DNZ-09-TA-021

Previous Text Back to Volume PageNext Text

Wylie title		Rigpe Dorje Publications, 2024
Location	gdams ngag rin po che'i mdzod Volume 9, Text 21, Pages (Folios to )
Author	འབྲི་གུང་རིག་འཛིན་ཆོས་ཀྱི་གྲགས་པ་
Citation	Drikung Kyabgon Chungtsang, 1st (Chos kyi grags pa). '. In Gdams ngag rin po che'i mdzod, Vol. 9: . Kalimpong: Rigpe Dorje Publications, 2024.	Shechen Publications, 1999
Side notes	Verso: bka' brgyud skor
More details More details
Genre

Tibetan Text

[edit]

༄༅། །ལྔ་ལྡན་གཏོར་དབང་ཡིད་བཞིན་ནོར་བུ་ཞེས་བྱ་བ་བཞུགས་སོ། །

ལྔ་ལྡན་གཏོར་དབང་ཡིད་བཞིན་ནོར་བུ་ཞེས་བྱ་བ་བཞུགས་སོ། །བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །མགོན་པོ་འབྲི་གུང་པར་གྲགས་པ། ། ཡབ་སྲས་བཞེད་པའི་ཕྱག་ལེན་ནི། །མཐོང་བརྒྱུད་ཇི་བཞིན་འདིར་བཤད་ཀྱི། །མོས་ལྡན་ཡོད་ན་དགའ་བས་ལོང༌། །ཕྱག་རྒྱ་ཆེན་པོ་ལྔ་ལྡན་ལ་གནད་དུ་སོང་བའི་སློབ་དཔོན་གྱིས་སློབ་མ་སྣོད་ལྡན་ལ་ལྔ་ལྡན་གཏོར་དབང་བསྐུར་ན། དྲི་བཟང་གིས་སྦགས་པའི་སྟེགས་བུའི་དབུས་སུ་མཉྫིའི་སྟེང་དུ་རིན་པོ་ཆེའི་སྣོད་གས་ཆག་མེད་པར་ཟླུམ་གཏོར་པད་འདབ་བཞིས་བསྐོར་བ་དཀར་དམར་གྱིས་བརྒྱན་པའི་སྟེང་དུ་དར་གདུགས་དང་བཅས་པའི་གཡས་སུ་བུམ་པ་མགུལ་ཆིངས་ལྔ་ལྡན་ནང་བཅུད་སོ་ལྔའི་ནང་ཆུས་སུམ་གཉིས་བཀང་བ་ཁ་རྒྱན་དང་བཅས་པ། གཡོན་དུ་ཐོད་པ་མཚན་ལྡན་ཆང་བཟང་པོ་ལ་ཨ་མྲི་ཏ་བཏབ་པ་ཁ་དར་དམར་གྱིས་བཅད་པ། དེ་རྣམས་ཀྱི་ མདུན་དུ་བླ་མ་ཡི་དམ་མཁའ་འགྲོ་ཆོས་སྐྱོང་གི་གཏོར་མ་དང༌། དེ་དག་གི་མདུན་དུ་ཆུ་བཞི་ཉེར་སྤྱོད་བཤམ། ཚོགས་རྫས་འདུ་བྱ། སློབ་དཔོན་ཁྲུས་བྱ། གཞི་བགེགས་ལ་གཏོར་མ་བཏང༌། སྐྱབས་སེམས་ཡན་ལག་བདུན་སོགས་འོག་ནས་དབང་གི་སྐབས་སུ་འབྱུང་བ་ལྟར་བྱས་རྗེས། མཆོད་པ་ནང་མཆོད་བདེ་མཆོག་ལྟར་བྱིན་རླབས། བསང་སྦྱང་སྟོང་པའི་ངང་ལས་རྡོ་རྗེའི་ར་གུར་འཇིགས་དུས་ཀྱི་མེ་ལྟར་འབར་བ་མེ་རི་དང་བཅས་པའི་སྲུང་བའི་གུར་འཁོར་ལོའི་ནང་དུ་བདག་དང་གཏོར་མ་སྐད་ཅིག་གིས་རྫོགས་པའི་བཅོམ་ལྡན་འདས་འཁོར་ལོ་སྡོམ་པ་སྐུ་མདོག་མཐིང་ནག་ཞལ་གཅིག་པ་སྤྱན་གསུམ་མཆེ་བ་ཅུང་ཟད་གཙིགས་པ། ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རལ་པའི་ཐོར་ཅོག་གི་རྩེ་མོར་ནོར་བུ་དང་མདུན་དུ་སྣ་ཚོགས་རྡོ་རྗེ། གཡོན་དུ་ཟླ་བ་ཕྱེད་པས་སྤྲས་ཤིང་མི་བསྐྱོད་པའི་ཅོད་པན་ཅན། ཐོད་སྐམ་ལྔ་རིན་པོ་ཆེའི་རྩེ་བྲན་ཅན་དར་དཔྱངས་དང་བཅས་པས་དཔྲལ་བའི་སྟེང་དུ་བཅིངས་པ། ཐོད་རློན་ལྔ་བཅུའི་དོ་ཤལ་དང་སྟག་གི་པགས་པའི་ཤམ་ཐབས་ཅན། རུས་པའི་ཕྱག་རྒྱ་ལྔ་དང་ཐལ་ཆེན་གྱིས་བྱུགས་པ། གར་གྱི་ཉམས་དགུ་དང་ལྡན་པ། ཞབས་གཡས་བརྐྱངས་གཡོན་བརྐུམས་པས་འཇིགས་བྱེད་དུས་མཚན་པད་ཉིའི་སྟེང་དུ་མནན་པའི་པང་དུ་ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཁྲོ་ཆགས་སྤྱན་གསུམ་མཆེ་བ་ཅུང་ཟད་གཙིགས་ཤིང་ནམ་མཁའི་གོས་ཅན་ཐོད་སྐམ་ལྔའི་དབུ་རྒྱན་དང་དོ་ཤལ་འཕྱངས་པ། ཕྱག་གཡས་རྡོ་རྗེ་གདེངས་ཤིང་གཡོན་ཐོད་པ་བདུད་ཀྱི་ཁྲག་གིས་བཀང་བ་ཐོགས་ནས་ཡབ་ཀྱི་མགུལ་དུ་འཁྱུད་པ། ཞབས་གཡས་ཡབ་ལ་འཁྱུད་ཅིང་གཡོན་ཡབ་ཀྱི་གཡས་དང་ལྷན་ཅིག་ཏུ་བརྐྱང་བ། ཁྲག་ལ་དགྱེས་ཤིང་ཁྲག་འཛག་པ། ཕྱག་རྒྱ་ལྔས་སྤྲས་པ། སྐྲ་གྲོལ་བ། རྣམ་སྣང་གི་ཅོད་པན་ཅན། ཡབ་ཀྱི་མཚོག་མའི་སྟེང་དུ་ཉི་མའི་གདན་ལ་དཔལ་ལྡན་བླ་མ་ཧེ་རུ་ཀ་སྔོ་སང་ཕྱག་གཉིས་རྡོར་དྲིལ་འཛིན་པས་ཡུམ་ལ་འཁྱུད་པ། རལ་པའི་ཐོར་ཚུགས་ཅན། ཕྱག་རྒྱ་དྲུག་དང་རིན་པོ་ཆེ་དང་དར་གྱི་རྒྱན་སྣ་ཚོགས་པས་བརྒྱན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། མཚན་སོ་གཉིས་དང་དཔེ་བྱད་བརྒྱད་ཅུས་མཛེས་པའི་བར་དུ་ཡུམ་རྡོ་རྗེ་རྣལ་འབྱོར་མ་དམར་མོ་གཡས་རྡོ་རྗེ་ཕྱར་ཞིང༌། གཡོན་ཐོད་པ་བདུད་རྩིས་གང་བ་བསྣམས་པ་དང་བཅས་པས་ཡབ་ཀྱི་ མགུལ་ལ་འཁྱུད་ཅིང་ཕྱག་རྒྱ་ལྔས་བརྒྱན་པ། གཅེར་མོ་སྐྲ་གྲོལ་བ་ཞབས་གཉིས་པདྨའི་སྐྱིལ་ཀྲུང་གིས་ཡབ་ཀྱི་རྐེད་ལ་འཁྲིལ་བ། འཁོར་ལོ་སྡོམ་པའི་དཔྲལ་བར་ཟླ་བ་ལ་ༀ་དཀར་པོ། མགྲིན་པར་པདྨའི་ལྟེ་བར་ཨཱཿ དམར་པོ། སྙིང་གར་སྣ་ཚོགས་རྡོ་རྗེའི་ལྟེ་བར་ཧཱུྃ་སྔོན་པོས་མཚན་པ་ལས་འོད་འཕྲོས་ཡེ་ཤེས་པ་སྤྱན་དྲངས། ཛཿ ཧཱུྃ་བཾ་ཧོཿ གཉིས་སུ་མེད་པར་གྱུར། ༀ་བཛྲ་གུ་རུ་ཙཀྲ་སམྦ་ར་ཨ་རྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ༑ ཨཉྩ་མཱ་ནམ། པྲོ་ཀྵ་ཎཾ། པཱདྱཾ། པུཥྤཾ། དྷཱུ་པཾ། ཨཱ་ལོ་ཀཾ། གྷན་དྷཾ། ནེ་ཝི་དྱཾ། ཤབྡ་སྦྱར་བས་མཆོད། གང་གིས་དྲིན་གྱིས་བདེ་ཆེན་ཉིད། །སོགས་དང༌། ཧེ་རུ་ཀ་དཔལ་དཔའ་བོ་ཆེ། །སོགས་ཀྱིས་བསྟོད། ཡིག་བདུན་དང་བླ་མའི་མཚན་སྔགས་ཅི་རིགས་པ་བཟླ། བླ་མ་ཡི་དམ་མཁའ་འགྲོ་ཆོས་སྐྱོང་གི་གཏོར་མ་རང་རང་གི་ཚོགས་འབུལ། ཚོགས་བྱིན་རླབས་འབུལ་བ་སོགས་བདེ་མཆོག་ལྟར་བྱའོ། །སློབ་མ་ལ་དབང་བསྐུར་བ་ནི་དུང་ཞལ་དུ་དྲིའི་ཆུ་ལ་དུམ་སྐྱེས་མའི་སྔགས་བཟླས་པས་ཁྲུས་བྱ། གྲལ་ལ་འཁོད། བགེགས་ལ་གཏོར་མ་བྱིན་ལ་བསྐྲད། མཎྜལ་ཕུལ་ལ། སྔོན་འགྲོའི་ཆོས་བཞི་དང་བརྒྱུད་པའི་རྣམ་ཐར་ཅི་རིགས་པ་བཤད་ལ། སློབ་མས་མེ་ཏོག་དང་བཅས་པའི་ཐལ་མོ་སྦྱར་ཏེ། ན་མོ་སྣང་སྲིད་རྣམ་དག་གི་བླ་མ་ལ། །སྣང་སྲིད་གཞི་བཞེངས་སུ་གསོལ་བ་འདེབས། །ཁམས་གསུམ་ཡོངས་གྲོལ་དུ་གསོལ༴ འཁོར་བ་དོང་སྤྲུག་ཏུ༴ རྗེ་ཡིད་བཞིན་ནོར་བུ་ལ་གསོལ༴ སྨྲ་བསམ་བརྗོད་མེད་ལ༴ མཁྱེན་པའི་ཡེ་ཤེས་ལ༴ བརྩེ་བའི་བདག་ཉིད་ལ༴ འགྲོ་བ་སྐྱོབས་མཛད་ལ༴ བདག་སེམས་ཉིད་རང་ངོ་འཕྲོད་པར་ བྱིན་གྱིས་རློབས། །ཆོས་ཉིད་ཀྱི་གནས་ལུགས་རྟོགས་པར་བྱིན་གྱིས་རློབས། །སེམས་གདོད་ནས་སངས་རྒྱས་སུ་རྟོགས་པར་བྱིན་གྱིས་རློབས། །བློ་འདས་ཆོས་སྐུར་རྟོགས་པར་བྱིན་གྱིས་རློབས། །ཞེས་ལན་གསུམ་གྱིས་གསོལ་བ་བཏབ། སླར་ཡང༌། རྗེ་ན་མོ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོར་གྱུར་པ། ཐུགས་རྗེ་དང་སྟོང་པ་རོ་མཉམ་པ་དྲི་མ་གསུམ་གྱིས་མ་གོས་པའི་རྗེ་བླ་མ་དམ་པ་རྣམས་དང༌། ཡི་དམ་དཀྱིལ་འཁོར་གྱི་ལྷ་ཚོགས། དམ་པ་ཡེ་ཤེས་ཀྱི་ཆོས་སྐྱོང་བའི་སྲུང་མ་རྣམས་ལ་སྐྱབས་སུ་མཆིའོ། །སངས་རྒྱས་ལ༴ ཆོས༴ དགེ་འདུན༴ བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ཐམས་ཅད་དག་པར་མཛད་དུ་གསོལ། གསུམ་གྱིས་སྐྱབས་སུ་འགྲོ། སླར་ཡང༌། རྗེ་སེམས་ཉིད་ངོ་བོ་ཉིད་ཀྱི་སྐུ། །ལྷུན་གྱིས་གྲུབ་ཅིང་འདུས་མ་བྱས། །སྨྲ་བསམ་ཤེས་བརྗོད་ཡུལ་ལས་འདས། །རྗེ་རིན་པོ་ཆེ་ལ་ཕྱག་འཚལ་ལོ། །དངོས་དང་དངོས་མེད་འཁོར་འདས་ཀུན། །སེམས་ཉིད་གཅིག་ཏུ་འདྲེས་པ་ལས། །ཀུན་ཏུ་བཟང་པོར་གྱུར་པ་ཡི། །བླ་མེད་མཆོག་བས་མཆོད་པར་བགྱི། །རང་གཞན་ཐམས་ཅད་རྫོགས་སངས་རྒྱས། །སྐུ་གསུམ་ལྷུན་གྱིས་གྲུབ་པ་ལ། །ཐ་མལ་ལུས་ངག་ཡིད་གསུམ་གྱིས། །འཁྲུལ་པར་གྱུར་པ་མཐོལ་ལོ་བཤགས། །རང་གཞན་གདོད་ནས་སངས་རྒྱས་ཤིང༌། །བླ་མེད་ཀུན་མཆོག་གསུམ་པོ་དང༌། །འགྲོ་བ་ཀུན་གྱི་དགེ་བ་ལ། །སྙིང་ནས་དགའ་བས་ ཡི་རང་ངོ༌། །རྒྱལ་སྲས་མྱུར་དུ་སངས་རྒྱས་ཤིང༌། །རྫོགས་པའི་བྱང་ཆུབ་ཐོབ་པ་རྣམས། །ཆོས་ཀྱི་འཁོར་ལོ་བསྐོར་གྱུར་ནས། །འགྲོ་ཀུན་སངས་རྒྱས་ཐོབ་མཛད་གསོལ། །སྟོན་པ་ཐུགས་རྗེ་ཆེན་པོ་རྣམས། །མྱ་ངན་འདའ་བར་གང་བཞེད་པ། །སྔོན་གྱི་དམ་བཅའ་དགོངས་མཛོད་ལ། །མྱ་ངན་མི་འདའ་བཞུགས་པར་གསོལ། །བདག་དང་འགྲོ་བ་མ་ལུས་པའི། །དུས་གསུམ་བསགས་པའི་དགེ་བ་རྣམས། །གདོད་ནས་ཡོད་པའི་དགེ་བ་དེས། །འགྲོ་ཀུན་བླ་མེད་བྱང་ཆུབ་མྱུར་ཐོབ་ཤོག །ཅེས་ལན་གསུམ་གྱིས་ཚོགས་བསགས། དེ་ནས་ཆོས་ལྔའི་དང་པོ་རྗེ་འཇིག་རྟེན་གསུམ་གྱི་མགོན་པོས། བྱམས་དང་སྙིང་རྗེའི་རྟ་ཕོ་ལ། །གཞན་ཕན་གྱིས་དཀྱུས་ཐག་མ་ཆོད་ན༑ ༑ཁྲོམ་ལྷ་མིའི་འོར་ཆེ་མི་འབྱུང་བས། །སེམས་སྔོན་འགྲོ་འདི་ལ་ནན་ཏན་མཛོད། །ཅེས་གསུངས་པས། སེམས་ཅན་ཐམས་ཅད་ཀྱི་དོན་དུ་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ། དེའི་ཆེད་དུ་ལམ་ཟབ་མོའི་དབང་མནོས་ཏེ་ཉམས་སུ་བླངས་པས། བདག་དང་བདག་ཅག་ཐམས་ཅད་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། ཐར་པ་དང་ཐམས་ཅད་མཁྱེན་པའི་བར་དུ་གཅོད་པ་ཐམས་ཅད་ཀྱིས་གཙོར་བྱས་པའི་མ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བདེ་བ་དང་ལྡན་སྡུག་བསྔལ་དང་བྲལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་བྱ། ཞེས་དང༌། ཡང༌། དེའི་ཆེད་དུ་སངས་མ་རྒྱས་ཀྱི་ བར་དུ་ལུས་ངག་ཡིད་གསུམ་དགེ་བ་ལ་བཀོལ། མ་ཤིའི་བར་དུ་ལུས་ངག་ཡིད་གསུམ་དགེ་བ་ལ་བཀོལ། དུས་ད་རེས་ནས་བཟུང་སང་ཉི་མ་ད་ཙམ་གྱི་བར་དུ་ལུས་ངག་ཡིད་གསུམ་དགེ་བ་ལ་བཀོལ། ཞེས་གསུམ་བྱ། གཉིས་པ་ནི། རང་ལུས་ལྷ་སྐུའི་རྒྱལ་པོ་ལ། །གཞི་འགྱུར་མེད་ཀྱི་གདན་ས་མ་བཟུང་ན། །མ་མཁའ་འགྲོའི་འཁོར་འབངས་མི་འདུ་བས། །ལུས་ཡི་དམ་གྱི་ལྷ་ལ་ནན་ཏན་མཛོད། །ཅེས་གསུངས་པས། ཡི་དམ་གྱི་ལྷ་བསྒོམ་པ་ནི། སློབ་མ་ཁཎྜ་རོས་བསང༌། སྭ་བྷཱ་བས་སྦྱང༌། སྟོང་པའི་ངང་ལས་སྐད་ཅིག་གིས་རྫོགས་པའི་བཅོམ་ལྡན་འདས་འཁོར་ལོ་སྡོམ་པ་སྐུ་མདོག་མཐིང་ནག་ཅེས་པ་ནས། ཁྲག་འཛག་པ། ཕྱག་རྒྱ་ལྔས་སྤྲས་པ་ཞེས་པའི་བར་སྔར་ལྟར་ལས། ཡབ་ཀྱི་དཔྲལ་བར་ཟླ་བ་ལ་ༀ་དཀར་པོ། མགྲིན་པར་པདྨའི་ལྟེ་བར་ཨཱཿ དམར་པོ། སྙིང་གར་སྣ་ཚོགས་རྡོ་རྗེའི་ལྟེ་བར་ཧཱུྃ་སྔོན་པོ་རྣམས་ཀྱིས་མཚན་པར་གྱུར། སློབ་དཔོན་ཧེ་རུ་ཀ་གསལ་བའི་ཐུགས་ཀའི་ཧཱུྃ་ལས་ལྕགས་ཀྱུ་ལྟ་བུའི་འོད་ཟེར་འཕྲོས་པས་ས་འོག་ས་སྟེང་ས་བླར་གནས་པའི་ལྷ་འཁོར་ལོ་ལྔའི་དཔའ་བོ་དང་རྣལ་འབྱོར་མ་སྐད་ཅིག་གིས་བཀུག །སློབ་མའི་ལུས་ལ་བསྟིམས་པས་གཉིས་སུ་མེད་པར་གྱུར་པར་བསམ་ཞིང༌། གུ་གུལ་གྱིས་བདུག །
