DNZ-10-THA-033

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 10, Text 33, Pages (Folios to )
Author	འཇམ་མགོན་ཀོང་སྤྲུལ་
Citation
Side notes
More details More details
Genre

Tibetan Text

Tsagli

Mandalas

[edit]

༄༅། །དཔལ་འཁོར་ལོ་བདེ་མཆོག་རས་ཆུང་ལུགས་ཀྱི་དཀྱིལ་འཁོར་གྱི་ཆོ་ག་བདེ་ཆེན་ལང་ཚོ་ཞེས་བྱ་བ་བཞུགས་སོ། །

ན་མོ་གུ་རུ་ཤྲཱི་ཛྭ་ལ་སམྦ་རེ་བྷྱཿ ཀུན་ཁྱབ་ཟག་མེད་དབྱིངས་ལས་མི་གཡོ་བར། །ཡེ་ཤེས་རོལ་པའི་གར་མཛད་བདེ་བ་མཆོག །འཁོར་ལོ་ལྔ་ཡི་ལྷ་ལ་གུས་བཏུད་ནས། །དཀྱིལ་འཁོར་ཆོ་གའི་ལག་ལེན་ཉུང་གསལ་དགོད། །དེའང་བཀའ་སྲོལ་འདིའི་ལུགས་ཀྱི་སྨིན་ལམ་ཡིད་བཞིན་ནོར་བུ་ལ་དབང་པོ་རབ་འབྲིང་ཐ་གསུམ་གྱི་དབང་གིས་སྒྲུབ་ཐབས་རྒྱས་འབྲིང་བསྡུས་གསུམ། སྨིན་བྱེད་རྒྱས་འབྲིང་བསྡུས་གསུམ་གནང༌། རེ་རེ་བཞིན་སྦྱར་བས་སྨིན་བྱེད་རྣམ་གྲངས་བཞི་བཅུ་རྩ་གྲངས་འབྱུང་ཡང་རྒྱས་པའི་ཁོངས་སུ་བསྡུས་པ་ཤུགས་ཀྱིས་འདུ་བ་དང༌། དབང་པོ་ཐ་མ་ལ། ཕྱི་དཀྱིལ་རྒྱས་པ་ལ་དབང་བསྐུར་རྒྱས་པ་སྦྱར་ན་གཞན་རྣམས་ཞར་བྱུང་དུ་གྲུབ་པས་དེའི་དབང་དུ་བྱས་ན། རྩ་བའི་སྡོམ་ལ། སློབ་དཔོན་སློབ་མ་དགོས་དུས་གནས། །ཇི་ལྟར་དབང་བསྐུར་ཚུལ་དང་དྲུག །ཅེས་གསུངས་པ་ལས། འདིར་ཇི་ལྟར་དབང་བསྐུར་བའི་ཚུལ་བཤད། དེ་ཡང་སྔོན་འགྲོ། དངོས་གཞི། རྗེས་གསུམ། རེ་རེ་ལའང་ནང་ཚན་དབྱེ་བ་མང་དུ་དབྱེ་བར་གསུངས་ཀྱང་འདིར་རྡུལ་ཚོན་གྱི་དཀྱིལ་འཁོར་མི་འགྲུབ་པའི་དབང་དུ་བྱས་ནས། རས་བྲིས་ཀྱི་ཕྱོགས་ལ་ངེས་པར་དགོས་པའི་ལག་ལེན་མདོར་བསྡུས་ཏེ་བཀོད་ན། སྔོན་འགྲོ། དངོས་གཞི། རྗེས་གསུམ། སྔོན་འགྲོ་ལ་ས་ཆོག་སྐབས་འདིར་མི་དགོས། སྟ་གོན་རྣམས་ལ་འཇུག་པའི་ཐོག་མར་སྒྲུབ་ཐབས་ཀྱི་དབུ་ནས་བརྩམས་བདག་བསྐྱེད་བཟླས་པ་བསྡུ་ལྡང་གི་བར་འགྲུབ་པར་བྱ། དེ་ནས་སྟ་གོན་གྱི་རིམ་པ་བཞིའི་དང་པོ་ལྷ་སྟ་གོན་ནི། མདུན་དུ་སྟེགས་བུ་དྲི་བཟང་གི་ཆུས་ཆག་ཆག་བཏབ་པའམ། ལག་ལེན་བདེ་ཆེད་མཎྜལ་བྱི་དོར་བྱས་པར་སློབ་དཔོན་གྱིས་གཙོ་བོ་ཡབ་ཡུམ་གྱི་སྙིང་པོ་དང་ཉེ་སྙིང༌། སོ་སོའི་ས་བོན་རྣམས་བརྗོད་བཞིན་པས་དབུས་སུ་ཆང་དང་དྲི་བཟང་སྦྱར་བའི་ཐིག་ལེ་གྲུ་བཞི། དེ་རྒྱབ་ཕྱོགས་བཞིར་བཞི། དེ་རྒྱབ་ཕྱོགས་མཚམས་བརྒྱད་རིམ་པ་བཞི་ལ་ཐིག་ལེ་བརྒྱད་ཚན་བཞི་བཅས་གཡོན་པའི་སྲིན་མཛུབ་ཀྱིས་གཡོན་སྐོར་དུ་བཀོད། དེ་རྣམས་ཀྱི་སྟེང་དུ་ལས་རྡོར་གྱིས་གཙོ་བོ་ལ་ཚོམ་བུ་ཆེ་གཅིག །འཁོར་རྣམས་ལ་ཆུང་བ་རེ་བཀོད་ལ་གཞི་སྟེགས་སུ་བཀོད། མདུན་དུ་ནང་མཆོད་ཐོད་པའི་བདུད་རྩི། མཐའ་སྐོར་དུ་མཆོད་ཡོན་དང་ཉེར་སྤྱོད་གཡོན་སྐོར་དུ་བཤམ། སྒྲུབ་ཐབས་ལྟར་མཆོད་པ་རྣམས་བྱིན་བརླབ། ཚོམ་བུ་རྣམས་ཁཎྜ་རོ་ཧེས་བསང༌། ས་བྷཱ་ཝས་སྦྱང༌། སྟོང་པའི་ངང་ལས་ཚོམ་བུའི་དཀྱིལ་འཁོར་གྱི་འོག་གཞིར་འབྱུང་བ་རིམ་བརྩེགས་སྲུང་འཁོར་དང་ བཅས་པའི་སྟེང་དུ་ཐར་པ་ཆེན་པོའི་གཞལ་མེད་ཁང་རྒྱན་དང་བཀོད་པ་མཚན་ཉིད་ཐམས་ཅད་ཡོངས་སུ་རྫོགས་པ་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་གཞལ་ཡས་ཁང་གི་ལྟེ་བར་པད་ཉི་འཇིགས་བྱེད་དུས་མཚན་གྱི་གདན། འཁོར་ལོ་ལྔའི་ལྷ་རྣམས་ལ་སོ་སོའི་གདན་དང་བཅས་གྲུབ་པར་གྱུར། དབུས་ཀྱི་གདན་གྱི་སྟེང་དུ་ཧཱུྃ་མཐིང་ནག་ལས་རྡོ་རྗེ་སྔོན་པོ་ཧཱུྃ་གིས་མཚན་པ་དེ་ལས་འོད་ཟེར་འཕྲོས། རྒྱལ་བ་སྲས་བཅས་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་སྡོམ་པའི་སྐུར་གྱུར་པ་ནི་སོགས་སྒྲུབ་ཐབས་ནས་འབྱུང་བ་ལྟར་ལ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཡབ་ཡུམ་བདེ་བ་ཆེན་པོར་སྙོམས་པར་ཞུགས་པའི་བྱང་ཆུབ་སེམས་ཀྱི་ཐིག་ལེའི་འོད་ཟེར་ཕྱི་རོལ་ཏུ་འཕྲོས་ཏེ་འཁོར་རྣམས་ཀྱི་གདན་ཐོག་ཏུ་འཁོད་པ་ལས་བདེ་ཆེན་འཁོར་ལོའི་ཕྱོགས་ཀྱི་པད་འདབ་བཞི་ལ་སོགས་ནས། དཔའ་བོ་མཁའ་འགྲོ་ཐམས་ཅད་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པའོ། །དེ་རྣམས་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོས་མཚན་པར་གྱུར། འབར་བའི་རྒྱ་དང༌། ཕ་ཕ་ཞེས་པ་ནས། ཛཿ ཧཱུྃ་བྃ་ཧོཿ འི་བར་དང༌། སླར་ཡང་ལྷ་རྣམས་ཀྱི་ཐུགས་ཀའི་ས་བོན་སོགས་ནས། རང་རང་གི་རིགས་བདག་གིས་དབུར་བརྒྱན་པར་གྱུར། བར་སྒྲུབ་ཐབས་བཞིན་བྱ། དེ་ནས་འོག་གི་མདུན་བསྐྱེད་ སྐབས་ལྟར་ཕྱི་མཆོད་མཆོད་ཡོན་ཉེར་སྤྱོད། རིག་མ་བཅུ་དྲུག་རྣམས་དང༌། ནང་མཆོད། གསང་མཆོད། དེ་ཁོ་ན་ཉིད་མཆོད་རྣམས་སྒྲུབ་ཐབས་ལྟར་བྱས་ལ། ༀ། བཅོམ་ལྡན་མགོན་པོ་སོགས་རྐང་བརྒྱད་ཀྱིས་བསྟོད། ཐལ་མོ་སྦྱར་ཏེ་སྤོས་ཐོགས་ལ། བླ་མ་དང་དཔལ་འཁོར་ལོ་སྡོམ་པའི་ལྷ་ཚོགས་འཁོར་དང་བཅས་པ་ཐམས་ཅད་བདག་ལ་དགོངས་སུ་གསོལ། རྣལ་འབྱོར་པ་རྡོ་རྗེ་ཆྒཻ་མོ་ཞེས་བགྱི་བ་བདག་གིས་ཀྱང་དམ་པ་ཁྱེད་རྣམས་ཀྱི་རྗེས་སུ་ཞུགས་ནས་འགྲོ་བ་མ་སྨིན་པ་རྣམས་སྨིན་པར་བྱ་བ་དང༌། མ་གྲོལ་བ་རྣམས་གྲོལ་བར་བྱ་བ་དང༌། དབུགས་མ་ཕྱུང་བ་རྣམས་དབུགས་དབྱུང་བར་བྱ་བའི་སླད་དུ་སློབ་མ་རྣམས་ལ་དབང་བསྐུར་བའི་རིམ་པ་ལ་འཇུག་པར་བགྱི་ན། ཐུགས་བརྩེ་བ་ཆེན་པོས་ཉེ་བར་དགོངས་ཏེ་བཀས་གནང་བ་དང་བྱིན་གྱིས་བརླབ་ཏུ་གསོལ། ཅེས་གསོལ་བ་བཏབ་པས་དཀྱིལ་འཁོར་འབྲི་བའི་གནང་བ་ཐོབ་པར་མོས་ནས་འདེགས་པའི་རྒྱ་དང༌། ༀ་བཛྲ་ཨུཏྟིཥྛ། ཞེས་དཀྱིལ་འཁོར་གྱི་ལྷ་རྣམས་ནམ་མཁའི་དབྱིངས་སུ་བཞུགས་པར་མོས་ལ། ༀ་སུ་པྲ་ཏིཥྛ་བཛྲཱ་ཡེ་སྭཱ་ཧཱ། ཞེས་བརྗོད་ལ་མཎྜལ་བསྡུའོ། །གཉིས་པ་བུམ་པ་སྟ་གོན་ལ། རྣམ་རྒྱལ་དར་སྔོན་པོ་དང་ལས་བུམ་དར་དམར་པོའི་མགུལ་ཆིངས། གཉིས་ཀར་དྲི་བཟང་ཆུས་སུམ་གཉིས་བཀང༌། བུམ་རྫས་སོ་ལྔ་བཏབ། གུ་གུལ་གྱིས་བདུག ། ཡུངས་ཀར་འཐོར་ལ་སུམྦྷ་ནིའི་སྔགས་བརྗོད་ལ་བགེགས་བསྐྲད། རྣམ་རྒྱལ་དཀྱིལ་འཁོར་གྱི་དབུས་མཉྫིའི་སྟེགས་དང་ལས་བུམ་གཡོན་ངོས་སུ་ཁ་རྒྱན་དང་བཅས་ཏེ་བཞག །རྣམ་རྒྱལ་གྱི་ཁར་དུང་ཆོས་དྲི་བཟང་གི་ཆུས་བཀང་བ་དང་གཟུངས་རྡོར་བཀོད། གཏོར་མ་དང་མཆོད་པ་རྣམས་སྔར་ལྟར་ བཤམས་ལ་བྱིན་བརླབ། བུམ་པ་གཉིས་གོང་ལྟར་བསང་སྦྱང༌། སྟོང་པའི་ངང་ལས་པྃ་པྃ་ལས་པདྨ་དང༌། ཨ་ཨ་ལས་ཟླ་བའི་གདན་གཉིས་ཀྱི་སྟེང་དུ། བྷྲཱུྃ་བྷྲཱུྃ་ལས་རིན་པོ་ཆེ་བཻ་ཌཱུ་ལས་གྲུབ་པའི་བུམ་པ་གཉིས་ལྟོ་བ་ཡངས་ཤིང་མགྲིན་པ་ཕྲ་བ། ཁ་གཡེལ་ཞིང་མཆུ་འཕྱང་བ། ལྷ་རྫས་དར་གྱིས་མགུལ་པ་དཀྲིས་ཤིང༌། དཔག་བསམ་ཤིང་གིས་ཁ་བརྒྱན་པ། ནང་ཆུ་དང་བཅུད་བཟང་པོས་ཡོངས་སུ་གང་བའི་རྣམ་རྒྱལ་བུམ་པའི་ནང་དུ་འོག་གཞི་འཁོར་ལོ་དཀར་པོ། དེ་སྟེང་དམར་པོ། དེ་སྟེང་སྔོན་པོ་ཐམས་ཅད་ཀྱང་རྩིབས་བརྒྱད་པ་འཁོར་ལོ་དང་པདྨ་དང་རྡོ་རྗེའི་ཕྲེང་བས་བསྐོར་བ། དེ་སྟེང་པྃ་ལས་པདྨ་འདབ་བརྒྱད་ཨ་ལས་ཟླ་བ་རྃ་ལས་ཉི་མའི་དཀྱིལ་འཁོར་གྱི་སྟེང་དུ་འཇིགས་བྱེད་དུས་མཚན་དང་བཅས་པ། མཚམས་བཞིར་བུམ་ཐོད་བདུད་རྩིས་གང་བའི་ཁར་སྣ་ཚོགས་རྡོ་རྗེས་མཚན་པ་རེ། འཁོར་ལོ་གསུམ་གྱི་རྩིབས་རྣམས་དང་སྒོ་མཚམས་བརྒྱད་ལ་པདྨ་དང་ཉི་མའི་གདན་རེ་རེ་གྲུབ་པར་གྱུར། དབུས་ཀྱི་གདན་གྱི་སྟེང་དུ་རྡོ་རྗེ་མཐིང་ནག་ཧཱུྃ་སྔོན་པོས་མཚན་པ་ལས་འོད་ཟེར་འཕྲོས་སོགས་གོང་གི་ལྷ་སྟ་གོན་ལྟར། གཙོ་བོ་ཡབ་ཡུམ་དང་འཁོར་རྣམས་ཀྱི་བསྐྱེད་ཆོག་ཚང་བར་བརྗོད། ལས་ཐམས་ཅད་པའི་བུམ་པའི་ནང་དུ། པྃ་ལས་པདྨ་དང༌། རྃ་ལས་ཉི་མ། བྃ་ལས་རོའི་གདན་གྱི་སྟེང་དུ་ལྷ་མོ་ཁཎྜཱ་རོ་ཧེ་མ་སྐུ་མདོག་དམར་མོ་ཞལ་གཅིག་ཕྱག་བཞི་མ། གཡས་དང་པོ་གྲི་གུག །གཉིས་པ་ན་ཌཱ་མ་རུ། གཡོན་དང་པོ་ཐོད་ཁྲག །གཉིས་པ་ན་ ཁ་ཊྭཱཾ་ག་འཛིན་པ། ཁྲོ་ལ་འཛུམ་པའི་ཞལ་མཆེ་བ་ཅུང་ཟད་གཙིགས་ཤིང་མཛེས་ལ་ཡངས་པའི་སྤྱན་གསུམ་དང་ལྡན་པ། དབུ་སྐྲ་སིལ་བུའི་སྟོད་ཆ་གྱེན་དུ་བརྫེས་པ་ནོར་བུ་དང་མེ་ཏོག་གི་ཕྲེང་བས་མཛེས་ཤིང་ལྷག་མ་ཐུར་དུ་གྲོལ་བས་རྐེད་པ་ནོན་པ། ཐོད་པ་སྐམ་པོ་ལྔའི་དབུ་རྒྱན་དང༌། རློན་པ་ཁྲག་འཛག་པ་ལྔ་བཅུའི་དོ་ཤལ་ཅན། གཅེར་བུ་རུས་པའི་རྒྱན་དྲུག་གིས་བརྒྱན་པ། གཟུགས་དང་ལང་ཚོ་དར་ལ་བབས་ཤིང་བྷ་ག་དང་ནུ་མ་རབ་ཏུ་རྒྱས་པ། བདེ་བ་ཆེན་པོས་རྣམ་པར་མྱོས་པའི་ཆ་བྱད་ཅན་གྱི་ཞབས་གཉིས་གཡས་བསྐུམ་ཞིང་གཡོན་བརྐྱང་བའི་གར་སྟབས་ཀྱིས་པད་ཉི་རོའི་གདན་ལ་བཞུགས་པའོ། །ལྷ་ཐམས་ཅད་ཀྱི་སྤྱི་བོར་ༀ་དཀར་པོ་སོགས་གནས་གསུམ་བྱིན་བརླབ། དམ་ཡེ་བསྲེ་བ། དབང་བསྐུར། རྒྱས་གདབ་རྣམས་ལྷ་སྟ་གོན་ལྟར་བྱ་བའི་ཚིག་མཇུག་དོན་ཡོད་གྲུབ་པས་དབུར་བརྒྱན། ཁཎྜ་རོ་ཧེ་ལ་རིན་ཆེན་འབྱུང་ལྡན་གྱིས་དབུར་བརྒྱན། དབང་ལྷ་རྣམས་ཀྱང་དབུ་རྒྱན་ལ་ཐིམ་པར་གྱུར། དེ་ནས་ཕྱིའི་མཆོད་པ་ནི། བྷྲཱུྃ་ཨྃ་ཛྲ་ཁྃ་ཧཱུྃ་རྣམས་འོད་དུ་ཞུ་བ། ལྷ་རྫས་ལས་གྲུབ་པའི་གཟུགས་སྒྲ་དྲི་རོ་རེག་བྱ་རྣམས་ངོ་བོ་བཟང་ཞིང་རྒྱ་ཆེ་བ་བཀོད་པ་བསམ་གྱིས་མི་ཁྱབ་པ་ཐོགས་པའི་ལྷ་མོ་དཔག་ཏུ་མེད་པས་བུམ་ནང་གི་ལྷ་ལ་མཆོད་པར་བསམས་ལ། ༀ་ཨཱཿ རཱུ་པ་བཛྲ་ཧཱུྃ། དེ་བཞིན་དུ། ཤབྡ། གནྡྷེ། ར་ས། སྤརྴེ་བཛྲ་ཧཱུྃ། ༀ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སམྦ་རཾ་ཝཱི་ར་ཡོ་གི་ནཱི་ཁཎྜ་རོ་ཧེ་ས་པ་རི་ཝཱ་ར་པཉྩ་ཀཱ་མ་ གུ་ཎ་པཱུ་ཛ་ཧོཿ ནང་མཆོད་ནི། བདེ་ཆེན་འཁོར་ལོའི་མཚམས་བཞིའི་བུམ་ཐོད་བདུད་རྩིས་གང་བ་རྣམས་ལས་ཐོད་པ་བདུད་རྩིས་གང་བ་དཔག་ཏུ་མེད་པ་འཕྲོས་པས། ལྷ་རེ་རེའི་ཕྱག་ཏུ་ཐོད་པ་བདུད་རྩིས་གང་བ་རེ་རེ་བྱུང་བ་རྣམས་གསོལ་བས། ལྷ་ཐམས་ཅད་ཀྱི་སྐུ་གསུང་ཐུགས་ཟག་པ་མེད་པའི་བདུད་རྩིས་ཚིམ་པར་བསམ། ༀ་ཨཱཿ ཧཱུྃ་ཧ་ཧོཿ ཧྲཱིཿ ལན་གསུམ། ༀ་བྷ་ག༴ ས་པ་རི་ཝཱ་ར་ཨ་མྲ་ཏ་པཱུ་ཛ་ཧོཿ ཞེས་བདུད་རྩི་འཐོར་ཞིང་འབུལ་ལོ༑ ༑གསང་མཆོད་ནི། གཙོ་བོ་ཡབ་ཡུམ་སྐུ་གསུང་ཐུགས་ཀྱི་ལྷ་རྣམས་སྙོམས་པར་ཞུགས་པས་ནང་གི་མཁའ་འགྲོ་མ་བཞི་དང་ལྷ་མོ་ཁཎྜ་རོ་ཧེ་ཕྱོགས་མཚམས་མ་བརྒྱད་ལ་སོགས་ཏེ་འཁྲིལ་སྦྱོར་མེད་པ་རྣམས་ཀྱང་ར་རོ་བའི་ཟག་མེད་ཀྱི་བདེ་བ་མྱོང་བར་བསམས་ལ། ༀ་བྷ་ག༴ ཝཱ་ར་མ་ཧཱ་སུ་ཁ་གུ་ཧྱ་པཱུ་ཛ་ཧོཿ ཞེས་འཁྱུད་རྒྱ་བྱ། དེ་ཁོ་ན་ཉིད་ཀྱི་མཆོད་པ་ནི། ༀ་བྷ་ག༴ ཝཱ་ར་ཤཱུ་ནྱ་ཏཱ་ཛྙཱ་ན་པཱུ་ཛ་ཧོཿ ཞེས་གནས་ལུགས་ཀྱི་ངང་ལ་མཉམ་པར་བཞག་གོ །ཧཱུྃ། པད་ཉི་འཇིགས་བྱེད་སོགས་དང༌། ལས་བུམ་གྱི་ལྷ་ལ། དཔལ་ལྡན་རིན་ཆེན་མཁའ་འགྲོ་མ། །མཁའ་འགྲོ་མ་ཡིས་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུང་ཐུགས། །འགྲོ་བ་སྐྱོབ་ལ་ཕྱག་འཚལ་བསྟོད། །ཅེས་པས་བསྟོད། བཟླས་པ་བྱ་བ་ནི། གཟུངས་ཐག་ལ་འཇུས་ཏེ། རང་གི་ཐུགས་ཀ་ནས་སྔགས་ཀྱི་ཕྲེང་བ་གཟུངས་ཐག་ལ་འཁྲིལ་ཏེ་བུམ་ནང་གི་ལྷ་ཡི་ཐུགས་ཀར་ཐིམ་པས་ལྷ་ཚོགས་རྣམས་ཀྱི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་ གྱུར་པར་བསམས་ལ། བཟླས་པ་བྱ་བ་ནི། ལྷ་གཙོ་འཁོར་ཐམས་ཅད་ཀྱི་ཐུགས་སྲོག་སྔགས་ཕྲེང་དང་བཅས་པ་མན་ངག་ལྟར་གསལ་བཏབ་ལ། ༀ་ཧྲཱིཿ ཧ་ཧ་ཧུཾ་ཧཱུྃ་ཕཊ། ཡབ་ཀྱི་ཉེ་སྙིང་ངོ༌། །ༀ་ཤྲཱི་བཛྲ་ཧེ་ཧེ་རུ་རུ་ཀཾ་ཧུཾ་ཧཱུྃ་ཕཊ། ཌཱ་ཀི་ནཱི་ཛྭ་ལ་སམྦ་རཾ་སྭཱ་ཧཱ། ཡབ་ཀྱི་སྙིང་པོའོ། །ༀ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུྃ་ཧཱུྃ་ཕཊ། ཡུམ་གྱི་སྙིང་པོའོ། །ༀ་བཛྲ་བཻ་རོ་ཙ་ནཱི་ཡེ་ཧུཾ་ཧཱུྃ་ཕཊ། ཡུམ་གྱི་ཉེ་སྙིང་ངོ༌། །འདི་རྣམས་བརྒྱ་རྩ་ལས་མི་ཉུང་བར་ཅི་འགྲུབ་བཟླ། མཁའ་འགྲོ་མ་བཞི། འཁོར་ལོ་གསུམ། སྒོ་མཚམས་མ་བརྒྱད་བཅས་ཀྱི་སྔགས་རྣམས་ཀྱང་ཉེར་གཅིག་གམ་བདུན་རེ་ཙམ་བཟླ། གཟུངས་ཐག་ལས་བུམ་ལ་སྤོས་ཏེ། ༀ་ཁཎྜ་རོ་ཧེ་ཧུཾ་ཧཱུྃ་ཕཊ། མཐར་མཆོད་པ་ཁ་གསོ། གཏོར་མ་བྱིན་རླབས་ནི། ༀ་སྟོང་པ་ཉིད་དུ་གྱུར། ཨཱཿ རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་འོད་དུ་ཞུ་བ་ལས་བྱུང་བའི་གཏོར་མ་གཟུགས་དམ་པ། སྒྲ་དམ་པ། དྲི་དམ་པ། རོ་དམ་པ། རེག་བྱ་དམ་པ། འདོད་པའི་ཡོན་ཏན་ལྔ་དང་ལྡན་པ་ཡུལ་ས་དང་ནམ་མཁའ་བར་སྣང་ཐམས་ཅད་ལ་ཁྱབ་ཅིང་རྒྱས་པ་ཉིད་དུ་གྱུར། ༀ་ཨཱཿ ཧཱུྃ་ཧ་ཧོཿ ཧྲཱིཿ ལན་གསུམ་གྱིས་བརླབ། རྡོ་རྗེ་ཐལ་མོ་ཁ་གྱེན་དུ་ཕྱེ་བའི་ཕྱག་རྒྱས། ༀ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སམྦ་རཾ་ཝཱི་ར་ཡོ་གི་ནཱི་ཁཎྜ་རོ་ཧི་ས་པ་རི་ཝཱ་ར་ཨི་དཾ་བ་ལ་ཏ་ཁ་ཁ་ཁཱ་ཧི་ཁཱ་ཧིཿ ལན་གསུམ་གྱིས་ཕུལ་ལ། བཅོམ་ལྡན་འདས་དཔལ་འཁོར་ལོ་སྡོམ་པའི་ལྷ་ཚོགས་རྣམས་ཀྱིས་བདག་ཅག་རྣམས་ལ་ཐུགས་བརྩེ་བ་ཆེན་པོས་དགོངས་ཏེ་མཆོག་ཐུན་མོང་གི་དངོས་གྲུབ་མ་ལུས་པ་སྩོལ་བ་དང་བདེ་ཆེན་ཕྱག་ རྒྱ་ཆེན་པོའི་དངོས་གྲུབ་མྱུར་བ་ཉིད་དུ་སྩལ་བར་མཛད་དུ་གསོལ། སླར་ཡང་སྒྲུབ་ཐབས་ལྟར་མཆོད་རྫས་བྱིན་བརླབ། རབ་འབྱམས་ཞིང་གི་དཀྱིལ་འཁོར་ཐམས་ཅད་པར། །རྒྱལ་བའི་སྤྱན་ལ་མཛེས་པ་མ་ལུས་ཀུན། །གཅིག་བསྡུས་གཟུགས་ཀྱི་རྡོ་རྗེའི་སྒྱུ་འཕྲུལ་དཔྱིད། །བཅོམ་ལྡན་བུམ་པའི་ལྷ་ལ་འབུལ་བར་བགྱི། །ༀ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སམྦ་རཾ་ཝཱི་ར་ཡོ་གི་ནཱི་ཁཎྜ་རོ་ཧེ་ས་པ་རི་ཝཱ་ར་བཛྲ་རཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུྃ༑ རབ་འབྱམས་ཞིང་གི༴ རྒྱལ་བའི་སྙན་ལ་འཇེབས་པ་མ་ལུས་ཀུན། །གཅིག་བསྡུས་སྒྲ་ཡི་རྡོ་རྗེའི་སྒྱུ་འཕྲུལ་དཔྱིད། །བཅོམ་ལྡན་བུམ༴ ཤབྡ་པཱུ་ཛ༴ རབ་འབྱམས༴ རྒྱལ་བའི་ཤངས་ལ་ཞིམ་པ་མ་ལུས་ཀུན། །གཅིག་བསྡུས་དྲི་ཡི་རྡོ་རྗེའི་སྒྱུ་འཕྲུལ་དཔྱིད། །བཅོམ་ལྡན༴ གནྡྷེ་པཱུ་ཛ༴ རབ་འབྱམས༴ རྒྱལ་བའི་ལྗགས་ལ་བདའ་བ་མ་ལུས་ཀུན། །གཅིག་བསྡུས་རོ་ཡི་རྡོ་རྗེའི་སྒྱུ་འཕྲུལ་དཔྱིད། །བཅོམ་ལྡན༴ ར་ས་པཱུ་ཛ༴ རབ་འབྱམས༴ རྒྱལ་བའི་སྐུ་ལ་བདེ་བ་མ་ལུས་ཀུན། །གཅིག་བསྡུས་རེག་བྱ་རྡོ་རྗེའི་སྒྱུ་འཕྲུལ་དཔྱིད། །བཅོམ་ལྡན༴ སྤརྴེ་པཱུ་ཛ༴ སྲབ་འཇམ་ཡང་བ་ལྷ་ཡི་གོས། །མི་བསྐྱོད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། ། བདག་ཀྱང་རྡོ་རྗེའི་སྐུ་ཐོབ་ཤོག །ༀ་བྷ་ག་ཝན༴ བཛྲ་སྤརྴེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུྃ། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སེལ་ མཛད་པའི། །སྤྲིན་རྣམས་སོ་སོར་གནས་གྱུར་ཅིག །ཅེས་རོལ་མོ་བྱའོ། །བསྟོད་པ་ནི། ཧཱུྃ། བཅོམ་ལྡན་མགོན་པོ་སོགས་ཡབ་ཡུམ་གྱི་རྐང་བརྒྱད་དང༌། དཔལ་ལྡན་རིན་ཆེན་མཁའ་འགྲོ་མ། །སོགས་ཀྱིས་བསྟོད། དེ་ནས་བདུད་རྩིར་བསྒྱུར་བ་ནི། དུང་ཆོས་ཀྱི་མཆོད་ཡོན་གཙོ་བོ་དང་ལས་ཀྱི་བུམ་པར་དབུལ་བ་དང་བཅས། རང་གི་ཐུགས་ཀའི་ཧཱུྃ་ཡིག་ལས་འོད་ཟེར་བུམ་ནང་དུ་འཕྲོས་པས། བུམ་ནང་གི་ལྷ་ཡེ་ཤེས་པ་རྣམས་ཕྱེ་སྟེ་རང་གི་སྙིང་གར་ཛཿ ཧཱུྃ་བྃ་ཧོཿ དམ་ཚིག་པ་འོད་དུ་ཞུ་བ་ལས་བྱུང་བའི་བདུད་རྩིའི་ནུས་པ་ཕུན་སུམ་ཚོགས་པས་བུམ་པ་གང་བར་གྱུར་པར་བསམ་མོ། །སློབ་མ་སྟ་གོན་ནི། སྨིན་ལམ་ཡིད་བཞིན་ནོར་བུ་ལས་རྩ་བའི་སྡོམ་ཚིག་བཅོ་ལྔར་གསུངས་ཀྱང༌། འདིར་མདོར་བསྡུས་ཙམ་དུ། ཐོག་མར། སློབ་མ་རྣམས་ཕྱི་རོལ་དུ་ཁྲུས་བྱ། ནང་དུ་འཁོད། མཎྜལ་བཀྱེ་བསྡུ་བྱས་ལ། མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བདེ་ཆེན་ཕྱག་རྒྱ་ཆེན་པོ་དཔལ་འཁོར་ལོ་བདེ་མཆོག་གི་གོ་འཕང་ཐོབ་པར་བྱ། དེའི་ཆེད་དུ་ཟབ་ལམ་མཁའ་འགྲོ་སྙན་བརྒྱུད་ཀྱི་སྨིན་བྱེད་ཀྱི་དབང་བསྐུར་ཞུས་ནས་གྲོལ་བྱེད་རིམ་པ་གཉིས་ཀྱི་རྣལ་འབྱོར་ཉམས་སུ་བླང་བར་བགྱིའོ་སྙམ་དུ་བྱང་ཆུབ་མཆོག་ཏུ་སེམས་བསྐྱེད་པ་དང༌། ཆོས་གསན་པའི་ཀུན་སྤྱོད་རྣམས་ཚུལ་བཞིན་ལྡན་པས་གསན་པར་ཞུ། འདིར་དྲང་ངེས་ཀྱི་ཆོས་བཤད་དང་བརྒྱུད་པ་ཡིད་བཞིན་ནོར་བུའི་ལོ་རྒྱུས་རྒྱས་པར་བཤད་པར་གསུངས་ལ། མི་ནུས་པས་མདོར་བསྡུ་ན། དེའང་རང་རེ་རྣམས་རྙེད་པར་དཀའ་བ་དལ་བ་བརྒྱད་འབྱོར་པ་བཅུ་དང་ལྡན་པའི་མི་ལུས་རིན་པོ་ཆེ་ ལྷ་བས་ལྷག་པའི་ལུས་རྟེན་ཁྱད་པར་ཅན་ཐོབ། མཇལ་བར་དཀའ་བའི་བླ་མ་དགེ་བའི་བཤེས་གཉེན་མཚན་ཉིད་དང་ལྡན་པ་མཇལ། ཐོས་པར་དཀའ་བ་དམ་པའི་ཆོས་སྤྱི་དང་ཁྱད་པར་ཐེག་པ་ཆེན་པོ། དེའི་ཡང་སྙིང་དུས་གསུམ་དུ་འབྱོན་པར་དཀའ་བ་གསང་སྔགས་རྡོ་རྗེ་ཐེག་པའི་ཟབ་ཆོས་འདི་ལྟ་བུ་ནི་དབུལ་པོས་ཡིད་བཞིན་གྱི་ནོར་བུ་རྙེད་པ་ལས་ཀྱང་ངོ་མཚར་ཤིན་ཏུ་ཆེ་བ་ཡིན་ཀྱང༌། མྱུར་དུ་ཉམས་ལེན་ལ་མ་འབད་ན། སྤྱིར་འདུས་བྱས་ཐམས་ཅད་མི་རྟག །སྒོས་འགྲོ་བའི་ཚེ་སྲོག་ནམ་མཁའི་གློག་དང་ཆུའི་ཆུ་བུར་ལས་ཀྱང་འཇིག་སླ་བས་དེ་རིང་ཙམ་དུའང་མི་འཆི་བའི་ངེས་པ་མེད། ཤི་བའི་འོག་ཏུ་རྣམ་པར་ཤེས་པ་ལས་དགེ་སྡིག་གི་རྗེས་སུ་འབྲང་ཞིང་མཐོ་རིས་དང་ངན་སོང་དུ་སྐྱེ། སྲིད་པའི་རྩེ་མོ་ནས་ན་རཀ་དམྱལ་ཁམས་ཡན་ཆད་སྡུག་བསྔལ་གསུམ་གྱི་རང་བཞིན་ལས་མ་འདས་པས། འཁོར་བ་ཐོག་མ་མེད་པ་ནས་ད་ལྟའི་བར་དུ་ལུས་གྲངས་མེད་པར་བླངས་ཤིང་སྡུག་བསྔལ་དཔག་ཏུ་མེད་པ་མྱོང༌། ད་དུང་ཡང་མཐའ་མེད་པའི་འཁོར་བར་འཁྱམས་ཤིང་སྡུག་བསྔལ་དེ་ཙམ་མྱོང་བར་འགྱུར་བས་འཁོར་བ་སྡུག་བསྔལ་གྱི་རྒྱ་མཚོ་འདི་ལ་ཞེན་ལོག་དང་ངེས་འབྱུང་གི་བློ་དྲག་ཏུ་བསྐྱེད་པ་ཐོག་མར་གལ་ཆེ། འཁོར་བ་ལས་ཐར་བར་བྱེད་པ་ལ་བློ་བླ་མ་དཀོན་མཆོག་ལ་གཏད་ཅིང་སྐྱབས་སུ་འགྲོ། ཐེག་དམན་དང་མཐུན་པར་དགེ་བའི་ལས་བཅུ་བསྒྲུབས་པས་མཐོ་རིས་ཀྱི་བདེ་བ་ཐོབ་ཅིང་དེའང་ བྱང་ཆུབ་སེམས་ཀྱིས་ཟིན་ན་སངས་རྒྱས་འགྲུབ་པའི་རྒྱུར་འགྱུར། མི་དགེ་བ་བཅུ་སྤྱད་ན་ངན་སོང་གི་སྡུག་བསྔལ་ཚད་མེད་པ་མྱོང་བར་འགྱུར་བས་དགེ་བ་ཅི་ནུས་སུ་བསྒྲུབ། སྡིག་པ་མི་དགེ་བ་སྲོག་ལ་བབ་ཀྱང་སྤང་བ་ནི་དམ་པའི་ཆོས་སྒྲུབ་པ་བྱ་བ་ཡིན། གཞན་ཡང་ལུས་ཀྱི་སྒོ་ནས་རྟེན་གསུམ་བཞེངས་པ། ཕྱག་བསྐོར་ལ་བརྩོན་པ། ངག་གི་སྒོ་ནས་མདོ་རྒྱུད་དང་གཟུངས་སྔགས་ཟབ་མོ་ཀློག་པ། ཁ་ཏོན་བཟླས་བརྗོད་གསོལ་འདེབས་ལ་འབད་པ། ཡིད་ཀྱི་སྒོ་ནས་དད་པ་མོས་གུས་ཕན་སེམས་བཟང་པོ། ཁྱད་པར་ཐེག་པ་ཆེན་པོའི་ཆོས་བསྒྲུབ་པ་ལ་བྱང་ཆུབ་ཀྱི་སེམས་བསྐྱེད་བཟང་པོས་ཟིན་པའི་ལྟ་བ་རྣམ་པར་དག་པ་དང༌། སྤྱོད་པའི་ཚུལ་ཁྲིམས་རྣམ་པར་དག་པ་གལ་ཆེ་བ་ལགས། དེ་དག་ནི་ངེས་འབྱུང་བསྐྱེད་ནས་བློ་བཅོས་པར་གསུངས་པ་རྣམས་ཡིན་ལ་སྐབས་སུ་བབ་པའི་ལོ་རྒྱུས་ཅུང་ཟད་བརྗོད་ན། ཐེག་དམན་ཉན་ཐོས་ཀྱི་གྲུབ་མཐའ་འཛིན་པ་བརྒྱ་ཕྲག་ལས་ཐེག་ཆེན་གྱི་སྡེ་སྣོད་འཛིན་པ་གཅིག་གིས་ཁྱད་པར་འཕགས། ཐེག་ཆེན་པ་བརྒྱ་ལས་ཀྱང་སྔགས་ལམ་ལ་ཞུགས་པ་གཅིག་གིས་ཁྱད་པར་འཕགས། སྔགས་ཀྱང་བྱ་སྤྱོད་རྣལ་འབྱོར་བླ་མེད་ཀྱི་རྒྱུད་སྡེ་བཞི་པོ་གོང་ནས་གོང་དུ་ཁྱད་པར་འཕགས་པས། དེང་སང་བསྟན་པའི་མཐར་ཐུག་པའི་དབང་གིས་ཚེ་འདིར་འབྲས་བུ་དངོས་སུ་ཐོབ་པ་དཀོན་ཀྱང༌། དབང་ཐོབ་ཅིང་དམ་ཚིག་མ་ཉམས་ལ་སྔགས་ཀྱི་ལྟ་སྤྱོད་ལ་ཐེ་ཚོམ་མེད་པའི་དད་ མོས་དང་ལྡན་ན་བསྐྱེད་རྫོགས་ཀྱི་ཏིང་ངེ་འཛིན་ཆེར་ཉམས་སུ་མ་ལོན་ཀྱང་དབང་པོ་རབ་མི་ཚེ་གསུམ། དབང་པོ་འབྲིང་སྐྱེ་བ་བདུན། དབང་པོ་ཐ་མའང་སྐྱེ་བ་བཅུ་དྲུག་ནས་འབྲས་བུ་མཆོག་ཐོབ་པ་རྒྱལ་བ་དྲུག་པ་རྡོ་རྗེ་འཆང་གི་གསུང་མི་བསླུ་བའི་ཚད་མ་ཅན་ཡིན། དེ་ལས་ད་ལམ་སྐབས་སུ་བབ་པ་འདི་ནི་མ་རྒྱུད་ཐམས་ཅད་ཀྱི་ཡང་སྙིང་དཔལ་འཁོར་ལོ་སྡོམ་པ་ཡིན། རྒྱ་གར་འཕགས་པའི་ཡུལ་དུ་ལུ་དྲིལ་ནག་གསུམ་གཙོ་བོར་གྱུར་པའི་གྲུབ་ཐོབ་གྲངས་མེད་པ་བྱོན་པ་ཐམས་ཅད་ཕལ་ཆེར་འཁོར་ལོ་སྡོམ་པའི་སྒོ་ནས་གྲུབ་པ་ཐོབ་པ་ཤ་སྟག་ཡིན་པར་སྣང་ལ། བཀའ་སྲོལ་ཡང་མི་འདྲ་བ་ཉི་ཤུ་རྩ་བཞི་ཙམ་བྱུང་བ་ཕལ་ཆེར་བོད་དུའང་བྱོན་ལ་དེང་སང་ཡང་རྒྱུན་བཞུགས་པར་འདུག །ཐམས་ཅད་ལས་ཁྱད་པར་དུ་འཕགས་པ་སྙན་བརྒྱུད་ཀྱི་སྐོར་འདི་ནི་འཕགས་ཡུལ་གྲུབ་པའི་དབང་ཕྱུག་ཏཻ་ལོ་ཤེས་རབ་བཟང་པོས་རྡོ་རྗེ་འཆང་དངོས་སུ་མཇལ་ནས་བྱིན་གྱིས་བརླབས་པས་རྒྱུད་སྡེ་ཐམས་ཅད་ཀྱི་མངའ་བདག་ཏུ་གྱུར་ཀྱང་ཚུ་རོལ་མཐོང་བ་རྣམས་ཀྱི་སྣང་ངོར་བཀའ་བབས་བཞིའི་བླ་མ་རྣམས་བརྟེན་ནས་དེ་སྐབས་སུ་བཞུགས་སོ་ཅོག་གི་རྒྱུད་སྡེ་རྣམས་གསན་པའི་ཚུལ་བསྟན། ཁྱད་པར་དུ་གསང་བ་ཐམས་ཅད་ཀྱི་འབྱུང་གནས་ནུབ་ཕྱོགས་ཨོ་རྒྱན་ཡུལ་དུ་ཕེབས་ནས་ཆོས་སྐུ་ཡེ་ཤེས་ཀྱི་མཁའ་འགྲོ་རྡོ་རྗེ་རྣལ་འབྱོར་མ་དངོས་སུ་མཇལ་བའི་སྐབས། རྣལ་འབྱོར་མས་བརྡ་གསུམ་བསྟན་པས། ཏཻ་ལོ་པས་བརྡའི་ དོན་གོ་སྟེ། སྐུ་ཙཀ་ལི་ཡི་དཀོར་མཛོད་ནས། །བརྒྱུད་པ་ཡིད་བཞིན་ནོར་བུ་ཞུ། །གསུང་ཡི་གེ་བདུན་གྱི་དཀོར་མཛོད་ནས། །སྨིན་ལམ་ཡིད་བཞིན་ནོར་བུ་ཞུ། །ཐུགས་རྡོ་རྗེ་རྩེ་ལྔའི་ཕོ་བྲང་ནས། །གྲོལ་ལམ་ཡིད་བཞིན་ནོར་བུ་ཞུ། །ཞེས་གསོལ་བ་བཏབ་པས། རྣལ་འབྱོར་མས་བརྡའི་དོན་ཁྲོལ་བས། དབང་རབ་སྐལ་ལྡན་གྱི་གང་ཟག་ཏུ་དགོངས་ནས། སྙན་བརྒྱུད་ནོར་བུ་རྣམ་གསུམ་གྱི་མཛོད་ཡོངས་སུ་རྫོགས་པར་གཏད་ནས༑ མི་རབས་བཅུ་གསུམ་དུ་ཆིག་བརྒྱུད་ཀྱི་བཀའ་རྒྱས་བཏབ། དེ་ལ་པཎ་ཆེན་ནཱ་རོ་པས་མི་ལོ་བཅུ་གཉིས་སུ་བསྟེན་ཏེ་དཀའ་བ་ཆེན་པོ་བཅུ་གཉིས་སྤྱད་པའི་མཐར་འཁོར་ལོ་སྡོམ་པ་སྤྱི་དང༌། ཁྱད་པར་སྙན་བརྒྱུད་འདི་ཉིད་གནང་བས་གྲུབ་པའི་གོ་འཕང་མཐོན་པོར་གཤེགས། དེ་ལ་བོད་ཡུལ་གྱི་ལྷོ་བྲག་མར་པ་ལོ་ཙཱ་ཞེས་ཕྱི་དར་གྱི་ལོ་ཙཱའི་ནང་ནས་སུས་ཀྱང་འགྲན་ཟླ་མེད་པ་ཡོངས་སུ་གྲགས་པ་བཅོམ་ལྡན་འདས་དགྱེས་མཛད་རྡོ་རྗེ་དང༌། ཌ໋་བི་ཧེ་རུ་ཀ་མིའི་སྲིད་པ་བཟུང་བ་དེ་ཉིད་ཀྱིས་དཀའ་བ་ཆེན་པོར་སྤྱད་ནས་རྒྱ་གར་དང་བལ་ཡུལ་དུ་ལན་བཞི་བྱོན། འཕགས་ཡུལ་མཐའ་དབུས་མེད་པར་ཕེབས་ནས་མཁས་གྲུབ་ཀྱི་བླ་མ་བརྒྱ་དང་ལྔ་བཅུ་བསྟེན་ཏེ་གསན་བསམ་མཐའ་ཡས་པ་མཛད་ཚུལ་རྡོ་རྗེའི་མགུར་ལས་གསལ་བ་ལྟར་དང༌། ཁྱད་པར་པཎ་ཆེན་ནཱ་རོ་པ་ཉིད་ལོ་དྲུག་དང་ཟླ་བ་བདུན་བསྟེན་ནས་གསན་བསམ་སྒོམ་པ་ཆབས་ཅིག་ཏུ་མཛད་པས་གྲུབ་པའི་ དབང་ཕྱུག་ཆེན་པོར་གྱུར་ནས་འཕགས་ཡུལ་དུའང་གྲུབ་ཐོབ་ཀྱི་སྙན་པས་ཁྱབ། ལན་རྗེས་མར་ཕེབས་སྐབས་དཔལ་ནཱ་རོ་པ་སྤྱོད་པ་ལ་གཤེགས་ནས་སློབ་མ་ཉིད་དང་སྐལ་མཉམ་རེ་རེ་ཙམ་མ་གཏོགས་ཐུན་མོང་བ་སུས་ཀྱང་མཇལ་རྒྱུ་མེད་པ་ལ་རྗེ་མར་པས་ཚོགས་འཁོར་ཕུལ་ཞིང་གསོལ་བ་རྩེ་གཅིག་ཏུ་བཏབ་ནས་རྒྱ་གར་གྱི་ཡུལ་ཕྱོགས་ཀུན་ཏུ་བཙལ་བས་བྱང་པུཥྤ་ཧ་རིའི་དགོན་པར་མངོན་སུམ་དུ་མཇལ་ནས་ཟླ་བ་དྲུག་བཞུགས་པའི་སྐབས་སྙན་བརྒྱུད་ནོར་བུ་སྐོར་གསུམ་གདམས་པ་ཞུས་པས་ཁྱོད་ལ་གདམས་པ་འདི་འདྲ་ཡོད་ཅེས་སུས་ཟེར་གསུངས། ང་ལ་བོད་ན་སློབ་མ་མི་ལ་ཐོས་པ་དགའ་ཞེས་བྱ་བ་ཞིག་ཡོད་པས། དེ་ལ་མཁའ་འགྲོ་མས་ལུང་བསྟན་བྱུང་ཟེར་ཞུས་པས། དེ་མ་ཐག་ཐལ་མོ་སྦྱར་ཏེ། བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བ། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་ཕྱག་འཚལ་ལོ། །ཞེས་གསུངས་ནས་དབུ་དུད་པར་མཛད་པས་ཕྱོགས་དེའི་རྩི་ཤིང་རྣམས་ཀྱང་ལྷོ་ཕྱོགས་སུ་མགོ་དུད་པ་ད་ལྟའི་བར་དུ་ཡོད་པར་བཤད། རྗེ་མར་པའི་སློབ་མ་གཙོ་བོ་ཀ་ཆེན་བཞི་ལས་མེས་རྔོག་མཚུར་གསུམ་ལ་བཤད་བརྒྱུད་ཀྱི་བཀའ་བབས། རྗེ་བཙུན་མི་ལ་ལ་སྒྲུབ་བརྒྱུད་ཀྱི་བཀའ་བབས་ཏེ་སྙན་བརྒྱུད་ནོར་བུ་རྣམ་གསུམ་གྱི་གདམས་ངག་རྫོགས་པར་ཆིག་བརྒྱུད་དུ་གནང༌། རྗེ་བཙུན་མི་ལས་མིའི་ལྟོ་གོས་ཐམས་ཅད་སྤངས་ཏེ་མངའ་རིས་སྟོད་ཀྱི་གངས་བྲག་རྣམས་སུ་ཟྭ་ཚོད་དང་རས་གོས་ཙམ་ལ་བརྟེན་ཏེ་སྐུ་ཚེ་གཅིག་ཏུ་སྒྲུབ་པའི་རྒྱལ་མཚན་བཙུགས་པས་བོད་ཡུལ་ཙམ་ན་ཡོངས་སུ་གྲགས་པའི་གྲུབ་ཐོབ་ཆེན་པོ་འཕགས་ཡུལ་གྱི་གྲུབ་ཆེན་རྣམས་དང་རྣམ་དབྱེར་མེད་པ་བྱུང༌། དེ་ལ་སློབ་མ་མཁའ་སྤྱོད་དུ་གཤེགས་པ་བརྒྱད་སོགས་གྲངས་ལས་འདས་པ་བྱུང་ཡང་གཙོ་བོར་གྱུར་པ། ཉི་མ་ལྟ་བུ་དྭགས་པོ་ཟླ་འོད་གཞོན་ནུ་དང༌། ཟླ་བ་ལྟ་བུ་རས་ཆུང་རྡོ་རྗེ་གྲགས་པ་གཉིས་ཡིན་ལ། སྐབས་ཤིག་ཏུ་རྗེ་བཙུན་ཉིད་ལ་ཡི་དམ་རྡོ་རྗེ་ཕག་མོས་ལུང་བསྟན་ཏེ་ཐུགས་སྲས་བརྒྱད་ལ་སྙན་བརྒྱུད་ཀྱི་དུམ་བུ་རེ་བྱིན་ཅིག་ཅེས་གསུངས་པ་ལྟར་གནང་བར་ངེས་ཀྱང་རས་པ་ཞི་བ་འོད་དང༌། ཁྱི་ར་བ་མགོན་པོ་རྡོ་རྗེ་སོགས་ཕལ་ཆེར་མཁའ་སྤྱོད་དུ་གཤེགས་པས་བརྒྱུད་པ་འཛིན་པ་ནི་མ་བྱུང་བར་སྣང༌། རས་ཆུང་རྡོ་རྗེ་གྲགས་པ་ལ་གནང་བ་སྙན་བརྒྱུད་འབྲིང་པོ་དང༌། མཉམ་མེད་དྭགས་པོ་རིན་པོ་ཆེ་ལ་གནང་བ་སྙན་བརྒྱུད་རྒྱས་པ་དང༌། ངམ་རྫོང་སྟོན་པ་བྱང་ཆུབ་རྒྱལ་པོར་གནང་བ་ལ་སྙན་བརྒྱུད་བསྡུས་པ་ཞེས་གྲགས་ཤིང༌། དེ་གསུམ་ཀའི་སྨིན་གྲོལ་ཡིག་ཆ་ཚང་མའི་རྒྱུན་བཅས་ད་ལྟའི་བར་མ་ཉམས་པར་བཞུགས་པ་ལས༑ སྐབས་སུ་བབ་པ་འདི་ནི་རས་ཆུང་པའི་ལུགས་ཡིན། དེ་ལའང་རས་ཆུང་སློབ་མ་གྲུབ་ཐོབ་ཆེན་པོ་ཁྱུང་ཚང་རས་པ་ནས་རིམ་པར་བྱོན་ཏེ་བརྒྱུད་པ་བཅོ་བརྒྱད་པ་གཙང་སྨྱོན་ཧེ་རུ་ཀའི་བར་དུ་བྱོན་པ་རྣམས་ལ། རྩ་བ་རྡོ་རྗེའི་ཚིག་རྐང་དང༌། ཡིག་ཆ་ས་བོན་ཙམ་ལས་ཡིག་ཚོགས་རྒྱས་པར་མ་བཞུགས་པར་མངོན་ལ། གཙང་སྨྱོན་ཧེ་རུ་ཀ་ཕྱོགས་ལས་རྣམ་རྒྱལ་གྱིས་ནོར་བུ་སྐོར་གསུམ་གྱི་གཞུང༌། འགྲེལ་བཤད། ཁྲིད་ཡིག་རྣམས་སོགས་ཡིག་ཆ་གསལ་ལ་རྒྱས་པར་མཛད་ཅིང༌། དེའི་སློབ་མ་རྒོད་ཚང་རས་པ་སོགས་ཀྱིས་ཀྱང་ཡིག་ཆ་མང་དུ་མཛད་པའི་རྒྱུན་དེང་སང་ཡང་བཞུགས་པ་འདི་ནི་རས་ཆུང་རྩ་བའི་བཀའ་བརྒྱུད་ཡིན་ལ། ཡང་འགྲོ་མགོན་གཙང་པ་རྒྱ་རས་ཀྱིས་རས་ཆུང་རྡོ་རྗེ་གྲགས་པས་སྦས་པའི་གཏེར་ཁ་རོ་སྙོམས་སྐོར་དྲུག་སོགས་ལྷོ་བྲག་མཁར་ཆུ་ནས་སྤྱན་དྲངས་པ་དང༌། ཕྱིས་ཆོས་རྗེ་འབྲུག་པ་ལ་བཀའ་བབས་པའི་རས་ཆུང་སྙན་བརྒྱུད་འབྲུག་ལུགས་ཀྱང་མཆིས་པ་ལས་འདི་རྩ་བའི་བཀའ་བརྒྱུད་ཀྱི་ལུགས་ཡིན། འདིའི་སྨིན་བྱེད་ཀྱི་དབང་བསྐུར་བ་ལ་སློབ་མ་དབང་པོ་རབ་འབྲིང་ཐ་གསུམ། དེ་རེ་རེ་ལའང་ནང་གསེས་ཀྱིས་གསུམ་གསུམ་དུ་དབྱེ་བས་ནང་གསེས་དགུར་ཡོད་པའི་དབང་དུ་མཛད་ནས་དཀྱིལ་འཁོར་སྒྲུབ་ཚུལ་དང་དབང་བསྐུར་ཚུལ་རྣམ་གྲངས་བཞི་བཅུ་རྩ་གཉིས་ཙམ་གསུངས་ཀྱང་མདོར་བསྡུ་ན་ཡབ་རྒྱལ་པོ་ལྟ་བུའི་དཀྱིལ་འཁོར་བཞི། ཡུམ་བཙུན་མོ་ལྟ་བུའི་དཀྱིལ་འཁོར་བཞི། དེ་རྣམས་དང་འབྲེལ་བའི་རང་བྱུང་ལུས་ཀྱི་དཀྱིལ་འཁོར་དང་དགུ་ཡོད་པ་ལས་ད་ལམ་རིམ་གྱིས་པ་རྗེས་སུ་བཟུང་ཐབས་ཡབ་ཀྱི་དཀྱིལ་འཁོར་ལྷ་དྲུག་ཅུ་རྩ་གཉིས་ལ་ བརྟེན་པའི་སྨིན་བྱེད་ཀྱི་དབང་བསྐུར་བ་ལ་སློབ་མ་ལྷག་པར་གནས་པ་སྟ་གོན་གྱི་རིམ་པ་དང༌། དངོས་གཞིའི་དབང་བསྐུར་བ་གཉིས་སུ་འབྱུང་བ་ལས། ད་ལྟའི་སྐབས་སུ་སློབ་མ་སྟ་གོན་གྱི་རིམ་པ་རྣམས་བསྒྲུབ་པར་བྱ་བ་ལགས་པས་དེ་ཉིད་ཞུ་བའི་སླད་དུ་ཞིང་ཁམས་འབུལ་བར་ཞུ། ཞེས་སློབ་མ་རྣམས་ཀྱིས་མཎྜལ་འབུལ། དེ་ནས་གསོལ་བ་གདབ་པ་ནི། རྡོ་རྗེ་ཕག་མོས་མགྲིན་འཁྱུད་པའི། །དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ༑ ༑སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་གསུམ། དེ་ནས་ཁྱད་པར་གྱི་ཆོས་བཤད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམྦཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ༌། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་བསམ་ཡས་སུ། །སྔོན་དུ་སྡིག་པ་བྱས་པ་གང༌། །དཀྱིལ་འཁོར་བཟང་པོ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་བརྗོད་པའི། །ཚུལ་ལ་གནས་ན་སྨོས་ ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་གིས་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་སྤོང་བར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་ཉིད། །གང་ཕྱིར་རྒྱལ་བ་སྲས་བཅས་པའི། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་དུ། །ད་ལྟ་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་འདིར་ནི་དོང་བས་ན། །རང་བྱུང་སྐལ་བ་ཆེན་པོ་པ། ། འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཞེས་དང༌། བསྐལ་པར་བསགས་པའི་མུན་པ་ཡང༌། ཉི་ཟླ་དང་སྒྲོན་མེ་ལ་སོགས་པའི་འོད་ཀྱི་སྣང་བ་སྐད་ཅིག་མ་གཅིག་གིས་སེལ་ནུས་པ་ལྟར། ཚེ་འཁོར་བ་ཐོག་མཐའ་མེད་པ་ནས་བསགས་པའི་སྡིག་སྒྲིབ་རྣམས་ཀྱང་ཡེ་ཤེས་ཀྱི་སྣང་བ་སྐད་ཅིག་མས་སེལ་ནུས་པའི་ཐབས་གསང་སྔགས་རྡོ་རྗེ་ཐེག་པའི་དབང་ཟབ་མོ་བསྐུར་བས། ཁྱེད་རྣམས་དགའ་བ་དང་སྤྲོ་བར་གྱིས་ཤིག །ཅེས་བརྗོད། དེ་ནས་སྡོམ་པ་སྦྱིན་པ་ལ་བྱང་སེམས་ཀྱི་སྡོམ་པ་ནི་རྗེས་ཟློས་བྱས་ཏེ། བླ་མ་ཡི་དམ་གཙོར་བཞུགས་པའི། །སྲས་བཅས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་ མ་ཚོགས་ཀུན། །ཐམས་ཅད་བདག་ལ་དགོངས་སུ་གསོལ། །ཆྒཻ་མོ་ཞེས་བགྱི་བ་བདག །བླ་མེད་བྱང་ཆུབ་མ་ཐོབ་བར། །དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ་བརྗོད། རིག་འཛིན་སྔགས་ཀྱི་སྡོམ་པ་སྦྱིན་པ་ནི། བླ་མ་ཡི་དམ་ནས། དགོངས་སུ་གསོལ། །གྱི་མཐར། ཆྒཻ་མོ་ཞེས་བགྱི་བ་བདག །དུས་འདི་ཉིད་ནས་བཟུང་ནས་ནི། །ཇི་སྲིད་བྱང་ཆུབ་མ་ཐོབ་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང༌། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་ སྡོམ་པ་མ་ལུས་བཟུང༌། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་རྗེས་ཟློས་བྱ། ནང་གི་དབང་བསྐུར་བ་ནི། བླ་མ་དཀྱིལ་འཁོར་གྱི་གཙོ་བོ་ཡབ་ཡུམ་དང་བཅས་པར་གསལ་བའི་ཐུགས་ཀའི་ཧཱུྃ་གི་འོད་ཀྱིས་སློབ་མ་རྣམས་ཀྱི་སྒོ་གསུམ་གྱི་དྲི་མ་སྦྱངས་ཤིང༌། འོད་དུ་ཞུ་ཧཱུྃ་རེ་རེར་གྱུར་ཏེ་ཡབ་ཀྱི་ཞལ་དུ་དྲངས་ཤིང་ཞུགས་པ། ཐུགས་ཀར་རྗེས་ཆགས་ཀྱི་མེས་འོད་དུ་ཞུ་གསང་གནས་བརྒྱུད་ཡུམ་གྱི་མཁར་བྱོན་པས་ཧེ་རུ་ཀ་ཞལ་གཅིག་ཕྱག་གཉིས་པ་རེ་རེར་གྱུར་པ་ལ་སློབ་དཔོན་གྱིས་གོ་ཆ་བགོ་བ་ནི། བཅོམ་ལྡན་འདས་ཀྱི་ཐུགས་ཀར་ༀ་ཧ་ལས་རྡོ་རྗེ་སེམས་དཔའ་དཀར་པོ་ཞེས་སོགས་སྒྲུབ་ཐབས་ལྟར་བརྗོད་ལ། པད་ཉི་རོའི་གདན་ལ་བཞུགས་པ་དེ་དཔའ་བོ་དཔའ་མོ་ཐམས་ཅད་མེ་ལོང་ནང་གི་གཟུགས་བརྙན་ལྟར་སྣང་ལ་རང་བཞིན་མེད་པར་གསལ་བཏབ། ཡེ་ཤེས་པ་གཞུག་པ་ནི། བླ་མ་དཀྱིལ་འཁོར་གཙོ་བོར་གསལ་བའི་ཐུགས་ཀའི་ཧཱུྃ་ལས་འོད་འཕྲོས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཧེ་རུ་ཀའི་རྣམ་པར་ༀ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སཾ་ བ་ར་ཝཱི་ར་ཡོ་གི་ནཱི་ས་པ་རི་ཝཱ་ར་བཛྲ་ས་མཱ་ཛཿ ཞེས་ཡེ་ཤེས་པ་སྤྱན་དྲངས། ༀ་བྷ་ག་ཝཱན་ཤྲཱི་ཧེ་རུ་ཀ་སོགས་མཚན་སྔགས་ཀྱི་མཐར། ཨ?