DNZ-10-THA-018

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 10, Text 18, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །རྒྱལ་བ་ཡང་དགོན་པའི་ཁྱད་ཆོས་རི་ཆོས་ཡོན་ཏན་ཀུན་འབྱུང་གི་སྙིང་པོ་མ་དྲུག་གི་གདམས་ཟབ་བཞུགས་སོ། །

རྗེ་དུས་གསུམ་སངས་རྒྱས་ཀྱི་ངོ་བོ། སྐུ་བཞིའི་དབང་ཕྱུག ཕན་བདེའི་འབྱུང་གནས། ནོར་བུ་རིན་པོ་ཆེ་དབང་གི་རྒྱལ་པོ་ལྟ་བུ་དེ་ལ་དད་པའི་ཡིད་ཀྱིས་གུས་པའི་ལུས་བཏུད་སྙན་པའི་ངག་བརྗོད་དེ། ཞབས་ལ་སྤྱི་བོས་ཕྱག་འཚལ་ལོ། །ཁྱེད་ཀྱི་གསུང་ངག་བདུད་རྩིའི་ཐིག་པ་འདི་ཕྱོགས་ཐམས་ཅད་དུ་ཉི་ཟླ་ལྟར་རྒྱས་པར་གྱུར་ཅིག །རི་ཆོས་ཡོན་ཏན་ཀུན་འབྱུང་ནས་གདམས་ངག་གནད་ཀྱི་སྙིང་པོ་དྲུག་ཅེས་བྱ་བ་སྟོན་པ་ཞལ་གདམས་བརྗོད་པས་འཇིགས་ནས་ཡི་གེར་འགོད་པས་གནང་བར་ཞུའོ། །དེ་ལ་མ་དྲུག་ནི། དྲག་རླུང་གནད་ལྔ་མ། འཕོ་བ་ཧཱུྃ་དམར་མ། སྟོང་ཉིད་རྡོ་རྗེའི་ཚིག་དྲུག་མ། གསང་སྤྱོད་རྨང་ལམ་མ། ནད་འདོན་ཧཱུྃ་ཆོས་མ། འཛག་སྲུང་བཀའ་རྒྱ་མའོ། །དང་པོ་དྲག་རླུང་གནད་ལྔ་མ་ལ། སྤྱིར་རྡོ་རྗེའི་ཐེག་པ་ཐབས་ཀྱིས་ཁྱད་པར་དུ་བྱས་པ་ཡིན། ཐབས་དེ་ཡང་རྡོ་རྗེའི་ལུས་ལ་རླུང་སེམས་ཀྱི་རྟེན་འབྲེལ་གནད་དུ་བསྣུན་པས། ལྷན་ཅིག་སྐྱེས་པའི་ཡེ་ཤེས་རང་དབང་མེད་པར་མངོན་དུ་བྱེད་པ་སྟེ། དཔེར་ན་ལུས་ཀྱིས་ཆང་འཐུངས་ན་སེམས་ར་རོ་ནས་འགྲོ་བ་དང་འདྲ་བ་ཡིན། དེ་ལ་གནས་པ་རྩ་གཡོ་བ་རླུང་བཀོད་པ་བྱང་ཆུབ་ཀྱི་སེམས་གསུམ་གྱི་ནང་ན་ཡང་རླུང་མཆོག་ཏུ་གྱུར་པ་སྟེ། རྩ་ཁྱིམ་དང་འདྲ། ཐིག་ལེ་ནོར་དང་འདྲ། རླུང་བདག་པོ་དང་འདྲ་བ་ཡིན། དེ་ཡང་དགོངས་པ་ལུང་སྟོན་གྱི་རྒྱུད་ལས། རླུང་ཞེས་བྱ་བས་ལས་ཀུན་བྱེད། །རྣམ་ཤེས་བཞོན་པའི་རྟ་ཕོ་སྟེ། །ལྔ་ཡི་བདག་ཉིད་བཅུ་མིང་ཅན། །རྟེན་འབྲེལ་བཅུ་གཉིས་ཞེས་གྲགས་པ། །ངོ་བོ་རྣམ་པ་གསུམ་དུ་འགྱུར། །རླུང་ཞེས་བྱ་བའི་བྱང་ཆུབ་སེམས། །རྣམ་ཤེས་ཀུན་གྱི་གཙོ་འདི་ཡིན། །ཅེས་གསུངས་པས། རླུང་འབྱུང་བ་ལྔའི་བདག་ཉིད་མིང་གི་དབྱེ་བ་བཅུ། དུས་སྦྱོར་གྱི་ཁྱིམ་བཅུ་གཉིས་སུ་འཕོ་བ། ངོ་བོ་འབྱུང་འཇུག་གནས་གསུམ་གྱི་ རང་བཞིན་ཅན། ཕྱི་ནང་མེད་པར་འཁོར་འདས་ཀྱི་ཆོས་ཐམས་ཅད་རླུང་རྣམ་པར་ཤེས་པའི་རང་བཞིན་ཡིན་ནོ། །དེ་ཕ་བླ་མ་དམ་པའི་གདམས་ངག་གི་ལུགས་སུ་བྱེད་པ་ལ། ལམ་འབྲས་བུ་དང་བཅས་པའི་གདམས་ངག་ནས། རླུང་ལ་འཇུག་པ་བཞི། དབྱེ་བ་བཅུ། ཉམས་སུ་བླང་བའི་གནད་བདུན། མན་ངག་གི་གནད་བདུན་ཅུ་ཐམ་པ་ཞེས་གསུངས་པ་དང༌། གཞན་ཡང་རླུང་ལ་འཇམ་རླུང་དྲག་རླུང་གཉིས། དང་པོ་ལ་དགང་བ་དབྱུང་བ་མེད་པ་དང༌། དགང་བ་དབྱུང་བ་དང་བཅས་པ་གཉིས། དྲག་རླུང་བུམ་པ་ཅན་དང༌། བུམ་ཅན་མ་ཡིན་པ་གཉིས་སུ་གསུངས་ཡོད། དེ་ལས་གཞན་པའི་རླུང་སྦྱོར་ལ། དགྲམ་པ། བཏང་བ། བཟུང་བ། དགང་བ་དང་། ཁ་སྦྱོར། རླུང་རྒྱ་ཡན། ཕོ་རླུང་གདུལ་བ། མོ་རླུང་སྦྱར་བ། མ་ནིང་གི་རླུང་བཙན་ཐབས་སུ་དགག་པ་ལ་སོགས་པ་མང་དུ་གསུངས་པས། འདིར་དེ་རྣམས་ཀྱི་གནད་དྲིལ་བ་རླུང་གི་མྱོང་བས་གྲུབ་པ་སྟེ། གཙོ་ཆེར་འཕགས་པ་ཡབ་སྲས་དང་བི་པའི་རྗེས་སུ་འབྲངས་པ། རླུང་དྲག་པོ་རྡོ་རྗེ་ཐོད་སྦྱོར་ཉམས་སུ་བླང་བའི་གནད་ལྔ་དང་བཅས་པ་སྟོན་ཏེ། དེ་ལ་རྡོ་རྗེ་ཐོད་སྦྱོར་ཞེས་པ་ནི། རྡོ་རྗེ་རྣམ་པ་ཀུན་ལྡན་གྱི་སྟོང་པ། ཐོད་པ་ནི་ཀ་པཱ་ལ་སྟེ་བདེ་བ་སྐྱོང་བ། སྦྱོར་བ་བདེ་སྟོང་མྱུར་དུ་བསྐྱེད་པའམ་སྦྱོར་བར་བྱེད་པ་སྟེ། རྡོ་རྗེ་ཐེག་པའི་རླུང་སྦྱོར་ཐུན་མོང་མ་ཡིན་པ་ཞེས་པའི་སྒྲ་དོན་ནོ། །དེ་ཡང་རླུང་སྒོམ་པ་ཕལ་ཆེར་མུ་སྟེགས་ཀྱི་རླུང་སྦྱོར་ཡོད། ཉན་ཐོས། སེམས་ཙམ་དབུ་མའི་རླུང་སྦྱོར་ལ་སོགས་པ་ཡོད་དེ། རྡོ་རྗེ་ཐེག་པའི་རླུང་སྦྱོར་གསང་དབང་གི་མངོན་པར་རྟོགས་པ་ཕྱིན་ཅི་མ་ལོག་པ་རྒྱུད་ཀྱི་དགོངས་པ་སྒོམ་ཤེས་པ་ཉུང་བར་འདུག །གོང་མ་རྣམས་ཀྱིས་སེམས་ཟིན་པའམ། ཐུན་མོང་གི་དྲོད་རྟགས་སྣ་རེ་ཙམ་འབྱུང་གི། རླུང་བཅུ་གཅིག་ཏུ་མི་ཟིན་པས་རྩ་མདུད་མི་འཇིག་ཅིང༌། ཡེ་ཤེས་སྐྱེ་བར་མི་ནུས་སོ། །དེས་ན་རླུང་བཅུ་གཅིག་ཏུ་མི་ཟིན། འབྱུང་འཇུག་གནས་གསུམ་ལམ་དུ་མི་སློང་བའི་རླུང་སྦྱོར་ཟབ་ཀྱང༌། རྡོ་རྗེ་ཐེག་པའི་རླུང་སྦྱོར་མ་ཡིན་ནོ། །དེ་ལ་རླུང་རྡོ་རྗེ་ཐོད་སྦྱོར་ལ་ཁྱད་པར་གྱི་བྱེད་ཆོས་གསུམ། ལུས་གནད་ཀྱི་ཁྱད་པར་རྩ་སྟེང་འོག་ཁ་སྦྱོར་གྱི་གནད་ཀྱིས་ཡུལ་ཉི་ཤུ་རྩ་བཞིར་འཐེམས་པ། རླུང་སྦྱོར་གྱི་ཁྱད་པར་རླུང་ཕྱི་ནང་དབྱེར་མེད་ཀྱི་གནད་ཀྱིས་རླུང་བཅུ་གཅིག་ཏུ་ཟིན་པ། དམིགས་པའི་ཁྱད་པར་དངོས་པོའི་གནས་ལུགས་དང་མཐུན་པས་རླུང་སེམས་གཅིག་ཏུ་འདྲིལ་བའོ། །དང་པོ་ནི་འཁྲུལ་འཁོར་མེ་ཐབ་ཀྱི་དྲུག་ཆིངས་ཡིན་ཏེ། དང་པོ་རྐང་པ་རེ་མིག་ལྟར་བསྣོལ་བ་ལ། གཡས་པ་ཕྱིར་བཏང་གཡོན་པ་ནང་དུ་བཅུག་པའི་རྟིང་པས་བཤང་གཅིའི་བར་བལྟེམས་པས༑ ཡུལ་ཉི་ཤུ་རྩ་བཞིའི་སིནྡྷུ། སུ་ཝརྣ་ཊཱི་པ། སཽ་རཥྚ། པྲེ་ཏ་པུ་རི། གྲ?་ཧ་དེ་བ། ཧི་མཱ་ལ་ཡ། དེ་རྣམས་དབང་དུ་སྡུད་པ་སྟེ། ཡུལ་དེ་རྣམས་ཀྱི་རླུང་འགག །རྩ་སྟེང་འོག་ཁ་སྦྱོར་དུ་འགྲོའོ། །གཉིས་པ་ལག་པ་ཞགས་པ་ ལྟར་བསྡམས་པ་ནི་མཉམ་བཞག་གི་ཕྱག་རྒྱ་ལྟེ་འོག་སོར་གཉིས་སུ་བཙིར་ཏེ་གྲུ་མོ་ཐུར་ལ་བརྒྱངས་པས། ཡུལ་ཉེར་བཞིའི། ནཱ་ག་ར། མ་རུ། ཏྲི་ཤ་ཀུ་ནི། ཀཱ་མ་རཱུ་པ། དེ་རྣམས་དབང་དུ་སྡུད་པ་གོང་བཞིན་ནོ། །གསུམ་པ་མགྲིན་པ་ལྕག་ཀྱུ་ལྟར་དགུག་པ་ནི། མགྲིན་པ་བྲང་ལ་སྒུ་བར་བྱ་སྟེ། རྒྱབ་ཏུ་རྟིང་པར་གོ་འཐེམས་པས་རྩ་ཆུའི་ཁ་འཐེམས་ནས་བདེ་བ་སྐྱེ། བྱང་སེམས་འབེབ་པའི་རྩ་གཡོན་པ་འཐེམས་པས་ཐིག་ལེ་མི་འཛག ། མདུན་དུ་ཨོལ་མདུད་སྦས་པས་སྙིང་ཁའི་རྩ་བ་སིནྟ་ཁ་གྱེན་ལ་བལྟ། མིག་མི་འཛུམ་པར་ཧྲིག་གེར་བལྟ། ལྕེ་ཅུང་ཟད་བཟློག་སྟེ་རྐན་ལ་སྦྱར། ལུས་གནད་དེས་ཡུལ་ཉེར་བཞིའི་སྤྱི་གཙུག་ཛཱ་ལེནྡྷ་ར། ཨར་བུ་ཏ། ཨཽ་ཌཱི་ཡ་ན། གོ་དཱ་བ་རི། དེ་བཱི་ཀོ་ཊི། ཀ་ལིངྐ། ལམྦ་ཀ །དེ་རྣམས་དབང་དུ་བྱེད་པ་གོང་བཞིན་ནོ། །བཞི་པ་དཔུང་པ་རྒོད་གཤོག་ལྟར་བརྒྱངས་པས་ཡུལ་ཉེར་བཞིའི། ཀཉྩི་ཀ། ཨོ་ཊི། མཱ་ལ་བ། དེ་རྣམས་དབང་དུ་སྡུད་པའོ། །ལྔ་པ་ལུས་སེམས་ལི་རི་ལྟར་བསྒྲིམས་པས་ཡུལ་དེ་རྣམས་འཆུན་ཅིང་དབང་དུ་སྡུད་པས་བདེ་དྲོད་མྱུར་དུ་སྐྱེའོ། །དྲུག་པ་རྐེད་པ་མདའ་ལྟར་བསྲང་བས་ཡུལ་དེ་ཐམས་ཅད་དུ་ཡོན་ཏན་བསྐྱེད། ལུས་ཀྱི་རྩ་བྲན་ཐམས་ཅད་ནང་དུ་ཁ་བལྟ། དབུ་མ་ཤིན་ཏུ་དྭངས་པར་འགྱུར་ཏེ། རླུང་རང་གནས་སུ་འཇུག་པའོ། །དེ་ལྟར་འཁྲུལ་འཁོར་མེ་ཐབ་ཀྱི་དྲུག་ཆིངས་དེས། ཡུལ་ཉེར་བཞིའི་རྩ་གཅིག་དངོས་སུ་འཆུན་ཅིང༌། ཀོ་ས་ལ། པུལླི་ར་མ། རཱ་མེ་ཤྭ་རི་གསུམ་ཡང་ཤུགས་ཀྱིས་འཆུན་པས། ཡུལ་དེ་རྣམས་སུ་རླུང་འགགས་པས་མི་རྟོག་པ་སྐྱེ། རྩ་སྟེང་འོག་ཁ་སྦྱོར་དུ་འགྲོ། ཁམས་དང་སྙིགས་མ་ཕྱེད་པས་བདེ་བ་སྐྱེ། རྩ་ཁ་བྱེ་བས་དྲོད་སྐྱེ། རྩ་མདུད་འཇིག་པས་འཇིག་རྟེན་པའི་ལམ་གྱི་ཡེ་ཤེས་དང་ཡོན་ཏན་དཔག་ཏུ་མེད་པ་སྐྱེ་བའི་རྟེན་ཏེ། འཁྲུལ་འཁོར་འདི་བཅས་པ་ཙམ་གྱིས་བདེ་དྲོད་འུར་གྱིས་འོང་བ་ཡིན། རླུང་བཅུ་དབང་དུ་འདུས་ཏེ་རྐང་པ་རེ་མིག་ལྟར་བསྣོལ་བས་ཐུར་སེལ་དབང་དུ་སྡུད། ལག་པ་ཞགས་པ་ལྟར་བསྡམས་པས་མཉམ་གནས། མགྲིན་པ་ལྕག་ཀྱུ་ལྟར་བཀུག་པས་གྱེན་རྒྱུ། དཔུང་པ་རྒོད་གཤོག་ལྟར་གདེངས་པས་སྲོག་འཛིན། རྐེད་པ་མདའ་ལྟར་བསྲང་བ་དང༌། ལུས་ལི་རི་ལྟར་བསྒྲིམ་པས་ལས་ཁྱབ་བྱེད་དབང་དུ་སྡུད། དེ་ལྟར་རྩ་བའི་རླུང་ལྔ་དབང་དུ་འདུས་པས། ཡན་ལག་གི་རླུང་ལྔ་དབང་དུ་འདུ་བ་སྟེ། མདོར་ན་ཕ་རྒྱུད་ནས་རླུང་གཙོར་སྟོན། མ་རྒྱུད་ནས་རྩ་གཙོར་སྟོན་པ་སྟེ། དེ་རྣམས་འཁྲུལ་འཁོར་ལུས་གནད་འཐེམས་པ་གཅིག་གིས་དབང་དུ་བྱེད་པ་ལགས། གཞན་ཀུན་ལ་འཁྲུལ་འཁོར་འདི་འོལ་ཚོད་ཙམ་ཡོད་དེ། མིང་རྐྱང་ཙམ་ལས༑ འདི་ལ་གནད་འདི་ཡོད་མེད་པས་ཁྱད་པར་གྱི་ཆོས་སོ། །གཉིས་པ་རླུང་སྦྱོར་གྱི་ཁྱད་པར་ལ། རླུང་ཕྱི་ནང་དབྱེར་མེད་ཅེས་པའི་གནད་འདི་སུས་ཀྱང་གོ་བ་མེད། ཐབས་ལམ་པ་ཐམས་ཅད་རླུང་ཅུང་ཟད་ནང་དུ་ གནས་ན་ཡོན་ཏན་སྐྱེ། དེ་ཀས་ལས་ཟིན་པ་ཚོད། ཕྱི་རུ་སོང་ན་ཡོན་ཏན་ཕྱང་པ་ཚོད་དུ་བྱས་ནས་རྩོལ་བ་ཆེ་ལ་ཡོན་ཏན་ཆུང་བ་ཞིག་བྱེད་པར་འདུག་སྟེ། འདི་ཐམས་ཅད་རླུང་སེམས་དབྱེར་མེད་རླུང་ཕྱི་ནང་དབྱེར་མེད་མ་གོ་བ་ཡིན། འཁོར་འདས་ཀྱི་ཆོས་ཐམས་ཅད་རླུང་རྣམ་པར་ཤེས་པའི་རང་གཟུགས་ཡིན། དེ་ལ་ཕྱི་ནང་དབྱེར་མེད་དེ། ནམ་མཁའ་ཁྱབ་ཚད་རླུང་སེམས་ཀྱིས་ཁྱབ་སྟེ། དེའི་ངོ་བོ་ཡོད་པ་མིན། དེ་ལ་ལུས་སེམས་བེམ་རིག་རྣམ་རྟོག་ཐ་དད་ཕྱི་ནང་འཛིན་པ་ཐམས་ཅད་འཁྲུལ་པའི་སྣང་ངོ་ཡིན་ནོ། །དོན་ལ་ཐ་དད་མེད། དབུ་མར་ཚུད་པ་ཞེས་པ་ཡང་ཕྱི་ནང་མེད་པར་རླུང་སེམས་ནམ་མཁའི་ངོ་བོར་དྭངས་ཏེ་འགྱུ་བ་དང་བྲལ་བ་གཅིག་ཡིན་གྱི། རླུང་ཐམས་ཅད་རྩ་གཅིག་གི་ནང་དུ་བསྟུམས་ནས་སྡོད་པ་ནི་མ་ཡིན་ནོ། །དོན་གྱི་དབུ་མ་ཡང་དེ་ཡིན་ནོ། །དེས་ཕྱི་ནང་གསང་གསུམ་གྱི་རྟེན་འབྲེལ་གྱིས་རྩ་དབུ་མར་ཚུད་པའི་དུས་སུ༑ ཕྱི་ནང་མེད་པར་རླུང་སེམས་ནམ་མཁའི་ངོ་བོར་དྭངས་ཏེ། འབྱུང་འཇུག་གི་རླུང་དང་གཟུང་འཛིན་གྱི་རྟོག་པ་རྒྱུན་ཆད་པའོ། །དེས་དབུ་མར་རླུང་འཇུག །དེས་ནང་དུ་ཟིན་པ་དང་འཇུག་པས། རླུང་ཕྱི་རུ་ཟིན་དང་ནང་དུ་ཟིན་པ་ལ་ཡོན་ཏན་ཁྱད་མེད། བར་དུ་རླུང་འགྱུ་བ་ལ་ཟིན་ཀྱང་ཁྱད་མེད། ཐབས་ཀྱིས་ཟིན་ན་དེ་ཐམས་ཅད་ཡོན་ཏན་མཉམ་པོར་སྐྱེ། སེམས་ཕྱི་རུ་ཟིན་པ་དང་ནང་དུ་ཟིན་པ་དང་འགྱུ་བའི་ཐོག་ཏུ་ཟིན་པ་ རྣམས་ཁྱད་མེད་དེ་མི་རྟོག་པ་མཉམ་པོར་སྐྱེ་བ་ཡིན། དེ་ཐམས་ཅད་རླུང་སེམས་ཕྱི་ནང་དབྱེར་མེད་པ་ཡིན་པའི་ཕྱིར་རོ། །དེས་ན་དཔལ་ཆེན་བི་པས། འབྱུང་བ་ལམ་དུ་བྱེད་པ་ལ་གཏོང་བའི་ཡན་ལག་གསུམ། འཇུག་པ་ལམ་དུ་བྱེད་པ་ལ་དགང་བའི་ཡན་ལག་གཉིས། གནས་པ་ལམ་དུ་བྱེད་པ་ལ་ཁ་སྦྱོར། དེ་ཐམས་ཅད་སྡོམ་པ་ལ་སྲོག་རྩོལ་གྱི་མན་ངག་གསུངས། དུས་འཁོར་ནས་ཀྱང༌། རླུང་སྦྱོར་དྲུག་གསུངས་ཏེ༑ དེ་ཐམས་ཅད་ཡོན་ཏན་མཉམ་པོར་སྐྱེ་བར་བཤད་པ་ཡིན། དེ་ལྟར་ཕྱི་ནང་དབྱེར་མེད་ཀྱི་གནད་ཀྱིས། རླུང་བཅུད་དབང་དུ་བསྡུས་པ་ལ། རླུང་ལ་ཕྲ་བའི་རླུང་དང་རགས་པའི་རླུང་གཉིས། ཕྲ་བའི་རླུང་སེམས་ཀྱིས་ཁྱབ་ཚད་དུ་གསལ་གནས་ཟེར་བ་ཡིན་ལ། ཞེས་པའི་རླུང་ལ་རྩ་བའི་རླུང་ལྔ་ཡན་ལག་གི་རླུང་ལྔ་སྟེ་བཅུ། བུ་ག་དགུའི་རླུང་ལུས་ཀྱི་ཆ་ཤས་ཁྱབ་པར་རྒྱུ་སྟེ། དེ་ཐམས་ཅད་གཅིག་ཏུ་ཟིན་དགོས། དེ་མ་ཟིན་ན་འཁོར་ལོ་ལྔའི་རྩ་མདུད་འཇིག་མི་ནུས། ཡུལ་ཉི་ཤུ་རྩ་བཞིའི་རྩ་མདུད་འཇིག་མི་ནུས། རླུང་འགག་མི་ནུས་ཏེ་ཡེ་ཤེས་མི་སྐྱེའོ། །ད་ལྟ་རླུང་སྒོམ་པ་ཕལ་ཆེར་གྱེན་རྒྱུ་ཕྱིར་མི་རྒྱུ་བ་དང༌། འོག་སྒོ་ལས་མི་བྱེད་པ་ཙམ་ལ་རླུང་སྒོམ་པ་བྱེད་དེ་དོན་མི་འགྲུབ། དེའང་རླུང་དེ་རྣམས་དབང་དུ་སྡུད་པ་ལ་གནད་ལྔ་སྟེ། རླུང་ལྡོག་པ་མི་འབྱུང་བ་འབུད་པའི་གནད། རླུང་རང་གནས་སུ་བཟུང་བ་རྔུབ་པའི་གནད། རླུང་དབང་དུ་བསྡུ་བ་ དགང་བའི་གནད། རླུང་རྩ་མིག་ཏུ་གདབ་པ་གཞིལ་བའི་གནད། རླུང་ཕྱི་ནང་བསྲེ་བ་གཏོང་བའི་གནད་དོ། །རླུང་སྦྱོར་དེ་རྣམས་རྒྱུད་ལས་བཤད་དེ། གདན་བཞི་ལས། རྔུབ་དང་དགང་བ་གཞིལ་བ་དང༌། །མདའ་ལྟར་འཕང་དང་རྣམ་པ་བཞི། །རླུང་སྦྱོར་བ་བཞི་ལྡན་མ་ཤེས་ན། །ཡོན་ཏན་སྐྱོན་དུ་འགྱུར་བ་ཡིན། །ཞེས་པ་དང༌། བརྟག་གཉིས་ལས་ལྟ་སྟང་བཞི་དང་ཕྲིན་ལས་བཞི་ཡང་འགྲུབ་པར་བཤད་ལ། ཐིག་ལེ་དབང་དུ་སྡུད་པ་ལ༑ རྔུབ་པས་བཟུང་བ། དགང་བས་སྐྱིལ་བ། གཏོང་བས་འདྲེན་པ། གཞིལ་བས་དགྲམ་པ་འགྲུབ་པ་སྟེ། མདོར་ན་རླུང་སྦྱོར་འདིར་རྩ་རླུང་ཐིག་ལེའི་ཡོན་ཏན་མཐའ་དག་སྐྱེད་པའོ། །དེ་ལ་དང་པོ་འབུད་པ་ནི། དྲག་པོར་གསུམ་འབུད། འཇམ་ལ་རིང་བ་གསུམ་འབུད། ལུས་གཅུ་ཞིང་གསུམ་འབུད་པ་སྟེ། དེས་རྩ་སྦུབས་ན་རླུང་རོ་ངན་པ་ཡོད་པ་ཐམས་ཅད་སྦྱངས་ནས། སྣོད་བཀྲུ་བཤལ་བྱས་པར་ཟས་བླུགས་པ་ལྟ་བུ་སྟེ། རླུང་རོ་མ་བུས་པར་རླུང་བཀག་ན། དཔེར་ན་འོ་མ་རུལ་པ་ཐིགས་གཅིག་གིས། འོ་མ་ཟངས་གང་བ་འདྲུལ་བ་ལྟར། རྩ་སྦུབས་ཀྱི་རླུང་རོ་ངན་པ་དེས་རླུང་བཀག་པ་དེ་ཐམས་ཅད་དབང་དུ་བྱས་ནས་གེགས་སྐྱོན་དུ་འགྱུར་ལ། དེ་སྦྱངས་པས་རླུང་གི་ནད་ཐམས་ཅད་མི་འབྱུང༌། གཞན་ཡང་དབང་པོ་ཐམས་ཅད་དྭངས། འདུ་བའི་ནད་ཐམས་ཅད་སེལ། ལུས་ཡང་ཞིང་མགྱོགས། ལུས་བཀྲག་མདངས་རྒྱས། གེགས་སྔར་ཡོད་པ་ཐམས་ཅད་ སེལ་བ་སྟེ། རྗེ་ཀོ་བྲག་པའི་གེགས་སེལ་གྱི་གནད་ཐམས་ཅད་གཅིག་ལ་དྲིལ་བའི་རླུང་སྦྱོར་ཡིན་པས། འབུད་པ་དགུའི་གནད་མ་འཆུགས་པ་གལ་ཆེའོ། །གཉིས་པ་རྔུབས་པ་ནི། མགྲིན་པ་ཅུང་ཟད་རྒུ་བས་དྲག་ལ་ སྒྲ་མེད་དུ་ རིང་བ་རྔུབ་ལ། རླུང་གི་ཤུགས་རྫོགས་པ་དང་མཆིལ་མ་ཐིག་གཅིག་དང་སྦྲགས་ལ། མཉམ་བཞག་ཅེར་གྱིས་བསྒྲིམ་སྟེ། ལུས་དྲང་པོར་ལྡིགས་ཀྱིས་བསྐྱུར་ལ་ལྟེ་འོག་ཏུ་ཧྲིལ་གྱིས་གཏོང་བའོ། ། དཔེར་ན་སྦུད་པ་རླུང་གིས་གང་ཡང༌། སེ་ཁར་མ་འདྲིལ་ན་མེ་མི་ཕེར། དེ་བཞིན་དུ་ལུས་རླུང་གིས་གང་ཡང་ལྟེ་འོག་གི་གནས་སུ་མ་འདྲིལ་ན་བདེ་དྲོད་མི་སྐྱེ། གསུམ་པ་དགང་བ་ནི། དེ་ནས་མར་ཙིར་མི་མནོན་པར་རོ་སྟོད་སེང་བྱས་ལ། སོ་བར་བག་ཙམ་བཞག །རླུང་རང་ས་རུ་སེང་ངེ་ཁེགས་པ་ལ་ཁྲིམ་མེ་བསྒྲིམས་ནས། ལྟེ་འོག་ཏུ་ཧྲིལ་གཏོད་པ་ཡིན། མ་བསྒྲིམས་ན་ཆུ་རླུང་སྟོབས་འཕེལ་འགྲོ། འོག་རླུང་ཡང་ལུས་དང་པོ་ཆུས་ཆུས་པ་གསུམ་བྱས་ཏེ་སྲིན་པོའི་ཞལ་ཐེམས་བཏང་ནས་དྲག་ཏུ་འཐེན་འཐེན། རླུང་ཞབས་སོ་ལ་འཇོག་དབུགས་བྱུང་ན་མི་བསྐྱིལ། འོག་རླུང་དང་པོ་ནས་སྡོམ་ན་བླ་མ་དང་གདམས་ངག་གནད་ཅན་མེད་ན་རླུང་ལོག་མང་བ་ཡིན། རྒྱུ་མཚན་རླུང་ཚ་གྲང་གཉིས་རྟ་གཡག་གི་ཚུལ་དུ་ཡོད་པས། དེ་གཉིས་མ་སྙོམས་པ་ལས་གེགས་སྐྱོན་འབྱུང་ལ། སྟེང་རླུང་ཅུང་ཟད་འབྱོངས་ནས་རླུང་བསྡོམས་པས། སྟེང་རླུང་བདེ་གསལ་གྱི་ རང་བཞིན་དྲོད་དུ་སྐྱེས་པ་དང༌། དྲོད་གཉིས་སྙོམ་ནས་གེགས་མི་ལོང་པ་ཡིན་ནོ། །རླུང་སྟེང་འོག་གཉིས་པོ་ཐུབ་པ་དང་དྲག་ཏུ་གཅུན། དེ་ཐུབ་མི་ཐུབ་གཅིག་འཛིན་པ་ཡིན། དེས་རླུང་བཅུ་གཅིག་ཏུ་ཟིན་དགོས་ཏེ༑ ཁྱབ་བྱེད་ཆེད་དུ་ མཉམ་ཟེར་བ་སྣང་། ཟིན་པས་རྩ་རྣམས་ཀྱི་འཕར་བ་སྟོངས་འགྲོ། ཐུར་སེལ་གྱེན་ལ་ལོག་ཅིང་མེ་རླུང་སྟོབས་འཕེལ་བས་བདེ་དྲོད་སྐྱེ། སྲོག་འཛིན་དྭངས་སྙིགས་ཕྱེད་པས་རྣམ་རྟོག་གི་འགྱུ་བ་ཆད། གྱེན་རྒྱུ་གནད་དུ་ཚུད་པས་རླུང་ཚ་གྲང་འདྲེས་ཞིང་དགང་བ་ལ་དབང་ཐོབ། དེའི་སྟོབས་ཀྱིས་ཡན་ལག་གི་རླུང་ལྔ་ཡང་ཟིན་ཏེ། དབང་པོ་རྣམས་ལས་བཤོལ་ནས་ཡུལ་ལ་མི་འཛིན་པར། སྒོ་ལྔ་རྟོག་མེད་དུ་ཧད་ཀྱིས་འགྲོ༑ དེ་ལྟར་རླུང་བཅུ་གཅིག་ཏུ་ཟིན་པའི་རླུང་སྦྱོར་རྡོ་རྗེ་ཐེག་པའི་རྒྱུད་ཀྱི་དགོངས་པ། རླུང་ཕྲ་རགས་ཐམས་ཅད་ཕྱི་ནང་གཉིས་མེད་ཀྱི་གནད་ཀྱིས་ནང་དུ་དབང་དུ་སྡུད་པ་སྟེ། མཐར་ཕྱིན་པའི་ཚེ་ཇི་ཙམ་བཀག་ཀྱང་མི་བདེ་བ་མེད་པ་འབྱུང་ངོ༌། །བཞི་པ་གཞིལ་བ་ནི། དེ་མི་ཐུབ་པ་དང༌། རླུང་གི་དུག་དབྱུང་བ་བྱ་བ་ཅུང་ཟད་ཙམ་བཏང༌། ཡང་རྔུབས་ལ་མནན། དེ་ནི་དཔེར་ན་ཇ་བསྐོལ་བའི་གཞུར་ནས་སྦུ་བར་གཡེང་བ་དེ་ཕྱིར་ཕོ་བ་དང་འདྲ་སྟེ་གནད་ཆེ་བ་ཡིན་ནོ། །དེ་མི་ཐུབ་པ་དང་གཡས་སུ་གཅིག་བཅག །གཡོན་དུ་གཅིག་བཅག །དབུས་སུ་གཅིག་བཅག །ཡང་སེང་གེ་རྩལ་སྤྲུགས་ཀྱིས་འཕར་ཞིང་བཅག་གོ །དེས་ནི་རྩ་རྣམས་ཀྱི་ མདུད་པ་གྲོལ་ཞིང་ཡོན་ཏན་གྱི་རྩ་ཁ་བྱེ་ནས་དབུ་མར་རླུང་མྱུར་དུ་འཇུག་པའི་རླུང་སྦྱོར་རོ། །འཕར་བ་དེས་རླུང་ཐམས་ཅད་རང་སར་ཕེབས་ཏེ་རླུང་མ་ཐུབ་པའི་ལོག་པ་ཐམས་ཅད་མི་འབྱུང་ངོ༌། །ལྔ་པ་བཏང་བ་ནི། ཅུང་ཟད་ནང་དུ་འཐེན་ལ་དྲག་ཏུ་ཤད་ཀྱིས་ལྷག་མ་མེད་པར་བཏང༌། ཕྱི་རུ་གནས་ཚད་ཅིག་བཞག །བཏང་བའི་དུས་སུ་ལྟེ་བ་གུལ་ཙམ་ནང་དུ་འཐེན་ལ། དམིགས་པ་ལྟེ་འོག་ཏུ་གཏད་པ་གལ་ཆེ། དྭངས་མའི་རླུང་ཞབས་འཛིན་པ་གལ་ཆེ། དེ་ནི་རླུང་ཕྲ་རགས་ཐམས་ཅད་ཕྱི་ནང་དབྱེར་མེད་ཀྱི་གནད་ཀྱིས་ཕྱི་རུ་དབང་དུ་སྡུད་པ་སྟེ། ཇི་ཙམ་བཏང་ཡང་མི་བདེ་བ་མེད་ཙ་ན་མཐར་ཕྱིན་པའོ། །རླུང་ཕྱི་ནང་རང་འདྲེས་སུ་ཚང་བ་ཡིན་ནོ། །དེ་ལྟར་ཡང་ཡང་ངལ་མི་གསོ་བ་རུ་རྔུབས་ནས། གཡས་སུ་རླུང་སྦྱོར་དེ་རྣམས་ཚང་བ་གཅིག །གཡོན་དུ་དེ་རྣམས་ཚང་བ་གཅིག །དབུས་སུ་རླུང་སྦྱོར་དེ་རྣམས་ཚང་བ་གཅིག་སྟེ། དུས་རེ་ལས་ངལ་མི་གསོ་བར་བཞི་སྐོར་རེ་བྱེད་པ་ཡིན། དེ་རྣམས་ལ་གནད་མ་འཁྲུལ་བ་གལ་ཆེ་སྟེ། དེ་ཡང་བཏང་བའི་གནད་གཞིལ་བ་ལ་རགས། གཞིལ་བའི་གནད་དགང་བ་ལ་རགས། དགང་བའི་གནད་རྔུབས་པ་ལ་རགས། རྔུབས་པའི་གནད་འབུད་པ་ལ་རགས་ཏེ། གཅིག་འཁྲུལ་ན་ཐམས་ཅད་འཁྲུལ་འགྲོ། དེ་ཡང་རླུང་ལྷག་སྟོད་དུ་ལུས་ན་འབུད་པའི་གནད་འཁྲུལ། རླུང་བཅུ་གཅིག་ཏུ་མི་ཟིན་ན་དགང་བའི་གནད་འཁྲུལ། སྲོག་རྩོལ་གྱི་རླུང་དྷཱུ་ཏིའི་མར་ སྣར་མི་འདྲིལ་ན་རྔུབ་པའི་གནད་འཁྲུལ། ཁངས་པ་ལུས་ལ་མི་ཁྲེམས་ན་གཞིལ་བའི་གནད་འཁྲུལ། དབྱུང་བ་མཐུན་དུ་མི་བསློངས་ན་བཏང་བའི་གནད་འཁྲུལ་ལོ། །དེ་ལྟར་རྔུབས་པས་འཇུག་པ་ལམ་དུ་བྱེད། དགང་བ་དང་གཞིལ་བས་གནས་པ་ལམ་དུ་བྱེད། བཏང་བས་དབྱུང་བ་ལམ་དུ་བྱེད་པ་སྟེ། རང་བཞིན་གྱིས་འབྱུང་འཇུག་གནས་གསུམ་རླུང་སྦྱོར་གཅིག་གིས་དབང་དུ་བྱེད་ཅིང༌། རླུང་སེམས་ཕྱི་ནང་དབྱེར་མེད་ཀྱི་གནད་ཀྱིས༑ རླུང་བཅུ་གཅིག་ཏུ་ཟིན་པའི་རླུང་སྦྱོར་འདི་རྡོ་རྗེ་ཐེག་པའི་གཞུང་གསང་དབང་གི་མངོན་པར་རྟོགས་པ་ཐུན་མོང་མ་ཡིན་པ་ཡིན་ནོ། །གཞན་གྱི་རླུང་སྦྱོར་དང་འདི་ཤ་རྒྱབ་ཏུ་ཡོད། གཞན་གྱི་རླུང་གེགས་མང་བའི་རྒྱུ་མཚན་གནད་མང་དུ་འཆུགས་ཡོད་པ་ཡིན། ཐོག་མར་འབུད་པ་མི་ཤེས་དེས་གེགས་མང༌། རྔུབ་པ་ལ་སྒྲ་དང་བཅས་པས་གྲང་ཞིང་སྦོ། དྲག་པས་རྩ་གནས་གཞན་དུ་འབྱེར། ཁ་ནས་རྔུབ་པས་སྙིང་རླུང་འོང༌། སྲོག་རྩོལ་གང་རུང་ནས་རྔུབ་པས་ཚེ་ཐུང༌། སྣ་སྒོ་ནས་ཟིན་ཙམ་རྔུབ་པས་ཤུགས་མི་རྫོགས། དགང་བ་དབང་དུ་མི་འདུ། འཁྲུལ་འཁོར་སྨད་དུ་བསྐྱུར་མ་ཤེས་པས་སྟོད་མི་བདེ། བདེ་དྲོད་བུལ། དགང་བ་ལ་རླུང་བཅུ་གཅིག་ཏུ་མ་ཟིན་པས། ཡུལ་ཉེར་བཞིའི་རླུང་འགག་མི་ནུས་པས་ཡེ་ཤེས་མི་སྐྱེ། རླུང་ཚ་གྲང་མ་འདྲེས་པས་ཡོན་ཏན་གང་ཡང་མི་སྐྱེ། གཞིལ་བ་ལ་བ་སྤུའི་བུ་ག་རྣམས་ནས་རླུང་སོང་བར་བསྒོམ་ཟེར་ཏེ། དེ་ལ་སྐྱ་རྦབ་བམ། ཡང་དག་པར་རྒྱུའི་རླུང་ལོག་དོགས་ཡོད། ཡོན་ཏན་གྱི་རྩ་ཁ་མ་བྱེ་བར་རླུང་དབུ་མར་མི་ཚུད། བཏང་བ་ལ་སྤྱི་བོ་ནས་རྩལ་པོ་ཆེས་མདའ་འཕངས་པ་བཞིན་སྔོ་ཕྱུ་རུ་སོང་བར་བསམ་ཟེར་ཏེ། དེ་ཤིན་ཏུ་གནད་འཁྲུལ་ཚེ་ལ་ནན་ཏན་གནོད། རླུང་ལོག་འོང༌། རླུང་ཞབས་འཇོག་སྟེ་དེས་མི་འགྲུབ། རླུང་ཕྱིན་པ་བསྲེ་བ་མ་ཤེས་པར་དཀའ་ལས་ཆེ་ལ་དོན་ཆུང་བའི་རླུང་སྒོམ་པ་མང་བར་འདུག །འདི་དེ་རྣམས་དང་ཤ་རྒྱབ་ཏུ་ཡོད་དེ༑ གེགས་མི་འབྱུང་ལ་ཡོན་ཏན་མྱུར་དུ་སྐྱེ་བའི་གནད་ཤིན་ཏུ་མང་བར་ཡོད། ཐབས་ལམ་པ་རྣམས་ཕྱག་ལེན་མཐའ་ཆོད་པར་ལེགས་པར་ལག་ཁྲིད་ཚར་བ་གལ་ཆེའོ། །གསུམ་པ་དམིགས་པའི་ཁྱད་པར་དངོས་པོའི་གནས་ལུགས་དང་མཐུན་པ་ནི། ལུས་དངོས་པོའི་གནས་ལུགས་དང་མཐུན། ཕྱི་ནང་གསང་གསུམ་རྟེན་འབྲེལ། སྦྱང་གཞི། སྦྱོང་བྱེད། བརྡའ་དོན་འཕྲོད་པ་ཞིག་དགོས་ཏེ། དེ་གནད་འཆུགས་ན་བསྐལ་པར་བསྒོམས་ཀྱང་ཡོན་ཏན་མི་སྐྱེ་སྟེ། རྣ་བ་ལ་མིག་སྙམ་དུ་བསྒོམ་པ་དང་འདྲ། མིག་ཏུ་བསྐལ་པར་བསྒོམས་ཀྱང་རྣ་བ་མིག་ཏུ་མི་འགྲོ་བ་བཞིན་ནོ། །རྗེ་རས་པ་ཆེན་པོའི་ཞལ་ནས། རྒྱུ་ལས་མ་བྱུང་བའི་འབྲས་བུ་དཀའ། རླན་ལས་མ་བྱུང་བའི་མེ་ཏོག་དཀའ། གནད་དུ་མ་སོང་བའི་སེམས་འཛིན་དཀའ། གསུངས་སོ། །སྒོམ་པ་དོན་གྱི་གནད་རླུང་འབྱུང་བ་ལྔའི་རྟེན། ཁམས་བདུད་རྩི་ལྔའི་དྭངས་མ། ཉོན་མོངས་པ་དུག་ལྔའམ། ཡེ་ཤེས་ལྔའི་རང་གཟུགས་ འཁོར་ལོ་ལྔའི་གནད་ཀྱི་སྙིང་པོ་མ་འཁྲུལ་བ་དངོས་པོའི་གནས་ལུགས་དང་མཐུན་པ་གལ་ཆེ་སྟེ། ལྟེ་བར་གཏུམ་མོ་ལམ་དུ་བྱེད་པས་མཉམ་གནས་མེའི་རྟེན། བདེ་ཆེན་མེ་ཤེལ་རྒོད་མ་ཁའི་གནད། ཕག་མོའི་ཐིག་ལེ་ཨ་ཤད་ཀྱི་གཟུགས། དེའི་གནད་མ་འཁྲུལ་བ་གལ་ཆེ་བ་ཡིན། ལྟེ་བའི་དབུས་ན་ཨའི་གཟུགས་ཀྱིས་གནས་པ་དང༌། དུས་སྐབས་འགའ་ཞིག་གི་ཚེ་ཨ་ཤད་ཚེག་དྲག་ཏུ་འགྲོ་བ། དེ་ལ་སོགས་པ་རྒྱུན་གྱི་གནས་ལུགས་མ་ཡིན་ཏེ། ནོར་ས་ཡོད། འོད་གསལ་ལམ་དུ་བྱེད་པ་ལ་སྙིང་ཁ་ཆོས་ཀྱི་འཁོར་ལོའི་དབུས་ན་ཡོན་ཏན་གྱི་རྩ་་བ་སནྟ་ཞེས་བྱ་བའི་དབུས་ན། ཐིག་ལེ་ཧཱུྃ་གི་གཟུགས་ཡུངས་ཀར་སྦོམ་པོ་ཙམ་གཅིག་ཡོད་པ་ཡིན། དེ་ལུས་ཅན་རྣམས་ཀྱི་ཤེས་པ་གསལ་སྟོང་མི་རྟོག་པ་སྐྱེ་བའི་རྒྱུའམ་རྟེན་བྱེད་པ་ཡིན། འོད་གསལ་འཛིན་པའི་གནད་ཀྱང་དེ་ཡིན། ཨ་ནུ་ཏ་ར་ཧཱུྃ་ཡང་དེར་བསྒོམ་པ་ཡིན། སྙིང་ཁའི་ཕྱི་འདབ་དང་ཞེ་སྡང་གི་ཧཱུྃ་ལ་སོགས་པར་བསྒོམ་ན་གནད་འཆུགས་འགྲོ་སྟེ་ནོར་ས་ཡོད། སྒྱུ་ལུས་ལམ་དུ་བྱེད་པ་ལ་མགྲིན་པ་ཨའི་རྩ་མདུད་ཨའི་གཟུགས་ལ་དམིགས་པ་ཡིན། ཐིག་ལེ་ཨའི་གཟུགས་ལ་དམིགས་པ་ཡིན་ཏེ་ནོར་ས་ཡོད། ལས་ཀྱི་ཕྱག་རྒྱ་ལམ་དུ་བྱེད་པས་སྤྱི་གཙུག་གི་ཐིག་ལེ་ཟླ་བ་ཉ་བ་དང༌། ཧྃ་རྐྱང་པ་དང༌། ཧྃ་བཅུ་དྲུག་པ་དང༌། མཛོད་སྤུའི་ཧྃ་ཀྱོག་པོ་དང༌། ལྕེ་ཆུང་གི་ཧྃ་དང༌། དེ་རྣམས་ལ་སྒོམ་པ་དུས་ཀྱི་གནད་མ་འཁྲུལ་བ་དགོས་ཏེ་ནོར་ས་ཡོད། དེ་ལྟར་དམིགས་པའི་གནད་དངོས་པོའི་གནས་ལུགས་དང་མཐུན་པས་དམིགས་པ་དེ་ལ་སེམས་རྩེ་གཅིག་ཏུ་བཟུང་བས། རླུང་སེམས་དབྱེར་མེད་པའི་གནས་ཀྱིས་རླུང་དང༌། མཆོག་གི་གནས་དེར་རླུང་ཆུད་པ་སྟེ། དམིགས་པ་རླུང་འཛིན་པའི་གནད་དེ་གོ་བར་བྱས་ལ་དམིགས་པ་ལ་རྩེ་གཅིག་ཏུ་གཅུན་ཅིང༌། གེགས་མང་བ་རྣམས་དམིགས་པ་མི་གསལ་བ་དང༌། སེམས་ཡེངས་པ་ལས་བྱུང་བར་ཤེས་པར་བྱའོ། །དེ་ལྟར་རླུང་སེམས་དབྱེར་མེད། ལུས་སེམས་དབྱེར་མེད། སྣང་སེམས་དབྱེར་མེད་ཀྱི་གནད་ཀྱིས། རླུང་འཁྲུལ་འཁོར་དམིགས་པ་གསུམ་ཚོགས་པ་གཅིག་ཏུ་བྱས་པའི་གནད་འདིས་མྱུར་དུ་ལྷན་ཅིག་སྐྱེས་པའི་ཡེ་ཤེས་མངོན་དུ་བྱེད་པ་ཡིན་གྱིས། དེ་ལས་གཞན་པ་རྒྱུད་སྡེའི་དགོངས་པ་གནད་ཀྱི་སྙིང་པོ་མ་ཤེས་པའི། མགོ་བོར་འདི་བསྒོམ་དང་འཕོངས་སུ་འདི་བསྒོམ་གྱི་དམིགས་པའི་རྣམ་བཞག་མང་པོ་དང༌། ཡུལ་ཆེ་གེ་མོར་བླ་མ་རྗེ་བཙུན་ཆེ་གེ་མོའི་གདམས་ངག་འདི་དང་ཞེས་པའི་ཚིག་སྙན་སྙན་འདྲ་བའི་རྫུན་གྱི་ཕྲེང་བ་བརྒྱུས་པའི་ཐག་རུལ་གྱི་སྣ་ལ་འབྲེང་ཧྲུལ་འཐུད་པ་དེ་རྣམས་ཀྱིས་ཡུལ་མཐའ་འཁོབ་ཏུ་རྨོངས་པའི་མགོ་བོ་བསྐོར་བ་ལ་ཕན་གྱི། བྱང་ཆུབ་སྒྲུབ་པའི་སྒོམ་ཆེན་པ་ཉམས་སུ་ལེན་པ་ལ་མི་ཕན་པས། གྲུབ་ཐོབ་བརྒྱུད་པའི་གདམས་ངག་གནད་མ་འཆུག་གོལ་ས་མེད་པའི་ཕུལ། ཤུལ་བྲེང་ངེ་བ་འདི་རྣམས་ཤེས་བཟོ་དང་ཚོད་ཡོད་མི་བྱ་བར། ལེགས་པར་ཐུགས་སུ་ཆུད་པར་ བྱས་ལ་ཉམས་སུ་བླང་ངོ༌། །དྲག་རླུང་གནད་ལྔ་མའི་ཞལ་གདམས་ཆེ་ལོང་ཙམ་ཡི་གེར་བཀོད་པའོ། ། ཨྠ ི། ༄༅། །ན་མོ་གུ་རུ་བེ། འཕོ་བ་ཧཱུྃ་དམར་མའི་ལོ་རྒྱུས་ནི། རྗེ་མར་པ་ལོ་ཙཱ་བ་ལ། དགེ་བཤེས་རྔོག་ཆོས་རྡོར་གྱིས་འབྲི་དཀར་ཟལ་མ་གཅིག་པུ་བརྒྱ་ཐམ་པ། སྦྲ་དང་ཤེ་མ་སྒོ་ཁྱི་ཚུན་ཆོད་ཕུལ། གཡང་ཉམས་འགྲོ་བྱས་ནས་འབྲི་ཕུད་གཅིག་བཞག །དེ་མིན་ཐམས་ཅད་ཕུལ་བའི་དུས་སུ། སྤྱིར་དུ་ཡང་གདམས་ངག་མང་དུ་གནང༌། ཁྱད་པར་དུ་འཕོ་བའི་གདམས་ངག་འདི་གནང་ནས་བསྒོམས་པས། སྤྱི་བོ་ཚ་ནས་མི་ཟུག་པ་བྱུང་ནས། གདམས་ངག་འདྲ་མི་བདོག་གམ་ཞུ་བྱས་པས། ངའི་གདམས་ངག་གི་གཡང་ཉམས་ནས་འོང་གསུང༌། དེར་འབྲི་ཕུད་བཞག་པ་དང༌། དེ་མིན་ཡང་ནོར་མང་དུ་ཕུལ་ནས་ཞུས་པས། ལོག་གནོན་དང་ཚེ་སྲིང་བའི་དམིགས་པ་གཉིས་གནང་བ་ཡིན་གསུང༌། འཕོ་བ་ཁྱད་པར་གྱུར་པ་རྔོག་ལ་གནང་བ་བྱ་བ་ཡིན། གཏུམ་མོ་ཁྱད་པར་དུ་གྱུར་པ་མི་ལ་ལ་གནང་བ་བྱ་བ་ཡིན། བཀའ་བརྒྱུད་འཕོ་བའི་གདམས་ངག་ཙམ་ན་འདི་ལས་ཟབ་པ་མེད་པ་བྱ་བ་ཡིན་ནོ། །དེ་ཉམས་སུ་ལེན་པ་ལ་གཉིས། སྦྱོང་བ་དང་ལས་ལ་སྦྱར་བའོ། །སྦྱོང་བ་ལ་གཉིས། ཐོག་མར་སྔོན་འགྲོ་རླུང་བུམ་པ་ཅན་སྦྱོང་བ། འཕོ་བ་དངོས་སྦྱོང་བའོ། །དང་པོ་ནི། འཁྲུལ་འཁོར་སྐྱིལ་ཀྲུང་ལག་པ་མཉམ་བཞག་ཏུ་བྱས་ལ། ཐོག་མར་རླུང་དྲག་ཏུ་གསུམ་འབུད། དེ་ནས་རླུང་གི་ཕུགས་རྫོགས་ངེས་པ་ཞིག་དྲག་ ལ་རིང་བར་རྔུབས་ཏེ། ལྟེ་འོག་ཏུ་ཧྲིལ་གྱིས་བསྐྱུར་ལ། དེ་དང་དུས་མཚུངས་པར་འོག་རླུང་ཡང་བསྡམས་ཏེ། ཁ་སྦྱར་ལ་ཧ་ཅང་མི་གཅུན་པར་རང་སར་སེང་ངེ་བཟུང་ལ་ཁེབས་ཚད་དུ་དགག །དེ་མི་ཐུབ་པ་དང༌། ལན་གཅིག་ལན་གཉིས་གཞིལ་ལ་དེ་མི་ཐུབ་པ་དང་བཏང༌། དེ་ལ་དབུགས་འབྱུང་འཇུག་གནས་གསུམ་གཅིག་ཏུ་བྱས་པ་ཕྲེང་དོག་རེ་བསྐྱུར་བའམ། པུས་མོ་གཉིས་པོ་ལ་ལག་པ་མི་དྲག་པར་བསྐོར་ཞིང་སེ་གོལ་རེ་གཏོགས་པ་དེ་ལྟ་བུ་སུམ་ཅུ་སོ་དྲུག་ཁེགས་ན་བུམ་པ་ཅན་ཆུང་ངུ་། བདུན་ཅུ་རྩ་གཉིས་ཁེགས་ན་བུམ་པ་ཅན་འབྲིང༌། བརྒྱ་རྩ་བརྒྱད་ཁེགས་ན་བུམ་པ་ཅན་རབ་བོ། །དེའང་དང་པོ་སྦྱོང་བའི་དུས་སུ་རླུང་སོ་མ་ཇི་ཚད་ཁེགས་བལྟས་ལ། དེའི་ཐོག་ཏུ་ཞག་རེ་དབུགས་ཁུག་པ་རེ་རེ་ཡུན་གྱིས་རིང་བར་མནན་ཏེ། བུམ་པ་ཅན་རབ་འབྲིང་ཐ་གསུམ་ནས་ཁེགས་ཁེགས་སྦྱང་ངོ༌། །འཕོ་བ་ལས་སུ་རུང་ནས་ནམ་དགའ་དགར་འཕོ་བ་ལ་བུམ་པ་ཅན་འབྱོངས་པ་གལ་ཆེའོ། །དེ་ལྟར་བུམ་པ་ཅན་འབྱོངས་ནས་འཕོ་བ་སྦྱོང་བ་ལ་གསུམ། སྦྱང་བ་དངོས་དང༌། ལོག་གནོན་དང༌། ཚེ་སྲིང་བའི་དམིགས་པའོ། །དང་པོ་དུས་ཀྱི་གནད། སྟོན་ལ་སོགས་པའི་ནམ་ཟླ་བཟང་པོ་ལ། དབེན་པའི་གནས་སུ་མཚམས་དམ་པར་བཅད་ལ། ཟས་བཅུད་ཅན་གྱིས་ཁམས་བརྟས་པར་བྱས་ལ། ལུས་ཀྱི་གནད་རྐང་པ་སྐྱིལ་ཀྲུང་བཅའ། ལག་པ་ས་ནོན། རྐེད་པ་དྲང་པོར་བསྲང༌། མགྲིན་པ་ དྲང་ཞིང་སྒུ་བར་བྱ། བསམ་གཏན་གྱི་ཡན་ལག་གི་གནས་ལ། བྱང་ཆུབ་ཀྱི་མཆོག་ཏུ་སེམས་བསྐྱེད་དེ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། སྒྱུ་མ་ལྟ་བུའི་ཏིང་ངེ་འཛིན་གྱིས་རྡོ་རྗེ་འཛིན་པའི་གོ་འཕང་ཐོབ་པར་བྱ། དེའི་ཆེད་དུ་འཕོ་བའི་རྣལ་འབྱོར་བསྒོམ་པར་བྱ་སྙམ་དུ་སེམས་བསྐྱེད། ལུས་ཡི་དམ་གྱི་ལྷ་རུ་བསམ། བླ་མ་དམ་པ་སྤྱི་བོའི་གཙུག་ཏུ་གདན་བཞི་བརྩེགས་ཀྱི་སྟེང་དུ་བསྒོམ། ལྟེ་བར་ཧཱུྃ་དམར་པོ་བྱེ་རུའི་ཁ་དོག་ལྟ་བུ་ནས་གང་བ་གཅིག་བསམ། དེ་གསང་གནས་སུ་ལྷན་གྱིས་བབས་པ་ལས་འོད་ཟེར་བུང་བའི་མཚོན་ཆ་ལྟ་བུ་འཕྲོས་པས། ལུས་ཀྱི་ནང་ཆ་དང་མི་གཙང་ལྗན་ལྗིན་སྡིག་སྒྲིབ་ནད་གདོན་ཐམས་ཅད་བསྲེགས་ཏེ་ནང་བསེ་རྟའི་རྐྱལ་པ་ཁ་ཕྱེ་བ་བཞིན་དམར་སང་སྟོང་སང་སོང་བར་བསམ། ཧཱུྃ་ལས་ཧཱུྃ་བསྒྲིལ་མ་རེ་ཆད་ཅིང་བཤང་ལམ་དང་ཆུ་སོ་དང༌། ལྟེ་བ་དང་ཁ་དང་སྣ་དང་མིག་དང་རྣ་བ་དང༌། སྨིན་མཚམས་རྣམས་ཧཱུྃ་བསྒྲིལ་མ་རེས་དགག །སྤྱི་གཙུག་རྒྱ་མཐོང་ཁ་ཕྱེ་བ་བཞིན་ཧ་རེ་བཞག །དེ་ལྟར་ལུས་སྟོང་པའི་དཀྱིལ་ན་ཡར་རྩ་དབུ་མ་ཆོས་བཞི་ལྡན། མདའ་སྨྱུག་ཙམ་གཅིག་ཡར་རྩེ་སྤྱི་གཙུག་ཏུ་ཟུག །མར་རྩེ་གསང་བའི་གནས་སུ་ཟུག་པ་གཅིག་བསམ། དེའི་ནང་ན་ཡར་ཧཱུྃ་དམར་པོ་དེ་ཤིག་གི་འགྲོས་ཙམ་དུ་གུ་ལུ་ལུ་བྱུང་ནས། ལྟེ་བར་དབུགས་འབྱུང་འཇུག་གནས་གསུམ་གཅིག་ཏུ་བྱས་པའི་ཡུན་ཙམ་གཅིག་ངལ་གསོ། ཡང་དལ་བུས་ཕྱིན་ཏེ་སྙིང་ཁར་དེ་ཙམ་གཅིག་ངལ་གསོ། མགྲིན་པར་དེ་ཙམ་གཅིག་ངལ་གསོ། དེ་ནས་དལ་བུས་སྤྱི་གཙུག་ཚངས་པའི་བུ་ག་ན་ཡར་ཏུར་གྱིས་ཐོན་ནས་བླ་མའི་ཐུགས་ཁར་སིབ་ཀྱིས་སོང་བས༑ བླ་མ་དང་ཧཱུྃ་ཐ་མི་དད་པར་སྐྱ་ཀའི་གནམ་འཕང་བཞིན་ཡར་རྒྱངས་རྒྱངས་སོང་ནས། སུམ་ཅུ་རྩ་གསུམ་གྱི་གནས་རྡོ་ཨར་མོ་ལི་ཀའི་སྟེང་ན་ཕྱག་རྒྱ་ཆེན་པོའི་ངང་ལ་ཕྱད་དེ་བཞུགས་པ་ལ། དབུགས་འབྱུང་འཇུག་གནས་གསུམ་གཅིག་ཏུ་བྱས་པ་བཅུའི་ཡུན་ཙམ་གཅིག་རིག་པ་གཏད། ཡང་བླ་མ་སྤྱི་བོའི་གཙུག་ཏུ་དལ་བུས་མར་བྱོན་ཏེ། བླ་མའི་བཤང་ལམ་ནས་ཧཱུྃ་ཏུར་གྱིས་ཐོན་ནས་ཚངས་བུག་ནས་ཞུགས་ཏེ་དབུ་མའི་ནང་ནས་དལ་བུས་བབས་ནས་ལྟེ་འོག་ཏུ་གནས་པ་ལ། དབུགས་ལྔའི་ཡུན་ཙམ་ཞིག་རིག་པ་གཏད། ཡང་གོང་བཞིན་དལ་བུས་ཡར་འདོན། མར་དབབ། དེ་ལྟ་བུ་ནུས་ཚད་དུ་བསྒོམ་ཞིང༌། རླུང་བུམ་པ་ཅན་ནུས་ཚད་དུ་བཟུང་ངོ་། །དེ་ལྟར་རྩ་དབུ་མ་གསལ་བས་ཧཱུྃ་གིས་ཡར་འགྲོ་མར་འགྲོ་བྱེད་པ་དང༌། དལ་བུས་བྱེད་པས་རླུང་ལོག་དང་གེགས་མི་ཡོང་བ་ཡིན། ཧུར་ཕྱུར་བྱས་ན་རླུང་ལོག་འོང༌། དེ་ལྟར་ཐུན་བཞིར་སྦྱོང་ཞིང་འཕྲོ་གཅོད་པའི་དུས་སུ། སྤྱི་བོར་བླ་མས་ཚངས་བུག་མི་མངོན་པར་དགག །ཧཱུྃ་ལྟེ་འོག་ཏུ་བབས་པ་ལ་རིག་པ་ཡུན་རིང་གཏད། རླུང་རོ་མང་དུ་བུས་ཏེ། རིག་པ་སེམས་ཀྱི་སོ་བཟུང་ལ། དལ་བུས་ལངས་ཏེ་སྤྱོད་ལམ་བྱའོ། ། དེ་ལྟར་སྦྱངས་པས་འབྱོངས་པའི་རྟགས་རབ་སྤྱི་བོ་འབུར་བའམ། འབྲིང་ཆུ་སེར་ཚིག་པའམ། འགུལ་བའམ། ཐ་མ་ཡང་གཡའ་བའམ་ཟ་བའམ་ན་ཟུག་ནམ་བྱུང་བྱུང་གི་བར་དུ་བསྒོམ་མོ། །གཉིས་པ་དེ་ལྟར་རྟགས་བྱུང་བ་དང་ལོག་གནོན་བསྒོམ་པ་ནི། གོང་བཞིན་ཧཱུྃ་དང་བླ་མ་ཐ་མི་དད། རྡོ་ཨ་མོ་ལི་ཀའི་སྟེང་ན་ཕྱག་རྒྱ་ཆེན་པོ་ལ་བཞུགས་པ་ལ་དབུགས་ལྔའི་ཡུན་ཙམ་ཞིག་རིག་པ་གཏད། དབུ་མའི་མར་སྣ་ལྟེ་འོག་ཏུ་བབས་པ་ལ་བཅུའི་ཡུན་ཙམ་ཞིག་རིག་པ་གཏད། དེ་ནས་རིམ་གྱིས་ཡ་གིར་ཇེ་ཐུང་མ་ཀིར་ཇེ་རིང་ལ་གཏད་དེ། བླ་མའི་ཐུགས་ཁར་ཐིམ་སོང་ཙམ་ལ། བླ་མ་ཡར་མི་འདེབས་པར་ཧཱུྃ་དབུ་མར་དབབ། དེ་ནས་སྤྱི་བོ་ཙམ། དེ་ནས་མགྲིན་པ་ཙམ། དེ་ལས་མར་ཕབ་ལ། མཐར་ལྟེ་འོག་ཏུ་ལྷན་ཆགས་པ་ཙམ་ལ་རིག་པ་ཡུན་རིང་དུ་གཏད་དེ། རླུང་བུམ་པ་ཅན་བཟུང་ཞིང་ཟུག་ཆག་ནས་ཀྱང་ཞག་གསུམ་གྱི་བར་ལ་བསྒོམ་མོ། །གསུམ་པ་ཚེ་རིང་བའི་དམིགས་པ་བསྒོམ་པ་ནི། ལུས་སྟོང་རའི་ནང་དུ་རྩ་དབུ་མ་གསལ་བར་དམིགས་ལ། དེའི་ནང་དུ་ཧཱུྃ་དམར་པོ་ནས་གང་བ་དེ་ཡར་ཟང་སྤྱི་གཙུག་ལ་ཐུག །མར་ཟང་འོག་སྒོར་ལྷན་སོང་བར་བསམ་ཞིང་རླུང་བུམ་པ་ཅན་བཟུང༌། དེ་ལ་ངེས་པ་ཁོ་ནར་ཞག་བདུན་བསྒོམ་གསུང༌། དེ་ལྟར་སྦྱོང་བ། ལོག་གནོན། ཚེ་སྲིང་བའི་དམིགས་པ་གསུམ་ཞག་ཉེར་གཅིག་ལ་སོགས་པ་བསྒོམ་སྟེ། འབྱོངས་པའི་ངེས་པ་ཐོབ་པ་དང༌། དེ་ནས་གདམས་ངག་ལ་མ་བརྗེད་ཙམ་མ་གཏོགས་པ་བསྒོམ་མི་དགོས་ཏེ། ནམ་འཆི་བའི་དུས་ན་ལས་ལ་སྦྱར་བས་ཆོག་གོ །གཉིས་པ་ལས་ལ་སྦྱོར་བ་ལ་གསུམ། ཁམས་གསུམ་འཁོར་བར་འཁྱམས་པའི་རྒྱུ་དུག་གསུམ་གྱི་སྤྲོས་པ་བཅད་པ། རྣམ་པར་ཤེས་པ་བྱང་ཆུབ་ཀྱི་གནས་ནས་གདོན་པ། འོད་གསལ་སེམས་ཀྱི་རང་སོ་བཟུང་བའོ། །དང་པོ་ནི། ངེས་པའི་འཆི་རྟགས་བྱུང་སྟེ་འཆི་བར་ཤེས་པ་དང༌། འདོད་ཆགས་ཀྱི་སྤྲོས་པ་བཅད་དེ། ནང་སེམས་ཅན་ལ་ཆགས་པའི་ཉེ་འབྲེལ་དང་འཁོར་གཡོག་དང་རང་ལུས་ལ་མ་ཆགས་པར་བྱ། ཕྱི་རྫས་དང་ལོངས་སྤྱོད་ལ་ཆགས་པ་བདོག་པ་ཐམས་ཅད་སྤོང་དག་བྱ་ཞིང༌། དངོས་པོ་གང་ལ་ཡང་ཞེན་པ་མེད་པར་བློས་བཏང༌། ཞེ་སྡང་གི་སྤྲོས་པ་བཅད་དེ་སུ་དང་སུ་ལ་ཡང་ཞེ་འགྲས་པ་མེད་པར་བྱ་སྟེ། མཁོན་གཅུགས་སྦྱངས། གཏི་མུག་གི་སྤྲོས་པ་བཅད་དེ། ནད་དང་ཟུག་དབང་དུ་མི་བཏང་བར་རིག་པ་དྲུངས་བཏོན་ལ། ཐོས་བསམ་སྒོམ་གསུམ་གྱི་ཤེས་ཉན་དང་ཉམས་མྱོང་གང་ཡོད་པ་ཐམས་ཅད་གསལ་གདབ་པའོ། །གཉིས་པ་རྣམ་པར་ཤེས་པ་བྱང་ཆུབ་ཀྱི་ལམ་ནས་གདོན་པ་ནི། གདན་བཞི་ལས། དུས་སུ་གྱུར་ན་ འཕོ་བྱ་སྟེ། །དུས་མིན་ལྷ་རྣམས་གསོད་པར་བྱེད། །ཅེས་པས་ནམ་དགའ་དགར་འཕོས་ན་ལྷ་བསད་པའི་ལྟུང་བ་འོང༌། ངེས་པར་འཆི་བའི་དུས་ལ་བབས་ཏེ་འབྱུང་བཞི་དང༌། དབང་པོ་ཐིམ་ནས། དབུགས་ཅུང་ཟད་རྩེག་ཅིང་དཀར་དམར་གྱི་སྣང་བ་ཤར་བ་ལ་འཕོ་བར་བྱ་སྟེ། འཁྲུལ་འཁོར་སྐྱིལ་ཀྲུང་སེམས་ལུས་བཅོས་ཏེ་འཕོ་བའི་འདུག་སྟངས་བྱས་ལ་བྱང་ཆུབ་ཀྱི་མཆོག་ཏུ་སེམས་བསྐྱེད། སྐད་ཅིག་གིས་ལུས་ཡི་དམ་གྱི་ལྷར་བསམ། སྤྱི་བོ་ནས་ཁྲུ་གང་ཙམ་གྱི་ནམ་མཁའ་ལ་གདན་བཞི་བརྩེགས་ཀྱི་སྟེང་དུ། བླ་མ་དང་ཡི་དམ་ཐ་མི་དད་བཞུགས་པར་བསམ། ལྟེ་བའི་འོག་ཏུ་ཧཱུྃ་དམར་པོ་ནས་གང་བ་ཞིག་བསམ། དེ་ལས་འོད་ཟེར་འཕྲོས་པས་ལུས་ཀྱི་ནང་ཆ་དང་མི་གཙང་བའི་ལྗན་ལྗིན་ཉོན་མོངས་རྣམ་རྟོག་སྡིག་སྒྲིབ་ཐམས་ཅད་སངས་ཀྱིས་བསྲེག་པར་བསམ། དེ་ནས་ཧཱུྃ་དེ་ལས་ཧཱུྃ་བསྒྲིལ་མ་རེ་ཆད་ཅིང༌། སྒོ་བརྒྱད་པོ་གོང་བཞིན་བཀག་ལ༑ ཚངས་བུག་རྒྱ་མཐོངས་ཁ་ཕྱེ་བ་བཞིན་བཞག །རྗེ་ནཱ་རོ་པའི་ཞལ་ནས། སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་ལམ། །སྒོ་བརྒྱད་བཀག་ནས་སྒོ་གཅིག་འབྱེད། །མིང་ཡང་འཕོ་བའི་གདམས་ངག་ཟེར། །རླུང་དུས་སུ་ཁེགས་སམ་ལོ་ཙཱ་བ། །ཞེས་པའི་དོན་ནོ། །དེ་ནས་འཆི་ཀའི་རླུང་བཟློག་པ་དཀའ་ན་ཡང༌། ཤད་པ་གཅིག་ནང་དུ་ཟློག་ལ་ཏིང་ངེ་འཛིན་གྱིས། ཧཱུྃ་དེ་ལ་ལུས་སེམས་ཐམས་ཅད་བསྡུས་ཏེ། དེ་གྱེན་ལ་དྲག་ཏུ་སོང་ནས་ཚང་བུག་ནས་རྒྱངས་ཐོན་ཏེ། བླ་མའི་ཐུགས་དང་རང་གི་སེམས་དབྱེར་མེད་དུ་འདྲེས་པ་ཕྱག་རྒྱ་ཆེན་པོའི་ངང་ལ་རིག་པ་ལྷན་གྱིས་གཏད་ལ་རླུང་དྲག་ཏུ་གྱེན་ལ་ཕུལ་བས། བུམ་པ་ཅན་ཐུན་གཅིག་གིས་འཕོའོ། །དེས་ཀྱང་མ་འཕོས་ན་དམིགས་པ་མར་མི་དབབ་པར་རླུང་ཤད་པ་གཅིག་བཟློག་ལ་དྲག་ཏུ་གྱེན་ལ་ཕུལ་བས། གཉིས་པ་ལས་ཅིས་ཀྱང་འཕོའོ། །འཆི་བའི་རླུང་སེམས་ཤིང་ཐོག་སྨིན་པ་དང་འདྲ་བ་ཡིན། རྡོ་རྗེ་གདན་བཞི་ལས། ཧཱུྃ་གི་ང་རོ་དྲག་པོ་ཡིས། །ལུས་ཅན་རྣམས་ནི་སྐྲོད་པར་བྱེད། །ཅེས་པའི་དོན་ནོ། །གསུམ་པ་འོད་གསལ་སེམས་ཀྱི་རང་སོ་བཟུང་བ་ནི། དེ་ནས་རང་བཞིན་གྱི་འོད་གསལ་འཆར་ཏེ། དེ་དང་གོང་གི་རང་སེམས་བླ་མའི་ཐུགས་གཉིས་སུ་མེད་པ་ཕྱག་རྒྱ་ཆེན་པོའི་ངང་ལ་བཞག་པ་གཉིས་འོད་གསལ་མ་བུ་འཕྲོད་དེ། སྔར་འདྲིས་ཀྱི་མི་དང་འཕྲད་པ་བཞིན་ངོ་ཤེས། བྱེ་མ་དང་ཆུ་སྣ་འཕྲད་པ་བཞིན་གཅིག་ཏུ་འདྲེས། ཆུ་ལ་ཆུ་བཞག་པ་བཞིན་དབྱེར་མེད་པར་གྱུར་ཏེ། དེའི་ངང་ལ་ཞག་བདུན་གནས་ནུས་ན་དེ་ནས་ཕར་ཚེགས་མེད། དེ་ལ་ཞག་བཞི་བཅུ་རྩ་དགུ་གནས་ནུས་ན། མཐོང་སྤང་དང་སྒོམ་སྤང་གི་སྒྲིབ་པ་མ་ལུས་པ་སྦྱངས་ཏེ། འཆི་བ་ཆོས་སྐུའི་ཞིང་ཁམས་ལ་སངས་རྒྱས་ནས་བར་དོ་གཟུགས་སྐུའི་ཞིང་ཁམས་ལ་སྣང་བ་འཆར་རོ། །རབ་འོད་གསལ་དུ་འཕོ་བ། འབྲིང་སྒྱུ་ལུས་སུ་འཕོ་བ་དང༌༑ ཐ་མ་གླིང་དང་སྐྱེ་གནས་སུ་འཕོ་བ་དང༌། དེའི་འཕོ་བའི་འབྲས་བུ་གསུམ་ལ་སོགས་པ། འཕོ་བའི་གཞུང་ཁྲིད་ཀྱི་ཚར་ཆོས་སུ་ཤེས་པར་བྱའོ། །འཕོ་བ་ཧཱུྃ་དམར་མའི་ཞལ་གདམས། དཔལ་ཡང་དགོན་པའི་འོ། ། དགེའོ། ། ཨྠ ི། རྒྱ་རྒྱ་རྒྱ། ༄༅། །ན་མོ་རཏྣ་གུ་རུ་བེ། སྟོང་ཉིད་རྡོ་རྗེའི་ཚིག་དྲུག་ནི། གཞིའི་སྟོང་ལུགས་གཉིས། ལམ་གྱི་སྟོང་ལུགས་གཉིས། འབྲས་བུའི་སྟོང་ལུགས་གཉིས། སྟོང་པའི་འཐད་ལྡན་གཉིས། སྟོང་པ་གཏན་ལ་དབབ་ཐབས་གཉིས། སྟོང་པའི་སྐྱོན་ཡོན་གཉིས་སོ། །དང་པོ་ནི། ཆོས་ཐམས་ཅད་ཀྱི་ཆོས་ཉིད་ཅི་ཡང་མ་ཡིན་པ། རྣམ་པ་ཀུན་ལྡན་ཞེས་པའི་དོན་སྟོན་པ་སྟེ། སྤྱིར་སྟོང་པ་ལ། ཡོད་པ་ལ་ལྟོས་པའི་མེད་པ་ལྟ་བུ་ཕྱོགས་གཅིག་པའི་སྟོང་པ། ཀ་པཱ་ལི་ཆོས་ཀྱིས་སྟོང་པའམ། བུམ་པ་ཆུས་སྟོང་པ་ལྟ་བུ་ཉི་ཚེ་བའི་སྟོང་པ་དང༌། སྣང་བ་བཀག་པའི་སྟོང་པ་ལྟ་བུ་དང༌། གཅིག་པ་བཀག་པའི་སྟོང་པ་དང༌། སྟོང་པ་དང་སྟོང་པའི་རྣམ་བཞག །རྣམ་གྲངས་ཀྱི་སྟོང་པ་ལ་སོགས་པ། མདོར་ན་སྟོང་པ་ཞེས་པ་མེད་པའམ་མ་གྲུབ་པ་གཅིག་ལ་བློ་རྩེ་གཏད་པའི་ཕྱོགས་འཛིན་གྱི་ཤེས་པ་དེ་རྣམས་འདིའི་དགོངས་པ་མ་ཡིན་ལ། འདིར་ཆོས་ཐམས་ཅད་ཀྱི་ཆོས་ཉིད་ཅི་ཡང་མ་ཡིན་པ་དེ་ཉིད་ཆོས་ཅན་གྱི་དངོས་གཞིར་གནས་པ་ལ་རྣམ་ཀུན་མཆོག་ལྡན་གྱི་སྟོང་པ་ཞེས་བྱ་སྟེ། དེ་ཡང་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས། སངས་རྒྱས་ཀུན་གྱི་ཏིང་འཛིན་ནི། །སྟོང་པ་ཉིད་དུ་རྒྱལ་བས་བཤད། །གང་གིས་སྟོང་ཉིད་མི་ཤེས་པ། །དེ་ཡིས་མྱང་ངན་འདས་མི་ཤེས། །གང་ཕྱིར་དངོས་དང་དངོས་མེད་པ། །འཛིན་པ་སྟོང་ཉིད་ཡིན་ཞེས་བརྗོད། །ཅེས་པ་དང༌། སྒྱུ་འཕྲུལ་ དྲྭ་བའི་རྒྱུད་ལས། རྣམ་པ་ཀུན་ལྡན་རྣམ་པ་མེད། །བཅུ་དྲུག་ཕྱེད་ཕྱེད་ཐིག་ལེ་འཆང༌། །ཞེས་པ་དང༌། སྡུད་པ་ལས། ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་མངོན་པར་འབྱུང༌། །ཞེས་པ་ལ་སོགས་པ་གསུངས་ཏེ། མདོར་ན་ནང་པ་སངས་རྒྱས་པའི་བརྗོད་པར་བྱ་བའི་དོན་གྱི་སྙིང་པོ། སྟོང་པ་ཉིད་ཡིན། དེ་མ་རྟོགས་པས་རྫོགས་པའི་སངས་རྒྱས་མི་འཐོབ་པས་ཉན་རང་གི་བྱང་ཆུབ་མངོན་དུ་བྱེད་པར་བཤད་དོ། །དེ་ལ་གཞིའི་སྟོང་ལུགས་གཉིས་ནི། ཡོད་དང་མེད་པས་སྟོང་ལ་རྟག་དང་ཆད་པས་སྟོང༌། །སྣང་དང་སྟོང་པས་སྟོང་ལ་གཅིག་དང་དུ་མས་སྟོང༌། །ཞེས་པ་སྟེ། ཤེར་སྙིང་ལས། གཟུགས་སྟོང་པའོ། །སྟོང་པ་ཉིད་ཀྱང་གཟུགས་སོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་པ་སྟེ། དེའང་གཟུགས་སྟོང་པའོ་ཞེས་པ་ནི། ཡོད་པས་སྟོང༌། རྟག་པས་སྟོང༌། སྣང་བས་སྟོང༌། དུ་མས་སྟོང༌། དངོས་པོས་སྟོང་པའི་སྟོང་པ་ཡིན་ལ། སྟོང་པ་ཉིད་གཟུགས་སོ། །ཞེས་པ་ནི། མེད་པས་སྟོང༌། ཆད་པས་སྟོང༌། གཅིག་གིས་སྟོང༌། སྟོང་པས་སྟོང༌༑ དངོས་མེད་ཀྱིས་སྟོང་པའི་སྟོང་པ་སྟེ། དེ་གཉིས་སྔོན་ལ་སྣང་བར་ཤར་ནས། དེ་ནས་སྟོང་པར་ཐིམ་པའམ། སྔོན་ལ་སྟོང་པ་ཡིན་ལ་ཕྱི་ནས་སྣང་བར་ཤར་བ་ལྟ་བུ་མ་ཡིན་ཏེ། སྣང་བ་ལས་ལོགས་ན་སྟོང་པ་ མེད་ཅིང༌། སྟོང་པ་ལས་ལོགས་ན་སྣང་བ་མེད་པས། སྣང་སྟོང་གཉིས་འདུ་འབྲལ་མེད་པ་སྟེ། དེ་ཉིད་ལས། གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་སོ༑ ༑དེ་ཉིད་སྐྱེ་འགག་གནས་གསུམ་དང་བྲལ་བ་ཡང་ཡིན་ཏེ། དངོས་པོའི་ཆོས་སུ་སྐྱེ་བ་མེད་པ་ནི་གཟུགས་སྟོང་པ། དངོས་མེད་ཀྱི་ཆོས་སུ་འགག་པ་མེད་པ་ནི་སྟོང་པ་ཉིད་གཟུགས། ཐ་དད་ཆོས་ལ་གནས་པ་མེད་པ་ནི་གཟུགས་ལས་ཀྱང་སྟོང་པ་ཉིད་གཞན་མ་ཡིན་པའོ། །མདོར་ན་ཆོས་ཉིད་ཅི་ཡང་མ་ཡིན་པ་སྟེ། ཡོད་པའང་མ་ཡིན། མེད་པའང་མ་ཡིན། རྟག་པའང་མ་ཡིན། ཆད་པའང་མ་ཡིན། སྣང་བ་ཡང་མ་ཡིན། སྟོང་པའང་མ་ཡིན། དངོས་པོའང་མ་ཡིན། དངོས་མེད་ཀྱང་མ་ཡིན། འཁོར་བའང་མ་ཡིན། འདས་པའང་མ་ཡིན་ཏེ། ཕྱོགས་གཅིག་ཏུ་ཅི་ཡང་ཡིན་པས་སྟོང་ལ། ཕྱོགས་གཅིག་ཏུ་ཅི་ཡང་མ་ཡིན་པས་ཕྱོགས་མེད་དུ་ཅི་ཡང་ཡིན་པ་སྟེ། དེ་ཉིད་ལ་རྣམ་པ་ཀུན་ལྡན་གྱི་སྟོང་པ་ཞེས་བྱའོ། །དེས་ན་སྟོང་པ་དང་རྟེན་འབྲེལ་དབྱེར་མེད་པ་སྟེ། ཀླུ་སྒྲུབ་ཀྱིས། གཉིས་མེད་རྟེན་ཅིང་འབྲེལ་བར་འབྱུང༌། །འགོག་པ་མེད་པ་སྐྱེ་མེད་པ། །ཞེས་པ་ལ་སོགས་པ་རྒྱ་ཆེར་གསུངས་ཏེ། དེའང་ཆོས་ཉིད་ཅི་ཡང་མ་ཡིན་པས་སྟོང་པ། ཆོས་ཅན་ཅིར་ཡང་འཆར་བས་སྟོང་པ་སྟེ། ཅིར་ཡང་མ་ཡིན་པས་ཅིར་ཡང་འཆར་ལ། ཅིར་ཡང་འཆར་བས་ཅིར་ཡང་མ་ཡིན་ཏེ་དབྱེར་མེད་པའོ། །དེས་ན་སྟོང་པ་ཉིད་རྟེན་འབྲེལ་དུ་མ་གོ་ན་ཆད་ལྟར་འགྲོ་ལ། རྟེན་འབྲེལ་སྟོང་ཉིད་དུ་མ་གོ་ན། ལས་རྒྱུར་སྨྲ་བར་འགྲོ་བས། དེ་གཉིས་གནད་གཅིག་གིས་གཏན་ལ་འབེབས་པ་འདི་ཤིན་ཏུ་ཟབ་པའི་བརྗོད་བྱ་སྟེ། དེའི་དོན་མདོ་རྒྱུད་བསྟན་བཅོས་རྣམས་ནས་ཡང་མང་དུ་གསུངས་ཏེ། ཀླུ་སྒྲུབ་ཀྱིས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་གཞན་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པའི། །ཆོས་གཞན་ཡོད་པ་མ་ཡིན་ནོ། །ཞེས་ཐ་མི་དད་པར་གསུངས་པ་དང༌། ཟླ་བ་སྒྲོན་མའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་དངོས་པོ་ཡོད་མ་ཡིན། །རྐྱེན་ལ་རགས་ལས་གང་དེ་སྟོང་པ་དེ། །གང་གིས་སྟོང་ཉིད་ཤེས་ན་མཁས་པར་བཤད། །ཅེས་པ་དང༌། ཀླུ་སྒྲུབ་ཀྱིས། རྟེན་ཅིང་འབྲེལ་བར་འབྱུང་བ་གང༌། །དེ་ནི་སྟོང་པ་ཉིད་དུ་འདོད། །དེ་ནི་རྐྱེན་ལས་སྐྱེ་བ་སྟེ། །དེ་ནི་དབུ་མའི་ལམ་ཡིན་ནོ། །ཞེས་སྟོང་པ་རྟེན་འབྲེལ་དུ་བཤད་པ་དང༌། ནམ་མཁའ་ཆེ་ལས། ཁྱད་པར་ཅིར་ཡང་མཚུངས་པ་ལ། །ལས་སོ་ཞེས་ནི་རྣམ་པར་བཏགས། །ཅི་སྟེ་ལས་ཀྱི་དབང་གྱུར་ན། །རང་བྱུང་ཡེ་ཤེས་ཡོད་མ་ཡིན། ། ཞེས་རྒྱུ་འབྲས་སྟོང་པར་བཤད་པའོ། །དེ་ལྟར་ཆོས་ཉིད་ཅི་ཡང་མ་ཡིན་ཞིང༌། ཅི་ལ་ཡང་མི་གནས་པས། ཐ་སྙད་ཀྱི་གདགས་པ་མ་རྙེད་ཅིང༌། བློའི་ཡུལ་དུ་བྱར་མ་བཏུབ་པ་དེ་ལ་སྟོང་ཉིད་ཅེས་བྱ། དེ་བཞིན་ཉིད་ཅེས་བྱ༑ སྐྱེ་མེད། སྤྲོས་བྲལ། འོད་གསལ། དོན་དམ་པའི་བདེན་པ། ཆོས་དབྱིངས་སམ། ཆོས་ཉིད་ཅེས་པ་མིང་གི་རྣམ་གྲངས་ཏེ། བྱང་ཆུབ་སེམས་ཀྱི་རང་བཞིན། བསམ་གྱིས་མི་ཁྱབ་པའོ། །གཉིས་པ་ལམ་གྱིས་སྟོང་ལུགས་གཉིས་ནི། ལྟ་དང་ལྟ་མིན་གྱིས་སྟོང་སྒོམ་དང་ཐ་མལ་སྟོང་། །བྱ་དང་མི་བྱེད་འཁོར་གསུམ་ཀུན་ཏུ་སྟོང༌། །ཞེས་པ་སྟེ། དང་པོ་ལྟ་བ་དང་ལྟ་མིན་གྱིས་སྟོང་པ་རྣམ་པ་ཀུན་ལྡན་གྱི་སྟོང་པ་ནི། སྣང་སྲིད་འཁོར་འདས་ཀྱི་ཆོས་ཐམས་ཅད་སྟོང་པ་ཉིད་དུ་གཏན་ལ་ཕེབས་པས་ངའི་ལྟ་བ་འདི་ཡིན་ཞེས་པ་ཡོངས་གཅོད་ཀྱིས་བསྒྲུབ་བྱ་མེད་པས་ལྟ་བས་སྟོང་ལ། འདི་མིན་ཞེས་པ་རྣམ་གཅོད་ཀྱི་དགག་བྱ་མེད་པས་ལྟ་མིན་གྱིས་སྟོང་སྟེ། ཕྱོགས་འཛིན་གྱི་ལྟ་བ་ཐམས་ཅད་ལས་གྲོལ་བའོ། །དེའང་ཀླུ་སྒྲུབ་ཀྱིས། སྟོང་པ་ཉིད་ཀྱི་ལྟ་ཐོབ་ཀྱང༌། །ལ་ལའི་ལྟ་བ་མ་ཞིག་ན། །གསོར་མི་རུང་བའི་ལྟ་བ་ཅན། །སྨན་པས་བོར་བའི་ནད་པ་བཞིན། །ཞེས་པ་དང༌༑ ཨཱརྱ་དེ་བས། ལྟ་བ་ཐམས་ཅད་འཇོམས་མཛད་པའི། །ཡེ་ཤེས་སྐུ་ལ་ཕྱག་འཚལ་ལོ། །ཞེས་པ་དང༌། རྡོ་རྗེ་གུར་ལས། ལྟ་བ་རྣམས་ལས་བཟློག་པ་དང༌། །བདག་ཏུ་ལྟ་བ་ཚོལ་རྣམས་ཀྱི། །བདག་ཞེན་བསམ་པ་ བཟློག་པའི་ཕྱིར། །སྟོང་པར་རྒྱལ་བ་རྣམས་ཀྱིས་གསུངས། །ཞེས་གསུངས་པས། གོང་གི་ཕྱོགས་གཅིག་ཏུ་ཅི་ཡང་མ་ཡིན་ལ་ཕྱོགས་མེད་དུ་ཅི་ཡང་ཡིན་པའི་གནད་ཀས་འདིར་ལྟ་བ་འདི་ཡིན་འདི་མིན་གྱི་གཟའ་གཏད་མེད་པས། མཐའ་བརྒྱད་ཀྱི་ཕྱོགས་འཛིན་རང་གྲོལ་བ་ནི་ལྟ་བ་ཕྱིན་ཅི་མ་ལོག་པའོ། །བླ་མ་ཞང་གིས། ཡིན་པ་གང་ཡང་མེད་པ་ལ། །མ་ཡིན་པ་ཡང་གང་ཡང་མེད། །ཡིན་པ་དང་ནི་མིན་པ་གཉིས། །ཕན་ཚུན་ལྟོས་པར་འཛིན་པ་སྟེ། །ལྟོས་པ་ཟད་ལ་ལྟ་བ་མེད། །ཅེས་པའི་དོན་ནོ། །སྒོམ་གྱིས་སྟོང་པ་ཐ་མལ་གྱིས་སྟོང་པའི་སྒོམ་པ་རྣམ་པ་ཀུན་ལྡན་གྱི་སྟོང་པ་ནི། སེམས་རང་ལུགས་བཞག་པས་རྣམ་པར་རྟོག་པ་རང་འགགས་པའི་དུས་ན་ངོས་བཟུང་མེད་པའི་ཤེས་པ་སྒྲོ་བཏགས་ཀྱི་སྤྲོས་པ་དང་བྲལ་བས་སྒོམ་གྱིས་སྟོང་ལ་རང་རིག་ཡུལ་མེད་དུ་གསལ་བ་ལ་རྟོག་མེད་དུ་ངེས་ཤེས་སྐྱེས་པས་ཐ་མལ་གྱིས་སྟོང་པའོ། །ཡང་འདི་བསྒོམ་མོ་ཞེས་བློས་བྱས་པའི་བསྒོམ་རྒྱུ་གཅིག་ཀྱང་མི་འདུག་པས་བསྒོམ་གྱིས་སྟོང་ལ། འདི་བསྒོམ་མིན་ནོ་ཞེས་སྤང་བྱའམ་དོར་བྱ་མི་འདུག་པས་ཐ་མལ་གྱིས་སྟོང་པ་སྟེ། སྟོང་ཉིད་བསྒོམས་པས་གྲོལ་འགྱུར་གྱིས། །སྒོམ་པ་ལྷག་མ་དེ་དོན་ཡིན། །ཞེས་པའི་དོན་ནོ། །བྱ་བྱེད་ཀྱིས་སྟོང་པའམ་མི་བྱེད་པས་སྟོང་པའི་སྤྱོད་པ་རྣམ་པ་ཀུན་ལྡན་ནི། བྱ་བ་བྱེད་པས་སྟོང་སྟེ། སྦྱིན་པ་ལ་སོགས་ཉམས་སུ་ལེན་པའི་དུས་ཉིད་ན། གཏང་བྱའི་ཡུལ། གཏོང་མཁན་གྱི་བདག །བཏང་བའི་ཕན་ཡོན་གསུམ་རང་གི་ངོ་བོས་སྟོང་ཞིང་ཡོད་མ་མྱོང་ལ། བྱ་བ་མི་བྱེད་པས་སྟོང་སྟེ། སྟོང་པ་ཉིད་སྦྱིན་པ་ལ་སོགས་པ་བསོད་ནམས་ཀྱི་ཕུང་པོར་ཤར་ཅིང༌། མ་འགགས་ཤིང་ཡ་མ་བྲལ་སྤྱོད་པའོ། །དེ་ལྟར་བྱ་བ་བྱེད་ལྟར་མ་འགགས། བྱ་བ་བྱེད་མཁན་ངོ་བོས་སྟོང་པའི་བྱ་བ་བྱེད་པ་དང་མི་བྱེད་པ་བཅིངས་གྲོལ་མེད་པའི་སྟོང་ཉིད་དེ། འཕགས་པ་གཙུག་ན་རིན་པོ་ཆེའི་མདོ་ལས། དེ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་གང་ཞེ་ན། གང་སྦྱིན་པ་དང་མ་བྲལ་བ། ཚུལ་ཁྲིམས་དང་མ་བྲལ་བ། བཟོད་པ་དང་མ་བྲལ་བ། བརྩོན་འགྲུས་དང་མ་བྲལ་བ། བསམ་གཏན་དང་མ་བྲལ་བ། ཤེས་རབ་དང་མ་བྲལ་བ༑ ཐབས་དང་མ་བྲལ་བའོ། །ཞེས་པ་ལ་སོགས་པ་རྒྱ་ཆེར་གསུངས་པའི་དོན་ནོ། །དེ་ལྟ་བུའི་ལམ་རྣམ་པ་མཆོག་ལྡན་གྱི་སྟོང་པ་སྟེ། ཐབས་ཤེས་རབ། དོན་དམ་ཀུན་རྫོབ། བསྐྱེད་རིམ་རྫོགས་རིམ་ལ་སོགས་པ་དབྱེར་མེད་པ་སྟེ། ཕྱོགས་གཅིག་ཏུ་ཞེན་པ་ལས་གྲོལ་བའི་ལམ་མ་ནོར་ཞིང་རྣམ་པར་དག་པའོ། །དེ་ལྟར་ལམ་སྒྲོ་སྐུར་གྱི་མཐའ་དང་བྲལ་བ་ཟུང་འཇུག་རབ་ཏུ་མི་གནས་པ་དབུ་མའི་ལམ་ཉམས་སུ་བླངས་པས། འབྲས་བུ་སྲིད་ཞིའི་མཐའ་ལ་མི་གནས་པའི་བྱང་ཆུབ་ཆེན་པོ་མངོན་དུ་བྱེད་པའོ། །གསུམ་པ་འབྲས་བུའི་སྟོང་ལུགས་གཉིས་ནི། སྣང་དང་སྣང་མེད་ཡེ་ཤེས་རྒྱུན་གྱིས་སྟོང༌། །རྟོག་དང་རྟོག་མེད་འཁོར་དང་འདས་པས་སྟོང༌། །ཞེས་པ་སྟེ༑ ཡང་དག་པར་རྫོགས་པའི་སངས་རྒྱས་ལ་སྣང་བས་སྟོང་སྟེ། ཞེན་པས་བརྟས་པའི་འཁྲུལ་སྣང་མི་མངའ། སྣང་མེད་ཀྱིས་སྟོང་སྟེ། རང་སྣང་རང་ངོ་ཤེས་པ་ཡེ་ཤེས་ཀྱི་སྣང་བ་ལ་འགག་པ་མེད། ཡེ་ཤེས་ཡོད་པས་སྟོང་སྟེ། ཡོད་པ་དངོས་ཅན་གྱི་ཡང་དག་ཅིག་གྲུབ་པ་མེད། མེད་པས་སྟོང་སྟེ་ཡོད་མེད་སྒྲོ་སྐུར་གྱི་མཐའ་དང་བྲལ་བ་དེ་ཉིད་བསམ་གྱིས་མི་ཁྱབ་པའི་ཡེ་ཤེས་ཀྱི་དངོས་གཞིར་བཞུགས། རྟོག་པས་སྟོང་སྟེ། སེམས་དང་སེམས་ལས་བྱུང་བའི་རྣམ་ཤེས་དང༌། འདུ་ཤེས་ཀྱི་རྣམ་རྟོག་མི་མངའ། ཡུལ་དང་ཡུལ་ཅན་གྱི་ཐུགས་རྗེ་དང་ཕྲིན་ལས་མི་མངའ། རྟོག་མེད་ཀྱིས་སྟོང་སྟེ་ཉན་ཐོས་ཀྱི་འགོག་པའི་འབྲས་བུ་ལྟ་བུ་མ་ཡིན་པར། སོ་སོར་ཀུན་ཏུ་རྟོག་པའི་ཡེ་ཤེས་ཀྱིས་ཤེས་བྱའི་དཀྱིལ་འཁོར་ལ་མཁྱེན་པའི་ཡེ་ཤེས་རྒྱས་ཤིང་དུས་གསུམ་མངོན་སུམ་དུ་མཁྱེན་ལ། དམིགས་མེད་ཀྱི་སྙིང་རྗེས་རྩོལ་མེད་ཀྱི་ཕྲིན་ལས་སྲིད་མཐའི་བར་དུ་འབྱུང་བའོ། །འཁོར་བས་སྟོང་སྟེ་ཤེས་རབ་ཆེན་པོས་སྲིད་པ་ལ་མི་གནས། འདས་པས་སྟོང་སྟེ་སྙིང་རྗེ་ཆེན་པོས་ཞི་བ་ལ་མི་གནས་པའོ། །དེ་ལྟར་གཞི་ལམ་འབྲས་བུའི་ཉེས་པ་ཟད་པའི་སངས་རྒྱས་དེ་ལ་འགའ་ཞིག་འཁྲུལ་སྣང་གཞི་དང་ལམ་གྱི་ཤེས་སྒྲིབ་བཀབ་ནས་སྣང་བ་ཡོད་མེད་དང་ཡེ་ཤེས་རྒྱུན་ཆད་མ་ཆད་དང༌། རྟོག་པ་ཡོད་མེད་ལ་སོགས་པ་ལ་རྩོད་པ་འབྱུང་བར་འདུག་སྟེ། ཕྱོགས་གཅིག་གི་མུར་འཛིན་པ་དེ་དག་གིས་འབྲས་བུ་རྣམ་ཀུན་མཆོག་ལྡན་གྱི་སྟོང་པ་ཉིད་གོ་བ་མིན་ནོ། །རྡོ་རྗེ་གཅོད་པའི་མདོ་ལས། གང་དག་ང་ལ་གཟུགས་སུ་མཐོང༌། །གང་གིས་ང་ལ་སྒྲར་ཤེས་པ། །ལོག་པར་མཐོང་ལ་ཞུགས་པ་ཡི། །སྐྱེ་བོ་དེས་ནི་ང་མི་མཐོང༌། །འདྲེན་པ་རྣམས་ནི་ ཆོས་ཀྱི་སྐུ། །ཆོས་སྐུ་མཐོང་བྱ་མ་ཡིན་ནོ། །ཞེས་པའི་དོན་ནོ། །བཞི་པ་སྟོང་པའི་འཐད་ལྡན་ནི། སྟོང་དང་རྟེན་འབྱུང་དབྱེར་མེད་དག་སྡིག་འབྲས་བུ་འབྱིན། །ཐམས་ཅད་སྟོང་པ་ཡིན་ཕྱིར་འཁྲུལ་སྣང་ལྡོག་ཏུ་བཏུབ། །ཅེས་པ་སྟེ། ཆོས་ཐམས་ཅད་ཀྱི་ཆོས་ཉིད་ཅི་ཡང་མ་ཡིན་པའི་གནད་ཀྱིས་རྐྱེན་གྱིས་ཅིར་ཡང་འཆར་ཞིང་ཅིར་ཡང་བྱར་བཏུབ་པ་སྟེ། བསམ་པའི་རང་གཟུགས་བག་ཆགས་ཀྱི་གཟུགས་བརྙན། སྟོང་པ་ལས་སྟོང་པའི་ཆོས་འབྱུང་བ་དཀར་ནག་གི་རྒྱུ་འབྲས་ཏིལ་འབྲུ་ཙམ་ཡང་ཆུད་མི་ཟ་ཞིང༌། མ་འདྲེས་པར་འབྲས་བུ་འབྱིན་པ་སྟེ། ཕྱོགས་གཅིག་ཏུ་ཅི་ཡང་མིན་པས། ཕྱོགས་མེད་ཅིར་ཡང་འཆར་བས་ན། ཀུན་རྫོབ་ཀྱི་ཆོས་འཁོར་བའི་རྒྱུ་འབྲས་ཇི་སྙེད་པ་ཐམས་ཅད་ཀྱང་སྟོང་ཉིད་ཡིན་པས་འབྱུང་བའོ། །ཡང་ཆོས་ཐམས་ཅད་ཀྱི་ཆོས་ཉིད་སྟོང་པ་ཉིད་ཡིན་པའི་གནད་ཀྱིས། འཁྲུལ་པ་ལྡོག་ཅིང་མྱ་ངན་ལས་འདར་ཡང་བཏུབ་པ་སྟེ་ཆོས་ཐམས་ཅད་ལ་རྟག་བརྟན་ཐེར་ཟུག་མི་འགྱུར་བའི་དངོས་པོ་ཀོ་འཐས་ཡང་དག་ཏུ་གྲུབ་པ་གང་ཡང་མེད་པས། སྡིག་པ་བཤགས་སུ་བཏུབ་ལ། དགེ་བ་བསྔོ་རུ་བཏུབ། འཁྲུལ་སྣང་ལྡོག་ཏུ་བཏུབ་པ་སྟེ། སྡིག་པ་ལ་རང་བཞིན་མེད་ཅིང་མ་གྲུབ་པར་ཤེས་པ་ནི། སྡིག་པ་བཤགས་པའི་མཆོག་ཡིན་ལ། དགེ་བ་རང་བཞིན་མེད་ཅིང་མ་གྲུབ་པར་ཤེས་པ་ནི་ཟག་མེད་ཀྱི་དགེ་བའི་མཆོག་ཡིན་ཞིང༌། ཆོས་ཐམས་ཅད་རང་བཞིན་མེད་ཅིང་མ་གྲུབ་པ་ནི་ཆོས་སྐུའི་དངོས་གཞིར་ གནས་ཅིང༌། དེ་དེ་ལྟར་ཤེས་པ་ཡེ་ཤེས་ཏེ། མདོར་ན་སྟོང་ཉིད་རང་བཞིན་མེད་པའི་གནད་ཀྱིས་འཚང་རྒྱ་རུ་བཏུབ་ལ། མི་རྒྱ་བའི་རང་དབང་མེད་པའོ། །སྟོང་པ་དང་མི་རྟག་པ་ཡང་ཕུགས་གཅིག་སྟེ། དེ་ཉིད་ཆོས་ཀྱི་དབྱིངས་བསམ་གྱིས་མི་ཁྱབ་པ་ཡིན་ལ། ཆོས་ཉིད་དེ་དུས་ལས་འདས་ཤིང༌། དེ་ཉིད་ཤེས་པའི་ཡེ་ཤེས་དེ་དུས་ལ་དབང་སྒྱུར་བས། དུས་བསྐལ་པ་དང་སྐད་ཅིག་མ་ལ་ཁྱད་མེད་པ་དང༌། དུས་གསུམ་དང་དུས་མངོན་དུ་མཁྱེན་པ་དང༌། སྣང་བ་ལ་དབང་སྒྱུར་བས་སྟོང་གསུམ་ཉུངས་འབྲུར་ཚུད་པ་དང༌། བ་སྤུའི་བུ་ག་ནས་ཞིང་ཁམས་བྱེ་བ་འགྱེད་པ་ལ་སོགས་པའི་སྟོང་ཉིད་ཅི་ཡང་མ་ཡིན་པའི་གནད་ཀྱིས་འབྱུང་བ་སྟེ། ལུགས་བཟློག་མྱ་ངན་ལས་འདས་པའི་རྟེན་འབྲེལ་ཐམས་ཅད་སྟོང་ཉིད་ཡིན་པའི་གནད་ཀྱིས་འབྱུང་བའོ། །རྒྱལ་བའི་ཡུམ་ལས། གཟུགས་རྟག་བརྟན་ཐེར་ཟུག་མི་འགྱུར་བའི་དངོས་པོ་ཞིག་ཡིན་ན་ནི། ཐེག་པ་ཆེན་པོ་འདིས་ཀྱང་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ཟིལ་གྱིས་མནན་ཅིང་འབྱུང་བར་མི་འགྱུར་རོ། །ཞེས་པ་ལ་སོགས་པ་རྒྱ་ཆེར་གསུངས་སོ། །ལྔ་པ་སྟོང་པ་དེ་གཏན་ལ་དབབ་ལུགས་ཀྱི་ཚིག་རྐང་གཉིས་ནི། མ་བྱས་ཡུལ་མེད་རང་སྟོང་ལྷན་ཅིག་སྐྱེས། །གདོད་ནས་ཡོད་པ་བླ་མའི་དྲིན་གྱིས་ཤེས། །ཞེས་པ་སྟེ། སྟོང་ཉིད་དེ་ཡང་མཆོག་གསུམ་དང་ལྡན་པ་སྟེ། རང་སྟོང༌། ཡེ་སྟོང༌། རང་བཞིན་གྱིས་སྟོང་པའོ། །རང་སྟོང་པས་ཡུལ་མེད་དེ། སྟོང་བྱ་ཕྱི་རུ་བཞག་ནས། སྟོང་མཁན་ནང་དུ་ལུས་པ་ལྟ་བུ་མ་ཡིན་ཏེ། སྣང་རིག་རང་སྟོང་པའོ། །ཡེ་སྟོང་པ་དུས་བློ་བུར་དུ་མ་བྱུང་བ་སྟེ། སྔོན་ལ་སྣང་བ་འབྱུང་བ་ལ་དེ་ནས་སྟོང་པར་སོང་བ་ལྟ་བུ་མ་ཡིན་ཏེ། གདོད་མ་ནས་སྟོང་ཞིང༌། དངོས་པོའི་ཆོས་སུ་སྐྱེ་མ་མྱོང་བའོ། །རང་བཞིན་གྱིས་སྟོང་པ་ནི་བྱེད་པ་པོ་གཞན་གྱིས་མ་བྱས་པ་སྟེ། སངས་རྒྱས་ཀྱིས་བཅོས་ནས་སྟོང་དུ་བཅུག་པའམ། སེམས་ཅན་གྱིས་སྦྱངས་ནས་སྟོང་དུ་བཅུག་པའམ། ལམ་གྱིས་སྦྱངས་ནས་སྟོང་དུ་བཅུག་པའམ། བླ་མ་གདམས་ངག་ཆེ་ནས་བྱས་པའམ། སློབ་མ་ཤེས་རབ་ཆེ་ནས་བྱས་པའམ། སྣང་བ་བཀག་ནས་སྟོང་པ་བསྒྲུབས་པ་ལྟ་བུ་མ་ཡིན་ཏེ། ཆོས་ཐམས་ཅད་ཀྱི་རང་བཞིན་གྱིས་སྟོང༌། ངོ་བོས་སྟོང་པ་དུས་གསུམ་དུས་མེད་པས་སྟོང་པ། སྣང་བའི་དུས་ཉིད་ན་ངོ་བོས་སྟོང་པ་ཉིད་དོ། །བརྒྱད་སྟོང་པ་ལས། རབ་འབྱོར་གཟུགས་གཟུགས་ཀྱི་ངོ་བོ་ཉིད་ཀྱིས་སྟོང་སྟེ། རང་གི་མཚན་ཉིད་ཀྱིས་སྟོང་པ་ཡིན་པའི་ཕྱིར་རོ། །ཞེས་རྒྱ་ཆེར་གསུངས་པ་དང༌། ཡབ་སྲས་མཇལ་བ་ལས། ཆོས་འདི་ཐམས་ཅད་ནི་དུས་གསུམ་དུ་མཉམ་པ་ཉིད་ཀྱིས་མཉམ་པ་དག་སྟེ། འདས་པའི་དུས་ནའང་ཆོས་ཐམས་ཅད་ངོ་བོ་ཉིད་མེད་པས་ན་ད་ལྟར་བྱུང་བའི་བར་དུ་ངོ་བོ་ཉིད་དང་བྲལ་བའོ། །ཞེས་གསུངས་པའོ། །དེ་ལྟ་བུའི་སྟོང་པ་དེ་དངོས་པོའི་ཆོས་ཐམས་ཅད་དང་གཉིས་སུ་མེད་པར་རང་གི་ངོ་བོའི་ལྷན་ཅིག་སྐྱེས་པ་སྟེ། བརྟག་གཉིས་ལས། ལྷན་ཅིག་སྐྱེས་པ་གང་སྐྱེས་པ། །ལྷན་ཅིག་སྐྱེས་པར་དེ་བརྗོད་བྱ། །རང་བཞིན་ལྷན་སྐྱེས་ཞེས་བརྗོད་དེ། །རྣམ་པ་ཐམས་ཅད་སྡོམ་པར་གཅིག །ཅེས་པའི་དོན་ནོ། །དེ་ལྟ་བུའི་སྟོང་ཉིད་ལྷན་ཅིག་སྐྱེས་པ་དེ་ཐ་སྙད་ཀྱིས་གཏན་ལ་མི་ཕེབས་ཤིང༌། རྟོག་གེ་བའི་སྤྱོད་ཡུལ་མ་ཡིན་པས། ཐོས་བསམ་གྱི་ཤེས་རབ་ཀྱིས་དོན་སྤྱིའི་རྣམ་པ་ཙམ་གཏན་ལ་ཕེབས་སུ་ཟིན་ཀྱང༌། རང་མཚན་མངོན་སུམ་དུ་རྟོགས་པར་མི་འགྱུར་བས། བླ་མ་དམ་པའི་བྱིན་རླབས་ཀྱི་བརྡ་ཐབས་ཁྱད་པར་ཅན་ལ་བརྟེན་ནས་སྐྱེ་བའི་མཚན་མས་སྐྱེ་མེད་རྟོགས་པར་འགྱུར་ཞིང༌། དངོས་པོའི་ཆོས་ལ་བརྟེན་ནས་སྟོང་པའི་ཆོས་ཉིད་རྟོགས་པར་འགྱུར་ལ། ཡེ་ནས་ཡོད་པའི་ཡེ་ཤེས་ཁོང་ནས་སད་པར་བྱེད་དོ། །དྲུག་པ་སྟོང་པའི་སྐྱོན་ཡོན་གཉིས་ལ། རྣམ་ཀུན་མཆོག་ལྡན་ཟུང་འཇུག་དངོས་པོའི་གཤིས། །མེད་པའི་སྟོང་པ་འདྲ་མིན་ནོར་སར་ནོར། །ཞེས་པ་སྟེ། རྣམ་པ་ཀུན་ལྡན་གྱི་སྟོང་པ་ཕྱོགས་གཅིག་གིས་སྟོང་པ་སོགས་སྤྲོས་པས་དབེན་པའི་རང་བཞིན་དེ་ནི། དངོས་པོའི་གནས་ལུགས་དངོས་པོའི་གཤིས་ཡིན་ལ། དེ་ཇི་ལྟ་བར་རྟོགས་པའི་ཤེས་རབ་ནི། མྱུར་དུ་འཁོར་བ་ལས་བསྒྲལ་ཞིང༌། མངོན་པར་རྫོགས་པར་སངས་རྒྱས་པར་བྱེད་པ་ཡིན་ནོ། །ཀླུ་སྒྲུབ་ཀྱིས། ཡོད་པ་པོ་ནི་བདེ་འགྲོར་འགྲོ། །མེད་པ་པོ་ནི་ངན་འགྲོར་འགྲོ། །ཡང་དག་ཇི་བཞིན་ཡོངས་ཤེས་ན། །གཉིས་ལ་མི་བརྟེན་ཐར་བར་འགྱུར། །ཞེས་པ་དང༌། རྣམ་འགྲེལ་ལས། བྱམས་སོགས་རྨོངས་དང་འགལ་མེད་ཕྱིར། །ཉེས་པ་ཤིན་ཏུ་ཚར་གཅོད་མིན། །ཉེས་ཀུན་དེ་ཡི་རྩ་བ་ཅན། །དེ་ཡང་འཇིགས་ཚོགས་ལྟ་ལས་བྱུང༌། །སྟོང་ཉིད་ལྟ་དང་དེ་འགལ་བས། །དེ་ལས་བྱུང་བའི་ཉེས་ཀུན་སྤོང༌། །ཞེས་པ་དང༌། མདོ་དཀོན་མཆོག་བརྩེགས་པ་ལས། སྐལ་བ་དམན་པས་ཆོས་འདི་ལ། །ཐེ་ཚོམ་ཙམ་ཞིག་སྐྱེར་མི་ནུས། །ཐེ་ཚོམ་ཙམ་ཞིག་སྐྱེས་པས་ཀྱང༌། །སྲིད་པ་ཧྲུལ་པོར་བྱེད་པ་ཉིད། །ཅེས་པ་ལ་སོགས་པ་གསུངས་པས། གནས་ལུགས་ཀྱི་གཤིས་སྟོང་པ་ཉིད་དུ་བཞུགས་པ་ཡིན་ལ། དེ་མ་ནོར་བར་རྟོགས་པའི་ཤེས་རབ་ཀྱིས། ལས་ཐམས་ཅད་ཟག་པ་མེད་པར་སྒྲུབ་ཅིང༌། མྱུར་དུ་འཁོར་བ་ལས་གྲོལ་ཞིང༌། མྱ་ངན་ལས་འདས་པ་མངོན་དུ་བྱེད་པའོ། །མེད་པའི་སྟོང་པ་འདྲ་མིན་ནོར་སར་ནོར། །ཞེས་པ་ནི། སྟོང་པ་དང་མེད་པ་འདྲ་མིན་གྱི་ནོར་སར་ནོར་བ་ཡིན་པས། སྟོང་པ་ཞེས་པ་ཅང་མེད་ཕྱང་ཆད་གཅིག་ཏུ་གོ་ན། བློ་གྲོས་རྨོངས་ཤིང་ལྟ་བ་ཤིན་ཏུ་ནོར་བ་སྟེ། དེ་ལ་དགོངས་ནས། སྡུད་པ་ལས། ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དང༌། ས་ར་ཧས། དངོས་པོར་རྟོག་པ་ཕྱུགས་དང་འདྲ་བར་བརྗོད། །དངོས་མེད་རྟོག་པ་དེ་བས་ཀྱང་ནི་བླུན། །ཞེས་པ་དང༌། ཡུམ་ལས། སྟོང་པ་ཉིད་སྟོང་པ་ཉིད་དང་ཞེས་པ་ལ་སོགས་པ་མང་དུ་གསུངས། ཀླུ་སྒྲུབ་ཀྱིས། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང༌། །རིག་སྔགས་ལོག་པར་སྒྲུབ་པ་བཞིན། །ཞེས་པ་དང༌། ཆོས་སྤྱོད་མངོན་རྟོགས་ལས། སྟོང་པའི་བདག་པོ་སྟོང་པར་འགྲོ། །ཞེས་པ་ལ་སོགས་པ་མདོ་རྒྱུད་བསྟན་བཅོས་རྣམས་ནས་མང་དུ་གསུངས་ཏེ། དེ་ཐམས་ཅད་སྟོང་པ་མེད་པའི་ཕྱོགས་སུ་འཛིན་པ། ཆད་པར་ལྟ་བ་ལ་ཉེས། ཐབས་ལ་སྐུར་བ་འདེབས་པ་རྣམས་ལ་དགོངས་པ་ཡིན་ཏེ། སྟོང་པ་དང་མེད་པ་མ་ནོར་བར་རྣམ་ཀུན་མཆོག་ལྡན་གྱི་སྟོང་པ་གཉིས་མེད་རྟེན་ཅིང་འབྲེལ་འབྱུང་གི་དོན་ཁོང་དུ་ཆུད་པར་བྱའོ། །ཡང་རྒྱལ་བའི་ཡུམ་ལས། སྟོང་པ་ཉིད་ཀྱི་ཏིང་ངེ་འཛིན་ལ་འདྲིས་པར་བྱའོ། །སྟོང་པ་ཉིད་ཀྱི་ཏིང་ངེ་འཛིན་མངོན་དུ་མི་བྱའོ༑ ༑ཞེས་པ་དང༌། དཀོན་མཆོག་བརྩེགས་པ་ལས། སེང་གེ་གང་ལའང་མི་འཇིགས་མོད། །མེ་ཆེན་བྱུང་ན་འཇིགས་པ་སྐྱེས། །དེ་བཞིན་བྱང་ཆུབ་སེམས་དཔའ་ཡང༌། །ཆོས་གཞན་གང་ལའང་མི་འཇིགས་ཀྱང༌། །སྟོང་པ་ ཉིད་ལ་འཇིགས་པ་སྐྱེ། །ཞེས་པ་གསུངས་པའི་དོན་ཡང་གོ་བར་བྱའོ། །སྟོང་ཉིད་རྡོ་རྗེའི་ཚིག་དྲུག་མའི་ཞལ་གདམས་ཆེ་ལོང་ཙམ་ཡི་གེར་བཀོད་པའོ། ། ཨྠ ི། ༀ་སྭ་སྟི་སིདྡྷཾ། སྣང་དང་སྟོང་པས་སྟོང་ལ་རྟག་དང་ཆད་པས་སྟོང༌། །ཡོད་དང་མེད་པས་སྟོང་ལ་གཅིག་དང་དུ་མས་སྟོང༌། ༡ །བསྒོམ་དང་ཐ་མལ་གྱིས་སྟོང་ལྟ་དང་ལྟ་མིན་སྟོང༌། །བྱ་དང་མི་བྱེད་འཁོར་གསུམ་ཀུན་ཏུ་སྟོང༌། ༢ །རྟོག་དང་རྟོག་མེད་འཁོར་དང་འདས་པས་སྟོང༌༑ ༑སྣང་དང་སྣང་མེད་ཡེ་ཤེས་རྒྱུན་གྱིས་སྟོང༌། ༣ །སྟོང་དང་རྟེན་འབྱུང་དབྱེར་མེད་དགེ་སྡིག་འབྲས་བུ་འབྱིན། །ཐམས་ཅད་སྟོང་པ་ཡིན་ཕྱིར་འཁྲུལ་སྣང་ལྡོག་ཏུ་བཏུབ། ༤ །མ་བྱས་ཡུལ་མེད་རང་སྟོང་ལྷན་ཅིག་སྐྱེས༑ ༑ཡེ་ནས་ཡོད་པ་བླ་མའི་དྲིན་གྱིས་ཤེས། ༥ །རྣམ་ཀུན་མཆོག་ལྡན་ཟུང་འཇུག་དངོས་པོའི་གཤིས། །མེད་པའི་སྟོང་པ་འདྲ་མིན་ནོར་སར་ནོར། ༦ །སྟོང་ཉིད་རྡོ་རྗེའི་ཚིག་དྲུག་བྱ་བ་དོན་དམ་པ་རྣལ་དུ་སྟོན་པའི་ ཡེ་གེ་ ཨྠ ི ། ༄༅། །ན་མོ་གུ་རུ། བླ་མ་རིན་པོ་ཆེ་དང་ཞང་རིན་པོ་ཆེ་སྐྱེ་བ་འགའི་དཔོན་སློབ་ཡིན་གསུངས། དེ་ལྟ་ཡང་རྩ་བའི་བླ་མ་དང་མཉམ་པའི་མོས་གུས་ཡོད་པས། དུས་མཆོད་ཀྱང་ཁྲིག་གེ་མཛད། རྟོགས་པ་ལ་བོགས་མེད་ཙ་ན་ཡང་གསོལ་བ་འདེབས། བྱང་ཆུབ་ཀྱི་སེམས་ལ་བོགས་འདོན་པ་དང༌། རྨི་ལམ་སྦྱང་བ་ལ་སོགས་པའི་དུས་སུ་ཡང་གསོལ་བ་འདེབས་གསུངས། སྤྱིར་ཡང་མཚན་མོ་རྨི་ལམ་དུ་ཞལ་མང་དུ་མཇལ་བས། ཞང་གི་ཆོས་ཚོ་ལ་བརྒྱུད་པ་གཞན་ལ་བདའ་མི་དགོས། ཞང་རིན་པོ་ཆེས་རྒྱུད་བྱིན་གྱིས་བརླབས་པ་ཡིན་གསུངས། ད་ལྟ་ཡང་གསོལ་བ་ནམ་བཏབ་པའི་དུས་སུ་མཇལ་བ་ལ་ཐེ་ཚོམ་མི་ཟ་བར་གདའ་འོ། །ད་རེས་འདིར་ཇི་ལྟར་མཇལ་ན། རས་སྔོན་མདའ་རུ་རྗེ་རིན་པོ་ཆེ་སྐུ་འཁོར་ཤས་གཅིག་གིས་བཞུགས་པའི་དུས་སུ། སྔར་ཡུམ་བཞུགས་པ་ལ་ཡུམ་དགོན་པར་གཤེགས་པའི་ནུབ་མོ་ཁ་བ་གཅིག་བྱུང༌། དེར་རིན་པོ་ཆེའི་ཐུགས་ལ་ང་དག་འོ་མི་རྒྱལ་བར་འདུག་སྟེ། རྒན་མོ་ལྷ་ང་ནང་འཕྲེང་ཡིན་ཡོད་སྙམ་པ་གཅིག་བྱུང༌། དེས་རྐྱེན་བྱས་ནས་མའི་དྲིན་དྲན། དེར་དེ་བཞིན་དུ་སེམས་ཅན་ཐམས་ཅད་ཀྱིས་མ་བྱས་པའི་དྲིན་དྲན་པས་བྱམས་སྙིང་རྗེ་བསམ་གྱིས་མི་ཁྱབ་པ་ཐུགས་ལ་འཁྲུངས་སྤྱན་ཆབ་དཔག་ཏུ་མེད་པ་བྱུང༌། སྨོན་ལམ་དཔག་ཏུ་མེད་པ་བཏབ། དེའི་དུས་སུ་ལམ་དུ་བཏང་ཤེས་ན་ང་འགྲོ་དོན་གྱི་རྟེན་འབྲེལ་དེ་ཀས་འགྲིགས་པ་ལ། ངས་མ་ཤེས་པར་ཕར་རོ་མྱངས་གསུངས། དེའི་མཐར་ཐུག་ཐ་མལ་ཉིན་ཞག་གཅིག་ཏིང་ངེ་འཛིན་ལ་ཕྱམས་སོང་ནས། ཉེ་གནས་པས་ཚ་བ་དྲངས་པ་ཡང་ཕྱག་ཏུ་བཞེས་པ་བྱུང་འདུག་སྟེ་གསོལ་བ་མ་བྱུང་འདུག །དེ་ནས་དར་ཅིག་ཙ་ན། ཉི་བཞུར་ཐལ་ལེ་བ་གཅིག་ཡུད་བྱུང༌། ཡང་དེ་མ་ཐག་ཕྱམས་སོང༌། དེའི་བར་ལ་ཉེ་གནས་པས་འབོད་ནི་མ་ནུས། ཡང་ཡང་བསྐོར། དགོང་མོར་སོང་བ་དང་ཁོང་ཚོས་སྐོར་བའི་རྡོག་སྒྲས་ཏིང་ངེ་འཛིན་ནས་དེ་ནས་དེར་རྣམ་རྟོག་གི་སྤུན་ཐག་ཆད་ནས། གསལ་སྟོང་དུ་རྗེན་པར་རྟོགས་པའི་བོགས་ཉམས་ཀྱིས་བཏོན་ཁོར་ཡུག་ཏུ་སོང༌། སྒོམ་མེད་ཆེན་པོ་ཡིན་སྙམ་པའི་ཐག་ཆོད་པ་བྱུང༌། དེ་ནས་ཆོས་མང་པོ་གཅིག་གི་སྒྲོ་འདོགས་ཆོད། གེགས་སེལ་གཟེར་ལྔའི་ལྷ་འདྲེ་ལམ་དུ་ཁྱེར་བའི་སྐབས་སུ། ལྷ་འདྲེ་ཕ་མ་ཡིན། བླ་མ་ཡིན། ཡི་དམ་ཡིན། ལྷན་སྐྱེས་ཡིན་གསུངས་པ་ལས། འདི་ལྟར་ཡིན་བྱ་བ་མི་འདུག །ལམ་དུ་འཁྱེར་ལུགས་ གཅིག་ཡོད་སྙམ་ནས་ཞང་རིན་པོ་ཆེ་ལ་གསོལ་བ་བཏབ་པས། དེའི་ནུབ་མོ་མཚན་ལམ་ན། ན་བཀྲའི་བྲག་རྐེད་ཡིན་སྙམ་པ་ཞིག་ན། སྤང་ཁུད་སེར་སྡིང་ངེ་བ་ཞིག་ན། བླ་མ་ཞང་རིན་པོ་ཆེ་ཁྲི་གཅིག་གི་ལ་ན་བཞུགས། དར་ཐོད་གཅིག་མཛད། གདུགས་དཀར་པོ་གཅིག་ཕུབ། བུད་མེད་གཉིས་ཀྱིས་གཡས་གཡོན་ནས་བརྟེན་ནས་མདུན་ན་བཙུན་པ་འདྲ་བ་ཤས་གཅིག་དང༌། མི་སྐྱ་འདྲ་བ་དང་མཐའ་མ་ན་སྤྲང་པོ་འདྲ་བའི་ཞས་ཞིས་འདྲ་འདུག་པས། ངས་དེས་དགའ་བ་དང་མོས་གུས་ཐུན་མོང་མ་ཡིན་པས་ཕྱག་མང་དུ་བཙལ། དྲུང་དུ་ཕྱིན་པས་བླ་མ་ཞང་ཞལ་ཟས་ཀྱི་བྱེ་བྲག་གཅིག་གསོལ་གྱིན་འདུག་པས། ང་ལ་ཡང་རྒུན་འབྲུམ་འོལ་འདྲ་བའི་ཆེ་ཆུང་རྒུན་འབྲུམ་ཙམ་བྱས་པའི་སྤྲིན་སྤྲིན་པའི་འདི་ཡིན་ངོ་མི་ཤེས་པ་ཞིག་གནང༌། དེ་གསོལ་བས་རོ་མངར་ཤུལ་ཕྲིལ་བ། སྔར་ལྗགས་ལ་འཇོག་མ་མྱོང་བའི་རོ་མཆོག་བརྒྱ་དང་ལྡན་པ་ཞིག་བྱུང༌། ནང་པར་མནལ་སད་ཙ་ན་ཡང་དེའི་རོ་དེ་ལྗགས་དང་ཚེམས་ཀྱི་བར་དུ་ཆགས་ནས་ཞག་འགའ་ཞིག་བྱུང༌། ད་ལྟ་ཡང་ཁམས་ནམ་བཟང་ཙ་ན་ཡོད་གསུངས། དེའི་དུས་སུ་གསང་སྤྱོད་རྨོང་ལམ་མ་གནང་བའོ། །དེའང༌། ལྷ་འདྲེ་སྟོང་པའི་གཟུགས་བརྙན་འདི། །ལམ་དུ་ཁྱེར་བ་འདི་ལྟར་རོ། །ཕ་མ་ཡིན་གྱིས་བྱམས་པ་སྒོམས། །བླ་མ་ཡིན་གྱིས་གསོལ་བ་ཐོབ། །ཡི་དམ་ཡིན་གྱིས་དངོས་གྲུབ་ཞུས། །ལྷན་སྐྱེས་ཡིན་གྱིས་ངང་ལ་ཞོག །གསུངས། དེའི་འདྲོག་ལ་ མནལ་སད་ནས་ཆོས་རྣམ་པ་བཞི་ལ་བརྟེན་ནས། ལྷ་འདྲེ་ལམ་དུ་འཁྱེར་ཚུལ་གྱི་གསང་སྤྱོད་འདི་ཐུགས་ལ་ལམ་མེ་ཤར་ནས་འདུག །གཞན་ཡང་སྐུའི་བཀོད་པ་དང་འཁོར་གྱི་བྱེད་པ་དེ་རྣམས་ལ་གོ་རྒྱུ་མང་པོ་ཞིག་བྱུང༌། དེ་ལྟར་ལྷ་འདྲེ་ལམ་དུ་འཁྱེར་བ་ཐུན་མོང་མ་ཡིན་པའི་གསང་སྤྱོད་འདི་ལ་ལྷ་འདྲེ་ལམ་དུ་སློང་ཚུལ་བཞི་སྟེ། ལྷ་འདྲེ་ཕ་མར་ཤེས་པས་ཀུན་རྫོབ་བྱང་ཆུབ་ཀྱི་སེམས་ཀྱིས་ལམ་དུ་བྱེད་པ་བྱམས་པ་ཆེན་པོའི་གསང་སྤྱོད་དང༌། ཡི་དམ་དུ་ཤེས་པས་ཀུན་རྫོབ་བསྐྱེད་རིམ་ལྷའི་འཁོར་ལོས་ལམ་དུ་བྱེད་པ་སྒྱུ་ལུས་ཞིང་སྦྱོང་གི་གསང་སྤྱོད་དང༌། བླ་མར་ཤེས་པས་ལམ་ཟབ་མོ་མོས་གུས་ཀྱིས་ལམ་དུ་བྱེད་པ་དག་སྣང་ཀུན་ཁྱབ་ཀྱི་གསང་སྤྱོད་དང༌། ཆོས་སྐུར་ཤེས་པས་གཉིས་མེད་ཕྱག་རྒྱ་ཆེན་པོས་ལམ་དུ་བྱེད་པ་སྣང་སྲིད་རྒྱ་ཐིགས་ཀྱི་གསང་སྤྱོད་དོ། །དེ་རེ་རེ་ལ་གཉིས་གཉིས་ཏེ་སྤྱིར་ལྷ་འདྲེ་ལམ་དུ་སློང་ཚུལ་དང་། ཁྱད་པར་དུ་གསང་སྤྱོད་ཉམས་སུ་བླང་ཚུལ་ལོ། །དང་པོ་ནི། དོན་དམ་པའི་གཤིས་ལ་ལྷ་འདྲེ་དང་སངས་རྒྱས་དང་སེམས་ཅན་དང༌། རང་དང་གཞན་སྣང་ལ་སོགས་པའི་གཉིས་སྣང་ཐམས་ཅད་ངོ་བོ་ཉིད་ཀྱིས་མ་སྐྱེས་ཤིང་རྣམ་པར་དག་པས༑ དུས་གསུམ་དུ་ཡོད་མ་མྱོང་བ་ཡིན་ཡང་དེ་ཙམ་གྱིས་ལྷ་འདྲེ་ལམ་དུ་མི་བསློངས་པས། དོན་དམ་པར་ལྷ་འདྲེ་མ་གྲུབ་པས་བསླང་བྱ་སློང་བྱེད་ཀྱང་མ་གྲུབ་ལ། ཀུན་རྫོབ་ཏུ་ལྷ་འདྲེ་མེད་བྱས་ན་སྐུར་འདེབས་སུ་ གོལ་བས་དེ་ཡང་ཇི་སྲིད་རང་དུ་འཛིན་པ་ཡོད་ཀྱི་བར་དུ་ལྷ་འདྲེ་ཡང་ཡོད་ལ། དེ་ཡང་རང་དང་ལྷ་འདྲེ་གཉིས་ཀ་ལ་རྟག་བརྟན་ཐེར་ཟུག་མི་འགྱུར་བའི་དངོས་པོ་མེད་པས། བཏགས་ཆགས་ལྟར་སྣང་བསྒྲུབས་འགྲུབ་ཡིན་ཚུལ་ངེས་པ་མེད་ལ་རྐྱེན་གྱིས་ཅིར་ཡང་འཆར་བ་སྟེ། རང་ཐ་མལ་གྱི་རྣམ་རྟོག་དུག་གསུམ་རང་ག་མར་ཡོད་པའི་དུས་ན། དེའི་རང་གཟུགས་ལྷ་འདྲེ་ཡང་གནོད་བྱེད་ཀྱི་གདོན་བགེགས་སུ་ཡོད་ལ། རང་ཐེག་པ་ཆེན་པོའི་བྱང་ཆུབ་མཆོག་ཏུ་སེམས་བསྐྱེད་ནས་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱོང་བའི་དུས་ན། ལྷ་འདྲེ་དྲིན་ཅན་གྱི་ཕ་མར་ཡོད་ལ། རང་སྨིན་བྱེད་བུམ་པའི་དབང་ཐོབ་ནས་གྲོལ་བྱེད་བསྐྱེད་རིམ་ལམ་དུ་བྱེད་པའི་དུས་ན། ལྷ་འདྲེ་ཡི་དམ་གྱི་ལྷར་ཡོད་ལ། རང་རྫོགས་རིམ་གྱི་སྙིང་པོ་མོས་གུས་གཙོར་བྱེད་པའི་དུས་ན། ལྷ་འདྲེ་བླ་མ་སྐུ་གསུམ་གྱི་རང་བཞིན་དུ་ཡོད་ལ། རང་སྨིན་བྱེད་དབང་བཞི་ཐོབ་ནས་གྲོལ་བྱེད་ཕྱག་རྒྱ་ཆེན་པོ་ཉམས་སུ་ལེན་པའི་དུས་ན། ལྷ་འདྲེ་དེ་ལྷན་སྐྱེས་རང་བྱུང་གི་ཡེ་ཤེས་སུ་ཡོད་པ་སྟེ། ནང་གི་སེམས་ཀྱི་བྱེད་པ་ཇི་ལྟ་བ་བཞིན། ཕྱི་རོལ་གྱི་སྣང་བ་ཡང་དེར་སྣང་བས། སྣང་བ་རང་སེམས་བསམ་པའི་རང་གཟུགས་ཡིན་ལ། རང་ཐ་མལ་ལ་སེམས་ཅན་ལྷ་འདྲེ་གནོད་བྱེད་གདོན་བགེགས་ཡང་དག་ཏུ་གྲུབ་པ་མེད་པས། རྐྱེན་གྱིས་ཅིར་ཡང་འཆར་དུ་བཏུབ་སྟེ། ཆོས་ཐམས་ཅད་ཀྱི་ཆོས་ཉིད་སྟོང་པ་ཉིད་ཡིན་ལ། ཀུན་རྫོབ་ཀྱི་ ཆོས་ཉིད་དེ་ཉིད་དོན་དམ་པ་སྟེ། བདེན་གཉིས་དབྱེར་མེད་པའོ། །དེ་ལ་དང་པོ་བྱང་ཆུབ་ཀྱི་སེམས་ཀྱིས་ལྷ་འདྲེ་ལམ་དུ་བྱེད་པ་ནི། ཐེག་པ་ཆེན་པོ་བྱང་ཆུབ་མཆོག་ཏུ་སེམས་བསྐྱེད་ནས། བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱོང་བའི་རྣལ་འབྱོར་པ་ལ་ནམ་མཁའ་དང་མཉམ་པའི་སེམས་ཅན་ཐམས་ཅད་ཕ་མར་མ་གྱུར་པ་གང་ཡང་མེད་དེ། དེ་རེ་རེས་ཀྱང་ལན་གྲངས་བསམ་གྱིས་མི་ཁྱབ་པར་ཕ་མ་བྱས་ཤིང༌། ལུས་ལོངས་སྤྱོད་ལ་ལྟོས་པ་མེད་པར་བསྐྱངས་པའི་དྲིན་ཅན་གྱི་ཕ་མ་ཡིན་ལ། དེ་ཉིད་མདོ་ནས་རྒྱ་ཆེར་གསུངས་པ་སྟེ། ལུང་དེ་དགོངས་པ་ཅན་མ་ཡིན་པར་སྟོན་པ་ལ། ཀླུ་སྒྲུབ་ཀྱིས་ཀྱང་གསལ་པོར་གསུངས་ཏེ། དྲིན་ཅན་གྱི་ཕ་མ་དེ་རྣམས་སྡུག་བསྔལ་སྣ་ཚོགས་ཀྱིས་གདུངས་པ་ལ། ཕན་འདོགས་གནོད་སྐྱོབ་བདེ་བ་ལ་སྦྱོར་བའི་དྲིན་ལན་ལྡོན་དགོས། དེ་ལ་ཕ་མ་ཡིན་པའི་ལྷ་འདྲེ་ལ་ཞེ་སྡང་བྲེང་བ་གཅིག་བྱུང་ན། སེམས་བསྐྱེད་རྒྱས་ཀྱང་མ་ཐོབ༑ བློ་སྦྱོང་བྱས་ཀྱང་མ་འབྱོངས་པ་ཡིན། ད་ལྷ་འདྲེ་ཡིན་ན་ཕ་མ་མིན། ཕ་མ་ཡིན་ན་ལྷ་འདྲེ་མིན་པས། དེ་ཐམས་ཅད་ཕ་མ་རུ་ཤེས་ཤིང་བློ་སྣ་གཞན་དོན་དུ་སྦྱོང་བའི་ལྟ་བའི་གོ་ཆ་གྱོན། ད་ལྷ་འདྲེའི་བར་ཆད་གནོད་པ་བྱུང་བའི་དུས་སུ་འདི་ལྟར་ལམ་དུ་བཏང་སྟེ། ལྷ་འདྲེའི་བར་ཆད་དམ་གནོད་པ་དེ་ཉིད་རང་གི་ནང་དུ་བྱང་ཆུབ་ཀྱི་སེམས་ལ་ལྟེམ་རྐྱང་བྱུང་ཞིང༌། དུས་གསུམ་གྱི་རྟོག་པ་སྐྱེས་པའི་རང་གཟུགས་ཡིན་པས། སྐྱོན་གྱི་ས་བོན་རང་ལ་ཡོད་པ་ཤེས་པར་བྱས་ལ། དེ་ལ་གནད་དུ་བསྣུན་པ་ནི། ལུས་འཁྲུལ་འཁོར་དུ་གནས་ལ་ཚད་མེད་པ་བཞིའི་སྒོ་ནས་བྱང་ཆུབ་ཀྱི་སེམས་བསྒོམ་པ་ནི། སྤྱིར་ནམ་མཁའ་དང་མཉམ་པའི་སེམས་ཅན་ཐམས་ཅད་བདག་གི་མ་ཡིན། སྒོས་གནོད་ཅིང་བར་ཆད་བྱེད་པའི་གནོད་བྱེད་ཀྱི་ལྷ་འདྲེ་འདི་རྣམས་བདག་གི་མ་ཡིན། དེའང་ལན་གྲངས་བསམ་གྱིས་མི་ཁྱབ་པར་མ་བྱས་ཤིང༌། མ་བྱེད་པའི་དུས་ན་བདེ་སྡུག་གཏམ་ངན་གསུམ་ལ་མ་བལྟས་པར་ལུས་ལོངས་སྤྱོད་ལ་ལྟོས་པ་མེད་པར་བསྐྱངས་པས་ཤིན་ཏུ་དྲིན་ཆེ། དྲིན་ཅན་གྱི་མ་ཡིན་སྙམ་དུ་དྲིན་རྒྱས་པར་བསྒོམ་ཞིང༌། བདག་གི་དྲིན་ཅན་གྱི་མ་འདི་རྣམས་ལ་ཇི་ལྟར་ཕན་འདགས། ཇི་ལྟར་དྲིན་ལན་གླན། ཇི་ལྟར་བདེ་བ་ལ་དགོད། མ་འདི་རྣམས་བདེ་བ་དང་བདེ་བའི་རྒྱུ་དང་ལྡན་པར་བྱའོ། །སྙམ་དུ་བྱམས་པ་ཚད་མེད་པ་བསྒོམ། དེ་ལྟར་བདག་གི་དྲིན་ཅན་གྱི་མ་འདི་རྣམས་འདོད་བདེ་བ་འདོད་ཀྱང་འདུག་སྡུག་བསྔལ་གྱི་རང་བཞིན་དུ་འདུག །སྡུག་བསྔལ་གྱི་རྒྱུ་ལ་གནས། འབྲས་བུ་ལ་སྤྱོད། རྐྱེན་དང་མི་ལྡན་པའི་སེམས་ཅན་ཐམས་ཅད་སྙིང་རེ་རྗེ་སྙམ་དུ་སེམས་ཅན་གྱི་སྡུག་བསྔལ་རྒྱས་པར་བསྒོམ་ཞིང༌། སྡུག་བསྔལ་འདི་རྣམས་ལས་ཇི་ལྟར་བྱས་ལ་སྐྱོབ། གནོད་པ་འདི་རྣམས་ཇི་ལྟར་བསལ། སེམས་ཅན་འདི་རྣམས་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་བྱའོ། །སྙམ་པའི་སྙིང་རྗེ་ཚད་མེད་པ་བསྒོམ། གནོད་བྱེད་ཀྱི་མ་ཡིས་ གཙོ་བྱས་པའི་སེམས་ཅན་རྣམས་བདེ་བ་དང་ལྡན་ན་རེ་དགའ་སྟེ། སྡུག་བསྔལ་དང་བྲལ་ན་དགའ་སྟེ། མྱུར་དུ་བྱང་ཆུབ་ཐོབ་ན་རེ་དགའ་སྟེ། སེམས་ཅན་འདི་རྣམས་བདེ་བ་དང་ལྡན། སྡུག་བསྔལ་དང་བྲལ་མྱུར་དུ་སངས་རྒྱས་ཐོབ་ན་རང་ཉིད་ཇི་ལྟར་སོང་ན་ཡང་སོང་སྟེ་སྙམ་པའི་དགའ་བ་ཚད་མེད་པ་བསྒོམ་མོ། །དེ་ཡང་དགྲ་ཟིན་ཉེ་རིང་མེད་པར་མཐོ་དམན་མེད་པར་ཀུན་ལ་སྙོམས་ཤིང༌། དུས་རྒྱུན་ཆད་མེད་པར་བཏང་སྙོམས་ཚད་མེད་པ་བསྒོམ། དེ་ནས་གཞན་གྱི་སྡུག་བསྔལ་བསྡུ་ཞིང་གཞན་དོན་དུ་སྨོན་ལམ་གདབ་པ་སྟེ། བདག་ལ་ལྷ་འདྲེའི་བར་ཆད་དང་གནོད་པ་འདི་ལ་བརྟེན་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་ལས་དང་ཤེས་བྱའི་སྒྲིབ་པ་དང་སྐྱོན་དང་ཉེས་པ་ཐམས་ཅད་བྱང་ཞིང་དག་པར་གྱུར་ཅིག །ལྷ་འདྲེ་འདི་རྣམས་ཀྱིས་བདག་ལ་གནོད་པའི་བསམ་སྦྱོར་བརྩམས་པ་འདི་ཉིད་ཀྱིས་ནག་པོའི་འབྲེལ་པ་བྱས་ནས་གནོད་པའི་སྦྱོར་བ་དང༌། ཞེ་སྡང་གི་བསམ་པ་ཞི་ནས། བྱང་ཆུབ་ཀྱི་སེམས་ཀྱིས་རྒྱུད་ཡོངས་སུ་གང་ནས། དུས་དང་སྐྱེ་གནས་ཐམས་ཅད་དུ་བདག་གི་གདུལ་བྱར་གྱུར་ནས་ཐེག་པ་ཆེན་པོའི་ཆོས་ཀྱིས་སྨིན་པ་དང་གྲོལ་བར་བྱེད་པར་གྱུར་ཅིག །ཅེས་སྨོན་ལམ་གདབ་ཅིང་བློ་སྦྱང༌། དེ་ནས་གནོད་བྱེད་ཀྱི་ལྷ་འདྲེ་ལྟར་སྣང་བ་འདི་ཉིད་རང་གི་བློས་འཁྲུལ་པའི་སྣང་ངོར་ཤར་བ་ཡིན་གྱི། དོན་དམ་པ་ཤེས་བྱའི་གཤིས་ལ་སྐད་ཅིག་ཀྱང་གྲུབ་པ་ མེད་ཅིང་ཡོད་མ་མྱོང་ལ། ལྷ་འདྲེ་དང་བར་ཆད་ལྟར་སྣང་བའི་དུས་ཉིད་ན་རང་ངོ་སྐྱེ་འགག་གནས་གསུམ་དང་བྲལ་བའི་ཆོས་ཉིད་དུ་ཤེས་པས་གཉིས་སུ་མེད་པའི་ངང་ལ་ཕྱམས་ཀྱིས་བཞག་གོ །དེ་ནི་དོན་དམ་པ་བྱང་ཆུབ་སེམས་ཀྱིས་ལམ་དུ་བྱེད་པ་སྟེ། དེ་ལྟར་རང་རྒྱུད་བྱང་ཆུབ་ཀྱི་སེམས་སུ་ལྷང་ཤར་བའི་དུས་ན་ལྷ་འདྲེ་ཐམས་ཅད་ཕ་མ་རུ་འཆར་ཞིང༌། གནོད་པའི་སྦྱོར་བ་ཐམས་ཅད་ཕན་བདེ་རུ་འགྲོ་བར་འགྱུར་རོ། །ད་རང་ལ་གདོན་ནམ་གནོད་པའི་ལྷ་འདྲེ་གདུག་པ་ཅན་གྱིས་ཟིན་པ་ཡིན་ནའང༌། གོང་མ་དེ་རྣམས་ལ་ཕུར་ཚུགས་སུ་བསྒོམས་པས་མྱུར་དུ་ནད་དང་གདོན་ལས་ཐར་བར་འགྱུར་ཏེ། འཇིག་རྟེན་མགོན་པོ་འབྲི་ཁུང་པ་ལ། ཨེ་ཆུང་སྒོམ་ཕུག་ཏུ་མཛེ་ནད་དྲག་པོ་བྱུང་བའི་དུས་སུ། ཚད་མེད་པའི་སྙིང་རྗེ་ཐུགས་ལ་འཁྲུངས་པས་སྐད་ཅིག་དེ་ཉིད་ལ་བསྙུང་ནད་དེ་དྭངས་ཤིང༌། ཕྱིས་ཀྱང་སྙིང་རྗེའི་ཁྲིད་དེས་མཛེ་ཕོ་མང་པོའི་དོན་མཛད་དེ། མཛེ་འུར་འདེད་ཅེས་ཡོངས་སུ་གྲགས་པའོ། །གཞན་ཡང་དགྲ་ཐུལ་བ་དང་ནད་སོལ་བ་དུས་གཅིག་འོང་སྟེ། ལྷ་འདྲེའི་གནོད་པའི་བསམ་སྦྱོར་རྒྱུན་ཆད་པ་དང༌། ལྷ་འདྲེ་དེ་ཉིད་གདུལ་བྱར་གྱུར་པ་དང༌། དེ་ལ་བརྟེན་ནས་གཞན་དོན་བསམ་གྱིས་མི་ཁྱབ་པའི་སྒོ་འབྱེ་ཞིང༌། གོང་གི་ཚད་མེད་པ་བཞི་པོ་དེས་ཕྲིན་ལས་བཞི་ཡང་འགྲུབ་སྟེ། བྱམས་པས་ཞི་བའི་ཕྲིན་ལས་སྡིག་སྒྲིབ་ནད་གདོན་ཞི་བ་དང༌། སྙིང་རྗེས་དྲག་པོའི་ཕྲིན་ལས་ལྷ་འདྲེའི་བསམ་སྦྱོར་ངན་པ་འཆད་པ་དང༌། དགའ་བས་དབང་གི་ཕྲིན་ལས་གདོན་བགེགས་དེ་དབང་དུ་འདུ་བ་དང༌། བཏང་སྙོམས་ཀྱིས་རྒྱས་པའི་ཕྲིན་ལས་གདོན་དེ་ལ་བརྟེན་ནས་ཡང་ཚད་མེད་པའི་ལྷ་འདྲེའི་དོན་བྱེད་ཅིང༌། འཁོར་དང་ལོངས་སྤྱོད་སྙན་གྲགས་དང་ཕྲིན་ལས་ནམ་མཁའ་དང་མཉམ་པར་རྒྱས་པར་འགྱུར་བའོ། །ཡང་སྦྱང་གཞི་ཚངས་པའི་གནས་བཞི་ལ་སྦྱོང་བྱེད་ཚད་མེད་པ་བཞི་བསྒོམས་པས། འཇིག་རྟེན་པའི་མེས་པོ་ལྷ་ཚངས་པ་ཡིན་པས་འཇིག་རྟེན་ན་དེ་བས་དབང་ཆེ་བ་མེད་ཅིང༌། དེ་ཐམས་ཅད་དེའི་གཡོག་ལྟ་བུ་ཡིན་པའི་ཕྱིར་དུ། ལྷ་འདྲེ་མཐུ་བོ་ཆེ་རྣམས་དང༌། འཇིག་རྟེན་པ་ཐམས་ཅད་གདུལ་བྱར་འགྱུར་ཞིང༌། མཐར་ཐུག་རྣམ་པར་སྣང་མཛད་ཀུན་ཏུ་ཞལ་ལྟ་བུའམ། འཁོར་ལོ་བདེ་མཆོག་ལྟ་བུས་སེམས་ཅན་གྱི་དོན་མཛད་པའང་དེའི་རང་གཟུགས་ཡིན་ནོ། །གཞན་གྱི་སྡུག་བསྔལ་བསྡུས་པས་བློ་སྦྱོང་གི་བོགས་འདོན་ཅིང༌། དེ་ལ་རང་གི་སེམས་སུ་ཤེས་པས་ དམིགས་པ་མེད་པའི་བྱང་ཆུབ་ཀྱི་སེམས་སུ་འགྱུར་ཞིང༌། ཐམས་ཅད་ཀྱི་ཡོན་ཏན་གྱི་བྱེད་ཆོས་མྱུར་དུ་བསྐྱེད་པའོ། །གཉིས་པ་གསང་སྤྱོད་ཉམས་སུ་བླང་བའི་ཚུལ་ནི། འདྲེར་འཛིན་གྱི་རྣམ་རྟོག་དང་བདག་འཛིན་གྱི་ལྟོས་ཐག་བཅད་པ་དང༌། བྱང་ཆུབ་སེམས་ལ་བོགས་དབྱུང་བའི་ཕྱིར། གཅོད་སར་ཕྱིན་ལ་རོ་མཉམ་ཞིང་ཐག་བཅད་དེ། དེའང་རང་ལ་ལྷ་འདྲེ་གདོན་ཟེར་བ་ཡོད་ན་དེའི་ས་རུ་འགྲོ། དེ་མ་ཡིན་ན་གང་གཉན་ས་འདྲེ་ཆེ་བའི་སར་ཕྱིན་ལ། དེའི་ཡང་ས་དམིགས་སམ་གང་འཇིགས་འཇིགས་འདྲ་བ་རུ་ཕྱིན་ལ་མལ་བཅས་ཏེ། ལུས་འཁྲུལ་འཁོར་གནས་ལ་དཀོན་མཆོག་གསུམ་ལ་སྐྱབས་སུ་འགྲོ་བ་དང༌། བླ་མ་ལ་གསོལ་བ་གདབ། བྱང་ཆུབ་ཀྱི་མཆོག་ཏུ་སེམས་བསྐྱེད། དེ་ནས་གནས་བདག་དེས་གཙོ་བྱས་པའི་སེམས་ཅན་ཐམས་ཅད་ལ་གོང་གི་ཚད་མེད་པ་བཞི་པོ་དེ་སྙིང་ཐག་པ་ནས་ནན་ཏན་བསྐྱེད་ལ། ཡུན་རིང་དུ་གནད་དུ་བཏང༌། དེར་འཇིགས་པ་དང་ཡ་ང་བའི་རྟོག་པ་བྱུང་ན་འདི་སེམས་ཅན་མ་རུ་མ་ཤེས་པས། གནོད་བྱེད་འདྲེ་གདོན་དུ་བཟུང་བས་ལན། ལུས་ལོངས་སྤྱོད་ལ་ལྟོས་པ་མེད་པར་གཞན་དོན་དུ་མ་ཐོངས་པས། རང་ལུས་ལ་བདག་འཛིན་སྐྱེས་པས་ལན་པས། ཁྱོད་ཀྱི་སྙིང་རྗེ་དང་བྱང་ཆུབ་ཀྱི་སེམས་ཁ་ཙམ་དང་ཚིག་ཙམ་དང་གོ་ཡུལ་དུ་སོང་ནས་འདུག་པ། ཁྱོད་ལ་བློ་སྦྱོང་གི་སྐྱེ་ཚུལ་དེ་ལས་མི་འདུག་པ་སྙམ་དུ་རང་ལ་ཐག་བཅད་དེ་སྐྱོན་གྱི་རྩ་བ་བཏོན་ལ། ལྷ་འདྲེ་འདི་ནི་དྲིན་ཅན་མ་ཡིན་ན། ཕ་མས་འཇིགས་སམ། ཕ་མ་ལ་བག་ཚའམ། གཞི་བདག་གིས་གཙོར་བྱས་པའི་ནམ་མཁའ་དང་མཉམ་པའི་སེམས་ཅན་ཐམས་ཅད་དྲིན་ཅན་ཕ་མ་ཡིན་པ་ལ། སྔོན་ཆད་དྲིན་ལན་གང་ཡང་མ་ལོན་པས། ད་རེས་ལུས་འདི་བཏང་དགོས་སྙམ་དུ་བསམ་ལ། སྙིང་རྗེ་དུང་བ་གཅིག་བསྒོམས་ལ་གཞི་བདག་དེས་གཙོར་བྱས་པའི་ལྷ་འདྲེ་དཔག་ཏུ་མེད་པ་ཐིབས་ཀྱིས་བྱུང་བར་བསམ། དེ་ཐམས་ཅད་ཕ་མ་རུ་ཤེས་པས་དྲིན་ཆེན་གྱི་མ་ཁྱེད་རྣམས་ལ་དྲིན་ལན་དུ་སྟེར་བས་ཤ་དགའ་བ་ཤ་ཁྱེར། ཁྲག་དགའ་བ་ཁྲག་ཁྱེར། རུས་པ་དགའ་བ་རུས་པ་ཁྱེར། སོ་སོ་ཅི་འདོད་པ་ཁྱེར་ཅིག །ད་ལྟར་ཉིད་དུ་ཁྱེར་ཅིག་ཅེས་པས་ལྟོས་པ་མེད་པར་ཐམས་ཅད་ལ་ལིངས་ཀྱིས་བསྐྱུར་ལ། ལུས་ལ་སེམས་ཀྱིས་ཕྱི་མིག་ཀྱང་མི་ལྟ་བར་ཁྲེས་ཀྱིས་བཞག་སྟེ། སེམས་བྱམས་པ་ཆེན་པོའམ། སྙིང་རྗེ་ཆེན་པོའི་ངང་ལ་ཕྱམས་ཀྱིས་ཡུན་རིང་དུ་བཞག་གོ །དེ་ནས་གོང་ལྟར་ལྷ་འདྲེ་རང་སེམས་སུ་ཤེས་པས་རང་དང་ལྷ་འདྲེ་གཉིས་སུ་མེད་ཅིང་རང་ངོ་སྐྱེ་འགག་གནས་གསུམ་དང་བྲལ་བ་དོན་དམ་བྱང་ཆུབ་ཀྱི་སེམས་ལ་མཉམ་པར་བཞག་ལ། གཉིད་ལོག་པ་དང་སད་པ་དང༌། ཉིན་པར་ལ་སོགས་པ་དུས་ཐམས་ཅད་དུ་བྱང་ཆུབ་ཀྱི་སེམས་ལ་རྩེ་གཅིག་བསྒོམ་ཞིང༌། ཁྱད་པར་ལྷ་འདྲེའི་ཆོ་འཕྲུལ་བྱུང་ན་རང་གི་བྱང་ཆུབ་ཀྱི་སེམས་ལ་ལྟེམ་རྐྱང་བྱུང་ཞིང༌། འདྲེར་འཛིན་གྱི་རྟོག་པ་སྐྱེས་པའི་རང་གཟུགས་ཡིན་སྙམ་དུ་ཤེས་པས་གོང་ལྟར་གནད་དུ་བསྣུན་ཅིང༌། ལུས་ལྷ་འདྲེ་ལ་སྦྱིན་པ་བཏང་བ་ལ་ནན་ཏན་བསྐྱེད། སེམས་བྱམས་སྙིང་རྗེ་བྱང་ཆུབ་ཀྱི་སེམས་ལ་རྩེ་གཅིག་ཏུ་བསྒོམ། ཐུན་མཇུག་ཐམས་ཅད་ལ་སྨོན་ལམ་རྒྱ་ཆེན་པོ་མང་དུ་གདབ་ཅིང༌། ལྷ་འདྲེ་དེ་དག་གདུལ་བྱར་སྨོན་ལམ་གདབ། ཆོས་ཀྱི་སྦྱིན་པ་གཏང༌། དཀར་པོའི་འབྲེལ་གདགས། གཞན་དོན་གྱི་རྟེན་འབྲེལ་བསྒྲིག །དེ་ལྟར་ཇི་སྲིད་རང་གི་ འདྲེར་འཛིན་གྱི་རྟོག་པ་དང་ཡ་ང་བའི་ཁུ་འཕྲིགས་ཆོད་དེ། སྙིང་རྗེ་བྱང་ཆུབ་ཀྱི་སེམས་ལ་སོགས་མ་བྱུང་གི་བར་དུ་བསྒོམ། གཉིས་པ་བསྐྱེད་རིམ་ལྷའི་འཁོར་ལོས་ལྷ་འདྲེ་ལམ་དུ་སློང་ཚུལ་གཉིས་ལས། དང་པོ་སྤྱིར་ལམ་དུ་སློང་བ་ནི། སྨིན་བྱེད་བུམ་པའི་དབང་ཐོབ་ནས་གྲོལ་བྱེད་བསྐྱེད་རིམ་སྒོམ་པའི་རྣལ་འབྱོར་པ་ལ། སྣོད་ཀྱི་འཇིག་རྟེན་གཞལ་ཡས་ཁང་དང༌། བཅུད་ཀྱི་སེམས་ཅན་ལྷ་དང་ལྷ་མོ། ཚོར་བ་ཐམས་ཅད་བདེ་བ་ཆེན་པོ་ཡིན་ཏེ། དེ་ལ་ལྷ་མ་ཡིན་པའི་གནོད་བྱེད་བགེགས་ཤིག་གུད་དུ་བྱུང་ན་བུམ་དབང་བསྐུར་ཡང་མ་ཐོབ་ལ། བསྐྱེད་རིམ་བསྒོམས་ཀྱང་མ་འབྱོངས་པས། དུས་རྣམ་པ་ཐམས་ཅད་དུ་རང་གཞན་ཕུང་ཁམས་སྐྱེ་མཆེད་ཐམས་ཅད་ཡི་དམ་ལྷའི་འཁོར་ལོར་ཤེས་པར་བྱ་སྟེ། སྐུ་གསུང་ཐུགས་རྡོ་རྗེའི་དམ་ཚིག་དང་མ་བྲལ་བར་བྱ། ཁྱད་པར་དུ་རང་ལ་ལྷ་འདྲེའི་བར་ཆད་དམ་གནོད་པ་བྱུང་ན། རང་གི་བསྐྱེད་རིམ་ལ་ལྟེམ་རྐྱང་ཤོར་ཅིང༌༑ ཐ་མལ་གྱི་སྒོ་གསུམ་འདྲེར་འཛིན་གྱི་རྣམ་པར་རྟོག་པའི་རང་གཟུགས་ཡིན་པས། སྐྱོན་གྱི་ས་བོན་རང་དུ་ཤེས་པར་བྱས་ལ། གནད་དུ་བསྣུན་པ་ནི། ཕྱི་སྣོད་ཀྱི་འཇིག་རྟེན་གཞལ་ཡས་ཁང་ངམ་ཡི་དམ་གྱི་ལྷ་རུ་བསྒོམ། ནང་བཅུད་ཀྱི་སེམས་ཅན་ཐམས་ཅད་ལྷ་རུ་བསྒོམ། མདུན་དུ་གནོད་བྱེད་ཀྱི་བགེགས་དེ་ཡི་དམ་དུ་བསྒོམ། རང་དང་གནོད་བྱེད་གཉིས་ཀའི་ཐུགས་ཀར་ཟླ་བའི་སྟེང་དུ་ས་བོན་གྱི་ཡི་གེ་བསྒོམ། དེ་ནས་རང་གི་ཐུགས་ཀའི་ས་བོན་ལས་འོད་ཟེར་འཕྲོས། མདུན་གྱི་གདོན་ཡི་དམ་དུ་ཡོད་པའི་ཐུགས་ཀའི་ས་བོན་ལ་ཕོག་པས། ཐུགས་མཉེས་པའི་མཆོད་པ་ཕུལ་ནས། དེའི་ཐུགས་ཀའི་ས་བོན་ལས་འོད་ཟེར་ཚུར་འཕྲོས་པས། རང་གི་ཐུགས་ཀའི་ས་བོན་ལ་ཕོག་པས་མཆོག་དང་ཐུན་མོང་གི་དངོས་གྲུབ་ཐོབ་པར་བསམ་ཞིང༌། འོད་ཟེར་གྱི་འཕྲོ་འདུ་ལ་རིག་པ་གཏད་ལ་བཟླས་པ་བྱའོ། །དེའི་བྱེད་ལས་ནི་སྣོད་ཀྱི་འཇིག་རྟེན་གཞལ་ཡས་ཁང་དུ་བསྒོམས་པས་འབྲོས་མི་ནུས་པ་ཡིན། བཅུད་ཀྱི་སེམས་ཅན་ཡི་དམ་དུ་བསྒོམས་པས་རྫུ་མི་ནུས་པ་ཡིན། བགེགས་ཡི་དམ་དུ་བསྒོམས་པས་བསམ་སྦྱོར་ཕན་བདེ་རུ་ལྡོག་པ་ཡིན། རང་ཡི་དམ་དུ་སྒོམ་ཞིང༌༑ དེ་ཐམས་ཅད་དང་གཉིས་སུ་མེད་པ་ཆོས་ཀྱི་སྐུ་ཕྱག་རྒྱ་ཆེན་པོའི་ངང་ལ་བཞག་པས་བགེགས་དེ་རང་གི་དབང་དུ་འདུ་ཞིང༌། འོད་ཟེར་གྱི་འཕྲོ་འདུ་དེས་དེའི་གནོད་པའི་བསམ་སྦྱོར་ལ་ནུས་པ་སྐྱེས་ཚད་མཆོག་ཐུན་མོང་གི་དངོས་གྲུབ་ཏུ་འགྱུར་ཞིང་དེའི་ནུས་པར་འཆར་རོ། །བར་ཆད་ཀྱི་གདོན་བགེགས་ཞེས་པ་ས་ཟིན་ཐེར་ཟུག་པ་ཞིག་ཡང་དག་ཏུ་གྲུབ་པ་མེད་པས། རང་གི་ནང་གི་སེམས་ཀྱི་བྱེད་པ་ཇི་ལྟར་བལྟས་པ་བཞིན་དུ་ཕྱི་རོལ་དུ་ཡང་དེ་ལྟར་སྣང་སྟེ། འདྲེ་གདོན་དུ་བལྟས་ན་འདྲེ་གདོན་དུ་སྣང་ཞིང་དེའི་བྱེད་ལས་གནོད་པ་དང་བར་ཆད་དུ་འབྱུང་ལ། ཡི་དམ་དུ་བལྟས་ན་ཡི་དམ་དུ་སྣང་ཞིང་དེའི་བྱེད་ལས་ཀྱང་དངོས་གྲུབ་རྣམ་གཉིས་སུ་འབྱུང་སྟེ། ཀུན་སྤྱོད་ལས། འགྲོ་ལྔ་འདི་དག་སངས་རྒྱས་མངའ་བདག་ཉིད། །གར་མཁན་དག་དང་རི་མོ་མཁན་ལྟར་གནས། །གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུའི་ཉམས་ཀྱིས་དུ་མའི་གར་མཛད་དོ༑ ༑ཞེས་པ་དང༌། རྗེ་བཙུན་མི་ལའི་ཞལ་ནས། འཁྲུལ་སྣང་གདོན་བགེགས་ཆོ་འཕྲུལ་འདི། །མ་རྟོགས་དུས་ན་ལྷ་འདྲེ་ཡིན། །བར་ཆད་ཐོ་འཚམ་སྐྱེད་པར་བྱེད། །རྟོགས་པའི་དུས་ན་ཡི་དམ་ལྷ། །མཆོག་ཐུན་མོང་གི་དངོས་གྲུབ་སྟེར་བར་བྱེད། །དོན་མཐའ་ཐུག་ལ་ལྷ་དང་འདྲེ་རུ་མེད། །ཅེས་པ་སྟེ། །རང་གི་ནང་གི་ཐུགས་དམ་གྱི་བྱེད་པས་ཕྱི་རོལ་དུ་ལྷ་འདྲེའི་བར་ཆོད་དང་གནོད་པ་ཐམས་ཅད་ཕན་འདོགས་དང༌། དངོས་གྲུབ་ཏུ་འཆར་བ་སྟེ། ཡང་དག་པར་རྫོགས་པའི་སངས་རྒྱས་ལ་བདུད་ཀྱིས་མཚོན་ཆའི་ཆར་ཕབ་པ་མེ་ཏོག་གི་ཆར་དུ་གྱུར་ཅིང་། མི་སྙན་པའི་ང་རོ་བསྟོད་པའི་ཚིགས་བཅད་དུ་གྱུར་པ་ལྟ་བུའོ། །དེས་ན་ཡི་དམ་མིན་པ་ལ་ཡིན་པར་ བསྒོམ་པའི་ཀུན་བརྟགས་ལྟ་བུ་མ་ཡིན་ཏེ། ལྷ་འདྲེ་དེ་ཉིད་ལུས་གཟུགས་སྐུར་ལྷན་ཅིག་སྐྱེས། ངག་ལོངས་སྐུར་ལྷན་ཅིག་སྐྱེས། སེམས་ཆོས་སྐུར་ལྷན་ཅིག་སྐྱེས། ལྷན་སྐྱེས་ཡི་དམ་གྱི་འཁོར་ལོར་གནས་པ་ལ། ཡིན་པ་ལ་ཡིན་པར་ངོ་ཤེས་པར་བྱེད་པ་སྟེ། བསྐྱེད་རིམ་བརྟེན་ཅིང་དག་པའི་སྒྱུ་ལུས་དང་ཞིང་ཁམས་སྦྱོང་བར་འགྲོ། སྔར་འདྲེ་གདོན་དུ་ལྟ་བ་རྣམས་ཀྱི་གནོད་པའི་སྦྱོར་བ་ལྡོག་ཅིང༌། ད་འདྲེ་གདོན་གྱིས་མི་ཚུགས་ཤིང༌། སྣང་བ་ཡི་དམ་གྱི་ལྷར་འཆར་བའི་གདམས་ངག་ཡིན་ནོ། །གཉིས་པ་རང་གི་བསྐྱེད་རིམ་ཞིང་སྦྱོང་གི་བོགས་དབྱུང་ཞིང་ཡ་ང་བའི་ཁུ་འཕྲིག་འདྲེར་འཛིན་གྱི་རྟོག་པ་གཞོམ་པའི་ཕྱིར་གསང་སྤྱོད་ཉམས་སུ་བླང་བ་ནི། རང་ལ་གདོན་སྟབས་པའམ། གང་འདྲེ་ཆེ་ཞིང་གཉན་པའི་ས་དེར་ཕྱིན་ཏེ། རང་ལྷའི་ང་རྒྱལ་བརྟན་པས་གཟུགས་སྣང་སྟོང་མཐོང་ཚད་ཡི་དམ་དུ་ལམ་ལམ་བསྒོམ་ཞིང༌། རིག་པ་ངར་དང་ལྡན་པས་ཕྱིན་ཏེ། གཉན་ས་དེ་གཞལ་ཡས་ཁང་དུ་བསྒོམ། གཞི་བདག་དེ་ཡི་དམ་དུ་བསྒོམ། ཡི་དམ་དང་ཞལ་མཇལ་བ་རེ་དགའ་ན། སྣང་བ་ཐམས་ཅད་ཡི་དམ་གྱི་འཁོར་ལོ་དང་ཞལ་མཇལ་བ་རེ་དགའ་ན་སྙམ་དུ་བསམ་ཞིང་ངག་ཏུ་ཡང་བརྗོད་པས་རིག་པ་ཧུར་བུན་གྱིས་བཏང་ལ་སྤྲོས་བཅས་དྲག་པོ་ཞིག་བྱའོ། །དེ་ནས་གཞལ་ཡས་ཁང་དེའི་ཡ་ང་བའམ་འཇིགས་འཇིགས་འདྲ་བ་ཞིག་ཏུ་མལ་བཅས་ལ། གསུམ་ལ་སྐྱབས་འགྲོ་དང་བྱང་ཆུབ་མཆོག་ཏུ་ སེམས་བསྐྱེད་ལ། བླ་མ་ལ་གསོལ་བ་གདབ། དེ་ནས་གོང་གི་མངོན་རྟོགས་བསྒོམས་ལ་འོད་ཟེར་གྱི་འཕྲོ་འདུ་ལ་རིག་པ་གཏད་ལ། བཟླས་པ་བྱ་བའམ། ཡང་ན་ལྷ་སྐུ་ཕྱག་རྒྱ་ཆེན་པོ་ལ་ཡུན་རིང་དུ་བཞག་གོ །དེ་ལ་ཡང་ཡང་དང་ཁུ་འཕྲིགས་ཀྱི་རྟོག་པ་བྱུང་ན། སྣང་བ་ཡི་དམ་གྱི་འཁོར་ལོ་ཡིན། གདོན་བགེགས་འདི་ནི་ཡི་དམ་གྱི་ལྷ་ཡིན། ཁྱོད་ཡི་དམ་གྱི་ལྷས་འཇིགས་སམ། ཡི་དམ་མངོན་སུམ་དུ་བྱུང་ན་དགའ། གསུང་རང་མཇལ་ན་དགའ་བས། ཁྱོད་འཇིགས་ཤིང་ཡ་ང་བ་ནི་སྣང་བ་འདི་ཡི་དམ་དུ་མ་ཤེས་པས་འདྲེ་གདོན་དུ་བཟུང་བས་ལན་པ་ཡིན་ན་ཁྱོད་ཀྱི་བསྐྱེད་རིམ་ཙམ་པོ་དེས། མ་གྲུབ་ཟིན་སྙམ་དུ་རང་ལ་ཐག་བཅད་དེ། ཡ་ང་དང་ཁུ་འཕྲིགས་སེ་དེ་ནི་ལུས་ཀྱི་གཅེས་འཛིན་འདིས་ལན་པས། ཐ་མལ་གྱི་ཞེན་པ་གཏང་དགོས་སྙམ་དུ་བསམས་ཏེ། རང་གི་མདུན་དུ་མི་མགོ་སྐམ་པོ་གསུམ་གྱི་སྒྱེད་པུ་གསུམ་བསམ། སེམས་ཡི་དམ་དུ་ཡོད་པ་དེས་རང་གི་ཐོད་པ་ཕོག་སྟེ་སྒྱེད་པུ་དེའི་སྟེང་དུ་བཞག །དེའི་ནང་དུ་རང་གི་ལུས་དེ་ཡེ་ཤེས་ཀྱི་བདུད་རྩིར་བཞུ་སྟེ་དེ་ནས་གཞི་བདག་དེས་གཙོར་བྱས་པའི་བགེགས་རིགས་སྟོང་ཕྲག་བརྒྱད་ཅུ་ཡི་དམ་གྱི་ལྷར་སྤྱན་དྲངས་ཏེ༑ དེ་རྣམས་ལ་བདུད་རྩི་དེ་ནས་ཐོད་པས་གཅུས་ཤིང་དྲངས་པས། ལྷ་ལ་ལྷ་ཐིམ་པའི་ཚུལ་དུ་རོལ་བས་དེ་ཐམས་ཅད་ཟག་མེད་ཀྱི་བདེ་བས་ཕྲིལ་ཕྲིལ་ཡོད་པར་བསམ། མཐར་བདག་ལ་མཉེས་ཤིང་མཆོག་ཐུན་མོང་གི་ དངོས་གྲུབ་ཐམས་ཅད་ཐོགས་པ་མེད་པར་གནང་བར་བསམས་ལ། ལྷ་འདྲེ་དེ་རྣམས་རང་ལ་བསྡུ། རང་ཡི་དམ་དུ་གསལ་བས་རང་དང་ལྷ་འདྲེ་གཉིས་སུ་མེད་པར། སྤྲོས་བྲལ་ཕྱག་རྒྱ་ཆེན་པོའི་ངང་ལ་རྣམ་རྟོག་གི་སྤུན་ཐག་བཅད་དེ་ཕྱམས་ལིངས་ཀྱིས་བཞག་གོ །དེའི་ངང་ལ་གཉིད་ལོག་གོ །ཆོ་འཕྲུལ་བྱུང་ན་ཡི་དམ་གྱི་རྣམ་འཕྲུལ་བྱོན་པ་ཨ་རེ་དགའ། ད་རུང་དེ་བས་ཀྱང་ཆེ་བ་དངོས་གྲུབ་ཏུ་བྱོན་པར་ཞུའོ་སྙམ་དུ་བསམ་ཞིང་ངག་ཏུ་ཡང་བརྗོད་ལ། རིག་པ་གྲུང་བཏོན་ཏེ། ཡང་དག་ཉིད་ཆེན་པོའི་ཚོགས་འཁོར་ཞིག་བྱ་སྟེ། གོང་གི་མངོན་རྟོགས་དེ་གནད་དུ་བསྣུན། མཐར་དེ་ཐམས་ཅད་རང་ལ་བསྡུས་ཏེ་ལྷ་སྐུ་ཕྱག་རྒྱ་ཆེན་པོ་ལ་ཡུན་རིང་དུ་བཞག་གོ །མཚན་མོ་ཡང་དེ་ཉམས་སུ་བླང་ཞིང༌། ཉིན་པར་དང་རང་གཞན་སྣང་བ་ཐམས་ཅད་ཡི་དམ་ལྷའི་འཁོར་ལོ་ལ་ཡུན་རིང་དུ་དྲན་པ་རྒྱུན་ཆགས་སུ་བསྐྱང་ཞིང་རང་གཞན་གཉིས་སུ་མེད་པའི་ངང་ལ་ཕྱམས་བཞག་པའམ། བཟླས་པ་བྱའོ། །རྒྱུན་གཏོར་གཏོང་ན་གཞི་བདག་དེ་ལྷའི་འཁོར་ལོར་བྱས་ལ་དབུལ་ལོ། །དེ་ལྟར་རང་གི་བསྐྱེད་རིམ་ལ་བོགས་དབྱུང་བ་དང༌། ཡ་ང་བའི་འཁུ་འཕྲིགས་ནམ་ཆོད་ཆོད་ཉམས་སུ་བླང༌༑ འདིས་མྱུར་དུ་བསྐྱེད་རིམ་བརྟན་པར་བྱེད་དེ། གཞན་དུ་ལོ་གསུམ་བསྒོམས་པ་བས། གཉན་སར་ཞག་གསུམ་བསྒོམས་པ་བོགས་ཆེ། གཞན་ཡང་རང་གི་ཆགས་ཁ་ལ་སོགས་པའི་བར་ཆད་ཐམས་ཅད་སེལ་ལོ། ། གདོན་ལྟ་བ་ཡོད་ན་དེའི་གནོད་པའི་སྦྱོར་བ་ལྡོག་ལ། ལྷ་འདྲེ་ལ་བརྟེན་པའི་མཐུ་དང་ནུས་པ་དཔག་ཏུ་མེད་པ་འབྱུང་ངོ༌། །གསུམ་པ་ལམ་ཟབ་མོ་བླ་མ་ལ་མོས་གུས་ཀྱིས་ལམ་དུ་བྱེད་པ་ནི། སྤྱིར་རྡོ་རྗེ་ཐེག་པའི་ལམ་གྱི་སྙིང་པོ་བླ་མའི་མོས་གུས་ཡིན། དེ་ལམ་དུ་བྱེད་པ་ལ་བླ་མ་སངས་རྒྱས་སུ་མཐོང་དགོས། དེ་ལ་ཡང་སངས་རྒྱས་སྐུ་གསུམ་ཡེ་ཤེས་ལྔའི་བདག་ཉིད་ཅན་ཡིན། དེ་ལ་སངས་རྒྱས་ཆོས་ཀྱི་སྐུ་དེ་ལུས་ཅན་ཐམས་ཅད་ཀྱི་སེམས་ཀྱི་ཆོས་ཉིད་དང་དབྱེ་བ་མེད་པར་བཞུགས་པ་ཡིན། ལོངས་སྤྱོད་རྫོགས་པའི་སྐུ་དེ་རང་གཞན་གྱི་ལུས་ངག་ཡིད་གསུམ་ཕུང་ཁམས་སྐྱེ་མཆེད་སྣོད་བཅུད་བརྟན་གཡོ་དང་དབྱེ་བ་མེད་པར་བཞུགས་པ་ཡིན། སངས་རྒྱས་སྤྲུལ་པའི་སྐུ་དེ་སངས་རྒྱས་བྱང་སེམས་ཉན་རང་སོ་སོ་སྐྱེ་བོ་འབྱུང་བ་བེམས་པོ་ཐམས་ཅད་ཀྱི་རང་རང་གི་ནུས་པས་འགྲོ་དོན་བྱེད་པ་དང་དབྱེར་མེད་པར་བཞུགས་པ་ཡིན། དེ་ལྟར་སྣང་བ་ཐམས་ཅད་བླ་མ་སྐུ་གསུམ་གྱི་ངོ་བོ་ཡིན། སྣང་བ་ཐམས་ཅད་བླ་མར་མ་གོ་བའམ། བླ་མ་མིན་པའི་འདྲེ་གདོན་ཞིག་གུད་དུ་བྱུང་ན་མོས་གུས་བྱས་ཀྱང་མ་སྐྱེས་པ་ཡིན། བྱིན་རླབས་ཞུས་ཀྱང་མ་ཞུགས་པ་ཡིན། ཕྱོགས་འཛིན་ཞེན་པའི་མོས་གུས་དེས་དོན་མི་འགྲུབ་པ་ཡིན། དུས་ཐམས་ཅད་དུ་རང་གཞན་ལྷ་འདྲེ་བཟང་ངན་མཐོ་དམན་མེད་པར་སྣང་བ་བླ་མའི་དཀྱིལ་འཁོར་དུ་ཤེས་པས་གཉིས་སུ་མེད་པར་གསོལ་བ་གདབ་བོ། །ཁྱད་པར་དུ་ལྷ་འདྲེའི་བར་ ཆད་དམ་གནོད་པ་བྱུང་ན། རང་གི་མོས་གུས་ལ་ལྟེམ་རྐྱང་བྱུང་ནས། སྣང་བ་བླ་མའི་དཀྱིལ་འཁོར་ལ་འདྲེ་གདོན་དུ་བཟུང་བའི་རྣམ་རྟོག་དེའི་རང་གཟུགས་སུ་ཤེས་པས་གནད་དུ་བསྣུན་པ་ནི། རང་ཉིད་ཡི་དམ་གྱི་ལྷར་བསྒོམ། འདྲེ་གདོན་དེ་རྩ་བའི་བླ་མར་བསྒོམས་ལ་གདན་བཞི་བརྩེགས་ཀྱི་སྟེང་དུ་སྤྱི་བོའི་གཙུག་ཏུ་བསྒོམ། དེ་ལ་བླ་མ་བརྒྱུད་པ་དང་བཅས་པ་རྣམས་བསྟིམ། དེ་ལ་ལུས་ལོངས་སྤྱོད་ལྟོས་པ་མེད་པར་ཕུལ་ལ། སངས་རྒྱས་དངོས་ཀྱི་འདུ་ཤེས་ཀྱིས་གསོལ་བ་ཕུར་ཚུགས་སུ་གདབ། རྨད་དུ་བྱུང་བའི་བྱིན་རླབས་འབྱུང་སྟེ། འདྲེ་གདོན་དེའི་ལུས་ངག་ཡིད་གསུམ་གྱི་གཤིས་བླ་མ་སྐུ་གསུམ་གྱི་ངོ་བོར་གདོད་མ་ནས་དབྱེར་མེད་པར་བཞུགས་པ་ཡིན། དེའི་གནད་དུ་དེ་ལྟར་བསྣུན་པས་འདྲེ་གདོན་དེའི་གནོད་པའི་སྦྱོར་བ་ཐམས་ཅད་བྱིན་རླབས་ཀྱི་དཔུང་དུ་འབར་བ་སྟེ། གཤིས་ཅི་ཡང་མ་ཡིན་པས་རྐྱེན་གྱིས་ཅིར་ཡང་བྱར་བཏུབ་པའོ༑ ༑གཞན་ལ་བྱིན་རླབས་བྱེད་ན་ཡང་ནད་པ་དེ་ཡི་དམ་དུ་བསྒོམ། དེའི་སྤྱི་བོར་འདྲེ་གདོན་དེ་བླ་མར་བསྒོམས་ལ། ནད་པ་དེའི་ལུས་ལོངས་སྤྱོད་ལྟོས་པ་མེད་པར་ཕུལ་ལ། བླ་མ་ལ་བླ་མ་བརྒྱུད་པ་དང་བཅས་པ་བསྟིམས་ཏེ་གསོལ་བ་བཏབ་པས། གདོན་དྲག་པོ་ལ་ནད་པ་ལ་ང་རོ་ཆེར་འོང་བར་འདུག་སྟེ། དེ་ཡང་བླ་མའི་རྣམ་སྤྲུལ་དང་ཐུགས་རྗེའི་འཛིན་སྟངས་སུ་ཤེས་པས། མོས་གུས་ལྟེམ་རྐྱང་མེད་པར་གསོལ་བ་བཏབ་པས། གནོད་བྱེད་དེའི་ནུས་པ་ཐམས་ཅད་བྱིན་རླབས་ཀྱི་དཔུང་དུ་སོང་ནས་མྱུར་དུ་ནད་སོས་ནས་འགྲོ་བར་འདུག་སྟེ། ནད་པའི་བྱིན་རླབས་ཀྱང་འདིས་མཛད་པར་གདའ་འོ། །དེ་ལྟར་མོས་གུས་གནད་དུ་གཏོང་བ་འདིས་རང་གཞན་གྱི་རྟོག་ངན་གནོད་པ་ཐམས་ཅད་ཟློག་ལ། ཕྱིན་ཆད་ཀྱང་གདོན་གྱིས་མི་ཚུགས་པ་དང༌། མྱུར་དུ་མོས་གུས་དང་དག་སྣང་རྒྱ་ཆེན་པོ་འཆར་བར་འདུག་གོ །གཉིས་པ་རང་གི་མོས་གུས་ལ་བོགས་དབྱུང་ཞིང་ཡ་ང་བའི་ཁུ་འཕྲིགས་འདྲེར་འཛིན་གྱི་རྟོག་པ་གཅོད་པ་ལ་གསང་སྤྱོད་ཉམས་སུ་བླང་བ་ནི། གཉན་ས་དེ་གཞལ་ཡས་ཁང༌། གཞི་བདག་རྩ་བའི་བླ་མ་སྐུ་གསུམ་གྱི་ངོ་བོ། རང་ཡི་དམ་དུ་གསལ་བས་རིག་པ་ངར་དང་ལྡན་པར་བྱས་ཏེ་སླེབ་པ་དང་བླ་མ་ཡི་དམ་ཞལ་མཇལ་བར་བསམས་ལ། བླ་མ་དང་མཇལ་བ་རེ་དགའ་སྙམ་དུ་བསམ་ལ་ངག་ཏུ་བརྗོད་ཅིང་སྤྲོས་བཅས་དྲག་པོ་ཞིག་བྱའོ། །དེ་ནས་སྐྱབས་འགྲོ་སེམས་བསྐྱེད་དེ། རང་ཡི་དམ་དུ་བསྒོམ། གཞི་བདག་དེ་རྩ་བའི་བླ་མར་བསྒོམས་ལ། དེ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བླ་མའི་སྐུའི་རྣམ་པར་སྤྱན་དྲངས་ལ་གཉིས་སུ་མེད་པར་བསྟིམས་པས་སྣང་བ་ཐམས་ཅད་བླ་མར་བསྒོམས་ལ༑ རང་གི་ལུས་དབང་པོ་ཁོག་རྟེན་དང་བཅས་པ་འདི་ལྟོས་མེད་དུ་ཕུལ་ལ། ལུས་ལ་ཉེ་བར་མཁོ་བའི་ལོངས་སྤྱོད་ཐམས་ཅད་ཕུལ་ལ་མོས་གུས་ཚད་མེད་པས་གསོལ་བ་ཕུར་ཚུགས་སུ་གདབ་བོ། །དེ་ནས་བྱིན་རླབས་ ཞུས་ཏེ་བླ་མ་རང་ལ་བསྡུས། རང་དང་བླ་མ་སྣང་བ་ཐམས་ཅད་གཉིས་སུ་མེད་པ་བླ་མ་ཆོས་སྐུའི་ངང་ལ་ཡུན་རིང་དུ་བཞག་གོ །དེའི་ངང་ལ་གཉིད་ལོག་གོ །དེར་ཡང་འཇིགས་པ་དང་ཡ་ང་བའི་རྟོག་པ་བྱུང་ན་སྣང་བ་བླ་མའི་དཀྱིལ་འཁོར་ཡིན། ལྷ་འདྲེ་འདི་ནི་བླ་མ་སྐུ་གསུམ་གྱི་ངོ་བོ་ཡིན། ཁྱོད་བླ་མས་འཇིགས་སམ། བླ་མ་དངོས་སུ་བྱོན་ན་དགའ། ཞལ་མཇལ་ན་དགའ། གསུང་ཐོས་ན་དགའ། སྣང་བ་སྐུ་གསུམ་གྱི་ངོ་བོ་ལ་ཁྱོད་འདྲེར་འཛིན་གྱི་རྟོག་པ་འཆར་བ། མོས་གུས་ཀྱི་ཁམས་དེ་ལས་མེད་པ་སྙམ་དུ་རང་ལ་ཐག་བཅད་ལ། གང་གི་བླ་མའི་རྣལ་འབྱོར་ལ་ཤིན་ཏུ་འཇུར་བར་ཞིག་གནད་དུ་གཏང་ངོ༌། །རྨད་དུ་བྱུང་བའི་བྱིན་རླབས་འབྱུང༌། ཆོ་འཕྲུལ་བྱུང་ན་བླ་མའི་རྣམ་འཕྲུལ་དང་ཐུགས་རྗེའི་འཛིན་སྟངས་སུ་ཤེས་པའི་མོས་གུས་ལ་དྲག་ཏུ་བསྣུན་པས་བྱིན་རླབས་ཀྱི་ཉམས་བུན་མ་བུན་མ་འོང་སྟེ། ཉམས་སྣང་ཁ་མི་བསྐྱིལ་བར་འུར་གྱིས་གཏང་ངོ༌༑ ༑དེ་ལ་ཉིན་མཚན་མེད་པར་གསོལ་བ་རྩེ་གཅིག་ཏུ་འདེབས་ཤིང་རང་ལྷ་རུ་ཀྲོང་ངེ༌། གཞི་བདག་དེ་བླ་མར་ཀྲོང་ངེ༌། སྣང་བ་མཐོང་ཚད་བླ་མ་སྐུ་གསུམ་དུ་ཀྲོང་ཀྲོང་སྦྱོང་ཞིང༌། རང་གི་མོས་གུས་ལ་བོགས་ཐོན། ཡ་ང་བའི་སྙེམ་ཐག་ཆོད་ཆོད་ཀྱི་བར་དུ་ཉམས་སུ་བླང་ངོ༌། །གཏོར་མ་ལ་སོགས་པ་གཏོང་ན། ཡང་བླ་མ་ལ་འབུལ་བ་བྱས་ལ་བཏང་ངོ༌། །དེས་རང་གི་མོས་གུས་ལ་བོགས་རྒྱངས་པ་འོང༌། དག་སྣང་ཕྱོགས་མེད་དུ་འཆར། གཞི་བདག་དེའི་ནུས་པ་དང་འཇིག་རྟེན་པའི་ལྷ་འདྲེ་ཐམས་ཅད་ཀྱི་ནུས་པ་བྱིན་རླབས་སུ་འཆར་རོ། །གཞི་བདག་གཉན་གིན་བྱིན་རླབས་ཆེ་བར་འོང༌། དེས་ནི་བྱིན་རླབས་ཀྱི་ཚན་ཀ་མྱུར་དུ་འབབས་པའོ། །བཞི་པ་གཉིས་མེད་ཕྱག་རྒྱ་ཆེན་པོས་ལམ་དུ་བྱེད་པ་ལ་གཉིས་ལས། སྤྱིར་ལམ་དུ་སློང་བ་ནི། སྨིན་བྱེད་དབང་བཞི་པ་ཐོབ་ནས་གྲོལ་བྱེད་ཟུང་འཇུག་ཕྱག་རྒྱ་ཆེན་པོ་སྒོམ་པའི་རྣལ་འབྱོར་པ་ལ། སྣང་སྲིད་འཁོར་འདས་ཀྱི་ཆོས་མ་ལུས་ཤིང་ལུས་པ་མེད་པར་ཐམས་ཅད་སོ་མ་ཉམས། མདོག་མ་བསྒྱུར་བར་རང་བྱུང་ལྷན་ཅིག་སྐྱེས་པའི་ཡེ་ཤེས་ལས་མི་འདའ་ཞིང༌། དེ་ལས་ལོགས་པའམ། དེའི་གོང་ན་གཞན་མེད་དེ། སྤང་བླང་མེད་པར་ཕྱག་རྒྱ་ཆེན་པོའི་དཀྱིལ་འཁོར་ཡིན་ནོ། །དེ་ལ་ཕྱག་རྒྱ་ཆེན་པོ་མིན་པའི་ལྷ་འདྲེ་ཞིག་ལོགས་སུ་བྱུང་ན། དབང་བཞི་པ་བསྐུར་ཀྱང་མ་ཐོབ་ལ། ཕྱག་རྒྱ་ཆེན་པོ་བསྒོམས་ཀྱང་མ་སྐྱེས་པ་ཡིན་པས། སྣང་སྲིད་འཁོར་འདས་ཀྱི་ཆོས་མ་ལུས་པ་ཐམས་ཅད་རང་ལ་བསྡུ་རང་ངོ་ཤེས་པས། གཉིས་མེད་རང་དག་ཏུ་ཤར་བའི་ངང་ལ་རྒྱུན་ཆད་མེད་པར་གནས་པར་བྱའོ། །ཁྱད་པར་དུ་ལྷ་འདྲེའི་བར་ཆད་དམ་གནོད་པ་བྱུང་བའི་དུས་སུ། རང་གི་དགེ་སྦྱོར་ལ་ལྟེམ་རྐྱང་བྱུང་བས། གང་ཤར་ངོ་མ་ཤེས་པས་འདྲེར་འཛིན་གྱི་རྣམ་རྟོག་རང་ཁ་མར་ཤོར་བའི་རང་གཟུགས་ཡིན་པས། སྐྱོན་གྱི་ས་བོན་དེ་ངོ་ཤེས་པར་བྱས་ལ་གནད་དུ་བསྣུན་པ་ནི། འདྲེར་སྣང་དང་འདྲེར་འཛིན་བར་ཆད་གནོད་པ་རུ་ལམ་མེ་བ་དེ་ཉིད་ཀྱི་ངོ་བོ་ལ་བལྟས་པས། དེའི་ངོ་བོ་གསལ་སྟོང་བློ་བྲལ་ཡུལ་མེད་དུ་རྗེན་ལྷང་ངེ་འདུག་པ་དེ། ལྷ་འདྲེ་ངན་པ་ཞིག་གུད་དུ་སྤངས་ལ་ཕྱག་རྒྱ་ཆེན་པོ་བཟང་པོ་ཞིག་གུད་དུ་བཙལ་མ་དགོས་པར་འདྲེ་གདོན་བར་ཆད་ཀྱི་རྣམ་རྟོག་དེ་ཉིད་རང་གཉིས་མེད་ཕྱག་རྒྱ་ཆེན་པོར་རང་ངོ་ཤེས་པ་དེ་ལ། བདུད་རང་བྱུང་དང་གཅོད་རང་གྲོལ་ཞེས་བྱའོ། །རང་ཞི་ཙ་ན་བདུད་ཞི། རང་གནས་ཙ་ན་ བདུད་གནས། བདུད་རང་དུ་ཤེས་ཤིང་རང་ངོ་ཤེས་པས་རྒྱལ་བ་བདུད་ལས་རྒྱལ་བའི་དཔའ་བོ་ཞེས་བྱའོ། །ལྷ་དང་བཅས་པའི་ཅོད་པན་གྱི་རྒྱན་དུ་འགྱུར་རོ། །གཞན་ལ་བྱིན་རླབས་བྱེད་པ་ཡིན་ན། ནད་པ་དེའི་རྩར་ཕྱིན་པ་དང༌། རང་དང་ལྷ་འདྲེ་ནད་པ་གསུམ་རང་གི་སེམས་སུ་ཤེས་པས། གཉིས་མེད་ཕྱག་རྒྱ་ཆེན་པོའི་ངང་ལ་བཞག་པས་མྱུར་དུ་ནད་གདོན་ལས་གྲོལ་བའི་བྱིན་རླབས་ཆེན་པོ་འབྱུང་ངོ་། །གཉིས་པ་རང་གི་རྟོག་པ་ལ་བོགས་དབྱུང་ཞིང་ཡ་ང་བའི་ཁུ་འཕྲིགས་གཅོད་པ་ལ་གསང་སྤྱོད་བྱ་བ་ནི། རང་ལ་གདོན་ལྟ་བའམ་གཉན་ས་དེར་ཕྱིན་ཏེ། ལུས་སེམས་གཉིས་སུ་མེད་པ། སྣང་སེམས་གཉིས་སུ་མེད་པ། བེམས་རིག་གཉིས་སུ་མེད་པ། རང་དང་ལྷ་འདྲེ་གཉན་ས་ཐམས་ཅད་གཉིས་སུ་མེད་པ་ཕྱག་རྒྱ་ཆེན་པོའི་ངང་ལ་བཞག་ལ་དེའི་རྒྱུན་མ་ཡེངས་པར་བསྐྱང་ངོ༌། །ཡ་ང་བའི་ཁུ་འཕྲིགས་སམ་ལྷ་འདྲེའི་ཆོ་འཕྲུལ་བྱུང་ན། འདྲེར་འཛིན་འདྲེར་སྣང་དེ་ཉིད་ཀྱི་ངོ་བོ་ལ་ངོ་ཤེས་བྱ་ཞིང༌། བདུད་རང་གྲོལ་དང་གཅོད་རང་གྲོལ་གྱི་གནད་ཤེས་པས་གང་ཤར་ཐམས་ཅད་བཟོ་མེད་ཆོས་ཉིད་དུ་རྩལ་སྦྱང་ངོ༌། །དེ་ལྟར་ཉམས་སུ་བླངས་པས་རང་གི་རྟོགས་པ་ལ་བོགས་མྱུར་དུ་ཐོན་ཅིང༌། རང་གཞན་དབྱེར་མེད་དུ་ཤེས་ཤིང་རྣམ་རྟོག་དེ་དབང་དུ་འདུས་པའི་གནད་ཀྱིས་གཞི་བདག་དེས་གཙོ་བྱས་པའི་ལྷ་འདྲེ་ཐམས་ཅད་དབང་དུ་འདུ་ཞིང་ཕྱག་བྱ་མཆོད་པའི་གནས་སུ་འགྱུར་རོ། །དེ་ལྟར་ལྷ་འདྲེའི་གཞི་གཅིག་ལ་རང་གི་བྱེད་པ་ཐ་དད་ཀྱིས་བྱེད་པ་ཐ་དད་དུ་འབྱུང་སྟེ། གཤིས་ཆོས་ཉིད་ཅི་ཡང་མ་ཡིན་པ་ལ་རྐྱེན་གྱིས་ཅིར་ཡང་བྱར་བཏུབ་པའི་ཕྱིར། ད་ཕྱིན་ཆད་ལྷ་འདྲེའི་རྟོག་པ་བྱུང་ཚད་དེ་ལྟར་ལམ་དུ་བཏང་ཞིང༌། དགྲ་སྡང་བ་ལ་སོགས་པ་མི་མཐུན་པའི་རྐྱེན་ངན་བྱུང་ཚད་ཕ་མའམ། བླ་མའམ། ཡི་དམ་མམ། ཆོས་སྐུར་ཤེས་པས་ལམ་དུ་བྱེད་ཚུལ་གང་ཡང་རུང་བས་ལམ་དུ་བསླང་ངོ༌། །རྣམ་རྟོག་ལ་བཟོ་མཁས་པ་ཤེས་པས་འཁོར་འདས་ཀྱི་བདེ་ལེགས་རང་གིས་བྱེད་པ་ཞེས་པ་ཡང་དེ་ཉིད་ཡིན་ལ། ལྟས་ངན་གཡང་དུ་ལྡོག་ཅིང་བར་ཆད་དངོས་གྲུབ་ཏུ་སྤུངས་པའང་དེ་ཡིན་ནོ། །ལྷ་འདྲེ་ལམ་དུ་བྱེད་ཚུལ་འདི་མདོ་རྒྱུད་ཀྱི་དགོངས་པ་ཐམས་ཅད་དང་མཐུན་ཅིང༌། གདམས་ངག་བཀའ་མ་ཐམས་ཅད་ནས་ཀྱང་ནད་གདོན་བླ་མར་བལྟ། ཡི་དམ་དུ་བལྟ། ཆོས་སྐུར་བལྟ་ཞེས་པ་ལ་སོགས་པ་མང་དུ་གསུངས་ཏེ། ཉམས་མྱོང་ཆོས་སྤྱན་མེད་པས་མ་གོ །ལྷ་འདྲེ་ལམ་དུ་བྱེད་པ་འདི་ལས་ཟབ་པ་མེད། ཇོ་མོ་ལབ་སྒྲོན་མའི་བདུད་གཅོད་དམ། གསང་སྤྱོད་ཟློག་སྒོམ་མ་ལ་སོགས་པ་བས་ཀྱང་འདི་ལམ་གྱི་འཆུན་ཆེ་སྟེ། འདི་བྱམས་སྙིང་རྗེ་བྱང་ཆུབ་ཀྱི་སེམས་དང༌། བསྐྱེད་རིམ་དང་མོས་གུས་དང༌། ཕྱག་རྒྱ་ཆེན་པོ་བཞི་ཀའི་བོགས་འདོན་ཡིན་གསུངས། གསང་སྤྱོད་ལ་གཉན་ས་གཅིག་ཏུ་ལྷ་འདྲེ་ལམ་དུ་བྱེད་ཚུལ་བཞི་པོ་འདི་ལ་ཞག་གསུམ་གསུམ་བཅུ་གཉིས་ཀྱིས་ཐག་ཆོད་པ་ཡིན་གསུངས། འདི་ངའི་ཉམས་མྱོང་སོ་མ་ཡིན་པས་ཉམས་སུ་བླངས་ན་གདམས་ངག་གཞན་དང་བློ་བོགས་ལ་ཁྱད་ཡོད། བསྒོམས་ལ་ལྟོས་གསུངས། གསང་སྤྱོད་རྨང་ལམ་པའི་ཞལ་གདམས་ཅུང་ཟད་ཡི་གེར་བཀོད་ པའོ༑ ༑ ཨྠ ི། ༈ །ན་མཱཿ ཤྲཱི་བཛྲ་ཡོ་གི་ནཱི། བླ་མ་རིན་པོ་ཆེ་ཤྲཱི་རི་རས་སྔོན་ན་རྡོ་རྗེའི་སྐྱིལ་ཀྲུང་ལ་བཞུགས་པའི་དུས་སུ། ནུབ་གཅིག་གི་ནམ་ཕྱེད་སྨད་ཙམ་ན། མཚན་མའི་ཁྱད་པར་ཤིན་ཏུ་ངོ་མཚར་ཆེ་བ་ཞིག་བྱུང༌། དེ་ནས་མནལ་དེ་སད་པ་དང༌། བླ་ཡེར་མཁའ་འགྲོ་མ་བཞི་བཞུགས་ནས། ཧཱུྃ་སྐོར་གྱི་གདམས་ངག་བཞི་གནང་བ་ནི། རྡོ་རྗེ་མཁའ་འགྲོས་གནང་བ་ལ་འོད་གསལ་ལམ་དུ་བྱེད་པའི་ཧཱུྃ་སྐོར་དང༌། རིན་ཆེན་མཁའ་འགྲོས་གནང་བ་ལ་ནད་འདོན་གྱི་ཧཱུྃ་སྐོར་དང༌། པདྨ་མཁའ་འགྲོས་གནང་བ་ལ་ཐིག་ལེ་དབང་དུ་བྱེད་པའི་ཧཱུྃ་སྐོར་དང༌། ལས་ཀྱི་མཁའ་འགྲོས་གནང་བ་ལ་བར་ཆད་སེལ་བའི་ཧཱུྃ་སྐོར་དང་བཞི་གནང་བ་ཡིན། དེ་རྣམས་ལས་མཇལ་ལུགས་དང་གནས་ལུགས་བརྡར་བསྟན་པ་ལ་སོགས་པ་ངོ་མཚར་ཆེ་བ་ཡོད་དེ་སྨྲ་མ་བཏུབ་གསུངས། དེ་ལ་རིན་ཆེན་མཁའ་འགྲོས་གནང་བ་ནད་འདོན་གྱི་ཧཱུྃ་སྐོར་ནི། རིན་ཆེན་མཁའ་འགྲོ་སྐུ་མདོག་མི་ཤ་ཁ་སེར་མོ་སྐུ་ལ་རིན་པོ་ཆེའི་རྒྱན་གྱིས་བརྒྱན་པ། ཐུགས་ཁ་ན་ཧཱུྃ་མཐིང་ཀ་བཞུགས་པ། དེ་ལས་ཧཱུྃ་དཀར་པོ་ཆད་ཅིང་གྱེན་ལ་འཕྲོ་བ། དམར་པོ་ཆད་ཅིང་ཐུར་དུ་འཕྲོ་བ། ཕྱག་ཞབས་ཧཱུྃ་མཐིང་ག་རྒྱུན་པ་རུ་འབྱུང་ཞིང་ རྒྱུན་པ་རུ་འཕྲོ་བ། ཧཱུྃ་ཞེས་བརྗོད་པས་ཐུགས་ཀ་ནས་ཤངས་སྒོའི་བར་དུ་ཧཱུྃ་མཐིང་ཁ་བྲེང་ཆགས་སུ་བྱུང་ཞིང༌། ཤངས་སྒོ་ནས་ཧཱུྃ་གཅིག་ཆད་དེ་རང་གི་ཁར་ཐིམ་པ་དང༌། ངའི་སྙིང་ཁར་འཚངས་པ་འདྲ་བའི་མི་བདེ་བ་གཅིག་ཡོད་པ་དེ། རང་དབང་མེད་པར་དྲངས་ཤིང་འགྲོ་བའི་རྣམ་འཕྲུལ་དེ་ལྟ་བུ་གཅིག་བསྟན་ནས་དེ་ནས་འདི་སྐད་གསུངས་ཏེ། ཧཱུྃ་ལས་ཧཱུྃ་འཕྲོས་ཧཱུྃ་གིས་སྦྱོང༌། །ཧཱུྃ་བསྒོམ་ཧཱུྃ་གི་འཕྲོ་འདུ་ཡིས། །རང་གཞན་ནད་རྣམས་ཧཱུྃ་གིས་འཇོམས། །ཞེས་གསུངས་ཏེ། གསུང་གི་ཚིག་དེ་དང་གོང་གི་བརྡ་དེ་ལ་བརྟེན་ནས་ནད་འདོན་གྱི་གོ་བ་འདི་སྙེད་པ་ཡིན་གསུང་ངོ་། །འདི་ལ་གཉིས། རང་གི་ནད་འདོན་པ་དང༌། གཞན་གྱི་ནད་འདོན་པའོ༑ ༑དང་པོ་ནི། ལུས་ཡི་དམ་དུ་གསལ་བ། འཁྲུལ་འཁོར་སྐྱིལ་ཀྲུང་དྲང་པོར་འདུག་ལ། སྙིང་གའི་དཀྱིལ་དུ་ཧཱུྃ་མཐིང་ག་རྩེ་སོར་གཅིག་ཚད་ཙམ་ཤིན་ཏུ་གསལ་བར་བསྒོམ། དེ་ནས་ནད་ཚ་གྲང་གཉིས་བརྟགས་ལ་ཚད་པའི་ནད་ཀྱི་སྡེ་ཚན་ཡིན་ན་ཐུགས་ཀའི་ཧཱུྃ་མཐིང་ག་དེ་ལས་ཧཱུྃ་དཀར་པོ་ནས་གང་བ་གཅིག་ཆད་དེ། ལུས་ཀྱི་སྟོད་སྨད་ཐམས་ཅད་ཁོར་བསྐོར་བས་ནད་གདོན་ཐམས་ཅད་ཁབ་ལེན་གྱིས་ལྕགས་བསྡུས་པའམ། ནོར་བུ་སྤུར་ལེན་གྱིས་སྤུར་བསྡུས་པ་བཞིན་འུབ་རིལ་གྱིས་བསྡུས་ཏེ། སྤྱི་གཙུག་ནས་རྒྱངས་ཐོན། ནམ་མཁའི་དཀྱིལ་ཤིན་ཏུ་མཐོ་བར་ཡལ་གྱིས་ཡལ་བར་བསྒོམ་ཞིང༌། ཧཱུྃ་གིས་གདངས་དང་ལྡན་པའི་ རླུང་དྲག་པོ་གྱེན་ལ་འབུད་དོ། །གྲང་བའི་ནད་ཀྱི་སྡེ་ཚན་ཡིན་ན། ཐུགས་ཀའི་ཧཱུྃ་ལས་ཧཱུྃ་དམར་པོ་དྲོད་ཀྱི་རང་བཞིན་ཅན་གཅིག་ཆད་ནས་ལུས་ཀྱི་སྨད་དུ་བསྐོར་བས། ནད་ཐམས་ཅད་བསྡུས་ནས་འོག་སྒོ་ནས་འཐོན་ཏེ་སའི་སྟེང་ཤིན་ཏུ་དམའ་བར་ཡལ་བར་བསམ་མོ། །ནད་ངོས་མ་ཟིན་ན་ཐུགས་ཀའི་ཧཱུྃ་ལས་ཧཱུྃ་མཐིང་ག་གཅིག་ཆད་དེ། ལུས་ཀྱི་སྟོད་སྨད་ཐམས་ཅད་དུ་བསྐོར་ནས་ན་བ་ཐམས་ཅད་བསྡུས་ནས་རླུང་གང་རྒྱུ་བའི་སྣ་སྒོ་ནས་འཐོན་ཏེ་མདུན་གྱི་བར་སྣང་ལ་ཡལ་བར་བསམ། ཡན་ལག་གི་ནད་སྐྲངས་པ་ལ་སོགས་པ་ཐམས་ཅད་ལ་ཁོལ་བུའི་ནད་ལ། གང་ན་བའི་སར་ཧཱུྃ་མཐིང་ག་ནས་གང་བ་གཅིག་བསམ་སྟེ། ནད་ཐམས་ཅད་ལྷག་མ་མེད་པར་དེ་ལ་བསྡུས་ནས་སྐྲངས་པའི་དམིགས་སམ། སོར་མོའི་རྩེ་མོ་ནས་འཐོན་ཏེ། ནམ་མཁའ་ལ་ཡལ་བར་བསམ་མོ། །ནད་འདོན་དེ་རྣམས་བྱིན་རླབས་སོ་མ་ཡིན་པས་ཤིན་ཏུ་རྣོ་ཞིང་ཟབ་པར་འདུག་གོ །རྣམ་རྟོག་གིས་ བར་མ་ཆད་པར་བསྒོམ་ན་ནད་ཆེ་ཆུང་མེད་པར་གང་ཡང་འཐོན་པར་འདུག་གོ ༈ །གཉིས་པ་གཞན་གྱི་ནད་འདོན་པ་ནི། ནད་པ་དེའི་དྲུང་དུ་སླེབ་པ་དང་བྱང་ཆུབ་ཀྱི་སེམས་ལ་དུངས་པ་གཅིག་གནད་དུ་བཏང་ལ༑ ལྷའི་ང་རྒྱལ་བརྟན་པོས་འདུག་སྟེ། རང་གི་རླུང་གཡས་གཡོན་གང་རྒྱུ་བའི་ཕྱོགས་སུ་ནད་པ་བཞག་ལ། ནད་པ་དེའི་ཡང་རླུང་གང་རྒྱུའི་ཕྱོགས་སྟོན་དུ་གཞུག །དེ་གཉིས་ཀ་འཛོམ་ན་རྟེན་འབྲེལ་འགྲིགས་པ་ཡིན། མོས་གུས་དྲག་པོ་བསྒོམ་དུ་གཞུག །རང་གི་ཐུགས་ཀར་ཧཱུྃ་མཐིང་ཁ་དེ་གསལ་བར་བསྒོམ། དེ་ནས་རླུང་གཅིག་དྲག་ཏུ་ཤད་བུས་ལ་ཐུགས་ཀའི་ཧཱུྃ་ལས་ཧཱུྃ་རྒྱུན་པར་ཆད་དེ། རླུང་གང་རྒྱུ་བའི་སྣ་སྒོ་ནས་ཐུགས་ཀའི་བར་གྱི་རྩའི་ནང་དུ་ཧཱུྃ་གིས་ཁྲིགས་གང་སྟེ། སྣ་སྒོ་ནས་ཧཱུྃ་གཅིག་ལྷུག་སེ་ཡོད་པར་བསམ། ཡང་ནད་པ་དེའི་ཕྱོགས་སུ་རླུང་གཅིག་དྲག་ཏུ་བུས་པས། སྣ་སྒོའི་ཧཱུྃ་ལས་ཧཱུྃ་གཅིག་ཆད་དེ། ནད་པའི་ནད་ཚད་པ་ཡིན་ན་སྟོད། གྲང་བ་ཡིན་ན་སྨད། གང་དུ་གང་ན་བའི་སར་ཧཱུྃ་དེ་ཕར་སོང་བས། ནད་ཐམས་ཅད་རང་དབང་མེད་པར་ཧཱུྃ་དེ་ལ་འུབ་རིལ་གྱིས་བསྡུས་ནས། ཡང་རླུང་ཚུར་ལ་དྲག་ཏུ་རྔུབས་པས། ཧཱུྃ་དང་ནད་དུ་བཅས་པ་རང་དབང་མེད་པར་ཚུར་རྔུབས་ཏེ། སྣ་སྒོའི་ཧཱུྃ་ལ་ཐིམ། ཡང་དྲག་ཏུ་བུས་པས་ཧཱུྃ་དེ་ཕར་སོང་ནས་ནད་ཐམས་ཅད་བསྡུས། ཡང་རྔུབས་པས་སྣ་སྒོའི་ཧཱུྃ་ལ་ཐིམ་སྟེ། དེ་ལྟ་བུ་ལན་བདུན་གྱི་བར་དུ་བྱས་ནས་དེ་ནས་ཕྱི་ ཕྱོགས་སུ་ཤད་བུས་པས། སྣའི་ནང་གི་ཧཱུྃ་ཐམས་ཅད་གཅིག་གིས་གཅིག་དེད་དེ། ཕྱིར་ཉེ་ལ་སྤྱི་བོ་ནས། སངས་ཀྱིས་བུས་པས་ནད་སྣང་ནམ་མཁའི་ན་བུན་ལྟར་ཡལ་བར་བསམ། ཧཱུྃ་མཐའ་མ་དེས་སྣ་བཀག་པར་བསམ་སྟེ་རང་སྲུང་བ་ཡིན། ནད་པའི་ཡང་སྣ་གོང་གཉིས་སྙིང་ག་དང་གསུམ་དུ་ཧཱུྃ་མཐིང་ག་རེ་བསྒོམས་ཏེ་རང་སྲུང་བ་ཡིན། མཆན། ནད་འདོན་ཤིན་ཏུ་རྣོ་བ་ཚེར་མ་འདོན་པ་འདྲ་བ་འོང་བར་འདུག་སྟེ། གང་རུང་རུང་ལ་བྱས་ན་རང་ལ་གཟན་ པར་འདུག །དམ་སེལ་ལམ། སྡིག་སྒྲིབ་བམ་འཆལ་བའི་སྐྱོན་ཡོད་པ་ལ་བྱས་ན་རྣལ་འབྱོར་པའི་ཚེ་ལ་བར་བྱུང་དོགས་ཡོད་པས། སློབ་མ་མོས་གུས་ཅན་ནམ། གྲོགས་དམ་ཚིག་ཅན་ནམ། ཉེ་དུ་སྙིང་རེག་མ་ཡིན་པ་ལ་བྱ་རུ་མི་བཏུབ་གསུངས། སྤྱན་སྔ་ནས་ཕྱག་ལེན་འདི་ཀ་མཛད་པར་འདུག་སྟེ། ནད་དེ་ཏོག་ལེན་པ་འདྲ་བ་འོང་གིན་འདུག །ནད་འདོན་ཧཱུྃ་ཆོས་མའི་ཞལ་གདམས་ ཨྠ ི། ༈ །ན་མཿ ཤྲཱི་བཛྲ་ཡོ་གི་ནཱི༑ འཛག་སྲུང་བཀའ་རྒྱ་མ་ལ་གསུམ། དམིགས་པ་བཀའ་རྒྱ་མ། འཁྲུལ་འཁོར་བཀའ་རྒྱ་མ། རྫས་སྲུང་བཀའ་རྒྱ་མ། དང་པོ་ནི། སྤྱིར་ཐབས་ལམ་སྒོམ་པ་ན་འཛག་པའི་གེགས་འདི་ཀ་འོང་བར་འདུག །དེ་སེལ་ཡང་དཀའ། ཕལ་ཆེ་རང་ལ་གེགས་སུ་འོང་བ་མང་བར་འདུག །དམིགས་པ་དང་འཁྲུལ་འཁོར་ལེགས་ལེགས་འདྲ་བ། ཉན་ཙ་ན་རྣ་བར་སྙན་པ་དེ་རྣམས་ལ་སྒོམ་ཙ་ན་གཡུད་མི་འདུག་གསུངས། གདམས་ངག་གནད་དུ་ སོང་ན། བྱིས་པའི་རྩེད་མོ་འདྲ་བ་རྩེག་ཙམ་ལ། ཉན་ཙ་ན་ཡིད་མི་ཆེས་པ་འདྲ་བ་ཞིག་གིས་བསྒོམ་ཙ་ན་གནད་དུ་སེང་འོང་བ་ཡིན། ལར་ཁ་ཚོ་ཆེ་བ་མང་སྟེ་གདམས་པ་འདི་འདྲ་གཞན་ན་མི་བདོག་གོ །གནད་ཟབ་མོ་འདི་རྣམས་སླ་མོ་གཅིག་ཡོད་པས་ཤིན་ཏུ་གསང་བར་བྱ་གསུངས་ནས་བཀའ་རྒྱ་དམ་པོ་མཛད་པར་གདའ་འོ། །དེ་ལ་དམིགས་པ་དང་པོ་ནི། ཡང་དགོན་ན་འདག་ཆར་མཛད་པའི་དུས་སུ་ནངས་ཕྱོགས་ཤིག་བདེ་བ་ཟུག་རྔུ་དང་བཅས་པ་དྲག་པོ་གཅིག་སྐྱེས་ནས། ཐིག་ལེ་འཆོར་ལ་ཁད་པ་ཞིག་བྱུང་བས། བླ་མ་ལ་གསོལ་བ་བཏབ་པས། ཚིག་འདི་གཉིས་ནམ་མཁའ་ལ་ལྷང་བྱུང་སྟེ། ཟླ་བ་ཐུར་དུ་འཛག་པ་ན། །ཧཾ་ཡིག་གྱེན་ལ་བཞེངས་པར་བྱ། །ཞེས་བྱ་བ་ལ་དམིགས་པ་དེའི་ཡན་ལག་ཏུ་རྡོ་རྗེའི་བུ་གར་ཕཊ་དམར་སེར་མགོ་ཐུར་ལ་བསྟན་པ་གཅིག་བསམ། རྡོ་རྗེའི་རྩེ་མོ་ནས་ལྟེ་བའི་བར་རྩའི་ནང༌། ཧཱུྃ་དཀར་པོ་མགོ་གྱེན་ལ་བསྟན་པ་བྲེང་ཆགས་སུ་ཡོད་པར་བསམ། བ་སྤུའི་བུ་ག་ཐམས་ཅད་དུ་ཧཱུྃ་ཕྱེད་ཕྱེད་ཕྱིར་ཐོན། ཕྱེད་ཕྱེད་ནང་དུ་ནུབ་པས་འབག་ཞལ་དུ་ཡོད་པར་བསམ། དེ་ནས་ཧཾ་ཡིག་གྱེན་ལ་བཞེངས་པར་བྱ་བ་ལ་ཤེས་པ་དྲག་ཏུ་གཏད་ཅིང༌། རླུང་གྱེན་ལ་ཤད་ཤད་པ་དྲག་ཏུ་བུད། རྗེས་ལ་ཕྱག་རྒྱ་ཆེན་པོ་ལ་ཡུན་རིང་དུ་མཉམ་པར་བཞག །དམིགས་པ་གཉིས་པ་འདི་གསང་ཁྲིད་ཀྱི་དམིགས་པ་ཡིན། རྡོ་རྗེའི་རྩེ་མོ་ནས་ཡར་ཕྱིར་ལྡོག་ཏུ་འབུ་རུ་རུ་བྱུང་སྟེ། སྤྱི་བོ་ ནས་ཏུར་ཐོན་ནས་མཐོ་གང་ཙམ་དུ་ཕྱུ་རེ་ཡོད་པ་ལ་རིག་པ་དྲག་ཏུ་གཏད། དམིགས་པ་འདི་གཉིས་ངག་འདྲེན་པ་ཞི་དྲག་ཕལ་བས་འཆུན་ཆེ་བར་འདུག །འཛག་པ་དྲུག་ཀ་སྲུང་བར་འདུག་སྟེ། རྨི་ལམ་དུ་འཛག་ན་གཉིད་ལོག་ཁར་མང་དུ་བསྒོམ། བདེ་བ་སྐྱེས་པ་ལ་སོགས་པ་ནམ་འཛག་པའི་དུས་སུ་བསྒོམ། ཐུན་ཞབས་ཐམས་ཅད་ལ་བསྒོམ་མོ། །གཉིས་པ་འཁྲུལ་འཁོར་བཀའ་རྒྱ་མ་ནི། གྱད་ཀྱི་འདུག་སྟངས་བགྲད་པའི་མཐའ་དེས་བྱང་སེམས་འབབ་པའི་རྩ་སུམ་ཅུ་སོ་གཉིས་ཀྱི་རྩ་ཁ་འཐེམས་པ་ཡིན། ལན་གཉིས་ལན་གསུམ་གྱིས་གཟེར་ཐེམས་བཀག་པ་བཞིན་འགྲོ་བར་འདུག་སྟེ། འཛག་པའི་དུས་མ་ཡིན་པར་བྱས་ན་བདེ་ཉམས་ལ་གནོད་གསུངས། གཉིས་པ་ནི། ཤིང་བུ་མཐོ་གང་བ་གཅིག་གིས་རྐེད་པ་ན་ཐ་གུས་བཏགས་ནས། ཤིང་བུ་ཨར་བུ་ཏའི་གནས་སུ་དྲང་པོར་བཞག་སྟེ། ལམ་པ་ཀའི་གནས་སུ་ཐ་གུས་བཏོད་ནས་མི་འཆུག་པར་བྱས་པས། རྩ་གཡོན་ རོ་མ། པའི་ཁ་འཐེམས་ནས་མ་འཛག་པ་ཡིན། གདམས་ངག་ཁོལ་དུ་བཏོན་ན་བྱིས་པའི་རྩེད་མོ་འདྲ། གསུམ་པ་རྫས་སྲུང་བཀའ་རྒྱ་མ་ནི། དེ་ཐམས་ཅད་ཀྱིས་མ་ཕན་ན། གཤིན་རྗེའི་རལ་པ་བསླད་མེད་གཅིག་དྲག་པོའི་ཐུན་རྫས་རྒྱལ་པོ་གཅིག །པདྨ་རཀྟ་གྲོང་པའི་ཆོས་ཀྱིས་མ་གོས་པ་གཅིག །ནར་མ་གོ་ཏི་རུལ་སུངས་སུ་མ་སོང་བ་གཅིག །མ་ཧཱ་བྷུ་ལུ། རྒྱའི་ཚིལ་བུ། དེ་རྣམས་ཆ་སྙོམས་པ་ཞིབ་ཏུ་ བཏགས་ལ། བྱིས་པ་ལོ་བརྒྱད་པ་ནད་མེད་ཀྱི་དྲི་ཆུས་སྦྲུས་ལ། རིལ་བུ་ཡུངས་དཀར་གྱི་འབྲུ་ཙམ་གྲིབ་སྐམ་བྱས་ལ། ནང་ནུབ་བཞིན་རྡོ་རྗེའི་བུ་གར་རེ་རེ་བཅུག་པས་གཟེར་ཐེམས་ཁེགས་པ་བཞིན་འགྱུར་རོ། །འདི་ཐབས་གཞན་གྱིས་མ་ཕན་ནས་རྩ་ཁ་བྱེ་ནས་ཆུ་བཞིན་འཛག་པ་ཡང་འཕྲལ་དུ་ཁྲིག་གིས་འགྲོ་བར་འགྱུར་རོ། །ཟླ་བ་ཕྱེད་ཀྱི་བར་དུ་བསྟེན་ན་ལོ་གཅིག་ཙམ་གྱི་བར་དུ་སྲུང་བ་ཡིན་གསུངས། འཛག་སྲུང་བཀའ་རྒྱ་མའི་ཞལ་གདམས་ཆེ་ལོང་ཙམ་ཡི་གེར་བཀོད་པའོ། ། ཨྠ ི། རི་ཆོས་ལམ་གྱི་ཁོག་ཆེན་ལ། །མ་དྲུག་དོན་སྙིང་མི་བདོག་ན། །གནད་ཆེན་མང་ཡང་མ་ཚང་བས། །འཆུག་མེད་ལག་ལེན་ཤེས་པ་དཀའ། །བླ་མ་བརྟེན་ཡུན་ཐུང་བ་ཡིས། །ཟབ་མོའི་རྩ་བ་མི་ཆོད་པས། །གདམས་ངག་ཐོབ་ལོ་མི་བྱེད་པར། །ཞབས་པད་གཙུག་ཏུ་བསྟེན་བྱོས་ལ། །ཟབ་མོ་གསུང་གི་བདུད་རྩི་དེ། །ཡིད་ཚིམས་ལྷག་མ་མེད་འཐུངས་ན། །རང་གཞན་དོན་གཉིས་འགྲུབ་པར་ངེས། །དབེན་གནས་ཁུ་ལའི་གངས་འདབས་སུ། །བླ་མ་དམ་པའི་གསུང་སྒྲོས་ལ། །དབྲི་བསྣན་ལྷག་ཆད་མེད་པ་འདི། །གསོལ་བཏབ་དགྱེས་བཞིན་གནང་བ་ཡིན། །བློ་དམན་བསྒོམ་པ་རིན་ལྡན་གྱིས། །རང་ཉིད་ མི་བརྗེད་གཟུངས་སུ་བྲིས། །དགེ་དེས་གདམས་ངག་བདུད་རྩི་འདི། །དྲི་མེད་ཕྱོགས་བཅུར་གསལ་གྱུར་ནས། །ཆོས་རྗེའི་ཐུགས་དགོངས་རྫོགས་པར་ཤོག ། ཨྠ ི།། །།