རོལ་མོའི་སྒྲ་སྒྲོག་པ་དང་བཅས་པས། ༀ་ཧྲཱིཿ ཧ་ཧ་ཧཱུྃ་ཧཱུྃ་ཕཊཿ ཙཀྲ་སམྦ་ར་ཀཱ་ཡ་ཝཱཀྩིཏྟ་ས་མ་ཡ་གརྦྷ་ཙཀྲ་ས་པཱ་རི་ཝཱ་ར་བཛྲ་ས་མ་ཡ་ཛཿ ཨཱ་ཝེ་ཤ་ཡ་ཕ་ཕ་ཛཿ ཛཿ ཧྲཱིང་ཧྲཱིང་ཞེས་བྱིན་དབབ། ཏིཥྛ་བཛྲ་དང༌། རྡོ་རྗེ་རྒྱ་གྲམ་གྱིས་བརྟན་པར་བྱའོ། ། གསུམ་པ་ནི། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་གསུངས་པས་བླ་མའི་རྣལ་འབྱོར་བསྒོམ་པ་ནི། སློབ་དཔོན་གྱི་ཐུགས་ཀའི་ས་བོན་གྱི་འོད་ཟེར་གྱིས་ཕྱོགས་བཅུའི་རྒྱལ་བ་འཁོར་དང་བཅས་པ་ཐམས་ཅད་དབང་གི་ལྷ་གདན་གསུམ་ཚང་བའི་དཀྱིལ་འཁོར་བའི་རྣམ་པར་སྤྱན་དྲངས། ༀ་པཉྩ་ཀུ་ལ་སཱ་པ་རི་ཝཱ་ར་པུཥྤཾ་པྲ་ཏཱིཙྪ་སྭཱ་ཧཱ། དེ་བཞིན་དུ་ཉེར་སྤྱོད་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་རྣམས་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་ཡུམ་རྣམས་ཀྱིས་རྡོ་རྗེའི་གླུ་ལེན། བྱང་ཆུབ་སེམས་དཔའ་རྣམས་ཀྱིས། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། །དེས་ནི་དེ་རིང་ཁྱོད་ལ་དབང་བསྐུར་རབ་ཏུ་སྦྱིན། །ཞེས་ཤིས་པ་བརྗོད་ཅིང་མེ་ཏོག་འཐོར། བྱང་ཆུབ་སེམས་དཔའ་རྣམས་ཀྱིས་སློབ་མའི་སྟེང་ཕྱོགས་སུ་གདུགས་དང་རྒྱལ་མཚན་དང་བ་དན་ལ་སོགས་པ་དང་དྲི་ཞིམ་པོའི་མེ་ཏོག་གི་ཆར་འབེབས། ཁྲོ་བོ་ཁྲོ་མོ་རྣམས་ཀྱིས་ཕྱོགས་མཚམས་སྲུང་ཞིང་བགེགས་བསྐྲད། དེ་བཞིན་གཤེགས་པ་རྣམས་ཀྱིས་ཕྱག་གིས་ཅུང་ཟད་ཡོ་བར་བཟུང་བའི་བུམ་པ་དཀར་པོ་བྱང་ཆུབ་སེམས་ཀྱིས་བདུད་རྩིས་བཀང་བ་བསྣམས་པས། སངས་རྒྱས་རྣམས་ནི་ཐམས་ཅད་ཀྱིས། ། སྐྱེ་བས་མངོན་པར་དབང་བསྐུར་བ། །ཇི་ལྟར་དེ་བཞིན་བདག་གིས་འདིར། །དག་པ་ལྷ་ཡི་ཆུ་དབང་སྦྱིན། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བུམ་པའི་ཆུས་སློབ་མ་ལྷར་གསལ་བའི་སྤྱི་བོ་ནས་དབང་བསྐུར་སྐུ་གང་དྲི་མ་དག །ཆུ་ལྷག་མ་ཡར་ལུད་པ་མཚོག་མའི་སྟེང་དུ་འཁྱིལ་བ་ལས་ངོ་བོ་རྩ་བའི་བླ་མ་ཡིན་པ་ལ་དཔལ་ཧེ་རུ་ཀ་སྔོ་སང་ཞེས་པ་ནས། ཡབ་ཀྱི་རྐེད་ལ་འཁྲིལ་བ། དེ་ལྟར་གསལ་བའི་ཡབ་ཡུམ་ལ་སྔར་སྤྱན་དྲངས་པའི་དབང་ལྷ་རྣམས་གཉིས་སུ་མེད་པར་ཐིམ་པས་རྣམ་པ་བླ་མ་ཧེ་རུ་ཀ་ཡབ་ཡུམ་ལ་ངོ་བོ་གདན་གསུམ་ཚང་བའི་དཀྱིལ་འཁོར་ལྷ་ཚོགས་མ་ལུས་པའི་ངོ་བོར་གྱུར། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་མཆོག །བླ་མ་ཧེ་རུ་ཀ་ལ་བསྟོད། །ཅེས་བསྟོད། གཏོར་དབང་དངོས་ནི། བུམ་དབང་གི་དོན་དུ་སློབ་མས། དཔལ་ལྡན་བླ་མ་མཚན་རྣམས་ཀུན་རང་བཞིན། །བདག་གི་སྤྱི་བོར་ལུས་ཀྱི་ཐིག་ལེ་ལ། །ཉེ་བར་ཞུགས་ནས་བུམ་དབང་དགའ་བའི་ཆུས། །སད་པའི་བག་ཆགས་དག་པར་མཛད་དུ་གསོལ། །ཞེས་གསོལ་བ་བཏབ་པས་གཏོར་མ་སྐད་ཅིག་གིས་རྫོགས་པའི་བཅོམ་ལྡན་འདས་འཁོར་ལོ་སྡོམ་པ་སྐུ་མདོག་མཐིང་ནག་ཅེས་པ་ནས། ཡབ་ཀྱི་རྐེད་ལ་འཁྲིལ་བ། གསལ་བའི་བླ་མ་དང་འཁོར་ལོ་སྡོམ་པ་ཡབ་ཡུམ་གྱི་དཔྲལ་བ་ནས་འོད་ཟེར་དཀར་པོ་ཡབ་ཡུམ་བཞི་པོ་སྙོམས་པར་ཞུགས་པའི་བྱང་ཆུབ་ཀྱི་སེམས་ དཀར་དམར་འདྲེས་པའི་རྒྱུན་བབས་པས། སློབ་མའི་དཔྲལ་བར་ཐིམ་པ་དཔོན་སློབ་གཉིས་ཀས་མོས། སློབ་དཔོན་གྱིས་གཏོར་མ་སློབ་མའི་མགོར་བཞག་ཅིང་དམ་པ་རྗེ་བཙུན་རིན་པོ་ཆེ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱིས་བདག་སློབ་མའི་ལུས་ལ་བྱིན་གྱིས་བརླབ་པ་རྒྱ་ཆེན་པོ་མཛད་དུ་གསོལ། ཞེས་པ་སྦྱར་རོལ་ཆེན་བྱ། དེས་བུམ་པའི་དབང་བསྐུར་བ་ཐོབ༑ ལུས་ཀྱི་སྒོ་ནས་བསགས་པའི་སྲོག་གཅོད་པ་སོགས་མི་དགེ་བའི་ལས་གསུམ་ལ་སོགས་པ་བསགས་པ་དང་སད་པའི་གནས་སྐབས་ཀྱི་དྲི་མ་སྦྱངས། བསྐྱེད་པའི་རིམ་པ་བསྒོམ་པ་ལ་དབང༌། སྤྲུལ་པའི་སྐུའི་ས་བོན་དང་བག་ཆགས་རྒྱུད་ལ་བཞག །འབྲས་བུ་སྐུ་རྡོ་རྗེ་འགྲུབ་པའི་ནུས་པ་དང་སྐལ་ལྡན་དུ་བྱས་པ་ཡིན་ནོ། །སླར་གསང་དབང་དོན་དུ་སློབ་མས། ལོངས་སྤྱོད་རྫོགས་པ་སེམས་ཅན་གྱི་སྐད་དུ། །བདག་གི་མགྲིན་པ་ངག་གི་ཐིག་ལེ་ལ། །ཉེ་བར་ཞུགས་ནས་གསང་དབང་དགའ་བའི་མེས། །རྨི་ལམ་བུད་ཤིང་བསྲེག་པར་མཛད་དུ་གསོལ། །ཞེས་གསོལ་བ་བཏབ་པས་བླ་མ་དང་འཁོར་ལོ་སྡོམ་པ་ཡབ་ཡུམ་གྱི་མགྲིན་པ་ནས་འོད་ཟེར་དམར་པོ་དང་ཡབ་ཡུམ་སྙོམས་པར་ཞུགས་པ་སློབ་མའི་མགྲིན་པར་ཐིམ་པར་མོས། དམ་པ་དེས་གསང་བའི་དབང་བསྐུར་བ་ཐོབ། ངག་གི་སྒོ་ནས་རྫུན་ལ་སོགས་པའི་མི་དགེ་བའི་ལས་བཞི་བསགས་པའི་དང་ རྨི་ལམ་གྱི་གནས་སྐབས་ཀྱི་དྲི་མ་སྦྱངས། སྟེང་སྒོ་རྣམ་པར་གྲོལ་བའི་རིམ་པ་བསྒོམ་པ་ལ་དབང༌། ལོངས་སྤྱོད་རྫོགས་པའི་སྐུའི་ས་བོན་དང་བག་ཆགས་རྒྱུད་ལ་བཞག །འབྲས་བུ་གསུང་རྡོ་རྗེ་འགྲུབ་པའི་ནུས་པ་དང་སྐལ་ལྡན་དུ་བྱས་པ་ཡིན་ནོ། །སླར་ཤེར་དབང་གི་དོན་དུ་སློབ་མས། རྗེ་བཙུན་བླ་མ་མི་རྟོག་ཆོས་ཀྱི་སྐུ། །བདག་གི་སྙིང་གར་ཡིད་ཀྱི་ཐིག་ལེ་ལ། །ཉེ་བར་ཞུགས་ནས་ཤེས་རབ་ཡེ་ཤེས་ཉིས། །གཉིད་འཐུག་མུན་པ་སངས་པར་མཛད་དུ་གསོལ། །ཞེས་གསོལ་བ་བཏབ་པས། བླ་མ་དང་འཁོར་ལོ་སྡོམ་པ་ཡབ་ཡུམ་གྱི་ཐུགས་ཀ་ནས་འོད་ཟེར་སྔོན་པོ་དང་ཡབ་ཡུམ་སོགས་སློབ་མའི་སྙིང་གར་ཐིམ་པར་མོས། དམ་པ་ནས་གཏོར་མ་སྙིང་གར་གཏད། དེས་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ། ཡིད་ཀྱི་སྒོ་ནས་བསགས་པའི་སྡིག་སྒྲིབ་བརྣབ་སེམས་ལ་སོགས་མི་དགེ་བའི་ལས་གསུམ་གསགས་པ་དང་གཉིད་འཐུག་གི་གནས་སྐབས་ཀྱི་དྲི་མ་སྦྱངས། འོག་སྒོ་བདེ་བ་ཆེན་པོའི་རིམ་པ་བསྒོམ་པ་ལ་དབང་། ཆོས་ཀྱི་སྐུའི་ས་བོན་དང་བག་ཆགས་རྒྱུད་ལ་བཞག །འབྲས་བུ་ཐུགས་རྡོ་རྗེ་འགྲུབ་པའི་ནུས་པ་དང་སྐལ་ལྡན་དུ་བྱས་པ་ཡིན་ནོ། །དབང་བཞི་པའི་དོན་ཏུ། འགྲོ་བའི་མགོན་པོ་ལྷན་ཅིག་སྐྱེས་པའི་སྐུ། །བདག་གི་ལྟེ་བར་ཡེ་ཤེས་ཐིག་ལེ་ལ། །ཉེ་བར་ཞུགས་ནས་ཤེས་རབ་ཆེན་པོའི་དབང༌། །བསྐུར་བས་འཕོ་མེད་དགའ་བ་ཐོབ་འགྱུར་མཛོད། །ཅེས་གསོལ་བ་བཏབ་པས་བླ་མ་དང་འཁོར་ལོ་ སྡོམ་པ་ཡབ་ཡུམ་གྱི་ལྟེ་བ་ནས་འོད་ཟེར་སེར་པོ་དང་ཡབ་ཡུམ་གྱི་ལྟེ་བ་ནས་འོད་ཟེར་སེར་པོ་དང་ཡབ་ཡུམ་སོགས། དམ་པ་ནས་གཏོར་མ་ལྟེ་བར་གཏད། རོལ་ཆེན་བྱ། དེས་དབང་བཞི་པ་ཚིག་དབང་གི་དབང་བསྐུར་བ་ཐོབ༑ སྒོ་གསུམ་ཐ་དད་དུ་འཛིན་པའི་དྲི་མ་དང་འཕོ་བའི་གནས་སྐབས་ཀྱི་དྲི་མ་སྦྱངས། དབང་བཞི་པ་ཐོབ། ཕྱག་རྒྱ་ཆེན་པོ་བསམ་དུ་མེད་པ་ལ་དབང༌། ངོ་བོ་ཉིད་སྐུའི་ས་བོན་དང་བག་ཆགས་རྒྱུད་ལ་བཞག །འབྲས་བུ་ཡེ་ཤེས་རྡོ་རྗེ་འགྲུབ་པའི་ནུས་པ་དང་སྐལ་ལྡན་དུ་བྱས་པ་ཡིན་ནོ། །ཞེས་བརྗོད། བཞི་པ་ཕྱག་རྒྱ་ཆེན་པོ་བསྒོམ་པ་ནི། སེམས་ཉིད་ཀྱི་ནམ་མཁའ་ཡངས་པ་ལ། །རྣམ་རྟོག་གི་སྤྲིན་ཚོགས་མ་དེངས་ན། །མཁྱེན་གཉིས་ཀྱི་གཟའ་སྐར་མི་བཀྲ་བས། །སེམས་མི་རྟོག་འདི་ལ་ནན་ཏན་མཛོད། །ཅེས་གསུངས་པ་སྟེ་སློབ་མས། ཀུན་ཏུ་བདག་དང་མཁའ་མཉམ་སེམས་ཅན་གྱི། །གདོད་མའི་ལུས་ངག་ཡིད་དང་ཡེ་ཤེས་རྣམས། །ཁྱོད་ཀྱི་རྡོ་རྗེ་བཞི་དང་མཉམ་སྦྱོར་བས༑ ༑མཆོག་བདེ་མངོན་དུ་འགྱུར་བར་མཛད་དུ་གསོལ། །ཅེས་གསོལ་བ་བཏབ་པས་གཏོར་མའི་བླ་མ་ཡི་དམ་ཡབ་ཡུམ་ཐམས་ཅད་འོད་ཀྱི་རྣམ་པར་གྱུར་པ་སློབ་མའི་སྨིན་མཚམས་སུ་ཐིམ་མ་ཐག་སེམས་སྤྲོས་པའི་མཚན་མ་ཀུན་གྱིས་སྟོང་པའི་ངོ་བོ་ལ་མཉམ་པར་བཞག །དེ་ཡང་མགོན་པོ་བྱམས་པས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་ རྣམ་པར་གྲོལ། །ཞེས་དང༌། ཡེ་ཤེས་འདི་ནི་ཆེས་ཕྲ་ཞིང༌། །རྡོ་རྗེ་སྙིང་པོ་མཁའ་དང་མཚུངས། །རྡུལ་བྲལ་ཐར་སྦྱིན་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །ཞེས་སོགས་ཀྱི་དོན་ཕྱག་རྒྱ་ཆེན་པོའི་ངོ་སྤྲོད་ཞི་བ་རྒྱས་སུ་བཏབ་བོ། །ལྔ་པ་བསྔོ་བ་ནི། ཚོགས་གཉིས་ཡིད་བཞིན་གྱི་ནོར་བུ་ལ། །སྨོན་ལམ་གྱིས་བྱི་དོར་མ་བྱས་ན། །དགོས་འདོད་ཀྱི་འབྲས་བུ་མི་འབྱུང་བས། །རྗེས་བསྔོ་བ་འདི་ལ་ནན་ཏན་མཛོད། །ཅེས་གསུངས་པས། འཁོར་འདས་དུས་གསུམ་བསགས་ཡོད་ཀྱི་དགེ་བ་ཐམས་ཅད་འཁོར་གསུམ་དམིགས་མེད་ཀྱི་རྒྱས་བཏབ་སྟེ་བདག་དང་འཁོར་འདས་ཐམས་ཅད་ཀྱི་དུས་གསུམ་བསགས་པ་དང་ཡོད་པའི་དགེ་བའི་རྩ་བ་འདིས། འཇིག་རྟེན་གྱི་ཆོས་བརྒྱད་འཁོར་བའི་རྒྱུ་བཞི་འབྲས་བུ་ཉན་ཐོས་དང་རང་སངས་རྒྱས་ཀྱི་སར་སྨིན་པར་མི་འགྱུར་བར་བདག་དང་སེམས་ཅན་ཐམས་ཅད་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། ལོག་འདྲེན་བདུད་དང་བདུད་ཀྱི་དཀྱིལ་འཁོར་གྱིས་གཙོར་བྱས་པའི་མ་ནམ་མཁའ་དང་མཉམ་པའི་སེམས་ཅན་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ། མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་གྱུར་ཅིག །ཅེས་ལན་གསུམ་བསྔོ། ཤིས་པ་བརྗོད་པ་ནི། ཞིང་ཡོངས་སུ་དག་པའི་ཕོ་བྲང་ནས། །དྲུག་པ་རྡོ་རྗེ་འཆང་ཆེན་དང༌། །དཔལ་ལྡན་ཏཻ་ལོ་ནཱ་རོ་སོགས། །བྱིན་རླབས་ཆུ་རྒྱུན་མ་ཆད་པའི། །བརྒྱུད་པའི་བླ་མའི་བཀྲ་ཤིས་ ཤོག །ཅེས་བརྗོད། སློབ་མས། གཙོ་བོས་ཇི་ལྟར་སོགས་དང༌། དེང་ནས་བརྩམ་སྟེ་བདག་འབུལ་སོགས་ཀྱིས་དམ་ཚིག་བསྲུང་བ་དང་བདག་འབུལ་བར་ཁས་བླང༌། གཏང་རག་གི་མཎྜལ་འབུལ། གཏོར་མའི་ལྷ་གསལ་བཏབ། མཆོད་བསྟོད་ཡིག་བརྒྱས་ལྷག་ཆད་བསྐང༌། བཛྲ་མུས་ཡེ་ཤེས་གཤེགས། དམ་ཚིག་པ་རང་ལ་བསྡུ། ཤིས་བརྗོད་བསྔོ་སྨོན་གྱི་རྒྱས་གདབ་བོ། །དེ་ལྟར་ལྔ་ལྡན་གཏོར་དབང་བསྐུར་བའི་ཕྱག་བཞེས་ཀྱི་རིམ་པ་འདི་ཡང་རྗེ་འཇིག་རྟེན་གསུམ་གྱི་མགོན་པོ་ཡབ་སྲས་ཀྱི་ཕྱག་བཞེས་རྒྱལ་དབང་རཏྣའི་གསུང་རྒྱུན་དྲུང་པ་ རིན་ཆེན་གྱིས་ཕྱག་བྲིས་སུ་བཏབ་འདུག་པ་ལ། སླར་ཆུ་དབང་གིས་ཁ་བསྐངས་ཤིང་ཚིག་སྣ་བསྟུངས་ཏེ་བྲིས་པ་འདི་ཡང་ས་ཕག་ལོ་ས་ག་ཟླ་བའི་ཉེར་དགུ་ལ། འབྲི་གུང་པ་ཆོས་ཀྱི་གྲགས་པས་ཕོ་བྲང་རྩེ་བ་གཞིས་ཀར་མགྱོགས་པར་བྲིས་པའོ། །སརྦ་དཱ་མངྒ་ལཾ། །དགེའོ།། །།