ཾ་པྲ་ཏཱིཙྪ་སྭཱ་ཧཱ། ཞེས་སོགས་ཀྱིས་མཆོད། ཡེ་ཤེས་པ་དེ་རྣམས་ཁྱེད་རང་རྣམས་ལ་བསྟིམས་བྱུང་སྙམ་པའི་མོས་པ་མཛོད། ཕྱག་རྒྱ་དང་བཅས། ཛཿ ཧཱུྃ་བྃ་ཧོཿ ཞེས་རོལ་མོ་བྱ། སླར་ཡང་བླ་མའི་ཐུགས་ཀའི་ཧཱུྃ་ལས་འོད་འཕྲོས། རང་བཞིན་གྱི་གནས་ནས་རིགས་ལྔ་འཁོར་དང་བཅས་པ་ༀ་པཉྩ་ཀུ་ལ་ས་པ་རི་ཝཱ་ར་བཛྲ་ས་མཱ་ཛཿ པདྨ་ཀ་མ་ལཱ་ཡེ་སྟྭཾ། ༀ་པཉྩ༴ ཨ?ཾ༴ ཆོས་སྐུ་ནམ་མཁའ་བཞིན་དུ་སོགས། བཅོམ་ལྡན་རྒྱལ་བ་རིགས་ལྔ་འཁོར་དང་བཅས་པས་སློབ་མ་འདི་རྣམས་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་རིགས་ལྔའི་འཁོར་རྣམས་ཀྱིས་རོལ་མོའི་སྒྲ་སྣ་ཚོགས་སྒྲོགས་ཤིང་མཆོད་པ་སྣ་ཚོགས་འབུལ་བ་དང་བཅས་ཏེ། ཧེ་རུ་ཀ་དཔལ་འཁོར་བཅས་ཀྱིས། །སྐུ་གསུང་ཐུགས་ལས་བྱུང་བ་ཡི། །སྒྲིབ་གཉིས་བག་ཆགས་སྦྱོང་བྱེད་པའི། །རྡོ་རྗེའི་དབང་བསྐུར་ཆེན་པོ་སྦྱིན། །ༀ་གུ་རུ་སརྦ་ཏ་ཐཱ་ག་ཏ༴ ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར་བས་སྐུ་གང་དྲི་མ་དག་ཆུ་ལྷག་མ་ཡར་ལུད་པ། སྤྱི་བོར་འཁྱིལ་བ་མི་བསྐྱོད་པ་སྤྲུལ་སྐུའི་ཆ་བྱད་ཅན་རེ་རེས་དབུ་བརྒྱན་པར་གྱུར་པ་དེ་ཉིད་ཡུམ་གྱི་རྩིབས་ལོགས་གཡོན་ནས་ཐོན། པད་ཉི་རོ་གདན་གྱི་སྟེང་དུ་གྲལ་རིམ་གྱིས་བཞག་བྱུང་སྙམ་པའི་མོས་པ་མཛོད། ཅེས་སློབ་དཔོན་རྡོར་དྲིལ་པད་ཀོར་དང་བཅས། ཤྲཱི་ཙཀྲ་སཾ་བ་ར་པདྨ་ཀ་མ་ལཱ་ཡ་སྟྭཾ། ཞེས་པདྨའི་ཕྱག་རྒྱ་དང་བཅས་ཏེ་བཞག །དེ་ནས་བསྲུང་བ་ནི། སྲད་བུ་དམར་པོ་སུམ་བལྟབས་ལ་འབྲུ་གསུམ་བརྗོད་བཞིན་མདུད་པ་གསུམ་བོར་བ་ༀ་ཨཱཿ ཧཱུྃ་གིས་བྱིན་རླབས་བྱས། སྐྱེས་པའི་དཔུང་པ་གཡོན་དང༌། བུད་མེད་ཀྱི་གཡས་སུ་གཉིས་བལྟབས་སུ་བཅིང་ཞིང་མདུད་པ་བོར་ཏེ། ཡི་གེ་བདུན་པ་དང་འབྲུ་གསུམ་བརྗོད་བཞིན་དུ་དུང་ཆོས་སུ་དྲི་བཟང་ལས་བུམ་གྱི་ཆུ་བླུགས་ལ་རྡོ་རྗེ་འཛིན་པས་སྲིན་ལག་གཡོན་པས་མནན། དེ་བཞིན་དཔྲལ་མགྲིན་སྙིང་གར་རེག་ལ། དེ་ཡང་སྲུང་སྐུད་དམར་པོ་འདོམ་གང་བ་སྐྱེས་པའི་གཡོན་དང༌། བུད་མེད་ཀྱི་གཡས་ཀྱི་དཔུང་པར་འཆིང་བ་དེས་བྱང་སེམས་དཀར་དམར་སྲུང་བར་བྱེད་པ་ཡིན། དྲི་བཟང་གི་ཆུས་སྙིང་ག །མགྲིན་པ། དཔྲལ་བ་རྣམས་སུ་མས་རིམ་གྱིས་ཐིག་ལེ་བཀོད་ལ། ཧཱུྃ་ཨཱཿ ༀ། བརྗོད་པས། དཔྲལ་བར་སྐུ་རྣམ་སྣང༌། མགྲིན་པར་གསུང་འོད་དཔག་མེད། སྙིང་གར་ཐུགས་མི་བསྐྱོད་པ་སྔོན་པོ་རྣམས་སུ་གྱུར་པ་ལས། སངས་རྒྱས་བྱང་སེམས་ཐམས་ཅད་ཀྱི་སྐུ་གསུང་ཐུགས་འདུས་པའི་བདག་ཉིད་ཡིན་སྙམ་པའི་མོས་པ་མཛོད། མཆོད་པ་ནི། སློབ་མ་ལྷར་གསལ་བའི་མདུན་དུ་མཆོད་པ་སྣ་ལྔ་བཤམས་ལ། ཁྱེད་རང་རྣམས་ལྷར་གསལ་བ་ལ་སློབ་དཔོན་གྱིས་མཆོད་པའི་ལྷ་མོ་སྤྲོས་ཏེ་མཆོད་བྱུང་སྙམ་པའི་མོས་པ་མཛོད། ༀ་བཛྲ་ཨ?ཾ་སོགས་ཀྱིས་མཆོད། སོ་ཤིང་འདོར་བ་ནི། མཎྜལ་ཚོམ་བུ་དགུ་བཀོད་ལ་བཞག །སོ་ཤིང་དྲི་བཟང་གིས་བྱུགས་ཤིང་འབྲུ་གསུམ་གྱིས་རིན་པོ་ཆེར་བྱིན་གྱིས་བརླབས། ཐལ་མོ་སྦྱར་བའི་བར་དུ་བཅུག་པས་སྐྱུག་སྨན་ཟོས་པ་ལྟར་སྡིག་སྒྲིབ་སྐྱུགས་པར་བསམས་ལ་སོ་ལ་ཅུང་ཟད་དྲུད་དེ། སྔགས་ཀྱིས་འབུལ་བ་ནི། ༀ་ཨཱཿ ཛི་ཧྭཿ བཛྲ་སཾ་ཝརྡྷ་ནི་ཡེ་སྭཱ་ཧཱ། སོ་ཤིང་འོ་མ་ཅན་སོར་བཅུ་གཉིས་པ་འདི། རང་གི་སོ་ལ་ཅུང་ཟད་དྲུད་ལ་སྐྱུག་སྨན་ཟོས་པ་ལྟར། སྡིག་སྒྲིབ་ཐམས་ཅད་སྐྱུགས་པར་བསམས་ལ། ༀ་བཛྲ་ཧ་ས་ཧ། ཞེས་ཚོམ་བུ་དབུས་མ་ལ་ཐེ་ཚོམ་མེད་པར་ཕུལ། དེ་ལྟར་ཕུལ་བས་རྩེ་མོ་མེ་ཏོག་ཡོད་པ་དེ་རང་དང་བླ་མ་ཚོམ་བུ་དབུས་མ་ལ་བསྟན་ན་མཆོག་གི་དངོས་གྲུབ་ཐོབ། སྟེང་དུ་བསྟན་ན་རིག་འཛིན་གྱི་གོ་འཕང་ཐོབ། འོག་ཏུ་ས་ལ་གནས་པའི་གཏེར་གྱི་དངོས་གྲུབ་ཐོབ། ཕྱོགས་བཞིར་ཕྲིན་ལས་བཞི། མཚམས་བཞིར་དངོས་གྲུབ་སྣ་རེ་ཐོབ་པར་ལུང་བསྟན་ཏོ། །སྐྱོར་ཆུ་སྦྱིན་པ་ནི། ལས་བུམ་གྱི་ཆུས་བཀྲུས་པས་སྡིག་སྒྲིབ་དག་པར་མོས་པ་གྱིས་ལ་ཁྲུས་མཛོད། ཅེས་དང་ཡིག་བརྒྱ་བརྗོད། དེ་ནས་རྨི་ལམ་བརྟག་ཕྱིར་ཀུ་ཤ་སྦྱིན་པ་ནི། ཀུ་ཤའི་ཆུན་པོ་ཆེ་བ་ལག་གཡས་དང་ཆུང་བ་གཡོན་དུ་གཏད། ཆེ་བ་གདན། ཆུང་བས་སྔས་བྱས་ལ་སེང་གེའི་ཉལ་སྟབས་ཀྱིས་ཉལ་དགོས་པས། བཅོམ་ལྡན་འདས་ཀྱིས་ཀྱང་ཀུ་ཤའི་གདན་ལ་འདུག་ནས་བདུད་བཏུལ་ཞིང་སངས་རྒྱས་པ་ཡིན་པས། ཁྱེད་རང་རྣམས་ཀྱང་ཆུན་པོ་ཆེ་བ་གདན་དང༌། ཆུང་བ་སྔས་སུ་གྱིས་ལ་བླ་མ་དང་དཀྱིལ་འཁོར་གྱི་ཕྱོགས་ལ་མགོ་བསྟན་ཏེ་སེང་གེའི་ཉལ་སྟབས་ཀྱིས་ཉལ་ཞིང༌། ནངས་པར་དབང་ཟབ་མོ་ཐོབ་ཡོང་བས་རེ་དགའ་སྙམ་པ་དང༌། རྨི་ལམ་གཟུང་དགོས་སྙམ་པས་ཉོལ། ཞེས་བརྗོད། དགེ་བ་བསྔོས་ལ་སློབ་མ་རྣམས་གྲོལ། དེ་ནས་སློབ་དཔོན་གྱིས་གྲུབ་ན་གཏོར་འབུལ་དང་ཚོགས་མཆོད་སོགས་ རྗེས་ཀྱི་རིམ་པ་བྱ། མི་འགྲུབ་ན་གཏོར་འབུལ་མཆོད་བསྟོད་ཙམ་དང༌། ནོངས་བཤགས་ཤིས་བརྗོད་སོགས་བྱས་པས་གྲུབ་བོ། །བཞི་པ་དཀྱིལ་འཁོར་སྟ་གོན་ནི། རྡུལ་ཚོན་དཀྱིལ་འཁོར་བཞེངས་པའི་སྐབས་ཐིག་ཚོན་གྱི་བྱ་བ་རྣམས་དགོས་ཀྱང་འདིར་སྟེགས་བུ་གཙང་མར་ཁེབས་ཀྱིས་བཀབ་པའི་སྟེང་རས་བྲིས་ཀྱི་དཀྱིལ་འཁོར་མཚན་ཉིད་དང་ལྡན་པ་བཀྲམ། དབུས་སུ་མཉྫིའི་ཁར་སྔར་སྟ་གོན་བྱས་པའི་རྣམ་རྒྱལ་བུམ་པ། དུང་ཆོས་གཟུངས་རྡོར་བཅས་བཀོད། གཡས་གཡོན་རྣམས་སུ་རིགས་ལྔའི་དབུ་རྒྱན། རྡོ་རྗེ། དྲིལ་བུ། མདུན་ངོས་སུ་གསང་དབང་ཐོད་ཆང་བདུད་རྩི་རིལ་བུ་སྦྱར་བ་དང༌། ཤེར་དབང་ཁ་ཊྭཱཾ་ག་བཞག །ལོགས་གང་བདེར་སྣོད་གཅིག་ཏུ་མངའ་གསོལ་ཆས་ཐོར་ཚུགས་སྐྲ་ཚབ་ཐལ་རཀ་ཞག་གསུམ་ཐོད་སྐམ་དབུ་རྒྱན་ཐོད་རློན་དོ་ཤལ་རུས་རྒྱན་སྦྲུལ་ཆུན་བཅས་ཕྱོགས་བསྡུས། མི་ལྤགས་གླང་ལྤགས་སྟག་ཤམ། རོ་གདན། རྡོ་རྗེ་དྲིལ་བུ། གྲི་གུག་ཐོད་པ། ཁ་ཊྭཱཾ་ག་དང་ཅང་ཏེའུ༑ ཐོད་རྔ་དང་རྐང་གླིང་རྣམས་དངོས་སམ་རི་མོར་བྲིས་པ། སྣོད་གཅིག་ཏུ་རྗེས་གནང་ཆས། ནོར་བུ། རལ་གྲི། བགྲང་ཕྲེང༌། གླེགས་བམ། མིག་ཐུར། དགང་གཟར་བླུགས། སྣ་ཚོགས་རྡོ་རྗེ། མདའ་གཞུ། དུག་སྦྲུལ་དང་བུད་མེད་གཟུགས་བཞག །དཀྱིལ་འཁོར་གྱི་མཐའ་སྐོར་དུ་མཆོད་ཡོན་དང་ཉེར་སྤྱོད་གཡོན་བསྐོར། རྒྱབ་ཕྱོགས་སོགས་གང་བདེར་འབུལ་གཏོར་བཤོས་ཟླུམ་བཟའ་བཏུང་བཟང་དགུས་བསྐོར་བ་རྣམས་བཀོད། སྣོད་གཞན་ཞིག་ཏུ་སློབ་མ་མཆོད་པ་མཆོད་ཡོན་ཉེར་སྤྱོད། འདོད་ཡོན་ལྔ་བཅས་གང་བདེར་བཞག །གཞན་ཡང་སྔོན་གཏོར་སོགས་ཉེ་བར་མཁོ་བའི་ཡོ་བྱད་རྣམས་འདུ་བྱའོ༑ ༑གཉིས་པ་དབང་དོན་དཀྱིལ་འཁོར་བསྒྲུབ་པ་ལ། ཐོག་མར་སྒྲུབ་ཐབས་ལྟར་སྔོན་འགྲོ་གཏོར་མ་བཏང་བ་ནས་བཟླས་པ་བསྡུ་ལྡང་གི་བར་བདག་བསྐྱེད་ཚང་བར་བཏང༌། བུམ་བསྐྱེད་བཟླས་པ་ཁྱུགས་ཙམ་དང་བུམ་ལྷ་བདུད་རྩིར་བསྒྱུར། དེ་ནས་མདུན་བསྐྱེད་དཀྱིལ་འཁོར་བསང་སྦྱང༌། མདུན་རྟེན་ མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་ནམ་མཁའི་ཁམས་སུ་ཨེ་ཨེ་ལས་སོགས་སྒྲུབ་ཐབས་ལྟར་བསྐྱེད་ཆོག་རྫོགས་པར་བཏང༌། གོ་ཆ་བགོ །གནས་གསུམ་བྱིན་གྱིས་བརླབ། ཡེ་ཤེས་པ་གཞུག་པའང་དེ་ལྟར་ལ་དཔག་ཏུ་མེད་པས་བསྐོར་བ་དང༌། སྟ་གོན་གྱི་དཀྱིལ་འཁོར་ནམ་མཁར་བཞུགས་པ་རྣམས་ཀྱང་སྤྱན་དྲངས། ༀ་གུ་རུ་བྷ་ག་ཝཱན་སོགས་སྔགས་དང༌། བཛྲ་ས་མཱ་ཛཿ འི་རྗེས་སུ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམ་སྦྱངས་ཤིང༌། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང༌། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཞེས་དང༌། ༀ་བཛྲ་ཨ?ཾ་པྲ་ཏཱིཙྪ་སྭཱ་ཧཱས་མཆོད་ཡོན་དང༌། པདྨ་ཀ་མ་ལཱ་ཡ་སྟྭཾ་གྱིས་གདན་འབུལ། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ་གིས་ཁྲུས་གསོལ། མཆོད་རྫས་དམ་པ་འདི་དག་དང༌། །འཇིག་རྟེན་ཁམས་ཀྱི་མཆོད་རྫས་ཀུན། །ཐམས་ཅད་བློ་ཡིས་བླངས་ནས་ནི། །བཅོམ་ལྡན་འཁོར་དང་བཅས་ལ་འབུལ། ། ༀ་གུ་རུ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སཾ་བ་རཾ་ཝཱི་ར་ཡོ་གི་ནཱི་ས་པ་རི་ཝཱ་ར་ཨ?ཾ་ནས། ཤབྡའི་བར་གྱིས་མཆོད། བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པ་ཡིས་རྣམ་ཀུན་ཏུ། ། མཆོག་ཏུ་དད་པས་བསྟོད་པར་བགྱི། །ཞེས་མཆོད་བསྟོད་བྱ། ༀ་གུ་རུ་སོགས་ནས། ས་པ་རི་ཝཱ་ར་ཛཿ ཧཱུྃ་བྃ་ཧོཿ ཡེ་ཤེས་པ་དམ་ཚིག་གི་དཀྱིལ་འཁོར་ལ་ཐིམ་པས་དབྱེར་མེད་དུ་གྱུར། དབང་བསྐུར་བ་ནི། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས་སོགས། རིགས་བདག་གི་དབུ་རྒྱན་ལ་ཐིམ་བར་དང༌། མཆོད་བསྟོད། བཟླས་པ་བཅས་སྒྲུབ་ཐབས་བཞིན་བྱ། བཟླས་དམིགས་དོ་ལིའམ་བདེ་ཆེན་བཟླས་པ་དང་སྦྱར་ལ་བཟླས་གྲངས་སྐབས་བསྟུན་བྱ། དེ་ནས་མཆོད་བསྟོད་རྒྱས་པར་འབུལ་བའི་ཐོག་མར་མཆོད་པ་ཁ་གསོས་ལ་སྒྲུབ་ཐབས་ལྟར་བྱིན་བརླབ། དང་པོ་ཕྱི་མཆོད་ནི། གཙང་བདེ་བསིལ་སོགས་ཡན་ལག་བརྒྱད་ལྡན་ཆབ། །ཡིད་ཀྱི་གདུང་སེལ་ཀུན་དགའི་དཔལ་སྟེར་བའི། །ལྷ་ཡི་མཆོད་ཡོན་དམ་པའི་མཆོད་པ་འདི། །བླ་མ་དཀྱིལ་འཁོར་ལྷ་ཚོགས་རྣམས་ལ་འབུལ། །ༀ་གུ་རུ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སཾ་བ་ར་ཝཱི་ར་ཡོ་གི་ནཱི་ས་པ་རི་ཝཱ་ར་བཛྲ་ཨ?ཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུྃ། དེ་བཞིན་དུ། ཁ་དོག་རྣམ་པར་བཀྲ་བའི་འདབ་ཕྲེང་ལས། །ས་ཕྱོགས་བསུང་ཞིམ་ངད་པས་བསིལ་སྦྱིན་མཁན། །མིག་གི་བདུད་རྩིར་བཞད་པའི་མེ་ཏོག་འདི། །བླ་མ་དཀྱིལ་འཁོར་ལྷ་ཚོགས༴ སྔགས་ཐོག་མཐའ་གོང་ལྟར་ལ། བཛྲ་པུཥྤེ༴ རང་བྱུང་དྲི་ངད་སྦྱར་བའི་ སྤོས་ཀྱི་སྤྲིན། །ནམ་མཁའི་ཕ་མཐར་གཏིབས་ལས་ཞིང་ཁམས་ཀུན། །རབ་ཏུ་ཞིམ་པོས་ཀུན་དགར་བྱེད་པ་འདི། །བླ་མ༴ བཛྲ་དྷཱུ་པེ༴ ཉི་ཟླ་ནོར་བུའི་ཟེར་ཕྲེང་འབྲུ་མར་མེས། །མ་ལུས་མུན་པའི་དཔལ་འཕྲོག་སྣང་བ་ཡིས། །ཉིན་མཚན་མི་ཕྱེད་ཀུན་ཏུ་གསལ་བ་འདི། །བླ་མ༴ བཛྲ་ཨཱ་ལོ་ཀེ༴ དྲི་མེད་ཆབ་ལ་ཙནྡན་ག་པུར་དང༌། །གུར་གུམ་ལ་སོགས་རྣམ་པར་སྦྱར་བའི་རྫས། །བསིལ་བདེ་ཉོན་མོངས་ཚད་ནད་དྲུང་འབྱིན་དྲི། །བླ་མ༴ བཛྲ་གནྡྷེ༴ ཁ་དོག་དྲི་དང་རོ་བརྒྱར་ལྡན་པའི་བཤོས། །ཇི་ཙམ་མྱོང་ཡང་མི་མཐུན་མེད་པ་ཡི། །ལྷ་ཡི་ཞལ་ཟས་བདའ་དགུ་ཇི་སྙེད་པ། །བླ་མ༴ བཛྲ་ནཻ་ཝི་དྱ༴ རྔ་སིལ་དུང་དང་རྒྱུད་མང་ཆ་ལང་སོགས། །ཡན་ལག་འབུམ་སྡེའི་སྒྲ་དབྱངས་སྙན་སྒྲོགས་པ། །རོལ་མོའི་ཁྱད་པར་མ་ལུས་ཇི་སྙེད་ཀུན། །བླ་མ༴ བཛྲ་ཤབྡ་པཱུ་ཛ༴ སོགས་ཀྱིས་མཆོད་ཅིང་རོལ་མོ་བྱའོ། །འདོད་ཡོན་ལྔ་འབུལ་བ་ནི། རབ་འབྱམས་ཞིང་གི་དཀྱིལ་འཁོར་ཐམས་ཅད་པར། །རྒྱལ་བའི་སྤྱན་ལ་མཛེས་པ་མ་ལུས་ཀུན། །གཅིག་བསྡུས་གཟུགས་ཀྱི་རྡོ་རྗེའི་སྒྱུ་འཕྲུལ་དཔྱིད། །བླ་མ་དཀྱིལ་འཁོར་ལྷ་ཚོགས་རྣམས་ལ་འབུལ། །ༀ་གུ་རུ༴ བཛྲ་རཱུ་པ་པཱུ་ཛ༴ རབ་འབྱམས་ཞིང་གི༴ རྒྱལ་བའི་སྙན་ལ་འཇེབས་པ་མ་ལུས་ཀུན། །གཅིག་བསྡུས་སྒྲ་ཡི་རྡོ་རྗེའི་སྒྱུ་འཕྲུལ་དཔྱིད། །བླ་མ༴ བཛྲ་ཤབྡ༴ རབ་འབྱམས༴ རྒྱལ་བའི་ཤངས་ལ་ཞིམ་པ་མ་ལུས་ཀུན། །གཅིག་བསྡུས་དྲི་ཡི་ རྡོ་རྗེའི་སྒྱུ་འཕྲུལ་དཔྱིད། །བླ་མ༴ བཛྲ་གནྡྷེ༴ རབ་འབྱམས༴ རྒྱལ་བའི་ལྗགས་ལ་བདའ་བ་མ་ལུས་ཀུན། །གཅིག་བསྡུས་རོ་ཡི་རྡོ་རྗེའི་སྒྱུ་འཕྲུལ་དཔྱིད། །བླ་མ༴ བཛྲ་ར་ས༴ རབ་འབྱམས༴ རྒྱལ་བའི་སྐུ་ལ་བདེ་བ་མ་ལུས་ཀུན། །གཅིག་བསྡུས་རེག་བྱ་རྡོ་རྗེའི་སྒྱུ་འཕྲུལ་དཔྱིད། །བླ་མ༴ བཛྲ་སྤརྴེ་པཱུ་ཛ༴ དེའི་རྗེས་འབྲེལ་ཕྱི་སྣོད་འཇིག་རྟེན་འབུལ་བ་ནི། བདག་པོས་བཟུང་དང་མ་བཟུང་མཆོད་པའི་ཚོགས། །དངོས་དང་ཡིད་ཀྱི་འཕྲུལ་འཁོར་ལས་བྱུང་བའི། །སྒྱུ་འཕྲུལ་རྡོ་རྗེའི་རོལ་རྩལ་མཆོད་པའི་སྤྲིན། །བླ་མ་དཀྱིལ་འཁོར་ལྷ་ཚོགས་རྣམས་ལ་འབུལ། །ནང་བཅུད་འབུལ་བ་ནི། བདག་ལུས་ཕུང་ཁམས་འཕྲལ་ཡུན་གཏན་བདེ་དང༌། །མཁའ་ཁྱབ་ཞིང་གི་འགྲོ་བ་ལོངས་སྤྱོད་བཅས། །རྒྱལ་བ་རྣམས་ཀྱི་འབངས་སུ་བདག་འབུལ་ན། །རྗེས་བཟུང་བརྩེ་བས་དགོངས་ཏེ་བཞེས་སུ་གསོལ། །གཉིས་པ་ནང་མཆོད་བདུད་རྩི་འབུལ་བ་ནི། མཐེབ་སྲིན་གྱིས་བདུད་རྩི་འཐོར་ཞིང༌། ༀ་ཨཱཿ ཧཱུྃ། དམན་པའི་ཡུལ་ལས་རབ་འདས་ཤིང༌། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པའི། །བདུད་རྩི་མཆོག་གི་མཆོད་པ་འབུལ། །རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །ཏཻ་ལོ་ནཱ་རོ་མར་པ་མི་ལའི་ཞབས། །རས་ཆུང་རྡོར་གྲགས་ཁྱུང་ཚང་རས་པ་དང༌། །གྲུབ་ཐོབ་རྣམ་གསུམ་ཞལ་དུ་ༀ་ཨཱཿ ཧཱུྃ། །ཞང་སྟོན་ལོ་ཙཱ་འགྲོ་མགོན་དྷཱ་ར་ཤྲཱི། །བསོད་ནམས་རྒྱལ་མཚན་འཁྲུལ་ཞིག་རས་མ་དང༌། །གཟི་བརྗིད་རྒྱལ་མཚན་དབང་ཕྱུག་ཤེས་རབ་རྗེ། ། རི་ཁྲོད་རས་ཆེན་ཞལ་དུ་ༀ་ཨཱཿ ཧཱུྃ། །གཞོན་ནུ་དཔལ་ལྡན་ནམ་མཁའ་རྒྱལ་མཚན་དང༌། །ངག་གི་དབང་པོ་རབ་འབྱམས་ཆོས་ཀྱི་རྗེ། །གཙང་སྨྱོན་ཧེ་རུ་རྒོད་ཚང་རས་ཆེན་པ། །སངས་རྒྱས་རྡོ་རྗེའི་ཞལ་དུ་ༀ་ཨཱཿ ཧཱུྃ། །བྱམས་པ་ཕུན་ཚོགས་ཁྱབ་བདག་གྲུབ་མཆོག་དབང༌། །ནམ་མཁའི་མཚན་ཅན་ཕྲིན་ལས་རྒྱ་མཚོ་དང༌། །ཀརྨ་བཤད་སྒྲུབ་རྒྱལ་མཆོག་འཆི་མེད་དབང༌། །བསྟན་པའི་སྒྲོན་མེའི་ཞལ་དུ་ༀ་ཨཱཿ ཧཱུྃ། །ཡོན་ཏན་རྒྱ་མཚོ་འཛམ་གླིང་གྲགས་པའི་ཞབས། །ངག་གི་དབང་པོ་ཡེ་ཤེས་སྐལ་བཟང་དང༌། །དཔལ་ལྡན་རྒྱ་མཚོ་ངེས་དོན་བསྟན་པ་འཛིན། །ཆོས་ཀྱི་རྒྱ་མཚོའི་ཞལ་དུ་ༀ་ཨཱཿ ཧཱུྃ། །མཐུ་སྟོབས་རྒྱ་མཚོ་རིན་ཆེན་འོད་ཟེར་བ། །ཕྲིན་ལས་དབང་ཕྱུག་ཀུན་བཟང་རྡོ་རྗེ་དང༌། །ཨོ་རྒྱན་རྣམ་གྲོལ་རྩ་བའི་བླ་མ་སོགས། །སྙན་ནས་བརྒྱུད་པའི་ཞལ་དུ་ༀ་ཨཱཿ ཧཱུྃ། །དཔལ་ལྡན་འཁོར་ལོ་སྡོམ་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ༀ་ཨཱཿ ཧཱུྃ། རྒྱུད་སྡེ་བཞི་དང་འབྲེལ་བའི་ཡི་དམ་ལྷ་ཚོགས་རྣམས་ཀྱི་ཞལ་དུ་ༀ་ཨཱཿ ཧཱུྃ། གནས་གསུམ་གྱི་དཔའ་བོ་དང་རྣལ་འབྱོར་མ་རྣམས་ཀྱི་ཞལ་དུ་ༀ་ཨཱཿ ཧཱུྃ། མ་མགོན་ལྕམ་དྲལ་ལ་སོགས་པ་ཆོས་སྐྱོང་སྲུང་མ་རྣམས་ཀྱི་ཞལ་དུ་ༀ་ཨཱཿ ཧཱུྃ། དཀར་ཕྱོགས་སྐྱོང་བའི་གཞི་གནས་ཡུལ་བདག་རྣམས་ཀྱི་ཞལ་དུ་ༀ་ཨཱཿ ཧཱུྃ། འགྲོ་བ་རིགས་དྲུག་གི་སེམས་ཅན་ཐམས་ཅད་ཡི་དམ་གྱི་ལྷར་གསལ་བའི་ཞལ་དུ་ༀ་ཨཱཿ ཧཱུྃ། རང་གི་ ལྕེར་མྱངས་ལ། ༀ་ཨཱཿ ཧཱུྃ། བརྗོད། གསུམ་པ་གསང་བའི་མཆོད་པ་ནི། ཁ་དོག་དབྱིབས་ལེགས་ཡིད་འོང་རྒྱན་སྤྲས་མ། །སྐུ་མདོག་སྔོན་མོ་མཆོད་རྫས་པི་ཝཾ་འཛིན། །ཟག་མེད་བདེ་སྟེར་ཡེ་ཤེས་ལྷ་མོ་འདི། །བླ་མ་དཀྱིལ་འཁོར་ལྷ་ཚོགས་རྣམས་ལ་འབུལ། །ༀ་བཛྲ་བཱི་ཎེ་ཨཱཿ ཧཱུྃ། ཁ་དོག༴ སྐུ་མདོག་སེར་མོ་མཆོད་རྫས་གླིང་བུ་འཛིན། །ཟག་མེད༴ བླ་མ༴ ༀ་བཛྲ་ཝཾ་ཤེ་ཨཱཿ ཧཱུྃ། ཁ་དོག༴ སྐུ་མདོག་དམར་མོ་མཆོད་རྫས་རྔ་ཟླུམ་འཛིན། །ཟག་མེད༴ བླ་མ༴ མྲ་དཾ་གེ༴ ཁ་དོག༴ སྐུ་མདོག་ལྗང་གུ་མཆོད་རྫས་རྫ་རྔ་འཛིན། །ཟག་མེད༴ བླ་མ༴ མུ་ར་ཛེ༴ ཁ་དོག༴ བཞད་མ་དམར་མོ་འཛུམ་པའི་བཞིན་ལྡན་ཞིང༌། །ཟག་མེད༴ བླ་མ༴ ཧཱ་སྱེ༴ ཁ་དོག༴ སྒེག་མ་སྔོན་མོ་མཛེས་པའི་འགྱིང་བག་ཅན། །ཟག་མེད༴ བླ་མ༴ ལཱ་སྱེ༴ ཁ་དོག༴ གླུ་མ་ལྗང་གུ་སྙན་པའི་དབྱངས་ལེན་པའི། །ཟག་མེད༴ བླ་མ༴ གི་ཏཱི༴ ཁ་དོག༴ གར་མ་སེར་མོ་མཛེས་པའི་གར་བསྒྱུར་མ། །ཟག་མེད༴ བླ་མ༴ ནྲ་ཏྱེ༴ ཁ་དོག༴ སྐུ་མདོག་དཀར་མོ་མཆོད་རྫས་མེ་ཏོག་འཛིན། །ཟག་མེད༴ བླ་མ༴ པུཥྤེ༴ ཁ་དོག༴ སྐུ་མདོག་སྔོན་མོ་མཆོད་རྫས་བདུག་སྤོས་འཛིན། །ཟག་མེད༴ བླ་མ༴ དྷཱུ་པེ༴ ཁ་དོག༴ སྐུ་མདོག་དམར་མོ་མཆོད་རྫས་མར་མེ་འཛིན། །ཟག་མེད༴ བླ་མ༴ དཱི་པཾ༴ ཁ་དོག༴ སྐུ་མདོག་ལྗང་གུ་མཆོད་རྫས་དྲི་ཆབ་འཛིན། །ཟག་མེད༴ བླ་མ༴ གནྡྷེ༴ ཁ་དོག༴ གཟུགས་མ་དཀར་མོ་མཆོད་རྫས་མེ་ལོང་འཛིན། །ཟག་མེད༴ བླ་མ༴ ཨཱ་དརྴེ༴ ཁ་དོག༴ རོ་མ་དམར་མོ་མཆོད་རྫས་ཞལ་ཟས་འཛིན། །ཟག་མེད༴ བླ་མ༴ ར་ས༴ ཁ་དོག༴ རེག་མ་སེར་མོ་མཆོད་རྫས་ན་བཟའ་འཛིན། །ཟག་མེད༴ བླ་མ༴ སྤརྴེ༴ ཁ་དོག༴ དབྱིངས་མ་སྔོན་མོ་མཆོད་རྫས་ཆོས་འབྱུང་འཛིན། །ཟག་མེད་བདེ་སྟེར་ཡེ་ཤེས་ལྷ་མོ་འདི། །བླ་མ་དཀྱིལ་འཁོར་ལྷ་ཚོགས་རྣམས་ལ་འབུལ། །ༀ་བཛྲ་དྷརྨེ་ཨཱཿ ཧཱུྃ། བཞི་པ་དེ་ཁོ་ན་ཉིད་ཀྱི་མཆོད་པ་ནི། གནས་ལུགས་རང་ངོ་ཤེས་པའི་ཤེས་རབ་དང༌། །བདག་པས་གཞན་གཅེས་ལྡན་པའི་སྙིང་རྗེ་དང༌། །རང་བཞིན་དབྱེར་མེད་ཟུང་འཇུག་མཆོད་པ་འདི། །བླ་མ་དཀྱིལ་འཁོར་ལྷ་ཚོགས་རྣམས་ལ་འབུལ། །སྲིད་ཞི་རྟོག་དཔྱོད་བྲལ་བའི་མཉམ་གཞག་དང༌། །སྣང་བ་སྟོང་པར་མྱོང་བའི་རྗེས་ཐོབ་དང༌༑ ༑ངོ་བོ་མཉམ་རྗེས་ཁྱབ་གདལ་མཆོད་པ་འདི། །བླ་མ་དཀྱིལ་འཁོར༴ སྣ་ཚོགས་སྣང་བ་སྟོང་པའི་རོལ་རྩེད་འདི། །སྐུ་གསུམ་ལྷུན་གྲུབ་སྒྱུ་མའི་གར་མཁན་ལ། །ཡོངས་གྲུབ་མི་འབྲལ་ཆོས་དབྱིངས་མཆོད་པ་འདི། །བླ་མ༴ མཆོད་གནས་དམ་པ་མཆོད་མཁན་འཁོར་གསུམ་པོ། །དབྱེར་མེད་ཆོས་ཉིད་ངང་དུ་རོ་གཅིག་པའི། །བླ་མེད་བློ་འདས་མཆོད་པ་དམ་པ་འདི། །བླ་མ༴ དགེ་བས་འགྲོ་ཀུན་དེ་ཉིད་རྟོགས་པར་ཤོག །ཅེས་འཁོར་གསུམ་དམིགས་མེད་ཀྱི་གནས་ལུགས་ངང་ལ་མཉམ་པར་བཞག །བསྟོད་པ་རྒྱུད་ནས་བྱུང་བའི་རྐང་བརྒྱད་ནི། ཧཱུྃ། བཅོམ་ལྡན་མགོན་པོ་དཔའ་བོའི་དབང་ཕྱུག་ནི། །བསྐལ་པའི་མེ་ལྟར་འོད་ཟེར་རབ་ཏུ་འབར། །རལ་པའི་ཅོད་པན་དབུ་ཡི་རྒྱན་དུ་བཅིངས། །མཆེ་བ་ རབ་གཙིགས་དྲག་ཤུལ་འཇིགས་པའི་ཞལ། །སྐུ་ལ་ཕྱག་རྒྱ་གཟི་བརྗིད་ལྡན་པ་པོ། །དགྲ་སྟྭ་ཞགས་པ་ཁ་ཊྭཱཾ་མདུང་སོགས་བསྣམས། །རབ་འཇིགས་སྟག་གི་པགས་པའི་གོས་འཛིན་པའི། །སྐུ་ཆེན་དུད་ཀས་བགེགས་འཇོམས་མཛད་ལ་འདུད། །ཧཱུྃ། བཅོམ་ལྡན་རྣམ་ཀུན་རྡོ་རྗེ་ཕག་མོ་ཆེ། །འཇིག་རྟེན་གསུམ་གཞན་རྒོལ་བས་མི་ཚུགས་ཤིང༌། །འབྱུང་པོའི་འཇིགས་པ་མ་ལུས་རྡོ་རྗེ་ཕག་མོས་འཇོམས། །རྡོ་རྗེ་གདན་བཞུགས་ཚངས་པ་ལས་རྒྱལ་ཞིང༌༑ ༑བདུད་ཀྱི་འཇིགས་པ་མ་ལུས་སྐེམ་ཞིང་ཕམ་མཛད་པ། །སྐྱེ་གནས་འབྱུང་བ་ཀུན་གྱི་རང་བཞིན་གཟུགས། །ས་གསུམ་དབང་ཕྱུག་ཆོས་རྣམས་ཡོངས་རྫོགས་མཛད། །རྣལ་འབྱོར་འདོད་པའི་དབང་ཕྱུག་ཆེན་མོར་བསྟོད། །སྤྲོ་ན། བདེ་མཆོག་ལྷ་དྲུག་ཅུ་རྩ་གཉིས་ཀྱི་བསྟོད་པ་འབྲིང་པོ་ནི། ༀ། སྲིད་ཞིའི་དགེ་ལེགས་མ་ལུས་སྩོལ་མཛད་པའི། །བཀའ་བརྒྱུད་བླ་མ་དམ་པ་རྣམས་དང་ནི། །བཅོམ་ལྡན་འཁོར་ལོ་སྡོམ་པ་འཁོར་བཅས་ལ། །བདག་གིས་སྒོ་གསུམ་གུས་པས་ཕྱག་འཚལ་ལོ། །ཨཱཿ པད་ཉི་འཇིགས་བྱེད་དུས་མཚན་གདན་སྟེང་ན། །སྲིད་ཞི་མཉམ་སྦྱོར་འཁོར་ལོ་བདེ་མཆོག་ནི། །མཐིང་ནག་ཞལ་བཞི་བཅུ་གཉིས་ཕྱག་ཅན་གྱི། །ཞལ་རྣམས་སྔོ་ལྗང་དམར་སེར་སྤྱན་གསུམ་ལྡན། །མཆེ་གཙིགས་སྨིན་མ་སྨ་ར་ཨག་ཚོམ་སེར། །རལ་པ་གྱེན་བརྫེས་ཟླ་ཕྱེད་རྡོ་རྗེས་མཚན། །དང་པོའི་ཕྱག་གཉིས་རྡོར་དྲིལ་ཡུམ་ལ་འཁྱུད། །ཐ་མ་ཞིང་གླང་ལྤགས་རློན་བརྒྱངས་ཏེ་འཛིན། །ལྷག་མ་ གཡས་རྣམས་ཅང་ཏེའུ་གྲི་གུག་དང༌། །དགྲ་སྟྭ་རྩེ་གསུམ་འཛིན་ཅིང་གཡོན་རྣམས་ཀྱང༌། །ཁ་ཊྭཱཾ་ཐོད་ཁྲག་ཞགས་པ་ཚངས་མགོ་བསྣམས། །གར་དགུའི་ཉམས་ལྡན་དུར་ཁྲོད་ཆས་ཀྱིས་མཛེས། །འཁྲིལ་སྦྱོར་རྡོ་རྗེ་ཕག་མོ་དམར་མོ་ནི། །རབ་མཛེས་ཡིད་འོང་ཞལ་གཅིག་ཕྱག་གཉིས་མ། །གྲི་ཐོད་འཛིན་པས་ཡབ་ལ་འཁྱུད་ཅིང་སྟོབ། །སྒྱུ་མའི་གར་གྱིས་ས་གསུམ་འགྲོ་བ་འདུལ། །བཅོམ་ལྡན་བདེ་མཆོག་ཡབ་ཡུམ་ཕྱག་འཚལ་བསྟོད། །ཧཱུྃ། ཧེ་རུ་ཀ་དཔལ་ཡབ་ཡུམ་སྤྲུལ་པའི་འཁོར། །པད་འདབ་བརྒྱད་ཀྱི་ཕྱོགས་བཞིར་རིམ་པ་བཞིན། །མཁའ་འགྲོ་ལཱ་མ་དུམ་སྐྱེས་གཟུགས་ཅན་མ། །སྔོ་ལྗང་དམར་སེར་ཞལ་གཅིག་ཕྱག་བཞི་ཡིས། །གྲི་གུག་ཅང་ཏེའུ་ཐོད་ཁྲག་ཁ་ཊྭཱཾ་འཛིན། །ཞབས་རྣམས་སྐྱིལ་ཀྲུང་ཕྱེད་པའི་གར་སྟབས་ཀྱིས། །པད་འདབ་ཉི་དཀྱིལ་རོ་ཡི་གདན་ལ་བཞུགས། །ལང་ཚོ་རབ་རྒྱས་རུས་པའི་རྒྱན་གྱིས་མཛེས། །བདེ་ཆེན་གསང་ཡུམ་རྣམས་ལ་ཕྱག་འཚལ་ལོ། །ས་གསུམ་འཁོར་ལོའི་རྩིབས་གྱུར་ཉེར་བཞི་ཡི། །ཡུལ་རྣམས་སྐྱོང་བྱེད་དཔའ་བོ་མཁའ་འགྲོའི་ཚོགས། །ཐོད་དུམ་རབ་གཏུམ་མོ་སོགས་སྐུ་མདོག་སྔོ། །མྱུག་ཅན་ས་སྲུང་མ་སོགས་སྐུ་མདོག་དམར། །སྟོབས་ཆེན་འཁོར་ལོ་མ་སོགས་སྐུ་མདོག་དཀར། །ཡབ་རྣམས་ཞལ་གཅིག་ཕྱག་བཞིའི་དང་པོ་རྣམས། །གཡས་རྣམས་རང་རང་རིགས་བདག་ཕྱག་མཚན་དང༌། །གཡོན་རྣམས་དེ་མཐུན་དྲིལ་འཛིན་ཡུམ་ལ་འཁྱུད། །དེ་འོག་ གཡས་རྣམས་ཅང་ཏེའུ་འཛིན་ཅིང་འཁྲོལ། །གཡོན་འོག་རྣམས་ཀྱང་ཁ་ཊྭཱཾ་རྩེ་གསུམ་འཛིན། །རུས་པའི་རྒྱན་ཅན་གར་དགུའི་ཉམས་དང་ལྡན། །འཁྲིལ་སྦྱོར་ཡུམ་རྣམས་རྒྱན་དང་ཆ་ལུགས་དང༌། །ཕྱག་མཚན་འཁྱུད་སྟངས་གཙོ་མོ་དང་མཚུངས་པའི། །དཔའ་བོ་མཁའ་འགྲོ་རྣམས་ལ་ཕྱག་འཚལ་ལོ། །སྒོ་མཚམས་བཞུགས་པའི་ཁྭ་འུག་ཁྱི་ཕག་གདོང༌། །གཤིན་རྗེ་བརྟན་པོ་མཆེ་འཇོམས་དཔའ་མོ་རྣམས། །རང་རང་གནས་པའི་ཕྱོགས་མཚམས་སྐུ་མདོག་ཅན། །ཞལ་ཕྱག་ལ་སོགས་གསང་ཡུམ་བཞི་དང་མཚུངས། །ཡེ་ཤེས་མཁའ་འགྲོ་རྣམས་ལ་ཕྱག་འཚལ་ལོ། །ཕོ་བྲང་སྟེང་འོག་ཕྱོགས་མཚམས་ཐམས་ཅད་ན། །ཡིད་འོང་མཆོད་སྤྲིན་དུ་མས་མཆོད་བྱེད་པའི། ། ལྷ་མོ་བཅུ་དྲུག་རྒྱུད་སྡེ་བཞི་ལ་སོགས། །བར་ཁྱམས་གང་བའི་འཁོར་ལ་ཕྱག་འཚལ་ལོ། །དུར་ཁྲོད་ནང་བཞུགས་ཕྱོགས་སྐྱོང་ཞིང་སྐྱོང་ཀླུ། །རྣལ་འབྱོར་ཕོ་མོ་འདྲེ་སྲིན་ཡི་དྭགས་དང༌། །ཤ་ཟ་སྨྱོ་བྱེད་འབྱུང་པོ་རོ་ལངས་སོགས། །མཐའ་ཡས་ཕྱི་འཁོར་རྣམས་ལ་ཕྱག་འཚལ་ལོ། །བཅོམ་ལྡན་འཁོར་ལོ་སྡོམ་པ་འཁོར་བཅས་ལ། །ཕྱག་འཚལ་མཆོད་འབུལ་སྡིག་པ་མ་ལུས་བཤགས། །དགེ་ལ་ཡི་རངས་ཆོས་འཁོར་བསྐོར་བཞིན་དུ། །མྱ་ངན་མི་འདའ་རྟག་པར་བཞུགས་སུ་གསོལ། །དགེ་བ་བླ་མེད་བྱང་ཆུབ་ཆེན་པོར་བསྔོ། །འདིར་ཕྱག་ལེན་ལྟར་སྨོན་ལམ་ནི། ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་ཚིག་ཀྱང་མཆོག་ཏུ་ཚད་མ་སྟེ། །བདེན་པ་དེ་ཡིས་ལྷ་མོ་ མཆོག་གིས་ནི། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །དེ་ནས་སྒྲུབ་མཆོད་ཁོ་ནའི་སྐབས་ཡིན་ན། རང་ཉིད་ཀྱི་དམ་ཚིག་གསོ་བ་དང༌། ལམ་དུས་ཀྱི་བྱ་བ་གཙོ་བོ་ཡིན་པས་བདག་འཇུག་ལེན་པ་རྒྱུད་སྡེ་སྤྱིའི་ཕྱག་ལེན་ཡིན་པ་དང༌། སློབ་མ་གཞུག་པའི་སྐབས་དང་སློབ་དཔོན་རྟོགས་དགོངས་དམན་ན་བདག་འཇུག་རྫོགས་པར་མ་བླངས་ཐབས་མེད་ཡིན་པས་འོག་ཏུ་སློབ་མ་ལ་དབང་བསྐུར་བའི་སྐབས་ལྟར་འདོར་ལེན་བྱེད་པར་བྱས་ཏེ་དབང་བསྐུར་རྫོགས་པར་བླང་ངོ༌། །གཉིས་པ་དངོས་གཞི་དབང་བསྐུར་བ་ལ་གཉིས། འཇུག་པ་དང༌། དངོས་གཞིའོ། ། དང་པོ་ལ་ཕྱི་ནང་གཉིས་ལས། ཕྱི་འཇུག་གི་སྡོམ་ཚིག་ཏུ་ས་བཅད་བཅུར་གསུངས་པའི་དང་པོར་ཁྲུས་བྱ་བ་ནི། སློབ་དཔོན་གྱིས། ཇི་ལྟར་བལྟམས་པ་སོགས་བརྗོད། ལས་རྡོར་གྱིས་སྒོ་དྲུང་དུ་སློབ་མ་རྣམས་ལ་ཐོག་མར་ཆུ་གཙང༌། དེ་ནས་ལས་བུམ་གྱིས་ཁྲུས་བྱ། གཉིས་པ་བགེགས་བསྐྲད་པ་ནི༑ སློབ་དཔོན་དཀྱིལ་འཁོར་གྱི་གཙོ་བོའི་སྤྲུལ་པ་ཞལ་གཅིག་ཕྱག་གཉིས་པའི་སྐུ་ལས་སྐྱེས་པའི་ཡེ་ཤེས་ཀྱི་མེ་དང༌། ཐུགས་ཀའི་མཚོན་ཆའི་ཆར་གྱིས་བགེགས་བསྐྲད་པར་བསམས་ལ་ཐུན་གྱིས་བྲབ་ཅིང་དྲིལ་བུ་དྲག་ཏུ་དཀྲོལ། ༀ་སུམྦྷ་ནི་སོགས་བརྗོད། གསུམ་པ་མཎྜལ་འབུལ་བ་ནི། སེམས་བསྐྱེད་གསལ་བཏབ། ད་ལམ་སྐབས་སུ་བབ་པ་རིགས་དྲུག་པ་རྡོ་རྗེ་འཆང་ཡབ་ཡུམ་གྱི་གསང་ཚིག་བདེ་མཆོག་མཁའ་འགྲོ་སྙན་བརྒྱུད་རས་ཆུང་རྡོ་རྗེ་གྲགས་པའི་ལུགས་ཀྱི་སྨིན་བྱེད་རྒྱས་པར་བསྒྲུབ་པ་ལ་སྟ་གོན་གྱི་རིམ་པ་རྣམས་ཁར་སང་གི་སྐབས་སུ་སོང་ཟིན། དེ་རིང་དབང་བསྐུར་དངོས་ལ་འཇུག་པ་དང་དངོས་གཞི་གཉིས་ལས་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་དམིགས་ཏེ་ ཞིང་ཁམས་འབུལ་བར་ཞུ། ཞེས་མཎྜལ་རྒྱས་པར་ཕྱག་ལེན་ལྟར་འབུལ་དུ་གཞུག །བཞི་པ་རྨི་ལམ་དྲིས་ནས་བཟང་ན་སྤྲོ་བསྐྱེད་དང་ངན་ན་སྒྲིབ་སྦྱོང་དགོས་པར་གསུངས་ཀྱང་སྤྱི་ཙམ་དུ། ཁྱེད་རང་རྣམས་ལ་མདང་སུམ་རྨི་ལམ་བཟང་ངན་གང་བྱུང་རུང་སྒྱུ་མ་དང་རྨི་ལམ་གྱི་ཆོས་རྣམས་བདེན་པར་མ་གྲུབ་པས་བཟང་ངན་གང་བྱུང་ཡང་དགའ་མི་དགའི་རེ་དོགས་ཀྱི་རྟོག་པ་མ་བྱེད་ཅིག །འདིར་ཟ་བྱེད་རྡོ་རྗེ་མཁའ་འགྲོའི་སྦྱིན་སྲེག་བྱ་བར་གསུངས་པས་འཛོམས་ན་སྐུ་དང་ཐབ་ཁུང་སོགས་སློབ་དཔོན་མདུན་དུ་བཀོད། མ་འཛོམས་ན་མེ་སྣོད་ཙམ་བཞག །ལས་རྡོར་གྱིས་མེ་ལོང་དུ་ཏིལ་ནག་བླུགས་པ་སློབ་མ་རྣམས་ཀྱི་སྔོན་དུ་འགྲིམ། སློབ་དཔོན་གྱི་ཐུགས་ཀའི་ཧཱུྃ་ལས་འོད་འཕྲོས་ཁྱེད་རང་རྣམས་ལ་ཕོག་པས་སྡིག་སྒྲིབ་ཐམས་ཅད་རང་རང་གི་སྙིང་གར་ཡི་གེ་ཀཾ་ནག་པོའི་རྣམ་པར་འདུས། དེའང་བྱ་ཕག་སྦྲུལ་གསུམ་གྱི་རྣམ་པར་གྱུར་ནས་ཁའི་སྒོ་ནས་ཐོན་ཏེ་མདུན་གྱི་ཏིལ་ལ་ཐིམ་པར་བསམ། ཏིལ་སྣོད་བཟེད་ལ། ཧག་བརྗོད། དེ་སློབ་དཔོན་མདུན་དུ་བཞག །ༀ་ཨཱཿ ཧཱུྃ། གསུམ། མཆོད་རྫས་བདུད་རྩིའི་རང་བཞིན་དུ་གྱུར། མདུན་དུ་ཞི་བའི་ཐབ་ཁུང་ཟླུམ་ཞིང་དཀར་བ་མཚན་ཉིད་ཡོངས་སུ་རྫོགས་ཤིང་མེ་དཀར་གསལ་དུ་འབར་བའི་དབུས་ན་ཟ་བྱེད་རྡོ་རྗེ་མཁའ་འགྲོ་མཐིང་ནག་རྡོ་རྗེ་དང་དྲིལ་བུ་འཛིན་ཅིང་ཁྲོ་བོའི་ཆས་ཐམས་ཅད་ཀྱིས་བརྒྱན་པ་ཞལ་རབ་ཏུ་གདངས་པ་ལས་ཡེ་ཤེས་ཀྱི་མེ་འབར་བ་ལ་བདུད་རྩིའི་མཆོད་པ་འབུལ་བས་མཉེས་པར་བསམས་ལ། གཡོན་པའི་མཐེབ་སྲིན་གྱིས་ཏིལ་འབུལ་ཞིང༌། ༀ་ཌཱ་ཀ་ཁ་ཁ་ཁཱ་ཧི། སརྦ་པཱ་པཾ་ད་ཧ་ན་ བྷ་སྨིན་ཀུ་རུ་ཡེ་སྭཱ་ཧཱ། ཞེས་བདུན་ནམ་ཉེར་གཅིག་ཙམ་བརྗོད་ལ་མི་དམིགས་པར་བཞག །ལས་བུམ་གྱི་ཆུ་བྱིན་པས་ཕྱི་ནང་གི་སྡིག་སྒྲིབ་ཐམས་ཅད་དག་པར་མོས་ཤིག །ༀ་ཧྲཱིཿ བི་ཤུདྡྷ་སརྦ་པཱ་པཾ་ནིཤྩ་སཾ་ཤོ་དྷ་ཡ་སརྦ་བི་ཀལྤན་ཨ་པ་ན་ཡ་ཧཱུྃ་ཕཊ། སློབ་མ་རྣམས་ཀྱི་ལས་དང་ཉོན་མོངས་པ་བྱུར་དང་སྐལ་བ་ངན་པ་ཐམས་ཅད་ཤཱནྟ་ཀུ་རུ་སྭཱ་ཧཱ། ཞེས་བརྗོད། རྨི་ལམ་གྱི་སྐོར་འདི་བདག་འཇུག་སྐབས་མི་དགོས་སོ། །ལྔ་པ་གསོལ་བ་གདབ་པ་ནི། རྡོ་རྗེ་ཕག་མོས་མགྲིན་འཁྱུད་པའི། །དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་སྟོན་པའི། །མགོན་པོ་ཆེན་པོར་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །དྲུག་པ་ལྷ་ལ་གསོལ་གདབ་དང་གནང་སྦྱིན་ནི། སློབ་དཔོན་གྱིས་དྲིལ་བུ་རེས་འཇོག་ཏུ་འཁྲོལ་ལ། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་ཡི་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ཞེས་བརྗོད། བདུན་པ་སྡོམ་པ་བསྒྲག་པ་ནི། ཁྱེད་རྣམས་སྙིང་པོའི་དཀྱིལ་འཁོར་དུ་འཇུག་ཅིང་ཞུགས་ནས། ཚེ་འདིར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འདོད་པས་སྤྱིར་སོ་ཐར་བྱང་སེམས། ཁྱད་པར་དུ་རིག་འཛིན་སྔགས་ཀྱི་སྡོམ་པ་མཐའ་དག་མ་ཉམས་པར་ བསྲུང་དགོས། དེ་ལྟར་རིག་པ་འཛིན་པ་སྔགས་ཀྱི་དམ་ཚིག་དང་སྡོམ་པ་བསྲུངས་པས། སྡོམ་པ་ཐམས་ཅད་བསྲུང་བར་འགྱུར་བས་སྔགས་སྡོམ་བསྲུང་དགོས། དེ་ཡང་རིགས་ལྔའི་དམ་ཚིག་བསྲུང་བ་ལ་ཚང་སྟེ། ཕྱི་ནང་གི་འབྱུང་བ་ལྔ། ཕུང་ཁམས་སྐྱེ་མཆེད་ལ་སོགས་ཏེ། ཆོས་ཐམས་ཅད་རྒྱལ་བ་རིགས་ལྔའི་རང་བཞིན་དུ་གནས་པ་ཡིན་ལ། དམ་ཚིག་དང་སྡོམ་པ་ཐམས་ཅད་ཀྱང་རིགས་ལྔའི་དམ་ཚིག་དང་སྡོམ་པའི་ཁོངས་སུ་འདུས་པས༑ དེར་བསྡུས་ནས་བསྲུང་དགོས་པས་སྲུངས་ཤིག །ཅེས་བསྒོ། བརྒྱད་པ་སྡོམ་པ་བཟུང་བ་ནི། སྔར་སོ་ཐར་བྱང་སེམས་ཀྱི་སྡོམ་པ་མ་ཐོབ་པ་ཐོབ་པར་བྱེད་པ། ཐོབ་ནས་ཉམས་ཆག་བྱུང་བ་སོར་ཆུད་པར་བྱེད་ཅིང༌། ཉམས་ཆག་མེད་ན་གོང་འཕེལ་དུ་བྱེད་པ་ཡིན་པས། སོ་ཐར་བྱང་སེམས་ཀྱི་སྡོམ་པ་ལེན་སྙམ་པས་ཚིག་དོན་མཐུན་པའི་སྒོ་ནས་འདིའི་རྗེས་ཟློས་མཛོད། བླ་མ་ཡི་དམ་གཙོར་བཞུགས་པའི། །སྲས་བཅས་སངས་རྒྱས་ཐམས་ཅད་དང༌༑ ༑དཔའ་བོ་རྣལ་འབྱོར་མ་ཚོགས་ཀུན། །ཐམས་ཅད་བདག་ལ་དགོངས་སུ་གསོལ། །ཆྒཻ་མོ་ཞེས་བགྱི་བ་བདག །བླ་མེད་བྱང་ཆུབ་མ་ཐོབ་བར། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་སྒྲུབ་ཕྱིར། །བྱང་ཆུབ་ སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་མྱུར་ཐོབ་ཤོག །ལན་གསུམ་གྱིས་ཐུན་མོང་གི་སྡོམ་པ་དང༌། བླ་མ་ཡི་དམ་གཙོར་བཞུགས་པའི། །སྲས་བཅས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་མ་ཚོགས་ཀུན། །ཐམས་ཅད་བདག་ལ་དགོངས་སུ་གསོལ། །ཆེ་གེ་མོ་ཞེས་བགྱི་བ་བདག །དུས་འདི་ཉིད་ནས་བཟུང་ནས་ནི། །ཇི་སྲིད་བྱང་ཆུབ་མ་ཐོབ་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ༑ ༑བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང༌། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་གཟུང་བར་བགྱི༑ ༑སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། ། པདྨའི་རིགས་ཆེན་དག་པ་ལ། །ཕྱི་་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང༌། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་གྱིས་སྔགས་སྡོམ་བཟུང༌། དགུ་པ་མེ་ཏོག་དང་གདོང་གཡོག་ནི་མཚམས་སྦྱོར་སྤྱི་ལྟར་བྱས་ལ༑ ཨཱ་ཁཾ་བཱི་ར་ཧཱུྃ། ཞེས་མེ་ཏོག་སྦྱིན། ༀ་ཙཀྵུ་བྷནྡྷ་བ་ར་མ་ཎ་ཡེ་ཧཱུྃ། ཞེས་རས་ཡུག་དམར་པོས་གདོང་འཆིང༌། བཅུ་པ་བྱང་ཆུབ་ཀྱི་སེམས་གཉིས་བསྐྱེད་པ་ནི། ཁྱེད་རང་རྣམས་ལྷར་གསལ་བའི་སྙིང་གར་ཀུན་རྫོབ་བྱང་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ་རེ་རེ་བསམ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་རེ་སྒོམས་ཤིག །སློབ་དཔོན་གྱིས་རྡོ་རྗེ་འཕྲེད་དང་གྱེན་དུ་འཇོག་བཞིན་པས། ༀ་སརྦ་ཡོ་ག་ཙིཏྟ་ཨུཏྤ་ད་ཡཱ་མི་སུ་ར་ཏེ་ས་མ་ཡ་སྟྭཾ་ཧོཿ སིདྡྷི་བཛྲ་ཡ་ཐཱ་སུ་ཁཾ། ཞེས་དང༌། ངས་ཁྱེད་རྣམས་དཔལ་ཧེ་རུ་ཀའི་དཀྱིལ་འཁོར་དུ་གཞུག་པར་བྱ་ཡིས། ཡི་དམ་ལྷ་ཡི་དམ་ཚིག་དང༌། བྱང་ཆུབ་ཀྱི་སེམས་མ་དོར་བར་གོང་འཕེལ་དུ་གྱིས་ཤིག །འབྲས་བུ་ དམ་པ་སྐུ་གཉིས་ཐོབ་པར་འགྱུར་རོ། །གཉིས་པ་ནང་འཇུག་གི་དམ་ཚིག་བདུན་དུ་གསུངས་པའི། དང་པོ་དཀྱིལ་འཁོར་ནང་དུ་གཞུག་པ་ནི། སློབ་དཔོན་དཀྱིལ་འཁོར་གཙོ་བོའི་སྤྲུལ་པ་ཧེ་རུ་ཀ་ཞལ་གཅིག་ཕྱག་གཉིས་པ་ཞིག་སྲུང་འཁོར་གྱི་ཕྱི་རོལ་དུ་བྱོན་ཏེ། ཁྱེད་རང་རྣམས་ཀྱི་ལག་ནས་ཁྲིད་དེ་རྫུ་འཕྲུལ་གྱིས་སྐད་ཅིག་ལ་སྲུང་འཁོར་ནང་དུ་ཚུད་པར་གྱུར་སྙམ་པ་མཛོད། ཛཿ ཧཱུྃ་བྃ་ཧོཿ གཉིས་པ་ཕྱག་འཚལ་བ་ནི། དེ་ལྟར་སློབ་དཔོན་དཀྱིལ་འཁོར་གྱི་གཙོ་བོའི་སྤྲུལ་པ་དེ་ཉིད་ཀྱི་ཕྱི་བཞིན་ཕྱིན་པས། ཤར་སྒོའི་ཐད་ཀྱི་ནམ་མཁའ་ལ་ཡར་བལྟས་པས་རང་གི་རྩ་བའི་བླ་མ་ལ་བརྒྱུད་པའི་བླ་མའི་ཚོགས་ཀྱིས་བསྐོར་ཏེ་བཞུགས་འདུག་པ་དེ་ལ་ཕྱག་འཚལ་སྙམ་པས་འདིའི་རྗེས་ཟློས་མཛོད། སངས་རྒྱས་ཐམས་ཅད་འདུས་པའི་སྐུ། །ཡིད་བཞིན་ནོར་བུ་གཙུག་གི་རྒྱན། །ཚོགས་ཀྱི་སློབ་དཔོན་ཚོགས་ཀྱི་མཆོག །དཔལ་ལྡན་སྐུ་ལ་སྐྱབས་སུ་མཆི། །དེ་ནས་རིམ་བཞིན་ཕྱིན་པས་ལྷོ་སྒོའི་ཐད་དུ་སླེབས་པ་དེའི་ནམ་མཁར་བལྟས་པས་ཡི་དམ་འཁོར་ལོ་སྡོམ་པ་ལ་རྒྱུད་སྡེ་བཞིའི་ལྷ་ཚོགས་ཀྱིས་བསྐོར་ཏེ་བཞུགས་འདུག་པ་ལ་ཕྱག་འཚལ་སྙམ་པས། འཁོར་བའི་འཁོར་ལོ་རྒྱུན་གཅོད་ཅིང༌། །ཆོས་ཀྱི་འཁོར་ལོ་བསྐོར་མཛད་པ། །བདེ་མཆོག་འཁོར་ལོ་བདེ་བའི་མཆོག །དཔལ་ལྡན་སྐུ་ལ་སྐྱབས་སུ་མཆི། །དེ་ནས་ནུབ་སྒོའི་ནམ་མཁའ་ལ་ཡུམ་རྡོ་རྗེ་ཕག་མོ་ལ་འཁོར་རིགས་བཞིའི་མཁའ་འགྲོས་བསྐོར་ཏེ་བཞུགས་པ་ལ་ཕྱག་ འཚལ་སྙམ། སངས་རྒྱས་ཐམས་ཅད་སྐྱེད་པའི་ཡུམ། །བཅོམ་ལྡན་འདས་མ་རྗེ་བཙུན་མ། །མ་གཅིག་རྡོ་རྗེ་རྣལ་འབྱོར་མ། །དཔལ་ལྡན་མ་ལ་སྐྱབས་སུ་མཆི། །དེ་ནས་བྱང་སྒོའི་ཐད་ཀྱི་ནམ་མཁའ་ལ་བལྟས་པས་རྡོ་རྗེ་མཆེད་ལྕམ་ཐམས་ཅད་དཔའ་བོ་དང་དཔའ་མོའི་ཚུལ་དུ་བཞུགས་པ་ལ་ཕྱག་འཚལ་སྙམ་པས། དཔའ་བོ་དཔའ་མོ་རྡོ་རྗེ་ཡི། །སྤྱན་ཅན་ཆོས་སྐྱོང་རྡོ་རྗེ་སྤུན། །མ་ལུས་ལུས་པ་མེད་པ་ལ། །ཕྱག་འཚལ་གུས་པས་སྐྱབས་སུ་མཆི། །གསུམ་པ་དམ་བཞག་ལ་བཞི་ལས། ཕན་ཡོན་གྱི་སྒོ་ནས་དམ་ལ་བཞག་པ་ནི། རྡོ་རྗེ་སྤྱི་བོར་བཞག །ངས་ཁྱེད་རྣམས་ལ་དཀྱིལ་འཁོར་བཟང་པོ་འདིར་དབང་ཟབ་མོ་བསྐུར་བས་ཚེ་འདིར་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱང་ཐོབ་པར་གྱུར་ན་དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་ལྟ་བུའི་དབང་བསྐུར་ཟབ་མོ་སྦྱིན་པར་བྱ་ཡི། ཁྱེད་རྣམས་ཀྱིས་ཧེ་རུ་ཀའི་གསང་ཆེན་དམ་པ་འདི་དབང་མ་ཐོབ་པ་དང༌། མ་དད་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། སམྦུ་ཊི་ལས། ཁྱབ་འཇུག་དང་དབང་ཕྱུག་ཆེན་པོ་དང་ཚངས་པ་དང་ཉན་ཐོས་དང་རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་པའི་ཕྱིར་གསང་བའོ། །ཞེས་གསུངས། གལ་ཏེ་སྨྲས་ན་བུ་ཁྱོད་དམ་ཚིག་ཉམས་པར་འགྱུར་བས། རྡོ་རྗེ་འདིས་ཁྱོད་ཀྱི་མགོ་བོ་འགེམས་པར་འགྱུར་རོ། །ཞེས་བརྗོད། གཉིས་པ་ཉེས་དམིགས་ཀྱི་སྒོ་ནས་དམ་ལ་བཞག་པ་ནི། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ ན་ནི། །དེ་མ་ཐག་ཏུ་དྲལ་གྱུར་ནས། །རྡོ་རྗེའི་དམྱལ་བར་གནས་བཞིན་དུ། །མི་བཟད་སྡུག་བསྔལ་མྱོང་བར་འགྱུར། །དེ་བས་དམ་ཚིག་བསྲུང་བར་གྱིས། །གསུམ་པ་ཕན་ཡོན་ཉེས་དམིགས་གཉིས་ཀའི་སྒོ་ནས་དམ་ལ་བཞག་པ་ནི། ལས་བུམ་གྱི་སྐྱོར་ཆུ་བླུད་ལ། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ༀ་བཛྲ་ཨ་མྲ་ཏ་ཨུ་ད་ཀ་ས་མ་ཡ་ཧཱུྃ་བརྗོད། བཞི་པ་རྡོ་རྗེ་སློབ་དཔོན་བཀའ་གཉན་པའི་སྒོ་ནས་དམ་ལ་བཞག་པ་ནི། དེང་ཕྱིན་ཆད་ཁྱེད་རྣམས་ཀྱི་དཔལ་ཧེ་རུ་ཀ་དེ་ང་ཡིན་ནོ། །ངས་ཇི་ལྟར་བསྒོ་བ་བཞིན་སྒྲུབ་དགོས་སོ། །མ་བསྒྲུབས་ན་ཁྱེད་རྣམས་བཀའི་ཆད་པ་དྲག་པོའི་སྡུག་བསྔལ་གྱིས་གཟིར་བ་མ་སྤངས་པར་ཚེའི་དུས་བྱས་ཏེ་སེམས་ཅན་དམྱལ་བ་ཆེན་པོར་གནས་དགོས་པར་འགྱུར་རོ། །བརྗོད། བཞི་པ་ཡེ་ཤེས་པ་དབབ་པ་ནི། སློབ་མ་རྣམས་སྒོ་གསུམ་གྱི་གནད་གཅུན་དུ་གཞུག་ལ། ཁཎྜ་རོ་ཧེས་བསང༌། སྭ་བྷཱ་ཝས་སྦྱང༌། གཟུང་འཛིན་གྱིས་བསྡུས་པའི་ཆོས་ཐམས་ཅད་སྟོང་པ་ཉིད་དུ་གྱུར། སྟོང་པའི་ངང་ལས་ས་ཕྱོགས་དག་པའི་ཞིང་ཁམས་གནས་ཁང་ཐར་པ་ཆེན་པོའི་གཞལ་མེད་ཁང་གི་དབུས་སུ་ཁྱེད་རང་རྣམས་གང་དུ་གནས་པའི་གོ་སར་པྃ་ལས་པདྨ་རྃ་ལས་ཉི་མའི་དཀྱིལ་འཁོར། དེའི་སྟེང་དུ་འཇིགས་བྱེད་དང་དུས་མཚན་བསྒྱེལ་བའི་གདན་ལ་ཁྱེད་རང་རྣམས་ཀྱི་སེམས་ཉིད་ཧཱུྃ་མཐིང་ནག་ལས་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་པ་དེ་ལས་ འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས་ཁྱེད་རང་རྣམས་བཅོམ་ལྡན་འདས་འཁོར་ལོ་སྡོམ་པ་སོགས་ཀྱི་མངོན་རྟོགས་སྒྲུབ་ཐབས་ལྟར་ལ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཡབ་ཀྱི་ཐུགས་ཀར་ༀ་ཧ་ལས་རྡོ་རྗེ་སེམས་དཔའ་དཀར་པོ་སོགས་ནས། གདན་ལ་བཞུགས་པའོ། །ཡུམ་གྱི་ལྟེ་བར་ༀ་བྃ་སོགས་ནས། པད་ཉི་རོའི་གདན་ལ་བཞུགས་པའོ། །བར་དང༌། དེའི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོས་མཚན་པར་གསལ་བར་མོས་ལ་གསོལ་འདེབས་རྗེས་ཟློས། བླ་མ་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས། བདག་ལ་དཔལ་ཧེ་རུ་ཀ་དབབ་པར་མཛད་དུ་གསོལ། ལན་གསུམ། དེས་ན་དམིགས་པ་འདི་བཞིན་མཛོད་ཅིག །སློབ་དཔོན་གྱི་ཐུགས་ཀའི་ཧཱུྃ་དང༌། ཁྱེད་རང་རྣམས་ཡི་དམ་དུ་གསལ་བའི་སྟོང་རའི་ནང་རྩ་དབུ་མ་པདྨ་སྔོན་པོ་འདབ་བརྒྱད་དང༌། ཁམས་དམར་པོ་ཉི་མ་དཀར་པོ་ཟླ་བའི་གདན་གྱི་སྟེང་དུ་རང་འདྲའི་ཏིང་ངེ་འཛིན་སེམས་དཔའ་ཧེ་རུ་ཀ་ཚོན་གང་ཙམ་གསལ་ལ་དོད་པ་མགར་བའི་སོལ་མེ་ལས་ཐོན་པའི་ལྕགས་བསྲེགས་ལྟ་བུ་ལས་འོད་ཟེར་ཕྱོགས་བཅུར་འཕྲོས་པས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་རང་འདྲའི་སྐུ་དང་ཡིག་འབྲུ་ཕྱག་མཚན་མེའི་རང་བཞིན་འོད་རབ་ཏུ་འབར་བའི་རྣམ་པར་སྤྱན་དྲངས་པ་དང༌། དཀྱིལ་འཁོར་གཙོ་བོ་ལས་ཀྱང་རང་འདྲ་དཔག་ཏུ་མེད་པ་འཕྲོས། ཚེག་སྒྲ་འུར་སྒྲ་བཅས། སྙིང་གའི་ཧེ་རུ་ཀའི་ལུས་ལ་ཐིམ་པས་ཧེ་རུ་ཀ་མེ་འབར་བ་དྲག་ཏུ་འབར་ཞིང་རང་ལུས་མེ་འབར་བས་མི་བཟོད་པའི་བདེ་བ་རྒྱས་པར་གྱུར། པར་བསམས་ལ་ཤ་ཆེན་དང་གུ་གུལ་གྱི་དུད་པ་བཏང༌། རོལ་མོ་དྲག་ཏུ་འཁྲོལ་ཞིང་རིག་པ་ཧུར་ཕྱུངས་ལ། ༀ་ཤྲཱི་ཧེ་ཧེ་རུ་རུ་ཀཾ་བཛྲ་ཛྙ་ན་ཨཱ་ཝེ་ཤ་ཡ་ཨཱ་ཝེ་ཤ་ཡ་ཛཿ ཛཿ ཧཱུྃ་བྃ་ཧོཿ ཞེས་ལན་མང་དུ་བརྗོད། སྐུ་གསུང་ཐུགས་ཀྱི་ཡེ་ཤེས་དབབ་པའི་རྟགས་ལུས་ངག་ཡིད་ལ་ཇི་ལྟར་འཆར་ན་སོ་སོར་ངོ་སྤྲད། གང་ལྟར་བརྟན་པར་བྱ་བའི་ཕྱིར་སྤྱི་བོར་རྡོ་རྗེ་རྒྱ་གྲམ་དུ་བཞག་ལ། ༀ་ཤྲཱི་ཛྙ་ན་ཧེ་རུ་ཀ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ལྔ་པ་ཕྲིན་ལས་བརྟག་ཅིང༌། ཁྱེད་རང་རྣམས་མིག་དར་དང་བཅས་པའི་མིག་གིས་དཀྱིལ་འཁོར་གྱི་སྟེང་གི་ནམ་མཁའ་ལ་ཁ་དོག་ཅི་འདྲར་མཐོང་བ་ལྟོས་ཤིག །ཅེས་བལྟར་གཞུག །ཁ་དོག་ཇི་སྣང་དྲིས་པས་མཐོང་ཚུལ་སྨྲ། ཁ་དོག་དཀར་པོར་མཐོང་ན་ཞི་བ། སེར་པོས་རྒྱས་པ། དམར་པོས་དབང༌། ལྗང་གུས་དྲག་པོ། ཁ་དོག་སྣ་ཚོགས་ཀྱིས་ལས་སྣ་ཚོགས་འགྲུབ་པར་འགྱུར་བ་ཡིན་ནོ། །དེ་ནས་མེ་ཏོག་དབང་ཐོབ་མྱོང་བ་རྣམས་རང་རང་གི་ལྷག་པའི་ལྷ་ལ་འབུལ། མ་ཐོབ་པ་རྣམས་དཀྱིལ་འཁོར་གྱི་གཙོ་བོ་ལ་དམིགས་ཏེ་འབུལ་བ་ནི། ༀ་པུཥྤེ་མ་ལ་པྲ་ཏཱིཙྪ་ཧོཿ ཞེས་ལྟོས་མེད་དུ་འདོར་དུ་གཞུག །ཁྱེད་རང་རྣམས་ཀྱི་མེ་ཏོག་ཕོག་པའི་ལྷ་དེ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱེ་སྟེ་ཁྱེད་རང་རྣམས་ཀྱི་སྤྱི་བོར་ཐིམ་པའི་མོས་པ་མཛོད། ༀ་པུཥྤེ་མཱ་ལ་ས་མ་ཡ་ཧཱུྃ། ཞེས་བརྗོད་ཅིང་མེ་ཏོག་སྤྱི་བོར་བཅིང༌། དྲུག་པ་མིག་དབྱེ་བ་ནི། འབྱེད་པའི་ཕྱག་རྒྱ་དང་བཅས། སློབ་དཔོན་གྱིས་མ་རིག་པའི་འཐིབ་པོ་བསལ་བྱུང་སྙམ་པའི་མོས་པ་མཛོད། ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །རྡོ་རྗེའི་མིག་ནི་བླ་ན་མེད༑ ༑ཕྱེ་བས་ཡེ་ཤེས་མཐོང་བར་འགྱུར། །ༀ་བཛྲ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ ཏྲཱཾ། བརྗོད། བདུན་པ་དཀྱིལ་འཁོར་བསྟན་པ་ནི། སློབ་དཔོན་གྱིས། ཐར་པ་ཆེན་པོའི་གྲོང་ཁྱེར་མཆོག །ལྟོས་ཤིག་ལྟོས་ཤིག་སེམས་དཔའ་ཆེ། །དཀྱིལ་འཁོར་བཟང་པོ་འདི་ལ་ལྟོས། །མེ་ཏོག་གང་དུ་ལྷུང་གྱུར་པ། །དེ་ནི་ཁྱོད་ཀྱི་ལྷག་པའི་ལྷ། །དེ་ལ་དད་པ་རབ་ཏུ་བསྐྱེད། །སྔགས་དང་ཕྱག་རྒྱས་བྱིན་གྱིས་བརླབས། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང༌། ། དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་བརྗོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །དེ་ཕྱིར་ཁྱེད་རྣམས་སྐལ་ལྡན་འགྱུར། །དཔའ་བོ་རྣལ་འབྱོར་མ་རིགས་སྐྱེས། །དམ་ཚིག་མཆོག་ལ་གནས་པར་གྱིས། །ནུས་ན་སྲུང་འཁོར་ནས་གཙོ་བོའི་བར་མངོན་རྟོགས་ལྟར་རྒྱས་པར་བརྗོད། མི་ནུས་ན། བཅོམ་ལྡན་འདས་དཔལ་འཁོར་ལོ་སྡོམ་པ་དྲུག་ཅུ་རྩ་གཉིས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་མངོན་སུམ་བཞིན་དུ་མཐོང་བར་གྱུར། ཞེས་པ་རྣམས་བརྗོད་དོ། །གཉིས་པ་ དངོས་གཞི་དབང་བསྐུར་བ་ལ། བུམ་པ། གསང་བ། ཤེར་ཡེ། ཚིག་དབང་བཞི་ལས། དང་པོ་བུམ་དབང་ནི། དངོས་གཞིའི་དབང་བསྐུར་བའི་ཐོག་མར་བུམ་དབང་ཞུ་བའི་ཡོན་དུ་མཎྜལ་ཕུལ། ཞེས་མཚམས་སྦྱར་ལ། ཕྱི་སྣང་བ་སྣ་ཚོགས་ཀྱི་མཎྜལ་ལ༑ ༑ནང་དུ་མ་རོ་གཅིག་གི་ཆག་ཆག་བཏབ། །རང་གསལ་འཛིན་མེད་ཀྱི་མེ་ཏོག་བཀོད། །ཕ་བླ་མ་རྣམས་ཀྱི་སྐུ་ལ་འབུལ། །སྐུ་ལ་ཕུལ་བའི་བསོད་ནམས་ཀྱིས། །བདག་གཞན་ལུས་ཀྱི་སྒྲིབ་པ་དག་གྱུར་ཅིག །བདག་གཞན་ལུས་ལ་ཡོན་ཏན་རྫོགས་པ་དང༌། །བདག་གཞན་ལུས་ཀྱིས་འགྲོ་དོན་འགྲུབ་པར་ཤོག །ཅེས་མཎྜལ་སྔོན་དུ་འགྲོ་བས། མཁྱེན་བརྩེ་ཡེ་ཤེས་ལྔ་ཡི་བདག །འགྲོ་བའི་དེད་དཔོན་བླ་མ་མཆོག །བཅོམ་ལྡན་ཧེ་རུ་ཀ་དཔལ་གྱིས༑ ༑བདག་ལ་བུམ་དབང་བསྐུར་དུ་གསོལ། །ཞེས་གསོལ་བ་གདབ། བུམ་དབང་གི་སྡོམ་ལ་བཅུ་གཅིག་ཏུ་གསུངས་པའི་དང་པོར་མི་བསྐྱོད་པ་ཆུའི་དབང་ནི། ལས་བུམ་གྱི་ཆུ་འཐོར་ལ། ༀ་ཁཎྜ་རོ་ཧེས་བསང༌། སྭ་བྷཱ་ཝས་སྦྱང། སློབ་མ་རྣམས་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་ལས་པདྨ་རྃ་ལས་ཉི་མ་བྃ་ལས་རོའི་གདན་གྱི་སྟེང་དུ་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པ་ལས་འོད་འཕྲོས་འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས་མི་བསྐྱོད་འཁོར་ལོ་སྡོམ་པ་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་ཀྱི་གཡས་པ་དྲུག་གིས་རྡོ་རྗེ་དང༌། གཡོན་པ་དྲུག་གིས་དེས་ཡུ་བ་བྱས་པའི་དྲིལ་བུ་འཛིན་པའི་དང་པོ་གཉིས་ཀྱིས་ཡུམ་མཱ་མ་ཀཱི་ སྔོན་མོ་གྲི་གུག་དང་ཐོད་པ་འཛིན་པ་ལ་འཁྱུད་པ། ཞབས་གཉིས་གཡས་བརྐྱང་ཞིང་གཡོན་བསྐུམ་པའི་རོལ་སྟབས་ཀྱིས་བཞུགས་པ། རྒྱན་དང་ཆ་ལུགས་ཐམས་ཅད་ཡོངས་སུ་རྫོགས་པ་གར་དགུའི་ཉམས་དང་ལྡན་པར་གྱུར། དེའི་སྤྱི་བོར་ༀ་དཀར་པོ་མགྲིན་པར་ཨཱཿ དམར་པོ་ཐུགས་ཀར་ཧཱུྃ་སྔོན་པོས་མཚན་པར་གྱུར། ཐུགས་ཀའི་ཧཱུྃ་ལས་འོད་ཟེར་འཕྲོས་རང་འདྲའི་ཡེ་ཤེས་པ་སྤྱན་དྲངས། བཛྲ་ས་མཱ་ཛ། ཛཿ ཧཱུྃ་བྃ་ཧོཿ དབང་བསྐུར་བར་གསོལ་བ་གདབ་པ་ནི། བླ་མ་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་དབང་ཡུལ་གྱི་དཀྱིལ་འཁོར་གཙོ་བོ་དེ་བཞིན་གཤེགས་པ་ཡབ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་བུམ་པ་ལ་སོགས་རྫས་སོ་སོས་དབང་བསྐུར། མཆོད་པའི་ལྷ་དང་ལྷ་མོ་རྣམས་ཀྱིས་བཀྲ་ཤིས་པའི་གླུ་དབྱངས་བརྗོད་ཅིང་མཆོད། ལས་དབང་གི་ཁྲོ་བོ་ཁྲོ་མོ་རྣམས་ཀྱིས་བགེགས་སྐྲོད་པའི་ལས་མཛད་པ་དང༌། བུམ་པའི་ཆུས་སྤྱི་བོ་ནས་དབང་བསྐུར་བར་གྱུར་པར་བསམས་ལ། རྣམ་རྒྱལ་བུམ་པ་ལག་ཏུ་ཐོགས་ཏེ། ཧེ་རུ་ཀ་དཔལ་འཁོར་བཅས་ཀྱི། །སྐུ་གསུང་ཐུགས་ལས་བྱུང་བ་ཡི། །སྒྲིབ་གཉིས་བག་ཆགས་སྦྱོང་བྱེད་པའི། །རྡོ་རྗེའི་དབང་བསྐུར་ཆེན་པོ་སྦྱིན། །ༀ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། བུམ་པ་སྤྱི་བོར་བཞག་ཅིང་བུམ་ཆུ་མྱོང༌། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས་སྒོ་གསུམ་གྱི་དྲི་མ་ ཐམས་ཅད་དག །ལུས་ཐམས་ཅད་བདུད་རྩིའི་རྒྱུན་གྱིས་གང་སྟེ་སྤྱི་བོར་འཁྱིལ་བ་ལས་མི་བསྐྱོད་པས་དབུར་བརྒྱན་པར་གྱུར། དེ་ལ་མཆོད་པ་ནི། མཆོད་ཡོན་སོགས་བཏེགས་ལ། ༀ་བཛྲ་ཨ?ཾ་ནས། ཤབྡ་པྲ་ཏཱིཙྪ་སྭཱ་ཧཱའི་བར་བརྗོད། དེས་མི་བསྐྱོད་པ་ཆུའི་དབང་ཐོབ། རྣམ་ཤེས་ཀྱི་ཕུང་པོ་དང་ཉོན་མོངས་པ་ཞེ་སྡང་གི་དྲི་མ་དག །མི་བསྐྱོད་པའི་བསྐྱེད་རིམ་བསྒོམ་པ་ལ་དབང༌། མེ་ལོང་ལྟ་བུའི་ཡེ་ཤེས་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །ཞེས་རྟོགས་པ་བརྗོད། གཉིས་པ་རིན་འབྱུང་དབུ་རྒྱན་གྱི་དབང་ནི། སློབ་མ་དང་དབང་རྫས་དབུ་རྒྱན་གཉིས་ཀ་བསང་སྦྱང༌། སློབ་མ་དང་དབང་རྫས་གཉིས་ཀ་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་པྃ་ལས་པདྨ། རྃ་རྃ་ལས་ཉི་མ། བྃ་བྃ་ལས་རོའི་གདན་གྱི་སྟེང་དུ། ཏྲཱྃ་ཏྲཱྃ་ལས་རིན་པོ་ཆེ་སེར་པོ་ཏྲཱྃ་གྱིས་མཚན་པ་ལས་འོད་འཕྲོས་འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས་རིན་འབྱུང་འཁོར་ལོ་སྡོམ་པ་སྐུ་མདོག་སེར་པོ་ཞལ་བཞི་ཕྱག་བཅུ་གཉིས་ཀྱི་གཡས་པ་དྲུག་གིས་རིན་པོ་ཆེ་དང༌། གཡོན་པ་དྲུག་གིས་དེས་ཡུ་བ་བྱས་པའི་དྲིལ་བུ་འཛིན་པའི་དང་པོ་གཉིས་ཀྱིས་ཡུམ་རིན་ཆེན་སྒྲོལ་མ་སེར་མོ་གྲི་གུག་དང་ཐོད་པ་འཛིན་པ་ལ་འཁྱུད་པ། ཞབས་གཉིས་སོགས་གོང་བཞིན་ལ། ཧཱུྃ་ལས་འོད་འཕྲོས་དཀྱིལ་འཁོར་གཙོ་བོའི་ཐུགས་ཀ་ནས་རང་འདྲའི་ཡེ་ཤེས་པ་དང་ཕྱོགས་བཅུའི་མཆོད་འོས་ཐམས་ཅད་རིན་འབྱུང་འཁོར་ལོ་ སྡོམ་པའི་རྣམ་པར་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ དབང་རྫས་ལ་དབང་བསྐུར་བ་ནི། དཀྱིལ་འཁོར་ལྷ་ཚོགས་ཐམས་ཅད་ཀྱིས། འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་དཀྱིལ་འཁོར་པ་རྣམས་ཀྱིས་དབང་རྫས་ལ་དབང་བསྐུར་བར་མོས་ལ། ༀ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། རྣམ་རྒྱལ་བུམ་ཆུ་འཐོར། ཞེས་གསུངས་ཤིང་དབང་རྫས་ཀྱི་ལྷ་ལ་དབང་བསྐུར་བས་སྒོ་གསུམ་གྱི་དྲི་མ་ཐམས་ཅད་དག །ལུས་ཐམས་ཅད་བདུད་རྩིའི་རྒྱུན་གྱིས་གང་སྟེ་སྤྱི་བོར་འཁྱིལ་བ་རིན་ཆེན་འབྱུང་ལྡན་དུ་གྱུར། ཨ?ཾ་སོགས་ཀྱིས་མཆོད། དབང་རྫས་ཀྱི་རིན་འབྱུང་ཡབ་ཡུམ་སྙོམས་པར་ཞུགས་འོད་དུ་ཞུ་བ་ལས་རིན་པོ་ཆེའི་ཅོད་པན་དུ་གྱུར། ཡང་སློབ་མས་གསོལ་བ་གདབ་པ་ནི། བླ་མ་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཅེས་བརྗོད། དབུ་རྒྱན་སྤྱི་བོར་བཅིངས་ལ། སངས་རྒྱས་ཀུན་གྱི་དབུ་རྒྱན་དབང༌། །དེ་རིང་ཁྱོད་ལ་བསྐུར་བར་བྱ༑ ༑སངས་རྒྱས་མཆོག་ཏུ་བསྒྲུབ་པའི་ཕྱིར། །དབུ་རྒྱན་འདི་ཡིས་མཛེས་པར་བྱོས། །ༀ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུྃ། ཧེ་རུ་ཀ་དཔལ་སོགས། རྣམ་བུམ་ཆུ་འཐོར་ལ། ༀ་བཛྲཱི་བྷ་བ་ཨ་བྷི་ཥིཉྩ་ཧཱུྃ། ཞེས་སོགས་གོང་ལྟར་བརྗོད། སྤྱི་བོར་འཁྱིལ་བ་ལས་རིན་ཆེན་འབྱུང་ལྡན་གྱིས་དབུར་བརྒྱན། ཨ?