DNZ-07-JA-005

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 7, Text 5, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །བདེ་མཆོག་སྙན་བརྒྱུད་ཀྱི་འོད་རིག་བདེ་ཆེན་གྱི་གདམས་པ་བཞུགས་སོ། །

ན་མོ་གུ་རུ་དེ་བ་ཌཱ་ཀི་ནཱི། ཤེས་རབ་ཡེ་ཤེས་དང་འབྲེལ་བ་མཁའ་འགྲོའི་གསང་སྒྲོགས་པ་བདེ་བ་ཆེན་པོ་ལ། ཆགས་ལམ་ལས་རྒྱ་ལ་བརྟེན་པ་དང༌། གྲོལ་ལམ་འོད་རིག་ལ་བརྟེན་པ་གཉིས་ཏེ། ལས་རྒྱ་གསང་སྔགས་གསར་རྙིང་གཉིས་ནས་བཤད་ཀྱང་ཉམས་སུ་ལོངས་པ་ཉུང་སྟེ། སྔགས་པ་ཕ་ལ་བུ་མང་གི་འདམ་དུ་ཚུད་པའོ། །དཔེར་ན་སྐྱེས་བུ་རྟ་ལ་མ་བྱང་པ་གཅིག་རྟ་རྨུ་རྒོད་སྲབ་མདའ་ཆད་པ་ལ་ཞོན་ན་ཆེ་རུ་སྲོག་དང་བྲལ། ཆུང་ངུ་ཡན་ལག་འཆག །རྟས་དབང་མེད་དུ་ཁྱེར་ནས་གཅོང་རོང་གཡང་སའམ་གད་སྐྱིབས་སུ་ཤོར་ན་མི་རྟ་གཉིས་ཀ་འཆི། བར་སྐབས་སུ་སྣད་ཡར་འོང་བར་ཤེས་ཏེ། འབབ་པར་འདོད་ཀྱང་རང་དབང་མི་འབྱུང༌། མིས་འཕྱ། རང་འགྱོད་གཉིས་ཀ་འབྱུང༌། དེ་ལྟ་བུའི་རྟ་ཞོན་པ་བརྒྱ་བརྒྱ་ཙམ་ལ་བསྣད་ཡར་མེད་ཅིང་ཁྲོམ་ཐོག་ཆོད་པ་རེ་རེ་ཙམ་སྲིད་པའོ། །དེ་བཞིན་ཆགས་ལམ་ལས་རྒྱ་ལ་བརྟེན་པའི་གང་ཟག །སྙིང་རུས་ཀྱི་སྟོབས་ཞན་པ། རྩ་རླུང་ཐིག་ལེ་ལ་དབང་མ་ཐོབ་པ། རྟ་རྨུ་རྒོད་སྲབ་མདའ་ཆད་པ་ལ་ཞོན་པ་ལྟར། ཕྱག་རྒྱ་མ་བརྟེན་པས་ཆེར་དགེ་སྦྱོར་གྱི་སྐྱེད་འཕེལ་ཆད། ཚེའི་བར་ཆད་བྱེད། འབྲིང་བསོད་ནམས་ཆུ་ཆད་པ་ལྟར་འགྲོ། ཐ་མ་སྐུར་པ་ངན་པ་འབྱུང༌། ཇི་ཞིག་ནས་འགྱོད་ནས་སྤང་བར་འདོད་ཀྱང༌། བུ་ཚས་འབྲེལ་ནས་རང་དབང་མི་འབྱུང༌། བརྟག་པ་མཐའ་བཟུང་གི་རིགས་པས་དཔྱད་ན། སོ་སོ་སྐྱེ་བོ་རྣམས་མི་དད། དམ་པ་རྣམས་ཀྱི་ཐུགས་ཀྱིས་ཁྲེལ། དད་པ་ཅན་སུན་འབྱིན། རྩ་ལྟུང་བཅུ་གཉིས་པ་ཕོག །དྭངས་མ་འཛག་བདེར་ཤོར། རྩ་ལྟུང་ལྔ་པ་ཕོག །འགྲོ་དོན་མི་ནུས། ཁྱིམ་པ་དང་ཁྱད་མེད་གྱུར་པའི་ཉེན་ཡོད། དགོས་པའི་བྱང་སེམས་ཉམས། མི་དགོས་པའི་ཉོན་མོངས་པ་ཆེར་འཕེལ། ལྷ་དང་མཁའ་འགྲོ་གྱེས། རང་རྒྱུད་གཟུང་འཛིན་དང་ལས་རྒྱའི་ དབང་དུ་སོང༌། མཐར་ཤི་ནས་ངན་སོང་དུ་སྐྱེ་བའི་ཉེན་ཡོད་དེ། རྡོ་རྗེའི་ཚིག་རྐང་ནས། བག་མེད་འདོད་སྲེད་གཞན་དབང་ཆང་གིས་མྱོས། །དོན་ལས་ཉམས་ཤིང་སླར་ཡང་ངན་སོང་ལྟུང༌། །ཞེས་གསུངས་པས་ནཱ་རོ་པཎ་ཆེན་གྱིས་ལོ་གཅིག་ཤེས་རབ་མ་བརྟེན་ནས་ཏེ་ལོའི་དྲུང་དུ་ཕྱིན་པས་ནཱ་རོ་པས། བདག་ཟེར་བ་བཞིན་ཤེས་རབ་མ་མ་ཉན་ཤེས་རབ་མས་ཟེར་བ་བཞིན་བདག་མ་ཉན། བསམ་པ་ལྟ་སྤྱོད་མ་མཐུན་པས། །དོན་མེད་སྡུག་བསྔལ་སྣ་ཚོགས་མྱོང༌། །འདོད་ཡོན་སྲེད་པའི་བདེ་བ་ཡིས། །གཉིས་སྣང་གཟུགས་འཛིན་དབང་དུ་ཤོར། །གསུང༌། དེ་རྗེས་ཤེས་རབ་མ་ཏེ་ལོ་པ་ལ་ཕུལ་ནས། ལྟོས་མེད་བླ་མ་སངས་རྒྱས་ལ། །ཤེས་རབ་ཡོན་ཕུལ་རྣལ་འབྱོར་བདེ། །གསུངས། གྲུབ་ཐོབ་ཆེན་པོ་དེ་ལྟ་བུ་ཡང་དེ་སྐད་གསུང་ན། གཞན་རྣམས་ལྟ་སྨོས་ཀྱང་ཅི་དགོས། རྗེ་རས་ཆུང་པ་ལྟ་བུ་རླུང་སེམས་ལ་དབང་ཐོབ་ཀྱང༌། ལྷ་གཅིག་ལྡེམ་བུ་ཕྱག་རྒྱར་བཞེས་པ་ལ༑ ༑ཤིན་ཏུ་སྡུག་ཅིང་ཉམས་ཐག་སྟེ། །ཡུན་རིང་པོར་སྤང་དབང་མ་བྱུང་བར། །བླ་མ་ཡི་དམ་མཁའ་འགྲོ་རྣམས། །མཐོང་ཐོས་དྲན་ནམ་རས་ཆུང་པ། །བསམ་གྱིན་ཡི་མུག་མཆི་མ་དཀུ། །ཞེས་པ་ལ་སོགས་པ་གསུང་ངོ༌། ། མདོར་ན་ཆགས་ལམ་ནམ་མཁའི་སྐར་མ་ཙམ་ཡོད་ཀྱང༌། བར་ཆད་ཀྱིས་མ་ཁྱེར་བ་ལམ་དུ་སློངས་པ་ཉི་ཟླ་ཙམ་ལས་མ་བྱུང་བའོ། །དེའི་ཕྱིར་ལས་རྒྱ་མི་བརྟེན་ཅིང༌། ཤེས་རབ་ཡེ་ཤེས་ཀྱི་དབང་གི་ཉམས་ལེན་འོད་ཀྱི་ རིག་མ་བརྟེན་པའོ། །འདི་ནི་ཐབས་ཁྱད་པར་འཕགས་པའི་ལམ་ཡིན་ཏེ། སོ་སོ་ཐར་པའི་སྡོམ་པ་བསྲུང་བའི་རྩ་བའི་ཐིག་ལེ་མི་ཉམས་པའི་གནད་ཀྱང་འདིའོ། །བྱང་ཆུབ་སེམས་དཔའི་དོན་དམ་དང་ཀུན་རྫོབ་བྱང་ཆུབ་སེམས་སོགས་པ་འཕེལ་བའི་གནད་ཀྱང་འདིའོ། །གསང་སྔགས་དཀའ་བ་མེད་པར་ཐབས་ལ་མཁས་པས་ལམ་བགྲོད་པར་མྱུར་བའི་ཐབས་ཀྱང་འདིའོ། །གྲུབ་ཐོབ་རྣམས་ཀྱི་རྫུ་འཕྲུལ་སྟོན་པའི་གནད་ཀྱང་འདིའོ། །འདོད་ཆགས་ཅན་འདོད་ཆགས་ཟག་མེད་དུ་བསྲེ་བ་ཡང་འདིའོ། །རྩ་དཔའ་མོ། ཐིག་ལེ་དཔའ་བོ། རླུང་སྙོམས་འཇུག་ཏུ་གནས་པ་ལ། རྩ་རླུང་འཁོར་ལོ་བསྐོར་བས། དཔའ་བོ་མཁའ་འགྲོ་དངོས་སུ་འཁུལ་བའི་གནད་འདིའོ། །དེ་ལྟ་བུའི་མཁའ་འགྲོའི་གསང་སྒྲོགས་པ་བདེ་བ་ཆེན་པོ་དངོས་ལ་ལྔ་སྟེ། ཉམས་སུ་ལེན་པའི་དུས་བསྟན་པ། འོད་ཀྱི་རིག་མའི་སྒོམ་ཐབས། ཐིག་ལེའི་ལས་ལྔ་ལ་མཁས་པ། སྣང་བ་ཆོས་སྐུའི་དོན་གཏན་ལ་དབབ་པ། འཛག་སྲུང་རྡོ་རྗེའི་སྲོག་ཆིངས་བསྟན་པའོ། །དང་པོ་ལ་གསུམ། རི་བོང་རྒྱུག་པའི་དུས་དང༌། ཟླ་བ་ཆུས་འཛིན་པའི་དུས་དང༌། ཉི་མ་རྒྱལ་བའི་དུས་སོ། །དང་པོ་ཚེས་བརྒྱད། གཉིས་པ་བཅོ་ལྔ། གསུམ་པ་གནམ་གང་ངོ༌། །དུས་དེ་གསུམ་ལ་ཆགས་སྣང་ཆེ་ཞིང་ཐིག་ལེ་འཛག་པས་ཉམས་ལེན་བརྩོན་པར་བྱ། དེ་ཡང་འཇིག་རྟེན་པའི་སེམས་ཅན་རྣམས་ཀྱི་ཁམས་དྭངས་མ་དཀར་པོ་དང་ཟླ་བ་ངོ་བོ་གཅིག །དམར་པོ་ དང་ཉི་མ་ངོ་བོ་གཅིག །ཟླ་བ་རྒྱས་པ་བཞིན་དུ་དྭངས་མ་འཕེལ། ཟླ་བ་ཚེས་བཅོ་ལྔ་ནས་འགྲིབ་པ་བཞིན་འགྲིབ། གནམ་གང་གི་ཉིན་ཟླ་བ་ཟད་པ་དང་ཐིག་ལེ་ཡང་འཛད་པ་ཙམ་དུ་འགྱུར་ཡང༌། ཉི་ཟླ་སྦྱོར་བ་བྱེད་པའི་དུས་ཡིན་པས་ཆགས་པ་སྐྱེའོ། །སངས་རྒྱས་པས་དུས་དེ་གསུམ་ལ་རྩིས་སུ་འཛིན། བསྙེན་གནས་འབོགས་པའང༌། ཚེས་བརྒྱད་བཅོ་ལྔ་ཐིག་ལེ་འཕེལ་དུས་མ་ཟག་ན། སེམས་ཅན་བདེ་སྐྱིད་ཀྱི་རྟེན་འབྲེལ་མང་དུ་འགྲིག་པ་ལ་དགོངས། གནམ་གང་གི་ཉིན་ནུས་པ་ཟད་པ་ཙམ་དུ་གྱུར་པ་ལ་སྲེད་པ་སྦྱང་བས། ཐིག་ལེའི་ཤུལ་དུ་ཆུ་སེར་འཇུག །ནད་སྐྱེ། ཚེ་ཐུང༌། ཉོན་མོངས་པ་མི་དགེ་བ་དུ་མ་འཕེལ། ལོངས་སྤྱོད་དབུལ་བ་ལ་དགོངས། དུས་འདི་གསུམ་དང༌། བདེ་བ་ཤས་ཆེ་དུས་དང༌། ཞག་རེ་ལ་ལན་རེ་ཉམས་སུ་ལེན་པའོ། །ནམ་ཕྱེད་དང་ཉིན་ཕྱེད་ལ་ཉམས་སུ་མི་ལེན་ནོ། །འོད་ཀྱི་རིག་མའི་སྒོམ་ཐབས་བསྟན་པ་ནི། ལུས་གནད་གཏུམ་མོ་དང་མཐུན། སྐྱབས་འགྲོ་སེམས་བསྐྱེད་བླ་མའི་རྣལ་འབྱོར། རྗེ་བཙུན་མར་བསྒོམས་ཏེ་མཆོད་པ་དབུལ། བདེ་སྟོང་དགའ་བཞིའི་ཉམས་མྱོང་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་གདབ། སྤྱི་བོར་བླ་མ་འཁོར་ལོས་སྒྱུར་བའི་ཆ་བྱད། ཡབ་ཡུམ་སྦྱོར་བ་མཛད་པའི་སྦྱོར་མཚམས་ལ་རིག་པ་གཏད། དེ་ནས་ལུས་བདེ་ཕྲོལ་བྱུང་བ་དང༌། བླ་མ་ཡབ་ཡུམ་འོད་དུ་ཞུ། སྤྱི་བོར་ཐིམ། རྗེས་གནས་ལུགས་ཀྱི་ངང་དུ་བཞག ། བསྔོ་བ་བྱ། དམིགས་སྐོར་གཅིག་གོ །དེ་རྗེས་གོང་བཞིན་དུ་གསོལ་འདེབས་བྱ། མངོན་རྟོགས་རྒྱས་འབྲིང་ཅི་རིགས་པར་བསྒོམ། སྐུ་གསུང་ཐུགས་མཁའ་གསང་བྱིན་གྱིས་བརླབ། བདེ་མཆོག་ཡབ་ཡུམ་སྦྱོར་བ་མཛད་པའི་སྦྱོར་མཚམས་ལ་རིག་པ་གཏད། ཨ་ལོང་འབྱེད་འཛུམ་བྱ། སྐབས་སུ་སྤྱི་བོའི་བླ་མ་ཡབ་ཡུམ་གྱི་སྦྱོར་མཚམས་ནས། ཐིག་ལེ་བབས། ཚངས་བུག་ན་མར་འོང༌། རང་ལྷར་གསལ་བའི་ལུས་ཀྱི་ནང་ཐིག་ལེས་གང༌། བདེ་ཕྲིལ་བ་བསྒོམ། དེ་ནས་བདེ་བ་ཆེར་སྐྱེས་པ་དང༌། དགའ་བ་བཞི་ངོས་བཟུང༌། ཐིག་ལེ་གསང་གནས་སུ་བྱོན། བདེ་བ་མི་བཟོད་པ་ཙམ་བྱུང་བ་དང༌། ལྡོག་པར་བྱ། རྗེས་གནས་ལུགས་ངང་ལ་ཇི་སྲིད་གནས་པ་དེ་སྲིད་དུ་བཞག །དམིགས་སྐོར་གཅིག །དེ་ལ་ཐིག་ལེ་བརྟན་པ་དང༌། གཏུམ་མོའི་རླུང་སྦྱོར་ལ་ནན་ཏན་བྱས་པས། རླུང་ལ་དབང་ཐོབ་ཅིང་བདེ་བ་ཆེར་སྐྱེའོ། །དེ་ནས་གོང་བཞིན་དུ་གསོལ་འདེབས་ལ་སོགས་བྱ། སྲུང་འཁོར་བསྒོམ། དེ་ནས་རང་བདེ་མཆོག་ཏུ་བསྒོམ། སྤྱི་བོར་བཀའ་བརྒྱུད་ལ་སོགས་བསམ། སྙིང་གར་འཁོར་ལོ་སྡོམ་པ། ཡན་ལག་ལ་མཁའ་འགྲོ་ཆོས་སྐྱོང༌། བ་སྤུའི་བུ་གར་རྡོ་རྗེ་སྤུན་དྲན་པར་བྱས་ལ། བདེ་བའི་པཱུ་ཛ་དབུལ་སྙམ་དུ་བསམ། མདུན་དུ་འོད་ཀྱི་རིག་མ་བཀུག་ལ། རྗེ་བཙུན་མར་བསྒོམ། ཡབ་ཡུམ་གཉིས་ཀའི་གནས་གསུམ་དུ་ཡི་གེ་འབྲུ་གསུམ་དཀར་དམར་མཐིང་གསུམ་དུ་བསྒོམ། ཡབ་ཀྱི་ཐུགས་ཀར་ཡུམ་གྱི་སྙིང་པོ། ཡུམ་གྱི་ཐུགས་ཀར་ཡབ་ཀྱི་སྙིང་པོ་བཀོད། ཡབ་ཀྱི་ནོར་བུའི་རྩ་བར་ཧཱུྃ་སྔོན་པོ་མགོ་ནང་དུ་བསྟན་པ། ཚངས་བུག་གི་ཧྃ་དང་གཉིས་བ་ཐག་ལྟ་བུས་སྦྲེལ་བ་རྩེ་མོར་ཕཊ་སེར་པོ་མགོ་ཕྱིར་བསྟན་པ་བསམ། ཡུམ་གྱི་པདྨའི་ཟེའུ་འབྲུ་ལ་དྱཱ་ཡིག་དམར་པོ། ཡན་ལག་ཐམས