད་མིན་སྤང་བྱར་གསུངས་ཤིང༌། དེ་ལྟ་བུ་ལ་དབང་རྫོགས་པར་བསྐུར་ཡང་དབང་དོན་གྱི་ཡེ་ཤེས་ཇི་བཞིན་སྐྱེ་བར་མི་འགྱུར་བས་རྩེ་གཅིག་ཏུ་དད་པས་ཉན་ཅིང་ནན་ཏན་དུ་འཛིན་པར་བྱ་དགོས་སོ། །དྲུག་པ་སྡོམ་གསུམ་བསྟེན་པ་ནི། དཀོན་མཆོག་ཀུན་འདུས་ཀྱི་བདག་ཉིད་སློབ་དཔོན་གཙོ་བོར་བཞུགས་པའི་དཀྱིལ་འཁོར་ལྷ་ཚོགས་རྣམས་ཀྱི་སྤྱན་སྔར་བདག་གཞན་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་སྒོ་གསུམ་གུས་པ་ཆེན་པོས་སྐྱབས་སུ་འགྲོ་བ་དང༌། སོ་སོར་ཐར་པའི་འདུལ་བ། བྱང་ཆུབ་སེམས་དཔའི་བསླབ་བྱ། རིག་འཛིན་སྔགས་ཀྱི་དམ་ཚིག་རྣམས་ཚུལ་བཞིན་ཏུ་བསྲུང་ཞིང་གཞན་ལ་ཕན་པར་བགྱིད་དོ་སྙམ་པས་འདིའི་རྗེས་ཟློས། བཅོམ་ལྡན་དཀྱིལ་འཁོར་དེས་གསུངས་ཆོས། ། སོགས་ནས། སྟོན་པར་བགྱི། ཞེས་ལན་གསུམ། བདུན་པ་ཡན་ལག་བདུན་པ་བྱ་བ་ནི། ཁྱེད་རང་རྣམས་ཀྱི་མདུན་གྱི་ནམ་མཁར་བླ་མ་དང་གཉིས་སུ་མེད་པའི་བཅོམ་ལྡན་འདས་རྒྱུད་སྡེ་ལྔའི་དཀྱིལ་འཁོར་ལ་དཀོན་མཆོག་གསུམ་དང་རྩ་བ་གསུམ་གྱི་ལྷ་ཚོགས་སྤྲིན་གཏིབས་པ་ལྟ་བུས་བསྐོར་ཏེ་བཞུགས་པའི་སྤྱན་སྔར་བདག་གཞན་སེམས་ཅན་ཐམས་ཅད་ཀྱིས་འཁོར་བ་ཐོག་མ་མེད་པ་ནས་བསགས་པའི་སྡིག་པ་བཤགས་ཤིང༌། འཁོར་འདས་ཀུན་གྱི་དགེ་བ་ལ་ཡི་རང་བ་དང༌། ཆོས་ཀྱི་འཁོར་ལོ་བསྐོར་བར་བསྐུལ་བ་དང༌། རྡོ་རྗེ་ཐེག་པའི་དཀོན་མཆོག་གསུམ་ལ་སྐྱབས་སུ་འགྲོ་བ་དང༌། སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་པ་དང༌། དགེ་རྩ་བྱང་ཆུབ་ཆེན་པོར་བསྔོ་ཞིང་ལུས་འབུལ་བ་བཅས་ཡན་ལག་བདུན་པ་ཚུལ་བཞིན་བགྱིའོ་སྙམ་པས་འདིའི་རྗེས་ཟློས། བདག་གིས་སྡིག་པ་བགྱིས་པ་དང༌། །སོགས་སྒྲུབ་ཐབས་དབུ་ནས་འབྱུང་བ་ལྟར་ལ། ཁྱོད་ཀྱི་སྐུ་གསུམ་འགྲུབ་པར་ཤོག །བར་ལན་གསུམ། བརྒྱད་པ་དྲིས་ལན་ནི། དེ་བཞིན་གཤེགས་པ་ཐམས་ཅད་ཀྱི། །སོགས་ནས། ཁྱོད་འདོད་དམ། ཞེས་དྲིས་པའི་ལན་བཏབ་པ་འདིའི་རྗེས་ཟློས། དེ་བཞིན་གཤེགས་པ་སོགས་ནས། བདག་ཉིད་ཆེན་པོ་བདག་འཚལ་ལོ། །ཞེས་ལན་བཏབ། དགུ་པ་སྡོམ་པ་བསྒྲགས་པ་ནི། རྡོ་རྗེ་ཐེག་པའི་རྩ་བ་དམ་ཚིག་དང་སྡོམ་པ་ལ་རག་ལས་པས་ཤིན་ཏུ་གལ་ཆེ་བས་སྲུང་སྡོམ་བྱ་དགོས་པ་ནི་འདི་དག་ཡིན་ནོ་ཞེས་བསྒྲགས་པ་འདི་ལ་གསན་འཚལ། སངས་རྒྱས་ཆོས་དང་དགེ་འདུན་ཏེ། །སོགས་ནས། ཡང་དག་བཤད། བར་ལན་གསུམ། བཅུ་པ་སྡོམ་པ་བཟུང་བ་ནི། ཇི་སྐད་གསུངས་པའི་དམ་ཚིག་དང་སྡོམ་པ་རྣམས་ལེགས་པར་བླངས་ནས་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས། སློབ་དཔོན་འདིར་ནི་ སོགས་དང༌། ཇི་ལྟར་དུས་གསུམ་མགོན་པོ་སོགས་སྒྲུབ་ཐབས་ནས་འབྱུང་བ་ལྟར་ལན་གསུམ་རྗེས་ཟློས་བྱ། བཅུ་གཅིག་པ་གནས་གསུམ་བྱིན་རླབས་ནི། སློབ་མ་སྐད་ཅིག་གིས་རྡོ་རྗེ་སེམས་དཔའི་སྐུར་གྱུར་པའི་དཔྲལ་བར་ཟླ་བ་ལ་ༀ་ལས་འཁོར་ལོ་ༀ་གྱིས་མཚན་པ་ལས་སྐུ་རྡོ་རྗེ་སྐུ་མདོག་དཀར་པོ་འཁོར་ལོ་དང་དྲིལ་བུ་འཛིན་པ། མགྲིན་པར་སྣ་ཚོགས་པདྨ་ལ་ཨ་ལས་པདྨ་དམར་པོ་ཨཱཿ ས་མཚན་པ་ལས་གསུང་རྡོ་རྗེ་སྐུ་མདོག་དམར་པོ་པདྨ་དང་དྲིལ་བུ་འཛིན་པ། སྙིང་གར་ཉི་མའི་དཀྱིལ་འཁོར་ལ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་ཐུགས་རྡོ་རྗེ་སྐུ་མདོག་མཐིང་ག་རྡོ་རྗེ་དང་དྲིལ་བུ་འཛིན་པ་རྣམས་སུ་གྱུར། སློབ་མའི་གནས་གསུམ་དུ་བདུད་རྩི་ལྔ་དང་དྲི་བཟང་སྦྱར་བའི་ཐིག་ལེ་བྱ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། སངས་རྒྱས་བྱང་སེམས་ཐམས་ཅད་སྐུ་གསུང་ཐུགས་རྡོ་རྗེའི་རྣམ་པར་སྤྱན་དྲངས་སློབ་མའི་གནས་གསུམ་དུ་ཐིམ་པར་གྱུར། ཉེར་སྤྱོད་ལྔ། ༀ་ཨཱཿ ཧཱུྃ་ལན་གསུམ་གྱིས་བྱིན་བརླབས། དེ་ལྟར་བྱས་པས་ཁྱེད་རང་རྣམས་ཀྱི་ལུས་ངག་ཡིད་གསུམ་གདོད་མ་ནས་རྡོ་རྗེ་གསུམ་གྱི་ངོ་བོར་གནས་པ་དེ་ཆོ་ག་འདིས་ངོ་འཕྲོད་ཅིང་དེ་གསལ་བར་བྱས་པ་ཡིན། དེ་ལྟར་སེམས་བསྐྱེད་ཅིང་སྒོ་གསུམ་ལྷར་བྱས་མ་ཐག་པ་དེ་མཆོད་ཡུལ་དུ་བཟུང་བ་ཡིན། མེ་ཏོག་དབུ་ལ་ཕུལ་ནས་མཆོད་པར་མོས་པ་མཛོད། ༀ་བཛྲ་པུཥྤེ་ཨཱཿ ཧཱུྃ། བདུག་སྤོས་ཤངས་ལ༴ དྷཱུ་པེ༴ མར་མེ་སྤྱན་ལམ་དུ༴ ཨཱ་ལོ་ཀེ༴ དྲིའི་བྱུགས་པ་ཐུགས་ཀར༴ གནྡྷེ༴ ཞལ་ཟས་ལྗགས་ལ༴ ནཻ་ཝིདྱ་ ཨཱཿ ཧཱུྃ། ཞེས་པས་མཆོད་པ་ནི་ལུས་ངག་ཡིད་གསུམ་ལྷར་ཤེས་པའི་སྒོ་ནས་འདོད་ཡོན་ལ་མ་ཆགས་པར་ལོངས་སྤྱོད་ཅིག་ཅེས་པའི་དོན་ཡིན་ནོ། །དུས་འདི་ནས་ནི་བཟུང་ནས་སུ། །འཁོར་བའི་ཉེས་པས་མ་གོས་པར༑ ༑མཆོད་པ་ཀུན་དང་ལྡན་པ་ཡི། །དུས་ཀུན་ཏུ་ནི་དགེ་བར་མནོས། །ཞེས་བརྗོད། ཁྱེད་རང་རྣམས་ཀྱིས་རང་གི་གནས་གསུམ་གྱི་རྡོ་རྗེ་གསུམ་ལ་གསོལ་བ་འདེབས་པ་འདིའི་རྗེས་ཟློས་མཛོད། ༀ་སྐུ་ཡི་རྡོ་རྗེ་སྐུ་ཡི་མཆོག ། ཡེ་ཤེས་དང་ལྡན་གཏི་མུག་སེལ། །བཅོམ་ལྡན་གཙོ་བོ་སྐུ་རྡོ་རྗེ། །སྐུ་ཡི་རྡོ་རྗེར་ཕྱག་འཚལ་ལོ། །ཞེས་གསོལ་བ་བཏབ་པས། སྐུ་རྡོ་རྗེ་སློབ་མའི་ལུས་ལ་ཐིམ་པས། ལུས་སྐུ་རྡོ་རྗེའི་ངོ་བོར་གྱུར་པར་མོས་ལ། ༀ་སརྦ་ཏ་ཐཱ་ག་ཏ་ཀ་ཡ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་ང་རྒྱལ་འཛིན་དུ་གཞུག །དེ་བཞིན་དུ། གསུང་གི་རྡོ་རྗེ་གསུང་གི་མཆོག །སོ་སོར་རྟོག་པས་འདོད་ཆགས་འཇོམས། །བཅོམ་ལྡན་གཙོ་བོ་གསུང་རྡོ་རྗེ། །གསུང་གི་རྡོ་རྗེར་ཕྱག་འཚལ་ལོ། ། ཞེས་གསོལ་བ་བཏབ་པས། གསུང་རྡོ་རྗེ་སློབ་མའི་ངག་ལ་ཐིམ་པས། ངག་གསུང་རྡོ་རྗེའི་ངོ་བོར་གྱུར་པར་མོས་ལ། ༀ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཏྨ་ཀོ྅ཧཾ། དེ་བཞིན་དུ། ཐུགས་ཀྱི་རྡོ་རྗེ་ཐུགས་དམ་བསྐུལ། །དག་པའི་རང་བཞིན་ཞེ་སྡང་སྦྱོང༌། །བཅོམ་ལྡན་གཙོ་བོ་ཐུགས་རྡོ་རྗེ། །ཐུགས་ཀྱི་རྡོ་རྗེར་ཕྱག་འཚལ་ལོ། །ཞེས་གསོལ་བ་བཏབ་པས། ཐུགས་རྡོ་རྗེ་སློབ་མའི་ཡིད་ལ་ཐིམ་པས། ཡིད་ཐུགས་རྡོ་རྗེའི་ངོ་བོར་གྱུར་པར་མོས་ལ། ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ༀ་སུ་པྲ་ཏིཥྛ་བཛྲེ་སྭཱ་ཧཱ། ཞེས་མེ་ཏོག་འཐོར་ཞིང་བརྟན་པར་ཡང་བྱའོ། །བཅུ་གཉིས་པ་སོ་ཤིང་དོར་བ་ནི། བ་བྱུང་གིས་བྱུགས་པའི་མཎྜལ་ཐིག་བཞིས་ལིང་ཚེ་དགུར་བགོས་པ་ཞིག་བྱས་ལ། བྱང་ཆུབ་ཀྱི་ཤིང་དུ་མོས་པའི་སོ་ཤིང་ཨཱ་ཁཾ་ཝཱི་ར་ཧཱུྃ་ཞེས་བརྗོད་པས་སློབ་མའི་ལག་ཏུ་གཏད་ལ། འཆའ་བའི་ཚུལ་བགྱིས་པས་སྡིག་སྒྲིབ་ཐམས་ཅད་སྐྱུགས་པར་བསམས་ལ་སྔགས་འདིའི་རྗེས་ཟློས་དང་བཅས་ཏེ། སོ་ཤིང་གི་རྭ་བར་དོར་ཞིག །ༀ་ཨཱཿ ཁཾ་ ཝཱི་ར་ཧཱུྃ། ཞེས་འདོར་དུ་གཞུག །དེ་ལྟར་འདོར་བའི་ལྟས་ཀྱི་མཚན་མ་བཤད་པ་ནི། སྤྱི་རྒྱུད་ལས། དེ་ཚེ་བདག་ལ་ལྟ་བ་དང༌། །རྩེ་མོ་གྱེན་དུ་འགྲེང་གྱུར་ན། །དེ་ནི་དངོས་གྲུབ་མཆོག་ཅེས་བྱ། །དེ་བཞིན་ཤར་དུ་ཁ་བལྟས་ན། །དེ་ནི་དངོས་གྲུབ་འབྲིང་དུ་བཤད། །མཚམས་དང་བྱང་དུ་ཁ་བལྟས་ན། །འཇིག་རྟེན་པ་ཡི་དངོས་གྲུབ་འགྲུབ། །སོ་ཤིང་དོར་བ་བརྒྱ་ལམ་ཞིག །གལ་ཏེ་ཐུར་དུ་ཁ་བལྟས་ན། །དེ་ནི་ངེས་པར་ས་འོག་གི །དངོས་གྲུབ་དེ་ནི་ཐེ་ཚོམ་མེད། །ཅེས་གསུངས་པ་ལྟར་རོ། །དེས་ནི་གནས་སྐབས་སུ་སྡིག་སྒྲིབ་འདག་ཅིང་དངོས་གྲུབ་ཀྱི་མཚན་ལྟས་ཤེས་པ་དང་མཐར་ཐུག་འཚང་རྒྱ་བའི་ཚེ་བྱང་ཆུབ་ཀྱི་ཤིང་རྩོལ་མེད་དུ་འབྱུང་བའི་རྟེན་འབྲེལ་བསྒྲིགས་པ་ཡིན་ནོ། །བཅུ་གསུམ་པ་སྲུང་སྐུད་གདགས་པ་ནི། སྲུང་སྐུད་ཁ་དོག་ལྔ་ལྡན་ཁྲུ་གང་བར་མདུད་པ་གསུམ་བཏབ་ལ། ཧཱུྃ་ལས་བྱུང་བའི་སྲུང་སྐུད་མདུད་པ་གསུམ་ལ་ༀ་ཨཱཿ ཧཱུྃ་ཡོངས་སུ་གྱུར་པ་ལས། སྐུ་གསུང་ཐུགས་རྡོ་རྗེའི་ལྷ་གསུམ། སློབ་དཔོན་གྱི་ སྙིང་གའི་ཧཱུྃ་ལས་འོད་འཕྲོས། སངས་རྒྱས་ཐམས་ཅད་ཀྱི་ཐུགས་ཀ་ནས། ཡེ་ཤེས་ཀྱི་སྲད་བུ་རྡོ་རྗེ་གསུམ་དང་བཅས་པ་བཛྲ་ས་མཱ་ཛཿ ཛཿ ཧཱུྃཿ བྃ་ཧོཿ ལྷ་གསུམ་ཞུ་བ་ལས་མདུད་པའི་རྣམ་པར་གྱུར། སྐྱེས་པའི་དཔུང་པ་གཡོན་དང༌། བུད་མེད་ཀྱི་གཡས་སུ་བཅིངས། འདིའི་གནས་སྐབས་ཀྱི་དགོས་པ་ཁམས་བྱང་ཆུབ་ཀྱི་སེམས་འཕོ་བའི་བར་ཆད་མཐའ་དག་བསྲུང་བ་དང༌། མཐར་ཐུག་གི་དགོས་པ་སྐུ་གསུང་ཐུགས་རྡོ་རྗེའི་རང་བཞིན་དུ་སངས་རྒྱས་ནས་བདུད་ཀྱིས་མི་ཚུགས་པའོ། །ཞེས་བརྗོད། བཅུ་བཞི་པ་ཁྱོར་ཆུ་སྦྱིན་པ་ནི། དྲི་བཟང་དང་སྦྱར་བའི་ཆུ་འདི་ཉིད་ཕྱག་གཡས་གཡོན་གང་རུང་གི་ཁྱོར་བར་བཟེད་དེ་ཞལ་དུ་བཞེས་ཏེ་ཕྱིར་འཕོ་བས་ངག་གི་ཉེས་སྒྲིབ་ཐམས་ཅད་བྱང་ཞིང་དག་པར་གྱུར་པའི་མོས་པ་མཛོད། ཅེས་པའི་མཐར། ༀ་ཧྲཱིཿ བི་ཤུདྡྷ་དྷརྨཿ སརྦ་པཱ་པཾ་ནིཥྩ་ཨ་སྱ་ཤོ་དྷ་ཡ་སརྦ་བི་ཀལྤཱ་ན་ཨ་པཱ་ན་ཡ་ཧཱུྃ། ཞེས་ལན་གསུམ་གྱིས་ཁྱོར་ཆུ་སྦྱིན། དེས་ནི་གནས་སྐབས་ཀྱི་དགོས་པ་ཁ་དག་པ། ངག་སྒྲིབ་སྦྱོང་བ། རྨི་ལམ་གསལ་པོར་འབྱུང་བ་གསུམ་དང༌། མཐར་ཐུག་གི་དགོས་པ་རང་ཉིད་འཚང་རྒྱ་བའི་ཚེ་ན་སྐུ་གསུང་ཐུགས་ཀྱི་དག་པ་གསུམ་འཐོབ་པའོ། །བཅོ་ལྔ་པ་ཀུ་ཤ་སྦྱིན་པ་ནི། དྷཱིཿ ལས་བྱུང་བའི་ཀུ་ཤ། ༀ་ཨཱཿ བཛྲ་དྷྲིཀ་ཧཱུྃ་ཞེས། ལག་པ་གཡས་སུ་བྱིན་ཏེ་སྔས་ཀྱི་དོན་དང༌། ཧཱ་ལས་བྱུང་བའི་ཀུ་ཤ་ༀ་ཨཱཿ ཁཾ་ཝཱི་ར་ཧཱུྃ་ཞེས། ལག་པ་གཡོན་དུ་བྱིན་ཏེ་སྟན་གྱི་དོན་དུ་ཟུང་ཞིག །འདིའི་གནས་སྐབས་ཀྱི་དགོས་པ་ཀུ་ཤ་ འདི་དག་བྱེད་ཀྱི་རྩ་གཙང་ཞིང་དགེ་བ་ཡིན་པས་རྨི་ལམ་མི་འཁྲུལ་བ་དང་བར་ཆད་ཐམས་ཅད་སྲུང༌། མ་འོངས་པར་རང་ཉིད་འཚང་རྒྱ་བའི་ཚེ་ཀུ་ཤའི་གདན་རྩོལ་མེད་དུ་འབྱུང་བའི་རྟེན་འབྲེལ་བསྒྲིགས་པའོ། །བཅུ་དྲུག་པ་ཆོས་བཤད་པ་ནི། དེ་ནས་ཕྱིར་མི་ལྡོག་པ་ཟབ་མོའི་ཆོས་བཤད་པ་ནི། རྒྱུད་ལས་གསུངས་པ་འདི་ལ་གསན་པས་ཁྱབ་པར་གདའ། འཇིག་རྟེན་དུ་ནི་སོགས་བརྗོད་ལ་མཐར། ཞེས་གསུངས་པའི་དོན་ཐུགས་ལ་ངེས་པས་གསང་སྔགས་ཀྱི་ཐེག་པ་རྙེད་དཀའ་ཞིང༌། རྙེད་ན་ཕན་ཡོན་ཆེན་པོ་དང་ལྡན་པ་དང༌། དེ་ལྟར་རྙེད་པ་ལ་སྤྲོ་བ་རྒྱ་ཆེན་པོ་བསྐྱེད་མཛོད། བཅུ་བདུན་པ་གཟེངས་བསྟོད་པ་ནི། ནངས་པར་དཀྱིལ་འཁོར་ཆེན་པོ་མཐོང་བར་འགྱུར་བས་དགའ་བ་རྒྱ་ཆེན་པོ་གྱིས་ལ། ཀུ་ཤའི་གདན་ལ་སེང་གེའི་ཉལ་སྟབས་དང་དགེ་བའི་སེམས་ཀྱིས་ཉོལ་ཞིག །རྨི་ལམ་ཅི་མཐོང་བ་དེ་ཡང་ནངས་པར་ང་ལ་ལེགས་པར་སྨྲོས་ཤིག །ཅེས་བརྗོད་ལ་སློབ་མ་རྣམས་རང་གནས་སུ་བཏང་ངོ༌། །གསུམ་པ་ལྷག་གནས་མཇུག་གི་བྱ་བ་ནི། སྟ་གོན་གྱི་དཀྱིལ་འཁོར་ནམ་མཁར་འདེགས་པའི་སྔགས་རྒྱ་སོགས་དང་མཆོད་བསྟོད་གསོལ་གདབ་བཅས་དཀྱིལ་ཆོག་ལྟར་བྱའོ། །དེ་ནས་ཚོམ་བུ་སོགས་བསྡུས་ལ་རས་བྲིས་ཀྱི་དཀྱིལ་འཁོར་བཀྲམ། དཀྱིལ་འཁོར་ལྔ་པོའི་དབུས་སུ་མཉྫའི་སྟེང་དུ་སྔར་སྟ་གོན་བྱས་པའི་བུམ་པ་ལྔ་པོ་ཕྱོགས་མ་ནོར་བ་དགོད། གཙོ་བུམ་ཁར་དུང་ཆུ་གཟུངས་རྡོར་བཅས་དང༌། ལས་བུམ་བྱང་དུ་བཞག །དབང་ཆས་གཞན་གང་བདེར་བཞག་ཆོག་ཀྱང་ཀར་ལུགས་ཕྱག་བཞེས་ལྟར་ན་དཀྱིལ་འཁོར་གྱི་ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། མདུན་དུ་རྡོར་དྲིལ་ལྷན་ཅིག་བཅིངས་པ་རྣམས་དང༌། ཁ་ཊྭཱཾ་ག་ལ་ཌཱར་དྲིལ་བཏགས་པ། གྲི་གུག་ཐོད་པ་དངོས་སམ་ཙཀླི། གསང་དབང་ཐོད་ཆང༌། རིག་ཙཀ་རྣམས་ཀྱང་ཅི་བདེར་བཞག །རྒྱབ་ཕྱོགས་སུ་འབུལ་གཏོར་ལྔ་ཚོམ། སྲུང་མའི་གཏོར་འབུལ་བཅས་བཀོད། གཞུང་གསལ་ཕྱོགས་མཚམས་བརྒྱད་དུ་རྒྱལ་མཚན་བརྒྱད་དང་མཆོད་པའི་བུམ་པ་བརྒྱད་ཀྱང་དེ་མཉམ་བཀྲམ། མཆོད་པ་ལྷ་སྟ་གོན་སྐབས་བཤད་པ་ལྟར་དགོས་པས་ཆུ་བཞིའི་སྣོད་དུང་ཞལ་སོགས་བཞི་མདུན་ངོས་སུ་བཞག །མེ་ཏོག །སྤོས། མར་མེ། དྲི་ཆབ། ཞལ་ཟས་བཅས་ཉེར་སྤྱོད་ལྔ་ཚར་སུམ་ཅུ་སོ་བདུན་གྱིས་དཀྱིལ་འཁོར་གྱི་མཐའ་བསྐོར། རྗེས་གནང་ཆས། མིག་ཐུར། མེ་ལོང༌། དྲིལ་བུ། མདའ་གཞུ། འཁོར་ལོ། དུང༌། པུ་སྟི་རྣམས་ཀྱང་སྣོད་གཅིག་ཏུ་ལོགས་གང་བདེར་བཞག །གཞན་ཡང་སྔོན་འགྲོ་གཏོར་མ། ཕྱི་རོལ་གཏོར་མ། ཚོགས་ཀྱི་ཡོ་བྱད། དཀྱིལ་འཁོར་གྱི་མདུན་དུ་ནང་མཆོད་བདུད་རྩི་བཤམ། སྒྲུབ་དཀྱིལ་ལ་དགོས་པའི་ཡོ་བྱད་གཞན་རྣམས་ཀྱང་འཚོག་པར་བྱའོ། །དེ་ནས་བརྒྱུད་པའི་གསོལ་འདེབས་སྔོན་དུ་འགྲོ་བས་དཀྱིལ་ཆོག་ནས་འབྱུང་བ་བཞིན་སྦྱོང་བ། ཁྲུས་གསོལ། བགེགས་བསྐྲད་པ་རྣམས་བྱ། མཆོད་པ་བྱིན་རླབས། སྒྲུབ་ཐབས་ལྟར་སྐྱབས་འགྲོ་ནས་བརྩམས་བདག་བསྐྱེད་བསྡུ་ལྡང་གི་བར་བདག་བསྐྱེད་རྫོགས་པར་བསྒོམ། དཀྱིལ་ཆོག་ལྟར་དཀྱིལ་འཁོར་བསྐྱེད། གཟེངས་བསྟོད། སྒྲུབ་པ་ལྔ་ནས་བརྩམས་ཏེ་བཟླས་པ་མཆོད་བསྟོད་ཀྱི་བར་རྒྱས་པར་བཏང༌། འདས་གཏོར་སྒྲུབ་ཐབས་ལྟར་འབུལ། མྱུར་མཛད་མགོན་པོ། མཁའ་འགྲོ་སྡེ་ལྔ། འབྱུང་པོ་ཐམས་ཅད་པའི་གཏོར་མ་རྣམས་ནང་གཏོར་དུ་འབུལ། ཕྱི་རོལ་དུ་ཕྱིན་ལ་ཕྱོགས་བཞི་དབུས་ལྔའི་གཏོར་མ་བཏང༌། ནང་དུ་ཕྱིན་ལ་སྐོར་བ་དང་གསོལ་གདབ་བྱས་ལ་བདག་འཇུག་རྫོགས་པར་བླང༌། དཀྱིལ་འཁོར་ཡོལ་བས་བསྒྲིབ་བོ། །གཉིས་པ་སློབ་མ་ལ་དབང་བསྐུར་བ་ནི། སློབ་མ་རྣམས་སྒོ་དྲུང་དུ་འདུས་ལ་ལས་བུམ་གྱི་ཆུས་ཁྲུས་བྱ། ཕྱག་བཅས་གྲལ་དུ་འཁོད་ལ་མེ་ཏོག་བཀྲམ་བསྡུ་བྱ། སེམས་བསྐྱེད་གསལ་གདབ། དེ་ལ་སྐབས་སུ་བབ་པ་རྒྱུད་ལུང་མན་ངག་ཡིད་ཆེས་ཀྱི་ཚད་མ་དང་ལྡན་ཅིང༌། གྲུབ་ཐོབ་བརྒྱུད་པ་བར་མ་ཆད་པའི་སྙན་ནས་སྙན་དུ་བྱོན་པའི་བཅོམ་ལྡན་འདས་རྒྱུད་སྡེ་ལྔའི་དཀྱིལ་འཁོར་དུ་དབང་བསྐུར་བར་བྱེད་པ་ལ། བདག་བསྐྱེད་སྔོན་དུ་འགྲོ་བས་མདུན་བསྐྱེད་དཀྱིལ་འཁོར་སྒྲུབ་ཅིང་མཆོད་པ། ཕྱི་ནང་གི་གཏོར་ཆོག་བཏང་བ། བདག་ཉིད་འཇུག་པ་རྣམས་སྔོན་དུ་གྲུབ་ནས་སློབ་མ་རྣམས་ཀྱི་ངོ་སྐལ་དུ་གྱུར་པ། ལྷ་དང་སྐལ་པ་མཉམ་པའི་ཆེད་དུ་དཀྱིལ་འཁོར་དུ་འཇུག་པའི་ཆོ་ག་དང༌། ཞུགས་ནས་མངོན་པར་དབང་བསྐུར་བའི་ཆོ་ག་གཉིས་ཡོད་པ་ལ། ཐོག་མར་བླ་མ་དང་དཀྱིལ་འཁོར་གྱི་གཙོ་བོར་བཅོམ་ལྡན་འདས་རྒྱུད་སྡེ་ཆེན་པོ་ལྔའི་ལྷ་ཚོགས་ཐ་མི་དད་པའི་དྲུང་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་མཎྜལ་འབུལ་དུ་གཞུག །དེ་ནས་ཁྱེད་རང་རྣམས་ཀྱི་ཕྱག་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛད་པར་ཞུ། དགའ་ཆེན་ཁྱོད་བདག་སྟོན་པ་སྟེ། །སོགས་སྟ་གོན་སྐབས་ལྟར་ལན་གསུམ། སླར་ཡང་ཁྱད་པར་གྱི་གསོལ་བ་འདེབས་པ་འདིའི་རྗེས་ཟློས། སངས་རྒྱས་ཀུན་གྱི་སོགས་ལན་གསུམ། དེ་ལྟར་གསོལ་བ་བཏབ་པ་ལ་གནང་བ་སྦྱིན་པ་ནི། དེ་བཞིན་གཤེགས་པ་སོགས་ལན་གཅིག །ཁྱེད་རང་རྣམས་དཀྱིལ་འཁོར་གྱི་ཤར་གྱི་སྒོ་ཕྱེས་ཏེ་ནང་དུ་ཞུགས་ནས་ཤར་གྱི་ལྷ་རྣམས་ལ་གནས་པར་མོས་ལ། ཐལ་མོ་གནས་གསུམ་དུ་སྦྱར་བས་དཀྱིལ་འཁོར་གྱི་ལྷ་ལ་སྔགས་འདིའི་རྗེས་ཟློས་དང་བཅས་ཏེ་ཕྱག་མཛོད་ཅིག །ༀ་ན་མ་སྟེ་ཧཱུྃ། ན་མཿ མེ་ཧཱུྃ། ན་མོ་ན་མཿ ཧཱུྃ། རྒྱུད་སྡེ་ལྔའི་ལྷ་ཚོགས་རྣམས་ཀྱི་ཞབས་ལ་བཏུད་པའི་ཕྱག་བྱས་པས་ཤིན་ཏུ་མཉེས་པར་མོས་མཛོད། སྒོ་འདི་ཉིད་ནས་ཐོན་ཏེ་གཡས་སྐོར་གྱིས་ལྷོ་ཡི་སྒོ་ཕྱེས་ཏེ་སོགས་གོང་གིས་འགྲེས་ཏེ། ལྷོ་དང༌། ནུབ་དང༌། བྱང་རྣམས་ནས་ཕྱག་བྱས་ཏེ། གཡས་སྐོར་གྱིས་ཕྱིན་ཏེ་ལྷ་རྣམས་ལ་འཁོད་པར་མོས་ལ། སྟ་གོན་སྐབས་ལྟར་མཚམས་སྦྱོར་བཅས་བདུན་རྣམ་དག་བྱ། ཟབ་མོའི་དཀྱིལ་འཁོར་དུ་གཞུག་པ་ལ་རིགས་དང་སྐལ་བ་ཤེས་དགོས་པས། རིགས་ཀྱི་བུ་ཁྱོད་གང་ལ་དགའ། ཞེས་དྲིས་པས་ལན་བཏབ་པར་མོས་ལ་འདིའི་རྗེས་ཟློས། སྐལ་པ་བཟང་ལ་བདག་དགའོ། །ཞེས་དང༌། སྐལ་བཟང་དེས་ཁྱོད་ཅི་ཞིག་བྱ། ཞེས་དྲིས་པའི་ལན་དུ། སངས་རྒྱས་མཆོག་འདོད་དམ་ཚིག་ཡིན། ཞེས་ལན་བཏབ། གདོང་གཡོགས་སྦྱིན་པ་ནི། སྔོན་ཆད་རྒྱུད་སྡེ་ལྔའི་དཀྱིལ་འཁོར་དུ་མ་ཞུགས་པའམ། ཞུགས་ཀྱང་མཚོན་བྱ་དོན་གྱི་དཀྱིལ་འཁོར་མ་མཐོང་བས་བསྐྱར་ནས་འཇུག་པའི་མཚོན་བྱེད་དུ་རས་ཡུག་དམར་པོ་ཁ་ཚར་མ་ཉམས་པ་རེས་གདོང་གཡོགས་བཅིངས་པའི་མོས་པ་མཛོད། ༀ་ཙཀྵུ་བྷནྡྷ་ཝཱ་ར་མ་ཎ་ཡེ་ཧཱུྃ། ཞེས་གདོང་གཡོགས་དམར་པོ་སྦྱིན། དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་དུ་མི་བཏུབ་པས་ཕྱག་རྟེན་མཚོན་བྱེད་དུ་ཨུ་དུམྦ་ར་སོགས་མཆོག་གི་ མེ་ཏོག་སྣ་ལྔའི་ཕྲེང་བ་ཐལ་མོ་སྦྱར་བའི་བར་དུ་བཅུག་ནས་སྙིང་གར་ཐོགས་པར་མོས་ཤིག །ༀ་ཨཱཿ ཁཾ་ཝཱི་ར་ཧཱུྃ། ཞེས་མེ་ཏོག་གཏད། སྔགས་ཀྱི་ཐུན་མོང་མ་ཡིན་པའི་སེམས་བསྐྱེད་པའི་སླད་དུ་སྔོན་གྱི་དེ་བཞིན་གཤེགས་པ་སྲས་དང་བཅས་པ་སྔགས་ཀྱི་སྒོར་སྤྱད་པ་སྤྱོད་པ་རྣམས་ཀྱིས་སྟོང་ཉིད་སྙིང་རྗེའི་སྙིང་པོ་ཅན་བདེ་བ་ཆེན་པོའི་བདག་ཉིད་དུ་ཐུགས་བསྐྱེད་པ་དེ་བཞིན་དུ་བདག་གིས་ཀྱང་ཐམས་ཅད་རྣལ་འབྱོར་དང་བདེ་བ་ཆེན་པོར་སེམས་བསྐྱེད་པར་བགྱིའོ་སྙམ་པས་ཐལ་མོ་སྦྱར་བས་འདིའི་རྗེས་ཟློས་མཛོད། ༀ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། སློབ་དཔོན་གྱིས་མེ་ཏོག་དང་བཅས་པའི་རྡོ་རྗེ་སློབ་མའི་སྙིང་གར་བཞག་ལ། སེམས་བསྐྱེད་པ་དེ་བརྟན་པར་བྱ་བའི་མོས་པ་མཛོད། སུ་ར་ཏེ། ནས། ཡ་ཐཱ་སུ་ཁཾ། སློབ་དཔོན་གྱི་ཕྱག་གི་རྡོ་རྗེ་ལ་འཇུས་ཏེ་མདུན་དུ་ཞུགས་པར་མོས་ཤིག །ཛཿ ཧཱུྃཿ བྃ་ཧོཿ ཨཱ་ཁཾ་ཝཱི་ར་ཧཱུྃ། ཞེས་བརྗོད་ལ་ཡོལ་བ་བསལ། དེ་ནས་ཡེ་ཤེས་པ་དབབ་པའི་སྔོན་འགྲོ་དམ་བཞག་བཞི་རིམ་པར་བྱ་བ་ཡིན་ཏེ། ཐོག་མར་ལྷའི་དམ་ཚིག་བསྒྲག་པ་ནི། རྡོ་རྗེ་མགོར་བཞག་ལ། འདི་ནི་དམ་ཚིག་རྡོ་རྗེ་སྟེ། །སོགས་བརྗོད། དེ་ནས་ཉེས་དམིགས་ཀྱི་སྒོ་ནས་དམ་ལ་བཞག་པ་ནི། སྙིང་གར་རྡོ་རྗེ་བཞག་ལ། ཧེ་རུ་ཀ་དཔལ་སོགས་བརྗོད། ཕན་ཡོན་ཉེས་དམིགས་གཉིས་ཀའི་སྒོ་ནས་དམ་ལ་བཞག་ཅིང༌། དམ་ཚིག་རྡོ་རྗེའི་ཆུ་སྦྱིན་པ་ནི། དུང་ཆུ་སྦྱིན་ལ། འདི་ནི་ཁྱོད་ཀྱི་སོགས་བརྗོད། རྡོ་རྗེ་སློབ་དཔོན་གྱི་བཀའ་གཉན་པའི་སྒོ་ནས་དམ་ཚིག་བསྒྲག་པ་ནི། རྡོ་རྗེ་སྤྱི་བོར་བཞག་ལ། དེང་ནས་བཟུང་སྟེ་སོགས་བརྗོད། དེ་རྣམས་ཀྱིས་དཀྱིལ་འཁོར་ཕྱིའི་འཇུག་པ་རྣམས་སོ། །ནང་འཇུག་གི་དངོས་གཞི་ཡེ་ཤེས་པ་དབབ་པ་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས༑ དེ་བཞིན་གཤེགས་པ་སོགས་ལན་གསུམ། སློབ་དཔོན་གྱིས་རྡོ་རྗེ་རྩེ་གཅིག་པའི་ཕྱག་རྒྱ་སློབ་མའི་སྙིང་གར་གཏད་ལ། འདི་ནི་ཡེ་ཤེས་རྡོ་རྗེ་སོགས་བརྗོད། དེ་ནས་ལྷག་པའི་ལྷ་ལ་གསོལ་བ་གདབ་པ་འདིའི་རྗེས་ཟློས། དཔའ་བོ་དང་རྣལ་འབྱོར་མ་སོགས་ལན་གསུམ། ཁྱེད་རང་རྣམས་ལུས་ཀྱི་གནད་དྲང་པོར་བསྲང༌། ངག་གནད་སྲོག་རྩོལ་ཁ་སྦྱར་དུ་འཆིང༌། སེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་རྩེ་གཅིག་ཏུ་སྒོམས་ཤིག །ཁྱེད་རྣམས་འོད་དཔག་མེད་དམར་པོ་སོགས་དམིགས་པ་སྤྲོས། བྱིན་འབེབས་ཀྱི་སྤོས་སྦྱོར་བདུག །རོལ་མོའི་སྒྲ་དྲག་ཏུ་བྱས་ལ་བྱིན་འབེབས་སྔགས་ལན་མང་དུ་བརྗོད། དེ་ནས་བདེན་སྟོབས་བརྗོད་པ་ནི། རྡོར་དྲིལ་བཅས། ཨ་ཁཾ། ཡང་དག་པ་ཡི་སོགས་བརྗོད། དེ་ནས་སྔར་ནས་འབྲེལ་བའི་ལྷའི་རིགས་བརྟག་པའི་སླད་དུ་མེ་ཏོག་འབུལ་བ་ནི། སྔར་བྱིན་པའི་མེ་ཏོག་གི་ཕྲེང་བ་ལས་མ་ཉམས་པའི་མེ་ཏོག་གཅིག་གི་ཕྲེང་བར་མོས་ཏེ་དཀྱིལ་འཁོར་དབུས་ལ་འདོར་བར་མོས་ཏེ་སྔར་ནས་ལས་ཀྱིས་འབྲེལ་བའི་རིགས་ཀྱི་ལྷ་གང་ཡིན་པ་ལ་ཕོག་པར་ཤོག་ཅིག་སྙམ་དུ་ལྟོས་པ་མེད་པར་ཚོམ་བུའི་དཀྱིལ་འཁོར་དུ་དོར་བ་དང་ལྷན་ཅིག་འདིའི་རྗེས་ཟློས་མཛོད། སྔོན་ནས་བསྒྲུབས་པའི་སོགས་བརྗོད་དུ་གཞུག །ཁྱོད་རང་མེ་ཏོག་དཀྱིལ་འཁོར་གྱི་ དབུས་སུ་ཕོག་པའི་གཙོ་བོའི་རིགས་ཡིན་ནོ། །ཞེས་པ་ལྟ་བུ་ཕྱོགས་དང་རིགས་མེ་ཏོག་གང་ལ་ཕོག་པར་བསྒྱུར། དེ་ལྟར་ཕུལ་བའི་མེ་ཏོག་དེ་ཉིད་སླར་ཁྱོད་རང་རྣམས་ཀྱི་སྤྱི་བོར་བཅིངས་པའི་མོས་པ་མཛོད། སངས་རྒྱས་ཀུན་གྱི་སོགས་བརྗོད་ལ་མེ་ཏོག་སླར་སྤྱི་བོར་བཅིང༌། མིག་དབྱེ་བ་ནི། སློབ་མའི་མིག་ཏུ་ༀ་ཡིག་རེ་རེ་གསལ། མ་རིག་པའི་སྒྲིབ་གཡོགས་ཇི་མཆིས་པ་ཐམས་ཅད་མིག་དར་དང་ལྷན་ཅིག་ཏུ་བསལ་བའི་མོས་པ་མཛོད། ཧེ་རུ་ཀ་དཔལ་སོགས་བརྗོད་ལ༑ རྡོ་རྗེས་མིག་དར་དབྱེ། དེ་ལྟར་མ་རིག་པའི་སྒྲིབ་གཡོགས་བསལ་ནས་ཡེ་ཤེས་དག་པའི་མིག་ཐོབ་པས་དཀྱིལ་འཁོར་གྱི་ལྷ་ཚོགས་རྣམས་མངོན་སུམ་དུ་མཐོང་བར་མོས་ཤིག །དཀྱིལ་འཁོར་བཟང་པོ་འདི་ལ་ལྟོས། །སོགས་བརྗོད། དེ་ནས་ལྷ་ངོ་བོ་རྒྱས་པར་བསྟན་དགོས་པས། མདུན་གྱི་དཀྱིལ་འཁོར་རྡོ་རྗེའི་ས་གཞི་ར་བ་དྲ་བ་སོགས་སྒྲུབ་ཐབས་ཀྱི་མངོན་རྟོགས་ལྟར་ལ། ཨེ་ལས་དང་ཡྃ་ལས་སོགས་ས་བོན་རྣམས་བོར་ཏེ། བ་དན་ལ་སོགས་པས་བརྒྱན་པ། རྩིག་པའི་ཕྱི་རོལ་འགྲམ་སྟེགས་ཞེས་པ་ནས། དེ་རྣམས་ཀྱིས་ཡོངས་སུ་བསྐོར་བའི་གཞལ་ཡས་ཁང་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོ་བའི་སྟེང་དུ། མཚན་ཉིད་ཐམས་ཅད་ཡོངས་སུ་རྫོགས་པའི་གཞལ་མེད་ཁང་དབུས་གཙང་ཕྱུར་བུ་དང་བཅས་པ་ལྔ་ཚོམས་སུ་གནས་པ། རྟ་བབས་དང་བྲལ་བ་རྣམས་སོ། །དེ་རྣམས་ཀྱི་སྟེང་གི་ནམ་མཁའ་ལ། སྣ་ཚོགས་པདྨ་འདབ་མ་བརྒྱད་པ་ནས། ཟླ་བའི་དཀྱིལ་འཁོར་རེ་རེ། དབུས་ཀྱི་གདན་གྱི་སྟེང་དུ། བཅོམ་ལྡན་འདས་དགྱེས་མཛད་རྡོ་རྗེ་སྐུ་མདོག་མཐིང་ནག་ནས། འོད་ཀྱིས་ཁྱབ་པར་མཛད་པའོ། །ཞེས་པའི་བར་གཙོ་བོ་མཚོན་ཆ་ཅན་སྒྲུབ་ཐབས་བཞིན་བསྐྱེད། འདབ་མ་བརྒྱད་ལ་ཤར་དུ་གཽ་རཱི་ནག་མོ་ནས། སའི་དཀྱིལ་འཁོར་འཛིན་པ། ལྷ་མོ་ཐམས་ཅད་ཀྱང་སྤྱན་གསུམ་གསུམ་ནས། དབུས་ན་བཞུགས་པའོ། །ནང་གི་གཞལ་ཡས་ཁང་དབུས་མའི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོ་བའི་སྟེང་དུ། སྣ་ཚོགས་པདྨ་འདབ་མ་བརྒྱད་དང་བཅས་པའི་ལྟེ་བ་ལ་ནས། གར་གྱི་མེ་དཔུང་འབར་བའི་དབུས་ན་བཞུགས་པའོ། །གཞལ་ཡས་ཁང་ཤར་མའི་ནང་ལེའུ་ཚེ་དགུ་པ་ནས། གདུག་པ་ཅན་ཚར་གཅོད་པའོ། །གཞལ་ཡས་ཁང་ལྷོ་མའི་ནང་གི་ལྷ་སྣམ་ནས། གྲི་གུག་ཐོད་པ་བསྣམས་པའོའི་བར། གཞལ་ཡས་ཁང་ནུབ་མའི་དབུས་སུ། པདྨ་དམར་པོ་ནས། གང་བའི་བུམ་པ་བཞིའོ། །གཞལ་ཡས་ཁང་བྱང་མའི་དབུས་ཀྱི་ལྟེ་བ་ལ་སྣ་ཚོགས་རྡོ་རྗེ་ནས། གང་བ་བཞི་དང་བཅས་པའོ། །ཕྱིའི་གཞལ་ཡས་ཁང་གི་ཤར་སྒོར་རྟ་གདོང་མ་ནས། དྲིལ་བུ་འཛིན་པ། སྒོ་སྐྱོང་མ་བཞི་ཆར་ཡང་སྤྱན་གསུམ་དང་ལྡན་ཞིང༌། སྟག་གི་པགས་པའི་ཤམ་ཐབས་ཅན། དབུ་སྐྲ་དམར་ནས། དབུས་ན་བཞུགས་པའོ། ། དཀྱིལ་འཁོར་གྱི་སྟེང་གི་ནམ་མཁའ་ལ་སོགས་བརྗོད། དེ་དག་གིས་དཀྱིལ་འཁོར་དུ་ཕྱི་ནང་གི་འཇུག་པའི་རིམ་པ་རྣམས་སོ། །ཞུགས་ནས་མངོན་པར་དབང་བསྐུར་བ། བུམ་དབང༌། གསང་དབང༌། ཤེར་དབང༌། དབང་བཞི་པ་ རྣམས་རིམ་བཞིན་འབྱུང་བའི་དང་པོ་བུམ་དབང་ལ་རྡོ་རྗེ་སློབ་མའི་དབང་དང་སློབ་དཔོན་གྱི་དབང་གཉིས་སུ་ཡོད་པ་ལས། ཐོག་མར་རྡོ་རྗེ་སློབ་མའི་དབང་བསྐུར་ཞུ་བའི་ཡོན་དུ་དམིགས་ཏེ་མཎྜལ་ཕུལ་མཛོད། ཞེས་འབུལ་དུ་གཞུག །གསོལ་བ་འདེབས་པ་འདིའི་རྗེས་ཟློས། ཧེ་རུ་ཀ་དཔལ༴ སོགས་ལན་གསུམ། དབང་གི་སྔོན་དུ་འགྲོ་བ་བགེགས་སྦྱོང་བའི་སླད་དུ་སློབ་དཔོན་གྱི་ཐུགས་ཀ་ནས་སྤྲུལ་པའི་ཁྲོ་བོ་དང་མཚོན་ཆ་མེ་དཔུང་གི་ཚོགས་དཔག་ཏུ་མེད་པ་སྤྲོས་པས་དབང་གི་ཡེ་ཤེས་སྐྱེ་བ་ལ་བར་དུ་གཅོད་པའི་བགེགས་ཐམས་ཅད་རྒྱང་རིང་དུ་བསྐྲད་ཅིང་བསྒོ་བ་མི་ཉན་པ་ཐམས་ཅད་རྡུལ་ཕྲན་བཞིན་དུ་བརླག་པར་མོས་ཤིག །ༀ་སུམྦྷ་ནི་སོགས་དྲག་ཏུ་བརྗོད་ཅིང་ཡུངས་ཐུན། གུ་གུལ་དུད་པ། རོལ་མོ་དྲག་ཏུ་བྱའོ། །དེ་ནས་མདུན་དུ་ཏིལ་དང་མེ་ཆུ་བཤམ། བདག་གཞན་སེམས་ཅན་ཐམས་ཅད་ཀྱིས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྙིང་གར་ཡི་གེ་བྃ་གྱི་རྣམ་པར་གནས་པ༑ ལྟེ་བའི་གཏུམ་མོ་འབར་བའི་འོད་ཟེར་གྱིས་དེད་དེ། སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་པ་མདུན་གྱི་ཏིལ་ལ་ཐིམ་པར་མོས། ཞེས་བརྗོད་ལ་སྣ་བུག་གཡས་ནས་ཏིལ་ལ་རླུང་འབུད་དུ་གཞུག །བསང་སྦྱང༌། འབར་བའི་མེའི་ནང་དུ་ཁྲོ་བོ་རྡོ་རྗེ་མཁའ་འགྲོ་རྡོ་རྗེ་དང་དྲིལ་བུ་འཛིན་པ་ཞལ་གདངས་པའོ། །ༀ་བཛྲ་ཌཱ་ཀི་ཁ་ཁ་ཁཱ་ཧི་ཁཱ་ཧི། སརྦ་པཱ་པཾ་ད་ཧ་ན་བྷསྨི་ཀུ་རུ་སྭཱ་ཧཱ། ལན་གསུམ་བརྗོད་ལ། ཏིལ་གཡས་གཡོན་དུ་བསྐོར་ནས། གཡས་སུ་མེ་དང་གཡོན་དུ་ཆུ་དོར་བས། རྡོ་རྗེ་མཁའ་འགྲོའི་ཞལ་དུ་གསོལ་བ་དང༌། རྒྱ་མཚོ་ཆེན་པོར་སྐྱུར་བར་བསམ། མཐར་མེ་ཡང་ཆུ་ནང་དུ་བླུགས་སོ། །དེ་ནས་དབང་དངོས་ལ་དང་པོར་རིག་པའི་དབང་ལྔ་བསྐུར་བ་ལ་ཐོག་མར་མི་བསྐྱོད་པ་ཆུ་དབང་བསྐུར་བའི་སླད་དུ་དམིགས་པ་འདི་བཞིན་དུ་མཛོད། བསང་སྦྱང༌། སློབ་མ་དང་དབང་རྫས་རྣམ་རྒྱལ་བུམ་ཆུ་སོགས་བརྗོད་པའི་སྐབས་ལས་རྡོར་གྱིས་བུམ་པ་བཞི་པོའི་བུམ་ཆུ་གཙོ་བུམ་དུ་བསྡུ། དེ་ཉིད་ཐོགས་ལ། སློབ་དཔོན་གྱིས་ཁྲུས་སྔོན་དུ་འགྲོ་བས་བུམ་དབང་བསྐུར། བརྟན་བྱེད་ཆུ་དབང༌། རྡོ་རྗེའི་རིགས་ཀྱི་ལྷ་ཚོགས་དཔག་ཏུ་མེད་པ་བྱུང་ནས་ཁྱེད་རང་རྣམས་ལ་ཐིམ་པ་ལ་ཉེར་སྤྱོད་ལྔས་མཆོད་ཅིང་བསྟོད་པར་བྱས་པའི་མོས་པ་མཛོད། ལས་རྡོར་གྱིས་སློབ་མ་མཆོད་པ་བཏེགས། ༀ་བཛྲ་པུཥྤེ་ནས། ནཻ་ཝིདྱ་ཨཱཿ ཧཱུྃ་བར་དང༌། རོལ་མོའམ་དྲིལ་བུ་དཀྲོལ། མི་བསྐྱོད་པ་ནི་སོགས་ཤོ་ལོ་ཀ་གཅིག་གིས་བསྟོད། དེ་ལྟར་ཁྱོད་ལ་ཆུའི་དབང་བསྐུར་བས་སོགས་ནས། མངོན་དུ་གྱུར་པ་ཡིན་ནོ། །ཞེས་པའི་བར་དག་པ་བརྗོད། དེ་ནས་རིན་ཆེན་འབྱུང་ལྡན་དབུ་རྒྱན་གྱི་དབང་གི་སླད་དུ་དམིགས་པ་འདི་བཞིན་མཛོད། བསང་སྦྱང༌། སློབ་མ་དང་དབང་རྫས་དབུ་རྒྱན་སོགས་ནས་དག་པ་བརྗོད་པའི་བར་གཞུང་ལྟར་བྱ། འདི་ཕྱིན་ཆད་ལ་དེས་འགྲེས་ཏེ། འོད་དཔག་མེད་རྡོ་རྗེའི་དབང་གི་སླད་དུ་དམིགས་པ་འདི་བཞིན་མཛོད། བསང་སྦྱང༌། སློབ་མ་དང་དབང་རྫས་རྡོ་རྗེ་སྟོང་པའི་ངང་ལས་སོགས་ནས་དག་པ་བརྗོད་པ་ཡན་སྔར་ལྟར་བྱ། དེ་ནས་དོན་ཡོད་གྲུབ་པ་དྲིལ་བུའི་དབང་གི་སླད་དུ་དམིགས་པ་འདི་བཞིན་མཛོད། བསང་སྦྱང༌། སློབ་མ་དང་དབང་རྫས་ དྲིལ་བུ་སྟོང་པའི་ངང་ལས་སོགས་ནས་དག་པ་བརྗོད་པའི་བར་སྔར་ལྟར་བྱ། དེ་ནས་རྣམ་པར་སྣང་མཛད་མིང་གི་དབང་གི་སླད་དུ་དམིགས་པ་འདི་བཞིན་མཛོད། བསང་སྦྱང༌། སློབ་མ་དང་དབང་རྫས་སོགས་ནས་དག་པ་བརྗོད་པའི་བར་དང༌། འདི་ནི་སངས་རྒྱས་ཐམས་ཅད་ཀྱི་སོགས་བརྗོད། གཉིས་པ་རྡོ་རྗེ་སློབ་དཔོན་གྱི་དབང་བསྐུར་ཞུ་བའི་ཡོན་དུ་དམིགས་ཏེ་མཎྜལ་ཕུལ་མཛོད། ཞེས་འབུལ། གསོལ་བ་འདེབས་པ་འདིའི་རྗེས་ཟློས་མཛོད། འཁོར་ལོ་ཕྱིར་མི་ལྡོག་པའི་སོགས་ལན་གསུམ། ཐོག་མར་བརྟུལ་ཞུགས་ཀྱི་དབང་གི་རྗེས་སུ་གནང་བའི་སླད་དུ་དམིགས་པ་འདི་བཞིན་མཛོད། དཀྱིལ་འཁོར་གྱི་ཤར་ཕྱོགས་སུ་སོགས་ནས། ཁ་ཊྭཱཾ་ག་སོགས་གཏད་པའི་བར། དེ་ནས་རྡོར་དྲིལ་དང་དམ་ཚིག་གསུམ་སྦྱིན་པ་ལ་དམིགས་པ་འདི་བཞིན་མཛོད། སློབ་དཔོན་གྱི་ཕྱག་གི་རྡོར་དྲིལ་བསང་སྦྱང༌། སྟོང་པའི་ངང་ལས་སོགས་ནས། ཤིས་བརྗོད། ཆུ་དབང༌། སུ་པྲ་ཏིཥྛས་བརྟན་པའི་བར་གཞུང་ལྟར་བརྗོད། དེ་ནས་རྗེས་གནང་རྣམས་རིམ་པར་སྦྱིན་པ་ལ་ཐོག་མར་སྒེག་སོགས་བརྒྱད་ཀྱིས་མཆོད་པར་བྱས་པའི་མོས་པ་མཛོད། སློབ་དཔོན་གྱིས་སོ་སོའི་ཕྱག་རྒྱ་བྱས་ལ། སྒེག་དང་བཅས་པའི་ཕྲེང་བ་འཕང༌། སོགས་རྫོགས་པར་བརྗོད། མིག་ཐུར་གྱི་རྗེས་གནང་ནི། པྲཾ་ལས་བྱུང་བའི་ཤེས་རབ་ཀྱི་རང་བཞིན་ཅན་གྱི་ཐུར་མས་ཁྱེད་རང་རྣམས་ཀྱི་དེ་བཞིན་ཉིད་མཐོང་བ་ལ་བསྒྲིབ་པའི་མ་རིག་པའི་ལིང་ཐོག་བསལ་བར་མོས་ཤིག །མིག་ཐུར་གྱིས་མིག་དབྱེ་ཚུལ་བྱས་ལ། ཇི་ལྟར་མིག་མཁན་རྒྱལ་པོ་སོགས་བརྗོད། མེ་ལོང་གི་རྗེས་གནང་ནི། ཆོས་ཅན་གྱི་ སྣང་བ་ཐམས་ཅད་མེ་ལོང་ནང་གི་གཟུགས་བརྙན་ལྟར་ངེས་པའི་སྒོ་ནས་སེམས་ཅན་གྱི་དོན་གྱིས་ཤིག །ཅེས་ཤེས་པའི་སླད་དུ་ཨཱཿ་ལས་སྐྱེས་པའི་མེ་ལོང༌། ཆོས་རྣམས་གཟུགས་བརྙན་ལྟ་བུ་སྟེ། །སོགས་བརྗོད་ལ་མེ་ལོང་བསྟན། དྲིལ་བུའི་རྗེས་གནང་ནི། ཨ་ལས་བྱུང་བའི་དྲིལ་བུ་འདིའི་སྒྲས་མཚོན་ཏེ་ཆོས་ཐམས་ཅད་གྲག་སྟོང་སྐྱེ་བ་མེད་པའི་མཚན་ཉིད་ཅན་དུ་རྟོགས་པར་གྱིས་ཤིག །ཐམས་ཅད་ནམ་མཁའི་སོགས་བརྗོད་ལ་དྲིལ་བུ་དཀྲོལ། མདའ་གཞུའི་རྗེས་གནང་ནི། རང་དོན་ཡིད་བྱེད་ཀྱི་བློ་སྤངས་པའི་སླད་དུ་ཧོ་ལས་བྱུང་བའི་མདའ་གཞུ། ཐབས་ཀྱི་མདའ་དྲུག་ཤེས་རབ་ཀྱི་གཞུ་ལ་བཀང་སྟེ་ཕྱོགས་བཞི་དང་སྟེང་འོག་ཏུ་འཕངས་པས་བདུད་བཞི་དང༌། ཉན་རང་གི་སེམས་ཡིད་ལ་བྱེད་པ་བཅོམ་པ་ཡིན་སྙམ་དུ་མོས་ཤིག །དེ་བཞིན་གཤེགས་པ་སོགས་བརྗོད་ལ་མདའ་གཞུ་གཏད་ཅིང་འཕང་བའི་ཚུལ་བྱར་གཞུག །དེ་ནས་ཆོས་བཤད་པའི་རྗེས་སུ་གནང་བ་ནི་རྐང་འོག་གཉིས་སུ་འཁོར་ལོ་བྱིན་པར་མོས་ཤིག །ༀ་བཛྲ་ཧེ་ཏུ་མཾ་སོགས་བརྗོད་ལ་འཁོར་ལོ་རྐང་འོག་ཏུ་གཞུག །ཆོས་ཀྱི་དུང་ཆེན་འབུད་པར་གྱིས་ཤིག་ཅེས་པའི་དོན། ༀ་བཛྲ་བྷཱ་ཥ་རཾ་སོགས་བརྗོད་ལ་ལག་གཡས་སུ་དུང་གཏད། རྒྱུད་ལུང་མན་ངག་འདིའི་སྒོ་ནས་ཆོས་ཤོད་ལ་སེམས་ཅན་གྱི་དོན་གྱིས་ཤིག་ཅེས་པའི་བརྡ་ལ་རྒྱུད་ཀྱི་གླེགས་བམ་གཏད་པའི་མོས་པ་གྱིས། ༀ་མ་ཧཱ་དྷརྨ་སོགས་བརྗོད་ལ་གླེགས་བམ་གཏད། ཚུལ་ཇི་ལྟ་བུས་ཆོས་འཆད་ན་སྐབས་སོ་སོར་བབ་པའི་རིགས་ལྔའི་ཏིང་ངེ་འཛིན་གྱི་ ཕྲིན་ལས་རྣམས་སྒྲུབས་ཤིག་ཅེས་པའི་དོན་དུ་རིགས་ལྔའི་རྗེས་སུ་གནང་བ་ནི། འཁོར་ལོ་སོགས་རིགས་ལྔའི་ཕྱག་མཚན་རིམ་པར་གཏད་ལ། འཇིག་རྟེན་ཁམས་ནི་སོགས་བརྗོད། སེམས་ཅན་གྱི་དོན་གང་ལ་གང་འཚམས་ཀྱིས་བྱ་བའི་སླད་དུ་ཕྲིན་ལས་བཞི་དང་གྲུབ་པ་བརྒྱད་ཀྱི་རྗེས་སུ་གནང་བར་མོས་ཤིག །མཆོག་སྦྱིན་གྱི་ཕྱག་རྒྱ་བསྟན་ལ། ཞི་དང་རྒྱས་དང་སོགས་བརྗོད། རང་ཉིད་ལྷག་པའི་ལྷའི་ང་རྒྱལ་གྱིས་འདོད་ཡོན་ལྔ་ཚོགས་སུ་རོལ་པའི་རྗེས་སུ་གནང་བ་བྱིན་པར་མོས། བདག་ཉིད་སངས་རྒྱས་སོགས་བརྗོད། སྣང་སྟོང་དབྱེར་མེད་ཀྱི་ལྷ་སྒོམ་པའི་རྗེས་སུ་གནང་བ་བྱིན་པར་མོས། འདིར་འཛོམས་ན་རྒྱུད་སྡེ་གཙོ་བོའམ་ཙཀླི་སོགས་བསྟན། མ་འཛོམས་ཀྱང་ཆོག །འདོད་ཆགས་བྲལ་བ་སོགས་བརྗོད། གསུང་གསང་སྔགས་ཀྱི་རྗེས་གནང་སྩལ་བར་མོས་ཤིག །མེ་ཏོག་འཐོར་ལ། རིགས་ལྔ་འདི་ལ་སོགས་ལན་གསུམ། ཁྱེད་རང་རྣམས་ཀྱིས་སློབ་དཔོན་ལ་མེ་ཏོག་འབུལ་བཞིན་པས་འདིའི་རྗེས་ཟློས། རིགས་ལྔ་བདག་ལ་སོགས་ལན་གསུམ། སླར་མེ་ཏོག་འཐོར་ལ། སྔགས་ཀྱི་དངོས་གྲུབ་སོགས་བརྗོད། དེ་ལྟར་དབང་གིས་རྒྱུད་སྨིན་པའི་སློབ་མ་རྣམས་བྱང་ཆུབ་མཆོག་ཏུ་ལུང་བསྟན་པ་ཡིན་ཏེ། སློབ་དཔོན་གྱིས་སྣམ་སྦྱར་མནབ། གྲྭ་གཉིས་རི་དྭགས་ཀྱི་རྣ་བ་ལྟར་བྱས་ཏེ་ཕྱག་གཡོན་པས་ཐུགས་ཀར་བཟུང་གཡས་མི་འཇིགས་པའི་རྒྱས་རྡོར་དྲིལ་བཟུང་ལ། སློབ་དཔོན་བཅོམ་ལྡན་འདས་སོགས་བརྗོད། སྣམ་སྦྱར་ཕུད་ལ་སྐྱབས་སྦྱིན་གྱི་རྒྱས། ཁྱེད་རང་རྣམས་དེང་ནས་བཟུང་སྟེ་སྲིད་པའི་ངན་འགྲོ་ལས་རྟག་ཏུ་བཏོན་པར་དབུགས་དབྱུང་བར་མོས་ཤིག །གསང་ཆེན་མཆོག་གི་སོགས་བརྗོད། དེ་ནས་བརྟུལ་ཞུགས་ཀྱི་རྗེས་གནང་བྱིན་པར་མོས་ཤིག །དབང་རྫས་རྡོ་རྗེས་བསང་སྦྱང༌། སྟོང་པའི་ངང་ལས་སོགས་གཞུང་ལྟར་བརྗོད་ལ་གཏད། དེ་ནས་རྟེན་བརྟེན་པའི་དཀྱིལ་འཁོར་བ་རྣམས་ཀྱི་དག་པ་བརྗོད་པ་འདི་ལ་གསན་འཚལ། སེམས་ཅན་དོན་ཕྱིར་སེམས་བསྐྱེད་པས་སོགས་དང༌། དེ་ལྟར་ན་རས་བྲིས་ཀྱི་དཀྱིལ་འཁོར་དུ་ཞུགས་སོགས་བུམ་དབང་གི་དག་པའང་བརྗོད། དེ་ནས་དབང་གོང་མ་གསུམ་ཞུ་བའི་ཡོན་ཐུན་མོང་དུ་དམིགས་ཏེ་མཎྜལ་ཕུལ། ཐུན་མོང་དུ་གསོལ་བ་འདེབས་པ་འདིའི་རྗེས་ཟློས། བདག་ནི་འཁོར་བར་བྱིང་བ་སོགས་ལན་གསུམ། སློབ་དཔོན་བཅོམ་ལྡན་འདས་སོགས་ནས། ཡབ་ཀྱི་གསང་གནས་ཧཱུྃ་སོགས་མཁའ་གསང་བྱིན་རླབས་སྒྲུབ་ཐབས་ལྟར་ལ། ཐུགས་ཀར་རྗེས་སུ་ཆགས་པའི་མེས་སོགས་ནས། ཨཏྨ་ཀོ྅ཧཾ་བར་བརྗོད། གཉིས་པ་གསང་བའི་དབང་བསྐུར་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། ༀ་བཅོམ་ལྡན་ཞི་བ་ཆེན་པོ་སོགས་ལན་གསུམ་བརྗོད། དེ་ནས་དམིགས་པ་འདི་བཞིན་དུ་མཛོད། ༀ་ཨཱཿ ཧཱུྃ་སོགས་ནས་ཛཿ ཧཱུྃཿ བྃ་ཧོཿ འི་བར། ལུས་ཀྱི་དཀྱིལ་འཁོར་མ་མཐོང་བའི་བརྡར་གདོང་གཡོགས་འཆིང་མཛོད། ཨཱ་ཁཾ་ཝཱི་ར་ཧཱུྃ་གིས་མིག་དར་བཅིང༌། བདེན་གཉིས་དབྱེར་མེད་དུ་སེམས་བསྐྱེད་པར་མོས་ལ་འདིའི་རྗེས་ཟློས། ༀ་བཛྲ་ཡོ་ག་སོགས། སློབ་དཔོན་དཀྱིལ་འཁོར་གྱི་གཙོ་བོའི་མཁའ་གསང་ནས་བྱོན་པའི་དཀར་དམར་བྱང་ཆུབ་སེམས་ཀྱི་རྒྱུན་ཁྱེད་རང་ རྣམས་ལ་བྱིན་པར་མོས་ཤིག །བདུད་རྩི་སྦྱིན་ལ། ཇི་ལྟར་བཅོམ་ལྡན་སོགས་སྔགས་བཅས་བརྗོད། ཁྱེད་རང་རྣམས་ཀྱིས་སྔགས་འདིའི་རྗེས་ཟློས་དང་བཅས་བདུད་རྩི་མྱོང་ཞིག །ཨ་ཧོ་མ་ཧཱ་སུ་ཁཾ། དེ་བཞིན་དུ་ཤེས་རབ་རྡོ་རྗེ་སོགས་ཀྱིས་བདུད་རྩི་སྦྱིན་པའི་ཚིགས་བཅད་བཅས་ལན་གཅིག་བསྐྱར་ཏེ་བྱིན། བྱང་སེམས་དཀར་དམར་གྱིས་ལུས་ཀྱི་རྩ་གནས་ཐམས་ཅད་ལ་ཁྱབ་རང་བཞིན་བརྒྱད་ཅུའི་རྟོག་པ་དབྱིངས་སུ་ཐིམ། གསལ་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་པར་མོས་ལ་མཉམ་པར་ཞོག་མཛོད། དར་ཅིག་བཞག །ལུས་ཀྱི་དཀྱིལ་འཁོར་མཐོང་བའི་བརྡར་གདོང་གཡོགས་སོལ་མཛོད། ༀ་ཨཱཿ ཧཱུྃ་ཞེས་གདོང་གཡོགས་བཀྲོལ། དེ་ལྟར་ཀུན་རྫོབ་བྱང་ཆུབ་སེམས་ཀྱི་སོགས་རྟོགས་པ་བརྗོད། གསུམ་པ་ཤེས་རབ་ཡེ་ཤེས་ཀྱི་དབང་བསྐུར་ཞུ་བའི་ཕྱིར་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། དུས་གསུམ་སངས་རྒྱས་སོགས་ལན་གསུམ། བྷ་གའི་དཀྱིལ་འཁོར་མ་མཐོང་བའི་བརྡར་གདོང་གཡོགས་འཆིང་མཛོད། སྔགས་བཅས་མིག་དར་བཅིང༌། མཚན་ཉིད་ཐམས་ཅད་ཡོངས་སུ་རྫོགས་པའི་སོགས་ནས། དངོས་གྲུབ་མེད། བར་བརྗོད་ལ་རིག་ཙཀ་གཏད། དེ་ལྟར་བྱིན་པས་ལྷ་མོ་དེས་ཀྱང་འདི་སྐད་དྲིས་པའི་མོས་པ་མཛོད། བདུད་རྩི་བཟའ་དང་སོགས་ནས། བདེ་བྱེད་སྨྲོས། བར་བརྗོད། སྤྲོ་བས་ལན་འདེབས་པར་མོས་ལ་འདིའི་རྗེས་ཟློས། ལྷ་མོ་ཅི་ཕྱིར་ནས། འོ་བྱེད་བར་བརྗོད། ལྷ་མོ་དགྱེས་ནས་འདི་སྐད་གསུངས་ཏེ་པང་དུ་བྱོན་པར་མོས་ཤིག །ཨ་ཧོ་ང་ཡི་སོགས་བརྗོད། དེ་ནས་ཁྱེད་རང་རྣམས་དགྱེས་མཛད་རྡོ་རྗེ་མཚོན་ཆ་ཅན་སོགས་དང༌། མཁའ་གསང་བྱིན་རླབས་གོང་ལྟར་བྱ། སློབ་དཔོན་གྱི་ཐུགས་ཀའི་སོགས་ནས། བརྟན་པར་གྱུར་པར་མོས་ལ་མཉམ་པར་ཞོག་མཛོད། བྷ་གའི་དཀྱིལ་འཁོར་མཐོང་བའི་བརྡར་གདོང་གཡོགས་སོལ་མཛོད། ༀ་ཨཱཿ ཧཱུྃ། གདོང་གཡོགས་བཀྲོལ། དེ་ལྟར་བྷ་གའི་དཀྱིལ་འཁོར་སོགས་རྟོགས་པ་བརྗོད། བཞི་པ་ཆེན་པོ་ཚིག་དབང་རིན་པོ་ཆེ་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། ཁྱོད་ཞབས་པདྨོའི་སོགས་ལན་གསུམ། རྡོ་རྗེའི་ཚིག་འདིའི་དོན་རྗེས་སུ་དྲན་པས་གང་དུའང་རྣམ་པར་མི་རྟོག་པའི་ཡེ་ཤེས་ཆེན་པོའི་དབྱིངས་སུ་བལྟར་མེད་པའི་ཚུལ་གྱིས་ལྟོས་ལ་མཉམ་པར་ཞོག་མཛོད། ཡེ་ཤེས་འདི་ནི་སོགས་ནས། སྐད་ཅིག་དེ་ལ་སྒོམ། བར་བརྗོད་ལ་ཅུང་ཟད་མཉམ་པར་བཞག །ཐུང་མོང་མ་ཡིན་པའི་དམ་ཚིག་བསྒྲགས་པ་འདི་ལ་གསན་འཚལ། དེ་ལྟར་ན་དོན་དམ་བྱང་ཆུབ་སེམས་ཀྱི་སོགས་རྟོགས་པ་བརྗོད། དེ་དག་རྣམས་ཀྱིས་རིན་ཆེན་རྒྱ་མཚོའི་རྒྱུད་ཀྱི་དགོངས་དོན་སློབ་དཔོན་རྡོ་རྗེ་གདན་པའི་ཐུགས་དམ་མཁས་གྲུབ་ཁྱུང་པོ་རྣལ་འབྱོར་ལས་བརྒྱུད་པའི་རྒྱུད་སྡེ་ལྔའི་དཀྱིལ་འཁོར་ཆེན་པོར་དབང་བསྐུར་བ་ལེགས་པར་གྲུབ་པ་ཡིན་པས་དེ་དག་གི་སྐབས་སུ་ཐོབ་ཅིང་ཁས་བླངས་པའི་རྩ་བ་དང་ཡན་ལག་གི་དམ་ཚིག་དང་སྡོམ་པ་མཐའ་དག་ཚུལ་བཞིན་དུ་བསྲུང་བའི་མོས་པས་འདིའི་རྗེས་ཟློས། གཙོ་བོས་ཇི་ལྟར་སོགས་གསུམ། དབང་བསྐུར་རྫོགས་པར་ ཐོབ་པའི་གཏང་རག་གི་ཡོན་དུ་དམིགས་ཏེ་མཎྜལ་ཕུལ། ལུས་ལོངས་སྤྱོད་དགེ་བའི་རྩ་བ་དང་བཅས་པ་ཐམས་ཅད་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ཏེ་འབུལ་ན་ཆ་ཤས་ནས་བཞེས་ཏེ་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་སོགས་གསུམ། རྣམ་དཀར་གྱི་དགེ་རྩ་མཐའ་དག་འཁོར་གསུམ་རྣམ་པར་མི་རྟོག་པའི་དབྱིངས་སུ་བསྔོ་བས་རྒྱས་འདེབས་པ་དང་འདི་ཉིད་ཀྱི་སྒོ་ནས་ཀྱང་རང་གཞན་གྱི་དོན་རྒྱ་ཆེན་པོ་བསྒྲུབ་པར་མཛོད་ཅིག །བསོད་ནམས་འདི་ཡིས་སོགས་བསྔོ་སྨོན་ཤིས་བརྗོད་གང་འོས་བྱའོ། །དེ་ནས་རྗེས་ཀྱི་ཆོ་ག་ནི། ཚོགས་མཆོད་འདོད་ན་བདེ་མཆོག་ལྷ་ལྔ་ལྟར་བྱ། གཞུང་དུ་མ་བཤད་པས་མ་གྲུབ་ཀྱང་ཆོག །དཀྱིལ་ཆོག་གི་གཤམ་ནས་འབྱུང་བ་ལྟར་མཆོད་པ་རྣམས་ཁ་གསོས་ལ་བྱིན་བརླབ། མཆོད་བསྟོད་བྱ། བཅོམ་ལྡན་འདས་དཔལ་དགྱེས་མཛད་རྡོ་རྗེའི་སོགས་བརྗོད་ལ་དངོས་གྲུབ་ཞུ། ཡིག་བརྒྱ་ལན་ཉེར་གཅིག་བཟླ། བཟོད་གསོལ་བྱ། དཀྱིལ་འཁོར་རས་བྲིས་སྐབས། ཕྱོགས་བཅུ་ན་བཞུགས་པའི་སོགས་སྤྱི་ལྟར་བརྗོད་ལ་ཡེ་ཤེས་པ་རྣམས་རྟེན་དང་དཀྱིལ་འཁོར་ལ་བརྟན་བཞུགས་བྱ། དམ་ཚིག་པའི་དཀྱིལ་འཁོར་ༀ་ཨཱཿ ཧཱུྃ་གིས་རང་གི་སྙིང་གར་ཐིམ་པར་གྱུར། ཅེས་མོས། སྔར་ཕུར་གདབ་བྱས་ན། ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནི་སརྦ་ཨརྠ་ས་དྷ་ནི་སྭཱ་ཧཱ། ཞེས་སྤྱན་མའི་སྔགས་ཀྱིས་ཕུར་བུ་རྣམས་དབྱུང༌། སྔགས་དེ་ཉིད་ཀྱིས་ཕུར་ཁུང་དགང༌། སྐྱེ་ཞིང་སྐྱེ་བར་རིགས་མཆོག་ཏུ། །སོགས་ཐུན་མོང་མ་ཡིན་པའི་བསྔོ་སྨོན་རྒྱས་པ་དང་ཤིས་བརྗོད་བྱས་རོལ་མོ་སྙན་པར་དཀྲོལ་བཞིན་མེ་ཏོག་གི་ཆར་དབབ་བོ། །མི་ཕྱེད་རྡོ་རྗེ་ བཞི་ཡི་ཡེ་ཤེས་ནི། །མི་ཟད་རྒྱན་འཁོར་ལྔ་ཡི་དཀྱིལ་འཁོར་དུ། །ཤར་བའི་དབྱངས་དང་མཉམ་པར་ཉིད་གྱུར་ནས། །སྲིད་འགྲོར་དེ་ཡི་ཕྱག་རྒྱས་ཐེབས་པར་ཤོག །འདིའང་རྗེ་བཙུན་རིན་པོ་ཆེ་ནས་མཛད་པའི་སྒྲུབ་དཀྱིལ་གྱི་ཞབས་འདེགས་དང༌། སྔ་ཕྱིར་སྐུལ་བ་པོ་མང་ཞིག་གི་སླད་དུ་ཀརྨ་བཀའ་བརྒྱུད་ཀྱི་གྲལ་མཐར་འཁོད་པ་ཀརྨ་ངག་དབང་ཡོན་ཏན་རྒྱ་མཚོའམ་བློ་གྲོས་མཐའ་ཡས་པའི་སྡེས་རང་ལོ་གྱ་བདུན་པར་དཔལ་སྤུངས་ཡང་ཁྲོད་ཤྲཱི་དེ་བཱི་ཀོ་ཊི་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པའི་ཡི་གེ་པ་ནི་གམ་དུ་འཁོད་པ་བློ་གསལ་གསང་སྔགས་བསྟན་འཛིན་ནས་བགྱིས་པ་དགེ་ལེགས་འཕེལ།། །།