DNZ-13-PA-002-006

Previous TextNext Text

Wylie title	dam pa kun dga'i lugs kyi lam lnga'i glegs bam gyis dbang rgyas pa	Rigpe Dorje Publications, 2024
Location	gdams ngag rin po che'i mdzod Volume 13, Text 2, Subtext 6, Pages 95-168 (Folios 24a4 to 60b1)
Author	སྨིན་གླིང་ལོ་ཆེན་དྷརྨ་ཤྲཱི་
Citation	Smin gling lo chen d+harma shrI. Dam pa kun dga'i lugs kyi lam lnga'i glegs bam gyis dbang rgyas pa. In Gdams ngag rin po che'i mdzod, Vol. 13: 95-168. Kalimpong: Rigpe Dorje Publications, 2024.
Side notes	Recto: zhi byed dbang chog   Verso: zhi byed skor
More details More details
Genre	Empowerment Ritual - dbang chog - dbang skur

Tibetan Text

[edit]

༈ །།ༀ་སྭ་སྟི། ན་མོ་གུ་རུ་ཤྲཱི་བཛྲ་ཌཱ་ཀི་ནི་བྷྱཿ འདིར་དམ་པའི་ཆོས་སྡུག་བསྔལ་ཞི་བྱེད་ཀྱི་རྩ་བ་བཀའ་བབས་ཕྱི་མ་ལས། དྲི་མེད་ཐིགས་པ་ཕྱག་བཞེས་ཀྱི་སྐོར་ཞེས་བྱང་ཆུབ་སེམས་དཔའ་ཀུན་དགའི་ལུགས་ཀྱི་རྟེན་མ་སྨིན་པ་སྨིན་པར་བྱེད་པ་ལམ་ལྔའི་གླེགས་བམ་གྱི་དབང་བསྐུར་བ་ནི༑ དབང་ཐོབ་ཅིང་གྲངས་དུས་རྟགས་ཀྱི་བསྙེན་པ་གང་རུང་ཐེམས་པའི་སློབ་དཔོན་གྱིས་སྣོད་ལྡན་གྱི་སློབ་བུ་རྗེས་སུ་འཛིན་པར་འདོད་པས། ཐོག་མར་ཨཱ་ལི་ཀཱ་ལིའི་སྟ་གོན་དུ་གནས་པར་བྱ་སྟེ། རྒྱུ་གསེར་ཟངས་སོགས་ལ་ཕུལ་དུ་བྱས་པའམ། གཞི་ཇི་ལྟར་རིགས་པ་ལ་གསེར་དངུལ་ལྟ་བུས་བྲིས་པས་ཀྱང་རུང་སྟེ། ཨཱ་ལི་བཅུ་དྲུག་ཚན་བཞི། སྡེ་པ་ལྔ། མཐར་གནས། དྲོ་བའི་ཤ་ཥ་ས་དང༌། ཧ་ཀྵཿ སྟེ་ཚན་པ་བཅུ་གཉིས་སུ་བྱས་པ་བྲིས་ལ། སྐར་མ་རྒྱལ་གྱི་ཉིན་གཟའ་ཚེས་ལེགས་པ་ལ་རབ་གནས་བརྒྱ་རྩ་བརྒྱད་བྱ། དེ་ནས་དབེན་པའི་གནས་སུ་མཁོ་བའི་ཡོ་བྱད་རྣམས་ཚོགས་པར་བྱས་ཏེ། སྟན་བདེ་བ་ལ་འདུག་པའི་མདུན་དུ་མཎྜལ་གྱི་སྟེང་ཡི་གེ་ལྔ་བཅུ་པོ་ནས་དང་བསྲེས་ནས་ཐོད་པ་མཚན་ལྡན་དུ་བླུགས་ལ་བཀོད། འཕང་ལོ་ཐི་གུ་དང་བཅས་པ་ཕྱོགས་བཞིར་བཞག་ལ། ༀ་ཨཱཿ ཧཱུྃ་ཧྲཱིཿ གུ་རུ་སིདྡྷི་ཨ་བྷི་ཥིཉྩ་ཧཱུྃ། ཞེས་འབུམ་ཕྲག་བཞི་བཟླ་སྟེ། བསྙེན་པའོ། །དེ་ནས་མི་སྐད་མི་ཐོས་པའི་དབེན་པར་སོང་ལ། ཐོད་པ་དེ་ཐོད་པ་གཅིག་གི་ནང་དུ་བཅུག །སྟེང་ནས་ཐོད་པ་གཞན་ཞིག་བཀབ་སྟེ་དར་དམར་གྱིས་དྲིལ་ལ་མདུན་དུ་མེ་ལོང་གི་ཁར་བཞག་ཅིང༌། འཕང་ལོས་མཐའ་བསྐོར་ཏེ། ༀ་ཨཱཿ ཧཱུྃ་ཧྲཱིཿ གུ་རུ་སིདྡྷི་ཕ་ལ། ཤཱནྟ། པུཥྚཾ། པཱ་ཤཾ། ཀརྨ་ཀུ་རུ་ཧཱུྃ། ཞེས་འབུམ་ཕྲག་གཉིས་བཟླས་ཏེ། སྒྲུབ་པའོ། །དེ་ནས་ཐོད་པ་དེ་ཉིད་ཤེས་རབ་མ་སྟེ་རང་གི་ཕྱག་རྒྱ་མའམ་གྲོང་པས་མ་གོས་པའི་བུ་མོ། དེ་དག་མེད་ན་རང་གི་ལག་གཡོན་པས་བླངས་ཏེ། མདུན་དུ་མཎྜལ་ལ་མངལ་ཁྲག་དང་སིནྡྷུ་རས་ཆོས་འབྱུང་བྲིས་པའི་སྟེང་དུ་བཞག་ལ། གནས་དེ་དུར་ཁྲོད་དུ་བྱིན་གྱིས་རློབས་ཤིང་བསྒོམས་ནས། ༀ་ཨཱཿ ཧྲཱིཿ གུ་རུ་པྲ་མ་ཎ་ཡེ་ཛི་ན་མཻ་ཏྲི་བྷུ་ཧུ་ཀུ་རུ་ཧཱུྃ། ཞེས་འབུམ་ཕྲག་གཅིག་བཟླས་ཏེ། ལས་སྦྱོར་རོ། །དེ་ནས་རང་གི་སྤྱི་བོར་བཟུང་སྟེ། ༀ་ཨཱཿ ཧཱུྃ་ཧྲཱིཿ ཞེས་སྟོང་ཕྲག་བཞི། དེ་བཞིན་དུ། མཛོད་སྤུ། ཨོལ་མདུད། སྙིང་ག །ལྟེ་བ། གསང་གནས་རྣམས་སུ་བཞག་ནས་སྔགས་དེ་སྟོང་ཕྲག་རེ་རེ་བཟླ་སྟེ། དངོས་གྲུབ་ལེན་པའོ། །དེ་ནས་མདུན་དུ་བཞུགས་སུ་བཅུག་ལ་མཆོད་བསྟོད་གཏོར་མ་དབུལ། བཀྲ་ཤིས་བརྗོད་དོ། །དེ་ལྟར་བྱས་པས་བདག་ཉིད་རྣལ་འབྱོར་གྱི་དབང་ཕྱུག་ཆེན་པོ་ཞེས་བྱ་བའི་མིང་ཐོབ་ཅིང༌། གཞན་ནུས་ལྡན་དུ་བྱེད་པ་བླ་མའི་ལྡང་ཚད་དེ་བསྙེན་པ་ཁ་གསོ་བ་དང་མཐུན་པ་ཡིན་གསུང་ངོ༌། །དེ་ལྟར་རང་གི་བྱ་བ་རྣམས་ལེགས་པར་ཚར་ནས། སློབ་མ་ལས་འཕྲོ་ཅན་ཆེ་བ་བཞི་ལྡན་ཏེ་བླ་མ་ལ་གུས་པ། དཀོན་མཆོག་ལ་དད་པ། ཤེས་རབ་དང་སྙིང་རྗེ་ཆེན་པའི་སློབ་མ་ལ་རིམ་པ་གསུམ་ལས། འདིར་དང་པོ་དབང་རྟུལ་གྱི་གང་ཟག་སྨིན་པར་བྱེད་པ་ལས། དབང་ལྔའི་དང་པོ་བློ་སྦྱོང་གི་དབང་ནི། དུས་གཟའ་སྐར་ཚེས་གྲངས་བཟང་པའི་ཉི་མ་ལ། ཉམས་དགའ་ཞིང་བར་ཆད་མེད་པའི་གནས་དབེན་པར། གནས་ཁང་ཕྱགས་དར་བྱས། བླ་མ་དང་དཀོན་མཆོག་གི་རྟེན་རྣམས་ཁྲི་བཀོད་ལེགས་པ་ལ་བཞུགས་སུ་གསོལ། བླ་མའི་མདུན་དུ་བྲམ་ཟེའམ་དགེ་སློང་གཙང་མའི་ལག་ནས་བྱུང་བའམ། དུར་ཁྲོད་ནས་བྱུང་བའི་རས་དམར་པོ་བཏིང་བའི་སྟེང་དུ་ཤེར་ཕྱིན་གྱི་གླེགས་བམ་བཞག་ལ་འབྲས་དཀར་རམ་ནས་ བྲེ་བརྒྱད་ལས་མི་ཉུང་བ། བཟང་པོས་གཅེར་བ་གླེགས་བམ་གྱི་དབྱིབས་སུ་བཞེངས། དེའི་སྟེང་ལོགས་ལ་འབྲས་སོགས་ཀྱི་ཕྱེ་དཀར་པོས། གླང་ཆེན་ བེར་ཀ་རིས། སྣ་ལྟ་བུ་དང༌། བཙོད་ཀྱི་རུ་རུ་གཤིབས་པ་ཤད་གཉིས། ལྟ་བུ་དང༌། ཟླ་ཚེས་ཚིག་གུ་གཉིས། ལྟ་བུ་དང༌། སྐར་མདའ་ཁ་ཐིག་གཉིས། རྒྱུག་པ་ལྟ་བུ་དང༌། ཉི་ཟླ་ཤར་བ་ལྟ་བུ་ མིག་ཀོར་གཉིས། དང༌། ཨཱ་ལི་ཀཱ་ལི་ཆ་ལྔ་དཔེ་ཆུང་ལྟར་བྲི། དེའི་ཐིག་ཁོངས་སུ་ཆུད་པར་རིན་པོ་ཆེ་ལས་གྲུབ་པའི་ཨ་ཀྵཿ ལྔ་བཅུའི་བྱང་བུ་རབ་གནས་ཅན་གྱིས་བསྐོར་ལ་དགྲམ། དེའི་དབུས་སུ་ཐོད་པ་མཚན་ལྡན་དུ་ཆང་བཟང་པོ་ལ་བདུད་རྩི་རིལ་བུ་བཏབ་ཅིང་ཕྲད་བུ་རམ་བཟང་པོ་དང་སྦྱར་བ་བཀོད་ལ་དར་དམར་གྱིས་ཁ་བཅད། སྟེང་དུ་རྒྱལ་བ་ཡུམ་གྱི་བླ་རེ་ལྷའམ་ཨ་རང་ལ་ཞལ་བསྟན་པ་དབུབ་པའང་ཕྱག་ལེན་ལ་གནང༌། གླེགས་བམ་གྱི་མཐའི་ཕྱོགས་མཚམས་སུ་འབྲས་སམ་ནས་ཀྱི་ཕྱེ་མ་དཀར་པོས་པདྨ་འདབ་བརྒྱད་བྲིས་པ་དུར་ཁྲོད་བརྒྱད་དུ་མོས་ལ། དེ་རྣམས་ཀྱི་སྟེང་དུ་ཕྱོགས་སྐྱོང་ལ་གཏོར་མ། མཁའ་འགྲོ་ལ་ཤ་ཆེན། ཞིང་སྐྱོང་ལ་སྲུང་སྐུད། གྲུབ་ཐོབ་ལ་ཕྲེང་བ་རྣམས་བཀོད་དེ་དུར་ཁྲོད་ཀྱི་རྫས་སུ་མོས། མཐའ་ཅི་འབྱོར་བའི་མཆོད་པས་བསྐོར། ལས་བཞིའི་འབྲང་རྒྱས། ཤར་དུ་དཀར་ཟླུམ། ལྷོར་གྲུ་བཞི་སེར། ནུབ་ཏུ་ཟླ་གམ་དམར། བྱང་དུ་གྲུ་གསུམ་ནག་པོ་རྣམས་བཤམས། གཞན་ཡང་དཀྱིལ་འཁོར་མཆོད་པའི་གཏོར་མ་བཞི་རྒྱན་བཅས་པ་དང༌། བཟའ་བཅའ་བཏུང་བ་ལ་སོགས་པའི་ཚོགས་ཀྱི་ཡོ་བྱད་རྣམས་ཅི་བདེར་བཤམ་མོ། །དེ་ནས་རང་ཉིད་སྟན་བདེ་བ་ལ་འདུག་སྟེ། སྔོན་གཏོར་རྃ་ཡྃ་ཁྃ་གིས་བསངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ཨཱཿ ལས་ཡེ་ཤེས་ཀྱི་བདུད་རྩི་ཧཱུྃ་གིས་མཁའ་ཁྱབ་ཏུ་འཕེལ་བར་གྱུར། ༀ་ཨཱཿ ཧཱུྃ་ལན་གསུམ་གྱིས་གཏོར་མ་བསྔོས་ལ། ཕྱོགས་སྐྱོང་བ་བཅུ་དང་གཞི་བདག་དཀར་ཕྱོགས་པ་རྣམས་ལ་འབུལ་ལོ། །ཕན་པ་དང་བདེ་བའི་སེམས་ཀྱིས་སྟོང་གྲོགས་མཛོད་ཅིག །གང་དག་སྡང་བ་དང༌། གདུག་པའི་སེམས་དང་ལྡན་པ་ལོག་པར་བལྟ་བའི་བགེགས་དང་ལོག་འདྲེན་ཐམས་ཅད་ཀྱང་གཏོར་མ་འདིས་ཚིམས་པར་གྱིས་ལ་འདིར་མ་གནས་པར་གཞན་དུ་སོང་ཞིག །ཅེས་གཏོར་མ་ཕྱིར་དོར་རོ། །ༀ་བཛྲ་རཀྵ་རཀྵ་ཧཱུྃ་ཕཊ་ཅེས་པས་རྡོ་རྗེའི་ས་གཞི་ར་བ་དྲྭ་བ་གུར་དང་བླ་བྲེས་གཏམས་པ་ལས་ཡེ་ཤེས་ཀྱི་མེ་འབར་བས་ཅིས་ཀྱང་མི་ཤིགས་པར་གྱུར། རང་གི་སྙིང་གའི་འོད་ཟེར་གྱིས་ཚོགས་ཞིང་རྣམས་མདུན་གྱི་ནམ་མཁར་སད་པར་བསམ་ལ། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་ལན་གསུམ་གྱིས་སྐྱབས་སུ་འགྲོ། ཤེས་རབ་སྙིང་རྗེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བགྱིས་ནས། །བྱང་ཆུབ་མཆོག་ཏུ་སེམས་བསྐྱེད་བགྱི། །ཞེས་ལན་གསུམ་གྱིས་སེམས་བསྐྱེད། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་གྱུར་ཅིག །བདེ་དང་རྟག་ཏུ་མི་འབྲལ་ཞིང༌། །བཏང་སྙོམས་མཆོག་ལ་གནས་པར་ཤོག །ཅེས་གསུམ་དང༌། ན་མོ། བླ་མ་དཀོན་མཆོག་ཡི་དམ་ལྷ། །མཁའ་འགྲོ་སྲུང་མའི་ཚོགས་བཅས་ལ། །དང་བའི་སེམས་ཀྱིས་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་འབུལ། །བདག་གིས་སྡིག་པ་ཅི་བགྱིས་པ། །དེ་དག་ཐམས་ཅད་སོ་སོར་བཤགས། །སེམས་ཅན་དོན་མཛད་རྒྱལ་སྲས་གང༌། །དེ་དག་ཀུན་ལ་རྗེས་ཡི་རང༌། །ཇི་སྲིད་འཁོར་བ་མ་སྟོང་བར། །མྱ་ངན་མི་འདའ་གསོལ་བ་འདེབས། །མགོན་པོ་ཐུགས་རྗེ་ཆེ་ལྡན་རྣམས། །ཆོས་ཀྱི་འཁོར་ལོ་བསྐོར་བར་བསྐུལ། །འགྲོ་ཀུན་བསགས་པའི་དགེ་བ་གང༌། །བྱང་ཆུབ་ཏུ་ནི་བདག་གིས་བསྔོ། །ཞེས་ལན་གསུམ་གྱིས་བསོད་ནམས་ཀྱི་ཚོགས་བསག་གོ །སྭ་བྷཱ་ཝས་ཆོས་ཐམས་ཅད་སྟོང་པ་ཉིད་དུ་སྦྱངས་ཏེ་ཡེ་ཤེས་ཀྱི་ཚོགས་སོ། །འདི་རྩ་བར། རང་ལྷ་གང་ཡིན་གྱི་བསྐྱེད་བཟླས་བྱ་བར་བཤད་ཀྱང༌། ཕྱག་ལེན་དུ་བདག་མེད་མ་བསྒོམས་པར་མཛད་པས་དེའི་དབང་དུ་བྱས་ཏེ། སྟོང་པའི་ངང་ལས་རྡོ་རྗེ་སྲུང་བའི་གུར་ཁང་ཡེ་ཤེས་ཀྱི་མེ་འབར་བས་ཡོངས་སུ་བསྐོར་བའི་ནང་པད་ཉི་སྣ་ཚོགས་རྡོ་རྗེའི་ལྟེ་བ་ལ་གནས་པའི་གཞལ་ཡས་ཁང་གྲུ་བཞི་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པད་ཉི་རོའི་གདན་ལ་ༀ་ཡིག་ཡོངས་སུ་གྱུར་པ་ལས། རང་ཉིད་རྗེ་བཙུན་རྡོ་རྗེ་བདག་མེད་མ་སྐུ་མདོག་ནག་མོ་ཞལ་གཅིག་ཕྱག་གཉིས་ཀྱིས་གཡས་གྲི་གུག་ནམ་མཁའ་ལ་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པའི་གྲུ་མོ་ན་ཁ་ཊྭཱཾ་ག་བསྣམས་པ། སྤྱན་གསུམ་པ། ཞལ་མཆེ་བའི་མྱུ་གུ་ཅུང་ཟད་གཙིགས་ཤིང་ཁྲོ་འཛུམ་བཞད་པའི་ཉམས་ཅན། དབུ་སྐྲ་སེར་པོ་གྱེན་དུ་འཁྱིལ་བ་གཅེར་བུ་ཕྱག་རྒྱ་ལྔས་བརྒྱན་པ་གར་དགུའི་ཉམས་ཀྱིས་སྒེག་པ། ཞབས་གཉིས་གཡས་བསྐུམ་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པ་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ཡིག་རྣམས་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་བདག་ཉིད་དུ་གྱུར། ཐུགས་ཀའི་ཧཱུྃ་གི་འོད་ཟེར་གྱིས་རང་འདྲའི་ཡེ་ཤེས་པ་བཛྲ་ས་མཱ་ཛཿ ས་སྤྱན་དྲངས། ཛཿ ཧཱུྃ་བཾ་ཧོཿ ས་ཡེ་ཤེས་པ་དམ་ཚིག་པ་ལ་རོ་གཅིག་ཏུ་གྱུར། སླར་ཡང་ཐུགས་ཀའི་འོད་ཟེར་གྱིས་དབང་གི་ལྷ་བཛྲ་ས་མཱ་ཛཿ ས་སྤྱན་དྲངས། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། རིགས་ལྔ་ཡབ་ཡུམ་གྱི་ཐུགས་ཀ་ནས་བྱུང་བའི་ཡུམ་ལྔས་བྱང་ཆུབ་སེམས་ཀྱི་ཆུས་གང་བའི་བུམ་པ་ཐོགས་ནས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། ཞེས་དབང་བསྐུར་ཆུ་ལྷག་མ་སྤྱི་བོར་འཁྱིལ་བ་ལ་རྡོ་རྗེ་སེམས་དཔས་དབུ་བརྒྱན། རང་གི་ཐུགས་ཀར་ཉི་མ་ལ་གནས་པའི་ༀ་ཡིག་སྔགས་ཕྲེང་གིས་བསྐོར་བ་ལས་སྤྲོས་པའི་འོད་ཟེར་གྱིས་སྣོད་བཅུད་ཐམས་ཅད་དག་པའི་འཁོར་ལོར་སྦྱངས་པར་བསམས་ལ། ༀ་ཨཱཿ ཨཾ་སྭཱ་ཧཱ། ཞེས་བཟླས་ཤིང༌། དེས་སྐྱོ་ན་རང་གི་ཐུགས་ཀ་ནས་སྤྲོས་པའི་ལྷ་མོ་རྣམས་ཀྱིས་མཆོད་པར་བསམས་ལ། མཆོད་པ་བསངས་སྦྱངས། སྟོང་པའི་ངང་ལས་ༀ་ལས་བྱུང་བའི་མཆོད་སྣོད་ཡངས་ཤིང་རྒྱ་ཆེ་བ་རྣམས་སུ་ཨཱཿ ཡིག་ཞུ་བ་ལས་བྱུང་བའི་མཆོད་རྫས་རྣམས་འདོད་ཡོན་གྱི་རོལ་མོར་འཆར་བའི་བདུད་རྩིའི་རང་བཞིན་ཅན་ཧཱུྃ་ཡིག་གིས་ཡུལ་དུས་ཚད་མེད་པར་འཕེལ་བའི་མཆོད་སྤྲིན་དུ་གྱུར། ༀ་ཨཱཿ ཧཱུྃ། ཞེས་བདུན་ནམ་གསུམ་གྱིས་བརླབས་ལ། རབ་འབྱམས་རྒྱ་མཚོ་དཔག་མེད་ན། །མཆོད་རྫས་ཇི་སྙེད་ཡོད་པ་དང༌། །བདག་གིས་གུས་པར་བཤམས་པ་འདི། །རྗེ་བཙུན་བཅོམ་ལྡན་འདས་མར་འབུལ། །ༀ་ནཻ་རཏྣཱ་སཱ་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ། པུཥྤེ། དྷཱུ་པེ། ཨཱ་ལཱོ་ཀེ། གནྡྷེ། ནཻ་ཝིདྱེ། ཤཔྡ། ཞེས་བཅུག་པ་དང༌། ནང་མཆོད་འབྲུ་གསུམ་གྱིས་ཕུལ་ལ། བསྟོད་པ་ནི། རྣམ་དག་དྲི་མེད་དབྱིངས་ལས་སྐུ་སྤྲུལ་ཞིང༌། །སྒྱུ་མའི་སྐུ་མཆོག་མཛེས་པའི་ཆ་ལུགས་འཆང༌། །རབ་བརྗིད་གར་གྱིས་རྣམ་པར་བརྒྱན་པ་མོ། །འགྲོ་བའི་ཡིད་འཕྲོག་རྣམ་དག་སྐུ་ལ་བསྟོད། །བརྗོད་མེད་ངང་ལས་སྤྲུལ་པའི་གསུང་མཆོག་ནི། །གྲགས་སྟོང་ངོ་བོ་གཉིས་མེད་བྲག་ཆའི་སྒྲ། །འགྲོ་ཀུན་ཐར་ལམ་བདེ་ལ་འགོད་མཛད་པའི། །རྣམ་དག་དྲི་བྲལ་གསུང་ལ་གུས་པས་འདུད། །མི་རྟོག་དབྱིངས་ནས་ཐུགས་རྗེའི་འོད་ཟེར་འཕྲོ། །མཐར་ཕྱིན་ཐབས་ཀྱི་མཛད་པས་གདུལ་བྱ་སྒྲོལ། །དཔག་མེད་ཡོན་ཏན་དུ་མའི་མཆོག་མངའ་བ། །ཐུགས་མཆོག་ཡོན་ཏན་ཕྲིན་ལས་བཅས་ལ་འདུད། །ཅེས་བསྟོད། དེ་ནས་ཚོགས་རྫས་རྣམས་རྃ་ཡྃ་ཁྃ་གིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨཱཿ ལས་ཐོད་པ་ཡངས་ཤིང་རྒྱ་ཆེ་བའི་ནང་དུ་ༀ་ལས་ཚོགས་རྫས་བདུད་རྩི་ལྔའི་རང་བཞིན། ཧཱུྃ་ལས་ཡེ་ཤེས་ཀྱི་བདུད་རྩི་སྤྱན་དྲངས་ཏེ་ཐིམ་པས་འདོད་ཡོན་གྱི་རྣམ་པ་ཅིར་ཡང་འཆར་བར་བསམས་ལ། ༀ་ཨཱཿ ཧཱུྃ། ཞེས་ལན་གསུམ་བརྗོད་པས་བྱིན་གྱིས་བརླབས། དེ་ནས་གླེགས་བམ་བྱིན་གྱིས་བརླབ་པ་ནི། ལྕགས་ཀྱུའི་ཕྱག་རྒྱ་བཅས་ལ་ཛཿ ཧཱུྃ་བཾ་ཧོ་ཞེས་པས་འོག་མིན་གྱི་གནས་ནས་ཡེ་ཤེས་ཀྱི་གླེགས་བམ་སྤྱན་དྲངས་ཏེ་ཐིམ་པར་བསམས་ལ། ༀ་ཨཱཿ ཧཱུྃ་ཧྲཱིཿ ཞེས་བཞི་བརྒྱ་བཟླས། ཡང་སྔགས་རྒྱས་ཡེ་ཤེས་ཀྱི་ཡིག་འབྲུ་ཨཱ་ལི་ཀཱ་ལི་ལྔ་བཅུའི་རྣམ་པར་སྤྱན་དྲངས་པར་བསམས་ལ། ཨ་ཀྵ་ལྔ་བཅུ་པོ་ལན་བཞི་བཟླས་ནས་བླ་མ་ཆོས་ཀྱི་སྐུའི་ངོ་བོར་བྱིན་གྱིས་བརླབ་བོ། །ཡང་ཐོད་པའི་བདུད་རྩི་བརླབ་པ་ནི། བདུད་རྩིའི་སྟེང་དུ་ཟླ་བའི་གདན་ལ་ཡི་དམ་གྱི་ས་བོན་ཨཾ་ཡིག་འབར་བ། དེ་ལས་འོད་ཟེར་འཕྲོས། བླ་མ་དང་གཉིས་སུ་མེད་པའི་སངས་རྒྱས་རྡོ་རྗེ་འཆང་ཡབ་ཡུམ་སྤྱན་དྲངས། བདག་གི་སློབ་མ་འདི་དག་སྨིན་པར་མཛད་དུ་གསོལ། ཞེས་གསོལ་བ་བཏབ་པས་ཡབ་ཡུམ་མཉམ་པར་སྦྱོར་བའི་བྱང་སེམས་དཀར་དམར་བབས་པས་ཐོད་པ་ཁེངས་པར་བསམས་ལ། ཨ་མྲྀ་ཏ་ཧཱུྃ། ཞེས་པ་བཞི་བརྒྱ་བཟླས་རྗེས། ༀ་ཨཱཿ ཧཱུྃ་མང་དུ་བཟླས་པས་དཀྲུགས་ཤིང་རྒྱས་བཏབ་ལ་བཞག་གོ །ཡང་སྔགས་རྒྱས་ཕྲིན་ལས་བཞི་གྲུབ་པའི་རྫས་དེ་སྤྱན་དྲངས་འབྲང་རྒྱས་ལ་ཐིམ་པར་བསམས་ལ། ཤཱནྟིང་ཀུ་རུ་སྭཱ་ཧཱ། པུཥྚ་ཀུ་རུ་སྭཱ་ཧཱ༑ བ་ཤཾ་ཀུ་རུ་སྭཱ་ཧཱ། རཀྴ་ཀུ་རུ་སྭཱ་ཧཱ། ཞེས་བཟླས་པས་ཕྲིན་ལས་ཐོགས་མེད་དུ་འགྲུབ་པའི་རྫས་སུ་གྱུར་པར་བསམ་ཞིང༌། ཨ་བྷི་ཥིཉྩ་ཧཱུྃ་ཞེས་ཀྱང་བཟླས་སོ། །དེ་ནས་སློབ་མ་རྣམས་ཁྲུས་དང་ཕྱག་བྱས་ནས་གྲལ་དུ་འཁོད་པ་ལ། འོ་རྒྱུ་སེམས་ཅན་ལ་འབྲས་བུ་རྫོགས་པའི་སངས་རྒྱས་ཐོབ་པར་འདོད་པ་རྣམས་ཀྱིས་དམ་པའི་ཆོས་རིན་པོ་ཆེ་ཉམས་སུ་ལེན་དགོས་ལ། དེ་ཡང་གང་ཟག་བློའི་རིམ་པ་མི་གཅིག་པ་ལ་དགོངས་ནས་རྫོགས་པའི་སངས་རྒྱས་ཀྱིས་ཐེག་པ་སྣ་ཚོགས་གསུངས་པ་ལས། འདིར་ཐེག་པ་ཆེན་པོ། དེ་ལའང་སྔགས་མཚན་ཉིད་གཉིས་ལས་འདིར་སྔགས་གཙོ་བོར་སྟོན་པ། དེ་ལའང་རྒྱུད་སྡེ་རིན་པོ་ཆེ་བཞི་ལས་འདིར་བླ་མེད། དེ་ལ་གསུམ་ལས་འདི་སྙིང་པོ་དོན་གྱི་རྒྱུད། འདི་ཉམས་སུ་བླངས་པས་གྲུབ་པ་ཐོབ་པའི་གང་ཟག་དཔག་མེད་བྱོན་པ་ལས་འདིར་ནི་དམ་པ་རིན་པོ་ཆེའི་ལུགས་དམ་པའི་ཆོས་སྤྱིའི་མིང་བྱེ་བྲག་ལ་བཏགས་ནས། སྤྱི་མིང་སྒོས་སུ་ཐོབ་པའི་ཆོས་སྡུག་བསྔལ་ཞི་བྱེད། དེ་ལ་ཡང་སྔ་ཕྱི་བར་གསུམ་ལས་འདི་ནི་ཞི་བྱེད་བརྒྱུད་པ་ཕྱི་མ་བྱ་བ། སྒོ་བའི་རྣལ་འབྱོར་པ་བཞི་ལ་གསུངས་པ་ལས། འདི་བླ་མ་བྱང་ཆུབ་སེམས་དཔའ་ཀུན་དགའི་ལུགས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པའི་གདམས་ངག །གསང་སྔགས་དང་རྗེས་སུ་མཐུན་པ། རྩ་བ་དང་བརྒྱུད་ལ་བསྐུར་བ། སྙིང་པའི་དོན་ཐབས་རྟེན་འབྲེལ་གྱི་ཆེ་བ་དུ་མས་བརྒྱན་པ། སངས་རྒྱས་ཀྱི་བསྟན་པ་ཐམས་ཅད་སྟན་གཅིག་གི་སྟེང་དུ་དུས་གཅིག་ལ་ཉམས་སུ་ལེན་པ་དྲི་མེད་ཐིག་པ་ཕྱག་བཞེས་ཀྱི་སྐོར་བྱ་བ་དེ་ལགས། འདི་འཆད་པ་ལ་ཡན་ལག་ལྔ་སྟེ། ཡིད་ཆེས་བསྐྱེད་པ་གཏམ་རྒྱུད་ཀྱི་ཡན་ལག །རྟེན་སྨིན་པར་བྱེད་པ་དབང་གི་ཡན་ལག །ཉམས་སྐྱེ་བར་བྱེད་པ་ཁྲིད་ཀྱི་ཡན་ལག །རྟོགས་པ་འཆར་བར་བྱེད་པ་བླ་མའི་བྱིན་རླབས་ཀྱི་ཡན་ལག །སྤྲོས་པ་གཅོད་བྱེད་ཚིག་ཚོགས་ཀྱི་ཡན་ལག་དང་ལྔ་ལས། འདིར་རྟེན་མ་སྨིན་པ་སྨིན་པར་བྱེད་པ་དབང་གི་ཡན་ལག་གི་སྐབས་ཡིན་པས། ཐོག་མར་དབང་ཞུ་བའི་ཡོན་དུ་མཎྜལ་ཕུལ་མཛོད། ཅེས་མཎྜལ་ཕུལ་དུ་གཞུག །དེ་ནས་སྙིམ་པ་མེ་ཏོག་དང་བཅས་ཏེ་ཐལ་མོ་སྦྱར་ནས་འདིའི་རྗེས་ཟློས་མཛོད། བླ་མ་རིན་པོ་ཆེ། བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། ཞེས་ལན་གསུམ། དེ་ནས་བླ་མས། ཁྱེད་རྣམས་སེམས་ཅན་གྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ཨཱ་ལི་ཀཱ་ལིའི་བྱིན་རླབས་ཡི་གེ་ཕྱི་མའི་དབང་བསྐུར་ལྷན་ཅིག་སྐྱེས་པ་བཞི་རྫོགས་ཞུས་ལ་ཉམས་སུ་བླང་སྙམ་པས་མ་ཡེངས་པར་གསན་འཚལ། དེའང་དབང་འཁོར་རྩ་བ་ལས། གསོལ་བ་བཏབ་པའི་རྗེས་སུ། བླ་མས་ལྷག་པའི་ལྷ་མཆོད་ཅིང་ཚོགས་མཆོད་གླེགས་བམ་བྱིན་གྱིས་བརླབ་པར་བྱའོ། །དེ་ནས་སེམས་བསྐྱེད་པར་ལྡན་པས་ཐེག་པའི་རིམ་པ་ངོས་བཟུང་ལ། སྙིང་པོ་དོན་གྱི་ཆེ་བ་བརྗོད་པར་བྱའོ། །ཞེས་གསུངས་པ་ལས་ལག་ཏུ་བླང་བདེ་བའི་ཕྱིར་དེ་རྣམས་གསོལ་འདེབས་ཀྱི་གོང་དུ་གྲུབ་པས། ད་ཁྱད་འཕགས་ལྔའི་སྒོ་ནས་ལས་ཅན་སྤྲོ་བ་བསྐྱེད་པར་བྱ་སྟེ། དྲི་མེད་ཐིག་པ་ཕྱག་བཞེས་ཀྱི་སྐོར་འདི་ཉམས་སུ་ལེན་པ་ལ། དབྱིངས་རྣལ་འབྱོར་གསུམ་དུ་གནས་ཏེ། དང་པོ་བྱ་བ་གཞིའི་རྣལ་འབྱོར་རྟེན་སྡོམ་པ་གསུམ་ལྡན་དུ་བྱས་ནས་རྣལ་འབྱོར་གྱི་རང་ས་དྲུག་མ་ཉམས་པར་བསྲུང༌། དེའི་སྟེང་ནས་བྱེད་པ་ལམ་གྱི་རྣལ་འབྱོར་འཕགས་པའི་ལམ་རིམ་པ་ལྔ་དཀའ་ཐུབ་རྣམ་པ་གསུམ་གྱི་སྲང་ནས་བཏོན་པས། མཐར་བྱ་བྲལ་འབྲས་བུའི་རྣལ་འབྱོར་སངས་རྒྱས་སྐུ་བཞི་མངོན་དུ་འགྱུར་བ་ལ་ཚེགས་མེད་པ་ལགས། འདི་ལའང་ལམ་རིམ་པ་ལྔ་ལས། ད་རེས་ཀྱི་དབང་འདི་ཚོགས་ལམ་བགྲོད་པར་བྱེད་པ་བློ་སྦྱོང་གི་དབང་དང་བྱིན་རླབས་བྱ་བ་དེ་ཡིན། འདི་ནི་དབང་བསྐུར་བ་གཞན་ལས་ཁྱད་པར་ལྔས་འཕགས་པ་ཡིན་ཏེ། དང་པོ་དཀྱིལ་འཁོར་མི་བཤམ་གླེགས་བམ་བཤམས་པས་ཁྱད་པར་འཕགས་ཏེ༑ དཀྱིལ་འཁོར་ནི་ལྷ་དབང་ལུས་ལ་བསྐུར་བའི་རྟེན་ཙམ་ཡིན་ལ། གླེགས་བམ་ནི་ཆོས་དབང་སེམས་ལ་བསྐུར་བ་ཡིན་པས་ཁྱད་པར་འཕགས། འདི་ལ་གསུམ་ལས། རི་མོ་གཟུགས་ཀྱི་གླེགས་བམ་སངས་རྒྱས་སྐུ་གསུམ་གྱི་ཞིང་ཁམས། མཐའ་བསྐོར་རྟོགས་པ་དོན་གྱི་གླེགས་བམ་སྐུ་གསུམ་གྱི་དགོངས་པ། རྒྱབ་ན་མཚོན་བྱེད་སྒྲའི་གླེགས་བམ་གསུང་རབ་རིན་པོ་ཆེ་སྐུ་གསུམ་གྱི་ཕྲིན་ལས། དེ་ལྟར་གླེགས་བམ་འདི་མཐོང་བ་ཙམ་གྱིས་སྐྱོན་ཐམས་ཅད་འདགས་ཤིང་ཡོན་ཏན་ཐམས་ཅད་འབྱུང་བ་ཡིན་ནོ། །གཉིས་པ་དཀྱིལ་འཁོར་གྱི་སྟེང་དུ་ས་ཚོན་མི་འགྲེམ་པར་གླེགས་བམ་གྱི་སྟེང་དུ་ཡིག་འབྲུ་བཀྲམ་པས་འཕགས་ཏེ། ས་ཚོན་གྱིས་ཡེ་ཤེས་ལྔའི་མདངས་ལས་མི་མཚོན་ལ། ཡིག་འབྲུ་ནི་ཡེ་ཤེས་དངོས་སུ་རྒྱུད་ལ་སྐྱེ་བར་བྱེད་པའི་ས་བོན་ཡིན་པས་ཡང་དག་པའི་ལམ་རིམ། བདེ་བར་གཤེགས་པའི་ཞལ་ངོ༌། འཁོར་འདས་ཀུན་གྱི་རྩ་བ། མཐོང་བས་ཆོག་པའི་ལམ་ཡིན་ནོ། །གསུམ་པ་དཀྱིལ་འཁོར་གྱི་སྟེང་དུ་བུམ་པ་མི་འཆའ་བར་གླེགས་བམ་གྱི་སྟེང་དུ་བྷནྡྷ་འཆའ་བས་འཕགས་ཏེ། བུམ་པ་ནི་བཟོ་བོས་གསར་དུ་བསྒྲུབས་ཤིང་རྫས་ཆུས་བྱས་པས་བདེ་བར་གཤེགས་པའི་རྟེན་རྫས་ཙམ་ཡིན་ལ། བྷནྡྷ་ནི་རང་བྱུང་ལྷུན་གྲུབ་བསམ་འཕེལ་གྱི་ནོར་བུ་རིན་པོ་ཆེ། འདིའི་ནང་དུ་བླུགས་པའི་བདུད་རྩི་བྱང་སེམས་ནི། བདེ་བར་གཤེགས་པ་ཐམས་ཅད་མཉེས་པར་བྱེད་པའི་དམ་རྫས་ཏེ། ཟིན་པས་ཆོག་པའི་རྩི། རྫས་གཅིག་གིས་ཐུགས་དམ་སྐོང་བར་བྱེད་པ་ཡིན་ནོ། །བཞི་པ་དཀྱིལ་འཁོར་གྱི་གཙོ་བོ་ལྷས་མ་བྱས་པར་གླེགས་བམ་གྱི་གཙོ་བོ་བླ་མས་བྱས་ནས་དབང་བསྐུར་བས་འཕགས་ཏེ། ལྷས་སེམས་ཀྱི་སྒྲོ་འདོགས་དངོས་སུ་མི་ཆོད་ལ། བླ་མས་དངོས་སུ་གཅོད་དེ་རབ་རྟོགས་ལྡན་གྱི་བླ་མ་སངས་རྒྱས་ཐམས་ཅད་ཀྱི་བྱེད་པ་པོ། འབྲིང་ཉམས་མྱོང་དང་ལྡན་པའི་བླ་མ་ནི་སངས་རྒྱས་ཐམས་ཅད་ཀྱི་རྣམ་འཕྲུལ། ཐ་མ་གདམས་ངག་དང་ལྡན་པའི་བླ་མས་ཀྱང་སངས་རྒྱས་ཀྱི་ཕྲིན་ལས་ཙམ་སྒྲུབ་ནུས་པ་ཡིན་ནོ། །ལྔ་པ་དབང་བཞི་གྱེར་ཐབས་སུ་མི་བསྐུར་བར་ངོ་སྤྲོད་དུ་བསྐུར་བས་འཕགས་ཏེ། གྱེར་ཐབས་ནི་དོན་སྤྱི་ལ་བརྟེན་པ་ལམ་མོས་སྒོམ་ཙམ་ཡིན་ལ། ངོ་སྤྲོད་ཀྱི་ལམ་དངོས་སུ་རྫོགས་པར་བྱེད་པ་ཡིན་ཏེ། སློབ་མ་རབ་དབང་བསྐུར་བའི་དུས་དེ་ཉིད་རྟོགས་ཐོབ་དུས་མཉམ་དུ་འགྲོལ་ནུས། འབྲིང་གིས་རྩ་བྲལ་གྱི་དོན་རྙེད། ཐ་མས་ཀྱང་བྱང་སེམས་ཀྱི་ངོ་བོ་མཐོང་ངེས་པ་ཡིན་ནོ། །དེ་ལྟར་ཁྱད་དུ་འཕགས་པའི་དབང་འདི་རྒྱ་བོད་ཀྱི་མཁས་པ་གཞན་ལ་མ་གྲགས་ཤིང༌། སྔོན་ཆད་བོད་དུའང་མ་བསྒྱུར་བའི་ཁྱད་ཆོས་དམ་པ་རིན་པོ་ཆེས་བོད་ཀྱི་གདུལ་བྱ་རྣམས་ལ་ཐུགས་རྗེས་དགོངས་ནས། ཕྱི་སྡེ་སྣོད་གསུམ་གྱི་སྙིང་ཕྱུང༌། ནང་རྒྱུད་སྡེ་བཞིའི་སྲོག་བཅད། གསང་བ་སྙིང་པོ་དོན་གྱི་མིག་ཕྱེ། དེ་ཁོ་ན་ཉིད་མཁའ་འགྲོ་མ་རྣམས་ཀྱི་བཀའ་རྒྱ་བཀྲོལ་ནས། ཕྱི་རབས་ཀྱི་དོན་དུ་བླ་མ་བྱང་ཆུབ་སེམས་དཔའ་ཀུན་དགའ་ལ་ཆིག་བརྒྱུད་དུ་གནང་བ་ཡིན། དེ་ལྟ་བུའི་བྱིན་རླབས་འདི་ལ་དབང་གི་ཆུ་བོ་ཆེན་པོ་བཞི་རུ་ཡོད་པ་ལས། ཐོག་མར་བུམ་དབང་གི་བརྒྱུད་པ་ནི། ཆོས་སྐུ་རྡོ་རྗེ་འཆང་གིས་ལོངས་སྐུ་ལྷ་མོ་བདག་མེད་འདི་ལྟར་བྱིན་གྱིས་བརླབས་ཏེ། སེམས་ཉིད་ཀྱི་གཤིས་སྐྱེ་བ་མེད་པའི་གླེགས་བམ་ལ་རྩལ་མ་འགགས་རྟོགས་པའི་རི་མོ་ཤར་བ་དེ་ལ། ཐབས་མ་ཡེངས་པར་དྲན་པའི་དབང་བསྐུར་མཛད་པར་གདའ། བདག་མེད་མས་སྤྲུལ་སྐུ་དམ་པ་རིན་པོ་ཆེ་ལ་འདི་ལྟར་བྱིན་གྱིས་བརླབས་ཏེ། ཤིང་ཏཱ་ལ་བདུན་སྲིད་ཙམ་གྱི་བར་སྣང་ལ་བཞུགས་ཏེ། ཕྱག་མཛུབ་ཀྱིས་བར་སྣང་ལ་ནམ་མཁའ་དོན་གྱི་གླེགས་བམ་བྲིས་ནས། ཀུན་ཏུ་བཟང་པའི་མཆོད་ཚོགས་དངོས་སུ་སྤྲུལ་ནས་དབང་བཞི་རྫོགས་པར་བསྐུར། སྤྲུལ་པའི་སྐུ་དམ་པ་རིན་པོ་ཆེས་བླ་མ་བྱང་ཆུབ་སེམས་དཔའ་ཀུན་དགའ་ལ་འབྲས་དཀར་བརྡལ་བའི་གླེགས་བམ་ལ་དུང་གི་ཡིག་འབྲུ་བཀོད་ནས་མཆོད་ཚོགས་ཕུན་སུམ་ཚོགས་པ་བཅས་ནས་དབང་བཞི་བསྐུར། ཚུལ་དེ་ཁོ་ན་བཞིན་དུ་རིམ་པར་བླ་མ་བྱང་ཆུབ་སེམས་དཔའ་མཁས་བཙུན་སྤ་ཚབ་སྒོམ་པ་ལ། དེས་རྒྱལ་བ་ཏེ་ནེ་ལ། དེས་ཞིག་པོ་ཉི་མ་སེངྒེ་སྐུ་མཆེད་ལ། དེས་ཐམས་ཅད་མཁྱེན་པ་བསོད་ནམས་དཔལ་ལ། དེས་རྒྱལ་སྲས་ཀུན་དགའ་སྐུ་མཆེད་ལ། དེས་མཚན་ལྡན་རི་ཁྲོད་དབང་ཕྱུག་ལ། དེས་མཁན་ཆེན་ཚུལ་ཁྲིམས་ཕན་པ་ལ། དེས་དྲིན་ཅན་སངས་རྒྱས་དབོན་པོ་ལ། དེ་དང་རྒྱལ་སྲས་ཀུན་དགའ་སྐུ་མཆེད་ཀྱི་སློབ་མ་རྒྱ་སྟོན་སྨོན་ལམ་ཤེས་རབ་གཉིས་ཀྱིས། ཆོས་རྗེ་ཀུན་མཁྱེན་སྐུ་མཆེད་ལ། དེས་རྒྱ་སྒོམ་རྡོ་རྗེ་གདན་པ་ལ། དེས་བྱང་སེམས་རྒྱ་མཚོ་སྦྱིན་པ་ལ། དེས་སྐུ་གསུམ་བདེ་ཆེན་ལྷུན་གྲུབ་ལ། དེས་མཁས་གྲུབ་ནམ་མཁའ་བཟང་པོ་ལ། དེས་འཇམ་དབྱངས་དཔལ་འབྱོར་ལྷུན་གྲུབ་ལ། དེས་ཁྱབ་བདག་དཔལ་འབྱོར་ཕུན་ཚོགས་ལ། དེས་མཚུངས་མེད་བཀྲ་ཤིས་བཟང་པོ་ལ། དེས་དིང་རི་བ་ཆེན་པོ་རྗེ་བཙུན་བློ་གྲོས་བརྟན་པ་ལ། དེས་བདག་ལ་གནང་བ་ལགས་ཏེ་བྱིན་རླབས་སྣོད་གཅིག་ནས་གཅིག་ཏུ་བླུགས་པ་ལྟ་བུའི་ལུགས་ཡིན་པས། ཁྱེད་ཀྱིས་ཀྱང་འདིའི་ནང་བཞིན་ཉམས་སུ་བླངས་ན། ཉམས་རྟོགས། ལམ་རྟགས། ཡོན་ཏན་རྣམས་མར་མེ་གཅིག་ནས་གཅིག་ཏུ་སྤར་བ་ལྟར་འཆར་བའི་བཀའ་སྲོལ་འགྲན་ཟླ་དང་བྲལ་བ་ལགས་པས། བཀའ་བརྒྱུད་དྲི་མ་མེད་པ། སྒྲུབ་བརྒྱུད་ཐམས་ཅད་ཀྱི་ལན་ཚྭ། མཐོང་བས་ཆོག་པའི་ལམ༑ ཟིན་པས་ཆོག་པའི་རྩི། ཤེས་པས་ཆོག་པའི་གནད། འཕྲད་པས་ཆོག་པའི་བརྒྱུད་པ་འདི་ལ་ན་སོ་ལ་རྒན་གཞོན་ནམ། དབང་པོ་ལ་རྣོ་བརྟུལ་ལམ། གང་ཟག་ལ་ཉེ་རིང་མེད་པར་ཕན་ཐོགས་ཏེ། དབུལ་ཕོངས། ནད་པ་ཞྭ་ལོང་རྒན་བྱིས་གང་ཡིན་ཡང་རུང༌། དབང་འདི་དང་འཕྲད་པ་ཐམས་ཅད་སྐལ་ལྡན་ཡིན་པར་གསུངས་པས། འདི་རེ་འཚེངས་སྙམ་དུ་ཐུགས་ལ་སྤྲོ་བ་བསྐྱེད་པར་མཛད་འཚལ། ཆོ་ག་དངོས་ལ་གསུམ་ལས། དང་པོ་སྦྱོར་བ་རྟེན་སྡོམ་པ་གསུམ་ལྡན་དུ་བྱེད་པ་སྐྱབས་འགྲོ་སེམས་བསྐྱེད་མཆོད་པ་བསྔོ་བ་སྨོན་ལམ་དང་བཅས་པ་འདིའི་རྗེས་ཟློས་མཛོད། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་བླ་མ་དམ་པ་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཡི་དམ་གྱི་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་ཡི་དམ་གྱི་ལྷ་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མཁའ་འགྲོ་མའི་ཚོགས་རྣམས་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུ་ཡང་མཁའ་འགྲོ་མའི་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། བླ་མ་ཡི་དམ་མཁའ་འགྲོ་མའི་ཚོགས་རྣམས་བདག་ལ་དགོངས་སུ་གསོལ། བདག་གིས་འདས་པ་དང་མ་འོངས་པ་དང་ད་ལྟར་བྱས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཏེ་བླ་མ་ལ་དབུལ་བར་བགྱིའོ། །བླ་མ་ལ་ཕུལ་བས་བླ་མ་རིན་པོ་ཆེ་རྣམས་ཀྱི་ཐུགས་དགོངས་ཁྱད་པར་ཅན་ཡོངས་སུ་རྫོགས་པར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེས་བདེ་བར་གཤེགས་པ་རྣམས་ཀྱི་སྤྱན་ལམ་དུ་མཆོད་པའི་བྱེ་བྲག་ནམ་མཁའ་དང་མཉམ་པ་འབྱུང་བར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེ་སེམས་ཅན་ཐམས་ཅད་ལ་ཐུན་མོང་དུ་བསྔོ་བར་བགྱིའོ། །དེ་ལྟར་བསྔོས་པས་སེམས་ཅན་ཐམས་ཅད་འཁོར་བ་སྲིད་པ་སྡུག་བསྔལ་གྱི་རྒྱ་མཚོ་ལས་བསྒྲལ་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་གྱུར་ཅིག །དེ་མ་ཐོབ་ཀྱི་བར་དུ་ཡང་བདག་མྱུར་དུ་མངོན་པར་རྫོགས་པར་སངས་རྒྱས་ནས་འགྲོ་བ་མ་ལུས་པ་མཐའ་དག་གི་བླ་མ་བྱེད་པར་གྱུར་ཅིག །དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་ལན་གསུམ། དེ་ལྟར་མཆོག་ཏུ་གྱུར་པའི་སྐྱབས་འགྲོ། བླ་ན་མེད་པའི་སེམས་བསྐྱེད། ངོ་མཚར་ཅན་གྱི་མཆོད་པ། གཞན་དོན་དུ་འགྱུར་ངེས་ཀྱི་བསྔོ་བ། སེམས་ཅན་དང་མི་ཕྱེད་པའི་སྨོན་ལམ་དང་ལྔ་པོ་འདི་རང་ལ་ཐུགས་དམ་མཛད་ན་ཡང་ལམ་ལྔའི་ཉམས་རྟོགས་ཐམས་ཅད་སྐྱེ་བ་ཡིན་གསུང་ངོ༌། །དངོས་གཞི་དབང་བཞི་ཡོངས་སུ་རྫོགས་པར་བསྐུར་བ་ལ་བཞི་ལས། དང་པོ་ལུས་ཀྱི་སྒྲིབ་པ་དག་ནས༑ སངས་རྒྱས་ལོངས་སྤྱོད་རྫོགས་པའི་སྐུ་ཐོབ་པར་བྱ་བ་དང༌། དེ་མ་ཐོབ་ཀྱི་བར་དུའང་ཕུང་ཁམས་སྐྱེ་མཆེད་ལ་སོགས་པ་སྣང་གྲགས་དྲན་པའི་ཆོས་ཐམས་ཅད་བླ་མའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པར་བྱིན་གྱིས་བརླབས་ནས། དག་པའི་སྣང་བ་ཡུལ་དྲུག་ལ་སྦྱང་བའི་ཕྱིར་གླེགས་བམ་གྱི་ཡིག་འབྲུ་ལ་བརྟེན་ནས་བུམ་པའི་དབང་བཞི་བསྐུར་བ་ལས། དང་པོ་ཐུར་མས་བརྡ་སྤྲད་པའི་ཡིག་འབྲུ་ལ་མིག་མ་ཡེངས་པར་ལྟོས་ལ་གཟུགས་སུ་སྣང་བ་ཐམས་ཅད་ངོ་བོ་བླ་མའི་སྐུ་ལ་རྣམ་པ་ཡི་གེར་ཤེས་པར་བྱོས་ལ་འདིའི་རྗེས་ཟློས། ཨ་ཀྵ་ལྔ་བཅུ་ལ་རིན་པོ་ཆེའི་ཐུར་མ་རིམ་པར་བཙུགས་ལ། ཨ་ཨཱ། ཨི་ཨཱི། ཨུ་ཨུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས། ཧ་ཀྵཿ ཞེས་རྗེས་ཟློས་ཀྱིས་བཀླག །དེ་ནི་སྣང་བ་གཟུགས་ཀྱི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས། དབང་གང་གིས་ཐོབ་ན། ཡིག་འབྲུ་ལ་མིག་ལྟ་ཞིང་བླ་མའི་རྗེས་ཟློས་བྱས་པས་ཐོབ། ངོ་ཇི་ལྟར་འཕྲོད་ན་མིག་གི་ཡུལ་དུ་མཐོང་བའི་གཟུགས་ཐམས་ཅད་ཡི་གེ །ཡི་གེ་བླ་མའི་སྐུ་རུ་ངོ་འཕྲོད། བླ་མ་སངས་རྒྱས་ཆོས་ཀྱི་སྐུ་རུ་ངོ་འཕྲོད་དོ། །འབྲས་བུ་གང་འབྱུང་ན། ཕྱི་ཡུལ་གྱི་སྣང་བ་ཐམས་ཅད་ངོ་སྤྲོད་དུ་འཆར་བ་ཡིན་ནོ། །གཉིས་པ་སྒྲ་ཐམས་ཅད་ངོ་བོ་བླ་མའི་གསུང་ལ་རྣམ་པ་ཡི་གེར་ཤེས་པ་འདིའི་རྗེས་ཟློས། ཐུར་མ་བཙུགས་ནས། ཨཀྵ་བརྗོད། དེ་ནི་གྲགས་པ་སྒྲའི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས། དབང་གང་གིས་ཐོབ་ན་ཡི་གེ་ཀློག་པའི་གསུང་རྣ་བར་ལྷང་ལྷང་ཐོས་པས་ཐོབ། ངོ་ཇི་ལྟར་འཕྲོད་ན། རྣ་བའི་ཡུལ་དུ་ཐོས་པའི་སྒྲ་ཐམས་ཅད་ཡི་གེ །ཡི་གེ་བླ་མ་ཆོས་ཀྱི་སྐུའི་གསུང་ངོ་འཕྲོད། འབྲས་བུ་གང་འབྱུང་ན། ཕྱི་ཡུལ་དུ་གྲགས་པའི་སྒྲ་ཐམས་ཅད་གནད་ཀྱི་གདམས་པ་སངས་རྒྱས་ཀྱི་གསུང་རབ་འབའ་ཞིག་ཏུ་འཆར་བ་ཡིན་ནོ། །གསུམ་པ་དྲན་རྟོག་ཅི་འགྱུས་ཐམས་ཅད་ངོ་བོ་བླ་མའི་ཐུགས་ལ་རྣམ་པ་ཡི་གེར་ཤེས་པས་འདིའི་རྗེས། ཐུར་མ་བཙུགས་ལ་ཨཀྵ་བརྗོད། དེ་ནི་དྲན་པ་སེམས་ཀྱི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས༑ དབང་གང་གིས་ཐོབ་ན་བླ་མའི་གསུང་ལ་ཡིད་གཏད་དེ་དྲན་པ་མ་ཡེངས་པས་ཐོབ། ངོ་ཇི་ལྟར་འཕྲོད་ན། དྲན་པའི་རྣམ་རྟོག་ཅི་འགྱུས་ཐམས་ཅད་ཡི་གེ །ཡི་གེ་བླ་མ་ཆོས་སྐུའི་ཐུགས་སུ་ངོ་འཕྲོད། འབྲས་བུ་གང་འབྱུང་ན། དྲན་རྟོག་ཐམས་ཅད་རྟགས་དང་ཡོན་ཏན། ཏིང་ངེ་འཛིན་དང་སངས་རྒྱས་ཀྱི་ཐུགས་རྗེ་རུ་འཆར་བ་ཡིན་ནོ། །བཞི་པ་སྣང་གྲག་འགྱུ་བ་ཐམས་ཅད་ཀྱང་རང་གི་སེམས་ཉིད་སྟོང་པའི་རང་རྩལ་ཙམ་དུ་ཤེས་པས་འདིའི་རྗེས་ཟློས། ཐུར་མ་བཙུགས་ལ། ཨཀྵ་བརྗོད། དེ་ནི་ཡང་དག་དོན་གྱི་ཨཱ་ལི་ཀཱ་ལིའི་བྱིན་རླབས་བྱ་བ་ཡིན་པས། དབང་གང་གིས་ཐོབ་ན་དྲན་པ་མ་ཡེངས་པའི་སྟེང་དུ་བླ་མ་ལ་མོས་གུས་དུང་ངེ་བྱས་པས་ཐོབ། ངོ་ཇི་ལྟར་འཕྲོད་ན། འཁོར་འདས་ཀྱི་ཆོས་ཐམས་ཅད་རང་གི་སེམས། སེམས་ཉིད་གདོད་ནས་སྟོང་པ་ཉིད། སྟོང་ཉིད་ཆོས་ཀྱི་སྐུར་ངོ་འཕྲོད། འབྲས་བུ་གང་འབྱུང་ན་གཟུང་འཛིན་གྱི་འཁྲུལ་པ་རང་སར་ཞིག་ནས་འཁོར་འདས་མིང་ཙམ་དུ་གྲོལ་ནས་འགྲོ་བ་ཡིན་ནོ། །ད་བུམ་པའི་དབང་དེ་ཉིད་བརྟན་པར་བྱ་བའི་ཆོ་ག་གསུམ་བྱ་སྟེ། ཐོད་པ་སོ་སོའི་དབུ་ཐོག་ཏུ་ལན་གསུམ་བཞག་ལ་ཨཀྵ་ཚར་གཅིག་བརྗོད་པའི་ཚེ། བདུད་རྩི་བྱང་སེམས་ཡིག་འབྲུའི་ཚུལ་དུ་བྱིན་གྱིས་བརླབས་པ་རྣམས་ཐོད་པའི་ཚངས་བུག་ནས་འཛགས་ཏེ། ཁྱེད་རང་རྣམས་ཀྱི་ཚངས་བུག་ནས་མར་ཐིག་པ། ལུས་ཐམས་ཅད་རྩའི་རང་བཞིན། རྩ་ཡི་གེའི་རང་བཞིན། ཡི་གེ་རང་སྣང་དག་མ་དག་གི་ས་བོན་དུ་གནས་པ་ལ་ཐིམ་པས་རྩ་ཁམས་ཀྱི་སྒྲིབ་པ་ཐམས་ཅད་དག་པའི་སྣང་བ་འབའ་ཞིག་ཏུ་འཆར་བ་ཡིན་ནོ། །དེས་གླེགས་བམ་གྱི་ཡི་གེ་ལ་བརྟེན་ནས་བུམ་པའི་དབང་བཞི་བསྐུར་བ་སོང༌། ད་གཉིས་པ་བདུད་རྩི་གསང་བའི་དབང་བཞི་བསྐུར་བར་བྱ་སྟེ། དབང་གི་ཆུ་བོ་འདི་ནི་སངས་རྒྱས་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་དང༌། ཡུམ་ཀུན་ཏུ་བཟང་མོ་གཉིས་ཀྱིས། རིག་འཛིན་མཁའ་སྤྱོད་ཀྱི་བླ་མ་དཔལ་ལྡན་སུམ་ཅུ་རྩ་དྲུག་ལ་བསྐུར། དེ་རྣམས་ཀྱིས་དམ་པ་རིན་པོ་ཆེ་ལ་བསྐུར་བ་ཡིན། དེ་ཡང་དབང་འདིས་ངག་གི་སྒྲིབ་པ་དག་ནས། སངས་རྒྱས་སྤྲུལ་པའི་སྐུ་ཐོབ་པར་བྱ་བ་དང༌། དེ་མ་ཐོབ་ཀྱི་བར་དུ་ཡང་བཟའ་བ་དང་བཟའ་བ་མ་ཡིན་པའི་རྣམ་པར་རྟོག་པ་ཐམས་ཅད་བཅོམ་ནས་ནང་གི་རྩ་རླུང་ལས་སུ་རུང་བར་བྱ་བ་དང༌། སྐུ་གསུང་ཐུགས་ཡོན་ཏན་ཕྲིན་ལས་གྲགས་པ་སྟེ་དབང་ཕྱུག་ཆེན་པོ་དྲུག་བླ་མའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་ལ་བསྟེན་ནས་སྒྲུབ་པའི་ཕྱིར་གསང་བའི་དབང་བཞི་བསྐུར་བ་ནི། ཐོད་པའི་བདུད་རྩི་ནས་བླ་མའི་སྲིན་ལག་གིས་བླངས་ལ་སློབ་མའི་གནས་བཞིར་ཐིག་ལེ་བྱེད་པ་སྟེ་ཐོག་མར། དཔྲལ་བར་ཐིག་ལེ་བྱ་ཞིང་ཨ་བྷི་ཥིཉྩ་ༀ། ཞེས་བརྗོད་པས་ལུས་ཐ་མལ་དུ་འཛིན་པའི་སྒྲིབ་པ་དག་ནས། རང་ལུས་བླ་མ་དང་དེ་བཞིན་གཤེགས་པ་རྣམས་ཀྱི་སྐུར་བལྟ་ཞིང༌། ཇི་ལྟར་སྣང་བ་ཐམས་ཅད་སྣང་སྟོང་ཞེན་བྲལ་དུ་འཆར་བར་བྱིན་གྱིས་བརླབས། བདུད་རྩིའི་ཐིག་ལེ་དེ་ཉིད་ཡོངས་སུ་གྱུར་པ་ལས། སྤྱི་བོར་བདེ་ཆེན་གྱི་འཁོར་ལོའི་ལྟེ་བར་བླ་མའི་སྐུའི་ས་བོན་ༀ་ཡིག་དཀར་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་ལ་མ་ཡེངས་པར་དྲན་པས་ཟིན་པར་བྱས་ན་བླ་མའི་སྐུའི་བྱིན་རླབས་རྒྱུན་ཆད་མེད་པར་འབྱུང་བ་ཡིན་ནོ། །ཞེས་ངོ་སྤྲད། ཡང་མགྲིན་པར་ཐིག་ལེ་བྱ་ཞིང༌། ཨ་བྷི་ཥིཉྩ་ཨཱཿ ཞེས་བརྗོད་པས་ངག་ཐ་མལ་དུ་འཛིན་པའི་བག་ཆགས་ཀྱི་སྒྲིབ་པ་དག་ནས། རང་གི་ངག་བླ་མ་དང་དེ་བཞིན་གཤེགས་པ་ཐམས་ཅད་ཀྱི་གསུང་གྲག་སྟོང་དུ་འཆར་བར་བྱིན་གྱིས་བརླབས། ཐིག་ལེ་ཡོངས་སུ་གྱུར་པ་ལས་མགྲིན་པ་ལོངས་སྤྱོད་ཀྱི་འཁོར་ལོའི་ལྟེ་བར་བླ་མའི་གསུང་གི་ས་བོན་ཨཱཿ ཡིག་དམར་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་མ་བརྗེད་པར་དྲན་པས་ཟིན་ཙམ་བྱས་ན་བླ་མའི་གསུང་གི་བྱིན་རླབས་རྒྱུན་ཆད་མེད་པར་འབྱུང་བ་ཡིན་ནོ། །ཡང་སྙིང་གར་ཐིག་ལེ་བྱ་ཞིང༌། ཨ་བྷི་ཥིཉྩ་ཧཱུྃ། ཞེས་བརྗོད་པས་ཡིད་ཐ་མལ་དུ་འཛིན་པའི་བག་ཆགས་ཀྱི་སྒྲིབ་པ་དག་ནས། རང་གི་ཡིད་བླ་མ་དང་དེ་བཞིན་གཤེགས་པ་རྣམས་ཀྱི་ཐུགས་དྲན་སྟོང་དུ་བྱིན་གྱིས་བརླབས། ཐིག་ལེ་དེ་ཡོངས་སུ་གྱུར་པ་ལས་སྙིང་ག་ཆོས་ཀྱི་འཁོར་ལའི་ལྟེ་བར་བླ་མའི་ཐུགས་ཀྱི་ས་བོན་ཧཱུྃ་ཡིག་སྔོན་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་མ་བརྗེད་པར་དྲན་པས་ཟིན་པར་བྱས་ན་བླ་མའི་ཐུགས་ཀྱི་བྱིན་རླབས་རྒྱུན་ཆད་མེད་པར་འབྱུང་བ་ཡིན་ནོ། །ཡང་ལྟེ་བར་ཐིག་ལེ་བྱ་ཞིང༌། ཨ་བྷི་ཥིཉྩ་ཧྲཱིཿ ཞེས་བརྗོད་པས་སེམས་ཐ་མལ་དུ་འཛིན་པའི་སྒྲིབ་པ་དག་ནས་རང་སེམས་བླ་མ་དང་དེ་བཞིན་གཤེགས་པ་རྣམས་ཀྱི་ཐུགས་རིག་སྟོང་དུ་བྱིན་གྱིས་བརླབས། ཐིག་ལེ་ཡོངས་སུ་གྱུར་པ་ལས་ལྟེ་བ་སྤྲུལ་པའི་འཁོར་ལོའི་དབུས་སུ་བླ་མའི་ཡོན་ཏན་གྱི་ས་བོན་ཧྲཱིཿ སེར་པོ། དེ་རང་སེམས་དང་གཉིས་སུ་མེད་པར་ལྷང་ངེ༌། ལྷན་ནེ། ལྷམ་མེར་བཞུགས་པ་ལགས་ཀྱིས། དེ་མ་བརྗེད་པར་དྲན་པས་ཟིན་པར་བྱས་ན། བླ་མའི་ཡོན་ཏན་ཐམས་ཅད་བསླབ་མི་དགོས་པར་རང་ལ་ནང་ནས་འཆར་བ་ཡིན་ནོ༑ ༑ད་གསང་བའི་དབང་བཞི་པོ་དེ་བརྟན་བྱེད་ཀྱི་ཆོ་ག་གསུམ་བྱ་སྟེ། ཁྱེད་ཀྱིས་དབང་གོང་མ་དེ་དག་ཐོབ་པ་དེས། ལུས་ཀྱི་རྩ་ཁམས་ཐམས་ཅད་དཔའ་བོ་དང་དཔའ་མོར་སངས་རྒྱས་ནས་གཉིས་མེད་བྱང་ཆུབ་ཀྱི་སེམས་ལུས་ལ་རྒྱས་པས་རྒྱུད་སྡེའི་ལྷ་ཚོགས་ཐམས་ཅད་རང་ལུས་ལ་ཚང་བར་བཞུགས་པ་ལགས་ཀྱིས། དེ་རྣམས་ལ་མཆོད་པའི་ཕྱིར་ཧུབ་གསུམ་གསོལ་ཅིག །ཅེས་བརྗོད་ཅིངༀ་ཨཱཿ ཧཱུྃ་ཞེས་བདུད་རྩི་བླུད། རྫས་གཅིག་པུ་དེ་རང་ལུས་ལ་ཞུགས་པས་བླ་མ་ཡི་དམ་མཁའ་འགྲོ་ཐམས་ཅད་མཉེས་ཏེ་ཐུགས་དམ་བསྐོང༌། ཡབ་ཡུམ་སྦྱོར་བ་མཛད་པས་རྩ་ཁམས་ཐམས་ཅད་དྲོས་ཏེ་ཉམས་རྟོགས་ཁྱད་པར་ཅན་རྒྱུད་ལ་སྐྱེ་བ་ཡིན་ནོ༑ ༑དེས་བདུད་རྩི་གསང་བའི་དབང་བཞི་བསྐུར་བ་སོང༌། ད་གསུམ་པ་སྙིང་པོ་དོན་གྱི་ངོ་སྤྲོད་ལ་བརྟེན་ནས་ཤེས་རབ་ཡེ་ཤེས་ཀྱི་དབང་བསྐུར་བར་བྱ་སྟེ། འདི་ལ་དོན་གསུམ་ལས། དང་པོ་རྩ་བ་དོན་གྱི་འབྱུང་ཁུངས་ནི། སངས་རྒྱས་མཆོག་གི་སྤྲུལ་པའི་སྐུ་ཤཱཀྱ་ཐུབ་པས་རྟེན་འབྲེལ་དག་པ་གསུམ་གྱིས་མཉམ་པར་བཞག་པས་ངོ་བོ་སྟོང་པ་ཉིད་ཐུགས་སུ་ཆུད་དེ། རང་རིག་པའི་ཡེ་ཤེས་ཁོང་ནས་ཤར་བ་འདུས་པའི་འཁོར་རྣམས་ལ་དག་པའི་རྟེན་འབྲེལ་བརྡར་བསྟན་པས། འཕགས་པ་སྤྱན་རས་གཟིགས་ཀྱིས་རྟོགས། ཤཱ་རིའི་བུས་དྲིས། རབ་འབྱོར་གྱིས་ཞུས། ཀུན་དགའ་བོས་བསྡུས། བྱམས་པ་ལ་དོན་བརྒྱུད་གཏད། དེས་ཐོགས་མེད་ལ། དེས་དབྱིག་གཉེན་ལ། དེས་ཨཱརྱ་དེ་བ་ལ། དེས་དམ་པ་རིན་པོ་ཆེ་ལ་གནང་བའོ། །གཉིས་པ་རྩ་བ་དེ་སློབ་མའི་རྒྱུད་ལ་ཇི་ལྟར་བསྐུར་ན། འཁྲུལ་འཁོར་གསུམ་ལ་བརྟེན་ནས་བསྐུར་ཏེ། ལུས་ཀྱི་འཁྲུལ་འཁོར་ནི། རྐང་པ་སྐྱིལ་ཀྲུང༌། ལག་པ་མཉམ་བཞག །སྒལ་ཚིགས་གསེར་གྱི་དོང་རྩེ་ལྟར་བརྩེགས། དཔུང་པ་རྒོད་གཤོག་ལྟར་བརྒྱངས། མགྲིན་པ་རྨ་བྱ་ལྟར་མནན། སོ་དང་མཆུ་ཐ་མལ་དུ་འཇོག་པ་སྟེ། ཆོས་དྲུག་རྡོ་རྗེའི་གནས་ཐབས་སོ། །ངག་གི་འཁྲུལ་འཁོར་ནི། མིག་རྩེ། སྣ་རྩེ། སེམས་རྩེ་གསུམ་གཅིག་ཏུ་དྲིལ་ནས་ཤེས་པ་ལ་བསོར་བཅུག་པས་རླུང་ལྔ་དབུ་མར་ཚུད་དེ་ཡོན་ཏན་ཐམས་ཅད་སྐྱེ་བ་ཡིན་ནོ། །ཡིད་ཀྱི་འཁྲུལ་འཁོར་ནི། སྒོམ་འདོད་ཀྱི་རྟོག་པ་ཕྱིར་ཕུད་ནས། མི་སྒོམ་པའི་ཤེས་པ་རྟེན་མེད་ལ་བློ་བཞག་ས་མེད་པར་ཐག་བཅད་ནས་ཅར་ཕོག་ཏུ་ངོ་སྤྲད་པར་བྱ་སྟེ། ཁྱེད་ཅག་སེམས་རྣམ་པར་རྟོག་པའི་དབང་དུ་མ་སོང་བར། རང་ལུགས་སུ་རྩེན་གྱིས་ཞོག་ཅིག ༑ཅེས་ལན་གསུམ་དུ་བླ་མས་ངག་བསྲིངས་ལ་བརྗོད་དོ། །དེའི་ཉམས་ལེན་ལའང་གསུམ། ཐ་མལ་གྱི་ཤེས་པ་ངོས་བཟུང་བར་བྱ་བའི་ཕྱིར་རྩེན་གྱིས་འཇོག །དེས་གནས་སུ་མ་གཏུབ་ན་སློད་ཀྱིས་གློད་ལ་བཞག །དེ་ངོས་བཟུང་ཞིང་གནས་ན། ཉམས་བཤིག་ཅིང་སྒོམ་དུ་བཅུག་པས། རྗེས་ཉམས་རྟོགས་ཇེ་བཟང་ལ་འགྲོ་བ་ཡིན་ནོ། །གསུམ་པ་རྩ་བ་ཟིན་མི་ཟིན་དྲོད་ཚད་བཟུང་བ་ནི། སློབ་མ་མོས་གུས་རབ་ལ་དུས་དེ་ཉིད་དུ་རྟོགས་པ་འཆར་ཏེ། སྐྱེས་བུ་གཉིད་སད་པ་ལྟར་གྲོལ་བའང་འབྱུང༌། འབྲིང་ལ་རྟོགས་པ་རྩ་བྲལ་དུ་གོ་ནས་དགེ་སྦྱོར་གཤའ་མ་ཟིན། ཐ་མའང་སེམས་ཀྱི་ངོ་བོ་གདོད་ནས་སྟོང་པ་དེ་ངོས་ཟིན་ནས་ཏིང་ངེ་འཛིན་བཟང་པོ་སྐྱེ་ཞིང༌། རྟོག་པས་མ་འཕྲོགས་པར་སེམས་ཤིན་ཏུ་གསལ་དྭངས་སུ་འཆར། དེ་མ་ཡིན་པ་རྣམས་ལའང༌། བགས་ཀྱིས་ཏིང་ངེ་འཛིན་འཆར་ཞིང་དེ་ལ་རྩ་བྲལ་གྱི་དགེ་སྦྱོར་སྐྱེས་ནས། གདོད་རྟོགས་པ་བཟང་པོ་འཆར་རོ། །མདོར་ན་ཚེ་འདིའམ། འཆི་ཀའམ་བར་དོ་གསུམ་གང་རུང་ལ་དོན་མི་འགྲུབ་མི་སྲིད་གསུང་ངོ༌། །ད་དབང་གསུམ་པའི་དོན་དེ་ཉིད་བརྟན་བྱེད་ཀྱི་བརྡ་གསུམ་སྟེ། དང་པོ་མེ་ལོང་བསྟན་ལ། ཀྱེ་རིགས་ཀྱི་བུ་ཀུན་མིག་ཡུལ་དུ་མཐོང་བའི་གཟུགས་ཐམས་ཅད། དེ་རིང་ནས་འདིའི་ནང་དུ་ཤར་བའི་གཟུགས་བརྙན་ལྟར་ཤེས་པར་གྱིས་ཤིག །ཅེས་ལན་གསུམ། དེས་གཟུགས་ཐམས་ཅད་ཡང་དག་པར་ན་བདེན་པར་མ་གྲུབ་པའི་སྣང་སྟོང་ཞེན་བྲལ་དུ་ངོ་སྤྲད་པ་ཡིན་ནོ། །གཉིས་པ་སེ་གོལ་ལན་གསུམ་གཏོག་ཅིང༌། ཀྱེ་རིགས་ཀྱི་བུ་ཀུན་རྣ་བའི་ཡུལ་དུ་ཐོས་པའི་སྒྲ་ཐམས་ཅད། དེ་རིང་ནས་སེ་གོལ་གྱི་སྒྲ་འདི་ལྟར་ཤེས་པར་གྱིས་ཤིག །ལན་གསུམ། དེས་སྒྲ་ཐམས་ཅད་གྲག་སྟོང་གཉིས་སུ་མེད་པར་ངོ་སྤྲད་པ་ཡིན་ནོ། །གསུམ་པ་སྔར་རྨི་བའི་རྨི་ལམ་གྱི་སྣང་བ་དྲན་པར་གྱིས་ཤིག །ཀྱེ་རིགས་ཀྱི་བུ་ཀུན་ཡིད་ལ་དྲན་པའི་རྣམ་རྟོག་ཐམས་ཅད། དེ་རིང་ནས་མདངས་སུམ་གྱི་རྨི་ལམ་ལྟར་ཤེས་པར་གྱིས་ཤིག །ཅེས་ལན་གསུམ། དེས་བདེ་སྡུག་བཏང་སྙོམས་ཀྱི་རྟོག་པ་ཐམས་ཅད་བདེན་ཞེན་མེད་པར་རིག་སྟོང་དུ་ངོ་སྤྲད་པ་ཡིན་ནོ། །དེས་ཤེས་རབ་ཡེ་ཤེས་ཀྱི་དབང་བསྐུར་བ་སོང༌། ད་བཞི་པ་ཚིག་དབང་རིན་པོ་ཆེའི་ལྡེ་མིག་གིས་ཡེ་ཤེས་ཀྱི་སྒོ་འབྱེད་པའི་དབང་བསྐུར་བར་བྱ་སྟེ། དབང་གི་ཆུ་བོ་འདིའི་བརྒྱུད་པ་ནི། ངོ་བོ་ཉིད་སྐུ་གསང་བདག་ཕྱག་ན་རྡོ་རྗེས་གསང་བའི་མཁའ་འགྲོ་མ་རྣམས་ལ་བསྐུར། གསང་བའི་མཁའ་འགྲོ་མ་རྣམས་ཀྱིས་དམ་པ་རིན་པོ་ཆེ་ལ་བསྐུར་བ་ལགས་པས་འདི་ནི་སྔགས་གཅིག་གིས་འཚང་རྒྱ་བར་བྱེད་པའི་གདམས་པ་དབང་བཞི་ལམ་ཁྱེར་གྱི་གནད། ལམ་ཕྱག་རྒྱ་བཞིའི་སྒྲུབ་ཐབས། ལམ་ཟབ་མོ་བླ་མའི་གསང་སྒྲུབ་ལྟ་སྒོམ་བསྙེན་སྒྲུབ་ཏུ་བསྐྱལ་བས། ཉམས་རྟོགས་ཆན་བཟང་ཕབས་ཀྱིས་གླུམ་དུ་ལངས་པ་ལྟར་ཁོང་ནས་རང་ཤར་དུ་འོང་བ། ཡང་དག་དོན་གྱི་སྒྲིབ་སྦྱོང༌། ཚོགས་གཉིས་མྱུར་དུ་རྫོགས་པར་བྱེད་པའི་སྙིང་པོ་བློ་སྦྱོང་གི་ལུང་འདི་ལོང་ཞིག །ཅེས་བརྡ་སྤྲད་ལ། བླ་མའི་ཐུགས་ཀ་ནས་སྔགས་ཀྱི་ཡིག་འབྲུ་རྣམས་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་གར་འཁོར་བར་མོས་ལ་སྔགས་འདིའི་རྗེས་ཟློས་མཛོད། རང་གི་ཕྲེང་བ་ལ་འཇུར་བཅུག་ལ། ༀ་ཨཱཿ ཧྲཱིཿ གུ་རུ་སིདྡྷི་ཧཱུྃ། ཞེས་ལན་གསུམ་གྱིས་བཟླས་ལུང་བྱིན་ནས། འདི་ལ་ལམ་གྱི་ཡོན་ཏན་ཐམས་ཅད་སྐྱེ་བའི་གནད་རྣམ་པ་བཞི་ཡོད་དེ། ༀ་ཡེ་ཤེས་ལྔ་ལྡན་བུམ་དབང་གི་སྙིང་པོ་ཡིན་པས་ཡི་དམ་གྱི་ལྷ་ཕྱོགས་མེད་ལ་དག་སྣང་སྣ་ཚོགས་འཆར་བར་བྱེད། ལམ་ཕྱག་རྒྱ་བཞི་པས་གཞི་དམ་ཚིག་གི་ཕྱག་རྒྱ་འགྲུབ་པ་ཡིན་ནོ། །ཨཱཿ གསལ་བ་གསུམ་ལྡན་གསང་དབང་གི་སྙིང་པོ་ཡིན་པས། རྩ་རླུང་གི་རྟགས་དང་ཡོན་ཏན་སྣ་ཚོགས་འཆར། དོན་ཆོས་ཀྱི་ཕྱག་རྒྱ་འགྲུབ་པ་ཡིན་ནོ། །ཧྲཱིཿ དགའ་བ་བཞི་ལྡན་ཤེས་རབ་ཡེ་ཤེས་ཀྱི་སྙིང་པོ་ཡིན་པས། ཐིག་ལེ་ལས་སུ་རུང་ཞིང་ཁམས་ལྔ་དྭངས་པར་བྱེད། དཔེ་ལས་ཀྱི་ཕྱག་རྒྱ་འགྲུབ་པ་ཡིན་ནོ། །ཧཱུྃ། རྣམ་ཤེས་དྲུག་ལྡན་ཚིག་དབང་གི་སྙིང་པོ་ཡིན་པས་རྟོགས་པའི་ཡེ་ཤེས་ཕྱོགས་མེད་དུ་འཆར། འབྲས་བུ་ཕྱག་རྒྱ་ཆེན་པོ་འགྲུབ་པ་ཡིན་ནོ། །དེ་ལྟར་ཚིག་གི་དབང་བཞི་པོ་དེ་དག་བརྟན་པར་བྱེད་པ་ནི། གླེགས་བམ་གྱི་དབུས་ནས་མེ་ཏོག་བླངས་ཏེ། བློ་སྦྱོང་གི་སྙིང་པོ་བཟླས་པ་སློབ་མའི་ལུས་ལ་གཏོར་ཞིང་གྲུབ་པར་གྱུར་ཅིག །ཅེས་ལན་གསུམ། དེ་ནས་ཁྱེད་རང་རྣམས་བླ་མ་ལ་མོས་གུས་དྲག་པོ་བྱས་པས། བླ་མའི་སྐུ་གསུང་ཐུགས་གདན་ཁྲིའི་སྟེང་དུ་མ་ལུས་པར་སློབ་མའི་ལུས་ངག་ཡིད་གསུམ་ཆུ་ལ་ཆུ་བཞག་པ་ལྟར་སིབ་ཀྱིས་ཐིམ་ནས་ཁྲུག་གིས་འདྲེས་པའི་མོས་པ་མཛོད། དེས་བྱིན་རླབས་རྒྱུན་དུ་འབྱུང་བས་ལམ་རྟགས་མྱུར་དུ་འཆར། ཚོགས་གཉིས་རྒྱུན་ཆད་མེད་པས་སྒྲིབ་གཉིས་མྱུར་དུ་འདག །ཐུགས་རྗེའི་ནུས་མཐུ་ཕོག་པས་ལམ་གྱི་བར་ཆད་སེལ་བའི་གནད་གསུམ་པོ་ཡོད་གསུང་ངོ༌། །དེ་ལྟར་དབང་བཞི་ལ། དབང་ཉམས་བཅུ་དྲུག་དང༌། བརྟན་བྱེད་བཅུ་གཉིས་ཏེ། དབང་གི་ངོ་སྤྲོད་ཉི་ཤུ་རྩ་བརྒྱད་པོ་དེས་དབང་གི་དངོས་གཞི་རྣམས་ཚར་བ་ཡིན། ད་མཇུག་བསླབ་པར་བྱ་བའི་ཆོས་གསུམ་ལ་སློབ་པར་གདམས་ཏེ། དང་པོ་རྟེན་སྡོམ་པ་གསུམ་ལ་སློབ་པ་ནི། རྗེ་བཙུན་དམ་པ་རིན་པོ་ཆེའི་ལུགས་ཀྱིས་མ་གྲུབ་ཁས་ལེན་གྱི་སྡོམ་པ་ཙམ་ལ་མ་ལུས་པར། ཡང་དག་དོན་གྱི་སྡོམ་པ་གསུམ་བསྲུང་དགོས་པས། ལས་རྒྱུ་འབྲས་ལ་སྙིང་ཐག་པ་ནས་འཛེམས་པ་ཉན་ཐོས་ཀྱི་འདུལ་ཁྲིམས་དམ་པ། དགེ་བ་ཅི་བྱེད་གཞན་དོན་དུ་འཇུག་པ་བྱང་སེམས་ཀྱི་བསླབ་ཁྲིམས་ཡངས་པ། བླ་མ་ལ་སངས་རྒྱས་དངོས་སུ་བལྟ་བ་གསང་སྔགས་ཀྱི་དམ་ཚིག་གཙང་བ་གསུམ་གལ་ཆེ་བ་ཡིན་ནོ། །གཉིས་པ་རྣལ་འབྱོར་གྱི་རང་ས་དྲུག་བསྲུང་བར་གདམས་པ་ནི། གསོལ་བ་ལྷ་ལ་མི་འདེབས་ཏེ། བླ་མ་ལས་ལྷག་པའི་སྐྱབས་གཞན་མེད། དངོས་གྲུབ་འདྲེ་ལ་མི་ཞུ་སྟེ། འདུ་ལོང་བར་ཆད་ཀྱི་གཡབ་མོ་ཡིན། སྣ་ཐག་མི་ལ་མི་གཏད་དེ། ཤ་ཚ་རང་ལ་བྱེད་དགོས། ཕོ་རྒོད་ཚེ་འདིར་མི་འབྱིན་ཏེ། ཆོས་མིན་གྱི་བྱ་བ་ཐམས་ཅད་སྡུག་བསྔལ་གྱི་རྒྱུ་ཡིན་ནོ། །གོས་ངན་རྒྱལ་མཚན་གྱི་རྩེ་ལ་མི་འཕྱར་ཏེ་མིས་མཐོང་ཁྱིས་ཚོར་གྱི་སྒྲུབ་པ་བར་ཆད་མང་བ་ཡིན། གསང་བ་མཆུ་སྒོར་མི་འདོན་ཏེ། ཉམས་རྟོགས་གཞན་ལ་ངོམ་ན་ཉམས་ཀྱི་འཕེལ་བ་ཆད་པའི་རྒྱུ་ཡིན་ནོ། །གསུམ་པ་བོ་ཟགས་ལྟེམས་ལོག་གི་དྲི་མ་བཞི་བསྲུང་བར་གདམས་པ་ནི། བློ་སྦྱོང་གི་དུས་སུ་བླ་མ་ལ་མ་གུས་པའི་བློ་ཤོར་ན་བོ་བའི་དྲི་མ་ཡིན་པས་ཅི་མཛད་ཡོན་ཏན་དུ་བལྟ། སེམས་ཅན་ལ་བྱམས་པའི་བློ་སྤངས་ན་ཟགས་པའི་དྲི་མ་ཡིན་པས་སེམས་ཅན་གྱི་འཁྲུལ་པ་ལ་དོན་དུ་མི་བཟུང༌། དོན་མེད་པའི་སྤྱོད་པ་བཞི་དང་བཅས་པ་མ་སྤངས་ན་ལྟེམས་པའི་དྲི་མ་ཡིན་པས་ཚེ་འདིའི་བྱ་བ་དོན་དུ་མི་གཉེར། རོ་མ་མྱོང་བར་སྟན་ལས་འཕགས་ན་ལོག་པའི་དྲི་མ་ཡིན་པས་ལམ་རྟགས་དང་རྡོ་རུས་འཕྲོད་པར་བྱའོ། །དེ་ལྟར་སྦྱོར་བ་ལ་སྐྱབས་སེམས་མཆོད་བསྔོ་སྨོན་ལམ་སྟེ་ཆོས་ལྔ། དངོས་གཞི་ལ་དབང་བཞི། མཇུག་བསླབ་པར་བྱ་བའི་ཆོས་གསུམ་གྱིས་ཨཱ་ལི་ཀཱ་ལིའི་བྱིན་རླབས། ཡི་གེ་ཕྱི་མའི་དབང་བསྐུར། དོན་ལྷན་ཅིག་སྐྱེས་པ་བཞི་རྫོགས་ཞེས་བྱ་བ། ཤིན་ཏུ་ཟབ་པ་དེ་ཚར་བ་ལགས་པས་བཀའ་དྲིན་རེ་ཆེ་སྙམ་པས་བླ་མ་ལ་ཕྱག་གསུམ་འཚོལ། དེ་ནས་བཀའ་དྲིན་ཆེ་ལགས་ཞེས་བརྗོད། རྗེས་ཆོག་ལ་བདུན་ལས། གཏོར་མ་བཏང་བ་ནི། ལྷག་པའི་ལྷའི་འདས་གཏོར་དང་མགོན་པོ་ཨ་གྷོ་ར། མཁའ་འགྲོ་སྡེ་བཞི། ཞིང་སྐྱོང་ཀུན་ཏུ་རི་ཀ། ཨ་པ་རཱ་ཛི་ཏ། ཀླུ་ཆེན་བཏང་བཟུང་སོགས་ཆོས་སྲུང་རྣམས་དང༌། གཞི་བདག་སྤྱི་གཏོར་སོགས་སོ་སའི་གཞུང་བཞིན་བྱ། བཀྲ་ཤིས་བརྗོད་ལ་སྔར་བྱིན་རླབས་བྱས་པའི་འབྲང་རྒྱས་བཞི་དངོས་གྲུབ་ཀྱི་རྫས་སུ་རོལ། ཚོགས་རྫས་རྣམས་བྱིན་རླབས་གོང་དུ་གྲུབ་པས། ཚོགས་ཞིང་བླ་མ་ཡི་དམ་མཁའ་འགྲོ་དམ་ཅན་སྲུང་མའི་ཚོགས་དང་བཅས་པ་མདུན་གྱི་ནམ་མཁར་བཛྲ་ས་མཱ་ཛཿ ས་སད་པར་བསམ་ཞིང༌༑ ཚོགས་ཕུད་གཏོར་མར་བྲན་ལ། ༀ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་ས་པ་རི་ཝཱ་ར་ལ་ཨ་ཀཱ་རོ་བཏགས་པས་ཕྱི་གཏོར་དང༌། བ་ལ་ཨི་དཾ། ཁཱ་ཧི་ཁཱ་ཧི། བཛྲ་ཡོ་གི་ནཱི། ཀ་མ་རུ་པི་ནི། ཛ་ལ་མུ་ཀི་ཧྲཱིཿ ཁ་ཁ་ཁཱ་ཧི་ཁཱ་ཧི། ཧཱུྃ་ཧཱུྃ་ཕཊ་སྭཱ་ཧཱ། ཞེས་བཏགས་པས་ནང་གཏོར་བསྔོས་ལ་བླ་མེད་མཆོག་གི་མཐར་ༀ་གུ་རུ་སོགས་ལ་ག་ན་ཙཀྲ་པཱུ་ཛ་སྭཱ་ཧཱ། ཞེས་བཏགས་པས་ཚོགས་ཕུལ། དེ་ནས་ལས་རྡོར་གྱིས་བླ་མ་ལ་ཕྱག་བྱས་ལ་ཐབས་ཤེས་ཀྱི་རྫས་བསྣོལ་མར་ཐོགས་ནས། ༀ་པཱུ་ཛཿ སྭཱ་ཧཱ། ཞེས་མཆོད་པ་ལྔས་མཆོད་པར་བསམས་ལ། གཟིགས་ཤིག་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱར་མི་རུང༌། །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་པས་དགོངས་སུ་གསོལ། །ཞེས་རྟོག་པ་བསལ་བས་དྲངས། བླ་མས་པད་ཀོར་སྔོན་འགྲོས་རྩེ་གསུམ་གྱི་རྒྱ་སྟོན་བཞིན་དུ། བདེ་བར་གཤེགས་པ་ཆོས་ཀྱི་མཆོག །འདོད་ཆགས་དྲི་མ་བྲལ་བ་འདི། །བཟུང་འཛིན་དྲི་མ་རྣམ་པར་མེད། །དེ་བཞིན་ཉིད་ལ་བདག་ཕྱག་འཚལ། །ཞེས་པས་བླངས་ལ། རང་ལྷའི་ང་རྒྱལ་གྱིས། ༀ་ཨཱཿ ཧཱུྃ་ཞེས་ཚོགས་རྫས་བདུད་རྩིར་གྱུར་པར་ལག་སོར་འདོད་ཡོན་གྱི་ལྷ་མོར་བསམ་པས། ༀ་ཨ་མྲྀ་ཏེ་ཧཱུྃ། ཞེས་ལུས་ཀྱི་ལྷ་རྣམས་མཆོད་པར་མོས་ནས་ཚོགས་ལ་རོལ། ལྷག་མ་བསྡུས་ལ་ༀ་ཨཱཿ ཧཱུྃ་གིས་སྣོད་རིན་པོ་ཆེའི་ནང་དུ་བཅུད་བདུད་རྩིར་གྱུར་པ་ཐིམ་པར་མོས་ལ། གཏོར་མ་ཁ་ཕྲུ་བཏབ་ཅིང༌། ༀ་ཨུ་ཙྪིཥྚ་པིཎྜ་བྷྱཿ སྭཱ་ཧཱ། ཞེས་བཟླས་ནས་གཙང་གཏོར་དང་བསྲེས་ནས་ༀ་ཨཱཿ ཧཱུྃ་ཨུཙྪིཥྚ་བ་ལིཾ་ཏ་བྷཀྵ་ཡེ་སྭཱ་ཧཱ། འབྱུང་པོ་ལྷག་མ་ལ་དབང་བ་རྣམས་ཚིམས་པར་གྱུར་ཅིག །ཀྱཻ་མཁའ་འགྲོ་ཞིང་སྐྱོང་ཚོགས། །ལས་འདི་བདག་གིས་བསླབ་པར་བགྱི། །བདག་ལ་བདེ་ལེགས་བསྡུ་བ་དང༌། །ཕན་དང་ཡིད་འོང་བདེ་བ་དང༌། །གྲོང་དང་ཡུལ་འཁོར་ཤིས་པར་མཛོད། །ཅེས་བརྗོད་ལ་གཙང་སར་འབུལ་ལོ། །དེ་ནས་བདག་བསྐྱེད་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷར་ལངས་ལ་གླེགས་བམ་བསྡུ། དེ་ནས་ལམ་གྱི་བར་ཆད་ཞི་ཕྱིར་སྨོན་ལམ་གདབ། བསགས་པའི་དགེ་བ་དོན་ཡོད་པར་བྱ་ཕྱིར་དགེ་བ་བྱང་ཆུབ་ཆེན་པོར་བསྔོ་བར་བྱ་ཞིང༌། དེ་ནས་ནངས་པར་བླ་མས་སློབ་མ་རྣམས་ལ་བློ་སྦྱོང་གི་ལུང་དབོག་ཅིང་བསླབ་བྱ་རྒྱས་པར་བྱའོ། །དཀའ་ཐུབ་སོགས་དབང་ཆུན་གཅིག་ཏུ་བྱེད་ན། འབྲང་རྒྱས་ཀྱི་དངོས་གྲུབ་ལ་རོལ་པ་དང༌། གཏོར་མ་བཏང་ཞིང་གླེགས་བམ་བསྡུ་བ་རྣམས་ནུབ་ཐ་མ་བར་མི་བྱེད་དོ། །ལམ་ལྔ་ལས་ཚོགས་ལམ་བགྲོད་པར་བྱེད་པ་བློ་སྦྱོང་གི་དབང་ཆོག་ཚར་རོ། ། ཨྠིྀ།། ༈ །།ༀ་སྭ་སྟི། གཉིས་པ་སྦྱོར་ལམ་བསྒྲོད་པར་བྱེད་པ་དཀའ་ཐུབ་ཀྱི་དབང་ལ། གླེགས་བམ་བཤམ་ལུགས་སོགས་གོང་དང་འདྲ་བ་ལས། ཁྱད་པར་དམ་རྫས་བདུད་རྩིའི་ཕྲད་ཀ་ར་ལ་བྱ་ཞིང༌། བདག་བསྐྱེད་སྔོན་དུ་འགྲོ་བས་ཚོགས་དང་དབང་རྫས་བྱིན་རླབས་སྔར་ལྟར་ལས། ཁྱད་པར་ཡིག་འབྲུ་རྣམས་ལོངས་སྐུ་རིགས་ལྔའི་ལྷ་ཚོགས་སུ་བྱིན་གྱིས་བརླབ་བོ། །དེ་ནས་སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལ། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་སྦྱོར་ལམ་དྲོད་ཀྱི་ཡེ་ཤེས་སྐྱེད་པར་བྱེད་པ་ལམ་དཀའ་ཐུབ་ཀྱི་བྱིན་རླབས་ཞུས་ལ་ཉམས་སུ་བླང་སྙམ་དུ་མ་ཡེངས་པར་གསན་འཚལ། ཇི་ལྟར་ཉམས་སུ་ལེན་ལུགས་ལ། དབྱིངས་རྣལ་འབྱོར་གསུམ་ལས། བྱེད་པ་ལམ་གྱི་རྣལ་འབྱོར་ལ་ལམ་ལྔར་ཡོད་པའི། འདི་ནི་སྦྱོར་ལམ་དྲོད་ཀྱི་ཡེ་ཤེས་ཐོབ་པར་བྱེད་པ་དཀའ་ཐུབ་ཀྱི་དབང་བྱ་བ་ཡིན། འདི་ཡང་དབང་གཞན་ལས་ཁྱད་པར་ལྔས་འཕགས་ཏེ། གླེགས་བམ་བཤམས་པས་ལྷ་དབང་མ་ཡིན་པ་ཆོས་དབང་ཡིན་པ་དང༌། དཀྱིལ་འཁོར་འགྲེམས་པ་མདངས་ལ་བརྟེན་པའི་རྗེས་དཔག་མ་ཡིན་ཡེ་ཤེས་དངོས་སྐྱེད་བྱེད་ཡིན་པ་དང༌། བྷཉྫ་ནི་རྟེན་རྫས་ཙམ་མ་ཡིན་དམ་རྫས་ཡིན་པ་དང༌། བླ་མ་ནི་སྤྲུལ་པ་ཙམ་མ་ཡིན་སངས་རྒྱས་དངོས་ཡིན་པ་དང༌། དབང་རྣམ་གཞག་ཙམ་དུ་བསྐུར་བ་མ་ཡིན་ངོ་སྤྲོད་པའི་ཐབས་ཀྱི་ལམ་ཡོངས་རྫོགས་ལ་སྐྱེད་བྱེད་ཡིན་པས་ཁྱད་པར་དུ་འཕགས་སོ། །དེ་ལྟ་བུའི་དབང་བཀའ་འདི། བུམ་དབང་རྡོ་རྗེ་འཆང་ནས་བདག་མེད་མ། གསང་དབང་རྣམ་སྣང་ནས་མཁའ་བསྐྱོད་ཀྱི་བླ་མ། ཤེར་དབང་ཐུབ་པ་ནས་བྱམས་མགོན་ལ། ཚིག་དབང་གསང་བདག་ནས་གསང་བའི་མཁའ་འགྲོ་མ་རྣམས་ལ་བརྒྱུད་དེ། དམ་པ་རིན་པོ་ཆེས་བྱང་སེམས་ཀུན་དགའ་ལ་ཆིག་བརྒྱུད་དུ་གནང་བ་བྱིན་རླབས་སྣོད་གཅིག་ཏུ་བླུགས་པ་ལྟ་བུའི་བཀའ་སྲོལ་འགྲན་ཟླ་དང་བྲལ་བ་ལགས་པས་ཐུགས་སྤྲོ་བ་བསྐྱེད་པར་མཛོད། དབང་དངོས་ལ་གསུམ་གྱི༑ ཐོག་མ་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས༴ བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུའང་བླ་མ་དམ་པ་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཡི་དམ་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུའང་ཡི་དམ་ལྷ་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མཁའ་འགྲོ་མའི་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདག་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། སངས་མ་རྒྱས་ཀྱི་བར་དུའང་མཁའ་འགྲོ་མའི་ཚོགས་རྣམས་ལ་མོས་པ་དང་གུས་པ་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། བླ་མ་ཡི་དམ་མཁའ་འགྲོའི་ཚོགས་རྣམས་བདག་ལ་དགོངས་སུ་གསོལ། བདག་གིས་འདས་མ་འོངས་ད་ལྟར་བྱས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཏེ་བླ་མ་ལ་དབུལ་བར་བགྱིའོ། །བླ་མ་ལ་ཕུལ་བས་བླ་མ་རིན་པོ་ཆེ་རྣམས་ཀྱི་ཐུགས་དགོངས་ཁྱད་པར་ཅན་ཡོངས་སུ་རྫོགས་པར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེས་བདེ་བར་གཤེགས་པ་རྣམས་ཀྱི་སྤྱན་ལམ་དུ་མཆོད་པའི་བྱེ་བྲག་ནམ་མཁའ་དང་མཉམ་པ་འབྱུང་བར་གྱུར་ཅིག །དེ་ལས་བྱུང་བའི་དགེ་བའི་རྩ་བ་དེ་སེམས་ཅན་ཐམས་ཅད་དང་ཐུན་མོང་དུ་བསྔོ་བར་བགྱིའོ། །དེ་ལྟར་བསྔོས་པས་སེམས་ཅན་ཐམས་ཅད་འཁོར་བ་སྲིད་པ་སྡུག་བསྔལ་གྱི་རྒྱ་མཚོ་ལས་བསྒྲལ་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་གྱུར་ཅིག །དེ་མ་ཐོབ་ཀྱི་བར་དུའང་བདག་མྱུར་དུ་མངོན་པར་རྫོགས་པར་སངས་རྒྱས་ནས་འགྲོ་བ་མ་ལུས་པ་མཐའ་དག་གི་བླ་མར་གྱུར་ཅིག །དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་ལན་གསུམ། དངོས་གཞི་དབང་བཞི་ཡོངས་སུ་རྫོགས་པར་བསྐུར་བ་ལས། དང་པོ་བུམ་པའི་དབང་བཞི་བསྐུར་བ་ནི་ཡིག་འབྲུ་ལ་ལྟོས་ལ། གཟུགས་སྣང་ཐམས་ཅད་རྒྱལ་བ་རིགས་ལྔའི་སྐུར་བྱིན་གྱིས་བརླབས་པར་མོས་ལ་འདིའི་རྗེས་ཟློས༑ ཐུར་མ་བཙུགས་ལ་ཨཀྵཿ ཚར་གཅིག །སྒྲ་ཐམས་ཅད་རིགས་ལྔའི་གསུང་དུ་བྱིན་གྱིས་བརླབས་པར་མོས་ལ་འདིའི༴ ཨཀྵ་བརྗོད། དྲན་རྟོག་ཐམས་ཅད་རིགས་ལྔའི་ཐུགས་སུ་བྱིན་གྱིས་བརླབས་པར་མོས་ལ་འདིའི༴ ཨཀྵ་བརྗོད། སེམས་ཀྱི་ངོ་བོ་གདོད་ནས་སྐྱེ་བ་མེད་པ་ལས་སྣང་གྲགས་དྲན་པའི་ཆོས་ཐམས་ཅད་རང་བཞིན་མ་འགགས་པའི་རྩལ་སྣང་ཙམ་དུ་བྱིན་གྱིས་བརླབས་པར་མོས་ལ་འདིའི༴ ཨཀྵ་བརྗོད། ད་བུམ་དབང་དེ་ཉིད་བརྟན་པར་བྱ་བའི་ཕྱིར་ཡེ་ཤེས་ཀྱི་བདུད་རྩིའི་དམ་ཚིག་པའི་རྩ་ཡིག་རྣམས་ལ་ཕོག་པས། རང་ལུས་ཀྱི་རྩ་ཁམས་ཐམས་ཅད་རིགས་ལྔའི་ངོ་བོ་དཔའ་བོ་དཔའ་མའི་རང་བཞིན་དུ་རྣམ་པར་དག་པར་གྱུར་སྙམ་དུ་མོས་པ་མཛོད། ཅེས་ཐོད་པ་མགོ་ཐོག་ཏུ་བཞག་ལ་ཨཀྵ་བརྗོད་དོ། །དེས་བུམ་པའི་དབང་བཞི་སོང༌། ད་གསང་བའི་དབང་བསྐུར་བ་ནི། བདུད་རྩི་སྲིན་ལག་གིས་བླངས་ཏེ་སློབ་མའི་གནས་བཞིར་ཐིག་ལེ་བྱེད་པ་སྟེ། ཨ་བྷི་ཥིཉྩ་ༀ། ཞེས་དཔྲལ་བར་བཞག་པས་ༀ་དེ་ཉིད་སྤྱི་བོ་བདེ་ཆེན་གྱི་འཁོར་ལོ་རྣམ་སྣང་དཀར་པོ་འཁོར་ལོ་དང་དྲིལ་བུ་འཛིན་པ་ཚོན་གང་བ་གཅིག་གསལ་བར་གྱུར། ཨ་བྷི་ཥིཉྩ་ཨཱཿ ཞེས་མགྲིན་པར་བཞག་པས་ཨཱཿ དེ་ཉིད་ལོངས་སྤྱོད་ཀྱི་འཁོར་ལོ་འོད་དཔག་མེད་དམར་པོ་པདྨ་དང་དྲིལ་བུ་འཛིན་པ་གསལ་བར་གྱུར། ཨ་བྷི་ཥིཉྩ་ཧཱུྃ། ཞེས་སྙིང་གའི་ཐིག་ལེ་ཧཱུྃ་དེ་ཉིད་ཆོས་ཀྱི་འཁོར་ལོ་མི་བསྐྱོད་པ་སྔོན་པོ་རྡོ་རྗེ་དང་དྲིལ་བུ་འཛིན་པ་གསལ་བར་གྱུར༑ ཨ་བྷི་ཥིཉྩ་ཧྲཱིཿ ཞེས་ལྟེ་བའི་ཐིག་ལེ་ཧྲཱིཿ དེ་ཉིད་སྤྲུལ་པའི་འཁོར་ལོ་རིན་འབྱུང་སེར་པོ་རིན་པོ་ཆེ་དང་དྲིལ་བུ་འཛིན་པ་གསལ་བར་གྱུར། དེ་ལྟར་ལྷ་བཞི་པོ་དེ་ཡང་སྐུ་ཞི་བའམ་ཁྲོ་བོ་དཔའ་བོ་གཅིག་གམ་ཡབ་ཡུམ་གང་མོས་སུ་གསལ་ཐོབ་ལ་ཡང་ཡང་དྲན་པར་བྱོས་ཤིག །དེ་ཉིད་བརྟན་བྱེད་དུ་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས། འཁོར་ལོ་བཞིའི་ལྷ་རྣམས་ཀྱིས་གཙོ་མཛད་རྩ་ཁམས་ཀྱི་དཔའ་བོ་དང་དཔའ་མོ་ཐམས་ཅད་མཉེས་ནས་བདེ་གསལ་མི་རྟོག་པའི་ཉམས་བཟང་པོ་ནང་ནས་འཆར་བ་ཡིན་ནོ། །དེས་བདུད་རྩི་གསང་བའི་དབང་བསྐུར་བ་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་ཡང་དག་རྫོགས་པའི་སངས་རྒྱས་ཤཱཀྱ་ཐུབ་པས་བྱང་ཕྱོགས་ཀམྦྷི་རའི་མཆོད་རྟེན་གྱི་རྩར་རྩ་གསུམ་གཅིག་ཏུ་དྲིལ་ནས་རིག་པ་དྭངས་སུ་བཅུག་པས། དང་པོ་སེམས་ཀྱི་ངོ་བོ་སྟོང་པར་ངོས་ཟིན་ནས་རང་རིག་གི་ཡེ་ཤེས་ཁོང་ནས་སད་ཀྱང་ད་དུང་བསམ་གྱིས་མི་ཁྱབ་པའི་ཡེ་ཤེས་རྩལ་དུ་མ་ཤར་བས། གཉིས་པ་ཆུ་བོ་ནཻ་རཱཉྫ་ནའི་འགྲམ་དུ་ལོ་དྲུག་དཀའ་ཐུབ་ཀྱི་ཁོག་པར་ཞུགས་ཏེ་སྤྱན་ལྔས་དུག་ལྔའི་ཕྲ་རགས་ལ་གཟིགས་པས། རྩ་བྲལ་གྱི་རྟོག་པ་རང་སར་གྲོལ་ནས་བསམ་གྱིས་མི་ཁྱབ་པའི་ཡེ་ཤེས་རྩལ་དུ་ཤར། དེ་ནས་ཕྱིས་ཆོས་འཁོར་བར་པ་བསྐོར་དུས་འདུས་པའི་འཁོར་ལ་སྤྱན་ལྔའི་རྟེན་འབྲེལ་བརྡར་བསྟན་པས་སྤྱན་རས་གཟིགས་ཀྱིས་རྟོགས། ཤཱ་རིའི་བུས་དྲིས། དེར་འདུས་པའི་འཁོར་ཕལ་ཆེ་བས་བརྡའི་དོན་ཁོང་དུ་ཆུད་ནས་གླེངས། ཀུན་དགའ་བོས་བསྡུས། བྱམས་པ་ལ་དོན་བརྒྱུད་གཏད། དེ་ལ་ཐོགས་མེད་ཀྱིས་ཞུས་ནས། དབྱིག་གཉེན། ཨཱརྱ་དེ་བ། དམ་པ་རིན་པོ་ཆེས་ཆིག་བརྒྱུད་གསུམ་ལ་རིམ་པར་བབས་པའོ། །རྩ་བ་དེ་སློབ་མའི་རྒྱུད་ལ་ཇི་ལྟར་བསྐུར་ན། ལུས་གནད་རྣམ་སྣང་ཆོས་བདུན། ངག་གནད་སྟེང་འོག་གི་རླུང་འགྱུ་བ་བཅད་ནས་རླུང་དབུ་མར་གཞུག །ཡིད་སྒོམ་འདོད་སྤངས་ནས་སྤྱན་ལྔའི་ལྟ་སྟངས་ཀྱིས་རྟོག་པའི་རྩ་བ་བཅད་པར་བྱ་སྟེ། དེའང་དང་པོར་ལུང་མ་བསྟན་གཏི་མུག་གི་རྟོག་པ་ལ། རུས་སྦལ་ལྟར་མིག་བཙུམ་ནས་བལྟ། གཉིས་པ་བྲལ་བ་འདོད་ཆགས་ཀྱི་རྟོག་པ་ལ་མགྲོན་བུའི་རྒྱབ་ལྟར་ཟིམ་མེ་བལྟ། གསུམ་པ་དེ་བས་རགས་པ་ཞེ་སྡང་གི་རྟོག་པ་ལ་ཟླ་བ་ཚེས་པ་ལྟར་གཞུ་གང་ཙམ་དུ་བལྟ། བཞི་པ་དེ་བས་ཀྱང་རགས་པ་ཕྲག་དོག་གི་རྟོག་པ་ལ་མཁལ་མ་ལྟར་རང་ཐད་དུ་བལྟ། ལྔ་པ་ཤིན་ཏུ་རགས་པ་ང་རྒྱལ་གྱི་རྟོག་པ་ལ་ཟླ་བ་ཉ་གང་བ་ལྟར་བར་སྣང་ལ་མིག་བལྟའོ། །དེ་དག་གང་བྱེད་ཀྱང་རླུང་ཁ་སྦྱར་ལ་ལུས་སེམས་སྒྲིམས་ནས། རླུང་སེམས་འོད་གསལ་གྱི་མདངས་ལ་བཅིངས་ཏེ༑ གསལ་བདོ་བ་ལ་བཤིག་ཅིང་ཉམས་སུ་བླངས་པས། རྗེས་ལ་འཁོར་འདས་ཀྱི་ཆོས་ཐམས་ཅད་མཚན་ཉིད་མེད་པར་ཉམས་སུ་མྱོང་ནས་འོང་བ་ཡིན་ནོ། །གསུམ་པ་དེའི་དྲོད་ཚད་བཟུང་བ་ལ་དུས་བཞི་སྟེ། དང་པོར་རྒྱལ་བ་ཡུམ་གྱི་ཞལ་བལྟ་དུས་ཞེས་བྱ་སྟེ། བླ་མའི་སྤྱན་ལ་བལྟ། གཉིས་པ་ཞལ་མཐོང་དུས་བྱ་སྟེ། བླ་མའི་ལད་མོ་བཟླ། གསུམ་པ་དེ་གོམས་པར་བྱེད་དུས་ཞེས་བྱ་སྟེ། གོམས་པ་ཀློང་དུ་མ་གྱུར་གྱི་བར་དུ་འབད་པས་སྒོམ༑ བཞི་པ་མངོན་དུ་གྱུར་པའི་དུས་ཞེས་བྱ་སྟེ། རྟོག་པ་ཐམས་ཅད་རྩ་བྲལ་དུ་ཤེས་ཙ་ན་ཆེད་དུ་སྤྱན་ལྔས་བལྟ་མི་དགོས་སོ། །དེ་ལྟར་གོམས་པའི་ཚེ། གསུམ་པའི་དབང་དེ་ཉིད་བརྟན་པར་བྱ་བའི་ཕྱིར། གཟུགས་སྒྲ་དྲན་རྟོག་ཐམས་ཅད་སྒྱུ་མ་བྲག་ཆ་ལྦུ་བ་ལྟ་བུར་ཤེས་པར་བྱ་སྟེ། ཕྲ་བའི་བརྡ་ཞེས་བྱའོ། །དེས་ཤེས་རབ་ཡེ་ཤེས་ཀྱི་དབང་བསྐུར་བ་སོང༌། ད་བཞི་པ་ཚིག་དབང་བསྐུར་བ་ནི། རྒྱུ་རྩལ་བཞི་དང་བཅས་པས་ཉེ་བའི་བཟླས་ལུང་དབོག་པ་ཡིན་པས། དྲོད་ཀྱི་ཡེ་ཤེས་བཙན་ཐབས་སུ་སྐྱེ་བར་བྱེད་པའི་སྙིང་པོ་སྦྱོར་ལམ་དཀའ་ཐུབ་ཀྱི་ལུང་འདི་ལོངས་ཤིག །ༀ་ཨཱཿ ཧཱུྃ་གུ་རུ་སིདྡྷི་ཕ་ལ་ཧཱུྃ། ཞེས་ལན་གསུམ་གྱིས་བཟླས་ལུང་སྦྱིན་ནས་འདི་ལ་རྒྱུ་རྩལ་བཞི་སྟེ། དང་པོ་ནུས་པ་སྔགས་ཀྱི་རྩལ་རིན་པོ་ཆེའི་ལྷ་སྐུ་ལ་རང་འོད་འདོན་པ་དང་འདྲ་བས་སྙིང་པོ་གསལ་ལ་དག་པར་བཟླ། གཉིས་པ་རིག་པ་སེམས་ཀྱི་རྒྱུ་རྩལ་ཟད་པར་གྱི་སྐྱེ་མཆེད་སྒོམ་པ་དང་འདྲ་སྟེ། ཏིང་ངེ་འཛིན་གསལ་ལ་བརྟན་པར་བསྒོམ། གསུམ་པ་རྟེན་འབྲེལ་རྒྱུ་རྩལ་མཉྫི་ཀའི་མེ་ཏོག་རྫས་ཀྱིས་ཁ་བསྒྱུར་བ་དང་འདྲ་སྟེ། གང་ལ་དམིགས་པའི་རྟེན་རྫས་རྣམས་མདུན་དུ་དགྲམ། བཞི་པ་མཚམས་སྦྱོར་དུས་ཀྱི་རྒྱུ་རྩལ་གནམ་ལྕགས་དང་ཁྲེགས་རྡོ་འཕྲད་པའི་མེ་དང་འདྲ་སྟེ་བླ་མས་ཐུགས་ལ་འདོགས་དུས་སྒྲུབ་པ་ལ་ཕྱི་བཤོལ་མི་བྱ་བར་འབད་དགོས་པ་ཡིན་ནོ། །དེ་ལྟར་ཚིག་དབང་གི་ནུས་པ་དེ་ཉིད་བརྟན་པར་བྱ་བའི་ཕྱིར༑ གླེགས་བམ་གྱི་མེ་ཏོག་བླངས་པ་ལ་དཀའ་ཐུབ་ཀྱི་སྙིང་པོ་བཟླས་པ་བུ་ལ་འཐོར་ཞིང༌། གྲུབ་པར་གྱུར་ཅིག་ཅེས་ལན་གསུམ། དེས་བླ་མའི་སྐུ་གསུང་ཐུགས་ལྷའི་རང་བཞིན་དུ་གནས་པ་དེ་སློབ་མའི་ལུས་ངག་ཡིད་གསུམ་ལ་ཐིམ་པས་ཚོགས་གཉིས་རྫོགས། སྒྲིབ་གཉིས་བྱང་ནས། ལམ་རྟགས་དང་ཡོན་ཏན་འཆར་བ་ལ་ཚེགས་མེད་པ་ཡིན་ནོ། །མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང་རྣལ་འབྱོར་གྱི་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ། གཞན་དོན་སྔས་ན་བོ་བའི་དྲི་མ་ཡིན་པས་དམ་བཅའ་མ་གྲོལ་བར་དུ་སློབ་དཔོན་མི་བྱ། བསྙེན་བསྐུར་ཟོས་ན་ཟགས་པའི་དྲི་མ་ཡིན་པས་རང་རྫས་མི་སྟེར་ཞིང་གཞན་རྫས་མི་སྤྱོད། བསྲུང་སྡོམ་ལྷོད་ན་ལྟེམས་པའི་དྲི་མ་ཡིན་པས། བསྙེན་པ་བྱེད་དུས་ཁྲུས་མི་བྱ། གོས་སྟན་མི་སྤྲུག །སྐྲ་སེན་མི་འབྲེག །ངག་གི་སྨྲ་བ་གཅོད། མཆིལ་སྣབས་མི་འདོར། གཏོར་མ་སྦ་བ་སོགས་བསླབ་བྱ་རྣམས་དམ་དུ་བསྲུང་ངོ༌། །ཆོས་བརྒྱད་དྲན་ན་ལྡོག་པའི་དྲི་མ་ཡིན་པས་ཚེ་འདིའི་སྙན་གྲགས་རྒྱབ་ཏུ་དོར་བར་བྱའོ། །དེ་ལྟར་སྦྱོར་དངོས་རྗེས་གསུམ་གྱི་ཕྱག་ལེན་ལ་བརྟེན་ནས་སྦྱོར་ལམ་སྐྱེད་བྱེད་ཟབ་མོ་དཀའ་ཐུབ་ཀྱི་བྱིན་རླབས་ཚར་བ་ལགས་པས་བླ་མ་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས་ཞེས་བརྗོད། རྗེས་ཆོག་རྣམས་བློ་སྦྱོང་ལྟར་བྱའོ། །ལམ་ལྔ་ལས་སྦྱོར་ལམ་བགྲོད་པར་བྱེད་པ་དཀའ་ཐུབ་ཀྱི་དབང་ཆོག་ཚར་རོ། །ཨྠིྀ།། ༈ །།ༀ་སྭ་སྟི། གསུམ་པ་མཐོང་ལམ་མི་རྟོག་པའི་ཡེ་ཤེས་འཆར་བྱེད་རྗེས་བློ་བྲལ་གྱི་བྱིན་རླབས་ལ། གླེགས་བམ་སོགས་སྔར་ལྟར་བཤམ། ཁྱད་པར་བདུད་རྩིའི་འཕྲད་སྦྲང་རྩིས་བྱ། བདག་བསྐྱེད་སྔོན་འགྲོས་ཚོགས་དང་དབང་རྫས་སྔར་ལྟར་ལས། ཁྱད་པར་ཡིག་འབྲུ་ལས་བྱུང་བའི་རིགས་ལྔའི་ལྷ་ཚོགས་རྣམས་སྣང་ལ་རང་བཞིན་མེད་པ་འཇའ་ཚོན་ལྟར་བྱིན་གྱིས་བརླབས་སོ། །དེ་ནས་སློབ་མ་རྣམས་ཁྲུས་བྱས། ཕྱག་སྔོན་འགྲོས་གྲལ་དུ་འཁོད་པ་ལ། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་མཐོང་ལམ་རྣམ་པར་མི་རྟོག་པ་རྒྱུད་ལ་སྐྱེད་བྱེད་རྗེས་ཀྱི་བྱིན་རླབས་ཞུས་ལ་ཉམས་སུ་བླང་སྙམ་དུ་མ་ཡེངས་པར་གསན་འཚལ། དེ་ཇི་ལྟར་ཉམས་སུ་ལེན་ལུགས་ལ། དབྱིངས་རྣལ་འབྱོར་གསུམ་ལས། བྱེད་པ་ལམ་གྱི་རྣལ་འབྱོར་ལ་ལྔ་ཡོད་པའི་ནང་ནས། འདི་ནི་མཐོང་ལམ་ཉམས་སུ་ལེན་པ་རྗེས་ཀྱི་དབང་བྱ་བ་དེ་ཡིན། དེ་ཡང་དབང་གཞན་ལས་ཁྱད་པར་འཕགས་ཏེ། གླེགས་བམ་འདི་དཀྱིལ་འཁོར་ཐམས་ཅད་ཀྱི་འབྱུང་གནས་ཡིན་པས་དང༌། ཡིག་འབྲུ་འདི་ཆོས་ཐམས་ཅད་ཀྱི་ས་བོན་ཡིན་པས་དང༌། བྷཉྫ་འདི་དངོས་གྲུབ་ཐམས་ཅད་འབྱུང་བའི་རྫས་ཡིན་པས་དང༌༑ བླ་མ་ནི་སངས་རྒྱས་ཐམས་ཅད་ཀྱི་བྱེད་པ་པོ་ཡིན་པས་དང༌། ངོ་སྤྲོད་ཟབ་མོ་འདི་ཡང་དག་པའི་ལམ་དངོས་ཡིན་པས་ཁྱད་པར་དུ་འཕགས་པར་གདའ་སྟེ། དེ་ལྟ་བུའི་དབང་བཀའ་འདི་དམ་པ་རྒྱ་གར་གྱི་ཁྱད་ཆོས༑ བྱང་སེམས་ཀུན་དགའི་ཐུགས་དམ། རང་ཅག་རྣམས་ཆོས་འདི་འདྲ་དང་འཕྲད་པ་ཁར་རྗེ་ཡིན་པས་འཚེངས་པ་ལགས་སྙམ་དུ་སྤྲོ་བ་བསྐྱེད་པར་མཛོད། དབང་དངོས་ལ་གསུམ་གྱི། ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་དབང་བཞི་ཡོངས་སུ་རྫོགས་པར་བསྐུར་བ་ལ། དང་པོ་བུམ་པའི་དབང་བཞི་བསྐུར་བ་ནི་ཡིག་འབྲུ་ལ་ལྟོས་ལ་ཇི་ལྟར་སྣང་བ་ཐམས་ཅད་ངོ་བོ་བླ་མ། རྣམ་པ་ཡི་དམ་རིགས་ལྔའི་སྐུ་མཚན་ཉིད་བཞི་ལྡན་དུ་བྱིན་གྱིས་བརླབས་པར་མོས་ལ་འདིའི་རྗེས་ཟློས། ཡི་གེ་རེ་རེ་བཞིན་ཐུར་མ་བཙུགས་ལ་ཨཀྵཿ ཚར་གཅིག །དེ་ཐམས་ཅད་དང་པོར་སྐྱེ་བ་མེད། བར་དུ་གནས་པ་མེད། ཐ་མར་འགག་པ་མེད། བདེན་པའི་དངོས་པོར་གྲུབ་པ་མེད་དེ་གཟུགས་སྣང་སྟོང་ངོ༌༑ ༑ཞེས་བརྗོད་དུ་བཅུག །ཇི་ལྟར་གྲགས་པའི་སྒྲ་ཐམས་ཅད་ངོ་བོ་བླ་མ་ལ་རྣམ་པ་རིགས་ལྔའི་གསུང་མཚན་ཉིད་བཞི་ལྡན་དུ་མོས་ལ་འདིའི༴ ཨཀྵ་དང༌། སྐྱེ་མེད། གནས་མེད། འགག་མེད། དངོས་མེད་དེ་སྒྲར་གྲགས་ཐམས་ཅད་གྲག་སྟོང་ངོ༌། །ཞེས་བརྗོད། ཇི་ལྟར་དྲན་པའི་ཆོས་ཐམས་ཅད་ངོ་བོ་བླ་མ་ལ་རྣམ་པ་རིགས་ལྔའི་སྐུ་གསུང་ཐུགས་མཚན་ཉིད་བཞི་ལྡན་དུ་མོས་ལ་འདིའི༴ ཨཀྵ་དང༌། སྐྱེ་མེད། གནས་མེད། འགག་མེད། དངོས་མེད་དེ་ཡིད་དྲན་སྟོང་ངོ༌། །ཇི་ལྟར་སྣང་གྲག་འགྱུ་གསུམ་རང་གི་སེམས་ངོ་བོ་བླ་མ་ལ་རྣམ་པ་རིགས་ལྔའི་སྐུ་གསུང་ཐུགས་མཚན་ཉིད་བཞི་ལྡན་དུ་མོས་ལ་འདིའི༴ ཨཀྵ་དང༌། སྐྱེ་མེད། གནས་མེད། འགག་མེད༑ དངོས་མེད་དེ་སེམས་སུ་བདེ་སྟོང་གཉིས་སུ་མེད་པའོ། །ཞེས་བརྗོད། ད་བུམ་དབང་དེ་ཉིད་བརྟན་བྱེད་དུ་ལུས་ཀྱི་རྩ་ཁམས་ལྷ་དང་ལྷ་མོར་གསལ་བ་དེ་རྣམས་ཀྱང་སྐྱེ་མེད་སོགས་མཚན་ཉིད་བཞི་ལྡན་དུ་བྱིན་གྱིས་བརླབས་པས་དག་པའི་སྣང་བ་སྣ་ཚོགས་སུ་འཆར་བར་མོས་པ་མཛོད། ཐོད་པ་སྤྱི་བོར་བཞག་ལ་ཨཀྵཿ ཚར་གཅིག །མཇུག་ཏུ་རྩ་ཁམས་ཀྱི་ལྷ་ཐམས་ཅད་དང་པོར་སྐྱེ་མེད། བར་དུ་གནས་མེད། ཐ་མར་འགག་མེད། བདེན་པའི་དངོས་པོར་གྲུབ་པ་མེད་དོ། །ཞེས་བརྗོད་དོ། །དེས་བུམ་པའི་དབང་བཞི་སོང༌། ད་གསང་བའི་དབང་བསྐུར་བ་ནི། བདུད་རྩི་ལས་སྲིན་ལག་གིས་བླངས་ཏེ་བུའི་གནས་བཞིར་ཐིག་ལེ་བྱེད་པ་སྟེ། དཔྲལ་བར་ཨ་བྷི་ཥིཉྩ་ༀ། སྐྱེ་མེད། གནས་མེད༑ འགག་མེད། དངོས་མེད་དོ། །ཞེས་བརྗོད་པས། བདེ་ཆེན་འཁོར་ལོ་ༀ་ལས་རྣམ་སྣང་གི་སྐུ་མཚན་ཉིད་བཞི་ལྡན་གྱིས་རྒྱས་གདབ། མགྲིན་པར་ཐིག་ལེ། ཨ་བྷི་ཥིཉྩ་ཨཱཿ སྐྱེ་མེད། གནས་མེད། འགག་མེད། དངོས་མེད་དོ༑ ༑ཞེས་བརྗོད་པས་མགྲིན་པའི་འཁོར་ལོ་ཨཱཿ ལས་འོད་དཔག་མེད་ཀྱི་སྐུ་མཚན་ཉིད་བཞི་ལྡན་གྱིས་རྒྱས་གདབ། སྙིང་གར་ཨ་བྷི་ཥིཉྩ་ཧཱུྃ། སྐྱེ་མེད་སོགས་བརྗོད་པས། སྙིང་གའི་འཁོར་ལོ་ཧཱུྃ་ལས་མི་བསྐྱོད་པའི་སྐུ་མཚན་ཉིད་བཞི་ལྡན་གྱི་རྒྱས་གདབ། ལྟེ་བར་ཨ་བྷི་ཥིཉྩ་ཧྲཱིཿ སྐྱེ་མེད་སོགས་བརྗོད་པས་ལྟེ་བའི་འཁོར་ལོ་རིན་འབྱུང་གི་སྐུ་མཚན་ཉིད་བཞི་ལྡན་གྱི་རྒྱས་གདབ་བོ། །ད་དེ་ཉིད་བརྟན་བྱེད་དུ་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད། སྐྱེ་མེད་སོགས་བརྗོད་པས་རྩ་ཁམས་ཀྱི་དཔའ་བོ་དང་དཔའ་མོ་ཐམས་ཅད་མཉེས་པ་ལས་ཤར་བའི་ཉམས་རྟོགས་ཀུན་ཀྱང་མཚན་ཉིད་བཞི་ལྡན་དུ་འཆར་བ་ཡིན་ནོ། །དེས་གསང་བའི་དབང་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་སྟོན་པ་ཐུབ་པའི་དབང་པོས་ཆུ་བོ་ནཻ་རཉྫ་ནའི་འགྲམ་དུ་སྤྱན་ལྔའི་གཟིགས་པས་བསམ་གྱིས་མི་ཁྱབ་པའི་ཡེ་ཤེས་རྩལ་དུ་ཤར་ཡང༌། ད་དུང་སངས་རྒྱས་ཀྱི་ཡེ་ཤེས་ཁྱད་པར་ཅན་དེ་རྗེས་སུ་མ་མཐོང་ནས་རྡོ་རྗེ་གདན་དུ་བྱོན་ཏེ་བདུད་བཏུལ། སྤྱན་ལྔའི་ལྟ་སྟངས་སྒྱུར་བས་དེར་སངས་རྒྱས་ཀྱི་ཡེ་ཤེས་ཐོབ་ནས་ཆོས་འཁོར་བར་པའི་དུས། འདུས་པའི་འཁོར་ལ་ལྟ་སྟངས་སྒྱུར་བས། ཟབ་མོའི་བརྡ་དེ་སྤྱན་རས་གཟིགས་ཀྱིས་རྟོགས། ཤཱ་རིའི་བུས་དྲིས། འདུས་པའི་འཁོར་གྱིས་དོན་ཁོང་དུ་ཆུད་ནས་གླེངས། ཀུན་དགའ་བོས་བསྡུས། བྱམས་པ་ལ་དོན་བརྒྱུད་གཏད་ནས། ཐོགས་མེད། དབྱིག་གཉེན། ཨཱ་དེ་བ། དམ་པ་རིན་པོ་ཆེས་ཆིག་བརྒྱུད་ཀྱི་བླ་མ་གསུམ་ལ་རིམ་པར་བབས་ཏེ། ད་ལྟ་ཡན་མ་ཆད་པ་ཡིན་ནོ། །རྩ་བ་དེ་སློབ་མའི་རྒྱུད་ལ་ཇི་ལྟར་བསྐུར་ན། ལུས་གནད་ཆོས་བདུན་བཅའ། ངག་གནད་སྟེང་འོག་གི་རླུང་ཁ་སྦྱར་ལ་འགྱུ་བ་བཅད་དེ་དབུ་མར་གཞུག །ཡིད་སྒོམ་འདོད་ཀྱི་རྟོག་པ་སྤངས་ལ། ངོ་བོ་སྟོང་པ། རང་བཞིན་གསལ་བ། མཚན་ཉིད་གཉིས་མེད་དུ་གྲོལ་བར་བྱ་བའི་ཕྱིར། ལྟ་སྟངས་ལྔ་བསྒྱུར་ཏེ། ངན་སོང་དུ་ལྟུང་བའི་དོགས་པ་ཆོད་ཕྱིར་ཉན་ཐོས་ཞི་བའི་ལྟ་སྟངས་ཐུར་དུ་སྒྱུར། མཐོ་རིས་ཐོབ་འདོད་ཀྱི་རེ་བ་གཅོད་ཕྱིར་མུ་སྟེགས་ཚངས་པའི་ལྟ་སྟངས་གྱེན་དུ། ཞེ་སྡང་གི་རྟོག་པ་གཅོད་ཕྱིར་སེམས་དཔའི་ལྟ་སྟངས་གཡས་སུ༑ འདོད་ཆགས་ཀྱི་ཀུན་རྟོག་གཅོད་ཕྱིར་སེམས་མའི་ལྟ་སྟངས་གཡོན་དུ། སྒོམ་བློ་བསམ་གཏན་གྱི་འཆིང་བ་གཅོད་ཕྱིར་བདེ་བར་གཤེགས་པའི་ལྟ་སྟངས་ཐད་ཀར་བསྒྱུར་བར་བྱའོ། །དེ་ལྟར་ལྟ་སྟངས་གང་བསྒྱུར་ཡང༌༑ སྟེང་རླུང་མནན། འོག་རླུང་འཐེན། འགྱུ་བ་བཅད། སྒྲིམ་ཤ་བཏོན། རླུང་སེམས་འོད་གསལ་གྱི་མདངས་ལ་བཅིངས་ཏེ། གསལ་རྡོ་བ་ལ་བཤིག་ཅིང་སྒོམ་པས་རྗེས་ལ་བློ་བྲལ་ཐུགས་སུ་ཆུད་དེ་འཁོར་འདས་ཀྱི་ཆོས་ཐམས་ཅད་མཚན་ཉིད་མེད་པར་ཉམས་སུ་མྱོང་བར་བྱེད་དོ། །ད་དེའི་དྲོད་ཚད་བཟུང་བ་ལ་བཞི་སྟེ། དང་པོར་རྒྱལ་བ་ཡུམ་གྱི་ཞལ་བལྟ་དུས། བླ་མའི་སྤྱན་ལ་བལྟ། གཉིས་པ་མཐོང་དུས་བླ་མའི་ལད་མོ་བྱ༑ གསུམ་པ་དེ་གོམས་པར་བྱེད་དུས་དམ་ཇི་ལྟར་བཅས་ཀྱི་བར་དུ་ཉམས་སུ་བླངས། བཞི་པ་མངོན་དུ་གྱུར་དུས་ཆོས་ཐམས་ཅད་ལ་བདེན་འཛིན་ཞིག་ནས་ཀུན་རྫོབ་དག་སྣང་དུ་འཆར་ཙ་ན་ལྟ་སྟངས་ལྔ་པོ་ཆེད་དུ་བསྒྱུར་མི་དགོས་སོ། །དེ་ལྟར་གསུམ་པའི་དབང་དེ་བརྟན་པར་བྱ་བའི་ཕྱིར་རྗེས་སྤྱོད་ཐམས་ཅད་མཚན་ཉིད་བཞི་ལྡན་དུ་ངོ་སྤྲད་པར་བྱ་སྟེ། གཟུགས་སྣང་ཙམ་ནས་མ་གྲུབ་སྟེ་རང་བཞིན་གྱིས་སྟོང་པའོ། །རྟེན་འབྲེལ་གྱི་སྣང་བ་མ་འགགས་པས་སྟོང་ཉིད་ཀྱི་རྩལ་གཟུགས་སུ་སྣང་ལ། སྣང་ཙམ་ཉིད་ན་ངོ་བོ་སྟོང་ཉིད་ལས་མ་གཡོས་པས་གཟུགས་ལས་ཀྱང་སྟོང་པ་ཉིད་གཞན་མ་ཡིན་ཞིང༌། ངོ་བོ་སྟོང་པ་ཉིད་ལས་མ་གཡོས་ཀྱང་རྩལ་སྣང་གཟུགས་སུ་མ་འགགས་པས་སྟོང་པ་ཉིད་ལས་ཀྱང་གཟུགས་གཞན་མ་ཡིན་ཏེ། དེ་ལྟ་བུའི་མཚན་ཉིད་བཞི་ལྡན་དུ་རྣམ་མཁྱེན་གྱི་བར་གྱི་ཆོས་ཐམས་ཅད་ལ་ཤེས་པར་བྱ་ཞིང༌། དེ་ལྟར་ཤེས་ཙ་ན་རྣམ་གྲངས་ཀྱི་སྟོང་པ་དང༌། ལོག་པའི་ཀུན་རྫོབ་ཅེས་བྱ་བ་ཡུལ་དུ་མི་གནས་པ་ཡིན་ནོ། །དེས་ཤེར་དབང་སོང༌། ད་ཚིག་དབང་བསྐུར་བ་ནི། ༀ་ཨཱཿ ཧྲཱིཿ ཧཱུྃ་བཞི་དབང་བཞིའི་སྙིང་པོ་ཛཱི་ན་མི་ཏྲ་སྒྲུབ་པའི་སྙིང་པོ་སྟེ། རྣམ་པར་མི་རྟོག་པའི་ཡེ་ཤེས་ཅིག་ཅར་དུ་འཆར་བྱེད་རྟོག་པ་རྗེས་ཀྱི་སྙིང་པོའི་ལུང་འདི་ལོང་ཞིག །ༀ་ཨཱཿ ཧྲཱིཿ གུ་རུ་ཛཱི་ན་མི་ཏྲ་ཧཱུྃ་ཞེས་ལན་གསུམ་གྱིས་བཟླས་ལུང་བྱིན་ནས། ས་ལམ་ཐམས་ཅད་སྙིང་པོས་གཅོད་པ་ཡིན་པས་བཟླས་པ་ལ་རེམ་པར་བྱ་ཞིང་ལམ་རྟགས་རིག་པ་དྭངས་པ་ལས་འཆར་བས་དབེན་པར་མ་ཡེངས་ཙམ་དུ་སྒོམ། ཡོན་ཏན་ཚོགས་རྫོགས་པ་ལས་འབྱུང་བས་ཚོགས་བསགས་པ་ལ་འབད་པར་བྱའོ༑ ༑དེ་ཉིད་བརྟན་ཕྱིར་གླེགས་བམ་གྱི་སྟེང་ནས་མེ་ཏོག་བླངས་པ་ལ་རྗེས་ཀྱི་སྙིང་པོ་ལ་བཟླས་ནས་བུ་ལ་འཐོར་ཞིང༌། གྲུབ་པར་གྱུར་ཅིག་ཅེས་ལན་གསུམ། དེས་བླ་མ་དང་རང་སེམས་འདྲེས་པར་བསམ་པས་མཐོང་ལམ་གྱི་ཡེ་ཤེས་རྒྱུད་ལ་སྐྱེ་བ་ལ་ཚེགས་མེད་པར་གསུངས་སོ། །ད་མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང༌། རྣལ་འབྱོར་གྱི་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ༑ གཞི་ལ་གཡའ་ཆགས་ན་གཤིས་ཐོག་ཏུ་བོ་བས་ཆོས་གོ་ཐོག་ཏུ་མ་ལུས་པར་ཉམས་སུ་བླངས། གཉེན་པའི་བྱ་ར་མ་འགྱེལ་ན་ཉམས་ཐོག་ཏུ་ཟགས་པས་ཉམས་མྱོང་གཤིས་ཐོག་ཏུ་གཞིག །རང་ལྟ་ལ་མཆོག་ཏུ་བཟུང་ན་གོ་ཐོག་ཏུ་ལྟེམས་པས་ཆོས་ལ་ཕྱོགས་རིས་མི་བྱ། གྲུབ་མཐའི་འདོད་པ་མ་ཞིག་ན་ཚིག་ཐོག་ཏུ་ལོག་པས་རྟོག་པ་གཟུགས་བརྙན་དུ་མི་གཏོང་བར་བསླབ་པར་བྱའོ། །དེ་ལྟར་སྦྱོར་དངོས་རྗེས་གསུམ་གྱིས་མཐོང་ལམ་བགྲོད་པར་བྱེད་པ་རྗེས་ཀྱི་བྱིན་རླབས་ཚར་བ་ལགས་པས་བླ་མ་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས། ཞེས་བརྗོད། རྗེས་ཆོག་རྣམས་བློ་སྦྱོང་ལྟར་བྱའོ། །ལམ་ལྔ་ལས་མཐོང་ལམ་བགྲོད་བྱེད་ཀྱི་དབང་ཆོག་ཚར་རོ། ། ཨྠིྀ། གོམྦྷི་ར།། ༈ །།ༀ་སྭ་སྟི། བཞི་པ་སྒོམ་ལམ་ས་བཅུ་དུས་གཅིག་ལ་ནོན་པར་བྱེད་པ་རོ་སྙོམས་ཀྱི་བྱིན་རླབས་ལ། གླེགས་བམ་སོགས་སྔར་ལྟར་བཤམ། ཁྱད་པར་བདུད་རྩིའི་འཕྲད་ཀ་ར་བུ་རམ་སྦྲང་གསུམ་བྱ། བདག་བསྐྱེད་སྔོན་འགྲོས་ཚོགས་དང་དབང་རྫས་བྱིན་རླབས་གཞན་རྣམས་སྔར་ལྟར་ལས། ཁྱད་པར་ཡིག་འབྲུའི་ལྷ་རྣམས་གོ་རིམ་དང་བཟང་ངན་ཆེ་ཆུང་མེད་པར་མཉམ་ཉིད་དུ་བྱིན་གྱིས་བརླབ་བོ། །དེ་ནས་སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལས། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་བྱ། དེའི་ཆེད་དུ་སྒོམ་ལམ་ས་བཅུ་དུས་གཅིག་ལ་ནོན་པར་བྱེད་པ་རོ་སྙོམས་ཀྱི་དབང་ཟབ་མོ་ཞུས་ནས་ཉམས་སུ་བླངས་སྙམ་དུ་མ་ཡེངས་པར་གསན་འཚལ། དེ་ལ་བྱིན་རླབས་དབང་གི་ཆུ་བོ་འདི་དབང་གཞན་ལས་ཁྱད་པར་ལྔས་འཕགས་ཏེ། གླེགས་བམ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔ་མཚོན་པའི་རི་མོ་ཡིན་པས་དང༌། ཡིག་འབྲུ་ནི་འབྲས་ཆོས་ལྔ་པོ་དེ་ཡི་ས་བོན་གྲུངས་པོ་ཡིན་པས་དང༌། བྷཉྫ་ནི་དེ་བཞིན་གཤེགས་པ་ཐམས་ཅད་ཀྱིས་སྒྲུབ་པའི་དམ་རྫས་ཡིན་པས་དང༌། བླ་མ་ནི་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཡིན་པས་དང༌། ངོ་སྤྲོད་ཟབ་མོ་འདི་དེ་བཞིན་གཤེགས་པ་ཐམས་ཅད་ཀྱི་ལམ་དངོས་ཡིན་པས་ཁྱད་པར་དུ་འཕགས་པ་ལགས། དེ་ལྟ་བུའི་དབང་བཀའ་འདི་སྤྲུལ་པའི་སྐུ་དམ་པ་རྒྱ་གར་གྱིས་ཡུམ་བདག་མེད་མ། རིག་འཛིན་མཁའ་སྤྱོད་ཀྱི་བླ་མ། མགོན་པོ་བྱམས་པ། གསང་བའི་མཁའ་འགྲོ་མ་རྣམས་ལས་དབང་བཞི་པོ་འདི་གསན་ནས། ཆུ་བོ་ཆེན་པོ་བཞི་དྲིལ་གྱིས་བྱང་སེམས་ཀུན་དགའ་ལ་བསྩལ་བ་ལས་རིམ་པར་བརྒྱུད་དེ་དོན་བརྒྱུད་མ་ཆད་པས་འདི་དང་འཕྲད་པ་སྐལ་བ་རེ་བཟང་སྙམ་དུ་སྤྲོ་བ་བསྐྱེད་པར་མཛད་འཚལ། དབང་དངོས་ལ་གསུམ་གྱི། ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས་དེ་ཁོ་ན་ཉིད་བཞིན་དུ་འགྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་དབང་བཞི་རྫོགས་པའི་ངོ་སྤྲོད་བྱ་བ་ལས། དང་པོ་བུམ་པའི་དབང་བཞི་བསྐུར་བ་ནི། འདི་ལྟར་སྣང་བའི་ཆོས་ཐམས་ཅད། བླ་མ་དང་ཡི་དམ་གྱི་སྐུ་གསུང་ཐུགས་དང༌། ཐ་མལ་པའི་ལུས་ངག་ཡིད་གསུམ་གྱི་སྣང་བ་ལ་བཟང་ངན་མེད་པར་སྣང་སྟོང་གཉིས་མེད་དུ་འཛིན་པ་ཙམ་ཡང་མི་བྱ་བར་ཐག་བཅད་དེ་འདིའི་རྗེས། ཡི་གེ་ལ་ཐུར་མ་བཙུགས་ཏེ་ཀྵ་ནས་ཨའི་བར་མས་བཟློག་གིས་ཚར་གཅིག །ཨ་ནས་ཀྵའི་བར་ལུགས་འབྱུང་དུ་ཚར་གཅིག །ཡང་ཨཿ ཨཾ་ནས་ཨའི་བར་དབྱངས་ལྡོག་པ་དང༌། གསལ་བྱེད་ཀ་ནས་ཀྵའི་བར་ལུགས་འབྱུང་དུ་ཚར་གཅིག །ཡང་གསལ་བྱེད་སྡེ་པ་ལྔ། མཐའ་གནས་བྲོ་བ་ཀྵཿ སྟེ་བརྒྱད་པོ་སོ་སོར་བཅད་པའི་བར་དུ་དབྱངས་བཅུ་དྲུག་པོ་གཉིས་རེ་བཅུག་ནས་ཀློག་པ་ཚར་གཅིག་སྟེ་བཞིའོ། །འདི་ནི་གླང་འཁོར་བ་ཆེན་པོའི་ཕྱག་བཞེས་ཏེ་དབང་དཔེ་རྙིང་པ་རྣམས་སུ་ཐམས་ཅད་ལུགས་ལྡོག་ཏུ་ཀློག་པར་བཤད་དོ། །དེ་ལྟར་སྣང་གྲག་དྲན་པའི་ཆོས་ཐམས་ཅད་གོ་རིམ་ངེས་མེད་དུ་བྱིན་གྱིས་བརླབས་པས་སྒོམ་ལམ་ཤེས་བྱའི་སྒྲིབ་པ་ཐམས་ཅད་དག་ནས་ས་ལམ་ཆིག་རྫོགས་སུ་གྲོལ་བ་ཡིན་ནོ། །ད་བུམ་དབང་དེ་ཉིད་བརྟན་བྱེད་དུ་རང་ལུས་རྩ་ཁམས་ཀྱི་ལྷ་རྣམས་གོ་རིམ་དང་བཟང་ངན་མེད་པར་བྱིན་གྱིས་བརླབས་པས་དག་སྣང་ཕྱོགས་མེད་དུ་འཆར་བའི་མོས་པ་མཛོད། ཅེས་ཐོད་པ་སྤྱི་བོར་བཞག་ལ་དབྱངས་གསལ་མས་ལྡོག་ཚར་གཅིག་བརྗོད་དོ། །དེས་བུམ་པའི་དབང་བཞི་སོང༌། ད་གསང་དབང་བསྐུར་བ་ནི། བདུད་རྩིའི་ཐིག་ལེ་སྙིང་གར་ཨ་བྷི་ཥིཉྩ་ཧཱུྃ། ལྟེ་བར་ཨ་བྷི་ཥིཉྩ་ཧྲཱིཿ མགྲིན་པར་ཨ་བྷི་ཥིཉྩ་ཨཱཿ དཔྲལ་བར་ཨ་བྷི་ཥིཉྩ་ༀ། ཞེས་བཞག་པས། འཁོར་ལོ་བཞིའི་བདེ་བར་གཤེགས་པ་རྣམས་རིམ་པ་མ་ངེས་པར་གསལ་བཏབ་པས་བྱིན་རླབས་ཐུག་ཕྲད་དུ་འཆར་བ་ཡིན་ནོ། །དེ་ཉིད་བརྟན་བྱེད་དུ་ཧཱུྃ་ཨཱཿ ༀ་ཞེས་བདུད་རྩི་ལན་གསུམ་བླུད་པས། རྩ་ཁམས་ཀྱི་དཔའ་བོ་དང་དཔའ་མོ་ཐམས་ཅད་མཉེས་པ་ལས་ཤར་བའི་ཉམས་སྣང་ཐམས་ཅད་གསལ་བདེ་མི་རྟོག་པར་གོ་རིམ་ངེས་མེད་དུ་འཆར་བ་ཡིན་ནོ། །དེས་གསང་བའི་དབང་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་སྟོན་པ་ཐུབ་པའི་དབང་པོས་རྡོ་རྗེ་གདན་དུ་ལྟ་སྟངས་ལྔས་སངས་རྒྱས་ཀྱི་ཡེ་ཤེས་རྗེས་ལ་ཐོབ་ཀྱང༌། བཞི་པ་མཁྱེན་པའི་ཡེ་ཤེས་ཡུལ་ལ་མ་ཁེལ་ནས་ཞག་བདུན་ཕྲག་བདུན་དུ་འཇིག་རྟེན་གྱི་ཁམས་ཀུན་བཅགས་ནས་སྤྱོད་ལམ་བཞི་ལ་བསླབ་པས་མཁྱེན་པའི་ཡེ་ཤེས་ཡུལ་ལ་འཁེལ་ཏེ། འཁོར་ལོ་བསྐོར་བ་ལས་བར་པའི་དུས་འཁོར་འདུས་པའི་དབུས་སུ་སྤྱོད་ལམ་བསྒྱུར་བས་བརྡའི་དོན་དེ་སྤྱན་རས་གཟིགས་ཀྱིས་ཁོང་དུ་ཆུད། ཤཱ་རིའི་བུས་དྲིས། འདུས་པའི་འཁོར་གྱིས་སྒྲོ་ཞིང་གླེང་བ་རྣམས། ཀུན་དགའ་བོས་བསྡུས། དོན་གྱི་བརྒྱུད་པ་བྱམས་མགོན་ལ་གཏད། ཐོགས་མེད་ནས་རིམ་པར་དམ་པ་རིན་པོ་ཆེ་ལ་བརྒྱུད་དེ་ད་ལྟའི་བར་དུ་མ་ཆད་པ་ཡིན་ནོ། །རྩ་བའི་དོན་དེ་སློབ་བུའི་རྒྱུད་ལ་ཇི་ལྟར་བསྐུར་ན། སྔར་སྦྱོར་ལམ་དུ་བསྟན་པའི་སྤྱན་ལྔ་དང༌། མཐོང་ལམ་དུ་བསྟན་པའི་ལྟ་སྟངས་ལྔ་པོ་འདིར་སྤྱོད་ལམ་བཞི་དང་བསྲེས་ནས་ཉམས་སུ་ལེན་པ་སྟེ། དེ་ཡང་རྩ་བའི་སྤྱོད་ལམ་འགྲོ་འཆགས་ཉལ་འདུག་བཞི་ལས། ཡན་ལག་གི་སྤྱོད་ལམ་ཉི་ཤུར་ཕྱེ་ལ་ཉམས་སུ་བླངས་ཏེ། དེའང་འདུག་པའི་སྤྱོད་ལམ་ལྔ་ནི། རྟེན་འབྲེལ་དག་པ་རྡོ་རྗེའི་སྐྱིལ་ཀྲུང༌། ཕྱེད་སྐྱིལ། ཙོག་པུ། བསྙེས་པ། རྒྱལ་པོ་རོལ་པའི་འདུག་སྟངས་སོ། །ཉལ་བ་ལྔ་ནི། གཡས་ཉལ། གཡོན་ཉལ། གན་རྐྱལ། ཁ་སྦུབས། མགོ་གཏུམས། བརླ་སྒྲིལ་ལོ། །ལངས་པ་ལྔ་ནི། ལངས་ཀ །ཕྱེད་ལངས། ལངས་པ། གོས་གྱོན་པ། ལས་ཀ་བྱེད་པའོ། །འགྲོ་བ་ལྔ་ནི། འགྲོ་བ། འགྲོ་འཕྲོ་ལ་འཆམས་པ། རྒྱུག་པ། རྒྱུག་འཕྲོ་ལ་འཆམས་པ། ངལ་བསོ་བའོ། །དེ་རྣམས་ལྟ་སྟངས་ལྔ་དང་ལྟ་སྟངས་རེ་རེ་ཡང་སྤྱན་སྔ་དང་སྦྱར་བས་མཉམ་བཞག་གི་དུས་སུ་བལྟས་ནས། རྗེས་ཀྱི་དུས་སུ་སློད་པ་ནི། ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ནོ། །གང་ལྟར་སྒོམ་ཡང༌། སྟེང་རླུང་མནན། འོག་རླུང་འཐེན། རླུང་འགྱུ་བ་བཅད་སྒྲིམ་ཤ་བཏོན་ལ། ཆུན་བདོ་བ་ལ་བཤིག །བཤིག་རྗེས་སོ་མར་ལྷོད་དེ། ཁྲེས་སེ༑ རྟོག་མེད་རང་དྭངས་སུ་རྗེན་ནེ་བཞག་ལ། བདེ་སྡུག་གི་རྐྱེན་གང་ལའང་ཐོགས་རྡུག་མེད་པར་ལམ་དུ་ཁྱེར་བས། སྒོམ་བློའི་འཆིང་བྱེད་བྲལ། ཐ་མལ་གྱི་རྟོག་པ་གསར་པས་མ་སླེབས་ཀྱི་བར་དེར། ཆོས་ཉིད་གཞིའི་དོན་ལ་ངེས་ཤེས་སད་ནས་ཐམས་ཅད་མཚན་ཉིད་མེད་པར་ཉམས་སུ་མྱོང་བར་འགྱུར་རོ། །དབང་དེ་བརྟན་པར་བྱ་བའི་ཕྱིར་རྗེས་སྤྱོད་ཐམས་ཅད་རྣམ་པར་དག་པར་ངོ་སྤྲོད་པར་བྱ་སྟེ། རྟེན་དག་པ་ཉན་ཐོས༑ སྒྲུབ་པ་དག་པ་རང་རྒྱལ། ལམ་དག་པ་བྱང་ཆུབ་སེམས་དཔའ། འབྲས་བུའི་དག་པ་སངས་རྒྱས་ཀྱི་རྣམ་པར་དག་པ་དང་བཞི་ཡིན་ནོ། །དེས་ཤེར་དབང་ངོ༌། །ད་ཚིག་དབང་བསྐུར་བ་ནི། པྲ་མ་ཎ་ཡེ་ཞེས་སྔགས་འབྲུ་བཅུས་རོ་སྙོམས་ཀྱི་རྟོགས་པ་འཆར་བྱེད་སྒྲུབ་པ་ཆེན་པོའི་སྔགས་ཡིན་པས། དེ་ཡང་དམིགས་པ་བླ་མ་ལ་གཏད་དེ་མཐོང་སྟངས་སྦྱངས་འགོད་པ་གནས་བཞིའི་ལྷ་རྣམས་གསལ་བཏབ་ལ་གུས་པ་བསྐྱེད། དགྲམ་པ་རྟེན་འབྲེལ་གྱི་རྫས་རྣམས་སྟེང་འོག་ཕྱོགས་བཞིར་དགྲམ། བརྗོད་པ་རོ་སྙོམས་ཀྱི་སྙིང་པོ་འདི་གསལ་ལ་དག་པར་བཟླ་དགོས་པས་འདིའི་ལུང་ལོང་ཞིག །ༀ་ཨཱཿ ཧྲཱིཿ གུ་རུ་པྲ་མ་ཎ་ཡེ་ཧཱུྃ། ཞེས་ལན་གསུམ། དེ་བརྟན་ཕྱིར་སྙིང་པོ་བཟླས་པའི་མེ་ཏོག་འཐོར་ཞིང༌། གྲུབ་པར་གྱུར་ཅིག །ཅེས་ལན་གསུམ། དེས་རོ་སྙོམས་ཀྱི་རྟོགས་པ་མྱུར་དུ་འཆར་བ་ཡིན་ནོ། །ད་མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ། བདག་འཛིན་གྱི་ཁ་མ་ཐེངས་ན་རང་ཐོག་ཏུ་བོ་བས། ཕོ་ངས་བྱས་ཀྱི་ངོ་སོ་མི་བྱ། འཁོན་འཛིན་བརྟེན་ན་གཞན་ཐོག་ཏུ་ཟགས་པས་གཞན་གྱིས་བརྙས་པ་ལ་ཀོ་ལོང་མི་བྱ། གཉིས་སྣང་གི་མཐའ་མ་ཁྲོལ་ན་གོ་ཐོག་ཏུ་ལྟེམས་པས་བདག་གཞན་གཉིས་སུ་མ་བཟུང༌། ཟག་པའི་འཕན་ལངས་ན་འཕྲུལ་ཐོག་ཏུ་ལོག་པས་ཆགས་སྡང་གི་རྗེས་མི་བཅད་པ་ལ་བསླབ་པར་བྱའོ། །དེ་ལྟར་སྦྱོར་དངོས་རྗེས་གསུམ་གྱིས་སྒོམ་ལམ་རོ་སྙོམས་ཀྱི་དབང་བྱིན་རླབས་ཚར་བ་ཡིན་པས་བླ་མ་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས། ཞེས་བརྗོད། རྗེས་ཆོག་རྣམས་བློ་སྦྱོང་ལྟར་རོ། །ལམ་ལྔ་ལས་སྒོམ་ལམ་རོ་སྙོམས་ཀྱི་དབང་ཆོག་ཚར་རོ། ། ཨྠིྀ།། ༈ །།ༀ་སྭ་སྟི། ལྔ་པ་ཐར་ལམ་བྱ་བྲལ་གྱི་ཡེ་ཤེས་འཐོབ་པར་བྱེད་པ་སྒོམ་པ་བདག་གཏོད་ཀྱི་བྱིན་རླབས་ལ། གླེགས་བམ་སོགས་བཤམ་ལུགས་གཞན་འདྲ་བ་ལས། ཁྱད་པར་བདུད་རྩིའི་ཕྲད་རྩི་མར་ལ་བྱ། བདག་བསྐྱེད་སྔོན་འགྲོས་ཚོགས་དང་དབང་རྫས་བྱིན་རླབས་སྔར་བཞིན་ལས། ཁྱད་པར་ཡིག་འབྲུ་ལས་བྱུང་བའི་རིགས་ལྔའི་ལྷ་རྣམས་རྡོ་ཚན་ལ་མར་བཞག་པ་ལྟར་ཞུ་ལ་ཁད་དམ་ནམ་ལངས་ཀྱི་སྐར་མ་ལྟར་ཡལ་ལ་ཁད་དུ་བྱིན་གྱིས་བརླབ་བོ། །དེ་ནས་སློབ་མ་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལ། འོ་སེམས་ཅན་ཐམས་ཅད་ཀྱི་དོན་དུ་མྱུར་དུ་ཡང་དག་པར་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་ཐར་ལམ་བགྲོད་པར་བྱེད་པ་སྒོམ་པ་བདག་གཏོད་ཀྱི་དབང་བསྐུར་མཁྱེན་པའི་ཡེ་ཤེས་གཞན་འཇུག་གི་བྱིན་རླབས་འདི་ཞུས་ནས་ཉམས་སུ་བླངས་སྙམ་པས་མ་ཡེངས་པར་གསན་འཚལ། དེ་ལ་འདིར་ནི་ཐེག་པ་ཐམས་ཅད་ཀྱི་རྩེ་བསྡུས་མི་ཤིགས་པ་རྡོ་རྗེ་ལྟ་བུའི་དབང་བསྐུར་ཞེས་བྱ་བ་འདི་གཞན་ལས་ཁྱད་པར་ལྔས་འཕགས་ཏེ། གླེགས་བམ་འདི་ནི་དྲན་པས་ཆོག་པའི་དབང་ཡིན་པ་དང༌། ཨཱ་ལི་ཀཱ་ལིའི་ཡིག་འབྲུ་འདི་ནི་མཐོང་བས་ཆོག་པའི་ལམ་ཡིན་པ་དང་། བྷཉྫའི་རྫས་འདི་ནི་ཟིན་པས་ཆོག་པའི་རྩི་ཡིན་པས་དང༌། དབང་ངོ་སྤྲོད་ཀྱིས་བསྐུར་བ་འདི་ནི་ཤེས་པས་ཆོག་པའི་གནད་ཡིན་པས་དང༌། ལྷའི་དོད་བླ་མས་མཛད་པ་འདི་ནི་འཕྲད་པས་ཆོག་པའི་བརྒྱུད་པ་ཡིན་པའི་ཕྱིར་ཁྱད་པར་འཕགས་པ་ལགས། དེ་ལྟ་བུའི་དབང་བཀའ་འདི་ནི། བདེ་གཤེགས་རྡོ་རྗེ་འཆང༌། ཡུམ་བདག་མེད་མ། རྗེ་བཙུན་དམ་པ་རིན་པོ་ཆེ། བྱང་སེམས་ཀུན་དགའ། སྤ་ཚབ། རྒྱལ་བ་ཏེ་ནེ། ཞིག་པོ་རིན་པོ་ཆེ་སྐུ་མཆེད་ནས་ད་ལྟ་ཡན་ཆོད་དུ་དབང་གི་ཆུ་བོ་འབབ་འཕྲོ་མ་ཆད། ཉམས་རྟོགས་ཀྱི་ན་བུན་འཐུལ་འཕྲོ་མ་ཆད། ལམ་རྟགས་ཀྱི་འཇའ་ཚོན་འཆར་འཕྲོ་མ་ཆད། བྱིན་རླབས་ཀྱི་ཆར་རྒྱུན་འབབ་འཕྲོ་མ་ཆད། ཡོན་ཏན་གྱི་ལོ་ཐོག་སྐྱེ་འཕྲོ་མ་ཆད། གྲུབ་ཐོབ་ཀྱི་ཕྲེང་ཐག་མ་ཆད་པ་ཡིན་པས་འདི་དང་འཕྲད་པ་སྐལ་བ་རེ་བཟང་སྙམ་དུ་སྤྲོ་བ་བསྐྱེད་པར་མཛད་འཚལ། དབང་དངོས་ལ་གསུམ་གྱི་ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་དབང་བཞིའི་ངོ་སྤྲོད་བྱ་བ་ལས། དང་པོ་བུམ་པའི་དབང་བཞི་བསྐུར་བ་ནི། འདི་ལྟར་སྣང་གྲག་དྲན་པའི་ཆོས་རྣམས་རང་ལ་སྣང་བ་མེད་པར་ནམ་མཁའ་ལ་སྤྲིན་དེངས་པ་ལྟར་གྱུར། གཞན་སྣང་ལས་སངས་རྒྱས་སྤྲུལ་པའི་སྐུ་གསུང་ཐུགས་སྣ་ཚོགས་སུ་སྣང་བས་ཕྲིན་ལས་རྒྱུན་མི་འཆད་པའི་རྟེན་འབྲེལ་སྒྲིགས་པར་བསམ་ལ་འདིའི་རྗེས། ཡིག་འབྲུ་རྣམས་ལ་མས་ནས་ཡར་ཐུར་མ་ལུགས་ལྡོག་གིས་བཙུགས་ཏེ། ཡི་གེ་རྣམས་ཨ་འབའ་ཞིག་ཏུ་ལན་བཞིར་བཀླག་པས། དང་པོས་གཟུགས་སྣང་ལྷ་སྐུ། གཉིས་པས་གྲགས་པ་སྒྲ། གསུམ་པས་འགྱུ་བྱེད་དྲན་རྟོག་རྣམས་མི་དམིགས་པར་གྱུར། བཞི་པས་ཆོས་ཉིད་ལ་ཡང་དག་ཏུ་འཛིན་པའི་རྟོག་པ་ཡང་བློ་བྲལ་གྱི་དབྱིངས་སུ་ཡལ་ཞིང༌། དེ་ལྟར་ཡལ་བའི་རང་བཞིན་མ་འགགས་ཙམ་འདི་སངས་རྒྱས་སྤྲུལ་པས་སངས་རྒྱས་ཀྱི་ཕྲིན་ལས་ཐམས་ཅད་མཛད་པ་ཡིན་ནོ། །ད་བུམ་དབང་དེ་ཉིད་བརྟན་བྱེད་དུ་ཡེ་ཤེས་ཀྱི་བདུད་རྩི་རང་ལུས་རྩ་ཁམས་ཀྱི་ལྷ་རྣམས་ལ་ཕོག་པ་རིགས་ལྔའི་ལྷ་ཚོགས་རྣམས་བར་སྣང་གི་ན་བུན་ལྟར་རང་བཞིན་མེད་པར་ཡལ་བའི་མོས་པ་མཛོད། ཅེས་བྷཉྫའི་བདུད་རྩི་སྤྱི་བོར་བཞག་ལ་ཨ་འབའ་ཞིག་ལྔ་བཅུ་བརྗོད། དེ་ལྟར་རང་སྣང་གི་འཛིན་པ་མི་དམིགས་པར་ཡལ་བས་དག་པའི་སྣང་བ་གདུལ་བྱ་གཞན་ངོར་འཆར་བའི་ཡོན་ཏན་འགགས་པ་མེད་པར་སྣང་བར་འགྱུར་བ་ཡིན་ནོ། །དེས་བུམ་པའི་དབང་བཞི་སོང༌། ད་གསང་དབང་བསྐུར་བ་ནི། གནས་བཞིར་བདུད་རྩིའི་ཐིག་ལེ་གཉིས་བཏུད་དུ་བཞག་ཅིང་སྔགས་ལན་གཉིས་བརྗོད་པར་བྱ་བ་སྟེ། དཔྲལ་བར་བོ་དྷི་ཙིཏྟ་ཨཿ ཞེས་དང་པོས་དོན་དམ་བྱང་སེམས་ཀྱི་རྟོགས་པ་བརྟན་པར་གྱུར་པས་བདེ་ཆེན་འཁོར་ལོ་ལྷ་རྣམ་སྣང་འོད་དུ་ཞུ་སྟེ་མི་དམིགས་པར་གྱུར། གཉིས་པ་ཀུན་རྫོབ་བྱང་ཆུབ་ཀྱི་སེམས་ལ་ཐུགས་རྗེའི་ནུས་པ་རྒྱས་ཏེ་རང་ལུས་འགྲོ་བ་གང་གིས་མཐོང་བ་དེའི་ལུས་ཀྱི་སྡིག་སྒྲིབ་འདག་ནུས་པར་གྱུར། ཡང་མགྲིན་པར་བོ་དྷི་ཙིཏྟ་ཨཱཿ ཞེས་དང་པོས་ལོངས་སྤྱོད་འཁོར་ལའི་འོད་དཔག་མེད་མི་དམིགས་པར་ཡལ། གཉིས་པ་ཀུན་རྫོབ་བྱང་སེམས་ཀྱི་ནུས་པ་རྒྱས་ཏེ་རང་གི་གསུང་སུས་ཐོས་ཀྱི་ངག་གི་སྡིག་སྒྲིབ་འདག་ནུས་པར་གྱུར། ཡང་སྙིང་གར་བོ་དྷི་ཙིཏྟ་ཧཱུྃ། ཞེས་དང་པོས་ཆོས་ཀྱི་འཁོར་ལོའི་མི་བསྐྱོད་པ་མི་དམིགས་པར་ཡལ། གཉིས་པས་ཀུན་རྫོབ་ཀྱི་ནུས་པ་རྒྱས་ཏེ་རང་གི་ཉམས་རྟོགས་མངོན་ཤེས་ཀྱིས་གཞན་བདེ་བ་ལ་འགོད་ཅིང་སུས་དྲན་གྱི་ཡིད་སྒྲིབ་འདག་ནུས་པར་གྱུར། ཡང་ལྟེ་བར་བོ་དྷི་ཙིཏྟ་ཧྲཱིཿ ཞེས་དང་པོས་སྤྲུལ་པའི་འཁོར་ལོ་རིན་འབྱུང་མི་དམིགས་པར་ཡལ། གཉིས་པས་ཀུན་རྫོབ་ལ་ནུས་པ་ཐོབ་སྟེ་རྗེས་སུ་འཇུག་པའི་སློབ་མ་ལ་ཡོན་ཏན་སྐྱེས་ནས་དྲན་རྟོག་ཐམས་ཅད་སངས་རྒྱས་ཀྱི་ཕྲིན་ལས་སུ་འཆར་ནུས་པར་འགྱུར། དེ་ཉིད་བརྟན་བྱེད་དུ་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས་རྩ་ཁམས་ཀྱི་དཔའ་བོ་དང་དཔའ་མོ་རྣམས་དགྱེས་པ་ལས་སྐལ་ལྡན་ལ་དག་སྣང་དུ་ཤར་བའི་དངོས་རྟགས་རང་ལ་ང་རྒྱལ་མེད་པར་མཚན་དཔེ་སོགས་སངས་རྒྱས་ཀྱི་ཡོན་ཏན་གཞན་ངོ་ལ་སྣང་བར་འགྱུར་ཏེ། འགྲོ་དོན་རྩོལ་མེད་ལྷུན་གྲུབ་ཏུ་འབྱུང་བ་ཡིན་ནོ། །དེས་གསང་དབང་སོང༌། ད་ཤེས་རབ་ཡེ་ཤེས་ཀྱི་དབང་བསྐུར་བ་ནི། སྔོན་བྱུང་སྟོན་པ་ཐུབ་པའི་དབང་པོས་སྙིང་པོ་དོན་གྱི་བསམ་གཏན་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ལ་བརྟེན་ནས། ཡེ་ཤེས་བཞི་པོ་ཐུགས་སུ་ཆུད་དེ། གཞན་དོན་མཛད་པར་དགོངས་པ་ལ། ལྷ་ཚངས་པས་གསོལ་བ་བཏབ་པས་ཞལ་གྱིས་བཞེས་ཏེ། མཆོད་རྟེན་རྣམ་དག་ལ་ལྟ་སྒོམ་གྱི་ཞེན་པ་ཕུལ་ནས་སྒོམ་པ་བདག་པོ་ལ་གཏད། གཞན་དོན་ཕྲིན་ལས་ཀྱི་ལུང་བླངས་ཏེ་ཝཱ་ར་ཎ་སིར་བདེན་པ་བཞིའི་ཆོས་འཁོར་བསྐོར། དེ་ནས་བྱ་རྒོད་ཕུང་པོའི་རི་དང་རྒྱལ་པོའི་ཁབ་ཏུ་སྙིང་པོ་དོན་གྱི་འཁོར་ལོ་བསྐོར་བ་རྣམས། ཀུན་དགའ་བོས་བསྡུས། དོན་བརྒྱུད་འཕགས་པ་བྱམས་པས་ཟིན་ཏེ། རིམ་པར་ཐོགས་མེད་སོགས་འཕགས་པའི་བརྒྱུད་པ་གསུམ། སྤྲུལ་པའི་སྐུ་གཅིག །གྲུབ་ཐོབ་ཀྱི་བརྒྱུད་པ་གསུམ་སྟེ་བདུན་གྱི་བར་ཆིག་བརྒྱུད་དུ་བབས་པ་ལས། ཞིག་པོ་སྐུ་མཆེད་དང་ཐམས་ཅད་མཁྱེན་པ་ཡབ་སྲས་སོགས་མཁས་གྲུབ་ཀྱི་སྐྱེས་བུ་དམ་པ་རྣམས་ཀྱིས་ལེགས་པར་སྤེལ་བས་ད་ལྟའི་བར་དུ་སྙིང་པའི་དོན་བརྒྱུད་མ་ཆད་པ་ཡིན་ནོ། །རྩ་བའི་དོན་དེ་སློབ་མའི་རྒྱུད་ལ་ཇི་ལྟར་བསྐུར་ན། གླེགས་བམ་གྱི་དབུས་སུ་མཉྫིའི་སྟེང་དུ་ཞི་བའི་འབྲང་རྒྱས་བཞག་པ་ལ་གཟུངས་ཐག་བཏགས་ཏེ་དེ་ལ་དཔོན་སློབ་ཐམས་ཅད་ཀྱིས་འཇུས་ནས། འོ་བཟླས་ལུང་དབོག་ཅིང་སྒོམ་པ་བདག་པོ་ལ་གཏོད་པ་ཡིན་པས་འདིའི་རྗེས་ཟློས། ༀ་ཤཱནྟིང་ཀུ་རུ་སྭཱ་ཧཱ། ཞེས་ཉི་ཤུ་རྩ་གཅིག་དང༌། ད་ནི་བདག་མཉམ་རྗེས་དབྱེར་མེད་དུ་འདྲེས་ཕྱིན་ཆད་ནས། སེམས་ཅན་གྱི་དོན་ལས་རང་དོན་དུ་བལྟ་རྒྱུ་མེད་དོ། །མི་ལྟ། ལྟ་རེ་ཤི། ལྟ་ནའང་ང་ལ་སྡིག །མི་སྒོམ། སྒོམ་རེ་ཤི། སྒོམ་ནའང་ང་ལ་སྡིག །མི་སྤྱོད། སྤྱོད་རེ་ཤི༑ སྤྱོད་ནའང་ང་ལ་སྡིག །མི་སྒྲུབ། སྒྲུབ་རེ་ཤི། སྒྲུབ་ནའང་ང་ལ་སྡིག །ཅེས་བྲོ་བོར། སློབ་དཔོན་གྱིས། འོ་རང་འདོད་ཀྱི་ལྟ་སྤྱོད་སྒོམ་སྒྲུབ་རྣམས་སྤོངས་ལ། རྗེས་སྤྱོད་ཞི་བའི་ཕྲིན་ལས་ཀྱིས་སེམས་ཅན་གྱི་དོན་མཛོད་ཅིག །ཅེས་བརྗོད། དེ་བཞིན་དུ་ཞི་བའི་འབྲང་རྒྱས་ཤུལ་དུ་རྒྱས་པ་སོགས་ཀྱི་འབྲང་རྒྱས་རིམ་པར་སྤོ་བ་ལ་གཟུངས་ཐག་ནས་འཇུས་ཏེ། རྒྱས་པ་ལ། ༀ་པུཥྚིང་ཀུ་རུ་སྭཱ་ཧཱ། དབང་ལ། ༀ་ཝ་ཤཾ་ཀུ་རུ་སྭཱ་ཧཱ། དྲག་པོ་ལ། ༀ་རཀྵ་ཀུ་རུ་སྭཱ་ཧཱ། ཞེས་ཉེར་གཅིག་རེའི་རྗེས་སུ། ལྟ་སྤྱོད་སྒོམ་སྒྲུབ་བཞི་རང་དོན་ལ་འཁྲིས་པའི་གཉེན་པོ་བཤིག་བྱེད་ཀྱི་མནའང་སྐྱལ་དུ་གཞུག་ཅིང༌། རྗེས་སྤྱོད་ཕྲིན་ལས་གང་བྱེད་ཀྱིས་སེམས་ཅན་གྱི་དོན་མཛོད་ཅིག །ཅེས་གདམས་སོ། །དེ་ནས་ལུང་སྟོན་པའི་སྒོ་ནས་སྤྲོ་བ་བསྐྱེད་པ་ནི། ཨཀྵཿ ལྔ་བཅུ་པོ་ནས་དང་བསྲེས་པ་ཐོད་པའི་ནང་དུ་བླུགས་ལ་བླ་མས་རྟེན་འབྲེལ་སྙིང་པོ་མང་དུ་བཟླས་རྗེས། དཀོན་མཆོག་གསུམ་གྱི་བདེན་པ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས་པ་དང༌། ཆོས་ཉིད་རང་བཞིན་གྱིས་རྣམ་པར་དག་པའི་རྩལ་སྣང་རྟེན་འབྲེལ་བསླུ་བ་མེད་པའི་བདེན་པས་ལུང་གསལ་པོར་སྟོན་ཅིག །ཅེས་དམོད་དོར་ནས། སློབ་མར་ཡི་གེ་ལེན་དུ་བཅུག་ལ། དེ་བླ་མ་ལ་ཕུལ་ནས༑ བླ་མས་ལུང་སྟོན་ཏེ། ཀ་ཁ་ག་གྷ་ང༌ཨཱི་ར་ཡ་ཤ་རྣམས་གང་རིགས་འདུག་ན། འདི་ནི་ཤར་ཕྱོགས་རླུང་གི་ཡི་གེ་ཡིན་པས། ཁྱོད་ཞིང་ཁམས་མངོན་པར་དགའ་བར་སངས་རྒྱས་མི་བསྐྱོད་པའི་རིགས་སུ་འཚང་རྒྱ། མཚན་རྡོ་རྗེའམ་ཡི་གེ་གང་ཡིན་ལས་གྲས་པའི་མཚན་ཐོབ། བརྒྱུད་པ་ཟིན་པའི་སློབ་མ་ཤར་ནས་འོང༌། ཡི་དམ་རྡོ་རྗེའི་རིགས་སྒྲུབ་ཐག་ཉེ། ནད་རླུང་ནད་ལྡང༌། གདོན་རྒྱལ་འགོང་གནོད། མི་རིགས་རླུང་ཤས་ཆེ། ལྷ་མིན་གྱི་སྐྱེ་སྒོ་དགག་པའི་ཐབས་ལ་འབད་པར་བྱ། རང་གི་མིང་ཡིག་ཐོག་མ་དང་ངོས་བཟུང་བའི་ཡི་གེ་གཅིག་ཏུ་བབས་ན་རབ། མ་བུ་གྲོགས་སུ་གྱུར་པ་འབྲིང༌། དགྲ་གཤེད་དུ་གྱུར་ན་ཐ་མའོ། །ཡང༌། ཙ་ཚ་ཛ་ཛྷ་ཉ་ཨེ་ཨཽ་རཱ་ར་ཥ། འདི་ནི་ལྷོ་ཕྱོགས་མེའི་ཡི་གེ་ཡིན་པས། ཁྱོད་ཞིང་ཁམས་དཔལ་དང་ལྡན་པར་རིན་ཆེན་འབྱུང་གནས་ཀྱི་རིགས་སུ་འཚང་རྒྱ། མཚན་རིན་ཆེན་ནམ་རང་ཡིག་ལས་གྲས་པ། བརྒྱུད་འཛིན་ལྷོ། ལྷོ་རིན་ཆེན་རིགས། ནད་ཚད་པ། གདོན་ཕོ་གདོན། མི་རིགས་མེ། དམྱལ་བའི་སྐྱེ་སྒོ་བགག །རང་གི་མིང་ཐོག་བབས་པ་རབ། མ་བུ་གྲོགས་གསུམ་འབྲིང༌། དགྲ་གྱུར་ཐ་མའོ། །ཡང༌། ཊ་ཋ་ཌ་ཌྷ་ཎ་ཨ་ཨཱ་ཨཾ་ཨཱཿ ཀྵ། འདི་ནི་ནུབ་ཕྱོགས་ནམ་མཁའ་ལྕགས་ཀྱི་ཡི་གེ་ཡིན་པས། ཁྱོད་བདེ་བ་ཅན་དུ་སྣང་མཐའི་རིགས་སུ་འཚང་རྒྱ། མིང་པདྨའམ་རང་ཡིག་ལ་གྲས་པ། བརྒྱུད་འཛིན་ནུབ། ལྷ་པདྨའི་རིགས། ནད་ལྷ་ནད། གདོན་ལྷ་གདོན། མི་རིགས་ནམ་མཁའ། ལྷའི་སྐྱེ་སྒོ་དགག །མིང་ཡིག་ཐོག་མ་ལ་བབས་པ་རབ། མ་བུ་གྲོགས་གསུམ་འབྲིང༌། དགྲ་གྱུར་ཐ་མའོ། །ཡང༌། པ་ཕ་བ་བྷ་མ་ཨུ་ཨཱུ་ལ་ཧ་ཝ། འདི་ནི་བྱང་ཕྱོགས་ཆུའི་ཡི་གེ་ཡིན་པས། ཞིང་ཁམས་ལས་རབ་ཏུ་དོན་ཡོད་གྲུབ་པའི་རིགས་སུ་འཚང་རྒྱ། མིང་ཀརྨའམ་རང་ཡིག་ལས་དྲངས་པ་བརྒྱུད་འཛིན་བྱང༌། ལྷ་ལས་རིགས། ནད་གྲང་བ། གདོན་མོ་གདོན། མི་རིགས་ཆུ། ཡི་དྭགས་ཀྱི་སྐྱེ་སྒོ་དགག །རང་གི་མིང་ཡིག་ཐོག་མ་བྱུང་ན་རབ། མ་བུ་གྲོགས་གསུམ་འབྲིང༌། དགྲར་གྱུར་ཐ་མའོ། །ཡང༌། ཏ་ཐ་ད་དྷ་ན་ཨོ་ཨཽ་ལ་ལ་ས། འདི་ནི་དབུས་དང་མཚམས་ཀྱི་ཡི་གེ་ཡིན་པས། ཞིང་སྟུག་པོ་བཀོད་པར་རྣམ་སྣང་གི་རིགས་སུ་འཚང་རྒྱ། མཚན་དེ་བཞིན་གཤེགས་པའམ་ཡི་གེ་གང་ཡིན་ལས་གྲས་པ། བརྒྱུད་འཛིན་དབུས་སམ་མཚམས་ནས་འོང༌། ལྷ་བུདྡྷའི་རིགས། ནད་ས་ནད། གདོན་ས་གདོན། མི་རིགས་ས། འདོད་ལྷའི་སྐྱེ་སྒོ་དགག་པ་ལ་འབད། རང་གི་མིང་ཡིག་ཐོག་མ་བྱུང་ན་རབ། མ་བུ་གྲོགས་གསུམ་འབྲིང༌། དགྲ་གྱུར་ཐ་མའོ། །དེ་ཡང་ཡི་གེའི་རིགས་དང་མ་བུ་དགྲ་གྲོགས་ལ་བརྟེན་ནས། རབ་ཏུ་གྱུར་ན་བླ་མ་བརྟེན་དུས་ནས་རང་གཞན་གྱི་དོན་གྲུབ༑ འབྲིང་གིས་དཀའ་ཐུབ་ཐེམས་དུས་ནས་རང་གཞན་གྱི་དོན་གྲུབ། ཐ་མས་དཔའ་ཆེན་ལས་ལ་སྦྱར་དུས་ནས་རང་གཞན་གྱི་དོན་སྒྲུབ་ནུས་པ་ཡིན་ནོ། །དེས་ཤེར་དབང་སོང༌། ད་ཚིག་དབང་བསྐུར་བ་ནི། ལས་ལ་སྦྱར་བའི་སྔགས་སྒོམ་པ་བདག་གཏོད་ཀྱི་སྙིང་པོ་ཅི་བྱས་གཞན་དོན་འབའ་ཞིག་ཏུ་འགྲོ་བའི་སྔགས་ཡིན་པས་འདིའི་ལུང་ལོང་ཞིག །ༀ་ཨཱཿ ཧྲཱིཿ གུ་རུ་བྷུ་ཧུ་ཀུ་རུ་ཧཱུྃ། ཞེས་ལན་གསུམ། དེ་བརྟན་བྱེད་ཀྱི་སྙིང་པོ་བཟླས་པའི་མེ་ཏོག་འཐོར་ཞིང༌༑ གྲུབ་པར་གྱུར་ཅིག །ཅེས་ལན་གསུམ། དེས་སངས་རྒྱས་ཐམས་ཅད་ཀྱི་ཕྲིན་ལས་པ་བླ་མ་སྤྲུལ་པའི་སྐུའི་སྐུ་གསུང་ཐུགས་སློབ་མའི་ལུས་ངག་ཡིད་གསུམ་ལ་གཉིས་མེད་དུ་ཐིམ་པས་ཤེས་སྒྲིབ་ཕྲ་མོ་རྣམས་ཀྱང་དག །ཚོགས་ཆེན་རྫོགས་ནས་དབང་ཕྱུག་ཆེན་པོ་དྲུག་ཀ་དུས་གཅིག་ལ་ཐོབ་པར་འགྱུར་བ་ཡིན་ནོ། །ད་མཇུག་གི་ཆོས་གསུམ་སྟེ། རྟེན་སྡོམ་པ་གསུམ་དང་ལྡན་ཞིང༌། རྣལ་འབྱོར་གྱི་རང་ས་དྲུག་མ་ཉམས་པའི་སྒྲུབ་པ་པོ་དེས་དྲི་མ་བཞི་བསྲུང་བར་བྱ་སྟེ། འཁོར་བ་སྤང་བྱར་མཐོང་ན་རང་ཐོག་ཏུ་བོ་བས་རིགས་དྲུག་རང་སེམས་སུ་ཤེས་པར་བྱ། འབྲས་བུའི་སྒྲུབ་བློ་མ་དག་ན་གཞན་ཐོག་ཏུ་ཟགས་པས་སྐུ་བཞི་རང་ཆས་སུ་ཤེས་པར་བྱ། རེ་དོགས་ཀྱི་མཐའ་མ་སེལ་ན་གོ་ཐོག་ཏུ་ལྟེམས་པས་ཡུལ་སེམས་ཐམས་ཅད་བསམ་པའི་རང་གཟུགས་སུ་ཤེས་པར་བྱ། སྤྱོད་ལམ་ཐ་མལ་དུ་ཤོར་ན་ཚེ་འདིར་ལོག་པས་མི་ཚེ་སྒྲུབ་པ་ལ་བསྐྱལ་བར་བྱའོ། །དེ་ལྟར་སྦྱོར་དངོས་རྗེས་གསུམ་གྱི་མཐར་སྒྲུབ་པ་སྒོམ་པ་བདག་གཏད་ཀྱི་དབང་བསྐུར་བ་ཚར་བ་ཡིན་པས་ངེད་ལ་གཏོང་རག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས་ཞེས་བརྗོད། ལམ་ཕྱི་མ་བཞི་ལའང་འཇུག་ཡོན་དང་ལམ་ལྔ་ཀའི་རྗེས་སུ་གཏོང་རག་གི་མཎྜལ་འབུལ་བ་དབང་ཆོག་ལས་མི་འབྱུང་ཡང་སྤྱི་འགྲོ་ལྟར་ཕྱག་ལེན་དུ་གནང་བ་མི་འགལ་ལོ། །རྗེས་ཆོག་བདུན་པོ་བློ་སྦྱོང་ལྟར་བྱའོ། །ལམ་ལྔ་ལས་ཐར་ལམ་སྒོམ་པ་བདག་གཏོད་ཀྱི་དབང་སྟེ་ལམ་ལྔའི་དབང་ཆོག་ཚར་རོ། ། ཨྠིྀ།། ༈ །།ༀ་སྭ་སྟི། གཉིས་པ་དབང་པོ་འབྲིང་གི་གང་ཟག་སྨིན་པར་བྱེད་པ་ལམ་གསུམ་གཞུང་མའི་དབང་ལ་གསུམ་ལས། དང་པོ་བློ་སྦྱོང་ནི་སྔ་མ་དང་འདྲ་བ་ལས་ལམ་ལྔ་ཐོབ་པ་དེས་གོ་ཆོད་མོད། མ་ཐོབ་ན་འདིར་བླངས་ནས་བསྐུར་རོ། །གཉིས་པ་དཀའ་ཐུབ་ལ། བཤམས་བཀོད་དང་བདུད་རྩིའི་ཕྲད་ཀ་རས་བྱ་བ་རྣམས་འདྲ་བ་ལས། ཁྱད་པར་ཡིག་འབྲུ་རྣམས་བླ་མ་ལོངས་སྐུ་བདེ་མཆོག་གི་ལྷ་ཚོགས་སུ་བྱིན་གྱིས་བརླབས། དེ་ནས་སློབ་མ་རྣམས་འདུས་པ་དང༌། འོ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དབང་འབྲིང་སྨིན་བྱེད་ལམ་གསུམ་གཞུང་མ་ལ་ལེགས་པའི་ལམ་གསུམ་ལས་བློ་སྦྱོང་ཚར་ནས་འདིར་དཀའ་ཐུབ་ཀྱི་དབང་ཞུས་ནས་ཉམས་སུ་བླང་སྙམ་པས་གསན་འཚལ། དེའང་དབྱིངས་རྣལ་འབྱོར་གསུམ་ལས། བྱེད་པ་ལམ་གྱི་རྣལ་འབྱོར་ལ་ཡང་གསུམ་གྱི་གཉིས་པ་དཀའ་ཐུབ་ཀྱི་དབང་གི་སྐབས་ཡིན། འདི་ལའང་གཞན་ལས་ཁྱད་པར་ལྔས་འཕགས་པའི་དབང་བཀའ་སྲོལ་འགྲན་ཟླ་དང་བྲལ་བ་ལགས་པས་ཐུགས་སྤྲོ་བ་བསྐྱེད་ནས༑ ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་ལ་དབང་བཞི་ལས། དང་པོ་བུམ་པའི་དབང་ནི༑ མིག་ཡུལ་གྱི་གཟུགས་སྣང་དང་རང་གི་ཕུང་ཁམས་སྐྱེ་མཆེད་སྐྲ་སེན་སོགས་ཐམས་ཅད་བླ་མ་བདེ་མཆོག་ཡབ་ཡུམ་གྱི་སྐུར་སྒོམ་ལ་འདིའི་རྗེས་ཟློས། ཐུར་མ་བཙུགས་ལ་ཨཱཀྵཿ བརྗོད། རྣ་བའི་ཡུལ་གྱི་སྒྲ་གྲགས་དང༌། རང་གི་བརྗོད་པ་ཐམས་ཅད་བླ་མ་བདེ་མཆོག་གི་གསུང་དུ་མོས་ལ་ཨཱཀྵཿ བརྗོད། གཞན་སྣང་གི་དྲན་རྟོག་དང་རང་གི་འཆར་སྒོ་ཐམས་ཅད་བླ་མ་བདེ་མཆོག་གི་ཐུགས་སུ་མོས་ལ་ཨཱཀྵཿ སྣང་གྲགས་དྲན་པའི་ཆོས་ཐམས་ཅད་ཀྱང་རང་གི་སེམས་ལས་བྱུང་ཞིང་སེམས་གདོད་ནས་སྟོང་པ་ཉིད་དུ་དག་པ་ལས་སྣང་གྲག་དྲན་པ་ཐམས་ཅད་རང་བཞིན་མ་འགགས་པའི་རང་རྩལ་ཙམ་དུ་ཤེས་པ་འདིའི༴ ཨཱཀྵཿ བརྗོད། བརྟན་བྱེད་བདུད་རྩིའི་རྡུལ་ཕྲ་རབ་རེ་རེ་བཞིན་བདེ་མཆོག་ཏུ་གྱུར་པ་སྤྱི་བོ་ནས་ཐིམ་པས་རྩ་ཁམས་ཀྱི་ཡི་གེའི་སྒྲིབ་པ་དག་ནས་ཡི་གེ་རྣམས་བླ་མ་བདེ་མཆོག་ཡབ་ཡུམ་གྱི་སྐུར་གྱུར་པའི་མོས་པས། ཐོད་པའི་བདུད་རྩི་སྤྱི་བོར་བཞག་ཅིང་ཨཱཀྵཿ ཚར་གཅིག་བརྗོད་དོ། །གསང་དབང་བསྐུར་བ་ནི། ཨ་བྷི་ཥིཉྩ་ༀ། ཨ་བྷི་ཥིཉྩ་ཨཱཿ ཨ་བྷི་ཥིཉྩ་ཧཱུྃ། ཨ་བྷི་ཥིཉྩ་ཧྲཱིཿ ཞེས་གནས་བཞིར་སྲིན་ལག་གིས་བདུད་རྩིའི་ཐིག་ལེ་བཀོད་པས་བླ་མ་དང་དབྱེར་མེད་པའི་བདེ་མཆོག་སྤྱི་བོར་དཀར་པོ། མགྲིན་པར་དམར་པོ། ཐུགས་ཀར་སྔོན་པོ༑ ལྟེ་བར་སེར་པོ་རྣམས་ཚོན་གང་བ་རེ་རེས་རྒྱས་བཏབ་པར་གྱུར། བརྟན་བྱེད་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས། ཡི་དམ་གྱི་ལྷ་ཐམས་ཅད་ཀྱི་ཐུགས་དམ་དུས་གཅིག་ལ་སྐོང་ནས་ཉམས་རྟོགས་དངོས་གྲུབ་ཐམས་ཅད་ཐོབ་པར་བསམ་མོ། །ཤེར་དབང་བསྐུར་བ་ནི། ལུས་ཆོས་བདུན་བཅའ། ངག་རླུང་ཁ་སྦྱར། རླུང་སེམས་འོད་གསལ་གྱི་མདངས་ལ་བཅིངས་ཏེ། ཐུན་འགོར་སྒྲིམས་སློད་ཀྱི་ཚུལ་གྱིས་སྤྱན་ལྔ་དང་སྦྱར་བས་དུག་ལྔའི་རྟོག་པ་ཕྲ་རགས་བཅད། ཐུན་མཇུག་ཏུ་ལྟ་སྟངས་ལྔས་རེ་དོགས་ཆགས་སྡང་ཆེ་ཐབས་དང་ལྔ་པོ་རང་སར་འདག་ཏུ་བཅུག །མཉམ་བཞག་དེ་ལས་ལངས་ནས་ཐུན་མཚམས་སུ་སྤྱོད་ལམ་བཞི་ཀ་ལ་ལྟ་སྟངས་ལྔ་བསྒྱུར། ལྟ་སྟངས་རེ་ལ་སྤྱན་ལྔས་སྒྲིམ་སློད་ཀྱི་ཚུལ་གྱིས་ཉམས་སུ་བླང་འཚལ། བརྟན་བྱེད་སྣང་གྲགས་འགྱུ་གསུམ། སྒྱུ་མ། བྲག་ཆ། ཆུ་བུར་ལྟར་ཤེས་པར་མཛོད་ཅིག །ཚིག་དབང་བསྐུར་བ་ནི། དམ་པ་རིན་པོ་ཆེ་བརྒྱུད་པ་དང་བཅས་པའི་བླ་མ་གྲུབ་ཐོབ་རྣམས་ཀྱི་ཡི་དམ་བདེ་མཆོག་ལགས་པས་སྙིང་པོ་འདིའི་རྗེས། ༀ་ཨཱཿ ཧྲཱིཿ གུ་རུ་ཧ་ཧ་ཧཱུྃ་ཧཱུྃ་ཕཊ་ཧཱུྃ། ཞེས་ཅི་འགྲུབ་བཟླ། བརྟན་བྱེད་བླ་མ་དང་གཉིས་སུ་མེད་པའི་བདེ་མཆོག་རང་ལ་ཐིམ་པར་སྒོམས་ཤིག །མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་ལན་གསུམ། དེ་ལྟར་དབང་བཞི་རྫོགས་ནས་མཇུག་གི་ཆོས་གསུམ་ནི། རྟེན་སྡོམ་པ་གསུམ་དང་ལྡན་ཞིང༌། རྣལ་འབྱོར་གྱི་རང་ས་དྲུག་མ་ཉམས་པའི་སྒོ་ནས༑ དཀའ་ཐུབ་ཀྱི་བོ་ཟགས་ལྟེམས་ལོག་བཞིའི་དྲི་མ་བསྲུང་བ་ལ་འབད་པར་མཛོད་ཅིག །དེས་དཀའ་ཐུབ་ཀྱི་བྱིན་གྱིས་བརླབས་ཚར་བས་དྲིན་ཕྱག་གསུམ་འཚོལ་ལ། བཀའ་དྲིན་ཆེ་ལགས། ཞེས་བརྗོད། རྗེས་ཆོག་བདུན་སྔར་ལྟར་རོ།། ༈ །།གསུམ་པ་ཐར་ལམ་བདག་གཏོད་ལ། བཤམས་བཀོད་བདུད་རྩིའི་ཕྲད་སོགས་སྔར་གྱི་ཐར་ལམ་ལྟར་ལས། ཁྱད་པར་ཡིག་འབྲུའི་ལྷ་རྣམས་མི་དམིགས་པར་ཡལ་བ་ལས་མཁའ་འགྲོ་སྡེ་ལྔར་བྱིན་གྱིས་བརླབ་བོ། །དེ་ནས་སློབ་མ་རྣམས་གྲལ་དུ་འཁོད་པ་དང༌། སེམས་ཅན་གྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ལེགས་པའི་ལམ་གསུམ་པ་ཐར་ལམ་བདག་གཏོད་ཡེ་ཤེས་གཞན་འཇུག་གི་དབང་ཞུས་ནས་ཉམས་སུ་བླང་སྙམ་པས་གསན་འཚལ། དབང་འདི་ཡང་དབང་གཞན་ལས་ཁྱད་པར་ལྔས་འཕགས་པས་ཐུགས་སྤྲོ་བ་བསྐྱེད་ནས་ཐོག་མར་སྦྱོར་བ་སྐྱབས་སེམས་ཀྱི་རྗེས་ཟློས། བླ་མ་དམ་པ་རྣམས་ལ་སོགས་ལན་གསུམ་བརྗོད། དངོས་གཞི་ལ་དབང་བཞི་ལས། བུམ་དབང་ནི། གླེགས་བམ་གྱི་ཡིག་འབྲུ་ལ་ཐུར་མ་ལུགས་ལྡོག་གིས་བཙུགས་པ་ལ་ཨ་འབའ་ཞིག་ལྔ་བཅུ་ཚར་བཞི་བརྗོད། དང་པའི་ཚེ་སྐད་ཅིག་དང་པོ་ལ་ལྷར་འཛིན་གྱི་སྣང་བ་དབྱིངས་སུ་ཐིམ་ནས། སྐད་ཅིག་གཉིས་པ་ལ་མ་འགགས་པའི་རང་རྩལ་དུ་སྣང་བ་ཐམས་ཅད་བླ་མ་དང་གཉིས་སུ་མེད་པའི་མཁའ་འགྲོ་སྡེ་ལྔའི་སྐུར་ཤེས་པར་གྱིས་ཤིག །ལན་གཉིས་པའི་ཚེ། སྐད་ཅིག་དང་པོ་ལ་གྲག་པ་གསུམ་འཛིན་དབྱིངས་སུ་ཐིམ་ནས། སྐད་ཅིག་གཉིས་པར་མ་འགགས་པའི་རང་རྩལ་སྒྲ་ཐམས་ཅད་བླ་མ་མཁའ་འགྲོའི་གསུང་དུ་ཤེས་པར་གྱིས་ཤིག །ལན་གསུམ་པའི་ཚེ། སྐད་ཅིག་དང་པོ་ལ་དྲན་རྟོག་ཐུགས་འཛིན་དབྱིངས་སུ་ཐིམ་ནས། སྐད་ཅིག་གཉིས་པར་མ་འགགས་པའི་རང་རྩལ་དུ་དྲན་རྟོག་ཐམས་ཅད་བླ་མ་མཁའ་འགྲའི་ཐུགས་སུ་ཤེས་པར་གྱིས་ཤིག །བཞི་པའི་ཚེ། སྐད་ཅིག་དང་པོ་ལ་སྣང་གྲགས་དྲན་རྟོག་སེམས་ལས་བྱུང་ཞིང་སེམས་སྟོང་པ་ཉིད་ཀྱི་དབྱིངས་སུ་ཐིམ་ནས། སྐད་ཅིག་གཉིས་པ་ལ་དེའི་རང་རྩལ་ལས་འགྲོ་དོན་ཕྱོགས་མེད་དུ་གྲུབ་པའི་མོས་པ་མཛོད། བརྟན་བྱེད་བདུད་རྩིའི་ཆར་གྱི་རྣམ་པར་ཚངས་བུག་ནས་ཐིམ་པས་རྩ་ཁམས་ཀྱི་ལྷ་ཚོགས་དབྱིངས་སུ་ཐིམ་ནས་རྩ་ཁམས་ཐམས་ཅད་མཁའ་འགྲོ་སྡེ་ལྔར་གྱུར་པར་སྒོམས་མཛོད། ཅེས་ཐོད་པའི་བདུད་རྩི་སྤྱི་བོར་བཞག་ཅིང་ཨཀྵཿ ལྔ་བཅུ་བརྗོད། གསང་དབང་ནི། བོ་དྷི་ཙིཏྟ་ༀ། བོ་དྷི་ཙིཏྟ་ཨཱཿ བོ་དྷི་ཙིཏྟ་ཧཱུྃ། བོ་དྷི་ཙིཏྟ་ཧྲཱིཿ ཞེས་སྔགས་བཞི་པོ་རེ་རེ་ནས་ཚར་གཉིས་བཟླས་པ་དང་བསྟུན། གནས་བཞིར་བདུད་རྩིའི་ཐིག་ལེ་གཉིས་རེ་བྱས་པའི་དང་པའི་རྐྱེན་གྱིས༑ འཁོར་ལོ་བཞིའི་ལས་བཞི་པོ་འོད་དུ་ཞུ་ནས་མི་དམིགས་པས་ལྷར་འཛིན་གྱི་རྟོག་པ་དབྱིངས་སུ་ཐིམ། གཉིས་པས་མཁའ་འགྲོ་སྤྱི་བོར་དཀར་མོ། མགྲིན་པར་དམར་མོ། སྙིང་གར་སྔོན་མོ། ལྟེ་བར་སེར་མོ་རྣམས་བླ་མའི་སྐུ་གསུང་ཐུགས་ཡོན་ཏན་དབྱེར་མེད་པའི་མོས་པ་མཛད་འཚལ། བརྟན་བྱེད་ༀ་ཨཱཿ ཧཱུྃ་ཞེས་བདུད་རྩི་ལན་གསུམ་བླུད་པས། འགྲོ་དོན་རྩོལ་མེད་ལྷུན་གྲུབ་ཏུ་ཤར་བར་འགྱུར། ཤེར་དབང་ནི། གླེགས་བམ་གྱི་ཁར་མཉྫི་བཞག་པའི་འོག་ཏུ་ཐོད་པའི་ནང་དུ་ཨཀྵཿ ལྔ་བཅུ་ནས་དང་བསྲེས་པ་ལ་རྟེན་འབྲེལ་སྙིང་པོས་རབ་གནས་བྱས་ནས་མཎྜལ་ཚོམ་བུ་བདུན་བཀོད་པ་ཞིག་གིས་ཁ་བཅད་ལ་བཞག །མཉྫིའི་ཁར་ལས་བཞི་གང་ཡིན་གྱི་འབྲང་རྒྱས་བཀོད་པ་ལ་གཟུངས་ཐག་བཏགས་ནས། དེ་ལ་ཐམས་ཅད་ཀྱིས་འཇུས་ཏེ། བཟླས་ལུང་དབོག་ཅིང་སྒོམ་པ་བདག་པོ་ལ་གཏོད་པ་འདིའི་རྗེས་ཟློས། ཞི་བར། ༀ་ཤཱནྟིང་ཀུ་རུ་སྭཱ་ཧཱ། རྒྱས་པར། པུཥྚ༴ དབང་ལ། ཝཱ་ཤཾ༴ དྲག་པོ་ལ། རཀྵས༴ རྗེས་ལ། ལན་གསུམ་རེ་བཟླས། དེ་བཞི་རེ་རེའི་གཤམ་དུ། ད་ཕྱིན་ཆད་རང་དོན་དུ་མི་ལྟ། ལྟ་རེ་ཤི། ལྟ་ནའང་ང་ལ་སྡིག །མི་སྒོམ། མི་སྤྱོད། མི་སྒྲུབ་སོགས་རིགས་འགྲེ་སྦྱར། མཇུག་ཏུ་བླ་མས། འོ་རིགས་ཀྱི་བུ་ཁྱེད་རྣམས་ཀྱིས་གང་དང་གང་གིས་འདུལ་བའི་ཕྲིན་ལས་ཀྱིས་སེམས་ཅན་གྱི་དོན་གྱིས་ཤིག །ཅེས་གདམས། རྡོ་རྗེས་བྷནྡྷའི་ཡིག་འབྲུ་ལ་དམོད་བོར་ནས་ལེན་དུ་བཅུག་ལ། བླ་མས་སྔར་ལྟར་ལུང་སྟོན། འོན་ཀྱང་ལམ་ལྔའི་བདག་གཏོད་ཐོབ་ན་འདིར་མ་བྱས་ཀྱང་ཆོག་གསུང་ངོ༌། །ཚིག་དབང་ནི་སྒོམ་པ་བདག་གཏོད་ཀྱི་སྙིང་པོ་ཡིན་པས་འདིའི་ལུང་ལོང་ཞིག །ༀ་ཨཱཿ ཧྲཱིཿ ཧ་རི་ནི་ས་ཧཱུྃ། ཞེས་བཟླར་བཅུག །བརྟན་བྱེད་བླ་མ་རྡོ་རྗེ་རྣལ་འབྱོར་མར་གསལ་བ་དེ་ཁྱེད་རང་ལ་ཐིམ་པའི་མོས་པ་མཛོད། མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་ལན་གསུམ་བརྗོད། དེ་ལྟར་དབང་བཞི་ཐོབ་ནས་མཇུག་གི་ཆོས་གསུམ་ནི། རྟེན་སྡོམ་པ་གསུམ་དང་ལྡན་ཞིང་རང་ས་དྲུག་མ་ཉམས་པའི་སྒོ་ནས་བདག་གཏོད་ཀྱི་བོ་ཟགས་ལྟེམས་ལོག་བཞིའི་དྲི་མ་བསྲུང་བ་ལ་འབད་པར་མཛོད་ཅིག །དེས་བདག་གཏོད་ཀྱི་བྱིན་རླབས་ཚར་བས་བླ་མ་ལ་དྲིན་ཕྱག་གི་ཕྱག་གསུམ་འཚོལ་ལ། བཀའ་དྲིན་ཆེ་ལགས་ཞེས་བརྗོད། རྗེས་ཆོག་བདུན་སྔར་ལྟར་བྱའོ། །དབང་པོ་འབྲིང་སྨིན་བྱེད་ལམ་གསུམ་གཞུང་མའི་དབང་ཆོག་ཚར་རོ།། ༈ །།ༀ་སྭ་སྟི། གསུམ་པ་དབང་རྣོན་ལ་རྫོགས་པའི་དབང་གཅིག་མའམ་ཟབ་མོ་ཀུ་སུ་ལུའི་དབང་ཞེས་པ་ལམ་གསུམ་གླེགས་བམ་ལ་མི་ལྟོས་པར་བླ་མའི་སྐུའི་དཀྱིལ་འཁོར་ལ་བརྟེན་ནས་བསྒྲུབ་པ་ཏིང་ངེ་འཛིན་ལམ་གསུམ་གྱི་དབང་བསྐུར་བ་ནི༑ ཕྱག་བཞེས་སུ་གླེགས་བམ་བཤམས་པར་མཛད་ཅིང༌། དེ་ཡང་མི་འདྲ་བའི་ཁྱད་པར་འདིར་གླེགས་བམ་གྱི་ཁར་ནས་ཕུང་པོར་སྤུངས་པས་དབྱིབས་སྒྱུར་མོར་བྱས་པའི་སྟེང་དུ་བྷཉྫ་དམ་རྫས་གུར་དང་བཅས་པ་བཤམས་ཤིང་ཕྱོགས་བཞིར་འབྲང་རྒྱས་ཀྱིས་བསྐོར་བ་སོགས་གཞན་འདྲ་བར་མཛད། ཆོ་ག་ནི་བདག་བསྐྱེད་སྔོན་དུ་འགྲོ་བས་ཚོགས་དང་དབང་རྫས་བྱིན་རླབས་བྱས་ལ། སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་དང༌། འོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དབང་རྣོན་སྨིན་པར་བྱེད་པ་ཟབ་མོ་ཀུ་སུ་ལུའི་དབང་ཏིང་ངེ་འཛིན་ལམ་གསུམ་གྱི་བྱིན་རླབས་ཞུས་ལ་ཉམས་སུ་བླང་སྙམ་པས་གསན་འཚལ། དེས་ན་སྤྲུལ་པའི་སྐུ་རྗེ་བཙུན་དམ་པ་རྒྱ་གར་བའི་བཀའ་དྲིན་གྱིས་བརྡ་ལ་བརྟེན་ནས་དོན་གཅེར་མཐོང་དུ་རྟོགས་ཤིང༌། བྱིན་རླབས་རང་བྱུང་དུ་བབས་པ། ཉམས་ཡེ་ཤེས་སུ་འབར་བ་བླ་མ་རྫོང་པའི་ལུགས་ཀྱི་བློ་སྦྱོང་དཀའ་ཐུབ་བདག་གཏོད་གསུམ་དུས་གཅིག་ཏུ་བསྐུར་བའི་བཀའ་སྲོལ་གྱི་དབང་འདི་སྒྲུབ་པར་བྱེད་པ་ལ། ཐོག་མར་སྦྱོར་བ་སྐྱབས་འགྲོ་སེམས་བསྐྱེད་ཀྱི་རྗེས་ཟློས། བླ་མ་དམ་པ་རྣམས་ལ་ཞེས་པ་ནས། དེ་ཁོ་ན་བཞིན་དུ་གྲུབ་པར་གྱུར་ཅིག །ཅེས་པའི་བར་ལན་གསུམ། དངོས་གཞི་ལ་ལན་གསུམ་གྱི། དང་པོ་བླ་མ་ཆོས་སྐུར་སྒྲུབ་པ། བསྙེན་པ་བློ་སྦྱོང་གི་དབང་བཞི་ལས། བུམ་དབང་གི་ལམ་ཁྱེར་ནི། སློབ་དཔོན་དང་སློབ་མ་གཉིས་ཀ་ཡི་དམ་བདེ་མཆོག་གི་སྐུར་གསལ་བའི་ལུས་ཀྱི་དབུས་སུ་རྩ་དབུ་མ་ཆོས་བཞི་ལྡན། སྤྱི་མགྲིན་སྙིང་ལྟེའི་གནས་བཞིར་འཁོར་ལོ་བཞི་རེ་རེ་ལའང་རྩ་འདབ་ལྔ་བཅུར་གནས་པའི་འདབ་མ་ལ་ཨཱ་ལི་ཀཱ་ལིའི་ཡིག་འབྲུ་རྣམས་སྤྱི་བོར་དཀར་པོ། མགྲིན་པར་དམར་པོ། སྙིང་གར་སྔོན་པོ། ལྟེ་བར་སེར་པོ་རྣམས་གསལ་བར་གྱུར། དེ་ནས་ཨཱཀྵཿ ལན་བཞི་རྗེས་ཟློས་བྱས་པའི་ལན་དང་པོས། བླ་མ་རྣམ་པ་ཡི་དམ་ལ་ངོ་བོ་ཆོས་སྐུའི་བདག་ཉིད་ཅན་དུ་བཞུགས་པའི་སྤྱི་བའི་ཡིག་འབྲུ་ལས་འོད་ཟེར་དཀར་པོ་འཕྲོས་སྨིན་མཚམས་ནས་ཐོན། རང་རང་གི་ཚངས་བུག་ནས་ཞུགས་ཏེ་སྤྱི་བའི་ཡིག་འབྲུ་རྣམས་ལ་ཐིམ་པས། ཡིག་འབྲུ་རྣམས་ལས་འོད་དཀར་པོ་གཅིག་ནས་གཅིག་ཏུ་བརྒྱུད་དེ་ལུས་ཀྱི་ནང་ཐམས་ཅད་གང༌། ལུས་ཀྱི་སྡིག་སྒྲིབ་ཐམས་ཅད་སྦྱངས། ལུས་ཤེལ་སྒོང་ལྟར་གྱུར། གཟུགས་སྣང་ཐམས་ཅད་བླ་མའི་སྐུར་ཤར་བའི་མོས་པ་སྒོམ་དུ་གཞུག །ལན་གཉིས་པས། བླ་མའི་མགྲིན་པའི་ཡིག་འབྲུ་ལས་འོད་དམར་པོ་འཕྲོས་ལྗགས་སྟེང་ནས་ཐོན། རང་རང་གི་མགྲིན་པར་ཐིམ་པས་ཡིག་འབྲུ་ལས་བྱུང་བའི་འོད་དམར་པོས་ལུས་གང༌། ངག་གི་སྡིག་སྒྲིབ་སྦྱངས། ལུས་མཆོང་ལྟར་དམར་ལྟེམ་གྱིས་སོང༌། སྒྲ་གྲགས་ཐམས་ཅད་བླ་མའི་གསུང་དུ་ཤར་བར་མོས། ཡང་ལན་གསུམ་པས། བླ་མའི་ཐུགས་ཀའི་ཡིག་འབྲུ་ལས་འོད་སྔོན་པོ་འཕྲོས། རང་རང་གི་སྙིང་གར་ཐིམ་པས་ཡིག་འབྲུ་ལས་བྱུང་བའི་འོད་སྔོན་པོས་ལུས་ནང་གང༌། སེམས་ཀྱི་སྡིག་སྒྲིབ་སྦྱངས། རང་ལུས་འཇའ་ཚོན་ལྟར་དྭངས་པར་གྱུར། དྲན་རྟོག་ཐམས་ཅད་བླ་མའི་ཐུགས་སུ་ཤར་བར་མོས། ཡང་ལན་བཞི་པས། བླ་མའི་ལྟེ་བའི་ཡིག་འབྲུ་ལས་འོད་ཟེར་སེར་པོ་ཐོན། རང་རང་གི་ལྟེ་བར་ཐིམ་པས་ཡིག་འབྲུ་ལས་བྱུང་བའི་འོད་སེར་པོས་ལུས་ནང་གང༌། སྒོ་གསུམ་ཕྲ་བ་བག་ཆགས་ཀྱི་སྒྲིབ་པ་སྦྱངས། རང་ལུས་ནམ་མཁའ་གསེར་གྱི་ཁ་དོག་ལྟ་བུར་དྭངས། སྣང་གྲགས་དྲན་པའི་ཆོས་ཐམས་ཅད་སྟོང་ཉིད་ཀྱི་རྩལ་ཙམ་ལས་ཡང་དག་པར་བདེན་པར་མ་གྲུབ་པའི་གཤིས་རྣམ་པར་དག་པ་དེ་བླ་མའི་དགོངས་པ་ཆུ་ལ་ཆུ་བཞག་པ་ལྟར་དབྱེར་མེད་དུ་མོས་ལ་མཉམ་པར་བཞག་གོ །གསང་དབང་གི་ལམ་ཁྱེར་ནི། ཨ་བྷི་ཥིཉྩ་ༀ། ཨ་བྷི་ཥིཉྩ་ཨཱཿ ཨ་བྷི་ཥིཉྩ་ཧཱུྃ། ཨ་བྷི་ཥིཉྩ་ཧྲཱིཿ ཞེས་སྲིན་ལག་གིས་བདུད་རྩིའི་ཐིག་ལེ་གནས་བཞིར་བཀོད་པས། སྤྱི་བོར་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ༀ་དཀར་པོ། མགྲིན་པར་པདྨ་འདབ་མ་བརྒྱད་ཀྱི་ལྟེ་བར་ཨཱཿ དམར་པོ། སྙིང་གར་རྡོ་རྗེ་སྔོན་པོའི་ལྟེ་བར་ཧཱུྃ་སྔོན་པོ། ལྟེ་བར་རིན་ཆེན་སེར་པོ་ཟུར་བརྒྱད་པའི་ལྟེ་བར་ཧྲཱིཿ སེར་པོ་རྣམས། བླ་མའི་སྐུ་རྡོ་རྗེ། གསུང་རྡོ་རྗེ། ཐུགས་རྡོ་རྗེ། ཡོན་ཏན་ཕྲིན་ལས་འདུས་པའི་རྡོ་རྗེའི་ངོ་བོར་མོས་པ་མཛོད། ཤེར་དབང་གི་ལམ་ཁྱེར་ནི། ལུས་གནད་ཆོས་བདུན་བཅའ། རླུང་སྟེང་འོག་ཁ་སྦྱར་ལ་དབུ་མར་བཅུག །ཡིད་བྲལ་བ་གསུམ་ངང་དུ་ངལ་བསོ་བའོ། །སེམས་མ་བཅོས་པར་རྩེན་གྱིས་ཞོག་ལ་སྒྲིམ་སློད་ཀྱིས་ཉམས་སུ་བླངས་པས་ཉམས་རྟོགས་ཇེ་བཟང་ལ་འགྲོ་བ་ཡིན་ནོ། །ཚིག་དབང་ལམ་ཁྱེར་ནི། སྤྱི་བོར་བླ་མ་ཆོས་ཀྱི་སྐུ་ནམ་མཁའི་གོས་ཅན་གྱི་རྣམ་པར་གསལ་ཐོབ་ལ་བློ་སྦྱོང་བའི་སྙིང་པོ་འདིའི་ལུང་ལོངས་ཤིག །ༀ་ཨཱཿ ཧྲཱིཿ གུ་རུ་སིདྡྷི་ཧཱུྃ། ལན་གསུམ། སྤྱི་བའི་བླ་མ་རང་ལ་ཐིམ་པས་བྱིན་གྱིས་བརླབས་པའི་མོས་པ་མཛོད། མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་བརྗོད། གཉིས་པ་བླ་མ་ཡི་དམ་གྱི་ལྷར་སྒྲུབ་པར་བྱེད་པ་སྒྲུབ་པ་དཀའ་ཐུབ་ཀྱི་དབང་ལ་བཞི་ལས། བུམ་དབང་གི་ལམ་ཁྱེར་ནི། ཨཱཀྵཿ འི་རྗེས་ཟློས་ལན་བཞི་བྱས་པའི་དང་པོས། བླ་མ་བདེ་མཆོག་ལྷན་སྐྱེས་སུ་གསལ་བའི་སྨིན་མཚམས་ནས་ཡི་གེའི་འོད་ཟེར་དཀར་པོ་ཐོན། རང་གི་སྤྱི་བོར་ཐིམ་པས། རང་ལུས་དང་ཕྱིའི་ཡུལ་སྣང་ཐམས་ཅད་བདེ་མཆོག་ལྷན་སྐྱེས་ཀྱི་སྐུ་སྣང་སྟོང་དུ་གྱུར་པར་མོས། ལན་གཉིས་པས། ཞལ་ནས་ཡིག་འབྲུའི་འོད་དམར་པོ་ཐོན། རང་གི་མགྲིན་པར་ཐིམ་པས་རང་གི་ངག་ནས་ཅི་བརྗོད་དང་ཕྱི་རོལ་གྱི་སྒྲ་ཐམས་ཅད་ལྷན་སྐྱེས་ཀྱི་གྲགས་སྟོང་གཞོམ་མེད་དུ་མོས། ལན་གསུམ་པས། ཐུགས་ཀ་ནས་ཡིག་འབྲུའི་འོད་ཟེར་མཐིང་ག་ཐོན། རང་གི་སྙིང་གར་ཐིམ་པས། རང་གི་རྟོག་པ་ཅི་འགྱུས་དང་གཞན་རྒྱུད་ཀྱི་དྲན་རྟོག་ཐམས་ཅད་ཀྱང་ལྷན་སྐྱེས་སུ་ཡོད་པས་དེ་དག་ཐམས་ཅད་ཀྱང་དེ་ལས་མ་འདས་པར་ཐག་བཅད་དོ། །ལན་བཞི་པས། ལྟེ་བ་ནས་ཡིག་འབྲུའི་འོད་ཟེར་སེར་པོ་ཐོན། རང་གི་ལྟེ་བར་ཐིམ་པས་བླ་མ་བདེ་མཆོག་ཏུ་གསལ་བའི་སྐུ་གསུང་ཐུགས་ཡོན་ཏན་དང་བཅས་རང་ལ་བརྒྱན་པར་མོས་ལ་མཉམ་པར་བཞག་གོ །གསང་དབང་ལམ་ཁྱེར་ནི། འཁོར་ལོ་བཞིའི་ལྟེ་བའི་ཡི་གེ་ༀ་ཨཱཿ ཧཱུྃ་ཧྲཱིཿ རྣམས་འོད་དུ་ཞུ་བ་ལས། སྤྱི་བོར་སྐུའི་བདེ་མཆོག་དཀར་པོ། མགྲིན་པར་གསུང་གི་བདེ་མཆོག་དམར་པོ། སྙིང་གར་ཐུགས་ཀྱི་བདེ་མཆོག་སྔོན་པོ། ལྟེ་བར་ཡོན་ཏན་གྱི་བདེ་མཆོག་སེར་པོ་རྣམས་ཀྱིས་རྒྱས་བཏབ་པར་གྱུར༑ ཤེར་དབང་ལམ་ཁྱེར་ནི། ལུས་གནད་ཆོས་བདུན་བཅའ། རླུང་གནད་ཁ་སྦྱོར་ལ་འགྱུ་བ་བཅད། ཡིད་སྒོམ་འདོད་ཀྱི་རྟོག་པ་སྤངས་ལ། སྤྱན་ལྔ་བསྒྱུར་བར་བྱ་སྟེ། དེའང་ཉོན་མོངས་པའི་རྟོག་པ་ཤིན་ཏུ་རགས་པ་ལ་རུས་སྦལ་ལྟ་བུ། ཐ་མལ་རང་ག་ལ་ཟླ་ཚེས་ལྟ་བུ། ཐ་མ་རྐུན་བུ་ལ་མཁལ་མ་ལྟ་བུ། ཤེས་པ་དྲན་མེད་འཐིབས་པོ་ལ་ཟླ་བ་ཉ་གང་བ་ལྟ་བུའི་སྤྱན་གྱིས་ནམ་མཁའི་དབྱིངས་སུ་ལྟ་ཞིང༌། གསལ་བདོ་བ་ལ་བཤིག་པས་རྗེས་བློ་བྲལ་དུ་འཆར་རོ། །ཐུན་མཚམས་སུ་ཉལ་འདུག་ལངས་འགྲོའི་རྩ་བའི་སྤྱོད་ལམ་བཞི་ལ་ཡན་ལག་ལྔ་ལྔར་ཕྱེ་བའི་ཉི་ཤུ་དང༌། ལྟ་སྟངས་ལྔ་ལ་སྤྱན་ལྔ་བསྒྱུར་བས་ཐམས་ཅད་དུ་ཡེངས་པ་མེད་པར་བསྐྱང་བར་བྱོས་ཤིག ༑ཚིག་དབང་ལམ་ཁྱེར་ནི། རྒྱུ་རྩལ་བཞི་དང་ལྡན་པའི་སྒོ་ནས་ཡི་དམ་བདེ་མཆོག་གི་སྙིང་པོ་འདི་ཡི་ལུང་ལོང་ཞིག །ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊ། ལན་གསུམ། བླ་མ་བདེ་མཆོག་ཏུ་གསལ་བ་རང་ལ་ཐིམ་པའི་མོས་པ་གྱིས། མེ་ཏོག་འཐོར་ཞིང་གྲུབ་པར་གྱུར་ཅིག །ཅེས་བརྗོད། གསུམ་པ་བླ་མ་མཁའ་འགྲོར་སྒྲུབ་པ་ལས་སྦྱོར་སྒོམ་པ་བདག་གཏོད་ཀྱི་དབང་ལ་བཞི་ལས། བུམ་དབང་ལམ་ཁྱེར་ནི། ཨ་ཡིག་ལྔ་བཅུའི་རྗེས་ཟློས་ལན་བཞིའི་དང་པོས། བླ་མ་རྡོ་རྗེ་མཁའ་འགྲོར་གསལ་བའི་སྨིན་མཚམས་ནས་ཨ་དཀར་པོ་ཐོན། རང་གི་སྤྱི་བོར་ཐིམ་པས། ཕྱི་རོལ་གྱི་སྣང་བ་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་སྣང་དུ་ཤར་བའི་གཟུགས་ཐམས་ཅད་རྡོ་རྗེ་ཌཱ་ཀིའི་སྐུ་སྣང་སྟོང་དུ་གྱུར་པར་མོས། ལན་གཉིས་པས། ལྗགས་སྟེང་ནས་ཨ་དམར་པོ་ཐོན། རང་གི་མགྲིན་པར་ཐིམ། སྒྲར་གྲགས་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་དུ་ཤར་བའི་སྒྲ་ཐམས་ཅད་རྡོ་རྗེ་ཌཱ་ཀིའི་གསུང་གྲགས་སྟོང་གཞོམ་མེད་དུ་མོས། ལན་གསུམ་པས། ཐུགས་ཀ་ནས་ཨ་སྔོན་པོ་ཐོན། རང་གི་སྙིང་གར་ཐིམ། དྲན་རྟོག་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་དུ་ཤར་བའི་དྲན་རྟོག་ཐམས་ཅད་རྡོ་རྗེ་ཌཱ་ཀིའི་ཐུགས་བདེ་སྟོང་དུ་མོས། ལན་བཞི་པས། ལྟེ་བ་ནས་ཨ་སེར་པོ་ཐོན། རང་གི་ལྟེ་བར་ཐིམ། སྣང་གྲགས་འགྱུ་གསུམ་ཐམས་ཅད་སྐྱེ་མེད་ཀྱི་ཀློང་དུ་ཡལ། མ་འགགས་པའི་རྩལ་དུ་ཤར་བའི་སྣང་གྲགས་དྲན་རྟོག་ཐམས་ཅད་རྡོ་རྗེ་ཌཱ་ཀིའི་སྐུ་གསུང་ཐུགས་ཀྱི་རོལ་པར་མོས་ལ་མཉམ་པར་བཞག་གོ །གསང་དབང་ལམ་ཁྱེར་ནི། འཁོར་ལོ་བཞིའི་ལྟེ་བའི་བདེ་མཆོག་ཡབ་ཡུམ་ལ་ཐིམ། ཡུམ་རྣམས་ཡོངས་སུ་གྱུར་པ་ལས་མཁའ་འགྲོ་བཞིར་གྱུར་ཏེ། སྤྱི་བོར་སངས་རྒྱས་མཁའ་འགྲོ་དཀར་མོ་གཡས་འཁོར་ལོ་དཔྲལ་བར་འཕྱར་བས་སྣང་བ་ཐམས་ཅད་ཟིལ་གྱིས་གནོན་པ། མགྲིན་པར་པདྨ་མཁའ་འགྲོ་དམར་མོ་གཡས་པདྨ་མགྲིན་པར་འཛིན་པས་སྣང་བ་ཐམས་ཅད་དབང་དུ་སྡུད་པ། སྙིང་གར་རྡོ་རྗེ་མཁའ་འགྲོ་སྔོན་པོ་གཡས་རྡོ་རྗེ་ཐུགས་ཀར་འཛིན་པས་སྣང་བ་དག་ཅིང་ལས་སུ་རུང་བར་བྱེད་པ། ལྟེ་བར་རིན་ཆེན་མཁའ་འགྲོ་སེར་མོ་རིན་ཆེན་ལྟེ་བར་འཛིན་པས་དགོས་འདོད་ཐམས་ཅད་སྒྲུབ་པ། ཐམས་ཅད་ཀྱང་གཡོན་ཐོད་ཁྲག་འཛིན་ཅིང༌། ཕྱག་རྒྱ་ལྔས་བརྒྱན་པ་རོའི་གདན་ལ་གར་སྟབས་ཀྱིས་མེའི་དབུས་སུ་བཞུགས་པས་རྒྱས་བཏབ་པའོ༑ ༑ཤེར་དབང་ལམ་ཁྱེར་ནི། ད་ཕྱིན་ཆད་སེམས་ཅན་གྱི་དོན་མ་གཏོགས་རང་དོན་དུ་མི་ལྟ། མི་སྒོམ། མི་སྤྱོད། མི་སྒྲུབ་སྙམ་དུ་རང་དོན་དུ་རང་ལ་འཁྲིལ་བའི་གཉེན་པོ་བཤིག་ཅིང༌། བློ་ཐག་བཅད་ནས་གཞན་དོན་དུ་ཅི་འགྱུར་ལ་བསླབ་པར་བྱོས་ཤིག །ཚིག་དབང་ལམ་ཁྱེར་ནི། མཁའ་འགྲོ་རྣམས་ལས་ལ་བཀོལ་བའི་ཕྱིར་འཁོར་ལོ་བཞིའི་མཁའ་འགྲོ་མ་རྣམས་ལ་དམིགས་པ་གཏད་ནས་བླ་མ་མཁའ་འགྲོར་སྒྲུབ་པའི་ལུང་འདི་ལོངས་ཤིག །ༀ་ཨཱཿ ཧྲཱིཿ ཧ་རི་ནི་ས་ཧཱུྃ། ལན་གསུམ། བླ་མ་ཌཱ་ཀིར་གསལ་བ་རང་ལ་ཐིམ་པས་བྱིན་གྱིས་བརླབས་པར་མོས། འགྲུབ་པར་གྱུར་ཅིག །ཅེས་མེ་ཏོག་དོར། དེས་བློ་སྦྱོང་དཀའ་ཐུབ་བདག་གཏོད་གསུམ་ཏིང་ངེ་འཛིན་ལ་བརྟེན་ནས་སྟན་ཐོག་གཅིག་ཏུ་བསྐུར་བ་ཀུ་སུ་ལུའི་ཉམས་ལེན་རྫོང་པའི་དབང་གཅིག་མར་གྲགས་པ་དེ་ཚར་བ་ལགས་པས་བླ་མ་ལ་དྲིན་ཕྱག་གསུམ་འཚོལ། བཀའ་དྲིན་ཆེ་ལགས། ཞེས་བརྗོད། དེ་ནས་རྗེས་ཀྱི་ཆོ་ག་རྣམས་སྔར་གྱི་འགྲོས་ལྟར་ཤེས་པར་བྱའོ། །དམ་ཆོས་སྡུག་བསྔལ་ཞི་བྱེད་ཀྱི་དབང་ཆོག་བཀླག་པས་གྲུབ་པ་ལས། བཀའ་བབས་ཕྱི་མའི་རྩ་བ་གླེགས་བམ་གྱི་དབང་རྒྱས་འབྲིང་བསྡུས་གསུམ་བཤད་པའི་ལེ་ཚན་ནོ། །དར་རྒྱས་འཕེལ།།