ཾ་སོགས་ཀྱིས་མཆོད། དེས་རིན་ཆེན་འབྱུང་ལྡན་ཅོད་པན་གྱི་དབང་ཐོབ། ཚོར་བའི་ཕུང་པོ་དང་ཉོན་མོངས་པ་ང་རྒྱལ་གྱི་དྲི་མ་དག །རིན་ཆེན་འབྱུང་ལྡན་གྱི་སྐུ་བསྒོམ་པ་ལ་དབང༌། འབྲས་བུ་མཉམ་ཉིད་ཡེ་ཤེས་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །གསུམ་པ་འོད་དཔག་མེད་རྡོ་རྗེའི་དབང་ནི། སློབ་མ་དང་རྡོ་རྗེ་བསང་སྦྱང༌། སློབ་མ་དང་དབང་རྫས་རྡོ་རྗེ་གཉིས་ཀ་མི་དམིགས་ཏེ་སོགས་གོང་དབུ་རྒྱན་སྐབས་ལྟར་ལ། གདན་གྱི་སྟེང་དུ་ཧྲཱིཿ ཧྲཱིཿ ལས་པདྨ་དམར་པོ་ཧྲཱིཿ ས་མཚན་པ་ལས་སོགས། འོད་དཔག་མེད་འཁོར་ལོ་སྡོམ་པ་སྐུ་མདོག་དམར་པོ་ཞལ་བཞི་ཕྱག་བཅུ་གཉིས་ཀྱི་གཡས་པ་དྲུག་གིས་པདྨ་དང༌། གཡོན་པ་དྲུག་གིས་དེས་ཡུ་བ་བྱས་པའི་དྲིལ་བུ་འཛིན་པའི་དང་པོ་གཉིས་ཀྱིས་ཡུམ་གོས་དཀར་མོ་དམར་མོ་གྲི་གུག་དང་ཐོད་པ་འཛིན་པ་ལ་འཁྱུད་པ་སོགས། ཧཱུྃ་ལས་འོད་འཕྲོས་དཀྱིལ་འཁོར་གཙོ་བོའི་ཐུགས་ཀ་ནས་རང་འདྲའི་ཡེ་ཤེས་པ་དང་ཕྱོགས་བཅུའི་མཆོད་འོས་ཐམས་ཅད་འོད་དཔག་མེད་འཁོར་ལོ་སྡོམ་པའི་རྣམ་པར་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ དབང་རྫས་ལ་དབང་བསྐུར་བ་ནི། དཀྱིལ་འཁོར་ལྷ་ཚོགས་ ཐམས་ཅད་ཀྱིས་སོགས་གོང་ལྟར། འཁྱིལ་བ་འོད་དཔག་མེད་དུ་གྱུར་ནས་དབུ་བརྒྱན་པར་གྱུར། གོང་ལྟར་མཆོད། འོད་དཔག་མེད་ཡབ་ཡུམ་སྙོམས་པར་ཞུགས་འོད་དུ་ཞུ་བ་ལས་བྱུང་བའི་དབང་རྫས་རྡོ་རྗེར་གྱུར་པར་བསམ། ཡང་སློབ་མས༑ བླ་མ་དང་དཀྱིལ་འཁོར་ལྷ་ཚོགས་ཐམས་ཅད༴ གསོལ་བཏབ་རྗེས་ཟློས་བྱ། སློབ་དཔོན་གྱིས། སངས་རྒྱས་ཀུན་གྱི་རྡོ་རྗེའི་དབང༌། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ཟུངས། །ༀ་མ་ཧཱ་བཛྲ་ཨ་བྷི་ཥིཉྩ་ཧཱུྃ། ཧེ་རུ་ཀ་དཔལ་སོགས་གོང་བཞིན་དང༌། འོད་དཔག་མེད་ཀྱིས་དབུར་བརྒྱན། ཨ?ཾ་སོགས་ཀྱིས་མཆོད། དེས་འོད་དཔག་མེད་རྡོ་རྗེའི་དབང་ཐོབ། འདུ་ཤེས་ཀྱི་ཕུང་པོ་དང་ཉོན་མོངས་པ་འདོད་ཆགས་དག །འོད་དཔག་མེད་ཀྱི་བསྐྱེད་རིམ་བསྒོམ་པ་ལ་དབང༌། འབྲས་བུ་སོ་སོར་རྟོག་པའི་ཡེ་ཤེས་མངོན་དུ་གྱུར་པའི་སྐལ་བ་ཅན་དུ་བྱས་པ་ཡིན་ནོ། །བཞི་པ་དོན་གྲུབ་དྲིལ་བུའི་དབང་ནི། སློབ་མ་དང་དབང་རྫས་དྲིལ་བུ་གཉིས་ཀ་མི་དམིགས་ཏེ་སོགས་ནས། གདན་གྱི་སྟེང་དུ་ཨ་ཨ་ལས་རལ་གྲི་ལྗང་གུ་ཨས་མཚན་པ་ལས་སོགས། དོན་གྲུབ་འཁོར་ལོ་སྡོམ་པ་སྐུ་མདོག་ལྗང་གུ་ཞལ་བཞི་ཕྱག་བཅུ་གཉིས་ཀྱི་གཡས་པ་དྲུག་གིས་རལ་གྲི་དང༌། གཡོན་པ་དྲུག་གིས་དེས་ཡུ་བ་བྱས་པའི་དྲིལ་བུ་འཛིན་པའི་དང་པོ་གཉིས་ཀྱིས་ཡུམ་དམ་ཚིག་སྒྲོལ་མ་ལྗང་གུ་སོགས། མཆོད་འོས་ཐམས་ཅད་དོན་གྲུབ་འཁོར་ལོ་སྡོམ་པའི་རྣམ་པར་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ དབང་རྫས་ལ་དབང་བསྐུར། འཁྱིལ་བ་དོན་གྲུབ་ཏུ་གྱུར་ནས་དབུ་བརྒྱན་པར་གྱུར། གོང་ལྟར་མཆོད། དོན་གྲུབ་ཡབ་ཡུམ་སྙོམས་པར་ཞུགས། འོད་དུ་ཞུ་བ་ལས་བྱུང་བའི་དབང་རྫས་དྲིལ་བུར་གྱུར། སློབ་མས། བླ་མ་དང་དཀྱིལ་འཁོར་ལྷ་ཚོགས་སོགས། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །བྱང་ཆུབ་མཆོག་ཏུ་རྒྱལ་བས་བཞེད། །ཁྱོད་ཀྱིས་ཀྱང་ནི་རྟག་ཏུ་ཟུངས། །ༀ་མ་ཧཱ་གྷཱཎྜེ་ཨ་བྷི་ཥིཉྩ་ཧཱུྃ། ཧེ་རུ་ཀ་དཔལ་སོགས་དབང་བསྐུར། དོན་ཡོད་གྲུབ་པས་དབུར་བརྒྱན་པར་གྱུར། ཨ?ཾ་སོགས་ཀྱིས་མཆོད། དེས་དོན་ཡོད་གྲུབ་པ་དྲིལ་བུའི་དབང་ཐོབ། འདུ་བྱེད་ཀྱི་ཕུང་པོ་དང་ཉོན་མོངས་པ་ཕྲག་དོག་དག །དོན་ཡོད་གྲུབ་པའི་བསྐྱེད་རིམ་བསྒོམ་པ་ལ་དབང༌། འབྲས་བུ་བྱ་བ་གྲུབ་པའི་ཡེ་ཤེས་མངོན་དུ་གྱུར་པའི་སྐལ་བ་ཅན་དུ་བྱས་པ་ཡིན་ནོ། །ལྔ་པ་རྣམ་པར་སྣང་མཛད་མིང་གི་དབང་ནི། སློབ་མ་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་ལས་པདྨ་རྃ་ལས་ཉི་མ་བྃ་ལས་རོའི་གདན་གྱི་སྟེང་དུ་ༀ་ལས་འཁོར་ལོ་ༀ་གྱིས་མཚན་པ་ལས་སོགས། རྣམ་སྣང་འཁོར་ལོ་སྡོམ་པ་སྐུ་མདོག་དཀར་པོ་ཞལ་བཞི་ཕྱག་བཅུ་གཉིས་ཀྱི་གཡས་པ་དྲུག་གིས་འཁོར་ལོ་དང༌། གཡོན་པ་དྲུག་གིས་དེས་ཡུ་བ་བྱས་པའི་དྲིལ་བུ་འཛིན་པའི་དང་པོ་གཉིས་ཀྱིས་ཡུམ་སངས་རྒྱས་སྤྱན་མ་སྐུ་མདོག་དཀར་མོ་སོགས། རྣམ་སྣང་འཁོར་ལོ་སྡོམ་པའི་རྣམ་པར་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ ཡང་སློབ་མས། བླ་མ་དང་དཀྱིལ་འཁོར་ལྷ་ཚོགས་སོགས་གསོལ་གདབ། དཀྱིལ་འཁོར་གཙོ་བོའི་ཕྱག་གཡས་སྤྱི་བོར་བཞག་ཅིང་གཡོན་མི་འཇིགས་པའི་ཕྱག་རྒྱ་དང་བཅས་ཏེ། རྡོར་དྲིལ་སྤྱི་བོར་བསྣོལ་ལ། སངས་རྒྱས་ཀུན་གྱི་མིང་གི་དབང༌། །དེ་རིང་ཁྱོད་ལ་བསྐུར་བར་བྱ། །སངས་རྒྱས་མཆོག་ཏུ་རབ་བསྒྲུབ་ཕྱིར། །རྡོ་རྗེའི་མིང་ནི་ཁྱོད་ཀྱིས་ཟུངས། །འདིར་མེ་ཏོག་གང་ལ་ཕོག་པའི་རིགས་སོ་སོའི་མིང་བཏགས་དགོས་པར་གསུངས་ཀྱང་སྤྱི་ཙམ་དུ། ༀ་ཤྲཱི་ཧེ་རུ་ཀ་ན་མཿ ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧཱུྃ་མི་བསྐྱོད་རྡོ་རྗེ་ཞེས་བྱ་བའི་དེ་བཞིན་ གཤེགས་པའོ། །ཧེ་རུ་ཀ་དཔལ་སོགས་ཆུ་དབང་བསྐུར། རྣམ་པར་སྣང་མཛད་ཀྱིས་དབུར་བརྒྱན་པར་གྱུར། ཨ?ཾ་སོགས་ཀྱིས་མཆོད། དེ་ལྟར་རྣམ་པར་སྣང་མཛད་མིང་གི་དབང་ཐོབ། གཟུགས་ཀྱི་ཕུང་པོ་དང་ཉོན་མོངས་པ་གཏི་མུག་དག །རྣམ་པར་སྣང་མཛད་ཀྱི་བསྐྱེད་རིམ་བསྒོམ་པ་ལ་དབང༌། འབྲས་བུ་ཆོས་ཀྱི་དབྱིངས་ཀྱི་ཡེ་ཤེས་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །དྲུག་པ་བརྟུལ་ཞུགས་རྡོ་རྗེ་སེམས་དཔའི་དབང་ནི། སློབ་མ་བསང་སྦྱང༌། སློབ་མ་དང་རྡོ་རྗེ་གཉིས་ཀ་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་པྃ་ལས་པདྨ་ཨ་ཨ་ལས་ཟླ་བའི་གདན་གྱི་སྟེང་དུ་ཧཱུྃ་ཧཱུྃ་ལས་རྡོ་རྗེ་དཀར་པོ་ཧཱུྃ་གིས་མཚན་པ་ལས་སོགས། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས་པའི་པང་ན། ཡུམ་རྡོ་རྗེ་སྙེམས་མ་དཀར་མོ་གྲི་གུག་དང་ཐོད་པ་འཛིན་པས་ཡབ་ཀྱི་མགུལ་ནས་འཁྱུད་ཅིང༌། ཞབས་གཉིས་པདྨའི་སྐྱིལ་ཀྲུང་གིས་ཡབ་ཀྱི་སྐུ་ལ་འཁྲིལ་བ། གཉིས་ཀའང་རུས་པ་དང་རིན་པོ་ཆེའི་རྒྱན་དུ་མས་མཛེས་པ། དེའི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོ། ཧཱུྃ་ལས་འོད་འཕྲོས་དཀྱིལ་འཁོར་གཙོ་བོའི་ཐུགས་ཀ་ནས་རང་འདྲའི་ཡེ་ཤེས་པ་དང༌། ཕྱོགས་བཅུའི་མཆོད་འོས་ཐམས་ཅད་རྡོ་རྗེ་སེམས་དཔའི་རྣམ་པར་བཛྲ་ས་མཱ་ཛཿ ཛཿ ཧཱུྃ་བྃ་ཧོཿ དཀྱིལ་འཁོར་ ལྷ་ཚོགས་ཐམས་ཅད༴ སྤྱི་བོར་འཁྱིལ་བ་རྡོ་རྗེ་སེམས་དཔའ་ཡབ་ཡུམ་དུ་གྱུར་ནས་དབུ་བརྒྱན་པར་གྱུར། ཨ?ཾ་སོགས་ཀྱིས་མཆོད། དབང་རྫས་ཀྱི་རྡོ་རྗེ་སེམས་དཔའ་ཡབ་ཡུམ་སྙོམས་པར་ཞུགས་ཏེ་འོད་དུ་ཞུ་བ་ལས་སངས་རྒྱས་ཐམས་ཅད་ཀྱི་ཐུགས་ཡེ་ཤེས་ལས་བྱུང་བའི་རྡོ་རྗེར་གྱུར། འདི་དེ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་སྟེ། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཟུང༌། ། ལག་ན་རྡོ་རྗེའི་བརྟུལ་ཞུགས་བརྟན། །ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་སྟྭཾ། ཨེ་ཥ་དྷ་ར་ཡཱ་མི་ཧི་ཧི་ཧི་ཧི་ཧཱུྃ། ཞེས་རྡོ་རྗེ་སྙིང་གར་བཅང༌། ཞེས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོ་རྡོ་རྗེ་རྩེ་ལྔ་པ་བྱིན་པས་སྙིང་གར་རྡོ་རྗེ་སེམས་དཔའ་གསལ་བར་བསམ། ཨ?ཾ་སོགས་ཀྱིས་མཆོད། དེ་ལྟར་རྡོ་རྗེ་སེམས་དཔའི་དབང་ཐོབ་འཁོར་བའི་རང་བཞིན་མྱང་འདས་སུ་རྟོགས། དམན་པར་འཛིན་པའི་དྲི་མ་དག །རྡོ་རྗེ་སེམས་དཔའི་བསྐྱེད་རིམ་བསྒོམ་པ་ལ་དབང༌། འབྲས་བུ་ཉོན་མོངས་པ་ལྔ་ཡེ་ཤེས་ལྔ་མངོན་དུ་གྱུར་པའི་སྐལ་བ་ཅན་དུ་བྱས་པ་ཡིན་ནོ། །བདུན་པ་མངའ་དབུལ་བ་ལ་ས་བཅད་བཅུ་གཉིས་སུ་ཡོད་པའི་དང་པོ་སློབ་མ་ལྷར་བསྐྱེད་པ་ནི། བསང་སྦྱང༌། སློབ་མ་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་ལས་པདྨ་རྃ་ལས་ཉི་མ་བྃ་ལས་འཇིགས་བྱེད་དུས་མཚན་གྱི་སྟེང་དུ་ཁྱེད་རང་རྣམས་ཀྱི་རྣམ་ཤེས་ཧཱུྃ་ལས་བཅོམ་ལྡན་འདས་འཁོར་ལོ་སྡོམ་པ་ཡབ་ཡུམ་གྱི་སྐུར་གྲུབ་ཅིང་ གསལ་བ་ནི་སྐུ་མདོག་མཐིང་ནག་ཞལ་བཞི་ལས་ཞེས་པ་ནས། ཡབ་ཡུམ་གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར། བར་སྒྲུབ་ཐབས་ལྟར་དང༌། བཅོམ་ལྡན་འདས་ཀྱི་ཐུགས་ཀར་ༀ་ཧ་ལས་སོགས། རྡོ་རྗེ་ཕག་མོའི་ལྟེ་བར་སོགས། སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོས་མཚན་པར་གྱུར། སྤྲོ་ན་ཡེ་ཤེས་དབབ་པ་གོང་ལྟར་བྱ། སློབ་མས་གསོལ་བ་གདབ་པ་ནི། བླ་མ་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས༑ བདག་ལ་མངོན་པར་དབང་བསྐུར་དུ་གསོལ། ལན་གསུམ། ལྷ་ཚོགས་རྣམས་ཀྱིས་གསུང་བར་བསམས་ལ། རྣམ་བུམ་ལག་ཏུ་ཐོགས། ཧེ་རུ་ཀ་དཔལ་སོགས་བུམ་དབང་ལྟར་ལ། རྡོ་རྗེ་སེམས་དཔའ་ཡབ་ཡུམ་གྱིས་དབུར་བརྒྱན་པར་གྱུར། དང་པོའི་ལྕང་ལོའི་དབང་ནི། ཁྱེད་རང་རྣམས་ཡི་དམ་གྱི་ལྷར་གསལ་བ་དེ་ལ་ལྕང་ལོ་སྤྱི་བོར་བཅིངས་པའི་མོས་པ་མཛོད། སྐྲ་གྲོལ་ཉོན་མོངས་གྲོལ་བ་སྟེ། །མུ་ཏིག་རྒྱན་ལྡན་ཡིད་འཕྲོག་པ། །ལྕང་ལོ་ཅོད་པན་ཐོར་ཚུགས་ནི། །ཡེ་ཤེས་སྒྲོན་མེའི་རྒྱན་དུ་ཁྱེར། །ལྕང་ལོ་སྤྱི་བོར་བཅིང་ཚུལ་བྱ། གཉིས་པ་བྱུགས་པའི་རྩི་གསུམ་གྱི་དབང་ནི། ཁྱེད་རང་རྣམས་ཀྱི་མཁུར་རྩེ་གཉིས། ཨོག་མའི་རྩེ། སྣའི་རྩེ་རྣམས་སུ་ཁྲག་གི་ཐིག་ལེ། ལྐོག་མའི་མགོ་བྲང་རྣམས་ལ་ཞག་གི་ཟོ་རིས། འགྲམ་པ་གཉིས། རྣ་ལྟག་གཉིས་དཔྲལ་བ་སོགས་ལུས་བྱིང་ལ་ཐལ་ཆེན་གྱི་ཚོམ་བུ་བྱུགས་པའི་མོས་པ་མཛོད། ཁྲག་རིས་དམར་པོ་སྙིང་རྗེའི་རྒྱན། །ཞག་གི་ཟོ་རིས་བྱམས་པའི་རྒྱན། །ཐལ་ཆེན་ཚོམ་བུ་སྟོང་ཉིད་རྒྱན། ། སྣང་སྟོང་དབྱེར་མེད་རྒྱན་དུ་ཁྱེར། །ཐལ་ངག་ཞག་གསུམ་བྱུགས། གསུམ་པ་འདོགས་རྒྱན་གསུམ་གྱི་དབང་ནི། དབུ་ལ་མི་མགོ་སྐམ་པོ་ལྔ། ལུས་ལ་ཐོད་རློན་ཁྲག་འཛག་པ་ལྔ་བཅུའི་དོ་ཤལ། ཡན་ལག་བཞི་ལ་སྦྲུལ་གྱི་གདུ་བུས་བརྒྱན་པའི་མོས་པ་མཛོད། རུས་རྒྱན་སྦྲུལ་གྱི་ཆུན་པོ་དང༌། །ཐོད་སྐམ་ལྔ་ཡི་དབུ་རྒྱན་དང༌། །ཁྲག་འཛག་ལྔ་བཅུའི་དོ་ཤལ་རྣམས། །དེང་ནས་ཁྱོད་ཀྱིས་རྒྱན་དུ་ཁྱེར། །བཞི་པ་བགོ་བའི་གོས་རྣམས་ཀྱི་དབང་ནི། སྐུ་སྟོད་ལ་གླང་ཆེན་གྱི་ཀོ་རློན། སྐུ་སྨད་ལ་སྟག་ལྤགས་ཀྱི་ཤམ་ཐབས། སྐུ་སྐེད་ལ་ཞིང་ཆེན་གྱི་གཡང་གཞིས་གཡོགས་པའི་མོས་པ་མཛོད། འདོད་ཆགས་དག་པའི་གཡང་གཞི་དང༌། །ཞེ་སྡང་དག་པའི་སྟག་ཤམ་དང༌། །གཏི་མུག་དག་པའི་གླང་ལྤགས་ཏེ། །བླ་མེད་ན་བཟའ་རྒྱན་དུ་ཁྱེར། །ལྔ་པ་གདན་གྱི་དབང་ནི། པདྨ་ཉི་མ་རོའི་གདན་རྐྱང་འོག་ཏུ་བཏིང་བའི་མོས་པ་མཛོད། འཇིགས་རུང་དུར་ཁྲོད་དབུས་སུ་ནི། །ཧེ་རུ་ཀ་ཡི་ཉམས་ལྡན་པས། །རྟོག་མེད་རོ་གདན་ལ་འདུག་སྟེ། །ཉམ་ང་མེད་པའི་སྤྱོད་པ་གྱིས། །དྲུག་པ་ཐབས་ཤེས་ཕྱག་རྒྱའི་དབང་ནི། ཕྱག་གཡས་སུ་རྡོ་རྗེ་དང་གཡོན་དུ་དྲིལ་བུ་གཏད་བྱུང་བའི་མོས་པ་མཛོད། རྡོ་རྗེ་ཐབས་ལྡན་བདེ་བ་སྟེ། །དྲིལ་བུ་ཤེས་རབ་སྟོང་པ་ཉིད། །ཐབས་དང་ཤེས་རབ་གཉིས་མེད་པའི། །རྡོ་རྗེ་དྲིལ་བུ་གཟུང་བར་བྱ། །བདུན་པ་གྲི་ཐོད་ཀྱི་དབང་ནི། ཡང་གྲི་གུག་དང་ཐོད་པ་སྤྲད་པ་ཐུགས་ཀའི་སྟེང་འོག་ཏུ་འཛིན་ཚུལ་མཛོད། གཡས་ཀྱི་སྡིག་ཅན་སྲོག་གཅོད་གྲིས། ། བདུད་བཞི་ལ་སོགས་སྲོག་བཅད་ནས། །གཡོན་གྱི་ཡེ་ཤེས་ཀ་པཱ་ལར། །བདུད་རྩི་ལྔ་ལ་རོལ་པར་བྱ། །བརྒྱད་པ་ནི། ཕྱག་གཡས་ལ་ཅང་ཏེའུ་དང་གཡོན་གྲུ་མོར་ཁ་ཊྭཱཾ་ག་གཏད་པར་མོས་ལ། ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་དཔལ་ཌཱ་མ་རུ། །དཔའ་བོ་དཔའ་མོ་གཉིས་མེད་པའི། །ཁ་ཊྭཱཾ་ཅང་ཏེའུ་གཟུང་བར་བྱ། །དགུ་པ་ནི། ཐོད་རྔ་དང་མི་རྐང་གླིང་བུ་གཏད་པ་འབུད་དཀྲོལ་མཛོད་ཅིག །ཐོད་པ་ལྟག་སྤྲོད་རྔ་ཆུང་དང༌། །མཁའ་འགྲོ་འབོད་པའི་གླིང་བུ་འདི། །དམ་ཅན་སྤྱན་འདྲེན་མཆོད་པ་དང༌། །ཕྲིན་ལས་རྣམ་བཞི་བསྒྲུབ་ཕྱིར་ཟུངས། །བཅུ་པ་མཆོད་པ་ནི། མཆོད་པའི་ལྷ་མོ་རྣམས་ཀྱིས་མཆོད་རྫས་དུ་མས་ཁྱེད་རང་རྣམས་ལ་མཆོད་པ་བྱས་པའི་མོས་པ་མཛོད། ༀ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སམྦ་རཾ་ཝཱི་ར་ཡོ་གི་ནཱི་བཛྲ་ཨ?ཾ་ནས། ཤབྡའི་བར་གྱིས་རོལ་མོ་དང་བཅས་ཏེ་མཆོད། བཅུ་གཅིག་པ་བསྟོད་པ་ནི། མཆོད་པའི་ལྷ་མོ་དེ་དག་གིས་བསྟོད་པར་མོས། ༀ། བཅོམ་ལྡན་མགོན་པོ་སོགས་རྐང་བརྒྱད་ཀྱིས་བསྟོད། བརྒྱད་པ་དབང་དོན་ངོ་སྤྲད་པ་ནི། དེ་ལྟར་བུམ་པའི་དབང་ཐོབ་པས། སྦྱང་གཞི་ལུས་ལྷ་ལ་སྦྱང་བྱ་དམན་པར་འཛིན་པའི་དྲི་མ་སྦྱངས་ཤིང༌། སྦྱོང་བྱེད་བསྐྱེད་རིམ་བསྒོམ་པ་ལ་དབང༌། སྦྱངས་འབྲས་མཆོག་གི་སྤྲུལ་སྐུ་ཐོབ་པར་འགྱུར་རོ། །ཞེས་དབང་དོན་གྱི་རྟོགས་པ་བསྐྱེད། གཉིས་པ་གསང་དབང་ལ་གསུམ་གྱི་དང་པོ་མཎྜལ་ནི། ངག་ཐ་སྙད་སྣ་ཚོགས་ཀྱི་མཎྜལ་ལ། །བརྗོད་དུ་མེད་པའི་ཆག་ཆག་བཏབ། །བརྗོད་བྱ་མཚོན་བྱེད་ཀྱི་མེ་ཏོག་བཀོད། །ཕ་བླ་མ་རྣམས་ཀྱི་གསུང་ལ་འབུལ། །གསུང་ལ་ཕུལ་བའི་བསོད་ནམས་ཀྱིས། །བདག་གཞན་ངག་གི་སྒྲིབ་པ་བྱང་གྱུར་ཅིག །བདག་གཞན་ངག་ལ་ཡོན་ཏན་རྫོགས་པ་དང༌། །བདག་གཞན་ངག་གིས་འགྲོ་དོན་འགྲུབ་པར་ཤོག །ཅེས་མཎྜལ་སྔོན་དུ་འགྲོ་བས་གསོལ་བ་གདབ་པ་ནི། ཧེ་རུ་ཀ་དཔལ་འགྲོ་བའི་མགོན། །བཀའ་དྲིན་མཉམ་མེད་རྗེ་བཙུན་གྱིས། །བླ་མེད་གསང་བའི་དབང་གིས་ཀྱང༌། །བདག་ཅག་སྨིན་པར་མཛད་དུ་གསོལ། །ལན་གསུམ། དབང་དངོས་ནི། བླ་མ་དཀྱིལ་འཁོར་གྱི་གཙོ་བོ་ཡབ་ཡུམ་དུ་གསལ་བ་སྦྱོར་བ་མཛད་པའི་སྦྱོར་མཚམས་ནས། བྱང་སེམས་དཀར་དམར་ཨཱ་ལི་ཀཱ་ལིའི་རྣམ་པར་ནར་གྱིས་བྱོན། ཁྱེད་རང་རྣམས་ཀྱི་ལྕེ་ཐོག་ཏུ་མྱངས་པས་རྩ་གསུམ་འཁོར་ལོ་བཞི་ལ་སོགས་པའི་རྩ་སྦུབས་མེར་གྱིས་གང་བས། ལུས་ཕྱི་གསལ་ནང་གསལ་ཐོགས་པ་མེད་པར་བསམས་ལ། བདུད་རྩི་སྦྱིན་ཞིང༌། འཁོར་ལོ་སྡོམ་པ་ཡབ་ཡུམ་གྱི། །གསང་བ་སྐུ་ཡི་དཀྱིལ་འཁོར་ལས། །བྱུང་བའི་བྱང་སེམས་དཀར་དམར་གྱིས། །སྐལ་ལྡན་ཁྱོད་ལ་དབང་བསྐུར་རོ། །ༀ་བཛྲ་གུ་ཧྱ་ཨ་བྷི་ཥིཉྩ་ཧཱུྃ། ཞེས་བརྗོད་ཅིང་བདུད་རྩི་ལྕེ་ཐོག་ཏུ་བླང༌། གསུམ་པ་དབང་དོན་ངོ་སྤྲད་པ་ནི། དེ་ལྟར་གསང་བའི་དབང་ཐོབ་པས༑ སྦྱང་གཞི་ངག་སྔགས་ལ་སྦྱང་བྱ་དམན་པར་འཛིན་པའི་དྲི་མ་སྦྱངས་ཤིང་། སྦྱོང་བྱེད་གཏུམ་མོ་བསྒོམ་པ་ལ་དབང༌། སྦྱངས་འབྲས་ཆོས་ཐམས་ཅད་བྲག་ཆ་ལྟར་སྟོང་པར་རྟོགས་པས་ཆོས་སྐུ་ཐོབ་པར་འགྱུར་རོ། ། ཞེས་དབང་དོན་གྱི་རྟོགས་པ་བསྐྱེད། གསུམ་པ་ཤེར་དབང་ལ་གསུམ་གྱི་དང་པོ། ཡིད་རྟོག་པ་སྣ་ཚོགས་ཀྱི་མཎྜལ་ལ། །སྤྲོས་དང་བྲལ་བའི་ཆག་ཆག་བཏབ། །རང་བྱུང་ལྷན་སྐྱེས་ཀྱི་མེ་ཏོག་བཀོད། །ཕ་བླ་མ་རྣམས་ཀྱི་ཐུགས་ལ་འབུལ། ། ཐུགས་ལ་ཕུལ་བའི་བསོད་ནམས་ཀྱིས། །བདག་གཞན་ཡིད་ཀྱི་སྒྲིབ་པ་དག་གྱུར་ཅིག །བདག་གཞན་ཡིད་ལ་ཡོན་ཏན་རྫོགས་པ་དང༌། །བདག་གཞན་ཡིད་ཀྱིས་འགྲོ་དོན་འགྲུབ་པར་ཤོག །ཅེས་མཎྜལ་སྔོན་དུ་འགྲོ་བས་གསོལ་བ་གདབ་པ་ནི། ཟག་མེད་བདེ་ཆེན་ལ་གནས་པའི། །བཅོམ་ལྡན་ཧེ་རུ་ཀ་དཔལ་གྱིས། །བདེ་ཆེན་ལྷན་སྐྱེས་དབང་གིས་ཀྱང༌། །བདག་ཅག་སྨིན་པར་མཛད་དུ་གསོལ། །གཉིས་པ་དངོས་གཞི་ནི་ཐོག་མར་དོན་དྲི་བ་ལ། གསང་སྔགས་བླ་མེད་དོན་རིག་པས། །ཟས་ལ་དམེ་གཙང་མེད་པ་དང༌། །འཁོར་འདས་གཉིས་སུ་མི་རྟོག་པའི། །དམ་ཚིག་བདག་གིས་བསྲུང་ནུས་སམ། །ཞེས་དྲིས་པའི་ལན་བཏབ་པ་ནི། གསང་སྔགས་བླ་མེད་དོན་རིག་པས། །ཟས་ལ་དམེ་གཙང་མེད་པ་དང༌། །འཁོར་འདས་གཉིས་སུ་མི་རྟོག་པའི། །དམ་ཚིག་བདག་གིས་བསྲུང་ནུས་སོ། །ཞེས་བརྗོད། བླ་མའི་ཐུགས་ཀ་ནས་རྗེ་བཙུན་མ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན་ཏེ་ཁྱེད་རང་རྣམས་ལ་གནང་ཞིང༌། དེ་དང་མཉམ་པར་སྦྱར་བ་ཙམ་གྱིས་དགའ་བཞིའི་བདེ་བས་སེམས་འོད་གསལ་དུ་ཐིམ་པའི་མོས་པ་དང༌། ཐུར་སེལ་ཡང་ཅུང་ཟད་འཐེན་ལ་དགའ་བ་ངོས་གཟུང་གྱིས་ཤིག །ཁ་ཊྭཱཾ་ག་ཡུམ་དུ་གསལ་བ་ལག་ཏུ་གཏད་ནས། སྲིད་པའི་འདོད་ཆགས་སྤངས་ནས་ནི། །འཁོར་བའི་མཚོ་ལས་སྒྲོལ་བའི་ཐབས། །ཟག་མེད་དགའ་བཞིའི་དཔལ་སྐྱེད་པའི། །ཡེ་ཤེས་ལྷ་མོ་འདི་བཞེས་ཤིག །ༀ་མ་ཧཱ་ཁུ་ལ་པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ༑ དེ་དང་སྙོམས་པར་ཞུགས་པས་དགའ་བ་བཞིའི་ཡེ་ཤེས་མངོན་དུ་བྱས་པར་བསམས་ལ་ཁ་ཊྭཱཾ་གའམ་རིག་ཙག་བཟུང་ངོ༌། །གསུམ་པ་དབང་དོན་ངོ་སྤྲད་པ་ནི། དེ་ལྟར་ཤེས་རབ་ཡེ་ཤེས་ཀྱི་དབང་ཐོབ་པས། སྦྱང་གཞི་སེམས་ཀྱི་འཆར་སྒོ་སྣང་སྟོང་ཟུང་འཇུག་ལ། སྦྱང་བྱ་ཐ་དད་གཉིས་སུ་འཛིན་པའི་དྲི་མ་སྦྱངས་ཤིང་། སྦྱོང་བྱེད་ཕོ་ཉ་བསྒོམ་པ་ལ་དབང༌། སྦྱངས་འབྲས་ཟུང་འཇུག་ལོངས་སྐུ་ཐོབ་པར་འགྱུར་རོ། །ཞེས་དབང་དོན་གྱི་རྟོགས་པ་བསྐྱེད། བཞི་པ་ཚིག་དབང་ལ་གསུམ་གྱི་དང་པོ། སྒོ་གསུམ་རྣམ་དག་གི་མཎྜལ་ལ། །བློ་དང་བྲལ་བའི་ཆག་ཆག་བཏབ། །སྐུ་གསུམ་ལྷུན་གྲུབ་ཀྱི་མེ་ཏོག་བཀོད། །ཕ་བླ་མ་རྣམས་ཀྱི་སྐུ་གསུང་ཐུགས་ལ་འབུལ། །སྐུ་གསུང་ཐུགས་ལ་ཕུལ་བའི་བསོད་ནམས་ཀྱིས། །བདག་གཞན་ལུས་ངག་ཡིད་གསུམ་སྒྲིབ་པ་བྱང་གྱུར་ཅིག །བདག་གཞན་ལུས་ངག་ཡིད་ལ་ཡོན་ཏན་རྫོགས་པ་དང༌། །བདག་གཞན་ལུས་ངག་ཡིད་ཀྱིས་འགྲོ་དོན་འགྲུབ་པར་ཤོག །ཅེས་མཎྜལ་སྔོན་དུ་འགྲོ་བས་གསོལ་བ་གདབ་པ་ནི། བྱང་ཆུབ་རྡོ་རྗེ་སངས་རྒྱས་ལ། །མཆོད་སྦྱིན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་སླད་དུ། །ནམ་མཁའི་རྡོ་རྗེ་དེང་བདག་སྩོལ། །ལན་གསུམ། དེ་ནས་དབང་དངོས་ནི། ཁྱེད་རང་རྣམས་ལུས་རྣམ་སྣང་གི་ཆོས་བདུན་དང་ལྡན་ཞིང༌། ངག་མི་སྨྲ་དབུགས་ཐད་སོར་རྒྱུར་འཇུག །སེམས་བཟང་ངན་གྱི་འཛིན་རྟོག་སྤངས་ལ་ཅི་གནས་ཀྱི་བར་ལ་མཉམ་པར་བཞག་མཛོད། ཅུང་ཟད་བཞག །བླ་མས། སློབ་མ་འདི་རྣམས་ཀྱིས་དོན་དམ་པའི་བདེན་པ་མཐོང་བར་གྱུར་ཅིག །ཅེས་སྨོན་ལམ་བྱ། དེ་ནས་བླ་མས། བུ། དེ་བཞིན་ཉིད་ཀྱི་ཡེ་ཤེས་ནི། །མཆོག་ཏུ་མི་འགྱུར་བདེ་བས་གང༌། །བདེ་མཆོག་འཁོར་ལོ་བདེ་བའི་མཆོག །དེ་ནི་རང་གི་སེམས་ཉིད་ཡིན། །ལྟོས་ཤིག་རང་གི་སེམས་ལ་ལྟོས། །རང་གི་སེམས་ལ་བལྟས་པས་ན། །དབང་བསྐུར་ལ་སོགས་སྣང་བ་རྣམས། །གདོད་ནས་རང་གི་སེམས་སུ་གསལ། །གསལ་ཙམ་ཉིད་ནས་སྟོང་པ་སྟེ། །སྟོང་པ་ཉིད་རང་གསལ་བའི་ཕྱིར༑ ༑སྣང་སྟོང་ཟུང་འཇུག་སེམས་ཀྱི་དོན། །སྨྲ་བསམ་བརྗོད་མེད་ཤེས་པར་གྱིས། །ཞེས་བརྗོད་ཅིང་དོན་བསམ། གསུམ་པ་རྗེས་དབང་དོན་ངོ་སྤྲད་པ་ནི། དེ་ལྟར་ཚིག་དབང་ཐོབ་པས་སྦྱང་གཞི་སྒོ་གསུམ་དབྱེར་མེད་བློ་འདས་བརྗོད་བྲལ་ལ། སྦྱང་བྱ་རྟག་འཛིན་སྨྲ་བརྗོད་ཀྱི་དྲི་མ་སྦྱངས་ཤིང༌། སྦྱོང་བྱེད་བློ་འདས་ཕྱག་རྒྱ་ཆེན་པོ་བསྒོམ་པ་ལ་དབང༌། སྦྱངས་འབྲས་ངོ་བོ་ཉིད་སྐུ་ཐོབ་པར་འགྱུར་རོ། །ཞེས་དབང་དོན་གྱི་རྟོགས་པ་བསྐྱེད། གཉིས་པ་མཐའ་རྟེན་ལ་བཞི། རྗེས་གནང༌། ལུང་བསྟན། དབུགས་དབྱུང༌། གཟེངས་བསྟོད་རྣམས་སོ། །དང་པོ་རྗེས་གནང་ལ་རྣམ་གྲངས་བཅུ་གཉིས་ཡོད་པ་ལས། དང་པོར་བརྒྱུད་པ་ཡིད་བཞིན་ནོར་བུའི་རྗེས་གནང་བྱིན་པར་མོས་ཤིག །ནོར་བུ་སྤྱི་བོར་བཞག་ལ། སྤྲུལ་སྐུ་བླ་མ་ཡིད་བཞིན་གྱི། ། ནོར་བུ་རིན་ཆེན་གཙུག་གི་རྒྱན། །རྡོ་རྗེ་འཆང་དང་དབྱེར་མེད་པས། །བཀའ་བརྒྱུད་བླ་མའི་བརྒྱུད་པ་ཟུངས། །གཉིས་པ་སྨིན་ལམ་ཡིད་བཞིན་ནོར་བུའི་རྗེས་གནང་བྱིན་པར་མོས་ཤིག །རྣམ་རྒྱལ་བུམ་པ་ལག་ཏུ་གཏད་ལ། མཁྱེན་བརྩེས་འགྲོ་བ་རྗེས་གཟུང་ཕྱིར། །དཀྱིལ་འཁོར་ཆོ་ག་བཞིན་བྲིས་ནས། །དབང་བཞིའི་སྐལ་ལྡན་གདུལ་བྱ་རྣམས། །སྨིན་བྱེད་ལས་ལ་བརྩོན་པར་གྱིས། །གསུམ་པ་གྲོལ་ལམ་ཡིད་བཞིན་ནོར་བུའི་རྗེས་གནང་བྱིན་པར་མོས་ཤིག །རལ་གྲི་ལག་ཏུ་གཏད་ལ། འགྲོ་ཀུན་འཁོར་བར་འཆིང་བྱེད་པའི། །མ་རིག་ཞགས་པ་ཇི་སྙེད་པ། །ཤེས་རབ་རལ་གྲིས་བཅད་ནས་ཀྱང༌། །རྣམ་གྲོལ་ལམ་ལ་འགོད་པར་གྱིས། །བཞི་པ་བཟླས་པའི་རྗེས་གནང་ནི། སློབ་དཔོན་དང་སློབ་མ་གཉིས་ཀ་ལྷར་གསལ་བའི་ཐུགས་ཀར་པད་ཉིའི་སྟེང་དུ་ཧཱུྃ་སྔོན་པོ་རེ་རེ་བསམ། བླ་མའི་ཐུགས་ཀར་ཧཱུྃ་ཡིག་སྔགས་ཕྲེང་གིས་བསྐོར་བ་དེ་ལས་སྔགས་ཕྲེང་འཕྲོས། ཁྱེད་རང་རྣམས་ཀྱི་ཁར་ཞུགས་སྙིང་གའི་ཧཱུྃ་གི་མཐར་འཁོད་པའི་དམིགས་པ་མཛོད་ལ་འདིའི་རྗེས་ཟློས། བཅོམ་ལྡན་བདག་གི་བཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ཞེས་བརྗོད་ལ་སྙིང་པོ་ཡོངས་རྫོགས་རྗེས་ཟློས་བྱར་གཞུག །མཐར་བགྲང་ཕྲེང་གཏད་ལ། རིན་ཆེན་ཐོད་པའི་བགྲང་ཕྲེང་འདི། །ཧེ་རུ་ཀ་དཔལ་འཁོར་བཅས་ཀྱི། །མཁྱེན་བརྩེ་ཡེ་ཤེས་ཐུགས་རྒྱུད་ནི། །སྙིང་པོ་སྔགས་ཀྱིས་བསྐུལ་བར་གྱིས། །བཅོམ་ལྡན་འདི་ལ་སྩལ་ལགས་ཀྱི། ། འདི་ལ་འགོ་བར་མཛད་དུ་གསོལ། །ཞེས་བརྗོད་ལ་མེ་ཏོག་འཐོར། ལྔ་པ་མཆོད་པའི་རྗེས་སུ་གནང་བ་ནི། སྟོང་གསུམ་མཆོད་རྫས་ཀྱིས་བཀང་བ་བླ་མས་དཀྱིལ་འཁོར་ལྷ་ཚོགས་ལ་འབུལ་ཚུལ་བྱས་ལ་སྔགས་དང་ཕྱག་རྒྱ་ལན་གཅིག་མཛད་པར་ཞུ། ལས་རྡོར་གྱིས་མཆོད་པ་བཏེགས། ༀ་གུ་རུ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སཾ་བ་རཾ་ཝཱི་ར་ཡོ་གི་ནཱི་ས་པ་རི་ཝཱ་ར་ཨ?ཾ་ནས། ཤབྡའི་བར་དང༌། ༀ་བཛྲ་རཱུ་པ་ཨཱཿ ཧཱུྃ། ཤབྡ༴ གནྡྷེ༴ ར་ས༴ སྤརྴེ་ཨཱཿ ཧཱུྃ། དེང་ནས་བྱང་ཆུབ་མ་ཐོབ་བར། །བླ་མ་རྒྱལ་བ་སྲས་བཅས་ལ། །ཕྱི་ནང་གསང་བ་དེ་ཁོ་ནའི། །མཆོད་པའི་ལས་ལ་བརྩོན་པར་གྱིས། །དྲུག་པ་བསྟོད་པའི་རྗེས་གནང་བྱིན་པར་མོས་ཤིག །སྐལ་ལྡན་སྐྱེས་བུ་ཁྱེད་རྣམས་ཀྱི། ། དད་གུས་བསམ་སྦྱོར་གདུང་དབྱངས་ཀྱིས། །བླ་མ་དཀྱིལ་འཁོར་ལྷ་ཚོགས་ལ། །ཡོན་ཏན་སྒོ་ནས་བསྟོད་པར་བྱ། །བདུན་པ་ཆོས་འཆད་པའི་རྗེས་གནང་བྱིན་པར་མོས་ཤིག །གླེགས་བམ་ལག་ཏུ་གཏད་ལ། འགྲོ་རྣམས་སྨིན་ཅིང་གྲོལ་བྱའི་ཕྱིར། །མདོ་རྒྱུད་བསྟན་བཅོས་མན་ངག་རྣམས། །མཐའ་དྲུག་ཚུལ་བཞིའི་སྒོ་ནས་ནི། །དེང་ནས་སྣ་ཚོགས་ཆོས་འཁོར་བསྐོར། །བརྒྱད་པ་རབ་གནས་ཀྱི་རྗེས་སུ་གནང་བར་མོས་ཤིག །མིག་ཐུར་གཏད་ལ། སྐུ་གསུང་ཐུགས་ཀྱི་རྟེན་རྣམས་ལ། །དབང་བསྐུར་སྤྱན་དབྱེ་མངའ་དབུལ་སོགས། །རབ་ཏུ་གནས་པའི་བྱ་བ་རྣམས། །དེང་ནས་ཁྱོད་ཀྱིས་ཡང་དག་བྱོས། །དགུ་པ་སྦྱིན་སྲེག་གི་རྗེས་གནང་བྱིན་པར་མོས་ཤིག །དགང་གཟར་ བླུགས་སྤྲད་ལ། སྟོང་ཉིད་སྙིང་རྗེ་དབྱེར་མེད་པའི། །དགང་གཟར་དགང་བླུགས་འཆང་བ་ཡིས། །ཕྱི་ནང་གསང་བ་དེ་ཁོ་ནའི། །སྦྱིན་སྲེག་ལས་ལ་བརྩོན་པར་གྱིས། །བཅུ་པ་ཕྲིན་ལས་བཞིའི་རྗེས་གནང་བྱིན་པར་མོས་ཤིག །སྣ་ཚོགས་རྡོ་རྗེ་གཏད་ལ། བསྟན་དང་འགྲོ་བའི་དོན་དུ་ནི། །ཞི་རྒྱས་དབང་དྲག་ལ་སོགས་པའི། །ལས་ཚོགས་རབ་འབྱམས་རྒྱ་མཚོ་ལ། །ཁྱེད་རྣམས་དབང་བས་བརྩོན་པར་གྱིས། །བཅུ་གཅིག་པ་ཐེག་དམན་བདུད་ཀྱི་ཕྱོགས་གཞོམ་པའི་རྗེས་གནང་བྱིན་པར་མོས་ཤིག །མདའ་གཞུ་གཏད་ལ། དཔའ་བོ་མི་ཡི་སེང་གེ་ཁྱོད། །ཤེས་རབ་སྙིང་རྗེའི་མདའ་གཞུ་ཡིས། །ཉན་རང་ཞི་བདེའི་སེམས་དང་ནི། །བདུད་ཕྱོགས་གཞོམ་ཞིང་གཞན་དོན་གྱིས༑ ༑བཅུ་གཉིས་པ་འགྲོ་ཀུན་འཁོར་བ་ལས་སྒྲོལ་ཕྱིར་སྟོང་ཉིད་སྙིང་རྗེའི་རྗེས་གནང་བྱིན་པར་མོས་ཤིག །དུག་སྦྲུལ་དང་མི་མོའི་གཟུགས་བསྟན་ལ། སྡིག་པ་དུག་སྦྲུལ་རེག་མཐོང་འཇོམས། །དེ་ཕྱིར་ཅི་ཡང་མི་བྱ་ཞིང༌། །དགེ་བ་མ་ལྟར་བྱམས་པ་ཉིད། །དེ་ཕྱིར་ཕུན་སུམ་ཚོགས་པར་བྱ། །གཉིས་པ་ལུང་བསྟན་པ་ནི། སློབ་དཔོན་ཤཱཀྱ་ཐུབ་པའི་ཆ་ལུགས་སུ་བསྒྱུར་ལ་མི་འཇིགས་ཕྱག་རྒྱ་ཆོས་གོས་ཀྱི་སྣ་གཉིས་རི་དྭགས་ཀྱི་རྒྱལ་པོ་སེང་གེའི་རྣ་བ་ལྟར་བྱ། སྙིང་གར་བཟུང༌། གཡས་གཡོན་རྡོར་དྲིལ་འཛིན་ཅིང༌༑ སློབ་དཔོན་སྟོན་པ་ཤཱཀྱའི་རྒྱལ་པོར་གྱུར་པས་མི་འཇིགས་པའི་ཕྱག་རྒྱ་སྙིང་གར་བཟུང་བ་ནི། རི་དྭགས་ཀྱི་རྒྱལ་པོ་སེང་གེ་དེ་རི་དྭགས་ཕལ་པ་གང་ལའང་འཇིགས་པ་མེད་པ་ལྟར། ཁྱེད་རྣམས་ཀྱང་དཀྱིལ་འཁོར་ འདིར་དབང་བསྐུར་བས་ཕྱིས་ནས་ཉམ་ང་དང་བག་ཚ་བ་བྱེད་མི་དགོས་པས། དེའི་བརྡ་ཆོས་མཚོན་བཞིན་བླ་མ་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས་སོ་སོའི་གསང་མཚན་དང་མཐུན་པར་འཚང་རྒྱ་བའི་ལུང་སྟོན་པར་གྱུར། ༀ། འདི་ལྟར་ཁྱོད་ལ་ངས་ལུང་བསྟན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་གདོད་ནས་དག་པའི་ཕྱིར། །སྤང་བྱ་ཀུན་ལས་གྲོལ་བ་ཡི། །ཁམས་གསུམ་ཆོས་ཀྱི་རྒྱལ་སྲིད་མཆོག །ཀྱེ། དཔལ་སོ་སོའི་གསང་མཚན་བརྗོད་ལ་འདི་ཞེས་བྱ་བའི་དེ་བཞིན་གཤེགས་པར་འགྱུར་རོ། །ཤྲཱི་ཧེ་རུ་ཀ་གསང་མཚན་འདི་ཞེས་བྱ་བ་སརྦ་ཏ་ཐཱ་ག་ཏ་སིདྡྷི་ས་མ་ཡ་སྟྭཾ། བྷུརྦྷུ་ཝཱ་སྭཱ། ཞེས་བརྗོད། གསུམ་པ་དབུགས་དབྱུང་བ་ནི། བླ་མ་དཀྱིལ་འཁོར་པའི་ལྷ་ཚོགས་རྣམས་ཀྱིས་ཁྱེད་རང་རྣམས་ལ་དབུགས་དབྱུང་སྩོལ་བར་མོས་ཤིག །གསང་ཆེན་མཆོག་གི་དཀྱིལ་འཁོར་འདིར། །དབང་བསྐུར་ཟབ་མོ་ཐོབ་པས་ནི། །ཁམས་གསུམ་ཆོས་ཀྱི་རྒྱལ་སྲིད་ཆེ། །དཔལ་ལྡན་ཡོན་ཏན་འབྱུང་བའི་གནས། །བདུད་ཚོགས་ཀུན་ལས་ངེས་རྒྱལ་བའི། །གྲོང་ཁྱེར་མཆོག་ཏུ་གཞུག་པ་ཡིན། །བཞི་པ་གཟེངས་བསྟོད་པ་ནི། སླར་ཡང་གཟེངས་བསྟོད་སྩོལ་བར་མོས། མཆོག་ཏུ་གསང་བའི་དཀྱིལ་འཁོར་འདིར། ། བཅུག་པ་དང་ནི་མཐོང་བ་ཡིས། །སྡིག་ཏོའི་ཆོས་ལས་རྣམ་པར་གྲོལ། །དེ་ཕྱིར་ཁྱེད་རྣམས་བདེ་བར་གནས། །ཕྱིས་ནས་ཉམ་ང་དང་བྲལ་བའི། །བདེ་ཆེན་ཐེག་པ་འདི་ཡིས་ནི། །མི་ཐུབ་པ་དང་མི་ཆོད་པ། །གཅིག་ཀྱང་ མེད་པས་དགའ་བར་གྱིས། །ཞེས་བརྗོད། གསུམ་པ་རྗེས་ཀྱི་བྱ་བ་ནི། དམ་ཚིག་བསྲུང་དགོས་པར་གདམས་པ། གཙོ་བོས་ཇི་ལྟར་སོགས་དང༌། བདག་གིས་སྒོ་གསུམ་ལོངས་སྤྱོད་བཅས། །དེང་ནས་འདྲེན་པ་ཁྱེད་ལ་འབུལ། །ཉེས་ལྟུང་དྲི་མས་གོས་གྱུར་ན། །ཆ་ཡིས་སྤྱད་ཅིང་སྐྱོབ་ཏུ་གསོལ། །ཞེས་ལན་གསུམ། གཏང་རག་གི་མཎྜལ་འབུལ། དགེ་བསྔོ་བྱས་ལ་སློབ་མ་གྲོལ་ལོ། །རྩ་བའི་གསུམ་པ་རྗེས་ཀྱི་བྱ་བ་ལ། རྩ་བའི་གཞུང་ལས་ས་བཅད་བཅུ་གཅིག་གིས་བསྟན་པའི་དང་པོ་གཏོར་འབུལ་ནི་སྒྲུབ་ཐབས་ཀྱི་གཤམ་ནས་བླངས་ཏེ་འདིར་སྦྱར། གཉིས་པ་རྩ་བའི་གཞུང་དུ་ཚོགས་ཀྱི་འཁོར་ལོ་བྱ་བར་གསུངས་ཀྱང་དེང་སང་ཚོགས་འཁོར་དངོས་ནུས་མཁན་གྱི་རྣལ་འབྱོར་པ་དཀོན་པས་ས་བཅད་ཙམ་དུ་ཚོགས་མཆོད་འབུལ་བ་ནི། སྟག་ལྤགས་ལ་སོགས་པའི་གདན་གྱི་སྟེང་དུ་མ་ད་ན་དང་བཱ་ལ་གཙོ་བོར་གྱུར་པའི་བཟའ་བཏུང་བཟང་པོ་ཅི་འབྱོར་པ་བཤམ། བདུད་རྩི་ལྟར་བྱིན་བརླབ། ཚོགས་ཞིང་སྤྱན་འདྲེན་པ་ནི། ༀ་ཨཱཿ ཧཱུྃ། གནས་སྤྱི་གཙུག་ཉི་ཟླའི་གདན་སྟེང་ན། །དེ་ན་རྩ་བའི་བླ་མ་བཞུགས། །འཁོར་ནི་བརྒྱུད་པའི་བླ་མས་བསྐོར། །ཐེག་ཆེན་ཆོས་འཁོར་དེ་ན་བསྐོར། །བདེ་ཆེན་ཚོགས་འཁོར་འདི་ན་བསྐོར། །གནས་འདིར་སྤྱན་འདྲེན་གཤེགས་སུ་གསོལ། །གནས་འོག་མིན་ཆོས་ཀྱི་ཕོ་བྲང་ན། །དེ་ན་འཁོར་ལོ་བདེ་མཆོག་བཞུགས། །འཁོར་ནི་རྒྱུད་སྡེ་བཞི་ཡིས་བསྐོར། །ཐེག་ཆེན་ཆོས་འཁོར་དེ་ན་བསྐོར། །བདེ་ཆེན་ཚོགས་འཁོར་འདི་ན་བསྐོར། །གནས་འདིར་སྤྱན་འདྲེན་གཤེགས་སུ་གསོལ། །གནས་དགོས་འདོད་ཀུན་འབྱུང་གཏེར་གླིང་ན། །དེ་ན་ཀུ་རུ་ཀུལླེ་བཞུགས། ། འཁོར་ནི་གནོད་སྦྱིན་མཁའ་འགྲོས་བསྐོར། །ཐེག་ཆེན་ཆོས་འཁོར་དེ་ན་བསྐོར། །བདེ་ཆེན་ཚོགས་འཁོར་འདི་ན་བསྐོར། །གནས་འདིར་སྤྱན་འདྲེན་གཤེགས་སུ་གསོལ། །གནས་བདེ་ཆེན་ཤར་ལྷོ་ནུབ་བྱང་ན། །དེ་ན་རིགས་བཞིའི་མཁའ་འགྲོ་བཞུགས། །དམ་ཚིག་ལས་ཀྱི་མཁའ་འགྲོས་བསྐོར། །ཐེག་ཆེན༴ བདེ་ཆེན༴ གནས་འདིར༴ གནས་བསིལ་བ་ཚལ་གྱི་དུར་ཁྲོད་ན། །དེ་ན་མ་མགོན་ལྕམ་དྲལ་བཞུགས། །འཁོར་ནི་དམ་ཅན་རྒྱ་མཚོས་བསྐོར། །ཐེག་ཆེན༴ བདེ་ཆེན༴ གནས་འདིར༴ གནས་ཕྱོགས་བཅུ་དབེན་པའི་རི་ཁྲོད་ན། །དེ་ན་རྡོ་རྗེ་མཆེད་ལྕམ་བཞུགས། །འཁོར་ནི་སྐལ་ལྡན་ཕོ་མོས་བསྐོར། །ཐེག་ཆེན༴ བདེ་ཆེན༴ གནས་འདིར༴ གནས་རང་ལུས་རྒྱལ་བའི་དཀྱིལ་འཁོར་ན། །དེ་ན་རང་བྱུང་ཡེ་ཤེས་བཞུགས། །འཁོར་ནི་སེམས་བྱུང་ཚོགས་ཀྱིས་བསྐོར། །ཐེག་ཆེན༴ བདེ་ཆེན༴ གནས་འདིར༴ གཤེགས་ནས་བདེ་ཆེན་ཚོགས་ལ་རོལ། །བྱིན་གྱིས་རློབས་ལ་དངོས་གྲུབ་སྩོལ། །ཕྲིན་ལས་མ་ལུས་བསྒྲུབ་ཏུ་གསོལ། །གུ་རུ་དེ་བ་ཌཱ་ཀི་ནཱི་དྷརྨ་པཱ་ལ་ས་པ་རི་ཝཱ་ར་བཛྲ་ས་མཱ་ཛཿ མ་ཧཱ་སུ་ཁ་ག་ཎ་པཱུ་ཛ་ཧོཿ བླ་མ་ཡི་དམ་མཁའ་འགྲོ་དང༌། །ཆོས་སྐྱོང་སྲུང་མ་རྡོ་རྗེ་སྤུན། །མཆོད་པའི་ཡུལ་དུ་སྤྱན་དྲངས་པས། །དགྱེས་བཞིན་གནང་སྟེ་བྱོན་པ་ཡིས། །ཚོགས་གཉིས་སྤེལ་མཛད་ཐམས་ཅད་ཀྱང༌། །ཉམས་དང་རྟོགས་པ་འུ་རུ་རུ། །ཐུགས་རྗེའི་སྤྲིན་ཚོགས་ཐིབས་སེ་ཐིབ། །བྱིན་རླབས་ན་བུན་ཐུ་ལུ་ལུ། །དངོས་གྲུབ་ཆར་རྒྱུན་འབེབས་བཞིན་དུ། །གནས་མཆོག་འདི་རུ་བཞུགས་སུ་གསོལ། །བཞུགས་ནས་བདེ་ཆེན་ཚོགས་ལ་རོལ། །ཚོགས་ལ་རོལ་ལ་དགྱེས་བཞིན་དུ། །རིག་འཛིན་བདག་ཅག་འཁོར་བཅས་ལ། །སྐུ་གསུང་ཐུགས་ཀྱི་དབང་བསྐུར་སྩོལ། །མོས་པའི་བུ་ལ་བྱིན་གྱིས་རློབས། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །རང་གཞན་དོན་གཉིས་འགྲུབ་པར་མཛོད། །གུ་རུ་མཎྜལ་དེ་ཝ་ཌཱ་ཀི་ནཱི་ས་པ་རི་ཝཱ་ར་མ་ཧཱ་སུ་ཁ་ག་ཎ་པཱུ་ཛ་ཧོཿ ཞེས་སློབ་དཔོན་གྱིས་བདུད་རྩི་འཐོར། ཡན་ལག་བདུན་པ་འབུལ་བ་ནི། ཐལ་མོ་སྦྱར་ཏེ། བླ་མ་ཡི་དམ་ལྷ་ཚོགས་ལ། །སྒོ་གསུམ་གུས་པས་ཕྱག་འཚལ་ལོ། །ཕྱི་ནང་གསང་གསུམ་མཆོད་པ་འབུལ། །དུག་གསུམ་དབང་གི་སྡིག་པ་བཤགས། །དུས་གསུམ་དགེ་ལ་རྗེས་ཡི་རང༌། །ཐེག་གསུམ་ཆོས་འཁོར་བསྐོར་བཞིན་དུ། །ཁམས་གསུམ་འགྲོ་བའི་དོན་བཞུགས་གསོལ། །དགེ་བས་སྐུ་གསུམ་མྱུར་ཐོབ་ཤོག ༑ཅེས་བརྗོད། རྡོ་རྗེའི་གླུ་བླང་བ་ནི། ཀོལླ་ཨི་རེཊྛི་ཨ་བོལླ། །མུམྨུ་ནི་རེ་ཀཀྐོ་ལཱ། །གྷ་ཎ་ཀྲི་པི་ཊ་ཧོ་བཱཛྫ་ཨི། །ཀ་རུ་ཎི་ཀེ་ཨ་ཨི་ཎ་རོ་ལཱ། །ཏ་ཧ་བ་ལ་ཁཛྫ་ཨཱི། །གཌྷ་མ་ཨ་ཎཱ་བིཛྫ་ཨ་ཨི། །ཧ་ལེ་ཀཱ་ལིཉྩ་ར་པ་ཎི་ཨ་ཨི། །དུ་དྷུ་ར་བཛྫི་ཨ་ཨི། །ཙ་ཨུ་ས་མ་ཀཙྖུ་རཱི་སིཧླ། །ཀཱ་པུ་ར་ལཱ་ཨི་ཨ་ཨི། །མཱ་ལ་ཨི་ཨིནྡྷ་ཎ་སཱ་ལ་ཛཿ ཏ་ཧ་བྷ་རུ་ཁཱ་ཨི་ཨ་ཨི། །ཕྲ་ཁ་ཎ་ཁ་ཊ་ཀ་རནྟེ། །ཤུདྡྷ་ཨ་ཤུདྡྷ་ཎ་མ་ཎི་ཨ་ཨི། །ནི་རཱཾ་སུ་ཨཾ་གེ་ཙ་ཌཱ་ཝི། །ཏ་ཧ་ཛ་ས་རཱ་ཝ་ པ་ཎི་ཨ་ཨི། །མཱ་ལ་ཨ་ཛེ་ཀུནྡུ་རུ་བཱ་ཊྚ་ཨི། །ཌིཎྜི་མ་ཏ་ཧིནྣ་བཛྫི་ཨ་ཨི། །དེ་ནས་ཚོགས་ཕུད་འབུལ་བ་ནི། སློབ་དཔོན་གྱིས་བདུད་རྩི་འཐོར་ལ། ༀ་ཨཱཿ ཧཱུྃ། བླ་མེད་མཆོག་གི་མཆོད་པ་དམ་པ་འདི། །སོགས་དཀྱིལ་ཆོག་ལྟར་འབུལ། ལུགས་འདིར་དམ་ཚིག་བསྲེ་བར་གསུངས་པའི་ཚོགས་ལ་རོལ་པ་ནི། ལས་རྡོར་གྱིས་ཚོགས་བདུད་རྩི་ཐོགས། ཀྱེ། རྡོ་རྗེ་སློབ་དཔོན་དགོངས་སུ་གསོལ། །འདིར་ནི་ཆོས་རྣམས་བཟང་པོ་སྟེ། །འདུས་པ་རྣམས་ལ་ཐེ་ཚོམ་མེད། བྲམ་ཟེ་ཁྱི་དང་གདོལ་པ་ཕག །རང་བཞིན་གཅིག་ཏུ་དགོངས་ཏེ་རོལ། །སློབ་དཔོན་གྱིས་པད་ཀོར་བཅས་བླངས་ལ། རིན་ཐང་མེད་ལས་ལེགས་འོང་ཆོས། །འདོད་ཆགས་ལ་སོགས་དྲི་མ་བྲལ། །གཟུང་དང་འཛིན་པ་རྣམ་སྤངས་པས། །དེ་བཞིན་ཉིད་ལ་བདག་ཕྱག་འཚལ། །ཨ་ལ་ལ་ཧོཿ ཞེས་བླང༌། མཆེད་ལྕམ་རྣམས་ལའང་དྲངས་ཏེ་ཚིམ་པ་དྲུག་ལྡན་དུ་རོལ། དེ་ནས་གསུམ་པ་སྐོང་བཤགས་དང་འདོད་དོན་གསོལ་གདབ་བྱ་བ་ནི། ཧཱུྃ། བླ་མ་ཡི་དམ་མཁའ་འགྲོ་དང༌། །ཆོས་སྐྱོང་སྲུང་མ་རྡོ་རྗེ་སྤུན། །ཚོགས་ཞིང་དམ་པ་འཁོར་བཅས་རྣམས། །བརྩེ་བས་བདག་ལ་དགོངས་སུ་གསོལ། །རྣལ་འབྱོར་བདག་ཅག་འཁོར་བཅས་རྣམས། །ཉོན་མོངས་དུག་ལྔའི་དབང་གྱུར་པས། །འདོད་ལོག་ཚེ་འདིའི་བྱ་བ་ཡིས། །སྒོ་གསུམ་ཉིན་མཚན་ཀུན་ཡེངས་ནས། །ཕྱི་ནང་གསང་བ་མཐར་ཐུག་གི། །བསྙེན་སྒྲུབ་བཟླས་བརྗོད་ཚོགས་གཏོར་རྣམས། །ཆག་དང་ཆུང་དང་ཉམས་ལ་སོགས། །སྐུ་གསུང་ཐུགས་དང་འགལ་བ་ཡི། །རྩ་བ་དང་ནི་ཡན་ལག་གི། །དམ་ཚིག་ ཉམས་ཆག་ཉེས་ལྟུང་ནི། །འཁོར་བ་ངན་སོང་རྒྱུར་གྱུར་ཅིང༌། །མཐོ་རིས་ཐར་པའི་གེགས་གྱུར་རྣམས། །གནོང་འགྱོད་དྲག་པོའི་སེམས་ཀྱིས་ནི། །མ་ལུས་བདག་གིས་མཐོལ་ལོ་བཤགས། །སླན་ཆད་སྡོམ་ཞིང་དག་པར་བགྱིད། །བརྩེ་བས་བྱིན་གྱིས་བརླབ་ཏུ་གསོལ། །དངོས་འབྱོར་ཡིད་ཀྱིས་སྤྲུལ་པ་ཡི། །ཕྱི་ནང་གསང་བ་མཐར་ཐུག་གི། །འདོད་ཡོན་རྣམ་ལྔའི་མཆོད་སྤྲིན་ནི། །བཀོད་པ་མཆོག་གྱུར་ཀུན་ཚང་ཞིང༌། །ས་དང་བར་སྣང་ཁྱབ་པ་ཡིས། །བླ་མ་ཡི་དམ་མཁའ་འགྲོ་དང༌། །ཆོས་སྐྱོང་སྲུང་མ་རྡོ་རྗེ་སྤུན། །འཁོར་དང་བཅས་པ་ཐམས་ཅད་ཀྱི། །ཐུགས་བཞེད་རྣམ་དག་འགྲུབ་གྱུར་ཅིག །ཐུགས་བསམ་རྣམ་དག་རྫོགས་གྱུར་ཅིག ། ཐུགས་དམ་གཉན་པོ་བསྐང་གྱུར་ཅིག །ཐུགས་དམ་གཉན་པོ་སྐོང་གྱུར་ནས། །མཁྱེན་བརྩེ་མཐུ་སྟོབས་ནུས་པ་དང༌། །རྫུ་འཕྲུལ་དྲག་ཤུལ་རྒྱས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །རྣལ་འབྱོར་བདག་ཅག་འཁོར་བཅས་ཀྱི། །དམ་ཚིག་ཉམས་ཆགས་བསྐང་དུ་གསོལ། །དམ་ཚིག་ཉམས་ཆགས་བསྐངས་ནས་ཀྱང༌། །བརྩེ་བ་ཆེན་པོས་རྗེས་གཟུང་ཕྱིར། །འགྱུར་མེད་སྐུ་ཡི་དངོས་གྲུབ་སྩོལ། །ཚངས་དབྱངས་གསུང་གི༴ འཁྲུལ་མེད་ཐུགས་ཀྱི༴ ཡོན་ཏན་རེ་སྐོང༴ ཕྲིན་ལས་འགྲོ་འདུལ་དངོས་གྲུབ་སྩོལ། །མདོར་ན་མཆོག་དང་ཐུན་མོང་གི། །དངོས་གྲུབ་མ་ལུས་ཁྱེད་ཀྱིས་སྩོལ། །སྔོན་ལས་འཕྲལ་རྐྱེན་ལ་སོགས་པའི། །བར་ཆད་ མ་ལུས་ཁྱེད་ཀྱིས་སོལ། །དེང་ནས་བྱང་ཆུབ་མ་ཐོབ་བར། །བློ་འགེལ་ལྟོས་སྐྱུར་རེ་ས་དང༌། །སྐྱབས་གནས་གཞན་ན་མ་མཆིས་པས། །མཁྱེན་བརྩེ་ནུས་ལྡན་ཁྱེད་རྣམས་ཀྱིས། །བདག་ཅག་འཁོར་དང་བཅས་པ་རྣམས། །བརྩེ་བས་འབྲལ་མེད་བསྐྱང་དུ་གསོལ། །བཞི་པ་ལྷག་མ་གཏང་བ་ནི། ལས་རྡོར་གྱིས་ལྷག་མ་རྣམས་བསྡུས་ཏེ་སློབ་དཔོན་མདུན་དུ་བཞག་པ་ལ། སློབ་དཔོན་གྱིས་བྱ་ཁྱུང་གི་ཕྱག་རྒྱ་དང༌། མ་ད་ནས་ཁ་ཕྲུ་བཏབ་ལ། ༀ་ཨུཙྪིཥྚ་བ་ལ་ཏ་བྷཀྵ་སཱི་སྭཱ་ཧཱ། ༀ་བརྗོད་པས་ལྷག་གཏོར་མི་དམིགས་ཏེ་སྟོང་པར་བསམ། ཨཱཿ བརྗོད་པས་ཐོད་པ་ལ་སོགས་པའི་སྣོད་ཡངས་ཤིང་རྒྱ་ཆེ་བ་དུ་མར་བསམ། ཧཱུྃ་བརྗོད་པས་དེ་ཐམས་ཅད་ཀྱི་ནང་དུ་ཟད་མི་ཤེས་པའི་འདོད་ཡོན་ལྔ། ངོ་བོ་བཟང་ཞིང་རྒྱ་ཆེ་བས་ཡིད་ལ་ཟག་པ་མེད་པའི་བདེ་བ་སྐྱེད་ནུས་པ། རྣམ་པའི་བཀོད་པ་བསམ་གྱིས་མི་ཁྱབ་པས་དབང་པོ་ལྔ་ཚིམས་ནུས་པར་གྱུར། ལྷག་མ་མཚམས་སྟེགས་ལ་བཀོད། རྡོར་ཐལ་ཕྱེ་བས། ༀ་ཛྙ་ན་ཌཱ་ཀི་ནཱི། ས་མ་ཡ་ཌཱ་ཀི་ནཱི། ལོ་ཀ་ཌཱ་ཀཱི་ནཱི། ས་པ་རི་ཝཱ་ར་བ་ལ་ཏ་ཁ་ཁ་ཁཱ་ཧི། ལན་གསུམ། ནམ་མཁའ་མཛོད་དང༌། ཨ་ཀཱ་རོ་རྣམས་ཀྱང་བརྗོད། ཧཱུྃ། དང་པོ་ཕུད་ཀྱིས་མི་མཆོད་དུ། །བླ་མ་ཡི་དམ་ཕུད་ཀྱི་བདག །བར་དུ་ཚོགས་ལ་མི་རོལ་དུ། །མཁའ་འགྲོ་ཆོས་སྐྱོང་ཚོགས་ལ་མཉེས། །དེ་ཚེ་འདོད་ཡོན་མི་སྤྱོད་དུ། །རྣལ་འབྱོར་ཕོ་མོ་འདོད་པས་ཚིམ། །ལྷག་མ་ཁྱོད་ལ་མི་སྟེར་དུ། །ཁྱེད་རྣམས་ང་ཡི་བྲན་དང་གཡོག །ལྷག་མ་ཁ་ཕྲུ་མི་བཏབ་ཏུ། །རྗེ་དང་འབངས་སུ་ ཁྱད་པར་ཆེ། །ཐ་མར་གཅིག་ཏུ་མི་བསྲེ་རུ། །ཆོས་ཉིད་ངང་དུ་ཁྱད་པར་མེད། །ད་ལན་རྣལ་འབྱོར་ཕོ་མོ་ཡི། །འདོད་ཡོན་ཚོགས་ལ་རོལ་པའི་ལྷག །སྣ་ཚོགས་འདོད་པའི་གཏོར་མ་འདི། །རང་རང་འདོད་པའི་སྣོད་དུ་བླུགས། །བྱམས་པ་ཆེན་པོའི་ཁ་ཕྲུ་བཏབ། །སྙིང་རྗེ་ཆེན་པོའི་སྔགས་བཟླས་ནས། །གཞན་དོན་དགའ་སྤྲོའི་ཕྱག་རྒྱ་བསྟན། །སྲིད་ཞི་མཉམ་ཉིད་ཏིང་འཛིན་གྱིས། །འདོད་རྒུ་འབྱུང་བར་བྱིན་བརླབས་པའི༑ ༑དཔལ་གྱི་གཏོར་མ་འདི་ལོངས་ཤིག །བླངས་ནས་རོལ་ཞིང་ཚིམས་གྱིས་ལ། །ཧེ་རུ་ཀ་ཡི་བཀའ་བཞིན་དུ། །བཅོལ་བའི་ཕྲིན་ལས་ཐམས་ཅད་སྒྲུབས། །ས་མ་ཡ་མ་ནུ་སྨ་ར། ས་མ་ཡ་རཀྵནྟུ། ལྔ་པ་གཏོར་མ་གཏང་བ་ནི། ཆོས་སྐྱོང་སྤྱི་གཏོར་བྲན་ལ། ༀ་ཨཱཿ ཧཱུྃ། བྷྲཱུྃ་ༀ་ཛྲ་ཁྃ་ཧཱུྃ་རྣམས་འོད་དུ་ཞུ་བ་ལས་བྱུང་བའི་དྲག་པོའི་མཆོད་ཡོན་དང་ཉེར་སྤྱོད། རྒྱལ་སྲིད་སྣ་བདུན། མཁའ་ལྡིང་དང་སེང་གེ་ལ་སོགས་པའི་རྐང་བཞིའི་ཚོགས་དང༌། མཚོན་ཆ་དང་དུར་ཁྲོད་ཀྱི་ཡོ་བྱད་སོགས་དམ་ཅན་རྒྱ་མཚོ་མཉེས་པའི་མཆོད་སྤྲིན་ས་དང་ནམ་མཁའ་བར་སྣང་ཐམས་ཅད་ཁྱབ་པར་བསམས་ལ། ༀ་བཛྲ་མ་ཧཱ་ཨ?ཾ་པྲ་ཏཱིཙྪ་སྭཱ་ཧཱ། ༀ་བཛྲ་པུཥྤེ་ཨཱཿ ཧཱུྃ། དེ་བཞིན་དུ། དྷཱུ་པེ༴ ཨ་ལོ་ཀེ༴ གནྡྷེ༴ ནཻ་ཝི་དྱ༴ ཤབྡའི་བར་གྱིས་སྔགས་རོལ་མོ་དང་བཅས་པས་བྱིན་གྱིས་བརླབ། ཧཱུྃ། ཁྲག་འཐུང་རྒྱལ་པོ་ཧེ་རུ་ཀ །ལྷ་ཆེན་ནག་པོ་དཔལ་འབར་དང༌། །བྷྱོཿ ལྷ་མོ་ནག་མོ་རེ་མཱ་ཏི། །མཁའ་འགྲོ་མེ་ལྕེ་འབར་མ་གཉིས། ། བཀའ་ཉན་འཁོར་གྱིས་བསྐོར་བ་ནི། །འཇིག་རྟེན་གསུམ་གྱི་དྲེགས་པའི་གཙོ། །ལྷ་ཆེན་བརྒྱད་དང་ཀླུ་ཆེན་བརྒྱད། །གཟའ་ཆེན་བརྒྱད་དང་འཇིགས་བྱེད་དགུ། །རྒྱུ་སྐར་ཉི་ཤུ་རྩ་བརྒྱད་དང༌། །ཕྱོགས་སྐྱོང་བཅུ་དང་རྒྱལ་ཆེན་བཞི། །བསིལ་བ་ཚལ་ལ་སོགས་པ་ཡི། །དུར་ཁྲོད་རྣམས་ཀྱི་བདག་པོ་དང༌། །ནཱ་ལེནྡྲ་ལ་སོགས་པ་ཡི། །གཙུག་ལག་ཁང་གི་སྲུང་མ་དང༌། །ལྷ་སྲིན་སྡེ་བརྒྱད་དྲེགས་པ་ཅན། །རྒྱན་དང་ཆ་ལུགས་བཞོན་པར་བཅས། །སྤྲུལ་པ་ཡང་སྤྲུལ་ཉིང་སྤྲུལ་དང༌། །འཁོར་འབངས་བྲན་གཡོག་མ་ལུས་པ། །འདིར་གཤེགས་བདག་ལ་དགོངས་སུ་གསོལ། །བརྒྱན་པའི་གཏོར་མ་འདི་བཞེས་ཤིག །དམར་ཆེན་གཏོར་མ་འདི་བཞེས་ཤིག ། རཀྟའི་མཆོད་ཡོན༴ དབང་པོའི་མེ་ཏོག༴ ཤ་ཆེན་བདུག་སྤོས༴ ཞུན་ཆེན་སྣང་གསལ༴ བདུད་རྩིའི་དྲི་ཆབ༴ ཤ་ཁྲག་ཞལ་ཟས༴ རྐང་གླིང་རོལ་མོ༴ བདུད་རྩི་སྨན་རཀ༴ ཛ་གད་ཕུད་མཆོད༴ དཔའ་བོའི་ངར་ཆུ༴ སྔར་བཅོལ་གཏང་རག༴ ཕྱི་མའི་ཞུ་གསོལ་འདི་བཞེས་ཤིག །བླ་མེད་མཆོད་པ་འདི་བཞེས་ནས། །མཁའ་མཉམ་སེམས་ཅན་ཐམས་ཅད་ལ། །ཕན་བདེ་མ་ལུས་འབྱུང་བའི་གནས། །སངས་རྒྱས་བསྟན་པ་རིན་པོ་ཆེ། །ཕྱོགས་དུས་གནས་སྐབས་ཐམས་ཅད་དུ། །དར་རྒྱས་ཡུན་རིང་གནས་པ་དང༌། །འགྲོ་ལ་བདེ་སྐྱིད་འབྱུང་བ་ཡི། །ཕྲིན་ལས་གཡེལ་མེད་མཛད་དུ་གསོལ། །རྣལ་འབྱོར་བདག་ཅག་འཁོར་བཅས་ཀྱི། །ཆོས་ལྡན་བསམ་སྦྱོར་ ཀུན་འགྲུབ་ཅིང༌། །རེ་བ་ཐམས་ཅད་བསྐང་དུ་གསོལ། །བསམ་པ་ཐམས་ཅད་བསྒྲུབ་ཏུ་གསོལ། །ཞེས་གཏོར་མ་འབུལ། བཛྲ་མུཿ གཏོར་མགྲོན་ཡེ་ཤེས་པ་རྣམས་གཤེགས། དྲུག་པ་གཏང་རག་གི་མཆོད་པ་ནི། མཆོད་པ་ཁ་གསོས་ལ་བསང་སྦྱང༌། སྒྲུབ་ཐབས་ལྟར་བྱིན་བརླབ། རབ་འབྱམས་ཞིང་གི་དཀྱིལ་འཁོར་སོགས་འདོད་ཡོན་ལྔ་མཆོད་དཀྱིལ་ཆོག་ལྟར་འབུལ། ཧཱུྃ། བཅོམ་ལྡན་མགོན་པོ་སོགས་རྐང་བརྒྱད་ཀྱིས་བསྟོད། བདུན་པ་དབང་བཞི་བླང་བ་ནི། དཔལ་ལྡན་བླ་མ་རིན་པོ་ཆེ། །སྐུ་གསུང་ཐུགས་ལས་བྱུང་བ་ཡི། །བདག་ལ་དབང་བཞི་བསྐུར་དུ་གསོལ། །སྨིན་ཅིང་གྲོལ་བར་མཛད་དུ་གསོལ། །བླ་མའི་སྐུ་ལ་གསོལ་བ་འདེབས། །ལུས་ལ་བདེ་དྲོད་འབར་བར་བྱིན་གྱིས་རློབས། །བླ་མའི་གསུང་ལ་གསོལ༴ ངག་ལ་ནུས་པ་ཐོན་པར༴ བླ་མའི་ཐུགས་ལ་གསོལ༴ སེམས་ལ་རྟོགས་པ་འཆར་བར༴ བླ་མའི་སྐུ་གསུང་ཐུགས་ལ་གསོལ་བ་འདེབས། །སྒོ་གསུམ་དབྱེར་མེད་རྟོགས་པར་བྱིན་གྱིས་རློབས། །ཞེས་གསོལ་བ་བཏབ་པས། བླ་མ་དཀྱིལ་འཁོར་ལྷ་ཚོགས་ཐམས་ཅད་ཀྱི་སྤྱི་བོའི་ༀ་དཀར་པོ་ལས་འོད་ཟེར་དཀར་པོའི་ཚོགས་དཔག་ཏུ་མེད་པ་འཕྲོས། བདག་དང་སེམས་ཅན་ཐམས་ཅད་ཀྱི་སྤྱི་བོར་ཐིམ། སྐུ་ལས་ཀྱང་སྐུ་དཔག་ཏུ་མེད་པ་འཕྲོས། ལུས་ལ་ཐིམ་པས་སྐྱེ་བ་དང་ཚེ་རབས་ཐམས་ཅད་དུ་ལུས་ཀྱི་སྒོ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱས། སྐུ་བུམ་པའི་དབང་ཐོབ། ལུས་སྐུ་ རྡོ་རྗེའི་རང་བཞིན་དུ་གྱུར། ལམ་བསྐྱེད་རིམ་བསྒོམ་པ་ལ་དབང༌། འབྲས་བུ་སྤྲུལ་སྐུ་ཐོབ་པའི་སྐལ་ལྡན་དུ་གྱུར། ཡང་བླ་མ་དཀྱིལ་འཁོར་ལྷ་ཚོགས་ཐམས་ཅད་ཀྱི་མགྲིན་པའི་ཨཱཿ དམར་པོ་ལས་འོད་ཟེར་དམར་པོའི་ཚོགས་དཔག་ཏུ་མེད་པ་འཕྲོས། བདག་དང་སེམས་ཅན་ཐམས་ཅད་ཀྱི་མགྲིན་པར་ཐིམ། ཞལ་ནས་ཀྱང་ཨཱ་ལི་ཀཱ་ལི་ལ་སོགས་ཏེ་སྔགས་ཀྱི་ཕྲེང་བ་དཔག་ཏུ་མེད་པ་འཕྲོས། ལྕེ་ལ་ཐིམ་པས་སྐྱེ་བ་དང་ཚེ་རབས་ཐམས་ཅད་དུ་ངག་གི་སྒོ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱས། གསུང་གསང་བའི་དབང་ཐོབ། ངག་གསུང་རྡོ་རྗེའི་རང་བཞིན་དུ་གྱུར། ལམ་གཏུམ་མོ་བསྒོམ་པ་ལ་དབང༌། འབྲས་བུ་ཆོས་སྐུ་ཐོབ་པའི་སྐལ་ལྡན་དུ་གྱུར། ཡང་བླ་མ་དཀྱིལ་འཁོར་ལྷ་ཚོགས་ཐམས་ཅད་ཀྱི་ཐུགས་ཀའི་ཧཱུྃ་སྔོན་པོ་ལས་འོད་ཟེར་སྔོན་པོའི་ཚོགས་དཔག་ཏུ་མེད་པ་འཕྲོས། བདག་དང་སེམས་ཅན་ཐམས་ཅད་ཀྱི་སྙིང་གར་ཐིམ༑ ཡང་རྡོ་རྗེ་དྲིལ་བུ་གྲི་གུག་ཐོད་པ་ཌཱ་མ་རུ་ཁ་ཊྭཱཾ་ག་ལ་སོགས་ཏེ་ཕྱག་མཚན་དཔག་ཏུ་མེད་པ་འཕྲོས། སྙིང་གར་ཐིམ་པས་སྐྱེ་བ་དང་ཚེ་རབས་ཐམས་ཅད་དུ་ཡིད་ཀྱི་སྒོ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱས། ཐུགས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཐུགས་རྡོ་རྗེའི་རང་བཞིན་དུ་གྱུར། ལམ་ཕོ་ཉ་བསྒོམ་ལ་དབང༌། འབྲས་བུ་ལོངས་སྐུ་ཐོབ་པའི་སྐལ་ལྡན་དུ་གྱུར། དེ་ནས་བླ་མ་ དཀྱིལ་འཁོར་ལྷ་ཚོགས་ཐམས་ཅད་ཀྱི་སྤྱི་མགྲིན་སྙིང་གའི་གནས་གསུམ་ལ་ཐིམ་པས་སྐྱེ་བ་དང་ཚེ་རབས་ཐམས་ཅད་དུ་སྒོ་གསུམ་གཅིག་ཆར་དུ་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱས། དབང་བཞི་པ་ཚིག་དབང་རིན་པོ་ཆེ་ཐོབ། སྒོ་གསུམ་སྐུ་གསུང་ཐུགས་རྡོ་རྗེའི་རང་བཞིན་དུ་གྱུར། ལམ་ཕྱག་རྒྱ་ཆེན་པོ་བསྒོམ་པ་ལ་དབང༌། འབྲས་བུ་ངོ་བོ་ཉིད་སྐུ་ཐོབ་པའི་སྐལ་ལྡན་དུ་གྱུར་པར་བསམ་མོ། །བརྒྱད་པ་བཟོད་པར་གསོལ་བ་ནི། ༀ་བཛྲ་ཧེ་རུ་ཀ་ས་མ་ཡ་སོགས། མ་འབྱོར་པ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་གསོལ། །ལྷག་པ་དང་ནི་ཆད་པ་དང༌། །ཆོ་གའི་ཡན་ལག་ཉམས་པ་དང༌། །བདག་གིས་བགྱིས་ནོངས་ཅི་མཆིས་པ། །དེ་ཡང་མགོན་པོས་བཟོད་པར་གསོལ། །བག་མེད་བརྗོད་པ་མ་དག་པ། །རྒྱུད་ལས་གསུངས་པའི་ཆོ་ག་བཞིན། །མ་ལྕོགས་འཁྲུལ་པ་ཅི་མཆིས་པ། །དེ་ཡང་མགོན་པོས་བཟོད་པར་གསོལ། །ཞེས་ནོངས་པ་བཤགས། དགུ་པ་ཉེར་བསྡུ་ནི། དཀྱིལ་འཁོར་རས་བྲིས་སྐབས། ཡེ་ཤེས་པ་རྣམས་རྟེན་འདི་ཉིད་ལ་འབྱུང་བ་བཞིས་གནོད་པས་མ་ཞིག་གི་བར་དུ་བརྟན་པར་བཞུགས་ནས་བསྟན་པ་དང་སེམས་ཅན་གྱི་དོན་མཛད་དུ་གསོལ། ༀ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཛཿ ཧཱུྃ་བྃ་ཧོཿ དམ་ཚིག་གི་དཀྱིལ་འཁོར་འོད་དུ་ཞུ་ནས་རང་ལ་ཐིམ་པར་གྱུར། བཅུ་པ་བསྔོ་བ་ནི། བདག་གི་དགེ་བའི་རྩ་བ་ འདིས་ཉེ་བར་མཚོན་ཏེ་བདག་དང་འཁོར་འདས་སེམས་ཅན་ཐམས་ཅད་ཀྱི་དུས་གསུམ་དུ་བསགས་པ་དང་ཡོད་པའི་དགེ་བའི་རྩ་བ་ལ་བརྟེན་ནས་བདག་གཞན་ནམ་མཁའ་དང་མཉམ་པའི་སེམས་ཅན་ཐམས་ཅད་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཞིང་ཁམས་གདུལ་བྱ་སྐུ་ཚེ་མཛད་པ་སོགས་ད་ལྟ་ཉིད་དུ་མཉམ་པར་གྱུར་ནས་ཆོས་ཀྱི་དབྱིངས་ནམ་མཁའི་མཐར་ཐུག་གི་སེམས་ཅན་ཐམས་ཅད་འཁོར་བ་དོང་ནས་མ་སྤྲུགས་ཀྱི་བར་དུ་འབད་རྩོལ་དང་ཐོགས་ཐུག་མེད་པར་འགྲོ་བའི་དོན་རྒྱུན་ཆད་མེད་པ་འབྱུང་བར་གྱུར་ཅིག །སངས་རྒྱས་སྐུ་བཞི་བརྙེས་པའི་བྱིན་རླབས་དང༌༑ ༑སོགས་ཤློ་ཀ་བརྗོད། བཅུ་གཅིག་པ་ཤིས་བརྗོད་བྱ་བ་ནི། མེ་ཏོག་འཐོར་ལ། ༀ་ཨཱཿ ཧཱུྃ། སྐུ་གསུམ་མངོན་གྱུར་རྡོ་རྗེ་འཆང༌། །བདེ་གསལ་མི་རྟོག་ངང་ལས་ནི། །ཁམས་གསུམ་འགྲོ་བའི་དོན་མཛད་པའི། །བཀའ་བརྒྱུད་བླ་མའི་བཀྲ་ཤིས་ཤོག །ཆོས་དབྱིངས་སྲིད་ཞིའི་ངོ་བོ་ཉིད། །དཀྱིལ་འཁོར་ལྷ་ཡི་རྣམ་པར་ཤར། །དྲན་པས་དངོས་གྲུབ་གཉིས་འབྱུང་བའི། །ཡི་དམ་ལྷ་ཡི༴ བླ་མེད་རྒྱལ་བའི་འཁྲིལ་སྦྱོར་ཡུམ། །འགྲོ་ཀུན་དགེ་ལེགས་སྒྲུབ་མཛད་མ། །རྣལ་འབྱོར་ཉམས་རྟོགས་སྐྱེད་པའི་སྲིང་། །མ་སྲིང་མཁའ་འགྲོའི་བཀྲ༴ ཆོས་ཉིད་ཞི་བའི་ངང་བཞུགས་ཀྱང༌། །བསྟན་དགྲ་སྒྲོལ་ཕྱིར་དྲག་ཤུལ་ཅན། །རྣལ་འབྱོར་ཕྲིན་ལས་ཀུན་སྒྲུབ་པའི། །ཆོས་སྐྱོང་ སྲུང་མའི༴ བླ་མའི་བཀའ་ལུང་དབང་བཞིའི་དོན། །ཡེངས་མེད་ཉམས་ལེན་དམ་ཚིག་སྲུང༌། །རང་བས་བླ་མ་མཆེད་ལྕམ་གཅེས། །རྡོ་རྗེ་སྤུན་གྱི༴ གདོད་ནས་སྟོང་པ་ཆོས་ཀྱི་སྐུ། །སྲིད་ཞི་གང་དུའང་མ་གྲུབ་ཅིང་༑ ༑རང་ངོ་ཤེས་པས་རང་སར་གྲོལ། །ཡེ་ཤེས་སེམས་ཀྱི༴ མདོར་ན་དམ་པ་ཁྱེད་རྣམས་ཀྱི། །བདེན་པ་ཆེན་པོའི་མཐུ་ལས་ནི། །གནས་འདིར་དམ་ཆོས་འཕེལ་བ་དང༌། །བདེ་ལེགས་ཕུན་སུམ་ཚོགས་པར་ཤོག །ཅེས་བརྗོད་ལ་བདེ་ལེགས་སུ་བྱའོ། །ཀུན་ལས་ཁྱད་འཕགས་ཐུན་མོང་མ་ཡིན་པའི། །གྲུབ་ཐོབ་སྙན་ནས་བརྒྱུད་པའི་ཟབ་ཆོས་འདིས། །སྐལ་ལྡན་མཐའ་དག་རྒྱུད་སྨིན་རྣམ་གྲོལ་མཆོག །བདེ་ཆེན་རྟག་པ་དམ་པའི་དཔལ་ཐོབ་ཤོག །ཅེས་པའང་གདམས་ངག་མཛོད་བཀའ་བརྒྱུད་རིན་པོ་ཆེའི་ཁྲིད་རིམ་རྣམས་ཀྱི་སྨིན་བྱེད་དུ་བཞུགས་སུ་གསོལ་བ་དང༌། མཁན་ཆེན་བླ་མ་རིན་པོ་ཆེ་ཀརྨ་བཀྲ་ཤིས་འོད་ཟེར་རབ་ཏུ་རྒྱས་པའི་སྡེའི་ཞལ་སྔ་ནས་གསུང་བསྐུལ་གནང་བ་ལྟར། རིས་མེད་ཀྱི་བསྟན་པ་ལ་གུས་པ་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོས་རྩ་བའི་ཡི་གེ་གཙང་སྨྱོན་ ཧེ་རུ་ཀའི་ནོར་བུ་སྐོར་གསུམ་དང་མཐུན་པར་ཤྲཱི་དེ་བཱི་ཀོ་ཊི་ཙཱ་འདྲ་རིན་ཆེན་བྲག་གི་སྒྲུབ་གནས་སུ་རང་ལོ་གྱ་བདུན་པར་སྦྱར་བའི་ཡི་གེ་པ་ནི་ཉེ་བར་གནས་པ་བློ་གསལ་གསང་སྔགས་བསྟན་འཛིན་ནས་བགྱིས་པ་དགེ་ལེགས་འཕེལ།། །།

[edit]

[edit]