ཁྲོ་ཕུ་བཀའ་བརྒྱུད་ལས་བྱུང་བའི་ཕྱག་རྒྱ་ཆེན་པོ་ལྔ་ལྡན་གྱི་ཁྲིད་ཡིག།

Previous Text Back to Volume PageNext Text

Wylie title	khro phu bka' brgyud las byung ba'i phyag rgya chen po lnga ldan gyi khrid yig	Rigpe Dorje Publications, 2024
Location	gdams ngag rin po che'i mdzod Volume 10, Text 2, Pages 27-30 (Folios 1a1 to 2b3)
Author	ཁྲོ་ཕུ་ལོ་ཙཱ་བ་བྱམས་པའི་དཔལ་
Citation	Khro phu lo tsA ba byams pa dpal. Khro phu bka' brgyud las byung ba'i phyag rgya chen po lnga ldan gyi khrid yig. In Gdams ngag rin po che'i mdzod, Vol. 10: 27-30. Kalimpong: Rigpe Dorje Publications, 2024.	Shechen Publications, 1999
Side notes	Verso: bka' brgyud skor
More details More details
Source Author(s)	སྒམ་པོ་པ་ (sgam po pa)
Genre	Contemplative Guide Books and Instructional Manuals - khrid yig  ·  Mahamudra - phyag rgya chen po
Colophon	།རྗེ་བཙུན་དྭགས་པོ་རིན་པོ་ཆེའི་ཞལ་གདམས་རྫོགས་སོ། །ཞེས་ཁྲོ་ཕུ་ལོ་ཙཱ་བ་གནུབས་བྱམས་པའི་དཔལ་གྱི་གསུང་རབ་མན་ངག་བརྒྱ་རྩ་ལས་བྱུང་བའོ།།
	/rje btsun dwags po rin po che'i zhal gdams rdzogs so/_/zhes khro phu lo tsA ba gnubs byams pa'i dpal gyi gsung rab man ngag brgya rtsa las byung ba'o//

Tibetan Text

[edit]

༄༅། །ཁྲོ་ཕུ་བཀའ་བརྒྱུད་ལས་བྱུང་བའི་ཕྱག་རྒྱ་ཆེན་པོ་ལྔ་ལྡན་གྱི་ཁྲིད་ཡིག་བཞུགས་སོ། །

༄༅། །བླ་མ་དམ་པ་རྣམས་ལ་ཕྱག་འཚལ་ལོ། །བླ་མ་ཆེན་པོ་ནཱ་རོ་པའི་ཐུགས་ཀྱི་སྙིང་པོ་ཕྱག་རྒྱ་ཆེན་པོ་ལྔ་ལྡན་གྱི་ངོ་སྤྲོད་ནི། དང་པོ་བྱང་ཆུབ་མཆོག་ཏུ་སེམས་བསྐྱེད། གཉིས་པ་བླ་མའི་རྣལ་འབྱོར་བསྒོམ། གསུམ་པ་ཡི་དམ་ལྷ་ཡི་ང་རྒྱལ་བསྒོམ། བཞི་པ་སེམས་ཉིད་སངས་རྒྱས་སུ་ངོ་སྤྲོད། ལྔ་པ་དགེ་བའི་རྩ་བ་རྫོགས་པའི་བྱང་ཆུབ་ཏུ་བསྔོ་བའོ། །དང་པོ་ནི། བྱམས་སྙིང་རྗེ་དྲག་པོས་སྨོན་འཇུག་གཉིས་ཀྱི་བྱང་སེམས་སྙིང་ཐག་པ་ནས་ལན་གསུམ་གྱི་བར་དུ་བསྒོམ་མོ། །གཉིས་པ་ནི། ཉིན་སྤྱི་བོ་དང༌། མཚན་མོ་སྙིང་གར་སེང་ཁྲི་པད་ཟླ་གསུམ་བརྩེགས་ཀྱི་གདན་ལ་རང་གི་རྩ་བའི་བླ་མ་མཉམ་བཞག་གི་ཕྱག་རྒྱ་ཅན་གསལ་བར་བསྒོམས་ལ་སངས་རྒྱས་ཀྱི་འདུ་ཤེས་བསྐྱེད། གསོལ་བ་དྲག་ཏུ་གདབ་བོ། །གསུམ་པ་ནི། རང་གི་ལུས་རྩ་བའི་དཀྱིལ་འཁོར་ཡི་དམ་ལྷའི་ང་རྒྱལ་བསྐྱེད། བཟླས་པ་བརྒྱ་རྩ་བརྒྱད་ཙམ་བྱའོ། །བཞི་པ་ནི། མ་བཅོས་གཉུག་མར་ངོ་སྤྲད་པ་དང༌། རྣམ་རྟོག་འོད་གསལ་དུ་ངོ་སྤྲད་པ་གཉིས་ལས། དང་པོ་ནི། བསམ་གཏན་གྱི་ཕྱག་རྒྱ་བཅས་ལ་རང་སེམས་འདི་བཅས་བཅོས་མི་བྱ་བར་ལྷོད་ཀྱིས་གློད། ལྷན་གྱིས་བཞག །ཕྱམས་ཀྱིས་བཏང་ངོ༌། །ཤོར་ས་བཞི་དང༌། གོལ་ས་གསུམ་གྱི་བར་ཆད་བསལ། བྱིང་རྒོད་བློས་བྱས་གསུམ་གྱི་གེགས་བསལ་ལོ། །གཉིས་པ་ནི། དེའི་ངང་ལས་རྣམ་རྟོག་གང་བྱུང་ཡང༌། བྱུང་བ་དེ་ཉིད་ལ་ཅེར་གྱིས་བལྟས་པས་བལྟ་རྒྱུ་མེད་དེ་རང་གྲོལ་དུ་འགྱུར་བས་རྟོག་པ་དེ་ཉིད་ཡུལ་སྣ་ཚོགས་ཀྱི་རྐྱེན་གྱིས་སྣང་བར་ཤར་དུ་བཅུག་པ་ནི། གཟུགས་སྒྲའི་རྐྱེན་གྱིས་ཡེ་ཤེས་རང་སད་པ་བྱ་བ་ཡིན། ཅེར་གྱིས་བལྟས་པས་བལྟ་རྒྱུ་མ་རྙེད་པ་ནི། ཡེ་ཤེས་ལ་ཡེ་ཤེས་སུ་རང་ངོ་རང་གིས་ཤེས་པར་བྱ་བ་ཡིན་ནོ། །ལྔ་པ་ནི། སྔོན་འགྲོ་གསུམ་པོ་བསོད་ནམས་ཀྱི་ཚོགས་སོ། །བཞི་པ་དངོས་གཞི་ཡེ་ཤེས་ཀྱི་ཚོགས་ཡིན་པས་ཚོགས་གཉིས་ལས་འབྲས་བུ་སངས་པ་དང་རྒྱས་པ་གཉིས་འབྱུང་བས་ཇི་ལྟར་འབྱུང་བ་བཞིན་དུ་བསྔོ་སྟེ། བདག་གི་དགེ་བའི་རྩ་བ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བརྗོད་དོ། །རྗེ་བཙུན་དྭགས་པོ་རིན་པོ་ཆེའི་ཞལ་གདམས་རྫོགས་སོ། །ཞེས་ཁྲོ་ཕུ་ལོ་ཙཱ་བ་གནུབས་བྱམས་པའི་དཔལ་གྱི་གསུང་རབ་མན་ངག་བརྒྱ་རྩ་ལས་བྱུང་བའོ།། །།