DNZ-17-TSA-013

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 17, Text 13, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

[edit]

༄༅། །ཀུན་མཁྱེན་བོ་དོང་བའི་བཀའ་སྲོལ་ཐུབ་པ་མདོ་གཅོད་ཀྱི་ངག་འདོན་བཀླག་པས་གྲུབ་པ་བཞུགས་སོ། །

བླ་མེད་ཡོན་ཏན་རྫོགས་སངས་རྒྱས། །ཡུམ་ཆེན་ཤེས་རབ་ཕ་རོལ་ཕྱིན། །བཀའ་དྲིན་མཚུངས་བྲལ་བླ་མ་རྗེ། །བརྒྱུད་པར་བཅས་ལ་གུས་པས་འདུད། །མཉམ་མེད་ཐུབ་པའི་དབང་པོས་རྗེ་འཇིགས་མེད་གྲགས་པ་ལ་དག་སྣང་དུ་བསྩལ་བའི་གསང་གཅོད་ཟབ་མོ་ཉམས་སུ་ལེན་པའི་ངག་འདོན་གྱི་རིམ་པ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ལ་གསུམ། སྐྱབས་འགྲོ། སེམས་བསྐྱེད། བླ་མའི་རྣལ་འབྱོར་གསོལ་འདེབས་དང་བཅས་པའོ། །དང་པོ་ནི། སྐྱབས་ཡུལ་གསལ་བཏབ་ལ། བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བར་མོས་ཏེ། བདག་དང་ཁམས་གསུམ་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མངའ་བདག །དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་ རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ༴ རྫོགས་པའི་སངས་རྒྱས་བཅོམ་ལྡན་འདས་རྣམས་ལ༴ དམ་པའི་ཆོས་རྣམས་ལ༴ འཕགས་པའི་དགེ་འདུན་རྣམས་ལ༴ དཔལ་མགོན་དམ་པ་ཆོས་སྐྱོང་བའི་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ༴ ཞེས་དང༌། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་ཅི་ནུས་བརྗོད། གཉིས་པ་ནི། ཤེས་རབ་སྙིང་རྗེ་དང་ལྡན་པའི། །བརྩོན་པས་སེམས་ཅན་དོན་དུ་བདག །སངས་རྒྱས་དྲུང་དུ་གནས་བྱས་ནས། །རྫོགས་པའི་སངས་རྒྱས་ཐོབ་པར་བགྱི། །ལན་གསུམ་གྱི་རྗེས། ཚད་མེད་བཞི་བསྒོམ་པ་ནི། སེམས་ཅན་ཐམས་ཅད་བདེ་བ་དང་སོགས། བཏང་སྙོམས་ལ་གནས་པར་གྱུར་ཅིག་ལན་གསུམ། གསུམ་པ་ལ། བླ་མ་ཐུབ་པའི་དབང་པོའི་རྣལ་འབྱོར་དམ་ཚིག་པ་གསལ་བཏབ་པ་ནི། རང་གི་སྤྱི་བོར་བྷྲཱུཾ་ལས་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་ཕུན་སུམ་ཚོགས་པའི་སྟེང་དུ། པདྨ་དང་ཟླ་བའི་གདན་ལ་རང་གི་དྲིན་ཅན་རྩ་བའི་བླ་མ་དེ་ཉིད། དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ། ཞལ་གཅིག་ཕྱག་གཉིས། གཡོན་ས་གནོན་དང༌། གཡས་མཉམ་བཞག་མཛད་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ན་བཟའ་ཆོས་གོས་ངུར་སྨྲིག་གསོལ་བ། མཚན་དང་དཔེ་བྱད་ཀྱིས་སྤྲས་པ། སྐུ་ལྟ་བས་ཆོག་མི་ཤེས་པ། གསུང་ཡན་ལག་དྲུག་ཅུའི་དབྱངས་དང་ལྡན་པ། ཐུགས་ཤེས་བྱ་ཇི་ལྟ་ཇི་སྙེད་མངོན་སུམ་དུ་མཁྱེན་པའི་ཡེ་ཤེས་ཅན་དུ་གྱུར། ཡེ་ཤེས་པ་སྤྱན་འདྲེན་པ་ནི། དེའི་ཐུགས་ཀའི་འོད་ཟེར་གྱིས་རྩ་བརྒྱུད་ཀྱི་བླ་མ་དམ་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། གཉིས་སུ་མེད་པར་ཐིམ་པས་དེ་ཉིད་བླ་མར་སོང་སྐྱབས་གནས་ཀུན་འདུས་ཀྱི་ངོ་བོར་གྱུར། མཆོད་པ་འབུལ་བ་ནི། འགྲོ་ཀུན་རེ་རེའང་ཞིང་རྡུལ་ལུས་སྤྲུལ་ནས། །མཆོད་པའི་ལྷ་མོ་མཛེས་མ་གྲངས་མེད་པ། །ནམ་མཁའ་ཁྱབ་པར་གྱུར་པས་ཕྱི་དང་ནང༌། །གསང་བ་དེ་ཉིད་མཆོད་པ་བསམ་མི་ཁྱབ། །བདག་སོགས་འགྲོ་བའི་དོན་དུ་འབུལ་ལགས་ན༑ ༑བཞེས་ནས་མཆོག་ཐུན་དངོས་གྲུབ་སྩལ་དུ་གསོལ། །ༀ་གུ་རུ་དྷེ་ཝ་ཌཱ་ཀི་ནི་ས་པཱ་རི་ཝཱ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུྃ། དེ་ནས་རྐང་གླིང་ལན་གསུམ་གྱིས་ཐོག་དྲངས་ཏེ། ཌཱ་རུ་འཁྲོལ་ཞིང་སྣང་བ་འགྱུར་བའི་དབྱངས་དང་ བཅས་པས་གསོལ་བ་འདེབས་པ་ནི། བྱིན་རླབས་ཅན་གྱི་བླ་མ་ལ། །བདག་དང་འགྲོ་དྲུག་སེམས་ཅན་རྣམས། །གསོལ་བ་སྙིང་གི་དཀྱིལ་ནས་འདེབས། །བྱིན་རླབས་ཐུགས་ཀྱི་ཀློང་ནས་ཞུ། །ཞེས་དང༌། གཞན་ཡང་འཇིགས་བྲལ་དུས་གསུམ་རྣམ་མཁྱེན་གྱི་གསོལ་འདེབས་དང༌། རྩ་བའི་བླ་མའི་གསོལ་འདེབས་ཇི་ལྟར་རིགས་པའི་རྗེས། བརྒྱུད་འདེབས་ནི། རྗེ་ན་མོ་གུ་རུ་བྷྱཿ གནས་འོག་མིན་ཆོས་དབྱིངས་ཕོ་བྲང་དུ། །ཆོས་སྐུ་ཡུམ་ཆེན་ཤེས་རབ་ཕར་ཕྱིན་ལ་གསོལ་བ་འདེབས། ། མེད་སྣང་འཁྲུལ་པའི་རང་མཚང་རིག་པ་དང༌། །འཛིན་པ་རང་སར་གྲོལ་བར་བྱིན་གྱིས་རློབས། །གནས་བྱ་རྒོད་ཕུང་པོའི་རི་བོ་རུ། །སྤྲུལ་སྐུ་བཅོམ་ལྡན་ཤཱཀ་ཐུབ་ལ༴ མེད་སྣང༴ འཛིན་པ༴ གནས་ཆོས་འབྱུང་ཨེ་ཡི་གཙུག་ལག་ཏུ། །འཇིགས་བྲལ་ཕྱོགས་ལས་རྣམ་རྒྱལ་ལ༴ མེད་སྣང་༴ འཛིན་པ༴ གནས་སྟག་ལུང་ཐང་གི་དགོན་པ་རུ། །ཀུན་མཁྱེན་ངག་གི་དབང་པོ་ལ༴ མེད་སྣང༴ འཛིན་པ༴ གནས་མངོན་པར་དགའ་བའི་ཞིང་ཁམས་སུ༑ ༑སྤྲུལ་སྐུ་འཆི་མེད་དཔལ་བཟང་ལ༴ མེད་སྣང་༴ འཛིན་པ༴ གནས་སྙེ་མོ་བྱེ་མཁར་ཆོས་སྡེ་རུ། །མཁས་པ་སངས་རྒྱས་ལྷུན་འགྲུབ་ལ༴ མེད་སྣང༴ འཛིན་པ༴ གནས་དགའ་ལྡན་ཆོས་དབྱིངས་ཕོ་བྲང་དུ། །མཉམ་མེད་ནམ་མཁའ་འོད་ཟེར་ལ༴ མེད་སྣང༴ འཛིན་པ༴ གནས་མངོན་དགའ་ཆོས་སྡེའི་ཕོ་བྲང་དུ། །ཆོས་རྒྱལ་ནམ་མཁའ་རིན་ཆེན་ལ༴ མེད་སྣང༴ འཛིན་པ༴ གནས་བསམ་གཏན་ཞལ་གཟིགས་དབེན་གནས་སུ། ། ཡོངས་འཛིན་ནམ་མཁའ་རྒྱལ་པོ་ལ༴ མེད་སྣང་༴ འཛིན་པ༴ གནས་གསང་སྔགས་བདེ་ཆེན་ཕོ་བྲང་དུ། །འཇམ་དབྱངས་ནམ་མཁའ་དཀར་པོ་ལ༴ མེད་སྣང་༴ འཛིན་པ༴ གནས་འགགས་མེད་ལྷུན་གྲུབ་ཕོ་བྲང་དུ། །གྲུབ་མཆོག་འདུས་ཆེན་རབ་རྒྱས་ལ༴ མེད་སྣང་༴ འཛིན་པ༴ གནས་ཐུབ་བསྟན་ཆོས་ཀྱི་ཕོ་བྲང་དུ། །སྐྱབས་མགོན་འཇམ་དབྱངས་དགའ་བ་ལ༴ མེད་སྣང་༴ འཛིན་པ༴ གནས་བདེ་ཆེན་ལྷུན་གྲུབ་ཕོ་བྲང་དུ། །མཉམ་མེད་རིན་ཆེན་བཟང་པོ་ལ༴ མེད་སྣང་༴ འཛིན་པ༴ གནས་བཀྲ་ཤིས་ཆོས་སྡིངས་ཕོ་བྲང་དུ། །འདྲེན་མཆོག་དགེ་ལེགས་རྒྱལ་མཚན་ལ༴ མེད་སྣང་༴ འཛིན་པ༴ གནས་ལྷ་རྩེ་བླ་མའི་གདན་ས་རུ། །སྐལ་བཟང་འཇམ་དབྱངས་རྣམ་རྒྱལ་ལ༴ མེད་སྣང་༴ འཛིན་པ༴ གནས་སྐུ་གསུམ་ཞིང་ཁམས་ཀློང་ཡངས་སུ། །མཁྱེན་བརྩེའི་དབང་ཕྱུག་རྣམ་གཉིས་ལ༴ མེད་སྣང་༴ འཛིན་པ༴ གནས་ཡེ་ཤེས་མཁའ་འགྲོའི་ཚོགས་དབུས་སུ། །རྗེ་བཙུན་རྡོ་རྗེ་བཙུན་མོ་ལ༴ མེད་སྣང་༴ འཛིན་པ༴ གནས་འབྲལ་མེད་སྙིང་གི་ཕོ་བྲང་དུ། །དྲིན་ཅན་རྩ་བའི་བླ་མ་ལ༴ མེད་སྣང་༴ འཛིན་པ༴ ཞེས་གསོལ་བ་བཏབ་པས་བླ་མ་དཔལ་རྒྱལ་བ་ཤཱཀྱ་ཐུབ་པ་དེ་ཉིད། ཐུགས་དགྱེས་པའི་འཛུམ་བག་དང་ལྡན་པས་འོད་དུ་ཞུ། རང་གི་སྤྱི་བོ་ནས་ཐིམ། རང་དང་བླ་མ་ཐ་དད་དུ་འཛིན་པ་སྤངས་ཏེ་གཉིས་སུ་མེད་པའི་ངང་ནས། རང་ཉིད་སྐད་ཅིག་གིས་རྗེ་བཙུན་རྡོ་རྗེ་ཕག་མོའི་སྐུར་གྱུར། དགེ་བ་འདི་ཡིས་མྱུར་དུ་བདག ། རྡོ་རྗེ་ཕག་མོ་འགྲུབ་གྱུར་ཅིག །འགྲོ་བ་གཅིག་ཀྱང་མ་ལུས་པ། །ཁྱེད་ཀྱི་ས་ལ་འགོད་པར་ཤོག །ཅེས་བརྗོད་ཅིང་སྣང་གྲགས་ཐམས་ཅད་རྨི་ལམ་དང་སྒྱུ་མའི་རང་བཞིན་དུ་ཤེས་པས་རིག་པ་གཅེར་བུ་རྟེན་མེད་ཟང་ཐལ་གྱི་ངང་དུ་མཉམ་པར་བཞག་པ་ནི་སྒྱུ་མ་ལྟ་བུའི་ཏིང་ངེ་འཛིན་ནོ། །གཉིས་པ་དངོས་གཞི་ལ་གསུམ། ཟིལ་གནོན་དམིགས་པ་སྐོར་གསུམ། རང་སེམས་དབྱིངས་སུ་འཕོ་བ། ཕུང་པོ་གཟན་དུ་བསྐྱུར་བའོ། །དང་པོ་ནི། རྐང་གླིང་སྙན་ལ་འགྱུར་བ་གསུམ་བུས་པའི་དང་པོའི་སྐབས་རྣལ་འབྱོར་པ་ང་འདིར་སླེབས་ཡོད་དོ། །གཉིས་པར་ལྷ་འདྲེ་ཐམས་ཅད་འདིར་འདུས། འདིར་ཚོགས། གསུམ་པར་ཁྱེད་རྣམས་ངའི་བཀའ་ལ་ཉོན། ངས་ཐེག་ཆེན་གྱི་ལམ་ལ་འགོད་དོ་ཞེས་སྒྲར་གྲགས་པས་ལྷ་འདྲེ་ཁྲོམ་ཆེན་པོ་འཚོགས་པ་བཞིན་དུ་འདུས། རང་གི་ཕྱག་གཡས་པས་ཞིང་ཆེན་གྱི་པགས་པ་དེ་རྣམས་ཀྱི་སྟེང་དུ་ཆལ་གྱིས་དགྲམ་པར་བསམས་ལ། ཕཊཿ ཅེས་བརྗོད། དེ་བཞིན་དུ་ལྷའི་ང་རྒྱལ་གྱི་ངང་ནས། ཕཊཿ སྤྲོས་བྲལ་ལྟ་བའི་ངང་ནས། ཕཊཿ དམིགས་མེད་སྙིང་རྗེའི་ངང་ནས། ཕཊཿ ཅེས་བརྗོད་ལ་རིག་པ་ངར་བསྐྱེད་དེ་གཉན་ས་རི་ཁྲོད་དུ་སྙེམས་ཐག་བཅད། སླར་ཡང་རང་གི་སྤྱི་བོར་བླ་མ་ཤཱཀྱ་ཐུབ་པ་སྐད་ཅིག་གིས་གསལ་བའི་ཐུགས་ཀའི་ཧཱུྃ་ལས་འོད་ཟེར་སྔོན་པོ་དཔག་ཏུ་མེད་པ་འཕྲོས་པས་སྣང་སྲིད་ལྷ་འདྲེ་སྔར་མ་འདུས་པའི་ལྷག་མ་ཐམས་ཅད་རང་གི་ཞབས་འོག་ཏུ་འདུས་ནས་བྱང་ཆུབ་མཆོག་ཏུ་སེམས་བསྐྱེད་པར་བསམ། གཉིས་པ་ནི། དཔའ་བར་འགྲོ་བའི་ཏིང་ངེ་འཛིན་ཏེ། རང་ཕག་མོར་གསལ་བའི་རྩ་དབུ་མའི་ནང་དུ་ལྟེ་བའི་ཐད་དུ་རང་སེམས་ཀྱི་ངོ་བོ་འོད་དཀར་པོའི་གོང་བུ་བྱེའུའི་སྒོ་ང་ཙམ་དུ་གནས་པར་གྱུར། ཕཊཿ ཅེས་པས། འོད་ཀྱི་གོང་བུ་དེ་ཉིད་སྙིང་ག །ཕཊ། མགྲིན་པ། ཕཊ། སྤྱི་བོའི་ཀླད་ རྒྱའི་འོག །ཕཊ། སྤྱི་བོའི་ཚངས་བུག་ནས་རྒྱངས་ཀྱིས་ཐོན་པར་བསམས་ལ་དབྱིངས་རིག་བསྲེས་ཏེ་མཉམ་པར་བཞག །ཕཊ། དེའི་ངང་ལས་རང་སེམས་ཀྱི་ངོ་བོ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་པ། གཡས་གྲི་གུག་ཕྱར་ཞིང༌། གཡོན་སྡིགས་མཛུབ་ཀྱིས་རང་གི་ཐ་མལ་གྱི་ཕུང་པོ་རྙིང་པ་དཀར་ཞིང་ཚོ་ལ་མཛེས་ཤིང་སྣུམ་པ་ལ་གཟིར་བའི་རྣམ་པ་ཅན་དུ་གྱུར་པར་བསམ་མོ། །གསུམ་པ་ལ་གསུམ། ནུབ་དང་པོ། དཀར་འགྱེད། དམར་འགྱེད། སྤུས་སྟོན་ནོ། ། དང་པོ་ནི། ཕཊ། ཐོད་པ་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། ཕཊ། གོ་རོ་ཙ་ན་རོ་བརྒྱད་དང་ལྡན་པའི་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ། ལན་གསུམ། རྐང་གླིང་གསུམ་བུས་པས༑ བླ་མ་ཡི་དམ་མཁའ་འགྲོ་རྣམས་སྟེང་གི་ནམ་མཁར་བྱོན། རང་ཕག་མོར་གསལ་བའི་ཐུགས་ཀ་ནས་མཆོད་པའི་ལྷ་མོ་ཐོད་པ་ཐོགས་པ་རྣམས་ཀྱིས་བདུད་རྩིའི་ཕུད་བཅུས་ཏེ་མཆོད་པར་བསམས་ལ། ཕཊ། བླ་མ་ཡི་དམ་ཐུགས་དགོངས་རྫོགས་གྱུར་ཅིག །ཕཊ། རྒྱལ་བ་རྒྱ་མཚོ་མཆོད་པས་མཉེས་གྱུར་ཅིག །ཅེས་བརྗོད། སླར་ཡང༌། ཕཊ། པགས་པ་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཕཊ། ཤ་ཁྲག་ནང་རོལ་དང་བཅས་པ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿ ཧཱུྃ། ལན་གསུམ། རྐང་གླིང་གསུམ་གྱིས་མཁའ་འགྲོ་ཆོས་སྐྱོང་སོགས་སྤྱན་དྲངས་ལ་སྟེང་འོག་ཕྱོགས་མཚམས་ཐམས་ཅད་དུ་འཁོར་བར་བསམ། མཁའ་འགྲོ་ཆོས་སྐྱོང་ཐུགས་དམ་བསྐང་གྱུར་ཅིག །ཕཊ། རིགས་དྲུག་འབྱུང་པོ་ གཏོར་མས་ཚིམ་གྱུར་ཅིག །ཕཊ། ལན་ཆགས་དགྲ་བགེགས་བུ་ལོན་ཁྱེར་གྱུར་ཅིག །ཅེས་བརྗོད་ཅིང་དམིགས་པ་གསལ་བཏབ། གཉིས་པ། ནུབ་གཉིས་པ། དམར་འགྱེད་ནི། ཕཊ། པགས་པ་དབང་ཆེན་གསེར་གྱི་ས་གཞིར་གྱུར༑ ༑ཕཊ། གཏི་མུག་ཤ་ཡི་ཕུང་པོ་ཆེན་པོར་གྱུར། །ཕཊ། འདོད་ཆགས་ཁྲག་གི་རྒྱ་མཚོ་ཆེན་པོར་གྱུར། །ཕཊ། ཞེ་སྡང་རུས་པའི་གྲམ་ཁྲོད་ཆེན་པོར་གྱུར། །ༀ་ཨཱཿ ཧཱུྃ། ལན་གསུམ། རང་ཕག་མོར་གསལ་བའི་ཐུགས་ཀའི་བྃ་ཡིག་གི་འོད་ཟེར་གྱིས་མགྲོན་རྣམས་ཐམས་ཅད་སྤྱན་དྲངས་པར་བསམས་ལ་རྐང་གླིང་གསུམ་འབུད། དེ་རྣམས་ཀྱིས་རྫས་ལ་དགྱེས་བཞིན་དུ་ལོངས་སྤྱོད་པར་བསམས་ལ་ཕུང་པོ་ཚོགས་མཆོད་བཏང༌། ནུབ་གསུམ་པ། གསུམ་པ་སྤུས་སྟོན་ནི། ༀ་ཨཱཿ ཧཱུྃ་ལན་གསུམ་གྱིས། ཕུང་པོ་འདོད་རྒུ་ཐམས་ཅད་འབྱུང་བའི་ལོངས་སྤྱོད་བསམ་གྱིས་མི་ཁྱབ་པར་གྱུར། རྐང་གླིང་གསུམ་གྱིས་མགྲོན་ཐམས་ཅད་སྤྱན་དྲང༌། སོ་སོའི་གང་འདོད་པའི་ཡོ་བྱད་ལ་དགྱེས་བཞིན་རོལ་པར་བསམས་ལ། ཕུང་པོ་ཚོགས་མཆོད་ནི། ༀ་ཨཱཿ ཧཱུྃ། མཁྱེན་བརྩེའི་བྱིན་རླབས་བསམ་མི་ཁྱབ། །བླ་མ་ཡི་དམ་མཁའ་འགྲོར་བཅས། །མཆོད་པའི་ཚོགས་ཀྱིས་མཉེས་པ་དང༌། །ཆོས་སྐྱོང་དམ་ཅན་སྲུང་མའི་ཚོགས། །ཐུགས་དམ་གཉན་པོ་བསྐང་གྱུར་ཅིག །རིགས་དྲུག་འབྱུང་པོའི་ཚོགས་རྣམས་ཀུན། །རང་རང་འདོད་པས་ཚིམས་གྱུར་ཅིག །ལན་ཆགས་བུ་ལོན་ཁྱེར་གྱུར་ཅིག །ཅེས་བརྗོད། གསུམ་པ་རྗེས་ལ་གསུམ། ཚོགས་དྲུག་ལམ་ཁྱེར་བྱ་བ། བདེན་པའི་སྟོབས་བརྗོད་པ། ཆོས་སྦྱིན་དང་བསྔོ་སྨོན་གྱིས་མཐའ་བརྒྱན་པའོ། །དང་པོ་ནི། མིག་གི་ དབང་པོའི་མཚོ་ནང་དུ། །མཛེས་དང་མི་མཛེས་གཟུགས་སོགས་ལ། །ཆགས་ཤིང་ཞེན་པའི་འདྲེ་རྒོད་ཡོད། །གནས་མཆོག་འདི་རུ་གཅོད་ཅིག་བྱེད། །གསང་གཅོད་མཐའ་རུ་ཕྱིན་པ་དང༌། །གཟུགས་འཛིན་ཁ་ཡན་འདྲེ་རྒོད་རྣམས། །རང་སར་ཞི་བར་བྱིན་གྱིས་རློབས། །རྣ་བའི་དབང་པོའི་བྲག་ཕུག་ཏུ། །སྙན་དང་མི་སྙན་སྒྲ་སོགས་ལ། །ཆགས་ཤིང་༴ གནས་མཆོག༴ གསང་གཅོད༴ སྒྲ་འཛིན་ཁ་ཡན༴ རང་སར༴ སྣ་ཡི་དབང་པོའི་ལམ་འཕྲང་དུ། །ཞིམ་དང་མི་ཞིམ་དྲི་སོགས་ལ། །ཆགས་ཤིང་༴ གནས་མཆོག༴ གསང་གཅོད༴ དྲི་འཛིན་ཁ་ཡན༴ རང་སར་ཞི་བར༴ ལྕེའི་དབང་པོའི་ཐང་དཀྱིལ་དུ། །མངར་དང་མི་མངར་རོ་སོགས་ལ། །ཆགས་ཤིང་༴ གནས་མཆོག༴ གསང་གཅོད༴ རོ་འཛིན༴ རང་སར༴ ལུས་ཀྱི་དབང་པོའི་གྲོང་ཁྱེར་དུ། །འཇམ་དང་མི་འཇམ་རེག་སོགས་ལ། །ཆགས་ཤིང་༴ གནས་མཆོག༴ གསང་གཅོད༴ འཇམ་འཛིན་ཁ་ཡན༴ རང་སར༴ ཡིད་ཀྱི་དབང་པོའི་མཁའ་དབྱིངས་སུ། །བཟང་དང་ངན་པའི་རྟོག་ཚོགས་ལ། །ཆགས་ཤིང་ཞེན་པའི༴ གནས་མཆོག་འདི༴ གསང་གཅོད༴ རེ་དོགས་བཟང་ངན་འདྲེ་རྒོད་རྣམས། །རང་སར་ཞི་བར་བྱིན་གྱིས་རློབས། །ཞེས་བརྗོད་ཅིང་བརྟུལ་ཞུགས་ཀྱི་གདིངས་བསྐྱེད། གཉིས་པ་ནི། ཚངས་པའི་འཇིག་རྟེན་མན་ཆད་ནས། །ན་རག་དམྱལ་བ་ཡན་ཆད་དུ། །བསམ་པ་ཙམ་གྱིས་ཚིམ་གྱུར་ཅིག །དམིགས་པ་ཙམ་གྱིས་གྲུབ་གྱུར་ཅིག ༈ །རྒྱལ་བ་མཆོད་པས་མཉེས་ གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར༴ ལན་ཆགས་བུ་ལོན་ཁྱེར་གྱུར༴ ཕ་མའི་དྲིན་ལན་འཁོར་གྱུར་ཅིག ༈ །ཕ་མ་ལ་སོགས་སེམས་ཅན་ཚོགས། །རྣམ་བཞིའི་མགྲོན་དུ་གྱུར་པ་ལ། །ཚད་མེད་མཆོད་སྦྱིན་འདི་བསྔོས་པས། །ལོངས་སྤྱོད་ལྡན་ཞིང་ཚོགས་རྫོགས་ནས། །ཐམས་ཅད་མངོན་པར་སངས་རྒྱས་ཤོག ༈ །ཡུལ་ཕྱོགས་འདི་རུ་བྱིན་གྱིས་རློབས། །གནས་མཆོག་འདི་རུ༴ འདུག་ས་འདི་རུ༴ སྟན་ཐོག་འདི་རུ༴ ད་ལྟ་ཉིད་དུ༴ སྐད་ཅིག་ཉིད་དུ༴ མྱུར་བ་ཉིད་དུ་བྱིན་གྱིས་རློབས། །ཞེས་བརྗོད་པས་བསྔོས་པ་བཞིན་དུ་གྲུབ་པའི་མཐུན་འགྱུར་རྒྱལ་བ་སྲས་དང་བཅས་པས་མཛད་པར་བསམ། གསུམ་པ་ནི། རང་ཉིད་སྐད་ཅིག་གིས་འཕགས་པ་ཐུགས་རྗེ་ཆེན་པོ་ཕྱག་བཞི་པར་གསལ་བའི་ཐུགས་ཀར་པད་ཟླའི་སྟེང་དུ་ཧྲཱིཿ ཡིག་གི་མཐར་ཡི་གེ་དྲུག་མའི་སྔགས་ཀྱིས་བསྐོར་བ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས། སེམས་ཅན་ཐམས་ཅད་ལ་ཕོག་པས་སྒོ་གསུམ་གྱི་སྡིག་སྒྲིབ་དག །ཐུགས་རྗེ་ཆེན་པོའི་སྐུ་གསུང་ཐུགས་ཀྱི་ངོ་བོར་གྱུར་པར་བསམས་ལ། ༀ་མ་ཎི་པདྨེ་ཧཱུྃ། བརྒྱ་རྩ་སོགས་བཟླས་པའི་རྗེས་སུ། ཆོས་རྣམས་གང་དག་རྒྱུ་ལས་བྱུང༌། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང༌། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། ། འདི་ནི་སངས་རྒྱས་བསྟན་པ་ཡིན། །ཞེས་དྲང་དོན་དང༌། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང༌། །ངོ་བོ་མེད་ཅིང་གནས་མེད་པར། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །ཞེས་ངེས་དོན་ཟབ་མོའི་ཆོས་སྦྱིན་བྱ། སྦྱིན་པ་རྒྱ་ཆེན་གྱུར་པ་འདི་ཡི་མཐུས། །འགྲོ་བའི་ནང་ནས་རང་བྱུང་སངས་རྒྱས་ཤོག །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་འགྲོའི་ཚོགས་རྣམས་སྦྱིན་པས་གྲོལ་གྱུར་ཅིག །ཅེས་ཟང་ཟིང་དང་ཆོས་སྦྱིན་གྱི་དགེ་བའི་རྩ་བ་བྱང་ཆུབ་ཏུ་བསྔོ། ཕཊ། ཅེས་པས། ཡར་མགྲོན་རྣམས་ཆོས་ཀྱི་དབྱིངས་སུ་གཤེགས། ཕཊཿ མར་མགྲོན་རྣམས་རང་གི་གནས་སུ་སོང༌། ཕཊ། རང་ཉིད་ཐུགས་རྗེ་ཆེན་པོར་གསལ་བའང་འོད་གསལ་སྟོང་པ་ཉིད་ཀྱི་དབྱིངས་སུ་ཐིམ། སླར་ཡང་རང་སྐད་ཅིག་གིས་ཐུགས་རྗེ་ཆེན་པོའི་སྐུར་གྱུར་པར་བསམ་མོ། །དགེ་བ་འདི་ཡིས་མྱུར་དུ་བདག །ཐུགས་རྗེ་ཆེན་པོ་འགྲུབ་གྱུར་ཅིག །འགྲོ་བ་གཅིག་ཀྱང་མ་ལུས་པ། །ཁྱེད་ཀྱི་ས་ལ་འགོད་པར་ཤོག །ཕ་མ་སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོང་པར་ཤོག །བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང༌། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ ཀུན་གྱི་རྗེས་སུ་བདག་སློབ་ཅིང༌། །དགེ་བ་འདི་དག་ཐམས་ཅད་རབ་ཏུ་བསྔོ། །བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག །སྐྱེས་པ་ཉམས་པ་མེད་པ་དང༌། །གོང་ནས་གོང་དུ་འཕེལ་བར་ཤོག ༑སྐྱེ་བ་ཀུན་ཏུ་ཡང་དག་བླ་མ་དང༌། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ནས། །ས་དང་ལམ་གྱི་ཡོན་ཏན་རབ་རྫོགས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །འབྱུང་པོ་གང་དག་འདིར་ནི་ལྷགས་གྱུར་ཏེ༑ ༑སའམ་འོན་ཏེ་བར་སྣང་འཁོད་ཀྱང་རུང༌། །སྐྱེ་རྒུ་རྣམས་ལ་རྟག་ཏུ་བྱམས་བྱེད་ཅིང༌། །ཉིན་དང་མཚན་མོ་ཆོས་ལ་སྤྱོད་པར་ཤོག །ཅེས་སོགས་བསྔོ་སྨོན་བཀྲ་ཤིས་རྒྱས་པར་བྱ། དེ་ལྟ་བུས་མཚོན་ཏེ་མཉམ་རྗེས་ཐམས་ཅད་དུ། ཆོས་ཐམས་ཅད་སྣང་སྟོང་དབྱེར་མེད་ཟབ་གསལ་ཟུང་འཇུག་ཕྱག་རྒྱ་ཆེན་པོའི་རྩིས་ཟིན་པར་བྱས་པས་བདག་འཛིན་གྱི་འཁྲི་བ་རྩད་ནས་ཆོད་དེ། བདག་མེད་རྣམ་གཉིས་ཀྱི་དོན་ལ་གོམས་འདྲིས་བརྟན་པ་ཐོབ་པ་ནི་རྡོ་རྗེ་ལྟ་བུའི་ཏིང་ངེ་འཛིན་ཞེས་བྱའོ། །གོང་གི་འགྱེད་དམིགས་གསུམ་པོ་དེ་གཉན་ས་སོགས་སུ་འགྲོ་བའི་ཚེ་ནུབ་གསུམ་དུ་རིམ་པར་བྱ་བ་ཡིན་ལ། རྒྱུན་ཁྱེར་གྱི་སྐབས་སུ་གསུམ་ཀ་རེས་མོས་སམ་ཐར་ཆགས་སུ་བྱ་བའམ། ཡང་ན་རང་གང་མོས་གཅིག་ལ་དྲིལ་ཀྱང་རུང་བར་གསུངས་སོ། །དེ་ལྟར་ཀུན་མཁྱེན་བོ་དོང་བ་ཆེན་པོའི་ཟབ་མོ་དག་སྣང་གི་གདམས་ངག་ཐུབ་པ་མདོ་གཅོད་དུ་ གྲགས་པའི་ངག་འདོན་བླ་མ་བརྒྱུད་པའི་ཕྱག་བཞེས་ཇི་ལྟ་བ་བཞིན་དག་པར་བྲིས་པ་དགེ་ལེགས་འཕེལ།། །།