་ཅད་ལ་ཧྃ་ལྗང་གུ་རེ་བསམ། དེ་ནས་སྟེང་ནས་བྱང་ཆུབ་སེམས་ཀྱི་སོ་གཟུག་སྟེ་གུང་མོས་སྣ་རྩེ་སྟེམ། འོག་འཁོར་བའི་རྒྱུན་ལམ་བཅད་དེ་སྒྲོ་བཤམ་གྱི་བར་སྲིན་མཛུབ་ལ་གུང་མོ་གཙེར་ལ་སྟེམ། དེ་ནས་དལ་བུས་བསྲུབ་སྦྱོར་བརྒྱད་བྱ། སྦྱོར་བ་བྱེད་པར་བསམ་སྟེ། རྡོ་རྗེའི་ཚིག་རྐང་ནས། སྐལ་ལྡན་སྐྱེས་བུ་ཧེ་རུ་ཀ་རུ་བལྟ། །ཕྱག་རྒྱ་མཚན་ལྡན་རྡོ་རྗེ་རྣལ་འབྱོར་མ། །གཉིས་མེད་འཁྲིལ་སྦྱོར་ཟག་བཅས་ཟག་མེད་རོལ། །ཞེས་པའོ། །ལུས་ངལ་བའི་དུས་སུ་སྣའི་རྩེ་མོར་བལྟ། སྒོ་གསུམ་དབྱེར་མེད་རིག་སྟོང་ཆོས་ཉིད་ནམ་མཁའི་དོན་ལ་བཞག །ཉོན་མོངས་པ་རང་ག་མར་མི་བཏང༌། འཛག་བདེར་མི་བཏང༌། ལུས་འཁོར་ལོ་ལྟར་སྐོར། ཐིག་ལེ་ལྕགས་ཀྱུ་ལྟར་བཟུང༌། རླུང་སེམས་ལི་རི་ལྟར་སྒྲིམ། ཆགས་པ་སྤྱོད་དགུ་ཅོག་ལ་ལུགས་འབྱུང་གི་དགའ་བཞི་ཡོད་དེ་ངོས་མི་ཟིན། འདིར་ངོས་བཟུང་བ་ནི། རླུང་གི་རྩེ་མོ་དང་རྩའི་རྩེ་མོ་སྲིན་མཛུབ་ལ་ཡོད་པས་དེས་བསྒུལ་ནས་འཁྲིག་ཏུ་འོང༌། དེ་ནས་སྣ་རྩེ་སྨིན་མཚམས་སུ་བདེ་བ་བསྐྱེད། དང་པོ་ཁྲག་ཁུ་བ་སྤྱི་བོར་འདུས་པས། ལུས་ཁོལ་བུར་བདེ། སྤྱི་བོ་ནས་མགྲིན་པར་བབས་པས་དགའ་བ། དེ་ནས་སྙིང་གར་བབས་པས་ལུས་ཕལ་ཆེར་རྒྱས་ཞིང་མཆོག་དགའ། དེ་ནས་ལྟེ་བར་བབས་པས་ལུས་ཀུན་ཏུ་བདེ་ཕྲིལ་ཙེར་ཁྱབ་པས་ཁྱད་པར་གྱི་དགའ་བ། ལྟེ་བ་ནས་གསང་གནས་སུ་བབས་པས་སྣང་སྲིད་ཀྱི་དངོས་པོ་ཐམས་ཅད་བདེ་ཞིང་ལྷན་ཅིག་སྐྱེས་པའི་དགའ་བའོ། །ཐིག་ལེའི་ལས་ལྔ་ལ་མཁས་པར་བྱ་བ་ནི། ནོར་བུའི་རྩེ་མོར་བབས་ནས་འཁྲུལ་འཁོར་གྱིས་ལྡོག་པ་སྙམ་བྱེད་ཀྱང༌། ཕྱིས་ཆུ་དང་སྡོངས་ན་འཛག །འཁོར་ལོ་ལ་མ་ཁྲེམས་ན་ནད་དུ་འགྲོ་བའི་ཉེན་ཡོད་དོ། །དེ་བས་གསང་གནས་སུ་བབས་པ་ན། ལྡོག་པ་གནད་ཆེའོ། །དེ་ལ་དང་པོ་དབབ་པ་ལ་མཁས་པ་ནི། དུས་ལ་མི་བབ་པར་བསྲུབ་སྦྱོར་བརྒྱད་དལ་བུས་བྱའོ། །གཟུང་བ་ལ་མཁས་པ་ནི། བར་དེར་རླུང་སང་བུད་སྲིན་པོ་བསྐུམ་བྱ། ལུགས་འབྱུང་ངོས་འཛིན་པའོ། །ལྡོག་པ་ལ་མཁས་པ་ནི། དམིགས་པ་ཞལ་ལས་ཤེས། རྣ་བ་ལ་སེན་མོ་གདབ། གླིང་བཞི་བསྡུ། ཐུར་སེར་བཅུད། ཉི་ཟླ་གྱེན་ལ་ལྡོག །དར་ཆེན་འཕྱར། རྒྱ་མཚོ་བྲག་ལ་བརྡེབ། ཞི་དྲག་ངག་གི་འདྲེན་ནི། སེང་གེ་རྩེ་བ་ལ་ཎི་ཎི་དགུ་དྲང༌། གླང་ཆེན་འགྱིང་བ་ལ་ཧིབ་ཧིབ་ཅེས་གསུམ། སྟག་མོའི་སྐྱུགས་ལ་ཧབ་ཧབ་ཅེས་གསུམ། རྨ་བྱ་འཕུར་ལ་ཧཱུྃ་ཧཱུྃ་ཞེས་པ་གསུམ་གྱིས། རུས་སྦལ་བསྐུམ་ལ་ཧྲིག་གསུམ་མོ། །དགྲམ་པ་ལ་མཁས་པ་ནི། བྱ་རྒོད་ཁྲུས་དང་སེང་གེའི་སྤྲུགས་བྱའོ། ། གནས་པ་ལ་མཁས་པ་ནི། ཕྱག་རྒྱ་ཆེན་པོའི་དོན་ལ་འཇོག་པའོ། །དེ་ཡང་རྡོ་རྗེའི་ཚིག་རྐང་ནས། ཐིག་ལེ་དབབ་བཟུང་ཟློག་དགྲམ་གནས་སུ་སྤེལ། །ཞེས་གསུངས་སོ། །སྣང་བ་ཆོས་སྐུའི་དོན་གཏན་ལ་དབབ་པ་ནི། ལུགས་འབྱུང་དགའ་བཞིའི་དོན། ལྷན་ཅིག་སྐྱེས་པའི་ཡེ་ཤེས། ཤེས་བྱ་སྤྲིན་བར་ཉི་མ་ལྟ་བུ་ཡུད་ཙམ་བྱུང་བ་དེ་ངོས་ཟིན་པར་བྱའོ། །ལུགས་ལྡོག་གི་དགའ་བ་བཞི་ནི། གསང་གནས་ནས་ལྟེ་བར་ལྡོག་པས་དགའ་བ་དང༌༑ ལྟེ་བ་ནས་སྙིང་གར་ལྡོག་པས་མཆོག་དགའ་དང༌། སྙིང་ག་ནས་མགྲིན་པར་ལྡོག་པས་ཁྱད་པར་གྱི་དགའ་བ། མགྲིན་པ་ནས་སྤྱི་བོར་ལྡོག་པས་ལྷན་ཅིག་སྐྱེས་དགའ་འོ། །དགའ་བ་གསུམ་དཔེའི་ཡེ་ཤེས་ལ། ལྷན་ཅིག་སྐྱེས་པ་དོན་གྱི་ཡེ་ཤེས་ཡིན་པར་རིག་པར་བྱའོ། །དེའི་དུས་སུ་དགའ་བ་གསུམ་དང་བྲལ། རླུང་དབུ་མར་ཚུད་པས་སྲོག་རྩོལ་ཆ་མཉམ་རྒྱུ། རྣམ་པར་ཤེས་པ་ཡུལ་ལ་འཕྲོ་བ་ཆད། ཉམས་རྟོགས་ཀྱི་འཆར་ཚུལ་རྣམ་པ་གསལ་ལ་སྒྲིབ་པ་མེད་པ། ངོ་བོ་སྟོང་པ་ཉམས་བདེ་ལ་ཟག་པ་མེད་པ་འཆར། དབང་བཞི་པའི་དོན་རྗེན་ནེ་ལྷང་ངེ་བ་དེ་ཉིད་ཇི་སྲིད་དུ་བཞག །དེ་ལྟར་ཡང་ཡང་སྦྱངས་པས་རྩ་ཕྲ་བའི་མདུད་པ་དྲལ་བས་དགའ་བ། རགས་པ་དྲལ་བས་མཆོག་དགའ། དྷཱུ་ཏིའི་སྣ་རྩེར་རླུང་སེམས་འདུས་པའི་དུས་སུ་ཁྱད་པར་གྱི་དགའ་བ། དྷཱུ་ཏིའི་མདུད་པ་དྲལ་དུས་ལྷན་ཅིག་སྐྱེས་པའི་དགའ་བའོ། །དེ་ལྟར་ལུགས་འབྱུང་གི་དགའ་བ་བཞི། ལུགས་ལྡོག་གི་ དགའ་བ་བཞི། རྩ་མདུད་གྲོལ་བའི་དགའ་བ་བཞི། དགའ་བ་བཅུ་གཉིས་ཉམས་སུ་མྱོང་བ་ནི། དབང་གསུམ་པའི་ཉམས་ལེན་ལ་བརྟེན་ནས་བཞི་པ་དོན་ལྷན་ཅིག་སྐྱེས་པའི་ཡེ་ཤེས་ཡང་དག་མངོན་དུ་གྱུར་པ་ཞེས་བྱ་བ་སྟེ། རྡོ་རྗེའི་ཚིག་རྐང་ནས། དགའ་བ་བཞི་གསུམ་བཅུ་གཉིས་དོན་ལ་བལྟ། །ལྷན་སྐྱེས་ཡེ་ཤེས་རང་བཞིན་དབྱེར་མེད་སྟོན། །སྣང་སྲིད་ཐམས་ཅད་ཟག་མེད་བདེ་བར་འཆར། །གསུངས་པའོ། །དེ་ལྟར་གོམས་པས་ཟླ་བ་དྲུག་ནས་སྟེང་གི་སེང་གེ་དཀར་མོ་ཐུར་དུ་ཚུད་པས་སྐྱོན་བརྒྱད་ལས་གྲོལ། ས་འོག་གི་རུས་སྦལ་ལམ་ནས་དྲོངས། ས་བླའི་སྟག་མོ་ནགས་ལ་ཁྲེམས། ཁྲག་འོ་མར་འགྱུར། གསང་གནས་སུ་ཉི་ཟླ་ལྟར་འཁོར། རྣམ་སྣང་མི་སྐྱོད་དབྱིངས་སུ་གཤེགས། རླུང་བཅུ་གནས་སུ་ཟིན། རྫུ་འཕྲུལ་ལ་མངའ་བརྙེས། གཞན་གྱི་སེམས་ཤེས་པའི་མངོན་ཤེས་འབྱུང༌། རྩ་མི་མངོན། སྐྲ་དཀར་གཉེར་མ་མི་འབྱུང༌། མཁའ་འགྲོ་མི་བཞིན་དངོས་སུ་འདུ་བ་འབྱུང༌། ཕྱག་རྒྱའི་ལུང་བསྟན་ཐོབ། ཐིག་ལེའི་ལུས་སུ་གྱུར་ནས་ཆོས་སྐུར་སངས་རྒྱ་བ་སྟེ་རྡོ་རྗེའི་ཚིག་རྐང་ནས། དེས་ན་རྡོ་རྗེའི་ལུས་ལ་གནད་དུ་བསྣུན། །ཚེ་འདིར་སངས་རྒྱས་སྟེར་བར་ཐེ་ཚོམ་མེད༑ ༑ཅེས་གསུངས་སོ། །འཛག་སྲུང་རྡོ་རྗེའི་སྲོག་ཆིངས་བསྟན་པ་ནི་གཉིས་ཏེ། རྟེན་འབྲེལ་གྱི་ཆིངས་བསྟན་པ་དང༌། སྐྱོན་གྱི་སེལ་ཐབས་བསྟན་པའོ། །དང་པོ་ནི་ཐིག་ལེ་འཛག་བདེར་ཤོར་ན། ལྟུང་བ་ཕོག །ཡོན་ཏན་མི་འབྱུང་བས་བསྲུང་སེམས་བརྟན་པ་གནད་དོ། །སྙོམས་འཇུག་དུས་སུ་ལོང་མེད་འཛག་པ་དང༌། ཡུལ་རྐྱེན་གྱིས་འཛག་པ་ལ། མགྲོན་བུ་མ་ཉམས་གཅིག་གི་ནང་དུ་ཟངས་ལྕགས་བཅུག་ནས་ཁ་སྤྲ་ཚིལ་གྱིས་བཅད་དེ་ལྕེ་འོག་ཏུ་བཅུག་ན་ཡུན་རིང་པོར་མི་འཛག །རྗེས་འཁྲུལ་འཁོར་བྱས་པས་ཁྲེམས་སོ། །ལྕེ་འོག་ཡུན་རིང་ན་ལྕེ་རྡོར་པོར་འགྲོ་བས་ཁུག་ཆུང་དུ་སྦ། ཡང་ན་ཟངས་སྣོད་དུ་ཆུ་བླུག་ཟུར་དུ་མེ་ལོང་གཟུག །མེ་ལོང་དཀྱིལ་དུ་རཀྴ་གདོང་དྲུག་པའམ་གསུམ་པ་བཏགས། ཆུ་ནང་དུ་མགྲོན་བུ་བསྐྱུར་བས་མགྲོན་བུ་དང་རཀྴ་འབྱར་ན་མོ་ཡིན་པས། དེ་སྙོམས་འཇུག་དུས་ལྕེ་འོག་བཅུག་པས་ཐིག་ལེ་འཛིན་པའོ། །རཀྴ་ལ་མི་འབྱར་ན་མགྲོན་བུ་ཕོ་ཡིན་པས་དོན་མེད་དོ། །ཡང་ཙནྡན་དཀར་དམར་དུང་དང་མན་ཤེལ། ཁྱིའི་མིག་གི་འབྲས་བུ་དྲི་ཆུ་དང་སྦྱར་ཏེ། མིའམ་ཁྱི་གང་རུང་གི་སྲོག་པ་རྩའི་ནང་དུ་མཚོན་སྐུད་སྣ་ལྔ་པ་གཞུག །རྩའི་ཡར་སྣ་མར་སྣ་རྒྱུས་པས་བསྡམས་ཏེ་སྐེད་པ་ལ་བཅིངས་ན། དྭངས་མ་མུ་དྲ་བསྟེན་ཡང་འཆོར་མི་སྲིད་དོ། །གཉིས་པ་སྐྱོན་གྱིས་འཛག་པ་སེལ་ཐབས་ནི། གདམས་པ་སྤྱིའི་གེགས་སེལ་དུ་ཤེས་པར་བྱས་པས་ཐིག་ལེའི་སྐྱོན་བརྒྱད་ལས་གྲོལ་ལོ། །ཐིག་ལེའི་ལས་ལྔ་ལ་ཡང་ཡང་སྦྱངས་པས་འོག་རླུང་ལ་དབང་ཐོབ་པའི་རྟགས། རྡོ་རྗེས་འོ་མ་འདྲེན་པར་ནུས་པས། ཀ་ར་དང་རའི་འོ་མ་བསྲེས་ཏེ། བ་གླང་གི་མིད་པའམ་རྒྱུ་མའི་ནང་དུ་བླུག ། རྒྱུ་མ་ཚད་དུ་མཛུབ་གང་རྡོ་རྗེ་ལ་བཀོན་ལ། ཐི་གུས་དམ་ལྷོད་རན་པར་བཅིངས་ཏེ། ཧཱུྃ་རིང་ཧཱུྃ་ཐུང་འཁྲུལ་འཁོར་གྱིས་དྲངས་པས་འོ་མ་ཕུག་རོན་གྱི་སྒོང་ཕྱེད་ཕྱེད་ཙམ་དུ་ཚུད་དོ། །དེ་དུས་ལུས་ལ་བདེ་བས་ཁྱབ། དྭངས་མ་འཆིང་བའི་རྟགས། མིག་གི་བཀྲག་ཆེ། བཞིན་མདོག་ཡིད་དུ་འོང༌། བདེ་བ་བསྒོམ་དུས་བདག་གཞན་ངོ་མི་ཤེས། གསེར་དང་བོང་བ་མཉམ། བདེ་བས་བརྒྱལ་བ་ལ་སོགས་པ་འབྱུང༌། རྒྱུན་དུ་ཚོགས་འཁོར་བརྟེན་པར་བྱ། མུ་དྲའི་ལུང་བསྟན་ཐོབ་ཀྱང་མཁའ་ལ་ཤུ་ཏྲ་མི་དབབ་སྟེ། གཞན་ལུས་བས་རང་ལུས་བདེ་བ་བཅུ་དྲུག་འགྱུར་གྱིས་ཆེ་བའོ། །རྣལ་འབྱོར་གྱི་དབང་ཕྱུག་ཆེན་པོ་མི་ལ་རས་པས་མཁའ་འགྲོའི་གསང་སྒྲོགས་པ་བདེ་བ་ཆེན་པོའི་ཡིག་ཆ་མཛད་པ་འདི་ལ་ལས་རྒྱ་དང་འོད་རིག་གཉིས་ལས། ཁྱུང་ཚང་པ་ཡེ་ཤེས་བླ་མས་མཁའ་འགྲོ་ལ་གསོལ་བ་བཏབ་ནས། ཚངས་སྤྱོད་འཛིན་པའི་སྣོད་ལྡན་འགའ་ལ་ཕན་པའི་ཕྱིར། འོད་རིག་བདེ་ཆེན་གྱི་གདམས་པ་འདི། ལེགས་པར་ཕྱེ་ཞིང་ཟུར་དུ་བཀོལ་བའོ། །དཔེ་འདི་ལ་ཤིན་ཏུ་དམ་པར་བྱ། གསང་བར་བྱ། སྦ་བར་བྱའོ། །མཁའ་འགྲོའི་གསང་བ་སྒྲོགས་པ་བདེ་བ་ཆེན་པོའོ། །ཤུབྷཾ།། །།