DNZ-16-MA-003

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 16, Text 3, Pages (Folios to )
Author	འཇམ་མགོན་ཀོང་སྤྲུལ་
Citation	'jam mgon kong sprul. '. In Gdams ngag rin po che'i mdzod, Vol. 16: . Kalimpong: Rigpe Dorje Publications, 2024.	Shechen Publications, 1999
Side notes	Verso: khrid thor bu ba'i skor
More details More details
Genre

Tibetan Text

[edit]

༄༅། །གྲུབ་མཆོག་སྤྱི་ལ་བརྟེན་པའི་བླ་མའི་རྣལ་འབྱོར་རྒྱ་གར་ལུགས་དངོས་གྲུབ་ཐིག་ལེ་འཁྱིལ་བ་བཞུགས་སོ། །

༄༅། །ན་མོ་གུ་རུ་མ་ཧཱ་སིདྡྷི་ལབྡྷེ་བྷྱཿ རྣམ་རྟོག་ལ་བརྟེན་མི་རྟོག་བརྙེས། །མི་རྟོག་ཁོང་ནས་ཡེ་ཤེས་ཤར། །ཟུང་འཇུག་གྲུབ་པ་མཆོག་རྣམས་དང༌། །དབྱེར་མེད་རྡོ་རྗེ་འཛིན་ལ་འདུད། །བླ་མའི་རིམ་པ་ལས་འོངས་པ། །བྱིན་རླབས་འཇུག་པའི་ཐབས་ཟབ་མོ། །གྲུབ་ཐོབ་བརྒྱུད་པའི་ཞལ་ལུང་ལྟར། །རང་རྟོག་འཁྲུལ་དྲིས་མ་བསླད་དགོད། །གྲུབ་པའི་སྤྱི་མེས་ཆེན་པོ་སློབ་དཔོན་རྟ་མཆོག་ཞབས་དང༌། རྩོད་དུས་ཀྱི་དཔལ་ཧེ་རུ་ཀ་ཞི་བ་སྦས་པའི་གདམས་ངག་གི་བཀའ་སྲོལ་ལྟར་སློབ་དཔོན་དཔའ་བོ་འོད་གསལ་ལུགས་ཀྱི་གྲུབ་ཐོབ་བརྒྱད་ཅུ་རྩ་བཞི་གཙོ་བོར་གྱུར་པའི་གྲུབ་ཆེན་གང་ལའང་སྦྱོར་དུ་རུང་བའི་བླ་མའི་རྣལ་འབྱོར་ཉམས་སུ་ལེན་པར་འདོད་པས། དབེན་པའི་གནས་སུ་མཎྜལ་གྱི་ཡོ་བྱད་ཉེ་བར་བསྡོག །འབྱོར་ན་ཕྱི་ནང་གི་མཆོད་པ་ཇི་ལྟར་རིགས་པ་བཤམས་ལ། སྐྱབས་འགྲོ་དང་སེམས་བསྐྱེད། ཚད་མེད་བཞི་བསྒོམ་པ་རྣམས་སྤྱི་ལྟར་སྔོན་དུ་བཏང༌། མཎྜལ་བྱི་དོར་བྱས་ལ། ༀ་བཛྲ་བྷཱུ་མི་སྭཱ་ཧཱ། ཞེས་སྐྱོན་སྦྱང༌། ༀ་བཛྲ་རེ་ཁེ་ཧཱུྃ་སྭཱ་ཧཱ། ཞེས་དྲི་བཟང་དང་བ་བྱུང་གིས་སྐྱང་ནུལ་བྱ། དེའི་དབུས་སུ་ལག་པ་གཡས་པས་མེ་ཏོག་གསར་པའི་ཚོམ་བུ་བཀོད་ལ། ཧཱུྃ་སུ་མེ་རུ་མ་དྷྱེ་མ། ཤར་དུ་བཀོད་ལ། ཡ་པཱུརྦ་བི་དེ་ཧ་དྭཱི་པ། ལྷོར་བཀོད་ལ། ར་ཛཾ་བུ་དྭཱི་པ་དཀྵི་ཎཿ ནུབ་ཏུ་བཀོད་ལ། ཝ་གོ་ད་ནཱི་ཡ་བཤྩི་མ་དྭཱི་པ། བྱང་དུ་བཀོད་ལ། ལ་ཨུརྟ་ར་ཀུ་རུ་དྭཱི་པ། ཤར་གྱི་གཡས་གཡོན་དུ་བཀོད། ཡཾ་ཡཿ དེ་ཧཤྩ་བི་དེ་ཧ། ལྷོའི་གཡས་གཡོན་ཏུ་བཀོད་ལ། རཾ་རཿ ཙ་མ་རཤྩ་ཨ་པ་ཙ་མ་རཿ ནུབ་ཀྱི་གཡས་གཡོན་ཏུ་བཀོད་ལ། ཝཾ་ཝཿ ཤ་ཋཤྩ་ཨུརྟ་ར་མཏྟྲི་ཎཿ བྱང་གི་གཡས་གཡོན་ཏུ་བཀོད་ལ། ལཾ་ལཿ ཀུ་ར་ཝཤྩ་ཀོ་ར་ཝཱ། ཤར་གྱི་ཤར་དང་ནུབ་ཀྱི་ནུབ་ཏུ་བཀོད་ལ། ཙནྡྲ་སཱུརཡ་བྷཱུ་ཥི་ཏ། ཞེས་བརྗོད་ནས། རིན་ཆེན་སྣ་ཚོགས་རང་བཞིན་ནི། །རི་རབ་ལྕོག་བརྒྱད་ཡང་དག་ལྡན། །གླིང་བཞི་གླིང་ཕྲན་ལྡན་པ་འདི། །འབུལ་གྱི་ཡང་དག་བཞེས་སུ་གསོལ། །ཞེས་མེ་ཏོག་དོར་ལ་མཎྜལ་མདུན་སྟེགས་སུ་བཀོད། མཎྜལ་གྱི་དབུས་སུ་དག་པ་ཡེ་ཤེས་ཀྱི་ཞིང་ཁམས་རྒྱ་དང་ཚད་ཡོངས་སུ་ཆད་པ་མེད་པ་རྒྱན་བཀོད་པ་ཕུན་སུམ་ཚོགས་པ་དང་བཅས་པ་ཕྱི་རོལ་སྲུང་བའི་ འཁོར་ལོ་གཞོམ་དུ་མེད་པས་ཡོངས་སུ་བསྐོར་བའི་སྙིང་པོར་གཞལ་མེད་ཁང་རྒྱུ་དང་བཀོད་པ་ཕུན་སུམ་ཚོགས་པ། དུར་ཁྲོད་རོལ་པའི་ཡོ་བྱད་དང་ལྷ་རྫས་ཀྱི་ཉེར་སྤྱོད་མཐའ་ཀླས་པས་བརྒྱན་པའི་དབུས་སུ་ཀྲཥྞ་སཱ་རའི་པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་དཔལ་ས་ར་ཧ། སྐུ་མདོག་དཀར་དམར་བྲམ་ཟེའི་ཆ་བྱད་ཅན། བགྲེས་རྒུད་སྤངས་པའི་ལང་ཚོ་འགྱུར་བ་མེད་པའི་གང་བ་ལ་རྟག་ཏུ་གནས་པ། དབུ་སྐྲ་ཅོ་བྲེགས་རས་དམར་པོའི་ཨངྒ་རག་གསོལ་ཞིང་ཕྱག་གཉིས་གཉུག་མའི་གནས་ལུགས་མཚོན་པར་བྱེད་པའི་མདའ་སྲོང་བའི་ཕྱག་རྒྱ་ཅན། ཞབས་ཕྱེད་སྐྱིལ་ཀྲུང་དུ་བཞུགས་པའི་གཡོན་ནས་རིག་མ་ཡེ་ཤེས་ཀྱི་རྣལ་འབྱོར་མ་མདའ་མཁན་མོའི་ཚུལ་ཅན་གྱིས་བརྟེན་པ། ལྷན་ཅིག་སྐྱེས་པའི་བདེ་བ་ཆེན་པོའི་ཡེ་ཤེས་ཀྱི་གཟི་འོད་ཕྱོགས་བརྒྱར་འབར་བས་བཟོད་པར་དཀའ་བའི་ཟིལ་ཅན་ཉི་མའི་སྙིང་པོ་ལྟ་བུ། སྲིད་པ་གསུམ་ཟིལ་གྱིས་གནོན་པའི་ལྟ་སྟངས་ཀྱིས་རབ་ཏུ་དཔའ་བའི་ཉམས་ཅན། ཐུགས་གཉིས་སུ་མེད་པའི་ཡེ་ཤེས་ཕྱག་རྒྱ་ཆེན་པོ་ཆོས་ཀྱི་སྐུ་ལ་རྟག་ཏུ་མཉམ་པར་བཞག་པ། ལྷུན་གྱིས་གྲུབ་ཅིང་རྒྱུན་མི་ཆད་པའི་ཕྲིན་ལས་ཀྱི་རྣམ་པར་རོལ་པ་ཟད་མི་ ཤེས་པ་ཅན། དཔའ་བོ་དང་ཌཱ་ཀི་རྒྱ་མཚོ་ལྟ་བུའི་མཆོད་ཅིང་བརྗིད་པ་དང༌། ས་གསུམ་གྱི་དབང་པོ་རྣམས་ཀྱི་རི་མོར་བྱེད་བཞིན་པའི་སྐུ་ཅན་གྱི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ། དམ་ཚིག་པ་དང་ཡེ་ཤེས་པ་གདོད་ནས་དབྱེར་མི་ཕྱེད་པ། དངོས་དང་བརྒྱུད་པའི་བླ་མ་ཀུན་འདུས། ཡི་དམ་ཞི་ཁྲོ་རབ་འབྱམས་ཀུན་འདུས། སངས་རྒྱས་ཆོས་དང་དགེ་འདུན་ཀུན་འདུས། མཁའ་འགྲོ་ཆོས་སྐྱོང་སྲུང་མ་ཀུན་འདུས། བརྟན་གཡོའི་ཁྱབ་བདག །འཁོར་འདས་ཀྱི་དཔལ་མགོན། སྐྱབས་གནས་ཀུན་གྱི་སྤྱི་གཟུགས་ཆེན་པོར་མངོན་སུམ་དུ་བཞུགས་པར་གྱུར། ༀ་ཨཱཿ དཔལ་ལྡན་རྡོ་རྗེ་བླ་མ་དམ་པའི་ཞབས་ཀྱི་པདྨོ་ཡང་དག་པའི་ཡེ་ཤེས་གསལ་བར་བྱེད་པ་དེ་ལ་ཕྱག་འཚལ་ལོ་ཧཱུྃ། ཨདྱ་སིདྡྷྱའ་མཱཾ། ཞེས་ལན་མང་དུ་ཕྱག་བྱ། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །མདའ་བསྣུན་ཁྱོད་ཞབས་པད་ལ་འདུད། །རྒྱལ་བ་ཀུན་དངོས་བླ་མ་ལ། །དངོས་བཤམས་ཡིད་སྤྲུལ་མཆོད་པའི་སྤྲིན། །སྒོ་གསུམ་ལོངས་སྤྱོད་དགེ་རྩར་བཅས། །གུས་པས་འབུལ་གྱིས་བཞེས་སུ་གསོལ། །ཉོན་མོངས་དབང་གྱུར་ཐོག་མེད་ནས། །སྡིག་སྒྲིབ་ཉེས་ལྟུང་ཅི་བསགས་པར། །གནོང་འགྱོད་དྲག་པོས་སྙིང་ནས་བཤགས། །དག་ཅིང་ཚངས་པའི་དངོས་གྲུབ་སྩོལ། །སྐྱེ་འཕགས་རྒྱལ་བ་སྲས་བཅས་ཀྱིས། །ཟག་བཅས་ཟག་པ་མེད་པ་ཡི། །བསོད་ནམས་གང་བསགས་ཐམས་ཅད་ལ། །དགའ་བ་ཆེན་པོས་རྗེས་ཡི་རང༌། །ཟབ་དང་རྒྱ་ཆེའི་ཆོས་ཀྱི་སྒོ། །ཁྱད་པར་ཐེག་མཆོག་བླ་ན་མེད། །གདུལ་བྱའི་ཁམས་དབང་མོས་པ་བཞིན། །རྒྱུན་ཆད་མེད་པར་སྟོན་པར་བསྐུལ། །འཁོར་བའི་ འཁོར་ལོ་མ་ཞིག་བར། །དེ་སྲིད་སྙིང་རྗེའི་གཞན་དབང་གིས། །ཞི་བའི་དབྱིངས་སུ་མི་གཞོལ་བར། །རྟག་ཅིང་བརྟན་པར་བཞུགས་གསོལ་འདེབས། །འདིས་མཚོན་དུས་གསུམ་དགེ་བའི་མཐུས། །མྱུར་དུ་བྱང་ཆུབ་མཆོག་ཐོབ་ནས། །ནམ་མཁའ་མཉམ་པའི་སེམས་ཅན་རྣམས། །སྲིད་པའི་མཚོ་ལས་སྒྲོལ་བར་ཤོག །ཅེས་ཡན་ལག་བདུན་པ་ཅི་མང་དང༌། ཐུན་མོང་གི་མཎྜལ་སྤྱི་ལྟར་རྒྱས་བསྡུས་ལན་མང་དུ་ཕུལ། རྗེས་གནང་གི་མཎྜལ་ནི། སྐད་ཅིག་གིས་ཡེ་ཤེས་ཀྱི་རལ་གྲི་རྣོ་ངར་དང་ལྡན་པ་ལག་ཏུ་བྱུང༌། དེས་རང་ལུས་དུམ་བུར་བྱས་ནས་མཎྜལ་དུ་བཀོད་པར་གྱུར། ཧཱུྃ་མསྟ་ཀ་སུ་མེ་རུ་ཡ་བཱ་མ་བཱ་ད་བི་དེ་ཧཿ ར་ཧི་ནི་པཱ་ད་ཛམྦུ་དྭཱི་པ། ཝ་པཤྩི་མ་དྭཱི་མ་པ་ཧི་ན་ཧསྟ། ལ་བཱ་མ་ཧསྟ་ཀུ་རུ་ཨུརྟ་ར། ཤཱུ་ཏྲ་ཀུ་སུ་མ་ཙནྡྲ་སཱུ་གྷཱུ་ཥི་ཏཾ། ཞེས་ཚོམ་བུ་བཀོད་པར་མོས་ལ། ཨི་དཾ་གུ་རུ་རཏྣ་ཨཱཏྨ་ནཾ་ཀཱ་ཡ་མཎྜལ་ནི་ཏ་ཡཱ་མི། ཞེས་དབུལ་ཞིང་སླར་ཡང༌། རང་ལུས་རྣམ་སྨིན་ཕུང་པོའི་ཀ་པཱ་ལ། །ལིངས་ཀྱིས་ཕོག་དབུས་ལྷག་མའི་ལུས་ཕུང་རྣམས། །རིལ་པོར་བཅུག་ལ་ཡི་གེ་འབྲུ་གསུམ་གྱིས། །སྦྱངས་རྟོགས་སྦར་བཞུ་བདུད་རྩིའི་རྒྱ་མཚོར་གྱུར། །ༀ་ཨཱཿ ཧཱུྃ་ཧ་ཧོ་ཧྲཱིཿ ལན་མང་དུ་བརྗོད། ལྗགས་རྡོ་རྗེའི་འོད་ཟེར་གྱི་སྦུ་གུས་གསོལ་བར་གྱུར་པར་བསམ་ལ། ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། །ལེགས་སྦྱར་འདི་ནི་དཔལ་ལྡན་བླ་མ་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ༀ་ཨཱཿ ཤྲཱི་མཱ་ན་སངྒུ་ རུ་མ་ཧཱ་སིདྡྷི་མཱ་ན་ས་ར་ཧ་ས་པ་རི་ཝཱ་རེ་བྷྱཿ ཨི་དཾ་བ་ལ່་ག་ཎ་ཙཀྲ་མ་ཧཱ་པཱུ་ཛ་ཁཱ་ཧི། སརྦ་སིདྡྷི་མྨེ་པྲ་ཡཙྪནྟུ། འདིར་ཕྱི་ནང་གི་མཆོད་པ་ཅི་འབྱོར་བས་མཆོད་པར་གསུངས་པས་རྒྱས་པར་སྤྲོ་ན་མཆོད་ཕྲེང་གི་ཚིག་ཅི་རིགས་སྦྱར། དཀྱུས་སུ། ཡང་དག་དགའ་བའི་མེ་ཏོག་གིས། །རྡོ་རྗེ་ཉི་མ་པདྨར་ཕྱུང༌། །མེ་ཏོག་བདག་ཉིད་ལ་མཆོད་པ། །རྡོ་རྗེ་གསུམ་གྱི་བདག་ཉིད་མཆོག །པུཥྤེ་སོགས་སྦྱར། རྣམ་རྟོག་ཚོགས་ཀྱི་ཡུལ་མིན་ཅིང༌། །ལྟེ་བར་གཏུམ་མོ་འབར་བ་ཡིས། ། ངེས་པར་སྲེགས་པ་དེ་ཡི་སྤོས། །ཐུགས་ཀྱི་རྡོ་རྗེ་ལ་ནི་དབུལ། །ཡི་གེ་ཧཱུྃ་ལས་ཡང་དག་བྱུང༌། །སྔགས་ཀྱི་འོད་ཟེར་ཤིན་ཏུ་གསལ། །མར་མེ་འབར་བའི་ཡང་དག་འོད། །ཐུགས་ཀྱི་རྡོ་རྗེ་ལ་དབུལ་བྱ། །བདེ་བ་ཆེན་པོའི་ནམ་མཁར་གནས། །བྱང་ཆུབ་སེམས་ནི་སད་པ་དང༌། །དེ་ཉིད་ཀྱིས་ཀྱང་བྱུགས་པ་ནི། །ཐུགས་ཀྱི་རྡོ་རྗེ་ལ་དབུལ་བྱ། །འདིར་ནི་གང་དང་གང་ལོངས་སྤྱོད། །དབང་པོ་ཐམས་ཅད་ཡང་དག་བསྟན། །དེ་དག་ཐམས་ཅད་ཐུགས་རྡོ་རྗེ། །བཟའ་བའི་མཆོད་པས་མཆོད་པར་བྱ། །འགོག་པའི་རྡོ་རྗེར་ཞུགས་པའི་སེམས། །རང་ཉམས་དཔྱིད་ཀྱི་དཔའ་བོའི་གླུ། །གཞོམ་མེད་ན་དའི་སྒྲ་དབྱངས་ཀྱིས། །ཐུགས་ཀྱི་རྡོ་རྗེར་མཆོད་པར་བགྱི། ། ནང་མཆོད་བདུད་རྩི་ཕུལ་ལ། ༀ་ཨཱཿ ཧཱུྃ། བདུད་རྩི་ལྔ་ཡི་བཟའ་བ་ནི། །དངོས་གྲུབ་ཀུན་གྱི་དེ་ཉིད་མཆོག །སྒྲོན་མ་ལྔ་ཡི་བཟའ་བ་ནི། །སངས་རྒྱས་ཀུན་གྱི་དམ་ཚིག་གཙོ། །ཉེས་བྲལ་ཞི་བའི་བཏུང་བ་མཆོག །སྦྲང་རྩི་བུ་རམ་འབྲུ་དང་ཤིང༌། །བཅོས་པའི་མྱོས་བྱེད་རྣམ་པ་ལྔ། །ཤེས་རབ་རང་བཞིན་དབུལ་བར་བགྱི། །མཚན་ཉིད་དང་ལྡན་པའི་རིག་མ་ཕུལ་བར་མོས་ལ། ལྷ་མོ་འདི་དག་ཕྱག་རྒྱ་ཆེ། །མཐའ་ཡས་བདེ་བ་སྦྱིན་པ་མོ། །རིགས་ལྔ་ལས་བྱུང་འདི་ཕུལ་བས། །རིག་པའི་བརྟུལ་ཞུགས་མཐར་ཕྱིན་ཤོག །ལྷ་དང་མི་ཡི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡི། །བཅུ་དྲུག་ཆར་ཡང་མི་ཕོད་པའི། །དགའ་བ་བླ་ན་མེད་པས་མཆོད། །ཅེས་གསང་བའི་མཆོད་པ་བྱ། བསྟོད་པ་གྲུབ་ཆེན་སོ་སོའི་སྔགས་བརྗོད་བྱེ་བྲག་པ་སོགས་གང་ཤེས་དང༌། སྤྱི་ཙམ་དུ། ཟབ་ཞི་སྤྲོས་དང་བྲལ་བ་གཉུག་མའི་དོན། །སྣང་དང་སྟོང་པ་གཉིས་དང་གཉིས་མིན་ལ། །ཨེ་མ་ཧོ་འདི་སྙམ་བྲལ་བའི་ལྟ་བ་ཅན། །བདེ་ཆེན་ལྷན་སྐྱེས་རོལ་པ་ཁྱེད་ལ་འདུད། །སྨྲ་བསམ་བརྗོད་དུ་མེད་པའི་རང་བཞིན་ལ། །བདེ་སྟོང་འཛིན་པ་མེད་པ་བདེ་བའི་ཉམས། །ཨེ་མ་ཧོ་རྩོལ་བྲལ་ལྷུག་མའི་སྒོམ་པ་ཅན། །བདེ་ཆེན་ལྷན་སྐྱེས་རོལ་པ་ཁྱེད་ལ་འདུད། །སྤང་བླང་བྱར་མེད་རང་བཞིན་འོད་གསལ་ལ། །གཟུང་འཛིན་གློ་བུར་དྲི་མ་རྣམ་དག་པ། །ཨེ་མ་ཧོ་རང་བཞིན་ལྷུན་གྲུབ་འབྲས་བུ་ཅན། །བདེ་ཆེན་ལྷན་སྐྱེས་རོལ་པ་ཁྱེད་ལ་འདུད། །ཅེས་པ་ཙམ་བྱ། སླར་ཡང་ཡན་ལག་བདུན་པ་བྱ་བར་གསུངས་པས་རྒྱས་བསྡུས་གང་ལྕོགས་ སྦྱོར་ཆོག །དཀྱུས་ཙམ་དུ། ༀ་ཨཱཿ དཔལ་ལྡན་རྡོ་རྗེ་བླ་མ་དམ་པའི་ཞབས་ཀྱི་པདྨོ་ཡང་དག་པའི་ཡེ་ཤེས་གསལ་བར་བྱེད་པ་དེ་ལ་ཕྱག་འཚལ་ལོ། །ཧཱུྃ། བྱང་ཆུབ་སྙིང་པོར་མཆིས་ཀྱི་བར། །བླ་མ་སངས་རྒྱས་ལ་ཕྱག་ འཚལ། །སྐྱོབས་པ་ཆོས་ལ་ཕྱག་འཚལ་ལོ། །དགེ་འདུན་རྗེ་ལ་ཕྱག་འཚལ་ལོ། །ཕྱག་འོས་སངས་རྒྱས་ཐམས་ཅད་དང༌། །རྒྱལ་བས་གསུངས་པའི་ཆོས་རྣམས་དང༌། །ཚུལ་ཁྲིམས་བཟང་ལྡན་དགེ་འདུན་ཏེ། ། དཀོན་མཆོག་གསུམ་ལ་བདག་སྐྱབས་མཆི། །བྱས་དང་བྱེད་དུ་བཅུག་དང་ཡི་རང་བའི། །སྡིག་པ་མ་ལུས་སྐྱོན་ཀུན་འཇིག་བྱེད་པའི། །སྤྱན་སྔར་སོ་སོར་བཤགས་ཤིང་སླར་ཡང་ནི། །མི་བྱེད་པ་ཡི་སྡོམ་པ་བླང་བར་བགྱི། ། ཉན་ཐོས་རང་རྒྱལ་བླ་མེད་རྒྱལ་བ་དང༌། །རྒྱལ་བའི་སྲས་ཀྱིས་དགེ་བ་གང་མཛད་པ། །དེ་དག་ཀུན་ལ་ཡང་དག་ཡི་རངས་ཤིང༌། །བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །རྒྱལ་བ་དཀོན་མཆོག་ལ་སོགས་གསུམ་པོ་ལ། །དངོས་པོ་ཀུན་གྱིས་བདག་ནི་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དེ་བཞིན་དུ། །བླ་ན་མེད་པའི་ལམ་ལ་བརྟེན་པར་བགྱི། །བདག་གིས་དུས་གསུམ་དགེ་བ་ཅི་སྤྱད་པས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །བླ་མེད་རྡོ་རྗེ་ཐེག་པའི་སྣོད་གྱུར་ཏེ། །ཀུན་ཀྱང་རྡོ་རྗེ་འཛིན་པ་མྱུར་ཐོབ་ཤོག །ཅེས་པ་ཙམ་བྱ། དེ་ནས། ཨཱཏྨ་ནཾ་སུ་ཁ་དུཿ ཁ་ཏེ་མེ་ཛྙཱ་ནེ་སུ་ཁ་ཀི་དུཿ ཁ་ཏོ་མ་ཐི། ནསྠི་ས་ར་ཧ་ན་མོ་སྟུ་ཏི། ཞེས་པའམ་བོད་སྐད་དུ་བསྒྱུར་ན། བདག་གི་བདེ་སྡུག་ཁྱེད་ཀྱིས་མཁྱེན་ནོ། །བདེའམ་སྡུག་ཀྱང་ཁྱོད་ལས་གཞན་མ་མཆིས་སོ། །ཕྱག་འཚལ་ཞིང་འདུད་དོ་ས་ར་ཧ། །ཞེས་པ་གང་རིགས་ཀྱིས་དྲག་ཏུ་གསོལ་བ་གདབ་ཅིང༌། གུ་རུ་ཤ་ར་ཎཾ་གཙྪ་མི༑ ལན་མང་དུ་བརྗོད། ༀ་ཨཱཿ མ་ཧཱ་སིདྡྷི་ལབྡྷ་ས་ར་ཧ་པཱ་ད་ཧཱུྃ་ཧཱུྃ། ཞེས་པའི་མཚན་སྔགས་ཀྱང་ཅི་ནུས་སུ་བཟླ་ཞིང༌། མཐར། བླ་མ་གྲུབ་བརྙེས་རྣལ་འབྱོར་དབང་ཕྱུག་གི །སྐུ་ལ་རྩ་གསུམ་འཁོར་ལོ་ལྔ་གསལ་བའི། །གཡོན་ཕྱོགས་རྐྱང་མ་དང་འབྲེལ་ཀུནྡའི་ཁམས། །སྐུ་ཡི་བྱིན་རླབས་བདུད་རྩི་འོད་དཀར་ཚུལ། །སྨིན་མཚམས་ནས་བྱུང་རང་གི་དཔྲལ་བར་ཐིམ། །ལུས་ཀྱི་སྒྲིབ་དག་བུམ་དབང་ཐོབ་པར་གྱུར། །གཡས་ཕྱོགས་རོ་མ་དང་འབྲེལ་རྡུལ་གྱི་ཁམས། །གསུང་གི་བདུད་རྩི་འོད་དམར་ཚུལ་དུ་བྱུང༌། །མགུལ་པའི་གནས་ནས་བདག་གི་མགྲིན་པར་ཐིམ། །ངག་གི་སྒྲིབ་དག་གསང་བའི་དབང་བསྐུར་ཐོབ། །ཨ་ཝ་དྷཱུ་ཏི་མུན་ཅན་དྭངས་མའི་ཚུལ། །ཐུགས་ཀྱི་བྱིན་རླབས་བདུད་རྩི་འོད་མཐིང་བཅས། །ཐུགས་ཀའི་གནས་ནས་སྙིང་གར་ཐིམ་པ་ཡིས། །ཡིད་ཀྱི་སྒྲིབ་དག་ཤེར་དབང་ཡེ་ཤེས་ཐོབ། །བླ་མ་འོད་དུ་ཞུ་ནས་རང་ལ་ཐིམ། །གཉིས་མེད་བསམ་བརྗོད་བྲལ་བའི་ངང་དུ་བཞག ། སྒོ་གསུམ་འཕོ་བའི་སྒྲིབ་དག་ཚིག་དབང་ཐོབ། །བླ་མ་རང་སེམས་ཐ་མི་དད་དུ་འདྲེས། །ཞེས་དམིགས་ལ་བསམ་མེད་གཉུག་མའི་རང་ངོར་མཉམ་པར་འཇོག །དེ་ལས་ལྡང་བ་ན། ཨེ་མ་མ་ལ་དུས་གསུམ་དགེ་བ་འདིས། །བདག་དང་མར་གྱུར་ མཐའ་ཡས་སེམས་ཅན་ཀུན། །གྲུབ་པ་མཆོག་གིས་རྟག་པར་རྗེས་བཟུང་ནས། །ཕྱག་རྒྱ་ཆེན་པོའི་དངོས་གྲུབ་མྱུར་ཐོབ་ཤོག །མགོ་བོར་བླ་མའི་ཅོད་པན་འཆང༌། །ལག་ཏུ་རྡོ་རྗེ་དྲིལ་བུ་འཛིན། །ངག་ཏུ་གསང་སྔགས་རྒྱལ་པོ་བཟླ། །ཡིད་ཀྱིས་ཟུང་འཇུག་བསྒོམ་པར་ཤོག །ཅེས་སོགས་ཐུན་མོང་མ་ཡིན་པའི་བསྔོ་སྨོན་གདབ་ཅིང་ཤིས་བརྗོད་ཀྱིས་མཐའ་བརྒྱན་ནོ། ༈ །དེ་བཞིན་དུ་གཞན་འདྲ་བ་ལ། མངོན་རྟོགས་ཀྱི་སྐབས། པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་དཔལ་མགོན་འཕགས་པ་ཀླུ་སྒྲུབ་སྐུ་མདོག་སྔོ་སངས་ནོར་བུའི་ཁ་དོག་ལྟ་བུ་དྭངས་ཤིང་དྲི་མ་མེད་པ་མཚན་དང་དཔེ་བྱད་ཀྱིས་སྤྲས་ཤིང་ཕྱག་གཉིས་ཆོས་འཁོར་གྱི་ཕྱག་རྒྱ་ཐུགས་ཀར་འཆིང་བ། ན་བཟའ་ཆོས་གོས་གསུམ་དང་བཅས་ཤིང་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ཤཾ་ཁ་ལ་སོགས་པའི་ཀླུའི་རྒྱལ་པོ་མཆོག་རྣམས་སྦྲུལ་གྱི་རྣམ་པས་གདེངས་ཀའི་གྲིབ་མ་འབུལ་བ་ལ་སྐུ་རྒྱབ་བརྟེན་པ། ཐུགས་གཉིས་སུ་མེད་པའི་ཡེ་ཤེས་མན་གོང་བཞིན་ལ། བསྟོད་པའི་སྐབས། ནཱ་གཱརྫུ་ནའི་ཞབས་ལ་འདུད། །མཚན་སྔགས་ཀྱང་ས་ར་ཧའི་ཚབ་ཏུ། ནཱ་གཱརྫུ་ན་མ་གཏོགས་གཞན་གོང་དང་འདྲ་བ་ཉིད་དོ། ༈ །དེ་བཞིན་ཤ་བ་རི་ལའང༌། བླ་མ་དང་གྲུབ་པའི་དབང་ཕྱུག་དཔལ་རི་ཁྲོད་པ་ཆེན་པོ། འགྱུར་བ་མེད་པའི་ཆོས་ཉིད་མཚོན་པའི་སྐུ་མདོག་ནག་པོ། དབུ་སྐྲ་རལ་པ་སྤྱི་བོར་བཅིངས་པ་སྨྱུག་མའི་ཤུན་པས་བསྡམས་པ། སྤྱན་འབྲུ་ཚུགས་སུ་གཟིགས་ཤིང་སྤྱན་རྩ་དམར་བ། ཕྱག་གཉིས་མདའ་དང་འོད་མའི་གཞུ་མཆོག་ལ་ཕག་རྒོད་ཀྱི་ཁོག་སྟོད་དང་ཁོག་སྨད་བཀལ་བ། རྨ་བྱའི་མདོངས་སྒྲོ་གཤིབས་པའི་ཤམ་ཐབས་དང༌། མེ་ཏོག་འབྲས་བུའི་རྒྱན་སྣ་ཚོགས་པས་བརྒྱན་ཏེ་འགྱིངས་བག་དང་བཅས་པའི་རོལ་སྟབས་སུ་བཞུགས་པ། སྐུའི་གཡས་གཡོན་ནས་རིག་མ་རྒྱན་དང་ཆ་ལུགས་གཙོ་བོ་དང་མཚུངས་ཤིང་མདའ་དོང་འཛིན་པ་གཉིས་ཀྱིས་བརྟེན་པ། ལྷན་ཅིག་སྐྱེས་པའི་བདེ་བ་མན་འདྲ། རི་ཁྲོད་དབང་ཕྱུག་ཞབས་ལ་འདུད། །ཤ་བ་རི་པཱ་ད་ཞེས་བསྒྱུར་བ་མ་གཏོགས་འདྲ། བསྟོད་པའི་སྐབས་སྤྲོ་ན་ནགས་རིན་གྱིས་མཛད་པའི་ཤ་བ་རི་པའི་བསྟོད་ཆེན་སོགས་ཀྱང་འདོན་ནོ། ༈ །དེ་བཞིན་དུ་གྲུབ་ཆེན་ནག་པོ་སྤྱོད་པ་ལའང༌། རྩ་བའི་བླ་མ་དང་གཉིས་སུ་མེད་པའི་གྲུབ་པའི་སློབ་དཔོན་བརྟུལ་ཞུགས་སྤྱོད་པའི་དབང་ཕྱུག་ཀཧྣ་པ་ཆེན་པོ་སྐུ་མདོག་ནག་པོ་དཔའ་ཞིང་སྒེག་པ་ཧུར་བག་ཆགས་པ་ཕྱག་གཡས་ཅང་ཏེའུ་འཁྲོལ་ཞིང༌། གཡོན་ཀ་པཱ་ལ་བདུད་རྩིས་གང་བ་འཛིན་པའི་མཆན་ཁུང་དུ་རྡོ་རྗེ་ཁ་ཊྭཱཾ་ག་བསྒྲེང་བ། དབུ་སྐྲ་རལ་པའི་ཐོར་ཚུགས་ཅན་སྐུ་ལ་མི་རུས་ཀྱི་ཕྱག་རྒྱ་དྲུག་གིས་བརྒྱན་ཅིང་སྟག་གི་པགས་པའི་ཤམ་ཐབས་གསོལ་བ། བི་ཤྭ་རཱུ་པི་ནཱི་ཞེས་བྱ་བའི་སྲིན་མོའི་གཙོ་མོ་འཇིགས་སུ་རུང་བ་གདན་ནམ་བཞོན་པའི་ཚུལ་དུ་གནས་པའི་སྟེང་ན་རོལ་སྟབས་སུ་བཞུགས་པ། རེས་འགའ་རོ་ལངས་ཆེན་པོ་མེ་ཏོག་གི་ཕྲེང་བས་བརྒྱན་པ་ལ་ཆིབས་པ་སོགས་སྣ་ཚོགས་པའི་རྣམ་འཕྲུལ་སྟོན་པར་མཛད་བཞིན་པའི། སྟེང་གི་ནམ་མཁའ་ལ་གདུགས་བདུན་འཛིན་པ་མེད་པར་འཁོར་ཞིང༌། ཌཱ་མ་རུ་བདུན་འཁྲོལ་བ་པོ་མེད་པར་རང་འཁྲོལ་བ། རེས་འགའ་གདུགས་བདུན་བརྒྱ་དང་ཌཱ་མ་རུ་བདུན་བརྒྱར་འཕེལ་བའི་ཆོ་འཕྲུལ་ཅན། སྣང་བའི་འཁོར་བདུན་བརྒྱ་དང་མི་སྣང་བའི་འཁོར་བདུན་བརྒྱ་ལ་སོགས་པ་གྲུབ་པ་དང་རིག་པ་འཛིན་པའི་རྣལ་འབྱོར་ཕོ་མོ་གྲངས་མེད་པའི་དབུས་ན་རོལ་པ། ལྷན་ཅིག་སྐྱེས་པའི་བདེ་བ་མན་འདྲ། སྤྱོད་འཆང་དབང་པོའི་ཞབས་ལ་འདུད། །ཙརྱ་བཛྲ་རམ། ཀཧྣ་ཙརྱ་ཀ་པཱ་ད་ཞེས་སྦྱར་བ་དང༌། ༈ གཉིས་སུ་མེད་པ་གྲུབ་པའི་དབང་ཕྱུག་བི་རཱུ་པ་ཆེན་པོ་སྐུ་མདོག་སྨུག་ནག་སྦོམ་ཞིང་ཐུང་ལ་གསུས་ཁྱིམ་ཆེ་བ། དབུ་སྐྲ་ཅོ་བྲེགས་ལ་མེ་ཏོག་གི་ཕྲེང་བས་སྤུད་པ། ལྷག་མ་རྒྱན་སྤངས་ཤིང་ཕྱག་གཡས་སྡིགས་མཛུབ་ཀྱི་ཕྱག་རྒྱ་གདེངས་པས་ཉི་མ་བརྟོད་ལ་གནོན་པའི་ཚུལ་དང༌། གཡོན་བ་མེན་གྱི་རྭ་ཞལ་ཆང་གིས་གང་བ་དཀུར་བརྟེན་པ། ཤ་ནའི་གོས་ཀྱིས་འདོམས་དཀྲིས་ཅན་རོལ་པའི་འདུག་སྟངས་སུ་བཞུགས་པ། གཡོན་གྱི་ཕྱོགས་ནས་རིག་མ་ཆང་སྣོད་འཛིན་པས་འདུད་པའི་ཚུལ་ཅན། ལྷན་ཅིག་སྐྱེས་པའི་མན་འདྲ། བི་རཱུ་པ་ལ་ཕྱག་འཚལ་འདུད། །བི་རཱུ་པཱ་ད་ཞེས་བསྒྱུར་བ་དང༌། ༈ གྲུབ་པའི་དབང་ཕྱུག་ཌོམྦྷི་ཧེ་རུ་ཀ་སྐུ་མདོག་དཀར་དམར་རལ་པའི་ཐོར་ཚུགས་དང་རུས་པའི་རྒྱན་དྲུག་གིས་བརྒྱན་པ། ཤིན་ཏུ་འཇིགས་པའི་སྦྲུལ་རེག་པའི་དུག་ཅན་གྱིས་རྒྱན་དུ་མཛད་ཅིང༌། མཐོང་བའི་དུག་ཅན་ལྕག་གི་ཚུལ་དུ་བསྣམས་པ། ཁ་རླངས་ཀྱི་དུག་ཅན་བདུན་གྱིས་དབུའི་སྟེང་དུ་གདེངས་ཀར་བྱས་ཤིང༌། སྟག་མོ་མི་ཟན་འཇིགས་སུ་རུང་བ་ལ་ཆིབས་པའི་བརླ་གཡོན་པའི་སྟེང་ནས་གསང་བའི་གཟུངས་ མ་གཡུང་མོ་རྣལ་འབྱོར་མ་གཅེར་མོ་པདྨ་ཅན་གྱི་མཚན་ཉིད་ཡོངས་སུ་རྫོགས་པས་དམ་དུ་འཁྱུད་ཅིང་འཁྲིལ་བའི་བདེ་བས་དགྱེས་རྒུར་རོལ་བ། ལྷན་ཅིག་སྐྱེས་མན་འདྲ། ཌོམྦྷི་པ་ལ་ཕྱག་འཚལ་འདུད། །ཌོམྦྷི་ཧེ་རུ་ཀ་པཱ་ད་ཞེས་བསྒྱུར། ༈ གྲུབ་པའི་དབང་ཕྱུག་ལཱུ་ཧི་པ་ཆེན་པོ་སྐུ་མདོག་སྔོ་སངས་སྐེམས་ཤིང་རིད་པའི་ཚུལ་ཅན་རལ་པའི་ཐོར་ཚུགས་ཅུང་ཟད་དང་བཅས་ཤིང་རས་ཀྱི་སྨད་དཀྲིས་གསོལ་བ། སྐུའི་མདུན་ཕྱོགས་སུ་ཉའི་རྒྱུ་ལྟོ་སྤུངས་པ་ལས་ཕྱག་གིས་བླངས་ཏེ་ཞལ་དུ་གསོལ་བའི་རྣམ་པ་ཅན་ཕྱེད་སྐྱིལ་གྱིས་བཞུགས་པ། ལྷན་ཅིག་སྐྱེས་མན་འདྲ་བ་ལ། ལཱུ་ཧི་པ་ལ་ཕྱག་འཚལ་འདུད། །ལཱུ་ཧི་པཱ་ད་ཞེས་བསྒྱུར་བ་དང༌། ༈ བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་གཽ་རཀྵ་ནཱ་ཐ་སྐུ་མདོག་དཀར་སྔོ་སྣུམ་པའི་མདངས་ཅན་ཤངས་རྒྱུད་མཐོ་ཞིང་འཛུམ་བག་གི་མདངས་དང་ལྡན་པ། ཨག་ཚོམ་དང་དབུ་སྐྲ་ལྗང་སེར། ལྟ་ལྟངས་ཅེར་རེ་བ། སྙན་ལ་མུ་དྲ་ནག་པོ་དང༌། མགུལ་དུ་སིངྒ་ནཱ་དའི་རྭ་དུང་འཆང་ཞིང་སྐུ་ལ་ཙཀྲ་ཀནྟ་སྟེ་འཁོར་ལོ་ལྟ་བུའི་བེམ་པོ་གསོལ་བ། སྒོམ་ཤིང་ལ་ཀོས་ཀོ་བརྟེན་པའི་ཚུལ་གྱིས་སྐྱིལ་ཀྲུང་དང་བཅས་དྲང་པོར་བཞུགས་ཤིང༌། ཕྱག་མཉམ་བཞག་གི་སྟེང་ན་ཀུ་བའི་ སྣོད་ཐོགས་པ། མཐོང་བའི་མོད་ལ་ཉམས་དགའ་ཞིང་ཐ་མལ་གྱི་སྣང་བ་ཧྲུལ་པོར་འཇིག་པ། ལྷན་ཅིག་སྐྱེས་པ་མན་འདྲ། གཽ་རཀྵ་ལ་གུས་པས་འདུད། །གཽ་རཀྵ་ནཱ་ཐ་པཱ་ད་ཞེས་བསྒྱུར་བ་དང༌། ༈ གྲུབ་པའི་སློབ་དཔོན་ཆེན་པོ་ཏནྟི་པ་སྔོ་སངས་ཤིན་ཏུ་སྨིན་པའི་ན་ཚོད་ཅན་གྱི་སྐུ་ལུས། ཨག་ཚོམ་དང་སྨ་ར་རིང་དུ་འཕྱང་བ་དབུ་སྐྱེས་དང་བཅས་པ་རབ་ཏུ་དཀར་བའི་མདངས་ཅན། རས་ཀྱི་སྨད་དཀྲིས་གསོལ་ཞིང་ཁྲི་ཐགས་ཀྱི་བྱ་བ་ལ་བརྩོན་པའི་ཚུལ་དུ་བཞུགས་པ། ལྷན་ཅིག་སྐྱེས་པ་སོགས་དང༌། ཏནྟི་པ་ལ་གུས་པས་འདུད། །ཏནྟི་ཀ་པཱ་ད་སོགས། ༈ གྲུབ་པའི་དབང་ཕྱུག་རྡོ་རྗེ་དྲིལ་བུ་པ་སྐུ་མདོག་སྔོ་སངས་རལ་པའི་ཐོར་ཚུགས་ཅན། རུས་པའི་རྒྱན་དྲུག་དང་སྟག་གི་པགས་པའི་ཤམ་ཐབས་འཕྱང་བ། ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་པདྨ་ཅན་གྱི་མཚན་ཉིད་ཡོངས་སུ་རྫོགས་པ་རྡོ་རྗེ་རྣལ་འབྱོར་མའི་རྣམ་པ་དཀར་གསལ་ལྟ་བས་ཆོག་མི་ཤེས་པ་ལ་འཁྱུད་དེ་མཉམ་པར་སྦྱོར་བའི་བདེ་བ་རྒྱས་པ། ཞབས་གཡས་བརྐྱང་གི་སྟབས་ཅན་ཞེས་དང༌། དྲིལ་བུ་པ་ལ་ཕྱག་འཚལ་འདུད། །བཛྲ་གྷཱཎྜ་པཱ་ད་ཞེས་སོ། ༈ །གྲུབ་པའི་དབང་ཕྱུག་ཆེན་པོ་ཛཱ་ལནྡྷ་ར་སྐུ་མདོག་དཀར་དམར་རལ་པའི་ཐོར་ཚུགས་དང་རུས་པའི་རྒྱན་ཅན་རས་དམར་པོའི་འདོམས་དཀྲིས་གསོལ་བ། ཞབས་ཕྱོགས་གཅིག་རྒྱབ་ནས་དཔུང་པར་བཀལ་ཞིང་ཕྱོགས་གཅིག་བཞེངས་པའི་ཚུལ་ཅན། ཕྱག་གཉིས་རྡོ་རྗེ་གཙུག་ཏོར་གྱི་ ཕྱག་རྒྱ་ལྡོག་སྟེ་སྤྱི་བོར་འཆིངས་པ། གཡོན་གྱི་ཕྱོགས་ནས་རིག་མ་རྣལ་འབྱོར་མའི་ཆ་བྱད་ཅན་གྱིས་འདུད་བཞིན་པ་ཞེས་དང༌། ཛཱ་ལནྡྷ་རའི་ཞབས་ལ་འདུད། །ཛཱ་ལནྡྷ་ར་པཱ་ད་ཞེས་སོ། ༈ །གྲུབ་པའི་སློབ་དཔོན་ཆེན་པོ་ཀུ་ཀུ་རི་པ་སྐུ་མདོག་སྔོ་སངས་རུས་པའི་རྒྱན་དང་རལ་པའི་ཐོར་ཚུགས་ཅན། ཕྱེད་སྐྱིལ་གྱིས་བཞུགས་ཤིང་ཐོད་པ་འཛིན་པའི་པང་དུ་རྡོ་རྗེ་ཡན་ལག་མ་ཀུ་ཀུ་རི་གཞོན་ནུའི་གཟུགས་ཅན་བཟུང་སྟེ་དགྱེས་རྒུར་རོལ་པ། ཞེས་དང༌། ཀུ་ཀུ་རཱི་པར་ཕྱག་འཚལ་འདུད། །ཀུ་ཀུ་རི་པཱ་ད་ཞེས་སོ། ༈ །གྲུབ་པའི་སློབ་དཔོན་ཆེན་པོ་ལྭ་བ་པ་སྐུ་མདོག་དཀར་དམར་ཚངས་པ་སྤྱོད་པའི་ཆ་བྱད་ཅན། སྐུ་ལ་ལྭ་བའི་དུམ་བུ་བརྒྱ་ཕྲག་བསྡུས་ཏེ་དྲུབས་པའི་ན་བཟའ་གསོལ་ཞིང་ཕྱག་གཉིས་མཉམ་བཞག་གི་ཕྱག་རྒྱས་སྐྱིལ་མོ་ཀྲུང་བཅས་ཏེ་གཉིད་འཐུག་གི་ཟོལ་གྱིས་འོད་གསལ་བསམ་གྱིས་མི་ཁྱབ་པ་ལ་མཉམ་པར་འཇོག་པའི་ཚུལ་ཅན། ཞེས་དང༌། ལྭ་བ་པ་ལ་ཕྱག་འཚལ་འདུད། །ཀམྦ་ལ་པཱ་ད་བསྒྱུར་བ་དང༌། ༈ ཉེར་སྤྱོད་མཐའ་ཀླས་པས་བརྒྱན་པའི་དབུས་སུ་གྲུབ་པའི་སློབ་དཔོན་ཆེན་པོ་ཨིནྡྲ་བྷཱུ་ཏི་མིའི་བདག་པོ་སྟོབས་ཀྱིས་འཁོར་ལོས་བསྒྱུར་བའི་ཆ་བྱད། སྐུ་མདོག་དཀར་དམར་མཛེས་ཤིང་བརྗིད་ལ་ཆགས་པའི་ཉམས་ཅན་དར་དང་རིན་པོ་ཆེའི་རྒྱན་གྱིས་སྤྲས་ཏེ་ནོར་བུའི་ཁྲི་སྟན་མཐོ་ཞིང་ཡངས་ལ་བཀོད་ལེགས་པའི་སྟེང་དུ་བདེ་ལུགས་སུ་བཞུགས་པའི་སྐུའི་མཐའ་བསྐོར་དུ་ བུད་མེད་རིན་པོ་ཆེའི་མཚན་ཉིད་རྫོགས་པའི་བཙུན་མོའི་ཚོགས་ལྔ་བརྒྱས་བསྐོར་བ་འདོད་པའི་ཡོན་ཏན་ཐམས་ཅད་ལ་རྗེས་སུ་ཆགས་པས་རྟག་ཏུ་དགྱེས་རྒུར་རོལ་པའི་རྣམ་པ་ཅན། ཞེས་དང༌། ཨིནྡྲ་བྷཱུ་ཏི་ལ་ཕྱག་འཚལ། ། ཤྲཱི་ན་རེནྡྲ་བྷཱུ་ཏི་པཱ་ད། ཞེས་སོ། ༈ །གྲུབ་པའི་སློབ་དཔོན་ཆེན་པོ་དཔལ་བདེ་བ་ཆེན་པོ་པདྨ་ཀཱ་ར་སྐུ་མདོག་དཀར་ལ་དམར་བའི་མདངས་ཆགས་པ། ཞལ་གྱི་དཀྱིལ་འཁོར་རབ་ཏུ་གང་ཞིང་རྒྱས་ལ། པདྨ་རྒྱས་པ་ལྟ་བུའི་སྤྱན་རས་དང་མཆུ་སྒྲོས་མངའ་བ། དབུའི་དཔྲལ་བའི་དབྱིངས་སུ་རྡོ་རྗེས་མཚན་པའི་པདྨ་རྒྱས་པའི་རེ་ཁཱས་སྤྲས་ཤིང༌། སྐུའི་ཆ་ཤས་ཐམས་ཅད་དུ་པདྨ་ཨུཏྤལ་ལྕགས་ཀྱུ་ཞགས་པ་ལ་སོགས་པའི་ཤ་མཚན་དགེ་བ་ཤ་སྟག་གིས་སྤྲས་པ། ཀཱནྚ་ཀའི་ཅོད་པན་མནབས་ཤིང༌། གསང་གོས་ཀྱི་སྟེང་དུ་ཆོས་གོས་རྣམ་པ་གསུམ་གསོལ་བ། ཕྱག་གཡས་རྡོ་རྗེ་རྩེ་ལྔ་པ་ཐུགས་ཀར་གདེངས་ཤིང༌། གཡོན་ཀ་པཱ་ལ་བདུད་རྩིས་གང་དཀུར་བརྟེན་པའི་མཆན་དུ་རྡོ་རྗེའི་ཁ་ཊྭཱཾ་ག་བཅུག་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུའི་གཡས་གཡོན་ནས་མཚན་ཉིད་ཐམས་ཅད་ཡོངས་སུ་རྫོགས་པའི་པདྨ་ནཱི་བཅུ་དྲུག་པའི་ལང་ཚོ་ཅན་གྱིས་བརྟེན་པ། ལྷན་ཅིག་སྐྱེས་པའི་སོགས་དང༌། པདྨཱ་ཀ་རར་ཕྱག་འཚལ་འདུད། །ཤྲཱི་མ་ཧཱ་སུ་ཁ་པདྨ་བཛྲ་པཱ་ད་ཞེས་བསྒྱུར་བ་དང༌། ༈ གྲུབ་པའི་སློབ་དཔོན་ཆེན་པོ་ནག་པོ་བི་རཱུ་པ། དབུ་ལ་རྡོ་རྗེ་ཐོད་ཅེས་བྱ་བ་རྟེན་འབྲེལ་གྱི་བྱིན་རླབས་ཀྱི་ ཅོད་པན་སྔོན་པོ་གསོལ་ཞིང༌། ཕྱག་གཡས་བ་མེན་གྱི་རྭ་བདུད་རྩིས་གང་བ་འཛིན་ཞིང་གསོལ་བ། གཡོན་པུས་མོའི་སྟེང་དུ་བཞག་པ། སྐུའི་མདུན་དུ་ཀ་པཱ་ལ་མ་ཧཱ་བ་ལས་གང་བ་བཞག་ཅིང༌། དབུ་སྐྲ་ཅོ་བྲེག་པགས་པའི་གདན་དང་འདོམས་དཀྲིས་ཅན། ལྷག་མ་རྒྱན་དང་ན་བཟའ་སྤངས་ཤིང་རྣལ་འབྱོར་པ་ཧུར་བག་ཆགས་པའི་རྣམ་པ། སྐུའི་གཡོན་ནས་རིག་མ་ཐལ་མོ་སྦྱར་བ་དང་བཅས་པ། ལྷན་ཅིག་སོགས་དང༌། ནག་པོ་བི་རཱུ་པ་ལ་འདུད། །ཀྲཥྞ་བི་རཱུ་པཱ་ད་ཞེས་བསྒྱུར། ༈ བརྒྱན་པའི་དབུས་སུ་གྲུབ་པའི་དབང་ཕྱུག་ཏིལླི་པ་ཆེན་པོ་སྐུ་མདོག་སྔོ་ནག་དབུ་སྐྲ་རལ་པའི་ཐོར་ཚུགས་ཅན། རས་ཀྱི་ཨངྒ་རག་གསོལ་ཞིང་མི་འགྲེང་གང་ཙམ་གྱི་ནམ་མཁའ་ལ་འཕགས་ཏེ་ཏིལ་བརྡུང་བའི་རྣམ་པ་ཅན། སྐུའི་མདུན་དུ་རིག་མ་ཏིལ་མཁན་མོའི་རྣམ་པས་བར་སྣང་ལ་གནས་བཞིན་དུ་ཏིལ་ལུགས་པའི་བྱ་བ་ལ་བརྩོན་པ་དང་ཐབས་གཅིག་ཏུ་ལྷན་ཅིག་སྐྱེས་པའི་ཡེ་ཤེས་ཇི་ལྟར་འབྱུང་བའི་བརྡའ་སྟོན་པར་མཛད་པ། བདེ་བ་ཆེན་པོའི་ཡེ་ཤེས་ཀྱི་སོགས་དང༌། ཏིལླི་པ་ལ་ཕྱག་འཚལ་ལོ། །ཏིལླི་ཀུ་པཱ་ད་ཧཱུྃ་ཧཱུྃ། ༈ གྲུབ་པའི་སློབ་དཔོན་ཆེན་པོ་དཔལ་ནཱ་རོ་པ་སྐུ་མདོག་སྨུག་ནག་ལྟ་བར་མི་བཟོད་པའི་ཟིལ་དང་ལྡན་པ། དབུ་སྐྲ་རལ་པའི་ཐོར་ཚུགས་དང་རུས་པའི་རྒྱན་དྲུག་གིས་སྤྲས་ཤིང་དར་གྱི་ཨངྒ་རག་གསོལ་བ། ཞིང་ཆེན་གྱི་པགས་པ་བཤུས་མ་ཐག་པ་ཁྲག་འཛགས་པ་སྟོད་གཡོགས་ཀྱི་ཚུལ་དུ་མནབས་པའི་ རྐང་ལག་གཉིས་ནས་ཕྱག་གིས་བཟུང་སྟེ་ཕན་ཚུན་དུ་བརྒྱངས་པ། ཞབས་བརྐྱང་བསྐུམ་གྱི་ཚུལ་དུ་བཞུགས་པའི་གར་སྟབས་ཅན། ལྷན་ཅིག་སྐྱེས་སོགས་དང༌། ནཱ་རོ་པ་ཡི་ཞབས་ལ་འདུད། །ནཱ་རོ་པཱ་ད་ཞེས་བསྒྱུར་བ་དང༌། ༈ དབུས་སུ་གྲུབ་པའི་སློབ་དཔོན་ཆེན་པོ་དཔལ་ཤཱནྟི་པ་སྐུ་མདོག་སྔོ་སྐྱ་གནས་བརྟན་རྡོ་རྗེ་འཛིན་པ་ཆེན་པོ། ཅུང་ཟད་སྨིན་པའི་ན་ཚོད་ཅན་གྱི་རྣམ་པ་ཆོས་གོས་རྣམ་པ་གསུམ་དང་པཎྜི་ཏའི་ཅོད་པན་མནབས་ཤིང༌། ཕྱག་གཉིས་ཆོས་འཆད་ཀྱི་ཕྱག་རྒྱ་དང་བཅས་ཏེ་ཏ་ལའི་བྱང་བུར་བྲིས་པའི་གླེགས་བམ་བསྣམས་པ། ཞབས་རྡོ་རྗེའི་སྐྱིལ་མོ་ཀྲུང་གིས་གདིང་བ་ལ་བཞུགས་པ་དང༌། ཤཱནྟི་པ་ལ་ཕྱག་འཚལ་ལོ༑ ༑རཏྣ་ཨཱ་ཀར་ཤཱནྟི་པཱ་ཞེས་སྦྱར། དེ་བཞིན་དུ། ༈ བརྒྱན་པའི་དབུས་སུ་གྲུབ་པའི་སློབ་དཔོན་ཆེན་པོ་ཤྲཱི་སཏྭ་ནཱ་ཐ་ཤཱནྟི་གུཔྟ་སྐུ་མདོག་སྨུག་ནག །རིན་པོ་ཆེ་དང་རུས་པའི་རྒྱན་ཐོ་རེ་བས་སྤྲས་པ། སྐུ་ཤ་ཉམས་རྒྱས་ཤིང་བརྗིད་ལ་ཧུར་བག་ཆགས་པ། དབུ་སྐྲ་ཅོ་བྲེགས་རས་ཀྱིས་འདོམས་དཀྲིས་གྲུ་གསུམ་པ་གསོལ་ཞིང་ཞབས་གཉིས་བཟང་པོའི་འདུག་སྟངས་ཀྱིས་རིན་པོ་ཆེའི་ཁྲི་ལ་པགས་པའི་གདན་གྱི་སྟེང་དུ་བཞུགས་པ། ཕྱག་གཉིས་ཆོས་ཀྱི་འཁོར་ལོའི་ཕྱག་རྒྱ་ཐུགས་ཀར་འཆིང་བ། ལྷན་ཅིག་སྐྱེས་སོགས་དང༌། ཤཱནྟི་གུཔྟ་ལ་ཕྱག་འཚལ། །ཤྲཱི་སཏྭ་ནཱ་ཐ་ཤཱནྟི་གུཔྟ་ཧཱུྃ་ཧཱུྃ། ཞེས་སྦྱར། དེ་བཞིན་དུ། ༈ པགས་པའི་གདན་ལ་རྩ་བའི་བླ་མ་དང་གཉིས་སུ་ མེད་པའི་སློབ་དཔོན་ཆེན་པོ་ཤྲཱི་བུདྡྷ་གུཔྟ་ཛོ་གིའི་ཆ་བྱད་སྐུ་མདོག་དཀར་ལ་དམར་བའི་མདངས་ཆགས་པ། སྐུ་བོང་ཆེ་ཞིང་ལྷུན་ཆགས་ལ་དང་བ་འདྲེན་པ། མཐོང་བའི་མོད་ལ་བ་སྤུ་གཡོ་ཞིང་སྐྱི་བུང་ཞེས་བྱེད་པའི་ཟིལ་དང་ལྡན་པ། དབུ་སྐྲ་རལ་པ་ཐོར་ཚུགས་སུ་བཅིངས་པའི་རྩེ་མོ་ནས་རལ་པའི་ཟར་བུ་ཅུང་ཟད་རྒྱབ་ཏུ་འཕྱང་བ། མེ་ཏོག་སེར་པོ་ཁ་བྱེ་མ་ཐག་པའི་ཐོད་བཅིངས་གསོལ་བ། བགྲེས་རྒུད་སྤངས་པའི་ལང་ཚོས་གང་བ་ལ་གནས་ཤིང་ཧུར་བག་ཆགས་པ། རས་ཀྱི་འདོམས་དཀྲིས་དང་ན་བཟའ་གསོལ་ཞིང་པུས་འཁྱུད་ཅན། ཕྱག་གཡས་ས་གནོན་པུས་སྟེང་དུ་བཀབ་ཅིང་གཡོན་ཀ་པཱ་ལ་བདུད་རྩིས་གང་བ་དཀུར་བརྟེན་པའི་ཚུལ་གྱིས་འཛིན་པ། སྐུ་དྲང་པོར་བསྲངས་ཏེ་སྐྱིལ་ཀྲུང་ཕྱེད་པའི་འདུག་སྟངས་ཀྱིས་བཞུགས་པ། ལྷན་ཅིག་སྐྱེས་པའི་སོགས་དང༌། བུདྡྷ་གུཔྟར་གུས་ཕྱག་འཚལ། །ཤྲཱི་བུདྡྷ་གུཔྟ་ནཱ་ཐ་ཧཱུྃ་ཧཱུྃ། ཞེས་སྦྱར་བ་མ་གཏོགས་གོང་དང་འདྲའོ། །འདི་རྣམས་ཀྱིས་མཚོན་ནས་རང་རང་གིས་དམིགས་བསལ་དུ་དད་པའི་ཡུལ་སོགས་གྲུབ་ཐོབ་རྣལ་འབྱོར་གྱི་དབང་ཕྱུག་གང་ལའང་སྦྱོར་དུ་རུང་བར་གསུངས་པས། སོ་སོའི་མངོན་རྟོགས་དང་མཚན་དང་མཚན་སྔགས་ཁ་སྤོས་པས་ཆོག་གོ །དགེ་བས་གྲུབ་པ་མཆོག་རྣམས་ཀྱི། །བྱིན་རླབས་བདག་གི་རྒྱུད་ལ་ཞུགས། །རྟོགས་གྲོལ་དུས་མཉམ་མཁའ་སྤྱོད་ཆེའི། །གྲོང་ཁྱེར་ཉམས་དགར་དབུགས་དབྱུང་ཤོག །ཚུལ་འདི་ལྟ་བུའི་བླ་མའི་རྣལ་འབྱོར་མཛད་བྱང་མི་གསལ་ཡང་རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐའི་གསུང་ཟིན་ཡིན་ངེས་པར་བཞུགས་པ་ལ་ཚིག་ཟིན་གྱི་ཁ་སྐོང་འོས་རིགས་འཐད་ལྡན་ རྣམས་དཀྱུས་སུ་བཙུད་པའི་བཀླགས་ཆོག་ཉིད་དུ་བློ་གྲོས་མཐའ་ཡས་པའི་སྡེས་རྫོང་གསར་བཀྲ་ཤིས་ལྷ་རྩེའི་ཆོས་གྲྭར་བཀོད་པ་དགེ་ལེགས་འཕེལ།། །།